བླ་མའི་རྣལ་འབྱོར་ཟབ་ལམ་མཐར་ཐུག་མཆོག་དངོས་བདུད་རྩིའི་བུམ་བཟང་།
བླ་མའི་རྣལ་འབྱོར་ཟབ་ལམ་མཐར་ཐུག་མཆོག་དངོས་བདུད་རྩིའི་བུམ་བཟང་བཞུགས། ན་མོ་གུ་རུ་པྲ་ཝཱ་ཀ་ར་ཡེ། འདིར་ལུང་ཟིན་སྐྱེས་མཆོག་རིག་འཛིན་བླ་མའི་རྣལ་འབྱོར་དང་འབྲེལ་བའི་ཚོགས་སྐོང་སྤྲོ་བ་དག་གིས་ཚོགས་གཉིས་སྤེལ་ཕྱིར་མཆོད་པ་རྣམས་གང་འབྱོར་འདུ་བར་བྱས་ལ། རང་ལྷའི་རྣལ་འབྱོར་དང་ལྡན་པས། རྙིང་ལུགས་ལྟར་གྱི་སྐྱབས་
སེམས་སྤྱི་མཐུན་སྔོན་དུ་འགྲོ་བས། ཤཱུནྱ་ཏའི་སྔགས་ཀྱིས་གཟུང་འཛིན་ཆོས་རྣམས་སྟོང་པར་སྦྱངས་ནས། སྟོང་ལས་མདུན་མཁར་འཇའ་ཚོན་ལྔ་ལྡན་གྱི། །ཐིག་ལེ་ཐིག་ཕྲན་འོད་དང་འོད་ཟེར་འཕྲོ། །དེ་དབུས་སྣ་ཚོགས་པདྨ་ཉི་ཟླའི་སྟེང་། །བུདྡྷ་ཐོད་ཕྲེང་ངོ་བོར་ཡོངས་གྲུབ་པ། །རྣམ་པ་ཐུགས་ཀྱི་རིག་འཛིན་འཁོར་ལོས་སྒྱུར། །ཧེ་རུ་ཀ་དཔལ་བརྟུལ་ཞུགས་སྤྱོད་པ་འཆང་། །ཀརྨ་རྣམ་རྒྱལ་རྡོ་རྗེ་རབ་བརྟན་རྩལ། །ཞལ་གཅིག་གཡུ་རལ་ལྕང་ལོ་སྤྲིན་ལྟར་གཏིབས། །སྤྱན་གཉིས་ལྟ་སྟངས་དོན་དམ་ཆོས་ཉིད་གཟིགས། །དབང་ཞུ་པདྨ་མཐོང་གྲོལ་ཅོད་པན་གསོལ། །ཕྱག་གཡས་ཅང་ཏེའུ་གཡོན་པས་ཐོད་ཆང་འཛིན། །ཤེས་རབ་སྙེམས་ཚུལ་ཁ་ཊཱཾ་གྲུ་མོར་བཅུག །རབ་བརྗིད་སྐུ་ནི་རི་རྒྱལ་ལྷུན་པོ་བཞིན། །མདོ་སྔགས་གཉིས་ལྡན་ཆ་ལུགས་ཡོངས་རྫོགས་པའི། །ཕོད་ཀ་སྟག་ཤམ་ཆོས་གོས་ཟབ་བེར་བཀླུབས། །ཞབས་གཉིས་རྒྱལ་པོ་རོལ་པའི་སྟངས་སྟབས་ཀྱིས། །སྣང་སྲིད་ཟིལ་གནོན་གར་ཉམས་དགུ་དང་ལྡན། །གནས་གསུམ་ༀ་དཀར་ཨཱཿདམར་ཧཱུྃ་མཐིང་མཚན། །རྡོ་རྗེ་གསུམ་གྱི་ངོ་བོར་ཡེ་ནས་གྲུབ། །གནམ་ས་བར་སྣང་ཆུ་འཛིན་ཕྲེང་བྲེས་དབུས། །བཀའ་བརྒྱུད་བླ་མ་ཡི་དམ་དཔའ་བོ་དང་། །རྣལ་འབྱོར་མ་ཚོགས་ཌཱ་ཀི་ཆོས་སྲུང་རྣམས། །བུ་ཡུག་འཚུབས་བཞིན་བྱིན་རླབས་ཆར་རྒྱུན་འབེབས། །ཀུན་ཀྱང་གསལ་སྟོང་འཛིན་མེད་ལྷམ་མེར་གསལ། །ཨེ་མ་ཧོ། ཀུན་ཁྱབ་སྤྲོས་བྲལ་ཡེ་ཤེས་ལྔ་ཀློང་དུ། །ལོངས་
