ཀུན་རིག་གི་དབང་བསྐུར་རྣམ་གྲོལ་སྒོ་ཆེན་འབྱེད་པའི་ལྡེ་མིག
ཀུན་རིག་གི་དབང་བསྐུར་རྣམ་གྲོལ་སྒོ་ཆེན་འབྱེད་པའི་ལྡེ་མིག་ཅེས་བྱ་བ་བཞུགས་སོ། །
ན་མོ་སརྦ་བི་ད་ཡེ། བཅོམ་ལྡན་འདས་ཐམས་ཅད་རིག་པའི་སྒོ་ནས་སློབ་མ་རྗེས་སུ་བཟུང་བའི་རིམ་པ་ལ། བདག་བསྐྱེད། བུམ་བསྐྱེད། མདུན་བསྐྱེད། བདག་འཇུག་བཅས་གྲུབ་ནས་དབང་བསྐུར་བ་ལ། ཐོག་མར་ཁྲུས་དང་མཎྜལ་བཀྱེ་བསྡུ་ཟིན་ནས། ནམ་མཁའ་དང་མཉམ་པའི་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་བྱ། དེའི་ཆེད་དུ་བཅོམ་ལྡན་འདས་ཐམས་ཅད་རིག་པའི་རྩ་བའི་དཀྱིལ་འཁོར་དུ་སྨིན་པར་བྱེད་པའི་དབང་བསྐུར་ཟབ་མོ་ཞུ་སྙམ་པའི་ཐུགས་བསྐྱེད་ཀྱི་སྒོ་ནས་གསན་པར་འཚལ། དེ་ཡང་བདག་ཅག་གི་སྟོན་པ་ཡང་དག་པར་རྫོགས་པའི་སངས་རྒྱས་ཐབས་མཁས་ལ་ཐུགས་རྗེ་ཆེན་པོའི་ཕྲིན་ལས་དང་
ལྡན་པ་དེས་གདུལ་བྱ་སོ་སོའི་བློ་དང་ཁམས་དང་བག་ལ་ཉལ་རྣམས་སོ་སོར་མཁྱེན་ནས་ཆོས་ཀྱི་སྒོ་དཔག་ཏུ་མེད་པ་ཞིག་གསུངས་པ་རྣམས་ནི། རྒྱུ་ཕར་ཕྱིན་ཐེག་པ་དང་། འབྲས་བུ་གསང་སྔགས་རྡོ་རྗེ་ཐེག་པ་གཉིས་སུ་འདུས་ཤིང་། རྡོ་རྗེ་ཐེག་པ་དེ་ལ་ཡང་། གཙོ་ཆེ་བའི་དབང་དུ་བྱས་ན། ཡེ་ཤེས་རྡོ་རྗེ་ཀུན་ལས་བཏུས་པའི་རྒྱུད་ལས། དམན་པ་རྣམས་ནི་བྱ་བའི་རྒྱུད། །བྱ་མིན་རྣལ་འབྱོར་དེ་ལྟག་ལ། །སེམས་ཅན་མཆོག་ལ་རྣལ་འབྱོར་མཆོག །ཅེས་གསུངས་པ་བཞིན། བྱ་བའི་རྒྱུད་དང་། སྤྱོད་པའི་རྒྱུད་དང་། རྣལ་འབྱོར་གྱི་རྒྱུད་དང་། རྣལ་འབྱོར་བླ་ན་མེད་པའི་རྒྱུད་དང་། རྒྱུད་སྡེ་ཆེན་པོ་བཞིར་བཞུགས་པ་ལས་འདི་རྣལ་འབྱོར་གྱི་རྒྱུད་ཡིན། དེ་ལ་རྩ་བ་དང་བཤད་པ་དང་ཆ་མཐུན་
དང་། འཕྲོས་པའི་རྒྱུད་བཞི་ལས་འཕྲོས་པའི་རྒྱུད་ཡིན། ལྷ་འདིའི་ངོ་བོ་ནི་སྤྱན་རས་གཟིགས་ལོངས་སྤྱོད་རྫོགས་པའི་སྐུ་འོག་མིན་འཐུག་པོ་བཀོད་དུ་བཞུགས་པའི་རྣམ་སྣང་གང་ཆེན་མཚོ་དེ་ཉིད་ཡིན་ལ། དེའང་རྒྱུད་ཇི་ལྟར་བྱུང་བའི་ཚུལ་ནི། སྔོན་འདས་པའི་སངས་རྒྱས་བྱེ་བ་ཕྲག་བརྒྱད་ཅུ་རྩ་བཞིས་ཀྱང་གསུངས་ལ། བསྟན་པ་འདི་ལ་བཅོམ་ལྡན་འདས་ཤཱཀྱ་ཐུབ་པ་སུམ་ཅུ་རྩ་གསུམ་ལྷ་གནས་དགའ་བའི་ཚལ་གྱི་གཞལ་མེད་ཁང་ཆེན་པོར་འཁོར་བྱང་ཆུབ་སེམས་དཔའ་བྱེ་བ་ཕྲག་མང་པོ་དང་། འཇིག་རྟེན་པ་བརྒྱ་བྱིན་ལ་སོགས་པ་ལྷ་མང་པོ་དང་ཐབས་གཅིག་ཏུ་པདྨའི་གདན་ལ་བཞུགས་ནས། ངན་སོང་གི་རྒྱུད་ཐམས་ཅད་ཡོངས་སུ་སྦྱོང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་བཞུགས་པས་མཛོད་སྤུ་ནས་འོད་ཟེར་སྣ་ཚོགས་འཕྲོས་ཤིང་། སེམས་ཅན་ཐམས་ཅད་ཉོན་མོངས་པའི་འཆིང་བ་ལས་གྲོལ་ཞིང་། བདེ་བ་སོ་སོར་ཐོབ་སྟེ་དགའ་བའི་ཚལ་ཐམས་ཅད་སྣང་བར་བྱས། དེའི་ཚེ་བརྒྱ་བྱིན་ངོ་མཚར་དུ་གྱུར་ནས་ལྷའི་བུ་ནོར་བུ་དྲི་མ་མེད་པའི་འོད་ཚེ་འཕོས་པ་ངན་སོང་དུ་སྐྱེས་པ་ཐར་པའི་ཆེད་དུ་གསོལ་བ་བཏབ་པའི་ངོར་བརྟག་པ་དང་པོ་བཅོམ་ལྡན་འདས་ཉིད་ཀྱིས་གསུངས་ཤིང་། ཕྱག་ན་རྡོ་རྗེ་བྱིན་གྱིས་བརླབས་ནས་བརྟག་པ་གཉིས་པ་གསུངས། དེ་ནས་སླར་ཡང་ཕྱག་རྡོར་ཉིད་ཁྲོ་བོ་མེ་ལྟར་འབར་བའི་སྐུར་བཞེངས་ནས་ཕྱག་རྡོར་གཙོ་བོར་གྱུར་བའི་དཀྱིལ་འཁོར་བདུན་སོགས་གསུངས་པས་བརྒྱ་བྱིན་
ལ་སོགས་པ་རྣམས་རྗེས་སུ་ཡི་རངས་ཏེ་མཆོད་པ་དང་། མཚན་བརྒྱ་རྩ་བརྒྱད་ཀྱི་སྒོ་ནས་བསྟོད་ཅིང་ལྷའི་བུ་དེ་ངན་སོང་ནས་ཐར་ཏེ་བྱང་ཆུབ་ཆེན་པོའི་གོ་འཕང་ལ་བཀོད་པར་མཛད་དོ། །དེ་ལྟ་བུའི་རྒྱུད་འདི་ལྷ་ཡུལ་དུ་བཞུགས་པ། སངས་རྒྱས་མྱ་ངན་ལས་འདས་ནས་ལོ་ཉེར་བརྒྱད་འདས་པ་ན། རྒྱ་གར་ཤར་ལྷོའི་ཕྱོགས་གྲོང་ཁྱེར་པ་ཏི་ཀཱིརྟི་བྱ་བར་རྒྱལ་པོ་རབ་གསལ་ཟླ་བའམ་ཛ་ཞེས་གྲགས་པའི་ཁང་སྟེང་དུ་གླེགས་བམ་གྱི་ཆར་བབས་པ་དང་མཉམ་དུ་བྱོན་ཅིང་། གསང་བའི་བདག་པོས་རྡོ་རྗེ་དབྱིངས་ཀྱི་དཀྱིལ་འཁོར་སྤྲུལ་ནས་དབང་བསྐུར། རྒྱུད་ཀྱི་བཀའ་གཏད་རྗེས་སུ་གནང་བར་མཛད། རྒྱལ་པོ་སྒྲ་གཅན་ཟིན་བཟང་པོ། ཡེ་ཤེས་རྡོ་རྗེ། པྲཛྙ་སིདྡྷི། རབ་འབྱོར་སྐྱོང་དང་བཞི་ལ་གནང་། དེ་བཞི་ཀའི་དྲུང་ནས་སློབ་དཔོན་ཀུན་དགའ་སྙིང་པོ་ཞེས། འཇམ་དཔལ་རྩ་རྒྱུད་ལས། ཡི་གེ་ཨ་མིང་སྡོམ་བརྩོན་པ། །སྟོན་པའི་བསྟན་པ་གསལ་བྱེད་འབྱུང་། །ཞེས་ལུང་དུ་བསྟན་པའི་སློབ་དཔོན་དེ་ཉིད་ཀྱིས་གསན་པ་སྟེ། དེ་ཡང་རྣལ་འབྱོར་རྒྱུད་ཀྱི་ཚིག་ལ་མཁས་པ་ཤཱཀྱ་བཤེས་གཉེན། དོན་ལ་མཁས་པ་སངས་རྒྱས་གསང་བ། ཚིག་དོན་གཉིས་ཀ་ལ་མཁས་པ་ཀུན་དགའ་སྙིང་པོ་སྟེ་ཡོ་ག་ལ་མཁས་པ་མི་གསུམ་སོགས་ཀྱིས་གཏན་ལ་ཕབ་པ་རྒྱ་གར་འཕགས་པའི་ཡུལ་དུ་ཉི་ཟླ་ལྟར་གྲགས་ཤིང་། གངས་ཅན་བོད་ཀྱི་ཡུལ་འདིར་བསྟན་པ་སྔ་དར་ཆོས་རྒྱལ་ཁྲི་སྲོང་ལྡེའུ་བཙན་གྱི་དུས་སུ་ངན་སོང་སྦྱོང་པའི་རྒྱུད་དང་སློབ་དཔོན་སངས་རྒྱས་གསང་བའི་འགྲེལ་
པ་སོགས་བསྒྱུར། ཕྱི་དར་གྱི་དུས་ལོ་ཆེན་རིན་ཆེན་བཟང་པོའི་སྐུ་ཚེའི་སྟོད་ལ་པཎ་ཆེན་དྷརྨཱ་པ་ལར་ཞུས་ནས་ཡོ་ག་སྟོད་ལུགས་སུ་གྲགས་པ་དང་། སྐུ་ཚེའི་སྨད་ལ་ཀུན་སྙིང་གི་ལུགས་སུ་མཛད་པས་ཡོ་ག་སྨད་ལུགས་སུ་གྲགས་པ་བྱུང་ཞིང་རྣལ་འབྱོར་རྒྱུད་ཀྱི་བསྟན་པ་དར་ཞིང་རྒྱས་པར་མཛད་ནས་སྐུ་ལུས་མ་བཞག་པར་མཁའ་སྤྱོད་དུ་བྱོན། དེ་ནས་སྙེ་མདོ་བ་ཀུན་དགའ་དོན་གྲུབ་ཀྱི་དྲུང་ནས་ཐམས་ཅད་མཁྱེན་པ་རང་བྱུང་རྡོ་རྗེས་གསན་ཞིང་རིམ་པར་བརྒྱུད་ནས་རྗེ་དོན་ལྡན་ཞབས་དང་། ཆོས་གྲགས་རྒྱ་མཚོ་སོགས་ཀྱིས་རྒྱས་བསྡུས་མང་དུ་མཛད་པ་ལས། འདི་ནི་པཎྜི་ཏ་ཀུན་དགའ་སྙིང་པོས་རྣལ་འབྱོར་རྒྱུད་དུ་བཀྲལ་བའི་སྒྲུབ་ཐབས་ཇོ་བོ་སྨྲྀ་ཏི་ཛྙཱ་ནས་རང་འགྱུར་དུ་མཛད་པའི་བཀའ་སྲོལ་ཇི་ལྟ་བ་བཞིན་དུ། ཀུན་མཁྱེན་མི་བསྐྱོད་རྡོ་རྗེས་མཛད་པའི་སྒྲུབ་དཀྱིལ་རྣམ་རོལ་སྒོ་ཆེན་གྱི་སྟེང་ནས་དབང་བསྐུར་བ་ཡིན་ཏེ། དེའང་རྒྱུད་ལས། བཅོམ་ལྡན་འདས་ཀྱིས་བཀའ་སྩལ་པ། ལྷའི་དབང་པོ་ཉོན་ཅིག །སེམས་ཅན་དམྱལ་བ་ལ་སོགས་པའི་དབང་དུ་གྱུར་པའི་སེམས་ཅན་སྡིག་པ་བྱེད་པ། སྡིག་པ་ཆེན་པོ་བྱེད་པ་དེ་དག་ཅི་ནས་ཀྱང་། སེམས་ཅན་དམྱལ་བའི་སྡུག་བསྔལ་ལས། ཐབས་སླ་བས་གྲོལ་བར་འགྱུར་པ་ཉོན་ཅིག །དེ་བཞིན་དཀྱིལ་འཁོར་བྲིས་ནས་ནི། །དེ་ལྟར་ཡང་ནི་བུམ་པ་ལ། །བརྒྱ་རྩ་བརྒྱད་དུ་བཟླས་ནས་ནི། །དབང་བསྐུར་བར་ནི་རབ་ཏུ་བརྟགས། །དེ་ནས་སྡིག་པ་ཀུན་སྦྱངས་ཏེ། །དམྱལ་བ་ལ་སོགས་སྡུག་བསྔལ་ལས། །དེ་ནི་མྱུར་
དུ་རྣམ་པར་ཐར། །སྡིག་ལས་བདག་ཉིད་རྣམ་གྲོལ་ཏེ། །དག་པར་འགྱུར་བའི་ལྷ་རྣམས་ཀྱིས། །རིགས་སུ་སྐྱེ་བར་གྱུར་ནས་ཀྱང་། །དེ་ནི་རྟག་ཏུ་སངས་རྒྱས་དང་། །ཆོས་འགྲོ་བ་ནི་ཐོབ་པར་འགྱུར། །ཕྱིར་མི་ལྡོག་པའི་ས་ལ་གནས། །རིམ་གྱིས་བྱང་ཆུབ་ཐོབ་པར་འགྱུར། །ཞེས་གསུངས་སོ། །དེ་ལྟ་བུའི་ཕན་ཡོན་དང་བྱིན་རླབས་མཆོག་དང་ལྡན་པའི་དབང་བསྐུར་ཞུ་བར་བྱེད་པ་ལ་སློབ་དཔོན་གྱིས་བགྱི་བར་འོས་པའི་བདག་མདུན་བུམ་པ་བསྒྲུབ་པ། བདག་ཉིད་འཇུག་ཅིང་དབང་ལེན་པ་དང་བཅས་པ་གྲུབ་ནས། ད་ཁྱེད་རང་སློབ་མ་རྣམས་ཀྱི་ངོ་སྐལ་དུ་གྱུར་པའི་མཎྜལ་ཕུལ། ཞེས་མཎྜལ་ཕུལ། དེ་ལྟར་མཎྜལ་ཕུལ་བ་སྔོན་དུ་སོང་ནས་དཀྱིལ་འཁོར་དུ་འཇུག་ཅིང་དབང་ཞུ་བའི་དོན་དུ་གསོལ་བ་འདེབས་པ་འདིའི་རྗེས་ཟློས་མཛོད། །དགའ་ཆེན་ཁྱོད་བདག་སྟོན་པ་སྟེ། །སློབ་དཔོན་ཆེན་པོ་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ནི་གཞུག་པར་འཚལ། །ལན་གསུམ། ད་ཁྱེད་རང་རྣམས་ཀྱི་མདུན་གྱི་ནམ་མཁར་བླ་མ་དང་གཉིས་སུ་མེད་པའི་ཀུན་རིག་རྩ་བའི་ལྷ་སུམ་ཅུ་སོ་བདུན་དང་མགྲོན་ཐབས་ཀྱི་ལྷ་དང་བཅས་པ་ལ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་
བསྐོར་བ་སྤྲིན་གྱི་ཕུང་པོ་ལྟར་བཞུགས་པའི་དྲུང་དུ་ཁྱེད་རང་རྣམས་ཀྱི་ཐོག་མ་མེད་པ་ནས་བསགས་པའི་སྡིག་སྒྲིབ་ཉེས་ལྟུང་ཐམས་ཅད་བཤགས། རྒྱལ་བ་སྲས་དང་བཅས་པས་བསོད་ནམས་དང་ཡེ་ཤེས་ཀྱི་ཚོགས་བསགས་ཤིང་འགྲོ་བའི་དོན་མཛད་པ་ལ་རྗེས་སུ་ཡི་རང་། དུས་འདི་ནས་བཟུང་དཀོན་མཆོག་གསུམ་ལ་སྐྱབས་སུ་འགྲོ་ཞིང་བྱང་ཆུབ་མཆོག་ཏུ་སེམས་བསྐྱེད་ནས། སེམས་ཅན་ཐམས་ཅད་སངས་རྒྱས་ཀྱི་ས་ལ་བཀོད་པའི་ཆེད་དུ། དུས་རྟག་ཏུ་ཕ་རོལ་ཏུ་ཕྱིན་པ་དྲུག་ལ་སྤྱོད་པར་བགྱིའོ་སྙམ་པས་འདིའི་རྗེས་ཟློས་མཛོད། དབང་མེད་བདག་གིས་མི་དགེ་བགྱིས་པ་དང་། །རྗེས་སུ་ཡི་རང་ཡང་ན་བགྱིད་སྩལ་གང་། །དེ་དག་ཐམས་ཅད་བྱང་ཆུབ་མཆོག་གི་ནི། །སྤྱན་སྔར་ད་ལྟ་མ་ལུས་སོ་སོར་བཤགས། །བདེ་གཤེགས་སྲས་ཀྱི་ཚོགས་གཉིས་ཟབ་པ་དང་། །རྒྱ་ཆེན་འགྲོ་བ་མ་ལུས་པ་ཡི་དོན། །སྒྲུབ་པར་བྱེད་དང་དེ་ལས་གཞན་ལ་ཡང་། །རྟག་ཏུ་བདག་ནི་རྗེས་སུ་ཡི་རང་ངོ་། །ཐུགས་རྗེས་ཁྱབ་པའི་ཐུགས་དང་ལྡན་གྱུར་ཅིག །བློ་གྲོས་སྡིག་བྲལ་གཏི་མུག་ཚོགས་ཀུན་བཅོམ། །མ་ལུས་རིགས་ཀྱི་པདྨའི་ནང་བཞུགས་པའི། །བདེ་བར་གཤེགས་པ་རྣམས་ལ་སྐྱབས་སུ་མཆི། །བློ་མཆོག་རྣམས་ཀྱི་ཀུན་དགའ་ར་བ་སྟེ། །དམན་པས་འཇིགས་པ་རྣམས་ཀྱི་རྒྱལ་བྱེད་ཚལ། །སྲིད་པའི་འབྱོར་བ་ཟིལ་གྱིས་གནོན་པའི་མཆོག །གསུང་མཆོག་ཆོས་ལ་བདག་ནི་སྐྱབས་སུ་མཆི། །འདོད་ཆགས་ལ་སོགས་སྦྲུལ་གྱི་དུག་བཅོམ་ཞིང་། །བློ་
