རྒྱལ་བ་ཡབ་སྲས་གསོལ་འདེབས།
རྒྱལ་བ་ཡབ་སྲས་གསོལ་འདེབས་བཞུགས། མཆོག་ཏུ་མི་འགྱུར་ཆོས་དབྱིངས་མཐའ་བྲལ་ཁམས། །རང་མདངས་ལྷུན་གྲུབ་བདེ་བ་ཆེན་པོའི་རྩལ། །འགགས་མེད་སྒྱུ་འཕྲུལ་དྲྭ་བའི་རང་བཞིན་ཅན། །སྐུ་གསུམ་བདག་ཉིད་བླ་མའི་ཞབས་ལ་འདུད། །འབྱམས་ཀླས་བསྐལ་པའི་གོང་ནས་
བྱང་ཆུབ་ཀྱི། །སྤྱད་པ་སྤྱོད་ཅིང་བདུད་རྩི་བརྙེས་ཟིན་ཀྱང་། །འགྲོ་སྒྲོལ་དམ་བཅས་སྙིང་རྗེའི་སྐུར་བཞེངས་པ། །རྗེ་བཙུན་བདུད་འདུལ་རྡོ་རྗེའི་ཞབས་ལ་འདུད། །རླབས་ཆེན་ཐུགས་བསྐྱེད་ཟབ་མོའི་འཇུག་ངོགས་ནས། །གདུལ་བྱ་རྗེས་འཛིན་ཕྲིན་ལས་ཡིད་བཞིན་དབང་། །ལྷན་སྐྱེས་ཡེ་ཤེས་དངོས་གྲུབ་ཆར་འབེབས་པ། །མི་ཕམ་ཆོས་གྲུབ་རྒྱ་མཚོའི་ཞབས་ལ་འདུད། །རྒྱལ་ཀུན་མཁྱེན་པའི་བདུད་རྩིའི་འོད་དཀར་པོ། །བློ་གྲོས་ཆུ་གཏེར་གཅིག་ཏུ་སྨིན་པ་ཡི། །མདོ་རྒྱུད་གངྒཱའི་རྒྱུན་བཟང་གཏེར་དམ་པ། །འཇམ་མགོན་ཆོས་ཀྱི་འབྱུང་གནས་ཞབས་ལ་འདུད། །དོན་དམ་མི་ཤིགས་སྙིང་པོའི་རྩ་བ་བརྟན། །རང་བྱུང་ཟག་མེད་བདེ་སྟོང་ཡལ་འདབ་རྒྱས། །འབྲས་བུ་སྐུ་བཞིའི་གོ་འཕང་སྦྱིན་པའི་དཔལ། །རྡོ་རྗེ་གཙུག་ལག་དགའ་བའི་ཞབས་ལ་འདུད། །དཔེ་མེད་ཚོགས་གཉིས་རྒྱ་ཆེན་ས་གཞི་བརྡལ། །ཇི་ལྟ་ཇི་སྙེད་གཟིགས་པའི་པད་ཚལ་བཞད། །སྐྱེ་དགུའི་གཙུག་གི་རྒྱན་དུ་རོལ་པ་ཡི། །རིག་འཛིན་རྡོ་རྗེ་དྲག་པོའི་ཞབས་ལ་འདུད། །བརྗོད་བྲལ་གནས་ལུགས་གཉུག་མའི་ཁྱོན་ཡངས་པོར། །ཟབ་མོ་ལྟ་བའི་ཡང་རྩེ་ཤིང་རྟ་ཡིས། །ལུས་ཅན་སྲིད་འགྲོའི་ངལ་བ་སེལ་བའི་གཉེན། །དྲིན་ཅན་དབང་གི་རྡོརྗེའི་ཞབས་ལ་འདུད། །དེ་ལྟར་ཕྱག་འཚལ་མཆོད་ཅིང་མི་དགེ་བཤགས། །ཡི་རང་བསྐུལ་ཞིང་གསོལ་འདེབས་བསྔོ་བར་བགྱི། །དུས་གསུམ་མཁའ་ཁྱབ་རིགས་དྲུག་དུཿཁ་ལས། །སྒྲོལ་བའི་
མྱང་འདས་གོ་འཕང་ཐོབ་གྱུར་ཅིག །ཀྱེ་མ། གྲངས་མེད་བསྐལ་པར་འཁྲུལ་འབྱམས་དྲྭ་བས་འབྲེལ། །སྣང་ཞེན་མ་རིག་མུན་པ་སྟུག་པོས་བསྒྲིབས། །དྲན་རྟོག་རྗེས་ཤེས་ལས་ཀྱི་སེར་བུས་བསྐྱོད། །རྣམ་སྨིན་གཡང་ལས་སྐྱོབས་ཤིག་བཀའ་བརྒྱུད་རྣམས། །ཐར་མེད་ལས་ཀྱི་དབང་བཙན་དུག་ལྔ་ཡིས། །ཞི་བདེའི་གོ་སྐབས་འགོག་པའི་གཉིས་འཛིན་བདུད། །རང་གསལ་ཤར་གྲོལ་ཀློང་དུ་སྦྱང་བྱས་ནས། །ཉོན་མོངས་གཡུལ་ལས་སྐྱོབས་ཤིག་བཀའ་བརྒྱུད་རྣམས། །སྐྱེ་ཞིང་སྐྱེ་བ་ཚེ་རབས་ཐམས་ཅད་དུ། །མ་ནོར་ལམ་སྟོན་བླ་མས་རྗེས་འཛིན་ཅིང་། །ཆོས་ཀྱི་དཔལ་ལ་རྟག་པར་ལོངས་སྤྱོད་ནས། མངོན་པར་རྫོགས་སངས་རྒྱས་པ་ཐོབ་གྱུར་ཅིག །ཅེས་པའང་མགོ་ལོག་ཕྱོགས་ཀྱི་སྒྲུབ་ཆེན་པ་བླ་མ་དགེ་ལེགས་རྒྱ་མཚོས་བསྐུལ་བའི་ངོར། སི་ཏུ་པདྨ་ཉིན་བྱེད་དབང་པོས་སྤེལ་པ་ཛ་ག་ཏཾ།། །།