གསོལ་འདེབས་ཡོངས་འདུའི་ལྗོན་བཟང་བྱིན་རླབས་དགའ་ཆར།
གསོལ་འདེབས་ཡོངས་འདུའི་ལྗོན་བཟང་བྱིན་རླབས་དགའ་ཆར་ཞེས་པ་བཞུགས་སོ། །འགྱུར་མེད་ཀུན་ཁྱབ་མཐའ་བྲལ་ཆོས་ཀྱི་སྐུ། །བདེ་བ་ཆེན་པོའི་རང་མདངས་ལོངས་སྤྱོད་རྫོགས། །རང་བྱུང་ལྷུན་གྲུབ་སྤྲུལ་པའི་སྐུར་སྣང་བ། །ཨོ་རྒྱན་ཆེན་པོ་པདྨཱ་ཀཱ་རར་འདུད། །དྲི་མེད་ཀོ་ཤའི་མཚོར་འཁྲུངས་དུས་གསུམ་གྱི། །མཐུ་སྟོབས་གཅིག་བསྡུས་བུདྡྷཱ་ཐོད་ཕྲེང་རྩལ། །གསང་སྔགས་བླ་མེད་ཐེག་མཆོག་སྟོན་པའི་གཉེན། །རིགས་རྣམས་ཀུན་བདག་
ཧེ་རུ་ཀ་དཔལ་འདུད། །གང་ཞིག་མཐའ་གཉིས་རྣམ་པར་བྲལ་བ་ཡི། །འདུས་མ་བྱས་པའི་རང་གཟུགས་ངེས་པའི་དོན། །ཡང་དག་གྲོལ་བའི་རྨད་བྱུང་ཕྲིན་ལས་ཅན། །དཔལ་ལྡན་རྡོ་རྗེ་འཛིན་ཞབས་པད་ལ་འདུད། །ཉོན་མོངས་གཉིས་འཛིན་བདུ༵ད་བཞིའི་གཡུལ་ངོ་རྣམས། །ཕ་མཐར་གཞོམ་ཞིང་འདུ༵ལ་བའི་མངོན་སྤྱོད་ཀྱི། །རྡོ༵་རྗེ༵་གདེངས་པས་སྣང་སྲིད་ཟིལ་གནོན་པ། །ལུས་མེད་མཐར་བྱེད་ཕྲིན་ལས་ལྡན་དེར་འདུད། །ཆོས་ཀུན་མཁྱེན་པའི་ཀློ༵ང་ཡངས་དཀྱིལ་འཁོར་ནས། །ངེས་གསང་རིང་ལུགས་གས༵ལ་བའི་ཉིན་མོར་བྱེད། །སྙི༵ང་པོ༵་བྱང་ཆུབ་སྐྱེད་ཚལ་རྒྱས་པའི་དཔྱིད། །ཐུགས་བསྐྱེད་འོད་སྟོང་མ་རིག་མུན་སེལ་འདུད། །མཁའ་སྤྱོད་པ༵དྨ༵་འོད་ཀྱི་ཞིང་བཞུགས་ནས། །འགྲོ་རྣམས་བདེ༵་ཆེ༵ན་ལམ་ལ་འགོད་པའི་ཕྱིར། །སྤྲུལ་བསྒྱུར་དུ་མ་འཛམ་གླི༵ང་ཁྱབ་པར་སྤེལ། །ཐབས་མཁས་ཟབ་མོའི་རོལ་པ༵་སྟོན་ལ་འདུད། །འཆི་མེད་རིག་འཛིན་རྟག་ལྡན་གཞོམ་བྲལ་སྐུ། །སྟོབས་བཅུའི་རྩལ་རྫོགས་ཚེ༵་དབ༵ང་དངོས་གྲུབ་བརྙེས། །དགོས་འབྱུ༵ང་ནོ༵ར་བུ༵་བསམ་འཕེལ་དབང་གི་རྒྱལ། །ལྷར་བཅས་གཙུག་གི་རྒྱན་གྱུར་ཁྱོད་ལ་འདུད། །འཇམ་དཔལ་དཔའ་བོ་ཇི་བཞིན་ཤེས་བྱའི་གནས། །གཙུ༵ག་ལ༵ག་སྒོ་བརྒྱའི་རྣམ་དཔྱོད་འོད་སྟོང་གིས། །དབྱངས་ཅན་དག༵འ་བ༵འི་འཛུམ་ཕྲེང་བཞད་པ་ཡི། །ངག་གི་དབ༵ང་པོ༵་སྨྲ་བའི་སེང་གེར་འདུད། །དོན་དམ་རྡོ་རྗེའི་དབྱིངས་ལས་མ་གཡོས་ཀྱང་། །གང་འདུལ་
