སྨིན་དབང་ཟབ་མོའི་མཚམས་སྦྱོར་རིགས་རྣམས་ཕྱོགས་གཅིག་ཏུ་བསྡེབས་པ་ངོ་མཚར་བདུད་རྩིའི་གཏེར་མཛོད།
རཏྣ་གླིང་པའི་གཏེར་བྱོན་ཐུགས་རྗེ་ཆེན་པོ་གསང་འདུས་དབང་གི་བཤད་པ་སྐལ་ལྡན་ཡིད་ཀྱི་གདུང་སེལ་རྣ་བའི་བདུད་རྩི།
སྨིན་དབང་ཟབ་མོའི་མཚམས་སྦྱོར་རིགས་རྣམས་ཕྱོགས་གཅིག་ཏུ་བསྡེབས་པ་ངོ་མཚར་བདུད་རྩིའི་གཏེར་མཛོད་ཅེས་བྱ་བ་བཞུགས་སོ། །
རཏྣ་གླིང་པའི་གཏེར་བྱོན་ཐུགས་རྗེ་ཆེན་པོ་གསང་འདུས་དབང་གི་བཤད་པ་སྐལ་ལྡན་ཡིད་ཀྱི་གདུང་སེལ་རྣ་བའི་བདུད་རྩི་བཞུགས་སོ། །འདིའི་གཤམ་དུ་ཕན་ཡོན་བརྗོད་པ་ཡང་ཡོད། ནམ་མཁའ་དང་མཉམ་པའི་མ་གྱུར་འགྲོ་བ་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་བདེ་བླག་ཏུ་ཐོབ་པར་བྱ་སྙམ་པའི་བྱང་ཆུབ་མཆོག་ཏུ་ཐུགས་བསྐྱེད་ལེགས་པར་གསལ་བཏབ་ནས་གསན་པར་མཛད་འཚལ། དེ་ལ་འདིར་བཅོམ་ལྡན་འདས་འགྲོ་འདུལ་ཐུགས་རྗེ་ཆེན་པོ་གསང་བ་འདུས་པའི་སྒོ་ནས་གདུལ་བྱ་སྐལ་བ་དང་ལྡན་པ་རྣམས་ཡང་དག་པའི་ལམ་ལ་དཀྲི་བའི་ཐབས་ཚུལ་དུ་མ་ལས་སྐབས་སུ་བབ་པ་སྒྲུབ་ཆེན་དང་འབྲེལ་བའི་སྐྱེ་བདུན་མྱོང་གྲོལ་རིལ་བུ་སྒྲུབ་པ་ལ་བརྟེན་ནས་སྨིན་བྱེད་ཀྱི་དབང་བསྐུར་ཟབ་མོ་བགྱིད་པ་ཡིན་ཅིང་། ཐོག་མར་ཡིད་ཆེས་དང་བ་འདྲེན་པའི་ཕྱིར་དུ་ལོ་རྒྱུས་ཟུར་ཙམ་སྨོས་ན།
དེ་ཡང་འཕགས་པ་སྤྱན་རས་གཟིགས་འཇིག་རྟེན་དབང་ཕྱུག་ནི་དུས་གསུམ་གྱི་རྒྱལ་བ་མ་ལུས་པ་ཐམས་ཅད་ཀྱི་ཐུགས་རྗེ་གཅིག་ཏུ་འདུས་པའི་རང་གཟུགས་རྒྱ་མཚོ་ཆེན་པོ་ལྟ་བུ་སྟེ། ཆོས་ཀྱི་སྐུ་འཁོར་འདས་ཐམས་ཅད་ལ་ཡེ་གདོད་མ་ནས་ཁྱབ་པའི་རང་བཞིན་དུ་ངེས་ཤིང་། དེས་ན་ཀུན་ཁྱབ་དང་པོའི་སངས་རྒྱས་འོད་མི་འགྱུར་བ་ཞེས་བྱ་བ་བདེ་བར་གཤེགས་པ་རྣམས་ཀྱི་དབྱིངས་དང་ཡེ་ཤེས་རོ་གཅིག་པའི་ངང་དུ་ལྷུན་གྱིས་གྲུབ་པར་གནས་སོ། །རྒྱུད་ཆེན་ལས། ཕྱོགས་བཅུ་དུས་གསུམ་སངས་རྒྱས་རྣམས། །ཐུགས་རྗེ་ཆེན་པོར་མ་གྱུར་མེད། །དེ་ཉིད་སྐུ་གསུང་ཐུགས་བཅས་པ། །གསང་འདུས་རྒྱུད་འདིར་མ་འདུས་མེད། །ཅེས་གསུངས་པ་དང་། མདོ་སྡེ་ཟ་མ་ཏོག་ལས། ནམ་མཁའ་ནི་ཀུན་ཏུ་ཁྱབ་པ་
ཐུགས་རྗེ་ཆེན་པོའི་ཞལ་དང་། རླུང་གི་འགྲོ་འོང་ནི་གྲག་སྟོང་གསུང་གི་རང་བཞིན། ཉི་མ་དང་ཟླ་བ་རབ་ཏུ་གསལ་བ་ཡེ་ཤེས་སྤྱན་གྱི་རྣམ་པ་སྟེ་ཞེས་གསུངས་པ་དེ་ལ་སོགས་པ་བརྡ་དང་བརྡའི་སྒོ་ནས་གཅིག་དང་དུ་མའི་རྣམ་པར་རོལ་པ་འགྲོ་བའི་དོན་དུ་བསྟན་པ་དང་། རྒྱལ་བ་རྣམས་ཀྱི་གསང་གསུམ་མི་ཟད་རྒྱན་གྱི་འཁོར་ལོར་སྒྱུར་བའི་ལོངས་སྤྱོད་ཡོངས་སུ་རྫོགས་པའི་སྐུའི་བཀོད་པའི་དབང་དུ་བྱས་ན། དེ་ཡང་འོག་མིན་སྟུག་པོ་བཀོད་པ་ཞེས་གཞི་དང་སྙིང་པོ་མེ་ཏོག་གིས་བརྒྱན་པའི་ཞིང་ཁམས་རྒྱ་ཁྱོན་ཚད་ལས་འདས་པ་བཀོད་པ་དང་ཡོན་ཏན་ཕུན་སུམ་ཚོགས་པའི་ཞིང་དེའི་སྟོན་པ་རྣམ་པར་སྣང་མཛད་སྤྱན་རས་གཟིགས་གངས་ཅན་མཚོ་ཞེས་བྱ་བ། གནས་ངེས་པ་འོག་མིན་གྱི་ཞིང་དེར། འཁོར་ངེས་པ་ས་བཅུའི་བྱང་ཆུབ་སེམས་དཔས་བསྐོར་ཞིང་། དུས་ངེས་པ་འཁོར་བ་ཇི་སྲིད་ཀྱི་བར་དུ། ཆོས་ངེས་པ་ཐེག་ཆེན་གསང་སྔགས་འབའ་ཞིག་འཆད་པ། གཙོ་མཆོག་ངེས་པ་ལོངས་སྤྱོད་རྫོགས་པའི་སྐུ་སྟེ། དེའི་བ་སྤུའི་ཁུང་བུ་རེ་རེར་ཡང་འཇིག་རྟེན་གྱི་ཁམས་དཔག་ཏུ་མེད་པ་སྤྲུལ་པའི་ཐུགས་རྗེ་ཆེན་པོའི་རང་གཟུགས་ཀྱིས་འགྲོ་བའི་དོན་མཐའ་ཡས་པར་མཛད་པ་དང་། ཕྱག་གི་ལྷུང་བཟེད་ཀྱི་ནང་སྤོས་ཆུའི་རྒྱ་མཚོ་ཆེན་པོའི་དབུས་སུ་མེ་ཏོག་པདྨ་ཉི་ཤུ་རྩ་ལྔ་བརྩེགས་མར་སྐྱེས་པའི་ཟེའུ་འབྲུ་རེ་རེའི་ནང་ནའང་། འཇིག་རྟེན་གྱི་ཁམས་དཔག་ཏུ་མེད་
པར་སྤྲུལ་པའི། མེ་ཏོག་བཅུ་གསུམ་པའི་ཟེའུ་འབྲུ་དབུས་མ་གཅིག་གི་ནང་དུ་སྟོང་གསུམ་མི་མཇེད་འཇིག་རྟེན་གྱི་ཁམས་འདི་ཆགས་ཤིང་། དེ་ཡང་ཐུགས་ཀའི་ཐད་དུ་གནས་པའི་རྟེན་འབྲེལ་གྱིས་འཇིག་རྟེན་གྱི་ཁམས་འདིར་དགེ་སྡིག་གང་བྱས་སྟོབས་དང་འགྱུར་གཞན་ལས་ཆེ་བར་གསུངས་པའི་བསོད་ནམས་མཆོག་གི་འདུ་བྱས་པ་ཐར་པའི་ལམ་སྟེགས་ཀྱི་གཞི་ཁོ་ནར་གྲུབ་པ་དང་། ངེས་པའི་དོན་དུ་ཐོག་མའི་མགོན་པོ་ཀུན་བཟང་དང་པོའི་སངས་རྒྱས་ཀྱི་རང་བཞིན་དང་། དྲང་བའི་དོན་དུ་འགྲོ་བའི་དོན་ལ་སླར་ཡང་བྱང་ཆུབ་ཏུ་སེམས་བསྐྱེད་པའི་ཚུལ་དང་། ལམ་ལ་སློབ་པ་སོགས་སྣང་ཚུལ་དུ་མར་བསྟན་པ་དང་། མ་འོངས་པར་སངས་རྒྱས་འོད་ཟེར་དཔལ་བརྩེགས་ཀྱི་རྒྱལ་པོར་མངོན་པར་འཚང་རྒྱ་བ་སོགས་དུས་གསུམ་དང་དུས་མེད་ཀྱི་སེམས་ཅན་རྣམས་འདུལ་བའི་ཆེད་དུ། དེ་ལྟ་བུའི་མཐུ་སྟོབས་དང་རྫུ་འཕྲུལ་སྣ་ཚོགས་པར་དབང་བསྒྱུར་བའི་འཕགས་ཆེན་བྱང་ཆུབ་སེམས་དཔའི་སྤྱོད་པ་རླབས་པོ་ཆེ་སྤྱད་ཅིང་། སྟོང་ཉིད་ཤེས་རབ་བདེ་བ་ཆེན་པོའི་རང་བཞིན་ཆོས་ཐམས་ཅད་ཀྱི་ཕ་རོལ་ཏུ་ཕྱིན་མ། དུས་གསུམ་གྱི་རྒྱལ་བ་རྣམས་བསྐྱེད་པའི་གཞི་གསང་བ་ཡེ་ཤེས་དང་དབྱེར་མེད་ཟུང་དུ་འཇུག་པའི་རང་རྩལ་སྣང་བའི་རྣམ་པར་རོལ་པ་སྲས་ནོར་བུ་འཛིན་པ་དང་སྲས་མོ་གསང་སྔགས་འཛིན་མ། དེ་ལས་མ་གཡོས་པར་རྒྱལ་བ་རིགས་ཀྱི་ཡབ་ལྔ་དང་། ཡུམ་ལྔ། སེམས་དཔའ་
ཡབ་ཡུམ་བཅུ་དྲུག །བསྐལ་བཟང་ཞིང་གི་འདྲེན་པ་སངས་རྒྱས་སྟོང་དང་རྩ་གཉིས། འགྲོ་འདུལ་སྤྲུལ་སྐུ་ཐུབ་དྲུག །སྒོ་སྐྱོང་ཁྲོ་རྒྱལ་ཡབ་ཡུམ་སོགས་མདོར་ན་ཞི་བ་དང་ཁྲོ་བོའི་དཀྱིལ་འཁོར་གྱི་འཁོར་ལོ་རབ་འབྱམས་མཐའ་ཡས་པ་བསམ་མི་ཁྱབ་པའི་རང་བཞིན་ཅན་རྣམས་ཀྱང་འདི་ཉིད་ཀྱི་རོལ་གར་ལས་མ་འདས་ཤིང་། འོ་སྐོལ་གྱི་སྟོན་པ་མཉམ་མེད་ཤཱཀྱའི་རྒྱལ་པོས་བསྟན་པའི་དམ་ཆོས་པདྨ་དཀར་པོ་དང་། སྣང་བ་རོལ་པ། ཟ་མ་ཏོག་ཆེ་ཆུང་ལ་སོགས་མདོ་སྡེ་མང་པོ་དང་། བྱ་རྒྱུད་པདྨ་དྲྭ་བ་དང་དོན་ཡོད་ཞགས་པ་སོགས་དང་། སྤྱོད་རྒྱུད་ལ་སྙིང་རྗེ་ཆེན་པོ་རང་བཞིན་རྒྱུད་སོགས་དང་། རྣལ་འབྱོར་རྒྱུད་ལ་པདྨ་ཅོད་པན་གྱི་སྐོར་རྣམས་དང་། བླ་མེད་ལ་པདྨ་རྒྱལ་པོའི་རྒྱུད་ལ་སོགས་པ་སྤྱན་རས་གཟིགས་ཀྱི་སྒོས་རྒྱུད་དཔག་ཏུ་མེད་པ་རྣམས་རྒྱ་གར་གྱི་ཡུལ་ལྗོངས་ཐ་གྲུར་སྤེལ་ཞིང་ཐུགས་རྗེ་ཆེན་པོའི་འོད་ཟེར་གྱིས་ཁྱབ་པར་མཛད་ཅིང་། བོད་ཡུལ་འདིར་ཇི་ལྟར་དར་བའི་ཚུལ་ནི་བཅོམ་ལྡན་འདས་ཀྱིས་མཛད་པ་ཐ་མའི་ཚུལ་བསྟན་པའི་ཚེ། སྤྱན་རས་གཟིགས་ཀྱིས་བོད་ཁ་བ་ཅན་དུ་ཆོས་ཀྱི་འཁོར་ལོ་བསྐོར་བར་གསོལ་བ་ན། འཕགས་པ་ཁྱོད་ཀྱི་གདུལ་བའི་ཞིང་ཁོ་ནར་ངེས་པས་དེ་ལྟར་ཡིད་དམ་འཆའ་བར་གྱིས་ཤིག་ཅེས་གསུངས་པས། འཕགས་པ་ཉིད་ཀྱི་པོ་ཊ་ལའི་རི་བོ་ནས་བྱང་ཕྱོགས་ཁ་བ་ཅན་གྱི་ལྗོངས་སུ་དགོངས་པ་གཏད་ཙམ་ན། ས་འོག་ཏུ་གྲང་
དམྱལ་མི་བཟད་པའི་སྡུག་བསྔལ་གྱི་ཚོར་བས་ཉེན་པ་དཔག་ཏུ་མེད་པ་རྣམས་སྙིང་རྗེའི་ལྕགས་ཀྱུས་ཉེ་བར་དྲངས་ནས་ཐར་པའི་ལམ་ལ་བཀོད། དེ་ནས་འཕགས་པ་མཆོག་དང་། རྗེ་བཙུན་སྒྲོལ་མས་སྤྲུལ་སྒྱུར་གྱི་སྒོ་ནས་ཆོས་ཀྱི་སྣོད་དང་རྟེན་དུ་རུང་བའི་ཕྱིར་ཐབས་མཁས་ཐུགས་རྗེའི་འཕྲུལ་ཀྱིས་བྷོ་ཊ་ཞེས་པའི་རྐང་གཉིས་པ་རྣམས་སྤེལ་ཞིང་། བྱང་ཆུབ་སེམས་དཔའ་ནམ་མཁའི་སྙིང་པོའི་རྣམ་འཕྲུལ་རྒྱལ་པོའི་ཐོག་མ་གཉའ་ཁྲི་བཙན་པོ་འཁྲུངས་པ་དེས་རྒྱལ་ཁྲིམས་ལ་བརྟེན་ནས་མི་ཆོས་ཀྱི་སྲོལ་ཚུགས། དེ་ནས་བྱང་སེམས་ཀུན་ཏུ་བཟང་པོའི་སྤྲུལ་པ་ཐོ་ཐོ་རི་སྙན་ཤལ་གྱི་སྐབས། ཕོ་བྲང་གི་ཡང་རྩེར་མདོ་ཟ་མ་ཏོག །དཔང་ཀོང་ཕྱག་རྒྱ་པ། ཤེལ་གྱི་མཆོད་རྟེན་རྣམས་ནམ་མཁའ་ནས་བབས་ཏེ་དམ་པ་ཆོས་ཀྱི་དབུ་བརྙེས། དེ་ནས་སྤྱན་རས་གཟིགས་དངོས་སྲོང་བཙན་སྒམ་པོ་ཞེས་གྲགས་པ་དབུ་གཙུག་ཏུ་རིགས་བདག་སྣང་མཐའ་འདུ་འབྲལ་མེད་པར་བཞུགས་པ་དེས་ཆོས་འཁོར་ལྷ་སའི་གཙུག་ལག་ཁང་སོགས་བཞེངས་པ་དང་ཇོ་ཤཱཀ་རྣམ་གཉིས་སྤྱན་དྲངས། གཞན་ཡང་སེམས་ཅན་རྣམས་གསུང་ཡི་གེ་དྲུག་པའི་སྒོ་ནས་འགྲོ་དོན་ཕྲིན་ལས་རྒྱ་ཆེར་སྤེལ་བ་སོགས་ལྷ་ཆོས་ཀྱི་སྲོལ་གཏོད། དེ་ནས་འཇམ་དཔལ་སྤྲུལ་པ་ཆོས་རྒྱལ་ཁྲི་སྲོང་ལྡེའུ་བཙན་གྱིས་ཐུགས་བསྐྱེད་རྨད་དུ་བྱུང་བའི་སྒོ་ནས། སངས་རྒྱས་གཉིས་པ་ཨོ་རྒྱན་རིན་པོ་ཆེ་པདྨ་འབྱུང་གནས། ཟ་ཧོར་གྱི་མཁན་
པོ་བོ་དྷི་སཏྭ། བི་མ་ལ་མི་ཏྲ། གཞན་ཡང་རྒྱ་གར་གྱི་པཎ་གྲུབ་མང་པོ་སྤྱན་དྲངས། བོད་ཡུལ་གྱི་ལྷ་སྲིན་མི་བསྲུན་པ་རྣམས་བཏུལ་ཞིང་དམ་ལ་བཞག་ནས་བཀའི་སྲུང་མར་བསྐོས་པ་དང། ཟན་ཡང་དཔལ་གྱི་བསམ་ཡས་གཙོས་གཙུག་ལག་ཁང་ཆེན་པོ་བརྒྱ་དང་རྩ་བརྒྱད། ཕྲན་བུ་སྟོང་དང་རྩ་གཉིས་བཞེངས་པར་མཛད། ལོ་ཙཱ་བ་བཻ་རོ་ཙ་ན། ཀ་ཅོག་རྣམ་གཉིས། ལྡན་མ་རྩེ་མང་སོགས་སྐད་གཉིས་སྨྲ་བ་རྣམས་ཀྱིས་མདོ་སྔགས་ཀྱི་ཆོས་ཚུལ་དུ་མ་བསྒྱུར་ཞིང་གཏན་ལ་ཕབ། ཁྱད་པར་གསང་བ་འདུས་པའི་རྒྱུད་མཁའ་འགྲོའི་བརྡའ་ཡིག་ལས་ཨོ་རྒྱན་ཆེན་པོས་སྒྲ་རང་འགྱུར་གནང་། བཀའི་བསྡུ་བ་པོ་ཡེ་ཤེས་མཚོ་རྒྱལ་དང་། རྒྱལ་བ་མཆོག་དབྱངས། ལང་གྲོ་ལོ་ཙཱ་བ་གསུམ་གྱིས་ཤོག་སེར་ལ་དག་པར་བཀོད། ཨཪྱ་པཱ་ལོའི་གླིང་དང་། ལྷོ་བྲག་གནམ་སྐས་ཅན་རྣམས་སུ་གསང་བ་འདུས་པའི་དཀྱིལ་འཁོར་ཆེན་པོ་ཞལ་ཕྱེས་ནས་ལས་ཅན་རྣམས་རྒྱུད་སྨིན་པར་བཛད་དེ། སྨོན་ལམ་ཟབ་མོས་མཚམས་སྦྱར་ཏེ། བཀའི་སྲུང་མ་རྣམས་ལ་གཉེར་དུ་གཏད་ཅིང་བསེ་ཡི་སྒྲོམ་བུར་བཅུག་ནས་ཟབ་གཏེར་དུ་སྦས་པ་སྟེ། ཐེམ་བྱང་ལས། ཐུགས་རྗེ་ཆེན་པོ་གསང་འདུས་ཞི་ཁྲོའི་སྐོར༔ མོན་མཁར་སྟེང་དུ་མཁའ་རིས་གདན་དྲངས་ཚེ༔ མཚོ་རྒྱལ་བདག་དང་བཙུན་པ་མཆོག་དབྱངས་དང་༔ ཤེལ་དཀར་བཟའ་དང་ལང་གྲོ་ལོ་ཙཱ་ཱདང་༔ ཨ་ཙར་ཡེ་ཤེས་རྣམས་ཀྱིས་ཡི་གེར་
བྲིས༔ གནམ་སྐས་བྲག་ལ་གཏེར་ཁ་གསུམ་སྦས་ཏེ༔ ཞེས་དང་། ཁྱད་པར་སྔོན་འཕགས་མཆོག་སྤྱན་རས་གཟིགས་ཀྱིས་འགྲོ་བའི་དོན་དུ་ཐབས་ལ་མ་རྨོངས་པའི་ཚུལ་དུ་མའི་སྤྲུལ་སྒྱུར་གྱིས་བྲམ་ཟེའི་རིགས་དང་། གཞན་ཡང་གང་ཟག་མཆོག་གི་སྐྱེ་བ་བདུན་བརྩེགས་ཅན་ཁོ་ནར་བཞེས་པའི་སྐུ་ཤ་རྣམས་དང་། རྩ་བརྒྱད་སྟོང་སྦྱར་གྱི་བདུད་རྩི་ཆོས་སྨན་དམ་རྫས་ལ་སོགས་པ་གཏེར་གནས་གཞན་རྣམས་ལའང་རིམ་པར་སྦས་ཤིང་། གཏེར་ཁ་འདིར་ཡང་ཤོག་སེར་དང་སྐྱེ་བདུན་དམ་རྫས་སོགས་རྒྱ་རིམ་པ་བདུན་གྱིས་བཏབ་ནས། དགེ་བསྙེན་སྐུ་ལྷ་མཁའ་རི་དང་༔ ཀླུ་བདུད་ནག་པོ་མགོ་དགུ་དང་༔ མ་མོ་སྔགས་ཀྱི་སྲུང་མ་དང་༔ དམ་ཅན་རྡོ་རྗེ་ལེགས་པ་ལ༔ བཀའ་འདི་གཏད་དོ་ས་མ་ཡཿམ་འོངས་དུས་ཀྱི་ཐ་མ་ལ༔ ལས་ཅན་ཐུགས་རྗེ་ཆེན་པོ་ཡི༔ སྐལ་ལྡན་གཅིག་དང་འཕྲད་པར་ཤོག༔ ཅེས་སྨོན་ལམ་མཛད་པ་བཞིན་ཕྱིས་དུས་ལ་བབ་པ་ན་ལང་གྲོ་ལོ་ཙཱའི་སྐྱེ་བ་འགྲོ་འདུལ་གླིང་པའམ། ཞིག་པོ་གླིང་པའམ། རཏྣ་གླིང་པ་ཞེས་ཡོངས་སུ་གྲགས་པ་དེ་ལྟར་གླིང་པ་གསུམ་གྱི་མཚན་དང་ལྡན་པ། གཏེར་ཆེན་ཆོས་ཀྱི་རྒྱལ་པོ་རིག་འཛིན་གྲུབ་པའི་དབང་ཕྱུག་དེ་ཉིད་ཀྱིས་ཟབ་གཏེར་ཞལ་ཕྱེ་བའི་སྐབས། གཏེར་སྲུང་དགེ་བསྙེན་མཁའ་རི་ལྕམ་དྲལ་ཡང་ཁྲོམ་ཚོགས་རྣམས་ཀྱིས་དངོས་སུ་མཐོང་བར་གཏེར་སྒོ་བསྟན་པ་དང་།
མེ་ཏོག་གི་ཆར་འབབས་ཤིང་། དྲི་བཟང་གི་ངད་ལྡང་བ། དབང་པོའི་གཞུ་ལྟ་བུ་ཁ་དོག་ལྔ་ལྡན་གྱི་འཇའི་གུར་ཁང་དང་། དར་ཡུགས་བརྐྱང་པ་ལྟ་བུ་སོགས་ཡ་མཚན་རྨད་དུ་བྱུང་བའི་ལྟས་དུ་མ་བཅས་ཤོག་སེར་དང་དམ་རྫས་སོགས་སྤྱན་དྲངས་ཤིང་། སྤྱིར་ཨོ་རྒྱན་ཆེན་པོས་གཏེར་ཁ་གཞན་རྣམས་ཀྱི་ཆོས་བདག་གི་གཙོ་བོ་ཡང་རྒྱལ་དབང་ཀརྨ་པ་ན་རིམ་ལུང་གིས་ཟིན་བཞིན་དང་། སྒོས་སུ་ཆོས་འདིའི་བཀའ་བབས་ཀྱི་མངའ་བདག་རྗེ་བདུན་པ་ཆོས་གྲགས་རྒྱ་མཚོ་ལ་གཏེར་བྱོན་གྱི་ཟབ་ཆོས་ཚང་མ་དང་། དམ་རྫས་ཨ་མ་སོགས་འབུལ་ཞིང་། གཞན་ཡང་རྗེ་འབྲུག་པ་རྒྱལ་དབང་ཆོས་རྗེ་སོགས་བཀའ་བབས་ཆོས་ཀྱི་བདག་པོ་ལྔ། ཉེ་བའི་ཐུགས་སྲས་རྣམ་བཞི། རིགས་ལྡན་ལྔ་དང་དཀྱིལ་འཁོར་འཛིན་པ་བརྒྱད། ལས་ཅན་ཆོས་བདག་ཉེར་ལྔ་ལ་སོགས་པ་བྱོན་དང་འབྱོན་འགྱུར་གྱི་བུ་སློབ་ནམ་མཁའི་སྐར་ཚོགས་ཙམ་གྱིས་གཞན་དོན་ཕྲིན་ལས་ཀྱི་སྒོ་དུ་མས་ས་ཆེན་པོའི་རྡུལ་དང་མཉམ་པའི་འགྲོ་བ་རྣམས་ཡང་དག་པའི་ལམ་ལ་བཀོད་པ་སོགས་ཕན་པའི་ཡོན་ཏན་རང་རེ་སོ་སྐྱེའི་བློ་ལས་འདས་ཤིང་བརྗོད་པར་དཀའ་ནའང་ཆ་ཤས་ཙམ་ཞིག་སྨོས་ན། དོན་ཏིག་འགྲོ་བ་ཀུན་གྲོལ་གྱི་རྒྱུད་ལས། ཐུགས་རྗེའི་ཕྲིན་ལས་ཤུགས་འབྱུང་བ༔ འདི་ཉིད་མྱོང་བ་ཙམ་གྱིས་ནི༔ བློ་དང་བྲལ་བའི་དོན་རྟོགས་ནས༔ བསྒོམ་མི་དགོས་པ་མྱོང་གྲོལ་ལོ༔ ཞེས་དང་།
