འཕགས་མ་སྒྲོལ་མ་ཉེར་གཅིག་གི་ཆོ་ག་མེ་ཏོག་པད་དཀར་ཕྲེང་མཛེས།
འཕགས་མ་སྒྲོལ་མ་ཉེར་གཅིག་གི་ཆོ་ག་མེ་ཏོག་པད་དཀར་ཕྲེང་མཛེས་ཞེས་བྱ་བ་བཞུགས་སོ།
རྒྱལ་ཀུན་མཐུ་སྟོབས་གཅིག་བསྡུས་ཐུགས་རྗེའི་བདག་ཉིད་ཅན། །གསུང་གི་རྡོ་རྗེ་ཚེ་འོད་སྣང་བ་དཔག་ཏུ་མེད། །བརྩེ་ཆེན་དམ་བཅས་འགྲོ་སྒྲོལ་གཉེན་གཅིག་འཇིག་རྟེན་མགོན། །འཕགས་མཆོག་སྙིང་རྗེས་འགྲོ་ལ་སྤྱན་རས་གཟིགས་པ་ཡི། །བྱམས་པའི་རྣམ་རོལ་རང་གཟུགས་སྤྲུལ་པའི་ཚུལ་སྣང་བ། །དུས་གསུམ་རྒྱལ་ཀུན་སྐྱེད་ཡུམ་ཡིད་བཞིན་འཁོར་ལོ་དཀར། །སྒྱུ་འཕྲུལ་ཅིར་ཡང་འཆར་བའི་འཕགས་མ་ཉེར་གཅིག་ལ། །གསོལ་འདེབས་སྨིན་གྲོལ་དངོས་སྩོལ་བདག་རྒྱུད་བྱིན་གྱིས་རློབས། །ལོ་ཀི་ཤྭ་རས་མངོན་དུ་བྱིན་རླབས་གྲུབ་པའི་དབང་ཐོབ་པ། །མི་ཏྲ་ཛོ་ཀི་ཐུབ་བསྟན་གསལ་བའི་ཉི་མ་ཆེ། །
འགྲོ་བའི་མུན་སེལ་མགོན་ཁྱོད་བླ་མེད་སྙིང་པོའི་བར། །གསོལ་འདེབས་སྨིན་གྲོལ་དངོས་སྩོལ་བདག་རྒྱུད་བྱིན་གྱིས་རློབས། །པནྜི་ཏ་པ་དོན་ཡོད་རྡོ་རྗེ་འོད་སྲུང་མགོན། །མཆོག་གཟིགས་ཇོ་སྲས་མཉམ་མེད་བྱམས་པ་སེངྒེའི་མཚན། །ཀུན་སྤངས་རིན་ཆེན་ཤེས་རབ་གཡུང་སྟོན་བཛྲ་ཤྲཱི། །གསོལ་འདེབས་སྨིན་གྲོལ་དངོས་སྩོལ་བདག་རྒྱུད་བྱིན་གྱིས་རློབས། །མཁན་པོ་གྲགས་ཚུལ་མཁས་ཤིང་གྲུབ་པ་ཆོས་དར་བ། །སངས་རྒྱས་དཔལ་བ་ཀིཪྟི་ཤྲཱི་བྷ་དྲ་དང་། །སློབ་དཔོན་རིན་ཆེན་ཀུན་དགའ་རབ་འབྱམས་ཆོས་རྗེ་ལ། །གསོལ་འདེབས་སྨིན་གྲོལ་དངོས་སྩོལ་བདག་རྒྱུད་བྱིན་གྱིས་རློབས། །རྗེ་བཙུན་གཙུག་ལག་ཕྲེང་བ་
དཀོན་མཆོག་ཡན་ལག་ཞབས། །ཡོངས་འཛིན་རྣམ་རྒྱལ་དཔལ་བཟང་ངག་གི་དབང་པོ་མཆོག །ངག་དབང་བཀྲ་ཤིས་དཔལ་གྲུབ་རྣམ་རྒྱལ་ལེགས་གྲུབ་ལ། །གསོལ་འདེབས་སྨིན་གྲོལ་དངོས་སྩོལ་བདག་རྒྱུད་བྱིན་གྱིས་རློབས། །དོན་གཟིགས་ཕྲིན་ལས་ཤེས་རབ་ཡེ་ཤེས་རྡོ་རྗེ་ཅན། །ཟབ་གཏེར་མངའ་བདག་གྲུབ་དབང་ལཱ་ལི་ཏ་བཛྲ། །འཇམ་མགོན་རིག་འཛིན་གསུང་རབ་རྒྱ་མཚོ་གང་དེ་ལ། །གསོལ་འདེབས་སྨིན་གྲོལ་དངོས་སྩོལ་བདག་རྒྱུད་བྱིན་གྱིས་རློབས། །ཤེས་བྱ་ཀུན་མཁྱེན་གནས་ཐོབ་དྷརྨ་ཀ་ར་དང་། །བདེ་ཆེན་འཁོར་ལོའི་མགོན་པོ་བདུད་འདུལ་རྡོ་རྗེ་འཆང་། །བཀའ་དྲིན་མཉམ་མེད་རྩ་བརྒྱུད་བླ་མ་མཆོག་རྣམས་ལ། །གསོལ་འདེབས་སྨིན་གྲོལ་དངོས་སྩོལ་བདག་རྒྱུད་བྱིན་གྱིས་རློབས། །རྟོག་ཚོགས་ལྷ་ཡི་དཀྱིལ་འཁོར་ཡེ་ཤེས་རོལ་པར་འཆར། །རིག་རྩལ་འཆི་མེད་རྟག་པ་རྡོ་རྗེའི་གདེང་ཐོབ་ནས། །ཟུང་འཇུག་སྐུ་བཞིའི་བདག་ཉིད་མངོན་གྱུར་འགྲོ་བ་རྣམས། །སྒྲོལ་བའི་ཡང་དག་རྫོགས་སངས་གོ་འཕང་མཆོག་བརྙེས་ཤོག །ཅེས་པའང་འཕགས་མའི་དཀྱིལ་ཆོག་གི་བརྒྱུད་པའི་གསོལ་འདེབས་ཐུགས་དམ་བརྒྱ་རྩ་ལྟར་སྨིན་བྱེད་ལམ་གྱི་བརྒྱུད་པ་བཀོད་ཅིང་། གཞན་དུ་རྗེ་དགུ་པ་བཛྲེ་ཤྭ་ར་ནས་བརྒྱུད་པ་དང་། ཇོ་ནང་རྗེ་བཙུན་སོགས་ནས་བརྒྱུད་པ་སྟེ། བརྒྱུད་པ་གསུམ་ལྡན་བྱིན་རླབས་ཀྱི་ཚན་ཁ་རྨད་དུ་གྱུར་པའང་ཤེས་བར་བྱའོག །ན་མོ་གུ་རུ་ཨཱཪྱ་ཏཱ་རེ་བྷྱཿསྲིད་
ཞིའི་ཟུར་ཕུད་གསེར་གྱི་པདྨོས་མངོན་པར་འདུད་པ་ཡི། །གང་ཞིག་འཁོར་བའི་འཆིང་བ་ཀུན་སྒྲོལ་བཅོམ་ལྡན་འཕགས་མ་ཡུམ། །ཁྱོད་ཀྱི་ཞབས་པད་རི་བོང་འཛིན་པ་བདུད་རྩིའི་འོད་དཀར་ཅན། །ཇི་སྲིད་སྙིང་པོའི་བར་དུ་བདེ་ཆེན་འཁོར་ལོར་རྟག་ཏུ་རོལ། །འཁོར་བའི་ཆུ་བོ་ཆུ་བཞིས་ཉེན་པ་རྣམས། །དྲན་པ་ཙམ་གྱིས་མི་འཇིགས་སྦྱིན་བའི་གཏེར། །ཡིད་ལ་འདོད་འཇོའི་དཔལ་སྩོལ་ལྷག་པའི་ལྷའི། །རྨད་བྱུང་ཕྲིན་ལས་སྣང་བ་སྤེལ་བར་བྱ། །འདིར་རྗེ་བཙུན་མ་ཉེར་གཅིག་གི་སྒྲུབ་ཐབས་གྲུབ་ཆེན་ཉི་མ་སྦས་པའི་ལུགས་ཀྱི་མངོན་པར་རྟོགས་པ་ལས་བརྩམས་ཏེ་ཁྱེར་བདེར་བཀོད་པར་བྱ་སྟེ། དེ་ཡང་སློབ་དཔོན་ངག་དབང་གྲགས་པའི་ཀུན་བཏུས་ལས། དབེན་པའི་གནས་སུ་རས་བྲིས་སོགས། །མདུན་དུ་མཆོད་པ་བྱས་ནས་ནི། །སྔགས་རྣམས་བཟླས་པ་ཙམ་གྱིས་ཀྱང་། །འཆི་བ་བསླུ་ུབ་འབྱུང་བར་འགྱུར། །ཞེས་གསུངས་ཤིང་། དེ་ཡང་སྤྱིར་ཆོ་ག་འདི་ལ་བདག་མདུན་བུམ་པ་དབང་རྗེས་བཅས་རིམ་ལྔ་དང་། དེ་དག་རེ་རེ་ལ་ཡང་བྱེ་བྲག་ནང་གསེས་སུ་དབྱེ་བས་དོན་ཚན་སོ་སོར་བཀོད་པ་ལས་བདག་བསྐྱེད་ཀྱི་སྐབས་འདིར་སྤྱི་དོན་ལྔས་བསྡུས་ཏེ་བསྟན། བྱེ་བྲག་ཏུ་ཡན་ལག་གི་རྣམ་གྲངས་སོ་སོར་ཕྱེ་ནས་བཀོད་པ་ལས། དང་པོ། སློབ་དཔོན་མཚན་ཉིད་དང་ལྡན་པའི་དྲུང་ནས་འདི་ཉིད་ཀྱི་སྨིན་བྱེད་རྒྱུད་ལ་འཇུག་པའི་རྣལ་འབྱོར་པས་བསྒྲུབ་པར་བྱ་སྟེ། བྱང་ཆུབ་ཚེ་དང་དངོས་གྲུབ་གཞན། །མ་སྨིན་པ་ལས་འབྱུང་མི་འགྱུར། །ཞེས་གསུངས་པའི་ཕྱིར་རོ། །གཉིས་པ་དུས་ནི་རབ་བཞིའམ། རྟག་པར་ཡང་རུང་སྟེ། དཀར་
ཕྱོགས་ཀྱི་སྔ་ཆར་དགེ་བའི་དུས་ལ་བརྩམས་ཏེ། དེ་ཡང་ཐོག་མར་བཀྲ་ཤིས་ཤིང་བྱིན་ཆགས་པའི་གནས་སུ་གཙང་སྦྲ་དང་ལྡན་པས་བྱི་དོར་ལེགས་པར་བྱས་ལ། གསུམ་པ་ཚོགས་གཉིས་རྫོགས་པའི་རྟེན་འབྱུང་མཆོད་རྫས་ཡོ་བྱད་ཀྱི་རྣམ་པ་དུ་མས་ཕྱོགས་ཀུན་ཏུ་བརྒྱན་པའི་དབུས་སུ་རྟེན་བྱིན་རླབས་ཅན་བཀྲམ་པ་དང་། ཁྱད་པར་འཕགས་མ་ཉེར་གཅིག་གི་སྐུ་བརྙན་ནམ་བྲིས་སྐུ་ཡང་བཤམས། སྟེགས་ཀྱི་ཁར་རྡུལ་ཚོན་རྡོར་མེའི་རྭ་དཀྱིལ་དང་པདྨ་འདབ་མ་རིམ་པ་གསུམ་ལྡན་དབུས་དང་བཅས་པ་ལ་གཙོ་འཁོར་སོ་སོའི་རང་མདོག་གི་ལྷ་མཚན་བཀོད་པའམ། རས་བྲིས་སམ་ཡང་ན་མཎྜལ་གྱི་དབུས་སུ་འབྲུ་དཀར་ཚོམ་བུ་དྲི་བཟང་གིས་སྦགས་པ་རྩ་སྔགས་བཟླས་བཞིན་པར་སོ་སོར་བཀོད། དེའི་སྟེང་མཉྫིའི་ཁར་རྣམ་རྒྱལ་བུམ་པ་མཚན་ཉིད་དང་ལྡན་པ་དར་དང་མེ་ཏོག་རིན་པོ་ཆེས་ཁ་བརྒྱན་པ། ཁ་རྒྱན་དུང་ཆོས་གཟུངས་རྡོར་དང་བཅས་པ་ཡང་བཤམས། དལ་འབབ་རྒྱུན་གྱིས་སུམ་གཉིས་བཀང་ཞིང་ཉེར་ལྔའི་རྫས་དང་དྲི་བཟང་ཡང་བཏབ། ལས་ཀྱི་བུམ་པ་དཀྱིལ་འཁོར་བྱང་ཤར་དུ་བཤམས། ལྷོར་ཅོད་པན། ནུབ་ཏུ་རྡོ་རྗེ། བྱང་དུ་དྲིལ་བུ། བྱང་ཤར་དུ་མིང་དབང་གི་རྡོར་དྲིལ་སོགས་ཀྱང་བཤམས་ནས་ཕྱོགས་མཚམས་སུ་ཉེར་སྤྱོད་ལ་སོགས་པ་མཆོད་པའི་བྱེ་བྲག་རྣམས་དང་། རིན་པོ་ཆེའི་སྣོད་དུ་ཟླུམ་གཏོར་དཀར་གསུམ་གྱིས་སྦྲུས་པ་ལྔ་ཚོམ་མཐར་མར་གྱི་རིལ་བུས་ཕྱུར་བུར་འགེངས་པ་དང་། གཞན་ཡང་བསངས་ཆུ་སོགས་ཉེ་བར་མཁོ་བའི་ཡོ་བྱད་རྣམས་འདུ་བར་བགྱིད་ལ། ནུབ་མ་ཡིན་པར་ལྷོ་ཡི་ཕྱོགས་པོ་ཊ་ལ་ལྟ་བུར་གདོང་ཕྱོགས་ལ་བསམ་པ་བྱང་ཆུབ་ཀྱི་སེམས་དང་ལྡན་པས་ཁྲུས་དང་གཙང་སྦྲ་བཅས་ཏེ། བདེ་བར་འདུག་ལ། དང་པོ། རང་ཉིད་སྐད་ཅིག་གིས་པད་
དཀར་དང་ཟླ་བའི་གདན་གྱི་སྟེང་དུ་བཅོམ་ལྡན་འདས་མ་རྒྱན་དང་ཆ་ལུགས་ཐམས་ཅད་ཡོངས་སུ་རྫོགས་པའི་སྐུར་གྱུར། གཉིས་པ་སྔོན་དུ་འགྲོ་བའི་གཏོར་མ། ༀ་བཛྲ་ཀྲོ་དྷ་ཧྱ་གྲྀ་ཝ་ཧུ་ལུ་ཧུ་ལུ་ཧཱུྃ་ཕཊ། ཀྱིས་བསངས། ༀ་སྭ་བྷཱ་ཝས་སྤྱངས། སྟོང་པའི་ངང་ལས་བྷྲཱུྃ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ཁྃ་འོད་དུ་ཞུ་བ་ལས་གཏོར་མ་འདོད་པའི་ལོངས་སྤྱོད་མི་ཟད་པ་ཅིར་ཡང་འཆར་བ་ནམ་མཁའ་མཛོད་ཀྱི་རང་བཞིན་བསམ་གྱིས་མི་ཁྱབ་པར་གྱུར། ༀ་ཨ་ཀཱ་རོ་ལན་གསུམ་གྱིས་བྱིན་རླབས་སྤེལ། ༀ་ད་ཤ་དིག་ལོ་ཀ་པ་ལ་བྷཱུ་མི་པ་ཏི་ས་པ་རི་ཝཱ་ཱར་ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་སོགས། ལན་གསུམ་བརྗོད། ༀ་ད་ཤ་དིག་ལོ་ཀ་པ་ལ་བྷཱུ་མི་པ་ཏི་ས་པ་རི་ཝཱ་ར་བཛྲ་ཨརྒྷཾ་པྲ་ཏཱིཙྪ་སྭཱ་ཧཱ། དེ་བཞིན་དུ། པུཥྤེ། དྷཱུཔེ། ཨཱ་ལོ་ཀེ། གནྡྷེ། ནེཝི་དྱ། ཤབྡའི་བར་བརྗོད། རྡོ་རྗེའི་དཀྱིལ་འཁོར་ཆེན་པོ་འདིར། །སྒྲུབ་ལ་མངོན་པར་སྐྱོང་བ་ཡི། །འཇིག་རྟེན་ལྷ་ཀླུ་གནོད་སྦྱིན་དང་། །གནས་དང་གཞི་ཡི་བདག་པོ་སོགས། །མཐུ་ཆེན་འབྱུང་པོ་མ་ལུས་རྣམས། །མཆོད་སྦྱིན་གཏོར་མ་འདི་བཞེས་ལ། །གང་དག་བྱང་ཆུབ་བསྒྲུབ་པ་ཡི། །རྣལ་འབྱོར་ནད་གདོན་བར་ཆད་ཞི། །ཚེ་བསོད་ཡེ་ཤེས་དཔལ་འབྱོར་རྒྱས། །ཕྱི་ནང་སྣང་སྲིད་དབང་སྡུད་ཅིང་། །དགྲ་བགེགས་གནོད་བྱེད་རྡུལ་དུ་རློག །འཇིག་རྟེན་བདེ་ཞིང་འབྲུ་ནོར་འཕེལ། །ཆོས་བཞིན་བསམ་དོན་འགྲུབ་པ་དང་། །
ཕྲིན་ལས་རྒྱ་ཆེན་བསྒྲུབ་ཏུ་གསོལ། །གནས་འདིར་ལྟ་བར་མི་དབང་བའི། །ནག་པོའི་ཕྱོགས་གྱུར་ལོག་འདྲེན་རྣམས། །འདི་རུ་མ་འདུག་དེངས་པར་གྱིས། །གལ་ཏེ་བཀའ་འདས་ཐོ་འཚམ་ན། །ཁྲོ་བོའི་རྡོ་རྗེ་མེ་ཆར་གྱིས། །བགེགས་ཚོགས་བརླག་གྱུར་གདོན་མི་ཟ། །ༀ་བཛྲ་ཀྲོ་དྷ་ཧྱ་གྲྀ་ཝ་ༀ་སུམྦྷ་ནི་སོགས་ཧཱུྃ་བཞིའི་སྔགས་ཀྱིས་བགེགས་བསྐྲད། གསུམ་པ་སྲུང་འཁོར་ནི། ཐུགས་ཀའི་ཏཱྃ་ཡིག་གི་འོད་ཟེར་ལས་གྲུབ་བའི་ཕྱི་རོལ་དུ་ཡེ་ཤེས་ཀྱི་རང་བཞིན་འོད་ཟེར་ཁ་དོག་དྲུག་པ་དང་། ནང་དུ་མེ་རི་དཀར་པོའི་གུར་ཁང་ཟླུམ་པོར་འཁྱིལ་བ་ཡངས་ཤིང་རྒྱ་ཆེ་བ་ཕྱི་ནང་བར་མཚམས་ཐམས་ཅད་ཨུཏྤལ་སྔོན་པོ་ཁ་བྱེ་མ་ཐག་གིས་གང་བ་རབ་ཏུ་སྲ་ཞིང་བརྟན་པ་གཞོམ་གཞིག་དང་བྲལ་བའི་སྲུང་བའི་འཁོར་ལོས་གཏམས་པར་གྱུར། ༀ་བཛྲ་རཀྵ་རཀྵ་ཧཱུྃ་ཧཱུྃ་ཧཱུྃ། ཞེས་སྲུང་འཁོར་བསྒོམས་ལ། དེ་ནས་དང་པོ་མཆོད་པ་བྱིན་གྱིས་བརླབ་པ་ནི། ༀ་བཛྲ་ཀྲོ་དྷ་སོགས་ཀྱིས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ༀ་ལས་བྱུང་བའི་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་ཆོས་ཀྱི་དབྱིངས་དང་མཉམ་པའི་ནང་དུ་ཧཱུྃ་ཡིག་དཔག་ཏུ་མེད་པ་ཞུ་བ་ལས་བྱུང་བའི་རྡོ་རྗེའི་མཆོད་ཡོན། ཞབས་བསིལ། མེ་ཏོགབདུག་སྤོས། མར་མེ། དྲི་ཆབ། ཞལ་ཟས། རོལ་མོ། གཞན་ཡང་རྡོ་རྗེའི་མཆོད་པའི་སྤྲིན་རབ་འབྱམས་ནམ་མཁའི་ཁམས་གང་བ་ཟག་མེད་བདེ་བ་ཆེན་པོའི་རང་བཞིན་ཅན་འཕགས་པ་ཀུན་ཏུ་བཟང་པོའི་རྣམ་པར་ཐར་
པ་ལས་ཀྱང་ཆེས་ཆེར་ལྷག་པ་རྒྱུན་མི་ཆད་པ་སྤྲོ་བར་གྱུར། ཅེས་བརྗོད་ནས་ཐལ་མོ་ཁོང་སྟོང་ནམ་མཁའ་མཛོད་ཀྱི་རྒྱས། ༀ་སརྦ་བིད་པཱུ་ར་པཱུ་ར་སུ་ར་སུ་ར་ཨ་བརྟ་ཡ་ཨ་བརྟ་ཡ་ཧོ། ལན་གསུམ་བརྗོད། ༀ་བཛྲ་སྥ་ར་ཎ་ཁཾ། ༀ་བཛྲ་ཨརྒྷཾ་ཨཱཿཧཱུྃ་སྭཱ་ཧཱ། དེ་བཞིན་དུ། པཱ་ཱདྱཾ། པུཥྤེ། དྷཱུ་པེ། ཨཱ་ལོ་ཀེ། གནྡྷེ། ནཻ་ཝི་དྱ། ཤཔྡ་ཨཱཿཧཱུྃ་སྭཱ་ཧཱ། སོ་སོའི་ཕྱག་རྒྱ་དང་བཅས་ཏེ་བརྗོད་ལ། གཉིས་པ་སྐྱབས་སུ་འགྲོ་བ་ནི། ན་མོ། བདག་དང་འགྲོ་བ་མཁའ་ཁྱབ་སེམས་ཅན་རྣམས། །ཕྱོགས་བཅུ་དུས་གསུམ་བདེ་གཤེགས་མ་ལུས་པའི། །གསང་གསུམ་ངོ་བོ་བཅོམ་ལྡན་འཕགས་མ་ཡུམ། །ཁྱོད་ཞབས་པདྨོར་སྒོ་གསུམ་སྐྱབས་སུ་མཆི། །ཆགས་བྲལ་དམ་པའི་ཆོས་མཆོག་ཕ་རོལ་ཕྱིན། །བརྒྱད་ཁྲི་སྟོང་ཕྲག་བཞི་ཡི་བདེན་བའི་དོན། །གསུང་གི་རོལ་པ་རྗེ་བཙུན་སྒྲོལ་མ་ཡུམ། །ཁྱོད་ཞབས་པདྨོར་དང་བས་སྐྱབས་སུ་མཆི། །ཚོགས་ཀྱི་དམ་པ་བྱང་ཆུབ་ངེས་དོན་གཞི། །ལུང་རྟོགས་ཟབ་མོའི་གནས་ལ་མཐའ་བྲལ་བ། །དགེ་འདུན་བདག་ཉིད་འཇིག་རྟེན་མགོན་གྱུར་མ། །ཁྱོད་ཞབས་པདྨོར་གུས་པས་སྐྱབས་སུ་མཆི། །དཔལ་ལྡན་རིགས་ཀུན་བདག་པོ་རྡོ་རྗེ་ཅན། །བྱིན་རླབས་རྩ་བ་བརྒྱུད་པའི་བླ་མ་དང་། །དངོས་གྲུབ་འབྱུང་གནས་ཡི་དམ་རྒྱུད་སྡེ་བཞི། །དཔའ་པོ་མཁའ་འགྲོ་ཡེ་ཤེས་ལྷ་རབ་འབྱམས། །ཕྲིན་ལས་ཆོས་སྐྱོང་རྒྱ་མཚོ་འདུས་པ་ཡི། །
