རྩ་གསུམ་གྱི་དྲིལ་སྒྲུབ་ཚེ་གཡང་འགུག་པའི་རིམ་པ་འདོད་དགུའི་བུམ་བཟང་།
རྩ་གསུམ་གྱི་དྲིལ་སྒྲུབ་ཚེ་གཡང་འགུག་པའི་རིམ་པ་འདོད་དགུའི་བུམ་བཟང་བཞུགས་སོ།
ན་མོ་གུ་རུ་ཧ་སྱ་བཛྲ་ཡེ། གར་དབང་རྡོ་རྗེ་འཆང་ཆེན་དཀྱིལ་འཁོར་གཙོ། །རྒྱལ་ཀུན་སྐྱེད་ཡུམ་རྡོ་རྗེ་རྣལ་འབྱོར་མ། །ཨེ་ཝཾ་གཉིས་མེད་བདེ་ཆེན་ཟུང་འཇུག་སྐུ། །དཔལ་ལྡན་བླ་མ་མཆོག་གིས་སྐྱོང་གྱུར་ཅིག །འདིར་རྣལ་འབྱོར་གྱི་དབང་ཕྱུག་ཆེན་པོ་བཞད་པ་རྡོ་རྗེ་དང་། ཡི་དམ་ལྷན་ཅིག་སྐྱེས་མ་ལ་བརྟེན་ནས་མཆོག་སྒྲུབ་པ། བཅོམ་ལྡན་འདས་མགོན་པོ་ཚེ་དཔག་མེད་དང་བཀའ་སྲུང་ལྷ་སྨན་རྒྱལ་མོ་མཆེད་ལྔ་ལ་བརྟེན་ནས་ཚེ་དཔལ་བསྐྱེད་ཅིང་རྨ་གཡང་འགུགས་པའི་རིམ་པ་ལ། དང་པོ་སྒྲུབ་པ་པོ་སྡོམ་པ་དམ་ཚིག་ལ་གནས་ཤིང་བསྟན་དང་བླ་མར་གུས་པ། བླ་མེད་ཀྱི་དཀྱིལ་འཁོར་ཞུགས་ཤིང་སྨིན་སྒྲོལ་གྱིས་རྒྱུད་བརླན་པ་དག་གིས་ཡར་ངོའམ་ཚེས་བརྒྱད་དང་། བཅུ། བཅོ་ལྔ་ལ་
སོགས་པ་དུས་ཁྱད་པར་ཅན་ལ། གྲུབ་ཐོབ་གོང་མས་བྱིན་གྱིས་བརླབས་པའི་དབེན་གནས། གངས་དང་རྫ་རི་གཡའ་སྤང་སྨན་དང་མེ་ཏོག་གི་ལྗོངས་སམ། ནགས་ཚལ་དང་ཆུ་བོའི་ངོགས་སོགས་གང་ཡང་རུང་བར་གནས་ཁང་མཛེས་པར་བརྒྱན་ལ། དཀོན་མཆོག་རྩ་གསུམ་གྱི་རྟེན་བཀྲམ་པའི་མདུན་དུ། སྟེགས་བུ་གྲུ་བཞི་པར་བ་བྱུང་ལྔ་དང་མ་ད་ནས་ཆགས་ཆགས་གདབ་ཅིང་། ཚོན་གྱི་ཆོས་འབྱུང་དམར་པོ་བསྣོལ་མ་མུ་ཁྱུད་དཀར་པོ་ཅན་གྱི་དབུས་སུ་པདྨ་འདབ་བཞི་ཕྱོགས་མདོག་ལྟེ་བར་གྲི་གུག །ཤར་དུ་རྡོ་རྗེ། ལྷོར་རིན་པོ་ཆེ། ནུབ་ཏུ་པདྨ། བྱང་དུ་རལ་གྲི་བཀོད། དེའི་ཕྱིར་ཐོད་ཕྲེང་དང་། རྡོ་ར་མེ་རིས་བསྐོར་བ་རྡུལ་ཚོན་ནམ་རས་བྲིས་གང་རུང་གི་སྟེང་། མཉྫིའི་ཁར་རིན་པོ་ཆེའི་བུམ་པ་རྒྱན་དང་ལྡན་པ་ལྔ་ཚན་ལྔའི་རྫས་དང་རྒྱུན་འབབ་ཆུས་སུམ་གཉིས་བསྐང་།
དར་དམར་གྱི་མགུལ་ཆིངས་དང་། ཁ་རྒྱན་དུང་ཆོས་གཟུངས་རྡོར་བཀོད། མཐར་མཆོད་པ་བདུན་གྱིས་བསྐོར། གཡས་སུ་དར་དམར་གྱི་སྟེང་དུ་འབྲུ་ཚོམ་ལ་ཚེ་གཏོར་བུམ་གཟུགས་རྒྱན་ལྡན། ཚེ་རིལ་དང་ཚེ་ཆང་། གཡོན་དུ་དར་དཀར་པོའི་སྟེང་། གཡུང་དྲུང་དམར་པོ་གཡོན་འཁྱིལ་ལྔ་ཚོམ་བྲིས་པའི་སྟེང་དུ་འབྲུའི་ཚོམ་བུ་བཀོད་ལ། འབྲུ་དཀར་སྣ་ཚོགས་པའི་ཕྱེ་མ་རིན་པོ་ཆེའི་རིགས་དང་སྨན་སྣ་བསྲེས་པ། བ་དཀར་ར་དཀར་སོགས་ཀྱི་འོ་མས་སྦྲུས་པའི་ལྷ་མོ་ལྔའི་གཏོར་མ་དཔེའུ་རིས་ལྟར་བཤམས་པའི་སྟེང་དུ་དར་དཀར་གྱི་གུར་ཕུབ། སྤོད་སྣ་ཚོགས་བཏབ་པའི་ཞི་རྒྱས་དབང་དྲག་གི་འབྲང་རྒྱས། དཀར་མོའི་ལག་གཡས་དང་། ལྷང་དཀར་གྱི་ཤ། དཀར་གསུམ་དང་མངར་གསུམ། ཇ་ཆང་། ཁུར་བ་དང་། ཤིང་ཏོག་སོགས་མདོར་ན་ཟས་སྣ་ཚོགས་པས་མཐར་བསྐོར་ཞིང་མདའ་རྒོད་སྒྲོ་མ་དར་སྣ་ལྔའི་ཅོད་པན་ཅན་མེ་ལོང་སོར་གདུབ་བཏགས་པའི་མགུལ་དུ། རིན་པོ་ཆེའི་ཟ་མ་ཏོག །མུ་ཏིག །གཡུ། མགྲོན་བུ། མུ་མེན་སོགས་རིན་པོ་ཆེའི་རིགས་དང་། སིནྡྷུ་ར། བཟང་དྲུག་སོགས་སྨན་སྣས་བསྐང་བ་འདོག་ཅིང་། གཞན་ཡང་བླ་རྡོ་རྟེན་རྫས་གང་འབྱོར་དང་། མཐར་ཉེར་སྤྱོད་བདུན་གྱི་མཆོད་པ་དང་། བཀྲ་ཤིས་རྫས་བརྒྱད་རྟགས་བརྒྱད་རྒྱལ་སྲིད་སྣ་བདུན་སོགས་བྲིས་འབུར་གང་རུང་། འོག་ཏུ་དགོས་པའི་གཏོར་འབུལ་རྣམས་དང་། གསེར་སྐྱེམས། ཕྱེ་མར། འབྲུ་སྣ། སྨན་སྣ། དར་སྣ་སྤོས་སྣ་སོགས་མཆོད་རྫས་རྣམ་པ་ཇི་སྙེད་རྒྱ་ཆེ་ཞིང་ཡིད་དུ་འོང་བ་གང་དག་ཚར་དུ་དངར་བར་བཤམས། སྒྲུབ་པོའི་མདུན་དུ་གཡོན་ནས་བརྩམས་ཏེ། ལག་མཆོད་
ཀྱི་ཀ་པཱ་ལ་བདུད་རྩིའི་རིལ་བུ་དང་ལྡན་པ་མྱོས་བྱེད་ཀྱིས་གཏམས་པ། ཌཱ་དྲིལ་རྣམས་བཀོད། གཞན་ཡང་རོལ་མོའི་རིགས་སོགས་ཅི་རིགས་པར་འདུ་བྱས་ལ། གཉིས་པ་ནང་མཆོད་བྱིན་གྱིས་བརླབ་པ་ནི། བདག་ཉིད་སྐད་ཅིག་རྡོ་རྗེ་རྣལ་འབྱོར་མ། །ལྷན་ཅིག་སྐྱེས་མའི་ངོ་བོར་གསལ་བར་གྱུར། །ༀ་ཨཱཿབིགྷྣཱན་གྱིས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཡྃ་རྃ་ཀྃ་རྣམས་ལས། །རླུང་མེའི་དཀྱིལ་འཁོར་ཐོད་སྒྱེད་གསུམ་གྱི་སྟེང་། །ཨ་ལས་ཀ་པཱ་ལ་ཡི་སྣོད་ཡངས་པར། །བི་མུ་མ་ར་ཤུ་ལས་བདུད་རྩི་ལྔ། །གོ་ཀུ་ད་ཧ་ན་ལས་ཤ་ལྔ་སྟེ། །སླར་ཡང་སོ་སོར་ཡི་གེས་མཚན་པའོ། །རླུང་བསྐྱོད་མེ་སྦར་བཅུད་ཁོལ་དེ་སྟེང་དུ། །འབྲུ་གསུམ་འོད་འཕྲོས་ཡེ་ཤེས་བདུད་རྩི་བཀུག །དམ་ཚིག་བདུད་རྩི་དབྱེར་མེད་ཡེ་ཤེས་ཀྱི། །བདུད་རྩིའི་རང་བཞིན་ཟག་མེད་རྒྱ་མཚོར་གྱུར། །ༀ་ཨཱཿཧཱུྃ། ལན་གསུམ་བརྗོད་པས་བྱིན་གྱིས་བརླབས། གསུམ་པ་སྔོན་གཏོར་བཏང་བ་ནི། སྔར་བཞིན་བྱིན་གྱིས་བརླབས་ལ་འབར་བའི་ཕྱག་རྒྱས། ཕེཾ་ཕེཾ་ཕེཾ། གྱིས་སྤྱན་དྲངས་ལ། པད་སྐོར་རྡོ་རྗེ་ཐལ་མོ་ཁ་ཕྱེ་བས། ༀ་བཛྲ་ཨཱ་ར་ལི་ཧོཿཛཿཧཱུྃཿབྃ་ཧོཿབཛྲ་ཌཱ་ཀི་ནི་ས་མ་ཡ་སྟྭྃཿདྲྀ་ཤྱ་ཧོཿཞེས་པ་ལན་གསུམ་མམ་བཞི་འམ་ལྔ་བརྗོད། སོ་སོའི་ཕྱག་རྒྱས། ༀ་བཛྲ་ཨརྒྷཾ་ཨཱཿཧཱུྃ་སྭཱ་ཧཱ། ༀ་བཛྲ་པཥྤེ༴དྷུ་པེ༴ཨཱ་ལོ་ཀེ༴གནྡྷེ༴ནཻ་བི་དྱ༴ཤབྡ་ཨཱཿཧཱུྃ་སྭཱ་
ཧཱ། པད་ཀོར་དང་རྡོར་ཐལ་ཁ་གྱེན་པས། ༀ་ཁ་ཁ་ཁཱ་ཧི་ཁཱ་ཧི། སརྦ་ཡཀྵ་རཀྵ་ས་བྷུ་ཏ་པྲེ་ཏ་པི་ཤ་ཙ་ཨུནྨ་ད། ཨ་པ་སྨ་ར་ཌཱ་ཀ་ཌཱ་ཀི་ནྱ་ད་ཡ། ཨི་དམྦ་ལིང་གྲྀཧྣནྟུ་ས་མ་ཡ་རཀྵནྟུ་མ་མ་སརྦ་སིད་དྷི་མྨཻ་པྲ་ཡཙྪནྟུ་ཡ་ཐེ་བཾ་ཡ་ཐེཥྚཾཿབྷཱཉྫ་ཐ་ཛི་གྷ་ཐ་པི་པ་ཐ་མ་ཏི་ཀྲ་མ་ཐ། མ་མ་སརྦ་ཀཱ་ར་ཏ་ཡ་སདྟ་སུ་ཁཾ་བི་ཤུདྡྷ་ཡེ། སཱ་ཧཱ་ཡི་ཀ་བྷ་ཝནྟུ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ལན་བཞིར་བརྗོད། རྡོ་རྗེའི་དཀྱིལ་འཁོར་གཉན་སྐྱོང་ཞལ་བཞེས་པ། །རྡོ་རྗེའི་དམ་ལྡན་ཞིང་སྐྱོང་ཆེན་པོ་བརྒྱད། །རྡོ་རྗེ་མཁའ་འགྲོ་སོ་གཉིས་འཁོར་ཚོགས་བཅས། །རྡོ་རྗེའི་རྣལ་འབྱོར་བདག་གི་མཆོད་སྦྱིན་གྱི། །དངོས་བཤམས་ཡིད་སྤྲུལ་གཏོར་མ་འདི་བཞེས་ལ། །བདག་འཁོར་བཅས་རྣམས་དཔལ་གྲགས་དབང་ཕྱུག་ཅིང་། །ཚེ་རིང་ནད་མེད་ལས་བཞིའི་དངོས་གྲུབ་སྩོལ། །སྐལ་པ་བཟང་སྤེལ་དགེ་བའི་སྟོང་གྲོགས་མཛོད། །གང་དག་དཀྱིལ་འཁོར་ལྟ་བར་མི་དབང་བའི། །ལོག་འདྲེན་བདུད་ཚོགས་མ་གནས་གཞན་དུ་དེངས། །གལ་ཏེ་བཀའ་འདས་རྡོ་རྗེ་ཁ་ཊཱྃ་གས། །ལུས་སྲོག་རྡུལ་ཕྲན་ཐལ་བར་བརླག་ཏ་རེ། །ཞེས་གཏོར་མ་ཕྱིར་ཕུལ། ༀ་སུམྦྷ་ནི་སོགས་ཧཱུྃ་བཞིའི་སྔགས་ཀྱིས་བགེགས་བསྐྲད་ལ། རྡོ་རྗེ་གསོར་ཞིང་ཡུངས་ཀར་བྲབ། གུ་གུལ་བདུག །བཞི་པ་སྲུང་འཁོར་ནི། སྟེང་འོག་ཕྱོགས་མཚམས་རྡོ་རྗེའི་གུར་བླ་བྲེ། །རྭ་བ་དྲྭ་བ་ས་གཞིའི་རྣམ་པར་གྱུར། །ཕྲ་མེན་
རྣམས་ཀྱིས་དཀྱིལ་འཁོར་སྒོ་མཚམས་བསྡོམས། །སྲུང་དང་ཟློག་པའི་ཕྲིན་ལས་མཛད་དུ་གསོལ། །ༀ་བཛྲ་རཀྵ་རཀྵ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་བསྒོམ་མོ། །ལྔ་པ་སྐྱབས་སུ་འགྲོ་བ་དང་སེམས་བསྐྱེད་པ་ནི། ན་མོ། བདག་དང་འགྲོ་བ་མ་ལུས་པའི། །དེང་ནས་བྱང་ཆུབ་སྙིང་པོའི་བར། །སངས་རྒྱས་ཆོས་དང་དགེ་འདུན་དང་། །བླ་མ་ཡི་དམ་དཀྱིལ་འཁོར་ལྷ། །ཡེ་ཤེས་ཆོས་སྐྱོང་ཌཱ་ཀི་ལ། །སྒོ་གསུམ་གུས་པས་སྐྱབས་སུ་མཆི། །སེམས་ཅན་བདེ་ལྡན་སྡུག་བསྔལ་བྲལ། །དགའ་དང་བཏང་སྙོམས་ཆེར་གནས་ཤོག །ལན་གསུམ་མམ་བདུན་བརྗོད། དྲུག་པ་མཆོད་རྫས་བྱིན་རླབས་ནི། ༀ་ཨཱཿབིགྷྣཱན་གྱིས་བསངས། སྭཱ་བྷཱ་ཝས་སྦྱངས། སྟོང་པའི་ངང་ལས་ཨ་ལས་ཀ་པཱ་ལ། །ཡངས་ཤིང་རྒྱ་ཆེན་རྣམས་ཀྱི་ནང་དུ་ཧཱུྃ། །དཔག་མེད་འོད་ཞུ་ལྷ་རྫས་ལས་གྲུབ་པའི། །རྡོ་རྗེའི་མཆོད་ཡོན་མེ་ཏོག་བདུག་སྤོས་དང་། །སྣང་གསལ་དྲི་ཆབ་ཞལ་ཟས་སྒྲ་སྙན་སོགས། །གཏོར་ཚོགས་བརྟེན་རྫས་ཕྱི་ནང་གསང་བ་ཡི། །མཆོད་སྤྲིན་ཟག་མེད་བདེ་ཆེན་སྐྱེད་བྱེད་པ། །དྭངས་ཤིང་ཐོགས་མེད་མཁའ་དབྱིངས་གང་བར་གྱུར། །ༀ་བཛྲ་ཨརྒྷཾ། པུཥྤེ། དྷཱུ་པེ། ཨཱ་ལོ་ཀེ། གནྡྷེ། ནཻ་ཝི་དྱ། ཤབྡ་ཨཱཿཧཱུྃ་སྭཱ་ཧཱ། ཞེས་བྱིན་བརླབས་ལ། བདུན་པ་ཚོགས་ཞིང་ནི། རང་ཉིད་རྣལ་འབྱོར་མར་གསལ་སྙིང་ག་ཡི། །ས་
བོན་འོད་ཀྱིས་བླ་མ་བཅོམ་ལྡན་མ། །སངས་རྒྱས་བྱང་སེམས་ཚོགས་དང་བཅས་པ་རྣམས། །མདུན་མཁར་སྤྱན་དྲངས་བཛྲ་ས་མཱ་ཛཿཐལ་མོ་སྦྱར་ལ། ཕྱག་འཚལ་བ་དང་སོགས། དཀོན་མཆོག་གསུམ་ལ་བདག་སྐྱབས་མཆི། །སོགས་བདུན་རྣམ་དག་དང་རྒྱུན་བཤགས་བྱ། ཚོགས་ཞིང་འོད་ཞུ་རང་དང་དབྱེར་མེད་གྱུར། །དེ་ནས་ཚངས་པའི་གནས་བཞི་བསྒོམ་ལ། བརྒྱད་པ་བདག་ཉིད་ལྷ་ཡི་རྣལ་འབྱོར་ལ་འཇུག་པ་ནི། ༀ་སྭ་བྷ་སོགས་དང་། སྟོང་པའི་ངང་ལས་ཁམས་གསུམ་པོ། །ཐམས་ཅད་ཆོས་འབྱུང་གཞལ་ཡས་ཁང་། །དེ་དབུས་པདྨ་རོ་ཡི་སྟེང་། །རང་སེམས་ཧྲཱིཿལས་འོད་ཟེར་འཕྲོས། །འཕགས་མཆོད་སེམས་ཅན་དོན་བྱས་འདུས། །ཡོངས་གྱུར་བདག་ཉིད་རྣལ་འབྱོར་མ། །ཆོས་སྐུ་ཉག་གཅིག་ཞལ་གཅིག་མ། །ཐབས་ཤེས་ཟུང་འཇུག་ཕྱག་གཉིས་མ། །བདུད་དཔུང་འཇིགས་བྱེད་ཁྲོ་གཉེར་ཅན། །མཆེ་གཙིགས་ཚེམས་ཀྱིས་མ་མཆུ་མནན། །དམར་ལ་གཡོ་ཟླུམ་སྤྱན་གསུམ་འབར། དབུ་སྐྲ་ཁམ་ནག་འབར་ཞིང་གྲོལ། །ཐོད་སྐམ་ལྔ་ཡི་དབུ་རྒྱན་ཅན། །འདུ་བྱེད་དག་པའི་རང་བཞིན་གྱིས། །ཐོད་རློན་ལྔ་བཅུའི་དོ་ཤལ་འཕྱང་། མེ་ཏོག་དྲིལ་བུ་གཡེར་ཁས་བརྒྱན། །ཕྱིན་དྲུག་རུས་རྒྱན་ཕྱག་རྒྱ་ལྔ། །རྡོ་རྗེ་གྲི་གུག་ཐོད་ཁྲག་བསྣམས། །རུས་པའི་ཁ་ཊྭཱྃ་གྲུ་མོར་བརྟེན། །གཡོན་
བརྐྱང་གར་གྱི་རྣམ་པར་རོལ། །སྟོང་གསུམ་ཁྱབ་ཅིང་འོད་འབར་བའོ། །དེ་ཡི་སྤྱི་བོ་བགྲིན་པ་དང་། །སྙིང་ག་ལྟེ་བ་གསང་གནས་སུ། །སེང་གེ་རྨ་བྱ་གླང་ཆེན་དང་། །རྟ་མཆོག་ཤང་ཤང་གིས་བཏེགས་ཁྲིར། །སྣ་ཚོགས་རིན་ཆེན་ལས་གྲུབ་སྟེང་། །པདྨ་སྟོང་ལྡན་ཟླ་དཀྱིལ་དབུས། །ༀ་ཧཱུྃ་ཏྲཱྃ་ཧྲཱིཿཨཱཿརྣམས་ལས། །བཅོམ་ལྡན་རིགས་ལྔ་ཚེ་དཔག་མེད། །སྐུ་མདོག་དཀར་དམར་མཐིང་སེར་ལྗང་། །ཞལ་གཅིག་ཕྱག་གཉིས་ཚེ་བུམ་འཛིན། །པདྨའི་དབུ་རྒྱན་སྙན་རྒྱན་དང་། །མགུལ་རྒྱན་ཕྱག་ཞབས་གདུབ་བུས་མཛེས། །ལེ་རྒན་དར་གྱི་སྟོད་གཡོགས་དང་། །སྨད་གཡོགས་ཞབས་གཉིས་རྡོར་སྐྱིལ་བཞུགས། །འོད་དང་འོད་ཟེར་འབར་བ་རུ། །སྣང་སྟོང་ཆུ་ུཟླ་ལྟ་བུར་གསལ། །རང་གི་སྤྱི་བོར་པདྨ་དཀར། །དྲི་མེད་འདབ་བརྒྱའི་གེ་སར་དབུས། །ཐབས་ཤེས་ཉི་ཟླའི་དཀྱིལ་འཁོར་སྟེང་། །རྩ་བརྒྱུད་བླ་མ་ཀུན་འདུས་པ། །རྗེ་བཙུན་བཞད་པ་རྡོ་རྗེ་ནི། །ཞི་འཛུམ་ཕྱག་གཡས་སྙན་ལ་བརྟེན། །གཡོན་པས་བ་མེན་རྭ་ཡི་སྣོད། བདུད་རྩིས་གཏམས་པ་ཐུགས་ཀར་བསྣམས། །ལྕང་ལོ་ཕོད་ཁ་ལིང་ངེ་བ། །སྐུ་ལ་རས་དཀར་བླ་གོས་གསོལ། །ཞབས་གཉིས་རོལ་པའི་སྟབས་ཀྱིས་བཞུགས། །དེ་ཡི་སྤྱི་བོར་འཇའ་འོད་ཀློང་། །རྨ་བྱ་བརྒྱད་སྟེགས་རིན་ཆེན་
ཁྲིར། །ཆགས་མེད་པདྨ་ཟླ་བའི་སྟེང་། །དེ་བཞིན་གཤེགས་པ་སྣང་མཐའ་ཡས། །དམར་གསལ་མཉམ་བཞག་ལྷུང་བཟེད་བསྣམས། །སྤྲུལ་སྐུའི་ཆ་ལུགས་མཚན་དཔེ་རྫོགས། །བཀའ་བརྒྱུད་བླ་མ་ཡི་དམ་ལྷ། །ཌཱ་ཀི་ཆོས་སྐྱོང་སྤྲིན་ལྟར་གཏིབས། །དེ་ལྟར་བསྐྱེད་པའི་ལུགས་དཀྱིལ་གྱི། །གནས་གསུམ་འབྲུ་གསུམ་ས་བོན་ལས། །འོད་འཕྲོས་ནུབ་ཕྱོགས་ཨོ་རྒྱན་དང་། །བདེ་ཆེན་པདྨོ་བཀོད་པའི་ཞིང་། །རང་བཞིན་རྣམ་དག་དཀྱིལ་འཁོར་ནས། །བསྒོམ་པ་དང་འདྲའི་ཡེ་ཤེས་པ། །སངས་རྒྱས་བྱང་སེམས་དཔའ་བོ་དང་། །རྣལ་འབྱོར་མ་ཡི་འཁོར་ཚོགས་བཅས། །དཔག་ཏུ་མེད་པ་སྤྱན་དྲངས་གྱུར། །གུ་རུ་དྷེ་ཝ་ཌཱ་ཀི་ནི་བཛྲ་ས་མ་ཛཿཞེས་སྤྱན་དྲངས། དེ་རྣམས་སྐུ་ལས་སྐུ་མང་འཕྲོས། །ལུས་ཐིམ་བདེ་དང་དྲོད་ནུས་བསྐྱེད། །གསུང་ལ་ཨཱ་ལི་ཀཱ་ལི་འཕྲོས། །ངག་ཐིམ་མཐུ་དང་ནུས་པ་བསྐྱེད། །ཐུགས་ལས་བྱང་སེམས་ཆུ་རྒྱུན་བབས། །ཡིད་ཐིམ་བདེ་སྟོང་ཏིང་འཛིན་བསྐྱེད། །ལྷ་རྣམས་རང་རང་སོ་སོར་ཐིམ། །གཉིས་མེད་རིགས་བདག་དབུ་བརྒྱན་པའོ། །ཞེས་དམ་ཚིག་པར་ཡེ་ཤེས་གཉིས་མེད་དུ་བསྟིམ་ནས། དགུ་པ་བཟླས་པའི་རིམ་པ་ནི། གསང་བར་ཆོས་འབྱུང་པདྨ་འདབ་བཞིའི་དབུས། །ཧྲཱིཿདང་འདབ་བཞིར་ཧ་རི་ནི་ས་སྟེ། །ཧྲཱིཿལས་
སྔགས་ཕྲེང་གཡོན་དུ་བསྐོར་བ་ལ། །དོན་ཀུན་འགྲུབ་བྱེད་འཁོར་ལོ་འོད་འབར་བའོ། །ༀ་བཛྲ་བཻ་རོ་ཙ་ནཱི་ཡེ་ཧ་རི་ནི་ས་ཧཱུྃ་ཧཱུྃ་ཕཊ་སྭཱ་ཧཱ། ཞེས་གང་ནུས་བཟླ་ཞིང་། སྤྱི་བོའི་རྗེ་བཙུན་རིན་པོ་ཆེར་གསོལ་བ་གདབ་པ་ནི། རྒྱལ་དབང་བརྒྱད་པས་མཛད་པའི། བྱང་ཕྱོགས་མུན་པའི་སྨག་རུམ་ན། །གངས་ལ་ཉི་མ་ཤར་འདྲ་བའི། །ཐོས་པ་དགའ་ཞེས་བྱ་བ་ཡི། །སྐྱེས་བུ་དེ་ལ་གུས་ཕྱག་འཚལ། །བྱངཕྱོགས་རྒྱུད་དུ་སྐུ་འཁྲུངས་ཤིང་། །འཇིག་རྟེན་སྐྱོན་གྱིས་མ་གོས་པར། །དཀའ་བ་སྤྱད་པའི་ངོ་མཚར་ཅན། །མི་ལ་མཆོག་ལ་གསོལ་བ་འདེབས། །བདེ་ཆེན་བརྗོད་མེད་རོ་ཡིས་མྱོས། །སྲིད་གསུམ་དག་པའི་ཕྱག་རྒྱས་བཅིངས། །བསྲེག་བཞུའི་ལམ་ནས་ལྷན་ཅིག་སྐྱེས། །མི་ལ་མཆོག་ལ༴རགས་སྣང་ཕྲ་ཐིག་ཟབ་མོར་བསྟེན། །ཕྲ་མྱོང་བདག་བྱིན་བརླབས་པར་མཛད། །གསང་བའི་དཀྱིལ་འཁོར་རིགས་ཀྱི་བདག །མི་ལ་མཆོག་ལ༴འཛག་མེད་གཙོ་མོར་ས་བོན་བཀྲོལ། །སྲིད་བདག་ལམ་དུ་སྙིང་རྗེས་ལེན། །ནུས་པ་དྲག་པོའི་སྐུར་བཞེངས་པ། །མི་ལ་མཆོག་ལ༴བདག་ཀྱང་འཁོར་བ་མི་སྤང་ཞིང་། །མྱང་འདས་ཞི་བར་མི་འཇུག་སྟེ། །མཁའ་སྤྱོད་དབང་ཕྱུག་མི་ལ་ཡི། །མཆོག་གི་དངོས་གྲུབ་འགྲུབ་གྱུར་ཅིག །སོགས་མཐར་ཆགས་སུ་བརྗོད། ༀ་ཨཱཿགུ་རུ་ཧ་སྱ་བཛྲ་ཧཱུྃ། ཞེས་མཚན་སྔགས་བཟླས་ལ་གདུང་ཤུགས་ཀྱིས་གསོལ་བ་འདེབས་པ་རྗེ་སྒམ་པོ་པས་མཛད་པ་ནི། བླ་མ་རྗེ་བཙུན་རིན་པོ་ཆེ། བདག་གི་ལས་དང་ཉོན་མོངས་
པའི་སྒྲིབ་པ་དང་། ཤེས་བྱའི་སྒྲིབ་པ་དང་། བག་ཆགས་ཀྱི་སྒྲིབ་པ་ཐམས་ཅད་ད་ལྟ་ཉིད་དུ་དག་པར་བྱིན་གྱིས་བརླབ་ཏུ་གསོལ། འདུག་ས་འདི་ཉིད་དུ་དག་པར་བྱིན་གྱིས་བརླབ་ཏུ་གསོལ། ཐུན་འདི་ཉིད་དུ་དག་པར་བྱིན་གྱིས་བརླབ༴བླ་མ་རྗེ་བཙུན་རིན་པོ་ཆེ། བདག་གི་རྒྱུད་འདི་དག་པར་བྱིན་གྱིས་བརླབ་ཏུ་གསོལ། རྒྱུད་འདི་རྣམ་པར་གྲོལ་བར་བྱིན་གྱིས་བརླབ་ཏུ༴ད་ལྟ་ཉིད་དུ་གྲོལ་བར་བྱིན༴འདུག་ས་འདི་ཉིད་དུ་གྲོལ་བར་བྱིན་གྱིས༴ཐུན་འདི་ཉིད་དུ་གྲོལ་བར་བྱིན་གྱིས༴བླ་མ་རྗེ་བཙུན་རིན་པོ་ཆེ། བདག་གི་རྒྱུད་ལ་ཏིང་ངེ་འཛིན་ཕྱིན་ཅི་མ་ལོག་པ་མཆོག་ཏུ་གྱུར་པ་སྐྱེ་བར་བྱིན་གྱིས་བརླབ་ཏུ་གསོལ། ད་ལྟ་ཉིད་དུ་སྐྱེ་བར་བྱིན་གྱིས་བརླབ་ཏུ་གསོལ། འདུག་ས་འདི་ཉིད་དུ་སྐྱེ་བར་བྱིན་གྱིས༴ཐུན་འདི་ཉིད་དུ་སྐྱེ་བར་བྱིན་གྱིས་བརླབ༴བླ་མ་རྗེ་བཙུན་རིན་པོ་ཆེ། བདག་གི་རྒྱུད་ལ་ཕྱག་རྒྱ་ཆེན་པོའི་ཡེ་ཤེས་ཕྱིན་ཅི་མ་ལོག་པ་མཆོག་ཏུ་གྱུར་པ་སྐྱེ་བར་བྱིན༴ད་ལྟ་ཉིད་དུ་སྐྱེ་བར་བྱིན་གྱིས༴འདུག་ས་འདི་ཉིད་དུ་སྐྱེ་བར་བྱིན་གྱིས་བརླབ་ཏུ་གསོལ། ཐུན་འདི་ཉིད་དུ་སྐྱེ་བར་བྱིན་གྱིས་བརླབ་ཏུ་གསོལ། ཅེས་ལན་གསུམ། དེ་ལྟར་གསོལ་བ་བཏབ་པས་སྐུ་ལས་བདུད་རྩིའི་རྒྱུན་བབས་ཏེ་རང་གི་གནས་བཞི་གང་། དབང་བཞི་ཐོབ། སྒྲིབ་བཞི་དག་ནས་སྐུ་བཞིའི་ས་བོན་རྒྱུད་ལ་བཞག་པར་གྱུར། ཡང་འོད་དཔག་མེད་ལ་ཡིད་རྩེ་
གཅིག་ཏུ་གུས་པའི་བློས་སྔགས་ཀྱིས་གསོལ་བ་བཏབ་པ་ནི། ༀ་བཛྲ་ཨཱ་ཡུ་ཥེ་ས་ར་ཧ། ཀ་ར་རེ། ཤ་ར་རེ་ཧཱུྃ་ཕཊ། ལན་བདུན་ནམ་ཉེར་གཅིག་སྐབས་དང་བསྟུན་པར་བརྗོད་ལ། རྗེ་ཀརྨ་ཆགས་མེད་པས་མཛད་པའི་བཟླས་དམིགས་འདི་བཞིན་འདོན་སྒོམ་སྦྲགས། སྤྱི་བོའི་འོད་དཔག་མེད་ལས་འོད་ཟེར་འཕྲོས། །སྣང་སྲིད་འཁོར་འདས་ཚེ་དང་བསོད་ནམས་ཀུན། །འོད་ཀྱིས་བསྡུས་ནས་ལྷུང་བཟེད་ནང་དུ་ཐིམ། །ལྷུང་བཟེད་ནང་ནས་ཚེ་ཡི་བདུད་རྩི་འཕྱུར། །མི་ལའི་ཚངས་བུག་ནས་ཞུགས་རང་ལུས་གང་། །རང་གི་གནས་ལྔའི་ཚེ་དཔག་རིགས་ལྔ་ལས། །རང་མདོག་འོད་འཕྲོས་རིགས་ལྔའི་རིགས་གྱུར་པའི། །ཚེ་ཡི་དངོས་གྲུབ་བསྡུས་ཏེ་རང་ལ་ཐིམ། །འཆི་མེད་ཚེ་ཡི་རིག་འཛིན་ཐོབ་པར་གྱུར། །ༀ་ཨ་མཱ་ར་ནི་ཛཱི་ཝནྟི་ཡེ་སྭཱ་ཧཱ། གང་འགྲུབ་དང་། ༀ་ན་མོ་བྷ་ག་ཝ་ཏེ་ཨ་པ་རི་མི་ཏ་ཨཱ་ཨུརྫྙ་ན་སུ་བི་ནིཥྩི་ཏ་ཏེ་ཛྭ་ར་ཛ་ཡ། ཏ་ཐཱ་ག་ཏཱ་ཡཱརྷ་ཏེ་སམྱཀྶཾ་བུདྡྷཱ་ཡ། ཏདྱ་ཐཱ། ༀ་པུཎྱེ་པུཎྱེ་མ་ཧཱ་པུཎྱེ་ཨ་པ་རི་མི་ཏ་པུཎྱེ་ཨ་པ་རི་མི་ཏ་པུཎྱེ་ཛྙཱ་ན་སཾ་བྷཱ་རོ་པ་ཙི་ཏེ། ༀ་སརྦ་སཾ་ཀཱ་ར་པ་རི་ཤུདྡྷེ་དྷརྨ་ཏེ་ག་ག་ན་ས་མུད་ག་ཏེ་སྭ་བྷཱ་ཝ་བི་ཤུདྡྷེ་མ་ཧཱ་ན་ཡ་པ་རི་ཝཱ་རེ་སྭཱ་ཧཱ། ཚེ་གཟུངས་ཀྱང་བཟླའོ། །མཐར། སྦྱིན་པའི་སྟོབས་ཀྱིས་སངས་རྒྱས་ཡང་དག་འཕགས། །མི་ཡི་སེང་གེ་སྦྱིན་པའི་སྟོབས་རྟོགས་ཏེ། །སྙིང་རྗེ་ཅན་གྱི་གྲོང་ཁྱེར་
འཇུག་པ་ན། །སྦྱིན་པ་མཐར་ཕྱིན་ཚེ་ཡང་འཕེལ་བར་ཤོག །ཚུལ་ཁྲིམས་སྟོབས་ཀྱིས་སངས་རྒྱས་ཡང་དག་འཕགས། །མི་ཡི་སེང་གེ་ཚུལ་ཁྲིམས་སྟོབས་རྟོགས་ཏེ། །སྙིང་རྗེ་ཅན་གྱི་གྲོང་ཁྱེར་འཇུག་པ་ན། །ཚུལ་ཁྲིམས་མཐར་ཕྱིན་ཚེ་ཡང་འཕེལ་བར་ཤོག །བཟོད་པའི་སྟོབས་ཀྱིས་སངས་རྒྱས་ཡང་དག་འཕགས། །མི་ཡི་སེང་གེ་བཟོད་པའི་སྟོབས་རྟོགས་ཏེ། །སྙིང་རྗེ་ཅན་གྱི་གྲོང་ཁྱེར་འཇུག་པ་ན། །བཟོད་པ་མཐར་ཕྱིན་ཚེ་ཡང་འཕེལ་བར་ཤོག །བརྩོན་འགྲུས་སྟོབས་ཀྱིས་སངས་རྒྱས་ཡང་དག་འཕགས། །མི་ཡི་སེང་གེ་བརྩོན་འགྲུས་སྟོབས་རྟོགས་ཏེ། །སྙིང་རྗེ་ཅན་གྱི་གྲོང་ཁྱེར་འཇུག་པ་ན། །བརྩོན་འགྲུས་མཐར་ཕྱིན་ཚེ་ཡང་འཕེལ་བར་ཤོག །བསམ་གཏན་སྟོབས་ཀྱིས་སངས་རྒྱས་ཡང་དག་འཕགས། །མི་ཡི་སེང་གེ་བསམ་གཏན་སྟོབས་རྟོགས་ཏེ། །སྙིང་རྗེ་ཅན་གྱི་གྲོང་ཁྱེར་འཇུག་པ་ན། །བསམ་གཏན་མཐར་ཕྱིན་ཚེ་ཡང་འཕེལ་བར་ཤོག །ཤེས་རབ་སྟོབས་ཀྱིས་སངས་རྒྱས་ཡང་དག་འཕགས། །མི་ཡི་སེང་གེ་ཤེས་རབ་སྟོབས་རྟོགས་ཏེ། །སྙིང་རྗེ་ཅན་གྱི་གྲོང་ཁྱེར་འཇུག་པ་ན། །ཤེས་རབ་མཐར་ཕྱིན་ཚེ་ཡང་འཕེལ་བར་ཤོག །སོགས་བརྗོད་པར་བྱའོ། །བཅུ་པ་མདུན་བསྐྱེད་ཡི་དམ་བསྒྲུབ་པ་ནི། བིགྷྣཱན་གྱིས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་མདུན་གྱི་མཁར། །ཨེ་ལས་
ཆོས་འབྱུང་གཞལ་ཡས་ཁང་། །དེ་དབུས་པདྨ་རོ་ཡི་སྟེང་། །ཡི་གེ་ཧྲཱིཿལས་འོད་ཟེར་འཕྲོས། །འཕགས་མཆོད་སེམས་ཅན་དོན་བྱས་འདུས། །ཡོངས་གྱུར་རྡོ་རྗེ་རྣལ་འབྱོར་མ། །ཆོས་སྐུ་ཉག་གཅིག་ཞལ་གཅིག་མ། །ཐབས་ཤེས་ཟུང་འཇུག་ཕྱག་གཉིས་མ། །བདུད་དཔུང་འཇིགས་བྱེད་ཁྲོ་གཉེར་ཅན། །མཆེ་གཙིགས་ཚེམས་ཀྱིས་མ་མཆུ་མནན། །དམར་ལ་གཡོ་ཟླུམ་སྤྱན་གསུམ་འབར། །དབུ་སྐྲ་ཁམ་ནག་འབར་ཞིང་གྲོལ། །ཐོད་སྐམ་ལྔ་ཡི་དབུ་རྒྱན་ཅན། །འདུ་བྱེད་དག་པའི་རང་བཞིན་གྱི། །ཐོད་རློན་ལྔ་བཅུའི་དོ་ཤལ་འཕྱངས། །མེ་ཏོག་དྲིལ་བུ་གཡེར་ཁས་བརྒྱན། །ཕྱིན་དྲུག་རུས་རྒྱན་ཕྱག་རྒྱ་ལྔ། །རྡོ་རྗེ་གྲི་གུག་ཐོད་ཁྲག་བསྣམས། །རུས་པའི་ཁ་ཊྭཱཾ་གྲུ་མོར་བརྟེན། །གཡོན་བརྐྱང་གར་གྱི་རྣམ་པར་རོལ། །སྟོང་གསུམ་ཁྱབ་ཅིང་འོད་འབར་བའོ། །ཕྱོགས་བཞིར་ཧ་རི་ནི་ས་ལས། །ཤར་དུ་རྡོ་རྗེ་མཁའ་འགྲོ་སྔོ། །ལྷོ་རུ་རིན་ཆེན་མཁའ་འགྲོ་སེར། །ནུབ་ཏུ་པདྨ་མཁའ་འགྲོ་དམར། །བྱང་དུ་ལས་ཀྱི་མཁའ་འགྲོ་ལྗང་། །རྡོ་རྗེ་རིན་ཆེན་པདྨ་དང་། །རལ་གྲིས་མཚན་པའི་གྲི་ཐོད་འཛིན། །ཁ་ཊྭཱཾ་མཆན་བཅུག་རྒྱན་ཆ་ལུགས། །ཡོངས་སུ་རྫོགས་པ་གསལ་བར་གྱུར། །གཙོ་མོའི་གསང་གནས་ཆོས་འབྱུང་དབུས། །ཧྲཱིཿདང་མཁའ་འགྲོ་བཞིའི་ཐུགས་ཀའི། །ས་བོན་རྣམས་ལས་འོད་འཕྲོས་པས། །ཨོ་རྒྱན་གནས་ནས་བཅོམ་ལྡན་མ། །རིགས་བཞི་མཁའ་འགྲོ་འཁོར་དང་བཅས། །བླ་མ་ཡི་དམ་སངས་རྒྱས་དང་། །དཔའ་
བོ་རྣལ་འབྱོར་མ་ཡི་ཚོགས། །མདུན་གྱི་ནམ་མཁར་སྤྱན་དྲངས་གྱུར། །བཛྲ་ས་མཱ་ཛཿༀ་བཛྲ་བཻ་རོ་ཙ་ནི་ཡེ་ཨརྒྷཾ། པུཥྤེ། དྡྷཱུ་པེ། ཨཱ་ལོ་ཀེ། གནྡྷེ། ནཻ་ཝི་དྱ། ཤབྡ་པྲ་ཏིཙྪ་སྭཱ་ཧཱ། པཉྩ་ཨ་མྲྀ་ཏ་ཨཱཿཧཱུྃ། བཛྲ་མ་ཏངྒི་ཨཱཿཧཱུྃ། ཞེས་བརྗོད། ཧཱུྃ་ཆོས་ཉིད་རྣམ་པར་དག་པའི་ངང་། །སྐྱེ་བ་མེད་པ་སྤྲུལ་པའི་སྐུ། །སྙིང་རྗེའི་དབང་གིས་བྱུང་བ་ཡི། །བཅོམ་ལྡན་རྡོ་རྗེ་རྣལ་འབྱོར་མ། །ཞལ་གཅིག་ཕྱག་གཉིས་སྐུ་མདོག་དམར། །མཚལ་དང་སིནྡྷུ་ར་ལྟར་མཛེས། །གཡས་པས་གྲི་གུག་གཡོན་ཐོད་ཁྲག །ཐབས་ཀྱི་རང་བཞིན་ཁ་ཊྭཱཾ་གཡོན། །ཤེས་རབ་ལྔ་དང་ཡེ་ཤེས་ལྔས། །རབ་བརྒྱན་སྐུ་གསུམ་ཚུལ་དུ་བཞུགས། །སྐུ་གསུང་ཐུགས་ཀྱི་རྡོ་རྗེར་ལྡན། །བཅུ་དྲུག་ལོ་ལོན་གཞོན་ཅིང་སྒེག །འབར་བ་ཡི་ནི་གར་དགུར་ལྡན། །སྤྱན་གསུམ་པོ་ལ་མཆེ་བ་བཞི། །ཅུང་ཟད་གཙིགས་ཤིང་ཁྲོ་མོའི་ཞལ། །གཅེར་བུ་དབུ་སྐྲ་གྲོལ་ཞིང་གནག །དབུ་ལ་ཐོད་སྐམ་ལྔ་ཡིས་བརྒྱན། །ཐོད་རློན་གྱི་ནི་དོ་ཤལ་བྱས། །རུས་པ་དང་ནི་རིན་པོ་ཆེས། །བརྒྱན་ཅིང་དར་གྱི་ཅོད་པན་ཐོགས། །ཡེ་ཤེས་མེ་དཔུང་འབར་བའི་ཀློང་། །སྣ་ཚོགས་པདྨ་ཉི་མའི་གདན། །གཉིས་མེད་གཡས་བརྐྱང་གར་གྱིས་གནས། །དུས་མཚན་རོ་ཡི་ལྟེ་བར་མནན། །མཁའ་འགྲོའི་ཚོགས་ཀྱི་གཙོ་མོ་སྟེ། །རྣལ་
འབྱོར་མ་ལ་ཕྱག་འཚལ་བསྟོད། །མཆོག་དང་ཐུན་མོང་ལ་སོགས་པ། །ཅི་བསམ་པ་ཡི་དོན་རྣམས་ཀུན། །རྣལ་འབྱོར་དབང་ཕྱུག་ཆེན་མོ་ཡིས། །དུས་འདི་ཉིད་དུ་བདག་ལ་སྩོལ། །ཅེས་པས་བསྟོད། དེ་རྣམས་སྐུ་ལས་སྐུ་མང་འཕྲོས། །ལུས་ཐིམ་བདེ་དང་དྲོད་ནུས་བསྐྱེད། །གསུམ་ལས་ཨཱ་ལི་ཀཱ་ལི་འཕྲོས། །ངག་ཐིམ་མཐུ་དང་ནུས་པ་བསྐྱེད། །ཐུགས་ལས་བྱང་སེམས་ཆུ་རྒྱུན་བབས། །ཡིད་ཐིམ་བདེ་སྟོང་ཏིང་འཛིན་བསྐྱེད། །ལྷ་རྣམས་རང་རང་སོ་སོ་ལ། །ཐིམ་པས་གཉིས་སུ་མེད་པར་གྱུར། །ཅེས་བརྗོད་ལ། བཟླས་པ་ནི། ༀ་བཛྲ་བཻ་རོ་ཙ་ནི་ཡེ་ཧ་རི་ནི་ས་ཧཱུྃ་ཧཱུྃ་ཕཊ། བཅུ་གཅིག་པ་བུམ་པ་བསྒྲུབ་པ་ནི། ༀ་ཨཱཿབིགྷྣཱན་གྱིས་བསངས། སྭཱ་བྷཱ་ཝས་སྦྱངས། སྟོང་པའི་ངང་ལས་བྷྲཱུྃ་ཡིག་ཡོངས་གྱུར་ལས། །རིན་ཆེན་པདྨ་རཱ་ག་ལས་གྲུབ་པའི། །བཀྲ་ཤིས་བུམ་བཟང་མཆུ་འཕྱང་ལྟོ་བ་ལྡིར། །ཞབས་ཞུམ་མགྲིན་རིང་མགུལ་ཆིངས་ལེ་བརྒན་དར། །དཔག་བསམ་ཤིང་ལོ་མེ་ཏོག་ཁ་རྒྱན་མཛེས། །ནང་དུ་ལྔ་ཕྲག་ལྔ་ཡི་རྫས་རྣམས་དང་། །ལྷ་ཡི་བདུད་རྩིའི་རང་བཞིན་ཆུས་བསྐང་དབུས། །པཾ་ལས་པདྨ་དམར་པོ་འདབ་སྟོང་ལྡན། །གེ་སར་འཛུམ་ཕྲེང་སྡོང་བུ་ཡལ་ག་དང་། །ལོ་འདབ་ཀུན་ཏུ་རྒྱས་པ་དེ་ཡི་སྟེང་། །ཨ་ལས་ཆུ་ཤེལ་ཟླ་བའི་དཀྱིལ་འཁོར་ནི། །ཆ་ཤས་ཡོངས་
གང་ལྟེ་བར་ཧྲཱིཿདམར་པོ། །དེ་ལས་འོད་འཕྲོས་འཕགས་མཆོད་འགྲོ་སྒྲིབ་སྦྱངས། །འོད་ཟེར་ཚུར་འདུས་ཡོངས་སུ་གྱུར་པ་ལས། །རྒྱལ་ཀུན་གསུང་གི་རྡོ་རྗེའི་ངོ་བོ་ཉིད། །ཚེ་དང་ཡེ་ཤེས་དཔག་མེད་མགོན་པོ་མཆོག །སྐུ་མདོག་འཆར་ཀའི་ཉིན་བྱེད་ལྟར་དམར་བ། །མཚན་དཔེར་རབ་རྫོགས་འོད་དང་འོད་ཟེར་འབར། །ཞི་འཛུམ་ཞལ་གཅིག་ཕྱག་གཉིས་མཉམ་བཞག་རྒྱས། །ཚེ་ཡི་བུམ་པ་བདུད་རྩིའི་བཅུད་གཏམས་འཛིན། །རཏྣའི་དབུ་རྒྱན་སྙན་ཆ་མགུལ་ཆུ་དང་། །དོ་ཤལ་སེ་མོ་དོ་དང་ཕྱག་ཞབས་གདུབ། །དར་ལའི་སྟོད་གཡོགས་སྨད་གཡོགས་ཞབས་རྡོར་སྐྱིལ། །ལོངས་སྤྱོད་རྫོགས་པའི་སྐུར་གསལ་གནས་གསུམ་དུ། །ༀ་དཀར་ཨཱཿདམར་ཧཱུྃ་མཐིང་ཐུགས་ཀའི་དབུས། །ཟླ་སྟེང་ཧྲཱིཿདམར་དེ་ལས་འོད་ཟེར་འཕྲོས། །བསྐྱེད་པ་དང་འདྲའི་ཡེ་ཤེས་འཁོར་ལོའི་ཚོགས། །མདུན་གྱི་ནམ་མཁར་སྤྱན་དྲངས་གསལ་བར་གྱུར། །བཛྲ་ས་མཱ་ཛཿཞེས་པས་སྤྱན་དྲངས་ལ། ༀ་བཛྲ་ཨརྒྷཾ་པྲ་ཏཱིཙྪ་སྭཱ་ཧཱ། པུཥྤེ། དྷཱུ་པེ། ཨཱ་ལོ་ཀེ། གནྡྷེ། ནཻ་ཝི་དྱ། ཤབྡ་སོགས་ཀྱིས་མཆོད་པ་དང་། ཧྲཱིཿབཅོམ་ལྡན་མགོན་པོ་ཚེ་དཔག་མེད། །མཁའ་མཉམ་སྐུ་གསུང་ཐུགས་མངའ་བ། །རྣམ་དག་སྐུ་གསུང་ཐུགས་སུ་ལྡན། །ཚེ་དཔག་མེད་ལ་ཕྱག་འཚལ་བསྟོད། །ཅེས་དང་། ཛཿ་ཧཱུྃ་
བྃ་ཧོཿཡེ་ཤེས་དམ་ཚིག་པ། །དབྱེར་མེད་གྱུར་ཅིང་སླར་ཡང་ཐུགས་ཀའི་ཧྲཱིཿ། །དེ་ལས་འོད་འཕྲོས་དབང་ལྷ་རིགས་ལྔའི་ཚོགས། རང་བཞིན་གནས་ནས་སྤྱན་དྲངས་མཆོད་པར་གྱུར། །ༀ་སརྦ་ཏ་ཐཱ་ག་ཏ་ཨརྒྷཾ་པྲ་ཏིཙྪ་སྭཱ་ཧཱ། སོགས་ནས། ཤབྡའི་བར་དང་། ༀ་སརྦ་ཏ་ཐཱ་ག་ཏ་ཨ་བྷི་ཥཉྩ་ཏུ་མཾ། །གསོལ་བཏབ་མོད་ལ་དེ་བཞིན་གཤེགས་པ་དང་། །གཤེགས་མ་རྣམས་ཀྱིས་དབང་བསྐུར་སྐུ་ཁྲུས་གསོལ། །ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ། ཞེས་གསུངས་ཡེ་ཤེས་བདུད་རྩིའི་ཆུས་དབང་བསྐུར། །སྐུ་གང་ཆུ་ཞབས་སྤྱི་བོར་བརྟེན་པ་ལས། །རིགས་བདག་འོད་དཔག་མེད་པས་དབུ་བརྒྱན་ཅིང་། །བུམ་ལྷའི་ཐུགས་ཀར་རིན་ཆེན་ཟ་མ་ཏོག །དབུས་སུ་ཧྲཱིཿདམར་དེ་ལས་སྔགས་ཕྲེང་བསྐོར། །ཐ་མར་བདག་དང་བསྲུང་བྱའི་མིང་བཅས་གསལ། །ཐལ་མོ་སྦྱར་ལ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་ཏུ་མེད་པ་ཤིན་ཏུ་རྣམ་པར་ངེས་པ་གཟི་བརྗིད་ཀྱི་རྒྱལ་པོ་ཐུགས་རྗེ་ཆེན་པོ་དང་ལྡན་པས་བདག་རྒྱུད་བྱིན་གྱིས་རློབས་ཤིག །ཚེ་དང་ཡེ་ཤེས་ཀུན་ནས་རྒྱས་པར་བྱིན་གྱིས་བརླབ་ཏུ་གསོལ། ༀ་བཛྲ་ཨཱ་ཡུ་ཥེ། ས་ར་ཧ། ཀ་ར་རེ། ཤ་ར་རེ་ཧཱུྃ་ཕཊ། ཅེས་ལན་གསུམ། བདག་དང་
བསྲུང་བྱ་དེང་ནས་བཟུང་སྟེ་མགོན་པོ་ཚེ་དཔག་ཏུ་མེད་པའི་སྐྱབས་འོག་ཏུ་ཚུད་པར་གྱུར་ཅིག །བདག་ལ་རིང་པོའི་མཆོག་ཐོབ་པར་གྱུར་ཅིག །ཚེ་སྲོག་བྲག་ལས་སྲ་བར་གྱུར་ཅིག །ཚེ་ཉི་ཟླ་དང་མཉམ་པར་གྱུར་ཅིག །མི་རྒྱུད་ཆུ་ལས་རིང་བར་གྱུར་ཅིག །ལྕགས་ཀྱི་སྲོག་རྩ་འགྲུབ་པར་གྱུར་ཅིག །ལོ་བརྒྱ་འཚོ་བར་གྱུར་ཅིག །སྟོན་བརྒྱ་མཐོང་བར་གྱུར་ཅིག །འཆི་མེད་ཚེ་ཡི་གཡུང་དྲུང་ཐོབ་པར་གྱུར་ཅིག །ཅེས་གསོལ་བ་བཏབ། རང་གི་སྙིང་གའི་འོད་ཟེར་གཟུངས་ཐག་བརྒྱུད། །བུམ་ལྷར་ཐིམ་པའི་འོད་ཀྱིས་རྒྱལ་བ་མཆོད། །ཐུགས་རྗེ་བྱིན་རླབས་བརྟན་གཡོ་སྣང་སྲིད་ཀྱི། །ཡོན་ཏན་བདུད་རྩིའི་དྭངས་བཅུད་བུམ་ལྷ་ཡི། ཤངས་བུག་ནས་ཞུགས་སྔགས་ཕྲེང་མིང་ཡིག་ལ། །ཐིམ་པས་བདག་དང་བསྒྲུབ་བྱའི་ལུས་ངག་ཡིད། །གཞོམ་མེད་རྟག་པ་རྡོ་རྗེའི་རང་བཞིན་གྱུར། །དེ་ནས་བཟླས་པ་བྱ་བ་ནི། ༀ་ཨ་མཱ་ར་ཎི་ཛཱི་ཝནྟི་ཡེ་སྭཱ་ཧཱ། གང་འགྲུབ་བཟླས་ལ། ན་མོ་བྷ་ག་ཝ་ཏེ་ཨ་པ་ར་མི་ཏ་སོགས་གཟུངས་རིང་བཟླའོ། །བཅུ་གཉིས་པ་ཚེ་འགུགས་པ་ནི། བདག་དང་བུམ་ལྷའི་ཐུགས་ཀའི་འོད་ཀྱིས་འཁོར་འདས་བརྟན་གཡོའི་ཚེ་བཅུད་ཐམས་ཅད་བསྡུས་པར་བསམ་ནས་ཚེ་ཡི་མདའ་དར་གཡབ་ཅིང་། ཧཱུྃ་བཅོམ་ལྡན་མགོན་པོ་ཡེ་ཤེས་ཚེ་དཔག་མེད། །
