གུ་རུ་པདྨ་ལ་རྣམ་དག་གི་བསྟོད་པ།
ན་མོ་རཏྣ་གུ་རུ་པདྨ་བི་ཤུདྡྷ་སྟོད་ཏྲ་ན་མ། །གུ་རུ་པདྨ་ལ་རྣམ་དག་གི་བསྟོད་པ་ཞེས་བྱ་བ་བླ་མ་ཐུགས་རྗེ་ཆེན་པོ་དང་ལྡན་པའི་བཙུན་རིན་པོ་ཆེ་རྣམས་ལ་ཕྱག་འཚལ་ལོ། རྒྱ་མཚོ་ཆེན་པོ་ཀློང་ནས་བཞུགས་པ་ནི། །སྲིད་པ་རྣམ་དག་ཆོས་སྐུར་བསྟན་པའི་རྟགས། །སྣ་ཚོགས་པདྨའི་གདན་ལ་འཁྲུངས་པ་ནི། །སྐྱེ་བ་རྣམ་དག་སྤྲུལ་སྐུར་བསྟན་པའི་རྟགས། །མཚན་དང་དཔེ་བྱེད་འབར་བའི་སྐུར་བསྟན་པ། །ཐུགས་རྗེ་འགྲོ་བའི་དོན་དུ་བྱོན་པའི་རྟགས། །སྐུ་མདོག་དཀར་དམར་དམངས་དང་ལྡན་པ་ནི། །གཏི་མུག་མ་སྤངས་གནས་སུ་དག་པའི་རྟགས། །ཡུམ་ཆེན་མཁར་ཆེན་སྐུ་ལ་འཁྲིལ་བ་ནི། །འདོད་ཆགས་མ་སྤངས་གནས་སུ་དག་པའི་རྟགས། །རྡོ་རྗེ་དྲིལ་བུ་གཉིས་མེད་འཁྱུད་པ་ནི། །ཞེ་སྡང་མ་སྤངས་གནས་སུ་དག༴ ལྷབ་ལྷུབ་ན་བཟའ་རྒྱན་དང་ལྡན་པ་ནི། །ང་རྒྱལ་མ་སྤངས་གནས༴ འོད་ཟེར་
སྣ་ཚོགས་ཀུ་ལས་འཕྲོ་བ་ནི། །ཕྲག་དོག་མ་སྤངས་ནས༴ སྐུ་ཡི་ཆ་ལུགས་རྫོགས་ལ་ཕྱག་འཚལ་བསྟོད། །རིག་བྱེད་དང་པོ་ཐོག་མར་འདྲེན་པ་ནི། །སྐུ་ཡི་དངོས་གྲུབ་སྩོལ་བར་བྱེད་པའི་རྟགས། །དབྱངས་ཡིག་དང་པོ་བརྗོད་པར་བྱེད་པ་ནི། །གསུང་གི་དངོས་གྲུབ་ཐོབ་པར་བྱེད་པའི་རྟགས། །མཚན་ཡིག་རྡོ་རྗེའི་འབྲུ་ལྔ་གསུངས་པ་ནི། ཆོས་རྣམས་བླ་མའི་ངོ་བོར་བསྟན་པའི་རྟགས། །དངོས་གྲུབ་བསྐུལ་བྱེད་འབྲུ་གཉིས་བསྟན་པ་ནི། །མཆོག་དང་ཐུན་མོང་དངོས་གྲུབ་སྦྱིན་པའི་རྟགས། །དཔལ་མཆོག་དང་པོ་བརྗོད་པར་བྱེད་པ་ནི། །ཐུགས་ཀྱི་དངོས་གྲུབ་ཐོབ་པར་བྱེད་པའི་རྟགས། །གསུང་གི་གདངས་སྐད་རྫོགས་ལ་ཕྱག་འཚལ་བསྟོད། །དེ་བཞིན་ཉིད་ཀྱི་ངང་དུ་བཞུགས་པ་ནི། །ཆོས་དབྱིངས་ཡེ་ཤེས་ངོ་བོར་བསྟན་པའི་རྟགས། །སྣང་སྟོང་