གྲོས་རྣམ་དག་ཐུགས་རྗེ་ལྡན་པ་ཡི། །བརྟུལ་ཞུགས་དབང་པོའི་ཚོགས་ལ་སྐྱབས་མཆི་ཞིང་། །སྲིད་དང་བྲལ་བ་རྣམས་ལའང་བདག་ཕྱག་འཚལ། །རྒྱུ་ཡི་རྗེས་ལ་བདག་པོའི་ཡུལ་བདག་ཉིད། །འབྲས་བུའི་སྟོབས་ཀྱིས་དགྲ་ལས་རྒྱལ་གྱུར་པའི། །སྙིང་རྗེའི་རྩ་བ་ཟུག་ཅིང་ཡང་དག་རྟོགས། །མཉམ་མེད་བྱང་ཆུབ་སེམས་ནི་བསྐྱེད་པར་བགྱིད། །སེམས་ཅན་རྣམས་ནི་ཡོངས་སུ་སྨིན་པའམ། །ཡང་ན་ཡོངས་སུ་བསྐྱང་བར་བྱ་ཕྱིར་རམ། །རང་གི་སེམས་ནི་དག་པར་བྱ་བའི་ཕྱིར། །འདི་དག་ཐམས་ཅད་རྩྭ་སོག་བཞིན་དུ་བཏང་། །དེ་བཞིན་ཚུལ་ཁྲིམས་བཟོད་པ་བརྩོན་འགྲུས་དང་། །བསམ་གཏན་ཤེས་རབ་བླ་ན་མེད་པ་ནི། །བདག་དང་གཞན་རྣམས་དག་པར་བྱ་བའི་ཕྱིར། །སྐད་ཅིག་རེ་རེ་ཞིང་ཡང་བསྒོམ་པར་བགྱི། །བདེ་བར་གཤེགས་པ་སྔགས་ལ་མཁས་པ་ཡི། །ཆོས་རྒྱལ་རྟག་ཏུ་ལྷུན་གྱིས་གྲུབ་པ་ནི། །འགྲོ་བ་འདི་ཡིས་ཐོབ་པར་བྱ་བའི་ཕྱིར། །ཁྱད་འཕགས་གནས་ལ་བདག་ནི་གནས་པར་བགྱི། །གསུམ། དེ་ལྟར་མདོ་སྔགས་ཐུན་མོང་གི་སྐྱབས་འགྲོ་སེམས་བསྐྱེད་སོང་ནས། ཐུན་མོང་མ་ཡིན་པ་སྔགས་ཀྱི་དམ་ཚིག་དང་སྡོམ་པ་ཁས་ལེན་པ་ནི། རིགས་ལྔ་སྤྱིའི་དམ་ཚིག་བྱང་ཆུབ་ཏུ་སེམས་བསྐྱེད་ནས་དེའི་བསླབ་བྱ་ཚུལ་ཁྲིམས་ཀྱི་བསླབ་པ་དང་། དགེ་བའི་ཆོས་སྡུད་པ་དང་། སེམས་ཅན་གྱི་དོན་བྱེད་པ་དང་། རྣམ་སྣང་གི་དམ་ཚིག་ཏུ་རྒྱུ་དཀོན་མཆོག་གསུམ་འཛིན་པ་སོགས་རིགས་ལྔ་སོ་སོའི་དམ་ཚིག་རྣམས་
ཚུལ་བཞིན་དུ་བསྲུང་སྙམ་པ་གྱིས་ལ་འདིའི་རྗེས་ཟློས་མཛོད། མགོན་པོ་སངས་རྒྱས་རྣམས་དང་ནི། །སྲས་བཅས་བདག་ལ་དགོངས་སུ་གསོལ། །བདག་མིང་འདི་ཞེས་བྱ་བ་ཡིས། །བྱང་ཆུབ་སྙིང་པོ་མཆིས་ཀྱི་བར། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་མེད་པ། །དམ་པ་བདག་གིས་བསྐྱེད་པར་བགྱི། །ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །བདག་གིས་བརྟན་པོར་བཟུང་བར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །སངས་རྒྱས་རྣལ་འབྱོར་ལས་སྐྱེས་པའི། །སྡོམ་པ་དེང་ནས་བཟུང་བར་བགྱི། །རྡོ་རྗེ་རིགས་མཆོག་ཆེན་པོ་ལ། །རྡོ་རྗེ་དྲིལ་བུའི་ཕྱག་རྒྱ་ཡང་། །ཡང་དག་ཉིད་དུ་གཟུང་བར་བགྱི། །སློབ་དཔོན་དག་ཀྱང་གཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་དུ་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་མཆོག་དག་པ་ལ། །ཕྱི་ནང་གསང་བའི་ཐེག་པ་གསུམ། །དམ་པའི་ཆོས་ནི་གཟུང་བར་བགྱི། །ལས་གྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་མེད་པ། །དམ་པ་བདག་གིས་བསྐྱེད་བགྱིས་ནས། །སེམས་ཅན་ཀུན་གྱི་
དོན་གྱི་ཕྱིར། །བདག་གིས་སྡོམ་པ་མ་ལུས་གཟུང་། །མ་བརྒལ་བ་རྣམས་བསྒྲལ་བར་བགྱི། །མ་གྲོལ་བ་རྣམས་དགྲོལ་བར་བགྱི། །དབུགས་མ་ཕྱིན་པ་དབུགས་དབྱུང་བགྱི། །སེམས་ཅན་མྱ་ངན་འདས་ལ་འགོད། །ལན་གསུམ། ཁྱོད་རང་གི་སྙིང་གར་ཀུན་རྫོབ་བྱང་ཆུབ་སེམས་ཀྱི་ངོ་བོ་ཟླ་བའི་དཀྱིལ་འཁོར་གྱི་སྟེང་དུ་དོན་དམ་པ་བྱང་ཆུབ་སེམས་ཀྱི་ངོ་བོ་རྡོ་རྗེ་དཀར་པོ་རྩེ་ལྔ་པ་ཞིག་བསྒོམ་ལ་ཐམས་ཅད་རྡོ་རྗེའི་རྣལ་འབྱོར་དུ་སེམས་བསྐྱེད་པ་འདིའི་རྗེས་ཟློས་མཛོད། ༀ་སརྦ་ཡོ་ག་ཙིཏྟ་ཨུཏྤཱ་ད་ཡཱ་མི། ལན་གསུམ། ཁྱེད་རང་རྣམས་ཀྱི་སྙིང་གར་རྡོ་རྗེ་འདིས་རེག་པས་སེམས་བསྐྱེད་པ་དེ་མི་ཉམས་ཤིང་བརྟན་པར་གྱུར་སྙམ་པའི་མོས་པ་མཛོད། སྙིང་གར་རྡོ་རྗེས་རེག །སུ་ར་ཏེ་ས་མ་ཡ་སྟྭཾ་ཧོཿསིདྡྷི་བཛྲ་ཡ་ཐཱ་སུ་ཁཾ། དེ་ནས་ཁྱེད་རང་རྣམས་ཀྱི་དཔྲལ་བར་ༀ་ལས་འཁོར་ལོ་དཀར་པོ་རྩིབས་བཅུ་གཉིས་པའི་ལྟེ་བར་ༀ་དཀར་པོ། མགྲིན་པར་པདྨ་དམར་པོ་འདབ་མ་བཅུ་དྲུག་པའི་ཟེའུ་འབྲུར་ཨཱཿདམར་པོ། སྙིང་གར་རྡོ་རྗེ་སྔོན་པོ་རྩེ་ལྔ་པའི་ལྟེ་བར་ཧཱུྃ་སྔོན་པོས་མཚན་པ་སྐུ་གསུང་ཐུགས་རྡོ་རྗེ་གསུམ་དུ་བྱིན་གྱིས་བརླབ་པའི་མོས་པ་མཛོད། རིགས་གསུམ་སྤྱིའི་ཕྱག་རྒྱ་གནས་གསུམ་དུ་གཏུགས་ལ། ༀ་བྲྀ་ཏ་བྲྀ་ཏ་སརྦ་ཨཱ་བ་ར་ཎཱ་ནི་ཧཱུྃ་ཕཊ། ༀ་ཏྲཊ་ཏྲཊ་སརྦ་ཨཱ་བ་ར་ཎཱ་ནི་ཧཱུྃ་ཕཊ། ༀ་ཚིནྡྷ་ཚིནྡྷ་སརྦ་ཨཱ་བ་ར་ཎཱ་ནི་ཧཱུྃ་ཕཊ། དེ་ནས་ཁྱེད་རང་རྣམས་ཀྱི་གནས་ཉེར་གཉིས་བྱིན་གྱིས་བརླབ་པ་ནི། སྙིང་ག་མགྲིན་པ་དཔྲལ་བ་དང་། །སྨིན་
མཚམས་མཛོད་སྤུ་ཕྲག་པ་གཉིས། །མགོ་བོ་གཙུག་ཕུད་དཔུང་པ་གཉིས། །སྣ་དང་རྐེད་པ་པུས་མོ་བོལ། །ལོང་བུ་གཉིས་དང་མིག་གཉིས་དང་། །གསང་བའི་གནས་རྣམས་སུ་ཟླ་བ་རྡོ་རྗེ་རེ་རེས་བྱིན་གྱིས་བརླབ་པར་སྒོམས་ཤིག །ༀ་སརྦ་བིད་བཛྲ་ཨ་དྷིཥྛཱ་ན་ཛྙཱ་ན་ས་མ་ཡ་ཧཱུྃ། ཞེས་རྡོ་རྗེའི་ཕྱག་རྒྱ་བསྟན། སྔགས་ཉེར་གཉིས་སམ་གསུམ། དེ་ནས་དགེ་བའི་རྩ་བ་བྱང་ཆུབ་ཏུ་བསྔོ་བ་འདིའི་རྗེས་ཟློས་མཛོད། བདག་གི་དགེ་བའི་རྩ་བ་འདི་ཡང་སེམས་ཅན་ཐམས་ཅད་དང་ཐུན་མོང་དུ་བྱས་ཏེ་རྣམ་པ་ཐམས་ཅད་མཁྱེན་པའི་གོ་འཕང་མྱུར་དུ་ཐོབ་པར་གྱུར་ཅིག །ཞེས་བརྗོད། ཟབ་མོའི་ཆོས་བཤད་པ་ནི་རྣམ་སྣང་མངོན་བྱང་ནས་གསུངས་པ་འདི་ལ་གསན་པས་ཁྱབ་པར་འདུག །འཇིག་རྟེན་དུ་ནི་ཀུན་མཁྱེན་དག །ཨུ་དུམ་ཝཱ་རའི་མེ་ཏོག་བཞིན། །བརྒྱ་ལམ་ན་ནི་རེས་འགའ་ཞིག །འབྱུང་འགྱུར་ཡང་ནི་མི་འབྱུང་ངོ་། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་དཀོན་པ་སྟེ། །གང་གིས་སེམས་ཅན་མཉམ་མེད་དོན། །བླ་མེད་བྱེད་པར་ནུས་པ་ཡིན། །བསྐལ་པ་བྱེ་བ་དུ་མ་རུ། །སྔོན་དུ་སྡིག་པ་བྱས་པ་གང་། །དཀྱིལ་འཁོར་འདི་འདྲ་མཐོང་མ་ཐག །དེ་དག་ཟད་པར་འགྱུར་ཡིན་ན། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་ན་སྨོས་ཅི་དགོས། །སྐྱོབ་པའི་གསང་སྔགས་བཟླས་ན་ནི། །གོ་འཕང་བླ་ན་མེད་པར་འགྱུར། །གང་དག་སྤྱོད་པ་མཆོག་འདི་ལ། །བློ་གྲོས་ཤིན་ཏུ་མི་གཡོ་ན། །སྡུག་བསྔལ་ཐམས་ཅད་འབྱུང་བ་ཡི། །ངན་འགྲོ་དེ་ཡིས་
