འཕགས་མ་སྒྲོལ་མ་བཀྲ་ཤིས་དོན་གྲུབ་མའི་སྒྲུབ་ཐབས་རྗེས་གནང་།
འཕགས་མ་སྒྲོལ་མ་བཀྲ་ཤིས་དོན་གྲུབ་མའི་སྒྲུབ་ཐབས་རྗེས་གནང་དང་བཅས་པ་བཞུགས་སོ། །
དཔལ་ལྡན་བླ་མ་དང་དབྱེར་མེད་པའི་འཕགས་མ་སྒྲོལ་མ་བཀྲ་ཤིས་དོན་གྲུབ་མའི་ཞབས་ལ་ཕྱག་འཚལ་ལོ། །འདི་ཉིད་ཀྱི་ཆོ་གའི་རིམ་པ་ལ། དང་པོ་ནི། བླ་མ་མཚན་ཉིད་དང་ལྡན་པ་ལས་འདིའི་རྗེས་གནང་ཞུས་ནས། རབ་བཞི་ཡི་བདུན་ཕན་ལ་མཐུན་རྐྱེན་ཚོགས་པར་བྱས་ཏེ། བརྒྱད་ནས་སྒྲུབ་པ་དངོས་ལ་འཇུག་པར་བྱའོ། །དེ་ཡང་རང་དོན་བདག་བསྐྱེད་ཀྱི་སྒྲུབ་པ། མདུན་བསྐྱེད་དང་མཆོད་བསྟོད་བུམ་སྒྲུབ་གཟུངས་སྔགས་བཟླ་བ། གཞན་དོན་རྗེས་གནང་སྦྱིན་པ། ཟུང་འཇུག་གི་རྣལ་འབྱོར་དང་རྗེས་ཀྱི་ཆོ་གའོ། །ཐོག་མར་དཀྱིལ་འཁོར་གཏོར་མཆོད་ཀྱི་རིམ་པ་ནི། སྟེགས་ཀྱི་ཁར་མཎྜལ་རྡུལ་ཚོན་ནམ་རས་བྲིས་ཀྱི་པདྨ་སེར་པོ་འདབ་མ་བརྒྱད་པ། ལྟེ་བ་ལ་ཏཱྃ་ཡིག་
སེར་པོ་བྲི། ཡི་གེ་བཅུ་གཅིག་བརྗོད་བཞིན་པས་དབུས་སུ་ཚོམ་བུ་སེར་པོ་གཅིག་བཀོད། དེའི་སྟེང་དུ་མན་ཛིའི་ཁར་འཕགས་མོའི་སྐུ་བཞུགས་པ། མདུན་དུ་དཀར་གསུམ་མངར་གསུམ་གྱི་གཏོར་མ་ཟླུམ་པོ་དཀར་རྒྱན་ཅན་དང་། གཡས་སུ་རྣམ་རྒྱལ་བུམ་པ་དྲི་བཟང་ཆུས་སུམ་གཉིས་བཀང་བ་ཁ་རྒྱན་དུང་ཆོས་གཟུངས་ཐག་བཅས་པ། གཡོན་དུ་ལས་བུམ། སྟེགས་དམའ་བར་སྔོན་འགྲོ་གཏོར་མ་ཟླུམ་པོ་ཞིག་ཀྱང་བཤམས། སྒྲུབ་པོ་ཤ་ཆང་སྒོག་བཙོང་སོགས་སྤངས་ཏེ་ཁྲུས་དང་གཙང་སྦྲ་ལྡན་ཞིང་། སྟན་བདེ་བ་ལ་ཁ་ནུབ་ཏུ་མ་ཡིན་པར་འཁོད། རང་གི་མདུན་དུ་མཆོད་པ་དང་རྡོར་དྲིལ་སོགས་བཞག་གོ། །གཉིས་པ་ནི། བདག་བསྐྱེད་ཀྱི་རིམ་པ་བསྒྲུབ་པ་ལ། ལྷའི་རྣལ་འབྱོར་དང་ཐུན་མཚམས་ཀྱི་རྣལ་འབྱོར་རོ། །དེ་
ཡང་ཐོ་རངས་བྱ་རོག་སྐད་མ་གྲག་གོང་ནས་ཁྲུས་བྱས། ལུས་གནད་བསྲངས་ཏེ་འདི་སྐད་དུ་བསམ་མོ། །བདག་གིས་སེམས་ཅན་ཐམས་ཅད་ཀྱི་དོན་དུ་སངས་རྒྱས་བསྒྲུབ་པར་བྱ་བ་དང་། ཁྱད་པར་རྩ་བའི་བླ་མའི་སྐུ་ཚེ་མཛད་ཕྲིན་རྒྱས་པའི་ཕྱིར་དུ་འཕགས་མ་འདི་ཉིད་བསྒྲུབ་པ་ལ་འཇུག་གོ་སྙམ་པའི་ངང་དུ། སྔོན་འགྲོ་གཏོར་མ་ལ་ཆབ་བྲན། ༀ་བཛྲ་ཀྲོ་དྷ་ཧྱ་གྲཱྀ་ཝ་ཧུ་ལུ་ཧཱུྃ་ཕཊ། ཀྱིས་བསངས། ༀ་སྭ་བྷཱ་ཝ་ཤུ་དྡྷཿསོགས། ཞེས་སྟོང་པར་སྦྱངས། སྟོང་པ་ཉིད་གྱུར་སྟོང་པའི་ངང་། །ༀ་ལས་རིན་ཆེན་སྣོད་ཡངས་སུ། །ༀ་ཡིག་ཞུ་བ་ལས་བྱུང་བའི། །གཏོར་མ་བདུད་རྩིའི་རྒྱ་མཚོར་གྱུར། །ༀ་ཨཱཿཧཱུྃ། ལན་གསུམ་གྱིས་བྱིན་གྱིས་བརླབ། ༀ། གནས་བདག་ཡུལ་བདག་གྲོང་བདག་དང་། །གཉུག་མར་གནས་པ་ལ་སོགས་པའི། །གཏོར་མགྲོན་དུ་འོས་འདིར་མཆིས་གྱུར། །ཊཱཀྐི་ཧཱུྃ་ཛཿནམ་སརྦ་ཏ་ཐཱ་ཏེ་བྷྱོ་བི་ཤྭ་མུ་ཁེ་བྷྱ་སརྦ་ཐ་ཁཾ་ཨུཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་གྲྀཧྣེ་དཾ་བ་ལྱ་དི་སྭ་ཧཱ། ལན་གསུམ་དང་། ༀ་ཨ་ཀཱ་རོ་སོགས་ལན་གསུམ་བརྗོད། གང་ཡང་འདིར་གནས་ལྷ་དང་ཀླུ། །གནོད་སྦྱིན་སྲིན་པོའམ་གཞན་དག་ལ། །སྔགས་སྤྱོད་དོན་དུ་གཏོར་མ་འདི། །འབུལ་གྱིས་ཡང་དག་བཞེས་སུ་གསོལ། །མཆོད་སྦྱིན་གཏོར་མ་འདི་བཞེས་ལ། །ཞེས་པ་ནས། ཡིད་ལ་འདོད་པ་ཀུན་འགྲུབ་མཛོད། །ཅེས་པའི་བར་དང་། ༀ་སུམ་བྷ་ནི་སོགས་བརྗོད་དེ་གཏོར་མ་དོར། ཡི་
དམ་གྱི་ང་རྒྱལ་བརྟན་པོས་རྡོ་རྗེའི་ཟེར་གྱིས་བགེགས་བསྐྲད་དོ། །སྲུང་འཁོར་ནི། ཏཱྃ་ཡིག་འོད་ཟེར་ལས་བྱུང་བའི། །སྣ་ཚོགས་རྡོ་རྗེའི་ས་གཞི་དང་། །ར་བ་དྲ་བ་གུར་བླ་བྲེ། །ཡེ་ཤེས་མེ་རིས་སྲུང་འཁོར་གྱུར། །ༀ་བཛྲ་རཀྵ་རཀྵ་ཧཱུྃ་ཧཱུྃ་ཧཱུྃ་སྭཱ་ཧཱ། མཆོད་པ་བྱིན་རླབས་ནི། བསངས་སྦྱངས། སྟོང་པའི་ངང་ལས་ༀ་ཡིག་ལས། །རིན་ཆེན་སྣོད་ནི་རྒྱ་ཆེ་བ། །ཆོས་ཀྱི་དབྱིངས་དང་མཉམ་པའི་ནང་། །བྷྲཱུྃ་ལས་ཁམས་གསུམ་གྱི་རྫས་མཆོག །ཁྱད་པར་འཕགས་ཤིང་མཆོག་གྱུར་པའི། །མཆོད་ཡོན་ཞབས་བསིལ་མེ་ཏོག་སྤོས། །སྣང་གསལ་དྲི་ཆབ་ཞལ་ཟས་དང་། །རོལ་མོ་ལ་སོགས་མཆོད་པའི་རྫས། །དྭངས་ཤིང་ཐོགས་མེད་ཀུན་བཟང་གི། །རྣམ་ཐར་མཆོད་སྤྲིན་ལས་ལྷག་པ། །ནམ་མཁའི་མཐའ་ཁྱབ་ཇི་སྲིད་དུ། །རྒྱུན་མི་ཆད་པའི་རང་བཞིན་གྱུར། ༀ་བཛྲ་ཨརྒྷཾ་ཨཱཿཧཱུྃ། དེ་བཞིན་དུ། པཱ་དྱཾ་སོགས། ཤབྡའི་བར་བརྗོད། ཐལ་མོ་ཁོང་སྟོང་སྦྱར་བ་ནམ་མཁའི་མཛོད་ཀྱི་ཕྱག་རྒྱས། ༀ་སརྦ་བིད་པཱུ་ར་པཱུ་ཱུར་སུ་ར་སུ་ར་ཨ་ཝརྟ་ཨ་ཝརྟ་ཡ་ཧོཿབཛྲ་སྥ་ར་ཎ་ཁཾ། ཞེས་མཆོད་པ་བྱིན་གྱིས་བརླབས། སྐྱབས་འགྲོ་ནི། སངས་རྒྱས་མ་ལུས་ཀུན་གྱི་དངོས། །བཅོམ་ལྡན་འདས་མའི་ཞབས་པད་ལ། །བདག་དང་མཁའ་མཉམ་འགྲོ་ཚོགས་ཀུན། །བྱང་ཆུབ་བར་དུ་སྐྱབས་སུ་མཆི། དེ་བཞིན་དུ་དམ་ཆོས་དང་འཕགས་ཚོགས་
བཅས་རིགས་འགྲེ་ལ་ལན་གསུམ་མམ་ལྔ་བདུན་སོགས་བརྗོད། སེམས་བསྐྱེད་ནི། འགྲོ་ཀུན་སྡུག་བསྔལ་ལས་བསྒྲལ་ཏེ། །བདེ་བ་མཆོག་ལ་རབ་བཀོད་ཅིང་། །བླ་མེད་བྱང་ཆུབ་ལ་བཞག་ཕྱིར། །སྒོ་གསུམ་དགེ་ལ་བཀོལ་བར་བྱ། །ༀ་བོདྷི་ཙིཏྟ་ཨུ་པཱ་ད་ཡ་ཨ་ཧཾ། ཞེས་སེམས་བསྐྱེད་ནས། རང་ཉིད་སྐད་ཅིག་པད་ཟླའི་གདན། །འཕགས་མ་སྒྲོལ་མར་གསལ་བ་ཡི། །ཐུགས་ཀར་ཟླ་དཀྱིལ་དབུས་རང་སེམས། །ཏཱྃ་ཡིག་སེར་པོ་འོད་འཕྲོ་བས། །ལུས་གང་སྡིག་སྒྲིབ་ཐམས་ཅད་སྦྱངས། །འོད་ཟེར་ཕྱིར་འཕྲོས་པོ་ཊ་ལའི། །གནས་ནས་བཅོམ་ལྡན་སྒྲོལ་མ་ལ། །སངས་རྒྱས་བྱང་སེམས་དཔག་མེད་ཀྱིས། །བསྐོར་བ་ནམ་མཁར་སྤྱན་དྲངས་བཞུགས། །ༀ་ཏཱ་རེ་སརྦ་བུདྡྷ་བོདྷི་ས་ཏྭ་ས་པ་རི་ཝཱ་ར་ཨེ་ཧྱེ་ཧི་བཛྲ་ས་མ་ཛཿས་པ་རི་ཝཱ་ར་ཨརྒྷཾ་སོགས། དཀོན་མཆོག་གསུམ་ལ་བདག་སྐྱབས་མཆི། །སོགས། ཚོགས་ཞིང་སྙིང་ཁར་ཐིམ་པར་གྱུར། སེམས་ཅན་ཐམས་ཅད་བདེ་བ་སོགས་བརྗོད། ༀ་སྭ་བྷཱ་ཝ་སོགས། སྟོང་པའི་ངང་ལས་སྣ་ཚོགས་པདྨ་དང་། །ཟླ་བའི་དཀྱིལ་འཁོར་སྟེང་དུ་རང་སེམས་ཉིད། །ཏཱཾ་ཡིག་སེར་བོའི་འོད་ཀྱིས་སེམས་ཅན་རྣམས། །འཕགས་མ་སྒྲོལ་མའི་གོ་འཕང་ཉིད་ལ་བཀོད། །སངས་རྒྱས་ཐམས་ཅད་རབ་ཏུ་མཉེས་བྱས་ཏེ། །འོད་ཟེར་ཚུར་འདུས་ཡོངས་སུ་གྱུར་པ་ལས། །རང་ཉིད་བཅོམ་ལྡན་འདས་མ་སྒྲོལ་མ་
ནི། །ཞལ་བཞི་སྐུ་དང་རྩ་ཞལ་གསེར་གྱི་མདོག །གཡས་དཀར་གཡོན་དམར་རྒྱབ་ཞལ་སྔོན་པོ་རྣམས། །ཡིད་འོང་ཞལ་འཛུམ་མདངས་ལྡན་ཕྱག་བརྒྱད་ཅན། །གཡས་ཀྱི་དང་པོས་རྒྱལ་མཚན་གཉིས་པ་ཡིས། །འཁོར་ལོ་གསུམ་པས་པདྨ་བཞི་པ་དུང་། །གཡོན་གྱི་དང་པོས་བུམ་པ་གཉིས་པ་ཡིས། །དཔལ་གྱི་བེའུ་དང་ནི་གསུམ་པས་གདུགས། །བཞི་པ་གསེར་ཉ་འཛིན་ཅིང་བཀྲ་ཤིས་སྩོལ། །ལྷ་རྫས་དར་གྱི་སྟོད་གཡོགས་སྨད་གཡོགས་མཛེས། །རིན་ཆེན་སྣ་ཚོགས་དུ་མས་དབུ་རྒྱན་དང་། །སྙན་རྒྱན་མགུལ་རྒྱན་ཕྱག་གདུབ་ཞབས་གདུབ་དང་། །དཔུང་རྒྱན་དོ་ཤལ་སོགས་ཀྱིས་རྒྱན་སྤྲས་ལ། །ཞབས་གཉིས་རོལ་པའི་སྟབས་བཞུགས་དཔྲལ་བར་ༀ། །མགྲིན་པརཨཱཿདང་ཐུགས་ཀར་ཧཱུྃ་དེ་ལས། །འོད་ཟེར་འཕྲོས་པས་བསྒོམ་པ་དང་འདྲ་བའི། །ཡེ་ཤེས་སྤྱན་དྲངས་བཛྲ་ས་མ་ཛཿམ་ལུས་སེམས་ཅན་སོགས། པདྨ་ཀ་མ་ལ་ཡ་སྟྭཾ། མཆོད་བསྟོད་བརྗོད། ཛཿཧཱུྃ་བྃ་ཧོ་སླར་ཡང་ཐུགས་ཀ་ཡི། །ཏཱྃ་ལས་འོད་འཕྲོས་རིགས་ལྔ་འཁོར་དང་བཅས། །ནམ་མཁར་སྤྱན་དྲངས་བཛྲ་ས་མཱ་ཛཿམཆོད་བསྟོད་བྱ། ༀ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཾ། གསོལ་བཏབ་དབང་བསྐུར་ཆུ་རྒྱུན་གྱིས་སྐུ་གང་། །དྲི་མ་དག་ཅིང་ཆུ་ལྷག་
གྱེན་འཁྱིལ་བས། །འོད་དཔག་མེད་མགོན་མཆོག་གིས་དབུ་བརྒྱན་གྱུར། །དེའི་ཐུགས་ཀར་ཟླ་བའི་དཀྱིལ་འཁོར་སྟེང་། །ཏཱྃ་ཡིག་སེར་པོ་འོད་ཟེར་ཅན་གྱི་མཐར། །ༀ་ཏཱ་རེ་ཏུཏྟ་རེ་ཏུ་རེ་ཏྭྃ་སྭཱ་ཧཱ། ཞེས་པའི་སྔགས་ཕྲེང་ཁ་དོག་གསེར་བཙོ་མ། །ལྟ་བུས་བསྐོར་བ་དེ་ལས་འོད་ཟེར་འཕྲོས། །མི་མཐུན་ཉེར་འཚེའི་ཚོགས་རྣམས་མ་ལུས་ཞི། །བཀྲ་ཤིས་འདོད་དོན་ཐམས་ཅད་ལྷུན་གྱིས་འགྲུབ། །འཆི་མེད་ཚེ་དང་མཆོག་ཐུན་དངོས་གྲུབ་ནི། །བདེ་བླག་ཉིད་དུ་འགྲུབ་པའི་སྐལ་ལྡན་གྱུར། །བསྙེན་པ་ནི། ༀ་ཏཱ་རེ་ཏུཏྟ་རེ་ཏུ་རེ་ཏཱྃ་སྭཱ་ཧཱ། ཞེས་ཅི་འགྲུབ་བཟླས། དེ་ནས་ཐུན་བསྡུ་བའི་རྫོགས་རིམ་བསྒོམ་ན་འོག་ཏུ་གསལ། གསུམ་པ་མདུན་བསྐྱེད་ནི། བསངས་སྦྱངས་གོང་བཞིན་དང་། སྟོང་ཆེན་ངང་ལས་སྲུང་འཁོར་དབུས། །གཞལ་མེད་ཁང་པ་མཚན་རྫོགས་ཀྱི། །དབུས་སུ་སྣ་ཚོགས་པདྨ་དང་། །ཟླ་བའི་དཀྱིལ་འཁོར་ཉ་གང་སྟེང་། །ཏཱྃ་ཡིག་སེར་པོའི་སོགས་ནས། བཛྲ་ས་མ་ཛཿབར་གོང་ལྟར་བརྗོད། མ་ལུས་སེམས་ཅན་ཀུན་གྱི་མགོན་གྱུར་ཅིང་། སོགས། པདྨ་ཀ་མ་ལ་ཡ་སྟྭཾ། ཨརྒྷཾ་སོགས། ༀ་ཏཱ་རེ་སརྦ་བུདྡྷ་བོདྷི་ས་ཏྭ་ས་པ་རི་ཝཱ་ར་བཛྲ་ཨཾ་ཀུ་ཤ་ཛཿབཛྲ་པཱ་ཤ་ཧཱུྃ། བཛྲ་སྥོ་ཊ་བྃ། བཛྲ་ཨཱ་ཝེ་ཤ་ཡ་ཨ་ཨཱཿདབང་ལྷ་སྤྱན་དྲངས་དབང་བསྐུར་བས། །འོད་དཔག་མེད་པས་དབུ་བརྒྱན་གྱུར། །མཆོད་པ་གོང་
