བླ་མའི་ཐུགས་སྒྲུབ་བར་ཆད་ཀུན་སེལ་ལས་འཇམ་དཔལ་ཕ་རོལ་རྒོལ་འཇོམས་ཀྱི་སྐོང་བ་ཉེས་པའི་གཡུལ་རྒྱལ། པདྨ་གར་གྱི་དབང་ཕྱུག་རྩལ།
བླ་མའི་ཐུགས་སྒྲུབ་བར་ཆད་ཀུན་སེལ་ལས་འཇམ་དཔལ་ཕ་རོལ་རྒོལ་འཇོམས་ཀྱི་སྐོང་བ་ཉེས་པའི་གཡུལ་རྒྱལ་ཞེས་བྱ་བ་བཞུགས་སོ། །ན་མོ་གུ་རུ་ཡ་མཱནྟ་ཀ་ཡ། ཚོགས་ཀྱི་སྐབས་སུ་སྐོང་བ་བགྱིད་པའི་ཚེ་བྱིན་རླབས་ཟུར་དུ་མི་དགོས་ཤིང་། གཞན་དུ་བྱིན་རླབས་སྤྱི་མཐུན་སྔོན་དུ་བཏང་ནས་དབྱངས་རོལ་བཅས་འདི་སྐད་དོ། །ཧཱུྃ། ཆོས་དབྱིངས་མཐིང་ནག་འབར་བ་ཨེ་ཡི་ཀློང་། །འཇིག་རྟེན་འཇིག་རྟེན་འདས་པའི་དུར་ཁྲོད་ནས། །འཇམ་དཔལ་ཧེ་རུ་ཀ་དཔལ་གཤིན་རྗེའི་གཤེད། །ཡབ་ཡུམ་སྲས་འཁོར་དྲེགས་པའི་དམག་ཚོགས་བཅས། །ཐུགས་དམ་བསྐང་ཕྱིར་དད་པས་སྤྱན་འདྲེན་ན། །དྲག་ཤུལ་རྔམས་པའི་སྟབས་ཀྱིས་གཤེགས་ནས་ཀྱང་། །རྒོལ་བ་ཀུན་འཇོམས་བརྗིད་པའི་སྟབས་ཀྱིས་བཞུགས། ཁྲག་གི་རྒྱ་མཚོ་མི་རོའི་རྦ་རླབས་འཁྲུགས། །དུར་ཁྲོད་ས་གཞིར་མཚོན་ཆའི་ནགས་ཚལ་འཁྲིགས། །དྲག་པོའི་ཕོ་བྲང་བསྐལ་པའི་མེ་རླུང་འཚུབས། །ཏི་ར་བམ་ཆེན་གདན་གྱིས་ཐུགས་དམ་བསྐང་། །གདུག་པའི་འབྱུང་པོ་བྱ་གཅན་ཁྲོས་པ་དང་། །རོ་ལངས་ཧ་ཧ་རྒོད་པས་གར་སྟབས་སྒྱུར། །སྐར་མདའ་མེ་སྒྱོགས་རལ་གྲི་མདའ་ཆར་འབེབ། །བགེགས་འཇོམས་གཡུལ་གྱི་སྦྱོར་བས་ཐུགས་དམ་བསྐང་། །དྲང་སྲོང་རིག་སྔགས་གྲུབ་པས་དམོད་པ་འདོར། །
ཧཱུྃ་ཕཊ་གསང་བའི་དྲག་སྔགས་འཁོར་འདས་གཡོ། །མངོན་སྤྱོད་སྟོབས་ཀྱིས་དགྲ་བགེགས་ལོག་འདྲེན་རྣམས། །ཧུར་ཐུམས་ཚར་གཅོད་དྲག་པོས་ཐུགས་དམ་བསྐང་། །ཞིང་གི་བླ་བྲེ་རྒྱུ་རློན་ལྡ་ལྡི་འཕྱང་། །ཞིང་ཆེན་རྒྱལ་མཚན་ཞིང་ཆུང་བ་དན་ཕྱར། །ཙིཏྟའི་ཏོག་དང་མགོ་བོའི་དྲྭ་ཕྱེད་བྲེས། །རོ་སྐྲའི་རྔ་ཡབ་གཡོབ་པས་ཐུགས་དམ་བསྐང་། ཁྲག་ཆེན་དུག་མཚོ་དབང་