དཔལ་གསང་བ་འདུས་པའི་རྒྱུད་ལས། མ་སྒྲུབ་སངས་རྒྱས་ཐོབ་ཐབས་ལྔ༔ སྔོན་སྦྱང་ལས་དང་ཐོས་གྲོལ་དང་༔ རང་བྱུང་རྒྱུད་མཆོག་བཏགས་གྲོལ་དང་༔ མཚན་ལྡན་པད་ཅན་རྩ་ཡི་གནད༔ གསང་ལམ་ཟབ་མོའི་འཕོ་བ་དང་༔ ངོ་མཚར་མཆོག་རྫས་སྐྱེ་བདུན་ནོ༔ ཞེས་པ་ལྟར་གཏེར་ཆེན་ཉིད་ནས་ཀྱང་འཕན་ཡུལ་དུ་ཆོས་རྗེ་སྨོན་ལམ་རྒྱལ་པོས་བསྐུལ་བའི་བུམ་སྒྲུབ་དང་། གཞན་ཡང་སྒྲུབ་ཆེན་སུམ་ཅུ་ལྷག་ཙམ་མཛད་པས། གཞུང་དུ་གསལ་བའི་ཕྱི་ནང་གི་རྟགས་མཚན་ཁྱད་པར་ཅན་རྣམས་དང་། ཐུན་པ་རྣམས་ཀྱིས་ཀྱང་ཐུགས་རྗེ་ཆེན་པོ་ཞལ་མཇལ་བ་སོགས་ངོ་མཚར་བའི་གནས་དུ་མ་བྱུང་ཞིང་། ཕྱོགས་དང་རིས་སུ་མ་ཆད་པའི་སྐྱེ་འགྲོ་གྲངས་མེད་པ་རྣམས་འཁོར་བ་མཐའ་ཅན་ཆོས་ཉིད་མངོན་གྱུར་གྱི་གནས་ལ་བཀོད་པའི་ཕྲིན་ལས་རྒྱ་ཆེན་རྒྱུན་མི་ཆད་པར་སྤེལ་ཞིང་། རྒྱལ་སྲས་ཚེ་དབང་གྲགས་པ་ཞེས་དབང་ཆེན་རྟ་མགྲིན་དངོས་སུ་སྤྲུལ་པའི་གྲུབ་པ་ཡོངས་ཀྱི་འཁོར་ལོས་སྒྱུར་བ་དེ་ཉིད་དགུང་ལོ་བརྒྱ་དང་བཅུར་བཞུགས་ཤིང་། ཟབ་ཆོས་ཀྱི་རྒྱལ་ཐབས་ཆེན་པོར་གྱུར་པ་དེ་ལས་རིམ་པར་བརྒྱུད་བའི་རྔོད་ཤཱཀྱ་བཀྲ་ཤིས། མཁོར་དྲུང་པ་བསོད་ནམས་བཀྲ་ཤིས། ཚེ་ཆོག་པ་པདྨ་དབང་ཕྱུགརྡོ་རྗེ་འཛིན་པ་བཀྲ་ཤིས་དབང་ཕྱུག །ཡོངས་
འཛིན་ཀརྨ་དོན་ཡོད། དྲིན་ཆེན་ཀརྨ་ཆགས་མེད། ཆེ་ཚང་པ་གསུང་རབ་རྒྱ་མཚོ། འཇམ་མགོན་བསྟན་པའི་ཉིན་བྱེད། རིག་འཛིན་ཐུགས་ཀྱི་རྡོ་རྗེ་སོགས་མཁས་པ་དང་གྲུབ་པའི་དབང་ཕྱུག་དམ་པ་རྣམས་ཀྱི་བཀའ་དྲིན་ལས་ཐོབ་པའི་སྨིན་བྱེད་དབང་བསྐུར་ཟབ་མོ་བགྱིད་པ་ལ། དེ་ཡང་ཐུགས་རྗེ་ཀུན་ལ་ཁྱབ་པ་སྙིང་རྗེའི་སྤྱན་རས་ཀྱིས་འགྲོ་ལ་དུས་དྲུག་གཟིགས་པའི་མཁའ་དབྱིངས་ཡངས་པོར་རྩ་བ་དང་བརྒྱུད་པའི་བླ་མ་རིག་འཛིན་གྲུབ་ཐོབ་རྣམས་ཀྱི་བྱིན་རླབས་ཀྱི་སྤྲིན་ཕུང་གཏིབས་ཤིང་། ཡི་དམ་དཔའ་བོ་མཁའ་འགྲོས་དངོས་གྲུབ་རྣམ་པ་གཉིས་ཀྱི་ཆར་རྒྱུན་ནི་འབེབས། རྟེན་དང་བརྟེན་པའི་དཀྱིལ་འཁོར་སྒྲུབ་རྫས་ཀྱི་མདངས་འཇའ་ཚོན་ལྟར་བཀྲ་ཞིང་གསལ། དམ་ཅན་སྲུང་མ་དགྱེས་པའི་གད་རྒྱངས་ཆེན་པོའི་དབྱར་རྔ་ནི་ལྡིར། སྒྲུབ་པའི་རྣལ་འབྱོར་དཔོན་སློབ་རྣམས་ཀྱང་དམ་ཚིག་དང་ལྡན་པའི་སྒོ་ནས་བསྐྱེད་རྫོགས་ཟུང་དུ་འཇུག་པའི་ས་མ་དྷི་དང་མ་བྲལ་བར་སྒྲུབ་པ་ཆེན་པོའི་སྦྱོར་དངོས་རྗེས་གསུམ་གཞུང་དང་མཐུན་པར་གྲུབ་ཅིང་། དེས་ན་ལུང་བསྟན་བཀའ་རྒྱ་མ་ལས། མདོར་ན་ཨོ་རྒྱན་ངས་བསྟན་ཆོས་རྣམས་ལ༔ གཞུང་བཞིན་སུ་དང་སུ་ཡིས་སྤྱད་པ་ཀུན༔ ཐམས་ཅད་ང་སྤྲུལ་ཡིན་པར་ཤེས་པར་བྱ༔ ཕྱི་རབས་ཀུན་གྱིས་ཡིད་གཉིས་ཐེ་ཚོམ་སྤང༔ གུས་པས་བཀུར་སྟི་ཕུ་
དུད་འབྲེལ་བ་ཐོབ༔ ཅེས་གསུངས་པ་དང་། དབང་བསྐུར་འདི་ཉིད་ཐོབ་པའི་ཕན་ཡོན་ནི། གསང་འདུས་རྒྱུད་ཀྱི་དབང་གི་ལེའུ་ལས། དུས་གསུམ་བདེར་གཤེགས་སྐུ་གསུང་ཐུགས༔ ཡོན་ཏན་ཕྲིན་ལས་མ་ལུས་པ༔ ཡིག་བདུན་དག་ལ་ཡང་དག་རྫོགས༔ དབང་ཐོབ་ཡོན་ཏན་མཐའ་ཡས་ཏེ༔ ཞེས་སོགས་དང་། ཡིག་བདུན་དབང་དང་ལུང་ཐོབ་མིའི༔ ལས་དང་ལས་ཀྱི་རྣམ་སྨིན་རུང༔ མི་དགེ་བཅུ་དང་མཚམས་མེད་ལྔ༔ དུས་འདི་ཉིད་ལ་བྱང་བར་འགྱུར༔ ཞེས་སོ། །དེ་དག་ལ་སོགས་པ་བཀའ་གཏེར་གྱི་གཞུང་རྣམས་སུ་དུ་མར་གསུངས་ཤིང་། སྔགས་རྙིང་མའི་ལུགས་འདིར་རིང་བརྒྱུད་བཀའ་མ་དང་། ཉེ་བརྒྱུད་གཏེར་མ། ཟབ་མོ་དག་སྣང་བརྒྱུད་པ་སྟེ་བཀའ་སྲོལ་དེ་གསུམ་གཅིག་ཏུ་འདུས་པའི་སྨིན་ཅིང་གྲོལ་བའི་དབང་བསྐུར་ཟབ་མོ་ཞུ་བའི་ཕྱིར་ཁྱེད་རང་སློབ་མ་རྣམས་ཀྱི་ངོ་སྐལ་དུ་གྱུར་པའི་མཎྜལ་ཞིག་གནང་འཚལ། ཞེས་པའང་རྒྱལ་དབང་མཆོག་གི་སྤྱན་རས་ཨུཏྤལ་གྱི་འབབས་སྟེགས་སུ། སི་ཏུ་པདྨ་ཉིན་བྱེད་དབང་པོས་བཀོད་པ་མངྒ་ལཾ།། །།
ཐུགས་རྗེ་ཆེན་པོ་གསང་བ་འདུས་པའི་སྒྲུབ་ཆེན་དབང་དང་འབྲེལ་བའི་ཕན་ཡོང་བརྗོད་པ།
༈ ཐུགས་རྗེ་ཆེན་པོ་གསང་བ་འདུས་པའི་སྒྲུབ་ཆེན་དབང་དང་འབྲེལ་བའི་ཕན་ཡོང་བརྗོད་པ་བཞུགས་སོ། །ན་མོ་ལོ་ཀཱི་ཤྭ་ར་ཡ། འོ་ན་ད་ལམ་སྐབས་སུ་བབས་པ་སྐྱེ་བདུན་དམ་རྫས་ཀྱི་བུམ་སྒྲུབ་ཆེན་མོའི་ལོ་རྒྱུས་མདོར་བསྡུས་པ་ཙམ་ཞུ་ན། དེ་ལ་སྤྱིར་རྒྱུད་སྡ-ེ་བཞི་ཀ་ནས་རིལ་བུ་ལ་བརྟེན་ནས་མཆོག་དང་ཐུན་མོང་གི་དངོས་གྲུབ་བསྒྲུབ་པའི་ཐབས་དཔག་ཏུ་མེད་པ་གསུངས་ཏེ། འཇམ་དཔལ་དམར་པོའི་སྒོ་ནས་ཤེས་རབ་རིལ་བུ་དང་། དབྱངས་ཅན་མའི་ཤེས་རབ་རིལ་བུ་སོགས་བསྒྲུབ་པ་ལ་བརྟེན་ནས་ཤེས་རབ་དང་བློ་གྲོས་སྐྱེད་ཐབས་གསུངས་པ་དང་། གསར་མའི་བདེ་དགྱེས་གསང་གསུམ། དམར་ནག་འཇིགས་གསུམ་སོགས་བླ་མེད་ཀྱི་རྒྱུད་སྡེ་ཐམས་ཅད་དང་། རྙིང་མའི་བཀའ་དགོངས་ཕུར་གསུམ་སོགས་རྒྱུད་སྡེ་ཐམས་ཅད་ནས་ཀྱང་། བཟའ་བའི་དམ་ཚིག་གི་སྐབས་བདུད་རྩི་རིལ་བུ་བྱ་ཐབས། དེའི་ཕན་ཡོན་མྱོང་བ་ཙམ་གྱིས་མཆོག་གི་དངོས་གྲུབ་ཐོབ་ཚུལ་མཐའ་ཡས་པར་གསུངས་ཤིང་། མ་ཎི་རིལ་བུ་འདི་ལའང་གཏེར་ཁ་དུ་མ་ནས་བྱོན་པའི་བདུད་རྩི་རིལ་བུ་དང་། གཏེར་སྟོན་དུ་མས་བསྒྲུབས་པའི་བདུད་རྩི་རིལ་བུ་དང་། མཉམ་མེད་དྭགས་པོ་བཀའ་བརྒྱུད་རིམ་བྱོན་དང་། དཔལ་ལྡན་ས་སྐྱ་ན་རིམ་གྱིས་བསྒྲུབས་པའི་བདུད་རྩི་རིལ་བུ། འབྲི་གུང་བའི་བདུད་རྩི་རིལ་བུ་སོགས་ཀྱང་འདྲེས་ཤིང་དོན་ལ་མཆོག་གི་དམ་རྫས་རིལ་བུ་ཡིན་པའི་
ཕྱིར་དང་། བདུད་རྩི་རིལ་བུ་ཡང་ཤ་ལྔ་བདུད་རྩི་ལྔ་ཡིན་ལ། འདི་མཆོག་གི་སྐྱེ་བདུན་གཙོ་བོར་བྱས་པའི་རིལ་བུ་ཡིན་པས། རྒྱུད་སྡེ་རྣམས་ནས་བདུད་རྩི་རིལ་བུའི་ཕན་ཡོན་ཇི་སྐད་བཤད་པ་ཐམས་ཅད་མ་ཎི་རིལ་བུ་འདི་ལ་འབྱུང་ངོ་། །ཁྱད་པར་གསར་མའི་བདེ་མཆོག་རྩ་བ་དང་བཤད་པའི་རྒྱུད་ཆེན་པོ་རྣམས་ནས་ཀྱང་སྐྱེ་བ་བདུན་པ་ཡིན་མིན་བརྟག་པའི་ཐབས་དང་། སྐྱེ་བདུན་དེ་ཡི་ཤ་ལ་བརྟེན་ནས་མཁའ་སྤྱོད་སྒྲུབ་པའི་ཐབས་རྒྱ་ཆེན་པོ་གསུངས་ཤིང་། རྙིང་མའི་ཐུགས་རྗེ་ཁྲོས་མའི་ཆོས་སྐོར་ལ་ཡང་གསུངས་སོ། །ཁྱད་པར་དུ་གསང་སྔགས་རྙིང་མ་བཀའ་རྫོགས་པ་ཆེན་པོའི་རྒྱུད་སྡེ་རྣམས་ནས་གཞན་ལས་ཁྱད་པར་དུ་འཕགས་པའི་གདམས་ངག་མ་བསྒོམ་པར་སངས་རྒྱས་པའི་ཐབས་བཞི་གསུངས་ཏེ། བཏགས་པས་གྲོལ་བ་བཏགས་གྲོལ་འཁོར་ལོ། ཐོས་པས་གྲོལ་བ་ཐོས་གྲོལ་དང་འཕོ་བ། རིིག་པས་གྲོལ་པ་ཌཱ་ཀི་མཚན་ལྡན་པདྨ་ཅན། ཟོས་པས་གྲོལ་བ་སྐྱེ་བདུན་རིལ་བུ་དང་བཞིའོ། །དེ་ལ་ཐུགས་རྗེ་ཆེན་པོ་ཡང་སྙིང་འདུས་པའི་རྒྱུད་ལས། དེ་ནས་སྐྱེ་བདུན་ཤ་བསྒྲུབ་པ༔ དེ་ཉིད་བརྟགས་བསྒྲུབ་འགྲོ་དོན་བྱ༔ བརྟག་པ་སྐྱེ་བདུན་གང་ཡིན་དེས༔ མི་ཡི་སྐྱེ་བ་བདུན་སོགས་དྲན༔ དེ་ཡང་ཆོས་ལྡན་སྐྱེ་བདུན་པའི༔ རོ་བླངས་ཤ་རྣམས་ལེགས་བསྐམས་ཏེེ༔ ཞེས་དང་། ཐུགས་རྗེ་ཆེན་པོ་གསང་བ་འདུས་
པའི་རྒྱུད་ལས། དལ་འབྱོར་ཆོས་ལྡན་མི་ལུས་ནི༔ བདུན་ནི་བརྩེགས་མར་བླངས་པ་ཡི༔ ངེས་པར་ཡིད་ཆེས་ལྡན་པ་དེའི༔ རོ་བླངས་ཤ་རྣམས་ལེགས་པར་བསྐམ༔ ཞེས་གསུངས་པ་ལྟར། སྤྲུལ་པའི་གཏེར་ཆེན་དྲི་མེད་ལྷུན་པོ་དང་། གཞན་ཡང་གཏེར་ཁ་བཅུ་གསུམ་ནས་བྱོན་པའི་བྲམ་ཟེ་སྐྱེ་བདུན་གྱི་ཤ་དང་། བྲམ་ཟེ་དུང་རྣ་ཅན་གྱི་སྐུ་ཤ་པདྨ་གླིང་པའི་གཏེར་མ་དང་། རཏྣ་གླིང་པས་པཉྩ་ལྷ་ཁང་ནས་བཏོན་པའི་བྲམ་ཟེ་ལོ་ལི་ཇོ་སའི་སྐུ་ཤ་དང་། གནམ་སྐས་ཅན་ནས་བཏོན་པའི་བྲམ་ཟེ་ཛྭེ་ཏ་རི་པའི་སྐུ་ཤ་དང་། བྲམ་ཟེ་དྲི་མེད་སྙིང་པོས་གཙོས་བྲམ་ཟེ་ཉི་ཤུ་རྩ་ལྔའི་སྐུ་ཤ་རྣམས་གཙོ་བོ་བྱས་ནས་གསར་རྙིང་རིས་མེད་ཀྱི་དམ་རྫས་ཟབ་མོ་མཐའ་དག་ཀུན་འདུས་ཀྱི་རིལ་བུ་སྟེ། དེ་ལྟར་ཡིད་ཆེས་ཁུངས་བཙུན་དང་བ་འདྲེན་པའི་གནས་ཀྱི་རང་བཞིན་ལ། དེའང་། སྐྱེ་བདུན་བསྒྲུབ་པའི་ཕན་ཡོན་དང་། རིལ་བུ་ཟོས་པའི་ཕན་ཡོན། དབང་ཐོབ་པའི་ཕན་ཡོན་དང་གསུམ་མོ། །དང་པོ་བསྒྲུབ་པའི་ཕན་ཡོན་ནི། གསང་བ་འདུས་པའི་རྒྱུད་ལས། རྒྱལ་བ་མཉེས་མཆོད་རྒྱུན་མི་ཆད༔ སེམས་ཅན་སྒྲིབ་སྦྱོང་རྒྱུན་མི་ཆད༔ བདག་ལ་དངོས་གྲུབ་རྒྱུན་མི་ཆད༔ རྒྱུན་ཆད་མེད་པ་གསུམ་ལྡན་གྱི༔ ཏིང་འཛིན་འདི་ཟབ་འཇིག་རྟེན་འདིར༔ མ་བྱུང་མི་འབྱུང་འབྱུང་མི་འགྱུར༔ དངོས་གྲུབ་མ་ལུས་ཀུན་འབྱུང་ཞིང་༔ མྱུར་དུ་འགྲུབ་པར་ཐེ་ཚོམ་མེད༔ སྒྲུབ་ཐབས་གསུམ་པོ་བསྒྲུབ་ལམ་སྦྱངས༔ དོན་གཉིས་མཐར་
ཕྱིན་སངས་རྒྱས་སོ༔ ཞེས་དང་། གསང་སྒྲུབ་ལས། སྤྱན་རས་གཟིགས་དང་གཉིས་མེད་དེ༔ བར་དོའི་འཇིགས་པ་ཀུན་བྲལ་ཏེ༔ གསང་བ་འདུས་དང་གཉིས་མེད་འགྱུར༔ ཞེས་དང་། སྒྲུབ་པ་བྱེད་པའི་རྣལ་འབྱོར་རྣམས༔ ཚེ་འདིར་རིག་འཛིན་ཐོབ་པར་འགྱུར༔ དང་དུ་ལོངས་ཤིག་སྐལ་ལྡན་རྣམས། །ཞེས་དང་། སྒྲུབ་ཆེན་ལས། སྙིགས་མའི་དུས་སུ་ཐུགས་རྗེ་ཆེན་པོའི་བསྟན་པ་དར་བར་འབྱུང་སྟེ༔ ཀུན་ཀྱང་མ་ཎི་དུང་ཕྱུར་ལ་སོགས་དར་བའི་ཚེ༔ རང་བཞིན་དུ་བཟླས་པས་སྒྲུབ་ཆེན་འདི་ཉིད་བརྒྱ་འགྱུར་གྱི་ཡོན་ཏན་ཆེའོ༔ ཞེས་ཨོ་རྒྱན་ང་ཡི་བཀའོ༔ ཞེས་པས་སྒྲུབ་ཆེན་འདི་ལ་བྱེ་ཆུང་གཅིག་ཐོན་ན་དུང་ཕྱུར་གཅིག་འོང་ངེས་སོ། སྤྱིར་ཡིག་དྲུག་གི་ཕན་ཡོན་མཐའ་ཡས་པ་མདོ་རྒྱུད་དུ་མ་ནས་གསུངས་ཤིང་། དེ་ཡང་ཕྱི་ཡིག་དྲུག །ནང་ཡིག་བཅུ། གསང་བ་ཡིག་བདུན་ཡིན་པར་གསུངས་པས། ཡི་གེ་བདུན་པ་འདི་ཡི་ཕན་ཡོན་ནི། ཐུགས་རྗེ་ཆེན་པོ་ཡང་སྙིང་འདུས་པའི་རྒྱུད་ལས། འཇིག་རྟེན་སེམས་ཅན་སྲོག་གཏོན་པའི༔ བསོད་ནམས་འཕགས་པས་བགྲང་བར་ནུས༔ ཡིག་བདུན་ལན་གཅིག་བརྗོད་པ་ཡི༔ ཡོན་ཏན་བརྗོད་པར་ག་ལ་ནུས༔ ཁམས་གསུམ་སེམས་ཅན་མ་ལུས་ཀུན༔ སངས་རྒྱས་སར་བཀོད་ཡོན་ཏན་རྣམས༔ བགྲང་བར་
ནུས་ཀྱི་ཡིག་བདུན་པ༔ གཅིག་བརྗོད་ཡོན་ཏན་བརྗོད་མི་ནུས༔ རྒྱལ་བ་ནམ་མཁའ་གང་བ་ལཿམཆོད་པ་ཕུལ་བའི་བསོད་ནམས་ཚོགས༔ བགྲང་བར་ནུས་ཀྱི་ཡིག་བདུན་པ༔ གཅིག་བརྗོད་ཡོན་ཏན་བརྗོད་མི་ནུས༔ ཡང་སྙིང་ཡིད་ལ་སུས་བྱེད་ཚད༔ ཐུགས་རྗེ་ཆེན་པོ་ཉིད་ཡིན་ཕྱིར༔ བར་ཆད་བགེགས་ཞི་འགྲོ་བ་འདུལ༔ སྣང་སྲིད་འཁོར་འདས་དབང་དུ་འགྱུར༔ ཡང་སྙིང་ཐོས་ཚད་དྲན་རེག་རུང༔ སྒོམ་བཟླས་འདྲི་འཆང་བཏོན་པ་རྣམས༔ ཡོན་ཏན་ལྡན་ཞིང་གར་སྐྱེས་ཀྱང༔ སྤྱན་རས་གཟིགས་དང་བྲལ་མི་སྲིད༔ ཅེས་སོགས་གསུངས་པ་དང་། གཉིས་པ་རིལ་བུ་ཟོས་པའི་ཕན་ཡོན་ནི། ཐུགས་རྗེ་ཆེན་པོ་གསང་བ་འདུས་པའི་རྒྱུད་ལས། དེ་ནས་བཅོམ་ལྡན་རིགས་བདག་ལ༔ འདུས་པའི་འཁོར་གྱིས་ཡོངས་ཞུས་པ༔ རྩོལ་མེད་ངོ་མཚར་མཆོག་གི་རྫས༔ ཟོས་པས་སངས་རྒྱས་ཐོབ་པའི་ཐབས༔ བདག་ཅག་འཁོར་ལ་བཀའ་སྩོལ་ཅིག༔ བཅོམ་ལྡན་འདས་ཀྱིས་བཀའ་སྩལ་བ༔ ངོ་མཚར་དེ་ཉིད་བསྒྲུབ་པ་ན༔ བྱང་ཆུབ་སེམས་ལྡན་རྣལ་འབྱོར་གྱིས༔ འགྲོ་དོན་འཁོར་བ་དོང་སྤྲུགས་ཐབས༔ ཞེས་པ་ནས། རིལ་བུ་སུ་ཡི་ལྟོར་སོང་བ༔ ཚེ་རབས་གང་དང་གར་སྐྱེས་ཀྱང༔ སྤྱན་རས་གཟིགས་དང་འབྲལ་མི་སྲིད༔ བདག་པས་གཞན་གཅེས་འགྲོ་དོན་