བཞིན་བྱིན་གྱིས་བརླབས་ནས། ཕྱི་ནང་གསང་བ་དེ་ཁོ་ནའི། །མཆོད་ཡོན་ཞབས་བསིལ་མེ་ཏོག་སྤོས། །སྣང་གསལ་དྲི་ཆབ་ཞལ་ཟས་དང་། །རོལ་མོའི་མཆོད་པ་རྒྱ་མཚོའི་སྤྲིན། ཆོས་དབྱིངས་ཀུན་ཏུ་རྒྱས་འགེངས་པས། །བླ་མ་བཅོམ་ལྡན་འདས་མ་མཆོད། །ཨཱོཾ་གུ་རུ་ཨཱཪྱ་ཏཱ་རེ་ཨརྒྷཾ། པཱ་དྱཾ། པུཥྤེ། དྷཱུ་པེ། ཨ་ལོ་ཀེ། གནྡྷེ། ནཻ་ཝི་དྱ། ཤབྡ་པྲ་ཏིཙྪ་པཱུ་ཛ་མེ་གྷ་ས་མུ་དྲ་སྥ་ར་ན་ས་མ་ཡེ་ཨཱཿཧཱུྃ། ཞིང་ཁམས་རྣམ་དག་རྡོ་རྗེའི་ས་གཞི་ལ། །རྡོ་རྗེའི་རི་རབ་ལ་སོགས་མཆོད་པའི་སྤྲིན། །རབ་འབྱམས་བསམ་ཡས་རྡོ་རྗེའི་རྒྱན་ཕྲེང་འབར། རྡོ་རྗེའི་མཎྜལ་བླ་མེད་བཀོད་པ་འདི། །རྡོ་རྗེ་སྒྲོལ་མ་སངས་རྒྱས་ཀུན་ཡུམ་ལ། །མཆོག་ཏུ་དད་པས་ཀུན་ཏུ་བདག་འབུལ་ལོ། །ༀ་སརྦ་ཏ་ཐཱ་ག་ཏ་ཨཱཪྱ་ཏཱ་རེ་ས་པ་རི་ཝཱ་ར་མཎྜལ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། བསྟོད་པ་དང་འདོད་གསོལ་སྦྲགས་མ་ནི། འཕགས་མ་སྒྲོལ་མ་དབང་ཕྱུག་མ། །ཆོས་ཉིད་དབྱིངས་ལས་སྐུ་བྱུང་ལ། །སྲིད་གསུམ་འགྲོ་ལ་ཐུགས་རྗེས་བཟུང་། མ་ལྟར་བྱམས་མཛད་ལྷ་མོ་ཁྱོད། །ཚེ་རབས་གོང་ནས་བདག་གི་ལྷ། །བདག་ཉིད་སྒོ་གསུམ་དང་བ་ཡིས། །ལྷ་མོ་ཁྱོད་ལ་ཕྱག་འཚལ་ལོ། །བཅོམ་ལྡན་འདས་མ་ཐུགས་རྗེ་ཅན། །གསེར་གྱི་མདངས་ཅན་ཡིད་འོང་
མས། །ཉོན་མོངས་གདུང་བས་ཉམ་ཐག་པའི། །མི་བཟད་ཚ་གདུང་བསལ་དུ་གསོལ། །པདྨའི་ཞབས་གདན་དཔའ་གཅིག་མོ། །ཉི་མ་འབུམ་གྱི་གཟི་བརྗིད་ཅན། །མ་རིག་མུན་པར་རབ་འཐུམས་པའི། །མི་ཤེས་དྲྭ་བ་བཅད་དུ་གསོལ། །དཔལ་ལྡན་མ་གཅིག་ལྷ་ཡི་ལྷ། །རིན་ཆེན་དུ་མའི་དོ་ཤལ་ཅན། །མཚན་དང་དཔེ་བྱད་དཔལ་འབར་མ། །འཕགས་མ་སྒྲོལ་མ་ཁྱོད་ལ་འདུད། །བདག་ནི་ཐོག་མེད་དུས་རིང་ནས། །ལས་ཀྱི་རླུང་གིས་རབ་བདས་ཤིང་། །ངན་འགྲོ་མུ་མཐའ་མེད་འཁྱམས་ཏེ། །བློ་མིག་མུན་པས་བསྒྲིབས་ལགས་ན། །ད་ནི་འཕགས་མ་ཐུགས་རྗེ་ཅན། །བདག་ཅག་རྣམས་ཀྱི་མིག་མཛོད་ལ། །ཡང་ཡེ་དེ་འདྲའི་སྡུག་བསྔལ་ལས། །སྐྱོབ་པར་མཛོད་ཅིག་སྐྱབས་གཅིག་མོ། །དེང་ནས་བརྩམས་ཏེ་དུས་ཀུན་ཏུ། །གང་དུ་སྐྱེ་དང་སྐྱེ་བ་དེར། །མ་གཅིག་ཁྱེད་དང་མཇལ་བར་ཤོག །ཅེས་བྱིན་རླབས་ཆེ་བའི་ཁྱད་དུ་འབྲོམ་གྱིས་གསུངས་བ་དེ་ལྟར་བརྗོད་དོ། །དེ་ནས་གཏོར་འབུལ་ནི། བསངས་སྤྱངས་གོང་བཞིན། སྟོང་པའི་ངང་ལས་ༀ་ཡིག་ལས། །རིན་ཆེན་སྣོད་དུ་ༀ་ཨཱཿཧཱུྃ། འོད་ཞུ་ལྷ་རྫས་ལས་གྲུབ་པའི། །གཏོར་མ་ཕུན་སུམ་ཚོགས་པར་གྱུར། །ༀ་ཨཱཿཧཱུྃ། མདུན་གྱི་རྗེ་བཙུན་སྒྲོལ་མ་ཡི། །ལྷ་ཚོགས་དགྱེས་བཞིན་བཞུགས་པ་རྣམས། །ལྗགས་ཀྱི་འོད་ཟེར་སྦུ་གུ་ཡིས། །
གཏོར་མ་གསོལ་བས་དགྱེས་བསྐྱེད་གྱུར། །སྙིང་པོའི་མཐར། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་ལན་གསུམ། བཅོམ་ལྡན་འཁོར་དང་བཅས་རྣམས་ཀྱིས། །མཆོད་སྦྱིན་གཏོར་མ་འདི་བཞེས་ལ། །ཞེས་པ་ནས། ཡིད་ལ་འདོད་པ་ཀུན་འགྲུབ་མཛོད། །ཅེས་པའི་བར་བརྗོད། བསྙེན་པ་ནི། མདུན་བསྐྱེད་ཐུགས་ཀའི་སྔགས་ཕྲེང་འོད། །སྣོད་བཅུད་ལ་ཕོག་རང་གཞན་གྱི། །ཚེ་བསོད་དཔལ་འབྱོར་རྒྱས་པ་དང་། །བཀྲ་ཤིས་ཕྲིན་ལས་རབ་རྒྱས་གྱུར། །ཞེས་སྙིང་པོའི་རིགས་བཟླ། བཞི་པ་བུམ་བསྐྱེད་ནི། བུམ་པ་དུང་ཆོས་གཟུངས་ཐག་དང་བཅས་བཤམས། བསང་སྦྱངས་དང་། སྟོང་ལས་བུམ་བྱུང་ལྟོ་བ་ཡངས། །མཆུ་འཕྱང་མགྲིན་རིང་མཚན་ཉིད་རྫོགས། །དེས་ཡི་དབུས་སུ་བྃ་ཡིག་ལས། །པདྨ་ཨ་ལས་ཟླ་བ་དང་། །ཏཱཾ་ཡིག་སེར་པོ་ལས་འོད་འཕྲོས། །ཞེས་པ་ནས། འོད་དཔག་མེད་པས་དབུ་བརྒྱན་གྱུར། །ཞེས་བའི་བར་མདུན་བསྐྱེད་ལྟར་ལ། མཆོད་པ་བསྡུ་ན་སྔགས་མཆོད་ཙམ་དང་། སྤྲོ་ན་གོང་བཞིན་ལ། བསྟོད་པ་ནི། ཞིང་ཁམས་ཐམས་ཅད་ཡོངས་སུ་དག་པ་ལ། །རིན་ཆེན་མེ་ཏོག་མང་པོ་གཅལ་དུ་བཀྲམ། །དུས་གསུམ་སངས་རྒྱས་ཐམས་ཅད་སྐྱེད་པའི་ཡུམ། །ཡུམ་གྱུར་སྒྲོལ་མ་ཁྱོད་ལ་ཕྱག་འཚལ་བསྟོད། །དབང་དང་འབྲེལ་བའི་ལས་བུམ་བསྐྱེད་པར་སྤྲོ་ན། ལས་བུམ་དབུས་སུ་པད་ཉིའི་སྟེང་། །སྐད་ཅིག་ཁྲོ་
རྒྱལ་རྟ་མགྲིན་སྐུ། །ཐུགས་ཀར་ཧྲཱིཿལ་སྔགས་ཕྲེང་བསྐོར། །དེ་ལས་འོད་འཕྲོས་གནོད་བྱེད་བཅོམ། །སླར་ཡང་བདུད་རྩིའི་རྒྱུན་བབས་པས། །བུམ་ཆུ་ནུས་མཐུ་ཕུན་ཚོགས་གྱུར། །རྟ་མགྲིན་གྱི་སྙིང་པོ་ཅི་རིགས་བཟླའོ། །ཁྲོ་བོའི་རྒྱལ་པོ་རྟ་མགྲིན་གྱིས། །བགེགས་དང་བར་ཆད་བཟློག་པར་མཛོད། །ཅེས་བརྗོད་དོ། །ལྔ་པ་དབང་ལེན་པ་སྤྲོ་ན། ཁྲུས་བྱས་མཎྜལ་ཕུལ་ལ། བླ་མས། དེའང་སེམས་ཅན་ཐམས་ཅད་ཀྱི་དོན་དུ་རྣམ་མཁྱེན་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། གནས་སྐབས་སུ་བགེགས་དང་བར་ཆད་ཞི་ཞིང་མཆོག་ཐུན་དངོས་གྲུབ་ཐོབ་པའི་ཆེད་དུ་རྗེ་བཙུན་མའི་དབང་བསྐུར་ཟབ་མོ་ཞུ་སྙམ་དུ་ཐོག་མར་བླ་མ་ལ་གསོལ་བ་འདེབས་པ་འདིའི་རྗེས་ཟློས་མཛོད་ཅིག །གང་གི་དྲིན་གྱིས་བདེ་ཆེན་ཉིད། །ཅེས་སོགས་ལན་གསུམ་དང་། གཉིས་པ་འཕགས་མ་ལ་གསོལ་འདེབས་འདིའི་རྗེས་ཟློས་མཛོད། ལྷ་དང་ལྷ་མིན་ཅོད་པན་གྱིས། །ཞེས་སོགས་ལན་གསུམ། གསུམ་པ་ཐུན་མོང་དུ་གསོལ་འདེབས་འདིའི་རྗེས་ཟློས་མཛོད། དགའ་ཆེན་ཁྱོད་བདག་སྟོན་པ་སྟེ། །སོགས་ལན་གསུམ་བརྗོད། དེ་ནས་བླ་མས། རྟོག་པ་ཐམས་ཅད་ལེགས་པར་བསྡུས་ནས་ནི། །ཤིན་ཏུ་བསམ་པ་བཟང་པོ་ལྡན་པས་ཉོན། །བརྗེད་ངས་བློ་ལ་འོད་དཔག་མེད་སོགས་ཀྱིས། །བདེ་བར་གཤེགས་པ་རྣམས་ཀྱིས་བྱིན་མི་རློབས། །
ཞེས་པའི་དོན་བཞིན་མ་ཡེངས་པར་ཉོན་ཅིག །ཚངས་དབང་ཁྱབ་འཇུག་ཉི་ཟླ་དང་། །དྲག་པོ་ཕྱོགས་སྐྱོང་འདོད་ལྷས་ཀྱང་། །བ་སྤུའི་ཁུང་བུའང་གཅོད་མི་ནུས། །འཆི་བདག་ལས་རྒྱལ་སྒྲོལ་མ་བཞིན། །སྐྲ་དཀར་གཉེར་མ་སྐལ་ངན་ཆེ། །དབུལ་བ་ལ་སོགས་ཉམས་པར་བྱེད། །སེངྒེ་ལ་སོགས་འཇིགས་ཆེན་བརྒྱད། །སྡུག་བསྔལ་ཚོགས་རྣམས་སེལ་བར་བྱེད། །སློང་བ་མེད་པར་བཟའ་བཏུང་གོས། །ཁང་བཟང་རིན་ཆེན་སྣ་ཚོགས་འདུ། །རལ་གྲི་མིག་སྨན་རྐང་མགྱོགས་དང་། །བུམ་པ་བཟང་པོ་ལ་སོགས་གྲུབ། །སྙན་ངག་དང་ནི་རྩོད་པ་མཁས། །བློ་རྣོ་ཤེས་རབ་དྲི་མ་མེད། །གཞན་ཡང་ཅི་འདོད་དངོས་གྲུབ་ཐོབ། །ཅེས་སོགས་གསུངས་པས། སྒྲོལ་མ་བཀྲ་ཤིས་དོན་འགྲུབ་འདི་ཉིད་ངོ་བོ་སྒྲོལ་མ་དཀར་མོ་དང་ཐ་དད་མེད་ཕྱིར་འཆི་བ་བསླུ་བ་དང་། །མཆོག་ཐུན་དངོས་གྲུབ་མྱུར་དུ་ཐོབ་པའི་བསླུ་མེད་ཀྱིས་སྐྱབས་གནས་དམ་པ་འདི་ཉིད། མདུན་གྱི་ནམ་མཁར་སངས་རྒྱས་བྱང་སེམས་དཔག་ཏུ་མེད་པས་བསྐོར་ནས་བཞུགས་པའི་སྤྱན་སྔར་བདུན་རྣམ་དག་འདིའི་རྗེས་ཟློས་མཛོད། དཀོན་མཆོག་གསུམ་ལ་བདག་སྐྱབས་མཆི། །ཞེས་སོགས་ལན་གསུམ་བརྗོད། དེ་ནས་བསངས་སྦྱངས། སྟོང་པའི་ངང་ལས་པཾ་ཡིག་ལས། །པདྨ་ཨ་ལས་ཟླ་བའི་སྟེང་། །
ཏཱཾ་ཡིག་སེར་པོའི་འོད་ཟེར་གྱིས། །སེམས་ཅན་དོན་བྱས་སངས་རྒྱས་མཆོད། །ཚུར་འདུས་ཡོངས་སུ་གྱུར་པ་ལས། །དཔོན་སློབ་གཉིས་ཀ་སྒྲོལ་མ་ནི། །ཞེས་པ་ནས། ཞབས་གཉིས་རོལ་པའི་སྟབས་བཞུགས་དཔྲལ་བར་ༀ། །མགྲིན་པར་ཨཱཿདང་ཐུགས་ཀར་ཧཱུྃ་དང་ཏཱྃ། །སྔགས་འཁོར་གསེར་གྱི་མདོག་ཅན་ཕྲེང་བས་བསྐོར། །བླ་མར་གསོལ་བཏབ་མོས་གུས་ཚད་མེད་དང་། །རྗེས་ཟློས་འདི་བཞིན་དག་གསལ་གནང་བར་ཞུ། །དུས་གསུམ་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་ངོ་བོ་ཉིད། །དཔལ་ལྡན་བླ་མ་རིན་པོ་ཆེས། །བདག་གི་འགལ་རྐྱེན་ཀུན་བསལ་ནས། །རྗེ་བཙུན་མ་ཡི་སྐུ་གསུང་ཐུགས། །ཡོན་ཏན་ཕྲིན་ལས་མ་ལུས་པའི། །བྱིན་རླབས་དངོས་གྲུབ་སྩལ་དུ་གསོལ། །ཞེས་ལན་གསུམ། སློབ་དཔོན་ཐུགས་ཀའི་ཡིག་འབྲུ་ལས། །འོད་འཕྲོས་སངས་རྒྱས་བྱང་སེམས་ཀྱི། །ཐུགས་བརྒྱུད་བསྐུལ་བས་དེ་རྣམས་ཀྱི། །གཉིས་མེད་ཡེ་ཤེས་འཁོར་ལོ་དང་། །ཡིག་འབྲུའི་རྣམ་པར་བྱོན་གྱུར་ནས། །སློབ་དཔོན་ལ་ཐིམ་སློབ་དཔོན་གྱི། །འཁོར་ལོ་ཡིག་འབྲུར་བཅས་པ་ལས། །དེ་འདྲ་གྲངས་མེད་བྱུང་གྱུར་ནས། །སློབ་མ་ལ་ཐིམ་རྗེ་བཙུན་མའི། །སྐུ་གསུང་ཐུགས་ཀྱི་བྱིན་རླབས་ཞུགས། །ཡིག་འབྲུས་ལུས་གང་སྡིག་སྒྲིབ་དག །ནད་གདོན་བར་ཆད་ཐམས་
ཅད་ཞི། །མཆོག་ཐུན་དངོས་གྲུབ་ཐོབ་པར་གྱུར། །ཛ་ཧཱུྃ་བྃ་ཧོཿཡི་གེ་བཅུ་གཅིག་པ་དང་། ཨཱ་ཝེ་ཤ་ཡ་ཨ་ཨཱཿབརྗོད། ཏིཥྛ་བཛྲ་ཞེས་བརྟན་པར་བྱའོ། །ཞེས་གསོལ་འདེབས་འདིའི་རྗེས་ཟློས་མཛོད། །བྱང་ཆུབ་རྡོ་རྗེ་སངས་རྒྱས་ལ། །སོགས་ལན་གསུམ་དང་། ཞེས་པས་གསོལ་བ་བཏབ་པ་ལས། །སློབ་དཔོན་ཐུགས་ལས་འོད་ཟེར་འཕྲོས། །དབང་གི་ལྷ་རྣམས་སྤྱན་དྲངས་ཏེ། །མངོན་པར་གསོལ་བ་བཏབ་པ་ལས། །རིན་ཆེན་བུམ་པ་བདུད་རྩི་ཡིས། །གང་བས་བསྣམས་ཏེ་དབང་བསྐུར་གྱུར། །ཇི་ལྟར་བལྟམས་པ་ཙམ་གྱིས་ནི། །ཞེས་པ་ནས། དེ་བཞིན་བདག་གིས་དབང་བསྐུར་རོ། །ༀ་ཏཱ་རེ་ཏུཏྟ་རེ་ཏུ་རེ་ཏཱྃ་སྭཱ་ཧཱ། ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུྃ། ཞེས་པས་དབང་བསྐུར་དྲི་མ་དག །འཆི་མེད་ཚེ་དཔལ་ཡེ་ཤེས་ཐོབ། །ཆུ་ལྷག་ཡར་ལུད་འོད་དཔག་མེད། །མཆོག་གི་སྤྲུལ་སྐུས་རྒྱས་གདབ་གྱུར། །ཨརྒྷཾ་སོགས་ཀྱིས་མཆོད། དེ་ལྟར་ལྷ་སྐུ་བསྒོམ་ལ་དབང། །ལུས་སྒྲིབ་བྱང་ཞིང་མཚན་དཔེ་སོགས། །སྐུ་ཡི་ཡོན་ཏན་མ་ལུས་རྫོགས། །འབྲས་བུ་སྤྲུལ་སྐུ་འགྲུབ་པར་གྱུར། །གཉིས་པ་གསུང་གི་རྗེས་གནང་ནི། །དཔོན་སློབ་གཉིས་ཀ་རྗེ་བཙུན་མར། །གསལ་བའི་སློབ་དཔོན་ཐུགས་ཀ་ནས། །སྔགས་ཕྲེང་གསེར་