རྩ་བ་གསུམ་དངོས་ལྷག་པའི་ལྷར་གྱུར་མ། །ཁྱོད་ཞབས་པདྨོར་བླ་མེད་སྙིང་པོའི་བར། །མི་ཕྱེད་དད་པས་རྟག་པར་སྐྱབས་མཆིའོ། །ལན་གསུམ་བརྗོད། གསུམ་པ་སེམས་བསྐྱེད་པ་ནི། ཉོན་མོངས་མུན་པར་བྱིངས་བའི་འགྲོ་བ་རྣམས། །བསྒྲལ་ཕྱིར་ལྷག་བསམ་མཁའ་ལྟར་དྭངས་བ་ལ། །རྣམ་པར་གྲོལ་བའི་བདུད་རྩིའི་འོད་དཀར་གྱིས། །རྫོགས་པའི་སངས་རྒྱས་ཐོབ་པར་སེམས་བསྐྱེད་དོ། །ལན་གསུམ། ༀ་བོདྷི་ཙིཏྟ་ཨུ་པ་ད་ཡ་ཨ་ཧཾ། དང་པོ་ཚོགས་ཞིང་ནི། རང་ཉིད་བཅོམ་ལྡན་འདས་འཕགས་མ་སྒྲོལ་མར་གསལ་བའི་ཐུགས་ཀར་ཟླ་བ་ལ་གནས་བའི་ཏཱྃ་ཡིག་དཀར་པོ་ལས་འཕྲོས་པའི་འོད་ཟེར་གྱིས་ཕྱོགས་བཅུའི་འཇིག་རྟེན་ཐམས་ཅད་སྣང་བར་བྱས་ཏེ། རང་བཞིན་གྱི་གནས་དང་པོ་ཊ་ལ་ཡི་ཞིང་ཁམས་ནས་བླ་མ་འོད་དཔག་མེད་རིགས་ཀྱི་བདག་པོར་གྱུར་པའི་རྗེ་བཙུན་འཕགས་མ་སྒྲོལ་མའི་ལྷ་ཚོགས་རྣམས་ལ་སངས་རྒྱས་བྱང་ཆུབ་སེམས་དཔའ་སྲས་དང་སློབ་མར་བཅས་པས་བསྐོར་བ་མདུན་གྱི་ནམ་མཁའ་བཛྲ་ས་མཱ་ཛཿༀ་ཨཱཪྱ་ཏཱ་རེ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱ་ཧཱ། དེ་བཞིན་དུ། པཱ་དྱཾ། པུཥྤེ། དྷཱུཔེ། ཨཱ་ལོ་ཀེ། གནྡྷེ། ནཻ་ཝིདྱ། ཤབྡ། སོགས་ཀྱིས་མཆོད་ལ། གཉིས་པ་ཡན་ལག་བདུན་པ་འབུལ་བ་ནི། ཐལ་མོ་སྙིང་ཁར་སྦྱར་ལ། རྒྱལ་བ་རྒྱ་མཚོའི་ཡེ་ཤེས་ཀྱི། །རྒྱན་འཁོར་ལྔ་ཡི་བདག་ཉིད་ཅན། །བཅོམ་ལྡན་འཕགས་མའི་ལྷ་ཚོགས་ལ། །བདག་སོགས་འགྲོ་ཀུན་ཕྱག་
འཚལ་འདུད། །བདེ་བ་ཆེན་པོ་ཟག་མེད་ཀྱི། །ལོངས་སྤྱོད་འདོད་དགུའི་སྤྲིན་བཟང་པོ། །བློ་ཡིས་བླངས་ཏེ་དངོས་འབྱོར་དང་། །ཡིད་སྤྲུལ་དག་པའི་མཆོད་པ་འབུལ། །ཐོག་མེད་དུས་ནས་ད་ལྟའི་བར། །དུག་གསུམ་ཉོན་མོངས་དབང་གྱུར་པས། །སྡིག་པ་བགྱིས་དང་བགྱིད་སྩལ་རྣམས། །ཐམས་ཅད་མཐོལ་ཞིང་བཤགས་པར་བགྱི། །ཕྱོགས་བཅུའི་སངས་རྒྱས་བྱང་སེམས་དང་། །འཕགས་པ་ཉན་རང་སློབ་མར་བཅས། །གཞན་ཕན་རྨད་བྱུང་དགེ་བའི་སྟོབས། །དམ་པའི་རྗེས་སུ་ཡི་རང་ངོ་། །སེམས་ཅན་མ་བརྒལ་བསྒྲལ་བ་དང་། །མ་གྲོལ་གྲོལ་དང་དབུགས་དབྱུང་བ། །ཡང་དག་ལམ་ལ་དཀྲི་བའི་ཕྱིར། །ཆོས་ཀྱི་འཁོར་ལོ་བསྐོར་བར་བསྐུལ། །རབ་འབྱམས་ཞིང་གི་སྟོན་པ་རྣམས། །དོན་དམ་འགྱུར་བ་མི་མངའ་ཡང་། །འཕོ་མེད་རྟག་པ་རྡོ་རྗེའི་སྐུ། །ལྷུན་གྱིས་གྲུབ་པར་བཞུགས་གསོལ་འདེབས། །དུས་གསུམ་དགེ་བའི་ཆུ་རྒྱུན་གྱིས། །འགྲོ་དྲུག་དུཿཁའི་སྒྲིབ་དག་ནས། །སྐུ་བཞིའི་རྒྱ་མཚོར་འཇུག་པ་ཡི། །མྱང་འདས་གོ་འཕང་ཐོབ་ཕྱིར་བསྔོ། །ཞེས་ཡན་ལག་བདུན་པ་ཕུལ་ནས། ༀ་ཨཱཿཧཱུྃ་གིས་ཚོགས་ཞིང་རྣམས་རང་ལ་ཐིམ་པར་མོས། གསུམ་པ་ཚད་མེད་བཞི་སྒོམ་པ་ནི། སེམས་ཅན་བདེ་དང་བདེ་རྒྱུར་ལྡན་པར་ཤོག །སྡུག་བསྔལ་ཀུན་འབྱུང་རྒྱུ་དང་བཅས་པ་བྲལ་གྱུར་ཅིག །སྡུག་བསྔལ་མེད་པའི་བདེ་བས་འབྲལ་མེད་འཚོ་བ་
དང་། །ཉེ་རིང་བྲལ་བའི་བཏང་སྙོམས་ཚད་མེད་གནས་གྱུར་ཅིག །ཅེས་ལན་གསུམ་བརྗོད་ནས། རྣམ་པར་རྟོག་པ་མཐའ་དག་སྤངས་ཏེ་རྩེ་གཅིག་བའི་རྒྱུན་ལ་མཉམ་པར་བཞག་ནས། ཆོས་ཐམས་ཅད་ཀྱི་རང་བཞིན་ཡོངས་སུ་དག་པའི་སྔགས་འདིའི་བྱིན་གྱིས་བརླབ་བོ། །ༀ་སྭ་བྷཱ་ཝ་ཤུདྡྷཿསརྦ་དྷརྨ་བྷཱ་ཝ་ཤུ་དྡྷོ྅ཧཾ། ཆོས་ཐམས་ཅད་བདག་མེད་པའི་སྟོང་པ་ཉིད་དུ་བལྟས་ནས་དང་པོ། ༀ་ཤུ་ནྱཱ་ཏ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾ། སྟོང་པར་གྱུར། སྟོང་པའི་ངང་ལས་ཧཱུྃ་ལས་བྱུང་བའི་རྡོ་རྗེའི་རྭ་གུར་ཡེ་ཤེས་ཀྱི་མེ་དཔུང་འབར་བའི་སྲུང་འཁོར་ཡངས་ཤིང་རྒྱ་ཆེ་བའི་དབུས་སུ་བྷཱུྃ་ལས་དྭངས་བསིལ་ནོར་བུ་ཆུ་ཤེལ་དཀར་པོའི་གཞལ་ཡས་ཁང་དེ་ཡི་དབུས་སུ་པྃ་ལས་པདྨ་དཀར་པོ་སྡོང་བུ་ཡལ་ག་གེ་སར་མཆོག་ཏུ་རྒྱས་པ་འདབ་མ་རིམ་པ་གསུམ་དང་ལྡན་པའི་ལྟེ་བར་ཨ་ལས་ཟླ་བའི་དཀྱིལ་འཁོར་རྙོགས་པ་མེད་པ་ཉ་གང་བའི་གདན་གྱི་སྟེང་དུ་སྔོན་གྱི་སྨོན་ལམ་དང་ཐུགས་རྗེ་ཆེན་པོས་སྤྲུལ་པའི་ཏཱྃ་ཡིག་དཀར་པོ་གནས་པ་དེ་ལས་འོད་འཕྲོས། སེམས་ཅན་ཐམས་ཅད་ཀྱི་དུས་མ་ཡིན་པར་འཆི་བ་ལ་སོགས་པའི་འཇིགས་པ་རྣམས་བསལ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་མཆོད་པས་མཉེས་པར་བྱས། འོད་ཟེར་ཚུར་འདུས་ཡོངས་སུ་གྱུར་པ་ལས་རང་ཉིད་ཚེ་དཔལ་བསོད་ནམས་ཡེ་ཤེས་མཐའ་དག་འཕེལ་བར་བྱེད་པའི་བཅོམ་ལྡན་འདས་འཕགས་མ་སྒྲོལ་མ་སྐུ་མདོག་དཀར་མོ་སྟོན་ཀའི་ཟླ་བ་ཆུ་ཤེལ་
ལྟར་དྭངས་ཤིང་འཚེར་བ། བལྟ་བས་མི་ངོམས་པར་རབ་ཏུ་མཛེས་བའི་སྤྱན་དཀྱུས་རིང་ཞིང་ཞི་བ་ཆེན་པོའི་འཛུམ་པའི་མདངས་ཅན་ཞལ་གཅིག་ཕྱག་གཉིས། དབུ་ུལ་སྤྱན་གསུམ་དང་ཕྱག་ཞབས་བཞི་ཡི་མཐིལ་དུ་ཡང་སྤྱན་རེ་རེ་སྟེ། ཡེ་ཤེས་ཀྱི་སྤྱན་བདུན་དང་ལྡན་པ། དབུ་སྐྲ་མཐོན་མཐིང་ལྟག་པར་བཅིངས་པའི་ལྷག་མ་གཡས་གཡོན་དུ་འཕྱང་བ། བརྒྱད་གཉིས་ལོན་པའི་ལང་ཚོས་སྒེག་ཅིང་ཆགས་པའི་ཉམས་ཅན་ནུ་འབུར་ཟུང་གིས་མཛེས་པ། ཡོངས་འདུའི་མེ་ཏོག་གི་སྙེ་མ་དང་། ལྷའི་གསེར་གྱི་ཅོད་པན་ཡིད་བཞིན་གྱི་ནོར་བུས་སྤྲས་པའི་དབུ་རྒྱན་དང་མུ་ཏིག་དཀར་པོ་ལ་སོགས་པ་རིན་པོ་ཆེའི་རྣམ་པ་དུ་མའི་སྙན་ཆ། མགུལ་ཆུ། དོ་ཤལ། སེ་མོ་དོ། དཔུང་རྒྱན། ཕྱག་ཞབས་ཀྱི་གདུ་བུ། སྐ་རགས་གཡེར་ཁའི་ཕྲེང་བ་དང་བཅས་པ་རྒྱན་ཐམས་ཅད་ཀྱིས་མཛེས་པ། ཕྱག་གཡས་མཆོག་སྦྱིན་གྱིས་འདོད་དགུ་སྟེར་བའི་ཕྱག་རྒྱ་དང་། གཡོན་པས་མཐེབ་སྲིན་སྦྱར་བས་ཨུཏྤལ་དཀར་པོ་འདབ་མ་མཆོག་ཏུ་ཡངས་པའི་སྡོང་བུ་ཐུགས་ཀར་འཛིན་པ། དེ་ཡང་རྩེ་མོ་གསུམ་དུ་གྱེས་བའི་དབུས་ཀྱི་མེ་ཏོག་འདབ་བརྒྱ་སྙན་དྲུང་དུ་རྒྱས་པ། གཡས་ཀྱི་རྩེ་མོར་འབྲས་བུ་དང་། གཡོན་གྱི་རྩེ་མོར་ཁ་མ་བྱེ་བ་བུམ་པར་ཡོད་པ། ལྷ་རྫས་ཀྱི་དར་དཀར་པོའི་སྟོད་གཡོགས་དང་། དབང་པོའི་གཞུ་ལྟ་བུའི་དར་གྱི་སྨད་གཡོགས་རྣམ་
པར་བཀྲ་བ། ཞབས་གཉིས་རྡོ་རྗེ་སྐྱིལ་ཀྲུང་གིས་བཞུགས་ཤིང་། ཟླ་བའི་རྒྱབ་ཡོལ་ཅན། དྲི་མ་མེད་པའི་འོད་དང་འོད་དཔག་ཏུ་མེད་པ་ཕྱོགས་བཅུར་འཕྲོ་བ། དེ་ཡི་ཕྱི་རིམ་ལ་པདྨ་འདབ་མ་བཞི་དང་། དེའི་ཕྱིར་པདྨ་འདབ་མ་བདུན་དང་། དེའི་ཡང་ཕྱི་རིམ་ལ་པདྨ་འདབ་མ་བཅུ་རྣམས་ཀྱི་སྟེང་དུ་མདུན་ནས་གཡས་བསྐོར་དུ་རིམ་པ་བཞིན་པད་ཉི་ཟླ་བའི་གདན་སོགས་རེ་རེ་ལ་རང་རང་གི་ས་བོན་ལས་སྐྱེས་བའི་ལྷ་མོ་རྣམས་སུ་གྱུར་པ་ནི། ༀ་ལས་སྒྲོལ་མ་རབ་ཏུ་དཔའ་མོ་སྐུ་མདོག་དམར་མོ་མེ་དཔུང་འཕྲོ་བ། ཞལ་གཅིག་ཕྱག་བརྒྱད་ཀྱི་དང་པོ་གཉིས་སྤྱི་བོར་བསྣོལ་བའི་རྡོ་རྗེ་དང་དྲིལ་བུ་འཛིན་པ། གཉིས་པ་གཉིས་མདའ་དང་གཞུ། གསུམ་པ་གཉིས་འཁོར་ལོ་དང་དུང་། བཞི་པ་གཉིས་རལ་གྲི་དང་ཞགས་པ་བསྣམས་པ་ཞི་བའི་ཉམས་ཅན་ཆོས་འབྱུང་ལ་གནས་པ། ཏཱྃ་ཡིག་ལས་དཀར་མོ་ཟླ་མདངས་ཀྱི་སྒྲོལ་མ་དཀར་མོ་དཀར་སྔོ་སེར་བའི་ཞལ་གསུམ་ཕྱག་བཅུ་གཉིས་ཀྱི་དང་པོ་གཉིས་མཉམ་གཞགགཡས་ལྷག་མས་ཁ་ཊྭཱཾ་ག །འཁོར་ལོ། ནོར་བུ། རྡོ་རྗེ། མེ་ཏོག་གི་ཕྲེང་བ་འཛིན་པ། གཡོན་རྣམས་ཀྱི་སྤྱི་བླུགས། ཨུཏྤལ། དྲིལ་བུ། བུམ་པ། པོ་ཏི་འཛིན་པ། རེ་ཡིག་ལས་གསེར་མདོག་ཅན་གྱི་སྒྲོལ་མ་སེར་མོ་ཞལ་གཅིག་ཕྱག་བཅུ་མ་གཡས་རྣམས་ཀྱི་ཕྲེང་བ་རལ་གྲི། མདའ། རྡོ་རྗེ། དབྱུག་གུ། གཡོན་རྣམས་ཀྱིས་དར་དཔྱངས།
ཞགས་པ། པདྨ། དྲིལ་བུ། གཞུ་བསྣམས་པ། ཏྱཱཏ་ཡིག་ལས་གཙུག་ཏོར་རྣམ་པར་རྒྱལ་མའི་སྒྲོལ་མ་སེར་མོ་ཞལ་གཅིག་ཕྱག་བཞི། གཡས་མཆོག་སྦྱིན་དང་ཕྲེང་བ། གཡོན་སྤྱི་བླུགས་དང་དབྱུག་པ་འཛིན་པ། སེམས་དཔའི་སྐྱིལ་ཀྲུང་གིས་བཞུགས་པའོ། །དེ་ཡི་ཕྱི་རིམ་དུ་ཏཱ་ཡིག་ལས་ཧཱུྃ་སྒྲ་སྒྲོགས་པའི་སྒྲོལ་མ་སེར་མོ་ཞལ་གཅིག་ཕྱག་གཉིས་གཡས་སྐྱབས་སྦྱིན། གཡོན་པདྨ་སེར་པོ་བསྣམས་པ། རེ་ཡིག་ལས་འཇིག་རྟེན་གསུམ་ལས་རྣམ་པར་རྒྱལ་བའི་སྒྲོལ་མ་དམར་མོ་ཞལ་གཅིག་ཕྱག་བཞི་མ། གཡས་དང་པོས་རྡོ་རྗེ། གཉིས་པས་རལ་གྲི། གཡོན་དང་པོས་སྡིགས་མཛུབ། གཉིས་པས་ཞགས་པ་བསྣམས་པ་སེམས་དཔའི་སྐྱིལ་ཀྲུང་གིས་བཞུགས་པ། ཏུ་ཡིག་ལས་རྒོལ་བ་འཇོམས་པའི་སྒྲོལ་མ་སྐུ་མདོག་ནག་མོ་ན་བཟའ་སེར་པོ་མནབས་པ། དྲག་མོ་དབུ་སྐྲ་གྱེན་དུ་བརྫེས་པ་ཞལ་གཅིག་ཕྱག་བཞི་གཡས་ཀྱི་ཐོག་མ་འཁོར་ལོ། ཕྱི་མ་རལ་གྲི། གཡོན་གྱི་ཐོག་མ་པདྨ་ལ་གནས་པའི་རྡོ་རྗེ། ཕྱི་མས་སྡིགས་མཛུབ་མཛད་པ། ཞབས་གཡོན་བརྐྱང་གི་སྟབས་ཅན། རེ་ཡིག་ལས་དབང་མཆོག་སྟེར་བའི་སྒྲོལ་མ་སེར་མོ་ཞལ་གཅིག་ཕྱག་བཞི་མ། ཕྱག་དང་པོ་གཉིས་མྱ་ངན་མེད་པའི་ཤིང་གི་ཡལ་ག་དང་པདྨ། འོག་མ་གཉིས་ནོར་བུ་དང་བཅས་པའི་མཆོག་སྦྱིན་དང་བུམ་པ་བསྣམས་པ། ཞབས་
སྐྱིལ་ཀྲུང་ཕྱེད་པའི་རོལ་སྟབས་ཀྱིས་ཆུ་སྲིན་ལ་གནས་པ། ཏཱྃ་ཡིག་ལས་སེང་ལྡེང་ནགས་ཀྱི་སྒྲོལ་མ་སྐུ་མདོག་ལྗང་སྔོན་ཞལ་གཅིག་ཕྱག་གཉིས་མ། གཡས་སྐྱབས་སྦྱིན་དང་གཡོན་མཐེབ་སྲིན་གྱིས་ཨུཏྤལའི་སྡོང་བུ་ཐུགས་ཀར་འཛིན་པ། ཞབས་གཡས་བརྐྱང་བས་སྐྱིལ་ཀྲུང་ཕྱེད་པའི་རོལ་པས་བཞུགས་པ། སྭཱ་ཡིག་ལས་མྱ་ངན་མེད་པའི་སྒྲོལ་མ་དམར་མོ། ཕྱག་བཞིའི་དང་པོ་གཉིས་སྤྱི་བོར་ཐལ་མོ་སྦྱར་བ། འོག་མ་གཉིས་ཀྱི་རལ་གྲི་དང་མྱ་ངན་མེད་པའི་ཤིང་གི་ཡལ་ག་མེ་ཏོག་དམར་པོ་ཅན་འཛིན་པ། ཧཱ་ཡིག་ལས་ཕོངས་པ་སེལ་བའི་སྒྲོལ་མ་ནག་མོ་དྲག་མོའི་སྐུ་ཅན་གཡས་གཟའ་བརྒྱད་འགུགས་པའི་ལྕགས་ཀྱུ་དང་། གཡོན་ཕོངས་པ་སེལ་བའི་ལྕགས་ཀྱུ་ཞགས་པ་དང་བཅས་པ་བསྣམ་པ། གཡས་བརྐྱང་གི་སྟབས་ཀྱིས་བཞུགས་པའོ། །དེ་ཡི་ཕྱི་རིམ་དུ་ཨཱཿཡིག་ལས་བཀྲ་ཤིས་སྣང་བའི་སྒྲོལ་མ་སེར་མོ་ཞལ་གཅིག་ཕྱག་བརྒྱད་ཀྱི་གཡས་རྣམས་རྩེ་གསུམ། ལྕགས་ཀྱུ། རྡོ་རྗེ། རལ་གྲི། གཡོན་རྣམས་ཐུགས་ཀར་གཏོད་པའི་རིན་པོ་ཆེ། ལྕགས་ཀྱུ། དབྱུག་གུ། བུམ་པ་བསྣམས་པ། བྲུཾ་ཡིག་ལས་ཡོངས་སུ་སྨིན་པར་མཛད་པའི་སྒྲོལ་མ་དམར་མོ་དྲག་མོའི་སྐུ་ཅན་ཞལ་གཅིག་ཕྱག་བཞི། ཕྱག་གཡས་ཀྱི་དང་པོས་རལ་གྲི། གཉིས་པས་མདའ། གཡོན་གྱི་དང་པོས་འཁོར་ལོ། གཉིས་པས་གཞུ་འཛིན་པ། གཡས་བརྐྱང་གི་སྟབས་
ཀྱིས་བཞུགས་པ། ཨཏ་ཡིག་ལས་ཁྲོ་གཉེར་གཡོ་བའི་སྒྲོལ་མ་མཐིང་ག་ནག་དཀར་དམར་བའི་ཞལ་གསུམ་ཁྲོ་གཉེར་བསྡུས་ཤིང་བཱ་སུ་ཏ་རོལ་པ། ཕྱག་དྲུག་གི་གཡས་རྣམས་ཀྱིས་རལ་གྲི། ལྕགས་ཀྱུ། དབྱུག་པ། གཡོན་པ་རྣམས་ཀྱིས་ཐོད་པ། ཞགས་པ། ཚངས་མགོ་འཛིན་པ། མགོ་རློན་གྱི་དབུ་རྒྱན་དང་། དོ་ཤལ། སྟག་ལྤགས་དང་། སྦྲུལ་གྱིས་བརྒྱན་པ། ཞིང་ཆེན་གྱི་གདན་ལ་འགྱིང་བ། ཕྱོགས་མཚམས་བརྒྱད་དུ་རིན་པོ་ཆེའི་ཤིང་གི་མྱུ་གུ་སྐྱེས་པ། ཎི་ཡིག་ལས་དགེ་ལེགས་སྟེར་བའི་སྒྲོལ་མ་དཀར་མོ་ཕྱག་གཡས་གསུམ་ན་ཕྲེང་བ། མཆོག་སྦྱིན། དབྱུག་པ། གཡོན་གསུམ་ན་པདྨ། རིལ་བ། པོ་ཏི་འཛིན་པ། ཧཱུྃ་ཡིག་ལས་ཆགས་པ་འཇོམས་པའི་སྒྲོལ་མ་དམར་མོ་ཕྱག་གཡས་ཐུགས་ཀར་རྩེ་གསུམ་དང་། གཡོན་སྡིགས་མཛུབ་འཕྱར་བས་སྙིང་པོ་དང་འབྲས་བུར་བཅས་པའི་ཤིང་འཛིན་པ་སེམས་དཔའི་སྐྱིལ་ཀྲུང་གིས་བཞུགས་པ། ཤ་ཡིག་ལས་བདེ་བ་སྒྲུབ་པའི་སྒྲོལ་མ་དམར་སེར་ཕྱག་གཉིས་ཀྱི་ཐུགས་ཀར་ཟླ་བའི་དཀྱིལ་འཁོར་བསྣམས་པ། སེམས་དཔའི་སྐྱིལ་ཀྲུང་གིས་བཞུགས་པ། ཀི་ཡིག་ལས་རབ་ཏུ་རྒྱས་པའི་སྒྲོལ་མ་དཀར་མོ་ཕྱག་བཞི་མ། དང་པོ་གཉིས་སྤྱི་བོར་བསྣོལ་བས་ལྕགས་ཀྱུ་འཛིན་པ། ལྷག་མ་གཉིས་མཆོག་སྦྱིན་དང་གླེགས་བམ་གྱིས་མཚན་པའི་ཨུཏྤལ་བསྣམས་པ། སེམས་
