སྒྲོལ་དཀར་ཡིད་བཞིན་འཁོར་ལོའི་སྒྲུབ་ཐབས་གྲུབ་གཉིས་མཆོག་སྩོལ།
སྒྲོལ་དཀར་ཡིད་བཞིན་འཁོར་ལོའི་སྒྲུབ་ཐབས་གྲུབ་གཉིས་མཆོག་སྩོལ་ཞེས་བྱ་བ་བཞུགས་སོ། །
ན་མོ་གུ་རུ་ཨཱཪྱ་ཏཱ་ར་ཡེ། །སྲིད་ཞིའི་འཆིང་སྒྲོལ་བཅོམ་ལྡན་མས། །འདི་ནས་སྙིང་པོའི་བར་དུ་ནི། །སྤྱི་བོའི་རྒྱན་དུ་ཞབས་པདྨོ། །འབྲལ་མེད་རྗེས་སུ་འཛིན་པར་མཛོད། །ཅེས་མཆོད་པར་བརྗོད་པ་སྔོན་དུ་སོང་ནས་དེ་ལ་འདིར་རྒྱལ་བའི་ཡུམ་འཕགས་མ་སྒྲོལ་མའི་སྒོ་ནས་མཆོག་དང་ཐུན་མོང་གི་དངོས་གྲུབ་མྱུར་དུ་འདོད་པའི་རྣལ་འབྱོར་པ་དག་གིས་བསྙེན་ཅིང་སྒྲུབ་པ་ལ་མཆོད་པའི་རིམ་པར་བདག་བསྐྱེད། མདུན་བསྐྱེད། བུམ་སྒྲུབ། རྗེས་སུ་གནང་བ་དང་བཅས་གསལ་བར་དགོད་པར་བྱ་སྟེ། དེ་ཡང་ཕུན་སུམ་ཚོགས་པ་རང་བཞིན་ལྷུན་གྱིས་གྲུབ་པའི་གནས་དབེན་པར་གཙང་སྦྲ་དང་ལྡན་པས། ར་བ་བཞི་ཡི་དཀར་པོའི་ཕྱོགས་སམ། ཡང་ན་དཀར་པོའི་ཕྱོགས་གང་འདོད་ཀྱི་འགྲུབ་སྦྱོར་བཟང་པོར་མཆོད་པའི་ཡོ་
བྱད་རྣམས་འདུ་བར་བགྱིད་ལ། མཆོད་པའི་རྟེན་སྤྱི་དང་བྱེ་བྲག་འཕགས་མའི་སྐུ་བརྙན་ཐང་ཀ་སོགས་གང་འབྱོར་བཤམས་པའི་མདུན་དུ། སྟེགས་ཀྱི་ཁར་མཎྜལ་པདྨ་འདབ་བརྒྱད་འབྲུ་དཀར་གྱི་ཚོམ་བུར་བཀོད་པའི་ཁར་མཉྫིའི་སྟེང་བུམ་པ་མཚན་ཉིད་དང་ལྡན་པ་ཆུ་གཙང་གིས་སུམ་གཉིས་བཀང་བ་བུམ་རྫས་དྲི་བཟང་ཡང་བཏབ་ལ། དེ་སྟེང་དུང་ཆོས་གཟུངས་རྡོར་ཁ་རྒྱན་དང་བཅས་པ་བཤམས། མདུན་ངོས་སུ་ཉེར་སྤྱོད་ཀྱི་མཆོད་པ་རྣམས་ཕྲེང་ཚར་དང་། རིན་པོ་ཆེའི་སྣོད་དུ་གཏོར་ཟླུམ་དཀར་མངར་གྱིས་སྦགས་པ་དང་། བསང་ཆུ་སྔོན་གཏོར་སོགས་འདུ་བར་བྱས་ལ། ནངས་སྔ་བར་ཁྲུས་དང་སྤོས་ཀྱི་བྱུགས་པས་ལུས་གཙང་མར་བསྒོས་ལ་སྟན་བདེ་བར་འཁོད་དེ། སེམས་ཅན་ཐམས་ཅད་ལ་སྙིང་རྗེ་དང་བྱང་སེམས་ཀྱིས་ཀུན་
ནས་བསླངས་ཏེ། དང་པོ་བསང་ཆུའི་དོན་དུ་ༀ་བཛྲ་ཀྲོ་དྷ་ཉེར་གཅིག་བརྗོད་ལ་ཁྲོ་བོའི་རང་བཞིན་ནུས་ལྡན་དུ་མོས་ཏེ་གནས་དང་ཡོ་བྱད་རྣམས་ལ་བསང་གཏོར་བྱ། གཉིས་པ་བགེགས་དང་བར་ཆད་བསལ་བའི་དོན་དུ། ཕྱོགས་སྐྱོང་དང་གཞི་བདག་རྣམས་ལ་གཏོར་མ་འབུལ་བ་ནི། ལས་སྔགས་ཀྱིས་བསངས། སྭ་བྷཱ་ཝས་སྦྱངས། བྷྲུྃ་ལས་རིན་ཆེན་སྣོད་ཡངས་པར། །ཁྃ་ཞུ་གཏོར་མ་བདུད་རྩི་དངོས། །འདོད་ཡོན་དྭངས་ཤིང་ཐོགས་པ་མེད། །ལོངས་སྤྱོད་མཐའ་ཡས་ཆར་འབེབས་གྱུར། །ༀ་བཛྲ་སྥ་ར་ཎ་ཁཾ། ལན་གསུམ། ཨ་ཀཱ་རོས་སྦྱངས་སྤེལ་བྱིན་གྱིས་བརླབས། བྷཱུ་མི་པ་ཏི་ས་པ་རི་ཝཱ་ར་ཨརྒྷཾ། པུཥྤེ་སོགས་ཀྱིས་མཆོད། ན་མཿསརྦ་ཏ་ཐཱ་ག་ཏ་སོགས་ཀྱིས་ལན་གསུམ་འབུལ། ཕྱོགས་སྐྱོང་འཇིག་རྟེན་སྐྱོང་བ་དང་། །ས་བདག་གནས་བདག་ཡུལ་གྱི་ལྷ། །མཆོད་སྦྱིན་གཏོར་མ་འདི་བཞེས་ལ། །སོགས་ནས། ཡིད་ལ་འདོད་པ་ཀུན་འགྲུབ་མཛོད། །གང་འདིར་ལྟ་བར་མི་དབང་བའི། །ཉེར་འཚེ་གླགས་ལྟར་གྱུར་པ་ཡི། །གདོན་བགེགས་ལོག་འདྲེན་ཕྱིར་དེངས་ཤིག །ཡེ་ཤེས་བསྐལ་མེས་སྲེག་པར་བྱེད། །བཛྲ་ཀྲོ་དྷ་སུམྦྷ་ནི་སོགས་ཧཱུྃ་བཞིའི་སྔགས་བརྗོད་བགེགས་བསྐྲད། གསུམ་པ་སྲུང་བའི་འཁོར་ལོ་ནི། ཕྱོགས་མཚམས་འོད་དང་འོད་ཟེར་འཕྲོ། །ཡེ་ཤེས་མེ་རི་སྣ་ལྔ་འབར། །རྡོ་རྗེ་ཨུཏྤལ་ལ་སོགས་ཀྱི། །སྲུང་བའི་འཁོར་
