ཤོག་གྲངས་༤༠༡ ནས་༥༠༩ བར།
ཏིང་འཛིན་ལྡན་པས། བསྙེན་སྒྲུབ་ལས་ལ་སྦྱོར་བ་འཁོར་ལོ་རྣམ་བཞིས་དགོངས་པའི་ཕྲིན་ལས་ལ་རང་དབང་འཇུག་པའི་དབང་བསྐུར་ཐོབ་པར་མོས། ཧཱུྃ༔ དང་པོ་སྒྲུབ་པ་སོགས་དང་སླར་ཡང་གཤིན་རྗེའི་ལྷ་སྔགས་བརྗོད། གསུམ་པ་གསུང་རྟེན་ནི། དཔལ་ཆེན་ཧེ་རུ་ཀཿརྣམས་ཀྱི་གསུང་གི་ཡེ་ཤེས་འདུས་པ་དབང་ཆེན་ཁྲོ་བོའི་རྒྱལ་པོའི་ཡེ་ཤེས་ཕྱག་རྒྱ་རྟ་ཞལ་སྤྱི་བོར་བཞག་པས་འཁོར་འདས་ཐམས་ཅད་ཀྱི་སྲོག་རྟ་སྐད་ཐེངས་གསུམ་གྱི་དགོངས་པས་དབང་དུ་བྱེད་ནུས་པའི་མཐུ་ཐོབ་པར་མོས། ཧཱུྃ༔ དབང་ཆེན་འདུས་པའི་སོགས། ལྷ་སྔགས་མཐར་ཤམ་བུ་བཏགས། བཞི་པ་ཐུགས་རྟེན་ནི། བདེ་གཤེགས་ཁྲོ་བོའི་དབང་ཕྱུག་རྣམས་ཀྱི་ཐུགས་ཀྱི་ཡེ་ཤེས་འདུས་པ་ཡང་དག་ཧེ་རུ་ཀའི་ཕྱག་རྒྱ་དང་གཉིས་སུ་མེད་པའི་མར་མེ་སྤྱི་བོར་བཞག་ཅིང་དབང་བསྐུར་བས། ཡང་དག་དོན་གྱི་ཕྲིན་ལས་རུ་ལུ་འབྲུ་བརྒྱད་ཀྱི་དགོངས་པས་འཁོར་འདས་བདེ་ཆེན་སྙིང་པོར་ལ་བཟློ་བའི་དངོས་གྲུབ་ཀྱི་དབང་ཆེན་ཐོབ་པར་མོས། ཧཱུྃ༔ དབྱིངས་ཀྱི་རང་བཞིན་སོགས་ལྷ་སྔགས་མཐར་ཤམ་བུ་བཏགས། ལྔ་པ་ཡོན་ཏན་རྟེན་ནི། སྤྱི་དཔལ་ཆེན་པོ་རྣམས་ཀྱི་ཡེ་ཤེས་ཀྱི་ཡོན་ཏན་མ་ལུས་འདུས་པ་ཆེ་མཆོག་ཧེ་རུ་ཀའི་རྟེན་དང་བརྟེན་པར་བཅས་པའི་རང་བཞིན་བདུད་རྩིའི་ཕོ་བྲང་སྤྱི་བོར་བཞག་ཅིང་ཕྱག་ཏུ་གཏད་པས། སྲིད་པ་དང་མྱ་ངན་ལས་འདས་པའི་ཆོས་ཐམས་ཅད་བདུད་རྩི་རྣམ་
བཞིའི་དགོངས་པས་འཆི་མེད་དྭངས་སྲོག་ཐིག་ལེར་སྡུད་པའི་དངོས་གྲུབ་བསྒྲུབ་ནུས་པའི་དབང་ཐོབ་པར་མོས། ཧཱུྃ༔ བྷནྡྷ་ཁ་སྦྱོར་སོགས་ལྷ་སྔགས་མཐར་ཤམ་བུ་བཏགས། དྲུག་པ་ཕྲིན་ལས་རྟེན་ནི། ཁྲག་འཐུང་དྲག་པོ་ཁྲོ་རྒྱལ་རྣམས་ཀྱི་ཕྲིན་ལས་ཀྱི་ནུས་སྟོབས་གཅིག་ཏུ་རྫོགས་པ་བཛྲ་ཀཱི་ལ་ཡའི་ཡེ་ཤེས་ཀྱི་ཕྱག་རྒྱ་སྲིད་པ་ཕུར་བུར་རྫོགས་པའི་དཀྱིལ་འཁོར་སྤྱི་བོར་བཞག་ཅིང་ཕྱག་ཏུ་གཏད་པས། ཐལ་འབྱིན་རྣམ་བཞིའི་དགོངས་སྤྱོད་རོལ་པའི་ཕྲིན་ལས་ཀྱིས་འཁོར་བ་མྱང་འདས་སུ་སྒྲོལ་བའི་དངོས་གྲུབ་ལ་དབང་ཐོབ་པར་མོས། ཧཱུྃ༔ སྒྲུབ་པའི་རྟེན་མཆོག་སོགས། སྔགས་མཐར་ཤམ་བུ་བཏགས། བདུན་པ་མདོས་རྟེན་ནི། ཀུན་བཟང་ཧེ་རུ་ཀཿདཔལ་རྣམས་ཀྱི་ཡེ་ཤེས་ཀྱི་ཕྱག་རྒྱ་གཅིག་ཏུ་འདུས་པ་བླ་མེད་ཧེ་རུ་ཀའི་དཀྱིལ་འཁོར་རྟེན་དང་བརྟེན་པར་བཅས་པ་ཡོངས་རྫོགས་མདོས་གཏོར་སྤྱི་བོར་བཞག་ཅིང་ཕྱག་ཏུ་གཏད་པས། ཕྱི་ནང་གཞན་གསུམ་མཉམ་སྦྱོར་རྩ་རླུང་ཐིག་ལེ་བྱང་ཆུབ་ཀྱི་སེམས་ཀུན་ཁྱབ་རྣམ་དག་གི་དགོངས་སྤྱོད་དུ་ལ་བཟློ་བས་སྒྲུབ་རྟེན་མཆོད་སྐོང་མདོས་ཀྱིས་ལས་ཆེན་ལྔ་གཙོ་བོར་གྱུར་པའི་ལས་རབ་འབྱམས་ལ་འཇུག་ནུས་པའི་དབང་ཐོབ་པར་མོས། ཧཱུྃ༔ མཁའ་འགྲོ་བདེ་ཆེན་སོགས་ལྷ་སྔགས་མཐར་ཤམ་བུ་བཏགས། བརྒྱད་པ་བཀའ་གཏད་ནི། ཟིལ་གནོན་ཁྲོ་བོའི་དབང་ཕྱུག་རྣམས་ཀྱི་མཐུ་སྟོབས་དང་གཉིས་སུ་མེད་
པ་ཕྱག་རྒྱའི་ལྷའི་དཀྱིལ་འཁོར་དུ་བཞེངས་པ་གཏོར་མ་དྲེགས་པའི་ལྷ་ཚོགས་སུ་གསལ་བ་ཕྱག་ཏུ་གཏད་པས། དྲེགས་པ་ཀུན་འདུལ་གྱི་དགོངས་པ་སྒྲུབ་ལུགས་བཞིས་དྲེགས་པ་ལས་ལ་ཁོལ་ཞིང་། སངས་རྒྱས་ཀྱི་བསྟན་པ་བསྲུང་ནུས་པའི་ཕྲིན་ལས་ལ་དབང་ཐོབ་པར་མོས། ཧཱུྃ༔ གཏོར་སྣོད་དུར་ཁྲོད་སོགས། སྔགས་མཐར་ཤམ་བུ་བཏགས། དགུ་པ་ཟོར་རྫས་ནི། ཕྲིན་ལས་དྲག་པོའི་མཐུ་རྩལ་མེ་ལྟར་འབར་བའི་འཇིགས་བྱེད་ཧེ་རུ་ཀཿརོལ་པ་ཆེན་པོའི་གསལ་སྣང་སྟོབས་སུ་གྱུར་པ་མངོན་སྤྱོད་ཕྲིན་ལས་ཀྱི་ཐུན་རྫས་ཕྱག་ཏུ་གཏད་པས་གནད་ཀྱི་མན་ངག་བཞིའི་དོན་རྟོགས་ཤིང་། དྲག་སྔགས་དུག་ལྔ་རང་བསད་ཀྱི་དགོངས་པས་དམ་ཅན་ཕོ་ཉར་འགྱེད་ཅིང་། མངོན་སྤྱོད་དྲག་པོའི་ཕྲིན་ལས་ལ་འཇུག་པའི་མཐུ་དབང་ཐོབ་པར་མོས། ཧཱུྃ༔ ཐུན་སྣོད་ཨེ་སྒྲོམ་སོགས། སྔགས་མཐར་ཤམ་བུ་བཏགས། བཅུ་པ་གཏོར་དབང་ནི། ཐུགས་རྗེའི་མངའ་བདག་དཔལ་ཆེན་པོ་རྣམས་ཀྱི་རྒྱན་གྱི་འཁོར་ལོ་མ་ལུས་པའི་ཡེ་ཤེས་རྫོགས་པ། རིག་འཛིན་ཆེན་པོའི་སྐུ་དང་གཉིས་སུ་མེད་པའི་དཔལ་གྱི་གཏོར་མ་རྩ་གསུམ་རྒྱ་མཚོའི་སྤྲིན་གྱི་འདུ་འཕྲོ་དང་བཅས་པ་སྤྱི་བོར་བཞག་པས་སྒྲིབ་བཞི་སྦྱངས། དབང་བཞི་ཐོབ། སྐུ་བཞི་མངོན་དུ་གྱུར་པས་བདག་དོན་ཕུན་སུམ་ཚོགས་ནས། རིག་འཛིན་བླ་མ་བྱིན་རླབས་
ཀྱི་དགོངས་པས་གཞན་དོན་ཕུན་སུམ་ཚོགས་པ་ལ་དུས་རྟག་ཏུ་དབང་འབྱོར་པའི་མཐུ་ཆེན་ཐོབ་པར་མོས། ཧཱུྃ༔ རྒྱལ་བའི་གདུང་འཚོབ་སོགས། སྔགས་མཐར་ཤམ་བུ་བཏགས། དྲུག་པ་བླ་མ་རྡོ་རྗེ་འཆང་གི་བྱིན་དབང་བསྐུར་བ་ལ། སྐུ་འབག་རྒྱལ་ཀུན་སྤྱི་གཟུགས་ཁྱབ་བདག་བླ་མ་རྡོ་རྗེ་འཆང་གི་ཡེ་ཤེས་ཕྱམ་གདལ་ཡངས་པའི་ཐིག་ལེ་འབར་བའི་ཕྱག་རྒྱ་རྩ་བའི་བླ་མ་པདྨ་རྡོ་རྗེ་ཆོས་ཀྱི་རྣམ་པར་བཞེངས་པའི་སྐུ་ལས། ཡེ་ཤེས་བརྒྱད་ལ་སོགས་པའི་རྣམ་རོལ་རིག་འཛིན་བླ་མ་རྣམ་བརྒྱད་སོགས་བསམ་ཡས་སྒྱུ་འཕྲུལ་དྲྭ་བའི་སྤྲིན་ཕུང་གཏིབས་པ་བུ་ཡི་སྤྱི་བོར་སྤྱན་དྲངས་ཤིང་། ཐུགས་རྒྱུད་བསྐུལ་བས་བྱིན་རླབས་ཀྱི་ཟིལ་ཆར་བབ་པས་འཁོར་འདས་གཉིས་མེད་ཡེ་གྲོལ་ཆོས་སྐུའི་གཏན་སྲིད་ལ་དབང་འབྱོར་བའི་བྱིན་དབང་རྫོགས་པར་མོས་བྱས་ལ། ཕྲིན་ལས་སྙིང་པོ་གསལ་བའི་མཇུག་གི་ཚེ་ཡི་དངོས་གྲུབ་དབུར་འབྱུང་བའི། ཨོཾ་ཨཱཿཧཱུྃ༔ འོག་མིན་ཞིང་དུ་བདེ་བར་གཤེགས་པ་དངོས༔ བདེ་བྱེད་སོགས་སྔགས་བཅས་ཀྱིས་དབང་བསྐུར། དེ་ལྟར་དབང་ཆེན་རྣམས་ཐོབ་པས་བསྙེན་སྒྲུབ་རྣམ་པ་བཞི་དང་ཕྲིན་ལས་རབ་འབྱམས་ལ་དབང་ཞིང་། མཐར་ཐུག་ལྷ་དང་གཉིས་སུ་མེད་པའི་ཡེ་ཤེས་འགྲུབ་པ་ཡིན་ཏེ་གཞུང་ལས། དེ་ལྟར་ཡོངས་རྫོགས་དབང་བསྐུར་བས༔ སོགས་དབང་རྣམས་སྙིང་པོ་བསྡུས་པའི་མཇུག་ནས་ཆེན་པོ་འོ༔ ཞེས་གདམས་ཤིང་བསྔགས་པའི་རྡོ་རྗེའི་གསུང་བསླུ་བ་མེད་པས་
དབུགས་དབྱུང་བསྩལ་པ་ལ་ཡིད་ཆེས་ཀྱི་དགའ་བ་བསྒོམ་འཚལ། གསུམ་པ་བཀའ་རྒྱ་གདམས་གཏད་ནི། སློབ་མ་ཐུན་མིན་ལ་བཀའ་རྒྱ་གདམས་གཏད་ཀྱི་ཡུལ་དུ་དགོས་པ་ཡོད་ན་བསྐུར་ཚུལ་གཞན་ལས་རྟོགས་དགོས་ཤིང་ཐམས་ཅད་ལ་མི་སྤེལ་བར་བཀའ་རྒྱས་གདབ་པའི་ཕྱིར་མོས་སློབ་ཙམ་ལ་སྦྱོར་མི་དགོས་སོ། །བཞི་པ་མཐའ་རྟེན་ལ་སྡོམ་ནི། ཚེ་དབང་རྫས་སྦྱིན་ཤིས་པ་སྤེལ། །དམ་ཚིག་བསྒྲག་གཟུང་མཎྜལ་དང་། །ལུས་དབུལ་དགེ་རྩ་གཞན་དོན་བསྔོ། །ཞེས་བདུན་ལས། དང་པོ་ཚེ་དབང་ནི། མཐའ་རྟེན་འཆི་མེད་ཚེའི་དབང་བསྐུར་བ་ལ་འདུན་པ་འདི་བཞིན་མཛོད། གཏོར་སྣོད་ཟླ་གམ་དབང་གི་གཞལ་ཡས་ཁང་དུ་བཅུད་རྫས་གར་དབང་བདེ་གཤེགས་གཙོ་དང་བཅས་པའི་སྐུར་གསལ་བའི་དྭངས་སྲོག་འོད་ཟེར་གྱི་ལྕགས་ཀྱུས། འཁོར་འདས་ཀྱི་ཚེ་བཅུད་བདུད་རྩིའི་སྙིང་པོར་དྲངས་པའི་རྒྱུན་ཕྱག་གི་བུམ་པར་བསྐྱིལ་པའི་དབང་བསྐུར་བས། འཆི་མེད་དྭངས་མའི་རྒྱུན་བབས་པས་ལུས་ཀྱི་ནང་གང་། ལས་དང་རྐྱེན་གྱིས་བསྐྱེད་པའི་ཚེའི་བར་ཆད་མི་མཐུན་པའི་ཕྱོགས་ཐམས་ཅད་ལྷག་མེད་དུ་སྦྱངས། ཚེ་དཔག་མེད་དང་མཉམ་པའི་ཚེ་དབང་ཕུན་སུམ་ཚོགས་པའི་དངོས་གྲུབ་དམ་པ་ཐོབ་པར་མོས། དབང་རྣམས་སྙིང་པོར་བསྡུས་པའི་མཇུག་གི །ཧཱུྃ༔ བཅོམ་ལྡན་མགོན་པོ་ཚེ་དཔག་མེད༔ ཟླ་གམ་དབང་གི་སོགས་ཀྱིས་དབང་བསྐུར། གཉིས་པ་རྫས་སྦྱིན་ནི། གྲུབ་
པའི་རྫས་བཅུད་ལེན་གྱི་རིལ་བུ་དང་ཚེའི་བདུད་རྩིར་ལོངས་སྤྱད་པས་རགས་པའི་ཕུང་པོ་འོད་ལུས་སུ་དྭངས་ཤིང་། སྐྱེ་ཤི་བགྲེས་རྒུད་མེད་པའི་རྡོ་རྗེའི་ལུས་ཀྱིས་འཁོར་བ་མ་སྟོང་གི་བར་དུ་འགྲོ་བའི་དོན་བྱེད་ནུས་པའི་ཚེ་དབང་ཐོབ་པར་མོས། ཧཱུྃ༔ བཅོམ་ལྡན་མགོན་པོ་ཚེ་དཔག་མེད༔ སྒྲིབ་པའི་དྲི་མ་སོགས་ཕྲིན་ལས་སྙིང་པོ་གསལ་བ་ལྟར་སྔགས་བཅས་ཀྱིས་ཐབས་ཤེས་ཀྱི་རྫས་གཡས་གཡོན་དུ་སྦྱིན། གསུམ་པ་ཤིས་སྤེལ་ནི། མཚམས་སྦྱོར་སྤྱི་མཐུན་བཅས་ཤིས་བརྗོད་འབྲེལ་ཆགས་པ་སྤྲོ་འོ། །བཞི་པ་དམ་ཚིག་བསྒྲག་གཟུང་ནི། དེ་རྣམས་ཀྱི་སྒོ་ནས་ཡི་དམ་སྒྲུབ་པ་ཐམས་ཅད་ཀྱི་རྩ་བའམ་སྙིང་པོར་གྱུར་པ་རྫོགས་པ་ཆེན་པོ་བཀའ་འདུས་རྩ་བའི་སྙིང་ཐིག་གི་དབང་བསྐུར་ཐོབ་པ་ཡིན་པས། དབང་སྲོག་དམ་ཚིག་གི་རིམ་པ་བསྐྱེད་རྫོགས་རྫོགས་པ་ཆེན་པོའི་ལམ་གྱི་གཞུང་ཤིང་རྣམས་ནས་ཇི་སྐད་གསུངས་པ་ཐམས་ཅད་དབང་དུས་སུ་བསྒྲགས་ཤིང་ཁས་བླངས་པ་ལྟར་སྲོག་དང་སྙིང་ལས་གཅེས་པར་བསྲུང་དགོས་པས། དེ་ལྟར་བགྱིད་པའི་གཡར་དམ་བླང་བ་འདིའི་རྗེས་ཟློས། གཙོ་བོས་ཇི་ལྟར་སོགས། ལྔ་པ་གཏང་རག་མཎྜལ་དང་། དྲུག་པ་ལུས་དབུལ། བདུན་པ་དགེ་བསྔོ་རྣམས་གསང་བ་སྤྱི་བཞིན་ནོ། །བཅུ་པ་ཚོགས་ལ་རོལ་པ་ནི། ཐབས་ཤེས་ཀྱི་རྫས་བརྡའི་འབུལ་ལེན་བཅས་
ཕྱི་འདོད་ཡོན་ཞེན་མེད། ནང་རྡོ་རྗེའི་སྲེག་བླུག །གསང་བ་བདེ་ཆེན། ཡང་གསང་དེ་ཁོ་ན་ཉིད་སོགས་རྣལ་འབྱོར་པའི་ནུས་པ་དང་སྦྱར་བས་སྤྱད། སྤྲོ་ན་རྡོ་རྗེའི་གླུ་གར་ཡང་བྱ། བཅུ་གཅིག་པ་ལྷག་མ་བསྔོ་བ་ནི། ལྷག་གཏོར་བདུད་རྩིའི་སྤྲིན་ཕུང་འདོད་ཡོན་གྱི་རྣམ་པ་སོ་སོའི་མཐུན་རྫས་ནམ་མཁའ་དང་མཉམ་པར་བསམ་ལ། འབྲུ་གསུམ་གྱིས་བྱིན་བརླབ། པཉྩ་ཨ་མྲྀཏ་ཧཱུྃ་ཧ་ཧོ་ཧྲཱིཿས་བདུད་རྩིར་བསྒྱུར་ཞིང་མཁའ་ཁྱབ་ཏུ་སྤེལ། ཨེ་ཨཱ་རལླི་ཛཿས་མགྲོན་བཀུག །ལྷག་གཏོར་ཕྱིན་དབང་བསྐུར་སྤྱིར་བཏང་སོགས་ཉི་ཚེ་བ་ལ་ཕྲིན་ལས་སྙིང་པོར་བསྡུས་པ་ལྟར་དང་། ཡོངས་རྫོགས་གཏད་རྒྱའི་དབང་སོགས་ཐུན་མིན་གསང་བའི་ལས་དང་འབྲེལ་སྐབས་ཕྲིན་ལས་སྙིང་པོ་གསལ་བ་ལྟར་འདོར་ལེན་ཤེས་པར་བྱ་སྟེ། ལྷག་མ་བསྔོ། སྤྲོ་ན་སྨོན་ལམ་ཤིས་བརྗོད་ཀྱང་བྱ། བཅུ་གཉིས་པ་ཆད་མདོ་བསྒྲག །བཅུ་གསུམ་པ་ཟོར་ལས་ནི་སྤྱིར་བཏང་ཙམ་ལ་མི་དགོས། བཅུ་བཞི་པ་བརྟན་མ་སྐྱོང་བ་དང་། བཅོ་ལྔ་པ་རྟ་བྲོ་རྣམས་ཕྲིན་ལས་སྙིང་པོ་གསལ་བ་ལྟར་རྒྱུན་དུ་སྦྱོར། བཅུ་དྲུག་པ་རྗེས་མཆོད་པ་ནི། ཧཱུྃ༔ དབྱིངས་ཀྱི་རྒྱན་རྫོགས་སོགས་དང་། བཅུ་བདུན་པ་བསྟོད་པ་ནི། ཧཱུྃ༔ ངོ་བོ་ཀ་དག་སོགས་ཕྲིན་ལས་སྙིང་པོར་བསྡུས་པ་ལྟར་བྱ། བཅོ་བརྒྱད་པ་ནོངས་བཤགས་ནི། མ་རྙེད་ཡོངས་སུ་སོགས་དང་ཡི་གེ་བརྒྱ་པ་བརྗོད། བཅུ་དགུ་པ་དངོས་གྲུབ་བླང་བའི་དོན་དུ་དངོས་
གྲུབ་བསྐུལ་ཞིང་བསྡུ་བ་ནི། ཧཱུྃ༔ བཅོམ་ལྡན་མགོན་པོ་ཚེ་དཔག་མེད༔ སྒྲིབ་པའི་དྲི་མ་སོགས་ཀྱི་མཐར་ཚེ་ཛཔ྄་དེ་བརྒྱ་རྩ་ཅི་འགྲུབ་བཟླ། དབང་བསྐུར་སྐབས་འདི་གོང་དུ་སོང་ཟིན་པས་མ་བསྐྱར་ནའང་ཆོག །གང་ལྟར་ཡང་དབང་རྣམས་སྙིང་པོར་བསྡུས་པའི་མཐའི། ཧཱུྃ༔ བཅོམ་ལྡན་མགོན་པོ་ཚེ་དཔག་མེད༔ ཟླ་གམ་དབང་གི་སོགས་སྔགས་བཅས་ཀྱིས་ཚེ་གཏོར་གྱི་དབང་བླངས་ཤིང་ཚེ་རྫས་ལ་རོལ། ཉི་ཤུ་པ་བརྟན་བཞུགས་ནི། བྲིས་སྐུ་དང་རས་བྲིས་སོགས་རྟེན་ཡོད་ན། ཨོཾ། འདིར་ནི་རྟེན་དང་སོགས་ཀྱིས་བརྟན་བཞུགས་དང་། མེད་ན། མདུན་བཞུགས་ཡེ་ཤེས་ཀྱི་འཁོར་ལོ་རང་ལ་བསྡུ་བའམ། གཤེགས་གསོལ་གང་མོས་བྱ། ཉེར་གཅིག་པ་བསྡུ་ལྡང་ནི། སྤྱི་ཙམ་དུ། ཧཱུྃ༔ ལྷུན་གྲུབ་རིག་རྩལ་སོགས་ཕྲིན་ལས་སྙིང་པོར་བསྡུས་པ་ལྟར་བསྡུ་ལྡང་བྱ། བྱེ་བྲག་པར། གཟུགས་སྣང་མཁའ་ལ་འཇའ་ཡལ་སོགས་སྒྲུབ་པ་སྙིང་པོ་ཡོངས་རྫོགས་ལྟར་གྱི་དགོངས་པ་བསྐྱང་། ཉེར་གཉིས་པ་བསྔོ་སྨོན་ནི། ཧོ༔ འདུས་མ་བྱས་ཤིང་སོགས་དང་། ཉེར་གསུམ་པ་ཤིས་བརྗོད་ནི། ཨོཾ༔ བྱིན་རླབས་སྤྲིན་ཕུང་སོགས་སྒྲུབ་པ་སྙིང་པོ་ཡོངས་རྫོགས་ལྟར་སྦྱར་བས་འགྲུབ་བོ།། ༈ །།མཆོག་གྱུར་བདེ་ཆེན་གླིང་པའི་སྒྲུབ་ཆེན་བཀའ་བརྒྱད་བདེ་གཤེགས་ཀུན་འདུས་ཀྱི་བསྐྱེད་རྫོགས་འབྲིང་པོའི་དབང་བསྐུར་བཀླག་ཆོག་ཏུ་བཀོད་པ་ཡེ་ཤེས་ཐིག་ལེ་ལྟར་དབང་སྒྲུབ། དབང་དངོས་
རྗེས་བཅས་ཀྱིས་བསྐུར་རོ།། ༈ །།མཆོག་གླིང་དམ་ཆོས་སྙིང་པོ་སྐོར་ལྔའི་ཡི་དམ་བཀའ་འདུས་སྙིང་པོའི་དབང་གི་ཆོ་ག་དངོས་གྲུབ་ཡང་སྙིང་ལྟར་དབང་སྒྲུབ། དབང་དངོས། རྗེས་བཅས་ཀྱིས་བསྐུར་བས། སྒྲུབ་པ་སྡེ་བརྒྱད་སྤྱི་སྒྲུབ་ཀྱི་དབང་རྣམས་གྲུབ་བོ།། །།གཉིས་པ་སྒྲུབ་པ་སྡེ་བརྒྱད་བྱེ་བྲག་ཏུ་སྒྲུབ་པའི་སྐོར་ལ། འཇིག་རྟེན་ལས་འདས་པ་ལྔ། སོ་མཚམས་པ་གཅིག །འཇིག་རྟེན་པ་གཙོ་བོར་སྟོན་པ་གཉིས་ཏེ་བརྒྱད་ལས།དང་པོ་འཇམ་དཔལ་སྐུའི་སྒྲུབ་པ་ལ་གཉིས། ཞི་བ་དང་ཁྲོ་བོ་འོ། །དང་པོ་འཇམ་དཔལ་ཞི་བ་ལ། སར་བན་ཕྱོགས་མེད་ཀྱི་འཇམ་དཔལ་རྫོགས་པ་ཆེན་པོའི་ཕྲིན་ལས་དང་སྨིན་བྱེད་ཀྱི་ཆོག་བསྒྲིག་སྣང་སྟོང་འོད་ལྔའི་རྒྱ་ཅན་ལྟར་དབང་སྒྲུབ། དབང་དངོས་ལ། དབང་བཤད་སྐབས། གཉིས་ཀྱིས་གཏེར་མཛོད་ཞལ་ཕྱེ་བ་ལས་ཕྱི་མའོ། །དེ་ལའང་སྨིན་དབང་སྔོན་དུ་འགྲོ་དགོས་པས། འདི་ཉིད་ལས། སྨིན་པ་དབང་བཞི་ཐོབ་ནས་སོགས། དེ་ལྟར་མཎྜལ་འབུལ་བ་སྔོན་དུ་སོང་ནས། དབང་བསྐུར་ཟབ་མོ་ཞུ་བར་བྱེད་པ་ལ། ཐོག་མར་བླ་མ་དཀྱིལ་འཁོར་གྱི་ཁྱབ་བདག་བརྟན་པའི་འཁོར་ལོ་མངོན་སུམ་དུ་བཞུགས་པའི་སྐུ་གསུང་ཐུགས་ཀྱི་གསང་བ་ལ་བསྟོད་པ་བྱེད་པར་མོས་པས་འདིའི་རྗེས་ཟློས། ཨོཾ་ཨཱཿཧཱུྃ། ཆོས་ཀྱི་དབྱིངས་ཀྱི་ཞིང་ཁམས་སོགས་ནས། ཡེ་ཤེས་སྐུ་ཉིད་ཁྱོད་ལ་འདུད། །ཨོཾ་ཛྙཱ་ན་ཀཱ་ཡ་སྭཱ་ཧཱ། བར། སླར་ཡང་བརྒྱུད་པའི་
བླ་མ་རྣམས་ལ་དད་མོས་གདུང་ཤུགས་དྲག་པོས་གསོལ་བ་འདེབས་པ་འདིའི་རྗེས་ཟློས། ཆོས་སྐུ་འདུས་པ་ཀུན་ཏུ་བཟང་པོ་སོགས། དེ་ལྟར་རྩ་བ་དང་བརྒྱུད་པའི་བླ་མ་རྣམས་ལ་བསྟོད་ཅིང་གསོལ་བ་བཏབ་པ་སྔོན་དུ་བཏང་ནས། ཁྱད་པར་གྱི་དོན་ཞུ་བའི་སླད་དུ་རྟེན་འབྲེལ་གྱི་རྫས་རྣམས་དངོས་འབྱོར་ཡིད་སྤྲུལ་གྱིས་དབུལ་བར་མོས་ནས། དབང་བསྐུར་སྩོལ་བར་གསོལ་བ་འདེབས་པ་འདིའི་རྗེས་ཟློས། ཨེ་མ་ཧོ། རྡོ་རྗེ་སློབ་དཔོན་སོགས། དེ་ལྟར་གསོལ་བ་བཏབ་པ་ལ་སྣོད་བརྟག་ཅིང་གནང་བ་སྦྱིན་པ་འདི་ལ་གསན་འཚལ། ཧོཿ སྐལ་ལྡན་རིགས་ཀྱི་སོགས། སྡོམ་པ་ཐམས་ཅད་ཀྱི་གཞི་རྟེན་སྐྱབས་སུ་འགྲོ་བའི་སླད་དུ་བླ་མ་ཉིད་དཀོན་མཆོག་ཀུན་འདུས་ཀྱི་བདག་ཉིད་དུ་ཤེས་ཤིང་། དེའང་རང་རིག་གི་ངོ་བོར་རྫོགས་པར་ཐག་བཅད་པའི་ལྟ་དགོངས་ཟབ་མོར་ལ་བཟློ་བ་དང་བཅས་པ་འདིའི་རྗེས་ཟློས། ཧཱུྃ། རང་བྱུང་རིག་པ་ཡེ་ཤེས་སོགས་ལན་གསུམ། ཐེག་པ་ཆེན་པོའི་ལམ་གྱི་རྩ་བ་བྱང་ཆུབ་ཏུ་སེམས་བསྐྱེད་པའི་ཀུན་རྫོབ་སྙིང་རྗེ་ཆེན་པོ་དང་། རང་བཞིན་འོད་གསལ་རིག་པ་བྱང་ཆུབ་ཀྱི་སེམས་འཁོར་གསུམ་འཛིན་པའི་དམིགས་པ་དང་བྲལ་བ་དོན་དམ་སེམས་བསྐྱེད་ཟུང་དུ་འཇུག་པས་འདིའི་རྗེས་ཟློས། རིག་པ་རང་སར་སོགས་ལན་
གསུམ། དངོས་གཞིའི་དབང་བསྐུར་བའི་ཐོག་མར་སྒོ་གསུམ་ཐ་མལ་པ་ལ་དབང་གི་ཡེ་ཤེས་མི་ཆགས་པས། ཁྱེད་རང་རྣམས་གཞན་དུ་མ་ཡེངས་པར་སྣང་སྟོང་ཟུང་འཇུག་གི་ལྷའི་སྐུ་འདི་ལྟར་དུ་གསལ་ཐོབས་ཤིག །སློབ་མ་སྐད་ཅིག་གིས་སོགས། ཅན་དུ་བཞུགས་པའི་གནས་གསུམ་ཡི་གེ་གསུམ་གྱིས་མཚན་པ་གསལ་ཐོབས། སླར་ཡང་སློབ་དཔོན་ལ་མོས་གུས་བྱས་པའི་རྐྱེན་གྱིས་སློབ་དཔོན་གྱི་ཐུགས་ཀ་དང་། ཁྱེད་རང་རྣམས་ཀྱི་གནས་གསུམ་ལས་འཕྲོས་པའི་འོད་ཟེར་གྱིས་ཕྱོགས་དུས་ཀྱི་རྒྱལ་བ་རྣམས་ངོ་བོ་རྗེ་བཙུན་འཇམ་དཔལ་དབྱངས་རིགས་ལྔའི་རྒྱལ་བ་སྤྲུལ་འཁོར་བསམ་གྱིས་མི་ཁྱབ་པ་དང་བཅས་པ་བར་སྣང་ལ་ཁ་བ་བབས་པ་བཞིན་བྱོན་ནས་རྒྱ་མཚོ་ཆེན་པོར་ཐིམ་པ་ལྟར་ཁྱེད་རང་རྣམས་ལ་སིབ་སིབ་ཐིམ་པར་སྒོམས་ཤིག །སྤོས་རོལ་བཅས། ལས་བྱང་གི་བྱིན་འབེབ། ཧཱུྃ། གདོད་ནས་ལྷུན་གྲུབ་སོགས། ཨ་ཨཱཿ ཞེས་སྔགས་གྲངས་མེད་བརྗོད་པས་བྱིན་དབབ། དེ་ལྟར་དབབ་པའི་ཡེ་ཤེས་པའི་བྱིན་རླབས་བྱང་ཆུབ་ཀྱི་བར་དུ་བརྟན་པར་བྱས་པར་མོས། ཏིཥྛ་བཛྲས་རྡོ་རྗེ་སྤྱི་བོར་རྒྱ་གྲམ་དུ་རེག །དངོས་གཞི་ལ་རིག་པའི་དབང་ལྔ། ཡོངས་རྫོགས་བྱིན་རླབས་འདུས་པ་གཏོར་མའི་དབང་། རིག་པ་རྩལ་གྱི་དབང་གསུམ་དུ་འབྱུང་
བ་ལས། དང་པོ་ཐུན་མོང་རིག་པའི་དབང་ལྔའི་དོན་དུ་དམིགས་པ་འདི་བཞིན་མཛོད། ཁྱེད་རང་རྣམས་དཀྱིལ་འཁོར་གྱི་ཤར་ཕྱོགས་སུ་དབང་སྟེགས་ལ་འཁོད་པར་གྱུར། བདག་སློབ་དཔོན་གྱི་ཐུགས་ཀ་ནས་འོད་ཟེར་མཁའ་ཁྱབ་ཏུ་འཕྲོས་པས། དབང་གི་ལྷ་རྒྱལ་བ་རིགས་ལྔ་ཡབ་ཡུམ་དང་། སེམས་དཔའ་སེམས་མ། ཁྲོ་བོ་ཁྲོ་མོའི་ཚོགས་དང་བཅས་པ་སྤྱན་དྲངས་པ་རྣམས་ཀྱིས་ཆུ་དང་ཅོད་པན། རྡོ་རྗེ་དྲིལ་བུ་མིང་དང་བཅས་པའི་དབང་རྣམས་རིམ་པར་བསྐུར་ཞིང་། བརྒྱུད་པའི་བླ་མ་རྣམས་ལ་གསོལ་བ་བཏབ་པས་ཐུགས་རྗེའི་བྱིན་རྩལ་གཡོས་ཏེ་དབང་དོན་གྱི་ཡེ་ཤེས་རྒྱུད་ལ་འཕེལ་བརྟན་དུ་བྱིན་གྱིས་བརླབས་པར་མོས། ཧཱུྃ། ཡེ་ཤེས་དབང་བསྐུར་སོགས་དབང་ལྔ་སོ་སོར་གསོལ་འདེབས་ཀྱང་སྦྱར་བས་རིམ་པར་བསྐུར། མིང་དབང་སྐབས། བཛྲ་ཀ་ལཱ་ཤ་ཨ་བྷི་ཥིཉྩ་ཧཱུྃ། ཁྱེད་རང་རྣམས་ཀྱི་གསང་བའི་མཚན་དུ་སྣ་ཚོགས་རང་གྲོལ་རྩལ་ཞེས་བྱ་བར་ཟུངས་ཤིག །ཅེས་བརྗོད། གོང་བཞིན་གསོལ་འདེབས་སོང་རྗེས། དེ་རྣམས་ཀྱིས་ཉོན་མོངས་ལྔའི་དྲི་མ་བཀྲུས། རིགས་ལྔའི་དབང་ཐོབ་པས་ཕུང་པོ་ལྔ་ལ་མཚན་མར་ལྟ་བ་སྦྱངས། ཡེ་ཤེས་ལྔ་མངོན་དུ་བྱས། སྐུ་ལྔའི་སངས་རྒྱས་ཐོབ་རུང་གི་སྐལ་པ་རྒྱུད་ལ་བཞག་པའོ། །
གཉིས་པ་ཞི་ཁྲོ་ཡོངས་རྫོགས་ཀྱི་གཏོར་དབང་བསྐུར་བ་ནི། གཏོར་མའི་སྣོད་དབྱིངས་ཀྱི་གཞལ་ཡས་ཁང་དུ་གཏོར་མ་རིག་པ་རང་བྱུང་གི་ལྷ་ཚོགས་གཉིས་མེད་བདེ་ཆེན་བཀོད་པའི་རྒྱན་དང་བཅས་པ། ཞི་ཁྲོ་རིག་འཛིན་དང་དམ་པ་རིགས་བརྒྱའི་དཀྱིལ་འཁོར་གསལ་ལ་རྫོགས་པ་གནས་སོ་སོར་དབང་བསྐུར་ཞིང་ལྷ་བསྟིམ་པས་དབང་དང་བྱིན་རླབས་དངོས་གྲུབ་ཐོབ་ཅིང་། རིག་པ་རྩལ་གྱི་དབང་བསྐུར་རུང་དུ་སྨིན་པར་བྱས་པ་མོས། ཨོཾ་ཨཱཿཧཱུྃ། ཡེ་ཤེས་དབང་བསྐུར་སོགས་གཏོར་མ་གནས་སོ་སོར་གཞུང་བཞིན་བསྐུར་ནས། ངོ་བོ་དབྱེར་མེད་གཅིག་ཏུ་གྱུར་པར་མོས། དེ་རྣམས་ཀྱིས་རྒྱུད་དག་ཅིང་སྨིན་པར་བྱས་ནས། གསུམ་པ་དབང་ཐམས་ཅད་ཀྱི་མཐར་ཐུག་རིག་པ་རྩལ་གྱི་དབང་བསྐུར་བའི་ཐོག་མར་གཉིས་འཛིན་བློ་ཡི་དྲི་མས་དོན་དམ་གྱི་རང་ཞལ་སྒྲིབ་པའི་མཚོན་བྱེད་གདོང་གཡོགས་འཆིང་མཛོད། ཅེས་མིག་དར་བཀབ། ཤེལ་དང་ཨ་ཡིག་རིགས་ལྔའི་སྐུ་རྣམས་བརྗོད་ཚིག་དང་བསྟུན་པར་མིག་ལམ་དུ་འཕྱར་ནས། འོ། རིགས་ཀྱི་བུ། རིག་པ་རྩལ་གྱི་དབང་བསྐུར་ཞེས་བྱ་བ་ནི་འཁོར་འདས་ཀུན་ལ་ཁྱབ་ཅིང་། དུས་གསུམ་གྱི་སྤྲོས་པ་དང་བྲལ་བ། སེམས་ཅན་ཐམས་ཅད་ཀྱི་སྙིང་ལ་ཡེ་བཞུགས་འཁོར་བའི་དུས་སུ་བྲལ་
