གུ་རུ་ཞི་དྲག་ཐུན་མོང་གི་ཐུགས་སྒྲུབ་བདེར་གཤེགས་འདུས་པའི་ལས་བྱང་དངོས་གྲུབ་སྙིང་པོ།
གུ་རུ་ཞི་དྲག་ཐུན་མོང་གི་ཐུགས་སྒྲུབ་བདེར་གཤེགས་འདུས་པའི་ལས་བྱང་དངོས་གྲུབ་སྙིང་པོ་བཞུགས་སོ། །
ན་མོ་བཛྲ་ཨཱ་ཙརཱ་པདྨ་སཾ་མ་བྷ་ཝ་མངྒ་ལ་ཤྲཱི་ལེ། བདེ་སྟོང་དབྱེར་མེད་སྲིད་བཞིའི་དཔལ། །ཀུན་ཏུ་བཟང་པོ་ཧེ་རུ་ཀ །གངས་ཅན་ཁོད་པའི་སྐྱེ་བོ་རྣམས། །མགོན་པོ་ཕག་མོ་གྲུ་པར་གླིང་། །དཀྱིལ་འཁོར་ཀུན་གྱི་ཁྱབ་པའི་བདག །གང་དེའི་སྟོན་འཁོར་ཐ་མི་དད། །སྲས་ཀྱི་ཐུ་བོ་སྟག་ལུང་པར། །མཚན་བྱ་གསང་བའི་མཛོད་ཀྱི་སྒོ། །དབྱེ་བ་ཞེས་བྱའི་རྣམ་ཐར་ཕུལ། །གསང་བའི་གཏམ་དུ་བཟློ་མཛད་པར། །ཉིད་གྱི་སྔོན་བྱུང་འཕགས་ཡུལ་དུ། །སྐུ་ཡི་བཀོད་པ་བརྒྱུད་བསྟན་ལས། །པདྨའི་རྒྱལ་པོ་འཁྲེགས་པ་ཅན། །གཏུལ་བ་གཅིག་ཅེས་རྣམ་པར་བསྒྲགས། །ཡབ་སྲས་གསང་གསུམ་དབྱེར་མེད་པས། །སྤྱེས་རབ་ལོགས་སུ་མི་དགོས་ཞེས། །དེས་ཀྱང་ནང་གི་འཁོར་ལ་གདམས། །དེ་ལྟའི་གསང་བ་བསམ་མི་ཁྱབ། །སངས་རྒྱས་
རིང་གི་སྤྱོད་ཡུལ་ལས། །རྨོང་པ་བདག་འདྲའི་ཡུལ་མིན་ཡང་། །ཟློག་མེད་མོས་པ་འཕེལ་པའི་རྒྱུས། །གསང་ཆུས་དབོན་པོ་ཀཱིརྟི་ཤྲཱིའི། །ཞལ་ལུང་སྤྲིན་སྲོལ་ལམ་ཟབ་མོ། གྲུབ་པའི་སྐྱེ་བོ་བརྒྱུད་མང་ལས། །འངས་པ་དེང་འདིར་གསལ་བྱའི་ཕྱིར། །རིགས་ཀྱི་ཁྱབ་བདག་མཆོག་ཉིད་ལ། །གསོལ་བ་བཏབ་སྟེ་ཡི་གེར་བགྱི། །གནང་ཞིང་བྱིན་གྱིས་རླབས་ཏུ་གསོལ། །དེ་འདིར་གུ་རུ་ཞི་དྲག་གཅིག་དྲིལ་གྱི་སྒྲུབ་ཐབས་ཟབ་མོའི་ལ་འཇུག་པར་འདོད་པས། བྱ་བའི་ལས་ཀྱི་རིམ་པ་ལ་གསུམ། སྔོན་འགྲོ། དངོས་གཞི། རྗེས་སོ། དང་པོ་ལ་སྦྱོར་བའི་སྔོན་འགྲོ་དང་། ཆོ་གའི་སྔོན་འགྲོ་གཉིས་ལས། དང་པོ་ནི་དབང་བསྐུར་ལས་ཇི་སྐད་བཤད་པ་བཞིན། སྒྲུབ་མཆོད་ལ་ཡང་འདུ་བྱ་ཞིང་
གཞན་ཡང་འོག་ཏུ་དགོས་པའི་ཡོ་བྱད་རྣམས་ལེགས་པར་ཚགས་སུ་ཚུད་པར་བྱའོ། གཉིས་པ་ཆོ་གའི་སྔོན་འགྲོལ་རྣམས་གྲངས་བཅུ་གཞི་ཡོད་པ་ལས། དང་པོ་གནས་ཡུལ་བྱིན་རླབས་དང་བཀའ་བབས་གསོལ་འདེབས་བྱ་བ་ནི། ཧཱུཾ་ཧཱུཾ་ཧཱུཾ། ཆོས་སྐུ་སྐྱེ་བ་མེད་པའི་ངང་ལས་གཟུགས་སྐུ་སྒྱུ་མའི་རོལ་པར་སྣང་བ་ཐམས་ཅད། བླ་མ་ཡི་དམ་མཁའ་འགྲོའི་་སྐུ་དང་ཞིང་ཁམས་སུ་མངོན་པར་བྱང་ཆུབ་པ་ལས་སྣང་སྲིད་སྣོད་བཅུད་ཐམས་ཅད་འོད་དུ་འབར་ཞིང་ལྷ་དང་ལྷ་མོའི་རང་བཞིན་གྱི་གང་བརྣམས་ཀྱིས་རྡོ་རྗེའི་གླུ་ལེན་པ་དང་། བཀྲ་ཤིས་ཀྱི་ཚིགས་སུ་བཅད་པ་བརྗོད་པ་དང་། ཕྱི་ནང་གསང་གསུམ་གྱི་མཆོད་པའི་ཆར་ཆེན་པོ་འབེབས་པར་གྱུར། གུ་རུ་དེ་ཝ་ཌཱ་ཀྐཱི་ནཱི་བཛྲ་སྥ་ར་ཎ་ཁཾ། ཨོ་ཨཱཿཧཱུཾ། འོག་མིན་ཆོས་དབྱིངས་གནས་མཆོག་དམ་པ་ནས། སྐྱེ་འགགས་འགྱུར་མེད་སྤྲོས་བྲལ་ཆོས་ཀྱི་སྐུ། །ཀུན་ཏུ་བཟང་པོ་ཆེ་མཆོག་ཧེ་རུ་ཀ །གསོལ་བ་འདེབས་སོ་དབང་བསྐུར་བྱིན་
གྱིས་བརློབས། །རྣམ་དག་གསང་བ་མཆོག་གི་དཀྱིལ་འཁོར་དུ། །མཚན་དཔེས་རབ་བརྒྱན་ལོངས་སྤྱོད་རྫོགས་པའི་སྐུ། །རྡོ་རྗེ་སེམས་དཔའ་ཞི་ཁྲོ་བཀའ་བརྒྱད་ལྷ། །གསོལ་བ་འདེབས་སོ་དབང་བསྐུར་བྱིན་གྱིས་རློབས། །ཐུགས་རྗེ་འགྲོ་བ་འདུལ་བའི་ཞིང་ཁམས་སུ། གང་ལ་གང་འདུལ་དེར་སྟོན་སྤྲུལ་པའི་སྐུ། །རྡོ་རྗེ་འཆང་ཆེན་ཤཱག་ཐུབ་དགའ་རབ་ལ། །གསོལ་བ་འདེབས་སོ་དབང་བསྐུར་བྱིན་གྱིས་རློབས། །རིག་པ་འཛིན་པའི་གནས་མཆོག་དམ་པ་རུ། བཀའ་ཡི་བསྡུ་བ་བཛད་པའི་རྡོ་རྗེ་ཆོས། གསང་བའི་བདག་པོ་རྡོ་རྗེ་འཆང་ཆེན་ལ། །གསོལ་བ་འདེབས་སོ་དབང་བསྐུར་བྱིན་གྱིས་རློབས། །སོ་ས་གླིང་གི་དུར་ཁྲོད་ཆེན་པོ་རུ། །བདེ་བྱེད་བརྩེགས་པའི་གཏེར་སྲུང་བདག་མོ་མཛད། །མཁའ་འགྲོ་གཙོ་མོ་ལས་ཀྱི་དབང་ཆེན་ལ། །
།གསོལ་བ་འདེབས་སོ་དབང་བསྐུར་བྱིན་གྱིས་རློབས། །མ་ལ་ཡ་ཡི་གནས་མཆོག་དམ་པ་རུ། །ཕྱག་ན་རྡོ་རྗེའི་བྱིན་རླབས་ཆོས་ཆར་ཕབ། །གླེགས་བམ་དབང་ཐོབ་ཨིན་དྲ་བྷུ་ཏི་ལ། །།གསོལ་བ་འདེབས་སོ་དབང་བསྐུར་བྱིན་གྱིས་རློབས། །རྩབ་འགྱུར་ཚལ་གྱི་དུར་ཁྲོད་ཆེན་པོ་ནས། །རྡོར་སེམས་སྤྲུལ་པ་དགའ་རབ་དངོས་དང་མཇལ། །རྫོགས་ཆེན་དབང་ཐོབ་ཤྲཱི་སེང་ཧ་ལ། །གསོལ་བ་འདེབས་སོ་དབང་བསྐུར་བྱིན་གྱིས་རློབས། །དཔའ་ལུང་ཡང་ཕུ་ནགས་ཚལ་དྲྭ་ཅན་དུ། །ཀུན་བཟང་སྤྲུལ་པ་རྡོ་རྗེ་འཆང་གི་སྲས། །སྒྲ་དོན་བཀའ་བབ་གོ་མ་དེ་ཝལ། །གསོལ་བ་འདེབས་སོ་དབང་བསྐུར་བྱིན་གྱིས་རློབས། །ཨོ་རྒྱན་དྷ་ན་ཀོ་ཤའི་མཚོ་གླིང་དུ། །པད་སྡོང་ལས་འཁྲུངས་རང་བྱུང་སྐྱེ་ཤི་བྲལ། །རིག་རྩལ་དབང་ཐོབ་པདྨ་འབྱུང་གནས་ལ། །གསོལ་བ་འདེབས་སོ་དབང་བསྐུར་བྱིན་གྱིས་རློབས། །ཤར་ཕྱོགས་བསིལ་བ་ཚལ་གྱི་དུར་ཁྲོད་དུ། །ཐུབས་ཀྱི་རིག་འཛིན་རྡོ་རྗེ་གྲུབ་པ་རྩལ། །ཡང་དག་གྲུབ་པའི་ཧཱུཾ་ཆེན་ཀ་ར་ལ། །གསོལ་བ་འདེབས་སོ་དབང་བསྐུར་བྱིན་གྱིས་རློབས། །ལྷོ་ཕྱོགས་
སྐུ་ལ་རྫོགས་པའི་དུར་ཁྲོད་དུ། །སྐུ་ཡི་རིག་འཛིན་རྡོ་རྗེ་བསམ་འགྲུབ་རྩལ། །གཤིན་རྗེའི་གཤེད་གྲུབ་འཇམ་དཔལ་བཤེས་གཉེན་ལ། །གསོལ་བ༴ །ནུབ་ཕྱོགས་པདྨ་བརྩེགས་པའི་དུར་ཁྲོད་དུ། །གསུང་གི་རིག་འཛིན་རྡོ་རྗེ་དྲག་པོ་རྩལ། །དབང་ཆེན་གྲུབ་པའི་ནཱ་ག་ཛུ་ན་ལ། །གསོལ་བ༴ །བྱང་ཕྱོགས་ལས་རབ་རྫོགས་པའི་དུར་ཁྲོད་དུ། །ཕྲིན་ལས་རིག་འཛིན་རྡོ་རྗེ་ལས་གྲུབ་རྩལ། །ཕུར་པ་གྲུབ་པའི་པྲ་ཝ་ཧ་སྟི་ལ། །གསོལ་བ༴ །ཤར་ལྷོ་ལྷུན་གྱི་གྲུབ་པའི་དུར་ཁྲོད་དུ། །ཡོན་ཏན་རིག་འཛིན་རྡོ་རྗེ་གྲོ་བོ་ལོད། །བདུད་རྩི་གྲུབ་པའི་བཱི་མ་མི་ཏྲ་ལ། །གསོལ་བ༴ །ལྷོ་ནུབ་གསང་ཆེན་རོལ་པའི་དུར་ཁྲོད་དུ། །རྦོད་གཏོང་རིག་འཛིན་རྡོ་རྗེ་དབང་སྡུད་རྩལ། །མ་མོ་གྲུབ་པའི་དྷ་ན་སང་ཀྲྀ་ལ། །
གསོལ་བ༴ ནུབ་བྱང་བདེ་ཆེན་བརྡལ་བའི་དུར་ཁྲོད་དུ། །མཆོད་བསྟོད་རིག་འཛིན་རྡོ་རྗེ་གཤོག་རྒོད་རྩལ། །དྲེགས་པ་གྲུབ་པའི་རོམྦུ་གུ་ཧྱ་ལ། །གསོལ་བ༴ བྱང་ཤར་ལང་ཀ་བརྩེགས་པའི་དུར་ཁྲོད་དུ། །དྲག་སྔགས་རིག་འཛིན་རྡོ་རྗེ་ཐེག་གཤོག་རྩལ། །དམོད་པ་གྲུབ་པའི་ཤཱིནྟཾ་གརྦྷ་ལ། །གསོལ་བ༴ ལྷོ་ནུབ་རྔ་ཡབ་གླིང་ཕྲན་གནས་མཆོག་ཏུ། །ཀུན་གྱི་བཅུད་བསྡུས་རྡོ་རྗེ་ཐོད་ཕྲེང་རྩལ། །ཡོངས་རྫོགས་གྲུབ་པའི་མ་ཧཱ་གུ་རུ་ལ། །གསོལ་བ༴ བལ་ཡུལ་ཡང་ལེ་ཤོད་ཀྱི་བྲག་ཕུག་ཏུ། །ཞི་བའི་བཀའ་བབ་མཁས་པའི་སྡེ་སྣོད་བདག །རྡོ་རྗེ་དབྱིངས་གྲུབ་དྲི་མེད་བཤེས་གཉེན་ལ། །གསོལ་བ༴ སྦྲགས་ཀྱི་ཡངས་རྫོགས་ཤེལ་གྱི་བྲག་ཕུག་ཏུ། །འཇམ་དཔལ་བཀའ་ཕབ་ཉི་ཟླ་གདན་དུ་བཏིང་། །སློབ་དཔོན་ཆེན་པོ་སངས་རྒྱས་ཡེ་ཤེས་ལ། །