གྱི་མདོག་ཅན་ནི། །ཞལ་བརྒྱུད་སློབ་མའི་ཞལ་ཞུགས་ཏེ། །ཐུགས་ཀར་ཐིམ་པས་རྗེ་བཙུན་མའི། །གསུང་གི་དངོས་གྲུབ་མ་ལུས་ཐོབ། །སྔགས་ཀྱི་ནུས་མཐུ་ཐོབ་པར་གྱུར། །ཡི་གེ་བཅུ་གཅིག་པའི་རྗེས་ཟློས་བྱ། སླར་ཡང་མེ་ཏོག་གི་ཕྲེང་བ་ཞིག་ཕུལ་བར་བསམ་ནས་འདིའི་རྗེས་ཟློས་མཛོད། བཅོམ་ལྡན་བདག་ལ་བསྩལ་ལགས་ཀྱི། །བདག་ལ་འགོ་བར་མཛད་དུ་གསོལ། ཞེས་ལན་གསུམ་གྱིས་གསོལ་བ་བཏབ། སྔགས་ཕྲེང་དེ་ཉིད་ཐོད་དུ་བཅིངས་པའི་མོས་པ་གྱིས་ཤིག །བཅོམ་ལྡན་འདི་ལ་བསྩལ་ལགས་ཀྱི། །འདི་ལ་འགོ་བར་མཛད་དུ་གསོལ། །སྔགས་ཀྱི་དངོས་གྲུབ་བསྩལ་དུ་གསོལ། །བརྟུལ་ཞུགས་བརྟན་པར་མཛད་དུ་གསོལ། །རྗེ་བཙུན་སྒྲོལ་མའི་བྱིན་རླབས་ཀྱིས། །མཁའ་སྤྱོད་གནས་སུ་དྲང་དུ་གསོལ། །དེ་ལྟར་གསུང་གི་རྗེས་གནང་གིས། །བཟླས་པའི་རིམ་པ་བྱེད་ལ་དབང་། །ངག་སྒྲིབ་བྱང་ཞིང་ཚངས་དབྱངས་ལྡན། །གསུང་གི་བྱིན་རླབས་ཡོངས་སུ་རྫོགས། །འབྲས་བུ་ལོངས་སྐུ་འགྲུབ་པར་འགྱུར། །གསུམ་པ་ཐུགས་ཀྱི་རྗེས་གནང་ནི། །དཀྱིལ་འཁོར་དབུས་ཀྱི་སྒྲོལ་མ་ལས། །མར་མེ་གཉིས་མཆེད་བཞིན་དུ་སྐུ། །སྤྱི་བོར་བྱོན་ནས་དབྱེར་མེད་ཐིམ། །མ་བཅོས་སྤྲོས་བྲལ་ལྷུན་གྱིས་གྲུབ། །ཡི་གེ་བཅུ་གཅིག་པའི་མཐར། བཛྲ་ས་མ་ཡ་སྟྭཾ། ཞེས་བརྗོད་
མེ་ཏོག་སྤྱི་བོར་བཞག །དེ་ཡིས་མི་རྟོག་མངོན་དུ་བྱས། །ཡིད་སྒྲིབ་དག་ནས་རྗེ་བཙུན་མའི། །ཐུགས་ཀྱི་རྡོ་རྗེ་སྙིང་ལ་ཞུགས། །འབྲས་བུ་ཆོས་ཀྱི་སྐུ་འགྲུབ་གྱུར། །བཞི་པ་ཡོན་ཏན་རྗེས་གནང་ནི། །དཔོན་སློབ་གཉིས་ཀ་ལྷར་གསལ་བར། །རྒྱན་ཆ་འདི་གཏད་སངས་རྒྱས་ཀྱི། །ཡོན་ཏན་དངོས་གྲུབ་མཐའ་དག་ལྡན། །འབྲས་བུ་བདེ་ཆེན་སྐུ་འགྲུབ་གྱུར། །ལྔ་པ་ཕྲིན་ལས་རྗེས་གནང་ནི། །བླ་མ་འཕགས་མ་སྒྲོལ་མ་ཡི། །གནས་བཞིར་དཀར་དམར་སྔོ་ལྗང་སེར། །འོད་འཕྲོས་སློབ་མའི་གནས་བཞིར་ཐིམ། །སྒོ་གསུམ་ཆ་མཉམ་སྒྲིབ་ཚོགས་དག །ཕྲིན་ལས་མཐའ་ཡས་དབང་བསྒྱུར་ཞིང་། །འབྲས་བུ་ངོ་བོ་ཉིད་སྐུར་གྱུར། །དེ་ལྟར་རྗེས་གནང་ཐོབ་ནས་ནི། དམ་ཚིག་བསྲུང་བའི་རྗེས་ཟློས་མཛོད། །གཙོ་བོས་ཇི་ལྟར་སོགས་ལན་གསུམ་དང་། མཎྜལ་ཕུལ། ལུས་དང་ལོངས་སྤྱོད་དྲུག་ཆ་ནི། །ལྟོས་མེད་འབུལ་སྙམ་རྗེས་ཟློས་མཛོད། །དེང་ནས་བརྩམས་ཏེ་སོགས་ལན་གསུམ་དང་། བསོད་ནམས་འདི་ཡིས་སོགས་བརྗོད། དེ་ནས་ཐུན་བསྡུའི་རྫོགས་རིམ་ནི། ཐུགས་ཀའི་ཏྲྃ་ལས་འོད་འཕྲོས་པས། །རྒྱུ་དང་མི་རྒྱུའི་སྣོད་བཅུད་ཀུན། །འོད་དུ་ཞུ་ནས་རང་ལ་ཐིམ། །རང་ཡང་འོད་ཞུ་སྔགས་འཁོར་དང་། །དེ་ཡང་ཏཱྃ་ཡིག་ནཱ་དར་ཐིམ། །མི་དམིགས་རྣམ་
ཀུན་མཆོག་ལྡན་གྱི། །སྟོང་ཉིད་འོད་གསལ་ཆེན་པོའོ། །ཨཱཪྱ་ཏཱ་རེ་ཧཾཿསླར་ཡང་དེ་ཉིད་སྐད་ཅིག་གིས། །ཆུ་ལས་ཉ་ལྡང་ཇི་བཞིན་དུ། །གཟུགས་སྐུ་ཡོངས་རྫོགས་གསལ་བར་གྱུར། རྗེས་ཀྱི་ཆོ་གའི་རིམ་པ་ལས། །མཆོད་བསྟོད་བྱས་ནས་བཟོད་གསོལ་ནི། མ་འབྱོར་པ་དང་ཡིག་བརྒྱ་བརྗོད། འདོད་དོན་གསོལ་བཏབ་ནི། རྗེ་བཙུན་བཅོམ་ལྡན་འདས་མ་ཐུགས་རྗེ་ཅན། །གཤེགས་གསོལ་བྱེད་ན། ༀ་ཁྱེད་ཀྱིས་སེམས་ཅན་དོན་ཀུན་མཛད། སོགས། བཛྲ་མུཿཡེ་ཤེས་པ་རྣམས་རང་གནས་གཤེགས། །དམ་ཚིག་པ་རྣམས་རང་ལ་ཐིམ། །གཤེགས་གསོལ་མི་བྱེད་པ་དང་རྟེན་ཡོད་ན། བདག་དང་འགྲོ་ལ་ཐུགས་བརྩེའི་ཕྱིར། །ཞེས་པ་ནས། དེ་སྲིད་བཅོམ་ལྡན་བཞུགས་སུ་གསོལ། །ཡེ་ཤེས་སེམས་དཔའ་རྟེན་མཆོག་འདིར། །རྣམ་པ་ཀུན་ཏུ་མི་འབྲལ་ཞིང་། །བདག་སོགས་འགྲོ་བ་ཐམས་ཅད་ལ། རྟག་ཏུ་ཐུགས་རྗེས་བཟུང་དུ་གསོལ། །རྟེན་འབྲེལ་སྙིང་པོ་སོགས་དང་། ༀ་སུ་པྲ་ཏིཥྛ་བཛྲ་ཡེ་སྭཱ་ཧཱ། ཞེས་བརྗོད་ཅིང་མེ་ཏོག་འཐོར། དེ་ནས་ལྷ་མཚན་བསྡུས་ཏེ་ལྷ་ལའང་བསྟིམས། རང་གི་སྤྱི་བོར་ཡང་བཞག །ཨ་ཀཱ་རོ་སོགས་བརྗོད། དྲིལ་བུ་གསིལ། རྡོ་རྗེས་པད་འདབ་ནས་བཟུང་། རྡུལ་ཚོན་ནམ་ཚོམ་བུ་གང་ཡིན་གྱི། མཆོད་སྦྱིན་གནས་འདིར་གང་ལྷགས་པ། སོགས་ཀྱིས་གཤེགས་གསོལ་བྱ། མཆོད་གཏོར་གཙང་སར་དོར། དགེ་བ་འདི་ཡིས་མྱུར་དུ་བདག །སོགས་
ཀྱིས་བསྔོ་བ་སོགས་གང་འོས་དང་། བཀྲ་ཤིས་པའི་ཚིགས་སུ་བཅད་པ་རྒྱས་བསྡུས་གང་འོས་བརྗོད་པར་བྱའོ། །དེ་ལྟར་འཕགས་མ་སྒྲོལ་མ་བཀྲ་ཤིས་དོན་འགྲུབ་མའི་ཆོ་ག་འདི་བཞིན་མདོར་བསྡུས་ཚིག་བཅད་དུ་བྲིས་པ་སྟེ། བསྙེན་པའི་གྲངས་ཚད་འགྲུབ་པའི་རྟགས་མཚན་གཞན་ཡང་གང་ཅིར་རྒྱས་པར་སྤྲོ་ཚེ་སྒྲོལ་མའི་སྒྲུབ་སྐོར་གཞན་ནས་གང་འོས་ཁ་གསབ་ཆོག་ཅིང་། འདིའི་བརྒྱུད་པ་ནི། བཅོམ་ལྡན་འདས་རྡོ་རྗེ་འཆང་ཆེན་པོ། །གསང་བདག་ཕྱག་ན་རྡོ་རྗེ། རྡོ་རྗེ་རྣལ་འབྱོར་མ། པཎྜི་ཏ་ཨ་བྷྱེ་ཀ་རི། པཎྜི་ཏ་འདྲེན་པའི་ཞབས། པཎྜི་ཏ་གཽ་ལ་ཤྲཱིཿཔཎྜི་ཏ་ཀཱིཪྟི། ལོ་ཙྪ་བ་ཀིིཪྟི་དྷཱ་ཛ། སློབ་དཔོན་རིན་ཆེན་འབྱུང་ལྡན། བླ་མ་རིན་ཆེན་གུང་བ། སློབ་དཔོན་བསོད་ནམས་འཕེལ། སློབ་དཔོན་ཚུལ་ཁྲིམས་རྒྱལ་མཚན། བླ་མ་ཀུན་དགའ་རིན་ཆེན། མཁན་ཆེན་བསོད་ནམས་མཆོག་གྲུབ། བླ་མ་དགེ་འདུན་རྒྱལ་མཚན། བླ་མ་བྱམས་པ། གྲུབ་ཆེན་ཀིཪྟི་ཤྲིཿསི་ཏུ་ཆོས་ཀྱི་གོ་ཆ། དཔལ་ལྡན་མི་ཕམ་ཆོས་ཀྱི་དབང་ཕྱུག །གར་དབང་ཆོས་ཀྱི་དབང་ཕྱུག །གནས་མདོ་ཀརྨ་ཆགས་མེད། བདུད་མོ་ཀརྨ་དར་རྒྱས། དཔལ་ཆེན་ཆོས་ཀྱི་དོན་གྲུབ། སི་ཏུ་བསྟན་པའི་ཉིན་བྱེད། དེས་བདག་ལའོ། །དེ་ལྟར་འཕགས་མ་སྒྲོལ་མ་བཀྲ་ཤིས་དོན་གྲུབ་མ་མཆོད་ཅིང་བསྒྲུབ་པའི་རིམ་པ་མདོར་བསྡུས་འདི་བཞིན། ཞི་བ་ཞེས་པའི་ཧོར་ཟླ་༡༡ཚེས་༡ཕྱི་མར་པ་སངས་ནམ་འབྲུའི་འགྲུབ་སྦྱོར་དང་ཉི་མ་བྱང་བགྲོད་བསྐྱེད་རིམ་ཐོག་མ་ཟླ་བའི་རླུང་རྒྱུའི་རྟེན་འབྲེལ་བཅས། གང་ཅིར་ཕུན་སུམ་ཚོགས་པའི་དུས་དེར་ཤཱཀྱའི་དགེ་སློང་ཀརྨ་ཀ་བདུད་ཚོགས་འདུལ་བའི་རྡོ་རྗེས་ལྷག་བསམ་རྣམ་པར་དཀར་བས་སྤེལ་བ་དགེ། །།
འཕགས་མ་བཀྲ་ཤིས་དོན་གྲུབ་མའི་རྒྱས་པའི་སྦྱིན་སྲེག་བསམ་འཕེལ་ནོར་བུ།
འཕགས་མ་བཀྲ་ཤིས་དོན་གྲུབ་མའི་རྒྱས་པའི་སྦྱིན་སྲེག་བསམ་འཕེལ་ནོར་བུ་བྱ་བ་བཞུགས་སོ། །བླ་མ་དམ་པ་དང་ལྷག་པའི་ལྷ་གཉིས་སུ་མེད་པ་ལ་ཕྱག་འཚལ་ལོ། །འདིར་དམ་ཚིག་དང་སྡོམ་པ་ལྡན་ཞིང་རིམ་གཉིས་ཀྱི་རྣལ་འབྱོར་པས་རྒྱས་པའི་ལས་བསྒྲུབ་པར་བྱ་བ་དང་། དངོས་གྲུབ་རྣམ་གཉིས་ཐོབ་པར་བྱ་བ་དང་། སྔགས་དང་ཆོ་གའི་ལྷག་ཆད་ཁ་སྐོང་བ་དང་། དཀྱིལ་འཁོར་གྱི་ལས་དང་། རྟེན་རབ་ཏུ་གནས་པ་ལ་སོགས་པ་དང་འབྲེལ་བའི་ཚེ་སྦྱིན་སྲེག་གི་ལས་བརྩམས་ཏེ་དཔལ་ཡང་དག་བར་སྦྱོར་བ་ལས། སྣ་ཚོགས་ལས་ནི་རབ་བསྒྲུབ་ཕྱིར། །སྦྱིན་སྲེག་ལས་ནི་བཤད་པར་བྱ། །མེ་ནི་ལྷ་ཡི་ཁ་རུ་གསུངས། །སྦྱིན་སྲེག་དེ་ནི་རྣམ་པར་གནས། །སྦྱིན་སྲེག་གིས་ནི་ལྷ་རྣམས་ཚིམ། །ཚིམ་ནས་དངོས་གྲུབ་རབ་ཏུ་སྩོལ། །གང་ཞིག་སྔགས་ཀྱི་ལྷག་ཆད་དག །། སྦྱིན་སྲེག་གིས་ནི་དེ་ཀུན་དག །ཅེས་དང་། ཅི་གསུངས་སྦྱིན་སྲེག་བྱས་ནས་ནི། །དཀྱིལ་འཁོར་དམ་པ་བཞེངས་པ་དང་། །ཞེས་དང་། བཟང་པོ་ཡོངས་བཟུང་ལས། རབ་གནས་ལ་སོགས་རྗེས་ལ་ནི། །མ་དྲན་པ་དང་མ་ནུས་པ། །ཆོ་ག་མ་ཚང་གྱུར་པ་རྣམས། །སྦྱིན་སྲེག་གིས་ནི་རྫོགས་པར་བྱ། །ཞེས་གསུངས་སོ། །དེས་ན་ལས་ཀྱི་རིམ་པ་ལ་འཇུག་པ་ལ་གསུམ་སྟེ། སྦྱོར་བ་དང་དངོས་གཞི་རྗེས་གསུམ་མོ། །དང་པོ་ལ་གསུམ་སྟེ། ཐབ་བཅའ་བ། ཡོ་བྱད་རྣམས་ཇི་ལྟར་བཤམས་པ། །སློབ་དཔོན་གྱི་ཆས་གོས་སོགས་བསྟན་པའོ། །དང་པོ་ནི་སམྦུ་ཊི་ལས། རྒྱས་པའི་ཐབ་ཁུང་གྲུ་བཞི་སྟེ། །ཁྲུ་གཉིས་ཚད་དུ་རྣམ་པར་
རྒྱས། །འོག་ཏུ་ཁུང་བུ་གྲུ་གང་བ། །མུ་རན་ལ་ནི་སོར་བརྒྱད་ཉིད། །མེ་ཏོག་སེར་པོས་བརྒྱན་པ་དང་། །དྲི་ནི་སེར་པོས་རྗེས་སུ་བྱུག །གང་དུ་སྦྱིན་སྲེག་བྱ་བའི་གནས་སུ་སྟེགས་བུ་འདུ་བྱ་བ་སོགས་གྲུབ་ནས་ཐོག་མར་ཐིག་གདབ་པ་ནི། ཚངས་ཟུར་བཞི་པོ་ལེགས་བཏབ་སྟེ། །དབུས་ནས་ཚངས་སྟེང་སོར་མོ་ནི། །ཉེར་བཞི་ཚན་གཅིག་བརྒྱད་ཚན་གཉིས། །མཚན་མར་བྱས་ལ་དེ་སྟེང་ནས། །ཟུར་ཐིག་སྟེང་དུ་མཚན་མར་བྱ། །དེ་སྟེང་གྲུ་བཞི་ཕྱོགས་རེ་ལ། །གསུམ་གསུམ་བཏབ་པས་ཐབ་རྒྱ་དང་། །མུ་རན་ཁ་ཁྱེར་ཡང་དག་འབྱུང་། །སོར་མོ་བརྒྱད་དང་བཅུ་དྲུག་གི། །པདྨའི་ལྟེ་བར་འདབ་མ་བསྐོར། །དཀྱུས་ཐིག་བཏབ་པས་རྒྱས་པ་འགྲུབ། །དེ་ལྟར་ཐིག་རྣམས་གདབ་པར་བྱས་ནས། དེ་ནས་ཐབ་ཁུང་བརྩིག་པ་ནི། རྒྱས་པ་ལ་མཆུའི་ཕྱི་ནང་གི་ཐིག་གཉིས་ཀྱི་བར་དུ་གྲུ་བཞིར་བརྩིག་པའི་རྒྱ་ཕྱེད་དཔང་དུ་ཡོད་པས་ཁ་ནས་སོར་བརྒྱད་པའི་མཆུར་དོར་བ་རྒྱ་དཔང་མཉམ་པར་སོར་བརྒྱད་པའི་ཁ་ཁྱེར་ལ་རིན་པོ་ཆེའི་ཕྲེང་བ་དང་བཅས་པ། པདྨ་རྒྱས་པའི་དབྱིབས་ལྟ་བུ་ནང་དུ་ངང་གིས་གཞོལ་བ། དེའི་ཕྱི་རོལ་གྱི་གྲྭ་བཞིར་རིན་པོ་ཆེ་སེར་པོས་མཚན་པ་དབུས་སུ་པད་འདབ་བརྒྱད་དེ་ཕྱོགས་བཞི་དམར། མེ་རླུང་སེར། བདེན་བྲལ་ལྗང་། དབང་ལྡན་སྔོ། ལྟེ་བ་ལྗང་ཁུའི་སྟེང་དུ་རིན་པོ་ཆེ་སེར་པོ། འཁོར་ཡོད་ཚེ་ཕྱོགས་ཀྱི་འདབ་མ་ལ་སོ་སོའི་ལྷ་མཚན་དགོས་ཤིང་། ཚོན་གཞན་མ་འབྱོར་ཚེ་སེར་པོ་ཁ་རྐྱང་བཀྲམ་པའི་སྟེང་དུ་གོང་ལྟར་བྲིས་པས་འཐུས། བརྐོ་ཐབ་བྱེད་ན་ཁ་ཁྱེར་གྱི་རྩ་ཐིག་དེ་ནང་དུ་ཐབ་རང་གི་རྒྱ་ཡི་ཕྱེད་ཟབས་སུ་
