བཟླས་ཆོག་སྔགས་འབུམ་དཀར་པོ་རྡོ་རྗེའི་གོ་ཁྲབ། རྡོ་རྗེ་གླིང་པ།
བཟླས་ཆོག་སྔགས་འབུམ་དཀར་པོ་རྡོ་རྗེའི་གོ་ཁྲབ་བཞུགས་སོ༔ གཏེར་ཁ་སུམ་ལྡན༔
གུ་རུ་པདྨ་འབྱུང་གནས་དང་བླ་མ་དམ་པ་རྣམས་ལ་ཕྱག་འཚལ་ལོ༔ ལྔ་བརྒྱ་དུས་ཀྱི་མཐའ་རུ་སླེབ་པའི་ཚེ༔ འགྲོ་བ་མི་རྣམས་བསོད་ནམས་ཆུང༔ དུས་ཀྱི་ཆར་ཆུ་མི་འབབ་ཅིང༔ སྐྱེས་འབྲུ་དུས་སུ་མི་སྨིན་པས༔ དེ་དུས་སྤྱོད་ངན་སྣ་ཚོགས་བྱེད༔ དེ་བྱས་འབྱུང་པོ་མང་པོ་འཁྲུགས་གྱུར་ཏེ༔ གདོན་དུ་སྟེང་གདོན་འོག་གདོན་དང༔ འབྱུང་པོའི་ཚོགས་རྣམས་ཁ་རྒྱལ་ཏེ༔ ནད་དུ་མཛེ་ཤུ་གཟའ་ནད་དར་བར་འགྱུར༔ རིམས་ནད་མིང་མི་ཐོགས་པ་མང་པོ་འབྱུང༔ ལྷ་རྗེ་སྨན་པས་ནད་ངོས་མི་ཟིན་ཏེ༔ བཟང་དྲུག་སྨན་གྱིས་ནད་ཀྱི་ཟུག་མི་ཆོག༔ སྟེང་གདོན་འོག་གདོན་རིམས་ཀྱིས་མི་ཚུགས་པའི༔ དཀར་པོའི་སྔགས་འབུམ་འདི་ལ་ཡི་དམ་བྱ༔ ངག་བཅད་དམ་པོས་བསྙེན་པ་ཅི་ནུས་བྱེད༔ བརྒྱ་རྩ་རེ་ལ་རྒྱུན་གྱི་དམ་བཅའ་མཛོད༔ གཞན་དོན་བྱེད་ན་ཁྲུས་དང་སྔགས་ཆུས་མི་སོས་གང་ཡང་མེད༔ འདི་ལ་དམིགས་པ་བསྒོམ་རྒྱུ་མེད༔ བསྲུང་བྱ་གང་ཡང་མི་དགོས༔ གདམས་པ་དངོས་ནི་འདིའོ༔ ཨོཾ་པདྨ་ཤ་ཝ་རི་ཕཊ༔ ནན་པར་ཤིག༔ ནཱ་ག་ནན༔ ཏདྱ་ཐཱ༔ སརྦ་ཝི་རི་ཏ༔ ཧ་ན་ཧ་ན༔ བཛྲེ་ན་རཀྵ་རཀྵ་སྭཱ་ཧཱ༔ བཟླས་ཆོག་དཀར་པོའི་སྔགས་འབུམ་འདིས༔ ཁྱད་པར་གནམ་ནད་མེ་གཟའ་ཆུ་གཟའ་རླུང་གཟའ་དང༔ བཙན་དུག་སྦྱར་དུག་དུག་རིགས་ཐམས་ཅད་ལ༔ འདི་ཡི་སྔགས་ཆུ་
