ལམ་ཟབ་བླ་མའི་རྣལ་འབྱོར་སྤྱི་དང་བྱེ་བྲག་གི་རིམ་པ་རྣམས་ཕྱོགས་གཅིག་ཏུ་བསྡེབས་པ་ཡེ་ཤེས་བདུད་རྩིའི་གཏེར་མཛོད།
ལམ་ཟབ་བླ་མའི་རྣལ་འབྱོར་སྤྱི་དང་བྱེ་བྲག་གི་རིམ་པ་རྣམས་ཕྱོགས་གཅིག་ཏུ་བསྡེབས་པ་ཡེ་ཤེས་བདུད་རྩིའི་གཏེར་མཛོད་ཅེས་བྱ་བ་བཞུགས་སོ། །
བླ་མའི་རྣལ་འབྱོར་ཚན་ཆུང་ཁ་ཤས་བཞུགས།
བདག་ཉིད་ཐ་མལ་སྤྱི་གཙུག་ཏུ། །ཡེ་ཤེས་འོད་ལྔའི་ཐིག་ལེའི་དབུས། །རིན་ཆེན་སེང་གེས་བཏེགས་པའི་ཁྲིར། །ངོ་བོ་རྩ་བའི་བླ་མ་ལ། །རྣམ་པ་རྡོ་རྗེ་འཆང་ཆེན་པོ། །གསལ་འཚེར་ནམ་མཁའི་མདོག་ཅན་གྱི། །ཕྱག་གཉིས་རྡོར་དྲིལ་བསྣོལ་ཐབས་འཛིན། །ཞབས་གཉིས་རྡོ་རྗེ་སྐྱིལ་ཀྲུང་བཞུགས། །དབུ་རྒྱན་སྙན་རྒྱན་མགུལ་རྒྱན་དང། །ཕྱག་ཞབས་གདུ་བུ་སྐ་རགས་འཕྱངས། །ལོངས་སྤྱོད་རྫོགས་པའི་ཆ་ལུགས་ལྡན། །ཞལ་མདངས་འཛུམ་པའི་ཉམས་དང་བཅས། །མཚན་དཔེའི་སྐུ་མཆོག་ལྷམ་མེ་བ། །སྐྱབས་གནས་ཀུན་འདུས་དམ་པ་ལ། །ཕྱག་
འཚལ་མཆོད་པ་རྒྱ་མཚོ་འབུལ། །ཉེས་བཤགས་དགེ་ལ་ཡི་རང་ངོ་། །ཞིང་འདིར་ཆོས་སྟོན་བཞུགས་གསོལ་འདེབས། །འགྲོ་ཀུན་བྱང་ལམ་ཐོབ་ཕྱིར་བསྔོ། །རང་བྱུང་ལྷན་སྐྱེས་དོན་དམ་པ། །ཇི་བཞིན་རྟོགས་པར་བྱིན་གྱིས་རློབས། །དུས་གསུམ་སངས་རྒྱས་འདུས་པའི་སྐུ། །དཀྱིལ་འཁོར་ཀུན་གྱི་བདག་པོ་ཆེ། །བཀའ་དྲིན་གསུམ་ལྡན་རིན་པོ་ཆེ། །དྲིན་ཅན་རྗེ་ལ་གསོལ་བ་འདེབས། །བདག་འཛིན་འཁྲུལ་པ་དག་པ་དང། །རང་སེམས་སྐྱེ་མེད་དོན་རྟོགས་ནས། །སྣང་སྲིད་ཆོས་ཀྱི་སྐུ་རུ་འཆར། །མཆོག་གི་གོ་འཕང་ཐོབ་བྱིན་རློབས། །ཕ་གཅིག་
དམ་པ་རྗེ་བཙུན། །རྒྱལ་དབང་སྐུ་བཞིའི་དབང་ཕྱུག །ངན་སོང་འཇིགས་སྐྱོབ་མགོན་པོ། །དྲིན་ཅན་བླ་མ་མཁྱེན་ནོ། །ཕ་གཅིག་ཕྲིན་ལས་བཞི་ལྡན། །ཡེ་ཤེས་སྐད་ཅིག་འཕོ་བའི། །ཐུགས་རྗེའི་བྱིན་རླབས་གཏེར་འཛིན། །དྲིན་ཅན་བླ་མ་མཁྱེན་ནོ། །བདག་འདྲ་ལས་ངན་སེམས་ཅན། །ཉམ་ཐག་སྐྱབས་མེད་མགོན་མེད། །ཉོན་མོངས་གཡང་ལས་ཐར་བའི། །དྲིན་ཅན་ཐུགས་རྗེས་དྲོངས་ཤིག །ཅེས་མོས་གུས་ཀྱི་འདུན་པ་རྩེ་གཅིག་པས་རྒྱང་འབོད་ཀྱི་ཚུལ་དུ་ལན་ཅི་ནུས་བྱས་ལ། དེ་ནས་བྱིན་རླབས་ཀྱི་དབང་བཞི་ལེན་པ་ནི། བླ་མའི་སྐུ་དང་གསུང་དང་ཐུགས། །ཡེ་ཤེས་རྡོ་རྗེའི་བྱིན་རླབས་ཀྱི། །འོད་ཟེར་དཀར་དམར་མཐིང་ལྗང་འཕྲོས། །གནས་བཞིར་ཐིམ་པས་དབང་བཞི་རྫོགས། །སླར་ཡང་མོས་གུས་གསོལ་བཏབ་མཐུས། །དགྱེས་ཚུལ་དང་བཅས་འོད་དུ་ཞུ། །ཆུ་ལ་ཆུ་བཞག་ཇི་བཞིན་ཏུ། །སྤྲོས་མེད་ངང་ལ་མཉམ་པར་བཞག །ཅེས་ཅི་གནས་སུ་བཞག །བདག་ནི་སྐྱེ་བ་ཚེ་རབས་ཀུན་ཏུ་ཡང། །སྒྲུབ་བརྒྱུད་བསྟན་པའི་སྒོར་ཞུགས་བླ་མ་མཆོག །འབྲལ་མེད་བརྙེས་པ་གསུམ་གྱིས་གུས་མཆོད་ཅིང། །བློ་འདས་ཕྱག་རྒྱ་ཆེན་པོ་འགྲུབ་གྱུར་ཅིག །ཉོན་མོངས་ཆུ་བོར་སྤྱོད་པའི་འགྲོ་བ་རྣམས། །རབ་དཀར་དགེ་བའི་གྲུ་རྫིང་ལ་བརྟེན་ནས། །བྱང་ཆུབ་སེམས་གཉིས་སྐྱ་བས་རྒྱུད་བསྐུལ་ཏེ། །མྱང་འདས་ཆེན་པོའི་
གོ་འཕང་མྱུར་ཐོབ་ཤོག །ཅེས་པ་འདིའང་འཕགས་ནོར་བདུན་གྱིས་ཕྱུག་པ་མཆོག་སྤྲུལ་བདེ་ཆེན་རབ་འཕེལ་ནས་བླ་མའི་རྣལ་འབྱོར་སྤྱི་ལ་འཇུག་པའི་ཁྱེར་བདེ་ཞིག་བསྐུལ་ངོར་སི་ཏུ་ཧོ་ཐོག་ཐུ་པདྨ་ཉིན་བྱེད་དབང་པོས་ཤིང་ཡོས་ཁྲུམས་ཟླའི་ཡར་ཚེས་ལ་བྲིས་པ་འགྲོ་རྣམས་ཟུང་འཇུག་རྡོ་རྗེ་འཆང་གི་གོ་འཕང་ལ་འགོད་པར་གྱུར་ཅིག །བཀྲ་ཤིས།། །།རང་ལྷར་གསལ་བའི་སྤྱི་བོར་པད་ཟླའི་སྟེང་། །ངོ་བོ་བླ་མ་རྣམ་པ་རྡོ་རྗེ་འཆང། །རྩ་བརྒྱུད་རྣམས་དང་ཡི་དམ་དཀྱིལ་འཁོར་ལྷ། །ཆོས་སྐྱོང་རྒྱ་མཚོས་བསྐོར་ནས་བཞུགས་པར་གསལ། །ཕྱག་འཚལ་མཆོད་ཅིང་བསྟོད་དང་ནོངས་པ་བཤགས། །ཡི་རངས་བསྐུལ་གསོལ་དགེ་བ་བྱང་ཆུབ་བསྔོ། །བདག་སོགས་འགྲོ་རྣམས་འདི་བཟུང་སྙིང་པོའི་བར། །སྐྱབས་གསོལ་ཐུགས་རྗེས་བདག་རྒྱུད་བྱིན་གྱིས་རློབས། ༀ་ཨཱཿབཛྲ་དྷཱ་ར་ཧཱུྃ། ཅི་ནུས་བཟླས་མཐར། མཐར་ནི་བླ་མ་འོད་ཞུ་རང་ལ་ཐིམ། །དབྱེར་མེད་གཅིག་འདྲེས་མ་བཅོས་ངང་དུ་བཞག །དགེ་དེས་སྐྱེ་དང་ཚེ་རབས་ཐམས་ཅད་དུ། །དམ་པས་རྗེས་བཟུང་སྐུ་བཞི་མངོན་གྱུར་ཤོག །ཅེས་སི་ཏུ་པས་རྣམ་གླིང་དགོན་པར་བླ་སྤྲུལ་བཞེད་ངོར་སྤེལ་བ་དགེ།། །།སྤྱི་བོར་པད་ཉི་ཟླ་གདན་སྟེང་། །རྡོ་རྗེ་འཆང་དབང་ཆོས་ཀྱི་རྗེ། །ནམ་མཁའི་མདོག་ཅན་རྡོར་དྲིལ་བསྣམས། །ཞབས་ཟུང་རྡོ་རྗེ་སྐྱིལ་ཀྲུང་བཞུགས། །ལྷ་རྫས་དར་གྱི་ན་བཟས་མཛེས། །རིན་ཆེན་རྒྱན་གྱིས་རྣམ་
པར་བཀླུབས། །ཡེ་ཤེས་འོད་ལྡའི་ཀློང་དུ་གསལ། །སངས་རྒྱས་ཀུན་གྱི་སྤྱི་དཔལ་ཆེ། །རིགས་རྣམས་ཁྱབ་བདག་འཁོར་ལོའི་མགོན། །བཀའ་དྲིན་མཉམ་མེད་བླ་མ་མཁྱེན། །སྐྱེ་ཞིང་སྐྱེ་བར་རྗེས་འཛིན་ཏེ། །བླ་མེད་རྡོ་རྗེ་འཆང་འགྲུབ་ཤོག །སྤྱི་བོའི་བླ་མ་འོད་ཞུ་ནས། །དབྱེར་མེད་ཆུ་ལ་ཆུ་བཞག་ལྟར། །རང་སེམས་མ་བཅོས་ལྷུག་པར་བཞག །ཅེས་རྟོགས་ལྡན་དཔལ་ལྡན་ཕྲིན་ལས་ནས་བསྐུལ་ལྟར། སི་ཏུས་དཔལ་འཛོང་གནས་མཆོག་ནས་བྲིས་པ་མངྒ་ལྃ།། །།རང་ལུས་ཐ་མལ་སྤྱི་བོ་རུ། །བླ་མ་རྡོ་རྗེ་འཆང་ཆེན་པོ། །སྐུ་ུམདོག་སྔོན་པོ་ཕྱག་གཉིས་ཀྱིས། །རྡོར་དྲིལ་བསྣོལ་ཐབས་ལོངས་སྐུའི་ཆས། །ཡོངས་རྫོགས་འོད་ལྔའི་ཀློང་དུ་གསལ། །དཀོན་མཆོག་འདུས་པའི་ངོ་བོ་ཉིད། །གསོལ་བ་འདེབས་སོ་བྱིན་གྱིས་རློབས། །དབང་བཞི་རྫོགས་ཐོབ་སྒྲིབ་བཞི་དག །སྐུ་བཞིའི་གོ་འཕང་ཡོངས་ཐོབ་ནས། །བླ་མེད་བྱང་གྲོལ་མྱུར་ཐོབ་ཤོག །ཅེས་བསྟན་དབང་ནས་བསྐུལ་ངོར་སི་ཏུས་སྤེལ། བཀྲ་ཤིས་དཔལ་འབར་འཛམ་གླིང་རྒྱན་དྲུག་ཤོག །དགེའོ།། །།
བླ་མའི་རྣལ་འབྱོར་དཀོན་མཆོག་ཀུན་འདུས།
བླ་མའི་རྣལ་འབྱོར་དཀོན་མཆོག་ཀུན་འདུས་བཞུགས། སྤྱི་བོར་པད་ཟླའི་གདན་གྱི་སྟེང། །བླ་མ་ཁྱབ་བདག་རྡོ་རྗེ་འཆང། །ལོངས་སྤྱོད་རྫོགས་པའི་ཆས་དང་ལྡན། །དེ་ལ་དཀོན་མཆོག་རྩ་
གསུམ་གྱི། །ལྷ་ཚོགས་དཔག་མེད་བསྐོར་བར་གསལ། །བདག་སོགས་མཁའ་མཉམ་འགྲོ་ཀུན་གྱི། །ཕྱག་འཚལ་མཆོད་བཤགས་རྗེས་ཡི་རང། །བསྐུལ་ཞིང་གསོལ་འདེབས་བསྔོ་བར་བགྱི། །རང་བྱུང་ལྷན་སྐྱེས་ཕྱག་རྒྱ་ཆེ། །སྙིང་པོའི་དོན་རྟོགས་བྱིན་གྱིས་རློབས། །ༀ་ཨཱཿབཛྲ་དྷཱ་ར་ཧཱུྃ། ཞེས་བསྙེན་ཅིང། མཐར་ནི་སྐྱབས་ཡུལ་རང་ལ་ཐིམ། །དབྱེར་མེད་ཆུ་ལ་ཆུ་བཞག་ལྟར། །མ་བཅོས་སྤྲོས་མེད་ངང་དུ་བཞག །དགེ་དེས་རང་གཞན་སངས་རྒྱས་ཤོག །ཅེས་སྔགས་འཆང་ཀརྨ་རྣམ་རྒྱལ་ངོར་སྤེལ།། །།རང་ཉིད་ཐ་མལ་སྤྱི་བོ་རུ། །པདྨ་དཀར་པོ་འདབ་བརྒྱད་པ། །ཟླ་བའི་དཀྱིལ་འཁོར་ཉ་གང་སྟེང་། །རིགས་ཀུན་གཙོ་བོ་བླ་མ་མཆོག །རྣམ་པ་རྡོར་སེམས་སྐུ་མདོག་དཀར། །ཕྱག་གཉིས་རྡོ་རྗེ་དྲིལ་བུ་འཛིན། །དབུ་རྒྱན་སྙན་རྒྱན་མགུལ་རྒྱན་དང། །ཕྱག་ཞབས་གདུ་བུ་རིན་ཆེན་བརྒྱན། །དར་ལིའི་སྟོད་གཡོགས་སྨད་གཡོགས་གསོལ། །ཞབས་གཉིས་སེམས་དཔའི་སྐྱིལ་ཀྲུང་བཞུགས། །ཐུགས་ཀར་ཧཱུྃ་མཐར་ཡིག་བརྒྱས་བསྐོར། །སྐུ་ལས་བདུད་རྩི་འོ་མའི་རྒྱུན། །བསིལ་བ་བདེ་བའི་རང་བཞིན་ཅན། །བབས་པས་རང་ལུས་གང་བར་གྱུར། །ༀ་བཛྲ་ས་ཏྭ་སོགས་ཡི་གེ་བརྒྱ་པ་དང་དྲུག་པ་ཅི་ནུས་བཟླས་མཐར། ཀྱེ་མགོན་པོ། བདག་ནི་འཁྲུལ་པའི་དབང་གྱུར་ཏེ། །སྐུ་གསུང་ཐུགས་
དང་གང་འགལ་བའི། །ཉེས་ལྟུང་ཐམས་ཅད་བྱང་ཞིང་དག །དག་ཚངས་དབུགས་དབྱུང་མཛད་དུ་གསོལ། །གསོལ་བཏབ་མཐུ་ལས་སྡིག་སྒྲིབ་རྣམས། །དུད་ཁུ་སོལ་ཁུའི་རྣམ་པར་ཐོན། །རང་ལུས་ཤེལ་སྒོང་ལྟ་བུར་གྱུར། །སྤྱི་བོའི་བླ་མ་འོད་ཞུ་ནས། །དབྱེར་མི་ཕྱེད་པ་རང་ལ་ཐིམ། །མ་བཅོས་གཉུག་མའི་ངང་ལ་བཞག །དགེ་འདིས་མཁའ་མཉམ་མ་རྒན་རྣམས། །སངས་རྒྱས་གོ་འཕང་ཐོབ་ཕྱིར་བསྔོ། །ཅེས་པའང་དབོན་སྤྲུལ་ཀརྨ་འབྱུང་གནས་ཀྱི་ཐུགས་བཞེད་བཞིན་སི་ཏུ་པདྨ་ཉིན་བྱེད་དབང་པོས་འཛི་སྒར་བཀྲ་ཤིས་ཆོས་གླིང་དུ་སྤེལ་བ་སརྦ་མདྒ་ལཾ།། །།སྤྱི་བོར་དྲི་མེད་ཟླ་རྒྱས་སྟེང། །ཧྲཱིཿཡིག་དམར་པོའི་འཕྲོ་འདུ་ལས། །ངོ་བོ་རྩ་བའི་བླ་མ་ལ། །རྣམ་པ་བཅོམ་ལྡན་སྣང་མཐའ་ཡས། །དམར་གསལ་ཞལ་གཅིག་ཕྱག་གཉིས་པ། །མཉམ་བཞག་ལྷུང་བཟེད་ཚེ་བུམ་འཛིན། །ན་བཟའ་ཆོས་གོས་ཞབས་རྡོར་སྐྱིལ། །མཚན་དང་དཔེ་བྱད་ཡོངས་རྫོགས་པ། །འོད་དང་འོད་ཟེར་ཀློང་དུ་གསལ། །གནས་གསུམ་ༀ་ཨཱཿཧཱུྃ་ཡིག་ལས། །འོད་འཕྲོས་བདེ་ཆེན་ཞིང་ཁམས་ནས། །བསྐྱེད་པ་དང་འདྲའི་ཡེ་ཤེས་པ། །དཔག་མེད་སྤྱན་དྲངས་རང་ཐིམ་གྱུར། །སླར་ཡང་ཐུགས་འོད་འཕྲོས་པ་ལས། །དབང་ལྷ་རིགས་ལྔས་དབང་བསྐུར་ཞིང་། །རིགས་བདག་རྣམ་སྣང་རྒྱས་གདབ་གྱུར། །ཐུགས་ཀར་ཟླ་སྟེང་ཧྲཱིཿཡིག་དམར། །
དེ་མཐར་སྔགས་ཕྲེང་གཡས་སུ་འཁོར། །ཕྱོགས་དུས་རྒྱལ་བ་རྒྱ་མཚོའི་ཚོགས། །ཀུན་གྱི་ཐུགས་རྗེ་དངོས་གྲུབ་རྣམས། །སྣང་མཐའི་སྐུར་གྱུར་རང་ལ་ཐིམ། །ཕྱི་སྣོད་ནང་བཅུད་འགྲོ་བ་རྣམས། །ལྷ་ཡི་ངོ་བོར་བསྒྱུར་བ་དང་། །རིགས་དྲུག་སྒྲིབ་སྦྱང་བྱང་ཆུབ་ཀྱི། །ལམ་བཀོད་ཁྱེར་སོ་གསུམ་ལྡན་ངང་། །ༀ་ཨཱ་མི་དྷེ་ཝཱ་ཧྲཱིཿཅི་ནུས་བཟླས་མཐར། རྒྱལ་ཀུན་ཐུགས་རྗེའི་གཏེར་ཆེན། །པདྨ་གསུང་གི་དབང་ཕྱུག །སངས་རྒྱས་འོད་དཔག་མེད་མགོན། །དབྱེར་མེད་དཔལ་ལྡན་བླ་མར། །སྙིང་ནས་དད་པས་གསོལ་འདེབས། །བདག་དང་འབྲེལ་ཐོགས་སེམས་ཅན། །ནུབ་ཕྱོགས་བདེ་ལྡན་ཞིང་དུ། །གང་གི་ཞལ་མཐོང་ལུང་ཐོབ། །ཕྱིར་མི་ལྡོག་བར་བྱིན་རློབས། །ཅེས་བླ་མ་རྒྱང་འབོད་སྨོན་ལམ་དང། བཅོམ་ལྡན་འདས་ཀྱི་སྐུ་ལས་ཡེ་ཤེས་ལྔའི། །ངོ་བོ་ༀ་དཀར་ཨཱཿདམར་ཧཱུྃ་སྔོན་པོ། །སྭཱ་སེར་ཧཱ་ལྗང་འཕྲོས་པས་བདག་ལུས་ཀྱི། །གནས་ལྔར་ཐིམ་པས་ཕུང་ཁམས་སྡིག་སྒྲིབ་བསལ། །དབང་བཞི་ཐོབ་ཅིང་བླ་མ་འོད་ཞུ་ནས། །དབྱེར་མེད་གཅིག་འདྲེས་སྣང་སྲིད་ཆོས་ཐམས་ཅད། །གནས་ལུགས་ཕྱག་རྒྱ་ཆེན་པོའི་ངོ་བོར་བཞག །ཅེས་ཅི་གནས་ཉམས་བསྐྱང་ལ་། མཐར་དགེ་རྩ་བྱང་ཆེན་བསྔོ། དེ་ལྟར་གདན་ས་བར་པའི་སྒྲུབ་ཆེན་ཕྲིན་ལས་ཕུན་ཚོགས་ངོར་སི་ཏུ་པདྨ་ཉིན་བྱེད་དབང་པོས་སྤེལ་བ་སརྦ་མདྒ་ལམ། ཤུ་བྷམ།། །།
ཧྲཱིཿསྣང་སྲིད་ཆོས་རྣམས་གཟོད་ནས་མཚན་བྲལ་ངང་། །སྙིང་རྗེ་ཆེན་པོའི་རོལ་རྩལ་འགག་མེད་མདངས། །གསལ་སྟོང་འོད་ཕུང་ཡི་དམ་ལྷར་གསལ་བའི། །སྤྱི་བོར་དྲིན་ཅན་རྩ་བའི་བླ་མ་ནི། །རྣམ་པ་གུ་རུ་པདྨ་འབྱུང་གནས་མཆོག །མཚན་དཔེའི་གཟི་འབར་ཆ་ལུགས་ཡོངས་སུ་རྫོགས། །སྐུ་དང་ཡེ་ཤེས་དབྱེར་མེད་ལྷུན་གྲུབ་ཀྱང་། །གཉིས་འཛིན་སྣང་ཡུལ་བག་ཆགས་དག་པའི་ཕྱིར། །ཐུགས་ལས་འོད་འཕྲོས་པདྨ་འོད་ཞིང་ནས། །ཡེ་ཤེས་སྤྱན་དྲངས་དམ་ཡེ་གཉིས་མེད་གྱུར། །ཧཱུྃ། ཨོ་རྒྱན་ཡུལ་གྱི་ནུབ་བྱང་མཚམས། །པདྨ་གེ་སར་སྡོང་པོ་ལ། །ཡ་མཚན་མཆོག་གི་དངོས་གྲུབ་བརྙེས། །པདྨ་འབྱུང་གནས་ཞེས་སུ་གྲགས། །འཁོར་དུ་མཁའ་འགྲོ་མང་པོས་བསྐོར། །ཁྱེད་ཀྱི་རྗེས་སུ་བདག་སྒྲུབ་ཀྱིས། །བྱིན་གྱིས་བརླབ་ཕྱིར་གཤེགས་སུ་གསོལ། །གུ་རུ་པདྨ་སིདྡྷི་ཧཱུྃཿཿཞེས་ཚར་བདུན་ནམ་གསུམ་དང་། གནས་མཆོག་འདི་རུ་བྱིན་ཕོབ་ལ། །སྒྲུབ་མཆོག་བདག་ལ་དབང་བཞི་བསྐུར། །བགེགས་དང་ལོག་འདྲེན་བར་ཆད་སོལ། །མཆོག་དང་ཐུན་མོང་དངོས་གྲུབ་སྩོལ། །ༀ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛཿསིདྡྷི་ཕ་ལ་ཧཱུྃ། ཞེས་ཐོད་ཕྲེང་རྩལ་སྔགས་གང་འགྲུབ་བཟླ། དེ་ལྟར་གསོལ་བ་བཏབ་པས་བླ་མ་ཡི། །རྡོ་རྗེ་བཞི་ཡི་བྱིན་རླབས་འོད་ཟེར་ཚུལ། །འཕྲོས་ནས་རང་གི་གནས་
བཞིར་ཐིམ་པའི་མོད། །གནས་སྐབས་རྣམ་བཞིའི་སྒྲིབ་པ་དག་ནས་ཀྱང་། །སྐུ་བཞིའི་ས་བོན་རྒྱུད་ལ་བཞག་པར་གྱུར། །སྐྱེ་བ་ཀུན་ཏུ་ཡང་དག་བླ་མ་དང་། །འབྲལ་མེད་ཆོས་ཀྱི་དཔལ་ལ་ལོངས་སྤྱོད་ཅིང་། །ས་དང་ལམ་གྱི་ཡོན་ཏན་རབ་རྫོགས་ཏེ། །རྡོ་རྗེ་འཆང་གི་གོ་འཕང་མྱུར་ཐོབ་ཤོག །བརྗོད། ཅེས་ཀརྨའི་དད་པའི་གསོས་སུ་སྤེལ།། །།
མར་མི་དྭགས་གསུམ་གྱི་བླ་མའི་རྣལ་འབྱོར།
མར་མི་དྭགས་གསུམ་གྱི་བླ་མའི་རྣལ་འབྱོར་བཞུགས། ཀྱེ་མ། གཟུང་འཛིན་མ་རིག་འཆིང་བའི་དྲྭ་བ་ལ། །འཐུམ་པའི་རང་གཞན་སེམས་ཅན་སྙིང་རེ་རྗེ། །ད་ནི་ངེས་དོན་སྙིང་པོའི་གསང་ལམ་མཆོག །རང་བྱུང་ཡེ་ཤེས་གནས་ལ་འབད་པར་བྱ། །དངོས་ཀུན་ཆོས་རྣམས་སྟོང་ཉིད་ཆེན་པོའི་ངང་། །སྣང་བའི་རྩལ་ལས་མ་འགག་དཀྱིལ་འཁོར་ཤར། །མདུན་མཁར་ལྔ་ལྡན་འཇའ་འོད་འཐིབས་པའི་ཀློང་། །པད་ཉི་ཟླ་གདན་གསུམ་གསལ་དབུས་མ་ལ། །དགྱེས་མཛད་ཧེ་རུ་ཀ་དངོས་ལོ་ཙཱ་ཆེ། །ཆོས་ཀྱི་བློ་གྲོས་དགེ་བསྙེན་ཆ་ལུགས་ཅན། །རབ་བརྗིད་གཟི་འབར་ཟིལ་གནོན་ཕྱག་རྒྱ་མཛད། །གཡས་སུ་རྗེ་བཙུན་མི་ལ་ཐོས་པ་དགའ། །རས་དཀར་བླ་གོས་སེམས་ཉིད་ངལ་གསོའི་ཚུལ། །རྡོ་རྗེའི་མགུར་དབྱངས་ཏམ་བུ་ུར་བཞིན་སྒྲོག །གཡོན་དུ་ཟླ་འོད་གཞོན་ནུ་རབ་བྱུང་ཆས། །དབུ་ལ་སྒོམ་ཞུ་མཉམ་བཞག་ཕྱག་རྒྱ་ཅན། །མི་རྟོག་ཏིང་འཛིན་ཟབ་མོདོན་ལ་གནས། །
གཞན་ཡང་སྟེང་འོག་བར་མཚམས་ཐམས་ཅད་དུ། །ཆོས་ལོངས་སྤྲུལ་དང་བཀའ་བརྒྱུད་བླ་མའི་ཚོགས། །ཡི་དམ་ཌཱ་ཀི་དཔའ་བོ་རྣལ་འབྱོར་མ། །དམ་ཅན་ཆོས་སྲུང་ལ་སོགས་སྐྱབས་གནས་རྣམས། །སྤྲིན་ལྟར་གཏིབ་བཞིན་རབ་ཏུ་གསལ་བར་གྱུར། །ཅེས་གསལ་བཏབ་ནས། ཀྱེ་ཧོ། དུས་གསུམ་རྒྱལ་ཀུན་གྱི་གོང་བུ། །གཅིག་བསྡུས་ཐུགས་རྗེ་ཡི་གཏེར་ཆེན། །བྱིན་རླབས་བུམ་བཟང་གི་བདག་ཉིད། །རྗེ་བཙུན་བླ་མ་རང་མཁྱེན་ནོ། །གཏན་མེད་འཁྲུལ་འབྱམས་ཀྱི་སེམས་ཅན། །ཆོས་མེད་དྲེད་པོ་ལ་གཟིགས་དང་། །ངན་སོང་འཁོར་བ་ཡི་འདམ་ལས། །ནུས་མཐུའི་ལྕགས་ཀྱུ་ཡིས་དྲོངས་ཤིག །བདག་སོགས་མཁའ་མཉམ་གྱི་འགྲོ་བ། །སྐྱབས་མེད་མགོན་བྲལ་ལ་དགོངས་མཛོད། བདེ་ཆེན་ཐར་མཆོག་གི་ཞིང་དུ། །མྱུར་དུ་འདྲེན་པར་རང་བྱིན་རློབས། །ཅེས་གསོལ་འདེབས་རྒྱང་འབོད་ཚུལ་དུ་ཚར་ཁ་ཤས་དང་། མཐར། སྣང་སྲིད་བླ་མའི་དཀྱིལ་འཁོར་དེ་ཐམས་ཅད། །འོད་ཞུ་གཙོར་ཐིམ་དེ་ཡང་རང་ལ་ཐིམ། །བླ་མ་རང་སེམས་དབྱེར་མེད་གཉུག་མའི་ངང་། །མ་བཅོས་སྤྲོས་པ་ཀུན་བྲལ་ཀློང་དུ་བཞག །མཐར་དགེ་བསྔོ་སོགས་བྱའོ། །ཅེས་པའང་སི་ཏུ་པས། དད་དམ་ལྡན་པ་དབུ་དར་རྒྱས་ངོར་སྤེལ་བ་དགེའོ།། །།
གྲུབ་ཆེན་ཀརྨ་པཀྴིའི་བླ་མའི་རྣལ་འབྱོར།
གྲུབ་ཆེན་ཀརྨ་པཀྴིའི་བླ་མའི་རྣལ་འབྱོར་བཞུགས་སོ། །
སྣང་སྲིད་འཁོར་འདས་ཆོས་ཐམས་ཅད། །འཛིན་མེད་བློ་འདས་ཕྱག་རྒྱ་ཆེའི། །རང་མདངས་མ་འགགས་གསལ་བའི་ངང་། །སྤྱི་བོར་པདྨ་ཉི་ཟླའི་སྟེང་། །ཨོ་རྒྱན་ཆེན་པོའི་ངོ་བོ་ཉིད། །རྣམ་པ་དཔལ་ཆེན་ཧེ་རུ་ཀ། གྲུབ་ཐོབ་རྒྱ་མཚོའི་དབང་ཕྱུག་མཆོག །ཀརྨ་པཀྴི་གཟི་འོད་འབར། །དམར་སྨུག་ཞལ་གཅིག་ཕྱག་གཉིས་ཀྱི། །ཟིལ་གནོན་ཕྱག་རྒྱ་ཞབས་རྡོར་སྐྱིལ། །ཆོས་གོས་རྣམ་གསུམ་ཟབ་བེར་གསོལ། །ཞྭ་ནག་ཁྱུང་གཤོག་དབུ་ལ་མཛེས། །སྤྱན་གསུམ་འོད་ཀྱི་དཀྱིལ་འཁོར་འཁྱིལ། །ཁྲོ་འཛུམ་ཨག་ཚོམ་ཟུར་གསུམ་ནག །ཡེ་ཤེས་ལྔ་ལྡན་ཐིག་ལེའི་དབུས། །སྣང་ལ་རང་བཞིན་མེད་པར་གསལ། །གནས་གསུམ་འབྲུ་གསུམ་ལས་འོད་འཕྲོས། །ཕྱོགས་བཅུའི་ཞིང་ཁམས་རབ་འབྱམས་ནས། །རྩ་གསུམ་ལྷ་ཡི་ཐུགས་རྗེ་བསྐུལ། །ཡེ་ཤེས་སེམས་དཔའ་སྤྱན་དྲངས་ཐིམ། །དབང་ལྷས་དབང་བསྐུར་མཆོད་ཅིང་བསྟོད། །རིགས་བདག་པད་འབྱུང་རྒྱས་གདབ་གྱུར། །ཐུགས་ཀར་ཧཱུྃ་མཐར་སྔགས་ཕྲེང་འཁོར། །སྤྲོ་བསྡུས་སྒྲིབ་སྦྱང་རྒྱལ་ཀུན་གྱི། །ཡེ་ཤེས་ཆེན་པོ་ཐོབ་པར་གྱུར། །ༀ་ཨཱཿཤྲི་མཱན་མ་ཧཱ་གུ་རུ་ཀརྨ་པཀྴི་སརྦ་སིདྡྷི་ཕ་ལ་ཧཱུྃ། དུས་གསུམ་མཉམ་མེད་ཤཱཀྱའི། །རྒྱལ་པོས་བྱིན་རླབས་ལུང་བསྟན། །སྒྲུབ་བརྒྱུད་ཀརྨ་ཀཾ་ཚང་། །ཞེས་གྲགས་སངས་རྒྱས་གཉིས་པ། །པད་འབྱུང་དབྱེར་མེད་ཉིད་དུ། །ལུང་
ཟིན་བསྟན་འགྲོའི་མགོན་པོ། །དུས་གསུམ་མཁྱེན་པ་ནས་བཟུང་། །བཅུ་གསུམ་བདུད་འདུལ་རྡོ་རྗེའི། །བར་དུ་སྐྱེས་རབས་ཕྲེང་བ། །གཅིག་ཏུ་བསྡུས་པའི་ངོ་བོ། །ཆོས་ཀྱི་བླ་མ་མཁྱེན་ནོ། །གཉིས་འཛིན་འཁྲུལ་པས་བསླད་པའི། །འཁོར་བའི་འཁོར་ལོ་འདི་ལྟའི། །མ་དག་སེམས་ཀྱི་ཆོ་འཕྲུལ། །རིག་སྟོང་རྩ་བྲལ་ཆེན་པོ། །རང་གསལ་རང་གྲོལ་ངང་དུ། །ཀ་དག་དབྱིངས་སུ་ཟློག་ཅིག །ༀ་ཨཱཿཀརྨ་པཀྴི་ཧཱུྃ། གསོལ་བཏབ་མཐུ་ལས་དེང་ནས་བཟུང་། །མ་ནོར་ལམ་སྟོན་བླ་མ་དང་། །ཐེག་ཆེན་གསང་སྔགས་དམ་པའི་ཆོས། །སྤྱོད་པའི་སྐལ་བ་ལྡན་གྱུར་ཅིག །ལྟ་ལོག་ཆོས་ལྟར་བཅོས་པའི་བདུད། །དམ་ཉམས་འདྲེས་ཁྱེར་དྲེད་པོ་ཡིས། །ནམ་ཡང་བསླུ་བར་མ་གྱུར་ཅིག །གདོད་མའི་སངས་རྒྱས་ཀུན་ཏུ་བཟང་། །དགོངས་པ་མཉམ་ཉིད་རྟོགས་པར་ཤོག །བླ་མ་འོད་ཞུ་རང་ལ་ཐིམ། །ཆུ་ལ་ཆུ་བཞག་ཇི་བཞིན་པར། །དབྱེར་མེད་གཅིག་ཏུ་འདྲེས་པར་གྱུར། །སྣང་གྲག་རྟོག་བའི་དོན་ཐམས་ཅད། །བླ་མའི་དཀྱིལ་འཁོར་ཡོངས་སུ་ཤར། །འཁོར་འདས་དུས་གསུམ་དགེ་བའི་ཚོགས། །འབྲས་བུ་སྐུ་གསུམ་ཐོབ་ཕྱིར་བསྔོ། །རྩ་གསུམ་བདེ་ལེགས་རབ་དགའི་ཆར། །སྲིད་གསུམ་ཀུན་ཏུ་ཁྱབ་གྱུར་ཅིག །སྐྱབས་ཆེ་བླ་མ་བསོད་ནམས་ཆོས་འཕེལ་གྱི་དགོངས་བཞེད་ལྟར་གར་དབང་རིན་པོ་ཆེའི་བཀའ་ཕེབས་པར་སི་ཏུ་པདྨ་ཉིན་བྱེད་དབང་པོས་འོག་མིན་ཀརྨ་ནས་སྤེལ་བ་མདྒ་ལཾ། དགེའོ།། །།
ཐུན་བཞིའི་སྒོམ་རིམ་ཉུང་བསྡུས་གྲུབ་གཉིས་འབྲས་སྟེར།
༈ ཐུན་བཞིའི་སྒོམ་རིམ་ཉུང་བསྡུས་གྲུབ་གཉིས་འབྲས་སྟེར་བཞུགས་སོ། །ན་མོ་གུ་རུ་ཀརྨ་ཡེ། མི་བསྐྱོད་རྒྱལ་བའི་ཞལ་གྱི་བདུད་རྩི་ལས། །བྱུང་བའི་ཉམས་ལེན་ཟབ་ལམ་རྨད་བྱུང་བ། །ཐུན་བཞིའི་དོན་བསྡུས་བླ་མའི་རྣལ་འབྱོར་ཞིག །སྤེལ་བགྱི་མཁའ་འགྲོས་བཀའ་ཡི་གནང་བ་སྩོལ། །སྤྱི་བོར་མཁའ་དབྱིངས་འཇའ་འོད་ཟེར་གྱི་ཀློང་། །ཡེ་ཤེས་མཁའ་འགྲོ་དམར་མོ་ཌཱ་བྷན་བསྣམས། །གཅེར་བུ་སྐྲ་གྲོལ་རྒྱན་སྤང་སྤྱན་གསུམ་ལྡན། །དཀར་འཛིན་ཆུ་འཛིན་རབ་རྒྱས་བདེ་བ་ཆེའི། །གར་གྱི་རོལ་པས་རྩེ་བཞིན་རྣམ་མང་པོས། །སྐུ་ཡི་བཀོད་པ་ཉི་ཟེར་རྡུལ་ལྟར་འཚུབས། །དེ་དབུས་རྩ་བའི་བླ་མ་ཀརྨ་པ། །ཆོས་གོས་རྣམ་གསུམ་ཞྭ་ནག་གསེར་གདངས་ཅན། །ཕྱག་གཉིས་རྡོར་དྲིལ་བསྣོལ་འཛིན་ཞབས་སྐྱིལ་ཀྲུང་། །ཆོས་དབྱིངས་དོན་དམ་སྐྱེ་མེད་ལྟ་སྟངས་ཅན། །གསོལ་བཏབ་ཙམ་གྱིས་མི་བཟོད་གདུང་བ་ཡི། །དད་དང་མོས་གུས་དག་སྣང་དུངས་སེ་དུང་། །བྱིན་རླབས་དངོས་གྲུབ་ཆར་བཞིན་ཐིབས་སེ་ཐིབ། །དཀོན་མཆོག་འདུས་པའི་ངོ་བོར་ལྷམ་མེར་གསལ། །ཀྱཻ། སྣང་སྟོང་སྐུ་ལ་གྲགས་སྟོང་གསུང་། །བདེ་སྟོང་ཐུགས་ལ་གསོལ་བ་འདེབས། །གསང་གསུམ་རྡོ་རྗེའི་བྱིན་ཕོབ་ལ། །དབང་བསྐུར་བདག་རྒྱུད་སྨིན་གྲོལ་མཛོད། །ཕྱོགས་དུས་རྒྱལ་བ་རྒྱ་མཚོ་རྣམས། །ཀུན་ཀྱང་བླ་མའི་སྐུ་ལ་ཐིམ། །རིགས་དཀྱིལ་ཁྱབ་བདག་ངེས་པར་ཤར། །ཡེ་ཤེས་མཁའ་འགྲོ་ལྗང་སེར་དམར། །དཀར་ནག་སྔོ་ཁྲ་ཌཱ་རུ་དང་། །བྷནྡྷ་བསྣམས་ཤིང་གར་སྟབས་
འཁྱུག །ཉོན་མོངས་སྡིག་སྒྲིབ་རྩད་ནས་བསལ། །དམ་ཚིག་རྩ་བ་ཡན་ལག་གི། །ནོངས་པ་བཤགས་སོ་དག་ཚངས་སྩོལ། །གསོལ་བཏབ་མོད་ལ་མཁའ་འགྲོ་རྣམས། །རིམ་བཞིན་གཙོ་མོའི་སྐུ་ལ་ཐིམ། །དེ་ཉིད་རང་ཐིམ་མཁའ་འགྲོར་གོང་གི་ཕག་མོ་དམར་མོ། མཆན། གསལ། །རྩ་བའི་བླ་མ་སྐད་ཅིག་གིས། །འཁོར་ལོ་བདེ་མཆོག་དཔའ་གཅིག །མཆན། སྐུར་གྱུར་ནས། །རྒྱན་དང་ཆ་ལུགས་ཡོངས་སུ་རྫོགས། །ཆོས་འབྱུང་ཕྱག་རྒྱ་སྤྱི་བོར་མཛད། །བདེ་བའི་ཉམས་ལྡན་གར་སྟབས་གཡོ། །རང་ཉིད་མཁའ་འགྲོར་གསལ་པ་ཡི། །བདུད་རྩིའི་མཆོད་འབུལ་ཡེ་ཤེས་མེ། །འབར་ཞིང་འོད་ཀྱིས་སྤྱན་དྲངས་ནས། །སྙིང་གར་འདི་སྐབས་རླུང་བུམ་ཅན་ནམ་བར་རླུང་བཟུང་། མཆན། པད་ཉིར་བཞུགས་པར་མོས། །དེ་ཡི་དཔྲལ་མགྲིན་ཐུགས་ལྟེ་བར། །ༀ་དཀར་ཨཱཿདམར་ཧཱུྃ་སྔོན་པོ། །ཧོཿསེར་སྐུ་གསུང་ཐུགས་རྡོ་རྗེའི། །ངོ་བོར་རབ་ཏུ་གསལ་བར་གྱུར། །སངས་རྒྱས་ཐམས་ཅད་འདུས་པའི་སྤྱི་དཔལ། །རིགས་དྲུག་འཁོར་བའི་སྡུག་བསྔལ་སེལ་བྱེད། །ཡང་དག་ངེས་པའི་ལམ་མཆོག་སྟོན་པའི། །རྗེ་བཙུན་བདུད་འདུལ་རྡོ་རྗེ་མཁྱེན་ནོ། །ལན་གསུམ་མམ་བདུན་བཏོན་ལ། ཀརྨ་པ་མཁྱེན་ནོ། །ཅི་ནུས་བགྲང་། དཀོན་མཆོག་ཀུན་འདུས་མཁྱེན་ནོ། །དྭགས་པོ་བཀའ་བརྒྱུད་མཁྱེན་ནོ། །བདུད་འདུལ་རྡོ་རྗེ་མཁྱེན་ནོ། །སྐྱབས་གནས་གཅིག་ཆོག་མཁྱེན་ནོ། །ཀྱེ་མ་དྲིན་ཆེན་བླ་མ། །རིགས་ཀུན་ཁྱབ་བདག་ཆེན་པོ། །
དཔལ་ལྡན་རྡོ་རྗེ་འཆང་དངོས། །དྲན་མཆོག་འཁོར་ལོའི་མགོན་པོ། །སྙིང་ནས་གསོལ་བ་འདེབས་སོ། །ཕྱག་རྒྱ་ཆེན་པོའི་ཡེ་ཤེས། །འགྱུར་མེད་ལྷན་སྐྱེས་ངོ་བོ། །མྱུར་དུ་རྟོགས་པར་བྱིན་རློབས། །དུས་གསུམ་དགེ་ཚོགས་ཐམས་ཅད། །འགྲོ་བའི་དོན་དུ་འབུལ་བཞེས། །རྗེ་བཙུན་ཁྱེད་རང་ལྟ་བུར། །སྙིང་ནས་བྱིན་གྱིས་རློབས་ཤིག །ཅེས་བརྗོད་ལ་སྙིང་གའི་བླ་མ་འོད་དུ་ཞུ་ནས་རང་དང་དབྱེར་མེད་དུ་མོས། རང་ལྷར་གསལ་བ་དེ་ཡང་མི་དམིགས་པའི་ངང་དུ་འཇའ་ཡལ་བ་ལྟར་རྫོགས་རིམ་ལྟ་བའི་ངང་ལ་རེ་ཞིག་མཉམ་པར་བཞག །རྡོ་རྗེ་ཅན་དངོས་བླ་མ་ལ་གསོལ་བ་འདེབས་སོ། །ཀར་བརྒྱུད་གྲུབ་ཐོབ་རྒྱ་མཚོ་ལ་གསོལ་བ་འདེབས་སོ། །ཐུགས་རྗེ་བྱིན་རླབས་གཏེར་ཆེན་ལ་གསོལ་བ་འདེབས་སོ། །རྗེ་བཙུན་བདུད་འདུལ་རྡོ་རྗེ་ལ་གསོལ་བ་འདེབས་སོ། །ཚེ་གཅིག་རྟེན་ཐོག་འདི་ཉིད་དུ། །ངེས་པའི་དོན་མཆོག་ཟབ་མོའི་ལམ། །སྦྱངས་པའི་ཡོན་ཏན་མཐར་ཕྱིན་ནས། །བླ་མེད་སྒྲུབ་པ་སྙིང་པོ་ཡི། །གེགས་མེད་ལྷུན་གྱིས་གྲུབ་གྱུར་ནས། །ཕྱག་རྒྱ་ཆེན་པོ་འགྲུབ་པར་ཤོག །ཅེས་དང་། གཞན་ཡང་བསྔོ་བ་སྨོན་ལམ་གྱིས་རྒྱས་གདབ་པར་བྱའོ། །དེ་ལྟར་ཐུན་བཞིའི་རྣལ་འབྱོར་མདོར་འསྡུས་འདི་བཞིན་དྲུང་འཚོ་བ་དགེ་སློང་ནོར་བུས་བསྐུལ་ངོར། སི་ཏུ་པདྨ་ཉིན་བྱེད་དབང་པོས་སྤེལ་བ་འགྲོ་རྣམས་ཟུང་འཇུག་རྡོ་རྗེ་འཆང་གི་གོ་འཕང་ཐོབ་པར་གྱུར་ཅིག། །།
ཐུན་མིན་བླ་མའི་རྣལ་འབྱོར།
ཐུན་མིན་བླ་མའི་རྣལ་འབྱོར་བཞུགས། མཆོག་གསུམ་ངོ་བོ་
དཔལ་ལྡན་རྡོ་རྗེ་འཆང་ཀརྨ་པ་ལ་ཕྱག་འཚལ་ལོ། །འདིར་སྐལ་བ་དང་ལྡན་པ་དག་གི་སྤྱོད་ཡུལ་དུ་ཐུན་མོང་མ་ཡིན་པའི་བླ་མའི་རྣལ་འབྱོར་བསྒོམ་པར་སྤྲོ་ན། དང་པོ་སྐྱབས་སེམས་ནི། བདག་དང་མ་གྱུར་འགྲོ་བ་རྣམས། །དེང་ནས་བྱང་ཆུབ་སྙིང་པོའི་བར། དཀོན་མཆོག་ཀུན་འདུས་བླ་མ་ལ། །རྟག་པར་སྐྱབས་མཆི་གསོལ་བ་འདེབས། །དུས་གསུམ་མཁའ་མཉམ་སེམས་ཅན་རྣམས། །རྫོགས་སངས་གོ་འཕང་ལ་འགོད་ཕྱིར། །སྨོན་དང་འཇུག་བའི་སེམས་བསྐྱེད་ནས། །ཚད་མེད་འགྲོ་སྒྲོལ་དམ་བཅའོ། །ལན་བདུན་ནམ་ཉེར་གཅིག །གཉིས་པ་བསྐྱེད་རིམ་རྣལ་འབྱོར་ནི། ༀ་ཤཱུ་ནྱ་ཏས་སྦྱངས་ནས། གཟུང་འཛིན་སྣང་བ་འདི་ཀུན་རང་བཞིན་གྱི། །སྟོང་པའི་རང་མདངས་དེ་ལས་མ་གཡོས་ངང་། །རང་ཉིད་ཡི་དམ་ལྷར་གསལ་མདུན་གྱི་མཁར། །ཡེ་ཤེས་ལྔ་ལྡན་འོད་ཀློང་དཀྱིལ་འཁོར་དབུས། །གྱད་དང་སེང་ཆེན་གྱིས་བཏེགས་རིན་ཆེན་ཁྲིར། །མ་ཆགས་པདྨ་ཐབས་ཤེས་ཉི་ཟླའི་སྟེང། །དེ་དབུས་རྒྱལ་ཀུན་འདུས་པའི་ངོ་བོ་ཉིད། །རྩ་བའི་བླ་མ་བྱམས་ཆེན་མི་ཕམ་མགོན། །དངོས་སྣང་རྗེ་བཙུན་དྷརྨཱ་ཀ་ར་མཆོག །ཞྭ་དམར་གསེར་མདངས་ཅོད་པན་དབུ་ལ་གསོལ། །དཀར་གསལ་བགྲེས་ཉམས་ཕྱག་གཉིས་ཆོས་འཆད་རྒྱས། །ཨུཏྤལ་སྡོང་བུས་བཏེགས་པའི་རལ་པོད་བསྣམས། །ཆོས་གོས་རྣམ་གསུམ་ཞབས་གཉིས་རྡོར་སྐྱིལ་བཞུགས། །དེ་ཡི་དཔྲལ་བར་པད་ཉི་ཟླ་སྟེང་དུ། །མ་འོངས་བསྐལ་བཟང་དྲུག་པ་
སེང་གེ་སྒྲའི། །རྣམ་འཕྲུལ་དཔལ་ལྡན་དུས་གསུམ་ཀུན་ཏུ་མཁྱེན། །བགྲེས་ཚུལ་ཞྭ་ནག་ཅོད་པན་ཕྱག་བྱང་ཆུབ། །མཆོག་གི་རྒྱ་ཅན་ངུར་སྨྲིག་རྣམ་གསུམ་བཀླུབས། །རྡོར་སྐྱིལ་གྱིས་བཞུགས་མགྲིན་པར་པདྨ་དང། །ཉི་ཟླའི་སྟེང་དུ་འདས་པའི་སངས་རྒྱས་ནི། །རཏྣ་ཨངྒ་སྤྲུལ་བསྒྱུར་གར་གྱི་དབང་། །དཀོན་མཆོག་ཡན་ལག་པད་རག་ཅོད་པན་མཛེས། །ཕྱག་གཉིས་བགྲང་ཕྲེང་ཆོས་གོས་གསུམ་ལྡན་གསོལ། །ཞབས་གཉིས་སྐྱིལ་མོ་ཀྲུང་བཞུགས་ཐུགས་ཀ་རུ། །པད་ཉི་ཟླ་སྟེང་སྙིང་པོ་དོན་བརྒྱུད་ཀྱི། །བྱིན་རླབས་ངེས་ཐོབ་པདྨ་ཉིན་བྱེད་དབང་། །དགེ་སློང་ཆ་ལུགས་དབང་ཞུ་མཐོང་གྲོལ་ཅན། །རྡོ་རྗེ་དྲིལ་འཛིན་སྐྱིལ་ཀྲུང་དང་བཅས་གསལ། །གཙོ་བོའི་སྤྱི་བོར་པདྨ་ཉི་ཟླའི་སྟེང་། །རིགས་བདག་རྡོར་འཆང་ཟླ་འོད་གཞོན་ནུའི་ཚུལ། །སྒོམ་ཞྭ་གསོལ་ཞིང་འདུལ་འཛིན་ཆ་བྱད་ཀྱི། །མཉམ་བཞག་ནོར་བུ་བསྣམ་ཞིང་ཞབས་རྡོར་སྐྱིལ། །དེ་ལྟར་སངས་རྒྱས་སྐུ་ལྔའི་བདག་ཉིད་གསལ། །ཕྱོགས་དང་ཕྱོགས་མཚམས་བཀའ་བརྒྱུད་བླ་མའི་ཚོགས། །དུས་གསུམ་རྒྱལ་དང་དམ་ཆོས་འཕགས་དགེ་འདུན། །རྒྱུད་བཞིར་འབྲེལ་བའི་ཡི་དམ་དཀྱིལ་འཁོར་ལྷ། །ཡེ་ཤེས་ཆོས་སྐྱོང་ལས་དང་འཇིག་རྟེན་གྱི། །དམ་ཅན་བཀའ་ཡི་སྲུང་མ་མཐུ་རྩལ་ཅན། །ཀུན་ཀྱང་བཀྲ་གསལ་ལམ་མེར་སྤྲིན་ལྟར་གཏིབས། །གསོལ་བཏབ་ཙམ་གྱིས་བཟོད་མེད་མོས་གུས་
འབར། །ཐ་མལ་སྣང་བ་གང་ཤར་སྟོང་ཉིད་དང་། །སྙིང་རྗེ་ཟུང་འཇུག་བདེ་གསལ་མི་རྟོག་ངང་། །སྣང་སྲིད་བླ་མའི་དཀྱིལ་འཁོར་རོལ་པར་ཤར། །སོ་སོའི་གནས་གསུམ་ༀ་དཀར་ཨཱཿདམར་པོ། །ཧཱུྃ་མཐིང་མཚན་པ་དེ་ལས་འོད་ཟེར་འཕྲོས། །འོག་མིན་ཆོས་དབྱིངས་ཕོ་བྲང་བདེ་བ་ཆེ། །རང་རིག་ངོ་བོ་དག་པ་རབ་འབྱམས་ཀྱི། །ལྷ་ཚོགས་སྤྱན་དྲངས་བཛྲ་ས་མ་ཛཿགསུམ་པ་སྤྱན་འདྲེན་ནི། ༀ། སྐུ་ལྔའི་བདག་ཉིད་བཅོམ་ལྡན་འདས། །ཨཱཿརྣམ་གྲོལ་ལམ་མཆོག་སྟོན་པའི་བདག །ཧཱུྃ། ཟབ་ཞི་སྤྲོས་བྲལ་འདུས་མ་བྱས། །ཧོཿདབྱིངས་ནས་བརྩེར་དགོངས་འདིར་གཤེགས་གསོལ། །བདག་གཞན་འགྲོ་རྒྱུད་ཉོན་མོངས་ཀྱི། །དྲ་བ་རྩད་ནས་གཞོམ་པའི་ཕྱིར། །ཡེ་ཤེས་ཐུགས་རྗེའི་ཀློང་ཡངས་ནས། །མཆོག་ཐུན་གྲུབ་པའི་བདུད་རྩིའི་ཆར། །བྱིན་རླབས་དབང་བཞིས་སྨིན་པ་དང་། །རྒྱུད་བཞི་གྲོལ་བར་མཛད་དུ་གསོལ། །བཞི་པ་མཆོད་འབུལ་ནི། རང་གི་ཐུགས་ཀའི་འོད་ཟེར་ལས། །སྤྲུལ་པའི་རྡོ་རྗེ་ལྷ་མོ་ནི། །གཟུགས་སྒྲ་དྲི་རོ་རེག་ཆོས་སོགས། །ཕྱི་ཡི་མཆོད་པ་བཅུ་དྲུག་དང་། །དམ་རྫས་ཤ་ལྔ་བདུད་རྩི་ལྔ། །བླ་མེད་ནང་གི་མཆོད་པ་དང་། །གསང་བ་བདེ་སྟོང་དབྱེར་མེད་ངང་། །ཟུང་འཇུག་བདེ་ཆེན་མཆོད་པ་འབུལ། །དེ་ལྟར་མཆོད་བྱ་མཆོད་བྱེད་རྣམས། །གཉིས་མེད་རྟོགས་པས་བསྐང་ཞིང་བཤགས། །ཡི་གེ་བརྒྱ་པ་བརྗོད་ལ། །བདག་གཞན་
རྒྱུད་ཀྱི་ཉེས་པ་གང་མཆིས་བཤགས་ཤིང་། བླ་མ་རྣམས་ཀྱི་སྐུ་ལས་བདུད་རྩི་འོ་རྒྱུན་ལྟ་བུ་སྤྲོས་ནས་རང་ལུས་ལྟེམས་ཀྱིས་གང་ནས། དེའི་འོད་ཟེར་གྱིས་འགྲོ་བའི་སྡིག་སྒྲིབ་ཉེས་ལྟུང་ཐམས་ཅད་དག་པར་མོས་ལ། སངས་རྒྱས་ཀུན་འདུས་ཀྱི་ངོ་བོར་རྩེ་གཅིག་མོས་པས། ཀརྨ་པ་མཁྱེན་ནོ། །ཅི་ནུས་བཟླ། དྲུག་པ་བླ་མ་རྒྱང་འབོད་གསོལ་འདེབས། དུས་གསུམ་གྱི་སངས་རྒྱས་འདུས་པའི་སྐུ། །ཆོས་བརྒྱད་ཁྲི་བཞི་སྟོང་འབྱུང་བའི་གནས། །འདྲེན་པ་ཚོགས་ཞིང་གི་མངའ་བདག་མཆོག །མ་རིགས་དྲུག་སེམས་ཅན་གཟིགས་སུ་གསོལ། །མཁའ་ཁྱབ་ཆོས་སྐུ་ཡི་རང་བཞིན་ལ། །བདེ་བ་ཆེ་ལོངས་སྤྱོད་ཡོངས་རྫོགས་པ། །གང་འདུལ་གྱི་སྤྲུལ་བསྒྱུར་སྟོན་པ་པོ། །བདག་འགྲོ་དྲུག་ཐུགས་རྗེས་སྐྱོང་དུ་གསོལ། །འཇིག་རྟེན་གྱི་ཞེན་འཛིན་མཐའ་མེད་འདི། །བློ་ཨ་འཐས་འཁྲུལ་སྣང་ཤེས་བཞིན་པར། །མི་རྟག་དང་ངེས་འབྱུང་མོས་གུས་ཀྱིས། །ལུས་རྟེན་འདིར་རྒྱུད་གྲོལ་བྱིན་གྱིས་རློབས། །སྣང་སྲིད་ཀུན་སྐྱེ་མེད་ཀློང་ཡངས་པར། །རང་བྱུང་གི་རིག་པ་རང་གྲོལ་ངང་། །ལྷན་སྐྱེས་ཀྱི་ཡེ་ཤེས་མངོན་གྱུར་ནས། །རྗེ་བཙུན་གྱི་རྣམ་ཐར་མཚུངས་བྱིན་རློབས། །དེ་ནས་བདུན་བ་དབང་བཞིའི་བྱིན་རླབས་བསྐུལ་བ། ཀྱེ་ཧོ། ཕ་གཅིག་དྲིན་ཆེན་བླ་མ། །དོན་བརྒྱུད་བྱིན་རླབས་གཏེར་ཆེན། །དེང་བདག་རྡོ་རྗེ་སེམས་དཔའ། །མྱུར་འགྲུབ་རྒྱུད་སྨིན་གྲོལ་མཛོད། །མཐོང་ཐོས་དྲན་རེག་འབྲེལ་ཚད། །ཐུགས་རྗེའི་རོལ་པས་སྐྱོང་བཞིན། །གང་འདིར་མངོན་བྱང་ཆུབ་པའི། །གོ་འཕང་བདེ་བླག་སྩོལ་
ཅིག །བརྒྱད་བ་དབང་ལེན་པ་དངོས། དེ་ལྟར་གསོལ་བཏབ་ཐུགས་བརྒྱུད་བསྐུལ་བའི་མཐུས། །སྐྱབས་གནས་རྒྱ་མཚོ་འདུས་ཞལ་ངེས་པ་ཡི། །བླ་མའི་དཀྱིལ་འཁོར་ལྷ་ཚོགས་འོད་ཞུ་ནས། །རིགས་ཀུན་ཁྱབ་བདག་གཙོ་བོའི་སྐུ་ུལ་ཐིམ། །དེ་ཡི་གསང་གསུམ་ཡེ་ཤེས་རྡོ་རྗེ་བཞིའི། །བྱིན་རླབས་བུམ་གསང་ཤེར་ཡེ་བཞི་པའི་དོན། །རྣམ་པ་ༀ་དཀར་ཨཱཿདམར་ཧཱུྃ་མཐིང་ག །ཧོཿལྗང་འོད་ཟེར་དང་ནི་བདུད་རྩིའི་རྒྱུན། །རང་གི་གནས་བཞིར་ཐིམ་པས་དབང་བཞི་ཐོབ། །རྒྱུད་སྨིན་སྒྲིབ་དག་ལམ་བཞི་འབྱོངས་པ་དང་། །སྐུ་བཞིའི་གོ་འཕང་མངོན་གྱུར་བྱིན་གྱིས་རློབས། །བླ་མ་དགྱེས་ཞལ་མདངས་བཅས་འདི་སྐད་དུ། །གཞི་ནས་མ་བཅོས་ཡེ་ནས་ལྷུན་གྲུབ་ལ། །ཐ་མལ་རང་ལུགས་ཆེན་པོར་བཞག་པ་ན། །སྐྱེ་འཆི་མེད་པ་ནམ་མཁའི་ཀློང་ཡངས་སུ། །འཕོ་འགྱུར་མེད་པ་ཆོས་སྐུའི་ལུས་མཐོང་འགྱུར། །ཅེས་པའི་ཟབ་དོན་བཀའ་གསང་གནང་ཐོབ་ནས། །བྱམས་ཆེན་ཞི་བའི་དབྱིངས་ལས་རྗེས་དགོངས་ཏེ། །འོད་ཞུ་བདག་ཐིམ་དབྱེར་མེད་བདེ་ཆེན་ངང་། །མ་བཅོས་སྤྲོས་ཀུན་བྲལ་བའི་ཀློང་དུ་བཞག །ཅི་གནས་སུ་ཉམས་ལེན་བསྐྱངས་ལ་མཐར་བསྔོ་བ་དང་སྨོན་ལམ་གྱིས་རྒྱས་གདབ་པར་ཡང་བྱའོ། །ཅེས་པའི་རྣལ་འབྱོར་དོན་ཚན་བརྒྱད་པ་འདིའང་སི་ཏུ་པདྨའི་མིང་ཅན་གྱིས། བམ་སྟེང་གྲུབ་པའི་དབང་མཆོག་གི། །སྤྲུལ་གར་སྔོན་སྨོན་ལེགས་སྨིན་པ། །གུཎའི་མཚན་ཅན་བཞེད་སྐོང་ཆེད། །བཀོད་དགེས་འགྲོ་ཀུན་སངས་རྒྱས་ཤོག །མདྒ་ལཾ། ཛ་ཡནྟུ།། །།
༈ བླ་མ་རྒྱང་འབོད་དང་གསོལ་འདེབས་དངོས་གྲུབ་ཡོངས་འདུ་ཞེས་པ་བཞུགས་སོ། །ཨ་ཧོཿརང་སེམས་འཁྲུལ་པ་རྒྱ་འབྱམས་ཀྱི་ངང་ནས། །སྐབས་ཤིག་སྣང་བ་ཡེ་ཆ་ལས་འཕྲོས་པའི། །རྩ་བའི་བླ་མ་དམ་པ་དེ་དྲན་བྱུང་། །རྡོ་རྗེ་འཆང་དངོས་སུ་ངེས་ཤེས་རྙེད་བྱུང་། །འཇུར་བུར་བཅིངས་པའི་རྗེས་ཤེས་ཀྱི་ངང་ནས། །རྣམ་རྟོག་ཐོལ་བྱུང་དུ་གཏད་མེད་འཕྲོས་པའི། །དྲན་མཆོག་རྩ་བའི་བླ་མ་གསལ་བྱུང་ངོ་། །རྡོ་རྗེ་འཆང༴ སེམས་དུས་གསུམ་གྱི་སྤྲོས་པ་རྒྱུན་བཅད་ནས། །ཤེས་ཐོག་ཏུ་རིག་པ་གནས་པའི་ཚེ་ན། །གཤིས་ཀུན་ཁྱབ་ངོ་བོ་བླ་མ་དྲན་བྱུང་ངོ་། །རྡོ་རྗེ༴ མགོན་ཁྱོད་ཀྱི་བཀའ་དྲིན་རྗེས་སུ་སྐྱོང་བའི། །ལམ་འབྲས་བུའི་ཉམས་ལེན་གནད་དུ་བསྣུན་པས། །སྐུ་བཞི་ཡི་དབང་ཕྱུག་བླ་མ་དྲན་བྱུང་ངོ་། །རྡོ་རྗེ༴ སྣང་སྲིད་ཀྱིས་བསྡུས་བའི་ཆོས་རྣམས་ཐམས་ཅད། །ཆོས་དབྱིངས་ཡེ་སྟོང་མཐའ་བྲལ་གྱི་ཡེ་ཤེས། །སྐྱེ་མེད་ངོ་བོ་བླ་མ་དྲན་བྱུང་ངོ་། །རྡོ་རྗེ་འཆང་དངོས་སུ་ངེས་ཤེས་རྙེད་བྱུང་། །སུ་ཁ་སིདྡྷི། ཨ་ཧོཿགསོལ་བ་སྙིང་གི་དཀྱིལ་ནས་འདེབས་སོ། །བྱིན་རླབས་ཐུགས་ཀྱི་ཀློང་ནས་སྩོལ་ཅིག །ཕ་གཅིག་སངས་རྒྱས་རྡོ་རྗེ་འཆང་མཁྱེན་ནོ། །ལྷན་ཅིག་སྐྱེས་པའི་ཡེ་ཤེས་སྨིན་གྲོལ་སྩོལ་ཅིག །ཅེས་རྒྱང་འབོད་དར་དྲག་ལ་ཡུན་རིང་བ་སེམས་མོས་གུས་ཀྱི་སྣང་བ་འགྱུར་ངེས་བྱས་ལ་མཆོག་གི་བླ་མའི་རྣལ་འབྱོར་རྣམས་ལ་རྟག་འགྲུས་སུ་འབད་པ་ཆེར་སྤྲོ་བར་རིགས་སོ། །དེ་ཡང་དམ་ཚིག་བཀོད་པའི་རྒྱུད་ལས། མཚན་དང་དཔེ་བྱད་ལྡན་བའི་ལྷ། །བསྐལ་བ་འབུམ་དུ་བསྒོམས་པ་ལས། །བླ་མ་དྲན་བ་འབུམ་ཆར་མིན། །བསྙེན་སྒྲུབ་བཟླས་པ་ས་ཡ་ལས། །བླ་མའི་གསོལ་འདེབས་ལན་གཅིག་ལྷག །ཅེས་སོགས་ཕན་ཡོན་མཐའ་ཡས་བར་གསུངས་པའི་ཕྱིར་རོ། །མདྒ་ལམ་ཀུརྦནྟུ། ཤུ་བྷམ།། །།
བླ་མའི་རྣལ་འབྱོར་སྣང་སྲིད་དག་པ་རབ་འབྱམས་ནམ་མཁའ་ཡེ་དྭངས།
༈ བླ་མའི་རྣལ་འབྱོར་སྣང་སྲིད་དག་པ་རབ་འབྱམས་ནམ་མཁའ་ཡེ་དྭངས་ཞེས་བྱ་བ་བཞུགས་སོ། །ཤྲཱི་མ་ཧཱ་གུ་རུ་ཀརྨ་ཀྭ་ཡ་ན་མཿཚད་མེད་བྱམས་པའི་ཟླ་སྣང་གིས། །སྒྲིབ་གཉིས་རབ་རིབ་མུན་པ་སེལ། །རྣམ་གྲོལ་ལམ་མཆོག་གསལ་བའི་གཉེན། །འགྲོ་མགོན་དཔལ་ལྡན་བླ་མར་འདུད། །གང་ལ་བསྟེན་ན་འཁོར་མཚོ་ལས། །སྒྲོལ་བྱེད་བྱང་ཆུབ་གྲུ་གཟིངས་འདི། །ངེས་འབྱུང་བློ་ཡིས་བསྐུལ་བས་ན། །རིང་མིན་ཐར་བའི་གྲོང་འཇུག་ངེས། །དེ་ལ་འདིར་དུས་གསུམ་སངས་རྒྱས་འདུས་པའི་རང་གཟུགས་དཔལ་ལྡན་ཀརྨ་པ་ཆེན་པོའི་བླ་མའི་རྣལ་འབྱོར་བསྒོམ་རིམ་ཞིག་སྤེལ་བ་སྟེ། དེ་ཡང་བདག་ཅག་གི་སྟོན་པས་མདོ་རྒྱུད་དྲང་ངེས་ཀྱི་ཐེག་པ་རྣམས་ལས་བླ་མ་མཆོད་བ་མགྲིན་གཅིག་བསྔགས་པའི་གནས་སུ་གསུངས་ཤིང་། ཁྱད་པར་རྗེ་མཐོན་མཐིང་དང་པདྨ་རཱ་གའི་ཅོད་པན་འཆང་བ་གྲུ་འཛིན་བདག་པོའི་ཕྲེང་བ་འཛིན་བ་རྣམས་ནི་གསར་རྙིང་དུ་མ་ནས་ལུང་གིས་ཟིན་པའི་ཆོས་ཀྱི་རྒྱལ་པོ་ངེས་པ་ཉིད་དུ་མངོན་སུམ་ཚད་མར་གྲུབ་ཅིང་། དེས་ན་བཅོས་མིན་ཤུགས་འབྱུང་མོས་གུས་ཙམ་གྱིས་རང་སེམས་ཆོས་སྐུར་འཆར་བའི་ལམ་ཟབ་མོ་གཅིག་ཆོད་ཀྱི་གདམས་པ་བསྟན་ཏེ། གདོད་ནས་གྲུབ་པའི་གནས་སམ་རྒྱལ་བས་བྱིན་གྱིས་བརླབས་པའི་གནས་ལྟ་བུར་བླ་མའི་སྐུ་བརྙན་དང་ཕྱག་ཞབས་ཀྱི་རྗེས་བཀྲམ་ལ། ཚོགས་གཉིས་བསོད་ནམས་སྤེལ་བའི་རྟེན་འབྲེལ་དུ་ཕྱི་ནང་གསང་བའི་འདོད་ཡོན་མཆོད་རྫས་ཇི་སྙེད་པ་དང་། མཎྜལ་ནང་མཆོད་བདུད་རྩི་ཐབས་ཤེས་ཀྱི་རྫས་མཆོག་ཚོགས་ཀྱི་འཁོར་ལོའི་ཡོ་བྱད་རྣམས་འདུ་བགྱིད་ལ། རང་ཉིད་བདེ་དགྱེས་སོགས་ཡི་དམ་གང་རུང་བསྐྱེད་ལ་དང་པོ་ནང་མཆོད་བྱིན་གྱིས་བརླབ་པ་ནི། ༀ་ཨཱཿབིགྷྣན་གྱིས་བསངས་། ༀ་སྭབྷཱ་ཝས་སྦྱངས། དངོས་ཀུན་སྟོང་པར་གྱུར་པའི་ངང་། །རླུང་
དཀྱིལ་སྔོན་པོ་གཞུ་དབྱིབས་ཅན། །ཡྃ་ཡིག་བ་དན་མཚན་པའི་སྟེང་། །མེ་དཀྱིལ་དམར་པོ་ཟུར་གསུམ་འབར། །རྃ་ཡིག་མཚན་པ་དེ་སྟེང་དུ། །ཀྃ་ལས་མི་མགོའི་ཐོད་སྒྱེད་གསུམ། །ཨ་ལས་མཚན་ལྡན་ཀ་པཱ་ལ། །ཡངས་ཤིང་རྒྱ་ཆེ་ཕྱི་དཀར་ལ། །ནང་དམར་ཐབས་ཤེས་མཚོན་པ་ཡི། །དབུས་སུ་མུ་ལས་དྲི་ཡི་ཆུ། །ཤར་དུ་བི་ལས་དྲི་ཆེན་དང་། །ལྷོ་རུ་ར་ལས་རཀྟ་བསྐྱིལ། །ནུབ་ཏུ་ཤུ་ལས་བྱང་སེམས་དཀར། །བྱང་དུ་མ་ལས་ཀླད་པ་སྟེ། །བདུད་རྩི་རྣམ་ལྔ་སླར་ཡང་ནི། །དབུས་སུ་ན་ལས་མི་ཡི་ཤ། །ཤར་ལྷོར་གོ་ལས་བ་གླང་དང། །ལྷོ་ནུབ་ཀུ་ལས་ཁྱི་ཡི་ཤ། ནུབ་བྱང་ད་ལས་གླང་ཆེན་དང། །བྱང་ཤར་ཧ་ལས་རྟ་ཡི་ཤ། བདུད་རྩི་དང་ནི་ཤ་ཆེན་ལྔ། །ཡི་གེ་སོ་སོས་རྒྱས་བཏབ་བོ། །རང་གི་སྣ་བུག་གཡོན་པ་ནས། །ཧཱུྃ་གི་དབྱིབས་ཅན་རླུང་སྤྲོས་པས། །རླུང་གཡོས་མེ་བསྐྱོད་ཐོད་རྫས་ཁོལ། །དམ་ཚིག་བདུད་རྩིའི་འོད་ཀློང་ལས། །ༀ་ཨཱཿཧཱུྃ་སྤྲོས་ཡེ་ཤེས་ཀྱི། །ཟག་མེད་བདུད་རྩི་སྤྱན་དྲངས་ནས། །བྱིན་རླབས་དམ་ཡེ་དབྱེར་མེད་པའི། །མཐའ་ཀླས་ཡེ་ཤེས་རྒྱ་མཚོར་གྱུར། །ༀ་ཨཱཿཧཱུྃ། ལན་གསུམ་བརྗོད་བས་བྱིན་བརླབས་ལ། དེ་ནས་སྔོན་འགྲོའི་གཏོར་མའང་གོང་བཞིན་བྱིན་གྱིས་བརླབས་ཏེ། ༀ་ཁ་ཁ་ཁཱ་ཧི་སོགས་ལན་བཞི་བརྗོད་ལ། ཧཱུྃ། དམ་ཚིག་ཆེན་པོའི་དབང་གིས་ནི། །ཞིང་སྐྱོང་མཐུ་ཆེན་བརྒྱད་རྣམས་དང། །མཁའ་འགྲོ་སུམ་ཅུ་སོ་གཉིས་སོགས། །དཀྱིལ་འཁོར་བསྒྲུབ་ལ་མངོན་ཕྱོགས་པའི། །མ་ལུས་འཁོར་དང་
ཡང་འཁོར་རྣམས། །འདིར་གཤེགས་མཆོད་སྦྱིན་གཏོར་མ་བཟང། །ལྔ་ལྡན་དག་པའི་བདུད་རྩི་ཡིས། །སྦྱངས་སྤེལ་བསྒྱུར་བའི་འདོད་ཡོན་རྣམས། །བཞེས་ནས་རྣལ་འབྱོར་མཐུན་རྐྱེན་སྤེལ། །ནད་གདོན་ཞི་དང་དཔལ་འབྱོར་རྒྱས། །མོས་པ་རྣམ་བཞིས་དབང་སྡུས་ལ། །ལོག་འདྲེན་བར་ཆད་རྐྱེན་ངན་སོལ། མདོར་ན་ཡིད་ལ་གང་བསམ་པའི། །འདོད་དོན་ལྷུན་གྱིས་གྲུབ་པར་མཛོད། །གང་དག་ལྟ་བར་མི་དབང་བའི། །གདོན་བགེགས་འབྱུང་པོ་ཕྱིར་དེངས་ཤིག །བཀའ་ལས་འདས་ན་ཆོས་ཉིད་ཀྱི། །བདེན་པས་ཐལ་བར་བརླག་ཏ་རེ། །ༀ་སུམ་བྷ་ནི་དྲག་ཏུ་བརྗོད། སྟེང་འོག་ཕྱོགས་མཚམས་མ་ལུས་པར། །རང་གི་ཐུགས་ཀའི་འོད་ཟེར་ལས། །རྡོ་རྗེའི་རྭ་གུར་ཡེ་ཤེས་མེའི། །སྲུང་བའི་འཁོར་ལོས་གཏམས་པར་གྱུར། །བཛྲ་རཀྴ་རཀྴ་ཧཱུྃ་ཧཱུྃ་ཧཱུྃ། །ཅེས་སྲུང་འཁོར་བསྒོམས་ལ། མཆོད་པ་བྱིན་རླབས་ནི། ནང་མཆོད་ཀྱིས་བྲན་ལ། ༀ་ཨཱཿབིགྷྣཱན་སོགས་ཀྱིས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཨ་ལས་ཐོད་སྣོད་དུ། །ཧཱུྃ་ཡིག་དཔག་མེད་འོད་དུ་ཞུ་བ་ལས། །རྡོ་རྗེའི་མཆོད་ཡོན་ཞབས་བསིལ་མེ་ཏོག་སྤོས། །སྣང་གསལ་དྲི་ཆབ་ཞལ་ཟས་རོལ་མོ་རྣམས། །ལྷ་རྫས་རྨད་བྱུང་ཟག་མེད་བདེ་བ་ཆེ། །ཀུན་ཏུ་བཟང་པོའི་སྨོན་ལམ་ལས་གྲུབ་བཞིན། །མཆོད་པའི་སྤྲིན་གྱིས་རབ་འབྱམས་དབྱིངས་གང་བ། །རྒྱལ་རྣམས་དགྱེས་པ་སྐྱེད་པའི་རང་བཞིན་གྱུར། །ༀ་བཛྲ་ཨརྒྷཾ་ཨཱཿཧཱུྃ། དེ་བཞིན་དུ། པཱདྱཾ་པུཥྤེ་དྷཱུ་པེ་ཨཱ་ལོ་ཀེ་གནྡྷེ་ནཻ་ཝདྱེ་
