བླ་མའི་རྣལ་འབྱོར་སངས་རྒྱས་ལག་གཏད་ཡེ་ཤེས་རང་འབར།
བླ་མའི་རྣལ་འབྱོར་སངས་རྒྱས་ལག་གཏད་ཡེ་ཤེས་རང་འབར་བཞུགས། ༀ་མ་ཧཱ་ཤཱུ་ཎྱ་ཏ་སོགས་ཀྱིས་སྟོང་པར་སྦྱངས། སྤྱི་བོར་པད་དཀར་འདབ་སྟོང་དྲི་མེད་སྟེང་། །ཆུ་ཤེལ་དབང་པོ་ཆ་ཤས་ཡོངས་རྫོགས་དབུས། །དུས་གསུམ་རྒྱལ་བའི་སྤྱི་དཔལ་འཁོར་ལོའི་མགོན། །འཕགས་པའི་སར་གནས་བྱང་ཆུབ་སེམས་དཔའ་མཆོག །རྗེ་བཙུན་བདུད་འདུལ་རྡོ་རྗེ་ཞལ་གཅིག་པ། །ཕྱག་གཉིས་ས་གནོན་མཉམ་བཞག་ཚེ་བུམ་བསྣམས། །ཆོས་གོས་རྣམ་གསུམ་ཟབ་བེར་ཟླུམ་གསོལ་ཞིང་། །དབུ་ལ་མཐོང་གྲོལ་ཞྭ་ནག་གསེར་མདངས་མཛེས། །སྤྱན་གཉིས་ཆོས་ཉིད་དོན་དམ་དབྱིངས་ལ་གཟིགས། །ཞབས་གཉིས་རྡོ་རྗེ་སྐྱིལ་ཀྲུང་གཡོ་མེད་ངང་། །འོད་དང་འོད་ཟེར་ཟེར་ཐག་ཀུན་ཏུ་འཕྲོ། །བཀའ་བརྒྱུད་གྲུབ་ཐོབ་རྒྱ་མཚོ་སྤྲིན་ལྟར་གཏིབས། །ཡི་དམ་དཔའ་བོ་ཌཱ་ཀི་ཆོས་སྲུང་མ། །ཆར་ལྟར་བབ་ཅིང་དངོས་གྲུབ་
བྱིན་ཆེན་འབེབས། །མོས་གུས་གསོལ་བཏབ་ཙམ་གྱིས་སྣང་སྲིད་ཞིང་། །དག་པ་བླ་མའི་དཀྱིལ་འཁོར་བསྒྱུར་ནུས་པའི། །གདུང་ཤུགས་དྲག་པོའི་དབྱངས་ཀྱིས་བསྐུལ་ལགས་ན། །ཐུགས་རྗེ་ཅན་གྱི་བཀའ་བརྒྱུད་བླ་མ་རྣམས། །བདག་རྒྱུད་ཡེ་ཤེས་བདེ་ཆེན་རང་འབར་ནས། །གཟུང་འཛིན་འཆིང་བ་མ་ལུས་དབྱིངས་སུ་དག །སྟན་ཐོག་འདི་རུ་མཆོག་དངོས་ཐོབ་ནུས་པའི། །མི་འགྱུར་དོན་གྱི་བྱིན་རླབས་འཕོ་དབང་སྩོལ། །ཅེས་བསྐྱེད་དང་འབེབས་པའི་དམིགས་པ་དང་། དེ་ནས། བླ་མ་ལ་གསོལ་བ་འདེབས་སོ། །བཀའ་བརྒྱུད་ཀུན་འདུས་ངོ་བོ་ལ་གསོལ་བ་འདེབས་སོ། །རྒྱལ་དབང་ཀརྨ་པ་ལ་གསོལ་བ་འདེབས་སོ། །བཅུ་གསུམ་བདུད་འདུལ་རྡོ་རྗེ་ལ་གསོལ་བ་འདེབས་སོ། །རབ་འབྱམས་ཞིང་ཀུན་སྐུ་ཡིས་ཁྱབ་པ་ལ་གསོལ་བ་འདེབས་སོ། །སྐུ་དང་ཞིང་ཁམས་ཐ་མི་དད་པ་ལ་གསོལ་བ་འདེབས་སོ། །ཆོས་དབྱིངས་ཡེ་ཤེས་ངང་ནས་ཐུགས་རྗེས་གཟིགས་ཤིག །བདག་སོགས་སེམས་ཅན་ངན་སོང་གཡང་ལས་སྒྲོལ་ཅིག །མི་རྟག་སྐྱོ་ཤས་ངེས་འབྱུང་རྒྱུད་ལ་སྐྱེ་བར་གྱུར་ཅིག །སྐྱེས་ནས་དམ་པའི་ཆོས་ཀྱི་སྐལ་བ་དང་ལྡན་པར་གྱུར་ཅིག །ཉམས་ལེན་ཚེ་གཅིག་རྡོ་རྗེ་འཆང་ཆེན་འགྲུབ་པར་གྱུར་ཅིག །ཀརྨ་པ་མཁྱེན་ནོ། །ཅི་ནུས་བགྲང་མཐར། ཆོས་སྐུ་སྣང་མཐའ་ལོངས་སྐུ་སྤྱན་རས་གཟིགས། །སྤྲུལ་སྐུ་པད་འབྱུང་སྐུ་གསུམ་འདུས་པའི་དཔལ། །བྱམས་མགོན་སེང་གེ་ལ་སོགས་བསྐལ་བཟང་གི། །འདྲེན་པ་རྣམས་ཀྱི་
ཐུགས་རྗེའི་ནུས་མཐུ་རྩལ། །ཀུན་འདུས་སངས་རྒྱས་ཕྲིན་ལས་རོལ་པ་འཆང་། །གང་དེར་སྙིང་ནས་གསོལ་འདེབས་བདག་རྒྱུད་ཀྱི། །མ་རིག་དབང་གྱུར་དུག་ལྔའི་སྡིག་སྒྲིབ་ཚོགས། །སྡོམ་གསུམ་འགལ་བའི་ལས་བགྱིས་མཐོལ་ལོ་བཤགས། །ཕྱིན་ཆད་ཀུན་རྟོག་རྐྱེན་གྱིས་མི་ལྡང་བར། །བྱིན་གྱིས་རློབས་ཤིག་བདེ་ཆེན་འཁོར་ལོའི་མགོན། །ངན་སོང་རིགས་དྲུག་སྐྱེ་སྒོ་བཅད་དུ་བསོལ། །རྣམ་དག་བདེ་བ་ཅན་དུ་ལམ་སྣ་དྲོངས། །གདོད་མའི་གནས་ལུགས་མངོན་གྱུར་བྱིན་གྱིས་རློབས། །དཔལ་ལྡན་བླ་མའི་གནས་བཞིར་རྡོ་རྗེ་བཞིའི། །ངོ་བོ་སྣ་ཚོགས་འོད་འཕྲོས་རང་གནས་བཞིར། །ཐིམ་པས་དབང་བཞི་ཐོབ་ཅིང་སྒྲིབ་བཞི་དག །སྐུ་བཞི་ཐོབ་ཅིང་དགྱེས་པའི་འཛུམ་ཞལ་གྱི། །བྱང་ཆུབ་བར་དུ་འདུ་འབྲལ་མེད་པ་ཡི། །དབུགས་དབྱུང་རྡོ་རྗེའི་གསུང་གི་གནང་བ་བཅས། །འོད་དཀར་ལྟེམས་ཀྱིས་ཞུ་ནས་རང་ལུས་ཐིམ། །བདེ་གསལ་མི་རྟོག་རང་བྱུང་རིག་པའི་མདངས། །བྱར་མེད་བློ་འདས་བདེ་བ་ཆེན་པོའི་ངང་། །ཞེས་མཉམ་བཞག་དང་བཅས་ཉམས་ལེན་ངང་ལ་དར་ཅིག་བཞག །མཐར། དགེ་འདིའི་འགྲོ་བ་མ་ལུས་རྡོ་རྗེ་སེམས། །སོགས་ཤླཽ་ཀ་གཅིག་གིས་བསྔོ་བ་དང་། ཟབ་ལམ་རྣལ་འབྱོར་སྒྲུབ་པའི་དགེ་ཚོགས་མཐུས། །སྟན་ཐོག་འདི་རུ་བདེ་ལྡན་ཞིང་བགྲོད་ཅིང་། །མཁའ་མཉམ་མ་གྱུར་ཀུན་ཀྱང་སྲིད་ཞི་ལ། །མི་གནས་བྱང་ཆེན་འདྲེན་པའི་དཔལ་གྱུར་ཅིག །ཅེས་པའི་སྨོན་ལམ་མདོར་བསྡུས་དང་། །གཞན་ཡང་སྨོན་ལམ་གང་ཤེས་བྱའོ། །དེ་ལྟར་ཁང་གསར་ཀརྨ་འཆི་མེད་རྒྱ་མཚོ་ནས་