སྤྱོད༔ ཡིག་བདུན་བཟླས་ཤིང་དམ་ཚིག་བསྲུངས༔ ཐམས་ཅད་འཁོར་བ་དོང་ནས་སྤྲུགས༔ ཅེས་པའི་བར་གསུངས་པ་དང་། འདི་དག་གི་སྒྲུབ་པའི་ཕན་ཡོན་རིག་འཛིན་རཏྣ་གླིང་པའི་གཏེར་ལུང་ལས། གསང་འདུས་རྒྱུད་དོན་སྐྱེ་བདུན་སྒྲུབ་པའི་ཐབས༔ མ་འོངས་དོན་དུ་ཨོ་རྒྱན་པདྨ་ངས༔ ཆོས་དང་དམ་རྫས་གནམ་སྐས་བྲག་ལ་སྦས༔ མ་འོངས་སྲིན་མོ་ཁྲོས་འདྲའི་བྲག་དེ་ནས༔ གཏེར་སྟོན་འགྲོ་འདུལ་རྡོ་རྗེས་བཏོན་པ་ལས༔ ཕན་ཡོན་གནས་སྐབས་མཐར་ཐུག་གཉིས་སུ་བཤད༔ གནས་སྐབས་འཇིགས་པ་བརྒྱད་གྲོལ་མཐར་ཐུག་ནི༔ འགྲོ་བའི་དོན་དུ་སྤྲུལ་བ་འབྱོན་པའོ༔ སྒྲུབ་གནས་སྤ་གྲོ་སྟག་ཚང་སྦས་པ་ཡི༔ འཛད་མེད་རིག་འཛིན་དངོས་གྲུབ་རྒྱ་མཚོའི་གཏེར༔ རིལ་བུ་ཨཱཿཡིག་རང་བྱོན་ཁ་དོག་གསུམ་དུ་ཡོད༔ མ་འོངས་སྙིགས་མ་ལྔ་བཅུ་ཁ་རལ་དུསཿཔདྨ་རྡོ་རྗེའི་མིང་ཅན་དེ་ལ་སྤྲོད༔ གཟའ་དང་རྡོར་ལེགས་དམ་ཚིག་གཉེར་དུ་བསྐོས༔ ཅེས་དང་། པདྨ་བཀའ་ཡི་ཐང་ཡིག་ལས། རྒྱལ་སྲས་ལྷ་རྗེའི་སྐུ་ཤ་གཏེར་དུ་སྦས་སྐབས་སུ། དབང་པོ་ལྔ་དང་ཟག་ཆུ་ཤ་དང་རུས༔ ཤིག་གི་སྙིང་ཙམ་སུ་ཡི་ལྟོར་སོང་བ༔ རྨོངས་པའི་ལྟོར་སོང་མི་ཡི་དངོས་གྲུབ་འབྱུང༔ དབུལ་པོའི་ལྟོར་སོང་ནོར་གྱི་དངོས་གྲུབ་ཐོབ༔ འཆི་འཕོའི་ལྟོར་སོང་ཚེ་ཡི་དངོས་གྲུབ་ཐོབ༔ དད་ཅན་ལྟོར་སོང་ཆོས་ཀྱི་
དངོས་གྲུབ་ཐོབ༔ དེ་ལ་སོགས་ཀྱི་ཡོན་ཏན་མང་ཡོད་ཀྱང༔ ལོག་ལྟ་ཅན་གྱིས་ཡོན་ཏན་སྐྱོན་དུ་མཐོང་༔ དེ་ཡང་འབྲེལ་བ་སྣ་གཅིག་ཐོབ་པ་ཡིན༔ སྒྲིབ་པ་དག་སྟེ་ཆོས་ཉིད་ལས་སད་འགྱུར༔ ཅེས་གསུངས་པ་དང་། སྐྱེ་བདུན་རིལ་བུས་འདུལ་བའི་དུས་ཚོད་ནི་དེང་གི་སྐབས་ཉིད་དུ་ངེས་པ་སྟེ། དོན་ཏིག་འགྲོ་བ་ཀུན་སྒྲོལ་གྱི་རྒྱུད་ལས། སྙིགས་མའི་དུས་སུ་ཚེ་ཐུང་ནད་མང་ཞིང་། །ལོངས་སྤྱོད་དབུལ་ཕོངས་ཉོན་མོངས་རང་སར་གྲོལ། །ཆོས་ལ་ཉན་བསམ་སྒོམ་གསུམ་གུས་མཁན་མེད། །དེ་དུས་ཚེགས་ཆུང་དོན་ཆེའི་དམ་རྫས་འདི། །འགྲོ་དོན་ཕྱོགས་བཅུར་སྐྱོ་ངལ་མེད་པར་སྤེལ། །ཞེས་པ་ལ་སོགས་པའི་ཕན་ཡོན་བརྗོད་ལས་འདས་པར་མཆིས་སོ། །རིལ་བུ་འདི་ཉིད་རི་བོ་ཆེན་པོའི་རྩེར་སྦས་ན། རི་དེ་ལ་རླུང་ཕོག་ཚད་ཀྱི་སྐྱེ་འགྲོ་ཕོ་མོ་དང་། སྣང་སྲིད་ཀྱི་མི་མ་ཡིན་པ་ཐམས་ཅད་ཐར་པའི་ལམ་ལ་འགོད་པར་འགྱུར་རོ། །ལྷ་སྲིན་སྡེ་བརྒྱད་ཀྱི་གནོད་འཚེ་ཐམས་ཅད་ཞི་བར་འགྱུར་རོ། །ཚོང་འདུས་དང་ས་མདོ་རྣམས་སུ་སྦས་ན་དེར་ཕྱིན་ཚད་ཐམས་ཅད་ཀྱི་ལས་སྒྲིབ་དག་ནས་ཐར་པའི་ལམ་སྣ་ཟིན་པར་འགྱུར་རོ། །དཀོར་མཛོད་དུ་སྦས་ན་ལོངས་སྤྱོད་འཕེལ་བར་འགྱུར་རོ། །ནོར་ལྷས་སུ་སྦས་ན་གོད་ཡམས་མི་འབྱུང་ཞིང་རྟ་ནོར་འཕེལ་བར་འགྱུར་རོ། །ཞིང་ལ་སྦས་ན་ལོ་ཏོག་ལེགས་པར་འགྱུར་རོ། །མཚོའམ་ཆུ་མིག་གི་འགོར་སྦས་ན་ཆར་ཆེན་པོ་
འབབ་པ་འགྱུར་རོ། །མེ་ལ་བསྲེག་ན་དུད་པ་ཕོག་ཚད་ཀྱི་སྐྱེ་འགྲོ་ཐམས་ཅད་སངས་རྒྱས་པ་དང་། སྡེ་བརྒྱད་ཀྱི་གདུག་རྩུབ་ཐམས་ཅད་ཞི་བ་དང་། འགོ་བའི་ནད་རིམས་རྒྱུན་ཆད་པར་འགྱུར་རོ། །ལུས་ལ་འཆང་ན་འགོ་ནད་དང་མཚོན་ཆའི་རིགས་ཐམས་ཅད་ཐུབ་པར་འགྱུར་རོ། །རིལ་བུ་ཆུར་སྦྱངས་ནས་ཞིང་ལ་འཐོར་ན་འབུ་སྲིན་དང་བཙའ་སད་སོགས་གནོད་པ་ཐམས་ཅད་ཐུབ་པར་འགྱུར་རོ། །སྐུ་གསུང་ཐུགས་རྟེན་གྱི་ནང་དུ་འཇུག་ན་ཕྱག་སྐོར་འབྲེལ་ཚད་རྫོགས་པའི་སངས་རྒྱས་ཀྱི་ས་ལ་ཕྱིན་པར་འགྱུར་རོ། །ཁྱད་པར་དུ་ུས་གནད་གསོ་བའི་ནང་གཞུག་བྱས་ན་མཐའ་ཡི་དམག་ཚོགས་བཟློག་པར་འགྱུར་རོ། །གང་དུ་བསྒྲུབ་པའི་ཡུལ་དེར་བཀྲ་ཤིས་ཤིང་བྱིན་ཆགས་པ་དང་། འཇའ་འོད་དང་སྤྲིན་རྒྱུན་ལྡན་དུ་འབྱུང་བ་དང་ཆར་ཆུ་དུས་སུ་འབེབས་པར་འགྱུར་རོ། །ཐན་པ་དང་ལོ་ནད་བཙའ་སད་ཐམས་ཅད་མི་འབྱུང་ཞིང་ལོ་ཕྱུགས་རྟག་ཏུ་ལེགས་པ་དང་མུ་གེའི་བསྐལ་པ་ཐམས་ཅད་ཞི་བར་འགྱུར་རོ། །མི་ནད་དང་ཕྱུགས་ནད་ཐམས་ཅད་རྒྱུན་ཆད་པར་འགྱུར་རོ། །ཕྱི་ནང་གི་དུས་འཁྲུགས་ཐམས་ཅད་ཞི་བ་དང་མཐའ་ཡི་དམག་དཔུང་ཐམས་ཅད་བཟློག་པར་འགྱུར་རོ། །དབང་ཐོབ་པའི་ཕན་ཡོན་ནི།
དཀྱིལ་འཁོར་མཐོང་ཞིང་དབང་བསྐུར་ཐོབ། །ཕུང་པོ་བདག་ཉིད་སྨིན་པར་འགྱུར། །སྡིག་པ་ཐམས་ཅད་རྣམ་པར་སྤང་། །རྡོ་རྗེ་འཛིན་པའི་གནས་ཐོབ་བོ། །ཞེས་སོགས་གསུངས་པ་དང་། རིག་འཛིན་པདྨ་འབྱུང་གནས་ཀྱིས། གཏེར་སྟོན་རཏྣ་གླིང་པ་ཉིད་ལུང་བསྟན་ཞལ་གདམས་དང་བཅས་པའི་མཇུག་ནས། སྐལ་ལྡན་དེ་ཡི་གདུལ་བྱ་རྗེས་འཇུག་རྣམས༔ ། སློབ་མ་བས་ཀྱང་ཡང་སློབ་རྗེས་སློབ་དུས༔ རིམ་པ་བཞིན་དུ་བསྟན་པ་མཐའ་རྒྱས་འགྱུར༔ མཐའ་དབུས་ཕྱོགས་མཚམས་ཀུན་ཏུ་ཆོས་འདི་དར༔ སྙིགས་མའི་འགྲོ་བ་ཕྱམ་གཅིག་ཐར་ལམ་བགྲོད༔ འཕྲད་ཆོག་མཐོང་གྲོལ་འགྱུར་ཏེ་ངོ་མཚར་ཆེ༔ བོད་ཡུལ་ས་འོག་ཀུན་གྱི་གཏེར་གཅིག་མ༔ ལས་ཅན་སྐྱེས་བུ་རྣམས་ཀྱིས་འདི་སྤྱོད་ཅིག༔ ཅེས་དང་། ལང་གྲོས་ཞུས་པའི་ལན་ལས་ཀྱང་། བུ་བས་ཀྱང་ཡང་སློབ་ཀྱི་དུས་ན་བསྟན་པ་མཐའ་རྒྱས་སུ་འགྲོ་བར་འགྱུར་རོ༔ ཞེས་ལུང་བསྟན་པ་དང་། རཏྣའི་གཏེར་ཆོས་ཀྱི་ནང་ནས་ཀྱང་ཐུགས་རྗེ་ཆེན་པོ་གསང་བ་འདུས་པ་འདི་བོད་ཡུལ་དུ་ཡུན་རིང་དར་ཏེ་ཐུགས་རྗེ་ཆེན་པོའི་སྤྲུལ་པ་དང་སྲས་བྱང་ཆུབ་སེམས་དཔའི་རིགས་དེ་དག་གི་སློབ་བརྒྱུད་ལ་སོགས་རིམ་པ་བཞིན་དུ་རྒྱུན་མ་ཆད་པར་
བྱོན་ནས་ཡིག་བདུན་གྱི་བསྟན་པ་འཛིན་པ་དང་། ལ་ལས་སྐྱོང་བ་དང་། ལ་ལས་སྲུང་བར་བྱེད། རང་གཞན་ཀྱི་དོན་རྒྱ་ཆེན་པོར་བྱེད་པ་ལུང་བསྟན་པ་ནི། ཐུགས་རྗེ་ཆེན་པོ་གསང་བ་འདུས་པའི་རྒྱུད་ཆེན་པོ་ཉིད་ལས། མ་འོངས་བསྟན་པའི་སྒྲོན་མེ་འདི༔ ཤཱཀ་ཐུབ་མྱ་ངན་འདས་ནས་ཀྱང༔ ལོ་ནི་སུམ་སྟོང་ཉེ་བ་ན༔ རྡོ་རྗེ་གདན་གྱི་བྱང་ཕྱོགས་ངོས༔ རི་བོ་ནག་པོ་བཅུ་གསུམ་འདས༔ ཁ་བ་ཅན་གྱི་རྒྱལ་ཁམས་སུ༔ འགྲོ་ཀུན་ཐུགས་རྗེ་ཆེན་པོའི་ཞིང་༔ ཐུགས་རྗེའི་སྤྲུལ་སྲས་བརྒྱུད་འཛིན་གྱིས༔ ཡིག་བདུན་བསྟན་པ་འཛིན་སྐྱོང་སྲུངས༔ རིམ་པ་བཞིན་དུ་དོན་གཉིས་སྤྱོད༔ རྒྱུད་མཆོག་འདི་ཡང་དེར་སྣང་འགྱུར༔ ཞེས་བཀའ་སྩལ་ཏོ། །དེ་ལྟར་སྐལ་ལྡན་གྱི་སློབ་མ་ཁྱེད་རྣམས་ཀྱིས་དད་གསུམ་རྣམ་པར་དག་པའི་མོས་པ་བརྟན་པོའི་སྒོ་ནས་ཐུགས་ཀྱི་དཔལ་བེའུར་སིམ་པ་ཞུ། ཞེས་ཆགས་མེད་རིན་པོ་ཆེའི་གསུང་ལས་མདོར་བསྡུས་ཏེ་སི་ཏུ་པདྨ་ཉིན་བྱེད་དབང་པོས་བཀོད་པ་དགེ་ལེགས་འཕེལ། སརྦ་དཱ་ཀ་ལྱྭ་ཎཾ་བྷ་ཝ་ཏུ།། །།
ཚེ་སྒྲུབ་ཐབས་ཤེས་ཁ་སྦྱོར་དབང་གི་མཚམས་སྦྱོར་སྐལ་བཟང་རྣ་བའི་བདུད་རྩི།
ཚེ་སྒྲུབ་ཐབས་ཤེས་ཁ་སྦྱོར་དབང་གི་མཚམས་སྦྱོར་སྐལ་བཟང་རྣ་བའི་བདུད་རྩི་ཞེས་བྱ་བ་བཞུགས་སོ། །ན་མོ་ཨཱ་ཡུཿཨ་མི་ཏ་བྷ་པདྨཱ་ཀཱ་ར་ཡེ། འདིར་གཏེར་ཆེན་མི་འགྱུར་རྡོ་རྗེའི་གཏེར་བྱོན་ཚེ་སྒྲུབ་ཐབས་ཤེས་ཁ་སྦྱོར་གྱི་སྨིན་དབང་ཟབ་མོའི་མཚམས་སྦྱོར་དང་དབང་བཤད་དད་ལྡན་དང་བ་འདྲེན་པའི་ཕྱིར་དུ་སྤྲོ་ན། ཐོག་མར་དཀྱིལ་འཁོར་གཞུང་བཞིན་བསྲང་ནས་བཀའ་སྲུང་རྣམས་ཀྱི་གཏོར་འབུལ་གྲུབ་མཚམས་སྒོ་དབྱེ་འདོན། བླ་མ་རིག་འཛིན་གྱིས་དབང་ལེན། རཀྵཿབར། དེ་ནས་སློབ་མ་སྒོ་དྲུང་དུ་འདུག་བཅུག་ནས་བདུད་བཞི་རྣམས་ཀྱང་བཏོན་ལ་རིམ་བཞིན་ཕྱི་རོལ་རྒྱང་རིང་པོར་སྐྱེལ། སྲུང་འཁོར་བསྒོམ། བཀའ་སྲུང་གཏོར་འབུལ་རྣམས་ཕུལ་གྲུབ་ནས། ཧཱུྃ། ཡེ་ཤེས་ལྔ་ཡི་སོགས་ཀྱིས་ཁྲུས་བྱས་ནས་ནང་དུ་འོང་ལ་བགེགས་བསྐྲད། དེ་ནས་དཀྱིལ་འཁོར་ཡོལ་བའི་ཕྱི་རོལ་དུ་གནས་པ་ལ་སློབ་དཔོན་གྱིས་དྲི་བ། ཀྱཻ་ཧོཿརིགས་ཀྱི་བུ་སོགས་ནས། དྲང་པོར་སྨོས༔ བར་དང་། དེ་ནས་སློབ་མ་རྣམས་ཀྱིས་སམ་ཡང་ན་རྗེས་ཟློས་ཀྱིས། ཀྱཻ་ཧོཿརྡོ་རྗེ་འཛིན་པ་སོགས་དང་། སློབ་དཔོན་གྱིས། ཀྱཻ་ལེགས་སོ་སོགས་དང་། ཡང་རྗེས་ཟློས་སམ་སློབ་མས། ལྷ་ཚེ་ལྷ་རིག་འཛིན་སོགས་ཞུ། ཡང་སློབ་དཔོན་གྱིས། ལེགས་སོ་སྐྱེས་བུ་སོགས་དང་རྗེས་ཟློས་སམ། སློབ་མས། ལེགས་སོ་ལེགས་སོགས་ཞུ་ནས་ཕྱག་འཚལ། ཡོལ་བ་བསལ་ནས་དྲུང་དུ་འཁོད། སློབ་དཔོན་གྱིས། སྔོན་ཆད་དཀྱིལ་འཁོར་གཉན་པོ་མ་མཐོང་པའི་བརྡར་གདོང་གཡོགས་འཆིང་བའི་མོས་
པ་མཛོད། མིག་དར་བཅིངས་ལ། བཅོམ་ལྡན་འདས་ཚེ་དང་ཡེ་ཤེས་དཔག་ཏུ་མེད་པའི་དཀྱིལ་འཁོར་གྱི་དབང་བསྐུར་ཟབ་མོ་ཞུ་བའི་དོན་ཏུ་མཎྜལ་འབུལ་བར་ཞུ། མཎྜལ་ནི། ཧོཿབདག་ལུས་ཕུང་ཁམས་སོགས་ཀྱིས་མཎྜལ་ཕུལ་ལ། སློབ་དཔོན་གྱིས་འདི་སྐད་དུ། ནམ་མཁའ་དང་མཉམ་པའི་སེམས་ཅན་ཐམས་ཅད་ཡང་དག་པར་རྫོགས་པའི་སངས་རྒྱས་ཚེ་དང་ཡེ་ཤེས་དཔག་ཏུ་མེད་པ་འོད་སྣང་མཐའ་ཡས་ཀྱི་གོ་འཕང་རིན་པོ་ཆེ་ཐོབ་པར་བྱ་སྙམ་པས་ཐུགས་བསྐྱེད་རྣམ་པར་དག་པའི་སྒོ་ནས་ལེགས་པར་གསན་འཚལ། དེ་ཡང་དུས་གསུམ་གྱི་རྒྱལ་བ་ཀུན་གྱི་བདག་ཉིད་ཤཱཀྱའི་དབང་པོའི་རྒྱལ་ཚབ་དམ་པར་བསྔགས་པའི་སངས་རྒྱས་གཉིས་པ་ཨོ་རྒྱན་གྱི་སློབ་དཔོན་མཚོ་སྐྱེས་རྡོ་རྗེ་འཆང་ཆེན་པོ་གུ་རུ་པདྨ་འབྱུང་གནས་དེ་ཉིད་ཀྱིས་གདུལ་བྱ་མཐའ་དག་སྨིན་གྲོལ་ཐར་ལམ་ལ་བཀོད་པའི་ཕྱིར་དུ་ཟབ་མོའི་གདམས་པ་ཆེས་ཆེར་དུ་མར་སྩལ་བའི་ནང་ཚན་ལས། འཆི་བ་མེད་པའི་རྡོ་རྗེའི་ཚེ་དང་ཡེ་ཤེས་ཀྱི་དངོས་གྲུབ་སྒྲུབ་པའི་ཉེ་ལམ་ཟབ་མོའི་གཏེར་ཁ་མ་འོངས་ཕྱི་མའི་སེམས་ཅན་རྣམས་ལ་ཐུགས་བརྩེ་བའི་སླད་དུ་གངས་ཅན་བོད་ཀྱི་ཡུལ་འདིར་ཚེ་རིལ་དང་། ཚེ་ཆུ་ལྷག་པར་ཟབ་མོའི་གདམས་པ་འགའ་ཞིག་སྦས་ཤིང་། གནས་ཁྱད་པར་ཅན་བསམ་ཡས་མཆིམས་ཕུ། གཡའ་མ་ལུང་། འབྲས་མོ་ལྗོངས། པདྨ་བཀོད། ཟམ་བུ་ལུང་ལ་
སོགས་པ་རྣམས་ཚེ་ཡི་སྒྲུབ་གནས་རྣམས་སུ་བྱིན་གྱིས་བརླབས། ཚེ་མི་འགྱུར་བའི་རྒྱ་ཡིས་མཚན་པའི་བྲག་ཕུག་མཱ་ར་ཏི་ཀ། ཡར་ལུང་ཤེལ་བྲག །སྒྲགས་ཀྱི་ཡང་རྫོང་། ལྷོ་བྲག་མཁར་ཆུ། ཁམས་ཀྱི་སེང་གེ་གནམ་མཆོངས། སྐྱིད་འབྱམས་ཀྱི་ཉི་ཟླ་ཕུག་དང་ཐབས་ཤེས་ཕུག་ལ་སོགས་པ་ཡང་ཚེ་བསྒྲུབ་པའི་རང་བྱུང་གི་སྒྲུབ་ཕུག་མང་པོར་བྱིན་གྱིས་བརླབས། རི་བོ་ལྷུན་ཆགས་པ་དཔལ་གྱི་ཙཱ་རི་ཏྲ། གཙང་གི་ཇོ་མོ་ཁ་རག །ཡར་ལྷ་ཤམ་པོ་སོགས་དང་། ཁྱད་པར་ཏི་སེ་གངས་ཀྱི་རི་དང་། ཀམ་པོ་གངས་ཀྱི་ར་བ། རོང་བཙན་ཁ་བ་དཀར་པོ་སོགས་བོད་ཀྱི་འབྲོག་ཆེན་དང་། གངས་རི་ཐམས་ཅད་ཀྱང་རྡོ་རྗེ་ཚེ་ཡི་སྒྲུབ་པའི་གནས་མཆོག་ཏུ་བྱིན་གྱིས་བརླབས། མ་ཕམ་གཡུ་མཚོ། གནམ་མཚོ་ཕྱུག་མོ། ཙཱ་རི་གཡུ་མཚོ། རྨ་ཀུང་ལུང་སོགས་གཏན་འཁྱིལ་གྱི་མཚོ་རྣམས་དང་། ཆུ་མིག་མང་པོ་ཚེ་ཆུ་གཏེར་གནས་སུ་བྱིན་གྱིས་བརླབས་པ་སོགས་རྫུ་འཕྲུལ་གྱི་བཀོད་པས་གཏེར་དུ་སྦས་པ་ལས། ད་ལམ་སྐབས་སུ་བབས་པའི་ཚེའི་སྒྲུབ་པའི་སྒོ་ནས་སྨིན་གྲོལ་གྱི་གདམས་པ་ཟབ་མོ་འདི་ནི་སྔོན་གུ་རུ་པདྨ་འབྱུང་གནས་དང་། ཌཱ་ཀི་ལྷ་ལྕམ་མནྡ་ར་བ་རྣམ་གཉིས་བྲག་ཕུག་མཱ་ཱར་ཏི་ཀར་ཚེ་ཡི་རིག་འཛིན་སྒྲུབ་པའི་ཚེ་མགོན་པོ་ཚེ་དཔག་མེད་དངོས་སུ་བྱོན་ཏེ་བྱིན་གྱིས་བརླབས་ནས་ཚེ་སྒྲུབ་ཀྱི་སྐོར་དུ་མ་གསུངས་ཤིང་། ཨོ་རྒྱན་ཡབ་ཡུམ་དང་གཉིས་མེད་གཅིག་ཏུ་
འདྲེས། སྐྱེ་འཆི་མེད་པ་རྡོ་རྗེའི་སྐུ་ཐོབ་ནས་སླར་གུ་རུ་ཉིད་གདོང་དམར་བོད་ཀྱི་ཡུལ་དུ་འབྱོན་པའི་སྐབས་མངའ་བདག་འཇམ་དབྱངས་ཀྱི་སྤྲུལ་པ་ཁྲི་སྲོང་ལྡེའུ་བཙན་གྱི་དུས་སུ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་གི་དབུ་རྩེར་གཏན་ལ་ཕབ་ནས་བཀོད་ཅིང་། ཕྱིས་ལྷ་སྲས་མུ་ཁྲི་བཙན་པོར་སྔོན་འཕྲལ་སྨོན་ལམ་བཟང་པོས་མཚམས་སྦྱར་ནས་གཏེར་དུ་སྦས་ཤིང་། དེ་ཉིད་ཀྱི་སྐྱེ་བའི་རྣམ་འཕྲུལ་པ་རིག་འཛིན་མི་འགྱུར་རྡོ་རྗེ་དྲག་པོ་ནུས་ལྡན་རྩལ་ཞེས་གྲགས་པ་སྤྲུལ་པའི་གཏེར་ཆེན་གང་དེར་སྔོན་སྦྱངས་སྐྱེས་སྟོབས་ཀྱི་ཡོན་ཏན་སྨིན་པའི་མཐུ་ལས་རྫུ་འཕྲུལ་སྣ་ཚོགས་ལ་དབང་བསྒྱུར་བ་དེ་ཉིད་ཀྱིས་ཨོ་རྒྱན་རིན་པོ་ཆེའི་བྱིན་གྱིས་བརླབས་པའི་སྒྲུབ་གནས་ཆེན་པོ་ཁམས་ཀྱི་སེང་གེ་གནམ་མཆོངས་བྲག་དང་འབྲེལ་བའི་སྙིང་ཐང་སྐྱིད་འབྱམས་ཉི་ཟླ་ཕུག་གི་གཡོན་ཟུར། སྲ་བརྟན་རང་བྱུང་རྡོ་རྗེའི་བྲག་གི་དབུས་ནས་དངོས་སུ་སྐལ་ལྡན་ཀུན་གྱིས་མཐོང་བར་གཏེར་སྒྲོམ་སྤྱན་དྲངས་ནས་མཁའ་འགྲོའི་བརྡའི་ཡི་གེ་བཀྲོལ་ནས་ཇི་ལྟ་བར་གཏན་ལ་ཕབ་ནས་ཟབ་ཆོས་རིན་པོ་ཆེ་གཞན་ལས་ཁྱད་པར་དུ་འཕགས་པ་དཔེར་ན་རྒྱུ་སྐར་སྟོང་གི་དབུས་སུ་ཟླ་བའི་དཀྱིལ་འཁོར་གསལ་ལ་དྭངས་བ་བཞིན་ཚེ་སྒྲུབ་ཐབས་ཤེས་ཁ་སྦྱོར་དུ་གྲགས་པ་འདི་ཉིད་བྱིན་རླབས་ཀྱི་ཚན་ཁ་རྨད་དུ་བྱུང་བ་སྟེ། དེ་དག་གི་དཀྱིལ་འཁོར་གཉེན་པོའི་སྒོ་ནས་སྨིན་བྱེད་ཀྱི་དབང་བསྐུར་