ཤབྡ་ཨཱཿཧཱུྃ། གིས་བྱིན་གྱིས་བརླབས་ལ། སྐྱབས་སུ་འགྲོ་བ་ནི། བདག་གཞན་མར་གྱུར་མཁའ་ཁྱབ་རྣམས། །དེང་བཟུང་སྙིང་པོ་བྱང་ཆུབ་བར། །སྟོན་མཆོག་ཞི་བ་ཆགས་བྲལ་བ། །འཕགས་ཚོགས་དགེ་འདུན་བདག་ཉིད་ཅན། །དཔལ་ལྡན་བླ་མ་རྡོ་རྗེ་འཆང་། །བྱིན་རླབས་རྩ་བ་བརྒྱུད་པར་བཅས། །ཡི་དམ་དཀྱིལ་འཁོར་རབ་འབྱམས་ལྷ། །དངོས་གྲུབ་འབྱུང་གནས་དམ་པ་དང་། །སངས་རྒྱས་ཆོས་དང་ཚོགས་ཀྱི་མཆོག །ཐུགས་རྗེའི་གཏེར་མངའ་དཀོན་མཆོག་གསུམ། །དཔའ་བོ་མཁའ་འགྲོ་ཆོས་སྐྱོང་ལ། །སྐྱབས་སུ་མཆིའོ་བདག་བྱིན་རློབས། །ལན་བདུན་ནམ་ཉེར་གཅིག་བརྒྱ་ཙམ་བརྗོད། འགྲོ་རྣམས་འཁོར་བའི་དུཿཁ་ལས། །སྒྲོལ་ཕྱིར་བདག་ཉིད་ཟབ་མོའི་ལམ། །འཁོད་ནས་གཞན་ཕན་སེམས་བསྐྱེད་ཀྱིས། །ཀུན་ཀྱང་རྣམ་གྲོལ་ཐོབ་པར་བགྱི། །ལན་གསུམ་སེམས་བསྐྱེད་ལ། དཀོན་མཆོག་གསུམ་ལ་བདག་སྐྱབས་མཆི། །སོགས་ཡན་ལག་བདུན་པ་འབུལ། སེམས་ཅན་ཐམས་ཅད་བདེ་དང་ལྡན། །སྡུག་བསྔལ་རྒྱུ་དང་བྲལ་གྱུར་ཅིག །ཉེ་རིང་ཆགས་སྡང་སྤངས་པ་ཡི། །བཏང་སྙོམས་ཆེན་པོར་གནས་གྱུར་ཅིག །ཅེས་ལན་གསུམ་ཚད་མེད་བསྒོམས་ལ། དེ་ནས་བླ་མའི་དཀྱིལ་འཁོར་བསྐྱེད་བའི་རིམ་པ་ནི། ༀ་མ་ཧཱ་ཤཱུནྱ་ཏཱ་སོགས། ཞེས་དངོས་སྣང་འཛིན་པའི་བག་ཆགས་ཐམས་ཅད་དོན་དམ་སྟོང་ཉིད་ཡེ་ཤེས་ཆེན་པོའི་དབྱིངས་སུ་སྦྱངས་ལ། ཆོས་རྣམས་དམིགས་མེད་སྟོང་པའི་ངང་ཉིད་ལས། །བྷྲཱུྃ་ལས་གཞལ་ཡས་དཀྱིལ་འཁོར་
གྲུ་ུབཞི་པ། །སྒོ་བཞི་རྟ་བབས་ཆོས་འཁོར་གདུགས་རི་དྭགས། །དྲྭ་ཕྱེད་མདའ་ཡབ་འདོད་སྣམ་རིན་པོ་ཆེ། །སྣ་ཚོགས་རྒྱན་དང་ཕྱོགས་མཚམས་ཀུན་ཏུ་ཡང་། །བ་དན་རྔ་ཡབ་གདུགས་དང་རྒྱལ་མཚན་སོགས། །གཞན་ཡང་མཆོད་པའི་བྱེ་བྲག་དཔག་མེད་འཕྲོ། །སྟེང་འོག་ཤར་སྔོ་ལྷོ་སེར་ནུབ་དམར་བ། །བྱང་ལྗང་དབུས་དཀར་ཕྱི་རིམ་རྡོ་རྗེ་ཡི། །རྭ་བ་དང་ནི་འོད་ཟེར་འབར་བ་ཅན། །དབུས་སུ་པད་སྡོང་ཡལ་ག་ལྔར་གྱེས་པའི། །དབུས་མར་པད་དཀར་འདབ་མ་བཅུ་གསུམ་པ། །ཟེའུ་འབྲུ་གེ་སར་རྒྱས་པའི་ལྟེ་བ་ལ། །མི་འཇིགས་བཞི་དང་ལྡན་པ་སེང་གེའི་ཁྲི། །ལྷ་ཀླུ་མི་ཡི་བསོད་ནམས་ལས་གྲུབ་པའི། །རིན་ཐང་བྲལ་བའི་རེག་བྱ་དུ་མས་བརྒྱན། །དྲི་མེད་དྭངས་གསལ་ཆུ་ཤེལ་ཆ་རྫོགས་སྟེང་། །སངས་རྒྱས་ཀུན་འདུས་ངོ་བོ་རིགས་དཀྱིལ་བདག །རྗེ་བཙུན་བདུད་ཚོགས་འདུལ་བའི་རྡོ་རྗེ་འཆང་། །དཀར་གསལ་ཞལ་གཅིག་བགྲེས་ཚུལ་དབུ་སྐྱེས་དཀར། །སྤྱན་གཉིས་དོན་དམ་སྐྱེ་མེད་ཀློང་དུ་གཟིགས། །མཐོང་གྲོལ་ཞྭ་ནག་གསེར་མདངས་ཁྱུང་གཤོག་ཅན། །ནོར་བུ་རིན་ཆེན་དུ་མས་རྒྱན་མཛེས་པ། །རིགས་བདག་མི་བསྐྱོད་བརྡ་མཚོན་དབུ་ལ་གསོལ། །ཕྱག་གཉིས་བདེ་སྟོང་དབྱེར་མེད་རྡོ་རྗེ་དྲིལ། །བསྣོལ་འཛིན་སྐུ་ལ་ཆོས་གོས་རྣམ་གསུམ་དང་། །ཟ་འོག་བེར་གསོལ་ཞབས་གཉིས་སྐྱིལ་མོ་ཀྲུང་། །གཡོ་མེད་དྲང་པོའི་ལུས་གནད་སངས་ཀྱིས་བཞུགས། །གཡས་གཡོན་རིིམ་བཞིན་སྐྱེས་རབས་གསེར་གྱི་
ཕྲེང་། །མཐའ་སྐོར་པད་འདབ་བཅུ་གསུམ་སོ་སོའི་སྟེང་། །ཟླ་བའི་དཀྱིལ་འཁོར་ཉ་གང་དང་པོའི་དབུས། །དཔལ་ལྡན་དུས་གསུམ་མཁྱེན་པ་བགྲེས་ཉམས་ལྡན། །དབུ་སྐྱེས་རབ་དཀར་སྤྱན་གཉིས་བར་སྣང་གཟིགས། །ཕྱག་གཉིས་མཉམ་བཞག་དཔལ་བེའུ་ཞབས་རྡོར་སྐྱིལ། །གཉིས་པར་གྲུབ་ཆེན་ཀརྨ་པཀྴི་ནི། །སྨུག་ནག་ཨག་ཚོམ་ཟུར་གསུམ་སྤྱན་ལྟ་སྟངས། །ཟིལ་གནོན་ཕྱག་རྒྱ་ཞབས་གཉིས་རྡོར་སྐྱིལ་བཞུགས། །གསུམ་པར་སེམས་དཔའ་རང་བྱུང་རྡོ་རྗེ་ནི། །དཀར་གསལ་མིའུ་ཐུང་གཟུགས་ལ་སྤྱན་ཧྲིག་གེ། །ཆོས་འཁོར་ཕྱག་རྒྱ་ཞབས་གཉིས་སྐྱིལ་མོ་ཀྲུང་། །བཞི་པར་འཛམ་གླིང་རོལ་པའི་རྡོ་རྗེ་ནི། །ཞལ་དཀྱུས་རིང་ཞིང་མཆོག་སྦྱིན་མཉམ་བཞག་རྒྱས། །འཁོར་ལོ་འཛིན་ཞིང་ཞབས་གཉིས་ཕྱེད་སྐྱིལ་བཞུགས། །ལྔ་པར་དེ་བཞིན་གཤེགས་པ་མཚན་དཔེས་བརྒྱན། །སྐྱབས་སྦྱིན་ཕྱག་ན་རིན་ཆེན་ཕྲེང་བ་འཛིན། །ཞབས་གཉིས་བཟང་པོའི་སྟབས་བཞུགས་དྲུག་པར་ནི། །མཐོང་བ་དོན་ལྡན་སྒེག་ཉམས་སྨིན་མ་འཁྱུགས། །རྡོ་རྗེ་དྲིལ་འཛིན་པདྨའི་སྐྱིལ་མོ་ཀྲུང་། །བདུན་པར་ཆོས་གྲགས་རྒྱ་མཚོ་དཀར་སྨུག་བརྗིད། །ཆོས་འཆད་མེ་ཏོག་ནོར་བུ་འཛིན་ཞབས་གཉིས། །སེམས་སྐྱིལ་གྱིས་བཞུགས་བརྒྱད་པ་མི་བསྐྱོད་རྒྱལ། །སྐུ་བོང་རིང་ཞིང་ཕྱག་ཞབས་མཐིལ་བསྟན་ནས། །བྱིན་རླབས་སྟངས་སྟབས་ཀྱིས་བཞུགས་དགུ་པར་ནི། །དབང་ཕྱུག་རྡོ་རྗེ་དཀར་གསལ་ཕྱག་གཉིས་ཀྱིས། །ས་གནོན་
མཉམ་བཞག་ཚེ་ཡི་བུམ་པ་བསྣམས། །རྡོར་སྐྱིལ་གྱིས་བཞུགས་བཅུ་པར་བཟོ་སྦྱོང་མཆོག །བཛྲ་དྷརྨཱ་དྷཱ་ཏུ་བགྲེས་ཉམས་ཅན། །མཆོག་སྦྱིན་མཉམ་བཞག་པད་དཀར་སྡོང་བུ་འཛིན། །སེམས་སྐྱིལ་གྱིས་བཞུགས་བཅུ་གཅིག་རྒྱལ་བའི་དབང་། །ཡེ་ཤེས་རྡོ་རྗེ་མཉམ་བཞག་མི་གཡོ་ཞབས། །རྡོར་སྐྱིལ་བཞུགས་ཤིང་བཅུ་གཉིས་མཉམ་མེད་འདྲེན། །བྱང་ཆུབ་རྡོ་རྗེ་གཞོན་ཚུལ་ཞི་མ་ཁྲོ། །སྐྱབས་སྦྱིན་མཉམ་བཞག་ཡིད་བཞིན་ནོར་བུ་འཛིན། །རྡོར་སྐྱིལ་གྱིས་བཞུགས་ཀུན་ཀྱང་དབུ་ུལ་ནི། །ཞྭ་ནག་གསེར་མདངས་གསོལ་ཞིང་ཆོས་གོས་གསུམ། །ཟབ་བེར་ལྷབ་ལྷུབ་སྐུར་གསོལ་དེ་དག་ཀྱང་། །ངོ་བོ་གཅིག་ལ་རྣམ་པ་དུ་མར་སྤྲུལ། །གང་འདུལ་ཐབས་ཀྱིས་འགྲོ་བའི་སྐྱབས་སུ་བཞུགས། །བཅུ་གསུམ་མདུན་དབུས་ཞྭ་དམར་ཅོད་པན་ཅན། །དཔལ་ལྡན་མི་ཕམ་ཆོས་གྲུབ་རྒྱ་མཚོ་ནི། །སྐུ་ཤ་རབ་རྒྱས་སྤྱན་གཉིས་དབྱིངས་སུ་གཟིགས། །ཕྱག་གཉིས་ཐབས་ཤེས་ངོ་བོ་རྡོར་དྲིལ་འཛིན། །ཞབས་གཉིས་སེམས་དཔའི་སྐྱིལ་མོ་ཀྲུང་གིས་བཞུགས། །ཆོས་གོས་རྣམ་གསུམ་བེར་ཆེན་ཟླུམ་གསོལ་ཞིང་། །ཐབས་མཁས་གང་འདུལ་དེར་སྣང་སྟོན་ཅིང་བཞུགས། །རྒྱབ་ཕྱོགས་སྟེང་གི་པདྨ་ཉི་མའི་སྟེང་། །ཁྱབ་བདག་རྡོར་འཆང་མཐོན་མཐིང་རྡོ་རྗེ་དྲིལ། །བསྣོལ་འཛིན་རང་འོད་ཡུམ་འཁྱུད་ལོངས་སྐུའི་ཆས། །ཡོངས་རྫོགས་རིན་ཆེན་རྒྱན་ལྡན་ཞབས་རྡོར་སྐྱིལ། །གཡས་ཕྱོགས་པདྨར་ཟླ་སྟེང་སྒྲོལ་མ་དཀར། །སྤྱན་བདུན་ཕྱག་གཡས་མཆོག་
སྤྱིན་གཡོན་ཨུཏྤལ། །དར་དང་རིན་ཆེན་རྒྱན་ལྡན་རྡོར་སྐྱིལ་བཞུགས། །གཡོན་ཕྱོགས་པདྨ་ཉི་མ་ཟླ་བའི་སྟེང་། །ཨོ་རྒྱན་ཆེན་པོ་པད་ཞྭ་ཕོད་ཀ་དང་། །ཆོས་གོས་གསོལ་ཞིང་རྡོ་རྗེ་ཐོད་པ་བསྣམས། །ཁ་ཊྭཱྃ་དཀུར་བསྟེན་རྡོར་སྐྱིལ་ལྷམ་མེར་གསལ། །མདུན་ཕྱོགས་འོག་གི་པདྨར་ཉི་རོའི་སྟེང་། །བེར་ཅན་རང་བྱུང་རྒྱལ་མོ་འཁྲིལ་སྦྱོར་རོལ། །རྔམས་ཤིང་ཞལ་གདངས་ལྗགས་འདྲིལ་སྤྱན་གསུམ་འབར། །གཉིས་ཀའང་གྲི་ཐོད་འཛིན་ཅིང་བེར་ནག་གསོལ། །ཁྲོ་བོའི་ཆས་རྫོགས་ཞབས་གཉིས་འདོར་སྟབས་བཞུགས། །ལྷ་ཚོགས་རྣམས་ཀྱི་གནས་གསུམ་ༀ་ཨཱཿཧཱུྃ། །གདོད་ནས་ལྷུན་གྲུབ་འགྱུར་མེད་ངོ་བོས་མཚན། །དེ་ལྟར་དཀོན་མཆོག་ཀུན་འདུས་ཀརྨ་པ། །སྐུ་ཡི་བཀོད་པས་ཞིང་ཁམས་ཡོངས་ལ་ཁྱབ། །རབ་འབྱམས་ཞིང་རྣམས་མ་ལུས་སྐུ་ལ་རྫོགས། །གཙོ་བོའི་ཐུགས་ཀའི་ས་བོན་འོད་ཟེར་འཕྲོས། །མི་མངོན་ཆོས་དབྱིངས་གནས་ནས་རྩ་གསུམ་གྱི། །དཀྱིལ་འཁོར་འཁོར་ལོ་བསྐྱེད་པ་དང་འདྲ་བ། །བུ་ཡུག་འཚུབས་བཞིན་མདུན་མཁར་སྤྱན་དྲངས་གྱུར། །ཞེས་བརྗོད་ལ་བྱིན་འབེབས་པ་ནི། སྟེང་དག་པ་འོག་མིན་ཞིང་ཁམས་ནས། །རིགས་ཀུན་གྱི་གཙོ་བོ་རྡོ་རྗེ་འཆང་། །སངས་རྒྱས་དང་བྱང་སེམས་གཤེགས་སུ་གསོལ། །དབང་བསྐུར་ལ་བྱིན་ཆེན་དབབ་ཏུ་གསོལ། །གཡས་པོ་ཏ་ལ་ཡི་གནས་མཆོག་ནས། །དུས་གསུམ་གྱི་རྒྱལ་ཡུམ་སྒྲོལ་མ་དཀར། །ལྷ་
ཡི་དམ་ཞི་ཁྲོ་གཤེགས་སུ་གསོལ། །དབང་བསྐུར་ལ་བྱིན་ཆེན་དབབ་ཏུ་གསོལ། །གཡོན་དཔལ་རི་པདྨ་འོད་ཞིང་ནས། །མཆོག་གྲུབ་པའི་སྤྱི་མེས་པདྨ་འབྱུང་། །འཁོར་རིག་འཛིན་ཌཱ་ཀི་གཤེགས་སུ་གསོལ། །དབང་བསྐུར་ལ་བྱིན་ཆེན་དབབ་ཏུ་གསོལ། །དབུས་རང་སེམས་སྣང་སྟོང་ཕོ་བྲང་ནས། །རྗེ་ཀརྨ་པ་ཡི་སྐྱེས་རབས་ཕྲེང་། །བཀའ་བརྒྱུད་པའི་བླ་མ་གཤེགས་སུ་གསོལ། །དབང་བསྐུར་ལ་བྱིན་ཆེན་དབབ་ཏུ་གསོལ། །འོག་དམ་ཚིག་གཉེན་པོའི་དུར་ཁྲོད་ནས། །དཔལ་མ་ཧཱ་ཀཱ་ལ་རེ་མ་ཏི། །བཀའ་ཆོས་སྐྱོང་རྒྱ་མཚོ་གཤེགས་སུ་གསོལ། །དབང་བསྐུར་ལ་བྱིན་ཆེན་དབབ་ཏུ་གསོལ། །རྡོ་རྗེ་བསྡུ་བའི་རྒྱས། ༀ་ཤྲཱི་མཱན་གུ་རུ་མཎྜལ་ས་པ་རི་ཝཱ་ར་བཛྲ་ས་མ་ཡ་ཛཿཅེས་སྤྱན་དྲངས་ལ། ཛཿཧཱུྃ་བྃ་ཧོཿབཛྲ་ས་མ་ཡ་ཏིཥྛ་ལྷན། དམ་ཡེ་གཉིས་མེད་དུ་བསྟིམས་ལ། སླར་ཡང་གཙོ་བོའི་ཐུགས་ཀའི་འོད་ཟེར་གྱིས། །རང་བཞིན་གནས་ནས་དབང་ལྷ་སྤྱན་དྲངས་ཏེ། །རིགས་ལྔ་ཡབ་ཡུམ་ལ་སོགས་དེ་བཞིན་གཤེགས། །དགོངས་པ་མཛད་དང་ཤིས་བརྗོད་མེ་ཏོག་འཐོར། །རིན་ཆེན་བུམ་བཟང་བདུད་རྩིའི་ཆར་རྒྱུན་གྱིས། །དབང་བསྐུར་ཆུ་ལྷག་ཡར་ལུད་རིགས་ལྔ་པོ། །སྤྲུལ་སྐུའི་རྣམ་པས་སོ་སོའི་དབུ་བརྒྱན་གྱུར། །ཅེས་དབང་བསྐུར་རྒྱས་གདབ་དང་། དེ་ནས་མཆོད་པའི་བྱེ་བྲག་རྣམས་རིམ་བཞིན་འབུལ་བ་ནི། མཐའ་ཡས་འགྲོ་ཁམས་རྒྱ་མཚོ་ན། །དྲི་མེད་མཆོད་ཡོན་ཇི་སྙེད་པ། །རྣམ་དག་མོས་བློས་འབུལ་ལགས་ན། །བཞེས་ནས་
སྨིན་གྲོལ་དངོས་གྲུབ་སྩོལ། །ༀ་སརྦ་ཏ་ཐཱ་ག་ཏ་གུ་རུ་དེ་ཝ་དྷརྨ་པཱ་ལ་ས་པ་རི་ཝཱ་ར་བཛྲ་ཨརྒྷཾ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། མཐའ་ཡས་འགྲོ་ཁམས་རྒྱ་མཚོ་ན། །རྒྱུན་འབབ་ཞབས་བསིལ་ཇི་སྙེད་པ། །རྣམ་དག་མོས་བློས་འབུལ་ལགས་ན། །བཞེས་ནས་སྨིན་གྲོལ་དངོས་གྲུབ་སྩོལ། །སྔགས་ཐོག་མཐའ་འདྲ་བར། པཱ་དྱཾ༴ མཐའ་ཡས་འགྲོ་ཁམས་རྒྱ་མཚོ་ན། །རབ་མཛེས་མེ་ཏོག་ཇི་སྙེད་པ། །རྣམ་དག་མོས་བློས་འབུལ་ལགས་ན། །བཞེས་ནས་སྨིན་གྲོལ་དངོས་གྲུབ་སྩོལ། །པུཥྤེ༴ མཐའ་ཡས་འགྲོ་ཁམས་རྒྱ་མཚོ་ན། །བདུག་སྤོས་བསུང་ཞིམ་ཇི་སྙེད་པ། །རྣམ་དག་མོས་བློས་འབུལ་ལགས་ན། །བཞེས་ནས་སྨིན་གྲོལ་དངོས་གྲུབ་སྩོལ། དྷཱུ་པེ༴ མཐའ་ཡས་འགྲོ་ཁམས་རྒྱ་མཚོ་ན། །སྣང་གསལ་འོད་ཟེར་ཇི་སྙེད་པ། །རྣམ་དག་མོས་བློས་འབུལ་ལགས་ན། །བཞེས་ནས་སྨིན་གྲོལ་དངོས་གྲུབ་སྩོལ། །ཨཱ་ལོ་ཀེ༴ མཐའ་ཡས་འགྲོ་ཁམས་རྒྱ་མཚོ་ན། །བྱུང་བའི་དྲི་བཟང་ཇི་སྙེད་པ། །རྣམ་དག་མོས་བློས་འབུལ་ལགས་ན། །བཞེས་ནས་སྨིན་གྲོལ་དངོས་གྲུབ་སྩོལ། །གནྡྷེ༴ མཐའ་ཡས་འགྲོ་ཁམས་རྒྱ་མཚོ་ན། །ཞལ་ཟས་སྣ་ཚོགས་ཇི་སྙེད་པ། །རྣམ་དག་མོས་བློས་འབུལ་ལགས་ན། །བཞེས་ནས་སྨིན་གྲོལ་དངོས་གྲུབ་སྩོལ། །ནཻ་ཝི་དྱེ༴ མཐའ་ཡས་འགྲོ་ཁམས་རྒྱ་མཚོ་ན། །རྒྱུད་མངས་བྱེ་བྲག་ཇི་སྙེད་པ། །རྣམ་དག་མོས་བློས་འབུལ་ལགས་ན། །བཞེས་ནས་སྨིན་གྲོལ་དངོས་གྲུབ་སྩོལ། །
ཤབྡ༴ མཆོད་རོལ་བྱ། འཇིག་རྟེན་རབ་འབྱམས་ཞིང་རྣམས་ན། །རྡོ་རྗེ་གཟུགས་སྒྲ་དྲི་རོ་རེག །རྨད་བྱུང་ཡིད་འོང་མཆོད་པ་རྣམས། །འབུལ་བཞེས་དངོས་གྲུབ་རྣམ་གཉིས་སྩོལ། །ༀ་བཛྲ་རུ་པ་ཤབྡ་གནྡྷེ་རཱ་ས་སྤཪྴེ་ཨཱཿཧཱུྃ་སྭཱ་ཧཱ། རིན་ཆེན་འཁོར་ལོ་དཔལ་བེའུ་པདྨ་དང་། །རྒྱལ་མཚན་གདུགས་བཟང་བུམ་པ་དུང་དཀར་པོ། །གསེར་ཉ་བཀྲ་ཤིས་རྨད་བྱུང་རྟགས་བརྒྱད་འདི། །བླ་མའི་དཀྱིལ་འཁོར་ལྷ་ལ་མཆོད་པ་འབུལ། །གསེར་གྱི་འཁོར་ལོས་མངའ་དབང་བསྒྱུར། །བསམ་འཕེལ་ནོར་བུ་དགོས་འདོད་འབྱུང་། །བཙུན་མོ་རིན་ཆེན་བདེ་སྟོང་སྟེར། །ཁྱིམ་བདག་ཟས་གཡང་དཔལ་འབྱོར་བརྗིད། །ཁྱུ་མཆོག་སྟོབས་བཅུའི་རྩལ་ཆེན་རྫོགས། །ཅང་ཤེས་རྫུ་འཕྲུལ་ཐར་ལམ་དྲོངས། །དམག་དཔོན་བདུད་བཞིའི་གཡུལ་ལས་རྒྱལ། །རྒྱལ་སྲིད་རིན་ཆེན་སྣ་བདུན་པོ། །རྒྱལ་བའི་དཀྱིལ་འཁོར་ལྷ་ལ་འབུལ། །རྒྱལ་ཀུན་ཐུགས་རྗེའི་བྱིན་རླབས་ཀྱིས། །རྒྱལ་བ་ཉིད་དང་དབྱེར་མེད་ཤོག །གང་ཞིག་འཇིག་རྟེན་འདིའམ་གཞན། །དཔལ་འབྱོར་སྲིད་ཞིའི་ལོངས་སྤྱོད་ཀྱི། །མཆོད་པའི་སྤྲིན་ཕུང་ཟད་མེད་པར། །རྒྱ་ཆེན་བསྐལ་པར་འཕྲོ་གྱུར་ཅིག །སྤྲོ་ན་ཡན་ལག་བདུན་པ་བཏོན་ལ། དེ་ནས་མཎྜལ་འབུལ་བ་ནི། ༀ་བཛྲ་ས་ཏྭ་སོགས་ཡིག་བརྒྱ་བརྗོད། ཞིང་ཁམས་ཡང་དག་གསེར་གྱི་ས་གཞི་བརྡལ། །རྡོ་རྗེའི་རི་ཡི་ཁོར་ཡུག་ར་བས་བསྐོར། །དབུས་སུ་རི་དབང་རྒྱལ་པོ་མཆོག་རབ་མཐོ། །གླིང་ཆེན་ལུས་འཕགས་འཛམ་གླིང་བ་
ལང་སྤྱོད། །སྒྲ་མི་སྙན་དང་གླིང་གཡོག་རོལ་མཚོ་སོགས། །རིན་ཆེན་ས་འཛིན་ཡོངས་འདུ་ས་བརྟོལ་ལྗོན། །འདོད་འཇོའི་བ་མོ་མ་རྨོས་འབྲུ་སྣ་ཚོགས། །རྒྱལ་སྲིད་སྣ་བདུན་གཏེར་ཆེན་བུམ་པ་བཟང་། །མཆོད་པའི་ལྷ་མོས་ཡོངས་བསྐོར་ཉི་ཟླ་གསལ། །ཀུན་ཁྱབ་གདུགས་དཀར་མི་ནུབ་རྒྱལ་མཚན་བསྒྲེངས། །གཞན་ཡང་ཁམས་གསུམ་ཕྱི་སྣོད་ནང་བཅུད་ཀྱི། །ལོངས་སྤྱོད་ཕུན་ཚོགས་ཕྲ་རབ་རྡུལ་བྱེ་སྙེད། །གྲངས་མེད་མངོན་པར་བཀོད་ལེགས་མཎྜལ་འདི། །བླ་མ་ཡི་དམ་སངས་རྒྱས་བྱང་སེམས་དང་། །དཔའ་པོ་མཁའ་འགྲོ་ཆོས་སྐྱོང་ཚོགས་རྣམས་ལ། །གུས་པས་འབུལ་ལོ་བརྩེ་བས་བཞེས་སུ་གསོལ། །བཞེས་ནས་བདག་རྒྱུད་སྨིན་གྲོལ་བྱིན་གྱིས་རློབས། །ༀ་མཎྜལ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། ས་གཞི་སྤོས་ཆུས་སོགས་དང་། དངོས་དང་ཡིད་སྤྲུལ་རྒྱ་མཚོས་དྲངས་པ་ཡི། །དགོས་འབྱུང་ནོར་བུའི་མཎྜལ་འདི་ཕུལ་བས། །བྱང་ཆུབ་ལམ་ལ་བར་ཆད་དང་བྲལ་ཞིང་། །སྲིད་ཞིར་མི་གནས་རྣམ་གྲོལ་མཆོག་ཐོབ་ཤོག །སྐུ་གསུམ་ཡོངས་རྫོགས་བླ་མའི་ཚོགས་རྣམས་ལ། །སོགས་ཀྱང་བརྗོད་ནས། ཕྱག་འཚལ་མཆོད་བཤགས་ཡི་རངས་བསྐུལ་གསོལ་འདེབས། །བདག་ལུས་ལོངས་སྤྱོད་དུས་གསུམ་དགེ་རྩ་འབུལ། །ཆོས་དབྱིངས་མྱང་འདས་ཆེན་པོར་བསྔོ་བར་བགྱི། །མ་རྣམས་རྫོགས་པའི་སངས་རྒྱས་མྱུར་ཐོབ་ཤོག །ཅེས་ཕྱི་ཡི་མཆོད་པ་ཕུལ་ནས།
ནང་མཆོད་འབུལ་བ་ནི། བདུད་རྩི་མཐེབ་སྲིན་གྱིས་མཆོད་ལ། རྡོ་རྗེ་འཆང་ཆེན་ཡུམ་གྱུར་འཕགས་མ་དང་། །གུ་རུ་པདྨ་དཔལ་ལྡན་དུས་གསུམ་མཁྱེན། །གྲུབ་ཆེན་ཀརྨ་པ་དང་རང་བྱུང་ཞབས། །རོལ་པའི་རྡོ་རྗེ་ཐུབ་ཆེན་དེ་བཞིན་གཤེགས། མཐོང་བ་དོན་ལྡན་ཆོས་གྲགས་རྒྱ་མཚོ་དང་། །མི་བསྐྱོད་རྡོ་རྗེ་དབང་ཕྱུག་རྡོ་རྗེའི་ཞབས། །ཆོས་དབྱིངས་རྡོ་རྗེ་ཡེ་ཤེས་རྡོ་རྗེ་མཆོག །བྱང་ཆུབ་རྡོ་རྗེ་བདུད་ཚོགས་འདུལ་རྡོ་རྗེ། །མི་ཕམ་ཆོས་གྲུབ་རྒྱ་མཚོ་ལ་སོགས་པ། །རྩ་བར་བརྒྱུད་པའི་མཆོད་འོས་རབ་འབྱམས་དང་། །མ་ཧཱ་ཀཱ་ལ་བཀའ་སྡོད་དམ་ཅན་ཚོགས། །ཡེ་ཤེས་བདུད་རྩིའི་རྒྱུན་འབུལ་གྲུབ་གཉིས་སྩོལ། །ༀ་ཨཱཿཧཱུྃ་གིས་མཆོད་ལ། གསང་བའི་མཆོད་པ་ནི། རྡོ་རྗེ་ལྷ་མོ་བཅུ་དྲུག་པོ། །རྒྱན་ལྡན་མཚར་སྡུག་མདོག་སྣ་ཚོགས། །པི་ཝཾ་གླིང་བུ་རྔ་ཆེན་དང་། །རྫ་རྔ་ལ་སོགས་ཐོགས་པ་དང་། །བཞད་དང་སྒེག་པ་གླུ་གར་མཁན། །མེ་ཏོག་བདུག་སྤོས་སྣང་གསལ་དྲི། །གཟུགས་དང་རོ་བཅུད་རེག་བྱ་མ། །ཆོས་དབྱིངས་བདེ་སྟོང་ལྷ་མོའི་ཚོགས། །ཡིད་འོང་མཆོད་པ་སྤྲོ་བཞིན་དུ། །དགའ་བཞིའི་ཡེ་ཤེས་བསྐྱེད་པར་བགྱི། །ༀ་བཛྲ་བཱི་ནི་ཧཱུྃ་ཧཱུྃ་ཕཊཿདེ་བཞིན་ཐོག་མཐའ་འདྲ་བར། ཝཾ་ཤེ༴ མྲྀ་དཾ་གི༴ མུ་རཉྫེ༴ ཧཱ་སྱེ༴ ལཱ་སྱེ༴ གཱིརྟི༴ ནྲྀ་ཏྱ༴ པུཥྤེ༴ དྷཱུ་པེ༴ དཱི་པཾ༴ གནྡྷེ༴ ༀ་རཱུ་པ་བཛྲེ༴ རཱ་ས༴ སྤཪྴེ༴ དྷརྨཱ་དྷཱ་ཏུ་བཛྲེ་བར་བརྗོད། ཞེས་འབུལ། མཆོད་བྱ་མཆོད་བྱེད་ཐམས་ཅད་ཀྱང་། །རང་བྱུང་རིག་བའི་རྩལ་ལས་གསལ། །དངོས་
སྣང་འཛིན་མེད་དེ་བཞིན་ཉིད། །བློ་འདས་ཆེན་པོའི་ངང་དུ་རོལ། །མ་ཧཱ་ཛྙཱ་ན་ཤུནྱ་ཏཱ་པཱུ་ཛ་ཧོཿཞེས་དེ་ཁོ་ན་ཉིད་ཀྱི་མཆོད་པ་ཆེན་པོའོ། །དེ་ནས་བསྟོད་པ་ཕྱག་འཚལ་བ་ནི། ཧྲཱིཿསྤྲོས་བྲལ་རང་བྱུང་བདེ་བ་ཆེ། །དོན་དམ་འགགས་མེད་ཐུགས་རྗེའི་མདངས། །སྒྱུ་འཕྲུལ་དྲྭ་བས་ཞིང་ཀུན་ཁྱབ། །རྡོ་རྗེ་འཆང་ལ་ཕྱག་འཚལ་བསྟོད། །སྨྲ་བསམ་བློ་འདས་ཕ་རོལ་ཕྱིན། །མཉམ་ཉིད་ངང་ནས་གང་འདུལ་སྟོན། །དུས་གསུམ་རྒྱལ་ཀུན་སྐྱེད་པའི་ཡུམ། །འཕགས་མ་སྒྲོལ་མར་ཕྱག་འཚལ་བསྟོད། །བདེ་གཤེགས་འདུས་པའི་སྤྱི་དཔལ་མཆོག །གདོད་མའི་སངས་རྒྱས་ཧེ་རུ་ཀ། འཆི་མེད་གྲུབ་པའི་གཏེར་ཆེན་པོ། །པདྨཱ་ཀ་རར་ཕྱག་འཚལ་བསྟོད། །བསྐལ་བཟང་ཞིང་འདིར་སངས་རྒྱས་སྟོང་། །མ་འོངས་རྣམ་འདྲེན་དྲུག་པ་ནི། །སེང་གེ་ཞེས་བྱར་འཚང་རྒྱ་བའི། །ཟབ་མོའི་ཐུགས་བསྐྱེད་ལྡན་ལ་འདུད། །གང་ཞིག་རྣམ་འཕྲུལ་དུ་ུམ་ཡི། །ཆུ་ཟླའི་གར་གྱིས་བརྩེ་བ་ཅན། །འགྲོ་ལ་མི་འཇིགས་སྦྱིན་པའི་གཉེན། །གང་འདུལ་དེར་སྣང་སྟོན་དེར་འདུད། །ཆོས་ནོར་དབང་བསྒྱུར་འཛམ་བུའི་གླིང་། །བྱང་ཕྱོགས་བསིལ་རིའི་ལྗོངས་འདི་རུ། །སྤྱན་རས་གཟིགས་དང་དབྱེར་མེད་པར། །གཅིག་གྱུར་འབྲེལ་ཚད་དོན་ལྡན་འདུད། །མཐོན་མཐིང་ཅོད་པན་ཕྲེང་བ་འཛིན། །དཔལ་ལྡན་དུས་གསུམ་མཁྱེན་པ་ནས། །བདུད་ལས་རྣམ་པར་རྒྱལ་བའི་བར། །སྐྱེས་རབས་བཅུ་གསུམ་དྲང་ངེས་ཀྱི། །མདོ་རྒྱུད་རྒྱ་མཚོར་གསལ་ལ་འདུད། །སངས་རྒྱས་དངོས་ལས་ལྷག་པ་ཡི། །བཀའ་
དྲིན་གསུམ་ལྡན་རྡོ་རྗེ་འཛིན། །རིགས་དང་དཀྱིལ་འཁོར་ཡོངས་ཀྱི་བདག །རྗེ་བཙུན་བདུད་འདུལ་རྡོ་རྗེར་འདུད། །སྔོན་བསགས་ལེགས་བྱས་སྨིན་པའི་མཐུས། །ཀུན་རྫོབ་སྣང་ངོར་ཞལ་མཐོང་ཞིང་། །སྨིན་གྲོལ་ཆོས་ཀྱི་བདུད་རྩིས་ཚིམས། །ཐུགས་ཀྱིས་བྱིན་བརླབས་རྗེས་བཟུང་འདུད། །དེ་ལས་བྱུང་བའི་ལམ་ཟབ་མོ། །ཀུན་གཞི་བདེ་གཤེགས་སྙིང་པོ་ཞེས། །དོན་དམ་རང་རྩལ་སྣང་ཆ་ལས། །སྣང་སྲིད་བླ་མའི་དཀྱིལ་འཁོར་ཤར། །མཉམ་ཉིད་མཁའ་ཀློང་ཡེ་དག་པའི། །སྟོང་ཉིད་ཡེ་ཤེས་ཆེན་པོ་རུ། །གྲག་སྟོང་བརྗོད་མེད་བསྟོད་པས་བསྟོད། །གསལ་སྟོང་ངང་དུ་ཕྱག་འཚལ་བསྟོད། །སྙིང་རྗེའི་དབྱིངས་ལས་ཁྲོས་པའི་ཚུལ། །ཉོན་མོངས་བདུད་བཞི་ཚར་གཅོད་པའི། །ཡེ་ཤེས་མགོན་པོ་བེར་ཡབ་ཡུམ། །བཀའ་སྡོད་ཚོགས་ལ་ཕྱག་འཚལ་བསྟོད། །ཕྱོགས་བཅུའི་སངས་རྒྱས་བྱང་སེམས་ལྷ། །རབ་འབྱམས་རྡུལ་སྙེད་གྲངས་འདས་ཀྱང་། །ཀརྨ་ཀ་ཡི་ངོ་བོར་གསལ། །བླ་མ་མགོན་པོ་དབྱེར་མེད་པ། །ཡེ་ཤེས་ཆོས་སྐྱོང་བེར་ནག་ཅན། །དཀོན་མཆོག་ཀུན་འདུས་ཀརྨ་པ། །བཅུ་གསུམ་བདུད་འདུལ་རྡོ་རྗེ་འཆང་། །སྐྱེ་དང་ཚེ་རབས་འབྲལ་མེད་ཤོག །ཅེས་རང་དང་སེམས་ཅན་ཐམས་ཅད་ལུས་གངྒཱའི་ཀླུང་བྱེ་སྙེད་དུ་སྤྲུལ་ནས་ཕྱག་འཚལ་བར་དམིགས་ནས་ངེས་འབྱུང་སྐྱོ་ཤས་དྲག་པོའི་སྒོ་ནས་འབད་པར་བྱའོ། །དེ་ནས་བཤགས་པ་བྱ་བ་ནི། སྤྲོ་ན་དང་པོར་ཕུང་པོ་གསུམ་པའི་མདོ་བཏོན་ལ་ཐལ་མོ་སྦྱར་ཕྱག་འཚལ་ཞིང་། ཀྱཻ། ཕྱོགས་བཅུ་ུན་བཞུགས་པའི་བདེ་བར་གཤེགས་པ་སངས་རྒྱས་ཆོས་དང་དགེ་འདུན་ཐམས་ཅད་
ཀྱི་མངའ་བདག་དཔལ་ལྡན་བླ་མ་རྡོ་རྗེ་འཆང་ཆེན་པོ་དེང་བདག་སོགས་མཐའ་ཡས་པའི་སེམས་ཅན་རྣམས་ལ་དགོངས་སུ་གསོལ་ལོ། །བདག་མིང་འདི་ཞེས་བགྱི་བས་ཐོག་མེད་དུས་རིང་ནས་ད་ལྟའི་བར་དུ་བསགས་པའི་ཉོན་མོངས་པ་ལྔའི་དབང་དུ་གྱུར་པའི་མི་དགེ་བ་བཅུ། མཚམས་མེད་པ་ལྔ། དེ་དང་ཉེ་བ་ལྔ་བགྱིས་པ་དང་། སོ་ཐར་བྱང་སེམས་གསང་སྔགས་ཀྱི་སྡོམ་པ་བསླབ་བྱ་དམ་ཚིག་དང་འགལ་བའི་ཉེས་པ་དང་ལྟུང་བའི་ཚོགས་ཅི་དང་ཅི་མཆིས་པ་ཐམས་ཅད་འདུན་པ་དྲག་པོའི་སྒོ་ནས་མཐོལ་ལོ་བཤགས་སོ། །མི་འཆབ་བོ། །མི་སྦེད་དོ། །ཕྱིན་ཆད་ངེས་པར་སྡོམ་ལགས་སོ། །ཅེས་ལན་གསུམ་བརྗོད། ༀ་ས་མ་ཡ། ཨཱཿས་མ་ཡ། ཧཱུྃ་ས་མ་ཡ། ༀ་ཤྲཱི་མཱ་ན་ཀརྨ་ཀ་ས་ཏྭ་ས་མ་ཡ་སོགས། ༀ་བཛྲ་ས་ཏྭ་ཧཱུྃ་ཅི་ནུས་བརྗོད་མཐར། བླ་མ་ཆེན་པོའི་དཀྱིལ་འཁོར་གྱི་འཁོར་ལོ་ཀུན་གྱི་ཞལ་ནས། ཀྱེ་ཧོཿསྐལ་ལྡན་རིགས་ཀྱི་བུ་ཁྱོད་ཀྱི་སྡིག་སྒྲིབ་ཉེས་ལྟུང་ཐམས་ཅད་དག་གོ་ཞེས་གནང་བ་བྱིན་པར་གྱུར། དེ་ལྟར་དག་ཚངས་དབུགས་དབྱུང་དངོས་སུ་ཐོབ་བར་བསམ་མོ། །དེ་ནས་བླ་མ་རྒྱང་འབོད་ལ་འཇུག་སྟེ། མོས་གུས་ཚད་མ་རྒྱུད་ལ་སྐྱེ་བའི་རྣལ་འབྱོར་པ་དག་གིས་འདི་ལྟར་བསྒོམ་མོ། །བླ་མའི་སྐུ་ལས་བྱུང་བའི་བྱིན་རླབས་རིལ་བུ་ཁར་བཅུག་ལ། སྤྱི་བོར་སྒོམ་ཞྭ་བཅིངས། བླ་གོས་ཕྲག་པར་གཟར་ཆོས་གོས་ཀྱི་གྲྭ་ལག་གཡོན་གྱིས་དཀུར་བསྟེན། གཡས་ཐལ་མོ་ཕྱིར་བསྟན་གྱིས་དཀུ་གཡས་བསྟེན་ལ་ངག་ཏུ། བླ་མ་དམ་པ་དྲན་བྱུང་ངོ་། །རིགས་དྲུག་པ་རྡོ་རྗེ་འཆང་ཆེན་པོར་གསལ་བྱུང་ངོ་། །རྣམ་དག་གི་ཞིང་ཁམས་རྒྱ་མཚོར་
འབྱམས་ཀླས་སོང་ངོ་། །འོད་ཟེར་བཟོད་མེད་དུ་འབར་སོང་ངོ་། །སྣོད་བཅུད་ཐམས་ཅད་ཞུ་སོང་ངོ་། །རྡོ་རྗེ་འཆང་བདག་ལ་དབབ་པར་མཛོད། །བདག་ལ་ངལ་གསོ་བར་མཛོད། །ཅེས་བརྗོད་ཅིང་འདོན་སྒོམ་དྲག་ཏུ་བྱས་པས་ཡེ་ཤེས་འདྲེན་པའི་མོས་གུས་བསྐྱེད་མི་ཐུབ་ན། ཌཱ་ཀིཎྜཧོཿབླ་མ་ནམ་དྲན་པ་ན་ལུས་རྣམ་སྣང་ཆོས་བདུན་ལག་པ་གཉིས་ས་གནོན་བྱས་ལ་སྟེང་འོག་གི་རླུང་ཁ་སྦྱར། ལུས་གྱི་ནང་སྟོང་སེང་དུ་བསྒོམས་ནས་སྐེད་སྐོར་བྱས་རིམ་ནས་རྣམ་ཤེས་འགགས། རང་བཞིན་འོད་གསལ་གྱི་སེམས་ཟླ་གདན་དུ་གྱུར་བ་ལ་བླ་མ་ཅི་འདྲ་ཁོ་ན་བཞུགས་སུ་གསོལ་བ་བསྒོམས་ནས་སྐེད་སྐོར་དྲག་ཏུ་བྱས་པས་བླ་མ་སྟོང་ཆེན་དུ་ཞུ་ནས་ཟླ་དཀྱིལ་གྱི་ཐིག་ལེ་དམར་བོ་ཡུངས་འབྲུ་ཙམ་ལ་ཤེས་བ་གཏད། འདི་ནི་འོད་གསལ་བསྐྱེད་པའི་མོས་གུས་འདྲེན་ཐབས་ཡིན་ནོ། །རྣམ་ཤེས་ཡེ་ཤེས་སུ་འཕོ་བར་བྱེད་བའི་ཕྱིར་ཡིན་ན། གཞན་གོང་དང་འདྲ་བ་ལ། སྤྱི་བོར་ཐལ་བྱུང་གི་ནམ་མཁར་བླ་མ་ཡེ་ཤེས་ཀྱི་མེ་འུར་འུར་འབར་བའི་ཞབས་གཡོན་པའི་མཐེ་བོང་གི་འོད་ཟེར་གྱིས་རང་སེམས་འོད་གསལ་སྙིང་ག་ནས་ཐིག་ལེ་དམར་པོ་སྲན་ཆུང་ཙམ་པ་དེ་རང་དབང་མེད་པར་བསྡུས་ནས་བསྒོམ་ཞིང་དྲག་སྦྱོར་བྱ་བ་དང་། ཡེ་ཤེས་ཕྱག་ཆེན་སྩོལ་མེད་དུ་མ་སྐྱེས་ན་ལེ་ལན་ཐམས་ཅད་ང་དབྱངས་ཅན་བཟང་པོ་ལ་བསྡོས་ཤིག །དེ་ལྟར་མི་བསྐྱོད་རྒྱལ་བས་གསུང་བཞིན་འདི་ནི་ཐུན་མོང་མིན་པའི་རྡོ་རྗེའི་བཀའ་ལ་ཚད་བཟུང་ལྷུར་ལེན་གྱིས་མོས་གུས་སྐྱེད་ཅིག །རྗེ་རྡོ་རྗེ་འཆང་ཆེན་མན་ཆད་ནས། །བདུད་འདུལ་བའི་རྡོ་རྗེ་ཡན་ཆད་ཀྱི། །བཀའ་བརྒྱུད་པའི་གྲུབ་ཐོབ་བླ་མའི་ཚོགས། །དེང་བདེ་ཆེན་འཁོར་ལོར་རྟག་བཞུགས་ལ། །ངེད་སྐལ་ལྡན་བུ་རྣམས་བསྐྱབ་ཏུ་གསོལ། །ལས་ཉོན་མོངས་འཁོར་བའི་འདམ་དུ་བྱིངས། །ཆོས་
བླ་མའི་དཀོར་གྱིས་རང་རྒྱུད་བསྲེགས། །བདུད་བཞི་ཡི་ཆུ་བོས་ཁྱེར་ལ་ཉེ། །ངན་སོང་གི་གཡང་སར་ལྷུང་ངེས་བའི། །མ་རིག་པའི་མུན་པས་བསྒྲིབས་པ་ཡི། །བདག་མཁའ་ཁྱབ་སེམས་ཅན་སྙིང་རྗེས་དགོངས། །དུཿཁ་ལས་མྱུར་དུ་བསྐྱབ་ཏུ་གསོལ། །དུས་སྙིགས་མ་ལྔ་བདོར་སྐྱེས་པ་ཡི། །སྐལ་མེད་རྣམས་དགེ་བ་རིང་དུ་བསྲིངས། །མི་དགེ་བའི་ལས་ཀྱི་ཁུར་ཆེན་ནོན། །བདག་སེམས་ཅན་ལ་བརྩེ་བས་བཟུང་དུ་གསོལ། །ལས་འཕྲོ་དང་ལྡན་ནམ་སྙམ་པ་ཡི། །རྗེ་དངོས་ཀྱིས་བསླབ་སྡོམ་དམ་ཚིག་ནོད། །འཕྲལ་མོས་བློ་བསྒྱུར་ཡང་རྐྱེན་མ་ཆགས། །རང་བྱས་ལས་རང་སྨིན་ང་རེ་འགྱོད། །ཕྱི་དབྱིབས་ལེགས་ཞི་དུལ་ཙམ་ཡོད་རུང་། །ནང་དུག་ལྔའི་རྣམ་རྟོག་རྒྱས་པ་ཡིས། །ཉེས་ལྟུང་གི་ཆར་པ་རྒྱུན་མི་ཆད། །སྡིག་ཆེན་བདག་ཐུགས་རྗེས་ད་གཟིགས་ཤིག །བླ་མ་ལ་སངས་རྒྱས་འདུ་ཤེས་བྲལ། །གནས་གདན་སར་ཞིང་ཁམས་མི་མཐོང་བ། །མཆེད་གྲོགས་ལ་དག་སྣང་མི་འབྱོང་བ། །རྒྱུད་དྲེད་པོར་ཐུགས་རྗེས་ད་གཟིགས་ཤིག །དུས་ལྔ་བདོའི་ཡང་མཐར་འཁོར་བ་ཡི། །སྲིད་བཟུང་གི་འགྲོ་བ་མཆིས་སོ་ཅོག །སྐལ་བ་དང་རིགས་ཆད་ཀྱི་དབང་གིས་ནི། །རྗེ་ཁྱེད་དང་མ་མཇལ་སྙིང་རྗེའི་གནས། །ཀྱེ་མ་ཀྱེ་ཧུད་ཐུགས་རྗེས་འདོར་རམ་ཅི། །དད་མོས་གུས་དྲག་པོས་རྒྱུད་རླན་པའི། །ལས་སྐལ་བར་ལྡན་རྣམས་བྱིན་རླབས་ཀྱི། །ལམ་བཟང་པོར་དཀྲི་བར་མཛད་དུ་གསོལ། །ལར་སེམས་ཀྱི་ཆོ་འཕྲུལ་བག་ཆགས་ཀུན། །ཟད་མེད་ཀྱི་ཆུ་བོའི་
རྒྱུན་འདི་བཞིན། །རང་བྱུང་ལ་རང་ཡལ་མཁའ་འདྲ་བ། །སྐྱེ་འགགས་དང་གནས་མེད་ཀྱི་ངང་ཉིད་དུ། །བརྗོད་མེད་པ་ཡེ་ཤེས་ཀྱི་ཕྱག་རྒྱ་ཆེ། །དཔལ་ཀུན་ཏུ་བཟང་པོའི་དགོངས་པའི་དོན། །བཀའ་བརྒྱུད་པ་གཤེགས་ཤུལ་ལམ་ཟབ་མོ། །དེ་མངོན་སུམ་རྟོགས་པར་བྱིན་གྱིས་རློབས། །ཅེས་སྣང་བ་འགྱུར་ངེས་བྱའོ། །བཀའ་བརྒྱུད་པ་འདི་མོས་གུས་བྱིན་རླབས་ཀྱི་བརྒྱུད་བ་ཡིན་པས་བཅོས་མིན་དག་སྣང་སྦྱང་བ་གལ་ཆེ་བར་གདའོ། །འདི་སྐབས་རྗེ་མི་བསྐྱོད་རྒྱལ་བས་མཛད་པའི་གསོལ་འདེབས་ཐུན་བཞིར་རྟག་པར་འདོན་ཞིང་། འདིར་སྤྲོ་ན་བདེ་སྟོང་མ། ཟུང་འཇུག་མ། རྡོ་རྗེ་འཆང་ཆེན་མ། དངོས་ཀུན་མ་སོགས་དང་། ཀརྨ་པ་ན་རིམ་དང་། ཞྭ་དམར་བཅུ་པའི་གསོལ་འདེབས་བཅས་བྱ་ཞིང་། བསྡུ་ན་ཡང་རྡོ་རྗེ་འཆང་ཆེན་མ། ཀརྨ་པ་བཅུ་གསུམ་དང་ཞྭ་དམར་བཅུ་པའི་གསོལ་འདེབས་བཅས་གཏོན་ལ། དེ་ནས་བསྙེན་པ་བྱ་བ་ནི། དེ་ལྟར་གསོལ་བ་བཏབ་པས་དཀྱིལ་འཁོར་ལྷ་ཚོགས་ཐམས་ཅད་ཀྱི་སྐུ་ལས་འོད་ཟེར་འཕྲོས་ནས་རྩ་བའི་བླ་མར་ཐིམ་པས་དེ་ལས་བྱིན་རླབས་འོད་ཟེར་ལྔ་ལྡན་དུ་ཕྱོགས་བཅུར་འཕྲོས་ནས་བདག་གཞན་སེམས་ཅན་ཐམས་ཅད་ལ་ཕོག་པས་སྡིག་སྒྲིབ་ཉེས་ལྟུང་ཐམས་ཅད་བྱང་ཞིང་དག །མཆོག་དང་ཐུན་མོང་གི་དངོས་གྲུབ་ཆར་བཞིན་དུ་བབས་ནས་དབྱེར་མེད་དུ་ཐིམ་པས་ཕྱག་རྒྱ་ཆེན་པོའི་གོ་འཕང་ཐོབ་པར་གྱུར་ཅིག །ཅེས་བསམ་ལ། ༀ་ཨཱཿམཱ་ར་ད་མ་ཀ་བཛྲ་ཧཱུྃ་སྭཱ་ཧཱ། སྐྱེས་རབས་ཐམས་ཅད་འདུས་པའི་ངོ་བོ་ཡིན་ལ་ཡིན་བཞིན་དུ་གཙོ་བོའི་བསྙེན་པ་གང་འགྲུབ་བྱའོ། །སྟེང་རྡོ་རྗེ་འཆང་ལ་དམིགས་ནས། ༀ་བཛྲ་དྷྲྀཀྲ་ཧཱུྃ་སྭཱ་ཧཱ།
གཡས་སྒྲོལ་མར་དམིགས་ལ། ༀ་ཏཱ་རེ་སོགས། གཡོན་ཨོ་རྒྱན་རིན་པོ་ཆེར་དམིགས་ནས། བཛྲ་གུ་རུ་སོགས། འོག་མགོན་པོ་ལྕམ་དྲལ་ལ་དམིགས་ནས། ༀ་མ་ཧཱ་ཀཱ་ལ་མ་ཧཱ་ཀཱ་ལཱི་ཧཱུྃ་ཕཊ་སྭཱ་ཧཱ། ཅེས་སོ་སོར་གང་འགྲུབ་བཟླའོ། །དེ་ནས་ཚོགས་ཀྱི་འཁོར་ལོ་བསྐོར་བ་ནི། ཐོག་མར་ཚོགས་རྫས་རྣམས། ནང་མཆོད་ལྟར་བྱིན་གྱིས་བརླབས་ལ་བསངས་སྦྱངས་སྤེལ་བར་བྱའོ། །ན་མོ་ཐབས་ཤེས་བདེ་སྟོང་གཉིས་མེད་ཀྱི། །ཟབ་མོ་ཚོགས་ཀྱི་འཁོར་ལོའི་འདོད་ཡོན་བཟང་། །ཤ་ལྔ་བདུད་རྩི་ལྔ་ལྡན་ཟག་མེད་ཀྱི། །ཡེ་ཤེས་ཆེན་པོར་སྦྱངས་སྤེལ་བསྒྱུར་བྱས་འདི། །བྱིན་རླབས་རྩ་བ་བླ་མ་དངོས་གྲུབ་ཀྱི། །འབྱུང་གནས་ཡི་དམ་ཕྲིན་ལས་ཆོས་སྐྱོང་བ། །དམ་ཅན་རྒྱ་མཚོ་ལ་སོགས་མཆོད་འོས་ལ། །འབུལ་ཕྱིར་ཀུན་ཀྱང་དབྱིངས་ནས་སྐུ་བསྐྱོད་ཅིག །པཉྩ་ཨ་མྲྀ་ཏ་ལ་ཁཱ་ཧི། ག་ཎ་ཙཀྲ་ལ་ཁཱ་ཧི། ཧཱུྃ། གནས་འོག་མིན་ངེས་པ་ལྔ་ལྡན་ཞིང་། །མཆོག་ཁ་སྦྱོར་ཡན་ལག་བདུན་ལྡན་པ། །རིགས་ཀུན་གྱི་བདག་པོ་རྡོ་རྗེ་འཆང་། །ཚོགས་འཁོར་ལོར་རོལ་ཕྱིར་གཤེགས་སུ་གསོལ། །གནས་པོ་ཏ་ལ་ཡི་ཞིང་ཁམས་ནས། །འགགས་མེད་ཀྱི་ཐུགས་རྗེའི་རང་བཞིན་ཅན། །རྒྱལ་ཀུན་གྱི་ཡུམ་གྱུར་སྒྲོལ་མ་དཀར། །ཚོགས་འཁོར་ལོར་རོལ་ཕྱིར་གཤེགས་སུ་གསོལ། །གནས་སྤྲུལ་ཞིང་དཔལ་རི་པདྨ་འོད། །སྒྱུ་འཕྲུལ་གྱི་རོལ་པའི་གར་རྩེད་མཁན། དཔལ་པདྨ་འབྱུང་གནས་ཧེ་རུ་ཀ། ཚོགས་འཁོར་ལོར་རོལ་ཕྱིར་གཤེགས་སུ་གསོལ། །གནས་འགྱུར་
མེད་ཡོངས་གྲུབ་འདོད་མའི་གཤིས། །གཤིས་ཀུན་ཁྱབ་རང་སྣང་ཀློང་ཡངས་ནས། དུས་གསུམ་གྱི་སངས་རྒྱས་འདུས་པའི་སྐུ། །མཐོན་མཐིང་གི་ཅོད་པན་འཆང་བ་པོ། །སྐྱེས་རབས་ཀྱི་ཕྲེང་བ་བཅུ་གསུམ་དང་། །གནས་བདེ་ཆེན་པདྨ་བཀོད་པ་ནས། །ཚེ་འོད་སྣང་མཐའ་ཡས་རྣམ་པར་འཕྲུལ། །དཔལ་མི་ཕམ་ཆོས་གྲུབ་རྒྱ་མཚོ་སོགས། །རྩ་བ་དང་བརྒྱུད་པའི་བླ་མ་རྣམས། །བྱིན་རླབས་ཀྱི་སྤྲིན་ཕུང་ཐིབས་སེ་ཐིབ། །དངོས་གྲུབ་ཀྱི་ཆར་རྒྱུན་སི་ལི་ལི། །ཚོགས་འཁོར་ལོར་རོལ་ཕྱིར་གཤེགས་སུ་གསོལ། །གནས་དུར་ཁྲོད་འཇིགས་རུང་རྩུབ་འགྱུར་ཚལ། །བསྐལ་མེ་འབར་རླུང་ནག་འཚུབ་དཀྱིལ་ནས། །རྡོ་རྗེ་བེར་རང་བྱུང་རྒྱལ་མོ་སོགས། །ཚོགས་འཁོར་ལོར་རོལ་ཕྱིར་གཤེགས་སུ་གསོལ། །གནས་དཀྱིལ་འཁོར་གཞལ་ཡས་ཉམས་རེ་དགའ། །རྫས་མཆོད་པ་གཟི་ལྡན་དང་རེ་སྤྲོ། །རྣལ་འབྱོར་རྣམས་རྡོ་རྗེའི་དམ་རེ་གཙང་། །ཕྱི་སྣོད་དང་ནང་བཅུད་བྱིན་གྱིས་རློབས། །ཅེས་སྤྱན་དྲངས་ལ། དེ་ནས་ཚོགས་ཕུད་རིམ་བཞིན་སྤྲོས་ལ་གཏོར་མ་གསོས་ནས་ཡང་ནང་མཆོད་ལྟར་གྱི་བྱིན་རླབས་བྱས་ལ་གཏོར་བསྔོས་ནི། འབར་བའི་རྒྱས། ཕེཾ་ཕེཾ་ཕེེཾ་པད་སྐོར་དང་རྡོར་ཐལ་ཁ་ཕྱེེ་བཅས། ༀ་བཛྲ་ཨཱ་ར་ལི་ཧོཿཛཿཧཱུྃ་བྃ་ཧོཿབཛྲ་ཌཱཀྐཱི་ནི་ས་མ་ཡ་སྟྭཾ་དྲྀ་ཤྱ་ཧོཿལན་གསུམ། ན་མོ་རཏྣ་གུ་རུ་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་གསུམ། ཆོས་སྐུ་དྲུག་པ་རྡོ་རྗེ་འཆང་ཆེན་པོ། རྗེ་བཙུན་ཨཱཪྱ་ཏཱ་རེ། ཨོ་རྒྱན་པདྨ་བཛྲ། ཏེ་ལོ་པྲཛྙཱ་བྷ་དྲ། ནཱ་རོ་ཛྙཱ་ན་སིདྡྷི། མར་པ་དྷརྨ་མ་ཏི། མི་ལ་ཧཱ་སྱེ་
བཛྲ། སྙི་སྒོམ་པུཎྱེ་རཏྣ། དཔལ་ལྡན་དུས་གསུམ་མཁྱེན་པ། འགྲོ་མགོན་དར་མ་གྲགས། སྤོམ་བྲག་པ་བསོད་ནམས་རྡོ་རྗེ། གྲུབ་ཆེན་ཀརྨ་པཀྴི། གཉན་རས་དགེ་འདུན་འབུམ། སེམས་དཔའ་རང་བྱུང་རྡོ་རྗེ། གཡུང་སྟོན་རྡོ་རྗེ་དཔལ། འཛམ་གླིང་རོལ་པའི་རྡོ་རྗེ། རྟོགས་ལྡན་མཁའ་སྤྱོད་དབང་པོ། ཆོས་རྗེ་དེ་བཞིན་གཤེགས་པ། རྗེ་བཙུན་རིན་ཆེན་བཟང་པོ། ཀུན་མཁྱེན་མཐོང་བ་དོན་ལྡན། བན་སྒར་འཇམ་དཔལ་བཟང་པོ། བྱང་སེམས་དཔལ་འབྱོར་དོན་གྲུབ། རྒྱལ་དབང་ཆོས་གྲགས་རྒྱ་མཚོ། གྲུབ་ཆེན་བཀྲ་ཤིས་དཔལ་འབྱོར། འཇིགས་མེད་དབྱངས་ཅན་བཟང་པོ། རྒྱལ་བ་དཀོན་མཆོག་ཡན་ལག །རྗེ་བཙུན་དབང་ཕྱུག་རྡོ་རྗེ། གར་དབང་དྷརྨེ་ཤྭ་ར། རྒྱལ་མཆོག་ཆོས་དབྱིངས་རྡོ་རྗེ། དཔལ་ལྡན་ཡེ་ཤེས་སྙིང་པོ། མཚུངས་མེད་ཡེ་ཤེས་རྡོ་རྗེ། དཔལ་ཆེན་ཆོས་ཀྱི་དོན་གྲུབ། རྒྱལ་དབང་བོདྷི་བཛྲ། འཇམ་མགོན་དྷརྨཱ་ཀ་ར། རྗེ་བཙུན་བདུད་འདུལ་རྡོ་རྗེ། མི་ཕམ་ཆོས་གྲུབ་རྒྱ་མཚོ་ལ་སོགས་པ་གྲུབ་པའི་ས་ལ་བཞུགས་པའི་བཀའ་བརྒྱུད་རིན་པོ་ཆེའི་སྙིང་པོ་དོན་གྱི་དྲིན་ཆེན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་ཞལ་དུ་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། བཅོམ་ལྡན་འདས་དཔལ་འཁོར་ལོ་བདེ་མཆོག །རྗེ་བཙུན་རྣལ་འབྱོར་མ། འཇིག་རྟེན་དབང་ཕྱུག་རྒྱལ་བ་རྒྱ་མཚོ་ལ་སོགས་པ་ཡི་དམ་རྒྱུད་སྡེ་བཞི་ཡི་དཀྱིལ་འཁོར་དཔའ་བོ་དང་མཁའ་འགྲོ་མ་རྣམས་ཀྱི་ཞལ་དུ་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི།
ཡེ་ཤེས་ཀྱི་མགོན་པོ་མ་ཧཱ་ཀཱ་ལ་རྡོ་རྗེ་བེར་ནག་པོ་ཅན། འདོད་པ་ཁམས་ཀྱི་དབང་ཕྱུག་ལྷ་མོ་རང་བྱུང་རྒྱལ་མོ་ལ་སོགས་པ་ཡེ་ཤེས་དང་ལས་དང་འཇིག་རྟེན་གྱི་དྲེགས་པ་ཆོས་སྐྱོང་ཕོ་རྒྱུད་མོ་རྒྱུད་རྣམས་དང་། དཔལ་ལྡན་ཞིང་སྐྱོང་དབང་པོ། ཡུམ་ཆེན་སི་ན་ར་མ། ལས་མཁན་བདུད་དམག་སྟོང་སྡེའི་ཚོགས་རྣམས་དང་། དམ་ཅན་སྐྱེས་བུ་ཆེན་པོ། མཆེད་ཟླ་སུམ་བརྒྱ་དྲུག་ཅུ། གཞན་ཡང་སངས་རྒྱས་ཀྱི་བསྟན་པ་སྲུང་བར་ཞལ་གྱིས་བཞེས་པའི་བཀའ་སྲུང་དམ་ཅན་རྒྱ་མཚོ་ཚོགས་ཀྱི་ཞལ་དུ་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། དེ་ལྟར་དམ་རྫས་བདུད་རྩིའི་གཏོར་མ་རྒྱ་ཆེན་པོ་འདི་འབུལ་བའི་མཐུས་བྱིན་གྱིས་བརླབས་པ་དང་། མཆོག་དང་ཐུན་མོང་གི་དངོས་གྲུབ་སྩོལ་ཅིག །ཞི་རྒྱས་དབང་དྲག་གི་ཕྲིན་ལས་ཐོགས་པ་མེད་པའི་སྒོ་ནས་རྣལ་འབྱོར་སྐྱོང་ཞིང་ཁྱད་པར་བསྟན་པ་དང་བསྟན་འཛིན་རྣམས་སྲུང་སྐྱོབ་གཡེལ་བ་མེད་པར་ཇི་ལྟར་བཅོལ་པའི་ཕྲིན་ལས་མཛོད་ཅིག །ཅེས་འབུལ་ལོ། །དེ་ནས་ཕྱོགས་སྐྱོང་རྣམས་ལ། ༀ་ཁ་ཁ་ཁཱ་ཧི་ཁཱ་ཧི་དང་། ༀ་ཧྲིཾ་ཧྲིཾ་ཧ་ཧ་སོགས་ནས་ཕེཾ་བར་བརྗོད། ཧཱུྃ། དམ་ཚིག་སོགས་ནས། འགྲུབ་པར་མཛོད། བར་བརྗོད་ལ། དེ་ནས་སྒྲུབ་པ་པོ་རྣམ་ཚོགས་ལ་རོལ་ཞིང་ཐབས་ཤེས་ཀྱི་རྫས་འཛིན་བཞིན་དུ། ཀྱཻ། བདེ་སྟོང་རྟེན་འབྲེལ་ཟབ་མོའི་རང་བཞིན་ཅན། །ལོངས་སྤྱོད་ཚོགས་ཀྱི་འཁོར་ལོ་དགྱེས་པར་རོལ། །ཞེས་དྲངས་ལ། ལེན་པ་པོས། ཧོཿཐབས་ཤེས་ངོ་བོ་བྱིན་རླབས་ཀུན་འབྱུང་གནས། །གཉིས་འཛིན་ཡེ་དག་དྲི་མེད་ཨེ་མ་ཧོཿཞེས་བརྗོད་ནས་རོལ་བར་བྱའོ། །དེ་ནས་ཕུད་ལྷག་
ལ་བདུད་རྩིས་བྲན་ལ། ཨ་ཀཱ་རོས་བྱིན་གྱིས་རླབས། གང་དག་དཀྱིལ་འཁོར་གཉེན་པོའི་མུ་ཁྱུད་ལ་གནས་པའི་འཁོར་གྱི་བཀའ་ཉན་བྲན་གཡོག་དམ་ཚིག་གཉེན་པོའི་གདུང་སེམས་ཅན་ལྷག་མའི་གཏོར་མ་དབང་བ་རྣམས་ལ་ཕུད་ལྷག་བཤལ་ཆུའི་མཆོད་པ་འབུལ་ལོ། །བསྟན་བ་རིན་པོ་ཆེ་བསྲུང་བ་དང་། རྣལ་འབྱོར་པའི་ཕྲིན་ལས་རྣམ་བཞི་མྱུར་དུ་འགྲུབ་པ་དང་། འགལ་རྐྱེན་བར་ཆད་མི་མཐུན་པའི་ཕྱོགས་ཐམས་ཅད་བཟློག་ཅིང་ཇི་ལྟར་བཅོལ་པའི་ལས་རྣམས་གཡེལ་མེད་དུ་སྒྲུབ་བར་བཛོད་ཅིག །སརྦ་ཨུཙྪིཤྚ་བ་ལིངྟ་བྷཀྵ་བྷཀྵ་སི་ཁ་ཁ་ཁཱ་ཧི་ཁཱ་ཧི། ཞེས་ལྷག་མ་ཕྱི་རོལ་དུ་ཕུལ། དེ་ནས་རྗེས་ཀྱི་ཆོ་ག་ནི། མཆོད་པ་གསོ་བྲན་ལེགས་པར་བྱས་ནས། རྒྱས་པར་ན་གོང་གི་མཆོད་པ་བྱིན་རླབས་དང་ཕྱི་མཆོད་ཚན་གཉིས་བཅས། བསྡུ—་ན་སྔགས་མཆོད་ཙམ་དང་བསྟོད་པ་ནི། དཔལ་ལྡན་ཁྱོད་ཀྱི་ཐུགས་རྗེའི་ཉི་མ་ཆེན་པོས་སྲིད་པའི་མཁའ་ལ་ཁྱབ། །གང་ཞིག་མ་རིག་ཉོན་མོངས་སྒྲིབ་གཉིས་མུན་སྟུག་དྲྭ་བ་གཞོམ་པ་ཡི། །མཐའ་ཡས་ཟབ་མོའི་སྟོབས་མངའ་གདུལ་བྱ་རྒྱ་མཚོའི་འདམ་སྐྱེས་པདྨོའི་གཉེན། །ཇི་ལྟར་འདུད་དོ་བྱམས་པའི་འོད་ཟེར་བདག་བློ་ཀུན་ཏུ་གསལ་བར་མཛོད། །ཞེས་བརྗོད། བཟོད་གསོལ་ནི། དེང་འདིར་དཀྱིལ་འཁོར་བསྒྲུབ་ལ་ནོངས་པ་ཡི། །ལྟ་སྒོམ་ཏིང་འཛིན་བཟླས་བརྗོད་གཡེལ་བ་དང་། །མཆོད་རྫས་འཁྲུལ་པའི་དབང་གྱུར་ཉམས་པ་སོགས། །ཉེས་པ་གྱུར་རྣམས་བཟོད་གསོལ་དག་ཚངས་སྩོལ། །རྟེན་འབྲེལ་སྙིང་པོ་དབྱངས་གསལ་བྱེད་སྦྲེལ་བར་ལན་གསུམ་བརྗོད་ལ། དེ་ནས་བྱིན་རླབས་དབང་བཞི་ལེན་པའི་མོས་
གུས་དྲག་པོས་འདི་སྐད་དོ། །བླ་མ་རིན་པོ་ཆེ་ལ་གསོལ་བ་འདེབས། །བདག་འཛིན་བློ་ཡིས་སོགས་ཚར་ཁ་ཤས་བརྗོད་ལ་ཐལ་མོ་སྙིང་གར་སྦྱར་ལ། དཀྱིལ་འཁོར་ལྷ་ཚོགས་དགོངས་ཤིང་གསན་དུ་གསོལ། །མོས་འདུན་གདུང་བས་རྒྱལ་རྣམས་མཆོད་བསྐུལ་ན། །སྐལ་ལྡན་བདག་རྒྱུད་སྨིན་གྲོལ་བྱིན་རླབས་ཀྱི། །ཆར་ཆེན་དངོས་གྲུབ་དམ་པ་མྱུར་དུ་སྩོལ། །དེ་ཡི་ངང་ནས་ཕྱི་རིམ་དཀྱིལ་འཁོར་དང་། །སྐྱབས་ཡུལ་བླ་མའི་ལྷ་ཚོགས་མ་ལུས་ཀུན། །འོད་ཟེར་ངོ་བོ་རྩ་བའི་བླ་མར་ཐིམ། །དཀོན་མཆོག་ཀུན་འདུས་དཔལ་ལྡན་རིགས་ཀུན་བདག །དགྱེས་པའི་རྣམ་འགྱུར་དང་བཅས་མཛོད་སྤུ་ནས། །འོད་ཟེར་དཀར་པོ་རང་གི་དཔྲལ་བར་ཐིམ། །ལུས་ཀྱི་སྒྲིབ་དག་སྐུ་མཆོག་བུམ་དབང་ཐོབ། །བསྐྱེད་རིམ་བསྒོམ་པར་དབང་ཞིང་སྤྲུལ་སྐུ་འགྲུབ། །མགྲིན་པའི་གནས་ནས་འོད་དམར་ཟེར་འཕྲོས་ཏེ། །རང་གི་མགྲིན་ཐིམ་ངག་གི་སྒྲིབ་དག་ནས། །གསུང་མཆོག་གསང་བའི་དབང་ཐོབ་རྩ་རླུང་ལ། །བསྒོམ་པར་དབང་ཞིང་ལོངས་སྐུ་འགྲུབ་པར་འགྱུར། །ཐུགས་ཀའི་གནས་ནས་འོད་སྔོན་ཟེར་འཕྲོས་ཏེ། །རང་གི་སྙིང་གར་ཐིམ་པས་ཡིད་སྒྲིབ་དག །ཐུགས་མཆོག་ཤེར་དབང་ཐོབ་ཅིང་སྙོམས་འཇུག་ལ། །བསྒོམ་པར་དབང་ཞིང་ཆོས་སྐུ་འགྲུབ་པར་འགྱུར། །གནས་གསུམ་འོད་ཟེར་དཀར་དམར་མཐིང་ག་འཕྲོས། །རང་གི་སྒོ་གསུམ་ལ་ཐིམ་སྒྲིབ་ཚོགས་དག །བཞི་པའ་ིདབང་མཆོག་ཐོབ་སྟེ་ཕྱག་རྒྱ་ཆེ། །བསྒོམ་པར་དབང་ཞིང་ངོ་བོ་ཉིད་སྐུ་འགྲུབ། །དེ་ནས་ངེས་བ་དོན་གྱི་བྱིན་རླབས་
པ། །བླ་མ་འོད་དུ་ཞུ་ནས་རང་ལ་ཐིམ། །དབྱེར་མེད་གཅིག་འདྲེས་མཚོ་ལ་ཆར་བབས་བཞིན། །མི་ཕྱེད་རྡོ་རྗེ་གསུམ་གྱི་ངོ་བོ་གྱུར། །ཅེས་ཅི་གནས་སུ་མཉམ་བཞག་བྱས་ལ་ངོ་བོ་བསྐྱང་བར་བྱའོ། །དེའི་ངང་ནས་ལུས་གསལ་སྟོང་། ངག་གྲག་སྟོང་། སེམས་བདེ་སྟོང་གི་ངང་ནས་སྤྱོད་ལམ་ལ་འཇུག་གོ། དེ་ནས་བསྔོ་སྨོན་ནི། གཅིག་ཆོད་ལམ་གྱི་མཐར་ཐུག་བསྒྲུབས་པ་ཡི། །དགེ་བས་བདག་གཞན་ཁམས་གསུམ་སེམས་ཅན་ཀུན། །རང་བྱུང་ཡེ་ཤེས་དེ་ཉིད་གནས་མཐོང་ནས། །སྐུ་ལྔའི་བདག་ཉིད་རྡོ་རྗེ་འཆང་འགྲུབ་ཤོག །དེ་ནས་ཤིས་པའི་མེ་ཏོག་ཆར་དུ་བསྙིལ་ལ། ༀ་ཤྲཱི་ཤྲཱི་ཤྲཱི་སྭ་སྟི། སྔོན་ཚེ་རྫོགས་ལྡན་བསྐལ་བཟང་བསྟན་པ་ལ། །སྐྱེ་རྒུའི་དཔལ་ཡོན་བདེ་ལེགས་དགུང་ལ་བསྙེགས། །ཀུན་ཀྱང་ཞི་བ་ཆོས་ཀྱི་བདུད་རྩི་ཡིས། །ཚད་མེད་སྒྲོལ་བཞིན་དེང་ཡང་བཀྲ་ཤིས་ཤོག །ཇི་ལྟར་སྲིད་འདིའི་ཤིས་པའི་ཡོན་ཏན་རྣམས། །རྣལ་འབྱོར་དཔོན་སློབ་ཡིད་ལ་འདོད་འཇོ་བའི། དཔག་བསམ་རྐང་འཐུང་ལྗོན་བཞིན་རྟག་བརྟན་ཞིང་། །ཚོགས་གཉིས་འབྲས་བུ་མངོན་པར་ཕྱུག་གྱུར་ཅིག །གང་ཞིག་འཁོར་བའི་འཆིང་པ་རིང་སྤངས་ནས། །རྒྱལ་བའི་ཞིང་ཁམས་བཀོད་པ་ལྷུན་གྲུབ་ཏུ། །རྣམ་དག་སྙིང་པོའི་དོན་རབ་སྟོན་པའི་ཕྱིར། །བཀའ་དྲིན་གསུམ་ལྡན་རྡོ་རྗེ་རྒྱལ་པོ་དང་། །གཉིས་མེད་ཟུང་དུ་འབྲེལ་བའི་མཆེད་ལྕམ་རྣམས། །རྟག་ཏུ་འབྲལ་མེད་ཕུན་སུམ་ཚོགས་པ་ཡི། །ཚོམ་བུ་གཅིག་གི་ངང་དུ་སངས་རྒྱས་ནས། །