དཔའི་སྐྱིལ་ཀྲུང་གིས་བྱ་ངང་པ་ལ་གནས་པ། ཛ་ཡིག་ལས་སྡུག་བསྔལ་བསྲེག་པའི་སྒྲོལ་མ་དཀར་མོ་ཕྱག་གཉིས་ཀྱིས་ཐུགས་ཀར་མེ་ཐབ་བསྣམས་པ། ཅུང་ཟད་གཡས་བརྐྱང་བས་སེམས་དཔའི་སྐྱིལ་ཀྲུང་ཅན། ཙེ་ཡིག་ལས་དངོས་གྲུབ་འབྱུང་བའི་སྒྲོལ་མ་དམར་སེར་ཕྱག་གཉིས་ཀྱིས་ཐུགས་ཀར་གསེར་གྱི་བུམ་པ་བསྣམས་པ། སེམས་དཔའི་སྐྱིལ་ཀྲུང་གིས་བཞུགས་པ། ཕེ་ཡིག་ལས་ཡོངས་རྫོགས་བྱེད་པའི་སྒྲོལ་མ་དཀར་མོ་ཅུང་ཟད་ཁྲོ་ཞིང་སྤྱན་གསུམ་མ་ཕྱག་གཡས་མདུང་རྩེ་གསུམ་དང་། གཡོན་མུ་ཏིག་གི་ཕྲེང་བ་འཛིན་པ། སྟག་གི་པགས་པའི་ཤམ་ཐབས་ཅན། སྐྱིལ་ཀྲུང་ཕྱེད་པའི་རོལ་པས་ཁྱུ་མཆོག་གླང་དཀར་པོ་ལ་གནས་པའོ། །དེ་དག་ཐམས་ཅད་ཀྱང་ལྷའི་གོས་སྣ་ཚོགས་པའི་དར་དང་རིན་པོ་ཆེའི་རྒྱན་དུ་མས་མཛེས་པར་སྤྲས་ཤིང་སྐུའི་དཀྱིལ་འཁོར་རབ་ཏུ་གསལ་ཞིང་འོད་ཀྱི་སྣང་བས་ཕྱོགས་བཅུར་ཁྱབ་པར་གྱུར། ལྷ་ཚོགས་རྣམས་ཀྱི་སྤྱི་བོར་ༀ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ་དང་སོ་སོའི་ས་བོན། ཁྱད་པར་གཙོ་མོའི་ཐུགས་ཀའི་དབུས་སུ་པད་དཀར་དང་ཟླ་བའི་དཀྱིལ་འཁོར་གྱི་ལྟེ་བར་ཏཱྃ་ཡིག་དཀར་པོས་མཚན་པར་གྱུར་པ། དེ་དག་རྣམས་ལས་འོད་དང་འོད་ཟེར་གྱི་ཚོགས་དཔག་ཏུ་མེད་པ་འཕྲོས། ལྷོ་ཕྱོགས་རི་བོ་པོ་ཊ་ལ་དང་། རང་བཞིན་རྣམ་པར་དག་པའི་ཞིང་རབ་འབྱམས་
ནས་བསྒོམ་པ་དང་འདྲ་པའི་རྗེ་བཙུན་མ་འཕགས་མ་སྒྲོལ་མའི་དཀྱིལ་འཁོར་གྱི་འཁོར་ལོ་རྟེན་དང་བརྟེན་པར་བཅས་པ་ལ་སངས་རྒྱས་དང་བྱང་ཆུབ་སེམས་དཔའ་སྲས་དང་སློབ་མའི་ཚོགས་དཔག་ཏུ་མེད་པས་བསྐོར་བ་སྤྱན་དྲངས་བཛྲ་ས་མཱ་ཡ་ཛཿཞེས་བརྗོད་ལ། གཉིས་པ་སྤྱན་འདྲེན་པ་ནི། པོ་ཊ་ལ་ཡི་གནས་མཆོག་ནས། །ཏཱྃ་ཡིག་ལྗང་ཁུ་ལས་འཁྲུངས་ཤིང་། །ཏཱྃ་ཡིག་འོད་ཀྱིས་འགྲོ་བ་སྒྲོལ། སྒྲོལ་མ་འཁོར་བཅས་གཤེགས་སུ་གསོལ། །ཛཿཧཱུྃ་བྃ་ཧོཿདམ་ཚིག་སེམས་དཔའ་དང་གཉིས་སུ་མེད་པར་གྱུར། གསུམ་པ་དབང་བསྐུར་བ་ནི། སླར་ཡང་ཐུགས་ཀའི་ས་བོན་གྱི་འོད་ལས་བྱུང་བའི་དབང་ལྷ་རིགས་ལྔ་འཁོར་དང་བཅས་པ་སྤྱན་དྲངས། ༀ་བཛྲ་ཨརྒྷཾ། པཱདྱཾ། པུཥྤེ། དྷཱུ་པེ། ཨཱ་ལོ་ཀེ། གནྡྷེ། ནཻ་ཝི་དྱ། ཤབྡ་པྲ་ཏཱིཙྪ་སྭཱ་ཧཱ། ༀ་ཨ་བྷི་ཥིཉྩ་ཏུ་མཾ། ཞེས་གསོལ་བ་བཏབ་པས། ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་ཡ་ཤྲཱི་ཡེ་ཧཱུྃ། ཞེས་གསུངས་ཤིང་བུམ་པའི་ཆུས་དབང་བསྐུར། སྐུ་གང་དྲི་མ་དགཆུའི་ལྷག་མ་གྱེན་དུ་འཁྱིལ་བ་ལས། གཙོ་མོ་ལ་འོད་དཔག་མེད་ཀྱིས་དབུ་བརྒྱན་ཅིང་། འཁོར་རྣམས་ལ་རིགས་ལྔ་སོ་སོས་དབུ་བརྒྱན་པར་གྱུར། ཅེས་དབང་བསྐུར་རྒྱས་གདབ་དང་། དེ་ནས་བཞི་པ་མཆོད་པ་འབུལ་བ་ནི། ༀ་རྡོ་རྗེའི་མཆོད་ཡོན་དྭངས་ཤིང་རྒྱ་མཚོར་འཁྱིལ། །ཞབས་བསིལ་རབ་ཏུ་སིམ་བྱེད་ཡིད་གར་
འོང་། །མེ་ཏོག་སྣ་ཚོགས་རྣམ་པར་བཀྲ་ཞིང་བརྡལ། །བདུག་པའི་སྤོས་མཆོག་ངད་ལྡན་སྤྲིན་ཆེན་གཡོ། །སྣང་གསལ་ཀུན་ཁྱབ་འོད་ཀྱི་ཟེར་མདངས་འཚེར། །དྲི་ཆབ་བྱུགས་པའི་ཁྱད་པར་དུ་མ་དང་། །ཞལ་ཟས་འཆི་མེད་བཅུད་བཟང་རོ་བརྒྱར་ལྡན། །རྒྱུད་མངས་རོལ་མོ་སྙན་པའི་གླུ་དབྱངས་སོགས། །མཆོད་པའི་བྱེ་བྲག་རྨད་བྱུང་དམ་པ་འདི། །ཡིད་བཞིན་མཆོག་སྩོལ་འཕགས་མ་བཅོམ་ལྡན་འདས། །ལྷ་ཚོགས་རྣམས་ལ་གུས་པས་མཆོད་པ་འབུལ། །བཞེས་ནས་བདག་རྒྱུད་བྱིན་གྱིས་བརླབ་ཏུ་གསོལ། །ༀ་ཨཱཪྱ་ཏཱ་རེ་ས་པ་རི་ཝཱ་ར་བཛྲ་ཨརྒྷཾ་པྲ་ཏཱིཙྪ་ཡེ་སྭཱ་ཧཱ། སྔགས་ཐོག་མཐའ་འདྲ་བར། པཱ་དྱཾ། པུཥྤེ། དྷཱུ་པེ། ཨ་ལོ་ཀེ། གནྡྷེ། ནཻ་ཝི་དྱ། ཤབྡའི་བར་བརྗོད། ལྔ་པ་བསྟོད་པ་ནི། ༀ་རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ། །སོགས་ཕྱག་འཚལ་ཉེར་གཅིག་ཚར་གཉིས་ཀྱིས་བསྟོད། ཕན་ཡོན་ཚར་གཅིག་བཅས་དང་། རི་བོང་ཅན་གྱི་འོད་ཟེར་འབུམ་འཕྲོ་བ། །སྲིད་འགྲོ་འཁོར་བའི་བག་ཆགས་མུན་པ་བཅོམ། །ཡང་དག་ངེས་པའི་ཀུནྡ་གྲོལ་བའི་གཉེན། །བཅོམ་ལྡན་ཡིད་བཞིན་འཁོར་ལོར་ཕྱག་འཚལ་བསྟོད། །ཕྲིན་ལས་སྣ་ཚོགས་སྐྱོབ་པའི་བདུད་རྩིའི་གཏེར། །ཉོན་མོངས་གདུང་སེལ་ཐུགས་རྗེའི་བསིལ་རྒྱུན་འབེབས། །ཆུ་ཟླའི་གར་རོལ་མཐའ་ཡས་ཅིར་ཡང་བསྒྱུར། །རྗེ་བཙུན་འཕགས་མ་ཉེར་གཅིག་ཕྱག་འཚལ་བསྟོད། །མཆོག་
དང་ཐུན་མོང་དངོས་གྲུབ་ཆར་ཆེན་པོ། །དེང་འདིར་ཚོགས་གཉིས་སེམས་བསྐྱེད་དག་པའི་སར། །བྱང་ཆུབ་དགེ་བའི་མྱུ་གུ་རྒྱས་པའི་ཕྱིར། །སྟན་ཐོག་འདི་རུ་སྨིན་པར་བྱིན་གྱིས་རློབས། །ཞེས་བསྟོད་ནས། དྲུག་པ་སྔགས་འཁོར་བསྒོམ་པ་ནི། རང་ཉིད་བཅོམ་ལྡན་འདས་མར་གསལ་བའི་ཐུགས་ཀར་པད་ཟླའི་སྟེང་དུ་འཁོར་ལོ་དཀར་པོ་རྩིབས་བརྒྱད་མུ་ཁྱུད་དང་ལྡན་པ་འོད་དཀར་པོ་འཕྲོ་བའི་ལྟེ་བར་ཏཱྃ། མདུན་ནས་གཡས་བསྐོར་དུ། ༀ་མ་མ་ཨཱ་ཡུཿཔུཎྱེ་ཛྙཱ་ན་པུཥྚིཾ་ཀུ་རུ་ཧཱ། རྩིབས་བརྒྱད་ལ། ཏཱ། རེ། ཏུཏ་། ཏཱ། རེ། ཏུ། རེ། སྭཱ། ཞེས་པས་ཡིག་འབྲུ་རྣམས་ཤིན་ཏུ་དཀར་ཞིང་གསལ་ལ་འཚེར་བ་མི་གཡོ་བར་གནས་པ་དང་། ཕྱི་རིམ་ལྷ་སོ་སོའི་ས་བོན་ལས་ཀྱང་འོད་འཕྲོས། ཕྱོགས་བཅུའི་རྒྱལ་བ་རྣམས་མཆོད། ཁམས་གསུམ་འགྲོ་བའི་ཚེ་དཔལ་བསོད་ནམས་བསྐྱེད་ཅིང་། སླར་འོད་ཟེར་གྱིས་དུས་གསུམ་སངས་རྒྱས་བྱང་སེམས་ཐམས་ཅད་ཀྱི་མཐུ་དང་ནུས་པ་བྱིན་རླབས། བརྟན་པ་དང་གཡོ་བའི་འཁོར་འདས་ཀྱི་ཚེ་དང་བསོད་ནམས་དཔལ་དང་འབྱོར་པའི་དྭངས་མ་འབྱུང་བ་ཆེན་པོ་བཞི་ཡི་བཅུད་ལ་སོགས་པ་ཐམས་ཅད་འོད་ཟེར་གྱི་རྣམ་པར་བསྡུས་ནས། འཁོར་ལོ་དང་ཡིག་འབྲུ་ལ་ཐིམ་པས་མཆོག་དང་ཐུན་མོང་གི་དངོས་གྲུབ་མ་ལུས་པ་འགྲུབ་པར་གྱུར་བར་མོས་ལ། དེ་ཡང་། འཕགས་མ་སྒྲོལ་མ་བསྒོམ་དེ་ཡི། །ཐུགས་ཀར་འཁོར་
ལོ་འོད་ཟེར་དཀར། །རེའུ་མིག་བརྒྱད་ལ་ཡི་གེ་ནི། །བརྒྱད་པོ་རྣམས་ཀྱིས་ཡོངས་སུ་གང་། །ༀ་ཧཱའི་ཡི་གེའི་དབུས་གནས་པའི། །ཉེ་བར་བསྒྲུབ་བྱའི་མིང་དང་ལྡན། །རྩེ་གཅིག་པ་ཡི་སེམས་ཀྱིས་ནི། །ངེས་པར་བརྟན་པོས་ཟླ་དྲུག་བསྒོམ། །ཡི་གེ་བཅུ་པའི་སྔགས་འདི་ནི། །སྐྱོ་བ་མེད་པའི་སེམས་ཀྱིས་བཟླས། །ༀ་གྱི་ཡི་གེ་དང་པོར་སྦྱིན། །ཕྱི་ནས་ཏཱ་རེ་རབ་ཏུ་སྦྱར། །དེ་འོག་ཏུཏྟཱ་རེ་ཏུ་རེ། །སྭཱ་ཧཱའི་མཐའ་ཅན་ལས་ཀུན་བྱེད། །ཅེས་གསུངས་པ་ལྟར་སྔགས་འཁོར་གསལ་བ་བསྒོམ་ལ། བདུན་པ་བསྙེན་པ་བྱ་བ་ནི། ༀ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཞེས་རྩ་སྔགས་ཡིག་བཅུ་རིགས་སྔགས་ཀྱི་རྒྱལ་མོ་འདི་ཉིས་བརྒྱ་བཟླས་ལ། འབྲུ་བརྒྱད་མཐར། མ་མ་ཨཱ་ཡུཿཔུཎྱ་ཛྙཱ་ན་པུཥྚིཾ་ཀུ་རུ་སྭཱ་ཧཱ། ཞེས་སྤེལ་ཚིག་ཅན་བརྒྱ་རྩ་བཟླའོ། །བརྒྱད་པ་ཕན་ཡོན་བསྟན་པ་ནི། ཚངས་དབང་ཁྱབ་འཇུག་ཉི་ཟླ་དང་། །དྲག་པོ་ཕྱོགས་སྐྱོང་འདོད་ལྷས་ཀྱང་། །བ་སྤུའི་རྩེ་མོའང་མི་གཅོད་པར། །འཆི་བདག་ལས་རྒྱལ་སྒྲོལ་མ་བཞིན། །སྐྲ་དཀར་གཉེར་མ་སྐལ་ངན་དང་། །ནད་དང་དབུལ་བ་ཀུན་ཟད་བྱེད། །སེང་གེ་ལ་སོགས་འཇིགས་ཆེན་བརྒྱད། །སྡུག་བསྔལ་ཚོགས་ནི་འཇིགས་པར་བྱེད། །མ་བསློང་པར་ནི་ཟས་སྐོམ་སོགས། །ཁང་བཟང་གོས་ལ་སོགས་པ་རྙེད། །རལ་གྲི་མིག་སྨན་རྐང་བྱུགས་དང་། །བུམ་བཟང་ལ་སོགས་དངོས་གྲུབ་རྣམས། །སྙན་ངག་སྨྲ་མཁན་རྩོད་པ་བྱང་། །གཅིག་ཏུ་དྲི་མེད་ཤེས་རབ་དང་། །འདོད་པའི་དངོས་གྲུབ་གཞན་དག་ཀྱང་། །འཁོར་ལོ་འདི་ལས་ལེགས་པར་འབྱུང་། །ཞེས་གསུངས་སོ། །དེ་ཡང་རྩ་བའི་སྔགས་འབུམ་ཚོ་བཅུའི་གྲངས་བསྙེན་ཐེམ་པ་ཡིན་ལ། བྱེ་བ་བཟླས་པས་དོན་ཐམས་ཅད་འགྲུབ་པར་
བཤད་དོ། །དེ་ནས་སྒྲོལ་མ་ལས་ཐམས་ཅད་པའི་རིགས་སྔགས་ནི། ན་མོ་རཏྣ་ཏྲ་ཡཱ་ཡ། ན་མཿཨཱཪྱ་ཨ་བ་ལོ་ཀི་ཏེ་ཤྭ་ར་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀ་ཡ། ཏདྱ་ཐཱ། ༀ་ཏཱ་རེ་ཏུཏྟཱ་རེ་ཏུ་རེ་སརྦ་དུཥྚཾ། པྲ་དུཥྚཾ། མ་མ་ཀྲྀ་ཏ། ཛཾ་བྷ་ཡ། སྟྭཾ་བྷ་ཡ། མོ་ཧཱ་ཡ། བྷནྡྷ་ཡ། ཧཱུྃ་ཧཱུྃ་ཧཱུྃ། ཕཊ་ཕཊ་ཕཊ། སརྦ་དུཥྚཾ་སྟྭཾ་བྷ་ནི་ཏཱ་རེ་སྭཱ་ཧཱ། ཞེས་ཕན་ཡོན་བསྐྱེད་པ་དང་ཁ་སྐོང་བའི་ཕྱིར་བཟླས་པ་བྱའོ། །དེ་ཡང་རྒྱུད་ལས། འཇིག་རྟེན་ལ་ནི་དངོས་གཞན་གང་། །སྔགས་ཀྱིས་མི་འགྲུབ་དེ་ཡོད་མིན། །ཡང་དག་དད་པས་འབད་པ་ལས། །སྔགས་རྣམས་ཡིད་བཞིན་ནོར་བུར་མཚུངས། །ཞེས་སོ། །སྤྱི་དོན་གཉིས་པ་བུམ་བསྐྱེད་བསྒྲུབ་པ་ནི་ལས་རིམ་བདུན་ཡོད་པ་ལས། དང་པོ་ནི། རྣམ་རྒྱལ་བུམ་པ། ༀ་བཛྲ་ཀྲོ་དྷ་སོགས་ཀྱིས་བསངས། སྭ་བྷཱ་ཝས་སྤྱངས། སྟོང་པའི་ངང་ལས་པྃ་ལས་སྣ་ཚོགས་པདྨ་དང་། ཨ་ལས་ཟླ་བའི་དཀྱིལ་འཁོར་གྱི་སྟེང་དུ། བྷྲཱུྃ་ལས་བྱུང་བའི་རིན་པོ་ཆེའི་བུམ་པ་དཀར་པོ་དྲི་མ་དང་བྲལ་བ། ལྟོ་བ་ཡངས་ཤིང་མགྲིན་པ་རིང་ལ་མཆུ་འཕྱང་བ་མེ་ཏོག་དང་ལྷའི་གོས་ཀྱིས་མགྲིན་པ་དཀྲིས་པ། དཔག་བསམ་ཤིང་ལོས་ཁ་བརྒྱན་ཅིང་མཚན་ཉིད་ཐམས་ཅད་ཡོངས་སུ་རྫོགས་པར་གྱུར་པའི་རྣམ་པར་རྒྱལ་བའི་བུམ་པའི་ནང་དུ་ལྔ་ཕྲག་ལྔ་ལྡན་གྱི་རྫས་དུ་མས་གཏམས་པའི་ཡན་ལག་བརྒྱད་དང་ལྡན་པའི་བདུད་རྩིའི་རྒྱ་མཚོ་སྔོ་ལ་དྭངས་ཤིང་འཁྱིལ་བའི་དབུས་སུ་པྃ་ལས་པདྨ་དཀར་པོའི་སྡོང་བུ་ཡལ་ག་གེ་སར་མཆོག་ཏུ་རྒྱས་
པ་ཞེས་སོགས་ལྷ་ཚོགས་རྣམས་བདག་བསྐྱེད་ལྟར་དམིགས་ནས། འོད་ཀྱི་སྣང་བས་ཕྱོགས་བཅུར་ཁྱབ་པར་གྱུར་ཅེས་པའི་བར་དང་། གཉིས་པ་ནི། ལས་བུམ་གྱི་དབུས་སུ་པདྨ་དང་ཉི་མར་ཧྲཱིཿལས་ཁྲོ་བོའི་རྒྱལ་པོ་རྟ་མགྲིན་སྐུ་མདོག་དམར་པོ་ཞལ་གཅིག་ཕྱག་གཉིས་གཡས་རྡོ་རྗེའི་དབྱུག་པ་དང་གཡོན་སྡིགས་མཛུབ་བསྒྲེང་བ། དབུ་སྐྲ་དམར་སེར་འབར་ཞིང་སྤྱི་གཙུག་ཏུ་རྟ་ཞལ་ལྗང་ཞུར་འཚེར་བ། ཐོད་སྐམ་དང་དར་དཔྱངས་ཀྱིས་བརྒྱན་པ། སྦྲུལ་གྱི་ཡན་ལག་དཀྲིས་ཤིང་། སྟག་ལྤགས་ཀྱི་ཤམ་ཐབས་ཅན། ཁམས་གསུམ་དབང་དུ་སྡུད་ཅིང་ཞབས་གཉིས་དོར་སྟབས་ཀྱིས་ཡེ་ཤེས་བསྐལ་པའི་མེ་དཔུང་འབར་བའི་ཀློང་དཀྱིལ་དུ་གསལ་བའོ། །དེ་ལྟར་ལྷ་ཚོགས་ཐམས་ཅད་དང་། དཔལ་རྟ་མགྲིན་རྣམས་ཀྱི་གནས་གསུམ་དུ་འབྲུ་གསུམ་གྱིས་མཚན་པ་དང་། རང་རང་གི་ཐུགས་ཀར་ས་བོན་ལས་འོད་ཟེར་དཀར་པོ་དང་། སྣ་ཚོགས་པའི་འོད་དང་། འོད་ཟེར་དཔག་ཏུ་མེད་པ་འཕྲོས་པས་རང་བཞིན་རྣམ་པར་དག་པའི་ཞིང་ཁམས་རབ་འབྱམས་དང་། ཁྱད་པར་དུ་ལྷོ་ཕྱོགས་པོ་ཊ་ལ་ཡི་ཞིང་ཁམས་ནས་རྗེ་བཙུན་མ་འཕགས་མ་སྒྲོལ་མ་ལྷ་ཉེར་གཅིག་གི་དཀྱིལ་འཁོར་རྟེན་དང་བརྟེན་པར་བཅས་པ་ལ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཞིང་གི་རྡུལ་སྙེད་མ་ལུས་ཤིང་ལུས་པ་མེད་པས་བསྐོར་བ་སྤྱན་དྲངས་བཛྲ་ས་མ་ཛཿགསུམ་པ་སྤྱན་འདྲེན་པ་དང་། དབང་