བསྒྲུབ་པ་ལ་ཞིང་ཁམས་ཀྱི་ལོ་རྒྱུས་གཏེར་གཞུང་རྡོ་རྗེའི་ཚིག་ནས་གསུངས་པ་ལྟར་བརྗོད་པར་བྱ་སྟེ། དེ་ཡང་ཐ་ཚིག་ལོ་རྒྱུས་མདོར་ཙམ་བསྟན་པ་ནི༔ སོགས་ནས། ཞལ་གདམས་མ་ནོར་བ་ཉིད་མཐར་ཕྱིན་པའོཿཅེས་པའི་བར་བརྗོད་ལ། དེ་ལྟར་སྐལ་ལྡན་ཁྱེད་རྣམས་ཀྱིས་དད་པ་མོས་གུས་དག་པའི་སྣང་བས་སྤྲོ་བ་བསྐྱེད་པར་མཛོད་ལ། གསང་བ་སྔགས་ཀྱི་རྣལ་འབྱོར་དཀྱིལ་འཁོར་གཉེན་པོ་འཇུག་པའི་བློས་ཐོག་མར་བླ་མ་དང་དཀྱིལ་འཁོར་གྱི་གཙོ་བོ་དབྱེར་མེད་པའི་དྲུང་དུ་སྐྱབས་སུ་འགྲོ་བ་དང་སེམས་བསྐྱེད་པའི་རྗེས་ཟློས་མཛོད། དཀོན་མཆོག་གསུམ་དང་སོགས། ལན་གསུམ། མ་གྱུར་དུས་གསུམ་སོགས། དེ་ནས་ཁྱེད་རང་རྣམས་ཀྱི་ཚེ་རབས་འཁོར་བ་ཐོག་མེད་ནས་བསགས་པའི་རྒྱུ་དང་འབྲས་བུའི་སྡིག་པ་དང་སྒྲིབ་པ་ཐམས་ཅད་དཀྱིལ་འཁོར་ལྷ་ཚོགས་རྣམས་ཀྱི་སྤྱན་སྔར་གནོང་འགྱོད་དྲག་པོས་བཤགས་པའི་སྒོ་ནས་འདིའི་རྗེས་ཟློས། ན་མོ་ཡེ་ནས་ལས་དབང་སོགས། དེ་ལྟར་ནོངས་བཤགས་ཚངས་པར་བསྩལ་ནས་ལས་དང་ཉོན་མོངས་ཀྱི་སྒྲིབ་པའི་མུན་པ་རྣམས་བསལ། ཤེས་རབ་ཡེ་ཤེས་གསལ་བའི་སྤྱན་དང་ལྡན་པར་མོས་ཤིག །གསེར་གྱི་ཐུར་མ་ཐོགས་ལ། ཧོཿསྐྱེས་བུ་ཁྱེད་རྣམས་སོགས་ཀྱིས་མིག་དར་བསལ་ལ་ལྷ་ངོ་བསྟན་པ་ནི། ཧོ་གསན་དུ་གསོལ་ལོ་སོགས། རྡོ་རྗེའི་དཀྱིལ་འཁོར་ལ་རེག་པའི་མོས་
པས། འོ་རིགས་ཀྱི་བུ་རྣམས་སོགས་ནས། བསོད་ནམས་ཕུན་སུམ་ཚོགས་པའོ། །བར་བརྗོད་ལ། དེ་ནས་མདུན་བསྐྱེད་ཡེ་ཤེས་ཀྱི་དཀྱིལ་འཁོར་བ་རྣམས་དང་། སློབ་དཔོན་ཚེ་དཔག་མེད་ཀྱི་དཀྱིལ་འཁོར་གསལ་བའི་ཐུགས་ཀ་ནས་འོད་ཟེར་འཕྲོས་པས་ཕྱོགས་དུས་རྒྱལ་བ་སྲས་དང་བཅས་པའི་ཐུགས་རྒྱུད་བསྐུལ་ནས་ཁྱད་པར་དུ་ཚེ་འོད་སྣང་བ་དཔག་ཏུ་མེད་པ་ཡེ་ཤེས་སེམས་དཔའི་ལྷ་ཚོགས་རྣམས་སྐུ་ཆེ་ཆུང་སྣ་ཚོགས་པ་མདུན་གྱི་ནམ་མཁར་བྱོན་ནས་དེ་དག་རྣམས་ཀྱི་ཡེ་ཤེས་ཆེན་པོའི་གསང་བ་བསམ་གྱིས་མི་ཁྱབ་པའི་ཕྲིན་ལས་ཀྱིས་བྱིན་གྱིས་བརླབ་པའི་མོས་པ་མཛོད་ཅིག །དེ་ནས་རོལ་ཆས་རྣམས་ལྡིར་ལ་མདའ་དར་གཡབ། སྤོས་འགྲིམ་ལ། ཧཱུྃ། ཞིང་ཁམས་རྣམ་དག་སོགས་ཀྱིས་སློབ་མ་ལ་བྱིན་འབེབས་དང་། རང་ཉིད་ཀྱང་ཐབས་ཤེས་ཀྱི་དཀྱིལ་འཁོར་གསལ་བཏབ། ཧཱུྃ། ཡེ་ཤེས་ལྔ་ལྡན་སོགས་ཀྱིས་སྤྱན་འདྲེན། ས་མ་ཡ་ཛཿཛ་ཧཱུྃ་བྃ་ཧོཿབར་བརྗོད་ལ། སྤྲོས་མེད་ཀྱི་མཆོད་བསྟོད་དམིགས་པ་བྱ། དེ་ནས་དབང་གི་གཞི་འགོད་པའི་སླད་དུ་ཁྱེད་རང་རྣམས་དམིགས་པ་འདི་བཞིན་མཛོད། ཧྲཱིཿའདིར་ཚོགས་སྐལ་ལྡན་སོགས་ནས། ཏིཥྛ་བཛྲཿཞེས་རྡོ་རྗེ་སྤྱི་བོར་བཞག་ལ་ཡེ་ཤེས་པ་རྣམས་དབྱེར་མེད་དུ་བསྟིམ་པར་བྱའོ། །དེ་ལྟར་རྡོ་རྗེ་སྤྱི་བོར་བཞག་པས་ཡེ་ཤེས་པ་དེ་ཉིད་བྱང་ཆུབ་མ་ཐོབ་བར་དུ་འདུ་འབྲལ་མེད་པའི་མོས་པ་མཛོད། དེ་ནས་མདུན་བསྐྱེད་ཀྱི་དཀྱིལ་འཁོར་ལྷ་
ཚོགས་རྣམས་དང་། སློབ་དཔོན་ལྷར་གསལ་བའི་བུམ་པའི་དཀྱིལ་འཁོར་དང་། ནམ་མཁར་གནས་པའི་ལྷ་ཚོགས་རྣམས་ཏེ་ཐབས་ཤེས་ཁ་སྦྱོར་གྱི་དཀྱིལ་འཁོར་བ་རྣམས་ཀྱི་སྐུ་ཡི་ཆ་ལས་ཡེ་ཤེས་བདུད་རྩིའི་རྒྱུན་བབས། བུམ་ནང་ནས་ཁོལ་ཞིང་ཁྱེད་རང་རྣམས་ཀྱི་སྤྱི་བོ་ནས་ཞུགས། ལུས་སེམས་བདེ་བ་ཆེན་པོས་ཁྱབ་པར་སྒོམས་ཤིག །ཧཱུྃ། པདྨ་རཱ་གའི་བུམ་དཀྱིལ་དབུས༔ ཞེས་སོགས་དབང་བསྐུར་ཡོངས་རྫོགས་བཏོན་ནས། དེ་དག་རྣམས་ཀྱིས་རྒྱལ་བ་སྲས་དང་བཙུན་མོ་ཡབ་ཡུམ་ཉན་རང་བྱང་སེམས་རིགས་ལྔ་དང་ཡུམ་ལྔ། སེམས་དཔའ་དང་སེམས་མ་ཐུབ་པ་རིགས་དྲུག །ལྷ་མོ་བཅུ་དྲུག །སྒོ་སྲུང་ཁྲོ་བོ་ཡབ་ཡུམ་རྣམས་ཀྱི་སྨིན་བྱེད་བདུད་རྩིའི་རྒྱུན་གྱི་དབང་མཆོག་དམ་པ་ཐོབ་པ་ཡིན་ནོ། །དེ་ནས་ལྷ་དབང་ལུས་ལ་བསྐུར་བའི་དོན་དུ་འདིའི་རྗེས་ཟློས། ཀྱེ། རྡོ་རྗེ་འཛིན་པ་སོགས། སློབ་དཔོན་གྱིས། ཀྱཻ། ཡི་དམ་ལྷ་ཡི་བསྐྱེད་རིམ་ལ༔ སོགས་ནས། རིགས་ཀྱི་བུ༔ བར་བརྗོད། དེ་ནས་མདུན་བསྐྱེད་དཀྱིལ་འཁོར་ལྷ་ཚོགས་རྣམས་ཀྱི་སྐུ་ལས་མར་མེ་གཅིག་ལ་གཉིས་མཆེད་ཀྱི་ཚུལ་དུ་བྱོན་ནས་ཁྱེད་རང་རྣམས་ལ་ཐིམ་པས་རྣམ་དག་རྒྱལ་བའི་དཀྱིལ་འཁོར་མ་ལུས་པ་གཅིག་ཆར་དུ་དབྱེར་མེད་པར་རྟོགས་པའི་འདུན་པ་མཛོད་ཅིག །ཧཱུྃ། རྒྱལ་བ་རབ་འབྱམས་གཅིག་བསྡུས་པའི༔ སོགས་སྐུ་གཟུགས་དབང་རྣམས་ཡོངས་རྫོགས་བསྐུར་
ནས། དེ་ལྟར་བཅོམ་ལྡན་འདས་རྡོ་རྗེ་ཚེ་དང་ཡེ་ཤེས་ཀྱི་འོད་དཔག་ཏུ་མེད་པ་ཡབ་ཡུམ་སྲས་དང་བཙུན་མོ་ཉན་རང་རྣམས་དང་། རྒྱལ་བ་རིགས་ལྔ་ཡབ་ཡུམ་སོགས་ཀྱི་དབང་བསྐུར་བས་ཕུང་པོ་ལྔ་དང་ཁམས་ལྔ་རྣམ་པར་དག་སྟེ་སྐུ་ལྔ་ཡེ་ཤེས་ལྔ་མངོན་དུ་གྱུར་པའི་གོ་འཕང་ཐོབ། ཉེ་སྲས་སེམས་དཔའ་རྣམས་ཀྱི་དབང་བསྐུར་བས་ཚོགས་བརྒྱད་ཀྱི་འཆིང་བ་རང་སར་གྲོལ། སྤྲུལ་སྐུ་ཐུབ་པ་དྲུག་གི་དབང་བསྐུར་བས་རིགས་དྲུག་གི་རྣམ་སྨིན་དག་ནས་སྐྱེ་བའི་སྒོ་ཆོད། ལྷ་མོ་བཅུ་དྲུག་གི་དབང་བསྐུར་བས་ཡུལ་དང་ཡུལ་ཅན་གྱི་སྣང་བ་ཐམས་ཅད་རྣམ་པར་དག་སྟེ་གཉིས་འཛིན་འཁྲུལ་པའི་སྒྲིབ་པ་རང་སར་དག །སྒོ་སྲུང་ཁྲོ་བོ་ཁྲོ་མོའི་དབང་བསྐུར་བས་བདུད་བཞིའི་བར་ཆད་རྩད་ནས་གཅོད་ཅིང་ལས་བཞི་གྲུབ་པ་ཆེན་པོ་བརྒྱད་ཀྱི་དངོས་གྲུབ་དང་། ཁྱད་པར་དུ་འཆི་མེད་ཚེའི་གོ་འཕང་བདེ་བླག་ཏུ་ཐོབ་པའི་སྐལ་བ་དང་ལྡན་པར་བྱས་སོ། །དེ་ནས་ལྷུང་བཟེད་དང་། །འཁར་གསིལ་ཆོས་གོས་གཏད་ལ། ཧཱུྃ། རྡོ་རྗེ་ཚེ་ཡི་ལྷ་ཚོགས་ཀྱིས༔ སོགས་དང་། དེ་ལྟར་ཀུན་རྫོབ་མཚན་མ་རྫས་ཀྱི་དབང་བསྐུར་བའི་རྟེན་འབྲེལ་ལས་དོན་དམ་པར་སྤྲུལ་པའི་སྐུའི་རོལ་པས་འགྲོ་བ་རྣམས་ཡང་དག་པའི་ལམ་ལ་བཀོད་པའི་སྨོན་ལམ་འབྲ ེལ་པ་འདི་དགོས་པ་ཁྱད་པར་དུ་འཕགས་པའོ། །ཁྲོ་ཆས་རྣམས་ཐོགས་ལ། ཧཱུྃ། དཔལ་གྱི་དུར་ཁྲོད་
ཆས་སོགས། དེ་ལྟར་དུར་ཁྲོད་དཔའ་ཆས་བརྒྱད་ཀྱིས་བརྒྱན་པའི་དབང་བསྐུར་བའི་མཐུས་བདུད་བཞི་དང་ཉོན་མོངས་མ་ལུས་རྩད་ནས་འཇོམས་ཤིང་ཚེ་འདི་ཉིད་ལ་དཔལ་ཧེ་རུ་ཀའི་གོ་འཕང་ཐོབ་པའི་རྟེན་འབྲེལ་ཕུན་སུམ་ཚོགས་པའོ། །འདོད་ཡོན་ལྔ་ཐོགས་ལ། ཧཱུྃ། མཛེས་ཤིང་ཡིད་འོང་སོགས། དེ་ལྟར་ཚེ་རབས་ཐམས་ཅད་དུ་འདོད་པའི་ཡོན་ཏན་རྣམས་ལ་རྟག་པར་ལོངས་སྤྱོད་ཅིང་མི་ཟད་པའི་ནམ་མཁའ་མཛོད་ལ་དབང་འབྱོར་བའི་སྦྱིན་པའི་ཕ་རོལ་ཏུ་ཕྱིན་པ་མཆོག་ཏུ་གྱུར་པའི་སྐལ་བ་དང་ལྡན་པའི་དགོས་པའོ། །དེ་ནས་སྤྱི་འགྲེ་ལྟར་ན་ཚེ་འགུགས་ལ་འཇུག །དེ་མིན་སྐབས་འདིར་སྦྱིན་སྲེག་ལས་མཐའ་དང་། པུསྟིའི་ལུང་སྦྱིན་གཉིས་དང་འོག་ནས་འབྱུང་བའི་ཆོས་སྐྱོང་བཀའ་གཏད་བཅས་ཆོས་བརྒྱུད་སྤེལ་ངེས་ཀྱི་སློབ་མ་མ་གཏོགས་གར་ཐོད་ཐོད་དུ་མི་བྱ། སྤྲོ་ན། ལིང་ག་ལ་ཚེ་བདུད་འགུགས་པ་ནི། ཧཱུྃ། དཀོན་མཆོག་གསུམ་དང་སོགས་བདེན་སྟོབས་ཀྱིས་བཀུག །ཧཱུྃ། རྡོ་རྗེ་ཚེ་དཔག་སོགས་ཀྱིས་ཕུར་པས་བསྒྲལ། ལིངྒ་མེར་བསྲེག་ཞལ་བསྟབ་འདོན། ལས་མཐའ་སློབ་མར་སྦྱིན། དེ་ནས་ཕྱི་ལྟར་ན་གསུང་རབ་ཀྱི་གླེགས་བམ་ཨ་ཡིག་དཀར་པོས་མཚན་པ། ནང་ལྟར་ན་རྒྱལ་བ་རབ་འབྱམས་རྣམས་ཀྱི་གསང་སྔགས་དམ་པའི་ཆོས་ཀྱི་རང་སྒྲ་སྒྲོགས་པ་འདིའི་དབང་བསྐུར་བས་ཁྱེད་རང་རྣམས་ཀྱི་རྒྱུད་ལ་གསུང་དབྱངས་ཡན་ལག་དྲུག་ཅུའི་
ནུས་པ་མཐར་ཕྱིན་ནས་འགྲོ་བའི་དོན་རླབས་པོ་ཆེ་མྱུར་བ་ཉིད་དུ་སྤྱོད་ནུས་པ་ལ་དབང་ཐོབ་པའི་མོས་པ་མཛོད། ཧཱུྃ། རབ་འབྱམས་རྒྱལ་བའི་གསུངས་སོགས་དང་། དེ་ནས་དཀྱིལ་འཁོར་གྱི་ལྷ་ཚོགས་རྣམས་ལ་གསོལ་བ་བཏབ་པས་གཙོ་འཁོར་རྣམས་དང་ཁྱད་པར་ཚེ་བདག་རྒྱལ་བ་རིགས་ལྔ་ཡབ་ཡུམ་རྣམས་ཀྱིས་རང་འདྲའི་སྤྲུལ་པ་དཔག་ཏུ་མེད་པ་ཕྱོགས་བཅུར་སྤྲོས་ནས་ཁྱེད་རང་རྣམས་ཀྱི་ཚེ་ཡར་བ་དང་ཆད་པ་དང་འཐོར་བ་རྣམས་དང་། འབྱུང་བ་བཞི། ཁམས་གསུམ་སྲིད་བཅུད་དཔལ་འབྱོར་གྱི་དྭངས་མ། ཕྱོགས་བཅུའི་རྒྱལ་བ་རྣམས་ཀྱི་གསང་གསུམ་མི་བཟད་པ་རྒྱན་གྱི་འཁོར་ལོའི་དངོས་གྲུབ་ཐམས་ཅད་ཚེ་བདག་ཚེ་འགུགས་ཆེན་པོ་ཡབ་ཡུམ་བཅུའི་ཕྱག་གི་བུམ་པར་བསྡུས་ནས་ཁྱེད་རང་རྣམས་ཀྱི་རྒྱུད་ལ་དབྱེར་མེད་དུ་བསྟིམ་ནས་ཚེ་མི་ནུབ་པ་རྒྱལ་མཚན་ལྟ་བུ། མི་འགྱུར་བ་གཡུང་དྲུང་ལྟ་བུ། མི་ཤིགས་པ་རྡོ་རྗེ་ལྟ་བུར་རྟག་བརྟན་གཞོམ་བྲལ་ཆེན་པོར་རྒྱས་གདབ་པའི་མོས་པ་མཛོད། ཀྱཻ། ཉི་མ་ཤར་ཕྱོགས་རྡོ་རྗེའི་རིགས༔ སོགས། དབྱངས་སྙན་པོས་བརྗོད་ཅིང་མདའ་དར་གཡབ་ནས་མགོར་བཞག །རྡོ་རྗེ་འཆང་དབང་མྱུར་འགྲུབ་ཤོག༔ བར་བརྗོད་ནས། དེ་ལྟར་ཡེ་ཤེས་ལྔ་ཡི་ངོ་བོས་དུག་ལྔའི་ཟེར་བཅོམ་སྟེ་འགུགས་པ་དང་། ལྷ་མོ་ལྔ་ཡི་ངོ་
བོས་ཁམས་ལྔའི་བཅུད་བསྡུས་ཏེ་ཚེ་འགུགས་པ་དང་། དབྱིངས་རིག་རྡོ་རྗེ་དབྱིངས་ཕྱུག་མ་དང་རྡོ་རྗེ་འཆང་གཉིས་ངོ་བོར་འདྲེས་ཏེ་ཁྱེད་རང་རྣམས་ཀྱི་སེམས་ཀུན་ཏུ་བཟང་པོ་སྐྱེ་འཆི་དང་བྲལ་བའི་ཀློང་དུ་སྐྱེ་མེད་དུ་ཐག་བཅད། འཆི་མེད་དུ་གདེང་བཅའ། རེ་དོགས་ལ་བདེན་མེད། སྣང་བའི་ཡུལ་དང་བྱེད་ལས་ཀུན་རྫོབ་སྒྱུ་མ་སྨིག་རྒྱུ་ལྟ་བུར་མདོར་ན་དངོས་སྣང་གིས་བསྡུས་པའི་ཆོས་ཐམས་ཅད་དག་པ་ཡེ་ཤེས་ཀྱི་ངང་དུ་རོལ་པ་མཛོད་ཅིག །དེ་ནས་དཔལ་གྱི་གཏོར་མ་འདི་ཉིད་རྡོ་རྗེ་ཚེ་ཡི་ལྷ་ཚོགས་རྣམས་ཀྱི་དཀྱིལ་འཁོར་ཆེན་པོའི་གནས་ཏེ། ཁྱེད་རང་རྣམས་ཀྱི་སྤྱི་བོར་བཞག་པས་དབང་བཞི་ཐོབ། རྒྱུད་བཞི་སྨིན། སྐུ་བཞི་འགྲུབ། ལམ་བཞི་འབྱོང་། འཆི་བ་མེད་པའི་ཚེ་ཐོབ། རྒུད་པ་མེད་པའི་ལང་ཚོ་རྒྱས། རྟག་བརྟན་གཞོམ་གཞིག་དང་བྲལ་བའི་མགོན་པོ་ཚེ་དཔག་མེད་དང་དབྱེར་མེད་པ་གཏོར་མ་ལྷར་གསལ་བ་མཚོ་ལ་ཆར་བབ་པ་ལྟར་ཁྱེད་རང་རྣམས་ལ་ཐིམ་པའི་མོས་པ་མཛོད་ཅིག །ཧཱུྃ། དཔལ་གྱི་གཏོར་མ་རི་རབ་འབར༔ སོགས་བརྗོད་ནས། གཏོར་མ་སྤྱི་བོར་བཞག །འདིར་གཞུང་ལས་མ་གསལ་ཀྱང་ཚེ་རིལ་ཆང་སྦྱིན་པ་ནི། བཀྲ་ཤིས་ཚེ་ཡི་རང་བཞིན་ཅན། །རྩི་བཅུད་སྙིང་པོའི་རིལ་བུ་འདི། །ཚེ་དཔལ་འགྱུར་བ་མེད་པའི་རྫས། །དངོས་གྲུབ་དམ་
པ་འདིར་རོལ་ཅིག །བཀྲ་ཤིས་ཚེ་མཆོག་རྒྱ་མཚོ་ཆེ། །འཆི་མེད་ལྷ་ཡི་བདུད་རྩི་དངོས། །ཚེ་རིང་དཔལ་གྱི་གཏེར་ཆེན་པོའི། །དངོས་གྲུབ་དམ་པ་རྟག་རོལ་ཅིག །ཅེས་བརྗོད་ལ་བར་སྐབས་ཚེ་གཟུངས་རྣམས་བཟླས་སོ། །སྐབས་འདིར་སྤྲོ་ན་ཆོས་སྐྱོང་བཀའ་གཏད་གཞུང་ལྟར་བྱ། དེ་ནས་དབང་གི་མཐའ་རྟེན་ནི། དེང་ཕྱིན་ཆད་ཁྱེད་རྣམས་ཀྱིས་ཐེག་ཆེན་བྱང་ཆུབ་སྤྱོད་པའི་སེམས་དང་མ་བྲལ་བར་གྱིས་ལ་རིགས་ཀུན་གྱི་ཁྱབ་བདག་དཀྱིལ་འཁོར་ཡོངས་ཀྱི་གཙོ་བོ་རྡོ་རྗེ་འཆང་སྤྱི་བོར་བསྒོམ་ནས་ཚད་མེད་སྙིང་རྗེ་ཆེན་པོའི་གོ་ཆ་བགོས་ཏེ་སེམས་ཅན་ཐམས་ཅད་བྱང་ཆུབ་ཀྱི་ས་ལ་འགོད་ནུས་པའི་དབང་ཐོབ་པའི་མོས་པ་མཛོད། ཧཱུྃ། རང་ལས་གཞན་གཅེས་བསམ་པ་ཡིས༔ སོགས་སྐུ་སྤྱི་བོར་བཞག །དེ་ནས་བྱང་ཆུབ་སྙིང་པོའི་བར་དུ་བླ་མ་བཅོམ་ལྡན་འདས་ཚེ་དཔག་མེད་དབྱེར་མེད་པར་སྤྱི་བོར་བསྒོམ་ལ་ལྷག་པའི་ལྷར་འཛིན་ནས་དམ་ཚིག་སྲུང་སྡོམ་རྣམས་ཚུལ་བཞིན་དུ་འཛིན་སྙམ་པས་འདིའི་རྗེས་ཟློས་མཛོད། གཙོ་བོས་ཇི་ལྟར་སོགས་དང་། ཧཱུྃ། བདག་ལུས་ཕུང་ཁམས་སོགས་ཀྱིས་མཎྜལ་འབུལ། ལུས་ལོངས་སྤྱོད་གཏང་རག་གིས་ཡོན་དུ་འབུལ་བའི་བློས་འདིའི་རྗེས་ཟློས། དེང་ནས་བརྩམས་ཏེ་སོགས། དེ་ལྟར་སྤྲུལ་པའི་གཏེར་ཆེན་རིག་པ་འཛིན་པ་
ཡོངས་ཀྱི་གཙོ་མཆོག་མི་འགྱུར་རྡོ་རྗེ་དྲག་པོ་ནུས་ལྡན་རྩལ་གྱི་གཏེར་བྱོན་ཟབ་ཆོས་ཚེ་སྒྲུབ་ཁྱད་པར་དུ་འཕགས་པ་ཐབས་ཤེས་ཁ་སྦྱོར་ཞེས་བྱ་བ་ཟབ་གནད་བཀའ་རྒྱ་ཅན་གྱི་དཀྱིལ་འཁོར་གཉན་པོའི་དབང་བསྐུར་ཟབ་མོ་ལེགས་པར་གྲུབ་པས་དེ་ལ་བརྟེན་ནས་རང་དང་གཞན་ཕན་རྣམ་པར་དཀར་བའི་ལས་ལ་སྦྱོར་བའི་དོན་ལ་ཡང་དག་པར་སྤྱོད་པར་མཛོད་ཅིག །སློབ་མ་རྣམས་གྲོལ། སྐུ་གསུམ་བླ་མ་དང་། རྟེན་དང་གཏོར་མའི་སོགས། བཀྲ་ཤིས་དང་སྨོན་ལམ་གྱིས་མཐའ་བརྒྱན་པར་བྱའོ། །ཅེས་པ་པུནྱ་མ་ཎི་ཞེས་པས་འདི་ལྟར་ཡོངས་ལ་ཕན་པའི་ཕྱིར་དུ་ལྷག་བསམ་བཟང་པོས་བསྐུལ་བའི་ངོར། སི་ཏུ་པདྨ་ཉིན་བྱེད་དབང་པོས་ཕུན་སུམ་ཚོགས་པའི་རྟེན་འབྱུང་གི་དུས་དང་སྦྱོར་བར་དགེ་བ་སྤེལ་བ་མངྒ་ལཾ། ཛ་ཡནྟུ། དགེའོ།། །།
