བླ་སྒྲུབ་ཡིད་བཞིན་ཀུན་སྩོལ།
བླ་སྒྲུབ་ཡིད་བཞིན་ཀུན་སྩོལ་ཞེས་བྱ་བ་བཞུགས་སོ། །སྭ་སྟི། འདིར་དཔལ་ལྡན་ཀརྨ་པའི་བླ་མའི་རྣལ་འབྱོར་ལ་བརྩོན་པའི་སྒྲུབ་པ་པོས། དབེན་པའི་གནས་སུ། རྟེན་གསུམ་གྱི་དྲུང་དུ་མཆོད་པ་ཇི་སྙེད་ཚར་དུ་དངར་བ་བཤམས་པར་བྱའོ། །དེའང་དང་པོ་ཡོན་ཏན་ཟུར་ཙམ་བརྗོད་ན། རྡོ་རྗེ་གདན་བཞི་ལས། དུས་གསུམ་སངས་རྒྱས་མཆོད་པ་བས། །བླ་མའི་བ་སྤུ་ཉག་གཅིག་མཆོད། །དེ་ནི་བསོད་ནམས་ཁྱད་པར་འཕགས། །ཅེས་དང་། དྲིན་དང་ལྡན་པའི་བླ་མ་དེ། །སྤྱི་བོའི་གཙུག་གམ་སྙིང་གི་དཀྱིལ། །ཡན་ལག་མཐིལ་སོགས་གང་བསྒོམ་པ། །སངས་རྒྱས་སྟོང་གི་ཡོན་ཏན་ནི། །གང་ཟག་དེ་ཡིས་འཛིན་པར་འགྱུར། །ཅེས་སོགས་རྒྱུད་ལུང་དུ་མ་ནས་བསྔགས་པའི་ཡུལ་དུ་མཛད་པ་ལྟར་མོས་པས་ཡར་གཞལ་ཙམ་དུ་མ་ཡིན་པར། བཅོས་མིན་གྱི་དད་གུས་གདུང་ཤུགས་དང་བཅས་པས་ཀུན་ནས་བསླང་པས་ཚུལ་འདིར་འཇུག་པ་ལ་ཐོག་མར་སྐྱབས་ཡུལ་རྣམས་མདུན་མཁར་ལམ་གྱིས་གསལ་བཏབ་ལ། ན་མོ། །སྐྱབས་གནས་དཀོན་མཆོག་རྒྱ་མཚོའི་སྐུ་གསུང་ཐུགས། །ཡོན་ཏན་ཕྲིན་ལས་གཅིག་བསྡུས་རྡོ་རྗེ་འཛིན། །རྩ་བའི་བླ་མར་དེང་བཟུང་སྙིང་པོའི་བར། །བདག་སོགས་སྐྱབས་མཆི་ཐུགས་རྗེས་བཟུང་དུ་གསོལ། །མ་གྱུར་སེམས་ཅན་དོན་ཕྱིར་བླ་མ་བསྒྲུབ། །ཀུན་ཀྱང་བྱང་ཆུབ་ཐོབ་པར་སེམས་བསྐྱེད་དོ། །ཅེས་སྐྱབས་འགྲོ་སེམས་བསྐྱེད་ལན་གསུམ་དང་། དེ་ནས་བླ་མའི་རྣལ་འབྱོར་ལ་འཇུག་པ་ནི། སྣང་སྲིད་ཆོས་ཀུན་དམིགས་མེད་ངང་། །སྟོང་དང་སྙིང་རྗེའི་རྩལ་སྣང་ལས། །རང་ཉིད་རྡོ་རྗེ་རྣལ་འབྱོར་མར། །གསལ་བའི་སྤྱི་བོར་པད་དཀར་དང་། །ཉི་ཟླའི་སྟེང་དུ་རྒྱལ་ཀུན་གྱི། །ཡེ་ཤེས་གཅིག་བསྡུས་འཁོར་ལོའི་མགོན། །ངོ་བོ་དཔལ་ལྡན་ཀརྨ་པ། །རྗེ་བཙུན་བདུད་འདུལ་