ལྔ་ཚིལ་གྱི་གསུར། །རྣམ་ཤེས་མཁྲིས་པའི་ཆབ་དང་ཤ་རུས་ཟས། །འཇིགས་པའི་གཟུགས་སྒྲ་དྲི་རོ་རེག་བྱ་ལྔ། །འབྱུང་འཁྲུགས་དུར་ཁྲོད་སྒྲ་ཡིས་ཐུགས་དམ་བསྐང་། །རྩ་བརྒྱད་སྟོང་སྦྱར་མྱོས་བྱེད་ཛ་གད་བཅུད། །དམར་ཆེན་ཁྲག་གི་རྒྱ་མཚོ་དཔའ་བོའི་སྐྱེམས། །རོ་བརྒྱ་ནུས་པ་དང་ལྡན་བ་ལིཾ་ཏ། །སྦྱོར་སྒྲོལ་ཚོགས་ཀྱི་འཁོར་ལོས་ཐུགས་དམ་བསྐང་། །ལྷ་སྣང་གསལ་ཞིང་ང་རྒྱལ་རྩེ་གཅིག་བརྟན། །བསྙེན་སྒྲུབ་ལས་ཀྱི་བཟླས་པ་ཆུ་བོའི་རྒྱུན། །བདེ་སྟོང་ཟུང་འཇུག་འོད་གསལ་ཆེན་པོའི་ངང་། །འཁོར་འདས་གཞི་ལ་རྫོགས་པས་ཐུགས་དམ་བསྐང་། །བདུད་དགྲ་བདུད་འདུལ་འཇམ་དཔལ་གཤིན་རྗེའི་གཤེད། །ཕ་རོལ་རྒོལ་འཇོམས་མཐུ་ཆེན་ཧེ་རུ་ཀ །གཏུམ་མོ་དུག་ཧྲུལ་ཚེ་འཆི་སྲོག་གི་བདག །སྤྲུལ་པའི་གཤེད་ཆེན་མ་གཤིན་དྲེགས་པའི་
ཚོགས། །འཁོར་བཅས་ཐུགས་དམ་གཉན་པོ་དབྱིངས་སུ་བསྐང་། །རྩ་བ་ཡན་ལག་རྡོ་རྗེའི་དམ་ཚིག་ལས། །མ་རིག་དབང་གིས་འགལ་ཞིང་ཉམས་གྱུར་པ། །རྣམ་དག་ཡེ་ཤེས་ཀློང་དུ་བཟོད་བཞེས་ལ། །དངོས་གྲུབ་རྣམ་གཉིས་ཐོགས་པ་མེད་པར་སྩོལ། །དམ་སྲི་བདུད་ཀྱི་ཆོ་འཕྲུལ་ཞི་བ་དང་། །བྱད་ཕུར་རྦོད་གཏོང་རིག་སྔགས་གདུག་པའི་དབལ། །མི་ཁ་སྨྲ་མཆུ་སྦྱོར་ངན་ཚིག་གི་མཚོན། །ལོ་ཟླ་ཞག་ཀག་འཆི་བདག་བདུད་ཀྱི་དཔུང་། །ཆག་ཆེ་ཉམ་ང་ལྟས་ངན་བྱུར་གྱི་འདྲེ། །མདོར་ན་མི་མཐུན་རྐྱེན་དང་བར་ཆད་རྣམས། །དྲག་ཤུལ་སྟོབས་ཀྱིས་ཟློག་ཅིང་སྒྱུར་བ་སོགས། །ཇི་ལྟར་གསོལ་བའི་དོན་ཀུན་མྱུར་འགྲུབ་ནས། །ཕྱོགས་ལས་རྣམ་པར་རྒྱལ་བའི་ཕྲིན་ལས་མཛོད། །ཅེས་པ་འདི་ཉིད་ལ་མོས་པའི་བློ་གྲོས་བརྟན་པ་ཀརྨ་ཉི་མ་ནས་ཆེད་དུ་བསྐུལ་ངོར། དུས་མཐའི་རྣལ་འབྱོར་པདྨ་གར་གྱི་དབང་ཕྱུག་རྩལ་གྱིས་དཔལ་སྤུངས་ཡང་ཁྲོད་དེ་བཱི་ཀོ་ཊིའི་སྙིང་པོར་བགྱིས་པ་དགེ་ལེགས་འཕེལ།། །།