སྨོན་ལམ་གྱི་རིམ་པ་རྣམས་ཕྱོགས་གཅིག་ཏུ་བསྡེབས་པ་ཐར་ལམ་བདུད་རྩིའི་གཏེར་མཛོད།
སྨོན་ལམ་གྱི་རིམ་པ་རྣམས་ཕྱོགས་གཅིག་ཏུ་བསྡེབས་པ་ཐར་ལམ་བདུད་རྩིའི་གཏེར་མཛོད་ཅེས་བྱ་བ་བཞུགས་སོ།
སྨོན་ལམ་གྱི་རིམ་པ་བྱང་ཆུབ་མཆོག་གི་གྲུ་གཟིངས་ཞེས་བྱ་བ་བཞུགས་སོ། །ཞིང་ཁམས་རྒྱ་མཚོ་མངའ་མཛད་པའི། །རྒྱལ་བ་རྒྱ་མཚོ་ཉན་རང་ཚོགས། །རྒྱུད་སྡེ་རྒྱ་མཚོའི་དཀྱིལ་འཁོར་ལྷ། །ཆོས་སྐྱོང་རྒྱ་མཚོ་དགོངས་སུ་གསོལ། །འདི་ལྟར་བསོད་ནམས་དཔག་མེད་ལས་གྲུབ་པའི། །རྨད་བྱུང་བྱང་ཆེན་དགེ་འབྲས་བླ་ན་མེད། །སྔོན་གྱི་སྐྱེས་བུ་དམ་པའི་ཟླ་མེད་སྲོལ། །མི་ཡི་སེང་གེ་ལྷར་བཅས་མཆོད་གནས་གྱུར། །ཨེ་མ་བོ་དྷི་ས་ཏྭའི་བསླབ་པ་རྣམས། །ཉམས་མེད་གོང་ནས་གོང་དུ་འཕེལ་བ་དང་། །བྱང་ཆུབ་སེམས་མཆོག་འབྲལ་བ་མེད་བཞིན་དུ། །ལོག་ཕྱོགས་བདུད་ཀྱི་ལས་རྣམས་སྤང་བར་ཤོག །བརྩེ་ཆེན་བྱམས་པའི་ཐུགས་དང་ལྡན་རྣམས་ཀྱི། །གཞན་དོན་ཚད་མེད་ཇི་ལྟར་འབྱུང་བ་
དང་། །བདེ་གཤེགས་སྟོན་པ་མཆོག་གི་དགོངས་པའི་དོན། །མ་གྱུར་མཁའ་མཉམ་འགྲོ་ལ་འབྱུང་གྱུར་ཅིག །མངོན་ཤེས་དྲུག་ལྡན་རྒྱལ་དང་རྒྱལ་བའི་སྲས། །ཆོས་མཆོག་རིག་གྲོལ་བསླབ་ལྡན་དགེ་འདུན་ཚོགས། །མཆོག་གསུམ་བཀྲ་ཤིས་མཁའ་དབྱིངས་ཀློང་ཡངས་ནས། །རྣམ་ཀུན་བདེ་ལེགས་ཉིན་བྱེད་གསལ་གྱུར་ཅིག །ཅེས་པའང་འགྲོ་བའི་མགོན་གྱུར་སྒྲུབ་བརྒྱུད་རིན་པོ་ཆེའི་ལམ་སྲོལ་རྗེས་སུ་སློབ་པའི་ཡིད་ཅན་རྣམ་དག་ཚུལ་ཁྲིམས་རྒྱན་སྤྲས་གནས་མཚུངས་ཀརྨ་མཚན་བཟང་གིས་འདི་ལྟར་བྱང་ཆུབ་སེམས་དཔའི་སྤྱོད་པ་ལ་འཇུག་པ་སློབ་པའི་སྐབས། ཀྭན་ཏིང་ཏཱ་ཡི་སི་ཏུས་སྨོན་ལམ་ཤིས་བརྗོད་རྟེན་འབྱུང་གི་ཆེད་དུ་བྲིས་པ་སྟེ་དགེ་ལེགས་སུ་གྱུར་ཅིག །ཀྱེ་མ་དེང་དུས་སྙིགས་མ་ལྔ་བདོ་བའི། །རང་མདངས་ཆེས་ཆེར་སྟོན་པའི་སྐབས་འདིར་ཡང་། །བྱང་ཆེན་སྤྱོད་པའི་རྗེས་སུ་
སློབ་འདི་དག །ལེགས་སོ་ལེགས་སོ་བསྐལ་བཟང་མཆོག་ཏུ་གྱུར། །རྒྱལ་ཀུན་ངོ་བོ་པདྨ་འབྱུང་། །གཉིས་མེད་ཡེ་ཤེས་རྣམ་རོལ་བ། །གདུལ་དཀའ་སྒྲོལ་མཛད་དཔལ་ཆེན་པོ། །གྲུབ་པའི་དབང་ཕྱུག་པཀྴི་རྗེ། །སྣང་སྟོང་འགྱུར་མེད་རྡོ་རྗེའི་སྐུ། །ཚངས་དབྱངས་གྲག་སྟོང་ལྡན་པའི་གསུང་། །མཁའ་ལྟར་ཡངས་པའི་བདེ་སྟོང་ཐུགས། །སྐུ་གསུམ་ཡོན་ཏན་ཡོངས་རྫོགས་པ། །སྒྲུབ་བརྒྱུད་བསྟན་པའི་ཉི་མ་ཆེ། །འགྲོ་དྲུག་མ་རིག་མུན་པ་སེལ། །ལེགས་པའི་ལམ་མཆོག་གསལ་སྟོན་པ། །གྲུབ་པའི་འཁོར་ལོས་སྒྱུར་བ་པོ། །དཔལ་ལྡན་ཀརྨ་ཀ་ཞེས་གྲགས། །འཛམ་གླིང་བྱེ་བ་ཕྲག་བརྒྱའི་ཞིང་། །དེ་སྙེད་རྗེས་འཛིན་མགོན་པོ་མཆོག །བསྟན་འགྲོའི་ངལ་བ་རིང་བསྐྲད་པའི། །སྙིང་རྗེ་ཚད་མེད་སྐུར་བཞེངས་པ། །སྤྲུལ་པའི་སྐྱེས་མཆོག་ཕྲེང་བ་ལས། །བཅུ་གསུམ་བདུད་འདུལ་རྡོ་རྗེའི་ཞབས། །རྒྱལ་ཀུན་ངོ་བོ་ཐུགས་རྗེ་ཅན། །སྙིགས་དུས་གདུལ་བྱའི་བསོད་ནམས་ཞིང་། །དཔལ་ཡོན་བཟང་པོར་ཡོངས་སུ་གྲུབ། །རྣམ་པར་འདྲེན་པ་མཆོག་གང་ལ། །བདག་ལུས་རྡུལ་སྙེད་སྤྲུལ་ནས་ནི། །དད་པའི་བློ་ཡི་གདུང་ཤུགས་ཀྱིས། །ཡན་ལག་ས་ལ་གུས་བཏུད་དེ། །འཁོར་ལོའི་མགོན་ལ་ཕྱག་འཚལ་ལོ། །ལུས་དང་ལོངས་སྤྱོད་དུས་གསུམ་གྱི། །དགེ་ཚོགས་གཅིག་ཏུ་བསྡུས་ནས་ནི། །རྨད་བྱུང་དྲི་མེད་མནྜལ་འདི། །འབུལ་ལོ་བཞེས་ནས་བྱིན་གྱིས་རློབས། །ཐོག་མེད་དུས་ནས་ད་ལྟའི་
བར། །ལུས་ངག་ཡིད་ཀྱི་མི་དགེའི་ལས། །ནོངས་པར་གྱུར་པའི་ཚོགས་ཇི་སྙེད། །བཤགས་སོ་དག་ཚངས་དངོས་གྲུབ་སྩོལ། །རྒྱལ་རྣམས་ཐུགས་བསྐྱེད་དཔག་དཀའ་བའི། །ཟབ་མོ་རྒྱ་ཆེན་ཕྲིན་ལས་ཀྱིས། །མཐོང་ཐོས་དྲན་རེག་སྨིན་གྲོལ་བའི། །གཞན་དོན་ཚད་མེད་རྗེས་ཡི་རངས། །མཁའ་དང་མཉམ་པའི་སེམས་ཅན་རྣམས། །སྐལ་བར་འཚམས་པའི་དམ་ཆོས་ཀྱི། །འཁོར་ལོ་རིམ་པ་གསུམ་གྱི་དོན། །བསྐོར་བར་གསོལ་ལོ་ཐུགས་རྗེ་ཅན། །ཟླ་མེད་མཚན་དཔེ་འབར་བའི་སྐུ། །ཡན་ལག་དྲུག་ཅུའི་གསུང་གི་མཛོད། །ཇི་སྙེད་མཁྱེན་པའི་ཐུགས་མངའ་བ། །གསང་གསུམ་འགྱུར་མེད་རྡོ་རྗེའི་སྐུ། །མི་ཤིགས་རྡོ་རྗེ་མི་འགྱུར་བ། །གཡུང་དྲུང་མི་འཇིགས་སེང་གེ་ཁྲིར། །གཡོ་མེད་རྟག་པར་བརྟན་བཞུགས་ནས། །འོད་མི་འགྱུར་བཞིན་ཞབས་བརྟན་གསོལ། །བདག་གིས་དགེ་བའི་ལས་བགྱིས་དང་། །བགྱིད་དུ་སྩལ་བའི་དགེ་བ་དེས། །འཁོར་བའི་དུཿཁར་སྤྱོད་པ་རྣམས། །མྱང་འདས་ཆེན་པོར་འགོད་པར་ཤོག །བདག་ནི་ཚེ་རབས་ཀུན་ཏུ་ཡང་། །བླ་མ་དཔལ་ལྡན་ཀརྨ་པ། །ནམ་ཡང་འབྲལ་མེད་གུས་མཆོད་ཅིང་། །དམ་པའི་བདུད་རྩིའི་དཔལ་སྤྱོད་ནས། །རང་བྱུང་ལྷན་སྐྱེས་དོན་དམ་པ། །གཉུག་མའི་ཡེ་ཤེས་མངོན་གྱུར་ནས། །བླ་མེད་སྐུ་བཞིའི་རྒྱལ་ས་ཆེ། །མྱུར་དུ་ཐོབ་པར་བྱིན་གྱིས་རློབས། །ཇི་སྲིད་དེ་མ་ཐོབ་ཀྱི་བར། །གཉིས་འཛིན་འཁྲུལ་པའི་ལས་དབང་གི། །མི་མཐུན་
ཉེར་འཚེ་བདུད་རིགས་ཀྱིས། །རློམ་པའི་ལས་རྣམས་སྤང་བར་ཤོག །དེ་ལྟར་ཡིད་ཀྱི་པདྨོ་ལས། །བྱུང་བའི་དྲི་བསུང་ངད་ལྡང་བ། །དད་པའི་སེར་བུས་བསྐུལ་བྱས་ཏེ། །རྫོགས་སངས་རྒྱས་ཀྱི་གཞིར་གྱུར་ཅིག །རྒྱལ་དང་དེས་གསུང་ཆོས་དགེ་འདུན། །མཆོག་གསུམ་བྱིན་རླབས་སྟོབས་ཆེན་པོས། །དེང་འདིར་སྨོན་ལམ་དགེ་ཚོགས་རྣམས། །མ་ལུས་ལུས་མེད་འགྲུབ་གྱུར་ཅིག །བཀའ་བརྒྱུད་རིན་ཆེན་གྲུབ་པའི་དབང་། །རྒྱུད་བཞིར་འབྲེལ་བའི་ཡི་དམ་ལྷ། །དཔལ་མགོན་དམ་ཅན་སྲུང་མའི་ཚོགས། །རྩ་གསུམ་བཀྲ་ཤིས་འབྱུང་གྱུར་ཅིག །ཅེས་པའང་བསམ་གཏན་མཆོག་གླིང་གི་བྱ་བཏང་བ་དགེ་སློང་མཛེས་ལྡན་གྱི་ཐུགས་བཞེད་ལྟར། སི་ཏུ་སྤྲུལ་སྐུ་པདྨ་ཉིན་བྱེད་དབང་པོས་སྒྲ་རྒྱལ་འབྲུག་གི་ལོ་ས་ཟླའི་ཡར་ཚེས་ཀྱི་དཀར་ཕྱོགས་ལ་ཐུབ་བསྟན་གླིང་ནས་བྲིས་པ་སྟེ། ལར་སྨོན་ལམ་གསོལ་འདེབས་སོགས་རྒྱལ་མཆོག་ཡབ་སྲས་རྣམས་ཀྱིས་བསྩལ་བའི་སྡེ་ཚན་དང་། ཁྱད་པར་མདོ་སྡེ་ཕལ་ཆེན་ལས་བྱུང་བའི་སྨོན་ལམ་སོགས་གསུང་གི་བདེན་ཚིག་འགྲུབ་པའི་འཕགས་པ་རྣམས་ཀྱིས་བཀྲལ་བ་དག་གི་རྗེས་སུ་སློབ་པར་ཞུ་ཞིང་། བདག་ལྟ་སོ་སྐྱེས་སྨོས་པའི་རང་བཞིན་གཏད་མེད་ཀྱི་ཚིག་གིས་ཕན་པ་ཆེར་མི་མངོན་པས་དེ་ལྟར་ཐུགས་མཚོར་བསྟིམ་པ་ཞུ་ཞུ།། ༈ །།བདེ་བ་ཅན་གྱི་སྨོན་ལམ་མཁའ་ལྡིང་ཤུགས་འཆང་ཞེས་བྱ་བ་བཞུགས་སོ། །ན་མོ་གུ་རུ་ཨ་མི་ཏ་བྷ་ཡ། དེ་བཞིན་གཤེགས་པ་ལྷ་རྣམས་ཀུན་གྱི་ལྷ། །སྟོབས་བཅུའི་མངའ་བདག་སངས་རྒྱས་བཅོམ་
ལྡན་འདས། །ཚེ་དང་ཡེ་ཤེས་དཔག་མེད་འོད་མཐའ་ཡས། །རྒྱལ་དང་རྒྱལ་བའི་མཆོག་དེར་གུས་པས་འདུད། །གང་ཚེ་མཉན་ཡོད་རྒྱལ་བྱེད་སྐྱེད་མོས་ཚལ། །མགོན་མེད་ཟས་སྦྱིན་ཀུན་དགའ་ར་བ་རུ། །སྟོན་པ་དོན་ཀུན་ཡོངས་གྲུབ་ཤཱཀྱའི་ཏོག །འཁོར་དུ་བྱང་སེམས་ཉན་ཐོས་དཔག་མེད་དང་། །ལྷ་མིའི་འཁོར་ཚོགས་དུ་མས་ཡོངས་བསྐོར་དབུས། །ཤེས་རབ་མཆོག་ལ་གདམས་ཏེ་བསྔགས་པའི་གནས། །ནུབ་ཕྱོགས་ཞིང་ཁམས་བྱེ་བ་ཁྲག་ཁྲིག་འབུམ། །དེ་ཡི་ཕ་རོལ་བདེ་ཅན་པདྨོ་བཀོད། །གཟི་བརྗིད་རྒྱལ་པོ་འོད་དཔག་མེད་པའི་ཞིང་། །ཕུན་ཚོགས་ལྔ་ལྡན་དཔལ་གྱི་ཡོན་ཏན་བརྒྱན། །ཀུན་ནས་རྣམ་པར་སྣང་བའི་འོད་ཀྱིས་གསལ། །རྨད་བྱུང་མཐའ་ཡས་བཀོད་པ་བླ་ན་མེད། །བསམ་བརྗོད་བྲལ་བའི་ཞིང་གི་སྟོན་མཆོག་དེར། །རྟག་པར་རྒྱུན་གྱི་ཕྱག་འཚལ་སྒོ་གསུམ་འདུད། །དངོས་དང་ཡིད་སྤྲུལ་ཀུན་བཟང་མཆོད་སྤྲིན་འབུལ། སྒྲིབ་གཉིས་བག་ཆགས་དབང་གྱུར་ཉེས་བཤགས་སྡོམ། །ཐེག་ཆེན་བྱང་ཆུབ་སྤྱོད་ལ་ཡི་རང་ངོ་། །ཕྱོགས་བཅུའི་རྒྱལ་རྣམས་ཆོས་འཁོར་བསྐོར་བར་བསྐུལ། །བགྲང་ཡས་བསྐལ་པར་འགྲོ་དོན་བཞུགས་གསོལ་འདེབས། །དུས་གསུམ་དགེ་ཚོགས་ཆོས་དབྱིངས་ཆེན་པོར་བསྔོ། །བདག་དང་བདག་ལ་འབྲེལ་བའི་ལུས་ཅན་རྣམས། །ནམ་ཞིག་སྒྱུ་མའི་གཡར་ཁང་འཇིག་ཉེའི་དུས། །ཅི་བྱ་གཏོལ་བྲལ་ངང་དུ་གནས་པའི་