འབྱུང་བ་ལྔ་ལ་དབང་བསྒྱུར་ལྷ་མོའི་ཚོགས། །བདག་དང་བསྲུང་བྱའི་ཚེ་དང་གཡང་སྤེལ་ཅིག །སྟེང་འོག་ཕྱོགས་བཅུ་སྣོད་ཀྱི་འཇིག་རྟེན་ལ། །བྲོས་དང་འཁྱམས་དང་ཡར་བའི་ཚེ་ཁུག་ཅིག །སྟོང་ཕྲག་བརྒྱད་ཅུ་བགེགས་ཀྱི་ཚོགས་རྣམས་ཀྱིས། བརྐུས་དང་འཕྲོག་དང་གཞོམ་པའི་ཚེ་ཁུག་ཅིག །འབྱུང་བའི་དགྲ་གཤེད་འཁྲུགས་པའི་ལས་སྦྱོར་གྱིས། །ཉམས་དང་ཟད་དང་འཐོར་བའི་ཚེ་བསོས་ཤིག །ཧད་ཀྱིས་བསྔངས་དང་ཡིད་ཀྱིས་བརྒྱལ་བ་དང་། །འུད་ཀྱིས་འགྲོགས་པའི་ཚེ་དང་གཡང་གསོས་ཤིག །ཚེ་ཁུག་གཡང་སྐྱོབ་དངོས་གྲུབ་བསྩལ་དུ་གསོལ། །འབྱུང་ལྔ་འོད་ལྔ་འབར་བའི་ཚེ་བཅུད་བསྟིམས། །འཆི་མེད་ཚེ་ཡི་དངོས་གྲུབ་བསྩལ་དུ་གསོལ། །ཞེས་བསྐུལ་ཞིང་། སྔགས་ནི། ཨ་གྷུ་ས་མ་ཡ་ཨེ་ཧྱེ་ཨཱ་ཡུརྫྙཱ་ན་ཚེ་བྷྲཱུྃ། ཞེས་བཟླ། དེ་ནས་རྒྱས་གདབ་པ་ནི། དང་པོ་རྩེ་གཅིག་སེམས་ཀྱི་རྒྱ། །གཉིས་པ་ཐབས་དང་ཤེས་རབ་རྒྱ། །གསུམ་པ་སྐུ་གསུང་ཐུགས་ཀྱི་རྒྱ། །བཞི་པ་ཚད་མེད་བཞི་ཡི་རྒྱ། །ལྔ་པ་ཡེ་ཤེས་ལྔ་ཡི་རྒྱ། །དྲུག་པ་རྟ་མགྲིན་དབང་གི་རྒྱ། །བདུན་པ་ཆོས་ཀྱི་དབྱིངས་ཀྱི་རྒྱ། །རྒྱ་བདུན་རིམ་གྱིས་བཏབ་པ་ལ། །སུ་ཡང་འདའ་བར་མ་བྱེད་ཅིག །ༀ་བཛྲ་རཀྵ་རཀྵ་ཧཱུྃ། དེ་ནས་ཚེ་སྦ་བ་ནི། ཨཱ་ཆོས་ཀྱི་དབྱིངས་སུ་ཚེ་སྦས་པས། །སངས་རྒྱས་
ཀྱིས་ཀྱང་མི་གཟིགས་ན། །གནོད་བྱེད་བགེགས་ཀྱིས་ལྟ་ཅི་སྨོས། །དེ་ཕྱིར་རྡོ་རྗེའི་ཚེ་སྦའོ། །ༀ་བཛྲ་རཀྵ་རཀྵ་ཧཱུྃ། །ཞེས་བརྗོད། ༀ་སརྦ་ཏ་ཐཱ་ག་ཏ་ཨཱཿཡུཿདེ་ཝ་ས་པ་རི་ཝཱ་ར་ཨརྒྷཾ་པྲ་ཏིཙྪ་སྭཱ་ཧཱ། དེ་བཞིན་རིགས་འགྲེས། ཤབྡ་བར་གྱིས་མཆོད། བསྟོད་པ་ནི། ཧྲཱིཿབཅོམ་ལྡན་མགོན་པོ་ཚེ་དཔག་མེད། །མཁའ་དང་མཉམ་པའི་སྐུ་མངའ་བ། །སྐུ་མཆོག་རྣམ་པར་དག་པའི་སྐུ། །མཉམ་ཉིད་སྐུ་ལ་ཕྱག་འཚལ་ལོ། །གསུང་མཆོག་རྣམ་པར་དག་པའི་གསུང་། །གསུང་རབ་དམ་པ་སྤྲོས་དང་བྲལ། །ཡི་གེ་མེད་ཅིང་སྒྲ་སྤངས་པ། །སྤྲོས་མེད་གསུང་ལ་ཕྱག་འཚལ་ལོ། །ཐུགས་ཉིད་རྣམ་པར་དག་པའི་ཐུགས། །ཐུགས་མཆོག་རྣམ་པར་རྟོག་པ་སྤངས། །ཆགས་མེད་ཡེ་ཤེས་མཁྱེན་པ་སྟེ། །སྟོང་ཉིད་ཐུགས་ལ་ཕྱག་འཚལ་ལོ། །ཞེས་པས་བསྟོད་ལ། བུམ་ལྷ་བཅོམ་ལྡན་མགོན་པོ་འོད་ཞུ་ནས། །འཆི་མེད་ཡེ་ཤེས་བདུད་རྩིའི་རྣམ་པར་གྱུར། །དུང་ཆོས་ཀྱི་ཆུ་བུམ་པར་བླུགས། བཅུ་གསུམ་པ་བཀའ་སྲུང་ལྷ་སྨན་རྒྱལ་མོ་འཁོར་བཅས་བསྐྱེད་པའི་རིམ་པ་ནི། ༀ་ཨཱཿབིགྷྣན་གྱིས་བསངས། སྭ་བྷཱ་ཝས་སྦྱངས། མདུན་གྱི་ས་གཞིར་སྲིད་པའི་རྡུལ་བརྩེགས་ཀཻ་ལ་ཤ་ཡི་རི། །དྭངས་གསལ་ཆུ་ཤེལ་མདངས་འཚེར་བདུད་རྩིའི་ཆར་རྒྱུན་རྟག་ཏུ་འབེབས། །གཡའ་དང་རྫ་བྲག་རྣམ་མང་ཨནྡྷ་སྙིལ་
མཚུངས་སྤང་གི་ལྗོངས། །མརྒ་ཏ་བཞིན་ཡིད་དབང་བརྟས་བྱེད་སྨན་གྱི་སྐྱེད་མོས་ཚལ། །མེ་ཏོག་སྣ་ཚོགས་རྣམ་པར་བཀྲ་ཞིང་དྲི་བསུང་ངད་ལྡང་བ། །ལོ་འདབ་འབྲས་བཟང་ཁུར་གྱིས་དུད་པའི་རྐང་འཐུང་ལྗོན་པ་དང་། །པདྨས་བརྒྱན་པའི་མཚོ་དང་རྫིང་བུ་དག་བྱེད་གཙང་མའི་ཆབ། །དལ་བར་འབབས་པའི་འགྲམ་ངོགས་ངང་པ་ལ་སོགས་འཕུར་ལྡིང་གཡོ། །ཅ་ཅོའི་གླུ་དབྱངས་སྙན་པས་སྒྲ་འཛིན་སིམ་པ་སྟེར་བར་བྱེད། །མཁའ་ཡི་གླང་པོ་ལང་ལིང་ཀུན་ཏུ་དཀྲིགས་ཤིང་བསིལ་བ་སྦྱིན། །ཕྱོགས་དང་ཕྱོགས་མཚམས་འཇའ་འོད་ཁ་དོག་ལྔ་ལྡན་ལམ་མེ་བ། །དེ་ལྟའི་རི་དབང་རབ་བརྗིད་སྤོ་མཐོའི་གཡོན་གྱི་གྲྭ་ཟུར་མགུལ། །ལྷ་རྫས་རིན་ཐང་བྲལ་བའི་དར་དཀར་དྲི་མེད་ཡངས་པའི་གུར། །ཟ་འོག་གསེར་གྱི་རེ་ཁཱ་རྣམ་པར་བཀྲ་བའི་ཡོལ་བ་དང་། །ཙནྡན་དཀར་དང་དམར་བའི་ཚུགས་ཤིང་དར་སྔོན་ཆོན་ཐག་ལ། །གསེར་དང་དངུལ་གྱི་ཕུར་བཏབ་གཞན་ཡང་ས་གསུམ་འཇིག་རྟེན་གྱི། །མཁོ་དགུའི་ལོངས་སྤྱོད་ངོ་མཚར་ཁྱད་འཕགས་དུ་མས་དཔའ་བ་སྟེ། །ཕྱི་ལྟར་བཀོད་ལེགས་ཡོན་ཏན་རྨད་བྱུང་ཕུན་སུམ་ཚོགས་པ་དང་། །ནང་ལྟར་རང་བཞིན་ལྷུན་གྱིས་གྲུབ་པའི་ཕོ་བྲང་དམ་པ་དངོས། །གསང་བ་ལྟར་ན་དོན་དམ་ཨེ་ཡིག་རྡོ་རྗེ་བཙུན་མོའི་དབྱིངས། །དེ་ཡི་
དབུས་སུ་པཾ་ལས་པདྨ་རཾ་ལས་ཉི་མའི་གདན། །བཀྲ་གསལ་དཀྱིལ་འཁོར་ལྔ་པོ་སོ་སོར་གསལ་བར་གྱུར་བ་ཡི། །དབུས་སུ་དུང་གི་སེང་ལྕམ་དཀར་མོ་གཡུ་ཡི་རལ་པ་ཅན། །རིན་ཆེན་གསེར་དང་དར་ཟབ་འཕྱང་འཕྲུལ་དྲིལ་བུ་གཡེར་ཁས་བརྒྱན། །དེ་ཡི་སྟེང་དུ་རིགས་འདུས་སངས་རྒྱས་མཁའ་འགྲོའི་ངོ་བོ་ཉིད། །གཙོ་མོ་ལྷ་སྨན་རྒྱལ་མོ་བཀྲ་ཤིས་ཚེ་ཡི་དབང་ཕྱུག་མ། །སྐུ་མདོག་དཀར་གསལ་སྟོན་ཀའི་ཟླ་བ་ཆ་ཤས་ཡོངས་གང་བཞིན། །རབ་ཏུ་མཛེས་ཤིང་ལྟ་ན་སྡུག་པའི་ཞལ་གཅིག་ཕྱག་གཉིས་པ། །གཡས་པས་གསེར་གྱི་རྡོ་རྗེ་རྩེ་དགུ་ནམ་མཁར་ཕྱར་བ་ཡིས། །ཚེ་ཡི་བར་ཆད་བསྲུང་ཞིང་གཡོན་པས་རིན་ཆེན་བུམ་པ་བཟང་། །འཆི་མེད་ཚེ་ཡི་བདུད་རྩིས་བཀང་བ་དཔལ་བེའུ་གཡུང་དྲུང་དང་། །དགའ་འཁྱིལ་གྱིས་བརྒྱན་ཐུགས་ཀར་འཛིན་པས་སྒྲུབ་པོར་དངོས་གྲུབ་སྟེར། །ཐོར་ཚུགས་རྩེ་མོར་དུང་དཀར་གཡས་སུ་འཁྱིལ་བས་མཛེས་པར་བརྒྱན། །ཤར་དུ་རྐྱང་བུ་ཁ་དཀར་ལ་གནས་བཛྲ་ཌཱ་ཀི་མ། །མཐིང་གི་ཞལ་བཟང་དབང་སྔོན་མདངས་ལྡན་ཕྱག་གཡས་ཨཱ་དར་ཤ། སྣང་སྲིད་གསལ་སྟོན་གཡོན་པས་དར་དཀར་བ་དན་ཕྱར་སྟབས་འཛིན། །རིན་ཆེན་ཨིནྡྲའི་ཐོར་ཚུགས་དང་ལྡན་དགྱེས་པའི་ཞལ་མདངས་མངའ། །ལྷོ་རུ་རྒྱ་སྟག་གྲུས་མ་ལ་གནས་རཏྣ་ཌཱ་ཀི་མ། །མི་གཡོ་བློ་བཟང་བཙོ་མ་གསེར་གྱི་མདོག་ཅན་ཕྱག་གཡས་
པས། །རིན་ཆེན་སྣོད་དུ་ལྷ་ཡི་ཞལ་ཟས་བསོད་ཅིང་རོ་བརྒྱར་ལྡན། །གཡོས་པས་ནེའུ་ལེ་བསྣམས་ཤིང་ཀ་ན་ཀ་ཡི་ཐོར་ཚུགས་ཅན། །ནུབ་ཏུ་གསེར་ཤ་ཡུ་མོ་ལ་གནས་པདྨ་ཌཱ་ཀི་མ། །ཅོད་པན་མགྲིན་བཟང་པདྨ་རཱ་གའི་མདོག་མཚུངས་ཕྱག་གཡས་ཀྱིས། །དགོས་འབྱུང་ནོར་བུ་དབང་རྒྱལ་གཡོན་པས་རིན་ཆེན་ཟ་མ་ཏོག །མོས་པ་རྣམ་བཞི་དབང་དུ་བསྒྱུར་ཅིང་བྱུ་རུའི་ཐོར་ཚུགས་མཛེས། །བྱང་དུ་གཡུ་འབྲུག་སྔོན་མོ་ལ་གནས་ཀརྨ་ཌཱ་ཀི་མ། །གཏད་དཀར་འགྲོ་བཟང་མརྒད་ཁ་དོག་འཆང་ཞིང་ཕྱག་གཡས་པ། །རྩ་མཆོག་དཱུཪྺའི་ཆུན་པོ་གཡོན་པས་ལྟོ་འགྲོའི་ཞགས་པ་བསྣམས། །ཕྲིན་ལས་ཐོགས་མེད་མྱུར་བར་སྟོན་ཅིང་གཡུ་ཡི་ཐོར་ཚུགས་ལྡན། །ཀུན་ཀྱང་ཞི་མ་ཁྲོ་འཛུམ་མཚར་སྡུག་འོད་དུ་འབར་བ་ཅན། །དར་དཀར་གོ་ཟུ་ཡ་མཚན་དབང་པོའི་ཚོན་རིས་དང་ལྡན་པ། །མནྟྲི་ལ་སོགས་ན་བཟའ་སུམ་བརྩེགས་ལྷབ་ལྷུབ་སྐུ་ལ་གསོལ། །ལྷ་ཡི་རེག་བྱ་པཉྩ་ལི་ཀའི་སྟོད་གཡོགས་རྣམ་པར་བཀྲ། །རིན་ཐང་བྲལ་བའི་ལྷ་དང་ཀླུ་དབང་མི་ཡི་ནོར་བུ་ནི། །སྣ་ཚོགས་དག་གིས་པྲོག་ཞུ་སྙན་དང་མགུལ་རྒྱན་དཔུང་གདུབ་སྤྲས། །དོ་ཤལ་སེ་མོ་དོ་དང་མུ་ཏིག་ཆུན་འཕྱང་དྲིལ་གཡེར་ཕྲེང་། །ཞབས་གདུབ་ལ་སོགས་རྒྱན་མཛེས་འཇའ་འོད་ཟེར་གསུམ་ཀློང་དུ་གསལ། །བསྐྱེད་པའི་ཡབ་ཡུམ་མིང་པོ་བདུན་དང་བརྟན་
སྐྱོང་བཅུ་གཉིས་པོ། །གཞན་ཡང་ལས་དང་འཇིག་རྟེན་དཔའ་བོ་ཌཱ་ཀི་སྨན་མོའི་ཚོགས། །བྱེ་བ་འབུམ་སྡེ་སྣང་ཞིང་སྲིད་པའི་སྡེ་བརྒྱད་ཡུལ་ལྷ་དང་། །གནས་དང་གཏེར་བདག་དགེ་བསྙེན་འཁོར་ཚོགས་རང་རང་རིགས་མཐུན་སྡེ། །རྒྱན་དང་ཆ་ལུགས་སྣ་ཚོགས་སྟོན་ཅིང་དཔུང་ཚོགས་དུ་མས་བསྐོར་བར་བསྐྱེད། །དེ་ལྟར་གཙོ་འཁོར་རྣམས་ཀྱི་གནས་གསུམ་འབྲུ་ུགསུམ་མཚན་པ་དང་། །རང་གི་ཐུགས་ཀའི་འོད་ཟེར་གྱིས་བསྐུལ་བསྐྱེད་པ་དང་འདྲའི་ལྷ། །འབྲོག་ཆེན་ལ་ཕྱི་གངས་ཀྱི་ར་བའི་གནས་མཆོག་དམ་པ་ནས། །གཙོ་འཁོར་ཡོངས་རྫོགས་སྐད་ཅིག་ཉིད་ལ་གནས་འདིར་སྤྱན་དྲངས་གྱུར། །དེ་ནས་རྗེ་གར་དབང་དྲུག་པས་བསྩལ་བའི་སྤྱན་འདྲེན་སོགས་ཀྱི་རིམ་པ་ལས་གཞུང་སོར་བཞག་ལས། བཅུ་བཞི་པ་སྤྱན་དྲངས་པ་དང་བཞུགས་སུ་གསོལ་བ་ནི། སྤོས་དཀར་གྱི་དུད་པ་དང་རོལ་མོ་སྣ་ཚོགས་བསྒྲག་ལ། སྔོན་ཚེ་དུར་ཁྲོད་བསིལ་ཚལ་དུ། །མཁའ་འགྲོ་སེང་གེའི་གདོང་ཅན་གྱི། །སྤྱན་སྔར་ཐུགས་དམ་ཞལ་བཞེས་པའི། །མཁའ་འགྲོ་ལྔ་པོ་གནས་འདིར་གཤེགས། །སྔོན་ཚེ་ཁ་ལ་རོང་སྒོ་རུ། །ཨོ་རྒྱན་པདྨ་འབྱུང་གནས་ཀྱི། །སྤྱན་སྔར་ཐུགས་དམ་ཞལ་བཞེས་པའི། །མཁའ་འགྲོ་ལྔ་པོ་གནས་འདིར་གཤེགས། །སྔོན་ཚེ་སྨན་ལུང་ཆུ་བར་དུ། དབང་ཕྱུག་བཞད་པ་རྡོ་རྗེ་ཡི། །སྤྱན་སྔར་ཐུགས་དམ་ཞལ་བཞེས་པའི། །མཁའ་འགྲོ་ལྔ་པོ་གནས་
འདིར་གཤེགས། །ཕྱི་ལྟར་སྨན་བཙུན་ཆེན་མོ་ལྔ། །ནང་ལྟར་ཞིང་སྐྱོང་ཆེན་མོ་ལྔ། །གསང་བ་རིགས་ཀྱི་ཡུམ་ཆེན་ལྔ། །གཙོ་མོ་བཀྲ་ཤིས་ཚེ་རིང་མ། །སྡེ་བརྒྱད་དུ་མའི་འཁོར་དང་བཅས། །རྣལ་འབྱོར་སྒྲུབ་པོ་འཁོར་བཅས་ལ། །ཐུགས་དམ་བརྩེ་བས་དགོངས་མཛོད་ལ། །མཆོད་པའི་གནས་འདིར་གཤེགས་སུ་གསོལ། །བྷྱོ། རྡོ་རྗེ་གདན་གྱི་བྱང་ཕྱོགས་ནས། །བལ་བོད་གཉིས་ཀྱི་ས་མཚམས་ན། །གངས་དཀར་ཤེལ་གྱི་ཅོད་པན་ཅན། །ཕུ་ཆུ་སྙན་པའི་རྒྱུན་སྒྲ་ཅན། །ནགས་མ་མེ་ཏོག་ཤམ་བུ་ཅན། །གཡའ་སྤང་གཡུ་ཡི་སྐ་རགས་ཅན། །སྨན་ལྗོངས་བྲག་གི་ར་བ་ཅན། །གནས་མཆོག་དེ་འདྲའི་གཡོན་མགུལ་ནས། །རིན་ཆེན་སྣ་ལྔའི་ཁྲི་སྟེང་ན། །བཀྲ་ཤིས་ཚེ་ཡི་དབང་ཕྱུག་མ། །དྲག་པོའི་གདུང་བས་ཁྱོད་འབོད་ན། །དེ་རིང་སྒྲུབ་པའི་གནས་མཆོག་འདིར། །ལྷབ་ལྷུབ་ན་བཟའི་རྒྱན་དང་བཅས། །སིལ་སྙན་རོལ་མོའི་སྒྲ་དང་བཅས། །ནམ་མཁའི་མཐོངས་ནས་སྤྱན་འདྲེན་ན། །འཁོར་དང་བཅས་པ་གཤེགས་སུ་གསོལ། །ཨཉྫཱིའི་དྷཱ་རིའི་རིགས་ཀྱི་ཌཱ་ཀི་མ། །ཀུན་གྱིས་གཙོ་མོ་བཀྲ་ཤིས་ཚེ་རིང་མ། །དེ་ཡི་མཆེད་ཟླ་ཟ་བྱེད་ཆེན་མོ་བཞི། །འཁོར་དང་བཅས་པ་གནས་འདིར་གཤེགས་སུ་གསོལ། །ༀ་ཨེ་ཧྱེ་ཧི་ཨཉྫི་དྷཱ་རི་པཉྩ་ཌཱ་ཀི་ནཱི་ས་པ་རི་ཝཱ་ར་བཛྲ་ས་མ་ཛཿཛཿཧཱུྃ་བྃ་ཧོཿགཉིས་སུ་མེད་པར་གྱུར། །གངས་
དཀར་རིན་ཆེན་གཞལ་ཡས་ཁང་། །ཉི་ཟླ་པདྨའི་གདན་སྟེང་དུ། །ལྷ་སྨན་འཁོར་བཅས་བཞུགས་སུ་གསོལ། །བར་ཆད་སོལ་ལ་དངོས་གྲུབ་ཞུ། །ཇོ་མོ་བཀྲ་ཤིས་ཚེ་རིང་མ་མཁའ་འགྲོ་ལྔ་འཁོར་རྒྱ་མཚོ་དང་བཅས། མཁའ་འགྲོ་མ་སེང་གེ་གདོང་ཅན་དང་། ཏཱ་མ་ལ་རི་ཁྲོད་མ་དང་། གཏུམ་མོ་དང་། སྔོ་སངས་མ་དང་། བི་ན་མོ་བཛྲ་དང་། སློབ་དཔོན་པདྨ་འབྱུང་གནས་དང་། དཔལ་བཞད་པ་རྡོ་རྗེ་ལ་སོགས་པ་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་དང་དམ་ལས་མ་འདའ་བར། སངས་རྒྱས་ཀྱི་བསྟན་པ་སྲུངས། དཀོན་མཆོག་གི་དབུ་འཕང་བསྟོད། བསྟན་འཛིན་གྱི་བུ་སློབ་སྐྱོང་། རྣལ་འབྱོར་པ་བདག་ཅག་ལ་སྡང་བར་བྱེད་པའི་དགྲ། གནོད་པར་བྱེད་པའི་བགེགས། ལོག་འདྲེན་གདུག་པ་ཅན་རྣམས་ཀྱི་བསམ་པ་ངན་པ་དང་། སྦྱོར་བ་རྩུབ་པ་ཐམས་ཅད་ཐལ་བའི་རྡུལ་བཞིན་དུ་བརླག་པ་དང་། བདག་ཅག་གི་བསམ་དོན་ཐམས་ཅད་ཡིད་བཞིན་དུ་འགྲུབ་ཅིང་ཆོས་ལྡན་གྱི་བྱ་བ་མཐར་ཕྱིན་པ་དང་། མཆོག་དང་ཐུན་མོང་གི་དངོས་གྲུབ་ཐམས་ཅད་བདེ་བླག་ཏུ་ཐོབ་པའི་ཕྲིན་ལས་མཛོད་ཅིག །ཅེས་བརྗོད་ལ་ཌཱ་ཀི་ལྔའི་སྤྱི་བོར་རྡོ་རྗེ་བཞག །ལྕེར་བདུད་རྩིར་བྱིན། དམ་ལ་བཞག་པའི་མོས་པས། ༀ་ཨཉྫཱི་དྷ་རི་པཉྩ་ཌཱ་ཀི་ནཱི་ས་པ་རི་ཝཱ་ར་ས་མ་ཡ་མ་ནུ་སྨ་ར་ཡ་ས་མ་ཡ་མཱ་ཏི་ཀྲ་མ་ཏི་ས་
མ་ཡ་རཀྵནྟུ། ཞེས་བརྗོད། སྐབས་འདིར་བསྙེན་པ་བྱ་བར་འདོད་ན། ཌཱ་ཀི་ལྔ་པོ་སོ་སོའི་ཐུགས་ཀར་ཉི་མའི་སྟེང་དུ་རིམ་བཞིན་ༀ་ཧ་རི་ནཱི་སའི་ས་བོན་ལས་རང་རང་གི་སྔགས་ཀྱིས་བསྐོར་བར་གྱུར། པར་བསམ་ལ། ༀ་ཨ་ཀ་ནི་ཙ་ལི་མི་ཐུ་ཕྲི་ལི་རེ་སྭཱ་ཧཱ། ༀ་ཌཱ་ཀི་ནི་ཀནྟྲ་པ་ནི་མ་ར་ཡ་ཛཿསྭཱ་ཧཱ། ༀ་ན་ཏྲི་མ་ཏྲི་དུ་རུ་མ་ཏྲི་སྭཱ་ཧཱ། ༀ་ཌཱ་ཀི་ས་པ་རི་ཙཀྲ་མུ་ནི་ཏིཥྛ་རྦད་ལོ་སྭཱ་ཧཱ། ༀ་ཨ་ནི་ནི་མ་ཏ་ར་ཀི་ནི་མི་ཐུ་ཕྲི་ལི་རི་ཡེ་སྭཱ་ཧཱ། བཅོ་ལྔ་པ་ཕྱག་འཚལ་བ་ནི། ༀ་ཉི་མ་ནུབ་ཕྱོགས་ཕ་ཀི་ན། །གངས་དཀར་དགུང་དུ་རྩེ་མཐོ་བ། །མཐོ་ལ་གཉེན་ནོ་ཚེ་རིང་མ། །རྡོ་རྗེ་མི་འགྱུར་དཔལ་གྱི་ཡུམ། །ན་བཟའ་དཀར་མོ་ཚེ་ཡི་ལྷ། །ལྷན་སྐྱེས་ཡུམ་ལ་ཕྱག་འཚལ་ལོ། །ལྷ་མོ་མཐིང་གི་ཞལ་བཟང་མ། །མཆོག་གི་དངོས་གྲུབ་གནང་མཛད་མ། །རྡོ་རྗེ་ཁྲོས་མ་ཞེས་སུ་གྲགས། །རྡོ་རྗེ་མཁའ་འགྲོར་ཕྱག་འཚལ་བསྟོད། །ལྷ་མོ་མི་གཡོ་བློ་བཟང་མ། །དགོས་འདོད་ཆར་བཞིན་འབེབས་མཛད་མ། །རྡོ་རྗེ་བཞད་མ་ཞེས་སུ་གྲགས། །རིན་ཆེན་མཁའ་འགྲོར་ཕྱག་འཚལ་བསྟོད། །ལྷ་མོ་ཅོད་པན་མགྲིན་བཟང་མ། །ཚེ་ཡི་དངོས་གྲུབ་གནང་མཛད་མ། །རྡོ་རྗེ་དཔལ་མོ་ཞེས་སུ་གྲགས། །པདྨ་མཁའ་འགྲོར་ཕྱག་འཚལ་བསྟོད། །ལྷ་མོ་གཏད་དཀར་འགྲོ་བཟང་མ། །དྲག་པོའི་དངོས་གྲུབ་
གནང་མཛད་མ། །རྡོ་རྗེ་གར་མཁན་ཞེས་སུ་གྲགས། །ལས་ཀྱི་མཁའ་འགྲོར་ཕྱག་འཚལ་བསྟོད། །གཟི་བརྗིད་དཔལ་དང་འོད་དུ་འབར། །རྫུ་འཕྲུལ་མཐུ་སྟོབས་བདག་མོ་སྟེ། །རྡོ་རྗེ་མི་འགྱུར་དཔལ་གྱི་ཡུམ། །གཙོ་མོ་ལྔ་པོ་འཁོར་དང་བཅས། །མ་མོ་སྨན་མོ་འབུམ་གྱིས་བསྐོར། །མཆོད་གཏོར་བཟང་པོ་འདི་བཞེས་ལ། །རྡོ་རྗེ་འཆང་དང་ཐོད་ཕྲེང་རྩལ། །བཞད་པ་རྡོ་རྗེའི་ཐུགས་རྗེ་ཡི། །སྤྱན་སྔར་ཁས་བླངས་དམ་བཅས་བཞིན། །བཅོལ་པའི་ཕྲིན་ལས་འགྲུབ་པར་མཛོད། །བླ་མའི་སྐུ་ཚེ་ཁྱོད་ཀྱིས་བསྲིངས། །སངས་རྒྱས་བསྟན་པ་ཁྱོད་ཀྱིས་སྲུངས། །སྒྲུབ་པའི་བར་ཆད་ཁྱོད་ཀྱིས་སོལ། །བདུད་དང་མུ་སྟེགས་ཁྱོད་ཀྱིས་ཐུལ། །ཡོན་བདག་རྐྱེན་ངན་ཁྱོད་ཀྱིས་སྲུངས། །ཡུལ་ཕྱོགས་ཀུན་ཏུ་བདེ་ལེགས་སྤེལ། །ༀ་ཧྲིཾཧྲིཾ་ཧཱུྃ་ཧཱུྃ་ཧཱ་ཧཱ་ཧོ་ཧོ་ཕེཾ་ཕེཾ་ཕཊ། ཧཱུྃ། རྡོ་རྗེ་མི་འགྱུར་དཔལ་གྱི་ཡུམ། །རྡོ་རྗེ་ཁྲོས་མ་ཞེས་སུ་གྲགས། །གསང་མཚན་རྡོ་རྗེ་བཞད་པ་མོ། །རྡོ་རྗེ་དཔལ་མོ་ལོངས་སྤྱོད་ཡུམ། །གསང་མཚན་རྡོ་རྗེ་གར་མཁན་མ། །ཁྱེད་ཀྱི་རྫུ་འཕྲུལ་མཐུ་སྟོབས་ཀྱིས། །སྣང་སྲིད་བདག་གིས་དབང་དུ་བསྡུས། །རྣལ་འབྱོར་བཅོལ་བའི་ཕྲིན་ལས་མཛོད། །ཅེས་ཕྱག་འཚལ། བཅུ་དྲུག་པ་མཆོད་ཅིང་བསྟོད་པ་ནི། རྗེ་མི་བསྐྱོད་ཞབས་ཀྱིས་བསྩལ་བ་ལྟར། རྗེ་བླ་མ་ཡི་དམ་ཆོས་སྐྱོང་དང་། །ལྷ་མཁའ་