ལོས་བར་མེད་གཏམས། །ༀ་བཛྲ་རཀྵ་རཀྵ་ཧཱུྃ་ཧཱུྃ་ཧཱུྃ། དེ་ནས་མཆོད་པ་བྱིན་གྱིས་བརླབ་པ་ནི། ལས་སྔགས་ཀྱིས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ༀ་ཡིག་ལས། །རིན་ཆེན་སྣོད་དུ་ཧཱུྃ་ཡིག་ཚོགས། །འོད་ཞུ་མཆོད་རྫས་དཔག་ཏུ་མེད། །ཀུན་ཏུ་བཟང་པོའི་མཆོད་པའི་སྤྲིན། །རབ་འབྱམས་རྒྱ་ཆེན་ཇི་སྙེད་པ། །ཆོས་དབྱིངས་རྒྱས་པར་གང་བར་གྱུར། །ༀ་བཛྲ་ཨརྒྷཾ་ཨཱཿཧཱུྃ་སྭཱ་ཧཱ། དེ་བཞིན་དུ། པཱ་དྱཾ། པུཥྤེ། དྷཱུཔྤེ། ཨཱ་ལོ་ཀེ། གནྡྷེ། ནཻ་ཝི་དྱ། ཤབྡ་བར་བརྗོད། ༀ་སརྦ་བིད་པཱུ་ར་པཱུ་ར་སུ་ར་སུ་ར་ཨ་བརྟ་ཡ་བྷྱ་སྭཱ་ཧཱ། ལན་གསུམ་བརྗོད་ལ་བྱིན་གྱིས་བརླབས། ལྔ་པ་སྐྱབས་སུ་འགྲོ་བ་ནི། སངས་རྒྱས་ཆོས་དང་ཚོགས་ཀྱི་མཆོག །བླ་མ་ཡི་དམ་ཆོས་སྐྱོང་སྟེ། །མཆོག་གསུམ་རྩ་གསུམ་བདག་ཉིད་ཅན། །འཕགས་མ་སྒྲོལ་མའི་ཞབས་པདྨོར། །བདག་སོགས་སེམས་ཅན་དེང་བཟུང་ནས། །བྱང་ཆུབ་བར་དུ་སྐྱབས་སུ་མཆི། །བདུན་ནམ་ཉེར་གཅིག་བརྗོད། སེམས་བསྐྱེད་པ་ནི། འཁོར་བ་སྡུག་བསྔལ་རྒྱ་མཚོ་ལས། །བདེ་བ་མཆོག་ལ་དྲངས་པའི་ཕྱིར། །བླ་མེད་ཐེག་ཆེན་སེམས་བསྐྱེད་ནས། །སྒོ་གསུམ་དགེ་ལ་འཇུག་པར་བྱ། །ལན་གསུམ་བརྗོད་ལ། ༀ་བོདྷི་ཙིཏྟ་ཨུཏྤཱ་ད་ཡཱ་མི། དྲུག་པ་ཚོགས་ཞིང་ནི། རང་ཉིད་སྐད་ཅིག་རྗེ་བཙུན་མ། །རྒྱན་དང་ཆ་ལུགས་ཡོངས་སུ་རྫོགས། །གསལ་བའི་གནས་གསུམ་ཡི་གེས་
མཚན། །དེ་ལས་འོད་འཕྲོས་ཡེ་ཤེས་སེམས། །དཀོན་མཆོག་རྒྱ་མཚོ་མ་ལུས་པ། །མདུན་གྱི་ནམ་མཁར་གསལ་བར་གྱུར། །ༀ་ཨཱཪྱ་ཏཱ་རེ་བཛྲ་ཨརྒྷཾ་པྲ་ཏཱིཙྪ་སྭཱ་ཧཱ། དེ་བཞིན་དུ། པཱདྱཾ་ནས། ཤབྡའི་བར་བརྗོད། ན་མ་ཨཱཪྱ་ཏཱ་ར་ཡ། མཆོད་པ་འབུལ་ལོ་བཤགས་སོ་ཡི་རང་ངོ་། །བསྐུལ་ཞིང་གསོལ་བ་འདེབས་སོ་དགེ་ཚོགས་རྒྱུན། །ཐར་པ་ཐམས་ཅད་མཁྱེན་པའི་རྒྱུར་བསྔོའོ། །ཞེས་བསྡུས་པའི་ཚུལ་གྱིས་ཡན་ལག་བདུན་པ་ཕུལ་ནས། ༀ་ཨཱཿཧཱུྃ། ཞེས་རང་ལ་བསྟིམ། བདུན་པ་ཚད་མེད་བསྒོམ་པ་ནི། སེམས་ཅན་ཐམས་ཅད་བདེ་དང་བདེ་རྒྱུར་ལྡན། །སྡིག་དང་སྡུག་བསྔལ་རྒྱུ་དང་བྲལ་བར་ཤོག །སྡུག་བསྔལ་མེད་པའི་བདེ་དང་མི་འབྲལ་ཞིང་། །བཏང་སྙོམས་ཆེན་པོའི་ངང་དུ་གནས་གྱུར་ཅིག །ལན་གསུམ། དེ་ནས་བསྐྱེད་པའི་རིམ་པ་ལ་དང་པོ་རང་ལྷར་གསལ་བཏབ་པ་ནི། ༀ་ཤཱུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ། ཆོས་རྣམས་ཐམས་ཅད་སྟོང་ཉིད་གྱུར། །སྟོང་པའི་ངང་ལས་པྃ་ལས་ནི། །པདྨ་དཀར་པོ་དྲི་མ་མེད། །འདབ་མ་གེ་སར་མཆོག་ཏུ་ཡངས། །སྟེང་དུ་ཨ་ལས་ཟླ་ཤེལ་གྱི། །དཀྱིལ་འཁོར་ཉ་གང་དབུས་སུ་ཏཱྃ། །དཀར་པོ་འོད་དང་འོད་ཟེར་འབར། །འཕྲོས་པས་རྒྱལ་མཆོད་དངོས་གྲུབ་བསྡུས། །སེམས་ཅན་འཇིགས་པ་ཀུན་ལས་བསྒྲལ། །ཚུར་འདུས་ཡོངས་སུ་གྱུར་པ་ལས། །རང་ཉིད་འཕགས་མ་སྒྲོལ་མ་དཀར། །ཤིན་ཏུ་
དྭངས་ཤིང་གསལ་འཚེར་བ། །ཞལ་གཅིག་ཕྱག་གཉིས་སྤྱན་དཀྱུས་རིང་། །ཡིད་འོང་སྒེག་པའི་ཉམས་དང་ལྡན། །གཡས་པས་མཆོག་སྦྱིན་ཕྱག་རྒྱ་དང་། །གཡོན་པས་མཐེབ་སྲིན་ཨུཏྤ་ལ། །དཀར་པོ་ཡལ་འདབ་རྒྱས་པ་བསྣམས། །དབུ་སྐྲ་མཐོན་མཐིང་ཐོར་ཚུགས་བཅིངས། །ཡིད་བཞིན་ནོར་བུ་རིན་པོ་ཆེ། །གསེར་དང་མུ་ཏིག་ལ་སོགས་པས། །ཅོད་པན་སྙན་དང་མགུལ་གྱི་རྒྱན། །ཕྱག་ཞབས་གདུ་བུ་དཔུང་རྒྱན་དང་། །སེ་མོ་དོ་དང་སྐ་རགས་འཕྱང་། །བརྒྱད་གཉིས་ལང་ཚོའི་ཆ་ཤས་རྫོགས། །ནུ་འབུར་ཟུང་མཛེས་ལྷ་ཡི་གོས། །དཀར་པོས་སྟོད་གཡོགས་དབང་གཞུ་ཡི། །སྨད་གཡོགས་ཞབས་གཉིས་སྐྱིལ་མོ་ཀྲུང་། །ཟླ་བའི་རྒྱབ་ཡོལ་གསལ་བར་གྱུར། །གནས་གསུམ་ༀ་དཀར་ཨཱཿདམར་པོ། །ཐུགས་ཀའི་ཆ་སྨད་ཧཱུྃ་སྔོན་གསལ། །ཐུགས་ཀའི་དབུས་སུ་པད་ཟླར་ཏཱཾ། །དཀར་པོའི་འོད་ཀྱིས་ཡེ་ཤེས་པ། །རང་བཞིན་གནས་དང་ཁྱད་པར་དུ། །ལྷོ་ཕྱོགས་གྲུ་འཛིན་པོ་ཊ་ལའི། །གནས་ཀྱི་ཞིང་མཆོག་དམ་པ་ནས། །བསྐྱེད་པ་དང་འདྲའི་ཡེ་ཤེས་པ། །སངས་རྒྱས་བྱང་ཆུབ་སེམས་དཔའ་དང་། །སྲས་དང་སློབ་མ་སྤྲུལ་པའི་ཚོགས། །ཇི་སྙེད་དུ་མས་བསྐོར་བ་རྣམས། །མདུན་གྱི་ནམ་མཁར་སྐད་ཅིག་ལ། །སྤྱན་དྲངས་བཛྲ་ས་མཱ་ཛཿཞེས་སྤྱན་དྲངས་ལ། གཉིས་པ་མཆོད་ཅིང་བསྟོད་པ་ནི།
