འདོན་འགྲིགས་བཀོད་པ།
འདོན་འགྲིགས་བཀོད་པ་བཞུགས། ཕྱག་འཚལ་ཉེར་གཅིག་ཆོ་ག་སྒྲུབ་མཆོད་དང་། སྐུ་རིམ་ལྟ་བུའི་སྐབས། དང་པོར་ཚིག་བདུན་གསོལ་འདེབས་དང་། བསམ་པ་ལྷུན་གྲུབ་མ། དེ་ནས་བརྒྱུད་འདེབས་དང་། སྔོན་འགྲོ་གཏོར་མ་ནས་བཟུང་བདག་བསྐྱེད་དང་། བུམ་བསྐྱེད་མདུན་བསྐྱེད་རྣམས་ལ་ཕྱག་འཚལ་ཉེར་གཅིག་བཏོན་སྐབས་ཐལ་མོ་སྦྱར་ལ། ཕྱག་འཚལ་ཏཱ་རེ་མྱུར་མ་སོགས་
མཎྜལ་བཞི་པ་ལྟར། གཉིས་དང་། གསུམ་བདུན་གྱི་གྲངས་ལ། ཕན་ཡོན་ཚར་རེ་དང་། བསྙེན་པའི་གྲངས་གཞུང་དུ་གསལ། །མདུན་བསྐྱེད་དབང་བསྐུར་རྒྱས་གདབ་མཚམས་ཚོགས་ཐེངས་བྱ། ཡར་འཚོགས་བསྙེན་པ་དང་། མཆོད་པ། གཏོར་འབུལ། སྔོན་འགྲོ་བཏང་ཞིང་། ཁྲུས་བྱབ་དམིགས་བསལ་དགོས་ན་བྱ། དེ་མན་འདིར་མི་དགོས་ཤིང་། བདག་འཇུག་བྱིན་རླབས་ཀྱི་ཆེད་དུ་བྱ་ཞིང་། རྗེས་ཟློས་རྣམས་ཚར་རེས་འཐུས། བྱིན་འབེབས་སྐབས་རོལ་ཚིག་དཀྱིལ་ཆོག་གཞན་ལྟར་དགོས། རོལ་མོ་སྤྱི་ལ་མཆོད་རོལ་དགོས་པ་དང་། གྲོལ་ཉིན་ལྟ་བུ་དང་། སློབ་མར་དབང་གི་སྐབས་ལ་རྗེས་ཟློས་གསུམ་རེ་དགོས། དབང་གི་ནང་ཡིག་ཆུང་ཐམས་ཅད་རྒྱུན་པར་འདོན་མི་དགོས་ཤིང་། དབང་གནང་སྐབས་སློབ་དཔོན་གྱིས་མཚམས་སྦྱོར་གསུང་རྒྱུ་ཡིག་ཆུང་སེར་ཡོད་བཞག །ཡིག་ཆུང་སེར་མེད་འདོན་རྒྱུ་དང་། ཆོ་ག་འདི་ཉིན་རེ་ཚར་གཉིས་འདོན་ཚེ། གོང་ལྟར་མཆོད་པ་བྱིན་རླབས་ནས་སྐྱབས་འགྲོ་ཚར་གཅིག་འདོན་ལ་ཚོགས་པ་གུང་གསེང་བྱ། དེ་ནས་ཡར་འཚོགས་སྐྱབས་འགྲོ་ལན་གཉིས་དང་བཅས་སྔར་ལྟར་མདུན་བསྐྱེད་དབང་བསྐུར་རྒྱས་གདབ་མཚམས་ཚོགས་ཐེངས་དང་། ཡར་འཚོགས་བསྙེན་པ་མཆོད་པ་གཏོར་འབུལ་བྱ། སྔོན་འགྲོ་མི་དགོས། བདག་འཇུག་དང་རྗེས་ཆོག་བྱ། །
ཕྱག་འཚལ་ཉེར་གཅིག་དྲིལ་གསིལ་བྱ། བཀྲ་ཤིས་སྨོན་ལམ་སོགས་མཐའ་རྒྱས་སྤེལ་ལེགས་མཛད་པས་གྲུབ་པའོ། །མངྒ་ལམ་སུ་ཛ་ཡནྟུ།། །།ནམ་མཁའ་དང་མཉམ་པའི་སེམས་ཅན་ཐམས་ཅད་གནས་སྐབས་སུ་འཆི་མེད་ཚེ་དང་ཡེ་ཤེས་ཀྱི་དཔལ་རྒྱས་པ་དང་། མཐར་ཐུག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