གསོལ་བ༴ །དཔལ་གྱི་བསམ་ཡས་མཆིམ་ཕུའི་དགེ་གོང་དུ། །དབང་ཆེན་བཀབ་བབ་རྟ་སྐད་སྤྱི་བོར་འབྱིན། །དགེ་སློང་ངན་ལམ་རྒྱལ་བ་མཆོག་དབྱངས་ལ། །གསོལ་བ༴ །ལྷོ་བྲག་མཁར་ཆུ་གཉེན་གྱི་དབེན་གནས་སུ། །ཡང་དག་བཀའ་བབ་མཁའ་ལ་བྱ་བཞིན་འཕུར། །སློབ་དཔོན་ཆེན་པོ་ནམ་མཁའི་སྙིང་པོ་ལ། །གསོལ་བ༴ །ཡར་ལུང་ཤེས་བྲག་གཉེན་གྱི་དབེན་གནས་སུ། །ཆེ་མཆོག་བཀའ་བབ་བྲག་ལས་བདུད་རྩི་འབྱིན། །གཉག་ཆེན་ཛྙཱ་ན་གུ་མ་ར་ཛ་ལ། །གསོལ་བ༴ །མོན་ཁ་དེ་རིང་སེང་གེ་རྫོང་གསུམ་དུ། །ཕྲིན་ལས་བཀའ་བབ་བྲག་ལ་ཕུར་པ་འདེབས། །མ་གཅིག་རྡོ་མོ་མཁའ་ཆེན་མཚོ་རྒྱལ་ལ། །གསོལ་བ༴ །ཡར་ལུང་ཤམ་པོ་གངས་ཀྱི་ར་བ་རུ། །མ་མོའི་བཀའ་བབ་བརྩ་རླུང་དབང་བསྐུར་ནས། །སློབ་
དཔོན་ཆེན་པོ་དཔལ་གྱི་ཡེ་ཤེས་ལ། །གསོལ་བ༴ སྤ་གྲོ་སྟག་ཚང་སེང་གེ་བསམ་འགྲུབ་ཏུ། །སྡེ་བརྒྱད་བཀའ་བབ་ལྷ་སྲིན་བྲན་དུ་ཁོལ། །སློབ་དཔོན་ཆེན་པོ་དཔལ་གྱི་སེང་གེ་ལ། །གསོལ་བ༴ བྲག་དམར་གཡའ་མ་ལུང་གི་དབེན་གནས་སུ། །མཐུ་སྟོབས་བཀའ་བབ་དམོད་པས་སྒྲོལ་བར་ནུས། །སྟོབས་མཆོག་གྲུབ་པའི་བཱཻ་རོ་ཙ་ན་ལ། །གསོལ་བ༴ དཔལ་གྱི་བསམ་ཡས་དབུ་རྩེ་རིགས་གསུམ་དུ། །བདེར་འདུས་བཀའ་བབས་གཞན་སྣང་ཟིལ་གྱིས་གནོན། །ཆོས་རྒྱལ་ཚངས་པ་ལྷ་ཡི་མེ་ཏོག་ལ། །གསོལ་བ༴ རྡོ་རྗེ་མེ་ལོང་གྲུབ་པའི་ཕོ་བྲང་ནས། །ཡོངས་རྫོགས་བཀའ་བབ་ཡ་མཚན་རྫུ་འཕྲུལ་འགྱེད། །གྲུབ་པའི་སྐྱེས་མཆོག་སངས་རྒྱས་དབོན་པོ་ལ། །གསོལ་བ༴ ལྷུན་གྲུབ་བདེ་བ་ཆེན་པོའི་ཕོ་བྲང་དུ། །པདྨས་
བྱིན་རླབས་ཟབ་མོའི་གཏེར་སྒོ་འབྱེད། །འདྲེན་མཆོག་རྒྱལ་པོ་བདུད་འཇོམས་རྡོ་རྗེ་ལ། །གསོལ་བ༴ བརྒྱུད་པའི་བཀའ་བབ་ཆུ་བོ་ཀུན་གྱི་དཔྱིད། །ཟབ་དོན་བདུད་རྩིས་སྐལ་ལྡན་སྨིན་པར་མཛོད། །ཡོངས་འཛིན་དམ་པ་བཟང་པོའི་མཚན་ཅན་ལ། །གསོལ་བ༴ བཀའ་བབ་ཆུ་བོ་ཀུན་འདུས་ཕོ་བྲང་དུ། །རྒྱུད་ལུང་མན་ངག་ནོར་བའི་འབྱུང་གནས་མཆོག །བཀའ་དྲིན་མཉམ་མེད་བཛྲ་ཆེ་མཆོག་རྩལ། །གསོལ་བ༴ རང་བྱུང་ཐུགས་གསུང་སྐུ་རྟེན་གསལ་བའི་དབུས། །རིག་འཛིན་ཞལ་གྱི་བདུད་རྩིས་ལེགས་གཏམས་པ། །དམ་པའི་མཚན་གྱི་བྱིན་གྱིས་རླབས་དེ་ལ། །གསོལ་བ༴ རང་ལུས་རྣམ་དག་རྒྱལ་བའི་དཀྱིལ་འཁོར་དུ། །མཆོག་དང་ཐུང་མོང་དངོས་གྲུབ་ཀུན་རྩོལ་བའི། །བདེ་གཤེགས་ཀུན་འདུས་པདྨ་ཐོད་
ཕྲེང་རྩལ། །གསོལ་བ༴ ཕྱི་ནང་སྣང་སྲིད་དུར་ཁྲོད་ཞིང་ཁམས་སུ། །རྡོ་རྗེ་གསུང་དངོས་དཔའ་བོ་མཁའ་འགྲོ་དང་། །མཐུ་རྩལ་ཆེ་མངའ་ཆོས་སྐྱོང་གཏེར་བདག་ལ། །གསོལ་བ་འདེབས་སོ་དབང་བསྐུར་བྱིན་གྱིས་རློབས། །འགྱུར་མེད་སྐྱ་ཡི་དངོས་གྲུབ་སྩལ་དུ་གསོལ། །འགགས་མེད་གསུང་གི་དངོས་གྲུབ་སྩལ་དུ་གསོལ། །འཁྲུལ་མེད་ཐུགས་ཀྱི་དངོས༴ རྡོ་རྗེ་ཚེ་ཡི་དངོས༴ མཆོག་དང་ཐུན་མོང་དངོས༴ གཉིས་པ་སྔོན་གཏོར་བྲན་ལ། རང་ཉིད་གཟོད་ནས་ཡོངས་གྲུབ་ལྷག་པའི་ལྷ། །བདེ་གཤེགས་ཀུན་འདུས་པདྨོ་ཐོད་ཕྲེང་རྩལ། །དུད་ཁྲོད་ཆས་བརྒྱད་བརྗིད་པའི་གར་དགུར་སྔན། །སྣང་སྟོང་དབྱེར་མེད་ངང་དུ་གསལ་བར་འགྱུར། རྃ་ཡྃ་ཁྃ། རཏྣ་པཉྩ་ཨོཾ་ཨཱཿཧཱུྃ། བསྲེགས་གཏོར་བཀྲུས། རིན་པོ་ཆེ་ཡི་སྣོད་
བདུད་རྩིས་གང་བར་གྱུར། །ཞེས་བྱིན་རླབས། བྷཱུ་མི་པཱ་ཏི་ཀྵེ་ཏྲ་པ་ལས་པ་རི་ཝ་ར་བཛྲ་ས་མ་ཛ༔ ཞེས་པས་མགྲོན་དགུགས། བྷཱུ་མི་པ་ཏི་ཀྵེ་ཏྲ་པ་ལ་སོགས། ན་མ༔སརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷྱེ༔ སརྦ་ཤ་ཁ་ཨུཏྒ་ཏེ་སྥ་ར་ཎ་ཨི་མི་ག་ག་ན་ཁཾ་གྷྲིཧྣ་དཾ་བ་ལྱ་དི་སྭཱ་ཧཱ། ལན་གསུམ་གྱིས་འབུལ། བྷུ་མི་པ་ཏིཀྵེ་ཊ་པ་ལས་པཱ་རི་ཝ་ར་ཨརྒྷཾ་ནས། ཤཔྟ་པྲ་ཏཱི་ཙྪ་སྭཱ་ཧཱ། ཧཱུྃ། ས་བདག་ཞིང་སྐྱོང་འཁོར་དང་བཅས། །མཆོད་སྦྱིན་གཏོར་མ་འདི་བཞེངས་ལ། །སོགས་ནས། ཡིད་ལ་འདོད་པ་ཀུན་འགྲུབ་མཛོད། །ཅེས་རོལ་མོ་དང་བཅས་གཏོར་མ་ཕྱིར་བསྔོའོ། །བསུམ་པ་སྐྱབས་སུ་འགྲོ་བ་ནི། ན་མོ། བླ་མ་བདེ་གཤེགས་འདུས་པའི་སྐུ། །དཀོན་མཆོག་གསུམ་གྱི་རང་བཞིན་ལ། །བདག་དང་འགྲོ་དྲུག་སེམས་ཅན་རྣམས། །བྱང་ཆུབ་བར་དུ་སྐྱབས་སུ་མཆི། །ལན་གསུམ། །བཞི་པ་སེམས་བསྐྱེད་པ་ནི།
སེམས་བསྐྱེད་འགྲོ་བ་ཀུན་དོན་དུ། །བླ་མ་སངས་རྒྱས་བསྒྲུབ་ནས་ནི། །གང་ལ་གང་འདུལ་ཕྲིན་ལས་གྱིས། །གཞན་དོན་སྐྱོང་བར་སེམས་བསྐྱེད་དོ། །ཅེས་ལན་གསུམ། ལྔ་པ་ཚོགས་བསགས་པ་ནི། སྐུ་གསུམ་བླ་མ་གཤེགས་སུ་གསོལ། །ཉི་ཟླ་པདྨའི་གདན་ལ་བཞུགས། །སྒོ་གསུམ་གུས་པས་ཕྱག་འཚལ་ལོ། །ཕྱི་ནང་གསང་གསུམ་མཆོད་པ་འབུལ། །ཉམས་ཆགས་སྡིག་སྒྲིབ་མཐོལ་ལོ་བཤགས། །དུས་གསུམ་དགེ་ལ་རྗེས་ཡི་རང་། །མྱ་ངན་མི་འདའ་གཞན་དོན་བཞུགས། །ཡང་གསང་ཨ་ཏིའི་ཆོས་འཁོར་བསྐོར། །དགེ་ཚོགས་བགྱིས་པས་འགྲོ་བ་ཀུན། །སྤྲོས་བྲལ་དབྱིངས་ལ་འགོད་པར་ཤོག །ཅེས་ལན་གསུམ། དྲུག་པ་བཀའ་བསྒོ་བ་ལ་གཏོར་མ་ལས་སྔགས་ཀྱིས་གསང་། སྟོང་པའི་ངང་ལས་བྷྲུཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་
ཨོཾ་ཨཱཿཧཱུྃ་འོད་དུ་ཞུ་བ་ལས་བྱུང་བའི་བགེགས་ཀྱི་གཏོར་མ་འདོད་པའི་ཡོན་ཏན་ལྔ་དང་ལྡན་པའི་བདག་ཉིད་ཅན་དུ་བསམ་ལ། ཨོཾ་ཨཱཿཧཱུྃ། ལན་གསུམ་གྱིས་རླབས། སརྦ་བ་གྷཱ་ན་ཨ་ཀརྵ་ཡ་ཛཿཡ་ས་མགྲོན་དགུགས། དེ་ཉིད་གཏོར་སྔགས་བཏགས་པ་ལན་གསུམ་གྱིས་བསྡོས། རོལ་མོ་དང་བཅས། ཧཱུྃ་ཧྲཱིཿ བླ་མ་རྣམས་ཀྱི་བྱིན་རླབས་དང་། ཡི་དམ་ལྷ་ཡི་ཏིང་འཛིན་དང་། །མཁའ་འགྲོ་རྣམས་ཀྱིས་མཐུ་རྩལ་གྱིས། །དངོས་གྲུབ་བར་ཆད་བྱེད་པའི་བགེགས། །ལོག་པར་འདྲེན་པ་བདུད་ཡི་ཚོགས། །འདི་རུ་མ་འདུག་གཞན་དུ་དེངས། །གལ་ཏེ་མི་འགྲོ་སྡོད་གྱུར་ན། །དབང་ཆེན་ཁྲོས་པའི་ཏིང་འཛིན་གྱིས། །ཁྱོད་ཀྱི་ལུས་ངག་ཡིད་གསུམ་ཀུན། །རྡུལ་ཕྲན་བཞིན་དུ་བརླག་པར་བྱེད། །དེ་བས་རང་རང་གནས་སུ་དེངས། །ཨོཾ་སུམ་བྷ་ནི་སོགས་ཧཱུྃ་བཞིའི་སྔགས་བརྗོད་