མ་མྱོང་ལ། མྱང་འདས་ཀྱི་དུས་སུ་ཐོབ་པ་མེད་པ་རང་ཆས་སུ་བཞུགས་པ། དུས་གསུམ་སངས་རྒྱས་ཀྱི་ངོ་བོ། འདི་ལྟར་རང་ལ་གནས་ཏེ་སྔར་མ་མཐོང་བས་ལན། ད་མཐོང་བ་འདི་ཀ་བདེ་བར་གཤེགས་པ་རིགས་ལྔ་ཡིན་པས། ངན་པ་ལོགས་སུ་མ་སྤང་། བཟང་པོ་གུད་ནས་མི་བཙལ་བར་ཡེ་ནས་རང་ལ་རྫོགས་པའི་དོན་ངོ་སྤྲོད་པ་ལྟར་ཤེས་པར་མཛོད་ཅིག །ཨ། མེ་ལོང་ལྟ་བུའི་ཡེ་ཤེས་སོགས། མི་ཟ་ན་འཚང་རྒྱ་བ་ཡིན་ནོ། །དེ་ལྟར་ངོ་སྤྲོད་དོན་གྱི་དབང་བསྐུར་ཞིང་། ཡེ་ཤེས་ལ་ཡེ་ཤེས། ཆོས་ཉིད་ལ་ཆོས་ཉིད་བསྟིམ་པས་འཁོར་འདས་གཉིས་མེད་ཡེ་སངས་རྒྱས་པའི་དོན་ལ་ཐེ་ཚོམ་མི་ཟ་ན་འཚང་རྒྱ་བ་ཡིན་ཞིང་། དེ་ལ་རིག་པ་རྩལ་གྱི་དབང་ཞེས་ཐ་སྙད་ཙམ་དུ་བྱས་པའོ། །དེ་ལྟར་ཡེ་ཤེས་ཀྱི་དཀྱིལ་འཁོར་མངོན་དུ་གྱུར་པའི་བརྡར་གདོང་གཡོགས་བཀྲོལ་བ་ཞུ། དེ་ལྟ་བུའི་དོན་སླར་ཡང་དཔེ་དང་དོན་གྱི་སྒོ་ནས་ཞིབ་མོར་ཕྱེས་ཏེ་ངོ་སྤྲོད་པ་ལགས་པས་སྙན་གཏོད་ཅིག །དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །འཕགས་པ་རྣམས་ཀྱི་སོགས་ནས། དོན་ཐུགས་སུ་ཆུད་དོ། །ཞེས་པའི་བར་བརྗོད་ཅིང་། མཆན་བུ་ཟུང་དཀྱུས་སུ་འཛུད་ཤེས་ན་བཅུག །མིན་ན་དོར། དེ་ལྟར་དཔེ་ཞིང་དང་སྐུའི་བཀོད་པས་མཚོན་པ་དེ་ཐམས་ཅད་ཀྱང་ངོ་སྤྲོད་པ་བཞིན་
ཁྱེད་རྣམས་ཀྱི་བློ་ངོར་དེ་ལྟ་བུའི་ཚུལ་ལམ་པ་ཞིག་འཆར་སྙམ་བྱེད་དེ། ཐམས་ཅད་ཀྱང་མིང་གིས་མཚོན་པ་ཙམ་ལས། དོན་ལ་རང་རིག་ལས་ལོགས་སུ་གྲུབ་པ་མེད་པའི་རང་བཞིན་བརྗོད་དུས་ཉིད་ནས་རང་བྱུང་གི་ཡེ་ཤེས་ལ་རྫོགས་ཤིང་། རྫོགས་པ་ཉིད་ནས་དེ་ཉིད་རང་གི་བློ་ངོ་ལས་གཞན་གང་ནས་ཀྱང་མ་འོངས། གར་ཡང་མི་འགགས་པའི་མཚན་ཉིད་ཅན་བཞིན། འཁོར་འདས་ཀྱི་སྣང་ཆ་འདི་དག་ཀྱང་རང་གི་སྣང་བ་ཙམ་དུ་ཤར་ཙམ་ཉིད་ནས། རང་རིག་གི་རོལ་པ་ལས་གཞན་དུ་གྲུབ་པ་དང་བྲལ་བའི་རང་བཞིན་ཅན་ཡིན་ཏེ། དེ་སྔ་དོན་མ་རྟོགས་པས་འཁོར་འདས་དང་བདེ་སྡུག་ལ་བླང་དོར་དུ་ཞེན་པས་རང་གིས་རང་བཅིངས་ཏེ་འཁོར་བར་འཁྱམས་པ་ཡིན་ལ། ད་ནི་རིག་པའི་རྩལ་དབང་གི་ངོ་སྤྲོད་འདི་ཐོབ་པ་ལ་བརྟེན་ནས་རང་བྱུང་རང་ཤར། ཤར་གྲོལ་དུས་མཉམ། ཡིད་དཔྱོད་ཀྱི་བློ་ལས་འདས་པའི་དོན་དམ་གྱི་དགོངས་པ་ལས་མ་གཡོས་པར་ཆུ་བོའི་རྒྱུན་གྱི་རྣལ་འབྱོར་ལ་འབད་པར་མཛོད་ཅིག །དེ་ལྟར་དབང་བསྐུར་ཟབ་མོ་ཐོབ་པའི་རྩ་བ་དང་ཡན་ལག་གིས་བསྡུས་པའི་དམ་ཚིག་རྣམས་སྤྱི་ལྟར་བསྲུང་དགོས་པ་ཐུགས་ལ་ངེས་པར་མཛད་དེ་འདིའི་རྗེས་ཟློས། གཙོ་བོས་ཇི་ལྟར་སོགས་ལན་གསུམ། དེ་ལྟར་འཇམ་དཔལ་རྫོགས་པ་ཆེན་པོའི་
སྨིན་བྱེད་གཏོར་མ་ལ་སོགས། དེང་ནས་བརྩམ་སྟེ་སོགས་ལན་གསུམ། འདི་ལྟར་ཆོ་ག་ཟབ་མོ་བགྱིས་པའི་དགེ་བའི་དངོས་པོ་འདི་ཉིད། སྔོན་བཅོམ་ལྡན་འདས་རྒྱལ་བ་ཤཱཀྱ་ཐུབ་པས་གནས་རི་བོ་བྱ་རྐང་གི་གནས་སུ་འཇམ་དཔལ་གྱི་ཆོས་འདི་བཀའ་བསྩལ་པས། སྐུ་ལས་འོད་ཟེར་བྱེ་བ་འབུམ་ཕྲག་མང་པོ་བཀྱེ། འོད་ཟེར་རེ་རེའི་རྩེ་ལ་པདྨ་རེ། པདྨ་རེ་ལ་སྤྲུལ་པའི་སྐུ་རེ་བྱོན་ནས། ཕྱོགས་བཅུའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་གྲོལ་བར་མཛད་པ་དེ་བཞིན་དུ། སངས་རྒྱས་ཀྱི་ཞིང་ཁམས་འདིར་བདག་གིས་བྱང་ཆུབ་མཆོག་ཏུ་སེམས་བསྐྱེད་དེ། འཇམ་དཔལ་གྱི་རྩ་བའི་ཆོས་འདི་བཤད་ཅིང་ཉན་པས། ཕྱོགས་བཅུ་དང་ཁམས་གསུམ་གྱི་སེམས་ཅན་ཐམས་ཅད་སྐྱེ་མེད་ཡེ་ཤེས་ཀྱི་སྐུ་ཐོབ་པར་གྱུར་ཅིག །འཛིན་མེད་རང་སྣང་དུ་གྲོལ་བར་གྱུར་ཅིག་སྙམ་པས་དགེ་བ་ཡོངས་སུ་བསྔོ་བ་དང་། སྨོན་ལམ་བཏབ་པ་འདི་ཆབས་ཅིག་ཏུ་གསུང་མཛོད། བསོད་ནམས་འདི་ཡིས་སོགས། གང་ཚེ་བལྟ་བར་འདོད་པ་སོགས། སླར་ཡང་རྒྱལ་བའི་འཁོར་ལོ་རབ་འབྱམས་རྣམས་མདུན་གྱི་ནམ་མཁར་བྱོན་ནས། སློབ་དཔོན་དང་ལྷན་ཅིག་ཚིགས་སུ་བཅད་པའི་དབྱངས་དང་དགེ་ལེགས་ཀྱི་མེ་ཏོག་སིལ་མས་སློབ་མ་རྣམས་ལ་བཀྲ་ཤིས་ཕུན་སུམ་
ཚོགས་པ་མཛད་པར་མོས། ཆོས་ཤེས་བཀྲ་ཤིས་སོགས། དེས་འཇམ་དཔལ་རྫོགས་པ་ཆེན་པོའི་སྨིན་བྱེད་རིག་པའི་རྩལ་དབང་ཟབ་མོ་རིག་པ་འཛིན་པའི་ཕྱག་བཞེས་ཀྱིས་བརྒྱན་པ་ལེགས་པར་ཕུལ་གྲུབ་པ་ལགས་པས། འདིའི་སྒོ་ནས་ཀྱང་རང་གཞན་གྱི་དོན་གཉིས་རྒྱ་ཆེན་པོ་བསྒྲུབ་པར་འཚལ། ཞེས་པས་མཐའ་བརྒྱན། ཆོ་གའི་རྗེས་ཚོགས་ལ་རོལ་ཞིང་ལྷག་མ་ཕྱིན་མཐར་དབྱུང་བར་བྱའོ།། ༈ །།སངས་རྒྱས་གླིང་པའི་ཟབ་རྒྱ་དང་པོ་འཇམ་དཔལ་ཡེ་ཤེས་སེམས་དཔའི་སྒྲུབ་ཐབས་ཆོ་ག་རྗེས་གནང་དང་བཅས་པ་ཡེ་ཤེས་མཆོག་ཏུ་རྒྱས་པ་ལྟར་དབང་སྒྲུབ། རྗེས་གནང་དངོས། རྗེས་ཆོག་བཅས་བྱའོ།། ༈ །།ཟབ་རྒྱ་གཉིས་པ་འཇམ་དཔལ་དམར་པོ་ཞི་དྲག་ཕྱེད་མ་ལོངས་སྤྱོད་ཚེ་འཕེལ་གྱི་སྒྲུབ་ཐབས་དབང་བསྐུར་དང་བཅས་པའི་ཟིན་བྲིས་ཚེ་དབང་མཆོག་ཏུ་རྒྱས་པ་ལྟར་དབང་སྒྲུབ། དབང་དངོས། རྗེས་བཅས་བྱའོ།། ༈ །།གཏེར་ཆེན་བདུད་འདུལ་རྡོ་རྗེའི་ཡི་དམ་དམར་ནག་འཇིགས་གསུམ་གྱི་འཇམ་དབྱངས་རིགས་ལྔ་དང་དབྱངས་ཅན་མ་དམར་མོ་བཅས་ཀྱི་སྒྲུབ་ཐབས་དབང་གི་སྤྱི་ཆིངས་ཡེ་ཤེས་སྣང་བ་རྣམ་འབྱེད་ལྟར། ཕྱི་སྒྲུབ་འཇམ་དཔལ་དཀར་པོ་གཞོན་ནུ་ཆུ་སྐྱེས། ནང་སྒྲུབ་འཇམ་དམར་ཨ་ར་པ་ཙ་བློའི་མུན་སེལ། གསང་སྒྲུབ་གསེར་མདོག་ཡེ་ཤེས་སེམས་དཔའ། ཡང་གསང་དམར་སེར་བློའི་མུན་སེལ། ཟབ་གསང་བླ་མེད་སྨྲ་སེང་ཡབ་ཡུམ་ཟུང་འཇུག །དབྱངས་ཅན་དམར་མོའི་གསང་
སྒྲུབ་སྟེ་དྲུག་པོ་སོ་སོར་དབང་སྒྲུབ། དབང་དངོས་གཞི་དྲུག །རྗེས་ཆོག་བཅས་རིམ་པར་ཞིབ་ཚགས་བྱའོ།། ༈ །།ཚེ་སྒྲུབ་འཆི་བདག་བདུད་འཇོམས་དབང་ནི། སངས་གླིང་འཇམ་དམར་ལོངས་སྤྱོད་ཚེ་འཕེལ་དང་ལྷ་སྔགས་སོགས་འདྲ་བས་དེར་ཆུ་བོ་གཅིག་འདྲེས་སུ་བཞུགས་པར་གསུངས་སོ།། །།དེ་རྣམས་ཀྱིས་འཇམ་དཔལ་ཞི་སྒྲུབ་ཀྱི་སྐོར་རྣམས་གྲུབ་བོ།། །།གཉིས་པ་འཇམ་དཔལ་དྲག་པོ་གཤིན་རྗེ་རོལ་པའི་སྐོར་ལ། རྒྱ་ཞང་ཁྲོམ་རྡོ་རྗེ་འབར་གྱི་གཏེར་བྱོན། བཅོམ་ལྡན་འདས་འཇམ་དཔལ་ཕྱག་རྒྱ་ཟིལ་གནོན་ཚེ་བདག་ནག་པོའི་དབང་ཆོག་པད་གནུབས་ཆུ་བོ་གཅིག་འདྲེས་ཀྱི་སྨིན་བྱེད་ཡེ་ཤེས་འཁོར་ལོ་ལྟར་བདག་བསྐྱེད། སྟ་གོན། དབང་སྒྲུབ། དབང་དངོས་གཞིའི་སྐབས་རྭ་ཟོར་གྱི་ཐེབས་བརྩི་ལུགས་ནི། འཕངས་པའི་ཚེ་རྭ་རྩ་རྩེ་གཉིས་ཀ་ཐེབས་ཕྱོགས་དང་མིག་སྟེང་དུ་གཏད་ན་ཐེབས་ཆེན། གོང་འདྲ་ལས་མིག་འོག་ཏུ་ཚུད་ན་གན་ཐེབས། རྭ་རྩེ་ཐེབས་ཕྱོགས་དང་རྩ་བ་རང་ལ་བསྟན་ཅིང་མིག་སྟེང་དུ་གཏད་ན་བརྡུང་ཐེབས་ནང་མ། དེ་ལས་མིག་སར་གཏད་ན་བརྡུང་ཐེབས་ཕྱི་མ་སྟེ། སྔ་མ་སྔ་མ་མཆོག་གོ །དེ་བཞི་ལས་ཕྱིན་ཅི་ལོག་ཏུ་གྱུར་པའི་བཟློག་བཞི་དང་། རྩ་རྩེ་ནམ་མཁར་བསྟན་ཅིང་སྒང་ཚུགས་ན་སྒང་། རྭ་རྩ་རྩེ་གཉིས་ཀ་སར་ཟུག་ན་ལྐུགས་པ། ཞེས་བྱ་སྟེ། དེ་རྣམས་ལ་བསྐྱར། འོན་ཀྱང་སྒང་ལྐུགས་གཉིས་པོའི་རྩེ་མོ་དགྲ་ཕྱོགས་སུ་བསྟན་ན་རྒྱ་འདྲེའི་ཟོར་ཐེབས་ཞེས་བྱ་ཞིང་། རྒྱུད་ནས་བསྐྱར་དགོས་དང་། ཕྱག་ལེན་
ལ་དབང་དུས་ཇི་ལྟར་བྱུང་ཡང་མི་བསྐྱར་བར་ཐེབས་ཡོད་དབང་མཛད་སྲོལ་མི་ཕམ་པས་གསུངས་ཀྱང་། སྨིན་ལུགས་ལ་བསྐྱར་བ་བཞིན་འདིར་ཡང་བསྐྱར་དགོས། རྗེས་ཆོག་བཅས་བྱའོ།། ༈ །།ཡང་བཟློག་མེའི་སྤུ་གྲི་འདོད་བུམ། ༼༡༠༡༽ལྟར་དབང་སྒྲུབ། དངོས་གཞིར་གཏོར་དབང་རྣོན་པོ་ནང་གཅོད། རྗེས་བཅས་བྱའོ།། ༈ །།ཨོ་རྒྱན་གཏེར་བདག་གླིང་པའི་གཤིན་རྗེ་དྲེགས་པ་འཇོམས་བྱེད་ཀྱི་དབང་ཆོག་བདེ་ཆེན་འདོད་འཇོ་ལྟར་ས་ཆོག་ཐིག་གདབ་དོར་བའི་དབང་སྒྲུབ་སྐབས། འདིའི་ཆ་ལག་ལས་གཤིན་གྱི་རྗེས་གནང་སྦྱར་ན་སྟབས་བདེ་བས། བཀའ་སྲུང་སྤྱིའི་གསོལ་མཆོད་རྗེས། ༼ཉི༽ལས་གཤིན་ཕྲིན་ལས་ཕོ་ཉ་མྱུར་མགྱོགས་གཏང་བའི་དབུར། མཆོད་རྫས་དང་སྨན་རཀ་བྱིན་རླབས་དྲེགས་འཇོམས་ལས་བྱང་བདུད་ལས་རྣམ་པར་རྒྱལ་བའི་དགའ་སྟོན་ནས་འབྱུང་བ་བླངས་ཏེ། རང་གཞུང་མཆོད་གཏོར་བརླབ་པ་དང་། མདུན་རྟེན་བསྐྱེད་པ་ནས་གཟུང་བཟླས་པའི་མཐར་ཐུག་པའི་བར་རྗེས་གནང་གི་ཡི་གེར་འབྱུང་བ་བཞིན་བཏང་། དྲེགས་འཇོམས་ལས་བྱང་བཞིན་ཚོགས་བྱིན་རླབས་ནས། བསྒྲལ་བསྟབ་མཐར་རིག་མེ་དོར་ཞིང་གནང་བ་ནོད། དབང་དངོས་གཞིར་མཚམས་སྦྱོར་གྱི་ཁྱད་པར་ནི། དེ་ལ་རྒྱལ་བ་སྲས་དང་བཅས་པ་ཐམས་ཅད་ཀྱི་སྐུའི་གསང་བ་གཅིག་ཏུ་བསྡུས་པ། དཔལ་ཆེན་འཇམ་དཔལ་གཤིན་རྗེ་གཤེད་པོ་ལ་རྩ་བཤད་མན་ངག་གི་རྒྱུད་དང་། བཀའ་བབས་གྲུབ་བརྙེས་ཀྱི་སློབ་དཔོན་སོ་སོས་བཀྲལ་པའི་མན་ངག་གི་བཀའ་སྲོལ་མཐའ་
ཡས་པ་བཞུགས་ཤིང་། གངས་ཅན་འདིར་ཡང་སྔ་འགྱུར་རྙིང་མའི་ཕྱོགས་ལ་ངོ་བོའི་དབྱེ་བའི་གཤེད་སྐོར་རིགས་ལྔ་དང་། རྣམ་པ་ཡེ་ཤེས་དང་། ལས་དང་། འཇིག་རྟེན་པའི་ཚུལ་གསུམ། ཕྲིན་ལས་ཀྱི་བྱེ་བྲག་གཤིན་རྗེ་རྣ་ཆ་བརྒྱད་ནི། རྣོན་པོ་ནང་གཅོད་སྲུང་བའི་རྣ་ཆ། ཁྲོ་འདུས་ཟློག་པའི་རྣ་ཆ། འཕྲུལ་འཁོར་རྒྱས་བསྡེབས་སྡེབ་ཀྱི་རྣ་ཆ། རླུང་ནག་འཁྲུགས་པ་འབྱེད་པའི་རྣ་ཆ། དུ་རི་ཀ་གནན་པའི་རྣ་ཆ། འཆར་ཀ་ནག་པོ་མདོས་ཀྱི་རྣ་ཆ། སྲོག་ལེན་གསད་པའི་རྣ་ཆ། ཨུརྨོ་ངན་སྔགས་ཀྱི་རྣ་ཆའམ། ཡང་ན། ཁྲོ་འདུས་ཟློག་པའི་རྣ་ཆ། ཨུརྨོ་གསད་པའི་རྣ་ཆ། འཆར་ཀ་ཟོར་གྱི་རྣ་ཆ། ཀིང་ཀང་གནན་པའི་རྣ་ཆ། ཁ་ཐུན་ཐོད་པའི་རྣ་ཆ། འཕྲུལ་འཁོར་རྒྱས་བསྡེབས་སྡེབ་ཀྱི་རྣ་ཆ། རླུང་ནག་འབྱེད་པའི་རྣ་ཆ། ས་ཚོལ་དུ་རི་ཀ་གཏད་ཀྱི་རྣ་ཆ་སྟེ་བརྒྱད་སོགས་སུ་གྲགས་པ་དང་། ཕྱི་འགྱུར་གསར་མའི་ཕྱོགས་ལ་དམར་ནག་འཇིགས་གསུམ་ནང་གསེས་དང་བཅས་པ་བྱོན་པ་ལས། འདིར་ཡེ་ཤེས་ཀྱི་གཤིན་རྗེ་གཤེད་པོ་དེ་བཞིན་གཤེགས་པའི་རིགས། འཁོར་འདས་ཀུན་གྱི་ཕྱག་རྒྱ་ཟིལ་གྱིས་གནོན་པ། ཞི་ཁྲོ་དྲིལ་སྒྲུབ། གཤེད་སྐོར་རྒྱ་མཚོའི་བཅུད་དང་སྙིང་པོར་ཕྱུང་པ་འདི་ཉིད་དང་འབྲེལ་བའི་ལོ་རྒྱུས་ཅུང་
ཟད་ཅིག་སྙད་ན། གཏེར་གཞུང་རྡོ་རྗེའི་ལུང་ལས། བདག་འདྲ་མཚོ་སྐྱེས་རྡོ་རྗེ་ཐོད་ཕྲེང་རྩལ༔ སྤྲེ་འུའི་ལོ་ལ་ཀོ་ཥའི་གླིང་དུ་འཁྲུངས༔ སུམ་སྟོང་ཉེ་བར་རྒྱ་གར་ཨོ་རྒྱན་སོགས༔ བསྟན་པའི་རྒྱལ་མཚན་རྩོད་མེད་སེང་གེར་གྲགས༔ ཞེས་དང་། རིག་འཛིན་གྲུབ་ཐོབ་ཐམས་ཅད་ལ༔ དབང་དང་གདམས་པ་དཔག་མེད་ཞུས༔ ཁྱད་པར་དྲག་སྔགས་མཐུ་ཡི་བདག༔ ཕུང་བྱེད་ཤཱནྟིཾ་གརྦྷ་ལ༔ འཇམ་དཔལ་རྒྱུད་དང་སྒྲུབ་ཐབས་ཀྱི༔ སྙིང་པོ་གཅིག་བསྡུས་མན་ངག་མཆོག༔ ཐུགས་རྒྱུད་དྭངས་མའི་ཁྲག་ཐིགས་ཞུས༔ ཉམས་བླངས་རང་གི་སྙིང་ལ་གབ༔ ཅེས་དང་། ཆོས་རྒྱལ་ངོ་དང་སྨོན་ལམ་ཡུལ་གཟིགས་ནས༔ སྟག་གི་ལོ་ལ་གངས་ཅན་ཡུལ་འདིར་སླེབས༔ གཙུག་ལག་ས་བཏུལ་རབ་གནས་མངའ་གསོལ་བྱས༔ ཆོས་དང་གདམས་ངག་བསྟན་སྲུང་དྲག་སྔགས་བཅས༔ སྨོན་ལམ་དབང་གིས་རྗེ་འབངས་རྣམས་ལ་བཤད༔ མ་འོངས་དོན་ཕྱིར་གཏེར་ཁ་དཔག་མེད་སྦས༔ ཁྱད་པར་ལོ་ཙཱ་བཻ་རོ་ཙ་ན་ལ༔ སྙིང་པོའི་བཅུད་མཆོག་གཤིན་རྗེའི་གདམས་པ་བསྟན༔ སྤེལ་བར་མི་བྱ་སྙིང་ལ་གབ་བྱས་ནས༔ མ་འོངས་དོན་དུ་ཟབ་མོའི་གཏེར་དུ་སྦོས༔ འདི་ནི་ཐུགས་ཀྱི་བརྣག་པ་མིན་རེ་ཀན༔ ཞེས་
པའི་བཀའ་གཙིགས་དང་། ཁྱད་པར་དུ་རྣམ་སྣང་ལོ་ཙཱ་བ་བཻ་རོ་ཙ་ན་ལ་འཇམ་དཔལ་གཤིན་རྗེ་གཤེད་དྲེགས་པ་འཇོམས་བྱེད་ཀྱི་གདམས་པ་ཡོངས་སུ་རྫོགས་པ་གནང་བའི་ཚེ། གསེར་གྱི་མཎྜལ་ལ་གན་གཡུ་སྐར་ཆེན་འོད་འཕྲོ་ཚོམ་བུར་བཀོད་པ་ཕྱག་ཏུ་ཕུལ༔ གུས་པས་ཕྱག་གྲངས་མེད་དུ་བཙལ་ནས་གསོལ་པ༔ ཨེ་མ༔ རྒྱལ་བ་ཀུན་འདུས་མ་ལུས་འགྲོ་བའི་སྐྱབས༔ རྒྱ་བོད་ཀུན་ཏུ་རྩོད་མེད་སྤྲུལ་སྐུར་གྲགས༔ རྡོ་རྗེ་འཆང་དང་ཡོན་ཏན་དགོངས་པ་མཉམ༔ དུས་གསུམ་མཁྱེན་པའི་པདྨ་ཐོད་ཕྲེང་རྩལ༔ བདག་ལ་གནང་བའི་གཤིན་རྗེའི་གདམས་སྐོར་རྣམས༔ མ་འོངས་དོན་དུ་གཏེར་དུ་སྦ་ལགས་ན༔ གཏེར་གནས་འདོན་པའི་དུས་དང་གཏེར་འབྱིན་གང༔ དབང་བའི་ཆོས་བདག་གནོད་པའི་བདུད་རིགས་སོགས༔ ཡིད་ཆེས་ངེས་ཤེས་བསྐྱེད་ཕྱིར་བརྡ་བཀྲོལ་ཏེ༔ བརྩེ་བས་དགོངས་ཏེ་བདག་ལ་བསྩལ་དུ་གསོལ༔ ཞེས་ཞུས་པས༔ བཀའ་བསྩལ་པ༔ ཨེ་མ་ལེགས་སོ་ལེགས་སོ་སྙིང་གི་བུ༔ མ་ཡེངས་གུས་པའི་སེམས་ཀྱིས་བདག་ལ་གསོན༔ ད་ལྟ་དུས་དང་བསྐལ་པ་བཟང་གྱུར་ཅིང༔ བདག་འདྲ་
མཚོ་སྐྱེས་པདྨ་ཐོད་ཕྲེང་སོགས༔ མཁས་གྲུབ་ལོ་པཎ་ནམ་མཁའི་སྐར་ལྟར་བཀྲ༔ མདོ་སྔགས་གདམས་པའི་ཆོས་ཀྱང་དར་ཞིང་རྒྱས༔ དེ་ཕྱིར་ད་ལྟའི་འགྲོ་རྣམས་སྐལ་པ་བཟང༔ མ་འོངས་སྙིགས་མ་ལྔ་བདོའི་འགྲོ་བ་རྣམས༔ མི་མཐུན་རྐྱེན་མང་མཐུན་པའི་རྐྱེན་ཉུང་ཞིང༔ ཚེ་ལ་ལོངས་མེད་སྡེ་བརྒྱད་འབྱུང་པོས་འཚེ༔ རྒྱས་བཤད་ཆོས་ཀྱང་ཉམས་སུ་ལེན་པ་དཀའ༔ བླངས་ཀྱང་བསྲེ་ལྷད་ཞུགས་ཕྱིར་ནུས་མཐུ་ཆུང༔ དེ་ཕྱིར་ཚིག་ཉུང་དོན་འདྲིལ་གདམས་པ་འདི༔ འདི་ནས་ཤར་ལྷོ་དཔལ་ཆེན་སྒྲུབ་པའི་གནས༔ གསང་བའི་ཤེལ་ཕུག་བྱང་འདབས་རྒྱལ་མཚན་འདྲའི༔ བྲག་ལ་མི་འགྱུར་རྟགས་ཐོབས་སྦོས་ཤིག་གསུང༔ འདོན་དུས་སྙིགས་མ་ལྔ་བདོའི་བསྟན་པའི་མཐར༔ ཚེ་ལོ་སུམ་ཅུ་ཁ་རལ་དུས་ཀྱི་ཚེ༔ ས་ཡི་མདངས་ཉམས་ལོ་ཉེས་བཅུད་མི་འབྱུང༔ གནམ་གྱི་འོད་ཉམས་ཆར་ཆུ་སྒང་གཤོང་ཆེ༔ སྐྱེ་འགྲོའི་གཡང་ཉམས་མི་ཕྱུགས་ནད་མུག་ལྡང༔ ས་གཡོ་རི་བྲག་ཉིལ་ཞིང་རླུང་ཆེན་འཚུབས༔ ལུས་ཆས་སྤྱོད་ལམ་ཡ་མ་ཟུང་དུ་འགྱུར༔ མཐའ་བཞིའི་མི་རྣམས་དབུས་སུ་ཐགས་ལྟར་འགྲིམ༔ འགྲོ་རྣམས་མི་དགེའི་ལས་ལ་འབད་འབུངས་འདོན༔ དགེ་བཅུའི་བྱ་བ་རྩི་དུག་ལྟ་བུར་སྤོང༔ ཆོས་
བྱེད་གྲོགས་རྣམས་ཐོས་བསམ་སྒོམ་སྒྲུབ་གཡེལ༔ རྒྱལ་བློན་ཁྲིམས་མེད་དམག་དང་བཙན་རྫོང་བརྩིག༔ སྐྱེ་བོ་རྣམས་ཀྱང་ཨར་ཇག་ལིངས་ལ་འབད༔ ཆོས་སྤྱོད་ཉམས་དམའ་སྡིག་སྤྱོད་ཅི་བསམ་འགྲུབ༔ སྙིགས་མ་ལྔ་བདོའི་མེ་མོ་ལུག་གི་ལོ༔ གཏེར་འདི་མི་གཞག་འདོན་པའི་དུས་བབས་འགྱུར༔ ཞེས་དང་། དེ་ཚེ་འདི་ཉིད་འབྱིན་པའི་སྐྱེས་བུ་ནི༔ ད་ལྟའི་ལོ་ཙཱ་བཻ་རོ་ཙ་ན་ཁྱོད༔ འཕོ་མེད་ཆོས་སྐུའི་དགོངས་པ་མངོན་གྱུར་ཀྱང༔ སེམས་བསྐྱེད་སྨོན་ལམ་བཏབ་པའི་མཐུ་བཙན་པས༔ མ་འོངས་གཡོ་རུ་གྲ་ཞེས་བྱ་བའི་ཕུ༔ ལུང་པ་བྱང་བལྟ་དོར་མ་བརྐྱངས་འདྲའི་སར༔ ཕ་མ་ཚེ་དང་འཛིན་གྱིས་བསྐྱེད་པའི་བུ༔ སྔགས་སྐྱེས་རྣལ་འབྱོར་བྱའམ་ཁྱི་ཡི་ལོ༔ ལུས་སྒེག་རིན་ཆེན་རིགས་ཀྱི་རྟགས་འཆང་བ༔ གསང་བའི་མཚན་རྟགས་ཕྱག་རྒྱ་རྣམ་ལྔས་སྤྲས༔ པདྨའི་མིང་ཅན་ཨོ་རྒྱན་བདག་ལ་མོས༔ ཀུན་གྱི་བློ་དང་མི་བསྟུན་སྨྱོ་སྤྱོད་ཅན༔ རེས་འགའ་ངེས་འབྱུང་རེས་འགའ་བླུན་པོའི་ཚུལ༔ རེས་འགའ་རིག་རྩལ་ཤེས་སྒོ་རབ་ཏུ་ཡངས༔ རེས་འགའ་ཉོན་མོངས་འཁྲུལ་པའི་དབང་དུ་གཏོང༔ རེས་འགའ་སྣང་སྲིད་ཆོས་སྐུའི་རོལ་པར་བལྟ༔ མ་ངེས་སྤྱོད་པས་སྣ་ཚོགས་འགྲོ་བ་འདུལ༔ སྨོན་ལམ་མཐུ་ཡིས་ཟབ་མོའི་
གཏེར་འགའ་འབྱིན༔ དེ་འདྲའི་ལས་ཅན་འབྲེལ་ཚད་དོན་དང་ལྡན༔ འདུད་ཅིང་བསྟོད་རྣམས་བླ་མེད་བྱང་ཆུབ་ཐོབ༔ སྐྱེས་བུ་དེ་ལ་བར་ཆད་ཆོ་འཕྲུལ་ལྡང༔ ལ་ལས་གཏེར་མིན་རྫུན་གཏེར་གཡོ་ཁྲམ་དང༔ འབར་ཤ་མི་ཁའི་ཡ་ག་ཆར་ལྟར་འབེབ༔ མདུན་ནས་དད་པའི་གསོལ་འདེབས་ལྷང་ལྷང་འབོད༔ རྒྱབ་ནས་མི་དད་སྐུར་པ་དིར་དིར་སྒྲོག༔ ད་ལྟ་བདག་དང་ཁྱོད་ཀྱིས་མ་ཐུལ་བའི༔ སྐྱེ་བོ་མི་བསྲུན་རྣམས་ཀྱིས་དུས་དེར་འཚེ༔ ལ་ལས་སྐུར་འདེབས་ལ་ལས་གདུལ་བྱ་དགག༔ ལ་ལས་ཟས་ངན་ལ་ལའི་དམ་གྲིབ་ཕོག༔ མདོར་ན་མི་མཐུན་པ་ཡི་ལས་ཀུན་སྒྲུབ༔ དེ་ཚེ་སེམས་ཞུམ་མི་དགོས་རིག་རྩལ་སྐྱེད༔ གདུང་ཤུགས་དད་པས་ང་ལ་གསོལ་བ་ཐོབས༔ ང་ཡི་ཐུགས་རྗེས་སྐྱོབ་བོ་སྙིང་ལ་ཕུར༔ ཅེས་དང་། དེ་ཚེ་ཆོས་འདི་དབང་བའི་སྐྱེས་བུ་ནི༔ པདྨ་ང་སྤྲུལ་བྱང་སེམས་རྟ་སྦྲུལ་ལོ༔ བཟང་པོའི་མིང་ཅན་སྨོན་ལམ་མཐའ་བཙན་པས༔ གདམས་པ་འདི་ཉིད་གབ་སྦས་མེད་པར་སྦྱིན༔ ང་དྲུག་ང་བརྒྱད་ཚེ་ཡི་བར་ཆད་དང༔ ཕ་རོལ་གཞན་སྡེའི་གནོད་པ་མ་ལུས་པ༔ འདི་ཉིད་ཉམས་སུ་བླངས་པས་ངེས་པར་བཟློག༔ ཁྱད་པར་ཆོས་འདིའི་འགྲོ་དོན་སྒོ་འབྱེད་འགྱུར༔ ཞེས་སོགས་དང་།
འཇམ་དཔལ་སྒྲུབ་པའི་ལས་ཀྱི་གཞུང༔ འདི་ནི་འཇིག་རྟེན་གསུམ་ན་དཀོན༔ ཞེས་དང་། ཟབ་འདྲིལ་དྲེགས་པ་འཇོམས་བྱེད་འདི༔ སྔོན་ཆད་རྒྱ་དང་བོད་གཉིས་ཀར༔ རླུང་ཕྱོགས་ཙམ་ཡང་མ་གྲགས་ཀྱང༔ སྨོན་ལམ་ལས་ཀྱིས་འབྲེལ་བ་དང༔ སྣོད་དང་ལྡན་ཕྱིར་བདག་གིས་བཤད༔ མི་སྤེལ་ཉམས་སུ་ལེན་པ་གཅེས༔ གཞན་དུ་སྤེལ་ན་དམ་ཚིག་ཉམས༔ དེས་ན་འདི་ཉིད་སྲ་བའི་གོ༔ ཆོས་མཛད་སྐྱེས་བུ་སྲུང་བའི་མཁར༔ བདེ་གཤེགས་སྤྱི་དགྲ་སྒྲོལ་བའི་མཚོན༔ ཕས་ཀྱི་རྦོད་གཏོང་ཟློག་པའི་གཤེད༔ འདི་ཡི་སྔགས་དང་སྲུང་བ་ཙམ༔ གང་གིས་མཐོང་རེག་ཙམ་གྱིས་ཀྱང༔ བདུད་ཚོགས་བ་མོར་ཉི་ཇི་བཞིན༔ ཞེས་དང་། འདི་ནི་གསང་བའི་མན་ངག་སྟེ༔ པདྨ་བདག་གི་སྙིང་བཅུད་ཡིན༔ འདི་ཡིས་མི་འཐུལ་མི་འཇོམས་པའི༔ ནུས་མཐུ་ལྡན་པ་གཞན་ཡོད་མིན༔ ཞེས་དང་། བདག་ཉིད་བྱང་ཆུབ་སྒྲུབ་པ་དང༔ ཕ་རོལ་རྦོད་གཏོང་ཟློག་པ་དང༔ བྱད་མ་རང་གཤེད་དབབ་པའི་ཕྱིར༔ ཕྱིར་ཟློག་མན་ངག་འདི་ཁོ་ན༔ ཞེས་དང་། འདི་ནི་ཀུན་གྱི་ཡང་སྙིང་སྟེ༔ བདུད་སྡེ་བྱེ་བ་འབུམ་སྡེ་ཡང༔ སྐད་ཅིག་ཉིད་ལ་བརླག་པར་བྱེད༔ དེ་ཕྱིར་འདི་ལ་ནན་ཏན་མཛོད༔ ཅེས་སོགས་འབྱུང་ཁུངས་ལོ་རྒྱུས་
མ་འོངས་ཐ་མའི་སྣང་ཚུལ། གང་དུ་སྦ་བའི་གནས། འདོན་པའི་དུས་རྟགས། གཏེར་འབྱིན་གྱི་སྐྱེས་བུ། ཟབ་ཆོས་ཀྱི་བདག་པོ། དགོས་གནད་ཀྱི་ཆེ་བ་ལ་སོགས་པ་གསལ་བར་བསྟན་པ་བཞིན། ལོ་ཆེན་བཻ་རོ་ཙ་ནའི་གསུང་གི་རྣམ་པར་འཕྲུལ་པ། ཨོ་རྒྱན་གཏེར་བདག་གླིང་པ་པདྨ་གར་དབང་འགྱུར་མེད་རྡོ་རྗེ་རྩལ་གྱི་གཏེར་ཁ་གཉིས་པ། སློབ་དཔོན་ཆེན་པོའི་བདུད་རྩི་ཡོན་ཏན་གྱི་གནས་མཆོག །ཨོ་རྒྱན་མཁའ་འགྲོའི་གླིང་དང་མཚུངས་པའི་ཡར་ལུང་ཤེལ་གྱི་བྲག་དཔལ་ཆེན་སྒྲུབ་ཕུག་གི་བྱང་འདབས། བྲག་རྒྱལ་མཚན་འདྲ་བའི་ངོས་སུ་མཁའ་ལྡིང་རྒྱལ་པོའི་བརྟུལ་ཞུགས་ཀྱིས་གཤེགས་ཤིང་། རྫུ་འཕྲུལ་གྱི་བཀོད་པ་རྨད་དུ་བྱུང་བས་གདན་དྲངས་པ་འཇམ་དཔལ་གཤིན་རྗེ་གཤེད་དྲེགས་པ་འཇོམས་བྱེད་ཀྱི་དཀྱིལ་འཁོར་དུ་སྨིན་བྱེད་ཀྱི་དབང་བསྐུར་ཟབ་མོ་བསྒྲུབ་པར་བགྱི་བ་ལ་སོགས་ཀྱིས་མཚམས་སྦྱར་ལ་མཎྜལ། གཉིས་སུ་འཛིན་པའི་རྟོག་སྒྲིབ་ཀྱིས་རང་བྱུང་དོན་གྱི་ལྷ་ཞལ་མ་མཇལ་བའི་བརྡར་གདོང་གཡོགས་འཆིང་མཛོད། འབྲུ་གསུམ་གྱིས་མིག་དར་གཏད། ལྷ་དང་མཇལ་བའི་ཕྱག་རྟེན་མཚོན་བྱེད་རིན་པོ་ཆེའི་མེ་ཏོག་གི་ཕྲེང་བ་རེ་ཕྱག་ཏུ་ཐོགས་པར་མོས། ཨཱ་ཁཾ་བཱི་ར་ཧཱུྃ་གིས་མེ་ཏོག་སྦྱིན། བླ་མ་འཇམ་དཔལ་ཕྱག་རྒྱ་ཟིལ་གནོན་གྱི་ཡེ་ཤེས་
སྐུ་དང་ཐ་མི་དད་པ་ལ་མོས་གུས་གདུང་ཤུགས་དྲག་པོས་གསོལ་བ་འདེབས་པ་འདིའི་རྗེས་ཟློས། ཨེ་མ་བླ་མ་སོགས་ལན་གསུམ། དེ་ལྟར་ཞུས་པའི་ལན་དུ་སྤྲོ་བ་བསྐྱེད་ཅིང་གནང་བ་སྦྱིན་པ་ནི། ཨེ་མ་སྣོད་དང་སོགས། སྡོམ་པ་ཐམས་ཅད་ཀྱི་གཞི་རྟེན་སྐྱབས་སུ་འགྲོ་བའི་སླད་དུ། མདུན་གྱི་ནམ་མཁར་དཀོན་མཆོག་ཀུན་འདུས་བླ་མ་འཇམ་པའི་རྡོ་རྗེའི་དཀྱིལ་འཁོར་བ་རྩ་གསུམ་རབ་འབྱམས་ཀྱི་འཁོར་ལོ་མཁའ་ཁྱབ་ཏུ་བཞུགས་པའི་སྤྱན་སྔར། བདག་སོགས་སེམས་ཅན་ཐམས་ཅད་དེང་ནས་བྱང་ཆུབ་བར་དུ་རྩེ་གཅིག་གུས་པས་སྐྱབས་སུ་འགྲོ་བའི་བློས་འདིའི་རྗེས་ཟློས། ལས་བྱང་ལྟར། ན་མོ༔ བདག་དང་མཐའ་ཡས་སོགས་ལན་གསུམ། རང་རིག་ཡེ་ཤེས་སྙིང་པོའི་རང་ངོ་མ་ཤེས་པར་འཁྲུལ་རྟོག་གི་དབང་གིས་འཁོར་བར་འཁྱམས་པའི་འགྲོ་རྣམས་བདེ་ཆེན་གྱི་སར་བསྒྲལ་བའི་ཕྱིར་སྨིན་བྱེད་ཀྱི་སྒོར་ཞུགས་ནས། རིམ་པ་གཉིས་ཀྱི་རྣལ་འབྱོར་དང་ལྡན་པས་ཕྲིན་ལས་རབ་འབྱམས་བརྩམ་པར་བགྱིའོ་སྙམ་དུ་སེམས་བསྐྱེད་པ་འདིའི་རྗེས་ཟློས། རང་རིག་རང་ངོ་སོགས་ལན་གསུམ། དབང་གི་སྲོག་ལམ་གྱི་རྩ་བ་རྡོ་རྗེ་ཐེག་པའི་དམ་ཚིག་དུག་ལྔ་ཡེ་ཤེས་ལྔའི་ངོ་བོར་ཤེས་པ་སོགས་ཡན་ལག་བསླབ་བྱ་ལྔ་ཕྲག་ལྔ་དང་། རིགས་ལྔའི་བརྟུལ་ཞུགས་
