བླ་མའི་རྣལ་འབྱོར་དོན་གཉིས་ཡོངས་འདུ་དངོས་གྲུབ་མཆོག་སྩོལ།
བླ་མའི་རྣལ་འབྱོར་དོན་གཉིས་ཡོངས་འདུ་དངོས་གྲུབ་མཆོག་སྩོལ་བཞུགས། ན་མོ་གུ་རུ་བཛྲ་དྷ་ར་ཡ། འདིར་བླ་མའི་རྣལ་འབྱོར་ཁྱེར་བདེར་བཀོད་པ་ལ། དེ་ཡང་ཚོགས་དང་མཆོད་པ་འབྲེལ་པ་ཕན་ཡོན་བྱིན་རླབས་ཀྱི་ཚན་ཁ་ལྷག་པར་ཐོབ་པ་སྟེ། རིམ་ལྔ་ལས། མཆོད་པ་ཐམས་ཅད་ཡོངས་སྤངས་ནས། །བླ་མ་མཆོད་པ་ཡང་དག་བརྩམས། །དེ་མཉེས་པས་ནི་ཀུན་མཁྱེན་གྱི། །ཡེ་ཤེས་མཆོག་ནི་ཐོབ་པར་འགྱུར། །ཅེས་གསུངས་པ་ལྟར། རྟེན་གྱི་དྲུང་དུ། མཆོད་པའི་བྱེ་བྲག་ཐམས་ཅད་འདུ་བགྱིས་ལ། བདེ་བའི་སྟན་ལ་འཁོད་ནས། དང་པོ་སྐྱབས་སེམས་ནི། ན་མོ། དུས་གསུམ་སྟོན་མཆོག་ཆགས་བྲལ་དམ་པའི་ཆོས། །རིག་གྲོལ་ཚོགས་དང་རྩ་གསུམ་རབ་འབྱམས་ལྷ། །ཀུན་འདུས་དབྱེར་མེད་བླ་མར་སྐྱབས་སུ་མཆི། །འགྲོ་རྣམས་བྱང་ཆུབ་ཐོབ་པར་སེམས་བསྐྱེད་དོ། །ལན་གསུམ་དང་། གཉིས་པ་མཆོད་རྫས་བྱིན་བརླབ་ནི། ཨ་མྲྀ་ཏས་བསངས། སྭ་བྷཱ་ཝས་སྦྱངས་། ༀ་ལས་རིན་ཆེན་སྣོད་རྣམས་སུ། །ཧཱུྃ་ཡིག་འོད་ཞུ་ལྷ་ཡི་རྫས། །རྡོ་རྗེའི་མཆོད་པའི་སྤྲིན་རྒྱ་མཚོ། །ཀུན་བཟང་སྨོན་ལམ་ཇི་བཞིན་གྱུར། །ༀ་བཛྲ་ཨརྒྷཾ་ཨཱཿཧཱུྃ་སྭཱ་ཧཱ། །དེ་བཞིན། པཱ་དྱཾ་ནས། ཤབྡའི་བར་
དང་། གསུམ་པ་རང་ལྷར་གསལ་བའི་མདུན་མཁར་བསྐྱེད་པའི་རིམ་པ་བསྟན་པ་ནི། ༀ་སྭ་བྷཱ་ཝས་སྦྱངས། སྟོང་པའི་ངང་ལས་མདུན་མཁར་འོད་ལྔའི་ཀློང་། །བྷྲཱུྃ་ལས་རིན་ཆེན་གཞལ་མེད་ཁང་ཆེན་པོ། །གྲུ་བཞི་སྒོ་བཞི་མཚན་ཉིད་ཡོངས་སུ་རྫོགས། །དེ་དབུས་གྱད་དང་སེང་ཆེན་བཞིས་བཏེགས་ཁྲིར། །ལྷ་མིའི་དཔལ་འབྱོར་བཀོད་ལེགས་ཕུན་ཚོགས་སྟེང་། །པྃ་ལས་པད་དཀར་འདབ་སྟོང་གེ་སར་རྒྱས། །ཨ་ལས