ཅིང་བགེགས་བསྐྲད། བདུན་པ་མཚམས་བཅད་པ་ནི། ཧཱུྃ། ང་ནི་ཡེ་ནས་ངང་གི་ཁྲོད། མཚམས་བཅོད་ཁྲོ་བོས་ནམ་མཁའ་གང་། བགེགས་འདུལ་ཁྲོ་བོའི་རོལ་མཚམས་ལས། །སུ་ཡང་འདའ་བར་མ་བྱེད་ཅིག །ཨོཾ་བཛྲ་ཀྲོ་དྷ་རཀྵ་ཧཱུྃ། བརྒྱད་པ་བརྡའ་སྒོ་དབྱེ་བ་ནི། ཧཱུྃ། སྣོད་ཀྱི་འཇིག་རྟེན་གཞལ་ཡས་ཁང་། །བཅུད་ཀྱི་སེམས་ཅན་ལྷ་ཡི་ཚོགས། །གཉིས་འཛིན་ལོག་ལྟས་སྒོ་བཅད་པ། །རང་གསལ་སྙིང་པོས་བརྡའ་སྒོད་བྱེ། །བྷཱུྃ་པྲ་བེ་ཤ་ཡ་ཕཊ། དབུ་པ་བརྡའ་ཡི་ཕྱག་བྱ་བ་ནི། ཧྲཱིཿ རང་བྱུང་ཡེ་ཤེས་རིག་པའི་ལྷ། །མ་རྟོག་རང་ངོ་མ་ཤེས་པས། །ཡེ་ནས་གྲུབ་ཀྱང་ཞལ་མ་མཇལ། །སྟོང་གསལ་ངང་དུ་བརྡལ་ཕྱག་འཚལ། །ན་མོ་པཱུ་རུ་ཤ་ཡ་ཧོ༔ བཅུ་པ་རྡོ་རྗེའི་དེ་བཅའ་བཟུང་བ་ནི། ཧྲཱིཿ བླ་མ་ཡི་དམ་མཁའ་འགྲོའི་ཚོགས། །དུས་གསུམ་
འབྲལ་མེད་དཀྱིལ་འཁོར་འདིར། །བདག་དང་གཉིས་མེད་གཅིག་པ་ལས། །སྤོག་གི་ཕྱིར་ཡང་མི་གཏོང་བསྒྲུབ། །བཛྲ་ཙིཏྟ་ཧཱུྃ༴ བཅུ་གཅིག་པ་བྱིན་དབབ་པ་ནི། །རོལ་མོའི་དབྱངས་ཀྱི་འགྱུར་པ། །སྦྱང་སྤོས་ཀྱི་དུད་སྤྲིན་མོས་གུས་རྩེ་གཅིག་པ་དང་བཅས་ཏེ། ཧྲཱིཿ ཆོས་དབྱིངས་ལྷུ་གྲུབ་ཕོ་བྲང་ནས། །བླ་མ་ཡི་དམ་མཁའ་འགྲོ་དང་། །ཆོས་སྐྱོང་སྲུང་མ་དམ་བཅས་གྱིས། །གནས་འདིར་དབང་བསྐུར་བྱིན་ཕོབ་ཅིག །ཨོཾ་བཛྲ་ས་མ་ཡ་ཨ་བེ་ཤ་ཡ་ཨ་ཨཱཿབཅུ་གཉིས་པ་ནོངས་པ་བཤགས་པ་ནི། ཐལ་མོ་སྦྱོར་ཏེ། ཧྲཱི༔ བླ་མ་ཡི་དམ་མཁའ་འགྲོ་དགོངས། །ཁྱེད་ནི་རྣམ་དག་དྲི་མ་མེད། །བདག་ནི་ཉོན་མོངས་དྲི་མས་སྒྲིབས། ཉམས་ཆགས་སྡིག་སྒྲིབ་མཐོལ་ལོ་བཤགས། །ཨོཾ་བཛྲ་ས་ཏྭ་ཨཱཿ བཅུ་གསུམ་པ་མཆོད་པ་བྱིན་གྱིས་རླབས་པ་ལ། །རྣམ་པ་བཞི་
ལས། དང་པོ་ནི། ལས་སྔགས་གྱི་བསངས། རྃ་ཡྃ་ཁྃ། རང་གི་ཐུགས་ཀ་ནས་རྃ་ཡྃ་ཁྃ་འཕྲོས་ཡེ་ཤེས་ཀྱི་མེ་རླུང་གྱུར་པས་མཆོད་རྫས་ཀྱི་དངོས་འཛིན་ཉེས་སྐྱོན་ཐམས་ཅད་བསྲེག་གཏོར་བཀྲུས་ཏེ་སྟོང་པར་གྱུར། སྟོང་པའི་ངང་ཨོཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་སུ་བདུག་སྤོས་མེ་ཏོག་མར་མེ་དྲི་ཆབ་ཞལ་ཟས་རོལ་མོ་ཐོག་པའི་ལྷ་མོ་རེ་རེ་ལའང་དཔག་ཏུ་མེད་པ་འཕྲོ་བའི་ཀུན་བཟང་མཆོད་པའི་སྤྲིན་ཕུང་ནམ་མཁའི་མཛོད་ལྟ་བུར་ཟད་མི་ཤེས་པས་ཁྱབ་པར་གྱུར། ཨོཾ་ཨཱཿཧཱུྃ་བཛྲ་པུཥྤེ་དྷུ་པེ་སོགས་ནས། ཤཔྟ་ཨཱཿཧཱུྃཿ གཉིས་པ་བདུད་རྩི་རླབས་པ་ནི། རྃ་ཡྃ་ཁྃ། སྟོང་པའི་ངང་ལས་རྃ་ཡྃ་ཁྃལས་རླུང་མེ་ཐོད་སྒྱེད་ཀྱི་སྟེང་དུ་ཨཱཿལས་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ་གོ་ཀུ་ད་ཧ་ན་ལས་ཤ་ལྔ་བི་མུ་མ་ར་ཤུ་ལས་བདུད་རྩི་ལས་གང་བ། དེའི་སྟེང་
དུ་ཟླ་བའི་དཀྱིལ་འཁོར་ཁ་ཆོད་ཀྱི་ཚུལ་དུ་གནས་པའི་སྟེང་དུ་ཧཱུྃ་ལས་རྡོ་རྗེ་སྔོན་པོ་རྩེ་ལྔ་བའི་ལྟེ་བར་ཧཱུྃ་གི་མཚན་པའི་འོད་ཟེར་གྱིས། རླུང་གཡོས་ཨེ་སྤྲ་རྫས་རྣམས་ཞུ་ཞིང་ཁོལ་བས་ཉེས་སྐྱོན་དུ་གནས་རླུངས་པ་ཧཱུྃ་ཡིག་གི་རྣམ་པར་འཕྲོས་ཡེ་ཤེས་ཀྱི་བདུད་རྩི་དཀུག དམ་ཚིག་གི་བདུད་རྩིའི་རྒྱུ་དང་འདྲེས། ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ་སརྦ་པཉྩ་མ་མྲྀ་ཏ་ཧཱུྃ་ཧྲཱིཿཋཿ གསུམ་པ་ནི། རྃ་ཡྃ་ཁྃ། སྟོང་པའི་ངང་ལས་ཐོད་པ་དུམ་བུ་གཅིག་པ་སྟོང་གསུམ་དང་མཉམ་པའི་ནང་དུ། ཨོཾ་ཨཱཿཧཱུྃ་ཞུ་བ་ལས་བྱུང་བའི་ཞལ་ཟས་འདོད་ཡོན་ལྔ་ཡི་ལྷ་མོ་སྤྲིན་གྱི་ཕུང་པོ་ལྟ་བུར་འཁྲིགས་པར་གྱུར། ཨོཾ་ཨཱཿཧཱུྃ་མ་ཧཱ་བ་ལིང་ཏ་ཏེ་ཛྭ་ལ་ལིངྒ་བ་ལ་བ་ཏེ་གུ་ཧྱ་ས་མ་ཡེ་སྭཱ་ཧཱ། ལན་གསུམ། བཞི་པ་ནི། རྃ་ཡྃ་ཁྃ། སྟོང་པའི་ངང་ལས་པདྨ་འབར་བའི་སྣོད་ཆེན་པོར། རྃ་ལས་
རྡོ་རྗེ་སྒེག་མོ་དམར་མོའི་མཁའ་ནས་ཁྲག་བབ་སྟེ། ཉོན་མོངས་པ་བག་ཆགས་དང་བཅས་པ་འཇོམས་པའི་རཀྟའི་རྒྱ་མཚོ་རྦ་ཀློང་རྒྱ་མདུད་ཀྱི་ཚུལ་དུ་འཁྲུགས་པ་ལ་ལྷ་མོ་ཉིད་འོད་དུ་ཞུ་ནས་ཐིམ་པས་འཁོར་བ་སྟོང་པར་གྱུར། ཨོཾ་ཨཱཿཧཱུྃ་མ་ཧཱ་རཀྟ་མནྟ་མཎྜལ་ཧཱུྃ་ཕཊ། ཞེས་པ་རྣམས་ཀྱིས་བྱིན་གྱིས་རླབས། གཉིས་པ་དངོས་གཞི། བྱིན་རླབས་བསྙེན་པ་གཙོ་བོར་གྱུར་པའི་བདག་བསྐྱེད་ཚོགས་བསགས་སྒྲུབ་པ་གཙོ་བོར་གྱུར་པའི་མདུན་བསྐྱེད་དོ། །དང་པོ་ལ་རྣམས་གྲངས་དྲུག་ཡོད་པའི་དང་པོ་དཀྱིལ་འཁོར་བསྐྱེད་ཅིང་རླབས་པ་ནི། ཨོཾ། ཆོས་རྣམས་སྟོངས་ཉིད་སྤྲོས་དང་བྲལ། །འགགས་མེད་རོལ་པ་སྙིང་རྗེའི་རྩལ། །རང་རིག་གནམ་ལྕག་རྡོ་རྗེ་ནི། །རྩེ་ལྔ་ཧཱུྃ་ཡིག་དམར་ནག་བཅས། །འོད་ཟེར་འབར་བའི་འདུ་འཕྲོ་ལས། །འབྱུང་བ་རྣམ་ལྔའི་དཀྱིལ་འཁོར་བརྩེགས། །རྡོ་རྗེའི་ས་བཞི་རྭ་གུར་དང་། །ཡེ་ཤེས་མེ་དཔུང་འབར་བའི་ཀློང་། །བྷྲུྃ་ལས་བྱུང་བའི་གཞལ་ཡས་ཁང་། །
བདེ་ཆེན་ཕོ་བྲང་འོད་དུ་འབར། །སྒོ་འཁྱམས་རྟ་བབ་འཁོར་ཡུག་མཛེས། །དེ་དབུས་སྣ་ཚོགས་པད་ཉིའི་སྟེང་། །དཔའ་བོ་སྟག་གི་པགས་པ་ལ། །ཕྱག་མཚན་ས་བོན་གནས་གྱུར་ལས། །བདག་ཉིད་པདྨ་ཐོད་ཕྲེང་རྩལ། །དམར་ནག་ཞལ་གཅིག་ཕྱག་གཉིས་པ། །སྤྱན་གསུམ་དམར་ཟླུམ་ཁྲོ་གཉེར་བསྡུས། །ཞལ་གདངས་མཆེ་གཙིགས་ཧཱུྃ་སྒྲ་སྒྲོགས། །དབུ་སྐྲ་སྨར་སྨིན་མའི་ཚོགས། །དམར་སེར་མེ་ལྟར་གྱེན་དུ་གཡེང་། །ཡན་ལག་ཉིད་ལག་རགས་ཤིང་གཏུན། །གསུས་ཁྱིམ་རྒྱ་མཚོ་ལྟ་བུར་རྒྱས། །ཐོད་སྐམ་ལྔ་ཡི་དབུ་རྒྱན་དང་། །མགོ་རློན་ལྔ་བཅུའི་དོ་ཤལ་འཕྱང་། །ཀླུ་ཆེན་བརྒྱད་ཀྱིས་ལེགས་བརྒྱན་ཅིང་། །ཕྱག་རྒྱ་དྲུག་གི་རྒྱས་བཏབ་པ། །ཞིང་ལྤགས་གླང་ལྤགས་ན་བཟའ་མཛད། །
སྟག་གི་ལྤགས་པའི་ཤམ་ཐབས་བགོས། །ཁྲག་ཞག་ཐལ་བའི་ཚོམ་བུས་སྤྲས། །ཕྱག་གཡས་གནམ་ལྕགས་རྡོ་རྗེ་གདེངས། །ལྷ་སྲིན་སྡེ་བརྒྱད་ཐལ་བར་བརླག །ཕྱག་གཡོན་རི་རབ་ཕུར་བུ་འདྲིལ། །བསྟན་པའི་རུ་ཏྲ་ཀུན་ལ་འདེབས། །བ་སྤུ་བུ་ག་ཐམས་ཅད་ནས། །ཁྲོ་ཆུང་གྲངས་མེད་འཕྲོ་ཞིང་འདུ། །མ་མོ་འབུམ་གྱི་ཚོགས་དབུས་སུ། །གར་དགུའི་ཉམས་ཀྱིས་མངོན་པར་བརྗིད། །གཡས་བསྐུམ་གཡོན་བརྐྱང་རུ་ཏྲ་ཟུང་། །གྱད་ཀྱི་འདོར་སྟབས་ཆེན་པོས་བརྫིས། །སྟེང་འོག་ཕྱོགས་མཚམས་ཐམས་ཅད་དུ། །བླ་མ་ཡི་དམ་མཁའ་འགྲོ་དང་། །ཆོས་སྐྱོང་སྲུང་མ་དམ་ཅན་རྣམས། །དངོས་གྲུབ་སྟེར་ཞིང་བར་ཆད་སེལ། །ཆར་སྤྲིན་ལྟ་བུར་གཏིབས་པར་གྱུར། །སྐུ་གསུམ་ཐུགས་སུ་བྱིན་བརླབས་ཤིང་། །
