བླ་མ་ཡི་དམ་དབྱེར་མེད་ཀྱི་གསོལ་འདེབས་བདེ་སྨོན་ཡོངས་འདུའི་ལྗོན་པ།
བླ་མ་ཡི་དམ་དབྱེར་མེད་ཀྱི་གསོལ་འདེབས་བདེ་སྨོན་ཡོངས་འདུའི་ལྗོན་པ་བྱ་བ་བཞུགས་སོ། །ན་མོ་བུདྡྷ་བོ་དྷི་ས་ཏྭ་བྷྱ། མཐའ་ཡས་བླ་ན་མེད་པའི་སྙིང་སྟོབས་ཀྱི། །དམ་བཅས་ས་གསུམ་གཡོ་བའི་ཐུགས་རྗེ་ཅན། །མཆོག་གི་དང་པོའི་སངས་རྒྱས་འོད་མི་འགྱུར། །ཚེ་འོད་དཔག་ཏུ་མེད་པའི་སྐུར་སྣང་བ། །རྣམ་དག་ཞིང་གི་ཡོན་ཏན་ལྷུན་རྫོགས་པའི། །བདེ་ལྡན་པདྨོ་བཀོད་པའི་ཕོ་བྲང་དབུས། །
མཚན་དཔེའི་གཟི་བྱིན་བལྟར་མི་མངོན་པར་བཞུགས། །ཕྱོགས་བཅུའི་རྒྱལ་བ་ཀུན་གྱི་མགྲིན་དབྱངས་གཅིག །རབ་བསྟོད་དབུགས་དབྱུང་དུ་མས་གཟེངས་བསྟོད་ཅིང་། །ལྷར་བཅས་ཡོངས་ཀྱི་སྐྱབས་ཡུལ་གཉེན་གཅིག་པུ། །སྤྱི་བོས་འདུད་པའི་སྐལ་བཟང་ཅིར་ཡང་ཐོབ། །གང་ཞིག་འགྲོ་ལ་བརྩེ་ཆེན་རྟ་བདུན་གྱིས། །དྲངས་བའི་སྒྱུ་འཕྲུལ་རྡོ་རྗེའི་འོད་སྟོང་གི། །གོང་བུ་གཅིག་ཏུ་སྨིན་པའི་དཔལ་ཡོན་ཅན། །འཆར་ཀའི་ཉིན་བྱེད་ལྟར་དམར་ཅོད་པན་འཛིན། །གར་དབང་རྡོ་རྗེ་འཆང་ཆེན་སྤྲུལ་པའི་སྐུ། །དཔལ་ལྡན་མི་ཕམ་ཆོས་གྲུབ་རྒྱ་མཚོ་མཆོག །ལུས་ཅན་སྐལ་ལྡན་མཐོང་དང་ཐོས་པ་ཡི། །འབྲེལ་ཚད་ཕྱམ་གཅིག་བདེ་ཆེན་སར་བཀོད་པ། །སྣང་མཐའ་ཡས་དང་དབྱིངས་དང་ཡེ་ཤེས་ཀྱི། །ངོ་བོ་གཅིག་ལ་རྣམ་པ་གང་འདུལ་སྟོན། །ཐབས་མཁས་གདུལ་བྱའི་མོས་པ་སྣ་ཚོགས་པས། །འདྲེན་པའི་དེད་དཔོན་ཁྱོད་ལ་གསོལ་བ་འདེབས། །བདག་སོགས་བདེ་ཆེན་ཞིང་དུ་བགྲོད་གྱུར་ཅིག །གཡས་སུ་འཇིག་རྟེན་དབང་ཕྱུག་སྤྱན་རས་གཟིགས། །གཡོན་དུ་ཕྱག་ན་རྡོར་འཛིན་མཐུ་ཆེན་ཐོབ། །བྱམས་པ་འཇམ་དཔལ་ཀུན་ཏུ་བཟང་པོ་དང་། །ནམ་མཁའི་སྙིང་པོ་སྒྲིབ་པ་རྣམ་པར་སེལ། །ས་ཡི་སྙིང་པོ་བྱང་སེམས་ཉེ་སྲས་བརྒྱད། །ལྷག་པའི་མཁྱེན་བརྩེ་ལྷག་པའི་སེམས་བསྐྱེད་ཀྱི། །ཟླ་མེད་ཐུགས་རྗེ་ཆེན་