ཟུང་འཇུག་ཆེན་པོར་བསྟན་པ་ནི། མེ་ལོང་ཡེ་ཤེས་ངོ་བོར་བསྟན་པའི་རྟགས། །རོ་མཉམ་ལྷན་ཅིག་སྐྱེས་པར་གྱུར་པ་ནི། །མཉམ་ཉིད་ཡེ་ཤེས་ངོ་བོར་བསྟན་པའི་རྟགས། །ཤིས་བྱ་མ་འདྲེན་སོ་སོར་གསལ་བ་ནི། །ཀུན་རྟོགས་ཡེ་ཤེས་ངོ་བོར་བསྟན་པའི་རྟགས། མ་གཙལ་ལྷུན་གྲུབ་ཆེན་པོར་གྱུར་པ་ནི། །བྱ་གྲུབ་ཡེ་ཤེས་ངོ་བོར་བསྟན་པའི་རྟགས། །ཐུགས་ཀྱི་རང་བཞིན་རྫོགས་ལ་ཕྱག་འཚལ་བསྟོད། །བདག་ལུས་གུས་པས་སྐུ་ལ་འདུད་པར་བགྱི། །ལུས་གནས་དག་པར་སྤྲུལ་སྐུར་བྱིན་གྱིས་རློབས། །ངག་གནས་དག་པ་གསུང་ལ་འདུད་པར་བགྱི། །ངག་གནས་དག་པ་ལོངས་སྐུར་བྱིན་གྱིས་རློབས། །བདག་ཡིད་དྭངས་བས་ཐུགས་ལ་འདུད་པར་བགྱི། །སེམས་གནས་དག་པ་ཆོས་སྐུར་བྱིང་གྱིས་རློབས། །སྒོ་
གསུམ་གུས་པས་སྐུ་གསུང་ཐུགས་ལ་འདུད། །རྣམ་གསུམ་དག་པ་ཉིད་སྐུར་བྱིན་གྱིས་རློབས། །གྲགས་དཔལ་དད་པས་ཁྱོད་ལ་གུས་བསྟོད་པས། །དགེ་བ་གང་དག་བསྐྲུན་པ་དེ་ཡི་ནི། །ནམ་མཁའི་མཐའ་ཀླས་གྱུར་པའི་སེམས་ཅན་རྣམས། །མཚུངས་བྲལ་བླ་མའི་ཡེ་ཤེས་འཇུག་པར་ཤོག །གུ་རུ་པདྨ་ལ་རྣཾ་དག་གི་བསྟོད་པ་ཞེས་བྱ་བ་བླ་མ་ནི་རིན་པོ་ཆེ་སངས་རྒྱས་ཡར་བྱོན་གྱི་ཞབས་ཀྱི་པད་མོ་རྙོགས་པ་མེད་པ་ལ་གུས་པར་སྤྱི་བོའི་གཙུག་གིས་གཏུགས་ཤིང་དྲིན་གྱིས་ལེགས་པར་དོམས་པས་བགྱིས་པ་རྗེ་དེ་ཉིད་ཀྱི་སྙན་བརྒྱུད་དྲི་མ་མེད་པའི་ཆོས་ཀྱི་གསང་མཛོད་འཛིན་པ་ཤཀྱའི་དགེ་སློང་ཀྱིའི་རྡོ་རྗེ་འཆང་བའི་རྣལ་འབྱོར་པ་ཀིརྟི་ཤྲཱིའི་ཡུལ་མདོ་ཁམས་ཀྱི་ས་ཆ་དབྱི་ཤོད་ཀྱི་ལུང་པ་དཔལ་རི་བོ་ཆེའི་དགོན་པར་འབྲུག་ལོ་སྤྲུལ་གྱི་ཟླ་བའི་ཡར་ཚེས་བཅུ་ལ། དགེ་བཤེས་གཞོན་ནུ་དར་གྱིས་གསོལ་བ་བཏབ་པའི་ངོར་ཡི་ཡེ་ཉེ་ཕང་སྦྱར་བ་རྫོགས་སོ། །