ཡེ་ཤེས་ལྔ་ཡི་དབང་བསྐུར་རོ། །ཨོཾ་ཨཱཿཧཱུྃ། ཨོཾ་ཧཱུྃ་སྭཱ་ཨཱཾ་ཧ༔ གཉིས་པ་སྤྱན་འདྲེན་པ་ནི། ཐོད་རྔ་དབྱངས་རོལ་དང་བཅས་ཏེ། ཧཱུྃ། ཡུལ་གྱི་མིང་ནི་རྔ་ཡབ་གླིང་། །ཟངས་མདོག་དཔལ་རིའི་རྩེ་མོ་རུ། །གྲུབ་པ་མཐར་ཕྱིན་མངོས་གྲུབ་བརྙེས། །རྗེ་བཙུན་པདྨ་ཐོད་ཕྲེང་རྩལ། །མ་མོ་འབུམ་གྱི་ཚོགས་དང་བཅས། །གནས་འདིར་སྤྱན་འདྲེན་གཤེགས་སུ་གསོལ། །མཆོག་དང་ཐུན་མོང་དངོས་གྲུབ་སྩོལ། །དུས་སྙིགས་དམ་འགོང་ཚར་ཆོད་ཅིག །ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ཨོཾ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛཿ སིདྡྷི་ཕ་ལ་ཧཱུྃ་ཨཱཿ ཧྲཱིཿམ་རི་ནི་ས་ར་ཙ་ཧྲཱི་ཡ་ཙིཏྟ་ཧྲཱིང་ཧྲཱིང་ཛ་ཛཿཛཿཧཱུྃ་བཾ་ཧོཿ གསུམ་པ་བཞུགས་སུ་གསོལ་ཞིང་ཕྱག་འཚལ་བ་ནི། ཧཱུྃ། ཁྲག་འཐུང་པདྨ་དྲག་པོ་རྩལ། འབར་བའི་
གདན་ལ་དགྱེས་བཞུགས་གསོལ། །ལྷ་རྟོགས་དབྱེར་མེད་དག་མཉམ་དང་། །མ་བཅོས་ཡོངས་རྫོགས་ཕྱག་འཚལ་བསྟོད། །བཛྲ་ས་མ་ཡ་ཏིཥྛ་ལྷན། །ཨ་ཏི་པཱུ་ཧོཿ བཞི་བ་མཆོད་པ་འབུལ་བ་ནི། ཧཱུྃ་ཧྲཱིཿ བླ་མ་ཡི་དམ་མཁའ་འགྲོ་ལ། །མཆོད་པ་བྱེ་བྲག་འབུལ་བ་ནི། །ཕྱི་མཆོད་འདོད་ཡོན་རྣམ་པ་ལྔ། །ནང་མཆོད་ཤ་ལྔ་བདུད་རྩི་ལྔ། །གསང་མཆོད་བྱང་སེམས་བདེ་སྟེར་རྒྱུན། །ཐམས་མཆོག་མཐར་ཕྱིན་བདུད་རྩི་དང་། །ཤེས་རབ་མཐར་ཕྱིན་རཀྟ་དང་། །ཐབས་ཤེས་དབྱེར་མེད་གཏོར་མ་སོགས། །སྐུ་གསུམ་ཀློང་དུ་བཞེས་ནས་ཀྱང་། །མཆོག་དང་ཐུན་མོང་དངོས་གྲུབ་སྩོལ། །ཨོཾ་གུ་རུ་དྷེ་ཝ་ཌཱ་ཀི་ནི་ས་པཱ་རི་ཝ་ར་ཨརྒྷཾ་ནས་ཤཔྟ་མ་ཧཱ་པཉྩ་པཱུ་ཛཿ བོ་དྷི་ཙིཏྟ་ག་ན་གུ་ཧྱ་མ་ཧཱ་པཱུ་ཛཿ སརྦ་པཉྩ་ཨ་མྲྀ་ཏ་རཀྟ་བ་ལིངྟ་པཱུ་ཛ་ཁ་ཁ་ཁཱ་ཧི་
ཁཱ་ཧི། ལྔ་པ་བསྟོད་པ་ནི། ཧཱུྃ། མ་མོ་འབུམ་གྱི་ཚོགས་དབུས་སུ། །པདྨ་ཐོད་ཕྲེང་བརྗིད་པའི་སྐུ། །བགེགས་དཔུང་བརླག་པར་མཛད་པ་སྟེ། །གར་མཛད་ཁྱོད་ལ་ཕྱག་འཚལ་བསྟོད། །རྡོ་རྗེའི་སྟོབས་ཀྱིས་ཆར་འབེབས། །ཀཱི་ལ་ཡ་ཡིས་དགྲ་སྙིང་གཟིར། །དཔལ་གྱི་ཆས་བརྒྱད་འཇིགས་པའི་བརྒྱན། །རྔམས་ཆེན་ཁྱོད་ལ་ཕྱག་འཚལ་བསྟོད། །འོད་ཟེར་བསྐལ་བའི་མེ་ལྟར་འབར། །ལས་ཀྱི་མཁའ་འགྲོ་བྲན་དུ་འགྱེད། །སྲིད་གསུམ་ཐམས་ཅད་ཟིལ་གྱིས་གནོན། །དབང་ཆེན་ཁྱོད་ལ་ཕྱག་འཚལ་བསྟོད། །རྡོ་རྗེ་མེ་རིའི་གུར་ཁང་བཞུགས། །མི་མཐུན་བདུད་ཀྱི་དཔུང་ལས་རྒྱལ། །ལྷ་སྲིན་སྡེ་བརྒྱད་དམ་ལ་འདོགས། །ཁྲོ་ཆེན་ཁྱོད་ལ་ཕྱག་འཚལ་བསྟོད། ཧཱུྃ་གིས་མགྲིན་པའི་སྒྲུབས་རབ་
གང་། །རྡོ་རྗེ་སྔགས་ཀྱི་འབྲུག་སྒྲ་ཡིས། །མ་རུང་བགེགས་ཀྱི་ཀླད་པ་འགེམས། །གདུམ་ཆེན་ཁྱོད་ལ་ཕྱག་འཚལ་བསྟོད། །རྣམ་པར་རྟོག་པས་མི་བརྒུལ་ཞང་། །ཡེ་ཤེས་ཤིན་ཏུ་ཟབ་པའི་ཐུགས། །གཞན་ཕན་ནོར་བུའི་མཛོད་འཛིན་པའི། །ཆུ་གཏེར་ཁྱོད་ལ་ཕྱག་འཚལ་བསྟོད། །ཁྱོད་ཀྱི་མཚན་གྱི་ཡོན་ཏན་གྱིས། །ལྷས་ངན་ཐམས་ཅད་སེལ་བྱེད་ཅིང་། །དཔལ་གྱི་འབྱོར་པ་རྒྱས་བྱེད་པའི། །དོན་ལྡན་ཁྱོད་ལ་ཕྱག་འཚལ་བསྟོད། །ཁྱོད་ཀྱི་ཕྲིན་ལས་ལྷུན་གྲུབ་པས། །བདུད་སྡེའི་དཔུང་ཆེན་རབ་བཅོམ་མཛད། །བདག་ཀྱང་ཁྱོད་དང་དབྱེར་མེད་པར། །སངས་རྒྱས་བསྟན་པ་སྲུང་པར་ཤོག །དྲུག་པ་ཛ་བྲ་བསྙེན་བཟླ་བ་ལ། ཐོགས་མར་ཞི་བར་བསྙེན་པ་ནི། རང་ཉིད་དམ་ཚིག་སེམས་དཔའ་ནི། །ཁྲོ་ཆེན་དཔལ་གྱིས་ཆས་བརྒྱན་པའི། །སྙིང་གར་ཡེ་ཤེས་
སེམས་དཔའ་མཆོག །མ་ཧཱ་གུ་རུ་འཛུམ་ཞིང་ཞི། །དཀར་ལ་དམར་བའི་མདངས་ཆགས་པའི། །ལེབ་རྒན་དར་གྱི་ཆོས་གོས་ཅན། །ཕྱག་གཡས་གསེར་གྱི་རྡོ་རྗེ་དང་། །ཕྱག་གཡོན་ཚེ་བུམ་བཅུད་ལྡན་བསྣམས། །པད་ཞྭ་པྲོག་ལྔ་རྒྱན་ལྡན་གསོལ། །འགྱིང་ཚུལ་རྡོ་རྗེའི་སྐྱིལ་ཀྲུང་གིས། །ཟླ་བའི་གང་ན་ལ་བཞུགས་པ་དེའི། །ཐུགས་ཀར་ཉི་མའི་དཀྱིལ་འཁོར་དབུས། །ཏིང་འཛིན་སེམས་དཔའ་ཡི་གེ་ཧཱུྃ། །དམར་ནག་བླ་མའི་ངོ་བོ་ཉིད། །སྔགས་ཀྱི་ཕྲེང་བས་བསྐོར་བ་ལས། །འོད་འཕྲོས་སྣོད་བཅུད་ཐམས་ཅད་ཀྱང་། །རྒྱལ་བའི་དཀྱིལ་འཁོར་ཆེན་པར་བྱས། །ཚུར་འདུས་མ་ཧཱ་གུ་རུ་ལ། །ཡེ་ཤེས་མཁའ་འགྲོ་སྡེ་ལྔས་བསྐོར། །རྔ་ཡབ་གླིང་ནས་སྤྱན་དྲངས་ཏེ། །ས་བོ་མཆོག་ལ་དགྱེས་བཞིན་བཞུགས། །
ཁམས་གསུམ་མ་ལུས་དབང་དུ་བསྡུས། །ཟིལ་གནོན་ཁྲོ་བོ་ཆེན་པོར་གསལ། །ཨོཾ་ཨཱཿ བཛྲ་གུ་རུ་པདྨ་སིདྡྷི་ཧཱུྃ། ཞེས་ཅི་ནུས་བཟླས། གཉིས་པ་ཁྲོ་བོར་སྒྲུབ་པ་ཐོག་མར་ཛབ་བསྐུལ་བ་ནི། ཧཱུྃ། རྡོ་རྗེའི་རྭ་གུར་མེ་དཔུང་འབར་བའི་ཀློང་། །བདེ་གཤེགས་ཀུན་འདུས་པདྨ་ཐོད་ཕྲེང་རྩལ། །སེམས་དཔའ་སུམ་བརྩེགས་དབྱིངས་ལས་ཡེ་ཤེས་ཤར། །བརྗིད་པའི་ཀུ་ལ་དུར་ཁྲོད་ཆས་རྣམས་རྫོགས། །གསུང་གི་སྙིང་པོ་སྔགས་སྒྲོགས་སྔགས་ཀྱི་སྒྲ། །ཐུགས་ནི་མི་འགྱུར་བདེ་ཆེན་ཡེ་ཤེས་སེམས། །ཛབ་ཀྱི་སྙིང་པོ་རྡོ་རྗེའི་སྐུ་གསུང་ཐུགས། །ཧཱུྃ་ལས་འཕྲོས་པས་སྟོང་གསུམ་སྐུ་ཡིས་གང་། མ་གསལ་བར་དུ་བསྐྱེད་ཅིང་འབད་པས་བསྒོམ། །མ་གྲུབ་བར་དུ་ཏིང་འཛིན་མི་བཏང་ངོ་། ཧཱུྃ་ཧཱུྃ་ཧཱུྃ་ཧཱུྃ་ཧཱུྃ། ཞེས་ཧཱུྃ་ལྔ་སྦྲེལ་གྱི་བཟླས་པ་ཅི་འགྲུབ་བྱ། གསུམ་པ་གཉིས་མེད་ཟུང་འཇུག་
ལས་སྦྱོར་ནི། ཏིང་འཛིན་སེམས་དཔའ་མ་ཧཱ་གུ་རུ་དངོས། །ཁྱབ་བདག་རྩ་བའི་བླ་མའི་སྐུར་གསལ་གྱུར། ཅེས་དམིགས་ཤིང་མོས་གུས་དྲག་ཏུ་བསྐྱེད་པས་ཞི་བ་བསྙེན་ཅི་རིགས་བྱ། མཐར་སྟོད་ཚིག་གི་མཆོད་པ་ཕུལ། འདི་ལ་བརྟེན་ནས་བསྙེན་པ་བྱ་བའི་ཚུལ་གཞན་དུ་ཤེས། །གཉིས་པ་མདུན་བསྐྱེད་སྒྲུབ་པ་ལ་རྣམ་གྲངས་བཅུ་གསུམ་ཡོད་པས། དང་པོ་ནི་མདུན་རྟེན་གསང་སྦྱང་། སྟོང་པའི་ངང་ལས་སྐད་ཅིག་གིས། སྣ་ཚོགས་པདྨ་འདབ་བརྒྱད་ལ། །ཚོགས་བརྒྱད་དག་པའི་དུར་ཁྲོད་དང་། །རྡོ་རྗེའི་རྭ་གུར་འབར་ཕྲེང་གིས། །ཡོངས་སུ་བསྐོར་བའི་ལྟེ་བ་ལ། །ཆོས་འབྱུང་ཕྱི་དཀར་ནང་དམར་བ། །བསྣོལ་མར་བརྩེགས་པའི་ནང་དབུས་སུ། །ངོ་བོ་རྩ་བའི་བླ་མ་ནི། རྣམ་པ་པདྨ་སཾ་བྷ་བ། སྐུ་མདོག་དཀར་ལ་དམར་བའི་མདངས། །ཞི་ཞིང་འཛུམ་ལ་སྒེགས་པའི་ཉམས། །དབུ་སྐྲ་རལ་བའི་ཐོར་ཚུགས་ཅན། །རྡོར་
དྲིལ་འཛིན་པའི་ཕྱག་གཉིས་ཀྱིས། །ཡུམ་ཆེན་སངས་རྒྱས་མཁའ་འགྲོ་མ། །དཀར་མོ་གྲི་ཐོད་ཅན་ལ་འཁྱད། །རིན་ཆེན་རུས་པའི་རྒྱན་གྱིས་མཛེས། །ལྷ་རྫས་བར་གྱི་ན་བཟའ་ཅན། །སྣ་ཚོགས་པདྨ་ཉི་དཀྱིལ་སྟེང་། །རྡོ་རྗེའི་སྐྱིལ་ཀྲུང་གིས་བཞུགས་ལ། །གཟུངས་མ་སྒྲ་གྲོལ་རུས་རྒྱས་ཅན། །པདྨའི་སྐྱིལ་མོ་ཀྲུང་གིས་འཁྲིལ། མཚན་དཔེའི་དཔལ་འབར་འོད་ལྔ་འཕྲོ། །ཕྱོགས་མཚམས་པདྨའི་འདབ་མ་ལ། །ཤར་དུ་ཀེའུ་རི་མ་སྔོ། །ཕྱག་གཡས་ཞིང་དབྱུག་གཡོན་ཐོང་ཁྲག །ལྷོ་རུ་ཙོའུ་རི་མ་སེར། །ཕྱག་གཉིས་མདའ་གཞུ་འགེངས་པར་མཛད། །ནུབ་ཏུ་པྲ་མོ་ཧ་དམར་མོ། །ཆུ་སྲིན་རྒྱལ་མཚན་ཐོད་པ་བསྣམས། །བྱང་དུ་བེ་ཏཱ་བི་ནག་མོ། །རྡོ་རྗེ་དང་ནི་བྱིས་པའི་རོ། ཤར་ལྷོར་པུཀྐ་སེ་དམར་
