ཤོག་གྲངས་༢༠༡ ནས་༣༠༠ བར།
རིམ་པའང་། དབང་དུས་ནས་བདག་གིས་སྲུང་མར་གཉེར་གཏད་ཅིང་། ཉིད་རྣམ་པས་ཀྱང་དམ་ཚིག་ཁས་ལེན་སྤྱི་དང་བྱེ་བྲག་གཙོ་བོས་ཇི་ལྟར་སོགས་སུ་མཛད་ཟིན་པས་ཁྱབ་པར་བྱས་ཏེ། འདི་ལྟར་གྲོལ་ལམ་ཟབ་མོ་ཉན་བཤད་བགྱིས་པ་ལས་བྱུང་བའི་སོགས་ཀྱིས་མཚམས་སྦྱར་ཏེ་དགེ་བསྔོ་སྨོན་ཤིས་བཅས་བྱའོ།། ༈ །།འབྲོག་བན་ཁྱེའུ་ཆུང་ལོ་ཙཱའི་རྣམ་འཕྲུལ་བདུད་འདུལ་རྡོ་རྗེའི་ཡང་གསང་བླ་མེད་པདྨ་འོད་འབར་གྱི་དབང་ཆོག་བྱིན་རླབས་སྤྲིན་འཕྲོ་མཚམས་སྦྱོར་གྱིས་བརྒྱན་པ་ལྟར་དབང་སྒྲུབ། དབང་དངོས། ཀྵེ་ཏྲ་པཱ་ལའི་བཀའ་གཏད། དབང་དང་ཆོ་གའི་རྗེས་ཆོག་བཅས་བྱའོ།། ༈ །།ལྷ་བཙུན་ནམ་མཁའ་འཇིགས་མེད་རྩལ་གྱི་དག་སྣང་རྩ་གསུམ་རིག་འཛིན་སྲོག་སྒྲུབ་ཀྱི་རྩ་བའི་དབང་བསྐུར་མ་བུ་ཟུང་བསྡེབས་བལྟས་ཆོག་ཏུ་བཀོད་པ་འཆི་མེད་ཡེ་ཤེས་མྱུ་གུ་ལྟར་དབང་སྒྲུབ་སྐབས། ཚོགས་མཆོད་ཀྱི་དབུར། ༼ཅི༽ཡུམ་བཀའ་རྡོ་རྗེ་ཕག་མོའི་ལས་བྱང་གཏུམ་མོ་བདེ་ཆེན་པདྨའི་གྲུ་གཟིངས་ཀྱི་མེ་དབང་ཆོག་ཁྲིགས་བདེ་ཆེན་པདྨའི་མྱུ་གུ་ནས་འབྱུང་བ་བཞིན་ཚོགས་མཆོད་ལ་ཐུག་གི་བར་གཏང་། དེ་མཚམས།༼ཏི༽བཀའ་སྲུང་དྲག་པོ་སྡེ་བཞིའི་ལས་བྱང་གཏེར་གཞུང་དྲག་སྔགས་ལས་ཀྱི་ཐོག་རྒོད་ལྟར་ལྷ་བསྐྱེད་ནས་བསྒྲལ་མཆོད་གཙོར་གྱུར་གྱི་མཆོད་པ་དང་བསྟོད་ཕྲིན་རྫོགས་ཀྱི་བར་གཏང་། བཟླས་དམིགས་དྲག་པོ་སྡེ་བཞིའི་སྲོག་དབང་ཆོ་ག་གནམ་ལྕགས་འབར་བའི་མྱུ་གུར་འབྱུང་བ་བཞིན་དང་། དབང་རྫས་རྣམས་ལ་བྱིན་འབེབ་ཀྱི་
དམིགས་པ་འབད་དེ་གསལ་མཐར་སྔགས་ཀྱིས་མཆོད་ཅིང་། ཧཱུྃ། སྔོན་ཚེ་ཨོ་རྒྱན་ཆེན་པོའི་སྤྱན་སྔ་རུ། །ཆོས་བཞིན་སྒྲུབ་པར་བྱེད་པའི་གང་ཟག་ལ། །མ་ཡིས་བུ་ལྟར་སྐྱོང་བར་ཞལ་བཞེས་པའི། །རྡོ་རྗེའི་ཆོས་སྲུང་རྣམས་ལ་ཕྱག་འཚལ་བསྟོད། །ཅེས་པའི་བསྟོད་པ་བྱ། དེ་ནས་ཆོས་སྲུང་གཏོར་འབུལ་བསྡུས་པའང་གཏང་། ཚོགས་མཆོད་སྐབས། ཡབ་བཀའི་ཚོགས་བྱིན་རླབས་ནས་བསྒྲལ་བསྟབ་རྫོགས་པ་དང་། ཡུམ་བཀའི་ཚོགས་མཆོད་བྱིན་རླབས་ནས་ཕུད་བསྐང་མཐར། ཡབ་བཀའི་སྐོང་བཤགས་ཚོགས་རོལ་ལ་ཐུག་གི་བར་གཏང་། ཐམས་ཅད་ལ་དམིགས་ནས་རིག་མེ་དོར་ཞིང་གནང་བ་ནོད། དབང་དངོས་མཐར་ཆགས་སུ་བསྐུར་བའི། དང་པོ་གཞུང་གི་དཀྱུས་སུ་རྩ་དབང་བསྡུས་པ་ཚེ་དབང་དམར་པོ་བཅུད་བསྡུས་ཀྱི་སྐབས། གུད་སྦས་རིག་པའི་རྩལ་དབང་སྦྱོར་བ་ནི། དེ་ནས་ཐུན་མོང་མ་ཡིན་པའི་སྐལ་ལྡན་སྙིང་གི་བུ་མཆོག་ལ་གུད་དུ་སྦས་པ་རིག་པའི་རྩལ་དབང་རྣམ་པ་གསུམ་ལས། དང་པོ་དབང་མཆོག་རྡོ་རྗེ་སྙིང་པོའི་རྫོགས་ཆེན་གསང་བ་ངོ་སྤྲོད་གུད་སྦས་རིག་པའི་རྩལ་དབང་བསྐུར་བའི་སྐབས་སུ་བབས་པ་སྟེ། དེའང་། ཡང་གསང་སྒོམ་མེད་སོགས་ནས། ཡང་གབ་སྦས་དོན་ཐམས་ཅད་ཀྱི་མཐར་ཐུག་གི་ངོ་སྤྲོད་ཞུ་བའི་ཡོན་དུ། ཕྱི་ནང་གི་འདོད་པའི་ཡོན་ཏན་སོགས་ནས། མཎྜལ་འབུལ་བའི་མོས་པ་དང་བཅས་འདིའི་རྗེས་ཟློས་མཛད་པ་ཞུ། འོག་ཏུ་འབྱུང་བའི། འབྱམས་ཀླས་ཟག་མེད་སོགས་ལན་གཅིག །དེ་ནས་རྟོག་པའི་སྒྲིབ་གཡོགས་བུད་དེ་ཡེ་གནས་རང་བྱུང་གི་གནས་ལུགས་གཅེར་མཐོང་དུ་མཇལ་བའི་རྟེན་འབྲེལ་མཚོན་པའི་ཕྱིར་
ལུས་གཅེར་བུར་ཕྱུང་པའི་བརྡར་སྟོད་གཡོགས་བསལ། གུས་པས་ཐལ་མོ་སྙིང་གར་སྦྱར་ནས་མ་ཡེངས་པར་བླ་མའི་ཐུགས་ཀར་སེམས་རྩེ་གཅིག་ཏུ་གཏོད་ལ་དམིགས་པ་འདི་ལྟར་གསལ་ཐོབས། གོང་གི །བླ་མ་རིག་འཛིན་ཀུན་འདུས་སོགས་ནས། གསལ་བར་བསྒོམས་ལ་གསོལ་བ་འདེབས་པ་འདིའི་རྗེས་ཟློས། འོག་གི །སྲིད་ཞིའི་ངོ་བོ་སོགས་ལན་གསུམ། དེ་ལྟར་གསོལ་བ་བཏབ་པ་ལ། དངོས་གཞིའི་ཚིག་དབང་རིན་པོ་ཆེ་བརྡ་དང་དོན་གྱིས་མཚོན་ནས་བསྐུར་བ་ལ། ཕྱིའི་ཡུལ་སྣང་ཐམས་ཅད་མ་བྱས་ལྷུན་རྫོགས་ཞིང་དང་དཀྱིལ་འཁོར་གྱི་འཁོར་ལོ་ཡེ་རྫོགས་སུ་ངོ་སྤྲོད་པའི་ཕྱིར་བརྡ་ཡི་ཕྱག་རྒྱས་དབང་བསྐུར་ཞིང་། ཚིག་གི་སྒོ་ནས་དོན་མཚོན་པས་རང་སྣང་བདེ་བ་ཆེན་པོའི་ཞིང་དུ་རྟོགས་པའི་དབང་ཐོབ་པར་མོས་བྱས་ལ། རས་བྲིས་ཀྱི་དཀྱིལ་འཁོར་རམ། བུམ་པ་ཞིག་མིག་ལམ་དུ་བསྟར་ཞིང་། མགོ་བོར་བཞག་ལ། ཧྲཱི༔ གུ་རུ་རིག་འཛིན་སོགས། བྷྲཱུྃ་མཎྜལ་ཨ་བྷི་ཥིཉྩ་ཧཱུྃ༔ བར། དེ་ནས་ཕུང་ཁམས་ཀྱིས་བསྡུས་པའི་སྣང་བ་ཐམས་ཅད་ཡེ་ནས་མ་བཅོས་རྩ་བ་གསུམ། ངོ་བོ་རང་བཞིན་ཐུགས་རྗེ་ཡེ་བཞུགས་ཀྱི་སྣང་ཆར་རྫོགས་པ་ངོ་སྤྲད་པའི་བརྡར་རྩ་བ་གསུམ་གྱི་ཕྱག་རྒྱའི་བརྡས་མཚོན་ཏེ། དོན་གྱི་བཞུགས་ཚུལ་ངོ་སྤྲོད་པ་ལགས་པས་མཁྱེན་པར་མཛོད། རྩ་བ་གསུམ་གྱི་སྐུ་བསྟན་ཅིང་མགོ་བོར་བཞག་ལ། ཕུང་པོ་
ལྔ་ནི་སོགས། ཥིཉྩ་ཧཱུྃ༔ བར། འདི་ལྟར་ཡུལ་སྣང་ཐམས་ཅད་གཉིས་མེད་ཐབས་ཤེས་ཡེ་ནས་མཉམ་སྦྱོར་ཐིག་ལེ་ཆེན་པོར་རྟོགས་པས་ཆོས་ཉིད་ལ་ཆོས་ཉིད་རོལ་པའི་བརྡས་མཚོན་པའི་དོན་གྱི་གནས་ལུགས་རྟོགས་པར་མཛོད་ཅིག །བདུད་རྩི་དང་ཚོགས་རྫས་བྱིན་ལ། ཐབས་ཤེས་སྣོད་བཅུད་སོགས། དེ་ལྟར་སྣོད་བཅུད་གདོད་ནས་ཡེ་སྦྱོར་ཁྱབ་གདལ་རིག་པའི་རྩལ་སྣང་འགག་མེད་ཟང་ཐལ་དུ་གནས་པའི་དོན་གཅེར་མཐོང་དུ་ངོ་འཕྲོད་པའི་ཕྱིར། དགོངས་བརྒྱུད་བྱིན་རླབས་འཕོ་བའི་དབང་བསྐུར་བརྡ་དང་ཚིག་གིས་མཚོན་ཏེ་རྩལ་དབང་ཐོབ་པར་མོས། དབང་བཞིའི་ཆས་རྣམས་སྣོད་གཅིག་ཏུ་བསྡུས་པ་སྤྱི་བོར་བཞག་ལ། ཧྲཱི༔ སྣང་ཞིང་སྟོང་ལ་སོགས། དེ་ནས་སྐུ་དང་ཡེ་ཤེས། ལྟ་སྒོམ་སྤྱོད་པ། ཁྲེགས་ཆོད་དང་ཐོད་རྒལ་ལ་སོགས་པའི་དོན་གྱི་གནད་གསང་། ཕྱིའི་སྤྲོས་པ་དང་ནང་གི་ཏིང་ངེ་འཛིན་ལ་མི་ལྟོས་པ་གཉིས་མེད་དག་པ་རབ་འབྱམས་ཀྱི་དཀྱིལ་འཁོར་ཆེན་པོའི་རང་ཞལ་རྗེན་པར་ཕྱུང་སྟེ་ངོ་སྤྲོད་པ། རྡོ་རྗེའི་ཚིག་རྐང་འདིའི་དོན་ལ་མཉམ་པར་ཞོག་ཅིག །ཧོ༔ དང་པོ་འཁོར་འདས་སོགས། བཙན་ས་ཟིན་པ་ངོ་ཤེས་པར་གྱིས་ཤིག༔ བར་དག་པར་བཀླག །དེ་ལྟ་བུའི་མཆོག་གསང་བླ་ན་མེད་པའི་རྩལ་དབང་འདི་ཐོབ་པའི་ཆེ་བ་བརྗོད་
ཅིང་། ལོ་རྒྱུས་རིག་འཛིན་ཆེན་པོའི་ཞལ་ལུང་དྲི་མ་མེད་པ་ཉིད་བཀླག་པས་སྤྲོ་བ་བསྐྱེད་པ་དང་། བསྐུར་ཞིང་ཐོབ་པའི་གནད་དེ་ཉིད་ཚིག་སྐམ་དུ་མི་འཇོག་པར་ཉམས་ལེན་དུ་དྲིལ་བར་གདམས་ཤིང་། རྡོ་རྗེའི་སྲུང་མར་དམ་ཚིག་གི་གཉེར་བཅོལ་བ་བཅས་བགྱིད་པ་ལགས་པས་ངེས་པར་མཛོད། རྫོགས་པ་ཆེན་པོ་བརྗོད་མེད་སོགས་ནས། སྟོང་གྲོགས་མཛོད་ཅིག༔ བར་བརྗོད། དེས། རིག་འཛིན་སྲོག་གི་སོགས་ནས། བཀའ་རྒྱ་ཅན་ལེགས་པར་ཐོབ་པ་ལགས་སོ། །དེ་ནས་རྩལ་དབང་གཉིས་པ་པདྨ་འོད་ཀྱི་སོགས་ནས། རྩལ་དབང་ཞུ་བའི་ཕྱིར་མཎྜལ་འབུལ་ཞིང་གསོལ་བ་འདེབས་པ་འདིའི་རྗེས་ཟློས། ཧཱུྃ༔ གསལ་མདངས་མི་འགྱུར་སོགས་ནས། སིདྡྷི་ཕ་ལ་ཧཱུྃ༔ དེ་ལྟར་གསོལ་བ་བཏབ་པས། རྗེ་བཙུན་བླ་མའི་ཐུགས་རྗེའི་རྩལ་གཡོས་ཏེ་འོད་གསལ་སྤྲོས་པ་བྲལ་བའི་ནམ་མཁའ་ལས་དགོངས་བརྒྱུད་བྱིན་རླབས་ཀྱི་ཆར་ཆེན། མདངས་ལྔའི་ཚོམ་བུ་ཚད་མེད་པའི་ཟེར་ཕྲེང་བརྡལ་བའི་དབུས་སུ་རིག་པ་ཟང་ཐལ་འོད་སྐུར་སྨིན་པ་གུ་རུ་ཐོད་ཕྲེང་སྡེ་ལྔ་མཁའ་འགྲོའི་འཁོར་གྲངས་མེད་པ་གསལ་ལམ་ལམ། འོད་ཁྱུག་ཁྱུག །བཀྲག་མེར་མེར། བྱིན་ཐིབ་ཐིབ་བྱོན་ནས་སྐུ་ཉིད་རྣམས་ཀྱི་ཕུང་ཁམས་རྩ་གནས་ཐམས་ཅད་ལ་ཐིམ་པས། ཆན་ལ་ཕབས་རྩི་བཏབ་པའམ་
ལྕགས་ལ་གསེར་འགྱུར་གྱི་རྩིས་ཐེབས་པ་ལྟར་མ་དག་པའི་ཕུང་ཁམས་སྐྱེ་མཆེད་ཀྱི་སྒྲིབ་པའི་རྟེན་དུ་གྱུར་པའི་རྩ་མདུད་ཐམས་ཅད་འོད་གསལ་ཨ་ཝ་དྷཱུ་ཏིའི་ངོ་བོར་གྲོལ། ཉོན་རླུང་གི་འགྱུ་བ་ཡེ་ཤེས་འགྲོ་འོང་དང་བྲལ་བའི་རླུང་དུ་སྨིན། ཐིག་ལེ་འཕོ་མེད་དྭངས་མ་མི་ཤིགས་པའི་བདེ་བ་ཆེན་པོའི་རང་བཞིན་དུ་གྱུར་པས། སྒོ་གསུམ་གྱི་ཟག་པ་ཆོས་དབྱིངས་སུ་དེངས་ཏེ་འོད་གསལ་སྒྱུ་མ་ཡེ་ཤེས་རྡོ་རྗེའི་སྐུ་མངོན་དུ་བྱས་པའི་ཐུགས་མོས་མཛོད། ཆོས་དབྱིངས་བདེ་བ་ཆེན་པོ་སོགས་ནས། གུ་རུ་པདྨ་སིདྡྷི་ཧཱུྃ༔ དེ་ལྟར་དབང་བསྐུར་པས་རགས་ལུས་འོད་གསལ་དུ་སྨིན། ཕུང་པོའི་ཆགས་ཐོགས་ཀྱི་སྒྲིབ་པ་དག་ལས་རབ་ཏུ་རྣམ་པར་གྲོལ་བས་ཟག་པའི་ཁམས་རྣམས་དང་མི་ལྡན་པའི་ཡེ་ཤེས་མངོན་དུ་གྱུར། གཟུང་འཛིན་གྱི་སྐྱེ་མཆེད་རྣམས་ཆོས་དབྱིངས་སུ་བསྡམས་པས་སེམས་དང་བྲལ་བའི་རིག་པ་རྗེན་ལ་བུད། ཆོས་དང་ཆོས་ཉིད་དུ་སྣང་བའི་འཛིན་པ་གཞི་མེད་ལ་སོང་བས། འཁོར་འདས་ལམ་གསུམ་གྱི་སྣང་བ་ཐམས་ཅད་མཉམ་རྫོགས་ཐིག་ལེ་ཉག་གཅིག་ཏུ་ཁ་འདུམས་པའི་ཕྱིར་ན་བརྡལ་བ་ཐིག་ལེའི་སའམ་ཀུན་བཟང་དབྱེ་བ་མེད་པའི་ས་ལ་དབང་བསྐུར་པ་སྟེ། དེའི་དོན་རྡོ་རྗེའི་ཚིག་གིས་ངོ་སྤྲོད་པའི་སྒོ་ནས་དོན་གྱི་ཡེ་ཤེས་བཙན་ཐབས་སུ་འབེབ་པ་
ལགས་པས། མོས་འདུན་དྲག་པོ་སྐྱེད་ལ་མོས་གུས་ཀྱི་ངོ་བོ་གཏད་མེད་དུ་གྲོལ་བའི་རིག་སྟོང་གཉུག་མའི་རང་ངོ་ལ་མཉམ་པར་ཞོག་ཅིག །ཧཱུྃ་ཧཱུྃ་ཧཱུྃ༔ ཐིག་ལེ་ཆེན་པོ་གཅིག་གི་ཀློང༔ སོགས་ནས། ཨ་ཨ་ཨ༔ དེ་ལྟ་བུའི་རིག་པ་རྩལ་གྱི་དབང་བསྐུར་པ་དེ་ལ་དབང་ཐམས་ཅད་མ་བསྐུར་དུས་གཅིག་ལ་རྫོགས་པའི་རྫོགས་པ་ཆེན་པོ་གསང་མཆོག་འོད་གསལ་སྙིང་པོ་འདིའི་ཁྱད་པར་གྱི་ཆོས་བླ་ན་མེད་པ་སྟེ། རང་རིག་འོད་གསལ་མཐའ་དབུས་མེད་པའི་ཁྱབ་གདལ་ཆེན་པོ། འཁོར་འདས་བཟང་ངན་གྱི་ཕྱོགས་སུ་མ་ལྷུང་བས་སྣང་སྲིད་དག་དང་མ་དག་གི་མཚན་མ་ཟད། ཡེ་ནས་རང་གནས་ཀྱི་འོད་གསལ་འདུ་འབྲལ་མེད་པ་ལ་རྩ་རླུང་བྱེད་རྩོལ་ཐབས་ལ་མི་ལྟོས། བདེ་བ་ཆེན་པོའི་ཡེ་ཤེས་རང་ལུགས་སུ་གནས་པ་ལ་དཔེས་མཚོན་པའི་ཡུལ་ལས་འདས། གནས་ལུགས་ཚིག་གིས་གཏན་ལ་མི་ཕེབས་པས་བརྗོད་བསམ་སྤྲོས་པ་དང་བྲལ་བའི་ཕྱིར། དབང་བཞི་བསྐུར་ཐོབ་བྲལ་བའི་ཆོས་ཉིད་དུ་ལ་བཟླ་བའི་རིག་རྩལ་དོན་གྱི་དབང་བསྐུར་བ་སྟེ། དེའི་དོན་ལྟ་བ་ངོས་གཟུང་མེད་པའི་རྒྱ་ཡན་ཆེན་པོ། སྒོམ་པ་གཏང་བཞག་གཉིས་མེད་རང་བབས་ཆེན་པོ། སྤྱོད་པ་གཟའ་གཏད་ཞིག་པའི་རང་ཤར་ལྷུག་པར་རྩལ་སྦྱོང་བ་ཡིན་པས། འདིའི་དོན་ལ་མཉམ་
པར་འཇོག་པའི་སླད་དུ་གསལ་འདེབས་ཀྱི་ཚིག་དེའི་གནད་དོན་ལ་ཐུགས་ངེས་གནང་འཚལ། གསུམ་པ་དག་སྣང་མོས་གུས་ཟབ་དོན་རྟོགས་པའི་སྒོ་འབྱེད་ཅེས་བྱ་བ་ལས་བྱུང་བའི་རིག་པ་རྩལ་གྱི་དབང་ངམ། རིག་འཛིན་འདུས་པའི་རྡོ་རྗེའི་སྲོག་དབང་བསྡུས་པར་གྲགས་པ་གསན་པའི་ཡོན་དུ་མཎྜལ་འབུལ་ཞིང་གསོལ་བ་འདེབས་པ་འདིའི་རྗེས་ཟློས། ཧཱུྃ༔ གསལ་དྭངས་མི་འགྱུར་སོགས་གོང་བཞིན་མཎྜལ་གསོལ་གདབ་རྐང་པ་ལྔ་སྔགས་བཅས་སྔར་ལྟར་སྔོན་དུ་འགྲོ་བས། དབང་དངོས་ལ། སློབ་མ་རྣམས་ལུས་གནད་དང་སྒོ་ཡུལ་རླུང་རིག་གི་གནད་གཅུན་པས་དབྱིངས་རིག་གཉིས་མེད་འོད་གསལ་སྤྲོས་པ་དང་བྲལ་བའི་ངང་ལ་མཉམ་པར་བཞག་པ་ལ། ཀ་དག་ཡེ་གྲོལ་དོན་གྱི་སྙིང་པོའི་དབང་གིས་དགོངས་པའི་བཙན་ས་འཛིན་པ་དང་། ཡེ་ཤེས་རྒྱལ་ཐབས་སྤྱི་བླུག་གིས་ལྷུན་གྲུབ་སྣང་བ་བཞིའི་ཡེ་ཤེས་ཟད་སར་སྐྱེལ་བའི་རྡོ་རྗེའི་ཚིག་དོན་རིམ་པར་འབྱུང་བ་ལ་སྙན་གཏོད་ཅིག །ཧཱུྃ༔ མཐའ་བྲལ་རིག་པ་སོགས་ནས། ཨ་ཨ་ཨ༔ ཕཊ༔ ཅེས་ཅུང་ཟད་མཉམ་པར་གཞག །དེ་ལྟ་བུའི་གནས་ལུགས་འོད་གསལ་རྫོགས་པ་ཆེན་པོའི་དབང་དོན་གྱི་ཡེ་ཤེས་དེའང་། རྟོགས་ལྡན་བླ་མའི་བྱིན་རླབས་ཁོ་ན་ལ་བརྟེན་ནས་སྐྱེས་བརྟན་གོང་འཕེལ་དུ་བྱ་བ་ལ་རག་ལས་པ་ལས་ཐབས་གཞན་གྱིས་མི་རྙེད་པར་གསུངས་ཕྱིར། ལམ་གྱི་གེགས་
སེལ་དང་བོགས་འདོན་ཐམས་ཅད་ཀྱི་རྒྱལ་པོ་བླ་མའི་བྱིན་རླབས་ལམ་དུ་བྱེད་པ་དབང་བཞིའི་དམིགས་པ་དང་བཅས་པ་རྗེས་འབྲེལ་མཐའ་རྟེན་དུ་མཛད་པ་ཕྱག་ལེན་དུ་གདའ་བས། ཚིག་རིས་དང་མཐུན་པའི་བསྒོམ་བྱ་རྣམས་ཐུགས་ལ་ངེས་པས་སྒོམ་ལུང་འབོགས་པ་འདི་ལ་གསན་པས་ཁྱབ་པར་གདའ་སྟེ། ཨ༔ མ་ཡེངས་མ་བཅོས་སོགས་ནས། ཙིཏྟ་སིདྡྷི་ཧཱུྃ༔ བར་གཏང་། དེས་དོན་དམ་རིག་པའི་རྩལ་དབང་གསུམ་རྗེས་འབྲེལ་དང་བཅས་པ་ལེགས་པར་གྲུབ་པ་ལགས་སོ། །ཤིས་པ་བརྗོད། ཅེས་སྦྱོར་ཞིང་། གཞན་སྔར་འཕྲོས་དབང་གཞུང་བཞིན་མཐར་དབྱུང་ཞིང་། རྩ་དབང་རྒྱས་པ་དངོས་བསྟན་ལྟར་སྦྲེལ་བའི་གཏང་རག་མཎྜལ་རྗེས། དེས་སྨིན་བྱེད་དབང་གི་རིམ་པ་རྣམས་གྲུབ་ནས། གྲོལ་བྱེད་ཀྱི་གདམས་ཁྲིད་འབོགས་པ་ཡིན་པས་སྙན་གཏོད་ཅིག །དེ་ལ་སྲོག་སྒྲུབ་ཡང་སྙིང་ཐུན་མོང་གི་ཁྲིད་ཡིག་སྲིད་ཞིའི་འོད་གསལ་གྱི་ཉི་མ་སོགས་ཁྲིད་ཡིག་འཇའ་གུར་འོད་གསལ་གྱི། ལམ་ཟབ་མོ་ལྷུན་གྲུབ་སྣང་བཞིའི་ཁྲིད་ཡིག་གུད་དུ་བཞུགས་པ་ལས་བླང་བར་བྱའོ། །ཞེས་གསུངས་པ་བཞིན་ལགས། དེ་ལྟར་རིག་འཛིན་སྲོག་གི་སྒྲུབ་པའི་སོགས་དབང་གཞུང་མཐའི་དམ་ཚིག་ཁས་བླངས་རྗེས། དེ་ནས་སླར་ཡང་འདི་ཉིད་ཀྱི་ཡབ་བཀའ་རིག་འཛིན་དང་ཡུམ་བཀའ་
རྡོ་རྗེ་ཕག་མོ་གཉིས་ཀའི་རྫོགས་རིམ་མཐར་ཐུག །གཏུམ་མོ་བདེ་ཆེན་པདྨའི་གྲུ་གཟིངས་ཀྱི་སྨིན་བྱེད་གཏུམ་མོའི་མེ་དབང་དང་། རྗེས་འབྲེལ་གཅོད་ཡུལ་དཔའ་བོའི་ཐོལ་གླུའི་སྤྱོད་པའི་རྗེས་གནང་བཅས་བགྱིད་པའི་སྐབས་སུ་བབས་པ་ཡིན། དེ་ལ། འདིར་ཡེ་ཤེས་མཁའ་འགྲོ་པདྨ་མདྭངས་གསལ་སོགས་དབང་ཆོག་བདེ་ཆེན་པདྨའི་མྱུ་གུ་ལྟར་མཐར་ཆགས་སུ་བསྐུར་བའི་སྐབས། མཁའ་འགྲོའི་སྨྲེ་བཤགས་དྲི་མེད་བཤགས་རྒྱུད་ལས་ཕྱུང་པ།༼ངི༽ཡང་གཏེར་མཁའ་འགྲོ་གསང་འདུས་སྐབས་སུ་འབྱུང་བ་དེ་སྦྱོར། མཐའི་ཤིས་བརྗོད་ཟིན་པ་དང་། དེས་སྨིན་བྱེད་དབང་གི་རིམ་པ་སོང་ནས། དེ་དང་འབྲེལ་བའི་གྲོལ་བྱེད་ཟབ་ཁྲིད་འབོགས་པ་ལའང་གཉིས་ལས། དང་པོ་གཏུམ་མོ་བདེ་ཆེན་པདྨའི་གྲུ་གཟིངས་ཀྱི་ཟབ་ཁྲིད་ནི། རིག་འཛིན་ཚེ་ཡི་སྒྲུབ་ཐབས་རྒྱས་བསྡུས་དང་འབྲེལ་བའི་རྫོགས་རིམ། མཐར་ཐུག་ཚེའི་རིག་འཛིན་བསྒྲུབ་པའི་མྱུར་ལམ། ཚེ་ཟབ་མོ་རླུང་དུ་བསྒྲུབ་པའི་འབར་འཛག་ཟབ་ཁྱད་ཀྱི་སོགས་གཏུམ་མོའི་རྩ་གཞུང་བཞིན། གཏུམ་མོ་བདེ་ཆེན་པདྨའི་གྲུ་གཟིངས་ཞེས་བྱ་བ་རྫོགས་སོ། །ཞེས་པའི་མཚམས། འོག་གི །ཚུལ་འདིས་འཆི་མེད་ཚེ་ཡི་རིག་འཛིན་འགྲུབ་སོགས་ནས། རས་རྐྱང་དང་མི་འབྲལ་བ་གལ་ཆེ། ཞེས་གསུངས་པ་བཞིན་མཚར་ཆོས་སུ་མི་བྱ་བར་ཉམས་ལེན་ཚུལ་བཞིན་མཛད་དེ། བདེ་སྟོང་ཀུན་
ཏུ་བཟང་པོ་ཡབ་ཡུམ་གྱི་གོ་འཕང་དམ་པ་མངོན་དུ་བྱེད་ཐུབ་པ་ཞིག་ལ་འབད་པས་བྱ་བ་དོན་ལྡན་བགྱིས་པའི་གྲུབ་འབྲས་མཆོག་གི་དངོས་གྲུབ་མངོན་དུ་བྱེད་དགོས་པ་ལགས་སོ། །གཉིས་པ་དེ་དང་རྗེས་སུ་འབྲེལ་བ་གཟུང་འཛིན་རྩད་གཅོད་ཀྱི་ལམ་ཁྱེར། གཅོད་ཡུལ་དཔའ་བོའི་ཐོལ་གླུའི་དགོངས་འགྲེལ་གསལ་བྱེད་ཀྱི་ཁྲིད་ལུང་འབོགས་པ་ལ། ཐོག་མར་རྩ་བའི་སྡོམ་གྱིས་སྤྱི་དོན་མདོར་བསྟན་པ་སྔོན་དུ་འགྲོ་བས་མཚམས་སྦྱར་ཏེ། དངོས་གཞིའི་དོན་རྣམས་ལེགས་པར་བཀྲལ་བའི་གཞུང་འདི་ཉིད་ལས། རིན་ཆེན་ཞི་བ་རྡོ་རྗེ་སྙིང་པོའི་ལམ། །སོགས་ནས། ཕྱོགས་རྣམས་ཀུན་ཏུ་བཀྲ་ཤིས་བྱེད་པར་ཤོག །ཅེས་གསུངས་པ་བཞིན། ཟབ་མོའི་རྣལ་འབྱོར་འདི་ལ་བརྟེན་ནས་རང་གཞན་ཕྱམ་གཅིག་སྤྲོས་མེད་ཀུན་ཏུ་བཟང་མོའི་གོ་འཕང་ཐོབ་ཅིང་། སྐུ་དང་ཡེ་ཤེས་འདུ་འབྲལ་བྱ་རྩོལ་མེད་པའི་ཕྲིན་ལས་ཀྱིས་ཁམས་གསུམ་ཡོངས་སྒྲོལ་ཆེན་པོར་སྦྱོར་དགོས་པ་ལགས་སོ། །དེ་ལྟར་སྨིན་གྲོལ་སྟན་ཐོག་གཅིག་ཏུ་ལེགས་པར་ཐོབ་པའི་སྲུང་མཚམས་ཀྱི་དམ་ཚིག་རྡོ་རྗེ་ཐེག་པའི་གསང་བ་སྤྱི་དང་། ཁྱད་པར་གྱིས་བསྡུས་པ་ཐམས་ཅད་འཛིན་དགོས་པས། དེ་ལྟར་བགྱིད་པའི་གཡར་དམ་ཁས་བླང་བ་འདིའི་རྗེས་ཟློས། གཙོ་བོས་ཇི་ལྟར་སོགས།
དེ་ལྟར་ཐོབ་པའི་གཏང་རག་དང་། སླར་ཡང་རིག་འཛིན་སྲོག་སྒྲུབ་ཀྱི་བཀའ་སྲུང་དྲག་པོ་སྡེ་བཞིའི་སྲོག་དབང་ཟབ་མོ་ཞུ་བའི་ཡོན་དུ་མཎྜལ། སྲོག་དབང་ཆོ་ག་གནམ་ལྕགས་འབར་བའི་མྱུ་གུ་བཞིན་གྱི་མཚམས་སྦྱོར་ནས། གསོལ་གདབ་ཕྱིན་མཐར་ཆགས་སུ་བསྐུར་ནས། དགེ་བསྔོ་བཅས་བྱ། ཆོ་གའི་རྗེས་ལ། ཐོག་མར་ཡུམ་བཀའི་ལས་བྱང་གི་ཚོགས་ལ་རོལ། ལྷག་མ་ནས་བཀྲ་ཤིས་གྲུབ་ཀྱི་བར་དང་། དེ་ནས་ཡབ་བཀའ་རིག་འཛིན་གྱི་ཚོགས་རོལ་ནས། རྟ་བྲོའི་རྗེས། གཏོར་འགུགས་ནས་བཀྲ་ཤིས་རྫོགས་ཀྱི་བར་དམ་ཅན་སྤྱི་གཏོར་གྱི་མཇུག་ཆོག་བཞིན་གྱིས་དྲག་པོ་སྡེ་བཞིའི་རྗེས་ཆོག་གི་གོ་གཅད། དེ་ནས་དངོས་གྲུབ་བླངས་ཤིང་། གཏང་རག་གི་མཆོད་བསྟོད་ཕྱིན་རིག་འཛིན་ལས་བྱང་ལྟར་བགྱིས་པས་འགྲུབ། འདིར་བསྒྲུབ་ཚུལ་སྟབས་བདེའི་ཁྱད་ཀྱིས་བྱས་པ་ཡིན་ཅིང་དོན་ལའང་ཆེར་མི་འགལ་བར་མངོན། རིང་ལུགས་བཞིན་མཛད་པར་འདོད་ན། ཡབ་ཡུམ་གྱི་ཕྲིན་ལས་དང་ཚོགས་མཆོད་སྤེལ་མ་མེ་དབང་གི་ཆོག་ཁྲིགས་ནས་འབྱུང་བ་བཞིན། རྗེས་རིམ་ཡང་དེ་ལྟར་གུང་བསྡེབ། དྲག་པོ་སྡེ་བཞི་ལའང་ཆད་ཐོའི་དབུར། བསྐང་གསོ་རྒྱས་པ་དང་། གཞུང་གི་མཆོད་བསྟོད་ཀྱི་རྗེས་སུ། ཆོས་སྐྱོང་གི་མཆོད་བསྟོད་སོགས་སྤེལ་མར་གཏོང་དགོས་པ་རྣམས་ཁྱད་པར་རོ།། ༈ །།མངའ་བདག་ཕྲིན་ལས་ཀྱི་སྤྲུལ་པ་རྒྱལ་དབང་ལྔ་པའི་དག་སྣང་རྒྱ་ཅན་ཉེར་ལྔ་ལས། ཚེ་དཔག་མེད་
དྭངས་མ་བཅུད་འདྲེན་གྱི་དབང་ཆོག་ཁྲིགས་སུ་བསྡེབས་པ་འཆི་མེད་དགའ་སྟོན་ལྟར་དབང་སྒྲུབ། དབང་དངོས། རྗེས་བཅས་སོ།། ༈ །།གནམ་ཆོས་ཐུགས་ཀྱི་གཏེར་ཁ་སྙན་བརྒྱུད་ཟབ་མོའི་སྐོར་ལས་བྱོན་པའི་ཨོ་རྒྱན་རིན་པོ་ཆེ་པདྨ་འབྱུང་གནས་ཀྱི་དབང་ལ། ཐོག་མར་དབང་སྒྲུབ་རྒྱས་པར་རྩ་གསུམ་སྤྱིའི་ལས་བྱང་དང་། བསྡུ་ན་སྐྱབས་སེམས། ན་མོ༔ དཀོན་མཆོག་གསུམ་དང་སོགས། མཆོད་པ་བྱིན་རླབས། ཀ་དག་ཀློང་ནས་སོགས་སྔོན་དུ་འགྲོ་བས། གཏེར་གཞུང་བཞིན་སྐུ་གསུམ་འཁོར་དང་བཅས་པའི་མངོན་རྟོགས་ཚིག་རིས་གཅིག་གིས་བདག་མདུན་བུམ་པ་སོ་སོར་གསལ་བཏབ་ལ། བྱང་གི་པད་འབྱུང་མཇུག་གི །སྤྲུལ་སྐུའི་ཆ་ལུགས་ཡོངས་སུ་རྫོགས༔ བར་དང་། གཙོ་འཁོར་རྣམས་ཀྱི་གནས་གསུམ་གྱི༔ འབྲུ་གསུམ་ལས་ནི་འོད་འཕྲོས་པས༔ སྒོམ་པ་དང་མཚུངས་ཡེ་ཤེས་པ༔ སྤྱན་དྲངས་བདག་མདུན་རྣམས་ལ་ཐིམ༔ བཟླས་དམིགས་ནི། ཐུགས་ཀར་ཟླ་སྟེང་རྡོ་རྗེའི་ལྟེར། །ཧྲཱིཿམཐར་སྔགས་ཀྱི་ཕྲེང་བས་བསྐོར། །དེ་ལས་འོད་ཟེར་མཆོད་པའི་སྤྲིན། །ཕར་འཕྲོས་རྒྱལ་བའི་དཀྱིལ་འཁོར་མཆོད། །ཚུར་འདུས་བྱིན་རླབས་དངོས་གྲུབ་བསྡུས། །སྣང་གྲགས་ལྷ་སྔགས་ཆོས་སྐུའི་ངང་། །དག་པ་རབ་འབྱམས་འཁོར་ལོར་གྱུར། །ཅེས་པའི་ཏིང་ངེ་འཛིན་དང་ལྡན་པས་སིདྡྷི་ཅི་འགྲུབ་བཟླ། མཐར་མཆོད་བསྟོད་སྤྱི་