ཨརྒྷཾ་སོགས་ཀྱིས་མཆོད། ལྷ་དང་ལྷ་མིན་ཅོད་པན་གྱིས། །སོགས་ཀྱིས་བསྟོད། །ཛཿཧཱུྃ་བྃ་ཧོཿཡེ་ཤེས་སེམས། །དམ་ཚིག་པ་དང་དབྱེར་མེད་གྱུར། །གསུམ་པ་དབང་བསྐུར་བ་ནི། སླར་ཡང་ཐུགས་ལས་འོད་འཕྲོས་ཏེ། །དབང་གི་ལྷ་རྣམས་སྤྱན་དྲངས་ནས། །མཆོད་པའི་སྤྲིན་གྱིས་མཉེས་པར་བྱས། །གསོལ་བཏབ་མོད་ལ་ཡེ་ཤེས་ཀྱི། །བདུད་རྩིའི་རྒྱུན་གྱི་དབང་བསྐུར་ཐོབ། །སྐུ་གང་དྲི་མ་དག་པར་བྱས། །ཆུ་ཞབས་ཡར་བརྟེན་འོད་དཔག་མེད། །སྤྲུལ་སྐུའི་རྣམ་པས་རྒྱས་གདབ་གྱུར། །དེ་ནས་བཞི་པ་སྔགས་འཁོར་བསྒོམ་པ་ནི། བཅོམ་ལྡན་འདས་མའི་ཐུགས་ཀའི་དབུས་སུ་འཁོར་ལོ་དཀར་པོ་རྩིབས་བརྒྱད་པ། མུ་ཁྱུད་ལྔ་དང་ལྡན་པའི་ལྟེ་བར་ཏཱྃ། གཡས་སུ་ༀ་དང་གཡོན་དུ་ཧཱ། མདུན་ནས་གཡས་བསྐོར་དུ་མ་མ་ཨཱ་ཡུ་པུཎྱ་ཛྙཱ་ན་པུཥྚིཾ་ཀུ་རུ་ཧཱ། རྩིབས་བརྒྱད་ལ་ཏཱ། རེ། ཏུཏ། ཏཱ། རེ། ཏུ། རེ། སྭཱ། ཞེས་པས་མཚན་པ་དང་། མུ་ཁྱུད་ནང་མ་ལ། ཨ་ལི་གཡོན་བསྐོར། བར་མ་ལ་ཀ་ལི་གཡས་བསྐོར། ཕྱི་རིམ་ལ་ཡེ་དྷརྨ་གཡས་སུ་བསྐོར་ཞིང་། དེ་ཡི་ཕྱི་རིམ་རྡོ་རྗེ་དཀར་པོ་མཆུར་ཉལ་བའི་ཕྲེང་བ་དང་། དེ་ཡི་ཡང་ཕྱི་རོལ་དུ་འོད་དཀར་པོའི་ཟེར་ཐག་གི་ཕྲེང་བ་དང་ལྡན་པའི་སྔགས་འཁོར་ལས་འོད་ཟེར་འཕྲོས། ཕྱོགས་བཅུའི་རྒྱལ་བ་རྣམས་ཀྱི་ཐུགས་རྗེ་བྱིན་རླབས་དངོས་གྲུབ་དང་། བརྟན་གཡོ་སྣོད་ཀྱི་འབྱུང་བའི་རྩི་དང་།
བཅུད་ཀྱིས་བསྡུས་པའི་ལྷ་ཀླུ་རིག་འཛིན་གྲུབ་པ་ལ་སོགས་པ་འགྲོ་བ་མཐའ་དག་གི་དཔལ་འབྱོར་ཐམས་ཅད་འོད་ཟེར་གྱི་རྣམ་པར་འཁོར་ལོ་དང་ཡིག་འབྲུ་ལ་ཐིམ་པས་འཆི་བ་མེད་པའི་ཚེ་དང་རྒུད་པ་མེད་པའི་ལང་ཚོ་རབ་ཏུ་རྒྱས་པར་གྱུར། ཞེས་སྔགས་འཁོར་བསྒོམས་ལ། ཡི་གེ་བཅུ་པ་ཅི་ནུས་བཟླས་མཐར། ཚེ་ཤམ་ཅན་ཡང་བཟླའོ། །དེ་ནས་མདུན་བསྐྱེད་སྒྲུབ་ཅིང་མཆོད་པ་ནི། དང་པོ་བདག་བསྐྱེད་ལྟར་ལ་ཁྱད་པར། འཕགས་མ་སྒྲོལ་མ་སྐུ་མདོག་དཀར། །ཞེས་པ་སོགས་དང་སྤྱན་འདྲེན་ནས་རྒྱས་གདབ་པར་བྱའོ། །དེ་ནས་གཉིས་པ་མཆོད་པ་འབུལ་བ་ནི། དྲི་མེད་མཆོད་ཡོན་དག་བྱེད་ཞབས་བསིལ་དང་། །ཡིད་འོང་མེ་ཏོག་མཁའ་ཁྱབ་བདུག་པའི་སྤོས། །སྣང་བྱེད་མར་མེ་རྨད་བྱུང་དྲི་ཡི་མཆོག །བཅུད་ལྡན་ཞལ་ཟས་དབྱངས་སྙན་རོལ་མོའི་སྒྲ། །འཁོར་བ་ཇི་སྲིད་མཆོད་པའི་སྤྲིན་སྤྲོས་ནས། །རྒྱལ་ཡུམ་འཕགས་མའི་ལྷ་ཚོགས་རྣམས་ལ་འབུལ། །ༀ་ཨཱཪྱ་ཏཱ་རེ་ས་པ་རི་ཝཱ་ར་བཛྲ་ཨརྒྷཾ་པྲ་ཏཱིཙྪ་ཨཱཿཧཱུྃ། དེ་བཞིན་དུ། པཱ་དྱཾ། པུཥྤེ། དྷཱུཔྤེ། ཨཱ་ལོ་ཀེ། གྷནྡྷེ། ནཻ་ཝི་དྱ། ཤབྡའི་བར་བརྗོད་ལ་རོལ་མོ་འབུལ་ལོ། །འདོད་ཡོན་འབུལ་བ་ནི། འཇིག་རྟེན་འདི་ན་རྡོ་རྗེའི་གཟུགས་སྒྲ་དྲི། །བཤོས་གཙང་སྲབ་འཇམ་ལྷ་ཡི་དར་སྣ་ཚོགས། །རབ་འབྱམས་ཞིང་རྣམས་མ་ལུས་ཡོངས་བཀང་ནས། །བཅོམ་ལྡན་ཡིད་བཞིན་འཁོར་ལོའི་ལྷ་ལ་འབུལ། །སྔགས་ཀྱི་ཐོག་མཐའ་སྔར་བཞིན།
