གུ་རུ་རྗེ་འབངས་ཉེར་ལྔའི་ལས་བྱང་ལ་ཅུང་ཟད་རྒྱས་པར་སྤྲོ་བའི་སྐབས་ཟུར་རྒྱན།
སྭསྟི། འདིར་གུ་རུ་རྗེ་འབངས་ཉེར་ལྔའི་ལས་བྱང་ལ་ཅུང་ཟད་རྒྱས་པར་སྤྲོ་བའི་སྐབས་ཟུར་རྒྱན་འདི་ལྟར་དང་པོ་ལྷ་བསྐྱེད་ལ། ཞབས་གཉིས་རྡོར་སྐྱིལ་ཟླ་ཉི་པད་སྟེང་བཞུགས། །དེ་ཕྱིར་བུདྡྷ་བཛྲ་རཏྣ་དང་། །པདྨ་ཀརྨ་ཐོད་ཕྲེང་རྩལ་ལྔ་གསལ། །པདྨ་འབྱུང་གནས་པདྨ་སམྦྷ་ཝ། །བློ་ལྡན་མཆོག་སྲེད་པདྨ་རཱ་ཛ་དང་། །སཱུཪྱ་འོད་ཟེར་ཤཱཀ་སེང་གྲོ་བོ་ལོད། །སེང་ཧ་སྒྲ་སྒྲོགས་ལ་སོགས་རང་རང་གི། །ཆ་ལུགས་མ་ངེས་སྣ་ཚོགས་ཅིར་ཡང་བསྒྱུར། །ཡེ་ཤེས་ལྔ་ལྡན་སོགས་གཞུང་ལྟར་དང་། གཉིས་པ་སྤྱན་འདྲེན་སྐབས། དཔལ་རི་པདྨ་འོད་ཀྱི་ཕོ་བྲང་ནས། །ཨོ་རྒྱན་ཆེན་པོ་སྐུ་ལྔ་མཚན་བརྒྱད་དང་། །རྗེ་འབངས་ཉེར་ལྔ་སངས་རྒྱས་བྱང་སེམས་ཚོགས། །སྤྲུལ་དང་ཡང་སྤྲུལ་སོགས་གཞུང་ལྟར་དང་། གསུམ་པ་ཕྱག་འཚལ་ལ། མཚོ་སྐྱེས་རྡོ་རྗེ་འཆང་ཆེན་པོ། །སྐུ་ལྔ་མཚན་བརྒྱད་རྗེ་འབངས་བཅས། །དད་མོས་གདུང་བས་གུས་ཕྱག་འཚལ། །བཞི་པ་བསྟོད་པའི་སྐབས། སྲིད་པའི་དུ་ཁཿམཐར་བྱེད་དཔའ་བོ་ཆེ། །གང་འདུལ་ཚུལ་གྱི་རྣལ་འབྱོར་སྤྱོད་པ་འཆང་། །ཅེས་དང་། ལྔ་པ་ཚོགས་འབུལ་དང་བསྐང་བཤགས་བསྒྲལ་བསྟབ་ཀྱི་རིམ་པ་ལ། གཞུང་གི་ཚོགས་བྱིན་རླབས་དང་སྔགས་ཀྱི་མཐར། ཧཱུྃ། ཆོས་དབྱིངས་མཐའ་བྲལ་ཀློང་ཡངས་ནས། །སྣང་སྟོང་ཟུང་འཇུག་བདེ་བ་ཆེ། །རིག་རྩལ་མ་འགགས་
ཅིར་ཡང་ཤར། །རྒྱལ་དང་རྒྱལ་སྲས་རྒྱ་མཚོ་རྣམས། །འདིར་གཤེགས་ཚོགས་ཀྱི་མཆོད་པ་བཞེས། །མཆོག་དང་ཐུན་མོང་དངོས་གྲུབ་སྩོལ། །ག་ན་ཙཀྲ་པཱུ་ཛ་ཁཱ་ཧི། ཅེས་ཚོགས་ཀྱི་མཆོད་པ་ཕུལ་ལ། དེ་ནས་བསྐང་བ་བྱ་བ་ནི། ཧཱུྃ་ཧྲཱིཿསྐུ་