འགྲོ་ཁམས་ཡོངས་སྒྲོལ་ཆེན་པོའི་བཀྲ་ཤིས་ཤོག །གཞན་ཡང་བསྔོ་བ་སྨོན་ལམ་ཤིས་བརྗོད་སོགས་ཀྱང་སྤྲོ་ན་བྱའོ། །དེ་ལྟར་རྫོགས་པའི་སངས་རྒྱས་ཀརྨ་པ་བཅུ་གསུམ་བདུད་འདུལ་རྡོ་རྗེའི་བླ་མའི་རྣལ་འབྱོར་མཆོད་ཕྲེང་གིས་བརྒྱན་པ་ཞིག་དགོས་ཞེས་དད་བརྩོན་གྱིས་ཉེ་བར་ཕྱུག་པ་དགེ་སློང་བསོད་ནམས་དབང་རྒྱལ་གྱིས་ས་སྤྱོད་གསུང་གི་གནས་མཆོག་དཔལ་ཀརྨའི་དགོན་ནས་བསྐུལ་བའི་ངོར་མཐོན་མཐིང་ཅོད་པན་འཆང་བ་བཅུ་གསུམ་པ་དང་། རཱ་གའི་ཅོད་པན་འཆང་བ་བཅུ་པ་བཅས་རྩོད་དུས་ཀྱི་རྡོ་རྗེ་འཆང་ཉིད་དུ་ངེས་པའི་བློ་ཅན། རྒྱལ་བ་གཉིས་ཀྱིས་རྗེས་སུ་འཛིན་པ་སི་ཏུ་སྤྲུལ་སྐུ་པདྨ་ཉིན་བྱེད་དབང་པོས་དཔལ་སྤུངས་ཐུབ་བསྟན་ཆོས་འཁོར་གྱི་གཙུག་ལག་ཏུ་བཀོད་པ་འགྲོ་རྣམས་ཐར་པའི་རྒྱ་མཚོར་ཆོས་ཀྱི་བདུད་རྩིའི་དཔལ་ལ་སྤྱོད་ནས་དཔལ་ལྡན་བླ་མ་ཆེན་པོའི་གོ་འཕང་ཐོབ་པའི་རྒྱུར་གྱུར་ཅིག །སརྦ་མདྒ་ལཾ། སུ་ཛ་ཡནྟུ།། །།
བླ་མའི་མཆོད་ཆོག་ནམ་མཁའ་ཡེ་དྭངས་ཀྱི་སྨིན་དབང་དང་བསྐང་བཤགས་ལྷན་ཐབས་སུ་བསྡེབས་པ།
བླ་མའི་མཆོད་ཆོག་ནམ་མཁའ་ཡེ་དྭངས་ཀྱི་སྨིན་དབང་དང་བསྐང་བཤགས་ལྷན་ཐབས་སུ་བསྡེབས་པ་བཞུགས་སོ། །གུ་རུ་དྷརྨ་ཀཱ་ཡ་ན་མཿའདིར་བླ་སྒྲུབ་མཆོད་པ་དང་འབྲེལ་བའི་སྤྲོས་མེད་དོན་གྱི་དབང་བཞི་ལེན་པ་ནི་གཞུང་དུ་གསལ་ནའང་། སྤྲོས་པ་ལ་དགའ་བའི་སྐལ་བ་དང་ལྡན་པ་རྣམས་ཀྱི་ངོར་གསང་སྔགས་བླ་མེད་ལུགས་ཀྱི་སྨིན་དབང་གིས་རྒྱུད་བརླན་པའི་གདམས་པ་སྤེལ་བ་བྱ་སྟེ། དེའང་དང་པོ་བཤམས་བཀོད་ལ། བུམ་སྟེགས་པདྨ་འདབ་བརྒྱད་ཀྱི་སྟེང་དུ་ལྔ་ཚན་ལྔའི་རྫས་དང་རྒྱུན་འབབ་ཆུས་སུམ་གཉིས་བཀང་པའི་བུམ་པ་མཚན་ཉིད་དང་ལྡན་པ་ལ་ཁ་རྒྱན་དང་། དུང་ཆོས། གཟུངས་རྡོར་སོགས་བཤམས། གཞན་ཡང་དབང་རྫས་ཀྱི་རིགས་དབུ་རྒྱན། རྡོ་རྗེ། དྲིལ་བུ། མིང་དབང་གི་རྡོར་དྲིལ། ཐོད་པ་བདུད་རྩི་དམ་
རྫས་ཀྱིས་གཏམས་པ། གཟུངས་མའི་ཙཀླི། དམ་ཆུ། མཎྜལ་བཀྱེ་བསྡུའི་ཆས་སོགས་དང་ཉེ་བར་མཁོ་བ་རྣམས་ཀྱང་འདུ་བགྱིད་ཅིང་། ལས་བུམ་ཡང་གང་བདེར་བཞག །སླར་དགོས་རྒྱུའི་སྔོན་གཏོར་ཞིག་ཀྱང་བཤམས། སློབ་དཔོན་གྱི་མདུན་དུ་གཡོན་ནས་བརྩམས་ཏེ་ནང་མཆོད། ཅང་ཏེའུ། རྡོར་དྲིལ། ནས་བཟེད་རྣམས་བཀོད་ལ། གཉིས་པ་གཞུང་ལྟར་གྱི་གདོན་བྱ་རྣམས་མཐར་ཆགས་སུ་བཏོན་ཏེ་མདུན་བསྐྱེད་བསྙེན་པ་བཅས་ཟིན་ནས་བུམ་པ་བདུད་རྩིས་བསངས་ཞིང་། ༀ་མ་ཧཱ་ཤཱུ་ནྱ་ཏཱ་སོགས་དང་། ཆོས་རྣམས་མི་དམིགས་སྟོང་པ་ཉིད་དུ་གྱུར། །བྷྲཱུྃ་ལས་རིན་ཆེན་བུམ་པ་མཚན་རྫོགས་ཀྱི། །དབུས་སུ་པད་སྡོང་ཡལ་ག་ལྟར་གྱེས་པའི། །སོགས་མདུན་བསྐྱེད་ཇི་བཞིན་ལ། མི་མངོན་ཆོས་དབྱིངས་གནས་ནས་རྩ་གསུམ་གྱི། །དཀྱིལ་འཁོར་བསྐྱེད་པ་དང་འདྲའི་ཡེ་ཤེས་སེམས། །སྤྱན་དྲངས་བུམ་ལྷར་གཉིས་སུ་མེད་པར་ཐིམ། །རྡོ་རྗེ་བསྡུ་བའི་རྒྱས། ༀ་ཤྲཱི་མཱན་གུ་རུ་མཎྜལ་ས་པ་རི་ཝཱ་ར་བཛྲ་ས་མ་ཡ་ཛཿཞེས་སྤྱན་དྲངས་ཏེ། ཛཿཧཱུྃ་བྃ་ཧོཿདབྱེར་མེད་དུ་གྱུར་པར་མོས་ལ་དབང་བསྐུར་བ་ནི། སླར་ཡང་ཐུགས་ཀའི་འོད་ཟེར་གྱིས། །དབང་ལྷ་སྤྱན་དྲངས་ཁྲུས་གསོལ་ཞིང་། །ཆུ་ཞབས་གྱེན་བརྟེན་རིགས་ལྔ་ཡིས། །རྒྱས་གདབ་ལྷ་རྣམས་རང་ཐིམ་གྱུར། །གཞུང་ལྟར་མཆོད་པ་བྱིན་གྱིས་བརླབས་ལ། མཐའ་ཡས་ཞིང་ཁམས་རབ་འབྱམས་ཀྱི། །དག་ཅིང་དྲི་མེད་མཆོད་པའི་རྫས། །སྣ་ཚོགས་བློ་ཡིས་བླངས་ནས་སུ། །དཀྱིལ་འཁོར་ལྷ་ལ་འབུལ་བར་བགྱི། །ༀ་བཛྲ་ཨརྒྷཾ་པྲ་ཏཱིཙྪ་སྭཱ་ཧཱ།
དེ་བཞིན་དུ། པཱ་དྱཾ་ནས། ཤབྡའི་བར་གྱིས་མཆོད། གཙོ་འཁོར་རྣམས་ཀྱི་ཐུགས་ཀར་ཟླ་སྟེང་ཧཱུྃ། །དེ་མཐར་སྔགས་ཕྲེང་འོད་ཟེར་བདུད་རྩིའི་རྒྱུན། །བབས་པས་བུམ་པ་གང་ཞིང་སླར་འོད་འཕྲོས། །བདག་གཞན་འགྲོ་བའི་སྡིག་སྒྲིབ་ཀུན་དག་གྱུར། །པར་བསམས་ལ་སྔགས་ཚན་ལྔ་པོ་སོ་སོར་བཟླའོ། །མཐར་དུང་ཆོས་ཀྱི་ཆུ་བུམ་བར་ཕུལ་ལ། ༀ་ཤྲཱི་མཱན་གུ་རུ་མཎྜལ་ཨརྒྷཾ་པྲ་ཏིཙྪ་སྭཱ་ཧཱ། །ཞེས་མཆོད་ཡོན་འབུལ་ཞིང་། བུམ་ལྷ་འོད་ཞུ་དག་བྱེད་ལྷ་ཆུར་གྱུར། །པུཥྤེ་སོགས་ནས། ནཻ་ཝི་དྱེ་ཨཱཿཧཱུྃ་གིས་མཆོད། དེ་ནས་གཟུངས་རྡོར་ལས་བུམ་ཁར་སྤོ་ནས་ལས་ལྷ་བསྐྱེད་པ་ནི། བིགྷྣཱན་གྱིས་བསངས་། སྭ་བྷཱ་ཝས་སྦྱངས། ལས་བུམ་དབུས་སུ་པད་ཉིའི་སྟེང་། །བགེགས་མཐར་བྱེད་པ་སྐུ་མདོག་མཐིང་། །རྡོ་རྗེ་ཞགས་བསྣམས་ཁྲོ་ཆས་རྫོགས། །ཐུགས་ཀར་ཧཱུྃ་མཐར་སྔགས་ཕྲེང་གསལ། ༀ་ཨཱཿབིགྷྣཱན་སོགས་ཉེར་གཅིག་བརྗོད་ལ་མཐར་བུམ་ཆུའི་བསང་གཏོར་བཅས། བསྲུང་དང་བཟློག་པའི་ཕྲིན་ལས་མཛོད། །ཁྲོ་རྒྱལ་འོད་ཞུ་བུམ་ཆུར་གྱུར། །པར་མོས་ལ། གསུམ་པ་བདག་ཉིད་འཇུག་ཅིང་དབང་ལེན་པ་ནི། རང་ཡི་དམ་དུ་གསལ་བཞིན་པར། མདུན་བསྐྱེད་ལྷ་ཚོགས་རྣམས་ཀྱིས་དབང་གི་བྱ་བ་མཛད་པར་དམིགས་ལ། ལས་བུམ་གྱི་ཁྲུས། ཇི་ལྟར་བལྟམས་པ་སོགས་ནས། ས་མ་ཡ་ཤྲི་ཡེ་ཧཱུྃ་བར་དང་། གཞུང་གི་མཎྜལ། ཞིང་ཁམས་ཡང་དག་སོགས་ནས། ས་མ་ཡེ་ཨཱཿཧཱུྃ། བར་གྱིས་ཕུལ། དེ་ནས་གསོལ་བ་གདབ་བ་ནི། ཀྱཻ། དཔལ་ལྡན་བླ་མ་རྡོ་རྗེ་འཛིན། །དཀྱིལ་འཁོར་ཀུན་བདག་
ཧེ་རུ་ཀ། བདག་ལ་སྨིན་བྱེད་ཟབ་མོའི་དབང་། །རྒྱུད་གྲོལ་ཐུགས་རྗེས་བཟུང་དུ་གསོལ། །འདི་རིགས་ལན་གསུམ་མམ་རེ་རེས་འཐུས་སོ། །སློབ་དཔོན་གྱིས། ཀྱེ་ཧོཿའདིར་ཚོགས་རིགས་ལྡན་གྱི། །རྡོ་རྗེ་སློབ་མ་ཁྱེད་རྣམས་ཉོན། །གསང་སྔགས་དབང་བཞིའི་ལམ་ཟབ་མོའི། །སྣོད་དང་ལྡན་པའི་ལས་ཅན་དག །ཞུགས་ཀྱི་དེ་བས་སྐལ་དམན་རྣམས། བལྟ་བར་མི་དབང་དེངས་པར་རིགས། །དེའི་ལན་དུ། ཨེ་མ། བདག་ཅག་ངེས་པར་འཁོར་བ་ལས། །ཐར་འདོད་བྱང་ཆུབ་སེམས་བསྐྱེད་ཅིང་། །གསང་བ་སྔགས་ཀྱི་དམ་ཚིག་རྣམས། །ནམ་ཡང་མི་སྤང་སྲོག་ལྟར་བསྲུང་། །ཞེས་ཞུའོ། །དེ་ནས་སློབ་དཔོན་གྱིས་རྡོ་རྗེ་སྤྱི་བོར་བཞག་ལ། ཧོཿགསང་བ་ཆེན་པོའི་དཀྱིལ་འཁོར་དུ། །དེང་ནས་འཇུག་གོ་དམ་མེད་ལ། །སྨྲ་བར་མི་རུང་དམ་བཅའ་བཟུང་། །དེ་ཕྱིར་ཐ་ཚིག་ངོ་བོར་འཚལ། །སློབ་མས། བཛྲ་ས་མ་ཡ་རཀྵཿབརྗོད་ལ་དམ་ཆུ་བླུད། དེ་ནས་གཞུང་ལྟར་གྱི་སྔོན་གཏོར་བྱིན་གྱིས་བརླབས་ལ་བསྔོ་ཞིང་འབུལ་ཏེ་སྲུང་འཁོར་བཅས་ཟིན་ནས། ཀུན་རྫོབ་དོན་དམ་བྱང་ཆུབ་སེམས་བསྐྱེད་ཕྱིར། །སྙིང་གར་ཟླ་སྟེང་རྡོ་རྗེ་རྩེ་ལྔ་བསྒོམ། །ༀ་སརྦ་ཡོ་ག་ཙིཏྟཾ་ཨུཏྤཱ་ད་ཡཱ་མི། །ལན་གསུམ་སྙིང་གར་རྡོ་རྗེས་རེག་ལ། སུ་ར་ཏེ་ས་མ་ཡ་སྟྭཾ་ཧོཿསིདྡྷི་བཛྲ་ཡ་ཐཱ་སུ་ཁཾ། ཡེ་ཤེས་དབབ་ཕྱིར་གསོལ་བ་གདབ་པ་ནི། བཀའ་བརྒྱུད་བླ་མ་དཔའ་བོ་རྣལ་འབྱོར་ཚོགས། །ཡེ་ཤེས་ཆོས་སྐྱོང་རྣམས་ཀྱིས་བདག་བྱིན་རློབས། །ལན་གསུམ། དེ་ནས་དབང་གི་གཞི་འགོད་པའི་དོན་
དུ་དམིགས་པ་ནི། སྔར་བསྐྱེད་པ་ཇི་ལྟར་སླར་ཡང་སློབ་མའི་དོན་དུ་གསལ་གདབ་པ་ནི། མདུན་མཁར་གཞལ་ཡས་དཀྱིལ་འཁོར་གྲུ་བཞི་པ། །སྒོ་བཞི་རྟ་བབས་སོགས་མཐར་ཆགས་སུ་བཏོན་ལ། རབ་འབྱམས་ཞིང་རྣམས་མ་ལུས་སྐུ་ལ་རྫོགས། །བར་དང་། བདག་ཉིད་གཞན་ལ་དབང་བསྐུར་དུས་ཁྱེད་རང་བརྗོད་ལྷར་གསལ་ཐུགས་ཀའི་འོད་ཟེར་གྱིས། །སློབ་དཔོན་ཐུགས་རྒྱུད་བསྐུལ་ཞིང་སླར་འོད་འཕྲོས། །དཀྱིལ་འཁོར་ལྷ་ཚོགས་བདེ་ཆེན་རྡོ་རྗེའི་དབྱིངས། །ཟག་མེད་ཐུགས་དམ་རྒྱུད་བསྐུལ་འོག་མིན་དང་། །རང་བཞིན་གནས་ནས་ཡེ་ཤེས་སྤྱན་དྲངས་ཏེ། །མཚོ་ལ་ཆར་བབས་ལྟ་བུ་སློབ་མ་ལ། །སིབ་སིབ་ཐིམ་པས་དབྱེར་མེད་རོ་གཅིག་གྱུར། །གུ་གུལ་དང་སྤོས་བསྲེག་ཅིང་རོལ་མོའི་སྒྲ་དང་བཅས། སྟེང་དག་པ་འོག་མིན་སོགས་ཀྱིས་བྱིན་འབེབས་ཤིང་དབྱངས་དང་བཅས། དབང་བསྐུར་ལ་བྱིན་ཆེན་དབབ་དུ་གསོལ། །བར་དང་། ༀ་ཨཱཿགུ་རུ་བཛྲ་དྷྲྀཀྲ་དེ་ཝ་ཌཱཀྐཱི་ནཱི་དྷརྨ་པཱ་ལ་ས་པ་རི་ཝཱ་ར་ཛྙཱ་ན་བཛྲ་ཨཱ་ཝེ་ཤ་ཡ་ཨཱ་བེ་ཤ་ཡ་ཨ་ཨ་ཨཿལན་ཁ་ཤས་བརྗོད་ཅིང་སྣང་བ་འགྱུར་ངེས་སུ་བྱིན་ཕབ། དེ་ནས་ངོ་སྤྲད་རྡོ་རྗེའི་གླུ་བླང་བ། ལྟོས་ཤིག་རང་སེམས་སྣང་བའི་རྩལ། །མ་སྐྱེས་མི་འགགས་བརྗོད་བ་བྲལ། །བློ་འདས་བདེ་ཆེན་གཉུག་མའི་གཤིས། །གསལ་ལ་དེར་འཛིན་མེད་པར་སྐྱོངས། །ཡེ་ཤེས་བརྟན་ཕྱིར་རྡོ་རྗེ་སྤྱི་བོར་བཞག་ལ། ཏིཥྛ་བཛྲ་ཞེས་བརྗོད། དབང་དངོས་གཞིའི་དོན་དུ། ས་གཞི་སྤོས་ཆུས་སོགས་མཎྜལ་ཕུལ་ལ། གསོལ་གདབ་ནི། ཨེ་མ། དཔའ་བོ་རྣལ་འབྱོར་མ་
དཔལ་ཚོགས། །བདག་ལ་དགོངས་མཛོད་དབང་བཞི་ཡི། །ཆུ་བོ་ཆེན་པོས་རྒྱུད་སྨིན་ཅིང་། །གྲོལ་བ་མངོན་གྱུར་བྱིན་རློབས་མཛོད། །ལན་གསུམ། དེ་ནས་དབང་རྫས་རྣམས་རིམ་བཞིན་ཐོགས་ལ། དཀྱིལ་འཁོར་ལྷ་ཚོགས་ཐུགས་ཀའི་འོད་ཟེར་གྱིས། །དྲངས་པའི་དབང་ལྷ་རིགས་ལྔས་དགོངས་པ་མཛད། །སེམས་དཔའ་སེམས་མ་རྣམས་ཀྱིས་བཀྲ་ཤིས་པའི། །མེ་ཏོག་འཐོར་ཞིང་མཆོད་པའི་ལྷ་མོས་མཆོད། །ཁྲོ་བོ་ཁྲོ་མོས་སྲུང་བའི་ལས་མཛད་ཅིང་། །རིགས་ཀྱི་ཡུམ་ལྔས་ཕྱག་ན་བུམ་པ་བཟང་། །ཡེ་ཤེས་བདུད་རྩིའི་བཅུད་བཀང་འཛིན་པ་དང་། །རིན་ཆེན་པྲོག་ཞུ་ཅོད་པན་དར་ཆུན་འཕྱངས། །རྩེ་མོ་དགུ་པའི་རྡོ་རྗེ་འོད་འབར་བ། །དྲིལ་བུ་གྲག་སྟོང་རང་སྒྲ་སྒྲོག་པ་དང་། །མིང་གི་དབང་མཆོག་རྡོ་རྗེ་དྲིལ་བུ་སོགས། །བསྣམས་ནས་དབང་མཆོག་དམ་པ་སྦྱིན་པར་བྱ། །དང་པོ་བུམ་པས་དབང་བསྐུར་བ་ནི་མགོར་བཞག་ལ། ཇི་ལྟར་བལྟམས་པ་སོགས་ནས། ས་མ་ཡ་ཤྲི་ཡེ་ཧཱུྃ་བར་དང་། བུམ་ཆུ་བཏུང་གཞུག་ལ། ༀ་བཛྲོ་ད་ཀ་ཨ་བྷི་ཥིཉྩ་ཧཱུྃ་སུ་ར་ཏེ་སྟྭཾ་ཨ་ཧཾ། བུམ་ཆུས་བསང་གཏོར་ཡང་བྱ་ཞིང་། དེ་ནས་པྲོག་ཞུ་ཐོགས་ལ། ལོངས་སྤྱོད་ཡོངས་རྫོགས་དབུ་རྒྱན་དབང་། །རིན་ཆེན་དཔལ་དང་ལྡན་དབང་བསྐུར། །ༀ་ཨཱཿམུ་ཀུ་ཊ་ཨ་བྷི་ཥིཉྩ་ཧཱུྃ། སྤྱི་བོར་བཅིངས་ལ། ༀ་བཛྲོ་ད་ཀ་སོགས་ཆུ་དབང་སྔར་ལྟར་དང་། རྡོ་རྗེའི་དབང་ནི། སངས་རྒྱས་ཀུན་གྱི་ཐུགས་རྡོ་རྗེ། །ཆོས་བདུན་ཡོན་ཏན་ལྡན་པར་ཤོག །ༀ་བཛྲ་ཨ་བྷི་ཥཉྩ་ཧཱུྃ། ལན་གསུམ་དུ་རྡོ་རྗེ་
གསོར། ༀ་བཛྲོ་ད་ཀ་སོགས་དང་། དྲིལ་བུ་ཐོགས་ལ། ཐེག་ཆེན་ཆོས་ཀྱི་སྒྲ་དབྱངས་ཀྱིས། །འཁོར་བ་དོང་སྤྲུགས་དབང་ཐོབ་ཤོག །ༀ་བཛྲ་ཨ་དྷི་པ་ཏི་སྟྭཾ་ཨ་བྷི་ཥིཉྩཱ་མི་ཏིཥྛ་བཛྲ་ས་མ་ཡ་སྟྭཾ། དྲིལ་བུ་བཀྲོལ། ༀ་བཛྲོ་ད་ཀ་སོགས་དང་། མིང་དབང་ནི། བདེར་གཤེགས་ཀུན་གྱིས་དབུགས་དབྱུང་ཞིང་། །ལུང་བསྟན་མིང་དབང་མཆོག་ཐོབ་ཤོག །ༀ་བཛྲ་ས་ཏྭ་སྟྭཾ་ཨ་བྷི་ཥིཉྩཱ་མི་བཛྲ་ནཱ་མ་ཨ་བྷི་ཥེ་ཀ་ཏ་ཤྲཱི་ཧེ་རུ་ཀ་ཞེས་བྱ་བའོ། །རྡོར་དྲིལ་སྤྱི་བོར་བཞག་ནས་བཀྲོལ། ༀ་བཛྲོ་ད་ཀ་སོགས་སྔར་ལྟར་ཆུ་དབང་ཡང་བསྐུར། དེ་ལྟར་ཆུ་དང་ཅོད་པན་རྡོ་རྗེ་དང་། །དྲིལ་བུ་མིང་དབང་བསྐུར་བས་ཉོན་མོངས་ལྔ། །རྣམ་པར་དག་ཅིང་ཕུང་ལྔ་གནས་འགྱུར་ནས། །ཡེ་ཤེས་ལྔ་ཐོབ་རིགས་ལྔས་རྒྱས་གདབ་གྱུར། །དེ་ལྟར་རིག་པའི་དབང་ལྔ་བསྐུར་བ་ཡིས། །ལུས་སྒྲིབ་དག་ནས་བསྐྱེད་རིམ་བསྒོམ་པར་དབང་། །འབྲས་བུ་སྤྲུལ་སྐུའི་ས་བོན་རྒྱུད་ལ་སྨིན། །དེ་ནས་མཆོག་དབང་གོང་མ་རྣམ་གསུམ་ཆེད་དུ། ས་གཞི་སྤོས་ཆུས་སོགས་མཎྜལ་ཕུལ་ལ་གསང་དབང་ནི། ཀ་པཱ་ལ་དམ་རྫས་ཀྱིས་བཀང་བ་སྤྱི་བོ་དང་མགྲིན་པར་བཞག་སྟེ། དཀྱིལ་འཁོར་ལྷ་ཚོགས་བདེ་སྟོང་རང་བཞིན་གྱི། །ཐབས་ཤེས་བྱང་སེམས་རྒྱུན་གྱིས་དབང་བསྐུར་རོ། །བདུད་རྩི་བཏུང་ལ། ཨ་ཧོཿམ་ཧཱ་སུ་ཁ་ཨ་བྷི་ཥིཉྩ་ཏུ་མཱཾ། དེ་ལྟར་གསང་དབང་ཐོབ་ནས་ངག་སྒྲིབ་བྱང་། །རྫོགས་རིམ་བསྒོམ་དབང་འབྲས་བུ་ལོངས་སྐུ་འགྲུབ། །དེ་ནས་ཤེར་དབང་ནི། རིག་མའི་ཙཀླི་གཏད་ལ། དཀྱིལ་འཁོར་པ་ལས་གཟུངས་མ་མཚན་ལྡན་སྤྲོས། །སློབ་མར་སྙོམས་ཞུགས་
དགའ་བཞིའི་ཡེ་ཤེས་མྱོང་། །དེ་ལྟར་ཤེར་ཡེའི་དབང་ཐོབ་སྡིག་སྒྲིབ་དག །བདེ་སྟོང་བསྒོམ་དབང་འབྲས་བུ་ཆོས་སྐུ་འགྲུབ། །དེ་ནས་བཞི་པ་ཚིག་དབང་ནི། སློབ་མ་རྣམས་ལུས་གནད་བཅས་ལ། སློབ་དཔོན་གྱིས། སྣང་སྲིད་འཁོར་འདས་ཆོས་ཐམས་ཅད། །སེམས་ལས་གུད་དུ་མ་གྲུབ་ཅིང་། །སྤྲོས་བྲལ་ནམ་མཁའི་རྡོ་རྗེ་ཆེ། །ཡང་དག་ཡེ་ཤེས་ངོ་བོར་གསལ། །ཅེས་ངོ་སྤྲད། ཕྱག་ཆེན་ལ་བསྟེན་བཞི་པའི་དབང་བསྐུར་ཐོབ། །སྒོ་གསུམ་སྒྲིབ་དག་ངོ་བོ་ཉིད་སྐུ་འགྲུབ། །དེ་ནས་སློབ་དཔོན་དུ་བསྒྲུབ་པའི་དབང་གི་དོན་དུ། ས་གཞི་སྤོས་ཆུས་སོགས་མཎྜལ་ཕུལ། སློབ་མ་སླར་ཡང་བཛྲ་ས་ཏྭ་གསལ། །རང་འོད་ཡུམ་འཁྱུད་དབང་ལྷ་བུམ་པའི་ཆུས། །ཇི་ལྟར་བཅོམ་ལྡན་བལྟམས་ཚེ་ཁྲུས་གསོལ་བཞིན། །དྲི་མེད་ལྷ་ཆུས་དེང་འདིར་དབང་བསྐུར་རོ། །ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུྃ། །ཞེས་བུམ་དབང་བསྐུར་ཞིང་བཏུང་དུའང་བཅུག །རྡོར་དྲིལ་གཏད་ལ། ཧཱུྃ་དང་ཨཱཿལས་བྱུང་བའི་རྡོ་རྗེ་དྲིལ། །བསྣོལ་ཐབས་སུ་འཛིན་ལ། མ་ཧཱ་བཛྲ་ཧཱུྃ་བཛྲ་གྷཎྜེ་ཨཱཿདཀྲོལ་ལ། གསང་གསུམ་དམ་ཚིག་བརྟན་ཞིང་དེང་ཕྱིན་ཆད། །འགྲོ་བའི་སློབ་དཔོན་དམ་པར་དབུགས་དབྱུང་ངོ་། །ལུང་བསྟན་པ་ནི། སློབ་དཔོན་གྱིས་རྡོར་དྲིལ་དང་བཅས། གཡོན་པས་ཆོས་གོས་ཀྱི་གྲྭ་རི་དྭགས་ཀྱི་རྣ་བ་ལྟར་འཛིན། གཡས་མི་འཇིགས་པའི་ཕྱག་རྒྱ་དང་བཅས། ཀྱེ། དེང་ནས་སངས་རྒྱས་སྲས་སུ་གྱུར། །སེམས་ཅན་དོན་ཆེན་བླ་མེད་སྤྱོད། །མ་འོངས་བྱང་ཆུབ་བདུད་རྩི་བརྙེས། །ཆོས་འཁོར་
སྒྱུར་རྒྱལ་མཆོག་ཏུ་འགྱུར། །དེ་ནས་དབང་གི་རྗེས་ནི། སློབ་མས། ཧོཿདུས་གསུམ་སངས་རྒྱས་ངོ་བོ་ཉིད། །གང་གི་དྲིན་ལས་ཟབ་ལམ་གྱི། །སྨིན་གྲོལ་དེང་ཐོབ་རྩ་བ་དང་། །ཡན་ལག་དམ་ཚིག་ཚུལ་བཞིན་བསྲུང་། །ལན་གསུམ་དང་། །གཏང་རག་གི་མཎྜལ། ཞིང་ཁམས་ཡང་དག་ནས། སངས་རྒྱས་མྱུར་ཐོབ་ཤོག །བར་ཚང་མ་བརྗོད་ལ་ཕུལ། སླར་ཡང་། དེང་བཟུང་སྙིང་པོ་བྱང་ཆུབ་བར། །རྡོ་རྗེ་ཅན་ཞབས་ཚེ་རབས་སུ། །མི་འབྲལ་བསྒྲུབས་པའི་མཆོད་པ་ཡིས། །བསྙེན་ཅིང་ཐུགས་རྗེས་སྐྱོང་གྱུར་ཅིག །ལན་གསུམ་སོགས་ཀྱིས་གསོལ་བ་སྙིང་ནས་གདབ་བར་བྱ་ཞིང་། བསོད་ནམས་འདི་ཡིས་ཐམས་ཅད་གཟིགས་པ་ཉིད། །སོགས་ཀྱང་བརྗོད་པར་བྱའོ། །དེ་ནས་ཚོགས་ཀྱི་འཁོར་ལོ་བསྐོར་བ་དང་རྗེས་ཀྱི་བྱ་བ་རྣམས་གཞུང་བཞིན་བྱའོ།། །།དེ་ནས་ཐུགས་དམ་བསྐང་མཆོད་སྤྲོ་ན། འཆད་འགྱུར་ཇི་བཞིན་བསྐང་རྫས་མཆོད་པའི་བྱེ་བྲག་རྣམས་གང་འབྱོར་འདུ་བྱས་ལ། མར་མེ་རྣམས་སྤར་ཞིང་སྤོས་བསྲེག །ནང་མཆོད་སྦྲེང་། གཞུང་གི་ཚོགས་ཕུད་འབུལ་བའི་འདོད་གསོལ་གྱིས། བཅོལ་པའི་ཕྲིན་ལས་མཛོད་ཅིག །ཅེས་པའི་མཐར་རོལ་མོའི་སྒྲ་སྣ་ཚོགས་ཀྱིས་གཟི་བྱིན་བསྐྱེད་ཅིང་། རྣལ་འབྱོར་པ་རྣམས་ལྟ་སྒོམ་དང་ལྡན་པས་དད་པའི་སེམས་ཀྱིས་དྲངས་ནས། གདུང་བའི་ང་རོས་བསྐུལ་བའི་དབྱངས་དང་བཅས་འདི་སྐད་དོ། །ཧཱུྃ་ཧྲཱིཿའགྱུར་མེད་སྤྲོས་བྲལ་བདེ་ཆེན་ཀློང་། །རང་བྱུང་ལྷུན་གྲུབ་འོད་གསལ་བ། །དངོས་ཀུན་སྣ་ཚོགས་མཉམ་ཉིད་ངང་། །འཁོར་འདས་ཀ་ནས་དག་པའི་དབྱིངས། །ཀུན་བཟང་བརྡལ་ཁྱབ་ཆེན་པོའི་མདངས། །དོན་དམ་ཡེ་ཤེས་དཀྱིལ་
འཁོར་ལྷ། །གཤེགས་བཞུགས་མཚན་མ་མི་མངའ་ཡང་། །ཀུན་རྫོབ་སྒྱུ་མའི་སྣང་ཆ་ལས། །སྒྲུབ་པའི་རིག་འཛིན་རྣལ་འབྱོར་པས། །མོས་གུས་གདུང་བས་བསྐུལ་ལགས་ན། །ཆུ་ཟླའི་གར་གྱིས་བརྩེ་བ་ཡི། །ཐུགས་རྗེ་བྲི་གང་དང་བྲལ་བ། །རྩ་གསུམ་རྒྱལ་བ་རབ་འབྱམས་རྣམས། །འགྲོ་བའི་དོན་དུ་སྐུ་བསྐྱོད་ལ། །བླ་མེད་གསང་ཆེན་རོལ་པ་ཡི། །ཧེ་རུ་ཀ་གནས་དུར་ཁྲོད་ཀྱི། །གཞལ་ཡས་ཚོགས་ཁང་འབར་བ་འདིར། །གསང་བ་མཆོག་གི་མཆོད་པ་རྣམས། །གཞུང་བཞིན་ཇི་ལྟར་བཀྲམ་ནས་སུ། །ཚར་དུ་དངར་བའི་དམ་ཚིག་རྫས། །གདོད་ནས་རྣམ་དག་ར་ས་ཡ། །མ་ཧཱ་པཉྩ་ཨ་མྲྀ་ཏ། །ཚེ་གལ་བ་ལིཾ་རི་ལྟར་བརྗིད། །ཐབས་ཤེས་དབྱེར་མེད་རྒྱན་དང་ལྡན། །དམར་ཆེན་རཀྟའི་རྒྱ་མཚོ་བསྐྱིལ། །རྦ་རླབས་ཕྲེང་བ་ཆལ་ཆིལ་གཡོ། །ག་ཎ་ཙཀྲ་ཟག་མེད་ཀྱི། །ཡེ་ཤེས་བདུད་རྩིའི་རང་བཞིན་ཅན། །རྡོ་རྗེའི་མཆོད་ཡོན་ཞབས་བསིལ་བ། །ཆུ་དང་ཐང་སྐྱེས་སྤོས་ངད་ལྡང་། །སྣང་ཞིང་གསལ་བྱེད་དྲི་ཡི་ཆབ། །བཤོས་གཙང་རྒྱུད་མངས་རོལ་སྙན་སྒྲོགས། །གཟུགས་སྒྲ་དྲི་རོ་རེག་ཆོས་དང་། །རྡོ་རྗེ་ལྷ་མོ་བཅུ་དྲུག་སོགས། །མཉེན་ལྕུག་འཁྲིལ་ལྡེམ་གར་སྟབས་བསྒྱུར། །བདེ་སྟོང་མཆོད་པས་དགྱེས་བསྐྱེད་ཅིང་། །སྟོང་གསུམ་འཇིག་རྟེན་སྣང་སྲིད་ཞིང་། །རི་དབང་ལྷུན་པོ་གླིང་ཆེན་བཞི། །གླིང་ཕྲན་ཁོར་ཡུག་མུ་ཁྱུད་མཛེས། །ཉི་ཟླ་བཀྲ་ཤིས་རྫས་རྟགས་
བརྒྱད། །རྒྱལ་སྲིད་ཉེ་བའི་རིན་ཆེན་བདུན། །རྩེ་མོར་ཆོས་བཟང་ལྷའི་ཕོ་བྲང་། །ལོངས་སྤྱོད་དཔལ་འབྱོར་ཕུན་ཚོགས་རྣམས། །བཀོད་ལེགས་ཕྱུར་བུར་སྤུངས་ནས་སུ། །ཕྱི་ནང་གསང་བའི་བསྐང་མཆོད་རྫས། །ཀུན་བཟང་རྣམ་ཐར་ལས་ལྷག་པ། །དངོས་འབྱོར་ཡིད་ཀྱིས་མངོན་སྤྲུལ་ནས། །དད་དང་མོས་བློ་རྣམ་དག་པའི། །དབྱངས་ཀྱི་ཡན་ལག་རྒྱ་མཚོ་ཡིས། །དྲངས་པའི་མི་ཤིགས་ནཱ་དའི་སྒྲ། །མཐའ་ཡས་ཞིང་ཁམས་རྒྱས་འགེངས་པས། །བསྐང་ངོ་བསྐལ་པར་ཐུགས་དམ་བསྐང་། །འོག་མིན་སྟོན་པ་ཆོས་ཀྱི་སྐུ། །གདོད་མའི་མགོན་པོ་ཡེ་སངས་རྒྱས། །བཛྲ་དྷ་རའི་ཐུགས་དམ་བསྐང་། །རྣམ་གྲོལ་ཐར་མཆོག་ལམ་སྟོན་གསོལ། །པོ་ཏ་ལ་ཡི་རི་བོ་ནས། །ཚེ་དབང་ཡིད་བཞིན་དཔལ་སྟེར་ཡུམ། །ཨཱཪྱ་ཏཱ་རེའི་ཐུགས༴ རྡོ་རྗེའི་ཆོས་བདུན་ལྡན་བྱིན་རློབས། །མཁའ་སྤྱོད་པདྨ་འོད་ཞིང་དུ། །འཆི་མེད་གྲུབ་བརྙེས་ཨོ་རྒྱན་རྗེ། །པྲ་ཝ་ཀ་རའི༴ མི་འགྱུར་རྟག་བརྟན་ཚེ་དངོས་སྩོལ། །ཡོངས་རྫོགས་ཐུབ་བསྟན་རྒྱལ་མཚན་འཛིན། །དུས་གསུམ་ཀུན་མཁྱེན་ཀརྨ་ཀ། དྷརྨ་ཀཱིརྟིའི༴ ཤེས་བྱ་ཐོགས་པ་མེད་བྱིན་རློབས། །སྣང་སྲིད་ཟིལ་གནོན་རྫུ་འཕྲུལ་ཅན། །གདུལ་དཀའ་མཐར་བྱེད་དཔའ་བོ་ཆེ། །ཆོས་ཀྱི་བླ་མའི༴ ཁམས་གསུམ་དབང་སྒྱུར་མཐུ་སྟོབས་སྩོལ། །མཁྱེན་རབ་ཀེ་ལཱ་ཤ་རིའི་ངོགས། །གཞན་སྟོང་སྨྲ་བའི་གདོང་ལྔ་པ། །རང་བྱུང་རྡོ་རྗེའི༴ མི་འཇིགས་སྤོབས་པ་ཐོབ་བྱིན་རློབས། །
ལུང་རིགས་དཔུང་ཚོགས་ཡན་ལག་བཞིས། །ལོག་ལྟའི་རྒོལ་པ་སྤ་བཀོང་བའི། །འཛམ་གླིང་ཆོས་གྲགས༴ ཕྱོགས་ལས་རྣམ་རྒྱལ་བློ་གྲོས་སྩོལ། །མཚན་དཔེ་རང་བཞིན་ལྷུན་གྱིས་གྲུབ། །རྩོལ་མེད་འགྲོ་དོན་རྒྱུན་མི་ཆད། །དེ་བཞིན་གཤེགས་པའི༴ འབྲེལ་ཚད་རྫོགས་སངས་རྒྱས་བྱིན་རློབས། །ཐེག་གསུམ་མཐར་ཐུག་ཟབ་མོའི་དོན། །ལེགས་བཤད་ཆོས་ཀྱི་རྒྱལ་ཐབས་འཆང་། །མཐོང་བ་དོན་ལྡན༴ སྒྲིབ་བྲལ་ལྷན་སྐྱེས་ཡེ་ཤེས་སྩོལ། །ཐུགས་རྗེའི་འོད་དཀར་ཞི་བསིལ་གྱིས། །ཉོན་མོངས་གདུང་སེལ་སྨན་གཅིག་པུ། །རང་བྱུང་མཚོ་སྐྱེས༴ གནས་ལུགས་མངོན་གྱུར་བྱིིན་གྱིས་རློབས། །ཟབ་གསལ་ངོ་བོ་ཉིད་དབྱིངས་ལས། །ཇི་ལྟ་ཇི་སྙེད་ཐམས་ཅད་མཁྱེན། །དབྱངས་ཅན་དགའ་བའི༴ ཤེས་རབ་གསུམ་གྱི་སྣང་བ་སྩོལ། །ཨེ་ཝྃ་ཟུང་འཇུག་རོལ་བའི་ཀློང་། །བདེ་སྟོང་མི་ཕྱེད་རྡོ་རྗེ་ཅན། །མི་ཕམ་ཆོས་དབང༴ སྐྱེ་འགགས་གནས་བྲལ་བྱིན་གྱིས་རློབས། །ཀུན་ཁྱབ་འགྱུར་མེད་མཁའ་ཡངས་པོར། །བདེ་ཆེན་དྲྭ་བ་སྡོམ་པའི་གར། །ཆོས་དབྱིངས་རྡོ་རྗེའི༴ མི་རྟོག་ཏིང་འཛིན་རྒྱུད་སྨིན་སྩོལ། །སྲིད་མཚོ་སྒྲོལ་བའི་དེད་དཔོན་ཆེ། །ཡང་དག་ཡེ་ཤེས་ལྔའི་བདག་ཉིད། །ཛྙཱ་ན་བཛྲེ༴ ལས་ཉོན་འཁྲུལ་འཁོར་བཟློག་བྱིན་རློབས། །སྲིད་ཞིའི་དགོས་འབྱུང་དཔག་བསམ་དབང་། །དོན་གཉིས་ཕུན་ཚོགས་ཆར་འབེབས་པ། །བོ་དྷི་བཛྲེ༴ བྱང་ཆུབ་སྙིང་བོར་དབུགས་དབྱུང་སྩོལ། །རིགས་དཀྱིལ་
ཁྱབ་བདག་འཁོར་ལོས་སྒྱུར། །ངེས་དོན་རྡོ་རྗེ་སློབ་དཔོན་མཆོག །བདུད་ལས་རྣམ་རྒྱལ༴ དབང་བཞི་ཡེ་ཤེས་ཐོབ་བྱིན་རློབས། །ལོངས་སྐུ་ངེས་པ་ལྔ་ལྡན་བདག །གར་དབང་རྡོར་འཆང་རྣམ་པར་འཕྲུལ། །ཆོས་གྲུབ་རྒྱ་མཚོའི༴ ཕྱག་རྒྱ་ཆེན་པོས་རྒྱུད་གྲོལ་སྩོལ། །སྒྲུབ་པའི་སྲོལ་གཏོད་བསྟན་པ་སྤེལ། །རྩོད་ལྡན་འགྲོ་བའི་དོན་སྤྱོད་པ། །རྩ་བརྒྱུད་བླ་མའི༴ དག་སྣང་ཕྱོགས་མེད་འབྱོང་བྱིན་རློབས། །གསང་མཆོག་དགྱེས་པའི་རོལ་པ་ན། །བྱ་སྦྱོད་རྣལ་འབྱོར་བླ་མེད་ཀྱི། །ཡི་དམ་ལྷ་ཚོགས༴ མཆོག་ཐུན་དངོས་གྲུབ་སྩལ་དུ་གསོལ། །སྣང་སྟོང་རྩ་རླུང་ཐིག་ལེ་དང་། །འདུ་འབྲལ་མེད་པར་གནས་ཞིང་སྐྱོང་། །དཔའ་བོ་འཁའ་འགྲོའི༴ བདེ་གསལ་ཉམས་རྟོགས་འཆར་བྱིན་རློབས། །དམ་ཚིག་གཉན་པོའི་ཕོ་བྲང་ནས། །ཆོས་སྐྱོང་མ་མགོན་ལྕམ་དྲལ་ཚོགས། །དམ་ཅན་སྲུང་མའི༴ ལས་བཞིའི་ཕྲིན་ལས་མྱུར་འགྲུབ་མཛོད། །དེ་ལྟར་ཡེ་ཤེས་དཀྱིལ་འཁོར་བའི། །རྩ་གསུམ་རབ་འབྱམས་རྒྱ་མཚོ་རྣམས། །བསྐང་ངོ་བསྐལ་པར་ཐུགས་དམ་བསྐང་། །འགལ་རྐྱེན་བར་ཆད་རྦོད་གཏོང་ཟློག །ཧོཿདགོངས་སུ་གསོལ་ལོ་རྩ་བ་གསུམ། །མི་མངོན་ཕྱོགས་བཅུའི་ཞིང་བཞུགས་པའི། །རྒྱལ་དང་རྒྱལ་བའི་གདུང་འཚོབ་རྣམས། །དེང་འདིར་གསན་ཅིང་དགོངས་བར་མཛོད། །བདག་སོགས་འཁྲུལ་བློ་གཟུང་འཛིན་དབང་། །བག་ཆགས་བརྟས་པས་ནོངས་གྱུར་པ། །སོ་ཐར་བྱང་སེམས་གསང་སྔགས་ཀྱི། །རྩ་བ་ཡན་ལག་དམ་ཉམས་པ། །
ཁྱད་པར་རྡོ་རྗེ་རྒྱལ་པོ་ལ། །ལོག་ལྟ་ཕ་མར་མ་གུས་དང་། །སྣོད་མིན་རྣམས་ལ་གསང་སྒྲོག་སོགས། །ཉམས་ཆག་བསྐང་ངོ་དག་ཚངས་སྩོལ། །འཁོར་འདས་གཉིས་ཆོས་ཐམས་ཅད་ཀུན། །ཡེ་ནས་མ་བཅོས་སྤྲོས་མཚན་དབེན། །རྣམ་དག་བདེ་ཆེན་གཉུག་མའི་གཤིས། །རང་རིག་སྐྱེ་བ་མེད་པའི་ཀློང་། །བསྐང་དང་བཤགས་བྱ་མ་གྲུབ་ཀྱང་། །ཆོས་ཉིད་འོད་གསལ་རྫོགས་པ་ཆེ། །དབྱེར་མེད་མ་ཧཱ་མུ་དྲའི་མདངས། །ཆོས་ཅན་རྟེན་འབྲེལ་རང་བཞིན་ལས། །འདའ་དཀའ་རྡོ་རྗེའི་བཀའ་གསང་གཉན། །སྤྱོད་པའི་རྣལ་འབྱོར་མཆེད་རྣམས་ཀྱིས། །རྨད་བྱུང་དམ་རྫས་ཚོགས་འཁོར་ལོའི། །བསྐང་མཆོད་བླ་མེད་ཕུལ་བའི་མཐུས། །བདག་དང་མཐའ་ཡས་སེམས་ཅན་གྱི། །དམ་ཚིག་ཉམས་ཆག་བྱང་གྱུར་ཅིག །ལས་ངན་སྡིག་སྒྲིབ་དག་གྱུར་ཅིག །འཁོར་བ་དོང་ནས་སྤྲུགས་གྱུར་ཅིག །ཀུན་བཟང་མཁའ་ཀློང་དབྱིངས་སུ་བསྐང་། །ཆོས་ཉིད་ངང་དུ་སོར་ཆུད་ཤོག །ས་མ་ཡ་ཨ་ཨ་ཨཱཿདེ་ནས་ཞིང་སྐྱོང་བ་རྣམས་དང་མཁའ་འགྲོའི་གཏོར་འབུལ་གཏང་། ཚོགས་ལ་ལོངས་སྤྱོད་པ། ལྷག་མ་དང་རྗེས་ཆོག་བྱིན་རླབས་བསྡུ་བ་སོགས་ཀྱང་བྱའོ། །དེ་ལྟར་སྨིན་དབང་དང་སྐོང་བཤགས་ཀྱི་རིམ་པ་འདི་དག་ཟབ་ལམ་སྤྱོད་པའི་སྐལ་བ་ཅན་རྡོ་རྗེའི་སློབ་མ་མཚན་ལྡན་དགེ་སློང་ཀརྨ་བཀྲ་ཤིས་པའི་བཞེད་ངོར། རྒྱལ་དབང་པདྨའི་མཚན་གྱི་བྱིན་རླབས་ཐོབ་པའི་སི་ཏུ་པདྨ་ཉིན་བྱེད་དབང་པོས་བཀོད་པ་ཚུལ་འདིར་འབྲེལ་ཚད་སྣང་སྲིད་བླ་མའི་དཀྱིལ་འཁོར་དུ་རང་གྲོལ་ཕྱག་རྒྱ་ཆེན་པོ་མངོན་དུ་ཐོབ་པར་གྱུར་ཅིག །སརྦ་ཐཱ་མདྒ་ལཾ་བྷ་ཝ་ནྟུ།། །།
བླ་སྒྲུབ་ཡིད་བཞིན་ཀུན་སྩོལ།
བླ་སྒྲུབ་ཡིད་བཞིན་ཀུན་སྩོལ་ཞེས་བྱ་བ་བཞུགས་སོ། །སྭ་སྟི། འདིར་དཔལ་ལྡན་ཀརྨ་པའི་བླ་མའི་རྣལ་འབྱོར་ལ་བརྩོན་པའི་སྒྲུབ་པ་པོས། དབེན་པའི་གནས་སུ། རྟེན་གསུམ་གྱི་དྲུང་དུ་མཆོད་པ་ཇི་སྙེད་ཚར་དུ་དངར་བ་བཤམས་པར་བྱའོ། །དེའང་དང་པོ་ཡོན་ཏན་ཟུར་ཙམ་བརྗོད་ན། རྡོ་རྗེ་གདན་བཞི་ལས། དུས་གསུམ་སངས་རྒྱས་མཆོད་པ་བས། །བླ་མའི་བ་སྤུ་ཉག་གཅིག་མཆོད། །དེ་ནི་བསོད་ནམས་ཁྱད་པར་འཕགས། །ཅེས་དང་། དྲིན་དང་ལྡན་པའི་བླ་མ་དེ། །སྤྱི་བོའི་གཙུག་གམ་སྙིང་གི་དཀྱིལ། །ཡན་ལག་མཐིལ་སོགས་གང་བསྒོམ་པ། །སངས་རྒྱས་སྟོང་གི་ཡོན་ཏན་ནི། །གང་ཟག་དེ་ཡིས་འཛིན་པར་འགྱུར། །ཅེས་སོགས་རྒྱུད་ལུང་དུ་མ་ནས་བསྔགས་པའི་ཡུལ་དུ་མཛད་པ་ལྟར་མོས་པས་ཡར་གཞལ་ཙམ་དུ་མ་ཡིན་པར། བཅོས་མིན་གྱི་དད་གུས་གདུང་ཤུགས་དང་བཅས་པས་ཀུན་ནས་བསླང་པས་ཚུལ་འདིར་འཇུག་པ་ལ་ཐོག་མར་སྐྱབས་ཡུལ་རྣམས་མདུན་མཁར་ལམ་གྱིས་གསལ་བཏབ་ལ། ན་མོ། །སྐྱབས་གནས་དཀོན་མཆོག་རྒྱ་མཚོའི་སྐུ་གསུང་ཐུགས། །ཡོན་ཏན་ཕྲིན་ལས་གཅིག་བསྡུས་རྡོ་རྗེ་འཛིན། །རྩ་བའི་བླ་མར་དེང་བཟུང་སྙིང་པོའི་བར། །བདག་སོགས་སྐྱབས་མཆི་ཐུགས་རྗེས་བཟུང་དུ་གསོལ། །མ་གྱུར་སེམས་ཅན་དོན་ཕྱིར་བླ་མ་བསྒྲུབ། །ཀུན་ཀྱང་བྱང་ཆུབ་ཐོབ་པར་སེམས་བསྐྱེད་དོ། །ཅེས་སྐྱབས་འགྲོ་སེམས་བསྐྱེད་ལན་གསུམ་དང་། དེ་ནས་བླ་མའི་རྣལ་འབྱོར་ལ་འཇུག་པ་ནི། སྣང་སྲིད་ཆོས་ཀུན་དམིགས་མེད་ངང་། །སྟོང་དང་སྙིང་རྗེའི་རྩལ་སྣང་ལས། །རང་ཉིད་རྡོ་རྗེ་རྣལ་འབྱོར་མར། །གསལ་བའི་སྤྱི་བོར་པད་དཀར་དང་། །ཉི་ཟླའི་སྟེང་དུ་རྒྱལ་ཀུན་གྱི། །ཡེ་ཤེས་གཅིག་བསྡུས་འཁོར་ལོའི་མགོན། །ངོ་བོ་དཔལ་ལྡན་ཀརྨ་པ། །རྗེ་བཙུན་བདུད་འདུལ་
རྡོ་རྗེ་ལ། །རྣམ་པ་བཅོམ་ལྡན་རྡོ་རྗེ་འཆང་། །ནམ་མཁའི་མདོག་ཅན་ལོངས་སྐུའི་ཆས། །དར་དང་རིན་ཆེན་རྒྱན་གྱིས་མཛེས། །ཐབས་ཤེས་རྡོར་དྲིལ་བསྣོལ་སྟབས་འཛིན། །ཞབས་གཉིས་རྡོར་སྐྱིལ་འོད་ལྔའི་ཀློང་། །སྒྲུབ་བརྒྱུད་བླ་མའི་ཚོགས་ཀྱིས་བསྐོར། །ཀུན་ཀྱང་མཚན་དཔེ་ལྷམ་མེར་གསལ། །ཆོས་དབྱིངས་དགོངས་པ་སྐྱེ་མེད་ངང་། །དོན་དམ་གཟིགས་པའི་ལྟ་སྟངས་ཅན། །དྲན་ཙམ་ཉིད་ནས་མོས་གུས་འབར། །བཟོད་མེད་གདུང་ཤུགས་དྲག་པོ་ཡིས། །གསོལ་བཏབ་ཙམ་གྱི་བྱིན་རླབས་མྱུར། །མྱུར་བའི་སྟོབས་ཀྱིས་བདག་རྒྱུད་ལ། །ཡེ་ཤེས་མངོན་སུམ་སྟོན་བ་ཡི། །ཐུགས་རྗེའི་འོད་ཟེར་ཀུན་ཏུ་ཁྱབ། །སྙིང་ནས་གསོལ་འདེབས་དུས་ལ་བབ། །ཀྱེ། སྣང་སྟོང་སྐུ་ལ་གྲག་སྟོང་གསུང་། །བདེ་སྟོང་ཐུགས་ཀྱི་རང་བཞིན་ཅན། །རྡོ་རྗེའི་གསང་བ་གསུམ་ཕྱག་འཚལ། །སྐུ་གསུང་ཐུགས་ཀྱིས་བྱིན་གྱིས་རློབས། །ཀྱེ། རང་བྱུང་སྣང་སྟོང་ཕོ་བྲང་ནས། །རྩ་བའི་བླ་མ་སྤྱན་འདྲེན་ན། །གནམ་ས་བླ་འོག་མཆོག་གསུམ་དང་། །རྩ་གསུམ་ལྷ་ཚོགས་སྤྲིན་ལྟར་གཏིབས། །དངོས་གྲུབ་ཆར་འབེབས་འཇའ་འོད་འཚེར། །དད་དང་གདུང་བས་གསོལ་བཏབ་པས། །ཐུགས་དམ་དབང་གིས་འདིར་གཤེགས་གསོལ། །མོས་བའི་བུ་ལ་བྱིན་གྱིས་རློབས། །དེ་ལྟར་བྱིན་འབེབས་ནས་མཆོད་པ་འབུལ་བ་ཡན་ལག་བདུན་པ་ནི། ཕྱག་
འཚལ་མཆོད་ཅིང་མི་དགེ་བཤགས། །ཡི་རངས་ཆོས་འཁོར་བསྐོར་གསོལ་འདེབས། །དགེ་བས་འགྲོ་དྲུག་སངས་རྒྱས་ཀྱི། །གོ་འཕང་ཐོབ་པའི་ཕྱིར་བསྔོའོ། །བདག་ལུས་ལོངས་སྤྱོད་སྣང་སྲིད་ཀྱི། །དངོས་པོ་ཀུན་གྱི་མཆོད་པའི་ཚོགས། །ཞིང་ཁམས་རབ་འབྱམས་རྒྱས་འགེངས་པ། །བླ་མ་དཀྱིལ་འཁོར་ལྷ་ལ་འབུལ། །ༀ་རཏྣ་མཎྜལ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡ་ཧཱུྃ། དེ་ནས་རྗེ་ཟླ་འོད་གཞོན་ནུའི་གསུང་ལས་བྱུང་བ་འདིའང་བྱིན་རླབས་ཀྱི་ཁྱད་དུ་བརྗོད་པར་བྱ་བ་ནི། བླ་མ་རིན་པོ་ཆེ་བདག་མིང་འདི་ཞེས་བྱ་བའི་ལས་དང་ཉོན་མོངས་པའི་སྒྲིབ་པ་དང་། ཤེས་བྱའི་སྒྲིབ་པ་དང་། བག་ཆགས་ཀྱི་སྒྲིབ་པ་ཐམས་ཅད་ད་ལྟ་ཉིད་དུ་དག་པར་བྱིན་གྱིས་བརླབ་ཏུ་གསོལ། །འདུག་ས་འདི་ཉིད་དུ་དག་པར་བྱིན༴ ཐུན་གཅིག་པོ་འདི་ཉིད་ངང་ལ་དག་པར་བྱིན༴ བླ་མ་རྗེ་བཙུན་རིན་པོ་ཆེ་བདག་མིང་འདི་ཞེས་བྱ་བའི་རྒྱུད་འདི་དག་པར་བྱིན༴ རྒྱུད་འདི་རྣམ་པར་གྲོལ་བར་བྱིན༴ ད་ལྟ་ཉིད་དུ་དག་པར་བྱིན༴ འདུག་ས་འདི་ཉིད་དུ་དག་པར་བྱིན༴ ཐུན་འདི་ཉིད་ལ་དག་པར་བྱིན༴ བླ་མ་རྗེ་བཙུན་རིན་པོ་ཆེ་བདག་མིང་འདི་ཞེས་བྱ་བའི་རྒྱུད་ལ་ཏིང་ངེ་འཛིན་ཕྱིན་ཅི་མ་ལོག་པ་མཆོག་ཏུ་གྱུར་པ་སྐྱེ་བར་མཛད་དུ་གསོལ། ད་ལྟ་ཉིད་དུ་སྐྱེ་བར་བྱིན༴ འདུག་ས་འདི་ཉིད་དུ་སྐྱེ་བར་བྱིན༴
ཐུན་འདི་ཉིད་ཀྱི་རིང་ལ་སྐྱེ་བར་བྱིན༴ བླ་མ་རྗེ་བཙུན་རིན་པོ་ཆེ་བདག་མིང་འདི་ཞེས་བྱ་བའི་རྒྱུད་ལ་ཡེ་ཤེས་ཕྱིན་ཅི་མ་ལོག་པ་མཆོག་ཏུ་གྱུར་པ་བསྐྱེད་པར་མཛད་དུ་གསོལ། །ད་ལྟ་ཉིད་དུ་སྐྱེ་བར་བྱིན༴ འདུག་ས་འདི་ཉིད་དུ་སྐྱེ་བར་བྱིན༴ ཐུན་འདི་ཉིད་ལ་སྐྱེ་བར་བྱིན་གྱིས་བརླབ་ཏུ་གསོལ། ཅེས་པ་རྣམས་སོ་སོར་ལན་གསུམ་རེ་བརྗོད་ལ། ཀརྨ་པ་མཁྱེན་ནོ། །ཞེས་ཅི་ནུས་དང་། དེ་ནས་རྗེ་དུས་གསུམ་མཁྱེན་པས་མཛད་པར་གྲགས་པ། བླ་མ་རིན་པོ་ཆེ་ལ་གསོལ་བ་འདེབས། །བདག་འཛིན་བློ་ཡིས་ཐོང་བར་བྱིན་གྱིས་རློབས། །དགོས་མེད་རྒྱུད་ལ་སྐྱེ་བར་བྱིན་གྱིས་རློབས། །ཆོས་མིན་རྣམ་རྟོག་འགག་བར་བྱིན་གྱིས་རློབས། །རང་སེམས་སྐྱེ་མེད་རྟོགས་པར་བྱིན་གྱིས་རློབས། །འཁྲུལ་པ་རང་སར་ཞི་བར་བྱིན་གྱིས་རློབས། །སྣང་སྲིད་ཆོས་སྐུར་རྟོགས་པར་བྱིན་རློབས། །ཅེས་ཀྱང་བརྗོད་པར་བྱའོ། །སྤྲོ་ན་རྒྱང་འབོད་མདོར་བསྡུས་ནི། སྐྱབས་དཀོན་མཆོག་འདུས་པའི་ངོ་བོ་ཉིད། །མགོན་དྲིན་ཆེན་རྩ་བའི་བླ་མ་ལ། །དུས་འདི་ནས་མཐར་ཐུག་སངས་རྒྱས་བར། །བདག་མགོན་མེད་སེམས་ཅན་བསྐྱབ་ཏུ་གསོལ། །གནས་འགྲོ་བ་རིགས་དྲུག་གི་སྡུག་བསྔལ་མཚོར། །བྱིངས་པ་ཡི་སྐྱབས་མེད་རྣམས་བསྒྲལ་དུ་གསོལ། །གདོད་རང་ཆས་སུ་གྲུབ་པའི་གཉུག་མའི་སེམས། །དོན་མངོན་གྱུར་གྱི་རྟོགས་པའི་གདེང་ཐོབ་ཤོག །ཕ་བཀའ་བརྒྱུད་ཀྱི་བླ་མ་དགོངས་སུ་གསོལ། །ཆོས་ཐེག་ཆེན་གྱི་ལྟ་སྒོམ་རྣམ་དག་པར། །ཚུལ་ཇི་བཞིན་ཤེས་རབ་ཀྱི་མིག་ཐོབ་ནས། །གནད་མ་ནོར་སྦྱངས་གོམས་ཀྱི་མཐར་སོན་ཤོག །དེ་ནས་བརྒྱུད་པའི་གསོལ་འདེབས་བསྡུས་པར་ན། ཆོས་སྐུ་རྡོ་རྗེ་འཆང་ཆེན་མ་ཏིའི་ཞབས། །ས་ར་ཧ་དང་ཀླུ་སྒྲུབ་ཤ་བ་རི། །མཻ་ཏྲི་མར་མི་དྭགས་
པོ་དུས་གསུམ་མཁྱེན། །རས་ཆེན་རྒྱལ་སྲས་པཀྵི་ཨོ་རྒྱན་རྗེ། །རང་བྱུང་གཡུང་སྟོན་རོལ་རྡོར་མཁའ་སྤྱོད་དབང་། །དེ་བཞིན་གཤེགས་བ་རིན་ཆེན་བཟང་དོན་ལྡན། །འཇམ་དཔལ་བཟང་པོ་གུ་ཤྲི་མཚོ་སྐྱེས་ཞབས། །སངས་རྒྱས་མཉན་པ་མི་བསྐྱོད་དཀོན་མཆོག་འབངས། །དབང་ཕྱུག་རྡོ་རྗེ་ཆོས་ཀྱི་དབང་ཕྱུག་དང་། །ཆོས་དབྱིངས་རྡོ་རྗེ་ཡེ་ཤེས་སྙིང་པོ་དང་། །ཡེ་ཤེས་རྡོ་རྗེ་ཆོས་ཀྱི་དོན་ཀུན་འགྲུབ། །བྱང་ཆུབ་རྡོ་རྗེ་ཆོས་ཀྱི་འབྱུང་གནས་མཆོག །བདུད་འདུལ་རྡོ་རྗེ་ཆོས་གྲུབ་རྒྱ་མཚོའི་སྡེ། །ཡི་དམ་དཀྱིལ་འཁོར་ལྷ་ཚོགས་བཀའ་སྲུང་ལ། །གསོལ་འདེབས་རང་བྱུང་རིག་པ་རང་གྲོལ་ངང་། །ལྷན་སྐྱེས་ཡེ་ཤེས་མངོན་གྱུར་བྱིན་གྱིས་རློབས། །དེ་ནས་བྱིན་རླབས་དབང་བཞི་བླང་བའི་རིམ་པ་ནི། དྲན་ཆོག་རྒྱལ་པོ་བླ་མ་རིན་པོ་ཆེ། །སྐལ་ལྡན་སྨིན་གྲོལ་དབང་བཞི་བསྐུར་གསོལ་འདེབས། །སྐྱབས་ཡུལ་ཐམས་ཅད་རྩ་བའི་བླ་མར་ཐིམ། །དགྱེས་པ་དང་བཅས་དབང་གི་དགོངས་པ་མཛད། །བླ་མའི་དཔྲལ་བའི་ༀ་ལས་འོད་དཀར་འཕྲོས། །རང་གི་དཔྲལ་ཐིམ་ལུས་ཀྱི་སྒྲིབ་པ་དག །བུམ་དབང་ཐོབ་ཅིང་བསྐྱེད་རིམ་སྣང་སྟོང་ལྷར། །བསྒོམ་པར་དབང་བའི་སྤྲུལ་སྐུ་འགྲུབ་པར་འགྱུར། །མགྲིན་པའི་ཨཱཿལས་འོད་ཟེར་དམར་པོ་འཕྲོས། །རང་གི་མགྲིན་ཐིམ་ངག་གི་སྒྲིབ་པ་དག །གསང་བའི་དབང་ཐོབ་རྫོགས་རིམ་རྩ་ཐིག་རླུང་། །སྒྱུ་ལུས་གསལ་སྟོང་བསྒོམ་དབང་ལོངས་སྐུ་འགྲུབ། །ཐུགས་ཀའི་ཧཱུྃ་ལས་འོད་ཟེར་སྔོན་པོ་འཕྲོས། །རང་
གི་སྙིང་ཁར་ཐིམ་པས་ཡིད་སྒྲིབ་དག །ཤེར་ཡེའི་དབང་ཐོབ་དགའ་བཞི་ཡེ་ཤེས་ཀྱི། །བདེ་སྟོང་བསྒོམ་དབང་ཆོས་ཀྱི་སྐུ་འགྲུབ་འགྱུར། །སླར་ཡང་འོད་ཟེར་དཀར་དམར་མཐིང་འཕྲོས་ནས། །སྒོ་གསུམ་ལ་ཐིམ་ཆ་མཉམ་སྒྲིབ་པ་དག །དབང་བཞི་ཐོབ་ཅིང་ཕྱག་རྒྱ་ཆེ་བསྒོམ་དབང་། །ངོ་བོ་ཉིད་སྐུ་འགྲུབ་པའི་སྐལ་ལྡན་གྱུར། །རྡོ་རྗེ་འཆང་དབང་དཔལ་ལྡན་ཀརྨ་པ། །བདག་ཉིད་པདྨའི་ཟེའུ་འབྲུར་རྟག་བཞུགས་ནས། །བྱང་ཆུབ་བར་དུ་འབྲལ་མེད་རྗེས་བཟུང་ལ། །གསང་གསུམ་རྡོ་རྗེའི་བྱིན་རླབས་དེང་འདིར་སྩོལ། །དེ་ལྟར་གསོལ་བཏབ་བླ་མ་འོད་ཞུ་ནས། །རང་ཐིམ་གཅིག་འདྲེས་ཕྲིན་ལས་རབ་འབྱམས་ཀུན། །བསྒྲུབ་པར་ནུས་པ་རྡོ་རྗེ་སློབ་དཔོན་དབང་། །ཐོབ་ཅིང་བདག་རྒྱུད་བླ་མའི་སྐུ་གསུང་ཐུགས། །དབྱེར་མེད་ངང་ལ་མ་བཅོས་རང་བབས་སུ། །སྤྲོས་ཀུན་བྲལ་བ་ཅི་གནས་མཉམ་པར་བཞག །ཅེས་པའི་ཚིག་དོན་ལྟར་རང་སེམས་ངོ་བོ་བསྐྱང་ལ། མཐར། བདག་གིས་དུས་གསུམ་བསགས་པའི་དགེ་གང་མཆིས། །འགྲོ་ཀུན་གདོད་མའི་བདེར་གཤེགས་རྡོ་རྗེ་འཆང་། །གོ་འཕང་ཐོབ་ཕྱིར་ཡོངས་སུ་བསྔོ་བར་བགྱི། །དེ་ལྟར་སྨོན་ལམ་རྣམ་དག་འགྲུབ་གྱུར་ཅིག །ཅེས་པའང་དད་གསུམ་གྱི་ལྷག་བློ་དང་ལྡན་པ་དགེ་སློང་འབྱོར་ལྡན་གྱིས་བསྐུལ་ལྟར་སི་ཏུ་པདྨ་ཉིན་བྱེད་དབང་པོས་ས་ཟླའི་དཀར་ཕྱོགས་བཟང་པོ་གཉིས་པར་བཀོད་པ་འབྲེལ་བཅས་སངས་རྒྱས་ཀརྨ་ཀའི་གོ་འཕང་ལ་རེག་པར་གྱུར་ཅིག །མངྒ་ལམ།། །།
བླ་མའི་རྣལ་འབྱོར་དངོས་གྲུབ་མཆོག་སྩོལ།
བླ་མའི་རྣལ་འབྱོར་དངོས་གྲུབ་མཆོག་སྩོལ་བཞུགས་སོ། །རང་མདུན་ཡེ་ཤེས་ལྔ་ཡི་འོད་ཀྱི་ཀློང་། །རིན་ཆེན་སེང་གེས་བཏེགས་པའི་ཁྲི་སྟེང་དུ། །དུས་གསུམ་རྒྱལ་བའི་སྤྱི་གཟུགས་ཀརྨ་པ། །འཇིགས་བྲལ་རྒྱལ་དབང་བདུད་འདུལ་རྡོ་རྗེ་ནི། །སྐུ་མདོག་དཀར་གསལ་ཕྱག་གཉིས་མཉམ་པར་བཞག །ཞབས་གཉིས་རྡོ་རྗེ་སྐྱིལ་མོ་ཀྲུང་གིས་བཞུགས། །སྐུ་ལ་ཆོས་གོས་རྣམ་གསུམ་ལྷུག་པར་གསོལ། །མཚན་དཔེའི་གཟི་བྱིན་རབ་གསལ་ལྷང་ངེ་བ། །བདག་སོགས་མཁའ་མཉམ་འགྲོ་བའི་དཔལ་དུ་ཤར། །མཆོག་གསུམ་རྒྱལ་བ་རྒྱལ་སྲས་འཕགས་པའི་ཚོགས། །ཟུང་འཇུག་ཕྱག་རྒྱ་ཆེན་པོ་བཀའ་བརྒྱུད་ཀྱི། །གྲུབ་ཐོབ་རྒྱ་མཚོ་ཉིན་མོར་བྱེད་ལྟར་གསལ། །མཆོག་དང་ཐུན་མོང་གྲུབ་གཉིས་སྩོལ་མཛད་པ། །རྒྱུད་སྡེ་བཞི་ཡི་ཡི་དམ་རབ་འབྱམས་རྣམས། །དྲི་མེད་ཆ་ཤས་ཡོངས་རྫོགས་འོད་དཀར་བཞིན། །དངོས་གྲུབ་བདུད་རྩིའི་ཆར་རྒྱུན་སི་ལི་ལི། །ཆོས་དབྱིངས་ཡེ་ཤེས་ངང་ལས་གྲུབ་པའི་ལྷ། །མ་ཧཱ་ཀཱ་ལ་རྡོ་རྗེ་རེ་མ་ཏི། །དམ་ཅན་བཀའ་སྡོད་ཆོས་ཀྱི་སྲུང་མ་རྣམས། །ཆར་སྤྲིན་དང་མཚུངས་བཟོད་དཀའི་གཟི་བྱིན་ལྡན། །གཞན་ཡང་ཕྱི་ནང་བར་ཆད་ཀུན་སེལ་བ། །གནས་གསུམ་དག་པའི་ཞིང་ཁམས་རབ་འབྱམས་ཀྱི། །ཌཱ་ཀི་དཔའ་བོ་རྒྱུ་སྐར་ཕྲེང་བཞིན་གསལ། །སྣ་ཚོགས་ཕྲིན་ལས་ནམ་མཁའི་གློག་ལྟར་འཁྱུག །དེ་ལྟར་སྐྱབས་ཡུལ་ངོ་བོ་མཆོག་གསུམ་དང་། །རྩ་
གསུམ་རྒྱལ་བའི་དཀྱིལ་འཁོར་གསལ་བའི་མདུན། །བདག་གིས་གཙོ་བྱས་རིགས་དྲུག་ཕ་མའི་ཚོགས། །གདུང་ཤུགས་དྲག་བོས་ཕྱག་འཚལ་མཆོད་པ་འབུལ། །ཉེས་བཤགས་རྗེས་སུ་ཡི་རང་ཆོས་སྟོན་འཚལ། །དགེ་བ་བྱང་ཆུབ་ཆེན་པོར་བསྔོ་བར་བགྱི། །མི་ཕྱེད་རྩེ་གཅིག་སྙིང་ནས་གསོལ་བ་འདེབས། །སངས་རྒྱས་ཀུན་འདུས་ཀརྨ་པ་མཁྱེན་ནོ། །ཀརྨ་པ་མཁྱེན་ནོ། །ཞེས་མོས་གུས་ཀྱི་འདུན་པ་དང་ལྡན་པས་མང་ཙམ་བརྗོད་ནས། །འཕགས་པ་སྙིང་རྗེའི་རང་གཟུགས་འགྲོ་བའི་མགོན། །སྤྱན་རས་གཟིགས་དངོས་རྒྱལ་མཆོག་ཀརྨ་པ། །འཇིགས་བྲལ་བདུད་ཚོགས་འདུལ་བའི་རྡོ་རྗེ་ལ། །རྣམ་ཀུན་གསོལ་བ་བཏབ་པའི་བྱིན་རླབས་ཀྱིས། །ཚེ་གཅིག་དམ་ཆོས་ཟབ་མོ་ཕྱག་རྒྱ་ཆེའི། །གནས་ལུགས་དོན་རྟོགས་སྒྱུ་ལུས་ཆོས་སྐུར་འཆར། །རྟེན་ཐོག་འདི་རུ་འཇའ་ལུས་སྐུ་འགྲུབ་ནས། །རྡོ་རྗེ་འཆང་གི་གོ་འཕང་ཡོངས་ཐོབ་ཤོག །མཐར་ནི་སྐྱབས་ཡུལ་བླ་མའི་སྐུ་ལ་ཐིམ། །རྩ་བའི་བླ་མ་རང་སེམས་གཉིས་མེད་འདྲེས། །དབང་བཞི་མཆོག་ཐོབ་སྒོ་གསུམ་སྡིག་སྒྲིབ་དག །སྣང་གྲག་རྟོག་གསུམ་བླ་མའི་དཀྱིལ་འཁོར་གྲུབ། །བདག་ཅག་སྐྱེ་དང་ཚེ་རབས་ཐམས་ཅད་དུ། །རིགས་ཀུན་ཁྱབ་བདག་བཛྲ་དྷཱ་ར་དང་། །དབྱེར་མེད་དཔལ་ལྡན་བླ་མས་རྗེས་བཟུང་སྟེ། །མ་ཧཱ་མུ་དྲའི་གོ་འཕང་ཐོབ་གྱུར་ཅིག །དེ་ལྟར་འཇིག་རྟེན་ཞིང་འདིའི་སྟོན་མཆོག་དཔལ་ཀརྨ་པའི་གསོལ་འདེབས་བླ་མའི་རྣལ་འབྱོར་འདི་ཡང་གཏེར་ཆེན་རོལ་པའི་རྡ་ོ
རྗེའི་སྒྱུ་འཕྲུལ་པདྨ་བསྟན་འཕེལ་གྱི་དགོངས་བཞེད་ལྟར། སི་ཏུའི་མིང་ཅན་གྱིས་ཀུན་དགའ་ཞེས་པ་ཤིང་ཕོ་སྟག་གི་ལོ་ཆོ་འཕྲུལ་ཅན་གྱི་ཡར་ཚེས་ལ་དཔལ་གྱི་མཚུར་ཕུའི་གཙུག་ལག་ཏུ་བྲིས་པའོ།། །།
ཀརྨ་པ་བདུད་འདུལ་རྡོ་རྗེའི་བླ་སྒྲུབ།
༈ རང་ཉིད་ཐ་མལ་སྤྱི་བོར་པདྨ་དཀར། །འདབ་རྒྱས་དེ་སྟེང་ཟླ་དཀྱིལ་དྲི་མེད་དབུས། །རྒྱལ་ཀུན་ཕྲིན་ལས་བདག་པོ་ཀརྨ་ཀ། རྗེ་བཙུན་བདུད་ཚོགས་འདུལ་བའི་རྡོ་རྗེ་མཆོག །སྐུ་མདོག་དཀར་གསལ་མཚན་དཔེའི་རྒྱན་རྣམས་རྫོགས། །ཞྭ་ནག་གསེར་མདངས་རིན་ཆེན་རྒྱན་སྤྲས་གསོལ། །སྤྱན་གཉིས་དོན་དམ་ཆོས་ཉིད་དབྱིངས་སུ་གཟིགས། །ཆོས་གོས་རྣམ་གསུམ་ན་བཟས་ཀུན་ཏུ་བཀླུབས། །ཕྱག་གཡས་མཆོག་སྦྱིན་གཡོན་པས་པད་དཀར་འཛིན། །ཞབས་གཉིས་རྡོ་རྗེ་སྐྱིལ་མོ་ཀྲུང་གིས་བཞུགས། །ཡེ་ཤེས་ལྔ་ལྡན་འཇའ་འོད་གཏིབས་པའི་ཀློང་། །གསལ་སྟོང་སྒྲིབ་མེད་སྐུ་རུ་གསལ་བར་གྱུར། །སྟེང་འོག་བར་མཚམས་འཇའ་འོད་ཐིག་ལེའི་ཀློང་། །བཀའ་བརྒྱུད་རིག་འཛིན་གྲུབ་ཐོབ་རྒྱ་མཚོ་དང་། །རྒྱུད་སྡེ་རབ་འབྱམས་ཡི་དམ་ཞི་ཁྲོའི་ཚོགས། །ཆོས་ཀྱི་སྲུང་མ་མ་མགོན་ལྕམ་དྲལ་དང་། །དམ་ཅན་གཏུམ་རྔམ་དྲག་ཤུལ་ལྡན་པའི་ཚོགས། །སྣ་ཚོགས་སྐུ་དང་ཆ་ལུགས་ཅིར་ཡང་སྒྱུར། །མེ་རླུང་འཚུབས་མའི་ནང་དུ་མངོན་སུམ་གསལ། །དེ་ལྟར་སྐྱབས་ཡུལ་དཀོན་མཆོག་རྩ་གསུམ་ལ། །བདག་སོགས་སེམས་ཅན་རྣམས་ཀྱི་ལུས་རྡུལ་སྙེད། །གྲངས་མེད་དུ་མར་སྤྲུལ་ཏེ་རྩེ་གཅིག་པའི། །སྒོ་གསུམ་དང་བའི་ཡིད་ཀྱིས་ཕྱག་འཚལ་ཞིང་། །ཀུན་ཏུ་བཟང་པོའི་མཆོད་པའི་སྤྲིན་གྱིས་