པོའི་སྣང་བ་ལས། །མཁའ་མདངས་མི་བསྐྱོད་ཅོད་པན་འཆང་ནས་སུ། །འགྲོ་སྒྲོལ་ཕྲིན་ལས་བདུད་རྩིའི་ཆ་ཤས་གང་། །རྗེ་བཙུན་བདུད་ཚོགས་འདུལ་བའི་རྡོ་རྗེ་འཆང་། །བྱིན་རླབས་འོད་དཀར་སྲིད་ཞིའི་མུན་སེལ་མགོན། །གསོལ་བ་འདེབས་སོ་ཁྱོད་ཞབས་བསྙེན་པར་སྨོན། །རབ་ཏུ་འཕགས་པའི་སར་གནས་འཕགས་པ་ཡི། །ཐུགས་བསྐྱེད་གོ་ཆ་བཙན་པོའི་སྙིང་སྟོབས་ཀྱིས། །ལོག་ལྟ་བདུད་རིས་ཁྲི་མུན་ཞུམ་པའི་ཕྱིར། །གཟུགས་སྐུ་ཁྱུང་སྔོན་སྐྱེས་ལྟར་ལུང་རིགས་ཀྱིས། །རྒྱལ་བསྟན་ཡོངས་རྫོགས་འཛིན་པ་སྨྲ་བའི་དབང་། །བྱམས་མགོན་དངོས་སྣང་དྷརྨཱ་ཀཱ་རའི་ཞབས། །གསོལ་བ་འདེབས་སོ་བདག་བྱིན་བརླབས་པ་དང་། །སྒྲིབ་གཉིས་བག་ཆགས་མ་ལུས་སྦྱང་དུ་གསོལ། །དེ་ལྟར་རྣམ་པར་དག་པའི་ཞིང་རྣམས་ཀུན། །སྐུ་ལ་རྫོགས་ཤིང་སྐུ་ཡི་བཀོད་པ་ནི། །ཞིང་ཁམས་མ་ལུས་གང་བར་སྣང་བ་ཡི། །སྟོན་འཁོར་ཐ་མི་དད་པའི་ཕྲིན་ལས་ཀྱིས། །བསྐལ་མང་སྔོན་ནས་བྱང་ཆུབ་སྤྱད་མཆོག་དོན། །འགྲོ་ལ་རྗེས་སུ་ཆགས་པའི་སྙིང་སྟོབས་འཕྲུལ། །གཡོ་བ་མེད་བཞིན་གུས་པས་གསོལ་འདེབས་ན། །མྱུར་བར་ཐུགས་རྗེའི་ལྕགས་ཀྱུས་དྲོང་དུ་གསོལ། །འབྱུང་ལྔའི་ཕུང་ཁམས་སྒྱུ་ལུས་ཡལ་བའི་ཚེ། །རྩེ་གཅིག་སྐྱབས་གནས་ཡིད་ཀྱིས་འཆང་ལགས་ན། །མྱུར་བར་ཐར་པའི་ལམ་སྣ་དྲངས་ནས་སུ། །
ཞིང་མཆོག་དམ་པར་བརྫུས་ཏེ་སྐྱེ་བར་ཤོག །དེ་མ་ཐག་ཏུ་ཞལ་མཐོང་ལུང་བསྟན་ཐོབ། །སྤྲུལ་པས་ཕྱོགས་བཅུར་འགྲོ་བའི་དོན་ལ་སྤྱོད། །ཕྱིར་མི་ལྡོག་པར་བདེ་བ་ཅན་ཞིང་དུ། །རྫོགས་སངས་རྒྱས་ཀྱི་གོ་འཕང་ཐོབ་གྱུར་ཅིག །ཅེས་རྡོ་སྟོད་གཡུ་ཐོག་པའི་སྒྲུབ་ཆེན་ཀརྨ་ནས་རྒྱལ་བ་ཡབ་སྲས་གསུམ་གྱི་གསོལ་འདེབས་དང་བདེ་སྨོན་ཟུང་དུ་འཇུག་པ་འདི་བཞིན་བསྐུལ་བར་བརྟེན། སི་ཏུ་པདྨ་ཉིན་བྱེད་དབང་པོས་སྤེལ་པ་སརྦ་ཛ་ག་ཏཾ། །ཤུ་བྷཾ།། །།