ཚེ། །བློ་གཏད་ལིང་སྐྱུར་རྩེ་གཅིག་གསོལ་འདེབས་ན། །བླ་མ་དང་ནི་དབྱེར་མེད་བདེ་ལྡན་མགོན། །སྟོན་པ་མཆོག་ཉིད་ཡིད་ངོར་མངོན་སུམ་དུ། །རྟོགས་པའི་ཚད་མེད་བྱིན་རླབས་འབྲེལ་བ་དང་། །སྔོན་ཚེ་ཞལ་བཞེས་བྱང་ཆུབ་ཐུགས་བསྐྱེད་ལྟར། །བདེ་བ་ཅན་དེར་ཏ་ལེར་འཕོ་ནུས་ཤོག །དེ་ལྟའི་སྨོན་ལམ་འབྲེལ་པ་མཐའ་བཙན་ཕྱིར། །དེང་བཟུང་ཇི་སྲིད་འཚོ་བའི་བར་དུ་ཡང་། །སྐྱབས་མེད་སྐྱོབ་པའི་མགོན་དུ་ཁྱོད་ལ་གསོལ། །ཉོན་མོངས་བག་ཆགས་མཐུག་པོའི་དབང་གིས་ནི། །ཐར་པའི་ལམ་བཟང་སྒྲིབ་པར་སྲིད་ན་ཡང་། །བརྩེ་ཆེན་མགོན་གྱི་ཐུགས་རྗེས་འདོར་རམ་ཅི། །མྱུར་བར་ཕྱག་གིས་འདྲེན་པར་མཛད་དུ་གསོལ། །གཞན་ཡང་ཕྱོགས་བཅུའི་ཞིང་བཞུགས་བཅོམ་ལྡན་འདས། །མི་འཁྲུགས་རྒྱལ་བ་ཉི་ཟླའི་སྒྲོན་མ་དང་། །མཐའ་ཡས་མགོན་པོ་འོད་འཕྲོ་ཕུང་པོ་ཆེ། །སེང་གེ་ཚངས་པའི་དབྱངས་ལྡན་ལ་སོགས་པ། །བདེ་གཤེགས་ཀུན་གྱི་དབུགས་དབྱུང་བདེན་པའི་གསུང་། །གང་ཞིག་ཇི་ལྟར་དེ་ཉིད་ཡོངས་སྨིན་ཅིང་། །ཕྱིར་མི་ལྡོོག་པ་བདེ་ཆེན་ཞིང་བགྲོད་ནས། །རྒྱལ་བས་དབང་བསྐུར་ལུང་བསྟན་ཐོབ་པར་ཤོག །དེ་ལྟར་སྨོན་ལམ་མཚམས་སྦྱོར་དག་པ་དང་། །བདག་སོགས་དུས་གསུམ་བསགས་པའི་དགེ་བ་རྣམས། །ཞིང་མཆོག་འཇུག་ཕྱིར་ཡོངས་སུ་བསྔོ་བར་བགྱི། །ཀུན་ཀྱང་བླ་མེད་བྱང་ཆུབ་ཐོབ་གྱུར་ཅིག །ཅེས་པའང་ཧོར་སྒྲུབ་ཆེན་ཀརྨ་མི་ཕམ་བཤེས་གཉེན་དཔལ་བཟང་པོས་
བསྐུལ་བའི་ངོར་སི་ཏུ་པས་སྤེལ་བ་མངྒ་ལཾ། ༈ །བདེ་ཆེན་ཞིང་སྨོན་ཐར་འདོད་དད་བའི་ལྕགས་ཀྱུ་ཞེས་པ་བཞུགས། བདག་གི་དུས་གསུམ་དགེ་བའི་རྩ་བ་རྣམས། །དཀོན་མཆོག་རིན་ཆེན་གསུམ་ལ་འབུལ་བར་བགྱི། །དེ་ཡི་ལེགས་བྱས་ཇི་སྙེད་མཆིས་སོ་ཅོག །མར་གྱུར་ནམ་མཁའི་མཐའ་མཉམ་ཡོངས་ལ་བསྔོ། །སྡུག་བསྔལ་ཀུན་འབྱུང་རྒྱུ་བཅས་དག་གྱུར་ཅིག །རབ་དཀར་དགེ་ཚོགས་ཚོགས་གཉིས་རྒྱ་མཚོ་ཡི། །བྱང་ཆུབ་སྤྱོད་པའི་ལྷག་བསམ་སྟོབས་དག་གིས། །བདག་དང་བདག་ལ་འབྲེལ་བའི་ཡིད་ཅན་རྣམས། །མི་རྟག་གཡར་ཁང་འཇིག་པར་ཉེན་པ་ན། །སྐྱབས་གནས་ཐུགས་རྗེ་ཅན་གྱི་བདེ་བར་གཤེགས། །བཅོམ་ལྡན་འོད་སྣང་དཔག་ཏུ་མེད་བའི་མགོན། །ལྷ་ཚོགས་རྣམས་ལ་རྩེ་གཅིག་གསོལ་བ་འདེབས། །ལས་སྣང་གཉིས་འཛིན་འཁྲུལ་པའི་གཡུལ་ངོ་ཟློག །གཉུག་མའི་འོད་གསལ་བདེ་ཆེན་ཡེ་ཤེས་ཀྱི། །རང་རིག་དོན་དམ་ངོ་བོ་འཕྲོད་གྱུར་ནས། །བདེ་བླག་ཉིད་དུ་ལམ་སྣ་དྲང་དུ་གསོལ། །ནུབ་ཕྱོགས་བདེ་བ་ཅན་དུ་སྐྱེ་བར་ཤོག །སྟོན་པ་སངས་རྒྱས་བླ་མ་ཚེ་མཐའ་ཡས། །དངོས་སུ་ཞལ་མཐོང་བདུད་རྩི་དམ་པ་བརྙེས། །ཕྱོགས་བཅུའི་རྒྱལ་རྣམས་མཆོད་ཅིང་འཇིག་རྟེན་ཁམས། །འདྲེན་པའི་དེད་དཔོན་ཉིད་དུ་འགྲུབ་པར་ཤོག །མཆོག་གསུམ་རྩ་གསུམ་ཡོངས་འདུས་རིགས་ཀུན་བདག །སྣང་མཐའ་ཡས་པ་ཆོས་གྲུབ་རྒྱ་མཚོ་ཡིས། །དེང་
འདིར་ཇི་ལྟར་སྨོན་ལམ་འགྲུབ་པ་ཡི། །བླ་མེད་བདེན་པ་དམ་པས་སྐྱོང་གྱུར་ཅིག །ཏདྱ་ཐཱ། པཉྩ་པྲི་ཡ་ཨ་བ་བྷོ་དྷ་ན་ཡ་སྭཱ་ཧཱ། ཞེས་སྨོན་ལམ་བརྗོད་པར་བྱའོ། །དེ་ལྟར་ཚུལ་འདིར་སྨོན་ལམ་གྱི་བློ་ཅན་དད་གསུམ་ལྡན་པ་སྒྲུབ་ཆེན་ངེས་ལེགས་མཐར་ཕྱིན་གྱི་ངོར། སི་ཏུ་པས་སྤེལ་བ་དོན་ལྡན་དུ་གྱུར་ཅིག །བཀྲ་ཤིས། །དུས་གསུམ་རྒྱལ་བའི་སྤྱི་གཟུགས་འོད་དཔག་མེད། །མཆོག་གི་ཞིང་ཁམས་བདེ་ལྡན་པདྨོ་བཀོད། །བདག་སོགས་འབྲེལ་བཅས་སྐྱེ་གཞན་བར་མ་ཆོད། །བརྫུས་འཁྲུངས་སྟོན་པའི་ཞལ་མཐོང་ལུང་བསྟན་ཐོབ། །བྱང་ཆུབ་སྤྱོད་པ་མཐར་ཕྱིན་འགྲོ་བའི་དོན། །ཡོངས་འགྲུབ་མཐར་ཐུག་རྫོགས་སངས་རྒྱས་ཐོབ་ཤོག །ལྷ་མགར་ཀརྨ་བཟང་པོའི་ངོར་སྤེལ་བ་དགེག །ན་མོ་ཨ་མི་ཏ་བྷ་ཡེ། དུས་གསུམ་སངས་རྒྱས་ཀུན་འདུས་རྒྱལ་བའི་རྒྱལ། །འདྲེན་པ་ཚེ་འོད་དཔག་མེད་མགོན་པོ་ལ། །སྒོ་གསུམ་ཕྱག་འཚལ་མཆོད་ཅིང་ཉེས་ཀུན་བཤགས། །རྗེས་སུ་ཡི་རང་བསྐུལ་ཞིང་གསོལ་བ་འདེབས། །རང་གཞན་དགེ་ཚོགས་བྱང་ཆུབ་ཐོབ་ཕྱིར་བསྔོ། །གནས་སྐབས་ཆོས་མཐུན་བསམ་དཔྱོད་ལེགས་འགྲུབ་ཅིང་། །ནམ་ཞིག་བདེ་ཆེན་དག་པའི་ཞིང་ཁམས་སུ། །སྐྱེ་གཞན་བར་མ་ཆོད་པར་བརྫུས་སྐྱེས་སུ། །སྟོན་པ་མཆོག་གི་ཞལ་མཐོང་ས་ལམ་གྱི། །ཡོན་ཏན་ཡོངས་རྫོགས་སྤྲུལ་པས་འགྲོ་ཀུན་གྱི། །མགོན་དུ་འགྱུར་ཅིང་མ་གྱུར་སེམས་ཅན་རྣམས། །བླ་མེད་རྫོགས་སངས་གོ་འཕང་ཐོབ་གྱུར་ཅིག །ཀརྨ་དོན་དམ་ངོར་སྤེལ་བ་དགེ། །
བདེ་ལྡན་ཞིང་གི་མགོན་པོ་ཡི། །བྱིན་རླབས་ཐུགས་རྗེའི་འོད་སྣང་གིས། །འགྲོ་བློའི་སྒྲིབ་མུན་གཏན་བཅིལ་ནས། །ཡང་དག་ཐར་པའི་ལམ་འགོད་ཤོག །ཅེས་དགེ་སློང་ལའོ།། །།བདེ་བ་ཅན་གྱི་ཞིང་མགོན་འོད་མི་འགྱུར། །སྲས་དང་སློབ་མར་བཅས་ལ་གུས་ཕྱག་འཚལ། །དུས་གསུམ་དགེ་ཚོགས་སེམས་ཅན་དོན་ཕྱིར་བསྔོ། །ཀུན་ཀྱང་བདེ་ལྡན་པདྨོ་བཀོད་ཞིང་དུ། །སྐྱེས་ཏེ་རྒྱལ་བའི་ཞལ་མཐོང་བླ་མེད་ཀྱི། །ལུང་བསྟན་མཆོག་ཐོབ་སླར་ཡང་ཕྱོགས་བཅུ་ཡི། །སངས་རྒྱས་ཞིང་བགྲོད་སྤྲུལ་པ་དུ་ུམ་ཡིས། །འགྲོ་རྣམས་ཕྱིར་མི་ལྡོག་པའི་སར་བཀོད་ཤོག །ཡ་གྲི་དབང་རྒྱལ་ངོར་སྤེལ། །ཡོན་ཏན་བསམ་བརྗོད་བྲལ་བ་བདེ་ཅན་ཞིང། །སྟོན་པ་སངས་རྒྱས་འོད་མི་འགྱུར་བའི་སྐུ། །སྲས་དང་སློབ་བཅས་ཐུགས་རྗེས་དེང་དགོངས་ལ། །བདག་དང་འབྲེལ་གྱུར་སེམས་ཅན་ཇི་སྙེད་པའི། །དུས་གསུམ་དགེ་ཚོགས་བྱང་ཆུབ་ཐོབ་ཕྱིར་བསྔོ། །དེ་མཐུས་མཆོག་གི་ཞིང་ཁམས་དམ་པ་རུ། །སྐྱེས་ཏེ་བླ་མེད་ལུང་བསྟན་མྱུར་ཐོབ་ནས། །སྤྲུལ་བསྒྱུར་དུ་མས་འགྲོ་བའི་མགོན་གྱུར་ཅིག །ཀརྨ་ཆོས་ལྡན་ངོར་སྤེལ། །དཔལ་ལྡན་སྟོབས་བཅུའི་མངའ་བདག་བདེ་བར་གཤེགས། །མ་ལུས་འདུས་པའི་ཐུགས་རྗེའི་རང་བཞིན་ཅན། །བཅོམ་ལྡན་སངས་རྒྱས་འོད་སྣང་མཐའ་ཡས་ལ། །མི་ཕྱེད་དད་པས་ཀུན་ཏུ་ཕྱག་འཚལ་ལོ། །རྣམ་དག་མཆོད་ཕུལ་ཉེས་
ཚོགས་ནོངས་པ་བཤགས། །དགེ་ལ་ཡི་རང་ཆོས་ཀྱི་འཁོར་ལོ་བསྐོར། །མྱ་ངན་མི་འདའ་བཞུགས་གསོལ་དུས་གསུམ་གྱི། །བསགས་པའི་དགེ་ཚོགས་བྱང་ཆུབ་ཆེན་པོར་བསྔོ། །མཐའ་བྲལ་ཡོན་ཏན་བརྗོད་པར་དཀའ་བ་ཡི། །དག་པའི་ཞིང་མཆོག་བདེ་ཆེན་པདྨོ་བཀོད། །སྟོན་པ་གཟི་བརྗིད་རྒྱལ་པོ་ཚེ་འོད་མགོན། །ལྷ་དང་ལྷ་མོ་དཔག་མེད་ཀྱིས་བསྐོར་བ། །བདག་དང་བདག་གི་འབྲེལ་ཐོགས་སེམས་ཅན་རྣམས། །ནམ་ཞིག་རྒྱལ་བའི་ཞལ་མཐོང་ལུང་བསྟན་ཐོབ། །བླ་ན་མེད་པ་ཕྱིར་མི་ལྡོག་པ་ཡི། །གོ་འཕང་དམ་པ་བདེ་བླག་ཉིད་ཐོབ་ཤོག །སངས་རྒྱས་ཆོས་དང་དགེ་འདུན་ཏེ། །དཀོན་མཆོག་རིན་ཆེན་རྣམ་གསུམ་གྱི། །ཚད་མེད་བདེན་པའི་བྱིན་རླབས་ཀྱིས། །སྨོན་ལམ་ཇི་བཞིན་འགྲུབ་པར་ཤོག །ཏདྱ་ཐཱ་པཉྩ་བྲི་ཡ་ཨ་བ་བྷོ་དྷ་ན་ཡེ་སྭཱ་ཧཱ། ཞེས་ལྷ་བྲིས་པ་ཀརྨ་རྣམ་དག་ངོར་སྤེལ། །འཁོར་འདས་ཀུན་ཁྱབ་གདོད་མའི་མགོན། །ཨོ་རྒྱན་སྣང་མཐའི་ཐུགས་རྗེ་ཡིས། །འགྲོ་རྒྱུད་སྒྲིབ་གཉིས་དྲུངིས་ཕྱུང་སྟེེ། །བསམ་དོན་ལྷུན་གྲུབ་གཏན་འདུན་གྱི། །ཆོས་རྣམས་གེགས་མེད་ཡོངས་སྨིན་ནས། །སྐུ་ལྔའི་བདག་ཉིད་ཆེན་པོ་ཡི། །གོ་འཕང་བདེ་བླག་ཉིད་ཐོབ་ནས། །ཀུན་ཀྱང་བདེ་ཆེན་སར་འགོད་ཤོག །ཅེས་བླ་མ་ལེགས་བཤད་ངོར་སྤེལ། །འོད་སྣང་མཐའ་ཡས་སྒྱུ་འཕྲུལ་ལས། །འཁྲུངས་པའི་སྟོན་མཆོག་
ཞྭ་དམར་གྱི། །ཅོད་པན་འཆང་བ་བཅུ་པ་མཆོག །མི་ཕམ་ཆོས་གྲུབ་རྒྱ་མཚོ་ལ། །རྣམ་ཀུན་གསོལ་འདེབས་གུས་ཕྱག་འཚལ། །སྐྱེ་ནས་སྐྱེ་བར་འབྲལ་མེད་ཅིང་། །པདྨོ་བཀོད་པའི་ཞིང་ཁམས་དེར། །ཚེ་འཕོས་གྱུར་ཚེ་སྐྱེ་བར་ཤོག །སྐྱེས་ནས་འགྲོ་བའི་དོན་འབྱུང་ཤོག །ཅེས་བརྩོན་འགྲུས་ངོར་སྤེལ། །བདེ་ལྡན་པདྨོ་བཀོད་པར་འོད་དཔག་མགོན། །ཨོ་རྒྱན་ཡུལ་དུ་སྤྲུལ་སྐུ་པདྨ་འབྱུང་། །གངས་ཅན་ལྗོངས་སུ་ཞྭ་དམར་ཅོད་པན་འཛིན། །རབ་འབྱམས་ཞིང་གི་བདག་པོ་གང་དེར་འདུད། །དེང་བཟུང་བྱང་ཆུབ་སྙིང་པོར་གྱུར་གྱི་བར། །དལ་བརྒྱད་འབྱོར་བཅུའི་ཡོན་ཏན་ཡོངས་རྫོགས་ནས། །དཔག་མེད་བརྗོད་བྲལ་དག་པའི་ཞིང་ཁམས་དེར། །རྒྱལ་བའི་གསུང་གི་དབང་ཕྱུག་ཐོབ་པར་ཤོག །ཕྱོགས་བཅུའི་སངས་རྒྱས་བྱང་སེམས་སྲས་དང་བཅས། །རྒྱལ་བ་རབ་འབྱམས་ཐུགས་རྗེ་ཀུན་འདུས་པ། །བདེ་ལྡན་ཞིང་གི་མགོན་པོ་འོད་མི་འགྱུར། །དབྱེར་མེད་དཔལ་ལྡན་ཆོས་གྲུབ་རྒྱ་མཚོའི་ཞབས། །བདག་སོགས་དུས་གསུམ་དུས་མེད་འགྲོ་བ་ཡིས། །ཕྱག་འཚལ་གསོལ་འདེབས་དགེ་ཚོགས་བྱང་ཆེན་བསྔོ། །རྣམ་གྲོལ་ལམ་བཀོད་བླ་མེད་འཕགས་པ་ཡི། །སྨོན་པའི་འདོད་དོན་ལྷུན་གྲུབ་བྱིན་རློབས་ལ། །པདྨོ་བཀོད་པའི་ཞིང་མཆོག་དེར་སྐྱེས་ནས། །ཕྱིར་མི་ལྡོག་པ་སངས་རྒྱས་སར་འགོད་ཤོག །ཅེས་ཁྲ་ཕུག་སྤྲུལ་སྐུས་བསྐུལ་ངོར་སྤེལ། །