བསྐུར་རྒྱས་གདབ་པ་ནི། ༀ་དམིགས་མེད་ཐུགས་རྗེ་མཁའ་ལྟར་དག་པ་ཡི། །ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང་། །ཐབས་དང་ཤེས་རབ་གཟུགས་བརྙན་སྐུར་སྟོན་པ། །སྒྲོལ་མ་འཁོར་བཅས་གནས་འདིར་གཤེགས་སུ་གསོལ། །ཞེས་བརྗོད་སྤྱན་དྲངས་ལ། ཛཿཧཱུྃ་བྃ་ཧོཿདམ་ཚིག་སེམས་དཔའ་དང་གཉིས་སུ་མེད་པར་གྱུར། སླར་ཡང་ཐུགས་ཀའི་ས་བོན་གྱི་འོད་ལས་བྱུང་བའི་དབང་གི་ལྷ་རྣམས་བཛྲ་ས་མཱ་ཛཿༀ་ཨ་བྷི་ཥིཉྩ་ཏུ་མཾ། ཞེས་གསོལ་བ་བཏབ་པས། ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ། ཞེས་བུམ་པའི་ཆུས་དབང་བསྐུར་སྐུ་ུགང་། ལྷག་མ་ཡར་ལུད་པ་ལས། གཙོ་བོ་ལ་འོད་དཔག་མེད་དང་། ལྷ་ཚོགས་རྣམས་ལ་རིགས་ལྔ་སོ་སོས་རྒྱས་གདབ་ཅིང་། དཔལ་རྟ་མགྲིན་ལ་སྣང་བ་མཐའ་ཡས་ཀྱིས་དབུ་བརྒྱན་པར་གྱུར། ཅེས་དབང་བསྐུར་རྒྱས་གདབ་དང་། དེ་ནས་བཞི་པ་མཆོད་པ་ནི་སྔར་ལྟར་བྱིན་གྱིས་བརླབས་ལ། གང་ཞིག་འཇིག་རྟེན་འདི་འམ་གཞན་དག་ན། །དག་ཅིང་དྲི་མེད་ཡིད་འོང་མཆོད་ཡོན་འདི། །འཕགས་མ་སྒྲོལ་མའི་ལྷ་ཚོགས་རྣམས་ལ་འབུལ། །བཞེས་ནས་ཟག་མེད་བདེ་བ་སྩལ་དུ་གསོལ། །ༀ་ཨཱཪྱ་ཏཱ་རེ་ས་པ་རི་ཝཱ་ར་བཛྲ་ཨརྒྷཾ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། སོ་སོའི་ཕྱག་རྒྱ་དང་བཅས། གང་ཞིག་འཇིག་རྟེན༴རྣམ་དག་མོས་བློས་ཆུ་གཙང་ཞབས་བསིལ་
འདི། །འཕགས་མ་སྒྲོལ་མའི༴བཞེས་ནས༴སྔགས་ཐོག་མཐའ་འདྲ་བར། པཱདྱཾ༴གང་ཞིག་འཇིག་རྟེན༴ལྷ་ཡི་མེ་ཏོག་མཛེས་པའི་དགའ་ཚལ་འདི། །འཕགས་མ་སྒྲོལ་མའི༴བཞེས་ནས༴པུཥྤེ༴གང་ཞིག་འཇིག་རྟེན༴མ་ལ་ཡ་ལུང་དྲི་ཞིམ་སེར་བུས་བསྐྱོད། །འཕགས་མ་སྒྲོལ་མའི༴བཞེས་ནས༴དྷཱུ་པེ༴གང་ཞིག་འཇིག་རྟེན༴མ་རིག་མུན་གསལ་མར་མེ་གཟི་འོད་འབར། །འཕགས་མ་སྒྲོལ་མའི༴བཞེས་ནས༴ཨཱ་ལོ་ཀེ༴གང་ཞིག་འཇིག་རྟེན༴ག་བུར་ལ་སོགས་བྱུགས་བའི་རྣམ་པ་གང་། །འཕགས་མ་སྒྲོལ་མའི༴བཞེས་ནས༴གནྡྱེ༴གང་ཞིག་འཇིག་རྟེན༴ལྷ་མིའི་འབྱོར་བ་བཅུད་ལྡན་ཞལ་ཟས་འདི། །འཕགས་མ་སྒྲོལ་མའི༴བཞེས་ནས༴ནཻ་ཝི་དྱ༴གང་ཞིག་འཇིག་རྟེན༴དབྱངས་ཀྱི་ཁྱད་པར་སྣ་ཚོགས་རོལ་མོའི་སྒྲ། །འཕགས་མ་སྒྲོལ༴བཞེས་ནས༴ཤབྡ༴ཞེས་བརྗོད་ལ་མཆོད་པའི་བྱེ་བྲག་རྣམས་འབུལ་ལོ། །འདོད་ཡོན་རྣམ་ལྔ་འབུལ་བ་ནི། གང་ཞིག་འཇིག་རྟེན་འདིའམ་གཞན་དག་ན། །གཟུགས་མཆོག་རྣམས་དང་གྲག་སྟོང་མི་ཤིགས་སྒྲ། །སྦྱར་དང་རང་བྱུང་དྲི་ངད་འཆི་མེད་བཤོས། །ལྷ་རྫས་རེག་འཇམ་འདོད་ཡོན་རྣམ་པ་ལྔ། །རྒྱལ་སྲིད་བཀྲ་ཤིས་རྫས་རྟགས་མཆོད་པའི་ཚོགས། །འཕགས་མ་སྒྲོལ་མའི་ལྷ་ཚོགས༴བཞེས་ནས༴ༀ་བཛྲ་རཱུ་པ་ཤབྡ་
གནྡེ་རཱ་ས་སྤཪྴེེ་མངྒ་ལ་བི་ཤྭ་པྲ་ཏཱིཙྪ་ཡེ་ཨཱཿཧཱུྃ་སྭཱ་ཧཱ། ཞེས་བརྗོད་ལ་འབུལ། དེ་ནས་ཕྱག་འཚལ་ཉེར་གཅིག་ཚར་གསུམ་དང་། ཕན་ཡོན་ཚར་གཅིག་བཀླག །དེ་ནས་ཐལ་མོ་མེ་ཏོག་གི་སྙིམ་པ་དང་བཅས། རིན་ཆེན་རི་བོའི་དབུས་ན་ལྷུན་པོ་དང་། །རབ་མཛེས་པདྨའི་ཚལ་ན་འདབ་སྟོང་ཅན། །རྣམ་དག་རྒྱུ་སྐར་མཁའ་ལ་ཟླ་བ་བཞིན། །རྨད་བྱུང་སེམས་དཔའི་དབུས་ན་འཕགས་མའི་སྐུ། ཐ་སྙད་བརྗོད་པའི་སྤྲོས་པས་གོས་མིན་ཀྱང་། །སྣ་ཚོགས་གདུལ་བྱའི་སྐད་དུ་གཅིག་ཅར་དུ། །དག་གསལ་དྲི་མེད་སོ་སོར་ངེས་པའི་དོན། །ལེགས་སྟོན་རྩོལ་མེད་ཀུན་འགྲོ་འཕགས་མའི་གསུང་། །ཆོས་རྣམས་ཀུན་ལ་མི་གནས་ཆོས་ཀྱི་དབྱིངས། །རྣམ་དག་མངོན་སུམ་རྟོགས་ནས་སྣ་ཚོགས་དོན། །ཇི་བཞིན་གཟིགས་པ་དམིགས་པ་མེད་པའི་བདག །དུས་གསུམ་རྒྱལ་བ་ཀུན་དང་དབྱེར་མེད་ཐུགས། །རྣམ་འཕྲུལ་དཔག་མེད་མཁའ་མཉམ་འགྲོ་བ་ཀུན། །རྗེས་སུ་འཛིན་མཛད་ཐུགས་རྗེའི་ཁྱོན་ཡངས་ཁྱོད། །གླིང་བཞིའི་མུན་སེལ་ཉི་མའི་དཀྱིལ་འཁོར་བཞིན། །ཚད་མེད་འགྲོ་བའི་དོན་ལ་ངལ་མ་གྱུར། །ནམ་མཁའི་ལམ་ལ་ཉིན་མོར་བྱེད་པ་དང་། །ཆུ་གཏེར་དབུས་ན་ལྷུན་པོའི་དཔལ་བཞིན་དུ། །འཕགས་མའི་ནང་ན་འཕགས་མའི་ལྷ་མོ་ཁྱོད། །བདག་གི་ཡིད་ལ་ཉེ་བ་ཉིད་དུ་མཛོད། །ཅེས་རྗེ་རོལ་པའི་རྡོ་རྗེས་མཛད་པ་དང་།
རྣམ་པ་དུ་མས་ལྷག་པའི་ཤེས་རབ་ཀྱིས། །སྲིད་ཞིའི་དཔལ་དང་མགོན་གྱུར་བྱམས་པའི་གཉེན། །འཆི་མེད་ལྷ་མོ་ཉེར་གཅིག་སྐུར་སྣང་བ། །བདག་རྒྱུད་ཡེ་ཤེས་མངོན་གྱུར་བྱིན་གྱིས་རློབས། །ཞེས་མེ་ཏོག་འཐོར། དེ་ནས་ལྔ་པ་ཡན་ལག་བདུན་པ་ཚིགས་རྒྱུན་ཆགས་གྱིས་འབུལ་བ་ནི། དུས་གསུམ་གྱི་རྒྱལ་བ་ཐམས་ཅད་སྐྱེད་པའི་ཡུམ་གྱུར་འཕགས་མ་སྒྲོལ་མ་ཡིད་བཞིན་འཁོར་ལོ་བཅོམ་ལྡན་འདས་མ་སྒྲོལ་མ་ཉེར་གཅིག་དཀྱིལ་འཁོར་གྱི་ལྷ་ཚོགས་ཡབ་ཡུམ་སྲས་དང་སློབ་མ་སྤྲུལ་པར་བཅས་པ་རྣམས་ལ་ཕྱག་འཚལ་ལོ། །འདུད་དོ། །མཆོད་པའི་རྣམ་པ་དུ་མ་ཟག་པ་མེད་པའི་རང་བཞིན་ཅན་བདག་པོས་བཟུང་དང་མ་བཟུང་བའི་དཔལ་དང་འབྱོར་པའི་སྤྲིན་གྱི་ཕུང་པོ་ཀུན་ཏུ་བཟང་པོའི་སྨོན་ལམ་གྱི་སྟོབས་དང་། གཟུངས་དང་རིག་པའི་མཐུ་དང་། བདག་ཅག་རྣམས་ཀྱི་མོས་པས་བསྐྱེད་པའི་རབ་འབྱམས་མཐའ་ཡས་པར་རྒྱས་པར་གང་བའི་བླ་ན་མེད་པའི་མཆོད་པ་རྒྱ་མཚོ་ནི་བཞེས་པར་མཛད་དུ་གསོལ། བདག་དང་སེམས་ཅན་ཐམས་ཅད་ཀྱིས་ཐོག་མེད་དུས་རིང་ནས་ད་ལྟ་ལ་ཐུག་གི་བར་དུ་མི་དགེའི་ལས་ཅི་དང་ཅི་བགྱིད་པ་ཐམས་ཅད་ནི་སོ་སོར་བཤགས་སོ། །འཕགས་པ་དང་སོ་སོའི་སྐྱེ་བོའི་ཡང་དག་པའི་དགེ་བ་ལ་ནི་རྗེས་སུ་ཡི་རང་ངོ་། །ཕྱོགས་བཅུའི་སངས་རྒྱས་ཐམས་ཅད་བདག་སོགས་སེམས་ཅན་གྱི་དོན་དུ་ཆོས་ཀྱི་འཁོར་ལོ་ནི་བསྐོར་བར་བསྐུལ་
ལོ། །ཞི་བའི་དབྱིངས་སུ་མནལ་བའི་ཚུལ་བསྟན་པའི་འཇིག་རྟེན་གྱི་སྒྲོན་མེ་གང་དག་ཇི་སྲིད་ཀྱི་བར་དུ་འཚོ་ཞིང་གཞེས་པ་ནི་གསོལ་ལོ། །བདག་གི་དུས་གསུམ་བསགས་པའི་དགེ་བའི་ཚོགས་ཅི་མཆིས་པ་རྣམས་སེམས་ཅན་ཐམས་ཅད་མི་གནས་པའི་བྱང་ཆུབ་སྙིང་པོའི་གོ་འཕང་ལ་འགོད་པའི་རྒྱུར་ཡོངས་སུ་བསྔོ་བར་ནི་བགྱིའོ། །ཞེས་བརྗོད་པར་བྱའོ། །དེ་ནས་དྲུག་པ་བུམ་བསྐྱེད་གྱི་བཟླས་པར་འཇུག་པ་ནི། རྣམ་རྒྱལ་བུམ་པའི་སྟེང་དུ་དུང་ཆོས་ཁར་མེ་ཏོག་གི་ཕྲེང་བ་དང་ལྡན་པའི་གཟུངས་རྡོར་བཞག་ལ། བདག་ཉིད་འཕགས་མ་སྒྲོལ་མར་གསལ་བའི་ཐུགས་ཀའི་འཁོར་ལོ་ཡིག་འབྲུ་དང་བཅས་པ་ལས་སྔགས་ཕྲེང་འོད་ཟེར་དཀར་པོའི་རྣམ་པ་གཟུངས་ཐག་ལ་བརྒྱུད་དེ་བུམ་ལྷའི་ཐུགས་ཀར་ཕོག་པས་ལྷ་ཚོགས་རྣམས་ཀྱི་ཐུགས་དམ་གྱི་རྒྱུད་བསྐུལ་ཏེ་དོན་གཉིས་བྱས། སླར་འོད་ཟེར་འཕྲོས་པས་རྒྱལ་བ་རྣམས་ཀྱི་བྱིན་རླབས་དང་། བརྟན་གཡོ་མ་ལུས་པའི་དྭངས་བཅུད་ཐམས་ཅད་བདུད་རྩི་འོད་ཀྱི་རྣམ་པར་བསྡུས། བུམ་ལྷ་རྣམས་ལ་ཐིམ་པས་ཐུགས་ཀའི་སྔགས་འཁོར་དང་སྐུའི་ཆ་ལས་འཆི་མེད་ཡེ་ཤེས་ཀྱི་བདུད་རྩིའི་རྒྱུན་བབས། བུམ་པ་གང་བར་གྱུར། ཅེས་བསམ་ལ། ཡི་གེ་བཅུ་པ་སུམ་བརྒྱ་བཟླས་ལ། སྤེལ་ཚིགས་ཅན་བརྒྱ་དང་ལྔ་བཅུ། ལས་ཐམས་ཅད་པའི་སྔགས་དང་། རྟ་མགྲིན་སྔགས་ཀྱང་བཟླས་སོ། །བདུན་པ་དུང་ཆོས་ཀྱི་ཆུ་རྒྱུན་མཆོད་པའི་ཚུལ་དུ་བུམ་པར་དབུལ་ནས།
ༀ་ཨཱཪྱ་ཏཱ་རེ་བཛྲ་ཨརྒྷཾ་པྲ་ཏཱིཙྪ་ཨཱཿཧཱུྃ། ཞེས་བརྗོད་ལ་ཕུལ། བུམ་པའི་ལྷ་རྣམས་བདེ་བ་ཆེན་པོར་དབྱེར་མི་ཕྱེད་པར་འོད་དུ་ཞུ་ནས་བུམ་ཆུའི་རང་བཞིན་དུ་གྱུར། པུཥྤེ་ལ་སོགས་པ་ཉེར་སྤྱོད་ལྔས་མཆོད། ལས་བུམ་གྱིས་བསངས་གཏོར་བྱས་ལ། ཁྲོ་བོའི་རྒྱལ་པོ་དཔལ་རྟ་མགྲིན་གྱི་ལས་ཐམས་ཅད་སྒྲུབ་པ་དང་། བར་ཆད་ཀྱི་བགེགས་བཟློག་པའི་ཕྲིན་ལས་མཛད་དུ་གསོལ། དཔལ་རྟ་མགྲིན་འོད་དུ་ཞུ་ནས་བདུད་རྩིར་གྱུར། དེ་ནས་མདུན་བསྐྱེད་བསྒྲུབ་ཅིང་མཆོད་བའི་རིམ་པ་ལ། དོན་ཚན་ལྔའི་དང་པོ་ནི། ལས་སྔགས་ཀྱིས་བསངས། ཤཱུ་ནྱ་ཏས་སྦྱངས། སྟོང་པའི་ངང་ལས་མདུན་གྱི་ནམ་མཁར་ཧཱུྃ་ལས་བྱུང་བའི་རྡོ་རྗེའི་རྭ་གུར་ཡེ་ཤེས་ཀྱི་མེ་དཔུང་འབར་བའི་སྲུང་འཁོར་ཡངས་ཤིང་རྒྱ་ཆེ་བའི་དབུས་སུ་སོགས་ལྷ་ཚོགས་ཐམས་ཅད་སྔར་ལྟར་བསྐྱེད་ལ། བཛྲ་ས་མཱ་ཛཿའི་བར་བརྗོད་ནས། གཉིས་པ་སྤྱན་འདྲེན་པ་ནི། པོ་ཊ་ལ་ཡི་གནས་མཆོག་ནས། །སོགས་ནས། གཤེགས་སུ་གསོལ། བར་དང་། ༀ་ཐུགས་རྗེ་རྨད་བྱུང་བཅོམ་ལྡན་འདས། །འཇིག་རྟེན་དབང་པོའི་སྲས་མོ་མཆོག །མ་ལུས་རྒྱལ་བ་ཀུན་གྱི་ཡུམ། །འཕགས་མ་སྒྲོལ་མ་འདིར་གཤེགས་གསོལ། །སྒྱུ་འཕྲུལ་འཛིན་མ་ཁྱོད་ཀྱི་སྐུ། །ཆོས་དང་དེ་བཞིན་ལོངས་སྤྱོད་རྫོགས། །སྲིད་པ་ཀུན་ཏུ་རྣམ་སྤྲུལ་མ། །དེང་འདིར་སྤྱན་འདྲེན་གཤེགས་སུ་གསོལ། །རྡོ་རྗེ་སེམས་དཔའ་བདེ་ཆེན་ཡུམ། །དོན་དམ་ཕྱག་རྒྱ་ཆེན་མོའི་སྐུ། །གདོད་ནས་དྲི་བྲལ་
གསང་ཆེན་མ། །གཉིས་མེད་རོ་མཉམ་གཤེགས་སུ་གསོལ། །འགྲོ་འོང་མེད་ཀྱང་འགྲོ་འོང་ལྟར། །སྟོན་མཛད་ཕྲིན་ལས་རྒྱ་མཚོའི་གཏེར། །དོན་གཉིས་མཐའ་དག་ལྷུན་གྲུབ་མ། །ཐུགས་རྗེ་མངའ་བ་འདིར་གཤེགས་གསོལ། །བརྗོད་བྲལ་ཕར་ཕྱིན་ཤེས་རབ་ཡུམ། །སྐྱེ་འགག་གནས་མེད་ཀུན་ཏུ་ཁྱབ། །རང་རིག་ལྷན་ཅིག་སྐྱེས་མ་དངོས། །བདེ་སྟོང་ལྷ་མོ་འདིར་གཤེགས་གསོལ། །མཁའ་དབྱིངས་གང་བའི་རྣམ་པར་རོལ། །ཡེ་ཤེས་སྒྱུ་འཕྲུལ་གར་མཁན་མ། །དུས་གསུམ་རྒྱལ་བའི་ཚོགས་དང་བཅས། །འདིར་གཤེགས་རྣལ་འབྱོར་བྱིན་གྱིས་རློབས། །ཆུ་ཤེལ་སྟོན་ཟླའི་མདོག་འཆང་ཞིང་། །སྣ་ཚོགས་ལེགས་བྱས་འོད་ཟེར་ཅན། །ཚུར་སྤྱོན་ཚུར་སྤྱོན་འཕགས་མའི་ཚོགས། །མཆོད་པའི་གནས་འདིར་གཤེགས་སུ་གསོལ། །ༀ་སརྦ་ཏ་ཐཱ་ག་ཏ་ཨཱཪྱ་ཏཱ་རེ་ས་པ་རི་ཝཱ་ར་བཛྲ་ས་མ་ཡ་ཛ་ཛཿཞེས་ཡེ་ཤེས་པ་སྤྱན་དྲངས་ནས། གསུམ་པ་གདན་འབུལ་བ་ནི། འཕགས་མ་དེང་འདིར་བྱོན་པ་ལེགས། །བདག་ཅག་བསོད་ནམས་སྐལ་བ་བཟང་། །ཚོགས་གཉིས་ཡོངས་སུ་རྫོགས་སླད་དུ། །འདིར་ནི་གཉིས་མེད་བརྟན་པར་བཞུགས། །སྣང་སྲིད་རབ་འབྱམས་ཞིང་མཉམ་པའི། །པདྨ་འདབ་རྒྱས་གེ་སར་བཞད། །འཇིག་རྟེན་ཚངས་དབང་བརྒྱ་བྱིན་དང་། །ལྷ་མིན་ལ་སོགས་བྱེ་བ་ཡིས། །གཙུག་གིས་མངོན་པར་འདུད་པའི་ཁྲི། །དྭངས་ཤིང་དད་པའི་མོས་བློ་
ཡིས། །ཇི་ལྟར་བདེ་བར་འབུལ་ལགས་ན། །འདི་ཉིད་དུ་ནི་བཞུགས་སུ་གསོལ། །ༀ་པདྨ་ཀ་མ་ལ་ཡ་སྟྭཾ་སྭཱ་ཧཱ། ཛཿཧཱུྃ་བྃ་ཧོཿསྤྱན་དྲངས་པའི་ཡེ་ཤེས་སེམས་དཔའི་ལྷ་ཚོགས་དམ་ཚིག་སེམས་དཔའ་གཉིས་མེད་གཅིག་ཏུ་གྱུར། བཞི་པ་དབང་བསྐུར་རྒྱས་གདབ་པ་ནི། སླར་ཡང་ཐུགས་ཀའི་ས་བོན་ལས་འོད་ཟེར་འཕྲོས། རང་བཞིན་གྱི་གནས་ནས་དབང་གི་ལྷ་རྣམས་སྤྱན་དྲངས་བཛྲ་ས་མཱ་ཛཿༀ་པཉྩ་ཀུ་ལ་ས་པ་རི་ཝཱ་ར་ཨརྒྷཾ་པྲ་ཏིཙྪ་ཡེ་སྭཱ་ཧཱ། དེ་བཞིན་དུ། པཱ་དྱཾ་ནས། ཤཔྡའི་བར་བརྗོད་ལ། ༀ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཾ། ཞེས་གསོལ་བ་བཏབ་པས། དེ་བཞིན་གཤེགས་པ་རྣམས་ཀྱིས་དབང་བསྐུར་བའི་དགོངས་པ་མཛད། སེམས་དཔའ་སེམས་མ་རྣམས་ཀྱིས་རྡོ་རྗེའི་གླུ་ལེན་ཞིང་ཤིས་པའི་མེ་ཏོག་འཐོར། ཁྲོ་བོ་ཁྲོ་མོ་རྣམས་ཀྱིས་བསྲུང་བའི་ལས་མཛད། རིག་པའི་ལྷ་མོ་རྣམས་ཀྱིས་རིན་པོ་ཆེའི་བུམ་པ་བདུད་རྩིས་གང་བ་ཐོགས་ནས། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་གསོལ་ལོ། །ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ། ཞེས་གསུངས་ཤིང་དབང་བསྐུར། སྐུ་གང་དྲི་མ་དག །ཆུ་ཞབས་སྤྱི་བོར་བསྟེན་པས་གཙོ་བོ་ལ་འོད་དཔག་མེད་སྤྲུལ་སྐུའི་རྣམ་པ་ཅན་གྱིས་དབུ་བརྒྱན་པ་དང་། ལྷ་ཚོགས་རྣམས་ལ་རིགས་ལྔ་སོ་སོས་རྒྱས་གདབ་པར་གྱུར། ཅེས་
