གུ་རུ་ཚེ་མཐའ་ཡས་པ་དང་འབྲེལ་བའི་བྱིན་རླབས་ཚེ་དབང་།
༄༅། ཨོཾ་སྭ་སྟི། རྒྱལ་ཀུན་འདུས་པའི་ཞལ་སྐྱིན་གུ༵་རུ༵་རྗེ། །གང་དང་དབྱེར་མེད་བླ་མ་ཚེ༵་དཔག་མེད། །ཚེ་དང་ཡེ་ཤེས་འོད་སྣང་མཐ༵འ་ཡ༵ས་པ༵། །དེ་ལ་གུས་པས་བཏུད་ནས་ཚེ་དབང་བྲི། །དེ་ལ་འདིར་ཨོ་རྒྱན་གསང་སྔགས་གླིང་པའི་གཏེར་བྱོན་གུ་རུ་ཚེ་མཐའ་ཡས་པ་དང་འབྲེལ་བར་བྱིན་རླབས་ཚེ་དབང་བསྐུར་བ་ལ་གསུམ་སྟེ། སྦྱོར་བ་ཡོ་བྱད་ཀྱི་བཤམས་བཀོད་དང་། དངོས་གཞི་སྒྲུབ་པའི་ཐབས་དང་། བྱིན་རླབས་ཚེ་དབང་གི་རིམ་པའོ།། དང་པོ་ནི། སྟེགས་ཀྱི་ཁར་པདྨ་འདབ་བརྒྱད་དམ་ཚོམ་བུ་གསུམ་བཀོད་པའི་སྟེང་དུ་སྟེང་དུ་མཉྫིའི་ཁར་བུམ་པ་དང་གུ་རུའི་སྐུ་འབག དེའི་མདུན་དུ་ཚེ་འབྲང་བུམ་གཟུགས། གཡས་སུ་ཚེ་རིལ། གཡོན་དུ་ཚེ་ཆང་། རྒྱབ་ཏུ་མདའ་དར་བཅས་ཀྱི་མཐའ་ཕྱི་ནང་གི་མཆོད་པས་བསྐོར་བ་དང་། གཞན་ཡང་ལས་བུམ་འཐོར་ནས་ཌ་མ་རུ་རྡོར་དྲིལ་སོགས་ཉེར་མཁོ་རྣམས་ཚོགས་པར་བྱའོ༎ གཉིས་པ་ནི། ལས་བྱང་གིས་བདག་མདུན་དབྱེར་མེད་ཐ་དད་གང་རུང་དང་། བུམ་པ་གཉིས་སྤྱི་ལྟར་བསྒྲུབས་ཏེ་ཚེ་འགུགས་མཆོད་བསྟོད་བུམ་ལྷ་འོད་ཞུ་ཏིང་ངེ་འཛིན་གྱི་དབང་ལེན་པ་བཀའ་གཏེར་སྲུང་གི་གཏོར་འབུལ་ཚོགས་འཁོར་བཅས་བྱའོ༎ གསུམ་པ་ནི། སློབ་མ་རྣམས་ཁྲུས་བྱས་བགེགས་བསྐྲད་སྲུང་འཁོར་བསྒོམ་མེ་ཏོག་བཀྲམ་ནས་ཀུན་སློང་བཅོས་པ་དང་ཆོས་བཤད་ཅི་རིགས་བྱས་མཐར། འདིར་ལོ་ཙཱ་བ་ཆེན་པོ་མཁར་ཆུ་དཔལ་གྱི་དབང་ཕྱུག་གི་སྤྲུལ་པའི་རྣམ་པར་རོལ་པ་རིག་འཛིན་ཨོ་རྒྱན་གསང་སྔགས་གླིང་པས་དགུང་ལོ་ཉེར་གཅིག་བཞེས་པ་རབ་བྱུང་བཅོ་ལྔ་པའི་མེ་གླང་ལོར་དཔལ་གྱི་བསམ་ཡས་ཀྱི་མཚོ་མོ་མགུལ་ནས་སྤྱན་དྲངས་པའི་བླ་མའི་ཚེ་སྒྲུབ་གུ་རུ་ཚེ་མཐའ་ཡས་པའི་བྱིན་རླབས་ཚེ་དབང་ཟབ་མོ་བགྱི་བ་ལ་སློབ་དཔོན་གྱི་བྱ་བ་སོགས་རྒྱས་བསྡུས་ཅི་རིགས་པས་མཚམས་སྦྱར་ཏེ་མཎྚལ་འབུལ་དུ་འཇུག་གོ༎ དེ་ནས་གསོལ་བ་འདེབས་པ་ནི། ཀུན་མཁྱེན་ཡེ་ཤེས་ཕུང་པོ་ཅན། །སྲིད་པའི་འཁོར་ལོ་རྣམ་སྦྱོང་བ། །དེ་རིང་བཤད་པའི་རིན་ཆེན་གཏེར། །གཙོ་བོས་བདག་ལ་བཀའ་དྲིན་སྩོལ། །ལན་གསུམ། སྐྱབས་སེམས་ཚོགས་བསགས་ཀྱི་དམིགས་པ་སྤྱི་ལྟར་གསལ་བཏབ་ལ་རྒྱུན་བཤགས་གང་རུང་ཞིག་ལན་གསུམ་བྱའོ༎ དེ་ནས་ཡེ་ཤེས་དབབ་པའི་སླད་དུ་ཁྱེད་རང་ལུས་གནད་སྐྱིལ་ཀྲུང་ཞེས་པ་ནས་བསང་སྦྱང་ཡན་སྤྱི་ལྟར་བྱ། སྟོང་པའི་ངང་ལས་པདྨ་ཉི་ཟླའི་སྟེང་དུ་ཁྱེད་རང་གི་རྣམ་པར་ཤེས་པའི་ངོ་བོ་ཧྲཱིཿདཀར་དམར། དེ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་པ་ལས། ཁྱེད་རང་འཆི་མེད་རིག་འཛིན་མཚོ་སྐྱེས་བླ་མ་གུ་རུ་ཚེ་མཐའ་ཡས་པ་སྐུ་མདོག་དཀར་ལ་དམར་བའི་མདངས་ཆགས་པ། ཕྱག་གཡས་གསེར་གྱི་རྡོ་རྗེ་རྩེ་ལྔ་པ་ཐུགས་ཀར་འཛིན་ཅིང་། གཡོན་མཉམ་གཞག་གིས་ཐོད་པའི་དབུས་སུ་འཆི་མེད་ཚེའི་བདུད་རྩིས་གང་བའི་པདྨ་རཱ་གའི་བུམ་པ་དཔག་བསམ་ཤིང་གིས་ཁ་བརྒྱན་པ་བསྣམས་པ། མཆན་ཁུང་གཡོན་ན་ཁ་ཊྭཱཾ་འཆང་བ། སྐུ་ལ་གསང་གོས་ཕོད་ཀ་ཆོས་གོས་ཟ་བེར་དང་། དབུ་ལ་མཉེན་ཞུ་གསོལ་བ། རིན་པོ་ཆེའི་རྒྱན་གྱིས་བརྒྱན་པ། ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། མཚན་དཔེའི་གཟི་བྱིན་མཆོག་ཏུ་འབར་བའི་སྐུར་གྱུར་པའི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ་རྣམས་དང་། བདག་མདུན་གྱི་ཐུགས་ཀ་ནས་འོད་ཟེར་དཔག་ཏུ་མེད་པ་ཕྱོགས་བཅུར་འཕྲོས་པས་ཕྱོགས་བཅུའི་སངས་རྒྱས་བྱང་སེམས་རྩ་གསུམ་ཆོས་སྐྱོང་ཐམས་ཅད་གུ་རུ་ཚེ་མཐའ་ཡས་པའི་རྣམ་པར་ཆར་སྤྲིན་གཏིབ་པ་ལྟར་བྱོན་པ་དང་། དཀྱིལ་འཁོར་གྱི་ལྷའི་ཐུགས་ཀ་ནས་ཀྱང་རང་འདྲ་དཔག་ཏུ་མེད་པ་བྱུང་སྟེ་ཁྱེད་རང་ལ་སིབ་སིབ་ཐིམ་པས་རྒྱུད་བྱིན་གྱིས་བརླབས་ཤིང་བདེ་བ་ཆེན་པོའི་ཡེ་ཤེས་བཟོད་མེད་དུ་འབར་བའི་མོས་པ་བརྟན་པོར་མཛོད་ཅིག