ཐབས་མཁས་གང་འདུལ་དེར་སྣང་སྟོན་མཛད་ཅིང་། །སྲིད་མཚོའི་འཇིགས་སྒྲོལ་ཡང་དག་ལམ་བཟང་པོའི། །གོ་འཕང་དམ་པར་མངོན་དུ་སྦྱོར་བའི་དཔལ། །བདེ་ལྡན་ཞིང་གི་རྒྱལ་རྣམས་ལ་ཕྱག་འཚལ། །བདག་ལུས་ཕྲ་རབ་རྡུལ་གྱི་གྲངས་འདས་སུ། །སྤྲུལ་ནས་དུས་གསུམ་རང་གཞན་དགེ་ཚོགས་ཀུན། །ཐམས་ཅད་རྫོགས་པའི་སངས་རྒྱས་མྱུར་ཐོབ་ཕྱིར། །དངོས་དང་ཡིད་སྤྲུལ་དག་པའི་སྣང་བ་ཡི། །རང་མདངས་ངང་ལས་མཆོད་པ་ཆེན་མོ་འབུལ། །རིག་པའི་རང་རྩལ་གཉུག་མའི་དྲན་ཤེས་ཀྱིག །ཡིད་བྱེད་སྣ་ཚོགས་འཕྲོ་འདུའི་སྣང་བ་ཀུན། །གཞི་རྩ་བྲལ་བའི་སྤྲོས་བྲལ་ཡེ་ཤེས་ཀྱི། །གནས་ལུགས་ངོ་བོ་མཐོང་བར་བྱིན་གྱིས་རློབས། །ཚེ་རབས་ཀུན་ཏུ་དམ་ཆོས་སྙིང་པོའི་དོན། །མ་ནོར་འབྲས་བུ་མངོན་དུ་སྤྱོད་པར་ཤོག །དུས་གསུམ་དགེ་ཚོགས་རྒྱ་མཚོས་ཡོངས་བསྐུལ་ཏེ། །བདེ་ལྡན་པདྨོ་བཀོད་པའི་ཞིང་ཁམས་མཆོག །བྱང་ཆུབ་སེམས་དཔའ་ཆོས་གྲུབ་རྒྱ་མཚོ་ནི། །སངས་རྒྱས་འོད་དཔག་ཚུལ་དུ་སྟོན་པ་དེའི། །ཞལ་མཐོང་བླ་མེད་མྱང་འདས་ཆེན་པོ་ཡི། །དབུགས་དབྱུང་ཐོབ་ཅིང་སླར་ཡང་ཇི་སྲིད་དུ། །སྲིད་པ་དེ་སྲིད་འགྲོ་སྒྲོལ་དེད་དཔོན་དུ། །འཁོར་བའི་གཡང་ལས་སྐྱོབ་པའི་མཐུ་ལྡན་ཞིང། །འཁོར་བ་དོང་སྤྲུགས་ཀུན་ཀྱང་སངས་རྒྱས་ཤོག །གྲ་ལྔ་ཚེ་བརྟན་ངོར་སྤེལ། །བདེ་ལྡན་ཞིང་གི་འདྲེན་པ་འོད་དཔག་མེད། །དབྱེར་མེད་
སྒྱུ་འཕྲུལ་རོལ་པ་རིགས་ཀྱི་བདག །པདྨ་གར་དབང་དབང་གི་ཅོད་པན་ཅན། །མི་ཕམ་ཆོས་གྲུབ་རྒྱ་མཚོའི་ཞབས་པདྨོ། །དེང་བཟུང་བླ་མེད་བྱང་ཆེན་མ་ཐོབ་བར། །འབྲལ་མེད་རྗེས་འཛིན་སྒྱུ་ལུས་ཆུ་བུར་ལུས། །ཡལ་མ་ཐག་དེར་བདེ་ལྡན་ཞིང་ཁམས་སུ། །པདྨའི་སྦུབས་སུ་བརྫུས་ཏེ་སྐྱེ་བར་ཤོག །རྒྱལ་བའི་ཞལ་མཐོང་ཕྱིར་མི་ལྡོག་པ་ཡི། །གོ་འཕང་རིན་ཆེན་བདེ་བླག་ཐོབ་གྱུར་ཅིག །དཔལ་སྦས་ངོར་སྤེལ། །ཨེ་མ་ཧོཿགདོད་མའི་སངས་རྒྱས་འོད་མི་འགྱུར་བ་དངོས། །དབང་གི་ཅོད་པན་འཆང་བ་བཅུ་པ་མཆོག །མི་ཕམ་ཆོས་གྲུབ་རྒྱ་མཚོའི་ཞབས་པདྨོ། །བྱང་ཆུབ་བར་དུ་འབྲལ་མེད་ཐུགས་རྗེས་སྐྱོང་། །བདེ་ལྡན་དག་པའི་ཞིང་ཁམས་དམ་པ་རུ། །བརྫུས་ཏེ་སྐྱེས་ནས་སྟོན་པའི་ཞལ་མཐོང་ཞིང་། །ཕྱོགས་བཅུ་དུས་གསུམ་རྒྱལ་བའི་ལུང་བསྟན་ཐོབ། །སྤྲུལ་པས་འགྲོ་བ་འདྲེན་པའི་དཔལ་གྱུར་ཅིག །བཅས་དར་རྒྱས་ངོར་སྤེལ། །ཕྱོགས་བཅུའི་སངས་རྒྱས་ཀུན་གྱི་བདག་ཉིད་མཆོག །རྒྱལ་བའི་ཞིང་ཁམས་ཡོངས་ཀྱི་དཔལ་འཛིན་པ། །ནུབ་ཕྱོགས་བདེ་ལྡན་པདྨོ་བཀོད་པ་ཡི། །སྟོན་པ་འོད་མི་འགྱུར་ལ་ཕྱག་འཚལ་འདུད། །བླ་མེད་སྙིང་རྗེའི་དབང་གིས་ཉམ་ཐག་འགྲོ། །ཡལ་བར་མ་དོར་ཐུགས་རྗེའི་མཁའ་དབྱིངས་ནས། །འཆར་བའི་སྒྱུ་འཕྲུལ་དབང་གི་ཅོད་པན་ཅན། །ཕྲིན་ལས་འོད་སྟོང་ལྡན་དེར་ཕྱག་འཚལ་འདུད། །ཟབ་མོའི་མཁྱེན་བརྩེ་
ནུས་པའི་དབང་ཕྱུག་གིས། །སྲིད་ཞིའི་མུན་པ་རིང་པོར་མཐར་བྱེད་ནས། །དོན་གཉིས་པདྨའི་མྱུ་གུ་བསྐྱེད་ནུས་པའི། །ཐུགས་རྗེ་མཐའ་ཡས་མགོན་དེར་ཕྱག་འཚལ་འདུད། །དེ་ལྟར་སྒོ་གསུམ་དད་པའི་མོས་བློ་ཡིས། །གྲངས་མེད་རྡུལ་སྙེད་ལུས་རབ་ཡོངས་སྤྲུལ་ཏེ། །ཕྱོགས་བཅུའི་ཞིང་བཞུགས་རྒྱལ་བ་སྲས་བཅས་དང་། །སྟོན་མཆོག་འོད་ཀྱི་སྣང་བ་མཐའ་ཡས་ལ། །ཕྱག་འཚལ་མཆོད་ཅིང་བཤགས་དང་རྗེས་ཡི་རང་། །བསྐུལ་ཞིང་གསོལ་འདེབས་དུས་གསུམ་རབ་དཀར་དགེའི། །ལྷག་བསམ་ཕུང་པོ་གཅིག་ཏུ་བཟླུམས་བྱས་ནས། །བདག་སོགས་འཁོར་བའི་འདམ་ལས་བསྒྲལ་ཕྱིར་བསྔོ། །དེ་མཐུས་བདག་ཀྱང་ཨ་འཐས་སྒྱུ་མའི་ལུས། །ཆུ་བུར་གྱུར་བའི་འདུས་བྱས་སྟོང་པའི་ཚེ། །བཅོམ་ལྡན་སྟོན་མཆོག་འོད་དཔག་མེད་མགོན་གྱི། །མཐའ་ཀླས་ཟབ་མོའི་ཐུགས་རྗེ་རྒྱུད་བསྐུལ་ཏེ། །སྐད་ཅིག་དེ་རུ་མགོན་དེའི་ཞིང་ཁམས་སུ། །སྐྱེ་གཞན་བར་མ་ཆོད་པར་བརྫུས་སྐྱེས་ནས། །རྒྱལ་བའི་ཞལ་མཐོང་ཆོས་ཀྱི་བདུད་རྩི་ཐོབ། །སླར་ཡང་མགོན་མེད་རྣམས་ཀྱི་དེད་དཔོན་དུ། །སྤྲུལ་པ་དུ་མར་འདྲེན་པའི་དཔལ་གྱུར་ཤོག །དེ་ལྟར་རྩེ་གཅིག་ཡིད་ཀྱི་མོས་བློ་ཡིས། །བདེ་ཆེན་ཞིང་བདག་མགོན་དེར་གསོལ་བཏབ་མཐུས། །དེ་བཞིན་ཉིད་དུ་འགྲུབ་པར་བྱིན་རློབས་ཤིག །སྐུ་གསུམ་བདག་ཉིད་འཆི་མེད་པདྨ་འབྱུང་། །ཡི་དམ་ལྷ་དང་སྲུང་མའི་ཐུགས་རྗེའི་མཐུས། །ཇི་ལྟར་དེ་ལྟར་བདེ་བླག་ཉིད་འགྲུབ་
པར། །སྨོན་ལམ་ཡིད་ལ་འདོད་འཇོའི་དཔལ་གྱུར་ཅིག །ཅེས་པའང་ཁམས་སྨྱོན་དབོན་པོ་བླ་མ་དགེ་ལེགས་ཀྱི་བཞེད་ལྟར་སྤེལ། །ཧྲཱིཿཕྱོགས་དུས་རྒྱལ་བ་རབ་འབྱམས་ཞིང་གི་བདག །མ་ལུས་ཇི་སྙེད་འདུས་པའི་གཏེར་ཆེན་པོ། །བདེ་ལྡན་པདྨོ་བཀོད་པའི་དཀྱིལ་འཁོར་གྱི། །སྟོན་མཆོག་དམ་པ་སངས་རྒྱས་སྣང་མཐའ་ཡས། །གསུང་གི་དབང་ཕྱུག་དམ་པའི་ཕྲིན་ལས་ཀྱི། །སྒྱུ་འཕྲུལ་དྲྭ་བའི་རྣམ་པར་རོལ་པ་ནི། །རཱ་གའི་ཅོད་པན་འཆང་བའི་ཕྲེང་བ་ལས། །ཚར་དུ་དངར་བ་དྷརྨ་སིརྡྷནྡྷ། །གང་གི་གསང་གསུམ་ཡོན་ཏན་མི་བཟད་པར། །བདག་ལུས་བྱེ་སྙེད་ལུས་སྤྲུལ་ཕྱག་འཚལ་ཞིང་། །མཆོད་ཅིང་བཤགས་སོ་ཡི་རང་བསྐུལ་གསོལ་འདེབས། །དུས་གསུམ་བསགས་དགེ་མཁའ་ཁྱབ་སེམས་ཅན་ཀུན། །བྱང་ཆུབ་ཆེན་པོ་མྱུར་ཐོབ་ཕྱིར་བསྔོའོ། །བདག་ནི་སྐྱེ་ནས་སྐྱེ་བ་ཐམས་ཅད་དུ། །སྤྱན་རས་གཟིགས་དངོས་དཔལ་ལྡན་ཀརྨ་པ། །མཐའ་ཡས་རོལ་པ་དབང་གི་ཅོད་པན་ཅན། །འབྲལ་མེད་རྗེས་འཛིན་ཆོས་མཐུན་བསམ་པ་ཀུན། །དབྱར་མཚོ་ལྟར་འཕེལ་ཉིད་དུ་འགྱུར་བར་ཤོག །ཆོས་མིན་བསླུ་ཆོས་མཁན་དང་མི་འཕྲད་ཅིང་། །སྡིག་པའི་གྲོགས་པོའི་དབང་དུ་མི་འགྱུར་ཤོག །ནམ་ཞིག་སྒྱུ་ལུས་འཁྲུལ་པའི་དུས་བྱུང་ཚེ། །སངས་རྒྱས་རྒྱལ་བ་འོད་སྣང་མཐའ་ཡས་ཀྱི། །སྔོན་གྱི་ཐུགས་དམ་གཉེན་པོས་བསྐུལ་བཞིན་དུ། །བདེ་ལྡན་པདྨོ་བཀོད་
པའི་ཞིང་ཁམས་སུ། །པདྨའི་སྦུབས་སུ་བརྫུས་ཏེ་སྐྱེས་ནས་སུ། །ཞལ་མཐོང་གསུང་གི་བདུད་རྩིའི་གསང་བ་ཐོབ། །སྤྲུལ་པས་སེམས་ཅན་གངྒཱའི་ཀླུང་བྱེ་སྙེད། །དེ་སྙེད་རྣམས་ཀྱི་འདྲེན་པའི་དཔལ་གྱུར་ཤོག །བླ་མེད་མཆོག་གསུམ་བདེན་པའི་བྱིན་རླབས་དང་། །རྩ་གསུམ་བསླུ་མེད་བདེན་པའི་ཐུགས་རྗེའི་མཐུས། །ཇི་ལྟར་གསོལ་བའི་སྙིང་པོའི་རྣམ་པ་གང་ག །བདེ་བླག་ཉིད་དུ་འགྲུབ་པའི་རྒྱུར་གྱུར་ཅིག །དེ་ཡང་རྡོ་རྗེའི་ཚིག་ལྡན་སྔོན་བྱོན་གོང་མ་རྣམས་ཀྱིས་བསྩལ་བའི་བདེ་སྨོན་རིགས་མང་དུ་སྣང་བས་ན་དེ་མཐུས་འཁོར་མཚོ་ལས་བསྒྲལ་ནུས་པ་ནི་ཚད་མ་ཉིད་དུ་གྱུར་བའོ། །འདི་ལྟ་བུ་ཁོ་བོ་སོ་སྐྱེའི་བཀོད་པ་ནི་དགོས་པ་ནམ་ཡང་དབེན་ཅིང་ཉི་མ་དང་མེ་ཁྱེར་ལྟ་བུར་གྱུར་ཀྱང་ཡོར་སྟོད་སྔགས་རིགས་ཚད་མའི་རིགས་ཆོས་བརྒྱུད་འཛིན་དགེ་སློང་ཀརྨ་དར་རྒྱས་ཀྱི་ངོ་མ་ལྡོག་ཙམ་དུ་ཀརྨའི་གདན་སར་སྤེལ་བ་དགེ་ལེགས་འཕེལ། །ཐོག་མའི་མགོན་པོ་ཀུན་བཟང་འོད་དཔག་མེད། །དེང་བཟུང་བྱང་ཆུབ་བར་དུ་སྐྱབས་སུ་མཆི། །བདག་གིས་དུས་གསུམ་དགེ་ཚོགས་གང་བསགས་པ། །འགྲོ་དྲུག་སེམས་ཅན་སངས་རྒྱས་ཐོབ་ཕྱིར་བསྔོ། །སྒྱུ་ལུས་མི་རྟག་ཆོས་ཉིད་གྱུར་མ་ཐག །བདེ་བ་ཅན་དུ་བརྫུས་སྐྱེས་སྟོན་པ་མཆོག །ཞལ་མཆོད་གསུང་གི་བདུད་རྩིས་རྒྱུད་སྨིན་ཅིང་། སྤྲུལ་པས་འགྲོ་བ་སྒྲོལ་བའི་དཔལ་དུ་ཤོག །རག་ཤུལ་བ་ེཧུའི་དྲའི་སངས་ཚེ་རྒྱལ་ངོར་སྤེལ། །རང་སྣང་རྣམ་དག་བདེ་ཆེན་པདྨོ་བཀོད། །རང་རིག་ཆོས་སྐུ་སངས་རྒྱས་
འོད་དཔག་མེད། །རང་བྱུང་སྤྱན་རས་གཟིགས་དངོས་ཀརྨ་པ། །རང་གསལ་མ་འགགས་བྱང་སེམས་ཉན་རང་འཁོར། །དུ་མས་ཡོངས་བསྐོར་ཞིང་མཆོག་དམ་པ་དེར། །སྐྱེ་གཞན་བར་མ་ཆོད་པར་བརྫུས་སྐྱེས་ནས། །རྒྱལ་དང་རྒྱལ་སྲས་ཞལ་མཐོང་ལུང་བསྟན་ཐོབ། །སྤྲུལ་པས་འབྲེལ་ཚད་འདྲེན་པའི་དེད་དཔོན་ཤོག །རྗེ་བཙུན་མའི་བཞེད་ངོར་སྤེལ། །སངས་རྒྱས་རྐང་གཉིས་གཙོ་དང་ཆགས་བྲལ་བ། །དམ་ཆོས་རིག་དང་གྲོལ་པའི་སར་གནས་ཚོགས། །བླ་མེད་མཆོག་གསུམ་འདི་ནས་བྱང་ཆུབ་བར། །སྐྱབས་གནས་རྟག་ཏུ་འབྲལ་བ་མེད་གྱུར་ནས། །ཚེ་དཔལ་ཡེ་ཤེས་ཆོས་ལྡན་ལོངས་སྤྱོད་རྒྱས། །དད་དང་དམ་ཚིག་རྣམ་དག་ཚུལ་ཁྲིམས་ལྡན། །ལྷར་བཅས་བསྔགས་འོས་མཆོད་པའི་ཞིང་གྱུར་ནས། །འགྲོ་ཀུན་འདྲེན་པའི་དཔལ་ལ་དབང་འབྱོར་ཤོག །ནམ་ཞིག་གཡར་ཁང་བོར་མ་ཐག་ཉིད་དུ། །བཅོམ་ལྡན་སྣང་མཐའི་ཞལ་མཐོང་ལུང་བསྟན་ཐོབ། །སྤྲུལ་པས་འགྲོ་འདྲེན་ཕྱིར་མི་ལྡོག་ནས་སུ། །རྫོགས་སངས་རྒྱས་ཀྱི་གོ་འཕང་མངོན་གྱུར་ཤོག །ཅེས་བརྩོན་འགྲུས་ངོར་སྤེལ། །ཕྱོགས་དུས་རྒྱལ་བ་རབ་འབྱམས་ཐུགས་རྗེ་གཏེར། །ཨོ་རྒྱན་ཆེན་པོ་པདྨ་ཀཱ་ར་མཆོག །བརྩེ་ཆེན་དབྱིངས་ནས་དགོངས་ཤིག་དེང་འདི་རུ། །སྨོན་ལམ་བདེན་པའི་བདེན་འགྲུབ་བྱིན་གྱིས་རློབས། །བདག་སོགས་རྣམས་ཀྱི་དུས་