རཱུ་པ། ཤབྡ། གནྷེ། ར་ས། སྤཪྴེ་སོགས་ཀྱང་བརྗོད། དཔལ་འབྱོར་ཕུན་སུམ་ཚོགས་པ་ཡི། །རི་རབ་གླིང་བཞི་གླིང་ཕྲན་བརྒྱད། །ཉི་ཟླ་ལ་སོགས་མཆོད་པའི་རྫས། །སྒྲོལ་མའི་དཀྱིལ་འཁོར་ལྷ་ལ་འབུལ། །ༀ་མཎྜལ་པཱུ་ཛ་ཨཱཿཧཱུྃ། རྗེ་བཙུན་བཅོམ་ལྡན་འདས་མ་ཐུགས་རྗེ་ཅན། །ཞེས་པ་ནས། ཡར་ངོའི་ཟླ་ལྟར་འཕེལ་ཞིང་རྒྱས་པར་མཛོད། །ཅེས་པའི་བར་གྱིས་གསོལ་བ་གདབ། དེ་ནས་གསུམ་པ་གཏོར་མ་འབུལ་བ་ནི། ལས་སྔགས་ཀྱིས་བསངས། སྭ-བྷཱ་ཝས་སྦྱངས། སྟོང་པའི་ངང་ལས་ༀ་ལས་རིན་པོ་ཆེའི་སྣོད་ཡངས་པའི་ནང་དུ། ༀ་ཨཱཿཧཱུྃ་ཞུ་བ་ལས་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པ་བདུད་རྩིའི་རྒྱ་མཚོར་གྱུར། །ༀ་ཨཱཪྱ་ཏཱ་རེ་ས་པ་རི་ཝཱ་ར་ཨི་དཾ་སོགས་ཀྱིས་ལན་བདུན་ནམ་གསུམ་གྱིས་ཕུལ། བསྟོད་པ་ནི། འཁོར་བ་ལས་སྒྲོལ་ཏཱ་རེ་མ་སོགས་ཤླཽ་ཀ་གཅིག་དང་། བཅོམ་ལྡན་འཁོར་དང་བཅས་རྣམས་ཀྱིས། །མཆོད་སྦྱིན་གཏོར་མ་སོགས་བརྗོད་ལ། བཞི་པ་བཟླས་པ་བྱ་བ་ནི། མདུན་བསྐྱེད་ལྷ་ཡི་ཐུགས་ཀའི་སྔགས་ཕྲེང་ལས། །འོད་འཕྲོས་ཕྱི་སྣོད་ནང་བཅུད་ཀུན་ལ་ཕོག །ཚེ་དཔལ་འབྱོར་པ་འོད་དང་འོད་ཟེར་གྱི། །རྣམ་པར་བསྡུས་ནས་སྔགས་ཕྲེང་ལ་ཐིམ་གྱུར། །ཞེས་མོས་ལ་བཟླས་པ་བྱའོ། །དེ་ནས་བུམ་བསྐྱེད་ནི། དང་པོ་ལས་སྔགས་ཀྱིས་བསངས་སྦྱངས། ཆོས་ཀུན་སྟོང་པ་ཆེན་པོའི་ངང་། །པྃ་ལས་པདྨ་ཨ་ལས་ནི། །ཟླ་བའི་སྟེང་དུ་བྷྲཱུྃ་ཡིག་ལས། །རིན་ཆེན་བུམ་པ་
མཚན་ཉིད་རྫོགས། །བདུད་རྩིའི་རྒྱུན་གྱིས་གང་བའི་དབུས། །བདག་བསྐྱེད་ལྟར་ལ། པདྨ་དཀར་པོ་དྲི་མ་མེད། །ཅེས་སོགས་དང་། འཕགས་མ་སྒྲོལ་མ་སྐུ་མདོག་དཀར། ཞེས་པའི་ཁྱད་པར་ལས་གཞན་དཀྱུས་ལྟར་སྤྱན་འདྲེན་དང་རྒྱས་གདབ་བར་བཏོན། གཉིས་པ་མཆོད་བསྟོད་ནི། ཨོ་ཨཱཪྱ་ཏཱ་རེ་ས་པ་རི་ཝཱ་ར་བཛྲ་ཨརྒྷཾ་སོགས་ཀྱིས་མཆོད་པ་དང་། རཱུ་པ། ཤབྡ་སོགས་ཀྱང་བརྗོད། རྒྱལ་མཆོག་ཚེ་དཔག་མེད་པའི་ཡུམ། །འཆི་མེད་ངེས་པར་སྟེར་བ་མོ། །རིག་པ་འཛིན་མ་བཅོམ་ལྡན་འདས། །རྗེ་བཙུན་སྒྲོལ་མར་ཕྱག་འཚལ་བསྟོད། །ཅེས་བསྟོད་ནས། གསུམ་པ་བཟླས་པ་ནི། རང་ཉིད་ལྷར་གསལ་བའི་ཐུགས་ཀ་ནས་སྔགས་ཕྲེང་ཐོན། བུམ་ལྷའི་ཐུགས་ཀར་ཞུགས་པས་ཐུགས་དམ་གྱི་རྒྱུད་བསྐུལ་ནས་སྲིད་ཞི་མ་ལུས་པའི་ཕུན་སུམ་ཚོགས་པ་ཐམས་ཅད་བསྡུས་ཏེ་བུམ་ལྷར་ཐིམ་པར་གྱུར་ཅེས་པར་མོས་ལ་ཡི་གེ་བཅུ་པ་བཟླའོ། །མཐར། ༀ་བཛྲ་ཨརྒྷཾ་ཨཱཿཧཱུྃ་གིས་དུང་ཆོས་ཀྱི་ཆུ་མཆོད་ཡོན་དུ་ཕུལ་ནས། ཉེར་སྤྱོད་ལྔས་མཆོད། བཅོམ་ལྡན་འདས་མ་བུམ་པའི་ཆུ་དང་དབྱེར་མེད་པར་འོད་དུ་ཞུ་བར་གྱུར། ཅེས་བུམ་ལྷ་འོད་ཞུ་དང་། སྐབས་འདིར་གཞན་གྱི་དོན་རྗེས་གནང་སྦྱིན་པ་སོགས་སྤྲོ་ན། དང་པོ་རང་ཉིད་ཀྱིས་ཏིང་ངེ་འཛིན་གྱི་དབང་བླངས་ནས། གཉིས་པ་སློབ་མ་རྣམས་ལ་དུང་ཆོས་ཆབ་ཀྱིས་ཁྲུས་དང་། སྔར་བཤད་པ་ལྟར་སྔོན་འགྲོ་བགེགས་
བསྐྲད་སྲུང་འཁོར་བར་བྱ། དེ་ནས་གསུམ་པ་དབང་གི་ཐོག་མར་སྤྱི་བཤད་ཅུང་ཟད་སྤྲོ་ན། ནམ་མཁའ་དང་མཉམ་པའི་སེམས་ཅན་ཐམས་ཅད་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ་སྙམ་པའི་ཐུགས་བསྐྱེད་དང་ལྡན་པའི་སྒོ་ནས་གསན་འཚལ། དེ་ལ་ཡང་མཐར་ཐུག་ཕྱིར་མི་ལྡོག་པ་མཆོག་གི་གོ་འཕང་དང་། གནས་སྐབས་སུ་བགེགས་དང་བར་ཆད་ཉོན་མོངས་པའི་དྲི་མ་མཐའ་དག་བསལ་བའི་དོན་དུ་འཕགས་མ་ཡིད་བཞིན་འཁོར་ལོའི་དབང་བསྐུར་བ་ཡིན་ཏེ། དེ་ཡང་རྣལ་འབྱོར་མའི་རྒྱུད་ལས། འཆི་བ་བསླུ་བྱེད་དཀར་མོའོ། །ཞེས་པས་བསྟན་ཅིང་། འདི་ཡི་སྒྲུབ་ཐབས་ཀྱི་རྒྱ་གཞུང་སློབ་དཔོན་ངག་གི་དབང་ཕྱུག་ཅེས་བྱ་བ་མཁས་པ་དང་གྲུབ་པའི་ཁྱུ་མཆོག་དེ་ཉིད་དངོས་སུ་རྗེ་བཙུན་མ་ཡིས་བྱིན་གྱིས་བརླབས་ཤིང་རྗེས་སུ་བཟུང་བར་བརྟེན་འདི་ཡི་རིག་པའི་སྐོར་རྒྱུད་སྡེ་སོ་སོ་ནས་གསུངས་པ་རྣམས་ཕྱོགས་གཅིག་ཏུ་བསྡུས་པའི་བསྟན་བཅོས་འཆི་བསླུ་ཀུན་བཏུས་སུ་གྲགས་པ་བཀྲལ་བར་མཛད་ཅིང་། གཞན་ཡང་མན་ངག་གི་རྣམ་པ་དུ་མ་འཕགས་མས་དངོས་སུ་གདམས། དེས་བླ་མ་རྡོ་རྗེ་གདན་པ་ཆེན་པོ་ལ་གནང་ཞིང་སྒྲུབ་པས་ཞལ་གཟིགས་ཐུན་མོང་དང་ཐུན་མོང་མ་ཡིན་པའི་ཚུལ་དུ་མ་བསྟན་པར་མཛད་པ་རྣམས་བསྟན་བཅོས་སུ་ཡི་གེར་བཏབ། དེ་ལ་བརྟེན་ནས་སྒྲུབ་ཐབས་མི་འདྲ་བ་ཡང་འགའ་ཞིག་
