ལྷག་མ།
༈ ལྷག་མ་ནི། ཧཱུྃ། ཧེ་རུ་ཀ་པའི་དཀྱིལ་འཁོར་དུ། །ཚོགས་ཀྱི་མཆོད་པ་ཕུལ་བ་ཡིས། །བདག་གཞན་འགྲོ་བ་མ་ལུས་པ། །དཀྱིལ་འཁོར་གཅིག་ཏུ་འགྲུབ་པར་ཤོག །ཨ་ཀ་རོ་མི་ཁཾ་སརྦ་དྷརྨས་བྱིན་གྱིས་བརླབས། ཨོཾ་ཨཱ་ཧཱུྃ། ལྷག་ལ་དབང་བ་དྲེག་པའི་ཚོགས༔ སྤྲིན་ལྟར་གཏིབས་ཅིང་ཧབ་ཤ་རྒྱུག༔ ཤ་ཁྲག་རྗེན་པའི་ཚོགས་ལྷག་བཞེས༔ སྔོན་གྱི་དམ་བཅའ་ཇི་བཞིན་དུ༔ བསྟན་དགྲ་དམ་ཉམས་ཟས་སུ་ཟོ༔ རྟགས་དང་མཚན་མ་མྱུར་དུ་སྟོན༔ བསྒྲུབ་པའི་བར་ཆད་ཟློག་པ་དང༔ ཕྲིན་ལས་ཐོགས་མེད་འགྲུབ་པར་མཛོད༔ ཨུཙྪིཥྚ་བྷ་ལིང་ཏ་ཁ་ཧཱི༔ ཚོགས་མཆོད་ཕུལ་བའི་བསོད་ནམས་ཀྱིས། །མི་ཟད་གཏེར་ལ་ལོངས་སྤྱད་ནས། །ཡེ་ཤེས་སྣང་བ་རབ་གསལ་ཏེ། །ཀ་དག་ཆེན་པོའི་ས་ཐོབ་ཤོག །