རིག་འཛིན་ཚེ་དབང་ནོར་བུའི་བླ་སྒྲུབ།
༈ རིག་འཛིན་ཚེ་དབང་ནོར་བུའི་བླ་སྒྲུབ་བཞུགས། རང་ཉིད་ལྷར་གསལ་སྤྱི་བོར་འོད་ལྔའི་ཀློང་། །པདྨ་ཉི་ཟླའི་སྟེང་དུ་ཧྲཱིཿཡིག་ལས། །འོད་འཕྲོས་དོན་གཉིས་བྱས་ནས་ཧེ་རུ་ཀ། རྡོ་རྗེ་ཚེ་དབང་ནོར་བུ་ཞི་མ་ཁྲོ། །སྤྱན་གསུམ་ལྟ་སྟངས་དབུ་ལ་པད་ཞུ་གསོལ། །ཕྱག་གཡས་རྡོ་རྗེ་གཡོན་པས་ཀ་པཱ་ལ། །བདུད་རྩིས་བཀང་དབུས་ཚེ་བུམ་ཤིང་ལོས་བརྒྱན། །མེ་ག་ལི་ལྗང་བླ་གོས་ངུར་སྨྲིག་བཀླུབས། །ཞབས་གཉིས་རོལ་སྟབས་བདེ་ཆེན་ཡེ་ཤེས་ཀྱི། །རང་འོད་རབ་འབར་གཟི་བྱིན་ལྡན་པར་གསལ། །གནས་གསུམ་འབྲུ་གསུམ་ཐུགས་ཀར་ཧྲཱིཿམཐར་སྔགས། །དེ་ལས་འོད་འཕྲོས་འཕགས་མཆོད་བྱིན་རླབས་བསྡུས། །རང་གཞན་སྒྲིབ་སྦྱོང་སྣོད་བཅུད་སྣང་སྲིད་ཀུན། །བླ་མའི་དཀྱིལ་འཁོར་ངོ་བོར་ལྷུན་གྱིས་གྲུབ། །ༀ་ཨཱཿཨཱ་ཡུཿཨིནྡྲ་མ་ཎི་ཧཱུྃ། ཅི་ནུས་བཟླས་ལ། སྐྱབས་ཡུལ་སྐུ་ལས་འོད་འཕྲོས་དབང་བཞི་ཐོབ། །སྒྲིབ་བཞི་དག་ནས་སྐུ་བཞི་མངོན་དུ་གྱུར། །བླ་མ་རང་ཐིམ་དབྱེར་མེད་མ་བཅོས་ངང་། །སྤྲོས་བྲལ་བདེ་བ་ཆེན་པོའི་ཀློང་དུ་བཞག །ཅེས་པའང་རྗེ་དྲུང་མཆོག་སྤྲུལ་རིན་པོ་ཀརྨ་ཆོས་རྒྱལ་ཕུན་ཚོགས་ཀྱི་བཞེད་ལྟར་སི་ཏུ་པདྨ་ཉིན་བྱེད་དབང་པོས་སྤེལ་བ་སརྦ་ཛ་ག་ཏཾ།། །།