གསུམ་ཡེ་རྫོགས་པད་འབྱུང་ཐོད་ཕྲེང་རྩལ། །སྐུ་ལྔ་རྒྱལ་བ་དགོངས་བརྒྱུད་ཐུགས་དམ་བསྐང་། །གུ་རུ་སྤྲུལ་པའི་མཚན་བརྒྱད་ལ་སོགས་པ། །རིག་འཛིན་བརྡའ་ཡི་བརྒྱུད་པའི་ཐུགས་དམ་བསྐང་། །མངའ་བདག་མཚོ་རྒྱལ་རྗེ་འབངས་ཉི་ཤུ་ལྔ་། །གང་ཟག་སྙན་བརྒྱུད་བླ་མའི༴ མཐིང་དམར་ཅོད་པན་འཆང་བ་བཀའ་བརྒྱུད་ཀྱི། །བྱིན་རླབས་དོན་གྱི་བརྒྱུད་པའི༴ རཏྣ་གླིང་སོགས་གཏེར་ཆེན་གཏེར་ཕྲན་བདག །མཁའ་འགྲོ་གཏད་བརྒྱུད་བླ་མའི༴ ཀརྨ་ཆགས་མེད་བཀའ་གཏེར་ཡོངས་ཀྱི་བདག །ཤོག་སེར་ཆོས་སྤེལ་བརྒྱུད་པའི༴ ཐུགས་ཀྱི་རྡོ་རྗེའི་དགོངས་གཏད་ལས་ཅན་རྣམས། །སྨིན་གྲོལ་ལམ་ཟབ་བརྒྱུད་རིམ༴ འབྲེལ་ཚད་ཐར་པའི་གོ་འཕང་འགོད་ནུས་པའི། །སྐྱེ་བདུན་མྱོང་གྲོལ་བརྒྱུད་པའི༴ མཐོང་ཐོས་དྲན་པས་འགྲོ་བ་སྒྲོལ་བའི་མགོན། །དྲིན་ཆེན་རྩ་བརྒྱུད་བླ་མའི༴ མཆོག་དང་ཐུན་མོང་དངོས་གྲུབ་ཆར་ལྟར་འབེབས། །ཡི་དམ་རྒྱུད་སྡེའི་ལྷ་ཚོགས་ཐུགས་དམ་བསྐང་། །ས་ལམ་བར་ཆད་སེལ་ཞིང་ཕྲིན་ལས་སྒྲུབ། །ཆོས་སྐྱོང་སྲུང་མ་རྣམས་ཀྱི་ཐུགས་དམ་བསྐང་། །ཧཱུྃ་ཧྲཱིཿརང་བྱུང་གདོད་ནས་ཧེ་རུ་ཀ་ཡི་གནས། །གཞལ་ཡས་ཚོགས་ཁང་འབར་
བ་ཉམས་རེ་དགའ། །བཀྲ་གསལ་ཡེ་ཤེས་དཀྱིལ་འཁོར་ལྷ་ཡི་ཚོགས། །ལྷུན་རེ་ཆགས་ཞིང་གཟི་བྱིན་འོད་དང་ལྡན། །ཕྱི་ནང་གསང་བ་ཡང་གསང་དེ་ཁོ་ནའི། །དམ་རྫས་མཆོད་པ་རྨད་བྱུང་དྭངས་རེ་སྤྲོ། །ལྟ་སྒོམ་རྣམ་དག་སྤྱོད་པའི་ངང་ཚུལ་གྱི། །སྒྲུབ་པའི་རྣལ་འབྱོར་མཆེད་ལྕམ་དམ་རེ་གཙང་། །ཧཱུྃ་ཧྲཱིཿཐུགས་དམ་གཉན་བསྐང་མཆོད་པའི་བྱེ་བྲག་ནི། །མཆོད་ཡོན་མེ་ཏོག་བདུག་སྤོས་སྣང་གསལ་དྲི། །ཞལ་ཟས་སྒྲ་སྙན་འདོད་ཡོན་ལྔ་ལ་སོགས། །ཕྱི་ཡི་མཆོད་པས་ཐུགས་དམ་བསྐང་གྱུར་ཅིག །རྨད་བྱུང་བརྗིད་ལྡན་མ་ཧཱ་བ་ལིང་ཏ། །འཆི་མེད་རྫས་མཆོག་པཉྩ་ཨ་མྲྀ་ཏ། །ཆགས་མེད་ཆགས་བྲལ་ཨརྒྷཾ་རཀྟ་དམར། །པདྨ་དུང་ཅན་ལ་སོགས་མཚན་ལྡན་གྱི། །བླ་མེད་ནང་གི་མཆོད་པས་ཐུགས་དམ་བསྐང་། །གཟུང་འཛིན་སྣང་བ་རང་གྲོལ་གཉིས་མེད་ངང་། །མཆོད་བྱ་མཆོད་བྱེད་ཆོས་ཉིད་དག་པའི་ཀློང་། །ཀུན་བཟང་བདེ་ཆེན་དབྱིངས་སུ་བསྐང་གྱུར་ཅིག །ཅེས་བསྐང་ངོ་། །དེ་ནས་བཤགས་པ་བྱ་བ་ནི། ཧཱུྃ་ཧྲཱིཿབླ་མ་དཀྱིལ་འཁོར་ལྷ་ཚོགས་དགོངས། །བདག་ནི་སྐྱེ་བ་ཐོག་མེད་ནས། །ད་ལྟའི་ལུས་འདི་ཡན་ཆད་དུ། །མ་རིག་རྨོངས་པའི་དབང་གྱུར་པས། །རྩ་བ་ཡན་ལག་ཉེས་ལྟུང་རྣམས། །ཚོགས་ཀྱི་མཆོད་པས་བསྐང་ཞིང་བཤགས། །ༀ་བཛྲ་ས་ཏྭ་ས་མ་ཡ་སོགས་ཡིག་བརྒྱ་བརྗོད། དེ་ནས་བསྒྲལ་ལས་ནི། ཧཱུྃ། ང་ནི་ཡེ་ནས་ཆེ་བའི་མཆོག །དབང་
དྲག་འབར་བ་དྲག་པོ་རྩལ། །སྣང་སྲིད་དྲེགས་པ་སྡེ་བརྒྱད་རྣམས། །ཀུན་ཀྱང་བཀའ་ཉན་བྲན་ཁོལ་གྱུར། །ཧཱུྃ་ཧཱུྃ་ཧཱུྃ། འགུགས་པ་ནི། ཧཱུྃ། བདག་ཉིད་དཔལ་གྱི་ཐུགས་ཀ་ནས། །སྤྲུལ་པའི་ཁྲོ་ཆུང་སྐར་ལྟར་འཁྲུགས། །བསྟན་དགྲ་སྒོས་དགྲ་ལོག་འདྲེན་རྣམས། །ཁུག་ཅིག་ཛཿཧཱུྃ་བྃ་ཧོཿཕཊ། བསྒྲལ་ཞིང་བསྟབ་པ་ནི། ཧཱུྃ། ཆོས་ཉིད་ཞི་བའི་ངང་ལས་ཁྲོ་བོའི་སྐུ། །ཞིང་བཅུ་ཚང་བའི་བསྟན་དགྲ་བསྒྲལ་ཕྱིར་དུ། །ཡེ་ཤེས་མཚོན་གྱིས་དུག་ལྔའི་ཕུང་པོ་བཅོམ། །དག་པ་རྣམ་དག་བདུད་རྩིར་བསྒྱུར་བྱས་ནས། །དཀྱིལ་འཁོར་ལྷ་ཚོགས་དགྱེས་པ་བསྐང་གྱུར་ཅིག །དེ་ནས་ཚོགས་ལ་ལོངས་སྤྱོད་པ་སོགས་གཞུང་ལྟར་བྱའོ། །ཅེས་པའང་ཀརྨ་ཆགས་མེད་དངོས་སྤྲུལ་པདྨ་འཆི་མེད་གྲུབ་དབང་གིས་བཞེད་ལྟར་སི་ཏུ་པདྨ་ཉིན་བྱེད་དབང་པོས་སྤེལ་བ་མངྒ་ལམ།། །།