རྡོ་རྗེ་ལ། །རྣམ་པ་བཅོམ་ལྡན་རྡོ་རྗེ་འཆང་། །ནམ་མཁའི་མདོག་ཅན་ལོངས་སྐུའི་ཆས། །དར་དང་རིན་ཆེན་རྒྱན་གྱིས་མཛེས། །ཐབས་ཤེས་རྡོར་དྲིལ་བསྣོལ་སྟབས་འཛིན། །ཞབས་གཉིས་རྡོར་སྐྱིལ་འོད་ལྔའི་ཀློང་། །སྒྲུབ་བརྒྱུད་བླ་མའི་ཚོགས་ཀྱིས་བསྐོར། །ཀུན་ཀྱང་མཚན་དཔེ་ལྷམ་མེར་གསལ། །ཆོས་དབྱིངས་དགོངས་པ་སྐྱེ་མེད་ངང་། །དོན་དམ་གཟིགས་པའི་ལྟ་སྟངས་ཅན། །དྲན་ཙམ་ཉིད་ནས་མོས་གུས་འབར། །བཟོད་མེད་གདུང་ཤུགས་དྲག་པོ་ཡིས། །གསོལ་བཏབ་ཙམ་གྱི་བྱིན་རླབས་མྱུར། །མྱུར་བའི་སྟོབས་ཀྱིས་བདག་རྒྱུད་ལ། །ཡེ་ཤེས་མངོན་སུམ་སྟོན་བ་ཡི། །ཐུགས་རྗེའི་འོད་ཟེར་ཀུན་ཏུ་ཁྱབ། །སྙིང་ནས་གསོལ་འདེབས་དུས་ལ་བབ། །ཀྱེ། སྣང་སྟོང་སྐུ་ལ་གྲག་སྟོང་གསུང་། །བདེ་སྟོང་ཐུགས་ཀྱི་རང་བཞིན་ཅན། །རྡོ་རྗེའི་གསང་བ་གསུམ་ཕྱག་འཚལ། །སྐུ་གསུང་ཐུགས་ཀྱིས་བྱིན་གྱིས་རློབས། །ཀྱེ། རང་བྱུང་སྣང་སྟོང་ཕོ་བྲང་ནས། །རྩ་བའི་བླ་མ་སྤྱན་འདྲེན་ན། །གནམ་ས་བླ་འོག་མཆོག་གསུམ་དང་། །རྩ་གསུམ་ལྷ་ཚོགས་སྤྲིན་ལྟར་གཏིབས། །དངོས་གྲུབ་ཆར་འབེབས་འཇའ་འོད་འཚེར། །དད་དང་གདུང་བས་གསོལ་བཏབ་པས། །ཐུགས་དམ་དབང་གིས་འདིར་གཤེགས་གསོལ། །མོས་བའི་བུ་ལ་བྱིན་གྱིས་རློབས། །དེ་ལྟར་བྱིན་འབེབས་ནས་མཆོད་པ་འབུལ་བ་ཡན་ལག་བདུན་པ་ནི། ཕྱག་
འཚལ་མཆོད་ཅིང་མི་དགེ་བཤགས། །ཡི་རངས་ཆོས་འཁོར་བསྐོར་གསོལ་འདེབས། །དགེ་བས་འགྲོ་དྲུག་སངས་རྒྱས་ཀྱི། །གོ་འཕང་ཐོབ་པའི་ཕྱིར་བསྔོའོ། །བདག་ལུས་ལོངས་སྤྱོད་སྣང་སྲིད་ཀྱི། །དངོས་པོ་ཀུན་གྱི་མཆོད་པའི་ཚོགས། །ཞིང་ཁམས་རབ་འབྱམས་རྒྱས་འགེངས་པ། །བླ་མ་དཀྱིལ་འཁོར་ལྷ་ལ་འབུལ། །ༀ་རཏྣ་མཎྜལ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡ་ཧཱུྃ། དེ་ནས་རྗེ་ཟླ་འོད་གཞོན་ནུའི་གསུང་ལས་བྱུང་བ་འདིའང་བྱིན་རླབས་ཀྱི་ཁྱད་དུ་བརྗོད་པར་བྱ་བ་ནི། བླ་མ་རིན་པོ་ཆེ་བདག་མིང་འདི་ཞེས་བྱ་བའི་ལས་དང་ཉོན་མོངས་པའི་སྒྲིབ་པ་དང་། ཤེས་བྱའི་སྒྲིབ་པ་དང་། བག་ཆགས་ཀྱི་སྒྲིབ་པ་ཐམས་ཅད་ད་ལྟ་ཉིད་དུ་དག་པར་བྱིན་གྱིས་བརླབ་ཏུ་གསོལ། །འདུག་ས་འདི་ཉིད་དུ་དག་པར་བྱིན༴ ཐུན་གཅིག་པོ་འདི་ཉིད་ངང་ལ་དག་པར་བྱིན༴ བླ་མ་རྗེ་བཙུན་རིན་པོ་ཆེ་བདག་མིང་འདི་ཞེས་བྱ་བའི་རྒྱུད་འདི་དག་པར་བྱིན༴ རྒྱུད་འདི་རྣམ་པར་གྲོལ་བར་བྱིན༴ ད་ལྟ་ཉིད་དུ་དག་པར་བྱིན༴ འདུག་ས་འདི་ཉིད་དུ་དག་པར་བྱིན༴ ཐུན་འདི་ཉིད་ལ་དག་པར་བྱིན༴ བླ་མ་རྗེ་བཙུན་རིན་པོ་ཆེ་བདག་མིང་འདི་ཞེས་བྱ་བའི་རྒྱུད་ལ་ཏིང་ངེ་འཛིན་ཕྱིན་ཅི་མ་ལོག་པ་མཆོག་ཏུ་གྱུར་པ་སྐྱེ་བར་མཛད་དུ་གསོལ། ད་ལྟ་ཉིད་དུ་སྐྱེ་བར་བྱིན༴ འདུག་ས་འདི་ཉིད་དུ་སྐྱེ་བར་བྱིན༴
ཐུན་འདི་ཉིད་ཀྱི་རིང་ལ་སྐྱེ་བར་བྱིན༴ བླ་མ་རྗེ་བཙུན་རིན་པོ་ཆེ་བདག་མིང་འདི་ཞེས་བྱ་བའི་རྒྱུད་ལ་ཡེ་ཤེས་ཕྱིན་ཅི་མ་ལོག་པ་མཆོག་ཏུ་གྱུར་པ་བསྐྱེད་པར་མཛད་དུ་གསོལ། །ད་ལྟ་ཉིད་དུ་སྐྱེ་བར་བྱིན༴ འདུག་ས་འདི་ཉིད་དུ་སྐྱེ་བར་བྱིན༴ ཐུན་འདི་ཉིད་ལ་སྐྱེ་བར་བྱིན་གྱིས་བརླབ་ཏུ་གསོལ། ཅེས་པ་རྣམས་སོ་སོར་ལན་གསུམ་རེ་བརྗོད་ལ། ཀརྨ་པ་མཁྱེན་ནོ། །ཞེས་ཅི་ནུས་དང་། དེ་ནས་རྗེ་དུས་གསུམ་མཁྱེན་པས་མཛད་པར་གྲགས་པ། བླ་མ་རིན་པོ་ཆེ་ལ་གསོལ་བ་འདེབས། །བདག་འཛིན་བློ་ཡིས་ཐོང་བར་བྱིན་གྱིས་རློབས། །དགོས་མེད་རྒྱུད་ལ་སྐྱེ་བར་བྱིན་གྱིས་རློབས། །ཆོས་མིན་རྣམ་རྟོག་འགག་བར་བྱིན་གྱིས་རློབས། །རང་སེམས་སྐྱེ་མེད་རྟོགས་པར་བྱིན་གྱིས་རློབས། །འཁྲུལ་པ་རང་སར་ཞི་བར་བྱིན་གྱིས་རློབས། །སྣང་སྲིད་ཆོས་སྐུར་རྟོགས་པར་བྱིན་རློབས། །ཅེས་ཀྱང་བརྗོད་པར་བྱའོ། །སྤྲོ་ན་རྒྱང་འབོད་མདོར་བསྡུས་ནི། སྐྱབས་དཀོན་མཆོག་འདུས་པའི་ངོ་བོ་ཉིད། །མགོན་དྲིན་ཆེན་རྩ་བའི་བླ་མ་ལ། །དུས་འདི་ནས་མཐར་ཐུག་སངས་རྒྱས་བར། །བདག་མགོན་མེད་སེམས་ཅན་བསྐྱབ་ཏུ་གསོལ། །གནས་འགྲོ་བ་རིགས་དྲུག་གི་སྡུག་བསྔལ་མཚོར། །བྱིངས་པ་ཡི་སྐྱབས་མེད་རྣམས་བསྒྲལ་དུ་གསོལ། །གདོད་རང་ཆས་སུ་གྲུབ་པའི་གཉུག་མའི་སེམས། །དོན་མངོན་གྱུར་གྱི་རྟོགས་པའི་གདེང་ཐོབ་ཤོག །ཕ་བཀའ་བརྒྱུད་ཀྱི་བླ་མ་དགོངས་སུ་གསོལ། །ཆོས་ཐེག་ཆེན་གྱི་ལྟ་སྒོམ་རྣམ་དག་པར། །ཚུལ་ཇི་བཞིན་ཤེས་རབ་ཀྱི་མིག་ཐོབ་ནས། །གནད་མ་ནོར་སྦྱངས་གོམས་ཀྱི་མཐར་སོན་ཤོག །དེ་ནས་བརྒྱུད་པའི་གསོལ་འདེབས་བསྡུས་པར་ན། ཆོས་སྐུ་རྡོ་རྗེ་འཆང་ཆེན་མ་ཏིའི་ཞབས། །ས་ར་ཧ་དང་ཀླུ་སྒྲུབ་ཤ་བ་རི། །མཻ་ཏྲི་མར་མི་དྭགས་
པོ་དུས་གསུམ་མཁྱེན། །རས་ཆེན་རྒྱལ་སྲས་པཀྵི་ཨོ་རྒྱན་རྗེ། །རང་བྱུང་གཡུང་སྟོན་རོལ་རྡོར་མཁའ་སྤྱོད་དབང་། །དེ་བཞིན་གཤེགས་བ་རིན་ཆེན་བཟང་དོན་ལྡན། །འཇམ་དཔལ་བཟང་པོ་གུ་ཤྲི་མཚོ་སྐྱེས་ཞབས། །སངས་རྒྱས་མཉན་པ་མི་བསྐྱོད་དཀོན་མཆོག་འབངས། །དབང་ཕྱུག་རྡོ་རྗེ་ཆོས་ཀྱི་དབང་ཕྱུག་དང་། །ཆོས་དབྱིངས་རྡོ་རྗེ་ཡེ་ཤེས་སྙིང་པོ་དང་། །ཡེ་ཤེས་རྡོ་རྗེ་ཆོས་ཀྱི་དོན་ཀུན་འགྲུབ། །བྱང་ཆུབ་རྡོ་རྗེ་ཆོས་ཀྱི་འབྱུང་གནས་མཆོག །བདུད་འདུལ་རྡོ་རྗེ་ཆོས་གྲུབ་རྒྱ་མཚོའི་སྡེ། །ཡི་དམ་དཀྱིལ་འཁོར་ལྷ་ཚོགས་བཀའ་སྲུང་ལ། །གསོལ་འདེབས་རང་བྱུང་རིག་པ་རང་གྲོལ་ངང་། །ལྷན་སྐྱེས་ཡེ་ཤེས་མངོན་གྱུར་བྱིན་གྱིས་རློབས། །དེ་ནས་བྱིན་རླབས་དབང་བཞི་བླང་བའི་རིམ་པ་ནི། དྲན་ཆོག་རྒྱལ་པོ་བླ་མ་རིན་པོ་ཆེ། །སྐལ་ལྡན་སྨིན་གྲོལ་དབང་བཞི་བསྐུར་གསོལ་འདེབས། །སྐྱབས་ཡུལ་ཐམས་ཅད་རྩ་བའི་བླ་མར་ཐིམ། །དགྱེས་པ་དང་བཅས་དབང་གི་དགོངས་པ་མཛད། །བླ་མའི་དཔྲལ་བའི་ༀ་ལས་འོད་དཀར་འཕྲོས། །རང་གི་དཔྲལ་ཐིམ་ལུས་ཀྱི་སྒྲིབ་པ་དག །བུམ་དབང་ཐོབ་ཅིང་བསྐྱེད་རིམ་སྣང་སྟོང་ལྷར། །བསྒོམ་པར་དབང་བའི་སྤྲུལ་སྐུ་འགྲུབ་པར་འགྱུར། །མགྲིན་པའི་ཨཱཿལས་འོད་ཟེར་དམར་པོ་འཕྲོས། །རང་གི་མགྲིན་ཐིམ་ངག་གི་སྒྲིབ་པ་དག །གསང་བའི་དབང་ཐོབ་རྫོགས་རིམ་རྩ་ཐིག་རླུང་། །སྒྱུ་ལུས་གསལ་སྟོང་བསྒོམ་དབང་ལོངས་སྐུ་འགྲུབ། །ཐུགས་ཀའི་ཧཱུྃ་ལས་འོད་ཟེར་སྔོན་པོ་འཕྲོས། །རང་
གི་སྙིང་ཁར་ཐིམ་པས་ཡིད་སྒྲིབ་དག །ཤེར་ཡེའི་དབང་ཐོབ་དགའ་བཞི་ཡེ་ཤེས་ཀྱི། །བདེ་སྟོང་བསྒོམ་དབང་ཆོས་ཀྱི་སྐུ་འགྲུབ་འགྱུར། །སླར་ཡང་འོད་ཟེར་དཀར་དམར་མཐིང་འཕྲོས་ནས། །སྒོ་གསུམ་ལ་ཐིམ་ཆ་མཉམ་སྒྲིབ་པ་དག །དབང་བཞི་ཐོབ་ཅིང་ཕྱག་རྒྱ་ཆེ་བསྒོམ་དབང་། །ངོ་བོ་ཉིད་སྐུ་འགྲུབ་པའི་སྐལ་ལྡན་གྱུར། །རྡོ་རྗེ་འཆང་དབང་དཔལ་ལྡན་ཀརྨ་པ། །བདག་ཉིད་པདྨའི་ཟེའུ་འབྲུར་རྟག་བཞུགས་ནས། །བྱང་ཆུབ་བར་དུ་འབྲལ་མེད་རྗེས་བཟུང་ལ། །གསང་གསུམ་རྡོ་རྗེའི་བྱིན་རླབས་དེང་འདིར་སྩོལ། །དེ་ལྟར་གསོལ་བཏབ་བླ་མ་འོད་ཞུ་ནས། །རང་ཐིམ་གཅིག་འདྲེས་ཕྲིན་ལས་རབ་འབྱམས་ཀུན། །བསྒྲུབ་པར་ནུས་པ་རྡོ་རྗེ་སློབ་དཔོན་དབང་། །ཐོབ་ཅིང་བདག་རྒྱུད་བླ་མའི་སྐུ་གསུང་ཐུགས། །དབྱེར་མེད་ངང་ལ་མ་བཅོས་རང་བབས་སུ། །སྤྲོས་ཀུན་བྲལ་བ་ཅི་གནས་མཉམ་པར་བཞག །ཅེས་པའི་ཚིག་དོན་ལྟར་རང་སེམས་ངོ་བོ་བསྐྱང་ལ། མཐར། བདག་གིས་དུས་གསུམ་བསགས་པའི་དགེ་གང་མཆིས། །འགྲོ་ཀུན་གདོད་མའི་བདེར་གཤེགས་རྡོ་རྗེ་འཆང་། །གོ་འཕང་ཐོབ་ཕྱིར་ཡོངས་སུ་བསྔོ་བར་བགྱི། །དེ་ལྟར་སྨོན་ལམ་རྣམ་དག་འགྲུབ་གྱུར་ཅིག །ཅེས་པའང་དད་གསུམ་གྱི་ལྷག་བློ་དང་ལྡན་པ་དགེ་སློང་འབྱོར་ལྡན་གྱིས་བསྐུལ་ལྟར་སི་ཏུ་པདྨ་ཉིན་བྱེད་དབང་པོས་ས་ཟླའི་དཀར་ཕྱོགས་བཟང་པོ་གཉིས་པར་བཀོད་པ་འབྲེལ་བཅས་སངས་རྒྱས་ཀརྨ་ཀའི་གོ་འཕང་ལ་རེག་པར་གྱུར་ཅིག །མངྒ་ལམ།། །།