རྣམས་ཚུལ་བཞིན་དུ་བསྲུང་བའི་བློས་འདིའི་རྗེས་ཟློས། དུག་ལྔ་དག་པ་སོགས་དབང་ཆོག་ལྟར་ལན་གསུམ། ཁྱད་པར་ཞི་བའི་ཕྲིན་ལས་ཀྱི་ཡུལ་དུ་མ་གྱུར་པ་བསྟན་དང་རྣལ་འབྱོར་ལ་འཁུ་བ་སོགས་མ་རུངས་པ་རྣམས་ཚར་གཅོད་རྗེས་སུ་འཛིན་པའི་ཕྱིར། འཇམ་དཔལ་དྲག་པོའི་བསྙེན་སྒྲུབ་ལས་ཀྱི་སྦྱོར་བ་རྣམས་བརྩམ་པར་བྱའོ་སྙམ་པས་འདིའི་རྗེས་ཟློས། ཧེ་རུ་ཀཿདཔལ་སོགས་ལན་གསུམ། ཁྱེད་རང་རྣམས་ལས་ཀྱི་རྡོ་རྗེས་ཁྲིད་དེ་ཡོལ་བའི་ནང་དུ་དྲངས་ཤིང་། དཀྱིལ་འཁོར་གྱི་སྒོ་བཞི་ཤག་གིས་ཕྱེ་བར་མོས། ཛཿཧཱུྃ་སོགས་ནས། ཛཿཛཿབར་བརྗོད། ཁྱེད་རང་རྣམས་དཀྱིལ་འཁོར་ཆེན་པོའི་ཤར་སྒོ་ནས་ཞུགས་ཏེ། རིམ་པར་ལྷ་ཚོགས་རྣམས་ཀྱི་ཞབས་ལ་ཕྱག་འཚལ་བར་མོས་པས། ཐལ་མོ་གནས་གསུམ་དུ་སྦྱོར་ལ་འདིའི་རྗེས་ཟློས། ཨོཾ་ན་མཿསོགས་ལན་བཞི། དེ་རྣམས་ཀྱིས་ཕྱི་རོལ་ནས་འཇུག་པ་རྣམས་གྲུབ། ནང་འཇུག་གི་སྔོན་འགྲོ་འདི་ལྟ་བུའི་གསང་བ་གཞན་ལ་མི་བསྒྲག་པར་གདམས་ཤིང་། རྡོ་རྗེ་སྤྱི་བོར་བཀོད་དེ་དམ་ལ་བཞག་པར་མོས། ཧཱུྃ༔ འཇམ་དཔལ་གཤིན་རྗེའི་སོགས། བདུད་རྩི་དང་སྦྱར་བའི་དུང་ཞལ་གྱི་ཆུ་ནན་སྦྱིན་པ་སྙིང་དབུས་ཡེ་ཤེས་སེམས་དཔའ་དང་དབྱེར་མེད་དུ་གྱུར་ནས། དམ་ཚིག་བསྲུངས་ན་དངོས་གྲུབ་ཐོབ་ཅིང་། འདས་ན་
གཤེད་མར་འགྱུར་བའི་དོན་དྲན་པར་མཛོད་ཅིག །ཧཱུྃ༔ འདི་ནི་དམ་ཚིག་སོགས་ནས། སློབ་མ་ལྷར་བསྐྱེད། བྱིན་དབབ། བརྟན་པར་བྱས་རྗེས། དེ་ལྟར་ཁྱེད་རང་རྣམས་ལྷའི་སྐུར་གསལ་ཞིང་། ཡེ་ཤེས་ཀྱི་དཀྱིལ་འཁོར་དུ་བཅུག་པས། དེང་ཕྱིན་ཆད་ལྷ་དང་སྤྱོད་ཡུལ་མཉམ་པའི་སྐལ་པ་ཅན་དུ་ངེས་པའི་རྟགས་སུ་དཔལ་དང་དུར་ཁྲོད་ཀྱི་ཆས་གོས་སྦྱིན་པ་རྣམས་གནས་སོ་སོར་བགོས་པར་མོས། ཧཱུྃ༔ སྔོན་ཚེ་དཔལ་ཆེན་སོགས། སྔར་བྱིན་པའི་མེ་ཏོག་དེ་ཉིད་ལྷ་ལ་བཟང་ངན་མེད་ཀྱང་། རང་རིག་དང་སྔོན་ནས་འབྲེལ་བ་གང་ཡིན་པའི་ལྷག་པའི་ལྷས་བཞེས་སུ་གསོལ་སྙམ་པའི་དམོད་འདོར་བ་དང་བཅས། འདིའི་རྗེས་ཟློས་ཀྱིས་མེ་ཏོག་ཕྱག་རྒྱའི་དཀྱིལ་འཁོར་དུ་དོར་ཅིག །ཧཱུྃ༔ ཁྲག་འཐུང་གཤིན་རྗེའི་སོགས། དེ་ལྟར་ཕུལ་པའི་མེ་ཏོག་གཙོ་བོས་བཞེས་ཏེ། སླར་ཁྱེད་རང་རྣམས་ལ་དབང་རྟགས་ཅོད་པན་གྱི་ཚུལ་དུ་སྤྱི་བོར་བཅིངས་པར་མོས། ཧཱུྃ༔ ཐུགས་མཆོག་འཇམ་དཔལ་སོགས། མ་རིག་པའི་སྒྲིབ་གཡོགས་མིག་དར་དང་ལྷན་ཅིག་གསེར་གྱི་ཐུར་མས་བསལ་བར་མོས། གཤིན་རྗེ་གཤེད་པོས་སོགས་ནས། ཐོབ་པར་འགྱུར༔ དེས་ཕྱི་ལྟར་མཚན་མ་རྫས་ཀྱི་སོགས་ཡིག་ཆུང་ནས། གྲུབ་པའི་བརྡ་དོན་ཤེས་པར་མཛོད་ཅིག །དེ་རྣམས་ཀྱིས་ཕྱི་ནང་གི་འཇུག་པའི་ཆོས་རྣམས་གྲུབ་ནས། དངོས་གཞི་ལ་
བུམ་གསང་ཤེར་ཡེ་ཚིག་དབང་བཞི་རིམ་པར་འབྱུང་བ་ལས། དེ་རྣམས་ཞུ་བའི་ཡོན་དུ་མཎྜལ། གསོལ་བ་གདབ་པ་འདིའི་རྗེས་ཟློས། སྔོན་ཚེ་བདེ་བར་སོགས་ནས། ནམ་མཁའ་གང་བར་སྤྱན་དྲངས་པ་ལ་སློབ་དཔོན་གྱིས་མཆོད་ཅིང་གསོལ་བ་འདེབས་པར་གྱུར། ཨོཾ་བཛྲ་པུཥྤེ་ནས། ཤབྡ་པྲ་ཏཱིཙྪ་སྭཱ་ཧཱས་མཆོད། དེ་བཞིན་གཤེགས་པ་སོགས་ལ་བར་སྐབས་ཀྱི་ཡིག་ཆུང་ཁ་བསྒྱུར་ཕྲན་བུས་ཟུར་བརྒྱན་ནས་མཚམས་སྦྱོར་བྱས་ན་འཐུས་པ་གོང་འོག་ཀུན་ལ་འགྲེས་ཤིང་། སྐུ་དབང་རྫོགས་མཚམས། གཉིས་པ་གསུང་གི་དབང་བསྐུར་བ་ནི། ལྷ་ཚོགས་རྣམས་ཀྱི་མགྲིན་པ་ནས་གསུང་སྔགས་ཀྱི་ཕྲེང་བའི་ཚོགས་འཕྲོས། ཁྱེད་རང་རྣམས་ཀྱི་མགྲིན་པར་ཐིམ་པས། ངག་ལ་གསུང་གི་དབང་དང་བྱིན་རླབས་མ་ལུས་པ་ཞུགས་ཏེ། བཟླས་བརྗོད་ཀྱི་རིམ་པ་ལ་འཇུག་པའི་མཐུ་ཐོབ་པར་མོས། ཧཱུྃ༔ སྣ་ཚོགས་རྣམ་རྟོག་སོགས་ནས། ཡོན་ཏན་གཏོར་དབང་མཐའ་བར་བསྐུར། ལྔ་པ་ཕྲིན་ལས་དྲག་པོ་མངོན་སྤྱོད་སྒྲོལ་བའི་དབང་བསྐུར་བའི་དོན་དུ་དཔོན་སློབ་གཉིས་ཀ་འཇམ་དཔལ་གཤིན་རྗེ་གཤེད་དྲེགས་པ་འཇོམས་བྱེད་ཀྱི་གསལ་སྣང་རྫོགས་ཤིང་། ང་རྒྱལ་བརྟན་པའི་ངང་ནས་བདག་གི་བརྗོད་ཚིག་དང་མཐུན་པའི་ཏིང་ངེ་འཛིན་རྣམས་ལ་འཇུག་པར་འཚལ། བྲུབ་ཁུང་
ཉ་བོ་དང་བཅས་པ་སློབ་དཔོན་གྱི་མདུན་དུ་བཀོད། བྲུབ་ཁུང་སྟོང་པའི་ངང་ལས། ཨེ་ལས་ལྕགས་སྲེག་གི་ཁང་སྒྲོམ་ཟུར་གསུམ་པ་བང་རིམ་དགུ་པ་ཁ་ཁྱེར་དོག་ཅིང་གཏིང་ཟབ་པ། འོག་ན་འདོད་ཆགས་ཀྱི་ཁྲག་མཚོ་ཁོལ་བ། ལོགས་ལ་ཞེ་སྡང་གི་མེ་རླུང་འཚུབས་པ། སྟེང་ན་གཏི་མུག་གི་མུན་པ་གཏིབས་པ། མཚོན་ཆའི་ཆར་འབེབས་ཤིང་ནད་དང་དུག་གི་རླངས་པ་འཕྱོ་བ། ཐན་དང་ལྟས་ངན་གྱི་ཆོ་འཕྲུལ་སྣ་ཚོགས་མི་ཟད་པར་འཁྲུགས་པ། ལས་བྱེད་གཤིན་རྗེའི་དམག་ཚོགས་སེང་གེ་ལྟར་རྔམས་པ། སྟག་ལྟར་འཕྱོ་བ་སྲིན་པོ་ལྟར་ཁྲོས་པ་ཤ་ཟ་ལྟར་རྒྱུག་པ། རྒྱོབ་རྒྱོབ་དང་སོད་སོད་ཀྱི་སྒྲ་འབྲུག་ལྟར་སྒྲོག་པས་གང་བ། སྲིད་པ་ལས་ཀྱི་བཙོན་ཁང་དྲག་པོ་དེའི་ནང་དུ་ནྲྀ་ཏྲི་དུད་ཁ་ཡོངས་སུ་གྱུར་པ་ལས། དགྲ་བགེགས་དེ་རྣམས་ལུས་གཅེར་བུ་རིད་པ། མདོག་ནག་ཅིང་དྲན་པ་ཉམས་པ་མྱ་ངན་གྱི་ཕྱག་རྒྱ་ཅན། བུ་ག་དགུ་ནས་རྣག་ཁྲག་འཛག་པ་གནོད་བྱེད་ཐམས་ཅད་འདུས་པའི་ངོ་བོར་གྱུར། སློབ་དཔོན་གྱིས་གཡབ་དྲིལ་འགུགས་རྒྱ་བཅས། ན་མོ། རིག་འཛིན་རྩ་བརྒྱུད་ཀྱི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི་བཀའ༴ ཆོས་ཀྱི་བཀའ༴ དགེ་འདུན་གྱི་བཀའ༴ གསང་སྔགས་
དང་རིག་སྔགས་དང་གཟུངས་སྔགས་དང་། སྙིང་པོ་དང་ཕྱག་རྒྱ་དང་ཏིང་ངེ་འཛིན་རྣམས་ཀྱི་བདེན་པ་དང་། ཆོས་ཉིད་གདོད་ནས་སྟོངས་ཀྱང་ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། ཁྱད་པར་བཅོམ་ལྡན་འདས་འཇམ་དཔལ་གཤིན་རྗེའི་གཤེད་པོའི་དཀྱིལ་འཁོར་གྱི་ལྷ་ཚོགས་བཀའ་སྡོད་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱི་བཀའ་བདེན་པ་དང་། བདེན་པ་ཆེན་པོའི་མཐུ་ལ་བརྟེན་ནས། བསྟན་དང་འགྲོ་བའི་སྤྱི་དགྲ། ཁྱད་པར་རིག་པ་འཛིན་པ་བདག་ཅག་དཔོན་སློབ་ཡོན་མཆོད་འཁོར་དང་བཅས་པ་རྣམས་ལ་སྔ་དགྲ་ལག་གིས་བདར་པ། ཕྱི་དགྲ་ཡིད་ལ་སེམས་པ། ད་དགྲ་ཐད་དུ་འཛུགས་པའི་གཟུགས་ཅན་སྡང་བའི་དགྲ་དང་གཟུགས་མེད་གནོད་བྱེད་བགེགས་ཀྱི་ཚོགས་དང་བཅས་པ་ཐམས་ཅད། སྲིད་པ་གསུམ་གྱི་ཁོངས་གར་གནས་གར་བྲོས་ཀྱང་སྐད་ཅིག་ཡུད་ཙམ་གྱིས་དམིགས་པའི་རྟེན་འདི་ལ་ཁུག་ཅིག །སྒྲུབ་སྔགས་ཤམ་བུར། ཆེ་གེ་མོ་ཨཱ་ཀརྵཱ་ཡ་ཛཿ ཞེས་དགུག་གཞུག་ནན་ཏན་དུ་བྱ། སླར་ཡང་ནན་གྱིས་འགུགས་ཕྱིར་ཕོ་ཉ་འགྱེད་པ་ནི། ཛ༔ ཁྲག་འཐུང་འཇམ་དཔལ་གཤིན་རྗེ་ཡི༔ ལས་བྱེད་བཀའ་ཉན་ཕོ་ཉའི་ཚོགས༔ ཁྱོད་ཀྱི་དམ་ཚིག་དུས་ལ་བབས༔ སྤྲུལ་པ་འགྱེད་པའི་དུས་ལ་བབས༔ དགྲ་
བགེགས་འགུགས་པའི་དུས་ལ་བབས༔ སྡང་བའི་དགྲ་དང་གནོད་པའི་བགེགས༔ གང་ལ་བྱ་བ་ཁྱོད་ཀྱིས་ཤེས༔ བླ་སྲོག་རྣམ་པར་ཤེས་པ་ཀུན༔ མ་ཤོར་མ་གཏང་ཁུག་ལ་ཤོག༔ བཏབ་པའི་དུས་ལས་མ་འདའ་བར༔ ཞིང་བཅུ་ཚང་བའི་དགྲ་དང་བགེགས༔ ཐམས་ཅད་མ་ལུས་མྱུར་དུ་ཁུག༔ ལྕགས་ཀྱུ་ཅན་གྱིས་སྙིང་ནས་དྲོངས༔ ཞགས་པ་ཅན་གྱིས་ཡན་ལག་ཆིངས༔ ལྕགས་སྒྲོག་ཅན་གྱིས་དབང་པོ་སྡོམས༔ དྲིལ་བུ་ཅན་གྱིས་མྱོས་སུ་ཆུག༔ ལས་ཀྱི་རླུང་གིས་རྒྱབ་ནས་ཕུལ༔ འཇིགས་པའི་མུན་པས་མདུན་ནས་བསུས༔ སྐད་ཅིག་དེ་ནི་ཡུད་ཙམ་ལ༔ རང་དབང་མེད་པར་ཁྲིད་ལ་ཤོག༔ ཨ་མུ་ཀ་སརྦ་ནྲྀ་ཏྲི་བཛྲ་ཨཾ་ཀུ་ཤ་ཛཿཛ༔ ཞེས་བརྗོད་ཅིང་། འདི་སྐབས་སྤྲོས་པ་ལ་དགའ་ན། བརྗོད་ཚིག་དང་བསྟུན་པའི་ཕྱག་རྒྱ་སོགས་རིམ་པར་གདབ་ཅིང་། འགུགས་དམིགས་བཅས་ཀྱིས་བཀུག །ལྷ་དང་དབྱེ་བ་ནི། ལིངྒ་དབྱེ་རྫས་ཀྱིས་བདུག་ཅིང་། སྒྲོ་གཉིས་ཀྱིས་འབྱེད་ལ། ཧཱུྃ༔ དབྱེ་བྱེད་ལས་ཀྱི་ཕོ་ཉའི་ཚོགས༔ ལས་ངན་སྡིག་ཅན་དགྲ་བོ་འདི༔ བསྲུང་ཞིང་སྐྱོབ་པར་བྱེད་པ་ཡི༔ ཡེ་ཤེས་འཇིག་རྟེན་ལྷ་ཡི་ཚོགས༔ ཕྲོལ་ཅིག་ཕྱེས་ཤིག་རྣམ་པར་ཕྱེས༔ མཉམ་པོར་འོང་བའི་བདུད་དང་སྤྲོད༔ མ་མ་ཏྲག་རཀྴ་མཱ་ར་ཡ་ཕྱེ་ཕྱེ༔ ནྲྀ་ཏྲི་དེ་ཝ་སརྦ་ཨུ་ཙ་ཏ་ཡ་ཕཊ༔ ཉེས་པ་
བསྒྲག་པ་ནི། ཧཱུྃ༔ དུག་ལྔའི་དབང་གྱུར་ལས་ངན་ཁྱོད༔ བསྒྲལ་བའི་ཞིང་བཅུ་ཚང་བ་སྟེ༔ སྙིང་རྗེས་ཁྲོས་ནས་བསྒྲལ་བར་བྱ༔ བྱང་ཆུབ་མཆོག་ཏུ་སེམས་སྐྱེད་ཅིག༔ ཐུན་རྫས་རྣམས་སྡེ་བརྒྱད་ཀྱི་དམག་ཚོགས་ནད་མཚོན་དུག་ཆར་དམིགས་བྱའི་སྟེང་དུ་ཕབ་པས་ལུས་སེམས་རྡུལ་དུ་བརླགས་པར་བསམ་ལ། ཐུན་བྲབ་ཅིང་། ཧཱུྃ༔ ཁྲག་འཐུང་འཇམ་དཔལ་གཤིན་རྗེ་ཡི༔ ཕོ་ཉར་མངགས་པ་ཐུན་གྱི་བདག༔ དགྲ་བགེགས་སྒྲོལ་ཕྱིར་ལས་ལ་ཡ༔ སྣ་ཚོགས་དྲག་པོ་རྫས་ཀྱི་ཐུན༔ གློག་ལྟར་འཁྱུག་ཅིང་ཐོག་ལྟར་འབེབ༔ དགྲ་བགེགས་ལུས་སྲོག་འབེན་ལ་ཡ༔ ཨེ་ཡ་མ་རཱ་ཛ་དགྲ་བགེགས་བྱད་མ་ཤ་ཏྲཱུཾ་ཏྲིག་ནན༔ སྲོག་ནྲྀ་ཏྲི་ཧུར་ཐུཾ་ཛ༔ མཱ་ར་ཡ་རྦད་སོད༔ ཁཾ་ཤག་རོ་མྱག་མུག་ཏི་རྦད༔ དགྲ་བོའི་སྲོག་རྩ་མཱ་ར་ཡ་ཆོད༔ ཐུཾ་རིལ་རྦུད༔ ཨེ་མྱག་ཐུན་བྷྱོ༔ མཱ་ར་ཡ་རྦད་ཛ༔ དཔོན་སློབ་གཉིས་ཀ་འཇམ་དཔལ་གཤིན་རྗེ་གཤེད་ཀྱི་གསལ་སྣང་དང་ལྡན་པས། སློབ་དཔོན་གྱི་རྩ་བའི་ཕྱག་གི་སོར་མོ་རྣམས་རིགས་ལྔ་ཡབ་ཡུམ་བཅུར་གྱུར། ས་མ་ཡ་ཧོཿ རྗེས་སུ་ཆགས་པའི་སྦྱོར་བས་སྙོམས་པར་ཞུགས་པའི་སྲས་མཆོག་བཛྲ་ཀཱི་ལ་ཡ་སྐུ་སྟོད་སྲིན་པོ་ཁྲོས་པའི་ཉམས་ཅན་མཐིང་ནག །ཕྱག་གཉིས་ཕུར་བུ་བསྒྲིལ་བ། ལྟེ་བ་མན་
ཆད་ཆུ་སྲིན་གྱི་ཁ་ནས་གནམ་ལྕགས་འབར་བའི་དབལ་ཟུར་གསུམ་རྣོ་བའི་ཁོང་སེང་དུ་ལྷའི་ཕོ་བྲང་གནས་དང་བཅས་པ། རྩེ་མོར་དྲེགས་པའི་དམག་ཚོགས་ལས་ལ་རྔམས་ཤིང་དུས་མེའི་ཚྭ་ཚྭ་འཕྲོ་བར་གྱུར། ཨོཾ་ཡ་མ་ཀྲོ་དྷ་བཛྲ་ཀཱི་ལི་ཀཱི་ལ་ཡ་ཀཱ་ཡ་ཝཱ་ཀ་ཙིཏྟ་ཨ་བྷི་ཥིཉྩ་མཱི། ཕུར་པ་ལས་བྱུང་བའི་འོད་ཟེར་གྱིས་རྒྱལ་བ་སྲས་དང་བཅས་པའི་བྱིན་རླབས་ནུས་མཐུ་འོད་ཟེར་གྱི་རྣམ་པར་སྤྱན་དྲངས། དེ་ཉིད་ལ་ཐིམ་པས་ཁམས་གསུམ་དུས་གཅིག་ཏུ་སྒྲོལ་བའི་མཐུ་དང་ལྡན་པར་གྱུར་པའི་སྲས་མཆོག་ཕུར་བུ་སློབ་བུའི་ཕྱག་ཏུ་གཏད་པས། སྲིད་གསུམ་སྒྲོལ་བའི་ནུས་དབང་ཐོབ་པར་མོས། དབང་ཆོག་ལྟར། ཧཱུྃ༔ འཇམ་དཔལ་ཁྲོས་པ་སོགས་སྔགས་དང་བཅས་པས་ལག་ཏུ་གཏད། ཕུར་བུ་སྲས་མཆོག་དངོས་སུ་གསལ་བ་དམིགས་བྱའི་སྙིང་གར་འདྲིལ་ཞིང་བཏབ་པས། ཉོན་མོངས་པའི་བག་ཆགས་བདེ་ཆེན་ཡེ་ཤེས་ཀྱི་ཀློང་དུ་བསྒྲལ་བར་མོས། ཧཱུྃ༔ ཁྲོ་རྒྱལ་ཁྲག་འཐུང་ཆེན་པོ་ཡི༔ སྲས་མཆོག་བཛྲ་ཀཱི་ལ་ཡ༔ བསྒྲིལ་བས་ལྷ་ཡང་སྐྲག་བྱེད་ན༔ བཏབ་པས་དགྲ་བགེགས་སྨྲོས་ཅི་དགོས༔ ཞིང་བཅུ་ཚང་བའི་ལོག་འདྲེན་འདི༔ སྒྲོལ་ཅིག་ཡེ་ཤེས་ཀློང་དུ་སྒྲོལ༔ ཨེ་མྱགས་ཡ་རྔུབས་མུག་ཤ་ཀ་དུན་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ༔ དེ་ནས་བརྟེན་པ་དབྱིངས་སུ་བསྒྲལ་
བའི་དགོངས་པ་རྣམ་གསུམ་ནི། ཕུར་པ་ལས་འོད་ཟེར་འཕྲོས། ཁོ་ལ་ཕོག །བདུད་བཞི་རང་གཤེད་དུ་དབབ་ནས་འཁོར་ལོ་བཞིའི་རྩ་རྣམས་བཅད། ཀླད་ཁྲག་ཁྲུག་གིས་འདྲེས། གཟུགས་ཕུང་གི་འབྱུང་བའི་དྭངས་མ་རིམ་བཞིན་འདུས་ནས་ཚེ་རྟེན་ཨ་དང་། རྣམ་ཤེས་ནྲྀའི་རྣམ་པར་འདུས་པ་ཕུར་རྩེའི་ཧཱུྃ་གིས་བླངས་ནས་རང་ལ་བསྟིམས་པས། ཨ་དཀར་འོད་ཀྱི་རང་བཞིན་སྙིང་གར་ཐིམ་ཚེ་དཔལ་གཟི་བརྗིད་འབར། ནྲྀ་དེ་ཕཊ་ཀྱིས་འཕངས་པས་ཕུར་པའི་ཁོང་གསེང་ནས་ཞུགས། ལས་ངན་གྱི་རྣམ་སྨིན་བཀྲུས། དྭངས་མ་ཧཱུྃ་དུ་གྱུར་པ་རྒྱ་མདུད་ཀྱི་མགོར་ཐོན་ནས་འཇམ་དཔལ་ཡེ་ཤེས་སེམས་དཔའི་ཐུགས་ཀར་ཐིམ་པར་བསམ་ལ། སྐྱེ་མེད་དབྱིངས་སུ་སྒྲོལ་བའི་དགོངས་པ་བསྟན་པ་ནི། ཨེ་མ་ཁམས་གསུམ་སེམས་ཅན་རྣམས༔ མ་རྟོགས་འཁྲུལ་པ་སྙིང་རེ་རྗེ༔ སྙིང་རྗེས་བསྒྲལ་བའི་དམ་ཚིག་ནི༔ བསད་ཅིང་མནན་པ་མ་ཡིན་ཏེ༔ ཐུགས་རྗེའི་ཐབས་ཀྱི་སྦྱོར་བ་ཡིས༔ ཕུང་པོ་བསྒྲལ་བའི་ཞིང་དུ་བྱས༔ རྣམ་ཤེས་ཡུམ་གྱི་མཁའ་ལ་སྦ༔ ཡེ་ཤེས་དཔའ་བོར་བྱིན་བརླབས་ཏེ༔ རིག་པ་སྐྱེ་མེད་དབྱིངས་སུ་འཕང༔ ཁྱོད་ནི་རྒྱལ་བའི་སྲས་སུ་བསྐྱེད༔ ཨ་ཕཊ། ཅེས་དགོངས་པ་བསྐྱང་། སླར་ཡང་རྟེན་གཞི་
བག་ཆགས་འཁྲུལ་པའི་གཟུགས་ཕུང་། ཕྱག་མཚན་རལ་གྲི་ལ་སོགས་མཚོན་ཆའི་ཚོགས་ཀྱིས་དུམ་བུར་གཏུབས་པར་མོས། ཧཱུྃ༔ སྙིང་རྗེ་ཁྲོས་པའི་ཁྲོ་རྒྱལ་གྱིས༔ ཡེ་ཤེས་རྣོ་དབལ་མཚོན་ཆ་ཡིས༔ དགྲ་བགེགས་བག་ཆགས་འཁྲུལ་སེམས་བསྒྲལ༔ རྣམ་ཤེས་ཆོས་ཀྱི་དབྱིངས་སུ་ཐིམ༔ ཨེ་མྱགས་ཡ་རྔུབས་མུག་ཤ་ཀ་དུན༔ ཨ་མུ་ཀ་ཤ་ཏྲཱུཾ་ཏྲིག་ནན་རྦད་ནན༔ ཙིཏྟ་ཐུཾ་རིལ་རྦད༔ ཆེ་གེ་མོའི་སྲོག་ནྲྀ་ཏྲི་ཧུར་ཐུཾ་ཛ༔ ཁམ་ཤག་རོ་མྱགས་མུག་ཏི་རྦད༔ མཱ་ར་ཡ་རྦད༔ ཅེས་རལ་གྲིས་གཏུབ། ཐོ་གཏུན་ཐབས་ཤེས་རོལ་པའི་མཁའ་གསང་སྦྱོར་བས་བག་ཆགས་ཀྱི་ལུས་སྐྱེ་མེད་དབྱིངས་སུ་རྡུལ་དུ་བརླགས་པར་མོས། ཧཱུྃ༔ རྡུངས་ཤིག་རྡོ་རྗེ་འབར་བའི་གཏུན༔ བཀའ་ལས་འདའ་བྱེད་སྡིག་ཅན་རྣམས༔ ཁྲོ་མོ་འབར་བའི་གཏུན་ཁུང་དུ༔ རྡོ་རྗེ་ཐོ་བས་བརྡུང་བྱས་པས༔ ལྷ་ཡང་རུང་སྟེ་བརླག་བྱེད་ན༔ དགྲ་དང་བགེགས་ལ་སྨྲོས་ཅི་དགོས༔ ཨོཾ་པདྨ་ཨ་ཀོ་ཊ་ཡ་ཁ་ཐཾ་ཁ་ཐཾ༔ ཞེས་བརྡུང་། དགྲ་བགེགས་བསྒྲལ་པའི་ཤ་ཁྲག་བདེ་ཆེན་བྱང་ཆུབ་སེམས་ཀྱི་བདུད་རྩིའི་རང་བཞིན་དུ་བྱིན་གྱིས་བརླབས་ཤིང་འཁྱིལ་པ། དཀྱིལ་འཁོར་ལྷ་ཚོགས་བཀའ་སྡོད་དང་བཅས་པའི་ཞལ་དུ་བསྟབ་པར་མོས། ཧཱུྃ༔ བསྐལ་པའི་མེ་ལྟར་འབར་བའི་ཀློང༔ འཇམ་
དཔལ་ཁྲོ་རྒྱལ་གཤིན་རྗེའི་གཤེད༔ སྐུ་ནི་རི་རབ་ལྟ་བུར་བཞེངས༔ གནམ་ས་ལྟ་བུའི་ཞལ་གདོངས་ལ༔ གངས་རི་གཏམས་འདྲའི་མཆེ་བ་གཙིགས༔ གློག་དམར་འཁྱུག་འདྲའི་ལྗགས་རྐྱོངས་ལ༔ ཞིང་བཅུ་བསྒྲལ་པའི་ཤ་ཁྲག་རུས༔ དུག་གསུམ་སྐུ་གསུམ་ཀློང་དུ་འབུལ༔ བཞེས་ཤིག་རོལ་ཅིག་ཁ་རཾ་ཁཱ་ཧི༔ ཨོཾ་ཨ་ཀྲོ་ཏེ་ཀ་ཡ་མཱནྟ་ཀ་ས་པ་རི་ཝཱ་ར་མ་ཧཱ་མཱཾ་ས་རཀྟ་ཀེཾ་ནི་རི་ཏི་ཙིཏྟ་བ་སུ་ཏ་ཁ་ཁ་ཁཱ་ཧི་ཁཱ་ཧི༔ ལིང་རོ་བདུད་རྩིར་སྦར་པ་བསྟབ། ལྷ་ཚོགས་རྣམས་ཀྱིས་སོགས་དབང་ཆོག་ལྟར་མཆོག་དབང་གསུམ་རིམ་པར་བསྐུར་བ་ཤིས་བརྗོད་མགོ་བར་གྲུབ་རྗེས། དེ་རྣམས་ཀྱིས་འཇམ་དཔལ་གཤིན་རྗེ་གཤེད་དྲེགས་པ་འཇོམས་བྱེད་ཀྱི་རྩ་བའི་དབང་བསྐུར་ལེགས་པར་གྲུབ་ནས། དེ་དང་རྗེས་སུ་འབྲེལ་བར་བཅོམ་ལྡན་འདས་ལས་ཀྱི་གཤིན་རྗེ་སོགས་འཆི་བདག་ལས་ཀྱི་གཤིན་རྗེའི་རྗེས་གནང་གི་ཆོ་ག་ལྟར་མཚམས་སྦྱར་ལ་མཎྜལ། གསོལ་བ་གདབ་པ་འདིའི་རྗེས་ཟློས། རྡོ་རྗེ་འཛིན་པ་སོགས་ལན་གསུམ། རྒྱུད་དག་པར་བྱ་བའི་སླད་དུ་བླ་མ་དང་མདུན་བསྐྱེད་དབྱེར་མེད་འཇམ་དཔལ་ཞི་ཁྲོའི་ལྷ་ཚོགས་མངོན་སུམ་དུ་བཞུགས་པའི་སྤྱན་སྔར། ཕྱག་མཆོད། ཉེས་བཤགས། ཡི་རང་། བསྐུལ་ཞིང་གསོལ་བ། བཞུགས་གསོལ། བྱིན་དབང་ཞུ་བ་བཅས་ཡན་ལག་བདུན་པའི་དོན་གསལ་འདེབས་
བཞིན་པས་འདིའི་རྗེས་ཟློས། སྤྲོས་པ་ཀུན་ཞི་སོགས་དྲེགས་འཇོམས་ལས་བྱང་ལྟར་ལན་གསུམ། དེ་ནས་རྗེས་གནང་དངོས་ལ་འདུན་པ་འདི་བཞིན་དུ་མཛོད། སློབ་དཔོན་ཉིད་འཇམ་དཔལ་གཤིན་རྗེའི་གཤེད་དྲེགས་པ་འཇོམས་བྱེད་སྐུ་མདོག་མཐིང་ནག །ཞལ་གསུམ་གཡས་དཀར་གཡོན་དམར་དབུས་མཐིང་ག །ཕྱག་དྲུག་གཡས་གསུམ་འཁོར་ལོ་རལ་གྲི་གྲི་གུག །གཡོན་གསུམ་ཐོད་ཁྲག་བེ་ཅོན་སྡིགས་མཛུབ། ཞབས་བཞི་གཡས་བསྐུམ་གཡོན་བརྐྱང་གིས་པད་ཉི་ཆུ་གླང་དྲེགས་པ་ཀླུ་གཉན་ས་བདག་གི་གདན་ལ་འགྱིང་བ། ཡུམ་ཟ་བྱེད་བཻ་ཏཱ་ལི་གྲི་ཐོད་འཛིན་པ་དང་མཉམ་པར་སྦྱོར་བ། སྐུ་ལ་དཔལ་དང་དུར་ཁྲོད་ཀྱི་ཆས་ཀྱིས་བརྒྱན་ཅིང་། དབུ་གཙུག་ཏུ་བྱ་ཁྱུང་ལྡིང་བ། སྐུ་ལས་སྤྲུལ་པའི་ཁྲོ་ཚོགས་འཕྲོ་བ། བསྐལ་མེའི་ཕྲེང་བ་འཁྲིགས་པའི་ཀློང་ན་བཞུགས་པར་གསལ་བ་དང་། མདུན་དུ་བཤམས་པའི་གཏོར་མ་བཀའ་སྡོད་ལས་ཀྱི་གཤིན་རྗེ་འཁོར་དང་བཅས་པ་དང་། ཁྱེད་རང་སློབ་མ་རྣམས་གཙོ་རྐྱང་གི་སྐུ་བདག་གིས་བརྗོད་པའི་ཚིག་རིས་ལས་འབྱུང་བ་བཞིན་གསལ་འདེབས་པར་འཚལ། ཨོཾ་མ་ཧཱ་ཤཱུནྱ་ཏཱ་སོགས་ལས་གཤིན་གྱི་ཕྲིན་ལས་ལྟར། སྐད་ཅིག་གིས་ལྷགས་པར་གྱུར་པ་རྣམས་མདུན་བསྐྱེད་ལ་བསྟིམས། ཐ་ཚིག་བསྒྲགས་ཤིང་དམ་ལ་བཞག །
མཆོད་ཅིང་བསྟོད་པས་དགྱེས་ཏེ་ཇི་ལྟར་བཅོལ་བའི་བཀའ་ལ་ཉན་པར་མོས་ཤིག །སྤོས་རོལ་དབྱངས་ཀྱིས། ཧཱུྃ༔ ལྷོ་ཕྱོགས་གཤིན་རྗེའི་སོགས་བསྟོད་པའི་མཐར། དེ་ནས་སློབ་དཔོན་གཤིན་རྗེའི་གཤེད་དུ་སོགས། དེ་ནི་སྐུའི་རྗེས་སུ་གནང་བ་ཡིན་ནོ། །ཡང་སློབ་དཔོན་གཤིན་རྗེའི་སོགས། ཐུགས་རྒྱུད་བསྐུལ། མདུན་བསྐྱེད་ལས་སོགས་རིགས་འགྲེ་སྦྱར་ཞིང་གསུང་དང་ཐུགས་ཀྱི་རྗེས་གནང་སྦྱིན། དེ་ནས་བཀའ་བསྒོ་བ་ནི། སློབ་དཔོན་གཤིན་རྗེ་གཤེད་དུ་གསལ་བའི་ཐུགས་ཀའི་འོད་ཟེར་མདུན་བསྐྱེད་ལ་ཕོག་པའི་རྐྱེན་གྱིས་མདུན་བསྐྱེད་གཙོ་འཁོར་རྣམས་གུས་ཤིང་འདུད་པའི་ཚུལ་དང་བཅས། བདག་གིས་བཀའ་བསྒོས་པ་ལྟར་ཕྲིན་ལས་རབ་འབྱམས་བསྒྲུབས་ཤིང་། བྱང་ཆུབ་བར་དུ་མི་འབྲལ་བར་འགྲོགས་པར་ཁས་བླངས་པར་མོས་ཤིག །ཧཱུྃ༔ སྔོན་ཚེ་འཇམ་དཔལ་སོགས་བཀའ་བསྒོའི་མཐར། གཏོར་མའི་ལྷ་ཚོགས་འཁོར་དང་བཅས་པ་ཁྱེད་རང་རྣམས་ལ་ཐིམ་པས། བདག་དང་དྲེགས་པ་གཉིས་སུ་འཛིན་པའི་རྟོག་པ་ལས་གྲོལ་བ་འཁོར་འདས་མཉམ་ཉིད་རང་རིག་ཡེ་ཤེས་ཀྱི་ཀློང་དུ་རྫོགས་པར་ཤེས་པའི་ས་མཱ་དྷི་ལ་མཉམ་པར་འཇོག་འཚལ། ཞེས་ཅུང་ཟད་ཉམས་སྐྱོང་དུ་བཅུག །སླར་ཡང་གཏོར་མའི་ལྷ་སྔར་བསྐྱེད་པ་བཞིན་རྩལ་སྣང་མ་འགགས་རོལ་པར་ལམ་སྟེ་གསལ་བ་དང་། ཁྱེད་རང་རྣམས་
ཀྱི་ལྕེ་ལ་བདུད་རྩི་སྦྱིན། མགོ་བོར་རྡོ་རྗེ་བཞག་པས་དམ་ཚིག་གཉན་པོ་གཅིག་ཏུ་བསྲེ་བ་ཡིན་པས་དོན་གོ་བར་མཛོད། ཨོཾ་ཡ་མ་སོགས། དེ་ལྟར་རྗེས་གནང་ཟབ་མོ་ཐོབ་པས་དེང་ཕྱིན་གསང་བའི་དམ་ཚིག་སྤྱི་དང་། ཁྱད་པར་འདི་ཉིད་ཀྱི་མཆོད་བསྟོད་བསྐུལ་བ་ལ་བརྩོན་པའི་སྒོ་ནས་བསྙེན་སྒྲུབ་ལས་ཀྱི་སྦྱོར་བ་ཡལ་བར་མི་འདོར་ཞིང་བརྩོན་པས་བསྒྲུབ་པ་སོགས་གཡར་དམ་གཉན་པོ་ཚུལ་བཞིན་དུ་བསྲུང་བའི་བློས་འདིའི་རྗེས་ཟློས། དེང་ནས་རྡོ་རྗེའི་སོགས། དབང་ཆོག་བདེ་ཆེན་འདོད་འཇོའི་མཇུག་ལྟར་མཚམས་སྦྱོར་སྤྱི་མཐུན་བཅས། བཀྲ་ཤིས། དམ་བསྒྲག་གཟུང་། གཏང་རག །ལུས་དབུལ། དགེ་བསྔོ་བཅས་སྤྱི་ལྟར་དང་། ཆོ་གའི་རྗེས་ཆོག་ཚོགས་ལ་རོལ་པ་ཕྱིན་མཐར་དབྱུང་ངོ་།། ༈ །།པདྨ་འོད་གསལ་མདོ་སྔགས་གླིང་པའི་སྙན་བརྒྱུད་གཤིན་རྗེའི་ཐུགས་ཐིག་གི་སྨིན་བྱེད་ཀྱི་རིམ་པ་ཆུ་འབབས་སུ་བཀོད་པ་ཡེ་ཤེས་བདུད་རྩིའི་བཅུད་སྦྱིན་ལྟར་དབང་སྒྲུབ། དབང་དངོས་ཀྱི་མཇུག །སྨིན་བྱེད་དབང་བསྐུར་བའི་ཆོ་ག་ཟབ་མོ་ལེགས་པར་གྲུབ་པ་ལགས། སྨིན་པ་གྲོལ་བར་བྱེད་པ་ཁྲིད་ཀྱི་རིམ་པ་གསན་པའི་ཡོན་དུ་མཎྜལ་ཕུལ། ཞེས་མཎྜལ་འབུལ་དུ་གཞུག །དེའང་རྒྱུད་དང་མན་ངག་ཐམས་ཅད་ཀྱི་སྙིང་པོའི་ཡང་བཅུད་ཕྱུང་པའི་ཁྲིད་ཚུལ་འདི་ལ་སྔོན་འགྲོ་སྣོད་རུང་དུ་བྱ་བ། དངོས་གཞི་འཁོར་ལོ་རྣམ་བཞིའི་དགོངས་པས་གྲུབ་