བརྗོད། དེ་ནས་ལྔ་པ་མདུན་བསྐྱེད་ཀྱི་བཟླས་པར་འཇུག་པ་ནི། མདུན་བསྐྱེད་འཕགས་མ་སྒྲོལ་མ་ཡིད་བཞིན་འཁོར་ལོའི་ཐུགས་ཀར་པད་ཟླའི་སྟེང་དུ་འཁོར་ལོ་དཀར་པོ་རྩིབས་བརྒྱད་མུ་ཁྱུད་དང་བཅས་པའི་ལྟེ་བར་ཏཱྃ་སྔགས་ཕྲེང་དང་བཅས་པ་རྩིབས་བརྒྱད་ལ་ཡི་གེ་བརྒྱད་གསལ་བར་གྱུར་པ་ལས་འོད་དང་འོད་ཟེར་འཕྲོ་བ། ཕྱི་རིམ་སྒྲོལ་མའི་ལྷ་ཚོགས་རྣམས་ཀྱི་ཐུགས་ཀའི་ས་བོན་ལས་ཀྱང་འོད་ཟེར་ཁ་དོག་སྣ་ཚོགས་གསལ་ཞིང་འཚེར་བའི་རྣམ་པ་དུ་མ་ཕྱོགས་བཅུར་འཕྲོས་པས། འཕགས་པ་མཆོད། སེམས་ཅན་གྱི་དོན་བྱས། དུས་གསུམ་གྱི་སངས་རྒྱས་དང་བྱང་ཆུབ་སེམས་དཔའ་བླ་མ་ཡི་དམ་དཔའ་བོ་མཁའ་འགྲོ་ཡེ་ཤེས་ཀྱི་ཆོས་སྐྱོང་ལ་སོགས་པ་ཐམས་ཅད་ཀྱི་མཐུ་སྟོབས་ནུས་རྩལ་ཡོན་ཏན་བྱིན་རླབས་དངོས་གྲུབ་དང་། བརྟན་གཡོ་སྣོད་བཅུད་ཀྱི་སྲིད་ཞིའི་ཚེ་དང་བསོད་ནམས་དཔལ་དང་འབྱོར་པ་འཇིག་རྟེན་ཁམས་ཀྱི་རྩི་སྨན་རིན་པོ་ཆེ། འབྱུང་བ་ཆེན་པོ་བཞི་ལ་སོགས་པའི་ནུས་པ་ཐམས་ཅད་འོད་ཟེར་གྱི་རྣམ་པར་བསྡུས་ནས་བདག་ཉིད་དང་མདུན་བསྐྱེད་ཀྱི་ཐུགས་ཀའི་སྔགས་འཁོར་ལ་ཐིམ་པས་ལས་བཞི་གྲུབ་པ་ཆེན་པོ་བརྒྱད་སོགས་མཆོག་དང་ཐུན་མོང་གི་དངོས་གྲུབ་ཐམས་ཅད་ཐོགས་མེད་བདེ་བླག་ཏུ་ཐོབ་པར་གྱུར་པར་མོས་ལ་རིགས་སྔགས་ཀྱི་རྒྱལ་མོ་ཡི་གེ་བཅུ་པ་བདུན་བརྒྱ་དང་། སྤེལ་ཚིག་ཅན་སུམ་བརྒྱ་དང་ལྔ་བཅུ་བཟླ། དེ་ནས་སྒྲོལ་མ་ལས་ཐམས་ཅད་
པའི་གཟུངས་སྔགས་ཀྱང་བཟླས་པར་བྱའོ། །དེ་དག་ནི་མདུན་བསྐྱེད་ཀྱི་རིམ་པའོ། །དེ་ནས་མཆོད་པ་འབུལ་བ་ལ། དོན་ཚན་བཅུ་གཉིས་སུ་ཡོད་པ་ལས། དང་པོ་ནི་སྔར་ལྟར་མཆོད་རྫས་རྣམས་བྱིན་གྱིས་བརླབས་ལ། དེ་དག་སླར་ཡང་མཐུ་བསྐྱེད་པའི་ཕྱིར་མཆོད་པའི་སྤྲིན་གྱི་གཟུངས་ལན་གསུམ་མམ་བདུན་ལ་སོགས་པ་བརྗོད་པར་བྱ་སྟེ། ༀ་ན་མོ་བྷ་ག་ཝ་ཏེ། བཛྲ་སཱ་ར་པྲ་མརྡ་ནཱ་ཡ། ཏ་ཐཱ་ག་ཏ་ཡ། ཨརྷ་ཏེ། སམྱཀྶཾ་བུདྡྷཱ་ཡ། ཏདྱ་ཐཱ། ༀ་བཛྲེ་བཛྲེ། མ་ཧཱ་བཛྲེ། མ་ཧཱ་བིདྱ་བཛྲེ། མ་ཧཱ་ཏེ་ཛོ་བཛྲེ། མ་ཧཱ་བོ་དྷི་མཎྚོ་པ་སཾ་ཀྲ་མ་ཎེ་སརྦ་ཀརྨ་ཨ་ཝ་ར་ཎ་བི་ཤྭ་དྷ་ནེ་སྭཱ་ཧཱ། ཞེས་བརྗོད་ལ། ཀུན་ཏུ་བཟང་པོའི་མཆོད་པའི་སྤྲིན་གྱི་འཁོར་ལོའི་རང་བཞིན་ཟག་པ་མེད་པར་འཕྲོ་བར་མོས་ལ། གཉིས་པ་ནི། མཐའ་ཡས་ཞིང་ཁམས་རབ་འབྱམས་ན། །མཐོན་ཀའི་མདངས་ཅན་ཚངས་རལ་ཀླུངས། །ཡན་ལག་བརྒྱད་ལྡན་མཆོད་ཡོན་འདི། །དཀྱིལ་འཁོར་ལྷ་ཚོགས་རྣམས་ལ་འབུལ། །ༀ་སརྦ་ཏ་ཐཱ་ག་ཏ་ཨཱཪྱ་ཏཱ་རེ་ས་པ་རི་ཝཱ་ར་བཛྲ་ཨརྒྷཾ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྤ་ར་ཎ་ས་མ་ཡེ་ཨཱཿཧཱུྃ། དེ་བཞིན་དུ། མཐའ་ཡས་ཞིང་ཁམས་རབ་འབྱམས་ན། །དལ་འབབ་རྒྱུན་བཟང་མཆོག་ཏུ་དྭངས། །དག་བྱེད་ཞབས་བསིལ་དམ་པ་འདི། །དཀྱིལ་འཁོར་ལྷ་ཚོགས༴སྔགས་ཐོག་མཐའ་འདྲ་བར། པདྱཾ། མཐའ་ཡས་ཞིང་ཁམས༴ལྷ་ཡི་མེ་ཏོག་མནྡ་ར། པདྨ་ཀུ་ུམུད་སྐྱེད་མོས་ཚལ། །དཀྱིལ་འཁོར་ལྷ་ཚོགས། པུཥྤེ། མཐའ་ཡས༴ཨ་ཀར་ཙནྡན་དུ་རུ་ཀ། དྲི་ཞིམ་བདུག་པའི་སྤྲིན་ཆེན་
གཏིབས། །དཀྱིལ་འཁོར༴ལྷ་ཚོགས༴དྷཱུ་པེ། མཐའ་ཡས་ཞིང་ཁམས༴སྣང་བའི་སྒྲོན་མེའི་རྣམ་པ་གང་། །འཕྲུལ་གྱི་འོད་ཟེར་ཕྱོགས་བཅུར་འབར། །དཀྱིལ་འཁོར་ལྷ་ཚོགས༴ཨཱ་ལོ་ཀེ། མཐའ་ཡས་ཞིང་ཁམས༴དྲི་མཆོག་ལེགས་པར་སྦྱར་བ་ཡི། །བྱུགས་པའི་དྲི་བསུང་ངད་ལྡང་བ། །དཀྱིལ་འཁོར་ལྷ་ཚོགས༴གནྡྷེ། མཐའ་ཡས་ཞིང་ཁམས༴སྣ་ཚོགས་བཅུད་ཀྱི་ཁམས་བསྡུས་པའི། །རྨད་བྱུང་ཞལ་ཟས་ཡི་གར་འོང་། །དཀྱིལ་འཁོར་ལྷ་ཚོགས༴ནཻ་ཝི་དྱ། མཐའ་ཡས་ཞིང་ཁམས༴གྲག་སྟོང་སྒྲ་སྙན་རོལ་མོ་དང་། །ཚངས་དབྱངས་རྡོ་རྗེའི་གླུ་ཡིས་བསྟོད། །དཀྱིལ་འཁོར་ལྷ་ཚོགས༴ཤབྡ། ཞེས་སོགས་ཕྱག་རྒྱ་དང་བཅས་ཏེ་དབུལ་ཞིང་། གསུམ་པ་དཔལ་མོ་ལུགས་ཀྱི་ཡན་ལག་བདུན་པ་ནི། རྗེ་བཙུན་འཕགས་མ་སྒྲོལ་མ་དང་། །ཕྱོགས་བཅུ་དུས་གསུམ་བཞུགས་པ་ཡི། །སོགས་དང་། ༀ། རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ། །ཕྱག་འཚལ་ཏཱ་རེ་མྱུར་མ་དཔའ་མོ། །ཏུཏྟཱ་རེ་ཡིས་འཇིགས་པ་སེལ་མ། །ཏུ་རེས་དོན་ཀུན་བྱེད་པའི་སྒྲོལ་མ། །སྭཱ་ཧཱ་ཡི་གེ་ཁྱོད་ལ་འདུད་དོ། །ཕྱག་འཚལ་སྒྲོལ་མ་མྱུར་མ་དཔའ་མོ། །ཞེས་སོགས་ཕྱག་འཚལ་ཉེར་གཅིག་ཚར་བདུན་གྱིས་བསྟོད། ལྷ་མོ་ལ་གུས་ཡང་དག་ལྡན་པའི། །སོགས་དེ་དག་བཅོམ་ལྡན་འདས་ཀྱི་སྒྲོལ་མ་ལ་བསྟོད་པ་སྟེ་རྒྱུད་ལས་བྱུང་བ་བྱིན་རླབས་ཁྱད་པར་དུ་འཕགས་པའོ། །དེ་ནས་བཞི་པ་འདོད་
ཡོན་རྣམ་ལྔ་འབུལ་བ་ནི། ཕྱོགས་བཅུའི་འཇིག་རྟེན་ཞིང་ཁམས་རྒྱ་མཚོ་ཡི། །རྡོ་རྗེའི་གཟུགས་མཆོག་རྒྱན་ཕྲེང་ཡིད་དུ་འོང་། །བླ་མ་བཅོམ་ལྡན་དཀྱིལ་འཁོར་ལྷ་ལ་འབུལ། །བཞེས་ནས་དངོས་གྲུབ་དམ་པ་སྩལ་དུ་གསོལ། །ༀ་སརྦ་ཏ་ཐཱ་ག་ཏ་ཨཱཪྱ་ཏཱ་རེ་ས་པ་རི་ཝཱ་ར་བཛྲ་རཱུ་པ་ཀ་མ་གུ་ཎ་བཛྲ་པཱུ་ཛི་ཏེ་ཨཱཿཧཱུྃ། ཕྱོགས་བཅུའི་འཇིག་རྟེན༴རྡོ་རྗེའི་སྒྲ་ཡི་བྱེ་བྲག་དབྱངས་སྙན་ལྡན། །བླ་མ་བཅོམ་ལྡན༴བཞེས་ནས་དངོས་གྲུབ་དམ་པ་སྩལ་དུ་གསོལ། །སྔགས་ཐོག་མཐའ་འདྲ་བར། ཤབྡ། ཕྱོགས་བཅུའི་འཇིག་རྟེན༴རྡོ་རྗེ་དྲི་ཡི་རྣམ་པ་ཀུན་ཏུ་དཀྲིགས། །བླ་མ་བཅོམ་ལྡན༴བཞེས་ནས༴གནྡྷེ། ཕྱོགས་བཅུའི་འཇིག་རྟེན༴རྡོ་རྗེ་རོ་ཡི་འདོད་ཡོན་རྣམ་པ་གང་། །བླ་མ་བཅོམ་ལྡན༴བཞེས་ནས༴རཱ་ས། ཕྱོགས་བཅུའི་འཇིག་རྟེན༴རྡོ་རྗེའི་རེག་བྱ་དབང་པོའི་གཞུ་ལྟར་བཀྲ། །བླ་མ་བཅོམ་ལྡན༴བཞེས་ནས༴སྤཪྴེ། སོགས་ཀྱང་སོ་སོའི་སྔགས་རྒྱ་བཅས་ཏེ་འབུལ་ལོ། །དེ་ནས་ལྔ་པ་ནི། མེ་ཏོག་ཐོགས་ལ། དྭངས་པའི་ཡིད་མཚོའི་གནས་ལས་ཐོན་པ་ཡི། །དད་པའི་མེ་ཏོག་པུཎྜཱ་རི་ཀ་ནི། །ལྷག་བསམ་སྙིམ་བའི་ལག་གི་འཁྲི་ཤིང་རྩེར། །གུས་པས་མཆོད་པའི་རྟེན་དུ་འབུལ་ལགས་ན། །ཐུགས་རྗེ་བྱམས་པའི་དབྱིངས་ནས་ཉེར་དགོངས་ལ། །བླ་མེད་མཆོག་གི་བྱིན་གྱིས་བརླབ་ཏུ་གསོལ། །ༀ་ན་མོ་བྷ་ག་ཝ་ཏེ་པུཥྤ་ཀེ་ཏུ་རཱ་ཛ་ཡ་ཏ་ཐཱ་ག་ཏ་ཡ། ཨརྷ་ཏེ་
སམྱཀྶཾ་བུདྡྷ་ཡ། ཏདྱ་ཐཱ། ༀ་པུཥྤེ་པུཥྤེ་མ་ཧཱ་པུཥྤེ། པུཥྤེ་ཨུཏ་བྷ་ཝེ། པུཥྤེ་སཾ་བྷ་ཝེ། པུཥྤེ་ཨ་བ་ཀི་ར་ཎི་སྭཱ་ཧཱ། ཞེས་ལན་བདུན་ནམ་ཉེར་གཅིག་གིས་མངོན་པར་བསྔགས་ནས་མེ་ཏོག་འབུལ་ན། ཇི་སྙེད་པ་དེ་སྙེད་ཀྱི་མེ་ཏོག་བྱེ་བར་ཕུལ་བའི་འགྱུར་གྱི་གཟུངས་སྔགས་བྱིན་རླབས་དང་ལྡན་པས་འབད་པས་ཟུངས་ཤིག །དེ་ནས་དྲུག་པ་ཡན་ལག་ལྔ་པའི་སྨོན་ལམ་ནི་ཐལ་མོ་མེ་ཏོག་སྙིམ་པ་སྦྱར་ནས། ཐོག་མ་མེད་ནས་ད་ལྟའི་བར། །དུག་གསུམ་དབང་གྱུར་ནོངས་པའི་ཚོགས། །འཕགས་མའི་ལྷ་ཚོགས་མཁྱེན་གཟིགས་ལྡན། །སྤྱན་སྔར་སོ་སོར་བཤགས་པར་བགྱི། །བདེར་གཤེགས་འཕགས་པ་བྱང་ཆུབ་སེམས། །ཉན་ཐོས་རང་རྒྱལ་འགྲོ་རྣམས་ཀྱི། །བསམ་གཏན་བཟླས་བརྗོད་དགེ་བའི་སྟོབས། །བདག་ནི་རྗེས་སུ་ཡི་རང་ངོ་། །ཕྱོགས་བཅུའི་ཞིང་ཁམས་བཞུགས་པ་ཡི། །སྟོན་པ་སངས་རྒྱས་སྲས་དང་བཅས། །སེམས་ཅན་ཀུན་དོན་བསྒྲུབ་པའི་ཕྱིར། །ཆོས་འཁོར་རྟག་ཏུ་བསྐོར་བར་བསྐུལ། །རྒྱལ་བ་མྱ་ངན་འདའ་བཞེད་རྣམས། །མ་གྲོལ་འཁོར་བ་ལས་སྒྲོལ་ཕྱིར། །བསྐལ་པ་ཞིང་རྡུལ་ཇི་སྙེད་པར། །འཚོ་ཞིང་གཞེས་པར་གསོལ་བ་འདེབས། །བདག་གི་དགེ་བའི་རྩ་བ་འདིས། །ཀུན་ཏུ་བཟང་པོའི་སྤྱོད་པ་སྤྱད། །བྱང་ཆུབ་མངོན་དུ་ལེགས་བྱས་ནས། །སེམས་ཅན་ཐམས་ཅད་བདེར་འགོད་ཤོག །ཅེས་བརྗོད་ཅིང་མེ་ཏོག་འཐོར། དེ་ནས་བདུན་པ་འཕགས་པ་སྤྱན་རས་གཟིགས་དབང་
ཕྱུག་གི་སྒྲོལ་མར་བསྟོད་པ་མཚན་བརྒྱ་རྩ་བརྒྱད་པ་ནི། ༀ། དགེ་བ་མ་ནི་གཟི་བརྗིད་ཅན། །འཇིག་རྟེན་གསོ་བྱེད་སྙན་པ་ཆེ། །སོགས་རྒྱུད་ནས་བྱུང་བའི་ཚིགས་སུ་བཅད་པ་དག་གིས་ཀྱང་བསྟོད་པར་བྱའོ། །དེ་ནས་བརྒྱད་པ་བཟང་པོ་སྤྱོད་པའི་སྨོན་ལམ་ཡན་ལག་བདུན་པ་འབུལ་བ་ནི། ཇི་སྙེད་སུ་དག་ཕྱོགས་བཅུའི་འཇིག་རྟེན་ན། །དུས་གསུམ་གཤེགས་པ་མི་ཡི་སེང་གེ་ཀུན། །ཞེས་སོགས། མཆོད་པའི་ཡན་ལག་སྐབས་སུ་མེ་ཏོག་འཐོར། ཐམས་ཅད་རྫོགས་པའི་བྱང་ཆུབ་ཕྱིར་བསྔོའོ། །བར་བཏོན་ནས། མཆོད་པའི་མཎྜལ་རྡུལ་ཕྱི་བ་དང་དྲིའི་ཐིག་ལེ་དགོད་པ་དང་བཅས། ༀ་བཛྲ་ས་ཏྭ་ས་མ་ཡ་སོགས་ཡི་གེ་བརྒྱ་པ་བརྗོད་ལ། མེ་ཏོག་ཚོམ་བུ་སོ་སོར་འགོད་བཞིན་པས། ༀ་བཛྲ་བྷཱུ་མི་ཨཱཿཧཱུྃ། རིན་པོ་ཆེ་གསེར་གྱི་ས་གཞིའི་ཁོར་ཡུག་བརྡལ་བའོ། །ༀ་བཛྲ་རེ་ཁེ་ཨཱཿཧཱུྃ། རྡོ་རྗེའི་རི་ཡི་མུ་ཁྱུད་ཀྱི་རྭ་བས་ཡོངས་སུ་བསྐོར་བའི་ལྟེ་བར་ཧཱུྃ་སྲུང་པའི་རང་བཞིན་འོད་ཟེར་འབར་བ། ༀ་ཧྃ་སུ་མེ་ར་ཝེ་ན་མཿདབུས་སུ་རི་ཡི་རྒྱལ་པོ་རི་དབང་ལྷུན་པོ་མཆོག་རབ། ༀ་ཡྃ་པཱུ་ཱུརུ་བི་དེ་ཧ་ཡ་ན་མཿཤར་ལུས་འཕགས་པོ། ༀ་རྃ་ཛྃ་པུ་དྭཱི་པཱ་ཡ་ན་མཿལྷོ་འཛམ་བུ་གླིང་། ༀ་ལྃ་ཨ་པ་ར་གོ་དཱ་ནཱི་ཡཱ་ཡ་ན་མཿནུབ་བ་ལང་སྤྱོད། ༀ་ཝྃ་ཨུཏྟ་ར་ཀུ་ར་ཝེ་ན་མཿབྱང་སྒྲ་མི་སྙན། ༀ་ཡྃ་ཨུ་པ་དྭཱི་པཱ་ཡ་ན་མཿༀ་ཡྃ་ཨུ་པ་དྭཱི་པ་ཡ་ན་མཿལུས་དང་ལུས་འཕགས། ༀ་རྃ་ཨུ་པ་དྭཱི་པཱ་ཡ་ན་མཿༀ་རྃ་ཨུ་པ་དྭཱི་པཱ་ཡ་ན་མཿརྔ་ཡབ་དང་རྔ་ཡབ་
གཞན། ༀ་ལྃ་ཨུ་པ་དྭཱི་པཱ་ཡ་ན་མཿༀ་ལྃ་ཨུ་པ་དྭཱི་པཱ་ཡ་ན་མཿགཡོ་ལྡན་དང་ལམ་མཆོག་འགྲོ། ༀ་ཝྃ་ཨུ་པཱ་དྭཱི་པ་ཡ་ན་མཿༀ་ཝྃ་ཨུ་པ་དྭཱི་པ་ཡ་ན་མཿསྒྲ་མི་སྙན་དང་སྒྲ་མི་སྙན་ཀྱི་ཟླ། ༀ་སུཪྱཱ་ཡཱ་ཡ་ན་མཿགསལ་བྱེད་ཤེས་རབ་ཀྱི་ཉི་མ། ༀ་ཙནྡྲ་ཡ་ན་མཿསྣང་བྱེད་ཐབས་ཀྱི་ཟླ་བ། གཞན་ཡང་སྲིད་ཞིའི་ལོངས་སྤྱོད་དཔལ་འབྱོར་ཕུན་སུམ་ཚོགས་པ་རབ་འབྱམས་མཆོད་བའི་སྤྲིན་རྒྱ་མཚོས་ཡོངས་སུ་གང་བ་འདི་ཉིད་བཅོམ་ལྡན་འདས་འཕགས་མ་སྒྲོལ་མའི་ལྷ་ཚོགས་སྲས་དང་སློབ་མར་བཅས་པ་ཕྱོགས་བཅུ་དུས་གསུམ་གྱི་དཀོན་མཆོག་རིན་པོ་ཆེ་རྣམས་ལ་འབུལ་བར་བགྱིའོ། ཐུགས་བརྩེ་བ་ཆེན་པོའི་དབྱིངས་ནས་ཉེ་བར་དགོས་ཏེ་ཞེས་སུ་གསོལ། བཞེས་ནས་བདག་གཞན་སེམས་ཅན་ཐམས་ཅད་རྒྱུ་ཚོགས་གཉིས་རྫོགས། སྒྲིབ་གཉིས་བྱང་། དངོས་གྲུབ་ཀྱི་མཆོག་དམ་པ་བསྩལ་དུ་གསོལ། ཞེས་མེ་ཏོག་འཐོར། ཞིང་ཁམས་རྣམ་པར་དག་པ་རྡོ་རྗེའི་ས་གཞི་ལ། །རྡོ་རྗེའི་རི་རབ་ལ་སོགས་རྨད་བྱུང་མཆོད་པའི་སྤྲིན། །རབ་འབྱམས་དཔག་ཡས་རྡོ་རྗེའི་རྒྱུན་གྱི་ཕྲེང་བ་ལྡན། །རྡོ་རྗེའི་མཎྜལ་བླ་ན་མེད་པའི་བཀོད་པ་འདི། །རྡོ་རྗེ་སྒྲོལ་མའི་ལྷ་ཚོགས་མ་ལུས་འཁོར་བཅས་ལ། །མཆོག་ཏུ་དད་པས་ཀུན་ཏུ་བདག་འབུལ་བྱིན་གྱིས་རློབས། །མེ་ཏོག་འཐོར་ཞིང་། ༀ་མཎྜལ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ།
