བཅོམ་ལྡན་འདས་འོད་དཔག་མེད་ཀྱི་སྒོམ་བཟླས་ཉུང་འདུས་སུ་བཀོད་པ།
བཅོམ་ལྡན་འདས་འོད་དཔག་མེད་ཀྱི་སྒོམ་བཟླས་ཉུང་འདུས་སུ་བཀོད་པ་བཞུགས་སོ། །སྭསྟི། འདིར་བཅོམ་ལྡན་འདས་འོད་དཔག་མེད་
ལ་བརྟེན་ནས་རང་གཞན་གྱི་དོན་བྱ་བར་འདོད་ན། སངས་རྒྱས་ཆོས་ཚོགས་དང་ཚད་མེད་བཞི་བཅས་སྔོན་དུ་བཏང་ནས། སྭ་བྷཱ་ཝ་སོགས། སྣང་ཞིང་སྲིད་པའི་ཆོས་རྣམས་ཀུན། །གཟུང་འཛིན་བྲལ་བའི་སྟོང་བར་གྱུར། །དེ་ཡི་ངང་ལས་རང་རྩལ་མདངས། །རྨ་བྱས་བཏེགས་པའི་རིན་ཆེན་ཁྲིར། །སྣ་ཚོགས་པདྨ་ཟླ་བའི་སྟེང་། །རང་སེམས་ཧྲཱིཿཡིག་འོད་འཕྲོ་འདུས། །དོན་གཉིས་བྱས་ཏེ་ཡོངས་གྱུར་ལས། །བཅོམ་ལྡན་འོད་མི་འགྱུར་བའི་སྐུ། །པདྨ་རཱ་གའི་རི་བོ་ལྟར། །དམར་གསལ་ཞལ་གཅིག་ཕྱག་མཉམ་བཞག །ལྷུང་བཟེད་བདུད་རྩིས་བཀང་བ་འཛིན། །ཆོས་གོས་རྣམ་གསུམ་ཞབས་རྡོར་སྐྱིལ། །མཚན་དཔེའི་འོད་ཀྱི་དཀྱིལ་འཁོར་གསལ། །གཡས་གཡོན་པདྨ་ཟླ་བའི་སྟེང་། །ཕྱག་ན་པདྨ་རྡོ་རྗེ་འཛིན། །རྒྱལ་སྲས་ཐུ་བོ་མཆོག་བརྒྱད་དང་། །གཞན་ཡང་སངས་རྒྱས་བྱང་ཆུབ་སེམས། །ཉན་ཐོས་རང་རྒྱལ་ཚོགས་ཀྱིས་བསྐོར། །གཙོ་བོའི་གནས་གསུམ་ༀ་ཨཱ་ཧཱུྃ། །ཐུགས་ཀར་པད་ཟླར་ཧྲཱིཿཡིག་ལས། །འོད་འཕྲོས་བདེ་ཆེན་ཞིང་ཁམས་ནས། །བསྒོམ་པ་དང་འདྲའི་ཡེ་ཤེས་པ། །སྤྱན་དྲངས་དམ་ཡེ་གཉིས་མེད་གྱུར། །སླར་ཡང་འོད་འཕྲོས་དབང་ལྷ་བསྐུལ། །དབང་བསྐུར་སྐུ་གང་དྲི་མ་དག །ཚེ་དཔག་མེད་ཀྱིས་རྒྱས་གདབ་ཅིང་། །ཐུགས་ལས་སྤྲོས་པའི་ལྷ་མོས་མཆོད། །ༀ་བཛྲ་ཨརྒྷཾ་པྲ་ཏཱིཙྪ་སྭཱ་ཧཱ། དེ་བཞིན་དུ། པཱ་དྱཾ། ནས། ཤ་བྡའི་བར་གྱིས་