་ཉ་གང་ཆུ་ཤེལ་དབང་པོས་མཚན། །དེ་སྟེང་རྒྱལ་ཀུན་གསུང་གི་ངོ་བོ་ཧྲཱིཿ། འོད་འཕྲོས་འཕགས་མཆོད་འགྲོ་བའི་སྒྲིབ་གཉིས་སྦྱང་། །ཚུར་འདུས་ཡོངས་གྱུར་འཇིག་རྟེན་དབང་ཕྱུག་མགོན། །ས་ར་ཧ་ཡི་རྣམ་རོལ་སྤྲུལ་པའི་སྐུ། །དཔལ་ལྡན་གྲུབ་མཆོག་དགེ་ལེགས་རབ་རྒྱས་ནི། །བདེ་ཆེན་གཟི་བྱིན་རབ་འབར་བརྗིད་བག་ཅན། །ཞལ་གཅིག་ཞལ་འཛུམ་དབུ་ལ་སྒོམ་ཞུ་གསོལ། །སྤྱན་ཟུང་ལྟ་སྟངས་ཆོས་ཉིད་དབྱིངས་ལ་གཟིགས། །ཕྱག་གཉིས་ཌཱ་དྲིལ་གྲག་སྟོང་སྒྲ་སྒྲོག་ཅིང་། །ལེ་བརྒན་དར་གྱི་ཆོས་གོས་རྣམ་གསུམ་དང་། །ཟ་འོག་བེར་ཆེན་ཟླུམ་འཁྱིལ་ལྷབ་མ་ལྷུབ། །ཞབས་གཉིས་སེམས་དཔའི་སྐྱིལ་ཀྲུང་དང་བཅས་བཞུགས། །ཡེ་ཤེས་རང་འོད་འཕྲོ་བའི་ཀློང་དུ་གསལ། །དཔྲལ་མགྲིན་ཐུགས་ཀར་འབྲུ་གསུམ་མཚན་པར་གྱུར། །གཞན་ཡང་སྟེང་འོག་ཕྱོགས་མཚམས་བར་མེད་དུ། །བཀའ་བརྒྱུད་བླ་མ་ཡི་དམ་དཔའ་བོ་དང་། །མཁའ་འགྲོ་ཆོས་སྐྱོང་ལ་སོགས་སྐྱབས་ཡུལ་རྣམས། །སྤྲིན་
ཕུང་གཏིབས་བཞིན་གསལ་སྟོང་འཛིན་མེད་པ། །རྣམ་དག་དཀྱིལ་འཁོར་རང་བཞིན་ལྷུན་གྱིས་རྫོགས། །ཐུགས་ཀའི་ཧཱུྃ་ལས་འོད་འཕྲོས་པོ་ཊ་ལ། །བདེ་ལྡན་ཞིང་དང་དཔལ་གྱི་རི་བོ་ནས། །འགྲོ་བའི་དོན་དུ་སྙིང་རྗེས་བརྩེར་དགོངས་ལ། །འཁོར་བཅས་སྤྱན་འདྲེན་གནས་འདིར་གཤེགས་སུ་གསོལ། །ༀ་ཤྲཱི་མཱན་གུ་རུ་དེ་ཝ་ཌཱ་ཀི་ནི་དྷརྨ་པཱ་ལ་ས་པ་རི་ཝཱ་ར་བཛྲ་ས་མ་ཡ་ཛཿཛཿབཞི་པ་བྱིན་འབེབས་ཅིང་སྤྱན་འདྲེན་པ་ནི། ཧཱུྃ། སྐྱེ་མེད་སྤྲོས་བྲལ་ཀློང་ཡངས་ནས། །རྒྱལ་བ་རབ་འབྱམས་རྒྱ་མཚོའི་དབུས། །སྤྱན་རས་གཟིགས་དབང་སྐུ་བསྐྱོད་འཚལ། །དབང་བཞི་བསྐུར་ལ་བྱིན་ཆེན་ཕོབ། །རང་བྱུང་ཐུགས་རྗེའི་རོལ་པ་ལས། །བརྟུལ་ཞུགས་སྤྱོད་པ་འཆང