མཇུག་བྱང་།
༈ སྔགས་རིག་འཛིན་པ་མཆེད་གྲོགས་གསེར་གཤིས་འཆང་བ་ཀུན་བཟང་བསོད་མཆོག་ལགས་ཀྱི་ཐུགས་བསྐྱེད་ལས་བྱུང་བའི། གཏེར་གསར་རྙིང་མདོ་དང་བཅས་པའི་ཉིང་བཅུད་ཕྱོགས་གཅིག་ཏུ་བསྡུས་ཏེ། སྔ་འགྱུར་རྙིང་མའི་ཞལ་འདོན་ཕྱོགས་བསྒྲིགས་ཞེས་པ་འདི། སྤྱིར་མདོ་རྒྱུད་བཀའ་གཏེར་ཟབ་རྒྱས་ཀྱི་ཆོས་སྡེ་རྒྱ་ཆེར་བཞུགས་པ་རྣམས། གྲུབ་རིགས་ས་ལ་གནས་པ་ཚོའི་དགོངས་བཅུད་ཧྲིལ་དྲིལ་གྱིས་རིམ་གཉིས་ལམ་གྱི་གདམས་གནད་ཚང་ལ་རྒྱས་བསྡུས་རན་པར་མཛད་ཡོད་པ་ནི་རྒྱུན་སྤྱོད་ཞལ་འདོན་འདིའི་རིགས་ཀྱི་ཁྱད་ཆོས་རེད། དེ་ནི་ཉམས་བཞེས་སླ་ལ་བྱིན་རླབས་མྱུར་བ། འཇུག་པ་བདེ་ལ་ནང་སེམས་གྲོལ་བར་ནུས་པའི་སྒྲུབ་ཆོས་གཅིག་ཆོག་གི་ཐབས་ལམ་བཟང་པོར་ཡིན་པའི་ངེས་ཤེས་ཀྱིས། ད་ལན་དམ་པ་གང་གིས་དཔེ་དེབ་འདི་པར་བསྐྲུན་ཆོས་སྦྱིན་གྱི་དགེ་རྩ་གནདསྨིན་བྱས་པའི་བསོད་ནམས་གང་མཆིས་དེས། ས་ཆེན་པོའི་ཁྱོན་གྱི་འགྲོ་བ་རྣམས་ལ་ནང་བསྟན་གྱི་བྱིན་རླབས་ཞུགས་ཤིང་། སེམས་ཆོས་ཀྱི་ཉམས་ལེན་ལ་གནས་ནས་འཚེ་མེད་ཞི་བའི་ལམ་དུ་གནས་སྐབས་བདེ་སྐྱིད་ཚེ་རིང་ཆོས་འབྱོར་རྒྱས་ཏེ། མི་རིང་པར་གཏན་བདེའི་དཔལ་ལ་མྱུར་དུ་ལོངས་སྤྱོད་པའི་རྒྱུ་རུ་འགྱུར་བར་སྨོན། ཞེས་རྒྱ་ཀོང་རིག་འཛིན་མཐར་ཕྱིན་གྱིས་མཆེད་པོ་གང་གི་ཆོས་སྦྱིན་རྣམ་དཀར་ལ་ཡི་རངས་གུས་སྨོན་དུ་ཕུལ་བའོ།