མཆོད། ཐུགས་ཀའི་ཧྲཱི་མཐར་སྔགས་ཀྱི་ཕྲེང་། །གཡས་བསྐོར་འོད་ཀྱིས་རྒྱལ་རྣམས་མཆོད། །ཀུན་ཀྱང་སྣང་མཐའི་སྐུར་གྱུར་ནས། །རང་ཐིམ་སླར་ཡང་འོད་ཟེར་འཕྲོས། །རིགས་དྲུག་སེམས་ཅན་སྡིག་སྒྲིབ་སྦྱོང་། །སྣོད་བཅུད་ལྷ་ཡི་རང་བཞིན་གསལ། །སྒྲ་གྲགས་སྔགས་ལ་དྲན་རྟོག་ཐུགས། །དག་པ་རྣམ་པ་གསུམ་ལྡན་གྱུར། །ༀ་ཨ་མི་དྷེ་ཝ་ཧྲཱིཿཅི་ནུས་བཟླ་ཞིང་། དམིགས་བསལ་ཚེ་སྒྲུབ་སྐབས། སླར་ཡང་ལྔ་ལྡན་འོད་ཀློང་ནས། །སྤྲུལ་པའི་ལྷ་མོ་མགྱོགས་མའི་ཚོགས། །འཕྲོས་པས་ཚེ་ལྷ་རིག་པ་འཛིན། །དྲང་སྲོང་ལྷ་ཀླུ་མི་སོགས་ཀྱི། །ཚེ་བསོད་དཔལ་གྲགས་འབྱུང་བ་ལྔའི། །དྭངས་བཅུད་འོད་ཟེར་རྣམ་པར་བསྡུས། །རང་ཐིམ་རྟག་པའི་རྡོ་རྗེ་ཅན། །གཞོམ་བྲལ་མི་འགྱུར་ལྷུན་གྱིས་གྲུབ། །ༀ་ཨ་མི་དྷེ་ཝ་ཨཱ་ཡུཿསིདྡྷི་ཧཱུྃ། ཅི་ནུས་བཟླས་པའི་མཐར། སྦྱིན་པའི་སྟོབས་ཀྱིས་སོགས་ཕར་ཕྱིན་དྲུག་གི་བདེན་ཚིག་དང་། ཡང་སྒྲིབ་སྦྱོང་སོགས་ལ། བདེ་སྨོན་ཤེས་བྱ་མའམ། ངོ་མཚར་སངས་རྒྱས་གང་འོས་བྱ་ཞིང་། སྣོད་བཅུད་ལྷར་བསྡུ་དེ་ཉིད་ཀྱང་། །འོད་ཞུ་ཧྲཱིཿར་ཐིམ་མི་དམིགས་པ། །མ་བཅོས་སྤྲོས་བྲལ་ངང་དུ་བཞག །སླར་ཡང་ལྷ་སྐུར་ལམ་གྱིས་གསལ། །དགེ་བ་འདི་ཡིས་མྱུར་དུ་བདག །སོགས་དང་། དགེ་བ་འདི་ཡིས་སྐྱེ་བོ་ཀུན། །སོགས་དང་བཀྲ་ཤིས་རིམ་པ་ཅི་རིགས་བརྗོད་པར་བྱའོ། །ཞེས་པ་འདི་སི་ཏུ་པདྨ་ཉིན་བྱེད་དབང་པོས་ཆོས་
ཁྲིམས་པ་ཀརྨ་ལྷས་སྐྱབས་ཀྱི་བཞེད་ལྟར་འདུས་སྡེའི་ཞལ་འདོན་རྒྱུར་སྤེལ་བ་དགེ་བར་གྱུར་ཅིག །སརྦ་མངྒ་ལཾ།། །།དཀོན་མཆོག་གསུམ་ལ་བྱང་ཆུབ་བར། །སྐྱབས་སུ་མཆི་ཞིང་འགྲོ་བ་རྣམས། །བདེ་ལྡན་སྡུག་བསྔལ་དང་བྲལ་ཞིང་། །བླ་མེད་གོ་འཕང་ཐོབ་གྱུར་ཅིག །དངོས་ཀུན་ཆོས་རྣམས་སྟོང་པའི་ངང་། །དེ་ལས་རང་ཉིད་པད་ཟླའི་སྟེང་། །ཧྲཱིཿདམར་འོད་ཀྱིས་འཕགས་པ་མཆོད། །སེམས་ཅན་དོན་བྱས་ཡོངས་གྱུར་ལས། །བཅོམ་ལྡན་སྣང་མཐའ་ཚེ་དཔག་མེད། །དམར་གསལ་པདྨ་རཱ་གའི་མདོག །ཞལ་གཅིག་ཕྱག་གཉིས་མཉམ་བཞག་གི། ཕྱག་རྒྱས་ལྷུང་བཟེད་བཅུད་བཀང་ནང་། །ཚེ་བུམ་རིན་ཆེན་ཤིང་ལོས་བརྒྱན། །བསྣམས་ཤིང་ཆོས་གོས་རྣམ་གསུམ་བཀླུབས། །ཞབས་གཉིས་རྡོར་དཀྱིལ་མཚན་དཔེ་འབར། །ཟླ་བའི་རྒྱབ་ཡོལ་འོད་ལྔ་ཡི། །ཟེར་དང་ཟེར་ཐག་ཀུན་ཏུ་འཕྲོ། །གནས་གསུམ་ༀ་ཨཱཿཧཱུྃ་གིས་མཚན། །ཐུགས་ཀའི་དབུས་སུ་པད་ཟླར་ཧྲཱིཿ། དེ་ལས་འོད་འཕྲོས་རང་བཞིན་གྱི། །ཆོས་དབྱིངས་རྣམ་པར་དག་པའི་ཞིང་། །བདེ་ལྡན་པདྨོ་བཀོད་པ་ནས། །འོད་སྣང་མཐའ་ཡས་ཚེ་དཔག་མེད། །བསྒོམ་པ་དང་འདྲའི་ཡེ་ཤེས་པ། །ཕྱོགས་བཅུའི་རྒྱལ་དང་རྒྱལ་སྲས་ཚོགས། །བཙུན་མོ་བྱང་སེམས་ཉན་རང་གི། །འཁོར་ཚོགས་སྤྱན་དྲངས་མདུན་མཁར་བཞུགས། །རང་གི་ཐུགས་ཀའི་འོད་ཟེར་གྱིས། །བསྐུལ་བའི་མཆོད་ལྷས་མཉེས་
པར་བྱས། །ཛཿཧཱུྃ་བྃ་ཧོཿདམ་ཚིག་དང་། །ཡེ་ཤེས་གཉིས་མེད་སླར་ཡང་ནི། །ཐུགས་ཀའི་ས་བོན་ལས་འོད་འཕྲོས། །དབང་ལྷ་རིགས་ལྔ་ཡབ་ཡུམ་རྣམས། །སྤྱན་དྲངས་མཆོད་པས་དགྱེས་པ་བསྐྱེད། །དབང་བསྐུར་གསོལ་གདབ་མོད་ཉིད་ལ། །དགོངས་པ་མཛད་ཅིང་ལྷ་ཡི་ཆུ། །དྲི་མེད་དག་པས་ཁྲུས་གསོལ་ཞིང་། །སྐུ་གང་ཆུ་ཞབས་སྤྱི་བོར་བརྟན། །ཚེ་དཔག་མེད་པས་དབུ་རྒྱན་གྱུར། །རང་འོད་ལས་སྤྲུལ་མཆོད་ལྷ་མོ། །དུ་མ་སྤྲོས་པས་ཀུན་བཟང་གི། །སྨོན་ལམ་ཇི་བཞིན་མཆོད་པའི་སྤྲིན། །མཁའ་དབྱིངས་བཀང་བས་མཆོད་པར་གྱུར། །ༀ་བཛྲ་ཨརྒྷཾ་པྲ་ཏཱིཙྪ་སྭཱ་ཧཱ། དེ་བཞིན་དུ། པཱདྱཾ། པུཥྤེ་ཨཱཿཧཱུྃ། ནས། ཤབྡ་བར་གྱིས་མཆོད་ལ། བདེ་ཆེན་བདེ་བའི་རང་བཞིན་གྱི། །ལྷུན་གྲུབ་ཞིང་གི་སྟོན་པ་མཆོག །རྒྱལ་བ་རྒྱལ་བའི་འབྱུང་གནས་གཏེར། །འོད་སྣང་དཔག་མེད་ཕྱག་འཚལ་བསྟོད། །ཐུགས་ཀའི་པད་ཟླར་ཧྲཱིཿདམར་པོ། །དེ་མཐར་སྔགས་ཕྲེང་གཡས་སུ་བསྐོར། །འོད་འཕྲོས་ཕྱོགས་བཅུའི་བདེ་གཤེགས་མཆོད། །ཚུར་འདུས་བྱིན་རླབས་ཐུགས་རྗེའི་སྟོབས། །ལྷ་སྐུའི་རྣམ་པར་སྤྱན་དྲངས་ནས། །མཚོ་ལ་ཆར་བབས་བཞིན་དུ་ཐིམ། །མཆོག་ཐུན་དངོས་གྲུབ་ཐོབ་པར་བསམ། །སླར་ཡང་འོད་འཕྲོས་མ་གྱུར་འགྲོ། །རིགས་དྲུག་འཁོར་བའི་སྐྱེ་སྒོ་བཅད། །ཀུན་ཀྱང་ལྷ་ཡི་དཀྱིལ་འཁོར་དམིགས། །ཁྱེར་སོ་གསུམ་ལྡན་
ཏིང་འཛིན་དང་། །ༀ་ཨ་མི་དྷེ་ཝ་ཧྲཱིཿསྙིང་པོ་ཅི་ནུས་སུ་བཟླས་ལ། ཉེ་སྙིང་། ཧྲཱིཿཅེས་པའང་བཟླས་ལ། མཐར། ཕྱི་སྣོད་ལྷ་ཡི་དཀྱིལ་འཁོར་པ། །རང་ལ་ཐིམ་ཞིང་རང་ཉིད་ཀྱང་། །ཐུགས་ཀའི་ས་བོན་ལ་ཐིམ་ནས། །དེའང་མི་དམིགས་འོད་གསལ་བ། །མ་བཅོས་སྤྲོས་བྲལ་ངང་ལ་བཞག །ཅེས་ཅི་གནས་རང་བབས་སུ་མཉམ་བཞག་གི་ངོ་བོ་བསྐྱངས་ལ། སླར་ཡང་ལྷ་སྐུར་གསལ་བ་ཡི། །གནས་གསུམ་འབྲུ་གསུམ་མཚན་པར་གྱུར། །སྣོད་བཅུད་ལྷ་ཡི་རང་བཞིན་སྐུ། །སྒྲ་གྲགས་སྔགས་ལ་དྲན་རྟོག་ཐུགས། །ཀུན་བཟང་ཀློང་ཡངས་ཆེན་པོར་གསལ། །དགེ་བ་འདི་ཡིས་སོགས་བརྗོད། སྐབས་སུ་གཏོར་མ་འབུལ་བར་སྤྲོ་ན། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་ལས་རིན་ཆེན་སྣོད་མཆོག་ཏུ། །ལྷ་ཡི་ཞལ་ཟས་གཙང་ཞིང་བཟང་། །འདོད་ཡོན་ལྔ་ལྡན་མཆོད་པའི་ཚོགས། །རྒྱ་ཆེན་རྒྱུན་མི་ཆད་པར་མོས། །རང་གི་སྙིང་གའི་འོད་ཟེར་གྱིས། །བསྐུལ་ལས་ཡེ་ཤེས་སྤྱན་དྲངས་གྱུར། །ༀ་ཨ་ཀཱ་རོས་ལན་གསུམ་བྱིན་བརླབས་ལ་འབུལ། ༀ་བཛྲ་ཨརྒྷཾ་སོགས་ཀྱིས་མཆོད། གོང་བཞིན་བསྟོད་པ་དང་། འདོད་དོན་གསོལ་བ་ནི། མཆོད་སྦྱིན་གཏོར་མ་འདི་བཞེས་ལ། །སོགས་ནས། ཀུན་འགྲུབ་མཛོད་བར་བརྗོད། མ་འབྱོར་པ་སོགས་ཀྱིས་བཟོད་གསོལ་དང་། བཛྲ་མཱུས་ཡེ་ཤེས་གཤེགས་པའམ། སུ་པྲ་ཏིཥྛས་བརྟན་བཞུགས་བྱ་བའང་ལེགས། ཅེས་པའང་འཇང་ཡུལ་གྱི་སྒྲུབ་པ་ཀརྨ་ཐུགས་རྗེས་བསྐུལ་ལྟར་སི་ཏུ་པས་སྤེལ་བ་མངྒ་ལཾ།། །།