སེར། །གཡོན་ཞིང་གཡས་པས་རྒྱུ་མ་འདྲེན། །ལྷོ་ནུབ་གྷསྨ་རི་ལྗང་གུ། །རྡོ་རྗེས་ཐོད་ཁྲག་དཀྲུག་ཅིང་གསོལ། །ནུབ་བྱང་སྨེ་ཤ་ནི་མཐིང་ནག །ཙིཏྟ་བཟུང་ནས་ཞལ་དུ་གསོལ། །བྱང་ཤར་ཙཎྜ་ལི་སེར་སྐྱ། །ཞིང་གི་མགོ་ལུས་འབྲེལ་མ་བསྣམས། །ཐམས་ཅད་ཞལ་གཅིག་སྤྱན་གསུམ་ལྡན། །མཆེ་གཙིག་རལ་བའི་ཅོད་པཎ་ཅན། །དབུ་རྒྱན་རིན་ཆེན་རྩེ་བྲན་མཛེས། །ཕྱག་རྒྱ་ལྔས་བརྒྱན་ཁྲོ་ཆགས་ཉམས། །གཡས་བསྐུམ་གཡོན་བརྐྱང་པད་ཟླར་བཞེངས། །སྐུ་གསུང་ཐུགས་སུ་བྱིན་རླབས་ཤིང། །ཡེ་ཤེས་རྣམ་ལྔས་དབང་བསྐུར་རོ། །ཨོཾ་ཨཱཿཧཱུྃ། ཨོཾ་ཧཱུྃ་སྭཱ་ཨཱཾ་ཧཱ། གཉིས་པ་སྤྱན་འདྲེན་ནི། ཧཱུྃ་ཧྲཱི། སྔོན་གྱི་བསྐལ་བའི་དང་པོ་ལ། །ཨོ་རྒྱན་ཡུལ་གྱི་ནུབ་བྱང་མཚམས། །པདྨ་གེ་སར་སྡོང་པོ་
ལ། །ཡ་མཚན་མཆོག་གི་དངོས་གྲུབ་བརྙེས། །པདྨ་འབྱུང་གནས་ཞེས་སུ་གྲགས། །འཁོར་དུ་མཁའ་འགྲོ་མང་པོས་བསྐོར། །ཁྱེད་ཀྱི་རྗེས་སུ་བདག་སྒྲུབ་ཀྱི། །བྱིན་གྱིས་རླབས་ཕྱིར་གཤེགས་སུ་གསོལ། །ཨོཾ་ཨཱཿ བཛྲ་གུ་རུ་པདྨ་སིདྡྷི་ཧཱུྃ། ཨོཾ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛཿ སིདྡྷི་ཕ་ལ་ཧཱུྃ་ཨཱཿ །ཧྲཱིཿམ་ཧ་རི་ནི་ས་ར་ཙ་ཧྲཱིཿཡ་ཙིཏྟ་ཧྲཱིཾ་ཧྲཱིཾ་ཛཿཛཿ ཛ་ཧཱུྃ་བྃ་ཧོཿ གསུམ་པ་བཞུགས་སུ་གསོལ་བ་ནི། ཧཱུྃ། བྱིན་གྱིས་རླབས་ཤིང་བརྟན་པར་བཞུགས་སུ་གསོལ། བཛྲ་ས་མ་ཡ་ཏིཥྛ་ལྷན། བཞི་པ་ཕྱག་འཚལ་བ་ནི། ཧཱུྃ། སྐྱེ་འགགས་འགྱུར་མེད་ཕྲིན་ལས་ཐམས་ཅད་རྫོགས། །རང་བྱུང་ཐུགས་རྗེས་འགྲོ་དྲུག་
སྒྲོལ་བར་མཛད། །ཡིད་བཞིན་ནོར་བུ་དངོས་གྲུབ་ཆར་ལྟར་འབེབས། །པདྨ་ཐོད་ཕྲེང་རྩལ་ལ་ཕྱག་འཚལ་བསྟོད། །ཨ་ཏི་བུ་ཧོཿ པྲ་ཏི་ཙྪ་ཧོཿ ལྔ་པ་ཕྱི་མཆོད་འབུལ་བ་ནི། ཧཱུྃ། བླ་མ་ཡི་དམ་མཁའ་འགྲོ་ལ། །ལྷ་རྫས་ཕྱི་མཆོད་འབུལ་བ་ནི། །ཨརྒྷཾ་མེ་ཏོག་བདུག་སྤོས་དང་། །མར་མེ་དྲི་ཆབ་ཞལ་ཟས་དང་། །སྙན་པའི་རོལ་མོ་མཆོད་པར་འབུལ། ཨོཾ་ཨཱཿཧཱུར་སརྦ་སིདྱ་དྷ་ར་པཱུ་ཛི་ཏ་ཧཱུྃ་ཨཱཿ ཨོཾ་བཛྲ་པུཥྤེ་ཧཱུྃ། ཨོཾ་བཛྲ་དྷུ་པེ་ཧཱུྃ། ཨོཾ་བཛྲ་ཨ་ལོ་ཀེ་ཧྲཱིཿ ཨོཾ་བཛྲ་ནཻ་བིདྱ་ཧཱུྃ། ཨོཾ་བཛྲ་ཤཔྟ་ཨཱཿ དྲུག་པ་ནང་མཆོད་འབུལ་བ་ནི། ཧཱུྃ། བླ་མ་ཡི་དམ་མཁའ་འགྲོ་ལ། །རང་བྱུང་ནང་མཆོད་འབུལ་བ་ནི། །དབང་པོ་རྣམ་ལྔའི་མེ་ཏོག་མཆོད། །གསུར་ཆེན་བདུག་སྤོས་དྲི་ཡི་མཆོད། །ཞུན་ཆེན་སྣང་གསལ་མར་མེས་མཆོད། །རྡོ་རྗེ་དྲི་ཆུའི་
བྱུག་པས་མཆོད། །བདུད་རྩིའི་དྲི་ཆེན་ཞལ་ཟས་མཆོད། །རྐང་གླིང་ཐོད་རྔ་སྒྲ་ཡིས་མཆོད། །དུས་གསུམ་སྐུ་གསུམ་ཐུགས་སུ་མཆོད། །དུག་ལྔ་ཡེ་ཤེས་ལྔ་རུ་མཆོད། །སྣང་སྲིད་ཕྱག་རྒྱ་བཞི་རུ་མཆོད། །མཆོད་བཞེས་དབང་དང་དངོས་གྲུབ་སྩོལ། །མ་ཧཱ་མཾ་ས་ཁཱ་ཧི། མ་ཧཱ་ཙིཏྟ་ཁཱ་ཧི་མ་ཧཱ་པཉྩ་ཨ་མྲྀ་ཏ་ཁཱ་ཧིཿ བདུན་པ་གསང་བ་སྐྱོར་མཆོད་ནི། ཧཱུྃ། བླ་མ་ཡི་དམ་མཁའ་འགྲོ་ལ། གཉིས་མེད་གསང་མཆོད་འབུལ་བ་ནི། །ཡབ་ཡུམ་གཉིས་མེད་མཀའ་གསང་ནས། །བྱང་སེམས་དཀར་དམར་བཅེ་བའི་རྒྱུན། །བདེ་བའི་རོ་སྙོམས་མཆོད་པར་འབུལ། །སྐུ་ལུས་དགྱེས་ཕྱིར་བཞེས་སུ་གསོལ། །ས་མ་ཡ་སྟྭཾ། རྭ་ག་ཡ་མི། ར་ཧོ་ཉ་ཧཾ། བོ་དྷི་ཙིཏྟ་ཧཱུྃ། བརྒྱད་པ་དྲག་པོའི་བསྒྲལ་མཆོད་ནི། ཧཱུྃ། བླ་མ་ཡི་དམ་མཁའ་འགྲོ་ལ། །དྲག་པོའི་
བསྒྲལ་མཆོད་འབུལ་བ་ནི། །ཆེ་མཆོག་པདྨ་ཐོད་ཕྲེང་རྩལ། །ཕྱག་གཡས་རྡོ་རྗེ་རྩེ་དགུ་བསྣམས། །ཕྱག་གཡོན་ཕུར་པས་དགྲ་སྙིང་གཟེར། །གནོད་བྱེད་ཐལ་བའི་རྡུལ་དུ་རློག །དགྲ་བགེགས་ཤ་རུས་མཆོད་པར་བཞེས། །ནྲྀ་ཏྲི་ཤ་ཧཱུྃ་སརྦ་མཱ་ར་ཡ་རྦད། མ་ཧཱ་མཾ་ས་ཁཱ་ཧི། མ་ཧཱ་ཙིཏྟ་ཧཱ་ཧི། དགུ་པ་བདུད་རྩི་སྨན་མཆོད་ནི། ཧཱུྃ། རང་བྱུང་གདོན་ནས་རྣམ་པར་དག །རྩ་བ་བརྒྱད་ལ་ཡན་ལག་སྟོད། །བདུད་རྩི་སྨན་གྱི་མཆོད་པ་འདི། །བླ་མ་ཡི་དམ་མཁའ་འགྲོ་དང་། །ཆོས་སྐྱོང་དམ་ཅན་རྣམས་ལ་འབུལ། །སྐུ་གསུང་ཐུགས་ཀྱི་དངོས་གྲུབ་སྩོལ། །མ་ཧཱ་སརྦ་པཉྩ་ཨ་མྲྀ་ཏ་ཧཱ་ཧི། ཆོས་སྐུ་སྣང་བ་མཐའ་ཡས་ཞལ་དུ་སརྦ་པཉྩ་ཨ་མྲྀ་ཏ་ལ་ཁ་རྃ་ཁཱ་ཧི། ལོངས་སྐུ་ཐུགས་རྗེ་ཆེན་པོ་ཞལ་དུ༴ སྤྲུལ་སྐུ་པདྨ་འབྱུང་གནས་ཞལ་
དུ༴ མ་ཅིག་ཡེ་ཤེས་མཚོ་རྒྱལ་ཞལ༴ རྗེ་བཙུན་སངས་རྒྱས་དབོན་པོའི་ཞལ༴ ཐུགས་སྲས་ཨཱ་ནནྟ་ཤྲཱིའི༴ ཆོས་སྐུ་ཨོ་རྒྱན་མགོན་པའི༴ སྤྱན་སྔ་ཡོན་ཏན་རྒྱལ་མཚན༴ སློབ་དཔོན་པུཎྱེ་དྷཱ་ཛའི༴ རྗེ་བཙུན་ཡེ་ཤེས་བཟང་པོའི༴ བླ་མ་རྒྱལ་བ་བཟང་པོའི༴ གྲུབ་མཆོག་རཏྣ་བྷ་དྲའི༴ མཉམ་མེད་དོན་གྲུབ་རིན་ཆེན༴ མཁན་ཆེན་ཆོས་དཔལ་བཟང་པོའི༴ རིག་འཛིན་བསོད་ནམས་བཀྲ་ཤིས༴ རྒྱལ་དབང་མཚོ་སྐྱེས་རྡོ་རྗེའི༴ རིགས་བདག་ཀུན་དགའི་མཚན་ཅན༴ སྐྱབས་མཆོག་ངག་དབང་རྣམ་རྒྱལ༴ མཆོག་སྤྲུལ་བཀྲ་ཤིས་དཔལ་གྲུབ༴ ཁྱབ་བདག་གྲགས་པ་ལེགས་གྲུབ༴ ངག་དབང་འཇམ་དཔལ་རྒྱ་མཚོ་འཕགས་པ་བཀྲ་ཤིས་དབང་རྒྱལ༴ ངག་དབང་ཕྲིན་ལས་བསྟན་འཛིན༴ གྲགས་པ་རིན་ཆེན་ཤེས་རབ༴ བཀྲ་ཤིས་གྲགས་པ་རྒྱལ་མཚན༴ གྲགས་པ་རིན་
ཆེན་ལེགས་གྲུབ༴ རྒྱལ་མཆོག་ཆོས་དབྱིངས་ལྷུན་གྲུབ༴ ངག་དབང་བསྟན་པའི་ཉི་མ༴ མཆོད་སྤྲུལ་གྲགས་པ་རྒྱ་མཚོ༴ མཚུངས་མེད་ངག་དབང་ལྷུན་གྲུབ༴ དྲིན་ཅན་རྩ་བརྒྱུད་བླ་མའི༴ ཡི་དམ་ཞི་ཁྲོ་རབ་འབྱམས༴ གནས་ཡུལ་དཔའ་པོ་མཁའ་འགྲོའི༴ ཆོས་སྐྱོང་དམ་ཅན་རྒྱ་མཚོའི༴ མཆེད་ལྕམ་རྡོ་རྗེ་སྤུ་གྲོགས༴ གཞན་ཡང་མཆོད་འོས་རྒྱ་མཚོའི་ཞལ་དུ༴ བཅུ་པ་རཀྟ་དམར་མཆོད་ནི། ཧཱུྃ། བླ་མ་ཡི་དམ་མཁའ་འགྲོ་ལ། །རྒྱུ་དྲུག་བསྒྲལ་བའི་རཀྟ་འདི། །འདོད་ཆགས་རྩད་ནས་བཅད་པའི་ཕྱིར། །སྐྱེ་མེད་དོན་གྱི་མཆོད་པ་བཞེས། །མ་ཧཱ་རཀྟ་ཁཱ་ཧི། བཅུ་གཅིག་པ་བ་ལིང་གཏོར་མཆོད་ནི། ཧཱུྃ། བླ་མེད་མཆོག་གི་མཆོད་པ་དམ་པ་འདི། །ཡེ་ཤེས་ལྔ་ཡི་འོད་ཟེར་རྣམ་པར་འགྲོ། །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ། །གས་དམ་