འགྲོ་ལྔ་ཡི་སྤྱན་སྔ་རུ། །རྫས་ཡན་ལག་བརྒྱད་ལྡན་ཨརྒྷཾ་འདི། །ཡིད་དྭངས་བས་འབུལ་གྱིས་བཞེས་སུ་གསོལ། །ༀ་ཤྲཱི་མན་གུ་རུ་དེ་ཝ་པཉྩ་ཌཱ་ཀི་ནཱི་ས་པ་རི་ཝཱ་ར་བཛྲ་ཨརྒྷཾ་པྲ་ཏིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། རྗེ་བླ་མ་ཡི་དམ་ཆོས་སྐྱོང་དང་། །ལྷ་མཁའ་འགྲོ་ལྔ་ཡི་སྤྱན་སྔ་རུ། །རྫས་འདབ་རྒྱས་བཟང་པོའི་མེ་ཏོག་འདི། །ཡིད་དྭངས་བས་འབུལ་གྱི་བཞེས་སུ་གསོལ། །ༀ་ཤྲཱི་མཱན་གུ་རུ་དེ་ཝ་པཉྩ་ཌཱ་ཀི་ནི་ས་པ་རི་ཝཱ་ར་བཛྲ་པུཥྤེ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། རྗེ་བླ་མ་ཡི་དམ་ཆོས་སྐྱོང་དང་། །ལྷ་མཁའ་འགྲོ་ལྔ་ཡི་སྤྱན་སྔ་རུ། །ངད་དྲི་བསུང་ཕུན་ཚོགས་བདུག་སྤོས་འདི། །ཡིད་དྭངས་བས་འབུལ་གྱི་བཞེས་སུ་གསོལ། །ༀ་ཤྲཱི་མཱན་གུ་རུ་དེ་ཝ་པཉྩ་ཌཱ་ཀི་ནཱི་ས་པ་རི་ཝཱ་ར་བཛྲ་དྷཱུ་པེ་པྲ་ཏིཙྪ་པཱུ་ཛ་ཡེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། རྗེ་བླ་མ་ཡི་དམ་ཆོས་སྐྱོང་དང་། །ལྷ་མཁའ་འགྲོ་ལྔ་ཡི་སྤྱན་སྔ་རུ། །འོད་སྣང་གསལ་འབར་བའི་མར་མེ་འདི། །ཡིད་དྭངས་བས་འབུལ་གྱི་བཞེས་སུ་གསོལ། །ༀ་ཤྲཱི་མཱན་གུ་རུ་དེ་ཝ་པཉྩ་ཌཱ་ཀ་ིནཱི་ས་པ་རི་ཝཱ་ར་བཛྲ་ཨ་ལོ་ཀེ་པྲ་ཏིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། རྗེ་བླ་མ་ཡི་དམ་ཆོས་སྐྱོང་དང་། །ལྷ་མཁའ་འགྲོ་ལྔ་ཡི་སྤྱན་སྔ་རུ། །རྫས་དྲི་མཆོག་སྦྱར་བའི་བྱུག་པ་འདི། །ཡིད་དྭངས་བས་འབུལ་
གྱི་བཞེས་སུ་གསོལ། །ༀ་ཤྲཱི་མཱན་གུ་རུ་དེ་ཝ་པཉྩ་ཌཱ་ཀི་ནཱི་ས་པ་རི་ཝཱ་ར་བཛྲ་གནྡྷེ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། རྗེ་བླ་མ་ཡི་དམ་ཆོས་སྐྱོང་དང་། །ལྷ་མཁའ་འགྲོ་ལྔ་ཡི་སྤྱན་སྔ་རུ། །བཅུད་རོ་བརྒྱ་ལྡན་པའི་ལྷ་བཤོས་འདི། །ཡིད་དྭངས་བས་འབུལ་གྱི་བཞེས་སུ་གསོལ། །ༀ་ཤྲཱི་མཱན་གུ་རུ་དེ་ཝ་པཉྩ་ཌཱ་ནཱི་ས་པ་རི་ཝཱ་ར་བཛྲ་ནཻ་ཝིདྱ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། རྗེ་བླ་མ་ཡི་དམ་ཆོས་སྐྱོང་དང་། །ལྷ་མཁའ་འགྲོ་ལྔ་ཡི་སྤྱན་སྔ་རུ། །གླུ་སྒྲ་དབྱངས་ལྡན་པའི་རོལ་མོ་འདི། །ཡིད་དྭངས་བས་འབུལ་གྱི་བཞེས་སུ་གསོལ། །ༀ་ཤྲཱི་མཱན་གུ་རུ་དེ་ཝ་པཉྩ་ཌཱ་ཀི་ནཱི་ས་པ་རི་ཝཱ་ར་བཛྲ་ཤབྡ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། འཁོར་ལོ་ཡིད་བཞིན་ནོར་བུ་དང་། །རབ་མཛེས་བཙུན་མོ་མི་བདག་དང་། །དཔལ་གྱི་གླང་པོ་ཅང་ཤེས་རྟ། །དམག་དཔོན་རིན་ཆེན་སྣ་བདུན་པོ། །དངོས་གྲུབ་རྣམ་གཉིས་སྩོལ་བྱའི་ཕྱིར། །དབང་ཕྱུག་བཞད་པ་རྡོ་རྗེ་དང་། །ལྷ་སྨན་འཁོར་དང་བཅས་ལ་འབུལ། །དགྱེས་པར་བཞེས་ནས་བདག་ལ་དགོངས། །ༀ་ཤྲཱི་མཱན་གུ་རུ་དེ་ཝ་པཉྩ་ཌཱ་ཀི་ནཱི་ས་པ་རི་ཝཱ་ར་སཔྟ་རཏྣ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། རིན་ཆེན་གདུགས་དང་གསེར་ཉ་དང་། །གཏེར་ཆེན་བུམ་པ་པདྨ་བཟང་། །དུང་དཀར་གཡས་འཁྱིལ་དཔལ་བེའུ། །
མཆོག་གི་རྒྱལ་མཚན་འཁོར་ལོ་བཟང་། །དངོས་གྲུབ་རྣམ་གཉིས་སྩོལ་བྱའི་ཕྱིར། །དབང་ཕྱུག་བཞད་པ་རྡོ་རྗེ་དང་། །ལྷ་སྨན་འཁོར་དང་བཅས་ལ་འབུལ། །དགྱེས་པར་བཞེས་ནས་བདག་ལ་དགོངས། །ༀ་ཤྲཱི་མཱན་གུ་རུ་དེ་ཝ་པཉྩ་ཌཱ་ཀི་ནཱི་ས་པ་རི་ཝཱ་ར་ཨཥྟ་མངྒ་ལཾ་ཧེ་ཏུ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། ཡུངས་ཀར་དུཪྺ་བིལ་བ་དང་། །གི་ཝང་ལི་ཁྲི་ཞོ་མཆོག་དང་། །མེ་ལོང་རྣམ་དག་དུང་དཀར་རྣམས། །ལྷ་མོ་བརྒྱད་ཀྱིས་ཕུལ་བ་ལྟར། །དངོས་གྲུབ་རྣམ་གཉིས་སྩོལ་བྱའི་ཕྱིར། །དབང་ཕྱུག་བཞད་པ་རྡོ་རྗེ་དང་། །ལྷ་སྨན་འཁོར་དང་བཅས་ལ་འབུལ། །དགྱེས་པར་བཞེས་ནས་བདག་ལ་དགོངས། །ༀ་ཤྲཱི་མཱན་གུ་རུ་དེ་ཝ་པཉྩ་ཌཱ་ཀི་ནཱི་ས་པ་རི་ཝཱ་ར་ཨཥྚ་མངྒ་ལཾ་དྲ་བྱ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། ཞེས་ཕྱི་མཆོད་དང་། ཨ་ལས་བདེ་སྐྱོང་ཀ་པཱ་ལ། །ཤ་ལྔ་བདུད་རྩི་ལྔས་གཏམས་པ། །ཡི་གེ་འབྲུ་ལྔས་བྱིན་བརླབས་ནས། །ཡེ་ཤེས་བདུད་རྩི་མཆོག་སྦྱར་བ། །དངོས་གྲུབ་རྣམ་གཉིས་སྩོལ་བྱའི་ཕྱིར། །དབང་ཕྱུག་བཞད་པ་རྡོ་རྗེ་དང་། །ལྷ་སྨན་འཁོར་དང་བཅས་ལ་འབུལ། །སྐུ་ལུས་རྒྱས་ཕྱིར་བཞེས་སུ་གསོལ། །ༀ་ཤྲཱི་མཱན་གུ་རུ་དེ་ཝ་པཉྩ་ཌཱ་ཀི་ནཱི་ས་པ་རི་ཝཱ་ར་པཉྩ་ཨ་མྲྀ་ཏ་ཁ་རཾ་ཁཱ་ཧི། ཞེས་ནང་མཆོད་ནི། ཡབ་ཡུམ་གཉིས་
མེད་མཁའ་རྡོ་རྗེ། །སྙོམས་འཇུག་དགའ་བ་བཞི་ཡི་དངོས། །དཀར་དམར་བྱང་ཆུབ་སེམས་ཀྱི་རྫས། །རོ་མཉམ་བདེ་ཆེན་མཆོད་པ་འདི། །དངོས་གྲུབ་རྣམ་གཉིས་སྩོལ་བྱའི་ཕྱིར། །དབང་ཕྱུག་བཞད་པ་རྡོ་རྗེ་དང་། །ལྷ་སྨན་འཁོར་དང་བཅས་ལ་འབུལ། །བདེ་ཆེན་མཆོག་གིས་མཉེས་གྱུར་ཅིག །ༀ་ཤྲཱི་མཱན་གུ་རུ་དྷཱེ་ཝ་པཉྩ་ཌཱ་ནཱི་ས་པཱ་རི་ཝཱ་ར་བཛྲ་མ་ཏཱྃ་གཱི་ཨཱཿཧཱུྃ་སྭཱ་ཧཱ། །ཞེས་གསང་མཆོད་དང་། སྣོད་ཀྱི་འཇིག་རྟེན་བས་ཀྱང་རྒྱ་ཆེ་ཞིང་། །རི་རབ་ལྷུན་པོ་བས་ཀྱང་བརྗིད་ཆགས་པ། །ཉི་ཟླ་ཟུང་གཅིག་ལས་ཀྱང་འོད་འབར་བ། །བདུད་རྩིའི་རྒྱ་མཚོར་གྱུར་བའི་གཏོར་མ་འདི། །བཞད་པ་རྡོ་རྗེ་ཡི་དམ་ཆོས་སྐྱོང་ཚོགས། །ལྷ་སྨན་འཁོར་བཅས་ལྗགས་ཀྱི་པདྨ་ནི། །རྡོ་རྗེ་རྩེ་གསུམ་སྦུ་གུས་དགྱེས་བར་དྲོངས། །ༀ་ཨ་ཀ་རོ་མུ་ཁཾ་སརྦ་དྷརྨཱ་ཎཱཾ་ཨདྱ་ནུཏྤནྣཱ་ཏྭ་ཏ་ༀ་ཨཱཿཧཱུྃ་ཕཊ་སྭཱ་ཧཱ། ༀ་ཤྲཱི་མཱན་གུ་རུ་དེ་ཝ་བཛྲ་ས་མ་ཡ་སརྦ་པཉྩ་ཌཱ་ཀི་ནཱི་ཨི་དཾ་བ་ལིང་གྲྀཧྣ་ཁ་ཁ་ཁཱ་ཧི་ཁཱ་ཧི། མ་མ་སརྦ་ཀརྨ་སིདྡྷི་མེ་པྲ་ཡཙྪ་ཧཱུྃ། ཞེས་གཏོར་མ་ཕུལ། ཧཱུྃ་ལྷ་སྨན་བཀྲ་ཤིས་ཚེ་རིང་མ། །ཁྱོད་ཀྱི་ཆོ་དང་འབྲང་སྨོས་པ། །ཡབ་ནི་ལྷོ་ལྷ་དེ་བོ་ཡིན། །ཡུམ་ནི་འབྲང་ཡུལ་སྨན་གཅིག་མ། མིང་པོ་བདུན་ལ་སྲིང་མོ་ལྔ། །ལྔ་ཚིགས་དབུས་ཀྱི་གཙོ་མོ་སྟེ། །ཁྱོད་ནི་གཙང་རིགས་ལྷ་ཡི་སྲས། །མཚར་སྡུག་འོད་དུ་ཀྱི་
ལི་ལི། །ཞལ་བཟང་ཟླ་བ་ཉ་བ་འདྲ། །ལྷ་མོ་རྣམས་ཀྱང་ཟིལ་གྱིས་གནོན། །མགྲིན་པ་གཅིག་ལ་གླུ་སྒྲ་སྟོང་། །ཚངས་པའི་དབྱངས་ཀྱང་ཟིལ་གྱིས་གནོན། །དབུ་སྐྲ་ཉག་མ་རེ་རེ་ལ། །གསེར་གཡུའི་ལན་ཚར་སྟོང་སྟོང་ལྡན། །ན་བཟའ་དར་དཀར་གོ་ཟུ་གསོལ། །རིན་ཆེན་དུ་མས་སྐུ་ལུས་བརྒྱན། །ཉིན་གསུམ་གངས་དཀར་སྟོད་ལ་བཞུགས། །སྨན་མོ་རྣམས་དང་ལྷན་ཅིག་རོལ། །མཚན་གསུམ་རྒྱ་གར་ཡུལ་དུ་བཞུགས། །རབ་ཏུ་འཇིགས་པའི་དུར་ཁྲོད་དུ། །མཁའ་འགྲོ་རྣམས་དང་ཚོགས་འཁོར་རོལ། །བཀའ་ཉན་སྤྲུལ་པའི་ཕོ་ཉ་སོགས། །མ་ལུས་འཁོར་དང་བཅས་པ་རྣམས། །འདིར་བྱོན་བདག་གི་ཕྲིན་ལས་མཛོད། །ཧཱུྃ་ཁྱོད་ལ་མཆོད་པ་འབུལ་བ་ནི། །བདུད་རྩི་སྨན་གྱི་རྩི་ཕུད་དང་། །མེ་ཏོག་ཡིད་འོང་མཛེས་པའི་ཚལ། །སྤོས་དྲི་ཕུན་སུམ་ཚོགས་པ་དང་། །སྒྲོན་མེ་དྲི་མཆོག་བཤོས་གཙང་དང་། །སྒྲ་སྙན་གསང་བའི་རྔེའུ་ཆུང་རྣམས། །ཐུགས་བརྩེར་དགོངས་ཤིང་བཞེས་ནས་ཀྱང་། །བྱིན་རླབས་དངོས་གྲུབ་བསྩལ་དུ་གསོལ། །སྔོན་ཚེ་དབེན་གནས་ཡོངས་རྫོང་དུ། །དཔལ་ལྡན་བཞད་པ་རྡོ་རྗེ་ལ། །རང་རྟགས་སྲོག་གི་སྙིང་པོ་ཕུལ། །བཀའ་འབངས་བགྱིད་པར་རྩིས་ལ་ཕབ། །ཆོས་བརྒྱུད་སྤེལ་བར་གཡར་དམ་བཅས། །
དེ་རིང་སྨན་བཙུན་རྒྱལ་མོ་ལ། །མིང་པོས་གསོལ་བ་འདེབས་པ་ནི། །སྲིད་སྲུང་རིགས་རྒྱུད་སྤེལ་བ་དང་། །སྣང་གསལ་པྲ་ཡི་དངོས་གྲུབ་དང་། །རྨ་གཡང་ཟས་ཀྱི་དངོས་གྲུབ་དང་། །བང་མཛོད་ནོར་གྱི་དངོས་གྲུབ་དང་། །རྐང་བཞི་ཕྱུགས་ཀྱི་དངོས་གྲུབ་དང་། །གཞན་ཡང་ཕྱི་ནང་གསང་བ་ཡི། །དངོས་གྲུབ་མ་ལུས་བདག་ལ་སྩོལ། །ཁྱོད་ལ་གསོལ་བ་འདེབས་པ་ནི། །རྣལ་འབྱོར་ཚེ་བསྲིངས་གཟི་མདངས་སྐྱེད། །ནང་གི་རླུང་སེམས་དབང་དུ་སྡུད། །ཟག་བཅས་ལུས་ཀྱི་བདེ་བ་སྐྱེད། །ཕྱི་ཡི་སྣང་བ་དབང་དུ་སྡུས། །ཕྲིན་ལས་རྣམ་བཞི་འགྲུབ་པར་མཛོད། །བཀྲ་ཤིས་དཔལ་བསྐྱེད་འཁོར་སྐྱོང་ལ། །འགལ་རྐྱེན་ཀུན་སོལ་མཐུན་རྐྱེན་སྒྲུབས། །བསམ་དོན་ཡིད་བཞིན་འགྲུབ་ལ་སོགས། །བཅོལ་པའི་ལས་ཀྱི་འབྲས་བུ་དེ། །མཆིས་པར་མཛོད་ཅིག་ཐུགས་དམ་ཅན། །དེ་ནས་བསྟོད་པ་ནི། ཧཱུྃ་ཆོས་དབྱིངས་སྐྱེ་བ་མེད་པ་ལས། །ཐུགས་རྗེའི་གཟུགས་ཀྱི་སྐུ་སྤྲུལ་ནས། །འགྲོ་བའི་དོན་ལ་བྱོན་པ་ཡི། །རྫུ་འཕྲུལ་སྣ་ཚོགས་སྟོན་མཛད་མ། །གཙོ་མོ་བཀྲ་ཤིས་ཚེ་རིང་མ། །མཁའ་འགྲོའི་དབང་ཕྱུག་ལྔ་ལ་བསྟོད། །མཁའ་འགྲོ་ཆེན་མོ་ལྔ་པོ་ནི། །རེས་འགའ་གངས་དཀར་རྩེ་ལ་བཞུགས། །ལྷ་སྨན་མང་པོའི་འཁོར་གྱིས་བསྐོར། །དཀར་གསུམ་མངར་གསུམ་ཕུད་ལ་རོལ། །དངོས་གྲུབ་ལྔ་པོ་སྟེར་
མཛད་མ། །ལྷ་སྨན་རྒྱལ་མོ་ལྔ་ལ་བསྟོད། །མཁའ་འགྲོ་ཆེན་མོ་ལྔ་པོ་ནི། །རེས་འགའ་དུར་ཁྲོད་བརྒྱད་ན་བཞུགས། །ཞིང་སྐྱོང་མཁའ་འགྲོའི་འཁོར་གྱིས་བསྐོར། །མ་ཧཱ་མཾ་སའི་མཆོད་པ་བཞེས། །མཆོག་དང་ཐུན་མོང་དངོས་གྲུབ་སྟེར། །ཞིང་སྐྱོང་མཁའ་འགྲོ་ལྔ་ལ་བསྟོད། །མཁའ་འགྲོ་ཆེན་མོ་ལྔ་པོ་ནི། །རེས་འགའ་གྲུབ་གནས་རྣམས་ལ་བཞུགས། །བརྟན་མ་བཅུ་གཉིས་འཁོར་གྱིས་བསྐོར། །ཤ་དང་ཆང་གི་ཚོགས་ལ་རོལ། །རྣལ་འབྱོར་སྒྲུབ་པོའི་སྟོངས་གྲོགས་མཛོད། །དམ་ཚིག་ཆེན་མོ་ལྔ་ལ་བསྟོད། །མཁའ་འགྲོ་ཆེན་མོ་ལྔ་པོ་ནི། །རེས་འགའ་ཆོས་མཛོད་གར་གནས་བཞུགས། །དམ་ཅན་སྲུང་མའི་ཚོགས་ཀྱིས་བསྐོར། །ཞལ་ཟས་གཙང་མའི་ཕུད་ལ་རོལ། །སངས་རྒྱས་བསྟན་པའི་བྱ་ར་མཛད། །བསྟན་སྲུང་ཆེན་མོ་ལྔ་ལ་བསྟོད། །མཁའ་འགྲོ་ཆེན་མོ་ལྔ་པོ་ནི། །ཕྱི་ལྟར་སྨན་བཙུན་ཆེན་མོ་ལྔ། །ནང་ལྟར་ཞིང་སྐྱོང་ཆེན་མོ་ལྔ། །གསང་བ་རིགས་ཀྱི་ཡུམ་ཆེན་ལྔ། །དུས་གསུམ་སངས་རྒྱས་བསྐྱེད་པའི་ཡུམ། མཁའ་འགྲོའི་དབང་ཕྱུག་ལྔ་ལ་བསྟོད། །འདིར་གཤེགས་གཏོར་མ་འདི་བཞེས་ཤིག །དཀར་གསུམ་མངར་གསུམ་གཙང་མའི་ཕུད། །ཤ་ཆང་དམ་ཚིག་ཅན་གྱི་རྫས། །མ་ཧཱ་མཾ་སའི་མཆོད་པ་བཞེས། །
སྔར་བཅོལ་བསྒྲུབ་པའི་གཏང་རག་དང་། །ད་བཅོལ་ཕྲིན་ལས་མ་ལུས་པ། །བསྒྲུབ་པའི་གསོལ་འདེབས་བརྟན་པོར་འབུལ། །རྣལ་འབྱོར་བཅོལ་པའི་ཕྲིན་ལས་མཛོད། །ཨོ་རྒྱན་པདྨ་འབྱུང་གནས་དང་། །བཞད་པ་རྡོ་རྗེའི་སྤྱན་སྔ་རུ། །ཐུགས་དམ་ཞལ་བཞེས་དགོངས་མཛོད་ལ། །རྣལ་འབྱོར་བཅོལ་བའི་ཕྲིན་ལས་ཀུན། །ད་ལྟ་ཉིད་དུ་འགྲུབ་པར་མཛོད། །སངས་རྒྱས་བསྟན་པ་རིན་ཆེན་དང་། །རྣལ་འབྱོར་བདག་ཅག་འཁོར་བཅས་ལ། །སྡང་བའི་དགྲ་དང་གནོད་པའི་བགེགས། །ཐར་པའི་བར་དུ་གཅོད་པའི་བདུད། །རྡུལ་ཕྲན་བཞིན་དུ་བརླག་པར་མཛོད། །སངས་རྒྱས་བསྟན་པ་དར་བ་དང་། །རྣལ་བྱོར་བདག་ཅག་ཚེ་རིང་ཞིང་། །ནད་མེད་འབྱོར་པ་རྒྱས་པ་དང་། །སྒྲུབ་པ་མཐའ་རུ་ཕྱིན་པར་ཤོག །བཅུ་བདུན་པ་ཚེ་ཡི་དངོས་གྲུབ་འགུགས་པ་ནི། སྨན་བཙུན་ལྷ་ལྔའི་ཐུགས་ཀ་ནས། །ཚེ་བཅུད་འགུགས་པའི་མགྱོགས་མ་བཞི། །ཕྱོགས་བཅུར་སྤྲོས་པས་བརྟན་གཡོ་ཡི། །ཚེ་བསོད་དཔལ་གཡང་བསྡུས་པར་གྱུར། །དེ་ནས་ཚེ་ཡི་དབང་བསྐུར་བའི་གཟུངས་ལས་འབྱུང་བའི། ཧཱུྃ་ཤར་གྱི་ཕྱོགས་ནས་ཚེ་འགུགས་མ། །རྡོ་རྗེ་ལྷ་མོ་ལྕགས་ཀྱུ་མ། །སྐུ་མདོག་དཀར་ལ་འོད་ཟེར་འཕྲོ། །ཕྱག་མཚན་ཕྱག་ན་ལྕགས་ཀྱུ་བསྣམས། །ཤར་ཕྱོགས་དྲི་ཟའི་ལག་ནས་ཚེ་ཁུག་ཅིག །ལྷོ་ཡི་ཕྱོགས་ནས་ཚེ་འགུགས་མ། །ཆོས་
ཀྱི་ལྷ་མོ་ཞགས་པ་མོ། །སྐུ་མདོག་མཐིང་ཁ་འོད་ཟེར་འཕྲོ། །ཕྱག་མཚན་ཕྱག་ན་ཞགས་པ་བསྣམས། །ལྷོ་ཕྱོགས་གཤིན་རྗེའི་ལག་ནས་ཚེ་ཁུག་ཅིག །ནུབ་ཀྱི་ཕྱོགས་ནས་ཚེ་འགུགས་མ། །ཆོས་ཀྱི་ལྷ་མོ་ལྕགས་སྒྲོག་མ། །སྐུ་མདོག་དམར་ལ་འོད་ཟེར་འཕྲོ། །ཕྱག་མཚན་ཕྱག་ན་ལྕགས་སྒྲོག་བསྣམས། །ནུབ་ཕྱོགས་ཀླུ་གདོན་ལག་ནས་ཚེ་ཁུག་ཅིག །བྱང་གི་ཕྱོགས་ནས་ཚེ་འགུགས་མ། །ལས་ཀྱི་ལྷ་མོ་དྲིལ་དཀྲོལ་མ། །སྐུ་མདོག་ལྗང་ལ་འོད་ཟེར་འཕྲོ། །ཕྱག་མཚན་ཕྱག་ན་དྲིལ་བུ་བསྣམས། །བྱང་ཕྱོགས་གནོད་སྦྱིན་ལག་ནས་ཚེ་ཁུག་ཅིག །ཚེ་བྷྲཱུྃ་གཡུ་བྷྲཱུྃ་བཛྲ་ཨཱ་ཡུ་ུཥེ་སྭཱ་ཧཱ། ས་ཡི་སྙིང་པོ་གསེར་ལ་བསྡུ། །གསེར་ལ་ཚེ་ཡི་རྟེན་མཆིས་སོ། །ཆུ་ཡི་སྙིང་པོ་ཚྭ་ལ་བསྡུ། །ཚྭ་ལ་ཚེ་ཡི་རྟེན་མཆིས་སོ། །ཤིང་ཏོག་སྙིང་པོ་མངར་ལ་བསྡུ། །མངར་ལ་ཚེ་ཡི་རྟེན་མཆིས་སོ། །རྩི་ཐོག་སྙིང་པོ་མར་ལ་བསྡུ། །མར་ལ་ཚེ་ཡི་རྟེན་མཆིས་སོ། །འབྲུ་ཐོག་སྙིང་པོ་ཏིལ་ལ་བསྡུ། །ཏིལ་ལ་ཚེ་ཡི་རྟེན་མཆིས་སོ། །སྲོག་གི་སྙིང་པོ་ཎི་ལ་བསྡུ། །ཎི་ལ་ཚེ་ཡི་རྟེན་མཆིས་སོ། །ཞེས་དང་། དེ་ལྟར་ཚེ་ཡི་དངོས་གྲུབ་འབྱུང་བའི་བཅུད། །རང་གི་སྤྱི་བོར་འོད་དཔག་མེད་པ་ནི། །ལྷུང་བཟེད་ནང་ཞུགས་བདུད་རྩིར་ཁོལ་ཞིང་ལུད། །མི་ལའི་སྐུ་གང་ཞབས་ཀྱི་མཐེ་བོང་གི། །སེན་ཕྲག་