ཏུ་སྤེལ། དེ་ལ་བ་རི་ལོ་ཙཱ་བ་རིན་ཆེན་གྲགས་ཀྱིས་གསན་ཅིང་རྗེས་སུ་འཛིན། རྒྱུད་དང་སྒྲུབ་ཐབས་ཀྱི་སྐོར་རྣམས་མ་འདྲེས་སོ་སོར་རྟོགས་པའི་རྒྱ་གཞུང་རྣམས་བོད་དུ་སྤྱན་དྲངས་ནས་བསྒྱུར་ཅིང་གཏན་ལ་ཕབ་ནས་གསལ་བར་བྱེད་པའི་གནས་སུ་སྟོན་པར་མཛད། དེ་ལ་དགེ་བའི་བཤེས་གཉེན་གླེ་ནག་པས་གསན། དེ་ལ་སྒྲེ་པ། དེས་རྒྱལ་བས་ལུང་གིས་ཟིན་པའི་བསྟན་པའི་བདག་པོ་མཉམ་མེད་དྭགས་པོ་རིན་པོ་ཆེ་ཟླ་འོད་གཞོན་ནུ་ལ་གནང་ཞིང་དེ་ནས་རིམ་པས་ཀཾ་ཚང་སྒྲུབ་བརྒྱུད་འདི་ཉིད་ཀྱི་སྙིང་པོ་དོན་གྱི་བརྒྱུད་པ་དང་གཅིག་འདྲེས་སུ་གྱུར་ཅིང་། ཡང་རྗེ་བཙུན་མས་བླ་མ་གསེར་གླིང་པ། དེས་ཇོ་བོ་རྗེ། དགེ་བཤེས་སྟོན་པ། སྤྱན་སྔ་བ། སྒྲེ་པ་ནས་དྭགས་པོ་རིན་པོ་ཆེར་འདུས་པ་དང་། ཡང་ལུགས་གཅིག་ལ་སྒྲོལ་མས་ཇོ་བོ་རྗེ་དཱི་པཾ་ཀ་ར། བྱམས་པའི་རྣལ་འབྱོར་པ། སྙུག་རུམ་པ་ནས་དྭགས་པོ་རིན་པོ་ཆེར་འདུས་པ་སྟེ། བཀའ་བབས་ཆུ་བོ་གསུམ་འབྲེལ་རྗེ་སྒམ་པོ་པར་འདུས་པ་དང་། གཞན་ཡང་ཁ་ཆེ་པཎ་ཆེན་ནས་བརྒྱུད་པ་དང་། གྲུབ་ཆེན་རིན་པོ་ཆེ་ཀརྨ་པཀྴི་ནས་བརྒྱུད་པ། བླ་མ་ས་སྐྱ་པ་ཆེན་པོ་ནས་བརྒྱུད་པ་སོགས་མདོར་ན་བཀའ་བབས་ཀྱི་ཆུ་བོ་དྲུག་གཅིག་ཏུ་འདུས་པ་ཡང་སྣང་ཞིང་། དེ་ལྟར་བྱིན་རླབས་ཀྱི་ཚན་ཁ་གཞན་ལས་ཁྱད་པར་དུ་འཕགས་པ། གོང་མ་དག་གི་རྡོ་རྗེའི་
གསུང་ལས། འཆི་ལྟས་ཅི་ལྟར་བྱུང་ཡང་ངེས་པར་བཟློག་ནུས་པའི་འཕགས་མ་སྒྲོལ་མའི་རིག་སྔགས་དང་སྒྲུབ་པ་རྩིས་སུ་མཛད་ཅིང་ཐུགས་ཉམས་སུ་བསྟར་བ་ཡང་ཆེས་མང་བར་བྱུང་ཞིང་། དེ་དག་ཀྱང་ཕྲིན་ལས་རྒྱ་ཆེ་ཞིང་འགྲོ་དོན་རྒྱས་པ་སོགས་ལྷག་པའི་ལྷ་འདི་ཉིད་ལ་བསྟེན་ནས་གྲུབ་པ་བརྙེས་པ་ཁོ་ན་སྟེ། དེ་ལྟ་བུའང་བརྒྱུད་པ་རིན་པོ་ཆེ་འདི་དག་ལས་བྱུང་ཞིང་ཚུལ་བཞིན་དུ་སྒྲུབ་པར་བྱས་ན་འཆི་མེད་ཀྱི་ཚེ་དང་རྒུད་མེད་ཀྱི་ལང་ཚོ། གཞན་ཡང་དངོས་གྲུབ་ཅི་འདོད་པ་མཐའ་དག་ཡིད་བཞིན་དུ་ངེས་པར་འབྱུང་ཞིང་། དུས་མ་ཡིན་པའི་འཆི་བ་སོགས་འཇིགས་པ་བརྒྱད་དང་བཅུ་དྲུག་ལས་སྐྱོབ་ནུས་པ་དང་། མཐར་ཐུག་ཆོས་དབྱིངས་བདེ་བ་ཆེན་པོའི་ངང་དུ་དབྱེར་མེད་པར་སངས་རྒྱས་པ་སོགས་འགྲུབ་པར་འགྱུར་ཞིང་། དེ་ཡང་པཎ་ཆེན་ངག་དབང་གྲགས་པའི་ཀུན་བཏུས་ལས། ཚངས་དབང་ཁྱབ་འཇུག་ཉི་ཟླ་དང་། །དྲག་པོ་ཕྱོགས་སྐྱོང་འདོད་ལྷས་ཀྱང་། །བ་སྤུའི་ཁུང་བུའང་གཅོད་མི་ནུས། །འཆི་བདག་ལས་རྒྱལ་སྒྲོལ་མ་བཞིན། །སྐྲ་དཀར་གཉེར་མ་སྐལ་ངན་ནད། །དབུལ་བ་ལ་སོགས་ཉམས་པར་བྱེད། །སེང་གེ་ལ་སོགས་འཇིགས་ཆེན་བརྒྱད། །སྡུག་བསྔལ་ཚོགས་རྣམས་སེལ་བར་བྱེད། །སློང་བ་མེད་པར་བཟའ་བཏུང་གོས། །ཁང་བཟང་རིན་ཆེན་སྣ་ཚོགས་འདུ། །རལ་གྲི་མིག་སྨན་རྐང་མགྱོགས་དང་། །བུམ་པ་བཟང་པོ་ལ་