དགོངས་ལ་ཅི་བདེར་བཞེས་སུ་གསོལ། །མ་ཧཱ་བ་ལིང་ཏ་ཁཱ་ཧི། །བཅུ་གཉིས་པ་བསྟོད་པ་འབུལ་བ་ནི། ཧཱུྃ། ཆོས་ཀྱི་དབྱིངས་ལས་མ་གཡོས་ཀྱང་། །ཐུགས་རྗེའི་དབང་གི་ཉེར་དགོངས་ཏེ། །གྲུབ་པའི་གནས་མཆོག་དམ་པ་འདིར། །དད་པས་སྤྱན་འདྲེན་གཤེགས་སུ་གསོལ། །ཡན་ལག་གཙོ་བོ་སྤྱི་གཙུག་སྟེང་། །སྣ་ཚོགས་པདྨ་ཟླ་གདན་ལ། །རིག་འཛིན་དམ་པ་པདྨའི་སྐུ། །མི་འགྱུར་བརྟན་པར་བཞུགས་སུ་གསོལ། །དུས་རྣམས་ཀུན་ཏུ་རྟག་པར་ཡང་། །འདྲེན་པ་བླ་མེད་ཁྱོད་ལ་བདག །གུས་པས་སྤྱི་བོར་མཆོད་བགྱིད་ཅིང་། །ཡང་དང་ཡང་དུ་ཕྱག་འཚལ་ལོ། །ཕྱི་ནང་གསང་བ་མཆོད་པ་སྤྲིན། །དོན་མཆོག་གློག་འོད་རབ་འཁྱུག་ཅིང་། །བླ་མ་ཁྱེད་ལ་མཆོད་པར་བགྱི། །རིག་འཛིན་གྲུབ་པ་རབ་བརྙེས་པ། །སྐྱེ་འཆི་མི་མངའ་རྟག་པའི་སྐུ། །
ནམ་མཁའ་གནས་པར་གཞན་དོན་མཛད། །བླ་མ་ཁྱེད་ལ་ཕྱག་འཚལ་ལོ། །སྙིང་རྗེའི་ཆུ་གཏེར་ཆེན་པོའི་ཀློང་། །གུ་ཏུ་པདྨ་རྒྱས་པ་ལ། །བདག་ཡིད་གདུང་བས་མདུན་བདར་ནས། །སྙན་ངག་དུ་མས་གསོས་ཞིང་བསྟོད། །རྡོ་རྗེ་སློབ་དཔོན་རྡོ་རྗེ་འཆང་། །ཀུན་ཏུ་བཟང་པོ་བཅོམ་ལྡན་འདས། །དབྱེར་མེད་བླ་མ་ཁྱོད་ཀྱི་བདག། །དབང་བཞིས་སྨིན་པར་མཛད་དུ་གསོལ། །བསྐྱེད་དང་རྫོགས་པའི་ལམ་བསྟན་ཅིང་། །མྱུར་འགྲུབ་མྱུར་བར་བགྱིད་པ་སྟེ། །ཐམས་མཆོག་རྨད་དུ་བྱུང་བ་ཉིད། །རྗེ་བཙུན་བསྒྲུབ་པར་བདག་འཚལ་ལོ། །ཁྱོད་ནི་མཁའ་ལྟར་ཀུན་སྤངས་ཀྱང་། །ཐུགས་རྗེ་གློག་གི་འོད་ལས་མྱུར། །གདུང་བས་གསོལ་བ་འདེབས་པའི་བུ། །རྟག་ཏུ་ཡེ་ཤེས་གཟིགས་པས་སྐྱོབས། །དཔལ་གྱི་ཆས་བརྒྱད་
འཇིགས་པས་བརྒྱན། །དུར་ཁྲོད་མ་མོའི་ཚོགས་ཀྱིས་བསྐོར། །ལྷ་སྲིན་སྡེ་བརྒྱད་ཟིལ་གྱིས་གནོན། །དཔའ་བོས་བདུད་ཀུན་འདུལ་དུ་གསོལ། །གྲགས་པའི་དཔལ་གྱིས་ཁྱོད་བསྟོད་བཞིན། །གང་གིས་མགྲིན་པར་བརྒྱན་པ་རྣམས། །ཐུགས་རྗེ་ལྡན་པའི་གུ་རུ་ཡིས། །བདེ་ཆེན་རིག་འཛིན་ཞིང་དུ་དྲོངས། །བདག་གིས་བསྟོད་ཅིང་གསོལ་བཏབ་པའི། །དགེ་བ་གང་དང་གང་བསགས་པ། །རྒྱ་ཆེན་དེ་ཡིས་འགྲོ་བ་རྣམས། །པདྨའི་གོ་འཕང་ཐོབ་པར་ཤོག །སྐབས་འདིར་རྣམ་དག་གི་བསྟོད་པའང་སྤྲིན་བྱ། །བཅུ་གསུམ་པ་ཛབ་བཟླ་བ་ནི། །དཀྱིལ་འཁོར་ལྷ་ཚོགས་ཐམས་ཅད་ཀྱི། །ཐུགས་ཀའི་ས་བོན་སྔགས་ཕྲེང་གི། །འོད་ཀྱིས་ཕྱོགས་བཅུའི་བདེ་གཤེགས་ཀྱི། །བྱིན་རླབས་བསྡུས་ཏེ་བདག་ལ་ཐིམ། །ཨོཾ་ཨཱཿ བཛྲ་གུ་རུ་པདྨ་སིདྡྷི་ཧཱུྃ། ཞེས་གཙོ་བོའི་ཐུགས་ཀར་ཟླ་སྟེང་ཧྲཱིཿམ་མོ་
བརྒྱད་ལ་ཉི་སྟེང་མིང་ཡིག་དང་པོ་ཐིག་ལེས་བརྒྱན་པ་གསལ། །ཧྲཱིཿམཐར་སྔགས་ཕྲེང་གཡས་སུ་བསྐོར་བའི་འོད་ཟེར་སྤྲོ་བསྡུས་དམིགས་ཏེ་བཟླས་པ་ཅི་འགྲུབ་བྱའོ། མཐར་སྟོང་ཚིག་གི་མཆོད་བསྟོད་བྱ། སྐབས་འདི་བུམ་པ་སྒྲུབ་ན་ཟུར་དུ་གསལ་བ་ལྟར་བགྱིས་པས་འཐུས། བདག་འཇུག་ལེན་ན་སློབ་མ་ལ་དབང་བསྐུར་བ་ལྟར་སྐབས་འདིར་བླངས་ཏེ་ཚིག་ཕྲད་ཅུང་ཟད་སྒྱུར་ཤེས་པར་བྱའོ། སྤྱི་དོན་གསུམ་པ་རྗེས་ཀྱི་རིམ་པ་ལ། རྣམ་གྲངས་བཅུ་བཞི་ཡོད་པ་ལས། དང་པོ་ཚོགས་བྱིན་གྱིས་རླབས་པ་ནི། ཚོགས་རྫས་བཟའ་བཏུང་བྱ་ནོམ་པ་བཤགས་ལ་ནང་མཆོད་སོགས་ཀྱི་བྲན་ཏེ། རྃ་ཡྃ་ཁྃ་གིས་བསངས། ཨོཾ་ཨཱཿཧཱུྃ་ལན་གསུམ། ཧཱུྃ། བདག་ཉིད་ལྷ་ཡི་ཐུགས་ཀ་ནས། །རྃ་ཡྃ་ཁྃ་འཕྲོས་ཚོགས་ལ་ཐིམ། །ཚོགས་ཀྱི་དངོས་འཛིན་མཚན་མ་སྦྱངས། །ཚོགས་ཀྱང་ཡེ་ཤེས་བདུད་རྩིར་གྱུར། །བདག་ཉིད་ལྷ་ཡི་ཐུགས་ཀ་ནས། །བྱིན་གྱིས་རློབས་པའི་ཡི་གེ་ནི། །ཨོཾ་དང་ཨཱཿདང་ཧཱུྃ་གསུམ་འཕྲོས། །ཧཱུྃ་གིས་རྣམ་པར་
རྟོག་པ་སྦྱངས། ཨཱཿཡིག་ཡེ་ཤེས་བདུད་རྩིར་བསྒྱུར། །ཨོཾ་གྱིས་འདོད་ཡོན་སྣང་སྲིད་གང་། །ཧྲཱིཿཡིས་ཚོགས་མཆོད་རྒྱས་པར་གྱུར། །གཉིས་པ་ཚོགས་ཞིང་སྤྱན་འདྲེན་པ་ནི། ཧཱུྃ། སྐྱེ་མེད་ཆོས་དབྱིངས་ཕོ་བྲང་ནས། །རྒྱ་བརྒྱུད་བླ་མ་ཐམས་ཅད་ཀྱང་། །ཚོགས་ལ་སྤྱན་འདྲེན་གཤེགས་སུ་གསོལ། །རང་བཞིན་ལྷུ་གྲུབ་ཐམས་ཅད་ནས། །ཡི་དམ་ལྷ་ཚོགས་ཐམས་ཅད་ཀྱང་། །ཚོགས་ལ་སྤྱན་འདྲེན་གཤེས་སུ་གསོལ། །ཉི་ཤུ་རྩ་བཞིའི་གནས་མཆོག་ནས། །དཔའ་བོ་མཁའ་འགྲོ་ཐམས་ཅད་ཀྱང་། །ཚོགས་ལ་སྤྱན་འདྲེན་གཤེགས་སུ་གསོལ། །དུར་ཁྲོད་ཆེན་པོའི་གནས་བརྒྱད་ནས། །ཆོས་སྐྱོང་སྲུང་མ་ཐམས་ཅད་ཀྱང་། །ཚོགས་ལ་སྤྱན་འདྲེན་གཤེགས་སུ་གསོལ། །གསུམ་པ་ཚོགས་འདུལ་བ། དང་པོ་ཚོགས་ཕུད་འབུལ་བ་ནི།
ཧཱུྃ། གསང་ཆེན་ལྷུན་གྲུབ་དཀྱིལ་འཁོར་དུ། །བླ་མ་ཡི་དམ་མཁའ་འགྲོ་ལ། །ཞལ་ཟས་ཚོགས་ཀྱི་མཆོད་པ་འབུལ། །སྐུ་གསུང་ཐུགས་ཀྱི་དངོས་གྲུབ་སྩོལ། །མ་ཧཱ་ག་ཎ་ཙཀྲ་པཱུ་ཛ་ཁཱ་ཧི། །དེའི་རྗེས་འབྲེལ་གཏོར་མ་འབུལ་བ་ནི། །རྃ་ཡྃ་ཁྃ་ཏྲྃ་ཧཱུྃ། གསུམ། ཨོཾ་ཨཱཿཧཱུྃ། ཧཱུྃ། གཏོར་མའི་ཡོ་བྱད་རྷམས་ཅད་ཀུན། །རྣམ་རྟོག་དངོས་འཛིན་བག་ཆགས་སྦྱངས། །རིན་ཆེན་སྣོད་ལ་བདུད་རྩིའི་བཅུད། །འདོད་ཡོན་ལྷ་མོ་སྤྲིན་ལྟར་གཏིབས། །ཨོཾ་ཨཱཿཧཱུྃ་བཛྲ་གུ་རུ་པདྨ་དྷེ་ཝ་ཌཱ་ཀཱི་ནི་བ་ལིཾ་ཏ་ཁཱ་ཧི། ལན་གསུམ། མ་ཧཱ་པཉྩ་ཨ་མྲྀ་ཏ་ཁཱ་ཧི། མ་ཧཱ་རཀྟ་ཁཱ་ཧི། མ་ཧཱ་བ་ལིཾ་ཏ་ཁཱ་ཧི། ཧཱུྃ། སྣང་བ་སྣོད་ཀྱི་འཇིག་རྟེན་གཏོར་གཞོང་དུ། སྲིད་པ་བཅུད་ཀྱི་སེམས་ཅན་གཏོར་མར་སྦྱར། །བཟའ་བཏུང་བྱེ་བྲག་སྣ་ཚོགས་མཆོད་པའི་རྫས། །དཔལ་གྱི་
གཏོར་མ་མཛེས་ཤིང་བརྗིད་པ་འདི། །རི་རྒྱལ་ལྷུན་པོ་བས་ཀྱང་འཕང་རེ་མཐོ། །བདུད་རྩི་སྨན་དང་རཀྟ་འཁྱིལ་བ་འདི། །རྒྱ་མཚོའི་འཆིང་རྣམས་པས་ཀྱང་རྒྱ་རེ་ཆེ། །ཡེ་ཤེས་བདུད་རྩིས་ཚོགས་གཏོར་རྒྱ་ཆེན་འདིས། །བདེ་གཤེགས་ཀུན་འདུས་པདྨ་ཐོད་ཕྲེང་རྩལ། །འཁོར་དང་བཅས་པའི་ཐུགས་དམ་སྐོང་གྱུར་ཅིག །ཐུགས་རྗེས་དགོངས་ལ་དབང་དང་དངོས་གྲུབ་སྩོལ། །ཞེས་འབུལ། །བར་པ་བཤགས་པ་ནི། ཧཱུྃ། སྔོན་བྱུང་དུས་ནས་ད་ལྟའི་བར། །མ་རིག་ལུས་དང་ངག་སེམས་ཀྱི། །རྩ་བ་ཡན་ལག་ཉམས་ཆག་ཀུན། །ཚོགས་ཀྱི་མཆོད་པས་བཤགས་པར་བགྱི། ཞེས་དང་ཡིག་བརྒྱ་བརྗོད། །ཐམ་བསྒྲལ་བཏབ་ནི། ལྕགས་ཀྱུའི་ཕྱག་རྒྱ་དང་བཅས། ན་མོ། རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་
ཀྱི༴ ཆོས་ཀྱི༴ དགེ་འདུན་གྱི༴ བཅོམ་ལྡན་འདས་ཞི་ཁྲོ་བཀའ་བརྒྱད། འདུས་པ་མདོ། སྒྱུ་འཕྲུལ་རྒྱན། འཆི་མེད་ཚེ། སྙིང་པོ་ཕྱག་རྒྱ། ལྷུན་གྲུབ་རིག་འཛིན། གསང་སྔགས་རིགས་སྔགས་ཀྱི་ལྷ་ཚོགས་འཁོར་དང་བཅས་པ་རྣམས་ཀྱི་བདེན་པ་དང་། ཁྱད་པར་གུ་རུ་བདེ་གཤེགས་འདུས་པ་ཞི་ཁོར་རབ་འབྱམས་ཀྱི་ཚོགས་དང་བཅས་པའི་བདེན་པ་དང་། གཞན་ཡང་བཀའ་སྲུང་དམ་ཅན་རྒྱ་མཚོ་རྒྱལ་བའི་དགོངས་པ་བསྐང་ཞིང་ལེགས་ཉེས་ཀྱི་སྟངས་འཛིན་པ། །དམ་ཚིག་གི་རྗེས་གཅོད་པའི་གཏེར་བདག་སྡེ་དཔོན་སུམ་ཅུ། བཀའ་སྲུང་ཤན་པ་སྡེ་བརྒྱད། ཁྲོ་བོ་དང་ཁྲོ་མོ། སྤྲུལ་བ་ཡང་སྤྲུལ། ཕོ་ཉ་ལས་བྱེད་བཀའ་སྲུང་དང་བཅས་པ་རྣམས་ཀྱི་བཀའ་བདེན་པ་དང་། བདེན་པ་ཆེན་པོ་འདི་ཡི་མཐུ་དང་སྟོབས་དང་གཟི་བརྗིད་དང་བྱིན་གྱིས་རླབས་པ་ལ་