བརྐོ་ཞིང་། བྲི་ཐབ་ལ་ནི་དཔང་དངོས་སུ་མེད་ཀྱང་བསམ་པས་འགྲུབ་བོ། །ཐབ་ཀྱི་ཁ་དོག་དང་དབྱིབས་སོགས་ནི་གོང་གི་ལུགས་དང་འོག་ཏུ་ཐབ་ཀྱི་བསྐྱེད་ཆོག་གིས་རྟོགས་པར་འགྱུར་རོ། །དེས་ན་འདིར་སྨོས་པ་རྣམས་ནི་དཔེར་བརྗོད་པ་ཙམ་ཡིན་ནོ། །བུད་ཤིང་ནི་ཡམ་ཤིང་སོ་སོའི་རྒྱུ་དང་མཐུན་པའམ་ཤུག་པ་སོགས་དྲི་ཞིམ་པོ་དང་། དགོན་པའི་བ་ལང་ལྕི་བ་སྲོག་ཆགས་མེད་པ་ཡང་རུང་སྟེ་ཐབ་ཀྱི་དབྱིབས་དཔངས་རྣམས་མཐུན་པར་རྒྱས་པ་ལ་ཐབ་ཀྱི་མཆུ་ཡི་ནང་དུ་དམ་པར་བརྩིགས་པའི་ནང་གི་ཤར་ལྷོར་རྫའི་ཀོང་བུ་མར་གྱིས་བཀང་བ་སྡོང་བུ་ཅན་བཞག་གོ། །གཉིས་པ་ཡོ་བྱད་རྣམས་ཇི་ལྟར་བཤམས་པ་ནི། རྒྱས་པ་ལ་སློབ་དཔོན་གྱི་གཡོན་ཕྱོགས་ནས་བརྩམས་ཏེ་གཡས་བསྐོར་དུ་རིམ་པ་བཞིན་ཆུ་བཞི། ཉེར་སྤྱོད་ལྔ། མར་ལ་བཅོས་པའི་གཏོར་མ་དང་བཅས་པ་སྟེགས་བུ་མཐོ་དམན་ནམ་ཕྱི་ནང་བྱས་པའི་ཁར་འདས་མ་འདས་ཀྱི་ཚར་གཉིས་བཤམས། མ་འབྱོར་ན་ཚར་གཅིག་སྤྱི་སོར་བཤམས་ལ། མཆོད་འབུལ་རེ་རེ་བཞིན་མཆོད་པ་རྣམས་བརྗེ་བའང་ཁ་གསོ། ཡང་གཡས་ཕྱོགས་ཀྱི་མདུན་ངོས་ནས་བརྩམས་ཏེ་སྔ་མ་བཞིན་དུ་བྱང་ཆུབ་ཀྱི་ཤིང་སོགས་དང་། ཁྱད་པར་དུ་རྒྱས་པ་ལ་ཡམ་ཤིང་གི་རྒྱུ་དེ་ཉིད་ཀྱི་ཡལ་གའི་དབུས་ཀྱི་ཆ་ལས་བྱུང་བ་འོ་མ་དང་མར་གྱིས་བསྒོས་ཤིང་གུར་གུམ་གྱིས་བྱུགས་པ། སྲིད་དུ་གྲུ་གང་། སྦོམས་སུ་ཆང་གང་། བའམ་རའི་མར་གྱི་ཁུ་བ། ཏིལ་ནགཡུངས་ཀར། ཞོ། བག་ཕྱེ། བུ་ུརམ་གསུམ་མམ། འོ་མ་སྦྲང་རྩི་ཞིབ་བསྲེས་པའི་རིལ་བུའི་ཟས་མཆོག་དང་། ཞོ། འབྲས། སོ་བ།
ནས། སྲན་མ། གྲོ། དཱུརྦ། ཀུ་ཤ་སྔོན་པོ་རྩ་རྩེ་མ་ཉམས་པ་མར་དང་འོ་མས་སྦགས་པ་དང་། ཤིང་ཏོག་སྣ་ཚོགས་རྣམས་བཤམས། ཡང་ན་རྒྱས་པ་ལ་སཱ་ལི་དམར་པོ། མེ་ཏོག་བརྒྱ་པ། བིལ་བའི་འབྲས་བུ། པདྨ། ནཱ་ག་གེ་སར། འབྲུ་དག་གོ། །རྒྱས་པའི་མཆོད་རྫས་དང་སྟེགས་བུའི་ཁ་དོག་སེར་པོ་བྱ་ཞིང་། དེ་དག་གི་སྣོད་ཀྱང་གསེར་སོགས་སེར་པོ་དང་། སློབ་དཔོན་གྱི་མདུན་མེ་ཡོལ་གྱི་ནང་དུ་གཡོན་ནས་རིམ་བཞིན་མེ་ལྷའི་གདན་ཀྱི་ཀུ་ཤ་ཆུན་པོ་བཅུ། ནང་མཆོད། རྡོ་རྗེ། དགང་བླུགས་ཁ་སྦྱར། དྲིལ་བུ། མེ་ཏོགབསང་གཏོར་གྱི་ཀུ་ཤ། རླུང་གཡབ་རྣམས་བཤམས། གཞན་ཡང་ལས་མཐུན་གྱི་ཁྲུས་རས་དང་གོས་ཟུང་དག་ཀྱང་བཤམ་མོ། །གསུམ་པ་སློབ་དཔོན་གྱི་ཆས་གོས་སོགས་བསྟན་པ་ནི། ཆས་གོས་སེར་པོ་དང་། རྒྱན་ནི་གསེར་སོགས་རིན་པོ་ཆེའོ། །སློབ་དཔོན་གྱི་ཁ་ལྟ་ཕྱོགས་ནི། རྒྱས་པ་ལ་བྱང་དུ་བལྟ་བར་སམྦུ་ཊི་ལས་གསུངས་ཤིང་། དཀྱིལ་འཁོར་དང་འབྲེལ་ན། ཐབ་དཀྱིལ་འཁོར་གྱི་ཕྱོགས་གང་དུ་བྱ་བའང་། དེ་ཉིད་ལས། བྱང་དུ་རྒྱས་པའི་ཐབ་ཁུང་ཉིད། །ཅེས་གསུངས་པས་དཀྱིལ་འཁོར་གྱི་ཞལ་གང་དུ་ཕྱོགས་ཀྱང་རུང་། ལས་དང་མཐུན་པའི་དཀྱིལ་འཁོར་གྱི་ཕྱོགས་སུ་ཐབ་བཅའ་ཞིང་། སློབ་དཔོན་ནི་ལས་དང་མཐུན་པའི་ཕྱོགས་སུ་ཁ་བལྟ་བའམ། ཡང་ན་སྦྱིན་སྲེག་དང་འབྲེལ་བའི་སྐབས་སུ་དཀྱིལ་འཁོར་གྱི་ཞལ་ནུབ་ཕྱོགས་སུ་བལྟ་བར་བཞེངས་ན་རྒྱས་པ་
ལ་སོགས་པའི་ལས་ཀུན་ལ་དཀྱིལ་འཁོར་གྱི་ཕྱོགས་གང་དུ་བྱ་བ་དང་། སློབ་དཔོན་གང་དུ་ཁ་བལྟ་བའི་འབྱུང་བའི་ཕྱོགས་གཉིས་ཀ་མི་འགལ་བས་ཤིན་ཏུ་འགྲིགས་ཤིང་ལེགས་པར་མངོན་ནོ། །སློབ་དཔོན་གྱི་གདན་དང་འདུག་སྟངས་ནི། རྒྱས་པ་ལ་ཁྲིའུ་སེར་པོའི་སྟེང་དུ་བཟང་པོའི་འདུག་སྟངས་བྱའོ། །དུས་ནི་ཡར་ངོའི་ཚེས་བརྒྱད་སོགས་ཀྱི་སྔ་དྲོའོ། །གཉིས་པ་དངོས་གཞི་ལ་གཉིས། འཇིག་རྟེན་པ་དང་། འཇིག་རྟེན་ལས་འདས་པའི་ཆོ་གའོ། །དང་པོ་ནི། བདག་ཉིད་ཁྲུས་བྱས་ལས་དང་མཐུན་པའི་ཚོན་དང་དྲིས་བྱུགས། དེ་ནས་བདག་བསྐྱེད་བསྒོམ་ཞིང་ཐུན་བསྡུ་སོགས་བྱས་ལ། སླར་ཡང་། བདག་ཉིད་སྐད་ཅིག་ཁྲོ་བོའི་རྒྱལ། །ཧེ་རུ་ཀ་དཔལ་རྟ་མཆོག་དམར། །ཕྱག་གཉིས་དབྱུག་ཐོ་སྡིགས་མཛུབ་ཅན། །འདོར་ཐབས་ཁྲོ་ཆས་རྫོགས་པར་གསལ། །འདི་ནས་བཟུང་སྟེ་སྦྱིན་སྲེག་མ་གྲོལ་གྱི་བར་དུ་ངག་སྨྲ་བཅད། ལག་པ་རྡོར་དྲིལ། ཡིད་ཏིང་ངེ་འཛིན་དང་མ་བྲལ་བར་དགོས་ཤིང་། རྡོར་དྲིལ་བྱིན་རླབས་སྔར་བྱས་པ་མེད་ན་འདིར་བྱིན་རླབས་དགོས་པས། མདུན་དུ་ལས་བུམ་ཞིག་བཅས་ལ། ལས་བུམ་དབུས་སུ་པད་ཉིའི་སྟེང་། །སྐད་ཅིག་ཁྲོ་རྒྱལ་རྟ་མགྲིན་སྐུ། །ཐུགས་ཀར་ཧྲཱིཿལ་སྔགས་ཕྲེང་བསྐོར། །དེ་ལས་འོད་འཕྲོས་གནོད་བྱེད་བཅོམ། །སླར་ཡང་བདུད་རྩིའི་རྒྱུན་བབས་པས། །བུམ་ཆུ་ནུས་མཐུ་ཕུན་ཚོགས་གྱུར། །རྟ་མགྲིན་གྱི་སྙིང་པོ་ཅི་རིགས་བཟླའོ། །ཁྲོ་བོའི་རྒྱལ་པོ་རྟ་མགྲིན་གྱིས། །
བགེགས་དང་བར་ཆད་བཟློག་པར་མཛོད། །ཅེས་བརྗོད་དོ། །སླར་རྡོར་དྲིལ་ལ། ༀ་བཛྲ་ཀྲོ་དྷ་ཧྱ་གྷྲྀ་ཝ་ཧུ་ལུ་ཧུ་ལུ་ུཧཱུྃ་ཕཊ་ཀྱིས་བསངས། སྭ་བྷཱ་ཝ་སོགས་ཀྱིས་སྦྱངས། རྡོར་དྲིལ་མི་དམིགས་སྟོང་ཉིད་གྱུར། །སྟོང་པའི་ངང་ལས་པད་ཟླའི་སྟེང་། །ཧཱུྃ་ལས་རྡོར་སེམས་ཡབ་ཡུམ་དཀར། །ཞལ་གཅིག་ཕྱག་གཉིས་རྡོར་དྲིལ་འཛིན། །སྣང་ལ་རང་བཞིན་མེད་པའི་སྐུའི། གནས་གསུམ་ༀ་ཨཱཿཧཱུྃ་གིས་མཚན། །ཧཱུྃ་ལས་འོད་འཕྲོས་ཡེ་ཤེས་པ། །དབང་གི་ལྷ་བཅས་སྤྱན་དྲངས་ཏེ། །ཛཿཧཱུྃ་བྃ་ཧོ་ཡེ་ཤེས་པ། །དམ་ཚིག་པ་དང་དབྱེར་མེད་གྱུར། །སླར་ཡང་དབང་ལྷ་འཁོར་བཅས་ཀྱིས། །དབང་བསྐུར་སྐུ་གང་དྲི་མ་དག །ཆུ་ལྷག་སྤྱི་བོར་བརྟེན་པ་ལས། །མི་བསྐྱོད་པ་ཡིས་དབུ་བརྒྱན་གྱུར། །རྡོར་སེམས་ཡབ་ཡུམ་ཞུ་བ་ལས། །རྡོར་དྲིལ་མཚན་ཉིད་ལྡན་པར་གྱུར། །ལག་མཐིལ་གཡས་སུ་ཟླ་བ་དང་། །གཡོན་དུ་ཉི་མའི་དཀྱིལ་འཁོར་གསལ། །བར་བསམས་ཏེ་པད་ཀོར་དང་བཅས་པས། ༀ་མ་ཧཱ་བཛྲ་ཧཱུྃ། ཞེས་རྡོ་རྗེ་བླངས་ཏེ་གསོར། ༀ་བཛྲ་གྷཎྜེ་ཨཱཿཞེས་པད་ཀོར་དང་བཅས་ཏེ་དྲིལ་བུ་བླངས་ལ་སླར་ཡང་པད་ཀོར་དང་བཅས་པས། ༀ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ་ཏིཥྛ་ཨེ་ཥ་སྟྭཾ་དྷ་ར་ཡཱ་མི་བཛྲ་ས་ཏྭ་ཧི་ཧི་ཧི་ཧི་ཧི་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཞེས་བརྗོད་བཞིན་པས་རྡོ་རྗེ་ལན་གསུམ་གསོར།
སླར་བསྟོད་དེ་སྙིང་གར་བཟུང་ང་ོ། །དེ་ནས་དྲིལ་བུ་གནས་བརྒྱད་དུ་བསྐོར་ཞིང་གསིལ་བ་སྟེ་དྲིལ་ལྕེ་དྲིལ་བུའི་ནང་གི་ཕྱོགས་མཚམས་བརྒྱད་དུ་རེས་མོས་ཀྱིས་རེག་པ་གསིལ་བཞིན་པར། ༀ་བཛྲ་གྷཎྜེ་ར་ཎི་ཏ་པྲ་ར་ཎི་ཏ་སཾ་པྲ་ར་ཎི་ཏ་སརྦ་བུདྡྷ་ཀྵེ་ཏྲ་པྲ་ཙཱ་ལི་ནི་པྲཛྙཱ་པཱ་ར་མི་ཏཱ་ནཱ་ད་སཾ་བྷ་ཝི་ཏ་བཛྲ་དྷརྨ་ཧྲི་ད་ཡཾ་སནྟོ་ཥ་ཎི་ཧཱུྃ་ཧཱུྃ་ཧཱུྃ་ཧོཿཧོཧོཿཨཱ་ཁཾ་སྭཱ་ཧཱ། ཞེས་བརྗོད་ལ་པད་ཀོར་བྱས་ཏེ་རྡོ་རྗེ་སྙིང་གར་བཟུང་ཞིང་དྲིལ་བུ་སྒྲ་ཆེ་བར་གསུམ་བཀྲོལ་བས་སངས་རྒྱས་ཀྱི་ཞིང་ཐམས་ཅད་སྒྲས་བསྐུལ་ཞིང་མཆོད་པར་བསམས་ཏེ་གྲག་སྟོང་དུ་མཉམ་པར་བཞག་གོ། །དེ་ནས་སྔོན་འགྲོ་གཏོར་མ་ལ་ༀ་བཛྲ་ཀྲོ་དྷ་སོགས་ཀྱིས་བསངས། ༀ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷ་ཝ་ཤུདྡྷོ྅་ཧཾ། ཞེས་སྟོང་པར་སྦྱངས། སྟོང་པ་ཉིད་གྱུར་སྟོང་པའི་ངང། །ༀ་ལས་རིན་ཆེན་སྣོད་ཡངས་སུ། །ༀ་ཡིག་ཞུ་བ་ལས་བྱུང་བའི། །གཏོར་མ་བདུད་རྩིའི་རྒྱ་མཚོར་གྱུར། །ༀ་ཨཱཿཧཱུྃ། ལན་གསུམ་གྱིས་བྱིན་བརླབས། ༀ་གནས་བདག་ཡུལ་བདག་གྲོང་བདག་དང་། །གཉུག་མར་གནས་པ་ལ་སོགས་པའི། །གཏོར་མགྲོན་དུ་འོས་འདིར་མཆིས་གྱུར། །ཊཀྐི་ཧཱུྃ་ཛཿན་མཿསརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷྱ་སརྦ་ཐ་ཁཾ་ཨུངྒ་ཏེ་སྥ་ར་ཎ་ཨི་མཾ་ག་ག་ན་ཁཾ་གྲྀ་ཧྞེ་དཾ་བ་ལྱཱ་ཏེ་སྭཱ་ཧཱ། ལན་གསུམ་དང་། ༀ་ཨ་ཀཱ་རོ་མུ་ཁཾ་སརྦ་དྷརྨ་ཎཾ་ཨ་དྱ་ནུ་ཏྤནྣ་ཏྭ་ཏ་ༀ་ཨཱཿཧཱུྃ་ཕཊ་སྭཱ་ཧཱ། ལན་གསུམ་བརྗོད། གང་ཡང་འདིར་གནས་ལྷ་དང་ཀླུ། །གནོད་