མཐའ་དབྱིངས་སུ་སྐྱེལ་བ་གཉིས་སུ་ཡོད་པ་ལས། དང་པོ་སྔོན་འགྲོ་སྣོད་རུང་དུ་བྱ་བ་ལ། ངེས་འབྱུང་གིས་བློ་བཅོས་པ། སྐྱབས་སེམས་ཀྱིས་གཞི་འདིང་བ། བླ་མའི་བྱིན་རླབས་ཡེ་ཤེས་འབེབ་པ་གསུམ་དུ་བསྟན། གཉིས་པ་འཁོར་ལོ་རྣམ་བཞིའི་དགོངས་པས་གྲུབ་མཐའ་དབྱིངས་སུ་སྐྱེལ་བ་ལ། དང་པོ་སྦྱང་གཞི་གནས་པའི་འཁོར་ལོ་འོད་གསལ་སྙིང་པོའི་གནས་ལུགས་ཐོས་པའི་ལྟ་བས་གཏན་ལ་འབེབས། གཉིས་པ་སྦྱང་བྱ་སྲིད་པའི་འཁོར་ལོ་རྩ་རླུང་བྱང་ཆུབ་ཀྱི་སེམས་ལ་བསམ་པའི་ཤེས་རབ་ཀྱིས་སྒྲོ་འདོགས་བཅད། གསུམ་པ་སྦྱོང་བྱེད་འདུལ་ཐབས་སྤྲུལ་པའི་འཁོར་ལོ་ལ། བུམ་དབང་ལམ་བྱེད་དབྱིབས་ཀྱི་ལམ་ལ་བརྟེན་ནས་འཁྲུལ་པའི་སྣང་བ་སྦྱང་། གསང་དབང་ལམ་བྱེད་སྔགས་ཀྱི་ཐབས་ལ་བརྟེན་ནས་ཀུན་བརྟགས་ཀྱི་ཞེན་པ་སྦྱང་། ཤེར་དབང་ལམ་བྱེད་གསང་རྩའི་གནད་ལ་བརྟེན་ནས་ཉོན་མོངས་ཀྱི་རྩ་བ་གཅོད། ཚིག་དབང་ལམ་བྱེད་ཀ་དག་གི་དགོངས་པ་དང་ལྷུན་གྲུབ་སྣང་བའི་གདངས་ལ་བརྟེན་ནས་ཆོས་ཐམས་ཅད་ཟད་སར་བསྐྱལ་པས། བཞི་པ་སྦྱངས་འབྲས་གདོད་ནས་བཞུགས་པའི་འཇམ་དཔལ་ཡེ་ཤེས་ཀྱི་འཁོར་ལོ་མངོན་དུ་བྱེད་པའི་ཚུལ་རྣམས། དོན་རྒྱ་ཆེ་ལ་ཚིག་ཉུང་ངུས་བསྟན་པའི་རྩ་བའི་གཞུང་རྡོ་རྗེའི་གསུང་འདི་ལྟར་ལགས་པས་ཐུགས་ལ་ངེས་པ་ཞུ། མཆོག་གི་ཡེ་ཤེས་ལམ་བྱེད་པ༔ སོགས་གཏེར་གཞུང་ལྟར།
མཐར་ཐུག་འབྲས་བུ་ཆེན་པོ་འོ༔ ཞེས་པའི་བར་ནུས་ན་དོན་འགྲོལ་ལ་བཤད། མི་ནུས་ན་བརྡ་འཕྲོད་ངེས་དལ་བར་བཀླག་མཐར། ཞེས་ཇི་སྐད་བསྟན་པའི་བསྒོམ་དོན་རྣམས་རྒྱུད་ལ་སྦྱོར་བར་མཛད་འཚལ། དེ་རྣམས་ཀྱིས་འཇམ་དཔལ་གཤིན་རྗེའི་ཐུགས་ཏིག་གི་སྨིན་གྲོལ་རིམ་པ་ཆ་ཚང་བ་ལགས་པས་སོགས་ཀྱིས་མཚམས་སྦྱར་ལ་དམ་ཚིག་བསྒྲག་གཟུང་སོགས་གཞུང་ལྟར་རྗེས་ཆོག་རིགས་བཅས་བྱ།། ༈ །།ཨོ་རྒྱན་མཆོག་གྱུར་གླིང་པའི་ཟབ་པ་སྐོར་བདུན་གྱི་གཤིན་རྗེ་ཚེ་བདག་ནག་པོ་ལྕགས་བྱང་མའི་སྨིན་བྱེད་མཚམས་སྦྱོར་གྱིས་བརྒྱན་པ་སྟོང་སྲོག་འཁོར་ལོའི་བཅུད་འབེབ་ལྟར་དབང་སྒྲུབ་ཀྱི་སྐབས་ཟབ་བདུན་སྔོན་འགྲོའི་སྤྱི་ཆིངས་མཇུག །སླར་འདུས་རྒྱུ་ཡི་ཡི་གེར་ཐིམ༔ ཞེས་པའི་འཕྲོས་སུ། རཾ་ཡཾ་ཁཾ༔ སྥ་ར་ཎ་ཕཊ༔ སཾ་ཧ་ར་ཎ་ཧཱུྃ༔ རྒྱུ་ལས་ཨེ་ཡཾ་ར་སུཾ་ཀེཾ་རཾ་བྷྲཱུྃ༔ འཕྲོས་པས་ཨེ་ལས་ནམ་མཁའ་མཐིང་ནག་བརྡལ༔ ཡཾ་ལས་རླུང་ནག་སྲ་ཞིང་བརྟན་པའི་ནང༔ ར་ལས་ཁྲག་མཚོ་དམར་ནག་ཟླུམ་ཞིང་འཁྲུགས༔ སུཾ་ལས་རིན་ཆེན་ས་གཞི་བརྡལ་བའི་སྟེང༔ ཀེཾ་ལས་རུས་པའི་རི་རབ་དཔངས་མཐོ་བརྗིད༔ རཾ་ལས་བསྐལ་པའི་མེ་ཆེན་འཚུབས་འཁྱིལ་འབར༔ བྷྲཱུྃ་ལས་དུར་ཁྲོད་འཇིགས་པའི་གཞལ་ཡས་ཁང༔ སྲུང་བའི་འཁོར་ལོ་དུར་ཁྲོད་བརྒྱད་རྣམས་གྲུབ༔ ཧཱུྃ༔ ཨེ་ལས་ཨེ་ཀ་ཛཱ་ཊི་ཟིལ་གནོན་འཁྱུད༔ སོགས་ཤོག་དྲིལ་བཞི་པ་དང་སྦྲེལ་བ་སོགས་སྐབས་དང་སྦྱར། དངོས་གཞི་དབང་རྐྱང་
ལུགས་སུ་བསྐུར། རྗེས་ཆོག་བཅས་བྱའོ།། ༈ །།དྲག་སྔགས་ཀྱི་ཟབ་པ་གཤིན་རྗེའི་གཤེད་མ་ཧཱ་ཡོ་ག་ལྟར་བསྒྲུབ་པའི་དབང་བསྐུར་འཁོར་ལོ་རོལ་པའི་བཅུད་འདྲེན་ལྟར་དབང་སྒྲུབ། དབང་དངོས། རྗེས་རིམ་བཅས་བྱའོ།། ༈ །།གུ་རུ་ཆོས་ཀྱི་དབང་ཕྱུག་གི་གཤིན་རྗེ་འཆར་ཁ་ནག་པོའི་གདོང་ཟོར་གནམ་ལྕགས་སྤུ་གྲི་འབར་བའི་ཟོར་དབང་གནམ་ལྕགས་འཁོར་ལོ་དང་ཟོར་དབང་ཐུན་མོང་མ་ཡིན་པ་དཀྱུས་གཅིག་ཏུ་བསྐུར་བའི་ཚུལ་གནམ་ལྕགས་ཞུན་ཐིག་ལྟར་དབང་སྒྲུབ་ལྷ་བསྐྱེད་སྐབས་དབང་བསྐུར་བྱིན་རླབས་བསྡུས་པ་བྱེད་ན། སྤྱི་བོའི་རིགས་ལྔ་སྙོམས་འཇུག་ཆུས༔ དུག་ལྔའི་སྒྲིབ་སྦྱངས་ཕུང་པོ་ལྔ༔ གནས་འགྱུར་རིགས་ལྔས་དབུ་བརྒྱན་གྱུར༔ ཨོཾ་ཧཱུྃ་ཏྲཱཾ་ཧྲཱི་ཨཱ༔ གནས་གསུམ་ཟླ་བ་པད་ཉི་ལ༔ ཨོཾ་ཨཱཿཧཱུྃ་གི་འོད་ཟེར་གྱིས༔ རྒྱལ་བའི་རྡོ་རྗེ་གསུམ་སྤྱན་དྲངས༔ ཐིམ་པས་རྣམ་སྣང་འོད་དཔག་མེད༔ མི་བསྐྱོད་པ་ཡི་སྐུ་རུ་གྱུར༔ ཨོཾ་ཨཱཿཧཱུྃ༔ གཙོ་འཁོར་ཀུན་གྱི་གནས་གསུམ་གྱི༔ འབྲུ་གསུམ་འོད་ཟེར་འབར་བ་ལས༔ འོད་འཕྲོས་ཡེ་ཤེས་སེམས་དཔའི་ཚོགས༔ རང་བཞིན་གནས་ནས་ས་མཱ་ཛ༔ སྤྱན་འདྲེན་སོགས་བྱ། དངོས་གཞི་ཟོར་དབང་ཐུན་མོང་བ་དང་ཐུན་མིན། རྗེས་ཆོག་བཅས་བྱའོ།། ༈ །།སངས་རྒྱས་གླིང་པའི་ཟབ་རྒྱ་གསུམ་པ་འཇམ་དཔལ་ནག་པོ་ཡང་ཟབ་ཐུགས་ཀྱི་ཚལ་པའི་ཕྲིན་ལས་
རྗེས་གནང་དང་བཅས་པ་མཐུ་སྟོབས་མཆོག་ཏུ་རྒྱས་པ་ལྟར་དབང་སྒྲུབ་སྐབས། མདུན་བསྐྱེད་བཟླས་དམིགས་ནི། མདུན་བསྐྱེད་ཐུགས་ཀར་ཉི་སྟེང་གནམ་ལྕགས་ཀྱི། །མཆོད་རྟེན་བྲེ་ནང་རྡོ་རྗེ་ཧཱུྃ་གིས་མཚན། །བུམ་ལྟོར་བེ་ཅོན་ཡཿདང་རི་རབ་ནང་། །ཐོད་དབྱུག་བྷྱོཿས་མཚན་མཆོད་རྟེན་ཕྱི་རོལ་སྔགས། །གསལ་འཚེར་བརྗིད་ལྡན་ཕྲེང་བས་བསྐོར་བར་གསལ། །བདག་བསྐྱེད་ཐུགས་ཀའི་ས་བོན་སྔགས་ཕྲེང་ལས། །འོད་འཕྲོས་ཞལ་ཐོན་མདུན་བསྐྱེད་ཞལ་དུ་ཞུགས། །ཐུགས་སྲོག་སྔགས་ཕྲེང་ལ་ཐིམ་བྱིན་རླབས་དབྱིག །འོད་ཟེར་ཚུལ་ཐོན་མདུན་བསྐྱེད་ཐུགས་ཀ་ནས། །ཚུར་ཕྱུང་བདག་ཐུགས་སྔགས་ཀྱི་འཁོར་ལོར་ཐིམ། །མགལ་མེ་ལྟ་བུར་དྲག་ཏུ་འཁོར་བ་ལས། །འོད་ཕྲེང་ཕར་འཕྲོས་རྒྱལ་བའི་དཀྱིལ་འཁོར་མཆོད། །ཚུར་འདུས་བདག་དང་སྒྲུབ་རྫས་རྣམས་ལ་ཐིམ། །བཀྲག་མདངས་འོད་ཟེར་མཐུ་སྟོབས་འབར་བར་བསམ། ཞེས་སྦྱར། དབང་དངོས། རྗེས་ཆོག་བཅས་བྱའོ།། ༈ །།རཏྣ་གླིང་པའི་རྟ་མགྲིན་གསང་འདུས་ཀྱི་འཇིགས་བྱེད་མེའི་སྤུ་གྲིའི་དབང་བསྐུར་གྱི་ཆོ་ག་གསལ་བར་བཀོད་པ་འགྱུར་མེད་སྙིང་པོ་ལྟར་དབང་སྒྲུབ། དབང་དངོས་གཞི་གྲུབ་རྗེས། ཆགས་མེད་ཡིག་ཆ་ལྟར། དེ་ནས་འཇམ་དཔལ་ཁྲོས་པའི་བཀའ་སྡོད་འཆི་བདག་ལས་ཀྱི་གཤིན་རྗེའི་བཀའ་གཏད་ཟབ་མོ་ཞུ་བའི་ཡོན་དུ་མཎྜལ་ཕུལ། བླ་
མ་འཇིགས་མཛད་ཁྲོ་བོའི་རྒྱལ་པོར་གསལ་བ་ལ་གསོལ་བ་འདེབས་པ་འདིའི་རྗེས་ཟློས་མཛོད། བཅོམ་ལྡན་རྡོ་རྗེ་སོགས། རྒྱུད་སྦྱོང་བའི་སླད་དུ་ཚོགས་ཀྱི་ཞིང་མཆོག་རྒྱ་མཚོ་གསལ་བཏབ་པའི་སྤྱན་སྔར་བདུན་རྣམ་དག་འབུལ་བའི་བློས་འདིའི་རྗེས་ཟློས། དཀོན་མཆོག་གསུམ་ལ་སོགས། བཀའ་གཏད་ཟབ་མོ་བགྱིད་པའི་ཐོག་མར་ཁྱེད་རང་རྣམས་གཉན་པོ་སྟོབས་ཀྱི་ཕྱག་རྒྱའི་ལྷ་འདི་ལྟར་གསལ་ཐོབས་ཤིག །སྭ་བྷཱ་ཝས་སྦྱང་། སྟོང་པའི་ངང་ལས་ཁྱེད་རང་རྣམས་གང་དུ་གནས་པའི་གོ་སར་ཨེ་གྲུ་གསུམ་གྱི་དབུས་སུ་གླང་རྒོད་ཟུང་བཞི་ཉི་ཟླ་པདྨའི་གདན་ལ། སེམས་ཉིད་ཧཱུྃ་མཐིང་ནག་ལས་འོད་ཟེར་འཕྲོ་འདུས་དོན་གཉིས་བྱས། གདུག་པ་ཅན་ཚར་བཅད། ཚུར་འདུས་ཡོངས་སུ་གྱུར་པ་ལས། སྐད་ཅིག་གིས་སློབ་མ་འཇིགས་བྱེད་ཡ་མཱནྟ་ཀ་སྐུ་མདོག་མཐིང་ནག་ཞལ་གསུམ་ཕྱག་དྲུག་པ།སོགས་འཇིགས་བྱེད་མེའི་སྤུ་གྲིའི་དབང་ཆོག་འགྱུར་མེད་སྙིང་པོ་ལྟར། སེར་ནག་གྲི་ཐོད་འཛིན་པས་འཁྱུད་པ། དམ་ཡེ་གཉིས་སུ་མེད་པའི་སྐུར་ལམ་གྱིས་གྱུར་པར་མོས། དེ་ནས་དབང་དངོས་ལ། དང་པོ་སྐུ་བསྐྱེད་པའི་ཏིང་ངེ་འཛིན་གྱི་རྗེས་སུ་གནང་བའི་སླད་དུ་སྔར་བསྐྱེད་ཟིན་པའི་མདུན་གྱི་རྟེན་ཁྱེད་རང་རྣམས་ཀྱི་བློ་ངོར་སླར་ཡང་འདི་ལྟར་གསལ་ཐོབས་ཤིག །ཨོཾ་
སྭ་བྷཱ་ཝ་སོགས། སྟོང་པའི་ངང་ལས་མདུན་དུ་པདྨ་དང་ཉི་མ་དགྲ་བགེགས་བསྒྱེལ་བའི་སྟེང་དུ་སོགས་གོང་གི་གཏོར་ཆོག་སྐབས་ལྟར། པདྨ་ཀ་མ་ལཱ་ཡ་སཏྭཾ༔ བར། མེ་ཏོག་འཐོར་ཞིང་། ཧཱུྃ༔ ལས་ལས་གྲུབ་པའི་སྟོབས་པོ་ཆེ༔ རྫུ་འཕྲུལ་དབང་ལྡན་དྲེགས་པའི་གཙོ༔ འབྱུང་བའི་འཁོར་ལོ་ཐམས་ཅད་འཇོམས༔ ཆོས་རྒྱལ་སྐུ་ཡི་བཀྲ་ཤིས་ཤོག༔ ཅེས་བཀྲ་ཤིས་བརྗོད། དེ་ནི་སྐུ་བསྐྱེད་པའི་རྗེས་སུ་གནང་བའོ། །གཉིས་པ་གསུང་སྔགས་བཟླ་བའི་རྗེས་སུ་གནང་བ་ནི། ཁྱེད་རང་རྣམས་ཀྱིས་སློབ་དཔོན་ལ་གུས་འདུད་བྱས་པའི་རྐྱེན་གྱིས་སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་ལ་ཕོག །དེའི་ཐུགས་ཀར་ཉི་མ་ལ་ཡཿམཐིང་གའི་མཐར་སྔགས་ཀྱིས་བསྐོར་བ་ལས་སྔགས་ཕྲེང་གཉིས་པ་མཆེད། ཁྱེད་རང་རྣམས་ཀྱི་ཐུགས་སྲོག་གི་གདན་ལ་ཐིམ་པས། དྲེགས་པའི་སྲོག་སྔགས་བཟླས་པའི་སྒོ་ནས་ལས་རབ་འབྱམས་སྒྲུབ་པ་ལ་ཐོགས་པ་མེད་པའི་མཐུ་ཐོབ་པར་མོས་ལ་སྔགས་འདིའི་རྗེས་ཟློས། ཨོཾ་ཀཱ་ལ་རཱུ་པ་ཧཱུྃ་ཕཊ༔ ལན་གསུམ། སླར་ཡང་དམ་བཅའ་གཟུང་བའི་ཕྱིར་སློབ་དཔོན་ལ་མེ་ཏོག་གི་ཕྲེང་བ་རེ་ཕུལ་བར་མོས་ལ་འདིའི་རྗེས་ཟློས། ཆོས་རྒྱལ་བདག་ལ་བསྩལ་ལགས་ཀྱིས། །བདག་ལ་འགོ་བར་མཛད་དུ་གསོལ། །ལན་གསུམ། བྱིན་གྱིས་
རློབ་པའི་ཕྱིར་ད་ལྟ་ཕུལ་པའི་མེ་ཏོག་ཉིད་སྔགས་ཀྱི་ཕྲེང་བར་བྱིན་བརླབས་ཏེ་ཁྱེད་རང་རྣམས་ཀྱི་སྤྱི་བོར་བཅིངས་པས་རིག་སྔགས་ཀྱི་མཐུ་རྩལ་རྫོགས་པར་མོས་ཤིག །ཆོས་རྒྱལ་འདི་ལ་བསྩལ་ལགས་ཀྱིས། །འདི་ལ་འགོ་བར་མཛད་དུ་གསོལ། །ལན་གསུམ། བཀྲ་ཤིས་གོང་ལྟར་ལ། གསུང་གི་ཞེས་བསྒྱུར་བ་བརྗོད། དེ་ནི་གསུང་གི་སྔགས་བཟླ་བ་ལ་དབང་བའི་རྗེས་སུ་གནང་བའོ། །གསུམ་པ་ཐུགས་ཀྱི་རྗེས་སུ་གནང་བ་ནི། ཡང་སློབ་དཔོན་ལ་གུས་འདུད་བྱས་པའི་རྐྱེན་གྱིས་སློབ་དཔོན་གྱི་ཐུགས་ཀ་ནས་འོད་ཟེར་འཕྲོས་པས་མདུན་བསྐྱེད་བསྐུལ། དེའི་ཐུགས་ཀ་ནས་ཕྱག་མཚན་རྡོ་རྗེའི་དབྱུག་པ་ཡཿཡིག་གིས་མཚན་པ་འཕྲོས་ནས། སློབ་མ་རྡོ་རྗེ་འཇིགས་བྱེད་དུ་གསལ་བ་ལ་སྲོག་སྙིང་གི་ཚུལ་དུ་ཕུལ་བས་དམ་ཅན་ཆེན་པོའི་སྲོག་ལ་དབང་ཐོབ། ཞི་རྒྱས་དབང་དྲག་མངོན་སྤྱོད་ཀྱི་སྒོ་ནས་ལས་རབ་འབྱམས་སྒྲུབ་པ་ལ་དབང་ཐོབ་པར་མོས་ཤིག །ཕྱག་མཚན་ལག་ཏུ་གཏད། སྔགས་ཀཱ་ལ་རཱུ་པ་བརྗོད། བཀྲ་ཤིས་ལ་ཐུགས་ཀྱི་ཞེས་བསྒྱུར། དེ་ནི་ཐུགས་ཀྱི་རྗེས་སུ་གནང་བའོ། །སླར་ཡང་གཏོར་མ་དམ་ཅན་ཆོས་ཀྱི་རྒྱལ་པོར་གསལ་བ་ཁྱེད་རང་རྣམས་ཀྱི་བྲན་དང་སྲུང་མར་གཏད་ཅིང་། ལས་
ཀྱི་གཉེར་ཁ་བཅོལ་བའི་བཀའ་བསྒོས་པ་བཞིན་བསྒྲུབ་པར་ཁས་ལེན་པར་མོས་ཤིག །གཏོར་མར་མེ་སྒྲོན་བཙུགས་པ་ལག་ཏུ་གཏད་དེ། ཧོཿ དམ་ཅན་ཆོས་ཀྱི་རྒྱལ་པོ་ཁྱེད་ཀྱིས་བཅོམ་ལྡན་འདས་རྡོ་རྗེ་འཇིགས་བྱེད་ཆེན་པོའི་བཀའ་དང་དམ་ལས་མ་འདའ་བར་རྡོ་རྗེའི་སློབ་མ་འདི་རྣམས་ཀྱིས་སྦྱིན་པའི་ཕུད་བཞེས། བཅོལ་བའི་ལས་གྱིས། སངས་རྒྱས་ཀྱི་བསྟན་པ་སྲུངས། དཀོན་མཆོག་གི་དབུ་འཕང་བསྟོད། སྡང་བའི་དགྲ་སོད། གནོད་པའི་བགེགས་ཆོམས། ཁྱད་པར་དུའང་དུས་མ་ཡིན་པར་འཆི་བའི་རྐྱེན་ངན་པ་ཐམས་ཅད་ཞི་བ་དང་ཟློག་པའི་ཕྲིན་ལས་མཛོད་ཅིག །ཨོཾ་ཀཱ་ལ་རཱུ་པ་ས་མ་ཡ་མ་ནུ་སྨ་ར་ཡ་ས་མ་ཡ་མ་ཏི་ཀྲ་མ་ཏི༔ ས་མ་ཡ་རཀྵནྟུ་སྭཱ་ཧཱ༔ དེ་རྣམས་ཀྱི་སྒོ་ནས་ལས་ཀྱི་གཤིན་རྗེ་དམ་ཅན་ཆོས་རྒྱལ་གྱི་བཀའ་གཏད་ལེགས་པར་ཐོབ་པ་ཡིན་པས། དེང་ཕྱིན་ཆད་སྲུང་མར་བཟུང་ལ་མཆོད་གཏོར་བསྟོད་བསྐུལ་གྱི་རིམ་པས་མཉེས་པར་གྱིས་ཤིག །ཇི་ལྟར་བསྒོས་པ་བཞིན་མཛད་སྙམ་པའི་བློས་འདིའི་རྗེས་ཟློས། གཙོ་བོས་ཇི་ལྟར་སོགས་སྤྱི་ལྟར་རོ། །རྗེས་ཆོག་བཅས་བྱའོ།། ༈ །།མི་འགྱུར་རྡོ་རྗེའི་གནམ་ཆོས་འཇིགས་བྱེད་ཀྱི་དབང་སྒྲུབ། དངོས་གཞི་གཟུངས་དབང་། རྗེས་བཅས་གནམ་ཆོས་སྤྱི་བཞིན་བྱའོ།། ༈ །།ཟུར་མཁར་མཉམ་ཉིད་རྡོ་རྗེ་ལ་བཀའ་བབས་པའི་ཀིང་ནག་བཀའ་གཏེར་གཉིས་ལྡན་ཕ་
རོལ་རྒོལ་འཇོམས་ཀྱི་དབང་ཆོག་བདུད་བཞིའི་གཡུལ་འཇོམས་ལྟར་དབང་སྒྲུབ་སྐབས། ཟུར་མཁར་དང་ཆགས་མེད་ཆོག་སྒྲིག་གང་ཡིན་ཡང་བདག་བདུན་ཚིག་རིས་གཅིག་གིས་བསྐྱེད་དེ། བསྟོད་པ་ཕྲིན་བཅོལ་གྲུབ་ཀྱི་བར་བཏང་། དེ་ནས་ཟུར་ལུགས་ཕྲིན་ལས་དངོས་གྲུབ་ཀྱི་སྙེ་མའི་བཟླས་པའི་རྗེས་སུ་འབྱུང་བའི་ཛཔ྄་བསྐུལ་བྱས་ལ། བསྙེན་དམིགས་ནི། རང་ཉིད་འཇམ་དཔལ་གཤིན་རྗེ་གཤེད་པོ་ཡི། །ཐུགས་ཀར་གསང་བདག་ཐུགས་དབུས་ཉི་མའི་སྟེང་། །ཡ་ཡིག་གདན་ཐབས་སྟེང་དུ་ཧཱུྃ་མཐིང་ནག །ཧ་ཁོག་ནང་དུ་མཱུཾ་ཡིག་དམར་སེར་མཚན། །དེ་མཐར་རྩ་སྔགས་གཡས་སུ་འཁོར་བ་ལས། །འོད་ཟེར་དཔག་ཡས་ནམ་མཁའ་གང་བར་འཕྲོས། །རྒྱལ་དང་དེ་སྲས་ཁྲོ་རྒྱལ་མ་ལུས་མཆོད། །མཐུ་སྟོབས་བྱིན་རླབས་ཀུན་བསྡུས་རང་ལ་ཐིམ། །འགྲོ་བའི་ཉོན་མོངས་དགྲ་བགེགས་ཐམས་ཅད་བཏུལ། །བསོད་ནམས་ནུས་མཐུ་ཀུན་བསྡུས་བདག་ལ་ཐིམ། །བདག་ཉིད་མཐུ་སྟོབས་གཟི་བརྗིད་མཚུངས་མེད་གྱུར། །ཨོཾ་མཉྫུ་ཤྲཱི་ཡ་མཱནྟ་ཀ་ཡ་མ་རཱ་ཛ་ཧཱུྃ་ཕཊ། ཅེས་རྩ་སྔགས་དང་། ཨོཾ་མཉྫུ་ཤྲཱི་ཡ་མཱནྟ་ཀ་ཀཱ་ལ་རཱུ་པ་ཧྲཱིཿཥྚི་ཝཱི་ཀྲྀ་ཏཱ་ན་ན་ཧཱུྃ་ཕཊ། ཅེས་དང་། དེ་ནས་འོག་གི་ཨོཾ་ཨ་ཀྲོ་ཏེ་ཀ་ཡ་མཱནྟ་ཀ་སོགས་དང་། ཨོཾ་ཡ་མ་རཱ་ཛ་ས་དོ་མེ་ཡ་སོགས་སྔགས་ཚན་གཉིས་པོ་ཡར་ལེན། དེ་མཚམས་རིམ་པར་གོང་འོག་གི་འཁོར་སྔགས་
བཅས་གཙོ་འཁོར་ཕྱེད་པར་ཟུར་མཁར་ལུགས་བཞིན་བཟླ། ཟུར་མཁར་ལུགས་ལས་བྱང་བཏང་ན། སྲུང་ཟློག་གསད་དམིགས། བཟླས་པ། ཐུན་གཏོར་བཅས་དུག་རི་ལྟར་སྦྱར། བུམ་པར་བསྐྱེད་བཟླས་སྤྱི་འགྲོ། ཚོགས་མཆོད་སོགས་དང་། དུག་རི་ལྟར་ན། དམིགས་བཟླས་གོང་བཞིན་དང་། དེ་ནས་སྲུང་ཟློག་གསད་པ་ཐུན་གཏོར་བཅས་བྱས་རྗེས། བུམ་པ་བསྐྱེད་བཟླས། ཚོགས་མཆོད་ཟུར་མཁར་ཆོག་སྒྲིག་ནས་བླངས། གང་ལྟར་ཡང་། ལས་བུམ་དུ་འཁྱིལ་པ་བསྐྱེད་བཟླས་དང་། རིག་མེ་དོར་ཞིང་གནང་བ་ནོད་རྗེས། དངོས་གཞི་རྩ་དབང་། གཏང་རག་དང་ཞུ་ཡོན་ཕྱོགས་འཐུས་ཀྱི་མཎྜལ་རྗེས། དུག་རིར་བདེར་འཇུག་ལྟར་གཏོར་དབང་སྦྱར། འདི་ལ་དབང་སྒྲུབ་ཟུར་དུ་མི་དགོས་གོང་གིས་འཐུས། མཆན། ཆོ་གའི་རྗེས་ཆོག་ལུགས་གཉིས་གང་བྱེད་ནའང་སློབ་དཔོན་གྱིས་ཚོགས་ལ་རོལ་ཞིང་། ལྷག་མ་བསྔོ་བ་ཕྱིན་ཟུར་མཁར་ལུགས་བཞིན་ལ། སྤྱི་ལྟར་མཆོད་བསྟོད། བརྟན་བཞུགས་སྦྱར་བས་འགྲུབ་བོ།། ༈ །།ཞང་ཁྲོམ་གྱི་གཤིན་རྗེ་ཁྲོ་ཆུ་སྨན་སྡོང་བསེ་སྒྲོམ་མའི་དབང་ཆེན་གཞན་དུ་ཤེས། སྤྱིར་བཏང་ལ། གཏོར་དབང་བཀླག་ཆོག་ཏུ་བཀོད་པ་ཧ་ལའི་བཅུད་ལེན་ལྟར་དབང་སྒྲུབ། གཏོར་དབང་དངོས་ཀྱི་བཟླས་ལུང་སྐབས་དམིགས་པ་གསལ་རྗེས། རཀྴའི་ཕྲེང་བ་སྦྲེལ་ལ། དུ་ཏྲི་ཡ་མ་རཱ་ཛ། ཡ་མ་རཀྴ། ཀྲོ་དྷ་པ་ཙ་ལ། ཀཱ་ལ་རཱུ་པ། ཨཱ་ཀྲོ་རཱ་ཛ། ཡ་མ་རཱ་ཛ། ས་མ་ཡ་ཛཿཛཿ ཞེས་བསྙེན་སྔགས་ལན་གསུམ་རྗེས་
ཟློས་བྱར་གཞུག །སློབ་མ་གཤིན་རྗེ་དུག་སྡོང་གསལ་བ་ཡི། །ཐུགས་ཀའི་ཧཱུྃ་ནང་བསྲུང་བྱ་མཐའ་དག་ཚུད། །ཡ་དང་ཧཱུྃ་ལས་འོད་ཟེར་ཁྲོ་ཆུང་འཕྲོས། །རྒྱལ་བའི་བྱིན་རླབས་དྲེགས་པའི་མཐུ་ནུས་བསྡུས། །བདག་དང་བསྲུང་བྱ་གུར་ཁང་རྣམས་ལ་ཐིམ། །བྱད་མའི་སྲུང་འཁོར་ཕྱི་སྣོད་འབྱུང་བཅུད་བསྡུས། །སྲུང་འཁོར་ལ་ཐིམ་སྲ་མཁྲེགས་མི་འགྱུར་བརྟན། །བྱད་མའི་ཚེ་བསོད་སྲོག་གི་དྭངས་མ་དང་། །རང་གི་བླ་ཚེ་འཁྱམས་དང་ཁྱེར་པ་རྣམས། །འོད་ཟེར་ཛཿདམར་གྱིས་བསྡུས་བདག་ལ་ཐིམ། །སྐྱེ་འཆི་མེད་པ་རྡོ་རྗེའི་སྐུར་བསམ་པའི། །ཏིང་འཛིན་ལྡན་པས་སྲུང་སྔགས་རྗེས་ཟློས་མཛོད། །གོང་གི་བསྙེན་སྔགས་ཤམ་བུར། རུ་རུ་རཀྨོ་རཀྴ་མ་བྷྱོ་ཛཿཛཿ ཞེས་ཡུམ་སྔགས་དང་། མ་མ་ནྲྀ་བྷྲཱུྃ་བཛྲ་རཀྵ་རཀྵ་སྭཱ་ཧཱ། ཞེས་སྲུང་སྔགས་བཅས་སྦྲེལ་བ་ལན་གསུམ། སྤྱི་གཙུག་མཆོད་རྟེན་གསུམ་གྱི་ནང་དུ་ནི། །རྟ་མགྲིན་བྱ་ཁྱུང་གཤིན་རྗེའི་གཤེད་ནག་པོ། །སྤྱི་བོར་འཆར་ཀ་མགྲིན་པར་མྱོས་བྱེད་འབར། །སྙིང་གར་ཕྱག་རྒྱ་ཟིལ་གནོན་གསང་གནས་སུ། ཁ་ཐུན་ནག་པོ་དཔུང་གཡས་ཁྲག་མཚོ་ཁོལ། །དཔུང་གཡོན་རལ་པ་ཚར་དགུ་ལུས་ཀྱི་ལྷ། །སྐུ་ལས་རང་འདྲའི་ཁྲོ་ཆུང་དཔག་མེད་སྤྲོས། །བྱད་མ་ལྷར་བཅས་གཡུལ་ངོ་ཕར་བཟློག་ཅིང་། ཁྲོ་ཆུང་ཐོག་
སེར་མཚོན་ཆའི་སྒྱོགས་ཆེན་གྱིས། །བྱད་མའི་ལྷ་སྲུང་མཚོན་ཆ་བསྐལ་མེ་དང་། །དུག་རླངས་གནམ་ལྕགས་བྱད་མའི་སྟེང་དུ་བརྒྱབས། །མྱོས་དང་བསྲེགས་བྱས་ཁྲོ་ཆུང་ཚུར་འདུས་ཏེ། །ཞལ་ཕྱིར་གཟིགས་ཏེ་སྲུང་ཟློག་ལས་མཛད་གྱུར། །ཛཿཡིག་དམར་པོས་ཚེ་བསོད་ནྲྀ་ལྗང་འཕྲོགས། །རང་ལ་བསྟིམས་ཤིང་བྱད་མའི་ལས་སྒྲིབ་དང་། །གཤིན་རྗེ་ཁྲོས་པས་འབྱུང་བ་རྣམ་པར་འཁྲུགས། །མཚོན་ཆ་སྣ་ཚོགས་ཆུ་རླབས་ལྟར་ཁོལ་བས། །བྱད་མ་ལྷར་བཅས་རྡུལ་དུ་བརླགས་པ་ཡི། །དམིགས་གནད་ལྡན་པས་ཟློག་སྔགས་རྗེས་ཟློས་མཛོད། །བསྙེན་སྔགས་དང་ཡུམ་སྔགས་མཐར། ཨ་ཡ་མ་དུ་རུ་ཙ་ཤ་ན་དགྲ་བོ་བྱད་མ་ལྷ་སྲུང་དང་བཅས་པ་ཐམས་ཅད་ནྲྀ་ཏྲི་མཱ་ར་ཡ་བྷྱོ་བྷྱོ་ཟློག་ཟློག །ལན་གསུམ། ལྷ་ཚོགས་རབ་ཁྲོས་ཐུགས་ལས་སྤྲུལ་པ་ཡི། ཁྲོ་ཆུང་ཕོ་ཉ་ལས་མཁན་གྲངས་མེད་ཀྱིས། །དགྲ་བགེགས་རང་དབང་མེད་པར་མདུན་དུ་བཀུག །ཁོ་ཡི་སྙིང་ནང་རལ་གྲིའི་འཁོར་ལོ་ནི། །རྩིབས་དྲུག་རྣོ་ངར་ལྡན་པ་གཡོན་འཁོར་བས། །ཚེ་སྲོག་དོན་སྙིང་ཤ་རུས་དམར་ཉིལ་གཏུབས། །ཚེ་བསོད་རང་བསྟིམ་རྣམ་ཤེས་དབྱིངས་སུ་སྤར། །གཏོར་མ་བྱད་མའི་ཤ་ཁྲག་དོན་སྙིང་རྣམས། །གཤིན་རྗེའི་ལྷ་ཚོགས་ཞལ་བསྟབ་རྗེས་མེད་དུ། །གྱུར་པར་མོས་པས་གསད་སྔགས་
རྗེས་ཟློས་མཛོད། །ཆོས་གྲགས་ཆོག་སྒྲིག་ལས་བྱང་གདུག་པ་ཀུན་སྒྲོལ་ལྟར་གསད་སྔགས་ལན་གསུམ་བཅས་སྦྱར། རྗེས་བཅས་བྱའོ།། ༈ །།འཇམ་དཔལ་ཤིན་ཏུ་ཁྲོས་པ་ཁྱབ་བདག་ནཱ་ག་རཀྴའི་སྐོར་ལ། རིན་ཆེན་གླིང་པའི་ནཱ་ག་རཀྴ་༼༢༡༡༽ལྟར་དབང་སྒྲུབ། གཏོར་དབང་དངོས། རྗེས་བཅས་བྱའོ།། ༈ །།གནམ་ཆོས་འཇམ་དཔལ་ནཱ་ག་རཀྴའི་སྒྲུབ་ཐབས་ཀྱི་དབང་སྒྲུབ། དངོས་གཞི་གཟུངས་དབང་། རྗེས་བཅས་གནམ་ཆོས་སྤྱི་ལྟར་བྱའོ།། ༈ །།སྐྱིད་གྲོང་ཐུགས་མཆོག་རྡོ་རྗེའི་དྲེགས་འདུལ་གནམ་ལྕགས་མེ་འཁོར་གྱི་གཏུམ་པོ་ནཱ་ག་རཀྴའི་དབང་ཆོག་ཡེ་ཤེས་མེ་འབར་མཚམས་སྦྱོར་གྱིས་བརྒྱན་པ་ཕྲིན་ལས་མེ་འབར་ལྟར་དབང་སྒྲུབ། དབང་དངོས། རྗེས་ཆོག་བཅས་བྱའོ། །དེ་རྣམས་ནི་བཅོམ་ལྡན་འདས་ཕྱག་རྒྱ་ཟིལ་གནོན་ཧེ་རུ་ཀཿསྟེ། འཇམ་དཔལ་སྐུ་ཞི་དྲག་དང་བཅས་པའི་སྐོར་རྣམས་གྲུབ་བོ།། །།གཉིས་པ་པདྨ་གསུང་དུ་སྒྲུབ་པའི་སྐོར་ལ་གཉིས། ཞི་བ་དང་། ཁྲོ་བོའོ། །དང་པོ་ཞི་སྒྲུབ་ལའང་གཉིས། རིགས་བདག་ཚེ་འོད་དཔག་མེད་དང་། ཞི་བ་ཐུགས་ཆེན་ནོ། །དང་པོ་རིགས་བདག་ལའང་གཉིས་ཀྱི། དང་པོ་ཚེ་དཔག་མེད་ཀྱི་སྐོར་ལ།སློབ་དཔོན་སངས་རྒྱས་གསང་བ་ནས་བརྒྱུད་པ། ༼༥༠༽ལྟར་ལུང་ལུགས་ཚེ་དཔག་མེད་ཀྱི་དབང་སྒྲུབ། དབང་དངོས། རྗེས་བཅས་བྱའོ།། ༈ །།མངའ་བདག་ཉང་གི་གུ་རུ་མཚོ་སྐྱེས་རྡོ་རྗེའི་ཚེ་