ནམ་སྙིང་ཚེ་སྒྲུབ་དབང་གི་མཚམས་སྦྱོར།
ནམ་སྙིང་ཚེ་སྒྲུབ་དབང་གི་མཚམས་སྦྱོར་བཞུགས། ན་མོ་བཛྲ་ཨ་མི་ཏཱ་ཡུ་ུཥེ། འཆི་མེད་རིག་འཛིན་ཐུགས་ཀྱི་བཅུད། །ཡང་ཟབ་ཚེ་སྒྲུབ་ཨ་ཏིའི་ལུགས། །བྱིན་རླབས་བཅུད་དྲིལ་སྨིན་དབང་གི། མཚམས་སྦྱོར་བདུད་རྩིའི་གྲུ་ཆར་སྤྲོ། །དེ་ཡང་དང་པོ་རྩ་གསུམ་གྱི་ཞལ་ཐང་བཤམས་ཤིང་མདུན་དུ་སྟེགས་ཀྱི་ཁར་མཎྜལ་ལ་རྡུལ་ཚོན་གཞུང་མཐུན་ནམ། ཚོམ་བུ་གང་རུང་གི་སྟེང་དུ་མཉྫིའི་ཁར་དཔལ་གཏོར་རྒྱན་ལྡན་གྱི་རྩེར། སྐུ་རྟེན་ཙཀླི་ཡོད་ན་བཙུགས། མདུན་དུ་སྨན་རཀ་གཏོར་གསུམ། མཆོད་པ་ཕྲེང་ཚར། ལས་བུམ་གང་བདེར། ཚེ་རིལ་ཆང་ཡང་བཀོད། སྔོན་འགྲོ་དཀར་བགེགས། སྤོས་ཐུན་ཌཱ་དྲིལ་སོགས་འདུ་བྱས་ལ། ལས་བྱང་བསྙེན་པ་ཡན་གྲངས་གསོག་དགོས་མིན་དབང་བསྐུར་གྲངས་སམ། ལོང་སྐབས་དང་བསྟུན་ལ་བདག་འཇུག་དབང་ལེན། ཧྲཱིཿརང་གི་རང་རིག་སོགས་ཀྱིས་གཏོར་མ་སྤྱི་བོར་བཞག །ཚེ་རིལ་ཆང་དངོས་གྲུབ་ཏུ་རོལ། ལས་བུམ་རྟ་མགྲིན་བསྐྱེད་བཟླས་ཀྱང་བྱ། དེ་ནས་སློབ་མ་རྣམས་འཚོགས་ལ། ཇི་ལྟར་བལྟམས་པ་སོགས་ཀྱིས་ཁྲུས་དང་སྔོན་གཏོར་བྲན། དཀར་བགེགས་པདྨ་བཛྲ་ལྟར་བཏང་། གུ་གུལ་བདུག །ཡུངས་ཀར་བྲབ། སྲུང་འཁོར། ཧྲཱིཿསྣང་སྲིད་ལྷ་ཡི་སོགས་དང་། མཎྜལ་བཀྱེ་བསྡུ་བྱ། འོ་ན་ནམ་མཁའ་དང་མཉམ་པའི་སེམས་ཅན་ཐམས་ཅད་མགོན་པོ་ཚེ་དང་ཡེ་ཤེས་དཔག་ཏུ་མེད་པའི་གོ་འཕང་ལ་འགོད་པར་བྱ། དེའི་ཆེད་དུ་ཚེ་དབང་ཟབ་མོ་ཞུ་སྙམ་པ་བྱང་ཆུབ་ཀྱི་ཐུགས་བསྐྱེད་གསལ་བཏབ་ནས་གསན་འཚལ། དེ་ཡང་བསོད་ནམས་ཀྱི་
ཚོགས་རྒྱ་ཆེན་པོ་ལས་གྲུབ་པའི་མི་ལུས་རིན་པོ་ཆེ་ཁམས་དྲུག་ལྡན་པ་འདིའང་། སྲོག་གཅོད་པའི་དབང་གིས་ཚེ་ཐུང་བ་དང་། རྡེག་བརྡུང་བརྔན་ཆེན་བྱས་པས་ནད་མང་ཞིང་། ཁྱད་པར་སུམ་ཅུ་ཁ་རལ་གྱི་དུས་སུ་གློ་བུར་གྱི་འཆི་རྐྱེན་བསམ་གྱིས་མི་ཁྱབ་པ་དེ་དག་ཀྱང་ལས་སྔོན་སོང་གི་འབྲས་བུ་བསླུ་མེད་སྨིན་པར་ངེས་པས། མོ་བོན་རྩིས་སོགས་ཀུན་རྫོབ་ཀྱི་སྲུང་སྐྱོབ་སྤྱི་དང་། ཁྱད་པར་སྲོག་གཅོད་ཀྱི་མཆོད་སྦྱིན་སོགས་སྡིག་དང་འདྲེས་པའི་དགེ་བས་འཕྲལ་ཕུག་གཉིས་ཀར་རྣམ་སྨིན་ལོག་པར་འགྱུར་བས། རྒྱུ་སྲོག་གཅོད་སྤངས་ཤིང་མི་འཇིག་པ་སྲོག་གི་སྦྱིན་པ་སོགས་ཆོས་དང་ཟང་ཟིང་གི་གཏོང་བ་ལ་གོམས་པས་ཚེ་བསྲིང་བ་མདོ་སྔགས་ཐུན་མོང་གི་ལུགས་དང་། རྐྱེན་རྩ་གསུམ་ལྷ་ཡི་བྱིན་རླབས་ལ་བརྟེན་ཏེ་ཚེ་བསྲིང་བ་ནི་སྔགས་ལུགས་ཁྱད་པར་བ་སྟེ་ཐབས་ཟབ་ཅིང་རྒྱ་ཆེ་ལ་འཕྲལ་ཕུག་གཉིས་ཀར་རྟག་བརྟན་བདེ་བའི་དཔལ་ཡོན་གོང་འཕེལ་དུ་འགྱུར་བས། དེ་ལྟ་བུའི་རྒྱུད་དང་མན་ངག་སྒྲུབ་ཐབས་ཀྱི་རིམ་པ་གསར་རྙིང་བཀའ་གཏེར་གདམས་ངག་མཐའ་ཡས་པ་ཞིག་བཞུགས་པ་ལས། ད་ལམ་གྱི་སྐབས་འདིར་གསང་སྔགས་རྙིང་མ་བ་གཏེར་གྱི་ཕྱོགས་སུ་གཏོགས་པ་མགོན་པོ་ཚེ་དཔག་མེད་རྡོ་རྗེ་སློབ་དཔོན་གྱི་རྣམ་པར་རོལ་པ་ནམ་མཁའ་ཇི་སྲིད་སྐྱེ་འཆི་འདས་གྲོངས་མི་མངའ་བར་འཇའ་ལུས་འཕོ་བ་ཆེན་པོས་འཁོར་བ་དོང་སྤྲུགས་མཛད་པ་དུས་གསུམ་
ཀུན་མཁྱེན་པདྨ་སཾ་བྷ་བ་དེ་ཉིད་ཀྱིས་རྒྱལ་པོ་ཁྲི་སྲོང་ལྡེའུ་བཙན་གྱི་ཐུགས་བཞེད་བསྐང་ཕྱིར་བོད་ཡུལ་དུ་བསྟན་པའི་སྒྲོན་མེ་སྤར་བ་མཛད་པའི་སྐབས། ཚེ་གཅིག་གིས་གྲུབ་པ་རྣམ་གཉིས་མངོན་དུ་བརྙེས་པའི་ལོ་ཙཱ་བ་བརྒྱ་རྩ་བརྒྱད་ཀྱི་ནང་ནས། ལས་ཅན་དག་པའི་འཁོར་དགུའི་ཡ་གྱལ། ཡང་དག་ཐུགས་ཀྱི་རིག་འཛིན་གནུབ་བན་ནམ་མཁའི་སྙིང་པོས་ཕྱི་རབས་ཀྱི་དོན་དུ་གཡུ་ཡི་མཎྜལ་ཕུལ་ནས་གསོལ་བ་བཏབ་པས་ཨོ་རྒྱན་རིན་པོ་ཆེ་ར་ས་འཕྲུལ་སྣང་དུ་རབ་གནས་ལ་ཕེབས་པའི་ཤུལ་དུ། ཡེ་ཤེས་སེམས་དཔའ་སྐུ་ཚབ་གཟུགས་བརྙན་གྱི་རྣམ་པར་བྱིན་གྱིས་བརླབས་པ་དེའི་ཞལ་ནས་ཇི་ལྟར་གསུངས་པའི་ཚེ་སྒྲུབ་རྡོ་རྗེའི་ཚིག་རྐང་རྣམས་གནུབས་བན་ཆེན་པོས་ཐུགས་ཉམས་སུ་བསྟར་བས་དགུང་ལོ་ཉིས་བརྒྱ་ལྷག་ཙམ་བཞུགས་ཤིང་། ཕྱིས་སྡིག་སྤྱོད་རྒྱལ་པོ་གླང་དར་གྱིས་བསྟན་པ་ལ་འཚེ་བ་བརྩམས་པའི་སྐབས་སུ། དྲི་ཆུ་བྷནྡྷ་གང་ལ་བརྟེན་ཏེ་བསྐྱེད་བཟླས་མཛད་པ་ཙམ་གྱིས་ཚེ་ལྷའི་དཀྱིལ་འཁོར་མདུན་དུ་ལྷགས། འོད་ཟེར་དྲི་ཆུ་ལ་ཕོག་པས་ཁྲོ་ཆུ་ཁོལ་མ་དང་ཐོག་སེར་དུ་གྱུར་ནས་རྒྱལ་པོ་འཇིགས་ཤིང་སྤ་བཀོང་། སྡིག་བློན་རྣམས་ཀྱང་བརྒྱལ། ཧཱུྃ་སྒྲ་བསྒྲགས་པས་ཕ་རོལ་གཞན་སེམས་ཕམ་པ་སོགས་དངོས་གྲུབ་ནུས་མཐུ་གཅིག་ཅར་དུ་ཐོབ་པའི་ཟབ་ཆོས་དེ་ལྟ་བུ་མ་འོངས་ད་ལྟའི་སྐལ་ལྡན་ལས་ཅན་རྣམས་ཀྱི་དོན་དུ། ཁམས་ཀྱི་
གནས་ཆེན་ཉེར་ལྔའི་ནང་ཚན་སྐྱིད་འབྱམས་སྒྲུབ་གནས་སེང་གེ་གནམ་མཆོངས་ཀྱི་ཉེ་ཆར་ཉི་ཟླ་ཕུག་གི་མདུན་ཟུར་འགྱུར་མེད་རྡོ་རྗེའི་བྲག་ལ་རྒྱས་བཏབ་པ། ཆོས་རྒྱལ་མུ་ཁྲི་བཙན་པོའི་སྐྱེ་མཐའ་སྤྲུལ་པའི་རིག་འཛིན་ཆེན་པོ་མི་འགྱུར་རྡོ་རྗེ་དྲག་པོ་ནུས་ལྡན་རྩལ་གྱིས་ལས་ཅན་དུ་མ་འཚོགས་པའི་དབུས་སུ་ཟླ་བ་བདུན་དུ་འབད་རྩོལ་ཆེན་པོས་རྡོ་རྗེའི་རྒྱ་བཀྲོལ་བའི་ཚུལ་མཛད་པས་མཚོན་ཡིད་ཆེས་ངོ་མཚར་རྨད་དུ་བྱུང་ཞིང་བྱིན་རླབས་ཀྱི་ཚན་ཁ་ལྷག་པར་ཆེ་བར་རྡོ་རྗེའི་གསུང་ལས། ཆོས་རྣམས་ཀུན་གྱི་དོན་བསྡུས༔ སློབ་དཔོན་པདྨའི་ཐུགས་བཅུད༔ མ་མོ་མཁའ་འགྲོའི་སྙིང་ཁྲག༔ ནམ་མཁའི་སྙིང་པོའི་ཆོས་སྐལ༔ ཚེ་སྒྲུབ་འཆི་མེད་བཙན་རྫོང༔ གསང་སྒྲུབ་རྡོ་རྗེ་ཕ་ལམ༔ ཞེས་བྱ་བའི་དབང་བསྐུར་གྱི་རིམ་པ་སྒྲུབ་པར་བྱེད་པ་ལ། སློབ་དཔོན་གྱིས་བགྱི་བར་འོས་པ་རྣམས་སྔོན་དུ་སོང་ནས། ཁྱེད་རང་སློབ་མ་རྣམས་ཀྱི་ངོ་སྐལ་དུ་གྱུར་པའི་མཎྜལ་འབུལ་བར་ཞུ། དེ་ནས་མཎྜལ་ཕུལ་དུ་གཞུག །དེ་ནས་ཁྱེད་རང་རྣམས་རྒྱུད་དག་པར་བྱ་བའི་ཕྱིར་བླ་མ་དང་རྩ་གསུམ་ཚེ་ལྷའི་དཀྱིལ་འཁོར་དབྱེར་མེད་པའི་སྤྱན་སྔར། མཁའ་ཁྱབ་ཀྱི་སེམས་ཅན་ཐམས་ཅད་གཏན་བདེའི་གོ་འཕང་ལ་འགོད་པར་བྱ་བའི་ཕྱིར་སྐྱབས་སུ་འགྲོ་བ་དང་སེམས་བསྐྱེད་སྙམ་པས་འདིའི་རྗེས་ཟློས་མཛོད། ཧྲཱིཿདུས་གསུམ་རྒྱལ་བའི་སོགས་ལན་གསུམ།
དེས་དབང་དོན་གྱི་ཡེ་ཤེས་སྐྱེ་བའི་སྣོད་རུང་དུ་བསྒྲུབས་ནས། ད་བྱིན་འབེབས་ཅིང་ཏིང་ངེ་འཛིན་བསྒོམ་པ་ནི། ཧྲཱིཿསྣང་སྲིད་ལྷ་ཡི་དཀྱིལ་འཁོར་སོགས། དེ་ནས་བྱིན་རླབས་ཀྱི་གཞི་འགོད་པ་ལ། ཡུལ་སྣང་སེམས་གསུམ་གདོད་ནས་གདན་གསུམ་ཚང་བའི་ལྷའི་འཁོར་ལོར་རྫོགས་པ་དེ་ཉིད་བརྡ་སྤྲད་པའི་ཚིག་བརྗོད་པ་ན། ཡིན་པ་ལ་ཡིན་པར་གསལ་ཐོབ་མཛོད། ལས་བུམ་ཆུས་བྲན་ནས། ཧྲཱིཿཧེ་རུ་ཀ་ཡི་ཆོ་འཕྲུལ་ལསཿསོགས་ནས་སྔགས་དང་བཅས་ཌཱ་དྲིལ་སྤོས་རོལ་བྱ། དེ་ནས་ཚེ་ལྷ་ཡེ་ཤེས་ཀྱི་དཀྱིལ་འཁོར་སྤྱན་འདྲེན་པ་ནི། ཧྲཱིཿབདེ་བ་ཅན་དང་སོགས་མཐར་ཧཱུྃ་ངར་དང་ལྡན་པའི་སྒྲས་འབོད་ཅིང་སྤོས་རོལ་བྱ། དེ་ལྟར་ཕབ་པའི་ཡེ་ཤེས་སེམས་དཔའ་བརྟན་པར་གྱུར་བར་མོས་མཛོད། ཧྲཱིཿའདིར་བྱོན་ཚེ་ཡི་ལྷ་ཚོགས་རྣམསཿསོགས་དང་། དེ་ནས་དབང་གི་དངོས་གཞིའི་དོན་དུ་མཎྜལ་འབུལ། བདེ་གཤེགས་ཚེ་ཡི་ཕོ་བྲང་གཏོར་མ་རིན་ཆེན་འབར་བ་སྐུ་རྟེན་དང་བཅས་པ་འདི་ཉིད། ཐར་པ་ཆེན་པོའི་གཞལ་མེད་ཁང་། འཇའ་ཟེར་ཐིག་ལེ་ལུ་གུ་རྒྱུད་མུ་མཐའ་བྲལ་བའི་ཀློང་ན། ཀ་དག་རང་རིག་རང་གསལ་གྱི་རང་མདངས་འོད་མི་འགྱུར་བ་ཚེ་དཔག་མེད་དམ་ཡེ་དབྱེར་མེད་ཐབས་ཤེས་ཁ་སྦྱོར་གྱི་ཚོམ་བུ། མཁའ་འགྲོ་ཆོས་སྐྱོང་དང་བཅས་པའི་སྐུ་གསུང་ཐུགས་
ཡེ་ཤེས་རྡོ་རྗེའི་འོད་ཟེར་དཔག་ཏུ་མེད་པ་ཁྱེད་རང་རྣམས་ཀྱི་གནས་གསུམ་དུ་ཐིམ་པས་ཕུང་ཁམས་སྐྱེ་མཆེད་དུག་ལྔ་བདག་འཛིན་དང་བཅས་པ་རང་སར་དག །གཞི་རྫོགས་ཀློང་ཡངས་ཆེན་པོར་འཆི་མེད་རྡོ་རྗེ་དྭངས་མའི་སྲོག་ཏུ་སྨིན་ཅིང་གྲོལ། གནས་སྐབས་སུ་ཚེ་བསོད་ཡེ་ཤེས་འབྱོར་པ་དབང་ཐང་རླུང་རྟ་ཉམས་ཤིང་གུད་པ་སོར་ཆུད། བརྟན་གཡོའི་དྭངས་བཅུད་མ་ལུས་པ་བླ་སྲོག་གི་གཏེར་བསྡུས། འཆི་མེད་མགོན་པོའི་རྡོ་རྗེ་བཞི་དང་དབྱེར་མེད་དུ་གྱུར་སྙམ་པའི་མོས་པ་མཛོད། ཚེ་ཡི་དཔལ་གཏོར་གྱིས་དབང་བསྐུར་ཏེ། ཧྲཱིཿརང་གི་རང་རིག་གསལ་བ་ཡིཿསོགས་སྔགས་དང་བཅས་བརྗོད་ཅིང་ཚེ་རིལ་ཆང་ཡང་སྦྱིན། གྲངས་གསོག་སྐབས། ཡང་གཏོར་མ་འཆི་མེད་རྡོ་རྗེ་ཚེའི་ལྷ་ཚོགས་སུ་གསལ་བའི་སྐུ་གསུང་ཐུགས་ཡེ་ཤེས་རྡོ་རྗེའི་འོད་ཟེར་ཁ་དོག་སྣ་ཚོགས་ཁྱེད་རང་རྣམས་ཀྱི་གནས་བཞིར་ཐིམ་པས་དབྱེར་མེད་དུ་གྱུར་སྙམ་པའི་མོས་པ་མཛོད། ཧྲཱིཿརང་གི་རང་རིག་གསལ་བ་སོགས་སྔར་ལྟར་གྱི་གྲངས་འཛིན་ནས། མཐར། དེ་ལྟར་ཡང་ཟབ་ཨ་ཏི་ཡོ་གའི་ལུགས་ཀྱི་ཚེ་དབང་ཟབ་མོ་ལེགས་པར་གྲུབ་པས། གནས་སྐབས་སུ་འཇིགས་པ་བརྒྱད་དང་བཅུ་དྲུག །ཁྱད་པར་དུ་དུས་མ་ཡིན་པའི་འཆི་བ་བཟློག་ཅིང་། མཐར་ཐུག་བཅོམ་ལྡན་འདས་མགོན་པོ་ཚེ་
དཔག་མེད་དབྱིངས་དང་ཡེ་ཤེས་སུ་དབྱེར་མེད་དུ་འགྱུར་ལ། སྐབས་སུ་བབས་པའི་དམ་ཚིག་སྲོག་གཅོད་པ་དང་། འདོད་པས་ལོག་སྤྱོད་གདུག་ཅན་ཨར་ལ་གཏད་པ་སོགས་སྤང་བྱ། སྲོག་བསླུ་ཉེ་འདོན་སཱཙྪ་བཏབ་པ་སོགས་བླང་བྱ། ཁྱད་པར་རང་གི་སྒོ་གསུམ་ཡེ་ནས་ཚེ་ལྷའི་རང་བཞིན་དེ་ཡི་ཏིང་ངེ་འཛིན་དང་མ་བྲལ་བར་སློབ་སྙམ་པས་འདིའི་རྗེས་ཟློས་མཛོད། གཙོ་བོའི་ཇི་ལྟར་སོགས། གཏང་རག་གི་དོན་དུ་མཎྜལ། ལུས་ལོངས་སྤྱོད་འབུལ་སྙམ་པས་འདིའི་རྗེས་ཟློས་མཛོད། དེང་ནས་བརྩམས་ཏེ་སོགས། དེ་ལྟར་ཚེ་སྒྲུབ་ཡོངས་ཀྱི་ཟབ་པའི་མཐར་ཐུག་གུ་རུ་རིན་པོ་ཆེའི་ཐུགས་བཅུད་འཆི་མེད་ཚེ་ཡི་དབང་བསྐུར་ལེགས་པར་གྲུབ་པས་རང་གཞན་གྱི་དོན་རྒྱ་ཆེན་པོ་མཛོད། སྦྱིན་པ་གཏོང་ཞིང་ཚུལ་ཁྲིམས་སོགས་བརྗོད། མཐར་འཁོར་གསུམ་སྤྲོས་བྲལ་ཀ་དག་རྫོགས་པ་ཆེན་པོའི་ཀློང་དུ་མཉམ་པར་བཞག་ཅིང་། བཀྲ་ཤིས་དང་བསྔོ་སྨོན་གྱིས་རྒྱས་གདབ་པར་བྱའོ། །དེ་ལྟར་རིག་འཛིན་མི་འགྱུར་རྡོ་རྗེའི་སྐྱེས་རབས་ཀྱི་ཕྲེང་བ་བཞི་པ་མཆོག་སྤྲུལ་གང་དེའི་འགྲོོ་དོན་ཆེད་དུ་དབོན་ཀརྨ་བདེ་གསལ་གྱི་བཞེད་ངོར་སི་ཏུ་པདྨའི་མིང་ཅན་གྱིས་བཀོད་པ་བསྟན་འགྲོ་ཡོངས་ལ་ཕན་དང་བདེ་བའི་རྒྱུར་གྱུར་ཅིག །ཤུབྷཾ། མངྒ་ལཾ། འདིར་རིག་འཛིན་རྟ་མགྲིན་མགོན་
པོའི་ཕྱག་བཞེས་སུ་ཁྲུས་དང་མཎྜལ། པདྨ་བཛྲ་ལྟར་གྱི་དཀར་བགེགས་བཏང་། རང་གཞུང་བགེགས་བསྐྲད། སྐྱབས་སེམས། སློབ་མ་ལྷར་བསྐྱེད་སྤྱན་འདྲེན་བཞུགས་གསོལ་ཡན་གྲུབ་ནས་དབང་ཚིག་ལན་གསུམ་བརྗོད་པའི་དང་པོས་བུམ་པ། གཉིས་པས་ཚེ་གཏོར། གསུམ་པས་སྒྲུབ་དཔེ་རྣམས་གནས་གསུམ་བཞག་ལ་དབང་བསྐུར། མཐར་སྙིང་པོ་བརྗོད་ལ་ཚེ་རིལ་ཆང་སྦྱིན། ཤིས་བརྗོད་རྗེས་ཀྱི་བྱ་བ་སྤྱི་ལྟར་མཛད་པའི་ཕྱག་སྲོལ་སྣང་སྟེ་ཟུར་མང་ཕྱོགས་སུ་བརྒྱུད་པ་སོགས་ཀྱིས་འདི་ཁོ་ན་ལྟར་མཛད་ཀྱིན་སྣང་ངོ་། །འོན་ཀྱང་དཀར་བགེགས་ནི་དཀྱུས་ཙམ་ལ་སྤྱི་འགྲོ་བཏང་བས་འཐུས་སོ།། །།
པདྨ་བཛྲ་སྙིང་ཐིག་དབང་མོ་ཆེའི་མཚམས་སྦྱོར་གསལ་བཀོད་རིན་ཆེན་ཕྲེང་བ།
པདྨ་བཛྲ་སྙིང་ཐིག་དབང་མོ་ཆེའི་མཚམས་སྦྱོར་གསལ་བཀོད་རིན་ཆེན་ཕྲེང་བ་བཞུགས་སོ། །ན་མོ་གུ་རུ་པདྨ་བཛྲ་ཡེ། འདིར་པདྨ་བཛྲ་གྲུབ་ཐོབ་བརྒྱ་རྩའི་དཀྱིལ་འཁོར་དུ་སྐལ་ལྡན་གྱི་སློབ་མ་གཞུག་པར་འདོད་ན་འདིའི་དབང་ཐོབ་ཅིང་དམ་ཚིག་ལ་གནས་པའི་སློབ་དཔོན་གྱིས་དང་པོ་དཀྱིལ་འཁོར་བཤམས་བཀོད། ལས་བྱང་སོགས་མཐོང་བརྒྱུད་བཞིན་ཚུལ་ལྡན་ལྷག་མ་བཅས་གྲུབ་ནས། ཡེ་གསང་གི། བླ་མ་རིག་འཛིན་གྱིས་བདག་དབང་བླངས་ཏེ། སྨིན་བྱེད་དབང་གི་སྐབས་སུ་བབས་ན་སློབ་མ་རྣམས་ཕྱག་དང་བཅས་མདུན་དུ་འཁོད། སྔོན་འགྲོ་གླུད་གཏོར་དང་དཀར་གཏོར་མཚམས་སུ་རོལ་མོ་ལྡིར་ལ་ཕུལ། གུ་གུལ་བདུག །ཡུངས་ཐུན་བྲབ། མཚམས་རྔམས་དང་བཅས། ཧཱུྃ། སྟོང་གསུམ་ཀུན་ཁྱབ་སོགས་ཀྱི་སྲུང་འཁོར་དང་མཚམས་བཅད་མཐར་རོལ་མོ་བཞག །འདིའི་བར་ཚོགས་པས་མཉམ་འདོན། དེ་ནས་སློབ་དཔོན་གྱིས་མདའ་དར་མེ་ལོང་བཏགས་པ་རིམ་བཞིན་ཐོགས་ལ་གཡབ་ནས་དྲིལ་གསིལ་དང་བཅས། ཧཱུྃ། ང་ནི་ཐབས་ཀྱི་ཧེ་རུ་ཀ༔ སོགས་ནས། སྨིན་གྲོལ་དངོས་གྲུབ་སྩོལཿབར་གྱི་སྒོ་དབྱེ་གྲུབ་ནས། འོ་ན་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་རིགས་ཀུན་ཁྱབ་བདག་གདོད་མའི་སངས་རྒྱས་པདྨ་བཛྲ་རྩལ་གྱི་གོ་འཕང་རིན་པོ་ཆེ་ཐོབ་པར་བྱ། དེའི་ཆེད་དུ་ཐུགས་གཏེར་སྙིང་ཐིག་དབང་མོ་ཆེ་གསན་དགོངས་པའི་ཐུགས་བསྐྱེད་གསལ་བཏབ་ནས་གསན་པར་ཞུ། དེའང་གཞི་འབྱུང་ཚུལ་གྱི་ལོ་རྒྱུས་ཅུང་ཞིག་བརྗོད་ན༔