་རྣམས་དང་། །བྲམ་ཟེ་ཆེན་པོ་འདིར་གཤེགས་ལ། །སྨིན་ཅིང་གྲོལ་བའི་བྱིན་ཆེན་ཕོབ། །འགྲོ་བའི་དོན་དུ་གཟུགས་སྐུར་བསྟན། །རིག་འཛིན་རྣལ་འབྱོར་འཁོར་ཚོགས་བཅས། །གྲུབ་མཆོག་བླ་མ་གནས་འདིར་བྱོན། །དབང་བསྐུར་བྱིན་རླབས་དངོས་གྲུབ་སྩོལ། །ཛྙཱ་ན་བཛྲ་ཨཱ་ཝེ་ཤ་ཡ་ཨཱ་ཝེ་ཤ་ཡ་ཨ་ཨཿཛཿཧཱུྃ་བྃ་ཧོཿཞེས་དམ་ཡེ་དབྱེར་མེད་དུ་མོས་ལ། ལྔ་པ་དབང་བསྐུར་རྒྱས་གདབ་ནི། སླར་ཡང་ཐུགས་ལས་འོད་འཕྲོས་ཏེ། །རང་བཞིན་གནས་ནས་དབང་གི་ལྷ། །སྤྱན་དྲངས་དབང་བསྐུར་ཁྲུས་གསོལ་ནས། །རིགས་བདག་སྣང་མཐས་དབུ་བརྒྱན་གྱུར། །དྲུག་པ་མཆོད་པ་འབུལ་བ་ནི། དྲི་མེད་རྣམ་དག་རབ་དཀར་མོས་པའི་
བློས། །དྲངས་པའི་ལེགས་བྱས་རང་གཟུགས་ལྷ་ལམ་ཁྱོན། །དོག་པོར་གྱུར་པའི་རྡོ་རྗེའི་མཆོད་པའི་སྤྲིན། །ཐུགས་རྗེས་འགྲོ་བའི་དོན་ཕྱིར་བཞེས་སུ་གསོལ། །ༀ་བཛྲ་ཨརྒྷཾ་པྲ་ཏཱི་ཙྪ་ཨཱཿཧཱུྃ། ནས། ཤབྡའི་བར་དང་། གཞན་ཡང་ལྷ་མིའི་བདོག་པ་མཆིས་སོ་ཅོག །ཡིད་སྤྲུལ་དངོས་འབྱོར་ལོངས་སྤྱོད་དཔག་མེད་རྣམས། །མཎྜལ་གཅིག་ཏུ་བསྡུས་ནས་འབུལ་ལགས་ན། །བཞེས་ནས་བླ་མེད་གྲུབ་གཉིས་སྩལ་དུ་གསོལ། །གུ་རུ་ཨི་དཾ་མཎྜལ་ཀཾ་ནིཪྻ་ཏ་ཡ་མི། བདུན་པ་བཟླས་པ་བྱ་བ་ནི། མདུན་བསྐྱེད་ཐུགས་ཀར་ཟླ་སྟེང་ཧྲཱིཿམཐར་སྔགས། །འཁོར་བའི་འོད་ཀྱིས་རྒྱལ་མཆོད་དངོས་གྲུབ་ཐོབ། །འགྲོ་དྲུག་སྒྲིབ་སྦྱང་ཀུན་ཀྱང་ཡེ་ཤེས་ཀྱི། །རོལ་པ་ཆེན་པོའི་རང་བཞིན་ཉིད་དུ་གྱུར། །ༀ་ཨཱཿསིདྡྷ་པ་ར་མ་སྭ་སྟི་ཧཱུྃ། ཅེས་མཚན་སྔགས་ཅི་འགྲུབ་བཟླས་ལ། བརྒྱད་པ་ཚོགས་གཉིས་སྤེལ་ཕྱིར་དཔའ་བོའི་དགའ་སྟོན་ནི། ཨམྲྀ་ཏས་བསངས་། སྭ་བྷཱ་ཝས་སྦྱངས་། སྟོང་པའི་ངང་ལས་རླུང་མེ་ཐོད་སྒྱེད་སྟེང་། །ཨ་ལས་མཚན་ལྡན་བདེ་སྐྱོང་ཀ་པཱ་ལ། །ཡངས་ཤིང་རྒྱ་ཆེའི་ནང་དུ་ཤ་ལྔ་དང་། བདུད་རྩི་ལྔ་པོ་ས་བོན་མཚན་པ་ལས། །འོད་འཕྲོས་དམ་ཡེ་གཉིས་མེད་རྒྱ་མཚོར་གྱུར། །ༀ་ཨཱ་ཧཱུྃ་ཧ་ཧོ་ཧྲཱིཿལན་གསུམ་བྱིན་བརླབས་ལ། གནས་གྲུ་འཛིན་པོ་ཊ་ལ་ཞིང་དང་། །བདེ་བ་ཅན་དཔལ་རི་པད་འོད་སོགས། །རང་བཞིན་གྱི་དག་པའི་དཀྱིལ་འཁོར་ནས། །ལྷ་ནོར་བུ་པདྨ་ཅན་ཉིད་དང་། །དབྱེར་མེད་པའི་མདའ་བསྣུན་
ཆེན་པོ་མཆོག །སྐུ་རྣམ་འཕྲུལ་གསུམ་ལྡན་རྡོ་རྗེ་འཛིན། །གང་མི་མངོན་ཡེ་ཤེས་ཀློང་ཡངས་ནས། །ཐུགས་བདེ་སྟོང་དབྱིངས་ནས་དགོངས་མཛོད་ལ། །དེང་སྐལ་ལྡན་རྡོ་རྗེའི་དམ་ཚིག་ཅན། །དད་མོས་ཀྱིས་མཆོད་པའི་ཞིང་འདི་རུ། །རྒྱལ་བ་དང་རྒྱལ་སྲས་ཐུ་བོ་རྣམས། །རྩ་གསུམ་ལྷ་སྤྲིན་ལྟར་འདུས་པའི་དབུས། །གནས་འདིར་སྤྱོན་ཚོགས་ལ་གཤེགས་སུ་གསོལ། །བླ་མེད་ཀྱི་མཆོད་པའི་ཁྱད་པར་མཆོག །ཐབས་ཤེས་རབ་གཉིས་མེད་ཚོགས་འཁོར་ལོ། །བདག་གུས་པས་འབུལ་ལོ་བརྩེ་བས་བཞེས། །མཆོག་ཐུན་མོང་དངོས་གྲུབ་སྩལ་དུ་གསོལ། །གུ་རུ་དེ་ཝ་ཌཱ་ཀི་ནི་དྷརྨ་པཱ་ལ་ས་པ་རི་ཝཱ་ར་པཉྩ་ཨ་མྲྀ་ཏ་ལ་ཁཱ་ཧི། ག་ཎ་ཙཀྲ་ལ་ཁཱ་ཧི། ཅེས་ཚོགས་ཕུད་ཕུལ་ནས་སྒྲུབ་པོ་རྣམས་ཀྱང་དངོས་གྲུབ་ལ་རོལ་ནས། དགུ་པ་ལྷག་མ་ནི། རྡོ་རྗེ་འཆང་གི་བཀའ་གཏེར་སྲུང་མ་གཉན། །མཁའ་འགྲོ་ཤུགས་འགྲོ་ལ་སོགས་སྤྲུལ་འཁོར་རྣམས། །ཕུད་དང་ལྷག་མའི་དམ་རྫས་འདི་བཞེས་ལ། །བསྟན་སྐྱོང་རྣལ་འབྱོར་བསྲུང་བའི་ཕྲིན་ལས་མཛོད། །ཨུཥྩིཊ་བ་ལིངྟ་ཁཱ་ཧི། དེ་ནས་བཅུ་པ་ནོངས་བཤགས་ནི། ཀྱཻ། སངས་རྒྱས་ཀུན་འདུས་བླ་མ་མཆོག །དཀྱིལ་འཁོར་ཁྱབ་བདག་ཧེ་རུ་ཀ། འཁོར་བཅས་དེང་འདིར་དགོངས་སུ་གསོལ། །མི་ཤེས་རྨོངས་པར་གྱུར་པ་ཡིས། །སྡོམ་གསུམ་འགལ་ཉམས་ཅི་མཆིས་རྣམས། །མཐོལ་བཤགས་མི་སྒྲིབ་ཚངས་པར་སྩོལ། །ཡི་གེ་བརྒྱ་པ་བརྗོད། བཅུ་གཅིག་པ་བྱིན་རླབས་བསྡུ་བ་ནི། སྐྱབས་ཡུལ་ཀུན་ཀྱང་