ཅེས་བརྗོད་ལ་སྤོས་རོལ་དང་བཅས་ཏེ་བབ་དྲུག་གམ་ལས་བྱང་གི་སྤྱན་འདྲེན་གང་རུང་གི་མཐར། ཨོཾ་ཨཱཿཧཱུྃ་བཛྲ་གུ་རུ་པདྨ་ཨཱ་ཡུ་སིདྡྷི་ཚེ་བྷྲུཾ༔ ཛྙཱ་ན་ཨ་ཝེ་ཤ་ཡ་ཨ་ཨཱཿ ཞེས་མང་དུ་བཟླས་མཐར། སྤྱི་བོར་རྡོ་རྗེ་རྒྱ་གྲམ་དུ་བཞག་ཏེ། ཏིཥྛ་བཛྲ། ཞེས་བརྗོད་པས་བརྟན་པར་བྱའོ།། དེ་ནས་ཚེ་འགུག་པའི་དམིགས་པ་སྤྱི་ལྟར་གསལ་བཏབ་ལ། མདའ་དར་གཡོབ་ཅིང་། ཧྲཱིཿ དཀོན་མཆོག་རྩ་གསུམ་རབ་འབྱམས་དང༔ ཞེས་སོགས་སྒྲུབ་ཐབས་ལྟར་དང་། བྱང་གཏེར་ལྕགས་སྡོང་མ་ལྟར་གྱི་ཚེ་འགུགས་ཀྱང་བྱའོ༎ གཞུང་གི་དབང་ཆོག་ནི། གུ་རུ་ཚེ་མཐའ་ཡས་པར་འདུད༔ སྐལ་ལྡན་སློབ་མ་རྗེས་འཛིན་ཅིང༔ མན་ངག་དོན་གྱི་དབང་བསྐུར་ནི༔ སློབ་བུས་ཕྱག་འཚལ་མཎྚལ་ཕུལ༔ ལན་གསུམ་གསོལ་གདབ་སྐྱབས་སེམས་དང༔ སྡོམ་བཟུང་སྒྱུ་ལུས་ལྷར་གསལ་ཞིང༔ ཡེ་ཤེས་དབབ་ཅིང་དབྱེར་མེད་བསྟིམ༔ སླར་ཡང་དངོས་གཞིའི་གསོལ་འདེབས་ནི༔ ཨོཾ༔ རང་བྱུང་རྡོ་རྗེ་ཡེ་ཤེས་སྐུ༔ གུ་རུ་ཚེ་མཐའ་ཡས་པ་ཡི༔ གསང་བ་དོན་གྱི་དཀྱིལ་འཁོར་དུ༔ བྱིན་རླབས་དབང་བསྐུར་སྩལ་དུ་གསོལ༔ བྲིས་སྐུ་ལྷར་གསལ་སྤྱི་བོར་བཞག༔ བརྡ་དོན་ངོ་སྤྲད་དབང་བསྐུར་བྱ༔ ཧྲཱིཿ རབ་འབྱམས་དུས་གསུམ་རྒྱལ་ཀུན་མཁྱེན་བརྩེ་ཡི༔ མཐུ་སྟོབས་གཅིག་བསྡུས་གུ་རུ་ཚེ་མཐའ་ཡས༔ རྡོ་རྗེ་སློབ་མའི་ལུས་ལ་དབང་བསྐུར་བས༔ འགྱུར་མེད་སྐུ་ཡི་རིག་འཛིན་འགྲུབ་པར་ཤོག༔ བཛྲ་གུ་རུ་ཨཱ་ཡུ་ཥེ༔ ཀཱ་ཡ་ཨ་བྷི་ཥིཉྩ་ཨོཾ༔ ཞེས་གུ་རུའི་སྐུ་འབག་དང་ཚེ་འབྲང་སྤྱི་བོར་བཞག་གོ །མཆན། བྲིས་སྐུ་མགྲིན་པར་བཞག་ཅིང་གསུང་དབང་བསྐུར༔ ཨཱཿ བརྟན་གཡོའི་སྒྲ་སྐད་རྡོ་རྗེའི་སྔགས་ཀྱི་སྒྲ༔ གྲགས་སྟོང་བརྗོད་བྲལ་ཚེ་མཐའ་ཡས་པའི་གསུང༔ རྡོ་རྗེ་སློབ་མའི་གསུང་ལ་དབང་བསྐུར་བས༔ འགག་མེད་གསུང་གི་རིག་འཛིན་འགྲུབ་པར་ཤོག༔ བཛྲ་གུ་རུ་ཨཱ་ཡུ་ཥེ༔ ཝཱཀྐ་ཨ་བྷི་ཥིཉྩ་ཨཱ༔ ཞེས་སྐུ་འབག་དང་བུམ་པ་མགྲིན་པར་བཞག་ཅིང་བུམ་ཆུ་བླུད་པར་བྱའོ༎ བྲིས་སྐུ་སྙིང་ཀར་བཞག་ཅིང་ཐུགས་དབང་བསྐུར༔ ཧཱུྃ༔ རྒྱལ་ཀུན་དགོངས་པ་བདེ་སྟོང་སྙིང་པོ་ཆེ༔ རང་ཤར་རང་གྲོལ་ཚེ་མཐའ་ཡས་པའི་ཐུགས༔ རྡོ་རྗེ་སློབ་མའི་ཡིད་ལ་དབང་བསྐུར་བས༔ འཁྲུལ་མེད་ཐུགས་ཀྱི་རིག་འཛིན་འགྲུབ་པར་ཤོག༔ བཛྲ་གུ་རུ་ཨཱ་ཡུ་ཥེ༔ ཙིཏྟ་ཨ་བྷི་ཥིཉྩ་ཧཱུྃ༔ ཞེས་སྐུ་འབག་ཐུགས་ཀར་བཞག་ཅིང་ཚེ་རིལ་སྦྱིན་པར་བྱའོ།། བྲིས་སྐུ་ལྟེ་བར་ཡོན་ཏན་དབང་མཆོག་བསྐུར༔ སྭ༔ ཡིད་ལ་གང་འདོད་བསམ་པ་དེ་བཞིན་འབྱུང༔ གུ་རུ་ཚེ་མཐའ་ཡས་པའི་ཡོན་ཏན་ཏེ༔ རྡོ་རྗེ་སློབ་མའི་ལྟེ་བར་དབང་བསྐུར་བས༔ རྨད་བྱུང་ཡོན་ཏན་རིག་འཛིན་འགྲུབ་པར་ཤོག༔ བཛྲ་གུ་རུ་ཨཱ་ཡུ་ཥེ༔ སརྦ་གུ་ཎ་ཨ་བྷི་ཥིཉྩ་སྭ༔ ཞེས་སྐུ་འབག་ལྟེ་བར་བཞག་ཅིང་ཚེ་ཆང་བླུད་པར་བྱའོ༎ བྲིས་སྐུ་ཕྲིན་ལས་དབང་མཆོག་གསང་བར་བསྐུར༔ ཧྲཱི༔ ཅིར་ཡང་མ་རྨོངས་གང་འདུལ་ཐབས་མངའ་བ༔ གུ་རུ་ཚེ་མཐའ་ཡས་པའི་ཕྲིན་ལས་ཏེ༔ རྡོ་རྗེ་སློབ་མའི་གསང་བར་དབང་བསྐུར་བས༔ འགྲོ་འདུལ་ཕྲིན་ལས་རིག་འཛིན་འགྲུབ་པར་ཤོག༔ བཛྲ་གུ་རུ་ཨཱ་ཡུ་ཥེ༔ སརྦ་ཀརྨ་ཨ་བྷི་ཥིཉྩ་ཧཱ༔ སྐུ་འབག་གསང་བར་བཞག་ཅིང་མདའ་དར་གྱིས་སྤྱི་བོར་རེག་པར་བྱའོ།། བྲིས་སྐུ་སླར་ཡང་སྤྱི་བོར་བཞག་བྱས་ཏེ༔ ཧོ༔ ལྷ་སྐུའི་ངོ་བོ་སྐྱེ་མེད་གདོད་ནས་དག༔ སྟོང་གསལ་ཟུང་འཇུག་གུ་རུ་ཚེ་མཐའ་ཡས༔ རྡོ་རྗེ་སློབ་མའི་རྒྱུད་ལ་དབང་བསྐུར་བས༔ ལྷན་སྐྱེས་ཡེ་ཤེས་རྟོག་པ་མངོན་གྱུར་ཤོག༔ བཛྲ་གུ་རུ་ཨཱ་ཡུ་ཥེ༔ བཛྲ་ཛྙཱ་ན་སྭ་བྷ་བ་ཨ་བྷི་ཥིཉྩ་མཾ༔ མཐར་ནི་སློབ་མ་དབྱེར་མེད་བསྟིམ༔ ཐུགས་ཡིད་དབྱེར་མེད་གཅིག་ཏུ་བསྲེ༔ རང་བྱུང་དགོངས་པའི་ངང་བསྐྱངས་ལ༔ དོན་གྱི་ཡེ་ཤེས་མངོན་གྱུར་བསམ༔ ཞེས་གསུངས་པ་ལྟར། སྐུ་འབག་གུ་རུ་ཚེ་མཐའ་ཡས་པར་གསལ་བ་འོད་དུ་ཞུ་ནས་ཁྱེད་རང་ལ་གཉིས་སུ་མེད་པར་ཐིམ་པས་ཐུགས་ཡིད་དབྱེར་མེད་གཅིག་ཏུ་འདྲེས་ཏེ་རང་བྱུང་དགོངས་པ་དོན་གྱི་ཡེ་ཤེས་མངོན་དུ་གྱུར་པའི་མོས་པ་མཛོད། ཅེས་བརྗོད། ཚིག་འདི་གསར་སྦྱོར་རོ།། དབང་བསྐུར་ཀུན་གྱི་རྒྱལ་པོ་མཆོག༔ སྙིང་པོའི་བཅུད་མཆོག་གདམས་པ་འདི༔ ཡེ་ཤེས་མཚོ་རྒྱལ་ཁྱོད་ལ་གདམས༔ གསང་བའི་ནང་ནས་ཆེས་གསང་བ༔ ཕྱག་རྒྱ་ཆེན་པོ་གསང་བའི་ལམ༔ ཟབ་པ་ས་ཡི་གཏེར་དུ་སྦོས༔ ས་མ་ཡཱ༔ ཞེས་གུ་རུའི་བཀའ་སྩལ་བ་ཇོ་མོ་མཚོ་རྒྱལ་བདག་གིས་མི་བརྗེད་པའི་གཟུངས་ཀྱིས་བཟུང་ཞིང་ཡི་གེར་བྲིས་ཏེ་ཀླུ་རྒྱལ་གཙུག་ན་རིན་ཆེན་གྱི་ཕོ་བྲང་བསམ་ཡས་མཚོ་མོ་མགུལ་དུ་སྦས་པའོ༎ མ་འོངས་མཚོ་རྒྱལ་ང་སྤྲུལ་གྱི༔ སྐྱེས་བུ་དག་དང་འདི་འཕྲད་ནས༔ ཚེ་མཐའ་ཡས་པའི་ཡེ་ཤེས་ཀྱིས༔ དོན་གཉིས་ལྷུན་གྱིས་གྲུབ་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ མཇུག་ཏུ་དམ་ཚིག་ཁས་ལེན་པ་མཎྚལ་ཡོན་འབུལ་རྣམས་སྤྱི་ལྟར་དང་། སྒྲུབ་ཐབས་ཀྱི་མཇུག་ཆོག་རྣམས་ལས་བྱང་ལྟར་བྱའོ༎ ཐུ༵བ་བསྟ༵ན་རིན་ཆེན་འབྱུང་གནས་ལས་འོང་བའི། །ལེ༵གས་བཤ༵ད་ཕྲིན་ཆོག་བཟ༵ང་པོ༵འི་ནོ༵ར་བུ༵་འདིར། །རྒྱལ་བསྟ༵ན་འཛི༵ན་སྐྱོང་སྤེལ་བའི་འོད་འཕྲོ་བཞིན། །གཞ༵ན་ཕ༵ན་འདོད་རྒུ་མཐ༵འ་ཡ༵ས་ཆར་འབེབ་ཤོག ། རིག་འཛིན་ཨོ་རྒྱན་གསང་སྔགས་གླིང་པའི་གཏེར་བྱོནགུ་རུ་ཚེ་མཐའ་ཡས་པའི་ལེའུ་ཚན་ནོ༎ དགེའོ།། དགེའོ།། དགེའོ།།