སྦྱིན་སྲིན་པོའམ་གཞན་དག་ལ། །སྔགས་སྤྱོད་དོན་དུ་གཏོར་མ་འདི། །འབུལ་གྱིས་ཡང་དག་བཞེས་སུ་གསོལ། །མཆོད་སྦྱིན་གཏོར་མ་འདི་བཞེས་ལ། །ཞེས་པ་ནས། ཡིད་ལ་འདོད་པ་ཀུན་གྲུབ་བཛོད། །ཅེས་པའི་བར་དང་། ༀ་སུཾ་བྷ་ནི་སོགས་བརྗོད་དེ་གཏོར་མ་དོར། ཡུངས་ཀར་གྱི་རྫས་དང་ཡོ་བྱད་ཀུན་ལ་བྲབ་ཅིང་ཡི་དམ་གྱི་ང་རྒྱལ་བརྟན་པོས་རྡོ་རྗེའི་ཟེར་གྱིས་བགེགས་བསྐྲད་དོ། །སྲུང་འཁོར་ནི། ཏཱྃ་ཡིག་འོད་ཟེར་ལས་བྱུང་བའི། །སྣ་ཚོགས་རྡོ་རྗེའི་ས་གཞི་དང་། །ར་བ་དྲྭ་བ་གུར་བླ་བྲེ། །ཡེ་ཤེས་མེ་རིའི་སྲུང་འཁོར་གྱུར། །ༀ་བཛྲ་རཀྵ་རཀྵ་ཧཱུྃ་ཧཱུྃ་ཧཱུྃ་སྭཱ་ཧཱ། མེ་སྤར་བ་ནི། གཙུབ་ཤིང་ལས་བྱུང་བའམ་རུང་ཁང་ལས་བྱུང་བའི་མེ། ཁྱད་པར་ནགས་ལ་མེ་མཆེད་པ་ལས་བྱུང་བའམ་མེ་ཤེལ་ལས་བྱུང་བ་གང་རུང་མེ་སྣོད་དུ་བཞག །བསང་ཆུ་གཏོར་ལ། ༀ་བཛྲ་ཀྲོ་དྷ་སོགས་ཀྱིས་བསངས། དཔལ་འབར་ལ་སྦར་ཏེ་སླར་ཡང་བསང་ཆུ་གཏོར་ལ། ༀ་བཛྲ་ཀྲོ་དྷས་བསངས། ༀ་བཛྲ་ཛྭ་ལ་ཛྭ་ལ་ཧཱུྃ། ཞེས་ཐབ་ཀྱི་ཤར་ལྷོར་བཞག །ༀ་ཨཱཿཧཱུྃ། ཞེས་བརྗོད་དེ་རླུང་གཡབ་ཀྱིས་གཡབ་ཅིང་སྦར་རོ། ཡང་བུད་ཤིང་ཉུང་བ་ལྟ་བུས་མགྱོགས་པར་དགོས་ཚེ་མེ་ལྷའི་གདན་བཤམས་ནས་སམ་མེ་ལྷ་བསྐྱེད་ནས་མེ་སྦར་བའང་ཡོད་དོ། དེ་ནས། ༀ་བཛྲ་ཀྲོ་དྷ་སོགས་ཀྱིས་མར་ཁུ་དགང་བླུགས་གསུམ་མམ་བདུན་ཕུལ་བས་མེ་གསོས་ལ། སམྦུ་ཊིར། ཐབ་ཁུང་ཀུན་ཏུ་ཀུ་ཤ་ཡི། །རྩེ་
མོ་དྲང་པོར་ཡོངས་སུ་བསྐོར། ཞེས་པ་ལྟར་ཀུ་ཤའི་ཆུན་པོ་མ་ཉམས་ཤིང་ཧ་ཅང་རིང་ཐུང་སྤངས་པ་ཟུང་དུ་བྱས་པ་དག་རིམ་པར་བླངས་ཏེ་ལག་གཉིས་ཀྱི་བཟུང་བ་ཅུང་ཟད་པད་ཀོར་དང་བཅས་ཏེ། ༀ། ཀུ་ཤ་འདི་ནི་གཙང་ཞིང་དགེ། །ཚངས་པ་ལྷ་རྣམས་དག་བྱེད་ཡིན། །དཀོན་མཆོག་གསུམ་པོ་མཉེས་བྱེད་པ། །ས་ལས་སྐྱེས་པའི་འདབ་མའི་སྙིང་། །བདག་གི་བགེགས་རྣམས་ཐམས་ཅད་ནི། །ཞི་དང་བཀྲ་ཤིས་མཛད་དུ་གསོལ། །ༀ་བཛྲ་སཏྭ་ཨཱཿཅེས་ཆུན་པོ་ཆེ་བ་ཟུང་ཞིག་ཐབ་ཀྱི་སྟེང་དུ་རྩེ་བྱང་དུ་བལྟ་བས་བཞག་སྟེ་མེ་ལྷའི་གདན་དུ་བསམ། ཆུན་པོ་གཞན་དག་ནི་རང་གི་ཕྱོགས་གཡོན་ནས་བརྩམས་ཏེ་གཡས་བསྐོར་དུ་རིམ་པ་ལྟར་རྩེ་མོ་བྱང་དང་ཤར་ལྷོ་ནུབ་ཏུ་བལྟ་བར་སྔ་མའི་རྩེ་མོ་ཕྱི་མའི་རྩ་བར་ནོན་པར་སྐོར་ཐབས་སུ་དགྲམ་མོ། །འདི་ནི་མེ་ལྷའི་གདན་དང་སྦྱིན་སྲེག་གི་བྱ་བ་ལ་སྲུང་འཁོར་དུ་ཡང་འགྱུར་བས་ཐོག་མར་བྱ་ཞིང་ཐབ་བསྐྱེད་པའི་གོང་ངམ་འོག་ཏུ་བྱེད་པའང་ཡོད་དོ། །དེ་ནས་མཆོད་རྫས་བྱིན་བརླབ་པ་ནི། ཨརྒྷཾ་གྱིས་མཆོད་ཡོན། པཱ་དྱཾ་གྱིས་ཞབས་བསིལ། ཨཉྪ་མཱ་ནཾ་གྱིས་ཞལ་བསིལ། པྲོཀྵ་ཎཾ་གྱིས་འཐོར་འཐུང་སྟེ། ཆུ་བཞི་གོ་རིམ་རྒྱུད་སོ་སོ་ནས་ངེས་མེད་དུ་གསུངས་པས་གང་འོས་སུ་སྦྱར་ཏེ། གང་ལྟར་མཆོད་པ་བྱིན་རླབས་དངོས་ནི། བསངས་སྦྱངས། སྟོང་པའི་ངང་ལས་ༀ་ཡིག་ལས། །རིན་ཆེན་སྣོད་ནི་རྒྱ་ཆེ་བ། །ཆོས་ཀྱི་དབྱིངས་དང་མཉམ་པའི་ནང་། །བྷྲུྃ་ལས་ཁམས་
གསུམ་གྱི་རྫས་མཆོག །ཁྱད་པར་འཕགས་ཤིང་མཆོག་གྱུར་པའི། །མཆོད་ཡོན་ཞབས་བསིལ་ཞལ་བསིལ་དང་། །འཐོར་འཐུང་མེ་ཏོག་བདུག་སྤོས་སོགས། །སྣང་གསལ་དྲི་ཆབ་ཞལ་ཟས་དང་། །རོལ་མོ་ལ་སོགས་མཆོད་པའི་རྫས། །དྭངས་ཤིང་ཐོགས་མེད་ཀུན་བཟང་གི། །རྣམ་ཐར་མཆོད་སྤྲིན་ལས་ལྷག་པ། །ནམ་མཁའི་མཐའ་ཁྱབ་ཇི་སྲིད་དུ། །རྒྱུན་མི་ཆད་པའི་རང་བཞིན་གྱུར། །ༀ་བཛྲ་ཨརྒྷཾ་ཨཱཿཧཱུྃ། དེ་བཞིན་དུ། པཱ་དྱཾ། ཨཉྩ་མ་ནཾ། པྲོ་ཀྵ་ནཾ། པུཥྤེ། དྷུཔྤེ། དཱི་བྃ། གྷནྡྷེ། ནཻ་ཝི་དྱེ། ཤབྡའི་བར་བརྗོད། ཐལ་མོ་ཁོང་སྟོང་སྦྱར་བ་ནམ་མཁའ་མཛོད་ཀྱི་ཕྱག་རྒྱས། ༀ་སརྦ་བིད་པཱུ་ར་པཱུ་ར་སུ་ར་སུ་ར་ཨ་བརྟ་ཡ་ཨ་བརྟ་ཡ་ཧོཿབཛྲ་སྥ་ར་ཎཾ། ཞེས་མཆོད་པ་བྱིན་གྱིས་བརླབས་ནས་སྲེག་རྫས་རྣམས་བསངས་སྦྱངས། སྟོང་པའི་ངང་ལས་ༀ་ཡིག་ལས། །རིན་ཆེན་སྣོད་དུ་ༀ་ཨཱ་ཧཱུྃ། །འོད་ཞུ་ལྷ་རྫས་ལས་གྲུབ་པའི། །སྲེག་རྫས་ཕུན་སུམ་ཚོགས་པར་གྱུར། །ༀ་ཨཱཿཧཱུྃ། ངོ་བོ་བདུད་རྩིའི་རང་བཞིན་ལ། །རྣམ་པ་སྲེག་རྫས་སོ་སོར་གྱུར། །ༀ་ཨཱཿཧཱུྃ། ༀ་ཋཿཋཿཋཿཋཿཋཿཋཿཋཿཿཞེས་ལག་གཡས་རྡོ་རྗེ་དང་བཅས་པས་བླུགས་གཟར་དང་། གཡོན་དྲིལ་བུ་དང་བཅས་པས་དགང་གཟར་བཟུང་ལ་ཁ་སྦྱར་ཏེ་མར་ཁུ་ལ་རེག་ཅིང་། ༀ་ཨཱཿསྭཱ་ཧཱ། ཡམ་ཤིང་ལ་རེག་སྟེ། ༀ་ཛྲིཾ་སྭཱ་ཧཱ། རྫས་སྦྱངས་བའོ། །ཡང་སྲེག་
རྫས་ཐམས་ཅད་ལ་རིམ་བཞིན་རིག་སྟེ། ༀ་སྭཱ་ཧཱ། རྫས་བཀྲུ་བའོ། །ཡང་རྫས་ཐམས་ཅད་ལ་རིམ་པར་རེག་སྟེ། ༀ་ཀུ་རུ་ཀུ་རུ་སྭཱ་ཧཱ། ཞེས་བརྗོད་པས་བྱིན་གྱིས་བརླབས། དེ་ནས་ཐབ་བསྐྱེད་པ་ནི། ༀ་བཛྲ་ཀྲོ་དྷ་སོགས་ཀྱིས་བསངས། སྭཱ་བྷཱ་ཝས་སྦྱངས། ཐབ་ཁུང་མི་དམིགས་སྟོང་ཉིད་གྱུར། །སྟོང་པའི་ངང་ལས་པད་ཉིའི་སྟེང། །རྒྱས་པའི་ཐབ་ཁུང་གྲུ་བཞི་སེར། །ལག་ཁྲུ་དོ་ཡི་རྒྱ་ཁྱོན་ཅན། །རྒྱ་ཕྱེད་དཔངས་ལྡན་སོར་བརྒྱད་ཀྱི། །མཆུ་དང་ཁ་ཁྱེར་དེ་སྟེང་དུ། །རིན་ཆེན་སེར་པོའི་ཕྲེང་བ་དང་། །གྲ་བཞིར་རིན་ཆེན་དག་གིས་སྤྲས། །དེ་དབུས་པདྨ་འདབ་བརྒྱད་ལྟེར། །རྒྱས་པའི་རིན་ཆེན་སེར་པོས་མཚན། །ཐབ་ཀྱི་དབུས་སུ་མེ་དཀྱིལ་ནང་། །པད་ཉིའི་སྟེང་དུ་རཾ་ཡིག་ལས། །རྒྱས་པའི་མེ་ལྷ་སེར་པོ་ནི། །ཞལ་གཅིག་ཕྱག་གཉིས་མེ་ཐབ་དང་། །རིལ་བ་འཛིན་པ་དྲང་སྲོང་ཚུལ། །རལ་པའི་ཚོགས་བཅས་བརྗིད་ཉམས་ལྡན། །གསུས་འཕྱངས་ཚངས་སྐུད་སེར་པོས་བརྒྱན། །ར་སྐྱེས་ལ་གནས་འཁོར་བཅས་ཀྱི། །གནས་གསུམ་ༀ་ཨཱཿཧཱུྃ་གིས་མཚན། །ཧཱུྃ་ལས་འོད་འཕྲོས་ཤར་ལྷོ་ནས། །མེ་ལྷ་འཁོར་བཅས་སྤྱན་དྲངས་ཏེ། །ༀ། ཚུར་སྤྱོན་ཚུར་སྤྱོན་འབྱུང་པོ་ཆེ། །ལྷ་ཡི་རྒྱལ་པོ་བྲམ་ཟེ་མཆོག །སྲེག་བླུགས་ཞལ་ཟས་བཞེས་སླད་དུ། །འདིར་ནི་ཡང་དག་བསྙེན་པར་མཛོད། །བཟི་བརྗིད་ཆེན་པོ་མེ་ཡི་ལྷ། །འདོད་པ་
ཐམས་ཅད་རབ་བསྒྲུབ་པ། །ཐུགས་རྗེས་སེམས་ཅན་དོན་གྱི་ཕྱིར། །འདི་ཉིད་དུ་ནི་གཤེགས་སུ་གསོལ། །ༀ་ཊཱཀྐི་ཧཱུྃ་ཛཿཞེས་ལག་པ་གཡོན་པས་གཡས་པའི་མཁྲིག་མ་ནས་བཟུང་སྟེ། ཀུ་ཤ་དང་བཅས་མི་འཇིགས་པའི་ཕྱག་རྒྱ་བཅས་ལ་མཐེ་བོང་གིས་སྲིན་ལག་གི་རྩ་བར་གཡོབ་ཅིང་སྤྱན་དྲངས་ཏེ། ཐབ་ཀྱི་ཤར་ལྷོར་མེ་ཏོག་གཅིག་འཐོར་ལ། ཐབ་ཀྱི་ཤར་ལྷོར་ཀུ་ཤ་ཡི། །གདན་ལ་མེ་ལྷ་ཡེ་ཤེས་པ། །འཁོར་དང་བཅས་པ་བཞུགས་པར་གྱུར། །ཞེས་བརྗོད། བཟེད་ཞལ་སོ་སོར་ཆུ་བཞི་སྒྲེང་སྟེ། ༀ་ཨགྣ་ཡེ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱ་ཧཱ། དེ་བཞིན་སྔགས་ཐོག་མཐའ་འདྲ་བར། པཱདྱཾ། ཨཉྩ་མཱ་ནཾ། པྲོ་ཀྵ་ཎཾ། ཞེས་པས་ཆུ་བཞི་དབུལ། དེ་ནས་ལག་གཡས་རྡོ་རྗེ་དང་བཅས་པའི་མཐེ་བོང་གིས་མཐེའུ་ཆུང་མནན་པ་རྩེ་གསུམ་གྱི་ཕྱག་རྒྱ་བཅས་ལ། ༀ་བཛྲ་ཨ་ན་ལ་མ་ཧཱ་བྷུ་ཏ་ཛྭ་ལ་ཡ་སརྦ་པཱ་པཱན་བྷསྨཱིན་ཀུ་རུ་སརྦ་དུཥྚཾ་ཧཱུྃ་ཕཊ། དྲི་ཤྱ་ཛཿཧཱུྃ་བྃ་ཧོཿས་མ་ཡ་སྟྭཾ། ས་མ་ཡ་ཧོཿཞེས་དམ་ལ་བཞག །ཛཿཧཱུྃ་བྃ་ཧོཿཡེ་ཤེས་པ། །དམ་ཚིག་པ་དང་དབྱེར་མེད་གྱུར། །སླར་ཡང་ཐུགས་ཀའི་ཧཱུྃ་འོད་ཀྱིས། །རིགས་ལྔ་འཁོར་བཅས་སྤྱན་དྲངས་ཏེ། །དབང་བསྐུར་སྐུ་གང་དྲི་མ་དག །ཆུ་ཞབས་སྤྱི་བོར་བརྟེན་པ་ལས། །རིན་འབྱུང་གིས་ནི་དབུ་བརྒྱན་གྱུར། །ༀ་ཨགྣ་ཡེ་ས་པ་རི་ཝཱ་ར་པུཥྤེ་པྲ་ཏཱིཙྪ་སྭཱ་ཧཱ། དེ་བཞིན་དུ། དྷཱུ་པེ། ཨཱ་ལོ་ཀེ།
གནྡེ། ནཻ་ཝི་དྱ། ཤབྡའི་བར་གྱིས་གདན་མཆོད་དབུལ། འཇིག་རྟེན་དབང་ཕྱུག་ཚངས་དབང་མགོན་གྱི་སྲས། །མེ་ལྷའི་རྒྱལ་པོ་ཊཱ་ཀྐིས་དབང་བསྐུར་བ། །ཤེས་རབ་མཆོག་གིས་ཉོན་མོངས་ཐམས་ཅད་བསྲེག །འཛིན་བྱེད་མེ་ལྷ་ཉིད་ལ་རྣམ་པར་འདུད། །ཅེས་བསྟོད། དགང་བླུགས་ཁ་ལ་ཧཱུྃ་ཡིག་གསལ། །མེ་ལྷ་ཅུང་ཟད་ཞལ་གདངས་བའི། །ལྗགས་ལ་རཾ་ཡིག་གིས་མཚན་པས། །བསྲེག་རྫས་བདུད་རྩི་བཞེས་པར་གྱུར། །ན་མ་ས་མནྟ་བུདྡྷཱ་ནཱཾ་ༀ་ཨགྣ་ཡེ་ཧ་བྱ་ཀ་བྱ་བཱ་ཧཱ་ནཱ་ཡ་ཨཱ་དི་བྱ། ཅེས་ལག་གཉིས་རྡོར་དྲིལ་དང་དགང་བླུགས་འཛིན་ཅིང་བྱང་ཆུབ་མཆོག་གི་ཕྱག་རྒྱས་མར་ཁུ་དགང་བླུགས་གསུམ་མམ་བདུན་བྱོན་ཟན་དུ་འབུལ་ཏེ། སྤེལ་ཚིག་ནི། བདག་ཅག་དཔོན་སློབ་འཁོར་བཅས་ཀྱི། །དམ་པའི་ཆོས་ལྡན་བསམ་སྦྱོར་དང་། །ཚེ་དང་བསོད་ནམས་དཔལ་འབྱོར་དང་། །ནོར་དང་ལོངས་སྤྱོད་སྙན་གྲགས་སོགས། །སརྦ་པུཥྚིཾ་ཀུ་རུ་ༀ། ཞེས་འདོད་དོན་གསོལ་ཞིང་སྔགས་ཚིག་རྣམས་བརྗོད་བཞིན་པས་ལག་གཉིས་རྡོར་དྲིལ་དང་བཅས་པས་རྡོ་རྗེ་ཁུ་ཚུར་ལས་མཛུབ་མོ་གཉིས་བརྐྱང་ནས་དགང་བླུགས་བཟུང་། གཡས་པས་བླུགས་གཟར་གྱིས་མར་ཁུ་གསུམ་མམ་བདུན་སོགས་དགང་གཟར་དུ་བླུགས་ཏེ་གང་བ་དང་། ལག་གཉིས་སྔར་བཅས་པའི་བྱང་ཆུབ་མཆོག་གི་ཕྱག་རྒྱ་དེ་ཁ་སྦྱར། བླུགས་གཟར་མར་ཁུས་གང་བ་དགང་གཟར་གྱི་སྟེང་དུ་འཛིན་པའམ་ཁ་སྦྱར་ལ་གྲུ་མོ་གཉིས་
པུས་མོ་གཉིས་ལས་མི་འདའ་བར་གཡས་སུ་བསྐོར་ཞིང་། མར་ཁུ་དགང་གཟར་གསུམ་མམ་བདུན་གྱིས་བྱོན་ཟན་འབུལ། མེ་པྲ་སྐབས་འདིར་ཁོ་ནར་བརྟག་པ་དང་འདི་ནས་བརྩམས་ཏེ་ཇི་སྲིད་ཐབ་ཀྱི་བུད་ཤིང་རྣམས་ནུས་པ་མ་རྫོགས་པ་དེ་སྲིད་དུ་བརྟག་པ་སྟེ་ལུགས་གཉིས་ལ་སྔ་མ་ལྟས་བཏགས་ལ། དེའི་ཚུལ་ནི། སྦྱིན་སྲེག་འོད་ཀྱི་སྙེ་མར། རབ་བསྔགས་དགེ་བའི་མེ་ཡི་འོད། །དཔལ་བེའུ་དང་ནི་རྔ་ཡབ་གདུགས། །རྒྱལ་མཚན་པདྨ་དྲིལ་བུ་དང་། །རྩེ་གསུམ་པ་དང་རལ་གྲི་ཉ། །བཀྲ་ཤིས་ཨིནྡྲ་ནི་ལའི་མདོག །རྡོ་རྗེ་དུང་ལ་སོགས་པ་དང་། །དགང་གཟར་བླུགས་གཟར་རྣམ་པ་དང་། །དཀར་དང་འཇའ་འདྲ་མདོག་སྡུག་དང་། །གཡས་སུ་འཁྱིལ་དང་ཤིན་ཏུ་སྣུམ། །བྱུ་རུ་དང་ནི་གསེར་མདོག་འདྲ། །དངུལ་དང་རིན་ཆེན་བཻཌཱུཪྱ། །ཉི་འོད་འབར་མཚུངས་དྲི་མ་མེད། །དུ་བ་མེད་ཅིང་དྲི་ཞིམ་པ། །མྲྀ་ཏངྒ་ཡི་སྒྲ་ལྡན་མཆོག །ཅེས་པ་རྣམས་ལྟས་དགེ་བར་ཤེས་པར་བྱས་ལ། འོན་ཏེ་མི་དགེ་བའི་མཚན་མ་ཡང་དེ་ཉིད་ལས། དུ་བ་དཀུ་ཞིང་མེ་སྟག་འཕྲོ། །ཀུན་ནས་ལྡང་ཞིང་སྒྲ་དང་བཅས། །མྱུར་དུ་ཆད་ཅིང་ཞེན་པ་དང་། །མདངས་རྩུབ་པ་ལ་ཤ་ལི་མདོག །དེ་བཞིན་བ་ལང་མགོ་འདྲ་དང་། །མི་རོའི་དྲི་དང་ཉ་ཡི་དྲི། །བོང་བུའི་དྲི་ཅན་བགེགས་ཡོད་ཡིན། །ཞེས་པ་རྣམས་ཀྱིས་མེ་པྲ་བརྟག །ངན་ན་བསང་ཆུ་གཏོར་ཞིང་ལས་སྔགས་དང་སུམྦྷ་ནིས་བགེགས་བསྐྲད། ཧ་བྱ་སོགས་བྱོན་ཟན་གྱི་སྐབས་ལྟར་མར་ཁུ་དགང་བླུགས་གསུམ་