དྲ༵ག་པོ༵་ཐོགས་མེད་རྫུ་འཕྲུལ་གྱི། །རྣམ་བཞིའི་ཕྲི༵ན་ལ༵ས་འདུ༵ས་པ༵འི་རང་རྩ༵ལ་ལས། །འཁོར་འདས་དངོས་ཀུན་དབང་སྒྱུར་བྱེད་པོར་འདུད། །གང་སྐུའི་བཀོད་པས་རབ་འབྱམས་ཞིང་རྣམས་བདག །རྣམ་དག་ཞིང་ཀུན་མ་ལུས་སྐུ་ལ་རྫོགས། །ཀུན་བཟང་མཁའ་ཁྱབ་རྒྱལ་བ་རྡོརྗེ་འཆང་། །ཨོ་རྒྱན་ཆེན་པོར་སྒོ་གསུམ་གུས་པས་འདུད། །ལྔ་བརྒྱའི་མཐར་ཐུག་དུས་ཀྱི་ཡང་མཐའ་འདིར། །སངས་རྒྱས་གཞན་ལས་མགོན་ཁྱོད་ཐུགས་རྗེའི་སྟོབས། །ཁྱད་པར་འཕགས་པའི་ཞལ་བཞེས་རྗེས་དགོངས་ལ། །གདུང་ཤུགས་དྲག་པོས་རྩེ་གཅིག་གསོལ་བ་འདེབས། །བདག་རྒྱུད་ཡེ་ཤེས་མངོན་སུམ་ཐོགས་མེད་དུ། །མྱུར་དུ་སྩོལ་ཅིག་གུ་རུ་རིན་པོ་ཆེ། །ཇི་ལྟར་བསམ་པ་ལྷུན་གྱིས་འགྲུབ་པ་ཡི། །རེ་བའི་ཤིང་རྟ་འགེངས་པར་མཛད་དུ་གསོལ། །བྱང་ཆུབ་བར་ཆད་ལོག་པར་འདྲེན་པ་ཡི། །མི་དང་མི་མིན་གཉིས་སྣང་འཁྲུལ་པའི་ཆ། །འཛིན་མེད་ཡེ་སྟོང་ངང་དུ་རང་སར་ཞི། །ཆོས་ཀུན་སྒྱུ་མར་འཆར་བར་བྱིན་གྱིས་རློབས། །ཀ་ནས་དག་པའི་སེམས་ཉིད་གཉུག་མའི་གཤིས། །གང་ཤར་གནས་ལུགས་ངོ་བོ་ལྷུན་གྱིས་གྲུབ། །ཡེ་ཤེས་རྡོ་རྗེའི་དབྱིངས་སུ་རང་གྲོལ་ནས། །ཀུན་བཟང་རྡོར་འཆང་གོ་འཕང་ཐོབ་གྱུར་ཅིག །དཀར་པོའི་ཆ་གང་རི་བོང་འཛིན་པའི་དཀྱིལ་འཁོར་ཀུ་མུད་གཉེན། །དཀར་གསལ་དྲི་མེད་བདུད་རྩིའི་འོད་ཀྱིས་མཛེས་པར་གཏམས་འདི་རྨད། །ཇི་བཞིན་ཀརྨ་
བཀའ་བརྒྱུད་བསྟན་པའི་རྒྱལ་མཚན་མཆོག་རྣམས་ཀྱི། །ཞབས་རྟན་ཕྲིན་ལས་སྣང་བ་རབ་གསལ་རྟག་ཏུ་བདེ་ལེགས་ཤོག །རྒྱ་ཆེན་གཙུ༵ག་ལ༵ག་གོམས་སྟོབས་ལ། །ཆོ༵ས་ཀྱི༵་རྒྱ༵ལ་པོ༵་བླ་ན་མེད། །གྲུབ་པ་མཆོག་གི་གསུང་གཡར་ངོར། །པ༵དྨ༵་ཉི༵ན་མོ༵ར་བྱེད་པ༵ས་སྤེལ། །ཤུ་བྷཾ་སརྦ་ཛ་ག་ཏཾ།། །།