སྒྲུབ་འཆི་མེད་བདུད་རྩིའི་བུམ་པ་དབང་བསྐུར་བཅས་བཀླག་ཆོག་ཏུ་བསྡེབས་པ་བདུད་རྩིའི་ཆུ་རྒྱུན་ལྟར་དབང་སྒྲུབ། དབང་དངོས། རྗེས་ཆོག་བཅས་བྱའོ།། ༈ །།བྱང་གཏེར་ཐུགས་སྒྲུབ་དྲག་མཐིང་ཆོས་ཚན་ཉེར་ལྔའི་བཅུ་དགུ་པ་ཚེ་སྒྲུབ་ལྕགས་སྡོང་མ་༼༦༦༽འདོད་བུམ་ལྟར་ལྷ་གཅིག་བུམ་གཅིག་གི་དབང་སྒྲུབ། དབང་དངོས། རྗེས་བཅས་བྱ།། །།དེའི་ལྷ་མང་གི་དབང་ཆོག་འཆི་མེད་གྲུབ་པའི་ས་བོན་ལྟར་དབང་སྒྲུབ། དབང་དངོས། རྗེས་ཆོག་བཅས་བྱ། །འདི་ལ་དཔྱད་བྱའི་དོགས་གནས་ཤིན་ཏུ་ཆེ་བས། ཆོས་བདག་མཁྱེན་ལྡན་བསྟན་འཛིན་ཆེན་པོ་རྣམས་ལ་བཀའ་འདྲི་ཞུ་དགོས།། ༈ །།བཀའ་བརྒྱད་རང་ཤར་གྱི་ཆ་ལག་ཚེ་ལྷ་ཡོངས་རྫོགས་ཀྱི་ཕྲིན་ལས་སྨིན་བྱེད་དང་བཅས་པ་པདྨའི་རྒྱན་ཕྲེང་ལྟར་དབང་སྒྲུབ་སྐབས། དངོས་གཞིའི་ས་བཅད་དང་པོ་བཞིན་བདག་བསྐྱེད་ལ་འཕྲི་བསྣན་མེད་པར་མཐར་ཆགས་སུ་གཏང་། ས་བཅད་གཉིས་པ་བཞིན་བུམ་བསྐྱེད་ལ། གཙོ་བོ་ཚེ་དཔག་མེད་བདག་བསྐྱེད་ལྟར་གསལ་བཏབ་ནས། དར་དང་རིན་པོ་ཆེའི་རྒྱན་སྣ་ཚོགས་ཀྱིས་སྤྲས་པ༔ བར། དེའི་པང་དུ་ཡུམ་གོས་དཀར་མོས་འཁྱུད་པ། ཤིན་ཏུ་ལྷམ་མེ་ལྷང་ངེ་ལྷན་ནེ་སྣང་ལ་རང་བཞིན་མེད་པར་བསྒོམ༔ ཕྱོགས་བཞིའི་པད་འདབ་ལ་འཁོར་རྒྱལ་བ་རིགས་བཞི་ཡུམ་དང་བཅས་པ། སྒོ་མ་བཞི་རྣམས་གསལ་བར་བསྐྱེད་པས། ཚེ་དཔག་མེད་ཡབ་ཡུམ་རྣམས་ཕྱག་གཡས་རྡོ་རྗེ་ཚེ་དར་
རིགས་ལྔ་དང་། གཡོན་ཐམས་ཅད་བདུད་རྩིས་གང་བའི་བུམ་པ་བསྣམས་པ། སྒོ་མ་བཞིས་ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་དང་ཚེ་དར་བུམ་པ་བསྣམས་པ། ཐམས་ཅད་ཀྱང་དར་དང་རིན་པོ་ཆེའི་རྒྱན་ཆ་སྣ་ཚོགས་ཀྱིས་མཛེས་པར་སྤྲས་པའོ། །ལྷ་ཚོགས་རྣམས་ཀྱི་གནས་གསུམ་དུ་འབྲུ་གསུམ་གསལ་བ་དང་། ཐུགས་སྲོག་ཧྲཱིཿལས་འོད་ཟེར་འཕྲོས་པས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་དཀྱིལ་འཁོར་པའི་རྣམ་པར་སྤྱན་དྲངས་པར་གྱུར། ཧཱུྃ། མ་ལུས་སེམས་ཅན་སོགས་དང་། ཨོཾ་ན་མོ་བྷ་ག་ཝ་ཏེ་ཨ་པ་རི་མི་ཏ་ཨཱ་ཡུརྫྙཱ་ན་ས་པ་རི་ཝཱ་ར་བཛྲ་ས་མཱ་ཛཿས་སྤྱན་དྲངས། ཛཿཧཱུྃ་བཾ་ཧོཿས་དམ་ཡེ་གཉིས་སུ་མེད་པར་བསྟིམ། སྔགས་སྔ་མའི་ཤམ་དུ། བཛྲ་ཨརྒྷཾ་ནས། ཤབྡ་པྲ་ཏཱིཙྪ་སྭཱ་ཧཱའི་བར་གྱིས་ཕྱི་མཆོད་དང་། འབྲུ་གསུམ་གྱིས་ནང་མཆོད་འབུལ། བསྟོད་པ་ནི། ས་བཅད་གསུམ་པ་མདུན་བསྐྱེད་ཀྱི་བསྟོད་པའི་དབུ་ནས། ཧྲཱི༔ བཅོམ་ལྡན་མགོན་པོ་ཡེ་ཤེས་ཚེ་དཔག་མེད༔ སོགས་གཙོ་བོ་ཡབ་ཡུམ་གྱི་བསྟོད་པ་ཚིག་རྐང་བརྒྱད་འདིར་བླངས། དེ་ནས་བུམ་བསྐྱེད་གཞུང་གི་ཧྲཱི༔ བཅོམ་ལྡན་མགོན་པོ་ཚེ་དཔག་མེད༔ སོགས་ཚེ་བདག་རིགས་བཞི་ཡབ་ཡུམ་གྱི་བསྟོད་པའི་མཐར། ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་མ༔ དཀྱིལ་འཁོར་
ལྷ་ཚོགས་རྣམས་ལ་ཕྱག་འཚལ་བསྟོད༔ ཅེས་པ་རྣམས་སྦྲེལ་བས་བསྟོད། གཟུངས་ཐག་བླང་བ་སོགས་གཞུང་གསལ་ལྟར་གྱིས་བུམ་པ་བསྒྲུབ། མདུན་བསྐྱེད་ས་བཅད་གསུམ་པ་བཞིན་མཐར་ཆགས་སུ་བཏང་ཞིང་། གཞུང་བཟླས་རྗེས། སྒྲུབ་ཆེན་ཡོངས་རྫོགས་ཀྱི་རིགས་ལྔ་སྤྱི་དྲིལ་གྱི་བཟླས་པ་སྤྲོ་ན། ཧཱུྃ་བྷྲཱུྃ་བཛྲ་ཨཱ་ཡུ་ཥེ་ཧཱུྃ་ཨཱ༔ སོགས་གཏེར་གཞུང་ལྟར་སྦྱར། ཚོགས་ནས། ཚེ་འགུགས་བསྟིམ་སྲུང་བ་བཅས་གྲུབ་པ་དང་། ལས་བུམ་བསྒྲུབ་པ་ཕྱིན་དབང་ཆོག་བཞིན་ལ། བྱིན་རླབས་བླ་མའི་དབང་གིས་ཡེ་ཤེས་དབབ་པའི་བླ་བརྒྱུད་ཁ་སྐོང་ནི། འཇམ་དབྱངས་རྒྱལ་སྲས་ཀྱི་རྗེས་སུ། ཁྱབ་བདག་ཡེ་ཤེས་ལྔ་ཡི་བདག །རྩ་བརྒྱུད་བླ་མའི་དུས་ལ་བབས། །འཆི་མེད་ཚེ་དབང་བསྐུར་དུ་གསོལ། །རྡོ་རྗེ་ལྕགས་ཀྱུ་སོགས་དང་སྦྲེལ་ནས་དབང་དངོས་གཞི་མཐར་ཆགས་སུ་བསྐུར། རྗེས་ཆོག་བཅས་བྱའོ།། ༈ །།སངས་རྒྱས་གླིང་པའི་ཚེ་སྒྲུབ་ཉི་ཟླ་ཁ་སྦྱོར་གྱི་ཚེ་དབང་དོན་གྱི་པྲ་ཁྲིད་ཀྱི་ཟིན་བྲིས་ལྟར་དབང་སྒྲུབ། དབང་དངོས། རྗེས་བཅས་སོ།། ༈ །།རྡོ་རྗེ་གླིང་པའི་རྫོགས་ཆེན་ལྟ་བ་ཀློང་ཡངས་ཀྱི་ཞི་ཁྲོའི་ཚེ་སྒྲུབ་འོད་ཟེར་དྲྭ་བའི་ཚེ་དབང་རིན་ཆེན་འཁོར་ལོ་བཀླག་ཆོག་ཏུ་བསྡེབས་པ་བདུད་རྩིའི་འོད་ཟེར་ལྟར་དབང་སྒྲུབ། དབང་དངོས། རྗེས་བཅས་གྲུབ་བོ།། ༈ །།རཏྣ་གླིང་པའི་ཚེ་ཁྲིད་རྡོ་རྗེ་ཕྲེང་བའི་ནང་སྒྲུབ་ཀྱི་ཕྲིན་ལས་དབང་ཆོག་དང་བཅས་པ་རྡོ་རྗེ་ཕ་ལམ་གྱི་རྒྱན་ལྟར་དབང་སྒྲུབ། དབང་དངོས་ཚེ་བུམ་རྗེ་སྐུ་འཁོར་འདས་
ཀྱི་དྭངས་བཅུད་ཐམས་ཅད་བསྡུས་པའི་བཅུད་ལེན་གྱི་རིལ་བུ་དང་། འཆི་མེད་ཀྱི་བདུད་རྩིལ་རོལ་བས་ལྕགས་ལ་གསེར་འགྱུར་གྱི་རྩིས་ཐེབས་པ་ལྟར་སྙིགས་མའི་ཕུང་ཁམས་སྐྱེ་མཆེད་རྡོ་རྗེའི་ལུས་སུ་གྱུར་པར་མོས། ཧཱུཾ། རྩ་ཁམས་དག་པ་ལུས་ཀྱི་གནསཿ དམ་རྫས་ཚེ་ཡི་རིལ་བུ་འདིསཿ འབྱུང་བ་སོགས་བསྒྱུར་བས་ཚེ་རིལ་སྦྱིན་པ་སྦྱར། སླར་ཧཱུཾཿ རྩ་ཁམས་དག་པ་སོགས་གཞུང་གསལ་གྱིས་བདུད་རྩི་ཚེ་ཆང་བླུད་པ་སོགས་མཐར་ཆགས་སུ་བསྐུར། རྗེས་ཆོག་བཅས་བྱ། ༈ པདྨ་གླིང་པའི་ཚེ་ཁྲིད་རྡོ་རྗེ་ཕྲེང་བའི་དབང་གསུང་རྒྱུན་མ་འདོད་བུམ། ༼༧༣༽ལྟར་དབང་སྒྲུབ། དབང་དངོས། རྗེས་བཅས་བྱའོ།། ༈ །།གྲུབ་པའི་དབང་ཕྱུག་ཐང་སྟོང་རྒྱལ་པོའི་ལུགས་ཀྱི་ཚེ་སྒྲུབ་འཆི་མེད་དཔལ་སྟེར་འདོད་བུམ། ༼༧༢༽ལྟར་དབང་སྒྲུབ་ཀྱི་ལྷ་བསྐྱེད་སྐབས། དེའི་སྤྱི་བོ་ནས་རིམ་བཞིན་རྩ་བའི་བླ་མ་ཞེས་པའི་མཚམས། རྡོ་རྗེ་འཆང་དངོས་པདྨ་གར་དབང་། འཇམ་མགོན་མཁྱེན་བརྩེའི་དབང་པོ། རྗེ་བཙུན་ཕྲིན་ལས་ཆོས་སྒྲོན། རིག་འཛིན་ཕྲིན་ལས་རྣམ་རྒྱལ། དཔལ་ལྡན་པདྨ་བསྟན་འཛིན། རྒྱལ་སྲས་རིན་ཆེན་རྣམ་རྒྱལ། གཏེར་ཆེན་འགྱུར་མེད་རྡོ་རྗེ། རིག་འཛིན་ཕྲིན་ལས་ལྷུན་གྲུབ། སོགས་དང་། ཡང་བརྒྱུད་འདེབས་སྐབས། ཕྲིན་ལས་ལྷུན་གྲུབ་ཀྱི་རྗེས་སུ། རིག་འཛིན་ཆེན་པོ་འགྱུར་མེད་རྡོ་རྗེ་འཆང་། །རིན་ཆེན་རྣམ་རྒྱལ་པདྨ་བསྟན་
འཛིན་དང་། །ཕྲིན་ལས་རྣམ་རྒྱལ་ཕྲིན་ལས་ཆོས་ཀྱི་སྒྲོན། །ཡོངས་རྫོགས་བསྟན་པའི་མངའ་བདག་མཁྱེན་བརྩེའི་དབང་། །འཁོར་ལོའི་མགོན་པོ་པདྨ་གར་དབང་སོགས། །རྩ་བ་བརྒྱུད་པའི་སོགས་སྦྱར། འདི་ལ་བརྒྱུད་ཚུལ་འདྲ་མིན་མང་ངོ་། །དབང་དངོས་གཞིར་བརྒྱུད་པའི་ཁ་སྐོང་བཤད་མ་ཐག་པ་ལྟར་དང་། ཚེ་བུམ་དབང་གི་སྐབས། སྤྲོ་ན། ལྟར་འུབ་ཀྱིས་བསྡུས། བླ་མ་ཚེ་དཔག་མེད་དུ་གསལ་བའི་ཕྱག་གི་བུམ་པའི་ནང་དུ་ཞུགས་འཆི་མེད་ཀྱི་བདུད་རྩིར་གྱུར། ཅེས་པའི་མཚམས་སུ། པ་ལ། མོས་གུས་དུང་དུང་མཛད་པས་བདུད་རྩི་སོར་གྱིས་ཁོལ་ཏེ་སོགས་དེའི་འོག་ནས་འབྱུང་བའི་དམིགས་པ་སྦྲེལ་ཞིང་། ཚིགས་བཅད་སྔགས་བཅས་ཀྱིས་དབང་བསྐུར། ཡང་འོད་ཟེར་འཕྲོས་འབྱུང་བ་བཞིའི་ཁམས་ཐམས་ཅད་ལ་ཕོག །ཁྱད་པར། འོག་གཞི་གསེར་གྱི་སོགས་ནས། སྲ་ཞིང་འཐས་པ་ཐམས་ཅད་ཅེས་པའི་མཚམས། འོད་ཟེར་དེས་རྡོ་ཁབ་ལེན་སོགས་དེའི་གོང་དུ་འབྱུང་བ་བཞིན། བདུད་རྩིར་གྱུར། བར། པ་ལ། མོས་གུས་དུང་དུང་སོགས། དེའི་འོག་ནས་འབྱུང་བའི་དམིགས་པ་ཚིགས་བཅད་དང་སྔགས་བཅས་ཀྱིས་དབང་བསྐུར་བ་སྔར་ལྟར་རོ། །དེ་བཞིན་དུ། ཡང་འོད་ཟེར་འཕྲོས་འབྱུང་བ་བཞིའི་ཁམས་ཐམས་ཅད་ལ་ཕོག །ཁྱད་པར། འོག་གཞི་ཆུའི་སོགས་ནས། གཤེར་བ་ཐམས་ཅད། འོད་ཟེར་དེས་རྡོ་ཁབ་ལེན་
སོགས་གོང་འོག་སྦྲེལ་བ་སྔར་ལྟར་རོ། །ཡང་འོད་ཟེར་འཕྲོས་འབྱུང་བ་བཞིའི་ཁམས་ཐམས་ཅད་ལ་ཕོག །ཁྱད་པར། འོག་གཞི་མེའི་སོགས་ནས། སྲེག་པ་ཐམས་ཅད། འོད་ཟེར་དེས་རྡོ་ཁབ་ལེན་སོགས་གོང་འོག་སྦྲེལ་བ་སྔར་ལྟར་རོ། །ཡང་འོད་ཟེར་འཕྲོས་འབྱུང་བ་བཞི་ཡི་ཁམས་ཐམས་ཅད་ལ་ཕོག །ཁྱད་པར། འོག་གཞི་རླུང་གི་སོགས་ནས། འཆི་མེད་ཀྱི་བདུད་རྩིར་གྱུར། ཅེས་པའི་མཚམས། པ་ལ། མོས་གུས་དུང་དུང་སོགས་དེའི་འོག་ནས་འབྱུང་བ་སྔར་ལྟར་རོ། །ཡང་འོད་ཟེར་འཕྲོས་བཅུད་ཀྱི་སེམས་ཅན་ཐམས་ཅད་ལ་ཕོག །རིགས་དྲུག་སོགས་དཀྱུས་ལྟར་རོ། །བསྡུ་ན། གཞུང་ནར་འདེད་མཛད་པ་བཅས་གཉིས་ཀ་ཕྱག་བཞེས་སུ་འབྱུང་ངོ་། །རྗེས་བཅས་བྱའོ།། ༈ །།གཏེར་ཁ་བཞི་འདུས་ཀྱི་ཚེ་སྒྲུབ་བདུད་རྩི་བུམ་ཆུང་གི་སྒྲུབ་ཐབས་དབང་ཆོག་དང་བཅས་པ་ལྟར་དབང་སྒྲུབ། དབང་དངོས། རྗེས་བཅས་བྱའོ།། ༈ །།རས་ཆེན་དཔལ་འབྱོར་བཟང་པོའི་ཚེ་སྒྲུབ་ཟབ་མོ་མདའ་འཕེལ་མའི་ཚེ་དབང་བསྐུར་ཚུལ་འཆི་མེད་ཚེའི་དཔལ་སྟེར་ལྟར་ཕྱག་རྒྱུན་དུ་མཛད་པས། དབང་སྒྲུབ་ལ། ཚིག་བདུན་རྗེས། ལས་བུམ་འཁྱིལ་པས་བསྒྲུབ། འཆི་མེད་དཔལ་སྟེར་མཆོད་བརླབ། སྐྱབས་སེམས། བདག་མདུན་བུམ་པ་དབྱེར་མེད་དུ་བསྐྱེད་
དེ། གཞུང་གསལ་རྩ་བ་དང་། གསལ་བྱེད་ཚིགས་བཅད་ལྷུག་གཉིས་ཀ་སྤེལ་ཏེ། རླུང་རོ་བསལ་བ་དང་། རང་གི་སྙིང་གའི་སོགས་གཞུང་གསལ་བཞིན་བྱ་ཞིང་། ཡན་ལག་བདུན་པ། གསོལ་འདེབས། བཟླས་པ། བསྡུ་རིམ་དོར་ལ། སེམས་མ་བཅོས་སྤྲོས་བྲལ་འོད་གསལ་ཆེན་པོའི་ངང་དུ་ཉམས་ཅུང་ཟད་བསྐྱང་། ཚེ་གཟུངས་ཅུང་ཟད་བཟླས་ནས་ཚེ་མདའ་ལ་ཕུས་གདབ་ཅིང་རིང་ཐུང་ཚད་གཞལ། ཚེ་འགུགས་ཀྱི་མཐར། ཚེ་གཟུངས་མང་དུ་བཟླས་ལ། སླར་ཚད་གཞལ། མ་གྲུབ་ན་སླར་གསོལ་འདེབས་བསྙེན་པ་བཅས་སྔར་བཞིན་བསྐྱར། མཐར་བདག་དབང་བླང་བ་ནི། གསོལ་གདབ་ནས། སྣ་བདུན་རྫས་བརྒྱད་ཀྱི་མཐའ་བར་གྱིས་བླང་། དེ་ནས་བདག་བསྐྱེད་ལོགས་སུ་ཕྱེས་ཏེ་གཏོར་འབུལ་བྱ། གནང་བ་ནོད། དབང་དངོས་ལ། སྤྱི་ལྟར་ཁྲུས་ཆབ་གཏང་། མཎྜལ་བཀྱེ་བསྡུ། སེམས་བསྐྱེད་གསལ་གདབ། ལོ་རྒྱུས་ནས་གཟུང་མཐར་ཆགས་སུ་བསྐུར་བའི་རླུང་རོ་བསལ་བ་དང་། བུམ་ཅན་འཛིན་པ་སོགས་གཞུང་གསལ་དཔོན་སློབ་གཉིས་ཀས་བྱ་བ་དང་། འདོན་བྱ་རྩ་བ་ཚིགས་ཐམས་ཅད་སློབ་དཔོན་རྐྱང་པས་དམིགས་པ་འབོགས་རྒྱུ་དང་། སློབ་མས་གསོལ་འདེབས་སོགས་རྗེས་ཟློས་བྱ་རྒྱུ་གཉིས་མ་འདྲེས་པ་དགོས། རྫོགས་རིམ་བསྒོམ་ཞིང་མཉམ་པར་བཞག་རྗེས། སློབ་དཔོན་ནམ་སློབ་མ་མང་སྐབས་གཙོ་བོ་ཙམ་གྱིས་ཚེ་མདའ་ཚད་གཞལ་ལུགས་གཞུང་ལྟར་བྱེད་ཅིང་། སློབ་དཔོན་གྱིས་ཚེ་གཟུངས་བཟླ་ཞིང་། ཕུས་གདབ་རྒྱུ་སློབ་དཔོན་རྐྱང་པས་མཛད། ཚེ་འགུགས་དལ་བར་གྱེར་མཐར། བཟླས་པ་
དང་ཕུས་གདབ། སླར་ཡང་ཚེ་མདའ་ཚད་གཞལ། མ་འཕེལ་ན་སླར་ཚེ་གཟུངས་བཟླ་ཞིང་ཚེ་འགུགས་ཕྱིན་བསྐྱར། ཆད་ན་བསྐྱར་དགོས་པ་གཞིར་བཅས། དེ་སྟེང་གཞུང་གསལ་རིམ་གྲོ་རྣམས་ལ་འབད་བཅུག །དབང་དངོས་གཞིའི་གསོལ་གདབ་རྗེས། སྐུར་བྱེད་ནམ་མཁའི་དཀྱིལ་འཁོར་རྣམས་ཚེ་དཔག་མེད་དཀར་པོ་ཞེས་པར། ཕྱི་མ་རྣམས་ལ་རིམ་པ་བཞིན། མཐིང་ག །སེར་པོ། དམར་པོ། ལྗང་གུ་རྣམས་དང་། ཚིགས་བཅད་དབུ་སོ་སོར་ཁ་བསྒྱུར་དགོས། སྣ་བདུན་རྫས་བརྒྱད་བསྐུར་ཚིག་ཚེ་དཔག་ལྷ་དགུ་བཞིན་དགོས་པར་གསུངས་ཀྱང་། ལྷ་རྫས་ལས་བྱས་སོགས་དང་། མེ་ལོང་ཡེ་ཤེས་ལྟ་བུའི་སྤྱི་འགྲོ་ཚིགས་བཅད་རྒྱས་པས་བསྐུར་བས་འཐུས། དེའི་གོང་གི་དཀྱིལ་ཆོག་འཆི་མེད་འབྱུང་བའི་དཀྱུས་ལྟར། ཚེ་གཏོར་རྟེན་དང་བརྟེན་པར་བཅས་པའི་ལྷ་ཚོགས་སུ་བསྒོམས་པས་སོགས་ནས། གསོལ་འདེབས་སྐབས་ཁ་སྐོང་ནི། ནམ་མཁའ་འཆི་མེད་ཀྱི་རྗེས་སུ། ངེས་ལེགས་ཐར་པའི་ལམ་སྟོན་གཞལ་ཡས་ན། །བྱམས་པ་ཀུན་དགའ་བསྟན་འཛིན་ལ་གསོལ་བ་འདེབས། །མི་ཤིགས༴ རྟག་བརྟན༴ ཁྱབ་བདག་གསང་སྔགས་གྲུབ་པའི་གཞལ་ཡས་ན། །འཇམ་དབྱངས་མཁྱེན་བརྩེའི་དབང་པོ་ལ་གསོལ༴ མི་ཤིགས༴ རྟག་བརྟན༴ ཡོངས་རྫོགས་བསྟན་པ་རྒྱས་པའི་གཞལ་ཡས་ན། །འཇམ་མགོན་བློ་གྲོས་མཐའ་ཡས་ལ་གསོལ༴ མི་ཤིགས༴ རྟག་བརྟན༴
སྨིན་གྲོལ་གདམས་ངག་རྫོགས་པའི་གཞལ་ཡས་ན། །རིམ་བྱོན་བརྒྱུད་པའི་བླ་མ་ལ་གསོལ༴ མི་ཤིགས༴ རྟག་བརྟན༴ སྤྱི་གཙུག་སོགས་སྦྲེལ་ནས་མཐར་རྩ་སྔགས་བཟླ་ཞིང་ཚེ་ཟན་ནམ་ཚེ་འབྲང་གིས་དབང་བསྐུར། རྩ་སྔགས་བཟླ་ཞིང་ཚེའི་རིལ་ཆང་སྦྱིན། དེ་ནས་ཚེ་དབང་འཆི་མེད་ཚེའི་དཔལ་སྟེར་མཇུག་བཞིན། དམ་ཚིག་ཁས་བླང་སོགས་བྱ། ཆོ་གའི་རྗེས་ལ་མཆོད་ཁ་གསོས་ལ། འབྲུ་གསུམ་དང་ནམ་མཁའ་མཛོད་ཀྱི་སྔགས་རྒྱས་བརླབ་ཅིང་སྤེལ། ཨོཾ་ཤྲཱི་ཛྙཱ་ན་བཛྲ་ཨཱ་ཡུཿཥེ་ས་པ་རི་ཝཱ་ར་ཨརྒྷཾ། པུཥྤེ་ནས། ཤབྡ་པྲ་ཏཱིཙྪ་སྭཱ་ཧཱ། ཞེས་ཉེར་སྤྱོད་ཀྱིས་མཆོད། འཇིག་རྟེན་འདྲེན་པའི་སོགས་ཀྱིས་བསྟོད། བཅོམ་ལྡན་འདས་ཀྱིས་བདག་དང་སེམས་ཅན་ཐམས་ཅད་ལ་འཆི་མེད་ཚེའི་དངོས་གྲུབ་མ་ལུས་པ་བསྩལ་དུ་གསོལ། ཅེས་འདོད་དོན་གསོལ། མ་འབྱོར་པ་སོགས་དང་ཡིག་བརྒྱས་ནོངས་པ་བཟོད་པར་གསོལ། ཚོམ་བུ་ཡིན་ན། ཚེ་རྟེན་རྣམས་ལ་དམིགས་ཏེ་ཡེ་ཤེས་པ་བརྟན་ཅིང་། དམ་ཚིག་པ་བསྡུ་བ་སོགས་སྤྱི་ལྟར་དང་། བདག་བསྐྱེད་བསྡུ་རིམ་ནི། ཚེ་དབང་འཆི་མེད་ཚེའི་དཔལ་སྟེར་གྱི་བཟླས་པའི་རྗེས་སུ་འབྱུང་བ། སྣོད་བཅུད་སྲུང་འཁོར་སོགས་ནས། མངོན་སུམ་ལྟ་བུར་གསལ་བར་གྱུར། །བར་གྱིས་བསྡུ་ལྡང་བྱ། བསྔོ་སྨོན་བཀྲ་ཤིས་བཅས་ཀྱིས་མཐའ་བརྒྱན་པས་གྲུབ་བོ།། ༈ །།མངའ་རིས་པཎ་ཆེན་པདྨ་དབང་རྒྱལ་གྱི་ཚེ་སྒྲུབ་ཡེ་ཤེས་འོད་མཆོག་གི་དབང་
བསྐུར་བའི་ཆོ་ག་གསལ་བར་བསྡེབས་པ་ཡེ་ཤེས་འོད་ཀྱི་བུམ་པ་ལྟར་དབང་སྒྲུབ། དབང་དངོས། རྗེས་བཅས་བྱའོ།། ༈ །།འབྲི་གུང་ཆོས་རྒྱལ་རིན་ཆེན་ཕུན་ཚོགས་མཁའ་གྲོལ་ཀློང་ཡངས་ཞབས་ཀྱི་དམ་ཆོས་དགོངས་པ་ཡང་ཟབ་ལས་ཚེ་སྐོར་ཕྱི་ནང་གསང་བ་གསུམ་གྱི་ཟབ་དབང་བསྐུར་བའི་རིམ་པ་གསལ་བར་བཀོད་པ་རྡོ་རྗེའི་སྲོག་སྒྲུབ་ལྟར་ཕྱི་དབང་མཐར་ཆགས། ནང་དབང་བསྐུར་བ་གཞུང་གསལ་དེ་བྱ། གསང་བའི་དབང་བསྐུར་དུས་རིགས་ལྔའི་ལྷ་ཙཀ་མི་དགོས། བདུད་རྩི་རྐྱང་པ་ཡིན། དེ་ལྟར་དབང་གསུམ་པོར་དབང་སྒྲུབ། དབང་དངོས། རྗེས་ཆོག་བཅས་སོ་སོར་བྱ་དགོས་སོ།། ༈ །།གར་དབང་ཞིག་པོ་གླིང་པའི་ཚེ་སྒྲུབ་རྒྱལ་བ་འདུས་པའི་སྨིན་བྱེད་དབང་གི་ལག་ལེན་དཀྱུས་གཅིག་ཏུ་བསྡེབས་པ་འཆི་མེད་ཐིག་ལེ་ལྟར་བདག་བསྐྱེད། སྟ་གོན། དབང་སྒྲུབ། དབང་དངོས། རྗེས་ཆོག་བཅས་བྱའོ།། ༈ །།ཤེས་རབ་འོད་ཟེར་གྱི་གྲོལ་ཐིག་ཚེ་དཔག་མེད་འཆི་མེད་སྐུ་གསུམ་འདུས་པའི་སྒྲུབ་ཐབས་དབང་ཆོག་དང་བཅས་པ་ཚེ་དབང་བཅུད་འཁྱིལ་ལྟར་དབང་སྒྲུབ། དབང་དངོས། རྗེས་བཅས་བྱའོ།། ༈ །།འཇའ་ཚོན་སྙིང་པོའི་ཚེ་དཔག་མེད་གནམ་ལྕགས་རྡོ་རྗེ་དངོས་གྲུབ་ཀུན་འདུས་ཀྱི་དབང་བསྐུར་བཀླག་ཆོག་ཏུ་བཀོད་པ་འཆི་མེད་ཐིག་ལེ་ལྟར་དབང་སྒྲུབ། དབང་དངོས། རྗེས་བཅས་བྱའོ།། ༈ །།བདུད་འདུལ་རྡོ་རྗེའི་ཚེ་སྒྲུབ་རིག་འཛིན་སྲོག་ཐིག་ཚ་བ་དམར་ཐག་གི་དབང་ཆོག་དྲི་མེད་བདུད་རྩིའི་ཆུ་རྒྱུན་ལྟར་དབང་སྒྲུབ་
རྨ་ཆེན་སྤོམ་རའི་གསོལ་མཆོད་འདོད་དགུ་མྱུར་སྟེར་གཏེར་གཞུང་དང་། ༼ཉ༽པད་འོད་ཚོགས་མཆོད་སྦྱར། དབང་དངོས། སྤོམ་རའི་བཀའ་གཏད། རྗེས་ཆོག་བཅས་བྱའོ།། ༈ །།ཨོ་རྒྱན་གཏེར་བདག་གླིང་པའི་རིག་འཛིན་ཐུགས་ཐིག་གི་ཆ་ལག་ཚེ་སྒྲུབ་འཆི་མེད་ཡང་སྙིང་ཀུན་འདུས་ཀྱི་དབང་གོང་དུ་ཐུགས་ཐིག་རྩ་དབང་སྐབས་སོང་།། ༈ །།རྒོད་ལྡེམ་པའི་ཟབ་གཏེར་སླར་ཡང་དེའི་རྣམ་འཕྲུལ་གར་དབང་རྡོ་རྗེ་ཟླ་བ་རྒྱལ་མཚན་གྱི་ཡང་གཏེར་དུ་བྱོན་པ། རྡོར་སེམས་ཐུགས་ཀྱི་མེ་ལོང་གི་ཆོས་སྡེ་ཚེ་སྒྲུབ་ཡེ་ཤེས་རྒྱ་མདུད་ཀྱི་སྒྲུབ་ཐབས་དབང་ཆོག་བཅས་སྙིང་པོར་དྲིལ་བ་མི་ཤིགས་སྲོག་གི་རྒྱ་མདུད་ལྟར་དབང་སྒྲུབ། དབང་དངོས། རྗེས་ཆོག་བཅས་བྱའོ།། ༈ །།ཀློང་གསལ་སྙིང་པོའི་ཚེ་སྒྲུབ་ཡང་གསང་བླ་མེད་ཀྱི་དབང་སྒྲུབ་སྐབས། རིག་འཛིན་བརྒྱུད་པའི་གསོལ་འདེབས་མཐར། ཕྲིན་ལས་རང་གཞུང་འཆི་མེད་ལམ་བཟང་ལྟར་སྐྱབས་སེམས་ནས་བརྩམ་བགེགས་གཏོར་སྤྱི་ཁྱབ་བརླབ་འགུགས་བསྔོས་མཐར་བཀའ་བསྒོ་ལ་འཇུག་པས། བདག་མདུན་དབྱེར་མེད་ཀྱི་བསྐྱེད་བཟླས་དང་། རྣམ་བུམ་བསྐྱེད་བཟླས་སྤྱི་འགྲོ། ཚེ་འགུགས་ཡེ་ཤེས་ཐུགས་རྗེའི་ལྕགས་ཀྱུ་ལྟར་དམིགས་གནད་དང་བཅས་པའི་ཚེ་འགུགས་རྒྱས་གདབ་བཅས་གཏང་། སྟོང་ཚིགས་འབུལ་ཞིང་བུམ་ལྷ་འོད་ཞུ་བྱ། ལས་བུམ་རྟ་མགྲིན་གྱིས་བསྒྲུབ། སྲུང་མ་ལ་གཏོར་མ་འབུལ། ཚོགས་བྱིན་རླབས་ནས་བསྒྲལ་བསྟབ་མཐར། རིག་མེ་དོར་ཞིང་གནང་བ་ནོད། དབང་དངོས་ལ་དབང་གི་མཚམས་སྦྱོར་
འཆི་མེད་བདུད་རྩིའི་རྒྱུན་བཟང་ལྟར་འཇུག་པ་ནས་མཐར་ཆགས་སུ་བསྐུར། རྗེས་ཚོགས་ལ་རོལ་ཞིང་། ལྷག་མ་ཆད་བརྟན་རྟ་བྲོའི་རྗེས། གཏང་རག་གི་མཆོད་བསྟོད། ནོངས་བཤགས། བརྟན་བཞུགས། བདག་བསྐྱེད་བསྡུ་ལྡང་བཅས་སྤྱི་འགྲོ་སྦྱར། འཆི་མེད་ཚེ་ཡི་སོགས་བསྔོ་བ་དང་སྨོན་ལམ། ཧྲཱིཿ བཀྲ་ཤིས་གང་ཞིག་སོགས་ཤིས་བརྗོད་བཅས་བྱའོ།། ༈ །།ཡོན་དགེ་མི་འགྱུར་རྡོ་རྗེའི་ཚེ་སྒྲུབ་ཐབས་ཤེས་ཁ་སྦྱོར་གྱི་ཡང་སྙིང་ནམ་སྙིང་ཚེ་སྒྲུབ་ཀྱི་དབང་གི་མཚམས་སྦྱོར་ལྟར་དབང་སྒྲུབ། དབང་དངོས་བསྐུར་ཚུལ་ལ་རྗེས་ཀྱི་ཡིག་ཆུང་དུ་གསལ་བའི་རྟ་མགྲིན་མགོན་པོའི་ལུགས་བཞིན་བསྐུར་ཞིང་། རྗེས་བཅས་བྱའོ།། ༈ །།སྟག་ཤམ་བསམ་གཏན་གླིང་པའི་ཚེ་སྒྲུབ་པདྨ་གསང་ཐིག་དང་ལྕགས་དྲིལ་མ་གཉིས་ཀའི་ཡང་སྙིང་བཅུད་བསྡུས་ཀྱི་དབང་ལ། གཏེར་གཞུང་ལས་བྱང་ཚིག་དོན་རབ་གསལ་བཞིན་ལ་དབང་སྒྲུབ་ཀྱི་ཆོ་གའི་ཡན་ལག་ཕྲ་མོ་རྣམས་སྤྱི་ཁྱབ་སྦྱར་བ་དང་། དབང་དངོས་ལ། དབང་ཆོག་འཆི་མེད་མྱུར་སྩོལ་བཞིན། ཐོག་མར་མཎྜལ་སྔོན་འགྲོས་ལོ་རྒྱུས་གཏང་ཞིང་། མཚམས་སྦྱོར་སོགས་སྤྱི་ཁྱབ་བཞིན་བརྒྱན་ཏེ། རིགས་ལྔའི་ལྷ་དབང་སྐབས་ལྷ་ཙཀ་དང་མཐུན་པའི་བུམ་པ་ལྔ་སོ་སོའི་དབང་རེ་རེ་བཞིན་བསྐུར་ཞིང་། བུམ་ཆུ་རྣམས་སྣོད་གཞན་ཞིག་ཏུ་བསགས་ནས། རྗེས་སུ་བསྐུར་ཚིག་དང་སྦྲགས་ནས་སྦྱིན་དགོས། རྗེས་ཆོག་ཚོགས་མཆོད་སོགས་༼ཏ༽བླ་མ་ཡིད་བཞིན་ནོར་བུ་ལྟར་བྱའོ།། ༈ །།དབོན་གསས་ཁྱུང་ཐོགས་ཕྱི་
མའི་རྫོགས་ཆེན་ཀུན་བཟང་སྙིང་ཐིག་གི་རིགས་བདག་ཚེ་སྒྲུབ་ཡེ་ཤེས་སྲོག་ཏིག་པདྨ་འོད་གསལ་མདོ་སྔགས་གླིང་པར་ཉེ་བརྒྱུད་ཀྱི་དབང་ཆོག་དངོས་གྲུབ་སྒོ་འབྱེད་ལྟར་དབང་སྒྲུབ། དབང་དངོས། རྗེས་ཆོག་བཅས་བྱའོ།། ༈ །།རོང་སྟོན་པདྨ་བདེ་ཆེན་གླིང་པའི་ཀློང་གསལ་མཁའ་འགྲོའི་སྙིང་ཐིག་གི་ཡན་ལག་ཚེ་སྒྲུབ་རྡོ་རྗེ་རྒྱ་མདུད་ཀྱི་ཡང་གསང་སྨིན་བྱེད་ཟབ་མོ་མདོར་དྲིལ་བཀོད་པ་བདུད་རྩིའི་བུམ་བཟང་ལྟར་དབང་སྒྲུབ་ཀྱི་སྐབས། བགེགས་གཏོར་གྱི་ང་རྒྱལ་གཟུང་བ་ནས་མཚམས་གཅོད་གྲུབ་ཀྱི་བར་དབང་བསྐུར་ནས་འབྱུང་བ་དང་། བྱིན་འབེབ་དང་མཆོད་བརླབ།༼ག༽བདེ་གླིང་ཞི་ཁྲོའི་ལས་བྱང་ནས་འབྱུང་བ་བཅས་སྦྱར། དབང་དངོས་ཀྱི་མཐའི་དམ་ཚིག་བསྒྲགས་བཟུང་གི་རྗེས། དེ་ལྟར་དབང་བསྐུར་ཟབ་མོ་ཐུན་མོང་མ་ཡིན་པ་ལེགས་པར་ཐོབ་པའི་གཏང་རག་དང་། སླར་ཡང་གྲོལ་ལམ་གདམས་ཁྲིད་ཞུ་བའི་ཡོན་དུ་མཎྜལ། དེ་ལ་འདིར་པདྨ་བདེ་ཆེན་གླིང་པའི་ཟབ་གཏེར་ཀློང་གསལ་མཁའ་འགྲོའི་སྙིང་ཐིག་གི་ཆ་ལག །ཚེ་སྒྲུབ་རྡོ་རྗེའི་རྒྱ་མདུད་ཀྱི་གྲོལ་ཁྲིད་དམ་ལྡན་སྙིང་ནོར་བཀའ་རྒྱ་མའི་སྟེང་ནས་ཟབ་ཁྲིད་འབོགས་པ་ལ། ཐུན་མོང་སྔོན་འགྲོ་བློ་ལྡོག་བཞི་དང་། ཐུན་མིན་སྔོན་འགྲོ་སྐྱབས་སེམས་ཚོགས་གསག །དངོས་གཞི་བསྐྱེད་རིམ་ཡན་ལག་དང་བཅས་པ། འཁོར་འདས་ཚེ་བཅུད་བསྡུ་བསྟིམ། རྒྱས་གདབ་ལ་བརྟེན་པའི་བཟླས་རིམ། ལྷུན་འབྱམས་