ཞེས་འབུལ་ལོ། །དེ་ནས་དགུ་པ་ནི། གློག་དང་འདྲ་བའི་སྤྱན་མངའ་མ། །དཔའ་མོ་ཏཱ་རེ་ཏུཏྟཱུ་རེ། །སངས་རྒྱས་ཞལ་གྱི་པདྨ་ཡི། །གེ་སར་ལས་བྱུང་ཁྱོད་ལ་འདུད། །སྟོན་ཀའི་ཟླ་བ་རྒྱས་པ་ཡི། །དཀྱིལ་འཁོར་དང་མཚུངས་ཞལ་མངའ་མ། །མཆོག་སྦྱིན་ཕྱག་རྒྱ་ཨུཏྤ་ལ། །བསྣམས་མ་ཁྱོད་ལ་ཕྱག་འཚལ་ལོ། །འཁོར་བའི་གཟེབ་ལས་ཏུཏྟ་རེ། །སྭཱ་ཧཱས་ཉོན་མོངས་ཞི་བར་མཛད། །ༀ་གྱི་ངོ་བོ་ཉིད་ཀྱིས་ནི། །ཚངས་པའི་སྒོ་འབྱེད་ཁྱོད་ལ་འདུད། །འཇིགས་པ་ཆེན་པོ་བརྒྱད་ལས་ནི། །འཇིག་རྟེན་ཐམས་ཅད་སྐྱོབ་བར་མཛད། །ཀུན་གྱི་མ་རུ་གྱུར་པ་ཡི། །སྒྲོལ་མ་ཡུམ་ལ་ཕྱག་འཚལ་ལོ། །ཞེས་པའང་ངག་དབང་གྲགས་པས་མཛད་པ་དེ་ཡིས་བསྟོད་ལ་སྤོས་དང་རོལ་མོ་འབུལ་ལོ། །དེ་ནས་བཅུ་པ་རྗེ་དགུ་པས་མཛད་པའི་འདོད་གསོལ་ཡན་ལག་བདུན་པ་ནི། བཅོམ་ལྡན་འདས་མ་ཁྱོད་ལ་ཕྱག་འཚལ་ནས། །མཆོད་པ་རྣམ་པ་དུ་མས་རབ་མཆོད་དེ། །ཉེས་གསུམ་མཐར་བྱེད་ཁྱོད་ཀྱི་སྤྱན་སྔ་འདིར། སྡིག་པ་མཐའ་དག་བཤགས་ཤིང་བསྡོམ་པར་བགྱི། །འགྲོ་བའི་དགེ་ལེགས་ཀུན་ལ་དགའ་བསྐྱེད་དེ། །སྲིད་ཞིའི་ཀུན་ཏུ་བཅོམ་ལྡན་འདས་མ་ཁྱོད། །རབ་བདེ་བླ་མེད་ཆོས་ཀྱི་འཁོར་ལོ་མཆོག །རྟག་པར་བསྐོར་བས་མཐའ་དག་ཚིམ་པར་གསོལ། །ནམ་ཡང་ཁྱོད་ཚུལ་ནུབ་མེད་བཀའ་དྲིན་དང་། །དགེ་ཀུན་ཁྱོད་ཉིད་ཁོ་ནའི་རྒྱུར་གསོལ་ཞིང་། །
དགེ་ལེགས་སྙིང་པོའི་དཔལ་འབྲས་ཁྱོད་དང་བདག །རྣམ་པ་ཀུན་ཏུ་མི་ཕྱེད་ཉིད་གྱུར་ཅིག །ཅེས་བརྗོད་ལ་མེ་ཏོག་འཐོར། དེ་ནས་བཅུ་གཅིག་པ་རྒྱལ་སྲིད་སྣ་བདུན་སོགས་འབུལ་བ་ནི། ཛམྦུའི་གསེར་ལས་རང་བྱུང་བའི། །རྩིབས་སྟོང་མུ་ཁྱུད་རབ་མཉམ་ལྡན། །མཁའ་ལ་མངོན་པར་འཕགས་པ་ཡི། །འཁོར་ལོ་རིན་ཆེན་འབུལ་བར་བགྱི། །ༀ་ཙཀྲ་རཏྣ་པྲ་ཏཱིཙྪ་ཡེ་སྭཱ་ཧཱ། ཉིན་མོར་བྱེད་པའི་འོད་ལྡན་ཞིང་། །དགོས་འདོད་བསམ་པ་ཀུན་འབྱུང་བའི། །ལྷ་ལམ་མདངས་འཛིན་བཻ་ཌཱུཪྱ། །ནོར་བུ་རིན་ཆེན་འབུལ༴ༀ་མ་ཎི་རཏྣ༴ཤེས་རབ་རང་བཞིན་ལང་ཚོས་གང་། །སྒྱུ་འཕྲུལ་སྒེག་པའི་ཉམས་དང་ལྡན། །རེག་བྱ་མཆོག་གི་དུད་པ་ཡི། །བཙུན་མོ་རིན་ཆེན༴ༀ་སྟྲི་རཏྣ༴ཟབ་ཅིང་རྒྱ་ཆེ་གཏིང་དཔག་དཀའ། །ཕུར་བུའི་བློ་ལྡན་ཡིད་གཞུངས་པ། །ཕན་བདེའི་དཔྱིད་གྱུར་གཏོང་ཕོད་ཅན། །བློན་པོ་རིན་ཆེན༴། ༀ་པུ་རུ་ཥ༴སྟོབས་བཅུའི་རྩལ་རྫོགས་ཆུ་ཞིང་གབ། །ཐལ་དཀར་མཆེ་བ་དྲུག་ལྡན་པ། །ཀཻ་ལ་ཤ་ཡི་ཁ་དོག་ཅན། །གླང་པོ་རིན་ཆེན༴ༀ་ཧསྟི་རཏྣ༴རླུང་གི་ཤུགས་འཆང་གོམ་སྟབས་ཀྱིས། །འཁོར་ཡུག་བསྐོར་ཏེ་སླར་ལྡོག་པ། །རྨ་བྱའི་མགྲིན་འདྲའི་སྤུ་སྡུག་མཛེས། །རྟ་མཆོག་རིན་ཆེན༴ༀ་ཏུ་རངྒ་ཨ་ཤྭ་རཏྣཱ༴དཔའ་ཞིང་རྔམས་པའི་དྲེགས་པ་ཡིས། །བདུད་བཞིའི་ཕས་རྒོལ་མཐར་བྱེད་པའི། །
ཁམས་གསུམ་དབང་བསྒྱུར་སྙིང་སྟོབས་འཆང་། །དམག་དཔོན་རིན་ཆེན༴ༀ་ཁངྒ་རཏྣ༴ཞེས་དང་། དེ་ནས་བཀྲ་ཤིས་པའི་རྟགས་བརྒྱད་འབུལ་བ་ནི། ལྷ་རྫས་གདུགས་བཟང་ནོར་བུ་དྲིལ་གཡེར་འཕྱངས། །གསེར་མིག་དང་ལྡན་ཉ་མོ་འགྱུར་ཞིང་འཁྱུག །དྲི་མེད་འདབ་སྟོང་པདྨ་གེ་སར་ཅན། །གཡས་འཁྱིལ་སྐྱེ་བ་ལྔ་པ་ཆོས་སྒྲ་སྒྲོགས། །རིན་ཆེན་བུམ་པ་དཔག་བསམ་འབྱུང་གནས་གཏེར། །དཔལ་གྱི་བེའུ་དབང་པོའི་གཞུ་ལྟར་བཀྲ། །ཕྱོགས་ལས་རྣམ་གྲོལ་མི་ནུབ་རྒྱལ་མཚན་བསྒྲེང་། །ཟླུམ་འཁྱིལ་འཁོར་ལོ་རྩིབས་བརྒྱད་མུ་ཁྱུད་མཛེས། །བཀྲ་ཤིས་ལྷ་མོ་བརྒྱད་ཀྱིས་མཆོད་པ་ལྟར། །འཕགས་མའི་དཀྱིལ་འཁོར་དགྱེས་པ་བསྐྱེད་ཕྱིར་འབུལ། །ༀ་ཨཥྚ་ཧེ་ཏུ་མངྒ་ལ་པྲ་ཏཱིཙྪ་ཡེ་སྭཱ་ཧཱ། ཞེས་འབུལ་ཞིང་། དེ་ནས་བཀྲ་ཤིས་པའི་རྫས་བརྒྱད་འབུལ་བ་ནི། རྒྱལ་བ་སྐྱེད་པའི་ཡུམ་གྱུར་ལྷ་ཡི་ཚོགས། །དཀྱིལ་འཁོར་ཆེན་པོར་དོན་དམ་དེ་བཞིན་མཆོད། །ཀུན་རྫོབ་རྟེན་འབྲེལ་སྨོན་ལམ་ཁྱད་པར་གྱི། །བཀྲ་ཤིས་རྨད་བྱུང་རྫས་ཀྱི་བྱེ་བྲག་ནི། །ཡུངས་ཀར་བགེགས་འཇོམས་མཐུ་སྟོབས་ནུས་པར་ལྡན། །དུརྦས་ཚེ་འཕེལ་འཆི་མེད་རྡོ་རྗེ་འགྲུབ། །ལི་ཁྲིས་དབང་བསྒྱུར་ཆོས་ཀྱི་རྒྱལ་སྲིད་བརྟན། །གིའུ་ཝཾ་དུག་གསུམ་ནད་བཅོམ་ཉོན་མོངས་ཞི། །རྩི་བཅུད་དྭངས་མས་བཀྲ་ཤིས་ཡོན་ཏན་བསྐྱེད། །མེ་ལོང་སྒྲིབ་བྲལ་སྙིང་པོའི་དོན་
རྟོགས་ཤིང་། །བིལ་བས་དོན་འགྲུབ་བྱང་ཆུབ་འབྲས་བུ་སྨིན། །དུང་དཀར་ས་གསུམ་གྲགས་སྙན་ལྡིར་བར་བྱེད། །ཤིས་པའི་རྫས་མཆོག་འབུལ་བའི་བསོད་ནམས་ཀྱིས། ཚོགས་གཉིས་རྫོགས་ཤིང་དཔལ་དང་འབྱོར་བ་རྒྱས། །ཚེ་དབང་ཡེ་ཤེས་འགྱུར་མེད་གཞོམ་བྲལ་བརྟན། །ཡིད་ལ་འདོད་འཇོའི་དངོས་གྲུབ་ཆར་ཆེན་སྩོལ། །ༀ་ཨཥྚ་མངྒ་ལཾ་དྲ་བྱ་པྲ་ཏཱིཙྪ་ཡེ་སྭཱ་ཧཱ། ཞེས་འབུལ་ནས། དེ་ནས་བཅུ་གཉིས་པ་བཅོམ་ལྡན་འདས་ཀྱིས་གསུངས་པའི་བསྟོད་པ་ཚིགས་བཅད་བརྒྱད་པ་ནི། སེང་གེ་གླང་ཆེན་མེ་སྦྲུལ་ཆོམ་རྐུན་དང་། །ལྕགས་སྒྲོག་རྒྱ་མཚོ་ཤ་ཟའི་འཇིགས་པ་རྣམས། །ཞི་མཛད་ཟླ་བའི་འོད་ལྟར་མཛེས་པའི་སྐུ། །བཅོམ་ལྡན་སྒྲོལ་མ་ཁྱོད་ལ་ཕྱག་འཚལ་བསྟོད། །ཁྱོད་ཀྱི་ཞབས་ཀྱི་པདྨ་གཉིས་ལ་ནི། །ཡན་ལག་གཆོག་གིས་རབ་ཏུ་གཏུགས་གྱུར་ན། །མངོན་འདོད་བདེ་བའི་འབྲས་བུ་སྨིན་མཛད་མ། །བཅོམ་ལྡན་སྒྲོལ་མ་ཁྱོད་ལ༴འདབ་མ་བརྒྱད་ལྡན་ཡངས་པའི་སྙིང་པོ་ནི། །གསེར་ཞུན་ཉི་མ་འཆར་ཀའི་མདོག་འདྲ་ཞིང་། །རྡུལ་བྲལ་སྟོན་ཀའི་ཟླ་ལྟར་དྲི་མ་མེད། །བཅོམ་ལྡན་སྒྲོལ་མ་ཁྱོད་ལ༴དྲང་སྲོང་གཙོ་དང་གྲུབ་པ་ལྟོ་འཕྱེ་ཆེ། །གཤིན་རྗེ་སྲིན་པོ་གནོད་སྦྱིན་ལྷ་མིན་དང་། །ལྷ་ཚོགས་རྣམས་ཀྱི་ཞབས་ལ་ཕྱག་བྱས་པའི། །བཅོམ་ལྡན་སྒྲོལ་མ་ཁྱོད་ལ༴གླིང་དང་ནགས་ཚལ་སྟུག་པོ་རི་ཁྲོད་དང་། །ཕུག་
དང་ཆུ་ཀླུང་རི་བོའི་རྩེ་རྣམས་སུ། །དུས་རྣམས་ཀུན་ཏུ་བཞུགས་པར་གྱུར་པ་ཡི། །བཅོམ་ལྡན་སྒྲོལ་མ་ཁྱོད་ལ༴སེང་གེ་སྟག་དང་གླང་པོ་མཚོ་ཆེན་དང་། །མེ་དང་འཆིང་བ་རྐུན་པོ་སྦྲུལ་དུག་གི། །གནོད་པ་ཐམས་ཅད་རབ་ཏུ་འཇོམས་མཛད་མ། །བཅོམ་ལྡན་སྒྲོལ་མ་ཁྱོད་ལ༴ཏཱ་རེ་ཏུཏྟ་རེ་དང་ཏུ་རེ་ཡིས། །གཡུལ་གྱི་མཚོན་ཆ་བཟློག་མཛད་ཕན་པར་དགོངས། །འཇིགས་དང་རྨི་ལམ་ངན་པ་འཇོམས་མཛད་མ། །བཅོམ་ལྡན་སྒྲོལ་མ་ཁྱོད་ལ༴ཐུགས་རྗེས་ནོན་པའི་ཐབས་ཀྱིས་གང་དང་གང་། །སེམས་ཅན་གཟིགས་གྱུར་དེ་ཡི་དཔལ་འཕེལ་འགྱུར། །སྒྲོལ་མས་མི་བསླུའི་འབྲས་བུ་མྱུར་ཐོབ་མཛོད། །བཅོམ་ལྡན་སྒྲོལ་མ་ཁྱོད་ལ་ཕྱག་འཚལ་བསྟོད། །ཅེས་པས་བསྟོད་ཅིང་། ཐལ་མོ་མེ་ཏོག་གི་སྙིམ་པར་སྦྱར་ལ། རྗེ་བཙུན་བཅོམ་ལྡན་འདས་མ་ཐུགས་རྗེ་ཅན། །སོགས་ཀྱིས་འདོད་གསོལ་ཕུལ་ནས། སྐབས་སུ་མེ་ཏོག་འཐོར་བར་བྱའོ། །དེ་ལྟར་མཆོད་ཅིང་བསྟོད་པས་བཅོམ་ལྡན་འདས་མའི་ལྷ་ཚོགས་རྣམས་རབ་ཏུ་དགྱེས་ནས། སྒྲུབ་པ་པོ་དང་། གང་གི་དོན་དུ་བྱ་བ་དེ་ཡི་སྤྱི་བོར་མཆོག་སྦྱིན་པའི་ཕྱག་རྒྱས་རེག་སྟེ་དངོས་གྲུབ་ཀྱི་མཆོག་སྩོལ་བར་བསམ་མོ། །དེ་ནས་གཏོར་མ་འབུལ་བའི་རིམ་པ་ནི། དོན་བཞི་ལས་དང་པོ་བྱིན་གྱིས་བརླབས་ནས་མཆོད་པ་ནི། ༀ་བཛྲ་ཀྲོ་དྷས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ༀ་ལས་བྱུང་བའི་གཏོར་སྣོད་ཡངས་ཤིང་རྒྱ་ཆེ་བ་རིན་
པོ་ཆེ་ལས་གྲུབ་པའི་ནང་དུ་ༀ་ཨཱཿཧཱུྃ་ཞུ་བ་ལས་བྱུང་བའི་གཏོར་མ་འདོད་དགུའི་དཔལ་འབྱོར་ཅིར་ཡང་འཆར་བ་བླ་ན་མེད་པ་བདེ་བ་ཆེན་པོའི་ཡེ་ཤེས་སྐྱེད་པར་བྱེད་པའི་ཁ་དོག་དྲི་རོ་ནུས་པ་མཐའ་ཀླས་པ་རྒྱས་པར་འགེངས་པའི་རང་བཞིན་ཅན་དུ་གྱུར། ༀ་ཨཱཿཧཱུྃ། ལན་གསུམ་བརྗོད་ནས་བྱིན་གྱིས་བརླབས་ལ། ༀ་ཨཱཪྱ་ཏཱ་རེ་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་བདུན་ནམ་གསུམ་གྱིས་ཕུལ། ༀ་བཛྲ་ཨརྒྷཾ་སོགས་ཀྱིས་མཆོད། གཉིས་པ་བསྟོད་ཅིང་འབུལ་བ་ནི། ལྷ་དང་ལྷ་མིན་ཅོད་པན་གྱིས། །ཞབས་ཀྱི་པདྨོ་ལ་བཏུད་དེ། །ཕོངས་པ་ཀུན་ལས་སྒྲོལ་མཛད་མ། །སྒྲོལ་མ་ཡུམ་ལ་ཕྱག་འཚལ་བསྟོད། །གང་གི་བྱིན་རླབས་བདུད་རྩིའི་ཆར། །སྲིད་ཞིའི་ཚོགས་གཉིས་བསྐྱེད་པའི་གཉེན། །དོན་གཉིས་འབྲས་བུ་སྟེར་བ་མོ། །འཕགས་མའི་ལྷ་ཚོགས་རྣམས་ལ་བསྟོད། །བཅོམ་ལྡན་འདས་མ་འཁོར་བཅས་ཀྱི། །མཆོད་སྦྱིན་གཏོར་མ་འདི་བཞེས་ལ། །ནས། ཡིད་ལ་འདོད་པ་ཀུན་འགྲུབ་མཛོད། །བར་བརྗོད། གསུམ་པ་འདོད་དོན་གསོལ་བ་ནི། ཐལ་མོ་སྦྱར་ལ། རྗེ་བཙུན་མ་འཕགས་མ་སྒྲོལ་མའི་དཀྱིལ་འཁོར་གྱི་ལྷ་ཚོགས་རྣམས་ཀྱིས་བདག་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་བསྩལ་དུ་གསོལ། གྲུབ་པ་ཆེན་པོ་བརྒྱད་དང་། ཞི་བ་དང་། རྒྱས་པ་དང་། དབང་དང་
མངོན་སྤྱོད་ཀྱི་ཕྲིན་ལས་ལ་སོགས་པ་ཐམས་ཅད་ཐོགས་པ་མེད་པར་ལྷུན་གྱིས་གྲུབ་ནས་འགྲོ་བའི་དོན་ནུས་པར་མཛད་དུ་གསོལ། སྔོན་གྱི་ལས་དང་འཕྲལ་གྱི་རྐྱེན་ལས་བྱུང་བའི་འཇིགས་པ་ཆེན་པོ་བརྒྱད་དང་བཅུ་དྲུག་ལ་སོགས་པ་ནད་གདོན་བར་ཆད་ཉེ་བར་འཚེ་བའི་གནོད་བྱེད་ཐམས་ཅད་ཕྱིར་བཟློག་ཅིང་མེད་པར་མཛད་དུ་གསོལ། འཁོར་བ་སྡུག་བསྔལ་གྱི་རྒྱ་མཚོར་བྱིངས་པ་རྣམས་ཡང་དག་པའི་ལམ་ལ་བཀོད་པར་མཛད་དུ་གསོལ། དུས་ཀུན་ཏུ་ཡང་བདག་སོགས་སེམས་ཅན་ཐམས་ཅད་ཀྱི་མགོན་དང་དཔུང་གཉེན་སྐྱབས་དམ་པར་མཛད་ནས་ཐུགས་བརྩེ་བ་ཆེན་པོས་བྱིན་གྱིས་བརླབ་ཏུ་གསོལ། ཞེས་བརྗོད། ཁྱད་པར་འདོད་པའི་དོན་གང་ཡིན་པ་དེ་ཉིད་གསོལ་བ་རྩེ་གཅིག་ཏུ་གདབ་པོ། །བཞི་པ་ཕྱོགས་སྐྱོང་དང་གཞི་བདག་རྣམས་ལ་གཏོར་མ་བསྔོ་བ་ནི། སྔོན་འགྲོའི་སྐབས་སུ་འབྱུང་བ་ལྟར་བཏང་ནས་བགེགས་བསྐྲད་སྲུང་འཁོར་གྱི་བར་བྱ་ཞིང་། དེ་ནས་བདག་ཉིད་འཇུག་པ་དང་། གཞན་རྗེས་སུ་འཛིན་པའི་ཚུལ་གཉིས་ལས་དོན་སྐབས་ཐོབ་སོ་སོར་ཕྱེ་བ་ལས་རིམ་པ་བཅུ་ཡོད་པས། དང་པོ་ནི། ཇི་ལྟར་བལྟམས་པ་སོགས་ལས་བུམ་གྱི་ཁྲུས་དང་མཎྜལ་སོགས་ཕུལ་ལ་སྨིན་པར་བྱ་བའི་རིམ་པ་འོག་ཏུ་བཀོད་པར་ལྟར་རྫོགས་པར་བྱའོ། །གཉིས་པ་གཞན་སློབ་མ་གཞུག་པ་དང་འབྲེལ་བར་ཐོག་མར་བགེགས་དང་བར་ཆད་བསལ་བའི་དོན་དུ། སྔོན་འགྲོ་སྦྱོང་ཁྲུས་ཀྱི་རིམ་པ་སྤྲོ་ན། སློབ་མ་རྣམས་གུས་པ་དང་བཅས་དྲུང་དུ་འཁོད་ལ། སྟེགས་ཀྱི་ཁར་ཟླུམ་གཏོར་གསུམ་དང་ཆངས་བུ་
ཏིང་ལོ་གསུམ་རེ་བཅས་སྤེལ་མར་བཤམས་ལ། ཨ་ཀཱ་རོ་ལན་གསུམ་གྱིས་བྱིན་གྱིས་བརླབས། ༀ་སརྦ་བིགྷྣཾ་སོགས་ལན་གསུམ་གྱིས་གཏོར་མ་རྣམས་སློབ་མར་གཡས་བསྐོར་ལན་གསུམ་དང་སེ་གོལ་བཅས་བྱའོ། །གང་འདིར་རྡོ་རྗེའི་སློབ་མ་རྣམས་བཅོམ་ལྡན་འདས་མའི་དཀྱིལ་འཁོར་དུ་སྨིན་པར་བྱེད་པ་ལ་གནོད་ཅིང་འཚེ་བའི་གདོན་བགེགས་ཞི་བས་སྦྱང་བར་འོས་པ་རྣམས་ཚིམ་པར་གྱིས་ལ་རང་གནས་སུ་སོང་ཞིག །ཅེས་བཏང་། སླར་ཡང་ཆངས་བུ་ཏིང་ལོ་གཡོན་བསྐོར་སོགས་སྔར་བཞིན། སརྦ་བིགྷྣཱཾ་དང་རྡོ་རྗེ་གསོར་ལ། སུམྦྷ་ནི་སྤེལ་མར་ལན་གསུམ་བརྗོད་ལ། གང་འདིར་རྡོ་རྗེའི་སློབ་མ་རྣམས་བཅོམ་ལྡན་འདས་མའི་དཀྱིལ་འཁོར་དུ་སྨིན་པར་བྱེད་པ་ལ་གནོད་ཅིང་འཚེ་བའི་གདོན་བགེགས་ཞི་དྲག་ཕྱེད་མས་སྦྱང་བར་འོས་པ་རྣམས་ཚིམ་པར་གྱིས་ལ་རང་རང་གི་གནས་སུ་སོང་ཞིག །གལ་ཏེ་མི་འགྲོ་བ་དེ་དག་རྡོ་རྗེའི་མེ་ལྕེས་བརླག་པར་འགྱུར་རོ། །ཞེས་པས་བཏང་། དེ་ནས་རང་ཉིད་ཁྲོ་བོའི་ང་རྒྱལ་གྱིས་དྲིལ་སྟབས་དང་བཅས། དཀྱིལ་འཁོར་ཆེན་པོའི་ས་གཞི་ལ་གནས་པའི། །ལྷ་ལ་སོགས་པའི་བགེགས་ཚོགས་ཀུན་ཉོན་ཅིག །ང་ནི་གནས་འདིར་སློབ་མ་སྨིན་པར་བྱེད། །ཁྱོད་རྣམས་འདི་ནས་གཞན་དུ་འགྲོ་བར་གྱིས། །གལ་ཏེ་ང་ཡི་བཀའ་ལས་འདའ་བྱེད་ན། །ཡེ་ཤེས་ཅན་གྱི་རྡོ་རྗེ་འབར་བ་ཡིས། །མགོ་བོ་ཚལ་པ་བརྒྱར་ནི་འགས་འགྱུར་ཞིང་། །བགེགས་རྣམས་བརླག་པར་
