བླ་མའི་རྣལ་འབྱོར་དཀོན་མཆོག་ཀུན་འདུས།
བླ་མའི་རྣལ་འབྱོར་དཀོན་མཆོག་ཀུན་འདུས་བཞུགས། སྤྱི་བོར་པད་ཟླའི་གདན་གྱི་སྟེང། །བླ་མ་ཁྱབ་བདག་རྡོ་རྗེ་འཆང། །ལོངས་སྤྱོད་རྫོགས་པའི་ཆས་དང་ལྡན། །དེ་ལ་དཀོན་མཆོག་རྩ་
གསུམ་གྱི། །ལྷ་ཚོགས་དཔག་མེད་བསྐོར་བར་གསལ། །བདག་སོགས་མཁའ་མཉམ་འགྲོ་ཀུན་གྱི། །ཕྱག་འཚལ་མཆོད་བཤགས་རྗེས་ཡི་རང། །བསྐུལ་ཞིང་གསོལ་འདེབས་བསྔོ་བར་བགྱི། །རང་བྱུང་ལྷན་སྐྱེས་ཕྱག་རྒྱ་ཆེ། །སྙིང་པོའི་དོན་རྟོགས་བྱིན་གྱིས་རློབས། །ༀ་ཨཱཿབཛྲ་དྷཱ་ར་ཧཱུྃ། ཞེས་བསྙེན་ཅིང། མཐར་ནི་སྐྱབས་ཡུལ་རང་ལ་ཐིམ། །དབྱེར་མེད་ཆུ་ལ་ཆུ་བཞག་ལྟར། །མ་བཅོས་སྤྲོས་མེད་ངང་དུ་བཞག །དགེ་དེས་རང་གཞན་སངས་རྒྱས་ཤོག །ཅེས་སྔགས་འཆང་ཀརྨ་རྣམ་རྒྱལ་ངོར་སྤེལ།། །།རང་ཉིད་ཐ་མལ་སྤྱི་བོ་རུ། །པདྨ་དཀར་པོ་འདབ་བརྒྱད་པ། །ཟླ་བའི་དཀྱིལ་འཁོར་ཉ་གང་སྟེང་། །རིགས་ཀུན་གཙོ་བོ་བླ་མ་མཆོག །རྣམ་པ་རྡོར་སེམས་སྐུ་མདོག་དཀར། །ཕྱག་གཉིས་རྡོ་རྗེ་དྲིལ་བུ་འཛིན། །དབུ་རྒྱན་སྙན་རྒྱན་མགུལ་རྒྱན་དང། །ཕྱག་ཞབས་གདུ་བུ་རིན་ཆེན་བརྒྱན། །དར་ལིའི་སྟོད་གཡོགས་སྨད་གཡོགས་གསོལ། །ཞབས་གཉིས་སེམས་དཔའི་སྐྱིལ་ཀྲུང་བཞུགས། །ཐུགས་ཀར་ཧཱུྃ་མཐར་ཡིག་བརྒྱས་བསྐོར། །སྐུ་ལས་བདུད་རྩི་འོ་མའི་རྒྱུན། །བསིལ་བ་བདེ་བའི་རང་བཞིན་ཅན། །བབས་པས་རང་ལུས་གང་བར་གྱུར། །ༀ་བཛྲ་ས་ཏྭ་སོགས་ཡི་གེ་བརྒྱ་པ་དང་དྲུག་པ་ཅི་ནུས་བཟླས་མཐར། ཀྱེ་མགོན་པོ། བདག་ནི་འཁྲུལ་པའི་དབང་གྱུར་ཏེ། །སྐུ་གསུང་ཐུགས་
དང་གང་འགལ་བའི། །ཉེས་ལྟུང་ཐམས་ཅད་བྱང་ཞིང་དག །དག་ཚངས་དབུགས་དབྱུང་མཛད་དུ་གསོལ། །གསོལ་བཏབ་མཐུ་ལས་སྡིག་སྒྲིབ་རྣམས། །དུད་ཁུ་སོལ་ཁུའི་རྣམ་པར་ཐོན། །རང་ལུས་ཤེལ་སྒོང་ལྟ་བུར་གྱུར། །སྤྱི་བོའི་བླ་མ་འོད་ཞུ་ནས། །དབྱེར་མི་ཕྱེད་པ་རང་ལ་ཐིམ། །མ་བཅོས་གཉུག་མའི་ངང་ལ་བཞག །དགེ་འདིས་མཁའ་མཉམ་མ་རྒན་རྣམས། །སངས་རྒྱས་གོ་འཕང་ཐོབ་ཕྱིར་བསྔོ། །ཅེས་པའང་དབོན་སྤྲུལ་ཀརྨ་འབྱུང་གནས་ཀྱི་ཐུགས་བཞེད་བཞིན་སི་ཏུ་པདྨ་ཉིན་བྱེད་དབང་པོས་འཛི་སྒར་བཀྲ་ཤིས་ཆོས་གླིང་དུ་སྤེལ་བ་སརྦ་མདྒ་ལཾ།། །།སྤྱི་བོར་དྲི་མེད་ཟླ་རྒྱས་སྟེང། །ཧྲཱིཿཡིག་དམར་པོའི་འཕྲོ་འདུ་ལས། །ངོ་བོ་རྩ་བའི་བླ་མ་ལ། །རྣམ་པ་བཅོམ་ལྡན་སྣང་མཐའ་ཡས། །དམར་གསལ་ཞལ་གཅིག་ཕྱག་གཉིས་པ། །མཉམ་བཞག་ལྷུང་བཟེད་ཚེ་བུམ་འཛིན། །ན་བཟའ་ཆོས་གོས་ཞབས་རྡོར་སྐྱིལ། །མཚན་དང་དཔེ་བྱད་ཡོངས་རྫོགས་པ། །འོད་དང་འོད་ཟེར་ཀློང་དུ་གསལ། །གནས་གསུམ་ༀ་ཨཱཿཧཱུྃ་ཡིག་ལས། །འོད་འཕྲོས་བདེ་ཆེན་ཞིང་ཁམས་ནས། །བསྐྱེད་པ་དང་འདྲའི་ཡེ་ཤེས་པ། །དཔག་མེད་སྤྱན་དྲངས་རང་ཐིམ་གྱུར། །སླར་ཡང་ཐུགས་འོད་འཕྲོས་པ་ལས། །དབང་ལྷ་རིགས་ལྔས་དབང་བསྐུར་ཞིང་། །རིགས་བདག་རྣམ་སྣང་རྒྱས་གདབ་གྱུར། །ཐུགས་ཀར་ཟླ་སྟེང་ཧྲཱིཿཡིག་དམར། །
དེ་མཐར་སྔགས་ཕྲེང་གཡས་སུ་འཁོར། །ཕྱོགས་དུས་རྒྱལ་བ་རྒྱ་མཚོའི་ཚོགས། །ཀུན་གྱི་ཐུགས་རྗེ་དངོས་གྲུབ་རྣམས། །སྣང་མཐའི་སྐུར་གྱུར་རང་ལ་ཐིམ། །ཕྱི་སྣོད་ནང་བཅུད་འགྲོ་བ་རྣམས། །ལྷ་ཡི་ངོ་བོར་བསྒྱུར་བ་དང་། །རིགས་དྲུག་སྒྲིབ་སྦྱང་བྱང་ཆུབ་ཀྱི། །ལམ་བཀོད་ཁྱེར་སོ་གསུམ་ལྡན་ངང་། །ༀ་ཨཱ་མི་དྷེ་ཝཱ་ཧྲཱིཿཅི་ནུས་བཟླས་མཐར། རྒྱལ་ཀུན་ཐུགས་རྗེའི་གཏེར་ཆེན། །པདྨ་གསུང་གི་དབང་ཕྱུག །སངས་རྒྱས་འོད་དཔག་མེད་མགོན། །དབྱེར་མེད་དཔལ་ལྡན་བླ་མར། །སྙིང་ནས་དད་པས་གསོལ་འདེབས། །བདག་དང་འབྲེལ་ཐོགས་སེམས་ཅན། །ནུབ་ཕྱོགས་བདེ་ལྡན་ཞིང་དུ། །གང་གི་ཞལ་མཐོང་ལུང་ཐོབ། །ཕྱིར་མི་ལྡོག་བར་བྱིན་རློབས། །ཅེས་བླ་མ་རྒྱང་འབོད་སྨོན་ལམ་དང། བཅོམ་ལྡན་འདས་ཀྱི་སྐུ་ལས་ཡེ་ཤེས་ལྔའི། །ངོ་བོ་ༀ་དཀར་ཨཱཿདམར་ཧཱུྃ་སྔོན་པོ། །སྭཱ་སེར་ཧཱ་ལྗང་འཕྲོས་པས་བདག་ལུས་ཀྱི། །གནས་ལྔར་ཐིམ་པས་ཕུང་ཁམས་སྡིག་སྒྲིབ་བསལ། །དབང་བཞི་ཐོབ་ཅིང་བླ་མ་འོད་ཞུ་ནས། །དབྱེར་མེད་གཅིག་འདྲེས་སྣང་སྲིད་ཆོས་ཐམས་ཅད། །གནས་ལུགས་ཕྱག་རྒྱ་ཆེན་པོའི་ངོ་བོར་བཞག །ཅེས་ཅི་གནས་ཉམས་བསྐྱང་ལ་། མཐར་དགེ་རྩ་བྱང་ཆེན་བསྔོ། དེ་ལྟར་གདན་ས་བར་པའི་སྒྲུབ་ཆེན་ཕྲིན་ལས་ཕུན་ཚོགས་ངོར་སི་ཏུ་པདྨ་ཉིན་བྱེད་དབང་པོས་སྤེལ་བ་སརྦ་མདྒ་ལམ། ཤུ་བྷམ།། །།