གསུམ་བསགས་ཡོད་ཀྱི། །དགེ་རྩ་འཛད་མེད་ཆུ་བོ་རྣམ་བཞིའི་རྒྱུནག །རྫོགས་སངས་རྒྱས་ཀྱི་རྒྱ་མཚོར་འཇུག་གྱུར་ནས། །སྲིད་ཞིའི་གདུང་སེལ་བདུད་རྩིར་འགྱུར་བར་ཤོག །དེ་མ་ཐོབ་ཀྱི་ཚེ་རབས་སྐྱེ་ཀུན་ཏུ། །དལ་རྟེན་མཆོག་ཐོབ་དགེ་བའི་བཤེས་དང་མཇལ། །ལྟ་གྲུབ་ཚད་མའི་བསྟན་སྒོར་ཞུགས་ནས་ཀྱང་། །རྒྱལ་བསྟན་རིན་ཆེན་གསལ་བའི་གཉེན་གྱུར་ཤོག །མཁའ་ཁྱབ་སེམས་ཅན་རྣམས་ཀྱི་བདེ་དགེའི་གཞི། །ཇི་ལྟར་བསམ་དོན་ཆོས་བཞིན་ལྷུན་གྲུབ་པའི། །མཐུ་དང་ནུས་པས་ཡིད་སྲུབ་དཔུང་གཞོམ་སྟེ། །བྱམས་པའི་གོ་བགོས་སྙིང་རྗེའི་བསྒྲལ་འདྲེན་ཤོག །གང་ཞིག་རྒྱལ་བ་མཆོག་རྣམས་གཤེགས་པའི་ཤུལ། །ཟབ་དོན་སྙིང་པོ་གསང་སྔགས་བླ་མེད་ཀྱི། །ཆོས་ཚུལ་ཕྱག་རྫོགས་ཟུང་འཇུག་དབྱེར་མེད་པས། །བདག་རྒྱུད་སྨིན་སྒྲོལ་གཞན་ཕན་སྟོན་ནུས་ཤོག །ལྷར་བཅས་སྐྱེ་དགུའི་མཆོད་སྡོང་རིན་པོ་ཆེ། །སངས་རྒྱས་བསྟན་པ་ཡིད་བཞིན་དབང་གི་རྒྱལ། །འགྲོ་བློ་མོས་པའི་རྒྱལ་མཚན་རྩེར་མཆོད་ནས། །ནམ་མཁའ་ཅི་སྲིད་བར་དུ་མཐའ་རྒྱས་ཤོག །ངེས་དོན་བསྟན་འཛིན་བྱེད་པོ་གང་ཡིན་པ། །ཀུན་ཀྱང་ཕྲིན་ལས་རྣམ་བཞིའི་སྟོབས་རྒྱས་ཤིང་། །འགྲོ་དོན་ཐུགས་བསྐྱེད་དམ་བཅའ་ཇི་བཞིན་པར། །བསྙེལ་མེད་ཞབས་བརྟན་བཞེད་དོན་ཡོངས་གྲུབ་ཤོག །ལྔ་བདོའི་སྙིགས་མཐའ་འདིར་ཡང་ལེགས་བྱས་ཀྱི། །རྒྱུར་གྱུར་དགྲ་བཅོམ་རྗེས་སློབ་འདུས་པའི་ཚོགས།
ཐུགས་མཐུན་ཆོས་བཅུ་འཁོར་ལོ་གཉིས་དང་ལྡན། །འདུལ་སྡོམ་རྣམ་དག་དགེ་འདུན་སྡེ་རྒྱས་ཤོག །ཚངས་དབང་རྒྱལ་ཆེན་ལ་སོགས་དཀར་ཕྱོགས་སྐྱོང་། །བསྟན་ལ་རབ་གུས་མངོན་པར་འདུད་པ་རྣམས། །དཔུང་ཚོགས་སྟོབས་ཀྱི་མི་འཇིགས་དཔའ་བ་ཡི། །ནག་པོའི་ཕྱོགས་ཀྱི་གཡུལ་ལས་རྣམ་རྒྱལ་ཤོག །ཆོས་མིན་ཆོས་ལྟར་བཅོས་པའི་བསླུ་ཆོས་མཁན། །ལྟར་སྣང་བཟང་པོའི་ཚུལ་འཆོས་བདུད་རློམ་པའི། །ལོག་བཤེས་རྣམས་ཀྱང་རྟག་ཏུ་སྙེམས་བྲལ་ཞིང་། །ཚུལ་བཞིན་ཡང་དག་བསྟན་ལ་གུས་པར་ཤོག །དམྱལ་མེའི་བུད་ཤིང་སྒྲུབ་ལ་མངོན་འདོད་ཅིང་། །ལས་ཀྱི་བླང་དོར་ཕྱིན་ཅི་ལོག་སེམས་པའི། །དགེ་མིན་སྤྱོད་ལ་བརྩོན་པའི་རྗེ་བོ་དག །ལས་འབྲས་ཆོས་ལ་ཇི་བཞིན་བདེན་མཐོང་ཤོག །སྔོན་ཚེ་སྨོན་མཐུའི་འབྲས་རྙེད་དགེ་བཅུ་ཡི། །རྗེས་མཐུན་སྒྲུབ་བརྩོན་འབྲེལ་ཐོགས་ཇི་སྙེད་ཀུན། །ཚེ་རིང་ནད་བྲལ་བསམ་དོན་འབད་མེད་འགྲུབ། །རྟག་ཏུ་དགེ་ཞིང་དམ་པའི་ཆོས་ལྡན་ཤོག །འཇིག་རྟེན་ཁམས་འདིར་འབྱུང་པོའི་གནོད་པ་ཞི། །ལོ་ལེགས་སྐྱ་རྒྱལ་ཆར་ཆུ་དུས་འབེབས་ཤིང་། །ནད་མུག་མཚོན་འཁྲུགས་བསྐལ་ངན་འཇིགས་ཆེན་བྲལ། །རྫོགས་ལྡན་དང་པོའི་དཔལ་ལ་འགྲན་ནུས་ཤོག །མདོར་ན་བདག་གི་འབྲེལ་གྱུར་མཆིས་སོ་ཅོག །དགྲ་གཉེན་བར་མ་ཀུན་གྱིས་ཐོག་དྲངས་པ། །མ་གྱུར་འགྲོ་བ་ནམ་མཁའི་མཐའ་མཉམ་པའི། །སེམས་ཅན་ཐམས་ཅད་ཚད་མེད་བཞི་
ཐོབ་ཤོག །ཀུན་ཀྱང་འདུས་བྱས་སྒྱུ་ལུས་བོར་མ་ཐག །ནུབ་ཕྱོགས་བདེ་ཆེན་པདྨོ་བཀོད་ཞིང་དུ། །སྐྱེས་ནས་འོད་དཔག་མེད་ཀྱི་ཞལ་མཐོང་ཞིང་། །དབུགས་དབྱུང་ཕྱིར་མི་ལྡོོག་པའི་སར་གནས་ཤོག །གང་ཞིག་ཕྱོགས་བཅུའི་རྒྱལ་བ་སྲས་དང་ནི། །སློབ་མར་བཅས་པའི་ཐུགས་བསྐྱེད་སྨོན་ལམ་གྱི། །རྗེས་སུ་སློབ་པའི་དེང་འདིར་སྨོན་འདུན་ཀུན། །ད་ལྟ་ཉིད་དུ་འགྲུབ་པར་བྱིན་གྱིས་རློབས། །ཅེས་པའང་སྐྱབས་ཆེ་བླ་མ་བསོད་ནམས་ཆོས་འཕེལ་ནས་དད་གསུམ་རྣམ་པར་དག་པའི་མོས་བློས་བསྐུལ་བའི་ངོར། སི་ཏུ་པདྨ་ཉིན་བྱེད་དབང་པོས་སྤེལ་བ་དགེ་བར་གྱུར་ཅིག །ན་མོ་རཏྣ་ཏྲ་ཡཱ་ཡ། ཀུན་བཟང་པད་འབྱུང་ཨཪྱ་ཏཱ་རེ་ཡུམ། །དབྱེར་མེད་ཀརྨ་ཀ་དང་དཔལ་འབྲུག་པ། །མཆོག་གསུམ་རྩ་གསུམ་ཀུན་འདུས་དཀྱིལ་འཁོར་ལ། །གསོལ་འདེབས་སྨོན་ལམ་ཡོངས་འགྲུབ་བྱིན་གྱིས་རློབས། །བདག་དང་བདག་ལ་འབྲེལ་བའི་ལྟོས་བཅས་ཀྱི། །མ་གྱུར་འགྲོ་བའི་བསམ་སྦྱོར་རྣམ་དག་གི། །ཟག་བཅས་ཟག་མེད་དུས་གསུམ་དགེ་བའི་ཚོགས། །བླ་མེད་བྱང་ཆུབ་གོ་འཕང་ཐོབ་ཕྱིར་བསྔོ། །བསྟན་འཛིན་ཞབས་བརྟན་དགེ་འདུན་ཐུགས་མཐུན་ཞིང་། །འཇིག་རྟེན་བདེ་དང་རང་གཞན་ཚེ་བསོད་དཔལ། །འཕེལ་ཞིང་རྣམ་དག་བདེ་ཆེན་ཞིང་ཁམས་སུ། །སྟོན་མཆོག་ཞལ་མཐོང་རྗེས་སུ་འཛིན་གྱུར་ཅིག །འཛི་སྒར་རྒྱལ་སྲས་བླ་མ་པདྨ་དབང་དྲག་བཞེད་ལྟར་སྤེལ། ཤུ་བྷཾ། །ༀ་སྭ་སྟི། ཀུན་བཟང་དགོངས་པ་ཐེག་དགུའི་
ཡང་སྙིང་བཅུད། །པདྨ་ཀཱ་རའི་བཞེད་གཞུང་དགོངས་པའི་མཐིལ། །བརྒྱུད་པ་དྲུག་ལྡན་ལམ་རིམ་ཀུན་འདུས་པ། །ཆོས་རྒྱལ་ཡབ་སྲས་བཀའ་བབས་གསང་ཆེན་ཆོས། ༡། ཚེ་གཅིག་ཐར་ལམ་བསྙེགས་འདོད་སྐལ་ལྡན་ལ། །མེད་དུ་མི་རུང་བྱིན་རླབས་དྲོད་ཚད་ལྡན། །དུས་བབས་མཁའ་འགྲོའི་གཏད་རྒྱ་སླར་བབས་པའི། ཟབ་ཆོས་འདི་ནི་ཡིད་བཞིན་ནོར་ལས་འཕགས། ༢། སྔོན་བསགས་རྣམ་པར་དཀར་པའི་ཆུ་ཤེལ་སྣོད། །སྤངས་རྟོགས་ཡོན་ཏན་རྒྱ་མཚོའི་བཅུད་ཀྱིས་གཏམས། །མདོ་རྒྱུད་ལུང་རིགས་རྣམ་དཔྱོད་རྒྱན་ལྡན་པའི། །འདོད་འབྱུང་བུམ་བཟང་བློ་གྲོས་མཐའ་ཡས་རྒྱལ། ༣། དུས་གསུམ་རྒྱལ་བའི་གསུང་རབ་མཐའ་དག་གི། །ཐུགས་རྗེ་ནུས་པ་མཚུངས་ཞེས་རྡོ་རྗེའི་བཀའ། །དེས་ན་བསོད་ནམས་ཚོགས་ཀྱང་དེ་སྙེད་ཀྱི། །ཡོན་ཏན་མཐའ་དག་དེང་འདིར་རྫོགས་གྱུར་ཅིག༤། འདི་བཞེངས་དགེ་བས་རྒྱལ་བསྟན་སྤྱི་བྱེ་བྲག །ཁྱད་པར་རྡོ་རྗེ་སྙིང་པོའི་རིང་ལུགས་གང་། །ནུབ་མེད་ཕྱོགས་བཅུར་དར་ཞིང་རྒྱས་པ་དང་། །དེ་འཛིན་མཆོག་རྣམས་རྟག་བརྟན་འཚོ་གྱུར་ཅིག༥། འཇིག་རྟེན་ཁམས་སུ་ཉེར་འཚེ་ཀུན་ཞི་ཞིང་། །ཆར་ཆུ་དུས་འབེབས་ལོ་ཕྱུགས་རྟག་ཏུ་ལེགས། །རྫོགས་ལྡན་བདེ་སྐྱིད་དཔལ་ལ་སྤྱོད་བཞིན་དུ། །ཆོས་ལྡན་སྣང་བས་ཕྱོགས་མཐར་ཁྱབ་གྱུར་ཅིག༦། རྟེན་འདི་བཞེངས་པོ་དོན་གཉིས་ལྷུན་གྱིས་གྲུབ། །འགྲོ་དོན་ཕྲིན་ལས་ནམ་མཁའི་མཐར་ཁྱབ་ཅིང་། །གདོད་མའི་ཡེ་
ཤེས་མངོན་གྱུར་རང་རིག་རྩལ། །པདྨ་བཛྲ་མཆོག་དང་དབྱེར་མེད་ཤོག །༧མཆོག་གསུམ་རྩ་བ་གསུམ་གྱི་བདེན་སྟོབས་དང་། །རྣམ་དཀར་དགེ་བ་འདིས་མཚོན་དུས་གསུམ་གྱི། །ལེགས་བྱས་ཇི་སྙེད་མཆིས་ཀུན་གཅིག་བསྡུས་ཏེ། །ཀུན་ཀྱང་རྫོགས་སངས་གོ་འཕང་ཐོབ་ཕྱིར་བསྔོ། ༨། ཅེས་ཀོང་པོ་པས་སྟེང་སྤྲུལ་སྐུ་མཁས་མཆོག་ཀརྨ་ངག་དབང་ཡོན་ཏན་རྒྱ་མཚོས། བླ་མ་དགོངས་འདུས་གསེར་ཆོས་པུ་སྟི་བཅུ་གསུམ་བཞེངས་གྲུབ་སྐབས་སྨོན་ལམ་བཞེད་ལྟར་སྤེལ་བ་ཛ་ཡནྟུ། །སྭསྟི། ཕྱོགས་བཅུའི་རྒྱལ་དང་རྒྱལ་སྲས་འཕགས་པའི་ཚོགས། །བདེན་པ་གྲུབ་པ་རྣམས་ལ་ཕྱག་འཚལ་ལོ། །བདག་དང་ཕ་མས་གཙོར་བྱས་རིགས་དྲུག་གི། །སེམས་ཅན་སྡུག་བསྔལ་མཚོ་ལས་བསྒྲལ་དུ་གསོལ། །རང་གཞན་རྣམས་ཀྱི་དུས་གསུམ་དུས་མེད་ཀྱི། །དགེ་བའི་རྩ་བ་མཆོག་གསུམ་རྩ་གསུམ་ལྷའི། །སྐུ་གསུང་ཐུགས་ཡོན་ཕྲིན་ལས་རྟེན་མཆོག་རྣམས། །བཞེངས་པའི་ལེགས་བྱས་བྱང་ཆུབ་ཆེན་པོར་བསྔོ། །དེ་མ་ཐོབ་པར་ཚེ་རབས་ཀུན་ཏུ་ཡང་། །དལ་རྟེན་ཐོབ་ཅིང་མཚན་ལྡན་བླ་མ་མཇལ། །གསང་སྔགས་རྡོ་རྗེ་ཐེག་པའི་སྒོར་ཞུགས་ནས། །སྨིན་ཅིང་གྲོལ་བའི་ལམ་བཟང་ཐོབ་པར་ཤོག །ཆོས་དང་ཆོས་མིན་མ་ནོར་ཇི་བཞིན་པར། །གནས་སྐབས་ཚེ་བསོད་དཔལ་འབྱོར་རྒྱས་པ་དང་། །ནད་གདོན་བར་ཆད་མི་མཐུན་ཉེར་འཚེ་ཞི། །རང་བྱུང་ལྷན་སྐྱེས་འོད་གསལ་ཕྱག་རྒྱ་ཆེ། །གཉུག་མ་ཆོས་སྐུའི་རྒྱལ་སར་དབང་འབྱོར་ཤོག །ནམ་ཞིག་བདེ་ཆེན་པདྨོ་
བཀོད་ཞིང་དུ། །བརྫུས་ཏེ་སྐྱེས་ནས་སངས་རྒྱས་ཞལ་མཐོང་ཞིང་། །བླ་མེད་ལུང་བསྟན་དབུགས་དབྱུང་ཐོབ་ནས་སུ། །ཕྱིར་མི་ལྡོག་པའི་གོ་འཕང་ཐོབ་གྱུར་ཅིག །དད་གསུམ་འགྱུར་མེད་ཆོས་ཚུལ་ལྡན་པ་ཀརྨའི་བཞེད་ངོར་སྤེལ་བ་དགེ་བར་གྱུར་ཅིག །མངྒ་ལཾ་བ་ཝནྟུ། །མཆོག་གསུམ་ངོ་བོ་དཔལ་ལྡན་ཀརྨ་པ། །བདུད་འདུལ་རྡོ་རྗེ་སྙིང་གི་ཐིག་ལེ་རུ། །བྱང་ཆུབ་བར་དུ་འདུ་འབྲལ་མེད་བཞིན་དུ། །རང་བྱུང་ལྷན་སྐྱེས་ཆོས་སྐུ་མངོན་གྱུར་ཤོག །དགེ་བ་འདིས་མཚོན་དུས་གསུམ་དགེ་ཚོགས་རྣམས། །དེང་འདིར་ལེགས་བྱས་རྣམ་དག་རྒྱ་མཚོ་ཆེར། །འཇུག་ནས་ཐར་པའི་གོ་འཕང་བདེ་བླག་ཏུ། །ཐོབ་ཅིང་དམིགས་ཡུལ་སྒྲིབ་གཉིས་བྱང་གྱུར་ནས། །ས་དང་ལམ་གྱི་ཡོན་ཏན་གོང་འཕེལ་ཞིང་། །གདོད་མའི་བདེ་གཤེགས་རྡོ་རྗེ་འཆང་ཆེན་དང་། །དབྱེར་མེད་སེམས་ཉིད་སྤྲོས་བྲལ་བདེ་བ་ཆེ། །དབྱིངས་དང་ཡེ་ཤེས་རོ་གཅིག་སངས་རྒྱས་ཤོག །ཅེས་པའང་ལང་འགྲོ་ལོ་ཙཱའི་རྣམ་འཕྲུལ་དབོན་སྤྲུལ་དབང་གི་རྡོ་རྗེས་བཀའ་གནང་ལྟར་གང་གི་དབོན་པོ་དད་གསུམ་རྣམ་པར་དག་ཅིང་ལྷག་པའི་བསམ་པ་ཟླ་སྣང་ལྟར་དཀར་བ་ཚེ་དབང་ནོར་བུ་འདའ་ཀ་མར་སྨོན་ལམ་དུ་སྤེལ་བ་དགེག །གདོད་མའི་སངས་རྒྱས་ཀུན་བཟང་པདྨ་འབྱུང་། །དབྱེར་མེད་གྲུབ་པའི་སྤྱི་མེས་ཀརྨ་ཀ། བདུད་ཚོགས་འདུལ་པའི་རྡོ་རྗེ་འཆང་ཆེན་པོ། །དེང་བཟུང་བྱང་ཆུབ་བར་དུ་འབྲལ་མེད་ཤོག །ལྷར་བཅས་སྐྱེ་དགུས་མཆོད་པའི་ཞིང་གྱུར་པ། །ངེས་དོན་སྙིང་པོ་སྒྲུབ་བརྒྱུད་