མམ་བདུན་འབུལ་ལོ། །དེ་ནས་སྲེག་རྫས་དབུལ་ཏེ། ཡམ་ཤིང་རྣམས་བྱང་ཆུབ་ཀྱི་ཤིང་དུ་མོས་ལ་རྩེ་མོ་སྟེང་དུ་བསྟན་ལ་གཡས་པས་མཐེབ་སྲིན་ནམ་གུང་མཐེབ་ཀྱིས་དབུལ་ཞིང་། ཨ་ཨགྣ་ཡེ་ས་པ་རི་ཝཱ་ར་ༀ་བོ་དྷི་བྲྀཀྵ་ཡ་སྭཱ་ཧཱ། ཞེས་སྔགས་རེ་དང་ཡམ་ཤིང་རེ་བསྟུན་ཏེ་དབུལ་ཞིང་སྔགས་བཟླ་གྲོགས་ཡོད་ན་དུ་ཡོད་ཀྱི་གྲངས་དང་མཉམ་པའི་ཡམ་ཤིང་སྔགས་རེ་ལ་དབུལ། གྲངས་འཛིན་པ་པོས་ཀྱང་གྲངས་འཛིན་པ་སྟེ། དེང་སང་སྦྱིན་སྲེག་ལ་གྲངས་རྐུན་བྱེད་པའང་འདི་ནས་འཆུག་པ་ཡིན་པས་གྲངས་རྐུན་མི་བྱེད་ཅིང་ཚར་གསུམ་རེའམ་བདུན་རེའི་མཐར། ཨོཾ་བོ་དྷི་བྲྀཀྵ་ཡ་ཞེས་པའི་རྗེས་སུ། བདག་ཅག་དཔོན་སློབ་འཁོར་བཅས་ཀྱི། །གཟི་བརྗིད་ཕུན་སུམ་ཚོགས་པ་དང་། །དམ་པའི་ཆོས་ལྡན་བསམ་སྦྱོར་དང་། །འགྲོ་བའི་བདེ་སྐྱིད་རྒྱུ་བཅས་ཀུན། །སརྦ་པུཥྚིཾ་ཀུ་རུ་ༀ། ༀ་ཨགྣ་ཡེ་ས་པ་རི་ཝཱ་ར་ༀ་ཨགྣ་ཡེ་སྭཱ་ཧཱ། མར་ཁུ་དགང་བླུགས་ཀྱིས་དབུལ། བདག་ཅག་དཔོན་སློབ་འཁོར་བཅས་ཀྱི། །འབྱོར་པ་ཕུན་སུམ་ཚོགས་པ་དང་། །དམ་པའི་ཆོས་ལྡན་བསམ་སྦྱོར་དང་། །འགྲོ་བའི་བདེ་སྐྱིད་རྒྱུ་བཅས་ཀུན། སརྦ་པུཥྚིཾ་ཀུ་རུ་ༀ། ༀ་ཨགྣ་ཡེ་ས་པ་རི་ཝཱ་ར་ༀ་སརྦ་པཱ་པྃ་ད་ཧ་ན་བཛྲ་ཡ་སྭཱ་ཧཱ། ཞེས་ཏིལ་ནག་མཐེབ་སྲིན་ནམ་གུང་མཐེབ་ཀྱིས་དབུལ། བདག་ཅག་དཔོན་སློབ་འཁོར་བཅས་ཀྱི། །སྡིག་སྒྲིབ་ཞི་བྱེད་ལས་རྣམས་དང་། དམ་པའི་ཆོས་ལྡན་བསམ་སྦྱོར་
དང་། །འགྲོ་བའི་བདེ་སྐྱིད་རྒྱུ་བཅས་ཀུན། །སརྦ་པུཥྚིཾ་ཀུ་རུ་ༀ། ༀ་ཨགྣ་ཡེ་ས་པ་རི་ཝཱ་ར་ༀ་སརྦ་ཨརྠ་སིདྡྷི་ཡེ་སྭཱ་ཧཱ། ཡུངས་ཀར་ཏེ། བདག་ཅག་དཔོན་སློབ་འཁོར་བཅས་ཀྱི། །གདོན་བགེགས་ཞི་བྱེད་ལས་རྣམས་དང་། །དམ་པའི་ཆོས་ལྡན་བསམ་སྦྱོར་དང་། །འགྲོ་བའི་བདེ་སྐྱིད་རྒྱུ་བཅས་ཀུན། །སརྦ་པུཥྚིཾ་ཀུ་རུ་ༀ། ༀ་ཨགྣ་ཡེ་ས་པ་རེ་ཝཱ་ར་ༀ་སརྦ་སཾ་པ་དེ་སྭཱ་ཧཱ། ཟས་མཆོག་སྟེ། བདག་ཅག་དཔོན་སློབ་འཁོར་བཅས་ཀྱི། །བདེ་བ་ཕུན་སུམ་ཚོགས་པ་དང་། །དམ་པའི་ཆོས་ལྡན་བསམ་སྦྱོར་དང་། །འགྲོ་བའི་བདེ་སྐྱིད་རྒྱུ་བཅས་ཀུན། །སརྦ་པུཥྚིཾ་ཀུ་རུ་ༀ། ༀ་ཨགྣ་ཡེ་ས་པ་རེ་ཝཱ་ར་ༀ་སརྦ་སཾ་པ་དེ་སྭཱ་ཧཱ། ཞོ་སྟེ། བདག་ཅག་དཔོན་སློབ་འཁོར་བཅས་ཀུན། །ཤེས་རབ་ཕུན་སུམ་ཚོགས་པ་དང་། །དམ་པའི་ཆོས་ལྡན་བསམ་སྦྱོར་དང་། །འགྲོ་བའི་བདེ་སྐྱིད་རྒྱུ་བཅས་ཀུན། །སརྦ་པུཥྚིཾ་ཀུ་རུ་ༀ། ༀ་ཨགྣ་ཡེ་ས་པ་རི་ཝཱ་ར་ༀ་བཛྲ་པུཥྚ་ཡ་སྭཱ་ཧཱ། འབྲས་སོ་བ་སྟེ། བདག་ཅག་དཔོན་སློབ་འཁོར་བཅས་ཀྱི། །ཁྱིམ་གྱི་དཔལ་འབྱོར་རྒྱས་པ་དང་། དམ་པའི་ཆོས་ལྡན་བསམ་སྦྱོར་དང་། །འགྲོ་བའི་བདེ་སྐྱིད་རྒྱུ་བཅས་ཀུན། །སརྦ་པུཥྚིཾཀུ་རུ་ༀ། ༀ་ཨགྣ་ཡེ་ས་པ་རི་ཝཱ་ར་ཡ་བཛྲ་བི་ཛ་ཡ་སྭཱ་ཧཱ། སོ་བ་སྟེ། བདག་ཅག་དཔོན་སློབ་འཁོར་བཅས་ཀྱི། །
ནོར་དང་འབྲུ་རྣམས་རྒྱས་པ་དང་། །དམ་པའི་ཆོས་ལྡན་བསམ་སྦྱོར་དང་། །འགྲོ་བའི་བདེ་སྐྱིད་རྒྱུ་བཅས་ཀུན། །སརྦ་པུཥྚིཾ་ཀུ་རུ་ༀ། ༀ་ཨགྣེ་ཡེ་ས་པ་རི་ཝཱ་ར་ༀ་མ་ཧཱ་བེ་ག་ཡ་སྭཱ་ཧཱ། ནས་ཏེ། བདག་ཅག་དཔོན་སློབ་འཁོར་བཅས་ཀྱི། །ལུས་ཀྱི་ཤུགས་རྣམས་རྒྱས་པ་དང་། །དམ་པའི་ཆོས་ལྡན་བསམ་སྦྱོར་དང་། །འགྲོ་བའི་བདེ་སྐྱིད་རྒྱུ་བཅས་ཀུན། །སརྦ་པུཥྚིཾ་ཀུ་རུ་ༀ། ༀ་ཨགྣེ་ཡེ་ས་པ་རི་ཝཱ་ར་ༀ་མ་ཧཱ་བཱ་ལ་ཡ་སྭཱ་ཧཱ། སྲན་མ་སྟེ། བདག་ཅག་དཔོན་སློབ་འཁོར་བཅས་ཀྱི། །ལས་ཀྱི་སྟོབས་རྣམས་རྒྱས་པ་དང་། །དམ་པའི་ཆོས་ལྡན་བསམ་སྦྱོར་དང་། །འགྲོ་བའི་བདེ་སྐྱིད་རྒྱུ་བཅས་ཀུན། །སརྦ་པུཥྚིཾ་ཀུ་རུ་ༀ། ༀ་ཨགྣེ་ཡེ་ས་རི་ཝཱ་ར་ༀ་བཛྲ་གྷསྨ་རི་སྭཱ་ཧཱ། གྲོ་སྟེ། བདག་ཅག་དཔོན་འཁོར་བཅས་ཀྱི། །ལུས་ཀྱི་ནད་རྣམས་མེད་པ་དང་། །དམ་པའི་ཆོས་ལྡན་བསམ་སྦྱོར་དང་། །འགྲོ་བའི་བདེ་སྐྱིད་རྒྱུ་བཅས་ཀུན། །སརྦ་པུཥྚིཾ་ཀུ་རུ་ༀ། ༀ་ཨགྣེ་ཡེ་ས་པ་རི་ཝཱ་ར་ༀ་བཛྲ་ཨཱ་ཡུ་ཥེ་སྭཱ་ཧཱ། དཱུརྦ་སྟེ། བདག་ཅག་དཔོན་སློབ་འཁོར་བཅས་ཀྱི། །ཚེ་སྲོག་གོང་དུ་འཕེལ་བ་དང་། །དམ་པའི་ཆོས་ལྡན་བསམ་སྦྱོར་དང་། །འགྲོ་བའི་བདེ་སྐྱིད་རྒྱུ་བཅས་ཀུན། །སརྦ་པུཥྚིཾ་ཀུ་རུ་ༀ། ༀ་ཨགྣེ་ཡེ་ས་པ་རི་ཝཱ་ར་ༀ་ཨ་པྲ་ཏི་ཧ་ཏ་བཛྲ་ཡ་སྭཱ་ཧཱ། ཀུ་ཤ་སྟེ།
བདག་ཅག་དཔོན་སློབ་འཁོ་བཅས་ཀྱི། །མི་མཐུན་ཕྱོགས་རྣམས་སྲུང་བ་དང་། །དམ་པའི་ཆོས་ལྡན་བསམ་སྦྱོར་དང་། །འགྲོ་བའི་བདེ་སྐྱིད་རྒྱུ་བཅས་ཀུན། །སརྦ་པུཥྚིཾ་ཀུ་རུ་ༀ། ༀ་ཨགྣེ་ཡེ་ས་པ་རི་ཝཱ་ར་ༀ་བཛྲ་ཥེ་བཱ་ཡ་སྭཱ་ཧཱ། ཤིང་ཏོག་སྣ་ཚོགས་ཏེ། བདག་ཅག་དཔོན་སློབ་འཁོར་བཅས་ཀྱི། །རིགས་རྒྱུད་ཕུན་སུམ་ཚོགས་པ་དང་། །དམ་པའི་ཆོས་ལྡན་བསམ་སྦྱོར་དང་། །འགྲོ་བའི་བདེ་སྐྱིད་རྒྱུ་བཅས་ཀུན། །སརྦ་པུཥྚིཾ་ཀུ་རུ་ༀ། དེ་ཡང་སྡིག་པ་ཞི་བར་འདོད་ན་ཏིལ་ལྷག་པར་འབུལ་ཞིང་གཞན་རྣམས་གང་འབྱོར་རམ་མ་འབྱོར་ཀྱང་རུང་ངོ་། །དེ་བཞིན་དུ་ཚེ་རིང་བར་འདོད་ན་དཱུརྦ་འབུལ་བ་སོགས་ཀུན་ལ་ཤེས་པར་བྱ། མར་ཁུ་དང་ཡམ་ཤིང་ནི་ཐམས་ཅད་ལ་དགོས་སོ། །བདེ་མཆོག་སྡོམ་འབྱུང་སོགས་ལས་ནི། ཡམ་ཤིང་ནི་དཀྱིལ་འཁོར་ལའོ། །ཁུ་བའི་རྫས་རྣམས་ཞལ་དུའོ། །གོང་བུའི་རྫས་རྣམས་ནི་ཕྱག་ཏུའོ། །ཀུ་ཤ་ནི་གདན་དུའོ། །དཱུརྦ་དང་མེ་ཏོག་ནི་དབུ་ུལའོ། །ཞེས་འབྱུང་བ་ལྟར་བྱེད་པའང་ཡོད་དོ། །མེ་གསོ་བའི་ཕྱིར་བར་བར་དུ་མར་ཁུ་དགང་བླུགས་ཀྱིས་དབུལ་ལོ། །དེ་ཡང་སྡིག་པ་ཞི་བར་འདོད་ན་ཏིལ། ཚེ་རིང་བར་འདོད་ན་དཱུརྦ། བགེགས་ཞི་བར་འདོད་ན་ཡུངས་ཀར་སོགས་མང་བར་དབུལ། གྲངས་ཀྱང་གཙོ་བོར་དེ་ལ་སོགས་པ་ལྟར་སོ་སོའི་སྐབས་ཐོབ་དང་བསྟུན། མར་ཁུ་དང་ཡམ་ཤིང་ནི་མེད་ཀ་མེད་དོ། །དེ་ནས་མེ་ལྷའི་མཆོད་བསྟོད་ནི། གཙང་ཞིང་གཙང་མར་སྦྱར་བ་ཡི། །ལྷ་རྫས་དམ་པའི་
མེ་ཏོག་འདི། །དྲང་སྲོང་མེ་ལྷའི་ཚོགས་ལ་འབུལ། །བཞེས་ནས་རྒྱས་པའི་ཕྲིན་ལས་མཛོད། །ༀ་ཨགྣ་ཡེ་ས་པ་རི་ཝཱ་ར་པུཥྤེ་པྲ་ཏཱིཙྪ་སྭཱ་ཧཱ། གཙང་ཞིང་གཙང་མར་སྦྱར་བ་ཡི། །ལྷ་རྫས་དམ་པའི་བདུག་སྤོས་འདི། །དྲང་སྲོང་མེ་ལྷའི་ཚོགས་ལ་འབུལ། །བཞེས་ནས་རྒྱས་པའི་ཕྲིན་ལས་མཛོད། །ༀ་ཨགྷ་ཡེ་ས་པ་རི་ཝཱ་ར་དྷུ་པེ་པྲ་ཏཱིཙྪ་སྭཱ་ཧཱ། གཙང་ཞིང་གཙང་མར་སྦྱར་བ་ཡི། །ལྷ་རྫས་དམ་པའི་སྣང་གསལ་འདི། །དྲང་སྲོང་མེ་ལྷའི་ཚོགས་ལ་འབུལ། །བཞེས་ནས་རྒྱས་པའི་ཕྲིན་ལས་མཛོད། །ༀ་ཨགྣ་ཡེ་ས་པ་རི་ཝཱ་ར་ཨཱ་ཱལོ་ཀེ་པྲ་ཏཱིཙྪ་སྭཱ་ཧཱ། གཙང་ཞིང་གཙང་མར་སྦྱར་བ་ཡི། །ལྷ་རྫས་དམ་པའི་དྲི་ཆབ་འདི། །དྲང་སྲོང་མེ་ལྷའི་ཚོགས་ལ་འབུལ། །བཞེས་ནས་རྒྱས་པའི་ཕྲིན་ལས་མཛོད། །ༀ་ཨགྣ་ཡེ་ས་པ་རི་ཝཱ་ར་གནྡྷེ་པྲ་ཏཱིཙྪ་སྭཱ་ཧཱ། གཙང་ཞིང་གཙང་མར་སྦྱར་བ་ཡི། །ལྷ་རྫས་དམ་པའི་ཞལ་ཟས་འདི། །དྲང་སྲོང་མེ་ལྷའི་ཚོགས་ལ་འབུལ། །བཞེས་ནས་རྒྱས་པའི་ཕྲིན་ལས་མཛོད། །ༀ་ཨགྣ་ཡེ་ས་པ་རི་ཝཱ་ར་ནཻ་ཝི་དྱ་པྲ་ཏཱིཙྪ་སྭཱ་ཧཱ། གཙང་ཞིང་གཙང་མར་སྦྱར་བ་ཡི། །ལྷ་རྫས་དམ་པའི་རོལ་མོ་འདི། །དྲང་སྲོང་མེ་ལྷའི་ཚོགས་ལ་འབུལ། །བཞེས་ནས་རྒྱས་པའི་ཕྲིན་ལས་མཛོད། །ༀ་ཨགྣ་ཡེ་ས་པ་རི་ཝཱ་ར་ཤབྡ་པྲ་ཏཱིཙྪ་སྭཱ་ཧཱ། གཙང་ཞིང་གཙང་མར་སྦྱར་བ་ཡི། །ལྷ་རྫས་འཆི་མེད་བདུད་རྩི་འདི། །དྲང་
སྲོང་མེ་ལྷའི་ཚོགས་ལ་འབུལ། །བཞེས་ནས་རྒྱས་པའི་ཕྲིན་ལས་མཛོད། །ༀ་ཨགྣ་ཡེ་ས་པ་རི་ཝཱ་ར་པཉྩ་ཨ་མྲྀ་ཏ་པྲ་ཏཱིཙྪ་སྭཱ་ཧཱ། གཙང་ཞིང་གཙང་མར་སྦྱར་བ་ཡི། །ཟུང་འཇུག་བདེ་ཆེན་མཆོད་པ་འདི། །དྲང་སྲོང་མེ་ལྷའི་ཚོགས་ལ་འབུལ། །བཞེས་ནས་རྒྱས་པའི་ཕྲིན་ལས་མཛོད། །ༀ་ཨགྣ་ཡེ་ས་པ་རི་ཝཱ་ར་མ་ཏཾ་གི་པྲ་ཏཱིཙྪ་སྭཱ་ཧཱ། ཞེས་བརྗོད། འཇིག་རྟེན་དབང་ཕྱུག་ཚངས་དབང་མགོན་གྱི་སྲས། །མེ་ལྷའི་རྒྱལ་པོ་ཊཱཀྐིས་དབང་བསྐུར་བ། ཤེས་རབ་མཆོག་གིས་ཉོན་མོངས་ཐམས་ཅད་སྲེག །འཛིན་བྱེད་མེ་ལྷ་ཉིད་ལ་རྣམ་པར་འདུད། །ཅེས་པས་བསྟོད། དྲང་སྲོང་ཆེན་པོ་མེ་ལྷ་ཡིས། །སྔོན་གྱི་དམ་བཅས་མ་དོར་བར། །ལྷ་རྣམས་ཞལ་ནི་མེ་ཡིན་ཏེ། སྦྱིན་སྲེག་དེ་ནི་མེ་ལ་གནས། །ༀ་ཨགྣེ་ཡེ་སྭཱ་ཧཱ། ཞེས་མར་ཁུ་དགང་བླུགས་གསུམ་ཕུལ་ནས། ༀ་བཛྲ་ཀྲོ་དྷ་སོགས་ཀྱི་བསངས་ཆུས་མེ་དང་ཡོ་བྱད་རྣམས་བསངས་ལ། མེ་ལྷ་འཁོར་དང་བཅས་པ་རྣམས། །འོད་ཞུ་འབར་བའི་རྣམ་པར་གྱུར། །པར་བསམ་མོ། །གཉིས་པ་འཇིག་རྟེན་ལས་འདས་པའི་ཆོ་ག་ནི། མེ་ལྷའི་ལྟོ་བའམ་ཐུགས་ཀའམ་མེ་ལྷ་འབར་བའི་རྣམ་པར་གྱུར་པའི་དབུས་སུ་འཇིག་རྟེན་ལས་འདས་པའི་དཀྱིལ་འཁོར་བསྐྱེད་པ་སྟེ། ལུགས་གསུམ་ལས་ཕྱི་མ་ལྟར་བྱས་ཏེ། དེ་ཡི་ངང་ལས་སྲུང་འཁོར་དབུས། །གཞལ་མེད་ཁང་པ་