འགྲེ་བྱ། ལས་བུམ་དུ་རྡོར་སེམས་བསྐྱེད་བཟླས་དང་། རིག་མེ་དོར་ལ་གནང་བ་ནོད། དབང་དངོས་ལ། འདིར་དུས་གསུམ་རྒྱལ་བ་ཀུན་འདུས་ཨོ་རྒྱན་བླ་མ་མཆོག་གིས་རྗེས་འཇུག་རྣམས་ལ་དམིགས་མེད་ཐུགས་རྗེའི་དཔྱང་ཐག་ཆད་པ་མེད་པས་སྙིགས་འགྲོའི་གདུལ་བྱ་རྣམས་ལ་ལྷག་པར་བརྩེ་བས་རྗེས་སུ་བཟུང་སྟེ། གནས་སྐབས་དང་མཐར་ཐུག་གི་རེ་བ་ཡིད་བཞིན་དུ་སྐོང་བར་བྱེད་པ་རྩ་བ་གསུམ་གྱི་སྒྲུབ་ཐབས་ཇི་སྙེད་ཅིག་བཀའ་དྲིན་དུ་བསྩལ་པ་ལས། སྐབས་སུ་བབས་པ་འདི་ནི། ལོ་ཆེན་བཻ་རོ་ཙ་ན་དང་ཤུད་པུ་དཔལ་གྱི་སེང་གེ་ཟུང་དུ་འཇུག་པའི་རྣམ་རོལ་འཁྲུལ་ཞིག་དབང་དྲག་རྒྱ་མཚོའི་ཡང་སྤྲུལ་དེ་མ་ཐག་པ། སྤྲུལ་སྐུ་མི་འགྱུར་རྡོ་རྗེ་དགུང་ལོ་བཅུ་གཉིས་པ་མེ་སྤྲེལ་གྲོ་བཞིན་ཟླ་བའི་ཚེས་བཞིའི་ཉིན་ཨོ་རྒྱན་རིན་པོ་ཆེ་སྤྲུལ་སྐུའི་ཆ་ལུགས་ཅན་གྱིས་དངོས་སུ་བསྩལ་པའི་གདམས་ངག །བྱ་སླ་ཁྱེར་བདེ་བྱིན་རླབས་ཀྱི་ཚན་ཁ་དང་ལྡན་པའི་གུ་རུའི་སྒྲུབ་ཐབས་དང་འབྲེལ་བའི་སྨིན་བྱེད་བགྱི་བ་ལ། ཐོག་མར་བུམ་པ་འདིའི་ནང་ན་དཔལ་རྡོ་རྗེ་སེམས་དཔའ་བཞུགས་པའི་སྐུ་ལས་བདུད་རྩིའི་རྒྱུན་བྱུང་བ། སྤྱི་གཙུག་ནས་ཞུགས་པས་སྡིག་སྒྲིབ་ཉེས་ལྟུང་ཐམས་ཅད་བཀྲུས་ཤིང་དག་སྟེ་གསང་སྔགས་ཟབ་མོའི་དབང་བསྐུར་རུང་གི་སྣོད་ཁྱད་པར་ཅན་དུ་སྒྲུབ་པའི་མོས་པ་མཛོད། ཅེས་མཚམས་སྦྱར་ལ། ཧཱུྃ༔
བུམ་པ་འདི་ནི་སོགས་ལས་བུམ་གྱི་ཁྲུས་དང་། འདི་ནི་རིན་ཆེན་སོགས་མེ་ཏོག་བཀྱེ་བའི་ཚུལ་བྱ། དེ་ལྟར་བྱིན་པའི་འབྲུ་དེ་ཉིད་རིན་པོ་ཆེའི་རྡུལ་ཕྲན་རེ་རེ་ལས་ཀྱང་ཀུན་བཟང་མཆོད་པའི་སྤྲིན་ཕུང་དུ་འཆར་བའི་མཎྜལ་དུ་དམིགས་ཏེ་འདིའི་རྗེས་ཟློས་དང་བཅས་དབང་བསྐུར་ཞུ་བའི་ཡོན་དུ་འབུལ་བར་མཛོད། ལི་ཡི་མཎྜལ་རིན་ཆེན་སོགས། བླ་མ་དང་མ་ཧཱ་གུ་རུ་དབྱེར་མེད་རྩ་གསུམ་འདུས་པའི་ངོ་བོར་བཞུགས་པའི་སྤྱན་སྔར་དབང་བསྐུར་ཟབ་མོ་ཞུ་བའི་དོན་དུ་གསོལ་བ་འདེབས་པ་དང་། སྐྱབས་སུ་འགྲོ་ཞིང་སྡིག་པ་བཤགས་པ། དགེ་བ་ལ་ཡི་རང་ཞིང་སྨོན་འཇུག་གི་སེམས་བསྐྱེད་པ། དགེ་རྩ་ཡོངས་སུ་བསྔོ་བ་སྟེ་ལྔ་རྣམ་པར་དག་པ་ཚུལ་བཞིན་བགྱི་བའི་བློས་འདིའི་རྗེས་ཟློས། རྗེ་བླ་མ་སོགས། བྱིན་དབབ་པའི་སླད་དུ་ལུས་ལྷའི་ཏིང་ངེ་འཛིན་འདི་ལྟར་སྒོམས་ཤིག །ཧཱུྃ༔ ལྷོ་ནུབ་སྲིན་པོའི་སོགས་སྤོས་རོལ་བཅས་བྱིན་དབབ། མཐར་སུ་པྲ་ཏིཥྛས་བརྟན་པར་བྱ། དེ་ནས་དབང་དངོས་ལ། བུམ་པ་ཡེ་ཤེས་རང་སྣང་གི་ཕོ་བྲང་གཞལ་ཡས་ཁང་གི་དབུས་སུ་བུམ་བཅུད་མ་ཧཱ་གུ་རུའི་ལྷ་ཚོགས་དངོས་སུ་བཞུགས་པའི་སྐུ་ལས་བདུད་རྩིའི་རྒྱུན་བྱུང་། སྤྱི་བོ་ནས་ཞུགས་པས་ལུས་རྩའི་སྒྲིབ་པ་སྦྱངས། སྐུའི་དབང་ཐོབ། སྤྲུལ་སྐུའི་ས་བོན་རྒྱུད་ལ་བཞག་པར་མོས། ཧཱུྃ༔
བུམ་པ་འདི་ནི་སོགས་ཀྱིས་གཞུང་གསལ་བུམ་དབང་བསྐུར། རྒྱལ་བ་རྒྱ་མཚོའི་གསུང་གི་གསང་སྔགས་ཡི་གེའི་གཟུགས་སུ་ཤར་བའི་གླེགས་བམ་མགྲིན་པར་བཞག་པས་གཡོ་བ་རླུང་གི་དྲི་མ་སྦྱངས། གསུང་གི་དབང་ཐོབ། ལོངས་སྐུའི་ས་བོན་རྒྱུད་ལ་བཞག་པར་མོས། ཧཱུྃ༔ པུསྟི་འདི་ནི་སོགས་ཀྱིས་གླེགས་བམ་དབང་མགྲིན་པར་བསྐུར། གཏོར་མ་བླ་མའི་དཀྱིལ་འཁོར་དུ་གསལ་བས་དབང་བསྐུར་བས་འཕོ་བཅས་ཐིག་ལེའི་དྲི་མ་སྦྱངས། ཐུགས་ཀྱི་དབང་ཐོབ། ཆོས་སྐུའི་ས་བོན་རྒྱུད་ལ་བཞག་པར་མོས། ཧཱུྃ༔ གཏོར་མ་འདི་ནི་སོགས་ཀྱིས་གཏོར་མ་མགོ་དང་སྙིང་གར་བཞག །མདུན་བསྐྱེད་སྤྲུལ་སྐུའི་ལྟེ་བ་ནས་ཡེ་ཤེས་རྡོ་རྗེའི་བྱིན་རླབས་འདུས་པའི་ཐིག་ལེ་སེར་པོ་འཕྲོས། ཁྱེད་རང་རྣམས་ཀྱི་ལྟེ་བར་ཐིམ་པས་སྙོམས་འཇུག་བག་ཉལ་དང་བཅས་པའི་དྲི་མ་སྦྱངས། བདེ་གཤེགས་རྒྱལ་བའི་བྲལ་སྨིན་གྱི་ཡོན་ཏན་ཡོངས་སུ་རྫོགས་པ་མངོན་དུ་བྱེད་པའི་དབང་ཐོབ། ངོ་བོ་ཉིད་སྐུ་འགྲུབ་པའི་ས་བོན་རྒྱུད་ལ་བཞག་པར་མོས། ཧཱུྃ༔ འདི་ནི་པད་འབྱུང་སོགས་ཀྱིས་ཐིག་ལེ་ལྟེ་བར་བཞག །སྐུ་གསུམ་ཡེ་ཤེས་རོལ་པའི་ཕྲིན་ལས་ཐམས་ཅད་འབྱུང་བའི་གནས་ཤེས་རབ་དབྱིངས་ཀྱི་མཁའ་འགྲོའི་སྣང་བརྙན་གྱི་དབང་བསྐུར་བས། ཆོས་ཀྱི་དབྱིངས་ཀྱིས་གར་ཁྱབ་ཏུ་འབད་མེད་ལྷུན་གྱིས་གྲུབ་པའི་ཕྲིན་ལས་རབ་འབྱམས་
ལ་མངའ་དབང་བསྒྱུར་བའི་སྐལ་བ་རྒྱུད་ལ་བཞག་པར་མོས། ཧཱུྃ༔ འདི་ནི་ཡེ་ཤེས་སོགས་ཀྱིས་མཁའ་འགྲོའི་སྐུ་གསང་བར་བཞག །སྤྲོ་ན་ཤིས་པ་བརྗོད། དེ་ལྟར་དབང་བསྐུར་ཐོབ་པ་དེའང་འཛིན་པ་དམ་ཚིག་ལ་རག་ལས་པས། གསང་བ་གཉན་པོའི་དམ་ཚིག་རྣམས་བྱང་ཆུབ་བར་དུ་མིག་ལྟར་བསྲུང་བའི་དམ་བཅའ་བརྟན་པོས་འདིའི་རྗེས་ཟློས། འདི་ཉིད་བྱང་ཆུབ་སོགས་ཀྱིས་དམ་ཚིག་ཁས་བླང་། གཏང་རག་ཕྱིན་རྗེས་གནམ་ཆོས་སྤྱི་ཁྱབ་གུང་སྤྲོད་དེ་མཐར་དབྱུང་ངོ་།། ༈ །།ཨོ་རྒྱན་གཏེར་བདག་གླིང་པའི་ཟབ་གཏེར་བླ་སྒྲུབ་རིག་འཛིན་ཐུགས་ཐིག་གི་དབང་ཆོག་མཚམས་སྦྱོར་གྱིས་བརྒྱན་པ་དྲི་མ་མེད་པའི་འོད་ལྟར་ལ། སྔོན་འགྲོའི་ནང་གི་བརྒྱུད་འདེབས། ལས་བྱང་པདྨའི་དགོངས་རྒྱན་བཞིན་བདག་མདུན་དབྱེར་མེད་དུ་བསྒྲུབ། བུམ་སྒྲུབ་ཟུར་གསལ་སྦྱར་རྗེས། ཚེ་སྒྲུབ་ཡང་སྙིང་ཀུན་འདུས་ཀྱི་དབང་དང་། ཞལ་བཞི་པའི་གཏོར་དབང་འདིར་བཏགས་ན་བདེ་བས། ༼ཝ༽ཚེ་སྒྲུབ་ལས་བྱང་འཆི་མེད་འདོད་འཇོ་བཞིན་སྐྱབས་སེམས་ནས། ཚེ་སྦ་བསྟིམ་མཐའ་བར་གཏང་། དེ་ནས། ༼ཉི༽ཞལ་བཞི་པའི་ལས་བྱང་ལས་བཞི་རྣམ་རོལ་ལྟར་བྱིན་རླབས་ནས། བཟླས་པའི་སྐབས་སུ་གཏོར་དབང་ཕྲིན་ལས་སྟོབས་བསྐྱེད་བཞིན་བྱས་མཐར། མཆོད་བསྟོད་མདོར་བསྡུས་བྱ། ཐུགས་ཐིག་གི་ཚོགས་བཏང་བའི་རྩ་གསུམ་སྐོང་གསོའི་རྗེས་སུ་ཞལ་བཞི་པའི་སྐོང་བ་སྦྲེལ། བསྒྲལ་བསྟབ་རྗེས། ལས་བུམ་དུ་འཁྱིལ་པ་
བསྒྲུབ། རིག་མེ་དོར་ཞིང་གནང་བ་ཞུ། དབང་དངོས་དབང་ཆོག་དྲི་མ་མེད་པའི་འོད་ལྟར་མཐར་ཆགས་སུ་བསྐུར་ནས་ལུས་འབུལ་རྗེས། སླར་ཡང་ཐུགས་བསྐྱེད་པ་གསལ་བཏབ་ནས། ཟབ་ཆོས་འདི་ཉིད་ཀྱི་ཀ་དག་གི་ཁྲིད་ལུང་གསན་ཕྱིར་མཎྜལ། དེ་ཡང་མདོ་རྒྱུད་ཐམས་ཅད་ཀྱི་བརྗོད་བྱའི་མཐར་ཐུག་སོགས་ཁྲིད་ཡིག་དྲི་མེད་སྣང་བའི། ཡེ་ཤེས་རྩལ་ཁ་ཕྱོགས་མེད་དུ་རྒྱས་པའི་ཐབས་ལ་ཅི་ནས་ཀྱང་འབད་པར་བྱའོ། །ཞེས་གསུངས་པ་བཞིན་ཉམས་སུ་ལེན་པ་ལ་དྲིལ་ནས་བརྩོན་མཛོད། དེ་ནས་སླར་ཡང་འདི་ཉིད་དང་འབྲེལ་བའི་ཚེ་སྒྲུབ་འཆི་མེད་ཡང་སྙིང་ཀུན་འདུས་ཀྱི་དབང་བསྐུར་བ་ཡིན་ཏེ། དེ་ལ། སེམས་ཅན་ཐམས་ཅད་ཀྱི་དོན་དུ་སོགས་མཚམས་སྦྱོར་ངག་འདོན་གསལ་བདེར་སྤེལ་བ་དང་། དབང་ཆོག་འཆི་བདག་བདུད་འཇོམས་ལྟོ་སྦྱར་ཞིང་། ལས་བྱང་ནས་ཁ་སབ་དགོས་རིགས་ཀྱང་བླངས་ཏེ་བསྐུར་བའི་གཏང་རག་རྗེས། སླར་ཡང་བཀའ་སྲུང་མགོན་པོ་ཞལ་བཞི་པའི་གཏོར་མ་ལ་བརྟེན་པའི་སྲོག་དབང་བསྐུར་བ་ཡིན་ཏེ། དེའང་རྒྱལ་བའི་བསྟན་སྐྱོང་སོགས་དབང་ཆོག་ཕྲིན་ལས་སྟོབས་སྐྱེད་བཞིན་རྫོགས་པར་བསྐུར་ཞིང་། དགེ་བསྔོ་བཅས་དང་། ཆོ་གའི་རྗེས། ཚོགས་རོལ་ཕྱིན་ཚེ་སྒྲུབ་དང་ཆབས་ཅིག་གཏང་བའི་རྟ་བྲོའི་རྗེས། སྲུང་མའི་རྗེས་ཆོག །སྤྲོ་ན་སྐོང་བཤགས་བསྐྱར། གང་ལྟར་ཡང་སྤྱི་ཙམ་དུ་དམ་སྤྱིའི་རྗེས་ཀྱི་གཏོར་འབུལ་ནས་བཀྲ་ཤིས་
བརྗོད་མཐར། གཞུང་གི་དངོས་གྲུབ་བླང་སྐབས་ཚེ་སྒྲུབ་ཀྱི་དངོས་གྲུབ་ཀྱང་སྦྲེལ་ནས་བླང་། མཆོད་བསྟོད་སོགས་ཚེ་སྒྲུབ་དང་། ཐུགས་ཐིག་ལས་བྱང་བཞིན་སོ་སོར་མཐར་དབྱུང་བས་འགྲུབ་བོ།། ༈ །།མ་ཏི་རཏྣ་དང་སྟག་ཤམ་ཟུང་གི་བླ་མ་ཡིད་བཞིན་ནོར་བུ་རྣམ་གཉིས་ཆུ་བོ་གཅིག་འདུས་ཀྱི་རྩ་བའི་དབང་ལྔ་གཏོར་དབང་དང་བཅས་པའི་ཡི་གེ་བྱིན་རླབས་སྙིང་པོ་ལྟར་དབང་སྒྲུབ། དབང་དངོས། རྗེས་ཆོག་བཅས་སོ།། ༈ །།ཆོས་རྗེ་གླིང་པའི་ཟབ་ལམ་ཐུགས་ཀྱི་ནོར་བུའི་རྩ་བའི་དབང་ཆོག་མ་བུ་ཁྲིགས་བསྡེབས་སྨིན་བྱེད་བཅུད་ཀྱི་ནོར་བུ་ལྟར་བདག་བསྐྱེད། སྟ་གོན། དབང་སྒྲུབ། དབང་དངོས། རྗེས་ཆོག་བཅས་ཀྱིས་བསྐུར་རོ།། ༈ །།རོལ་པའི་རྡོ་རྗེའི་མཚོ་གཏེར་བླ་མ་རྒྱལ་བ་ཀུན་འདུས་ཀྱི་དབང་ལ། དབང་སྒྲུབ་སྐབས། དྲག་ཁྲོས་ནས་འབྱུང་བའི་སྐྱབས་སེམས་རྗེས། སྔོན་འགྲོ་དཀར་བགེགས་གཏང་། ལས་བྱང་དངོས་གྲུབ་ཀུན་འབྱུང་གི་མཚམས་གཅོད་ནས་གཟུང་མཐར་ཆགས་སུ་བཏང་ནས་བསྟོད་བཤགས་རྗེས། ཛཔ྄་ཁང་ཕྱེ། བཟླས་པ་ལ་སིདྡྷི། རྡོ་རྗེ་འཆང་གི་སྙིང་པོ་ཡུམ་ཤམ་ཅན། ཀུན་བཟང་། ཚེ་དཔག །ཐུགས་ཆེན། འཁོར་སྔགས་སྤྱི་དྲིལ་རྣམས་གཙོ་འཁོར་གྱི་རྣམ་པ་ཕྱེད་པར་བཟླས་ནས། དབང་ཆོག་ཟབ་པའི་མཐར་ཐུག་ལས་འབྱུང་བའི་བུམ་ལྷ་བསྐྱེད་བཟླས་དང་། ལས་བུམ་དུ་རྟ་མགྲིན་བསྐྱེད་བཟླས། སྤྱི་འགྲོའི་སྟོང་ཚིགས་ཕུལ་ནས་བུམ་ལྷ་འོད་ཞུ་བྱ། དེ་ནས་དབང་སྒྲུབ་
སྟབས་བདེ་ཕྱིར། ༼ཤ༽ཆ་ལག་རིགས་འདུས་རྡོར་སེམས་དང་། ༼ཆི༽རྒྱལ་འདུས་ཡུམ་བཀའ་ཕག་མོའི་གསང་སྒྲུབ། ༼ཝ༽ཡང་གསང་ཚེ་སྒྲུབ་ལྕགས་བང་མ་བཅས་ཕྱོགས་བསྒྲིལ་ནས་བསྐུར་དགོས་པས། འདིར་རིགས་འདུས་རྡོར་སེམས་སྒྲུབ་ཐབས་བཞིན་ལྷ་བསྐྱེད་ནས་བཟླས་པའི་མཐར་བསྙེན་བསྟོད་དོད་སྟོང་ཚིགས་མཆོད་བསྟོད། དབང་ཆོག་རྣམ་གྲོལ་སྤྲིན་གྱི་མྱུ་གུ་ལྟར་བུམ་པ་བཅས་བསྒྲུབས་ཟིན་ནས། ཕག་མོའི་གསང་སྒྲུབ་ཀྱི་ལྷ་བསྐྱེད་ནས་བཟླས་པའི་དབུར་ཛཔ྄་ཁང་ཕྱེས་ཏེ་བསྙེན་པ། དབང་ཆོག་བདེ་ཆེན་བདུད་རྩིའི་མྱུ་གུ་ལྟར་བུམ་བཟླས་བཏང་མཐར། གཏེར་གཞུང་མཁའ་འགྲོའི་བསྐུལ་ཕྲིན་བྱ། ཚེ་སྒྲུབ་ལྕགས་བང་མའི་བཀའ་བསྒོ་ནས་བསྟོད་བཤགས་བཟླས་པ་བཅས་བྱས་ལ། དབང་ཆོག་ལྕགས་ཀྱི་འཕྲུལ་ལྡེར་གསུངས་པ་བཞིན་མདུན་དཀྱིལ་གོ་སར་ཛཔ྄་ཁང་ཕྱེས་ལ་སྔགས་བཟླས་སོགས་སྟོང་ཚིགས་རྫོགས་ཀྱི་བར་གཏང་། དེ་ནས་རྒྱལ་འདུས་ཀྱི་བཀའ་སྲུང་དང་གཏེར་སྲུང་རྣམས་ཀྱི་གཏོར་འབུལ་དང་། ཚོགས་མཆོད། བསྒྲལ་བསྟབ་མཐར། སྤྱིར་དམིགས་པས་ཁྱབ་པར་བྱས་ཏེ། ཧྲཱི༔ བླ་མ་ལྷ་དང་ཌཱ་ཀིའི་ཚོགས༔ སོགས་རྒྱལ་འདུས་དབང་ལེན་གྱིས་དབང་བླངས་ཤིང་གནང་བ་ནོད། དབང་དངོས་ལ་འཇུག་པ་ན། མཚམས་སྦྱོར་གྱི་ཁྱད་པར། དེའང་ཆོས་སྐུ་འོད་གསལ་རྡོ་རྗེ་སྙིང་པོ་རྒྱ་ཆད་ཕྱོགས་ལྷུང་དང་བྲལ་བའི་ཐིག་ལེ་ཆེན་པོ་ལས་མ་གཡོས་བཞིན་དུ་འཕགས་པའི་ཡུལ་དུ་རྒྱལ་བའི་རྒྱལ་ཚབ་ཆེན་པོའི་སྐུར་བཞེངས་ཏེ།
མཚན་དང་སྐུའི་རོལ་པ་མཐའ་ཡས་པས་ཕྲིན་ལས་རླབས་པོ་ཆེ་མཛད། བོད་ཡུལ་ཆོས་སྐྱོང་བའི་རྒྱལ་པོའི་ཐུགས་བཞེད་བསྒྲུབ་པའི་དོན་དུ་སྤྱན་དྲངས་ཤིང་། དཔེ་ལས་འདས་པའི་གཙུག་ལག་ཁང་རྟེན་དང་བརྟེན་པར་བཅས་པ་གྲུབ་ནས། མདོ་སྔགས་ཀྱི་བསྟན་པ་ཉི་མ་ཤར་བ་ལྟར་མཛད་པའི་སྐབས་སུ། ལས་ཅན་རྗེ་འབངས་སོ་སོའི་མོས་ངོར་ཆོས་སྒོ་རབ་འབྱམས་བསྩལ་པ་ཕལ་ཆེར་ཕྱི་རབས་ཀྱི་དོན་དུ་ཟབ་མོའི་གཏེར་དུ་སྦ་བར་མཛད་པ་ལས། འདིར་སྐབས་སུ་བབས་པ་ནི། གྲུབ་པའི་རིག་འཛིན་ཧཱུྃ་ཀཱ་ར་དང་འཁོན་སྟོན་ཀླུའི་དབང་པོ་ཟུང་གི་ཡེ་ཤེས་ཀྱི་སྒྱུ་འཕྲུལ་འདུས་གཟུགས་རིག་འཛིན་རོལ་པའི་རྡོ་རྗེས་རྒྱམ་རྒྱལ་གནོད་སྦྱིན་ཆེན་པོའི་འདབས་ཞོལ་གཡུ་མཚོ་གཏན་འཁྱིལ་ནས། སྐལ་ལྡན་གྱི་འདུས་པ་དུ་མའི་མིག་ལམ་དུ་འགག་མེད་རྫུ་འཕྲུལ་གྱི་རོལ་པས་སྤྱན་དྲངས་པའི་སྐོར་ལས་བྱོན་པ། བླ་མ་རྒྱལ་བ་ཀུན་འདུས་ཀྱི་དབང་བཞི་ཟབ་པའི་མཐར་ཐུག་སྒྲུབ་པ་སྟེ། གཞུང་ལས། བདག་འདྲ་པདྨ་འབྱུང་གནས་ཀྱིས༔ ཕྱི་རབས་རྣལ་འབྱོར་སྨིན་པ་དང༔ འཇའ་ལུས་ཆོས་སྐུ་མྱུར་ཐོབ་ཕྱིར༔ ཡང་ཟབ་དབང་བསྐུར་རིམ་པ་བཤད༔ ཅེས་དང་། འདི་ནི་མ་ཐོབ་རྣལ་འབྱོར་པ༔ གསང་སྔགས་ལས་ལ་འཇུག་འདོད་རྣམས༔ ཕན་མེད་ངན་འགྲོ་སྒྲུབ་པའི་རྒྱུ༔ དེ་བས་
འདི་ལ་བརྩོན་པར་གྱིས༔ ཞེས་རྡོ་རྗེའི་གསུང་གིས་བསྔགས་པའི་དབང་བསྐུར་ཟབ་མོ་ཞུ་བའི་ཡོན་དུ་སོགས་ཀྱིས་མཚམས་སྦྱར་ནས་མཎྜལ་འབུལ་དུ་གཞུག །བླ་མ་དང་མ་ཧཱ་གུ་རུ་ཐ་མི་དད་པའི་དྲུང་དུ་གསོལ་བ་འདེབས་པ་འདིའི་རྗེས་ཟློས། ཧོ༔ ཁྱབ་བརྡལ་སྟོན་པ་སོགས་ལན་གསུམ། རྡོ་རྗེ་སློབ་དཔོན་རྩ་གསུམ་ཀུན་འདུས་ཀྱི་རང་བཞིན་དུ་བཞུགས་པའི་སྤྱན་སྔར། དབང་གི་ཡེ་ཤེས་སྐྱེ་བ་ལ་བར་དུ་གཅོད་པའི་སྡོམ་པ་གསུམ་དང་འགལ་བའི་དངོས་པོ་གང་མཆིས་པ་ཐམས་ཅད་ཡིད་ཡུལ་དུ་དྲན་པར་བྱས་ཏེ་གནོང་འགྱོད་དྲག་པོས་བཤགས་ཤིང་། སླན་ཆད་སྡོམ་པའི་འདུན་པ་རྩེ་གཅིག་པས་འདིའི་རྗེས་ཟློས། ཧོ༔ དགོངས་ཤིག་རྡོ་རྗེ་སོགས་ལན་གསུམ། ཐེག་པ་ཆེན་པོའི་ལམ་གྱི་རྩ་བ་བྱང་ཆུབ་ཏུ་སེམས་བསྐྱེད་པ་སྟེ། དེའང་མ་རྒན་མཁའ་ཁྱབ་ཀྱི་དོན་དུ་སྔོན་གྱི་རྒྱལ་བའི་རྗེས་སུ་སློབ་པར་དམ་འཆའ་བ་སྨོན་པ་དང་། དེའི་ཕྱིར་ཟབ་ལམ་བླ་མའི་དཀྱིལ་འཁོར་དུ་དབང་གིས་སྨིན་པར་བྱས་ནས་ལམ་རིམ་པ་གཉིས་ཉམས་སུ་བླངས་ཏེ། ཚེ་འདིར་བླ་ན་མེད་པའི་མཆོག་བསྒྲུབ་པར་བགྱིའོ་སྙམ་པ་འཇུག་པའི་སེམས་བསྐྱེད་ཟུང་ལྡན་གྱི་སྒོ་ནས་འདིའི་རྗེས་ཟློས། ཧོ༔ དུས་གསུམ་སངས་རྒྱས་སོགས་ལན་གསུམ། སྔོན་ཆད་གཟུང་འཛིན་གྱི་སྒྲིབ་པས་རང་རིག་དོན་གྱི་ལྷ་ཞལ་མ་མཇལ་བའི་མཚོན་བྱེད་
མིག་དར་འཆིང་མཛོད། ཅེས་སྔགས་ཀྱིས་མིག་དར་བྱིན། ཟབ་མོའི་གསང་བ་འདིར་འཇུག་པ་ལ་དམ་ཚིག་གི་རིམ་པ་རྣམས་སྲོག་ལས་གཅེས་པར་བསྲུང་དགོས་པར་གདམས་པ་ནི། རྡོ་རྗེ་མགོར་བཞག་སྟེ། ཧོ༔ ཉོན་ཅིག་སྐལ་ལྡན་སོགས། དམ་ཚིག་བསྲུངས་ན་མཆོག་གི་དངོས་གྲུབ་དང་། མ་བསྲུང་ན་རྡོ་རྗེ་དམྱལ་བར་ལྷུང་བས་མནའ་ཆུ་ལྕེ་ལ་བཞག་པ་སྙིང་དབུས་སུ་སིམ་སྟེ་དཔང་པོར་བཞུགས་པར་འགྱུར་བས། དེའི་ཚུལ་ཤེས་པས་ཁེ་ཉེན་གྱི་གནས་ལ་ཚུལ་བཞིན་འཇུག་པ་དང་། འདི་ལྟ་བུའི་སྤྱོད་ཚུལ་དམ་མེད་ལ་གསང་བར་གདམས་པ་ནི། མནའ་ཆུ་སྦྱིན་ལ། ཧཱུྃ༔ འདི་ནི་དམ་ཚིག་སོགས། དབང་གི་རྩ་བར་གྱུར་པ་ཡེ་ཤེས་ཀྱི་བྱིན་དབབ་པའི་སླད་དུ་རྩེ་གཅིག་པའི་ཡིད་ཀྱིས་འདི་ལྟར་གསལ་འདེབས་འཚལ། ཧཱུྃ༔ ཕུང་ཁམས་སྐྱེ་མཆེད་སོགས་ཀྱིས་ལྷར་བསྐྱེད། སྤོས་རོལ་དབྱངས་བཅས། ཧཱུྃ༔ ཁྱབ་བདག་བདེ་ཆེན་སོགས་ཀྱིས་བྱིན་དབབ། བརྟན་པར་བྱ་ཞིང་། མིག་དབྱེ་བའི་བར་དབང་གཞུང་བཞིན་བྱ། ལྷ་ངོ་བསྟན་པ་ནི། སྔོན་ཆད་མ་རིག་པས་བཅིངས་པའི་འཛིན་རྟོག་ཐམས་ཅད་དེང་འདིར་བསྐྱེད་པའི་གསལ་སྣང་གིས་ཐ་མལ་གྱི་སྣང་བ་སྦྱངས། ཡེ་ཤེས་དགོངས་བརྒྱུད་འཕོ་བའི་བྱིན་ཆེན་དབབ་པས་གཉིས་སྣང་གི་རྟོག་པ་བདེ་ཆེན་བྱང་ཆུབ་ཆེན་པོའི་ཐིག་ལེར་ཟླུམ་པས་རང་རིག་དོན་གྱི་ལྷ་དང་ཞལ་མཇལ་བ་
ཡིན་ཅིང་། དེའི་དོན་ངོ་སྤྲོད་པ་འདི་ལ་གསན་འཚལ། ཧཱུྃ༔ རང་སེམས་ཅིར་ཡང་སོགས། ཕྱག་ཤིང་ལ་སོགས་པས་མཚོན་ཏེ། དེ་ལྟར་གདོད་ནས་ཡེ་གྲུབ་ཀྱི་བཞུགས་ཚུལ་མཚོན་བྱེད་མཚན་མའི་དཀྱིལ་འཁོར་གྱིས་མཚོན་པའི་བརྡ་དོན་འདི་ལྟར་ཐུགས་ལ་ངེས་པ་དང་། འདིར་ཞུགས་ནས་ཟབ་མོའི་རྣལ་འབྱོར་ལ་བརྩོན་པར་མཛོད། ཧཱུྃ༔ འདི་ནི་བསྐྱེད་པའི་སོགས། འདི་ལྟར་རྟེན་དང་བརྟེན་པར་བཅས་པའི་དཀྱིལ་འཁོར་གྱི་ལྷ་དང་མཇལ་བའི་ཕྱག་རྟེན་དུ་མེ་ཏོག་འབུལ་ཞིང་། ལྷ་ཚོགས་ཀྱི་ཞབས་ལ་གུས་པས་ཕྱག་འཚལ་བའི་མོས་པ་མཛོད། དེ་རྣམས་ཀྱིས་འཇུག་པའི་ཆོས་རྣམས་གྲུབ་ནས། དབང་བསྐུར་དངོས་ལ་ཕན་ནུས་ཟབ་མོའི་དབང་རྣམས་རིམ་པར་འབྱུང་བ་ལས། དང་པོ་སློབ་མའི་མ་དག་པའི་ཕུང་པོ་ལྔ་པོ་སྦྱངས་ནས། སྐུ་ལྔའི་ཡེ་ཤེས་ཀྱི་ནུས་པ་འཇོག་པ་ཕྱི་ཕན་པའི་དབང་བསྐུར་བའི་དོན་དུ། སློབ་དཔོན་གྱི་ཐུགས་ཀའི་འོད་ཟེར་གྱིས་སྤྱན་དྲངས་པའི་གདན་གསུམ་ཚང་བའི་དབང་གི་ལྷ་རྣམས་དང་། དཀྱིལ་འཁོར་གྱི་ལྷ་ཚོགས་སློབ་དཔོན་དང་བཅས་པ་ལྷན་ཅིག་པས་དབང་གི་བྱ་བ་རྣམས་རིམ་པར་མཛད། མཆོད་པའི་ལྷ་མོས་མཆོད་ཅིང་། བྱང་ཆུབ་སེམས་དཔས་བཀྲ་ཤིས་བརྗོད། སེམས་མ་རྣམས་ཀྱིས་རྡོ་རྗེའི་གླུ་ལེན། ཁྲོ་བོ་ཁྲོ་མོ་རྣམས་ཀྱིས་བགེགས་
བསྐྲད་པར་གྱུར་པར་མོས། ཧཱུྃ༔ ཕྲིན་ལས་རྡུལ་ཚོན་དཀྱིལ་འཁོར་སོགས་ཀྱིས་རིག་པའི་དབང་ལྔ་པོ་བརྗོད་ཚིག་དང་མཐུན་པར་རིམ་བཞིན་བསྐུར་རོ། །དེས་རིག་པའི་དབང་ལྔ་བསྐུར་པས་མ་རིག་པ་ལྔ་སྦྱངས། ཡེ་ཤེས་ལྔ་མངོན་དུ་བྱས། སྤྲུལ་སྐུ་འཐོབ་རུང་གི་ས་བོན་ཐེབས་པ་ཡིན་ནོ། །གཉིས་པ་ནང་ནུས་པ་འཇོག་པའི་དབང་ལའང་གཉིས་ལས། དང་པོ་ཐུན་མོང་ཕྲིན་ལས་རྣམ་བཞིའི་སྒོ་ནས་གཞན་དོན་བསྒྲུབ་པར་རྗེས་སུ་གནང་བ་ནི། ཁྱེད་རང་རྣམས་བླ་མ་རྡོ་རྗེ་འཆང་པདྨ་འབྱུང་གནས་དཀར་པོ་ཞི་ཚུལ་རྡོར་དྲིལ་འཛིན་པ། རང་འོད་ཀྱི་ཡུམ་དང་བཅས་པའི་སྐུར་གསལ་བའི་ཕྱག་ཏུ་སྣ་ཚོགས་རྡོ་རྗེ་རེ་རེ་གཏད་པར་མོས། ཧཱུྃ༔ འདི་ནི་རྡོ་རྗེ་རྒྱ་གྲམ་སོགས་ཀྱིས་རྒྱ་གྲམ་གཏད། གཉིས་པ་ཐུན་མིན་ཟབ་མོའི་ལམ་བསྐྱེད་སྔགས་རྫོགས་གསུམ་གྱི་སྒོ་ནས་སྐལ་ལྡན་རྗེས་སུ་འཛིན་པ་སོགས་དོན་གཉིས་སྤྱོད་པར་ནུས་པའི་དབང་རྣམས་རིམ་པར་བསྐུར་བ་ལགས་པས་སོ་སོའི་དོན་ཐུགས་ལ་ངེས་འཚལ། ཧཱུྃ༔ འདི་ནི་པདྨ་སོགས་ཀྱིས་སྐུ་སྤྱི་བོར་བཞག །ཧཱུྃ༔ འདི་ནི་གུ་རུའི་སོགས་ཀྱིས་ཕྲེང་བ་མགྲིན་པར་བཞག །རྗེས་འབྲེལ་བཟླས་པའི་ལུང་བླང་བའི་སླད་དུ་སློབ་དཔོན་གྱི་ཐུགས་ཀ་ནས་སྔགས་ཀྱི་ཕྲེང་བ་བྱུང་། ཞལ་ནས་ཐོན། ཁྱེད་རང་རྣམས་ཀྱི་ཁ་སྒོ་ནས་ཞུགས། སྙིང་