གཅོད་པར་འགྱུར། །བདག་ཉིད་ཆེན་པོ་ཁྱེད་རྣམས་ཀྱིས། །རྙེད་པ་མཉམ་མེད་དེ་རིང་རྙེད། །གང་ཕྱིར་རྒྱལ་བ་སྲས་བཅས་པའི། །བདག་ཉིད་ཆེན་པོ་ཀུན་གྱི་ནི། །བསྟན་པ་འདི་ལ་ཁྱེད་རྣམས་ཀུན། །ཡོངས་སུ་བཟུང་སྟེ་སྐྱེ་བཞིན་པར། །དེ་ཕྱིར་ཁྱེད་རྣམས་ཐེག་ཆེན་དུ། །ད་ལྟ་རབ་ཏུ་སྐྱེ་བར་འགྱུར། །ཐེག་པ་ཆེན་པོ་ཆེར་འབྱུང་བའི། །ལམ་མཆོག་འདི་ནི་དཔལ་དང་ལྡན། །ཁྱེད་རྣམས་དེར་ནི་དོང་བས་ན། །རང་བྱུང་སྐལ་བ་ཆེན་པོ་པ། །འཇིག་རྟེན་ཐམས་ཅད་མཁྱེན་པ་ཡི། །དེ་བཞིན་གཤེགས་པ་ཉིད་དུ་འགྱུར། །དེ་ནས་ཁྲོ་བོ་འཇིག་རྟེན་གསུམ་རྒྱལ་གྱི་ཕྱག་རྒྱ་ཁྱེད་རང་རྣམས་ཀྱི་གནས་གསུམ་དུ་གཏུག་ཅིང་ཁྲོ་བོའི་སྔགས་བརྗོད་པས། ཁྱེད་རང་རྣམས་ཀྱི་དབང་ཞུ་བ་ལ་བར་དུ་གཅོད་པ་དང་། ལུས་ངག་ཡིད་གསུམ་ལ་གནོད་པ་ཐམས་ཅད་ཁྲོ་བོ་ཁམས་གསུམ་རྣམ་རྒྱལ་གྱིས་བསྲུངས་ནས་བར་ཆད་གང་གིས་ཀྱང་མི་ཚུགས་པར་སྒོམས་ཤིག །ༀ་བཛྲ་ས་ཏྭཱ་ཀྲོ་དྷ་ཨ་ན་ལཱརྐ་མ་ཧཱ་བཛྲ་ཀྲོ་དྷ་དྲ་བ་དྲ་བ། བི་དྲ་བ་བི་དྲ་བ། སརྦ་ཨ་པཱ་ཡ་ནཱ་ཤ་ཡ་ནཱ་ཤ་ཡ། ཧ་ར་ཧ་ར་པྲཱ་ཎཱ་ན་ཧཱུྃ་ཕཊ། ཨ་དྷི་ཏིཥྛ་སྭ་མཾ། ལན་གསུམ། སྔོན་ཆད་དཀྱིལ་འཁོར་ཆེན་པོ་འདི་མ་མཐོང་བའི་བརྡར་རས་ཡུག་དམར་པོ་ཁ་ཚར་མ་ཉམས་པ་ཞིག་གིས་གདོང་གཡོགས་པའི་མོས་པ་མཛོད། ༀ་བཛྲ་ཡཀྵ་ཧཱུྃ། ཨཱ་ཁཾ་བཱི་ར་ཧཱུྃ། ཞེས་མིག་དར་གཏད། དཀྱིལ་འཁོར་མཇལ་
བ་ལ་ཕྱག་རྟེན་དུ་ཡང་ཞིང་ཁམས་མ་ཉམས་པའི་མེ་ཏོག་གི་ཕྲེང་བ་ཞིག་གཏད་པའི་མོས་པ་མཛོད། ༀ་བཛྲ་ཨ་དྷི་ཏིཥྛ་ཧཱུྃ། ཞེས་མེ་ཏོག་གཏད། ཁྱེད་རང་རྣམས་སྐད་ཅིག་གིས་རྡོ་རྗེ་སེམས་དཔའི་སྐུར་གྱུར་པ་ལ་ཉེར་སྤྱོད་ལྔས་མཆོད་པར་མོས་ཤིག །ༀ་བཛྲ་པུཥྤེ་དྷཱུ་པེ་ཨཱ་ལོ་ཀེ་གནྡྷེ་ནཻ་ཝི་དྱ་ཨཱཿཧཱུྃ། ཞེས་པས་མཆོད། སློབ་དཔོན་གྱི་ཕྱག་གི་རྡོ་རྗེ་ལ་འཇུས་ཏེ་དཀྱིལ་འཁོར་གྱི་ནང་དུ་ཞུགས་པའི་མོས་པ་མཛོད། ༀ་བཛྲ་ས་མ་ཡ་ཧཱུྃ། ཞེས་དཀྱིལ་འཁོར་དུ་གཞུག །དེ་ནས་བྱིན་དབབ་པ་ནི་ཁྱེད་རང་རྡོ་རྗེ་སེམས་དཔར་གསལ་བའི་སྙིང་གར་རྡོ་རྗེ་སྔོན་པོ་ཧཱུྃ་གིས་མཚན་པ། མགྲིན་པར་པདྨ་དམར་པོ་ཧྲཱིཿས་མཚན་པ། དཔྲལ་བར་རིན་ཆེན་སེར་པོ་ཏྲཱྃ་གིས་མཚན་པ། སྤྱི་བོར་སྣ་ཚོགས་རྡོ་རྗེ་ལྗང་གུ་ཨཱཿས་མཚན་པ་དང་སློབ་དཔོན་གྱི་ཐུགས་ཀའི་ཨ་ཡིག་ལས་ཨ་ཡིག་དཔག་ཏུ་མེད་པ་དང་། དེ་བཞིན་གཤེགས་པ་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་ཡི་གེ་ཧཱུྃ་གི་རྣམ་པས་ལུས་ལ་ཞུགས་པར་གྱུར། ༀ་བཛྲ་པྲ་ཝེ་ཤ་ཡ་ཧཱུྃ། མང་ཉུང་ཅི་རིགས་དྲག་ཏུ་བརྗོད་ཅིང་རོལ་མོ་བྱ། ཡེ་ཤེས་པ་དེ་བརྟན་པར་བྱས་པའི་མོས་པ་མཛོད། སྤྱི་བོར་རྡོ་རྗེ་རྒྱ་གྲམ་དུ་བཞག་ལ། ཨ་ས་མེ། ཏྲི་ས་མེ། མ་ཧཱ་ས་མ་ཡ་ཧཱུྃ། ད་མེ་ཏོག་དེ་ཁྱེད་རང་གི་ཚེ་རབས་ནས་ལས་འཕྲོ་ཡོད་པའི་ལྷ་ལ་དབབ་པར་ཤོག་བསམ་པ་གྱིས་ལ་འདིའི་རྗེས་ཟློས་མཛོད། སངས་རྒྱས་དངོས་གྲུབ་ཐོབ་བྱའི་ཕྱིར། །བདག་ལ་ཐུགས་བརྩེར་
དགོངས་ནས་ནི། །འགྲོ་ལ་ཕན་པའི་གཙོ་ཆེན་གྱིས། །སྨན་པར་དགོངས་ཏེ་བཞེས་སུ་གསོལ། །ༀ་པྲ་ཏཱིཙྪ་ས་མ་ཡ་སྟྭཾ། ཞེས་དཀྱིལ་འཁོར་དུ་མེ་ཏོག་དོར། མེ་ཏོག་གང་ལ་ཕོག་པའི་ལྷ་དེ་ཚེ་རབས་ཀྱི་ལྷ་ཡིན་པས་དེའི་བྱིན་རླབས་མེ་ཏོག་དང་དབྱེར་མེད་པར་སྤྱི་བོར་ཐིམ་པར་སྒོམས་ཤིག །མེ་ཏོག་རིན་ཆེན་གང་དུ་ནི། །བབས་པར་གྱུར་པའི་རིགས་ཀྱི་ལྷ། །གཙོ་བོར་རིགས་དེ་བསྒྲུབས་ན་ནི། །དངོས་གྲུབ་མྱུར་སྟེར་ཐེ་ཚོམ་མེད། །ༀ་པྲ་ཏི་གྲྀ་ཧྞ་ཧཱུྃ། ཞེས་མེ་ཏོག་མགོར་བཅིངས། དེ་ནས་མ་རིག་པའི་སྒྲིབ་གཡོགས་དང་ལྷན་ཅིག་མིག་དར་བསལ་བའི་མོས་པ་མཛོད། རྡོ་རྗེ་སེམས་དཔའ་དེང་ཁྱེད་ཀྱི། མིག་འབྱེད་པར་ནི་བརྩོན་པར་མཛད། །ཕྱེ་བས་ཐམས་ཅད་མཐོང་འགྱུར་བའི། །རྡོ་རྗེའི་མིག་ནི་བླ་ན་མེད། །ༀ་བཛྲ་ཧཱ་སྱེ་ཨུརྒྷ་ཊ་ཡ་ཧཱུྃ། ཞེས་མིག་དར་བསལ། ༀ་བཛྲ་པཱ་ཤྱ་ཧོཿདེ་ནས་ལྷ་ངོ་བསྟན་པ་ནི། རས་བྲིས་ཀྱི་དཀྱིལ་འཁོར་འདི་ཉིད་འོག་མིན་ཆོས་ཀྱི་དབྱིངས་ཀྱི་ཞིང་ཁམས་དེ་ཡང་བསྲུང་བའི་འཁོར་ལོ་འཇིག་རྟེན་པའི་འཁོར་ཡུག་དང་བཅས་པའི་དབུས་སུ་གཞལ་ཡས་ཁང་ཕྱི་ནང་གཉིས་ཀ་རྒྱན་དང་བཀོད་པ་ཕུན་སུམ་ཚོགས་པའི་དབུས་སུ་རིགས་ཐམས་ཅད་ཀྱི་ཁྱབ་བདག་རྣམ་པར་སྣང་མཛད། ཕྱོགས་བཞིར་སྦྱོང་བའི་རྒྱལ་པོ་ལ་སོགས་པའི་དེ་བཞིན་གཤེགས་པ་བཞི། མཚམས་བཞིར་སངས་རྒྱས་སྤྱན་མ་ལ་སོགས་པའི་གཤེགས་མ་བཞི། ཆོས་ཀྱི་འཁོར་ལོའི་རྩིབས་རྣམས་