ཀཾ་ཚང་གི། །བསྟན་པ་རིང་ལུགས་སྲོལ་བཟང་འཛིན་བྱེད་པའི། །ཡང་དབེན་བསམ་གྲུབ་རི་ཁྲོད་ཅེས་བྱ་བར། །བསྟི་བའི་ལས་ཅན་སྐལ་པར་ལྡན་པ་རྣམས། །སྒོ་གསུམ་ཉེས་པའི་དྲི་ཡིས་མ་སྦགས་པར། །ཕ་རོལ་ཕྱིན་བཅུའི་གནས་ལ་སློབ་ནས་སུ། །རང་གཞན་དགེ་ལ་སྦྱོར་བར་བྱེད་པར་ཤོག །འཁོར་ཆོས་སྒྱུ་མའི་འཕྲུལ་ལ་ཡིད་སྐྱོ་ཤས། །ངེས་འབྱུང་བློས་བསྐུལ་དམ་ཆོས་སྙིང་པོ་ལ། །རྟག་ཏུ་བརྩོན་ཞིང་རང་བྱུང་ཡེ་ཤེས་ཆེའི། །རྩལ་རྫོགས་གཞི་ལམ་འབྲས་བུའི་ཡོན་ཏན་གང་། །འཕེལ་ཞིང་རྒྱས་ནས་གཞན་དོན་ཕྲིན་ལས་ཀྱིས། །འགྲོ་ཀུན་ཐར་པའི་ལམ་དུ་འཇུག་བྱེད་པའི། །དེད་དཔོན་དམ་པར་དབང་བསྒྱུར་བྱིན་གྱིས་རློབས། །ཞེས་སི་ཏུ་པདྨ་ཉིན་བྱེད་དབང་པོས་རི་མགུལ་སྤྲུལ་པའི་སྐུ་ནས་བཀའ་བརྒྱུད་གོང་མའི་རིང་སྲོལ་ཇི་བཞིན་དབེན་རིར་སྒྲུབ་སྡེ་གསར་འཛུགས་སྐབས་ཤིས་བརྗོད་སྨོན་ལམ་བཞེད་ངོར་སྤེལ་བ་དགེ་ལེགས་དར་རྒྱས་འཕེལ། མངྒ་ལཾ། །དཀྱིལ་འཁོར་ཡོངས་ཀྱི་གཙོ་མཆོག་དཔལ། །གྲུབ་པའི་སྤྱི་མེས་ནཱ་རོ་པའི། །རྣམ་འཕྲུལ་དཔལ་ལྡན་འབྲུག་པ་ཞེས། །ས་གསུམ་སྙན་པར་གྲགས་པ་ཅན། །བཀའ་བརྒྱུད་བསྟན་བའི་རྒྱལ་མཚན་འཛིན། །མཆོག་གི་སྒྲུབ་བརྒྱུད་ངེས་དོན་གྱི། །ཟབ་དོན་སྙིང་པོ་ལྷུར་ལེན་པའི། །རྣལ་འབྱོར་དབང་ཕྱུག་སྤྲུལ་པའི་སྐུ། །སྔོན་བསྐལ་སྨོན་བཟང་འབྲེལ་བའི་མཐུས། །པདྨས་ལུང་ཟིན་དགེ་སྦྱོང་དང་། །ཙནྡྲ་ནིརྨ་ཀཱ་ལ་བཅས། །ཚོམ་བུ་གཅིག་གིས་སྨིན་གྲོལ་
ཆོས། །མཐོང་ཐོས་གྲོལ་ལམ་མྱུར་ཐོབ་པ། །བགོ་སྐལ་ཉིད་དུ་ནོད་པ་ཡིས། །བསྟན་པའི་བཙས་དང་གདུལ་བྱའི་འགྲོ། །དོན་གཉིས་འགྲུབ་པའི་རྒྱུར་གྱུར་ཅིག །ཅེས་མཚོ་འཇུག་སྤྲུལ་སྐུ་བསྟན་འཛིན་ལྷུན་གྲུབ་ལ་ཤིས་བརྗོད་དགེ། ཤུ་བྷཾ། །དཔལ་རིགས་བརྒྱའི་ཁྱབ་བདག་ཀརྨ་པ། །མཆོག་དཀྱིལ་འཁོར་ཀུན་གཙོ་འབྲུག་པའི་ཞབས། །དོན་དབྱེར་མེད་རྡོ་རྗེ་དྲག་པོ་རྩལ། །སྐྱེ་བ་ནས་ཚེ་རབས་ཕྲེང་བ་རུ། །འབྲལ་མེད་ཅིང་དམ་ཆོས་ཟབ་མོའི་དོན། །མཐར་ཕྱིན་ནས་དོན་གཉིས་འབྲས་ཐོབ་ཤོག །མཆོག་གསུམ་རྩ་གསུམ་འདུས་པའི་ངོ་བོ་ཉིད། །ཨོ་རྒྱན་སློབ་དཔོན་པདྨཱ་ཀ་ར་མཆོག །དབྱེར་མེད་འཁོར་ལོའི་མགོན་པོ་བཀའ་དྲིན་ཅན། །བདག་སྙིང་པདྨོར་བྱང་ཆུབ་བར་བཞུགས་གསོལ། །རྒྱལ་བ་རབ་འབྱམས་ཕྱོགས་བཅུའི་ཞིང་བདག་པོ། །མ་ལུས་ལུས་མེད་བརྩེ་བས་འདིར་དགོངས་ལ། །ཇི་ལྟར་སྨོན་པའི་བདེན་ཚིག་འགྲུབ་གྱུར་པའི། །ཐུགས་རྗེའི་བྱིན་རླབས་ཆར་རྒྱུན་དབབ་ཏུ་གསོལ། །མཁའ་མཉམ་སེམས་ཅན་མ་རྒན་རིགས་དྲུག་པོ། །ཕྲ་རབ་རྡུལ་གྱི་གྲངས་འདས་འགྲོ་བ་དང་། །ཁྱད་པར་ནོར་སྐྱོང་སྐལ་ལྡན་ལས་ཅན་འདི། །ཚེ་འདིར་བདེ་སྐྱིད་བསམ་དོན་ལྷུན་གྲུབ་ཅིང་། །འདུས་བྱས་སྒྱུ་མའི་འཁྲུལ་འཁོར་འཇིག་པའི་ཚེ། །སྐྱེ་གཞན་བར་མ་ཆོད་པ་ཨོ་རྒྱན་གྱི། །མཁའ་སྤྱོད་པདྨ་འོད་ཀྱི་ཞིང་ཁམས་སུ། །སྟོན་མཆོག་པདྨ་འབྱུང་དང་མི་གཉིས་པའི། །
མ་ནོར་ལམ་སྟོན་ཚེ་རབས་འབྲེལ་བའི་མགོན། །དཔལ་ལྡན་བླ་མའི་ཞལ་མཐོང་ལུང་བསྟན་ཐོབ། །སྤྲུལ་པས་འཁོར་བའི་མཚོ་ཆེན་མྱུར་སྐེམ་ནས། །ཕྱིར་མི་ལྡོག་པའི་ས་ལ་འགོད་གྱུར་ཅིག །ཅེས་ཁྱབ་བདག་དམ་པ་འཛི་སྒར་རིན་པོ་ཆེའི་སྐུ་མདུན་གྱི་རྒྱ་ཁྱི་སེང་ཕྲུག་སྤུ་ར་ལ་སྨོན་ལམ་དུ་སི་ཏུས་བྲིས་པ་འགྲུབ་པར་གྱུར་ཅིག །བདེ་ལྡན་ཞིང་གི་མགོན་པོ་ཡི། །བྱིན་རླབས་ཐུགས་རྗེའི་འོད་སྣང་གིས། །འགྲོ་བློའི་སྒྲིབ་མུན་གཏན་བཅིལ་ནས། །ཡང་དག་ཐར་པའི་ལམ་འགོད་ཤོག །ཅེས་དགེ་སློང་ལའོ། །རྒྱལ་ཀུན་མཁྱེན་བའི་རང་གཟུགས་མཆོག །དཔལ་ལྡན་བླ་མ་རྡོ་རྗེ་འཛིན། །གང་གི་ཐུགས་རྗེའི་ཟླ་སྣང་གིས། །བདག་རྒྱུད་སྒྲིབ་གཉིས་བྱང་གྱུར་ཅིག །ཁྱབ་བརྡལ་ལྷུན་གྲུབ་ལ་སྤེལ། །སྟོན་མཆོག་དེས་གསུང་ཆོས་དགེ་འདུན། །རྣམ་གསུམ་ཐུགས་རྗེའི་མཁའ་ཀློང་ནས། །བྱིན་རླབས་ཆུ་ཁུར་ཕྲེང་བ་དཀྲིགས། །གདུལ་བྱ་མོས་བློའི་ས་གཞི་རུ། །བྱང་ཆུབ་སེམས་གཉིས་པད་ཚལ་རྒྱས། །ཐར་པ་དོན་ལྡན་འབྲས་སྨིན་ཅིང་། །འགྲོ་ལ་ཕན་བདེའི་དཔལ་ཀུན་བསྐྱེད། །རྫོགས་སངས་རྒྱས་ཐོབ་ཉིད་དུ་ཤོག །སྦྱིན་པ་མཐར་ཕྱིན་ངོར་སི་ཏུས་སྨྲས་པ་ཤུ་བྷཾ། །དགེ་བ་འདིས་མཚོན་དུས་གསུམ་བསགས་ཡོད་ཀྱི། །དགེ་ཚོགས་ཐམས་ཅད་གཅིག་ཏུ་བཟླུམས་བྱས་ཏེ། །དགེ་ལེགས་འབྱུང་གནས་དཀོན་མཆོག་གསུམ་ལ་འབུལ། །དགེ་དེས་འབྲེལ་ཐོགས་གྱུར་པའི་སེམས་ཅན་དང་། །ཁྱད་པར་
དམིགས་ཡུལ་དེ་དག་སྒྲིབ་གཉིས་ཀྱི། །ཁྱད་པར་ལས་ཀྱིས་སྙེམས་པའི་དབང་གིས་ནི། །ཁྱད་པར་རྩ་བ་ཡན་ལག་དམ་ཉམས་པ། །ཁྱད་པར་ལས་གྱུར་ཇི་སྙེད་སྡོམ་པའི་ཚོགས། །བླ་མེད་མཆོག་གསུམ་དྲུང་དུ་མཐོལ་བཤགས་ནསག །བླ་མེད་བརྩེ་བའི་སྤྱན་གྱིས་ཡོངས་དཀྱུད་དེ། །བླ་མེད་མཆོག་གི་ཚངས་པར་བསྩལ་ནས་ཀྱང་ག །བླ་མེད་སྐུ་བཞིའི་གོ་འཕང་མངོན་གྱུར་ཤོག །ཅེས་ཡར་གླིང་བླ་རྒན་ཀརྨ་མཆོག་དགའ་ནས་སྤུན་ཟླ་གཤིན་པོ་དབུ་ཕྱག་གཉིས་དང་འབྲེལ་ཐོགས་རྣམས་ཀྱི་དགེ་རྩར་བསྐུལ་བཞིན་འཕེན་གྱི་རྒྱབ་བྱང་དུ་སི་ཏུས་སྤེལ། །སྐྱབས་གནས་དཀོན་མཆོག་བྱང་སེམས་འཕགས་པའི་ཚོགས། །ཕྱོགས་བཅུའི་རྒྱལ་བ་རྣམས་ལ་ཕྱག་འཚལ་ལོ། །བདག་ནི་ཐོག་མེད་དུས་ནས་ད་ལྟའི་བར། །ལུས་ངག་ཡིད་ཀྱིས་མི་དགེའི་ལས་སྤྱོད་པ། །རང་བཞིན་ཁ་ན་མ་ཐོའི་སྤྱོད་པ་ཀུན། །ཐར་མེད་འཇིག་རྟེན་ལས་ངན་བསགས་པའི་རྒྱུས། །མི་དགེའི་ལས་གྱུར་ཐམས་ཅད་མཐོལ་ལོ་བཤགས། །སྔར་བྱས་སྡིག་པ་མ་ལུས་བཤགས་པར་བགྱི། །ཕྱིན་ཆད་མི་བགྱིད་དམ་བཅའ་སྙིང་ནས་བཟུང་། །དེང་ནས་བཟུང་སྟེ་བྱང་ཆུབ་སྙིང་པོའི་བར། །མ་ནོར་ལམ་སྟོན་བླ་མ་དམ་པ་དང་། །འབྲལ་བ་མེད་པར་དམ་ཆོས་སྒོར་ཞུགས་ནས། །སྐྱེ་བ་འདི་ནས་ཚེ་རབས་ཕྲེང་བ་ཀུན། །རྣམ་པར་དག་པའི་ཚུལ་ཁྲིམས་གཙང་མར་གནས། །ཆོས་སྤྱོད་བཅུ་ཡི་སྒྲུབ་པ་མཐར་ཕྱིན་ནས། །རྣམ་མཁྱེན་སངས་རྒྱས་གོ་
འཕང་ཐོབ་གྱུར་ཅིག །ཅེས་པ་འདི་ཀུན་དགའ་ཡེ་ཤེས་ནས་བཤགས་སྡོམ་རྒྱུན་ཁྱེར་འདོད་དོན་བཞིན་སི་ཏུས་སྤེལ་བ་དགེ། བཅོམ་ལྡན་འདས་མ་ཏཱ་རེ་ཡི། །བྱིན་རླབས་འོད་དཀར་འདུད་རྩིའི་རྒྱུན། །ཉོན་མོངས་གདུང་སེལ་སྩོལ་བའི་མཐུས། །ཚེ་དཔལ་ཡེ་ཤེས་སྣང་བ་རྒྱས། །མཆོག་ཐུན་དངོས་གྲུབ་དམ་པ་ཐོབ། །གཏན་བདེའི་འབྲས་བུ་སྨིན་གྱུར་ཅིག །ཅེས་ཡ་ཀྲེ་མཆོག་སྦྱིན་སོགས་ཀྱི་ངོར་སྤེལ་བ་ཛ་ག་ཏཾ། །རྒྱལ་ཀུན་ངོ་བོ་ཀརྨ་པ། །མཐོན་མཐིང་ཅོད་པན་འཆང་བ་པོ། །མཱ་ར་ད་མ་ཀ་བཛྲ། །ཚེ་རབས་ཀུན་ཏུ་མི་འབྲལ་ཞིང་། །ཟབ་དོན་ཆོས་ཀྱི་འདུད་རྩི་ཡིས། །སྨིན་ཅིང་གྲོལ་བའི་ལམ་འགོད་ནས། །བླ་མེད་སྐུ་བཞིའི་རྒྱལ་ས་ཆེ། །རིང་མིན་མྱུར་དུ་ཐོབ་པར་ཤོག །བི་ཛ་ཡས་བསྐུལ་ལྟར་སི་ཏུ་པས་དགེག །ཡིད་བཞིན་འཁོར་ལོ་བཅོམ་ལྡན་མ། །འཕགས་མ་སྒྲོལ་མའི་མཐུ་དཔལ་གྱིས། །ངག་དབང་ཡོན་ཏན་ཞེས་བྱ་བ། །ཚེ་བརྟན་དཔལ་འབྱོར་ཆོས་ལྡན་ཞིང་། །འདོད་དོན་ཡིད་བཞིན་ལྷུན་གྱིས་གྲུབ། །ནམ་ཞིག་མི་གནས་གྱུར་བའི་ཚེ། །ལོངས་སྐུའི་ཞིང་ཁམས་པོ་ཊ་ལར། །པདྨའི་སྤུབས་སུ་འཁྲུངས་གྱུར་ནས། །ཞིང་དེའི་སྟོན་མཆོག་འཇིག་རྟེན་མགོན། །ཞལ་མཐོང་ཆོས་ཀྱི་བདུད་རྩི་ཡིས། །རྒྱུད་གྲོལ་འགྲོ་ལ་སྙིང་རྗེའི་མཐུསག །ཐར་ལམ་སྟོན་ནུས་དེད་དཔོན་ཤོག །ཅེས་ཤོར་ཕུ་ངག་དབང་ཡོན་ཏན་ངོར་སྤེལ། །སྟོབས་བཅུའི་མངའ་བདག་བདེ་བར་གཤེགས། །ཐུབ་མཆོག་བསྟན་