སྤྱོད་ཡོངས་རྫོགས་གང་འདུལ་སྤྲུལ་པར་ཤར། །སྐལ་ལྡན་རྗེས་འཛིན་སྐལ་མེད་ཚར་གཅོད་འདྲེན། །ཕྲིན་ལས་བཞི་རྫོགས་མཐུ་སྟོབས་དབང་ཕྱུག་མཁྱེན། །ཆོས་དང་མཐུན་པའི་བསམ་དོན་ཡིད་བཞིན་འགྲུབ། །ཕྱི་ནང་གསང་བའི་བར་ཆད་སེལ་བྱིན་རློབས། །དེ་ལྟར་ལན་གསུམ་མམ་ལྔ་བདུན་བརྗོད་ལ། ཐུགས་ཀའི་ས་བོན་མཐར་སྔགས་ཕྲེང་། །སྤྲོ་སྡུས་པདྨ་འོད་ཞིང་ནས། །ཨོ་རྒྱན་རྗེ་འབངས་འཁོར་ཚོགས་བཅས། །བདག་མདུན་ལ་ཐིམ་དབྱེར་མེད་ངང་། །ཡེ་ཤེས་རྡོ་རྗེའི་གོ་འཕང་མཆོག །དངོས་གྲུབ་རྒྱུན་སྨིན་གྲོལ་ཐོབ་གྱུར། །ༀ་ཨཱཿབི་ཛ་ཡ་བཛྲ་ཧཱུྃ། གང་འགྲུབ་བཟླས་ལ་མཆོད་ཚོགས་བྱིན་རླབས་ནི། རྃ་ཡྃ་ཁྃ། ༀ་ཨཱཿཧཱུྃ། མཆོད་ཚོགས་རྣམ་དག་བདེ་ཆེན་གྱུར། །གདོད་ནས་ལྷུན་རྫོགས་གྲུབ་པའི་གནས། །ཨོ་རྒྱན་རང་བྱུང་དུར་ཁྲོད་ཆེ། །ཚོགས་ཁང་གཞལ་ཡས་བྱིན་རེ་ཆགས། །བླ་མེད་ཕྱི་ནང་གསང་མཆོད་རྫས། །ཚོགས་ཀྱི་འཁོར་ལོ་རྒྱ་ཆེན་པོ། །ཡེ་ཤེས་བདུད་རྩིའི་ཟེར་མ་ལས། །འདོད་ཡོན་ལྷ་མོས་གར་བསྒྱུར་ཞིང་། །ཟག་མེད་འདོད་དགུའི་ལོངས་སྤྱོད་སྤེལ། །ནམ་མཁའ་མཛོད་བཞིན་དང་རེ་སྤྲོ། །གྲུབ་པའི་རྣལ་འབྱོར་མཆེད་རྣམས་ཀྱང་། །ལྟ་སྤྱོད་ཚུལ་ལྡན་དམ་རེ་གཙང་། །དངོས་སུ་འབྱོར་དང་ཡིད་སྤྲུལ་པ། །ཀུན་བཟང་རྣམ་ཐར་འབྱམས་ཀླས་བཞིན། །སྣང་སྲིད་འཁོར་འདས་ཡོངས་བཀང་ནས། །ཕྱི་ནང་གསང་བ་ཡང་གསང་གི། །མཆོད་སྤྲིན་རབ་འབྱམས་རྒྱ་མཚོ་འདིས། །རྩ་གསུམ་འདུས་
པའི་ངོ་བོ་ཉིད། །ལུང་ཟིན་སྐྱེས་མཆོག་རྡོ་རྗེ་འཛིན། །སྒྲུབ་པའི་སྲོལ་གཏོད་བསྟན་པ་སྐྱོང་། །ཟབ་གཏེར་མངའ་བདག་རིག་སྔགས་འཆང་། །ཐེག་མཆོག་འོད་གསལ་ཨ་ཏིའི་ཆོས། །འགྲོ་རྒྱུད་མུན་སེལ་ལམ་བཟང་སྟོན། །རྣམ་རྒྱལ་རྡོ་རྗེའི་ཐུགས་དམ་བསྐང་། །གཞན་ཡང་བཀའ་བབས་ཆོས་ཀྱི་བདག །རྩ་བ་བརྒྱུད་པའི་བླ་མ་དང་། །ཡི་དམ་དཀྱིལ་འཁོར་ལྷ་ཡི་ཚོགས། །གནས་གསུམ་དཔའ་བོ་མཁའ་འགྲོ་དང་། །བཀའ་ཉན་གཏེར་བདག་ཆོས་སྲུང་རྣམས། །བསྐང་ངོ་བསྐལ་པ་ཐུགས་དམ་བསྐང་། །གཡར་དམ་གཉན་པོ་བསྐང་གྱུར་ནས། །དབང་དང་དངོས་གྲུབ་སྩོལ་བྱིན་རློབས། །བདག་ནི་ཉོན་མོངས་དུག་ལྔ་ཡི། །སྒྲིབ་པས་མ་རིག་དབང་གིས་ནི། །དམ་ཚིག་ཉམས་ཆག་འགལ་འཁྲུལ་སོགས། །ནོངས་གྱུར་ཐམས་ཅད་གནོང་འགྱོད་བཤགས། །ཆོས་ཀུན་ཡེ་ནས་མཉམ་ཉིད་ངང་། །བསྐང་དང་བཤགས་བྱ་བརྗོད་ལས་འདས། །མ་བཅོས་རང་བྱུང་ལྷུན་གྲུབ་རྩལ། །དོན་དམ་ཀ་དག་དབྱིངས་སུ་བསྐང་། །འཁོར་གསུམ་དམིགས་མེད་མཐའ་བྲལ་ཀློང་། །ཀུན་བཟང་རོལ་པར་སོར་ཆུད་ཤོག །ཅེས་ཚོགས་ཀྱི་མཆོད་པས་བསྐངས་ནས། དངོས་གྲུབ་ཀྱི་རྫས་ལ་རོལ་ཞིང་། ལྷག་མ་བཏང་བ། སྔགས་ཀྱི་བཀའ་སྲུང་དམ་ཚིག་ཅན། །མ་མོ་མཁའ་འགྲོ་ཤུགས་འགྲོ་སོགས། །ལྷག་གཏོར་བཞེས་ལ་བཅོལ་པའི་ལས། །མ་གཡེལ་མ་འདའ་ཕྲིན་ལས་མཛོད། །ཅེས་འབུལ། དེ་ནས་རྗེས་རིམ་བྱིན་རླབས་བསྡུ་བ་ནི། ན་མོ་གུ་རུ། སྤྲོས་བྲལ་ཆོས་དབྱིངས་ནམ་མཁའ་ཡངས་པ་
ལས། །བདེ་བ་ཆེན་པོ་མི་ཕྱེད་རྡོ་རྗེའི་བདག །ཨེ་ཝཾ་ཟུང་འཇུག་མཚོར་འཁྲུངས་པདྨ་སྐྱེས། །རིགས་ཀུན་ཁྱབ་བདག་མགོན་དེར་གསོལ་བ་འདེབས། །ལྔ་བརྒྱ་ཐ་མར་སྙིགས་དུས་སེམས་ཅན་རྣམས། །ཉོན་མོངས་རགས་པའི་མི་བསྲུན་འཆོལ་སྤྱོད་ངོར། །རྒྱལ་རྣམས་ཕྲིན་ལས་འཇུག་སྒོའི་གནས་དབེན་ཀྱང་། །ཨོ་རྒྱན་ཐུགས་བསྐྱེད་ལྷག་པར་རྗེས་སྐྱོང་བའི། སྤྲུལ་དང་ཡང་སྤྲུལ་གར་བསྒྱུར་རྣམ་རོལ་ནི། །སྣ་ཚོགས་བཀོད་པ་ཅིར་ཡང་འཆར་བ་ལས། །གང་འདིར་སྔགས་རིག་གྲུབ་པའི་སྤྱོད་འཆང་ཚུལ། །བླ་མེད་གསང་མཆོག་སྟོན་དེར་གསོལ་བ་འདེབས། །མི་ཕྱེད་འདུན་དང་དམ་ཚིག་རྣམ་དག་གི། གཞི་བརྟན་མོས་གུས་ལྟེམ་རྐྱང་བྲལ་བའི་ངང་། །བཅོས་མིན་གསོལ་འདེབས་བདག་ལ་བརྩེར་དགོངས་ཀྱཻ། །དབང་བཞི་བསྐུར་ཞིང་རྒྱུད་བཞི་སྨིན་པར་མཛོད། །ལམ་བཞི་འབྱོངས་ནས་སྐུ་བཞི་ཐོབ་བྱིན་རློབས། །དེ་ནས་སྐྱེད་པའི་དཀྱིལ་འཁོར་རང་ལ་ཐིམ། །བློ་འདས་བྱར་མེད་ཀུན་བཟང་གཉུག་མའི་གཤིས། །ཁྱབ་གདལ་ཀློང་ཡངས་སྐྱེ་མེད་ས་མ་དྷི། །ཨ་ཨ་ཨཱཿདེའི་ངང་དུ་གནས་ལུགས་ཀྱི་ངོ་བོ་སྐྱོང་། མཐར་བསྔོ་བ་སྨོན་ལམ་བཀྲ་ཤིས་སོགས་དཀྱུས་མཐུན་གྱིས་མཐའ་བརྒྱན་པར་བྱའོ། །དེ་ལྟར་ཀ་ཉིན་ལུང་ཆོས་གྲྭའི་སྒྲུབ་སྡེའི་སྤོང་བ་པ་སྦས་པའི་རྣལ་འབྱོར་སྙིང་པོའི་དོན་ལ་གཞོལ་བ་བླ་མ་ཀརྨ་འཕགས་མཆོག་དང་འཕེལ་རྒྱས་མཆེད་ཀྱི་བཞེད་ལྟར། སི་ཏུ་པདྨ་ཉིན་བྱེད་དབང་པོས་བཀོད་པ་འགྲོ་རྣམས་ཀུན་བཟང་རྡོ་རྗེ་འཆང་ཆེན་པད་འབྱུང་གི་གོ་འཕང་ལ་འགོད་པར་གྱུར་ཅིག །དགེའོ། །བཀྲ་ཤིས།། །།