སུ་རྡོ་རྗེ་སེམས་དཔའ་ལ་སོགས་པའི་སེམས་དཔའ་ཆེན་པོ་བཅུ་དྲུག །གྲྭ་ཕྱི་ནང་བཞིར་སྒེག་སོགས་ལྷ་མོ་བརྒྱད། ནང་གི་སྒོ་བཞིར་རྡོ་རྗེ་ལྕགས་ཀྱུ་ལ་སོགས་པའི་སྒོ་བ་བཞི། དཀྱིལ་འཁོར་ཕྱི་མའི་ལྷ་སྣམ་དང་པོ་ལ་བྱམས་པ་ལ་སོགས་པའི་བསྐལ་བཟང་གི་སེམས་དཔའ་བཅུ་དྲུག །ལྷ་སྣམ་གཉིས་པ་ལ་ངན་སོང་སྦྱོང་བ་ལ་སོགས་པའི་དཔེ་བྲལ་གྱི་སེམས་དཔའ་བཅུ་དྲུག །ལྷ་སྣམ་གསུམ་པ་ལ་དགའ་བོ་ལ་སོགས་པའི་ཉན་ཐོས་བཅུ་དྲུག །ལྷ་སྣམ་བཞི་པ་ལ་གདུང་བ་སེལ་བ་སོགས་རང་རྒྱལ་བཅུ་གཉིས། སྒོ་བཞིར་འཇིག་རྟེན་གསུམ་སྣང་སོགས་ཁྲོ་བོ་ཆེན་པོ་བརྒྱད། ཁོར་ཡུག་ལ་འཇིག་རྟེན་སྐྱོང་བ་རྣམས་སོགས་མདོར་ན་བཅོམ་ལྡན་འདས་ཐམས་ཅད་རིག་པའི་དཀྱིལ་འཁོར་རྟེན་དང་བརྟེན་པར་བཅས་པ་མངོན་སུམ་དུ་མཐོང་བའི་མོས་པ་མཛོད། ཅེས་ངོ་སྤྲད། ལྷ་དེ་དག་ཐམས་ཅད་ཀྱི་དམ་ཚིག་ཁྱེད་རང་རྣམས་ཀྱི་རྒྱུད་ལ་ཞུགས་པའི་མོས་པ་མཛོད་ཅིག །ༀ་བཛྲ་ས་མ་ཡ་ཧཱུྃ་ཕཊ། ཅེས་བརྗོད། དམ་ཚིག་དེ་བརྟན་པར་བྱས་པའི་མོས་པ་མཛོད། སྙིང་གར་རྡོ་རྗེ་བཞག་ལ། ༀ་བཛྲ་ས་མ་ཡ་ཧྲྀ་ད་ཡ་མེ་པྲ་ཝེ་ཤ་ཡ་དྲྀ་ཌྷ་ཏིཥྛ་ཧཱུྃ། ཞེས་དང་། དེ་ནས་དམ་ཚིག་གི་བདུད་རྩི་སྦྱིན་པ་ནི། དུང་ཆོས་ཀྱི་ཆུ་བླུད་ལ། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུང་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་འདིས་འགྲུབ། །ཅི་སྟེ་དམ་ཚིག་འདས་ན་ནི། །དེ་མ་ཐག་ཏུ་བཀས་ནས་གཤེགས། །
རྡོ་རྗེ་འཛིན་རྒྱལ་ཁྲོས་ནས་ནི། །བདུན་བརྒྱུད་རིགས་ནི་བརླག་པར་མཛད། །དེ་བས་རྟག་ཏུ་བུ་ཁྱོད་ཀྱིས། །རྒྱལ་བས་གསུངས་པའི་དམ་ཚིག་དང་། །སྡོམ་པ་དང་ནི་བླ་མའི་བཀའ། །ཤིན་ཏུ་མོས་པས་བསྲུང་བར་བྱ། །ཁྱོད་ཀྱིས་སྲོག་ཆགས་བསད་མི་བྱ། །མ་བྱིན་པར་ཡང་བླང་མི་བྱ། །བརྫུན་དང་འདོད་ལོག་སྤྱོད་པ་རྣམས། །དངོས་གྲུབ་འདོད་པས་བྱ་བ་མིན། །ཆང་ནི་བཏུང་བར་མི་བྱ་ཞིང་། །ཤ་ལ་སོགས་པ་བཟའ་མི་བྱ། །སེམས་ཅན་གནོད་པའི་སྦྱོར་བ་ནི། །ནམ་ཡང་བྱ་བ་མ་ཡིན་ནོ། །དཀོན་མཆོག་གསུམ་ནི་ཡོངས་མི་སྤོང་། །དུས་ཀུན་ཏུ་ནི་བྱང་ཆུབ་སེམས། །སྙིང་པོ་སྔགས་དང་ཕྱག་རྒྱ་དང་། །ལྷ་དང་བླ་མ་དེ་བཞིན་ནོ། །སྡིག་ལ་སོགས་པ་གང་ཡིན་དང་། །བླ་མའི་བཀའ་ལས་འདའ་མི་བྱ། །ལྷ་ལ་ཕུལ་བའི་རྙིང་པ་དང་། །དེ་ཡི་གྲིབ་མའང་འགོང་མི་བྱ། །ཕྱག་རྒྱའི་གཟུགས་ལའང་དེ་བཞིན་ནོ། །སྔགས་དང་ལྷ་ལ་སྨད་མི་བྱ། །གདོན་གྱི་ལས་སོགས་བྱ་བ་མིན། །མུ་སྟེགས་ཅན་ལ་སྨད་མི་བྱ། །མདོར་ན་ཐེ་ཚོམ་ཡིད་གཉིས་སོམ་ཉི་མི་བྱ་སྟེ། །བདག་གི་དེ་ཉིད་དང་ནི་སྔགས་སོགས་དེ་བཞིན་ནོ། །དེ་རྣམས་ཀྱི་སྟ་གོན་འཇུག་པ་དང་བཅས་པའི་ཆོས་བཅུ་བདུན་སོང་བ་ཡིན། ད་དབང་གི་དངོས་གཞི་ཞུ་བའི་ཕྱིར་མཎྜལ་ཕུལ། མཎྜལ་ཕུལ་ལ། རྒྱུད་ལས། སརྦ་བིད་ཀྱིས་ཇི་ལྟར་དབང་བསྐུར་ཏེ། །བུམ་པ་ལ་སོགས་ཇི་སྙེད་མང་ཐོགས་པས། །བཅུ་པོ་རྣམས་ཀྱི་དབང་ནི་ཅི་དགར་བསྐུར། །དེ་ནས་ལག་ཏུ་རྡོ་རྗེ་
དྲིལ་བུ་སྦྱིན། །ཞེས་གསུངས་པ་ལྟར། དང་པོ་སྔགས་དབང་གི་སླད་དུ་དམིགས་པ་འདི་བཞིན་མཛོད་ཅིག །སློབ་དཔོན་དཀྱིལ་འཁོར་གྱི་གཙོ་བོའི་ཐུགས་ཀ་ནས་སྔགས་ཀྱི་ཕྲེང་བ་བྱུང་ཞལ་ནས་ཐོན། ཁྱེད་རང་གི་ཞལ་ནས་ཞུགས་སྙིང་གར་ཐིམ་པའི་མོས་པ་མཛོད། སྤྱི་བོར་རྡོ་རྗེ་བཟུང་ལ། ན་མོ་བྷ་ག་ཝ་ཏེ། སརྦ་དུརྒ་ཏེ་པ་རི་ཤྭ་དྷ་ནི་རྭ་ཛ་ཡ། ཏ་ཐ་ག་ཏཱ་ཡཱརྷ་ཏེ། སམྱཀྶཾ་བུདྡྷཱ་ཡ། ཏདྱ་ཐཱ། ༀ་ཤོ་དྷ་ནི་ཤོ་དྷ་ནེ་སརྦ་པཱ་པཾ་བི་ཤོ་དྷ་ནི་ཤུདྡྷེ་བི་ཤུདྡྷེ་སརྦ་ཀརྨ་ཨཱ་ཝ་ར་ཎ་བི་ཤོ་དྷ་ན་སྭཱ་ཧཱ། ༀ་ཤོ་དྷ་ནེ་ཤོ་དྷ་ཡ་སརྦ་ཨ་པཱ་ཡ་ཧཱུྃ། ༀ་ཤོ་དྷ་ནེ་ཤོ་དྷ་ཡ་སརྦ་ཨ་པཱ་ཡ་ཏྲཱྃ། ༀ་ཤོ་དྷ་ནེ་ཤོ་དྷ་ཡ་སརྦ་ཨ་པཱ་ཡ་ཧྲཱིཿༀ་ཤོ་དྷ་ནི་ཤོ་དྷ་ཡ་སརྦ་ཨ་པཱ་ཡ་ཨཱཿཨོ་ཤོ་དྷ་ནེ་ཧཱུྃ། ༀ་ཤོ་དྷ་ནི་ཏྲཱྃ། ༀ་ཤོ་དྷ་ནི་ཧྲཱིཿༀ་ཤོ་དྷ་ནི་ཨཱཿཞེས་བརྗོད། དེ་ནས་དབང་བཅུ་བསྐུར་བ་ལ། དེ་བཞིན་གཤེགས་པ་བཞིས་དབང་བསྐུར་བའི་དགོངས་པ་མཛད། སེམས་དཔའ་རྣམས་ཀྱིས་ཤིས་པ་བརྗོད། ལྷ་མོ་རྣམས་ཀྱིས་གླུ་བླངས། ཁྲོ་བོ་བརྒྱད་ཀྱིས་བགེགས་བསྐྲད། རྡོ་རྗེ་མ་བཞིས་རིན་པོ་ཆེའི་བུམ་པ་བདུད་རྩིས་གང་བས་དབང་བསྐུར། སྐུ་གང་དྲི་མ་ཐམས་ཅད་དག །ལྷ་ཐམས་ཅད་ཀྱི་སྤངས་རྟོགས་ཀྱི་ཡོན་ཏན་ཐམས་ཅད་རྒྱུད་ལ་སྐྱེས་པའི་མོས་པ་མཛོད། བུམ་པ་ཐོགས་ལ། རིན་ཆེན་མཛེས་པའི་བཀྲ་ཤིས་བུམ་པ་འདིས། །སྐལ་ལྡན་སྐྱེས་བུ་ཁྱོད་ལ་དབང་བསྐུར་བས། །ལས་དང་ཉོན་མོངས་སྒྲིབ་པ་དག་གྱུར་ཏེ། །བྱང་ཆུབ་སེམས་ཀྱི་རླན་གྱིས་བརླན་པར་ཤོག །རྣམ་རྒྱལ་བུམ་པ་
