གྲིབ་བསང་བསྡུས་པ།
༈ གྲིབ་བསང་། རཾ་ཡཾ་ཁཾ། ཨོཾ་ཨཱཿཧཱུྃ། ཀྱཻ། ཡོངས་གྲུབ་བདེ་གཤེགས་སྙིང་པོ་ལ། །ཀུན་རྟོག་གྲིབ་ཀྱིས་ཕོག་པ་བསང་། །འཁོར་འདས་བདེ་བ་ཆེན་པོ་ལ། །གཟུང་འཛིན་གྲིབ་ཀྱིས་ཕོག་པ་བསང་། །སྣོད་བཅུད་དག་མཉམ་ཆེན་པོ་ལ། །གཞན་དབང་གྲིབ་ཀྱིས་ཕོག་པ་བསང་། །རྒྱུ་རྐྱེན་རྟེན་འབྲེལ་ཐབས་དུ་མས། །རྣམ་པར་རྟོག་པའི་དྲི་མ་བསང་། །ཤེལ་སྒོང་བཞིན་དུ་དག་གྱུར་ཅིག །ཡེ་ཤེས་རང་མདངས་རྒྱས་གྱུར་ཅིག །ཅེས་པ་འདི་དྲི་མེད་ཞིང་སྐྱོང་པས་སྦྱར་བ་དགེ། ༈ བསང་མཆོད་བསྡུས་པ་ནི། རཾ་ཡཾ་ཁཾ། ཨོཾ་ཨཱཿཧཱུྃ། ཧཱུྃ། སྣང་སྟོང་རྣམ་དག་བདུད་རྩིའི་བསང་མཆོད་འདིས། །རྣམ་རྟོག་ལས་བྱུང་གྲིབ་དང་མི་གཙང་ཀུན། །དག་གསལ་རྙོགས་མེད་ཆོས་སྐུ་ཆེན་པོའི་ངང་། །བསང་ངོ་ཀུན་བཟང་སྒྲིབ་མེད་ཀློང་དུ་ཨ། མི་ཕམ་གསུང་།