ཧྲཱིཿསྣང་སྲིད་ཆོས་རྣམས་གཟོད་ནས་མཚན་བྲལ་ངང་། །སྙིང་རྗེ་ཆེན་པོའི་རོལ་རྩལ་འགག་མེད་མདངས། །གསལ་སྟོང་འོད་ཕུང་ཡི་དམ་ལྷར་གསལ་བའི། །སྤྱི་བོར་དྲིན་ཅན་རྩ་བའི་བླ་མ་ནི། །རྣམ་པ་གུ་རུ་པདྨ་འབྱུང་གནས་མཆོག །མཚན་དཔེའི་གཟི་འབར་ཆ་ལུགས་ཡོངས་སུ་རྫོགས། །སྐུ་དང་ཡེ་ཤེས་དབྱེར་མེད་ལྷུན་གྲུབ་ཀྱང་། །གཉིས་འཛིན་སྣང་ཡུལ་བག་ཆགས་དག་པའི་ཕྱིར། །ཐུགས་ལས་འོད་འཕྲོས་པདྨ་འོད་ཞིང་ནས། །ཡེ་ཤེས་སྤྱན་དྲངས་དམ་ཡེ་གཉིས་མེད་གྱུར། །ཧཱུྃ། ཨོ་རྒྱན་ཡུལ་གྱི་ནུབ་བྱང་མཚམས། །པདྨ་གེ་སར་སྡོང་པོ་ལ། །ཡ་མཚན་མཆོག་གི་དངོས་གྲུབ་བརྙེས། །པདྨ་འབྱུང་གནས་ཞེས་སུ་གྲགས། །འཁོར་དུ་མཁའ་འགྲོ་མང་པོས་བསྐོར། །ཁྱེད་ཀྱི་རྗེས་སུ་བདག་སྒྲུབ་ཀྱིས། །བྱིན་གྱིས་བརླབ་ཕྱིར་གཤེགས་སུ་གསོལ། །གུ་རུ་པདྨ་སིདྡྷི་ཧཱུྃཿཿཞེས་ཚར་བདུན་ནམ་གསུམ་དང་། གནས་མཆོག་འདི་རུ་བྱིན་ཕོབ་ལ། །སྒྲུབ་མཆོག་བདག་ལ་དབང་བཞི་བསྐུར། །བགེགས་དང་ལོག་འདྲེན་བར་ཆད་སོལ། །མཆོག་དང་ཐུན་མོང་དངོས་གྲུབ་སྩོལ། །ༀ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛཿསིདྡྷི་ཕ་ལ་ཧཱུྃ། ཞེས་ཐོད་ཕྲེང་རྩལ་སྔགས་གང་འགྲུབ་བཟླ། དེ་ལྟར་གསོལ་བ་བཏབ་པས་བླ་མ་ཡི། །རྡོ་རྗེ་བཞི་ཡི་བྱིན་རླབས་འོད་ཟེར་ཚུལ། །འཕྲོས་ནས་རང་གི་གནས་
བཞིར་ཐིམ་པའི་མོད། །གནས་སྐབས་རྣམ་བཞིའི་སྒྲིབ་པ་དག་ནས་ཀྱང་། །སྐུ་བཞིའི་ས་བོན་རྒྱུད་ལ་བཞག་པར་གྱུར། །སྐྱེ་བ་ཀུན་ཏུ་ཡང་དག་བླ་མ་དང་། །འབྲལ་མེད་ཆོས་ཀྱི་དཔལ་ལ་ལོངས་སྤྱོད་ཅིང་། །ས་དང་ལམ་གྱི་ཡོན་ཏན་རབ་རྫོགས་ཏེ། །རྡོ་རྗེ་འཆང་གི་གོ་འཕང་མྱུར་ཐོབ་ཤོག །བརྗོད། ཅེས་ཀརྨའི་དད་པའི་གསོས་སུ་སྤེལ།། །།