མགོ་བོའི་གནས་ལྔར་བཞག་ལ། ༀ་བུདྡྷ་ཀཱ་ལ་ཤ་ཨ་བྷི་ཥིཉྩ་ༀ། ༀ་བཛྲ་ཀཱ་ལ་ཤ་ཨ་བྷི་ཥིཉྩ་ཧཱུྃ། ༀ་རཏྣ་ཀཱ་ལ་ཤ་ཨ་བྷི་ཥིཉྩ་ཏྲཱྃ། ༀ་པདྨ་ཀཱ་ལ་ཤ་ཨ་བྷི་ཥིཉྩ་ཧྲཱིཿༀ་ཀརྨ་ཀཱ་ལ་ཤ་ཨ་བྷི་ཥིཉྩ་ཨཱཿཿབརྗོད་ཅིང་བུམ་ཆུ་འཐུང་དུའང་གཞུག །དེ་ལྟར་མི་བསྐྱོད་པ་ཆུ་ཡི་དབང་བསྐུར་བས་ལས་དང་ཉོན་མོངས་པའི་སྒྲིབ་པ་དག་སྟེ་བྱང་ཆུབ་སེམས་ཀྱི་དབང་དང་ལྡན་པར་གྱུར་ཅིག །དེ་ནས་རིན་ཆེན་འབྱུང་ལྡན་ཅོད་པན་གྱི་དབང་བསྐུར་བ་ནི། དབུ་རྒྱན་ཐོགས་ལ། དེ་བཞིན་གཤེགས་པའི་དབུ་རྒྱན་ཅོད་པན་འདིས། །སྐལ་ལྡན་སྐྱེས་བུ་ཁྱོད་ལ་དབང་བསྐུར་བས། །སྐུ་གསུང་ཐུགས་ཀྱི་ཡོན་ཏན་རབ་རྫོགས་ཏེ། །རིགས་ལྔའི་སངས་རྒྱས་མྱུར་དུ་ཐོབ་པར་ཤོག །ༀ་བུདྡྷ་ཨ་བྷི་ཥིཉྩ་ༀ། དེ་བཞིན་དུ། བཛྲ་ཧཱུྃ། རཏྣ་ཏྲཱྃ། པདྨ་ཧྲཱིཿཀརྨ་ཨཱཿསོགས་བརྗོད་ཅིང་དབུ་རྒྱན་བསྐོན། དེ་ལྟར་དབུ་རྒྱན་གྱི་དབང་བསྐུར་བས་རིགས་ལྔའི་སྐུ་གསུང་ཐུགས་ཀྱི་དངོས་གྲུབ་ཐམས་ཅད་ཐོབ་པའི་དབང་དང་ལྡན་པར་གྱུར་ཅིག །དེ་ནས་རིན་པོ་ཆེའི་ཕྲེང་བས་དབང་བསྐུར་བ་ནི། མེ་ཏོག་ཕྲེང་བ་ཐོགས་ལ། རིན་ཆེན་མཛེས་པའི་མེ་ཏོག་ཕྲེང་བ་འདིས། །སྐལ་ལྡན་སྐྱེས་བུ་ཁྱེད་ལ་དབང་བསྐུར་བས། །བསམ་པ་མྱང་འདས་སྦྱོར་བ་ཁམས་གསུམ་གནས། །མཛེས་པའི་ཡོན་ཏན་ཕུན་སུམ་ཚོགས་པར་ཤོག །ༀ་རཏྣ་མཱ་ལ་ཨ་བྷི་ཥིཉྩ་ཏྲཱྃ་ཏྲཱྃ་ཏྲཱྃ་ཏྲཱྃ་ཏྲཱྃ། ཞེས་བསྐུར། དེ་ལྟར་རིན་པོ་ཆེའི་ཕྲེང་བས་དབང་བསྐུར་བས་བསམ་པ་མྱ་ངན་ལས་འདས་ཀྱང་སྦྱོར་བ་ཁམས་གསུམ་ན་སེམས་ཅན་གྱི་དོན་བྱེད་པ་ལ་མཛེས་པའི་
ཡོན་ཏན་ཕུན་སུམ་ཚོགས་པའི་དབང་དང་ལྡན་པར་གྱུར་ཅིག །དེ་ནས་དར་གྱི་ཅོད་པན་གྱི་དབང་བསྐུར་བ་ནི། དར་དཔྱངས་ཐོགས་ལ། མཛེས་ཤིང་ཡིད་འོང་དར་གྱི་ཅོད་པན་འདིས། །སྐལ་ལྡན་སྐྱེས་བུ་ཁྱོད་ལ་དབང་བསྐུར་བས། །ཤེས་བྱ་ཀུན་ལ་ཐོགས་པ་མེད་པ་དང་། །འགྲོ་བའི་དོན་ལ་མཐུ་དབང་ཐོབ་པར་ཤོག །ༀ་བཛྲ་པཊྚ་ཨ་བ་ལམྦ་ན་ཨ་བྷི་ཥིཉྩ་ཏྲཱྃ། ཞེས་བསྐུར། དེ་ལྟར་དར་གྱི་ཅོད་པན་གྱི་དབང་བསྐུར་བས་ཤེས་བྱ་ཐམས་ཅད་ལ་ཐོགས་པ་མེད་པ་དང་། སེམས་ཅན་གྱི་དོན་བྱེད་པ་ལ་མཐུ་ཐོགས་པ་མེད་པའི་དབང་དང་ལྡན་པར་གྱུར་ཅིག །དེ་རྣམས་ཀྱིས་རིན་ཆེན་འབྱུང་ལྡན་ཅོད་པན་གྱི་དབང་བསྐུར་བ་སོང་ནས། ད་འོད་དཔག་མེད་ཕྱག་མཚན་གྱི་དབང་བསྐུར་བ་ནི། རིགས་ལྔའི་ཕྱག་མཚན་ཐོགས་ལ། རིགས་ལྔའི་ཕྱག་རྒྱ་ལག་ཏུ་གཏད་ནས་ནི། །སྐལ་ལྡན་སྐྱེས་བུ་ཁྱོད་ལ་དབང་བསྐུར་བས། །སྐུ་གསུང་ཐུགས་ཀྱི་ཡོན་ཏན་རབ་རྫོགས་ཏེ། །ཡེ་ཤེས་ལྔ་ནི་མྱུར་དུ་རྟོགས་པར་ཤོག །ༀ་བུདྡྷ་མུ་དྲ་ཨ་བྷི་ཥིཉྩ་ༀ། དེ་བཞིན་དུ། བཛྲ་ཧཱུྃ། རཏྣ་ཏྲཱྃ། པདྨ་ཧྲཱིཿཀརྨ་ཨཱཿཞེས་རིགས་ལྔའི་ཕྱག་མཚན་གཏད། དེ་ལྟར་རིགས་ལྔའི་ཕྱག་རྒྱས་དབང་བསྐུར་བས། རིགས་ལྔ་ཡེ་ཤེས་ལྔའི་དབང་དང་ལྡན་པར་གྱུར་ཅིག །དེ་ནས་རྣམ་པར་སྣང་མཛད་མིང་གི་དབང་བསྐུར་བ་ནི། རྡོར་དྲིལ་ཐོགས་ལ། ཀུན་རྫོབ་མཚན་ཉིད་མཚོན་པ་མིང་གི་དབང་། །སྐལ་ལྡན་སྐྱེས་བུ་ཁྱོད་ལ་དབང་བསྐུར་བས། །མ་འོངས་སངས་རྒྱས་འཇིག་རྟེན་
ཞིང་ཁམས་སུ། །དེ་བཞིན་གཤེགས་པའི་མཚན་གྱི་མིང་ཐོབ་ཤོག །རྡོར་དྲིལ་སྤྱི་བོར་བཞག་ལ། ༀ་བུདྡྷ་ནཱ་མ་ཨ་བྷི་ཥིཉྩ་ༀ། དེ་བཞིན་དུ། བཛྲ་ཧཱུྃ། རཏྣ་ཏྲཱྃ། པདྨ་ཧྲཱིཿཀརྨ་ཨཱཿཀྱེ་དཔལ་རྡོ་རྗེ་སེམས་དཔའ་ཞེས་བྱ་བའི་དེ་བཞིན་གཤེགས་པའོ། །ཞེས་པའམ་ཡང་ན་སོ་སོའི་གསང་མཚན་བརྗོད། དེ་ལྟར་མིང་གི་དབང་བསྐུར་བས་མ་འོངས་པ་ན་རིགས་ཀྱི་གསང་མཚན་དང་མཐུན་པར་སངས་རྒྱས་པའི་དབང་དང་ལྡན་པར་གྱུར་ཅིག །དེ་ནས་རྡོ་རྗེ་སློབ་དཔོན་གྱི་དབང་གི་སླད་དུ་དམིགས་པ་འདི་བཞིན་དུ་མཛོད། སྟོང་པའི་ངང་ལས། པྃ་ལས་པདྨ། །ཨ་ལས་ཟླ་བའི་སྟེང་དུ་ཁྱེད་རང་རྣམས་རྡོ་རྗེ་སེམས་དཔའ་སྐུ་མདོག་དཀར་པོ་གཡས་རྡོ་རྗེ་ཐུགས་ཀར་འཛིན་ཅིང་གཡོན་དྲིལ་བུ་དཀུར་བརྟེན་པ། རྒྱན་ཐམས་ཅད་ཀྱིས་བརྒྱན་པ། སེམས་དཔའི་སྐྱིལ་ཀྲུང་གིས་བཞུགས་པར་གྱུར། རྡོར་སེམས་ཀྱི་སྐུ་འམ་དམ་རྒྱ་སྤྱི་བོར་བཞག་ནས། ༀ་བཛྲ་སཏྭཱ་ཧཱུྃ། ཞེས་བརྗོད། ཁྱེད་རང་རྣམས་ལྷར་གསལ་བ་ལ་བསྟོད་ཅིང་བསྔགས་པར་མོས་མཛོད། །སངས་རྒྱས་ཀུན་པས་སྔར་སངས་རྒྱས། །མི་ཤེས་དྲི་མ་ཀུན་བཅོམ་པ། །ཕྱག་ན་རྡོ་རྗེ་རྒྱལ་དབང་ལ། །དགའ་བའི་བསམ་པས་བསྟོད་པར་བྱ། །ཞེས་བརྗོད། དེ་ནས་དོན་ཡོད་གྲུབ་པ་དྲིལ་བུའི་དབང་གི་མཚོན་བྱེད་དུ་རྒྱ་གྲམ་གྱི་དབང་བསྐུར་བ་ནི། སྣ་ཚོགས་རྡོ་རྗེ་ལག་ཏུ་གཏད་ནས་ནི། །སྐལ་ལྡན་སྐྱེས་བུ་ཁྱོད་ལ་དབང་བསྐུར་བས། །ཕྲིན་ལས་རྣམ་བཞིས་འགྲོ་དོན་མཐར་ཕྱིན་ནས། །ལས་ཀྱི་རིགས་ཀྱི་དངོས་
གྲུབ་ཐོབ་པར་ཤོག །ༀ་ཀརྨ་ཨ་བྷི་ཥིཉྩ་ཨཱཿཞེས་བསྐུར། དེ་ལྟར་རྒྱ་གྲམ་གྱི་དབང་བསྐུར་བས། ཕྲིན་ལས་བཞིས་བདག་དང་གཞན་གྱི་དོན་བྱེད་པ་ལ་མཐུ་སྟོབས་ཐོགས་པ་མེད་པའི་དབང་དང་ལྡན་པར་གྱུར་ཅིག །དེ་ནས་ཆོས་ཀྱི་འཁོར་ལོའི་དབང་བསྐུར་བ་ནི། འཁོར་ལོ་རྐང་པའི་བར་དུ་བཞག་ལ། ཡོན་ཏན་རབ་རྫོགས་གསེར་གྱི་འཁོར་ལོ་འདིས། །སྐལ་ལྡན་སྐྱེས་བུ་ཁྱོད་ལ་དབང་བསྐུར་བས། །རྣམ་པར་སྣང་མཛད་སྐུ་མཆོག་རབ་ཐོབ་སྟེ། །ཆོས་ཀྱི་འཁོར་ལོ་མྱུར་དུ་བསྐོར་བར་ཤོག །ༀ་བཛྲ་ཙཀྲ་ཨ་བྷི་ཥིཉྩ་ཧཱུྃ་བྷྲཱུྃ། དེ་ལྟར་འཁོར་ལོའི་དབང་བསྐུར་བས་རྣམ་པར་སྣང་མཛད་ཀྱི་སྐུ་ཐོབ་སྟེ་ཆོས་ཀྱི་འཁོར་ལོ་བསྐོར་བའི་དབང་དང་ལྡན་པར་གྱུར་ཅིག །དེ་ནས་རིགས་ཐམས་ཅད་ཀྱི་ཁྱབ་བདག་འཁོར་ལོས་སྒྱུར་བའི་དབང་བསྐུར་བ་ནི། རིགས་ལྔའི་ཕྱག་མཚན་གྱི་ཡུ་བ་བྱས་པའི་དྲིལ་བུ་ལྔ་གཏད་ལ། རིགས་ལྔའི་བདག་པོ་ཡི་ནི་རང་བཞིན་གྱིས། །སྐལ་ལྡན་སྐྱེས་བུ་ཁྱོད་ལ་དབང་བསྐུར་བས། །རྡོ་རྗེ་སེམས་དཔའ་རིགས་རྣམས་ཀུན་གྱི་བདག །རིགས་དང་དཀྱིལ་འཁོར་ཀུན་གྱི་བདག་པོར་ཤོགༀ་བུདྡྷ་ཙཀྲ་ཨ་དྷི་པ་ཏི་སྟྭཾ་ཨ་བྷི་ཥིཉྩ་ༀ་ༀ་ༀ། ༀ་བཛྲ་ཙཀྲ་ཨ་དྷི་བ་ཏི་སྟྭཾ་ཨ་བྷི་ཥིཉྩ་ཧཱུྃ་ཧཱུྃ་ཧཱུྃ། ༀ་རཏྣ་ཙཀྲ་ཨ་དྷི་པ་ཏི་སྟྭཾ་ཨ་བྷི་ཥིཉྩ་ཏྲཱྃ་ཏྲཱྃ་ཏྲཱྃ། ༀ་པདྨ་ཙཀྲ་ཨ་དྷི་པ་ཏི་སྟྭཾ་ཨ་བྷི་ཥིཉྩ་ཧྲཱི་ཧྲཱི་ཧྲཱིཿༀ་ཀརྨ་ཙཀྲ་ཨ་དྷི་པ་ཏི་སྟྭཾ་ཨ་བྷི་ཥིཉྩ་ཨ་ཨ་ཨ། དེ་ལྟར་རིགས་ལྔའི་བདག་པོའི་དབང་བསྐུར་བས་རིགས་དང་དཀྱིལ་འཁོར་ཐམས་ཅད་ཀྱི་བདག་པོའི་དབང་དང་ལྡན་པར་གྱུར་ཅིག །དེ་ནས་གཟུངས་
དབང་བསྐུར་བ་ནི། ཡུམ་ལྔའི་ཕྱག་རྒྱ་སྤྱི་བོར་བཞག་ནས་ནི། །སྐལ་ལྡན་སྐྱེས་བུ་ཁྱོད་ལ་དབང་བསྐུར་བས། །གསང་རྒྱུད་མཐའ་དག་ཤེས་ཤིང་རྟོགས་ནས་སུ། །འཆད་ཅིང་སྟོན་པའི་དབང་དང་ལྡན་པར་ཤོགༀ་བུདྡྷ་དྷཱ་ར་ནི་ཨ་བྷི་ཥིཉྩ་ༀ། དེ་བཞིན་དུ། བཛྲ་ཧཱུྃ། རཏྣ་ཏྲཱྃ། པདྨ་ཧྲཱིཿཀརྨ་ཨཱཿཞེས་པས་བསྐུར། དེ་ལྟར་ཡུམ་ལྔའི་ཕྱག་རྒྱས་དབང་བསྐུར་བས་གསང་རྒྱུད་མཐའ་དག་ཤེས་ཤིང་རྟོགས་ནས་གཞན་ལ་འཆད་ཅིང་སྟོན་པའི་དབང་དང་ལྡན་པར་གྱུར་ཅིག །དེ་ནས་གསང་དབང་བསྐུར་བ་ནི། རིགས་ལྔའི་ཕྱག་རྒྱ་སྤྱི་བོ་སོགས་གནས་ལྔར་བཞག །རིགས་ལྔའི་ཕྱག་རྒྱ་གནས་ལྔར་བཅིངས་ནས་ནི། །སྐལ་ལྡན་སྐྱེས་བུ་ཁྱོད་ལ་དབང་བསྐུར་བས། ཡེ་ཤེས་ལྔ་ཡི་ཡོན་ཏན་རབ་རྫོགས་ཏེ། །བྱང་སེམས་གསང་བའི་དབང་དང་ལྡན་པར་ཤོག །ༀ་བུདྡྷ་གུ་ཧྱ་ཨ་བྷི་ཥིཉྩ་ༀ། དེ་བཞིན་དུ། བཛྲ་ཧཱུྃ། རཏྣ་ཏྲཱྃ། པདྨ་ཧྲཱིཿཀརྨ་ཨཿཞེས་པས་གཏད། དེ་ལྟར་རིགས་ལྔའི་ཕྱག་མཚན་གྱི་དབང་བསྐུར་བས་སངས་རྒྱས་རིགས་ལྔའི་ཐུགས་གསང་བ་བྱང་ཆུབ་ཀྱི་སེམས་རྟོགས་པའི་དབང་དང་ལྡན་པར་གྱུར་ཅིག །དེ་ལྟར་རྡོ་རྗེ་སློབ་དཔོན་གྱི་དབང་ཐོབ་ནས་དཀྱིལ་འཁོར་དང་ལྷའི་དེ་ཉིད་དབང་དང་རབ་གནས་སྦྱིན་སྲེག་སོགས་སློབ་དཔོན་གྱི་བྱ་བ་མཐའ་དག་མཁས་པར་བསླབ་ནས། འགྲོ་བ་གཞན་གྱི་དོན་བྱ་སྙམ་པས་དཀྱིལ་འཁོར་གྱི་དེ་ཉིད་རྒྱུད་ལས་གསུངས་པ་འདི་གསན་འཚལ། སངས་རྒྱས་ཀུན་གྱི་བྱང་ཆུབ་སེམས། །བླ་ན་མེད་པ་རྟོགས་
གྱུར་པ། །རྒྱལ་བས་གསུངས་པའི་ཡེ་ཤེས་གང་། །དེ་ནི་དཀྱིལ་འཁོར་སྙིང་པོར་གསུངས། །ཞེས་བརྗོད། དེ་ནས་ཧཱུྃ་ལས་བྱུང་བའི་རྡོ་རྗེ་ལག་གཡས་སུ་གཏད་པས་གསོར་ཞིང་སྙིང་གར་གཏོད་དེ་འཛིན་པའི་མོས་པ་མཛོད། །རྡོ་རྗེ་གཏད། ཧཱུྃ། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་ཏུ་བཟང་པོ་ཀུན་བདག་ཉིད། །རྡོ་རྗེ་སྙེམས་ཚུལ་བདག་པོའི་བདག །ཅེས་དང་། ཨ་ཡིག་ལས་བྱུང་བའི་དྲིལ་བུ་ཤེས་རབ་ཀྱི་རང་བཞིན། ལག་པ་གཡོན་དུ་གཏད་པས་དཀྲོལ་ཞིང་བསྙེན་པའི་ཚུལ་གྱི་དཀུར་བརྟེན་པའི་མོས་པ་མཛོད། དྲིལ་བུ་གཏད། ཨཿསྲིད་པ་ངོ་བོ་ཉིད་ཀྱི་བདག །ངོ་བོ་ཉིད་ཀྱིས་སྲིད་བྲལ་བྱས། །རང་བཞིན་དག་པའི་སེམས་དཔའ་མཆོག །སྲིད་པ་མཆོག་ནི་མཛད་པ་ཡིན། དྷརྨཱ་ཨཱཿདེ་ནས་རྡོར་དྲིལ་སྙིང་གར་བསྣོལ་ཐབས་སུ་འཛིན་པའི་མོས་པ་མཛོད། །ཞེས་བསྣོལ་བཅུག །དེ་བཞིན་གཤེགས་པ་ཀུན་གྱིས་ཀྱང་། །འདའ་བ་རུ་ནི་མི་མཛད་པའི། །ཕྱག་རྒྱའི་དམ་ཚིག་ཅེས་སུ་གྲགས། །ཡིད་ཀྱི་གཟུགས་ནི་བརྟན་ཕྱིར་རོ། །དེ་ལྟར་རྡོ་རྗེ་ཐུགས། དྲིལ་བུ་གསུང་། ཕྱག་རྒྱ་སྐུའི་དམ་ཚིག་གསུམ་སྦྱིན་པས་ཐབས་དང་ཤེས་རབ་ཟུང་དུ་འབྲེལ་ནས་བདག་དང་གཞན་གྱི་དོན་བྱེད་པའི་དབང་དང་ལྡན་པར་གྱུར་ཅིག །དེ་ནས་བཀའ་བསྒོ་བ་ནི། དེ་རིང་ཕན་ཆད་བུ་ཁྱོད་ཀྱི། །ཕྱག་ན་རྡོ་རྗེ་ང་ཡིན་གྱི། །ང་ཡིས་ཇི་ལྟར་བསྒོ་བ་བཞིན། །ཁྱོད་ཀྱིས་དེ་ལྟར་བྱ་དགོས་
སོ། །ༀ་པྲཛྙཱོ་པཱ་ཡ་ས་མ་ཡོ་ག་ཨ་བྷི་ཥིཉྩ་ཧཱུྃ་ཨཱཿཞེས་བརྗོད། དེ་ནས་མཐའ་བརྟེན་གྱི་དབང་ནི། རྒྱུད་ལས། འཁོར་ལོ་ལ་སོགས་རིན་ཆེན་བདུན་ཐོགས་ལ། །མི་ཡི་དབང་ཕྱུག་འཁོར་ལོ་ཐོབ་པ་དང་། །སྡིག་པ་གཞོམ་ཕྱིར་དབང་ནི་བསྐུར་བར་བྱ། །ཞེས་གསུངས་པས་གནས་སྐབས་སུ་འཁོར་ལོས་སྒྱུར་བའི་རྒྱལ་སྲིད་ཐོབ་ཅིང་མཐར་ཐུག་ཁམས་གསུམ་ཆོས་ཀྱི་རྒྱལ་པོ་སངས་རྒྱས་བཅོམ་ལྡན་འདས་ཀྱི་གོ་འཕང་ཐོབ་པའི་ཕྱིར་རྒྱལ་སྲིད་སྣ་བདུན་གྱི་དབང་བསྐུར་བ་ནི། འཁོར་ལོ་ཐོགས་ལ། ལྷ་རྫས་ལས་བྱས་ལྟེ་བ་ཤིན་ཏུ་བཟླུམས། །རྩིབས་སྟོང་ལྡན་ཞིང་མུ་ཁྱུད་རབ་མཉམ་བཟང་། །དང་པོའི་སར་གནས་རྣམ་པར་རྒྱལ་གྱུར་གང་། །འཁོར་ལོ་རིན་ཆེན་དམ་པས་དབང་བསྐུར་རོ། །ༀ་ཙཀྲ་རཏྣ་ཨ་བྷི་ཥིཉྩ་མཱཾ། ཕྱོགས་ཐམས་ཅད་ལས་རྣམ་པར་རྒྱལ་བའི་ཆོས་ཀྱི་འཁོར་ལོ་ནམ་མཁའི་མཐར་གཏུགས་པ་བསྐོར་ནུས་པའི་དབང་དང་ལྡན་པར་གྱུར་ཅིག །ནོར་བུ་ཐོགས་ལ། རིན་ཆེན་ངོ་བོ་ལྷ་རྫས་བཻ་ཌཱུཪྱ། །ཀུན་ཏུ་དཔག་ཚད་ཙམ་དུ་སྣང་བྱེད་ཅིང་། །དྲི་མེད་ཉིན་མོ་ཇི་བཞིན་མཚན་དེ་བཞིན། །ནོར་བུ་རིན་ཆེན་དམ་པས་དབང་བསྐུར་རོ། །ༀ་མ་ཎི་རཏྣ་ཨ་བྷི་ཥིཉྩ་མཱཾ། ཚེ་དཔག་ཏུ་མེད་པའི་འོད་དང་ལྡན་ཞིང་ལྷ་དང་བཅས་པའི་འཇིག་རྟེན་ཐམས་ཅད་རང་གི་གཟི་བརྗིད་ཀྱིས་གནོན་པའི་དབང་དང་ལྡན་པར་གྱུར་ཅིག །བཙུན་མོ་ཐོགས་ལ། གཟུགས་མཛེས་ལྟ་ན་སྡུག་ཅིང་