སོགས་འགྲུབ། །སྙན་ངག་དང་ནི་རྩོད་པ་མཁས། །བློ་རྣོ་ཤེས་རབ་དྲི་མ་མེད། །གཞན་ཡང་ཅི་འདོད་དངོས་གྲུབ་ནི། །འཁོར་ལོ་འདི་ལས་འབྱུང་བར་འགྱུར། །ཞེས་གསུངས་པ་ལྟར་ཕན་པའི་ཡོན་ཏན་མཐའ་ཡས་ཤིང་བརྗོད་ཀྱིས་མི་ལང་མོད་ཀྱང་། ཅུང་ཟད་སྤྲོས་པ་དེ་དག་ངེས་པར་གྱིས་ལ་སྒོ་གསུམ་གྱི་དད་དང་དང་བ་ཆེན་པོས་ཡིད་སྤྲོ་བའི་ངང་ནས་དབང་བསྐུར་ཟབ་མོ་སྨིན་གྲོལ་གྱི་ལམ་ལ་འཇུག་པའི་ཕྱིར་དུ་དངོས་དང་ཡིད་སྤྲུལ་རྒྱ་མཚོས་དྲངས་བའི་མཎྜལ་གནང་བར་ཞུ། ཞེས་མཎྜལ་ཕུལ་ལ། སློབ་དཔོན་གྱིས། དེ་ལྟར་མཎྜལ་ཕུལ་བ་སྔོན་དུ་སོང་ནས་ཐོག་མར་བདག་སློབ་དཔོན་དུ་འོས་པ་དང་རྗེ་བཙུན་མ་དབྱེར་མེད་པ་ལ་དབང་བསྐུར་ཞུ་བའི་དོན་དུ་གསོལ་བ་འདེབས་པ་འདིའི་རྗེས་ཟློས་མཛོད། རྒྱལ་བ་རབ་འབྱམས་འདུས་པའི་དཔལ། །བླ་མ་དང་ནི་རྗེ་བཙུན་མར། །གསོལ་འདེབས་སྨིན་གྲོལ་ལམ་ཟབ་མོ། །མ་ལུས་བཀའ་དྲིན་སྩལ་དུ་གསོལ། །ལན་གསུམ་གྱིས་གསོལ་བ་གདབ། མདུན་གྱི་ནམ་མཁར་ཡིད་བཞིན་འཁོར་ལོའི་ལྷ་ཚོགས་ལ། །སངས་རྒྱས་བྱང་སེམས་རྡུལ་སྙེད་སྤྲིན་ཕུང་གཏིབས་པ་བཞིན། །བསྐོར་བའི་སྤྱན་སྔར་ཡན་ལག་བདུན་པ་འབུལ་བའི་བློས། །རྩེ་གཅིག་གུས་པས་ཐལ་སྦྱར་འདི་ཡི་རྗེས་ཟློས་མཛོད། །དཀོན་མཆོག་གསུམ་ལ་བདག་སྐྱབས་མཆི། །སོགས་ལན་གསུམ་བརྗོད། དེ་ནས་བསྐྱེད་པའི་རིམ་པ་བསྒོམ་པའི་དོན་དུ་ནི། །
གསལ་སྟོང་འཛིན་མེད་ངང་དུ་དམིགས་པ་འདི་བཞིན་མཛོད། །ༀ་བཛྲ་ཀྲོ་དྷས་སློབ་མ་རྣམས་བསངས་ལ། ༀ་ཤཱུ་ནྱ་ཏ་སོགས་བདག་བསྐྱེད་ཇི་བཞིན་པ་ལ། ཁྱེད་རང་འཕགས་མ་སྒྲོལ་མ་དཀར། །ཞེས་སོགས་ནས། ཐུགས་ཀའི་དབུས་སུ་པད་ཟླར་ཏཱྃ། །འོད་ཟེར་དཀར་པོ་འབར་བ་ཅན། །སྣང་སྟོང་འཛིན་མེད་འཇའ་ཚོན་ལྟར། །བཀྲ་ཞིང་ལམ་མེར་གསལ་བར་བསྒོམ། །ཅེས་དམིགས་པ་སྤོར་ལ། དེ་ནས་རྒྱུད་ལ་ཡེ་ཤེས་ཆེན་པོའི་བྱིན་རླབས་མྱུར་དུ་འབེབས་པའི་ཕྱིར། བླ་མ་སྒྲོལ་མ་ཐ་མི་དད་པར་གསོལ་གདབ་འདིའི་རྗེས་ཟློས་མཛོད། དུས་གསུམ་སངས་རྒྱས་ཐམས་ཅད་ཀྱི་ངོ་བོ་བླ་མ་རིན་པོ་ཆེས། བདག་དུས་མ་ཡིན་པའི་འཆི་བ་དང་འཇིགས་པ་ཐམས་ཅད་ལས་སྒྲོལ་བའི་ཕྱིར། རྗེ་བཙུན་ཡིད་བཞིན་འཁོར་ལོའི་སྐུ་གསུང་ཐུགས་ཀྱི་བྱིན་གྱིས་བརླབས་པའི་ཡེ་ཤེས་དམ་པས་སྨིན་པར་མཛད་དུ་གསོལ། ལན་གསུམ་གསོལ་བ་བཏབ། དེ་ལྟར་གསོལ་བཏབ་སློབ་དཔོན་ཐུགས་ཀ་ནས། །འོད་འཕྲོས་མདུན་བསྐྱེད་ལྷ་ཡི་ཐུགས་རྒྱུད་བསྐུལ། །ཐུགས་ཀའི་ཧཱུྃ་དང་ཏཱྃ་ལས་འོད་ཟེར་འཕྲོས། །ཕྱོགས་བཅུའི་ཞིང་ཁམས་ཐམས་ཅད་སྣང་བར་བྱས། །རང་བཞིན་གནས་དང་ཁྱད་པར་ལྷོ་ཕྱོགས་ཀྱི། །པོ་ཊ་ལ་ཡི་གནས་མཆོག་དམ་པ་ནས། །བསྒོམ་པ་དང་འདྲའི་བཅོམ་ལྡན་སྒྲོལ་མ་དཀར། །སངས་རྒྱས་བྱང་སེམས་རྒྱ་མཚོ་
མ་ལུས་པ། །སྤྲིན་ཕུང་གཏིབས་པ་ལྟ་བུའི་ཡེ་ཤེས་སེམས། །མདུན་གྱི་ནམ་མཁར་སྐད་ཅིག་སྤྱན་དྲངས་ནས། །ཁྱེད་རྣམས་ལྷར་གསལ་སྐུ་ལ་གཉིས་མེད་པར། །ཐུགས་རྗེའི་བྱིན་རླབས་དངོས་གྲུབ་ཆར་ལྟར་བབས། །འཆི་མེད་དོན་དམ་ཡེ་ཤེས་རྒྱུད་ལ་ཞུགས། །སེམས་ཉིད་བདེ་བ་ཆེན་པོ་འོད་གསལ་བ། །གཡོ་འགུལ་མེད་པའི་ངང་དུ་གནས་པར་མཛོད། །ༀ་ཨཱཪྱ་ཏཱ་རེ་ས་པ་རི་ཝཱ་ར་མ་ཧཱ་བཛྲ་ཛྙཱ་ན་ཨ་ཝེ་ཤ་ཡ། ཨ་ཝེ་ཤ་ཡ་ཨ་ཨ་ཨ། ཞེས་སྤོས་འཐུལ། རོལ་མོ་བཀྲོལ་ལ་ཡེ་ཤེས་པ་གཞུག་ནས། དེ་ལྟར་བབས་པའི་ལྷ་དེ་ཉིད། །སྙིང་པོའི་བར་དུ་མི་འབྲལ་བར། །སྐལ་ལྡན་རྒྱུད་ལ་བརྟན་གྱུར་ཅིག །ཛྙཱ་ན་བཛྲ་ཏིཥྛ་ཧཱུྃ། ཞེས་རྡོ་རྗེ་མགོར་བཞག །དང་པོ་སྐུ་ཡི་རྗེས་གནང་ནི། སླར་ཡང་སློབ་དཔོན་སྙིང་གའི་འོད་ཟེར་གྱིས། །བསྐུལ་བས་དབང་ལྷ་རིགས་ལྔ་ཡབ་ཡུམ་རྣམས། །སྤྱན་དྲངས་མཆོད་པའི་སྤྲིན་གྱི་རྒྱ་མཚོས་མཆོད། །ༀ་པཉྩ་ཀུ་ལ་བཛྲ་ཨརྒྷཾ་ནས། ཤབྡའི་བར་བརྗོད། ༀ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཾ། ཞེས་གསོལ་བ་བཏབ་པས་དབང་ལྷ་རྣམས་ཀྱིས་རིན་པོ་ཆེའི་བུམ་པ་ཡེ་ཤེས་ཀྱི་བདུད་རྩིའི་རྒྱུན་གྱིས་གང་བ་བསྣམས་ནས་དབང་བསྐུར་བའི་མོས་པ་གྱིས་ཤིག །ཇི་ལྟར་བལྟམས་པ་ཙམ་གྱིས་ནི། །སོགས་བརྗོད། དེ་ལྟར་དབང་བསྐུར་སྒྲིབ་པ་བཞི་དག་ཅིང་། །སྐུ་བཞི་མངོན་བྱས་འཆི་མེད་ཚེ་དཔལ་ཐོབ། །ཆུ་
