སྤར་བྱང་སྨོན་ཚིག
༄༅། །ཨོཾ་སྭཱ་སྟི། སྔོན་དུས་གངས་ཅན་རི་སུལ་འདི། །ཆོས་དང་རྒྱལ་བས་སྟོང་པ་ཡི། །བདུད་ཡུལ་མུན་པའི་གླིང་དགུར་གྲགས། །དམར་ཕྱོགས་མཚན་མུན་འཁྲིགས་དང་མཚུངས། ༡ །དེ་ཚེ་འཕགས་ཆེན་རྒྱལ་སྲས་ཚོགས། །དམན་འགྲོར་ལྷག་བརྩེའི་ཐུགས་རྗེ་ཡིས། །ས་སྐྱོང་རྒྱལ་བློན་བཙུན་མོར་བཅས། །སྤྲུལ་པ་ཉི་ཟེར་རྡུལ་ལྟར་ལྷགས། ༢ །ཁྱད་པར་བདེ་གཤེགས་སྣང་མཐའ་ཡས། །འཇིག་རྟེན་དབང་ཕྱུག་པད་འབྱུང་སོགས། །པདྨའི་རིགས་ཀྱིས་གདུལ་གཟིགས་ཏེ། །རྫུས་སྐྱེས་སྤྲུལ་པའི་སྐུར་ཡང་བསྟན། ༣ །དང་པོའི་ལས་ཅན་བྱིས་པའི་ངོར། །བོན་སྒྲུང་མོ་རྩིས་ཕྱྭ་གཡང་སོགས། །རྒྱལ་བའི་ཕྲིན་ལས་སྣ་ཚོགས་པས། །འགྲོ་རྣམས་ངལ་གསོའི་དབུགས་དབྱུང་ཐོབ། ༤།ཀུན་བཟང་ལྷ་མཆོག་ཐོ་ར་འདུས། །དམ་ཆོས་རྟེན་གསུམ་སྐྱ་རེངས་ཤར། །མུན་གླིང་སྣང་བའི་སྒོ་ཆེན་ཕྱེས། །མཆོག་གསུམ་བསྟན་པའི་ཞིང་དུ་གྱུར། །༥ རིགས་གསུམ་ཆོས་རྒྱལ་མེས་དབོན་དང་། །སྤྲུལ་པའི་ལོ་པཎ་མཁན་སློབ་འཛོམས། །རྒྱལ་བསྟན་ཉིན་བྱེད་འདྲེན་པའི་ཚེ། །འོག་མིན་ཞིང་ཁམས་ལྗོངས་འདིར་ས་ས་འཕོས། ༦ །དེ་འདྲའི་མདོ་སྔགས་རྫོགས་ལྡན་དཔྱིད། །འཕགས་པའི་ཡུལ་དུའང་མ་བྱུང་ཞེས། །དཔལ་ལྡན་དཱི་པཾ་ཀཱ་ར་ཡིས། །ཞལ་བཞེས་གནང་སྟེ་དན་དཔང་མཛད། ༧ །ཁྱད་པར་རྒྱལ་དབང་མཚོ་སྐྱེས་རྗེས། །ལྷ་འདྲེ་དམ་བཏགས་སྲོག་སྙིང་བླངས། །ས་གཞི་བྱིན་བརླབས་གཏེར་གྱིས་གཏམས། །མདོ་སྔགས་ཆོས་འཁོར་བསྐོར་བ་བཅས། ༨ །མཛད་ཆེན་ཕྲིན་ལས་མ་སྐྱོང་ན། །ཕྱི་རབས་བསྟན་འགྲོའི་བདེ་སྐྱིད་ཀུན། །ནམ་མཁར་བྲིས་པའི་རི་མོ་བཞིན། །བརྟན་པའི་གོ་སྐབས་ག་ལ་སྲིད། ༩ །འོན་ཀྱང་མི་བསུན་བྱིས་པ་འགས། །དྲིན་ལྡན་ཕ་མ་ལ་འཁུ་ལྟར། །ཁྱོད་ཀྱི་ཆོས་བསྟན་གཤུང་རྣམས་ལ། །སྲས་བཅས་རྒྱལ་བས་དབྱིངས་ནས་ཁྲེལ། ༡༠ །བདག་ཅག་དད་པས་རྗེས་འབྲང་བས། །ལྟ་དགོངས་ཟབ་དོན་མ་རྟོགས་ཀྱང་། །ལོག་ལྟས་ཆོས་སྤོང་མ་བསགས་ཙམ། །ཚེ་རབས་ཀུན་ཏུ་སྙིང་ནས་སྨོན། ༡༡ །སྔ་དར་རྒྱ་ཆེན་བཀའ་ཡི་མཛོད། །གཉགས་གནུབས་ཟུར་གསུམ་ལ་བབས་པའི། །རྒྱུན་འཛིན་མཁས་གྲུབ་གཟའ་སྐར་བཞིན། །གྲངས་ལས་འདས་པ་བྱོན་མོད་ཀྱང་། ༡༢ །འགལ་རྐྱེན་དམ་སྲིའི་འཚེ་བ་ཡིས། །རྒྱལ་བསྟན་འགག་ལ་གཏུགས་པའི་ཚེ། །མེ་རོ་སླར་གསོའི་སྲོག་སྤར་བྱུང་། འཛིན་མཁན། །འཕགས་ཆེན་མཛད་རྗེས་ངོ་མཚར་ཅན། ༡༣ །སྔོན་དུས་རོང་ཟོམ་ཀློང་ཆེན་རྗེ། །བར་དུ་སྨིན་གཏེར་སྐུ་མཆེད་ཀྱིས། །རྙིང་བསྟན་གསོས་པའི་བཀའ་དྲིན་ལ། །ཕྱི་བྱོན་མཁས་གྲུབ་དུ་མས་བསྔགས། ༡༤ །དེ་ལ་འདིར་སྐབས་སུ་བབ་པ། སྔ་འགྱུར་བཀའ་མའི་བསྟན་སྲོག་འཛིན་པའི་ཤིང་རྟ་ཆེན་པོ། མཁས་ཤིང་གྲུབ་པའི་དབང་ཕྱུག སྤྲུལ་པའི་ལོ་ཙཱ་བ་མ་ཧཱ་པཎྜི་ཏ། དཔལ་རོང་ཟོམ་ཆོས་ཀྱི་བཟང་པོ་ནི། སྔ་འགྱུར་ལོ་ཙཱ་བ་རྣམས་ཀྱི་ཕྱི་ཤོས་ཡིན་པས། རབ་བྱུང་དང་པོའི་ལྕགས་འབྲུག་ལོར་གཙང་རོང་སྣར་ལུང་དུ་སྐུ་འཁྲུངས་ནས། སྐྱེས་སྦྱངས་མཁྱེན་རབ་ཀྱི་ཡོན་ཏན་གངས་རིའི་ཁྲོད་ན་འགྲན་ཟླ་བྲལ་ཞིང་། །གཞན་ཕན་ཕྲིན་ལས་ཀྱིས་རྒྱལ་བསྟན་ཇི་ལྟར་བསྐྱང་ཚུལ་རྣམ་ཐར་ཇི་སྙེད་ཅིག་སྔོན་གྱི་ཆོས་འབྱུང་དེབ་ཐེར་རྣམས་དང་། འཇམ་མགོན་མི་ཕམ་རིན་པོ་ཆེས་མཛད་པའི་བཀའ་འབུམ་པར་རྙིང་གི་དཀར་ཆག་ཏུ་གསལ། འདིར་ཕྱིས་བྱོན་མཁས་གྲུབ་དུ་མས་ཇི་ལྟར་བསྔགས་ཚུལ་ཟུར་ཙམ་བརྗོད་ན། ཀུན་མཁྱེན་འཇིགས་མེད་གླིང་པས། ཇི་སྐད་དུ། གངས་རིའི་ཁྲོད་ན་མདོ་སྒྱུ་སེམས་གསུམ་གྱི་བསྟན་པ་མི་ནུབ་པའི་རྒྱལ་མཚན་དུ་གྱུར་པ་རོང་ཟོམ་པཎྜི་ཏ་ཆེན་པོ། རྒྱལ་བ་ཀློང་ཆེན་རབ་འབྱམས། གཡུང་སྟོན་རྡོ་རྗེ་དཔལ། པཎྜི་ཏ་ཡེ་ཤེས་རོལ་པ་ལ་སོགས་ངོ་མཚར་བརྒྱུད་པའི་བླ་མ། ཞེས་དང་། དབང་ལུང་རྒྱུན་ལ་མདོ་སྒྱུ་སེམས། །རྒྱུད་འབུམ་ལ་སོགས་བཀའ་མའི་རྒྱུན། །སྙིང་ཐིག་ཡ་བཞི་སྒྲུབ་སྡེ་བརྒྱད། །ཡོད་ན་སྔ་འགྱུར་བསྟན་པ་ཡོད། །མེད་ན་དེ་ཉིད་ཉམས་པའི་རྟགས། །ཡིན་པས་རང་སྡེའི་སྲོལ་འབྱེད་ལ། །ཀུན་མཁྱེན་རྗེ་དང་རོང་ཟོམ་ཞབས། །མངའ་རིས་པཎ་ཆེན་ཤེས་རབ་འོད་། །འགྲན་ཟླ་བྲལ་བའི་མཁས་གྲུབ་ཡིན། །དེ་དག་གཞུང་ལ་གུས་པ་བསྐྱེད། །ཞེས་གསུངས་པ་དང་། ཟེ་ཆེན་རྒྱལ་ཚབ་འགྱུར་མེད་པདྨ་རྣམ་རྒྱལ་གྱིས་ཀྱང་། ཟུར་པ་ཡབ་སྲས་བཤད་སྒྲུབ་རྩ་བ་བཙུགས། །རོང་ཀློང་སྒྲོལ་གཡུང་བཤད་སྒྲུབ་ཡན་ལག་བརྐྱངས། །མྱོས་སྟོན་སྐུ་མཆེད་བཤད་སྒྲུབ་མེ་འབྲས་བསྐྱེད། །དེང་ཡང་སྤྱོད་ཡོད་བཀའ་དྲིན་འཁོར་མཐའ་ཅི། །སྲིད་འབྱོར་བྱེ་བས་ཁུག་མིན་རཏྣའི་མཛོད། །ཟླ་བྲལ་བ་ཡི་ནོར་སྐལ་འདི་ཡོད་བཞིན། །གཞན་ལུགས་འཆིང་བུའི་རྡོ་ལ་རིན་ཆེན་དུ། །རེ་བས་རྒྱུག་རྣམས་སྐལ་བ་དམན་པར་ཤེས། །ཞེས་གསུངས་པ་ལྟར་ཡིད་ཆེས་བྱ་བའི་གནས་སོ། །སླར་སྨྲས་པ། ས་ཆེན་འཕགས་པ་རོང་ཟོམ་བཀའ་ཡི་མཛོད། །བཛྲ་དྷ་རའི་རྒྱུད་དང་དབྱེར་མེད་པས། །རྟོན་པ་བཞི་ལྡན་ངེས་དོན་གཞུང་འདི་འདྲ། །སྲིད་གསུམ་འཇིག་རྟེན་བཙལ་ཀྱང་རྙེད་པར་དཀའ། ༡ །དེ་ཕྱིར་སྔ་འགྱུར་ཆོས་ལ་དད་ཅིང་གུས། །གཞུང་ལུགས་རབ་འབྱམས་དྲང་ངེས་མ་ནོར་བ། །སོ་སོར་འབྱེད་ལ་དོན་གཉེར་བློ་ལྡན་ཚོས། །གཞུང་བཟང་འདི་དག་ཐོས་བསམ་བྱ་བར་རིགས། ༢ ། ཕུན་ཚོགས་ལྔ་ལྡན་སྔོན་དུས་ལས་ཅན་ངོར། །གསུང་རབ་པུསྟི་དབྱངས་གསལ་གྲངས་བརྒལ་ཡང་། །སྙིགས་དུས་གདུལ་བྱའི་བསོད་ནམས་བགོ་སྐལ་དུ། །སྐུ་གསུམ་མཚོན་པར་བཞུགས་འདིར་གཟིགས་བརྩོན་འཚལ། ༣ །གྲངས་མེད་རིག་འཛིན་འོད་སྐུར་གཤེགས་པའི་ལམ། །ཨུ་དུམ་ཝཱ་རའི་གཙུག་རྒྱན་སྐལ་ཐོབ་བཞིན། །ཆུ་སྐྱེས་སེར་པོར་གསེར་གྱི་ཅོད་པན་དུ། མངོན་རློམ་རེ་འཚོལ་ངལ་བ་ཅི་ཞིག་དགོས།༤ །ཆོས་ཚུལ་འདི་ལ་རྣམ་དཀར་འབྲེལ་མཚོན་དགེས། །སྙིང་པོའི་བསྟན་པ་མི་ནུབ་དར་ཞིང་རྒྱས། །བསྟན་འཛིན་སྐྱེས་བུའི་ཕྲིན་ལས་སྲིད་གསུམ་ཁྱབ། །བདག་དང་འབྲེལ་ཐོགས་མངོན་སངས་རྒྱས་གྱུར་ཅིག །ཅེས་པའང་སྔ་འགྱུར་བཀའ་མ་ནང་རྒྱུད་སྡེ་གསུམ་གྱི་དགོངས་འགྲེལ་རྒྱབ་ཆོས་སུ་གཏོགས་པ་མ་ཧཱ་པཎྜི་ཏ་རོང་ཟོམ་ཆོས་ཀྱི་བཟང་པོའི་གསུང་རབ་པུསྟི་ཀ་བཅུ་ཕྲག་ཁ་ཤས་སྔར་དུས་སུ་བཞུགས་པར་གྲགས་ཀྱང་། ཕལ་ཆེར་རིམ་གྱིས་ནུབ་སྟེ་མི་མིན་གྱི་བསོད་ནམས་ལས་སྐལ་དུ་གྱུར། ཕྱིས་སུ་ལོ་ཆེན་བཻ་རོའི་རྣམ་འཕྲུལ་རྒྱལ་སྲས་གཞན་ཕན་མཐའ་ཡས་འོད་ཟེར་གྱིས་དབུས་གཙང་ཁམས་གསུམ་ནས་བཀའ་བསྡུ་གནང་བ་རྩ་པོད་གཉིས་དང་། རྗེས་བསྡུས་པོད་གཅིག་བཅས་སྐུ་གསུམ་གྲངས་ལྡན་རྫོགས་ཆེན་ཤྲཱི་སེང་དུ་པར་བཞུགས་པ་དུས་འགྱུར་སྐབས་སྤྱན་མའི་ཀློང་དུ་ཐིམ་སྟེ་དཔེ་རྒྱུན་ནུབ་ཉེར་གྱུར་ཚེ་རྒྱལ་བསྟན་བསྐྱར་གསོར་ཆ་ཙམ་ཕན་བློས་བཀའ་འབུམ་པོད་གསུམ་ཤིང་པར་བསྐྱར་སྐྲུན་བྱེད་པོ་དགེ་སྦྱོང་ཐ་ཤལ་བ་རྒན་བུ་པདྨ་ཀུན་གྲོལ་མིང་ཅན་དེས་སྨོན་ཚིག་ཏུ་བྲིས་པ་འདིས་མཚོན་དུས་གསུམ་བསགས་དགེས་སྙིང་པོའི་བསྟན་པ་མི་ནུབ་ཡུན་གནས་ཡོང་བའི་རྒྱུར་གྱུར་ཅིག། ། ། སརྦ་མངྒལཾ།