མཆོད། །མི་དགེ་ནོངས་པའི་ལས་གྱུར་མཐོལ་ལོ་བཤགས། །གཞན་ཕན་བྱང་ཆུབ་སྤྱོད་ལ་རྗེས་ཡི་རངས། །ཆོས་འཁོར་རྒྱུན་ཆད་མེད་པར་བསྐོར་བར་བསྐུལ། །དད་དང་མོས་པའི་བློ་ཡིས་གསོལ་བ་འདེབས། །དུས་གསུམ་བསགས་དགེ་མྱང་འདས་རྒྱུ་རུ་བསྔོ། །ཞེན་ལོག་ངེས་འབྱུང་དྲག་པོས་རྒྱུད་བརླན་ཅིང་། །གདོད་ནས་དོན་དམ་ལྷན་སྐྱེས་ཡེ་ཤེས་ཀྱི། །འོད་ཟེར་སྣང་བས་མ་རིག་སྒྲིབ་པའི་ཚོགས། །མུན་པའི་དྲ་བ་རྩད་ནས་གཞིལ་བ་དང་། །སེམས་ཉིད་ཆོས་སྐུའི་ངོ་བོ་གནད་མཐོང་ཞིང་། །སྐུ་བཞིའི་ངོ་བོ་མངོན་དུ་གྱུར་ནུས་པའི། །སྐྱབས་ཡུལ་དམ་པས་མྱུར་བར་བྱིན་རློབས་ཤིག །ཀརྨ་པ་མཁྱེན་ནོ། །ཅི་ནུས་བརྗོད་མཐར། འཕགས་པ་སྙིང་རྗེའི་རང་གཟུགས། །རྒྱལ་མཆོག་ཕྱག་ན་པདྨོ། །སྤྱན་རས་གཟིགས་དངོས་དམ་པ། །གྲུ་འཛིན་ཕྲེང་བ་རིམ་བྱོན། །བཅུ་གསུམ་བདུད་འདུལ་རྡོ་རྗེ། །ཐུགས་བསྐྱེད་གཏིང་མཐའ་ཡས་པས། །བསྐལ་པར་མཆོག་གི་སྤྲུལ་སྐུ། །རྒྱུན་མི་ཆད་པར་སྟོན་པའི། །འགྲོ་དྲུག་སྐྱབས་གནས་གཅིག་པུ། །རྗེ་བཙུན་ཁྱེད་རང་མཁྱེན་ནོ། །བདག་དང་བདག་འདྲའི་སེམས་ཅན། །ཉོན་མོངས་འཁོར་བའི་འདམ་ལས། །མྱུར་དུ་སྒྲོལ་བར་བྱིན་རློབས། །སྟན་ཐོག་འདི་རུ་བྱིན་རློབས། །བརྩེ་བ་ཆེན་པོས་བྱིན་རློབས། །ཡེ་ཤེས་འཕོ་བར་བྱིན་རློབས། །མཐར་ནི་སྐྱབས་ཡུལ་ཐམས་ཅད་འོད་ཞུ་ནས། །རྩ་བའི་བླ་མའི་སྐུར་ཐིམ་དེ་ཉིད་ཀྱི། །སྐུ་ལས་འོད་ཟེར་དཀར་དམར་སྔོ་སེར་
ལྗང་། །འཕྲོས་ཏེ་རང་ལུས་ལ་ཐིམ་སླར་ཡང་ནི། །དགྱེས་པ་དང་བཅས་འོད་དུ་ལྟེམ་གྱིས་ཞུ། །དབྱེར་མེད་གཅིག་འདྲེས་ཆུ་ལ་ཆུ་བཞག་ལྟར། །དུས་གསུམ་རྟོག་པ་མ་ལུས་རྒྱུན་བཅད་ནས། །མ་བཅོས་སོ་མའི་ངང་དུ་མཉམ་པར་བཞག །དགེ་འདི་བདག་གཞན་སེམས་ཅན་ཀུན། །སྤྱན་རས་གཟིགས་དབང་སྐུ་ཐོབ་ནས། །རིགས་དྲུག་འཁོར་བ་དོང་སྤྲུག་གི། །ཕྲིན་ལས་ཚད་མེད་འགྲུབ་གྱུར་ཅིག །ཅེས་པའང་དད་གསུམ་མངོན་མཐོ་རྗེ་སྟོད་མཛོད་པ་ཤཱཀྱ་དར་རྒྱས་ཀྱིས་བསྐུལ་བཞིན་ཀརྨའི་གདན་སར་ས་ཟླའི་དུས་ཆེན་ལ་སི་ཏུ་པདྨ་ཉིན་བྱེད་དབང་པོས་སྤེལ་བ་ཛ་ཡ།། །།
བླ་མའི་རྣལ་འབྱོར་སངས་རྒྱས་ལག་གཏད་ཡེ་ཤེས་རང་འབར།
བླ་མའི་རྣལ་འབྱོར་སངས་རྒྱས་ལག་གཏད་ཡེ་ཤེས་རང་འབར་བཞུགས། ༀ་མ་ཧཱ་ཤཱུ་ཎྱ་ཏ་སོགས་ཀྱིས་སྟོང་པར་སྦྱངས། སྤྱི་བོར་པད་དཀར་འདབ་སྟོང་དྲི་མེད་སྟེང་། །ཆུ་ཤེལ་དབང་པོ་ཆ་ཤས་ཡོངས་རྫོགས་དབུས། །དུས་གསུམ་རྒྱལ་བའི་སྤྱི་དཔལ་འཁོར་ལོའི་མགོན། །འཕགས་པའི་སར་གནས་བྱང་ཆུབ་སེམས་དཔའ་མཆོག །རྗེ་བཙུན་བདུད་འདུལ་རྡོ་རྗེ་ཞལ་གཅིག་པ། །ཕྱག་གཉིས་ས་གནོན་མཉམ་བཞག་ཚེ་བུམ་བསྣམས། །ཆོས་གོས་རྣམ་གསུམ་ཟབ་བེར་ཟླུམ་གསོལ་ཞིང་། །དབུ་ལ་མཐོང་གྲོལ་ཞྭ་ནག་གསེར་མདངས་མཛེས། །སྤྱན་གཉིས་ཆོས་ཉིད་དོན་དམ་དབྱིངས་ལ་གཟིགས། །ཞབས་གཉིས་རྡོ་རྗེ་སྐྱིལ་ཀྲུང་གཡོ་མེད་ངང་། །འོད་དང་འོད་ཟེར་ཟེར་ཐག་ཀུན་ཏུ་འཕྲོ། །བཀའ་བརྒྱུད་གྲུབ་ཐོབ་རྒྱ་མཚོ་སྤྲིན་ལྟར་གཏིབས། །ཡི་དམ་དཔའ་བོ་ཌཱ་ཀི་ཆོས་སྲུང་མ། །ཆར་ལྟར་བབ་ཅིང་དངོས་གྲུབ་
བྱིན་ཆེན་འབེབས། །མོས་གུས་གསོལ་བཏབ་ཙམ་གྱིས་སྣང་སྲིད་ཞིང་། །དག་པ་བླ་མའི་དཀྱིལ་འཁོར་བསྒྱུར་ནུས་པའི། །གདུང་ཤུགས་དྲག་པོའི་དབྱངས་ཀྱིས་བསྐུལ་ལགས་ན། །ཐུགས་རྗེ་ཅན་གྱི་བཀའ་བརྒྱུད་བླ་མ་རྣམས། །བདག་རྒྱུད་ཡེ་ཤེས་བདེ་ཆེན་རང་འབར་ནས། །གཟུང་འཛིན་འཆིང་བ་མ་ལུས་དབྱིངས་སུ་དག །སྟན་ཐོག་འདི་རུ་མཆོག་དངོས་ཐོབ་ནུས་པའི། །མི་འགྱུར་དོན་གྱི་བྱིན་རླབས་འཕོ་དབང་སྩོལ། །ཅེས་བསྐྱེད་དང་འབེབས་པའི་དམིགས་པ་དང་། དེ་ནས། བླ་མ་ལ་གསོལ་བ་འདེབས་སོ། །བཀའ་བརྒྱུད་ཀུན་འདུས་ངོ་བོ་ལ་གསོལ་བ་འདེབས་སོ། །རྒྱལ་དབང་ཀརྨ་པ་ལ་གསོལ་བ་འདེབས་སོ། །བཅུ་གསུམ་བདུད་འདུལ་རྡོ་རྗེ་ལ་གསོལ་བ་འདེབས་སོ། །རབ་འབྱམས་ཞིང་ཀུན་སྐུ་ཡིས་ཁྱབ་པ་ལ་གསོལ་བ་འདེབས་སོ། །སྐུ་དང་ཞིང་ཁམས་ཐ་མི་དད་པ་ལ་གསོལ་བ་འདེབས་སོ། །ཆོས་དབྱིངས་ཡེ་ཤེས་ངང་ནས་ཐུགས་རྗེས་གཟིགས་ཤིག །བདག་སོགས་སེམས་ཅན་ངན་སོང་གཡང་ལས་སྒྲོལ་ཅིག །མི་རྟག་སྐྱོ་ཤས་ངེས་འབྱུང་རྒྱུད་ལ་སྐྱེ་བར་གྱུར་ཅིག །སྐྱེས་ནས་དམ་པའི་ཆོས་ཀྱི་སྐལ་བ་དང་ལྡན་པར་གྱུར་ཅིག །ཉམས་ལེན་ཚེ་གཅིག་རྡོ་རྗེ་འཆང་ཆེན་འགྲུབ་པར་གྱུར་ཅིག །ཀརྨ་པ་མཁྱེན་ནོ། །ཅི་ནུས་བགྲང་མཐར། ཆོས་སྐུ་སྣང་མཐའ་ལོངས་སྐུ་སྤྱན་རས་གཟིགས། །སྤྲུལ་སྐུ་པད་འབྱུང་སྐུ་གསུམ་འདུས་པའི་དཔལ། །བྱམས་མགོན་སེང་གེ་ལ་སོགས་བསྐལ་བཟང་གི། །འདྲེན་པ་རྣམས་ཀྱི་
ཐུགས་རྗེའི་ནུས་མཐུ་རྩལ། །ཀུན་འདུས་སངས་རྒྱས་ཕྲིན་ལས་རོལ་པ་འཆང་། །གང་དེར་སྙིང་ནས་གསོལ་འདེབས་བདག་རྒྱུད་ཀྱི། །མ་རིག་དབང་གྱུར་དུག་ལྔའི་སྡིག་སྒྲིབ་ཚོགས། །སྡོམ་གསུམ་འགལ་བའི་ལས་བགྱིས་མཐོལ་ལོ་བཤགས། །ཕྱིན་ཆད་ཀུན་རྟོག་རྐྱེན་གྱིས་མི་ལྡང་བར། །བྱིན་གྱིས་རློབས་ཤིག་བདེ་ཆེན་འཁོར་ལོའི་མགོན། །ངན་སོང་རིགས་དྲུག་སྐྱེ་སྒོ་བཅད་དུ་བསོལ། །རྣམ་དག་བདེ་བ་ཅན་དུ་ལམ་སྣ་དྲོངས། །གདོད་མའི་གནས་ལུགས་མངོན་གྱུར་བྱིན་གྱིས་རློབས། །དཔལ་ལྡན་བླ་མའི་གནས་བཞིར་རྡོ་རྗེ་བཞིའི། །ངོ་བོ་སྣ་ཚོགས་འོད་འཕྲོས་རང་གནས་བཞིར། །ཐིམ་པས་དབང་བཞི་ཐོབ་ཅིང་སྒྲིབ་བཞི་དག །སྐུ་བཞི་ཐོབ་ཅིང་དགྱེས་པའི་འཛུམ་ཞལ་གྱི། །བྱང་ཆུབ་བར་དུ་འདུ་འབྲལ་མེད་པ་ཡི། །དབུགས་དབྱུང་རྡོ་རྗེའི་གསུང་གི་གནང་བ་བཅས། །འོད་དཀར་ལྟེམས་ཀྱིས་ཞུ་ནས་རང་ལུས་ཐིམ། །བདེ་གསལ་མི་རྟོག་རང་བྱུང་རིག་པའི་མདངས། །བྱར་མེད་བློ་འདས་བདེ་བ་ཆེན་པོའི་ངང་། །ཞེས་མཉམ་བཞག་དང་བཅས་ཉམས་ལེན་ངང་ལ་དར་ཅིག་བཞག །མཐར། དགེ་འདིའི་འགྲོ་བ་མ་ལུས་རྡོ་རྗེ་སེམས། །སོགས་ཤླཽ་ཀ་གཅིག་གིས་བསྔོ་བ་དང་། ཟབ་ལམ་རྣལ་འབྱོར་སྒྲུབ་པའི་དགེ་ཚོགས་མཐུས། །སྟན་ཐོག་འདི་རུ་བདེ་ལྡན་ཞིང་བགྲོད་ཅིང་། །མཁའ་མཉམ་མ་གྱུར་ཀུན་ཀྱང་སྲིད་ཞི་ལ། །མི་གནས་བྱང་ཆེན་འདྲེན་པའི་དཔལ་གྱུར་ཅིག །ཅེས་པའི་སྨོན་ལམ་མདོར་བསྡུས་དང་། །གཞན་ཡང་སྨོན་ལམ་གང་ཤེས་བྱའོ། །དེ་ལྟར་ཁང་གསར་ཀརྨ་འཆི་མེད་རྒྱ་མཚོ་ནས་
ཁོ་བོའི་རྣལ་འབྱོར་ཞིག་ནན་གྱིས་བསྐུལ་ཡང་། རང་གིས་གཞིགས་འབྲེལ་གྱིས་རྒྱལ་མཆོག་བཅུ་གསུམ་པ་ཞལ་མཐོང་གསུང་གི་བདུད་རྩི་ཐོབ་པའི་སངས་རྒྱས་དངོས་སྣང་རྒྱལ་བའི་ལུང་ཟིན་ཉིད་དུ་ཚད་མར་གྲུབ་པ་མཆོག་དེའི་རྣལ་འབྱོར་བྱིན་རླབས་ཀྱི་དགོས་ཁྱད་ཆེ་བའི་ཆེད་དུ་བྱས་ཏེ། དགེ་བས་བདག་གཞན་འགྲོ་རྣམས་མགོན་དེའི་ཐུགས་རྗེས་སྐྱོང་བར་གྱུར་ཅིག། །།ༀ་ཨཱཿཧཱུྃ། རང་སྣང་རྣམ་དག་གཞལ་ཡས་ཁང་གི་དབུས། །རང་སེམས་བདེ་གཤེགས་སྙིང་བོའི་སྣང་བའི་ཆ། །ཡི་དམ་གདན་གསུམ་ཚང་བའི་སྐུར་གསལ་བའི། །མདུན་མཁར་འཇའ་འོད་ཟེར་ཀློང་སེང་ཁྲི་དང་། །པད་དཀར་ཟླ་སྟེང་རྩ་བའི་བླ་མ་མཆོག །སྤྱན་རས་གཟིགས་དངོས་རྗེ་བཙུན་ཀརྨ་པ། །བདུད་འདུལ་རྡོ་རྗེ་ཞྭ་ནག་གསེར་མདངས་ཅན། །བགྲེས་ཚུལ་རབ་བྱུང་ཆ་ལུགས་ཕྱག་ས་གནོན། །མཉམ་བཞག་ཚེ་ཡི་བུམ་འཛིན་ཞབས་རྡོར་སྐྱིལ། །ཟླ་བའི་རྒྱབ་ཡོལ་དང་བཅས་ལྷམ་མེར་ཞུགས། །གཞན་ཡང་རྩ་བར་བརྒྱུད་པའི་བླ་མ་དང་། །ཡི་དམ་ཌཱ་ཀི་ཆོས་སྐྱོང་སྤྲིན་ལྟར་གཏིབས། །དྲན་ཙམ་བདེ་ཆེན་ཡེ་ཤེས་ཕྱག་རྒྱ་ཆེའི། །ཉམས་རྟོགས་ཡོན་ཏན་རྒྱུད་ལ་བསྐྱེད་ནུས་གསལ། །ཀྱེ་ཧོཿརབ་འབྱམས་རྒྱལ་བ་ཀུན་འདུས་རྡོ་རྗེ་འཆང་། །ལུང་རྟོགས་དམ་ཆོས་རྒྱ་མཚོའི་འབྱུང་གནས་ཆེ། །ཚོགས་མཆོག་དགེ་འདུན་ཀུན་གཙོ་རིགས་དཀྱིལ་བདག །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །ཞེས་དང་། ༀ་ཨཱཿམཱ་ར་ད་མ་ཀ་བཛྲ་ཧཱུྃ།
ཅེས་པའི་སྔགས་ཀྱང་བཟླས་མཐར། དཔལ་ལྡན་བླ་མ་རྡོ་རྗེ་ཅན། །སྲིད་པའི་འཇིགས་ལས་སྒྲོལ་བ་པོས། །སྐུ་གསུང་ཐུགས་དང་ཡེ་ཤེས་ཀྱི། །དབང་བཞི་བསྐུར་བར་མཛད་དུ་གསོལ། །ཞེས་གསོལ་བཏབ་པས་བླ་མ་ཡི། །རྡོ་རྗེ་བཞིི་ཡི་ས་བོན་འོད། །གནས་བཞིར་ཐིམ་པས་དབང་བཞི་ཐོབ། །བླ་མ་འོད་ཞུ་རང་ལ་ཐིམ། །རང་སེམས་མ་བཅོས་སོ་མའི་ངང་། །ཡེངས་མེད་དེ་ཡི་ངོ་བོ་སྐྱོང་། །བླ་མ་ཆོས་སྐུའི་རང་ཞལ་མཇལ། །ལྷུན་གྲུབ་གདོད་མའི་གནས་ཐོབ་གྱུར། །དགེ་བ་འདི་ཡིས་མྱུར་དུ་བདག །དཔལ་ལྡན་བླ་མ་འགྲུབ་གྱུར་སོགས་བརྗོད། ཅེས་ཁྲ་འགུ་དགོན་བློ་གྲོས་ཉི་མའི་སྤྲུལ་སྐུའི་བཞེད་ངོར་དགེ། །།
བླ་མའི་རྣལ་འབྱོར་ཚན་ཆུང་ཁ་ཤས་བཞུགས།
མདུན་མཁར་པད་དཀར་ཟླ་སྟེང་ཀརྨ་པ། །ཞལ་གཅིག་ཕྱག་གཉིས་ཞི་འཛུམ་མཚན་དཔེ་རྫོགས། །ཕྱག་གཉིས་ས་གནོན་མཉམ་བཞག་ཞབས་རྡོར་སྐྱིལ། །སྣང་བཞིན་གསལ་སྟོང་ལྷུན་གྲུབ་སྐུ་རུ་བསྐྱེད། །སྐྱབས་གནས་ཀུན་འདུས་བདུད་འདུལ་རྡོ་རྗེ་མཁྱེན། །གནས་གསུམ་འབྲུ་གསུམ་འོད་འཕྲོས་རང་ལ་ཐིམ། །དབང་བཞི་མཆོག་ཐོབ་སྐུ་བཞི་མངོན་གྲུབ་ཤོག །ཅེས་ཀརྨ་བཀྲ་ཤིས་ངོར་སྤེལ།། །།རང་ཉིད་ལྷར་གསལ་སྤྱི་བོར་པད་ཟླའི་སྟེང་། །བཀའ་བརྒྱུད་རྒྱ་མཚོ་ཡི་དམ་ལྷ་རབ་འབྱམས། །ཆོས་སྐྱོང་ཀུན་འདུས་ངོ་བོ་རྡོ་རྗེ་བེར། །དབྱེར་མེད་དྷརྨཱ་ཀ་ར་ཐམས་ཅད་མཁྱེན། །ཞལ་གཅིག་ཕྱག་གཉིས་ཆོས་འཆད་ཞབས་སྐྱིལ་ཀྲུང། །ཆོས་གོས་རྣམ་གསུམ་དབུ་ལ་མཐོང་
གྲོལ་གསོལ། །རབ་གསལ་སྟོན་ཟླའི་སྟེང་དུ་ལྷམ་མེར་གསལ། །སྐྱབས་གསུམ་སྤྱི་མེས་ཉིད་དུ་ངེས་བྱས་ནས། །ཕྱག་འཚལ་མཆོད་བཤགས་ཡི་རངས་བསྐུལ་གསོལ་འདེབས། །དགེ་ཀུན་འགྲོ་རྣམས་བྱང་ཆུབ་ཐོབ་ཕྱིར་བསྔོ། །དེང་བཟུང་བླ་མེད་བྱང་ཆུབ་སྙིང་པོའི་བར། །བདེ་ཆེན་འཁོར་ལོར་འདུ་འབྲལ་མེད་པ་རུ། །བསྙེན་པའི་གསོལ་འདེབས་བདག་རྒྱུད་སྨིན་གྲོལ་གྱི། །ཡེ་ཤེས་མཆོག་གི་ལམ་ཟབ་དབང་མཆོག་སྩོལ། །ༀ་ཨཱཿདྷརྨཱ་ཀ་ར་ཧཱུྃ། ཅེས་པའང་ཅི་ནུས་བཟླས་མཐར་བྱིན་རླབས་བསྡུ་བ། བཟོད་པར་གསོལ་བ། དུག་གསུམ་སྒྲིབ་པས་འཐུམས་པ་ཡི། །བསླབ་པ་གསུམ་དང་འགལ་བ་རྣམས། །མི་འཆབ་མི་སྦེད་མཐོལ་ཞིང་བཤགས། །སླན་ཆད་མི་བགྱིད་དམ་བཅའ་བཟུང་། །དག་ཚངས་སྒྲིབ་པར་མི་འགྱུར་བའི། །མགོན་པོས་དབུགས་དབྱུང་སྩལ་དུ་གསོལ། །བླ་མ་དགྱེས་བཅས་འོད་ཞུ་ནས། །རང་ཐིམ་སྒོ་གསུམ་དྲི་མ་དག །སྐུ་གསུམ་འབྲས་བུ་མངོན་གྱུར་ཏེ། །དབྱེར་མེད་ངང་དུ་མཉམ་པར་བཞག །མཐར་བསྔོ་སྨོན་བྱ། ཞེས་པའང་གནས་མདོ་ཆོས་རྒྱལ་གྱིས་བསྐུལ་ངོར། སི་ཏུ་པས་སྤེལ་བ་བཀྲ་ཤིས་ཀྱི་སྣང་བས་ཁྱབ་པར་གྱུར་ཅིག། །།རང་གི་སྦྱི་བོར་ཟླ་བའི་སྟེང་། །སྐྱབས་གནས་ཀུན་འདུས་པདྨ་འབྱུང་། །ངོ་བོ་ཡེ་ནས་གྲུབ་པ་ལ། །རྣམ་པ་པདྨའི་མཚན་འཆང་བ། །བཀྲ་གསལ་ལམ་མེར་རབ་བྱུང་ཆས། །ཟག་མེད་བདེ་སྟོང་དབྱེར་མེད་པའི། །རྡོར་དྲིལ་བསྣོལ་འཛིན་འོད་ཀློང་དུ། །རྩ་གསུམ་
དཀྱིལ་འཁོར་ཡོངས་འདུས་ཤར། །བཛྲ་གུ་རུ་བཟླ། རྗེ་བཙུན་པདྨའི་རྣམ་རོལ། །གང་ཤར་རང་བྱུང་ཉིད་གྲུབ། །གསོལ་འདེབས་བདག་རྒྱུད་བྱིན་རློབས། །གནས་སྐབས་མཐར་ཐུག་ཉེས་ཚོགས། །བར་ཆད་སེལ་ཞིང་སེམས་ཉིད། །ཀ་དག་གདོད་མའི་ངོ་བོ། །རང་ཞལ་མཐོང་བར་བྱིན་རློབས། །གང་ཁྱོད་བསྟན་འགྲོའི་དཔལ་དུ། །འཚོ་བརྟན་མི་འགྱུར་རྡོ་རྗེའི། །རང་བཞིན་གཞུགས་གསོལ་བྱིན་རློབས། །བླ་མའི་སྐུ་ལས་འོད་འཕྲོས་པས། །གནས་བཞིར་ཐིམ་པས་དབང་བཞི་ཐོབ། །རྒྱུད་བཞི་སྨིན་ཅིང་སྐུ་བཞི་འགྲུབ། །དབྱེར་མེད་རྡོ་རྗེ་འཆང་ཐོབ་ཤོག །ཅེས་པའང་བསླབ་གསུམ་ལྡན་བ་གྲུབ་དབང་བླ་མ་པདྨ་དབང་དྲག་གིས་བཞེད་ངོར་སི་ཏུ་པདྨའི་མིང་ཅན་གྱི་སྤེལ་བ་དགེའོ།། །།ༀ་ཨཱཿཧཱུྃ། རང་སྣང་རྣམ་དག་གཞལ་ཡས་ཁང་གི་དབུས། །རང་སེམས་བདེ་གཤེགས་སྙིང་པོའི་སྣང་བའི་ཆ། །ཡི་དམ་གདན་གསུམ་ཚང་བའི་སྐུར་གསལ་བའི། །སྤྱི་བོར་སེང་ཁྲི་པདྨ་ཉི་ཟླའི་སྟེང་། །རྩ་བའི་བླ་མ་དྲན་ཆོག་འཁོར་ལོའི་མགོན། །སྣང་སྲིད་ཟིལ་ནོན་པདྨ་རྒྱལ་པོའི་ཚུལ། །མཚན་དཔེའི་གཟི་འབར་རྒྱན་དང་ཆ་ལུགས་རྫོགས། །དྲན་ཙམ་བདེ་ཆེན་ཡེ་ཤེས་རྫོགས་པ་ཆེའི། །ཉམས་རྟོགས་ཡོན་ཏན་རྒྱུད་ལ་བསྐྱེད་ནུས་གསལ། །ཀྱེ་ཧོཿརབ་འབྱམས་རྒྱལ་བ་ཀུན་འདུས་རྡོ་རྗེ་འཆང་། །ལུང་རྟོགས་དམ་ཆོས་རྒྱ་མཚོའི་འབྱུང་གནས་ཆེ། །ཚོགས་མཆོག་དགེ་འདུན་ཀུན་གཙོ་རིགས་དཀྱིལ་བདག །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །ཅེས་དང།
ༀ་ཨཱཿཔདྨ་དེ་ཝེནྡྲ་སརྦ་སིདྡྷི་ཕ་ལ་ཧཱུྃ། ཅེས་པའི་སྔགས་ཀྱང་བཟླས་མཐར། དཔལ་ལྡན་བླ་མ་རྡོ་རྗེ་ཅན། །སྲིད་པའི་འཇིགས་ལས་སྒྲོལ་པ་པོས། །སྐུ་གསུང་ཐུགས་དང་ཡེ་ཤེས་ཀྱི། །དབང་བཞི་བསྐུར་བར་མཛད་དུ་གསོལ། །ཞེས་གསོལ་བཏབ་པས་བླ་མ་ཡི། །རྡོ་རྗེ་བཞི་ཡི་ས་བོན་འོད། །གནས་བཞིར་ཐིམ་པས་དབང་བཞི་ཐོབ། །བླ་མ་འོད་ཞུ་རང་ལ་ཐིམ། །རང་སེམས་བླ་མའི་ངོ་བོར་ཤར། །བཅོས་མའི་མོས་གུས་མ་ཡིན་པར། །བླ་མ་ཆོས་སྐུའི་རང་ཞལ་མཇལ། །ལྷུན་གྲུབ་གདོད་མའི་གནས་ཐོབ་གྱུར། །དགེ་བ་འདི་ཡིས་མྱུར་དུ་བདག །དཔལ་ལྡན་བླ་མ་འགྲུབ་གྱུར་སོགས་བརྗོད། ཅེས་དད་གསུམ་མངོན་མཐོ་བླ་མ་སྐུ་དགའི་བཞེད་ངོར་སི་ཏུ་པདྨའི་མིང་ཅན་གྱིས་སྤེལ་བ་དགེ། །།རང་ལུས་སྣང་སྟོང་ལྷར་གསལ་སྤྱི་བོ་རུ། །རིགས་ཀྱི་བདག་པོ་ཐེག་མཆོག་རྡོ་རྗེ་དང་། །པདྨ་ཉིན་བྱེད་གཙུག་ལག་ཆོས་ཀྱི་རྒྱལ། །རྡོ་རྗེ་དྲག་པོའི་སྒྱུ་འཕྲུལ་རྣམ་པར་རོལ། །བླ་མེད་བླ་མ་རྡོ་རྗེ་ཅན་རྣམས་གསལ། །དེ་ལ་གསོལ་བཏབ་མོས་གུས་བྱས་པའི་མཐུས། །སྐུ་གསུང་ཐུགས་དང་ཡེ་ཤེས་རྡོ་རྗེ་ཡིས། །བྱིན་རླབས་དབང་བསྐུར་བདུད་རྩིས་རྒྱུད་སྨིན་ནས། །སྐུ་བཞི་མངོན་འགྱུར་མཆོག་ཐུན་དངོས་གྲུབ་སྩོལ། །བླ་མ་འོད་ཞུ་རང་ཐིམ་དབྱེར་མེད་གྱུར། །བློ་འདས་ཕྱག་རྒྱ་ཆེན་པོའི་ངང་དུ་བཞག །དགེ་བས་བདག་གཞན་བྱང་ཆུབ་ཆེ་ཐོབ་ཤོག །ཅེས་གླིང་ཐོག་ཀརྨ་དངོས་གྲུབ་ངོར་སྤེལ།། །།ཧྲཱིཿཿ
རང་སྣང་རྣམ་དག་རྒྱལ་བའི་དཀྱིལ་འཁོར་དུ། །རང་ལུས་དག་པ་ལྷ་ཡི་སྐུར་གསལ་བའི། །སྤྱི་བོར་སེང་ཁྲི་པདྨ་ཉི་ཟླའི་སྟེང་། །རྒྱལ་ཀུན་འདུས་གཟུགས་པདྨ་འབྱུང་གནས་དང་། །དབྱེར་མེད་དྲིན་ཆེན་ཨདྒ་ཀཱ་རའི་ཞབས། །གསུམ་ལྡན་རྡོ་རྗེ་འཛིན་པའི་ཆ་ལུགས་སུ། །བག་བྲོ་བརྗིད་ཆགས་དྲན་པས་བདེ་ཆེན་གྱི། །ཡེ་ཤེས་རྩོལ་མེད་རྒྱུད་ལ་བསྐྱེད་ནུས་གྱུར། །བླ་མ་རིན་པོ་ཆེ་ལ་གསོལ་བ་འདེབས། །བདག་འཛིན་བློ་ཡིས་ཐོང་པར་བྱིན་གྱིས་རློབས། །དགོས་མེད་རྒྱུད་ལ་སྐྱེ་བར་བྱིན་གྱིས་རློབས། །འཁྲུལ་པ་རང་སར་དག་པར་བྱིན་གྱིས་རློབས། །སྣང་སྲིད་ཆོས་སྐུར་འཆར་བར་བྱིན་གྱིས་རློབས། །ཅེས་དང་། མ་ནམ་འཁའ་དང་མཉམ་པའི་སོགས་གྲངས་མང་བརྗོད་ཅིང་། གསོལ་འདེབས་སྙིང་པོ་བཛྲ་གུ་རུ་བཟླ། མཐར་ནི་བླ་མའི་སྐུ་ཡི་གནས་བཞི་ནས། །འོད་འཕྲོས་གནས་བཞིར་ཐིམ་པས་སྒྲིབ་བཞི་དག །དབང་བཞི་ཐོབ་ཅིང་སྐུ་བཞིའི་གོ་འཕང་འགྲུབ། །བླ་མ་འོད་ཞུ་རང་དང་དབྱེར་མེད་འདྲེས། །རང་སེམས་སྐྱེ་འགགས་གནས་དང་བྲལ་བའི་ངང་། བརྗོད་བྲལ་ལྷན་སྐྱེས་བདེ་སྟོང་ཟུང་འཇུག་པ། །བསམ་འདས་བླ་མ་ཆོས་སྐུའི་ཀློང་ཡངས་སུ། །བདག་དང་འབྲེལ་ཀུན་མངོན་པར་སངས་རྒྱས་ཤོག །ཅེས་ཀརྨ་བསོད་ནམས་ཀྱི་བཞེད་སྐོང་དུ་སི་ཏུས་སྤེལ།། །།བསྐལ་བཟང་འདྲེན་པ་སྟོང་རྩ་འབྱོན་པ་ལས། །བཞི་པ་བཅོམ་ལྡན་ཤཱཀྱ་ཐུབ་པ་ཡི། །རྒྱལ་བསྟན་བྱང་ཕྱོགས་ལྗོངས་འདིར་སྤེལ་བའི་ཕྱིར། །འགྲོ་མགོན་བླ་མ་རྡོ་རྗེ་རྒྱལ་པོ་ཞེས། །དོན་
དམ་བདེ་ཆེན་འཁོར་ལོ་སྡོམ་པའི་དཔལ། །སྟོང་ཉིད་ཤེས་རབ་ཡུམ་དང་མཉམ་པར་སྦྱོར། །བདེ་དང་སྟོང་པའི་ཡེ་ཤེས་གཟི་འོད་འབར། །སྐད་ཅིག་དྲན་པས་ལྷན་སྐྱེས་ཕྱག་རྒྱ་ཆེ། །མངོན་སུམ་རྒྱུད་ལ་སྐྱེད་ནུས་རྡོ་རྗེའི་སྐུ། །སྙིང་དབུས་ལྔ་ལྡན་འོད་ཀློང་གསལ་བར་གྱུར། །དཔལ་ལྡན་ཕག་མོ་གྲུ་ཡི་ནགས་ཁྲོད་ན། །སྐལ་ལྡན་གདུལ་བྱ་མང་པ་ོསྨིན་མཛད་ཅིང་། བསམ་གྱིས་མི་ཁྱབ་ཆོ་འཕྲུལ་སྣ་ཚོགས་སྟོན། །འགྲོ་མགོན་རིན་པོ་ཆེ་ལ་གསོལ་བ་འདེབས། །བླ་མ་རིན་པོ་ཆེ་ལ་གསོལ་བ་འདེབས། །བདག་འཛིན་བློ་ཡིས་ཐོངས་པར་བྱིན་གྱིས་རློབས། །དགོས་མེད་རྒྱུད་ལ་སྐྱེ་བར་བྱིན་གྱིས་རློབས། །ཆོས་མིན་རྣམ་རྟོག་འགགས་པར་བྱིན་གྱིས་རློབས། །རང་སེམས་སྐྱེ་མེད་རྟོགས་པར་བྱིན་གྱིས་རློབས། །འཁྲུལ་པ་རང་སར་ཞི་བར་བྱིན་གྱིས་རློབས། །སྣང་སྲིད་ཆོས་སྐུར་རྟོགས་པར་བྱིན་གྱིས་རློབས། །ཚར་ཁ་ཤས་རྒྱང་འབོད་ཚུལ་དུ་བཏོན་ལ། བླ་མ་ཡབ་ཡུམ་རྗེས་སུ་ཆགས་པའི་མེས། །ལྟེམ་གྱིས་ཞུ་བ་རང་གི་རྩ་དང་རླུང་། །ཐིག་ལེ་དང་བཅས་རྣམ་པར་དག་པའི་ཁམས། །མི་ཕྱེད་རྡོ་རྗེ་གསུམ་དང་དབྱེར་མེད་གྱུར། །སྐྱེ་བ་འདི་ནས་རིགས་བདག་མི་འཆོལ་ཞིང་། །སོགས་བརྗོད། ཅེས་པའང་སྐལ་ལྡན་ཀརྨའི་མཚན་ཅན་བཞེད་སྐོང་ཆེད་དུ་སྤེལ་བ་དགེ། །།
བླ་མའི་རྣལ་འབྱོར་བདེ་ཆེན་ལམ་གྱི་སྣང་བྱེད་རབ་གསལ་སྐལ་ལྡན་བགྲོད་པའི་མྱུར་ལམ།
༈ བླ་མའི་རྣལ་འབྱོར་བདེ་ཆེན་ལམ་གྱི་སྣང་བྱེད་རབ་གསལ་སྐལ་ལྡན་བགྲོད་པའི་མྱུར་ལམ་ཞེས་བྱ་བ་བཞུགས་སོ། །ན་མོ་གུ་རུ་པདྨཱ་ཀཱ་ར་ཡེ། །མཐའ་ཡས་ཡོན་ཏན་རིན་ཆེན་ཀུན་འབྱུང་གནས། །རྣམ་དག་རྒྱལ་བའི་དཀྱིལ་འཁོར་རྒྱ་མཚོ་ཆེར། །འཇུག་འདོད་དོན་གཉིས་སྙིང་པོའི་ནོར་བུ་མཆོག །སྐལ་ལྡན་བྱང་ཆུབ་གྲུ་རྫིང་འདིར་ཞུགས་ཀྱེ། །དེ་ཡང་དུས་གསུམ་སངས་རྒྱས་ཐམས་ཅད་ཀྱི་གསང་གསུམ་ཡེ་ཤེས་རོལ་པ་གཅིག་ཏུ་འདུས་པའི་དཔལ་ལྡན་བླ་མ་དམ་པ་རྣམས་ཀྱི་དྲང་དང་ངེས་པའི་ཆོས་ཚུལ་དུ་མས་འགྲོ་རྣམས་ཀུན་མཁྱེན་ཀྱི་གོ་འཕང་མངོན་དུ་སྟོན་པའི་དཀྱིལ་འཁོར་ཀུན་གྱི་གཙོ་མཆོག་དཔལ་ཧེ་རུ་ཀའི་སྐུར་བཞེངས་ནས་སྨིན་གྲོལ་གྱི་སར་བཀོད་པའི་གང་འདུལ་ཐབས་གྱིས་སྐྱོང་བའི། ཇི་ལྟར་ཆུ་ཀླུང་ཟླ་གཟུགས་བཞིན། །སྣ་ཚོགས་སྒྱུ་འཕྲུལ་གར་རྩེད་སྟོན། །ཅེས་པ་ལྟར་འདིར་ནི་བླ་མེད་ངེས་པའི་དོན་གྱི་ཡང་སྙིང་གཅིག་ཏུ་དྲིལ་བ་རྡོ་རྗེ་ཐེག་པའི་ཉེ་ལམ་ཟབ་མོ་མཆོག་གི་བླ་མའི་རྣལ་འབྱོར་ལ་འཇུག་པའི་མངོན་པར་རྟོགས་པ་ཐོ་ཙམ་བཀོད་པ་སྟེ། རབ་ཏུ་གོང་མ་དག་གི་བྱིན་གྱིས་བརླབས་པའི་སྒྲུབ་གནས་སམ། དབེན་ཞིང་ཉམས་དགའ་བྱིན་ཆགས་པའི་གནས་སུ་གཙང་སྦྲ་བྱི་དོར་ལེགས་པར་བྱས་ལ། དཀོན་མཆོག་གི་རྟེན་བཀྲམ་ལ་མཆོད་བའི་ཡོ་བྱད་སྣ་ཚོགས་པ་དང་། ཁྱད་པར་ཐབས་ཤེས་ཀྱི་རྫས་ནང་མཆོད་ལ་སོགས་པ་རྒྱ་ཆེར་བཤམས་ལ། གཞན་ཡང་བཀོད་པ་རབ་ཏུ་མཛེས་པས་བརྒྱན་པར་བྱ་བ་སོགས་མདོར་ན་ཚོགས་གཉིས་བསོད་ནམས་ཀྱི་ཞིང་དུ་མོས་པར་ཡོ་བྱད་ཀྱི་རྣམ་པ་དུ་ུམ་མདུན་དུ་བརྡལ་བར་བྱའོ། །དེ་ནས་ཐོག་མར་རང་ཉིད་ལྷ་ཡི་རྣལ་འབྱོར་དང་ལྡན་པས་བདུད་རྩི་བྱིན་གྱིས་བརླབ་བ་ནི། ༀ་ཨཱཿབིགྷྣཱན་སོགས་ཀྱིས་བསངས་། སྭ་བྷཱ་ཝས་སྦྱངས། སྟོང་པའི་ངང་ལས་ཡྃ་རྃ་ཀྃ་རྣམས་ལས་རླུང་མེ་ཐོད་སྒྱེད་ཀྱི་སྟེང་དུ་ཨཱཿལས་ཐོད་པ་དུམ་བུ་
གཅིག་པ་རྒྱ་ཁྱོན་ཆོས་ཀྱི་དབྱིངས་དང་མཉམ་པ། དཔྲལ་བ་རང་ལ་བསྟན་པ་ཕྱི་དཀར་ལ་ནང་དམར་བ་དེའི་དབུས་སུ་མུ། ཤར་དུ་བི། ལྷོར་ར། ནུབ་ཏུ་ཤུ། བྱང་དུ་མ་སྟེ་བདུད་རྩི་ལྔ་དང་། སླར་ཡང་དབུས་སུ་ན། ཤར་ལྷོར་གོ། ལྷོ་ནུབ་ཏུ་ཀུ། ནུབ་བྱང་དུ་ད། བྱང་ཤར་དུ་ཧ་སྟེ་ཤ་ལྔ་པོ་སླར་ཡང་ཡིག་འབྲུ་དེ་དག་གིས་མཚན་པར་གྱུར་བ་དང་། རང་གི་སྣ་བུག་གཡོན་པ་ནས་ཧཱུྃ་གི་དབྱིབས་ཅན་གྱི་རླུང་གཡོས་པས་མེ་སྤར་ཐོད་པ་དྲོས། རྫས་རྣམས་ཁོལ། མ་དག་པའི་དྲི་མ་སྦྱངས། སྟེང་དུ་ༀ་དཀར་ཨཱཿདམར་ཧཱུྃ་སྔོན་ལས་འོད་ཟེར་འཕྲོས་པས་ཡེ་ཤེས་ཀྱི་བདུད་རྩི་སྤྱན་དྲངས་ནས་དམ་ཚིག་གི་བདུད་རྩི་དང་གཉིས་སུ་མེད་པར་འདྲེས། བདེ་བ་ཆེན་པོའི་རང་བཞི་ཅན་དུ་གྱུར། །ༀ་ཨཱཿཧཱུྃ། ལན་གསུམ་བརྗོད་པས་བདུད་རྩི་བྱིན་གྱིས་བརླབས། དེ་ནས་སྔོན་འགྲོ་གཏོར་མ་བྱིན་གྱིས་བརླབ་པ་ཡང་གོང་ལྟར་བྱ་ཞིང་། ༀ་ཁ་ཁ་ཁཱ་ཧི་ཁཱ་ཧི། སརྦ་ཡཀྵ་རཀྵ་ས་བྷཱུ་ཏ་པྲེ་ཏ་པི་ཤ་ཙ་ཨུནྨད་ཨ་པ་སྨ་ར་ཌཱ་ཀ་ཌཱ་ཀི་ནྱ་ད་ཡ། ཨི་དཾ་པ་ལིཾ་གྲྀ་ཧྣནྟུ་ས་མ་ཡ་རཀྵནྟུ་མ་མ་སརྦ་སིདྡྷིམྨེ་པྲ་ཡ་ཙྪནྟུ་ཡ་ཐཻ་བྃ་ཡ་ཐཻ་ཥྚཾ། བྷཱུཉྫ་ཐ་ཛི་གྷ་ཐ་པི་པ་ཐ་མ་ཏི་ཀྲ་མ་ཐ། མ་མ་སརྦ་ཀཱ་ར་ཏ་ཡ་སད་སུ་ཁཾ་བི་ཤུདྡྷ་ཡེ། སཱ་ཧཱ་ཡི་ཀཾ་བྷ་ཝནྟུ་ཧཱུྃ་ཧཱུྃ་ཕཊ་སྭཱ་ཧཱ། ལན་བཞིར་བརྗོད་ལ། ཧཱུྃ། གང་དག་བླ་མེད་དཀྱིལ་འཁོར་འདིར། །མངོན་པར་འདུད་པའི་ཞིང་སྐྱོང་བརྒྱད། །མཁའ་འགྲོ་སུམ་ཅུ་སོ་གཉིས་སོགས། །མ་ལུས་འཁོར་ཚོགས་ཇི་སྙེད་པ། །འདིར་བཤམས་མཆོད་རྫས་འདོད་ཡོན་རྣམས། །དགྱེས་
དགུར་ཚིམ་པར་ལོངས་སྤྱོད་རོལ། །ཡང་དག་བྱང་ཆུབ་བསྒྲུབ་པ་ལ། །བར་ཆད་ནད་གདོན་ཞི་བར་མཛོད། །ཚེ་དཔལ་འབྱོར་པའི་དབང་དང་ལྡན། །བརྟན་གཡོའི་སྲིད་བཅུད་མ་ལུས་སྡུད། །མངོན་སྤྱོད་ལས་ཀྱི་དངོས་གྲུབ་སོགས། །ཕྲིན་ལས་ཐོགས་མེད་སྒྲུབ་པར་མཛོད། །ཅེས་དང་། དེང་འདིར་གནོད་ཅིང་འཚེ་བ་ཡི། །བསམ་སྦྱོར་ལོག་ལྟར་གྱུར་པ་རྣམས། །སྐད་ཅིག་ཉིད་ལ་ཕྱིར་དེངས་ཤིག །ཧཱུྃ་ཧཱུྃ། སུམ་བྷ་ནི་སོགས་ཀྱིས་བགེགས་བསྐྲད། སྟེང་འོག་ཕྱོགས་མཚམས་ཀུན་ཏུ་བར་མེད་རྡོ་རྗེའི་རྭ་བ་དྲྭ་བ་གུར་དང་བླ་རེ་ཕྱི་རོལ་ཡེ་ཤེས་ཀྱི་མེ་དཔུང་འབར་བས་སྲུང་བའི་འཁོར་ལོ་ཡངས་ཤིང་རྒྱ་ཆེ་བས་ཀུན་ནས་ཀུན་ཏུ་གཏམས་པར་གྱུར། ༀ་བཛྲ་རཀྵ་རཀྵ་ཧཱུྃ་ཧཱུྃ་ཧཱུྃ། ཅེས་སྲུང་འཁོར་བསྒོམས་ལ། དེ་ནས་གནས་དང་མཆོད་པའི་ཡོ་བྱད་བྱིན་གྱིས་བརླབ་པ་ནི་བདུད་རྩི་བྲན་ལ། ༀ་ཨཱཿབིགྷྣཱན་གྱིས་བསངས་། སྭ་བྷཱ་ཝས་སྦྱངས་ལ། སྟོང་པའི་ངང་ལས་ཨཱཿལས་ཐོད་པའི་སྣོད་ཡངས་པར་ཧཱུྃ་ཡིག་གི་ཚོགས་དཔག་ཏུ་མེད་པ་འོད་དུ་ཞུ་བ་ལས་བྱུང་བའི་རྡོ་རྗེའི་མཆོད་ཡོན། ཞབས་བསིལ། མེ་ཏོག །བདུག་སྤོས། སྣང་གསལ། དྲི་ཆབ། ཞལ་ཟས། རོལ་མོ། གཞན་ཡང་མཆོད་པའི་བྱེ་བྲག་སྣ་ཚོགས་པ་བསམ་གྱིས་མི་ཁྱབ་པ་འཕགས་པ་ཀུན་ཏུ་བཟང་པོའི་རྣམ་པར་ཐར་བ་ལས་བྱུང་བའི་མཆོད་པའི་སྤྲིན་གྱི་ཕུང་པོ་རབ་འབྱམས་ཆོས་ཀྱི་དབྱིངས་རྒྱས་པར་འགེངས་པའི་མཐུ་དང་ལྡན་པར་གྱུར། ༀ་སརྦ་བིད་པཱུ་ར་པཱུ་ར་སུ་ར་སུ་ར་ཨ་ཝརྟ་ཡ་ཧོ། ལན་གསུམ་དང་། ༀ་བཛྲ་སྥ་ར་
ཁཾ། ལན་གསུམ། ༀ་བཛྲ་ཨརྒྷ་ཾཨཱཿཧཱུྃ་སྭཱ་ཧཱ། དེ་བཞིན། པཱ་དྱཾ། པུཥྤེ། དྷཱུ་པེ། ཨཱ་ལོ་ཀེ། གནྡྷེ། ནཻཝི་དྱ། ཤབྡ་ཨཱཿཧཱུྃ་སྭཱ་ཧཱ། ཅེས་བྱིན་གྱིས་བརླབས་ལ། སྐྱབས་སུ་འགྲོ་བ་ནི། ན་མོ། དུས་གསུམ་སངས་རྒྱས་དམ་པའི་ཆོས། །ཚོགས་མཆོག་བླ་ན་མེད་པའི་མགོན། །བདག་ཉིད་ཆེན་པོ་རྡོ་རྗེ་ཅན། །དཔལ་ལྡན་བླ་མ་རིན་པོ་ཆེ། །རྩ་བ་བརྒྱུད་པར་བཅས་རྣམས་དང་། །ཡི་དམ་རྒྱལ་བའི་དཀྱིལ་འཁོར་ལྷ། །ཆོས་སྐྱོང་རྒྱ་མཚོ་ཚོགས་བཅས་ལ། །བདག་ནི་རྟག་པར་སྐྱབས་སུ་མཆི། །ལན་བདུན་ནམ་ཉེར་གཅིག་བརྗོད། སེམས་བསྐྱེད་ནི། གཞན་ཕན་སྙིང་རྗེས་ཀུན་བསླང་སྟེ། །བླ་མ་བདེ་གཤེགས་ཀུན་འདུས་ཀྱི། །གོ་འཕང་དམ་པ་བསྒྲུབ་ནས་ནི། །འགྲོ་སྒྲོལ་བྱང་ཆུབ་སེམས་བསྐྱེད་དོ། །ལན་གསུམ་དང་། སྐབས་འདིར་སྦྱང་བྱ་སྒྲིབ་གཉིས་ཀྱི་དྲི་མ་རྣམས་སྦྱོང་བྱེད་གཉེན་པོ་རྟེན་གྱི་སྟོབས་ཁྱད་པར་དུ་འཕགས་པ་བླ་མ་དང་རྡོ་རྗེ་སེམས་དཔའ་དབྱེར་མེད་དུ་སྒོམ་བཟླས་ཀྱི་རིམ་པ་བསྟན་པ་ནི། རང་གི་སྤྱི་གཙུག་ཚངས་པའི་གནས་སྟེང་དུ། །པད་དཀར་ཟླ་དཀྱིལ་སྟེང་དུ་ཧཱུྃ་དཀར་ལས། །བླ་མ་ཧེ་རུ་ཀ་དཔལ་དཔའ་པོ་ཆེ། །རྡོ་རྗེ་སེམས་དཔའ་རིགས་ཀུན་བདག་པོ་མཆོག །སྐུ་མདོག་དཀར་པོ་ཟླ་བའི་རྒྱབ་ཡོལ་ཅན། །ལོངས་སྐུ་མཚན་དཔེའི་ཆ་རྫོགས་ཞལ་གཅིག་པ། །ཕྱག་གཉིས་རྡོར་དྲིལ་འགྱིང་བག་ཚུལ་དུ་བསྣམས། །དར་དང་རིན་ཆེན་རྒྱན་སྤྲས་ཞབས་རྡོར་སྐྱིལ། །པང་དུ་རྡོ་རྗེ་སྙེམས་མ་མདོག་དཀར་གཡས། །གྲི་གུག་གཡོན་པས་ཐོད་ཆང་འཛིན་པ་
འཁྲིལ། །གནས་གསུམ་སྐུ་གསུམ་ངོ་བོ་ཡིག་འབྲུས་མཚན། །འོད་འཕྲོས་རང་བཞིན་གནས་ནས་ཡེ་ཤེས་པ། །སྤྱན་དྲངས་དབྱེར་མེད་ཐུགས་ཀར་ཟླ་དཀྱིལ་དབུས། །ཧཱུྃ་དཀར་མཐའ་མར་སྔགས་ཕྲེང་བསྐོར་བར་གྱུར། །སྐུ་ཡི་ཆ་ལས་བདུད་རྩི་འོ་མའི་རྒྱུན། །དཀར་ཞིང་བསིལ་བ་རེག་ན་བདེ་བ་འབབ། །སྡིག་སྒྲིབ་མ་ལུས་བྱང་ཞིང་དག་གྱུར་ནས། །རང་ལུས་འོད་དུ་གསལ་བ་དེ་ཡི་ངང་། །ༀ་བཛྲ་ས་ཏྭ་ས་མ་ཡ་སོགས་ཡི་གེ་བརྒྱ་པ་དང་། ཡིག་དྲུག་བཟླས་པའི་མཐར། ཀྱེ་ཧོ། བདག་ནི་ཉོན་མོངས་མ་རིག་དབང་། །སྒྲིབ་བའི་དྲྭ་བར་འཐུམས་པ་ཡི། །དམ་ཚིག་ཉེས་བའི་ཚོགས་ཀུན་འཤགས། །དག་ཚངས་དབུགས་དབྱུང་མཛད་དུ་གསོལ། །ཅེས་གསོལ་བས། བླ་མ་རྡོ་རྗེ་སེམས་དཔའ་ཡིས། །བུ་ཁྱོད་ནོངས་པ་བྱང་ངོ་ཞེས། །གནང་བ་ཐོབ་པའི་མོད་ཉིད་དུ། །འོད་ཞུ་རང་ལ་ཐིམ་པར་གྱུར། །དར་གཅིག་ཉམས་ལེན་བསྐྱངས་ལ། འགྲོ་ཀུན་བདེ་དང་ལྡན་གྱུར་ཅིག །སྡུག་བསྔལ་རྒྱུ་དང་བྲལ་བར་ཤོག །བདེ་བས་རྟག་པར་ཉེར་འཚོ་ཞིང་། །ཆོས་རྣམས་མཉམ་ཉིད་རྟོགས་པར་ཤོག །ལན་གསུམ་གྱིས་ཚད་མེད་བཞི་བསྒོམ་ལ། དེ་ནས་མདུན་མཁར་བླ་མའི་དཀྱིལ་འཁོར་བསྐྱེད་པ་གསལ་བཏབ་པ་ནི། མདུན་བསྐྱེད་རྟེན་རྣམས་བསངས་སྦྱངས་ལ། ༀ་མ་ཧཱ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ། གིས་ཆོས་ཐམས་ཅད་སྟོང་ཉིད་ཡེ་ཤེས་རྡོ་རྗེ་རང་བཞིན་མེད་པའི་བདག་ཉིད་དེ་ཁོ་ནའི་ངོ་བོར་སྦྱངས་ལ། སྟོང་པའི་ངང་ལས་མདུན་གྱི་མཁའ་དབྱིངས་སུ། །སྔོན་གྱི་སྨོན་ལམ་ཚོགས་གཉིས་རྫོགས་པའི་སྟོབས། །ཆོས་དབྱིངས་རང་
བཞིན་བསམ་མི་ཁྱབ་པ་དང་། །སངས་རྒྱས་ཞིང་སྦྱང་དག་པའི་སྦྱོར་པའི་མཐུས། །བདག་སོགས་མོས་པའི་རྟེན་འབྱུང་ལྷག་བསམ་གྱིས། །གནས་འདིར་ཐར་པ་ཆེན་པོའི་ཕོ་བྲང་མཆོག །ཞིང་ཁམས་བཀོད་པ་ཡོན་ཏན་ལྷུན་གྲུབ་པར། །ཕུན་སུམ་ཚོགས་པའི་རང་བཞིན་ལྡན་གྱུར་ཅིག །དེ་དབུས་པད་སྡོང་ཡལ་ག་ལྔར་གྱེས་པའི། དབུས་སུ་དྲི་མེད་པད་དཀར་འདབ་མ་བརྒྱད། །གེ་སར་ཟེའུ་འབྲུ་དེ་སྟེང་སེང་གེའི་ཁྲིར། །མ་ཆགས་སྐྱོན་གྱིས་མ་གོས་པདྨའི་གདན། །རང་བཞིན་འོད་གསལ་ཆུ་ཤེལ་ཉ་གང་སྟེང་། །རྒྱལ་བ་ཀུན་གྱི་ཡེ་ཤེས་རྣམ་པར་རོལ། །གསང་གསུམ་མི་བཟད་རྒྱན་འཁོར་ལྔ་ཡི་བདག །འཕགས་མཆོག་འཇིག་རྟེན་དབང་ཕྱུག་དངོས་སྣང་བ། །རྗེ་བཙུན་བདུད་ཚོགས་འདུལ་བའི་རྡོ་རྗེ་ནི། །བགྲེས་ཉམས་ཞྭ་ནག་གསེར་མདངས་ཁྱུང་གཤོག་གསོལ། །དབུ་སྐྱེས་རབ་དཀར་ལྟ་སྟངས་དབྱིངས་སུ་གཟིགས། །ཞལ་གཅིག་ཕྱག་གཉིས་གཡས་པ་ས་གནོན་དང་། །གཡོན་པས་མཉམ་བཞག་འཆི་མེད་བུམ་པ་བསྣམས། །ཆོས་གོས་རྣམ་གསུམ་ཞབས་གཉིས་སྐྱིལ་མོ་ཀྲུང་། །ཏིང་འཛིན་བྱེ་བ་ཕྲག་བརྒྱའི་འོད་ཟེར་གྱིས། །ཁམས་གསུམ་འཁོར་བ་དོང་ནས་སྤྲུག་ཅིང་བཞུགས། །ཤར་གྱི་འདབ་སྟེང་གླང་ཆེན་བཏེགས་པའི་ཁྲིར། །པད་ཟླའི་སྟེང་དུ་འོད་སྣང་མཐའ་ཡས་མགོན། །རིགས་དྲུག་ཁྱབ་བདག་ཞྭ་དམར་ཅོད་པན་ཅན། །མི་ཕམ་ཆོས་གྲུབ་རྒྱ་མཚོ་སྐུ་ཤ་རྒྱས། །ཕྱག་གཉིས་ཐབས་ཤེས་རྡོ་རྗེ་
དྲིལ་བུ་འཛིན། །ཆོས་གོས་རྣམ་གསུམ་ཟ་འོག་བེར་ཆེན་གསོལ། །ཞབས་གཉིས་རྡོར་སྐྱིལ་གཟི་བྱིན་རབ་ཏུ་འབར། །འབྲེལ་ཚད་དོན་དང་ལྡན་ཞིང་ལྷམ་མེར་བཞུགས། །ལྷོ་ཡི་འདབ་སྟེང་ཅང་ཤེས་བཏེགས་པའི་ཁྲིར། །པད་ཟླའི་སྟེང་དུ་ཐུགས་རྗེ་ཆེན་པོའི་འཕྲུལ། །བཀའ་དྲིན་མཉམ་མེད་དཔལ་ལྡན་འབྲུག་པ་མཆོག །བཀའ་བརྒྱུད་ཕྲིན་ལས་ཤིང་རྟ་སྐུ་མདོག་དཀར། །དབུ་ལ་སྒོམ་ཞྭ་རིན་ཆེན་སྤྲིན་དཔུང་མཛེས། །ཕྱག་གཡས་མཆོག་སྦྱིན་པད་དཀར་གཡོན་མཉམ་བཞག །ཆོས་གོས་རྣམ་གསུམ་རྡོ་རྗེ་སྐྱིལ་མོ་ཀྲུང་། །ཕན་བདེའི་ཆར་གྱིས་རྟག་ཏུ་སྐྱོང་བཞིན་བཞུགས། །ནུབ་ཀྱི་ཟླ་སྟེང་རྨ་བྱས་བཏེགས་པའི་ཁྲིར། །པད་ཟླའི་སྟེང་དུ་བྱམས་ཆེན་ཤེས་རབ་གཉེན། །ཀུན་མཁྱེན་ཆོས་ཀྱི་འབྱུང་གནས་བགྲེས་ཉམས་ལྡན། །དབང་རྟགས་ཅོད་པན་རྭ་གའི་མདངས་དང་ལྡན། །ཕྱག་གཉིས་ཆོས་འཆད་རལ་གྲི་པུསྟི་ཀཿ། ཆོས་གོས་རྣམ་གསུམ་ཞབས་གཉིས་སྐྱིལ་མོ་ཀྲུང་། །འགྲོ་རྣམས་མཁྱེན་བརྩེས་ཡང་དག་སར་བཀོད་ཕྱིར། །བཤད་སྒྲུབ་ཕྲིན་ལས་སྣང་བ་རྒྱས་པར་བཞུགས། །བྱང་གི་འདབ་སྟེང་ཁྱུང་ཆེན་བཏེགས་པའི་ཁྲིར། །པད་ཟླའི་སྟེང་དུ་མཚོ་སྐྱེས་རྣམ་པར་རོལ། །གྲུབ་པའི་དབང་ཕྱུག་དཔལ་ལྡན་དཔའ་བོ་མཆོག །རྡོ་རྗེ་གཙུག་ལག་དགའ་བའི་དབང་པོའི་སྡེ། །བགྲེས་ཚུལ་དབང་ཞུ་པདྨ་ཟུར་བརྒྱད་གསོལ། །ཕྱག་གཉིས་རྡོ་རྗེ་སྡིགས་མཛུབ་དྲིལ་དཀུར་
བརྟེན། །མེ་ཁ་ལི་ལྗང་བླ་གོས་ངུར་སྨྲིག་བཀླུབས། །ཞབས་གཉིས་ཕྱེད་སྐྱིལ་བདེ་སྟོང་ཡེ་ཤེས་རྒྱས། །ཤར་ལྷོའི་འདབ་སྟེང་རྡོ་རྗེས་མཚན་པའི་ཁྲིར། །པད་ཟླའི་སྟེང་དུ་རྩ་བའི་བླ་མ་ནི། །རྡོ་རྗེ་དྲག་པོ་ཕྲིན་ལས་འདུས་པ་རྩལ། །དཀར་སྨུག་དབུ་ལ་པདྨ་མཐོང་གྲོལ་གསོལ། །ཕྱག་གཡས་རྡོ་རྗེ་རྩེ་དགུ་མཁའ་ལ་གདེངས། །གཡོན་པས་ཕུར་པ་འདྲིལ་ཞིང་ལྕགས་སྡིགས་འཕྲོ། །ཕོད་ཀ་ཆོས་གོས་ཞབས་གཉིས་རོལ་པའི་སྟབས། །ལོག་འདྲེན་བགེགས་ཚོགས་ཞི་བའི་རྔམས་ཟེར་འཕྲོ། །ལྷོ་ནུབ་འདབ་སྟེང་རིན་ཆེན་མཚན་པའི་ཁྲིར། །པད་ཟླའི་སྟེང་དུ་སྔགས་ཀྱི་རིག་པ་འཛིན། །ཚེ་དབང་མགོན་པོ་འཆི་མེད་དཔལ་དར་མཆོག །སྨུག་ནག་པདྨ་ཁ་འབུས་དབང་ཞུ་ཅན། །ཕྱག་གཉིས་རྡོ་རྗེ་ཐོད་ཆང་འགྱིངས་བཅས་བསྣམས། །རྡོ་རྗེའི་གསང་གོས་དང་ནི་བླ་གོས་བཀླུབས། །ཞབས་གཉིས་པདྨའི་སྐྱིལ་མོ་ཀྲུང་གིས་བཞུགས། །ཚེ་བསོད་ཡེ་ཤེས་རྒྱས་པའི་དངོས་གྲུབ་འདུ། །ནུབ་བྱང་འདབ་སྟེང་པདྨས་མཚན་པའི་ཁྲིར། །པད་ཟླའི་སྟེང་དུ་གར་དབང་རྡོ་རྗེ་འཛིན། །ཆོས་སྐྱོང་རྣམ་པར་རྒྱལ་བ་སྐུ་བོང་མཐོ། །དབུ་ལ་དྭགས་ཞུ་གསོལ་ཞིང་ཕྱག་གཉིས་ཀྱི། །ཆོས་འཆད་མཉམ་བཞག་ཕྱག་རྒྱས་གླེགས་བམ་འཛིན། །སྐུ་ལ་ཆོས་གོས་རྣམ་པ་གསུམ་དང་ལྡན། །ཞབས་གཉིས་སེམས་དཔའི་སྐྱིལ་མོ་ཀྲུང་གིས་བཞུགས། །སྲིད་ཞིའི་བརྟན་གཡོ་མ་ལུས་དབང་དང་ལྡན། །བྱང་
ཤར་འདབ་སྟེང་རྒྱ་གྲམ་མཚན་པའི་ཁྲིར། །པད་ཟླའི་སྟེང་དུ་སྒྲུབ་བརྒྱུད་ཕྲིན་ལས་ཀྱི། །བྱེད་པོར་དབང་བསྐུར་ནོར་བུ་བསམ་འཕེལ་དབང་། །བགྲེས་པའི་ཉམས་ལྡན་བསྒོམ་ཞྭ་དབུ་ལ་གསོལ། །བསམ་གཏན་ངང་དུ་ཏིང་འཛིན་ཕྱག་རྒྱར་ལྡན། །ཆོས་གོས་རྣམ་གསུམ་རྡོ་རྗེ་སྐྱིལ་མོ་ཀྲུང་། །གཉིས་འཛིན་བར་ཆད་སྟོང་ཉིད་ངང་དུ་བསྟིམས། །དེ་ལྟར་དབུས་ཕྱོགས་བླ་མའི་དཀྱིལ་འཁོར་གསལ། །རྒྱབ་ཕྱོགས་སྟེང་གི་པདྨ་གེ་སར་སྟེང་། །ཉི་ཟླའི་གདན་ལ་དང་པོའི་སངས་རྒྱས་མཆོག །ཆོས་སྐུ་སྣང་བ་མཐའ་ཡས་སྐུ་མདོག་དམར། །ཞལ་གཅིག་ཕྱག་གཉིས་མཉམ་བཞག་ཞབས་རྡོར་སྐྱིལ། །གཡས་ཕྱོགས་པད་སྟེང་ཟླ་བའི་དཀྱིལ་འཁོར་དབུས། །འཕགས་པ་སྤྱན་རས་གཟིགས་དབང་གངས་རིའི་མདོག །ཞལ་གཅིག་ཕྱག་གཡས་མཆོག་སྦྱིན་གཡོན་པདྨ། །ལོངས་སྤྱོད་རྫོགས་སྐུའི་རྒྱན་ལྡན་ཞབས་རྡོར་སྐྱིལ། །གཡོན་ཕྱོགས་པདྨ་གེ་སར་ཉི་ཟླའི་སྟེང་། །འཆི་མེད་གུ་རུ་པདྨ་འབྱུང་གནས་ནི། །པད་ཞྭ་གསོལ་ཞིང་རྡོ་རྗེ་ཐོད་པ་བསྣམས། །ཁ་ཊྭཱྃ་ཕོད་ཀ་ཆོས་གོས་ཞབས་རྡོར་སྐྱིལ། །མདུན་ཕྱོགས་འོག་གི་པདྨ་ཉི་རོའི་སྟེང་། །ཡེ་ཤེས་མགོན་པོ་བེར་ནག་རང་བྱུང་རྒྱལ། །གཉིས་ཀའང་གྲི་ཐོད་འཛིན་ཅིང་འཁྱུད་སྟབས་ཀྱིས། །དར་ནག་བེར་གསོལ་རྫུ་འཕྲུལ་དྲེལ་རྟ་ཆིབས། །རྩ་གསུམ་ལྷ་ཚོགས་དེ་དག་ཐམས་ཅད་ཀྱི། །གནས་གསུམ་ༀ་དཀར་ཨཱཿདམར་ཧཱུྃ་མཐིང་མཚན། །དེ་ལས་འོད་ཟེར་ཕྱོགས་བཅུའི་ཞིང་དུ་འཕྲོས།
རབ་འབྱམས་དུས་གསུམ་རྒྱལ་བའི་ཐུགས་རྗེ་བསྐུལ། །ཀུན་ཀྱང་བསྐྱེད་པ་དང་འདྲའི་ཡེ་ཤེས་སེམས། །མདུན་གྱི་ནམ་མཁར་སྐད་ཅིག་སྤྱན་དྲངས་ནས། །ཐུགས་རྗེའི་བྱིན་རླབས་དངོས་གྲུབ་གཏིབ་པར་གྱུར། །ༀ་སརྦ་ཏ་ཐཱ་ག་ཏ་གུ་རུ་བཛྲ་ས་མ་ཛཿཛཿཧཱུྃ་ཧཱུྃ་ཕེཾ་ཕེཾ། ཅེས་བརྗོད་ལ་སྤྱན་འདྲེན་པ་ནི། སྟེང་དག་པ་ཆོས་དབྱིངས་ཕོ་བྲང་ནས། །དཔལ་དང་པོའི་སངས་རྒྱས་སྣང་མཐའ་ཡས། །མཆོག་དངོས་གྲུབ་སྤྲིན་ཕུང་ཐིབས་སེ་ཐིབ། །གནས་འདིར་བྱོན་བྱིན་ཆེན་དབབ་ཏུ་གསོལ། གཡས་པོ་ཊ་ལ་ཡི་ཞིང་ཁམས་ནས། །དཔལ་ལོངས་སྐུ་ཐུགས་རྗེ་ཆེན་པོའི་མགོན། །མཆོག་དངོས་གྲུབ་སྤྲིན་ཕུང་ཐིབས་སེ་ཐིབ། །གནས་འདིར་བྱོན་བྱིན་ཆེན་དབབ་ཏུ་གསོལ། །གཡོན་དཔལ་རི་པདྨ་འོད་ཞིང་ནས། །རྗེ་སྤྲུལ་སྐུ་གུ་རུ་ཐོད་ཕྲེང་རྩལ། །མཆོག་དངོས་གྲུབ་སྤྲིན་ཕུང་ཐིབས་སེ་ཐིབ། །གནས་འདིར་བྱོན་བྱིན་ཆེན་དབབ་ཏུ་གསོལ། །དབུས་མི་འགྱུར་གདོད་མའི་གཤིས་ཀྱི་ངང་། །རང་བྱུང་གི་གསལ་ལ་སྟོང་པ་ཡི། །སེམས་སྣང་སྟོང་དབྱེར་མེད་བདེ་བ་ཆེ། །དོན་དབྱིངས་དང་ཡེ་ཤེས་ཕོ་བྲང་ནས། །དྲན་ཆོག་གི་འཁོར་ལོའི་དབང་ཕྱུག་གཙོ། །རིགས་ཀུན་གྱི་ཁྱབ་བདག་རྡོ་རྗེ་འཆང་། །རྩ་བ་དང་བརྒྱུད་པའི་བླ་མ་རྣམས། །ཐུགས་བརྩེ་བ་ཆེན་པོས་བཟུང་སླད་དུ། །མཆོག་དངོས་གྲུབ་སྤྲིན་ཕུང་ཐིབས་སེ་ཐིབ། །གནས་འདིར་བྱོན་བྱིན་ཆེན་དབབ་ཏུ་གསོལ། །འོག་དམ་ཚིག་གཉེན་པོའི་གཞལ་ཡས་ནས། །དཔལ་མ་ཧཱ་ཀཱ་ལ་ལྕམ་དྲལ་
ཚོགས། །ཕྲིན་ལས་ཀྱི་གློག་འོད་ཁྱུགས་སེ་ཁྱུག །གནས་འདིར་བྱོན་ཕྱི་ནང་བར་ཆད་སོལ། །སྐྱབས་ཐུགས་རྗེ་ཅན་གྱི་བླ་མ་དང་། །མགོན་ཡི་དམ་དཀྱིལ་འཁོོར་མ་ལུས་དང་། །བསྟན་སྲུང་བའི་དམ་ཅན་རྒྱ་མཚོ་རྣམས། །དེང་མཆོད་པའི་གནས་འདིར་སྤྱན་འདྲེན་ན། །སྔོན་བྱང་ཆུབ་སྙིང་པོའི་སྨོན་ལམ་གྱིས། །མ་བརྒལ་དང་མ་གྲོལ་གདུལ་བྱ་རྣམས། །ཡང་དག་གི་ས་ལ་འགོད་པའི་ཕྱིར། །གནས་འདིར་བྱོན་བྱིན་རླབས་དངོས་གྲུབ་སྩོལ། །ༀ་ཤྲཱི་མཱན་གུ་རུ་དེ་ཝ་ཌཱ་ཀི་ནི་དྷརྨ་པཱ་ལ་ས་པ་རི་ཝཱ་ར་བཛྲ་ས་མ་ཡ་ཛཿཅེས་བརྗོད་ལ་དམ་ཚིག་དང་ཡེ་ཤེས་དབྱེར་མེད་དུ་གྱུར་པར་མོས་ལ། ཛཿཧཱུྃ་བྃ་ཧོཿདམ་ཚིག་ཡེ་ཤེས་དབྱེར་མེད་གཅིག་འདྲེས་གྱུར། །སླར་ཡང་ཐུགས་ཀའི་འོད་ཀྱིས་དབང་ལྷ་རྣམས། །རང་བཞིན་གནས་ནས་མ་ལུས་སྤྱན་དྲངས་ཏེ། །མཆོད་པའི་སྤྲིན་གྱི་རང་བཞིན་སྤྲོ་བར་གྱུར། །ༀ་བཛྲ་ཨརྒྷཾ། པཱདྱཾ། པུཥྤེ། དྷཱུཔྤེ། དི་པེ། གནྡྷེ། ནཻ་ཝི་དྱ། ཤབྟ་པྲ་ཏཱིཙྪ་ཡེ་སྭཱ་ཧཱ། བདེ་གཤེགས་རིགས་ལྔ་སེམས་དཔའ་སེམས་མ་དང་། །ཁྲོ་བོ་ཁྲོ་མོ་ལ་སོགས་དབང་གི་ལྷས། །དགོངས་པ་མཛད་དང་བཀྲ་ཤིས་མེ་ཏོག་འཐོར། །སྲུང་བའི་ལས་མཛད་ལྷ་མོ་རྣམས་ཀྱིས་ནི། །རིན་ཆེན་བུམ་བཟང་འཆི་མེད་བདུད་རྩི་ཡི། །རྒྱུན་གྱིས་མངོན་པར་དབང་བསྐུར་ཁྲུས་གསོལ་བགྱི། །ༀ་སརྦ་ཏ་ཐཱ་ག་ཏ་ཨ་བྷི་ཥ་ཀ་ཏ་ས་མ་ཡ་ཤྲཱི་ཡེ་ཧཱུྃ། ལྷ་རྫས་དབང་པོའི་གཞུ་ཅན་གོས་ཟུང་འབུལ། །ༀ་བཛྲ་ཝསྟྲ་ཨཱཿཧཱུྃ། །དབང་བསྐུར་ཆུ་ཞབས་གྱེན་དུ་འཁྱིལ་བས་ནི། །གཙོ་བོར་བཅོམ་
ལྡན་མི་བསྐྱོད་རྒྱས་གདབ་ཅིང་། འཁོར་རྣམས་རིགས་བདག་སོ་སོས་དབུ་བརྒྱན་གྱུར། །རྒྱལ་བའི་སྐུ་ལ་སྒྲིབ་པ་མི་འཚལ་ཡང་། །བདག་སོགས་འགྲོ་བ་སེམས་ཅན་ཀུན་དོན་ཕྱིར། །ཉོན་མོངས་བག་ཆགས་དྲི་མ་དག་གྱུར་ཅིག །ཅེས་དབང་བསྐུར་རྒྱས་གདབ་ལ། རང་ལུས་ཞིང་གི་རྡུལ་སྙེད་ཀྱི་ཕྲ་རབ་ཏུ་སྤྲུལ་ནས་ཕྱག་འཚལ་བ་ནི། ཨེ་མ་ཧོ་ལྷ་རྣམས་ཀུན་གྱི་ལྷ། །ཨེ་མ་ཧོ་རྒྱལ་དང་རྒྱལ་བའི་མཆོག །ཨེ་མ་སངས་རྒྱས་ཀུན་འབྱུང་གནས། །བླ་མའི་ཞབས་ལ་ཕྱག་འཚལ་ལོ། །གང་ཞིག་དྲན་པ་ཙམ་གྱིས་ཀྱང་། །བླ་མེད་གོ་འཕང་སྦྱིན་པ་ཡི། །ཡིད་བཞིན་རིན་ཆེན་གཏེར་ཆེན་པོ། །བླ་མའི་ཞབས་ལ་ཕྱག་འཚལ་ལོ། །དཔལ་ལྡན་ཡོན་ཏན་བསམ་ཡས་ཀྱི། །འོད་ཟེར་འབུམ་ཕྲག་བརྡལ་བ་ཡི། །མ་རིག་མུན་པ་རབ་བསལ་བ། །བླ་མའི་ཞབས་ལ་ཕྱག་འཚལ་ལོ། །བྱམས་དང་སྙིང་རྗེའི་རང་གཟུགས་ཀྱིས། །འགྲོ་ལ་བདུད་རྩིའི་བསིལ་སྦྱིན་ནས། །ངེས་དོན་འོད་དཀར་སྤྲོ་བ་ཅན། །བླ་མའི་ཞབས་ལ་ཕྱག་འཚལ་ལོ། །གཏིང་མཐའ་བྲལ་བའི་བློ་གྲོས་ཀྱི། །དྲང་ངེས་ཆོས་ཚུལ་རྒྱ་མཚོའི་བདག །སྨིན་གྲོལ་ཆུ་བོ་ཀུན་འདུས་པའི། །བླ་མའི་ཞབས་ལ་ཕྱག་འཚལ་ལོ། །གསོལ་བ་འདེབས་སོ་ཡེ་ཤེས་ཀྱི། །སྤྱན་གྱིས་གཟིགས་ལ་བྱིན་གྱིས་རློབས། །བདག་སོགས་སེམས་ཅན་ཐམས་ཅད་ལ། །དངོས་གྲུབ་དོན་གཉིས་ཆར་ཆེན་སྩོལ། །ཅེས་ཕྱག་འཚལ་ནས། ཕྱི་ཡི་མཆོད་པ་འབུལ་པ་ནི། དངོས་དང་ཡིད་སྤྲུལ་མཆོད་པའི་རྫས། །བདག་ལུས་