ནས་ཐོན་རང་གི་ཚངས་བུག་ཞུགས། །ལུས་གང་ཚེ་ཡི་དངོས་གྲུབ་ཐོབ་པར་གྱུར། །ༀ་ཨཉྫི་དྷ་རི་པཉྩ་ཌཱ་ཀི་ནི་ཨཱ་ཡུརྫྙཱ་ན་སིདྡྷི་ཧཱུྃ་སྭཱ་ཧཱ། །ཞེས་བཟླ། བཅོ་བརྒྱད་པ་ཕྱྭ་གཡང་འགུགས་པའི་རིམ་པ་ནི། བདག་དང་མདུན་གྱི་ལྷ་ཚོགས་རྣམས་ཀྱི་ཐུགས་ཀ་ནས་འོད་ཟེར་ཕྱོགས་བཅུར་ཞིང་རབ་འབྱམས་ཐམས་ཅད་དང་། ཁྱད་པར་བྱང་ཕྱོགས་ལྕང་ལོ་ཅན་དུ་འཕྲོས་པས། རྒྱལ་བ་ཤཱཀྱའི་དབང་པོ་ལ་སོགས་པའི་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རྣམས་དང་། རྒྱལ་པོ་ཆེན་པོ་རྣམ་ཐོས་སྲས་འཁོར་ཛམ་ལྷ་རྨུགས་འཛིན་ནོར་གྱི་བདག་པོ་ཡབ་ཡུམ་བཙུན་མོ་སྲས་དང་བློན་པོ་གནོད་སྦྱིན་བྱེ་བ་འབུམ་སྡེའི་ཚོགས་ཀྱིས་བསྐོར་བ་རྣམས་སྐད་ཅིག་གིས་སྤྱན་དྲངས་ནས་སྲིད་པ་གསུམ་གྱི་ཕྱྭ་དང་གཡང་གི་དངོས་གྲུབ་ཐམས་ཅད་ཆར་བབས་པ་བཞིན་དུ་བདག་དང་ཡོན་བདག་གནས་ཁང་སྒྲུབ་རྫས་རྣམས་ལ་ཐིམ་པར་གྱུར། །ཅེས་དམིགས་ནས་གསེར་འོད་དམ་པ་ལས་བྱུང་བའི་གཡང་འགུགས་ནི། ཀྱཻ། ཆོས་ཀྱི་རྒྱལ་པོ་བཅོམ་ལྡན་འདས། །ཆོས་ཀུན་རྣམས་ལ་མངའ་མཛད་པ། །ཕྱོགས་བཅུའི་སངས་རྒྱས་སྲས་བཅས་རྣམས། །བཀྲ་ཤིས་སྐྱིད་རྟག་གནས་འདིར་བྱོན། །དར་དཀར་གཡབ་ཅིང་གཡང་དུ་ལེན། །ཐུགས་རྗེའི་བྱིན་རླབས་ཆེན་པོ་ཡིས། །ཕྱྭ་དང་གཡང་དུ་སྐྱབས་སུ་གསོལ། །ཆོས་རྣམས་གང་དག་མེ་ལོང་འདྲ། །རྣམ་རྟོག་བྲལ་བས་
མེ་ལོང་དང་། །མི་སྐྱེ་མི་འགགས་གཟུགས་སྐུ་འཆར། །དྲི་མེད་འཇའ་ཚོན་ཇི་བཞིན་དུ། །ཡང་དག་ཐབས་ཤེས་སྐུ་རུ་གསལ། །གཡང་བརྟན་མི་འགྱུར་རྡོ་རྗེའི་སྐུ། །བཀྲ་ཤིས་གནས་འདིར་གཡང་ལ་བྱོན། །དར་དཀར་གཡབ་ཅིང་གཡང་དུ་ལེན། །བྱིན་རླབས་ཕྱྭ་དང་གཡང་དུ་འདུས། །དགེ་འདུན་བྱང་ཆུབ་ཕྱིར་མི་ལྡོག །མི་རྟོག་རབ་དགའ་ས་ལ་བཞུགས། །གཞན་དོན་མ་རིག་མུན་སེལ་བ། །བཀྲ་ཤིས་སྐྱིད་རྟགས་གཡང་ལ་བྱོན། །དར་དཀར་གཡབ་ཅིང་གཡང་དུ་ལེན། །རྒྱུ་སྦྱོར་ཡོན་གྱི་བདག་པོ་ལ། །གལ་ཏེ་འདི་ལ་བགེགས་ཡོད་ན། །དཀོན་མཆོག་གསུམ་གྱི་བྱིན་རླབས་དང་། །ཁྲོ་བོ་བདུད་རྩི་འཁྱིལ་པ་ཡིས། །མགོ་བོ་ཚལ་པ་བརྒྱར་འགས་ཤིང་། །ལུས་ཀྱང་དུམ་བུ་སྟོང་དུ་འཇིག །ༀ་ཨཱ་བཛྲ་ཀྲོ་དྷ་ཧཱུྃ་ཕཊ། ཆོས་ཀྱི་དབྱིངས་ཀྱི་ཕོ་བྲང་ནས། །ཡུམ་ཆེན་ཤེས་རབ་ཕ་རོལ་ཕྱིན། །ཕྱོགས་བཅུའི་སངས་རྒྱས་སྲས་དང་བཅས། །དར་དཀར་གཡབ་ཅིང་གཡང་དུ་ལེན། །འཁོར་དང་བཅས་པ་འདིར་བྱོན་ལ། །ཡོན་བདག་ཚེ་སྲོག་བསྐྱབ་ཏུ་གསོལ། །འོག་མིན་ཆོས་དབྱིངས་གཞལ་ཡས་ནས། །བཅོམ་ལྡན་རྣམ་པར་སྣང་མཛད་དང་། །ས་བཅུའི་བྱང་ཆུབ་སེམས་དཔའ་རྣམས། །དར་དཀར་གཡབ་ཅིང་གཡང་དུ་ལེན། །འཁོར་དང་བཅས་པ་འདིར་
བྱོན་ལ། །ཡོན་བདག་ཚེ་གཡང་བསྐྱབ་ཏུ་གསོལ། །བྱ་རྒོད་ཕུང་པོའི་རི་བོ་ནས། །བཅོམ་ལྡན་ཤཱཀྱ་ཐུབ་པ་དང་། །ཉན་ཐོས་ཆེན་པོ་མཆོག་བརྒྱད་རྣམས། །དར་དཀར་གཡབ་ཅིང་གཡང་དུ་ལེན། །འཁོར་དང་བཅས་པ་འདིར་བྱོན་ལ། །ཡོན་བདག་ཚེ་གཡང་བསྐྱབ་ཏུ་གསོལ། །སེང་གེ་བསྣོལ་བའི་ཁྲི་སྟེང་དུ། །ཉི་ཟླ་པདྨའི་གདན་སྟེང་ན། །བཅོམ་ལྡན་རྣམ་པར་སྣང་མཛད་ནི། །སྐུ་མདོག་དཀར་ལ་འོད་ཟེར་འཕྲོ། །ཕྱག་ན་གསེར་གྱི་བུམ་པ་བསྣམས། །ཞལ་ནས་གཡང་རབ་དམ་པ་འདོན། །ༀ་ཤྲཱི་བཛྲ་བཻ་རོ་ཙ་ན་རཏྣ་སིདྡྷི་ཧཱུྃ་ཧྲཱིཿཋཱ། དར་དཀར་གཡབ་ཅིང་སྤྱན་འདྲེན་ན། །བདེ་ལྡན་སྐྱིད་པའི་གནས་འདི་རུ། །འཁོར་དང་བཅས་པ་འདིར་བྱོན་ལ། །ཡོན་བདག་ཚེ་གཡང་བསྐྱབ་ཏུ་གསོལ། །འདི་ནས་ཤར་ཕྱོགས་ཞིང་ཁམས་ན། །གླང་ཆེན་བསྣོལ་བའི་ཁྲི་སྟེང་དུ། །ཉི་ཟླ་པདྨའི་གདན་སྟེང་ན། །རྡོ་རྗེ་སེམས་དཔའ་འཁོར་བཅས་ནི། །སྐུ་མདོག་དཀར་གསལ་རྒྱན་དང་ལྡན། །ཕྱག་ན་གསེར་གྱི་ལྷུང་བཟེད་བསྣམས། །ཞལ་ནས་གཡང་རབ་དམ་པ་འདོན། །ༀ་བཛྲ་རཏྣ་ཧཱུྃ་ཧྲཱིཿཋཱ། དར་དཀར་གཡབ་ཅིང་སྤྱན་འདྲེན་ན། །བདེ་ལྡན་སྐྱིད་པའི་གནས་འདི་རུ། །འཁོར་དང་བཅས་པ་འདིར་བྱོན་ལ། །ཡོན་བདག་ཚེ་གཡང་བསྐྱབ་ཏུ་གསོལ། །འདི་ནས་ལྷོ་ཕྱོགས་
རོལ་པ་ན། །རིན་ཆེན་འབར་བའི་གཞལ་ཡས་ན། །རྟ་མཆོག་བསྣོལ་བའི་ཁྲི་སྟེང་དུ། །ཉི་ཟླ་པདྨའི་གདན་སྟེང་ན། །བཅོམ་ལྡན་རིན་ཆེན་འབྱུང་ལྡན་ནི། །སྐུ་མདོག་གསེར་གྱི་ལྷུན་པོ་འདྲ། །ཕྱག་ན་གཡང་གི་དུང་ཞལ་བསྣམས། །ཞལ་ནས་གཡང་རབ་དམ་པ་འདོན། །ༀ་བཛྲ་ཨཱ་བཛྲ་རཏྣ་སརྦ་བྷ་ཝ་ཧཱུྃ་ཧྲཱིཿཋཱ། དར་དཀར་གཡབ་ཅིང་སྤྱན་འདྲེན་ན། །བཀྲ་ཤིས་སྐྱིད་པའི་གནས་འདི་རུ། །འཁོར་དང་བཅས་པ་འདིར་བྱོན་ལ། །བདག་ཅག་ཚེ་གཡང་བསྐྱབ་ཏུ་གསོལ། །འདི་ནས་ནུབ་ཀྱི་ཕྱོགས་རོལ་ན། །རྨ་བྱ་བསྣོལ་བའི་ཁྲི་སྟེང་དུ། །ཉི་ཟླ་པདྨའི་གདན་སྟེངས་ན། །བཅོམ་ལྡན་མགོན་པོ་ཚེ་དཔག་མེད། །ཚེ་ལ་དབང་བའི་ལྷ་དང་བཅས། །སྐུ་མདོག་དམར་པོ་འོད་ཟེར་འབར། །ཕྱག་ན་ཚེ་ཡི་བུམ་པ་བསྣམས། །ཞལ་ནས་གཡང་རབ་དམ་པ་འདོན། །ༀ་ཨཱཿབཛྲ་ཨ་མྲྀ་ཏ་པདྨ་སཾ་བྷ་ཝ་ཧཱུྃ་ཧྲཱི་ཋཱཿ། དར་དཀར་གཡབ་ཅིང་སྤྱན་འདྲེན་ན། །བཀྲ་ཤིས་སྐྱིད་པའི་གནས་འདི་རུ། །འཁོར་དང་བཅས་པ་འདིར་བྱོན་ལ། །བདག་ཅག་ཚེ་གཡང་བསྐྱབ་ཏུ་གསོལ། །བྱང་གི་ཕྱོགས་ན་བཞུགས་པ་ནི། །ཤང་ཤང་བསྣོལ་བའི་ཁྲི་སྟེང་ན། །ཉི་ཟླ་པདྨའི་གདན་སྟེང་ན། །བཅོམ་ལྡན་དོན་ཡོད་གྲུབ་པ་ནི། །ལྗང་ཁུ་ཨཱིནྡྲ་ནཱི་ལའི་མདོག །ཕྲིན་ལས་གྲུབ་པའི་ལྷ་དང་བཅས། །
ཕྱག་ན་གཡུ་ཡི་ལྷུང་བཟེད་ནི། །རིན་ཆེན་གཡང་གིས་གང་བ་བསྣམས། །ཞལ་ནས་གཡང་རབ་དམ་པ་འདོན། །ༀ་ཨཱཿཨ་མོ་གྷ་ཀརྨྨ་སིདྡྷི་སརྦ་ཛཿཧཱུྃ་ཧྲཱི་ཋཱ། དར་དཀར་གཡབ་ཅིང་སྤྱན་འདྲེན་ན། །བཀྲ་ཤིས་སྐྱིད་པའི་གནས་འདི་རུ། །འཁོར་དང་བཅས་པ་འདིར་བྱོན་ལ། །བདག་ཅག་ཚེ་གཡང་བསྐྱབ་ཏུ་གསོལ། །དབུས་ཀྱི་གཙོ་ལ་བཞུགས་པ་ནི། །གཙུག་ཏོར་དཀར་མོ་ལྷ་མོ་ནི། །སྐུ་མདོག་དཀར་མོ་གངས་རི་འདྲ། །དབུ་སྟོང་སྤྱན་གྱིས་ཀུན་ཏུ་གཟིགས། །ཕྱག་མཚན་རྣམ་གྲངས་སྟོང་དང་ལྡན། །ཐུགས་རྗེ་འགྲོ་བ་ཀུན་ལ་སྙོམས། །མི་དང་ནོར་གྱི་བདག་པོ་སྟེ། །དར་དཀར་གཡབ་ཅིང་སྤྱན་འདྲེན་ན། །བཀྲ་ཤིས་སྐྱིད་རྟག་གནས་འདི་རུ། །འཁོར་དང་བཅས་པ་འདིར་བྱོན་ལ། །ཡོན་བདག་ཚེ་གཡང་བསྐྱབ་ཏུ་གསོལ། །ཤར་གྱི་ཕྱོགས་ན་བཞུགས་པ་ནི། །རྡོ་རྗེ་གཙུག་ཏོར་ལྷ་མོ་སྟེ། །ཕྱག་ན་རྡོ་རྗེ་རྩེ་ལྔ་བསྣམས། །གཡོན་ན་གཡུ་ཡི་དྲིལ་བུ་གསིལ། །བདེ་ལྡན་སྐྱིད་པའི་གནས་འདི་རུ། །དར་དཀར་གཡབ་ཅིང་སྤྱན་འདྲེན་ན། །བདག་ཅག་ཚེ་གཡང་བསྐྱབ་ཏུ་གསོལ། །ལྷོ་ཡི་ཕྱོགས་ན་བཞུགས་པ་ནི། །རིན་ཆེན་གཙུག་ཏོར་ལྷ་མོ་ཆེ། །ཕྱག་ན་ཡིད་བཞིན་ནོར་བུ་བསྣམས། །གསེར་གྱི་དྲིལ་བུ་གསུང་སྙན་སྒྲོག །མི་གཡང་སྡུད་པའི་བདག་མོ་སྟེ། །
དར་དཀར་གཡབ་ཅིང་སྤྱན་འདྲེན་ན། །བཀྲ་ཤིས་སྐྱིད་པའི་གནས་འདི་རུ། །འཁོར་དང་བཅས་པ་འདིར་བྱོན་ལ། །བདག་ཅག་མི་གཡང་བསྐྱབ་ཏུ་གསོལ། །ནུབ་ཀྱི་ཕྱོགས་ན་བཞུགས་པ་ནི། །པདྨ་གཙུག་ཏོར་ལྷ་མོ་སྟེ། །ཕྱག་ན་པདྨ་འདབ་བརྒྱད་བསྣམས། །གཡོན་ན་གཡང་གི་ཞགས་པ་བསྣམས། །ཕྱུག་གཡང་སྡུད་པའི་བདག་མོ་སྟེ། །དར་དཀར་གཡབ་ཅིང་སྤྱན་འདྲེན་ན། །བཀྲ་ཤིས་སྐྱིད་པའི་གནས་འདི་རུ། །འཁོར་དང་བཅས་པ་འདིར་བྱོན་ལ། །ཡོན་བདག་ཕྱུག་གཡང་བསྐྱབ་ཏུ་གསོལ། །བྱང་གི་ཕྱོགས་ན་བཞུགས་པ་ནི། །ལས་ཀྱི་གཙུག་ཏོར་ལྷ་མོ་ཆེ། །ཕྱག་ན་རྡོ་རྗེ་རྒྱ་གྲམ་བསྣམས། །གཡོན་པ་འབྲས་ཀྱི་སྙེ་མ་འཛིན། །ལོ་གཡང་སྡུད་པའི་བདག་མོ་སྟེ། །དར་དཀར་གཡབ་ཅིང་སྤྱན་འདྲེན་ན། །བཀྲ་ཤིས་སྐྱིད་པའི་གནས་འདི་རུ། །འཁོར་དང་བཅས་པ་འདིར་བྱོན་ལ། །བདག་ཅག་ལོ་གཡང་བསྐྱབ་ཏུ་གསོལ། །གྲྭ་ཡི་ཕྱོགས་ནི་ཀུན་ཏུ་ཡང་། །རིགས་ཀྱི་ཡུམ་དང་གསང་བའི་ཡུམ། །དགོས་པ་རྣམས་ནི་སྟེར་བ་དང་། །ལོ་ཙཱ་དང་ནི་མ་མ་ཀཱི། །དཀར་མོ་སྒྲོལ་མ་ལ་སོགས་རྣམས། །དར་དཀར་གཡབ་ཅིང་སྤྱན་འདྲེན་ན། །དུམ་བུ་བཞི་ལ་གཡང་རྟེན་གསོལ། །ལྷ་ཡི་དབང་པོ་བརྒྱ་བྱིན་ཡང་། །ལྷ་རྣམས་ཀུན་ལ་
དབང་བསྒྱུར་ཞིང་། །ཕ་རོལ་ཆོས་ཀྱི་བགྲོ་གླེང་མཛད། །ལྷ་བྲན་མང་པོར་སྒྲ་སྒྲོག་ཅིང་། །བཀྲ་ཤིས་སྐྱིད་པའི་གནས་འདི་རུ། །ཡིད་བཞིན་ནོར་བུ་གཡང་དུ་བཏགས། །གཡས་པས་ལྷ་ཡི་ཕོ་བྲང་དུ། །བཀྲ་ཤིས་གཡང་རྣམས་བརྟན་པ་ཡི། །དོན་གྲུབ་ལྷ་མོ་ཕྲིན་ལས་ཆུ། །ལྕགས་ཀྱུ་ཞགས་པ་ལྕགས་སྒྲོག་དྲིལ། །དར་དཀར་གཡབ་ཅིང་སྤྱན་འདྲེན་ན། །གནས་འདིར་བསྲུང་བའི་ལས་མཛོད་ཅིང་། །དེ་རིང་ཡོན་བདག་འཁོར་བཅས་ལ། །མི་ཡི་ཚེ་དང་ནོར་གྱི་གཡང་། །ཟས་ཀྱི་བཅུད་དང་སྐོམ་གྱི་བཅུད། །རྟ་ཕྱུགས་སྲོག་ཆགས་ཀུན་གྱི་གཡང་། །མི་རྣམས་ཀུན་ལ་བསྐྱབ་ཏུ་གསོལ། །ཁྱེད་ཅག་ཀུན་ལ་བདེ་ལེགས་ཤོག །དེ་དག་སྡིག་པར་མ་གྱུར་ཅིག །ཉི་མ་ཐམས་ཅད་དགེ་བ་ཡིན། །རྒྱུ་སྐར་ཐམས་ཅད་བཟང་པོ་ཡིན། །སངས་རྒྱས་ཐམས་ཅད་རྫུ་འཕྲུལ་ཆེ། །དགྲ་བཅོམ་ཐམས་ཅད་ཟག་པ་ཟད། །བདེན་པའི་བདེན་ཚིག་འདི་བརྗོད་པས། །བདག་ཅག་རྣམས་ལ་བདེ་ལེགས་ཤོག །བཅུ་དགུ་པ་གསོལ་ཀ་བྱ་བ་ནི། འབྲུ་སྨན་རིན་ཆེན་ཟས་སྣ་ཚོགས། ཆང་ཕུད་བཟང་པོ་དང་སྦྱར་བས་མཆོད་ཅིང་འདི་སྐད་དུ། ཧཱུྃ་རྡོ་རྗེ་མི་འགྱུར་དཔལ་གྱི་ཡུམ། །སྐུ་མདོག་དཀར་མོ་གཞོན་ཚུལ་ཅན། །ཕྱག་གཡས་གསེར་གྱི་རྡོ་རྗེ་བསྣམས། །གཡོན་པས་ཚེ་ཡི་བུམ་པ་འཛིན། །བུམ་པའི་སྟེང་ན་དཔལ་བེའུ་
དང་། །གཡུ་དྲུང་རིན་ཆེན་འཁྱིལ་བས་བརྒྱན། །ལྷབ་ལྷུབ་ན་བཟའི་རྒྱན་དང་ལྡན། །སིལ་སྙན་རོལ་མོའི་སྒྲ་དང་བཅས། །རིན་ཆེན་དུ་མས་མཛེས་པར་བརྒྱན། །བཀྲ་ཤིས་ཚེ་ཡི་གཙོ་མོ་སྟེ། །ཆིབས་སུ་སེང་གེ་དཀར་མོ་ཆིབས། །གངས་དཀར་སྟོད་ན་བཞུགས་པ་མོ། །མཆོད་གཏོར་འདི་བཞེས་དངོས་གྲུབ་སྩོལ། །སྲིད་སྲུང་རིགས་རྒྱུད་འཕེལ་བའི་དངོས་གྲུབ་སྩོལ། །མཆོད་དོ་གཙང་མའི་ཕུད་ཀྱིས་མཆོད། །ལྷ་མོ་མཐིང་གི་ཞལ་བཟང་མ། །རྡོ་རྗེ་ཁྲོས་མ་ཞེས་སུ་གྲགས། །སྐུ་མདོག་སྔོ་བསངས་འཚེར་བག་ཅན། །ཆིབས་སུ་རྐྱང་བུ་ཁ་དཀར་ཆིབས། །ཕྱག་གཡས་དངུལ་དཀར་མེ་ལོང་བསྣབས། །གཡོན་པས་ལྷ་ཡི་བ་དན་ཕྱར། །སྐུ་ལ་དར་དཀར་ན་བཟའ་གསོལ། །སིལ་སྙན་རོལ་མོའི་སྒྲ་དང་བཅས། །མཆོད་གཏོར་འདི་བཞེས་དངོས་གྲུབ་སྩོལ། །སྣང་གསལ་བདེན་མཐོང་པྲ་ཡི་དངོས་གྲུབ་སྩོལ། །མཆོད་དོ་གཙང་མའི་ཕུད་ཀྱིས་མཆོད། །ལྷ་མོ་མི་གཡོ་བློ་བཟང་མ། །གསང་མཚན་རྡོ་རྗེ་བཞད་པ་མོ། །སྐུ་མདོག་སེར་མོ་གསེར་གྱི་མདོག །ཆིབས་སུ་རྒྱ་སྟག་ཁྲ་བོ་ཆིབས། །ཕྱག་གཡས་རིན་ཆེན་སྡེར་བཟང་ནང་། །ལྷ་ཡི་ཞལ་ཟས་སྣ་ཚོགས་བསྣམས། །གཡོན་པས་ནེའུ་ལེའི་རྐྱལ་བ་འཛིན། །སྒྲུབ་པ་པོ་ཡི་གྲོགས་མཛོད་ཅིག །མཆོད་གཏོར་འདི་
བཞེས་དངོས་གྲུབ་སྩོལ། །རྨ་གཡང་རོ་མཆོག་ཟས་ཀྱི་དངོས་གྲུབ་སྩོལ། །མཆོད་དོ་གཙང་མའི་ཕུད་ཀྱི་མཆོད། །ལྷ་མོ་ཅོད་པན་མགྲིན་བཟང་མ། །རྡོ་རྗེ་དཔལ་མོ་ལོངས་སྤྱོད་ཡུམ། །སྐུ་མདོག་དམར་གསལ་མདངས་དང་ལྡན། །ཆིབས་སུ་ཤ་བ་ཡུ་མོ་ཆིབས། །ཕྱག་གཡས་ཡིད་བཞིན་ནོར་བུ་དང་། །ཕྱག་གཡོན་རིན་ཆེན་སྒྲོམ་བུ་བསྣམས། །སྣང་སྲིད་ཐམས་ཅད་དབང་བསྡུས་ལ། །རྣལ་འབྱོར་བདག་གི་ཕྲིན་ལས་སྒྲུབས། །མཆོད་གཏོར་འདི་བཞེས་དངོས་གྲུབ་སྩོལ། །བང་མཛོད་འབྲུ་ནོར་འཕེལ་བའི་དངོས་གྲུབ་སྩོལ། །མཆོད་དོ་གཙང་མའི་ཕུད་ཀྱིས་མཆོད། །ལྷ་མོ་གཏད་དཀར་འགྲོ་བཟང་མ། །གསང་མཚན་རྡོ་རྗེ་གར་མཁན་མོ། །སྐུ་མདོག་སྔོ་ལྗང་མདངས་དང་ལྡན། །ཆིབས་སུ་གཡུ་འབྲུག་སྔོན་མོ་ཆིབས། །ཕྱག་གཡས་རྩ་མཆོག་དུཪྺཱ་དང་། །གཡོན་པས་སྦྲུལ་གྱི་ཞགས་པ་བསྣམས། །ཕྲིན་ལས་ཐོགས་པ་མེད་པ་ཡི། །མཐུ་དང་ནུས་པ་འདིར་སྟོན་ཅིག །མཆོད་གཏོར་འདི་བཞེས་དངོས་གྲུབ་སྩོལ། །རྐང་བཞི་རྟ་ཕྱུགས་འཕེལ་བའི་དངོས་གྲུབ་སྩོལ། །མཆོད་དོ་གཙང་མའི་ཕུད་ཀྱིས་མཆོད། །ཉི་ཤུ་པ་དྲག་པོའི་ཕྲིན་ལས་བཅོལ་བར་འདོད་ན། དམར་གཏོར་གྲུ་གསུམ་ཤ་ཆང་གིས་བརྒྱན་པ་བཤམས། ༀ་ཨ་ཀཱ་རོ་ལན་གསུམ་བརྗོད་པས་བྱིན་བརླབས་ནས། ཧཱུྃ་རྡོ་རྗེ་མཁའ་འགྲོ་ཁྱེད་རྣམས་ནི། །ཡེ་ཤེས་
མཁའ་འགྲོ་ཡིན་མོད་ཀྱང་། །སངས་རྒྱས་བསྟན་པ་བསྲུང་བའི་ཕྱིར། །ཤ་ཟ་མཁའ་འགྲོའི་ཚུལ་སྟོན་མ། །དམར་ཆེན་གཏོར་མ་འདི་བཞེས་ལ། །ཞིང་བཅུ་སྒྲོལ་བའི་ལས་མཛོད་ཅིག །ཆོས་ཁྲིམས་བསྟན་པ་སྔ་མ་ལ། །རྡོ་རྗེ་འཆང་དང་ཤཱཀ་ཐུབ་ཀྱིས། །སྤྱན་སྔར་ཁས་བླངས་དམ་བཅས་བཞིན། །སངས་རྒྱས་བསྟན་པ་ཁྱོད་ཀྱིས་སྲུངས། །ཆོས་ཁྲིམས་བསྟན་པ་བར་མ་ལ། །གདོང་དམར་བོད་ཀྱི་རྒྱལ་པོ་ཡིས། །མཐའ་འཁོབ་མུན་པའི་སྨག་རུམ་དུ། །དམ་པ་ཆོས་ཀྱི་ཁྲིམས་ཀྱང་བཙུགས། །མཁན་སློབ་བཅས་པ་སྤྱན་དྲངས་ཚེ། །ཁྱེད་ཅག་རྣམས་ཀྱིས་མ་བཟོད་ནས། །གུང་ཐང་ཁ་ལ་རོང་སྒོ་རུ། །སློབ་དཔོན་པདྨ་འབྱུང་གནས་ལ། །དངོས་སུ་ཐོ་འཚམས་བྱས་པའི་ཚེ། །ཟིལ་གནོན་དམ་ལ་བཏགས་པ་ཡི། །ཁས་བླངས་དམ་བཅས་འདོར་རམ་ཅི། །མ་གཡེལ་མ་གཡེལ་མཐུ་རྩལ་ཅན། །ཆོས་ཁྲིམས་བསྟན་པ་ཕྱི་མ་ལ། །ཆུ་བར་དཔལ་གྱི་ཕོ་བྲང་དུ། །དབང་ཕྱུག་བཞད་པ་རྡོ་རྗེ་ལ། །ཏིང་འཛིན་དྲོད་ཉུལ་བྱས་པའི་ཚེ། །མི་འཇིགས་སེངྒེའི་ང་རོ་ཡིས། །བདེན་ཚིག་ཆོས་ཀྱི་འཇམ་ཆར་ཕབ། །དད་པའི་མྱུ་གུ་སྐྱེས་པའི་ཚེ། །བཀའ་སྲུང་མཁའ་འགྲོར་དམ་བཅས་ནས། །ཆོས་བརྒྱུད་སྤེལ་བར་གཡར་དམ་བཅས། །དམ་ཚིག་ཉམས་ན་དམྱལ་བར་འགྲོ། །དེ་བས་དཔལ་ལྡན་རྡོ་རྗེ་འཛིན། །བཞད་པ་རྡོ་རྗེའི་བཀའ་བཞིན་དུ། །བཀའ་སྲུང་བཀའ་ཡི་བྱ་ར་མཛོད། །ཕོ་བྲང་གངས་ཀྱི་གཡོན་མགུལ་དུ། །སྟོན་ཟླ་ར་བའི་ཡར་ངོ་ལ། །བྲོ་
