ཁོག་དབུག་ཆུང་ངུ་།
༄༅། །ཁོག་དབུག་ཆུང་ངུ་།
༄༅། །བཅོམ་ལྡན་འདས་དཔལ་རྡོ་རྗེ་སེམས་དཔའི་དགོངས་མཛད་ལྷུན་གྱིས་གྲུབ་པའི་རྫོགས་པ་ཆེན་པོར་ཤེས་པར་བྱའོ། །དགོས་འབྲེལ་ནི་རྣམ་པ་ལྔ་སྟེ། རྗོད་པ་དང་། བརྗོད་པར་བྱ་བ་དང་།དགོས་པ་དང་། འབྲེལ་པ་དང་། དགོས་པའི་ཡང་དགོས་པའོ། །དེ་ལ་རྗོད་པར་བྱེད་པ་ནི་གསང་བའི་རྒྱུད་འདི་ཉིད་དོ། །བརྗོད་པར་བྱ་བ་ནི་དཔལ་རྡོ་རྗེ་སེམས་དཔའི་དགོངས་སྤྱོད། གསང་བ་ཀུན་གྱི་སྙིང་པོ་ཤིན་ཏུ་གསང་བ་ཆེན་པོ་འདིའི་ཡོན་ཏན་ཐམས་ཅད་བརྗོད་པར་བྱ་བ་ཡིན་ནོ། །དགོས་པ་ནི་དཀྱིལ་འཁོར་དང་དམ་ཚིག་དང་། འཕྲིན་ལས་དང་།མཆོད་པ་ལ་སོགས་པའི་དོན་ཤེས་པའོ། །འབྲེལ་པ་ནི་དགོས་པ་ཡོད་ཀྱང་འབྲེལ་པ་མེད་པ་དང་། འབྲེལ་པ་ཡོད་ཀྱང་དགོས་པ་མེད་པ་ལྟ་བུ་ནི་མ་ཡིན་ཏེ། རྒྱུད་འདིའི་དོན་ཤེས་པས་དེ་བཞིན་གཤེགས་པའི་སྐུ་ གསུང་ཐུགས་ཀྱི་ཆེ་བའི་ཡོན་ཏན་རྒྱུད་འདི་ལས་བྱུང་བས། ཐབས་དང་ ཐབས་ལས་བྱུང་བའི་ཚུལ་དུ་འབྲེལ་ཏོ། །དགོས་པའི་ཡང་དགོས་པ་ནི། བཅོམ་ལྡན་འདས་བདེ་བ་ཆེན་པོ། །དཔལ་རྡོ་རྗེ་སེམས་དཔའི་སྐུ་གསུང་ ཐུགས་ཡོན་ཏན་འཕྲིན་ལས་ཆེ་བའི་ཡོན་ཏན་ཐམས་ཅད་གྲུབ་བོ། །ལྷ་རྗེ་རྫས་སྣང་བའི་དོན་དུ་མཛད་པའི་ཁོག་དབུག་ཆུང་ངུ་ཞེས་བྱ་བ་རྫོགས་སོ།། །།རོང་ཟོམ་གསུང་ངོ་། །