ལོངས་སྤྱོད་སྣང་སྲིད་རྣམས། །ཚོགས་གཉིས་བསོད་ནམས་སྤེལ་བའི་ཕྱིར། །རབ་འབྱམས་ཞིང་གང་སྤྲོ་བར་གྱུར། །ཅེས་བརྗོད་ལ། རྣམ་པར་དག་ཅིང་གཙང་བྱེད་ཀྱི། །ཡན་ལག་བརྒྱད་ལྡན་མཆོད་ཡོན་འདི། །བླ་མ་དཀྱིལ་འཁོར་ལྷ་ལ་འབུལ། །བཞེས་ནས་བྱིན་གྱིས་བརླབ་ཏུ་གསོལ། །ༀ་ཤྲཱི་མཱན་ག་རུ་དེ་ཝ་ས་པ་རི་ཝཱ་ར་བཛྲ་ཨརྒྷཾ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། དྲི་མེད་ཚངས་རལ་ལས་འོངས་པའི། །ལམ་གསུམ་རྒྱུན་གྱི་ཞལ་བསིལ་འདི། །བླ་མ་དཀྱིལ་འཁོར་ལྷ་ལ་འབུལ། །བཞེས་ནས་བྱིན་གྱིས་བརླབ་ཏུ་གསོལ། །སྔགས་ཐོག་མཐའ་འདྲ་བར། བཛྲ་པཱདྱཾ༴ ཆུ་དང་ཐང་ལས་སྐྱེས་པ་ཡི། །འདབ་སྟོང་གེ་སར་ལོ་འདབ་རྒྱས། །བླ་མ་དཀྱིལ་འཁོར་ལྷ་ལ་འབུལ། །བཞེས་ནས་བྱིན་གྱིས་བརླབ་ཏུ་གསོལ། །བཛྲ་པུཥྤེ༴ ཙནྡན་ལ་སོགས་དྲི་བསུང་ལྗོན། །བདུག་སྤོས་རྣམ་པ་ཇི་སྙེད་རྣམས། །བླ་མ་དཀྱིལ་འཁོར་ལྷ་ལ་འབུལ། །བཞེས་ནས་བྱིན་གྱིས་བརླབ་ཏུ་གསོལ། །བཛྲ་དྷཱུ་པེ༴ ཉི་ཟླ་རིན་ཆེན་འོད་ཟེར་སོགས། །སྣང་ཞིང་གསལ་བྱེད་སྒྲོན་མེ་འདི། །བླ་མ་དཀྱིལ་འཁོར་ལྷ་ལ་འབུལ། །བཞེས་ནས་བྱིན་གྱིས་བརླབ་ཏུ་གསོལ། །བཛྲ་ཨཱ་ཱལོ་ཀེ༴ སྣ་ཚོགས་སྨན་གྱི་སྦྱོར་བ་ལས། །དྲི་ཆབ་ངད་ལྡན་བྱུགས་པའི་ཚོགས། །བླ་མ་དཀྱིལ་འཁོར་ལྷ་ལ་འབུལ། །བཞེས་ནས་བྱིན་གྱིས་བརླབ་ཏུ་གསོལ། །བཛྲ་གནྡྷེ༴ རོ་བརྒྱ་ལྡན་པ་བཅུད་ཀྱི་མཆོག །ལྷ་ཡི་ཞལ་ཟས་དམ་པ་འདི། །བླ་མ་དཀྱིལ་འཁོར་ལྷ་ལ་འབུལ། །བཞེས་ནས་བྱིན་གྱིས་
བརླབ་ཏུ་གསོལ། །བཛྲ་ནཻ་ཝིདྱེ༴ སྙན་ཅིང་དབྱངས་ལྡན་རྒྱུད་མངས་དང་། །རོལ་མོའི་བྱེ་བྲག་ཇི་སྙེད་པ། །བླ་མ་དཀྱིལ་འཁོར་ལྷ་ལ་འབུལ། །བཞེས་ནས་བྱིན་གྱིས་བརླབ་ཏུ་གསོལ། །བཛྲ་ཤབྟ༴ སོ་སོའི་ཕྱག་རྒྱ་དང་བཅས་ཏེ་མཆོད་རོལ་སྣ་ཚོགས་པ་བྱའོ། །དེ་ནས་འདོད་ཡོན་རྣམ་ལྔ་འབུལ་བ་ནི། ཕྱོགས་བཅུའི་རབ་འབྱམས་ཞིང་རྣམས་ལ། །གཟུགས་དང་སྒྲ་སྙན་དྲི་ཡི་བྱུགས། །རོ་བཅུད་ལྷ་ཡི་ཞལ་ཟས་རྣམས། །བླ་མ་དཀྱིལ་འཁོར་ལྷ་ལ་འབུལ། །བཞེས་ནས་ཐུགས་རྗེས་བདག་བྱིན་རློབས། །ༀ་བཛྲ་རཱུ་པ་ཤབྡ་གནྡྷེ་ར་ས་སྤ-ཪྴེ་ཀ་མ་གུ་ཎ་བཛྲ་པཱུ་ཱུཛི་ཏེ་ཨཱཿཧཱུྃ། དེ་ནས་རྒྱལ་སྲིད་སྣ་བདུན་འབུལ་བ་ནི། གསེར་གྱི་འཁོར་ལོ་རྩིབས་སྟོང་ལྡན། །བསམ་འཕེལ་ནོར་བུ་དགོས་འདོད་འབྱུང་། །ཁྱིམ་བདག་འབྱོར་བའི་དཔལ་གྱིས་ཕྱུག །ཤེས་རབ་བདེ་སྟོང་ལང་ཚོ་ཅན། །ཅང་ཤེས་ཐར་པའི་ལམ་གྱི་སྟེགས། །ཁྱུ་མཆོག་སྟོབས་བཅུའི་རྩལ་རྫོགས་ཤིང་། །བདུད་བཞི་མཐར་བྱེད་དཔའ་པོ་སྟེ། །རྒྱལ་སྲིད་རིན་ཆེན་སྣ་བདུན་འབུལ། །ༀ་སཔྟ་རཏྣ་པྲ་ཏཱི་ཙྪ་ཡེ་ཨཱཿཧཱུྃ། དེ་ནས་བཀྲ་ཤིས་པའི་རྟགས་བརྒྱད་འབུལ་བ་ནི། རིན་ཆེན་གདུགས་བཟང་གསེར་ཉ་འཁྱུགས། །བུམ་པ་དཔལ་བེའུ་རྒྱལ་མཚན་བསྒྲེངས། །དུང་དཀར་པདྨ་འཁོོར་ལོ་སྟེ། །བཀྲ་ཤིས་རྟགས་ཀྱི་མཆོད་པ་འབུལ། །ༀ་ཨཥྚ་མདྒལ་ཧེ་ཏུ་པྲ་ཏཱི་ཙྪ་ཡེ་ཨཱཿཧཱུྃ། དེ་ནས་རྫས་བརྒྱད་འབུལ་བ་ནི། ཀུན་ཏུ་གསལ་དང་སྐྱེ་བ་ལྔ། །གིའུ་ཝྃ་ལི་ཁྲི་ཞོ་མཆོག་དང་། །ཡུངས་ཀར་དུཪྺ་བིལ་བ་སྟེ། །བཀྲ་ཤིས་རྫས་ཀྱི་མཆོད་པ་འབུལ། །ༀ་ཨཥྚ་མདྒལ་དྲ་བྱ་པྲ་ཏཱི་ཙྪ་ཡེ་ཨཱཿཧཱུྃ། དེ་ནས་མཎྜལ་འབུལ་བ་ནི། ༀ་བཛྲ་བྷཱ་མི་ཨཱཿཧཱུྃ། གསེར་གྱི་ས་གཞི་མཐའ་དབུས་བརྡལ་བའོ། །ༀ་
བཛྲ་རེ་ཁེ་ཨཱཿཧཱུྃ། རྡོ་རྗེའི་རི་ཡིས་ཁོར་ཡུག་བསྐོར་བའི་དབུས། །རི་དབང་རྒྱལ་པོ་མཆོག་རབ་ལྷུན་པོའོ། །ཤར་ལྷོ་ནུབ་བྱང་རིམ་བཞིན་གླིང་ཆེན་བཞི། །ལུས་འཕགས་པོ་དང་ཛམ་བུ་ཆོས་ཀྱི་གླིང་། །བ་ལང་སྤྱོད་དང་བྱང་གི་སྒྲ་མི་སྙན། །གླིང་ཕྲན་བརྒྱད་དང་རིན་ཆེན་ས་འཛིན་དང་། །དཔག་བསམ་རྐང་འཐུང་འདོད་པ་འཇོ་བའི་བ། །མ་རྨོས་སྙེ་མ་རྒྱལ་སྲིད་སྣ་བདུན་དང་། །གཏེར་ཆེན་བུམ་པ་སྒེག་ཕྲེང་གླུ་ུགར་མ། །མེ་ཏོག་བདུག་སྤོས་སྣང་གསལ་དྲིའི་ལྷ་མོ། །ཉི་ཟླ་གདུགས་བཟང་རྒྱལ་མཚན་སྲིད་རྩེར་གཡོ། །གཞན་ཡང་གླིང་བཞི་བྱེ་བ་ཕྲག་བརྒྱ་ཡི། །ལྷ་མིའི་དཔལ་འབྱོར་ལོངས་སྤྱོད་སྣ་ཚོགས་པ། །རབ་འབྱམས་ཞིང་གི་རྡུལ་སྙེད་གྲངས་འདས་ཀུན། །རྡོ་རྗེའི་མཎྜལ་གཅིག་ཏུ་བསྡུས་ནས་ནི། །བླ་མ་ཡི་དམ་དཀྱིལ་འཁོར་ལྷ་ཚོགས་དང་། །སངས་རྒྱས་བྱང་སེམས་དཔའ་བོ་མཁའ་འགྲོའི་ཚོགས། །ཆོས་སྐྱོང་སྲུང་མར་བཅས་ལ་དབུལ་བར་བགྱི། །བཞེས་ནས་སྨིན་གྲོལ་བྱིན་གྱིས་བརླབ་ཏུ་གསོལ། །ༀ་མཎྜ་ལ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ཞེས་ཕྱིའི་མཆོད་པ་རྣམས་འབུལ་ཞིང་། ནང་མཆོད་འབུལ་བ་ནི། མཐེབ་སྲིན་གྱིས་བདུད་རྩི་འབུལ་བཞིན་པས། ཆོས་སྐུ་མཐའ་ཡས་ལོངས་སྐུ་སྤྱན་རས་གཟིགས། །སྤྲུལ་སྐུ་རྒྱལ་དབང་པདྨ་འབྱུང་གནས་ལ། །ཡེ་ཤེས་བདུད་རྩིའི་རྒྱུན་གྱི་མཆོད་པ་འབུལ། །རྗེ་བཙུན་བདུད་ཚོགས་འདུལ་བའི་རྡོ་རྗེ་འཆང་། །ཆོས་གྲུབ་རྒྱ་མཚོ་ཕྲིན་ལས་ཤིང་རྟ་དང་། །བསྟན་པའི་ཉིན་བྱེད་གཙུག་ལག་དགའ་བའི་
དབང་། །ཐུགས་ཀྱི་རྡོ་རྗེ་འཆི་མེད་དཔལ་དར་རྗེ། །ཆོས་སྐྱོང་རྣམ་རྒྱལ་ནོར་བུ་བསམ་འཕེལ་ལ། །ཡེ་ཤེས་བདུད་རྩིའི་རྒྱུན་གྱི་མཆོད་པ་འབུལ། །མ་མགོན་ལྕམ་དྲལ་ཆོས་སྐྱོང་སྲུང་མ་ལ། །ཡེ་ཤེས་བདུད་རྩིའི་རྒྱུན་གྱི་མཆོད་པ་འབུལ། །ཟག་མེད་བདེ་བ་ཆེན་པོའི་ངང་དུ་རོལ། །སརྦ་པཉྩ་ཨ་མྲྀ་ཏ་ༀ་ཨཱཿཧཱུྃ། ཅེས་ཕུལ་ནས་གསང་བའི་མཆོད་པ་ནི། རྡོ་རྗེ་རོལ་པའི་ལྷ་མོ་བཅུ་དྲུག་པོ། །པི་ཝཾ་གླིང་བུ་རྔ་ཆེན་རྫ་རྔ་དང་། །བཞད་མ་སྒེག་མཛེས་གླུ་གར་མེ་ཏོག་སྤོས། །སྣང་གསལ་དྲི་ཆབ་གཟུགས་རོ་བཅུད་རེག་བྱ། །ཆོས་དབྱིངས་བདེ་སྟོང་ལྷ་མོ་ལ་སོགས་པས། །གསང་བ་མཆོག་གི་མཆོད་པ་ཆེན་པོ་འབུལ། །ༀ་བཛྲ་ཝི་ཎི་ཧཱུྃ་ཧཱུྃ་ཕཊ། ཐོག་མཐའ་འདྲ་བར། ཝཾ་ཤེ། མྲི་དཾ་གེ། མུ་རཉྫེ། ཧ་སྱ། ལ་སྱ། གིརྟི། ནིརྟི། དྷཱུ་པེ། པུཥྤེ། དཱེ་པེ། གནྡྷེ། ༀ་ཨཱཿརཱུ་པ་བཛྲེ་ཧཱུྃ་ཧཱུྃ་ཕཊ། ར་ས༴ སྤཪྴེ༴ དྷརྨ་དྷཱ་ཏུ་བཛྲ་ཧཱུྃ་ཧཱུྃ་ཕཊ། ཅེས་ཕུལ་ནས། མཆོད་བྱ་མཆོད་བྱེད་ཐམས་ཅད་ཀྱང་། །དྲན་རིག་གསལ་བའི་ངང་དུ་སྟོང་། །འདུས་མ་བྱས་པའི་མཆོད་པ་ཆེ། །ཀ་ནས་དག་པའི་ཀློང་དུ་བཞེས། །ༀ་མ་ཧཱ་ཤཱུ་ནྱ་ཏ་པཱུ་ཛ་ཧོཿཅེས་དེ་ཁོ་ན་ཉིད་ཀྱི་མཆོད་པ་ཆེན་པོ་སྟེ་ཕྱི་ནང་གསང་བའི་མཆོད་པ་རྣམས་གྲུབ་ནས་སྡོམ་པ་གསུམ་དང་འགལ་པའི་དམ་ཚིག་རྩ་ལྟུང་གི་ཉེས་པ་ཐམས་ཅད་བཤགས་པ་ནི། ཧོ་དགོངས་སུ་གསོལ་ལོ། །དཔལ་ལྡན་བླ་མ་ཡི་དམ་དཀྱིལ་འཁོར་གྱི་ལྷ་ཚོགས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་གསན་
དུ་གསོལ། བདག་མིང་འདི་ཞེས་བགྱི་བ་ཚེ་རབས་འཁོར་བ་ཐོག་མེད་དུས་རིང་ནས་ཐ་མ་ད་ལྟའི་བར་དུ་འདོད་ཆགས་ཞེ་སྡང་གཏི་མུག་གིས་བསྐྱེད་པའི་སྡིག་པ་མི་དགེ་བ་བཅུ། མཚམས་མེད་པ་ལྔ། དེ་དང་ཉེ་བ་ལྔ་བགྱིད་པ་དང་། སོ་སོ་ཐར་པའི་སྡོམ་པ་དང་། བྱང་ཆུབ་སེམས་དཔའི་བསླབ་པ་དང་། གསང་བ་སྔགས་ཀྱི་དམ་ཚིག་སྟེ་སྡོམ་པ་གསུམ་དང་འགལ་བའི་རྩ་བ་ཡན་ལག་གི་ཉེས་པར་གྱུར་པའི་ལྟུང་པའི་ཚོགས་ཅི་མཆིས་པ་ཐམས་ཅད་རབ་ཏུ་གནོང་འགྱོད་དྲག་པོས་མཐོལ་ལོ་བཤགས་སོ། །དག་ཚངས་སྒྲིབ་པར་མི་འགྱུར་པའི་དབུགས་དབྱུང་དམ་པ་སྩལ་དུ་གསོལ། ཅེས་ལན་གསུམ་བརྗོད། དེ་ནས། ཀྱེ་མ་རྗེ་བཙུན་བླ་མ་དམ་པ། །སྐུ་བཞིའི་དབང་ཕྱུག་རྡོ་རྗེ་འཆང་ཆེན། །སྣ་ཚོགས་ཕྲིན་ལས་འོད་སྟོང་ཟེར་གྱིས། །བཅོམ་ལྡན་ཐུགས་མཆོག་རྣམ་ཐར་ཇི་བཞིན། །འགྲོ་ཀུན་ངན་སོང་མུན་པ་གཞོམ་ནས། །རྣམ་གྲོལ་ཡང་དག་ཐར་པའི་ལམ་མཆོག །གསལ་བར་སྟོན་པའི་བཀའ་དྲིན་གསུམ་ལྡན། །ཡོངས་སུ་འཛིན་པའི་སློབ་དཔོན་དྲན་བྱུང་། །མཁའ་ཁྱབ་ཡེ་ཤེས་རོལ་པ་འབྱམས་ཀླས། །ཞིང་ཁམས་ཡོངས་ཀྱི་མངའ་བདག་ཆེན་པོ། །རྨད་བྱུང་བྱིན་རླབས་རྒྱ་མཚོའི་འབྱུང་གནས། །སངས་རྒྱས་དངོས་སུ་སྣང་བ་དྲན་བྱུང་། །གཏན་གྱི་འདུན་མའི་སྐྱབས་གནས་གཅིག་ཆོག །སྐལ་ལྡན་རྒྱུད་ལ་ཡེ་ཤེས་འཕོ་བའི། །བྱིན་རླབས་དབང་བཞིའི་ཆུ་རྒྱུན་སྩོལ་བའི། །རྩ་བའི་བླ་མ་ཁྱེད་རང་དྲན་བྱུང་། །
དཔལ་ལྡན་དྭགས་པོ་བཀའ་ཡི་བརྒྱུད་པའི། །ངེས་པ་དོན་གྱི་སྒྲུབ་བརྒྱུད་གཅིག་བསྡུས། །འགྲོ་བའི་མགོན་པོ་བླ་མ་དྲན་བྱུང་། །ཕྱག་རྒྱ་ཆེན་པོའི་དངོས་གྲུབ་སྩོལ་ཅིག །ཅེས་བླ་མ་རྒྱང་འབོད་ཀྱི་ཚུལ་དུ་སྣང་བ་འགྱུར་ངེས་སུ་མོས་གུས་ཀྱི་དག་པའི་སྣང་བ་དང་ལྡན་པས་བཏོན་ལ། དེ་ནས་བསྙེན་པ་ལ་འཇུག་པ་ནི། དེ་ལྟར་གསོལ་བ་བཏབ་པས་ཕྱོགས་བཅུ་དུས་གསུམ་གྱི་བླ་མ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ་ཡེ་ཤེས་ཆོས་སྐྱོང་སྲུང་མའི་བྱིན་རླབས་ཐུགས་རྗེ་ནུས་རྩལ་ཐམས་ཅད་འོད་ཟེར་གྱི་རྣམ་པར་མདུན་བསྐྱེད་བླ་མའི་དཀྱིལ་འཁོར་གྱི་ལྷ་ཚོགས་རྣམས་ལ་ཐིམ། གཉིས་མེད་དུ་འདྲེས། ཐུགས་རྒྱུད་བསྐུལ། སླར་འོད་ཟེར་སྟེང་འོག་ཕྱོགས་མཚམས་ཀུན་ཏུ་འཕྲོས་པས་བདག་གཞན་འབྲེལ་ཚད་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཀྱི་སྡིག་སྒྲིབ་ཉེས་ལྟུང་བྱང་ཞིང་དག་ནས། འཁོར་བ་དང་ངན་སོང་གི་སྐྱེ་སྒོ་ཆོད་ནས་ཀུན་ཀྱང་དག་པ་ཡེ་ཤེས་ཀྱི་སྐུ་ཐོབ་པའི་སྐལ་པ་དང་ལྡན་པར་གྱུར་པར་བསམ་ལ། དེ་ཡི་ངང་ནས། དང་པོ་ཆོས་སྐུ་སྣང་མཐའ་ཡས་ལ་དམིགས་ཏེ། ༀ་ཨ་མིདྷཱེ་ཝ་ཧྲཱིཿཅི་ནུས་བཟླས། དེ་ནས་ལོངས་སྐུ་སྤྱན་རས་གཟིགས་ལ་དམིགས་ཏེ། ༀ་མ་ཎི་པདྨེ་ཧཱུྃ། ཞེས་ཅི་ནུས་དང་། སྤྲུལ་སྐུ་པདྨ་འབྱུང་གནས་ལ་དམིགས་ཏེ། ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ཅི་ནུས་དང་དབུས་ཕྱོགས་བླ་མ་ཀུན་འདུས་ཀྱི་གཙོ་བོར་དམིགས་ལ། ༀ་ཨཱཿམཱ་ར་ད་མ་ཀ་བཛྲ་ཧཱུྃ། བཟླས་པ་འདི་ཉིད་བུངས་བསྐྱེད་ནས་མཚན་སྔགས་
གཞན་རྣམས་མ་བཏོན་ཀྱང་རུང་། སྤྲོ་ན་བཏོན་པ་སོགས་གང་བདེར་བྱ་ཞིང་། འོག་ཕྱོགས་མ་མགོན་ལྕམ་དྲལ་ལ་དམིགས་ཏེ། ༀ་མ་ཧཱ་ཀཱ་ལ་མ་ཧཱ་ཀཱ་ལཱི་ཧཱུྃ་ཧཱུྃ་ཕཊ། ཅེས་པའང་བཟླས་ལ། དེ་ནས་ཐབས་ཤེས་ཀྱི་རྫས་ཚོགས་ཀྱི་མཆོད་པ་འབུལ་བ་ནི་ནང་མཆོད་ལྟར་བྱིན་གྱིས་བརླབས་ལ། ༀ་ཨཱཿཧཱུྃ་གི་བར་བརྗོད་ལ། ན་མོ། ཐབས་དང་ཤེས་རབ་གཉིས་སུ་མེད་པའི་ཚོགས་ཀྱི་འཁོར་ལོ་རྒྱ་ཆེན་པོ་འདི་བྱིན་རླབས་ཀྱི་རྩ་བ། དངོས་གྲུབ་ཀྱི་འབྱུང་གནས། ཕྲིན་ལས་ཀྱི་དབང་ཕྱུག །རྩ་གསུམ་རབ་འབྱམས་དཀྱིལ་འཁོར་ལྷ་ཚོགས་རྣམས་ཀྱི་ཞལ་དུ་ཁཱ་ཧི། པཉྩ་ཨ་མྲྀ་ཏ་ལ་ཁཱ་ཧི། ག་ཎ་ཙཀྲ་ལ་ཁཱ་ཧི། ལན་གསུམ་བརྗོད། ཚོགས་ལ་སྤྱན་འདྲེན་ནི། ཧཱུྃ། ཟག་མེད་ཡེ་ནས་སྟོང་པའི་དབྱིངས། །ཀློང་ཡངས་མཐའ་བྲལ་ཞིང་ཁམས་ནས། །ཆོས་སྐུ་སྣང་བ་མཐའ་ཡས་ཀྱང་། །འདིར་གཤེགས་ཚོགས་ལ་གཤེགས་སུ་གསོལ། །རང་བྱུང་འགྱུར་མེད་ལྷུན་རྫོགས་པ། །རྣམ་དག་བདེ་ཆེན་ཞིང་ཁམས་ནས། །ལོངས་སྐུ་ཐུགས་རྗེ་ཆེན་པོ་ཡང་། །འདིར་གཤེགས༴ འགགས་མེད་ཐུགས་རྗེའི་རང་རྩལ་མདངས། །དཔལ་རི་པདྨ་འོད་ཞིང་ནས། །སྤྲུལ་སྐུ་རྡོ་རྗེ་ཐོད་ཕྲེང་རྩལ། །འདིར་གཤེགས༴ དུས་གསུམ་རྒྱལ་ཀུན་ཡེ་ཤེས་ཀྱི། །སྒྱུ་འཕྲུལ་དྲྭ་བའི་རང་བཞིན་ཅན། །ཐབས་མཁས་ཟབ་མོ་འགྲོ་བའི་གཉེན། །རྩ་བ་བརྒྱུད་པའི་བཀའ་བརྒྱུད་ཀྱི། །རིག་འཛིན་གྲུབ་ཐོབ་རྒྱ་མཚོ་རྣམས། །འདིར་གཤེགས༴ བྱ་སྤྱོད་རྣལ་འབྱོར་བླ་ན་མེད། །རྒྱུད་སྡེ་བཞི་འབྲེལ་རབ་འབྱམས་ཀྱི། །
ཡི་དམ་ཞི་ཁྲོའི་ལྷ་ཚོགས་རྣམས། །འདིར་གཤེགས་ཚོགས་ལ་གཤེགས་སུ་གསོལ། །མཁའ་སྤྱོད་ས་སྤྱོད་དག་པའི་ཞིང་། །གནས་གསུམ་སྐྱོང་བའི་དཔའ་བོ་དང་། །མ་སྲིང་མཁའ་འགྲོ་དམ་ཚིགཅན། །འདིར་གཤེགས༴ བྱང་ཤང་ཆོས་དབྱིངས་ཕོ་བྲང་ནས། །མ་ཧཱ་ཀཱ་ལ་རྡོ་རྗེ་བེར། །རང་བྱུང་རྒྱལ་མོ་འཁོར་དང་བཅས། །འདིར་གཤེགས༴ དུར་ཁྲོད་བརྒྱད་དང་ཉེར་བཞིའི་གནས། །རང་རང་སོ་སོའི་གནས་མཆོག་ནས། །ཆོས་སྐྱོང་ཕོ་རྒྱུད་མོ་རྒྱུད་རྣམས། །འདིར་གཤེགས་ཚོགས་ལ་གཤེགས་སུ་གསོལ། །ཧཱུྃ། ཚོགས་ཁང་གཞལ་ཡས་ཉམས་རེ་དགའ། །སྒྲུབ་པའི་དཀྱིལ་འཁོར་བྱིན་རེ་ཆེ། །རྡོ་རྗེའི་རྣལ་འབྱོར་དམ་རེ་གཙང་། །ཚོགས་ཀྱི་འཁོར་ལོ་བཅུད་རེ་ཆེ། །དམ་རྫས་ཚོགས་ལ་སྤྱན་འདྲེན་གཤེགས། །རྨད་བྱུང་མཆོད་པ་བཞེས་སུ་གསོལ། །ཅེས་བརྗོད་ལ། ཚོགས་ཕུད་སྤྲོས་ནས་གཏོར་མར་བྲན་ལ་ནང་མཆོད་ཀྱི་བདུད་རྩི་བྱིན་རླབས་བསངས་སྦྱངས་སྔར་བཞིན་དུ་བྱས། ༀ་ཨཱཿཧཱུྃ་གི་བར་བརྗོད། འབར་བའི་རྒྱས། ཕེཾ་ཕེཾ་ཕེཾ། པད་ཀོར་དང་བཅས་རྡོར་ཐལ་ཁ་ཕྱེ་བས། ༀ་བཛྲ་ཨཱ་རལླྀ་ཧོཿཛཿཧཱུྃ་བྃ་ཧོཿབཛྲ་ཌཱ་ཀི་ནི་ས་མ་ཡ་སྟྭཾ་དྲི་ཤྱ་ཧོ། ལན་གསུམ། ན་མོ་རཏྣ་གུ་རུ་ཨི་དཾ་བ་ལིདྟ་ཁ་ཁ་ཁཱ་ཧི་ཁཱ་ཧི། ལན་གསུམ། ཆོས་སྐུ་སྣང་བ་མཐའ་ཡས། ལོངས་སྐུ་ཐུགས་རྗེ་ཆེན་པོ། སྤྲུལ་སྐུ་པདྨ་འབྱུང་གནས། བཀའ་གྲུབ་ཐོབ་བརྒྱུད་པའི་དཔལ་ལྡན་བླ་མ་དམ་པ་རྣམས་དང་། རིགས་བརྒྱའི་ཁྱབ་བདག་རྡོ་རྗེ་འཆང་བདུད་ཚོགས་འདུལ་བའི་རྡོ་རྗེ།
འཁོར་ལོའི་མགོན་པོ་མི་ཕམ་ཆོས་གྲུབ་རྒྱ་མཚོ། བཀའ་དྲིན་མཉམ་མེད་ཕྲིན་ལས་ཤིང་རྟ། ཀུན་མཁྱེན་འཇམ་མགོན་ཆོས་ཀྱི་འབྱུང་གནས། གྲུབ་པའི་དབང་ཕྱུག་གཙུག་ལག་དགའ་བ། རྩ་བའི་བླ་མ་ཤྲཱི་ཙིཏྟ་བཛྲ། སྔགས་ཀྱི་རིག་འཛིན་ཤྲཱིའི་མཚན་ཅན། རྡོ་རྗེ་འཛིན་པ་ཆོས་སྐྱོང་རྣམ་རྒྱལ། གྲུབ་པའི་སར་གནས་ནོར་བུ་བསམ་འཕེལ་ལ་སོགས་པ་དྲིན་ཅན་རྩ་བ་དང་བརྒྱུད་པར་བཅས་པའི་བླ་མ་རྣམས་ཀྱི་ཞལ་དུ་ཨི་དཾ་བ་ལིངྟ་ཁ་ཁ་ཁཱ་ཧི་ཁཱ་ཧི། ཡི་དམ་བྱ་བའི་རྒྱུད། སྤྱོད་པའི་རྒྱུད། རྣལ་འབྱོར་རྒྱུད། རྣལ་འབྱོར་ཆེན་པོ་བླ་ན་མེད་པའི་རྒྱུད། རྒྱུད་སྡེ་ཆེན་པོ་བཞི་དང་འབྲེལ་བའི་སངས་རྒྱས་དང་བྱང་ཆུབ་སེམས་དཔའ་དུས་གསུམ་གྱི་རྒྱལ་བ་སྲས་དང་བཅས་པ། དཔའ་བོ་དང་མཁའ་འགྲོ་མ་རྣམས་ཀྱི་ཞལ་དུ་ཨི་དཾ་བ་ལིདྟ་ཁ་ཁ་ཁཱ་ཧི་ཁཱ་ཧི། དཔལ་ཡེ་ཤེས་ཀྱི་མགོན་པོ། རྡོ་རྗེ་བེར་ནག་པོ་ཅན། ལས་ཀྱི་མགོན་པོ། འཇིག་རྟེན་གྱི་མགོན་པོ། རང་བྱུང་སྲིད་པའི་རྒྱལ་མོ། ཞིང་སྐྱོང་ཀུན་དགའ་གཞོན་ནུ། སྐྱེས་བུ་རྡོ་རྗེ་ལེགས་པ་ལ་སོགས་པ་ཆོས་སྐྱོང་བའི་སྲུང་མ་དམ་ཅན་རྒྱ་མཚོ་འཁོར་དང་བཅས་པ་རྣམས་ཀྱི་ཞལ་དུ་ཨི་དཾ་བ་ལིདྟ་ཁ་ཁ་ཁཱ་ཧི་ཁཱ་ཧི། དེ་ལྟར་སྐུ་གསུང་ཐུགས་ཟག་མེད་བདེ་བ་ཆེན་པོའི་མཆོད་པས་མཉེས་ནས་མཆོག་དང་ཐུན་མོང་གི་དངོས་གྲུབ་མ་ལུས་པ་མྱུར་དུ་སྩོལ་བ་དང་། གཞན་ཡང་རྐྱེན་ཕྱི་ནང་གི་བར་ཆད་ཐམས་ཅད་ཉེ་བར་ཞི་ནས་ཕྲིན་ལས་རྣམ་པ་བཞི་བསྒྲུབ་པའི་སྟོང་གྲོགས་མཛད་དུ་གསོལ། ཅེས་པས་འབུལ།
དེ་ནས་ཕྱོགས་སྐྱོང་དང་ཞིང་སྐྱོང་རྣམས་ལ་གཏོར་མ་འབུལ་བ་ནི། ༀ་ཁ་ཁ་ཁཱ་ཧི་སོགས་ལན་བཞི་དང་། ༀ་ཧྲིཾ་ཧྲིཾ་ཧཾ་ཧཾ་ཧེ་ཧེ་ཧི་ཧི་ཕེཾ་ཕེཾ། ལན་གསུམ་གྱིས་ལས་ཀྱི་མཁའ་འགྲོ་རྣམས་ལ་འབུལ། ཧཱུྃ། གང་དག་བླ་མེད་དཀྱིལ་འཁོར་སོགས་ནས། ཕྲིན་ལས་ཐོགས་མེད་བསྒྲུབ་པར་མཛོད། །ཅེས་བརྗོད་དེ་དབུལ་བར་བྱའོ། །དེ་ནས་སྒྲུབ་པོ་རྣམས་ཚོགས་ལ་རོལ་པ་ནི། ལས་ཀྱི་རྡོ་རྗེས་ཐབས་ཀྱི་རྫས་གཡས་དང་། ཤེས་རབ་ཀྱི་རྫས་གཡོན་དུ་འཛིན་བཞིན་པས། ཀྱེ། ལོངས་སྤྱོད་འདོད་ཡོན་བསམ་མི་ཁྱབ། །བདེ་སྟོང་ཚོགས་ཀྱི་འཁོར་ལོར་རོལ། །ལེན་པ་པོས། ཧོཿབླ་ན་མེད་པའི་དམ་ཚིག་རྫས། །ཆོས་ཀུན་མཉམ་པ་ཉིད་དེར་འདུད། །ཨ་ཧོ་མ་ཧཱ་སུ་ཁ། ཞེས་བརྗོད་ནས་འདུ་ཤེས་གསུམ་དང་ལྡན་པའི་ངང་ནས་རོལ་པར་བྱའོ། །དེ་ནས་ཕུད་ལྷག་རྣམས་ཕྱོགས་གཅིག་པར་བསྡུས་ལ་བདུད་རྩི་བྲན། ཨ་ཀཱ་རོས་བྱིན་གྱིས་བརླབས་ལ། ཐོད་པའི་སྣོད་ཡངས་ཤིང་རྒྱ་ཆེ་བའི་ནང་དུ་ཕུད་ལྷག་བཤལ་ཆུའི་གཏོར་མ་རྒྱ་ཆེར་འཕྲོ་ཞིང་ཟད་མེད་ཅིར་ཡང་འཆར་བར་གྱུར། སྔོན་ཚེ་དཔལ་ཆེན་པོའི་སྤྱན་སྔར་འདུད་ཅིང་ཕྲིན་ལས་བསྒྲུབ་པར་ཁས་བླངས་པའི་ལས་ཀྱི་མཁའ་འགྲོ། འཇིག་རྟེན་མཁའ་འགྲོ། ཤ་ཟ་མཁའ་འགྲོ། མཁའ་འགྲོ་ཕོ་ཉའི་ཚོགས་རྣམས་ལ་འབུལ་བར་བགྱིའོ། །ཚིམ་ཞིང་དགྱེས་པར་བཞེས་ལ་དམ་ཚིག་ཅན་གྱི་རྣལ་འབྱོར་པ་སྐྱོང་བ་དང་། ཉམས་པ་ཅན་རྣམས་ཚར་གཅོད་རྗེས་སུ་འཛིན་ཅིང་། སངས་རྒྱས་ཀྱི་བསྟན་པ་བསྲུང་ཞིང་ཅི་ལྟར་བཅོལ་བའི་ཕྲིན་ལས་མྱུར་དུ་བསྒྲུབ་པར་མཛོད་ཅིག །ཨུ་ཙྪིཥྚ་བ་ལིངྟ་བྷ་ཀྵ་བྷ་ཀྵ་སི་སྭཱ་ཧཱ། ཅེས་ཕྱི་རོལ་དུ་དོར་ལ། བཤལ་ཆུ་ཤིན་ཏུ་ལྷག་
མ་ལ་དབང་བ་རྣམས་ལ་སྦྱིན་ནོ། །དེ་ནས་རྗེས་ཀྱི་བྱ་བ་ནི། མཆོད་པ་རྣམས་གསོ་བྲན་ལེགས་པར་བྱ་བ་ལ། གོང་ལྟར་མཆོད་པ་བྱིན་རླབས་རྣམས་བྱ་ཞིང་། ཉེར་སྤྱོད་རྣམས་དང་འདོད་ཡོན་ལྔའི་མཆོད་པའི་བར་ཕུལ་ནས་བསྟོད་པ་ནི། ཨེ་མ། དཔལ་ལྡན་དེ་བཞིན་གཤེགས་ཀུན་ཐུགས་རྗེའི་རང་བཞིན་མཐའ་མི་མངོན། །སྲིད་དང་ཞི་བའི་འཆིང་བ་གྲོལ་མཛད་བརྩེ་ཆེན་ཉི་མ་ཡིས། །མྱ་ངན་འདས་པའི་ལམ་རབ་སྟོན་ཕྱིར་འགྲོ་བློའི་དགའ་ཚལ་དུ། །བྱང་ཆུབ་མྱུ་གུ་སྐྱེད་བྱེད་འགྲོ་བའི་དེད་དཔོན་ཁྱོད་ཕྱག་འཚལ། །ཅེས་བསྟོད་ལ། དཀྱིལ་འཁོར་ལྷ་ཚོགས་བསྒྲུབ་པ་ལ། །དུག་གསུམ་དབང་གིས་ནོངས་པའི་ཚོགས། །ཉེས་བར་གྱུར་བ་མཐོལ་ཞིང་བཤགས། །མི་སྒྲིབ་ཚངས་པའི་དངོས་གྲུབ་སྩོལ། །ༀ་བཛྲ་ས་ཏྭ་ས་མ་ཡ་སོགས་ཡིག་བརྒྱ་བརྗོད་ལ། བཟོད་བར་གསོལ་ནས་ལྷག་ཆད་བསྐང་། དེ་ནས་བྱིན་རླབས་དབང་བཞི་ལེན་པ་ནི། ཕ་གཅིག་གྲུབ་ཐོབ་ཆེན་པོ། །སྐྱབས་གཅིག་ཧེ་རུ་ཀ་དཔལ། །སངས་རྒྱས་ལག་བཅང་གཏོད་པའི། །ཡེ་ཤེས་སྐྱེ་བར་བྱིན་རློབས། །ཅེས་མོས་གུས་རྩེ་གཅིག་པའི་ངང་ནས་ལན་གསུམ་བསྐྱར་ནས་བརྗོད་ལ། ཀརྨ་པ་མཁྱེན་ནོ། །ཞེས་ཅི་ནུས་སུ་བཟླས་ལ་དྲན་པ་ཡེངས་མེད་དུ་མདུན་བསྐྱེད་བླ་མའི་དཀྱིལ་འཁོར་ལ་སེམས་འཛིན་བཞག་ལ། གསལ་གདབ་པ་ནི། ༀ། ནམ་མཁའ་ལས་བྱུང་མཚན་ལྡན་ཕྱིར། །ཐོག་མ་ཐ་མ་མེད་པའི་མཆོག །སེམས་དཔའ་རྡོ་རྗེ་ཆེ་རང་བཞིན། །རྡོ་རྗེ་སེམས་དཔར་བདག་སྒྲུབས་ཤིག །དེ་ནས་མདུན་བསྐྱེད་ཡས་ནས་མར་དང་། མས་ནས་ཡར་འོད་དུ་ཞུ་སྟེ་དབུས་ཀྱི་བླ་མ་སངས་རྒྱས་ཀུན་འདུས་ཀརྨ་པའི་སྐུ་ལ་ཐིམ་པར་བསྒོམས་ལ་འོད་ཟེར་གྱི་དབང་བླང་བ་ནི། དཔལ་ལྡན་རྩ་བའི་བླ་མའི་རིན་པོ་ཆེ། །དཀོན་
མཆོག་ཀུན་འདུས་ངོ་བོ་ཀརྨ་པའི། །དཔྲལ་བའི་ༀ་ལས་འོད་ཟེར་དཀར་པོ་འཕྲོས། །རང་གི་སྨིན་མཚམས་ཐིམ་པས་སྤྱི་བོ་གང་། །བུམ་དབང་ཐོབ་ཅིང་ལུས་ཀྱི་སྒྲིབ་པ་བྱང་། །སྣང་སྟོང་ལྷ་སྐུའི་བསྐྱེད་རིམ་བསྒོམ་པར་དབང་། །སྤྲུལ་སྐུ་འགྲུབ་པའི་སྐལ་བ་ལྡན་པར་བྱས། །མགྲིན་པའི་ཨཱཿལས་འོད་ཟེར་དམར་པོ་འཕྲོས། །རང་གི་ཞལ་དུ་ཐིམ་པས་མགྲིན་པ་གང་། །གསུང་གི་དབང་ཐོབ་ངག་གི་ཉེས་ལྟུང་བྱང་། །རྩ་རླུང་ཐིག་ལེའི་རྣལ་འབྱོར་བསྒོམ་པར་དབང་། །ལོངས་སྤྱོད་རྫོགས་སྐུ་འགྲུབ་པའི་སྐལ་ལྡན་གྱུར། །ཐུགས་ཀའི་ཧཱུྃ་ལས་འོད་ཟེར་སྔོན་པོ་འཕྲོས། །རང་གི་ཡིད་ལ་ཐིམ་པས་སྙིང་ག་གང་། །ཐུགས་ཀྱི་དབང་ཐོབ་སེམས་ཀྱི་ཉོན་མོངས་བྱང་། །དགའ་བཞི་ཡེ་ཤེས་སྙོམས་འཇུག་བསྒོམ་པར་དབང་། །སེམས་ཉིད་ཆོས་སྐུར་འགྲུབ་པའི་སྐལ་ལྡན་གྱུར། །སླར་ཡང་གསང་གསུམ་འོད་ཟེར་དཀར་དམར་མཐིང་། །འཕྲོས་པས་ལུས་ངག་ཡིད་ལ་ཐིམ་པ་ཡིས། །སྒོ་གསུམ་སྒྲིབ་དག་བཞི་པའི་དབང་མཆོག་ཐོབ། །འོད་གསལ་ཕྱག་རྒྱ་ཆེན་པོ་བསྒོམ་པར་དབང་། །ངོ་བོ་ཉིད་སྐུ་འགྲུབ་པའི་སྐལ་ལྡན་གྱུར། །དེ་ནས་བླ་མ་དགྱེས་པའི་མདངས་དང་བཅས། །འོད་དུ་ལྟེམ་གྱིས་ཞུ་ནས་རང་ལ་ཐིམ། །དབྱེར་མེད་རྡོ་རྗེ་བཞི་ཡི་བྱིན་རླབས་ཞུགས། །སྣང་གྲག་རྟོག་པའི་ཆོས་རྣམས་ཐམས་ཅད་ཀྱང་། །དག་པ་ཡེ་ཤེས་བླ་མའི་དཀྱིལ་འཁོར་ཤར། །དར་གཅིག་ཕྱག་ཆེན་གྱི་ཉམས་ལེན་ངོ་བོ་བསྐྱང་ནས་མཉམ་པར་བཞག །དགེ་བ་བྱང་ཆུབ་ཏུ་བསྔོ་བ་དང་སྨོན་ལམ་གྱི་མཚམས་སྦྱར་བ་ནི། རྒྱལ་ཀུན་རྡོ་རྗེའི་
གསུང་གི་རང་བཞིན་ཅན། །བདེན་པ་གྲུབ་པ་རྣམས་ལ་ཕྱག་འཚལ་ལོ། །གཅིག་ཆོད་ཟབ་ལམ་བླ་མ་བསྒྲུབ་པ་ཡི། །དགེ་རྩ་མི་ཟད་འདུས་པ་གངྒཱའི་རྒྱུན། །འགྲོ་ཀུན་ཐར་པའི་རྒྱ་མཚོར་འཇུག་པའི་ཕྱིར། །རྣམ་གྲོལ་བྱང་ཆུབ་ཆེན་པོར་བསྔོ་བར་བགྱི། །བདག་གཞན་དུས་གསུམ་སེམས་ཅན་ཐམས་ཅད་པ། །སྐུ་བཞིའི་གོ་འཕང་དམ་པ་ཐོབ་གྱུར་ཅིག །ཅེས་བརྗོད་པར་བྱའོ། །དེ་ནས་མེ་ཏོག་གི་ཆར་ཕྱོགས་ཀུན་ཏུ་འཐོར་ཞིང་ཤིས་པ་བརྗོད་པ་ནི། ཕུན་ཚོགས་དོན་གཉིས་འབྱུང་བའ་ིགནས། །སྐུ་གསུམ་བླ་མའི་བཀྲ་ཤིས་གང་། །དེང་འདིར་ཉི་ལྟར་གསལ་གྱུར་ཏེ། །འགྲོ་བའི་མ་རིག་མུན་སེལ་ཤོག །ཇི་སྙེད་གཟིགས་པའི་སྤྱན་མངའ་བ། །བཀའ་བརྒྱུད་བླ་མའི་བཀྲ་ཤིས་གང་། །དེང་འདིར་ཉ་རྒྱས་ཟླ་ལྟར་འཆར། །རང་བྱུང་ཡེ་ཤེས་གསལ་བྱེད་ཤོག །སྙིང་རྗེའི་དབྱིངས་ལས་མངོན་སྤྱོད་སྐུ། །ཆོས་སྐྱོང་སྲུང་མའི་བཀྲ་ཤིས་གང་། །དེང་འདིར་ཕྲིན་ལས་སྐར་ཚོགས་བཀྲ། །བར་ཆད་མེད་པའི་བཀྲ་ཤིས་ཤོག །སིདྡྷི་ཛ་ཡ་ཛ་ཡ། གཞན་ཡང་བཀྲ་ཤིས་ཅི་རིགས་པར་བྱའོ། །དེ་ལྟར་མཆོག་གི་དཔལ་ལྡན་བླ་མ་རྡོ་རྗེ་ཅན་རྣམས་དཀྱིལ་འཁོར་ཚུལ་དུ་བསྒྲུབས་པ་འདི་ནི། བཀའ་དྲིན་གསུམ་ལྡན་རྡོ་རྗེ་དྲག་པོ་དངོས་ཀྱི་རྒྱལ་ཚབ་ཏུ་མངའ་གསོལ་བ་རིམ་གཉིས་ཟབ་དོན་སྙིང་པོར་མངའ་དབང་བསྒྱུར་བ་བསྟན་པའི་གསལ་བྱེད་དཔལ་དགའ་སྤྲུལ་པའི་སྐུ་ཚེ་དབང་བསྟན་འཛིན་དཔལ་བཟང་པོའི་དགོངས་བཞེད་ཇི་ལྟ་བར་གུ་རུ་རིན་པོ་ཆེའི་མཚན་གྱི་བྱིན་རླབས་ཆ་ཙམ་ཐོབ་པ་སི་ཏུ་པདྨ་ཉིན་བྱེད་དབང་པོས་ས་ཟླའི་དཀར་ཕྱོགས་ཀྱི་དགའ་བ་གསུམ་བའི་ཚེས་ལ་བཀོད་བའི་དགེ་བས་འགྲོ་ཀུན་ཟུང་འཇུག་རྡོ་རྗེ་འཆང་གི་གོ་འཕང་ཐོབ་བའི་རྒྱུར་བསྔོའོ། །མདྒ་ལཾ་ཀུརྦནྟུ།། །།
བླ་མའི་རྣལ་འབྱོར་གྲུབ་གཉིས་མཆོག་སྩོལ།
༈ བླ་མའི་རྣལ་འབྱོར་གྲུབ་གཉིས་མཆོག་སྩོལ་ཞེས་བྱ་བ་བཞུགས། ན་མོ་གུ་རུ་ཝེ། བྱིན་རླབས་དང་དངོས་གྲུབ་ཐམས་ཅད་ཀྱི་འབྱུང་གནས་བླ་མའི་རྣལ་འབྱོར་ཟབ་མོའི་ཉེ་ལམ་འདི་ལྟར་ཚིག་དོན་ཡ་མ་བྲལ་བར་ཉམས་སུ་ལེན་པར་བྱ་སྟེ། དེའང་དང་པོ་སྐྱབས་སེམས་ནི། ཕྱོགས་བཅུ་དུས་བཞིའི་མཆོག་གསུམ་རྩ་བ་གསུམ། །གཅིག་བསྡུས་བླ་མ་རྡོ་རྗེ་འཛིན་རྣམས་ལ། །སྐྱབས་སུ་མཆིའོ་མཁའ་མཉམ་འགྲོ་བ་ཀུན། །བླ་མ་སངས་རྒྱས་གོ་འཕང་མྱུར་ཐོབ་ཤོག །ལན་གསུམ་དང་། གཉིས་པ་བསྐྱེད་པའི་རིམ་པ། ཕྱི་སྣོད་ནང་བཅུད་རང་ལུས་གཟུང་འཛིན་གྱི། །ཨ་འཐས་སྤྲོས་པ་ཀུན་བྲལ་གཉུག་མའི་ངང་། །རང་སྣང་རྣམ་དག་འོག་མིན་ཆོས་ཀྱི་དབྱིངས། །ཐར་པ་ཆེན་པོའི་རྒྱན་བཀོད་ཚད་མེད་པའི། །མདུན་མཁར་དབུས་སུ་སངས་རྒྱས་ཀུན་འདུས་པ། །འཇིག་རྟེན་དབང་ཕྱུག་ཐེག་མཆོག་རྡོ་རྗེ་འཆང་། །ཕྱག་གཉིས་མཆོག་སྦྱིན་ཆོས་འཆད་པད་དཀར་འཛིན། །ཞྭ་ནག་མཐོང་གྲོལ་གསོལ་ཞིང་ལྷམ་མེར་བཞུགས། །གཡས་སུ་འབྲི་ཁུང་ཆོས་ཉིད་ནོར་བུའི་དཔལ། །སྒོམ་ཞྭ་གསོལ་ཞིང་རབ་བྱུང་ཆ་ལུགས་ཅན། །གཡོན་ཏུ་བྱམས་མགོན་རྣམ་འཕྲུལ་སི་ཏུ་ུཔ། །པདྨ་ཉིན་བྱེད་ཞྭ་དམར་གསེར་མདངས་གསོལ། །མདུན་དུ་དཔལ་ལྡན་དཔའ་བོ་སྔགས་འཆང་ཆས། །པད་ཞུ་གསོལ་ཞིང་རྡོ་རྗེ་ཐོད་ཆང་བསྣམས། །གཙོ་བོའི་ཕྱོགས་བཞིར་རིག་པ་འཛིན་དབང་པོ། །རྡོ་རྗེ་དྲག་པོའི་སྒྱུ་འཕྲུལ་ཆོས་ཉི་མ། །ཀརྨ་ཆགས་མེད་མཆོག་སྣང་བསྟན་ཕྲིན་ཞབས། །མ་ཧཱ་སུ་ཁའི་རྣམ་པར་རོལ་པ་དང་། །ཡེ་ཤེས་ཉི་མའི་སྡེ་སོགས་སྟོན་
འཁོར་རྣམས། །རང་རྟགས་རིགས་ཀྱི་ཅོད་པན་གསོལ་བཞིན་པར། །མཚན་དཔེའི་ཆ་རྫོགས་ཆོས་གོས་རྣམ་གསུམ་བཀླུབས། །ཕྱག་གཉིས་མཉམ་བཞག་ཞབས་གཉིས་སྐྱིལ་མོ་ཀྲུང་། །སེང་ཁྲི་པདྨ་ཟླ་བའི་གདན་ལ་བཞུགས། །རྩ་གསུམ་ལྷ་ཚོགས་སྤྲིན་ལྟར་གཏིབ་དབུས་གསལ། །དྲན་ཙམ་ཉིད་ལ་ཟག་མེད་བདེ་ཆེན་བསྐྱེད། །གཤེགས་བཞུད་མི་མངའ་ཆུ་མཚོར་ཟླ་གཟུགས་བཞིན། །བླ་མའི་དཀྱིལ་འཁོར་མངོན་སུམ་གསལ་བར་གྱུར། །གསུམ་པ་ཡན་ལག་བདུན་འབུལ་པ་ནི། ན་མོ། བདག་ལུས་ཞིང་རྡུལ་གྲངས་མཉམ་ལུས་སྤྲུལ་ནས། །ཡོན་ཏན་བསྔགས་བརྗོད་སྒོ་གསུམ་གུས་ཕྱག་འཚལ། །ལུས་དང་ལོངས་སྤྱོད་དུས་གསུམ་དགེ་བ་སོགས། །ཕྱི་ནང་མཆོད་སྤྲིན་རྒྱ་མཚོ་བློས་སྤྲུལ་འབུལ། །ཐོག་མེད་དུས་ནས་ཉོན་མོངས་དབང་གྱུར་པས། །སྒོ་གསུམ་ནོངས་པའི་ལས་ཀུན་མཐོལ་ཞིང་བཤགས། །རྒྱལ་བ་སྲས་དང་བཅས་པའི་རྣམ་ཐར་དང་། །གཞན་ཡང་འགྲོ་ཀུན་དགེ་ལ་རྗེས་ཡི་རངས། །བསྟན་པ་རིས་མེད་སྐྱོང་བའི་གང་ཟག་རྣམས། །གདུལ་བྱའི་ཁམས་དབང་འཚམས་པའི་ཆོས་སྟོན་བསྐུལ། །བདག་སོགས་སྙིགས་མའི་བསྟན་འགྲོར་རྗེས་དགོངས་ལ། །འཕོ་མེད་རྟག་པར་འཚོ་ཞེས་བཞུགས་གསོལ་འདེབས། །རང་གཞན་ཟག་བཅས་ཟག་མེད་དགེ་ཚོགས་ཀུན། །བླ་མེད་བྱང་ཆུབ་གོ་འཕང་ཐོབ་ཕྱིར་བསྔོ། །བཞི་པ་མོས་གུས་གསོལ་འདེབས་ནི།
རྒྱལ་བ་ཀུན་གྱི་ཐུགས་རྗེ་གཅིག་བསྡུས་པ། །ཐེག་མཆོག་རྡོ་རྗེའི་ཞབས་ལ་གསོལ་བ་འདེབས། །ནཱ་གཱ་ཱརྫུ་ུན་འཇིག་རྟེན་གསུམ་མགོན་པོའི། །བརྒྱུད་འཛིན་ཆོས་ཉིད་ནོར་བུར་གསོལ་བ་འདེབས། །དཔལ་ལྡན་སངས་རྒྱས་མཚོ་སྐྱེས་རྡོ་རྗེ་ཡི། །རྣམ་རོལ་ཉིན་བྱེད་དབང་པོར་གསོལ་བ་འདེབས། །ཨོ་རྒྱན་ལུང་ཟིན་གསང་སྔགས་སྟོན་པའི་བདག །གཙུག་ལག་ཆོས་ཀྱི་རྒྱལ་པོར་གསོལ་བ་འདེབས། །ལྔ་བདོའི་དུས་འདིར་ཐུགས་རྗེ་གཞན་ལས་མྱུར། །ཐུགས་ཀྱི་རྡོ་རྗེ་གཉིས་པར་གསོལ་བ་འདེབས། །བཀའ་གཏེར་ཟབ་ཆོས་ཡོངས་ཀྱི་མངའ་བདག་མཆོག །ཀརྨ་ཤཱ་ས་དྷ་རར་གསོལ་བ་འདེབས། །རང་རིག་ཡེ་ཤེས་མངོན་གྱུར་རྟོགས་པའི་བདག །བདེ་ཆེན་མཆོག་གི་སྤྲུལ་སྐུར་གསོལ་བ་འདེབས། །སྒྲུབ་བརྒྱུད་ངེས་གསང་བསྟན་པའི་ཕྲིན་ལས་པ། །ཛྙ་ན་སཱུཪྱ་གར་ལ་གསོལ་བ་འདེབས། །སྐྱབས་གནས་དཀོན་མཆོག་ཀུན་འདུས་ངོ་བོ་ཉིད། །དྲིན་ཆེན་རྩ་བ་བརྒྱུད་པའི་བླ་མའི་ཚོགས། །དུས་གསུམ་སངས་རྒྱས་སྲས་སློབ་བཅས་རྣམས་དང་། དབྱེར་མེད་ངེས་པས་གསོལ་བ་བཏབ་པའི་མཐུས། །སྐལ་ལྡན་མོས་པའི་བུ་ུལ་བྱིན་གྱིས་རློབས། །ཐུགས་རྗེས་སྨིན་གྲོལ་དངོས་གྲུས་བསྩལ་དུ་གསོལ། །ལྔ་པ་མཚན་སྔགས་བཟླ་བ། ཀརྨ་པ་མཁྱེན། བརྒྱ་རྩ་བརྒྱད་བཟླ། དེ་ནས། ༀ་ཨཱཿཡཱ་ན་པར་མ་བཛྲ་ཧཱུྃ། སྔགས་ཤམ། མ་ཧཱ་མུ་དྲ་སིདྡྷི་ཧཱུྃ། དྲུག་པ་འདོད་
གསོལ། ཕན་བདེའི་འབྱུང་གནས་ཐུབ་བསྟན་དམ་པའི་ཆོས། །ཐོས་བསམ་སྒོམ་དང་སྒྲུབ་པའི་རྒྱལ་མཚན་འཛིན། །ཐར་པའི་དེད་དཔོན་བསྟན་འཛིན་དམ་པ་རྣམས། །ཞབས་པད་བརྟན་ཅིང་རྣམ་བཞིའི་ཕྲིན་ལས་རྒྱས། །རིས་མེད་དགེ་འདུན་འདུས་པའི་ཚོགས་རྣམས་ཀྱང་། །ཆོས་སྤྱོད་བཅུ་དང་འཁོར་ལོ་གཉིས་ལྡན་ཅིང་། །རྣལ་འབྱོར་བདག་ཅག་བྱང་ཆུབ་བསྒྲུབ་པ་ལ། །འགལ་རྐྱེན་ཞི་ཞིང་མཐུན་རྐྱེན་ཕུན་སུམ་ཚོགས། །སྤངས་དང་རྟོགས་པའི་ཡོན་ཏན་མཐའ་རུ་ཕྱིན། །གཞན་ཕན་ཚད་མེད་འགྲུབ་པར་བྱིན་གྱིས་རློབས། །དེ་མ་ཐོབ་ཀྱི་ཚེ་རབས་ཐམས་ཅད་དུ། །མ་ནོར་ལམ་སྟོན་བླ་མས་རྗེས་འཛིན་ཅིང་། །ཞབས་ཏོག་དགུ་ཕྲུགས་མཆོད་པས་མཉེས་བྱས་ཏེ། །ཚེ་རབས་ཀུན་ཏུ་འབྲལ་བ་མེད་གྱུར་ཅིག །མཁའ་ཁྱབ་མ་གྱུར་རིགས་དྲུག་སེམས་ཅན་རྣམས། །བྱང་ཆུབ་གོ་འཕང་མྱུར་དུ་ཐོབ་པར་ཤོག །ཅེས་དང་། བདུན་པ་བྱིན་རླབས་དབང་བཞི་ལེན་པ་ནི། རྒྱལ་ཀུན་འདུས་པ་བླ་མའི་དཀྱིལ་འཁོར་གྱི། །གསང་གསུམ་ཡེ་ཤེས་རྡོ་རྗེས་བྱིན་བརླབས་ནས། །དབང་བཞི་རྫོགས་པར་དེང་འདིར་བསྐུར་དུ་གསོལ། །ལྷན་སྐྱེས་བདེ་བས་ལུས་ལ་བྱིན་གྱིས་རློབས། །རྡོ་རྗེའི་བཟླས་པས་ངག་ལ་བྱིན་གྱིས་རློབས། །ཕྱག་རྒྱ་ཆེན་པོས་ཡིད་ལ་བྱིན་གྱིས་རློབས། །རྩེ་གཅིག་སྙིང་ནས་མོས་གུས་དྲག་པོ་ཡིས། །གསོལ་བ་བཏབ་པས་འཁོར་རྣམས་རིམ་པ་བཞིན། །འོད་དུ་ཞུ་ནས་གཙོ་བོའི་སྐུ་ལ་ཐིམ། །དེ་ཉིད་དཀོན་མཆོག་
ཀུན་འདུས་ངོ་བོར་གསལ། །དཔལ་ལྡན་རིགས་ཀུན་ཁྱབ་བདག་ཀརྨ་པ། །གང་དེའི་སྤྱི་མགྲིན་ཐུགས་ཀ་ལྟེ་བ་ནས། །འོད་ཟེར་འཇའ་ཚོན་དཀར་དམར་མཐིང་སེར་རྣམས། །འཕྲོས་ནས་རང་གི་གནས་བཞི་ལ་ཐིམ་པས། །སྐུ་གསུང་ཐུགས་དང་ཡེ་ཤེས་རྡོ་རྗེ་ཡི། །དབང་བསྐུར་བྱིན་རླབས་རྒྱུད་བཞི་སྨིན་པར་གྱུར། །ཀཱ་ཡ་ཝཱ་ཀ་ཙིཏྟ་ཛྙ་ན་བཛྲ་སིདྡྷི་ཕ་ལ་ཧཱུྃ། ལན་གསུམ། ཆོས་ཀྱི་སྐུ་ལ་འགྱུར་བ་མི་མངའ་ཡང་། །གཟུགས་སྐུ་བདག་གི་ལས་ཉོན་སྒྲིབ་སྦྱང་ཕྱིར། །ཐུགས་རྗེ་ཆེན་པོས་དབྱིངས་ནས་དགོངས་སུ་གསོལ། །དགྱེས་པ་དང་བཅས་འོད་ཀྱི་རྣམ་པར་ཞུ། །ཆུ་ལ་ཆུ་བཞག་ཇི་བཞིན་རང་སེམས་དང་། །དབྱེར་མེད་མ་བཅོས་ངང་དུ་མཉམ་པར་བཞག །ཅེས་ཅི་གནས་སུ་སེམས་ཀྱི་ངོ་བོ་བསྐྱང་བ་བྱའོ། །བརྒྱད་པ་རྗེས་ཀྱི་བསྔོ་སྨོན་བྱ་བ་ནི། དགེ་བ་འདིས་མཚོན་དུས་གསུམ་བསགས་ཡོད་ཀྱི། །ཟག་བཅས་ཟག་མེད་དགེ་ཚོགས་ཇི་སྙེད་པ། །མཐའ་ཡས་འགྲོ་རྣམས་བླ་མེད་བྱང་ཆུབ་ཀྱི། །གོ་འཕང་དམ་པ་མྱུར་དུ་ཐོབ་ཕྱིར་བསྔོ། །ཅེས་སི་ཏུ་པདྨའི་མིང་ཅན་གྱིས། ལུགས་ཟུང་མངོན་པར་མཐོ་བ་རག་ཤུལ་བེ་ཧུ་དཔལ་ལྡན་ཚེ་བརྟན་གྱི་བཞེད་ངོར་ཆོ་འཕྲུལ་ཟླ་བའི་ཚེས་བཅོ་ལྔ་བཟང་པོར་བཀོད་པ་སརྦ་ཐཱ་མདྒ་ལམ།། །།
བླ་མའི་རྣལ་འབྱོར་བདེ་ཆེན་ལམ་གྱི་སྣང་བ་རབ་གསལ།
༈ བླ་མའི་རྣལ་འབྱོར་བདེ་ཆེན་ལམ་གྱི་སྣང་བ་རབ་གསལ་བཞུགས་སོ། །མདུན་གྱི་ནམ་མཁར་པད་ཟླའི་གདན་གྱི་སྟེང་། །དུས་གསུམ་རྒྱལ་བའི་ཐུགས་རྗེའི་སྒྱུ་འཕྲུལ་ལས། །ཡོངས་གྲུབ་སྐྱེ་དགུའི་འདྲེན་པ་ཆེན་པོ་པ། །བྱང་ཆུབ་སེམས་དཔའ་ཆོས་གྲུབ་རྒྱ་མཚོ་མཆོག །དབང་གི་མདངས་ལྡན་ཅོད་པན་དབུ་ལ་གསོལ། །ཕྱག་གཉིས་མཉམ་བཞག་འཆི་མེད་ཚེ་བུམ་འཛིན། །སྐུ་ལ་ཆོས་གོས་རྣམ་པ་གསུམ་གྱིས་བཀླུབས། །ཞབས་གཉིས་སེམས་དཔའི་སྐྱིལ་མོ་ཀྲུང་གིས་བཞུགས། །བདེ་བར་གཤེགས་བའི་ཚོགས་ཀུན་སྤྲིན་ལྟར་གཏིབས། །བཀའ་བརྒྱུད་གྲུབ་ཐོབ་རྒྱ་མཚོ་ཆར་ལྟར་བབས། །ཞི་དང་ཁྲོ་བོའི་སྐུར་སྟོན་ཡི་དམ་དང་། །ཌཱ་ཀི་དམ་ཅན་སྲུང་མ་རླུང་ལྟར་འཚུབས། །དེ་མདུན་བདག་དང་བདག་གི་འབྲེལ་ཐོགས་པའི། །ཕ་མར་གྱུར་པའི་འགྲོ་བ་རིགས་དྲུག་ཀུན། །རྩེ་གཅིག་བླ་མ་དཀོན་མཆོག་རྣམ་གསུམ་ལ། །དད་གུས་དྲག་པོས་སྙིང་ནས་ཕྱག་འཚལ་ཞིང་། །མཆོད་པའི་སྤྲིན་ཚོགས་ནམ་མཁའ་གང་བར་འབུལ། །དམ་ཚིག་རྩ་ལྟུང་ཐམས་ཅད་མཐོལ་ཞིང་བཤགས། །གཞན་ཕན་སྤྱོད་པ་དག་ལ་རྗེས་ཡི་རང་། །སེམས་ཅན་དོན་དུ་བསྐལ་མང་བཞུགས་གསོལ་འདེབས། །བདག་སོགས་འགྲོ་ཀུན་ཐར་པའི་ལམ་མཁན་མཆོག །བཀའ་དྲིན་གསུམ་ལྡན་གྲུབ་དབང་བླ་མ་མཁྱེན། །འགྲོ་བའི་མགོན་པོ་མཚུངས་མེད་ཆོས་ཀྱི་རྗེ། །རྒྱལ་བ་མི་ཕམ་ཆོས་གྲུབ་རྒྱ་མཚོ་མཁྱེན། །
རྗེ་དྲིན་ཅན་རྩ་བའི་བླ་མ་སངས་རྒྱས་ཀུན་འདུས་མཁྱེན་ནོ། །ཞེས་སྙིང་ཐག་པ་ནས་ཅི་ནུས་བརྗོད། ཐབས་མཁས་གང་འདུལ་ཕྲིན་ལས་ཟབ་མོའི་བདག །བརྩེ་ཆེན་ཁྱོད་ཀྱི་ཐུགས་རྗེའི་ཀློང་ཡངས་ནས། །བྱང་ཆུབ་སེམས་ཀྱི་འོད་དཀར་ཡོངས་སུ་འཆར། །གདུལ་བྱའི་མོས་བློའི་ཀུ་མུད་རྣམ་པར་བཀྲ། །གསང་ཆེན་ཐེག་པའི་དམ་ཆོས་སྤྱོད་པ་དང་། །ནམ་ཞིག་སྒྱུ་ལུས་འཕོ་བར་གྱུར་མ་ཐག །བདེ་བ་ཅན་ཞེས་བྱ་བའི་ཞིང་ཁམས་སུ། །པདྨའི་སྙིང་པོར་བརྫུས་ཏེ་སྐྱེ་བར་ཤོག །དེ་མ་ཐག་ཏུ་ཞིང་དེའི་སྟོན་པ་མཆོག །འོད་དཔག་མེད་མགོན་གར་དབང་སྤྲུལ་པའི་སྐུ། །མི་ཕམ་དཔལ་ལྡན་ཆོས་གྲུབ་རྒྱ་མཚོའི་སྡེ། །ཞལ་མཐོང་གསུང་གི་བདུད་རྩི་མྱོང་བར་ཤོག །འཁོར་རྣམས་འོད་ཞུ་གཙོར་ཐིམ་དེ་ཉིད་ཀྱང་། །དགྱེས་པའི་ཚུལ་གྱིས་རང་གི་ལུས་ལ་ཐིམ། །དབང་བཞི་ཐོབ་ནས་སྐུ་བཞི་མངོན་དུ་བྱས། །མཚོ་ལ་ཆར་བབས་ལྟ་བུར་གཉིས་མེད་གྱུར། །དར་གཅིག་ལྟ་བའི་ངང་ལ་མཉམ་པར་བཞག་ནས་ཉམས་ལེན་ལ་གནས། སྐྱེ་དང་ཚེ་རབས་བརྒྱུད་པ་ཐམས་ཅད་དུ། །རྩ་བའི་བླ་མ་མི་འབྲལ་མཆོད་པར་ཤོག །དགེ་འདིས་འགྲོ་ཀུན་མྱང་འདས་སར་བཀོད་ནས། །མགོན་པོ་ཁྱོད་ཀྱི་གོ་འཕང་ཐོབ་གྱུར་ཅིག །ཅེས་རྒྱལ་མཆོག་བཅུ་གསུམ་བའི་ལུང་གིས་རས་སྤྲུལ་ཤེས་རབ་རྒྱ་མཚོ་ཞེས་པ་གང་ནས་ལྷ་རྫས་དང་བཅས་བསྐུལ་བར་བརྟེན། ས་བརྒྱད་སེམས་དཔའ་སྲིད་པའི་ལྷ་ཆེན་གྱི་བསྟི་གནས་དང་མི་རིང་བ་གང་དེའི་འཁོར་དུ་གཏོགས་པ་གང་བ་བཟང་པོའི་རི་
ཞོལ་གྱི་ངོགས་སུ་ཀརྨ་སི་ཏུས་བྲིས་པ་ཀུན་ཏུ་བཀྲ་ཤིས་ཀྱི་དཔལ་ལ་སྤྱོད་པར་གྱུར་ཅིག །མདྒ་ལམ།། །།
སྲུང་འཁོར།
སྔོན་འགྲོ་གཏོར་མ་ནང་མཆོད་ལྟར་བྱིན་གྱིས་བརླབས་ལ། ༀ་ཁ་ཁ་ཁཱ་ཧི་ཞེས་སོགས་ལན་བཞི་བརྗོད། ཞིང་སྐྱོང་བརྒྱད་དང་མཁའ་འགྲོ་སོ་གཉིས་སོགས། །ཞེས་སོགས་འོག་ནས་འབྱུང་བ་བཞིན། ལས་བཞིའི་ཕྲིན་ལས་མཛོད་བར་དང་། གཞན་ཡང་དཀྱིལ་འཁོར་ལྟ་བར་མི་དབང་པའི། །བདུད་བགེགས་ལོག་འདྲེན་འབྱུང་པོ་ཕྱིར་དེངས་ཤིག་གང་དག་བཀའ་ལས་འདས་ན་ཡེ་ཤེས་ཀྱི། །རྡོ་རྗེས་བརླག་པར་འགྱུར་བར་གདོན་མི་ཟ། །སུམྦྷ་ནི། བརྗོད་ལ། རང་ཉིད་ལྷར་གསལ་ཐུགས་ལས་འོད་ཟེར་འཕྲོས། །རྡོ་རྗེ་འཁོར་ལོ་རིན་ཆེན་པདྨ་དང་། །རྒྱ་གྲམ་འབར་བས་སྟེང་འོག་བར་མེད་པར། །སྲུང་བའི་འཁོར་ལོ་ཡངས་ཤིང་རྒྱ་ཆེས་གཏམས། །ཛྙཱ་ན་པཉྩ་བཛྲ་རཀྵ་རཀྵ་ཧཱུྃ། ཞེས་སྲུང་འཁོར་བསྒོམས་ལ། མདུན་བསྐྱེད་ལ་འཇུག་པར་བྱ།། །།
བླ་མའི་རྣལ་འབྱོར་བྱིན་རླབས་ཆར་འབེབས་བི་ཛ་ཧ་ར།
བླ་མའི་རྣལ་འབྱོར་བྱིན་རླབས་ཆར་འབེབས་བི་ཛ་ཧ་ར། ན་མོ་གུ་རུ་ཨ་མི་ཏ་བྷ་ཡ། འདིར་སངས་རྒྱས་ཐམས་ཅད་འདུས་བའི་བདག་ཉིད་ཆེན་པོ་དཔལ་ལྡན་བླ་མ་སྒྲུབ་པའི་ཆོ་ག་མཐར་ཆགས་སུ་བརྗོད་པར་བྱ་སྟེ། དེ་ཡང་། ཇི་སྐད་དུ། མཛོད་ལས། མཆོད་པ་ཐམས་ཅད་ཡོངས་སྤངས་ནས། །བླ་མ་མཆོད་པ་ཡང་དག་བརྩམས། །ཞེས་སོགས་ཀྱི་དཔེ་ཟླས་དབེན་བའི་ཡོན་ཏན་དུ་མས་མདོ་རྒྱུད་ཀུན་ནས་བསྔགས་བརྗོད་རྒྱ་ཆེར་གསུངས་ཤིས་ངེས་པ་དོན་གྱི་ཡོངས་བཅུད་དུ་ངེས་པའི། དེ་ལ་འདིར་རྟེན་སྐུ་བརྙན་འདྲ་འབག་དངོས་སམ། ཡང་ན་རྗེ་ཞྭ་དམར་པའི་སྐུ་འདྲ་གང་བྱུང་བཤམས་ལ། མདུན་ནུ་མཆོད་པ་
རྣམ་ལྔ། ནང་མཆོད་དང་གཏོར་མ་ཚོགས་ཀྱི་ཡོ་བྱད་སྣ་ཚོགས་པ། མཎྜལ་སོགས་མཆོད་པ་ཇི་སྙེད་འདུས་པར་བྱས་ཏེ། རང་ཉིད་ཡི་དམ་ལྷ་གང་རུང་བསྐྱེད་ལ། དང་པོ་སྐྱབས་འགྲོ་སེམས་བསྐྱེད་ཡན་ལག་བདུན་པ་ནི། མདུན་གྱི་ནམ་མཁར་དུས་གསུམ་སྐྱབས་ཡུལ་དཀོན་མཆོག་རྒྱ་མཚོ་གསལ་བའི་སྤྱན་སྔར་བདག་སོགས་མ་གྱུར་མཁའ་ཁྱབ་ཀྱི་སེམས་ཅན་ཐམས་ཅད་ཀྱིས་སྒོ་གསུམ་དྭངས་པའི་བློས། སྐྱབས་མཆོག་སྐྱབས་ཀྱི་མགོན་པོ་ཐུགས་རྗེ་ཅན། །བླ་མ་ཡི་དམ་སངས་རྒྱས་ཆོས་དགེ་འདུན། །དཔའ་བོ་མཁའ་འགྲོ་ཆོས་སྐྱོང་ཚོགས་བཅས་ལ། །དེང་བཟུང་བྱང་ཆུབ་བར་དུ་སྐྱབས་སུ་མཆི། །ཅེས་སྐྱབས་སེམས་འདི་དག་ལན་གསུམ་དང་། ཀྱེ་མ། བདག་གིས་འགྲོ་ཕན་ལྷག་བསམ་དྲག་པོ་ཡི། །བྱམས་དང་སྙིང་རྗེའི་གོ་ཆ་ཆེར་བགོས་ནས། །རིགས་དྲུག་འཁོར་བ་དོང་ནས་སྤྲུག་པ་ཡི། །ཚད་མེད་ཐུགས་རྗེས་འགྲོ་དོན་སྐྱོང་བར་ཤོག །དུས་གསུམ་རྒྱལ་ཀུན་འདུས་པ་ཡི། །དཔལ་ལྡན་བླ་མར་སྐྱབས་སུ་མཆི། །བདག་ལུས་ལོངས་སྤྱོད་དངོས་སྣང་སྲིད། །དཔལ་འབྱོར་མ་ལུས་མཆོད་པར་འབུལ། །ལས་ཉོན་སྒྲིབ་པའི་སྨག་རུམ་གྱི། །འཐིབ་པོའི་དབང་གྱུར་ཉེས་ཀུན་བཤགས། །ཆུ་ཟླའི་གར་གྱི་རོལ་པ་བཞིན། །མོས་ངོར་དེར་སྣང་རྗེས་ཡི་རང་། །བླ་མེད་ཡང་དག་སྣང་བ་ཡི། །དམ་ཆོས་ཉིན་བྱེད་ཀུན་གསལ་སྟོན། །ཐེག་ཆེན་བྱང་སེམས་སྤྱོད་པ་ཅན། །མགོན་རྣམས་བསྐལ་བརྒྱར་བཞུགས་
གསོལ་འདེབས། །རབ་དཀར་དགེ་ཚོགས་ཆུ་རྒྱུན་རྣམས། །ཐར་བའི་རྒྱ་མཚོར་འཇུག་གྱུར་ཅིག །ཅེས་ཡན་ལག་བདུན་པ་འབུལ་ནས་ཚད་མེད་བཞི་བསྒོམ་པ་ནི། འགྲོ་རྣམས་བདེ་ལྡན་སྡུག་བསྔལ་དང་བྲལ་ཞིང་། །དགའ་བདེའི་བཏང་སྙོམས་ཚད་མེད་གནས་གྱུར་ཅིག །ནང་མཆོད་བདུད་རྩི། ༀ་ཨཱཿབིགྷྣཱན་གྱིས་བསངས། སྭ་བྷཱ་ཝས་སྦྱངས་ལ། ཆོས་ཀུན་སྟོང་པའི་ངང་ཉིད་ལས། །ཡྃ་ལས་རླུང་དཀྱིལ་གཞུ་དབྱིབས་ཅན། རྃ་ལས་མེད་དཀྱིལ་ཟུར་གསུམ་པ། །དེ་སྟེང་ཧཱུྃ་གསུམ་སྤྲོས་པ་ལས། །བྷནྡྷ་སྐམ་པོ་བུམ་རིལ་གསུམ། །ལྟག་པ་ནང་བསྟན་དེ་སྟེངས་སུ། །ཨཱཿལས་ཐོད་སྣོད་ཡངས་པ་ནི། །ཕྱི་དཀར་ནང་དམར་དབུས་སུ་མུ། །ཤར་དུ་བི་དང་ལྷོ་རུ་ར། །ནུབ་ཏུ་ཤུ་དང་བྱང་དུ་མ། །བདུད་རྩི་ལྔ་པོ་ཡིག་འབྲུས་མཚན། །དབུས་སུ་ུན་དང་ཤར་ལྷོར་གོ། ལྷོ་ནུབ་ཀུ་དང་ནུབ་བྱང་ད། །བྱང་ཤར་ཧ་སྟེ་ཤ་ལྔའོ། །ཡི་གེ་སོ་སོས་མཚན་པར་གྱུར། །རང་གི་སྣ་བུག་གཡོན་པ་ནས། །ཧཱུྃ་གི་དབྱིབས་ཅན་རླུང་འཕྲོས་པས། །རླུང་གིས་མེ་བསྐྱོད་ཐོད་རྫས་ཁོལ། །མ་དག་དྲི་མ་དག་གཙང་སྦྱངས། །དེ་སྟེང་ༀ་ཨཱཿཧཱུྃ་ཡིག་ལས། །འོད་འཕྲོས་ཡེ་ཤེས་བདུད་རྩི་བཀུག །དམ་ཚིག་བདུད་རྩི་གཉིས་མེད་པར། །དག་པ་ཡེ་ཤེས་བདུད་རྩིར་གྱུར། །ཅེས་བདུད་རྩི་བྱིན་གྱིས་བརླབས་ལ། དེ་ནས་མདུན་གྱི་ནམ་མཁར་བླ་མའི་དཀྱིལ་འཁོར་བསྐྱེད་པ་ནི། སྣང་སྟོང་སྒྱུ་མ་ལྟ་བུའི་ངང་ནས་འདི་ལྟར་བསྒོམ་པར་བྱའོ། །ༀ་ཤུནྱཱ་ཏ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ། གཟུང་འཛིན་གྱིས་བསྡུས་བའི་ཆོས་ཐམས་ཅད་དོན་དམ་ཡེ་ཤེས་རྡོ་རྗེའི་དབྱིངས་སུ་བསྒྱུར་ནས། ཕྱི་ནང་སྣང་སྲིད་གཉིས་བསྡུས་དངོས་པོ་རྣམས། །