འཚལ་འགུམ་དུ་ཉེ་བའི་ཚེ། །འཆི་བདག་ཆད་པ་སུ་ཡིས་བཟློག །རང་བྱུང་སྒྲུབ་པའི་དབེན་གནས་སུ། །ཀུན་མཁྱེན་ཡེ་ཤེས་ཕུང་པོ་ཅན། །ཐ་མར་འབྱུང་བ་རྒྱུ་ཡི་གཞི། །སྨོན་འཇུག་རྣམ་གཉིས་སུ་ཡིས་བསྐྱེད། །ཡི་དམ་ལྷ་དང་སུ་ཡིས་སྤྲད། །ཐུགས་ཀྱི་ངོ་བོ་སུ་ཡིས་གནང་། །དེ་ཀུན་མཛད་པའི་བཀའ་དྲིན་ཅན། །སྤྱི་གཙུག་རྒྱན་དུ་བཞུགས་པ་དེ། །བཞད་པ་རྡོ་རྗེ་མ་ལགས་སམ། །དེ་ཡི་བཀའ་འབངས་བདག་ཅག་ཀྱང་། །སྙིགས་མའི་དུས་འདིར་མི་སྐྱོབ་ན། །བླ་མའི་བཀའ་བསྩལ་བཅག་གམ་ཅི། །རང་གི་སྙིང་པོ་རང་འདྲལ་ལམ། །མ་གཡེལ་མ་གཡེལ་མཁའ་འགྲོའི་ཚོགས། །ཁས་བླངས་དམ་བཅས་བཞིན་དུ་ནི། །དངོས་གྲུབ་མ་ལུས་བསྩལ་དུ་གསོལ། །བསྒྲལ་བའི་ཞིང་བཅུ་ཁྱོད་ཀྱིས་སྒྲོལ། །སངས་རྒྱས་བསྟན་པ་ཁྱོད་ཀྱིས་སྲུངས། །དཀོན་མཆོག་དབུ་འཕང་ཁྱོད་ཀྱིས་བསྟོད། །རྣལ་འབྱོར་སྒོས་དགྲ་ཁྱོད་ཀྱིས་སྒྲོལ། །ལྷ་འདྲེ་མི་གསུམ་དབང་དུ་སྡུས། །འབྱུང་བཞིའི་བར་ཆད་ཁྱོད་ཀྱིས་སོལ། །དུག་ལྔའི་རྣམ་རྟོག་ཞི་བར་མཛོད། །མ་ཧཱ་ས་མ་ཡ་མ་ནུ་སྨ་ར་ཧྲཱིཿབྷྱོ། ཆོས་ཀྱི་དབྱིངས་ཀྱི་ཡེ་ཤེས་ངང་ཉིད་ལས། །ཐབས་མཁས་ཐུགས་རྗེས་ལྷ་མོའི་ཚུལ་བཟུང་ནས། །སངས་རྒྱས་བསྟན་པ་བསྲུང་ཞིང་སྤེལ་མཛད་མ། །མཁའ་འགྲོ་ཆེན་མོ་བཀྲ་ཤིས་ཚེ་
རིང་མ། །དཔོན་གཡོག་ལྔར་བཅས་ཞིང་སྐྱོང་མཁའ་འགྲོ་མའི། །འཁོར་གྱི་ཚོགས་དང་བཅས་ལ་ཕྱག་འཚལ་བསྟོད། །འདིར་གཤེགས་ཤ་ཁྲག་བརྒྱན་པའི་གཏོར་མ་དང་། །ཛ་གད་སྨན་ཕུད་མཆོད་པ་འདི་བཞེས་ལ། །སྔ་བཅོལ་ལས་རྣམས་གྲུབ་པའི་གཏང་རག་དང་། །ད་བཅོལ་བསྒྲུབ་ཕྱིར་གཏོར་མ་སྨན་ཕུད་བཞེས། །རྣལ་འབྱོར་བདག་དང་བདག་གི་འཁོར་རྣམས་ཀྱི། །ཚེ་དང་དཔལ་འབྱོར་བསམ་པའི་དོན་རྣམས་ལ། །བར་དུ་གཅོད་བྱེད་ནད་དང་གདོན་བགེགས་དང་། །མི་དང་འབྱུང་པོའི་བར་ཆད་བཟློག་ཏུ་གསོལ། །དེང་ནས་བཟུང་སྟེ་བྱང་ཆུབ་མ་ཐོབ་བར། །ས་དང་ལམ་གྱི་ཡོན་ཏན་བསྒྲུབ་པ་ལ། །བར་དུ་གཅོད་བྱེད་འགལ་རྐྱེན་ཞི་བ་དང་། །མཐུན་རྐྱེན་འདོད་དགུ་མ་ལུས་འགྲུབ་པར་མཛོད། །བསྟན་དང་བསྟན་པའི་ཁུར་འཛིན་སྐྱེས་བུ་དང་། །རྣལ་འབྱོར་འགྲོ་དོན་ཕྱོགས་བཅུར་འཕེལ་བ་དང་། །གང་ལ་གང་འདུལ་ཕྲིན་ལས་རྣམ་པ་བཞི། །འགྲོ་ལ་ཕན་བདེ་འགྲུབ་པའི་སྡོང་གྲོགས་མཛོད། །དཀར་མོ་ཞི་བྱེད་གསལ་སྟོན་མ། །སྔོན་མོ་མཆོག་སྟེར་གསལ་སྟོན་མ། །སེར་མོ་རྒྱས་བྱེད་གསལ་སྟོན་མ། །དམར་མོ་དབང་བྱེད་གསལ་སྟོན་མ། །ལྗང་མོ་དྲག་བྱེད་གསལ་སྟོན་མ། །འཁོར་དང་བཅས་པ་ཐམས་ཅད་ཀྱིས། །གསང་བ་ནང་གི་མཆོད་པ་དང་། །བདུད་རྩི་སྨན་གྱི་མཆོད་པ་དང་། །རཀྟ་
དམར་གྱི་ཨརྒྷཾ་དང་། །དམར་ཆེན་གཏོར་མ་འདི་བཞེས་ལ། །བདག་དང་རྒྱུ་སྦྱོར་ཡོན་བདག་ལ། །སྡང་བར་བྱེད་པའི་དགྲ་རྣམས་སོད། །གནོད་པར་བྱེད་པའི་བགེགས་རྣམས་ཆོམས། །བར་ཆད་རྐྱེན་ངན་བཟློག་ཏུ་གསོལ། །ཞེས་དམར་གཏོར་ཕྱི་རོལ་དུ་བསྐྱལ་ལོ། །སྤྲོ་ན་འཁོར་བརྟན་སྐྱོང་བཅུ་གཉིས་ཀྱི་གཏོར་འབུལ་གཏེར་རྙིང་ལས་བྱུང་བ་ལྟར་བྱ་བ་ནི། གཏོར་མ་དང་གསེར་སྐྱེམས་བཤམས་ལ། ཨ་ཀཱ་རོས་བྱིན་བརླབས་ལ། ཧཱུཾ་བཀའ་ཡི་ཚོགས་དང་བཅས་ཉིད་དུ། །ཁྲག་འཐུང་དེ་བཞིན་ནམ་མཁའི་སྐུ། །ཚུར་གཤེགས་ཚུར་གཤེགས་སྐྱོང་མ་རྣམས། །འདིར་བྱོན་དམ་བསྐང་འཕྲིན་ལས་མཛོད། །བྷྱོ། བདག་ཉིད་ཆེན་མོ་ལ་སོགས་བདུད་མོ་བཞི། །གངས་དཀར་ཤ་མེད་ལ་སོགས་གནོད་སྦྱིན་བཞི། །ཀོང་བཙུན་དེ་མོ་ལ་སོགས་སྨན་མོ་བཞི། །བོད་ཁམས་སྐྱོང་བའི་བརྟན་མ་བཅུ་གཉིས་ལ། །སློབ་དཔོན་ཆེན་པོ་པདྨ་འབྱུང་གནས་ཀྱིས། །སོ་སོར་མཚན་བཏགས་རྒྱན་དང་ཆ་ལུགས་དང་། །བཞོན་པར་བཅས་ཏེ་བསྟན་པའི་བྱ་ར་མཛོད། །སྔོན་གྱི་ཐུགས་དམ་དམ་ཚིག་བརྩེར་དགོངས་ལ། །བྲན་དང་གཡོག་འཁོར་མང་པོའི་ཚོགས་དང་བཅས། །ལྷབ་ལྷུབ་རིན་ཆེན་མང་པོའི་རྒྱན་དང་བཅས། །འདིར་གཤེགས་དམ་སྐོང་མཆོད་སྦྱིན་གཏོར་མ་བཞེས། །བོད་ཁམས་སྐྱོང་བའི་བརྟན་མ་བཅུ་གཉིས་ཀྱིས། །སྔོན་གྱིས་དམ་ཚིག་དེ་ལྟར་དྲན་གྱིས་
ལ། །སྨན་རཀ་གཏོར་མའི་མཆོད་པ་འདི་བཞེས་ནས། །སངས་རྒྱས་བསྟན་པ་མཐའ་དག་རྒྱས་པར་མཛོད། །རྣལ་འབྱོར་བདག་གི་བསམ་པ་བསྒྲུབ་ཏུ་གསོལ། །ཧཱུྃ་དཔལ་ཆེན་ཁྲག་འཐུང་སྤྲུལ་པ་མོ། །ཡེ་ཤེས་དབྱིངས་ལ་རྟེན་འབྲེལ་ཚུལ། །ཕྱོགས་མ་བཞི་དང་མཚམས་མ་བཞི། །སྙིང་པོའི་མ་མོ་ཆེན་པོ་བཞི། །མ་རྟོགས་རྟེན་འབྲེལ་བཅུ་གཉིས་ཏེ། །ཕྱི་རོལ་བརྟན་མ་བཅུ་གཉིས་པོ། །ཀུན་ཀྱང་ཐུགས་ཀྱི་དབྱིངས་སུ་གཅིག །བཅུ་གསུམ་ས་དང་ལམ་གྱི་དངོས། །ཕྱི་ནང་གསང་བའི་དགའ་བ་བཞི། །དབྱེར་མེད་ཡེ་ཤེས་བཞི་དང་བཅས། །བཅུ་དྲུག་བདག་ཉིད་ཆེན་མོ་ལ། །སྣང་སྲིད་ཐམས་ཅད་མཆོད་དོ་བཞེས། །ལུགས་འབྱུང་ལུགས་ལྡོག་རྟེན་འབྲེལ་རྣམས། །དགའ་བཞིའི་ངོ་བོར་རྣམ་དག་ནས། །མཐར་ཐུག་རྡོ་རྗེ་འཆང་གི་ས། །སྐུ་གསུང་ཐུགས་དང་ཡེ་ཤེས་སུ། །མངོན་དུ་གྱུར་པའི་ཕྲིན་ལས་མཛོད། །ཅེས་བརྗོད་དེ་གཏོར་མ་དང་གསེར་སྐྱེམས་ཕུལ་ལོ། །ཉེར་གཅིག་པ་བཟློག་བསྒྱུར་ནི། བྷྱོ། མཁའ་འགྲོ་ཆེན་མོ་བཀྲ་ཤིས་ཚེ་རིང་མ། །དཔོན་གཡོག་ལྔར་བཅས་ཞིང་སྐྱོང་མཁའ་འགྲོ་དང་། །སྡེ་བརྒྱད་ལ་སོགས་བྲན་གཡོག་ཕོ་ཉའི་ཚོགས། །ཁྱེད་རྣམས་དེ་རིང་མཐུ་དང་དཔུང་བསྐྱེད་ལ། །རྣལ་འབྱོར་བདག་ཅག་འཁོར་དང་བཅས་པ་ཡི། །སྔོན་གྱི་ལས་དང་འཕྲལ་རྐྱེན་
ལས་བྱུང་བའི། །བྱང་ཆུབ་བསྒྲུབ་པའི་ལམ་གྱི་མི་མཐུན་ཕྱོགས། །འགལ་རྐྱེན་མ་ལུས་ཞི་བར་མཛད་དུ་གསོལ། །མཁའ་འགྲོ་ཆེན་མོ་མཐིང་གི་ཞལ་བཟང་མ། །ཁྱེད་རྣམས་དེ་རིང་མཐུ་དང་དཔུང་བསྐྱེད་ལ། །རྣལ་འབྱོར་བདག་ཅག་འཁོར་དང་བཅས་པ་ཡི། །ནད་རིགས་བཞི་བརྒྱ་རྩ་བཞི་ཞི་བ་དང་། །སྟོང་ཕྲག་བརྒྱད་ཅུའི་བགེགས་ཀྱི་གནོད་པ་བཟློག །གཏད་ཁྲམ་བན་སྔགས་དམོད་མོ་རྦོད་གཏོང་དང་། །འཇིགས་པ་བརྒྱད་དང་འཐབ་རྩོད་མེད་པར་མཛོད། །ཚེ་དང་ཐར་པའི་ལམ་ལ་བར་གཅོད་པའི། །བདུད་དང་གཤིན་རྗེའི་འཇིགས་པ་བཟློག་ཏུ་གསོལ། །ལས་དང་ཉོན་མོངས་བཅས་པའི་སྡིག་པ་དང་། །བག་ཆགས་འཁོར་བའི་སྡུག་བསྔལ་སྦྱོང་དུ་གསོལ། །མཁའ་འགྲོ་ཆེན་མོ་མི་གཡོ་བློ་བཟང་མ། །ཁྱེད་རྣམས་དེ་རིང་མཐུ་དང་དཔུང་བསྐྱེད་ལ། །རྣལ་འབྱོར་བདག་ཅག་འཁོར་དང་བཅས་པ་ལ། །ཚེ་རིང་ནད་མེད་བདེ་སྐྱིད་ཕུན་སུམ་ཚོགས། །འཇིག་རྟེན་འཇིག་རྟེན་འདས་པའི་དངོས་གྲུབ་སྩོལ། །ཡིད་ལ་འདོད་དགུ་དར་ཞིང་རྒྱས་པར་མཛོད། །མཁའ་འགྲོ་ཆེན་མོ་ཅོད་པན་མགྲིན་བཟང་མ། །ཁྱེད་རྣམས་དེ་རིང་མཐུ་དང་དཔུང་བསྐྱེད་ལ། །རྣལ་འབྱོར་བདག་ཅག་འཁོར་དང་བཅས་པ་ལ། །འགྲོ་བ་ཀུན་གྱི་དཔལ་དང་འབྱོར་པ་དང་། །འཇིག་རྟེན་ཁམས་ཀྱི་འདོད་ཡོན་མ་ལུས་པ། །ཁུག་
ཅིག་བསྡུས་ཤིག་རྣལ་འབྱོར་བདག་ཅག་གིས། །ད་ལྟ་ཉིད་དུ་འགྲུབ་པར་མཛད་དུ་གསོལ། །མཁའ་འགྲོ་ཆེན་མོ་གཏད་དཀར་འགྲོས་བཟང་མ། །ཁྱེད་རྣམས་དེ་རིང་མཐུ་དང་དཔུང་བསྐྱེད་ལ། །བླ་མའི་སྐུ་དགྲ་བསྟན་པ་བཤིག་པ་དང་། །སེམས་ཅན་འཚེ་དང་རྣལ་འབྱོར་བདག་ཅག་གི། །སྡང་བའི་དགྲ་དང་གནོད་པའི་བགེགས་ཀྱི་ཚོགས། །སོད་ཅིང་སྐྲོད་ཅིང་རྨུགས་ཤིག་རེངས་པར་མཛོད། །ཟུང་ཞིག་གཏུབས་ཤིག་མྱོས་དང་རྨོངས་པར་མཛོད། །ཤིག་ཅིག་ཆོམས་ཤིག་རྡུལ་ཙམ་མེད་པར་མཛོད། །ཟོ་ཞིག་འཐུང་ཞིག་ཤ་ཁྲག་ཚོགས་ལ་རོལ། །དམ་ཉམས་དགྲ་བོ་ཕ་རོལ་གནས་སུ་སྒྲོལ། །སངས་རྒྱས་བསྟན་པ་དར་ཞིང་རྒྱས་པ་དང་། །བསྟན་འཛིན་སྐྱེས་བུའི་འགྲོ་དོན་འཕེལ་བ་དང་། །རྒྱལ་ཁམས་བདེ་ཞིང་བཀྲ་ཤིས་ཆོས་འཕེལ་དང་། །རྣལ་འབྱོར་བྱང་ཆུབ་སྒྲུབ་པའི་ཕྲིན་ལས་མཛོད། །བུདྡྷ་ཌཱ་ཀི་ནི་བ་ཙཀྲ་ཁཱ་ཧི། བཛྲ་ཌཱ་ཀི་ནི། རཏྣ་ཌཱ་ཀི་ནི། པདྨ་ཌཱ་ཀི་ནི། ཀརྨ་ཌཱ་ཀི་ནི་བ་ཙཀྲ་ཁཱ་ཧི། ཞེས་བརྗོད། ཉེར་གཉིས་པ་ནོར་ལྷ་རྣམས་ལ་གཡང་བླན་པ་ནི། ཕྱེ་མར་དང་། གསེར་སྐྱེམས་ཀྱིས་མཆོད་དེ་འདི་སྐད་དོ། །ཧཱུྃ་བཅོམ་ལྡན་ཕྱག་ན་རྡོ་རྗེ་ནི། །གདུག་པ་མ་ལུས་འདུལ་བའི་ཕྱིར། །རྡོ་རྗེ་བསྣམས་ལ་ཕྱག་འཚལ་ལོ། །ཁྱོད་ཀྱི་བཀའ་ཉན་གསུང་སྔོད་ནི། །ཅི་འདོད་རེ་བ་སྐོང་མཛད་
པ། །མཐུ་ཆེན་སྟོབས་དང་ལྡན་པ་པོ། །གནོད་སྦྱིན་སུམ་ཁྲི་དྲུག་སྟོང་ལ། །མཐུན་པའི་དམ་རྫས་འབུལ་བ་ནི། །ཕྱེ་མར་མདའ་དར་རིན་ཆེན་དང་། །བདུད་རྩི་གསེར་སྐྱེམས་སིལ་སྙན་སོགས། །དཀར་མངར་སྨན་གྱི་མཆོད་པ་འབུལ། །ནོར་གྱི་དངོས་གྲུབ་བསྩལ་དུ་གསོལ། །བྱང་ཕྱོགས་དཀོར་མཛོད་ཕོ་བྲང་ནས། །ནོར་ལྷའི་རྒྱལ་པོ་རྣམ་ཐོས་སྲས། །གནོད་སྦྱིན་ཀུན་གྱི་གཙོ་བོ་སྟེ། །སྐུ་ལ་བསེ་ཁྲབ་འབར་བ་གསོལ། །ཕྱག་ན་བ་དན་རྩེ་བརྒྱད་འཕྱར། །གཡོན་པས་རིན་ཆེན་ནེའུ་ལེ་འཛིན། །གསེར་གྱི་མཆོད་རྟེན་སེར་པོ་ལས། །དགོས་འདོད་རིན་ཆེན་ཆར་ལྟར་འབབ། །ཆིབས་སུ་སེང་གེ་བསྒྱིངས་པར་ཆིབས། །ནོར་ལྷ་བྱེ་བའི་འཁོར་གྱིས་བསྐོར། །ཀུན་ཀྱང་རིན་ཆེན་རྒྱན་ཆ་ཅན། །ལག་ཏུ་རིན་ཆེན་ནེའུ་ལེ་འཛིན། །དར་དཀར་གཡབ་ཅིང་སྤྱན་འདྲེན་ན། །བཀྲ་ཤིས་སྐྱིད་པའི་གནས་འདི་རུ། །འཁོར་དང་བཅས་པ་འདིར་བྱོན་ལ། །རིན་ཆེན་དངོས་གྲུབ་བདག་ལ་སྩོལ། །ༀ་བཻ་ཤྲ་མ་ཎ་ཡ་རཏྣ་སིདྡྷི་ས་མ་ཡ་ཧཱུྃ་ཧྲཱིཿཋཱ། བཅོམ་ལྡན་ལྷ་མོ་ནོར་རྒྱུན་མ། །ཕྱག་གཡས་མཆོག་སྦྱིན་ཕྱག་རྒྱ་ཡིས། །འཇིག་པ་བརྒྱད་སྐྱོབ་འགྲོ་བ་སྡུད། །གཡོན་པའི་ཕྱག་གི་ཐུགས་ཀ་རུ། །རིན་ཆེན་འབྲས་ཀྱི་སྙེ་མ་འཛིན། །དགོས་འདོད་རེ་བ་སྐོང་མཛད་པ། །དཔག་བསམ་ཤིང་ཆེན་རྒྱས་པ་ལྟར། །དབུལ་བ་
སེལ་ཞིང་ཉོན་མོངས་འཇོམས། །དར་དཀར་གཡབ་ཅིང་སྤྱན་འདྲེན་ན། །འཁོར་དང་བཅས་པ་ཐམས་ཅད་ཀུན། །བཀྲ་ཤིས་གནས་འདིར་གཡང་ལ་འདུས། །རྟ་གླང་རིན་ཆེན་གོས་དང་འབྲུ། །ཁྲུས་ཀྱི་རྫིང་བུ་ལ་སོགས་པ། །རིན་ཆེན་དངོས་གྲུབ་བདག་ལ་སྩོལ། །ཨོ་གྷ་ཏཾ་ཛམྦྷ་སེམས་རཱག་ནི་མ་ཀ་ར་བཛྲ་རཏྣ་ཏིཏྟ་སརྦ་ཛཿཧཱུྃ་ཧྲཱིཿཋཱ། ཡིད་བཞིན་ནོར་བུ་རིན་ཆེན་གཏེར་མཛོད་ནས། །ནོར་ལྷའི་རྒྱལ་པོ་ཨཱཪྱ་ཛམྦྷ་ལ། །བཙོ་མ་གསེར་མདོག་གཟི་བརྗིད་ལྡན། །རིན་ཆེན་རྒྱན་ལྡན་ཕན་སེམས་ཅན། །ཕྱག་གཡས་ནོར་བུ་སྟེར་མཛད་པ། །ཕྱག་གཡོན་ནེའུ་ལེའི་རྐྱལ་པ་ནས། །སྒྲུབ་པ་པོ་ལ་དངོས་གྲུབ་སྟེར། །དར་དཀར་གཡབ་ཅིང་སྤྱན་འདྲེན་ན། །འཁོར་དང་བཅས་པ་ཐམས་ཅད་ཀུན། །བཀྲ་ཤིས་གནས་འདིར་གཡང་ལ་འདུས། །མི་ནོར་ཟས་གོས་དངོས་གྲུབ་སྩོལ། །ༀ་ཛམྦྷ་ལ་ཛ་ལེནྡྲ་ཡ་རཏྣ་སིདྡྷཱི་ཛཿཧཱུྃ་ཧྲཱིཿཋཱ། གནོད་སྦྱིན་རྒྱལ་པོ་རིན་ཆེན་སྤྱོན། །རིན་ཆེན་གཏེར་མཛོད་བདག་པོ་སྟེ། །ནོར་བུ་རིན་ཆེན་ཆར་ལྟར་འབེབས། །བདག་ལ་ནོར་གྱི་དངོས་གྲུབ་སྩོལ། །དར་དཀར་གཡབ་ཅིང་སྤྱན་འདྲེན་ན། །འཁོར་དང་བཅས་པ་ཐམས་ཅད་ཀྱིས། །འདོད་ཡོན་ལྔ་ལ་ལོངས་སྤྱོད་དང་། །བླ་ན་མེད་པ་ཆེན་པོའི་ནོར། །ཅིི་འདོད་ཕུན་སུམ་ཚོགས་པ་ཡི། །དངོས་
གྲུབ་ཆེན་པོ་བདག་ལ་སྩོལ། །ༀ་ཧྲཱིཿཨ་པ་ར་ཙི་ཏི་ཏེ་བདག་ལ་སིདྡྷི་ཛཿཧཱུྃ། །གནོད་སྦྱིན་རྒྱལ་པོ་གཏེར་བདག་པོ། །བཞུགས་པ་རི་རབ་རྩེ་ལ་བཞུགས། །ཐུགས་ནི་འཛམ་གླིང་ཀུན་ལ་ཁྱབ་། །སྐུ་མདོག་དམར་སེར་གཟི་བརྗིད་ལ། །ནོར་རྒྱུན་མ་ཡི་ཡུམ་དང་བཅས། །ཞབས་གཉིས་བརྐྱང་བསྐུམ་འབྱུང་པོ་མནན། །རིན་ཆེན་བཟང་པོ་ཁྱོད་ལ་བསྟོད། །ༀ་ཨ་ཕུ་ཡུ་ུཎི་ཤ་ཡ་དྷ་ར་དྷ་ར་དྷི་རི་དྷི་རི་སྭཱ་ཧཱ། ནོར་ལྷའི་རྒྱལ་པོ་རྣམ་ཐོས་སྲས། །སྐུ་མདོག་མ་ངེས་ཅིར་ཡང་སྟོན། །ཕྱག་གཚན་མདུང་དང་བ་དན་བསྣམས། །མཆོད་རྟེན་རིན་ཆེན་ནེའུ་ལེ་འཛིན། །རི་རབ་གླིང་བཞི་མི་ཡི་བཅུད། །རྣམ་རྒྱལ་ཁང་བཟང་ནོར་གྱིས་འགེངས། །ཡིད་བཞིན་ནོར་གྱིས་གཡང་འབེབས་པ། །རེ་བ་སྐོང་ཞིང་ནོར་རྣམས་སྦྱིན། །ཞལ་ནས་གཡང་རབ་དམ་པ་འདོན། །ན་མོ་རཏྣ་ཏྲ་ཡཱ་ཡ། །ན་མོ་བཻ་ཤྲ་མ་ཎ་ཡེ་མ་ཧཱ་རཱ་ཛཱ་ཡ། ཏདྱ་ཐཱ། སུ་མུ་སུ་མུ། ཙནྡྷ་ཙནྡྷ། ཙ་ར་ཙ་ར། ཀ་ར་ཀ་ར། ཀི་ལི་ཀི་ལི། ཀུ་རུ་ཀུ་རུ། མུ་རུ་མུ་རུ། ཙུ་རུ་ཙུ་རུ། སནྡྷ་བ་ཡེ། ཨད་མ་ནམ་ཉིད་ཏན། ཨན་དྷ་ར་དྷུ་ར་སྭཱ་ཧཱ། ན་མོ་བཻ་ཤྲ་མ་ཎ་ཡ་སྭཱ་ཧཱ། དྷ་ན་དྷ་ཡེ་སྭཱ་ཧཱ། ན་མོ་ནརྣ་པ་རི་སྭཱ་ཧཱ། མི་ནོར་ཟས་གསུམ་ཐམས་ཅད་དྷི་ཤ་མ་ནེ་ཡེ་སཏྣ་རཏྣ་སིདྷི་སྭཱ་ཧཱ། རིན་ཆེན་རྒྱལ་བ་རྒྱས་ཤིང་འཕེལ། །སྒྱུ་མའི་བང་མཛོད་ནམ་མཁའ་མཉམ། །ཀར་ཤ་པ་ཎི་བརྒྱ་སྟོང་ཕྲག །ཉིན་རེ་བཞིན་
དུ་གནང་བར་མཛོད། །མི་ཡི་འཁོར་ལོས་སྒྱུར་བ་དེ། །མི་རྣམས་ཀུན་ལ་མངའ་བརྙེས་པ། །སྐྱེ་བོ་མང་པོ་འཕེལ་ཞིང་རྒྱས། །དཀོན་མཆོག་ཡོན་བདག་མཛད་པ་ཡི། །འཁོར་ལོས་སྒྱུར་བའི་རྒྱལ་པོ་ཁྱོད། །མི་རྣམས་བདེ་དང་སྐྱིད་པའི་དོན། །དར་དཀར་གཡབ་ཅིང་སྤྱན་འདྲེན་ན། །འཁོར་དང་བཅས་པ་ཐམས་ཅད་ཀུན། །བཀྲ་ཤིས་གནས་འདིར་གཡང་ལ་འདུས། །རིན་ཆེན་སྣ་བདུན་བདག་ལ་སྩོལ། །རྟ་ལྷ་ཨཱཪྱ་རེ་མནྟ། །རྔོག་ཆགས་ཀུན་ལ་དབང་བསྒྱུར་ཞིང་། །དགྲ་ལྷའི་མཆོག་སྟེ་ཉི་མའི་སྲས། །ཁྱོད་ནི་དགྲ་ལྷའི་མཆེད་ཡིན་ཏེ། །ཆིབས་སུ་སྔོན་པོ་སྒལ་ནག་ཆིབས། །བཞེངས་ན་སྟག་གཉིས་སྔོན་ལ་འགྲོ། །སེང་ཆེན་གཉིས་ནི་ཕྱི་ན་འབྲང་། །ཁྱུང་ཆེན་གཉིས་ནི་གླད་ལ་ལྡིང་། །འཕྲག་པར་ལྕགས་ཀྱི་བྱ་ཁྲ་འཕུར། །དཔལ་འབར་ལམ་ལྷ་ཚེ་བསྲུང་ཞིང་། །ལམ་དང་གཡུལ་གྱི་དགྲ་ལས་རྒྱལ། །ནོར་དང་འབྲུ་རྣམས་འཕེལ་བ་ཡི། །ནོར་གྱི་དངོས་གྲུབ་སྩོལ་བའི་ཕྱིར། །དར་དཀར་གཡབ་ཅིང་སྤྱན་འདྲེན་ན། །འཁོར་དང་བཅས་པ་ཐམས་ཅད་ཀུན། །བཀྲ་ཤིས་གནས་འདིར་གཡང་ལ་བྱོན། །འབྲུ་རྣམས་འཕེལ་བའི་དངོས་གྲུབ་སྩོལ། །ༀ་ཨཱཪྱ་རེ་མནྟ་གྷོ་ར་སིདྡྷི་རཏྣ་སིདྡྷི་ཧཱུྃ་ཧྲཱིཿཋཱ། ཕྱུགས་ལྷ་ཀུན་གྱི་རྒྱལ་པོ་ནི། །གླང་ཆེན་ས་ལ་རབ་