མཚན་རྫོགས་ཀྱི། །དབུས་སུ་སྣ་ཚོགས་པདྨ་དང་། །ཟླ་བའི་དཀྱིལ་འཁོར་ཉ་གང་སྟེང་། །ཏཱྃ་ཡིག་སེར་པོ་འོད་ཀྱིས་སེམས་ཅན་རྣམས། །འཕགས་མ་སྒྲོལ་མའི་གོ་འཕང་ཉིད་ལ་བཀོད། །སངས་རྒྱས་ཐམས་ཅད་རབ་ཏུ་མཉེས་བྱས་ཏེ། །འོད་ཟེར་ཚུར་འདུས་ཡོངས་སུ་གྱུར་པ་ལས། །རྗེ་བཙུན་བཅོམ་ལྡན་འདས་མ་སྒྲོལ་མ་ནི། །ཞལ་བཞི་སྐུ་དང་རྩ་ཞལ་གསེར་གྱི་མདོག །གཡས་དཀར་གཡོན་དམར་རྒྱབ་ཞལ་སྔོན་པོ་རྣམས། །ཡིད་འོང་ཞལ་འཛུམ་མདངས་ལྡན་ཕྱག་བརྒྱད་ཅན། །གཡས་ཀྱི་དང་པོས་རྒྱལ་མཚན་གཉིས་པ་ཡིས། །འཁོར་ལོ་གསུམ་པས་པདྨ་བཞི་པ་དུང་། །གཡོན་གྱི་དང་པོས་བུམ་པ་གཉིས་པ་ཡིས། །དཔལ་གྱི་བེའུ་དང་ནི་གསུམ་པ་གདུགས། །བཞི་པས་གསེར་ཉ་འཛིན་ཅིང་བཀྲ་ཤིས་སྩོལ། །ལྷ་རྫས་དར་གྱི་སྟོད་གཡོགས་སྨད་གཡོགས་མཛེས། །རིན་ཆེན་སྣ་ཚོགས་དུ་མས་དབུ་རྒྱན་དང་། །སྙན་རྒྱན་མགུལ་རྒྱན་ཕྱག་གདུབ་ཞབས་གདུབ་དང་། །དཔུང་རྒྱན་དོ་ཤལ་སོགས་ཀྱི་རྒྱན་སྤྲས་པ། །ཞབས་གཉིས་རོལ་པའི་སྟབས་བཞུགས་དཔྲལ་བར་ༀ། །མགྲིན་པར་ཨཱཿདང་ཐུགས་ཀར་ཧཱུྃ་དེ་ལས། འོད་ཟེར་འཕྲོས་པས་བསྒོམ་པ་དང་འདྲ་བའི། །ཡེ་ཤེས་སྤྱན་དྲངས་མཛྲ་ས་མཱ་ཛཿམ་ལུས་སེམས་ཅན་ཀུན་གྱི་མགོན་གྱུར་ཅིང་། །སོགས་དང་། སྟོང་གསུམ་ཀུན་དང་
མཉམ་པ་སོགས། པདྨ་ཀ་མ་ལ་ཡ་སྟྭཾ། ཐབ་ཀྱི་དབུས་སུ་པད་ཟླའི་གདན་ལ་བཞུགས་པར་གྱུར། མཆོད་བསྟོད་བརྗོད། ཛཿཧཱུྃ་བྃ་ཧོཿསླར་ཡང་ཐུགས་ཀ་ཡི། །ཏཱྃ་ལས་འོད་འཕྲོས་རིགས་ལྔ་འཁོར་དང་བཅས། །ནམ་མཁར་སྤྱན་དྲངས་བཛྲ་ས་མཱ་ཛཿམཆོད་བསྟོད་བྱ། ༀ་སརྦ་ཏ་ཐཱ་ག་ཏ་ཨབྟི་ཥིཉྩ་ཏུ་མཱཾ། གསོལ་བཏབ་དབང་བསྐུར་ཆུ་རྒྱུན་གྱིས་སྐུ་གང་། །དྲི་མ་དག་ཅིང་ཆུ་ལྷག་གྱེན་འཁྱིལ་བས། །འོད་དཔག་མེད་མགོན་མཆོག་གིས་དབུ་བརྒྱན་གྱུར། །དེ་ནས་བྱོན་ཟན་འབུལ་བ་ནི། དགང་བླུགས་ཁ་ལ་ཧཱུྃ་ཡིག་གསལ། །བཅོམ་ལྡན་འདས་མའི་ལྗགས་ལ་ཡང་། །ཏཱྃ་ཡིག་དག་གིས་མཚན་པ་ཡིས། །བསྲེག་རྫས་བདུད་རྩི་བཞེས་པར་གྱུར། །ༀ་ཏཱ་རེ་ཏུཏྟཱ་རེ་ཏུ་རེ་ཏཱྃ་སྭཱ་ཧཱ། ལན་བདུན་ནམ་གསུམ། སྤེལ་ཚིག་ནི། བདག་ཅག་དཔོན་སློབ་འཁོར་བཅས་ཀྱི། །དམ་པའི་ཆོས་ལྡན་བསམ་སྦྱོར་དང་། །ཚེ་དང་བསོད་ནམས་དཔལ་འབྱོར་དང་། །ནོར་དང་ལོངས་སྤྱོད་སྙན་གྲགས་སོགས། །སརྦ་པུཥྚིཾ་ཀུ་རུ་ༀ། ༀ་བཛྲ་ཀྲོ་དྷས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ༀ་ཡིག་ལས། །སོགས་ནས། སྥ་ར་ན་ཁཾ། ཞེས་པའི་བར་གྱིས་མཆོད་པ་བྱིན་གྱིས་བརླབས། ཕྱི་ནང་གསང་བ་དེ་ཁོ་ནའི། །མཆོད་ཡོན་ཞབས་བསིལ་ཞལ་བསིལ་བ། འཐོར་འཐུང་མེ་ཏོག་བདུག་
སྤོས་དང་། །སྣང་གསལ་དྲི་ཆབ་ཞལ་ཟས་དང་། །རོལ་མོའི་མཆོད་པ་རྒྱ་མཚོའི་སྤྲིན། །ཆོས་དབྱིངས་ཀུན་ཏུ་རྒྱས་འགེངས་པས། །བླ་མ་བཅོམ་ལྡན་འདས་མ་མཆོད། །ༀ་གུ་རུ་ཨཱཪྱ་ཏཱ་རེ་ཨརྒྷཾ་པཱདྱཾ་པུཥྤེ་དྷཱུཔེ་ཨཱ་ལོ་ཀེ་གནྡྷེ་ནཻ་ཝི་དྱ་ཤབྡ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། ཞིང་ཁམས་རྣམ་དག་རྡོ་རྗེའི་ས་གཞི་ལ། །རྡོ་རྗེའི་རི་རབ་ལ་སོགས་མཆོད་པའི་སྤྲིན། །རབ་འབྱམས་བསམ་ཡས་རྡོ་རྗེའི་རྒྱན་ཕྲེང་འབར། །རྡོ་རྗེའི་མཎྜལ་བླ་མེད་བཀོད་པ་འདི། །རྡོ་རྗེ་སྒྲོལ་མ་སངས་རྒྱས་ཀུན་ཡུམ་ལ། །མཆོག་ཏུ་དད་པས་ཀུན་ཏུ་བདག་འབུལ་ལོ། །ༀ་སརྦ་ཏ་ཐཱ་ག་ཏ་ཨཱཪྱ་ཏཱ་རེ་ས་པ་རི་ཝཱ་ར་མཎྜལ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། བསྟོད་པ་དང་འདོད་གསོལ་སྦྲགས་མ་ནི། འཕགས་མ་སྒྲོལ་མ་དབང་ཕྱུག་མ། །ཆོས་ཉིད་དབྱིངས་ལས་སྐུ་ཕྱུང་ལ། །སྲིད་གསུམ་འགྲོ་ལ་ཐུགས་རྗེས་བཟུང་། །མ་ལྟར་བྱམས་མཛད་ལྷ་མོ་ཁྱོད། །ཚེ་རབས་གོང་ནས་བདག་གི་ལྷ། །བདག་ཉིད་སྒོ་གསུམ་དང་བ་ཡིས། །ལྷ་མོ་ཁྱོད་ལ་ཕྱག་འཚལ་ལོ། །བཅོམ་ལྡན་འདས་མ་ཐུགས་རྗེ་ཅན། །གསེར་གྱི་མདོག་ཅན་ཡིད་འོང་མས། །ཉོན་མོངས་གདུང་བས་ཉམ་ཐག་པའི། །མི་བཟད་ཚ་གདུང་བསལ་དུ་གསོལ། །པདྨའི་ཞབས་གདན་དཔའ་གཅིག་མོ། །ཉི་མ་འབུམ་གྱི་བཟི་བརྗིད་ཅན། །མ་རིག་མུན་པར་
རབ་འཐུམས་པའི། །མི་ཤེས་དྲྭ་བ་བཅད་དུ་གསོལ། །དཔལ་ལྡན་མ་གཅིག་ལྷ་ཡི་ལྷ། །རིན་ཆེན་དུ་མའི་དོ་ཤལ་ཅན། །མཚན་དང་དཔེ་བྱད་དཔལ་འབར་མ། །འཕགས་མ་སྒྲོལ་མ་ཁྱོད་ལ་འདུད། །བདག་ནི་ཐོག་མེད་དུས་རིང་ནས། །ལས་ཀྱི་རླུང་གིས་རབ་བདས་ཤིང་། །ངན་འགྲོ་མུ་མཐའ་མེད་འཁྱམས་ཏེ། །བློ་ཡིད་མུན་པས་བསྒྲིབ་ལགས་ན། །ད་ནི་འཕགས་མ་ཐུགས་རྗེ་ཅན། །བདག་ཅག་རྣམས་ཀྱི་མིག་མཛོད་ལ། །ཡང་ཡེ་དེ་འདྲའི་སྡུག་བསྔལ་ལས། །སྐྱོབ་པར་མཛོད་ཅིག་སྐྱབས་གཅིག་མོ། །དེང་ནས་བརྩམས་ཏེ་དུས་ཀུན་ཏུ། །གང་དུ་སྐྱེ་དང་སྐྱེ་བ་དེར། །མ་གཅིག་ཁྱེད་དང་མཇལ་བར་ཤོག །ཅེས་བྱིན་རླབས་ཆེ་བའི་ཆེད་དུ་འབྲོམ་གྱི་གསུངས་པ་དེ་ལྟར་བརྗོད་ནས་བསྲེག་རྫས་འབུལ་བ་ནི། ༀ་ཏཱ་རེ་ཏུཏྟཱ་རེ་ཏུ་རེ་ཏཱྃ་སྭཱ་ཧཱ། ༀ་བོ་བྷི་བྲིཀྵ་ཡེ་སྭཱ་ཧཱ། ཞེས་རེ་དང་ཡམ་ཤིང་རེ་བསྟུན་ལ་འབུལ། ཟླ་གྲོགས་ཀྱི་གྲངས་དང་བསྟུན་ནས་འབུལ་ཞིང་། གྲངས་རྐུན་མི་བྱེད་པར་གྲངས་འཛིན་པ་སོགས་གོང་འཇིག་རྟེན་པའི་སྐབས་ལྟར་བྱ་ཞིང་བཟླས་པའི་ཁ་སྐོང་གི་གྲངས་གསོག་པའང་འདི་བཞིན་གསོག་དགོས་སོ། །དེའི་མཐར། དྷྲྀ་ཀྵ་ཡ། བདག་ཅག་དཔོན་སློབ་འཁོར་བཅས་ཀྱི། །གཟི་བརྗིད་ཕུན་སུམ་ཚོགས་པ་དང་། །དམ་པའི་ཆོས་ལྡན་བསམ་སྦྱོར་དང་། །འགྲོ་བའི་བདེ་སྐྱིད་རྒྱུ་བཅས་ཀུན། །སརྦ་པུཥྚིཾ་ཀུ་རུ་ༀ།
ༀ་ཏཱ་རེ་ཏུཏྟཱ་རེ་ཏུ་རེ་ཏཱྃ་སྭཱ་ཧཱ། ༀ་ཨགྣ་ཡེ་སྭཱ་ཧཱ། ཞེས་མར་ཁུ་དགང་བླུགས་ཀྱིས་དབུལ། བདག་ཅག་དཔོན་སློབ་འཁོར་བཅས་ཀྱི། །འབྱོར་བ་ཕུན་སུམ་ཚོགས་པ་དང་། །དམ་པའི་ཆོས་ལྡན་བསམ་སྦྱོར་དང་། །འགྲོ་བའི་བདེ་སྐྱིད་རྒྱུ་བཅས་ཀུན། །སརྦ་པུཥྚིཾ་ཀུ་རུ་ༀ། ༀ་ཏཱ་རེ་ཏུཏྟཱ་རེ་ཏུ་རེ་ཏཱྃ་སྭཱ་ཧཱ། ༀ་སརྦ་པཱ་པཾ་ད་ཧ་ན་བཛྲ་ཡ་སྭཱ་ཧཱ། ཞེས་ཏིལ་ནག་མཐེབ་སྲིན་གྱིས་དབུལ། བདག་ཅག་དཔོན་སློབ་འཁོར་བཅས་ཀྱི། །སྡིག་སྒྲིབ་ཞི་བྱེད་ལས་རྣམས་དང་། །དམ་པའི་ཆོས་ལྡན་བསམ་སྤྱོར་དང་། །འགྲོ་བའི་བདེ་སྐྱིད་རྒྱུ་བཅས་ཀུན། །སརྦ་པུཥྚིཾ་ཀུ་རུ་ༀ། ༀ་ཏཱ་རེ་ཏུཏྟཱ་རེ་ཏུ་རེ་ཏཱྃ་སྭཱ་ཧཱ། ༀ་སརྦ་ཨརྠ་སིདྡྷ་ཡེ་སྭཱ་ཧཱ། ཡུངས་ཀར་ཏེ། བདག་ཅག་དཔོན་སློབ་འཁོར་བཅས་ཀྱི། །གདོན་བགེགས་ཞི་བྱེད་ལས་རྣམས་དང་། །དམ་པའི་ཆོས་ལྡན་བསམ་སྦྱོར་དང་། །འགྲོ་བའི་བདེ་སྐྱིད་རྒྱུ་བཅས་ཀུན། །སརྦ་པུཥྚིཾ་ཀུ་རུ་ༀ། ༀ་ཏཱ་རེ་ཏུཏྟཱ་རེ་ཏུ་རེ་ཏཱྃ་སྭཱ་ཧཱ། ༀ་སརྦ་སམྦ་དེ་སྭཱ་ཧཱ། ཟས་མཆོག་སྟེ། བདག་ཅག་དཔོན་སློབ་འཁོ་བཅས་ཀྱི། །བདེ་བ་ཕུན་སུམ་ཚོགས་པ་དང་། །དམ་པའི་ཆོས་ལྡན་བསམ་སྦྱོར་དང་། །འགྲོ་བའི་བདེ་སྐྱིད་རྒྱུ་བཅས་ཀུན། །སརྦ་པུཥྚིཾ་ཀུ་རུ་ༀ། ༀ་ཏཱ་རེ་ཏུཏྟཱ་རེ་ཏུ་རེ་ཏཱྃ་སྭཱ་ཧཱ། ༀ་སརྦ་སམྤ་དེ་སྭཱ་ཧཱ། ཞོ་སྟེ། བདག་ཅག་དཔོན་སློབ་འཁོར་བཅས་ཀྱི། །ཤེས་རབ་ཕུན་སུམ་ཚོགས་པ་དང་། །དམ་པའི་ཆོས་
ལྡན་བསམ་སྤྱོར་དང་། །འགྲོ་བའི་བདེ་སྐྱིད་རྒྱུ་བཅས་ཀུན། །སརྦ་པུཥྚིཾ་ཀུ་རུ་ༀ། ༀ་ཏཱ་རེ་ཏུཏྟཱ་རེ་ཏུ་རེ་ཏཱྃ་སྭཱ་ཧཱ། ༀ་བཛྲ་པུཥྚ་ཡེ་སྭཱ་ཧཱ། འབྲས་སོ་བ་སྟེ། བདག་ཅག་དཔོན་སློབ་འཁོར་བཅས་ཀྱི། །ཁྱིམ་གྱི་དཔལ་འབྱོར་རྒྱས་པ་དང་། །དམ་པའི་ཆོས་ལྡན་བསམ་སྦྱོར་དང་། །འགྲོ་བའི་བདེ་སྐྱིད་རྒྱུ་བཅས་ཀུན། །སརྦ་པུཥྚིཾ་ཀུ་རུ་ུༀ། ༀ་ཏཱ་རེ་ཏུཏྟཱ་རེ་ཏུ་རེ་ཏཱྃ་སྭཱ་ཧཱ། ༀ་བཛྲ་བཱི་ཛ་ཡ་སྭཱ་ཧཱ། སོ་བ་སྟེ། བདག་ཅག་དཔོན་སློབ་འཁོར་བཅས་ཀྱི། །ནོར་དང་འབྲུ་རྣམས་རྒྱས་པ་དང་། །དམ་པའི་ཆོས་ལྡན་བསམ་སྦྱོར་དང་། །འགྲོ་བའི་བདེ་སྐྱིད་རྒྱུ་བཅས་ཀུན། །སརྦ་པུཥྚིཾ་ཀུ་རུ་ༀ། ༀ་ཏཱ་རེ་ཏུཏྟཱ་ཏུ་རེ་ཏཱྃ་སྭཱ་ཧཱ། ༀ་མ་ཧཱ་བེ་ག་ཡ་སྭཱ་ཧཱ། ནས་ཏེ། བདག་ཅག་དཔོན་སློབ་འཁོར་བཅས་ཀྱི། །ལུས་ཀྱི་ཤུགས་རྣམས་རྒྱས་པ་དང་། །དམ་པའི་ཆོས་ལྡན་བསམ་སྦྱོར་དང་། །འགྲོ་བའི་བདེ་སྐྱིད་རྒྱུ་བཅས་ཀུན། སརྦ་པུཥྚིཾ་ཀུ་རུ་ༀ། ༀ་ཏཱ་རེ་ཏུཏྟཱ་ཏ་རེ་ཏུ་རེ་ཏཱྃ་སྭཱ་ཧཱ། ༀ་མ་ཧཱ་བཱ་ལ་སྭཱ་ཧཱ། སྲན་མ་སྟེ། བདག་ཅག་དཔོན་སློབ་འཁོར་བཅས་ཀྱི། །ལུས་ཀྱི་སྟོབས་རྣམས་རྒྱས་པ་དང་། །དམ་པའི་ཆོས་ལྡན་བསམ་སྦྱོར་དང་། །འགྲོ་བའི་བདེ་སྐྱིད་རྒྱུ་བཅས་ཀུན། །སརྦ་པུཥྚིཾ་ཀུ་རུ་ༀ། ༀ་ཏཱ་རེ་ཏུཏྟཱརེ་ཏུ་རེ་ཏཱྃ་སྭཱ་ཧཱ། ༀ་བཛྲ་གྷསྨ་རེ་སྭཱ་ཧཱ། གྲོ་སྟེ། བདག་ཅག་དཔོན་སློབ་འཁོར་བཅས་ཀྱི། །ལུས་ཀྱི་ནད་རྣམས་མེད་པ་དང་། །