གར་ཟླ་སྟེང་ཧྲཱིཿཡིག་དཀར་པོའི་མཐར་འཁོད་ཅིང་། བར་དུ་འོད་ཟེར་སྤྲོ་བསྡུས་རྒྱལ་བའི་བྱིན་རླབས་བསྡུས། རིག་དྲུག་རྒྱལ་བའི་ཞིང་དུ་སྦྱངས། སྣང་གྲགས་ཡེ་ཤེས་ཀྱི་འཁོར་ལོར་དག་པའི་མོས་པས་སྔགས་འདི་རྣམས་ཀྱི་རྗེས་ཟློས། གོང་གི་སྔགས་རྣམས་སོ་སོར་རྗེས་ཟློས་ལན་གསུམ་རེ་བྱ། ཧཱུྃ༔ འདི་ནི་གུ་རུའི་ཡེ་ཤེས་སོགས་ཀྱིས་མེ་ལོང་སྙིང་གར་འཇོག །དེ་རྣམས་ཀྱིས་རྡོ་རྗེ་སློབ་མ་དང་། སློབ་དཔོན་གྱི་དབང་བསྐུར་ཡོངས་སུ་རྫོགས་པ་ཐོབ་ཅིང་། གནས་སྐབས་དོན་གཉིས་ཀྱི་ཕྲིན་ལས་རབ་འབྱམས་དང་། མཐར་ཐུག་དམིགས་པ་མེད་པའི་ཕྲིན་ལས་གང་འདུལ་དེར་སྣང་རྩོལ་མེད་དུ་འཆར་བའི་རྟེན་འབྲེལ་བསྒྲིགས་པའོ། །གསུམ་པ་གསང་བ་ཟབ་མོའི་དབང་ལ་གསུམ་ལས། དང་པོ་གསང་བའི་དབང་གི་སླད་དུ་འདི་ལྟར་ངེས་པར་མཛོད། ཧཱུྃ༔ ཀུན་རྫོབ་བྱང་སེམས་སོགས་ཀྱིས་ཐོད་པའི་གསང་རྫས་སྦྱིན། དེ་ལྟར་བདུད་རྩི་མྱངས་པ་མགྲིན་པ་ནས་འཕེལ། རྩ་ཁམས་ཐམས་ཅད་ལ་ཁྱབ་པས་བདེ་བ་འབར། རང་བཞིན་བརྒྱད་ཅུའི་རྟོག་པ་འགགས། གསལ་སྟོང་རླུང་གི་རྣལ་འབྱོར་སྒོམ་པ་ལ་དབང་། ལོངས་སྤྱོད་རྫོགས་པའི་སྐུ་ཐོབ་རུང་གི་ས་བོན་རྒྱུད་ལ་ཐེབས་པ་ཡིན་ནོ། །གཉིས་པ་ཤེས་རབ་ཡེ་ཤེས་ཀྱི་དབང་བསྐུར་བའི་དོན་དུ་གཟུགས་དང་ལང་ཚོ་
རྫོགས་པའི་ཕོ་ཉ་མོ་རིག་མའི་བརྟུལ་ཞུགས་ཀྱི་ཕྱིར་ཕྱག་ཏུ་གཏད་པར་མོས། ཧཱུྃ༔ ཡེ་ཤེས་བྷ་གའི་སོགས་ཀྱིས་བརྡའམ་རིག་མ་ལག་ཏུ་སྦྱིན། དེ་ལྟར་གཏད་པའི་ལྷ་མོ་དང་ཁྱེད་རང་རྣམས་ལྷ་སྔགས་ཆོས་ཀྱི་འདུ་ཤེས་ལྡན་པས་མཉམ་པར་སྦྱོར་བས་ཡས་བབས་མས་བརྟན་གྱི་དགའ་བ་སུམ་ཅུ་རྩ་གཉིས་མཐར། འགྱུར་མེད་བདེ་ཆེན་ལྷན་སྐྱེས་ཀྱི་རང་ཞལ་མངོན་དུ་བྱས་པས་གཉིས་རྟོག་གི་དྲི་མ་སྦྱངས། དཔེ་ཡི་ཡེ་ཤེས་མངོན་དུ་གྱུར། ཆོས་སྐུ་ཐོབ་རུང་གི་ས་བོན་རྒྱུད་ལ་ཐེབས་པ་ཡིན་ནོ། །གསུམ་པ་ཚིག་དབང་སྦྱིན་པ་ནི། སྔར་དཔེ་ལས་སྐྱེས་པའི་ལྷན་ཅིག་སྐྱེས་དགའི་ཡེ་ཤེས་ཀྱིས་མཚོན་པའི་དཔེ་བྲལ་བློ་འདས་རང་རིག་ཟང་ཐལ་ཡིད་དཔྱོད་དང་བྲལ་བའི་ངང་དུ་མཉམ་པར་བཞག་པས། འཁོར་འདས་ཀྱི་གཉིས་ཆོས་ཐམས་ཅད་གཉིས་མེད་ཀྱི་ཡེ་ཤེས་ནམ་མཁའ་ལ་ནམ་མཁའ་ཐིམ་པ་བཞིན་དུ་མཚོན་བྱ་མཚོན་བྱེད་དང་བྲལ་བའི་རིག་པ་བྱང་ཆུབ་སེམས་ཀྱི་དཀྱིལ་འཁོར་དུ་འུབ་ཆུབ། དུག་ལྔའི་ཡུལ་སྣང་ཐམས་ཅད་རླབས་དང་རྒྱ་མཚོ། ཉི་མ་དང་ཟེར་བཞིན་རང་ཤར་རང་གྲོལ་དུ་ཐིམ་པས། སྣང་རིག་སྟོང་གསུམ་དབྱེར་མེད་དུ་འཛིན་བྲལ་ཡེ་དག་ཡེ་ཤེས་ལྔ་རྫོགས་ཀུན་ཏུ་བཟང་པོའི་དགོངས་ཀློང་ལས་མ་གཡོས་པར་འདིའི་དོན་ལ་མཉམ་པར་འཇོག་མཛོད།
ཧཱུྃ༔ དོན་དམ་འོད་གསལ་སོགས་ངོ་སྤྲོད་རྫོགས་པར་གྱེར། དེ་ལྟར་དབང་ཐམས་ཅད་ཀྱི་མཐར་ཐུག་ཚིག་དབང་རིན་པོ་ཆེ་དོན་གྱི་དབང་ཆེན་ཅར་ཕོག་ཏུ་བསྐུར་པས་ཡིད་དཔྱོད་ཀྱི་སྒྲིབ་པ་དག །བློ་འདས་རང་རིག་ཡེ་ཤེས་ཟང་ཐལ་ཡེ་སྟོང་འགྱུར་མེད་བདེ་བ་ཆེན་པོའི་དོན་སྒོམ་པ་ལ་དབང་། འབྲས་བུ་སྐུ་བཞི་ཡོངས་རྫོགས་ངོ་བོ་ཉིད་སྐུ་ཐོབ་རུང་གི་ས་བོན་རྒྱུད་ལ་ཐེབས་པ་ཡིན་ནོ། །རྗེས་ཀྱི་བྱ་བ་ཤིས་བརྗོད་བྱ། དམ་ཚིག་ཁས་བླངས་རྗེས། དེ་ལྟར་ཐོབ་པའི་གཏང་རག་དང་། སླར་ཡང་འདི་ཉིད་ཀྱི་ཆ་ལག་རིགས་འདུས་རྡོ་རྗེ་སེམས་དཔའི་དབང་བསྐུར་ཞུ་བའི་ཡོན་དུ་མཎྜལ། དེའང་སངས་རྒྱས་ཀུན་དངོས་རྗེ་བཙུན་པདྨ་ཐོད་ཕྲེང་རྩལ་སོགས་དབང་ཆོག་བཞིན་མཚམས་སྦྱོར་མཐར་གསོལ་འདེབས་ལ་འཇུག་ཅིང་། རྫོགས་པར་བསྐུར་བའི་གཏང་རག་དང་། སླར་ཡང་བླ་མ་རྒྱལ་བ་ཀུན་འདུས་ཀྱི་ཡུམ་བཀའ་རྡོ་རྗེ་ཕག་མོའི་སྨིན་བྱེད་དབང་བསྐུར་ཞུ་བའི་ཡོན་དུ་མཎྜལ། དེ་ཡང་ཇི་སྐད་དུ། བདག་འདྲ་པདྨ་འབྱུང་གནས་སོགས་ནས་གོང་བཞིན་མཐར་ཆགས་སུ་བསྐུར་བའི་གཏང་རག་དང་། སླར་ཡང་བླ་མ་རྒྱལ་བ་ཀུན་འདུས་ཀྱི་ཡང་གསང་ཚེ་དཔག་མེད་ཀྱི་སྒྲུབ་པ་ཚེ་སྒྲུབ་ལྕགས་ཀྱི་བང་མཛོད་ཀྱི་དབང་བསྐུར་ཞུ་བའི་ཡོན་དུ་སོགས་ཀྱིས་སྔར་བཞིན་མཚམས་སྦྱར་ཏེ། དབང་ཆོག་ལྕགས་ཀྱི་འཕྲུལ་ལྡེ་བཞིན་ལོ་རྒྱུས་དང་གསོལ་གདབ་ནས་
རྫོགས་པར་བསྐུར་ཞིང་དགེ་བསྔོ་བཅས་བྱ། ཆོ་གའི་རྗེས་ཚོགས་ལ་རོལ་ཞིང་། ལྷག་མ་ནས་རྟ་བྲོ་གྲུབ་རྗེས། ཧྲཱི༔ བླ་མ་ཡི་དམ་མཁའ་འགྲོ་དགོངས༔ སོགས་ཀྱིས་དངོས་གྲུབ་བསྐུལ་ཞིང་བླངས། དེ་ནས་ཡབ་བཀའ་དང་རྡོར་སེམས། ཡུམ་བཀའ་དང་ཚེ་སྒྲུབ་རྣམས་ལ་དམིགས་པས་མཆོད་ཅིང་། བསྟོད་པ་ནོངས་བཤགས་སྤྱི་ཁྱབ་ཞིག་སོ་སོར་དབུལ། མཐར་སྤྱི་ལ་དམིགས་པའི་བརྟན་བཞུགས། བསྡུ་ལྡང་། བསྔོ་སྨོན། བཀྲ་ཤིས་བཅས་ཚར་གཅིག་གིས་འཐུས་ཤིང་། གཏོར་མའི་སྲུང་འཁོར་ནི་སྒྲུབ་པ་དང་ཆོ་ག་ཉིན་སྦྲེལ་སྐབས་ལས། དབང་རྐྱང་ཉིན་གཅིག་གི་དུས་མི་དགོས་སོ།། ༈ །།སྙན་བརྒྱུད་མཁའ་འགྲོའི་སྙིང་ཁྲག་གུ་རུ་སྤྲོས་མེད་དོན་གྱི་སྒྲུབ་པའི་དབང་བསྐུར་བྱིན་རླབས་འོད་ཀྱི་མྱུ་གུ་ལྟར། ༼དི༽རྩ་གསུམ་ལས་བྱང་སྦྱར་བའི་དབང་སྒྲུབ། དབང་དངོས། རྗེས་ཆོག་བཅས་དང་། ༒ དག་སྣང་སྲིན་ཡུལ་མ་དང་། དེའི་སྨིན་བྱེད་ཀྱི་ལག་ལེན་ལྟར་དབང་སྒྲུབ། དབང་དངོས། རྗེས་བཅས་བྱའོ།། ༈ །།རིག་འཛིན་ཚེ་དབང་ནོར་བུའི་དགོངས་གཏེར་བསམ་པ་ལྷུན་གྲུབ་མའི་རྩ་བའི་དབང་བསྐུར་ཟབ་གསང་བཅུད་འདུས་ལྟར་དབང་སྒྲུབ། དབང་དངོས་ཀྱི་མཐའི། ངོ་བོ་ཉིད་ཀྱི་སྐུ་འགྲུབ་པའི་སྐལ་པ་དང་ལྡན་པར་བྱས་སོ། །དེ་རྣམས་ཀྱིས་སྨིན་ལམ་ཐམས་ཅད་ལེགས་པར་རྫོགས་པས། དེའི་གྲོལ་བྱེད་ཁྲིད་རིམ་ནི་འདི་ལྟར་ཉམས་སུ་བླང་སྟེ། འདིར་གུ་རུའི་གསོལ་འདེབས་ཀྱི་སྒྲུབ་ཐབས་བསྐྱེད་རྫོགས་ཀྱི་
སོགས་གསལ་བྱེད་ཟིན་བྲིས་དོན་གསལ་ཉི་མའི། རྩ་བའི་སྒྲུབ་ཐབས་གསལ་བར་བཤད་ཟིན་ཏོ། །དོན་གཉིས་པ་བྱེ་བྲག་ཡིད་བཞིན་ནོར་བུ་ལྟ་བུའི་མན་ངག་བཅུ་གསུམ་བཤད་པ་ལ་སོགས་ནས། ལེའུ་དང་པོ་འོ། །བྱེ་བྲག་གི་མན་ངག་གཉིས་པ་སོགས་དང་སྦྲེལ་ཞིང་། རྣམ་གྲངས་བཅུ་གསུམ་ལེགས་པར་བཤད་ཟིན་ཏོ། །བར། དེ་རྣམས་ཀྱི་སྒོ་ནས་དེ་ལྟར་བླ་མའི་དཀྱིལ་འཁོར་ཆེན་པོའི་སྨིན་གྲོལ་ཡོངས་རྫོགས་སྟན་ཐོག་གཅིག་ཏུ་ཐོབ་པ་ཡིན་པས། དེ་ཡང་གསང་སྔགས་ཀྱི་རྩ་བ་སོགས་དམ་ཚིག་ཁས་བླང་དང་སྦྲེལ་ནས། དབང་དང་ཆོ་གའི་རྗེས་གཞུང་བཞིན་བྱའོ།། ༈ །།རིག་འཛིན་འཇིགས་མེད་གླིང་པའི་དགོངས་གཏེར་ཀློང་ཆེན་སྙིང་གི་ཐིག་ལེའི་བླ་སྒྲུབ་ཡབ་བཀའ་རིག་འཛིན་འདུས་པའི་རྩ་དབང་རྒྱལ་ཐབས་སྤྱི་བླུགས་མཚམས་སྦྱོར་ཁྱེར་བདེས་བརྒྱན་པ་པདྨའི་དོ་ཤལ་ལྟར་དབང་སྒྲུབ། དབང་དངོས། རྗེས་ཆོག་བཅས་བྱའོ།། ༈ །།པདྨ་དགྱེས་པའི་སྙན་བརྒྱུད་གུ་རུ་ཞི་བ་ཡིད་བཞིན་ནོར་བུའི་དབང་ཆོག་བདུད་རྩིའི་བུམ་བཟང་ལྟར་དབང་སྒྲུབ། དབང་དངོས་ཀྱི་ལོ་རྒྱུས་སྐབས། གཙོ་བོར་གྱུར་པ་འདི་ཉིད་ནི། རིག་འཛིན་གཏེར་བདག་གླིང་པ་དང་ཐུགས་རྒྱུད་གཅིག་པ། དགེ་སྦྱོང་བློ་གསལ་རྒྱ་མཚོའི་ཡང་སྤྲུལ་དེ་མ་ཐག་པ་ང་ཕོད་དགེ་རྒན་པདྨ་དགྱེས་པ་ལ། རྩ་གསུམ་ཀུན་འདུས་མ་ཧཱ་གུ་རུ་པདྨ་སཾ་བྷ་ཝས་ཡང་ཟབ་སྙན་བརྒྱུད་
ཀྱི་ཚུལ་དུ་བསྩལ་པ། ཟབ་ལམ་ཡོངས་ཀྱི་མཆོག་གསང་མཐར་ཐུག་པ། མཁའ་འགྲོའི་སྙིང་ཁྲག །ཚིག་ཉུང་ལ་དོན་འདུས་པ། ཉམས་སུ་བླང་བདེ་བ། བྱིན་རླབས་ཀྱི་ཚན་ཁ་ལྷག་པར་ཆེ་བའི་ལམ་ཟབ་འདི་ཉིད་ཡིད་བཞིན་གྱི་ནོར་བུ་དང་མཚུངས་པའི་ཕྱིར། གུ་རུའི་ཐུགས་སྒྲུབ་སྙན་བརྒྱུད་ཡིད་བཞིན་ནོར་བུ་སོགས་དང་སྦྲེལ། རྗེས་བཅས་སོ།། ༈ །།སི་ཏུ་པདྨ་ཉིན་བྱེད་ཀྱི་དགོངས་གཏེར་བསྟན་བཅོས་ཀྱི་ཚུལ་དུ་མཛད་པ་ཨོ་རྒྱན་རྗེ་འབངས་ཉེར་ལྔའི་ལས་བྱང་དངོས་གྲུབ་སྤྲིན་ཕྲེང་དང་འབྲེལ་བའི་དབང་བསྐུར་བྱིན་རླབས་ཆར་རྒྱུན་ལྟར་དབང་སྒྲུབ་ལ་རྩ་གསུམ་སྤྱི་སྐོང་སྦྱར་ནས། དབང་དངོས། རྗེས་བཅས་བྱའོ།། ༈ །།མཆོག་གླིང་གཏེར་ཁ་སོ་གཅིག་པ་དམ་ཆོས་སྙིང་པོ་སྐོར་ལྔའི་བླ་མ་དགོངས་འདུས་སྙིང་པོའི་སྨིན་བྱེད་བཀླག་ཆོག་ཏུ་བཀོད་པ་བྱིན་རླབས་ཡང་སྙིང་ལྟར་དབང་སྒྲུབ། དབང་དངོས་ཀྱི་བྷནྡྷའི་བདུད་རྩིའི་བསྐུར་ཚིག་མཇུག་ཏུ། མི་ཕྱེད་རྡོ་རྗེར་སྨིན་པར་ཤོག །ཅེས་དང་། རིག་ཙཀ་བསྐུར་ཚིག་མཇུག་ཏུ། བདེ་ཆེན་རྡོ་རྗེའི་སྐུ་འགྲུབ་ཤོག །ཅེས་སོ་སོར་སྦྱར། རྗེས་བཅས་བྱའོ།། ༈ །།གཏེར་ཁ་བདུན་པ་རྒྱལ་ཀུན་སྤྱི་གཟུགས་གུ་རུ་པདྨ་བདུད་འདུལ་རྒྱལ་པོའི་དོན་དབང་བྱིན་རླབས་མཆོག་སྟེར་ལྟར་དབང་སྒྲུབ། དབང་དངོས། རྗེས་བཅས་བྱའོ།། ༈ །།གཏེར་ཁ་ཉེར་གཅིག་པ་ཡུམ་གཏེར་དུ་གཏོགས་པ་ཟུར་བཟའི་ཐུགས་དམ་སྐོར་དྲུག་ལས། བླ་སྒྲུབ་ཐུགས་ཀྱི་ཡང་སྙིང་གི་དབང་བསྐུར་བྱིན་རླབས་ཆུ་རྒྱུན་མཚམས་
སྦྱོར་གྱིས་བརྒྱན་པ་ལྟར་དབང་སྒྲུབ། དབང་དངོས། རྗེས་བཅས་བྱའོ།། ༈ །།གཏེར་ཁ་དྲུག་པ་ཟབ་བདུན་རྩ་གསུམ་གྱི་གུ་རུ་བདེ་བ་ཆེན་པོའི་ཕྲིན་ལས་དབང་ཆོག་དང་བཅས་པ་བདེ་ཆེན་བཅུད་འདྲེན་ལྟར་དབང་སྒྲུབ། དབང་དངོས། རྗེས་བཅས་བྱའོ།། ༈ །།གཏེར་ཁ་གསུམ་པ་བླ་མའི་ཐུགས་སྒྲུབ་བར་ཆད་ཀུན་སེལ་གྱི་དོན་དབང་འབྲིང་པོ་དང་བསྡུས་པའི་ཆོ་ག་སྙིང་པོའི་སྣང་བ་ལྟར་དབང་སྒྲུབ་སྐབས། ༼ཏི༽ཚེ་རིང་མ་སྦྱར་བ། དངོས་གཞིར་དབང་འབྲིང་ལྷ་དབང་སྦྱར་བ། བསྡུས་པ་གཏོར་དབང་། ཚེ་དབང་རྗེས་སུ་བཀའ་སྲུང་ཚེ་རིང་མཆེད་ལྔའི་ཐུན་མོང་གཏོར་མའི་དབང་བསྐུར་བཀྲ་ཤིས་བཅུད་འབེབ་ལྟར་གཏོར་དབང་སྦྱོར། རྗེས་ཆོག་བཅས་བྱའོ།། ༈ །།གཏེར་ཁ་ཉེར་གསུམ་པ་བླ་མའི་ཐུགས་སྒྲུབ་ཡིད་བཞིན་ནོར་བུ་བསམ་ལྷུན་གྱི་རྩ་བའི་དབང་བསྐུར་རྒྱས་པའི་ཆོ་ག་བཀླག་ཆོག་ཏུ་བཀོད་པ་ཡིད་བཞིན་དཔལ་འབྱུང་ལྟར་དབང་སྒྲུབ་སྐབས་ཚེ་དབང་ནང་ལྟར་དམིགས་བཟླས་ཚེ་འགུགས་སྦྱར་བ། དབང་དངོས་གཞིར་དབང་རྒྱས་པ་དང་། ཡིད་བཞིན་དཔལ་འབར་ལྟར་དབང་འབྲིང་པོ། ཡིད་བཞིན་དཔལ་སྟེར་ལྟར་དབང་བསྡུས་པ། ཡིད་བཞིན་དཔལ་འཛིན་ལྟར་ཚེ་དབང་རྣམས་དང་། རྗེས་ཆོག་བཅས་བྱའོ།། ༈ །།པདྨ་འོད་གསལ་མདོ་སྔགས་གླིང་པའི་དག་སྣང་འཆི་མེད་མཚོ་སྐྱེས་སྙིང་ཐིག་འདི་ནི། ཕྱི་སྒྲུབ་བར་ཆད་ཀུན་སེལ། ནང་སྒྲུབ་ཡིད་བཞིན་ནོར་བུ། གསང་སྒྲུབ་རྡོ་རྗེ་དྲག་རྩལ། ཡང་གསང་མཚོ་སྐྱེས་སྙིང་ཐིག་སྟེ་ཐུགས་སྒྲུབ་སྐོར་བཞི་བཞུགས་པར་གསུངས་པའི་སྡེ་ཚན་
ལས། མཚོ་སྐྱེས་སྙིང་ཐིག་གི་སྨིན་བྱེད་རྩ་བའི་དབང་བཞི་བཀླག་ཆོག་ཏུ་བཀོད་པ་ཡེ་ཤེས་བདུད་རྩིའི་ཆར་རྒྱུན་ལྟར་དབང་སྒྲུབ། དབང་དངོས། རྗེས་ཆོག་བཅས་བྱའོ།། ༈ །།རྣམ་སྣང་ལོ་ཙཱ་དངོས་བྱོན་གསང་ཆེན་བཀའི་སྡུད་པོ་རྒྱལ་བས་ལུང་བསྟན་འཇམ་མགོན་རྡོ་རྗེ་འཆང་པདྨ་གར་དབང་བློ་གྲོས་མཐའ་ཡས་འཆི་མེད་བསྟན་གཉིས་གཡུང་དྲུང་གླིང་པའི་གཏེར་བྱོན་རྩ་གསུམ་དགོངས་འདུས་ཟབ་མོ་གཏེར་གྱི་མཛོད་ལས། རིག་འཛིན་དོན་གྱི་དབང་བསྐུར་ལྟར་དབང་སྒྲུབ། དབང་དངོས་ཀྱི་ལོ་རྒྱུས་སྐབས། རྒྱ་རིམ་པ་བདུན་གྱིས་བཏབ་ནས། ཞེས་པའི་འཕྲོས་སུ། ཟབ་མོའི་གཏེར་དུ་བསྩལ་པ་ཉིད་ཀྱི་ཕྲིན་ལས་དུས་སུ་སོན་པ་ན། སྤྲུལ་པའི་གཏེར་ཆེན་མཆོག་གྱུར་བདེ་ཆེན་ཞིག་པོ་གླིང་པ་ཕྲིན་ལས་འགྲོ་འདུལ་རྩལ་གྱི་རྟེན་འབྲེལ་ལུང་བྱང་ལས། མཁས་པའི་དབང་པོ་ཡེ་ཤེས་སྤྱན་དང་ལྡན༔ དེ་ཡི་ཆེ་བ་ནོར་བུའི་མགུལ་དུ་སྦས༔ ཞེས་གསུངས་པ་ཉིད་རྩི་རྐེ་ནོར་བུ་སྤུན་གསུམ་གྱི་མགུལ་ནས་ཟབ་ཆོས་ནོར་བུ་སྐོར་བདུན་སོགས་སྤྱན་དྲངས་པའི་སྒེར་ལུང་ལས། རྣམ་སྣང་འོད་ཟེར་ལས་སྤྲུལ་ལོ་ཙཱ་བ༔ སྔོན་འདས་ཀུན་དགའ་ཤཱནྟིཾ་གརྦྷ་དང༔ ཟླ་གྲགས་ནག་པོ་སྤྱོད་པ་ཐུ་མི་སོགས༔ གང་འདུལ་སྒྱུ་འཕྲུལ་རོལ་པ་ཅིར་ཡང་འཆར༔ ད་ལྟ་ཁྱོད་ཀྱང་ཆོས་ཕྱིར་དཀའ་ཆེན་སྤྱད༔ དགའ་རབ་ཤྲཱི་སེང་ཐུགས་ཀྱི་མཛོད་རྣམས་ཐོབ༔ པདྨ་བདག་དང་
དགོངས་མཉམ་བོད་ཡུལ་གྱི༔ འགྲོ་བ་འདུལ་བའི་རྒྱལ་ཚབ་ཉིད་དུ་བསྐོས༔ སྐྱེ་འཆིའི་མཚན་མ་ཟད་ཀྱང་གཞན་སྣང་དུ༔ སྐྱེ་དང་སྤྲུལ་པ་ཡང་སྤྲུལ་ཉིང་སྤྲུལ་ནི༔ བསམ་ཡས་བརྗོད་ལས་འདས་སྟོན་འགྲོ་བ་འདུལ༔ ལས་ཀྱི་ལུས་ལྟར་སྣང་ཡང་སྤྲུལ་པའི་གཟུགས༔ མཁས་བཙུན་རྟོགས་ལྡན་གྲུབ་ཐོབ་རྣལ་འབྱོར་པ༔ བསྟན་པ་རིས་མེད་གང་འདུལ་མ་ངེས་འབྱུང༔ སྐྱེ་སྤྲུལ་ཀུན་ལ་དེ་ཡི་བག་ཆགས་འབྲེལ༔ འུག་བྱ་ལུང་དུ་ཟུར་ལས་ཤཱཀྱའི་མིང༔ རྒྱུ་ཡི་ཧེ་རུ་ཀཿབཞེངས་དཔལ་ཆེན་འགྲུབ༔ དེ་ཡི་ལས་འཕྲོས་ཙ་འདྲ་ཞེས་པའི་རིར༔ འབྲས་བུའི་སྐུ་གཟུགས་མཛོད་ལྔ་སྒྲུབ་པའི་སྡེ༔ སྐུ་གསུང་ཐུགས་ཀྱི་རྟེན་བཙུགས་ས་གནད་གསོ༔ སོགས་དང་། མཁས་པ་བཻ་རོའི་སྔོན་གྱི་ཐུགས་བསྐྱེད་དང༔ སྨོན་ལམ་མཐུ་བཙན་སྤྲུལ་པའི་རང་གཟུགས་ནི༔ ཁམས་ཕྱོགས་འབྲི་ཡི་ཀླུང་འགྲམ་གླིང་གི་ཡུལ༔ པདྨའི་རིགས་མཆོག་སྦས་གནས་ལུང་ཕྲན་དུ༔ མཁའ་ལྡིང་རིགས་ལས་གཡུང་དྲུང་མིང་ཅན་འབྱུང༔ བློ་གྲོས་མཐའ་ཡས་རྩལ་དང་ལྡན་པ་འབྱུང༔ བྱ་ཁྱི་ལོ་པ་བྱིས་སྤྱོད་ཧུར་འགྲོགས་ཅན༔ མི་ཆེ་མི་ཆུང་སྒེག་པ་རྡོ་རྗེའི་ལུས༔ ཞི་ཚུལ་ཡིད་འོང་ལུས་རྟགས་ཕྱག་རྒྱས་སྤྲས༔ རྟག་ཏུ་མངོན་པར་
ཤེས་པ་ཐལ་ཐོལ་འཆད༔ སྐབས་སུ་འགག་མེད་ངོ་མཚར་རྟགས་རེ་སྟོན༔ རྟོགས་པ་མཐོ་ཞིང་སྤྱོད་པ་ལྷུག་པར་སྐྱོང༔ ཕལ་པའི་སྣང་ངོར་བག་ཡངས་ཐ་མལ་ཚུལ༔ རྫུབ་ཆེ་བརྟག་དཀའ་འདྲིས་སླ་བསྟེན་པར་དཀའ༔ བཅུ་གསུམ་ལོ་ལ་བདག་གིས་བྱིན་གྱིས་བརླབས༔ རྟེན་འབྲེལ་འགྲིགས་ན་ཟབ་མོའི་གཏེར་ཁ་འབྱིན༔ ཀླ་ཀློ་ལྷ་མིན་གདུག་པའི་དམག་དཔུང་ཟློག༔ མཐའ་འཁོབ་མུན་པ་སེལ་བའི་སྒྲོན་མེ་བྱེད༔ ཅེས་སོགས་མ་ཧཱ་གུ་རུ་ཨོ་རྒྱན་རྡོ་རྗེ་འཆང་ཆེན་པོའི་ཞལ་ལུང་གིས་གཏེར་ཁ་དུ་མར་བསྔགས་པའི་མེ་ཏོག་འཐོར་བར་མཛད་ཅིང་། བསྟན་པ་ཡོངས་རྫོགས་ཀྱི་སྲོག་རྩ་གཅིག་པུར་གྱུར་པ། ངེས་པ་དོན་གྱི་རྡོ་རྗེ་འཆང་པདྨ་གར་དབང་འཆི་མེད་བསྟན་གཉིས་གཡུང་དྲུང་གླིང་པ་ཉིད་ལ། ལུང་བྱང་དེ་ཉིད་ལས། མངའ་བདག་ཡབ་སྲས་སྐྱེ་བས་གྲོགས་བྱས་ཏེ༔ བསྟན་འགྲོར་ཕན་པའི་བྱ་བ་རླབས་ཆེན་བསྒྲུབ༔ ཅེས་བསྔགས་པ་བཞིན། གཏེར་སྟོན་གྲུབ་ཐོབ་རྒྱ་མཚོའི་འཁོར་ལོས་སྒྱུར་བ། མངའ་བདག་དངོས་བྱོན་པདྨ་འོད་གསལ་མདོ་སྔགས་གླིང་པས་ལྔ་བདོའི་དུཿཁས་མནར་བའི་བོད་འབངས་བསྟན་འགྲོ་རྣམས་ལ་ཐུགས་བརྩེའི་འཇུག་པས་དྲངས་ཏེ། ཟབ་གཏེར་གྱི་རྟེན་འབྲེལ་སོར་ཆུད་པའི་སྒོ་
ཆེན་སྣང་བར་མཛད་པའི་མཐུས་དགུང་གྲངས་ང་བརྒྱད་དུ་ཕེབས་པ་ན། ཀུན་གཟིགས་བླ་མ་འོད་གསལ་སྤྲུལ་པའི་རྡོ་རྗེས་རྗེས་སུ་བསྩལ་པ་བཞིན་ཁ་བྱང་ཕྱག་ཏུ་ཕེབས་ཤིང་། ཡེ་ཤེས་ཀྱི་གཟིགས་ངོར། གུ་རུ་ཡབ་ཡུམ་གྱིས་གནང་བ་ཐོབ་ཅིང་། གཏེར་སྲུང་གིས་བསྐུལ་མའི་གསལ་སྣང་ཁྱད་པར་ཅན་གྱིས་མཚམས་སྦྱར་ཏེ། མདོ་ཁམས་སའི་ཐིག་ལེ། ལྷ་མདོ་འབུར་མོ་བདེ་ཆེན་པདྨ་བཀོད་མཛོད་ལྔ་འདུས་པའི་ཕོ་བྲང་ཆེན་པོ་ནས། ལས་ཅན་གྱི་འཁོར་སོགས་ཕུན་སུམ་ཚོགས་པའི་ཡན་ལག་ཐམས་ཅད་དང་ལྡན་པས་ཀུན་གྱིས་ཡིད་ཆེས་པར་སྤྱན་དྲངས་པ། འཕགས་པ་ཀུན་དགའ་བོའི་སྐུ་ཆོས། སློབ་དཔོན་ཧཱུྃ་ཀཱ་རའི་གསང་གོས་ལ་སོགས་པ་དང་ཆབས་ཅིག་བྱོན་པ། རྩ་གསུམ་དགོངས་པ་འདུས་པའི་ཤོག་སེར་རྩ་བ་དང་། ཨ་ཏ་རོང་གི་གཡས་ཕྱོགས་སྐུ་མཆོག་བདེ་ཆེན་ཕུག་དང་། ཕྲིན་ལས་འགྲོ་འདུལ་གནས་མཆོག་པདྨ་ལྷ་རྩེའི་དབུས་རིའི་རྗེ་བཙུན་གསང་ཕུག །རྨ་རོང་གྲུ་གུ་བཀྲ་ཤིས་གཏེར་རྫོང་། རྫོང་ཤོད་བདེ་གཤེགས་འདུས་པའི་ཕོ་བྲང་སོགས་ནས་རྩ་གསུམ་དགོངས་པ་འདུས་པའི་ཆོས་སྡེ་ཆེན་པོ་འདི་ཉིད་དང་འབྲེལ་བའི་སྤྱི་བྱེ་བྲག་གི་རྒྱབ་ཆོས་སྐོར་ཆ་ལག་དང་། སྐུ་གསུང་ཐུགས་ཀྱི་རྟེན་
སོགས་ངོ་མཚར་གྱི་དཔལ་དང་། བྱིན་རླབས་ཀྱི་གཟི་འོད་འབར་བ་རྣམས་སྤྱན་འདྲེན་པར་མཛད་ཅིང་། སླར་མཆོག་གི་རིག་འཛིན་ཀུན་མཁྱེན་རྡོ་རྗེ་གཟི་བརྗིད་རྩལ་དང་ཞལ་རྒྱས་པའི་སྒོ་ནས་ཤོག་སེར་ལས་གཏན་ལ་ཕབ་པའི་ཆོས་སྡེ་ཆེན་པོ་ལ། རྒྱུད་བཀའི་མཛོད། ལུང་གཏེར་གྱི་སོགས་དང་སྦྲེལ་བའི་དབང་དངོས། རིག་འཛིན་ཚེ་ཡི་དབང་བསྐུར་ལྟར་ཚེ་དབང་སྦྱར། རྗེས་བཅས་ཀྱི་སྒོ་ནས་བསྐུར་རོ།། ༈ །།གསང་ཐིག་སྙིང་པོའི་ཡབ་བཀའ་ཚེས་བཅུའི་བླ་སྒྲུབ་ཀྱི་དབང་བསྐུར་བཀླག་ཆོག་ཏུ་བཀོད་པ་སྨིན་བྱེད་བཅུད་ཀྱི་ཐིག་ལེ་ལྟར་དབང་སྒྲུབ། དེའང་དངོས་ཀྱི་ལོ་རྒྱུས་སྐབས། ཙ་འདྲ་རིན་ཆེན་བྲག་གི་ཞེས་པའི་འཕྲོས་སུ། མཚོ་རྒྱལ་གསང་ཕུག་ཏུ་ཟབ་མོའི་གཏེར་དུ་བསྩལ་པའི་ཕྲིན་ལས་ཀྱི་འཇུག་པ་དུས་སུ་སྨིན་པ་ན། མདོ་ཏིང་འཛིན་རྒྱལ་པོ་ལས། གང་གི་ལག་ན་ཏིང་འཛིན་མཆོག་ཡོད་པ། །རྒྱལ་བ་བྱམས་པ་གྲགས་པ་མཐའ་ཡས་བཞིན། །སེམས་ཅན་རྣམས་ཀྱི་དོན་མང་བྱེད་འགྱུར་བའི། །བློ་གྲོས་མཐའ་ཡས་དེ་ནི་ངས་ལུང་བསྟན། །ཅེས་རྒྱལ་བ་ཉི་མའི་གཉེན་གྱིས་དཔལ་གྱི་མགུལ་ནས་སྟོན་པའི་རྒྱལ་ཚབ་མ་ཕམ་མགོན་པོ་བཞིན། མཚོ་སྐྱེས་མ་ཧཱ་གུ་རུའི་རྒྱལ་ཚབ་ཆེན་པོར་བསྔགས་པ་ཉིད། ཀུན་མཁྱེན་བླ་མ་རྡོ་རྗེ་གཟི་བརྗིད་རྩལ་གྱི་ཞལ་སྔ་ནས། འཕགས་བོད་གཉིས་སུ་བློ་
གྲོས་མཚན་ཅན་གྱི་སློབ་དཔོན་མང་དུ་བྱུང་ཡང་། མཐའ་ཡས་དང་འབྲེལ་བ་ཅན་འདི་ནི་འཇམ་མགོན་ཆོས་ཀྱི་རྒྱལ་པོ་ཉིད་ཀྱི་མཚན་དོན་དང་ཤིན་ཏུ་འབྲེལ་བར་ཞལ་གྱིས་བཞེས་ཏེ། ཡང་ནས་ཡང་དུ་བསྔགས་པའི་མེ་ཏོག་འཐོར་བར་མཛད་པ་དང་། བླ་མའི་ཐུགས་སྒྲུབ་བར་ཆད་ཀུན་སེལ་གྱི་ཁྱད་པར་ཅན་གྱི་དྲྭ་ཕྱེད་མཛེས་པ་ལྟ་བུའི་ཆོས་སྡེ་ལས། བཻ་རོའི་སྐྱེ་མཐའ་གཡུང་དྲུང་མིང༔ བློ་གྲོས་མཐའ་ཡས་རྩལ་འཆང་བ༔ དེ་ཡིས་སྙིང་པོའི་བསྟན་པ་ལ༔ ཕན་པའི་བཙས་སུ་སྣང་བར་བྱེད༔ ཅེས་གསུངས་པ་ནི། སྤྲུལ་པའི་གཏེར་ཆེན་མཆོག་གྱུར་བདེ་ཆེན་གླིང་པས། རྡོ་རྗེ་འཆང་ཆེན་པོ་འདི་ཉིད་གཞོན་ནུའི་དུས་ཀྱི་མཚན་དང་། ཨོ་རྒྱན་བླ་མས་རང་གི་རྒྱལ་ཚབ་ཏུ་དབང་བསྐུར་པའི་མཚན་ཟུར་གྱི་སྒྲ་གཅིག་ཏུ་མཐུན་པར་གྲུབ་པར་དབུགས་དབྱུང་མཛད་པ་དང་། དུས་བབས་ཀྱི་རིག་འཛིན་ཀུན་གྲོལ་གསང་བ་རྩལ་གྱི་སྲིད་པ་བར་ཁུག་གི་ཁ་བྱང་ལས། ཁྱད་པར་འཕགས་པའི་སྐྱེས་བུ་ནི༔ དགེ་སློང་ཀུན་དགའི་སྤྲུལ་པ་སྟེ༔ བློ་གྲོས་རྒྱ་མཚོ་ལྟ་བུ་ཡི༔ ཤེས་བྱ་མཐའ་ཡས་ཅན་དུ་འབྱུང༔ འབུམ་ཕྲག་ལྔ་ཡི་འགྲོ་བ་འདྲེན༔ གང་མཇལ་ཐར་པའི་ལམ་ཕྱིན་འགྱུར༔ མཐའ་མི་དབུས་སུ་མི་ཉེ་བའི༔ བརྟུལ་ཞུགས་སྤྱོད་པ་རྒྱུན་དུ་སྐྱོང༔
