གཅོད་ཡུལ་མཁའ་འགྲོའི་གད་རྒྱངས།

༂ ཀློང་ཆེན་སྙིང་གི་ཐིག་ལེ་ལས༔ གཅོད་ཡུལ་མཁའ་འགྲོའི་གད་རྒྱངས་ཞེས་བྱ་བ་བཞུགས་སོ། །དབྱིངས་ཕྱུག་བདེ་ཆེན་མཚོ་རྒྱལ་མ་ལ་ཕྱག་འཚལ་ལོ༔ རང་བཞིན་རྫོགས་པ་ཆེན་པོ་ནི༔ ཉག་གཅིག་རྩད་ནས་གཅོད་པའི་ཕྱིར༔ གཅོད་བྱ་གཅོད་བྱེད་ལས་འདས་ཀྱང༔ སྤྲོས་པ་ཅན་གྱི་གང་ཟག་དང༔ བརྟུལ་ཞུགས་སྤྱོད་པ་ལམ་སློང་ཕྱིར༔ ཕུང་པོ་གཟན་བསྐྱུར་མན་ངག་བསྟན༔ དེ་ལ་མཁོ་བའི་ཡོ་བྱད་ནི༔ དྲེགས་པ་ཟིལ་གྱིས་གནོན་པའི་ཕྱིར༔ སྡེར་བཞི་མ་ཉམས་གཅན་གཟན་ལྤགས༔ ལྟ་བ་ཡས་འབུབས་ཅོག་པུ་དང༔ སྤྱོད་པ་མས་འཛེགས་ཁ་ཊྭཱཾ་ཀ༔ ལྷ་འདྲེ་དབང་བསྡུད་མཆོག་ཆེན་རྐང༔ སྣང་བ་ཟིལ་གནོན་ཌཱ་མ་རུ༔ མ་ཚོགས་དབང་སྒྱུར་དྲིལ་གཡེར་དང༔ སྟག་གཟིག་རས་མ་སྐྲའི་ཅོད་པན༔ མདོར་ན་བརྟུལ་ཞུགས་སྤྱོད་པ་ལ༔ འོས་པའི་ཆས་རྣམས་སྟ་གོན་བྱ༔ དེ་ནས་ས་གནད་གཉན་དམིགས་སུ༔ ཕོ་ཚོད་ལྷ་འདྲེར་བརྙས་སེམས་དང༔ ཆོས་བརྒྱད་བསམ་པས་མ་ཡིན་པར༔ ཚད་མེད་བཞི་ཡིས་དཔའ་གདེང་བསྐྱེད༔ སྣང་བ་གང་ཤར་ཐོག་བརྫིས་བྱ༔ དེ་ཚེ་ཟིལ་གནོན་དམིགས་པ་ཡིས༔ མ་གཅུན་དགྲ་ལ་བྱ་ཤོར་མཚུངས༔ དེ་ཕྱིར་རིག་པ་བརྟུལ་ཞུགས་དང༔ ཕཊ་ཅེས་རང་གི་སྙིང་ག་ནས༔ གནམ་ལྕགས་རྡོ་རྗེ་རྩེ་དགུ་པ༔ སྲ་བརྟན་ལྕི་ཞིང་འཐས་པ་ལ༔ འོད་ཟེར་མེ་དཔུང་འབར་བ་ཞིག༔ གང་དམིགས་གཉན་སར་ཐོག་ལྟར་ཕོབ༔ དེར་གནས་ལྷ་འདྲེ་དཔུང་དང་བཅས༔ འབྲོས་ཤིང་འཁྱར་བའི་དབང་མེད་པརཿ དཔའ་ཟིལ་ཆག་སྟེ་གནས་པར་བསམཿ དེ་ནས་ཚུལ་འཆོས་ངོ་ཚ་སོགསཿ ཐ་མལ་འཁུ་འཕྲིགས་བློ་སྤངས་ལཿ བརྟུལ་ཞུགས་ངར་མའི་གདེང་ལྡན་པས༔ འགྲོ་ལུགས་རྣམ་པ་བཞི་དག་ལསཿ ལྟ་བའི་གདེང་འགྲོས་ཤུགས་ཀྱིས་འགྲོ༔ དེ་ཡང་སྣང་སྲིད་ལྷ་འདྲེ་དང༔ གནས་གདོན་ལམ་འདྲེ་འཁྱམ་པོ་ཀུན༔ བཀུགས་ནས་ར་ལུག་བདས་པ་བཞིན༔ གཉན་སར་རང་དབང་མེད་པར་གཅུར༔ གནས་དེར་སླེབས་མ་ཐག་ཉིད་དུ༔ དྲག་ཤུལ་འབར་བའི་སྟངས་སྟབས་ཀྱིས༔ ལྷ་འདྲེ་ཀུན་གྱི་རྐང་པ་ནས༔ བཟུང་སྟེ་ཀླད་ལ་ལན་གསུམ་བསྐོར༔ དབང་ཆེན་བཞི་ལ་བརྡབས་པར་བསམ༔ ཅོག་པུ་སྟན་བཅས་ཤུགས་ཀྱིས་བསྒྱུར༔ ལྷ་འདྲེ་ཇི་ལྟར་དབྱིངས་ཆེ་ཡང༔ མི་ལྷོངས་མི་སྲིད་ཟི་ཁོལ་འགྲོ༔ རྣལ་འབྱོར་བརྟུལ་ཞུགས་ཆུང་གྱུར་ན༔ རིམ་པས་བློ་དང་སྦྱར་ཏེ་བྱ༔ དེ་ནས་རང་ཉིད་སྐད་ཅིག་གིས༔ གསང་བ་ཡེ་ཤེས་མཁའ་འགྲོ་མ༔ ཆེ་ཆུང་སྲིད་པའི་གཏོས་དང་མཉམ༔ རྣལ་འབྱོར་རྫོགས་པའི་སྐུར་བསྐྱེད་ལ༔ མི་རྐང་གླིང་བུ་དྲག་ཏུ་འབུད༔ ལྟ་བའི་ངར་བསྐྱེད་བྲོ་བརྡུང་བྱ༔ ཕཊ༔ འཇིགས་མེད་བརྟུལ་ཞུགས་སྤྱོད་པའི་རྣལ་འབྱོར་ངས༔ འཁོར་འདས་མཉམ་པར་བརྡལ་བའི་དགོངས་སྤྱོད་ཀྱིས༔ བདག་འཛིན་ལྷ་འདྲེའི་སྟེང་དུ་བྲོ་ཞིག་བརྡུང༔ གཉིས་འཛིན་འཁོར་བའི་རྣམ་རྟོག་རྡུལ་དུ་རློག༔ རྩ་བརྒྱུད་རིག་འཛིན་བླ་མ་བྲོ་ལ་བྱོན༔ ཡི་དམ་དཔའ་བོ་རྒྱ་མཚོ་བྲོ་ལ་བྱོན༔ མཁའ་འགྲོ་གནས་ཉུལ་མ་ཚོགས་བྲོ་ལ་བྱོན༔ བརྟུལ་ཞུགས་ལམ་དུ་ལྷོངས་པར་བྱིན་གྱིས་རློབས༔ ཕཊ༔ ཤར་ཕྱོགས་ལུས་འཕགས་གླིང་དུ་བརྡུངས་ཙ་ན༔ དཔའ་བོ་མཁའ་འགྲོའི་བྲོ་ར་ཟླུམ་ལ་འཁྱིལ༔ ཞེ་སྡང་རྒྱལ་པོའི་མགོ་ལ་ཆེམས་སེ་ཆེམ༔ མེ་ལོང་ཡེ་ཤེས་གླིང་བུ་ཀྱུ་རུ་རུ༔ ཧཱུྃ་ཧཱུྃ་ཧཱུྃ༔ ཕཊ༔ ལྷོ་ཡི་འཛམ་བུ་གླིང་དུ་བརྡུངས་ཙ་ན༔ དཔའ་བོ་མཁའ་འགྲོའི་བྲོ་ར་ཟུར་གསུམ་དབལ༔ ང་རྒྱལ་གཤིན་རྗེའི་མགོ་ལ་ཆེམས་སེ་ཆེམ༔ མཉམ་ཉིད་ཡེ་ཤེས་ཐོད་རྔ་ཁྲོ་ལོ་ལོ༔ ཧཱུྃ་ཧཱུྃ་ཧཱུྃཿ ཕཊ༔ ནུབ་ཀྱི་བ་ལང་སྤྱོད་ལ་བརྡུང་ཙ་ན༔ དཔའ་བོ་མཁའ་འགྲོའི་བྲོ་ར་ཟླ་གམ་འཁྱིལ༔ འདོད་ཆགས་སྲིན་མོའི་མགོ་ལ་ཆེམས་སེ་ཆེམ༔ སོར་རྟོགས་ཡེ་ཤེས་དྲིལ་གཡེར་ཁྲོ་ལོ་ལོ༔ ཧཱུྃ་ཧཱུྃ་ཧཱུྃཿ ཕཊ༔ བྱང་གི་སྒྲ་མི་སྙན་ལ་བརྡུངས་ཙ་ན༔ དཔའ་བོ་མཁའ་འགྲོའི་བྲོ་ར་གྲུ་བཞི་ལམ༔ ཕྲག་དོག་དམ་སྲིའི་མགོ་ལ་ཆེམས་སེ་ཆེམ༔ བྱ་གྲུབ་ཡེ་ཤེས་ཅོད་པཎ་པུ་རུ་རུ༔ ཧཱུྃ་ཧཱུྃ་ཧཱུྃཿ ཕཊ༔ དབུས་ཕྱོགས་ལྷུན་པོའི་རྩེ་རུ་བརྡུངས་ཙ་ན༔ དཔའ་བོ་མཁའ་འགྲོའི་བྲོ་ར་བྱིན་རེ་ཆགས༔ གཏི་མུག་ཤི་འདྲེའི་མགོ་ལ་ཆེམས་སེ་ཆེམ༔ ཆོས་དབྱིངས་ཡེ་ཤེས་ཧཱུྃ་གླུ་ཀྱུ་རུ་རུ༔ ཧཱུྃ་ཧཱུྃ་ཧཱུྃཿ ཕཊ༔ ཅེས་བརྡུངས་ཤེས་པ་གཏད་མེད་བཏང༔ དེ་ནས་ཅོག་པུ་འབུབས་པ་ནི༔ གཞི་དེའི་ལྷ་འདྲེ་གདུག་པ་ཅན༔ གན་རྐྱལ་བསྒྱེལ་བའི་ཡན་ལག་ལྔར༔ གནམ་ལྕགས་ཕུར་བུ་བཏབ་པར་བསམཿ ཕཊཿ ཤར་ཕྱོགས་རྡོ་རྗེ་མཁའ་འགྲོ་མས༔ བྱམས་པ་ཆེན་པོའི་ཕུར་པ་ཁྱེར༔ ལྷོ་ཕྱོགས་རིན་ཆེན་མཁའ་འགྲོ་མས༔ སྙིང་རྗེ་ཆེན་པོའི་ཕུར་པ་ཁྱེར༔ ནུབ་ཕྱོགས་པདྨ་མཁའ་འགྲོ་མས༔ དགའ་བ་ཆེན་པོའི་ཕུར་པ་ཁྱེར༔ བྱང་ཕྱོགས་ལས་ཀྱི་མཁའ་འགྲོ་མས༔ བཏང་སྙོམས་ཆེན་པོའི་ཕུར་པ་ཁྱེར༔ དབུས་ཕྱོགས་སངས་རྒྱས་མཁའ་འགྲོ་མས༔ བྱང་ཆུབ་སེམས་ཀྱི་ཕུར་པ་ཁྱེར༔ བདག་འཛིན་ལྷ་འདྲེའི་མགོ་བོ་དང༔ ལྷུ་ཚིགས་བཞི་ལ་བཏབ་པ་ཡིས༔ གཡོ་མགུལ་མེད་པར་གནས་པར་གྱུར༔ ཕཊ༔ ཅེས་བརྗོད་བདག་གཞན་ལྷ་འདྲེ་གསུམ༔ གང་དུ་མི་དམིགས་མཉམ་པར་བཞག༔ དེ་ནས་ལྷ་འདྲེ་ངོས་ཟིན་ནས༔ ལུས་སྦྱིན་དངོས་ལ་འཇུག་པ་ནི༔ ཕཊ༔ རང་སྣང་འོད་གསལ་བདེ་བ་ཆེན་པོའི་དབྱིངས༔ འབད་རྩོལ་སྤྲོས་པ་བྲལ་བའི་ནམ་མཁའ་ལ༔ རྩ་བའི་བླ་མ་དྲུག་པ་རྡོ་རྗེ་འཆང༔ དགོངས་བརྡ་སྙན་བརྒྱུད་བླ་མ་ཡི་དམ་ལྷ༔ མཁའ་འགྲོ་ཆོས་སྐྱོང་སྲུང་མ་སྤྲིན་ལྟར་གཏིབས༔ མ་འགགས་འཇའ་ཚོན་ཐིག་ལེའི་ཀློང་དུ་གསལ༔ ཞེས་པས་ཚོགས་ཞིང་གསལ་བཏབ་ལ༔ ལྷ་འདྲེས་གཙོ་བྱས་སེམས་ཅན་ཀུན༔ ཁྱེད་ཤེས་བློ་ཡིས་སྐྱབས་འགྲོར་དམིགས༔ ཕཊ༔ རང་བྱུང་གི་རིག་པ་བཅོས་མེད་འདི༔ སྐྱབས་ཡུལ་གྱི་ངོ་བོར་མ་རིག་པས༔ སྡུག་བསྔལ་གྱི་རྒྱ་མཚོར་བྱིངས་པ་རྣམས༔ སྐུ་གསུམ་གྱི་དགོངས་པས་བསྐྱབ་ཏུ་གསོལ༔ ལན་གསུམ་དེ་ནས་སེམས་བསྐྱེད་ནི༔ ཕཊ༔ སྣང་བ་ལ་དངོས་པོར་འཛིན་པའི་སེམས༔ བརྟུལ་ཞུགས་ཀྱི་སྤྱོད་པས་ཚར་བཅད་ནས༔ ཡང་དག་གི་གནས་ལུགས་རྟོགས་བྱའི་ཕྱིར༔ རེ་དོགས་དང་བྲལ་བར་སེམས་བསྐྱེད་དོ༔ དེ་ནས་མཎྜལ་ནི༔ ཁོག་པ་རི་རབ༔ ཡན་ལག་གླིང་བཞི༔ ཉིང་ལག་གླིང་ཕྲན༔ མགོ་བོ་ལྷ་གནས༔ མིག་གཉིས་ཉི་ཟླ༔ དོན་སྣོད་ལྷ་མིའི་དཔལ་འབྱོར་དུ་བསམས་ལ༔ ཕཊ༔ གཅེས་འཛིན་གྱི་ཕུང་པོ་སྒྱུ་མའི་ལུས༔ མཎྜལ་གྱི་ཚོམ་བུར་རབ་བཀོད་ནས༔ ཚོགས་ཞིང་གི་ལྷ་ལ་ལྟོས་མེད་འབུལ༔ བདག་འཛིན་གྱི་རྩ་བ་ཆོད་པར་ཤོག༔ ཕཊ༔ དེ་ནས་བླ་མའི་རྣལ་འབྱོར་ནི༔ ཕཊ༔ དབྱིངས་ཟག་མེད་ཆོས་སྐུའི་ནམ་མཁའ་ལ༔ མདངས་འཇའ་ཟེར་ཐིག་ལེར་འཁྲིགས་པའི་དབུས༔ ཕ་དུས་གསུམ་ཀུན་མཁྱེན་པདྨ་འབྱུང༔ ཚུལ་བརྟུལ་ཞུགས་སྤྱོད་པའི་ཧེ་རུ་ཀཿ མ་མཁའ་འགྲོ་རྒྱ་མཚོའི་ཚོགས་དང་བཅས༔ སྐུ་མཚན་དཔེའི་གཟི་བྱིན་ཏ་ལ་ལ༔ གསུང་གང་འདུལ་ཆོས་སྒྲ་འུ་རུ་རུ༔ ཐུགས་འོད་གསལ་རྡོ་རྗེ་སྙིང་པོའི་ངང༔ བུ་མོས་གུས་དྲག་པོས་གསོལ་བ་འདེབས༔ ཕྱི་རྣམ་རྟོག་དགྲར་ལངས་ལྷ་འདྲེའི་གཟུགས༔ ནང་རེ་དང་དོགས་པའི་གཉིས་འཛིན་སེམས༔ བར་སྣང་བ་སྣ་ཚོགས་རྐྱེན་ངན་ཀུན༔ ཆོས་ཟབ་མོ་བདུད་ཀྱི་གཅོད་ཡུལ་གྱིས༔ དུས་ད་ལྟ་སྟན་ཐོག་འདི་རུ་ཆོད༔ དབྱིངས་ཆོས་སྐུའི་རྒྱལ་ས་ཟིན་པ་རུ༔ ཕ་རྗེ་བཙུན་བླ་མས་བྱིན་གྱིས་རློབས༔ ཕཊ༔ ཕཊ༔ ཕཊ༔ ཅེས་བརྗོད་ཚོགས་ཞིང་རང་ལ་བསྟིམ༔ གཉིས་མེད་ངང་དུ་མཉམ་པར་བཞག༔ ཕཊ༔ དེ་ནས་བག་ཆགས་སྙིགས་མའི་ལུས༔ ཚོ་ཞིང་སྣུམ་ལ་གཏོས་ཆེ་བའི༔ དབུས་ནས་དྭངས་མའི་རིག་པ་ནི༔ ཁྲོས་མའི་རྣམ་པར་ཕཊཿཅེས་དབྱེ༔ ཞལ་གཅིག་ཕྱག་གཉིས་གྲི་ཐོད་ཅན༔ དེ་ཡིས་རང་ལུས་ཐོད་པ་ཕྲལ༔ སྟོང་གསུམ་ཁྱབ་པའི་མི་མགོ་ཡི༔ སྒྱེད་པུ་གསུམ་གྱི་ཁར་བཞག་ནང༔ འབྱུང་ལུས་ཚོགས་སུ་བཤམས་པ་དེ༔ འབྲུ་གསུམ་འོད་ཀྱིས་བདུད་རྩིར་སྦར༔ ཨོཾ་ཨཱཿཧཱུྃ་ཧ་ཧོ་ཧྲཱིཿ ཅི་མང་བརྗོད་པས་སྦྱང་སྤེལ་བསྒྱུར༔ ཁྲ་བོར་འགྱེད་ན་དེ་ཉིད་ལས༔ སྐྱེད་ཚལ་ཟས་གོས་སྨན་ལ་སོགས༔ ཡིད་ལ་ཅི་འདོད་ངོ་བོར་སྦར༔ དམར་འགྱེད་རང་ཉིད་ཁྲོས་ནག་མས༔ སྙིགས་མའི་ལུས་ཀྱི་པགས་པ་བཤུས༔ སྟོང་གསུམ་ཁྱབ་པར་བཀྲམ་པའི་སྟེང༔ གཟུགས་ཕུང་ཤ་ཁྲག་ཕུང་པོར་སྤུངས༔ ཤན་པའི་མདུན་ས་ལྟ་བུར་བསམ༔ ནག་འབྱེད་བདག་གཞན་སེམས་ཅན་གྱི༔ ཐོག་མེད་ནས་བསགས་ནད་གདོན་དང༔ སྡིག་སྒྲིབ་ཐམས་ཅད་ནག་བུན་གྱིས༔ བསྡུས་ཏེ་གཟུགས་ཕུང་ལ་བསྟིམ་པས༔ ལྷ་འདྲེས་ཟོས་པས་ཁོ་ཡི་ལུས༔ སོལ་བ་ལྟ་བུར་གྱུར་པར་བསམ༔ མཆོད་སྦྱིན་མགྲོན་རྣམས་འདི་ལྟར་འབོད༔ ཕཊ༔ མཆོད་ཡུལ་རྩ་གསུམ་དམ་ཅན་ནས༔ སྡེ་བརྒྱད་འབྱུང་པོས་གཙོ་བྱས་པའི༔ སྦྱིན་ཡུལ་ལན་ཆགས་འདྲེ་གདོན་ཡན༔ བརྟུལ་ཞུགས་སྤྱོད་པའི་གནས་འདིར་བྱོན༔ དེ་རིང་འཇིགས་མེད་རྣལ་འབྱོར་ངས༔ འཁོར་འདས་ཤན་འབྱེད་སྒྱུ་མའི་ལུས༔ སྟོང་གསུམ་ཁྱོན་ཡངས་ཀ་པཱ་ལར༔ བམ་ཆེན་ཚོགས་ཀྱི་འཁོར་ལོར་བཤམས༔ ཟག་མེད་ཡེ་ཤེས་བདུད་རྩིར་བསྒྱུར༔ འདོད་དགུར་འཆར་བའི་ཆོ་འཕྲུལ་ཅན༔ གཅེས་འཛིན་མེད་པར་འབུལ་ལགས་ཀྱིས༔ སྟོན་ཆེན་མགྲོན་ལ་གཤེགས་སུ་གསོལ༔ མཆོག་ཆེན་ཐོད་རྔ་སྐད་རེ་གསངས༔ ཞིང་ཆེན་གཡང་གཞི་བརྗིད་རེ་ཆེ༔ མི་རྐང་གླིང་བུ་གདངས་རེ་སྙན༔ དྲིལ་གཡེར་ཅོད་པན་དངས་རེ་སྤྲོ༔ བྱ་རྒོད་ཤ་ལ་འཐིབས་པ་བཞིན༔ སྐད་ཅིག་ཉིད་ལ་གཤེགས་སུ་གསོལ༔ ཕཊ༔ དེ་ནས་འབུལ་ཞིང་བསྔོ་བ་ནི༔ ཕཊ༔ གདོད་མའི་མགོན་པོ་མན་ཆད་ནས༔ རྩ་བའི་བླ་མ་ཡན་ཆད་ཀྱི༔ བརྒྱུད་གསུམ་རིག་འཛིན་བླ་མ་དང༔ ཡི་དམ་མཁའ་འགྲོ་ཆོས་སྐྱོང་ལ༔ བམ་ཆེན་བདུད་རྩིའི་མཆོད་པ་འབུལ༔ ལྷ་འདྲེས་གཙོ་བྱས་བདག་གཞན་གྱི༔ ཚོགས་གཉིས་རྫོགས་ཤིང་སྒྲིབ་གཉིས་བྱང༔ བརྟུལ་ཞུགས་འགྲོ་དོན་མཐར་ཕྱིན་ནས༔ སྣང་བ་འོད་གསལ་སྒྱུ་མར་འབྱོངས༔ ཡ་ང་བག་ཚ་ཆོས་སྐུར་གྲོལ༔ ཧེ་རུ་ཀ་ལྟར་བྱིན་གྱིས་རློབས༔ ཕཊ༔ འཇིག་རྟེན་འདས་དང་མ་འདས་ཀྱི༔ སྡེ་བརྒྱད་འབྱུང་པོ་མི་མ་ཡིན༔ ལོག་འདྲེན་ཤ་ཟའི་གདོན་ཚོགས་ལ༔ སྟོང་གསུམ་ཁྱབ་པའི་ཞིང་ལྤགས་སྟེང༔ ཤ་ཁྲག་རུས་པའི་ཕུང་པོར་འབུལ༔ བདག་ཏུ་འཛིན་ན་ང་རེ་ཞན༔ སྤྱོད་དུ་མ་ནུས་ཁྱོད་རེ་ལན༔ རིངས་ན་རྗེན་པར་ཁྱུར་མིད་ཐོང༔ ལྷོད་ན་དུམ་བུར་ཚོས་ལ་ཟོ༔ རྡུལ་ཕྲན་ཙམ་ཡང་མ་བཞག་ཅིག༔ ཕཊ༔ འཁོར་ཚེ་ཐོག་མ་མེད་པ་ནས༔ ཤ་འཁོན་ཆགས་པའི་ལན་ཆགས་དང༔ གློ་བུར་ལྷགས་པའི་སྙིང་རྗེའི་མགྲོན༔ ཁས་ཞན་དབང་ཆུང་མ་ལུས་ལ༔ སོ་སོར་གང་ལ་ཅི་འདོད་ཀྱི༔ འདོད་ཡོན་མི་ཟད་གཏེར་དུ་བསྔོ༔ འབྲེལ་པ་ཐོགས་ཚད་སངས་རྒྱས་ཤིང༔ བུ་ལོན་ལན་ཆགས་བྱང་བར་ཤོག༔ ཕཊ༔ ཅེས་བརྗོད་ལྟོས་པ་མེད་པར་བྱིན༔ སྟོང་ཉིད་ངང་ལ་མཉམ་པར་བཞག༔ དེ་ཚེ་ལུས་ལ་གཅེས་འཛིན་དང༔ འཇིགས་སྣང་ཁུ་འཕྲིགས་བློ་སྐྱེས་ན༔ ལུས་ནི་ལྷ་འདྲེར་བྱིན་ནས་མེད༔ སེམས་ནི་གཞི་མེད་རྩ་བ་བྲལ༔ འདྲེ་བས་སངས་རྒྱས་ཉིད་ཀྱིས་ཀྱང༔ གཟིགས་པ་མེད་སྙམ་གདེང་བསྐྱེད་ལ༔ གང་ཤར་རང་ངོ་རྩ་བདར་བཅད༔ ཐོགས་བཅས་བདུད་དང་ཕྱི་རྐྱེན་འབྱུང་བ་དང་གཅན་གཟན་མི་རྒོད་སོགས་དང་ཆགས་སྡང་གི་རྣམ་རྟོག་སོགས། ཐོགས་མེད་བདུད༔ ནད་རྐྱེན་དགའ་སྡུག་སེམས་ཚིག་ལ་སོགས། དགའ་བྲོད་བདུད་དང་རང་མཐོང་བདེ་སྐྱིད་མངོན་རློམ་སོགས། བསྙིངས་བྱེད་བདུད༔ ཐེ་ཚོམ་དང་ཁུ་འཕྲིག་ལ་སོགས། ཕཊ༔ ཅེས་དབྱིངས་སུ་གཅོད་པ་ཡིན༔ དེ་ཡང་དུས་ཚོད་ལ་མཚོན་ན༔ ཐོ་རངས་ཚོགས་གཉིས་རྫོགས་པའི་ཕྱིར༔ དཀར་འགྱེད་བདུད་རྩིའི་ངོ་བོར་སྤར༔ ཉིན་གུང་ལན་ཆགས་འཇལ་བའི་ཕྱིར༔ ཁྲ་འགྱེད་གང་ལ་འཚམས་པར་བསྔོ༔ ནུབ་མོ་བརྟུལ་ཞུགས་ལམ་སློང་ཕྱིར༔ བདག་འཛིན་ཚར་གཅོད་དམར་འགྱེད་གཏོང༔ སྲོད་ལ་སྡིག་སྦྱོང་ནག་འགྱེད་བྱ༔ ཀུན་ཀྱང་འདུན་པ་བསྒྱུར་བ་སྟེ༔ གཙོ་བོར་དམིགས་པས་ཉམས་སུ་བླང༔ དེ་ཚེ་ཆོ་འཕྲུལ་ཅི་བྱུང་ཡང༔ ཉམས་དང་བྲལ་བའི་ལྟ་བས་གཅུན༔ གལ་ཏེ་རྣལ་འབྱོར་དབྱིངས་ཆུང་ནས༔ ལྷོངས་འཚུབས་འཆུན་པར་དཀའ་བ་འམ༔ ལྷ་འདྲེ་དབྱིངས་ཆེས་མ་ལྷོངས་ན༔ ཀེང་རུས་དཀར་པོའི་དམིགས་པ་བྱ༔ ཕཊཿ ཅེས་རང་ཉིད་སྐད་ཅིག་གིས༔ ཀེང་རུས་དཀར་པོ་མེ་འབར་བ༔ ཤིན་ཏུ་ཆེ་བ་ལས་བྱུང་བའི༔ མེ་ཡིས་སྟོང་གསུམ་འཇིག་རྟེན་དང༔ ཁྱད་པར་ལྷ་འདྲེའི་གནས་རྟེན་བསྲེགས༔ མཐར་ནི་ཀེང་རུས་མེ་དང་བཅས༔ འོད་ཡལ་སྟོང་པའི་ངང་ལ་བཞག༔ འགོ་ནད་སྲུང་བ་ལ་ཡང་ཟབ༔ ཚར་ཚད་དུས་སུ་མ་བྱུང་དང༔ གནོད་འདྲེ་གདུག་པ་ཨར་གཏོད་ན༔ རིག་པ་ཁྲོས་མའི་སྐུར་གསལ་བས༔ སྙིགས་མའི་ལུས་ཀྱི་པགས་པ་བཤུས༔ སྟོང་གསུམ་ཁེངས་པའི་གཡང་གཞིའི་སྟེང༔ ཤ་རུས་གཅལ་དུ་བཀྲམ་པ་ལ༔ འདྲེ་གདོན་ཟས་ལ་གདུང་བའི་མོད༔ ཁྲོས་མས་གཡང་གཞི་འུབ་ཀྱིས་དྲིལ༔ སྦྲུལ་དང་རྒྱུ་མའི་ཞགས་པས་བསྡམས༔ ཀླད་ལ་བསྐོར་ཞིང་བརྡབས་པ་ཡིས༔ ཤ་མྱོག་རུས་མྱོག་དག་ཏུ་སོང༔ སྤྲུལ་པའི་གཅན་གཟན་དུ་མ་ཡིས༔ ལྷག་མ་མེད་པར་ཟོས་པར་བསམ༔ དབྱིངས་རིག་བསྲེས་ཏེ་མཉམ་པར་བཞག༔ དེས་ནི་ཚར་ཚད་ངེས་འབྱུང་ཞིང༔ འདྲེ་གདོན་གདུག་པ་ཚར་ཆོད་འགྱུར༔ ཀུན་ལ་གཅེས་འཛིན་བློ་སྤངས་ཏེ༔ ལྟ་བའི་གདེང་གིས་ཟིན་པ་གཅེས༔ དེ་ཚེ་ཚར་ཚད་འདྲ་བའི་ལྷོངས༔ ལྷོངས་ཚད་འདྲ་བའི་ཚར་ཚད་དང༔ གཉིས་ཀ་འདྲ་བའི་འདྲེས་མ་དང༔ འདྲེས་མ་འདྲ་བའི་བག་ཆགས་དང༔ ཚར་ལྷོངས་གཉིས་ཀ་མཐར་ཕྱིན་གྱི༔ རྟགས་རྣམས་ཉམས་དང་སྦྱར་ཏེ་སྤྱོད༔ དོན་ལ་བདག་མེད་ཀུན་བཟང་མོ༔ ཡུམ་ཆེན་ཤེས་རབ་ཕར་ཕྱིན་མའི༔ དགོངས་པ་ཀློང་དུ་གྱུར་ཙ་ན༔ གཅོད་ཡུལ་ལམ་དུ་ལོངས་པའོ༔ ས་མཱ་ཡ༔ རྗེས་ལ་བསྔོ་སྨོན་བྱ་བ་ནི༔ ཨཱཿ དགེ་དང་མི་དགེའི་རྟོག་ཚོགས་རང་གྲོལ་ལ༔ རེ་དང་དོགས་པའི་མཚན་མ་མི་དམིགས་ཀྱང༔ སྣང་ཆའི་རྟེན་འབྲེལ་བསླུ་མེད་དགེ་ཚོགས་རྒྱུན༔ ཟག་མེད་ཆོས་ཀྱི་དབྱིངས་སུ་བསྔོ་བར་བྱ༔ ཕཊ༔ ཀུན་རྫོབ་ལུས་ཀྱི་སྦྱིན་པ་ལ་བརྟེན་ནས༔ བསྐལ་པར་བསགས་པའི་བུ་ལོན་ལན་ཆགས་བྱང༔ དོན་དམ་ཆོས་ཀྱི་སྦྱིན་པས་རྒྱུད་གྲོལ་ཚེ༔ བདག་གི་འདུས་པ་དང་པོར་སྐྱེ་བར་ཤོག༔ དེ་ཚེ་མ་བཅོས་རང་བཞག་གཉུག་མའི་དོན༔ མི་བསྲུན་ལྷ་འདྲེའི་རྒྱུད་ལ་སྐྱེས་ནས་ཀྱང༔ ངར་འཛིན་འཁྲུལ་བའི་རྗེས་སུ་མི་འབྲང་བར༔ བྱམས་དང་སྙིང་རྗེས་ཤེས་རྒྱུད་བརླན་པར་ཤོག༔ བདག་ཀྱང་བརྟུལ་ཞུགས་སྤྱོད་པ་མཐར་ཕྱིན་ནས༔ སྐྱིད་སྡུག་རོ་སྙོམས་འཁོར་འདས་ཆོས་སྐུར་འབྱོངས༔ ཕྱོགས་ལས་རྣམ་རྒྱལ་འབྲེལ་ཚད་དོན་ལྡན་གྱིས༔ འཕྲིན་ལས་མཐར་ཕྱིན་འཇའ་ལུས་འགྲུབ་པར་ཤོག༔ ཅེས་བརྗོད་ལྟ་བའི་ངང་གདངས་བསྐྱངས༔ སྙིང་རྗེ་ཆེན་པོའི་རྩིས་ཟིན་པས༔ བདེ་སྡུག་གཏོང་ལེན་དམིགས་པ་དང༔ བདག་གི་བདེ་བ་ལྷ་འདྲེར་གཏོང་། ལྷ་འདྲེའི་སྡུག་བསྔལ་རང་གིས་བླངས། ཆོས་ཀྱི་སྦྱིན་པ་རྣམ་དག་བྱ༔ འབྲེལ་ཐོགས་བཟང་ངན་ཐར་ལམ་འགོད༔ ས་མཱ་ཡ༔ མ་མ་ཀོ་ལིང་ས་མནྟཿ ཆོས་རྣམས་ཐམས་ཅད་རྒྱུ་ལས་སོགས་དང་། སྡིག་པ་ཅི་ཡང་མི་བྱ་ཞིང་སོགས་དང་། འབྱུང་པོ་གང་དག་སོགས་ཀྱི་ཤིས་བརྗོད་བྱའོ། །རྐང་གླིང་རྟ་ནི། ཨོཾ་སྙན་ལ་རིང་བ་བུང་བའི་སྐད་ལྟ་བུ། ཧཱུྃ་རྔམ་ལ་འཚེར་བ་རྟ་སྐད་ལྟ་བུ། ཏྲཱཾ་དྲག་ལ་གཏུམ་པ་སྟག་མོའི་ངར་སྐད་ལྟ་བུ། ཧྲཱིཿ འགྱུར་ལ་ལྡེམ་པ་དྲི་ཟའི་སྐད་ལྟ་བུ། ཨཱཿ འགྱུར་ལྡེམ་གོང་འདྲ་ནས་གཤམ་འདེགས་ཙམ་བྱེད་པ་ལ་ཌཱ་ཀིའི་སྒྱུག་གླུ་ཟེར༔ དགེའོ། ༈ །བསྔོ་བ་སྨོན་ལམ། ཕཊཿ ན་མོ། ཆོས་རྣམས་ཐམས་ཅད་རྒྱུ་ལས་བྱུང་། །དེ་རྒྱུ་དེ་བཞིན་གཤེགས་པས་གསུངས། །རྒྱུ་ལ་འགོག་པ་གང་ཡིན་པ། །དགེ་སྦྱོང་ཆེན་པོའི་འདི་ལྟར་གསུངས། །སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་འདུལ། །འདི་ནི་སངས་རྒྱས་བསྟན་པ་ཡིན། །སྦྱིན་པ་རྒྱ་ཆེན་གྱུར་བ་འདི་ཡི་མཐུས། །འགྲོ་བ་རྣམས་ནི་རང་བཞིན་སངས་རྒྱས་རྒྱུ། །སྔོན་གྱི་རྒྱལ་བ་རྣམས་ཀྱིས་མ་བསྒྲལ་བ། །སྐྱེ་རྒུའི་ཚོགས་རྣམས་སྦྱིན་པས་གྲོལ་གྱུར་ཅིག ། ཕཊཿ ན་མོཿཚོགས་ཀྱི་ལམ་དང་སྦྱོར་བའི་ལམ། །མཐོང་བའི་ལམ་དང་སྒོམ་པའི་ལམ། །བར་ཆད་མེད་པར་ལམ་སྒོམ་ནས། །མ་ཡུམ་ཆེན་གྱི་གོ་འཕང་མྱུར་ཐོབ་ཤོག ། ཕཊཿ སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགགས་ནམ་མཁའི་ངོ་བོ་ཉིད། སོ་སོར་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུམ་གྱི་བཀྲ་ཤིས་ཤོག །ཕྱག་སྟོང་འཁོར་ལོས་བསྒྱུར་བའི་རྒྱལ་པོ་དང་། །སྤྱན་སྟོང་སྐལ་བ་བཟང་པོའི་སངས་རྒྱས་སྟོང་། །གང་ལ་གང་འདུལ་དེ་ལ་དེར་སྟོན་པ། །བཙུན་པ་སྤྱན་རས་གཟིགས་ལ་ཕྱག་འཚལ་ལོ། །ཨོཾ་མ་ཎི་པདྨེ་ཧཱུྃ་ཧྲཱིཿ གྲངས་མང་བརྗོད་མཐར། བདག་གི་ལུས་ཤ་ཁྲག་གི་མཆོད་སྦྱིན་འདི། ཁ་རག་པ་ཙམ་དང་། དྲི་ཚོར་བ་ཙམ་གྱིས་ན་བར་ཕན། ཤི་བ་སོས། རྒས་པ་དར། ཕོ་ཐམས་ཅད་སྤྱན་རས་གཟིགས་ཀྱི་གོ་འཕང་ཐོབ་པར་གྱུར་ཅིག མོ་ཐམས་ཅད་རྗེ་བཙུན་སྒྲོལ་མའི་གོ་འཕང་ཐོབ་པར་གྱུར་ཅིག ལན་ཆགས་གདོན་བགེགས་དང་རིག་དྲུག་སྙིང་རྗེའི་མགྲོན་ཐམས་ཅད་མགྲོན་པོ་རང་ཁྱིམ་དུ་ལོག་པ་ལྟར་སོ་སོ་རང་རང་གི་གནས་སུ་སོང་བར་གྱུར་ཅིག འབྱུང་པོ་ས་འོག་རྒྱུ་བ་དང་། །གང་ཡང་ས་སྟེང་འཁོད་པ་དང་། །ས་བླར་རྒྱུ་བ་གང་ཡིན་པ། །མགུ་བར་གྱིས་ལ་རང་གནས་སུ། །ཐམས་ཅད་ཐ་དད་འགྲོ་བར་གྱིས། སརྦ་བུདྡྷ་གཙྪཿ གཅོད་ཡུལ་ཉམས་སུ་ལེན་པའི་གང་ཟག་ལ། །རང་སེམས་བདུད་དུ་མི་བལྟ་ཞིང། །སྙེམས་རྟོག་མ་ལུས་ཆོད་པར་ཤོག །བཟང་པོའི་ཡོན་ཏན་ཅི་བྱུང་ཡང་། །དེ་ལ་རློམས་སེམས་མེད་པར་ཤོག །ངན་པའི་རྣམ་རྟོག་ཅི་བྱུང་ཡང་། །དེ་ལ་སྙེམས་རྟོག་མེད་པར་ཤོག །དམ་ཆོས་བདུད་ཀྱི་གཅོད་ཡུལ་འདི། །མཁའ་ལ་ཉི་མ་ཤར་བ་ལྟར། །ཕྱོགས་རྣམས་ཀུན་ཏུ་ཁྱབ་གྱུར་ཅིག །ཕཊཿ ཕཊཿ ཕཊ གནས་གདོན་ལུས་གདོན་གཉིས་ཀྱི་ཐོག་དྲངས། མཁའ་ཁྱབ་ཀྱི་སེམས་ཅན་ཐམས་ཅད་རང་རིག་པའི་ཡེ་ཤེས་ལ་རང་དབང་ཐོབ་པར་གྱུར་ཅིག སྣང་བ་རྒྱས་ཐེབས་པར་གྱུར་ཅིག །མཚན་མ་རང་སར་གྲོལ་བར་གྱུར་ཅིག །ཆོས་སྐུ་གཏིང་གསལ་གྱི་དོན་རྒྱུད་ལ་སྐྱེ་བར་གྱུར་ཅིག །ཀུན་བཟང་སྣང་མཐའ་པད་འབྱུང་མན་ཆད་དང་། །དྲིན་ཆེན་རྩ་བའི་བླ་མ་ཡན་ཆད་ཀྱིས། །འགྲོ་བའི་དོན་དུ་སྨོན་ལམ་གང་བཏབ་པ། །དེ་དག་ཐམས་ཅད་དེང་འདིར་འགྲུབ་པར་ཤོག །ཕན་བདེའི་འབྱུང་གནས་བསྟན་པ་འཕེལ་གྱུར་ཅིག །ཚེ་རབས་ཀུན་ཏུ་ཆོས་ལ་སྤྱོད་གྱུར་ཅིག །རྒྱལ་ཁམས་ཀུན་ཏུ་བཀྲ་ཤིས་རྒྱས་གྱུར་ཅིག །འགྲོ་ཀུན་ཕྱམ་གཅིག་སངས་རྒྱས་ཐོབ་པར་ཤོག །