་གོ་འཕང་ཐོབ་པར་བྱ་སྙམ་པའི་ཐུགས་བསྐྱེད་དང་བཅས་ཏེ། ལེགས་པར་གསན་འཚལ། དེ་ཡང་དུས་གསུམ་གྱི་རྒྱལ་བ་རྣམས་ནི་སེམས་ཅན་གྱི་དོན་ལ་ཐབས་མཁས་ཤིང་ཐུགས་རྗེས་ལྷག་པར་བརྩེ་བའི་ཕྱིར། ཕྱོགས་དུས་སངས་རྒྱས་ཀུན་གྱི་བྱིན་མཐུའི་གོང་བུ་སྨིན་པ་འཕགས་མཆོག་སྤྱན་རས་གཟིགས་འཇིག་རྟེན་དབང་ཕྱུག་གི་འཇིག་རྟེན་ཁམས་ཐམས་ཅད་སྒྲོལ་བའི་ཕྱིར་དུ། རྗེ་བཙུན་འཕགས་མ་སྒྲོལ་མ་དཀར་སྔོན་གཉིས་སུ་དངོས་སུ་སྣང་བའི་སྐུ་ཡི་བཀོད་པ་དང་། དེ་ལས་ཀྱང་མར་མེ་གཅིག་ལས་གཉིས་མཆེད་ཀྱི་ཚུལ་དུ་འཕགས་མ་ཉེར་གཅིག་ལ་སོགས་པ་གང་ལ་གང་འདུལ་གྱི་ཕྲིན་ལས་རླབས་པོ་ཆེ་འབྱམས་སུ་ཀླས་པའི་སྤྱོད་པ་གཞལ་བར་དཀའ་བ་དག་མཆིས་པར་སྣང་ཞིང་། ད་ལམ་སྐབས་སུ་བབས་པ་ནི། རྒྱ་གར་གྱི་པཎ་ཆེན་ངག་དབང་གྲགས་པའི་ལུགས་ཀྱི་སྒྲོལ་དཀར་འཆི་མེད་དཔལ་སྟེར་གཙོ་བོར་བྱས་ཏེ། སློབ་དཔོན་ཉི་མ་སྦས་པའི་བཞེད་པ་སྒྲོལ་མ་ཉེར་
གཅིག་སོར་བཞག་ནས། དཀྱིལ་འཁོར་གྱི་ཆོ་ག་གསར་དུ་བཀོད་ཅིང་། རྣལ་འབྱོར་རྒྱུད་ཀྱི་ལུགས་སུ་གཏོགས་པར་བྱས། ལར་འདི་ཡི་དཀྱིལ་ཆོག་གི་དབང་གཞུང་མི་ཏྲ་བརྒྱ་རྩའི་གྲལ་ལ་བཞུགས་པས། སྤྱན་རས་གཟིགས་དངོས་སྣང་དཔལ་ཀརྨ་པ་བཅུ་གསུམ་པའི་དྲུང་ནས་ཐོབ་ཅིང་། གཞན་ཡང་སྒྲུབ་ཐབས་རིན་འབྱུང་ལ་ཡང་རིག་གཏང་རྗེས་གནང་ཙམ་སྣང་བའི་རིག་འཛིན་རྡོ་རྗེ་དྲག་པོའི་དྲུང་ནས་ལེགས་པར་ཐོབ་པ་སྟེ། དེ་ལྟར་སྨིན་དབང་གྲོལ་བྱེད་གདམས་པའི་ཚན་ཁ་མ་ཉམས་པ་བྱིན་རླབས་ཁྱད་པར་དུ་འཕགས་པ་བཅོམ་ལྡན་འདས་མ་སྒྲོལ་མ་ཉེར་གཅིག་གི་དཀྱིལ་འཁོར་ཆེན་པོའི་དབང་བསྐུར་ཟབ་མོ་སྒྲུབ་པ་ལ། ཐོག་མར་སློབ་དཔོན་གྱི་བྱ་བ་བདག་མདུན་བུམ་པ་སྒྲུབ་པ་སོགས་མ་ནོར་བར་སྔོན་དུ་སོང་ཟིན་ནས། ད་ཁྱེད་རང་སློབ་མ་རྣམས་ཀྱི་ངོ་སྐལ་དུ་གྱུར་པའི་སྔོན་འགྲོ་སྟ་གོན་གྱི་ཆོས་རྣམས་ཞུ་བའི་དོན་དུ་དངོས་དང་ཡིད་སྤྲུལ་རྒྱ་མཚོས་དྲངས་བའི་མཎྜལ་གནང་འཚལ། ྃ ྂ ྃདེའང་རྡོ་རྗེའི་རྭ་གུར་ཡེ་ཤེས་ཀྱི་མེ་དཔུང་འབར་བའི་སྲུང་འཁོར་གྱི་ནང་དུ། ཟླ་བ་ཆུ་ཤེལ་དཀར་པོས་གཞལ་ཡས། དེའི་དབུས་སུ་པད་དཀར་སྡོང་བུ་ཡལ་འདབ་རྒྱས་པ་རིམ་པ་གསུམ་དང་ལྡན་པའི་ལྟེ་བར། ཟླ་བའི་དཀྱིལ་འཁོར་དེའི་སྟེང་དུ་བཅོམ་ལྡན་འདས་མ་སྒྲོལ་མ་དཀར་མོ། སྤྱན་བདུན་བཀྲ་ཞིང་། དབུ་