སྐུ་ཚེ་མཐར་ཕྱིན་འགྲོ་དོན་མཛད༔ ཅེས་མཚན་དང་དོན་དུ་འབྲེལ་བའི་ལུང་གིས་ཚད་མར་གྲུབ་པ། སྙིགས་མའི་དུས་འདིར་བོད་འབངས་སྐྱོབ་པའི་མགོན་གཅིག །རྒྱལ་དབང་པདྨ་ཐོད་ཕྲེང་རྩལ་དང་། གསང་འཛིན་རྣམ་སྣང་ལོ་ཙཱ་བ་ཆེན་པོ་སྟོན་འཁོར་དགོངས་པ་མཉམ་ཉིད་ཆེན་པོའི་ཀློང་ལས། ཧེ་རུ་ཀཿདཔལ་མཆོག་ཟུང་གི་ཐུགས་རྗེའི་སྒྱུ་འཕྲུལ་དངོས་དང་ཞལ་མི་གཉིས་པའི་རྒྱལ་ཚབ་ཆེན་པོ། གངས་ཅན་འདི་ན་དུས་གསུམ་དུ་འབྱོན་པར་དཀའ་བའི་རྡོ་རྗེ་སློབ་དཔོན་ཆེན་པོ་པདྨ་གར་དབང་འཆི་མེད་བསྟན་གཉིས་གཡུང་དྲུང་གླིང་པ་ཕྲིན་ལས་འགྲོ་འདུལ་རྩལ་གྱིས་གནས་མཆོག་དེ་ཉིད་ནས། སྣང་བ་དང་མི་སྣང་བའི་སྐྱེ་རྒུ་ཐམས་ཅད་ཡིད་ཆེས་ཀྱི་དད་པ་ལ་འགོད་པའི་ཕྲིན་ལས་ཀྱིས་ཟབ་མོའི་གཏེར་རྒྱ་འགྲོལ་བར་མཛད་པ་ལས། བླ་མའི་དམ་རྫས་བྱིན་རླབས་སྤྲིན་ཕུང་། བྲམ་ཟེ་ཨཱརྻ་སིདྡྷིའི་སྐུ་ཤ །འཆི་མེད་རིག་འཛིན་བཅུ་གསུམ་གྱིས་བསྒྲུབས་པའི་ཚེ་རིལ་སོགས་དམ་རྫས་ཁྱད་པར་ཅན་དུ་མ་དང་ལྷན་ཅིག །གསང་ཐིག་བླ་མ་ཡབ་ཡུམ་གྱི་སྒྲུབ་ཐབས་ཤོག་སེར་མཚན་ལྡན་མཁའ་འགྲོ་རྣམ་ལྔའི་དར་ཤམ་གྱིས་དྲིལ་བ་སྤྱན་དྲངས་ཤིང་། གནས་དུས་ཁྱད་པར་ཅན་གྱི་རྟེན་འབྱུང་གི་སྒོ་ཕྱེས་ཏེ་གཏན་ལ་ཕབ་ཅིང་། ཀུན་མཁྱེན་བླ་མ་འཇམ་པའི་དབྱངས་དངོས་
མཁྱེན་བརྩེའི་དབང་པོ་ཀུན་དགའ་བསྟན་པའི་རྒྱལ་མཚན་དཔལ་བཟང་པོ་གཙོ་བོར་གྱུར་པའི་བཀའ་བབས་ཆོས་བདག་རྣམས་ལ་རིམ་པར་བཀའ་དྲིན་དུ་བསྩལ་པ་སྟེ། འདི་ཉིད་ཉམས་སུ་ལེན་པ་དང་སོགས་སྦྲེལ་བའི་དབང་དངོས་ཀྱི་དམ་ཚིག་ཁས་བླངས་རྗེས། དེ་རྣམས་ཀྱིས་རྒྱུད་སྨིན་བྱེད་ཀྱི་དབང་བསྐུར་བ་རྩ་བ་ཡན་ལག་བཅས་གྲུབ་ནས། ལམ་ཉམས་སུ་ལེན་པའི་ཐབས་གྲོལ་གྱི་གདམས་ཁྲིད་འབོགས་པ་སྟེ། དེའང་རྒྱལ་བའི་སྐུ་གཅིག་བསྒྲུབས་པས་ནམ་མཁའ་དང་མཉམ་པའི་དཀྱིལ་འཁོར་ཐམས་ཅད་དུས་གཅིག་ལ་ངེས་པར་འགྲུབ་ཅིང་། བར་ཆད་མེད་ལ་བདེ་མྱུར་གྱི་ཁྱད་པར་དང་ལྡན་པའི་མན་ངག །རྒྱལ་བ་ཀུན་འདུས་ཨོ་རྒྱན་བླ་མའི་ཐུགས་སྒྲུབ། གཏེར་བྱོན་བླ་མའི་སྒྲུབ་ཐབས་སྔ་ཕྱིར་བྱུང་བ་ཐམས་ཅད་ལས་སོགས་ཁྲིད་ཡིག་འདུས་གསལ་དུ་བཀོད་པ་རྣམ་གྲོལ་ཐིག་ལེ་ལྟར་གྲོལ་བྱེད་ཁྲིད་འཆད་དེ། མཇུག་གི །ཉམས་ལེན་རྒྱུད་ལ་འབྱོར་བ་བགྱིད་འཚལ་ལོ། །ཞེས་བཀའ་བསྩལ་པ་བཞིན། རང་བཞིན་ཚེ་འདི་པའི་སྣང་ཤས་ཀྱིས་རང་མི་བསླུ་བའི་ངེས་འབྱུང་གིས་བསྐུལ་ཏེ། ཐབས་མང་པོ་ལ་ཡིད་རྟོན་པའི་བློ་མང་གི་དབང་དུ་མི་གཏོང་བར། ཡིད་བཞིན་གྱི་ནོར་བུ་ལས་ལྷག་པའི་བཀའ་གསང་ཟབ་མོ་བརྒྱུད་ཐག་ཉེ་ཞིང་། བྱིན་རླབས་
ལག་མཐིལ་དུ་མངོན་སུམ་སྩོལ་བའི་ལམ་འདིར་ཞུགས་ནས་མི་ལུས་དོན་ལྡན་དུ་མཛད་འཚལ་ཞིང་། དེ་ལྟར་སྨིན་གྲོལ་གྱི་རིམ་པ་སྟན་ཐོག་གཅིག་ཏུ་རྫོགས་པར་ཐོབ་པའི་ཡོན་གཞལ་བའི་སླད་དུ་རང་ལུས་བྲན་དང་། ལོངས་སྤྱོད་བླ་མའི་ཉེར་སྤྱད་དུ་བློས་བླངས་ཏེ་ལྟོས་མེད་དུ་འབུལ་བའི་བློས་འདིའི་རྗེས་ཟློས། དེང་ནས་བརྩམ་སྟེ་སོགས་ལུས་དབུལ་ནས་དབང་དང་། ཆོ་གའི་རྗེས་བསྐྱང་ངོ་།། ༈ །།གསང་ཐིག་སྙིང་པོའི་ཡུམ་བཀའ་བདེ་ཆེན་རྒྱ་མཚོའི་དབང་གི་ལག་ལེན་གསལ་བར་བཀོད་པ་བྱིན་རླབས་རྒྱ་མཚོ་ལྟར་དབང་སྒྲུབ། དབང་གི་ལོ་རྒྱུས་སྐབས། དུས་སུ་སོན་པའི་ཚེ། ཞེས་པའི་འཕྲོས་སུ། འཕགས་པ་ལངྐར་གཤེགས་པ་ལས། འདྲེན་པ་བློ་གྲོས་ཞེས་བྱ་བ། །ཤེས་བྱ་ལྔ་རྣམས་སྟོན་པ་པོ། །དཔའ་བོ་ཆེན་པོ་འབྱུང་བར་འགྱུར། །ཞེས་རྡོ་རྗེའི་ལུང་གིས་གསལ་བར་བསྟན་པའི་དོན། ཤེས་བྱ་རིག་པའི་གནས་ལྔ་སོགས་ལ་བྱས་ན། འཕགས་བོད་མཁས་གྲུབ་ཀུན་གྱི་སྤྱི་ནོར་ཡིན་པས། ལུང་བསྟན་ཡུལ་གྱི་ཁྱད་ཆོས་སུ་མི་འགྱུར་ལ། མཛོད་ཆེན་ལྔ་པོ་སྔར་མ་བྱུང་བའི་ཁྱད་པར་ཅན་གྱི་ཕྱིར། རྡོ་རྗེ་སློབ་དཔོན་ཆེན་པོ་འདི་ཉིད་དུ་ངེས་པའི་དབུགས་དབྱུང་ཀུན་མཁྱེན་བླ་མ་བློ་གྲོས་རྒྱ་མཚོ་དྲི་མ་མེད་པའི་འོད་དམ། རང་བྱུང་པདྨ་འོད་གསལ་མདོ་སྔགས་གླིང་པའི་ཞལ་ལུང་དྲི་མ་མེད་པས་
བསྔགས་པའི་དྲིལ་ཆེན་བསྒྲགས་པར་མཛད་པ་ཚད་མས་གྲུབ་པ་དང་། ཡང་གཏེར་མཁའ་འགྲོ་གསང་བ་ཀུན་འདུས་ལས། ལོ་ཙཱ་ཆེན་པོའི་ཡེ་ཤེས་དང༔ གཉིས་མེད་གཉིས་སུ་སྣང་བའི་ཚུལ༔ སྔགས་ཀྱི་གདུང་མཐར་བྱང་ཆུབ་སེམས༔ བློ་གྲོས་མི་ཟད་གཏེར་ལ་གཏད༔ ཅེས་སོགས་ཨོ་རྒྱན་ཆེན་པོའི་རྡོ་རྗེའི་ལུང་གིས་མཐའ་གཅིག་ཏུ་མ་ཡིན་པར་ཡང་ནས་ཡང་དུ་བསྔགས་པར་མཛད་ལ། སྙིགས་མ་ལྔ་བདོ་བའི་བསྟན་འགྲོའི་གདུང་སེལ་ཡིད་བཞིན་ནོར་བུ་ལས་ཀྱང་ཆེས་རྨད་དུ་བྱུང་བའི་བཀའ་དྲིན་གྱི་བདག་ཉིད། པདྨ་གར་དབང་འཆི་མེད་བསྟན་གཉིས་གཡུང་དྲུང་གླིང་པ་ཕྲིན་ལས་འགྲོ་འདུལ་རྩལ་གྱིས་གནས་ཆེན་དེ་ཉིད་ནས་ཟབ་མོའི་གཏེར་ཞལ་སྐལ་ལྡན་དུ་མའི་བསོད་ནམས་ཀྱི་དཔྱིད་དུ་དབྱེ་བར་མཛད་པ། གསང་ཐིག་སྙིང་པོའི་སྐོར་ལས། ལས་དང་དངོས་གྲུབ་ཐམས་ཅད་ཀྱི་རྩ་བ། དབྱིངས་ཀྱི་ཡུམ་མཆོག་མཁའ་འགྲོ་རྒྱ་མཚོའི་རྒྱུད་ལུང་མན་ངག་མཐའ་ཡས་པ་རྣམས་ཀྱི་སྙིང་པོའི་བཅུད་གཅིག་ཏུ་དྲིལ་བ། བླ་སྒྲུབ་འོད་ཀྱི་ཐིག་ལེའི་ཡུམ་བཀའ་མཁའ་འགྲོ་བདེ་ཆེན་རྒྱ་མཚོའི་དཀྱིལ་འཁོར་དུ་བྱིན་རླབས་དབང་བསྐུར་ཟབ་མོ་སོགས་སྦྱར་བའི་དབང་བཞི་ཟབ་ཁྱད་ཅན་གྱི་དམ་ཚིག་བསྒྲག་གཟུང་རྗེས། དེས་སྨིན་བྱེད་དབང་བསྐུར་གྱི་
རིམ་པ་གྲུབ་པའི་གཏང་རག་དང་། སླར་ཡང་གྲོལ་ལམ་གདམས་པའི་ཟབ་ཁྲིད་ཞུ་བའི་ཡོན་དུ་མཎྜལ། དེའང་ལས་དང་དངོས་གྲུབ་ཐམས་ཅད་ཀྱི་རྩ་བ་སོགས་ཁྲིད་ཀྱི་ཡི་གེ་འདུས་གསལ་དུ་བཀོད་པ་ཟབ་དོན་རྒྱ་མཚོ་ལྟར་གྲོལ་བྱེད་ཀྱི་ཁྲིད་འཆད་དེ། མཇུག་གི །ལྷན་སྐྱེས་རྡོ་རྗེ་བཙུན་མོའི་གོ་འཕང་འགྲུབ་པར་འགྱུར་རོ། །ཞེས་བཀའ་བསྩལ་པ་བཞིན་བྱིན་རླབས་དང་མཐུ་རྩལ་མངོན་སུམ་དུ་འབྱིན་པའི་ཟབ་ཆོས། དམ་ཉམས་དང་འདྲེས་ཁྱེར་གྱི་སེལ་བསླད་མེད་པ་འདི་ཉིད་ལ་ཅི་ནས་ཀྱང་ཉམས་ལེན་རེ་མཛད་པར་ཞུ་ཞིང་། དེ་ལྟར་སྨིན་གྲོལ་གྱི་གདམས་པ་ཟབ་མོ་གདན་ཐོག་གཅིག་ཏུ་ལེགས་པར་ཐོབ་པའི་བཀའ་དྲིན་གཞལ་ཕྱིར། ལུས་དང་ལོངས་སྤྱོད་བཅས་པ་ལྟོས་མེད་དུ་འབུལ་བའི་བློས་འདིའི་རྗེས་ཟློས། དེང་ནས་བརྩམ་སྟེ་སོགས་ལུས་དབུལ་ཕྱིན་དབང་དང་། ཆོ་གའི་རྗེས་རིམ་མཐར་དབྱུང་ངོ་།། ༈ །།དག་སྣང་དགོངས་གཏེར་ཟུང་འཇུག་ཚིག་བདུན་སྒྲུབ་ཐབས་ཟབ་མོའི་སྨིན་གྲོལ་ལག་ལེན་མཚམས་སྦྱོར་གྱིས་བརྒྱན་པ་པདྨའི་ལྡིང་ཁང་ལྟར་དབང་རྣམས་མཐར་ཆགས་སུ་བསྐུར་བའི་སྐབས། ཐོག་མར་བླ་མ་ཆོས་སྐུ་ལ་མཚོན་ན། དབང་སྒྲུབ་ལ་ཚིག་བདུན་དང་། སྐུ་གསུམ་གསོལ་འདེབས། འཇམ་མགོན་རྡོ་རྗེ་འཆང་རྣམ་གཉིས་ཀྱི་གསོལ་འདེབས་རྒྱས་བསྡུས་གང་མོས་དང་། གསར་བྲིས་བརྒྱུད་འདེབས་དངོས་གྲུབ་འདོད་འཇོའི་མཐར། བསང་ཆུ་བསྒྲུབ།
དཀར་གཏོར་གསེར་སྐྱེམས་འབུལ་མིན་སྐབས་དང་བསྟུན། བླ་མ་རིག་འཛིན་རྩ་གསུམ་སྒྱུ་འཕྲུལ་དྲྭ་བ་ཆེན་པོའི་ལྷ་ཚོགས་མདུན་གྱི་ནམ་མཁར་བཛྲ་ས་མཱ་ཛཿས་ཚོགས་ཞིང་གསལ་བཏབ་ལ། ཕྲིན་ལས་པདྨའི་སྡོང་པོ་ལྟར། ན་མོ༔ རིགས་ཀུན་ཁྱབ་བདག་སོགས་སྐྱབས་འགྲོ། སེམས་བསྐྱེད། ཡན་ལག་བདུན་པ། མཎྜལ་རྣམས་སོ་སོར་ལན་གསུམ་རེའི་མཐར། ཛཿཧཱུྃ་བཾ་ཧོཿ ཚོགས་ཞིང་རྣམས་རང་ལ་ཐིམ་པར་གྱུར། ཅེས་ཚོགས་ཞིང་བསྡུ། མཚམས་ལྷའི་ང་རྒྱལ་གཟུང་བ་ནི། རང་ཉིད་སྐད་ཅིག་གིས་རྟ་མཆོག་ཧེ་རུ་ཀཿརང་སྣང་གི་ཡུམ་དང་བཅས་པའི་སྐུར་གྱུར། བགེགས་གཏོར་བྲན་ལ། རཾ་ཡཾ་ཁཾ། སྟོང་པའི་ངང་ལས་རང་རང་གི་ཡིད་དང་མཐུན་པའི་སྣོད་རྣམས་སུ་ཁཾ་ལས་གཏོར་མ་འདོད་པའི་ཡོན་ཏན་ལྔ་དང་ལྡན་པ་སོ་སོའི་སྤྱོད་ཡུལ་བཞིན་དུ་འཆར་བར་གྱུར། ཨོཾ་ཨཱཿཧཱུྃ་ཧོཿ ལན་གསུམ་རྒྱ་དང་བཅས་པས་བྱིན་བརླབ། སརྦ་བྷཱུ་ཏ་ཨཱ་ཀརྵཱ་ཡ་ཛཿ ཞེས་མགྲོན་བཀུག །སརྦ་བིགྷྣཱན་ན་མཿསརྦ་ཏ་ཐཱ་ག་ཏ་བྷྱོ་སོགས་ནས། ཁཾ་གྲྀཧྣེ་དཾ་བ་ལྱཱ་དི་སྭཱ་ཧཱ། ཞེས་ནམ་མཁའ་མཛོད་ཀྱི་སྔགས་རྒྱ་ལན་གསུམ་གྱིས་བསྔོས་ལ། ཧཱུྃ༔ གདོད་ནས་འགྱུར་མེད་སོགས་བཀའ་བསྒོའི་མཐར་གཏོར་མ་ཕྱིར་དོར་ཞིང་། ཧཱུྃ་བཞིའི་དྲག་སྔགས་དང་། གུལ་ཡུངས་རོལ་མོའི་ཚམ་རྔམ་དང་བཅས་པས་བགེགས་བསྐྲད། སྲུང་འཁོར། བྱིན་འབེབ་ཚིགས་བཅད་རྗེས། བླ་མ་ཆོས་སྐུའི་སྔགས་ལ་ཤམ་བུ་བཏགས་པ་དང་། མཆོད་རླབས། ཏིང་འཛིན་གསུམ་གྱིས་ཁོག་ཕུབ་རྗེས། འདིར་ཆོས་
སྐུ་ལ། སྒྲུབ་ཐབས་པདྨ་རྒྱས་པ་ལས། དག་གསལ་ཆོས་དབྱིངས་སོགས་ནས། ཆེན་པོར་བཞུགས༔ བར་གྱིས་བདག་མདུན་དབྱེར་མེད་སྣང་སྲིད་གཞིར་བཞེངས་ཀྱི་དཀྱིལ་འཁོར་གསལ་གདབ། ཕྲིན་ལས་པདྨའི་སྡོང་པོ་བཞིན། ཡེ་ཤེས་རང་གསལ་སོགས་ཀྱིས་གནས་གསུམ་བརླབ་ཅིང་དབང་བསྐུར་རྒྱས་གདབ་བྱ། འདོན་ཐབས་པདྨ་དྲྭ་བ་ལྟར་སྤོས་རོལ་དབྱངས་བཅས་ཚིག་བདུན་ཤམ་ཅན་གྱི་སྤྱན་འདྲེན་གྱེར་མཐར། རྩ་སྔགས་གང་ཡིན་ཤམ་དུ། ཕྲིན་ལས་པདྨའི་སྡོང་པོའི་ཤམ་བུ་བཏགས་པ་བརྗོད། བསྟིམ་ཞིང་། བཞུགས་ཕྱག་མཆོད་བསྟོད་བྱ། འདིར་བསྙེན་པ་དང་བདག་བསྐྱེད་རྐྱང་པའི་སྐབས་ཛཔ྄་ཁང་ཕྱེ་མི་དགོས་ཀྱང་། དབང་དང་བདག་འཇུག་སོགས་མདུན་བསྐྱེད་གཙོར་འདོན་སྐབས། བྷྲཱུྃ་བི་ཤྭ་བི་ཤུདྡྷེ་དང་། སོ་སོའི་སྙིང་པོའི་ཤམ་དུ་ཕཊ་ཛཿབཏགས་པས། ཡེ་ཤེས་ཀྱི་འཁོར་ལོ་རྟེན་དང་བརྟེན་པར་བཅས་པ་མདུན་དཀྱིལ་གྱི་གོ་སར་ཕྱེས་ཏེ་དབྱེར་མེད་དུ་བཞུགས་པར་མོས། གང་ལྟར་ཡང་། ཕྲིན་ལས་ཀྱི། ཧཱུྃ་ཧྲཱི༔ ཡེ་ཤེས་འཁོར་ལོ་སོགས་ཤྭ་ལོ་ཀས་ཛཔ྄་ལ་བསྐུལ་ནས། དམིགས་པ་གསལ་བཏབ་ལ། ཆོས་སྐུའི་བཟླས་པ་འདོན་ཐབས་དང་། སྒྲུབ་ཐབས་ཟུང་ནས་འབྱུང་བ་ཅི་ནུས་བཟླ། སྨིན་གྲོལ་གྱི་མཚམས་སྦྱོར་ལག་ལེན་ལྟར་རྣམ་བུམ་བསྐྱེད་བཟླས་འོད་ཞུ་བཅས་བྱ། མཐར་དབྱངས་གསལ་རྟེན་སྙིང་གིས་སྔགས་ཀྱི་ལྷག་ཆད་ཁ་བསྐང་ཞིང་
ནུས་པ་བརྟན། ཧཱུྃ། ཡེ་ཤེས་ལྷ་ཚོགས་སྤྱན་འདྲེན་གཤེགས། །ཕྱི་ནང་གསང་བའི་མཆོད་པ་འབུལ། །སྐུ་གསུང་ཐུགས་ཡོན་ཕྲིན་ལས་བསྟོད། །བག་མེད་འགལ་འཁྲུལ་ཉམས་ཆག་བཤགས། །མ་ཧཱ་ཨ་མྲྀཏ་རཀྟ་བ་ལིཾ་ཏ་ཁཱ་ཧི། ཞེས་སྟོང་ཚིགས་འབུལ། ཡིག་བརྒྱས་ནོངས་པ་བཤགས། མདུན་བསྐྱེད་གཙོ་བོར་བྱེད་སྐབས་འདིར་དབང་བླང་བར་འདོད་ན། ཐལ་མོ་སྦྱར་ཞིང་དད་མོས་རྩེ་གཅིག་པས། སྐུ་བཞིའི་དབང་ཕྱུག་རྒྱལ་བ་རྡོ་རྗེ་འཆང་། །བདག་སོགས་འགྲོ་ལ་ཐུགས་རྗེས་ཉེར་དགོངས་ནས། །བུམ་གསང་ཤེས་རབ་ཡེ་ཤེས་དེ་ཁོ་ནའི། །ཡེ་ཤེས་མཆོག་གིས་བདག་རྒྱུད་གཏམས་པར་མཛོད། །ཅེས་གསོལ་བ་བཏབ་པས། ཚོགས་རྟེན་དཀྱིལ་འཁོར་གྱི་གཙོ་བོའི་སྤྱི་བོའི་ཨོཾ་ལས་འོད་ཟེར་དཀར་པོ་འཕྲོས། རང་གི་སྤྱི་བོར་ཐིམ་པས་བུམ་པའི་དབང་ཐོབ། ལུས་ཀྱི་དྲི་མ་སྦྱངས། ལམ་བསྐྱེད་རིམ་སྒོམ་པ་ལ་དབང་། འབྲས་བུ་སྤྲུལ་སྐུ་ཐོབ་པའི་སྐལ་པ་ཅན་དུ་བྱས། མགྲིན་པའི་ཨཱཿལས་འོད་ཟེར་དམར་པོ་འཕྲོས། རང་གི་མགྲིན་པར་ཐིམ་པས་གསང་བའི་དབང་ཐོབ། ངག་གི་དྲི་མ་སྦྱངས། ལམ་རྩ་རླུང་སྒོམ་པ་ལ་དབང་། འབྲས་བུ་ལོངས་སྐུ་ཐོབ་པའི་སྐལ་པ་ཅན་དུ་བྱས། ཐུགས་ཀའི་ཧཱུྃ་ལས་འོད་ཟེར་སྔོན་པོ་འཕྲོས།
རང་གི་སྙིང་གར་ཐིམ་པས་ཤེས་རབ་ཡེ་ཤེས་ཀྱི་དབང་ཐོབ། ཡིད་ཀྱི་དྲི་མ་སྦྱངས། ལམ་ཐིག་ལེ་སྒོམ་པ་ལ་དབང་། འབྲས་བུ་ཆོས་སྐུ་ཐོབ་པའི་སྐལ་པ་ཅན་དུ་བྱས། སླར་ཡང་གནས་གསུམ་ལས་འོད་ཟེར་དཀར་དམར་མཐིང་གསུམ་འཕྲོས། རང་གི་གནས་གསུམ་དུ་ཐིམ་པས་དབང་བཞི་པ་ཐོབ། ཡེ་ཤེས་ཀྱི་དྲི་མ་སྦྱངས། ལམ་རྫོགས་པ་ཆེན་པོ་སྒོམ་པ་ལ་དབང་། འབྲས་བུ་ངོ་བོ་ཉིད་སྐུ་ཐོབ་པའི་སྐལ་པ་ཅན་དུ་བྱས་སོ། །ཞེས་དང་། རིགས་འདུས་རྡོ་རྗེ་གསུམ་གྱི་དཀྱིལ་འཁོར་ནས༔ ལྔ་ལྡན་འོད་འཕྲོས་བདག་གི་སྒོ་གསུམ་ཐིམ༔ སྒྲིབ་ཀུན་དག་ནས་སྐུ་གསུམ་རྒྱུད་ལ་བཞག༔ མཆོག་ཐུན་དངོས་གྲུབ་མ་ལུས་ཐོབ་པར་གྱུར༔ ཅེས་དབང་དུས་སུ་སྐྱེས་པའི་ཡེ་ཤེས་སྐུ་གསུམ་གྱི་རྗེས་སུ་འཇུག་པ་མཆོག་ཏུ་མི་འགྱུར་བའི་བདེ་བ་ཆེན་པོ་དེ་ཁོ་ན་ཉིད་ཀྱི་ངང་ལ་མཉམ་པར་བཞག་གོ །ནུས་ན་དམ་ཅན་སྤྱི་གཏོར་གྱི་བྱིན་རླབས་ནས། བསྟོད་པའི་མཇུག་ཏུ་རིག་འཛིན་དགའ་སྟོན་དང་། སྒེར་སྲུང་བདེ་ཆེན་རྒྱལ་མོའི་གསོལ་མཆོད་སྦྱར་ནས། གཏེར་གཞིའི་མཐའ་བར་གཏང་། དེ་ཙམ་མི་ནུས་ན། བདེ་ཆེན་རྒྱལ་མོའི་གསོལ་མཆོད་ཙམ་བྱ། བཤགས་སྐོང་སྦྱར་ན། གསང་ཐིག་བླ་མ་དང་མཁའ་འགྲོའི་ཚོགས་མཆོད་སྐབས་ཀྱི་བཤགས་སྐོང་ཉེར་མཁོ་གྲུབ་ཐོབ་ཐུགས་ཐིག་ལས་ཁོལ་ཕྱུང་ལྟར་མཆོད་རྫས་རྣམས་བརླབ་ཅིང་ཚོགས་རྟེན་དྲངས་ལ། ཕྱག་མཆོད་བཤགས་པ་སྤྱི་དང་།
བྱེ་བྲག་ལུས་ངག་ཡིད་གསུམ་གྱི་བཤགས་པ། ཐུན་མོང་ཉེར་སྤྱོད། ཁྱད་པར་སྨན་རཀ་གཏོར་མ། མཆོག་ཏུ་མར་མེ་རྣམས་ཀྱི་སྐོང་བཤགས་སྦྱར། གང་ལྟར་ནའང་ཕྲིན་ལས་ཀྱི་ཚོགས་བྱིན་རླབས་ནས། བར་པ་བཤགས་པའི་མཐར་ཡིག་བརྒྱ་བཟླ། ཚོགས་ཐ་མ་ལ་དམིགས་ཏེ། ན་མོ། དཀོན་མཆོག་གསུམ་ལ་ཕྱག་འཚལ་ལོ། དཀོན་མཆོག་གསུམ་གྱི་བཀའ་བདེན་པ་དང་། ཆོས་ཉིད་རྣམ་པར་དག་པའི་བདེན་པ་དང་། ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། རིག་འཛིན་སྒྱུ་འཕྲུལ་རྣམ་པར་རོལ་པའི་ལྷ་ཚོགས་རྣམས་ཀྱི་བདེན་པ་དང་། སྤྲུལ་པ་ཡང་སྤྲུལ་ཕྱག་བརྙན་དང་བཅས་པ་རྣམས་ཀྱི་བདེན་པ་དང་། བདེན་པ་ཆེན་པོའི་མཐུས་མ་རུངས་པའི་སེམས་ཅན་བསྒྲལ་བའི་ཞིང་དུ་གྱུར་པ་ཐམས་ཅད་མཚན་མ་རྫས་ཀྱི་རྟེན་འདི་ལ་མཆིས་པར་གྱུར་ཅིག །ནྲྀ་ཏྲི་བཛྲ་ཨཾ་ཀུ་ཤ་ཛཿ ཛཿཧཱུྃ་བཾ་ཧོཿ ལས་ཕུར་ཐོགས་ལ། ཧཱུྃ༔ སྣང་སྲིད་ཁྲོ་བོའི་སོགས་ཀྱིས་བསྒྲལ་བསྟབ་བྱ། སྐབས་འདིར་སྐོང་བཤགས་ནི། ཨོཾ་ཨཱཿཧཱུྃ༔ བླ་མེད་གསང་བ་མཆོག་གི་དཀྱིལ་འཁོར་དུ༔ རིག་འཛིན་རྩ་གསུམ་ལྷ་ཚོགས་དགྱེས་པའི་རྫས༔ བདེ་བའི་ཡེ་ཤེས་རྣམ་པ་ཐམས་ཅད་པ༔ སྐོང་རྫས་ནམ་མཁའ་མཛོད་ཀྱི་གཏེར་དུ་གྱུར༔ ནམ་མཁའ་མཛོད་ཀྱི་སྔགས་རྒྱ་དང་། བཛྲ་སྥ་ར་ཎ་ཁཾ༔གིས་བྱིན་བརླབ།
དབྱངས་རོལ་བཅས། སྤྲོ་ན། རྩ་གསུམ་དགོངས་འདུས་ཀྱི་རིག་འཛིན་མཆོག་སྒྲུབ་ནས་འབྱུང་བ་འོག་ཏུ་ཉེར་མཁོའི་ངག་འདོན་སྐབས་སུ་མདོར་བསྡུས་ཁོལ་དུ་ཕྱུང་པ་ལྟར། ཧཱུྃ་ཧྲཱི༔ རང་བྱུང་གསང་མཆོག་སོགས་སྤྱི་སྐོང་བཤགས་པ་བཅས་བཏང་བའི་མཐར། བཤགས་སྐོང་ཉེར་མཁོའི་སྐོང་བཤགས་ནི་དེ་ཉིད་སྦྲེལ་མིན་སྐབས་དང་བསྟུན། འབྲིང་པོར་ཉེར་མཁོའི་ནང་གི་སྐོང་བཤགས་ཙམ་བྱ། ཤིན་ཏུ་བསྡུ་ན། སྐོང་རྫས་ནམ་མཁའ་མཛོད་ཀྱི་སྔགས་རྒྱས་བརླབ་སྟེ། རྩ་གསུམ་དགོངས་འདུས་ཀྱི་རྒྱུན་གྱི་ཕྲིན་ལས་ནས་འབྱུང་བའི་བསྐང་བསྡུས་ལྟ་བུའི་སྐོང་བཤགས་མདོར་བསྡུས་སྦྱར། ལས་བུམ་དུ་འཁྱིལ་པ་བསྐྱེད་བཟླས་བྱ། སྨིན་གྲོལ་ལག་ལེན་པདྨའི་ལྡིང་ཁང་ལྟར་བདག་ཉིད་འཇུག་ཅིང་དབང་བླང་བ་རྒྱས་བསྡུས་སྐབས་དང་བསྟུན། གནང་བ་ནོད། མདོར་བསྡུས་ཏིང་ངེ་འཛིན་གྱིས་དབང་ལེན་སྐབས་གོང་དུ་ལས་བུམ་བསྒྲུབ་པ་མ་སོང་ན་འདིར་བྱ། དངོས་གཞི་སྨིན་གྲོལ་མཐར་ཆགས་སུ་བསྐུར་གྲུབ་རྗེས། ལས་རྡོར་གྱིས་རྡོ་རྗེ་རྒྱལ་པོ་ལ་ཕྱག་བྱ། ཐབས་ཤེས་ཀྱི་རྫས་རྣམས་སྣོད་སོ་སོར་ཐོགས་པ་ལག་གཉིས་ཕན་ཚུན་བསྣོལ་བཞིན་པར་སྟོབ་ཅིང་། ཧོ༔ ཆོས་དབྱིངས་བྷཉྫར་སྣང་སྲིད་བདུད་རྩིར་བསྐྱིལ༔ རྡོ་རྗེའི་བཅུད་ལྡན་མི་ཟད་ལོངས་སྤྱོད་དང༔ ཛ་གད་གར་མཆོད་སྒེག་མཛེས་རྫས་མཆོག་འབུལ༔ ལྷུན་གྲུབ་བདེ་ཆེན་ཀློང་རོལ་དཔའ་བོ་ཆེ༔ ཞེས་བརྗོད་ཅིང་དྲངས། སློབ་དཔོན་གྱིས་པདྨའི་བསྐོར་བ་སྔོན་དུ་འགྲོ་བས་རྩེ་གསུམ་གྱི་ཕྱག་རྒྱ་དང་
བཅས་པས། ཨེ་མ་ཧོ༔ འདོད་ཡོན་མ་སྤང་ཟག་བྲལ་ཐབས་ཤེས་རྫས༔ ཡིད་བཞིན་གཏེར་མཛོད་གུ་ཧྱའི་ལོངས་སྤྱོད་རྣམས༔ བདག་ལུས་འཛིན་བྲལ་རྒྱལ་བའི་དཀྱིལ་འཁོར་འདིར༔ བདེ་ཆེན་རོ་གཅིག་ངང་དུ་བླངས་ཏེ་རོལ༔ ཞེས་པས་ལེན། ཕྲིན་ལས་ཀྱི། ཧོ༔ རང་ལུས་བླ་མ་སོགས་ཀྱིས་ལུས་དཀྱིལ་གྱི་ལྷ་ཚོགས་རྣམས་ཡང་དག་པར་ཚིམས་པར་བསམ་ཞིང་། བཟའ་བ་འཁོར་ལོའི་གཙོ་མོས་དང་། བཏུང་བ་གཙོ་བོས་ཐོག་མར་ལོངས་སྤྱད། ཨ་ཧོ༔ ཐམས་ཅད་བདག་ཉིད་སོགས་ཀྱིས་ནང་ཚོགས་རྡོ་རྗེའི་གླུ་བླངས། བཤགས་སྐོང་སྦྲེལ་སྐབས་དེའི་གླུ་ཡང་སྦྲེལ། ཧྲཱི༔ དོན་དམ་ཆོས་ཀུན་སོགས་གསང་ཚོགས་སྐབས་དང་བསྟུན། ལྷག་མའི་སྟེང་གཙང་ལྷག་བསྲེས་པར་བྱིན་གྱིས་བརླབས་པའི་བདུད་རྩིས་བྲན་ལ། ལྷག་མའི་དམ་ཚིག་འདོད་ཡོན་གྱི་ཕུང་པོ་ཟད་མི་ཤེས་པས་ནམ་མཁའ་གང་བར་གྱུར། ཨོཾ་ཨཱཿཧཱུྃ་ཧོ༔ས་བརླབ། ལྷག་སྡུད་ཀྱི་ཕོ་ཉ་རྣམས་ཨེ་ཨཱ་རལླི་སོགས་ཀྱིས་དྲངས་ནས། བྷྱོ༔ དམ་ཚིག་རྗེས་གཅོད་སོགས་རོལ་མོ་དང་བཅས་པས་ལྷག་གཏོར་ཕྱིར་དོར། བཤགས་སྐོང་ཉེར་མཁོ་སྦྲེལ་སྐབས་སྨོན་ལམ་མཐར་ཕྲིན་ལས་ཀྱི་ཚོགས་སྨོན་ཡང་སྦྱར། ཉེར་མཁོའི་བཀྲ་ཤིས་བརྗོད། དེ་མིན་ཕྲིན་ལས་ཀྱི་སྨོན་ལམ་གདབ། དམ་སྤྱིའི་གཏོར་འགུགས་ནས་ཕྲིན་ལས་བཅོལ། ཕྲིན་ལས་ཀྱི་བསྐུལ་དང་ཆད་བརྟན་གྱེར་མཐར། གཏོར་གཞོང་སྦུབས་ལ། ཨེ་ནྲྀ་ཏྲི་སརྦ་ཤ་ཏྲཱུཾ་བིགྷྣཱན་ཛཿཧཱུྃ་བཾ་ཧོཿ ཞེས་འགུགས་