སོགས། རྡོ་རྗེའི་ཚིག་རྐང་ཉིད་གསལ་དག་སྙན་པས་བཏོན་ལ། དེ་དག་ནི་པདྨ་བཛྲ་གྱི་ཡོན་ཏན་ཅུང་ཟད་བརྗོད་པའོཿབར་དང་། དེ་ལྟར་བྱུང་ཁུངས་ལོ་རྒྱུས་རྡོ་རྗེའི་གསུང་གིས་རྒྱས་པར་བསྟན་པའི་སྒྲུབ་ཐབས་ཟབ་མོ་འདི་ཡང་ཨུ་རྒྱན་སངས་རྒྱས་གཉིས་པ་ཡབ་ཡུམ་གྱིས་སྙིགས་དུས་ཀྱི་གདུལ་བྱ་རྣམས་ལ་དགོངས་ཏེ་ལྷོ་སྨར་ཁམས་ཕྱོགས་ཀྱི་སྦས་གནས་གྲུ་གུ་ལྷ་བྲག་ཏུ་གཏེར་དུ་སྦས། མི་འགྱུར་བའི་རྒྱ་བདུན་གྱིས་རྒྱས་བཏབ་གཏེར་བདག་ཏྲཀྵད་ནག་པོ་ལ་གཏད། གཏེར་སྲུང་ལྷ་བྲག་རྡོ་རྗེ་འབར་བ་རྩལ་ལ་བཅོལ། བདེན་ཚིག་སྨོན་ལམ་ཟབ་མོས་མཚམས་སྦྱར། ནམ་ཞིག་གདུལ་བྱ་འདུལ་བའི་དུས་ལ་བབ་པའི་ཚེ། ཇི་སྐད་དུ། གསང་བའི་བདག་པོའི་རོལ་གར་ལས༔ ཞི་རྒྱས་དབང་དྲག་མངོན་སྤྱོད་ཚུལ༔ མ་ངེས་སྣ་ཚོགས་ཅིར་ཡང་འཆར༔ ད་ལྟའི་ལྷ་སྲས་འདི་ཉིད་ཀྱང༔ སྐྱེ་བའི་ཐ་མ་རྒྱུན་ཆད་ཚེ༔ སེམས་ཅན་རྣམས་ལ་སྟོན་པར་འགྱུར༔ གང་ཞིག་ཟབ་ཆོས་ཐོད་པ་རྩལ༔ མཐོང་ཐོས་དྲན་རེག་སེམས་ཅན་རྣམས༔ སངས་རྒྱས་ཐོབ་པ་ཐེ་ཚོམ་མེད༔ ཅེས་གསུངས་པ་ལྟར་རིག་འཛིན་མི་འགྱུར་རྡོ་རྗེ་དྲག་པོ་ནུས་ལྡན་རྩལ་གྱིས་རྫུ་འཕྲུལ་གྱི་ཆོ་འཕྲུལ་ངོ་མཚར་མིག་གི་བདུད་རྩི་སྐལ་ལྡན་ཀུན་གྱི་སྤྱོད་ཡུལ་དུ་མངོན་སུམ་དུ་སྣང་བ་དང་བཅས་སྤྱན་དྲངས་པ་སྟེ། རྡོ་རྗེའི་གསུང་ལས། འདི་ཉིད་ཀྱི་དཀྱིལ་
འཁོར་དུ་ཞུགས་པའི་སེམས་ཅན་ཤི་གསོན་གང་ཡང་རུང་སྟེ་སྐད་ཅིག་ཉིད་ལ་འཚང་རྒྱ་བ་ཐེ་ཚོམ་མེད་དོ༔ ཞེས་དང་། ཐོས་པས་སེམས་ཅན་གྲོལ་བར་འགྱུར༔ བསྒོམ་པས་འཇའ་ལུས་མཁའ་སྤྱོད་འགྲུབ༔ བཟླས་པས་དངོས་གྲུབ་རྣམ་གཉིས་བརྙེས༔ དད་བརྩོན་སྙིང་རྗེའི་ངང་དུ་བསྒྲུབ༔ མ་འོངས་སེམས་ཅན་ཐམས་ཅད་ཀུན༔ ཐར་ལམ་བགྲོད་པའི་གོ་ཆ་ཡིན༔ འདི་ལས་ལྷག་པ་ཡོད་རེ་ཀན༔ དེ་ཕྱིར་འདི་ལ་བརྩོན་པར་གྱིས༔ ཞེས་གསུངས་པ་ལྟར། ཐོས་གྲོལ་གྱི་དཀྱིལ་འཁོར་ཆེན་པོ་གཏེར་སྟོན་རིག་འཛིན་གྲུབ་དབང་ཆེན་པོ་ནས་བདག་ཅག་གི་དཔལ་ལྡན་བླ་མ་དམ་པའི་བར་དུ་རིམ་པར་བརྒྱུད་པ་ལ་དམ་ཚིག་གི་སེལ་མ་ཞུགས། བྱིན་རླབས་ཀྱི་སོ་མ་ཉམས། གདམས་ངག་གི་དྲོད་མ་ཡལ་བའི་དབང་བསྐུར་ཟབ་མོ་བསྒྲུབ་པ་ལ་སློབ་དཔོན་གྱི་བགྱི་བར་འོས་པ་རྣམས་སྔོན་ཏུ་སོང་ནས། ཁྱེད་རང་སློབ་མ་རྣམས་ཀྱི་ངོ་སྐལ་དུ་གྱུར་པ་དབང་བསྐུར་ཞུ་བའི་ཡོན་དུ་མཎྜལ་འབུལ། ཞེས་མཎྜལ་འབུལ། དེ་ནས་དཀྱིལ་འཁོར་གྱི་གཙོ་བོ་དང་སློབ་དཔོན་དབྱེར་མེད་པ་ལ། ཐོག་མར་གསོལ་བ་གདབ་པ་འདིའི་རྗེས་ཟློས་མཛོད། རིགས་ཀུན་ཁྱབ་བདག་སོགས་རྗེས་ཟློས་ལན་གསུམ་དང་། སློབ་དཔོན་གྱིས། ལེགས་སོ་སྐལ་ལྡན་སོགས་ནས། སྐྱབས་སུ་འགྲོ་བར་གྱིས༔ བར། ཞེས་པའི་ལན་དུ་འདིའི་རྗེས་ཟློས།
ལེགས་སོ༔ ཞེས་དང་། དེ་ནས་ཕྱི་ནང་གསང་གསུམ་གྱི་སྐྱབས་སུ་འགྲོ་བ་འདིའི་རྗེས་ཟློས་མཛོད། ཞེས་མཚམས་སྦྱར་ལ་གུར་དྲག་རྡོ་རྗེ་ཕ་ལམ་ལྟར། ན་མོ༔ དཀོན་མཆོག་གསུམ་དང་བྱང་སེམས་ཉན་རང་ལྷ༔ བདག་དང་མཐའ་ཡས་དུས་གསུམ་སངས་རྒྱས་རྣམས༔ སྐྱེ་བ་འདི་ནས་སངས་རྒྱས་ཐོབ་ཀྱི་བར༔ ལུས་ངག་ཡིད་གསུམ་གུས་པས་སྐྱབས་སུ་མཆི༔ ནང་ལྟར་སྐྱབས་སུ་འགྲོ་བ་ནི། ན་མོ༔ བླ་མ་ཡི་དམ་དཔའ་བོ་མཁའ་འགྲོ་ལ༔ བདག་གཞན་དུས་གསུམ་དུས་མེད་སྐྱེ་འགྲོ་རྣམས༔ ཚེ་གཅིག་འཇའ་ལུས་ཆོས་སྐུའི་འབྲས་ཐོབ་ཕྱིར༔ དབྱེར་མེང་ངང་དུ་སྙིང་ནས་སྐྱབས་སུ་མཆི༔ གསང་བ་ལྟར་སྐྱབས་སུ་འགྲོ་བ་ནི། ན་མོ༔ རང་ལུས་རྣམ་དག་ལྷ་ཡི་ཕོ་བྲང་འདིར༔ གདོད་མའི་ཀུན་བཟང་ཡེ་ནས་སངས་རྒྱས་བཞུགས༔ ཕུང་པོ་ལྔ་དག་རིགས་ལྔའི་རྒྱལ་བ་གསལ༔ ཁམས་ལྔ་དག་པ་ཡུམ་ལྔ་བདེ་སྟོང་རྒྱས༔ རྩ་རླུང་རྣམ་དག་དཔའ་བོ་མཁའ་འགྲོ་དང༔ དུག་ལྔ་རྣམ་དག་ཡེ་ཤེས་ཐིག་ལེ་འཁྱིལ༔ བརྗོད་མེད་རང་གསལ་རང་སེམས་ཀུན་ཏུ་བཟང༔ རེ་དོགས་བླང་དོར་གཉིས་འཛིན་མེད་བཞིན་དུ༔ གང་ཤར་བདེ་སྡུག་ཆོས་སྐུའི་རོལ་བ་འཕྱོ༔ མ་བསྒྲུབ་སངས་རྒྱས་སེམས་ལ་སྐྱབས་སུ་མཆི༔ སོ་སོར་ལན་གསུམ་རེ། དེ་ནས་དབང་གཞུང་བཞིན། རིགས་ཀྱི་བུ་རྣམས་ནས། སེམས་བསྐྱེད་མཛོད༔ བར། དེ་ནས་ཕྱི་
ནང་གསང་བའི་སེམས་བསྐྱེད་པ་འདིའི་རྗེས་ཟློས་མཛོད། ཧཱུྃ་ཧྲཱིཿབདག་གཞན་དུས་གསུམ་དུས་མེད་སྐྱེ་འགྲོ་རྣམས༔ མི་དགེ་བཅུ་ཡི་ལས་སྒྲིབ་དག་གྱུར་ཅིང༔ མ་རིག་འཁོར་ལོ་ཀུན་རྟོག་རྣམ་དག་སྟེ༔ ཡང་དག་སངས་རྒྱས་ས་ལ་རབ་བཀོད་ཕྱིར༔ གསང་སྔགས་དྲག་པོའི་དཀྱིལ་འཁོར་བསྒྲུབ་པར་བྱ༔ འཁོར་བ་དོང་ནས་སྤྲུག་པར་སེམས་བསྐྱེད་དོ༔ ངན་སོང་གནས་གསུམ་མི་ཁོམ་གནས་བརྒྱད་པོ༔ མིང་ཡང་མེད་པར་ཟད་ཅིང་ཡུལ་འབྱིན་ཏེ༔ རྣམ་མཁྱེན་སངས་རྒྱས་མྱུར་དུ་ཐོབ་པར་ཤོག༔ དག་པ་རྣམ་དག་མྱུར་དུ་སངས་རྒྱས་ཤོག༔ ནང་ལྟར་བྱང་ཆུབ་སེམས་བསྐྱེད་པ་ནི། ཧཱུྃ་ཧྲཱི༔ བདག་དང་མཐའ་ཡས་དུས་གསུམ་སེམས་ཅན་རྣམས༔ ཡེ་གདོད་ཉིད་ནས་རང་སེམས་ཀུན་ཏུ་བཟང༔ ཕུང་པོ་ལྔ་ནི་དེ་བཞིན་གཤེགས་པ་ལྔ༔ འབྱུང་བའི་ཁམས་ལྔ་ཡེ་ཤེས་ལྷ་མོ་ལྔཿརྒྱུ་རྐྱེན་ཡེ་ནས་རང་བྱུང་ལྷ་ཡི་སྐུ༔ རང་གསལ་རང་ཆས་ལྷུན་གྲུབ་གཉུག་མའི་སེམས༔ སྟོང་པའི་ཡེ་ཤེས་འཁོར་འདས་མཉམ་པ་ཉིད༔ སྒྲིབ་གཡོགས་ཀུན་བྲལ་ངང་དུ་སེམས་བསྐྱེད་དོ༔ གསང་བ་དོན་གྱི་སེམས་བསྐྱེད་པ་ནི། ཧཱུྃ་ཧྲཱིཿབདག་གཞན་འདས་དང་ད་ལྟ་མ་འོངས་ཀྱི༔ སངས་རྒྱས་སེམས་ཅན་མིང་དུ་བཏགས་པ་ཙམ༔ སྐུ་ནི་བདེན་མེད་འཇའ་ལུས་སྣང་སྟོང་གཟུགས༔ གསུང་ནི་གྲག་སྟོང་བདེན་
མེད་བྲག་ཆ་ལྟར༔ ཐུགས་ནི་དུས་གསུམ་སྤྲོས་བྲལ་ལྷན་སྐྱེས་ཐུགས༔ སྐྱེ་འགགས་གནས་གསུམ་བྲལ་བའི་ཡེ་ཤེས་ལ༔ སངས་རྒྱས་མ་བསྒྲུབ་རང་ཆས་རང་གསལ་ཀློང༔ ངན་སོང་གནས་མེད་རིག་བྱེད་འཁྲུལ་ཆ་ཙམ༔ ཀུན་བྱེད་རྒྱལ་པོ་ཡེ་ནས་སངས་རྒྱས་ཉིད༔ གང་ལའང་རེ་དོགས་ཀུན་བྲལ་སེམས་བསྐྱེད་དོ༔ ཞེས་དང་། དེ་ནས་ཁྱེད་རང་རྣམས་ཀྱིས་འཁོར་བ་ཐོག་མེད་ནས་བསགས་པའི་སྡིག་སྒྲིབ་ཉེས་ལྟུང་བག་ཆགས་དང་བཅས་པ་སྦྱངས་ཤིང་། སྨིན་བྱེད་ཟབ་མོའི་སྣོད་དུ་རུང་བར་བྱ་བའི་ཕྱིར་བཅོམ་ལྡན་འདས་དཔལ་རྡོ་རྗེ་སེམས་དཔའི་སྐུར་ལམ་གྱིས་འདི་ལྟར་དུ་གསལ་ཐོབ་མཛོད། ཧཱུྃ་བྷྱོ༔ མི་རྟག་ཆུ་བུར་ནས། ཡིག་བརྒྱས་བསྐོར། བར། དེ་ནས་ཧེ་རུ་ཀའི་ཡིག་བརྒྱ་དཔོན་སློབ་མཉམ་དུ་གསུངས་པའི་ཚེ་ཁྲུས་ཆབ་བཏང་། དེ་ནས་དབང་གི་སྔོན་འགྲོ་འཇུག་པའི་ཆོས་རྣམས་གྲུབ་ནས། དངོས་གཞི་དབང་གི་གཞི་འགོད་པའི་ཕྱིར་ཡེ་ཤེས་པ་དབབ་པའི་སླད་དུ་ཁྱེད་རང་རྣམས་ཀྱི་ཕུང་ཁམས་སྐྱེ་མཆེད་ཡེ་ཤེས་ཀྱི་དཀྱིལ་འཁོར་ཆེན་པོར་འདི་ལྟར་དུ་ུགསལ་ཐོབ་མཛོད། ༀ་ཤུ་ནྱ་ཏ་ཛྙཱ་ན་སོགས། ཧཱུྃ་ཧྲཱིཿསྣོད་བཅུད་སྣང་སྲིད་མི་དམིགས་སོགས་བརྗོད་ཅིང་བསྐྱེད་རིམ་ཕོག་ནས། སྤྱན་འདྲེན་རོལ་ཆས་ལྡིར་ལ། སྔོན་བསྐལ་མ་སོགས། ཚོགས་པ་མཉམ་གསུང་གིས། དཀྱིལ་འཁོར་
གྱིས་ཁེངས་པར་གྱུར༔ བར་དབྱངས་རོལ་དང་སྤོས་འགྲིམ་བཅས་ཀྱིས་བྱིན་དབབ། སྐབས་འདིར་གཞུང་ལས་སློབ་དཔོན་གྱིས་བདག་བསྐྱེད་གསལ་བཏབ་གསུངས་ཀྱང་། བརྒྱུད་པའི་ཕྱག་བཞེས་ལ་སློབ་དཔོན་དང་། སློབ་མས་ཡིད་ཀྱི་དམིགས་པས་གདོད་ནས་ཡེ་གྲུབ་ཀྱི་རང་བཞིན་དེས་ཁྱབ་པར་གསུངས། དེ་ནས་སློབ་དཔོན་གདོད་ནས་ཡེ་ཤེས་ཀྱི་དཀྱིལ་འཁོར་ཆེན་པོར་གསལ་བཞིན་པ་དང་། མདུན་བསྐྱེད་རིག་འཛིན་རྒྱ་མཚོའི་ལྷ་ཚོགས་རྣམས་ཀྱི་ཐུགས་ཀའི་འོད་ཟེར་གྱིས་བསྐུལ་བའི་གདན་གསུམ་ཚང་བའི་དབང་གི་ལྷ་རྣམས་དང་། སློབ་དཔོན་པདྨ་བཛྲར་གསལ་བའི་ཕྱག་གི་བུམ་པར་གསང་སྔགས་ཀྱི་ལྷ་ཚོགས་རྣམས་བཞུགས་པའི་དབང་ཁྱེད་རང་རྣམས་ཀྱི་ལུས་ལ་བསྐུར་བས་ལུས་ཀྱི་སྒྲིབ་པ་དག་ནས་སྐུ་རྡོ་རྗེ་མངོན་དུ་གྱུར་བའི་མོས་པ་མཛོད། ཧཱུྃ། ང་ནི་པདྨ་བཛྲ་སོགས་ནས་བུམ་པ་སྤྱི་བོར་བཞག་ལ། བུམ་ཆུ་བཏུང་། སྨོན་ལམ་དང་རབ་གནས་མེ་ཏོག་འཐོར། ཀཱ་ཡ་སུ་པྲ་ཏིཥྛ་སོགས་བརྗོད། ཤོག་སེར་པུསྟིའི་དབང་ནི། དེ་ནས་རིགས་འདུས་མ་ཧཱ་གུ་རུའི་གསུང་ཡི་གེའི་འཕྲུལ་ལས་ཤར་བའི་སྙིང་ཐིག་གླེགས་བམ་ལས་གསང་སྔགས་ཡིག་འབྲུའི་ཚོགས་ཆར་ལྟར་བབས་ནས་གསུང་དབང་ངག་ལ་བསྐུར་བས་ངག་གི་སྒྲིབ་དག་ནས་གསུང་རྡོ་རྗེ་མངོན་དུ་བྱས་པའི་མོས་པ་མཛོད། ཧཱུྃ། ང་ནི་པདྨ་བཛྲ་ཡབ་ཡུམ་སོགས་ཀྱིས་མགྲིན་པར་བཞག་ལ་མཐར་སྨོན་ལམ་རབ་གནས་བར། ཡང་དཀྱིལ་འཁོར་
རྣམས་ལས་རང་བྱུང་ཡེ་ཤེས་ཀྱི་སྐུ་མར་མེ་གཅིག་ལ་གཉིས་མཆེད་ཀྱི་ཚུལ་དུ་འཕྲོས་ནས་ཁྱེད་རང་རྣམས་ཀྱི་སྙིང་གར་ཐིམ། ལྷ་དབང་སེམས་ལ་བསྐུར་བས་ཡིད་ཀྱི་སྒྲིབ་པ་དག་ནས་ཐུགས་རྡོ་རྗེ་མངོན་དུ་གྱུར་པའི་མོས་པ་མཛོད། དེ་ནས་ཙཀླི་རྣམས་རིམ་པར་ཐོགས་ལ་སྙིང་གར་བཞག །ཧཱུྃ། ང་ནི་པདྨ་བཛྲ་ཡབ་ཡུམ་སོགས། ལྷ་དབང་ཡོངས་རྫོགས་བསྐུར་མཐར་སྨོན་ལམ་རབ་གནས་དང་བཅས། དེ་ནས་རིགས་ལྔ་ཡེ་ཤེས་ལྔ་དང་ཕ་རོལ་ཕྱིན་དྲུག་གི་ངོ་བོར་རྟགས་ཀྱི་ཕྱག་རྒྱས་དབང་བསྐུར་བས་སངས་རྒྱས་ཐོད་པ་རྩལ་དང་དབྱེར་མེད་པའི་ཆོས་ཀྱི་རྒྱལ་སྲིད་ལ་མངའ་བརྙེས་ནས་ཕྲིན་ལས་རབ་འབྱམས་དབང་དུ་གྱུར་པའི་མོས་པ་མཛོད། ཧཱུྃ། རིག་འཛིན་སྐྱེས་བུ་སོགས་ནས། ཞི་ཆས་ཚང་མའི་དབང་དང་། སློབ་མ་ལ་མངའ་གསོལ་གཞུང་གསལ་ལྟར། རྔ་དུང་རོལ་མོ་ལྡིར། དབྱངས་དང་བཅས། དྲག་ཆས་རྣམས་གསོལ་ལ། ཧཱུྃ། ང་ནི་ཁྱབ་བདག་རྡོ་རྗེ་འཆང༔ སོགས་ནས། དབང་དང་ལྡན་པར་གྱུར་ཅིག༔ བར། དེ་ནས་ཕྲིན་ལས་གཏོར་མའི་དབང་གི་དོན་དུ། ཡེ་ཤེས་ལས་དང་འཇིག་རྟེན་གྱི་ཆོས་སྐྱོང་བ་རྣམས་ཀྱི་བཀའ་གཏད་པ་ནི། ཧཱུྃ༔ མ་ཧཱ་ཀཱ་ལ་སོགས་ཀྱིས་གཏོར་མ་རྣམས་མགོར་བཞགདེ་ལྟར་གནས་སྐབས་སུ་ལས་བཞིའི་ཕྲིན་ལས་སྒྲུབ་པ་དང་། མཐར་ཐུག་བྱང་ཆུབ་སྒྲུབ་པའི་བར་ཆད་སེལ་བའི་སྡོང་གྲོགས་
མཛད་པར་མོས་ལ། དེ་ནས་ཡང་གསང་དབང་བཞི་ཡོངས་རྫོགས་བསྐུར་བ་ནི། ཧཱུྃ། ང་ནི་པདྨ་བཛྲ་སོགས་རྡོ་རྗེ་འཆང་གི་སྐུ་སྤྱི་བོར་བཞག་ལ། དེ་ལྟར་དབང་བཞི་བསྐུར་བས་སྒྲིབ་བཞི་དག །རྒྱུད་བཞི་སྨིན། ལམ་བཞི་འབྱོང་། སྐུ་བཞིའི་གོ་འཕང་མངོན་དུ་གྱུར་པའི་མོས་པ་མཛོད། དེ་ལྟར་བཟླས་ལུང་སྦྱིན་པ་ནི། ཧཱུྃ། རིག་འཛིན་པདྨ་སོགས་ཀྱིས་གླེགས་བམ་མགོར་བཞག་ལ། སློབ་དཔོན་ལྷར་གསལ་བའི་ཐུགས་ཀ་ནས་སྔགས་ཕྲེང་འཕྲོས། ཁྱེད་རང་རྣམས་ལྷར་གསལ་བའི་ཐུགས་ཀར་ཧཱུྃ་གི་མཐར་སྔགས་ཀྱི་ཕྲེང་བ་འཁོར་བར་མོས་ལ་སྔགས་འདིའི་རྗེས་ཟློས། གཙོ་འཁོར་སྤྱི་དྲིལ་གྱི་སྔགས་ཚན་གསུམ་ལན་གསུམ་བཟླའོ། །དེ་ལྟར་གསུང་རིགས་སྔགས་ཀྱི་བྱིན་རླབས་ནུས་རྩལ་མཐུ་སྟོབས་ཁྱེད་རྣམས་ཀྱི་རྒྱུད་ལ་འཇུག་ཅིང་བརྟན་པར་གྱུར་ཅིག །དེ་ནས་དབང་གི་མཐའ་རྟེན་རྒྱལ་སྲིད་རིན་པོ་ཆེ་སྣ་བདུན་བྱིན་པས་རིག་པ་འཛིན་པའི་འཁོར་ལོས་སྒྱུར་བའི་རྒྱལ་ཐབས་ལ་འཁོད་ནས་ནམ་མཁའ་ཇི་སྲིད་བར་དུ་གཞན་དོན་འབད་མེད་ལྷུན་གྱིས་གྲུབ་པའི་དབང་ཐོབ་པའི་མོས་པ་མཛོད། ཧཱུྃ། གསེར་གྱི་འཁོར་ལོ་སོགས་རྒྱལ་སྲིད་ཀྱི་དབང་ལག་ཏུ་བཞག །དམ་ཚིག་གི་བསླབ་བྱ་སྦྱིན་པ་ནི། དེ་ལྟར་སྐལ་ལྡན་ཁྱེད་རྣམས་ལ་སོགས་བརྗོད། ཧོཿདགོངས་སུ་གསོལ་ལོ༔