སྐྲ་མཐོན་མཐིང་ལྟག་པར་བཅིངས་ཤིང་། ནུ་འབུར་ཟུང་གིས་མཛེས་པ། མུ་ཏིག་དཀར་པོ་གཙོ་བོར་གྱུར་པའི་རིན་པོ་ཆེའི་དབུ་རྒྱན། སྙན་ཆ་མགུལ་ཆུ་དོ་ཤལ་ལ་སོགས་རྒྱན་དུ་མས་སྤྲས་པ། ཕྱག་གཡས་མཆོག་སྦྱིན་དང་། གཡོན་མཐེབ་སྲིན་སྦྱར་བས་ཨུཏྤལ་དཀར་པོའི་སྡོང་བུ་ཐུགས་ཀར་འཛིན་པ། དར་དཀར་པོའི་སྟོད་གཡོགས་དང་སྣ་ཚོགས་དར་གྱི་སྨད་གཡོགས་ཅན། ཞབས་རྡོ་རྗེ་སྐྱིལ་ཀྲུང་གིས་བཞུགས་པ། ཟླ་བའི་རྒྱབ་ཡོལ་ཅན། དེའི་ཕྱི་རིམ་པད་འདབ་བཞི་དང་། དེའི་ཕྱི་རིམ་པད་འདབ་བདུན། དེའི་ཕྱིར་རིམ་པད་འདབ་བཅུ་རྣམས་ཀྱི་སྟེང་དུ་པད་ཉི་ཟླ་གདན་སོ་སོར། མདུན་དུ་སྒྲོལ་མ་རབ་ཏུ་དཔའ་མོ་སྐུ་མདོག་དམར་མོ། དཀར་མོ་ཟླ་མདངས་ཀྱི་སྒྲོལ་མ་དཀར་མོ། གསེར་མདོག་ཅན་གྱི་སྒྲོལ་མ་སེར་མོ། གཙུག་ཏོར་རྣམ་རྒྱལ་སྒྲོལ་མ་སེར་མོ། ཧཱུྃ་སྒྲ་སྒྲོགས་པའི་སྒྲོལ་མ་སེར་མོ། འཇིག་རྟེན་གསུམ་ལས་རྣམ་རྒྱལ་སྒྲོལ་མ་དམར་མོ། རྒོལ་བ་འཇོམས་པའི་སྒྲོལ་མ་ནག་མོ། དབང་མཆོག་སྟེར་བའི་སྒྲོལ་མ་སེར་མོ། སེང་ལྡེང་ནགས་ཀྱི་སྒྲོལ་མ་ལྗང་སྔོན། མྱ་ངན་མེད་པའི་སྒྲོལ་མ་དམར་མོ། ཕོངས་པ་སེལ་བའི་སྒྲོལ་མ་ནག་མོ། བཀྲ་ཤིས་སྣང་བའི་སྒྲོལ་མ་སེར་མོ། ཡོངས་སུ་སྨིན་པའི་སྒྲོལ་མ་དམར་མོ། ཁྲོ་གཉེར་གཡོ་བའི་སྒྲོལ་མ་མཐིང་ག །དགེ་ལེགས་སྟེར་བའི་སྒྲོལ་མ་
དཀར་མོ། ཆགས་པ་འཇོམས་པའི་སྒྲོལ་མ་དམར་མོ། བདེ་བ་སྒྲུབ་པའི་སྒྲོལ་མ་དམར་སེར། རབ་ཏུ་རྒྱས་པའི་སྒྲོལ་མ་དཀར་མོ། སྡུག་བསྔལ་སེལ་བའི་སྒྲོལ་མ་དཀར་མོ། དངོས་གྲུབ་འབྱུང་བའི་སྒྲོལ་མ་དམར་སེར། ཡོངས་རྫོགས་བྱེད་པའི་སྒྲོལ་མ་དཀར་མོ། དེ་རྣམས་ཀྱང་རྒྱན་ལུགས་སྣ་ཚོགས་པ་སྐུའི་དཀྱིལ་འཁོར་རབ་ཏུ་གསལ་ཞིང་འོད་ཀྱི་སྣང་བས་ཕྱོགས་བཅུར་ཁྱབ་པར་མངོན་སུམ་དུ་མཐོང་བའི་མོས་པ་མཛོད། །