སྟོང་ཉིད་ཆེན་པོའི་དབྱིངས་སུ་སྦྱང་བྱས་ནས། །མདུན་གྱི་ནམ་མཁར་རིན་ཆེན་གཞལ་ཡས་ཁང་། །མཚན་ཉིད་ཡོངས་རྫོགས་རྒྱན་དང་བཀོད་པ་རྣམས། །ཞིང་ཁམས་རབ་འབྱམས་ལྷུན་གྲུབ་དེ་དབུས་སུ། །གྱད་དང་སེང་གེ་བརྒྱད་བཏེགས་རིན་ཆེན་ཁྲིར། །དབྱིབས་ལེགས་རྨད་བྱུང་དེ་སྟེང་པདྨ་དཀར། །དྲི་མེད་འདབ་སྟོང་རྒྱས་པ་དེ་སྟེངས་སུ། །རབ་དཀར་ལྷུན་སྡུག་ཟླ་བའི་དཀྱིལ་འཁོར་དབུས། །དུས་གསུམ་སངས་རྒྱས་ཀུན་གྱི་ཕྲིན་ལས་མཛོད། །མི་བཟད་རྒྱན་འཁོར་ལྔ་ཡི་བདག་པོ་སྟེ། །རྡོ་རྗེ་སློབ་དཔོན་ཆེན་པོའི་སྐུར་སྣང་བ། །དཔལ་ལྡན་མི་ཕམ་ཆོས་གྲུབ་རྒྱ་མཚོ་ནི། །ཞལ་གཅིག་ཕྱག་གཉིས་སྐུ་མདོག་དཀར་དམར་མདངས། །ཐབས་ཤེས་དབྱེར་མེད་རྡོ་རྗེ་དྲིལ་བུ་འཛིན། །སྤྱན་གཉིས་ཆོས་ཉིད་འགྱུར་མེད་དོན་ལ་གཟིགས། །དབུ་ལ་མཐོང་གྲོལ་པདྨ་རཱ་གའི་མདོག །ཁྱུང་གཤོག་གསེར་མདངས་རིན་ཆེན་ཕྲ་ཚོམ་ཅན། །རིགས་བདག་པདྨ་གར་དབང་ཚུལ་དུ་གསོལ། །ཆོས་གོས་རྣམ་གསུམ་ཟ་འོག་བེར་ཆེན་བཀླུབས། །ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་བཞུགས། །གནས་གསུམ་ༀ་དཀར་ཨཱཿདམར་ཧཱུྃ་སྔོན་མཚན། །གཞན་ཡང་སྟེང་འོག་ཕྱོགས་མཚམས་ཐམས་ཅད་དུ། །སངས་རྒྱས་བྱང་སེམས་རིག་འཛིན་གྲུབ་ཐོབ་ཚོགས། །ཡི་དམ་དཔའ་བོ་མཁའ་འགྲོ་ཆོས་སྐྱོང་དང་། །ཞིང་སྐྱོང་བསྟན་སྲུང་རྒྱ་མཚོ་མ་ལུས་པ། །དཔག་མེད་
མཐའ་ཡས་བརྗོད་བྲལ་ཇི་སྙེད་ཚོགས། །བར་མཚམས་མེད་པར་བུ་ཡུག་འཚུབས་བཞིན་བཞུགས། །གཙོ་བོའི་ཐུགས་ཀའི་ཧཱུྃ་ལས་འོད་ཟེར་འཕྲོས། །རྣམ་དག་ཕྱོགས་བཅུའི་ཞིང་དང་འོག་མིན་གནས། །ཁྱད་པར་བདེ་ལྡན་པདྨ་བཀོད་ཞིང་ནས། །རྒྱལ་བ་འོད་སྣང་མཐའ་ཡས་ཐུགས་རྒྱུད་བསྐུལ། །མཆོག་གི་སྤྲུལ་སྐུ་གར་གྱི་དབང་པོ་ལ། །བཀའ་བརྒྱུད་བླ་མ་ཡི་དམ་ལྷ་ཚོགས་དང་། །དཔའ་བོ་ཌཱ་ཀི་ཆོས་སྐྱོང་འཁོར་ཚོགས་བཅས། །ཆར་སྤྲིན་གཏིབས་བཞིན་མདུན་བསྐྱེད་ལྷ་རྣམས་ལ། །གཉིས་མེད་དུ་མ་རོ་གཅིག་ངང་ཉིད་དུ། །དམ་ཚིག་དང་ནི་ཡེ་ཤེས་མཉམ་ཉིད་གྱུར། །གུ་རུ་དེ་ཝ་ཌཱ་ཀི་ནི་དྷརྨ་པཱ་ལ་ཨེ་ཧྱ་ཧི་བཛྲ་ས་མ་ཡ་ཛ་ཛཿཛཿཧཱུྃ་བྃ་ཧོཿསླར་ཡང་ཐུགས་ལས་འོད་ཟེར་དཀར་པོ་འཕྲོས། །རིགས་ལྔ་ཡུམ་ལྔ་ལ་སོགས་དབང་ལྷའི་ཚོགས། །རང་བཞིན་གནས་ནས་སྤྱན་དྲངས་མདུན་མཁར་བཞུགས། །དེ་བཞིན་གཤེགས་ཀུན་དབང་གི་དགོངས་པ་བཛད། །གཤེགས་མ་རྣམས་ཀྱིས་ཤིས་བརྗོད་མེ་ཏོག་འཐོར། །རིན་ཆེན་བུམ་པ་བདུད་རྩིས་ལེགས་གཏམས་པས། །དབང་བསྐུར་སྐུ་གང་ཆུ་ཞབས་ཡར་ལུད་ནས། །རིགས་བདག་པདྨ་གར་དབང་དབུ་བརྒྱན་གྱུར། །ཅེས་དབང་བསྐུར་རྒྱས་གདབ་དང་། དེ་ནས་མཆོད་བ་འབུལ་བའི་རིམ་པ་ནི། མཆོད་པ་རྣམས་ནང་མཆོད་བདུད་རྩིས་བསངས་ལ། ༀ་ཨཱཿབིགྷྣཱན་སོགས་དང་། སྭ་བྷཱ་ཝས་སྦྱངས། སྟོང་པའི་ངང་ལས་རིན་པོ་ཆེའི། །སྣོད་མཆོག་ཡིད་འོང་དུ་མའི་ནང་། །
མཆོད་ཡོན་ཞབས་བསིལ་མེ་ཏོག་སྤོས། །སྣང་གསལ་དྲི་ཆབ་ཞལ་ཟས་དང་། །སྒྲ་སྙན་ལ་སོགས་གཞན་ཡང་ནི། །ཕྱི་ནང་མཆོད་རྫས་དཔག་མེད་ཚོགས། །ཟག་མེད་ཀུན་བཟང་མཆོད་པའི་སྤྲིན། །བདེ་ཆེན་ཡེ་ཤེས་སྐྱེད་བྱེད་གྱུར། །ༀ་བཛྲ་ཨརྒྷཾ་ཨཱཿཧཱུྃ། དེ་བཞིན་དུ། པཱདྱཾ། པུཥྤེ། དྷཱུ་པེ། ཨཱ་ལོ་ཀེགནྡྷེ། ནི་ཝི་དྱ། ཤབྡ། སོགས་དང་། རཱུ་པ། ཤབྡ། གནྡྷེ། རཱ་ཱས། སྤཪྴེ། བི་ཤྭ་སྥ་ར་ཎ་ཨཱ་ཧཱུྃ་གིས་བྱིན་བརླབས་ནས། རབ་ཏུ་དག་གཙང་དྲི་མེད་གདུང་སེལ་བའི། །རྡོ་རྗེའི་མཆོད་ཡོན་འབུལ་གྱི་བདག་བྱིན་རློབས། །ༀ་ཤྲཱི་མཱན་གུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་བཛྲ་ཨརྒྷཾ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། དྭངས་ཤིང་སིམ་པའི་རྒྱུར་གྱུར་དལ་འབབས་ཀྱི། །ཞབས་བསིལ་ཡིད་འོང་འབུལ་གྱི་བདག་བྱིན་རློབས། །སྔགས་ཐོག་མཐའ་འདྲ་བ། པཱ་དྱཾ། སྐབས་གསུམ་མེ་ཏོག་མནྡཱ་ར་བ་སོགས། །ཆུ་སྐྱེས་ཐང་སྐྱེས་འབུལ་གྱི་བདག་བྱིན་རློབས། །པུཥྦེ། དྲི་བསུང་ཕུན་ཚོགས་སྤྲིན་ཆེན་ཕྱོགས་མཐར་དཀྲིགས། །བདུག་པའི་སྤོས་མཆོག་འབུལ་གྱི་བདག་བྱིན་རློབས། །དྷཱུ་པེ། ཉི་ཟླ་གཟའ་སྐར་འཕྲུལ་གྱི་གསལ་བྱེད་སོགས། །སྣང་བའི་རིགས་ཀུན་འབུལ་གྱི་བདག་བྱིན་རློབས། །ཨཱ་ལོ་ཀེ། ཇི་སྙེད་སྨན་སྤོས་སྦྱར་བ་ལས་བྱུང་བའི། །བྱུགས་པའི་དྲི་བཟང་འབུལ་གྱི་བདག་བྱིན་རློབས། །གནྡྷེ། ལྷ་ཡི་ཞལ་ཟས་རོ་བརྒྱ་དང་ལྡན་པ། །བཅུད་ཀྱིས་
ཡོངས་གཏམས་འབུལ་གྱི་བདག་བྱིན་རློབས། །ནཻཝཱི་དྱ། གྲག་སྟོང་སྒྲ་ཡི་བྱེ་བྲག་སྣ་ཚོགས་དང་། །མི་ཤིགས་ནཱ་ད་འབུལ་གྱི་བདག་བྱིན་རློབས། །ཤབྡ། རོལ་མོ་ལྡིར། མཐའ་ཡས་རབ་འབྱམས་འཇིག་རྟེན་གྱི། །གཟུགས་བཟང་དབྱངས་སྙན་དྲི་ངད་ལྡན། །བཤོས་གཙང་རེག་འཇམ་དུ་ཀུ་ལ། །རྣམ་མང་མཆོད་འབུལ་བདག་བྱིན་རློབས། །ༀ་ཤྲཱི་མཱན་གུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་བཛྲ་རཱུ་པ། ཤབྡ། གྷནྡྷེ། རཱ་ས། སྤཪྴེ་པཱུ་ཛི་ཏེ་ཨཱཿཧཱུྃ། གཞན་ཡང་སྲིད་ཞིའི་ལོངས་སྤྱོད་ཀྱི། །དཔལ་འབྱོར་རྒྱ་ཆེན་མི་བཟད་པ། །བསྐལ་པར་རྒྱུན་མི་འཆད་པ་ཡི། །མཆོད་སྤྲིན་མཁའ་དབྱིངས་གང་གྱུར་ཅིག །དེ་ནས་མཎྜལ་ནི། ༀ་བཛྲ་ས་ཏྭ་སོགས་ཡི་གེ་བརྒྱ་པ་བརྗོད་ལ། རྡོ་རྗེའི་ས་གཞི་རྣམ་པར་དག་པའི་དཀྱིལ་འཁོར་ལ། །མུ་ཁྱུད་ར་བས་ཡོངས་བསྐོར་དབུས་སུ་རི་དབང་པོ། །ལྷུན་པོ་མཆོག་རབ་ཤིན་ཏུ་མངོན་མཐོ་ལྷམ་མེ་བ། །ལུས་འཕགས་འཛམ་གླིང་བ་ལང་སྤྱོད་དང་སྒྲ་མི་སྙན། །ཤར་ལྷོ་ནུབ་བྱང་གླིང་ཆེན་བཞི་སྟེ་གླིང་གཡོག་དང་། །རིན་ཆེན་རི་བོ་དཔག་བསམ་རྐང་འཐུང་འདོད་འཇོའི་བ། །མ་རྨོས་ལོ་ཏོག་འཁོར་ལོ་ནོར་བུ་བཙུན་མོ་དང་། །ཁྱིམ་བདག་ཅང་ཤེས་ཁྱུ་མཆོག་གཡུལ་རྒྱལ་དཔའ་བོ་ཆེ། །གཏེར་ཆེན་བུམ་བཟང་སྒེག་པ་ཕྲེང་འཛིན་གླུ་དབྱངས་མ། །གར་མཁན་མེ་ཏོག་བདུག་སྤོས་སྣང་གསལ་དྲི་ཆབ་ཐོགས། །འདོད་ཡོན་ལྷ་མོ་རབ་འབྱམས་ཞིང་བཀང་མཆོད་པ་སྤྲོ། །ཉི་ཟླ་རིན་ཆེན་གདུགས་
བཟང་རྣམ་རྒྱལ་རྒྱལ་མཚན་བསྒྲེང་། །གཞན་ཡང་བར་མཚམས་ཀུན་ཏུ་ལྷ་མིའི་མཆོད་པའི་རྫས། །མཐའ་ཡས་མུ་མེད་ཕྲ་རབ་རྡུལ་གྱི་གྲངས་ལས་འདས། །བཀོད་ལེགས་རྨད་བྱུང་ཕུན་ཚོགས་ཡོན་ཏན་བརྗིད་པ་འདི། །དཔལ་ལྡན་བླ་མ་ཡི་དམ་སངས་རྒྱས་ཆོས་དགེ་འདུན། །དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས་ལ་འབུལ་བར་བགྱི། །བདག་གཞན་འགྲོ་ལ་བརྩེ་བར་དགོངས་མཛོད་དབྱིངས་ནས་རོལ། །བྱིན་རླབས་ཆར་གྱི་མཆོག་དང་ཐུན་མོང་དངོས་གྲུབ་སྩོལ། །ༀ་མཎྜལ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ཕྱག་འཚལ་མཆོད་བཤགས་ཡི་རང་བསྐུལ་གསོལ་འདེབས། །དུས་གསུམ་དགེ་རྩ་ཆོས་དབྱིངས་ཆེན་པོར་བསྔོ། །ཅེས་མཎྜལ་ཕུལ་ནས། ནང་མཆོད་འབུལ་བ་ནི། སྐུ་གསུམ་ཡེ་ཤེས་ལྔ་བདག་རྡོ་རྗེ་ཅན། །བཀའ་བརྒྱུད་རིག་འཛིན་གྲུབ་ཐོབ་རྒྱ་མཚོ་སོགས། །ཞིང་ཁམས་རབ་འབྱམས་བཞུགས་པའི་མཆོད་འོས་ལ། །དག་པ་ཡེ་ཤེས་བདུད་རྩིའི་རྒྱུན་འབུལ་བཞེས། །མཆོག་དང་ཐུན་མོང་དངོས་གྲུབ་བསྩལ་དུ་གསོལ། །ༀ་ཨཱཿཧཱུྃ། ཞེས་འབུལ། དེ་ནས་སྐབས་འདིར་བསྟོད་བཤགས་འབུལ་བ་ནི། ཆོས་དབྱིངས་ཀྱི་ནམ་མཁའ་མཐའ་དབུས་བརྡལ། །བདེ་ཆེན་རྩལ་མ་འགགས་སྤྲིན་ཚོགས་གཏིབས། །སྒྱུ་འཕྲུལ་གར་རྩེད་ཀྱི་ཆར་རྒྱུན་འབབས། །སྐུ་གསུམ་གྱི་བདག་ཉིད་ཁྱོད་ལ་བསྟོད། །སྐུ་མཚན་དཔེའི་ཉིན་བྱེད་འོད་སྟོང་ལྡན། །ལོག་རྟོག་གི་མུན་ཆེན་ཕ་མཐར་གཞོམ། །མཐོང་ཙམ་གྱིས་གྲོལ་བའི་ལམ་མཆོག་
སྟོན། །མཆོག་རྡོ་རྗེའི་སྐུ་ལ་ཕྱག་འཚལ་བསྟོད། །གསུང་ཡན་ལག་དྲུག་ཅུའི་དབྱངས་དང་ལྡན། །བཀའ་བརྒྱད་ཁྲི་བཞི་སྟོང་ཆོས་འཁོར་བསྐོར། །ཐོས་ཙམ་གྱིས་ཡང་དག་བདེན་པ་རྟོགས། །མཆོག་རྡོ་རྗེའི་གསུང་ལ་ཕྱག་འཚལ་བསྟོད། །ཐུགས་མཐའ་བྲལ་ཟབ་ཞི་སྤྲོས་དང་བྲལ། །ཏིང་ངེ་འཛིན་བརྒྱ་ཕྲག་སྟོང་མངའ་བ། །དྲན་ཙམ་གྱིས་རྣམ་གྲོལ་ལམ་ལ་བཀོད། །མཆོག་རྡོ་རྗེའི་ཐུགས་ལ་ཕྱག་འཚལ་བསྟོད། །དུས་གསུམ་གྱི་རྒྱལ་བ་མ་ལུས་པ། །ཀུན་འདུས་པ་བླ་མ་རྡོ་རྗེ་འཆང་། །དཔལ་མི་ཕམ་ཆོས་གྲུབ་རྒྱ་མཚོའི་ཞབས། །བདག་མགོན་མེད་འདི་ནས་བྱང་ཆུབ་བར། །མི་འབྲལ་བར་གཅིག་ཏུ་སྨོན་ལགས་ན། །རྗེ་ཁྱེད་ཀྱི་ཐུགས་རྗེས་བདག་བྱིན་རློབས། །དངོས་སྣང་གི་འཛིན་པའི་ཞེན་ཆགས་དང་། །འཁྲུལ་སྣང་ལ་ཨ་འཐས་རེ་དོགས་སོགས། །ཆོས་བརྒྱད་ཀྱི་ཉོན་མོངས་དགྲ་བོ་འདི། །རང་སར་ཡལ་བདེན་མེད་རྟོགས་གྱུར་ཅིག །སྐྱེ་མེད་ཀྱི་ངང་དུ་འགགས་མེད་པ། །གནས་མེད་ཀྱི་རྟོགས་པའི་རྩལ་རྫོགས་ཤོག །དུས་སྙིགས་མ་ལྔ་ཡི་ཡང་མཐའ་འདིར། །སྐལ་མེད་བདག་སྐལ་བར་ལྡན་ནམ་སྙམ། །རྗེ་སངས་རྒྱས་བདུད་འདུལ་རྡོ་རྗེ་དང་། །མཆོག་དབང་གི་ཅོད་པན་འཛིན་པ་གཉིས། །མཐོང་ཐོས་པས་ཐུགས་རྗེའི་ཟླ་སྣང་གིས། །བདག་བློ་ཡི་དད་བའི་ཀུ་མུད་རྒྱས། །བཅོས་མིན་གྱི་མོས་གུས་དྲག་པོ་ཡིས། །ལུས་བྱེ་སྙེད་སྤྲུལ་ནས་ཕྱག་འཚལ་ཞིང་། །ངག་ལྷང་ལྷང་གསོལ་བ་འདེབས་འདེབས་སོ། །
ཡིད་དུང་དུང་འདུན་པ་རྩེ་གཅིག་པས། །ཕ་མཁྱེན་ནོ་དུས་གསུམ་སངས་རྒྱས་མཁྱེན། །ཕ་མཁྱེན་ནོ་སངས་རྒྱས་ཀུན་འདུས་མཁྱེན། །བདག་ལས་ཉོན་ཁུར་གྱིས་ལྕི་བ་ཡིས། །དངོས་བཀའ་ཡི་གདམས་པ་གཡེལ་ལགས་ཀྱང་། །གདུང་ཤུགས་ཀྱི་མོས་གུས་འབར་བའི་མཐུས། །ཉམས་གསལ་སྣང་ངང་དུ་ཆོས་སྟོན་གསོལ། །མཆོག་ཁ་སྦྱོར་ཡན་ལག་བདུན་ལྡན་པ། གནད་མ་ཧཱ་མུ་དྲའི་བདག་ཉིད་ཅན། །ལམ་གཅིག་ཆོད་ཟབ་མོ་མྱུར་བརྒལ་ནས། །སྐུ་བཞི་ཡི་རྒྱལ་སར་དྲང་དུ་གསོལ། །ཅེས་དང་། དེ་ནས་སྙིང་པོ་བཟླས་པ་ནི། མདུན་བསྐྱེད་བླ་མའི་ཐུགས་ཀར་ཟླ་སྟེང་ཧྲཱིཿ། དམར་པོའི་མཐའ་མར་ཡིག་དྲུག་འཁོར་བ་ལས། །འོད་ཟེར་འཕྲོས་པས་བདག་གཞན་འགྲོ་ལ་ཐིམ། །སྡིག་སྒྲིབ་ཀུན་དག་སྣང་སྟོང་མངོན་དུ་གྱུར། །ༀ་ཨ་མི་དྷེ་ཝ་ཧྲཱིཿཅི་ནུས་དང་། ༀ་ཨཱཿདྷརྨ་སིདྡྷ་སཱ་ག་ར་ཧཱུྃ། མཚན་སྔགས་ཀྱང་བཟླའོ། །བླ་མ་ལ་གསོལ་བ་འདེབས་སོ། །བདག་འདྲའི་དམུ་རྒོད་སེམས་ཅན། །ལས་ངན་གཡང་ས་བརྒལ་ནས། །ཁྱོད་ཀྱི་ཞིང་ཁམས་བདེ་ལྡན་། །པདྨོ་བཀོད་པར་སྐྱེས་ནས། །རྒྱལ་བའི་ཞལ་མཐོང་ལུང་ཐོབ། །རྩེ་གཅིག་སྨོན་ལམ་འདེབས་སོ། །མི་ཕམ་ཆོས་གྲུབ་རྒྱ་མཚོ། །མཁྱེན་ནོ་ཐུགས་རྗེས་ཟུངས་ཤིག །ཅེས་རྒྱང་འབོད་ཚུལ་དུ་བྱའོ། །ཡང་། ཨ་ཧོཿརང་སེམས་འཁྲུལ་པ་ཞེས་དང་། མ་འོངས་དྲུག་པ་མཚན་གཉིས་ཀྱང་སྤྲོ་ན་བརྗོད། དེ་ནས་ཕྱི་ནང་དམ་ཚིག་ཉམས་ཆག་བཤགས་པ་ནི། ཀྱཻ། བླ་མ་རིན་པོ་
ཆེ་དཀྱིལ་འཁོར་ཀུན་གྱི་ཁྱབ་བདག་དཔའ་བོ་ཆེན་པོ་དང་། གཞན་ཡང་མཁྱེན་ཅིང་གཟིགས་པ་མངའ་བ་ཐམས་ཅད་དགོངས་སུ་གསོལ། བདག་མིང་འདི་ཞེས་བགྱི་བའི་འཁོར་བ་ཐོག་མེད་ནས་ད་ལྟའི་བར་དུ་ཉོན་མོངས་པའི་དབང་ལས་གྱུར་པའི་མི་དགེ་བའི་ལས་ཀྱི་སོ་ཐར་དང་གསང་སྔགས་བྱང་སེམས་ཀྱི་དམ་ཚིག་དང་འགལ་བའི་སྡིག་སྒྲིབ་ཉེས་ལྟུང་ནོངས་པ་ཐམས་ཅད་དེང་ཡེ་ཤེས་ཀྱི་སྤྱན་དང་ལྡན་པ་རྣམས་ཀྱི་དྲུང་དུ་མཐོལ་ལོ་བཤགས་སོ། །དེ་ལྟར་ཉེས་ཚོགས་བཤགས་པའི་བསོད་ནམས་ཀྱིས། །རྒྱལ་ཀུན་མགྲིན་དབྱངས་གཅིག་པས་དབུགས་དབྱུང་གྱུར། །ཕྱིན་ཆད་ནོངས་པར་བགྱིས་པའི་ལས་གང་དག །སྲོག་ལ་བབ་ཀྱང་མི་འདོར་དམ་བཅའ་བཟུང་། །ཞེས་བཤགས་སྦྱང་སྟོབས་བཞིའི་ཡ་གྱལ་རྟེན་བླ་མའི་སྟོབས་ཁྱད་འཕགས་གསུངས་ཕྱིར་འདི་ཡང་འབད་པས་ཟུངས་ཤིག །ཚོགས་གཉིས་རྒྱ་མཚོའི་རླབས་ཕྲེང་གཡོ་བའི་ཕྱིར། །ཚོགས་འཁོར་བྱིན་རླབས་མྱུར་འབེབས་བརྗོད་པར་བྱ། །ནང་མཆོད་ལྟར་ཚོགས་བྱིན་གྱིས་བརླབས་ནས། དག་པ་ཡེ་ཤེས་བདུད་རྩིར་གྱུར། །བར་དང་། ཧཱུྃ། ཐབས་དང་ཤེས་རབ་དབྱེར་མེད་པའི། །འདོད་ཡོན་ཞལ་ཟས་ཚོགས་འཁོར་ལོ། །ཤ་ལྔ་བདུད་རྩི་ལྔ་དང་ལྡན། །ཟག་མེད་ལོངས་སྤྱོད་ཆར་འབེབས་གྱུར། །པཉྩ་ཨ་མྲི་ཏ་ལ་ཁཱ་ཧི། ག་ན་ཙཀྲ་ལ་ཁཱ་ཧི། དེ་ནས་ཚོགས་རོལ་གྱི་མགྲོན་རྣམས་སྤྱན་དྲངས་པ་ནི། ཧཱུྃ་རང་སྣང་ཆོས་དབྱིངས་ཞིང་ཁམས་ནས། །བཀའ་བརྒྱུད་བླ་མ་སྐུ་བསྐྱོད་འཚལ། །རྣམ་འཕྲུལ་ཀློང་ཡངས་ཐིབས་སེ་ཐིབ། །འདིར་
གཤེགས་ཚོགས་ཀྱི་མཆོད་པ་བཞེས། །ནུབ་ཕྱོགས་བདེ་ཆེན་ཞིང་ཁམས་ནས། །རྩ་བའི་བླ་མ་སྐུ་བསྐྱོད་འཚལ། །བྱིན་རླབས་སྤྲིན་ཕུང་ཀྱི་ལི་ལི། །འདིར་གཤེགས་ཚོགས་ཀྱི་མཆོད་པ་བཞེས། །ཕྱོགས་བཅུའི་ཞིང་ཁམས་རབ་འབྱམས་ནས། །སངས་རྒྱས་བྱང་སེམས་སྐུ་བསྐྱོད་འཚལ། །ཐུགས་རྗེའི་ཆར་རྒྱུན་སི་ལི་ལི། །འདིར་གཤེགས་ཚོགས་ཀྱི་མཆོད་པ་བཞེས། །དག་པ་མཁའ་སྤྱོད་ཞིང་ཁམས་ནས། །ཡི་དམ་ཌཱ་ཀི་སྐུ་བསྐྱོད་འཚལ། །དངོས་གྲུབ་དབྱར་རྔ་དི་རི་རི། །འདིར་གཤེགས་ཚོགས་ཀྱི་མཆོད་པ་བཞེས། །དུར་ཁྲོད་ཆེན་པོའི་གནས་བརྒྱད་ནས། །ཆོས་སྐྱོད་སྲུང་མ་སྐུ་བསྐྱོད་འཚལ། །ཕྲིན་ལས་གློག་འོད་ཁྱུགས་སེ་ཁྱུག །འདིར་གཤེགས་ཚོགས་ཀྱི་མཆོད་པ་བཞེས། །ཙཱ་རི་ཡེ་ཤེས་འཁོར་ལོ་ནས། །ཞིང་སྐྱོང་འཁོར་བཅས་སྐུ་བསྐྱོད་འཚལ། །མྱུར་མགྱོགས་རླུང་ལྟར་ཐོགས་མེད་འཕྱོ། །འདིར་གཤེགས་ཚོགས་ཀྱི་མཆོད་པ་བཞེས། །གནས་དང་འདོད་ཡོན་བྱིན་ཕོབ་ལ། །སྒྲུབ་མཆོག་བདག་ལ་དབང་ཆེན་བསྐུར། །རླུང་སེམས་སྣང་བ་དབང་སྡུད་ཅིང་། །མཆོག་དང་ཐུན་མོང་དངོས་གྲུབ་སྩོལ། །དེ་ནས་ཚོགས་ཕུད་རིམ་པར་སྤྲོས་ལ། གཏོར་མར་བྲན་ནས། བླ་མ་ཡི་དམ་ཆོས་སྐྱོང་སོགས་ལ་དམིགས་ནས། སྔར་བཞིན་བདུད་རྩི་བྱིན་རླབས་བྱས་ལ། ཕེཾ་ཕེཾ་ཕེཾ། ༀ་བཛྲ་ཨ་རལླི་ཧོཿཛཿཧཱུྃ་བྃ་ཧོཿབཛྲ་ཌ་ཀི་ནི་ས་མ་ཡ་སྟྭཾ་ཌི་ཤྱ་ཧོཿཆོས་སྐུ་གར་དབང་རྡོ་རྗེ་འཆང་ཆེན་དང་། །ལོངས་སྐུ་ཚེ་འོད་
སྣང་བ་དཔག་ཏུ་མེད། །སྤྲུལ་སྐུ་འཆི་མེད་པདྨ་ཐོད་ཕྲེང་རྩལ། །མཐོན་མཐིང་པདྨ་རཱ་གའི་ཅོད་པན་ཅན། །རྒྱལ་བས་ལུང་ཟིན་རིམ་པར་བྱོན་རྣམས་དང་། །བཀའ་བརྒྱུད་གྲུབ་ཐོབ་རིག་འཛིན་རྒྱ་མཚོ་དང་། །སངས་རྒྱས་བྱང་སེམས་ཡི་དམ་དཀྱིལ་འཁོར་ལྷ། །མ་མགོན་མགར་གསུམ་ཞིང་སྐྱོང་ཆེན་པོ་སོགས། །ཆོས་སྐྱོང་སྲུང་མའི་ཞལ་དུ་མཆོད་པ་འབུལ། །དགྱེས་བཞེས་དངོས་གྲུབ་དམ་པ་མྱུར་དུ་སྩོལ། །དེ་ནས་འཇིག་རྟེན་སྐྱོང་བ་རྣམས་ལ། ༀ་ཁ་ཁ་ཁཱ་ཧི་ཁཱ་ཧི་སརྦ་ཡཀྴ་རཀྴ་སོགས་དང་། ༀ་ཧྲིཾ་ཧྲིཾ་ཧ་ཧ་སོགས་དང་ཕེཾ་བར་བརྗོད། ཞིང་སྐྱོང་བརྒྱད་དང་མཁའ་འགྲོ་སོ་གཉིས་སོགས། །འཁོར་བཅས་འདིར་བྱོན་མཆོད་སྦྱིན་འདོད་ཡོན་གྱི། །གཏོར་མ་འདི་བཞེས་རྣལ་འབྱོར་མཐུན་རྐྱེན་སྤེལ། །འགལ་རྐྱེན་ཕྱིར་བཟློག་ལས་བཞིའི་ཕྲིན་ལས་མཛོད། །ཅེས་ཕྲིན་ལས་བཅོལ། དེ་ནས་ཁྱད་པར་སྒོས་ཀྱི་བཀའ་སྲུང་ཞིང་སྐྱོང་ཆེན་པོའི་གཏོར་འབུལ་ནི། ཧཱུྃ་བྷྱོ། མཁའ་སྤྱོད་དཔལ་གྱི་ཙཱ་རི་ཏྲ། །རབ་འཇིགས་དུར་ཁྲོད་རོལ་པ་ནས། །འཁོར་ལོ་སྡོམ་པའི་ཐུགས་ལས་སྤྲུལ། །གྷ་ཡ་དྷ་ར་ཡབ་ཡུམ་དང་། །བདུད་དམག་སྟོང་སྡེའི་དཔུང་ཚོགས་བཅས། །དམ་ཚིག་འདུ་འབྲལ་མེད་བཞིན་དུ། །འཁོར་བཅས་གནས་འདིར་གཤེགས་སུ་གསོལ། །འདིར་བཤམས་ཡེ་ཤེས་ལྔ་ཡི་རྫས། །བ་ལིང་གཏོར་མ་རི་ལྟར་སྤུངས། །སྨན་རཀ་གཏན་འཁྱིལ་མཚོ་ལྟར་རྒྱས། །གཞན་ཡང་བསྐང་རྟེན་སྒྲུབ་པའི་རྫས། །ལོངས་སྤྱོད་མི་བཟད་སྤྲིན་ལྟར་གཏིབས། །བསྟན་སྲུང་
འཁོར་དང་བཅས་ལ་འབུལ། །དཔལ་ལྡན་མཁའ་སྤྱོད་དབང་པོ་ཡི། །རྡོ་རྗེའི་བཀའ་བསྒོས་མ་བསྙེལ་བར། །སངས་རྒྱས་བསྟན་དང་བསྟན་འཛིན་སྲུང་། །རྣལ་འབྱོར་ཚེ་དཔལ་ཆོས་འཕེལ་ཞིང་། །ནད་མཚོན་དལ་ཀ་དགྲ་ལ་སྒྱུར། །ཕ་རོལ་བྱད་དང་རྦོད་གཏོང་ཟློག །བཅོལ་པའི་ཕྲིན་ལས་བསྒྲུབ་པར་མཛོད། །ཅེས་ཕུལ། དེ་ནས་དངོས་གྲུབ་ཀྱི་རྫས་ཚོགས་ལ་རོལ་པ་ནི། ཀྱེ་ཀུན་རྟོག་མཉམ་ཉིད་ངང་ནས་འདོད་ཡོན་རོལ། །ལེན་པ་པོས། ཧོཿགཟུང་འཛིན་མཚན་བྲལ་དེ་བཞིན་ཉིད་ལ་འདུད། །ཨ་ཧོ་མ་ཧཱ་སུ་ཁ་ཧོཿཞེས་བརྗོད་ལ་རོལ་པར་བྱའོ། ཕུད་ལྷག་ལ་བདུད་རྩིས་བྲན་ལ། ཨ་ཀཱ་རོས་བྱིན་གྱིས་བརླབས་ནས། ཕུད་ལྷག་བཤལ་ཆུའི་གཏོར་མ་ལ་དབང་བའི་མཁའ་འགྲོ་དང་ཡང་འཁོར་ཕོ་ཉའི་ཚོགས་རྣམས་ལ་བསྔོ་ཞིང་འབུལ་བར་བགྱིའོ། །བསྟན་པ་སྲུང་ལ་རྣལ་འབྱོར་སྐྱོང་བའི་ཕྲིན་ལས་མ་གཡེལ་ཅིག །ཨུཙྪི་ཊ་བ་ལིཾ་ཏ་ཁཱ་ཧི། ཅེས་ཕུལ། དེ་ནས་མཆོད་པ་གསོ་བྲན་བྱས་ལ། ༀ་བཛྲ་ཨརྒྷཾ་ཨཱཿཧཱུྃ་སྭཱ་ཧཱ། དེ་བཞིན། པཱ་དྱཾ། པུཥྤེ། དྷཱུ་པེ། ཨཱ་ལོ་ཀེ། གནྡྷེ། ནཻཝི་དྱ། ཤབྡ་དང་། ༀ་བཛྲ་རཱུ་པ། ཤབྡ། གནྡྷེ། རཱ་ས། སྤཪྴེ་ཨཱཿཧཱུྃ་སྭཱ་ཧཱ། ཞེས་མཆོད། དྲན་པ་ཙམ་གྱིས་འཁོར་མཚོ་ལས། །ངེས་པར་སྒྲོལ་བའི་ཐུགས་རྗེ་ཅན། །དཀྱིལ་འཁོར་དབང་ཕྱུག་རྡོ་རྗེ་འཛིན། །རིགས་ཀུན་བདག་པོར་ཕྱག་འཚལ་བསྟོད། །ཅེས་དང་། གང་ཞིག་སངས་རྒྱས་ཡིད་བྱེད་པ། །དེ་ཡི་མདུན་ན་བཞུགས་གསུངས་བཞིན། །ཇི་ལྟར་དཔལ་
ལྡན་བླ་མ་མཆོག །བདག་ངོར་ངེས་པར་མངོན་སུམ་ཤར། །དེ་ཡི་ངང་ནས་རྩེ་གཅིག་མོས་གུས་དར་དྲག་བསྐྱེད་ལ། བླ་མའི་ཞལ་ནས་མངོན་སུམ་རྡོ་རྗེའི་བཀའ་ཡིས་གནང་བ་ཐོབ་པར་བསམ་ལ། ཀྱཻ་ཧོཿསེམས་ཉིད་དངོས་མེད་གདོད་ནས་རྣམ་དག་ལ། །རང་བཞིན་སྟོང་ཞིང་བཅོས་མེད་བསྒོམ་བྱ་དང་། །སྒོམ་བྱེད་བྲལ་བའི་ངང་ལ་ཤིགས་སེ་ཞོག །དེ་ཁོ་ན་ཉིད་སངས་རྒྱས་དགོངས་པའོ། །ཞེས་དེའི་ངང་ནས་བྱིན་རླབས་དབང་བཞི་བླང་བའི་མོས་གུས་ཀྱིས། སྐྱབས་ཡུལ་ཀུན་ཀྱང་མདུན་བསྐྱེད་བླ་མར་ཐིམ། །དེ་ཉིད་དགྱེས་པའི་འཛུམ་མདངས་གཡོ་བཞིན་དུ། །སྤྱི་བོ་མགྲིན་པ་ཐུགས་ཀ་ལྟེ་གསང་ནས། །ༀ་དཀར་ཨཱཿདམར་ཧཱུྃ་སྔོན་སྭཱ་སེར་ཧཱ། །ལྗང་འོད་ཟེར་འཕྲོས་རང་གི་གནས་ལྔར་ཐིམ། །སྐུ་གསུང་ཐུགས་ཡོན་ཕྲིན་ལས་བྱིན་རླབས་ཞུགས། །ཉོན་མོངས་ལྔ་དག་ཡེ་ཤེས་ལྔ་ཐོབ་གྱུར། །དེ་ཡི་ངང་ནས་བརྩེ་བ་ཆེན་པོར་བཅས། །འོད་དཀར་ལྟེམ་གྱིས་གྱུར་ནས་བདག་ལུས་དང་། །དབྱེར་མེད་གཅིག་འདྲེས་ཕྱག་རྒྱ་ཆེན་པོ་ཡི། །ཉམས་ལེན་ལྟ་བའི་ངང་དུ་དར་གཅིག་བཞག །དེ་ནས་བསྔོ་བ་སྨོན་ལམ་ནི། ན་མོ། བླ་མ་སྒྲུབ་པའི་དགེ་བ་གང་། །བདག་དང་སེམས་ཅན་ཐམས་ཅད་ཀུན། བླ་མེད་རྫོགས་པའི་བྱང་ཆུབ་བསྔོ། །ཕྱམ་གཅིག་སངས་རྒྱས་སར་འགོད་ཤོག །ཅེས་དང་། སྟོན་མཆོག་ཞི་བ་ཆགས་བྲལ་དང་། །རྩ་གསུམ་མཐུ་ུསྟོབས་འོད་སྟོང་ཅན། །དེང་འདིར་ཀུན་ནས་ཀུན་གསལ་བའི། །བཀྲ་ཤིས་རབ་གསལ་རབ་རྒྱས་ཤོགཅེས་ཤིས་པའི་མེ་ཏོག་འཐོར།
མཆོད་སྦྱིན་གནས་སོགས་བརྗོད་པར་བྱའོ། །དེ་ལྟར་དབང་གི་ཅོད་པན་འཛིན་པ་བཅུ་པ་མི་ཕམ་ཆོས་གྲུབ་རྒྱ་མཚོའི་བླ་སྒྲུབ་འདི་བཞིན་འོག་མིན་ཀརྨའི་གྲྭ་ཚང་བསླབ་གསུམ་ལྡན་པ་དགེ་སློང་ཀརྨ་ཚེ་བརྟན་གྱིས་དངོས་པོའི་མཎྜལ་དང་བཅས་བསྐུལ་བའི་ངོར་རྗེ་དེ་ཉིད་ཀྱི་ཐུགས་རྗེས་རྗེས་འཛིན་སི་ཏུ་པདྨ་ཉིན་བྱེད་དབང་པོས་རྒྱལ་ཟླའི་དཀར་ཕྱོགས་ཀྱི་ཉ་ལ་སྤེལ་བ། བདག་འདྲ་སོ་སྐྱེའི་བརྗོད་པ་དཔེ་ཆུ་ཤིང་དང་མཚུངས་པར་གྱུར་ཀྱང་། དོན་བླ་མ་སྒྲུབ་པ་མཆོག་གི་ཉེ་ལམ་སྟེ་སྐལ་ལྡན་རྣམས་ཀྱི་ཐར་པའི་ཐེམ་སྐས་ཙམ་དུ་གྱུར་པའོ། །དགེ་འདིས་ཀུན་མཁྱེན་བྱང་གྲོལ་མྱུར་ཐོབ་ཤོག །འདི་ཉིད་རྒྱས་བསྡུས་གསུམ་དུ་དབྱེ་བས་རྒྱས་པ་ནི་འདིར་གསལ་གྱི་འབྲིང་པོར་སྐྱབས་སེམས་ཡན་ལག་བདུན་པ་དེ་ནས་མདུན་བསྐྱེད་དབང་བསྐུར་རྒྱས་གདབ་མཆོད་པ་བྱིན་རླབས་ནས་མཎྜལ་ཚར་རྗེས། བསྟོད་ཕྱག །བཟླས་པ། བཤགས་སྡོམ་མཐར། སྔགས་མཆོད་རྣམས་དང་། དེ་ནས་གཞུང་ལྟར་རོ། །རྒྱུན་ཁྱེར་ལྟ་བུར་བསྡུ་ན། སྐྱབས་སེམས་ཡན་ལག་བདུན་ཕུལ་ནས། མདུན་བསྐྱེད་དབང་བསྐུར་རྒྱས་གདབ་པར། །སྔགས་མཆོད་ཕུལ་ནས་བསྙེན་པར་འཇུག །རྒྱང་འབོད་བཤགས་སྡོམ་མཐར། གང་ཞིག་སངས་རྒྱས་མན། བཀྲ་ཤིས་བར་གྱིས་འགྲུབ། ཅེས་ཡང་དབེན་དུ་སྤེལ།། །།
བླ་མའི་རྣལ་འབྱོར་བྱིན་རླབས་ཆར་འབེབས་ཀྱི་དབང་བཞི་དངོས་གྲུབ་སྤྲིན་ཕུང་།
བླ་མའི་རྣལ་འབྱོར་བྱིན་རླབས་ཆར་འབེབས་ཀྱི་དབང་བཞི་དངོས་གྲུབ་སྤྲིན་ཕུང་ཞེས་བྱ་བ་བཞུགས་སོ། །རྩ་བའི་བླ་མ་སྐྱེ་མེད་ཆོས་ཀྱི་སྐུ་ལ་ཕྱག་འཚལ་ལོ། །འདིར་བླ་སྒྲུབ་བྱིན་རླབས་ཆར་འབེབས་ལས་འཕྲོས་པའི་དབང་ཆོག་ཞིག་བཀོད་པ་སྟེ། བླ་མེད་ལུགས་ཀྱི་ཐུན་མོང་མིན་པའི་སྨིན་བྱེད་
རིམ་པ་ལ། མདུན་བསྐྱེད་མཆོད་པའི་དབུས་སུ་མཉྫིའི་སྟེང་རྣམ་རྒྱལ་བུམ་པ་ལྔ་ཕྲག་ལྔ་ཡི་རྫས་ཀྱིས་གཏམས་པར་དྲི་བཟང་གི་ཆུས་སུམ་གཉིས་བཀང་བའི་ཁར་དུང་ཆོས་དང་གཟུངས་རྡོར་ཁ་རྒྱན་སོགས་ཀྱང་བཀོད། རིགས་ལྔའི་དབང་རྫས་བཀྲམ། དེ་ཡི་སྟེང་དུ་ཀ་པཱ་ལ་མཚན་ཉིད་ལྡན་པ་མྱོས་བྱེད་དང་བདུད་རྩི་རིལ་བུས་གང་བའི་ཁར་མེ་ལོང་སིནྡྷུ་རའི་དཀྱིལ་འཁོར་བཤམས། གཞན་ཡང་ཉེར་མཁོའི་ཡོ་བྱད་འདུ་བར་བྱས་ལ། ཐོག་མར་མདུན་བསྐྱེད་དཀྱུས་ལྟར་གྱི་བཤགས་པའི་བར་བཏོན་ལ། བུམ་པ་བསངས་སྦྱངས་པ་ནི། ༀ་ཨཱ་བིགྷྣཱན་སོགས་དང་། ༀ་སྭ་བྷཱ་ཝས་སྦྱངས་ལ། སྟོང་ལས་དལ་དབུས་མཚན་ཉིད་ཡོངས་རྫོགས་པའི། །རིན་ཆེན་བུམ་པ་མཆུ་འཕྱང་ལྟོ་བ་ལྡིར། །མགྲིན་རིང་ཁ་ཡངས་ཞབས་ཞུམ་རྒྱན་གྱིས་སྤྲས། །ལམ་གསུམ་འབབས་ཀྱི་རྒྱུན་བཟང་མཚོ་འཁྱིལ་དབུས། །དྲི་མེད་པདྨའི་སྡོང་པོ་འདབ་རྒྱས་ལྟེར། །བསིལ་ཟེར་བྱེད་པའི་ཆ་ཤས་ཡོངས་གང་སྟེང་། །གར་དབང་རིགས་ཀུན་བདག་པོ་རྡོ་རྗེ་འཆང་། །དམར་གསལ་ཞལ་གཅིག་ཕྱག་གཉིས་རྡོ་རྗེ་དྲིལ། །བསྣོལ་འཛིན་རང་འོད་ཡུམ་འཁྱུད་མཚན་དཔེ་འབར། །ལོངས་སྤྱོད་རྫོགས་པའི་རྒྱན་དང་ཆ་ལུགས་མཛེས། །རྡོར་སྐྱིལ་གྱིས་བཞུགས་བདེ་སྟོང་ཡེ་ཤེས་རྒྱས། །གནས་གསུམ་ཡིག་གསུམ་ས་བོན་མཚན་པར་གྱུར། །དེ་ལས་འོད་ཟེར་སྣ་ཚོགས་ཕྱོགས་བཅུར་འཕྲོས། །ཁྱད་པར་ནུབ་ཕྱོགས་བདེ་ཆེན་ཕོ་བྲང་ནས། །སྤྱན་དྲངས་དབྱེར་མེད་བུམ་ལྷར་སིབ་སིབ་ཐིམ། །གུ་རུ་བཛྲ་ས་མ་ཡ་ཛཿཛ་ཧཱུྃ་བཾ་ཧོཿགཉིས་སུ་མེད་པར་གྱུར། །དེ་ནས་ཨརྒྷཾ་
སོགས་ཀྱིས་མཆོད་ནས། དྲན་པ་ཙམ་གྱིས་འཁོར་མཚོ་ལས། །ངེས་པར་སྒྲོལ་བའི་ཐུགས་རྗེ་ཅན། །དཀྱིལ་འཁོར་དབང་ཕྱུག་རྡོ་རྗེ་འཛིན། །རིགས་ཀུན་བདག་པོར་ཕྱག་འཚལ་བསྟོད། །ཅེས་པས་བསྟོད། ཕྱག་འཚལ་བ་དང་སོགས་ཡན་ལག་བདུན་པ་ཕུལ། བུམ་ལྷའི་ཐུགས་ཀའི་ཧཱུྃ་ལས་འོད་འཕྲོས་པས། །རྒྱལ་བ་རྒྱ་མཚོའི་ཐུགས་རྒྱུད་བསྐུལ་བར་བྱས། །དེ་ཉིད་ཚུར་འདུས་སྐུ་ཡི་ཆ་ཤས་ནས། །ཡེ་ཤེས་བདུད་རྩིའི་རྒྱུན་གྱི་ཆར་འབེབས་གྱུར། །ༀ་ཨཱཿཧཱུྃ་གུ་རུ་བཛྲ་དྷྲྀ་ཀྲ་ཧཱུྃ་སྭཱ་ཧཱ། ཅེས་སྙིང་པོ་གང་འགྲུབ་བཟླའོ། །བུམ་ལྷ་འོད་ཞུ་བདུད་རྩིའི་ངོ་བོར་གྱུར། །ཅེས་བརྗོད། དེ་ནས་སྔར་གྱི་མདུན་བསྐྱེད་བླ་མའི་དཀྱིལ་འཁོར་བཀྲ་ལམ་མེར་སླར་ཡང་མངོན་སུམ་གསལ་བཏབ་ནས། གཙོ་བོ་བུམ་བསྐྱེད་ལྟར་ལོངས་སྤྱོད་རྫོགས་སྐུ་གར་དབང་རྡོ་རྗེ་འཆང་རང་འོད་ཡུམ་ཅན་དུ་བསྐྱེད་ལ་དབང་བླང་བ་ནི། དང་པོ་གསལ་གདབ་ནི། ༀ་ནམ་མཁའ་ལས་བྱུང་མཚན་ལྡན་ཕྱིར། །ཐོག་མ་ཐ་མ་མེད་པའི་མཆོག །སེམས་དཔའ་རྡོ་རྗེ་ཆེ་རང་བཞིན། །རྡོ་རྗེ་སེམས་དཔར་བདག་སྒྲུབས་ཤིག །ཞེས་གསོལ་བ་བཏབ་ལ། ཇི་ལྟར་བལྟམས་པ་སོགས་ཀྱིས་ཁྲུས་དང་། སྔོན་འགྲོ་གཏོར་མ་བྱིན་རླབས་དང་བཅས་བགེགས་བསྐྲད་སྲུང་འཁོར་བར་བཏོན་ནས། མཎྜལ་ཕུལ་ལ། མི་ཕྱེད་པའི་བློས། ཐུགས་རྗེའི་བདག་ཉིད་བཀའ་དྲིན་གྱིས། །ཡང་དག་ཡེ་ཤེས་མཆོག་ཐོབ་སྟེ། །ཆོས་ཀྱི་བདུད་རྩི་འདི་འཐུང་ཕྱིར། །བླ་མ་ཆེ་ལ་གསོལ་བ་འདེབས། །ཅེས་ལན་གསུམ་བརྗོད། རྡོ་རྗེ་རྒྱལ་པོ་དགོངས་སུ་གསོལ། །ཐར་པ་
ཆེན་པོའི་གྲོང་མཆོག་ཏུ། །ངེས་པར་བདག་ནི་འཇུག་པ་དང་། །རིགས་ལྔའི་དམ་ཚིག་སོ་སོར་བཟུང་། །ལན་གསུམ། ༀ་སརྦ་ཡོ་ག་ཙིཏྟ་ཨུཏྤ་ད་ཡཱ་མི། ལན་གསུམ། རྡོ་རྗེ་སྙིང་གར་བཞག་ལ། སུ་ར་ཏེ་ས་མ་ཡ་སྟྭཾ་ཧོ། སིདྡྷི་བཛྲ་ཡ་ཐཱ་སུ་ཁཾ། ཅེས་སེམས་བསྐྱེད་ལ། བླ་མ་ཧེ་རུ་ཀ་དཔལ་སྙིང་ལ་བཞུགས། །རྡོ་རྗེ་སྙིང་གར་རེག །ཡེ་ཤེས་དབབ་པའི་སླད་དུ་གསོལ་བ་གདབ་པ་ནི། དཔལ་ཧེ་རུ་ཀ་ཡི་དཀྱིལ་འཁོར་གྱི་འཁོར་ལོ་རྣམས་ཀྱིས་བདག་ལ་དེ་བཞིན་ཉིད་ཀྱི་ཡེ་ཤེས་ནམ་མཁའ་ལྟ་བུ་བདུད་རྩི་ལྟ་བུ། རིན་པོ་ཆེ་ལྟ་བུས་གང་བར་མཛད་དུ་གསོལ། སྨིན་པར་མཛད་དུ་གསོལ། ཤིན་ཏུ་ཡང་སྨིན་པར་མཛད་དུ་གསོལ། །ལན་གསུམ། ཞེས་གསོལ་བ་བཏབ་པས་མདུན་བསྐྱེད་ལྷ་ཚོགས་རྣམས་ཀྱི་གསང་གསུམ་ཡེ་ཤེས་རྡོ་རྗེའི་བྱིན་རླབས་དངོས་གྲུབ་ཐམས་ཅད་སྐུ་དང་ཡིག་འབྲུ་ཕྱག་མཚན་གྱི་རྣམ་པར་རང་གི་སྤྱི་བོ་ནས་ཞུགས། ལུས་སེམས་བདེ་བ་ཆེན་པོའི་འོད་ཀྱིས་གང་བར་གྱུར། ༀ་གུ་རུ་བཛྲ་ས་མ་ཡ་ཛ་ཛ། ཛྙཱ་ན་ཨཱ་བེ་ཤ་ཡ་ཨཱ་བེ་ཤ་ཡ་ཨ་ཨ། དྲག་ཏུ་བརྗོད་ཅིང་། སྤོས་དང་རོལ་མོ་བྱའོ། །ལྟོས་ཤིག་རང་གི་སེམས་ལ་ལྟོས། །བལྟས་པས་སེམས་ལ་གྲུབ་པ་མེད། །གྲུབ་པ་མེད་པའི་སེམས་ཉིད་འདི། །སྣ་ཚོགས་སྣང་བ་ངོ་མཚར་ཆེ། །རང་སེམས་སྐྱེ་མེད་ཆོས་ཀྱི་སྐུ། །ཆོས་ཀྱི་སྐུ་ལ་སྐྱེ་འཇིག་མེད། །སྐྱེ་མེད་བདེ་བ་ཆེན་པོའི་སྐུ། །རང་ལ་ཡོད་པ་ངོ་མཚར་ཆེ། །རང་སེམས་ཆོས་སྐུའི་མེ་ལོང་ལ། །གཉིས་མེད་ཡེ་ཤེས་འོད་དུ་ཤར། །ཤར་བ་
ཉིད་ནས་གྲུབ་མེད་དེ། །བདེ་ཆེན་ལྷན་ཅིག་སྐྱེས་པ་ཡིན། །ཏིཥྛ་བཛྲ་གྱིས་བརྟན་པར་བྱས། སློབ་མ་དབང་རྫས་རིགས་ལྔ་ཡབ་ཡུམ་གསལ། །འོད་ཀྱིས་ལྷ་ཡི་དབང་རྫས་སོ་སོར་ཐོགས། །དགོངས་པ་མཛད་དང་མཆོད་ཅིང་ཤིས་པ་བརྗོད། །སྲུང་བའི་ལས་དང་བུམ་པ་བདུད་རྩི་ཡིས། །ཇི་ལྟར་བལྟམས་ཚེ་བཅོམ་ལྡན་ཁྲུས་གསོལ་ལྟར། །ལྷ་ཆུ་དག་པས་འདིར་ནི་དབང་བསྐུར་རོ། །ༀ་བཛྲ་ཨ་བྷི་ཥཉྩ་ཧཱུྃ། རཏྣ་མུ་ཀུ་ཊ་ཨ་བྷི་ཥེཉྩ་ཏྲྃ། བཛྲ་དྷཱ་ར་ནི་ཨ་བྷི་ཥིཉྩ་ཧྲཱིཿབཛྲ་ཨ་དྷི་པ་ཏི་སྟྭཾ་ཨ་བྷི་ཥིཉྩ་ཨཱཿབཛྲ་ན་མཿཨ་བྷི་ཥིཉྩ་ༀ། ཅེས་བརྗོད་ལ་བུམ་པ་དང་། དབུ་རྒྱན། པདྨ། དྲིལ་བུ། མིང་དབང་རྣམས་སོ་སོར་བསྐུར་ནས། ༀ་བཛྲོ་ད་ཀ་ཨ་བྷི་ཥིཉྩ་ཧཱུྃ། སུ་ར་ཏ་སྟྭཾ་ཨཱ་ཧཾཿཞེས་ཆུ་དབང་བསྐུར། དེ་ལྟར་དབང་བསྐུར་དུག་ལྔའི་སྒྲིབ་པ་དག །ཕུང་ལྔ་གནས་གྱུར་ཡེ་ཤེས་ལྔ་ཐོབ་ནས། །ཆུ་ཞབས་ཡར་ལུད་རིགས་ལྔས་དབུ་རྒྱན་གྱུར། །དེ་ནས་སློབ་དཔོན་དབང་ནི། དཔའ་བོ་ཆེན་པོ་མི་ལྡོག་པའི། །དབང་བསྐུར་བ་ནི་བདག་ལ་སྩོལ། །ལན་གསུམ་གསོལ་བ་བཏབ། རྡོ་རྗེ་དང་དྲིལ་བུ་བླངས་སྟེ། ཧཱུྃ་བྱུང་རྡོ་རྗེ་མ་ཧཱ་བཛྲ་ཧཱུྃ། ཨཱཿབྱུང་དྲིལ་བུ་བཛྲ་གནྜེ་ཨཱཿའཁྱུད་པའི་རྒྱ་དང་བཅས། སློབ་མ་རྡོ་རྗེ་སེམས་དཔའ་དང་། རྡོ་རྗེ་སྙེ་མ་ཟུང་འཇུག་གསལ། །རྡོ་རྗེ་དྲིལ་བུ་ཆེ་ཟུང་ཞིག །རྡོ་རྗེར་བྱིན་རློབས་སློབ་དཔོོན་གྱུར། །སློབ་མ་བསྡུ་བ་ཉིད་དུ་གྱིས། །དབང་བསྐུར་བ་ནི། རྡོ་རྗེ་ཆེན་པོས་དབང་བསྐུར་བ། །ཁམས་གསུམ་ཀུན་གྱིས་ཕྱག་བྱས་པ། །སངས་རྒྱས་ཀུན་
གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། །བུམ་པ་སྤྱི་བོར་བཞག་ཆུ་བཏུང་། ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ། ཆུ་ཞབས་གྱེན་འཁྱིལ་མི་བསྐྱོད་རྒྱས་གདབ་གྱུར། །ༀ་བཛྲ་པུཥྤེ་སོགས་ཉེར་སྤྱོད་ལྔས་མཆོད། འདོད་ཡོན་རོལ་ཞིང་ཁམས་གསུམ་དོན། །རྟེན་ཅིང་འབྲེལ་འབྱུང་ཉིད་དུ་སྤྱོད། །དེ་ལྟར་ལུས་ཀྱི་སྒྲིབ་དག་བུམ་དབང་ཐོབ། །བསྐྱེད་རིམ་བརྟན་ཐོབ་སྤྲུལ་སྐུ་འགྲུབ་པར་གྱུར། །དེ་ནས་གསང་དབང་ནི། མགོན་པོ་བདག་སོགས་འཁོར་བའི་འདམ། །བྱིང་བ་སྐྱབས་མེད་སྒྲོལ་མཛོད་ཅིག །ལན་གསུམ་གསོལ་བ་གདབ། གཙོ་བོ་ཡབ་ཡུམ་སྙོམས་འཇུག་གི། །བྱང་སེམས་རྒྱུན་གྱི་དབང་མཆོག་བསྐུར། ཀཱ་པ་ལ་མགྲིན་པར་བཞག་ལ། ཨ་ཧོ་མ་ཧཱ་སུ་ཁ། བདུད་རྩི་མྱོང་ལ། དེ་ལྟར་སངས་རྒྱས་རྣམས་ལས་བྱུང་བ་ཡི། །དམ་ཚིག་བཅུད་ཀྱི་བདེ་བ་ཆེན་པོ་མྱོང་། །ངག་གི་སྒྲིབ་དག་གསང་དབང་ཐོབ་ནས་ནི། །རྩ་རླུང་བརྟན་ཐོབ་ལོངས་སྐུ་འགྲུབ་པར་གྱུར། །དེ་ནས་ཤེས་རབ་ཡེ་ཤེས་དབང་ནི། ཧེ་རུ་ཀ་དཔལ་བདག་དྲོངས་ཤིག །གསང་བ་ཆེན་པོས་སྨིན་པར་མཛོད། །ལན་གསུམ་གསོལ་བ་བཏབ། སིནྡྷཱུ་རའི་དཀྱིལ་འཁོར་ཡུམ་དུ་གསལ་བས། རྡོ་རྗེ་སྙེ་མ་ལས་སྤྲོས་པའི། །བདེ་སྟེར་ལྷ་མོ་མཆོད་པར་གྱིས། །ཞེས་གཏད་ལ། མཁའ་གསང་བྱིན་བརླབས་སྦྱོར་བ་ཡིས། །དགའ་དང་མཆོག་དགའ་ཁྱད་པར་དགའ། །ལྷན་སྐྱེས་དགའ་བཞི་ཉམས་མྱོང་གྱུར། །སིནྡྷཱུ་རས་གནས་བཞིར་ཐིག་ལེ་བྱ། སེམས་ཀྱི་སྒྲིབ་དག་བདེ་སྟོང་བསྒོམ་པར་དབང་། །ཆོས་སྐུ་འགྲུབ་པའི་སྐལ་བ་ལྡན་པར་གྱུར། །བཞི་པ་ཚིག་དབང་ནི། རྡོ་རྗེ་ཅན་ཞབས་བཀའ་དྲིན་གྱིས། །རིན་ཆེན་བཞི་པའང་དེང་འདིར་སྩོལ། །ལན་
གསུམ་གསོལ་བ་གདབ། བླ་མ་སྤྱི་བོར་བསྒོམ། ལུས་གནད་ངོ་བོ་སྐྱོང་ལ། ཡེ་ཤེས་འདི་ནི་ཆེས་ཕྲ་ཞིང་། །རྡོ་རྗེ་ནམ་མཁའི་དཀྱིལ་ལྟ་བུ། །རྡུལ་བྲལ་མཐར་ཕྱིན་ཞི་བ་ཉིད། །ཁྱོད་རང་ཡང་ནི་དེ་ཡི་ཕ། །ཞེས་ཚིག་གི་བརྡ་སྤྲད་ལ། དོན་དམ་དེ་བཞིན་ཉིད་ཀྱི་དབང་བསྐུར་ཐོབ། །སྒོ་གསུམ་སྒྲིབ་དག་ཕྱག་ཆེན་བསྒོམ་པར་དབང་། །ངོ་བོ་ཉིད་སྐུ་འགྲུབ་པའི་སྐལ་ལྡན་གྱུར། །དེ་ནས་རྗེས་རིམ་ནི། གཙོ་བོས་ཇི་ལྟར་བཀའ་སྩལ་བདག་གིས་བགྱི། །ལན་གསུམ་དང་། གཏང་རག་གི་མཎྜལ་འབུལ་བར་བྱའོ། །དེང་ནས་བརྩམས་ཏེ་བདག་བྲན་སོགས་བརྗོད་ལ། དེ་ནས་དཔའ་བོའི་དགའ་སྟོན་ཚོགས་ཀྱི་འཁོར་ལོའི་དཀྱིལ་འཁོར་ལ་རོལ་པ་སོགས་རྣལ་འབྱོར་གྱི་ཉམས་བསྐྱང་བར་བྱའོ། །ཅེས་པའང་བསླབ་པའི་ཚུལ་ཁྲིམས་དང་དད་པའི་ནོར་ལྡན་སྒྲུབ་ཆེན་པ་བཀྲ་ཤིས་ཀྱི་བཞེད་ལྟར། སི་ཏུ་པདྨ་ཉིན་བྱེད་དབང་པོས་ཡང་དབེན་དུ་སྤེལ་བ་མངྒ་ལཾ།། །།
དབང་བཞི་དངོས་གྲུབ་སྤྲིན་ཕུང་གི་མཚམས་སྦྱོར་པད་དཀར་ཆུན་པོ།
དབང་བཞི་དངོས་གྲུབ་སྤྲིན་ཕུང་གི་མཚམས་སྦྱོར་པད་དཀར་ཆུན་པོ་ཞེས་བྱ་བ་བཞུགས་སོ། །སློབ་མ་ཁྲུས་དང་། སྔོན་འགྲོ་གཏོར་མ་བཏང་། བགེགས་བསྐྲད་ལ། དང་པོ་དབང་གི་སྤྱི་བཤད་ནི། ནམ་མཁའ་དང་མཉམ་པའི་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ལ་བཀོད་སྙམ་པའི་སེམས་བསྐྱེད་ནས་ལེགས་པར་གསན་འཚལ། གསན་པར་བྱ་བའི་ཆོས་དེ་ལ་ཡང་བདག་ཅག་གི་སྟོན་པས་རྒྱུ་ཕ་རོལ་དུ་ཕྱིན་པའི་ཐེག་པ་དང་། འབྲས་བུ་རྡོ་རྗེ་ཐེག་པ་གཉིས་སུ་གསུངས་པར་འདུས་ཤིང་། དེ་ཡང་རྒྱུད་སྡེ་བཞིར་དབྱེ་བ་ལས། ནང་
གསེས་གཉིས་སུ་དབྱེ་བ། གསུམ་དང་བཞིར་དབྱེ་བ། ལྔ་དང་དྲུག་ཏུ་དབྱེ་བ་གྲངས་ངེས་མེད་དུ་དབྱེ་བ་མཆིས་ནའང་ཡོངས་སུ་གྲགས་པ་རྒྱུད་སྡེ་བཞིར་བསྟན་ཅིང་། སྐྱེ་གནས་རྣམ་པ་བཞི་ཡི་གདུལ་བྱའི་ཁམས་དང་དབང་པོའི་བྱེ་བྲག་གི་གང་ཟག་ལ་དགོངས་ནས་སོ་སོར་གསལ་ཞིང་སྟོན་པར་མཛད་ཅིང་། དེ་ཡང་དབང་རྣོན་གྱི་རྒྱུད་ལ་བྱིན་རླབས་མྱུར་དུ་སྨིན་པའི་ཕྱིར། ཀུན་རྫོབ་ཏུ་དམ་ཡེ་གཉིས་ཀ་གདོད་ནས་རང་ཆས་སུ་བཞུགས་པ་དེ་ཡི་ངོ་བོར་གནས་པ་ལ་གསལ་ཐེབས་པས་དངོས་གྲུབ་ཐམས་ཅད་ལྷུན་གྱིས་གྲུབ་པས་རྣལ་འབྱོར་ཆེན་པོ་བླ་ན་མེད་པའི་རྒྱུད་ཅེས་གྲགས་པ་འདི་ཉིད་ཡིན་གྱི། དོན་དམ་པར་ནི་སྤྲོས་བྲལ་སྟོང་པ་ཉིད་ཀྱི་ཡེ་ཤེས་དབྱེར་མེད་འོད་གསལ་ཆེན་པོའི་ཆོས་ཉིད་ཀྱི་རང་བཞིན་ཅིར་ཡང་ཤར་བ་སྟེ། རྟག་པ་ཕྱི་མ་ལས། རང་བཞིན་གདོད་ནས་མ་སྐྱེས་པ། །རྫུན་མིན་བདེ་མིན་དེ་བཞིན་དུ། །ཐམས་ཅད་ཆུ་ཡི་ཟླ་བ་ལྟར། །འདོད་པ་རྣལ་འབྱོར་པས་ཤེས་ཀྱི། །ཞེས་པ་ལྟར་བསྟན་ཅིང་། མཆོག་གི་རྨད་དུ་བྱུང་བའི་རྒྱུད་ལ་བསྟེན་ནས་ལམ་གཅིག་ཆོད་ཀྱི་ཟབ་མོ་བླ་མ་སྒྲུབ་པའི་རྣལ་འབྱོར་གྱི་སྒོ་ནས་རྗེས་སུ་འཛིན་པ་སྟེ། དེ་ཡང་བླ་མ་སངས་རྒྱས་ཆོས་ཀྱི་སྐུ་ནི་དཔེར་ན་མེ་ལོང་གི་དངོས་པོ། གདུལ་བྱ་ནི་དེ་ཡི་ངོགས་ནས་གཟུགས་འཆར་བ། འདུལ་བྱེད་གཟུགས་ཀྱི་སྐུ་ནི་མི་གཡོ་བར་གཟུགས་ཇི་ལྟ་བར་འཆར་བའི་གཉེན་པོ། ཤར་བཞིན་པ་མེ་ལོང་ཉིད་ལ་དེ་ཡི་ངེས་པས་གསལ་བར་མཚོན་ནོ། །ཀུན་སྤྱོད་ཀྱི་རྒྱུད་ནས་གསུངས་པའི་མཆོད་བརྗོད།
གང་གི་དྲིན་གྱི་བདེ་ཆེན་ཉིད། །ཅེས་པའི་ཚིག་རྐང་བ་བཞི་པོའི་ལུང་དང་མཐུན་པར། བླ་མ་བསྟེན་པ་ལ་གུས་པ་རྣམས་སྨིན་ལམ་དབང་གི་དུས་མཚོན་བྱ་དོན་དམ་པའི་ཡེ་ཤེས་སྐྱེད་པར་བྱེད་དེ། དགྱེས་རྡོར་ལས། བླ་མའི་དུས་ཐབས་བསྟེན་པ་ལ། །རང་གི་བསོད་ནམས་ལས་ཤེས་བྱ། །ཞེས་གསུངས་ཤིང་། དེ་ལྟ་བུའི་བླ་མ་རིན་པོ་ཆེ་དབང་གི་རྒྱལ་པོ་ལྟ་བུ་སྟེ། གདུལ་བྱ་རྣམས་ཀྱི་བསམ་པ་ཇི་ལྟ་བར་རྫོགས་པར་བྱེད་ནུས་པས་སོ། །དེས་ན་དེ་ཉིད་རྡོ་རྗེ་སེམས་དཔའ་འམ། རྡོ་རྗེ་ཅན་ཏེ། ཇི་སྐད་དུ། བླ་མ་དང་ནི་རྡོ་རྗེ་འཛིན། །ཐ་དད་པར་ཡང་མི་རྟོག་གོ། ཞེས་དང་། དུས་གསུམ་སངས་རྒྱས་མཆོད་པ་བས། །བླ་མའི་བ་སྤུ་གཅིག་མཆོད་ལྷག །ཅེས་དང་། འཇམ་དཔལ་ལས། མཆོད་འོས་བསྟོད་འོས་ཕྱག་གི་གནས། །རྟག་ཏུ་རི་མོར་བྱ་བའི་འོས། །བཀུར་འོས་བརྗེད་པར་བྱ་བའི་མཆོག །ཕྱག་བྱར་འོས་པ་བླ་མའི་རབ། །ཅེས་སོགས། མདོ་རྒྱུད་གང་ནས་ཀྱང་ལུང་གི་འདྲེན་པ་ཆེས་མང་བར་གསལ་ཞིང་བསྔགས་པར་མཛད་ལ། དེ་ལྟར་མཚན་ཉིད་དང་ལྡན་པའི་བླ་མ་མཆོད་ཅིང་བྱིན་རླབས་རྒྱུད་ལ་སྨིན་པའི་ཕྱིར་རྣལ་འབྱོར་བསྒོམ་རིམ་ལ་བརྩོན་པར་བྱས་ན་མཆོག་དང་ཐུན་མོང་གི་དངོས་གྲུབ་ཐམས་ཅད་འབྱུང་བར་ངེས་པའི་ཚུལ་ལ་དྭངས་པ་བསྐྱེད་ཅིང་། དེ་དག་གི་ཕན་ཡོན་ཐེག་པ་ཆེ་ཆུང་སོ་སོ་ནས་གསུང་ཚུལ་དཔག་ཏུ་མེད་པ་སྤྲོས་ཀྱིས་མི་ལང་གི། འདིར་ནི་གཙོ་བོ་བྱིན་རླབས་བརྒྱུད་པའི་བཀའ་སྲོལ་མ་ཆད་པ་འབྲེལ་ཚད་དོན་དང་ལྡན་ཞིང་། ཁྱད་
པར་སྐལ་ལྡན་གྱི་རྒྱུད་ལ་དངོས་སུ་ཕྱག་རྒྱ་ཆེན་པོའི་ཡེ་ཤེས་སྐྱེད་པར་མཛད་ཅིང་ཕྱིར་མི་ལྡོག་པའི་གོ་འཕང་ལ་བཀོད་ནུས་པའི་བླ་མ་དེ་ཉིད་རྡོ་རྗེ་འཆང་དངོས་སུ་སྣང་བར་བྱེད་པ་རིགས་ཏེ། དེ་ཡང་སངས་རྒྱས་དྲུག་པ་སེངྒེའི་རྣམ་འཕྲུལ་མཐོན་མཐིང་གི་ཅོད་པན་འཆང་བ་དཔལ་ཀརྨ་པ་སྐྱེས་རབས་ཀྱི་ཕྲེང་བ་བཅུ་གསུམ་དང་། དབང་རྟགས་པདྨ་རཱ་གའི་ཅོད་པར་འཆང་བ་ཞྭ་དམར་པ་སྐྱེས་རབས་བཅུ་པ་འཛིན་པའི་རྡོ་རྗེ་སློབ་དཔོན་ཆེན་པོའི་སྐུར་སྣང་བ་འདི་དག་ནི་རྒྱལ་བ་བུ་རམ་ཤིང་པ་དང་། ཨོ་རྒྱན་ཆེན་པོའི་ལུང་གིས་ཟིན་ཅིང་དབུགས་དབྱུང་བར་མཛད་པ་སོགས་ཆེས་གསལ་བར་བསྟན་པ་གསར་རྙིང་གི་ཆོས་སྒོ་དུ་མར་བཀྲལ་བར་སྣང་བ་དང་། འོག་མིན་ཆོས་ཀྱི་དབྱིངས་ངེས་པ་ལྔ་ལྡན་གྱི་ཞིང་ན་གར་དབང་རྡོ་རྗེ་འཆང་གི་རྣམ་པར་རོལ་པ་དང་། བདེ་བ་ཅན་པདྨོ་རྣམ་པར་བཀོད་པར་འོད་སྣང་མཐའ་ཡས་ཀྱི་སྐུར་གསལ་བ་དང་། སྔོན་འདས་པའི་དུས་སངས་རྒྱས་དཀོན་མཆོག་ཡན་ལག་ཏུ་མངོན་པར་བྱང་ཆུབ་ནས་བདུད་རྩི་བརྙེས་ཟིན་ཀྱང་། གངས་རིའི་ལྗོངས་འདིར་ཡང་སྙིང་རྗེ་དང་། བྱམས་པ་དང་། བརྩེ་བ་ཆེན་པོས་འགྲོ་རྣམས་ཡལ་བ་མ་དོར་བའི་ཕྱིར་སྐྱེ་བའི་རྣམ་པར་འཕྲུལ་པ་ཇི་སྲིད་དུ་སྟོན་པར་མཛད་ཅིང་། དེ་ཡང་རྡོ་རྗེ་གུར་ལས། གང་ཕྱིར་རྡོ་རྗེ་སེམས་དཔའ་ནི། །དེ་ཉིད་སློབ་དཔོན་གཟུགས་བཟུང་སྟེ། །སེམས་ཅན་ཕན་གདགས་དམིགས་ནས་ནི། །ཐ་མལ་པ་ཡི་གཟུགས་སུ་གནས། །ཅེས་གསུངས་པས་བསྟན་ཅིང་གདུལ་བྱ་རྣམས་ཐབས་དང་རྣམ་པ་སྣ་ཚོགས་པའི་སྒོ་ནས་འདུལ་བར་
མཛད་ཅིང་། ཡང་དག་པའི་སར་ངེས་པར་དཀྲི་བའི་འཕགས་པ་མཆོག་གི་སྤྱོད་པ་དག་ཉེ་བར་སྤྱད་པའི་སྟོབས་ཀྱིས་དཀྱིལ་འཁོར་ཀུན་གྱི་གཙོ་བོ། རིགས་ཐམས་ཅད་ཀྱི་དབང་ཕྱུག །རྡོ་རྗེ་འཆང་དང་མི་གཉིས་པར་རྡོ་རྗེ་བཞི་ཡི་ངོ་བོར་མངོན་དུ་བསྙེན་པའི་སྒོ་ནས་སྨིན་དབང་འདི་དག་ཐོབ་པའི་དགོས་ཁྱད་ནི། དཀྱིལ་འཁོར་མཐོང་ཞིང་དབང་བསྐུར་ཐོབ། །ཕུང་པོ་བདག་ཉིད་སྨིན་པར་འགྱུར། །སྡིག་པ་ཐམས་ཅད་རྣམ་པར་སྤངས། །རྡོ་རྗེ་འཛིན་པའི་གནས་ཐོབ་བོ། །ཞེས་གསུངས་ཞིང་། དེ་ཡང་སྣོད་འདི་ལྟ་བུར་རུང་བའི་དལ་བ་བརྒྱད་དང་། འབྱོར་པ་བཅུ་དང་ལྡན་པའི་མི་ལུས་ཐོབ་པ་ཤིན་ཏུ་རྙེད་པར་དཀའ། དེ་ཡི་ནང་ནས་ཀྱང་རྡོ་རྗེ་ཐེག་པའི་སྙིང་པོ་གསང་བ་བླ་ན་མེད་པའི་ལམ་དུ་འཇུག་པ་ནི་དེ་བས་ཀྱང་ཁྱད་པར་དུ་འཕགས་ཤིང་རྨད་དུ་བྱུང་བ་སྟེ། དེ་ལ་ཡང་ཚེ་གཅིག་བྱང་ཆུབ་ཀྱི་འབྲས་བུ་སྨིན་པར་ནུས་པའི་མོས་གུས་བླ་མའི་རྣལ་འབྱོར་རྩ་བ་དང་གཞི་མ་ལྟར་ལམ་དང་ལམ་གྱི་སྟེགས་སུ་གྱུར་པས་དེ་དག་གི་སྒོ་ནས་སྨིན་གྲོལ་གྱི་དབང་བསྐུར་ཟབ་མོ་བགྱིད་པ་ལ་ཐོག་མར་བདག་སློབ་དཔོན་ཏུ་འོས་པའི་བྱ་བ། དཀྱིལ་འཁོར་མཆོད་ཅིང་བསྟོད་བསྐུལ་བསྙེན། །འཇུག་སོགས་རང་སྨིན་གཞན་གྲོལ་སྟོན། །ཞེས་གསུངས་པ་ལྟར་གྱི་སྦྱོར་དངོས་རྣམས་ཇི་ལྟར་བར་གྲུབ་ཅིང་། ཁྱེད་རང་སྐལ་ལྡན་སློབ་མ་རྣམས་ཀྱི་ངོ་སྐལ་དུ་གྱུར་པ་དབང་བསྐུར་ཡོངས་སུ་རྫོགས་པར་ཞུ་བའི་དོན་དུ་དངོས་དང་ཡིད་སྤྲུལ་གྱིས་དམིགས་ཏེ་མཎྜལ་གནང་བར་ཞུ། ཞེས་མཎྜལ་ཕུལ་ནས།
