འདི་ཕྱི་བར་དོ་གསུམ་གྱི་སྨོན་ལམ།

༄༅། །འདི་ཕྱི་བར་དོ་གསུམ་གྱི་སྨོན་ལམ་ཀུན་འདུས་བཞུགས་སོ། །ཕྱོགས་བཅུའི་ཞིང་ཁམས་རབ་འབྱམས་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་སྨོན་ལམ་ལ་མངའ་བརྙེས་པ་ཐམས་ཅད་བདག་ལ་དགོངས་སུ་གསོལ། ཐུགས་རྗེས་བཟུང་དུ་གསོལ། སྐྱེ་བ་ནས་སྐྱེ་བ་ཚེ་རབས་ནས་ཚེ་རབས་སུ་སྡིག་སྒྲིབ་ཐམས་ཅད་ད་ལྟ་ཉིད་དུ་བྱང་ཞིང་དག་པར་གྱུར་ཅིག ནང་གི་རྒྱུ་ཕྱིའི་རྐྱེན་བར་གྱི་མཚམས་སྦྱོར་ལ་སོགས་པ་དུས་གསུམ་གྱི་ལས་ངན་རྒྱུ་འབྲས་ས་བོན་བག་ལ་ཉལ་བ་དང་བཅས་པ་ཐམས་ཅད་ད་ལྟ་ཉིད་དུ་བྱང་ཞིང་དག་པར་གྱུར་ཅིག ཕྱིན་ཆད་ཀྱང་དམ་པའི་ཆོས་མ་བགྱིས་པའི་ལས་ལ་སྐད་ཅིག་ཙམ་ཡང་མི་འཇུག་པར་གྱུར་ཅིག བྱ་བ་དང་བྱེད་པ་ཐམས་ཅད་དཀར་པོ་དགེ་བའི་ལས་སུ་རང་བཞིན་གྱིས་འགྲུབ་པར་གྱུར་ཅིག བླ་མ་ལ་སངས་རྒྱས་ཀྱི་འདུ་ཤེས་འབྱུང་བར་གྱུར་ཅིག སྣང་བ་ཐམས་ཅད་ཡི་དམ་ལྷ་རུ་འཆར་བར་གྱུར་ཅིག བྱམས་པ་དང་སྙིང་རྗེ་བྱང་ཆུབ་ཀྱི་སེམས་རིན་པོ་ཆེ་རྒྱུད་ལ་སྐྱེ་བར་གྱུར་ཅིག མདོ་སྔགས་ཀྱི་ཆོས་ཐམས་ཅད་རང་བཞིན་གྱིས་གོ་བར་གྱུར་ཅིག འཆི་བ་སྙིང་ནས་དྲན་པར་གྱུར་ཅིག ལས་རྒྱུ་འབྲས་ཀྱི་གནད་གོ་བར་གྱུར་ཅིག སྐྱིད་སྡུག་གི་བྱ་བ་ཐམས་ཅད་རྨི་ལམ་ལྟ་བུར་གོ་བར་གྱུར་ཅིག ཚེ་འདི་ལ་ནད་དང་སྡུག་བསྔལ་རྐྱེན་ངན་བར་ཆད་ཀྱི་དབང་དུ་མི་འགྲོ་བར་གྱུར་ཅིག ལུས་ངག་ཡིད་གསུམ་གྱི་བྱ་བ་ཐམས་ཅད་དམ་པའི་ཆོས་སུ་འགྲོ་བར་གྱུར་ཅིག རྒྱུ་ཟས་ནོར་ལོངས་སྤྱོད་ཕྱུག་རྫས་ཐམས་ཅད་ཞིང་དག་པའི་གནས་སུ་འགྲོ་བར་གྱུར་ཅིག དུས་མ་ཡིན་པར་འཆི་བའི་དབང་དུ་མི་འགྲོ་བར་གྱུར་ཅིག གལ་ཏེ་དུས་ལ་བབ་ཏེ་འཆི་བའི་ཚེ་ན་གནད་གཅོད་གྱི་སྡུག་བསྔལ་སྤུ་ཙམ་ཡང་མེད་པར་གྱུར་ཅིག དྲན་པ་གསལ་ཞིང་རང་དབང་ཐོབ་ནས་སེམས་དགའ་སྤྲོ་དང་བཅས་ཏེ་འཆི་བར་གྱུར་ཅིག དེའི་ཚེ་ན་བླ་མ་ལྷ་ཡི་བསུ་མ་དང་བཅས་ཏེ་དག་པའི་སྣང་བ་དཔག་ཏུ་མེད་པ་འཆར་བ་གྱུར་ཅིག བར་དོ་ན་རང་ངོ་རང་གིས་ཤེས་པར་གྱུར་ཅིག འོད་ཐམས་ཅད་རང་འོད། སྒྲ་ཐམས་ཅད་རང་སྒྲ། གཟུགས་ཐམས་ཅད་རང་གཟུགས། ཕྱི་ནང་མེད་པར་དབྱེར་མེད་འོད་ཀྱི་ལུས་ཀློང་དུ་གྲོལ་བར་གྱུར་ཅིག