ཀརྨ་པ་བདུད་འདུལ་རྡོ་རྗེའི་བླ་སྒྲུབ།
༈ རང་ཉིད་ཐ་མལ་སྤྱི་བོར་པདྨ་དཀར། །འདབ་རྒྱས་དེ་སྟེང་ཟླ་དཀྱིལ་དྲི་མེད་དབུས། །རྒྱལ་ཀུན་ཕྲིན་ལས་བདག་པོ་ཀརྨ་ཀ། རྗེ་བཙུན་བདུད་ཚོགས་འདུལ་བའི་རྡོ་རྗེ་མཆོག །སྐུ་མདོག་དཀར་གསལ་མཚན་དཔེའི་རྒྱན་རྣམས་རྫོགས། །ཞྭ་ནག་གསེར་མདངས་རིན་ཆེན་རྒྱན་སྤྲས་གསོལ། །སྤྱན་གཉིས་དོན་དམ་ཆོས་ཉིད་དབྱིངས་སུ་གཟིགས། །ཆོས་གོས་རྣམ་གསུམ་ན་བཟས་ཀུན་ཏུ་བཀླུབས། །ཕྱག་གཡས་མཆོག་སྦྱིན་གཡོན་པས་པད་དཀར་འཛིན། །ཞབས་གཉིས་རྡོ་རྗེ་སྐྱིལ་མོ་ཀྲུང་གིས་བཞུགས། །ཡེ་ཤེས་ལྔ་ལྡན་འཇའ་འོད་གཏིབས་པའི་ཀློང་། །གསལ་སྟོང་སྒྲིབ་མེད་སྐུ་རུ་གསལ་བར་གྱུར། །སྟེང་འོག་བར་མཚམས་འཇའ་འོད་ཐིག་ལེའི་ཀློང་། །བཀའ་བརྒྱུད་རིག་འཛིན་གྲུབ་ཐོབ་རྒྱ་མཚོ་དང་། །རྒྱུད་སྡེ་རབ་འབྱམས་ཡི་དམ་ཞི་ཁྲོའི་ཚོགས། །ཆོས་ཀྱི་སྲུང་མ་མ་མགོན་ལྕམ་དྲལ་དང་། །དམ་ཅན་གཏུམ་རྔམ་དྲག་ཤུལ་ལྡན་པའི་ཚོགས། །སྣ་ཚོགས་སྐུ་དང་ཆ་ལུགས་ཅིར་ཡང་སྒྱུར། །མེ་རླུང་འཚུབས་མའི་ནང་དུ་མངོན་སུམ་གསལ། །དེ་ལྟར་སྐྱབས་ཡུལ་དཀོན་མཆོག་རྩ་གསུམ་ལ། །བདག་སོགས་སེམས་ཅན་རྣམས་ཀྱི་ལུས་རྡུལ་སྙེད། །གྲངས་མེད་དུ་མར་སྤྲུལ་ཏེ་རྩེ་གཅིག་པའི། །སྒོ་གསུམ་དང་བའི་ཡིད་ཀྱིས་ཕྱག་འཚལ་ཞིང་། །ཀུན་ཏུ་བཟང་པོའི་མཆོད་པའི་སྤྲིན་གྱིས་
མཆོད། །མི་དགེ་ནོངས་པའི་ལས་གྱུར་མཐོལ་ལོ་བཤགས། །གཞན་ཕན་བྱང་ཆུབ་སྤྱོད་ལ་རྗེས་ཡི་རངས། །ཆོས་འཁོར་རྒྱུན་ཆད་མེད་པར་བསྐོར་བར་བསྐུལ། །དད་དང་མོས་པའི་བློ་ཡིས་གསོལ་བ་འདེབས། །དུས་གསུམ་བསགས་དགེ་མྱང་འདས་རྒྱུ་རུ་བསྔོ། །ཞེན་ལོག་ངེས་འབྱུང་དྲག་པོས་རྒྱུད་བརླན་ཅིང་། །གདོད་ནས་དོན་དམ་ལྷན་སྐྱེས་ཡེ་ཤེས་ཀྱི། །འོད་ཟེར་སྣང་བས་མ་རིག་སྒྲིབ་པའི་ཚོགས། །མུན་པའི་དྲ་བ་རྩད་ནས་གཞིལ་བ་དང་། །སེམས་ཉིད་ཆོས་སྐུའི་ངོ་བོ་གནད་མཐོང་ཞིང་། །སྐུ་བཞིའི་ངོ་བོ་མངོན་དུ་གྱུར་ནུས་པའི། །སྐྱབས་ཡུལ་དམ་པས་མྱུར་བར་བྱིན་རློབས་ཤིག །ཀརྨ་པ་མཁྱེན་ནོ། །ཅི་ནུས་བརྗོད་མཐར། འཕགས་པ་སྙིང་རྗེའི་རང་གཟུགས། །རྒྱལ་མཆོག་ཕྱག་ན་པདྨོ། །སྤྱན་རས་གཟིགས་དངོས་དམ་པ། །གྲུ་འཛིན་ཕྲེང་བ་རིམ་བྱོན། །བཅུ་གསུམ་བདུད་འདུལ་རྡོ་རྗེ། །ཐུགས་བསྐྱེད་གཏིང་མཐའ་ཡས་པས། །བསྐལ་པར་མཆོག་གི་སྤྲུལ་སྐུ། །རྒྱུན་མི་ཆད་པར་སྟོན་པའི། །འགྲོ་དྲུག་སྐྱབས་གནས་གཅིག་པུ། །རྗེ་བཙུན་ཁྱེད་རང་མཁྱེན་ནོ། །བདག་དང་བདག་འདྲའི་སེམས་ཅན། །ཉོན་མོངས་འཁོར་བའི་འདམ་ལས། །མྱུར་དུ་སྒྲོལ་བར་བྱིན་རློབས། །སྟན་ཐོག་འདི་རུ་བྱིན་རློབས། །བརྩེ་བ་ཆེན་པོས་བྱིན་རློབས། །ཡེ་ཤེས་འཕོ་བར་བྱིན་རློབས། །མཐར་ནི་སྐྱབས་ཡུལ་ཐམས་ཅད་འོད་ཞུ་ནས། །རྩ་བའི་བླ་མའི་སྐུར་ཐིམ་དེ་ཉིད་ཀྱི། །སྐུ་ལས་འོད་ཟེར་དཀར་དམར་སྔོ་སེར་
ལྗང་། །འཕྲོས་ཏེ་རང་ལུས་ལ་ཐིམ་སླར་ཡང་ནི། །དགྱེས་པ་དང་བཅས་འོད་དུ་ལྟེམ་གྱིས་ཞུ། །དབྱེར་མེད་གཅིག་འདྲེས་ཆུ་ལ་ཆུ་བཞག་ལྟར། །དུས་གསུམ་རྟོག་པ་མ་ལུས་རྒྱུན་བཅད་ནས། །མ་བཅོས་སོ་མའི་ངང་དུ་མཉམ་པར་བཞག །དགེ་འདི་བདག་གཞན་སེམས་ཅན་ཀུན། །སྤྱན་རས་གཟིགས་དབང་སྐུ་ཐོབ་ནས། །རིགས་དྲུག་འཁོར་བ་དོང་སྤྲུག་གི། །ཕྲིན་ལས་ཚད་མེད་འགྲུབ་གྱུར་ཅིག །ཅེས་པའང་དད་གསུམ་མངོན་མཐོ་རྗེ་སྟོད་མཛོད་པ་ཤཱཀྱ་དར་རྒྱས་ཀྱིས་བསྐུལ་བཞིན་ཀརྨའི་གདན་སར་ས་ཟླའི་དུས་ཆེན་ལ་སི་ཏུ་པདྨ་ཉིན་བྱེད་དབང་པོས་སྤེལ་བ་ཛ་ཡ།། །།