གཞུག་བཅིངས་མནན་བྱས་ལ་རྡོ་རྗེའི་རྒྱས་བཏབ་སྟེ། ཧཱུྃ༔ རྣམ་ཐར་གསུམ་གྱི་སོགས་ཀྱིས་རྟ་བྲོ་བརྡུང་། སྲུང་མའི་རྗེས་དམ་སྤྱིའི་མཆོད་བསྟོད་ཕྱིན་མཐར་དབྱུང་། གཏང་རག་འབུལ་བ་ནི། གོང་གི་ཕྲིན་ལས་ཀྱི། ཨོཾ༔ མཆོད་པའི་ཕྱག་རྒྱ་སོགས་ཚིགས་བཅད་སྔགས་དང་བཅས་པས་མཆོད། ཧཱུྃ་ཧྲཱི༔ སྐྱེ་འགག་འགྱུར་མེད་ཆོས་ཀྱི་སྐུ༔ རང་བྱུང་ཐུགས་རྗེ་ལོངས་སྤྱོད་རྫོགས༔ དངོས་གྲུབ་ཆར་འབེབ་ཅིར་ཡང་སྤྲུལ༔ གུ་རུའི་སྐུ་གསུང་ཐུགས་ལ་བསྟོད། །ཅེས་པས་བསྟོད། ཛཔ྄་བསྙེན་གཤམ་དུ་འབྱུང་བའི་དབང་དང་དངོས་གྲུབ་བླང་བ་ནི། ཨོཾ༔ སྐུ་གསུང་ཐུགས་ཀྱི་སོགས་དང་། རྩ་སྔགས་མཐར། ཀཱ་ཡ་སོགས་བཏགས་པས་སྐུ་བརྙན་སོགས་སྒྲུབ་རྫས་ཡོད་ན་ལྷར་གསལ་བ་གནས་གསུམ་དུ་གཏུག །དངོས་གྲུབ་ཀྱི་རྫས་ལ་ལོངས་སྤྱད། དཀྱུས་ཙམ་ལ་བདུད་རྩི་བཀྱེ། ནོངས་བཤགས་ནི། ཧོ༔ བླ་མ་རིག་འཛིན་དཀྱིལ་འཁོར་དུ༔ ཏིང་འཛིན་མ་གསལ་བཟླས་བརྗོད་གཡེལ༔ ལྷག་ཆད་འགལ་འཁྲུལ་ཉམས་ཆག་ཀུན༔ སྙིང་ནས་བཤགས་སོ་ཚངས་པ་སྩོལ༔ ཅེས་དང་ཡིག་བརྒྱ་བརྗོད། རྟེན་ཡོད་ན། ཨོཾ། འདིར་ནི་གཟུགས་དང་སོགས་ཀྱིས་བརྟན་བཞུགས་བྱ། རྟེན་མེད་ན་ཡེ་ཤེས་ཀྱི་འཁོར་ལོ་གདོད་མའི་དབྱིངས་སུ་བསྲེ། དམ་ཚིག་པ་བདག་ཉིད་ལ་བསྟིམ། སྣོད་བཅུད་དཀྱིལ་འཁོར་སོགས་བསྡུ་ལྡང་། བསྔོ་སྨོན་བཀྲ་ཤིས་རྣམས་དང་། རྣམ་པར་
སྣང་མཛད་ཆོས་ཀྱི་འཁོར་ལོའི་རྒྱལ། །གཞན་རྣམས་ཀྱང་གཞི་བཤད་མ་ཐག་པ་ལྟར་ལ། བྱིན་འབེབ་གཤམ་དུ་སོ་སོའི་རྩ་སྔགས་གང་ཡིན་དང་། ཏིང་འཛིན་རྣམ་གསུམ་རྗེས། སྒྲུབ་ཐབས་པདྨ་རྒྱས་པ་ལྟར་སོ་སོའི་མངོན་རྟོགས་སྦྱར་མཐར། ཕྲིན་ལས་ཀྱི་གནས་གསུམ་བྱིན་རླབས་དབང་བསྐུར་རྒྱས་གདབ་རྗེས། འདོན་ཐབས་པདྨ་དྲྭ་བ་ནས་འབྱུང་བའི་ཚིག་བདུན་ཤམ་བུ་སྐབས་ཐོབ་ཅན་གྱི་སྤྱན་འདྲེན་དང་། ཛཔ྄་ཁང་དབྱེ་བར་རྩ་སྔགས་དང་། དངོས་གྲུབ་ལེན་ཆོག་ཚིགས་བཅད་མཚམས་སོ་སོའི་རྩ་སྔགས་ལ་ཤམ་བུ་སྦྲེལ་བ་དང་། སྨིན་གྲོལ་ལག་ལེན་དུ་བཤད་པ་བཞིན་དབང་ཡོངས་རྫོགས་དགོས་པ་དང་མི་དགོས་པའི་ཁྱད་པར་ཕྱེས་ཏེ། སྐབས་ཐོབ་ཀྱི་ལྷ་སྔགས་བསྒྱུར་བ་ཙམ་ལས། བླ་མ་ལོངས་སྐུ་ནས། འོད་མི་འགྱུར་བའི་བར་གུ་རུ་ཞི་དྲག་སོ་བདུན་དང་། དྲིལ་སྒྲུབ་རྣམས་ལ་རིགས་འགྲེ་ཤེས་པར་བྱས་ཏེ། རེ་རེ་བཞིན་སྦྱོར་དངོས་རྗེས་ཚང་རིམ་པར་ཞིབ་མོར་གཙང་དག་ཏུ་བྱ་བ་གལ་ཆེ། འགྲོ་འདུལ་གུ་རུ་དྲུག་གི་དབུ་ཞྭ་ལ། པད་ཞྭ་རིན་ཆེན་སྤྱི་བླུག་ཅེས་པ་འདབ་ལྡན་རིགས་ལྔའི་ཞྭ། ནམ་མཁའ་ཁྱུང་ལྡིང་ཞེས་པ་འདབ་གསུམ་པ་ནག་པོ། པད་ཞུ་སྣང་སྲིད་ཟིལ་གནོན་ཞེས་པ་པདྨ་མཐོང་གྲོལ་དམར་པོ། པཎ་ཞུ་ཡེ་ཤེས་རང་གསལ་ཞེས་པ་འདབ་བཞི་རྣ་བ་སྔོན་པོ། སྤྱོད་ཞུ་པདྨ་མཐོང་གྲོལ་ཞེས་པ་རྡོར་ཐག་གོང་ཞུ་དམར་སེར་རམ་རིག་འཛིན་སྤྱི་ཞྭ་གང་བདེ། མཆོག་ཞུ་རྡོ་རྗེ་རྩེ་མོ་ཞེས་པ་སྨིན་གླིང་གོང་ཞུ་དམར་སྨུག་རྡོ་རྗེའི་
ཏོག་ཅན་བཅས་སོ།། ༈ །།དེའི་ཡུམ་བཀའ་མཁའ་འགྲོ་འདུས་པའི་དབང་བསྐུར་མཚམས་སྦྱོར་གྱིས་བརྒྱན་པ་བདེ་ཆེན་གྲུབ་པའི་ཟིལ་མངར་ལྟར་དབང་སྒྲུབ་སྐབས། ཐོག་མར་ཚིག་བདུན་དང་། སྐུ་གསུམ་གསོལ་འདེབས། འཇམ་མགོན་རྡོ་རྗེ་འཆང་རྣམ་གཉིས་ཀྱི་གསོལ་འདེབས་རྒྱས་བསྡུས་གང་མོས་དང་། གསར་བྲིས་བརྒྱུད་འདེབས་དངོས་གྲུབ་འདོད་འཇོའི་མཐར། གསང་ཐིག་ཡུམ་བཀའི་མེ་མཆོད་སྒྲིབ་གཉིས་འཇོམས་བྱེད་ཡེ་ཤེས་འོད་དཀྱིལ་དུ་བསྟན་པའི་ལས་ཀྱི་མཁའ་འགྲོའི་བསང་ཆུ་བསྒྲུབ། དཀར་གཏོར་གསེར་སྐྱེམས་འབུལ་དགོས་མིན་སྐབས་དང་བསྟུན། རང་གི་སྙིང་ག་ནས་འཕྲོས་པའི་འོད་ཟེར་གྱིས་ཡེ་ཤེས་མཁའ་འགྲོའི་དཀྱིལ་འཁོར་ལ་རྩ་གསུམ་རྒྱལ་བ་རབ་འབྱམས་ཀྱིས་བསྐོར་བ་མཁའ་ཁྱབ་ཀྱི་འཁོར་ལོར་སད་པར་གྱུར་པར་མོས་ལ། མཁའ་འགྲོ་འདུས་པའི་ཕྲིན་ལས་ཀྱི། ན་མོ༔ ཀུན་བཟང་རྡོ་རྗེ་སོགས་སྐྱབས་འགྲོ། སེམས་བསྐྱེད། ཚོགས་གསག་བཅས་སོ་སོར་ལན་གསུམ་རེའི་མཐར། ཚོགས་ཞིང་འོད་གསལ་གྱི་ངང་དུ་ཐིམ་པར་གྱུར། ཅེས་ཚོགས་ཞིང་བསྡུ། མཚམས་ལྷའི་ང་རྒྱལ་གཟུང་བ་ནི། ཨོཾ་ཀྲོ་དྷཱི་ཤྭ་རཱི་ཧཱུྃ་ཕཊ་ཀྱིས། རང་རྡོ་རྗེ་ཁྲོས་མའི་སྐུ་རུ་གསལ་བར་གྱུར། བགེགས་གཏོར་རཾ་ཡཾ་ཁཾ་གིས་བསང་སྦྱང་། སྟོང་པའི་ངང་ལས་རང་རང་གི་ཡིད་དང་མཐུན་པའི་སྣོད་རྣམས་སུ་ཁཾ་ལས་གཏོར་མ་འདོད་པའི་ཡོན་ཏན་ལྔ་དང་ལྡན་པ་སོ་
སོའི་སྤྱོད་ཡུལ་བཞིན་དུ་འཆར་བར་གྱུར། ཨོཾ་ཨཱཿཧཱུྃ་ཧོཿ ལན་གསུམ་རྒྱ་དང་བཅས་པས་བརླབ། སརྦ་བྷཱུ་ཏ་ཨཱ་ཀརྵཱ་ཡ་ཛཿ ཞེས་མགྲོན་བཀུག །སརྦ་བིགྷྣཱན་ན་མཿསརྦ་ཏ་ཐཱ་ག་ཏ་བྷྱོ་སོགས་ནས། ཁཾ་གྲྀཧྣེ་དཾ་བ་ལྱཱ་དི་སྭཱ་ཧཱ། ཞེས་ནམ་མཁའ་མཛོད་ཀྱི་སྔགས་རྒྱ་ལན་གསུམ་གྱིས་བསྔོས་ལ། ཧྲཱི༔ དོན་དམ་སྐྱེ་བ་སོགས་བཀའ་བསྒོའི་མཐར། བགེགས་གཏོར་ཕྱིར་དོར་ཞིང་། ཧཱུྃ་བཞིའི་སྔགས་དང་། གུ་གུལ་ཡུངས་ཐུན་དྲག་རོལ་དང་བཅས་པས་བགེགས་བསྐྲད། སྲུང་མཚམས་བཅད། བླ་མའི་རྣལ་འབྱོར་བསྒོམ་པ་ནས། ཤུགས་དྲག་གསོལ་གདབ་ལན་གསུམ་གྱི་བར་མཚམས། སྔགས་བརྒྱ་རྩ་ཙམ་ཉུང་མཐའ་བྱས་པ་བཟླས་མཐར། ལམ་དབང་བླང་བ་ནི། བླ་མ་མཁའ་འགྲོའི་གནས་གསུམ་དུ་འབྲུ་གསུམ་གསལ་བཏབ་ལ། བླ་མའི་གནས་གསུམ་འབྲུ་གསུམ་ལས༔ འོད་ཟེར་རིམ་དང་ཅིག་ཅར་བྱུང༔ རང་གི་གནས་གསུམ་ཐིམ་པ་ཡིས༔ དབང་བསྐུར་སྒྲིབ་སྦྱངས་ཡེ་ཤེས་སྨིན༔ སླར་མོས་གུས་གདུང་ཤུགས་ཀྱིས་ཐུགས་རྒྱུད་བསྐུལ་བས། མཐར་ནི་དགྱེས་པས་འོད་དུ་ཞུ༔ བདག་དང་བླ་མ་དབྱེར་མེད་ངང༔ གཟུང་འཛིན་སྤྲོས་པ་ལས་འདས་པའི༔ འོད་གསལ་གཉུག་མའི་དབྱིངས་སུ་བཞག༔ ཨ་ཨ་ཨཿ ཞེས་མོས་གུས་ཀྱིས་དྲངས་པའི་ཤེས་པ་སྐད་ཅིག་མའི་རང་ངོ་ལ་དགག་སྒྲུབ་མེད་པར་ལྷན་ནེར་བཞག་གོ །སྤོས་རོལ་དབྱངས་དང་བཅས་
པས་མོས་གུས་དང་རིག་པའི་རྩལ་བསྐྱེད་ལ། ཧྲཱི༔ སྐྱེ་མེད་བཟང་མོའི་སོགས་བྱིན་འབེབ་ནས། མཆོད་རྫས་བརླབ། དམ་ཚིག་འཁོར་ལོ་བསྐྱེད་པ་བདག་ཉིད་ཀྱི་རྣལ་འབྱོར་ཁོ་ནའམ། དགོས་པ་གཞན་གྱི་སླད་དུ་ཚོགས་རྟེན་གྱི་དཀྱིལ་འཁོར་སྒྲུབ་པ་ལ་འཇུག་ན་ཡང་། བདག་མདུན་ཅིག་ཅར་དུ་སྒོམ་པ་རྡོ་རྗེ་ཐེག་པའི་རྩེ་མོ་མ་ཧཱ་ཡོ་གའི་མན་ངག་གི་གསང་བ་ཁོང་དུ་ཆུད་པར་བྱ་དགོས། བསྟོད་པའི་མཐར། དབང་སོགས་མདུན་བསྐྱེད་གཙོར་འདོན་སྐབས། བྷྲཱུྃ་བི་ཤྭ་བི་ཤུདྡྷེ་ཧྲཱིཿཕཊ་ཛཿས། ཡེ་ཤེས་ཀྱི་འཁོར་ལོ་རྟེན་དང་བརྟེན་པར་བཅས་པ་མདུན་དཀྱིལ་གྱི་གོ་སར་ཕྱེས་ཏེ་དབྱེར་མེད་དུ་བཞུགས་པར་མོས་ལ། ཧྲཱི༔ སྣང་སྲིད་ཡུམ་གྱི་སོགས་ཛཔ྄་ལ་བསྐུལ་ནས། བསྙེན་སྒྲུབ་ལས་ཀྱི་དམིགས་བཟླས་རིམ་པར་བྱ། དབང་དང་བདག་འཇུག་སྐབས། བུམ་བཟླས་ཡབ་བཀའི་སྐབས་བཞིན་ལ་མཁའ་འགྲོའི་སྔགས་བཟླ་བ་ཁྱད་པར་རོ། །གང་ལྟར་ཡང་ཐུན་མཐར་ལྷག་ཆད་ཁ་བསྐང་ཞིང་། ནུས་པ་བརྟན་པ། སྟོང་ཚིགས། ནོངས་བཤགས། ལམ་དབང་། སྲུང་མའི་གཏོར་འབུལ། སྐོང་ཆོག་བཅས་གོང་གསལ་ཡབ་བཀའ་བཞིན་བཏང་ནས། མར་མེའི་སྐོང་བའི་རྗེས། མཁའ་འགྲོའི་ཕྲིན་ལས་ཀྱི་ཚོགས་བྱིན་རླབས་ནས། མཆོད་བཤགས་བསྟབ་པ་དཀྱུས་གཅིག་ཏུ་ཕུལ་མཐར། སྤྱི་སྐོང་སྤྲོ་ན། ཡབ་བཀའི་སྐབས་སུ་བཤད་པ་འདིར་སྦྱར། ཟུར་གསལ་མཁའ་འགྲོ་འདུས་པའི་སྐོང་བཤགས་བྱིན་རླབས་ནས་མཐར་ཆགས་
སུ་བཏང་ཞིང་། གྲངས་གསོག་བྱ་མིན་སྐབས་དང་བསྟུན། བདག་འཇུག་རྒྱས་པའི་སྐབས། ལས་བུམ་བསྒྲུབ་ཅིང་ཁྲུས་ནས་གཟུང་དབང་གི་ལུས་དབུལ་མཐར། གཞན་ལ་དབང་བསྐུར་སྐབས་གནང་བ་ནོད་ཅིང་། དངོས་གཞིར་རྩ་བའི་དབང་བཞི། གཏོར་དབང་། སྲུང་མའི་བཀའ་གཏད་དགོས་མིན་སྐབས་དང་བསྟུན། རྗེས་རིམ་ལ། ཐབས་ཤེས་ཀྱི་ཚོགས་བརྡའི་འབུལ་ལེན་གོང་གསལ་ཡབ་བཀའ་ལྟར་བྱ། ཧོ༔ བཟའ་བཅའ་བཏུང་བའི་སོགས་ཀྱིས་བསྲེག་བླུག་ཏུ་རོལ། གསང་བའི་ཚོགས་རོལ་གང་ཟག་གི་བློ་དང་བསྟུན། ལྷག་མ་བསྡུས་པ་གཙང་ལྷག་གིས་མནན་ཅིང་། དམ་ཚིག་གི་བདུད་རྩིས་བྲན་ཏེ། ཨོཾ་ཨཱཿཧཱུྃ་ཧ་ཧོཿཧྲཱིཿ ལྷག་གཏོར་བདུད་རྩིའི་རྒྱ་མཚོ་འདོད་ཡོན་ཟད་པ་མེད་པའི་སྤྲིན་འཕྲོ་བས་དམ་ཅན་རྒྱ་མཚོའི་དགྱེས་པ་སྐོང་བའི་གཏེར་དུ་གྱུར། འབར་བའི་ཕྱག་རྒྱ་དང་བཤུག་གླུའི་བརྡས་བསྐུལ་ཏེ། ཨེ་ཨཱ་རལླི་ཧྲིཾ་ཧྲིཾ་ཕེཾ་ཕེཾཿ ལྷག་སྡུད་སྤྲིན་ལྟར་གཏིབས་པར་བསམ་ལ། བྷྱོ༔ མི་བསྲུན་ལས་ཀྱི་སོགས་ཀྱིས་ལྷག་མ་གཙང་སར་སྤུངས། འདིར་རྡོ་རྗེའི་གླུ་གར་དང་སྨོན་ལམ་ཤིས་བརྗོད་བཅས་ཉེར་མཁོའི་སྐོང་བཤགས་མཇུག་ནས་འབྱུང་བ་ཉིད་སྦྱར། དམ་སྤྱིའི་གཏོར་འབུལ་བྱ། དམར་གཏོར་ཤ་ཁྲག་གིས་བརྒྱན་པ་དང་། གསེར་སྐྱེམས་ལ་སྨན་རཀ་བྲན་ཅིང་། ཨོཾ་ཨཱཿཧཱུྃ་གིས་བདུད་རྩིར་བརླབས་ལ། ཧཱུྃ་བྷྱོ༔ ཡེ་ཤེས་མཁའ་འགྲོ་སོགས་འབུམ་བསྐུལ་མཐར་ཕྱིར་འབུལ། ཆད་བརྟན་མཐར། གཏོར་
གཞོང་སྦུབས་པའི་འོག་ཏུ། ཨེ་ནྲྀ་ཏྲི་སརྦ་ཤ་ཏྲཱུཾ་བིགྷྣཱན་ཛཿཧཱུྃ་བཾ་ཧོཿས་དགྲ་བགེགས་བཀུག་ལ། ཧཱུྃ༔ སྣང་སྲིད་ཁྲོས་མའི་སོགས་ཀྱིས་རྟ་བྲོ་བརྡུང་། དམ་སྤྱིའི་མཆོད་བསྟོད་ཕྱིན་མཐར་དབྱུང་། ཕྲིན་ལས་ཀྱི་གོང་གི་ཨོཾ་ཨཱཿཧཱུྃ༔ བདེ་ཆེན་ལོངས་སྤྱོད་སོགས་སྔགས་བཅས་ཀྱིས་མཆོད། ཧྲཱི༔ ཆོས་ཀུན་འབྱུང་གནས་ཆོས་ཀྱི་སྐུ༔ རིགས་ལྔའི་ཡུམ་མཆོག་ལོངས་སྤྱོད་རྫོགས༔ བདེ་ཆེན་རྒྱལ་མོ་ཅིར་ཡང་སྤྲུལ༔ མཁའ་འགྲོའི་ཚོགས་ལ་ཕྱག་འཚལ་བསྟོད༔ ཅེས་ཕྱག་འཚལ་གྱི་ཚིག་ཕྲད་བསྒྱུར་བས་བསྟོད། ཧཱུྃ་ཧྲཱི༔ བདེ་ཆེན་དགྱེས་རོལ་སོགས་ཕྲིན་ལས་ཀྱི་བཟླས་པའི་གཤམ་དུ་འབྱུང་བས་དངོས་གྲུབ་བསྐུལ་ཞིང་། སྔགས་བཟླ་བཞིན་སྒྲུབ་རྟེན་ཡོད་ན་གནས་གསུམ་དུ་གཏུགས། བདུད་རྩི་སོགས་དངོས་གྲུབ་ཀྱི་རྫས་རོལ་ནས། རྩ་ཁམས་བདུད་རྩིའི་བཅུད་ཀྱིས་གང༔ དངོས་གྲུབ་རྣམ་གཉིས་ཐོབ་པར་བསམཿ ཕྲིན་ལས་མཇུག་གི །སྐལ་པ་ངན་དང་སོགས་ཀྱིས་ནོངས་པ་བཤགས། རྟེན་ཡོད་ན། ཨོཾ། འདིར་ནི་གཟུགས་དང་སོགས་ཀྱིས་བརྟན་བཞུགས་བྱ། མེད་ན་རང་ལ་བསྟིམ། བདག་བསྐྱེད་སྣང་སྲིད་ཡེ་ནས་སོགས་ཀྱིས་བསྡུ་ལྡང་། བསྔོ་སྨོན། བཀྲ་ཤིས་བཅས་དང་། གཞན་ཡང་སྨོན་ཤིས་སྤྱི་དང་། བྱེ་བྲག་རྣམ་པར་སྣང་མཛད་སོགས་ཀྱིས་མཐའ་རྟེན་བྱའོ། །དེ་རྣམས་ཀྱིས་བླ་མ་སྤྲུལ་སྐུའི་སྒྲུབ་སྐོར་རྣམས་གྲུབ་བོ།། །།གཉིས་པ་
ཞར་བྱུང་བླ་སྒྲུབ་ཐོར་བུ་སྣ་ཚོགས་པའི་སྐོར་ལ། རིག་འཛིན་འཇའ་ཚོན་སྙིང་པོའི་གཏེར་བྱོན། རྗེ་སྒམ་པོ་པའི་ཞལ་གདམས་དྭགས་པོའི་གསང་ལམ་བླ་སྒྲུབ་སྐབས། དབང་དོན་སྒྲུབ་པ་གསར་བྲིས་ཉི་མའི་སྙིང་པོ་ཡེ་ཤེས་རྒྱན་གྱི་བླ་རེ་བཞིན་བསྒྲུབས་ནས། དབང་ཆོག་སྨིན་བྱེད་ཉི་མའི་འོད་ཕྲེང་ལྟར་དབང་དངོས་བསྐུར། ཆོ་གའི་རྗེས་རིམ་སྔ་མའི་མཇུག་བཞིན་བྱའོ།། ༈ །།གནམ་ཆོས་ཌོམྦི་པ། བིརྺ་པ། ཕ་དམ་པ། མི་ཏྲ་ཛོ་ཀི །རཏྣ་གླིང་པའི་སྒྲུབ་པ་བཅས་ལྔ་སོ་སོར་དབང་སྒྲུབ་རྒྱས་པ་བསྒྱུར་བྱེད་རྗེས་ཆོག་བཅས་གོང་གི་གུ་རུ་ཞི་བའི་སྐབས་ལྟར་ལ། དབང་དངོས་གཞི་གཟུངས་དབང་བཞིན་སོ་སོར་བསྐུར་བསྒྲུབ་བྱ་དགོས་སོ།། ༈ །།ཡོན་དགེ་མི་འགྱུར་རྡོ་རྗེ་ནུས་ལྡན་དྲག་པོ་རྩལ་གྱི་དག་སྣང་གྲུབ་ཆེན་ཀརྨ་པཀྴི་ཞལ་གཟིགས་མའི་བླ་སྒྲུབ་དབང་ཆོག་གི་མཚམས་སྦྱོར་ངོ་མཚར་སྣང་བ་ལྟར་དབང་སྒྲུབ་ཀྱི་བསྙེན་པ་རྣམས་གྲུབ་ནས། གསོལ་འདེབས་ནི། ཨོཾ་ཨཱཿཧཱུྃ། ཆོས་དབྱིངས་སྐྱེ་མེད་ཀློང་ཡངས་ནས། །མ་འགགས་ཐུགས་རྗེའི་རོལ་པར་ཤར། །རྒྱལ་བ་རྒྱ་མཚོའི་ལྷ་ཚོགས་ལ། །མོས་གུས་གདུང་བས་གསོལ་བ་འདེབས། །བྱིན་རླབས་མཐུ་དབང་དངོས་གྲུབ་སྩོལ། །བདག་དང་མཐའ་ཡས་སེམས་ཅན་རྣམས། །མ་རིག་བག་ཆགས་སད་པ་ལས། །རང་སྣང་ཡུལ་དུ་འཁྲུལ་པ་ཡི། །དངོས་འཛིན་ཨ་འཐས་འདུན་གྲོས་ཀུན༔ སོགས་གཏེར་གཞུང་གི་གཏོར་དབང་སྐབས་སུ་འབྱུང་བ་བཞིན་
དང་། དེ་ལྟར་གདུང་ཤུགས་དྲག་པོས་གསོལ་བཏབ་མཐུས། །མདུན་བསྐྱེད་བླ་མའི་ལྷ་ཚོགས་སོགས་ཀྱིས་དབང་ལེན་བྱ། དབང་དངོས་གཞི་བསྐུར། རྗེས་རིམ་སྐབས། མདུན་བསྐྱེད་བླ་མ་རང་གི་སྙིང་གར་ཐིམ༔ འཁོར་རྣམས་འོད་ཞུ་རང་ལ་ཐིམ་པར་གྱུར༔ དེ་ཡང་དམིགས་མེད་བློ་འདས་བརྗོད་མེད་ངང༔ སྣང་བའི་ཡུལ་ཀུན་འཛིན་མེད་རང་སར་དག །ཞེན་པའི་བློ་རྟོག་སྟོང་ཉིད་ཡངས་པར་གྲོལ། །བསམ་བརྗོད་མཐའ་བྲལ་ཆོས་ཉིད་དེ་བཞིན་ཉིད། །ཀ་དག་ཀུན་བཟང་ཀློང་དུ་མཉམ་པར་གཞག །ཅེས་པས་རང་ངོ་ལ་མཉམ་པར་གཞག །དེ་ལས་ལྡང་བ་ན། རྗེས་ཐོབ་འཁོར་འདས་སྣང་བ་སྣ་ཚོགས་ཀུན། །རང་རྩལ་རོལ་པ་འགག་མེད་ཟང་ཐལ་ཆེ། །གང་ཤར་རེ་དོགས་འཛིན་མེད་སྤང་ལེན་བྲལ། །མཉམ་ཡངས་བདེ་བ་ཆེན་པོ་ལམ་དུ་ཁྱེར། །བསྔོ་བ་ནི། ཟག་བཅས་ཟག་མེད་དགེ་ཚོགས་སྙིང་པོའི་སྤྲིན། །མཁའ་མཉམ་འགྲོ་བའི་དཔལ་དུ་གཏིབས་པ་ཡིས། །ཉེས་བརྒྱའི་ཚ་གདུང་ཀུན་བཅིལ་བྱང་ཆུབ་ཀྱི། །མྱུ་གུ་རྣམ་པར་འཕེལ་བའི་རྒྱུར་བསྔོ་འོ། །ཞེས་དང་། གཞན་ཡང་བསྔོ་སྨོན་སྤྲོ་ན། འདིས་མཚོན་དུས་གསུམ་དགེ་བ་ཅི་བསགས་མཐུས། །དཔལ་ལྡན་ཀརྨ་པ་ཡི་སྐུ་གསུང་ཐུགས། །ཡོན་ཏན་ཕྲིན་ལས་བདག་ཉིད་མྱུར་འགྲུབ་ནས། །འགྲོ་རྣམས་དེ་ཡི་
ས་ལ་འགོད་པར་ཤོག །བློ་རྒྱུད་ལས་རུང་ཟབ་མོའི་ལམ་ལ་ཞུགས། །དམ་ཆོས་སྒྲུབ་ལ་བར་ཆད་མི་འབྱུང་བར། །མྱུར་དུ་སྟོང་ཉིད་སྙིང་རྗེའི་རྩལ་ཆེན་རྫོགས། །ཟུང་འཇུག་རྡོ་རྗེ་འཆང་དབང་འགྲུབ་གྱུར་ཅིག །བཀྲ་ཤིས་ནི། སྲིད་ལས་འདས་ཀྱང་སྲིད་པའི་སྒྱུ་ཐབས་ཀྱིས། །དུས་གསུམ་སངས་རྒྱས་ཀུན་གྱི་ཕྲིན་ལས་མཛད། །རྩ་གསུམ་ཡོངས་འདུས་གྲུབ་ཆེན་ཀརྨ་པའི། །དཀྱིལ་འཁོར་ལྷ་ཚོགས་རྣམས་ཀྱི་བཀྲ་ཤིས་ཤོག །ཅེས་སོགས་ཀྱིས་མཐའ་བརྒྱན་པས་གྲུབ་བོ།། ༈ །།འཇིགས་མེད་གླིང་པའི་ཀློང་སྙིང་ཡང་གསང་བླ་སྒྲུབ་ཐིག་ལེའི་རྒྱ་ཅན་གྱི་ཁ་སྐོང་། ཀུན་མཁྱེན་རྡོ་རྗེ་གཟི་བརྗིད་རྩལ་གྱི་དགོངས་པའི་གཏེར་ལས་ཕྱུང་པ་སྨིན་བྱེད་ཡེ་ཤེས་མཆོག་སྦྱིན་གྱི་མཚམས་སྦྱོར་ཉུང་ངུར་བཀོད་པ་བདེ་ཆེན་ཐིག་ལེ་ལྟར་དབང་སྒྲུབ། དབང་དངོས། རྗེས་བཅས་སོ།། ༈ །།འོད་གསལ་སྤྲུལ་པའི་རྡོ་རྗེའི་དག་སྣང་གྲུབ་ཐོབ་ཆེན་པོའི་ཐུགས་ཐིག་གི་སྨིན་བྱེད་ཀྱི་ལག་ལེན་ཁྲིགས་སུ་བསྡེབས་པ་ལེགས་བཤད་སྙིང་པོ་ལྟར་དབང་སྒྲུབ། དབང་དངོས་མཐར། བདུད་རྩིའི་སྙིང་པོ་ལྟར་ཚེ་དབང་སྦྱར་ནས། ཟབ་ཁྲིད་ལ་དབང་གཞུང་ལྟར་མཚམས་སྦྱོར་སྔོན་འགྲོས། ཐུབ་དབང་རྡོར་འཆང་སོགས་ནས་མན་ངག་རྡོ་རྗེའི་ཚིག་རྐང་ལྟར། བརྡ་ཐིམ༔བར་དལ་བུས་བཀླགས་པའི་རྗེས། དེ་ལྟ་བུའི་གྲོལ་བྱེད་ཀྱི་གདམས་ཟབ། ཐེག་པ་ཡོངས་རྫོགས་ཀྱི་ཟབ་དོན་སྙིང་པོ་མདོར་དྲིལ་བའི་མན་ངག་
རྡོ་རྗེའི་ཚིག་རྐང་འདི་ནི། བསྟན་པ་ཡོངས་རྫོགས་ཀྱི་མངའ་བདག་ཀུན་གཟིགས་འཇམ་དཔལ་དབྱངས་དངོས་མཁྱེན་བརྩེའི་དབང་པོའམ། འོད་གསལ་སྤྲུལ་པའི་རྡོ་རྗེ་ཉིད་དགུང་ལོ་བཅོ་ལྔ་པར་གྲུབ་ཐོབ་ཆེན་པོ་དངོས་སུ་མཇལ་ཏེ་དགོངས་བརྒྱུད་བྱིན་རླབས་འཕོ་བའི་སྟོབས་དང་། བརྡ་ཡི་ཚིག་རྐང་སྙན་བརྒྱུད་དུ་བསྩལ་པ་ལ་བརྟེན་ནས། གསང་བ་རྨད་དུ་བྱུང་བའི་མཛོད་ཁང་ནས་ཕྱུང་སྟེ་གཏན་ལ་ཕབ་པ། དགུང་གྲངས་ཞེ་བདུན་གྱི་བར་དུ་བཀའ་རྒྱས་བཏབ་ཅིང་ཐུགས་ཉམས་སུ་བཞེས་ནས། རྒྱལ་བས་ལུང་བསྟན་འཇམ་མགོན་རྡོ་རྗེ་འཆང་ཆེན་པོ་དང་། སྤྲུལ་པའི་གཏེར་ཆེན་མཆོག་གྱུར་གླིང་པ། རྫོགས་ཆེན་གླིང་སྤྲུལ་ཐུབ་བསྟན་རྒྱལ་མཚན་རྣམ་པ་གསུམ་ལ། ཐོག་མའི་སྨིན་གྲོལ་ཚངས་སྤྲུགས་སུ་བསྩལ་པའི་གདམས་པ། ལྟ་སྒོམ་སྤྱོད་པ་བོགས་འབྱིན་འབྲས་བུ་ལྔས་བསྡུས་པའི་རྡོ་རྗེའི་སྒྲོམ་ཆེན་པོ་འདི་ཉིད་ཉམས་སུ་ལེན་པའི་དད་ལྡན་རྣམས་ཀྱིས་ཐོག་མར་བླ་མ་དམ་པ་ཚུལ་བཞིན་བསྟེན་ནས་དབང་གིས་སྨིན་ཅིང་། དམ་ཚིག་རྣམ་པར་དག་པས་ཉམས་ལེན་དངོས་ལ། སྔོན་དངོས་རྗེས་འཕྲོས་དོན་དང་བཞི་ལས། དང་པོ་སྔོན་འགྲོ་ལ། ཐུན་མོང་དང་ཐུན་མིན་གཉིས་ལས། དང་པོ་ལ་ནང་གསེས་ཀྱིས་དབྱེ་བའི་དང་པོ་ཐུན་གྱི་སྔོན་འགྲོ་
རྣམ་པ་གསུམ་གྱིས་ལས་རུང་དུ་བསྒྲུབས་ནས། གཉིས་པ་ཐུན་མོང་གི་སྔོན་འགྲོ་ལ། དལ་འབྱོར་རྙེད་དཀའ་སོགས་བློ་ལྡོག་རྣམ་པ་བཞི་རྒྱུད་ལ་འབྱོངས་པར་བྱ། གཉིས་པ་ཐུན་མིན་དང་ཁྱད་པར་གཉིས་ལས། དང་པོ་ཐུན་མིན་གྱི་སྔོན་འགྲོ་ལ། སྐྱབས་སུ་འགྲོ་བ་ནས་བླ་མའི་རྣལ་འབྱོར་བར་གྱིས་ཐེག་པ་ཆེན་པོའི་ལམ་གྱི་གཞུང་ཤིང་མཐར་ཕྱིན་པར་བྱ། གཉིས་པ་ཁྱད་པར་གྱི་སྔོན་འགྲོ་ལ། ལུས་ངག་ཡིད་གསུམ་གྱི་གནད་གཅུན་པས་སྒོ་གསུམ་ཤིན་སྦྱངས་ཀྱི་རྟགས་ཉམས་འོག་ཏུ་ཆུད་པར་བྱ། གཉིས་པ་དངོས་གཞི་ལ་ལྟ་བ། སྒོམ་པ། སྤྱོད་པ། བོགས་འདོན། འབྲས་བུ་ལྔ་ལས། དང་པོ་ལྟ་བ་དབུ་མ་ཆེན་པོ་ནི། གྲུབ་ཐོབ་ཆེན་པོ་ཉིད་ལ་གནས་བརྟན་ཡན་ལག་འབྱུང་གི་ཞལ་གཟིགས་ཏེ། ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པའི་སྒོ་ནས་ལྟ་བ་གཏན་འབེབ་ཀྱི་ཁྲིད་གསུངས། དེའི་དོན་མདོ་སྡུད་པར་བསྡུས་པའི་ལྟ་བ་དབུ་མ་ཆེན་པོ། གནས་ལུགས་སྟོང་པ་ཉིད། སྣང་ལུགས་མཚན་མ་མེད་པ། དེ་གཉིས་ཟུང་འཇུག་སྨོན་པ་མེད་པ་སྟེ། སྤྲོས་ཚོགས་མཐའ་བརྒྱད་དང་བྲལ་བར་གཏན་ལ་ཕབ། གཉིས་པ་སྒོམ་པ་ཕྱག་རྒྱ་ཆེན་པོ་ནི། མཁའ་འགྲོ་ནི་གུ་མ་མཇལ་ཏེ་ཕྱག་རྒྱ་ཆེན་པོ་གྭའུ་མ་རྫོགས་པར་