རྫོགས་པ་ཆེན་པོར་ལ་བཟླའི་རྫོགས་རིམ་བཅས་འདི་ལྟར་ཉམས་སུ་བླང་དགོས་ཏེ། དེ་ལ་འཆི་མེད་ཚེ་ཡི་སྒྲུབ་ཐབས་རྡོ་རྗེའི་རྒྱ་མདུད་ཀྱི་དོན་ཁྲིད་ཀྱི་རིམ་པ་འདི་ལ། སྔོན་འགྲོ་དང་། དངོས་གཞི། རྗེས་དང་གསུམ་ལས། དང་པོ་སོགས་མཐར་ཆགས་སུ་བཀླགས་ནས། ཁྲིད་རིམ་མ་ཐོབ་པ་རྣམས་ལ་བསྟན་མི་རུང་བའི་དམ་ཚིག་ཤེས་པར་མཛོད་ཅིག །ཅེས་གདམས་པ་བཞིན་མན་ངག་དང་གསང་དམ་བཅས་ཉམས་སུ་ཚུལ་བཞིན་བླང་བར་མཛད་འཚལ། དེ་ལྟར་སྨིན་གྲོལ་གདམས་ངག་ཆིག་རྫོགས་སུ་ཐོབ་པའི་བཀའ་དྲིན་འཚོབ་ཕྱིར། ལུས་ལོངས་སྤྱོད་དང་བཅས་པ་འབུལ་སྙམ་པས་འདིའི་རྗེས་ཟློས། དེང་ནས་བརྩམ་སྟེ་སོགས་ལུས་དབུལ་དང་དགེ་བསྔོ། ཆོ་གའི་རྗེས་རིམ་དབང་ཆོག་ཏུ་གསུངས་པ་བཞིན་བྱའོ།། ༈ །།རོལ་རྡོར་ཚེ་སྒྲུབ་ལྕགས་བང་མའི་དབང་བསྐུར་གོང་དུ་སོང་།། ༈ །།ཏའུ་རོག་རྗེ་གླིང་པའི་རྟ་མགྲིན་ཡིད་བཞིན་འབར་བའི་ཚེ་སྒྲུབ་གསང་བ་རྨད་བྱུང་པདྨ་འོད་གསལ་མདོ་སྔགས་གླིང་པའི་ཉེ་བརྒྱུད་ཀྱི་དབང་ཆོག་དགོས་པ་རྨད་བྱུང་ལྟར་དབང་སྒྲུབ། དབང་དངོས། རྗེས་བཅས་བྱའོ།། ༈ །།གར་དབང་འཆི་མེད་རྡོ་རྗེའི་ཚེ་སྒྲུབ་འཆི་མེད་ཐུགས་ཀྱི་ཐིག་ལེའི་དོན་དབང་མཚམས་སྦྱོར་གྱིས་བརྒྱན་པ་བདེ་ཆེན་འཁྱིལ་བ་ལྟར་དབང་སྒྲུབ། དབང་དངོས། རྗེས་བཅས་བྱའོ།། ༈ །།ཟུར་མཁར་ཟླ་བའི་འོད་ཟེར་གྱི་ཐུགས་
སྒྲུབ་རིག་འཛིན་བདེ་འདུས་ཀྱི་ཚེ་སྒྲུབ་རྡོ་རྗེ་སྙིང་པོ་འོད་ཀྱི་དྲྭ་བའི་ལས་བྱང་ལྟར་བདག་མདུན་བསྐྱེད་བཟླས། བུམ་པ་གཉིས་སྒྲུབ་ཚུལ་སྤྱི་འགྲོ། ཚེ་འགུགས་ནས་ཚོགས་བསྒྲལ་བསྟབ་རྗེས་རིག་མེ་དོར་ཞིང་གནང་བ་ནོད་ལ། ཁྲུས་དང་བགེགས་སྲུང་དགོས་ན་གཏང་། མཎྜལ་སྔོན་འགྲོ་དབང་བཤད་སོགས་དབང་ཆོག་ནོར་བུ་པད་ཕྲེང་ལྟར་དབང་དངོས་གཞི། རྗེས་ཚོགས་ལ་རོལ་པ་ཕྱིན་མཐར་དབྱུང་ངོ་།། ༈ །།དཔའ་བོ་བརྒྱད་པ་པདྨ་བསྟན་འཛིན་གྱི་དགོངས་གཏེར་ཚེ་སྒྲུབ་འཆི་མེད་བདུད་རྩིའི་བུམ་བཟང་འཆི་བདག་བདུད་འཇོམས་ཀྱི་དབང་སྒྲུབ་ལ། བརྒྱུད་འདེབས། སྐྱབས་སེམས་ནས་བརྩམ་ལས་བྱང་བཞིན་བདག་མདུན་དབྱེར་མེད་བསྐྱེད། བཟླས་པའི་དབུར་ཛཔ྄་ཁང་ཕྱེས་ཏེ་ཛཔ྄་བསྐུལ་མཐར། བུམ་པ་གཉིས་སྤྱི་ལྟར་བསྒྲུབ། ཚེ་འགུགས་རྒྱས་གདབ། མཆོད་བསྟོད་ནས། བཀའ་གཏེར་སྲུང་མའི་གཏོར་འབུལ། ཚོགས་མཆོད་བསྟབ་པའི་མཐར། རིག་མེ་དོར་ཞིང་གནང་བ་ནོད་རྗེས། དབང་དངོས་ཚེ་དབང་མྱུར་སྩོལ་ལྟར་ལ། ཐོག་མར་དེའི་དབང་བཤད་མཇུག་གི་རང་གཞན་གྱི་དོན་རྒྱ་ཆེར་བྱེད་པའི་སྨོན་ལམ་བཀའ་གཏད་མཛད་པ་ཉིད། ཕྱིས་དུས་ལ་བབས་པ་ན། རྒྱ་གར་གྱི་མཁས་པ་ཤེས་རབ་འབྱུང་གནས་དང་། རྣམ་སྣང་ལོ་ཙཱ་བ་ཆེན་པོ་ཟུང་དུ་འཇུག་པའི་ཡེ་ཤེས་ཀྱི་སྒྱུ་འཕྲུལ་དང་ཆོས་རྒྱལ་རིན་ཆེན་གླིང་པའི་རྣམ་འཕྲུལ་དཔལ་ལྡན་དཔའ་བོའི་དབང་ཕྱུག་སྐུ་ཕྲེང་བརྒྱད་པ། གཙུག་ལག་ཆོས་ཀྱི་རྒྱལ་པོ་པདྨ་བསྟན་འཛིན་གྱིས་
གནས་དུས་རྟེན་འབྲེལ་བཟང་པོ་ལྷུན་གྱིས་གྲུབ་པའི་སྐབས་ཕྱེས་ཏེ། ཨངྒི་ར་ཞེས་ཆུ་ཕོ་སྤྲེའུའི་ལོར་སྔོན་ཨོ་རྒྱན་ཆེན་པོས་ཟབ་གཏེར་འདི་ཉིད་ཀྱི་གདམས་ངག་བསྩལ་ཅིང་། གསང་མཚན་གར་དབང་འགྲོ་འདུལ་རྒྱལ་པོ་རྩལ་དུ་གསོལ་བའི་སྔོན་གནས་རྗེས་སུ་དྲན་པའི་སྒོ་ནས་ཟབ་མོའི་དགོངས་པའི་སྒྲོམ་ལས་ཕྱུང་སྟེ་གཏན་ལ་ཕབ་ནས་སྐལ་ལྡན་རྣམས་ལ་རིམ་པར་སྤེལ་བ། ཚེ་སྒྲུབ་འཆི་མེད་བདུད་རྩིའི་བུམ་བཟང་འཆི་བདག་བདུད་འཇོམས་འདི་ཉིད་ཀྱི་སྒོ་ནས་ཚེའི་དབང་བསྐུར་ཟབ་མོ་བསྒྲུབ་པར་བགྱི་བ་ལ་སོགས་ཀྱིས་མཚམས་སྦྱར་ནས་མཎྜལ་འབུལ་དུ་གཞུག །བླ་མ་དང་ཚེ་ཡི་བདག་པོ་དབྱེར་མེད་པའི་དྲུང་དུ་གསོལ་བ་འདེབས་པ་འདིའི་རྗེས་ཟློས་མཛོད། ཧོཿ ཚེ་དབང་མགོན་པོ་སོགས། སྐྱབས་སུ་འགྲོ་ཞིང་སེམས་བསྐྱེད་པའི་སླད་དུ། མདུན་གྱི་ནམ་མཁར་བཅོམ་ལྡན་འདས་ཚེ་དཔག་མེད་ལ་ཕྱོགས་དུས་ཀྱི་རྒྱལ་བ་རབ་འབྱམས་སྤྲིན་ཕུང་གཏིབས་པ་ལྟ་བུས་བསྐོར་བའི་སྤྱན་སྔར་བྱང་ཆུབ་སྙིང་པོའི་བར་དུ་སྐྱབས་སུ་འགྲོ་བ་དང་། མར་གྱུར་སེམས་ཅན་ཐམས་ཅད་ཚེ་དབང་རིག་འཛིན་གྱི་གོ་འཕང་ལ་འགོད་པའི་ཕྱིར་དུ་ཚེའི་དབང་ཞུ་བར་བགྱིའོ་སྙམ་དུ་སེམས་བསྐྱེད་པ་འདིའི་རྗེས་ཟློས་མཛོད། ཧྲཱིཿ བླ་མ་སྐུ་གསུམ་སོགས་ལས་བྱང་ལྟར་ལན་གསུམ། ཞིང་
མཆོག་དེ་རྣམས་ཀྱི་སྤྱན་སྔར་གསག་སྦྱང་གི་སྙིང་པོ་ཡན་ལག་བདུན་པའི་དོན་གསལ་འདེབས་བཞིན་པས་འདིའི་རྗེས་ཟློས། བཅོམ་ལྡན་ཚེ་མགོན་སོགས་ལན་གསུམ། དབང་གི་གཞིའམ་རྩ་བར་གྱུར་པ་ཡེ་ཤེས་དབབ་པའི་སོགས་གཞུང་བཞིན་བརྟན་པར་བྱས་རྗེས། དེ་ནས་དབང་དངོས་ལ་སྐུ་གསུང་ཐུགས་ཡོན་ཏན་ཕྲིན་ལས་ཡོངས་རྫོགས་འདུས་པའི་བྱིན་རླབས་མཐའ་རྟེན་དང་བཅས་ཡོད་པ་ལས། དང་པོ་སྐུ་བུམ་པའི་དབང་བསྐུར་བ་ནི། རྒྱན་དང་མཚན་ཉིད་རྫོགས་པའི་རྣམ་རྒྱལ་བུམ་པ་བཟང་པོ་ཚེ་ལྷའི་བྱིན་རླབས་འདུས་པའི་བདུད་རྩིའི་རྒྱུན་གྱིས་གང་བ་སྤྱི་བོར་བཞག་པ་ལས་བདུད་རྩིའི་རྒྱུན་བྱུང་བས་ལུས་དངོས་ཞེན་གྱི་དྲི་མ་སྦྱངས། འཇའ་ལུས་སྣང་སྟོང་རྒྱལ་བའི་སྐུར་གྱུར་པར་མོས། ཧྲཱིཿ ཚེ་ལྷའི་སྐུ་ལས་སོགས། གཉིས་པ་གསུང་གི་དབང་བསྐུར་བ་ནི། པདྨ་བྷཉྫའི་སྣོད་དུ་ཚེ་ལྷ་ཡབ་ཡུམ་གྱི་བདེ་རྒྱུན་བྱང་ཆུབ་སེམས་ཀྱི་རང་བཞིན་དུ་འཁྱིལ་པའི་ཚེ་ཆང་མགྲིན་པར་བཞག་ཅིང་མྱོང་བས་ངག་གཡོ་རྩོལ་གྱི་དྲི་མ་དག །བརྗོད་མེད་ནཱ་དའི་རང་སྒྲ་འཆི་མེད་རྡོ་རྗེའི་གསུང་དུ་སྨིན་པའི་ངེས་ཤེས་བསྐྱེད་མཛོད། ཧྲཱིཿ བདེ་གཤེགས་གསུང་གི་སོགས། གསུམ་པ་ཐུགས་ཀྱི་དབང་བསྐུར་བ་ནི། ཚེ་ལྷ་རྒྱལ་བའི་ཐུགས་མཆོག་འགྱུར་མེད་ཡེ་ཤེས་ལྔའི་རང་
བཞིན་མཚོན་པའི་རྡོ་རྗེ་རྩེ་ལྔ་སྙིང་གར་བཞག་པས་འཁྲུལ་རྟོག་འཛིན་སེམས་ཀྱི་དྲི་མ་སྦྱངས། རིག་སྟོང་སྤྲོས་བྲལ་འཆི་མེད་རྡོ་རྗེའི་ཐུགས་སུ་གྲོལ་བར་མོས། ཧྲཱིཿ མི་འགྱུར་ཀ་དག་སོགས། བཞི་པ་ཡོན་ཏན་གྱི་དབང་བསྐུར་བ་ནི། ཚེ་ལྷ་རྒྱལ་བའི་ཐབས་ཤེས་གཉིས་སུ་མེད་པའི་ནམ་མཁའ་མཛོད་ཀྱི་དཔལ་ལས་གྲུབ་པའི་འཆི་མེད་ཀྱི་རིལ་བུ་ལྟེ་བར་བཞག་ཅིང་མྱངས་པས། འབད་རྩོལ་དང་བྲལ་བའི་ཚེ་དབང་ཕུན་སུམ་ཚོགས་པའི་སྐལ་བ་དང་ལྡན་ཅིང་། མཉམ་ཉིད་བདེ་ཆེན་རྡོ་རྗེའི་སྐུ་ཐོབ་པར་མོས། ཧྲཱིཿ ཐབས་ཤེས་རྒྱུ་རྐྱེན་སོགས། ལྔ་པ་ཕྲིན་ལས་ཀྱི་དབང་བསྐུར་བ་ནི། བདེ་གཤེགས་ཚེའི་ཕྲིན་ལས་ཀྱི་རང་མདངས་ལས་ཤར་བའི་མདའ་དར་གསང་གནས་སུ་བཞག་པས། ཐོགས་མེད་ཡེ་ཤེས་འཁོར་འདས་ཀུན་ལ་ཁྱབ་པའི་ཕྲིན་ལས་ཚེའི་དབང་ཐོབ་པས་མི་འགྱུར་རྡོ་རྗེའི་སྲོག་ཏུ་གྲུབ་པར་མོས། ཧྲཱིཿ ཡེ་ཤེས་ལྔ་ཡི་སོགས། དྲུག་པ་བྱིན་རླབས་ཡོངས་རྫོགས་འདུས་པའི་དབང་བསྐུར་བ་ནི། ཚེ་གཏོར་རིན་ཆེན་འབར་བའི་གཞལ་མེད་ཁང་དུ་ཚེ་ལྷ་རྒྱལ་བའི་དཀྱིལ་འཁོར་གྱི་ལྷ་ཚོགས་མངོན་སུམ་དུ་བཞུགས་པ་ཁྱེད་རང་རྣམས་ཀྱི་སྤྱི་བོར་སྤྱན་དྲངས་ཤིང་དབང་བསྐུར་བས། ཚེ་དཔག་མེད་པའི་སྐུ་གསུང་ཐུགས་ཡོན་ཏན་ཕྲིན་ལས་ཡོངས་སུ་རྫོགས་པའི་མཐུ་བྱིན་
ཐོབ་ཅིང་། སྐྱེ་འཆི་དང་བྲལ་བའི་ཚེ་དབང་དངོས་གྲུབ་ཀྱི་སྐལ་བ་ཚེ་དཔག་མེད་དང་མཉམ་པར་གྱུར་པར་མོས། ཧྲཱིཿ བཅོམ་ལྡན་མགོན་པོ་སོགས། མཐའ་རྟེན་དུ་ཚེའི་བྱིན་རླབས་འགུགས་ཤིང་རྒྱས་འདེབས་པའི་སླད་དུ་དམིགས་པ་འདི་བཞིན་མཛོད། བདག་མདུན་ཚེ་དཔག་མེད་ཀྱི་ལྷ་ཚོགས་རྣམས་ཀྱི་སྐུ་ལས་འོད་ཟེར་ལྕགས་ཀྱུའི་དབྱིབས་ཅན་དང་། ཕོ་ཉ་མགྱོགས་མའི་ཚོགས་ཉི་ཟེར་ལ་རྡུལ་འཚུབས་པ་ལྟར་འཕྲོས་པ་རྣམས་ཀྱིས་འཁོར་འདས་ཀྱི་ཚེ་བཅུད་ཐམས་ཅད་དང་། རྡོ་རྗེའི་སློབ་མའི་ཚེ་ཡར་ཕྲོགས་འཐོར་ཞིག་གས་གྲུམ་ཆད་ལ་སོགས་པ་རྣམས་བཀུག་ནས་ཁྱེད་རང་རྣམས་ཀྱི་ལུས་ལ་འོད་ཟེར་སྦྲང་རྩིའི་རྣམ་པ། རྡོ་རྗེ་གཡུང་དྲུང་དཔལ་བེའུ་ལ་སོགས་པའི་དགེ་ལེགས་ཀྱི་མཚན་མའི་རི་མོ་འཁྱིལ་བཞིན། མདུན་བསྐྱེད་ཀྱི་ཕྱག་གི་བུམ་པར་ཞུགས་ནས་ཚེའི་བདུད་རྩི་ལ་ཐིམ་པ་མ་ཤོང་བའི་ཚུལ་གྱིས་ཕྱིར་ལུད། ཁྱེད་རང་རྣམས་ལ་སིབ་སིབ་ཐིམ་པས་བཀྲག་མདངས་འོད་དུ་འབར་ཞིང་། ཁྱད་པར་སྙིང་དབུས་ཉི་ཟླ་གྭའུའི་སྦུབས་ཚེ་རྟེན་ཧྲཱིཿདམར་གྱི་ཁོག་པར་ནྲྀ་ལྗང་གསལ་གྱི་མིག་ཏུ་ཨཿདཀར་གྱིས་མཚན་པར་ཐིམ་པས་རྡོ་རྗེ་ལྟ་བུའི་ཚེའི་དངོས་གྲུབ་ཐོབ་བྱུང་སྙམ་པའི་ངེས་ཤེས་སྐྱེད་ཅིག །སྤོས་བཏུལ་མདའ་དར་གཡབ་ཅིང་དབྱངས་དང་བཅས་པས། ཧྲཱིཿ སྔོན་གྱི་བསྐལ་པའི་སོགས་
ཟུར་གསལ་ལྟར་ཚེ་འགུགས་དང་། རྒྱས་གདབ་པ་ནི། སླར་ཡང་ཚེའི་བྱིན་རླབས་དང་ནུས་པ་མི་ཉམས་པའི་ཕྱིར་སྐུ་ལྔ་ཡེ་ཤེས་ལྔའི་ངོ་བོ་ཕྱག་མཚན་ལྔས་ལུས་ཀྱི་གནས་ལྔར་རྒྱས་བཏབ་པས་འགྱུར་མེད་བདེ་བ་ཆེན་པོ་སྐྱེ་འཆི་བགྲེས་རྒུད་དང་བྲལ་བའི་དབྱིངས། བར་ཆད་ཀྱི་མཚན་མས་ཉེ་མི་ནུས་པ་མགོན་པོ་ཚེ་དཔག་མེད་དང་མཚུངས་པའི་སྐུར་བྱིན་གྱིས་བརླབས་པར་མོས། ཧྲཱིཿ ཚེ་དང་ཡེ་ཤེས་སོགས། ཚེ་ལྷའི་དཀྱིལ་འཁོར་སློབ་དཔོན་དང་བཅས་པས་བཀྲ་ཤིས་བརྗོད་ཅིང་མེ་ཏོག་སིལ་མ་འཐོར་བས། དབང་གི་ཡེ་ཤེས་འཕེལ་ཞིང་བརྟན་པར་བྱས་པའི་མོས་པ་མཛོད། བཀྲ་ཤིས་ཇི་ལྟར་འོས་པ་བརྗོད། དེ་རྣམས་ཀྱིས་གུ་རུའི་ཕྲིན་ལས་ཀྱི་སྤྲུལ་པ་ལོ་ཆེན་བཻ་རོ་དང་། ཆོས་རྒྱལ་རིན་ཆེན་གླིང་པའི་རྣམ་འཕྲུལ་དཔའ་བོ་བརྒྱད་པ་པདྨ་གར་དབང་རྩལ་གྱི་དགོངས་གཏེར་ཚེ་སྒྲུབ་ཀྱི་སྨིན་བྱེད་ཟབ་མོ་ཕུལ་གྲུབ་པ་ལགས་པས། དེ་དག་གི་སྐབས་སུ་ཐོབ་པའི་དམ་ཚིག་སྤྱི་དང་། ཁྱད་པར་དུ་བྱས་པ་རྣམས་བསྲུང་བའི་བློས་འདིའི་རྗེས་ཟློས། གཙོ་བོས་ཇི་ལྟར་སོགས་སྤྱི་ལྟར་སྦྱར། རྗེས་ཚོགས་ལ་རོལ་པ་སོགས་ལས་བྱང་ལྟར་ལ། མཆོད་བསྟོད་བརྟན་བཞུགས་སྦྱར་བ་སྤྱི་འགྲོ་བཅས་ཀྱིས་གྲུབ་བོ།། ༈ །།མཆོག་གྱུར་གླིང་པའི་ཟབ་བདུན་རྩ་གསུམ་ཚེ་ཟབ་ཀྱི་ཚེ་དཀར་རིགས་ལྔ་སྤྱི་སྒྲུབ་ཀྱི་དབང་བསྐུར་
མཚམས་སྦྱོར་གྱིས་བརྒྱན་པ་བདུད་རྩིའི་ཆུ་རྒྱུན་ལྟར་དབང་སྒྲུབ། སྒོ་ཞུས། དབང་དངོས། རྗེས་ཆོག་བཅས་བྱའོ།། ༈ །།ཐུགས་སྒྲུབ་བར་ཆད་ཀུན་སེལ་གྱི་རིགས་བདག་བླ་མ་ཆོས་སྐུ་སྣང་མཐའ་ཚེ་དཔག་མེད་པའི་ལས་བྱང་དབང་ཆོག་དང་བཅས་པ་འཆི་མེད་བཅུད་འདྲེན་ལྟར་དབང་སྒྲུབ། དབང་དངོས། རྗེས་བཅས་བྱའོ།། ༈ །།མཆོག་གླིང་ཚེ་སྒྲུབ་རྡོ་རྗེ་ཕྲེང་བའི་རྩ་བའི་ལྷ་ཚེ་བདག་ཡབ་ཡུམ་སྲས་གསུམ་གྱི་ཕྱི་སྒྲུབ་རྒྱུད་ཀྱི་ཕྲིན་ལས་དང་འབྲེལ་བའི་སྨིན་བྱེད་སྐབས་དབང་སྒྲུབ་གཏེར་གཞུང་ཕྲིན་ལས་ལྟར་ལ། བསྟོད་པའི་མཇུག་ཏུ་ཛཔ྄་ཁང་ཕྱེས་ནས་བཟླས་པ་གཞུང་ལྟར་གྲུབ་རྗེས། ལས་བུམ་རྟ་མགྲིན་བསྐྱེད་བཟླས། བཞི་བསྟོད་དང་ཚེ་འགུགས་བསྐུལ། ཚོགས་བསྒྲལ་བསྟབ་མཐར་རིག་མེ་དོར་ལ་གནང་བ་ནོད་དོ། །དབང་དངོས་ལ། ཁྲུས་དང་བསྐྲད་སྲུང་སྔོན་འགྲོས། མཎྜལ་བཀྱེ་བསྡུ་བཅས། འོ། ནམ་མཁའ་དང་མཉམ་པའི་སེམས་ཅན་ཐམས་ཅད་གནས་སྐབས་འཆི་བའི་འཇིགས་པ་ལས་གྲོལ་ཞིང་། མཐར་ཐུག་འཆི་མེད་མགོན་པོའི་གོ་འཕང་ལ་འགོད་པའི་སླད་དུ་ཟབ་མོའི་དབང་བསྐུར་བ་གསན་ལ། ཁྱད་པར་འཕགས་པའི་གདམས་པ་ཉམས་སུ་ལེན་པར་བགྱིའོ་སྙམ་པའི་ཕན་འདོད་ཀྱི་ལྷག་བསམ་ཡིད་ལ་གསལ་བཏབ་སྟེ་གསན་པ་ཞུ། དེའང་རྨད་དུ་བྱུང་བའི་སློབ་དཔོན་ཆེན་པོ་ཙནྡྲ་གོ་མཱིས། བདེ་གཤེགས་ལམ་བསྟན་འགྲོ་བ་འདྲེན་པར་ཆས་གྱུར་ཅིང་། །སེམས་ཀྱི་སྟོབས་ཆེན་མི་ཡི་རྙེད་པ་གང་ཡིན་པ། །ལམ་དེ་ལྷ་དང་ཀླུ་ཡིས་མི་རྙེད་ལྷ་
མིན་དང་། །མཁའ་ལྡིང་རིག་འཛིན་མིའམ་ཅི་དང་ལྟོ་འཕྱེས་མིན། །མི་ཡི་དངོས་པོ་ཤིན་ཏུ་རྙེད་དཀའ་རྙེད་གྱུར་ནས། །དོན་དུ་བརྣག་པ་གང་ཡིན་དེ་ནི་བརྟུན་ཏེ་བསྒྲུབ། །ཅེས་གསུངས་པ་ལྟར། འོ་སྐོལ་རྣམས་ཀྱིས་རྙེད་པར་དཀའ་བ་ཡིད་བཞིན་གྱི་ནོར་བུ་ལས་ཀྱང་ལྷག་པའི་དལ་འབྱོར་གྱི་ལུས་རྟེན་ཁྱད་པར་ཅན་ཐོབ་པ་འདི་ཆུད་མི་ཟ་བའི་ཕྱིར་ཆོས་སྤྱོད་དགོས་ཏེ། དེ་ལ་ཚེ་མི་རྟག་ཅིང་འཇིག་པར་སླ་བ་རླུང་གསེབ་ཀྱི་མར་མེ་ལྟ་བུའི་འཛམ་བུ་གླིང་པ་རྣམས་ཀྱི་ཚེ་ལ་ངེས་པ་མེད་ཅིང་། ཁྱད་པར་སྙིགས་མ་ལྔ་བདོའི་ཚེའི་སྙིགས་མའི་མཐར་ཐུག་པས་དུས་མིན་དུ་འཆི་བའི་རྐྱེན་དང་བར་ཆད་མང་བའི་ཕྱིར་ཚེ་བསྲིང་ཞིང་འཆི་མེད་ཀྱི་གོ་འཕང་བསྒྲུབ་པ་ཤིན་ཏུ་གལ་ཆེ་སྟེ། ལྷོ་སྒོ་སྲུང་བའི་པཎྜི་ཏ་ཆེན་པོ་ངག་གི་དབང་ཕྱུག་གྲགས་པས། ཆོས་སྤྱོད་དབང་པོ་དུལ་བ་ནི། །འཁོར་བ་རུ་ནི་ཇི་སྲིད་འཚོ། །དེ་སྲིད་བསོད་ནམས་ལ་སོགས་ཚོགས། །བྱང་ཆུབ་སྒྲུབ་བྱེད་རབ་ཏུ་བསྐྱེད། །འཁོར་བར་སྲོག་ལས་གཅེས་པ་ནི། །འགའ་ཡང་ཡོད་པར་མ་མཐོང་སྟེ། །དེ་བས་ཀུན་ཏུ་ཐབས་མང་པོས། །འཆི་བ་བླུ་ལ་ནན་ཏན་བྱ། །ཞེས་གསུངས་པ་ལྟར། ཚེའི་སྒྲུབ་པ་ཉིད་ཐོག་མར་དོན་དུ་གཉེར་བྱའི་གཙོ་བོ་ཡིན་ལ། དེ་ལྟ་བུའི་ཐབས་ཕྱི་ནང་
གཉིས་ཀར་སྨན་སྔགས་རྫས་དང་རྟེན་འབྲེལ་གྱི་སྦྱོར་བས་རིང་པོར་འཚོ་བའི་ཆོ་ག་མང་དུ་འབྱུང་བ་ལས། ཁྱད་པར་དུ་གྱུར་པ་མཆོག་ཐུན་གྱི་དངོས་གྲུབ་ཅིག་ཅར་ལ་མངོན་དུ་བྱེད་པའི་ཐབས་གསང་སྔགས་རྡོ་རྗེ་ཐེག་པའི་བཀའ་སྲོལ་ལས་བྱོན་པ་རྣམས་ཡིན་ལ། འདིར་སྐབས་སུ་བབས་པ་ནི། ཨོ་རྒྱན་རིན་པོ་ཆེས་མདོ་ཁམས་ནམ་མཁའ་མཛོད་ཀྱི་གནས་སུ་ལྷ་སྲས་རྗེ་འབངས་འདུས་པ་ཕྱི་མ་རྣམས་ལ་བཀའ་འདུས་ཆོས་ཀྱི་རྒྱ་མཚོའི་ཆོས་འཁོར་བསྐོར་བའི་ཚེ་ལྷ་སྲས་རྗེ་འབངས་རྣམས་ཀྱིས་ཞུས་ངོར། རྒྱུད་ལུང་མན་ངག་ཐམས་ཅད་ཀྱི་སྙིང་པོའི་ཡང་ཞུན་བཅུད་དུ་དྲིལ་བ། ཚེ་སྒྲུབ་རྡོ་རྗེ་ཕྲེང་བ་ཐོག་མཐའ་བར་དུ་དགེ་བའི་བདག་ཉིད་ཅན་གསུངས་པ་ཉིད། ཕྱི་རབས་ཀྱི་དོན་དུ་ཁམས་ཀྱི་གླ་བ་རྐང་གཅིག་ཡེ་རྒྱལ་ནམ་མཁའ་མཛོད་ཀྱི་ལྷོ་ནུབ་ཚེ་ཞལ་འབར་བའི་བྲག །ཚེ་དཔག་མེད་ཀྱི་སྐུ་རང་བྱོན་དུ་ཡོད་པའི་ཐུགས་ཀར་གཏེར་དུ་སྦས་པ་སྟེ། ཇི་སྐད་དུ། རྟ་སྒོ་ཐང་དུ་དབུས་པའི་ཚོང་དུས་འོང༔ ཧས་པོ་རི་རྒྱུད་མེ་ཡར་རྫོང་ཞེས་འབྱུང༔ ཁ་བྲག་ཆུ་ཕུག་སྦས་པའི་གཏེར་ཁ་འདི༔ མི་བཞག་འདོན་པའི་རྟགས་དེ་བསྟན་ནས་བྱུང༔ ཨོ་རྒྱན་བདེ་ཆེན་གླིང་པ་ཞེས་བྱ་འབྱུང༔ ཞེས་དང་། དྲི་མེད་ཀུན་དགའི་གཏེར་ལུང་ལས། ཡེལ་སྟོད་གྲྭ་ཡི་
ལ་བར་དུ༔ ཨོ་རྒྱན་རཏྣའི་མཚན་གསོལ་བ༔ མཆོག་གཏེར་ཆོས་ལ་ལོངས་སྤྱོད་པ༔ ཆོས་བདག་པདྨའི་ཐུགས་སྤྲུལ་འབྱུང༔ ཞེས་དང་། རཏྣའི་བསྟན་པ་སྤྱི་ལུང་ལས། ནོར་བུའི་མིང་ཅན་ཁམས་ཀྱི་ལྷོ་ཕྱོགས་འབྱུང༔ ཞེས་སོགས་གཏེར་རྙིང་ཚད་ཐུབ་དུ་མ་ནས་ལུང་བསྟན་པ། ལྷ་སྲས་ལོ་ཙཱ་བ་དམ་འཛིན་མུ་རུབ་བཙད་པོ་ཉིད་གཏེར་སྟོན་སངས་རྒྱས་གླིང་པ་དང་ཞིག་པོ་གླིང་པ་སོགས་སྤྲུལ་པའི་ཟློས་གར་དུ་མར་བསྟན་པའི་མཐར། སྤྲུལ་པའི་གཏེར་ཆེན་ཆོས་ཀྱི་རྒྱལ་པོ་ཨོ་རྒྱན་མཆོག་གྱུར་བདེ་ཆེན་གླིང་པ་ཞེས་རྩོད་བྲལ་དུས་བབས་ཀྱི་སྤྲུལ་པའི་གཏེར་སྟོན་ཆེན་པོ་དགུང་གྲངས་སོ་དྲུག་པ། རབ་བྱུང་བཅུ་བཞི་པའི་ཤིང་བྱི་ལོར་གུ་རུ་ཡབ་ཡུམ་གྱི་ཚེ་རྫས་དང་ལྷན་ཅིག་ཏུ་སྤྱན་དྲངས་པའི་གཏེར་ཁ་ཉེར་དགུ་པ་ཚེ་སྒྲུབ་རྡོ་རྗེ་ཕྲེང་བ་ལ། ཐོག་མར་དགེ་བ་རྒྱུད་ལུགས་ཚེ་བདག་ཡབ་ཡུམ་སྲས་གསུམ་གྱི་སྒྲུབ་ཐབས། བར་དུ་དགེ་བ་ལུང་ལུགས་ཞི་ཁྲོའི་ལྷ་ལྔ་སྟོང་ལྔ་བརྒྱའི་སྒྲུབ་ཐབས། ཐ་མར་དགེ་བ་མན་ངག་ལུགས་ཡོངས་རྫོགས་འཆི་མེད་སྙིང་ཐིག་ཚེ་སྦྱིན་སྒྲོལ་མ་ཡིད་བཞིན་འཁོར་ལོའི་སྒྲུབ་ཐབས་རྣམས་ཀྱི་རྩ་བ་ཙམ་གཏན་ལ་ཕབ་ནས། སྟོན་པའི་རྒྱལ་ཚབ་ཨོ་རྒྱན་རྡོ་རྗེ་འཆང་དང་གཉིས་སུ་མེད་པ་འཇམ་མགོན་ཆོས་ཀྱི་རྒྱལ་པོ་མཚན་
བརྗོད་པར་དཀའ་བ་དེ་ཉིད་ལ་གཉེར་དུ་གདམས་པར་མཛད་དེ་དུས་རིང་པོར་འདས་པ་ན། དག་པའི་གཟིགས་སྣང་གི་བརྡས་བསྐུལ་བའི་རྟེན་འབྱུང་ཁྱད་པར་ཅན་གྱིས་སྐབས་ཕྱེས་ཏེ། ཐོག་མར་དགེ་བའི་ཆོས་སྡེའི་སྙིང་པོ་ཙམ་གཏན་ལ་ཕབ་པར་མཛད་པའི་ཟབ་ཆོས་ངོ་མཚར་བྱིན་རླབས་ཀྱི་ཚན་ཁ་དང་ལྡན་པ། ཚེ་སྒྲུབ་རྡོ་རྗེ་ཕྲེང་བ་ཞེས་མཆོག་དང་ཐུན་མོང་གི་དངོས་གྲུབ་མ་ལུས་པའི་འབྱུང་གནས་སུ་གྱུར་པ། གང་ཟག་གིས་བར་དུ་མ་ཆོད། རྟོག་གེས་བསྲེ་བསླད་མ་ཞུགས་པ། མཁའ་འགྲོའི་ཁ་རླངས་མ་ཡལ་བ། འདི་ལ་ཐོག་མཐའ་བར་དུ་དགེ་བའི་བདག་ཉིད་ཅན་དུ་བཞུགས་པ་ལས། ཐོག་མར་དགེ་བ་ཚེ་བདག་ཡབ་ཡུམ་སྲས་གསུམ་ལས། ཕྱི་སྒྲུབ་རྒྱུད་ཀྱི་ཕྲིན་ལས་དང་རྗེས་སུ་འབྲེལ་བ་འདི་ཉིད་ནི། གཞུང་ལས། ཕྱི་ལྟར་ཚོམ་བུར་བསྒྲུབ་པའི་ཚུལ༔ སྐལ་ལྡན་དོན་དུ་བདག་གིས་བསྟན༔ ཟབ་ཅིང་དངོས་གྲུབ་མྱུར་བའི་ལམ༔ ཉམས་སུ་བླངས་པས་དོན་ཆེན་འགྲུབ༔ ཡལ་བར་མ་དོར་གཅེས་པར་ཟུངས༔ ཞེས་ཡོངས་སུ་བསྔགས་པར་མཛད་པའི་འཆི་མེད་ཚེའི་དབང་བསྐུར་ཟབ་མོ་བསྒྲུབ་པའི་ཕྱིར། སློབ་དཔོན་གྱིས་བགྱི་བར་འོས་པ་རྣམས་རིག་འཛིན་བརྒྱུད་པའི་ཕྱག་བཞེས་ལས་ཇི་ལྟར་འབྱུང་བ་བཞིན་སོང་ནས་གྲུབ།
ཁྱེད་རང་རྣམས་ཀྱི་ངོ་སྐལ་དུ་གྱུར་པ་ཐོག་མར་ཚེ་དབང་ཟབ་མོ་གསན་པའི་ཡོན་དུ་སོགས་ཀྱིས་མཚམས་སྦྱར་ལ་མཎྜལ་འབུལ་དུ་གཞུག །བླ་མ་དང་དཀྱིལ་འཁོར་གྱི་གཙོ་བོ་དབྱེར་མ་མཆིས་པ་ལ་མི་ཕྱེད་དད་པའི་གདུང་ཤུགས་དྲག་པོས་གསོལ་བ་འདེབས་པ་འདིའི་རྗེས་ཟློས། བཅོམ་ལྡན་མགོན་པོ་སོགས། དེས་གསོལ་བ་བཏབ་པ་སོང་ནས། རྒྱུད་སྦྱོང་བའི་སླད་དུ་སློབ་དཔོན་དང་མདུན་བསྐྱེད་དབྱེར་མེད་པ་འཆི་མེད་ཚེའི་དཀྱིལ་འཁོར་དཀོན་མཆོག་རྩ་གསུམ་རྒྱ་མཚོའི་སྤྲིན་ཕུང་འཕྲོ་བའི་སྤྱན་སྔར། བདག་གཞན་མཁའ་ཁྱབ་ཀྱི་སེམས་ཅན་ཐམས་ཅད་བྱང་ཆུབ་བར་དུ་སྙིང་ནས་སྐྱབས་སུ་འགྲོའོ་སྙམ་པས་འདིའི་རྗེས་ཟློས། ན་མོ༔ དཀོན་མཆོག་ཀུན་འདུས་སོགས་ལས་བྱང་ལྟར་ལན་གསུམ། མར་གྱུར་སེམས་ཅན་ཐམས་ཅད་ཀྱི་དོན་དུ་ཚེ་དཔག་མེད་པའི་གོ་འཕང་འཐོབ་པར་བྱ། དེའི་ཆེད་དུ་འཆི་མེད་རིག་འཛིན་བསྒྲུབ་ནས་རྒྱལ་སྲས་ཀྱི་སྤྱོད་པ་རྒྱ་མཚོ་སྤྱད་པར་བགྱིའོ་སྙམ་པའི་སྨོན་འཇུག་གི་སེམས་བསྐྱེད་པ་འདིའི་རྗེས་ཟློས། འགྲོ་རྣམས་སངས་རྒྱས་སོགས་ལན་གསུམ། ཚོགས་ཞིང་དེ་དག་གི་སྤྱན་སྔར་གསག་སྦྱང་སྤེལ་གསུམ་གྱི་གནད་བསྡུས་པ་ཡན་ལག་བདུན་པ་བྱ་བའི་བློས་ཚིག་དང་མཐུན་པའི་ཏིང་ངེ་འཛིན་རེ་རེ་ནས་གསལ་ཐོབས་
ལ་འདིའི་རྗེས་ཟློས། ཚེ་བདག་ཡབ་ཡུམ་སོགས་ལན་གསུམ། དེ་ནས་དབང་གི་གཞི་འགོད་པ་ཡེ་ཤེས་པ་དབབ་པའི་ཕྱིར་ཁྱེད་རང་རྣམས་སྒོ་གསུམ་གྱི་གནད་གཅུན་ལ་དམིགས་པ་འདི་རྩེ་གཅིག་ཏུ་སྒོམས་ཤིག །རྟ་སྔགས་དང་ལས་བུམ་གྱི་ཆུས་བསང་། སྭ་བྷཱ་ཝས་སྦྱང་། གཟུང་འཛིན་གྱིས་བསྡུས་པའི་ཆོས་ཐམས་ཅད་གདོད་ནས་དག་པ་སྤྲོས་བྲལ་འོད་གསལ་སྟོང་པ་ཉིད་ཀྱི་ངང་ལས། སྣོད་རྣམ་པར་དག་པ་ཡེ་ཤེས་རང་སྣང་ལས་གྲུབ་པདྨ་བདེ་བ་ཅན་གྱི་གཞལ་མེད་ཁང་གི་དབུས་སུ་པདྨ་དང་ཟླ་བའི་གདན་ལ། བཅུད་རྣམ་པར་དག་པ་སྣང་སྲིད་ལྷའི་ཕྱག་རྒྱར་བསྒྲུབ་པའི་སླད་དུ་ཁྱེད་རང་རྣམས་ཀྱི་རིག་པའི་ངོ་བོ་ཨོཾ་དཀར་པོ། དེ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་པ་ལས་པདྨ་དཀར་པོ་ཨོཾ་གྱིས་མཚན་པ། དེ་ཉིད་ཀྱང་འཕྲོ་འདུས་དོན་བྱས་ཡོངས་སུ་གྱུར་པ་ལས། ཁྱེད་རང་རྣམས་བཅོམ་ལྡན་འདས་མགོན་པོ་ཚེ་དང་ཡེ་ཤེས་དཔག་ཏུ་མེད་པ་སྐུ་མདོག་སྟོན་ཀའི་ཟླ་བ་ལྟར་དཀར་བ། ཞལ་གཅིག་ཞི་བའི་འཛུམ་མདངས་དང་ལྡན་པ། ཕྱག་གཉིས་མཉམ་གཞག་གི་སྟེང་ན་འཆི་མེད་བདུད་རྩིས་བཀང་བའི་ཚེ་བུམ་པདྨ་དཀར་པོས་ཁ་བརྒྱན་པ་བསྣམས་པ། དར་གྱི་ཆས་གོས་ལྔ་དང་རིན་པོ་ཆེའི་རྒྱན་
བརྒྱད་ཀྱིས་བརྒྱན་པ། ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་སྣང་སྟོང་འོད་ཟེར་སྣ་ལྔ་བྱེ་བ་ཕྲག་དགུ་ཁྲིའི་ཀློང་ན་བཞུགས་པའི་སྐུར་ལམ་སྟེ་གསལ་བའི་གནས་གསུམ་དུ་ཨོཾ་དཀར་ཨཱཿདམར་ཧཱུྃ་མཐིང་གིས་མཚན་པར་སྒོམས་ཤིག །རྒྱུད་རྣམ་པར་དག་པ་ཡེ་ཤེས་ལྷའི་གཟི་བྱིན་དབབ་པའི་སླད་དུ་ཁྱེད་རང་གི་གནས་གསུམ་དང་། སློབ་དཔོན་དཀྱིལ་འཁོར་པ་དང་བཅས་པའི་ཐུགས་ཀ་ནས་འོད་ཟེར་གྱི་སྣང་བ་ཆོས་ཀྱི་དབྱིངས་འགེངས་པ་འཕྲོས། རྡུལ་གཅིག་གི་སྟེང་ན་རྡུལ་སྙེད་ཀྱི་གྲངས་དང་མཉམ་པའི་ཞིང་ན་བཞུགས་པའི་རྒྱལ་བ་སྲས་དང་བཙུན་མོར་བཅས་པ་ཐམས་ཅད་དང་། ཁྱད་པར་སྟེང་ཕྱོགས་འཇིག་རྟེན་གྱི་ཁམས་ཡོན་ཏན་དཔག་ཏུ་མེད་པ་ན་བཞུགས་པ་བཅོམ་ལྡན་འདས་མགོན་པོ་ཚེ་དཔག་ཏུ་མེད་པའི་ཐུགས་རྒྱུད་བསྐུལ། དེ་རྣམས་ཀྱི་གསང་བ་གསུམ་གྱི་བྱིན་རླབས་ཐམས་ཅད་སྐུ་དང་ཡིག་འབྲུ་ཕྱག་མཚན་གྱི་རྣམ་པ་བསམ་གྱིས་མི་ཁྱབ་པ་ཆར་ཆེན་པོ་འབབ་པ་བཞིན་དུ་སྤྱན་དྲངས་ནས། ཁྱེད་རང་རྣམས་ཀྱི་སྒོ་གསུམ་ལ་སིབ་སིབ་ཐིམ་པས་རྒྱུད་བྱིན་གྱིས་བརླབས་པའི་མོས་འདུན་མཛོད། འབེབ་པའི་རྫས་བདུག་ནས་དབྱངས་རོལ་བཅས། ཧྲཱི༔ རང་བྱུང་བདེ་ཆེན་སོགས་བྱིན་འབེབ་དང་། ཨ་མཱ་ར་ཎི་ལ། བཛྲ་ཨཱ་ཡུ་ཥེ་བཏགས་པའི་
སྔགས་མང་དུ་བརྗོད། ཡེ་ཤེས་པའི་བྱིན་རླབས་ཀྱི་རྒྱུན་གཉུག་མ་མི་ཤིགས་པའི་སྒོ་གསུམ་ལ་བརྟན་པར་བྱས་པའི་མོས་པ་མཛོད། ཏིཥྛ་བཛྲས་མགོ་བོར་མེ་ཏོག་གམ་རྡོ་རྗེ་རྒྱ་གྲམ་དུ་བཞག །དེ་རྣམས་ཀྱིས་དབང་གི་སྔོན་དུ་འགྲོ་བའི་རིམ་པ་སོང་ནས། དངོས་གཞིའི་དབང་ལ། ཐོག་མར་སློབ་དཔོན་རིག་པའི་ལྷ་མོ་དང་ལྷན་ཅིག་པས་བཀྲ་ཤིས་འཆི་མེད་ཚེའི་བདུད་རྩིའི་བུམ་པ་ཡབ་ཚེ་དཔག་མེད་ཀྱི་ངོ་བོ་ཡེ་ཤེས་ཀྱི་བཅུད་དུ་འཁྱིལ་བ་སྤྱི་བོར་བཞག་ཅིང་དབང་བསྐུར་བས། སད་པའི་གནས་སྐབས་དང་ལུས་ཀྱི་རྩ་ཁམས་མ་དག་པའི་བག་ཆགས་ཀྱི་དྲི་མ་གཏོར། སྐུ་བུམ་པའི་དབང་ཐོབ། ཕུང་པོའི་བདུད་བཅོམ། གཉུག་མའི་ཐིག་ལེ་གསོས། ལུས་བརྟན་པ་སྲོག་གི་ཚེ་བསྲིང་། འཆི་མེད་སྐུ་རྡོ་རྗེ་སྤྲུལ་པའི་སྐུའི་ས་བོན་རྒྱུད་ལ་བླུགས་པར་མོས། བུམ་པ་ཐོགས་ལ། ཨོཾ༔ བཀྲ་ཤིས་བུམ་པ་སོགས། ཨོཾ་ཨ་མཱ་ར་ཎི་ཛཱི་ཝནྟི་ཡེ་སྭཱ་ཧཱ་ཨཱ་ཡུརྫྙཱ་ན་ཚེ་བྷྲཱུྃ༔ ཀཱ་ཡ་ཨ་བྷི་ཥིཉྩ་ཨོཾ༔ སྤྱི་བོར་བཞག་ཅིང་བུམ་ཆུ་སྦྱིན། ཚེ་ཡུམ་ཙཎྜ་ལཱིའི་ངོ་བོ་འབྱུང་ལྔའི་དྭངས་བཅུད་དབྱིངས་ཕྱུག་ཡུམ་ལྔའི་བདེ་བའི་རྒྱུན་བདེ་སྐྱོང་གི་བདུད་རྩི་མྱང་བས་རྨི་ལམ་གྱི་གནས་སྐབས་དང་གཡོ་བ་རླུང་གི་ཟག་པ་གཏོར། གསུང་གསང་བའི་དབང་ཐོབ། འཆི་བདག་གི་བདུད་བཅོམ། ངག་སྔགས་ཀྱི་ཐིག་ལེ་
གསོས། སྐྱེ་འགག་མེད་པའི་རྒྱུན་གྱི་ཚེ་བསྲིང་། འཆི་མེད་གསུང་རྡོ་རྗེ་ལོངས་སྤྱོད་རྫོགས་སྐུའི་ས་བོན་རྒྱུད་ལ་བླུགས་པར་མོས། ཚེ་ཆང་ཐོགས་ལ། ཨཱ༔ པདྨ་བྷཉྫར་སོགས། ཨོཾ་དྷཱ་ཀི་ཙཎྜ་ལཱི་ཨཱ་ཡུརྫྙཱ་ན་ཚེ་བྷྲཱུྃ༔ ཝཱ་ཀ་ཨ་བྷི་ཥིཉྩ་ཨཱ༔ མགྲིན་པར་བཞག་ཅིང་བདུད་རྩི་སྦྱིན། སྲས་འཇིག་རྟེན་དབང་ཕྱུག་གི་ངོ་བོ་སྲིད་ཞིའི་དྭངས་བཅུད་འདུས་པའི་ཚེའི་རིལ་བུ་མྱང་བས་གཉིད་མཐུག་གི་གནས་སྐབས་དང་འཕོ་བཅས་ཀྱི་ཐིག་ལེའི་ཟག་པ་གཏོར། ཐུགས་ཤེས་རབ་ཡེ་ཤེས་ཀྱི་དབང་ཐོབ། ཉོན་མོངས་པའི་བདུད་བཅོམ། ཡིད་བདེ་ཆེན་དྭངས་མའི་ཐིག་ལེ་གསོས། མི་འགྱུར་རྟག་པ་གཉུག་མའི་ཚེ་བསྲིང་། འཆི་མེད་ཐུགས་རྡོ་རྗེ་ཆོས་སྐུའི་ས་བོན་རྒྱུད་ལ་བླུགས་པར་མོས། ཚེ་རིལ་ཐོགས་ལ། ཧཱུྃ༔ ཐབས་ཤེས་ཉི་ཟླའི་སོགས། ཨོཾ་མ་ཎི་པདྨེ་ཧཱུྃ་ཨཱ་ཡུརྫྙཱ་ན་ཚེ་བྷྲཱུྃ༔ ཙིཏྟ་ཨ་བྷི་ཥིཉྩ་ཧཱུྃ༔ སྙིང་གར་གཏུག་ཅིང་སྦྱིན། ཚེ་འབྲང་རྟ་མཆོག་དབང་གི་རྒྱལ་པོར་གསལ་བ་ལས་འོད་ཟེར་བདུད་རྩིའི་རྒྱུན་འཕྲོས། ཁྱེད་རང་རྣམས་ཀྱི་སྒོ་གསུམ་ལ་ཐིམ་པས་སྙོམས་འཇུག་གི་གནས་སྐབས་དང་ཤེས་བྱ་སྐྱེ་འཆིའི་མཚན་མའི་དྲི་མ་གཏོར། བཞི་པ་ཡེ་ཤེས་ཀྱི་དབང་ཐོབ། ལྷ་བུའི་བདུད་བཅོམ། ཡོངས་གྲུབ་རྟག་པའི་ཐིག་ལེ་གསོས། འཁོར་བ་སྲིད་དུ་རྒྱུན་མི་ཆད་པའི་ཚེ་བསྲིང་། འཆི་མེད་ཡེ་ཤེས་རྡོ་རྗེའི་ངོ་བོ་ཉིད་སྐུའི་ས་
བོན་རྒྱུད་ལ་བླུགས་པར་མོས། ཚེ་འབྲང་ཐོགས་ལ། ཧྲཱིཿ ཚེ་འབྲང་ཟླ་གམ་སོགས། ཨོཾ་བཛྲ་ཀྲོ་དྷ་ཧྱ་གྲཱི་ཝ་ཧཱུྃ་ཕཊ༔ སརྦ་ཨ་བྷི་ཥིཉྩ་ཧཱུྃ༔ སྤྱི་བོར་བཞག །དེ་ནས་ཚེ་འགུགས་པའི་སླད་དུ་སློབ་དཔོན་དཀྱིལ་འཁོར་པ་དང་བཅས་པའི་སྐུ་གསུང་ཐུགས་ཀྱི་འོད་ཟེར་ལྕགས་ཀྱུའི་དབྱིབས་ཅན་དང་། རྟ་མཆོག་དང་། ཁྱུང་གི་ཕོ་ཉ་ཉི་ཟེར་གྱི་རྡུལ་ལྟར་འཁོར་འདས་ཁྱབ་པར་འཕྲོས་པས་ཁྱེད་རང་རྣམས་ཀྱི་བླ་ཚེ་ཆད་ཉམས་འཁྱམས་པ་སྟོར་པ་ཐམས་ཅད་བཀུག །སྡེ་བརྒྱད་འབྱུང་པོས་བརྐུས་པ་ཐམས་ཅད་འཕྲོག །བརྟན་གཡོའི་སྲིད་ཞིའི་ཚེ་བཅུད་ཐམས་ཅད་འོད་ཟེར་སྣ་ལྔའི་རྣམ་པར་བསྡུས། བ་སྤུའི་བུ་ག་ནས་སིབ་སིབ་ཐིམ་པར་མོས། མདའ་དར་གཡབ་ལ། ཨོཾ༔ བཅོམ་ལྡན་སྐུ་ཡི་འོད་ཟེར་གྱིས༔ སོགས་ཚེ་འགུགས་དང་། སྔགས་རྣམས་བཟླ་ཞིང་ཚེ་བཀུག །དེ་ལྟར་ཁྱུང་ཆེན་དང་སྤྲུལ་པའི་ཕོ་ཉ་རྣམས་ཀྱིས་ཚེ་བཅུད་བསྡུས་པ་དེ་ཉིད་ཁྱེད་རང་རྣམས་ཀྱི་སྙིང་གར་སྲོག་རྟེན་རྡོ་རྗེ་དཀར་པོ་རྩེ་ལྔ་པའི་ལྟེ་བར་ཐབས་ཤེས་དྭངས་མ་ཉི་ཟླའི་གྭའུའི་ནང་དུ་ཨོཾ་ཨཱཿཧཱུྃ་དང་། རྭ་རྩེའི་ཡར་མར་གྱི་སྦུབས་གཉིས་སུ་ཁྲོཾ་དང་ཧྲཱིཿས་མཚན་པ་ལ་ཐིམ། ལུས་ལ་ཕྱག་མཚན་ལྔའི་གོ་ཆ་བགོས་ཤིང་རྡོ་རྗེའི་ཁོང་གསེང་རྟ་མཆོག་དང་ཁྱུང་གི་རྡུལ་གྱིས་གཏམས་པས་བར་ཆད་ཀྱིས་གླགས་མི་རྙེད་པར་གྱུར་པར་མོས། མདའ་དར་གནས་ལྔའམ་སྤྱི་བོར་རྒྱ་གྲམ་དུ་བཞག །
ཁྲོཾ༔ ཁྱུང་ཆེན་སྤྲུལ་པས་སོགས། ཨོཾ་ཁྲོཾ་ག་རུ་ཎ་ཧཱུྃ༔ ཚེ་བྷྲཱུྃ་ཛ༔ གཡུ་བྷྲཱུྃ་ཛ༔ ཨཱ་ཡུརྫྙཱ་ན་ཏིཥྛ་ཨོཾ༔ དེ་ལྟར་དབང་གི་བྱིན་རླབས་དང་ཚེ་བཅུད་ཀྱི་སྙིང་པོ་ཐམས་ཅད་གཉུག་མ་མི་ཤིགས་པའི་སྒོ་གསུམ་ལ་དབྱེར་མེད་དུ་བརྟན་པ་དེ་ཉིད་ཆོས་ཉིད་ཁྱབ་གདལ་བྱང་ཆུབ་སེམས་ཀྱི་དབྱིངས་སུ་རྒྱས་བཏབ་པས། འཆི་མེད་རྟག་པ་དམ་པ་སྐྱེ་འཆི་འཕོ་འགྱུར་བྲལ་བ་རྡོ་རྗེའི་སྲོག་འགྲུབ་པར་མོས། མེ་ཏོག་འཐོར་བཞིན་དུ། ཨ༔ སྤྲོས་པས་འཁོར་འདས་སོགས། ཨོཾ་སུ་པྲ་ཏིཥྛ་བཛྲཱ་ཡེ་སྭཱ་ཧཱ། ཞེས་དང་། རྟེན་འབྲེལ་སྙིང་པོས་བརྟན། མཚམས་སྦྱོར་སྤྱི་མཐུན་བཅས་ཤིས་པ་བརྗོད། དེ་ལྟར་ཚེ་རྒྱུད་རྡོ་རྗེ་ཕྲེང་བའི་ཐོག་མར་དགེ་བ་ཚེ་བདག་ཡབ་ཡུམ་སྲས་གསུམ་གྱི་ཚེ་དབང་ཟབ་མོ་ཐོབ་པའི་ཕན་ཡོན་ནི། གཞུང་ལས། བྱིན་རླབས་ལྡན་པའི་སློབ་དཔོན་གྱིས༔ དབང་འདི་ལན་གཅིག་བསྐུར་བས་ཀྱང༔ འཆི་བདག་ལོ་གསུམ་ངེས་པར་བཟློག༔ ཚེ་དང་ཡེ་ཤེས་འཕེལ་བར་འགྱུར༔ ཞེས་གསུངས་པའི་བྱིན་རླབས་དངོས་གྲུབ་དང་ཕྲིན་ལས་ཐམས་ཅད་ཀྱི་འབྱུང་གནས། ཤིན་ཏུ་ཟབ་པའི་གདམས་པ་འདི་ཉིད་གཡར་དམ་དུ་བྱ་བ་དང་། དམ་ཚིག་གི་རིམ་པ་ཇི་སྐད་བཤད་པ་རྣམས་ལ་སྤང་བླང་ཚུལ་བཞིན་དུ་བགྱིའོ་སྙམ་པས་འདིའི་རྗེས་ཟློས། གཙོ་བོས་ཇི་ལྟར་སོགས་སྤྱི་ལྟར་དང་། ཚོགས་ལ་རོལ་ཞིང་ལྷག་མ་སོགས་
ཕྲིན་ལས་ཀྱི་རྗེས་ཆོག་བྱའོ།། ༈ །།ཚེ་སྒྲུབ་རྡོ་རྗེ་ཕྲེང་བའི་ཚེ་བདག་ཡབ་ཡུམ་སྲས་གསུམ་གྱི་ནང་སྒྲུབ་ལུང་ཨ་ནུ་ཡོ་ག་ལྟར་བཀྲལ་བའི་བྱང་བུ་དང་འབྲེལ་བའི་སྨིན་བྱེད་དབང་སྐབས། བདག་དོན་སྒྲུབ་མཆོད་ནི། ཐོག་མར། བདག་དང་མཐའ་ཡས་སེམས་ཅན་རྣམས༔ དོན་གྱི་སངས་རྒྱས་ཡིན་མོད་ཀྱང༔ རྟོག་པའི་དབང་གིས་འཁོར་བ་ལས༔ བྱང་ཆུབ་མཆོག་ཏུ་སེམས་བསྐྱེད་དོ༔ ཞེས་ཀུན་རྫོབ་སེམས་བསྐྱེད་ལན་གསུམ། ཨེ་མ་ཧོ་ངོ་མཚར་རྨད་ཀྱི་ཆོས༔ རྫོགས་པའི་སངས་རྒྱས་ཀུན་གྱི་གསང༔ སྐྱེ་སོགས་མེད་ལས་ཐམས་ཅད་སྣང༔ སྐྱེ་འགགས་གནས་དམིགས་འགྲོ་འོང་བྲལ༔ ཞེས་དོན་དམ་གྱི་སེམས་ལྔ་བསྐྱེད་པ་ལན་གསུམ། ཧཱུྃ། རྣམ་དག་ཆོས་དབྱིངས་སོགས་ནང་སྒྲུབ་ལུང་གི་བྱང་བུ་ལྟར་མཚམས་གཅོད། བཤགས་པ། མཆོད་བརླབ་སྟེ་སྔོན་འགྲོ། དངོས་གཞི་བསྐྱེད་བཟླས་སྒྲུབ་གསུམ་གྱི་རིམ་པའི་བསྐྱེད་བཟླས་གྲུབ་མཐར། སྒྲུབ་པ་ནི་ཚེ་འབྲང་ལ་དམིགས་ཏེ། ཨོཾ་མ་ཧཱ་ཤཱུནྱ་ཏཱ་སོགས་ཀྱིས་སྦྱང་། བྷྲཱུྃ་བཛྲ་ཨཱ་ཡུ་ཥེ་བྷྲཱུྃ༔ གཞོམ་མེད་ཟླ་གམ་འབར་བ་རུ༔ པད་ཉིའི་སྟེང་དུ་ཧྲཱིཿདཀར་ལས༔ དབང་ཆེན་རྟ་མགྲིན་སོགས་ལྷ་བསྐྱེད་ནས། བསྟོད་པའི་བར་སྔར་ལྟར་དང་། བཟླས་དམིགས་ཀྱི་རྟ་མགྲིན་སྐབས། སྐུ་ལས་སྤྲུལ་པའི་ཁྲོ་ཆུང་ཚོགས༔ ཞེས་བསྒྱུར། ཛཔ྄་སོ་སོར་བཟླ་ཞིང་བདག་མདུན་སྒྲུབ་རྫས་ཐམས་ཅད་ལ་སྤྲོ་བསྡུའི་དམིགས་པས་ཁྱབ་པར་བྱས་མཐར།
བྷྲཱུྃ༔ ཚེ་ཡི་ཟླ་གམ་སོགས་ཚེ་འགུགས་བྱ། ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་སོགས་ཀུན་བཟང་། ཨོཾ་ཨཱ་ཧ་ར་ཨཱ་ཧ་ར་སརྦ་བིདྱཱ་དྷ་ར་པཱུ་ཛི་ཏེ་ན་མཿས་མནྟ་བུདྡྷཱ་ནཱཾ་ག་ག་ན་ཁཾ་ས་མ་ཡེ་སྭཱ་ཧཱ༔ ཞེས་ཞབས་བསིལ། ཨོཾ་ཤྲཱི་བཛྲ་རཱ་ག་དྷཱུ་པེ་དྷཱུ༔ ཨོཾ་ཤྲཱི་བཛྲ་རཱ་ག་པུཥྤེ་པུ༔ ཨོཾ་ཤྲཱི་བཛྲ་རཱ་ག་ཨཱ་ལོ་ཀེ་ཧྲཱི༔ ཨོཾ་ཤྲཱི་བཛྲ་རཱ་ག་གནྡྷེ་གན༔ ཞེས་བཞི་བསྣོལ་གྱིས་མཆོད། ཧཱུྃ༔ ཕྱོགས་བཅུའི་ཞིང་ཁམས་མ་ལུས་འདུས་པའི་གཙོ༔ རྒྱལ་བ་སྲས་བཅས་ཡུམ་ཚོགས་སྤྲུལ་པར་བཅས༔ ཉིད་ལས་མི་གཞན་འཁོར་གྱི་སྐུར་སྤྲུལ་པ༔ དབྱིངས་ཀྱི་ངང་ལས་མི་འདའ་དམ་ཚིག་ཅན༔ ཞི་ཁྲོའི་ལྷ་ཚོགས་ཀུན་ལ་ཕྱག་འཚལ་བསྟོད༔ ཨ་ལ་ལ་ཧོ༔ ཞེས་བསྟོད། བྷྲཱུྃ་ཧཱུྃ༔ བདེ་གཤེགས་རྒྱལ་བ་འཁོར་བཅས་དགོངས༔ སྐུ་གསུང་ཐུགས་རྒྱུད་རབ་དགྱེས་ཏེ༔ བདག་དང་མཐའ་ཡས་སེམས་ཅན་གྱི༔ ཉམས་སྐོང་སངས་རྒྱས་ས་ཐོབ་ཤོག༔ སྡུག་བསྔལ་མི་ཟད་ཀུན་སྦྱངས་ནས༔ རེ་སྨོན་ཐམས་ཅད་འགྲུབ་པར་མཛོད༔ ཅེས་བརྗོད། ཧཱུྃ་ཧྲཱི༔ རྩ་བའི་བླ་མ་སོགས་ཀྱིས་དབང་བླངས་ལ། གནང་བ་ནོད་དོ། །དབང་དངོས་ལ། འདིར་མགོན་པོ་ཚེ་དཔག་མེད་པ་དངོས་སུ་གྲུབ་པའི་སློབ་དཔོན་ཆེན་པོ་རྣམས་ཀྱིས་རྒྱུད་ལུང་མན་ངག་གི་དགོངས་པ་བཀྲལ་པ་རྡོ་རྗེའི་ཚེ་སྒྲུབ་པའི་གདམས་སྐོར་རྒྱ་མཚོ་ལྟ་བུ་མཆིས་པ་ལས། ད་ལམ་གྱི་སྐབས་སུ་བབས་པ་འདི་ནི་བོད་ཁམས་སྐྱོབ་པའི་མགོན་གཅིག་མ་ཧཱ་གུ་རུ་པདྨ་ཐོད་ཕྲེང་རྩལ་གྱིས་མདོ་ཁམས་ནམ་མཁའ་མཛོད་དུ་རྗེ་འབངས་འདུས་པ་ཕྱི་མ་རྣམས་ལ་བཀའ་འདུས་
ཆོས་ཀྱི་རྒྱ་མཚོའི་ཆོས་འཁོར་བསྐོར་བའི་ཚེ། རྒྱུད་ལུང་མན་ངག་ཐམས་ཅད་ཀྱི་ཡང་ཞུན་བཅུད་དུ་དྲིལ་བའི་ཚེ་སྒྲུབ་རྡོ་རྗེ་ཕྲེང་བ་ཐོག་མཐའ་བར་དུ་དགེ་བའི་བདག་ཉིད་ཅན་གསུངས་པ་ཉིད། མ་འོངས་པའི་དོན་དུ་དགོངས་ནས་ཁམས་ཀྱི་གླ་བ་རྐང་གཅིག་ཡེ་རྒྱལ་ནམ་མཁའ་མཛོད་ཀྱི་ལྷོ་ནུབ་ཚེ་ཞལ་འབར་བའི་བྲག་ཚེ་དཔག་མེད་པའི་སྐུ་རང་བྱོན་དུ་ཡོད་པའི་ཐུགས་ཀར་ཟབ་མོའི་གཏེར་རྒྱས་བཏབ་པ་ཉིད། ལྷ་སྲས་དམ་འཛིན་མུ་རུབ་བཙད་པོའི་རྣམ་འཕྲུལ་རྩོད་བྲལ་དུས་བབས་ཀྱི་སྤྲུལ་པའི་གཏེར་ཆེན་ཨོ་རྒྱན་མཆོག་གྱུར་བདེ་ཆེན་གླིང་པས་སྤྱན་དྲངས་ནས། རྣམ་སྣང་ལོ་ཙཱ་དངོས་བྱོན་གསང་བའི་བདག་པོ་འཇམ་མགོན་རྡོ་རྗེ་འཆང་ཆེན་པོ་མཚན་བརྗོད་པར་དཀའ་བ་དེ་ཉིད་ལ་གཉེར་དུ་གཏད་པར་མཛད་དེ་རིང་པོར་སོན་པ་ན། སླར་ཡང་དབྱིངས་ཀྱི་ཌཱ་ཀིའི་བརྡས་བསྐུལ་བའི་རྟེན་འབྱུང་ལ་བརྟེན་ནས། ཚེ་སྒྲུབ་རྡོ་རྗེ་ཕྲེང་བའི་ཆོས་སྡེའི་ཐོག་མར་དགེ་བ་ཚེ་བདག་ཡབ་ཡུམ་སྲས་གསུམ་གྱི་སྒྲུབ་སྐོར་རྩ་བ་ཙམ་སྐལ་ལྡན་གྱི་སྙིང་བཅུད་དུ་བསྩལ་པར་མཛད་པ་ལའང་ཕྱི་སྒྲུབ་རྒྱུད་ཀྱི་བྱང་བུ། ནང་སྒྲུབ་ལུང་གི་བྱང་བུ། གསང་སྒྲུབ་མན་ངག་གི་བྱང་བུ་གསུམ་དུ་བཞུགས་པ་ལས། འདིར་ནང་སྒྲུབ་ལུང་ཨ་ནུ་ཡོ་གའི་ལུགས་ཀྱི་བྱང་བུ་ལ་བརྟེན་པའི་སྨིན་བྱེད་བགྱིད་པ་སྟེ། གཞུང་ལས། ནང་སྒྲུབ་རླུང་སྔགས་དབྱེར་མེད་པ༔ ལུས་ཀྱི་དཀྱིལ་
འཁོར་དང་བཅས་པ༔ ཟབ་ཅིང་གནད་འདྲིལ་གསང་བའི་བཅུད༔ སྐལ་ལྡན་རྣམས་ཀྱི་སྙིང་ལ་ཕུར༔ ཅེས་བསྔགས་པར་མཛད་པའི་སྨིན་བྱེད་ཀྱི་དབང་བསྐུར་ཟབ་མོ་སོགས་ཀྱིས་མཚམས་སྦྱར་ལ་མཎྜལ་འབུལ། བླ་མ་བདེ་གཤེགས་ཀུན་འདུས་ཀྱི་ངོ་བོར་བཞུགས་པའི་དྲུང་དུ་དབང་བསྐུར་སྩོལ་བར་གསོལ་བ་འདེབས་པ་འདིའི་རྗེས་ཟློས། བདེ་ཆེན་དགྱེས་པར་སོགས། རྒྱུད་སྦྱོང་བའི་སླད་དུ་ཐོག་མར་ཀུན་རྫོབ་དམིགས་པ་དང་བཅས་པའི་བྱང་ཆུབ་ཏུ་སེམས་བསྐྱེད་པ་འདིའི་རྗེས་ཟློས། བདག་དང་མཐའ་ཡས་སོགས་གོང་བཞིན་ལན་གསུམ། དོན་དམ་གྱི་དབྱིངས་སུ་སྐྱེ་འགག་གནས་དམིགས་འགྲོ་འོང་རྣམས་གདོད་ནས་གྲུབ་མ་མྱོང་བའི་རང་བཞིན་མཐོང་བའི་དམིགས་པ་མེད་པའི་སེམས་ལྔ་བསྐྱེད་པ་འདིའི་རྗེས་ཟློས། ཨེ་མ་ཧོ་ངོ་མཚར་སོགས་ལན་གསུམ། དབང་གི་སྣོད་དུ་རུང་བའི་ཕྱིར་རྒྱུད་སྡོམ་ལྡན་དུ་བྱ་དགོས་པས། དེའི་སླད་དུ་སྡོམ་པ་གསུམ་སོ་སོར་བླངས་ཤིང་ངོ་བོ་གནས་འགྱུར། ཡོན་ཏན་ཡར་འཕེལ་དུས་སྐབས་དགོས་པ་ཉིད་གཙོ་བོར་བྱས་ཏེ་བསྲུང་བའི་བློས་འདིའི་རྗེས་ཟློས། བླ་མེད་གསང་བའི་སྒོར་ཞུགས་ནས༔ བྱང་ཆུབ་སྙིང་པོར་མཆིས་ཀྱི་བར༔ སོ་སོ་ཐར་དང་བྱང་ཆུབ་སེམས༔ རིག་པ་འཛིན་པའི་སྡོམ་པ་རྣམས༔ ཡང་དག་ཉིད་དུ་གཟུང་བར་བགྱི༔ ལན་གསུམ། དབང་
གི་གཞི་འགོད་པ་ཡེ་ཤེས་པ་དབབ་པའི་སླད་དུ་དམིགས་པ་འདི་རྣམས་མ་ཡེངས་པར་གསལ་ཐོབས་ཤིག །ཨོཾ་མ་ཧཱ་ཤཱུནྱ་ཏཱ་སོགས། སྟོང་པའི་ངང་ལས་ཕྱི་སྣོད་ཡུལ། །ཟླ་གམ་དབང་གི་གཞལ་ཡས་ནང་། །སློབ་མའི་སེམས་ཉིད་སྣང་བའི་ཆ། །པད་ཉིའི་སྟེང་དུ་ཧྲཱིཿདཀར་ལས༔ དབང་ཆེན་རྟ་མགྲིན་སོགས་མངོན་རྟོགས་ལྟར་སེམས་སྐྱིལ་བཞུགས༔ བར་ལྷ་བཞི་ཀ་བསྐྱེད། དེ་ལྟར་གསལ་བའི་གནས་གསུམ་དུ་རྒྱལ་བའི་རྡོ་རྗེ་གསུམ་གྱི་རང་བཞིན་འབྲུ་གསུམ་གྱིས་མཚན་པ་དང་། སློབ་དཔོན་ཡང་ཁྱེད་རང་རྣམས་ཀྱིས་བསྒོམས་པ་ལྟ་བུའི་སྐུ་དཀྱིལ་འཁོར་ལྷ་ཚོགས་མ་ལུས་པའི་བདག་ཉིད་ཅན་དུ་བཞུགས་པའི་ཐུགས་ཀའི་འོད་ཟེར་ནམ་མཁའ་ཁྱབ་པར་འཕྲོས་པས། རྩ་བ་གསུམ་གྱི་ལྷ་ཚོགས་རྣམས་ཚེ་བདག་ཡབ་ཡུམ་སྲས་དང་བཅས་པའི་སྐུ་གསུང་ཐུགས་ཀྱི་ཕྱག་རྒྱར་རྫོགས་པ་ཆར་དྲག་བབས་པ་རྒྱ་མཚོར་ཐིམ་པ་བཞིན་ཁྱེད་རང་རྣམས་ལ་སིབ་སིབ་ཐིམ་པས་རྒྱུད་བྱིན་གྱིས་བརླབས་ཤིང་། ཡེ་ཤེས་པ་སྒོ་གསུམ་ལ་ཕེབས་བྱུང་སྙམ་པའི་ངེས་ཤེས་སྐྱེད་ཅིག །ཧཱུྃ་ཧྲཱི༔ ཡེ་ནས་གཉིས་སུ་སོགས་ལས་བྱང་གི་སྤྱན་འདྲེན་མཐར། ཨོཾ་ཨཱཿཧཱུྃ་ཧྲཱིཿཁྲོཾ་ཨཱ་ཡུརྫྙཱ་ན་ཚེ་བྷྲཱུྃ༔ བཛྲ་ཨཱ་ཝེ་ཤ་ཡ་ཨ་ཨཱ༔ ཞེས་བཏགས་པ་བཟླ་ཞིང་སྤོས་རོལ་བཅས་བྱིན་དབབ། དེ་ལྟར་བྱིན་ཕབ་པའི་ཡེ་ཤེས་ཀྱི་བྱིན་རླབས་སྒོ་གསུམ་ལས་ནམ་ཡང་མི་འདའ་བར་བརྟན་པར་གྱུར་ཅིག །
ཏིཥྛ་བཛྲས་རྡོ་རྗེ་རྒྱ་གྲམ་སྤྱི་བོར་བཞག །དེ་རྣམས་ཀྱིས་དབང་གི་སྔོན་དུ་འགྲོ་བ་རྣམས་གྲུབ་ནས། དངོས་གཞི་སྦྱང་བྱ་སད་རྨི་གཉིད་ཆགས་ཀྱི་རིམ་པ་སྦྱོང་བྱེད་དབང་བཞིའི་བྱིན་རླབས་མཐའ་རྟེན་དང་བཅས་པ་འབྱུང་བ་ལས། དང་པོ་བུམ་པའི་དབང་བསྐུར་བ་ནི། གདན་གསུམ་ཚང་བའི་དབང་ལྷ་ནམ་མཁའ་གང་བ་དང་སློབ་དཔོན་ལྷན་ཅིག་པས། བུམ་པ་དབྱིངས་ཀྱི་གཞལ་ཡས་ཁང་དུ་བུམ་བཅུད་རིག་པ་འགྱུར་མེད་ཚེ་བཅུད་ཀྱི་སྙིང་པོར་འཁྱིལ་པ་ཐོགས་ནས་རྡོ་རྗེའི་གཏོར་བླུག་གི་ཆོ་ག་བྱིན་པར་མོས། ཨོཾ༔ བུམ་པ་དབྱིངས་ཀྱི་སོགས་མཐར། ཨོཾ་ཨཱཿཧཱུྃ་ཧྲཱིཿཁྲོཾ་ཨཱ་ཡུརྫྙཱ་ན་ཚེ་བྷྲཱུྃ༔ ཤམ་བུར། བཛྲ་ཀ་ལ་ཤ་སོགས་བཏགས་པ་བརྗོད་པས་བུམ་དབང་བསྐུར་ཞིང་བུམ་ཆུ་སྦྱིན། དེ་ལྟར་དབང་བསྐུར་པས། སད་པའི་གནས་སྐབས་རགས་པ་ལུས་ཀྱི་འཛིན་རྟོག་སྦྱངས་ནས་ཉོན་མོངས་པ་ལྔ་ཡི་དྲི་མ་གཏོར། ཡེ་ཤེས་ལྔ་མངོན་དུ་བྱེད་པའི་ནུས་པ་རྒྱུད་ལ་བླུགས། ལུས་སྣང་སྟོང་ཟུང་འཇུག་སྤྲུལ་པ་སྐུའི་རྡོ་རྗེ་འགྲུབ་པར་བྱིན་གྱིས་བརླབས་པའོ། །གཉིས་པ་གསང་བའི་དབང་བསྐུར་བ་ནི། སློབ་དཔོན་རྩ་གནས་ཀྱི་ལྷ་དང་བཅས་པ་མཉམ་སྦྱོར་རོལ་པའི་བདེ་རྒྱུན་ཐོད་པའི་བདུད་རྩིའི་བཅུད་དང་རོ་གཅིག་པ་ལྕེ་ལ་བཞག་པར་མོས། ཨཱཾ༔ བླ་མ་ཡབ་ཡུམ་སོགས་སྔགས་གོང་བཞིན་མཐའི་ཤམ་
བུ་བསྒྱུར། དེ་ལྟར་བྱིན་པའི་བདུད་རྩི་མགྲིན་པ་ནས་འཕེལ། ལུས་ཀྱི་ནང་གང་བས་བདེ་སྟོང་གི་ཡེ་ཤེས་རྒྱུད་ལ་སྐྱེས། རྨི་ལམ་གྱི་གནས་སྐབས་རླུང་སེམས་འདུས་པའི་ཞེན་རྟོག་ཕྲ་བ་རླུང་གི་དྲི་མ་སྦྱངས་ནས། ངག་གྲགས་སྟོང་གཞོམ་མེད་གསུང་གི་རྡོ་རྗེ་འགྲུབ་པར་བྱིན་གྱིས་བརླབས་པའོ། །གསུམ་པ་ཤེས་རབ་ཡེ་ཤེས་ཀྱི་དབང་བསྐུར་བ་ནི། མེ་ལོང་ལི་ཁྲིའི་དཀྱིལ་འཁོར་སྙིང་གར་བཞག་པ་ལས། གཟུགས་དང་ལང་ཚོ་རྒྱས་པའི་ཤེས་རབ་མ་གསང་བ་ཡེ་ཤེས་ཙཎྜ་ལཱིའི་ངོ་བོ་ཅན་བྱུང་བ་ལ་འདུ་ཤེས་གསུམ་ལྡན་གྱིས་རོལ་པར་མོས། ཧཱུྃ༔ མཚན་ལྡན་ཙཎྜ་སོགས་སྔགས་གོང་བཞིན། དེ་ལྟར་བྱས་པས་ཡས་བབས་དང་མས་བརྟན་གྱི་དགའ་བ་བཅུ་དྲུག་ལུགས་འབྱུང་དང་ལུགས་ལྡོག་གིས་འཕོ་མེད་དུ་བརྟན་པས། གཉིད་མཐུག་གི་གནས་སྐབས་མ་རིག་པའི་བློ་རྟོག་ཤིན་ཏུ་ཕྲ་བ་ཐིག་ལེའི་དྲི་མ་སྦྱངས་ནས། ཡིད་རང་བྱུང་འོད་གསལ་རིག་སྟོང་ཐུགས་ཀྱི་རྡོ་རྗེར་འཆར་བར་བྱིན་གྱིས་བརླབས་པའོ། །བཞི་པ་ཚིག་དབང་བསྐུར་བ་ནི། རང་བྱུང་རྡོ་རྗེ་སེམས་དཔའི་མེ་ལོང་གི་བརྡའི་དཔེས་མཚོན་ཅིང་། དོན་གྱི་ཡེ་ཤེས་ཅར་ཕོག་ཏུ་ངོ་སྤྲད་པའི་དོན་ལ་མཉམ་པར་འཇོག་མཛོད། ཤེལ་རྡོ་མིག་སྔར་ཕྱར་ཞིང་ཤེལ་འོད་སྣང་བར་བྱས་ལ། ཧོ༔ དབྱིངས་ཀྱི་ངོ་བོ་སོགས། དེ་ལྟར་ཤེལ་གོང་དྲི་མ་མེད་པ་ནི་དབྱིངས་ཀྱི་ངོ་
བོའམ་གནས་ལུགས་རང་བྱུང་རིག་པ་ལ། སྣང་བའི་ཆོས་ཀྱིས་ཡེ་ནས་མ་གོས་ཤིང་འཁྲུལ་མ་མྱོང་བའི་ཀ་དག་སྟོང་པ་ཉིད། ཤེལ་འོད་ཕྱིར་གསལ་བ་ནི་དབྱིངས་ཀྱི་རང་གདངས་རིག་པ་ཡེ་ཤེས་ཀྱི་སྣང་ཆ་གདོད་ནས་མ་འགགས་ཤིང་ལྷུན་གྱིས་གྲུབ་པ། དེ་གཉིས་ཀྱང་ཤེལ་དང་ཤེལ་འོད་ཐ་མི་དད་པ་ལྟར་སྣང་སྟོང་རེས་འཇོག་གི་རྟོག་པ་ལས་འདས་པའི་ཟུང་འཇུག་གི་གཤིས་འཁྲུལ་རྟོག་སྣང་དམིགས་སྟོང་པའི་མཚན་མ་དང་བྲལ་བ་ཡེ་རྫོགས་སུ་ངོ་སྤྲད་པས། རབ་ཏུ་ཕྲ་བ་ཤེས་བྱའི་མཐའ་ལ་ཆགས་པའི་དྲི་མ་སྦྱངས་ནས། གདོད་མའི་བཞུགས་ཚུལ་དེ་བཞིན་ཉིད་དབྱིངས་ཀུན་ཏུ་བཟང་པོའི་རང་ངོ་མཐོང་བ་མེད་པ་མཐོང་བས། འཁོར་འདས་གཉིས་མེད་ཆོས་ཟད་ཆེན་པོར་བྱིན་གྱིས་བརླབས་པའོ། །ལྔ་པ་མཐའ་རྟེན་ཚེའི་འབྲང་རྒྱས་ཀྱི་དབང་བསྐུར་བ་ནི། ཚེ་འབྲང་ཟླ་གམ་མཁའ་ཀློང་འཁྱིལ་བའི་དབྱིངས་ཀྱི་ཕོ་བྲང་གཞལ་མེད་ཁང་། རང་སྣང་བདེ་བ་ཆེན་པོའི་ལོངས་སྤྱོད་ཀྱི་རྒྱན་བཀོད་མ་བཅོས་ལྷུན་གྲུབ་རང་ཆས་སུ་རྫོགས་པའི་ནང་དུ་རིག་པ་ཡེ་ཤར་དོན་གྱི་ཡབ་གཅིག་བླ་མ་ཚེ་དཔག་མེད་དང་། ཡུམ་ལྷ་མོ་ཙཎྜ་ལཱི་གཉིས་སུ་མེད་པའི་རང་གདངས་ཐུགས་ཀྱི་སྲས་མཆོག་འཕགས་པ་སྤྱན་རས་གཟིགས། བཀའི་ཕོ་ཉ་རྟ་མཆོག་
རྒྱལ་པོ་ལ་ལས་བྱེད་རྡོ་རྗེའི་ཁྲོ་བོ་ཁྱུང་དང་བཅས་པའི་ལྷ་ཚོགས་རྣམས་ཀྱི་ཐུགས་དམ་བསྐུལ་ཞིང་གསོལ་བ་བཏབ་པས། དེ་རྣམས་ཀྱི་སྤྱི་བོ། མགྲིན་པ། ཐུགས་ཀ །ལྟེ་བ་རྣམས་ནས་རྡོ་རྗེ་བཞིའི་ཡེ་ཤེས་ཀྱི་བྱིན་རླབས་འོད་ཟེར་དཀར་དམར་མཐིང་སེར་གྱི་རྣམ་པ་རིམ་པར་བྱོན། ཁྱེད་རང་རྣམས་ཀྱི་གནས་བཞིར་ཐིམ་པས་ལུས་ངག་ཡིད་གསུམ་ཆ་སྙོམས་དང་བཅས་པའི་སྒྲིབ་པ་དག །སྐུ་གསུང་ཐུགས་ཡེ་ཤེས་རྡོ་རྗེ་བཞིའི་བྱིན་རླབས་རྩལ་རྫོགས་རྒྱུད་ལ་ཞུགས་ཤིང་ཐོབ་པར་མོས། ཧཱུྃ་ཧྲཱི༔ རྩ་བའི་བླ་མ་སོགས་དངོས་གྲུབ་ལེན་ཆོག་བརྗོད། དེ་ལྟར་དབང་བསྐུར་པས་ཚེའི་ལྷ་ཚོགས་རྣམས་འོད་ཟེར་གྱི་གོང་བུར་ཞུ་བ་ཁྱེད་རང་རྣམས་ལ་ཐིམ་པས་འཆི་མེད་རྡོ་རྗེའི་སྐུ་ཐོབ་པར་མོས། སླར་ཡང་འཁོར་འདས་དྭངས་བཅུད་འདུས་པའི་སྙིང་པོ་ཐིག་ལེར་འཁྱིལ་པ་མྱང་གྲོལ་གྱི་རིལ་བུ་དང་། གྲུབ་པའི་བདུད་རྩི་དངོས་གྲུབ་ཀྱི་དགའ་སྟོན་ཞལ་བསྲོའི་ཚུལ་དུ་བྱིན་པ་ལ་ལོངས་སྤྱོད་པས་ཚེ་དབང་ཕུན་སུམ་ཚོགས་པའི་སྐལ་པ་བཟང་པོ་ལ་རྟག་ཏུ་སྤྱོད་པའི་དབང་དང་ལྡན་པར་མོས། བྷྲཱུྃ། སྲིད་ཞིའི་དྭངས་བཅུད་གཡང་དུ་འཁྱིལ། །གྲུབ་པའི་དགའ་སྟོན་སྦྱིན་པའི་རྫས། །དངོས་གྲུབ་ཆེན་པོ་འདི་ལ་རོལ། །རྟག་ཏུ་ཚེ་དཔལ་འཕེལ་གྱུར་ཅིག །ཨོཾ་ཨཱ་ཡུརྫྙཱ་
ན་ཚེ་བྷྲཱུྃ་ཧཱུྃ། ཞེས་ཚེ་རིལ་དང་ཚེ་ཆང་སྦྱིན། དེ་རྣམས་ཀྱི་སྒོ་ནས་ཚེ་བདག་ཡབ་ཡུམ་སྲས་བཅས་ཀྱི་ནང་སྒྲུབ་ལུང་གི་བྱང་བུ་དང་འབྲེལ་བའི་དབང་བསྐུར་ཐོབ་པ་ཡིན་ཏེ། གཞུང་ལས། འདིས་ནི་ཟབ་མོའི་སྣོད་དུ་རུང༔ གནས་སྐབས་ཚེ་ཡི་དངོས་གྲུབ་ཐོབ༔ མཐར་ཐུག་བདེ་ཆེན་ཡེ་ཤེས་བརྙེས༔ ཞེས་གསུངས་པའི་ཕན་ཡོན་གྱི་ཚན་ཁ་མཆོག་དང་ལྡན་པ་ཉིད་གྲུབ་པ་ལགས་པས། དམ་ཚིག་སྤྱི་དང་བྱེ་བྲག་གི་ཁྱད་པར་ཕྱེས་པ་རྣམས་མདོར་བསྡུས་ཏེ་སྲུང་སྡོམ་བགྱིད་དོ་སྙམ་པས་འདིའི་རྗེས་ཟློས། གཙོ་བོས་ཇི་ལྟར་སོགས་སྤྱི་ལྟར་སྦྱར། རྗེས་ཆོག་ཚོགས་ནི་ཕྱི་སྒྲུབ་ལྟར། རཾ་ཡཾ་ཁཾ༔ ཕྱི་སྣོད་པད་གཞོང་སོགས་བྱིན་རླབས་དང་། ཨོཾ༔ བསོད་ནམས་ཡེ་ཤེས་སོགས་སྤྱན་དྲངས་ལ། རང་གཞུང་གི །ཧཱུྃ་ཧྲཱི༔ གདོད་ནས་བདུད་རྩི་སོགས་ཀྱིས་ཚོགས་མཆོད་འབུལ། ཚོགས་རྫས་ནང་གི་སྲེག་བླུག་ཏུ་རོལ། ལྷག་མའི་མཐར། ཧཱུྃ༔ སེམས་ཅན་དོན་ཕྱིར་ནན་ཏན་མཆོག་བསྐྱེད་དེ༔ ཡེ་ཤེས་ཐུགས་རྗེས་བདག་ལ་དགོངས་ནས་ཀྱང༔ མཆོག་དང་ཐུན་མོང་དངོས་གྲུབ་དམ་པ་རྣམས༔ བདག་ལ་བསྩལ་ཞིང་བརྟན་པར་བཞུགས་སུ་གསོལ༔ ཀཱ་ཡ་ཝཱ་ཀ་ཙིཏྟ་ཏིཥྛ་བཛྲས་དངོས་གྲུབ་གསོལ། ཛཔ྄་ཀྱི་སྐབས་ལྟར་ཀུན་བཟང་། ཞབས་བསིལ། བཞི་བསྣོལ་གྱིས་མཆོད་ཅིང་བསྟོད། མདུན་བསྐྱེད་
ཡེ་ཤེས་པ་བརྟན་བཞུགས་དང་། དམ་ཚིག་པ་རང་ལ་བསྡུ། ཧཱུྃ་ཧྲཱི༔ བྱང་ཆུབ་སེམས་ཀྱི་སོགས་བསྡུ་ལྡང་། བསྔོ་སྨོན། ཤིས་བརྗོད་བཅས་གཞུང་བཞིན་ནོ།། །།༧ ཚེ་སྒྲུབ་རྡོ་རྗེ་ཕྲེང་བའི་ཚེ་བདག་ཡབ་ཡུམ་སྲས་གསུམ་གྱི་གསང་སྒྲུབ་མན་ངག་རྫོགས་པ་ཆེན་པོའི་སྒོམ་རིམ་དང་འབྲེལ་བའི་དབང་བསྐུར་བ་ལ། ཐོག་མར་དབང་གི་དོན་སྒྲུབ་པ་ལ། མན་ངག་སྒོམ་རིམ་ནས་གསུངས་པའི་ཀུན་བཟང་དོན་ཕྲིན་ཉིད་མཐར་ཆགས་སུ་གཏང་། བཟླས་པའི་མཐར། སྤྱི་བོའི་ཨོཾ་ལས་སོགས་རྫོགས་རིམ་གྱི་གཞི་སྒྲུབ་པ་སྔོན་དུ་འགྲོ་བས་འཆི་མེད་ཀྱི་དགོངས་པ་ལ་ཅི་གནས་སུ་བཞག །དབང་དངོས་ལ། དེ་ལ་འདིར་དུས་གསུམ་གྱི་རྒྱལ་བ་ཐམས་ཅད་ཀྱི་བགྲོད་པ་གཅིག་པུའི་ལམ་མཆོག་གི་རྩེ་མོ། སྔ་འགྱུར་རྡོ་རྗེ་ཐེག་པའི་བཀའ་སྲོལ་ཟབ་མོའི་གཏེར་ལས་བྱོན་པའི་སྐོར་ལའང་རྒྱུད་ལུང་མན་ངག་གི་དགོངས་པ་དང་འབྲེལ་བའི་ཆོས་སྐོར་མཐའ་ཡས་པར་མཆིས་པ་ལས། སྐབས་སུ་བབས་པ་འདི་ནི་ལྷ་སྲས་འབྲིང་པོ་དམ་འཛིན་ཆོས་ཀྱི་བློ་གྲོས་ཀྱི་རྣམ་འཕྲུལ་གཏེར་ཆེན་ཆོས་ཀྱི་རྒྱལ་པོ་གཞི་མཆོག་གྱུར་གླིང་པ། ལམ་བདེ་ཆེན་གླིང་པ། འབྲས་བུ་ཞིག་པོ་གླིང་པ་སྟེ། གླིང་པ་གསུམ་གྱི་མཚན་དང་ལྡན་པའི་རིག་འཛིན་གྱི་འཁོར་ལོས་སྒྱུར་བ་དེ་ཉིད་ཀྱིས། སྔོན་ཆད་ས་སྟེང་དུ་མ་གྲགས་པའི་ཟབ་གཏེར་གྱི་གསང་སྒོ་རྒྱ་ཆེར་ཕྱེ་བར་མཛད་པའི་ནང་ཚན། ཡེ་རྒྱལ་ནམ་མཁའ་མཛོད་ཀྱི་ལྷོ་
ནུབ་ཚེ་ཞལ་བྲག་ནས་སྤྱན་དྲངས་པ་ཚེ་སྒྲུབ་རྡོ་རྗེ་ཕྲེང་བའི་ཆོས་སྐོར་འདི་ནི། རྩ་བ་རྡོ་རྗེའི་ལུང་ལས། ཚེ་རྒྱུད་རྡོ་རྗེ་ཕྲེང་བ་ལས༔ གདམས་ངག་མང་པོ་གནད་དུ་བསྡུས༔ སྐལ་ལྡན་རྗེ་འབངས་རྣམས་ལ་བཤད༔ སྤྲོས་ན་རྒྱ་ཆེ་བསམ་ཡས་ཀྱང༔ མདོར་དྲིལ་རྒྱུད་ལུང་མན་ངག་གསུམ༔ ཐོག་མཐའ་བར་དུ་དགེ་བའི་ལམ༔ རྒྱུད་དོན་ཚེ་བདག་ཡབ་ཡུམ་སྲས༔ ལུང་ལུགས་ཞི་ཁྲོ་སྟོང་ལྔ་བརྒྱ༔ མན་ངག་ཚེ་སྦྱིན་དཀར་མོར་བསྡུས༔ སྤྲོས་ན་རེ་རེ་ལ་ཡང་གསུམ༔ ཐོག་མར་དགེ་བ་ཚེ་ཡི་བདག༔ ཡབ་ཡུམ་སྲས་གསུམ་སྒྲུབ་པའི་ཐབས༔ ཕྱི་ནང་གསང་བ་ཡང་གསང་བཞི༔ གང་ཟག་བློ་ཡི་རིམ་པར་བསྟན༔ ཞེས་གསུངས་པ་བཞིན། ཚེ་རྒྱུད་རྡོ་རྗེ་ཕྲེང་བ་རྒྱུད་ལུང་མན་ངག་གིས་རིམ་པར་ཕྱེ་བ་དགེ་ལེགས་ཀྱི་དངོས་པོ་གསུམ་དང་ལྡན་པའི་ཆོས་མཛོད་འདི་ལའང་ནང་གསེས་སུ་ཕྱེ་ན། ཐོག་མར་དགེ་བ་ཚེ་བདག་ཡབ་ཡུམ་སྲས་གསུམ་གྱི་སྒྲུབ་ཐབས་ཁོ་ན་ལའང་། ཐོག་མ་བར་དང་མཐའ་མར་དགེ་བའི་བདག་ཉིད་ཅན་དུ་བཞུགས་པའི་ཐོག་མར་དགེ་བ་ཕྱི་སྒྲུབ་རྒྱུད་ཀྱི་ཕྲིན་ལས། ནང་སྒྲུབ་ལུང་གི་བྱང་བུ། གསང་སྒྲུབ་མན་ངག་སྒོམ་རིམ། ཡང་གསང་དང་བཅས་པའི་སྐོར་བཞིར་བཞུགས་པ་ལས། སྤྲུལ་པའི་གཏེར་ཆེན་ཉིད་ཀྱིས་
རྩ་བ་ཙམ་གཏན་ལ་ཕབ་སྟེ། རྒྱལ་བས་ཡོངས་རྫོགས་བསྟན་པའི་བདག་པོར་དབང་བསྐུར་པ་འཇམ་མགོན་རྡོ་རྗེ་འཆང་དངོས་མཚན་བརྗོད་པར་དཀའ་བ་དེ་ཉིད་ལ་བཀའ་བབས་ཀྱི་གཉེར་དུ་གཏད་པ་ལས། ཕལ་མོ་ཆེ་རང་ཅག་སྐལ་བ་དམན་པའི་གདུལ་བྱའི་སྤྱོད་ཡུལ་དུ་སྣང་བར་མ་གྱུར་ནའང་། ཕྱིས་སུ་རྫོང་ཤོད་བདེ་གཤེགས་འདུས་པའི་ཕོ་བྲང་ཆེན་པོར་སྒྲུབ་པ་ལ་ཞུགས་སྐབས་གནས་དུས་རྟེན་འབྲེལ་ཕུན་སུམ་ཚོགས་པའི་ལྟས་ཀྱི་མཚན་མ་དགེ་བ་ལ་བརྟེན་ནས། ཚེ་བདག་ཡབ་ཡུམ་སྲས་གསུམ་གྱི་སྒྲུབ་ཐབས་རྒྱུད་ལུང་མན་ངག་གི་སྐོར་དང་འབྲེལ་བ་རྣམས་ཀྱི་སྙིང་པོར་གྱུར་པའི་ཆོས་ཚན་གསུམ་པོ་གཏན་ལ་ཕབ་པར་མཛད་པ་ལས། འདི་ནི་གཏེར་གཞུང་ལས། དོན་དམ་རང་རིག་གདོད་མའི་གཤིས༔ ངོ་བོ་རང་བཞིན་ཐུགས་རྗེ་ནི༔ ཚེ་བདག་ཡབ་ཡུམ་སྲས་གསུམ་སྟེ༔ སྤྲུལ་པ་ཕྱག་བརྙན་ཅིར་ཡང་འཆར༔ དེ་ཉིད་གསང་བ་ཨ་ཏིའི་ལུགས༔ བློ་ཆེན་རྣམས་ཀྱིས་སྤྱོད་ཡུལ་དུ༔ སྤྲོས་མེད་ཟབ་མོའི་རྣལ་འབྱོར་བསྟན༔ ཞེས་གསུངས་པ་ལྟར་མན་ངག་རྫོགས་པ་ཆེན་པོ་འཆི་མེད་འཇའ་ལུས་རྡོ་རྗེའི་སྲོག་སྒྲུབ་ཀྱི་སྒོམ་རིམ་དང་འབྲེལ་བའི་སྨིན་བྱེད་བྱིན་རླབས་ཟབ་མོ་བསྒྲུབ་པར་བགྱི་བ་ལ་སོགས་ཀྱིས་མཚམས་སྦྱར་ལ་མཎྜལ་འབུལ། བླ་མ་ཚེ་བདག་ཀུན་ཏུ་བཟང་པོའི་ངོ་བོར་
བཞུགས་པ་ལ་རྩེ་གཅིག་གུས་པས་གསོལ་བ་འདེབས་པ་འདིའི་རྗེས་ཟློས། ཁྱབ་བདག་འོད་མི་འགྱུར་སོགས། ལམ་གྱི་གཞི་སྐྱབས་སུ་འགྲོ་བའི་སླད་དུ་ངོ་བོ་སྟོང་པ། རང་བཞིན་གསལ་བ། ཐུགས་རྗེ་མ་འགགས་པའི་ཆོས་དབྱིངས་བདེ་བ་ཆེན་པོ་རང་རིག་རང་བྱུང་གི་ངོ་བོར་གདོད་ནས་རྫོགས་པར་ཤེས་པས། དོན་གྱི་ཀློང་དུ་འཁོར་གསུམ་གྱི་སྤྲོས་པ་དང་བྲལ་བར་སྐྱབས་སུ་འགྲོ་བའི་བློས་འདིའི་རྗེས་ཟློས། ངོ་བོ་སྟོང་པ་སོགས་ཀུན་བཟང་དོན་ཕྲིན་ལྟར་ལན་གསུམ། འཁོར་འདས་སུ་སྣང་བ་འདི་དག་དོན་དམ་རང་བྱུང་གི་དཀྱིལ་འཁོར་དུ་སྤང་ཐོབ་བྲལ་བ་ཡེ་རྫོགས་ལྷུན་གྲུབ་གདོད་ནས་དག་མཉམ་དུ་ཤེས་པ་ཉིད་ལས་ནམ་ཡང་མི་འདའ་བར་སེམས་བསྐྱེད་པ་འདིའི་རྗེས་ཟློས། འཁོར་བ་མ་སྤངས་སོགས་ནས། རྩོལ་སྒྲུབ་བྲལ་བར་སེམས་བསྐྱེད་དོ༔ བར་ལན་གསུམ། དེས་རྒྱུད་སྦྱང་བ་སྔོན་དུ་སོང་ནས། དབང་གི་དངོས་གཞི་ཡེ་ཤེས་ཀྱི་བྱིན་དབབ་པའི་སླད་དུ་འདི་ལྟར་གསལ་ཐོབས་ཤིག །རྟོག་ཚོགས་མ་སྤང་དག་པའི་གཤིས། །རང་བྱུང་རང་ཤར་བདེ་ཆེན་ཞིང༔ ལོངས་སྤྱོད་བཀོད་པ་ལྷུན་རྫོགས་དབུས༔ དྭངས་མ་འོད་ལྔའི་ཕོ་བྲང་དུ༔ སློབ་མ་གདོད་ནས་གྲུབ་པའི་ལྷ། །དང་པོའི་སངས་རྒྱས་འོད་མི་འགྱུར༔ སོགས་ནས། མ་བསྐྱེད་ཡེ་ནས་རྫོགས་
པར་བཞུགས༔ དེ་ཡི་ཙིཏྟ་སྲོག་གི་གོ །དཔལ་གྱི་བེ་འུའི་སྒྲོམ་བུ་ནས། །ལྔ་ལྡན་འོད་ཟེར་མཁའ་ཁྱབ་འཕྲོས། །ཕྱོགས་དུས་རྒྱལ་བའི་དཀྱིལ་འཁོར་གྱི། །འཁོར་ལོ་ཐམས་ཅད་སྣང་བར་བྱས། །ཀུན་ཀྱང་རང་བྱུང་རིག་པའི་དལ། །ཡེ་འབྱམས་ལྷུན་གྲུབ་ཚོམ་བུར་བཅས། །གཉིས་སྣང་བྲལ་བར་འུབ་ཆུབ་པས། །བློ་འདས་དབྱིངས་སུ་མཉམ་པར་ཞོག །ཅེས་དམིགས་པ་ཕོག་ནས་སྤོས་རོལ་གྱིས་གཟི་བྱིན་བསྐྱེད་པ་དང་བཅས། ཨ་ཨ་ཨ་ཞེས་གྲངས་མེད་བརྗོད་ཅིང་དཔོན་སློབ་གཉིས་ཀས་དགོངས་ཉམས་སྤར། དེ་ལྟར་དབབ་པའི་ཡེ་ཤེས་ཀྱི་རང་ཞལ་མཐོང་བ་མེད་པའི་ཚུལ་དུ་མཐོང་བ་ཉིད་ཡིད་དཔྱོད་ཀྱི་རྩོལ་སྒྲུབ་དང་བྲལ་བ་རང་བབས་གཤིས་ཀྱི་གནས་ལུགས་དབྱིངས་རིག་དབྱེར་མེད་འོད་གསལ་བའི་ངང་དུ་མཉམ་པར་འཇོག་མཛོད། དེ་ལྟ་བུའི་བྱིན་རླབས་ཀྱི་རིམ་པ་བརྟན་པར་བྱ་བའི་ཕྱིར་གཏོར་སྣོད་དབྱིངས་ཀྱི་གཞལ་ཡས་ཁང་དུ་ཚེ་གཏོར་རིག་པ་རང་བྱུང་ཚེ་ལྷ་ཡབ་ཡུམ་སྲས་དང་བཀའ་སྡོད་ཕྱག་བརྙན་གྱི་འཁོར་ལོར་ཤར་པ། རང་སྣང་ཡེ་ཤེས་ལྔ་ལྡན་གྱི་ཟེར་ཐག་འབྱམས་ཀླས་སུ་འཕྲོ་བ་འདི་ཉིད་ཁྱེད་རང་རྣམས་ཀྱི་སྤྱི་བོར་བཞག་པས་རྡོ་རྗེ་ཚེ་དཔག་མེད་ཀྱི་སྐུ་ལས་བདུད་རྩིའི་རྒྱུན་བྱུང་། ལུས་ཀྱི་ནང་གང་བས་སྤྲོས་བཅས་བུམ་པའི་དབང་ཐོབ། ལུས་གདོས་བཅས་ཀྱི་འབྱུང་
བ་རང་སར་ཟད་ནས་འཆི་མེད་འཇའ་ལུས་རྡོ་རྗེའི་སྐུ་ལྔར་རྫོགས། ཡུམ་ཙཎྜ་ལཱིའི་སྐུ་ལས་བྱུང་བའི་བདུད་རྩིའི་རྒྱུན་གྱིས་རྩ་གནས་ཐམས་ཅད་ལ་ཁྱབ་པས་སྤྲོས་མེད་གསང་བའི་དབང་ཐོབ། ངག་རླུང་གཡོ་རྩོལ་གྱི་རྒྱུ་བ་དབྱིངས་སུ་ཐིམ་པས་འགག་མེད་གྲགས་སྟོང་བརྗོད་བྲལ་རྡོ་རྗེའི་གསུང་ལྔར་སྨིན། འགྲོ་འདུལ་འཕགས་པའི་སྐུ་ལས་བྱང་སེམས་དཀར་དམར་གྱི་བདུད་རྩིའི་རྒྱུན་བྱུང་བས་སྤྱི་བོ་དང་། གསང་གནས་ཀྱི་འཁོར་ལོའི་མཐར་ཐུག་པའི་བར་བརྟན་པས་ཤིན་ཏུ་སྤྲོས་མེད་ཤེས་རབ་ཡེ་ཤེས་ཀྱི་དབང་ཐོབ། ཟག་བཅས་འཕོ་བའི་ཁམས་བདེ་ཆེན་འགྱུར་མེད་ཀྱི་དྲྭ་བར་བསྡམས་པས་ཡིད་རིག་སྟོང་ཁྱབ་བརྡལ་ཡེ་ཤེས་རྡོ་རྗེའི་ཐུགས་ལྔ་མངོན་དུ་གྱུར། རྟ་མཆོག་དབང་གི་སྐུ་ལས་བདུད་རྩིའི་རྒྱུན་བྱུང་བས་ལུས་ཀྱི་ཕྱི་ནང་ཐམས་ཅད་ལ་ཁྱབ་པས་བླང་དོར་གཉིས་འཛིན་གྱི་རྟོག་པ་བཅོམ། རབ་ཏུ་སྤྲོས་མེད་བཞི་པ་ཚིག་ལས་འདས་པའི་དབང་ཐོབ། སྣང་བ་ཐམས་ཅད་གཞི་ལ་ཐིམ་པས་རང་རིག་ཀ་དག་བུམ་པ་སྐུའི་སྦུབས་ནང་གསལ་སྤྲོས་པ་མེད་པའི་ལྷུམས་སུ་ཞུགས་པས། རང་སྣང་སྐུ་དང་ཡེ་ཤེས་འབྱམས་ཀླས་ཀྱི་ཡོན་ཏན་མ་བཙལ་གདོད་ནས་རྫོགས་པ། འཆི་མེད་ཀུན་ཏུ་བཟང་པོའི་དབྱིངས་འགྱུར་མེད་རྡོ་རྗེའི་ཡོན་ཏན་ལྔ་ལ་རང་བྱན་ཆུབ། ཕྱག་བརྙན་
མཁའ་ལྡིང་རྒྱལ་པོའི་སྐུ་ལས་བདུད་རྩིའི་རྒྱུན་བྱུང་བ་སྒོ་གསུམ་ལ་ཞུགས་པས། སྣང་གསུམ་ཐ་དད་དུ་འཛིན་པའི་དྲི་མ་བག་ཆགས་ཀྱི་ས་བོན་དང་བཅས་པ་སྦྱངས། སྤྲོས་པ་ཐམས་ཅད་དང་བྲལ་བ་རིག་པ་རྩལ་གྱི་དབང་ཆེན་བསྐུར་ཐོབ་དང་བྲལ་བ་ཐོབ། ཕྱིར་གསལ་ཕྱོགས་ལྷུང་འབད་རྩོལ་དང་བྲལ་བའི་གཞན་སྣང་མཁའ་ཁྱབ་ཀྱི་ཆོ་འཕྲུལ་དུས་བཞི་མཉམ་པ་ཉིད་ཀྱི་དབྱིངས་སུ་རྒྱུན་གྱི་རྟག་པར་འཆར་བའི་རྡོ་རྗེའི་ཕྲིན་ལས་ལྔ་མངོན་དུ་བྱེད་པར་ནུས་པའི། དབང་མཆོག་རྒྱལ་པོ་རྣམས་སྟན་ཐོག་གཅིག་ཏུ་ཡོངས་སུ་རྫོགས་པར་ཐོབ་བྱུང་སྙམ་པའི་ངེས་ཤེས་སྐྱེད་ཅིག །ཨོཾ༔ སྐྱེ་འགག་མེད་པ་དབྱིངས་ཀྱི་སོགས་དང་། ཨོཾ་ཨཱཿཧཱུྃ་ཧྲཱིཿཁྲོཾ་ཨཱ་ཡུརྫྙཱ་ན་ཚེ་བྷྲཱུྃ༔ ཞེས་རྩ་སྔགས་དང་། ཨ་ཨཱ་ཨི་ཨཱི་སོགས་རྩ་ཡིག་དབྱངས་གསལ་བརྗོད་བཞིན་དབང་བསྐུར། མཐར། དེ་ལྟར་དབང་མཆོག་སྦྱིན་པའི་མཐུས། །རྟག་ཁྱབ་འོད་གསལ་ཆེན་པོའི་ཀློང་། །རང་རིག་དུས་གསུམ་མི་འགྱུར་བ༔ གདོད་ནས་མ་སྐྱེས་འཆི་བ་མེད༔ རྩ་བྲལ་ནམ་མཁའི་རང་བཞིན་ལ༔ གཟུང་འཛིན་འཆི་བདག་བྱུང་ཁུངས་སྟོང༔ བསྒོམ་བྱ་སྒོམ་བྱེད་ཀ་ནས་དག༔ བསྒྲུབ་བྱ་སྒྲུབ་བྱེད་དབྱིངས་སུ་འདྲེས༔ གཤིས་ལུགས་རིག་པ་ཟང་ཀ་མ༔ དྭངས་སངས་སྤྲོ་བསྡུ་བྲལ་བའི་ངང༔ སྒོ་གསུམ་ཅོག་གཞག་ཆེན་པོར་ཀློད༔ དབྱིངས་རིག་དབྱེར་མེད་འོད་གསལ་ཆེ། །
འཇའ་ལུས་འཆི་མེད་རྡོ་རྗེའི་སྲོག །རྟག་བརྟན་ཆེན་པོའི་ཉམས་སྐྱོངས་ཤིག །ཅེས་བརྗོད་ལ་ཅུང་ཟད་མཉམ་པར་འཇོག་བཅུག །ཚེ་གཏོར་གྱི་རས་མ་རྩ་བ་གསུམ་གྱི་དངོས་གྲུབ་དྭངས་མའི་བཅུད་དུ་འཁྱིལ་བ་ལ་ལོངས་སྤྱོད་པས་འཇའ་ལུས་རྡོ་རྗེའི་སྐུ་འགྲུབ་ཅིང་། འཁོར་བ་སྲིད་དུ་ཚེ་དཔག་མེད་དང་མཚུངས་པའི་ཕྲིན་ལས་ཐོགས་པ་མེད་པའི་མཐུ་ཐོབ་པར་མོས་ལ། གཏོར་མའི་ཆ་ཤས་མཚོན་པའི་ཚེ་རིལ་བདུད་རྩི་བཅས་སྦྱིན། དེ་ལྟར་དོན་གྱི་དབང་ཆེན་རྩལ་སྤྲུགས་སུ་བསྐུར་ཅིང་ཐོབ་པ་དེ་ཉིད་ལས་ནམ་ཡང་མི་འགྱུར་བའི་ཕྱིར། དབྱིངས་ཀྱི་མགོན་པོ་ཡུམ་སྲས་ཕྱག་བརྙན་དང་བཅས་པའི་དཀྱིལ་འཁོར་པ་རྩ་གསུམ་རྒྱ་མཚོའི་ཚོགས་དང་བཅས་པས་བཀྲ་ཤིས་ཀྱི་མེ་ཏོག་འཐོར་བས་རབ་ཏུ་གནས་ཤིང་། དགེ་ལེགས་ཕུན་སུམ་ཚོགས་པའི་ཚིགས་སུ་བཅད་པས་མངའ་གསོལ་བར་མོས། ཧཱུྃ་ཧྲཱི༔ འགྱུར་བ་མེད་པ་རྡོ་རྗེའི་སྐུ༔ འགག་པ་མེད་པ་རྡོ་རྗེའི་གསུང༔ འཁྲུལ་པ་མེད་པ་རྡོ་རྗེའི་ཐུགས༔ འཆི་མེད་རྡོ་རྗེའི་བཀྲ་ཤིས་ཤོག༔ ཅེས་སོགས་བཀྲ་ཤིས་ཅི་རིགས་བརྗོད། དེ་དག་གིས་ཚེ་རྒྱུད་རྡོ་རྗེ་ཕྲེང་བའི་ཐོག་མར་དགེ་བ་ཚེ་བདག་ཡུམ་སྲས་བཅས་ཀྱི་གསང་བའི་སྒྲུབ་ཐབས་མན་ངག་རྫོགས་པ་ཆེན་པོའི་ལུགས་སུ་བཀྲལ་པའི་དབང་བསྐུར་ལེགས་པར་གྲུབ་པའི་ཕན་
ཡོན་ནི། གཞུང་ལས། སྣོད་བཅུད་ནུས་ཡུལ་ཚོགས་པ་ན༔ ཚེ་ལ་དབང་ཐོབ་ཡེ་ཤེས་བརྙེས༔ མཆོག་ཐུན་ཅིག་ཅར་འགྲུབ་པའི་ཐབས༔ སྨིན་བྱེད་ཀུན་གྱི་མཐུར་ཐག་གོ༔ ཞེས་བསྔགས་པར་མཛད་པ་ཉིད་ལེགས་པར་གྲུབ་པ་ཡིན་པས། དེ་དག་གི་སྐབས་སུ་ཐོབ་པའི་རིག་འཛིན་གྱི་སྡེ་སྣོད་ལས་གསུངས་པ་སྤྱི་དང་། ཁྱད་པར་གྱིས་ཕྱེ་བའི་བསླབ་སྡོམ་གྱི་གནས་རྣམས་ཅི་ནུས་སུ་བསྲུང་བར་བགྱིའོ་སྙམ་པའི་བློས་འདིའི་རྗེས་ཟློས། གཙོ་བོས་ཇི་ལྟར་སོགས་སྤྱི་ལྟར་བྱ་ཞིང་། རྗེས་དམིགས་མེད་དུ་གཞག །དགེ་བསྔོ་སྨོན་ལམ་བཀྲ་ཤིས་ཇི་ལྟར་འོས་པས་མཐའ་བརྒྱན་ནོ།། ༈ །།རྡོ་རྗེ་ཚེ་དབང་ནོར་བུའི་དགོངས་གཏེར་བསྟན་བཅོས་ཀྱི་ཚུལ་དུ་བསྩལ་པའི་ཚེ་དཔག་མེད་པའི་སྒྲུབ་ཐབས་ཁྲིད་ཀྱི་ཡི་གེ་སྐུ་གསུམ་ལམ་རིམ་མཆོག་གི་སྒོ་འབྱེད་ལྟར་ཟབ་ཁྲིད་འཆད་པའི་དུས་ལ་བབས་པ་ན། ཐོག་མར་ཚིག་བདུན་དང་། ཨེ་མ་ཧོ༔ སྤྲོས་བྲལ་ཆོས་ཀྱི་དབྱིངས་ཀྱི་སོགས་སྐུ་གསུམ་གསོལ་འདེབས་དང་། རྡོ་རྗེ་སློབ་དཔོན་སོགས་ཀྱི་རྒྱུན་བཤགས་རྗེས། མཎྜལ་དང་ཆོས་བསྐུལ་མཐར། འོ། ནམ་མཁའི་མཐའ་མཉམ་གྱི་སེམས་ཅན་ཐམས་ཅད་མཐའ་མེད་འཁོར་བའི་རྒྱ་མཚོ་ཉམ་ངའི་འཇིགས་དང་སྡུག་བསྔལ་ལས་ཐར་དུས་མེད་པ་
འདི་རྣམས། བདག་གིས་བསྒྲལ་ཏེ་འཆི་མེད་མགོན་པོའི་གོ་འཕང་གཏན་གྱི་བདེ་མཆོག་དམ་པའི་གནས་ལ་འགོད་པར་བྱ། དེའི་ཆེད་དུ་བླ་མ་ཚེ་དང་ཡེ་ཤེས་དཔག་ཏུ་མེད་པའི་གོ་འཕང་རིན་པོ་ཆེ་མྱུར་དུ་ཐོབ་པའི་ལམ་གྱི་གདམས་ཟབ་གྲོལ་ཁྲིད་ཀྱི་རིམ་པ་ནོད་ནས། དོན་ཚུལ་བཞིན་ཉམས་སུ་ལེན་པར་བྱའོ་སྙམ་པའི་ཀུན་སློང་བྱང་ཆུབ་ཀྱི་སེམས་ལ་བློ་བཞག་ནས། སྣོད་ཀྱི་སྐྱོན་གསུམ། དྲི་མ་དྲུག་གིས་མ་སྦགས་པའི་རྒྱུད་དག་ཅིང་། སྔགས་བླ་མེད་ཀྱི་ལྟ་སྒོམ་རྡོ་རྗེ་གསུམ་གྱི་རྣལ་འབྱོར་ལ་གནས་པས་གསན་འཚལ། གང་གསན་བྱའི་ཆོས་ལའང་། རྒྱལ་བའི་ཐུགས་རྗེ་རྒྱུན་གྱིས་རྟག་པའི་ཕྲིན་ལས་འགོག་མེད་ཀྱི་སྣང་བརྙན་ཐེག་པ་རྒྱ་མཚོའི་སྤྱི་ཕུད། རིག་འཛིན་སྔགས་ཀྱི་ཐེག་པ་ཐམས་ཅད་ཀྱི་མཐར་ཐུག །གནས་སྐབས་འཆི་བ་མེད་པའི་ཚེ་དང་མཐར་ཐུག་ཡེ་ཤེས་རྡོ་རྗེ་ཀུན་བཟང་འོད་མི་འགྱུར་བའི་འོད་སྐུར་འགྲུབ་བྱེད་ཀྱི་མན་ངག །བཀའ་གཏེར་དག་སྣང་ལ་སོགས་པའི་སྒོ་མཐའ་ཡས་པར་བྱོན་པ་རྣམས་ལས། ད་ལམ་གྱི་སྐབས་སུ་བབས་པ་འདི་ནི། ཤར་ཀཿཐོག་པའི་རིག་འཛིན་ཆེན་པོ་རྡོ་རྗེ་ཚེ་དབང་ནོར་བུ་གཏེར་བཞད་རྩལ་ཞེས་ཡོངས་སུ་གྲགས་ལ། མཁས་ཤིང་གྲུབ་པ་བརྙེས་པའི་སློབ་དཔོན། འོད་དཔག་མེད་
མགོན་ཨོ་རྒྱན་བླ་མ་དང་རྣམ་དབྱེར་མེད་པ་དེ་ཉིད་ཀྱི་ཟབ་མོ་དགོངས་པའི་གཏེར་མཛོད་ཀྱི་དབྱིངས་སྒྲོམ་ལས་ཕྱུང་པ་ཉིད་གཙོར་མཛད། བཀའ་གཏེར་གྱི་མན་ངག་སྤྱི་དང་། ཁྱད་པར་གཏེར་ཆེན་པདྨ་བདེ་ཆེན་གླིང་པའི་ཚེ་སྒྲུབ་རྡོ་རྗེ་རྒྱ་མདུད་ཀྱི་དོན་ཁྲིད་བཅས། བཀའ་གཏེར་ཆུ་བོ་གསུམ་འདུས་སུ་བསྩལ་པའི་བཅོམ་ལྡན་འདས་ཚེ་དང་ཡེ་ཤེས་དཔག་ཏུ་མེད་པ་སྒྲུབ་པའི་ཐབས་ཀྱི་གདམས་ངག་ཁྲིད་རིམ་དང་འབྲེལ་བར་བཀྲལ་བ་སྐུ་གསུམ་ལམ་རིམ་མཆོག་གི་སྒོ་འབྱེད་ཀྱི་སྟེང་ནས་ཁྲིད་ལུང་འབོགས་པ་ཡིན། དེ་ལ་གང་གིས་ཉམས་ལེན་བྱེད་པའི་གང་ཟག །ཚེ་འདི་དང་ཕྱི་མའི་བདེ་འབྱོར་དུ་བཏགས་པའི་འཁོར་བའི་རྒྱུ་འབྲས་ལ་ཞེན་པ་ལྡོག་པ། ལྟར་སྣང་ཉི་ཚེ་བ་ཡུད་ཙམ་ལ་ཡིད་མི་བརྟོན་ཅིང་། མཐར་ཐུག་འཆི་མེད་ཞི་བ་མཆོག་གི་བདེ་ཆེན་དོན་དུ་གཉེར་བའི་སྐལ་བཟང་གི་སྐྱེ་བོ་རྣམས་ཀྱིས། གང་ཉམས་སུ་བླང་བྱའི་སྒྲུབ་ཐབས་ཁྲིད་ཡིག་སྐལ་ལྡན་བགྲོད་པ་གཅིག་པའི་ལམ་གྱི་སྒོ་ཆེན་འདིར་དབྱེ་བར་བྱ་སྟེ། དེ་ལ་དམ་པ་ཆོས་ཀྱི་སྐལ་བ་དང་ལྡན་པའི་གང་ཟག་བྱང་ཆུབ་སེམས་ལ་བློ་སྦྱངས་ཤིང་སོགས་ཁྲིད་ཡིག་དབུ་ནས་བཀླག་ཅིང་མཐའི། ལམ་རིམ་སྤྱིའི་ཆོས་ཏེ་འབད་པར་གདམས་བྱའོ། །ཞེས་གསུངས་པ་བཞིན། རྒྱུད་དབང་གིས་སྨིན་
པར་བྱས་ཏེ། ཐུན་མོང་གི་ལམ་རིམ་གྱིས་ཉན་རང་དང་། ཐུན་མིན་གྱི་སྔོན་འགྲོ། ཕྱི་ནང་བྱང་ཆུབ་སེམས་དཔའི་སྡེ་སྣོད་དང་། ཀྲྀ་ཡོག་ཕྱི་རྒྱུད་སྡེ་གསུམ་གྱི་རྣལ་འབྱོར་དང་མཐུན་པས་རྒྱུད་དང་། སྤྲུལ་སྐུའི་ཞིང་སྦྱངས། ནང་རྒྱུད་སྡེ་གསུམ་གྱི་སྒོ་གསུམ་དང་མན་ངག་བསྐྱེད་བཟླས་རྫོགས་པའི་རིམ་པས་སྣང་གྲགས་རྟོག་པ་དག་པ་རབ་འབྱམས་རྒྱལ་བའི་རྡོ་རྗེ་གསུམ་གྱི་ངོ་བོར་གཏན་ལ་ཕབ་པས་ལོངས་སྐུའི་ཞིང་སྦྱངས། ནང་རྒྱུད་སྡེ་གསུམ་གསང་བ་ཀ་དག་ཕྱག་རྒྱ་ཆེན་པོ་དང་། ཤིན་ཏུ་སྤྲོས་མེད་དོན་གྱི་རྣལ་འབྱོར་ལ་བརྟེན་ནས་ཆོས་སྐུའི་ཞིང་སྦྱང་ཞིང་། ཐུན་མཚམས་རྗེས་སྤྱོད་ཀྱི་རྣལ་འབྱོར་རྣམས་དང་བཅས་པས་བསྙེན་སྒྲུབ་ལས་སྦྱོར་ཡན་ལག་དང་བཅས་པ་ཚང་བ། ཚིག་ཉུང་ངུའི་སྒོ་ནས་དོན་རྒྱ་ཆེར་བཀྲལ་པ་འདི་ལ་ཉམས་ལེན་སྙིང་པོར་དྲིལ་ནས་འཆི་མེད་དོན་གྱི་ཚེ་མཆོག་རབ་བརྟན་རྡོ་རྗེའི་གནས་ཐོབ་པར་མཛོད་ཅིག །དེ་ལྟར་ཟབ་ཁྲིད་ཉན་བཤད་བགྱིས་པ་འདིའི་མཚོན། བདག་གཞན་དུས་གསུམ་གྱི་དགེ་ཚོགས་བྱང་ཆུབ་ཀྱི་རྒྱུར་ཡོངས་སུ་བསྔོ་བ་སོགས་ཀྱིས་མཚམས་སྦྱར་ཏེ་མཐར་དབྱུང་བས་གྲུབ་བོ། །དེ་དག་གིས་རིགས་བདག་བཅོམ་ལྡན་འདས་ཚེ་དཔག་མེད་ཀྱི་སྒྲུབ་སྐོར་རྣམས་གྲུབ་བོ།། །