སློབ་དཔོན་གྱིས། ཁྱེད་རྣམས་བླ་ན་མེད་པའི་བྱང་ཆུབ་འདོད་པ་ནི་ཤིན་ཏུ་ལེགས། དེ་ཡང་བླ་མའི་དཀྱིལ་འཁོར་ཆེན་པོས་ཁྱེད་རྣམས་ཀྱི་རྒྱུད་སྨིན་པར་བྱེད་པ་ལ་བདག་བླ་མར་འོས་པ་ལ་གསོལ་བ་འདེབས་པའི་འདུན་པས་འདིའི་རྗེས་ཟློས། ཐུགས་རྗེའི་བདག་ཉིད་བཀའ་དྲིན་གྱི་སོགས་བརྗོད་དུ་གཞུགཁྱེད་རྣམས་འཁོར་བ་སྡུག་བསྔལ་གྱི་རང་བཞིན་ཅན་ལས་ངེས་པར་འབྱུང་བའི་བློས། ཆོས་བརྒྱད་རྣམ་གཡེང་འཇིག་རྟེན་གྱི་འདུ་འཛི་སྤངས་ཏེ་ཐར་པ་དང་ཐམས་ཅད་མཁྱེན་པའི་གོ་འཕང་འདོད་པའི་ཕྱིར་མགོན་པོས་འདྲེན་པར་གསོལ་ཞེས་རིགས་ལྔ་སྤྱི་དང་བྱེ་བྲག་གི་སྡོམ་པ་རྣམས་འཛིན་སྙམ་པས་འདིའི་རྗེས་ཟློས། རྡོ་རྗེ་རྒྱལ་པོ་སོགས་བརྗོད། དེ་ནས་སེམས་བསྐྱེད་པའི་ཕྱིར་ཁྱེད་རང་རྣམས་ཀྱི་སྙིང་གར་ཀུན་རྫོབ་དང་དོན་དམ་གྱི་མཚོན་བྱེད་ཟླ་བའི་སྟེང་དུ་རྡོ་རྗེ་རྩེ་ལྔ་པ་བསྒོམ་ལ་འདིའི་རྗེས་ཟློས། ༀ་སརྦ་ཡོ་ག་ཙིཏྟ་སོགས། དེ་ནས་ཡེ་ཤེས་ཀྱི་དཀྱིལ་འཁོར་ཆེན་པོས་བྱིན་དབབ་པའི་ཕྱིར་གསོལ་བ་གདབ་པ་འདིའི་རྗེས་ཟློས་མཛོད། དཔལ་ཧེ་རུ་ཀ་ཡི་དཀྱིལ་འཁོར་གྱི་སོགས་བརྗོད་དུ་གཞུག་ནས་བྱིན་འབེབས་པར་བྱའོ། །དེ་ལྟར་ཕབས་པའི་ཡེ་ཤེས་དེ་ངོ་སྤྲད་པའི་ཕྱིར་རྡོ་རྗེ་གླུ་བླང་བ་ནི། ལྟོས་ཤིག་སོགས། དེ་ལྟར་ཡེ་ཤེས་དེ་ཉིད་བརྟན་པར་མོས་ཤིག །ཏིཥྛབཛྲ། དེ་ལྟར་ཡེ་ཤེས་དབབ་པ་དང་རྒྱས་བཏབ་ཟིན་གྱི། དེ་ནས་རིགས་པའི་དབང་ལྔ་བསྐུར་པ་ནི་སྡོམ་འབྱུང་ལས། ཆུ་དང་ཅོད་པན་རྡོ་རྗེ་དང་། །དྲིལ་བུ་མིང་གི་དབང་བསྐུར་ཏེ། །དབང་ལྔ་དེ་བཞིན་གཤེགས་བདག་ཉིད། །ཅེས་གསུངས་པས་དང་པོ་མི་བསྐྱོད་པ་ཆུ་ཡི་དབང།
རིན་ཆེན་འབྱུང་ལྡན་ཅོད་པན་གྱི་དབང་། འོད་དཔག་མེད་རྡོ་རྗེའི་དབང་། དོན་ཡོད་གྲུབ་པ་དྲིལ་བུའི་དབང་། རྣམ་པར་སྣང་མཛད་མིང་གི་དབང་སྟེ་རིགས་པའི་དབང་ལྔའོ། །དེ་ཡང་གཞི་ཕུང་པོ་ལྔ་གདོད་མ་ནས་རྒྱལ་བ་རིགས་ལྔར་བཞུགས་པ་ལ། དེ་ལྟར་མ་རིག་པའི་གདུལ་བྱ་རྣམས་ལ་གནས་ལུགས་ཇི་ལྟ་བ་བཞིན་སྟོན་པ་སྟེ། དམིགས་པ་འདི་བཞིན་དུ་མཛོད། ཅེས་བརྗོད་ལ། སློབ་མ་དབང་རྫས་སོགས་བརྗོད། ཆུ་དབང་གི་རྗེས་སུ། དེ་དག་ནི་ཐུགས་རྡོ་རྗེའི་དབང་ངོ་། །དབུ་རྒྱན། དེ་དག་ནི་ཡོན་ཏན་གྱི་དབང་ངོ་། །རྡོ་རྗེ། དེ་དག་ནི་གསུང་རྡོ་རྗེའི་དབང་ངོ་། །དྲིལ་བུ། དེ་དག་ནི་ཕྲིན་ལས་ཀྱི་དབང་ངོ་། །མིང་དབང་། དེ་དག་ནི་སྐུ་རྡོ་རྗེའི་དབང་ངོ་། །དེ་ལྟར་དབང་བསྐུར་དུག་ལྔའི་སྒྲིབ་པ་དག་སོགས་བརྗོད། དེ་ནས་རྡོ་རྗེ་སློབ་དཔོན་གྱི་དབང་གི་དོན་དུ་འདིའི་རྗེས་ཟློས་མཛོད། དཔའ་བོ་ཆེན་པོ་སོགས། དེ་ནས་དེ་བཞིན་གཤེགས་པ་ཐམས་ཅད་ཀྱི་གསང་བ་སྦྱིན་པ་ནི། ཧཱུྃ་བྱུང་སོགས་ནས། ཉིད་དུ་གྱིས་བར་བརྗོད་ལ། དེ་ནས་དཀྱིལ་འཁོར་གྱི་ལྷ་ཚོགས་རྣམས་ཀྱི་ཡེ་ཤེས་རྒྱུན་གྱི་དབང་བསྐུར་བ་ནི། རྡོ་རྗེ་ཆེན་པོ་སོགས། དེ་ནས་གསང་དབང་གི་དོན་དུ་འདིའི་རྗེས་ཟློས། མགོན་པོ་སོགས། བླ་མ་ཧེ་རུ་ཀ་ཡབ་ཡུམ་བདེ་བ་ཆེན་པོས་བསྐུལ་བའི་སྒྲས་དེ་བཞིན་གཤེགས་པ་ཐམས་ཅད་སྤྱན་དྲངས། རྗེས་ཆགས་ཀྱི་བྱང་སེམས་ཞུ། རྩ་འཁོར་ལོ་བཞིར་ཁྱབ་པར་མོས་ཤིག །དེ་ལྟར་སངས་རྒྱས་རྣམས་སོགས། དེ་ནས་ཤེས་རབ་ཡེ་ཤེས་ཀྱི་དོན་དུ་འདིའི་རྗེས་ཟློས། ཧེ་རུ་ཀ་དཔལ་སོགས། མེ་
ལོང་སིནྡྷུ་ར་ཆོས་ཀྱི་འབྱུང་གནས་རྡོ་རྗེ་བཙུན་མོའི་གསང་བ་ནས་འཕྲོས་པའི་ཤེས་རབ་མ་སྤྱིན་པ་ནི། རྡོ་རྗེ་སྙེ་མ་སོགས། སེམས་ཀྱི་སྒྲིབ་དག་སོགས། བཞི་པ་འཇིག་རྟེན་དང་འཇིག་རྟེན་ལས་འདས་པའི་དབང་གི་དོན་དུ་རྗེས་ཟློས་མཛོད། རྡོ་རྗེ་ཅན་སོགས། དེ་ཡང་དཔེ་ཡི་ལྷན་སྐྱེས་ལས་དོན་གྱི་ཡེ་ཤེས་མཚོན་པར་བྱ་སྟེ། ཁྱེད་རྣམས་ལུས་གནད་དང་ལྡན་པའི་སེམས་ཀྱི་རྡོ་རྗེ་གང་ཤར་དེ་ཡི་ངོ་བོ་ལ་མཉམ་པར་ཞོག་ཅིག །ཡེ་ཤེས་འདི་ནི་ཆེས་ཕྲ་ཞིང་སོགས་བརྗོད། དོན་དམ་དེ་བཞིན་ཉིད་ཀྱི་སོགས་བརྗོད། དེ་ལྟར་རྡོ་རྗེའི་གསང་བ་ཆེན་པོས་དབང་བསྐུར་རྫོགས་པར་གྲུབ་པ་ཡིན་གྱི། དེ་ཡང་དེ་ལྟ་བུ་ཐོབ་པའི་དགོས་ཁྱད་ནི། སློབ་དཔོན་ཨ་བྷཱ་ཡས། སྔར་མི་དབང་བ་ལ་དབང་བས་དབང་ཞེས་བྱ་སྟེ། དབུལ་པོའི་སྒྱེད་པུ་གསེར་དུ་ཡོད་པ་ངོ་ཤེས་པ་ལྟ་བུའོ་ཞེས་གསུངས་པ་ལྟར་དགའ་བ་དང་སྤྲོ་བ་རྒྱ་ཆེན་པོ་གྱིས་ལ་རྩ་བ་དང་ཡན་ལག་གི་དམ་ཚིག་རྣམས་ཚུལ་བཞིན་དུ་འཛིན་སྙམ་པས་འདིའི་རྗེས་ཟློས། གཙོ་བོས་ཇི་ལྟར་སོགས། གཏང་རག་གི་མནྜལ་དང་། ལུས་དང་ལོངས་སྤྱོད་ལྟོས་པ་མེད་པར་འབུལ་སྙམ་པས་འདིའི་རྗེས་ཟློས། དེང་ནས་བརྩམས་ཏེ་བདག་བྲན་དུ་སོགས་ཀྱང་བརྗོད་པར་བྱའོ། །དེ་ནས་མ་དན་དང་བ་ལ་ཚོགས་ཀྱི་ཡོ་བྱད་གཙོ་བོར་གྱུར་པའི་འདོད་ཡོན་རྣམས་ལ་དཔའ་བོའི་དགའ་སྟོན་གྱིས་རོལ་པར་བྱ་ཞིང་། རྣམ་པར་རྟོག་པ་མེད་པར་ནང་གི་སྦྱིན་སྲེག་གི་ངེས་པས་ལོངས་སྤྱད། དེའི་ཚེ་རྡོ་རྗེའི་གླུ་དང་གར་དང་། ཡེ་ཤེས་ཀྱི་ཀུན་ཏུ་རུའི་སྤྱོད་པ་སོགས་བྱའོ། །དེ་ལྟར་ཁྱབ་བདག་རྡོ་རྗེ་སེམས། །ཧེ་རུ་ཀ་དཔལ་བླ་མ་ཡི། །དཀྱིལ་འཁོར་ཆེན་པོར་སྨིན་བྱེད་ཀྱི། །དབང་བསྐུར་ཡེ་ཤེས་རྒྱུན་བཟང་འདི། །ཚུལ་འདིར་མོས་པའི་
སྐལ་པ་ཅན། །སྒྲུབ་ཆེན་མངྒའི་མིང་ཅན་གྱི། །རྣམ་དཔྱོད་བློ་གྲོས་པད་ཚལ་བཞད། །གདུལ་བྱའི་ར་ཡིག་གཉིས་པ་རྣམས། །ཆོས་ཀྱི་ཟིལ་མངར་ཐོབ་པའི་ཕྱིར། །ཉིན་མོར་བྱེད་པའི་དབང་པོ་ཡིས། །ཀུན་དགའི་འོད་སྟོང་སྤྲོ་བར་བྱས། །དགེ་དེས་སྐྱེ་དགུ་རྒྱལ་གྱུར་ཅིག །ཤུ་བྷཾ།། །།
བླ་མའི་རྣལ་འབྱོར་བྱིན་རླབས་ཆར་འབེབས་ཀྱི་ཟིན་བྲིས་རབ་གསལ་མེ་ལོང་།
བླ་མའི་རྣལ་འབྱོར་བྱིན་རླབས་ཆར་འབེབས་ཀྱི་ཟིན་བྲིས་རབ་གསལ་མེ་ལོང་བཞུགས། །དཔལ་ལྡན་མི་ཕམ་ཆོས་གྲུབ་རྒྱ་མཚོའི་ཞབས་ལ་ཕྱག་འཚལ་ལོ། །མགོན་པོ་དེ་ཉིད་ཀྱི་བླ་མའི་རྣལ་འབྱོར་མདོར་བསྡུས་ཞིག་སྐལ་བ་དང་ལྡན་པའི་ཆོས་སྐལ་དུ་སྦྱིན་པ་བྱིན་རླབས་ཆར་འབེབས་ཀྱི་ཟིན་ཐོ་ཞིག་དགོས་ཞེས་བྱ་བཏང་མངྒ་ལའི་མིང་ཅན་གྱིས་རྣམ་པར་དག་པའི་བློ་ཡིས་བསྐུལ་ཏེ། དེས་ན་ཐོ་ཙམ་བརྗོད་པར་བྱ་སྟེ། འདི་ཉིད་ཀྱི་སྒྲུབ་པ་དབང་དང་འབྲེལ་བའི་ཚེ་ལྟ་བུར་སྤྲོ་ན། ཐོག་མར་གདོད་ནས་རང་བྱུང་ལྷུན་གྱིས་གྲུབ་པའི་གནས་ས་སྤྱོད་དཔའ་བོ་མཁའ་འགྲོ་འདུ་བའི་གནས་སམ། རྒྱལ་བ་གོང་མས་བྱིན་གྱིས་བརླབས་ཤིང་ཞབས་ཀྱིས་བཅགས་པའི་གནས་སམ། དབེན་ཞིང་ཉམས་དགའ་ལ་བསམ་གཏན་གྱི་ཚེར་མ་མེད་པའི་སར་གནས་འཆའ་ཞིང་། ས་གཞི་བྱི་དོར་དང་། གཙང་སྦྲ་གང་ཆེའི་བཤམས་བཀོད་སོགས་བྱས་ལ། དམིགས་པའི་རྟེན་རྗེ་ཞྭ་དམར་པའི་སྐུ་བརྙན་འདྲ་ཞལ་ལམ། ན་རིམ་གང་ཡིན་གྱི་སྐུ་འམ་རས་བྲིས་བཤམས་ལ་སྟེགས་ཀྱི་ཁར་ལྷ་མཚན་མཎྜལ་དབུས་དང་ཕྱོགས་བཞིར་འབྲུ་དཀར་དྲི་བཟང་སྦགས་པའི་ཚོམ་བུ་བཀོད། དེ་སྟེང་མཉྫིའི་ཁར་བུམ་པ་མགུལ་ཆིངས་ཁ་རྒྱན་དུང་ཆོས་གཟུངས་རྡོར་ཡང་བཤམས། བུམ་པའི་སུམ་གཉིས་ཆུ་གཙང་གིས་
བཀང་བ་དང་། བུམ་རྫས་ཉེར་ལྔ་དྲི་བཟང་སོགས་བཏབ། དེ་སྟེང་མཉྫིའི་རིམ་གཅིག་སྟེང་རབ་ཏུ་ཐོད་པ་མཚན་ལྡན། མིན་ཀྱང་སྐྱོན་མེད་ཀྱི་ཐོད་པར་ཆང་དང་། འཛོམས་ན་རྩ་བརྒྱད་སྟོང་སྦྱར་གྱི་ཆོས་སྨན་བཏབ། དེ་ཡི་ཁར་མེ་ལོང་སིནྡྷཱུ་ར་བྱུགས་པའི་དབུས་སུ་ཆོས་འབྱུང་བསྣོལ་མ་ཁུག་དྲུག་ལ་དགའ་འཁྱིལ་གཡོན་བསྐོར། ལྟེ་བར་ཧྲཱིཿདེ་མཐར་ཡིག་ངོས་ནང་བསྟན་གྱིས། ༀ་བཛྲ་དྷྲིཀྲ་ཛྙཱ་ན་ཌཱ་ཀི་ནི་ས་མ་ཡ་ཨཱ་བེ་ཤ་ཡ་ཨཱ་བེ་ཤ་ཡ་ཨ་ཨཿཞེས་བྲིས་ལ་དར་དམར་གྱིས་དགབ། ཕྱོགས་བཞིར་དབུ་རྒྱན། རྡོ་རྗེ། དྲིལ་བུ། མིང་དབང་རྣམས་དངོས་སམ་ཙཀླི་སོགས་གང་བདེ་བཤམས་ལ་མདུན་དུ་མཆོད་པ་ཕྲེང་ཚར་བཤམས། ནང་མཆོད་ཀ་པཱ་ལ་བདུད་རྩིས་གང་བ་ཐོད་རྫས་དང་བཅས་པ། བླ་མ་ཡི་དམ་ཆོས་སྐྱོང་མཁའ་འགྲོའི་གཏོར་མ་ལྔ་ཚོམ་ཚོགས་དང་། ཤ་ཆང་གཞན་ཡང་ཟས་སྣའི་རིགས་དང་། མཆོད་པའི་མཎྜལ་སོ་བདུན་མའི་བཀོད་པ་ཅན་དང་། སྔོན་འགྲོ་གཏོར་མ། ཌཱ་དྲིལ། སྤོས་སྣོད། ཡུངས་ཀར་གུ་གུལ་ལ་སོགས་པ་ཉེར་མཁོའི་ཡོ་བྱད་འདུ་བར་བགྱིད་ལ། སྟན་བདེ་བར་ལུས་གནད་གང་བདེས་འཁོད་ལ། རང་ཉིད་རྩ་བའི་ཡི་དམ་གང་ཡིན་དེ་གསལ་བཏབ། མདུན་གྱི་ནམ་མཁར་སྐྱབས་ཡུལ་རྣམས་འདོན་སྒོམ་སྦྲགས་ནས། སྐྱབས་སེམས། ཡན་ལག་བདུན་པ། ཚད་མེད་བཞི་སོགས་བསྒོམ། ནང་མཆོད་བདུད་རྩི་བསང་སྦྱངས་བྱིན་རླབས་དང་པོ་ཉིན་པར་བྱ། སྔོན་འགྲོ་ཡང་དེ་བཞིན། བྱིན་རླབས་ཉིན་བསྟར་ཆགས་དང་། སྲུང་
འཁོར་བར། དེ་ནས་མདུན་མཁར་བླ་མའི་དཀྱིལ་འཁོར་བསྐྱེད་པ་སོགས་གཞུང་ཚིག་དང་དམིགས་པ་མཐུན་པར་ལྷ་སྐུ་ངོ་བོ་གསལ་བ། རྣམ་པ་སྟོང་པ། འཇའ་ཚོན་ལྟ་བུ། གཞན་ཡང་དུས་གསུམ་གྱི་སངས་རྒྱས་རྣམས་དང་། ཉེ་སྲས་བརྒྱད། ཉན་ཐོས་གནས་བརྟན་སོགས་བྱང་འཕགས་ཀྱི་སེམས་དཔའ་རྣམས་དང་། གུ་རུ་པདྨ་སོགས་རྒྱ་བོད་ཀྱི་རིག་འཛིན་གྲུབ་ཐོབ་བརྒྱུད་པའི་བླ་མ་ཐམས་ཅད་དང་། བདེ་དགྱེས་གསང་གསུམ་སོགས་རྒྱུད་སྡེ་བཞི་ཡི་ལྷ་རབ་འབྱམས། ཡེ་ཤེས་མགོན་པོ་བེར་དང་། ལྷ་མོ། དམ་ཅན། ཞིང་སྐྱོང་སོགས་ཆོས་སྐྱོང་རྒྱ་མཚོས་བསྐོར་བ་བར་མཚམས་མེད་པར་བཞུགས་པ། བཀྲ་ལམ་མེར་མེ་ལོང་གི་གཟུགས་བརྙན་བཞིན་གསལ་བར་བསྐྱེད་ནས་སྤྱན་འདྲེན་སོགས་གཞུང་ཚིག་ལྟར་དམིགས་པར་བྱའོ། །མདུན་བསྐྱེད་ཐུགས་ཀའི་འོད་ཀྱིས་བསྐུལ་བའི་དབང་ལྷ་སྤྱན་དྲངས་སོགས་དང་། ཕྱི་ནང་གི་མཆོད་པ། བསྟོད་ཕྱག་རྣམས་དཀྱུས་ལྟར་བྱའོ། །སྔགས་འཁོར་གསལ་ལྟར་ཧྲཱིཿཡི་མདུན་ནས་ཡིག་དྲུག་ངོ་ཕྱིར་བསྟན་གཡོན་དུ་བཀོད་གཡས་སུ་བསྐོར་བཟླས་པའི་སྔགས་དག་ཆ་དང་བཅས། དང་པོ་རིམ་བཞིན་གསལ་བཏབ། དེ་ནས་བར་མེད་ལྟ་བུར་འཁོར་བ་དང་། དེ་ནས་འོད་ཀྱི་རིགས་དྲུག་གི་ཞིང་དུ་ཕོག །སྡིག་སྒྲིབ་སྦྱངས། སྣང་གྲག་སྣོད་བཅུད་ལྷ་ཡི་ངོ་བོར་གསལ་བར་བསམ། མཚན་སྔགས་ཀྱང་སྐབས་སུ་བཟླའོ། །དེ་ལྟར་ཡིག་དྲུག་གཙོ་བོར་སྟོན་པ་ནི་གསུང་གི་དབང་ཕྱུག་སྣང་མཐའ་དང་ངོ་བོ་གཅིག་བཞིན་
དེ་ཡི་དགོས་ཁྱད་བསྟན་པའོ། །དེ་ནས་རྒྱང་འབོད་བྱ་བ་ནི། མི་རྟག་སྐྱོ་ཤས་ཀྱིས་བློ་བསྐུལ་ནས་ཆོས་བརྒྱད་གཉིས་འཛིན་ལ་ཞེན་པ་ལྡོག །སེམས་ཅན་རྣམས་ལ་སྙིང་རྗེ་དུང་ངེ་བ་བསྐྱེད་ནས་གྲུབ་ཐོབ་གོང་མའི་རྣམ་ཐར་རྗེས་སུ་དྲན་བཞིན་དེ་ཡི་རྗེས་སུ་སློབ་པའི་མོས་འདུན་གཏིང་ནས་སྐྱེས་པར་བྱས་ལ་གདུང་བའི་དབྱངས་དང་ལྡན་པས་སྣང་བ་འགྱུར་ངེས་སུ་བྱའོ། །དེ་ནི་མོས་གུས་སྒོམ་གྱི་མགོ་བོ་དང་། ཞེན་ལོག་སྒོམ་གྱི་རྐང་པར་གསུངས་བཞིན་མོས་གུས་དང་དག་སྣང་སྙིང་རྗེ་དམ་ཚིག་སོགས་ལམ་ཆོད་བྱིན་རླབས་འཇུག་ཕུལ་ཆེ་བ་རྒྱལ་བ་དག་གི་གསུང་ལས་བྱུང་བས་ནན་ཏར་འབད་པས་ཟུང་ཞིགདེ་ནས་སྡོམ་གསུམ་བཤགས་སྡོམ་སོགས་ཀྱང་སྙིང་ཁུང་རུས་པའི་གཏིང་ནས་འགྱོད་པ་དྲན་བཞིན་དུ་རྩེ་གཅིག་པས་བྱའོ། །དེ་ནས་བདག་ཉིད་འཇུག་ཅིང་དབང་བླང་བ་ནི། དངོས་གྲུབ་སྤྲིན་ཕུང་དུ་གསལ་ལྟར་རྣམ་རྒྱལ་བུམ་པ་སྐྱེད་ཆོག་དང་ཐུགས་ཀར་ཟླ་སྟེང་ཧྲཱིཿདམར་མཐར་སྔགས་ཕྲེང་བཀོད་པ་མདུན་བསྐྱེད་ལྟར་སྔགས་ཀྱི་དབྱེ་བ་ལས་གཞན་དུ་མ་མཆིས། འདི་སྐབས་རྡོར་འཆང་གཙོ་བོར་སྟོན་པ་ནི་གར་དབང་རྡོ་རྗེ་འཆང་ཉིད་ངེས་པ་ཐུན་མོང་མ་ཡིན་པའི་སྒྲུབ་པའི་རྩ་བ་མཐར་ཐུག་པའོ། །དེ་ནས་བདག་འཇུག་དབང་བཞི་བླང་བ་སོགས་གཞུང་དུ་བཀོད་པ་ལྟར་དང་། དབང་གི་ལྷ་རྣམས་རང་ཉིད་ལ་རིམ་པ་བཞིན་བསྟིམ་པ་སོགས་འདོན་སྒོམ་དང་བསྟུན་པར་གསལ་བར་དམིགས་པའོ། །དེས་རང་རྒྱུད་སྨིན་པར་བྱས་ནས་གཞན་སྐལ་པ་དང་ལྡན་པ་སྙིང་པོའི་བསྟན་པ་ལ་འཇུག་པའི་སློབ་མ་བྱང་ཆུབ་ཀྱི་སེམས་དང་ལྡན་པ་ལ་རྒྱུད་བྱིན་གྱིས་བརླབས་ཕྱིར་སྨིན་བྱེད་བསྐུར་བར་རུང་གི། དེ་ཡང་བདག་འཇུག་
ཟིན་ནས་ཚོགས་ཕུལ་བ་གཏོར་བསྔོས་མཚམས་སློབ་མ་རྗེས་འཛིན་བྱ་ལ། དེ་མིན་རྒྱུད་མ་དུལ་བའི་གཏི་མུག་ཅན་རྣམས་ལ་ནི་གསང་བ་གདམས་པ་མི་བྱའོ། །རྗེས་ཀྱི་བྱ་བ་ཚོགས་ཀྱི་འཁོར་ལོ་ནང་མཆོད་ལྟར་བྱིན་གྱིས་བརླབས། སྤྱན་འདྲེན་གཏོར་བསྔོས་ཚོགས་རོལ་ལྷག་མ་དང་། མཆོད་བསྟོད་རྣམས་དཀྱུས་ལྟར་འདོན་སྒོམ་དང་། བསྡུ་རིམ་གསོལ་གདབ་མི་བྱེད་པའི་འདུན་པ་དང་བཅས། བླ་མའི་ཞལ་ནས་དངོས་སུ་གདམས་པའི་དོན་ཚིགས་རྐང་བཞི་ལྷང་ལྷང་གསུངས་བར་མོས་ལ་མ་ཡེངས་པར་བྱས་ནས་དེ་ཡི་དོན་ཡིད་ལ་ཆུབ་པར་བྱས་ལ། མཐར་བྱིན་རླབས་བསྡུ་བའི་དབང་ནི། སྐྱབས་ཡུལ་ཐམས་ཅད་གཙོ་བོར་ཐིམ། དེ་ཡི་སྤྱི་བོ་ནས་ༀ་དཀར་པོ་འོད་ཟེར་དང་བཅས་པ་རང་གི་དཔྲལ་བར་ཐིམ། སྐུ་ཡི་དབང་ཐོབ། ཉོན་མོངས་པ་གཏི་མུག་དག །ཆོས་དབྱིངས་ཡེ་ཤེས་མངོན་དུ་གྱུར། དེ་ཡི་རིགས་འགྲེས་ཀྱི། ཨཱཿདམར་པོ། མགྲིན་པར་ཐིམ། གསུང་གི་དབང་ཐོབ། འདོད་ཆགས་དག །སོར་རྟོག་ཡེ་ཤེས་ཐོབ། ཧཱུྃ་སྔོན་པོ་སྙིང་གར་ཐིམ། ཐུགས་དབང་ཐོབ། ཞེ་སྡང་དག །མེ་ལོང་ཡེ་ཤེས་ཐོབ། སྭཱ་སེར་པོ་ལྟེ་བར་ཐིམ། ཡོན་ཏན་དབང་ཐོབ། ང་རྒྱལ་དགམཉམ་ཉིད་ཡེ་ཤེས་ཐོབ། ཧཱ་ལྗང་གུ་གསང་བར་ཐིམ། ཕྲིན་དབང་ཐོབ། ཕྲག་དོག་དག །བྱ་གྲུབ་ཡེ་ཤེས་ཐོབ་པར་མོས་ལ་མཐར་བླ་མ་འོད་དུ་ཞུ་རང་ཉིད་དང་དབྱེར་མེད་ཆུ་ལ་ཆུ་བཞག་པ་ལྟར་གྱུར་པར་མོས་ལ་སེམས་ཀྱི་གནས་ལུགས་སྐྱོང་། བསྔོ་བ་དང་སྨོན་ལམ་བཀྲ་ཤིས་སོགས་བྱའོ། །དེ་ནི་ཅུང་ཟད་རྒྱས་པ་སྤྲོ་བ་ཡིན་གྱི། དེ་ལས་ཁྱེར་བདེ་བའི་རྒྱས་འབྲིང་བསྡུས་གསུམ་གྱི་དབྱེ་བ་ནི་བྱིན་རླབས་ཆར་འབེབས་ཀྱི་མཐར་གསལ་ལོ། །དེ་ལྟར་འཇུག་པ་དེའི་ཟིན་བྲིས་ཐོ་ཙམ་ཞིག་བཀོད་པ་དུས་དང་གནས་སྐབས་ཐམས་ཅད་དུ་བཀྲ་ཤིས་པར་གྱུར་ཅིག། །།
བླ་མ་མཆོད་པ་མདོར་བསྡུས།
༈ སྭསྟི། འདིར་བླ་མ་མཆོད་པ་མདོར་བསྡུས་ཞིག་སྤྲོ་ན། དང་པོ་སྐྱབས་སེམས། མཁའ་ཁྱབ་དངོས་ཀུན་བདག་ཉིད་ཅན། །བདེ་ཆེན་ཡེ་ཤེས་ཐུགས་རྗེའི་འཕྲུལ། །རབ་འབྱམས་དཀྱིལ་འཁོར་ལྷ་ཚོགས་ལ། །བདག་སོགས་འགྲོ་ཀུན་སྐྱབས་སུ་མཆི། །བྱང་ཆུབ་མཆོག་ཏུ་སེམས་བསྐྱེད་དོ། །དེ་ནས་མཆོད་རྫས་རྣམས་ཨ་མྲྀ་ཏས་བསངས་། སྭ་བྷཱ་ཝས་སྦྱངས། སྟོང་ལས་རླུང་མེ་ཐོད་སྒྱེད་སྟེང་། །ཐོད་པ་མཚན་ལྡན་ཀ་པཱ་ལར། །ཤ་ལྔ་བདུད་རྩི་རྣམ་ལྔ་པོ། །ས་བོན་དང་བཅས་གསལ་བ་ལས། །འོད་འཕྲོས་ཡེ་ཤེས་བདུད་རྩི་བཀུག །དམ་ཡེ་དབྱེར་མེད་མཆོད་སྤྲིན་སྤེལ། །ༀ་ཨཱ་ཧཱུྃ་ཧ་ཧོ་ཧྲཱིཿལན་གསུམ་གྱིས་བྱིན་བརླབས་ནས། གནས་འོག་མིན་ངེས་པ་ལྔ་ལྡན་ཞིང་། །འཁོར་དཔའ་བོ་མཁའ་འགྲོ་འབུམ་གྱི་དབུས། །རྒྱལ་བ་དང་རྒྱ་མཚོའི་གཙོ་བོ་མཆོག །དཔལ་ས་བཅུའི་དབང་ཕྱུག་འགྲོ་བའི་མགོན། །རྗེ་བློ་གྲོས་རིན་ཆེན་དམ་པ་དང་། །བཀའ་བབས་ཀྱི་ཆོས་བདག་གྲུབ་པའི་དབང་། །ངེས་དོན་གྱི་རིང་ལུགས་འཛིན་པའི་ཕྲེང་། །སྲས་སློབ་དང་གདན་རབས་བརྒྱུད་པར་བཅས། །ཐུགས་ཆོས་དབྱིངས་ཀློང་ནས་འདིར་དགོངས་ལ། །ཚོགས་མཆོད་པའི་གནས་འདིར་གཤེགས་སུ་གསོལ། །བྱིན་རླབས་ཀྱི་སྤྲིན་ཕུང་ཐིབས་སེ་ཐིབ། །དངོས་གྲུབ་ཀྱི་ཆར་རྒྱུན་ཤ་ར་ར། །བདག་མོས་པའི་བུ་ལ་བྱིན་གྱིས་རློབས། །མཆོག་ཐུན་མོང་གི་དངོས་གྲུབ་དེང་འདིར་སྩོལ། །འདིར་བཤམས་
ཀྱི་དམ་ཚིག་གསང་བའི་རྫས། །ཤ་ལྔ་དང་བདུད་རྩི་རྣམ་ལྔ་ཡི། །འོད་ཟེར་ལས་ཀུན་བཟང་མཆོད་པའི་སྤྲིན། །རབ་འབྱམས་ཞིང་ཡོངས་བཀང་བློས་བླངས་ཏེ། །དད་མོས་པས་འབུལ་གྱི་བཞེས་སུ་གསོལ། །གཱ་ཱཎ་ཙཀྲ་པཉྩ་ཨ་མྲ་ྀཏ་སརྦ་པཱུ་ཛ་ཁཱ་ཱཧི། ཅེས་འབུལ་ལ། དེ་ལྟར་ཚོགས་ཀྱི་འཁོར་ལོ་ཡི། །མཆོད་པ་ཟབ་མོ་ཕུལ་བའི་མཐུས། །བདག་གཞན་ཚོགས་གསུམ་ཡོངས་རྫོགས་ནས། །གདོད་ནས་ལྷན་སྐྱེས་རང་བྱུང་གི། །མཐའ་བྲལ་བླ་མེད་སྙིང་པོའི་དོན། །མངོན་གྱུར་རྡོ་རྗེ་འཆང་ཐོབ་ཤོག །རྒྱལ་བའི་བསྟན་པ་དར་ཞིང་རྒྱས། །དེ་འཛིན་ཕྲིན་ལས་འགྲོ་དོན་འཕེལ། །སྔོན་བྱོན་རྒྱལ་བའི་ཐུགས་བསྐྱེད་འོད། །གང་འདིར་གསལ་བའི་བཀྲ་ཤིས་ཀྱིས། །རྣམ་ཀུན་དོན་གཉིས་ཡོངས་གྲུབ་ཤོག །ཅེས་པའང་ཀརྨ་སྦྱིན་པའི་ངོར་སྤེལ་བ་དགེ། །།
དྲུང་རྨ་སེ་བློ་གྲོས་རིན་ཆེན་བླ་སྒྲུབ་དང་རྗེས་འབྲེལ་ཚོགས་མཆོད་འབུལ་བ།
དྲུང་རྨ་སེ་བློ་གྲོས་རིན་ཆེན་བླ་སྒྲུབ་དང་རྗེས་འབྲེལ་ཚོགས་མཆོད་འབུལ་བར་སྤྲོ་ན། མཆོད་པའི་ཡོ་བྱད་རྣམས། ༀ་ཁནྜ་རོ་ཧིས་བསངས། སྭ་བྷཱ་ཝས་སྦྱངས། ཧྲཱིཿབདེ་ཆེན་དབྱིངས་ཀྱི་ཀཱ་པ་ལར། །འབྲུ་གསུམ་འོད་ཞུའི་ཐབས་ཤེས་ཀྱི། །འཆི་མེད་ར་ས་ཡ་ན་སྟེ། །ཚོགས་ཀྱི་འཁོར་ལོར་བྱིན་བརླབས་གྱུར། །ༀ་ཨཱཿཧཱུྃ། ལན་གསུམ་བརྗོད། ཕེཾ་ཕེཾ་ཕེཾ། བདེ་གསལ་ཆོས་དབྱིངས་ཞིང་ཁམས་ནས། །བདེ་གཤེགས་ཀུན་འདུས་ཧེ་རུ་ཀ། བདེ་ཆེན་དྲྭ་བ་སྡོམ་པ་ཉིད། །བདེ་སྟོང་ཚོགས་ལ་སྤྱན་འདྲེན་གཤེགས། །ཆོས་དབྱིངས་
ལྷུན་རྫོགས་ཀློང་ཡངས་ནས། །ལོངས་སྤྱོད་རྫོགས་པ་ཧེ་རུ་ཀ། གྲུབ་མཆོག་ཏཻ་ལོ་འགྲོ་བའི་མགོན། །རང་གསལ་ཚོགས་ལ་སྦྱན་འདྲེན་གཤེགས། །ཀུན་ཁྱབ་ཐུགས་རྗེའི་གནས་མཆོག་ནས། །དམིགས་མེད་སྙིང་རྗེའི་གར་རོལ་པ། །གྲུབ་བརྙེེས་མ་ཏི་རཏྣའི་མཚན། །ཤར་གྲོལ་ཚོགས་ལ་སྤྱན་འདྲེན་གཤེགས། །གཞན་ཡང་ཐབས་དང་ཤེས་རབ་ཀྱི། །སྣང་ཆ་ལས་ཤར་དཔའ་བོ་དང་། །མཁའ་འགྲོ་ཤུགས་འགྲོའི་ཚོགས་བཅས་ཀྱང་། །བདེ་ཆེན་ཚོགས་ལ་སྤྱན་འདྲེན་གཤེགས། །བག་དྲོ་བཀོད་ལེགས་ཚོགས་ཁང་འདིར། །དུར་ཁྲོད་གནས་སུ་བྱིན་གྱིས་རློབས། །འདིར་ཚོགས་མོས་པའི་བུ་སློབ་རྣམས། །དཔའ་བོ་ཌཱ་ཀིར་བྱིན་གྱིས་རློབས། །ཐབས་ཤེས་ཚོགས་ཀྱི་མཆོད་པ་འདི། །ཡེ་ཤེས་བདུད་རྩིར་བྱིན་གྱིས་རློབས། །མ་དག་ཕུང་ལྔ་ཁམས་ལྔ་རྣམས། །ཡེ་ཤེས་ལྔ་ཡི་ཀློང་དུ་བཞེས། །ཡེ་ནས་གནས་པའི་ཆོས་སྐུ་ལ། །རང་ངོ་ཤེས་བཞིན་སོ་མར་བཞག །རེ་དོགས་གཉིས་འཛིན་ལས་གྲོལ་བའི། །ཚོགས་མཆོད་དམ་པ་དང་རེ་སྤྲོ། །རྩ་གསུམ་རྒྱལ་བའི་ལྷ་ཚོགས་ཀྱི། །ཐུགས་དམ་དབྱིངས་སུ་བསྐང་བ་དང་། །ཀུན་རྫོབ་འཁྲུལ་པའི་ཉམས་ཆག་རྣམས། །ཡེ་དག་ཀུན་བཟང་དབྱིངས་སུ་བཤགས། །ཉག་གཅིག་ཆོས་སྐུའི་རང་ཞལ་ལ། །འཛིན་རྟོག་སྤྲོས་པས་སྒྲིབ་གྱུར་པ། །སྤྲོས་བྲལ་བདེ་ཆེན་ཀློང་ཡངས་སུ། །རང་གསལ་རང་གྲོལ་ངང་དུ་ཟློག །ཀུན་ཁྱབ་དབྱིངས་ཀྱི་མཁའ་
ཀློང་དུ། །སྒྲིབ་བྱེད་དྲི་མ་གང་མཆིས་ཀུན། །སྐྱེ་འགགས་གནས་མེད་ཆེན་པོ་རུ། །ལྷག་མེད་ཆོས་སྐུ་མངོན་མཐོང་ནས། །འཁྲུལ་གྲོལ་མཚན་མ་རྣམ་དག་པའི། །ཆོས་དབྱིངས་མཆོག་གི་བཀྲ་ཤིས་ཤོག །ཅེས་དོན་དམ་ཚོགས་ཀྱི་མཆོད་པ་ཚིག་དོན་མཐུན་པའི་སྒོ་ནས་འབུལ་ཞིང་དེ་ནས་བྱིན་རླབས་དབང་བཞི་བླང་བར་བྱའོ། །ཞེས་སི་ཏུ་པས་དབོན་ཀརྨ་བསྟན་པའི་བཞེད་ངོར་སྤེལ་བ་ཛ་ཡནྟུ།། །།
བླ་མའི་རྣལ་འབྱོར་དངོས་གྲུབ་ཡོངས་འདུ།
བླ་མའི་རྣལ་འབྱོར་དངོས་གྲུབ་ཡོངས་འདུ་བཞུགས་སོ། །སྭ་སྟི། འདིར་བླ་མའི་རྣལ་འབྱོར་དང་འབྲེལ་བའི་ཚོགས་མཆོད་ཀྱི་རིམ་པ་ཁྱེར་བདེར་བྱེད་པ་སྤྲོ་ན། ཡོ་བྱད་མཆོད་རྫས་རྣམས་འདུ་བགྱིས་ལ་རང་ལྷར་གསལ་བའི་ངང་ནས། ཨམྲྀ་ཏས་བསངས་། སྭ་བྷཱ་ཝས་སྦྱངས། སྟོང་ལས་ཨ་ཡིག་ཡོངས་གྱུར་ཐོད་པའི་སྣོད། །རྣམས་ཀྱི་ནང་དུ་ཧཱུྃ་ཡིག་ཚོགས་འོད་ཞུ། །དེ་ལས་མཆོད་པའི་བྱེ་བྲག་ཕྱི་ནང་རྫས། །འདོད་ཡོན་ཟག་མེད་མཆོད་སྤྲིན་རྒྱ་མཚོར་སྤེལ། །ཨ་ཀཱ་རོས་ལན་གསུམ་བྱིན་བརླབས། རང་མདུན་ནམ་མཁར་གྱད་དང་སེང་གེ་བཞིས། །བཏེགས་པའི་རིན་ཆེན་ཁྲི་སྟེང་པདྨ་དཀར། །འདབ་སྟོང་གེ་སར་རབ་རྒྱས་ཉི་ཟླའི་དབུས། །ཧྲཱིཿཡིག་འོད་ཀྱིས་དོན་གཉིས་བྱས་ཡོངས་གྱུར། །དཔལ་ལྡན་བླ་མ་ཆོས་སྐྱོང་འགྱུར་མེད་མཆོག །དཀར་གསལ་ཞི་འཛུམ་སྤྱན་གཉིས་ལྟ་སྟངས་གཟིགས། །ཞལ་གཅིག་ཕྱག་གཉིས་རྡོར་དྲིལ་འཁྱུད་སྟབས་འཛིན། །དབུ་ལ་སྒོམ་ཞུ་དང་ནི་ཞབས་སྐྱིལ་ཀྲུང་། །ཆོས་གོས་རྣམ་གསུམ་ན་བཟས་མཛེས་པར་བཀླུབས། །གནས་གསུམ་འབྲུ་
གསུམ་ཡི་གེས་མཚན་པར་གྱུར། །འཇའ་ཟེར་འོད་སྐུད་འཁྲུགས་པའི་ཀློང་དུ་གསལ། །གསོལ་བཏབ་ཙམ་གྱིས་བཟོད་མེད་གདུང་ཤུགས་འབར། །འབར་ཙམ་ཉིད་ནས་བྱིན་རླབས་ཐུགས་རྗེ་མྱུར། །མྱུར་བའི་སྟོབས་ཀྱིས་མཆོག་དང་ཐུན་མོང་གི། །དངོས་གྲུབ་སྤྲིན་འཁྲིགས་ཆར་རྒྱུན་ཤ་ར་ར། །སྟེང་འོག་བར་མཚམས་བཀའ་བརྒྱུད་བླ་མ་དང་། །ཡི་དམ་དཔའ་བོ་མཁའ་འགྲོ་ཆོས་སྐྱོང་ཚོགས། །ཀུན་ཀྱང་སྐྱབས་གནས་རྒྱ་མཚོའི་ངོ་བོར་གསལ། །གཙོ་བོའི་ཐུགས་ཀའི་ཧཱུྃ་ལས་འོད་འཕྲོས་པས། །འོག་མིན་ཆོས་ཀྱི་དབྱིངས་ཀྱི་ཞིང་ཁམས་ནས། །རྩ་གསུམ་ལྷ་ཚོགས་སྤྱན་དྲངས་དམ་ཚིག་དང་། །ཡེ་ཤེས་དབྱེར་མེད་དབང་ལྷས་དབང་བསྐུར་ཞིང་། །རིགས་བདག་རྡོར་སེམས་རྒྱས་གདབ་མཆོད་པའི་ཚོགས། །ནམ་མཁའ་གང་བས་དགྱེས་བསྐྱེད་མཆོད་པར་གྱུར། །ༀ་བཛྲ་ཨརྒྷཾ། པཱདྱཾ་ནས། ཤབྟའི་བར་གྱིས་མཆོད། ཐུགས་ཀར་ཟླ་སྟེང་ཧྲཱིཿདཀར་པོའི། །མཐའ་མར་སྔགས་ཀྱིས་བསྐོར་བ་ལས། །འོད་འཕྲོས་རྒྱལ་མཆོད་འགྲོ་དོན་བྱས། །ཚུར་འདུས་འཕགས་པའི་ཐུགས་རྗེ་དང་། །བྱིན་རླབས་བདག་རྒྱུད་ལ་སྨིན་ནས། །སྒོ་གསུམ་རྡོ་རྗེ་གསུམ་བརྙེས་གྱུར། །ༀ་ཨཱཿདྷརྨ་པཱ་ལ་ཨཀྵ་ར་ཧཱུྃ། ཞེས་བཟླས་ལ། ཚོགས་འཁོར་བྱིན་གྱིས་བརླབ་པ་ནི། ཨ་མྲྀ་ཏས་བསངས་། སྭ་བྷཱ་ཝས་སྦྱངས། སྟོང་ལས་རླུང་མེ་ཐོད་སྒྱེད་སྟེང་། །ཨ་ལས་ཡེ་ཤེས་ཀ་པཱ་ལར། །ཤ་ལྔ་བདུད་རྩི་
ལྔས་གང་བ། །སྦྱང་རྟོགས་སྦར་བའི་ནུས་པ་ཡི། །ཡེ་ཤེས་བདུད་རྩིའི་རང་བཞིན་ཅན། །ཐབས་ཤེས་གཉིས་མེད་མཆོད་པའི་སྤྲིན། །རབ་འབྱམས་མཐའ་ཡས་ཀུན་ཁྱབ་པའི། །འདོད་ཡོན་ཚོགས་ཀྱི་འཁོར་ལོར་གྱུར། །དེ་ནས་སྤྱན་དྲངས་པ་ནི། གནས་བདེ་ཆེན་འོག་མིན་གཞལ་ཡས་ནས། །ཕ་བཀའ་བརྒྱུད་བླ་མ་ཚོགས་ལ་བྱོན། །གནས་སྙིང་ག་ཆོས་ཀྱི་འཁོར་ལོ་ནས། །རྗེ་ཆོས་སྐྱོང་འགྱུར་མེད་ཚོགས་ལ་བྱོན། །གནས་དག་པ་མཁའ་སྤྱོད་ཞིང་ཁམས་ནས། །ལྷ་ཡི་དམ་ཌཱ་ཀི་ཚོགས་ལ་བྱོན། །གནས་བཀའ་གསང་དམ་ཚིག་དཀྱིལ་འཁོར་ནས། །ཆོས་སྐྱོང་བའི་སྲུང་མ་ཚོགས་ལ་བྱོན། །ཕྱི་ནང་གི་དངོས་པོའི་གཟུང་འཛིན་ཀུན། །ཡེ་ཤེས་ཀྱི་རོལ་པ་ཆེན་པོར་བསྒྱུར། །འདོད་ཡོན་ཚོགས་བདུད་རྩིའི་རང་བཞིན་སྤེལ། །རྣལ་འབྱོར་རྣམས་ཟག་མེད་བདེ་སྟོང་གི། །ཏིང་འཛིན་གྱི་རྩལ་སྐྱེད་མཆོག་ཐུན་མོང་། །དངོས་གྲུབ་ཀྱི་ཆར་ཆེན་དུས་འདིར་སྩོལ། །གུ་རུ་དེ་ཝ་ཌཱ་ཀི་ནི་དྷརྨ་པཱ་ལ་ས་པ་རི་ཝཱ་ར་པཉྩ་ཨ་མྲྀ་ཏ་ལ་ཁཱ་ཧི། ག་ཎ་ཙཀྲ་ལ་ཁཱ་ཧི། ཞེས་སྤྱན་དྲངས་ཤིང་ཚོགས་ཕུད་ཕུལ་ལ། རྣལ་འབྱོར་རྣམས་ཀྱང་རོལ་ནས། ལྷག་མ་ཨ་ཀ་རོས་བྱིན་བརླབས་ནས། ཕུད་ལྷག་བཤལ་ཆུར་དབང་བའི་མཁའ་འགྲོའི་ཚོགས། །ཀུན་ཀྱང་འདིར་སྤྱོན་གཏོར་མ་འདི་བཞེས་ལ། །བསྟན་པ་སྲུང་དང་རྣལ་འབྱོར་སྐྱོང་བ་སོགས། །གང་བཅོལ་ཕྲིན་ལས་རྣམ་བཞི་ཐོགས་མེད་སྒྲུབས། །ཞེས་པས་
ཕུལ། དེ་ནས་རྗེས་རིམ་བྱིན་རླབས་བསྡུ་བ་ནི། བླ་མའི་གསང་གསུམ་ཡེ་ཤེས་རྡོ་རྗེ་བཞིའི། །བྱིན་རླབས་ངོ་བོ་འོད་ཟེར་སྣ་ཚོགས་འཕྲོས། །རང་གི་གནས་བཞིར་ཐིམ་པས་དབང་བཞི་ཐོབ། །སྒྲིབ་བཞི་དག་ནས་སྐུ་བཞི་མངོན་དུ་གྱུར། །སྐྱབས་ཡུལ་ཐམས་ཅད་དཀྱིལ་འཁོར་གཙོ་བོར་བསྡུས། །དེ་ཉིད་དགྱེས་པ་དང་བཅས་འོད་ཞུ་ནས། །རང་ཐིམ་དབྱེར་མེད་ཆོས་དབྱིངས་གཉུག་མའི་གཤིས། །དུས་གསུམ་སྤྲོས་པ་བྲལ་བའི་ངང་དུ་བཞག །ཅི་གནས་སུ་མཉམ་པར་བཞག་ལ། དགེ་བ་འདི་ཡིས་སོགས་དང་། བསྔོ་སྨོན་དང་བཅས་བརྗོད། ཅེས་དབོན་པོ་བླ་མ་ཀརྨ་བསྟན་པ་ཚེ་རིང་གི་དགྱེས་སྐོང་ཕྱིར། སི་ཏུ་པས་སྤེལ་བ་སརྦ་ཛ་ག་ཏཾ།། །།
རྗེ་ཆོས་སྐྱོང་འགྱུར་མེད་ཀྱི་བླ་སྒྲུབ་ཁག་གཉིས།
གུ་རུ་སརྦ་ཡོ་ག་མ་ཧཱ་སུ་ཁ་ཛྙཱ་ན་བི་ཧ་ར་ཏིསྨ། ༀ་སྭ་བྷཱ་ཝ་སོགས་ཀྱིས་སྣང་སྲིད་ཀྱི་ཆོས་ཐམས་ཅད་སྟོང་པར་སྦྱངས་ནས། རང་གི་སྤྱི་བོར་བླ་མ་བསྒོམ་པ་ནི། བདག་ཉིད་ཐ་མལ་བདེ་ཆེན་འཁོར་ལོ་རུ། །པདྨ་ཉི་ཟླའི་སྟེང་དུ་རྒྱལ་ཀུན་གྱི། །གསང་གསུམ་ཡེ་ཤེས་གཅིག་བསྡུས་རྡོ་རྗེ་འཆང་། །དྲན་མཆོག་མགོན་པོ་ཆོས་སྐྱོང་འགྱུར་བ་མེད། །སྐུ་མདོག་དཀར་གསལ་ཞལ་གཅིག་ཕྱག་གཉིས་པ། །གཡས་པས་སྐྱབས་སྦྱིན་གཡོན་པས་ཚེ་བུམ་བསྣམས། །རྡོ་རྗེ་སྐྱིལ་ཀྲུང་ཆོས་གོས་རྣམ་གསུམ་བཀླུབས། །ཟབ་ཞི་སྤྲོ་བྲལ་ཏིང་འཛིན་ངང་ཉིད་ལས། །སྨིན་གྲོལ་དམ་ཆོས་བདུད་རྩིའི་སྒྲ་དབྱངས་སྒྲོག །མཆོག་ཐུན་ལས་བཞིའི་དངོས་གྲུབ་སྤྲིན་ཕུང་གཡོ། །དཀོན་མཆོག་འདུས་པའི་ངོ་བོར་ཁྱེད་ཤེས་ཀྱི། །མོས་བློས་ཡར་
གཞལ་མ་ཡིན་བཅོས་མིན་གྱི། །དད་གསུམ་བློ་ཡིས་རབ་བཏུད་གུས་འདུད་ནས། །ཕྱག་འཚལ་མཆོད་བཤགས་ཡི་རང་བསྐུལ་གསོལ་འདེབས། །དགེ་ཚོགས་འགྲོ་ཀུན་བྱང་ཆུབ་ཆེན་པོར་བསྔོ། །སྐྱབས་ཀུན་འདུས་བདེ་ཆེན་འཁོར་ལོའི་མགོན། །རིགས་དཀྱིལ་འཁོར་ཁྱབ་བདག་རྡོ་རྗེ་འཛིན། །དྲིན་ཆེན་རྗེ་ཆོས་སྐྱོང་འགྱུར་མེད་མཁྱེན། །སྐལ་ལྡན་བདག་རྗེས་འཛིན་བྱིན་གྱིས་རློབས། །ཚར་ཁ་ཤས་མོས་གུས་དང་ལྡན་པས་སྣང་བ་འགྱུར་ངེས་སུ་བཏོན། མཐར། སྤྱི་བོའི་བླ་མ་འོད་ཞུ་རང་ལ་ཐིམ། །དབང་བཞི་ཐོབ་ཅིང་སྒོ་གསུམ་སྒྲིབ་དག་ནས། །བླ་མ་ཆོས་སྐུའི་རང་ཞལ་ལེགས་མཐོང་ཞིང་། །སྐུ་བཞིའི་བདག་ཉིད་ཆེན་པོར་དབང་བསྒྱུར་ཤོག །དགེ་དེས་བདག་སོགས་རྡོ་རྗེ་འཆང་འགྲུབ་ཤོག །ཅེས་སྒྲུབ་པ་ཐེག་འཕེལ་གྱིས་ཤེལ་དཀར་མཱ་ལ། བལ་ཏྲམ་བཅས་ཕུལ་ནས་བསྐུལ་ངོར་སི་ཏུ་པདྨ་ཉིན་བྱེད་དབང་པོས་སྤེལ།། །།རང་ལུས་ཐ་མལ་མདུན་མཁར་དབུས། །འོད་ཀྱི་ཐིག་ལེ་འཁྱིལ་པའི་དབུས། །རིན་ཆེན་སེང་ཁྲི་དར་ཟབ་སྟེང་། །གར་དབང་ཆོས་སྐྱོང་འགྱུར་བ་མེད། །ཞི་འཛུམ་ཆོས་གོས་རྣམ་གསུམ་ལྡན། །བཀྲ་གསལ་ལྷམ་མེ་དེའི་སྤྱི་བོར། །དྲི་མེད་པདྨ་དཀར་པོ་ནི། །འདབ་སྟོང་རྒྱས་སྟེང་རིག་པ་འཛིན། །རྡོ་རྗེ་དྲག་པོ་ཞི་མ་ཁྲོ། །པད་ཞྭ་ཕོད་ཁ་རིན་ཆེན་བརྒྱན། །ཕྱག་གཉིས་རྡོ་རྗེ་ཕུར་སྡིག་འཛིན། །རོལ་སྟབས་ཀྱིས་བཞུགས་ལྷམ་མེ་བ། །དུས་གསུམ་རྒྱལ་བ་ཀུན་སྤྱི་དཔལ། །པདྨ་འབྱུང་གནས་དབྱེར་མེད་པའི། །དྲིན་ཆེན་བླ་མའི་
ཞབས་ལ་འདུད། །བདེ་ཆེན་ཡེ་ཤེས་དོན་རྟོགས་ཤོག །དྲག་རྩལ་འོད་ཞུ་བླ་མར་ཐིམ། །དེ་ཉིད་རང་ལུས་ལ་ཐིམ་པས། །དབང་བཞི་ཡོངས་རྫོགས་སྒྲིབ་བཞི་དག །སྐུ་བཞི་མངོན་དུ་གྱུར་པར་བསམ། །དར་གཅིག་ཅི་གནས་མཉམ་པར་བཞག །ཅེས་རྗེས་བསྔོ་བ་བྱའོ། །དེ་ལྟར་དབོན་པོ་ཀརྨ་བསྟན་པའི་ངོར་སི་ཏུས་དཔལ་སྤུངས་ཡང་དབེན་དུ་བྲིས་པ་མངྒ་ལམ།། །།
བླ་མའི་རྣལ་འབྱོར་དོན་གཉིས་ཡོངས་འདུ་དངོས་གྲུབ་མཆོག་སྩོལ།
བླ་མའི་རྣལ་འབྱོར་དོན་གཉིས་ཡོངས་འདུ་དངོས་གྲུབ་མཆོག་སྩོལ་བཞུགས། ན་མོ་གུ་རུ་བཛྲ་དྷ་ར་ཡ། འདིར་བླ་མའི་རྣལ་འབྱོར་ཁྱེར་བདེར་བཀོད་པ་ལ། དེ་ཡང་ཚོགས་དང་མཆོད་པ་འབྲེལ་པ་ཕན་ཡོན་བྱིན་རླབས་ཀྱི་ཚན་ཁ་ལྷག་པར་ཐོབ་པ་སྟེ། རིམ་ལྔ་ལས། མཆོད་པ་ཐམས་ཅད་ཡོངས་སྤངས་ནས། །བླ་མ་མཆོད་པ་ཡང་དག་བརྩམས། །དེ་མཉེས་པས་ནི་ཀུན་མཁྱེན་གྱི། །ཡེ་ཤེས་མཆོག་ནི་ཐོབ་པར་འགྱུར། །ཅེས་གསུངས་པ་ལྟར། རྟེན་གྱི་དྲུང་དུ། མཆོད་པའི་བྱེ་བྲག་ཐམས་ཅད་འདུ་བགྱིས་ལ། བདེ་བའི་སྟན་ལ་འཁོད་ནས། དང་པོ་སྐྱབས་སེམས་ནི། ན་མོ། དུས་གསུམ་སྟོན་མཆོག་ཆགས་བྲལ་དམ་པའི་ཆོས། །རིག་གྲོལ་ཚོགས་དང་རྩ་གསུམ་རབ་འབྱམས་ལྷ། །ཀུན་འདུས་དབྱེར་མེད་བླ་མར་སྐྱབས་སུ་མཆི། །འགྲོ་རྣམས་བྱང་ཆུབ་ཐོབ་པར་སེམས་བསྐྱེད་དོ། །ལན་གསུམ་དང་། གཉིས་པ་མཆོད་རྫས་བྱིན་བརླབ་ནི། ཨ་མྲྀ་ཏས་བསངས། སྭ་བྷཱ་ཝས་སྦྱངས་། ༀ་ལས་རིན་ཆེན་སྣོད་རྣམས་སུ། །ཧཱུྃ་ཡིག་འོད་ཞུ་ལྷ་ཡི་རྫས། །རྡོ་རྗེའི་མཆོད་པའི་སྤྲིན་རྒྱ་མཚོ། །ཀུན་བཟང་སྨོན་ལམ་ཇི་བཞིན་གྱུར། །ༀ་བཛྲ་ཨརྒྷཾ་ཨཱཿཧཱུྃ་སྭཱ་ཧཱ། །དེ་བཞིན། པཱ་དྱཾ་ནས། ཤབྡའི་བར་
དང་། གསུམ་པ་རང་ལྷར་གསལ་བའི་མདུན་མཁར་བསྐྱེད་པའི་རིམ་པ་བསྟན་པ་ནི། ༀ་སྭ་བྷཱ་ཝས་སྦྱངས། སྟོང་པའི་ངང་ལས་མདུན་མཁར་འོད་ལྔའི་ཀློང་། །བྷྲཱུྃ་ལས་རིན་ཆེན་གཞལ་མེད་ཁང་ཆེན་པོ། །གྲུ་བཞི་སྒོ་བཞི་མཚན་ཉིད་ཡོངས་སུ་རྫོགས། །དེ་དབུས་གྱད་དང་སེང་ཆེན་བཞིས་བཏེགས་ཁྲིར། །ལྷ་མིའི་དཔལ་འབྱོར་བཀོད་ལེགས་ཕུན་ཚོགས་སྟེང་། །པྃ་ལས་པད་དཀར་འདབ་སྟོང་གེ་སར་རྒྱས། །ཨ་ལས་ཉ་གང་ཆུ་ཤེལ་དབང་པོས་མཚན། །དེ་སྟེང་རྒྱལ་ཀུན་གསུང་གི་ངོ་བོ་ཧྲཱིཿ། འོད་འཕྲོས་འཕགས་མཆོད་འགྲོ་བའི་སྒྲིབ་གཉིས་སྦྱང་། །ཚུར་འདུས་ཡོངས་གྱུར་འཇིག་རྟེན་དབང་ཕྱུག་མགོན། །ས་ར་ཧ་ཡི་རྣམ་རོལ་སྤྲུལ་པའི་སྐུ། །དཔལ་ལྡན་གྲུབ་མཆོག་དགེ་ལེགས་རབ་རྒྱས་ནི། །བདེ་ཆེན་གཟི་བྱིན་རབ་འབར་བརྗིད་བག་ཅན། །ཞལ་གཅིག་ཞལ་འཛུམ་དབུ་ལ་སྒོམ་ཞུ་གསོལ། །སྤྱན་ཟུང་ལྟ་སྟངས་ཆོས་ཉིད་དབྱིངས་ལ་གཟིགས། །ཕྱག་གཉིས་ཌཱ་དྲིལ་གྲག་སྟོང་སྒྲ་སྒྲོག་ཅིང་། །ལེ་བརྒན་དར་གྱི་ཆོས་གོས་རྣམ་གསུམ་དང་། །ཟ་འོག་བེར་ཆེན་ཟླུམ་འཁྱིལ་ལྷབ་མ་ལྷུབ། །ཞབས་གཉིས་སེམས་དཔའི་སྐྱིལ་ཀྲུང་དང་བཅས་བཞུགས། །ཡེ་ཤེས་རང་འོད་འཕྲོ་བའི་ཀློང་དུ་གསལ། །དཔྲལ་མགྲིན་ཐུགས་ཀར་འབྲུ་གསུམ་མཚན་པར་གྱུར། །གཞན་ཡང་སྟེང་འོག་ཕྱོགས་མཚམས་བར་མེད་དུ། །བཀའ་བརྒྱུད་བླ་མ་ཡི་དམ་དཔའ་བོ་དང་། །མཁའ་འགྲོ་ཆོས་སྐྱོང་ལ་སོགས་སྐྱབས་ཡུལ་རྣམས། །སྤྲིན་
ཕུང་གཏིབས་བཞིན་གསལ་སྟོང་འཛིན་མེད་པ། །རྣམ་དག་དཀྱིལ་འཁོར་རང་བཞིན་ལྷུན་གྱིས་རྫོགས། །ཐུགས་ཀའི་ཧཱུྃ་ལས་འོད་འཕྲོས་པོ་ཊ་ལ། །བདེ་ལྡན་ཞིང་དང་དཔལ་གྱི་རི་བོ་ནས། །འགྲོ་བའི་དོན་དུ་སྙིང་རྗེས་བརྩེར་དགོངས་ལ། །འཁོར་བཅས་སྤྱན་འདྲེན་གནས་འདིར་གཤེགས་སུ་གསོལ། །ༀ་ཤྲཱི་མཱན་གུ་རུ་དེ་ཝ་ཌཱ་ཀི་ནི་དྷརྨ་པཱ་ལ་ས་པ་རི་ཝཱ་ར་བཛྲ་ས་མ་ཡ་ཛཿཛཿབཞི་པ་བྱིན་འབེབས་ཅིང་སྤྱན་འདྲེན་པ་ནི། ཧཱུྃ། སྐྱེ་མེད་སྤྲོས་བྲལ་ཀློང་ཡངས་ནས། །རྒྱལ་བ་རབ་འབྱམས་རྒྱ་མཚོའི་དབུས། །སྤྱན་རས་གཟིགས་དབང་སྐུ་བསྐྱོད་འཚལ། །དབང་བཞི་བསྐུར་ལ་བྱིན་ཆེན་ཕོབ། །རང་བྱུང་ཐུགས་རྗེའི་རོལ་པ་ལས། །བརྟུལ་ཞུགས་སྤྱོད་པ་འཆང་རྣམས་དང་། །བྲམ་ཟེ་ཆེན་པོ་འདིར་གཤེགས་ལ། །སྨིན་ཅིང་གྲོལ་བའི་བྱིན་ཆེན་ཕོབ། །འགྲོ་བའི་དོན་དུ་གཟུགས་སྐུར་བསྟན། །རིག་འཛིན་རྣལ་འབྱོར་འཁོར་ཚོགས་བཅས། །གྲུབ་མཆོག་བླ་མ་གནས་འདིར་བྱོན། །དབང་བསྐུར་བྱིན་རླབས་དངོས་གྲུབ་སྩོལ། །ཛྙཱ་ན་བཛྲ་ཨཱ་ཝེ་ཤ་ཡ་ཨཱ་ཝེ་ཤ་ཡ་ཨ་ཨཿཛཿཧཱུྃ་བྃ་ཧོཿཞེས་དམ་ཡེ་དབྱེར་མེད་དུ་མོས་ལ། ལྔ་པ་དབང་བསྐུར་རྒྱས་གདབ་ནི། སླར་ཡང་ཐུགས་ལས་འོད་འཕྲོས་ཏེ། །རང་བཞིན་གནས་ནས་དབང་གི་ལྷ། །སྤྱན་དྲངས་དབང་བསྐུར་ཁྲུས་གསོལ་ནས། །རིགས་བདག་སྣང་མཐས་དབུ་བརྒྱན་གྱུར། །དྲུག་པ་མཆོད་པ་འབུལ་བ་ནི། དྲི་མེད་རྣམ་དག་རབ་དཀར་མོས་པའི་
བློས། །དྲངས་པའི་ལེགས་བྱས་རང་གཟུགས་ལྷ་ལམ་ཁྱོན། །དོག་པོར་གྱུར་པའི་རྡོ་རྗེའི་མཆོད་པའི་སྤྲིན། །ཐུགས་རྗེས་འགྲོ་བའི་དོན་ཕྱིར་བཞེས་སུ་གསོལ། །ༀ་བཛྲ་ཨརྒྷཾ་པྲ་ཏཱི་ཙྪ་ཨཱཿཧཱུྃ། ནས། ཤབྡའི་བར་དང་། གཞན་ཡང་ལྷ་མིའི་བདོག་པ་མཆིས་སོ་ཅོག །ཡིད་སྤྲུལ་དངོས་འབྱོར་ལོངས་སྤྱོད་དཔག་མེད་རྣམས། །མཎྜལ་གཅིག་ཏུ་བསྡུས་ནས་འབུལ་ལགས་ན། །བཞེས་ནས་བླ་མེད་གྲུབ་གཉིས་སྩལ་དུ་གསོལ། །གུ་རུ་ཨི་དཾ་མཎྜལ་ཀཾ་ནིཪྻ་ཏ་ཡ་མི། བདུན་པ་བཟླས་པ་བྱ་བ་ནི། མདུན་བསྐྱེད་ཐུགས་ཀར་ཟླ་སྟེང་ཧྲཱིཿམཐར་སྔགས། །འཁོར་བའི་འོད་ཀྱིས་རྒྱལ་མཆོད་དངོས་གྲུབ་ཐོབ། །འགྲོ་དྲུག་སྒྲིབ་སྦྱང་ཀུན་ཀྱང་ཡེ་ཤེས་ཀྱི། །རོལ་པ་ཆེན་པོའི་རང་བཞིན་ཉིད་དུ་གྱུར། །ༀ་ཨཱཿསིདྡྷ་པ་ར་མ་སྭ་སྟི་ཧཱུྃ། ཅེས་མཚན་སྔགས་ཅི་འགྲུབ་བཟླས་ལ། བརྒྱད་པ་ཚོགས་གཉིས་སྤེལ་ཕྱིར་དཔའ་བོའི་དགའ་སྟོན་ནི། ཨམྲྀ་ཏས་བསངས་། སྭ་བྷཱ་ཝས་སྦྱངས་། སྟོང་པའི་ངང་ལས་རླུང་མེ་ཐོད་སྒྱེད་སྟེང་། །ཨ་ལས་མཚན་ལྡན་བདེ་སྐྱོང་ཀ་པཱ་ལ། །ཡངས་ཤིང་རྒྱ་ཆེའི་ནང་དུ་ཤ་ལྔ་དང་། བདུད་རྩི་ལྔ་པོ་ས་བོན་མཚན་པ་ལས། །འོད་འཕྲོས་དམ་ཡེ་གཉིས་མེད་རྒྱ་མཚོར་གྱུར། །ༀ་ཨཱ་ཧཱུྃ་ཧ་ཧོ་ཧྲཱིཿལན་གསུམ་བྱིན་བརླབས་ལ། གནས་གྲུ་འཛིན་པོ་ཊ་ལ་ཞིང་དང་། །བདེ་བ་ཅན་དཔལ་རི་པད་འོད་སོགས། །རང་བཞིན་གྱི་དག་པའི་དཀྱིལ་འཁོར་ནས། །ལྷ་ནོར་བུ་པདྨ་ཅན་ཉིད་དང་། །དབྱེར་མེད་པའི་མདའ་བསྣུན་
ཆེན་པོ་མཆོག །སྐུ་རྣམ་འཕྲུལ་གསུམ་ལྡན་རྡོ་རྗེ་འཛིན། །གང་མི་མངོན་ཡེ་ཤེས་ཀློང་ཡངས་ནས། །ཐུགས་བདེ་སྟོང་དབྱིངས་ནས་དགོངས་མཛོད་ལ། །དེང་སྐལ་ལྡན་རྡོ་རྗེའི་དམ་ཚིག་ཅན། །དད་མོས་ཀྱིས་མཆོད་པའི་ཞིང་འདི་རུ། །རྒྱལ་བ་དང་རྒྱལ་སྲས་ཐུ་བོ་རྣམས། །རྩ་གསུམ་ལྷ་སྤྲིན་ལྟར་འདུས་པའི་དབུས། །གནས་འདིར་སྤྱོན་ཚོགས་ལ་གཤེགས་སུ་གསོལ། །བླ་མེད་ཀྱི་མཆོད་པའི་ཁྱད་པར་མཆོག །ཐབས་ཤེས་རབ་གཉིས་མེད་ཚོགས་འཁོར་ལོ། །བདག་གུས་པས་འབུལ་ལོ་བརྩེ་བས་བཞེས། །མཆོག་ཐུན་མོང་དངོས་གྲུབ་སྩལ་དུ་གསོལ། །གུ་རུ་དེ་ཝ་ཌཱ་ཀི་ནི་དྷརྨ་པཱ་ལ་ས་པ་རི་ཝཱ་ར་པཉྩ་ཨ་མྲྀ་ཏ་ལ་ཁཱ་ཧི། ག་ཎ་ཙཀྲ་ལ་ཁཱ་ཧི། ཅེས་ཚོགས་ཕུད་ཕུལ་ནས་སྒྲུབ་པོ་རྣམས་ཀྱང་དངོས་གྲུབ་ལ་རོལ་ནས། དགུ་པ་ལྷག་མ་ནི། རྡོ་རྗེ་འཆང་གི་བཀའ་གཏེར་སྲུང་མ་གཉན། །མཁའ་འགྲོ་ཤུགས་འགྲོ་ལ་སོགས་སྤྲུལ་འཁོར་རྣམས། །ཕུད་དང་ལྷག་མའི་དམ་རྫས་འདི་བཞེས་ལ། །བསྟན་སྐྱོང་རྣལ་འབྱོར་བསྲུང་བའི་ཕྲིན་ལས་མཛོད། །ཨུཥྩིཊ་བ་ལིངྟ་ཁཱ་ཧི། དེ་ནས་བཅུ་པ་ནོངས་བཤགས་ནི། ཀྱཻ། སངས་རྒྱས་ཀུན་འདུས་བླ་མ་མཆོག །དཀྱིལ་འཁོར་ཁྱབ་བདག་ཧེ་རུ་ཀ། འཁོར་བཅས་དེང་འདིར་དགོངས་སུ་གསོལ། །མི་ཤེས་རྨོངས་པར་གྱུར་པ་ཡིས། །སྡོམ་གསུམ་འགལ་ཉམས་ཅི་མཆིས་རྣམས། །མཐོལ་བཤགས་མི་སྒྲིབ་ཚངས་པར་སྩོལ། །ཡི་གེ་བརྒྱ་པ་བརྗོད། བཅུ་གཅིག་པ་བྱིན་རླབས་བསྡུ་བ་ནི། སྐྱབས་ཡུལ་ཀུན་ཀྱང་
རིམ་བཞིན་འོད་ཟེར་གྱི། །རྣམ་པར་གཙོ་མཆོག་དཔལ་ལྡན་བླ་མར་ཐིམ། །དེ་ཡང་དགྱེས་པའི་འཛུམ་མདངས་དང་བཅས་ཏེ། །བྱིན་རླབས་དབང་གི་དགོངས་གཏད་མོད་ཉིད་ལས། །རྡོ་རྗེའི་སྐུ་གསུང་ཐུགས་དང་ཡེ་ཤེས་བཞིའི། །ངོ་བོ་འོད་ཟེར་དཀར་དམར་མཐིང་ལྗང་འཕྲོས། །རང་གི་གནས་བཞིར་ཐིམ་པས་སྒྲིབ་བཞི་དག །དབང་བཞི་མཆོག་ཐོབ་སྐུ་བཞི་མངོན་དུ་གྱུར། །བླ་མ་འོད་ཞུ་རང་དང་དབྱེར་མེད་ངང་། །གསལ་སྟོང་འཛིན་བྲལ་མ་བཅོས་མཉམ་པར་བཞག །དར་གཅིག་མི་རྟོག་པའི་ངང་དུ་བཞག་ལ། སླར་ཡང་རིག་རྩལ་ལྷ་ཡི་རོལ་པར་གསལ། །བཅུ་གཉིས་པ་དགེ་བ་བསྔོ་བ་ནི། རྡོ་རྗེའི་རྣལ་འབྱོར་འདིར་འབད་དགེ་བ་དང་། །དུས་གསུམ་ཟག་བཅས་ཟག་མེད་ལེགས་བྱས་བཅས། །རྨད་བྱུང་སྨོན་ལམ་ཟབ་མོས་མཚམས་སྦྱར་མཐུས། །བདག་གཞན་ཚེ་གཅིག་རྡོ་རྗེ་འཆང་འགྲུབ་ཤོག །བཅུ་གསུམ་པ་བཀྲ་ཤིས་བརྗོད་པ་ནི། རྒྱལ་ཀུན་ཡོངས་འདུ་བཀྲ་ཤིས་རྒྱ་མཚོའི་ཀློང་། །དོན་གཉིས་འབྲས་སྟེར་དགོས་འབྱུང་ཡིད་བཞིན་དབང་། །སྲིད་ཞིའི་གདུང་སེལ་འབད་མེད་འདོད་དགུའི་ཆར། །ཕན་བདེའི་དཔྱིད་དུ་འབབ་པའི་བཀྲ་ཤིས་ཤོག །དེ་ལྟར་དོན་ཚན་བཅུ་གསུམ་རྡོ་རྗེ་འཛིན་པའི་ས་ཡི་གྲངས་ལྡན་ཟབ་མོའི་རྣལ་འབྱོར་འདི་དག་ཟུར་མང་བླ་མ་བསྟན་འཛིན་པ་དེ་ཉིད་ཟག་མེད་ཐུགས་ཀྱི་དགོངས་པ་བདེ་ཆེན་ཆོས་དབྱིངས་ཀློང་དུ་བསྐང་བའི་ཕྱིར། སི་ཏུ་པདྨ་ཉིན་བྱེད་དབང་པོས་སྤེལ་བ་འགྲོ་རྣམས་ཟུང་འཇུག་རྡོ་རྗེ་འཆང་གི་གོ་འཕང་ཐོབ་པའི་རྒྱུར་གྱུར་ཅིག །དགེའོ། །མངྒ་ལམ།། །།
བླ་མའི་རྣལ་འབྱོར་ཡེ་ཤེས་གཟི་འབར་བྱིན་རླབས་མཆོག་སྩོལ།