ཚུལ་བཟང་མ། །པགས་པའི་མདོག་ལེགས་འཇམ་ཞིང་དྲི་མཆོག་ལྡན། །ཡིད་འོང་འདོད་དགུའི་རེག་བྱ་དང་ལྡན་པ། །བཙུན་མོ་རིན་ཆེན་དམ་པས་དབང་བསྐུར་རོ། །ༀ་སྟྲཱི་རཏྣ་ཨ་བྷི་ཥིཉྩ་མཱཾ། སེམས་ཅན་ཐམས་ཅད་ཏིང་ངེ་འཛིན་ཞི་བའི་ཚུལ་གྱིས་འཇིག་རྟེན་ལས་འདས་པའི་སྤྱོད་ཡུལ་ཡོངས་སུ་དག་ནས་རང་གཞན་གྱི་དོན་བདེ་བས་བསྒྲུབ་པ་ཡིད་བཞིན་དུ་འབྱོར་བའི་དབང་དང་ལྡན་པར་གྱུར་ཅིག །བློན་པོ་ཐོགས་ལ། གང་ཡང་རྒྱལ་བ་མུ་ཏིག་མདངས་ལྡན་པས། །གསེར་སོགས་མང་པོ་ཐུབ་ལ་ཕུལ་བ་ལྟར། །བཟོད་ལྡན་མཚུངས་པའི་ཁྱིམ་བདག་དོན་ལྡན་ཏེ། །བློན་པོ་རིན་ཆེན་དམ་པས་དབང་བསྐུར་རོ། །ༀ་པུ་རུ་ཥ་རཏྣ་ཨ་བྷི་ཥིཉྩ་མཱཾ། ལྷའི་མིག་རྣམ་པར་དག་པ་ཐོབ་ནས་འཕགས་པའི་ནོར་བདུན་དང་ལྡན་ཞིང་རང་གཞན་གྱི་དགོས་པ་མཐར་ཕྱིན་ནས་ཤེས་བྱ་ཐམས་ཅད་ལ་ཐོགས་པ་མེད་པའི་དབང་དང་ལྡན་པར་གྱུར་ཅིག །གླང་པོ་ཐོགས་ལ། ཡན་ལག་ཐམས་ཅད་ལེགས་སྐྱེས་ས་ལ་ནི། །རབ་གནས་གངས་ཆེན་རི་འདྲ་གླང་པོ་ཆེ། །རྒྱལ་པོ་ལ་འོས་མཁའ་ལ་རབ་འགྲོ་བའི། །གླང་པོ་རིན་ཆེན་དམ་པས་དབང་བསྐུར་རོ། །ༀ་ཧསྟི་རཏྣ་ཨ་བྷི་ཥིཉྩ་མཱཾ། སྟོབས་བཅུ་དང་ལྡན་ཞིང་བདུད་བཞིའི་སྟོབས་ཚར་བཅད་ནས་སེམས་ཅན་ཐམས་ཅད་ཐེག་པ་ཆེན་པོ་ལ་འཇུག་ནུས་པའི་དབང་དང་ལྡན་པར་གྱུར་ཅིག །རྟ་མཆོག་ཐོགས་ལ། ཐོ་རངས་དུས་སུ་ཕྱོགས་རྣམས་མ་ལུས་པའི། །ས་རྣམས་
བསྐོར་ནས་སླར་ཡང་ལྡོག་གྱུར་པ། །རྨ་བྱའི་མགྲིན་པའི་སྤུ་ལྟར་ཡིད་འོང་བའི། །རྟ་མཆོག་རིན་ཆེན་དམ་པས་དབང་བསྐུར་རོ། །ༀ་ཏུ་རངྒ་ཨ་ཤྭ་རཏྣ་ཨ་བྷི་ཥིཉྩ་མཱཾ། སོ་སོ་ཡང་དག་པ་རིག་པ་བཞིས་འགྲོ་བ་རྣམས་མི་གནས་པའི་མྱ་ངན་ལས་འདས་པའི་དབྱིངས་སུ་ཐོགས་པ་མེད་པར་སྐྱེལ་ནུས་པའི་དབང་དང་ལྡན་པར་གྱུར་ཅིག །དམག་དཔོན་ཐོགས་ལ། འགྲོ་དང་ལྡོག་དང་ཀུན་ནས་འོང་འགྱུར་པའི། །མ་ལུས་བདུད་དཔུང་འཇིག་པར་བྱེད་པ་སྟེ། །དཔལ་ལྡན་འབྱོར་པའི་དཔུང་དང་བཅས་པ་ཡི། །དམག་དཔོན་རིན་ཆེན་དམ་པས་དབང་བསྐུར་རོ། །ༀ་ཁདྒ་རཏྣ་ཨ་བྷི་ཥིཉྩ་མཱཾ། ཐབས་དང་ཤེས་རབ་གཉིས་སུ་མེད་པའི་དགོངས་པ་མཐར་ཕྱིན་ནས་འཇིག་ཚོགས་ལ་ལྟ་བའི་རི་བོ་མཐོན་པོ་ཉི་ཤུ་འཇོམས་ཤིང་ཡེ་ཤེས་ཕུན་སུམ་ཚོགས་པའི་དབང་དང་ལྡན་པར་གྱུར་ཅིག །དེ་ནས་རྒྱུད་ཀྱི་དགོངས་པ་བཞིན་དུ་བཀའ་ཡི་དབང་སྦྱིན་པ་ནི། རྡོ་རྗེ་སེམས་དཔའི་གནས་འདུག་ནས། །ཐམས་ཅད་བྱས་ཤིང་ཀུན་ཐོས་ཀྱང་། །འགྲུབ་འགྱུར་ཉེས་པས་མི་གོས་ན། །སྙིང་རྗེ་ལྡན་པས་སྨོས་ཅི་དགོས། །ༀ་སརྦ་ཏ་ཐཱ་ག་ཏ་ཨཱ་ཛྙཱ་ཏ་ཡ་དཱ་སྱ་མི་གྲྀ་ཧྞ་བཛྲ་སུ་སིདྡྷ་ཡེ། ༀ་བཛྲ་ཏིཥྛ་ཧཱུྃ། ཞེས་བརྗོད། དེ་ནས་རྗེས་སུ་གདམས་པ་ནི་འདི་ལ་གསན་པས་ཁྱབ་པར་གདའ། ཚེ་འདིའི་བདེ་བ་མ་ལུས་དང་། །འཇིག་རྟེན་ཕྱི་མའི་བདེ་མཆོག་དང་། །སངས་རྒྱས་ཉིད་ཀྱང་འཐོབ་འགྱུར་ན། །ལྷ་མིའི་བདེ་བ་སྨོས་ཅི་དགོས། །སངས་རྒྱས་ཀུན་དང་
བླ་མ་མཉམ། །རྡོ་རྗེ་སློབ་དཔོན་བརྙས་ན་ནི། །རྟག་ཏུ་སྡུག་བསྔལ་ཐོབ་འགྱུར་བས། །སློབ་དཔོན་ལ་ནི་བརྙས་མི་བྱ། །རྡོ་རྗེ་སྤུན་དང་སྲིང་མོ་དང་། །རྡོ་རྗེ་མ་རྣམས་ཉིད་ལ་ནི། །རྣལ་འབྱོར་ཅན་གྱིས་བརྙས་མི་བྱ། །རྟག་ཏུ་འཁོན་དང་གཅུགས་མི་བྱ། །དཀོན་མཆོག་གསུམ་ལ་གནོད་བྱེད་ལ། །བཟོད་པ་བསྒོམ་པར་མི་བྱ་སྟེ། །བླ་མ་དམོད་བརྩོན་མ་རུངས་དང་། །དམ་ཚིག་ལས་ནི་འདའ་བ་དང་། །དེ་སོགས་བྱེད་པ་ཚར་གཅོད་ན། །འགྲུབ་འགྱུར་ཞེས་ནི་ཀུན་རིག་གསུང་། །སེམས་ཅན་ཀུན་ལ་སྙིང་བརྩེས་ཆགས། །བསྒྲུབ་ན་མྱུར་དུ་འགྲུབ་པར་འགྱུར། །ཞེས་བརྗོད། དེ་ལྟར་བཅོམ་ལྡན་འདས་ཐམས་ཅད་རིག་པ་རྣམ་པར་སྣང་མཛད་ཀྱི་དཀྱིལ་འཁོར་དུ་དབང་བསྐུར་བ་ལེགས་པར་ཐོབ་པ་ཡིན་པས་དེ་དག་གི་སྐབས་སུ་བབ་པའི་དམ་ཚིག་རྣམས་ཚུལ་བཞིན་དུ་བསྲུང་སྙམ་པས་འདིའི་རྗེས་ཟློས། གཙོ་བོས་ཇི་ལྟར་སོགས། དབང་བསྐུར་རྫོགས་པར་ཐོབ་པའི་གཏང་རག་ཏུ་མཎྜལ། ས་གཞི་སོགས། ལུས་ལོངས་སྤྱོད་དགེ་རྩ་དང་བཅས་པ་འབུལ་སྙམ་པས་འདིའི་རྗེས་ཟློས། དེང་ནས་བརྩམས་ཏེ་སོགས། དེས་ཀུན་རིག་རྣམ་སྣང་གི་དཀྱིལ་འཁོར་དུ་དབང་ལེགས་པར་ཐོབ་པ་ཡིན་པས་དེ་ཡི་སྒོ་ནས་རང་གཞན་གྱི་དོན་རྒྱ་ཆེན་པོ་སྒྲུབས་མཛོད། བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱས་ཏེ། །སྐྱེ་རྒ་ན་འཆིའི་རྦ་རླབས་འཁྲུགས་པ་ཡི། །
སྲིད་པའི་མཚོ་ལས་འགྲོ་བ་བསྒྲོལ་བར་ཤོག །ཅེས་བརྗོད། རྗེས་ཆོག་གཞུང་ལྟར་བྱའོ། །ཅེས་པ་འདི་ནི་སི་ཏུ་པདྨའི་མིང་ཅན་གྱིས་བསྒྲིགས་པ་སརྦ་དཱ་ཀ་ལྱཱ་ཎཾ་བྷ་ཝནྟུ། དགེའོ། །དགེའོ། །དགེའོ། །