པའི་མངའ་བདག་མགོན། །རྣམ་པར་འདྲེན་པ་ཀརྨ་ཀ། གང་གི་ཐུགས་རྗེའི་འོད་རིས་ཀྱིས། །སྲིད་པའི་མུན་སྟུག་རབ་བསལ་ཏེ། །གང་འདིར་མི་མཐུན་ཀུན་གཞིལ་ནས། །ཚེ་དཔལ་ཡེ་ཤེས་སྣང་བ་རྒྱས། །ཡིད་བཞིན་འདོད་དོན་ཡོངས་གྲུབ་པའི། །མྱང་འདས་མྱུར་ཐོབ་བྱིན་གྱིས་རློབས། །ཅེས་མང་ཀྭ་དབང་རྒྱལ་ངོར་ཨ་སྒྲེ་ལ་སྨོན་ལམ་དུ་སྤེལ་བ་སུ་ཛ་ཡནྟུ། །རྩ་གསུམ་སྤྱི་མེས་པདྨ་འབྱུང་། །གང་གི་མཉམ་མེད་བྱིན་རླབས་མཐུས། །ལོག་ཕྱོགས་བདུད་སྡེའི་དཔུང་ཚོགས་ཀྱིས། །གླགས་ལྟར་གྱུར་པའི་བསམ་སྦྱོར་ཞི། །བདེ་ལེགས་དཔལ་ལ་ལོངས་སྤྱོད་ཅིང་། །དོན་གཉིས་མཐར་ཕྱིན་འབྲས་ཐོབ་ནསག །བླ་མེད་སྐུ་བཞིའི་རྒྱལ་ས་ཆེར། །འགོད་པའི་སྐལ་བཟང་ཐོབ་གྱུར་ཅིག །ཅེས་མང་ཀྭ་དབང་རྒྱལ་ནས་བསྐུལ་བཞིན་དཔལ་འབྱོར་ལ་སྨོན་ལམ་དུ་སྤེལ་བ་དགེག །རྒྱལ་བ་ཀུན་གྱི་ཐུགས་བསྐྱེད་མཁའ་ཀློང་ནས། །འཁྲུངས་པའི་རྒྱལ་བསྟན་ཡོངས་རྫོགས་འཛིན་པའི་བདག །སྲིད་གསུམ་མུན་སེལ་དཔལ་ལྡན་ཀརྨ་པ། །ཡི་དམ་ལྷ་དང་ཆོས་སྲུང་མཐུ་བྱིན་གྱིས། །གང་ཞིག་ཉེས་པའི་སྨག་རུམ་རྩད་འབྱིན་ཏེ། །ཡང་དག་ཡེ་ཤེས་པདྨོའི་ཚལ་ཆེན་རྒྱས། །མཆོག་ཐུན་དངོས་གྲུབ་རིང་མིན་མངོན་དུ་གྱུར། །གདོད་མའི་མགོན་པོའི་གོ་འཕང་ཐོབ་པར་ཤོག །ཅེས་པའང་མང་ཀྭ་བསོད་ནམས་ལགས་ཀྱི་ངོར་སྤེལ།
དཔལ་ལྡན་ལྷ་ཡི་ལྷར་གྱུར་བཅོམ་ལྡན་འདས། །འཇིག་རྟེན་མགོན་པོས་ཐུགས་རྗེས་ཉེར་དགོངས་ལ། །སྡུག་བསྔལ་དུཿཁའི་རྒྱ་མཚོར་བྱིང་བ་ཡི། །འགྲོ་དྲུག་སེམས་ཅན་རྣམས་ལ་གཟིགས་སུ་གསོལ། །དེང་ནས་བཟུང་སྟེ་བླ་མེད་བྱང་ཆུབ་བརག །དལ་རྟེན་བཟང་ཐོབ་དམ་པའི་རྗེས་སུ་ཞུགས། །གསང་སྔགས་རྡོ་རྗེ་ཐེག་མཆོག་སྒོར་འཇུག་ཅིང་། །སྐུ་བཞིའི་དབང་ཕྱུག་གོ་འཕང་མྱུར་ཐོབ་ཤོག །ཅེས་པའང་ལི་ཡུལ་བ་ཨ་ཧྱའི་ངོར་སྤེལ། །ༀ་སྭསྟི། སྟོན་པ་མཚུངས་མེད་ཤཱཀྱའི་རྒྱལ། །དེས་གསུང་ཆོས་དང་དགེ་འདུན་ཏེ། །དཀོན་མཆོག་རིན་ཆེན་རྣམ་གསུམ་གྱི། །བདེན་པའི་བདེན་ཚིག་ཟབ་མོའི་མཐུས། །ངེས་པ་དོན་གྱི་སྙིང་པོ་ཡི། །རིང་ལུགས་དྲི་མེད་ཡུན་དུ་གནས། །དར་རྒྱས་སྲིད་པའི་སྐྱེ་འགྲོ་ཡི། །བསོད་ནམས་དཔལ་དུ་གྱུར་ནས་སུ། །ལྷ་དབང་སྲུང་མའི་མཐུ་སྟོབས་ཀྱིས། །ལོག་ཕྱོགས་བདུད་སྡེ་ཕ་མཐར་བསྐྲད། །ཆོས་ཀྱི་རྒྱལ་མཚན་སྲིད་རྩེར་བསྒྲེང་། །བཀྲ་ཤིས་ལྷུན་གྲུབ་དཔལ་ལྡན་ཤོག །ཅེས་པའང་ཆོས་ཉིད་སྤྲུལ་སྐུས་བསྐུལ་བཞིན་རྒྱལ་བསྟན་འཕེལ་རྒྱས་ཀྱི་སྨོན་ལམ་དུ་སི་ཏུས་སྤེལ་བ་མངྒ་ལཾག །དཀོན་མཆོག་རྩ་གསུམ་ཐུགས་རྗེ་ཡིས། །དེང་འདིར་བསླབ་གསུམ་རྒྱན་ལྡན་པ། །གང་ཁྱོད་ཚེ་རབས་ཐམས་ཅད་དུ། །རྒྱལ་བསྟན་སྙིང་པོའི་སྒོར་ཞུགས་ཤིང་། །མཁའ་ཁྱབ་འགྲོ་བ་ཇི་སྙེད་པ། །
སྒྲོལ་བའི་དེད་དཔོན་གྱུར་ནས་སུ། །ཟུང་འཇུག་རྡོ་རྗེ་འཆང་ཆེན་པོའི། །གོ་འཕང་དམ་པར་འགོད་གྱུར་ཅིག །ཅེས་པའང་དགེ་རྒྱས་རྟོགས་ལྡན་རབ་འབྱོར་ལ་སྨོན་ལམ་དུ་སྤེལ་བའོ། །འཕགས་མ་དོན་ཀུན་སྒྲུབ་བྱེད་ཀྱི། །བྱིན་རླབས་རི་བོང་འཛིན་པ་ཡིས། །དེང་འདིར་མོས་ལྡན་ཀུ་མུད་ཏ། །བཀྲ་ཤིས་དགེ་བའི་དཔལ་སྤྱོད་པའི། །ཆོས་མཐུན་བསམ་པ་འགྲུབ་པ་དང་ག །དོན་གཉིས་ལྷུན་གྲུབ་འབྲས་ཐོབ་པའི། །རང་བྱུང་དོན་དམ་ལྷན་སྐྱེས་ཀྱི། །གནས་ལུགས་ངོ་བོ་མཐོང་བར་ཤོག །ལི་ཡུལ་མཆོག་སྦྱིན་པའི་དཔལ་ལ་སྨོན་ལམ་དུ་སྤེལ་བ་དགེག །སྐྱབས་ཡུལ་མཆོག་གསུམ་དམ་པའི་མགོན། །བདེ་གཤེགས་ལྷ་རྣམས་ཀུན་གྱི་ལྷ། །རྣམ་འདྲེན་རྒྱལ་དང་དེ་སྲས་ལ། །དང་བའི་ཡིད་ཀྱིས་ཕྱག་འཚལ་ནས། །བླ་མེད་མཆོད་སྤྲིན་རྒྱ་མཚོ་འབུལ། །ནོངས་པར་གྱུར་པའི་ལས་རྣམས་འཆགས། །གཞན་ཕན་སྤྱོད་ལ་རྗེས་ཡི་རངས། །ཆོས་ཀྱི་འཁོར་ལོ་བསྐོར་བར་བསྐུལ། །མྱ་ངན་མི་འདའ་བཞུགས་གསོལ་འདེབས། །དགེ་བས་འགྲོ་ཀུན་སངས་རྒྱས་ཤོག །བདག་ནི་དེང་བཟུང་བྱང་ཆེན་བར། །ངེས་པ་དོན་གྱི་རིང་ལུགས་ཀྱི། །སྒོར་ཞུགས་ལམ་སྟོན་བླ་མ་ཡིས། །རྗེས་བཟུང་སྨིན་ཅིང་གྲོལ་གྱུར་ནས། །མཁའ་དང་མཉམ་པའི་སེམས་ཅན་རྣམས། །བྱང་གྲོལ་ལམ་ལ་འགོད་གྱུར་ཅིག །ཅེས་སྔགས་རྒྱུད་སྦྱིན་པའི་ངོར་སྨྲས་པ་ཛ་ཡནྟུ། །
རྒྱལ་ཀུན་གཅིག་བསྡུས་ངོ་བོ་ཉིད། །པདྨཱ་ཀ་རའི་ཐུགས་བསྐྱེད་ལས། །འཁྲུངས་པའི་རྒྱལ་བསྟན་ཡོངས་རྫོགས་འཛིན། །པད་དཀར་འཆང་བ་ཐམས་ཅད་མཁྱེན། །གང་གི་ཐུགས་རྗེའི་འོད་ཟེར་གྱིས། །སྐལ་ལྡན་བློ་ཡི་སྐྱེད་ཚལ་དུ། །བྱང་ཆུབ་སེམས་གཉིས་འདབ་རྒྱས་ཤིང་། །བདེ་གཤེགས་སྙིང་པོའི་དོན་རྟོགས་ཤོག །ཅེས་བརྩོན་འགྲུས་ཞེས་པའི་ངོར་སྤེལ་བ་དགེ། སྐྱབས་གསུམ་ཐུགས་རྗེའི་ཀློང་ཡངས་ནས། །བྱིན་རླབས་འོད་སྟོང་ལྡན་པ་འཕྲོག །འགྲོ་བའི་ལས་ཉོན་སྒྲིབ་མུན་བཅོམ། །སྐལ་ལྡན་མོས་པའི་སྐྱེད་ཚལ་དུ། །དད་གསུམ་རྣམ་དག་པད་དཀར་བཀྲ། །བསླབ་གསུམ་རྣམ་དག་དྲི་བསུང་ཅན། །ཀརྨ་རྣམ་དག་ཆོས་ཚུལ་ལྡན། །མོས་གུས་རྣམ་དག་འབྱོངས་པར་ཤོག །དེང་ནས་བྱང་ཆེན་མ་འགོད་བར། །ཡོངས་འཛིན་དམ་པས་རྗེས་བཟུང་སྟེ། །སྨིན་གྲོལ་ལམ་བཟང་མྱུར་ཐོབ་ནས། །སྐུ་བཞིའི་བདག་ཉིད་འགྱུར་བར་ཤོག །དཀོན་མཆོག་རྒྱ་མཚོའི་བདེན་སྟོབས་དང་། །ཆོས་དབྱིངས་དོན་དམ་བདེན་བའི་མཐུས། །སྨོན་ལམ་འབྲས་བུ་ཇི་སྙེད་པ། །རིང་པོར་མི་ཐོགས་འགྲུབ་གྱུར་ཅིག །ཅེས་སྨུག་པོ་གནས་ཀྱི་ཀུན་སྤོང་དཀོན་སྐྱབས་ངོར། རྣམ་དག་ལ་སྨོན་ལམ་དུ་སྤེལ་བ་ཛ་ག་ཏཾ། །སྲིད་ཞིའི་དཔལ་གྱུར་མགོན་པོ་མཆོག །དཔག་དཀའི་ཕྲིན་ལས་འོད་སྟོང་ཅན། །དཔལ་ལྡན་རྗེ་བཙུན་ཀརྨ་པའི། །ཐུགས་རྗེའི་བྱིན་རླབས་མི་
བཟད་པས། །ཐར་འདོད་སྐལ་བཟང་པདྨོའི་ཚལག །ལོག་ཕྱོགས་སྨག་རུམ་དྲུངས་ཕྱུང་ནས། །དགེ་ཚོགས་འདབ་སྟོང་སྤྲོ་བཞིན་དུ། །རྣམ་ཀུན་རྗེས་སུ་འཛིན་པར་ཤོག །ཅེས་པའང་ཀརྨ་ཚེ་བརྟན་ལ་སྤེལ། །རབ་འབྱམས་རྒྱལ་བའི་མཐུ་བྱིན་གྱིས། །ཚེ་རབས་གཏན་དགེའི་དཔལ་ཐོབ་སྟེ། །ཟབ་མོ་ཆོས་ཀྱི་སྨིན་གྲོལ་ཐོབ། །སྐྱེ་དགུ་ཡོངས་ལ་སྨན་གྱུར་ཅིག །མཆོག་གསུམ་འདུས་ཞལ་ཀརྨ་པ། །རྩ་གསུམ་ལྷ་ཡི་བདེན་པ་དང་། །ཆོས་དབྱིངས་བསམ་མི་ཁྱབ་བའི་མཐུས། །དེ་ལྟར་སྨོན་ལམ་མྱུར་འགྲུབ་ཤོག །ཅེས་པའང་ཨ་ཁྱིང་ཞེས་པའི་ངོར་སྤེལ་བ་སརྦ་ཛ་ག་ཏཾ། །དཀོན་མཆོག་རྒྱ་མཚོའི་བྱིན་རླབས་ཀྱིསག །མཐའ་ཀླས་སེམས་ཅན་མ་ལུས་ཀུན། །འདྲེན་པའི་གཉེན་དུ་གྱུར་ནས་སུ། །བསྟན་འགྲོའི་བཙས་སུ་སྨིན་པ་ཡི། །ཇི་ལྟར་ཡིད་ལ་གང་འདོད་པ། །མ་ལུས་འགྲུབ་པའི་རྒྱུར་གྱུར་ཅིག །ཚ་ཀོ་བ་ཁྲོ་ཆུ་དགེ་སློང་ཡེ་ཤེས་ལའོ། །རྒྱལ་ཀུན་ཐུགས་རྗེའི་རང་གཟུགས་ཉིད། །དཔལ་ལྡན་སངས་རྒྱས་གཉིས་པ་མཆོག །འཆི་མེད་རིག་འཛིན་པདྨ་འབྱུང་། །གང་གི་གསང་གསུམ་མི་ཟད་པ། །དཔག་མེད་ཡོན་ཏན་སྟོབས་དག་གིས། །སྐྱེ་འགྲོ་ཕན་དང་བདེ་བའི་གཞིར། །ངེས་དོན་སྙིང་པོའི་རིང་ལུགས་ཀུན། །མི་ནུབ་ཕྱོགས་མཐར་ཁྱབ་གྱུར་ཅིག །ཅེས་ཕན་བདེ་ལ་སྨོན་ལམ་དུ་སྤེལ། །
ཕྱོགས་བཅུར་བཞུགས་པའི་རྒྱལ་བ་ཡི། །གསང་གསུམ་གཅིག་བསྡུས་ཀརྨ་པ། །མགོན་དེའི་བརྩེ་ཆེན་ཡེ་ཤེས་ཀྱི། །ཐབས་མཁས་ཟབ་མོའི་སྣང་བ་ཡིས། །སྐལ་ལྡན་འཁོར་མཚོ་བརྒལ་འདོད་དག །ངེས་འབྱུང་མོས་གུས་རྫིང་ལ་བརྟེན། །དག་པའི་ཁང་བཟང་རིན་ཆེན་གླིང་། །སྐུ་བཞིའི་ནོར་བུ་ཐོབ་པར་ཤོག །ཇི་སྲིད་དེ་མ་ཐོབ་ཀྱི་བར། །དཔལ་ལྡན་ཀརྨ་ཀཾ་ཚང་གི། །བསྟན་པའི་སྒོར་ཞུགས་ཡང་དག་གི། །ལམ་སྟོན་རྡོ་རྗེ་སློབ་དཔོན་དང་། །མི་འབྲལ་སྒོ་གསུམ་ཆོས་སྤྱོད་ཀྱི། །སྒྲུབ་པ་མཐར་ཕྱིན་སྐྱེ་དགུ་རྣམས། །ལེགས་པའི་ལམ་ལ་དཀྲི་བ་ཡི། །ཕྲིན་ལས་རྒྱ་ཆེར་སྟོན་ནུས་ཤོག །ཅེས་པའང་འཇང་རི་སྨུག་པོའི་རྟོགས་ལྡན་པ་དཀོན་མཆོག་སྐྱབས་ནས་བསྐུལ་བཞིན་སི་ཏུས་སྤེལ་བ་མངྒ་ལཾ། །དཔལ་ལྡན་སྟོབས་བཅུ་མངའ་བ་དེ་བཞིན་གཤེགས། །ཞི་བ་ཆགས་བྲལ་དམ་པའི་ཆོས་མཆོག་དང་། །བསླབ་ལྡན་ངུར་སྨྲིག་འཆང་དབང་སཾ་གྷ་ཤྲཱིི། །བླ་མེད་དཀོན་མཆོག་གསུམ་གྱི་བདེན་པ་ཡིས། །ཡུལ་རིས་ས་ཕྱོགས་གྲོང་རྡལ་འདིར་གནས་པའི། །དཔའ་བོ་ཌཱ་ཀི་གནས་སྲུང་ཡུལ་ལྷར་བཅས། །མ་ལུས་རྒུད་པའི་མཚན་མ་གཏན་ནས་ཞི། །སངས་རྒྱས་བསྟན་དང་སྐྱེ་དགུའི་དཔལ་ཡོན་ཚོགས། །གོང་དུ་འཕེལ་ཞིང་སྐྱོང་བའི་རྩལ་དྲག་ལྡན། །དེ་ཡི་མཐུ་ལས་གནས་ལྗོངས་འདི་ཉིད་དུ། །མི་ཕྱུགས་ནད་དང་ལོ་ཉེས་འཁྲུགས་རྩོད་ཞི། །ཆར་ཆུ་དུས་འབབ་