རིམ་བཞིན་འོད་ཟེར་གྱི། །རྣམ་པར་གཙོ་མཆོག་དཔལ་ལྡན་བླ་མར་ཐིམ། །དེ་ཡང་དགྱེས་པའི་འཛུམ་མདངས་དང་བཅས་ཏེ། །བྱིན་རླབས་དབང་གི་དགོངས་གཏད་མོད་ཉིད་ལས། །རྡོ་རྗེའི་སྐུ་གསུང་ཐུགས་དང་ཡེ་ཤེས་བཞིའི། །ངོ་བོ་འོད་ཟེར་དཀར་དམར་མཐིང་ལྗང་འཕྲོས། །རང་གི་གནས་བཞིར་ཐིམ་པས་སྒྲིབ་བཞི་དག །དབང་བཞི་མཆོག་ཐོབ་སྐུ་བཞི་མངོན་དུ་གྱུར། །བླ་མ་འོད་ཞུ་རང་དང་དབྱེར་མེད་ངང་། །གསལ་སྟོང་འཛིན་བྲལ་མ་བཅོས་མཉམ་པར་བཞག །དར་གཅིག་མི་རྟོག་པའི་ངང་དུ་བཞག་ལ། སླར་ཡང་རིག་རྩལ་ལྷ་ཡི་རོལ་པར་གསལ། །བཅུ་གཉིས་པ་དགེ་བ་བསྔོ་བ་ནི། རྡོ་རྗེའི་རྣལ་འབྱོར་འདིར་འབད་དགེ་བ་དང་། །དུས་གསུམ་ཟག་བཅས་ཟག་མེད་ལེགས་བྱས་བཅས། །རྨད་བྱུང་སྨོན་ལམ་ཟབ་མོས་མཚམས་སྦྱར་མཐུས། །བདག་གཞན་ཚེ་གཅིག་རྡོ་རྗེ་འཆང་འགྲུབ་ཤོག །བཅུ་གསུམ་པ་བཀྲ་ཤིས་བརྗོད་པ་ནི། རྒྱལ་ཀུན་ཡོངས་འདུ་བཀྲ་ཤིས་རྒྱ་མཚོའི་ཀློང་། །དོན་གཉིས་འབྲས་སྟེར་དགོས་འབྱུང་ཡིད་བཞིན་དབང་། །སྲིད་ཞིའི་གདུང་སེལ་འབད་མེད་འདོད་དགུའི་ཆར། །ཕན་བདེའི་དཔྱིད་དུ་འབབ་པའི་བཀྲ་ཤིས་ཤོག །དེ་ལྟར་དོན་ཚན་བཅུ་གསུམ་རྡོ་རྗེ་འཛིན་པའི་ས་ཡི་གྲངས་ལྡན་ཟབ་མོའི་རྣལ་འབྱོར་འདི་དག་ཟུར་མང་བླ་མ་བསྟན་འཛིན་པ་དེ་ཉིད་ཟག་མེད་ཐུགས་ཀྱི་དགོངས་པ་བདེ་ཆེན་ཆོས་དབྱིངས་ཀློང་དུ་བསྐང་བའི་ཕྱིར། སི་ཏུ་པདྨ་ཉིན་བྱེད་དབང་པོས་སྤེལ་བ་འགྲོ་རྣམས་ཟུང་འཇུག་རྡོ་རྗེ་འཆང་གི་གོ་འཕང་ཐོབ་པའི་རྒྱུར་གྱུར་ཅིག །དགེའོ། །མངྒ་ལམ།། །།