བརྟེན་ནས། སྤྱིར་སངས་རྒྱས་བསྟན་པའི་སྤྱི་དགྲ། དཔལ་ལྡན་བླ་མའི་སྐུ་དགྲ། དགེ་བ་བཅུལ་བར་དུ་གཅོད་པ། མི་དགེ་བ་བཅུ་ཡི་སྣ་འདྲེན་པ། བྱེ་བྲག་ཏུ་ཡང་རྣལ་འབྱོར་པ་བདག་ཅག་གི་དམིགས་པའི་རྟེན་དུ་གྱུར་པའི་ལས་ངན་གདུག་པ་ཅན་འདི་ཉིད་ཚེ་དང་བསོད་ནམས་མགོན་སྐྱབས་བྱེད་པའི་དབང་དུ་མ་བཏང་བར། རི་བོའི་རྩེ། རྒྱ་མཚོའི་གཏིང་། ས་འོགས་སྟེང་། ས་བླ་གར་གནས་ཀྱང་སྐད་ཅིག་ཡུད་ཙམ་ལ་ཚོགས་ཐ་མ་འདི་ལ་ཁུག་ཅིག །ནྲྀ་ཏྲི་ཨིཾ་ཀུ་ཤ་ཛ་ལན་གསུམ། ཧཱུྃ། མ་མོ་འབུམ་གྱི་དཀྱིལ་འཁོར་ནས། །པདྨ་ཐོད་ཕྲེང་ལྷ་ཚོགས་རྣམས། །བསྟན་པ་གཉེན་ལ་དགྲ་དར་ན། མི་མངོན་དབྱིངས་ནས་སྐུ་བཞེངས་ལ། །རྣལ་འབྱོར་བདག་གི་ར་མདའ་མཛོད། །གནས་འདིར་དྲག་པོའི་ལས་ལ་བྱོན། །ཡིད་ལ་བརྣག་པའི་དགེ་བགེགས་རྣམས། །
དྲག་པོའི་ལས་ཀྱི་མྱུར་དུ་སྒྲོལ། ཧཱུྃ། མཁའ་འགྲོ་རྒྱ་མཚོའི་དཀྱིལ་འཁོར་འདིར། །ཁོར་བོ་ཁོར་མོ་ཀུན་བཞུགས་ཏེ། སྤྲུལ་པའི་ཕོ་ན་བསམ་ཁྱབ། །ལྕགས་ཀྱུ་ཅན་གྱིས་སྙིང་ནས་ཟུང་། །ཞགས་པ་ཅན་གྱིས་ཡན་ལག་ཅིངས། །ལྕགས་སྒྲོག་ཅན་གྱིས་ལུས་ཀུན་སྡོམས། །དྲིལ་བུ་ཅན་གྱིས་རྒྱབ་ནས་ཕུལ། །ཕོ་ཉ་ཀུན་གྱིས་ཕྲིན་ལས་མཛོད། །ཨོཾ་བཛྲ་ཨང་ཀུ་ཤ་ཛ༔ ཨོཾ་བཛྲ་པ་ཤ་ཧཱུྃ། ཨོཾ་བཛྲ་སྥོ་ཊ་བཾ། ཨོཾ་བཛྲ་ཨ་བེ་ཤ་ཡ་ཧོཿ ཞེས་ཕྱག་རྒྱ་བཞིས་བཅིངས་ལས་ཕུར་བསྒྲིལ་ལ། ཧཱུྃ། ཆེ་མཆོག་པདྨ་ཐོད་ཕྲེང་རྩལ། །རྔམ་དྲག་གདུམ་པའི་རང་བཞིན་ལས། །ཡཀྴ་མེ་དཔལ་སྐར་ལྟར་འཁྲུགས། །ལས་ཀྱི་ཕོ་ཉ་སྟོང་གསུམ་གང་། །ཕྱག་གཡས་རྡོ་རྗེ་ནམ་མཁར་གདེངས། །གཡོན་པས་རི་རབ་ཕུར་བུ་འདྲིལ། །དགྲ་
བགེགས་བསྒྲལ་བའི་དུས་ལ་བབ། །རྡུལ་ཕྲན་བཞིད་དུ་བརླག་པར་མཛོད། །ནྲྀ་ཏྲི་ཤ་ཧྲཱྃ་མཱ་ར་ཡ་རྦད། ཞེས་བསྒྲལ་ཞིང་དུམ་བུར་གཏུབ་པ་བདུད་རྩིར་སྦར་ལ། བླ་མ་ཡི་དམ་མཁའ་འགྲོ་ཞལ་ཕྱེས་ཤིག །ཁམས་གསུམ་ཡོངས་སྒྲོལ་དགྲ་བགེགས་ཞལ་དུ་བསྟབ། །རྔམས་བྱེད་ཧོམ་ཁུང་ཡངས་པའི་མགུལ་དུ་བསྟིམ། ཟ་བྱེད་མི་འགྱུར་ཆོས་ཉིད་དབྱིངས་སུ་རོལ། །ཨོཾ་ཨཱཿཧཱུྃ་གུ་རུ་དྷེ་ཝ་ཌཱ་ཀི་ནཱི་དགྲ་བགེགས་འབྱུང་པོའི་ཤ་ཁྲག་རུས་པ་ལ་ཁཱ་ཧི། བཞི་པ་ཚོགས་ལ་རོལ་པ་ནི། ལས་ཀྱི་རྡོ་རྗེས། ཀྱེ་ཀྱེ་དགོངས་ཤིག་རྣལ་འབྱོར་པ། །གསང་ཆེན་ཐེག་པའི་འདོད་ཡོན་འདི། །བདེ་བ་ཆེན་པོ་སྒྲུབ་པའི་རྫས། །འདིཟན་མེད་རང་གྲོལ་ཆེན་པོར་རོལ། །སློབ་དཔོན་གྱིས། རྒྱལ་བའི་སྤྱོད་ཡུལ་ཐབས་ཀྱི་ལམ། །གཉིས་མེད་བདེ་ཆེན་རང་བཞིན་མཆོག །རྣམ་དག་ཚོགས་ཀྱི་ལོངས་སྤྱོད་འདིར། །ཆོས་ཉིད་
ངང་དུ་རོལ་པར་བྱ། །ག་ཎ་ཙཀྲ་པཱུ་ཛ་ཧོཿ ཞེས་པས་ཚིམ་པར་དྲུག་ལྡན་དུ་རོལ། །རྡོ་རྗེའི་གླུ་དང་སྨོན་ལམ་སོགས་བྱ། ལྔ་པ་ལྷག་མ་ནི། འབྲུ་གསུམ་གྱིས་བདུད་རྩིར་སྦར་ལ་བརླབས། །ཨོཾ་བཛྲ་ཌཱ་ཀི་ནི་ཧཱུྃ་ཛཿ དེ་བཞིན་དུ། བུདྡྷ༴ རཏྣ༴ པདྨ༴ ཀརྨ༴ ཞེས་མགྲོན་བསྡུས་པ། ཧཱུྃ། སྔོན་ཚེ་དཔལ་ཆེན་ཧེ་རུ་ཀའི། །སྤྱན་སྔར་ཁས་བླངས་དམ་བཅའ་ཤིང་། བར་དུ་པདྨ་འབྱུང་གནས་ཀྱི། །སྤྱན་སྔར་ཁས་བླངས་དམ་བཅས་པ། །ད་ལྟ་རིག་འཛིན་བདག་ཉིད་ཀྱི། །བྲན་དང་ཕོ་ཉར་ཁས་བླངས་པའི། །སྒྲུབ་སྡེ་བརྒྱད་ཀྱི་བཀའ་སྲུང་དང་། །གསང་སྔགས་ཐེག་པའི་བཀའ་སྲུང་རྣམས། །བཀའ་ཡི་ཕམ་ཕབ་འདི་བཞེས་ལ། །སྔོན་གྱི་དམ་ཚིག་དྲན་པར་གྱིས། །གསང་སྔགས་བསྟན་པ་རྒྱས་པར་མཛོད། །བདུད་དང་དམ་སྲི་རྡུལ་དུ་གློག །བཅོལ་བའི་ཕྲིན་ལས་འགྲུབ་
པར་མཛོད། བཛྲ་ཌཱ་ཀི་ནི་ཁཱ་ཧི། དེ་བཞིན་དུ། བུདྡྷ༴ རཏྣ༴ པདྨ༴ ཀརྨ༴ ཞེས་བརྗོད་ལ་ལྷག་མ་ཕྱིར་ཕུལ། དྲུག་པ་ཐུགས་དམ་བསྐུལ་བ་ནི། ཧཱུྃ་ཧྲཱིཿ མ་གཡེལ་མམ་གཡེལ་རིག་འཛིན་ཚོགས། །མ་གཡེལ་མ་གཡེལ་ཡི་དམ་ལྷ། །མ་གཡེལ་མ་གཡེལ་མཁའ་འགྲོའི་ཚོགས། །རྗེས་འཇུག་བྱིན་གྱིས་རློབས་པའི་ཕྱིར། །ཁྱེད་ཀྱི་ཐུག་དམ་གནད་ནས་བསྐུལ། །བདུན་པ་གཏོར་མ་སྐྱོང་བ་ནི། ཧཱུྃ། སྔོན་ཚེ་འོག་མིན་གནས་མཆོག་དམ་པ་རུ། །བཅོམ་ལྡན་དཔལ་ཆེན་གར་གྱི་དབང་ཕྱུག་གིས། །སྣང་སྲིད་མ་སྲིང་དམ་ལ་བཏགས་པ་བཞིན། །སྔོན་བཞིན་དགོངས་ལ་གཏོར་མ་འདི་ཡང་གསོལ། །སློབ་དཔོན་ཆེན་པོ་པདྨ་འབྱུང་གནས་དང་། །སློབ་མ་བལ་པོ་བ་སུ་དྷ་ར་གཉིས། །དབེན་གནས་ཡང་ལེ་ཤོད་ཀྱི་བྲག་ཕུག་ཏུ། །རྡོ་རྗེ་དབྱིངས་ཀྱི་
དཀྱིལ་འཁོར་ཞལ་ཕྱེས་ཤིང་། །རྡོ་རྗེ་རིགས་ཀྱི་སྲུང་མ་འཁོར་བཅས་ཀྱི། །སྔོན་བཞིན་དགོངས་ལ་གཏོར་མ་འདི་ཡང་གསོལ། །སློབ་དཔོན་ཆེན་པོ་པདྨ་འབྱུང་གནས་དང་། །སློབ་མ་གནུགས་བན་སངས་རྒྱས་ཡེ་ཤེས་ཀྱིས། །སྒྲགས་ཀྱི་ཡངས་རྫོགས་ཤེལ་ཀྱི་བྲག་ཕུག་ཏུ། །གཤིན་རྗེའི་གཤེད་ཀྱི་དཀྱིལ་འཁོར་ཞལ་ཕྱེས་ཚེ། །བཀའ་སྲུང་མ་མོ་གཟའ་བདུད་འཁོར་བཅས་རྣམས། །སྔོན་བཞིན་དགོངས་པ་གཏོར༴ སློབ་དཔོན་ཆེན་པོ་པདྨ་འབྱུང་གནས་དང་། །སློབ་མ་ངན་ལམ་རྒྱལ་མཆོག་དབྱངས་ཆེན་གྱིས། །མཆིངས་ཕུ་བྲེ་གུ་དགེའུའི་དབེན་གནས་སུ། །རྟ་མགྲིན་དཔང་གི་དཀྱིལ་འཁོར་ཞལ་ཕྱེས་ཚེ། །བཀའ་སྲུང་ཉི་ཤུ་རྩ་གཉིས་འཁོར་བཅས་ཀྱིས། །སྔོན་བཞིན་དགོངས་ལ་གཏོར་མ༴ སློབ་དཔོན་ཆེན་པོ་པདྨ་འབྱུང་གནས་
དང་། །སློབ་མ་གནུབས་བན་ནམ་མཁའི་སྙིང་པོ་ཡིས། །ལྷོ་བྲག་མཁར་ཆུ་གཉེན་གྱི་དབེན་གནས་སུ། །ཡང་དག་ཐུགས་ཀྱི་དཀྱིལ་འཁོར་ཞལ་ཕྱེས་ཚེ། །བཀའ་སྲུང་ཉི་ཤུ་རྩ་བརྒྱད་འཁོར་བཅས་ནི། བྷྱོཿ ཤར་ནས་གཤེགས་པའི་དབང་ཕྱུག་མ་བདུན་དང་། །ལྷོ་ནས་གཤེགས་པའི་དབང་ཕྱུག་མ་བདུན་དང་། །ནུབ་ནས་གཤེགས་པའི་དབང་ཕྱུག་མ་བདུན་དང་། །བྱང་ནས་གཤེགས་པའི་དབང་ཕྱུག་མ་བདུན་དང་། །མ་མོ་ཉི་ཤུ་རྩ་བརྒྱད་འཁོར་བཅས་རྣམས། །སྔོན་བཞིན་དགོངས་ལ་གཏོར་མ་འདི་ཡང་གསོལ། །སློབ་དཔོན་ཆེན་པོ་པདྨ་འབྱུང་གནས་དང་། །སློབ་མ་ཡུམ་མཆོག་མཁར་ཆེན་མཚོ་རྒྱལ་གྱིས། །མོན་ཁ་སེང་གེ་རྫོང་གི་དབེན་གནས་སུ། །རྡོ་རྗེ་ཕུར་པའི་དཀྱིལ་འཁོར་ཞལ་ཕྱེས་ཚེ། །རྡོ་རྗེ་ཕུར་སྲུང་བཅུ་དྲུག་འཁོར་བཅས་ཀྱིས། །སྔོན་བཞིན་