འགྱུར་བར་གདོན་མི་ཟ། །ༀ་བཛྲ་ཀྲོ་དྷ་སོགས་དང་། ཧཱུྃ་བཞིའི་སྔགས་དང་རྡོ་རྗེ་གསོར་ལ་གུ་གུལ་བདུག་ཡུངས་ཀར་གྱིས་བྲབ་ལ་བགེགས་བསྐྲད། དེ་ནས་གསུམ་པ་སྡིག་པ་སྦྱང་བ་ནི། མདུན་དུ་ཏིལ་དང་། གཡས་སུ་མེ། གཡོན་དུ་ཆུ་བཞག་ལ། ཁྱེད་རང་གི་སྙིང་གར་ཀཾ་ནག་པོ་སྡིག་སྒྲིབ་ཀྱི་ངོ་བོ་ཤ་ཟའི་གཟུགས་སུ་གནས་པ་ལ། ལྟེ་བ་ནས་ཧཱུྃ་ལས་རྡོ་རྗེ་གནོད་སྦྱིན་དུ་གྱུར་པས་དེད་དེ་སྣ་བུག་གཡས་ནས་ཐོན་མདུན་གྱི་ཏིལ་ལ་ཐིམ་པས་ཁྲོ་བོའི་ཞལ་དུ་སོང་བར་མོས་ཤིགༀ་སརྦ་པཱ་པཾ་ད་ཧ་ན་བྷསྨིན་ཀུ་རུ་ཧཱུྃ་སྭཱ་ཧཱ། མཐེབ་སྲིན་གྱིས་བླངས་ནས་གྱེན་དུ་ཕྱོགས་པ་སྟེང་འོག་བརྗེ་ཞིང་གཡས་གཡོན་དུ་ལན་གསུམ་བསྐོར་ཏེ། གཡས་སུ་ཡེ་ཤེས་ཀྱི་མེར་བསྲེགས། གཡོན་དུ་རྒྱ་མཚོ་ཆེན་པོར་དོར་བས་བྱང་ཞིང་དག་པར་གྱུར་པར་བསམས་ལ་མེར་བསྲེག་ཆུར་བླུག་སྟེ་ཕྱིར་དོར་རོ། །དེ་ནས་བཞི་པ་བཀྲུ་བྱབ་བསྲུང་བའི་རིམ་པ་བསྟན་པར་བྱ་བ་ནི། དེ་ཡང་རྣམ་རྒྱལ་ཆེན་པོས་རྒྱུན་གྱི་ཁྲུས་གསོལ་བ་ལ་ཕན་ཡོན་དཔག་ཏུ་མེད་པ་ཐོབ་པར་འགྱུར་གསུངས་བཞིན་ལྷ་ཁྲུས་སོགས་མི་དགོས་ཤིང་འདི་སྐད་དུ། མདུན་གྱི་ནམ་མཁར་འཕགས་མའི་དཀྱིལ་འཁོར་ཡོངས་སུ་རྫོགས་པ་ཇི་ལྟ་བར་གསལ་བ་བཀྲ་ལམ་མེར་བཞུགས་པ་དང་། ཁྱད་པར་དུ་མཚན་གཙོ་བུམ་ལག་ཏུ་ཐོགས་ལ་མཆན་ཉིད་ཡོངས་སུ་རྫོགས་པའི་རྣམ་རྒྱལ་ཆེན་པོའི་བུམ་པ་འདི་ཕྱི་རིན་པོ་ཆེ་ལས་གྲུབ་པ། ནང་ལྷ་ཡི་འཁོར་ལོར་ཟག་མེད་ཡེ་ཤེས་ཀྱི་བདུད་རྩི་བདེ་བ་ཆེན་པོའི་ངོ་བོར་
གནས་པ་ལས་དཀར་ཞིང་བསིལ་བ་རེག་ན་བདེ་བའི་ཆུ་རྒྱུན་འབབ་པས་ཁྱེད་རང་རྣམས་ཀྱི་ཚེ་རབས་ཐོག་མེད་ནས་བསགས་པའི་སྡིག་སྒྲིབ་ནད་གདོན་ཐམས་ཅད་དུད་ཁུ་དང་སོལ་ཁུའི་རྣམ་པར་ཕྱིར་ཐོན་ནས་ལུས་ཤེལ་གོང་གཡའ་ཕྱིས་བ་ལྟར་གསལ་སྟོང་སྒྲིབ་མེད་དྭངས་ཤིང་འཚེར་བའི་རྣམ་པ་ཅན་དུ་སོང་བར་མོས་ཤིག །བརྗོད་ལ་དང་པོ་ཁ་བཤལ། ཇི་ལྟར་བལྟམས་པ་སོགས། འདི་ནི་ཁྲུས་མཆོག་སོགས་དང་། ཡི་གེ་བཅུ་པའི་མཐར། སྤྲོ་ན་སོ་སོར་སྤེལ་ཚིག་ཅན་སྤྱི་འགྲོ་ལྟ་བུ་དང་། བསྡུ་ན། ནད་གདོན་སྡིག་སྒྲིབ་བགེགས་དང་བར་ཆད་གྲིབ་དང་མི་གཙང་བ་དུས་མ་ཡིན་པའི་འཆི་བ་ཕ་རོལ་གྱི་བྱད་དང་ཕུར་ཁ་རྦོད་གཏོང་མདོར་ན་མི་མཐུན་པའི་ཕྱོགས་ངན་པ་ཐམས་ཅད་ཤིནྟིཾ་ཀུ་རུ་སྭཱ་ཧཱ། ཞེས་ལོང་སྐབས་དང་བསྟུན་ལ་བརྗོད། དེ་ནས་བྱབ་པ་ནི་བསྒྲུབ་བྱའི་གཟུགས་ཁྲུས་ཆུར་འཆར་བར་བྱས་ཤིང་། བུམ་ཆུ་ཁར་བཟུང་དུ་བཅུག་ལ། བུམ་པའི་ཁ་རྒྱན་རྩེ་གསུམ་གྱི་རྒྱས་བཟུང་ལ། རྨ་བྱའི་མདོངས་ཀྱི་དབུས་སུ་ཟླ་པའི་དཀྱིལ་འཁོར་གྱི་སྟེང་དུ་ཏཱྃ་དཀར་པོའི་མཐར་ཉེ་སྙིང་གིས་བསྐོར་བ་ལས་འོད་ཟེར་ཁ་དོག་སྣ་ཚོགས་དང་འོད་དཀར་པོའི་ཟེར་འཕྲོས་ནས་ཁྱེད་རང་གི་ནད་གདོན་སྡིག་སྒྲིབ་གྲིབ་དང་མི་གཙང་བ་མི་མཐུན་པའི་ཕྱོགས་ཐམས་ཅད་བ་མོ་ལ་ཉི་ཟེར་ཕོག་པ་ལྟར་ཁྲུས་ཆུའི་ནང་དུ་སིབ་སིབ་ཐིམ་པར་མོས་ཤིག །ཅེས་ཉེ་སྙིང་མཐར་སྤེལ་ཚིག་རྒྱས་བསྡུས་གོང་ལྟར་སྐབས་དང་
བསྟུན་ལ། ཨ་པཱ་ན་ཡེ་སྭཱ་ཧཱ་བཏགས་པ་བརྗོད་ཅིང་བྱབ་པར་བྱའོ། །མཐར་ཁ་བཤལ། དེ་ནས་སྲུང་བ་ནི། མདུན་བསྐྱེད་ཀྱི་སྐུ་ལས་འོད་དང་འོད་ཟེར་གྱི་ཚོགས་དཔག་ཏུ་མེད་པ་འཕྲོས། ཁྱེད་རང་གི་ལུས་ལ་རྡོ་རྗེ་དང་ཨུཏྤལའི་སྲུང་བའི་རང་བཞིན་གྱིས་མི་ཤིགས་པར་རྒྱས་གདབ། མི་འགྱུར་བར་བརྟན་པར་བྱ་བའི་མོས་པ་མཛོད། རྒྱལ་བ་སྲས་བཅས་བདེན་པའི་སོགས་བརྗོད་ལ། རྡོ་རྗེ་སྤྱི་མགྲིན་སྙིང་ལྟེ་གསང་བ་དཔུང་པ་གཉིས་དཔྱི་གཉིས་པུས་མོ་གཉིས་སོགས་ལ་རྒྱ་གྲམ་བཀོད་པའི་ཚུལ་དུ་བཞག་ལ། ཉེ་སྙིང་དང་གོང་ལྟར། རཀྵ་རཀྵ་བཏགས་པ་བརྗོད། དེ་ལྟར་སྔོན་དུ་འགྲོ་བ་བཀྲུ་བྱབ་སྲུང་བའི་རིམ་པ་ལ་བརྟེན་ནས། རྡོ་རྗེའི་སློབ་མ་འཁོར་དང་བཅས་པ་མི་མཐུན་པའི་ཕྱོགས་ཐམས་ཅད་ལས་ཛ་ཡ་ཛ་ཡ་སུ་ཛ་ཡ། ཞེས་བརྗོད་པར་བྱའོ། །དེ་ལྟར་ཁྲུས་བྱབ་སྲུང་གསུམ་གྱི་སྤེལ་ཚིག་བསྡུས་པ་རེ་རེ་ནས་བརྒྱ་རྩ་བརྒྱད་ཀྱི་གྲངས་ལྡན་བྱས་ནས་ཁྲུས་བརྒྱ་ཞར་ལ་འགྲུབ་པའོ། །དེ་ནས་ལྔ་པ་དབང་དངོས་ལ་འཇུག་པ་ནི། མཎྜལ་གཞུང་ལས་བྱུང་བའམ་ཅི་རིགས་པ་ཕུལ་ལ། སྔོན་ཆད་རྡོ་རྗེའི་དཀྱིལ་འཁོར་འདིར་མ་ཞུགས་པའམ། མ་རིག་པའི་སྒྲིབ་གཡོགས་མཚོན་པའི་བརྡར་རས་ཡུག་དམར་པོ་ཁ་ཚར་མ་ཉམས་པ་རེའི་གདོང་གཡོགས་འཆིང་བའི་མོས་པ་མཛོད། ༀ་ཙཀྵུ་བྷནྡྷ་སོགས་ཀྱིས་གདོང་གཡོགས་བཅིངས། དཀྱིལ་འཁོར་མཇལ་བའི་ཕྱག་རྟེན་དུ་མེ་ཏོག་གི་ཕྲེང་བ་རེ་གཏད་པར་མོས་ཤིག །ཨཱ་ཁཾ་བཱི་ར་ཧཱུྃ། མེ་ཏོག་གཏད། དེ་ནས་
ཐལ་མོ་མེ་ཏོག་དང་བཅས་ཏེ་སློབ་དཔོན་དཀྱིལ་འཁོར་གྱི་གཙོ་བོ་དང་ཐ་མི་དད་པའི་དྲུང་དུ་གསོལ་བ་འདེབས་པ་འདིའི་རྗེས་ཟློས། སངས་རྒྱས་ཀུན་གྱི་རང་བཞིན་སྐུ། །སློབ་དཔོན་ལ་ནི་བདག་སྐྱབས་མཆི། །གཙོ་བོ་ལྷ་མོར་བཅས་པ་ཡི། །ལྷ་རྣམས་ལ་ནི་ཕྱག་འཚལ་ལོ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་ནི་གཞུག་པར་འཚལ། །ལན་གསུམ་དང་། སྙིང་གར་བྱང་ཆུབ་སེམས་ཀྱི་ངོ་བོ་ཟླ་བའི་སྟེང་དུ་སྟོང་ཉིད་ཡེ་ཤེས་རྡོ་རྗེ་རྩེ་ལྔ་པ་རེ་བསྒོམ་ལ་རྗེས་ཟློས། ༀ་སརྦ་ཡོ་ག་ཙིཏྟ་ཨུ་པ་ད་ཡ་མི། ལན་གསུམ། རྡོ་རྗེ་སྙིང་གར་རེག་ལ། ༀ་སུ་ར་ཏེ་ས་མ་ཡ་སྟྭཾ་ཧོ་སིདྡྷི་བཛྲ་ཡ་ཐ་སུ་ཁཾ། དེ་ཉིད་སྙིང་པོའི་བར་དུ་བྱང་ཆུབ་ཀྱི་སེམས་རབ་ཏུ་བརྟན་པར་བྱའོ། །དེ་ནས་བདུན་རྣམ་པར་དག་པ་རྡོ་རྗེ་གུར་ལས་བྱུང་བ་འདིའི་རྗེས་ཟློས། དཀོན་མཆོག་གསུམ་ལ་བདག་སྐྱབས་མཆིག །སོགས་ལན་གསུམ་དང་། རིགས་ལྔ་སྤྱི་དང་བྱེ་བྲག་གི་སྡོམ་པ་དམ་ཚིག་རྣམས་ཇི་ལྟ་བར་བསྲུང་བའི་མོས་པས་འདིའི་རྗེས་ཟློས། མགོན་པོ་སངས་རྒྱས་རྣམས་དང་ནི། །སོགས་ལན་གསུམ་བརྗོད། དེ་ནས་དམ་ལ་བཞག་པའི་རིམ་པ་བཞི་ལས་དང་པོ་ཕན་ཡོན་གྱི་སྒོ་ནས་དམ་ལ་བཞག་པ་ནི། རྡོ་རྗེ་སྤྱི་བོར་བཞག་ལ། དུས་འདི་ཉིད་དུ་ཁྱོད་ཉིད་ནི། །སངས་རྒྱས་རིགས་སུ་ཆུད་པས་ན། །ང་ཡིས་ཡེ་ཤེས་རྡོ་རྗེ་སྦྱིན། །དེ་ཡིས་རྒྱས་པར་འགྲུབ་པར་འགྱུར། །ཉེས་དམིགས་ཀྱི་སྒོ་ནས་དམ་བཞག་ནི། རྡོ་རྗེ་སྙིང་གར་རེག་ལ། ང་ཡིས་བསྟན་པའི་
གསང་སྔགས་འདི། །དམ་ཚིག་མེད་པའི་མི་རྣམས་ལ། །གལ་ཏེ་ཁྱོད་ཀྱིས་སྨྲས་གྱུར་ན། །དེ་མ་ཐག་ཏུ་དྲལ་ཏེ་གཤེགས། །གཉིས་ཀའི་སྒོ་ནས་དམ་བཞག་མནའ་ཆུ་སྦྱིན་པ་ནི། ཙནྡན་དང་གུར་གུམ་བསྲེས་པས་བདུད་རྩི་ལྔ་དང་ལྡན་པའི་ཆུ་སྦྱིན་ལ། འདི་ནི་ཁྱོད་ཀྱི་དམ་ཚིག་ཆུ། །དམ་ཚིག་བསྲུང་ན་དངོས་གྲུབ་འབྱུང་། །ཅི་སྟེ་དམ་ལས་འགལ་གྱུར་ན། །དེ་མ་ཐག་ཏུ་དྲལ་ཏེ་གཤེགས། །སློབ་དཔོན་བཀའ་གཉན་པར་གདམས་པའི་དམ་བཞག་ནི། ཐལ་མོ་སྤྱི་བོར་བཀོད། དེང་ནས་བརྩམས་ཏེ་ང་ཡི་བཀའ། །ཁྱོད་ཀྱིས་བརྙས་པར་མི་བྱ་ཞིང་། །དམ་ཚིག་འགལ་བར་མི་བྱ་སྟེ། །དེ་ནས་དམ་ལ་གནས་པར་གྱིས། །དེས་ཡོལ་བ་ཕྱི་འཇུག་གི་རིམ་པ་རྣམས་སོང་ནས། ནང་དུ་འཇུག་པའི་ཚུལ་ལ་ཐོག་མར་ཡེ་ཤེས་དབབ་པའི་སླད་དུ་འདིའི་རྗེས་ཟློས་ཐལ་མོ་སྦྱར་ལ། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབས་ལ་བདག་ལ་ཡེ་ཤེས་སེམས་དཔའ་དབབ་པར་མཛད་དུ་གསོལ། ཞེས་ལན་གསུམ་གསོལ་བ་བཏབ་ལ། དེ་ནས་དྲུག་པ་ཡེ་ཤེས་དབབ་པའི་དོན་དུ་དམིགས་པ་གསལ་བཏབ་པ་ནི། སློབ་མ་རྣམས་སྣང་བ་མཐའ་ཡས་སུ་གསལ་བའི་རྐང་མཐིལ་དུ་ཡྃ་ལས་རླུང་དཀྱིལ་སྔོན་པོ་ཟླ་གམ་བ་དན་ཡྃ་ཡིག་གིས་མཚན་པ། གསང་བར་རྃ་ལས་མེ་དཀྱིལ་དམར་པོ་འབར་བ་དང་ཛྷིཾ་གིས་མཚན་པ། སྙིང་ཁར་ཡྃ་ལས་ས་དཀྱིལ་སེར་པོ་གྲུ་བཞི་རྒྱ་གྲམ་དང་ཧཱུྃ་གིས་མཚན་པ། མགྲིན་པར་པྃ་ལས་ཆུ་དཀྱིལ་དཀར་
པོ་ཟླུམ་པོ་བུམ་པ་དང་ཨཾ་གིས་མཚན་པ། སྤྱི་བོར་ཡྃ་ལས་རླུང་དཀྱིལ་སྔོན་པོ་བ་དན་དང་ཧྃ་མགོ་ཐུར་བསྟན་གྱིས་མཚན་པ། རླུང་གཡོས། མེ་སྦར། ས་གཡོས། ཆུ་ཁོལ་བས་ཧྃ་ལས་བདུད་རྩིའི་རྒྱུན་བབས་པས་ལུས་ཐམས་ཅད་གང་ཞིང་སྙིང་གར་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་འོད་ཟེར་དང་བཅས་པ། མཐའ་མར་དཀྱིལ་འཁོར་གྱི་གཙོ་བོའི་རྩ་སྔགས་མེ་འབར་བའི་རྣམ་པ་བཞིན་དམར་ལྷག་ལྷག་པར་བསྒོམ་ལ། ལྷ་ཚོགས་རྣམས་ཀྱི་བྱིན་གྱིས་བརླབས་པའི་མོས་པ་གྱིས་ཤིག །རོལ་མོ་བསྒྲག་ཅིང་སྤོས་འཐུལ་ལ། ༀ་ཏཱ་རེ་ཏུཏྟཱ་རེ་ཏུ་རེ་ཛྙཱ་ན་བཛྲ་ཨ་བེ་ཤ་ཡ་ཨ་བེ་ཤ་ཡ་ཨཱཿཨཱཿཞེས་མང་དུ་བརྗོད་པས་བྱིན་འབེབས་པར་བྱས་ལ། དེ་ཉིད་དབྱེར་མེད་དུ་རྒྱས་གདབ་པར་མོས་ལ། ཏིཥྛ་བཛྲ། ཞེས་རྡོ་རྗེ་སྤྱི་བོར་བཞག །དེ་ནས་ཡེ་ཤེས་ཀྱི་དཀྱིལ་འཁོར་དུ་ཞུགས་པ་ལ་སྤོ་བའི་ཚུལ་གྱིས་ཆེད་དུ་བརྗོད་པ་འདིའི་རྗེས་ཟློས། རྡོ་རྗེའི་དཀྱིལ་འཁོར་ཆེན་པོར་བདག་ཞུགས་སོ། །རྣལ་འབྱོར་དཀྱིལ་འཁོར་ཆེན་པོ་བདག་གིས་མཐོང་། །གསང་བའི་དཀྱིལ་འཁོར་ཆེན་པོར་བདག་དབང་བསྐུར། །དེ་ནས་སློབ་མ་རྣམས་གཞུག་པའི་ཕྱིར་དཀྱིལ་འཁོར་དུ་གསོལ་བ་བཏབ་པ་ནི། དེ་བཞིན་གཤེགས་པ་ཀུན་གྱི་གནས། །རྡོ་རྗེ་སེམས་དཔའི་དཀྱིལ་འཁོར་མཆོག །སྙིང་པོའི་དཀྱིལ་འཁོར་འདི་རུ་ནི། །བདག་གིས་སློབ་མ་གཞུག་པར་བགྱི། །ཞེས་བརྗོད། སྔོན་ཚེ་སྦྱོང་བའི་
རིགས་ཀྱི་ལྷ་བརྟག་པའི་ཕྱིར་དཀྱིལ་འཁོར་དུ་མེ་ཏོག་འདོར་བ་ནི། རིན་ཆེན་མེ་ཏོག་ལ་སོགས་པ། །གང་ལ་ཕོག་པའི་རིགས་ཀྱི་ལྷ། །གཙོ་བོ་རིགས་ཏེ་བསྒྲུབ་ནས་ནི། །དངོས་གྲུབ་མྱུར་ཏེ་ཐེ་ཚོམ་མེད། །པྲ་ཏཱིཙྪ་བཛྲ་ཧོ། ཞེས་ཕུལ་ལ་དེ་ཉིད་སྤྱི་བོར་བསྟིམ་པ་ནི། བཅོམ་ལྡན་འདས་མ་ཁྱོད་ཀྱིས་ནི། །འདི་ནི་རབ་ཏུ་གཟུང་བར་གྱིས། །པྲ་ཏི་གྲྀཧྣ་སྭ་ཨི་མཾ་སཏྭ་མ་ཧཱ་བ་ལ། ཞེས་མེ་ཏོག་སྤྱི་བོར་བཀོད། མ་རིག་པའི་སྒྲིབ་གཡོགས་དང་མིག་དར་ལྷན་ཅིག་བསལ་བའི་མོས་པས། རྡོ་རྗེ་སེམས་དཔའ་དེང་ཁྱོད་ཀྱི། །མིག་འབྱེད་པར་ནི་བརྩོན་པར་མཛད། །ཕྱེ་བས་ཐམས་ཅད་མཐོང་གྱུར་བ། །རྡོ་རྗེའི་མིག་ནི་བླ་ན་མེད། །ཧེ་བཛྲ་པ་ཤྱ་ཧཱུྃ། ཅེས་རྡོ་རྗེ་དང་བཅས་ཏེ་མིག་དར་བསལ། དཀྱིལ་འཁོར་ལ་བལྟ་བ་བསྐུལ་བ་ནི། དཀྱིལ་འཁོར་བཟང་པོ་འདི་ལ་ལྟོས། །ཞེས་དཀྱིལ་འཁོར་ལ་བལྟ་བ་བསྐུལ་ནས། མངོན་རྟོགས་བཞིན་ངོ་སྤྲད་ལ། ྃ ྂ ྃདེ་ལྟར་འཕགས་མའི་དཀྱིལ་འཁོར་མངོན་སུམ་མཇལ་བར་མོས་ལ། སྤྲོ་བ་བསྐྱེད་ནས་བཀའ་བསྒོ་བ་ནི། ད་ནི་དད་པ་རབ་ཏུ་སྐྱེད། །ཁྱོད་ནི་རྣལ་འབྱོར་མ་རིགས་སྐྱེས། །སྔགས་དང་ཕྱག་རྒྱས་བྱིན་གྱིས་རློབས། །དམ་ཚིག་ཐམས་ཅད་སྐྱོང་བ་དང་། །གསང་སྔགས་རྣམས་ལའང་བརྩོན་པར་གྱིས། །དེ་ནས་འཇུག་པའི་ཆོས་རྣམས་སོང་ནས་དབང་དངོས་གཞིའི་དོན་དུ་མཎྜལ་ཕུལ་ལ། དེ་ནས་བདུན་པ་དབང་རྣམས་ཡོངས་སུ་རྫོགས་པར་ཞུ་བའི་དོན་དུ་འདིའི་རྗེས་ཟློས། མི་བསྐྱོད་རྡོ་