སོགས་བཀྲ་ཤིས་མཉམ་གསུང་མཐར་རོལ་མོ་ལྡིར་ཞིང་མེ་ཏོག་གི་ཆར་བསྙིལ། དེ་ལྟར་བཅོམ་ལྡན་ཧེ་རུ་ཀ་པདྨ་བཛྲ་སངས་རྒྱས་ཐོད་པ་རྩལ་གྱི་སྙིང་ཐིག་དབང་མོ་ཆེ་ལེགས་པར་གྲུབ་བ་ཡིན་པས་དེ་དག་གི་སྐབས་སུ་བབས་པའི་གསང་སྔགས་ཀྱི་དམ་ཚིག་དང་སྡོམ་པ་སྔོན་དུ་བརྗོད་བཞིན་པ་རྣམས་ཅི་ནུས་སུ་བསྲུང་སྙམ་པའི་སྒོ་ནས་འདིའི་རྗེས་ཟློས། གཙོ་བོས་ཇི་ལྟར་སོགས། དབང་བསྐུར་རྫོགས་པར་ཐོབ་པའི་གཏང་རག་གི་ཡོན་དུ་མཎྜལ། ཞེས་མཎྜལ་འབུལ། སླར་ཡང་ལུས་ལོངས་སྤྱོད་དགེ་རྩ་དང་བཅས་དྲུག་ཆ་གཅིག་ལྷ་དང་བླ་མར་འབུལ་སྙམ་པས་འདིའི་རྗེས་ཟློས། དེང་ནས་བརྩམས་ཏེ་སོགས། དེ་ལྟར་སྨིན་བྱེད་ཀྱི་དབང་བསྐུར་ཐོབ་པའི་དགེ་རྩ་ཐམས་ཅད་མཁའ་ཁྱབ་སེམས་ཅན་མ་གྱུར་རྣམས་ཀྱི་དོན་དུ་བསྔོ་བས་རྒྱས་གདབ་པར་མཛོད། བསོད་ནམས་འདི་ཡིས་སོགས་བརྗོད་ལ་སློབ་མ་གྲོལ། རྟེན་དང་གཏོར་མའི་སོགས་བསྡུ་རིམ་ཡང་བྱས་ལ་བསྔོ་སྨོན་མཐའ་རྒྱས་བྱའོ། །ཞེས་གཏེར་གཞུང་གི་དགོངས་དོན་ཇི་བཞིན་གཞིར་བཞག་པའི་ཅུང་ཞིག་གོ་བདེའི་ཆེད་དུ་མཚམས་སྦྱོར་འདིའང་སི་ཏུ་པདྨའི་མིང་ཅན་གྱིས་བསླབ་གསུམ་རྣམ་དག་རག་ཤུལ་དགའ་ལྡན་ཆོས་གླིང་གི་བླ་མ་འཇམ་དབྱངས་བསྟན་འཕེལ་གྱི་བཞེད་ངོར་བཀོད་པ་ནོངས་པ་གང་མཆིས་ཀུན་བཟང་ཀློང་དུ་བཟོད་པར་གསོལ་ཞིང་། དགེ་བས་འགྲོ་དོན་འཁོར་བ་དོང་ནས་སྤྲུག་པར་གྱུར་ཅིག །ཛ་ཡནྟུ།། །།
དག་སྣང་པཀྴིའི་དབང་བཞི་བྱིན་རླབས་མྱུར་འབེབས་ཀྱི་དབང་བཤད་དང་མཚམས་སྦྱོར།
དག་སྣང་པཀྴིའི་དབང་བཞི་བྱིན་རླབས་མྱུར་འབེབས་ཀྱི་དབང་བཤད་དང་མཚམས་སྦྱོར་བཞུགས། ནམ་མཁའ་དང་མཉམ་པའི་སེམས་ཅན་ཐམས་ཅད་ཟུང་འཇུག་སྐུ་བཞི་དང་ཡེ་ཤེས་ལྔ་ཡི་བདག་ཉིད་ཀྱི་གོ་འཕང་ཐོབ་པར་བྱ་སྙམ་པའི་འདུན་པ་དྲག་པོ་རྩེ་གཅིག་པའི་ངང་ནས་གསན་པར་མཛད་འཚལ། དེ་ཡང་ད་ལམ་སྐབས་སུ་བབས་པའི་དབང་བསྐུར་ཟབ་མོ་ལས་ཀྱང་ཆེས་ཟབ་པ་འདི་ཉིད། ཨོ་རྒྱན་གྱི་སློབ་དཔོན་ཆེན་པོ་སངས་རྒྱས་གཉིས་པ་དེ་ཉིད་གདུལ་བྱ་སྤྱི་དང་བྱེ་བྲག་གི་སྣང་ཚུལ་དུ་ཟ་ཧོར་གྱི་རྒྱལ་པོ་ཨིནྡྲ་བྷུ་ཏི་འཁོར་ཚོམ་བུ་འབུམ་དང་བཅས་པ་ཐུགས་རྗེ་ཐབས་མཁས་ཀྱིས་འདུལ་བར་དགོངས་ཏེ་དྷ་ན་ཀོ་ཤའི་མཚོ་གླིང་དུ་རང་བྱུང་སྐྱོན་གྱིས་མ་གོས་པདྨའི་སྡོང་པོ་ལ། དུས་གསུམ་རྒྱལ་བ་ཐམས་ཅད་ཀྱི་ཐུགས་རྗེ་གཅིག་ཏུ་བསྡུས་པའི་གོང་བུ་རང་བྱུང་ངོ་མཚར་སྤྲུལ་སྐུ་ཆེན་པོའི་བཀོད་པར་བརྫུས་ཏེ་འཁྲུངས་ནས་གསང་སྔགས་བླ་མེད་རྡོ་རྗེ་ཐེག་པ་མཆོག་གི་ཆོས་བསྟན་པར་མཛད་ཅིང་འགྲོ་བ་ལོག་པའི་ལམ་ལ་གོལ་པའི་ལྟ་ངན་ཝ་སྐྱེས་ལྟ་བུའི་ཚོགས་ཀྱིས་གཞན་ཡིད་བསླུ་ཞིང་བྲིད་པའི་ཚུལ་འཆོས་གཡོ་སྒྱུ་ཅན་རྣམས་མི་འཇིགས་སྤོབས་པ་གདོང་ལྔའི་ང་རོས་འགེམས་པར་དགོངས་ཏེ། ཁ་བ་ཅན་གྱི་དབུས་ལྗོངས་སུ་ཡང་ཆོས་རྒྱལ་མེས་དཔོན་རྣམ་པ་གསུམ་སོགས་ཀྱང་གུ་རུ་ཉིད་དང་ཐ་མི་དད་པར་སྐུ་ཡི་བཀོད་པ་ཙམ་ལས་རྒྱལ་བ་རིགས་གསུམ་གྱི་ངོ་བོའི་
རྣམ་པར་རོལ་པ་ཐོ་རི་སྙན་ཤལ་དང་། སྲོང་བཙན་སྒམ་པོའི་དུས་སུ་བོད་ཡུལ་གངས་རིའི་ཕྲེང་བ་འདི་ཉིད་དུ་དམ་ཆོས་ཀྱི་སྒྲོན་མེ་སྦར་བའི་དབུ་བརྙེས་པར་མཛད། མངའ་བདག་ཁྲི་སྲོང་ལྡེའུ་བཙན་གྱིས་དམ་པའི་ཆོས་ཀྱི་སྲོལ་བཏོད་པའི་ཕྱིར་རྒྱ་གར་ནས་ལོ་པཎ་སྐྱེས་མཆོག་ཇི་སྙེད་པ་དང་། ཁྱད་པར་མཁན་པོ་བྷོ་དྷི་སཏྭ། དེ་ལས་ཀྱང་ཁྱད་པར་གྱི་ཡོན་ཏན་དཔག་པར་དཀའ་བའི་མཐར་སོན་པ་ཨོ་རྒྱན་གྱི་སློབ་དཔོན་ཆེན་པོ་པདྨ་འབྱུང་གནས་སྤྱན་དྲངས་ཏེ། དེ་ཉིད་ཀྱི་མཚན་དཔེའི་ཉི་འོད་འབུམ་ཕྲག་ཏུ་བརྡལ་ཞིང་བོད་ཡུལ་གྱི་ལོག་བཤེས་རྣམས་ཀྱི་གཡང་ས་མུན་པ་སྟུག་པོར་གྱུར་བའི་དྲྭ་བ་ཡང་རྩད་ནས་འབྱིན་པར་མཛད། དཔལ་མི་འགྱུར་ལྷུན་གྱིས་གྲུབ་པའི་བསམ་ཡས་ལ་སོགས་གཙུག་ལག་ཁང་དང་། སད་མི་མི་བདུན་སོགས་དགེ་འདུན་གྱི་སྡེ་བཙུགས། བཀའ་མདོ་རྒྱུད་མཐའ་དག་བོད་སྐད་དུ་གཏན་ལ་ཕབ་ཅིང་རྒྱལ་བའི་བསྟན་པ་གསལ་བ་ལས་ཀྱང་གསལ་བའི་ཕུལ་དུ་མཛད། ལྷ་སྲིན་མ་རུངས་པ་རྣམས་ཀྱང་རྡོ་རྗེའི་ཐ་ཚིག་གཉེན་པོས་དམ་ལ་བཞག་སྟེ་རྒྱལ་བསྟན་ཡུན་གནས་ཀྱི་བཙས་སུ་ཡང་ཤར་ལྷོ་ནུབ་བྱང་དབུས་ཏེ་ས་འོག་ས་སྟེང་ཐམས་ཅད་ཆོས་དང་ནོར་གཏེར་གྱིས་བསྐངས་ནས་མ་འོངས་ལུང་ཟིན་གྱི་གང་ཟག་སོ་སོའི་ལས་སྐལ་དུ་མི་སྣང་བའི་རྒྱ་ཡིས་བཏབ་སྟེ་སྙིགས་མ་ལྔ་བདོའི་དུས་སུ་མདོ་སྔགས་བསྟན་པའི་རྒྱལ་མཚན་བསྒྲེང་བའི་དཔལ་དུ་བྱིན་གྱིས་བརླབས་ཏེ། དེ་ལྟར་གནས་དང་གང་ཟག་གི་
སྲུང་མ་དྲེགས་བྱེད་རྣམས་ལ་གཉེར་དུ་གདམས་པར་མཛད་ཅིང་། བོད་ཡུལ་གྱི་གདུལ་བྱ་ཕྱི་རབས་ཐུགས་རྗེས་ཉེ་བར་སྐྱོང་བའི་སླད་དུ་ལྷོ་ནུབ་རཀྴ་སྲིན་པོའི་ཁ་གནོན་དུ་འབྱོན་པར་ཉེ་བ་ན། ལྷ་སྲས་མུ་ཁྲི་བཙན་པོའི་སྔོན་འཕྲལ་སྨོན་ལམ་བཙན་པའི་དམ་བཅའ་ཟབ་མོ་རྨད་དུ་བྱུང་བའི་མཐུས་སློབ་དཔོན་ཆེན་པོས་རྗེས་སུ་འཛིན་པར་གནང་སྟེ། ཕྱི་རབས་མ་འོངས་རྗེས་འཇུག་གདུལ་བྱ་སྐལ་པ་ལས་དང་ལྡན་པ་རྣམས་ཀྱི་དཔུང་གཉེན་དང་། འོད་གསལ་སྙིང་པོ་དྲི་མ་མེད་པའི་རིང་ལུགས་ཉམས་པ་མེད་པའི་ཕྱིར་སྨོན་ལམ་དག་པས་མཚམས་སྦྱར་ཏེ་སུམ་ཅུ་ཁ་རལ་གྱི་དུས་འདིར་ལྷ་སྲས་མུ་ཁྲིའི་སྐྱེས་རབས་སྤྲུལ་པའི་གཏེར་ཆེན་རིག་འཛིན་མི་འགྱུར་རྡོ་རྗེ་ཅན་ཞེས་གྲགས་པ་དེ་ཉིད་ཀྱི་ལས་སྐལ་དུ་ས་གཏེར་ལ་སོགས་གཏེར་ཁ་དུ་མར་དབང་བའི་མངའ་བདག་ཏུ་གྱུར་པ་དང་། སྐབས་སུ་བབ་པ་འདི་ཉིད་དག་སྣང་ཞལ་གཟིགས་སུ་མངོན་པར་འཆར་པ་དེ་ཡང་། རིག་འཛིན་ནུས་ལྡན་རྡོ་རྗེའི་སོགས་ནས། ཅེས་གསུངས་པ་ལྟར་གྱི་རྗེ་ཀརྨ་པཀྴི་ཞལ་གཟིགས་མར་གྲགས་པ། དེ་ལྟར་གུ་རུ་པདྨ་དང་ཀརྨ་པ་དབྱེར་མེད་གཉིས་སུ་མེད་པའི་ཚུལ་སྔགས་རྒྱུད་ཚད་མ་རྣམས་སུ་ཡང་སྤྱིར་ངེས་པ་དང་། བྱེ་བྲག་གྲུབ་ཆེན་པཀྴིས་སློབ་དཔོན་པདྨ་དང་ཀརྨ་པའི་བར་བརྒྱུད་པ་ཡོད་ཀྱང་ཆོག་མེད་ཀྱང་ཆོག་གསུངས་པ་ལྟར་སྐུ་དང་ཞིང་ཁམས་ཐ་མི་དད་པ་ཆོས་ཀྱི་དབྱིངས་སུ་གཅིག་པའི་ཞལ་
བཞེས་ཐུན་མོང་མ་ཡིན་པ་དེ་ལྟར་ལ། དེ་དག་གི་སྒོ་ནས་ལུས་ངག་ཡིད་གསུམ་མི་ཕྱེད་པའི་དད་པ་ཆེན་པོའི་བློས་དཀྱིལ་འཁོར་གཙོ་བོ་དང་སློབ་དཔོན་དབྱེར་མེད་པ་ལ་གསང་སྔགས་ཟབ་མོའི་དབང་བསྐུར་ཡོངས་སུ་རྫོགས་པར་ཞུ་བའི་དོན་དུ་དངོས་དང་ཡིད་སྤྲུལ་རྒྱ་མཚོས་དྲངས་པའི་མཎྜལ་གནང་འཚལ། དེ་ནས་ཐོག་མར་དབང་བསྐུར་ཟབ་མོ་ཞུ་བའི་དོན་དུ་སྐྱབས་སུ་འགྲོ་བ་དང་སེམས་བསྐྱེད་པ་ལ་སློབ་དཔོན་དང་ཡི་དམ་དཀྱིལ་འཁོར་གྱི་ལྷ་ཚོགས་ཐ་མི་དད་པའི་དྲུང་དུ་གསོལ་བ་བཏབ་པ་འདིའི་རྗེས་ཟློས་མཛོད། དེ་ནས་ཕྱི་ནང་སྣོད་བཅུད་སྣང་སྲིད་ཀྱི་དངོས་པོ་གཟུང་འཛིན་གྱིས་བསྡུས་པའི་ཆོས་ཐམས་ཅད་དག་པ་རྒྱལ་བའི་དཀྱིལ་འཁོར་དུ་བསྐྱེད་པའི་རིམ་པ་བསྒོམས་པ་སྟེ་སྣང་སྟོང་གསལ་ལ་སྒྲིབ་མེད་ཀྱི་ངང་དུ་དམིགས་པ་འདི་བཞིན་མཛོད། ༈ དེ་ལྟར་ཡེ་ཤེས་པ་དེ་ཉིད་མི་འགྱུར་བ་རྒྱས་གདབ་པའི་མོས་པ་བརྟན་པོ་མཛོད་ཅིག །དེ་ནས་སྐུ་གསུང་ཐུགས་ཡོན་ཏན་ཕྲིན་ལས་ལྔའི་སྒོ་ནས་དབང་མཆོག་དམ་པའི་སྨིན་པར་བྱེད་པ་ལ། ཐོག་མར་སྐུ་མི་འགྱུར་བ་རྡོ་རྗེ་གསུམ་དང་རོ་གཅིག་པའི་ཕྱིར་བུམ་དབང་བསྐུར་བའི་མོས་པ་མཛོད། ༈ དེ་ནས་གསུང་མི་འགག་པ་ཚངས་དབྱངས་ཡན་ལག་དྲུག་ཅུ་མི་བཟད་པ་རྒྱན་གྱི་འཁོར་ལོར་དབང་ཐོབ་པའི་མོས་པ་བརྟན་པོ་མཛོད་ཅིག །༈ དེ་ནས་ཐུགས་ཇི་ལྟ་བ་དང་ཇི་སྙེད་
པ་མཁྱེན་པའི་ཡེ་ཤེས་ཀྱི་ཉི་འོད་འབུམ་དུ་བརྡལ་བའི་དབང་མཆོག་དམ་པ་ཐོབ་པའི་མོས་པ་མཛོད། ༈ དེ་ནས་རང་གཞན་གྱི་དཔལ་དང་ཡེ་ཤེས་ཐམས་ཅད་དགོས་འབྱུང་དཔག་བསམ་ལྗོན་པ་བཞིན་ཡོན་ཏན་ལྷུན་གྲུབ་ཏུ་འབྱུང་བའི་མོས་པ་མཛོད། ༈ དེ་ནས་ལས་དང་ཉོན་མོངས་ཀྱིས་བསླད་པའི་སྡིག་སྒྲིབ་བར་ཆད་ཐམས་ཅད་ལས་རྒྱལ་ཏེ་ཕྲིན་ལས་རྣམ་བཞིར་དབང་འབྱོར་བའི་མོས་པ་མཛོད། ༈ དེ་ནས་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་སྣང་སྲིད་ཟུང་འཇུག་སྤྲོས་པའི་མཐའ་དང་བྲལ་བ་ཕྱག་རྒྱ་ཆེན་པོའི་ངང་དུ་མཉམ་པར་ཞོག་ཅིག །དེ་ནས་གང་ཤར་སྣང་བའི་ཆ་ཐམས་ཅད་ཡབ་དང་སྟོང་པའི་ངོ་བོ་ཡུམ་གྱི་རང་བཞིན་གཉིས་མེད་བདེ་ཆེན་གྱི་ངང་དུ་རོལ་པར་གྱིས་ཤིག །༈ དེ་ནས་སྣང་བ་ཐམས་ཅད་བརྡ་ཆོས་སུ་སྟོན་པའི་དབང་ནི་གློ་བུར་ཡིད་བྱེད་ཀྱི་དྲན་རྟོག་ཐམས་ཅད་ཆོས་སྐུའི་རྒྱན་དུ་ངོ་ཤེས་པར་སྒོམས་ཤིག །༈ དེ་ནས་རིག་པའི་ངོ་བོ་སྟོང་པའི་རང་རྩལ་གྱི་ཡེ་ཤེས་དེ་ཡི་ངང་ནས་ཉོན་མོངས་རྟོག་ཚོགས་ཐམས་ཅད་རང་གྲོལ་ཆེན་པོའི་དབང་ཐོབ་པར་སྒོམས་ཤིག །༈ དེ་ནས་གཏོར་ཆེན་ཡེ་ཤེས་འབར་བའི་དབང་བསྐུར་བ་ནི་ཁྱོད་རང་རྣམས་ལྷར་གསལ་ཐོབ་ལ་མདུན་བསྐྱེད་ལྷ་ཚོགས་རྣམས་འོད་དུ་ལྟེམ་གྱིས་ཞུ་ནས་མཚོ་ལ་ཆར་བབ་པ་བཞིན་ཐིམ་ནས་དབང་བཞི་ཐོབ། སྒྲིབ་བཞི་དག །སྐུ་བཞི་མངོན་དུ་གྱུར་པའི་མོས་པ་
མཛོད། ཆོས་སྐུ་ཀུན་ཏུ་བཟང་པོ། ལོངས་སྐུ་རྒྱལ་བ་རིགས་ལྔ། སྤྲུལ་སྐུ་པདྨ་འབྱུང་གནས། དཔལ་ཆེན་གྲུབ་པའི་དབང་ཕྱུག་ཀརྨ་པཀྴི། རས་ཆུང་རྡོ་རྗེ་གྲགས་པ། དབང་ཆེན་དཔའ་བོ་རྟ་མགྲིན། ཡུམ་ཆེན་དཔའ་མོ་རྡོ་རྗེ་ཕག་ཞལ་ཅན། རིག་འཛིན་མི་འགྱུར་རྡོ་རྗེ་ནུས་ལྡན་དྲག་པོ་རྩལ། འཁོར་ལོའི་མགོན་པོ་ཤྲཱི་ཙིཏྟ་བཛྲ་བཀའ་བབས་ཆོས་བདག་བརྒྱུད་པ་རྣམས་དང། དཔལ་ཡེ་ཤེས་ཀྱི་མགོན་པོ་རྡོརྗེ་བེར་ནག་པོ་ཅན། འདོད་ཁམས་དབང་ཕྱུག་རང་བྱུང་གི་རྒྱལ་མོ། དམ་ཅན་སྐྱེས་བུ་རྡོ་རྗེ་ལེགས་པ་ལ་སོགས་པ་རྩ་གསུམ་རྒྱལ་བའི་ལྷ་ཚོགས་རྣམས་ཀྱིས་རྡོ་རྗེའི་སློབ་མ་འདི་རྣམས་ལ་མཆོག་དང་ཐུན་མོང་གི་དངོས་གྲུབ་དམ་པ་མྱུར་དུ་སྩོལ་བར་མཛད་དུ་གསོལ། བར་ཆད་བདུད་བཞི་ལོག་འདྲེན་སྔོན་ལས་འཕྲལ་རྐྱེན་ཆོས་མིན་གྱི་སྣང་བ་ཐམས་ཅད་རང་སར་དག་པར་བྱིན་གྱིས་རློབས་ཤིག །དེ་ནས་དབང་གི་མཐའ་རྟེན་རྒྱས་གདབ་བརྟན་བར་གཞོམ་གཞིག་དང་བྲལ་བའི་ཕྱིར་རྡོརྗེ་རྒྱ་གྲམ་གྱི་དབང་བསྐུར་བ་ནི། ༈ དེ་ལྟར་རྩ་གསུམ་ཐུན་མོང་མ་ཡིན་པའི་དབང་བཞི་ཟབ་མོ་བཀའ་རྒྱ་ཅན་འཁྲུལ་མེད་ཉིད་དུ་ཐོབ་པ་ཡིན་པས་ཕྱི་ནང་གསང་བའི་དམ་ཚིག་མཐའ་དག་རྗེས་སུ་སློབ་པ་དང་བླ་མེད་བྱང་ཆུབ་ཀྱི་བར་འདུ་འབྲལ་མེད་པར་ཡི་དམ་དུ་ཁ་ཙམ་མ་ཡིན་པར་འཛིན་སྙམ་པའི་སྒོ་ནས་རྗེས་ཟློས། མཎྜལ། ཅེས་དག་སྣང་ཞལ་གཟིགས་མའི་དབང་གི་མཚམས་སྦྱོར་འདི་ཡང་སི་ཏུ་པདྨ་ཉིན་བྱེད་དབང་པོས་དཔལ་སྤུངས་སྒྲུབ་སྡེར་སྤེལ་བ། ཛ་ཡནྟུ།། །།
དགོངས་གཏེར་གུ་རུ་དྲག་པོའི་དབང་གི་མཚམས་སྦྱོར་དངོས་གྲུབ་དགའ་ཆར་བི་ཧ་ར།
དགོངས་གཏེར་གུ་རུ་དྲག་པོའི་དབང་གི་མཚམས་སྦྱོར་དངོས་གྲུབ་དགའ་ཆར་བི་ཧ་ར། རྡོ་རྗེ་ཁྲོ་བོ་མ་ལུས་པ། །དྲག་པོ་ཕྲིན་ལས་སྣ་ཚོགས་གཟུགས། །འདུས་པ་ལས་རབ་ཀུན་གྱི་གཙོ། །བདེ་བ་རྩལ་གྱིས་རྣམ་ཀུན་སྐྱོངས། །འདིར་དགོངས་གཏེར་གུ་རུ་དྲག་པོའི་སྨིན་དབང་གི་སྒོ་ནས་སྐལ་ལྡན་རྗེས་སུ་འཛིན་པ་ལ། དང་པོ་ཡོ་བྱད་ཉེར་མཁོའི་བཤམས་ནི། སྟེགས་བུའི་ཁར་དཀྱིལ་འཁོར་བསྒོམ་དོན་ལྟར་གྱི་རྡུལ་ཚོན་ནམ་རས་བྲིས་བཀོད། བསྡུ་ན་མཎྜལ་ལྟེ་བར་ལྷ་གྲངས་དང་མཉམ་པའི་འབྲུ་ཡི་ཚོམ་བུ་འགོད། དེ་སྟེང་མཉྫིའི་ཁར་བུམ་པ་ཆས་ལྡན་རྫས་ཀྱིས་བཀང་བ། དེའི་ཁར་ཀ་པཱ་ལ་བདུད་རྩིས་གཏམས་པ་བཅས་དང་། གཡས་སུ་དཔལ་གཏོར་རྒྱན་ལྡན་སྐུ་ཙཀླི་དར་གདུགས་དམར་པོ་ཅན། གཡོན་དུ་རྡོར་དྲིལ། མདུན་དུ་སྐུ་ཙཀླི་རྣམས་དང་། དུད་ཁྲོད་དཔལ་ཆས། ཕྲེང་བ་དང་། ཤེལ་ལམ་མེ་ལོང་། དེའི་གཡས་གཡོན། རྡོ་རྗེ་དང་། སྡིགས་པའི་གཟུགས་བཅས་དང་། སྨན་གཏོར་རཀྟ། གཞན་ཡང་མཆོད་པ་ཕྲེང་ཚར་བཤམས། ཚོགས་ཀྱི་ཡོ་བྱད་དང་། ཆད་ཐོ། བརྟན་སྐྱོང་། བཀའ་སྲུང་གཏོར་མ་སོགས་དང་། མཎྜལ། ཁྲུས་ཆབ། སྔོན་འགྲོ་གཏོར་མ་བཅས་མཐོང་བརྒྱུད་བཞིན་དུ་འདུ་བགྱིས་ལ། གཉིས་པ་སྒྲུབ་པ་དངོས་གཞི་ལས་བྱང་ལྟར་བདག་མདུན་བུམ་གསུམ་དབྱེར་མེད་བསྐྱེད། བཟླས་པ་དང་ཚོགས་མཆོད་ཕུལ་གྲུབ་མཚམས། བདག་མདུན་འོད་ཟེར་སྤྲོ་བསྡུའི་ཏིང་ངེ་འཛིན་གྱི་དབང་བཞི་ཡང་ལེན་པར་བྱའོ། །གསུམ་པ་དབང་བསྐུར་བ་དངོས་ནི། སློབ་མ་རྣམས་ཁྲུས་བྱས།