བརྟན་ཏེ། །ཁྱུ་མཆོག་ཀུན་ལ་མངའ་མཛད་པ། །ཕྱག་ན་གཡང་གི་ཞགས་པ་བསྣམས། །བེའུ་རྣམ་རྒྱལ་འཁོར་དང་བཅས། །ཕྱུགས་རྣམས་འཕེལ་ཞིང་རྒྱས་པའི་ཕྱིར། །དར་དཀར་གཡབ་ཅིང་སྤྱན་འདྲེན་ན། །འཁོར་དང་བཅས་པ་ཐམས་ཅད་ཀུན། །བཀྲ་ཤིས་གནས་འདིར་གཡང་ལ་འདུས། །ཕྱུགས་ཀྱི་དངོས་གྲུབ་བདག་ལ་སྩོལ། །ༀ་ཨ་བ་ཤ་རཏྣ་སིདྡྷི་ཕ་ལ་ཧཱུྃ་ཧྲཱིཿཋཱ། ལྷ་རྒྱལ་ཨཱཪྱ་ཙ་མུཎྜི། །ནོར་སྲུང་པརྣ་ཤ་བ་རི། །ཡོ་བྱད་གྱེན་དུ་བསྲུང་བའི་ལྷ། །ལྷ་དང་ཀླུ་དང་ལྷ་མ་ཡིན། །ཀླུ་རྒྱལ་ཆར་འབེབས་ལོ་ཏོག་བསྲུང་། །ཀླུ་རྒྱལ་འབྲུ་བཅུད་སྤེལ་མཛད་མ། །དར་དཀར་གཡབ་ཅིང་སྤྱན་འདྲེན་ན། །འཁོར་དང་བཅས་པ་ཐམས་ཅད་ཀུན། །བཀྲ་ཤིས་གནས་འདིར་གཡང་ལ་འདུས། །ༀ་ཨ་ན་སིདྡྷི་ཧཱུྃ་ཧྲཱིཿཋཱ། །ཧཱུྃ་ཤར་གྱི་ཕྱོགས་ནས་གཡང་སྡུད་པ། །མ་ཧཱ་དེ་ཝ་ཡབ་སྲས་བཞི། །ཁྲོ་བོ་དཀར་གསལ་བརྗིད་པ་ལ། །ཕྱག་ན་དངུལ་གྱི་ལྕགས་ཀྱུ་བསྣམས། །མི་གཡང་ཐམས་ཅད་འགུགས་པར་བྱེད། །གཡོན་ན་གཡུ་ཡི་དྲིལ་བུ་གསིལ། །བར་ཆད་ཐམས་ཅད་སེལ་བར་མཛོད། །དར་དཀར་གཡབ་ཅིང་སྤྱན་འདྲེན་ན། །འཁོར་དང་བཅས་པ་ཐམས་ཅད་ཀུན། །བཀྲ་ཤིས་གནས་འདིར་གཡང་ལ་འདུས། །མི་ཡི་ཚེ་གཡང་བརྟན་པར་མཛད། །ལྷོ་ཡི་
ཕྱོགས་ནས་གཡང་སྡུད་བ། །མ་ཧཱ་དེ་ཝ་སྲས་དང་བཅས། །ཁྲོ་བོ་སེར་པོ་མི་བཟད་པ། །ཕྱག་ན་གསེར་གྱི་ཕྲེང་བ་བསྣམས། །གསེར་དངུལ་རིན་ཆེན་དབང་དུ་སྡུད། །གཡོན་ན་གཡུ་ཡི་དྲིལ་བུ་འཛིན། །གནོད་བྱེད་ཐམས་ཅད་སྐྲག་པར་བྱེད། །དར་དཀར་གཡབ་ཅིང་སྤྱན་འདྲེན་ན། །འཁོར་དང་བཅས་པ་ཐམས་ཅད་ཀུན། །བཀྲ་ཤིས་སྐྱིད་པའི་གནས་འདི་རུ། །རིན་ཆེན་སྣ་བདུན་རྒྱས་པར་མཛོད། །ནུབ་ཀྱི་ཕྱོགས་ནས་གཡང་སྡུད་པ། །མ་ཧཱ་དེ་བ་ལྕམ་དྲལ་བ། །ཁྲོ་བོ་དམར་པོ་མི་བཟད་པ། །ཕྱག་ན་གཡང་གི་ཞགས་པ་བསྣམས། །ཕྱུགས་གཡང་ཐམས་ཅད་འགུགས་པར་བྱེད། །གཡོན་ན་གཡུ་ཡི་དྲིལ་བུ་འཛིན། །ཚེ་གཡང་ཐམས་ཅད་འགུགས་པར་བྱེད། །དར་དཀར་གཡབ་ཅིང་སྤྱན་འདྲེན་ན། །འཁོར་དང་བཅས་པ་ཐམས་ཅད་ཀུན། །བཀྲ་ཤིས་གནས་འདིར་གཡང་ལ་འདུས། །རྐང་བཞི་ནོར་གྱི་དངོས་གྲུབ་སྩོལ། །བྱང་གི་ཕྱོགས་ནས་གཡང་འགུགས་པ། །མ་ཧཱ་དེ་བ་ཡབ་ཡུམ་གཉིས། །ཁྲོ་བོ་སྔོ་སྐྱ་བརྗིད་པའི་སྐུ། །ཕྱག་ན་འབྲས་ཀྱི་སྙེ་མ་བསྣམས། །ལོ་གཡང་ཐམས་ཅད་སྡུད་པར་བྱེད། །གཡོན་ན་སྨན་གྱི་ལྷུང་བཟེད་འཛིན། །སྡུག་བསྔལ་ནད་ལས་ཐར་བར་བྱེད། །དར་དཀར་གཡབ་ཅིང་སྤྱན་འདྲེན་ན། །འཁོར་དང་བཅས་
པ་ཐམས་ཀུན། །བཀྲ་ཤིས་གནས་འདིར་གཡང་ལ་འདུས། །འབྲུ་མཆོག་དངོས་གྲུབ་སྩལ་དུ་གསོལ། །ལི་ཁྲིས་ཁ་དོག་གསལ་བར་བྱེད། །དུང་ནི་སྨྲ་བསམ་བརྗོད་ལས་འདས། །བང་མཛོད་ནམ་མཁའི་མཛོད་དང་མཉམ། །འབྲས་དཀར་འབྲུ་བཅུད་ཀུན་གྱི་མཆོག །གི་ཝང་སྨན་མཆོག་ཀུན་གྱི་དངོས། །ཀུ་ཤ་བྱོལ་སོང་ཀུན་གྱི་གསོས། །ཡུངས་ཀར་ཁྲོ་བོ་ཀུན་གྱི་རྒྱལ། །བདུན་པོ་དེ་ཡང་གཡང་ལ་རྟེན། །འཁོར་ལོ་རིན་ཆེན་གླིང་བཞི་དབང་། །རྟ་མཆོག་རིན་ཆེན་སྤྲིན་གྱི་ཤུགས། །གླང་པོ་རིན་ཆེན་ཐེག་ཆེན་སྟོབས། །ནོར་བུ་རིན་ཆེན་དགོས་འདོད་རེ་བ་སྐོང་། །བཙུན་མོ་རིན་ཆེན་བདེ་མཆོག་ལྡན། །ཁྱིམ་བདག་རིན་ཆེན་དགོས་འདོད་སྦྱོར། །བློན་པོ་རིན་ཆེན་བློ་གྲོས་ལྡན། །དམག་དཔོན་རིན་ཆེན་ཚར་གཅོད་མཛད། །རྒྱལ་སྲིད་རིན་ཆེན་སྣ་བདུན་ཡང་། །དེ་རིང་བདག་ཅག་འཁོར་བཅས་ཀྱི། །ཕྱྭ་དང་གཡང་ལ་བརྟན་པར་ཤོག །ༀ་ཨཱཿཧཱུྃ་རཏྣ་ཙཀྲ་ཧཱུྃ་རཏྣ་སིདྡྷི་པྲཛྙཱ་མ་ཧཱ་མནྟ་མན་ཏིང་ཀ་སིདྡྷི་ཧཱུྃ་ཧྲཱིཿཋཱ། །ཞེས་འགུགས་ཤིང་བསྟིམ་མོ། གལ་ཏེ་གྲངས་གསོག་སྐབས། སྨན་བཙུན་ལྷ་ལྔའི་ཐུགས་ཀ་ནས། །སོགས། བདག་དང་མདུན་གྱི་ནས། ཀྱཻ་ཆོས་ཀྱི་རྒྱལ་པོ་སོགས་ནས། རྡོ་རྗེ་མི་འགྱུར་མ་འདོན། ཕུད་ཀྱིས་མཆོད་ནས། ཧཱུྃ་བཅོམ་ལྡན་ཕྱག་ན་རྡོ་རྗེ་ནས། ཧཱུྃ་ཧྲཱིཿཋཱ། བར་བརྗོད།
ཚར་རྗེས་མར་གསེར་སྐྱེམས་དྲག་བསྐུལ་སོགས་མཐར་ཆགས་སུ་འདོན། ཉེར་གསུམ་པ་གཡང་ལེན་པ་ནི། གཡང་བཤོས་ཚེ་གཏོར་ཚེ་རིལ་ཚེ་ཆང་མདའ་དར་འབྲང་རྒྱས་སོགས་དངོས་གྲུབ་ཀྱི་རྫས་རྣམས་གཏད་ལ། ཀྱེ་སྔོན་གྱི་བསྐལ་བའི་དང་པོ་ལ། །གཡང་གི་མི་རབས་མཆེད་བཞི་དེས། །གསེར་གྱི་ས་གཞིའི་སྟེང་དུ་ནི། །གཡང་གཞི་དཀར་པོ་དྲི་མེད་བཏིང་། །ཕྱག་ན་གཡང་ནས་སྔོན་པོ་བཀོད། །མེ་ཏོག་ཧ་ལོ་གཅལ་དུ་བཀྲམ། །ཕྱྭ་གཞི་གཡང་གཞིའི་སྟེང་དུ་ནི། །འདོད་འཇོ་དུང་གི་བ་དཀར་དང་། །རིན་ཆེན་མར་གྱི་ལུ་གུ་གཉིས། །འཕྱང་དང་དེ་ནི་རྦ་ན་འཛིན། །མི་རྣམས་ཀུན་གྱི་ཕྱྭ་ལོང་ལ། །ཕྱུགས་རྣམས་ཀུན་ལ་གཡང་ཁུགས་སོ། །དཀོན་མཆོག་གསུམ་གྱི་བྱིན་རླབས་ཀྱིས། །མི་རབས་མཆེད་བཞི་ཆེན་པོ་དེས། །འཁོར་ལོས་སྒྱུར་བའི་རྒྱལ་པོར་གྱུར། །རིན་ཆེན་བདུན་ལ་ལོངས་སྤྱོད་པའི། །བྱིན་རླབས་ཕྱྭ་དང་གཡང་གི་སྟོབས། །བྱང་ཕྱོགས་དཔལ་རི་ལྷུན་པོ་ལ། །དཔལ་གྱི་སྦ་སྨྱུག་ལྡེམ་པ་སྐྱེས། །ཚིགས་བདུན་ཚིགས་དགུ་བཅུ་གསུམ་པ། །འཁོར་ལོས་སྒྱུར་བའི་གཡང་རྟེན་ལགས། །ད་ལྟ་ལོངས་སྤྱོད་རྒྱས་པ་ཡང་། །བཀྲ་ཤིས་སྦ་སྙུག་རྒྱས་པ་དེ། །འཁོར་ལོས་སྒྱུར་བའི་གཡང་ཕུར་བྱས། །རྒྱལ་པོ་ལོངས་སྤྱོད་རྒྱས་པ་ལྟར། །དེ་རིང་སྙུག་རྒོད་ཚིགས་གསུམ་པ། །
ཡོན་བདག་འདི་ཡི་ཕྱྭ་གཡང་ལགས། །བཀྲ་ཤིས་ཕྱྭ་གཡང་ཕུར་ལ་རྟེན། །འཁོར་ལོས་སྒྱུར་བའི་རྟ་ཕུར་ལྟར། །ཡོན་བདག་ཕྱྭ་གཡང་ཕུར་ལ་རྟེན། །གཡང་མོ་ལུག་གི་གཡང་འདི་ནི། །ཨཱཪྱ་ཙ་མཎྜ་ལ་རྟེན། །འབྲས་ཟན་ཞལ་དཀར་ཕྱྭ་གཡང་རྟེན། །ཕྱུགས་གཡང་ཚེ་གཡང་ནོར་གཡང་རྣམས། །ཧུ་ཡེ་ཧུ་ལྡན་ཕྱྭ་ལྡན་ནོ། །མགོ་ནག་མི་ཡི་ཕྱྭ་ལོངས་ཤིག །དུད་འགྲོ་ཕྱུགས་ཀྱི་གཡང་ཁུགས་སོ། །གཡང་ལ་གཡང་འབྲོག་གནག་གི་གང་། །གཡང་ལ་གཡང་འཕེལ་ལུག་གིས་གང་། །གཡང་ལ་གཡང་འཕེལ་རྟ་ཡིས་གང་། །ནོར་ལ་གཡང་འཕེལ་བོང་བུས་གང་། །ནོར་ལ་གཡང་འཕེལ་ཕྱུགས་ཀྱིས་གང་། །ཁྱིམ་ལ་གཡང་འཕེལ་མི་ཡིས་གང་། །བང་མཛོད་གཡང་འཕེལ་འབྲུ་ཡིས་གང་། །ཚེ་ལ་གཡང་འཕེལ་ར་ཡིས་གང་། །ར་བ་གཡང་འཕེལ་ཕྱུགས་ཀྱིས་གང་། །དེ་ལྟར་བདག་ལ་བསྩལ་དུ་གསོལ། །དེ་ནས་ལྷ་རྣམས་གཡང་དུ་ལེན། །མི་རྗེ་མོན་དཀར་བྱ་བ་དེ། །དེ་རིང་ཕྱྭ་དང་གཡང་དུ་ལེན། །སྲས་རྗེ་འབྲི་ལྡོག་བྱ་བ་དེ། །དེ་རིང་ཕྱྭ་དང་གཡང་དུ་ལེན། །ལྷ་བུ་ལྷ་བྲན་བྱ་བ་དེ། །དེ་རིང་ཕྱྭ་དང་གཡང་དུ་ལེན། །ད་ནི་དཔལ་རྣམས་གཡང་དུ་བླན། །དཔལ་གྱི་མདའ་ནི་ལི་དམར་ལ། །གཡུ་ཡི་ཉི་མ་སྤུ་གྲི་རྒྱས། །བཏགས་པར་ཕྱྭ་དང་གཡང་དུ་བླན། །རྣ་ོམཚོན་
སྲ་ཞིང་དཔལ་དུ་བྱོན། །དེ་རིང་ཧུ་ཡེ་ཧུ་ལྡན་ནོ། །དེ་རིང་ཕྱྭ་ཡེ་ཕྱྭ་ལྡན་ནོ། །ཕོ་ལྷ་གཡང་དུ་བླན་པ་ནི། །ཕ་ནི་བླ་རྗེ་དམར་པོ་ཡིན། །མ་ནི་དམ་སྲིའི་མ་ཡིན་ནོ། །བུ་ནི་ཕོ་ལྷ་དཀར་པོ་དང་། །མོ་ལྷ་དེ་ནི་དཀར་མོ་ཡིན། །དེ་རིང་ཕྱྭ་དང་གཡང་དུ་བླན། །ད་ནི་ཁྱིམ་ལྷ་གཡང་དུ་བླན། །ཕ་ནི་སྤྱི་ལྷ་གང་པོ་དང་། །མ་ནི་སྤྱི་གཙུག་རྒྱལ་མོ་ཡིན། །བུ་ནི་ཁྱིམ་ལྷ་གེ་ཐུང་ཡིན། །དེ་རིང་ཕྱྭ་དང་གཡང་དུ་བླན། །དེ་རིང་ཕྱྭ་ཡེ་ཕྱྭ་ལྡན་ནོ། །དེ་རིང་ཧུ་ཡེ་ཧུ་ལྡན་ནོ། །གསེར་གྱི་ཀ་བ་མ་ཆག་ཅིག །གཡུ་ཡི་གདུང་མ་མ་ཆག་ཅིག །འཐིང་བུ་ལྷོག་ལྷོག་མ་བྱེད་ཅིག །མུ་རུ་གཡུ་སྦྲང་མ་ཞར་ཅིག །དབྱར་གསུམ་སྦྲ་ལ་ཐོག་མ་ལྷུང་། །དགུན་གསུམ་གུར་ལ་མེ་མ་ཤོར། །དུང་གི་བྱ་ལག་མ་འཐོར་ཅིག །དངུལ་གྱི་ཆོན་ཐག་མ་ཆད་ཅིག །ཕྱི་སྒོ་ཕྱེ་བའི་ནང་ཤེད་ན། །རིན་ཆེན་གསེར་གྱི་མི་བོ་ཆེ། །གསེར་གྱི་སྦ་འཁར་ཕྱག་ན་བསྣམས། །ནང་སྒོ་ཕྱུག་མོ་བྱ་བ་ནི། །ལྕགས་ཀྱི་རྟེན་མཁར་ཕྱག་ན་བསྣམས། །ཕྱི་མི་སྐྱ་བོ་ནང་དུ་མ་བཏང་ཞིག །ནང་མི་སྨུག་པོ་ཕྱི་རུ་མ་འབུད་ཅིག །ལྷ་ལུག་གྲོ་མོ་ཐང་ལ་མ་འབུད་ཅིག །སྲིད་ཀྱི་གླང་ཆེན་ནང་ལ་མ་གཏོང་ཞིག །ཁྱིམ་ལྷ་ཕྱྭ་དང་གཡང་དུ་བླན། །ད་ནི་ཞིང་ལྷ་གཡང་དུ་བླན། །ཕ་ནི་སྤྲིན་སྟོང་ཡོངས་ཀྱི་
རྗེ། །མ་ནི་བྱ་བཟང་མཐོང་གི་བཙུན། །སྲས་ནི་ཞིང་ལྷ་ཕ་ཝང་ཡིན། །ལོ་ལེགས་ལྗང་བུའི་དུས་ནས་ལེགས། །དེ་རིང་ཞིང་ལྷ་གཡང་དུ་བླན། །ཕྱུགས་ལྷ་གཡང་དུ་བླན་པ་ན། །ཕ་ནི་ཟླ་བཞི་ཕྱུག་པོ་ཡིན། །མ་ནི་ཉེར་བཞི་ཕྱུག་མོ་ཡིན། །སྲས་ནི་ཕྱུག་ལྷ་ཉེར་བུ་ཡིན། །དེ་རིང་ཕྱུག་ལྷ་གཡང་དུ་ལེན། །རྟ་ཡི་ལྷ་ནི་བྲེས་པོ་ཡིན། །འབྲི་ཡི་ལྷ་ནི་ཤམ་པོ་དང་། །གཡག་གི་ལྷ་ནི་དུང་ཕོ་དང་། །མཛོ་ཡི་ལྷ་ནི་གེ་གོད་དང་། །ལུག་གི་ལྷ་ནི་མན་བུ་དང་། །ར་ཡི་ལྷ་ནི་ཚེར་མོ་རྣམས། །དེ་རིང་ཕྱྭ་དང་གཡང་དུ་བླན། །ཐབ་ལྷ་གཡང་དུ་བླན་པ་ནི། །ཕ་ནི་བཙན་ལྷ་ཕུར་བུ་དང་། །མ་ནི་བྱ་ལྡན་བཙུན་མོ་ཡིན། །བུ་ནི་ཐབ་ལྷ་རོག་པོ་ཡིན། །དེ་རིང་ཐབ་ལྷ་གཡང་དུ་བླན། །རྒན་པ་རྣམས་ཀྱི་ཚེ་བསྲིངས་ལ། །གཞོན་པ་རྣམས་ཀྱི་དཔལ་སྐྱེད་ཅིག །དེ་རིང་ཧུ་ཡེ་ཧུ་ལྡན་ནོ། །དེ་རིང་ཕྱྭ་ཡེ་ཕྱྭ་ལྡན་ནོ། །ཞེས་པ་དང་། སངས་རྒྱས་བསྟན་སྲུང་དཀོན་མཆོག་དབུ་འཕང་བསྟོད། །དགེ་འདུན་སྡེ་སྐྱོང་རྣལ་འབྱོར་ཚེ་དཔལ་སྤེལ། །སྙན་པའི་དར་ཕྱོར་གྲགས་པའི་དུང་བུས་ལ། །འཁོར་དང་ལོངས་སྤྱོད་རྒྱས་པ་ཉིད་དུ་མཛོད། །རྒས་མེད་ལང་ཚོ་ལྡན་པའི་ལུས་སྟོབས་རྒྱས། །མིག་ལ་ཡ་མཚན་ལྟད་མོའི་དགའ་བ་དང་། །རྣ་བར་རྟག་ཏུ་སྙན་པའི་གཏམ་ཐོས་ཤིང་། །དྲི་ཞིམ་ངད་
པ་སྣ་དང་མི་འབྲལ་བར། །ཟས་སྐོམ་འབྱོར་བས་རོ་འཛིན་ཚིམ་བྱེད་ཅིང་། །ལུས་ལ་རེག་བྱ་བདེ་བ་ཁོ་ནས་འཚོ། །ཡིད་ལ་རྣམ་པར་བཀྲ་བའི་ཤེས་རབ་དང་། །ཟག་མེད་བདེ་བས་ནམ་ཡང་ངོམ་པར་མཛོད། །ཁྱོད་གསོལ་ཁྱོད་བསྟེན་ཁྱོད་མཆོད་ཁྱོད་རྦད་ན། །མཐུ་རྩལ་མ་ཆུང་བརྩེ་གདུང་ཆེ་བར་མཛོད། །གཞི་ལ་བཀྲ་ཤིས་ཕུན་ཚོགས་ལོངས་སྤྱོད་ལྡན། །བྱེས་སུ་ལམ་འཕྲང་ཆུ་ལས་སྒྲོལ་འདོན་མཛོད། །འཇིགས་སར་དགྲ་ཇག་ཆོམ་རྐུན་འཚེ་བ་སྐྱོབས། །མདོར་ན་བསམ་དོན་ཆོས་བཞིན་འགྲུབ་པར་མཛོད། །བདག་དང་མཐའ་ཡས་སེམས་ཅན་ཐམས་ཅད་ཀྱིས། །བླ་མེད་རྫོགས་པའི་བྱང་ཆུབ་བསྒྲུབ་པ་ལ། །འགལ་རྐྱེན་བར་ཆད་མ་ལུས་ཞི་བ་དང་། །མཐུན་རྐྱེན་བསམ་དོན་ལྷུན་གྱིས་འགྲུབ་པར་མཛོད། །ཅེས་དང་། སྲིད་ཞིའི་དཔལ་འབྱོར་མ་ལུས་འབྱུང་བའི་གཞི། །ཐུབ་པའི་བསྟན་པ་ཡུན་རིང་གནས་པ་དང་། །དེ་འཛིན་བྱེད་པའི་སྐྱེས་བུ་དམ་པ་རྣམས། །དཔལ་འབྱོར་གྱིས་བརྒྱན་ཡུན་རིང་ཞབས་བརྟན་ཤོག །བདག་ཅག་ཡོན་མཆོད་འཁོར་དང་བཅས་པ་ལ། །ཚེ་རིང་ནད་མེད་བདེ་སྐྱིད་ཕུན་སུམ་ཚོགས། །དོན་རྣམས་ཐམས་ཅད་ཡིད་བཞིན་འགྲུབ་པ་དང་། །འགྲོ་བའི་དོན་ལ་མཐུ་དང་ལྡན་པར་མཛོད། །ཅེས་དང་བཀྲ་ཤིས་ཀྱི་
རིམ་པ་སྐབས་སུ་གང་བབ་བརྗོད་ལ་ཡོན་བདག་རང་གནས་སུ་བཏང་། ཉེར་བཞི་པ་རྗེས་ཀྱི་ཆོ་ག་གཏང་རག་གི་ཚུལ་དུ་བསྐང་པ་བྱ་བ་ནི་མཆོད་རྫས་རྣམས་གསོ་དྲན་བྱས་ལ། རྗེ་ཆོས་ཀྱི་འབྱུང་གནས་ཀྱིས་བསྩལ་བ་ནི། ༀ་ཨཱཿབིགྷྣནྟ་ཀྲྀཏ་ཧཱུྃ་ཕཊ་ཀྱིས་བསངས། ༀ་སྭཱ་བྷ་ཝས་སྦྱངས། སྟོང་པའི་ངང་ལས་ཨ་ལས་ཡེ་ཤེས་ཀྱི་ཀ་པཱ་ལའི་ནང་དུ་ཤ་ལྔ་བདུད་རྩི་ལྔ་ཞུ་ཞིང་ཡེ་ཤེས་ཀྱི་བདུད་རྩི་དང་འདྲེས་པར་གྱུར་བའི་གཏོར་མ་བདུད་རྩིའི་རྒྱ་མཚོ་ཆེན་པོ་དང་། གཞན་ཡང་ཉེར་སྤྱོད་བདུན་དང་འདོད་ཡོན་ལྔ་བཀྲ་ཤིས་པའི་རྫས་རྣམས་དང་རྟེན་རྫས་སྒྲུབ་རྫས་མཆོད་རྫས་བསམ་གྱིས་མི་ཁྱབ་པ་ཟག་མེད་བདེ་བ་ཆེན་པོའི་ཡེ་ཤེས་ཀྱི་རང་བཞིན་ནམ་མཁའི་དབྱིངས་ཐམས་ཅད་གང་བར་གྱུར། ༀ་ཨཱཿཧཱུྃ། གསུམ། ༀ་བཛྲ་སྥ་ར་ཎ་ཁཾ། ༀ་བཛྲ་ཨརྒྷཾ་སོགས་ནས། ཤབྡ་ཨཱཿཧཱུྃ། གི་བར་བརྗོད་པས་བྱིན་གྱིས་བརླབས། ཧཱུྃ་མཁའ་དབྱིངས་བདེ་བ་ཆེན་པོའི་ཀློང། །འགྱུར་མེད་རང་རིག་འོད་གསལ་མདངས། །བདུད་རྩི་རཱ་ས་ཡ་ན་དངོས། །མཆོད་སྤྲིན་རྒྱ་མཚོ་དཀྲིགས་པ་འདི། །བདེ་ཆེན་ཞིང་མགོན་རྒྱལ་ཀུན་དངོས། །ཚེ་མཐའ་ཡས་པའི་ཐུགས་དམ་བསྐང་། །གྲུབ་པ་ཡོངས་ཀྱི་འཁོར་ལོས་སྒྱུར། །འཆི་མེད་པདྨ༴། རྒྱལ་བས་ལུང་བསྟན་སྤྱོད་པ་འཆང་། །ཀ་ཧྣ་པ་ཡི༴། བདེ་ཆེན་མཆོག་གི་དངོས་
གྲུབ་བརྙེས། །བཞད་པ་རྡོ་རྗེའི༴ཤེས་རབ་བདག་ཉིད་ཡུམ་ཆེན་མོ། །རྡོ་རྗེ་བཙུན་མོའི༴། གང་སྤྲུལ་རྡོ་རྗེ་མཁའ་འགྲོ་ནི། །ཉི་ཟླ་ཐོད་ཕྲེང་༴། ལེགས་ལྡན་ཚོགས་ཀྱི་བདག་པོའི་ཡུམ། །དབང་མོ་ཆེ་ཡི༴། བཀྲ་ཤིས་ཚེ་ཡི་དབང་ཕྱུག་མ། །རྡོ་རྗེ་མི་འགྱུར་དཔལ་གྱི་ཡུམ། །སངས་རྒྱས་མཁའ་འགྲོའི་ངོ་བོ་ཉིད། །ལྷ་སྨན་རྒྱལ་མོའི༴། སྣང་སྲིད་ཀུན་ཤེས་དབང་ཕྱུག་མ། །རྡོ་རྗེ་ཁྲོས་མ་བདེ་ཆེན་ཡུམ། །རྡོ་རྗེ་མཁའ་འགྲོའི་ངོ་བོ་ཉིད། །མཐིང་གི་ཞལ་བཟང་༴། དགོས་འདོད་ནོར་གྱི་དབང་ཕྱུག་མ། །རྡོ་རྗེ་བཞད་མ་འདོད་སྦྱིན་ཡུམ། །རིན་ཆེན་མཁའ་འགྲོའི་ངོ་བོ་ཉིད། །མི་གཡོ་བློ་བཟང༴། ཁམས་གསུམ་དབང་སྡུད་དབང་ཕྱུག་མ། །རྡོ་རྗེ་དཔལ་མོ་ལོངས་སྤྱོད་ཡུམ། །པདྨ་མཁའ་འགྲོའི་ངོ་བོ་ཉིད། །ཅོད་པན་མགྲིན་བཟང༴། དྲག་པོའི་ལས་ཀྱི་དབང་ཕྱུག་མ། །རྡོ་རྗེ་གར་མཁན་ཕྲིན་ལས་ཡུམ། །ལས་ཀྱི་མཁའ་འགྲོའི་ངོ་བོ་ཉིད། །གཏད་དཀར་འགྲོ་བཟང༴ཡབ་གཅིག་ལྷོ་ལྷ་དེ་ཝ་དང་། །ཡུམ་མཆོག་འབྲོག་ཡུལ་སྨན་མོ་དང་། །ཇོ་བོ་སྒ་རུ་ལ་སོགས་པ། །མིང་པོ་བདུན་གྱི༴། བདུད་མོ་བཞི་དང་གནོད་སྦྱིན་བཞི། །སྨན་མོ་བཞི་དང་གངས་ཅན་ལྗོངས། །སྐྱོང་ཞིང་རྒྱལ་བསྟན་སྤེལ་མཛད་
