ལུས་སྦྱིན་མགོར་གསོལ་འདེབས།

༈ ལུས་སྦྱིན་ལ་འཇུག་པ་ནི། སྐུ་གསུམ་བཀའ་བརྒྱུད་ཀྱི་ངོ་བོ། །ཡོངས་འདུས་ཡིད་བཞིན་གྱི་ནོར་བུ། །རྩ་བའི་བླ་མ་དེ་མཁྱེན་ནོ། །མཆོག་ཐུན་དངོས་གྲུབ་ཀུན་སྩོལ་ཅིག །རྒྱལ་བ་ཀུན་འདུས་རྗེ་བཙུན་བླ་མ་མཁྱེན་ནོ། །འཁོར་བ་དོང་ནས་སྤྲུག་པར་བྱིན་གྱིས་རློབས་ཤིག །སྐྱབས་གནས་ཀུན་འདུས་ཀྱི་ངོ་བོ། །མཁྱེན་བརྩེ་ནུས་པའི་བདག་ཉིད། །དྲིན་ཅན་མཚོ་སྐྱེས་རྡོ་རྗེ། །སྙིང་ནས་གསོལ་བ་འདེབས་སོ། །རྟག་ཏུ་དབྱེར་མེད་ཐུགས་རྗེས་བདག་རྒྱུད་བྱིན་གྱིས་རློབས་ཤིག །ལན་གསུམ། ཧྲཱིཿ འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས། །དུས་གསུམ་སངས་རྒྱས་ཀུན་གྱི་ངོ་བོ་ཉིད། རང་སེམས་ཆོས་སྐུ་མངོན་སུམ་སྟོན་མཛད་པའི། །རྩ་བའི་བླ་མ་རྣམས་ལ་གསོལ་བ་འདེབས། །༈ སྐྱབས་འགྲོ་སེམས་བསྐྱེད་དང་བླ་བརྒྱུད་གསོལ་འདེབས་གོང་དུ་སོང་ནས། ཕ་རྒྱུད་ཐབས་ཀྱི་བརྒྱུད་པ་ལ་གསོལ་བ་འདེབས། །མ་རྒྱུད་ཤེས་རབ་ཀྱི་བརྒྱུད་པ་ལ་གསོལ་བ་འདེབས། །སྐལ་ལྡན་ཉམས་ཀྱི་བརྒྱུད་པ་ལ་གསོལ་བ་འདེབས། །གྲུབ་ཐོབ་གཅོད་ཀྱི་བརྒྱུད་པ་ལ་གསོལ་བ་འདེབས། །སྟོབས་ལྡན་ཆོས་སྐྱོང་གི་བརྒྱུད་པ་ལ་གསོལ་བ་འདེབས། །འཁྲུལ་སྣང་འཇིག་རྟེན་གྱི་བྱ་བ་ལ། །ཞེན་པ་ལོག་པར་བྱིན་གྱིས་རློབས། །འབྱུང་གཞིས་བསྡུས་པའི་སྒྱུ་ལུས་ལ། །གཅེས་འཛིན་བྲལ་བར་བྱིན་གྱིས་རློབས། །འགལ་རྐྱེན་ནད་གདོན་བར་ཆད་ལ། །རོ་སྙོམས་ནུས་པར་བྱིན་གྱིས་རློབས། །སྣང་སྲིད་སེམས་ཀྱི་ཆོས་འཕྲུལ་ལ། །རང་ངོ་ཤེས་པར་བྱིན་གྱིས་རློབས། །རང་རིག་སྐུ་གསུམ་ལྷུན་གྲུབ་ལ། །རང་དབང་ཐོབ་པར་བྱིན་གྱིས་རློབས། །སྤྱིར་བདག་དང་འགྲོ་དྲུག་སེམས་ཅན་རྣམས། །རྒྱུ་གཉིས་འཛིན་དྲི་མ་ཀུན་སྤངས་ནས། །བླ་མེད་བྱང་ཆུབ་ཐོབ་པར་ཤོག །ཕཊཿཕཊཿཕཊཿ ཞེས་པའང་རྗེ་རང་བྱུང་རྡོ་རྗེས་སོ། །ཕཊཿརང་ཉིད་སྐད་ཅིག་གིས་གསང་བ་ཡེ་ཤེས་པའི་ཁྲོས་མ་ནག་མོ་མཐིང་ནག་ཞལ་གཅིག་ཕྱག་གཉིས་པ་སྤྱན་གསུམ་བསྒྲད་ཅིང་མཆེ་བ་བཞི་གཙིགས་པ། ཕྱག་གཡས་མི་ལྤགས་ཀྱི་གཡང་གཞི་དམར་ལྷབ་ལྷབ་ཏུ་རྡེབ་པ། གཡོན་མཆོག་ཆེན་གྱི་རྐང་ཀླིང་ཙིར་ཙིར་འབུད་པ། གྲུ་མོར་ཁ་ཊཾ་ཀ་བརྟེན་ཅིང་སྤྱི་བོར་ཕག་ཞལ་ནག་པོ་འབྲུག་ལྟར་ངུར་བ། གར་དང་དུར་ཁྲོད་རོལ་བའི་ཆས་ཀྱིས་བརྒྱན་པ། ཡེ་ཤེས་ཀྱི་མེ་དཔུང་འབར་བའི་ཀློང་ན་ཁམས་གསུམ་འཁོར་བ་གཡོ་ཞིང་འདར་ཏེ་དབང་དུ་སྡུད་ཅིང་ཟིལ་གྱིས་གནོན་པའི་སྐུར་གསལ་བའི་ཐུགས་ཀ་ནས་ལས་བྱེད་ཀྱི་དཔའ་བོ་མཁའ་འགྲོ་མ་བསམ་གྱིས་མི་ཁྱབ་པ་འཕྲོས་པས་སྣང་སྲིད་ཀྱི་ལྷ་འདྲེ་ཐམས་ཅད་ར་ལུག་སྤྱང་ཀིའི་དེད་པ་བཞིན་བདས་ནས་དབང་དུ་འདུས་པ་གྱུར། དེ་ནས་ཟིལ་གནོན་ནི། ཕཊཿ རང་གི་སྙིང་ག་ནས་གནམ་ལྕགས་ཀྱི་རྡོ་རྗེ་རྩེ་དགུ་པ་སྲ་ཞིང་བརྟན་པ་ལྕི་ཞིང་འཐས་པ་འོད་ཟེར་མེ་དཔུང་འབར་བ་ཞིག་གཉན་སར་ཐོག་ལྟར་བབས་པས་དེར་གནས་ཀྱི་ལྷ་འདྲེ་དཔུང་དང་བཅས་པ་བྲོས་ཞིང་འཕྱར་བའི་དབང་མེད་པར་དཔའ་ཟིལ་ཆགས་ཏེ་གུས་འདུད་ཀྱི་ཕྱག་རྒྱ་དང་བཅས་པའི་ཟིལ་གྱིས་ནོན་པར་གྱུར། ཕཊཿཕཊཿཕཊཿ ཞེས་པ་འདི་ཉིད་འཇིགས་མེད་རྒྱལ་བའི་སྨྱུ་གུས་མཛད་པའོ། །