བགེགས་གཏོར་བཏང་ནས་མཚམས་བཅད། སྲུང་འཁོར་བསྒོམ་ལ་དབང་བཤད་སྤྱི་འགྲོ་ལྟར་གྱི་མཚམས། སྐབས་སུ་བབས་པ་དཔལ་ཆེ་མཆོག་གུ་རུ་དྲག་པོ་ཀཱི་ལ་ཡའི་སྒོ་ནས་སྨིན་བྱེད་ཀྱི་དབང་བསྐུར་ཟབ་མོ་བགྱིད་པ་ཡིན་ཏེ། དེ་ཡང་ཨོ་རྒྱན་ཆེན་པོ་ཉིད་གདུལ་བྱ་ཞི་བས་མི་ཐུལ་བ་རྣམས་དྲག་པོའི་ཕྲིན་ལས་ཀྱིས་འདུལ་བར་དགོངས་ཏེ་པདྨ་དྲག་པོའི་སྐུར་བཞེངས་ནས་མངོན་སྤྱོད་སྙིང་རྗེའི་དབང་གིས་འགྲོ་བ་ལོག་པར་བལྟ་བ་རྣམས་བསྒྲལ་ཞིང་། བླ་མེད་བྱང་ཆུབ་ཆེན་པོའི་གནས་སུ་འདྲེན་པར་མཛད་ཅིང་། དེ་ཉིད་ཀྱི་རྒྱུད་དང་སྒྲུབ་ཐབས་ཁྱད་པར་དུ་འཕགས་པ་སྙིགས་དུས་ཀྱི་བསྟན་པའི་བཙས་སུ་གདམས་པ་འགའ་ཞིག་གཏེར་དུ་སྦས་པ། སྔ་འགྱུར་བཀའ་གཏེར་རིང་ལུགས་འཆང་བ་སྤྲུལ་པའི་གཏེར་ཆེན་ཡོངས་ཀྱི་མངའ་བདག་ཉང་རལ་ཉི་མ་འོད་ཟེར་དང་ཐུགས་རྒྱུད་ཡེ་ཤེས་རིག་པའི་ངོ་བོ་ཆོས་ཀྱི་དབྱིངས་སུ་འདྲེས་པ་དགོངས་གཏེར་རྒྱ་མཚོའི་འབྱུང་གནས་དམ་པ་རིག་འཛིན་རྡོ་རྗེ་དྲག་པོའི་ཐུགས་ཀྱི་ཀློང་ལས་འཆར་བའི་ཟབ་ཆོས་འདི་ཉིད་ཉང་དང་། རཏྣའི་གཏེར་ཁ་ལས་བྱུང་བའི་བླ་མ་དྲག་པོའི་བྱིན་རླབས་ཀྱི་བརྒྱུད་པའི་དབང་བཞིའི་ཆུ་བོ་གཅིག་ཏུ་འདྲེས་པའི་མཐུ་སྟོབས་དུ་མ་དང་ལྡན་པ་འདི་དག་གི་སྒོ་ནས་དབང་བསྐུར་བ་ལ་སློབ་དཔོན་གྱིས་བགྱི་བར་འོས་པ་རྣམས་ལེགས་པར་གྲུབ་ནས། སློབ་མའི་བྱ་བ་དབང་བཞི་ལེགས་པར་ཞུ་བའི་དོན་དུ་མཎྜལ་ཕུལ། ཅེས་མཎྜལ་ཕུལ་ལ། དེ་ནས་བླ་མ་དང་ཆེ་
མཆོག་པདྨ་དྲག་པོ་ཐ་མི་དད་པའི་དྲུང་དུ་དབང་བཞི་རྫོགས་པར་ཞུ་བའི་དོན་དུ་གསོལ་བ་བཏབ་པ་འདིའི་རྗེས་ཟློས་མཛོད། བླ་མ་བདུད་འདུལ་སོགས་ལན་གསུམ། དེ་ནས་མདུན་གྱི་ནམ་མཁར་སྟེང་གི་ཆ་ལ་རྩ་བརྒྱུད་ཀྱི་བླ་མ། བར་གྱི་ཆ་ལ་སངས་རྒྱས་བྱང་སེམས། པདྨ་དྲག་པོའི་ལྷ་ཚོགས། ཡི་དམ་ཞི་ཁྲོ་རབ་འབྱམས། འོག་གི་ཆ་ལ་ཡེ་ཤེས་ཆོས་སྐྱོང་སྲུང་མ་རྣམས་གསལ་བའི་དྲུང་དུ་སྐྱབས་སུ་འགྲོ་བ་དང་སེམས་བསྐྱེད་པ་འདིའི་རྗེས་ཟློས་མཛོད། ན་མོ། བླ་མ་བདེ་གཤེགས་སོགས་ལན་གསུམ། སེམས་བསྐྱེད་འགྲོ་བ་སོགས་ལན་གསུམ། དེ་ནས་བདུན་རྣམ་པར་དག་པ་འདིའི་རྗེས་ཟློས་མཛོད། རྡོ་རྗེ་རྒྱལ་པོ་སངས་རྒྱས་འདུས་པའི་སོགས་ལན་གསུམ། དེ་ནས་དབང་གི་གཞི་འགོད་པའི་སླད་དུ་དམིགས་པ་འདི་བཞིན་དུ་མཛོད་ཅིག །སློབ་མ་ལྷར་བསྐྱེད་པ་ནི། ཆོས་ཀུན་སྟོང་ཉིད་སྤྲོས་དང་སོགས་ལས་བྱང་ལྟར། སྤྱན་འདྲེན་སྐབས་སྤོས་དང་རོལ་མོ་དབྱངས་དང་བཅས་ཏེ། ཧྲཱིཿཡུལ་གྱི་མིང་ནི་རྔ་ཡབ་གླིང༔ སོགས་ནས་ཛབ་ལན་གསུམ་མམ་བདུན་གྱིས་བྱིན་དབབ་པའི་བར་བྱའོ། །དེ་ལྟར་ཡེ་ཤེས་པ་དེ་ཉིད་བྱང་ཆུབ་སྙིང་པོའི་བར་རབ་ཏུ་གནས་ཤིང་བརྟན་པར་གྱུར་པའི་མོས་པ་མཛོད། ཏིཥྛ་བཛྲ་བརྗོད་ལ་སྤྱི་བོར་རྡོ་རྗེ་བཞག །དེ་ནས་སྐུ་གསལ་སྟོང་ལྷུན་གྲུབ་འདུས་མ་བྱས་པ་ལྷ་ཡི་ངོ་བོ་བུམ་པའི་དབང་ལ་བརྟེན་པ་དང་། གསུང་གྲག་སྟོང་བརྗོད་
མེད་ཟུང་འཇུག་བདེ་བ་ཆེན་པོའི་ངོ་བོ་ཀ་པཱ་ལ་བདུད་རྩིའི་དབང་དང་། ཐུགས་སྟོང་ཉིད་སྙིང་རྗེ་དབྱེར་མེད་ཀྱི་ངོ་བོ་རྡོ་རྗེ་དྲིལ་བུའི་དབང་དང་། དེ་ཁོ་ན་ཉིད་དོན་དམ་སྤྲོས་བྲལ་ཡེ་ཤེས་ཀྱི་ངོ་བོ་རིག་པའི་རྩལ་དབང་སྟེ་བཞི་ལས། དང་པོ་སྐུ་བུམ་པའི་དབང་ནི། བུམ་པ་ཐོགས་ལ། བུམ་པ་སྐྱེ་མེད་ཀུན་བཟང་སོགས། གཉིས་པ་གསུང་གསང་བའི་དབང་ནི། ཐོད་ཆང་ཐོགས་ལ། སྣང་བ་ཐབས་ཀྱི་སོགས། གསུམ་པ་ཐུགས་ཤེས་རབ་ཡེ་ཤེས་ཀྱི་དབང་ནི། རྡོར་དྲིལ་ཐོགས་ཏེ། སྟོང་དང་སྙིང་རྗེར་དབྱེར་མེད་སོགས། བཞི་པ་རིག་པའི་རྩལ་དབང་ནི། ཁྱེད་རྣམས་སེམས་མ་བཅོས་པར་རང་བབས་སུ་གློད་ལ་འཇོག་ཅིག །ཤེལ་ལམ་མེ་ལོང་ཐོགས་ལ། སེམས་ཉིད་ཀ་དག་སོགས་དང་། དེ་ལྟར་མཚོན་བྱ་རྫས་ཀྱི་དབང་བསྐུར་ནས། མཚོན་བྱེད་ཚིག་གིས་བརྡ་སྤྲད་པ་ནི། འཁོར་འདས་སྣང་བའི་སོགས་ཀྱིས་ངོ་སྤྲོད་བྱའོ། །དེ་ནས་དཀྱིལ་འཁོར་ཆེན་པོའི་ལྷ་དབང་ཡོངས་རྫོགས་བསྐུར་བའི་དོན་དུ་དམིགས་པ་འདི་བཞིན་མཛོད། སློབ་དཔོན་པདྨ་དྲག་པོ་དངོས་ཡིན་སྙམ་པའི་འདུ་ཤེས་དང་། མདུན་བསྐྱེད་ཆེ་མཆོག་པདྨ་དྲག་པོའི་དཀྱིལ་འཁོར་གྱི་ལྷ་ཚོགས་རྣམས་ལས་མར་མེ་གཅིག་ལས་གཉིས་མཆེད་ཀྱི་ཚུལ་དུ་རིམ་བཞིན་ལྷ་སྐུ་རྣམས་འཕྲོས་ནས་ཁྱེད་རང་རྣམས་པདྨ་དྲག་པོར་གསལ་བའི་ལུས་ལ་སིབ་སིབ་ཐིམ་པར་སྒོམས་མཛོད་ཅིག །ཐོད་ཕྲེང་རྩལ་ཡབ་ཡུམ་སྐུ་སྤྱི་བོར་བཞག །རྒྱལ་བའི་སྤྱི་
གཟུགས་སོགས་བརྗོད། དེ་ནས་གཙོ་བོ་ཀཱི་ལ་ཡ་དང་། ཁྱུང་། འཇམ་དཔལ། རྟ་མགྲིན། ཕྱག་རྡོར། མཁའ་འགྲོ་སྡེ་ལྔ། མེ་དབལ། ཁྲོ་བཅུ། གིང་ཆེན་སྡེ་བཞི་བཅས་སོ་སོའི་དབང་རྫོགས་པར་བསྐུར། དེ་ལྟར་གུ་རུ་དྲག་པོའི་དཀྱིལ་འཁོར་གྱི་ལྷ་ཚོགས་རྣམས་ཀྱི་གསང་གསུམ་ཡེ་ཤེས་རོལ་པའི་སྣང་ཆ་དང་གཉིས་མེད་རང་བྱུང་རིག་པའི་ཀློང་དུ་དབྱེར་མི་ཕྱེད་པར་གྱུར་པའི་ངེས་ཤེས་བརྟན་པོ་མཛོད་ཅིག །དེ་ནས་བཟླས་པའི་ལུང་འབོག་པའི་དོན་དུ་དམིགས་པ་འདི་བཞིན་མཛོད། སློབ་དཔོན་ཆེ་མཆོག་དཔལ་དུ་གསལ་བའི་ཐུགས་ཀའི་སྔགས་ཕྲེང་ལས་སྔགས་ཕྲེང་གཉིས་པ་ཞིག་འཕྲོས། སློབ་དཔོན་གྱི་ཞལ་ནས་ཐོན། ཁྱེད་རང་རྣམས་ཀྱི་ཞལ་དུ་ཞུགས། ཁྱེད་རང་རྣམས་དྲག་པོར་གསལ་བའི་ཙིཏྟ་རིན་པོ་ཆེ་ཟུར་བརྒྱད་པའི་གུར་ཁང་དུ་པད་ཟླ་ལ་ཧཱུྃ་ཡིག་མཐིང་ནག་གི་མཐའ་སྐོར་དུ་ཞི་བའི་སྙིང་པོ་ཟླ་བ་རྒྱུ་སྐར་གྱིས་བསྐོར་བ་ལྟ་བུར་གསལ་ཐོབ་ལ་སྔགས་འདིའི་རྗེས་ཟློས་མཛོད་ཅིག །ཕྲེང་བ་གཏད་ལ། ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ལན་གསུམ། ཡང་པད་ཉི་ལ་ཧཱུྃ་ཡིག་གནས་འགྱུར་ཁ་དོག་དམར་པོ་དང་། དེ་མཐར་དྲག་སྔགས་འགལ་མེ་ལྟ་བུར་འཁོར་བ་གསལ་ཐོབ་ལ་སྔགས་འདིའི་རྗེས་ཟློས་མཛོད། ༀ་ཨཱ་ཿཧཱུྃ་ཨརྩིག་སོགས། སྔགས་རྣམས་ལན་གསུམ་རེ་དང་། སྣ་ཚོགས་ལས་གྲུབ་ཕྲེང་བ་སོགས། དེང་ཕྱིན་ཆད་འདི་ཉིད་རྩ་བའི་ཡི་དམ་དུ་བཟུང་ནས་
བསྙེན་དང་སྒྲུབ་པ་མངོན་སྤྱོད་ལ་སོགས་ལས་བཞིའི་སྒོ་ནས་རང་གཞན་གྱི་དོན་དང་། བསྟན་པ་སྲུང་བའི་མེལ་ཚེ་ལ་དབང་ཐོབ་པར་མོས་ཤིག །དུར་ཁྲོད་དཔལ་ཆས་གཏད་ལ། དེ་ནས་དྲག་པོའི་ཕྲིན་ལས་མཐའ་དག་མངའ་དབང་འབྱོར་བའི་ཕྱིར་དུར་ཁྲོད་དཔལ་ཆས་བཅུ་ཡི་རྒྱན་དང་ཆ་ལུགས་རྫོགས་པའི་མོས་པ་མཛོད། ཧཱུྃ། ཆེ་མཆོག་དམར་ནག་སོགས་དང་། རྡོ་རྗེ་དང་ལྕགས་སྡིགས་གཏད་ལ། དེ་ནས་ཁྱེད་རྣམས་ཁྲོ་རྒྱལ་ཡོངས་ཀྱི་དབང་ཕྱུག་ཆེ་བཙན་འགྲན་ཟླ་དང་བྲལ་བར་མངའ་གསོལ་ཕྱིར་ཕྱག་མཚན་གནམ་ལྕགས་ཀྱི་རྡོ་རྗེ་རྩེ་དགུ་པ། ལྕགས་ཀྱི་སྡིགས་པ་ནག་པོ་མགོ་དགུ་པ་གཏད་པ་ཙམ་གྱིས་དྲེགས་པ་སྡེ་བརྒྱད་ཟིལ་གྱིས་ནོན་དབང་དུ་བསྡུས་དམ་ལ་བཞག །རྒྱལ་འགོང་དམ་སྲི་ཐམས་ཅད་མེ་དང་སྦུར་མ་འཕྲད་པ་ལྟར་གཞོབ་ཐུལ་གྱིས་བསྲེག་པའི་མོས་པ་མཛོད། ཁྲོ་རྒྱལ་ཀུན་གྱི་སོགས་དང་། གནམ་ལྕགས་སྡིགས་པ་སོགས་བརྗོད། ལག་གཡས་གཡོན་དུ་གཏད། དེ་ནས་མཐའ་རྟེན་གཏོར་མའི་དབང་བསྐུར་བ་ནི། གཏོར་མ་སྤྱི་བོར་བཞག་ལ། གཏོར་མ་འདི་ཉིད་དཔལ་ཆེ་མཆོག་གུ་རུ་དྲག་པོ་པདྨ་ཐོད་ཕྲེང་ཧེ་རུ་ཀའི་དཀྱིལ་འཁོར་གྱི་ལྷ་ཚོགས་དངོས་སུ་གསལ་བ་དེ་དག་གི་གསང་བ་གསུམ་ལས་འོད་ཟེར་འཕྲོས། ཁྱེད་རང་གི་ལུས་ངག་ཡིད་གསུམ་ལ་ཐིམ་པས་རྡོ་རྗེ་གསུམ་གྱི་བྱིན་རླབས་ཐོབ། དུག་གསུམ་རྟོགས་པའི་དྲི་མ་སྦྱང་། སྐུ་གསུམ་གྱི་བདག་ཉིད་ཆེན་པོའི་གོ་
འཕང་མངོན་དུ་འགྱུར་ནུས་པའི་མཆོག་དང་ཐུན་མོང་གི་དངོས་གྲུབ་ཆར་ལྟར་བབས་ནས་བྱིན་གྱིས་བརླབས་པའི་མོས་པ་རྩེ་གཅིག་ཏུ་མཛོད་ཅིག །ཆོས་སྐུ་སྣང་བ་མཐའ་ཡས། ལོངས་སྐུ་ཐུགས་རྗེ་ཆེན་པོ། སྤྲུལ་སྐུ་པདྨ་འབྱུང་གནས། མཁའ་འགྲོ་བདེ་ཆེན་རྒྱལ་མོ། མངའ་བདག་ཆོས་རྒྱལ་ཁྲི་སྲོང་ལྡེའུ་བཙན། རིག་འཛིན་རྡོརྗེ་དྲག་པོ་ཕྲིན་ལས་འདུས་པ་ལས་རབ་བདེ་བ་རྩལ། བཀའ་བབས་ཆོས་བདག་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དང་། ཁྱད་པར་དུ་དཔལ་ཡེ་ཤེས་ཀྱི་ཁྲོ་བོ་ཆེན་པོ་ཡོངས་ཀྱི་སྤྱི་དཔལ་ཁྲག་འཐུང་པདྨ་དྲག་པོ་ཀཱི་ལ་ཡ། ཡུམ་བཅོམ་ལྡན་འདས་མ་རྡོ་རྗེ་རྣལ་འབྱོར་མ། ཡེ་ཤེས་ཁྱུང་ཆེན་འབར་བ། འཇམ་དཔལ་ཁྲོས་པ་གཤིན་རྗེའི་གཤེད་པོ། རྟ་མཆོག་རྒྱལ་པོ་ཧེ་རུ་ཀ་དཔལ། གསང་བདག་ཕྱག་ན་རྡོ་རྗེ་གཏུམ་པོ། གནོད་སྦྱིན་ཆེན་པོ་ཡཀྴ་མེ་དབལ། རིགས་བཞིའི་ཌཱ་ཀི་སྡེ་ལྔ། རང་བྱུང་སྤྲུལ་པའི་ཁྲོ་བོ་བཅུ། བདུད་འདུལ་གིང་ཆེན་སྡེ་བཞི་ཡབ་ཡུམ་ལ་སོགས་པ་གཞན་ཡང་ཡེ་ཤེས་ལས་དང་ཆོས་ཀྱི་སྲུང་མ་རྣམས་ཀྱིས་དེང་འདིར་སྐལ་ལྡན་འདི་རྣམས་ལ་གནོད་ཅིང་འཚེ་བའི་དགྲ་བགེགས་བདུད་རིས་ལོག་པར་ལྟ་བའི་བར་ཆད་ཉེར་འཚེ་མི་མཐུན་བའི་ཕྱོགས་ཐམས་ཅད་ལས་རྣམ་པར་རྒྱལ་བར་བྱིན་གྱིས་བརླབ་ཏུ་གསོལ། གནས་སྐབས་སུ་ཚེ་དཔལ་སྙན་གྲགས་དང་
འབྱོར་པ་རྒྱས་ཤིང་མཐུན་རྐྱེན་བསམ་པ་ཐམས་ཅད་ལྷུན་གྱིས་གྲུབ་པ་དང་། མཐར་ཐུག་སྐུ་དང་ཞིང་ཁམས་ཐ་མི་དད་པར་རྒྱལ་བའི་དཀྱིལ་འཁོར་དང་གཉིས་མེད་དབྱིངས་སུ་གཅིག་པའི་ངང་དུ་སངས་རྒྱས་པར་གྱུར་ཅིག །ཧཱུྃ། འགྲོ་བ་འདྲེན་མཛད་སོགས་སྔགས་དང་བཅས་བརྗོད། གཏོར་ཟན་དངོས་གྲུབ་ཀྱི་ཚུལ་དུ་རོལ་ནས་འཆི་མེད་ཚེ་ཡི་སྲོག་རྩ་བརྟན་པའི་མི་ཤིགས་པར་རྒྱས་གདབ་པའི་མོས་པ་མཛོད། གཏོར་ཟན་དང་། བདུད་རྩི་བཅས་སྦྱིན། དེ་ལྟར་ཆེ་མཆོག་དྲག་པོ་ཀཱི་ལ་ཡའི་དབང་བཞི་ཟབ་མོ་ཐོབ་པས་གསང་བ་སྔགས་ཀྱི་ཐེག་པ་ཕྱི་ནང་གསང་བས་བསྡུས་པའི་དམ་ཚིག་རྣམས་ཉམས་མེད་བསྲུང་སྙམ་པའི་སྒོ་ནས་འདིའི་རྗེས་ཟློས་མཛོད། གཙོ་བོས་ཇི་ལྟར་སོགས་ལན་གསུམ། གཏང་རག་གི་མཎྜལ་ཕུལ། རྗེས་ཀྱི་རིམ་པ་ཚོགས་ལ་རོལ། ལྷག་གཏོར་བཏང་། བསྐུལ་ཆད་ཐོ། བརྟན་སྐྱོང་། དངོས་གྲུབ་ལེན་པ། མཆོད་བསྟོད། བཀྲ་ཤིས་སོགས་གཞུང་ལྟར་འགྲིགས་ཆགས་སུ་བྱའོ། །དེ་ལྟར་དགོངས་གཏེར་བླ་མ་དྲག་པོའི་སྨིན་དབང་གི་མཚམས་སྦྱོར་འདི་བཞིན་རོང་མོ་སྤྲུལ་སྐུ་ཀརྨ་རིན་ཆེན་གྱི་ཐུགས་བཞེད་ལྟར། སི་ཏུ་པདྨ་ཉིན་བྱེད་དབང་པོས་རབ་བྱུང་བཅུ་བཞི་པ་གནམ་ལོར་སྤྱོད་པའི་ཁྲུམས་སྟོད་ཟླ་བའི་དབང་ཕྱོགས་ཀྱི་རྒྱལ་བ་གཉིས་པར་ཡང་དབེན་དོན་དམ་བདེ་དགའ་གླིང་དུ་སྤེལ་བ་བཀྲ་ཤིས་པར་གྱུར་ཅིག །༈ སྭསྟི། གསུང་རབ་ཀྱི་རིགས་བཀླག་ལུང་ཇི་བཞིན་ཡོད་མེད་ལ་གདམས་གཏད་ཆགས་
མེད་རིན་པོ་ཆེ་སོགས་ཀྱིས་བྱིན་རླབས་འཕོ་དབང་གནང་སྲོལ་ལ། ཁོ་བོས་གསར་བཀོད་རིགས་རྣམས་ཀྱང་དེའི་རྗེས་འབྲང་འོས་པར། དང་པོ། བདེ་གླིང་གཏེར་བྱོན་ཚིག་བདུན་གསོལ་འདེབས། བྱིན་འབེབས་སྔགས་བཅས་ཚར་གསུམ་གཏོན་ལ། ཡེ་དྷར་ལ་སུ་པྲ་ཏིཥྛ་བཏགས་པ་ལན་གསུམ་མེ་ཏོག་འཐོར་བཞིན་བརྗོད། རྒྱལ་ཀུན་ཐུགས་རྗེ་ཡོངས་འདུས་ཨོ་རྒྱན་རྗེའི། །གསང་གསུམ་བྱིན་རླབས་དེང་འདིར་འཇུག་ནས་སུ། །སྐལ་ལྡན་རྒྱུད་སྨིན་གྲོལ་བའི་དབང་ཐོབ་ཅིང་། །བསྟན་དང་འགྲོ་དོན་ཕྱོགས་མེད་སྤེལ་བ་ཡི། །མཐུ་སྟོབས་ནུས་པ་མཐར་ཕྱིན་ལྷུན་གྲུབ་ནས། །བླ་མེད་བྱང་ཆུབ་གོ་འཕང་ཐོབ་གྱུར་ཅིག །ཅེས་དད་ལྡན་སྔགས་འཆང་མངྒ་སཱ་ག་རའི་ངོར་སྤེལ་བ་དགེ། ༈ བྱིན་འབེབས་མདོར་བསྡུས། རང་ཉིད་ལྷར་གསལ་བའི་ཐུགས་ཀའི་འོད་ཟེར་ཀྱིས་བསྐུལ་བའི་མཆོག་གསུམ་རྩ་གསུམ་རབ་འབྱམས་རྒྱ་མཚོའི་ཞིང་དུ་བཞུགས་པའི་བླ་མ་ཡི་དམ་དཔའ་བོ་མཁའ་འགྲོ་ཡེ་ཤེས་ལས་དང་འཇིག་རྟེན་ཆོས་སྲུང་ནོར་ལྷ་གཏེར་བདག་ལ་སོགས་པ་རང་བཞིན་གྱི་གནས་དང་རང་རང་གི་གནས་ནས་མདུན་གྱི་ནམ་མཁར་སྤྱན་དྲངས་བཛྲ་ས་མཱ་ཛཿམདུན་བསྐྱེད་ཀྱི་རྟེན་ལ་དབྱེར་མེད་པར་བྱིན་དབབ་ནས། བདག་བསྐྱེད་སྐབས་རང་ཉིད་ལ་སིབ་སིབ་ཐིམ་པར་བསྒོམ། དེ་ནས་ལྷ་སོ་སོའི་ལས་བྱང་མངོན་རྟོགས་ལ་འཇུག་པར་བྱའོ། །ཀརྨ་བཀྲ་ཤིས་ངོར་སྤེལ་བ་དགེ། །།