འབྲུ་བཅུད་ལོ་ཏོག་འཕེལ། །བསྟན་པའི་སྙིང་པོ་སྒྲུབ་བརྒྱུད་དར་ཞིང་རྒྱས། །ལོག་འདྲེན་བདུད་རིས་ཐལ་བར་བརླག་གྱུར་ཅིག །མདོར་ན་སེམས་ཅན་རྣམས་ནི་མ་ལུས་པ། །བྱང་ཆུབ་སེམས་དང་ནམ་ཡང་འབྲལ་མེད་ཤོག །ཚེ་དང་བསོད་ནམས་དཔལ་འབྱོར་རྒྱས་གྱུར་ཅིང་། །རྣམ་པར་དག་པའི་དགེ་ལ་གཞོལ་བ་དང་ག །མཐར་ཐུག་སྐུ་བཞིའི་བདག་ཉིད་འགྲུབ་གྱུར་ནས། །རྣམ་ཀུན་བཀྲ་ཤིས་སྣང་བས་ཁྱབ་གྱུར་ཅིག །ཅེས་ཡ་ཀྲེ་མང་ཀྭ་དང་ཏེ་པུའི་ཡུལ་མི་རྣམས་ཀྱིས་གནས་གང་ལ་ཡང་དགེ་བའི་སྨོན་ལམ་བསྐུལ་བར་བརྟེན། མཆུ་ཟླའི་དཀར་ཕྱོགས་བཟང་པོར་ཐུབ་བསྟན་ཆོས་གླིང་ནས་སྤེལ་བར་དགེ་ལེགས་འཕེལ། །ཨཱཪྱ་ཏཱ་རེའི་ཐུགས་རྗེའི་མཁའ་ཀློང་ནས། །རྨད་བྱུང་བྱིན་རླབས་ཆུ་འཛིན་ཕྱོགས་བཅུར་གཡོ། །དགེ་ལེགས་འདོད་པ་འཇོ་བའི་ཆར་ཆེན་འབེབས། །དེང་འདིར་སྐལ་ལྡན་འཛིན་མའི་གཞི་འདི་རུག །ཕན་དང་བདེ་བའི་རྐང་འཐུང་རྒྱས་གྱུར་ཏེ། །བྱང་གྲོལ་ལམ་གྱི་འབྲས་བུ་ཡོངས་སུ་སྨིན། །ཡིད་ཅན་འགྲོ་བའི་གཉེན་དུ་གྱུར་ནས་སུ། །རྒྱལ་བསྟན་གསལ་བར་བྱེད་པའི་གསོས་སུ་ཤོག །ཅེས་ཁྲ་འབུ་མང་ཀྭ་བའི་འདོད་དོན་ལྟར་ཆོ་འཕྲུལ་ཅན་གྱི་ཡར་ཚེས་ལ་སྤེལ། །རིགས་ཀུན་གཙོ་བོ་དྲུག་པ་རྡོ་རྗེ་འཆང་། །པྲཛྙཱ་བྷ་དྲ་ནཱ་རོ་པཎ་ཆེན་སོགས། །ཟུང་འཇུག་ཕྱག་རྒྱ་ཆེན་པོ་བཀའ་བརྒྱུད་ཀྱི། །གྲུབ་པའི་དབང་པོ་མཆོག་རྣམས་ཐུགས་རྗེའི་མཐུས། །ཀརྨ་དར་རྒྱས་དེང་བཟུང་
བྱང་ཆུབ་བར། །དལ་བརྒྱད་འབྱོར་བཅུ་ལྡན་པའི་ལུས་བཟང་ཐོབ། །ཡང་དག་ལམ་སྟོན་ཡོངས་འཛིན་དམ་པ་མཇལ། །ཟབ་དོན་ཆོས་ཀྱི་བདུད་རྩིར་ལོངས་སྤྱོད་ནས། །གདོད་ནས་ལྷན་ཅིག་སྐྱེས་པའི་ཡེ་ཤེས་ཀྱི། །རང་བྱུང་གཉུག་མའི་ངོ་བོ་གནས་མཐོང་ཞིང་། །གཞན་ཕན་བྱང་སེམས་སྤྱོད་པ་རྒྱ་ཆེན་གྱིས། །སྲིད་མཚོ་བརྒལ་བའི་དེད་དཔོན་ཉིད་གྱུར་ཅིག །ཅེས་ལི་ཡུལ་པ་ཀརྨ་དར་རྒྱས་ངོར་སྤེལ་བ་དགེ་ཚོགས་ཡར་ཟླ་ལྟར་འཕེལ་རྒྱས་སུ་གྱུར་ཅིག །རྒྱལ་ཀུན་ངོ་བོ་གུ་རུ་རྗེག །སློབ་དཔོན་པདྨ་སཾ་བྷ་ཝའི། །བྱིན་རླབས་ཉིན་བྱེད་འོད་སྟོང་གིས། །སྐལ་ལྡན་སྙིང་གི་པདྨོའི་ཚལ། །གསལ་བར་བྱས་སོ་ཐུགས་རྗེའི་བདག །དེང་བཟུང་བླ་མེད་བྱང་ཆུབ་བར། །བརྩེ་བས་རྗེས་འཛིན་མཆོག་གི་ལམ། །འགོད་པའི་སྐལ་བཟང་ལྡན་གྱུར་ཅིག །ཅེས་དབང་རྒྱལ་ལགས་ཀྱི་ཐང་སྐུའི་རྒྱབ་ཟུང་དུ་སྤེལ་བ་དགེ། སྟོན་མཆོག་ཐུགས་རྗེའི་ཀློང་ཡངས་ནས། །བསྟན་བའི་སྣང་བྱེད་ཀརྨ་པ། །དངོས་གྲུབ་ཆུ་འཛིན་ཝཱ་ར་ཧི། །མ་ཧཱ་ཀཱ་ལ་དབྱར་རྔའི་བདག །ནོར་འཛིན་ཞིང་གི་ཁྱོན་ཡངས་པོར། །རྒྱལ་བསྟན་པདྨོའི་ཚལ་ཇི་སྙེད། །རབ་རྒྱས་མོས་ལྡན་བུང་བའི་ཚོགས། །དམ་པའི་རྩི་ཡིས་འཚོ་གྱུར་ཅིག །ཅེས་ལི་ཡུལ་བ་དགེ་སློང་སྒྲུབ་མཆོག་ངོར་ཐང་ཀའི་རྒྱབ་ཟུང་དུ་སྤེལ། །བཅོམ་ལྡན་རྒྱལ་བ་རྣམ་སྣང་མཛད། །ལྷ་ཚོགས་མ་ལུས་འཁོར་བཅས་ཀྱིས། །མཁའ་ཁྱབ་འགྲོ་བའི་ལས་
ཉོན་ལས། །བྱུང་བའི་ངན་སོང་སྦྱོང་དུ་གསོལ། །བདེ་བར་གཤེགས་དང་རྒྱལ་སྲས་ཚོགས། །སློབ་མར་བཅས་པའི་ཐུགས་རྗེའི་འོད། །བདག་སོགས་ནོངས་པའི་སྨག་རུམ་རྣམས། །རབ་ཏུ་བསལ་བའི་དབུགས་དབྱུང་སྩོལ། །ཅེས་དགེ་སློང་སྐལ་བཟང་གི་བྱིན་རྟེན་ཐང་ཀ་ལའོ། །སྟོན་མཆོག་རྒྱལ་དང་ཆགས་བྲལ་དམ་པའི་ཆོས། །ཚོགས་མཆོག་དགེ་འདུན་བླ་མེད་མཆོག་གསུམ་གྱི། །དཀྱིལ་འཁོར་རྒྱ་མཚོ་ཡོངས་ཀྱི་གཙོ་མཆོག་དཔལ། །དེང་འདིར་བརྩེ་བས་ཉེར་དགོངས་གསན་དུ་གསོལ། །བསྟན་དང་འགྲོ་བའི་བཙས་གྱུར་སྤྲུལ་པའི་སྐུ། །ཕན་བདེ་ཆོས་སྤྱོད་བཅུ་ཡི་སྒྲུབ་པ་འཕེལ། །རྒྱལ་བའི་རིང་ལུགས་སྙིང་པོར་སྲི་ཞུ་སོགས། །མཐར་ཕྱིན་རྟག་པར་གེགས་མེད་འབྱུང་གྱུར་ཅིག །ཅེས་ཁམས་སྨྱོན་སྤྲུལ་སྐུའི་བཞེད་ལྟར་སི་ཏུས་སྤེལ། །དཀོན་མཆོག་གསུམ་གྱི་བྱིན་རླབས་མཐུས། །དུས་གསུམ་བསགས་པའི་དགེ་ཚོགས་ཀྱི། །བསྟན་འཛིན་ཞབས་བརྟན་འགྲོ་བ་རྣམས། །བྱང་ཆུབ་ཆེན་པོ་ཐོབ་ཕྱིར་བསྔོ། །ལྷ་རྡོག་ངོར་སྤེལ། །དཀོན་མཆོག་ཀུན་འདུས་ཐུགས་རྗེའི་འོད། །སྣང་བྱེད་དམ་པས་དེང་འདི་རུ། །སྒྲིབ་གསུམ་བག་ཆགས་རྩད་འབྱིན་ནས། །བྱང་གྲོལ་ལམ་བཟང་ཐོབ་གྱུར་ཅིག །དཔལ་སྦས་ལའོ། །སྐྱབས་ཡུལ་དམ་པའི་མཐུ་དཔལ་ལས། །དེང་བཟུང་བྱང་ཆུབ་མ་ཐོབ་བར། །
ཆོས་མཐུན་དགེ་བའི་སེམས་ལྡན་ཞིང་། །གྲུབ་པའི་རྗེས་འཛིན་སངས་རྒྱས་ཤོག །སྔགས་འཆང་པདྨ་རྒྱལ་པོ་ལ་སྤེལ། །བདེ་ཆེན་འཁོར་ལོར་རྟག་བཞུགས་པའི། །གངས་ཅན་མགོན་པོ་ཀརྨ་ཀ། མི་འབྲལ་བརྩེ་བས་རྗེས་བཟུང་སྟེ། །བྱང་ཆུབ་སེམས་ལ་དབང་འབྱོར་ཤོག །དབང་ཕྱུག་ངོར་སྤེལ། །ནམ་མཁའ་མཛོད་བཞིན་ལོངས་སྤྱོད་ཀྱིག །དབང་ཕྱུག་དབང་སྒྱུར་རྣམ་ཐོས་སྲས། །རེ་མནྟ་ཡི་མཐུ་དཔལ་གྱིས། །དེང་འདིར་ཉེར་འཚེ་ཀུན་བྲལ་ཤོག །ཨ་ལྷུན་ངོར་སྤེལ། །རྒྱལ་ཀུན་སྤྱི་གཟུགས་པདྨའི་ཐུགས་རྗེའི་འོདག །དེང་འདིར་འགྲོ་བློའི་རྒྱུད་ཀྱི་མུན་པའི་ཚོགས། །ཕ་མཐར་བསྐྲད་ཅིང་ཐར་པ་ལམ་བཟང་གི། གོ་འཕང་དམ་པ་ཚེགས་མེད་ཐོབ་གྱུར་ཅིག །ཅེས་བཀའ་བརྒྱུད་ཆོས་འཕེལ་ངོར་སྤེལ། །རྒྱལ་ཀུན་སྤྱི་མེས་པདྨ་འབྱུང་། །གང་དེའི་ཐུགས་རྗེའི་འོད་སྣང་གིས། །སྐལ་ལྡན་ཉོན་མོངས་སྒྲིབ་ཚོགས་རྣམས། །དྲུངས་ནས་ཕྱུང་སྟེ་རྣམ་པར་གྲོལ། །ཐར་པ་མཆོག་གི་ལམ་བཟང་ལ། །མྱུར་དུ་འགོད་པའི་དཔལ་ཐོབ་ཅིང་། །འགྲོ་བའི་དེད་དཔོན་དམ་པ་རུ། །དབུགས་དབྱུང་ཡོངས་སུ་ཐོབ་པར་ཤོག །དཔོན་དགེ་ལེགས་ངོར་སྤེལ། །རྒྱལ་ཀུན་ཕྲིན་ལས་མཛོད་འཛིན་པ། །པད་འབྱུང་སྒྱུ་འཕྲུལ་རོལ་པ་ལས། །གྲུབ་པའི་དབང་ཕྱུག་ཡོངས་ཀྱི་རྒྱན། །རྡོ་རྗེ་དྲག་པོའི་ཞབས་པདྨོ། །བདེ་ཆེན་འཁོར་ལོར་
འབྲལ་མེད་པར། །བརྩེ་བས་རྗེས་འཛིན་ཐར་མཆོག་གི། ལམ་བཟང་དམ་པར་མྱུར་བ་རུ། །འགོད་པའི་སྐལ་བཟང་ཐོབ་གྱུར་ཅིག །གདོང་ངེ་བན་ཆུང་ངོར་སྤེལ། །སྐུ་གསུམ་སྟོན་པ་པདྨ་འབྱུང་། །གང་གི་ཐུགས་རྗེའི་མཁའ་དབྱིངས་ལས། །འཆར་བའི་ཕྲིན་ལས་རོལ་པ་མཆོག །འདྲེན་པའི་དཔལ་གྱུར་ཀརྨ་པ། །རྗེ་བཙུན་བདུད་འདུལ་རྡོ་རྗེའི་ཞབས། །སྐྱེ་ཀུན་འབྲལ་བ་མེད་པ་དང་། །ངེས་འབྱུང་བྱང་ཆུབ་སེམས་ལྡན་ཞིང་། །སྒྲུབ་པ་མཐའ་རུ་ཕྱིན་པ་དང་། །ཚེ་དཔལ་མཐའ་རུ་ཕྱིན་པ་དང་། །རང་གཞན་དོན་གཉིས་མཐར་ཕྱིན་ཞིང་། །སྐུ་བཞིའི་གོ་འཕང་མཐར་ཕྱིན་ཤོག །དགེ་སློང་ཀརྨ་མཐར་ཕྱིན་ངོར་སྤེལ། །རྒྱལ་བའི་ཐུགས་བསྐྱེད་རྨད་བྱུང་བས། །དེང་འདིར་དགེ་བའི་ཚོགས་འཕེལ་ཞིང་། །རྣམ་ཀུན་སྙིང་རྗེས་རྒྱུད་བརླན་ཅིང་། །བསྟན་འགྲོའི་དོན་ཆེན་འགྲུབ་གྱུར་ཅིག །སངས་རྒྱས་བླ་མའི་ངོར་སྤེལ། །རྒྱལ་ཀུན་སྤྱི་དཔལ་པད་འབྱུང་གི། །ཐུགས་རྗེའི་འཇུག་པ་ཟབ་མོ་ཡི། །དམ་པའི་བདུད་རྩིས་འཚོ་གྱུར་ཏེ། །སྐུ་བཞིའི་གོ་འཕང་མངོན་དུ་ཤོག །བླ་མ་རིག་བྱེད་ངོར་སྤེལ། །འཕགས་མའི་ཐུགས་རྗེའི་གཏེར་ཆེན་ལས། །བྱུང་བའི་འོད་དཀར་བདུད་རྩིའི་ཆར། །སྐལ་ལྡན་རྒྱུད་ལ་མྱུར་སྨིན་ནས། །ཚེ་དང་ཡེ་ཤེས་དཔལ་ཐོབ་ཤོག །འབྲོང་པ་བླ་མའི་ངོར་སྤེལ། །བླ་མ་ཡི་དམ་ཆོས་སྲུང་ཚོགས། །
རྩ་གསུམ་ལྷ་ཡི་བདེན་པ་ཡིས། །དེང་འདིར་མི་ནོར་དུས་རྟག་ཏུག །བདེ་བའི་དཔལ་ལ་སྤྱོད་གྱུར་ཅིག །ཅེས་པ་ཧོར་ཚང་ངོར་སྤེལ། །སྐྱབས་གནས་བསླུ་མེད་རྒྱལ་དབང་པདྨ་འབྱུང་། །ཐུགས་རྗེའི་བྱིན་རླབས་ཀློང་ཡངས་དམ་པ་ནས། །གཞན་ཕན་སྙིང་རྗེའི་ཆུ་ཁུར་ཕྲེང་བ་ཡིས། །དེང་འདིར་འགྱུར་མེད་ཡེ་ཤེས་འབྲས་སྨིན་ནས། །སྐུ་བཞིའི་གོ་འཕང་ཚེགས་མེད་ཉིད་ཐོབ་ཤོག །སྐྱིད་ཕུག་སྤྲུལ་སྐུའི་བཞེད་ལྟར་སྤེལ། །དབྱིངས་ཀྱི་ཁྲོ་རྒྱལ་ཧེ་རུ་ཀ། པདྨ་ཐོད་ཕྲེང་བྱིན་རླབས་ཀྱིས། །དེང་འདིར་ཉེར་འཚེ་ཀུན་བྲལ་ནས། །ཆོས་སྐུའི་བདག་ཉིད་ཐོབ་པར་ཤོག །ཆོས་རྒྱལ་ངོར་སྤེལ། །རྒྱལ་བའི་ཡུམ་གྱུར་ཏཱ་རེ་མས། །འཁོར་བའི་འཇིགས་ལས་བསྒྲལ་བ་དང་། །ཡེ་ཤེས་ཚེ་དཔལ་དབང་འབྱོར་ཞིང་། །དོན་གཉིས་ལྷུན་གྱིས་གྲུབ་གྱུར་ཏེ། །པོ་ཊ་ལ་ཞིང་དག་པའི་གནས། །ཚེགས་མེད་བདེ་བླག་ཉིད་བགྲོད་ནསག །འཕགས་མའི་སྲས་སུ་དབང་བསྐུར་བའི། །ངེས་ལམ་མཐར་ཐུག་ཐོབ་པར་ཤོག །དགེ་སློང་ཀརྨ་ཆོས་འཛིན་ངོར་སྤེལ། །དཔག་ཡས་རྒྱལ་བའི་ཐུགས་བསྐྱེད་ཀྱི། །འཇུག་པ་ཟབ་མོའི་དཔལ་དམ་པས། །རང་བྱུང་ཡེ་ཤེས་ཕྱག་རྒྱ་ཆེའི། །གནས་ལུགས་ཇི་བཞིན་རྟོགས་གྱུར་ཅིག །གནས་མདོ་བླ་ཆུང་བཞེད་ལྟར་སྤེལ། །རྒྱལ་ཀུན་ཐུགས་རྗེའི་འོད་སྣང་གིསག །དེང་འདིར་སྒྲིབ་པའི་མུན་ཚོགས་རྣམས། །རབ་