བླ་མའི་རྣལ་འབྱོར་ཡེ་ཤེས་གཟི་འབར་བྱིན་རླབས་མཆོག་སྩོལ་བཞུགས། སྭསྟི། གཅོད་ཡུལ་གྲུབ་བརྙེས་བླ་མའི་རྣལ་འབྱོར་དང་འབྲེལ་བའི་ཚོགས་མཆོད་ཀྱི་རིམ་པ་སྤྲ་ོན། མཆོད་རྫས་རྣམས་འདུ་བགྱིད་ལ། རང་ལྷར་གསལ་བའི་ངང་ནས། སྭ་བྷཱ་ཝས་དངོས་འཛིན་གྱི་ཆོས་ཐམས་ཅད་སྟོང་པར་སྦྱངས་ལ། སྟོང་ལས་མདུན་མཁར་འོད་ལྔའི་ཐིག་ལེའི་ཀློང་། །པད་དཀར་ཟླ་སྟེང་ཧྲཱིཿཡིག་ཡོངས་གྱུར་ལས། །རྒྱལ་དབང་ཀརྨའི་ཕྲིན་ལས་རང་གཟུགས་རྩལ། །ཡོངས་གྲུབ་གུ་རུ་ཛྙཱ་ན་བགྲེས་ཉམས་ཅན། །དབུ་ལ་སྒོམ་ཞུ་ཕྱག་གཉིས་ཆོས་འཆད་རྒྱ། །ཆོས་གོས་རྣམ་གསུམ་ཞབས་གཉིས་རྡོར་སྐྱིལ་བཞུགས། །ཆོས་དབྱིངས་སྐྱེ་མེད་ངང་ལ་ལྟ་སྟངས་ཅན། །གསོལ་བཏབ་ཙམ་གྱིས་བྱིན་རླབས་ཆར་རྒྱུན་འབེབས། །འབེབས་ཙམ་ཉིད་ནས་མོས་གུས་མྱུ་གུ་སྐྱེ། །སྐྱེས་པའི་མོད་ལ་བརྗོད་མེད་ཡེ་ཤེས་འཆར། །གནས་གསུམ་འབྲུ་གསུམ་འོད་ཀྱིས་འོག་མིན་ཞིང་། །དག་པ་མཁའ་སྤྱོད་གནས་ནས་ཨོ་རྒྱན་རྗེ། །བཀའ་བརྒྱུད་གྲུབ་ཐོབ་རྒྱ་མཚོའི་འཁོར་ཚོགས་བཅས། །སྤྱན་དྲངས་དམ་ཡེ་དབྱེར་མེད་ཉིད་དུ་གསལ། །ཐུགས་ལས་འོད་འཕྲོས་དབང་ལྷས་དབང་བསྐུར་ནས། །འདོད་ཡོན་ལྷ་མོས་ཕྱི་ནང་གསང་མཆོད་འབུལ། །ཐུགས་ཀར་ཟླ་སྟེང་ཧྲཱིཿམཐར་སྔགས་ཀྱིས་བསྐོར། །འོད་འཕྲོས་འཕགས་མཆོད་འགྲོ་བའི་སྒྲིབ་སྦྱངས་གྱུར། །ༀ་ཨཱཿགུ་རུ་ཛྙཱ་ན་སརྦ་སིདྡྷི་ཧཱུྃ། ཞེས་གང་འགྲུབ་བཟླས་ལ། བསྡུས་བ་ནི་དབང་བཞི་ལེན་པར་འཇུག །སྤྲོ་ན་ཚོགས་
ཀྱི་མཆོད་པ་དཔའ་བོའི་དགའ་སྟོན་ནི། རྃ་ཡྃ་ཁྃ་འཕྲོས་ཚོགས་རྫས་ཀྱི། །གཟུང་འཛིན་ཀུན་རྟོག་བག་ཆགས་སྦྱངས། །དག་པ་ཡེ་ཤེས་བདུད་རྩིར་སྤེལ། །རྒྱ་ཆེན་རྒྱུན་མི་ཆད་པར་གྱུར། ༀ་ཨཱཿཧཱུྃ་ཧ་ཧོ་ཧྲཱིཿལན་གསུམ་གྱིས་བྱིན་བརླབས་ལ། གནས་མཁའ་སྤྱོད་པདྨ་འོད་ཀྱི་ཞིང་། །ལྷ་ཞི་ཁྲོ་རབ་འབྱམས་འདུས་པའི་དབུས། །རྒྱལ་ཡོངས་ཀྱི་སྤྱི་གཟུགས་པདྨ་འབྱུང་། །དབྱེར་མེད་ཀྱི་རྗེ་བཙུན་ཀརྨ་ཀ། གནས་འདིར་གཤེགས་ཚོགས་ཀྱི་མཆོད་པ་བཞེས། །རྒྱུད་སྨིན་གྲོལ་མཆོག་ཐུན་དངོས་གྲུབ་སྩོལ། །གནས་རང་བཞིན་རྣམ་པར་དག་པའི་ཞིང་། །དངོས་སྣང་སྲིད་ལྷ་ཡི་དཀྱིལ་འཁོར་དབུས། །བཀའ་བརྒྱུད་པའི་གྲུབ་ཐོབ་རྒྱ་མཚོ་དང་། །གཅོད་ཡུལ་གྱི་གུ་རུ་ཛྙཱ་ན་མཆོག །གནས་འདིར་གཤེགས་ཚོགས་ཀྱི་མཆོད་པ་བཞེས། །རྒྱུད་སྨིན་གྲོལ་མཆོག་ཐུན་དངོས་གྲུབ་སྩོལ། །གནས་ཐབས་ཤེས་བདེ་སྟོང་དབྱེར་མེད་ཞིང་། །རྒྱུད་སྡེ་བཞིར་འབྲེལ་བའི་ཡི་དམ་དང་། །མ་གནས་གསུམ་དཔའ་བོ་ཌཱ་ཀིའི་ཚོགས། །ལེགས་ཉེས་ཀྱི་སྟངས་འཛིན་གཡར་དམ་ཅན། །གནས་འདིར་གཤེགས་ཚོགས་ཀྱི་མཆོད་པ་བཞེས། །རྒྱུད་སྨིན་གྲོལ་མཆོག་ཐུན་དངོས་གྲུབ་སྩོལ། །བཀའ་གསང་དང་དམ་ཚིག་གཉན་པོའི་ཞིང་། །ཆོས་སྐྱོང་བའི་མ་ཧཱ་ཀཱ་ལ་དང་། །དཔལ་ལྷ་མོ་ཡེ་ཤེས་ལས་འཇིག་རྟེན། །དྲེགས་ཅན་གྱི་སྲུང་མ་དམ་ཅན་རྣམས། །གནས་འདིར་གཤེགས་ཚོགས་ཀྱི་མཆོད་པ་
བཞེས། །ཕྲིན་ལས་ཀྱི་སྡོང་གྲོགས་མ་གཡེལ་མཛོད། །ཕྱི་སྣོད་ཀྱི་གཞལ་ཡས་ཁང་བྱིན་རློབས། །ནང་བཅུད་ཀྱི་མཆོད་རྫས་བདུད་རྩིར་བསྒྱུར། །བདག་རྒྱུད་ལ་ཟག་མེད་ཡེ་ཤེས་ཀྱི། །བདེ་སྟོང་གི་ཏིང་འཛིན་བསྐྱེད་དུ་གསོལ། །ག་ཎ་ཙཀྲ་པཉྩ་ཨམྲྀ་ཏ་ཁཱ་ཧི། ཅེས་པས་ཕུལ། ཧོ། ཐོག་མེད་ནས་ད་ལྟའི་ལུས་འདི་བར། །རྩ་བ་དང་ཡན་ལག་དམ་ཉམས་པ། །འདོད་ཡོན་ཚོགས་མཆོད་པས་བསྐང་ཞིང་བཤགས། །བཤགས་བྱ་དང་བཤགས་བྱེད་གཉིས་མེད་པར། །རང་རིག་པ་རང་བྱུང་ཀ་དག་ཀློང་། །བློ་འདས་ཀྱི་མཉམ་ཉིད་ཆེན་པོར་བཤགས། །ༀ་བཛྲ་ས་ཏྭ་ས་མ་ཡ་སོགས་ཡིག་བརྒྱ་བརྗོད། ཚོགས་ལ་རོལ། ལྷག་མ་བསྔོ་བ་ནི། ཧཱུྃ། བཀའ་ཡི་ལྷག་གཏོར་དབང་བ་ཡི། །མ་མོ་མཁའ་འགྲོ་ཤུགས་འགྲོའི་ཚོགས། །འདིར་གཤེགས་ཕུད་ལྷག་བཤལ་ཆུ་བཞེས། །བསྟན་པ་སྲུང་དང་རྣལ་འབྱོར་སྐྱོང་། །དམ་ཚིག་རྗེས་གཅོད་མེལ་ཚེ་དང་། །ནད་ཡམས་དལ་ཁ་བསྒྱུར་དུ་གསོལ། །ཨུཥྩྀ་ཊ་བ་ལིདྟ་ཁཱ་ཧི། རྗེས་རིམ་བྱིན་རླབས་བསྡུ་བ་ནི། མདུན་བསྐྱེད་བླ་མའི་སྐུ་ཡི་གནས་བཞི་ནས། །འོད་ཟེར་དཀར་དམར་མཐིང་ལྗང་འཕྲོས་པ་ལས། །རང་གི་གནས་བཞིར་ཐིམ་པས་དབང་བཞི་ཐོབ། །སྒྲིབ་བཞི་དག་ནས་སྐུ་བཞི་མངོན་དུ་གྱུར། །དེ་ཉིད་དགྱེས་པ་དང་བཅས་འོད་ཞུ་ནས། །རང་ཐིམ་དབྱེར་མེད་བདེ་ཆེན་ངང་དུ་བཞག །ཅེས་མ་བཅོས་སོ་མའི་ངང་དུ་ཅི་གནས་སུ་ངོ་བོ་བསྐྱངས་ལ། དགེ་དེས་བདག་
གཞན་འགྲོ་བ་མ་ལུས་པ། །ཀུན་བཟང་རྡོར་འཆང་གོ་འཕང་མྱུར་ཐོབ་ཤོག །ཅེས་པའང་དད་དམ་ཚུལ་ལྡན་དབུ་མཛད་ཀརྨ་དར་རྒྱས་ཀྱིས་བསྐུལ་ངོར། སི་ཏུ་པདྨ་ཉིན་བྱེད་དབང་པོས་སྤེལ་བ་དགེ། སརྦ་མངྒ་ལམ།། །།
གསོལ་འདེབས།
དུས་གསུམ་རྒྱལ་བའི་ཡུམ་གྱུར་ཤེར་ཕྱིན་མ། །སྟན་པའི་མངའ་བདག་བཅོམ་ལྡན་ཤཱཀྱ་ཐུབ། །སྨྲ་བའི་སེང་གེ་འཕགས་མ་སྒྲོལ་དཀར་ཡུམ། །གསོལ་འདེབས་དངོས་གྲུབ་གཉིས་རྩོལ་བདག་བྱིན་རློབས། །སུ་ཁ་སིདྡྷི་ཨཱཪྱ་དེ་ཝ་དང་། །ཕ་ཅིག་དམ་པ་མ་ཅིག་ལབ་ཀྱི་སྒྲོན། །ཁམ་བུ་ཡ་ལེ་ཛྙཱ་ན་ཛྭ་ལ་རྗེ། །གསོལ་འདེབས༴ གནམ་མཚོ་དོལ་བ་རང་བྱུང་རྒྱལ་བའི་ཞབས། །སེང་གེ་དཔལ་བ་དབང་རྡོར་རིན་ཆེན་ཤྲཱི། །བྱམས་པ་དཔལ་དང་འོད་ཟེར་བླ་མ་ལ། །གསོལ་འདེབས༴ སངས་རྒྱས་རིན་ཆེན་ཀུན་དགའ་རྣམ་པར་རྒྱལ། །ཀརྨ་བསྟན་སྐྱོང་འགྱུར་མེད་སྙིང་པོའི་སྡེ། །དཀོན་མཆོག་བསྟན་འཛིན་བསྟན་པ་རྣམ་རྒྱལ་ལ། །གསོལ་འདེབས༴ ཀརྨ་རིག་འཛིན་གསུང་རབ་རྒྱ་མཚོ་དང་། །དྲན་མཆོག་དྭངས་མའི་མགོན་པོ་ཐམས་ཅད་མཁྱེན། །བསྟན་པའི་ཉིན་བྱེད་རྩ་བའི་བླ་མ་ལ། །གསོལ་འདེབས༴ སྣང་སྲིད་ཆོས་ཀུན་སྒྱུ་མའི་རང་བཞིན་ལ། །བློ་འདས་མི་རྟོག་ཡེ་ཤེས་འོད་གསལ་ཆེའི། །གནས་ལུགས་ཇི་བཞིན་འཁྲུལ་མེད་གདེང་ཐོབ་ནས། །ཀུན་བཟང་ཁྱབ་བརྡལ་དབྱིངས་སུ་གྲོལ་གྱུར་ཅིག །ཅེས་ཀརྨ་དར་རྒྱས་ངོར་སྤེལ།། །།
རིག་འཛིན་ཚེ་དབང་ནོར་བུའི་བླ་སྒྲུབ།
༈ རིག་འཛིན་ཚེ་དབང་ནོར་བུའི་བླ་སྒྲུབ་བཞུགས། རང་ཉིད་ལྷར་གསལ་སྤྱི་བོར་འོད་ལྔའི་ཀློང་། །པདྨ་ཉི་ཟླའི་སྟེང་དུ་ཧྲཱིཿཡིག་ལས། །འོད་འཕྲོས་དོན་གཉིས་བྱས་ནས་ཧེ་རུ་ཀ། རྡོ་རྗེ་ཚེ་དབང་ནོར་བུ་ཞི་མ་ཁྲོ། །སྤྱན་གསུམ་ལྟ་སྟངས་དབུ་ལ་པད་ཞུ་གསོལ། །ཕྱག་གཡས་རྡོ་རྗེ་གཡོན་པས་ཀ་པཱ་ལ། །བདུད་རྩིས་བཀང་དབུས་ཚེ་བུམ་ཤིང་ལོས་བརྒྱན། །མེ་ག་ལི་ལྗང་བླ་གོས་ངུར་སྨྲིག་བཀླུབས། །ཞབས་གཉིས་རོལ་སྟབས་བདེ་ཆེན་ཡེ་ཤེས་ཀྱི། །རང་འོད་རབ་འབར་གཟི་བྱིན་ལྡན་པར་གསལ། །གནས་གསུམ་འབྲུ་གསུམ་ཐུགས་ཀར་ཧྲཱིཿམཐར་སྔགས། །དེ་ལས་འོད་འཕྲོས་འཕགས་མཆོད་བྱིན་རླབས་བསྡུས། །རང་གཞན་སྒྲིབ་སྦྱོང་སྣོད་བཅུད་སྣང་སྲིད་ཀུན། །བླ་མའི་དཀྱིལ་འཁོར་ངོ་བོར་ལྷུན་གྱིས་གྲུབ། །ༀ་ཨཱཿཨཱ་ཡུཿཨིནྡྲ་མ་ཎི་ཧཱུྃ། ཅི་ནུས་བཟླས་ལ། སྐྱབས་ཡུལ་སྐུ་ལས་འོད་འཕྲོས་དབང་བཞི་ཐོབ། །སྒྲིབ་བཞི་དག་ནས་སྐུ་བཞི་མངོན་དུ་གྱུར། །བླ་མ་རང་ཐིམ་དབྱེར་མེད་མ་བཅོས་ངང་། །སྤྲོས་བྲལ་བདེ་བ་ཆེན་པོའི་ཀློང་དུ་བཞག །ཅེས་པའང་རྗེ་དྲུང་མཆོག་སྤྲུལ་རིན་པོ་ཀརྨ་ཆོས་རྒྱལ་ཕུན་ཚོགས་ཀྱི་བཞེད་ལྟར་སི་ཏུ་པདྨ་ཉིན་བྱེད་དབང་པོས་སྤེལ་བ་སརྦ་ཛ་ག་ཏཾ།། །།
བླ་མའི་རྣལ་འབྱོར་ཟབ་ལམ་མཐར་ཐུག་མཆོག་དངོས་བདུད་རྩིའི་བུམ་བཟང་།
བླ་མའི་རྣལ་འབྱོར་ཟབ་ལམ་མཐར་ཐུག་མཆོག་དངོས་བདུད་རྩིའི་བུམ་བཟང་བཞུགས། ན་མོ་གུ་རུ་པྲ་ཝཱ་ཀ་ར་ཡེ། འདིར་ལུང་ཟིན་སྐྱེས་མཆོག་རིག་འཛིན་བླ་མའི་རྣལ་འབྱོར་དང་འབྲེལ་བའི་ཚོགས་སྐོང་སྤྲོ་བ་དག་གིས་ཚོགས་གཉིས་སྤེལ་ཕྱིར་མཆོད་པ་རྣམས་གང་འབྱོར་འདུ་བར་བྱས་ལ། རང་ལྷའི་རྣལ་འབྱོར་དང་ལྡན་པས། རྙིང་ལུགས་ལྟར་གྱི་སྐྱབས་
སེམས་སྤྱི་མཐུན་སྔོན་དུ་འགྲོ་བས། ཤཱུནྱ་ཏའི་སྔགས་ཀྱིས་གཟུང་འཛིན་ཆོས་རྣམས་སྟོང་པར་སྦྱངས་ནས། སྟོང་ལས་མདུན་མཁར་འཇའ་ཚོན་ལྔ་ལྡན་གྱི། །ཐིག་ལེ་ཐིག་ཕྲན་འོད་དང་འོད་ཟེར་འཕྲོ། །དེ་དབུས་སྣ་ཚོགས་པདྨ་ཉི་ཟླའི་སྟེང་། །བུདྡྷ་ཐོད་ཕྲེང་ངོ་བོར་ཡོངས་གྲུབ་པ། །རྣམ་པ་ཐུགས་ཀྱི་རིག་འཛིན་འཁོར་ལོས་སྒྱུར། །ཧེ་རུ་ཀ་དཔལ་བརྟུལ་ཞུགས་སྤྱོད་པ་འཆང་། །ཀརྨ་རྣམ་རྒྱལ་རྡོ་རྗེ་རབ་བརྟན་རྩལ། །ཞལ་གཅིག་གཡུ་རལ་ལྕང་ལོ་སྤྲིན་ལྟར་གཏིབས། །སྤྱན་གཉིས་ལྟ་སྟངས་དོན་དམ་ཆོས་ཉིད་གཟིགས། །དབང་ཞུ་པདྨ་མཐོང་གྲོལ་ཅོད་པན་གསོལ། །ཕྱག་གཡས་ཅང་ཏེའུ་གཡོན་པས་ཐོད་ཆང་འཛིན། །ཤེས་རབ་སྙེམས་ཚུལ་ཁ་ཊཱཾ་གྲུ་མོར་བཅུག །རབ་བརྗིད་སྐུ་ནི་རི་རྒྱལ་ལྷུན་པོ་བཞིན། །མདོ་སྔགས་གཉིས་ལྡན་ཆ་ལུགས་ཡོངས་རྫོགས་པའི། །ཕོད་ཀ་སྟག་ཤམ་ཆོས་གོས་ཟབ་བེར་བཀླུབས། །ཞབས་གཉིས་རྒྱལ་པོ་རོལ་པའི་སྟངས་སྟབས་ཀྱིས། །སྣང་སྲིད་ཟིལ་གནོན་གར་ཉམས་དགུ་དང་ལྡན། །གནས་གསུམ་ༀ་དཀར་ཨཱཿདམར་ཧཱུྃ་མཐིང་མཚན། །རྡོ་རྗེ་གསུམ་གྱི་ངོ་བོར་ཡེ་ནས་གྲུབ། །གནམ་ས་བར་སྣང་ཆུ་འཛིན་ཕྲེང་བྲེས་དབུས། །བཀའ་བརྒྱུད་བླ་མ་ཡི་དམ་དཔའ་བོ་དང་། །རྣལ་འབྱོར་མ་ཚོགས་ཌཱ་ཀི་ཆོས་སྲུང་རྣམས། །བུ་ཡུག་འཚུབས་བཞིན་བྱིན་རླབས་ཆར་རྒྱུན་འབེབས། །ཀུན་ཀྱང་གསལ་སྟོང་འཛིན་མེད་ལྷམ་མེར་གསལ། །ཨེ་མ་ཧོ། ཀུན་ཁྱབ་སྤྲོས་བྲལ་ཡེ་ཤེས་ལྔ་ཀློང་དུ། །ལོངས་
སྤྱོད་ཡོངས་རྫོགས་གང་འདུལ་སྤྲུལ་པར་ཤར། །སྐལ་ལྡན་རྗེས་འཛིན་སྐལ་མེད་ཚར་གཅོད་འདྲེན། །ཕྲིན་ལས་བཞི་རྫོགས་མཐུ་སྟོབས་དབང་ཕྱུག་མཁྱེན། །ཆོས་དང་མཐུན་པའི་བསམ་དོན་ཡིད་བཞིན་འགྲུབ། །ཕྱི་ནང་གསང་བའི་བར་ཆད་སེལ་བྱིན་རློབས། །དེ་ལྟར་ལན་གསུམ་མམ་ལྔ་བདུན་བརྗོད་ལ། ཐུགས་ཀའི་ས་བོན་མཐར་སྔགས་ཕྲེང་། །སྤྲོ་སྡུས་པདྨ་འོད་ཞིང་ནས། །ཨོ་རྒྱན་རྗེ་འབངས་འཁོར་ཚོགས་བཅས། །བདག་མདུན་ལ་ཐིམ་དབྱེར་མེད་ངང་། །ཡེ་ཤེས་རྡོ་རྗེའི་གོ་འཕང་མཆོག །དངོས་གྲུབ་རྒྱུན་སྨིན་གྲོལ་ཐོབ་གྱུར། །ༀ་ཨཱཿབི་ཛ་ཡ་བཛྲ་ཧཱུྃ། གང་འགྲུབ་བཟླས་ལ་མཆོད་ཚོགས་བྱིན་རླབས་ནི། རྃ་ཡྃ་ཁྃ། ༀ་ཨཱཿཧཱུྃ། མཆོད་ཚོགས་རྣམ་དག་བདེ་ཆེན་གྱུར། །གདོད་ནས་ལྷུན་རྫོགས་གྲུབ་པའི་གནས། །ཨོ་རྒྱན་རང་བྱུང་དུར་ཁྲོད་ཆེ། །ཚོགས་ཁང་གཞལ་ཡས་བྱིན་རེ་ཆགས། །བླ་མེད་ཕྱི་ནང་གསང་མཆོད་རྫས། །ཚོགས་ཀྱི་འཁོར་ལོ་རྒྱ་ཆེན་པོ། །ཡེ་ཤེས་བདུད་རྩིའི་ཟེར་མ་ལས། །འདོད་ཡོན་ལྷ་མོས་གར་བསྒྱུར་ཞིང་། །ཟག་མེད་འདོད་དགུའི་ལོངས་སྤྱོད་སྤེལ། །ནམ་མཁའ་མཛོད་བཞིན་དང་རེ་སྤྲོ། །གྲུབ་པའི་རྣལ་འབྱོར་མཆེད་རྣམས་ཀྱང་། །ལྟ་སྤྱོད་ཚུལ་ལྡན་དམ་རེ་གཙང་། །དངོས་སུ་འབྱོར་དང་ཡིད་སྤྲུལ་པ། །ཀུན་བཟང་རྣམ་ཐར་འབྱམས་ཀླས་བཞིན། །སྣང་སྲིད་འཁོར་འདས་ཡོངས་བཀང་ནས། །ཕྱི་ནང་གསང་བ་ཡང་གསང་གི། །མཆོད་སྤྲིན་རབ་འབྱམས་རྒྱ་མཚོ་འདིས། །རྩ་གསུམ་འདུས་
པའི་ངོ་བོ་ཉིད། །ལུང་ཟིན་སྐྱེས་མཆོག་རྡོ་རྗེ་འཛིན། །སྒྲུབ་པའི་སྲོལ་གཏོད་བསྟན་པ་སྐྱོང་། །ཟབ་གཏེར་མངའ་བདག་རིག་སྔགས་འཆང་། །ཐེག་མཆོག་འོད་གསལ་ཨ་ཏིའི་ཆོས། །འགྲོ་རྒྱུད་མུན་སེལ་ལམ་བཟང་སྟོན། །རྣམ་རྒྱལ་རྡོ་རྗེའི་ཐུགས་དམ་བསྐང་། །གཞན་ཡང་བཀའ་བབས་ཆོས་ཀྱི་བདག །རྩ་བ་བརྒྱུད་པའི་བླ་མ་དང་། །ཡི་དམ་དཀྱིལ་འཁོར་ལྷ་ཡི་ཚོགས། །གནས་གསུམ་དཔའ་བོ་མཁའ་འགྲོ་དང་། །བཀའ་ཉན་གཏེར་བདག་ཆོས་སྲུང་རྣམས། །བསྐང་ངོ་བསྐལ་པ་ཐུགས་དམ་བསྐང་། །གཡར་དམ་གཉན་པོ་བསྐང་གྱུར་ནས། །དབང་དང་དངོས་གྲུབ་སྩོལ་བྱིན་རློབས། །བདག་ནི་ཉོན་མོངས་དུག་ལྔ་ཡི། །སྒྲིབ་པས་མ་རིག་དབང་གིས་ནི། །དམ་ཚིག་ཉམས་ཆག་འགལ་འཁྲུལ་སོགས། །ནོངས་གྱུར་ཐམས་ཅད་གནོང་འགྱོད་བཤགས། །ཆོས་ཀུན་ཡེ་ནས་མཉམ་ཉིད་ངང་། །བསྐང་དང་བཤགས་བྱ་བརྗོད་ལས་འདས། །མ་བཅོས་རང་བྱུང་ལྷུན་གྲུབ་རྩལ། །དོན་དམ་ཀ་དག་དབྱིངས་སུ་བསྐང་། །འཁོར་གསུམ་དམིགས་མེད་མཐའ་བྲལ་ཀློང་། །ཀུན་བཟང་རོལ་པར་སོར་ཆུད་ཤོག །ཅེས་ཚོགས་ཀྱི་མཆོད་པས་བསྐངས་ནས། དངོས་གྲུབ་ཀྱི་རྫས་ལ་རོལ་ཞིང་། ལྷག་མ་བཏང་བ། སྔགས་ཀྱི་བཀའ་སྲུང་དམ་ཚིག་ཅན། །མ་མོ་མཁའ་འགྲོ་ཤུགས་འགྲོ་སོགས། །ལྷག་གཏོར་བཞེས་ལ་བཅོལ་པའི་ལས། །མ་གཡེལ་མ་འདའ་ཕྲིན་ལས་མཛོད། །ཅེས་འབུལ། དེ་ནས་རྗེས་རིམ་བྱིན་རླབས་བསྡུ་བ་ནི། ན་མོ་གུ་རུ། སྤྲོས་བྲལ་ཆོས་དབྱིངས་ནམ་མཁའ་ཡངས་པ་
ལས། །བདེ་བ་ཆེན་པོ་མི་ཕྱེད་རྡོ་རྗེའི་བདག །ཨེ་ཝཾ་ཟུང་འཇུག་མཚོར་འཁྲུངས་པདྨ་སྐྱེས། །རིགས་ཀུན་ཁྱབ་བདག་མགོན་དེར་གསོལ་བ་འདེབས། །ལྔ་བརྒྱ་ཐ་མར་སྙིགས་དུས་སེམས་ཅན་རྣམས། །ཉོན་མོངས་རགས་པའི་མི་བསྲུན་འཆོལ་སྤྱོད་ངོར། །རྒྱལ་རྣམས་ཕྲིན་ལས་འཇུག་སྒོའི་གནས་དབེན་ཀྱང་། །ཨོ་རྒྱན་ཐུགས་བསྐྱེད་ལྷག་པར་རྗེས་སྐྱོང་བའི། སྤྲུལ་དང་ཡང་སྤྲུལ་གར་བསྒྱུར་རྣམ་རོལ་ནི། །སྣ་ཚོགས་བཀོད་པ་ཅིར་ཡང་འཆར་བ་ལས། །གང་འདིར་སྔགས་རིག་གྲུབ་པའི་སྤྱོད་འཆང་ཚུལ། །བླ་མེད་གསང་མཆོག་སྟོན་དེར་གསོལ་བ་འདེབས། །མི་ཕྱེད་འདུན་དང་དམ་ཚིག་རྣམ་དག་གི། གཞི་བརྟན་མོས་གུས་ལྟེམ་རྐྱང་བྲལ་བའི་ངང་། །བཅོས་མིན་གསོལ་འདེབས་བདག་ལ་བརྩེར་དགོངས་ཀྱཻ། །དབང་བཞི་བསྐུར་ཞིང་རྒྱུད་བཞི་སྨིན་པར་མཛོད། །ལམ་བཞི་འབྱོངས་ནས་སྐུ་བཞི་ཐོབ་བྱིན་རློབས། །དེ་ནས་སྐྱེད་པའི་དཀྱིལ་འཁོར་རང་ལ་ཐིམ། །བློ་འདས་བྱར་མེད་ཀུན་བཟང་གཉུག་མའི་གཤིས། །ཁྱབ་གདལ་ཀློང་ཡངས་སྐྱེ་མེད་ས་མ་དྷི། །ཨ་ཨ་ཨཱཿདེའི་ངང་དུ་གནས་ལུགས་ཀྱི་ངོ་བོ་སྐྱོང་། མཐར་བསྔོ་བ་སྨོན་ལམ་བཀྲ་ཤིས་སོགས་དཀྱུས་མཐུན་གྱིས་མཐའ་བརྒྱན་པར་བྱའོ། །དེ་ལྟར་ཀ་ཉིན་ལུང་ཆོས་གྲྭའི་སྒྲུབ་སྡེའི་སྤོང་བ་པ་སྦས་པའི་རྣལ་འབྱོར་སྙིང་པོའི་དོན་ལ་གཞོལ་བ་བླ་མ་ཀརྨ་འཕགས་མཆོག་དང་འཕེལ་རྒྱས་མཆེད་ཀྱི་བཞེད་ལྟར། སི་ཏུ་པདྨ་ཉིན་བྱེད་དབང་པོས་བཀོད་པ་འགྲོ་རྣམས་ཀུན་བཟང་རྡོ་རྗེ་འཆང་ཆེན་པད་འབྱུང་གི་གོ་འཕང་ལ་འགོད་པར་གྱུར་ཅིག །དགེའོ། །བཀྲ་ཤིས།། །།
བླ་མའི་རྣལ་འབྱོར་བདེ་ཆེན་མཆོག་སྩོལ།
༈ བླ་མའི་རྣལ་འབྱོར་བདེ་ཆེན་མཆོག་སྩོལ་བཞུགས། མཆོག་གསུམ་ངོ་བོ་བླ་མ་ལ། །བདག་སོགས་འདི་ནས་བྱང་ཆུབ་བར། །སྐྱབས་གསོལ་འགྲོ་ཀུན་བདེ་གྱུར་ལྡན། །སྡུག་བསྔལ་དང་བྲལ་སངས་རྒྱས་ཤོག །སྭ་བྷཱ་ཝས་སྦྱངས། སྟོང་ལས་ཕྱི་ནང་མཆོད་པའི་རྫས། །རྒྱ་ཆེན་རྒྱུན་མི་ཆད་པ་ཡི། །ཀུན་ཏུ་བཟང་པོའི་མཆོད་སྤྲིན་གྱི། །ཟག་མེད་བདེ་ཆེན་དགྱེས་སྐྱེད་གྱུར། །ཨ་ཀཱ་རོས་བྱིན་བརླབས་ནས། བདག་ཉིད་ལྷར་གསལ་མདུན་གྱི་མཁའ་དབྱིངས་སུ། །རིན་ཆེན་གཞལ་ཡས་གྲུ་ུབཞི་མུ་ཁྱུད་རྫོགས། །དབུས་སུ་པདྨ་ཕྱོགས་མདོག་འདབ་བཞིར་ལྡན། །གེ་སར་དབུས་སུ་ཆོས་དབྱིངས་ཡེ་ཤེས་ཀྱི། །ངོ་བོ་ཧེ་རུ་ཀ་དཔལ་དཔའ་བོ་ཆེ། །རྡོ་རྗེ་གཙུག་ལག་དགའ་བའི་རྡོ་རྗེ་འཆང་། །ཞལ་གཅིག་ཕྱག་གཉིས་ཌཱ་དྲིལ་ཞབས་རོལ་སྟབས། །ཕོད་ཀ་ཆོས་གོས་པད་ཞྭ་རུས་རྒྱན་སྤྲས། །ཤར་གྱི་འདབ་མར་མེ་ལོང་ཡེ་ཤེས་ཀྱི། །ངོ་བོ་རིག་འཛིན་གྲུབ་པའི་དབང་ཕྱུག་མཆོག །ཧྱ་གྷྲྀཝ་ན་ཐཱ་ལམ་མེར་གསལ། །ལྷོ་ཡི་འདབ་མར་མཉམ་ཉིད་ཡེ་ཤེས་ཀྱི། །ངོ་བོ་ཁྲག་འཐུང་དཔལ་ཆེན་རྡོ་རྗེ་འཛིན། །ཤྲཱི་ཙིཏྟ་བཛྲ་ལམ་མེར་གསལ། །ནུབ་ཀྱི་འདབ་མར་སོར་རྟོག་ཡེ་ཤེས་ཀྱི། །ངོ་བོ་གསང་སྔགས་གྲུབ་པའི་སྐྱེས་བུ་མཆོག །རྗེ་བཙུན་པདྨ་ཀུན་ནས་རབ་ཏུ་གསལ། །བྱང་གི་འདབ་མར་བྱ་གྲུབ་ཡེ་ཤེས་ཀྱི། །ངོ་བོ་མངོན་སྤྱོད་ཕྲིན་ལས་སྣ་ཚོགས་ལ། །དབང་བསྒྱུར་ཚེ་དབང་འཆི་མེད་དཔལ་དར་གསལ། །རྒྱན་དང་
ཆ་ལུགས་ཕྱག་མཚན་གཙོ་བོ་ལྟར། །འོད་དང་འོད་ཟེར་འབར་བའི་ཀློང་དུ་གསལ། །དེ་ལྟར་སོ་སོའི་ཐུགས་ལས་འོད་འཕྲོས་པས། །འོག་མིན་དག་པ་མཁའ་སྤྱོད་ཞིང་ཁམས་ནས། །བསྒོམ་པ་དང་འདྲའི་ཡེ་ཤེས་སྤྱན་དྲངས་ཏེ། །མཚོ་ལ་ཆར་བཞིན་དབྱེར་མེད་རོ་གཅིག་གྱུར། །ཞེས་སྤྱན་དྲངས་ཏེ་མཆོད་པ་འབུལ་བ་ནི། ཧོ་ཕྱི་ནང་གསང་བའི་འདོད་ཡོན་རྫས། །ཚོགས་ཀྱི་འཁོར་ལོ་རྒྱ་ཆེན་པོ། །ཤ་ལྔ་བདུད་རྩི་ལྔ་ལྡན་གྱི། །ལོངས་སྤྱོད་ཟད་མེད་འདི་དག་ཀུན། །མཆོད་ཡུལ་དམ་པའི་ལྷ་ཚོགས་མཆོད། །བཞེས་ཤིག་རོལ་ཅིག་པཱུ་ཛ་ཧོ། །བདག་དང་མཐའ་ཡས་སེམས་ཅན་ཀུན། །དུག་གསུམ་དུག་ལྔའི་དབང་གྱུར་པའི། །རྩ་བ་ཡན་ལག་ཉམས་པ་བཤགས། །རང་རིག་ཀ་དག་དོན་རྟོགས་ནས། །ཡེ་ཤེས་སྐུ་ལྔ་མཆོག་ཐོབ་ཅིང་། །གཉིས་འཛིན་ལོག་རྟོག་གཡུལ་རྒྱལ་ཏེ། །དམ་པའི་གོ་འཕང་རེག་གྱུར་ཅིག །བཀྲ་ཤིས་དགེ་ལེགས་ཡོངས་འདུའི་ལྗོན། །འབད་མེད་ལྷུན་གྲུབ་དཔལ་ཐོབ་ནས། །བཀའ་བརྒྱུད་བསྟན་པའི་རྒྱལ་མཚན་མཆོག །སྲིད་པའི་རྩེ་མོར་མཐོ་གྱུར་ཅིག །ཅེས་པའང་བླ་མ་ཕྲིན་ལས་རབ་རྒྱས་ཀྱི་བཞེད་ལྟར། སི་ཏུས་སྤེལ་བ་མངྒ་ལམ།། །།སྣང་སྲིད་ཡེ་དག་བདེ་ཆེན་པད་འོད་ཞིང་། །རང་ལྷར་གསལ་བའི་སྤྱི་བོར་འཁོར་ལོའི་མགོན། །ངོ་བོ་པད་འབྱུང་རྣམ་པ་དཔལ་འབྲུག་པ། །བསྟན་པའི་རྒྱལ་མཚན་མཚན་དཔེ་མཐོང་གྲོལ་སྐུ། །ཐོས་དང་དྲན་རེག་ཡེ་ཤེས་མངོན་གྱུར་པའི། །སངས་རྒྱས་ཆོས་
དང་ཚོགས་མཆོག་ཀུན་འདུས་པ། །དྲན་མཆོག་དྭངས་མའི་མགོན་གྱུར་སྐྱབས་གནས་རྗེ། །དུས་འདིར་དྲན་ནོ་ཅི་མཛད་ཁྱེད་ཤེས་ཀྱི། །བཅོས་མིན་མོས་གུས་ངང་ནས་གསོལ་བ་འདེབས། །རྗེ་བཙུན་ཁྱེད་བཞིན་བདག་རྒྱུད་བྱིན་གྱིས་རློབས། །དེ་ནས་གསོལ་འདེབས་དང་། མཆོད་པ། བཀྲ་ཤིས་སོགས་ཞལ་བསྒྱུར་འདིའང་འདོན། བདེ་ཆེན་འགྱུར་མེད་འོད་གསལ་ཀུན་ཁྱབ་ཀློང་། །རང་བྱུང་ཡེ་ཤེས་ལྔ་ལྡན་ལོངས་སྤྱོད་རྫོགས། །རིགས་དཀྱིལ་འཁོར་ལོའི་མགོན་པོ་རྡོ་རྗེ་འཆང་། །དཔལ་ལྡན་འབྲུག་པའི་ཞབས་ལ་གསོལ་བ་འདེབས། །ལན་གསུམ་མམ་བདུན། མཚན་སྔགས་ནི། ༀ་ཨཱཿཤཱ་ས་ན་དྷྭ་ཛ་ཧཱུྃ། ཅི་ནུས་བཟླ་ཞིང་། དཔལ་ལྡན་འབྲུག་པ་མཁྱེན། དད་པའི་བློ་ཡིས་གང་གྲུབ་དང་། མཐར་ནི། བྱིན་རླབས་དབང་བཞིས་སྨིན་ཅིང་གྲོལ་བ་ཡི། །མི་འགྱུར་ཟག་མེད་བདེ་སྟོང་ཕྱག་རྒྱ་ཆེ། །རང་གཞན་དོནགཉིས་མཐར་ཕྱིན་ཆོས་ཀྱི་སྐུ། །མངོན་བྱང་ཆུབ་པའི་གོ་འཕང་མྱུར་ཐོབ་ཤོག །ཅེས་པའང་སི་ཏུ་པདྨའི་མིང་ཅན་གྱིས་དད་ལྡན་སེ་བོ་འཚོ་བྱེད་ཀརྨ་བཀྲ་ཤིས་ངོར་བཀོད་པའོ། །ཛ་ཡནྟུ།། །།
བླ་མའི་རྣལ་འབྱོར་ཡིད་བཞིན་རེ་སྐོང་ཐར་འདོད་གྲུ་རྫིང་།
བླ་མའི་རྣལ་འབྱོར་ཡིད་བཞིན་རེ་སྐོང་ཐར་འདོད་གྲུ་རྫིང་ཞེས་བྱ་བ་བཞུགས། ན་མོ་གུ་ར་ཝེ། འདིར་བླ་མའི་རྣལ་འབྱོར་དང་འབྲེལ་བའི་ཚོགས་བསྐང་བཤགས་པའི་རིམ་པ་སྤྲོ་ན་འདི་ལྟ་སྟེ། དང་པོ་སྐྱབས་སེམས་ནི། རྒྱལ་བ་རབ་འབྱམས་ཀུན་འདུས་པའི། །བླ་མེད་སྟོན་པ་རྡོ་རྗེ་འཛིན། །དཀྱིལ་འཁོར་གཙོ་མཆོག་དམ་པ་ལ། །སྒོ་གསུམ་གུས་པས་སྐྱབས་སུ་མཆི། །ནམ་མཁའི་མཐའ་མཉམ་སེམས་ཅན་རྣམས། །རྣམ་གྲོལ་
ཐར་མཆོག་ལ་འགོད་ཕྱིར། །དེང་ནས་སངས་རྒྱས་ཐོབ་ཀྱི་བར། །བདག་གིས་བླ་མ་བསྒྲུབ་པར་བགྱི། །དེ་ནས་མཆོད་རྫས་བྱིན་གྱིས་བརླབ་པ་ནི། སྭ་བྷཱ་ཝས་སྦྱངས། སྟོང་ལས་མཆོད་རྫས་ཕྱི་ནང་གསང་བ་ཡི། །སྨན་གཏོར་རཀྟའི་ཚོགས་རྣམས་ཟག་མེད་ཀྱི། །ཡེ་ཤེས་བདུད་རྩི་འོད་རླབས་རབ་འཕྲོ་བ། །ཀུན་བཟང་སྨོན་ལམ་ལས་གྲུབ་དགྱེས་སྐྱེད་གྱུར། །ༀ་ཨཱཿཧཱུྃ་ཧ་ཧོ་ཧྲཱིཿས་བྱིན་བརླབས་ཏེ། བསྐྱེད་རིམ་བསྒོམ་པ་ནི། ཕྱི་ནང་སྣོད་བཅུད་མི་དམིགས་སྟོང་ཉིད་གྱུར། །རང་ཉིད་ལྷར་གསལ་མདུན་གྱི་མཁའ་དབྱིངས་སུ། །ཡེ་ཤེས་ལྔ་ཡི་འཇའ་འོད་འཐིབས་པའི་ཀློང་། །རིན་ཆེན་དར་དང་སེང་གེས་བཏེགས་པའི་ཁྲི། །དེ་སྟེང་པདྨ་དཀར་པོ་འདབ་སྟོང་རྒྱས། །ཉི་ཟླའི་དཀྱིལ་འཁོར་གསལ་ལ་འཚེར་བའི་དབུས། །སངས་རྒྱས་པདྨ་འབྱུང་གནས་ངོ་བོ་ཉིད། །དཔལ་ལྡན་རིགས་ཀུན་དབང་ཕྱུག་ཧེ་རུ་ཀ། མཐའ་ཀླས་ཞིང་གི་བདག་པོ་དཔའ་བོ་ཆེ། །རྡོ་རྗེ་དྲག་པོ་ཕྲིན་ལས་འདུས་པ་རྩལ། །སྐུ་མདོག་དཀར་སྨུག་ཞི་མ་ཁྲོ་ཡི་ཚུལ། །དབུ་ལ་པདྨ་མཐོང་གྲོལ་རབ་མཛེས་གསོལ། །ཕྱག་གཡས་གསེར་གྱི་རྡོ་རྗེ་རྩེ་དགུ་དང་། །གཡོན་པས་སྡིགས་མཛུབ་གནམ་ལྕགས་ཕུར་བུ་བསྣམས། །སྐུ་ལ་ཕོད་ཀ་ཆོས་གོས་རྣམ་གསུམ་བཀླུབས། །ཞབས་གཉིས་རྒྱལ་པོ་རོལ་པའི་སྟབས་ཀྱིས་བཞུགས། །གནས་གསུམ་ༀ་དཀར་ཨཱཿདམར་ཧཱུྃ་མཐིང་གསལ། །ཧཱུྃ་ལས་འོད་འཕྲོས་འོག་མིན་ཞིང་རབ་འབྱམས། །ཁྱད་པར་ཨོ་རྒྱན་དཔལ་གྱི་མཁའ་སྤྱོད་ནས། །རྡོ་རྗེ་
སློབ་དཔོན་རྟ་མགྲིན་དབང་གི་རྒྱལ། །མ་ཚོགས་མཁའ་འགྲོ་རིག་འཛིན་བྱེ་བ་འབུམ། །ཆོས་ཀྱི་སྲུང་མ་རྒྱ་མཚོ་འཁོར་བཅས་རྣམས། །དེང་འདིར་དད་དང་དམ་ཚིག་མོས་བློ་ཡིས། །སྒྲུབ་པའི་གནས་འདིར་སྤྱན་འདྲེན་གཤེགས་སུ་གསོལ། །བཛྲ་ས་མ་ཡ་ཛཿཞེས་སྤྱན་དྲངས་ཏེ་གདན་འབུལ། པདྨ་ཀ་མ་ལཱ་ཡ་སྟྭྃ། ཧྲཱིཿསངས་རྒྱས་ཀུན་འདུས་སྐུ་མཆོག་མཚན་དཔེས་བརྒྱན། །དམ་པའི་གསུང་མཆོག་ཚངས་དབྱངས་དྲུག་ཅུ་ལྡན། །ཐུགས་མཆོག་རྡོ་རྗེ་ཏིང་འཛིན་བརྒྱ་ཕྲག་མངའ། །རིག་འཛིན་བླ་མའི་ཚོགས་ལ་ཕྱག་འཚལ་ལོ། །དེ་ནས་མཆོད་པ་འབུལ་བ་ནི། ཡན་ལག་བརྒྱད་ལྡན་མཆོད་ཡོན་ཞབས་བསིལ་དང་། །པུཎྜ་རི་ཀ་ལ་སོགས་མེ་ཏོག་ཚལ། །ཚུལ་ཁྲིམས་དྲི་བསུང་བདུག་སྤོས་སྤྲིན་བཞིན་གཏིབས། །རབ་གསལ་སྣང་བའི་སྒྲོན་མེ་ཉི་ལྟར་འཚེར། །ཚངས་རལ་ལས་འོངས་དག་བྱེད་དྲི་ཆབ་དང་། །ལྷ་ཡི་ཞལ་ཟས་སྣ་ཚོགས་རོ་བརྒྱར་ལྡན། །པི་ཝཾ་གླུ་དབྱངས་གྲག་སྟོང་སྒྲ་ཡིས་མཆོད། །དབང་ལྔའི་ཆུ་སྐྱེས་གསུར་ཆེན་སྤོས་ཞུན་མེ། །དྲི་ཆབ་ཞལ་ཟས་ཐོད་རྔ་རྐང་གླིང་སྒྲ། །བདུད་རྩི་སྨན་དང་རཀྟ་བ་ལིཾ་ཏ། །སྦྱོར་སྒྲོལ་ཏིང་འཛིན་བླ་ན་མེད་པའི་རྫས། །ཕྱི་ནང་གསང་མཆོད་སྣ་ཚོགས་བཞེས་སུ་གསོལ། །བསྟོད་པ་བྱ་བ་ནི། ཧྲཱིིཿགདོད་ནས་རྣམ་དག་ཆོས་ཀྱི་སྐུ་བརྙེས་ཀྱང་། །བྱམས་པས་འགྲོ་ལ་རྗེས་སུ་བརྩེ་བ་ཡི། །གང་འདུལ་དེར་སྟོན་སྒྱུ་འཕྲུལ་གར་རོལ་པ། །ཤྲཱི་ཐུགས་ཀྱི་རྡོ་རྗེར་ཕྱག་འཚལ་བསྟོད། །གྲུབ་གཉིས་སྩོལ་ཞིང་ས་
ལམ་བར་ཆད་སེལ། །རིག་འཛིན་རྒྱ་མཚོ་བྱེ་བ་འབུམ་སྡེ་དང་། །ཛྙཱ་ན་ཌཱ་ཀི་དཔའ་བོ་དཔའ་མོའི་ཚོགས། །ཆོས་ཀྱི་སྲུང་མ་རྣམས་ལ་བསྟོད་པར་བགྱི། །བཤགས་པ་ནི། བདག་དང་མཐའ་ཡས་སེམས་ཅན་ཐམས་ཅད་ཀྱི། །བསྐལ་དུས་སྔོན་ནས་ད་ལྟའི་བར་འདི་རུ། །མ་རྟོགས་དབང་གིས་ནོངས་པར་གྱུར་པ་རྣམས། །སྙིང་ནས་བཤགས་སོ་དག་ཚངས་དངོས་གྲུབ་སྩོལ། །ཡི་གེ་བརྒྱ་བ་བརྗོད། དེ་ནས་བཟླས་བའི་རིམ་པ་ནི། མདུན་བསྐྱེད་བླ་མའི་ཐུགས་ཀར་ཟླ་སྟེང་ཧཱུྃ། །མཐིང་གསལ་འབར་བ་དེ་མཐར་སྔགས་ཕྲེང་འཁོར། །འོད་འཕྲོས་འཕགས་མཆོད་འགྲོ་བའི་སྒྲིབ་གཉིས་སྦྱངས། །ཚུར་འདུས་ཡེ་ཤེས་བདག་རྒྱུད་ལ་སྨིན་གྱུར། །ༀ་ཨཱཿཤྲཱི་ཙིཏྟ་བཛྲ་ཧཱུྃ། ཞེས་ཅི་ཅུས་བཟླས། དེ་ནས་ཚོགས་མཆོད་འབུལ་བ་ནི། རྃ་ཡྃ་ཁྃ། ༀ་ཨཱཿཧཱུྃ། འདིར་བཤམས་ཞལ་ཟས་ཚོགས་གཏོར་གྱི། །མ་དག་གཉིས་འཛིན་བསྲེག་སྦྱང་བཀྲུས། །ཡེ་ཤེས་བདུད་རྩིར་བྱིན་བརླབ་ནས། །ཟག་མེད་མཆོད་སྤྲིན་རྒྱ་མཚོར་གྱུར། །གནས་འོག་མིན་ཆོས་དབྱིངས་ཞིང་རབ་འབྱམས། །དཔལ་ཨོ་རྒྱན་མཁའ་སྤྱོད་གཞལ་ཡས་ནས། །མགོན་མཚུངས་མེད་ཐུགས་ཀྱི་རྡོ་རྗེ་མཆོག །ཡིད་གདུང་བས་ཚོགས་ལ་སྤྱན་འདྲེན་གཤེགས། །འཁོར་རིག་འཛིན་གྲུབ་བའི་དབང་ཕྱུག་ཆེ། །མ་གནས་གསུམ་དཔའ་བོ་མཁའ་འགྲོ་དང་། །ཆོས་སྐྱོང་བའི་མགོན་པོ་ལྕམ་དྲལ་རྣམས། །ཚོགས་མཆོད་པ་བཞེས་ཕྱིར་གཤེགས་སུ་གསོལ། །ཧོ་ཚོགས་རྫས་འདོད་ཡོན་སྣ་ཚོགས་པ། །རོ་བཅུད་ལྡན་ལོངས་སྤྱོད་
བསམ་ཡས་འདི། །དཔལ་རྡོ་རྗེ་ཅན་དངོས་ཞལ་དུ་འབུལ། །འཁོར་དང་བཅས་དགྱེས་པར་ད་རོལ་ཅིག །གྷ་ན་ཙཀྲ་པཱུ་ཛ་ཧོཿཞེས་ཚོགས་ཕུད་ཕུལ་ནས་བསྐང་བ་བྱ་བ་ནི། ཧཱུྃ་ཧྲཱིཿའཆི་མེད་གྲུབ་པའི་འཁོར་ལོས་སྒྱུར། །པད་འབྱུང་སྒྱུ་འཕྲུལ་གར་རོལ་པ། །ཚངས་པ་ལྷ་ཡི་མེ་ཏོག་དང་། །དབྱེར་མེད་རྡོ་རྗེ་དྲག་བོ་རྩལ། །བསྐང་ངོ་མཆོད་དོ་ཐུགས་དམ་བསྐང་། །རིག་འཛིན་བྱེ་བ་འབུམ་གྱི་སྡེ། །མ་ཚོགས་ཌཱ་ཀི་དཔའ་བོ་དང་། །དམ་ཅན་ཆོས་སྲུང་ཐུགས་དམ་བསྐང་། །གཡར་དམ་གཉན་པོ་བསྐང་བའི་རྫས། །མཁའ་དབྱིངས་ཀུན་ཁྱབ་མཆོད་པའི་སྤྲིན། །ཉེར་སྤྱོད་ལྔ་དང་འདོད་ཡོན་དྲུག །རྡོ་རྗེ་ལྷ་མོ་བཅུ་དྲུག་པོ། །རྒྱལ་སྲིད་བདུན་དང་བཀྲ་ཤིས་བརྒྱད། །མཆོད་པའི་བྱེ་བྲག་མཐའ་ཀླས་པས། །ཐུགས་དམ་བསྐང་ངོ་བྱིན་གྱིས་རློབས། །དོན་གཉིས་མཐར་ཕྱིན་དངོས་གྲུབ་སྩོལ། །དེ་ནས་བཤགས་པ་ནི། ཧོ་རྡོ་རྗེ་རྒྱལ་པོ་སངས་རྒྱས་འདུས་པའི་སྐུ། །དཀྱིལ་འཁོར་མངའ་བདག་སློབ་དཔོན་དགོངས་སུ་གསོལ། །བདག་ཅག་མ་རིག་འཁྲུལ་བའི་ལས་དབང་གིས། །སོ་ཐར་བྱང་སེམས་གསང་སྔགས་དམ་འགལ་བ། །བཤགས་སོ་བཤགས་སོ་གནོང་འགྱོད་དྲག་པོས་བཤགས། །བཟོད་པར་བཞེས་ལ་དག་ཚངས་དབུགས་དབྱུང་གསོལ། །གཉིས་འཛིན་ལོག་རྟོག་གཡུལ་ངོ་ལས་རྒྱལ་ནས། །སྐུ་བཞི་མངོན་གྱུར་བླ་མེད་སངས་རྒྱས་ཤོག །བསྒྲལ་བ་ནི། ན་མོ་རྩ་གསུམ་ལྷ་ཡི་བདེན་པའི་མཐུས། །བསྟན་
དགྲ་དམ་ཉམས་མ་ལུས་འདིར་ཁུག་ཅིག །ཡེ་ཤེས་ཕུར་བུས་རབ་བསྒྲལ་དབྱིངས་སུ་བསྟིམ། །ཞལ་དུ་བསྟབ་བོ་བཞེས་ཤིག་དགྱེས་པར་རོལ། །དེ་ནས་ལྷག་མ་ཕུལ་བ་ནི། ཧཱུྃ་གསང་སྔགས་དཀྱིལ་འཁོར་སྐྱོང་བའི་ལྷག་སྡུད་རྣམས། །ཐམས་ཅད་འདིར་སྤྱོན་ཚོགས་ལྷག་གཏོར་མ་བཞེས། །གང་བཅོལ་ལས་ཀུན་ཐོགས་མེད་བསྒྲུབ་པ་དང་། །མི་མཐུན་རྐྱེན་རྣམས་བཟློག་པའི་ཕྲིན་ལས་མཛོད། །ཆད་ཐོ་དང་བརྟན་སྐྱོང་ནི། སྔོན་ཚེ་བར་དང་ཐ་དུས་བསྐལ་པ་ལ། །རིག་འཛིན་པདྨ་ཐོད་ཕྲེང་རྒྱལ་པོ་དང་། །དབྱེར་མེད་དཔལ་ཆེན་ཐུགས་ཀྱི་རྡོ་རྗེའི་དྲུང་། །ཡེ་ཤེས་ལས་ཀྱི་དཔའ་བོ་མཁའ་འགྲོ་སོགས། །འཇིག་རྟེན་དྲེགས་བྱེད་དམ་ཅན་སྲུང་མ་ཡིས། །སོ་སོའི་ཁས་བླངས་དམ་ཚིག་དྲན་མཛོད་ལ། །གསང་སྔགས་དཀྱིལ་འཁོར་གཉེན་པོ་སྐྱོང་བ་དང་། མཆོད་གཏོར་བཞེས་ལ་གང་བཅོལ་ཕྲིན་ལས་སྒྲུབས། །བོད་ཁམས་སྐྱོང་བའི་མ་སྲིང་བརྟན་མའི་ཚོགས། །ཐ་ཚིག་མ་འདའ་བཀའ་ཡི་གཏོར་མ་བཞེས། །བསྟན་པ་སྲུང་དང་འགྲོ་ལ་ཕན་བདེ་སྤེལ། །རྣལ་འབྱོར་འཁོར་སྲུང་བར་ཆད་བཟློག་ཏུ་གསོལ། །དེ་ནས་རྗེས་ཀྱི་བྱ་བ་ནི། རིག་འཛིན་ལྷ་ཚོགས་མཆོད་ཅིང་བསྒྲུབ་ལགས་ན། །ཐུགས་རྗེས་དགོངས་ཏེ་བདག་གཞན་སྨིན་གྲོལ་གྱི། །ལམ་ལ་འགོད་ཕྱིར་དབང་དང་དངོས་གྲུབ་སྩོལ། །སྐུ་བཞི་མངོན་དུ་འགྱུར་བར་བྱིན་གྱིས་རློབས། །དེ་ལྟར་སྐུ་གསུང་ཐུགས་ཡོན་ཕྲིན་ལས་ཀྱི། །འོད་ཟེར་དཀར་དམར་སྔོ་ལྗང་སེར་འཕྲོས་ནས། །
བདག་གི་གནས་བཞིར་ཐིམ་པས་དབང་བཞི་རྫོགས། །བླ་མ་འོད་ཞུ་དབྱེར་མེད་གཅིག་འདྲེས་གྱུར། །དེའི་ངང་ལ་དར་ཅིག་ཅི་གནས་སུ་མཉམ་པར་བཞག །དགེ་བ་འདིས་མཚོན་དུས་གསུམ་བསགས་ཡོད་ཀྱི། །དགེ་ཚོགས་ཐམས་ཅད་གཅིག་ཏུ་བཟླུམས་བྱས་ནས། །དགེ་ཀུན་སེམས་ཅན་སངས་རྒྱས་ཐོབ་ཕྱིར་བསྔོ། །དགེ་དེས་ཚོགས་གཉིས་ཡོངས་སུ་རྫོགས་ཐོབ་ཤོག །ཅེས་བསླབ་གསུམ་རྒྱན་ལྡན་བླ་མ་ནོར་བུ་ནས་རྟེན་དང་བཅས་འདི་ལྟར་དགོས་ཞེས་བསྐུལ་བ་ལྟར་སི་ཏུས་སྤེལ་བ་མངྒ་ལམ།། །།
བླ་མའི་རྣལ་འབྱོར་ཚོགས་མཆོད་དང་འབྲེལ་བ།
བླ་མའི་རྣལ་འབྱོར་ཚོགས་མཆོད་དང་འབྲེལ་བར་སྤྲོ་ན། སྐྱབས་སེམས་ནི། མཆོག་གསུམ་རྩ་གསུམ་ངོ་བོ་ཉིད། །རྡོ་རྗེ་འཛིན་དབང་བླ་མ་ལ། །སྐྱབས་སུ་མཆི་ཞིང་འགྲོ་བ་རྣམས། །འཁོར་མཚོ་ལས་གྲོལ་སེམས་བསྐྱེད་དོ། །ལན་གསུམ། མདུན་རྟེན་བསྐྱེད་པ་ནི། ༀ་ཤཱུ་ནྱ་ཏས་སྟོང་བར་སྦྱངས། ཆོས་རྣམས་མ་སྐྱེས་མི་འགགས་པ། །གསལ་སྟོང་རིག་པའི་སྣང་ཆ་ལས། །རང་ལྷར་གསལ་བའི་མདུན་གྱི་མཁར། །ཡེ་ཤེས་ལྔ་ལྡན་འཇའ་འོད་ཀློང་། །སྣ་ཚོགས་པདྨ་ཉི་ཟླའི་སྟེང་། །དྲིན་ཆེན་རྩ་བའི་བླ་མ་མཆོག །རྡོ་རྗེ་འཆང་གི་རྣམ་པ་ཅན། །ལོངས་སྤྱོད་རྫོགས་པའི་རྒྱན་ལྡན་པ། །རྒྱལ་ཀུན་འདུས་པའི་ངོ་བོར་གསལ། །འོད་དང་འོད་ཟེར་ཕྱོགས་བཅུར་འཕྲོ། །གནས་གསུམ་འབྲུ་གསུམ་ལས་འོད་འཕྲོས། །ཕྱོགས་བཅུའི་རྒྱལ་བ་སྲས་འཁོར་བཅས། །བླ་མའི་ཡེ་ཤེས་རོལ་པ་རུ། །སྤྱན་དྲངས་དམ་ཡེ་དབྱེར་
མེད་གྱུར། །ཤྲཱི་མཱན་གུ་རུ་དེ་ཝ་བཛྲ་ས་མཱ་ཛཿཔདྨ་ཀ་མ་ལ་ཡ་སྟྭྃ། སྤྱན་དྲངས་བཞུགས་གསོལ་དང་། བླ་མའི་དཀྱིལ་འཁོར་ལྷ་ཚོགས་ལ། །ཕྱི་ཡི་མཆོད་པ་སྣ་ཚོགས་དང་། །རང་བྱུང་འདོད་ཡོན་ནང་མཆོད་འབུལ། །གསང་མཆོད་བདེ་ཆེན་ལྷ་མོའི་ཚོགས། །འཁོར་འདས་རོ་མཉམ་དེ་བཞིན་ཉིད། །དུས་གསུམ་མཉམ་ཉིད་རྟོགས་པས་མཆོད། །ༀ་བཛྲ་ཨརྒྷཾ་ནས། པཱ་དྱཾ། ཤབྡའི་བར་དང་། མ་ཧཱ་པཉྩ་རཀྟ། བ་ལིང་ཏ། མ་ཧཱ་སུ་ཁ་པཱུ་ཛ་ཧོ། ཞེས་མཆོད། དུས་གསུམ་རྒྱལ་ཀུན་འདུས་པའི་དཔྱིད། །སྙིགས་དུས་འགྲོ་ལ་རྗེས་བརྩེ་བའི། །ཐུགས་རྗེ་རྨད་བྱུང་རིགས་ཀུན་བདག །རྡོ་རྗེ་ཅན་ལ་ཕྱག་འཚལ་བསྟོད། །ཅེས་བསྟོད། ཐུགས་ཀར་ཟླ་སྟེང་ཧྲཱིཿཡིག་མཐར། །སྔགས་ཕྲེང་གཡས་སུ་འཁོར་བ་ལས། །འོད་འཕྲོས་འཕགས་མཆོད་འགྲོ་སྒྲིབ་སྦྱང་། །མཆོག་ཐུན་དངོས་གྲུབ་ཐོབ་པར་གྱུར། །ༀ་ཨཱཿདྷརྨ་སུཪྱཱ་མ་ཧཱ་མུ་དྲ་སིདྡྷི་ཧཱུྃ། ཅེས་སྔགས་བཟླའོ། །དེ་ནས་ཚོགས་རྫས་རྣམས། ཨམྲྀ་ཏས་བསངས། ༀ་སྣང་བ་སྣོད་ཀྱི་གཏོར་གཞོང་དུ། ཨཱཿསྟོང་པ་བཅུད་ཀྱི་བདུད་རྩིས་གཏམས། །ཧཱུྃ་འདོད་ཡོན་སྣ་ཚོགས་སྤྲིན་སྤྲོར་གྱུར། །ཧྲཱིཿབདེ་ཆེན་མཉམ་ཉིད་ཚོགས་མཆོད་བཞེས། །ཞེས་ཚོགས་སྤྲོ། བདག་ཅག་འཁྲུལ་པའི་དབང་གྱུར་པས། །བསྐྱེད་རྫོགས་མི་གསལ་མོས་གུས་ལ། །ལྟེམས་རྐྱང་ཚོད་ཡོད་གྱུར་པ་སོགས། །སྡོམ་གསུམ་འགལ་ཉམས་སྡིག་སྒྲིབ་བཤགས། །གཉིས་འཛིན་མ་རིག་དགྲ་
དང་བགེགས། །བདག་མེད་ཕུར་པས་བསྒྲལ་ནས་ཀྱང་། །དུག་གསུམ་སྐུ་གསུམ་བདུད་རྩིར་གྱུར། །དཀྱིལ་འཁོར་ལྷ་ཚོགས་ཞལ་དུ་བསྟབ། །ག་ན་ཙཀྲ་པཱུ་ཛ་ཁཱ་ཧི། ཞེས་ཕུལ། ཨ་ཧོཿམ་ཧཱ་སུ་ཁཿ། དངོས་གྲུབ་རོལ། ལྷག་མ་ནི། ཧཱུྃ། དབྱིངས་དང་ཡེ་ཤེས་དབྱེར་མེད་ངང་། །རོལ་རྩལ་ལས་ཤར་སྲུང་མ་བྲན། །དྲེགས་བྱེད་མ་མོ་མཁའ་འགྲོའི་ཚོགས། །ལྷག་གཏོར་བཞེས་ལ་ཕྲིན་ལས་མཛོད། །དེ་ནས་བྱིན་རླབས་དབང་ལེན་ནི། ཧྲཱིཿམདུན་བསྐྱེད་བླ་མའི་གནས་བཞི་ལས། །རྡོ་རྗེ་བཞི་ཡི་ངོ་བོ་རུ། །ༀ་ཨཱཿཧཱུྃ་ཧོཿདཀར་དམར་མཐིང་། །ལྗང་འཕྲོས་རང་གི་གནས་བཞིར་ཐིམ། །དབང་བཞི་ཡེ་ཤེས་མཆོག་ཐོབ་ནས། སྐུ་བཞིའི་གོ་འཕང་རྒྱུད་སྨིན་གྱུར། །གུ་རུ་སརྦ་སིདྡྷི་ཕ་ལ་ཧཱུྃ། བླ་མ་འོད་ཞུ་རང་ལ་ཐིམ། །དབྱེར་མེད་ཆུ་ལ་ཆུ་ུབཞག་ལྟར། །དུས་གསུམ་རྟོག་པའི་རྒྱུན་བཅད་ནས། །མ་བཅོས་གང་ཤར་ངོ་བོ་བསྐྱང་། །ཞེས་ཅི་གནས་སུ་མཉམ་པར་བཞགདགེ་འདིས་འགྲོ་དྲུག་སེམས་ཅན་རྣམས། །བླ་མེད་གོ་འཕང་ཐོབ་པར་ཤོག །ཅེས་སི་ཏུ་པདྨའི་མིང་གིས་དད་གསུམ་ལྡན་པ་དགེ་ལེགས་ཆོས་འཕེལ་ངོར་རྡོ་རྗེ་དྲག་པོའི་མཆོག་སྤྲུལ་དེ་ཉིད་ཀྱི་བླ་སྒྲུབ་སྟེ། བླ་མའི་རྣལ་འབྱོར་གཞན་ལའང་སྦྱར་རུང་དུ་སྤེལ་བ་དགེ། མངྒ་ལམ།། །།
དཔལ་དགའ་སྤྲུལ་སྐུའི་བླ་མའི་རྣལ་འབྱོར།
སྭསྟི། འདིར་དཔལ་དགའ་སྤྲུལ་སྐུའི་བླ་མའི་རྣལ་འབྱོར་ལ་མོས་པ་དག་གིས། ངོ་བོ་བླ་མ་ལ་རྣམ་པ་ཨོ་རྒྱན་ཆེན་པོ་བསྐྱེད་བཟླས་སྤྲུལ་གཞི་ཉིད་དུ་ངེས་པས་རྟེན་དང་མཆོད་པ་ཚར་དུ་
དངར་བ་འདུ་བྱས་ལ། ༀ་ཨཱཿཧཱུྃ། དུས་འདི་ནས་བཟུང་བྱང་ཆུབ་སྙིང་པོའི་བར། །བླ་མ་དཀོན་མཆོག་གསུམ་ལ་སྐྱབས་སུ་མཆི། །བདག་དང་འགྲོ་ཀུན་མ་གྱུར་སེམས་ཅན་རྣམས། །སངས་རྒྱས་གོ་འཕང་ཐོབ་པར་སེམས་བསྐྱེད་དོ། །ལན་གསུམ། ༀ་ཤཱུནྱ་ཏ་སོགས། གཉིས་སུ་འཛིན་པའི་དྲི་མ་ཀུན་བྲལ་ངང་། །མདུན་མཁར་པད་སྡོང་ཉི་ཟླ་བརྩེགས་པའི་སྟེང་། །སྟོང་དང་སྙིང་རྗེ་ཟུང་འཇུག་རིག་རྩལ་ལས། །ཧྲཱིཿཡིག་ཡོངས་གྱུར་རྒྱལ་ཀུན་འདུས་པའི་དཔྱིད། །གུ་རུ་པདྨ་འབྱུང་གནས་ལམ་མེར་གསལ། །གནས་གསུམ་འབྲུ་གསུམ་ཐུགས་ཀའི་ས་བོན་ལས། །འོད་འཕྲོས་བདེ་ཆེན་པདྨ་འོད་ཞིང་ནས། །རྒྱལ་བ་སྲས་འཁོར་རྩ་གསུམ་ལྷ་ཡི་ཚོགས། །སྤྲིན་ཕུང་གཏིབ་བཞིན་སྤྱན་དྲངས་ས་མཱ་ཛཿཧཱུྃ། ཨོ་རྒྱན་ཡུལ་གྱི་སོགས་ཚིག་བདུན་གསོལ་འདེབས་སྔགས་དང་བཅས་ལན་གསུམ་གྱིས་བྱིན་ཕབས། ཧོཿརིགས་ཀུན་ཁྱབ་བདག་བླ་མ་རྡོ་རྗེ་འཆང་། །གཤེགས་དང་བཞུགས་པའི་མཚན་མ་མི་དམིགས་ཀྱང་། །གཉིས་སུ་འཛིན་པའི་རྟོག་པ་ཞི་བའི་ཕྱིར། །གཉིས་མེད་བདེ་བ་ཆེན་པོར་བཞུགས་སུ་གསོལ། །ཡེ་ནས་གནས་པ་ཆོས་སྐུའི་རོལ་པ་ལ། །དེ་བཞིན་ཉིད་དུ་རྟོགས་པས་གུས་ཕྱག་འཚལ། །ཕྱི་མཆོད་ཚོགས་དྲུག་ཡུལ་སྣང་མཆོད་ལྷར་སྤྲུལ། །ནང་མཆོད་སྐུ་གསུམ་བདུད་རྩི་ར་ས་ཡན། །གསང་བ་བདེ་བ་ཆེན་པོ་རྡོ་རྗེའི་དངོས། །འཁོར་གསུམ་དམིགས་བྲལ་དེ་བཞིན་ཉིད་དང་བཅས། །ལྷ་ལ་
ལྷ་ཐིམ་དགྱེས་པའི་ཚུལ་གྱིས་རོལ། །གང་གི་གསང་གསུམ་རྒྱལ་བ་ཀུན་ཡེ་ཤེས། །དབྱེར་མེད་གཅིག་ཏུ་ངེས་པར་བསྔགས་འོས་སྟོབས། །སྲིད་འདིར་མ་མཆིས་འོན་ཀྱང་རང་རིག་པ། །གདོད་མའི་མགོན་པོར་རོ་གཅིག་མོས་པས་བསྟོད། །བཤགས་དང་བཤགས་བྱ་བཤགས་མཁན་མི་དམིགས་པ། །སྒྱུ་མ་ལྟ་བུར་ནོངས་གྱུར་མ་ལུས་འཆགས། །དངོས་གྲུབ་སྩོལ་དང་སྩོལ་བ་མི་དམིགས་ཀྱང་། །ཐུན་མོང་སྤྱི་དང་རང་རིག་ཡེ་ཤེས་ཆེ། །མངོན་མཐོང་ཕྱག་རྒྱ་ཆེན་པོའི་དངོས་གྲུབ་དང་། །ཚིག་དང་ཡི་གེར་མི་ལྟོས་རྡོ་རྗེ་བཞིས། །བྱིན་རླབས་འཕོ་དབང་བདག་རྒྱུད་བྱིན་གྱིས་རློབས། །ཞེས་དང་། གསོལ་འདེབས་སྙིང་པོ་བཛྲ་གུ་རུ་བཟླས། རྒྱུན་ཁྱེར་བསྡུས་པའི་སྐབས་འདི་ནས་བྱིན་རླབས་བསྡུ་བ་ཕྱིན་བཏོན། རྒྱས་པར་སྤྲོ་ན་དེ་ནས་ཚོགས་རྫས་བཤམས་ལ་བྱིན་རླབས་ནི། ༀ་སྣང་བ་སྣོད་ཀྱི་གཏོར་གཞོང་དུ། །ཨཱཿསྟོང་པའི་རང་མདངས་ཚོགས་ཀྱི་རྫས། །ཧཱུྃ་ཀུན་བཟང་རོལ་པ་ཆེན་པོར་གྱུར། །ཧྲཱིཿཟག་མེད་བདེ་སྐྱེད་ཡེ་ཤེས་ཀྱི། །བཅུད་ཆེན་འདི་དཔལ་མཆོག་ཧེ་རུ་ཀ། དོན་སྟོང་ཉིད་རོལ་པའི་ཡུམ་དང་འཁོར། །དཔལ་རྩ་གསུམ་ལྷ་ཡི་སྤྲོ་བསྡུ་བཅས། །སྐྱབས་དམ་པར་གྱུར་ཀུན་དགྱེས་པར་བཞེས། །གཤིས་ཀུན་ཁྱབ་འགྱུར་བ་མེད་པའི་དངོས། །དོན་མཉམ་ཉིད་དབྱིངས་སུ་བསྒྲལ་བར་མཛོད། །དགྲ་གཉིས་འཛིན་འཁྲུལ་རྟོག་ལས་ཉོན་བདུད། །འཕྲལ་གློ་བུར་དྲི་མས་བསྒྲིབས་པ་རྣམས། །ཐབས་རང་རིག་
གཅེར་མཐོང་ངང་དུ་བཤགས། །ༀ་བཛྲ་ས་ཏྭ་ས་མ་ཡ་སོགས་ཡིག་བརྒྱ་བརྗོད། དཔལ་བདེ་བ་ཆེན་པོ་རྡོ་རྗེའི་གར། །དབྱིངས་གསུམ་གྱི་མཁའ་རུ་བསྒྱུར་བ་དང་། །ལྷ་སྔགས་དང་ཡེ་ཤེས་ཆེན་པོ་རུ། །འདུ་ཤེས་པའི་བདུད་རྩི་ཨེ་མ་ཧོ། །ཞེས་ཚོགས་ལ་རོལ་ཞིང་ལྷག་མ་བསྔོ་བ། ཧོཿདོན་བདེ་ཆེན་ཐིག་ལེ་ཉག་གཅིག་ལས། །ཐབས་སྣང་ཚུལ་གསང་བའི་དཀྱིལ་འཁོར་གྱི། །ཕྱི་མུ་རན་སྐྱོང་བའི་ལྷག་སྡུད་རྣམས། །བཅུད་རོ་ལྡན་ལྷག་མའི་གཏོར་མ་ལོངས། །འཕྲལ་བྱང་ཆུབ་སྒྲུབ་པའི་བར་ཆད་དང་། །གཏན་རྣལ་འབྱོར་བཞི་ཡི་གོལ་ཤོར་གྱི། །ས་ལམ་ལ་བར་གཅོད་འབྲས་འབྱིན་པའི། །འཁྲུལ་རྟོག་གི་བདུད་བཞིའི་དགྲ་དཔུང་ཟློག །ཨུཥྩི་ཊ་བ་ལིདྟ་ཁཱ་ཧི། བྱིན་རླབས་བསྡུ་བ་ནི། བླ་མའི་སྐུ་ཡི་གནས་བཞིར་རྡོ་རྗེ་བཞིའི། །ཡི་གེ་གསལ་ལས་འོད་འཕྲོས་གནས་བཞིར་ཐིམ། །དབང་དང་བྱིན་རླབས་ཀུན་ཐོབ་འོད་དུ་ཞུ། །རང་རིག་གདོད་མའི་དབྱིངས་སུ་རོ་གཅིག་འདྲེས། །དགེ་འདིས་འགྲོ་བ༴ རྟག་བདེའི༴ ནང་གིས་ལམ༴ སངས་རྒྱས་ཉིད་ཀྱི༴ ཞེས་སི་ཏུ་པདྨའི་མིང་ཅན་གྱིས་ཟུར་མང་བསྟན་འཛིན་མཆོག་སྤྲུལ་བཞེད་ངོར། འཛི་སྒར་ཆོས་སྐྱོང་སྤྲུལ་སྐུ་དཔལ་དགའི་བླ་མའི་རྣལ་འབྱོར་དུ་སྤེལ་བ་དགེ། གཞན་སྤྱི་ཁྱབ་ཏུ་གུ་རུ་རིན་པོ་ཆེ་ཁོ་ནའི་བླ་སྒྲུབ་ཏུ་དམིགས་ནས་ཉམས་ལེན་བགྱིས་ན་ཆོག་འདུག་སྟེ་ལེགས་བར་སེམས་སོ།། །།ༀ་ཨཱཿཧཱུྃ་ཧྲཱིཿརང་སྣང་གདོད་ནས་རྣམ་དག་སྟོང་ཉིད་ལས། །ཐབས་མཆོག་སྙིང་རྗེའི་རོལ་གར་ཡི་དམ་ལྷ། །
གདན་གསུམ་ཚང་བའི་སྐུར་གསལ་སྤྱི་གཙུག་ཏུ། །རྒྱལ་ཀུན་ཡེ་ཤེས་དབྱིངས་སུ་རོ་གཅིག་ཀྱང་། །གང་འདུལ་སྐུ་གསུམ་ཆུ་ཟླའི་རོལ་རྩེད་ཚུལ། །ཆོས་ཀྱི་སྣང་བ་མཐའ་ཡས་ཆོས་སྐུའི་ཀློང་། །འགྲོ་འདུལ་ལོངས་སྤྱོད་ཡོངས་རྫོགས་ཉིན་མོར་བྱེད། །ཆགས་མེད་གང་འདུལ་སྐུར་སྟོན་སྤྲུལ་པའི་སྐུ། །སྐུ་དང་ཡེ་ཤེས་ཐ་དད་བྲལ་བ་ཡི། །དབྱིངས་རིག་འདུ་འབྲལ་མེད་པའི་འོད་ཀློང་གསལ། །ༀ། ཆོས་དབྱིངས་མཐའ་བྲལ་ཀུན་ཏུ་ཁྱབ་པའི་དངོས། །དུས་གསུམ་སྐྱེ་འགགས་སྤྲོས་པའི་མཚན་མ་ལས། །ཡོངས་གྲོལ་བདེ་གཤེགས་སྙིང་པོ་དམ་པའི་བདག །བླ་མ་ཆོས་ཀྱི་སྐུ་ལ་གསོལ་བ་འདེབས། །ཨཿལྷུན་འགྲུབ་ཡེ་ཤེས་ལྔ་ལྡན་འཕོ་བྲལ་ཁམས། །རིགས་རྣམས་ཀུན་གྱི་ཟློས་གར་མི་འགོག་པར། །རང་རྩལ་སྐུ་དང་ཞིང་ཁམས་འདུ་འབྲལ་མེད། །བླ་མ་ལོངས་སྤྱོད་རྫོགས་སྐུར་གསོལ་བ་འདེབས། །ཧཱུྃ། སྐྱེ་མེད་རྩལ་ལས་གང་འདུལ་འགགས་མེད་ཀྱི། །སྒྱུ་འཕྲུལ་བསམ་གྱིས་མི་ཁྱབ་རོལ་བ་ཡིས། །འཁོར་བ་སྲིད་དུ་འཁོར་བའི་དོན་མཛད་པ། །བླ་མ་སྤྲུལ་པའི་སྐུ་ལ་གསོལ་བ་འདེབས། །ཧྲཱིཿརང་སེམས་བདེ་སྟོང་དབྱེར་མེད་ཕྱག་རྒྱ་ཆེའི། །ངོ་བོར་བཅོས་མིན་རྩེ་གཅིག་མཉམ་བཞག་པས། །བསྒོམ་བྱ་སྒོམ་བྱེད་བྲལ་བའི་ཡེ་ཤེས་ཏེ། །བླ་མ་ངོ་བོ་ཉིད་སྐུ་མངོན་དུ་གྱུར། །སྐྱེ་བ་ཀུན་ཏུ་ཡང་དག་བླ་མ་དང་། །སོགས་བརྗོད། ཅེས་སྐྱབས་རྗེ་འབྲུག་བ་རིན་པོ་ཆེའི་ཞལ་སློབ་བསྟན་འཛིན་ཆོས་དབང་གི་ངོར་སི་ཏུས་སྤེལ།། །།