འཐུང་བས་ཆོག༔ གག་ལྷོག་གཟེར་ཐུང་མ་མོའི་ནད་དང༔ ཕོ་ལོག་དམར་བཤལ་འབྲུམ་པའི་རིགས༔ ཕོ་གླང་སྐྲན་དང་དམུ་ཆུ་མཛེ་ནད་དང༔ ཤུ་བ་མེ་དབལ་བས་ལྡག་གཡེན་པ་དང༔ རྨ་དང་འབྲས་དང་གཉན་འབུར་དང༔ ཁྱད་པར་རིམས་ནད་སྟེང་གདོན་འོག་གདོན་རྣམས་ལ་བསྔགས་པ་ཡིན༔ ལིང་ཐོག་ཤ་མཛེར་ཤུ་ཐོར་དང༔ ལིང་རོ་ལ་སོགས་མིག་ནད་ཐམས་ཅད་ལ༔ སྔགས་ཆུ་བཏང་བས་མི་སོས་གང་ཡང་མེད༔ ཕྱི་ཡི་ནད་རྣམས་ཐམས་ཅད་ལ༔ སྔགས་འདི་བཏབ་པས་སོས་པར་འགྱུར༔ སོ་ནད་ལ་སོགས་རུས་ནད་ཐམས་ཅད་ལ༔ ཚྭ་ཆུ་དག་ལ་སྔགས་ནས་བྱིན་པས་ཕན༔ ཚད་པའི་ནད་རིགས་ཐམས་ཅད་ལ༔ གངས་ཆུ་དག་ལ་སྔགས་ཆུ་བྱས་ཏེ་བླུད༔ གྲང་བའི་ནད་ལ་ཆང་ལ་སྔགས་ནས་སྦྱིན༔ གློ་བུར་ནད་ལ་ཉུངས་དཀར་སྔགས་ནས་བྲབས༔ མི་གཙང་ནད་རིགས་ཐམས་ཅད་ལ༔ བུམ་ཆུར་བུལ་ཏོག་བཏབ་ལ་སྔགས་ནས་བཀྲུ༔ འགོ་བའི་ནད་རིགས་ཐམས་ཅད་ལ༔ བགྲང་པས་མི་ཐུབ་གང་ཡང་མེད༔ ལྷ་ཡི་ཆད་པ་གཟའ་ཡི་གཟེར་ནད་དང༔ རྒྱལ་པོའི་ཆོ་འཕྲུལ་གཉན་གྱི་གདུག་རྩུབ་ཐུབ༔ ལྷོག་པ་དཀར་ནག་ས་བདག་ཀླུ་གཉན་དང༔ བཙན་གྱི་གདོང་ཐུག་ལྷ་སྲིན་སྡེ་བརྒྱད་ཐུབ༔ མ་མོའི་ཡམས་ནད་དམུ་ཡི་བསྲང་ནད་དང༔ ཐེའུ་རང་སྲིས་རྐུ་བརྟན་མའི་གདོང་
ཐུག་ཐུབ༔ སྔགས་པའི་རྦད་གཟེར་སྤར་ཁ་དགྲ་གཤེད་དང༔ བཞི་གཤེད་ལྟས་ངན་བརྒྱད་ཅུ་ཐམས་ཅད་ཐུབ༔ གློ་བུར་བདུན་བརྒྱ་ཉི་ཤུ་དང༔ ཡེ་འདྲོག་སུམ་བརྒྱ་དྲུག་ཅུ་ཐུབ༔ ནད་རིགས་བཞི་བརྒྱ་རྩ་བཞི་དང༔ མི་མཐུན་ཕྱོགས་ནི་ཐམས་ཅད་ཐུབ༔ ཕྱོགས་ངན་ཀག་དང་མནའ་ཟོས་དང༔ མནའ་བསྐྱལ་དཀར་མིན་བྱེད་པ་དང༔ ཕོ་འདྲེ་མོ་འདྲེ་མ་ལུས་པ༔ སྲོད་དང་ཐོ་རེངས་འཕྲད་པ་དང༔ གཙུག་ལག་ངན་དགུ་ཐམས་ཅད་ཐུབ༔ སྲ་མཁྲེགས་རྡོ་རྗེའི་བྲག་དང་མཚུངས༔ སྔགས་བསྙེན་ཞག་གསུམ་ཐེང་ཚད་བཟླ༔ མཐིང་ཤོག་དག་ལ་གསེར་གྱིས་བྲི༔ རབ་གནས་བྱས་ལ་མགུལ་དུ་བཏགས༔ དེ་ལྟར་བྱས་པས་ཁམས་གསུམ་གྱི༔ སྔགས་པའི་ངན་བྱད་དག་གིས་འཆི་མི་སྲིད༔ ཚངས་པའི་ཚེ་དང་ལྡན་པར་འགྱུར༔ གཞན་ཡང་ཡོན་ཏན་བསམ་མི་ཁྱབ༔ སྲུང་བ་རྡོ་རྗེའི་གོ་ཆ་ཡིན༔ ཟློག་པ་མཚོན་ཆའི་འཁོར་ལོ་འདྲ༔ སྔགས་ཟློག་ཀུན་གྱི་མན་ངག་ཡིན༔ སུ་ལའང་འདི་ནི་བསྟན་པ་ཕངས༔ གནད་ཀྱི་མན་ངག་འདི་མེད་པར༔ མན་ངག་གཞན་ལ་གདིང་བཅའ་བ༔ སྙིང་མེད་མི་ལ་མིར་འཛིན་འདྲ༔ རྒྱ་གར་རྒྱ་ནག་ཁ་ཆེ་དང༔ ཨོ་རྒྱན་ཡུལ་ལ་སོགས་པ་ཡི༔ འཛམ་བུའི་གླིང་ཀུན་དཀྲུགས་བྱས་ཀྱང༔ འདི་འདྲའི་མན་ངག་རྙེད་མི་སྲིད༔ འདི་ཡོད་འགྲོ་བ་རྡོ་རྗེའི་སྐུ༔ རང་ལ་
ཅི་རི་འདི་ལ་རི༔ སྙིང་ལས་ཕངས་པའི་མན་ངག་འདི༔ སྙིང་དང་འདྲ་བ་མ་གཏོགས་པ༔ གཞན་ལ་བྱིན་ན་དམ་ཚིག་ཉམས༔ མཁའ་འགྲོས་བཀའ་སྲུངས་ཆད་པ་ཆོད༔ ཤི་ནས་དམྱལ་བར་སྐྱེ་བར་འགྱུར༔ གུ་རུ་པདྨ་འབྱུང་གནས་ཀྱིས༔ ཡིག་འབྲུ་སུམ་ཅུ་ཐམ་པ་ཡོད༔ ན་རོ་གཅིག་དང་གི་གུ་བཞི༔ འགྲེང་བུ་གཅིག་དང་རིང་ཆ་བཞི༔ ལྷག་ཆད་མེད་ན་དེ་དང་མཐུན༔ དེ་ཡང་ཟབ་པའི་གནད་གཅིག་ཡིན༔ བརྒྱུད་པའི་ལོ་རྒྱུས་དང་ཕན་ཡོན་སོགས་མང་དུ་འདུག་སྟེ༔ འདིར་ཡི་གེས་འཇིག་པས་མ་བྲིས་སོ༔ ཨོ་རྒྱན་པདྨས་འདི་ལ་ཟབ་པར་དགོངས་ནས་སེམས་ཅན་ལ་ཕན་པའི་ཕྱིར༔ དཀར་པོའི་སྔགས་འབུམ་ནང་ནས་ཁོལ་དུ་ཕྱུང་སྟེ༔ གནམ་སྐས་བྲག་ལ་གཏེར་དུ་སྦས༔ ཁོ་བོ་རྡོ་རྗེ་གླིང་པའི་བརྗེད་ཐོ་ལགས༔ འདི་ཉིད་ཞུ་བ་ལ་གསེར་ཞོ་རེ་མེད་པར་སུ་ལ་ཡང་མི་སྦྱིན་གསུངས༔ རྣམ་རྟོག་མ་ཆེ་དད་པ་ཆེ་བར་གྱིས༔ ས་མ་ཡ༔ རྒྱ་རྒྱ་རྒྱ༔ ༔