ཞབས་གྱེན་བརྟེན་འོད་དཔག་དབུ་བརྒྱན་གྱུར། །དེ་ལྟར་སྐུ་མཆོག་བུམ་པའི་དབང་ཐོབ་ནས། །ལྷ་ཡི་རྣལ་འབྱོར་བསྐྱེད་རིམ་བསྒོམ་པར་དབང། །འབྲས་བུ་སྤྲུལ་སྐུ་འགྲུབ་པའི་སྐལ་ལྡན་གྱུར། །གཉིས་པ་གསུང་གི་རྗེས་གནང་ནི། སློབ་དཔོན་ལྷར་གསལ་ཞལ་ནས་སྔགས་ཕྲེང་ཐོན། །སློབ་མའི་ཞལ་ཞུགས་ཐུགས་ཀར་ཐིམ་པའི་མོད། །དུས་གསུམ་རྒྱལ་བ་ཀུན་གྱི་གསུང་གསང་བ། །མི་བཟད་རྒྱན་གྱི་འཁོར་ལོའི་སྙིང་པོ་རྣམས། །དངོས་གྲུབ་ཚུར་བྱོན་ཁྱེད་རང་སྙིང་ཁར་ཐིམ། །འཁོར་བར་མོས་ལ་སྔགས་འདིའི་རྗེས་ཟློས་མཛོད། །སྔགས་ཕྲེང་གཏད་ལ་ཡི་གེ་བཅུ་པ་བཟླའོ། །སློབ་དཔོན་ལ་མེ་ཏོག་འཐོར་བཞིན་དུ་འདི་ཡི་རྗེས་ཟློས་མཛོད། བཅོམ་ལྡན་བདག་གིས་སོགས་ལན་གསུམ། མེ་ཏོག་དེ་ཉིད་སྤྱི་བོར་འཆིང་བར་མོས་ཤིག །བཅོམ་ལྡན་འདི་ལ་སྩལ་ལགས་ཀྱི། །སོགས་བརྗོད་མེ་ཏོག་སྤྱི་བོར་བཀོད། དེ་ལྟར་གསུང་གི་དབང་ཐོབ་ངག་སྒྲིབ་དག །རིག་སྔགས་ཟབ་མོས་སྣ་ཚོགས་ལས་ལ་དབང་། །འབྲས་བུ་ལོངས་སྐུ་འགྲུབ་པའི་སྐལ་ལྡན་གྱུར། །གསུམ་པ་ཐུགས་ཀྱི་རྗེས་གནང་ནི། མདུན་བསྐྱེད་འཕགས་མའི་སྐུ་ལས་སླར་ཡང་ནི། །རྗེ་བཙུན་མ་སྤྲོས་སློབ་མའི་སེམས་ལ་ཐིམ། །དབྱེར་མེད་རང་བཞིན་སྤྲོས་བྲལ་འོད་གསལ་བ། །མ་བཅོས་གཉུག་མའི་ངང་དུ་དར་ཅིག་ཞོག །མཎྜལ་ལྷ་མཚན་སྤྱི་བོར་བཞག །ཡི་གེ་བཅུ་པའི་མཐར། བཛྲ་ས་མ་ཡ་སྟྭཾ། དེ་ལྟར་ཐུགས་
ཀྱི་དབང་ཐོབ་ཡིད་སྒྲིབ་དག །མི་རྟོག་ཏིང་འཛིན་རྣལ་འབྱོར་བསྒོམ་པར་དབང་། །འབྲས་བུ་ཆོས་སྐུ་འགྲུབ་པའི་སྐལ་ལྡན་གྱུར། །དེ་ལྟར་འཕགས་མ་ཡིད་བཞིན་འཁོར་ལོའི་སྨིན་བྱེད་ཀྱི་རྗེས་སུ་གནང་བ་ལེགས་པར་ཐོབ་ནས་རྩ་བ་དང་ཡན་ལག་གི་དམ་ཚིག་བསྒྲགས་པ་ནི། དེ་ཡང་ལས་སྣ་ཚོགས་པའི་རྒྱུད་ལས། སོ་སོའི་དམ་ཚིག་སྡོམ་གནས་ཏེ། །ལྷ་ཡི་འཁོར་ལོ་དང་ལྡན་པས། །སྲོག་ཆགས་བསད་དང་མ་བྱིན་ལེན། །རྫུན་དང་ཕྲ་མ་འདོད་ལོག་གཡེམ། །རིང་དུ་སྤང་ཞིང་ཤེས་རབ་ཀྱི། །རང་བཞིན་བུད་མེད་སྨད་མི་བྱ། །སེམས་ཅན་རྣམས་ལ་མ་བཞིན་དུ། །བརྩེ་བས་རྟག་ཏུ་བཀུར་སྟི་བྱ། །དམ་ཚིག་སྲོག་ལ་གནས་པ་ཡི། །ལས་རྣམས་ཀུན་ལ་མཐུ་ཡོད་འགྱུར། །དེ་ལྟར་སྲུང་སྡོམ་རྣམས་ཚུལ་བཞིན་འཛིན་སྙམ་པའི་སྒོ་ནས་ཡིད་དམ་བཅས་ལ་འདིའི་རྗེས་ཟློས། གཙོ་བོས་ཇི་ལྟར་སོགས་དང་། གཏང་རག་གི་མཎྜལ་ཕུལ། ལུས་ལོངས་སྤྱོད་འབུལ་བའི་བློས་འདིའི་རྗེས་ཟློས། དེང་ནས་བརྩམས་ཏེ་སོགས་བརྗོད་ལ། སློབ་མ་རྗེས་འཛིན་གྱི་རིམ་པ་མདོ་ཙམ་བསྟན་ཟིན་ནས། རྗེས་ཀྱི་ཆོ་ག་ནི། དང་པོ་སྔར་ལྟར་མཆོད་པ་བྱིན་རླབས། སྔགས་མཆོད་ཕུལ་ལ། གཉིས་པ་མཚན་ངེས་པར་གྲགས་པས་བསྟོད་པ་ནི། ༀ་བཅོམ་ལྡན་འདས་མ་ཆེན་མོ། དེ་བཞིན་གཤེགས་པ་ཐམས་ཅད་ཀྱི་བཙུན་མོའི་མཆོག །དམ་ཚིག་སྒྲོལ་མ་ཞེས་