ཁོ་བོའི་རྣལ་འབྱོར་ཞིག་ནན་གྱིས་བསྐུལ་ཡང་། རང་གིས་གཞིགས་འབྲེལ་གྱིས་རྒྱལ་མཆོག་བཅུ་གསུམ་པ་ཞལ་མཐོང་གསུང་གི་བདུད་རྩི་ཐོབ་པའི་སངས་རྒྱས་དངོས་སྣང་རྒྱལ་བའི་ལུང་ཟིན་ཉིད་དུ་ཚད་མར་གྲུབ་པ་མཆོག་དེའི་རྣལ་འབྱོར་བྱིན་རླབས་ཀྱི་དགོས་ཁྱད་ཆེ་བའི་ཆེད་དུ་བྱས་ཏེ། དགེ་བས་བདག་གཞན་འགྲོ་རྣམས་མགོན་དེའི་ཐུགས་རྗེས་སྐྱོང་བར་གྱུར་ཅིག། །།ༀ་ཨཱཿཧཱུྃ། རང་སྣང་རྣམ་དག་གཞལ་ཡས་ཁང་གི་དབུས། །རང་སེམས་བདེ་གཤེགས་སྙིང་བོའི་སྣང་བའི་ཆ། །ཡི་དམ་གདན་གསུམ་ཚང་བའི་སྐུར་གསལ་བའི། །མདུན་མཁར་འཇའ་འོད་ཟེར་ཀློང་སེང་ཁྲི་དང་། །པད་དཀར་ཟླ་སྟེང་རྩ་བའི་བླ་མ་མཆོག །སྤྱན་རས་གཟིགས་དངོས་རྗེ་བཙུན་ཀརྨ་པ། །བདུད་འདུལ་རྡོ་རྗེ་ཞྭ་ནག་གསེར་མདངས་ཅན། །བགྲེས་ཚུལ་རབ་བྱུང་ཆ་ལུགས་ཕྱག་ས་གནོན། །མཉམ་བཞག་ཚེ་ཡི་བུམ་འཛིན་ཞབས་རྡོར་སྐྱིལ། །ཟླ་བའི་རྒྱབ་ཡོལ་དང་བཅས་ལྷམ་མེར་ཞུགས། །གཞན་ཡང་རྩ་བར་བརྒྱུད་པའི་བླ་མ་དང་། །ཡི་དམ་ཌཱ་ཀི་ཆོས་སྐྱོང་སྤྲིན་ལྟར་གཏིབས། །དྲན་ཙམ་བདེ་ཆེན་ཡེ་ཤེས་ཕྱག་རྒྱ་ཆེའི། །ཉམས་རྟོགས་ཡོན་ཏན་རྒྱུད་ལ་བསྐྱེད་ནུས་གསལ། །ཀྱེ་ཧོཿརབ་འབྱམས་རྒྱལ་བ་ཀུན་འདུས་རྡོ་རྗེ་འཆང་། །ལུང་རྟོགས་དམ་ཆོས་རྒྱ་མཚོའི་འབྱུང་གནས་ཆེ། །ཚོགས་མཆོག་དགེ་འདུན་ཀུན་གཙོ་རིགས་དཀྱིལ་བདག །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །ཞེས་དང་། ༀ་ཨཱཿམཱ་ར་ད་མ་ཀ་བཛྲ་ཧཱུྃ།
ཅེས་པའི་སྔགས་ཀྱང་བཟླས་མཐར། དཔལ་ལྡན་བླ་མ་རྡོ་རྗེ་ཅན། །སྲིད་པའི་འཇིགས་ལས་སྒྲོལ་བ་པོས། །སྐུ་གསུང་ཐུགས་དང་ཡེ་ཤེས་ཀྱི། །དབང་བཞི་བསྐུར་བར་མཛད་དུ་གསོལ། །ཞེས་གསོལ་བཏབ་པས་བླ་མ་ཡི། །རྡོ་རྗེ་བཞིི་ཡི་ས་བོན་འོད། །གནས་བཞིར་ཐིམ་པས་དབང་བཞི་ཐོབ། །བླ་མ་འོད་ཞུ་རང་ལ་ཐིམ། །རང་སེམས་མ་བཅོས་སོ་མའི་ངང་། །ཡེངས་མེད་དེ་ཡི་ངོ་བོ་སྐྱོང་། །བླ་མ་ཆོས་སྐུའི་རང་ཞལ་མཇལ། །ལྷུན་གྲུབ་གདོད་མའི་གནས་ཐོབ་གྱུར། །དགེ་བ་འདི་ཡིས་མྱུར་དུ་བདག །དཔལ་ལྡན་བླ་མ་འགྲུབ་གྱུར་སོགས་བརྗོད། ཅེས་ཁྲ་འགུ་དགོན་བློ་གྲོས་ཉི་མའི་སྤྲུལ་སྐུའི་བཞེད་ངོར་དགེ། །།