པའི། །བརྟན་མ་བཅུ་གཉིས༴། གཞན་ཡང་འཁོར་དུ་གཏོགས་པ་ཡི། །མ་མོ་སྨན་མོ་འབུམ་སྡེ་དང་། །ལྷ་སྲིན་དྲེགས་པ་ཡང་འཁོར་བཅས། །མ་ལུས་འཁོར་བཅས༴། རྟག་ཏུ་བརྟེན་ཞིང་བསྒྲུབ་པའི་ཕྱིར། །གངས་རིའི་གཟུགས་དང་དར་དཀར་གུར། །མདའ་དར་རིན་ཆེན་པར་བུ་སོགས། །རྟེན་པའི་རྫས་ཀྱིས༴། མཆོད་ཅིང་དགྱེས་པ་བསྐྱེད་པའི་ཕྱིར། །དམ་རྫས་གཏོར་མ་འབྲང་རྒྱས་སྨན། །གསེར་སྐྱེམས་ཉེར་སྤྱོད་འདོད་ཡོན་སོགས། །མཆོད་པའི་རྫས་ཀྱིས༴། དམ་ཚིག་གཉན་པོ་བསྲེ་བའི་ཕྱིར། །ལྷ་སྔགས་ཏིང་འཛིན་འཕྲོ་འདུ་དང་། །འཕོ་མེད་དགའ་བཞིའི་རོལ་པ་དང་། །མི་ཤིགས་ཕྱག་རྒྱས༴། ཕྲིན་ལས་མྱུར་དུ་བསྒྲུབ་པའི་ཕྱིར། །དུས་སུ་མཆོད་བསྟོད་བསྐུལ་བ་དང་། །བཟླས་པ་སྔགས་ཀྱི་འཁྲུལ་འཁོར་སོགས། །ལས་བཞིའི་ལས་ཀྱིས༴། མི་འབྲལ་འགྲོགས་ཤིང་བཀྲ་ཤིས་ཕྱིར། །དམ་ཚིག་སྲོག་བཞིན་བསྲུང་བ་དང་། །ཕྱག་རྒྱ་ཆེ་དབྱིངས་བདེ་ཆེན་དང་། །དབྱེར་མེད་རྟོགས་པས་ཐུགས་དམ་བསྐང་། །བདག་ཅག་མ་རིག་དབང་གྱུར་པས། །ལྟ་སྒོམ་སྤྱོད་པ་དམན་པ་དང་། །བག་མེད་བརྩོན་པ་གཡེལ་བ་དང་། །མཆོད་གཏོར་དུས་ལས་འགྱང་བ་དང་། །དངོས་དམན་གཙང་སྦྲ་ཆུང་བ་སོགས། །རྩ་བ་ཡན་ལག་དམ་ཚིག་ལ། །ནོངས་པར་གྱུར་པ་
གང་ལགས་པ། །སྙིང་ནས་བཤགས་སོ་དག་ཚངས་སྩོལ། །ཆོས་ཀུན་གདོད་ནས་དག་པ་ལ། །འཁྲུལ་མཚན་མཐའ་དག་མི་དམིགས་ཕྱིར། །བསྐང་དང་བཤགས་བྱ་མ་མཆིས་ཀྱང་། །རྟེན་འབྲེལ་སྒྱུ་མ་ལྟ་བུ་ཡིས། །བསྐངས་ཤིང་བཤགས་པའི་རོལ་པ་འདིས། །རྩ་བ་གསུམ་དང་ཁྱད་པར་དུ། །ལྷ་སྨན་ལྷ་ཚོགས་དགྱེས་གྱུར་ནས། །དངོས་གྲུབ་མ་ལུས་བསྩལ་དུ་གསོལ། །ཁྱད་པར་བདག་ཅག་འཁོར་བཅས་ལ། །དུས་དང་དུས་མིན་འཆི་བ་ལས། །རྣམ་རྒྱལ་བདུད་རྩིའི་བཅུད་ལེན་མཆོག །འཆི་མེད་ཚེ་ཡི་དངོས་གྲུབ་སྩོལ། །སྲིད་སྲུང་རིགས་རྒྱུད་སྤེལ་བ་དང་། །སྣང་གསལ་པྲ་ཡི་དངོས་གྲུབ་དང་། །རྨ་གཡང་ཟས་ཀྱིས་དངོས་གྲུབ་དང་། །བང་མཛོད་འབྲུ་ཡི་དངོས་གྲུབ་དང་། །རྐང་བཞི་ཕྱུགས་ཀྱི་དངོས་གྲུབ་དང་། །གཞན་ཡང་ཕྱི་ནང་གསང་བ་ཡི། །དངོས་གྲུབ་རྒྱ་མཚོའི་སྤྲིན་ཕུང་གིས། །བདག་ཡིད་འདོད་པ་འཇོ་བར་མཛོད། །ནད་གདོན་བར་ཆད་ཞི་བ་དང་། །ཚེ་བསོད་དཔལ་འབྱོར་མངའ་ཐང་རྒྱས། །ཁམས་གསུམ་སྲིད་བཅུད་དབང་དུ་བསྡུས། །སྡང་དགྲ་གདོན་བགེགས་ཚར་ཆོད་ཅིག །སྒྲུབ་བརྒྱུད་མཆོག་གི་རིང་ལུགས་འདི། །ནུབ་མེད་ཕྱོགས་བཅུར་རྒྱས་པའི་གཟིས། །དྲེགས་ལྡན་མཐའ་དག་ཟིལ་གནོན་པའི། །རྣམ་རྒྱལ་རྒྱལ་མཚན་སྒྲེང་བར་མཛོད། །
དངོས་བརྒྱུད་བསམ་སྦྱོར་མི་བསྲུན་པའི། །བསྟན་དགྲ་དམ་སྲིའི་དཔུང་བཅས་རྣམས། །ཁ་ཕུང་རྗེས་མེད་རྡུལ་དུ་རློག །རྦོད་གཏོང་རང་གཤེད་རང་ལ་ཕོབ། །ངེས་དོན་བསྟན་པའི་སྙིང་པོ་འདི། །གང་དུ་གནས་པའི་རྒྱལ་ཁམས་སུ། །ནད་འཁྲུགས་མུ་གེའི་མིང་མེད་ཅིང་། །བདེ་སྐྱིད་ལོ་ལེགས་བཀྲ་ཤིས་མཛོད། །མདོར་ན་བསྟན་འགྲོར་སྨ-ན་བགྱིད་པའི། །བདག་ཅག་རྣམས་ཀྱིས་རང་གཞན་དོན། །མཐའ་དག་གེགས་མེད་མྱུར་འགྲུབ་པའི། །བཀྲ་ཤིས་མཆོག་གི་བདེ་ལེགས་སྩོལ། །ཞེས་བརྗོད། ལྷ་རྫས་ཡིད་དུ་འོང་བ་ཡིས། །མཆོད་ཡོན་ཞབས་བསིལ་མེ་ཏོག་དང་། །བདུག་སྤོས་སྣང་གསལ་དྲི་ཆབ་དང་། །ཞལ་ཟས་རོལ་མོ་ལ་སོགས་པ། །དངོས་གྲུབ་རྣམ་གཉིས་སྩོལ་བྱའི་ཕྱིར། །དབང་ཕྱུག་བཞད་པ་རྡོ་རྗེ་དང་། །ལྷ་སྨན་འཁོར་དང་བཅས་ལ་འབུལ། །དགྱེས་པར་བཞེས་ནས་བདག་ལ་དགོངས། །ༀ་ཤྲི་མཱན་སོགས་ནས། ཤབྡའི་བར་བརྗོད། ཅེས་དང་། རྩ་བརྒྱུད་བླ་མ་བཞད་པ་རྡོ་རྗེ་དང་། །རྣལ་འབྱོར་མ་དཔལ་ཡི་དམ་མཁའ་འགྲོ་མ། །ཚེ་རིང་མཆེད་ལྔ་ཌཱ་ཀི་ཆོས་སྐྱོང་རྣམས། །ཐམས་ཅད་མ་ལུས་བདག་ལ་དགོངས་སུ་
གསོལ། །བདག་སོགས་མ་རིག་དབང་གྱུར་ནོངས་པའི་ཚོགས། །ཆད་ལྷག་ནོར་འཁྲུལ་གཏོར་མཆོད་དམན་པ་དང་། །དམ་ཚིག་མི་ལྡན་གསང་བ་སྨྲས་པ་སོགས། །མཐོལ་ལོ་བཤགས་སོ་བཟོད་པར་བཞེས་སུ་གསོལ། །བླ་མ་དམ་པས་བྱིན་གྱིས་རློབ་པ་དང་། །ཡི་དམ་ལྷ་ཡི་དངོས་གྲུབ་སྩོལ་མཛད་ཅིང་། །ཆོས་སྐྱོང་སྲུང་མས་བར་ཆད་སེལ་བ་དང་། །བསྟན་པ་དར་ཞིང་བཀྲ་ཤིས་ཆོས་འཕེལ་ཤོག །སངས་རྒྱས་བསྟན་སྲུང་དཀོན་མཆོག་དབུ་འཕང་བསྟོད། །དགེ་འདུན་སྡེ་སྐྱོང་རྣལ་འབྱོར་ཚེ་དཔལ་སྤེལ། །སྙན་པའི་དར་ཕྱོར་གྲགས་པའི་དུང་བུས་ལ། །འཁོར་དང་ལོངས་སྤྱོད་རྒྱས་པ་ཉིད་དུ་མཛོད། །རྒས་མེད་ལང་ཚོ་ལྡན་པའི་ལུས་སྟོབས་ལྡན། །མིག་ལ་ཡ་མཚན་ལྟད་མོའི་དགའ་བ་དང་། །རྣ་བར་རྟག་ཏུ་སྙན་པའི་གཏམ་ཐོས་ཤིང་། །དྲི་ཞིམ་ངད་པ་སྣ་དང་མི་འབྲལ་བར། །ཟས་སྐོམ་འབྱོར་པས་རོ་འཛིན་ཚིམ་བྱེད་ཅིང་། །ལུས་ལ་རེག་བྱ་བདེ་བ་ཁོ་ནས་འཚོ། །ཡིད་ལ་རྣམ་པར་བཀྲ་བའི་ཤེས་རབ་དང་། །ཟག་མེད་བདེ་བས་ནམ་ཡང་ངོམ་པར་མཛོད། །ཁྱོད་གསོལ་ཁྱོད་བསྟེན་ཁྱོད་མཆོད་ཁྱོད་རྦད་ན། །མཐུ་རྩལ་མ་ཆུང་བརྩེ་གདུང་ཆེ་བར་མཛོད། །གཞི་ལ་བཀྲ་ཤིས་ཕུན་ཚོགས་ལོངས་སྤྱོད་ལྡན། །བྱེས་སུ་ལམ་འཕྲང་ཆུ་ལ་
སྒྲོལ་འདོན་མཛོད། །འཇིགས་སར་དགྲ་ཇག་ཆོམ་རྐུན་འཚེ་བ་སྐྱོབ། །མདོར་ན་བསམ་དོན་ཡིད་བཞིན་འགྲུབ་པར་མཛོད། །ཅེས་དང་། སྲིད་ཞིའི་དཔལ་འབྱོར་མ་ལུས་འབྱུང་བའི་གཞི། །ཐུབ་པའི་བསྟན་པ་ཡུན་རིང་གནས་པ་དང་། །དེར་འཛིན་བྱེད་པའི་སྐྱེས་བུ་དམ་པ་རྣམས། །དཔལ་འབྱོར་གྱིས་བརྒྱན་ཡུན་རིང་ཞབས་བརྟན་ཤོག །བདག་ཅག་ཡོན་མཆོད་འཁོར་དང་བཅས་པ་ལ། །ཚེ་རིང་ནད་མེད་བདེ་སྐྱིད་ཕུན་སུམ་ཚོགས། །དོན་རྣམས་ཐམས་ཅད་ཡིད་བཞིན་འགྲུབ་པ་དང་། །འགྲོ་བའི་དོན་ལ་མཐུ་དང་ལྡན་པར་མཛོད། །ལྷ་རྣམས་ནོངས་པ་གང་མཆིས་བཟོད་པར་བཞེས། །རང་གནས་གཤེགས་སམ་རྟེན་ལ་ཅི་བདེར་བཞུགས། །འཇིག་རྟེན་འཇིག་རྟེན་འདས་པའི་དགེ་ལེགས་ཚོགས། །གོང་ནས་གོང་དུ་འཕེལ་པའི་བཀྲ་ཤིས་ཤོག །ཅེས་བརྗོད་ཅིང་། ཉེར་ལྔ་པ་ཡི་དམ་གྱི་རྗེས་ཆོག་གི་རིམ་པ་ལ་མཆོད་པ་ཁ་གསོས་ལ། ༀ་ཨཱཿབིགྷཱན་གྱིས་བསངས། སྭཱ་བྷ་ཝས་སྦྱངས། སྟོང་པའི་ངང་ལས་ཨ་ལས་ཀ་པཱ་ལར། །ཡངས་ཤིང་རྒྱ་ཆེ་རྣམས་ཀྱི་ནང་དུ་ཧཱུྃ། །དཔག་མེད་འོད་ཞུའི་ལྷ་རྫས་ལས་གྲུབ་པའི། །རྡོ་རྗེའི་མཆོད་ཡོན་མེ་ཏོག་བདུག་སྤོས་དང་། །སྣང་གསལ་དྲི་མཆོག་ཞལ་ཟས་སྒྲ་སྙན་སོགས། །དྭངས་ཤིང་ཐོགས་མེད་མཁའ་དབྱིངས་གང་བར་གྱུར། །ༀ་ཤྲཱི་བཛྲ་ཝཱ་ར་ཧཱི་བཛྲ་ཨརྒྷཾ་པྲ་ཏིཙྪ་
སྭཱ་ཧཱ། །པུཥྤེ། ནས། ཤབྡའི་བར་དང་། པཉྩ་ཨ་མྲྀ་ཏ་ཨཱཿཧཱུྃ། བཛྲ་མ་ཏཾ་གི་ཨཱཿཧཱུྃ། ཞེས་པས་མཆོད་ཅིང་། བསྟོད་པ་ནི། སྟོང་ཉིད་སྙིང་རྗེའི་བདག་ཉིད་ཅན། །ཁམས་གསུམ་པོ་ཡི་ངོ་བོ་ཉིད། །བསྐལ་པའི་མེ་ལྟར་འབར་པའི་འོད། །རྡོ་རྗེ་རྣལ་འབྱོར་མ་ལ་འདུད། །བདེ་བའི་རང་བཞིན་མ་སྐྱེས་པ། །ཅི་བཞིན་ཉིད་དུ་རྟོགས་གྱུར་པས། །གཞན་དོན་མཐར་ཕྱིན་མཛད་པ་ཡི། །རྣལ་འབྱོར་མ་ལ་ཕྱག་འཚལ་འདུད། །བདེ་གཤེགས་སྐུ་ལ་གཉིས་མེད་དང་། །ཟག་མེད་བདེ་བས་སྐུ་ཉམས་བརྟས། །སེམས་ཅན་རྣམས་ལ་བདེ་སྟེར་མ། །ཕག་མོའི་སྐུ་ལ་ཕྱག་འཚལ་བསྟོད། །ཅེས་བསྟོད་དེ། མ་འབྱོར་པ་དང་ཉམས་པ་དང་། །གང་ཡང་བདག་རྨོངས་བློ་ཡིས་ནི། །བགྱིས་པ་དང་ནི་བགྱིད་བསྩལ་བ། །དེ་ཀུན་མགོན་ལ་བཟོད་པར་གསོལ། །གང་ཡང་བདག་བློ་རྨོངས་གྱུར་པས། །ལེགས་སྤྱད་འདི་ལ་ཉེར་གྱུར་གང་། །གང་ཕྱིར་ལུས་ཅན་སྐྱབས་ཡིན་ཕྱིར། །དེ་ཀུན་མགོན་ཁྱོད་བཟོད་པར་གསོལ། །རྫོགས་སངས་རྒྱས་དང་ལྷ་རྣམས་དང་། །དེ་སྲས་རྣམས་དང་ཚངས་ལ་སོགས། །འཇིག་རྟེན་སྐྱོང་རྣམས་ཆོ་ག་འདིའི། །མ་ཚངས་མ་དག་བཟོད་པར་གསོལ། །ཞེས་ནོངས་པ་བཤགས་ཤིང་ཡིག་བརྒྱ་བརྗོད། ཐལ་མོ་སྦྱར་བས་འདོད་པའི་དོན་ལ་གསོལ་བ་བཏབ་ཅིང་། ལྷ་
མོ་ཚད་མ་དམ་ཚིག་ཚད་མ་དང་། །དེས་གསུང་ཚིག་ཀྱང་མཆོག་ཏུ་ཚད་མ་སྟེ། །བདེན་པ་དེ་ཡིས་ལྷ་མོ་མཆོག་གིས་ནི། །བདག་ལ་རྗེས་སུ་འཛིན་པའི་རྒྱུར་གྱུར་ཅིང་། །རིགས་སུ་སྐྱེ་དང་དམ་ཚིག་ཅན། །སྨྱོ་མེད་ཀྱེ་ཡི་རྡོ་རྗེ་སྟོན། །བླ་མ་ལ་གུས་སྙིང་རྗེར་ལྡན། །སྐྱེ་ཞིང་སྐྱེ་བར་འགྱུར་བར་ཤོག །ལག་པས་རྡོ་རྗེ་དྲིལ་བུ་འཁྲོལ། །ཟབ་མོའི་ཆོས་ནི་ཀློག་པ་དང་། །བཙུན་མོའི་ཤུ་ཀྲ་མཉམ་ཟས་ཅན། །སྐྱེ་ཞིང་སྐྱེ་བར་འགྱུར་བར་ཤོག །སེམས་ཅན་ཐམས་ཅད་སྡིག་མེད་ཅིང་། །སེམས་ཅན་ཐམས་ཅད་བདེ་གྱུར་ཅིག །གང་གི་ལམ་ནས་འགྲོ་བ་ཡི། །སངས་རྒྱས་ཉིད་དང་འཕྲད་པར་ཤོག །མ་བརྒལ་བ་རྣམས་བསྒྲལ་བ་དང་། །མ་གྲོལ་བ་རྣམས་བདག་གིས་གྲོལ། །ད་ལྟ་ཉིད་དུ་རྗེས་བརྩེ་བས། །རྣལ་འབྱོར་བསྟན་བཅོས་གནས་ལ་དགོད། །ཅེས་དང་། བདག་དང་འགྲོ་ལ་ཐུགས་བརྩེའི་ཕྱིར། །ཉིད་ཀྱི་རྫུ་འཕྲུལ་མཐུ་ཡིས་ནི། །ཇི་སྲིད་མཆོད་པ་བདག་བགྱིད་པ། །དེ་སྲིད་བཅོམ་ལྡན་བཞུགས་སུ་གསོལ། །ཞེས་རྒྱུན་པར་དང་། གྲོལ་དུས། ༀ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཞིང་དུ་གཤེགས་སུ་གསོལ། །སངས་རྒྱས་ཞིང་དུ་གཤེགས་ནས་ཀྱང་། །སེམས་ཅན་རྣམས་ཀྱི་དོན་སླད་དུ། །སླར་ཡང་
འབྱོན་པར་མཛད་དུ་གསོལ། །བཛྲ་མུ༴། ཞེས་ཡེ་ཤེས་པ་རྣམས་རང་བཞིན་གྱི་གནས་སུ་གཤེགས་ནས་དམ་ཚིག་པ་རྣམས་རང་གི་སྙིང་ཀའི་གནས་སུ་ༀ་ཨཱཿཧཱུྃ་གིས་བསྡུ། ཕྱི་རོལ་སྣོད་བཅུད་རྟེན་གཞལ་ཡས་ཁང་འཁོར་དང་བཅས་པ་བདག་ཉིད་ལ་འདུས། བདག་ཉིད་ཀྱང་སྤྱི་བོ་དང་ཞབས་མཐིལ་ནས་འདུས་ཏེ། གསང་གནས་ཀྱི་སྔགས་འཁོར་དང་ཧྲཱིཿལ་ཐིམ། དེ་ཡང་ཐིག་ལེ་དང་ནཱ་ད་ལས་འདས་ནས་དོན་དམ་སྟོང་པ་ཉིད་དོ། །ཞེས་ཅི་གནས་སུ་བཞག །སླར་ཡང་དེ་ཉིད་ཀྱི་ངང་ལས་སྟོང་བཞིན་དུ་ཉེ་བར་སྣང་བ་སྒྱུ་མའི་དཔེ་བཅུ་གཉིས་ཀྱི་ཁྱད་པར་བྱས་པའི་ཟུང་འཇུག་གཟུགས་ཀྱི་སྐུ་ཞལ་གཅིག་ཕྱག་གཉིས་གྲི་གུག་དང་ཐོད་པ་བསྣམས་པ་སྐུ་མདོག་དམར་མོ་ཕྱག་རྒྱ་ལྔས་བརྒྱན་པ་གསལ་བར་གྱུར། དགེ་བ་འདི་ཡིས་མྱུར་དུ་བདག །ཡི་དམ་ལྷ་ཚོགས་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །བཀྲ་ཤིས་ནི། ཆོས་དབྱིངས་མཁའ་ལ་རྒྱལ་དང་རྒྱལ་སྲས་ཀྱི། །རྒྱུ་སྐར་སྣ་ཚོགས་དབུས་ན་རི་བོང་ཅན། །འཆི་མེད་ཚེ་ཡི་ཆ་ཤས་ཡོངས་གང་བའི། །མགོན་པོ་ཚེ་དཔག་མེད་ཀྱི་བཀྲ་ཤིས་ཤོག །གྲུབ་པའི་བཅུད་ལེན་མཆོག་གི་རོ་མྱོང་བས། །འཕོ་མེད་འཇའ་ལུས་རྡོ་རྗེའི་སྐུ་འགྲུབ་ཅིང་། །གྲུབ་པ་བརྒྱད་ཀྱི་ནོར་གྱིས་ཡོངས་སུ་འབྱོར། །རྗེ་བཙུན་
བཞད་པ་རྡོ་རྗེའི་བཀྲ་ཤིས་ཤོག །སྟོང་དང་སྙིང་རྗེ་ཟུང་འཇུག་རོལ་རྩལ་ལས། །འཕགས་བཞི་སྐྱེད་ཡུམ་མཁའ་འདྲའི་ཆོས་ཀྱི་སྐུ། །པྲ་ཕབ་ལྟ་བུར་གཟུགས་ཀྱི་སྐུར་བཞེངས་པ། །རྡོ་རྗེ་རྣལ་འབྱོར་མ་ཡི་བཀྲ་ཤིས་ཤོག །དག་པ་གཉིས་ལྡན་ཟུང་འཇུག་བདེ་བ་ཆེ། །མངོན་དུ་བྱས་ཏེ་སྒྲུབ་བརྒྱུད་རིང་ལུགས་མཆོག །ཕྱོགས་བཅུར་སྤེལ་ཕྱིར་འཇིག་རྟེན་ཌཱ་ཀིའི་ཚུལ། །ཚེ་འཛིན་ལྷ་མོ་ལྔ་ཡི་བཀྲ་ཤིས་ཤོག །གནས་འདིར་ཉིན་མོར་བདེ་ལེགས་མཚན་བདེ་ལེགས། །སོགས་བརྗོད་ཅིང་མེ་ཏོག་འཐོར། བུམ་ཆུ་བཏུང་ཞིང་སིནྡྷུ་ར་གནས་གསུམ་དུ་བྱུག །ལྷག་མ་ཚགས་བྱ་ཞིང་གཡང་རྫས་རྣམས་ཕྱི་ལ་མི་འཁྱར་བ་བྱ། གཞན་དོན་ཡིན་ན་གཡང་གཏད་དུས་སྦྱིན་བདག་ཕོ་མོ་བོས་ནས་གཡང་རྫས་གཏད་པའི་གོང་དུ་གྲུབ་རྒྱལ་ལུགས་ཀྱི་ཚེ་དབང་བསྐུར་བ་དང་། ཁྱད་པར་བླ་མེད་དམ་ཚིག་ཅན་ལ་ཌཱ་ཀི་ལྔ་ཡི་བཀའ་གཏད་ཆགས་མེད་རིན་པོ་ཆེའི་དབང་ཆོག་ལྟར་བསྐུར་ཀྱང་ལེགས་ཤིང་སྤྱི་ལ་ནི་དེ་དག་ཁྲོམ་ཆོས་སུ་མི་རུང་བ་ཡང་གནད་ཀྱི་ཞལ་གདམས་དང་། དུས་མཆོད་ལྟར་གཙོ་མོ་ལྔའི་གཏོར་མ་དང་། འབུལ་གཏོར་ཙམ་ལ་བརྟེན་ནས་བསྡུས་ཏེ་འདོན་པར་སྤྲོ་ན་བདག་བསྐྱེད་བླ་མ་ཡི་དམ་གྱི་བསྐྱེད་བཟླས་ཚར་ནས་ཚེ་རིང་མའི་མངོན་རྟོགས་ནས་བཟུང་མཐར་ཆགས་སུ་འདོན་ཅིང་། གཡང་འགུགས་རྣམས་བཞག །རྗེས་ཆོག་ཀྱང་དེ་མཚུངས་བསལ་འདོན་ཞེས་པར་བྱས་ཀྱང་ཆོག་གོ། །འདི་ཡི་དམ་ཚིག་ཏུ་བླ་མ་མི་ལའི་བཀའ་བརྒྱུད་ཡི་དམ་ལྷན་ཅིག་སྐྱེས་མ། བཀའ་སྲུང་ལྷ་སྨན་རྒྱལ་མོ་རྣམས་སྲོག་
ལ་ཐུག་རུང་མི་འདོར་བའི་ཅི་མཛད་ཁྱེད་ཤེས་ཀྱིས་བློ་བཀལ་བ་དང་། ཕྱག་རྒྱ་ཆེན་པོའི་དྲན་པ་རྒྱུན་ཆགས་ཤིན་ཏུ་གལ་ཆེ་ཞིང་། དེ་ལྟར་དམ་ཚིག་དང་ལྡན་པར་བསྒྲུབ་ན། བླ་མའི་རྣལ་འབྱོར། ཡི་དམ་སྒོམ་བཟླས། ཚེ་སྒྲུབ། ནོར་སྒྲུབ་སོགས་དགོས་པ་ཐམས་ཅད་ཚང་བས་བརྒྱུད་པ་འདི་ཡི་རྗེས་འཇུག་རྣམས་ཀྱིས་གཅེས་སྤྲས་སུ་བྱ་བར་རིགས་སོ། །ཅེས་པའང་། སི་ཏུ་པདྨ་ཉིན་བྱེད་དབང་པོས། དབོན་བསམ་གཏན་སྤྲུལ་པའི་སྐུ་ཀརྨ་ཐེག་མཆོག་ངེས་དོན་བསྟན་འཕེལ་གྱི་ཐུགས་བཞེད་ལྟར། རྗེ་ཀརྨ་ཆགས་མེད་རིན་པོ་ཆེའི་ལུང་གཞིར་བྱས་ནས་གསལ་བར་བཀོད་པ་བཀྲ་ཤིས་མི་ནུབ་བསྟན་པ་དར་རྒྱས་འགྲོ་ལ་བདེ་སྐྱིད་ཕན་བདེའི་དཔལ་དུ་ཤོག །སརྦ་མངྒ་ལམ། །