གསན་པས་ནི་གུ་ཕྱག་ཆེན་དང་། རང་གྲོལ་གྱི་གདམས་པ་ཟབ་རྒྱས་སུ་བསྩལ་པ་ཐང་སྟོང་སྙན་བརྒྱུད་ལྟར་རང་བབ་གསུམ་གྱིས་མཉམ་པར་བཞག་སྟེ། སྐྱོན་བཞི་རང་གྲོལ་གྱི་ཉམས་བསྐྱང་བས། སྐུ་བཞི་རང་ཤར་གྱི་གདེངས་མངོན་དུ་གྱུར་པའི་ལམ། ནི་གུ་ཕྱག་ཆེན་ཉིད་ཚད་ལ་ཕེབས་པར་བསྒོམ། གསུམ་པ་སྤྱོད་པ་རང་གྲོལ་ཆེན་མོ་ལ། གཏུམ་མོ་བདེ་དྲོད་རང་འབར། སྒྱུ་ལུས་ཆགས་སྡང་རང་གྲོལ། འོད་གསལ་གཏི་མུག་རང་སངས། རྨི་ལམ་འཁྲུལ་པ་རང་དག་སྟེ་རྩ་བའི་ཆོས་བཞི་དང་། འཕོ་བ་མ་བསྒོམ་སངས་རྒྱས། བར་དོ་རྒྱལ་བ་ལོངས་སྐུ་སྟེ་ཡན་ལག་གི་ཆོས་གཉིས་བཅས་ནི་གུ་ཆོས་དྲུག་ལྟར་རྟགས་ཐོན་པར་སྦྱངས། ལྔ་པ་འབྲས་བུ་རྫོགས་པ་ཆེན་པོ་ནི། རྫོགས་པ་ཆེན་པོ་ལྷུན་གྲུབ་ཏུ་གྲོལ་བ་ལ་བསླབ་དགོས་ཤིང་། དེའང་གྲུབ་ཐོབ་ཆེན་པོ་ཉིད་ཀྱིས་རྒོད་ལྡེམ་གཏེར་བྱོན་རྫོགས་ཆེན་དགོངས་པ་ཟང་ཐལ་གསན་པར་མ་ཟད། རྔ་ཡབ་དཔལ་རིར་ཕེབས་སྐབས་གུ་རུ་རིན་པོ་ཆེས་ཞུ་སྣ་མཛད་དེ། རྡོ་རྗེ་སེམས་དཔའ་དངོས་ལས་རྫོགས་ཆེན་གྱི་རྒྱུད་འབུམ་ཕྲག་དྲུག་ཅུ་རྩ་བཞི་གསན་པས། རྒྱུད་དོན་མ་ལུས་པ་ཐུགས་སུ་ཆུད་པས་ནམ་མཁའ་ལྟ་བུའི་རྣལ་འབྱོར་པར་བཞུགས་པས། རྫོགས་པ་ཆེན་པོ་སེམས་ཀློང་མན་ངག་
སྡེའི་རིམ་པས་ཕྱེ་བའི་ཉམས་ལེན་གང་མོས་སུ་འཇུག་པར་བྱའོ། །གསུམ་པ་རྗེས་ཀྱི་རིམ་པ་ལ་གཉིས་ལས། དང་པོ་ཐུན་གྱི་རྗེས་རིམ་ནི། འཁོར་གསུམ་ལས་གྲོལ་བའི་བསྔོ་སྨོན་གྱིས་རྒྱས་གདབ་པ་དང་། གཉིས་པ་ཉམས་ལེན་གྱི་རྗེས་རིམ་ནི། ཐུན་མཚམས་ལ་སོགས་པའི་སྤྱོད་ལམ་རྣམ་པ་བཞིའི་ཉམས་མྱོང་གི་རྩི་དང་མ་བྲལ་བར་སྤྱོད་པས་ཉམས་ལེན་མཐར་དབྱུང་སྟེ། དོན་གཉིས་ཀྱི་བྱ་བ་རླབས་པོ་ཆེ་ལ་འཇུག་པའོ། །བཞི་པ་འཕྲོས་དོན་ལ་གསུམ་ལས། དང་པོ་ནི། མན་ངག་རྡོ་རྗེའི་ཚིག་རྐང་འདི་ཉིད་བྲིས་ཏེ་འབྲལ་མེད་དུ་བཅང་བ་དང་བཀླག་པས་བཏགས་གྲོལ། རེག་གྲོལ། མཐོང་གྲོལ། ཐོས་གྲོལ་དུ་འགྱུར་བ་དང་། ཚུལ་བཞིན་ཉམས་སུ་བླངས་ན་ལོ་ཟླའམ། བར་དོ་ལས་མི་འགྱང་བར་བླ་མེད་ཀྱི་གནས་སུ་དབུགས་ཆེན་འབྱིན་པའི་ཚུལ་གྱིས་ཕན་ཡོན་བསྟན་པ་དང་། གཉིས་པ་ནི། དག་སྣང་དགོངས་གཏེར་ལ་སོགས་པའི་བཀའ་བབས་ལྔ་ལྡན་གདམས་པའི་སྙིང་པོ་འདི་ཉིད་འགྲོ་འདུལ་ཡེ་ཤེས་སྒྱུ་མའི་སྤྲུལ་པའི་སྐུ་ལ་གཏད་པ་དང་། ཆོས་ཀྱི་བདག་པོ་ཉིད་དང་དགོངས་སྤྱོད་མཉམ་པའི་སྐལ་ལྡན་སྐྱེས་མཆོག་རྣམ་པ་གསུམ་ལ་སོགས་པའི་ལས་ཅན་རྣམས་ཀྱི་དོན་དུ་གདམས་པས་དབུགས་དབྱུང་བ་དང་། གསུམ་པ་ནི། རྒྱལ་དབང་པདྨ་
ཐོད་ཕྲེང་རྩལ་དང་། གྲུབ་པའི་དབང་ཕྱུག་ཐང་སྟོང་རྒྱལ་པོ་གཉིས་མེད་གཉིས་སུ་སྣང་བའི་གར་གྱིས་འགྲོ་ཀུན་སྐུ་གསུམ་གྱི་གོ་འཕང་ལ་དབུགས་ཆེན་འབྱིན་པའི་སྨོན་ལམ་མཛད་པ་སྟེ། འདི་ལྟ་བུའི་སྨིན་གྲོལ་གྱི་གདམས་པ་ཆིག་རྫོགས་སུ་སོགས་དབང་གཞུང་ལྟར་སྦྲེལ། རྗེས་ཆོག་བཅས་བྱའོ།། ༈ །།དག་སྣང་སྐུ་གསུམ་རིགས་འདུས་ཟབ་ཏིག་གི་སྙིང་པོ་དོན་གྱི་གཏོར་དབང་གི་མཚམས་སྦྱོར་མདོར་བསྡུས་པ་བདེ་ཆེན་མྱུ་གུ་ལྟར་དབང་སྒྲུབ། དབང་དངོས། རྗེས་ཆོག་བཅས་བྱའོ། །དེ་དག་གིས་བླ་མ་ཞི་བའི་སྒྲུབ་ཐབས་རྗེས་འབྲེལ་དང་བཅས་པའི་སྐོར་རྣམས་གྲུབ་བོ།། །།གསུམ་པ་གསང་བ་བླ་མ་དྲག་པོར་བསྒྲུབ་པའི་སྐོར་ལ། བཀའ་མ་འོ་བྲན་དྲག་དམར་འདོད་བུམ། ༼༣༩༽ལྟར་དབང་སྒྲུབ། དབང་དངོས། རྗེས་བཅས་བྱའོ།། ༈ །།ཉང་རལ་ཉི་མ་འོད་ཟེར་གྱི་གུ་རུ་དྲག་པོ་དམར་ཆེན་བདེ་གཤེགས་འདུས་པའི་དབང་བསྐུར་རྒྱས་པ་སྨིན་ལམ་དབང་གི་རྒྱལ་པོ་མ་བུ་ཟུང་བསྡེབས་ཀྱི་ཡི་གེ་སྒྲིབ་གཉིས་གཡུལ་ལས་རྣམ་རྒྱལ་ལྟར་དབང་སྒྲུབ་སྐབས། དཀྱུས་གསལ་སྲུང་མའི་གཏོར་བསྔོའི་རྗེས། དྲེགས་པའི་སྲོག་དབང་བྱེད་ན། མ་མགོན་སྡེ་བརྒྱད་ཀྱི་མཆོད་ཕྲིན་ཕྲིན་ལས་རྔ་སྒྲ་སྦྱར་བ་བཏང་ནས་བླ་རྡོ་ལ་སྡེ་བརྒྱད་བསྐྱེད་བསྟིམ་ནན་ཏན་བྱ། དབང་དངོས་ཀྱི་གཏོར་དབང་གྲུབ་མཐར། སླར་བླ་རྡོ་སྲོག་ཡིག་སློབ་མའི་མདུན་དུ་བཞག་ནས། དྲེགས་པའི་སྲོག་དབང་ལྟར།
ད་ནི་དམ་ཚིག་དང་ལྡན་པའི་སོགས་ནས། མཎྜལ་མཐར། དེ་ནས་སྲོག་དབང་དངོས་གཞི་བསྐུར་བའི་དོན་དུ་འདུན་པ་འདི་ལྟར་མཛོད། དཔོན་སློབ་གཉིས་ཀ་ཟིལ་གནོན་གུ་རུ་དྲག་པོ་རྒྱན་འཁོར་རྒྱ་མཚོའི་གཟི་བྱིན་སྟོབས་རྩལ་འབར་ཞིང་། ཐུགས་རྗེའི་ཡེ་ཤེས་དྲག་ཏུ་ཁྲོས་པས་སྣང་སྲིད་སྡེ་བརྒྱད་དབང་དུ་སྡུད་ཅིང་ཟིལ་གྱིས་གནོན་པའི་སྐུར་གསལ་བའི་མདུན་དུ། སྲོག་ཡིག་བླ་རྡོ་རྣམས་དྲེགས་པ་སྡེ་བརྒྱད་དངོས་སུ་གསལ་བ་བཀའ་ཉན་གུས་འདུད་ཀྱིས་འཁོད་པ་ལ། སླར་ཡང་ཐུགས་ཀའི་འོད་ཀྱིས་སྲོག་གི་སྙིང་པོ་དྲངས་ཏེ། སློབ་མའི་ཞབས་འོག་གི་གདན་ལ་བསྟིམས་པས། དྲེགས་པ་རྣམས་བརྟན་པ་དང་བྲལ་ཏེ་འདར་ཡེད་ཡེད་དུ་གནས་པ་ལ། སློབ་དཔོན་གྱིས་བླ་རྡོ་སྲོག་ཡིག་བུའི་ཞབས་འོག་ཏུ་བཅུག་སྟེ། འབངས་སུ་བཀའ་གཉེར་གཏད་པ་བཞིན་དུ་བྱེད་པར་ཁས་བླངས་ཤིང་། མནའ་དོར་བས་ཕྱིན་ཆད་འཁུ་ཞིང་ལྡོག་པའི་དབང་མེད་པར་མངགས་གཞུག་བྱེད་པའི་མོས་པ་བརྟན་པོར་སྐྱེད་ཅིག །བླ་རྡོ་དང་སྲོག་ཡིག་རེ་རེ་བཞིན་བླངས་ནས་སློབ་མའི་རྐང་ཞབས་སུ་འདྲེན་པའི་ཚུལ་དང་བཅས། ཧཱུྃ༔ དཀར་པོ་ལྷ་ཡི་བླ་རྡོ་སོགས་སྲོག་དབང་གཞུང་ལྟར། རྡུལ་དུ་བརླག་པར་བྱེད་པའི་དབང་ཐོབ་པར་གྱུར་ཅིག༔ བར་བརྗོད་མཐར། བླ་རྡོ་སྲོག་ཡིག་རྣམས་སྔར་གྱི་རང་མལ་དུ་འཇོག །དེས་སྡེ་བརྒྱད་བྲན་དུ་ཁོལ་
ཞིང་། ཅི་བཅོལ་བའི་ཕྲིན་ལས་བསྒྲུབ་པར་འགྱུར་རོ། །བརྒྱད་པ་རྒྱལ་ཐབས་སྤྱི་བླུགས་ཀྱི་དབང་སོགས་རྩ་དབང་རྒྱས་པ་སྨིན་ལམ་དབང་གི་རྒྱལ་པོའི་མཇུག་བཞིན་མཐར་ཆགས་སུ་བསྐུར། ཆོ་གའི་རྗེས་རིམ་སྐབས། སྤྲོ་ན། ལྷག་མའི་མཇུག་ཏུ་སྲུང་མའི་གཏོར་བསྔོས་རྒྱས་བསྡུས་གང་འོས་བསྐྱར། གང་ལྟར་ཡང་ཆད་ཐོ་དང་མཉམ་དུ་མ་མགོན་སྡེ་བརྒྱད་ཀྱི་གཏོར་མ་གཤེགས། བླ་རྡོ་གཏོར་སྒྲོམ་སོགས་སུ་བཅང་བའམ། རྟེན་བྱིན་ཅན་གྱི་འོག་ཏུ་བཅུག །ཆོ་གའི་རྗེས་གཞན་རྣམས་མཐར་དབྱུང་ངོ་།། ༈ དྲག་དམར་གཞུང་ཆེན་བདེ་གཤེགས་འདུས་པ་དང་འབྲེལ་བའི་རྡོ་རྗེ་སྤྱི་བླུགས་སུ་གྲགས་པ་འདོད་བུམ། ༼༢༤༽ལྟར་དབང་སྒྲུབ། དབང་དངོས། རྗེས་བཅས་བྱ།། ༈ །།དྲག་སྒྲུབ་འབྲིང་པོ་མེའི་སྤུ་གྲི་འདོད་བུམ། ༼༣༤༽ལྟར་དབང་སྒྲུབ། དབང་དངོས་ཀྱི་ཕྲིན་ལས་བཞིའི་དབང་གི་རྗེས། འདོད་བུམ། ༼༣༧༽གྱི་དྲག་དམར་ཆེ་འབྲིང་གང་རུང་དང་འབྲེལ་བའི་གཏོར་དབང་བསྡུས་པ་ལུ་གུ་རྒྱུད་ཀྱི་བྱིན་རླབས་སྦྱར། རྗེས་བཅས་བྱའོ།། ༈ །།ཆོས་དབང་གུ་རུ་དར་ནག་བེར་ཆེན་གྱི་བྱིན་རླབས་བྱེད་ཚུལ་ཡང་ཟབ་སྙིང་པོ་ལྟར་དབང་སྒྲུབ། དབང་དངོས། རྗེས་ཆོག་ཚོགས་མཆོད་བྱང་བདག་ཀརྨ་གུ་རུ་ལྟ་བུ་ནས་བླངས་ཤིང་། སྦྱིན་སྲེག་སོགས་བྱའོ།། ༈ །།བྱང་གཏེར་ཐུགས་སྒྲུབ་རྣམ་གསུམ་གྱི་གསང་སྒྲུབ་རྡོ་རྗེ་དྲག་པོ་རྩལ་གྱི་སྨིན་ལམ་དབང་གི་ཆུ་བོ་ཆེན་མོ་ཁྱེར་བདེར་བསྡེབས་པ་རིན་
ཆེན་ཕྲ་མཛེས་ལྟར། ཐོག་མར། ཐུགས་རྗེའི་དབང་གིས་ལྟ་བུའི་སྐྱབས་སེམས་སྔོན་འགྲོས། བདག་བསྐྱེད་ལ་སྔགས་ཕྲིན་གཏེར་མཛོད་གཞུང་དུ་མི་བཞུགས་པས། ཉམས་ལེན་རྒྱུན་ཁྱེར་དངོས་གྲུབ་ཀྱི་རྫིང་བུ་ལ་གཏེར་གཞུང་བདག་ཉིད་ལྷའི་བསྒོམ་ཐབས་གབ་སྤྲད་དེ། ཧཱུྃ་སུམ་བརྒྱ་ཉེར་གཅིག་ཕྱག་ལེན་ལྟར་བཟླ་ཚུལ་ལ། དང་པོར་ཧཱུྃ་བརྒྱ་རྩ་ཡིད་བཟླས་བྱ། གཉིས་པར་ཧཱུྃ་ཉིས་སྦྲེལ་བརྒྱ་རྩ་དང་། གསུམ་པར་ཧྲཱིཿཞེས་བརྗོད་པས་ཧཱུྃ་རྣམས་མཁའ་འགྲོར་བསྒྱུར་ཏེ། ཧཱུྃ་ལྔ་སྦྲེལ་བརྒྱ་རྩ་བཅས་ངག་བཟླས་བྱས་རྗེས། ཧཱུྃ་བདུན་སྦྲེལ་དབྱངས་ཀྱིས་ལན་ཉེར་གཅིག་བཟླས་མཐར། ཧཱུྃ༔ རིག་འཛིན་ཡོངས་རྫོགས་སྤྱན་འདྲེན་གཤེགས༔ ཕྱི་ནང་གསང་བའི་མཆོད་ཚོགས་འབུལ༔ ཉམས་ཆག་འགལ་འཁྲུལ་མཐོལ་ཞིང་བཤགས༔ སྐུ་གསུང་ཐུགས་ཡོན་ཕྲིན་ལས་བསྟོད༔ མཆོག་དང་ཐུན་མོང་དངོས་གྲུབ་སྩོལ༔ མ་ཧཱ་པཉྩ་ཨ་མྲྀཏ་རཀྟ་བ་ལིཾ་ཏ་ཁཱ་ཧི༔ ཞེས་སྟོང་ཚིགས་འབུལ། ཧཱུྃ༔ སྐྱེ་འགག་མེད་པ་སོགས་ཕྲིན་ལས་ལྟར་དོན་བསྟོད་བྱ། ས་ཆོག་སོགས་སྟ་གོན། དངོས་གཞི་དབང་སྒྲུབ་དང་དབང་རྒྱས་པ། རྗེས་བཅས་བྱ།། ༈ །།ལྷ་བྲག་ཐུགས་སྒྲུབ་དྲག་པོ་རྩལ་གྱི་སྨིན་ལམ་འབྲིང་པོ་གསེར་མཛོད་མའི་ཆོག་ཁྲིགས་བདུད་རྩིའི་ཐིག་ལེ་ལྟར་དབང་སྒྲུབ། དངོས་གཞིར་རྩ་བའི་དབང་འབྲིང་པོ། རྗེས་རིམ་བཅས་དང་། འདོད་བུམ། ༼༤༦༽ལྟར་བསྡུས་པ་བྱིན་
རླབས་ཐུགས་རྗེའི་དབང་གི་སྒྲུབ་པ། དངོས་གཞི། རྗེས་བཅས་དང་། ཡང་ཏིག་གཅེས་སྒྲོན་གྱི་ཟབ་ཁྲིད་འབོགས་པ་ལ། ཐོག་མར་ཚིག་བདུན་དང་། སྐུ་གསུམ་གསོལ་འདེབས། སྤྲོ་ན་རང་གཞུང་གི་བརྒྱུད་པའི་གསོལ་འདེབས་ཀྱང་བྱ། ཡན་ལག་བདུན་པས་རྒྱུད་སྦྱང་ཞིང་། མཎྜལ་འབུལ་བ། གསུང་བསྐུལ་བཅས་སྔོན་འགྲོས། སེམས་བསྐྱེད་གསལ་གདབ་ཅིང་། ཕུན་སུམ་ཚོགས་པ་ལྔས་གཞི་བཟུང་ནས། ཡང་ཏིག་གཅེས་སྒྲོན་གྱི་གདམས་ཁྲིད་འཆད་པ་ལ། གཏེར་ཁ་ལྷོ་བྱང་གཉིས་ཞེས་ཡོངས་སུ་གྲགས་པ་ལས། སྔ་མ་ལ་གོང་འོག་སྟེ་ཉང་དང་ཆོས་དབང་གཉིས། དེའང་ཉང་གཏེར་བཀའ་བརྒྱད་བདེར་འདུས་ཀྱི་ཁྲིད་དང་། ཁྲོས་ནག་གི་ཁྲིད་རྒྱུན་སོགས་དང་། ཆོས་དབང་གི་སངས་རྒྱས་མཉམ་སྦྱོར་དང་། བཀའ་བརྒྱད་གསང་རྫོགས་ཀྱི་རིམ་ལྔའི་ཁྲིད་སོགས་རྒྱ་ཆེར་བཞུགས། ཕྱི་མ་བྱང་གཏེར་གྱི་གཙོ་བོར་གྱུར་པ་ཟང་ཟང་ལྷ་བྲག་གི་མཛོད་ལྔའི་གཏེར་སྒོ་ཕྱེས་པ་ལས་བླ་གཏེར་ལྔ། དེ་ལས་གུ་རུའི་ཐུགས་ཚབ་ཏུ་བྱོན་པ་བྱང་པའི་ཁྲིད་ཆེན་བཞིར་གྲགས་པའི་ནང་ཚན། ལྷོ་གསེར་མཛོད་སེར་པོ་ནས་བྱོན་པ་ཡང་ཏིག་གཅེས་སྒྲོན་གྱི་སྨིན་ཁྲིད་བྱེད་སྐབས། གཟེར་ལྔ་སོགས་སོ་སོར་ཞག་གྲངས་བྱས་ནས་བསྒོམ་དགོས་པ་ཕྱག་ལེན་དུ་བསྟར་བ་གལ་ཆེ་ཡང་། ད་རེས་མགྱོགས་ཁྲིད་
ཀྱི་ས་བཅད་ལྟར་འཆད་པ་ལ། མདོར་བསྡུས་ཏེ་སྤྱིར་བསྟན་པ་དང་། རིག་འཛིན་ཆེན་པོ་པདྨ་ཕྲིན་ལས་ཀྱིས་མཛད་པའི་ཟིན་བྲིས་གཞུང་དོན་རབ་གསལ་ལྟར་བྱེ་བྲག་ཞིབ་རྒྱས་སུ་བཤད་པ་གཉིས་ལས། དང་པོ་སྤྱི་སྡོམ་ཚུལ་དུ་བཤད་པ་ལ། ཐོག་མར་ལོ་རྒྱུས་ཀྱི་སྒོ་ནས་སྤྲོ་བ་བསྐྱེད་དེ། སྔོན་འགྲོ་གཟེར་ལྔ་འདི་ཚིག་འབྲུ་འགྲེལ་གྱི་ཚུལ་དུ་བཤད་པ་ཕྱག་བཞེས་ཡིན་པས་དེ་ལྟར་བཤད་དགོས་ཀྱང་། དེ་མི་ནུས་པས་སྔོན་འགྲོ་གཟེར་ལྔའི་གཏེར་གཞུང་དང་། པད་ཕྲིན་ཁྲིད་ཡིག་གཉིས་གབ་སྤྲད་དེ་འཆད་པས་འཐུས་པར་བྱ་ཞིང་། ན་མོ༔ ཀུན་བཟང་ཐུགས་ལ་ཕྱག་འཚལ་ལོ༔ ཞེས་ཚིག་རྐང་གཅིག་གིས་ཕྱག་བྱས་ནས། འདི་མཛད་པ་པོ་སུ་ཡིན། ཅིའི་ཕྱིར་མཛད། དོན་གང་ཡིན་སོགས་ས་བཅད་ཕྱེ་ནས། གཞི་ལམ་འབྲས་བུའི་ཀུན་ཏུ་བཟང་པོ་ཡིན་ལུགས་སམ་གནས་ལུགས་ཀྱི་ཚུལ་དུ་བཤད་པ་དང་། ཉམས་སུ་ལེན་པའི་རྣལ་འབྱོར་པ་དེའི་མཚན་ཉིད་ཅི་ལྟ་བུ་ཞེ་ན། དང་འདོད་ཡིད་ཆེས་ཀྱི་དད་པ་གསུམ་དང་ལྡན་དགོས། དེས་ལམ་ལ་འཇུག་སྤྲོ་བ་ཡིན། དལ་འབྱོར་ལྡན་པའི་མི་ལུས་རིན་པོ་ཆེ་དེ་ཐོབ་ནས། འཁོར་བ་ལ་སྐྱོ་བ་བསྐྱེད། དེ་ལ་ཕན་པའི་ཐབས་ཐེག་པ་རིམ་པ་དགུ་སོགས་རྣམ་གྲངས་མང་ཡང་། འདིར་
ཨ་ཏི་རྫོགས་པ་ཆེན་པོ་བསྒོམ་དགོས། དེའང་ངན་སོང་གསུམ་སོགས་རིགས་དྲུག་གི་སྡུག་བསྔལ་གསུམ་ལ་བསམ། དེ་ལས་ཐར་ཕྱིར་དབེན་པའི་གནས་སུ་ཕྱིན་ནས་ཡོ་བྱད་ཚོགས་པར་བྱ། བདེ་བའི་སྟན་ལ་འཁོད་ནས་རིན་ཆེན་གནད་ཀྱི་གཟེར་ལྔ་བསྒོམ་དགོས་ཏེ། དེའང་སྐྱབས་སེམས། ཚོགས་གསག་མཎྜལ། སྒྲིབ་སྦྱོང་རྡོར་སེམས། མི་རྟག་སྐུལ་འདེབས། བླ་མའི་རྣལ་འབྱོར་གྱི་གཟེར་དང་ལྔ་ཡིན། གཟེར་ཞེས་པ་འདི་ཡང་དག་པའི་ལམ་ལས་མི་འཆུགས་པར་བྱེད་པའི་དོན་ཡིན་ལ། དང་པོ་བདག་དང་ཁམས་གསུམ་སེམས་ཅན་རྣམས་ལོག་པའི་ལམ་དེ་ལས་ལྡོག་ནས། ཞི་བའི་གོ་འཕང་འཐོབ་ཕྱིར་དཀོན་མཆོག་གསུམ་ལ་སྐྱབས་སུ་འགྲོ་དགོས། དེ་ནས་སེམས་ཅན་ལ་དམིགས་པའི་སྙིང་རྗེས་ངན་སོང་གསུམ་གཙོར་གྱུར་གྱི་སེམས་ཅན་ཐམས་ཅད་སྡུག་བསྔལ་ལས་ཐར་བའི་ཕྱིར་བྱང་ཆུབ་ཏུ་སེམས་བསྐྱེད་པ་ནི་ལུས་མདོར་བསྟན། དེ་ཇི་ལྟར་བསྒོམ་པའི་ཚུལ་ཁྲིད་གཞུང་ནས་བཤད་པ་ལྟར་སྐྱབས་ཡུལ་ལྔ་ཚོམ་སྒོམ་པ་ནི་གང་ལ་སྐྱབས་སུ་འགྲོ་བའི་ཡུལ། གང་གིས་སྐྱབས་སུ་འགྲོ་བར་བྱེད་པ་ནི་ཕ་མར་གྱུར་པའི་སེམས་ཅན་ཐམས་ཅད། ཇི་ལྟར་སྐྱབས་སུ་འགྲོ་བའི་ཚུལ་ནི་སྐྱབས་སེམས་ཀྱི་ཚིག་རིས་ལྟར་རོ། །
གཟེར་གཉིས་པ་ལ་ཕྱི་ནང་གསང་བའི་མཎྜལ་ལས། ཕྱི་ཡི་མཎྜལ་སྣོད་བཅུད་རི་གླིང་འཇིག་རྟེན། ནང་གི་མཎྜལ་སྐབས། འཇིག་རྟེན་ལས་ཀྱིས་འདུས་པའི་བར་དོ་ཞེས་པ་ད་ལྟའི་གནས་སྐབས་ཡུལ་འཁོར་ལོངས་སྤྱོད་གཅེས་རྒུ་རྣམས་ཡིན། གསང་བའི་མཎྜལ་བདག་ལ་ཉེར་མཁོར་གྱུར་པའི་སྣོད་བཅུད་ཡུལ་འཁོར་ལོངས་སྤྱོད། བདག་ལུས་གཅེས་འཛིན་གྱི་ཕུང་པོ་རྣམ་ཤེས་ཚོགས་བརྒྱད་དང་བཅས་པ་རིལ་པོར་འབུལ་བ་དང་སིལ་བུར་འབུལ་བ་བཅས། གཟེར་གསུམ་པ་ལ་ད་ལྟ་འཁོར་བར་འཁོར་བའི་རྒྱུ་ལས་ཉོན་གྱི་སྒྲིབ་པ་མ་དག་པས་ལན་པ་ཡིན། སྦྱང་བྱ་སྒྲིབ་པ་དེ་དག་སྦྱོང་བྱེད་ཀྱི་ཐབས་ཁྱད་པར་འཕགས་པ་རྡོ་རྗེ་སེམས་དཔའི་སྒོམ་བཟླས། དེའང་སྒོམ་ཚུལ་ཐུན་མོང་ཐུན་མིན་གཉིས་དང་། གཟེར་བཞི་པ་མི་རྟག་སྐུལ་འདེབས་བཅས་ཁྲིད་ཡིག་གཞུང་ལྟར་བསྒོམ་དགོས། གཟེར་ལྔ་པ་བླ་མའི་རྣལ་འབྱོར་སྐབས། རང་ལུས་དེར་འཛིན་མེད་པ་སྟེ་གང་ཡང་མི་དམིགས་པའི་སྤྱི་བོའི་ཐད། ཟབ་འབོལ་གྱི་ཁྲི་སྟེང་བླ་མ་དྲག་པོ་ཀུན་འདུས་ནོར་བུའི་ལུགས་སུ་སྒོམས་ལ་གསོལ་བ་གདབ་ཅིང་དབང་ལེན། དེ་ལྟར་ཐུན་མོང་སྔོན་འགྲོས་རྒྱུད་སྦྱོང་བ་གལ་ཆེ་བའི་ལུང་ཁྲིད་གཞུང་དུ་འབྱུང་བ། ཀ་དག་གི་ཁྲིད་གཞུང་ལས་གསུངས་པའི་ལུང་འདི་ནི་ཁུངས་རང་ཤར་གྱི་ཀ་དག་ཁྲིད་གཞུང་ཡིན། དེ་ནས་ཐུན་མིན་སྔོན་འགྲོ་སྐུ་གསུང་ཐུགས་ལ་སེམས་གཟུང་བ་གསུམ་གྱི། དང་པོ་ལུས་ལྷ་ལ་སེམས་འཛིན་པ་ནི། བླ་མའི་རྣལ་འབྱོར་ཟིན་པའི་རྗེས་ཐོག་འོད་ཞུ་ཚར་འཕྲལ་རྡོ་
རྗེ་དྲག་པོ་དཔའ་བོ་གཅིག་པར་བསྐྱེད་ནས། ཕྲ་རགས་ཀྱི་སེམས་འཛིན་ཁྲིད་ཡིག་ལྟར་དང་། དག་དྲན་ཡང་གསང་འདུས་པ་ལ་བལྟ་བར་གསུངས་ཀྱང་། མདོར་བསྡུས་དག་དྲན་གྱི་རྒྱས་འདེབས་ཤིག་བྱེད་དགོས། གཉིས་པ་ངག་སྔགས་ལ་སེམས་འཛིན་པ་ནི། ཐུགས་སྲོག་ས་བོན་ཧཱུྃ་གི་ཁ་དོག་སྒྲ་དབྱིབས་ལ་སེམས་འཛིན་ནས། དུས་བསྙེན་ཟླ་བ་གཅིག་ལ་རྫོགས་ཤིང་། སྒོམ་བཟླས་ཟུར་གསལ་སྟབས་བདེ་ཞིག་གཏང་། བཟླ་ཚུལ་ཐོ་རངས་ཞི་བ། སྔ་དྲོ་དྲག་པོ། ཉིན་གུང་དབང་། ཕྱི་དྲོ་རྒྱས་པར་ཕྱེ་བ་འདིའི་ལུགས། ཧཱུྃ་བརྒྱ་ལ་ཞི་བ། བརྒྱ་ལ་དྲག་པོ། བརྒྱ་ལ་དབང་བཅས་ཁྱོན་སུམ་བརྒྱ། མཐར་བདུན་གསུམ་ཉེར་གཅིག་རྒྱས་པར་བྱེད་པ་ཕྱག་ལེན། འདི་ནི་ཞི་དྲག་ཐུན་མོང་བའི་སྒྲུབ་ཐབས་ཧཱུྃ་བཟླས་འདི་ལས་ཟབ་པ་མེད། འདིའི་དབང་སྒྲུབ་སོགས་སྒྲུབ་པ་ཆེན་པོའི་སྐབས་བདག་བསྐྱེད་ཐེམ་ཅན་ལས་བྱང་འབྲིང་པོ་དང་། མདུན་བསྐྱེད་ཐེམ་མེད་སྒྲུབ་པ་ཆེན་པོའི་མངོན་རྟོགས་སྦྱར་དགོས། རྙིང་མ་གཞན་གྱི་རྒྱས་འགེབས་ཛཔ྄་ཁང་དབྱེ་བ་སོགས་ཕྱག་ལེན་ལ་མེད་པས་མི་བྱེད། གསུམ་པ་ཐུགས་ཕྱག་མཚན་ལ་སེམས་གཟུང་བ་ཁྲིད་གཞུང་ལྟར་བྱ། དེ་ནས་ཀ་དག་གི་སྔོན་འགྲོ་རྡོ་རྗེ་དཀར་པོ་དང་། ཧཱུྃ་སྔོན་པོ། ཐིག་ལེ་དཀར་དམར་བཅས་དམིགས་རིམ་གསུམ་ལ་སེམས་འཛིན་པ་ལ། ཐེག་ལེའི་སེམས་འཛིན་སྐབས་གསལ་
མི་ཐེབ་པའི་རིགས་ལ་དབུ་མ་སྦོམ་པ་དང་ཐིག་ལེ་ཆེ་བར་བསྒོམ། དེ་མིན་དམིགས་པ་བརྟན་པ་སོགས་ལ་ཕྲ་བ་རང་ལེགས། དེ་ནས་དངོས་གཞི་སེམས་ཆོས་ཉིད་ཀྱི་དཀྱིལ་འཁོར་སྒོམ་པ་ཀ་དག་གི་ངོ་བོ་སྐྱོང་ཚུལ་ཁྲིད་ཡིག་ལྟར་དང་། གེགས་སེལ་ལ་བྱིང་བ་གཏི་མུག་གི་གེགས་དང་། རྒོད་པ་ཞེ་སྡང་གི་གེགས། རྟོག་པ་ཟ་ཟིར་སྣ་ཚོགས་འཕྲོ་བའི་གེགས། ཤེས་པ་རྫི་འཁོར་བ་དང་རེ་དོགས་བདག་འཛིན་གྱི་གེགས། དེའང་རྫི་འཁོར་བ་ཞེས་པ་རེ་དོགས་བློ་སྣ་མང་པོས་འདི་ཡིན་འདི་མིན་མི་ཤེས་པའི་ཐེ་ཚོམ་ལ་ཟེར། ཞི་གནས་ཀྱི་གཞི་བཅའ་བ་དང་། དེ་ལ་དུག་གསུམ་བྱེ་བྲག་གི་གེགས་སེལ་ཏེ་ལྔ། ལྟ་ཐོག་སྒོམ་པ་ཚོལ་བ་བྱུང་གནས་འགྲོ་གསུམ་བརྟག་པ་སེམས་ཚོལ་ཚད་ལྡན་མ་བྱུང་བར་བརྟགས་བཅུག་ནས། ངོ་སྤྲོད་སྐབས་ཕྱག་ལེན་བཞིན། ངོ་སྤྲོད་དང་པོར་གཡོན་གྱི་སྡིགས་མཛུབ་ནམ་མཁར་གཏད། གཉིས་པར་མན་ཤེལ་བསྟན་ལ་ལྟ་སྟངས་གཏད་བཅུག །གསུམ་པར་གཡས་པས་སློབ་བུའི་སྙིང་གར་སྡིགས་མཛུབ་གཏད་དེ་ངོ་སྤྲོད་པ་བཅས་མཛད་པ་དང་། རྒྱུན་གྱི་ཉམས་ལེན་གྱི་གནད་བསྟན་པ་རྣམས་སོ། །གཉིས་པ་བྱེ་བྲག་རྒྱས་པར་འཆད་པ་ནི། དེ་ལ་འདིར་ཡང་ཏིག་གཅེས་པའི་སྒྲོན་མེ་སོགས་ཁྲིད་ཀྱི་ཟིན་བྲིས་གཞུང་དོན་རབ་གསལ་ལྟར་ལ། གཏེར་གཞུང་སྔོན་
འགྲོ་གཟེར་ལྔ་མི་བསྡུ་བར་ཚང་བར་གུང་སྤྲད་དེ། ཉམས་སུ་ལེན་པར་མཛོད་ཅིག་བར་མཐར་ཆགས་སུ་དལ་བུར་འཆད། དེ་ལྟར་ཞིབ་རྒྱས་སུ་བསྩལ་པ་ལྟར་ཉམས་སུ་བླངས་ནས་རིང་པོར་མི་ཐོགས་པར་རང་རིག་བླ་མ་རྡོ་རྗེ་དྲག་པོ་རྩལ་གྱི་གོ་འཕང་བདེ་བླག་ཏུ་རྙེད་པའི་ཐབས་ཁྱད་པར་འཕགས་པ་འདི་ལ་ཅིས་ཀྱང་བརྩོན་འཚལ་ཞིང་། དེ་ལས་བྱུང་བའི་དགེ་རྩ་ཡང་སོགས་ཀྱིས་མཚམས་སྦྱར་ལ་བསྔོ་སྨོན་བཅས་བྱའོ།། ༈ །།བྱང་གཏེར་རྒྱལ་བ་ཞི་ཁྲོ་ཚེ་དཔག་མེད་ལྷ་བཅུ་གསུམ་གྱི་དཀྱིལ་འཁོར་ཆེན་པོ་སྒྲུབ་ཅིང་མཆོད་པའི་ཆོ་ག་ཡིད་བཞིན་སྤྲིན་ཕུང་ལྟར་དག་སྣང་ཚེ་གུར་སྦྲགས་མའི་དབང་དོན་སྒྲུབ་པ་ལ། ཚིག་བདུན་གསོལ་འདེབས་རྗེས། སྔོན་འགྲོ་གཟེར་ལྔ་བླ་མའི་རྣལ་འབྱོར་གྱི་མཐར། བདག་ཉིད་དྲག་པོ་རྩལ་དུ་བསྐྱེད་ཅིང་། གཞི་གནས་ཀྱི་བདག་པོར་སྨིན་ལམ་རྒྱས་འབྲིང་གང་རུང་གི་དབུར་འབྱུང་བའི་གཏོར་མ་དཀར་དམར་གཏང་། རྒྱལ་ཆེན་མཆོད་པ། བགེགས་བསྐྲད་རྗེས། ཐུགས་སྒྲུབ་ཧཱུྃ་གི་ཕྲིན་ལས་ལྟར། ཧཱུྃ༔ ཕྱི་ནང་སྣོད་བཅུད་སྣང་བ་སོགས་ལྷ་མཚམས་དང་། སྲུང་འཁོར། བཤགས་པ། བྱིན་འབེབ། སྨན་རག་གཏོར་མཆོད་བྱིན་རླབས། ཏིང་འཛིན་རྣམ་གསུམ་ནས། ཕྱོགས་སྐྱོང་སྡེ་བརྒྱད་དྲེགས་པའི་སྲོག་རྩ་འདུས༔ ཞེས་པའི་བར་ལྷ་སྔགས་རྣམས་དོར་ནས་ཚིག་རྗེས་དོན་དྲན་གྱིས་བདག་བསྐྱེད་གསལ་གདབ། མདུན་རྟེན་རྣམས་ཚེ་སྒྲུབ་ཅིང་མཆོད་པའི་ཆོ་