དམ་པའི་ཆོས་ལྡན་བསམ་སྦྱོར་དང་། །འགྲོ་བའི་བདེ་སྐྱིད་རྒྱུ་བཅས་ཀུན། །སརྦ་པུཥྚིཾ་ཀུ་རུ་ༀ། ༀ་ཏཱ་རེ་ཏུཏྟཱ་རེ་ཏུ་རེ་ཏཱྃ་སྭཱ་ཧཱ། ༀ་བཛྲ་ཨཱ་ཡུ་ཥེ་སྭཱ་ཧཱ། དཱུརྦ་སྟེ། བདག་ཅག་དཔོན་སློབ་འཁོར་བཅས་ཀྱི། །ཚེ་སྲོག་གོང་དུ་འཕེལ་བ་དང་། །དམ་པའི་ཆོས་ལྡན་བསམ་སྦྱོར་དང་། །འགྲོ་བའི་བདེ་སྐྱིད་རྒྱུ་བཅས་ཀུན། །སརྦ་པུཥྚིཾ་ཀུ་རུ་ༀ། ༀ་ཏཱ་རེ་ཏུཏྟཱ་རེ་ཏུ་རེ་ཏཱྃ་སྭཱ་ཧཱ། ༀ་ཨ་པྲ་ཏི་ཧ་ཏ་བཛྲ་ཡེ་སྭཱ་ཧཱ། ཀུ་ཤ་སྟེ། བདག་ཅག་དཔོན་སློབ་འཁོར་བཅས་ཀྱི། །མི་མཐུན་ཕྱོགས་རྣམས་སྲུང་བ་དང་། །དམ་པའི་ཆོས་ལྡན་བསམ་སྦྱོར་དང་། །འགྲོ་བའི་བདེ་སྐྱིད་རྒྱུ་བཅས་ཀུན། །སརྦ་པུཥྚིཾ་ཀུ་རུ་ༀ། ༀ་ཏཱ་རེ་ཏུཏྟཱ་རེ་ཏུ་རེ་ཏཱྃ་སྭཱ་ཧཱ། ༀ་བཛྲ་ཥཱི་བཱ་ཡ་སྭཱ་ཧཱ། ཞེས་ཤིང་ཏོག་སྣ་ཚོགས་ཏེ། བདག་ཅག་དཔོན་སློབ་འཁོ་བཅས་ཀྱི། །རིགས་རྒྱུད་ཕུན་སུམ་ཚོགས་པ་དང་། །དམ་པའི་ཆོས་ལྡན་བསམ་སྦྱོར་དང་། །འགྲོ་བའི་བདེ་སྐྱིད་རྒྱུ་བཅས་ཀུན། །སརྦ་པུཥྚིཾ་ཀུ་རུ་ༀ། དེ་ཡང་སྡིག་པ་ཞི་བར་འདོད་ན་ཏིལ་ལྷག་པར་དབུལ་ཞིང་། གཞན་རྣམས་གང་འབྱོར་རམ། མ་འབྱོར་ཀྱང་རུང་ལ། དེ་བཞིན་དུ་ཚེ་རིང་བར་འདོད་ན་དཱུརྦ་སོགས་ཀུན་ལ་ཤེས་པར་བྱ། མར་ཁུ་དང་ཡམ་ཤིང་ནི་མེད་ཀ་མེད་དོ། །དེ་ནས་ན་བཟའ་དང་མེ་ཏོག་བདུག་སྤོས་སོགས་དབུལ་ཚིག་འདི་བཞིན་བྱ། ན་བཟའ་ཕལ་ཆེར་ན་བཟའ་བླ་བྲེ་དང་། །ན་བཟའ་བཀོད་པའི་འོད་ཟེར་རབ་བཀྱེ་ཞིང་། །ན་བཟའ་སྣ་ཚོགས་རབ་ཏུ་བཀྲམ་
བྱས་ནས། །རྒྱལ་བ་བདག་ཉིད་ཆེན་པོ་དེ་དག་མཆོད། །ༀ་ཨཱཪྱ་ཏཱ་རེ་གུ་རུ་བུདྡྷ་བོ་དྷི་ས་ཏྭ་ས་པ་རི་ཝཱ་རེ་བྷྱ། བཛྲ་སྤཪྴེ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། ཞེས་པ་དང་། དེ་བཞིན་དུ་སྦྱར་ཏེ། མེ་ཏོག་ཕལ་ཆེར༴པུཥྤེ། བདུག་སྤོས་ཕལ་ཆེར༴དྷཱུ་པེ༴རྣམས་ཀྱིས་དབུལ་ཞིང་། རིན་པོ་ཆེ་དང་སྨན་སོགས་ཀྱང་སྙིང་པོའི་མཇུག་ཏུ། ༀ་ཨཱཿཧཱུྃ་བཏགས་ལ་ཕུལ། ཁྲུས་རས་དང་གོས་ཟུང་ཡང་བཤམས་གསུངས་པའི་རིགས་པས་ཁྲུས་བྱེད་པར་སྤྲོ་ན། ཇི་ལྟར་བལྟམས་པ་སོགས། ཕྱི་བ་ནི། དེ་དག་སྐུ་ུལ་སོགས། འདི་ནི་ཁྲུས་མཆོག་སོགས། དེ་དག་སྐུ་ལ་སོགས། རྒྱལ་བའི་སྐུ་གསུང་ཐུགས་སོགས། དེ་དག་སྐུ་ལ་སོགས། ལྷག་བསམ་སོགས། སྣ་ཚོགས་དབང་པོའི་སོགས། སྲབ་འཇམ་སོགས། ཞེས་ཁྲུས་ཀྱིས་གོས་ཟུང་དབུལ་བ་སོགས་བྱའོ། །མི་སྤྲོ་ན་མ་བྱས་ཀྱང་ཆད་སྐྱོན་མེད། དེ་ནས་མཆོད་རྫས་རྣམས། བཛྲ་ཀྲོ་དྷས་བསངས། སྭཱ་བྷཱ་ཝས་སྦྱངས། སྟོང་པའི་ངང་ལས་ༀ་ཡིག་ལས། །འོག་མ་མཆོད་པ་བྱིན་རླབས་ནས་བཟུང་གོང་བཞིན་མཆོད་བསྟོད་ཚར་རྗེས། གཏོར་འབུལ་ནི། བཛྲ་ཀྲོ་དྷས་བསངས། སཱ་བྷ་ཝས་སྦྱངས། སྟོང་པའི་ངང་ལས་ཨོཾ་ཡིག་ལས། རིན་ཆེན་སྣོད་དུ་ༀ་ཨཱཿཧཱུྃ། འོད་ཞུ་ལྷ་རྫས་ལས་གྲུབ་པའི། །གཏོར་མ་ཕུན་སུམ་ཚོགས་པར་གྱུར། །ༀ་ཨཱཿཧཱུྃ། མདུན་གྱི་རྗེ་བཙུན་སྒྲོལ་མ་ཡི། །ལྷ་ཚོགས་དགྱེས་
བཞིན་བཞུགས་པ་རྣམས། །ལྗགས་ཀྱི་འོད་ཟེར་སྦུ་གུ་ཡིས། །གཏོར་མ་གསོལ་བས་དགྱེས་སྐྱེད་གྱུར། །སྙིང་པོའི་མཐར། ཨི་དཾ་བ་ལིངྟ་ཁ་ཁ་ཁཱ་ཧི་ཁཱ་ཧི། ཞེས་ལན་གསུམ། བཅོམ་ལྡན་འཁོར་དང་བཅས་རྣམས་ཀྱིས། །མཆོད་སྦྱིན་གཏོར་མ་འདི་བཞེས་ལ། །ཞེས་པ་ནས། ཡིད་ལ་འདོད་པ་ཀུན་འགྲུབ་མཛོད། །ཅེས་སོགས་ཀྱིས་ཕྲིན་ལས་བཅོལ། འདོད་དོན་གསོལ་བ་ནི། སྙིང་པོ་གསུམ་མམ་བདུན་གྱིས་མར་ཁུ་དགང་བླུགས་གསུམ་མམ་བདུན་དབུལ། ཐལ་མོ་སྦྱར་ལ། ལྷག་པའི་ལྷ་མཆོག་བཅོམ་ལྡན་འདས། །འཁོར་བཅས་བདག་ལ་དགོངས་སུ་གསོལ། །བདག་ཅག་དཔོན་སློབ་འཁོར་བཅས་ཀྱི། །དམ་པའི་ཆོས་ལྡན་བསམ་སྦྱོར་དང་། །འགྲོ་བའི་བདེ་སྐྱིད་རྒྱུ་བཅས་ཀུན། །ཟླ་བ་ཡར་གྱི་ངོ་བཞིན་དུ། །འཕེལ་ཞིང་རྒྱས་པར་མཛད་དུ་གསོལ། །ཞེས་གསོལ་བ་གདབ་པོ། །མདུན་བསྐྱེད་ཀྱི་ཐུགས་ཀ་ནས་འོད་ཟེར་གྱིས་འདོད་དགུའི་ཆར་བབ་པས་ཚེ་དང་བསོད་ནམས་དཔལ་དང་གཟི་བྱིན་རྒྱས་པར་བསྒོམས། དེ་ནས་གཏང་རག་གི་མཆོད་བསྟོད་ནི། ༀ་གུ་རུ་ཨཱཪྱ་ཏཱ་རེ་ཨརྒྷཾ་པཱ་དྱཾ། ནས། ཤབྡ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། བར་གྱིས་མཆོད་ནས། ཞིང་ཁམས་ཐམས་ཅད་ཡོངས་སུ་དག་པ་ལ། །སོགས་ཀྱིས་བསྟོད། ༀ་བཛྲ་ས་ཏྭ་ས་མ་ཡ་སོགས་ཡི་གེ་བརྒྱ་པ་བརྗོད། མ་
འབྱོར་པ་དང་སོགས་ཀྱིས་ནོངས་པ་བཤགས་ནས། གཤེགས་གསོལ་གྱི་སྐབས་སུ། ༀ་གུ་རུ་ཨཱཪྱ་ཏཱ་རེ་ཨཉྩ་མཱ་ནཾ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ་སྭཱ་ཧཱ། དེ་བཞིན་ཐོག་མཐའ་འདྲ་བར། པྲོཀྵ་ཎཾ་ཞེས་ཞབས་བསིལ་དང་འཐོར་འཐུང་དབུལ་ལ་མཆོད་ཡོན་སྦྲེང་བཞིན་པས་ཡིག་བརྒྱ་བརྗོད། ༀ། ཁྱོད་ཀྱི་སེམས་ཅན་དོན་ཀུན་མཛོད། །སོགས་དང་། བཛྲ་མུཿཡེ་ཤེས་པ་རྣམས་རང་གནས་གཤེགས། །དམ་ཚིག་པ་རྣམས་རང་ལ་ཐིམ། །གཤེགས་གསོལ་མི་བྱེད་པ་དང་རྟེན་ཡོད་ན། བདག་དང་འགྲོ་ལ་ཐུགས་བརྩེའི་ཕྱིར། །ཞེས་པ་ནས། དེ་སྲིད་བཅོམ་ལྡན་བཞུགས་སུ་གསོལ། །ཡེ་ཤེས་སེམས་དཔའ་རྟེན་མཆོག་འདིར། །རྣམ་པ་ཀུན་ཏུ་མི་འབྲལ་ཞིང་། །བདག་སོགས་འགྲོ་བ་ཐམས་ཅད་ལ། །རྟག་པར་ཐུགས་རྗེས་བཟུང་དུ་གསོལ། །རྟེན་འབྲེལ་སྙིང་པོ་སོགས་དང་། ༀ་སུ་པྲ་ཏིཥྛ་བཛྲ་ཡེ་སྭཱ་ཧཱ། ཞེས་བརྗོད་ཅིང་མེ་ཏོག་འཐོར། སྤྲུལ་པའི་དམ་ཚིག་པ་རྣམས་རང་གི་སྙིང་གའི་གནས་སུ་ཐིམ་པར་གྱུར། ༀ་ཨཱཿཧཱུྃ། གསུམ་པ་རྗེས་ཀྱི་ཆོ་ག་ནི། ༀ་ཨགྣ་ཡ་ཛྭ་ལ་རཾ། ཞེས་པས་མར་ཁུ་དགང་བླུགས་གསུམ་མམ་བདུན་ཕུལ་ནས། སླར་ཡང་མེ་ལྷ་འཁོར་བཅས་རྣམས། །
འབར་བའི་རྣམ་པ་ལས་བཞེངས་ཏེ། །དྲང་སྲོང་དག་གི་ཆ་བྱད་ཅན། །གཟི་བརྗིད་ཕུན་སུམ་ཚོགས་པར་གྱུར། །པར་བསམས་ལ། སྲེག་རྫས་ལྷག་མ་གང་ཡོད་གྲངས་ཚད་མི་འཛིན་པར་གོང་འཇིག་རྟེན་པའི་སྐབས་ལྟར་སོར་བཞག་འབུལ་ཞིང་འདོན་དགོས་པས། ༀ་ཨགྣ་ཡེ་ས་པ་རི་ཝཱ་ར་ༀ་བོདྷི་བྲིཀྵ་ཡ་སྭཱ་ཧཱ། ཡམ་ཤིང་སྟེ། བདག་ཅག་དཔོན་སློབ་འཁོར་བཅས་ཀྱི། །ཞེས་པ་ནས་ཤིང་ཐོག་ཚང་བའི་བར་བརྗོད། ཁྲུས་གསོལ་སྤྲོ་ན། ཇི་ལྟར་བལྟམས་པ་སོགས་ནས། ༀ་བཛྲ་ཝཱསྟྲཱ་སོགས་ཀྱི་བར་འཇིག་རྟེན་ལས་འདས་པའི་སྐབས་ལྟར་དང་། མཆོད་བསྟོད་ནི། གཙང་ཞིང་གཙང་མར་སྦྱར་བ་ཡི། །ལྷ་རྫས་དམ་པའི་མེ་ཏོག་འདི། །དྲང་སྲོང་མེ་ལྷའི་ཚོགས་ལ་འབུལ། །བཞེས་ནས་རྒྱས་པའི་ཕྲིན་ལས་མཛོད། །ༀ་ཨགྣ་ཡེ་ས་པ་རི་ཝཱ་ར་པུཥྤེ་པྲ་ཏཱིཙྪ་སྭཱ་ཧཱ། ཞེས་པ་ནས། ཤབྡ་པྲ་ཏཱིཙྪ་སྭཱ་ཧཱ། ཞེས་པའི་བར་གྱིས་མཆོད། འཇིག་རྟེན་དབང་ཕྱུག་ཚངས་དབང་མགོན་གྱི་སྲས། །སོགས་ཀྱིས་བསྟོད། མེ་ལྷའི་གཏོར་མ། ཨ་ཀཱ་རོས་བྱིན་གྱིས་བརླབས་ཏེ། དགང་བླུགས་བཟུང་ལ། ༀ་ཨགྣ་ཡེ་ས་པ་རི་ཝཱ་ར་ཨི་དཾ་བ་ལིངྟ་ཁ་ཁ་ཁཱ་ཧི་ཁཱ་ཧི། ཞེས་ལན་གསུམ་བརྗོད་བཞིན་པས་ཐབ་ཁུང་དུ་འབུལ། མེ་སྟེ་བསྲེག་བྱ་ཟ་བའི་ལྷ། །དྲང་སྲོང་རྒྱལ་པོ་གདོན་གྱི་བདག །ཤར་ལྷོ་མེ་ལྷའི་ཚོགས་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །མཆོད་སྦྱིན་གཏོར་མ་འདི་བཞེས་ལ། །ཞེས་པ་ནས། ཡིད་ལ་འདོད་པ་
ཀུན་འགྲུབ་མཛོད། །ཅེས་པའི་བར་གྱིས་ཕྲིན་ལས་བཅོལ། འདོད་དོན་གསོལ་བ་ནི་ཐལ་མོ་སྦྱར་ཏེ། དྲང་སྲོང་ཆེན་པོ་མེ་ཡི་ལྷ། །འཁོར་བཅས་བདག་ལ་དགོངས་སུ་གསོལ། །བདག་ཅག་དཔོན་སློབ་འཁོར་བཅས་ཀྱི། །དམ་པའི་ཆོས་ལྡན་བསམ་སྦྱོར་དང་། །འགྲོ་བའི་བདེ་སྐྱིད་རྒྱུ་བཅས་ཀུན། །ཟླ་བ་ཡར་གྱི་ངོ་བཞིན་དུ། །འཕེལ་ཞིང་རྒྱས་པར་མཛད་དུ་གསོལ། །དེ་ནས་ཡིག་བརྒྱ་བརྗོད་ལ། མ་འབྱོར་བ་དང་ཉམས་པ་དང་། །སོགས་ཀྱིས་བཟོད་པར་གསོལ་ལ། གཤེགས་གསོལ་ནི། ༀ་ཨགྣ་ཡེ་ས་པར་རི་ཝཱ་ར་ཨཉྩ་མཱ་ཎཾ་པྲ་ཏཱིཙྪ་སྭཱ་ཧཱ། ཐོག་མཐའ་འདྲ་བར། པྲོ་ཀྵ་ཎཾ་ཞེས་བརྗོད། ཡིག་བརྒྱ་བརྗོད་བཞིན་པས་མཆོད་ཡོན་སྦྲེང་སྟེ་གཤེགས་གསོལ་གྱི་དྲིལ་སྟབས་དང་བཅས་པས། བདག་གི་དོན་དང་གཞན་གྱི་དོན། །བྱིན་ཟ་ཁྱོད་ཀྱིས་བསྒྲུབ་ཀྱི་གཤེགས། །ཇི་བཞིན་དུས་སུ་སླར་འབྱོན་ཏེ། །བདག་གི་དངོས་གྲུབ་ཐམས་ཅད་སྒྲུབས། །ༀ་ཨགྣ་ཡེ་ས་པ་རི་ཝཱ་ར་བཛྲ་མུཿཡེ་ཤེས་མེ་ལྷ་ཤར་ལྷོར་གཤེགས། །དམ་ཚིག་པ་རྣམས་སྙིང་གར་ཐིམ། །དེ་ནས་བསྔོ་བ་སྨོན་ལམ་བྱས། ངག་གྲོལ། ལྷའི་ང་རྒྱལ་གྱིས་མཐུན་མཚམས་ཀྱི་བྱ་བ་ལ་འཇུག །ལོང་ཡོད་ན་ཐབ་ཀྱི་མེ་མི་བསྒུལ་བར་བཞག །ལོང་མེད་ན་འོ་མ་དང་དྲི་བཟང་གི་ཆུས་མེ་མཐའ་ནས་ཞི་བར་བྱས་ལ་རྡོ་རྗེ་བསྡུ་བའི་ཕྱག་རྒྱས་བསྡུས་ཏེ་རྒྱ་མཚོར་འབབས་པའི་ཆུ་བོར་འདོར་བ་སོགས་ལས་ཀྱི་རྗེས་མི་མངོན་པར་བཀྲ་ཤིས་བརྗོད་དོ། །ཅེས་པའང་ཕུར་སྒྲུབ་བླ་མ་ཕྲིན་ལས་ཀྱིས་རྒྱལ་བ་ཀརྨ་པས་མཛད་པའི་བཀྲ་ཤིས་དོན་གྲུབ་མར་རྒྱས་པའི་སྲེག་བླུགས་འབུལ་བའི་རིམ་པ་དགོས་ཞེས་བསྐུལ་བའི་ངོར་སྒྲིབ་གཉིས་སྲེག་བྱེད་སོར་བཞག་བྱས་ཏེ་སི་ཏུ་པདྨ་ཉིན་བྱེད་དབང་པོས་ས་ཟླའི་ཡར་ཚེས་ལ་ཟིན་ཐོར་སྤེལ་བ་ཛ་ཡནྟུ།། །།