དགོངས་ལ་གཏོར་མ་འདི་ཡང་༴ སློབ་དཔོན་ཆེན་པ་པདྨ༴ སློ་མ་འབྲོག་མི་དཔལ་གྱི་ཡེ་ཤེས་ཀྱིས། །ཡར་ལུང་ཤམ་པོ་གངས་ཀྱི་དབེན་གནས་སུ། །མ་མོའི་རྒྱུད་ལུང་དཀྱིལ་འཁོར་ཞལ་ཕྱེས་ཚེ། །བཀའ་སྲུང་མ་དང་མཁའ་འགྲོ་འཁོར་བཅས་ཀྱིས། །སྔོན་བཞིན་དགོངས་ལ༴ སློབ་དཔོན་ཆེན་པོ་པདྨ་འབྱུང་གནས་དང་། །སློབ་མ་མངའ་བདག་ཁྲི་སྲོང་ལྡེའུ་བཙན་གྱིས། །བྲག་དམར་མཆིམས་ཕུའི་གནས་དང་བསམ་ཡས་སུ། །དྲེག་པ་ཀུན་འདུས་དཀྱིལ་འཁོར་ཞལ་ཕྱེས་ཚེ། །བཀའ་སྲུང་ལྷ་སྲིན་སྡེ་བརྒྱད་འཁོར་བཅས་ཀྱིས། །སྔོན་བཞིན་དགོངས༴ སློབ་དཔོན་ཆེན་པོ་པདྨ༴ སློབ་མ་རླབས་ཆེན་དཔལ་གྱིས་སེང་གེ་ཡིས། །མུ་སྟེགས་ཤེས་ཀྱི་སྤ་མ་ཡང་གོང་དུ། །སྲོག་དང་སེར་བ་གཏད་གསུམ་དགོངས་པ་བཞིན། །བཀའ་སྲུང་ལྷ་གྲུ་
གདོང་མོ་འཁོར་བཅས་ཀྱིས། །སྔོན་བཞིན་དགོངས་ལ་གཏོར༴ སློབ་དཔོན་ཆེན་པོ་པདྨ༴ སློབ་མ་གོར་བཻ་རོ་ཙ་ན་ཡིས། །དཔལ་གྱིས་བསམ་ཡས་ནེའུ་སེང་ཆུ་རྒྱུན་དུ། །མན་ངག་ལྟ་བའི་རྫོང་འཕྲང་བཤད་པའི་ཚེ། །བོད་ཁམས་སྐྱོང་བའི་བརྟན་མ་བཅུ་གཉིས་ནི། །བདག་ཉིད་ཆེན་མོ་རྡོ་རྗེ་ཀུན་གྲགས་མ། །དཔལ་ལྡན་ཧ་རི་རྡོ་རྗེ་གཡའ་མ་སྐྱོང་། །གངས་ཀྱི་ཡུམ་ཆེན་རྡོ་རྗེ་ཀུན་ཏུ་བཟང་། །འབྲོག་ཆེན་བདུད་འདུལ་རྡོ་རྗེ་བགེགས་ཀྱི་གཙོ། །གསེར་གཀྱི་མཁའ་ལྡིང་རྡོ་རྗེ་ཀླུ་མོ་དང་། །གངས་དཀར་ཤ་མེད་རྡོ་རྗེ་གཡུ་སྒྲོན་མ། ཀོང་བཙུན་དེ་མོ་རྡོ་རྗེ་བོད་ཁམས་སྐྱོངས། །ཁ་རག་ཁྱུང་བཙུན་རྡོ་རྗེ་དཔལ་གྱི་ཡུམ། །གངས་ཀྱི་ཡུམ་ཆེན་རྡོ་རྗེ་གཡུ་བུན་མ། །མ་བཙུན་ཁུག་ཆོས་རྡོ་རྗེ་གཡར་མོ་བསིལ། །གཡུ་ཡི་དྲིལ་སྙན་རྡོ་རྗེ་སིལ་ལེ་མ། །བརྡའ་ལ་བཙུན་མོ་རྡོ་རྗེ་ཡེ་
ཤེས་མཆོག བཀའ་སྲུང་སྐྱོང་མ་བཅུ་གཉིས་འཁོར་བཅས་ཀྱི། །སྔོན་བཞིན་དགོངས་ལ་གཏོར་མ་འདི་ཡང་གསོལ། །གཏོར་གཞོང་སྦུབས་པའི་འོག་ཏུ་དམ་སྲིན་ནན་པར་དམིགས་ལ། ཧཱུྃ། ཨེ་ཡི་ཚོགས་ཀྱི་དཀྱིལ་འཁོར་དུ། །འབར་བ་ཁྲོ་བོའི་བརྟུལ་ཞུགས་ཀྱིས། །བདག་ཏུ་ལྟ་བའི་དམ་སྲི་མ་ནན། །ཡེ་ཤེས་དབྱིངས་ལས་མ་འདའ་ཞིག སརྦ་ཧཱུྃ་སརྦ་བིགྷྣཱ་སྟྭྃ་བྷ་ཡ་ནན། བརྒྱད་པ་མཆོད་བསྟོད་ནི། ཧཱུྃ་ཧྲཱིཿ བླ་མ་ཡི་དམ་མཁའ་འགྲོ་ལ། །མཆོད་པའི་བྱེ་བྲག་འབུལ་བ་ནི། །ཕྱི་མཆོད་འདོད་ཡོན་རྣམ་པ་ལྔ། །ནང་མཆོད་ཤ་ལྔ་བདུད་རྩི་ལྔ། །གསང་མཆོད་བྱང་སེམས་བདེ་སྟེར་རྒྱུན། །ཐབས་མཆོག་མཐར་ཕྱིན་བདུད་རྩི་དང་། །ཤེས་རབ་མཐར་ཕྱིན་རཀྟ་དང་། །ཐབས་ཤེས་དབྱེར་མེད་གཏོར་མ་སོགས། །སྐུ་གསུམ་ཀློང་
དུ་བཞེས་ནས་ཀྱང་། །མཆོག་དང་ཐུན་མོངས་དངོས་གྲུབ་སྩོལ། །ཨོཾ་གུ་རུ་དྷེ་ཝ་ཌཱ་ཀི་ནཱི་ས་པ་རི་ཝ་ར་ཨརྒྷཾ་ནས་ཤཔྟ་མ་ཧཱ་པཉྩ་པཱུ་ཛཿ བོ་དྷི་ཙིཏྟ་ག་ཎ་ཧྱ་མ་ཧཱ་པཱུ་ཛཿ སརྦ་པཉྩ་ཨ་མྲྀ་ཏ་རཀྟ་བ་ལིང་ཏ་པཱུ་ཛ་ཁ་ཁ་ཁཱ་ཧི་ཁཱ་ཧི། བསྟོད་པ་ནི། ཧྲཱིཿ མ་བཅོས་སྤྲོས་བྲལ་བླ་མ་ཆོས་ཀྱི་སྐུ། །བདེ་ཆེན་ལོངས་སྤྱོད་བླ་མ་ཆོས་ཀྱི་རྗེ། །པད་སྡོང་ལས་འཁྲུངས་བླ་མ་སྤྲུལ་པའི་སྐུ། །སྐུ་གསུམ་རྡོ་རྗེ་འཆང་ལ་ཕྱག་འཚལ་བསྟོད། །དགུ་པ་ནོངས་བཤགས་ནི། ཡིག་བརྒྱ་ལན་གསུམ་གྱི་མཐར་ཐལ་མོ་སྦྱར་ལ། ཧོཿ བླ་མ་གསང་བ་འདུས་པའི་དཀྱིལ་འཁོར་དུ། །སྒྲུབ་རྫས་དམན་ཞིང་རིང་འཛིན་ཆོ་ག་ཉམས། །འགལ་འཁྲུལ་ནོངས་པ་ཅི་མཆིས་བཟོད་པར་གསོལ། །ཚངས་པ་མཆོག་གི་དངོས་གྲུབ་སྩལ་དུ་གསོལ། །བཅུ་པ་དངོས་གྲུབ་བླངས་པ་ནི། །སྒྲུབ་རྟེན་སྤྱི་གོར་བླངས་ལ། ཧཱུྃ། བདེ་མཆོག་བདེ་སྤྱོད་ནམ་མཁའ་དཀྱིལ་
ཡངས་ནས། །རྒྱལ་བའི་དཀྱིལ་འཁོར་སྲས་བཅས་ཐུགས་དམ་ཅན། །མ་ཧཱ་གུ་རུ་པདྨ་ཐོད་ཕྲེང་རྩལ། །ཡེ་ཤེས་མཁའ་འགྲོ་གསང་བའི་ཡུམ་དང་སྦྱོར། །རྒྱལ་བ་ཡོངས་རྫོགས་མཉམ་སྦྱོར་དངོས་གྲུབ་མཆོག །ད་ལྟ་ཉིད་དུ་བདག་ལ་སྩལ་དུ་གསོལ། །འགྱུར་མེད་སྐུ་ཡི་དངོས་གྲུབ་སྩལ་དུ་གསོལ། །འགགས་མེད་གསུང་གི་དངོས་གྲུབ་སྩལ་དུ་གསོལ། །འཁྲུལ་མེད་ཐུགས་ཀྱི་དངོས་གྲུབ་སྩལ་དུ་གསོལ། །རྡོ་རྗེ་ཚེ་ཡི་དངོས་གྲུབ་སྩལ་དུ་གསོལ། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །ཨོཾ་ཨཱཿཧཱུྃ། མ་ཧཱ་གུ་རུ་སརྦ་སིདྡྷི་ཧཱུྃ། བཅུ་གཅིག་པ་མདུན་བསྐྱེད་གཤེགས་སུ་གསོལ་བ་ནི། །རྟེན་ཡོད་ན་རྟེན་བཞུགས་སྤྱི་ལྟར་བྱ། དམ་ཚིག་པ་རང་ལ་བསྡུ། རྟེན་མེད་ན་དམ་ཡེ་ཆབ་གཅིག་ཏུ་དམིགས་ཏེ། ཧོཿ ཐུགས་རྗེའི་བདག་ཉིད་གུ་རུ་རྗེ། །ཕྲིན་ལས་རྣམ་བཞིས་འགྲོ་བ་འདུལ། །
བདག་གཞན་དོན་གཉིས་མཐར་ཕྱིན་ནས། །སླར་ཡང་སྐྱེ་མེད་ཀློང་དུ་གཤེགས། །ཨོཾ་ཨཱཿཧཱུྃ་བཛྲ་མུཿ བཅུ་གཉིས་པ་བདག་བསྐྱེད་བསྡུ་ལྡན་ནི། །ཕྱི་ནང་སྣོད་བཅུད་སྣང་བ་ཀུན། །ཡིག་འབྲུ་ཧཱུྃ་ལ་ཧྲིལ་གྱིས་བསྡུ། །ཧཱུྃ་ནི་མི་དམིགས་འཇའ་ལྟར་ཡལ། །སླར་ཡང་བདག་ཉིད་ལྷ་ཡི་སྐུ། །ཟུང་འཇུག་རང་རིག་རང་ཤར་གསལ། །བཅུ་གསུམ་པ་སྨོན་ལམ་བཏབ་པ་ནི། །ཧོཿ བདག་གིས་དུས་གསུམ་བསགས་པའི་དགེ་བ་འདིས། །མཚུངས་མེད་བླ་མའི་ཐུགས་དགོངས་རྫོགས་པ་དང་། །ཕ་མས་གཙོ་བྱས་མཁའ་མཉམ་སེམས་ཅན་ཀུན། །ཡང་དག་རྡོ་རྗེ་གདོད་མའི་གནས་ཐོབ་ཤོག །བཅུ་བཞི་པ་བཀྲ་ཤིས་བརྗོད་པ་ནི། ཧྲཱིཿ ངོ་བོ་རང་བཞིན་ཐུགས་རྗེ་མངོན་དུ་གྱུར། །རྩ་བརྒྱུད་བླ་མ་རྣམས་ཀྱི་བཀྲ་ཤིས་ཤོག །མཆོག་དང་ཐུན་མོང་དངོས་གྲུབ་སྩོལ་མཛད་པའི། །ཡི་དམ་ལྷ་ཚོགས་
རྣམས་ཀྱི་བཀྲ་ཤིས་ཤོག །ཉི་ཤུ་རྩ་བཞི་རྩ་རླུང་ཐིག་ལེའི་བདག །དཔའ་བོ་མཁའ་འགྲོ་རྣམས་ཀྱི་བཀྲ་ཤིས་ཤོག །རྒྱལ་བའི་བསྟན་སྲུང་རྣལ་འབྱོར་བུ་བཞིན་སྐྱོང་། །དམ་ཅན་ཆོས་སྐྱོང་རྣམས་ཀྱི་བཀྲ་ཤིས་ཤོག །ཟབ་ཡངས་སྙིང་པོ་བཀའ་ཡི་བྱ་ར་མཛད། །གཏེར་བདེག་དམ་ཅན་རྣམས་ཀྱི་བཀྲ་ཤིས་ཤོག །ཅེས་བརྗོད་ལ་རོལ་མོའི་སྒྲ་སྦྱུར་ཞིང་མེ་ཏོག་གི་ཆར་བསྙིལ་བས་ཤིས་པའི་སྣང་བས་ཁྱབ་པར་བྱའོ། །དེ་ལྟར་གུ་རུའི་ཐུགས་སྒྲུབ་ཀྱི་ལས་བྱང་གནད་བསྡུས་པའི་ཡང་། གྲུབ་ཆེན་སངས་རྒྱས་དབོན་པའི་རྡོ་རྗེའི་གསུང་ཉིད་དཔང་བཞག་ལ་གཏེར་ཁ་གཞན་ནས་ཁ་བསྐང་ཏེ། ༧སྟག་ལུང་པ་ངག་དབང་རྣལ་རྒྱལ་གྱིས་གཏེར་གནས་ཆེན་པོ་རྒྱ་བོ་གདོང་པདྨ་ཧེ་རུ་ཀ་རྔ་བྱུང་གི་དྲུང་དུ་སྦྱར་བའོ། སླར་ཡང་མན་ངག་གཞན་གྱིས་ཅུང་ཟད་ཁ་བསྐང་སྟེ་སྔ་འགྱུར་གྱི་ལུགས་སྲོལ་ལྟར་ཕྱོགས་གཅིག་ཏུ་༧ཕྲིན་ལས་བྱམས་པའི་མིག་གིས་བྲིས་པ་ཆོས་ཚུལ་འདི་ཉིད་ཀྱི་རིང་ལུགས་ཕྱོགས་མཐང་རྒྱས་པའི་མྱུར་གྱུར་ཅིག །སརྦ་མངྒ་ལཾ། །