བྱ་བ། དེ་བཞིན་གཤེགས་པ་དང་། རྡོ་རྗེ་དང་། རིན་པོ་ཆེ་དང་། པདྨ་དང་། ལས་ཀྱི་རིགས་ཐམས་ཅད་ཀྱི་བདག་པོ། རྒྱུ་བ་དང་མི་རྒྱུ་བའི་བྱེད་པ་པོ། བརྟན་པ་དང་གཡོ་བའི་རང་བཞིན། གསང་བ་ལས་ཆེས་ཤིན་ཏུ་གསང་བ། གསང་བ་ཆེན་མོའི་དབང་ཕྱུག་མ་བདག་ཉིད་ཀྱི་རྡོ་རྗེའི་མིང་འདི་རྣམས་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་བྱུང་ངོ་། །བཅོམ་ལྡན་འདས་མ་སྒྲོལ་མ། རྡོ་རྗེ་མ། དམ་ཚིག་སྒྲོལ་མ། རྡོ་རྗེ་རྣལ་འབྱོར་མ་ཆེན་མོ། ཡེ་ཤེས་ལྔས་བརྒྱན་པ་མ། སངས་རྒྱས་ཐམས་ཅད་ཀྱི་དབང་བསྐུར་མ། ཡེ་ཤེས་ཀྱི་དཀྱིལ་འཁོར། ཟླ་བའི་བདེ་མ། ངོ་མཚར་བདེ་མ། སྐུ་དང་གསུང་དང་ཐུགས་ཀྱི་འདོད་མ། ཕུང་པོའི་བདག་མོ། སྐྱེ་མཆེད་ཀྱི་བདག་མོར་གྱུར་པ། འབྱུང་བ་རྣམས་རབ་ཏུ་ཐོབ་པ། ཡུལ་དང་བྲལ་བའི་རང་བཞིན། རྒྱུད་ཀུན་གྱི་དབང་ཕྱུག་མ། ཡེ་ཤེས་རྣམ་པ་ལྔས་བྱང་ཆུབ་པ། རྡུལ་དང་བྲལ་བ། དྲི་མ་མེད་པ། གསང་སྔགས་ཆེན་མོ། ཤིན་ཏུ་སྲ་བ། མཚན་དང་དཔེ་བྱད་རྣམས་ཀྱིས་སྤྲས་པ། དག་བྱེད་དག་བྱེད་ཆེན་མོ། ལས་ཐམས་ཅད་འགྲུབ་པར་བྱེད་པ། འདོད་པ་ཐམས་ཅད་རབ་ཏུ་སྦྱིན་མ། ཡི་གེ་བཅུ་པའི་སྒྲ་སྒྲོག་མ། སྒྲ་སྒྲོག་དགྱེས་མ། གདུང་མ། མྱུར་བ་མ། རྣམ་པར་གཤེགས་པ་ཡོངས་སུ་དག་པ། སྲ་ཞིང་བདེ་བ་ཡེ་ཤེས་
སྙིང་པོ། བདེ་བ་ཆེན་མོའོ། །ན་མཿན་མཿཨཱཪྱ་ཏཱ་ར་ཡ། ཞེས་པས་བསྟོད་ལ། བཅོམ་ལྡན་འདས་འཕགས་མ་སྒྲོལ་མ་དཀར་མོ་ཡིད་བཞིན་འཁོར་ལོའི་ལྷ་ཚོགས་འཁོར་དང་བཅས་པས་བདག་ལ་མཆོག་ཐུན་མོང་གི་དངོས་གྲུབ་མ་ལུས་པ་སྩོལ་བ་དང་། ལས་བཞི། གྲུབ་པ་ཆེན་པོ་བརྒྱད། འཆི་བ་མེད་པ་རྡོ་རྗེའི་ཚེ་དང་། རྒུད་པ་མེད་པའི་ལང་ཚོ་རྒྱས་ཤིང་། བསྟན་དང་འགྲོ་བའི་དོན་རླབས་པོ་ཆེ་འབྱུང་བར་བྱིན་གྱིས་བརླབ་ཏུ་གསོལ། བྱང་ཆུབ་སྒྲུབ་པའི་བགེགས་དང་བར་ཆད་ཐམས་ཅད་ཉེ་བར་ཞི་བར་མཛད་དུ་གསོལ། སེམས་ཅན་ཐམས་ཅད་བདེ་ལེགས་དང་དཔལ་འབྱོར་ཕུན་སུམ་ཚོགས་པས་དུས་ཀུན་ཏུ་ཤིས་པའི་ཡོན་ཏན་འཕེལ་ཞིང་རྒྱས་པར་མཛད་དུ་གསོལ། ཞེས་འདོད་པའི་དོན་སྤྱི་དང་བྱེ་བྲག་གང་ཡིན་པ་དེ་རྩེ་གཅིག་གསོལ་བ་བཏབ། འཕགས་མ་དགྱེས་པ་དང་བཅས་ཏེ་ཕྱག་གཡས་མཆོག་སྦྱིན་གྱི་རྒྱས་རང་དང་བསྲུང་བྱའི་སྤྱི་བོར་རེག་ནས་མཆོག་སྩོལ་བར་རྩེ་གཅིག་ཏུ་མོས། གསུམ་པ་ཡི་གེ་བརྒྱ་པས་ཆད་ལྷག་ཁ་བསྐང་། གཤེགས་གསོལ་བྱེད་ན། ༀ་ཁྱེད་ཀྱིས་སེམས་ཅན་སོགས། བཛྲ་མུས་ཡེ་ཤེས་པ་གཤེགས། དམ་ཚིག་པ་རང་ལ་བསྡུ་བའམ། རྟེན་ཡོད་ན། བདག་དང་འགྲོ་ལ་སོགས་དང་། སུ་པྲ་ཏིཥྛས་རྟེན་བཞུགས་གང་འོས་བྱ། དགེ་བ་འདི་ཡིས་མྱུར་དུ་བདག་སོགས་དང་། བཞི་པ་རྗེས་ཀྱི་རྣལ་འབྱོར་ནི། རང་གི་
ཐུགས་ཀའི་ཏཱྃ་ལས་འོད་ཟེར་འཕྲོས་པས་འཁོར་འདས་ཐམས་ཅད་ལ་ཕོག །དེ་དག་ཀྱང་རང་ཉིད་ལ་ཐིམ། རང་ཉིད་ཀྱང་རིམ་བཞིན་འཁོར་ལོ་དང་ཡིག་འབྲུ་ལ་ཐིམ། དེ་ཡང་ཏཱྃ་ལ་འདུས་ནས་ཐིག་ལེ་དང་ནཱ་ད། དེ་ཡང་མི་དམིགས་པ་སྟོང་ཉིད་འོད་གསལ་གྱི་ངང་ལ་མཉམ་པར་བཞག་གོ། ཞེས་ཅི་གནས་སུ་བཞག་ལ། ལྔ་པ་ཟུང་འཇུག་གི་སྐུར་ལྡང་བ་ནི། སླར་ཡང་རང་ཉིད་གསལ་ལ་འཛིན་མེད་འཕགས་མའི་སྐུར་ལམ་གྱིས་གསལ་བའི་གནས་གསུམ་ༀ་ཨཱཿཧཱུྃ་གིས་མཚན་པ་དང་སྣང་གྲག་གི་ཆོས་ཐམས་ཅད་སྐྱེ་བ་མེད་པ་ལྷ་ཡི་ངོ་བོར་རྣམ་པར་དག་གོ། །དེ་ནས་བཀྲ་ཤིས་ཅི་རིགས་པ་དང་བསྔོ་སྨོན་བརྗོད་ཅིང་རྒྱུན་སྤྱོད་ལ་འཇུག་པར་བྱའོ། །དེ་ལྟར་འཕགས་མ་ཡིད་བཞིན་འཁོར་ལོའི་ཆོ་ག་འཇུག་བདེར་བཀོད་པ་འདི་ནི་བསྟན་པའི་གསལ་བྱེད་དབོན་སྤྲུལ་ཀརྨ་འཆི་མེད་ཀྱི་དགོངས་བཞེད་ལྟར། སི་ཏུ་པདྨ་ཉིན་བྱེད་དབང་པོས་སྤེལ་བ་སྐྱེ་རྒུ་ཐམས་ཅད་ལ་དགེ་བར་གྱུར་ཅིག །སྭསྟི་ཛ་ཡནྟུ།། །།