ག་ཡིད་བཞིན་སྤྲིན་ཕུང་ལྟར། ཨོཾ་སྭ་བྷཱ་ཝས་སྦྱང་། སྟོང་པའི་ངང་ལས་མདུན་དུ་པད་ཟླའི་སྟེང་དུ།སོགས་ནས། སྣང་ལ་རང་བཞིན་མེད་པར་གྱུར། བར་གྱིས་བསྐྱེད། བདག་མདུན་ཆབས་ཅིག་པར། དུས་གསུམ་སངས་རྒྱས་སོགས་ཀྱིས་དབང་བསྐུར། སྤྱན་འདྲེན་ནི། ཧཱུྃ༔ སྔོན་གྱི་བསྐལ་པའི་སོགས་ཧཱུྃ་གི་ཕྲིན་ལས་ལྟར། གུ་རུ་དེ་ཝ་ཌཱ་ཀི་ནཱི་བཛྲ་ས་མ་ཡ་ཛ་ཛ༔བར། ཧཱུྃ། ནུབ་ཕྱོགས་བདེ་བ་སོགས་ཚེ་སྒྲུབ་ཆོ་ག་ལྟར། དངོས་གྲུབ་བསྩལ་དུ་གསོལ། །བར། ཧཱུྃ༔ བཞེངས་ཤིག་པདྨ་སོགས་ཐུགས་སྒྲུབ་ཧཱུྃ་གི་ཕྲིན་ལས་ལྟར་བཞེངས་བསྐུལ། བཞུགས་གསོལ། ཕྱག་འཚལ་ཚིགས་བཅད་རྗེས། འཇིག་རྟེན་འདྲེན་པའི་སོགས་ཀྱི་ཕྱག་འཚལ་ཤྭ་ལོ་ཀ་སྦྱར་ཞིང་། ཨ་ཏི་པཱུ་སོགས་མཆོད་པ་རྣམས་དང་། བསྟོད་པའི་མཐར། པདྨ་དབང་གི་གཞལ་ཡས་ཆེན་པོ་ན༔ མ་ཆགས་པདྨ་འབར་བའི་གདན་སྟེང་དུ༔ བཅོམ་ལྡན་མགོན་པོ་ཡེ་ཤེས་ཚེ་དཔག་མེད༔ འཆི་མེད་ཚེ་ཡི་ལྷ་ཚོགས་རྣམས་ཀྱིས་བསྐོར༔ རྡོ་རྗེ་ཚེ་ཡི་ལྷ་ལ་ཕྱག་འཚལ་བསྟོད༔ ཅེས་སྦྱར། ཧཱུྃ༔ ཆོས་ཀྱི་དབྱིངས་ཀྱི་སོགས་ཐུགས་སྒྲུབ་ཕྲིན་ལས་ཀྱི་ཛཔ྄་བསྐུལ་མཐར། ཧཱུྃ་བསྙེན་སུམ་བརྒྱ་ཉེར་གཅིག་ཕྱག་བཞེས་ལྟར་གྱི་རྗེས་སུ། སྤྲོ་བསྡུའི་དམིགས་པ་སྤྱི་འགྲེ་བཅས། ཚེ་བསྙེན་ཨོཾ་ཨ་མཱ་ར་ཎི་ཅི་འགྲུབ་བཟླ། ཐུགས་སྒྲུབ་ཕྲིན་ལས་ཀྱི་ཧཱུྃ༔ སྐྱེ་འགག་མེད་པ་སོགས་དོན་བསྟོད་བྱ། བྱང་ལུགས་ཆོས་སྲུང་གཏོར་འབུལ་
བསྡུས་པ་༼དི༽གཏང་། ཐུགས་སྒྲུབ་ཧཱུྃ་ཕྲིན་བཞིན་ཚོགས་མཆོད་ཕུལ་མཐར། ལས་བུམ་འཁྱིལ་པས་བསྒྲུབ། རིག་མེ་དོར་ཞིང་གནང་བ་ནོད། དབང་དངོས་གཞིར། དབང་སྔ་མའི་མཐར་སྦྲེལ་ཏེ་མི་བསྐུར་ན། ན་མོ་ཤེས་བྱའི་སོགས་ཚེ་སྒྲུབ་ཆོ་ག་ལྟར་ལས་བུམ་ཆུས་ཁྲུས་དང་། བགེགས་གཏོར་བརླབ་བསྔོ་བསྐྲད་པ། སྲུང་འཁོར་བཅས་ཐུགས་སྒྲུབ་ལྟར་བྱ་དགོས། གང་ལྟར་ནའང་སེམས་བསྐྱེད་གསལ་བཏབ་ནས། གདོད་མའི་མགོན་པོ་སོགས་ཚེ་སྒྲུབ་ཆོ་གའི་དབུ་ནས་འབྱུང་བའི་ལོ་རྒྱུས། འདི་ཉིད་ཡུམ་བརྒྱུད་ཁོ་ན་གཙོ་ཆེར་བཞུགས་པ་ལས་བྱོན་པའི་སྨིན་བྱེད་ཟབ་མོ་བསྒྲུབ་པར་བགྱི་བ་ལ་སོགས་ཀྱིས་མཚམས་སྦྱར་ལ་མཎྜལ་འབུལ་དུ་གཞུག །བླ་མ་དང་བཅོམ་ལྡན་འདས་མགོན་པོ་ཚེ་དཔག་ཏུ་མེད་པ་ཐ་མི་དད་པའི་དྲུང་དུ་གསོལ་བ་འདེབས་པ་འདིའི་རྗེས་ཟློས། ཚེ་སྒྲུབ་ཆོ་གའི་དཀྱུས་ཀྱི་བདག་འཇུག་ལྟར། བླ་མ་ཚེ་དཔག་སོགས། མདུན་གྱི་ནམ་མཁར་ཚེ་ལྷ་རྒྱལ་བའི་དཀྱིལ་འཁོར་པ་རྩ་གསུམ་སྲུང་མའི་ཚོགས་ཀྱིས་བསྐོར་བའི་སྤྱན་སྔར་རྩེ་གཅིག་དད་པས་བྱང་ཆུབ་བར་དུ་སྐྱབས་སུ་འགྲོ་བའི་བློས་འདིའི་རྗེས་ཟློས། འགྲོ་བའི་དཔལ་མགོན་སོགས། མར་གྱུར་གྱི་འགྲོ་བ་རྣམས་བྱང་གྲོལ་དམ་པར་འགོད་པའི་སླད་དུ་བླ་མ་ཚེ་ལྷའི་གོ་འཕང་འཐོབ་པའི་ཕྱིར་རྒྱུད་སྨིན་པར་བྱས་ཏེ། ཟབ་ལམ་ཉམས་སུ་བླང་བར་བགྱིའོ་སྙམ་པས་
འདིའི་རྗེས་ཟློས། སེམས་བསྐྱེད་འགྲོ་བ་སོགས། དབང་གི་གཞི་སྒྲུབ་པ་ཡེ་ཤེས་པའི་བྱིན་དབབ་པའི་སླད་དུ་དམིགས་པ་འདི་ཉིད་རྩེ་གཅིག་ཏུ་སྒོམ་འཚལ། སྭ་བྷཱ་ཝ་སོགས་ཀྱིས་སྟོང་པར་སྦྱངས་ནས། སློབ་མ་ལྷར་བསྐྱེད་ཅིང་། སྤྱན་འདྲེན་མཐར། ཨོཾ་ཨ་མཱ་ར་ཎི་དང་། ཛྙཱ་ན་ཨཱ་ཝེ་ཤ་ཡ་ཨ་ཨཱཿ ཞེས་སྦྲེལ་བ་བཟླས་པས་བྱིན་དབབ། དེ་ནས་ཚེ་འགུགས་པའི་སླད་དུ་བདག་མདུན་ལྷ་ཚོགས་ཀྱི་ཐུགས་ཀ་ནས་འོད་ཟེར་ལྕགས་ཀྱུའི་དབྱིབས་ཅན་དང་། རིགས་བཞིའི་ཚེ་བདག་ལྷ་མོ་མགྱོགས་མའི་ཚོགས་གྲངས་མེད་པ་འཕྲོས་པས། ཕྱོགས་བཅུའི་ཞིང་རབ་འབྱམས་ན་བཞུགས་པའི་རྩ་གསུམ་རྒྱལ་བའི་བྱིན་རླབས། རིགས་བཞིའི་ཚེའི་དངོས་གྲུབ། བརྟན་གཡོ་སྣོད་བཅུད་ཀྱི་དྭངས་མ་རྣམས་འོད་ཟེར་སྦྲང་རྩིའི་རྣམ་པར་བསྡུས། ཁྱེད་རང་རྣམས་དང་ཚེ་རྫས་ལ་བསྟིམས་པས་འཆི་མེད་ཚེ་ལ་དབང་བའི་རིག་འཛིན་ཐོབ། རྫས་ཐམས་ཅད་མྱང་གྲོལ་བདུད་རྩི་དངོས་གྲུབ་ཀྱི་དབྱིག་ཏུ་འཁྱིལ་བའི་མོས་པ་མཛོད། ཧྲཱིཿ དཀར་མོ་མགྱོགས་མ་སོགས་གྱེར། དངོས་གཞིའི་དབང་བསྐུར་བ་ལ། སྐུ་གསུང་ཐུགས་དང་ཡོངས་རྫོགས་གཏོར་དབང་མཐའ་རྟེན་བཅས་རིམ་པར་འབྱུང་བ་ལས། ཐོག་མར་སྐུ་བུམ་པའི་དབང་བསྐུར་བའི་དམིགས་པ་འདི་
བཞིན་མཛོད། བླ་མ་དང་མདུན་བསྐྱེད་བཅོམ་ལྡན་འདས་དབྱེར་མེད་པས་རྣམ་རྒྱལ་བུམ་པའི་དབང་བསྐུར་བས། བུམ་བཅུད་བདུད་རྩིའི་རྒྱུན་གྱིས་ལུས་ཀྱི་ནང་གང་། ལུས་ཀྱི་སྒོ་ནས་གཞན་གྱི་སྲོག་བཅད་པ་ལ་སོགས་པའི་སྒྲིབ་པ་མ་ལུས་པ་དག །སྐུ་རྡོ་རྗེ་འཆི་མེད་རྟག་པའི་ཚེ་ཐོབ་པར་མོས། ཨོཾ། བདེ་ཆེན་སྐུ་ཡི་སོགས་དང་། སྔགས་ཨ་མཱ་ར་ཎི་བརྗོད་པས་བུམ་དབང་བསྐུར་ཞིང་བུམ་ཆུ་སྦྱིན། བདག་མདུན་གྱི་ལྷ་ཚོགས་ལས་གསུང་རྡོ་རྗེ་ཚེ་དཔག་མེད་པའི་སྐུ་དཔག་ཏུ་མེད་པ་བྱོན། སློབ་མའི་མགྲིན་པར་ཐིམ་པས། ངག་གི་སྒོ་ནས་བདག་གཞན་གྱི་སྲོག་གཅོད་དུ་བསྩལ་པ་ལ་སོགས་པའི་སྒྲིབ་པ་དག །གསུང་རྡོ་རྗེ་འགག་མེད་རྟག་པའི་ཚེ་ཐོབ་པར་མོས། ཨཱཿ བདེ་ཆེན་གསུང་གི་སོགས་དང་། སྔགས་གོང་བཞིན་བརྗོད། ལྷ་ཚོགས་རྣམས་ཀྱི་ཐུགས་ཀ་ནས་བདེ་ཆེན་དབྱིངས་ཀྱི་མཁའ་འགྲོའི་ཚོགས་སྤྲོས། སློབ་མའི་སྙིང་གར་ཐིམ་པས། ཡིད་ཀྱི་སྒོ་ནས་སྲོག་གཅོད་པར་བསམས་པ་དང་། དེ་ལྟར་བགྱིས་པ་ལ་ཡི་རང་བ་ལ་སོགས་པའི་སྒྲིབ་པ་བག་ཆགས་དང་བཅས་པ་དག །ཐུགས་རྡོ་རྗེ་འཁྲུལ་མེད་རྟག་པའི་ཚེ་ཐོབ་པར་མཛོད། ཧཱུྃ། བདེ་གཤེགས་ཐུགས་ཀྱི་སོགས་སྔགས་བཅས་བརྗོད། བྱིན་རླབས་ཡོངས་རྫོགས་ཚེ་གཏོར་གྱི་དབང་བསྐུར་བ་ནི། གཏོར་མ་ཚེ་ལྷ་
ཡོངས་རྫོགས་ཀྱི་དཀྱིལ་འཁོར་རྟེན་དང་བརྟེན་པར་བཅས་པ་གསལ་བའི་སྟེང་གི་ཆ་ལ་བརྒྱུད་པའི་བླ་མ་ཐམས་ཅད་ཐོ་བརྩེགས་སུ་བཞུགས་པ་རྣམས་ཀྱི་ཕྱག་ཏུ་ཚེའི་བུམ་པ་བསྣམས་ཤིང་། གཞན་ཡང་ཚེ་བདག་རྒྱལ་བ་གྲུབ་པའི་རིག་འཛིན་ལྷ་དང་མཁའ་འགྲོའི་ཚོགས་དང་བཅས་པ་རྣམས་ཚེའི་དངོས་གྲུབ་ཀྱི་གཟི་བྱིན་འོད་དུ་འབར་ཞིང་། བདག་དང་སློབ་མ་ལ་དགྱེས་པའི་ཚུལ་དུ་བཞུགས་པ། ཁྱེད་རང་རྣམས་ཀྱི་སྤྱི་བོར་སྤྱན་དྲངས་ཤིང་ཐུགས་དམ་བསྐུལ་པས་སྐུ་གསུང་ཐུགས་ལས་འོད་ཟེར་འཕྲོས། འཁོར་འདས་ཀྱི་ཚེ་བཅུད་བསྡུས་པ་ཕྱག་གི་བུམ་པར་བསྐྱིལ། འཆི་མེད་ཡེ་ཤེས་ཀྱི་བདུད་རྩིར་གྱུར་པ་ཁོལ་ཞིང་ལུད་པ་དང་། ལྷ་ཚོགས་རིག་འཛིན་བརྒྱུད་པ་དང་བཅས་པའི་སྐུའི་ཆ་ཐམས་ཅད་ནས་ཀྱང་བདེ་ཆེན་ཚེའི་དངོས་གྲུབ་བདུད་རྩིའི་ཆར་རྒྱུན་བབས་པ་རོ་གཅིག་ཏུ་འདྲེས། སློབ་མའི་སྤྱི་བོ་ནས་ཞུགས། ལུས་ཀྱི་ནང་གང་བའི་འོད་ཟེར་བ་སྤུའི་སྒོ་ནས་ཉུག་གིས་ཐོན་པ་རྣམས་ཕ་ལམ་ལས་གྲུབ་རྡོ་རྗེར་གྱུར་པས་བར་ཆད་ཐམས་ཅད་བསྲུང་། མི་འགྱུར་རྡོ་རྗེ་ཚེའི་དབང་ཚེ་དཔག་མེད་པ་དང་སྐལ་པ་མཉམ་པ་ཐོབ་པར་མོས། ཆོས་སྐུ་ཀུན་བཟང་སོགས་སྔགས་བཅས་དང་། གཏོར་མ་གནས་གསུམ་དུ་འཇོག་བཞིན། སངས་རྒྱས་བྱང་ཆུབ་སོགས་བརྗོད། མཐའ་རྟེན་རིགས་བཞིའི་
དབང་རྟེན་རྣམས་ཀྱིས་གནས་སོ་སོར་དབང་བསྐུར་ཞིང་རྒྱས་བཏབ་པས་བར་ཆད་ཀྱི་གཡུལ་ལས་རྣམ་པར་རྒྱལ་ཞིང་། རིགས་བཞིའི་ཚེ་དབང་དངོས་གྲུབ་ཐམས་ཅད་ཐོབ་པར་མོས། རྡོ་རྗེ་རིགས་ཀྱི་སོགས་བརྗོད་ཅིང་། རྫས་རྣམས་ཀྱིས་དབང་བསྐུར། སོ་སོའི་སྨོན་ལམ་མགོར། སྐལ་ལྡན་རྡོ་རྗེའི་སློབ་མ་རྣམས་ཀྱི་ཚེ་སྲོག་ཅེས་ཁ་བསྒྱུར། སླར་ཡང་ཚེ་འབྲང་ཐོགས་ལ། ཚེ་འབྲང་གི་ལྷ་ཚོགས་ཁྱེད་རང་རྣམས་ལ་ཐིམ་པས་ལྷ་དང་བདག་གཉིས་སུ་མེད་ཅིང་སྐྱེ་འཆི་བགྲེས་རྒུད་དང་བྲལ་བའི་ཚེ་དབང་ཐོབ་པར་མོས། བཅོམ་ལྡན་མགོན་པོ་སོགས་བརྗོད་ཅིང་སྤྱི་བོར་བཞག །འཁོར་འདས་དྭངས་བཅུད་བསྡུས་པའི་རིལ་བུ་ཚེ་ལྷ་རྒྱ་མཚོའི་རྡོ་རྗེ་གསུམ་གྱི་བྱིན་རླབས་འདུས་པའི་གོང་བུ་ཁྱེད་རང་རྣམས་ཀྱི་གནས་གསུམ་དུ་གཏུགས་ཤིང་ལོངས་སྤྱད་པས་ཚེ་དབང་ཕུན་སུམ་ཚོགས་པའི་དཔལ་ལ་རྟག་ཏུ་སྤྱོད་པའི་དབང་ཐོབ་པར་མོས། འཇིགས་པ་མེད་པ་སོགས་ཀྱིས་ཚེ་རིལ་གནས་གསུམ་དུ་གཏུགས་ཤིང་སྦྱིན། སློབ་དཔོན་གྱིས་ཚེ་ཆང་ཀ་པཱ་ལ་གཡོན་གྱིས་བཟུང་། གཡས་པས་མདའ་དར་མདིལ་གྱིས་དཀྲུགས་ཤིང་། ལྷ་ཚོགས་རྣམས་ཀྱི་ཐུགས་ཀའི་འོད་ཀྱིས་བསྐུལ་པས་ཚེ་ལྷ་མགྱོགས་མ་རྣམས་ལས་རང་འདྲའི་སྤྲུལ་པ་གྲངས་མེད་པ་སྤྲོས། སྟོང་གསུམ་ཕྱོགས་བཅུའི་འཇིག་རྟེན་
རབ་འབྱམས་ཀྱི་ཚེ་བཅུད་བསྡུས་པ་ཚེ་ཆང་ལ་བསྟིམས་པས། འཆི་མེད་ཀྱི་ཨ་མྲྀཏ་ཟེག་མ་ལས་བཀྲ་ཤིས་ཀྱི་རི་མོ་རབ་ཏུ་འཚེར་བཞིན་པ་ཁྱེད་རང་རྣམས་ལ་དབང་བསྐུར་ཞིང་བཅུད་མྱང་བས་རྡོ་རྗེའི་སྲོག་འགྲུབ་པར་མོས། ཚེ་བདག་ཆེན་མོ་དཀར་མོ་སོགས་བརྗོད་ཅིང་རྒྱས་འདེབས་བཅས་གཞུང་གསལ་ལྟར་བྱ། བར་ཆད་བསྲུང་ཞིང་ཚེ་སྦ་བའི་སླད་དུ་ཁྱེད་རང་རྣམས་སྐད་ཅིག་གིས་ཁྲོ་རྒྱལ་རྟ་མགྲིན་སོགས་རྟ་སྔགས་བཟླས་མཐར། སློབ་དཔོན་གྱི་ཕྱག་གི་རྡོ་རྗེས་ཁྱེད་རང་རྣམས་ཀྱི་མདུན། དཔུང་པ་གཡས་གཡོན། རྒྱབ། སྤྱི་མགྲིན་སྙིང་ག་བཅས་ལུས་ཀྱི་གནས་བདུན་སོ་སོར་རྒྱས་བཏབ་པ་ལས་རྡོ་རྗེའི་རྡུལ་གྲངས་མེད་པ་འཕྲོས་པས་བ་སྤུའི་སྒོ་ཐམས་ཅད་ལ་ཁྱབ་པས་བསྲུང་ཞིང་བརྟན་པར་བྱས། སླར་སྙིང་གར་རེག་པས་སྐྱེ་འཆིའི་རྟོག་པ་བྲལ་བའི་འཆི་མེད་གཉུག་མའི་དབྱིངས་སུ་རྒྱས་ཐེབས་པར་མོས། དང་པོ་རྩེ་གཅིག་སོགས་བརྗོད། དེ་ལྟར་རྡོ་རྗེའི་ཚེ་དབང་ཟབ་མོ་ཐོབ་པ་དེ་ཉིད་འཛིན་པ་དམ་ཚིག་ལ་རག་ལས་པས། དེའི་ཕྱིར་གསང་བ་སྤྱི་དང་བྱེ་བྲག་གི་དམ་ཚིག་ལས་མི་འདའ་བར་བསྲུང་དགོས་ཤིང་། དེ་ཐམས་ཅད་ཀྱི་རྩ་བ་རྡོ་རྗེ་སློབ་དཔོན་གྱི་གསང་བ་གསུམ་གྱི་དམ་ཚིག་ལ་འདུ་བས་དེ་ཉིད་སྲོག་ལས་གཅེས་པར་བསྲུང་ཞིང་བཀའ་བསྩལ་ཕྲ་མོའང་མི་འདའ་བར་བགྱིད་དགོས་པར་གདམས་པ་འདི་ལ་སྙན་གཏོད་
འཚལ། དེ་རིང་ཕྱིན་ཆད་སོགས། དེ་ལྟར་བསྒོས་པའི་དམ་ཚིག་བསྲུང་བར་ཁས་བླངས་ཤིང་མི་འདའ་བའི་ཕྱིར་མནའ་འདོར་བ་འདིའི་རྗེས་ཟློས། ས་མ་ཡ་ན་ར་ཀན། གཙོ་བོས་ཇི་ལྟར་སོགས་གཞུང་བཞིན་དང་། རྗེས་ཆོག་སློབ་དཔོན་གྱིས་ཚོགས་ལ་རོལ་ཞིང་། ལྷག་མ་བསྔོ་བ་ཕྱིན་ཐུགས་སྒྲུབ་དྲག་པོ་རྩལ་གྱི་སྨིན་ལམ་དབང་གི་ཆུ་བོ་ཁྱེར་བདེར་བསྡེབས་པ་རིན་ཆེན་ཕྲ་མཛེས་ཀྱི་མཇུག་ཏུ་གསུངས་པ་ལྟར་ཧཱུྃ་གི་ཕྲིན་ལས་དང་བསྡེབས་ཤིང་མཐར་ཆགས་སུ་བཏང་བ་ལ། བསྟོད་པའི་རྗེས་སུ། འཇིག་རྟེན་འདྲེན་པའི་སོགས་ཤྭ་ལོ་ཀ་གཅིག་བསྣན་པ་ཙམ་ཁྱད་པར་རོ།། ༈ །།རྡོ་རྗེ་གླིང་པའི་གཏེར་བྱོན་སྙན་བརྒྱུད་ཟུང་འབྲེལ་གུ་རུ་དྲག་པོའི་དབང་བསྐུར་བཀླག་ཆོག་ཏུ་བཀོད་པ་ཟབ་ལམ་ཟླ་བའི་བདུད་རྩི་ལྟར་དབང་སྒྲུབ། དབང་དངོས། རྗེས་བཅས་བྱའོ།། ༈ །།རཏྣ་གླིང་པའི་གུ་རུ་དྲག་པོ་ཡང་གསང་བླ་མེད་མེ་རླུང་འཁྱིལ་པའི་དབང་རྒྱས་པ་རྡོ་རྗེའི་ཕྲེང་བ་བལྟས་ཆོག་ཏུ་བཀོད་པ་ཁྲག་འཐུང་ཐུགས་ཀྱི་སྙིང་པོ་ལྟར་བདག་བསྐྱེད། སྟ་གོན། ལས་བྱང་མེ་རླུང་འཁྱིལ་པ་ལ་བརྟེན་པའི་དབང་སྒྲུབ། རྩ་བའི་དབང་རྒྱས་མཐར་ཆགས་སུ་བསྐུར། དྲེགས་པའི་སྲོག་དབང་འདིར་མི་བཞུགས། ཡེ་ཤེས་བཅུད་ཀྱི་སྙིང་པོ་ལྟར་དོན་དབང་ནོར་བུ་ལུགས་སྦྱར། རྗེས་ཆོག་དང་། བྱིན་རླབས་བདུད་རྩིའི་སྙིང་པོ་ལྟར་དབང་བསྒྲུབ། བསྡུས་པ་གཏོར་དབང་། རྗེས་བཅས་བྱའོ།། ༈ །།པདྨ་གླིང་པའི་གུར་དྲག་དམར་ཆེན་མེ་ལྕེ་ཕྲེང་བའི་
དབང་འདོད་བུམ། ༼༢༤༽ལྟར་ཉང་དང་རྡོར་གླིང་ཟུང་འབྲེལ་དྲག་པོའི་དབང་བཞི་རྡོ་རྗེ་སྤྱི་བླུགས་ལ་པད་གླིང་དྲག་དམར་གྱིས་ཁྱད་པར་ཕྱེ་ཞིང་། མཁའ་འགྲོའི་ཌཱར་ཐོད་དབང་ཚིག་དྲིས་ལན་ནས་བླངས་པ་བཅས་ཀྱིས་དབང་སྒྲུབ་ཅིང་བསྐུར་རོ།། ༈ །།འབྲུག་པ་པདྨ་དཀར་པོའི་དག་སྣང་བླ་མ་དྲག་པོ་ཀཱི་ལ་ཡའི་དབང་དོན་སྒྲུབ་པ་ནི། ཚིག་བདུན་དང་། འབྲུག་ཆེན་ཆོས་ཀྱི་སྣང་བས་མཛད་པའི་བརྒྱུད་འདེབས་སམ། བསྡུ་ན། ཆོས་དབྱིངས་རང་བྱུང་སྐུ་གསུམ་རོལ་པའི་ཞིང་། །ཡོངས་ལ་དབང་བསྒྱུར་རྒྱལ་བ་ཀུན་འདུས་མགོན། །རྗེ་བཙུན་ཆེན་པོ་པདྨ་ཐོད་ཕྲེང་ལ། །གསོལ་བ་འདེབས་སོ་བྱིན་རླབས་དབང་བསྐུར་སྩོལ། །གང་གི་ཆོ་འཕྲུལ་བསམ་ཡས་རོལ་པའི་གར། །སྟོན་འཁོར་གཉིས་མེད་ཆུ་ཟླའི་གར་བསྒྱུར་བ། །ཀླུ་ཡི་རྒྱལ་མཚན་མི་ཕམ་པད་དཀར་ལ། །གསོལ་བ་འདེབས་སོ་བདག་རྒྱུད་སྨིན་གྲོལ་མཛོད། །བྱིན་རླབས་དོན་གྱི་དབང་གི་ཆུ་བོ་ཆེའི། །འབྱུང་གནས་རྒྱལ་ཚབ་སྐྱེས་མཆོག་སྤྲུལ་པའི་སྐུ། །རྩ་བའི་བླ་མའི་བར་དུ་རིམ་བྱོན་ལ། །གསོལ་བ་འདེབས་སོ་དོན་གཉིས་ལྷུན་གྲུབ་སྩོལ། །སྙིང་རྗེའི་སྤྲིན་སྟུག་མཁའ་ཁྱབ་བརྡལ་བ་ལས། །ལོག་འདྲེན་འདུལ་ཕྱིར་དབང་དྲག་རོལ་པའི་སྐུ། །ཆེ་མཆོག་དྲག་པོ་ཁྲག་འཐུང་ཀཱི་ལ་ཡར། །གསོལ་བ་འདེབས་སོ་བདུད་སྡེའི་གཡུལ་འཇོམས་ཤོག །
ཡེ་ཤེས་རོལ་པའི་ཕྱག་རྒྱར་བཞེངས་པའི་ལྷ། །ཞི་ཁྲོ་སྤྲུལ་འཁོར་མ་སྲིང་མཁའ་འགྲོའི་ཚོགས། །བཀའ་སྡོད་དམ་ཅན་ཕོ་ཉར་བཅས་པ་ལ། །གསོལ་བ་འདེབས་སོ་ཕྲིན་ལས་དངོས་གྲུབ་སྩོལ། །བསྐྱེད་སྔགས་རྫོགས་པའི་ཏིང་འཛིན་མཐར་ཕྱིན་ཏེ། །སྣང་གྲགས་རྟོག་ཚོགས་ཡེ་ཤེས་འཁོར་ལོར་སད། །མ་རིག་བདུད་ཚོགས་མི་གནས་དབྱིངས་སུ་བསྒྲལ། །རབ་འབྱམས་ཕྲིན་ལས་རྒྱ་མཚོ་ལྷུན་གྲུབ་ཤོག །ཅེས་པའི་རྗེས། སྐྱབས་སེམས་ནི། བདག་ནི་མགོན་པོ་སོགས་རྩ་གཞུང་ལྟར་ལན་གསུམ། བགེགས་གཏོར་བསྔོ་བ་ནི། རང་ཉིད་སྐད་ཅིག་གིས་ལས་ཀྱི་ཧེ་རུ་ཀཿཡཀྴ་མེ་དབལ་སྨུག་ནག་ཐོ་བ་དང་སྡིགས་མཛུབ་མཛད་པ། དུར་ཁྲོད་རོལ་པའི་ཆས་ཅན་གཟི་བརྗིད་འབར་བའི་སྐུར་གསལ་བའི་ང་རྒྱལ་བཟུང་ནས། བགེགས་གཏོར་བསང་སྦྱང་། བརླབ་འགུགས། བསྔོ་བ་རྣམས་སྤྱི་ལྟར་བྱས་ལ། བཀའ་བསྒོ་བ་ནི། ཧཱུྃ། ང་ནི་ཡཀྴ་མེ་དབལ་ཏེ། །པདྨ་དབང་གི་ཕོ་ཉ་བ། །བར་ཆད་བྱེད་པའི་བགེགས་ཐམས་ཅད། །རྒྱ་མཚོའི་མཐའ་ལ་བསྐྲད་པར་བྱ། །སུ་ཞིག་ང་ཡི་ཚིག་འདའ་བ། །དེ་ཡི་ལུས་སེམས་རྡུལ་དུ་རློག །དེ་འདྲའི་ཉེན་ལ་མ་བསྡོ་བར། །འདོད་པའི་མཆོད་སྦྱིན་འདི་ཁྱེར་ལ། ཁོར་ཡུག་རི་བོའི་སྐྱིབས་ལ་བྲོས། །ཨོཾ་བཛྲ་ཡཀྴ་ཧཱུྃ་ཕཊ། ཅེས་དང་།
ཧཱུྃ་བཞིའི་སྔགས་བརྗོད་པས་བསྐྲད། ཧཱུྃ། ཆོས་ཀུན་ཡེ་དག་ཡེ་རྫོགས་ལ། །བདུད་དང་ལོག་འདྲེན་གདོན་བགེགས་ཅི། །གློ་བུར་རྐྱེན་གྱིས་ཅིར་སྣང་ཡང་། །ཀ་དག་དབྱིངས་ལས་གཡོས་པ་མེད། །ཨོཾ་བཛྲ་རཀྵ་ཧཱུྃ། ཞེས་པས་མཚམས་བཅད། བདག་བསྐྱེད་ནི། ཨོཾ་སྭ་བྷཱ་ཝ་བི་སོགས་རྩ་གཞུང་ལྟར་མངོན་རྟོགས་ནས། སྤྱན་འདྲེན་མཐའི། གསལ་བ་ལ་རིམ་རིམ་ཐིམ་པར་གྱུར། ཅེས་བྱིན་རླབས་བསྡུ་བའི་དམིགས་པ་བཅས། ཛཔ྄་ཉེར་གཅིག་གམ་བདུན་བཟླ། མཐར་གཞུང་གསལ་གསོལ་གདབ་བཅས། དབུ་རྒྱན་གྱི་ཐོད་ཕྲེང་རིགས་ལྔ་ལས་དབང་ལེན་བྱ། བསྙེན་ཡིག་ལྟར་བཟླས་དམིགས་རྣམས་གསལ་བཏབ་ལ། ཛཔ྄་ཅི་ནུས་བསྙེན། དེ་ནས་མཆོད་རྫས་རྣམ་དག་ཆོས་དབྱིངས་ལྟ་བུས་བྱིན་གྱིས་བརླབ། མདུན་གྱི་རྟེན་རྣམས། སྭཱ་བྷཱ་ཝས་སྦྱངས་ནས། ཆོས་ཐམས་ཅད་ཡེ་སྟོང་ཁྱབ་གདལ་ཆེན་པོར་འབྱམས་ཀླས་པའི་ངང་ལས། དམིགས་མེད་སྙིང་རྗེ་སྒྱུ་མ་ཙམ་དུ་སྣང་ཆ་མ་འགགས་པའི་ཆོ་འཕྲུལ། མདུན་གྱི་སྐུ་རྟེན་གཏོར་མ་དང་བཅས་པ། རིག་འཛིན་ཆེན་པོ་པདྨ་དྲག་པོ་རྩལ་སོགས་མངོན་རྟོགས་ལྟར། འཇའ་འོད་སྣ་ལྔའི་དབུས་ན་གནས་པའོ། །གསུང་རྟེན་ཐོད་པ་བདུད་རྩིའི་དཀྱིལ་འཁོར་གྱི་དབུས་སུ་ཉི་ཟླའི་གྭའུ་ཁ་སྦྱོར་གྱི་སྦུབས་འོད་ལྔའི་ཀློང་དུ་ཧཱུྃ་དམར་པོའི་མཐར། རྩ་སྔགས་ཀྱི་ཕྲེང་བ་གློག་གི་ཞགས་པ་ལྟར་འཁྱིལ་བའི་རང་
སྒྲས་རྩ་གསུམ་དབྱིངས་ནས་བསྐུལ་ཞིང་། དམ་ཅན་མཁའ་འགྲོ་ལས་ལ་འགྱེད། གདོན་བགེགས་འབྱུང་པོ་རྡུལ་དུ་བརླག་པའི་མཐུ་བྱིན་འབར་བའོ། །ཐུགས་རྟེན་དེ་ཉིད་ཆ་གང་བའི་ཟླ་གདན་ལ་གསེར་གྱི་རྡོ་རྗེ་རྭ་གདེངས་བསྐལ་པའི་མེ་དཔུང་འབར་བ་ལས། ཕོ་ཉ་སྤྲུལ་པའི་ཚྭ་ཚྭའི་ཐོག་ཆར་འབེབ་པར་བསྐྱེད། ཡོན་ཏན་བུམ་པའི་ནང་དུ་བཅུད་བདུད་རྩིའི་རྒྱ་མཚོའི་དབུས་སུ་པད་སྡོང་ཡལ་ག་ལྔ་པའི་དབུས་དང་། ཕྱོགས་མཚམས་རྣམས་སུ་ཟླ་གདན་ལ། དབུས་སུ་བུདྡྷ་ཐོད་ཕྲེང་རྩལ། མདུན་དུ་རྡོ་རྗེ་ཐོད་ཕྲེང་རྩལ། གཡས་སུ་རཏྣ་ཐོད་ཕྲེང་རྩལ། རྒྱབ་ཏུ་པདྨ་ཐོད་ཕྲེང་རྩལ། གཡོན་དུ་ཀརྨ་ཐོད་ཕྲེང་རྩལ་རྣམས་དཀར་སྔོ་སེར་དམར་ལྗང་བའི་མདངས་ལྡན། ཐམས་ཅད་ཞི་མ་ཁྲོ་ཟ་འོག་སྨུག་པོའི་བེར་སོགས་མངོན་རྟོགས་འཕྲོས་ནས། འཁྱུད་དེ་རྡོ་རྗེ་སྐྱིལ་ཀྲུང་གིས་བཞུགས་པ། བར། ཕྲིན་ལས་ཀྱི་རྟེན་ཕུར་པ་དེ་ཉིད་རིག་འཛིན་ཆེན་པོ་ཀཱི་ལ་ཡ་རྒྱན་ཆས་ཡོངས་སུ་རྫོགས་པ་དབང་དྲག་འབར་བའི་གར་གྱི་རོལ་པའི་སྐུར་གྱུར། དེ་ལྟར་གསལ་བའི་ལྷ་ཚོགས་རྣམས་ལས་འོད་འཕྲོས་རྔ་ཡབ་གླིང་གི་སོགས་མངོན་རྟོགས་འཕྲོས་བཞིན་སྤྱན་འདྲེན་གྱེར། བྱིན་རླབས་བསྡུ་བསྟིམ་གྱི་དམིགས་པ་དང་སྔགས་སྔར་ལྟར་བཟླ་ཞིང་། དབང་བསྐུར་བཅས་ནར་འདེད་ཀྱིས། བདག་