རྗེའི་དབང་བསྐུར་བ། །འགྲོ་བ་སྐྱོབ་ཕྱིར་གཟི་བརྗིད་ཅན། །དེ་ལྟར་ཡོན་ཏན་འབྱུང་བ་སོགས། །དེ་བཞིན་བདག་ལ་དེང་སྩོལ་ཅིག །ལན་གསུམ། ཞེས་གསོལ་བ་བཏབ་པས་དཀྱིལ་འཁོར་གྱི་གཙོ་བོའི་རིན་པོ་ཆེའི་བུམ་པ་ཡེ་ཤེས་ཀྱི་བདུད་རྩིས་གང་བ་བསྣམས་ནས་དབང་བསྐུར་བ་ནི། རྣམ་རྒྱལ་བུམ་པ་ཐོགས་ལ། ཇི་ལྟར་བལྟམས་པ་སོགས་བརྗོད། ༀ་བཛྲ་སཏྭ་ཧཱུྃ། ༀ་བཛྲ་ཨ་བྷི་ཥིཉྩ་མི། སྤྱི་བོར་བཞག་ལ་བུམ་ཆུ་བཏུང་། དེ་ལྟར་ཀུན་གཞིའི་རྣམ་ཤེས་ཀྱི་དྲི་མ་བཀྲུས་ནས་མེ་ལོང་ལྟ་བུའི་ཡེ་ཤེས་རྒྱུད་ལ་སྨིན་པར་གྱུར། དེ་ནས་དཀྱིལ་འཁོར་ལྷ་ཚོགས་རྣམས་ཀྱིས་རིན་པོ་ཆེ་ལས་གྲུབ་པའི་རིགས་ལྔའི་མཚོན་བྱེད་ཅོད་པན་གྱི་དབང་བསྐུར་པ་ནི། ཅོད་པན་ཐོགས་ལ། ཕལ་པའི་གཞི་ནི་གཞོམ་པ་དང་། །ཡོན་ཏན་གཟི་བྱིན་བསྐྱེད་པའི་ཕྱིར། །ང་རྒྱལ་རིན་ཆེན་འབྱུང་ལྡན་གྱི། །ཅོད་པན་གྱིས་ནི་དབང་བསྐུར་རོ། ༀ་བཛྲ་དྷཱ་ཏྭཱི་ཤྭ་རི་ཧཱུྃ་ཨ་བྷི་ཥིཉྩ་མི། བཛྲ་ཧཱུྃ། རཏྣ་ཏྲྃ། པདྨ་ཧྲཱིཿཀརྨ་ཨཱཿཨ་བྷི་ཥིཉྩ་མི། རཏྣ་མ་ལ་ཏུ་ཥྱ་ཧོ། ཞེས་སྤྱི་བོར་བཀོན། དེ་ལྟར་ཉོན་མོངས་པའི་དྲི་མ་དག་ནས་མཉམ་པ་ཉིད་ཀྱི་ཡེ་ཤེས་རྒྱུད་ལ་སྐྱེས་པར་གྱུར། དེ་ནས་དཀྱིལ་འཁོར་ལྷ་ཚོགས་རྣམས་ཀྱི་ཡེ་ཤེས་ལྔར་མཚོན་པའི་རྡོ་རྗེའི་དབང་བསྐུར་བ་ནི། རྡོ་རྗེ་ཐོགས་ལ། སངས་རྒྱས་ཀུན་གྱི་རྡོ་རྗེའི་དབང་། །དེ་རིང་ཁྱོད་ལ་སྦྱིན་པར་བྱ། །སངས་
རྒྱས་ཀུན་ཏུ་རབ་སྒྲུབ་ཕྱིར། །རྡོ་རྗེའི་དབང་འདི་ཁྱོད་ལ་བསྐུར། །ༀ་བཛྲ་ཨ་བྷི་ཥིཉྩ་མི་ཏིཥྛ་བཛྲ་ས་མ་ཡ་སྟྭཾ། ལག་གཡས་སུ་གཏད། དེ་ལྟར་ཡིད་ཀྱི་དྲི་མ་དག་ནས་སོ་སོར་རྟོག་པའི་ཡེ་ཤེས་རྒྱུད་ལ་སྨིན་པར་གྱུར། དེང་ནས་དཀྱིལ་འཁོར་གྱི་ལྷ་ཚོགས་རྣམས་ཀྱི་སྟོང་ཉིད་ཀྱི་རང་བཞིན་དྲིལ་བུའི་དབང་བསྐུར་པ་ནི། དྲིལ་བུ་ཐོགས་ལ། སངས་རྒྱས་ཀུན་གྱི་དྲིལ་བུའི་དབང་། །དེ་རིང་ཁྱོད་ལ་བསྐུར་བར་བྱ། །སངས་རྒྱས་ཀུན་ཏུ་རབ་སྒྲུབ་ཕྱིར། །དྲིལ་བུ་འདི་ནི་ཁྱོད་ཀྱིས་ལོངས། །ༀ་བཛྲ་ཨ་དྷི་པ་ཏི་སྟྭཾ་ཨ་བྷི་ཥིཉྩ་མི། ལག་གཡོན་པར་བྱིན་ལ་བཀྲོལ། དེ་ལྟར་སྒོ་ལྔའི་རྣམ་ཤེས་ཀྱི་དྲི་མ་དག །བྱ་བ་གྲུབ་པའི་ཡེ་ཤེས་རྒྱུད་ལ་སྐྱེས་པར་གྱུར། དེ་ནས་དཀྱིལ་འཁོར་ལྷ་ཚོགས་རྣམས་ཀྱི་རྡོ་རྗེ་མིང་གི་དབང་བསྐུར་བའི་མོས་པ་མཛོད། རྡོ་དྲིལ་ཐོགས་ལ། སངས་རྒྱས་ཀུན་གྱི་མིང་གི་དབང་། །དེ་རིང་ཁྱོད་ལ་བསྐུར་བར་བྱ། །སངས་རྒྱས་ཀུན་ཏུ་རབ་སྒྲུབ་ཕྱིར། །རྡོ་རྗེའི་མིང་དབང་ཁྱོད་ཀྱིས་ལོངས། །ༀ་བཛྲ་སཏྭ་སྟྭཾ་བཛྲ་ན་མ་ཨ་བྷི་ཥེ་ཀ་ཏ་ཧཱུྃ། རྡོ་རྗེའི་གསང་མཚན་འདི་ཞེས་བྱ་བའི་དེ་བཞིན་གཤེགས་པའོ། །དེ་དག་ནི་སློབ་མའི་དབང་སྟེ། དེ་ནས་བརྒྱད་པ་སློབ་དཔོན་གྱི་དབང་ནི། ཁྱེད་རྣམས་དཔལ་རྡོ་རྗེ་སེམས་དཔར་སྒོམས་ཤིག །འདི་ནི་སངས་རྒྱས་ཐམས་ཅད་ཀྱི། །ཕྱག་ན་རྡོ་རྗེའི་ཕྱག་ན་འདུག །ཁྱོད་ཀྱིས་ཀྱང་ནི་རྟག་ཏུ་བཅང་། །ཕྱག་ན་རྡོ་
རྗེའི་བརྟུལ་ཞུགས་བརྟེན། །ༀ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ་ཏིཥྛ་བཛྲ་ཨེ་ཥ་དྷ་ར་ཡཱ་མི་ཧཱུྃ། ཧི་ཧི་ཧི་ཧི་ཧཱུྃ། རྡོ་རྗེ་ལན་གསུམ་གསོར་ནས་སྙིང་གར་བཟུང་ལ་རྡོ་རྗེའི་བརྟུལ་ཞུགས་སྦྱིན་པར་མོས་ཤིག །དེ་ནས་དགུ་པ་བཟླས་ལུང་སྦྱིན་པ་ནི། ཁྱེད་རང་གི་སྙིང་གར་ཟླ་བའི་སྟེང་དུ་ཏཱྃ་དཀར་པོ་སྔགས་ཕྲེང་དང་བཅས་པ་གསལ་ཐོབ་ལ། སློབ་དཔོན་གྱི་ཐུགས་ཀ་ནས་སྔགས་ཕྲེང་མུ་ཏིག་གི་ཕྲེང་བ་ལྟར་འཕྲོས་ནས་སློབ་མའི་ཞལ་དུ་ཞུགས་ཐུགས་ཀར་འཁོད་པར་མོས་ལ། ༀ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ལན་གསུམ་བརྗོད་དུ་གཞུག་ལ། མེ་ཏོག་འཐོར་ལ་རྗེས་ཟློས། བཅོམ་ལྡན་བདག་གིས་བཟུང་ལགས་ཀྱི། །བདག་ལ་འགོ་བར་མཛད་དུ་གསོལ། །ལན་གསུམ། དེ་ཉིད་སྤྱི་བོར་འཆིང་བར་མོས་ལ། བཅོམ་ལྡན་འདི་ལ་སྦྱིན་ལགས་ཀྱི། །འདི་ལ་ཉེ་བར་མཛད་དུ་གསོལ། །སྔགས་ཀྱི་དངོས་གྲུབ་སྩལ་དུ་གསོལ། །བརྟུལ་ཞུགས་བརྟན་པར་མཛད་དུ་གསོལ། །མེ་ཏོག་སྤྱི་བོར་བཀོད་ལ། དེ་ནས་དེ་བཞིན་གཤེགས་པ་ལྔའི་བདག་ཉིད་དུ་སངས་རྒྱས་ནས་སེམས་ཅན་གྱི་དོན་སྒྲུབ་བར་བྱེད་པའི་རྗེས་སུ་གནང་བ་ནི། རིགས་ལྔ་སོ་སོའི་ང་རྒྱལ་དང་བཅས་ཏེ་རིམ་བཞིན་ཕྱག་རྒྱས་བཅིངས་ལ། ཇི་ལྟར་འཇིག་རྟེན་མ་ལུས་པ། །སྣ་ཚོགས་ཐབས་ཀྱིས་འདུལ་བའི་ཕྱིར། །ཆོས་ཀྱི་འཁོར་ལོ་བསྐོར་བར་གྱིས། །སྲིད་པའི་མཚོ་ལས་བསྒྲལ་དུ་
གསོལ། །དེ་བཞིན་དུ། རྡོ་རྗེ༴རིན་ཆེན༴པདྨ༴རྒྱ་གྲམ༴སོགས་སྦྱར་ལ། བཅུ་པ་ནི། དེས་དཀྱིལ་འཁོར་ཆེན་པོའི་དབང་རྫོགས་པར་ཐོབ་ནས་ཕྱི་ནང་གསང་བའི་དམ་ཚིག་ཚུལ་བཞིན་འཛིན་སྙམ་པས་རྗེས་ཟློས། གཙོ་བོས་ཇི་ལྟར་སོགས་ལན་གསུམ་དང་། གཏང་རག་གི་མཎྜལ་དང་། ལུས་ལོངས་སྤྱོད་འབུལ་བ་ནི། དེང་ནས་བརྩམས་ཏེ་སོགས་ལན་གསུམ་རྗེས་ཟློས་དང་། མཐར་ཤིས་བརྗོད་དང་། དགེ་བ་བསྔོས་ནས་སློབ་མ་རྣམས་གྱེས། དེ་ནས་རྗེས་ཀྱི་ཆོ་ག་གཏང་རག་གི་མཆོད་པ་བྱ་བ་ནི། དོན་བདུན་ལས། དང་པོ་ནི་མཆོད་པ་རྣམས་ཁ་གསོ། སྔར་ལྟར་བསངས་སྦྱངས་བྱིན་གྱིས་བརླབས་ལ། འགྲོ་ཀུན་རེ་རེའང་ཞིང་རྡུལ་ལུས་སྤྲུལ་ནས། །ཡིད་འོང་རྨད་བྱུང་མཆོད་ཡོན་མར་གྱུར་ཏེ། །མཆོད་ཡོན་རྣམ་དག་མཁའ་དབྱིངས་གང་བ་ཡངས། །འཁོར་བ་ཇི་སྲིད་མཆོད་པར་འབུལ་གྱིས་བཞེས། །ༀ་ཨཱཪྱ་ཏཱ་རེ་ས་པ་རི་ཝཱ་ར་བཛྲ་ཨརྒྷཾ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། དེ་བཞིན་དུ་ཐོག་མཐའ་འདྲ་བར། ཞབས་བསིལ༴པཱདྱཾ༴མེ་ཏོག༴པུཥྤེ༴བདུག་སྤོས༴དྷཱུ་པེ༴སྣང་གསལ༴ཨ་ལོ་ཀེ༴དྲི་ཆབ༴གནྡྷེ༴ཞལ་ཟས༴ནཻ་ཝི་དྱ༴སྒྲ་སྙན༴ཤབྡ༴ཞེས་སོགས་བརྗོད་ལ་རོལ་ཆེན་བྱ། དེ་ནས་གཉིས་པ་བསྟོད་པ་ནི། ༀ་རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ། །ཕྱག་འཚལ་ཏཱ་རེ་སོགས་ཕྱག་འཚལ་ཉེར་གཅིག་གིས་བསྟོད། སྤྲོ་ན། ༀ་
འཁོར་བ་ལས་སྒྲོལ་ཏ་རེ་མ། །སོགས་ནས། མཐུན་རྐྱེན་ཕུན་སུམ་ཚོགས་པར་ཤོག །ཅེས་པའི་བར་བརྗོད། དེ་ནས་གསུམ་པ་འདོད་པའི་དོན་ལ་གསོལ་བ་བཏབ་པ་ནི། ཐལ་མོ་སྦྱར་ལ། བཅོམ་ལྡན་འདས་རྗེ་བཙུན་སྒྲོལ་མ་ཡིད་བཞིན་འཁོར་ལོ། འཕགས་མ་སྒྲོལ་མ་ཉི་ཤུ་རྩ་གཅིག་གི་དཀྱིལ་འཁོར་གྱི་འཁོར་ལོ་རྒྱལ་བ་སྲས་དང་སློབ་མར་བཅས་པ་སྤྲུལ་པའི་ཚོགས་རྣམས་བདག་ལ་དགོངས་སུ་གསོལ། ཁྱེད་རྣམས་ལ་མཁྱེན་པའི་ཡེ་ཤེས། བརྩེ་བའི་ཐུགས་རྗེ། མཛད་པའི་ཕྲིན་ལས། སྐྱོབ་པའི་ནུས་མཐུ་བསམ་གྱིས་མི་ཁྱབ་པ་མངའ་བ་ལགས་པས། སྤྱིར་ཕན་བདེའི་འབྱུང་གནས་སངས་རྒྱས་ཀྱི་བསྟན་པ་རིན་པོ་ཆེ་དར་ཞིང་རྒྱས་ལ་ཡུན་རིང་དུ་གནས་པ་དང་། བསྟན་འཛིན་གྱི་སྐྱེས་བུ་རྣམས་ཞབས་པད་བརྟན་ཞིང་རྣམ་པར་དཀར་བའི་ཕྲིན་ལས་རྒྱས་པར་མཛད་དུ་གསོལ། ཁྱད་པར་དུ་བདག་ཅག་རྣལ་འབྱོར་པ་རྒྱུ་སྦྱོར་བ་སྦྱིན་པའི་བདག་པོ་ཡོན་མཆོད་འཁོར་དང་བཅས་པ་རྣམས་ཀྱི་རྐྱེན་ཕྱི་ནང་གི་འགལ་རྐྱེན་བར་ཆད་ཐམས་ཅད་ཞི་ཞིང་། མཐུན་རྐྱེན་འདོད་པའི་དོན་ཐམས་ཅད་ཡིད་བཞིན་དུ་གྲུབ་པར་མཛད་དུ་གསོལ། མཆོག་དང་ཐུན་མོང་གི་དངོས་གྲུབ་ཐམས་ཅད་ཐོགས་མེད་བདེ་བླག་ཉིད་དུ་ཚེ་འདི་ཉིད་ལ་སྩོལ་བར་བྱིན་གྱིས་བརླབ་པར་མཛད་དུ་གསོལ། ཞེས་བརྗོད་ལ། བཞི་པ་བཟོད་གསོལ་ནི། ཡི་གེ་
བརྒྱ་བས་ལྷག་ཆད་ཁ་བསྐང་། མ་འབྱོར་པ་དང་ཉམས་པ་སོགས་ཀྱིས་བཟོད་པར་གསོལ་ནས། བདག་དང་འགྲ་ོལ་ཐུགས་བརྩེའི་ཕྱིར། སོགས་དང་། སུ་པྲ་ཏིཥྛས་བརྟན་བཞུགས་དང་། གཤེགས་གསོལ་བྱེད་ན། ༀ་ཁྱེད་ཀྱིས་སེམས་ཅན་དོན་ཀུན་མཛོད། །སོགས་ནས། བཛྲ་མུཿདམ་ཚིག་པ་རང་གི་སྙིང་གར་ཐིམ་པར་མོས། འཇིག་རྟེན་པ་རྣམས་རང་གནས་སུ་གཏང་བ་ནི། མཆོད་སྦྱིན་གནས་འདིར་སོགས་བརྗོད། དེ་ནས་ལྔ་པ་རྗེས་གཞིག་གི་རྣལ་འབྱོར་ནི། རང་གི་ཐུགས་ཀའི་ཏཱྃ་ལས་འོད་ཟེར་འཕྲོས། རྒྱུ་བ་དང་མི་རྒྱུ་བའི་སྣོད་བཅུད་ཐམས་ཅད་སྲུང་བའི་གུར་ཁང་ལ་ཐིམ། རང་ཉིད་ཀྱང་རིམ་གྱིས་ཐུགས་ཀའི་ཏཱྃ་ལ་ཐིམ། དེའང་ཐིག་ལེ་དང་ནཱ་ད་མི་དམིགས་པའི་ངང་ལས་རང་བཞིན་གྱིས་འོད་གསལ་བའོ། །ཞེས་པའི་ངང་དུ་མཉམ་པར་བཞག་ལ། སླར་རང་ཉིད་རྗེ་བཙུན་མ་ཡི་སྐུར་ལམ་གྱིས་གསལ་བའི་གནས་གསུམ་ༀ་ཨཱཿཧཱུྃ་གིས་མཚན་པར་གྱུར། སྣང་སྲིད་ཀྱི་ཆོས་ཐམས་ཅད་རང་བཞིན་མེད་པ་སྟོང་བཞིན་དུ་ཡེ་ཤེས་ལྷ་ཡི་དཀྱིལ་འཁོར་དུ་གསལ་བར་གྱུར། དྲུག་པ་བསྔོ་བ་ནི། དགེ་བ་འདི་ཡིས་མྱུར་དུ་བདག །སོགས། དགེ་བ་རྫོགས་བྱང་དུ་བསྔོ་བ་དང་། དགེ་བ་འདི་ཡིས་སྐྱེ་བོ་ཀུན། །སོགས་སྨོན་ལམ་གྱི་རྒྱས་གདབ་ལ། དེ་ནས་དཀྱིལ་འཁོར་རྗེས་བསྡུ་ནི། རྡུལ་ཚོན་ཡོད་ན། ཨ་ཀཱ་རོས་ཆོས་ཐམས་ཅད་སྐྱེ་བ་མེད་པར་ཡིད་ལ་བྱས་ཏེ་རིམ་བཞིན་བསྡུས་ཏེ་རྗེས་མི་མངོན་པར་བྱས་ལ། བདུན་པ་ཤིས་
པ་བརྗོད་པ་ནི། མེ་ཏོག་གི་ཆར་པ་སྙིལ་བཞིན་པས། རྒྱལ་བའི་དཀྱིལ་འཁོར་མཁའ་དབྱིངས་ཁྱོན་ཡངས་པོར། །གསང་གསུམ་རྒྱན་གྱི་ཡོན་ཏན་རབ་དྭངས་པའི། །མཐའ་དབུས་མེད་པའི་བཀྲ་ཤིས་གང་ཡིན་པ། །དེང་འདིར་དགེ་བའི་དཔལ་གྱིས་འཚོ་གྱུར་ཅིག །བླ་མེད་དཀོན་མཆོག་དམ་པ་ཉིན་མོའི་མགོན། །རྣམ་དག་ཐུགས་རྗེའི་རང་གཟུགས་འོད་སྟོང་གིས། །འཇིག་རྟེན་མུན་སེལ་བཀྲ་ཤིས་གང་ཡིན་པ། །དེང་འདིར་དགེ་བའི་དཔལ་གྱིས་འཚོ་གྱུར་ཅིག །ཡིད་བཞིན་འཁོར་ལོ་ནོར་བུ་ཆུ་ཤེལ་ཅན། །འགྲོ་ལ་བདུད་རྩིའི་དཔལ་སྟེར་ཡུམ་གྱུར་མ། །འཆི་མེད་མཆོག་སྦྱིན་བཀྲ་ཤིས་གང་ཡིན་པ། །དེང་འདིར་དགེ་བའི་དཔལ༴འཕགས་མ་ཉེར་གཅིག་ཕྲིན་ལས་གང་འདུལ་གྱི། །འོད་སྣང་དཀར་པོས་ཕྱོགས་བཅུར་ཁྱབ་པ་ཡི། །ཉོན་མོངས་གདུང་སེལ་བཀྲ་ཤིས་གང་ཡིན་པ། །དེང་འདིར་དགེ་བའི་དཔལ༴ལྷ་དང་བཅས་པའི་མཆོད་འོས་གཙུག་གི་རྒྱན། །བསྟན་འཛིན་དགེ་འདུན་སྐར་ཚོགས་ལྟ་བུར་རྒྱས། །ཕན་བདེའི་འབྱུང་གནས་བཀྲ་ཤིས་གང་ཡིན་པ། །དེང་འདིར་དགེ་བའི་དཔལ་གྱིས༴འཇིག་རྟེན་མེས་པོ་ཚངས་དང་བརྒྱ་བྱིན་དབང་། །སྟོབས་ཀྱི་དཔུང་ཚོགས་ལེགས་བྱས་ཆར་ཆེན་གྱི། །ཕྱོགས་ལས་རྣམ་རྒྱལ་བཀྲ་ཤིས་གང་ཡིན་པ། །དེང་འདིར་དགེ་བའི་དཔལ་གྱིས༴སྲིད་ཞིའི་ཕུན་
ཚོགས་ཡོངས་འདུའི་དཔག་བསམ་ལྗོན། །བསོད་ནམས་བྱེ་བའི་འབྲས་བུ་གཡུར་ཟ་བའི། །འདོད་དགུ་སྨིན་པའི་བཀྲ་ཤིས་གང་ཡིན་པ། །དེང་འདིར་དགེ་བའི་དཔལ་གྱིས་འཚོ་གྱུར་ཅིག །ཅེས་ཤིས་པ་བརྗོད་པ་གཞན་ཡང་ཅི་རིགས་པ་སྤེལ་བར་བྱའོ། །དེ་ལྟར་འཕགས་མ་སྒྲོལ་མའི་དཀྱིལ་འཁོར་གྱི་ཆོ་ག་འདི་ཡི་དང་པོ་སྤྱི་སྒྲུབ་ལ་བསྙེན་པ་ལེགས་པར་བྱས་ལ། དེ་ནས་ལྷ་ཉེར་གཅིག་པོ་སོ་སོའི་ལས་ཚོགས་མན་ངག་རྣམས་རྒྱ་གཞུང་ནས་ཇི་ལྟར་འབྱུང་བ་བཞིན་སྒྲུབ་པ་ལ་དབང་བ་ཡིན་ནོ། །དེ་ལྟར་ཚུལ་འདིར་མོས་པའི་བློ་ཅན་བསླབ་གསུམ་ལྡན་པ་སྟོང་ནག་པའི་སྐུ་སྐྱེ་ཕུན་ཚོགས་རབ་བརྟན་གྱི་རྣམ་པར་དག་པའི་རྒྱུད་ཀྱིས་ཉེ་བར་བསླངས་ནས་འདི་ལྟར་དགོས་ཞེས་རྟེན་འབྱུང་གི་མཎྜལ་དང་བཅས་ཏེ་བསྐུལ་བའི་ངོར། སི་ཏུ་པདྨ་ཉིན་བྱེད་དབང་པོས་བསྟན་འགྲོར་སྨན་པ་དང་བདེ་བའི་ཕྱིར་གསལ་བར་བཀོད་པའི་དགེ་བས་འགྲོ་རྣམས་འཆི་མེད་རྟག་པ་དམ་པའི་བདག་ཉིད་བཅོམ་ལྡན་འདས་མའི་གོ་འཕང་མངོན་དུ་རེག་པར་གྱུར་ཅིག །སརྦ་མངྒ་ལཾ་སུ་ཛ་ཡནྟུ། །