དེའི་དུས་སུ་བླ་མའི་གདམས་ངག་དྲན་པར་གྱུར་ཅིག ཡི་དམ་ལྷ་ཡི་བསྐྱེད་རིམ་གསལ་བར་གྱུར་ཅིག ལུས་འོད་ལུས་སེམས་ཆོས་སྐུ་བར་དོ་ལོངས་སྤྱོད་རྫོགས་སྐུ་སྒྱུ་མའི་སྐུར་སངས་རྒྱས་པར་གྱུར་ཅིག གལ་ཏེ་འཁྲུལ་སྣང་གི་དབང་གིས་ལམ་གཞན་དུ་འཁྱོག་པར་གྱུར་ན་མངལ་གྱི་སྒོ་འགག་པར་གྱུར་ཅིག རང་རིག་ཡེ་ཤེས་ངོ་ཟིན་པར་གྱུར་ཅིག སྐྱབས་གནས་བླ་མ་དྲན་པར་གྱུར་ཅིག དེ་ལས་ཀྱང་རང་དབང་མ་ཐོབ་ནས་ལས་རླུང་གི་དེད་པར་གྱུར་ན་ཕ་མ་འབྱོར་ལྡན་དམ་པའི་ཆོས་དང་མཐུན་པའི་བུ་རུ་སྐྱེ་བར་གྱུར་ཅིག དེ་ཡང་དལ་འབྱོར་གྱི་ལུས་དཀར་པོ་དགེ་བའི་ཆོས་དང་ཕྲད་པར་གྱུར་ཅིག ཆུང་ནས་གཞོན་ནུ་སོགས་རབ་བྱུང་ཚུལ་ཁྲིམས་རྣམ་པར་དག་པ་གྱུར་ཅིག མདོ་རྒྱུད་མན་ངག་ཐམས་ཅད་རང་བཞིན་གྱིས་གོ་བར་གྱུར་ཅིག ཕྱི་འདུལ་བ་དང་ནང་བྱང་སེམས་གསང་བ་སྔགས་ཀྱི་སྣོད་དུ་གྱུར་ནས་དངོས་པོ་གང་ལ་ཡང་མི་ཆགས་པ་ཚེ་དང་སྒྲུབ་པ་མཉམ་པར་གྱུར་ཅིག སྒྲུབ་པ་ལ་བར་ཆད་མི་འབྱུང་བར་གྱུར་ཅིག མངོན་ཤེས་དང་རྫུ་འཕྲུལ་སོགས་གྲུབ་རྟགས་ལ་མངའ་བརྙེས་པར་གྱུར་ཅིག མཐོང་ཐོས་དྲན་རེག་གི་སྐྱེ་འགྲོ་སེམས་ཅན་ཐམས་ཅད་སྣང་བ་དམ་པའི་ཆོས་ལ་བསྒྱུར་ནུས་པར་གྱུར་ཅིག ལས་བཟང་ངན་གྱི་འབྲེལ་བ་ཡོད་ཚད་སྨིན་གྲོལ་ལ་འགོད་ནུས་པར་གྱུར་ཅིག བསྟན་པ་དང་འགྲོ་བ་དཔལ་ལྡན་བླ་མར་གྱུར་ནས་ཕྲིན་ལས་རྒྱ་ཆེ་ཞིང་དཔང་མཐོ་བར་གྱུར་ཅིག སྙན་པ་དང་གྲགས་པས་འཇིག་རྟེན་གྱི་ཁམས་ཐམས་ཅད་ཁྱབ་པར་གྱུར་ཅིག འདས་པའི་ཚེ་ན་གདུང་རིང་བསྲེལ་གྱི་ཕུང་པོར་གྱུར་ཅིག ཡང་ན་འཇའ་ལུས་འོད་ཕུང་དུ་གྲོལ་བར་གྱུར་ཅིག དེ་དག་ལས་བྱུང་བའི་དགེ་བ་ཡང་ནམ་མཁའ་དང་མཉམ་པའི་སེམས་ཅན་ཐམས་ཅད་སྨིན་ཅིང་ཁྱབ་པར་གྱུར་ཅིག །ཀུན་བཟང་རྡོ་རྗེ་འཆང་ཆེན་མན་ཆད་ནས། །དྲིན་ཆེན་རྩ་བའི་བླ་མ་ཡན་ཆད་ཀྱིས། །འགྲོ་བའི་དོན་དུ་སྨོན་ལམ་གང་བཏབ་པ། །དེ་དག་ཐམས་ཅད་བདག་གཞན་འགྲུབ་པར་ཤོག །ཅེས་འདི་ཕྱི་བར་དོ་གསུམ་གྱི་སྨོན་ལམ་ཀུན་འདུས་འཇའ་ལུས་འོད་ཕུང་ཞེས་བྱ་བ་འདི་ནི་གཏེར་སྟོན་འཇའ་ཚོན་སྙིང་པོའི་མཛད་པའོ། དགེའོ། །མངྒ་ལཾ། །