ལ་ཞེས་པ་རྣམས་ཀྱི་མལ་དུ། ལྷ་ལ་ཞེས་བསྒྱུར་ནས། སྤྲུལ་པ་སྐུ་ཡི་ཆ་ལུགས་ཅན་དུ་གྱུར། བར། དེ་ནས་མཆོད་པ་ནི། ཧཱུྃ། དབང་དྲག་འབར་བའི་ལྷ་ཚོགས་དགྱེས་པའི་ཕྱིར། །ཞེས་པའི་ཚིག་རྐང་གཅིག་གི་འཕྲོས་སུ། ལྷ་རྫས་མེ་ཏོག་ཀུན་གྱིས་ནམ་མཁའ་བཀབ། །སོགས་རྩ་གཞུང་དཀྱུས་སུ་འབྱུང་བའི་མཆོད་བསྟོད་མཐར། བདག་མདུན་བར་འོད་ཟེར་སྤྲོ་བསྡུ་སྤྱི་འགྲོ་སྦྱར་བས་བཟླས་པ་ཅི་ནུས་ཀྱིས་ལྷ་ཚོགས་སྤྱི་དང་། བྱེ་བྲག་རྟེན་ལྔ་པོ་རེ་རེ་བཞིན་ལ་དམིགས་པ་གཏད་དེ། འཕྲོ་འདུའི་འཕྲུལ་འཁོར་ལྡན་པས་བཟླས་པ་རྩ་སྔགས་ཉིད་སོ་སོར་སྐབས་སྦྱར་གྱིས་ཅུང་ཟད་རེ་བསྙེན་མཐར། ཚོགས་རྫས་རཾ་ཡཾ་ཁཾ་གིས་བསང་སྦྱང་། ཨོཾ་ཨཱཿཧཱུྃ་ཧོཿས་བྱིན་བརླབས་ནས། ཚོགས་ཕུད་རིམ་པ་གསུམ་ཕུལ་རྗེས། སྲུང་མ་རྣམས་དང་གཞི་བདག་གི་གཏོར་མ་གོང་བཞིན་བསང་སྦྱང་བརླབ་སྟེ། སརྦ་དྷརྨ་པཱ་ལ་བྷཱུ་མི་པ་ཏི་ས་པ་རི་ཝཱ་ར་བཛྲ་ས་མཱ་ཛཿས་མགྲོན་སྤྱན་དྲངས། སརྦ་དྷརྨ་པཱ་ལ་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་ལན་གསུམ་གྱིས་སྲུང་མ་སྤྱི་དང་། ཨ་ཡ་མ་དུ་རུ་ཙ་ཤ་ན་ས་པ་རི་ཝཱ་ར་ཨི་དཾ་སོགས་ལན་གསུམ་གྱིས་དྲེགས་པ་སྡེ་བརྒྱད། ཨ་ཀཱ་རོ་ལན་གསུམ་གྱིས་གཞི་བདག་རྣམས་ལ་བསྔོས་ཏེ། ཨོཾ་བཛྲ་ཨརྒྷཾ་པུཥྤེ་ནས། ཤབྡ་པྲ་ཏཱིཙྪ་སྭཱ་ཧཱས་མཆོད། དམ་ཅན་རྒྱ་མཚོ་སྡེ་བརྒྱད་ཚོགས། །གཞི་བདག་འཁོར་དང་བཅས་རྣམས་ཀྱིས། །མཆོད་སྦྱིན་གཏོར་མ་སོགས་
ཀྱིས་ཕྲིན་ལས་བཅོལ། བྱིན་རླབས་ཀྱི་ཆོ་ག་བཀླག་ཆོག་ཏུ་བཀོད་པ་ཡེ་ཤེས་འོད་ཀྱི་ཕྲེང་བ་ལྟར་ལས་བུམ་བསྒྲུབ་པ་སོགས་ནས། དབང་དངོས་གཞིའི་བསྒྲལ་དབང་སྐབས། གཤེད་མས་བཙོན་ཁྲིད་པ་བཞིན་བྲུབ་ཁུང་དུ་བཅུག །ཅེས་པའི་མཚམས་སུ། པར་གྱུར། འགུགས་གཞུག་སྤྱི་འགྲོ་སྦྱར། དེ་ནས་དམིགས་པ་འདི་བཞིན་དུ་མཛོད། རང་གི་ཐུགས་ཀ་ནས་འོད་ཟེར་ལྕགས་ཀྱུ་སོགས། སྔགས་དམིགས་གོ་རིམ་བརྗོད་པའི་སྐབས་དབྱེ་རྫས་བདུག་ཅིང་སྒྲོ་གཉིས་ཀྱིས་དབྱེ་རྒྱ་བྱ། སྨྱོ་ཁྲག་བཏབ་ནས། ཚིག་པར་མོས་ཤིག །སླར་སྔགས་ཨརྩིག་ལ་ཤམ་བུ་འོག་མ་བཏགས་པ་བཟླ་བཞིན་ཕུར་པས་བསྒྲལ་ཞིང་། སྒྲོལ་གྲིས་གཏུབས་པའི་ལིང་རོ་སྨན་རཀ་གིས་བྲན་པ་ཆ་གཉིས་སུ་ཕྱེས་པས། ཕུད་ཧོམ་གཟར་དུ་བླུགས་པ་ཐོགས་ལ། དགྲ་བགེགས་བསྒྲལ་པའི་ཤ་ཁྲག་སོགས་ནས། ཁཱ་ཧིའི་བར་གྱིས་དཔལ་གཏོར་དུ་འབུལ། ཆ་གཅིག་པོ་དེ་སྡེ་བརྒྱད་གཏོར་མར་བླུགས་ལ། ཧཱུྃ། དྲེགས་པ་སྡེ་བརྒྱད་ཤ་ཁྲག་གཏོར་མ་བཞེས། །བདག་ཅག་འཁོར་དང་བཅས་ལ་གནོད་པ་ཡི། །སྲིད་པའི་ཁྲམ་ཁ་ཐམས་ཅད་དགྲ་ལ་སྒྱུར། །ལྷ་འདྲེའི་དམག་ཚོགས་མ་ལུས་དགྲ་ལ་དྲོངས། །ཕ་རོལ་བསམ་སྦྱོར་ངན་པའི་ལས་བརྩམས་པ། །བྱད་ཁ་ཕུར་ཁ་རྦོད་གཏོང་དྲག་པོ་དང་། །མཚེ་ཟོར་རྦད་འདྲེ་ཡུངས་ཟོར་འཕེན་པ་ཟློགས། །ས་བདག་ཀླུ་ཡིས་བྱད་དུ་
བཅུག་པ་ཟློགས། །ཐེའུ་རང་འབྱུང་པོ་སྲིས་ཀུན་ཐམས་ཅད་ཟློགས། །གཤིན་རྗེའི་འཁོར་ལོ་བདུད་ཀྱིས་ཁྲོམ་འདེབས་དང་། །མུ་སྟེགས་ངན་པས་བར་ཆད་བྱེད་པ་ཟློགས། །རྒྱལ་བསེན་རྣམས་ཀྱིས་སྨྱོ་འབོག་གཏོང་བ་དང་། །དྲང་སྲོང་གཟའ་དང་ཀླུ་གདོན་གནོད་པ་ཟློགས། །ཞང་ཞུང་ཛོ་ཟོར་སུམ་པའི་གླང་ཟོར་དང་། །བོན་པོ་རྣམས་ཀྱིས་བརྡ་ཟོར་འཕེན་པ་ཟློགས། །བནྡེའི་སྔགས་ཟོར་སྐྱེས་པའི་མདའ་ཟོར་དང་། །བུད་མེད་རྣམས་ཀྱིས་དམོད་ཟོར་འཕེན་པ༴ བདུད་ཀྱི་གཤེད་བཞི་རོ་ལངས་འབྱུང་པོ་དང་། །མ་མོ་རྣམས་ཀྱིས་ཁྲག་ཟོར་འཕེན་པ༴ མོ་རྩིས་ངན་དང་རྨི་ལམ་མཚན་མ་ངན། །ལྟས་ངན་མི་རུང་བརྒྱད་ཅུ་རྩ་གཅིག༴ བཞི་བརྒྱ་རྩ་བཞིའི་ནད་རྣམས་མ་ལུས་དང་། །གདོན་རིགས་ཉི་ཁྲི་ཆིག་སྟོང་ཚོགས་རྣམས༴ སྟོང་ཕྲག་བརྒྱད་ཅུའི་བགེགས་ཚོགས་མ་ལུས་དང་། །ཡེ་འདྲོགས་ཆེན་པོ་སུམ་བརྒྱ་དྲུག་ཅུ༴ གདོན་ཆེན་བཅོ་ལྔ་ལོ་ཟླ་ཞག་དུས་ཀེག །མི་མཐུན་ཕྱོགས་རྣམས་དགྲ་བགེགས་སྟེང་དུ༴ དུས་མིན་འཆི་བའི་འཇིགས་པ་བརྒྱད་རྣམས་དང་། །ལྟས་ངན་ཆོ་འཕྲུལ་དགྲ་བོའི་སྟེང་དུ་ཟློགས། །ཕྲིན་ལས་དྲག་པོ་ཤིན་ཏུ་མི་བཟད་པས། །སོད་ཅིག་ཐུལ་ཅིག་དགྲ་དང་བགེགས་ཀྱི་ཚོགས། །གཏད་དོ་གཉེར་རོ་སྲུང་མ་ཐུགས་དམ་ཅན། །ལེ་
ལོ་བཏང་སྙོམས་གཡེལ་བ་མ་མཛད་པར། །རྟགས་དང་མཚན་མ་མྱུར་དུ་སྟོན་མཛོད་ཅིག །རྣལ་འབྱོར་བདག་གིས་བཅོལ་པའི་ཕྲིན་ལས་རྣམས། །ད་ལྟ་ཉིད་དུ་འགྲུབ་པའི་ཕྲིན་ལས་མཛོད། །ཅེས་པའི་བསྐུལ་འདི་རྙིང་ལུགས་ལ་ཆེར་མི་སྣང་ཡང་། བཀའ་བརྒྱུད་སྤྱི་ལ་གྲགས་པ་ཉིད་སྦྱོར་དགོས་པ་འཇམ་མགོན་རྡོ་རྗེ་འཆང་ཆེན་པོའི་ཞལ་ཁྲིད་ཡིན་ཅིང་། སྡེ་བརྒྱད་གཏོར་མ་ཕྱི་རོལ་ཐེབས་ཕྱོགས་སུ་འབུལ་བའམ། དོ་གལ་ཆེ་ན་དམིགས་བྱའི་ཕྱོགས་སུ་འཕེན་པ་དམིགས་བསལ་དང་། གང་ལྟར་ཡང་། སྡེ་བརྒྱད་དྲེགས་པའི་ཚོགས་རྣམས་སོགས་ནས་མཐར་ཆགས་སུ་བསྐུར། རྗེས་རིམ་ནི། བརྡའི་འབུལ་ལེན་དང་བཅས་ཐབས་ཤེས་ཀྱི་ཚོགས་རྫས་ནང་གི་སྲེག་བླུག་ཏུ་རོལ། ལྷག་མ་འབྲུ་གསུམ་དང་། ཧ་ཧོ་ཧྲཱིཿས་བྱིན་གྱིས་བརླབ། ཨེ་ཨཱ་རལླི་ཕེཾ་གྱིས་མགྲོན་བཀུག་སྟེ། ལྷག་མའི་བཤལ་ཆུས་སོགས་རྩ་གཞུང་མཇུག་ལྡེབ་ནང་ལྟར་གཏང་། སྨོན་ལམ་གདབ། ཨོཾ་མ་ཧཱ་གུ་རུ་བཛྲ་ཀྲོ་དྷ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱ་ཧཱ། དེ་བཞིན་དུ། པཱ་དྱཾ་ནས། ཤབྡའི་བར་གྱིས་མཆོད། སྣང་བ་མཐའ་ཡས་སྐུ་གསུང་ཐུགས། །ཡོན་ཏན་ཕྲིན་ལས་ཐུགས་རྗེའི་ཐུགས། །གདུག་པ་འདུལ་མཛད་པདྨ་འབྱུང་། །རིག་འཛིན་ཆེན་པོར་ཕྱག་འཚལ་བསྟོད། །ཅེས་བསྟོད། མ་འབྱོར་བ་སོགས་དང་ཡིག་བརྒྱས་ནོངས་པ་བཤགས།
མདུན་བསྐྱེད་བརྟན་བཞུགས་སྤྱི་ལྟར་དང་། བདག་བསྐྱེད་ཉེར་བསྡུ་ནི། བླ་མ་དྲག་པོའི་ལྷ་ཚོགས་རྣམས། །ཡེ་དག་ཡེ་རྫོགས་ཆེན་པོའི་ངང་། །འོད་གསལ་ཐིག་ལེའི་ཀློང་དུ་བསྟིམ། །བདེ་བ་ཆེན་པོར་རོ་གཅིག་གྱུར། །དགེ་བསྔོ་ནི། དགེ་བ་འདི་ཡིས་མྱུར་དུ་བདག །བླ་མ་དྲག་པོ་འགྲུབ་གྱུར་ནས། །སོགས་དང་། ཤིས་བརྗོད་ཇི་ལྟར་རིགས་པས་མཐའ་བརྒྱན་པས་གྲུབ་བོ།། ༈ །།རིག་འཛིན་ལེགས་ལྡན་རྡོ་རྗེའི་དྲག་པོ་དབུ་དགུ་ཡེ་ཤེས་རང་གསལ་གྱི་དོན་དབང་བཀླག་ཆོག་ཏུ་བཀོད་པ་ཡེ་ཤེས་འོད་ཀྱི་ཞུན་ཐིགས་ལྟར་དབང་སྒྲུབ། དབང་དངོས། རྗེས་ཆོག་བཅས་བྱའོ།། ༈ །།བྱང་བདག་བཀྲ་ཤིས་སྟོབས་རྒྱལ་གྱི་བདུད་འདུལ་ཀརྨ་མ་ཧཱ་གུ་རུའི་ཕྲིན་ལས་དྲག་པོའི་སྲོག་གཏད་ཀྱི་ཆོ་ག་བྱིན་རླབས་གློག་གི་ཕྲེང་བ་ལྟར་དབང་སྒྲུབ། སྲོག་གཏད་དངོས། རྗེས་ཆོག་བཅས་བྱའོ།། ༈ །།མི་འགྱུར་ལས་འཕྲོ་གླིང་པའི་ཡང་ཟབ་རྩ་གསུམ་སྙིང་པོའི་བླ་མ་དྲག་པོ་པདྨ་གཏུམ་པོ་པདྨ་འོད་གསལ་མདོ་སྔགས་གླིང་པའི་ཉེ་བརྒྱུད་ཀྱི་དབང་ཆོག་དྲེགས་པ་ཀུན་འཇོམས་ལྟར་དབང་སྒྲུབ། དབང་དངོས། རྗེས་བཅས་བྱའོ།། ༈ །།འབྲི་གུང་དགོངས་ཟབ་རྡོ་རྗེ་གྲོ་ལོད་ཀྱི་སྒྲུབ་ཐབས་དབང་བསྐུར་ཡེ་ཤེས་རྩལ་བསྐྱེད་ལྟར་དབང་སྒྲུབ། དབང་དངོས། རྗེས་བཅས་བྱའོ།། ༈ །།ཞིག་པོ་གླིང་པ་གར་གྱི་དབང་ཕྱུག་རྩལ་གྱི་བླ་མ་དྲག་པོ་ཡང་གསང་མེའི་འཁོར་ལོ་ཞི་དྲག་གི་དབང་
ཆོག་གནམ་ལྕགས་ཟིལ་པ་བདུད་རྩིའི་བུམ་བཟང་གསལ་བར་བྱེད་པ་ལྟར་དབང་སྒྲུབ། དབང་དངོས། རྗེས་ཆོག་བཅས་བྱའོ།། ༈ །།འཇའ་ཚོན་གུར་དྲག་གཏོར་དབང་གོང་དུ་དཀོན་མཆོག་སྤྱི་འདུས་སྐབས་སུ་སོང་།། ༈ འཇའ་ཚོན་གུ་རུ་རྡོ་རྗེ་གྲོ་ལོད་ཞི་དྲག་གི་སྒྲུབ་ཐབས་དབང་ཆོག་དང་བཅས་པ་སྨིན་གྲོལ་བཅུད་དྲིལ་ལྟར་དབང་སྒྲུབ། དབང་དངོས། རྗེས་བཅས་བྱའོ།། ༈ །།བདུད་འདུལ་སྤྲུལ་སྐུའི་སྙིང་ཐིག་གི་གྲོ་ལོད་དབང་ཆོག་བྱིན་རླབས་སྤྲིན་འཕྲོ་བཀའ་རྒྱ་མ་མཚམས་སྦྱོར་གྱིས་བརྒྱན་པ་ལྟར་དབང་སྒྲུབ་སྐབས། ཞིང་སྐྱོང་རྗེས་གནང་ཡང་དཀྱུས་གཅིག་ཏུ་བསྒྲུབ་ན་སྟབས་བདེ་བས། ཞིང་སྐྱོང་གཏོར་འབུལ་བཞག་ནས། ཚོགས་མཆོད་དང་། རིག་མེ་དོར་ཞིང་གནང་བ་ནོད་པའི་མཐའ་བར་བཏང་ལ། ཞིང་སྐྱོང་གི་མཆོད་གཏོར་རྣམས་དམ་ཅན་སྤྱི་གཏོར་ལྟར་བསང་སྦྱང་བྱིན་གྱིས་བརླབས་ཏེ། ༼ཏི༽བསྟན་སྲུང་ཞིང་སྐྱོང་ཆེན་པོ་ཀུན་དགའ་གཞོན་ནུ་ཡབ་ཡུམ་གྱི་ལས་བྱང་གནམ་ལྕགས་མེའི་འཁོར་ལོ་དགྲ་བགེགས་རྡུལ་རློག་ལྟར། བདག་ཉིད་ལྷར་གསལ་ཞིང་བསྙེན་པ་ཅུང་ཟད་བཟླ། མདུན་རྟེན་བསྐྱེད་པ་ནས་མཆོད་པའི་རྗེས། ལམ་ཁྱེར་ལས་ཀྱི་བྱང་བུའི་མཆོད་པའི་མཇུག་གི་སྔགས་མཆོད་རྣམས་སྦྱར་ཞིང་། བསྟོད་པའི་མཐའ་བར་གཏང་། ཟུར་གསལ་སྔགས་བྱང་རྗེས་ལྟར་ཛཔ྄་བཟླས་ནི། མདུན་བསྐྱེད་ཞིང་སྐྱོང་དུ་གསལ་བའི་སྤྱི་བོར་སེང་གེ་སྒྲ་སྒྲོག་སོགས་ཀྱི་དམིགས་པ་གསལ་བཏབ་ནས། ཡི་དམ་ལྟར་བསྒྲུབ་པའི་ཡབ་ཡུམ་
རྒྱུན་བསྙེན་དང་། སྔགས་བྱང་དབུའི་གཙོ་འཁོར་ཡོངས་རྫོགས་ཀྱི་རྒྱུན་བསྙེན་སོ་སོར་བཟླ་ཞིང་། ཕྱི་མ་བུང་བསྐྱེད། སྤྲོ་ན། འབོད་རྦད་གསད་གསུམ་གྱི་སྔགས་ཀྱང་ཅུང་ཟད་རེ་བཟླ། མཐར་རྒྱས་པར་གསོལ་ཁ་དགོས་ཀྱང་། འདིར་གཞུང་དུ་དཔེ་ཆ་མི་བཞུགས་སྟབས། ལམ་ཁྱེར་ལས་ཀྱི་བྱང་བུ་ཉིད་མཐར་ཆགས་སུ་བཏང་རྗེས། ལས་བྱང་གནམ་ལྕགས་མེ་འཁོར་ལྟར་ཚོགས་བྱིན་རླབས། སྤྱན་འདྲེན། ཚོགས་མཆོད་ཕུལ་མཐར། ལས་བུམ་བསྒྲུབ། དངོས་གཞིར་གྲོ་ལོད་ཀྱི་དབང་མཐར་ཆགས་སུ་བསྐུར་རྗེས། བསྟན་སྲུང་ཞིང་སྐྱོང་དབང་པོའི་རྗེས་སུ་གནང་བའི་ཆོ་ག་གནམ་ལྕགས་ཞུན་འདྲིལ་ལྟར་རྗེས་གནང་བསྐུར། རྗེས་ཆོག་གི་ཐོག་མར་ཞིང་སྐྱོང་མཆོད་གཏོར་རྣམས་ཁ་གསོས་ལ། མཆོད་གསོལ་གྱི་ཚབ་ཏུ་ལམ་ཁྱེར་ལས་ཀྱི་བྱང་བུ་སླར་བསྐྱར། ཚོགས་ལ་རོལ་ཞིང་། ལྷག་མ་སྤྱི་ལྟར་བརླབ་སྟེ། ལས་བྱང་གནམ་ལྕགས་མེ་འཁོར་ལྟར་ལྷག་མ་བསྔོ། གཏོར་འབུལ་ཤ་ཁྲག་གིས་བརྒྱན་པར་དམིགས་ཏེ། དམ་ཅན་སྤྱི་གཏོར་བཞིན་འགུགས་བརླབ། སྔགས་བསྔོས། ཕྲིན་བཅོལ་རྣམས་སྦྱར་བ་ལ་འགུགས་པའི་མཇུག་དང་སྔགས་བསྔོས་ཀྱི་ཤཱ་ས་ན་ཟུང་གི་མལ་དུ། དམིགས་བསལ་ཞིང་སྐྱོང་གཙོ་འཁོར་ཡོངས་རྫོགས་ཀྱི་རྒྱུན་བསྙེན་སྦྱར་དགོས། ལས་བྱང་གནམ་ལྕགས་མེ་འཁོར་བཞིན་ཆད་བརྟན་བསྔོ། ལམ་ཁྱེར་ལས་ཀྱི་བྱང་བུ་ལྟར་མཆོད་པ་ཚིགས་བཅད་སྔགས་བཅས་ཀྱིས་མཆོད། དེའི་གོང་གི་ཕྱག་
འཚལ་གྱི་མཇུག །གཉིས་མེད་གུས་པའི་ཚུལ་གྱིས་ཕྱག་འཚལ་བསྟོད། །ཅེས་བསྒྱུར་བས་བསྟོད། ལས་བྱང་གནམ་ལྕགས་མེ་འཁོར་གྱི་འོག་ནས་འབྱུང་བ། གང་ཡང་བདག་བློ་སོགས་ནོངས་བཤགས། མདུན་བསྐྱེད་ཡེ་ཤེས་པ་རྟེན་ལ་བརྟན་བཞུགས། དམ་ཚིག་པ་འབྲུ་གསུམ་གྱིས་རང་ལ་བསྡུ། དེའི་འོག་ནས། ཕྱི་ནང་འཁོར་འདས་སོགས་ཀྱིས་རྫོགས་རིམ་བསྒོམ། སྔ་མའི་འཕྲོས་ཀྱི་བསྔོ་སྨོན། བརྟན་མའི་མཐར་འབྱུང་བའི་ཤིས་བརྗོད་བཅས་བྱ། དེ་ནས་གྲོ་ལོད་ཀྱི་ཚོགས་ལ་རོལ་པ་ཕྱིན་དབང་ཆོག་མཇུག་ཏུ་གསུངས་པ་བཞིན་རྗེས་ཆོག་བྱའོ།། ༈ །།རྡོ་རྗེ་ཐོགས་མེད་རྩལ་གྱི་དག་སྣང་རྒྱ་ཅན་ཉེར་ལྔའི་རྡོ་རྗེ་གྲོ་བོ་ལོད་ཀྱི་ཆོག་བསྒྲིགས་གནམ་ལྕགས་འབར་བ་ལྟར་དབང་སྒྲུབ། དབང་དངོས་ཀྱི་སྐབས། སློབ་མ་རྣམས་སྒོ་ཕྱིར་ཁྲུས་ནས་ཕྱུང་ལ། དེ་ལ་ཡང་དག་པར་རྫོགས་པའི་སངས་རྒྱས་ཐབས་མཁས་ལ་ཐུགས་རྗེ་ཆེན་པོ་མངའ་བ་དེ་ཉིད་ཀྱིས་གདུལ་བྱའི་བསམ་པ་དང་། དབང་པོ་དང་། སྐལ་པའི་ཁྱད་པར་དང་རྗེས་སུ་མཐུན་པའི་ཆོས་ཀྱི་བདུད་རྩི་བསམ་གྱིས་མི་ཁྱབ་པ་ཞིག་བསྟན་པ་ཐམས་ཅད་ཀྱང་དབྱེ་བའི་སྒོ་ནས་ཉན་ཐོས། རང་རྒྱལ། བྱང་སེམས་ཏེ་ཐུན་མོང་གི་ཐེག་པ་གསུམ། ཀྲི་ཡ། ཨུ་པ། ཡོ་ག་སྟེ་ཕྱི་རྒྱུད་སྡེ་འོག་མའི་ཐེག་པ་གསུམ། མ་ཧཱ་ཡོ་ག །ཨ་ནུ་ཡོ་ག །ཨ་ཏི་ཡོ་ག་སྟེ་ནང་རྣལ་འབྱོར་བླ་མེད་ལ་གདུལ་བྱ་བརྟུལ་
འབྲིང་རྣོན་པོས་རིམ་གཉིས་ཀྱི་ལམ་སྒོམ་ཚུལ་སོགས་ཀྱིས་དབྱེ་བའི་ཐེག་པ་གསུམ་སྟེ། ཐེག་པ་རིམ་པ་དགུ་དང་། བསྡུ་བའི་སྒོ་ནས་ཐེག་པ་ཆེ་ཆུང་གཉིས་སུ་འདུ་ལ། འདིར་ཐེག་ཆེན་ལ་རྒྱུ་འབྲས་ཀྱི་ཐེག་པ་གཉིས་ལས། འབྲས་བུའི་ཐེག་པ་དེ་ལའང་ཕྱི་ནང་གཉིས་ལས། ནང་རྒྱུད་བླ་ན་མེད་པའི་ཐེག་པ་ལ་བོད་འདིར་འགྱུར་སྔ་ཕྱིའི་དབང་གིས་སྔགས་གསར་རྙིང་གཉིས་སུ་གྲགས་པ་ལས་རྙིང་མའི་ཁོངས་སུ་གཏོགས་པ། དེ་ལའང་རིང་བརྒྱུད་བཀའ་མ། ཉེ་བརྒྱུད་གཏེར་མ། ཟབ་མོ་དག་སྣང་མ་ཞེས་པའི་བཀའ་སྲོལ་ཆེན་པོ་གསུམ་ལས། འདིར་ཟབ་མོ་དག་སྣང་གི་གདམས་པ་དང་འབྲེལ་བ་སྟེ། སྤྱིར་དག་སྣང་ལ་རབ་དངོས། འབྲིང་ཉམས། ཐ་མ་རྨི་ལམ་གྱི་དག་སྣང་གསུམ་ལས། ཁྱད་པར་དུ་གྱུར་པའི་ཆོས་སྡེ་འདི་ནི། ཡང་དག་པར་རྫོགས་པའི་སངས་རྒྱས་ཀྱིས་འཇམ་དཔལ་རྩ་བའི་རྒྱུད་ལས། སྟོན་པའི་གསུང་རབ་ས་སྟེང་དུ། །དུས་མཐར་འཇིག་རྟེན་ཉམས་པ་ན། །སྡོམ་བརྩོན་རྒྱལ་པོའི་ཚུལ་གྱིས་ནི། །འབྱུང་བར་འགྱུར་བར་ཐེ་ཚོམ་མེད། །ཅེས་དང་། རཏྣ་གླིང་པའི་གཏེར་ལུང་ལས། དེ་ནས་སྔོན་གྱི་ཐུགས་བསྐྱེད་རྒྱལ་པོ་ནི༔ ཐུགས་རྗེ་ཆེན་པོའི་སྤྲུལ་པ་དབུས་ནས་འབྱུང༔ བློ་གྲོས་སྟོབས་ལྡན་བཟང་པོའི་འོད་ཟེར་ཅན༔
སྣ་ཚོགས་ཐབས་ཀྱིས་འགྲོ་བའི་ཁ་ལོ་བསྒྱུར༔ ཞེས་པས་མཚོན་ཨོ་རྒྱན་སངས་རྒྱས་གཉིས་པས་ཟབ་མོའི་གཏེར་ཁ་བཅོ་ལྔ་ཙམ་ནས་རྡོ་རྗེའི་ལུང་གིས་ལན་གཅིག་མ་ཡིན་པར་བསྔགས་ཤིང་། འཕགས་མཆོག་འཇིག་རྟེན་དབང་ཕྱུག་ངུར་སྨྲིག་གར་གྱིས་རྣམ་པར་རོལ་པར་འཇིག་རྟེན་ན་ཡོངས་སུ་གྲགས་པ། ཀུན་མཁྱེན་རྒྱལ་བའི་དབང་པོ་རྡོ་རྗེ་ཐོགས་མེད་རྩལ་གྱིས་སྣང་སྲིད་ཐམས་ཅད་དག་པ་ཡེ་ཤེས་ཀྱི་རོལ་པར་གཟིགས་པས་མངོན་སུམ་པའི་དག་སྣང་རྒྱ་ཅན། སྐལ་ལྡན་རྣམས་ལ་སྨིན་གྲོལ་གྱི་སྒོ་འཕར་ཡོངས་སུ་ཕྱེ་ཞིང་། སྐལ་མེད་རྣམས་ལ་འཆོལ་བར་མི་སྤྱོད་པའི་ཕྱིར། ཇི་ལྟར་འཕགས་པ་ཆོས་འཕགས་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྒྱ་རིམ་པ་བདུན་གྱིས་བཏབ་པ་བཞིན་དུ། འཁོར་ལོ་ལ་སོགས་པའི་ཕྱག་རྒྱས་བཏབ་པར་མཛད་པའི་ཆོས་སྡེ་ཉི་ཤུ་རྩ་ལྔར་བཞུགས་པའི་ནང་ཚན། བྷྲཱུྃ་མཚན་རྡོ་རྗེ་རྭ་གདེངས་ཐོག་མདའི་རྒྱ་ཅན་ལས་བྱུང་བའི་གུ་རུ་རྡོ་རྗེ་གྲོ་ལོད་གནམ་ལྕགས་འབར་བ་སྟེ། དེའང་ཀུན་མཁྱེན་བླ་མ་དམ་པ་ཉིད་དགུང་གྲངས་ལྔ་བཅུ་རྩ་དྲུག་ཏུ་བབས་པ། ཆུ་ཕོ་བྱི་བའི་ལོ་ཧོར་གྱི་ཟླ་བ་དགུ་པའི་ཚེས་བཅོ་ལྔ་ནས་འཕགས་མཆོག་འཇིག་རྟེན་དབང་ཕྱུག་གི་གཙུག་ལག་ཁང་ཕོ་བྲང་དམར་པོ་རིའི་རྩེར། གཏེར་ཆེན་ཆོས་ཀྱི་
རྒྱལ་པོ་རིག་འཛིན་ཉི་ཟླ་འོད་ཟེར་རམ་མངའ་རིས་ལེགས་ལྡན་རྡོ་རྗེར་སངས་རྒྱས་གཉིས་པ་ཨོ་རྒྱན་ཆེན་པོས་དག་སྣང་དུ་བསྩལ་པའི་རླུང་སྦྱོར་གྱི་ཉམས་བཞེས་རྒྱུན་བསྐྱངས་པའི་ཚེ། མདུན་གྱི་ནམ་མཁར་ལེགས་ལྡན་རྗེ་དཀར་ཆས་སྟེང་གསང་གོས་སྔོན་པོ། ཆོས་གོས། པཎ་ཞུ་རྒོད་སྒྲོ་མ་བཞེས་པ། ཕྱག་གཡས་རཀྴའི་ཕྲེང་བ་པང་དུ་འདྲེན་པ། གཡོན་པུས་སྟེང་ནས་ལྕགས་ཕུར་འཛིན་པ་སྐྱིལ་ཀྲུང་གིས་འབོལ་སྟན་གཡག་རོག་གི་པགས་པའི་སྟེང་ན་བཞུགས་པ་གསལ་བའི་མུར་སྐད་ཅིག་ལ་རྡོ་རྗེ་གྲོ་ལོད་དུ་གནས་འགྱུར་ཏེ་འདི་སྐད་དོ། །བདུད་དང་དམ་སྲི་ཞི་བ་ལ། །ངེས་པ་དོན་གྱི་བླ་མ་དགོས། །ཐེ་ཚོམ་ཡིད་གཉིས་ཀྱིས་མི་འགྲུབ། །བློ་ཐག་ཆོད་པ་ཤིན་ཏུ་གཅེས། །ཞེས་གསུངས་པ་སོགས་དག་པའི་སྣང་བ་འབྱམས་ཀླས་པའི་མཐར། རང་སྣང་ཡེ་ཤེས་ཀྱི་དཀྱིལ་འཁོར་མངོན་སུམ་དུ་གསལ་བ་ལ་གུ་རུ་རྡོ་རྗེ་ཐོད་ཕྲེང་རྩལ་དཀྱིལ་འཁོར་གྱི་གཙོ་བོའི་རྣམ་པར་བཞེངས་པ་དང་། མཁའ་འགྲོ་ཡེ་ཤེས་མཚོ་རྒྱལ་དང་མནྡཱ་རཿབ་གཉིས་ཀྱིས་རྡོ་རྗེ་རྒྱལ་ཐེབས་ཀྱི་བྱ་བ་མཛད་དེ་དབང་དང་གདམས་ངག་རྣམས་རྫོགས་པར་བསྩལ་པ་ལྟར། རིག་འཛིན་མཆོག་གི་སྤྲུལ་པའི་སྐུ་པདྨ་ཕྲིན་ལས་དང་ཨོ་རྒྱན་གཏེར་བདག་གླིང་པ་སོགས་ལས་
ཅན་རྣམས་ལ་སྤེལ་བར་མཛད་པ་ནས་བཟུང་བརྒྱུད་པ་བར་མ་ཆད་པར་བྱོན་པ་སྟེ། དེ་ལའང་རྒྱུད་མ་སྨིན་པ་སྨིན་པར་བྱེད་པ་དབང་གི་གདམས་པ་དང་། སྨིན་ཟིན་གྲོལ་བར་བྱེད་པ་བསྐྱེད་རྫོགས་རིམ་པ་གཉིས་སུ་ཡོད་པ་ལས། འདིར་སྨིན་བྱེད་དབང་གི་རིམ་པ་འབུལ་བའི་སྐབས་སུ་བབས་པ་ལ། ཐོག་མར་སློབ་དཔོན་དང་དཀྱིལ་འཁོར་གྱི་གཙོ་བོ་ཐ་མི་དད་པ་དཀྱིལ་འཁོར་ཆེན་པོའི་ཕྱིའི་སྒོ་ཁང་དུ་བྱོན་པར་མོས་པའི་དྲུང་དུ་མེ་ཏོག་དང་བཅས་པའི་ཐལ་མོ་སྦྱར་ཏེ་གསོལ་བ་འདེབས་པ་འདིའི་རྗེས་ཟློས། ཧོཿ ཀྱེ་མ་གསང་ཆེན་སོགས་ལན་གསུམ། ཞེས་གསོལ་བའི་ལན་དུ། རིགས་དང་སྐལ་པ་བརྟག་པའི་ཕྱིར་དྲི་བ་བགྱིད་པ་འདི་ལ་གསན་འཚལ། ཀྱེ། བུ་ཁྱོད་ལམ་འདིར་སོགས་བརྗོད། སླར་ཡང་ཁྱད་པར་གྱི་དོན་ཞུ་བར་ནན་ཏན་གྱིས་གསོལ་བ་འདེབས་པ་འདིའི་རྗེས་ཟློས། བདག་ནི་རྩ་བ་སོགས་ལན་གཅིག །གསང་བ་ཟབ་མོའི་ཆོ་ག་སྒྲུབ་པའི་ཐོག་མར་བགེགས་ལ་གཏོར་མ་སྦྱིན་པ་ནི་སློབ་དཔོན་གྱིས་བགྱི་བ་ལགས་ཏེ། ཞེས་མཚམས་སྦྱར་ནས། སྤྱི་འགྲོའི་བགེགས་གཏོར་བྱིན་རླབས་འགུགས་བསྔོའི་རྗེས་ལས་བྱང་གི་བགེགས་བསྐྲད་བྱ། མཚམས་གཅོད་སྤྱི་ལྟར་སྦྱར་ན་ལེགས་པའི་ཡན་ལག་ཏུ་འགྱུར་སྙམ། དེ་ནས་དཀྱིལ་འཁོར་དུ་འཇུག་པའི་ཐོག་མར་གནང་བ་སྦྱིན་ཅིང་གདམས་ངག་འབོགས་པ་ནི། ཧོཿ སྣོད་
དང་ལྡན་ན་སོགས། སླར་ཡང་ཟབ་མོའི་དོན་ལ་འཇུག་ཕྱིར་སྤྲོ་བ་བསྐྱེད་ཅིང་དམ་ཚིག་གི་མདོ་བསྒྲག་པ་འདི་ལ་གསན་འཚལ། ཀྱེ། ཉོན་ཅིག་སྐལ་ལྡན་སོགས། བླ་མ་དཀྱིལ་འཁོར་གྱི་གཙོ་བོ་རྣམ་དབྱེར་མེད་པར་བཞུགས་པའི་དྲུང་དུ་དབང་བསྐུར་ཟབ་མོ་ཞུ་བའི་ཡོན་དུ་མཎྜལ་ཕུལ། ཞེས་མཎྜལ་འབུལ་བཅུག །ཁྱད་པར་གྱི་དོན་སྦྱིན་པའི་སླད་དུ་གསོལ་བ་འདེབས་པ་འདིའི་རྗེས་ཟློས། ཀྱེ་ཀྱེ། མཁའ་འགྲོའི་གྲོང་ཁྱེར་སོགས་ལན་གསུམ། མ་རིག་པའི་སྒྲིབ་པས་མིག་ལྡོངས་པའི་མཚོན་བྱེད་སྤྱན་དར་འཆིང་བ་དང་། ལྷ་དང་མཇལ་བའི་ཕྱག་རྟེན་དུ་ཨུ་དུཾ་ཝཱ་རའི་མེ་ཏོག་གི་ཆུན་པོ་རེ་ཕྱག་ཏུ་ཐོགས་པར་མོས། ཨཱ་ཁཾ་སོགས། བླ་མ་རྡོ་རྗེ་གྲོ་ལོད་རྩ་གསུམ་རྒྱལ་བའི་ཚོགས་དང་བཅས་པའི་སྤྱན་སྔར་རྡོ་རྗེ་ཐེག་པའི་སྐྱབས་སུ་འགྲོ་བའི་འདུན་པ་དང་བཅས་འདིའི་རྗེས་ཟློས། ན་མོ། བླ་མེད་བླ་མ་སོགས་ལན་གསུམ། སྨོན་པ་དང་འཇུག་པའི་བདག་ཉིད་ཀྱི་བྱང་ཆུབ་མཆོག་ཏུ་སེམས་བསྐྱེད་ཅིང་། རིག་འཛིན་སྔགས་ཀྱི་དམ་ཚིག་དང་སྡོམ་པ་རྣམས་འཛིན་པའི་བློས་འདིའི་རྗེས་ཟློས། བདེ་གཤེགས་རིག་འཛིན་སོགས་ལན་གསུམ། དབང་གི་སྣོད་དུ་རུང་བའི་ཕྱིར་ཚོགས་གསག་པའི་སླད་དུ་ཚིག་རིས་དང་མཐུན་པའི་ཏིང་འཛིན་ལ་བློ་བཞག་