བསལ་དོན་དམ་དེ་ཁོ་ནའི། །ངོ་བོ་མངོན་དུ་གྱུར་པར་ཤོག །ནུས་ལྡན་ནས་བསྐུལ་བཞིན་སྤེལ། །བཀའ་བརྒྱུད་ཡོངས་ཀྱི་གྲུབ་པའི་འབྱུང་གནས་མཆོག །བཞད་པ་རྡོ་རྗེའི་ཞབས་པད་བྱང་ཆུབ་བར། །འབྲལ་མེད་མཆོད་དོ་དུས་རྣམས་ཀུན་ཏུ་སྐྱོངས། །ཆོས་སྐུ་ཡེ་ཤེས་ཕྱག་རྒྱ་ཆེན་པོ་ཡི། །གནས་ལུགས་ངོ་བོ་འཁྲུལ་མེད་ཉིད་དུ་རྟོགས། །སྒྲིབ་གཉིས་བག་ཆགས་མ་ལུས་དྲུངས་ཕྱུང་སྟེ། །ཡང་དག་རྫོགས་སངས་རྒྱས་པའི་དཔལ་ཐོབ་ནས། །སྐྱེ་དགུའི་དེད་དཔོན་མྱུར་བ་ཉིད་འགྲུབ་ཤོག །རྟོགས་ལྡན་ཆོས་དབང་དང་དར་རྒྱས་ཟུང་ལ་སྤེལ། །དཔལ་ལྡན་རིགས་ཀུན་ངོ་བོ། །དྲུག་པ་རྡོ་རྗེ་འཆང་ཆེན། །མི་འབྲལ་སྙིང་གི་དབུས་བཞུགས། །འཕགས་ཡུལ་གྲུབ་བརྙེས་དབང་ཕྱུག །ས་ར་ཧ་ཞེས་གྲགས་དེ། །བདེ་ཆེན་འཁོར་ལོར་གུས་མཆོད། །གདོད་ནས་ལྷན་སྐྱེས་སེམས་ཉིད། །གནས་ལུགས་གཉུག་མ་ཆོས་སྐུའི། །རང་ཞལ་མངོན་དུ་གྱུར་ནས། །སྐུ་བཞིའི་གོ་འཕང་རིན་ཆེནག །བདེ་བླག་ཉིད་དུ་ཐོབ་ཅིང་། །རྫོགས་སངས་རྒྱས་ཀྱི་དཔལ་ཤོག །ཅེས་པའང་བསྟན་འཛིན་རིན་པོ་ཆེས་བཞེད་ལྟར་སི་ཏུས་སྤེལ། །སྐྱབས་གསུམ་ཀུན་འདུས་བདག་ཉིད་ཀརྨ་པ། །མ་འོངས་བསྐལ་བཟང་རྣམ་འདྲེན་དྲུག་པ་མཆོག །སེང་གེའི་རྣམ་འཕྲུལ་སྲིད་པ་ཇི་སྲིད་བར། །འགྲོ་བའི་སྐྱབས་སུ་སྒྱུ་འཕྲུལ་རྡོ་རྗེའི་གར། །རིམ་པར་
བྱོན་པ་རྣམས་ཀྱི་ཐུགས་བསྐྱེད་ལས། །འཁྲུངས་པའི་དགེ་ལེགས་བྱེ་བའི་ཆར་རྒྱུན་གྱིས། །དེང་འདིར་ངེས་འབྱུང་ཐར་པའི་ཞིང་ས་རུ། །བླ་མེད་སྐུ་བཞིའི་ས་བོན་སྨིན་གྱུར་ཏེ། །རྫོགས་སངས་རྒྱས་ཀྱི་ལམ་ལ་འགོད་གྱུར་ཅིག །ཅེས་པ་འདི་ཆགས་མེད་རིན་པོ་ཆེའི་མཆོག་སྤྲུལ་ཀརྨ་བསྟན་འཛིན་ཕྲིན་ལས་ནས་བཞེད་ལྟར་སི་ཏུས་སྤེལ། །རིགས་རྣམས་ཀུན་གྱི་བདག་པོ་མཆོག །བླ་མ་དཔལ་ལྡན་རྡོ་རྗེ་འཛིན། །ཤྲཱི་ཙིཏྟ་བཛྲ་ཞབས། །འབྲལ་མེད་དེང་བཟུང་བྱང་ཆུབ་བར། །སྐྱེ་དང་སྐྱེ་བར་རྗེས་འཛིན་ནས། །དག་པའི་ཞིང་མཆོག་པདྨ་འོད། །རིག་འཛིན་དཔའ་བོ་མཁའ་འགྲོ་ཡི། །ཞལ་མཐོང་བདུད་རྩི་མཉེས་པར་ཤོག །པད་ཆོས་ངོར་སྤེལ། །རྒྱལ་དབང་ཀརྨ་པ་མཆོག་གི། །བྱིན་རླབས་མཐུ་ཡིས་རང་བྱུང་གིག །ཡེ་ཤེས་དོན་དམ་དེ་ཉིད་ཀྱི། །གནས་ལུགས་ཇི་བཞིན་ཉིད་རྟོགས་ཤོག །ཐེག་འཕེལ་ངོར་སྤེལ་བའོ། །དཀོན་མཆོག་གསུམ་གྱི་བྱིན་རླབས་ཀྱི། །ཆར་ཆེན་དབབ་བའི་མཐུ་བྱིན་ལག །བརྟེན་ནས་གདུལ་བྱའི་ཐར་ལམ་ལྗོན། །བསྐྱེད་བསྲིང་བླ་མེད་འབྲས་ཐོབ་ཤོག །ཉི་མའི་ངོར་སྤེལ། །འཆི་མེད་པདྨཱ་ཀ་ར་ཡི། །ཕྲིན་ལས་མི་བཟད་འོད་སྟོང་གིས། །བདུད་བཞི་རྩད་ནས་གཞོམ་པ་དང་། །ཚེ་དཔལ་ཡེ་ཤེས་སྣང་བ་རྒྱས། །རྒྱལ་བསྟན་དྲི་མེད་རིན་པོ་ཆེརག །གསོས་སུ་སྨིན་པའི་བསམ་དོན་ཀུན། །འབད་པ་མེད་པར་འགྲུབ་པ་དང་། །ཕྱག་རྒྱ་ཆེན་པོ་
ཐོབ་གྱུར་ཅིག །སྔགས་འཆང་གུར་དྲག་ངོར་སྤེལ། །གངས་ཅན་མགོན་པོ་པད་དཀར་ཅནག །དབྱེར་མེད་དཔལ་ལྡན་ཀརྨ་པ། །ཆོས་ཀྱི་རྒྱལ་པོ་སྲིད་ཞིའི་མགོན། །མཆོག་གི་ཐུགས་རྗེའི་ཟླ་སྣང་གིས། །མ་རིག་སྒྲིབ་པའི་མུན་བཅོམ་ནས། །ཡང་དག་དོན་གྱི་ལམ་མཐོང་ཞིང་ག །སྐུ་བཞིའི་གོ་འཕང་མྱུར་ཐོབ་ནས། །འགྲོ་བའི་དེད་དཔོན་ཉིད་གྱུར་ཅིག །ཀརྨ་ནོར་བུའི་ངོར་སྤེལ། །སྐྱབས་གསུམ་འདུས་པའི་བདག་ཉིད་མཆོག །རྒྱལ་དབང་ཀརྨ་པ་ཞེས་པ། །ཉི་ཟླ་ལྟར་གྲགས་གང་དེ་ཡིས། །སྐྱེ་ནས་སྐྱེ་བར་རྗེས་འཛིན་ཤོག །ལྷུན་གྲུབ་ངོར་སྤེལ། །རྒྱལ་བའི་ཐུགས་བསྐྱེད་རོལ་པ་ཡིས། །དེང་འདིར་ཉེར་འཚེ་ལས་གྲོལ་ཏེ། །རྣམ་མཁྱེན་ཕྱིར་མི་ལྡོག་པ་ཡི། །གོ་འཕང་བདེ་བླག་ཐོབ་གྱུར་ཅིག །ཆོས་དབྱིངས་ངོར་སྤེལ། །རྒྱལ་བ་ཤཱཀ་ཐུབ་ཐུགས་རྗེའི་འོད། །ཕྱོགས་མཐར་ཁྱབ་པའི་ལེགས་བྱས་ཀྱིས། །འདུལ་བ་ཁྲིམས་ལྡན་དགེ་འདུན་རྣམས། །ཚུལ་ཁྲིམས་ཆོས་ཀྱི་རྒྱལ་མཚན་མཆོག །ཉམས་མེད་གོང་ནས་འཕེལ་བ་དང་། །དེ་མཐུས་ལྷ་ཀླུ་འབྱུང་པོའི་ཚོགས། །ཐམས་ཅད་བདེ་ལྡན་སྡུག་བསྔལ་བྲལ། །མི་རྣམས་སྐྱེ་རྒ་ན་འཆི་ཡི། །ཆུ་བོ་བཞི་ལས་གྲོལ་བ་དང་། །བྱང་གྲོལ་ལམ་ལ་འགོད་གྱུར་ཅིག །དབུ་དཔལ་ལྡན་ངོར་སྤེལ། །ཐུགས་རྗེ་ཐབས་མཁས་སྟོན་པ་ལ། །མི་ཕྱེད་གསོལ་བ་བཏབ་པའི་མཐུས། །བདག་ནི་ཚེ་
རབས་ཐམས་ཅད་དུ། །སོ་ཐར་བསྟན་པའི་སྒོར་ཞུགས་ནས། །མ་ནོར་སངས་རྒྱས་ལམ་སྟོན་པའི། །བླ་མ་མཆོག་དང་འབྲལ་མེད་ཅིང་། །ཚེ་གཅིག་དམ་ཆོས་ཕྱག་རྒྱ་ཆེ། །ཆོས་སྐུའི་རང་ཞལ་མངོན་གྱུར་ནས། །མཁའ་སྤྱོད་དག་པའི་ཞིང་ཁམས་སུག །ཚེགས་མེད་བདེ་བླག་བགྲོད་གྱུར་ཅིག །དབུ་མཛད་ཆོས་འཛིན་ངོར་བྲིས། །རྒྱལ་དབང་མཚོར་འཁྲུངས་པདྨ་འབྱུང་། །མདོ་སྔགས་གཉིས་ལྡན་སྟོན་མཆོག་ལ། །གསོལ་བཏབ་བདེན་པས་དེང་འདི་རུ། །རྒྱལ་ཁམས་ནད་མུག་འཁྲུགས་རྩོད་དང་། །ཆོས་མིན་བསླུ་བྲིད་ཐར་པའི་གེགས། །ལུས་མེད་རྒྱུད་བསྐུལ་མདའ་ལྔ་པའི། །དབང་གིས་ཉོན་མོངས་དུག་ལྔ་རྣམས། །ཀ་དག་དབྱིངས་སུ་རང་ཡལ་ནས། །ཡེ་ཤེས་སྐུ་རུ་ལྷུན་གྲུབ་ཤོག །བློ་གྲོས་ངོར་སྤེལ། །འདྲེན་པ་མཉམ་མེད་པདྨ་འབྱུང་། །གང་དེའི་བརྩེ་ཆེན་ཐུགས་བསྐྱེད་ལས། །བྱུང་བའི་ཡེ་ཤེས་གངྒཱའི་རྒྱུན། །རྨད་བྱུང་མི་བཟད་འབབས་པའི་མཐུས། །བདག་གཞན་རྒྱུད་ཀྱི་ལས་ཉོན་ལས། །བསྐྱེད་པའི་སྒྲིབ་བཞི་དག་གྱུར་ཏེ། །འབྲས་བུ་སྐུ་བཞིའི་གོ་འཕང་མཆོག །ཚེགས་མེད་བདེ་བླག་ཉིད་ཐོབ་ཤོག །སྒྲུབ་བརྒྱུད་ངོར་བྲིས། །སྟོན་པ་རྒྱལ་དབང་ཀརྨ་པའི། །ཐུགས་རྗེ་ཆེན་པོས་བཟུང་བའི་མཐུས། །ཁ་བ་ཅན་ལྗོངས་སྐྱེ་དགུའི་ཚོགས། །ཀུན་ཀྱང་བྱམས་པའི་སེམས་
ལྡན་ཞིང་། །རྟག་ཏུ་དམ་ཆོས་སྙིང་པོར་བསྒྲུབ། །དེ་མཐུས་རིགས་དྲུག་ལམ་རྒྱུད་ལྔར། །གནས་པའི་འགྲོ་བ་ཐམས་ཅད་ཀྱང་། །དགེ་དེས་བླ་མེད་མཆོག་ཐོབ་ཤོག །འདུས་བཟང་ངོར་སྤེལ། །མཆོག་གསུམ་བསླུ་མེད་ངོ་བོ་ཉིད། །སངས་རྒྱས་གཉིས་པ་པདྨ་འབྱུང་། །རྒྱལ་བ་གཞན་ལས་ཆེས་འཕགས་པའི། །མཁྱེན་དང་བརྩེ་བའི་རང་བཞིན་ཅན། །གང་དེས་གཞན་ཕན་བྱང་ཆུབ་ཀྱི། །ཐུགས་བསྐྱེད་ལྷ་ལམ་ཡངས་པོ་ནས། །འཆར་བའི་སྒྱུ་འཕྲུལ་རྣམ་རོལ་པ། །རྒྱུ་སྐར་ཕྲེང་ཚོགས་ལྟ་བུ་དང་། །དེ་དབུས་ཕུན་ཚོགས་ལྔ་ལྡན་གྱི། །ཡོན་ཏན་ཆ་ཤས་ཡོངས་གང་བག །སྲིད་འདིའི་སྒྲིབ་པའི་མུན་སེལ་གཉེན། །ཉི་ཟླ་ལྟར་གྲགས་ཀརྨ་པ། །རྒྱལ་མཆོག་བདུད་འདུལ་རྡོ་རྗེ་ཡི། །བྱིན་རླབས་འོད་དཀར་སྤེལ་བའི་མཐུས། །བདག་གཞན་རྒྱུད་ཀྱི་ཉོན་མོངས་པའིག །བག་ཉལ་མུན་པ་དྲུངས་ཕྱུང་སྟེ། །ཚེ་གཅིག་ཕྱག་རྒྱ་ཆེན་པོ་ཡི། །གོ་འཕང་མྱུར་བ་ཉིད་ཐོབ་སྟེ། །གྲུ་འཛིན་ཞིང་མཆོག་དེར་བགྲོད་ནས། །བླ་མེད་ལུང་བསྟན་ཐོབ་གྱུར་ཅིག །དགོན་གསར་ཀརྨ་ཚེ་བརྟན་ངོར་བགྱིས། །རྒྱལ་ཀུན་སྐྱེད་ཡུམ་འཕགས་མ་སྒྲོལ། །གང་དེའི་བྱིན་མཐུས་ཚེ་དཔལ་རྒྱས། །ཆོས་ལྡན་བསམ་དོན་འབད་མེད་འགྲུབ། །རང་བྱུང་ཡེ་ཤེས་ངོ་བོ་ཉིད། །ཆོས་སྐུའི་རང་ཞལ་མངོན་གྱུར་ཏེ། །པོ་ཊ་
ལ་ཡི་ཞིང་མཆོག་ཏུ། །འཕགས་མས་རྗེས་འཛིན་བྱང་ཆུབ་ཆེའི། །འབྲས་བུ་མངོན་དུ་འགྱུར་པར་ཤོག །ཀརྨ་ཆོས་དབྱིངས་ངོར་སྤེལ། །དེ་ལྟར་དགེ་ཚོགས་ནམ་མཁའི་མཐའ་འགེངས་པའི། །ལེགས་བྱས་རྒྱ་མཚོའི་རླབས་ལས་དྲངས་པ་ཡིས། །སྨོན་པའི་བསམ་དོན་ཡིད་བཞིན་དབང་རྒྱལ་ལྟར། །འབད་མེད་ཉིད་དུ་འགྲུབ་པར་གྱིས་རློབས། །རྒྱལ་བསྟན་སྙིང་པོར་གྱུར་པའི་ཀཾ་ཚང་གི། །ངེས་དོན་རིང་ལུགས་ཕྱོགས་མཐར་ཁྱབ་ཡུན་གནས། །དེ་འཛིན་རྣམས་ཀྱང་ཕྲིན་ལས་རབ་འཕེལ་ཞིང་། །གང་འདིར་ཚེ་བསོད་ཡེ་ཤེས་རབ་ཏུ་རྒྱས། །སྐྱེ་ཀུན་སྙིང་པོའི་བསྟན་པ་སྤེལ་ནུས་པའི། །ཕྱག་རྒྱ་ཆེན་པོའི་ཡེ་ཤེས་རྒྱུད་སྨིན་ནས། །སྐལ་ལྡན་འགྲོ་སྒྲོལ་མཐར་ཐུག་སངས་རྒྱས་ཀྱི། །གོ་འཕང་དམ་པ་མྱུར་ཐོབ་བྱིན་རློབས་ཤོག །ལྷ་བཟོ་སྤྲུལ་སྐུ་པའི་བཞེད་ལྟར་སྤེལ། །མཆོག་གསུམ་རྒྱལ་བའི་ཐུགས་བསྐྱེད་ཀྱི། །དཔག་བསམ་ལྗོན་པ་ལ་བརྟེན་ནས། །འགྲོ་བའི་ཉོན་མོངས་ཚ་གདུང་དག །བྱམས་པའི་བསིལ་གྲིབ་དམ་པ་ཡིས། །བདེ་ནས་བདེ་བར་འཚོ་གྱུར་ཅིག །ནམ་ཡང་སྐྱེ་བ་བརྒྱུད་མ་རུ། །རྒྱལ་དབང་ཀརྨ་པ་དེ་ཡིས། །རྗེས་འཛིན་མྱ་ངན་འདས་ཐོབ་ཤོག །བདེ་དགའི་ངོར་སྤེལ། །གངས་ཅན་ལྷ་གཅིག་སྤྱན་རས་གཟིགས། །ཐ་མི་དད་པ་ཀརྨ་པ། །ཕྱོགས་དུས་རྒྱལ་བའི་གསང་གསུམ་གྱི། །ཡོན་ཏན་འཛིན་ལ་དབང་སྒྱུར་
བའི། །མགོན་དེས་སྐྱེ་དང་སྐྱེ་བ་ནས། །ཐུགས་རྗེས་འབྲལ་མེད་སྐྱོང་བ་དང་། །ཆོས་ལྡན་དཔལ་འབྱོར་ལྷུན་གྲུབ་ཅིང་ག །མཐར་ཐུག་བྱང་གྲོལ་ལམ་འགོད་ཤོག །རྒྱ་མཚོའི་ངོར་སྤེལ། །རྩ་གསུམ་ཐུགས་རྗེའི་འོད་སྣང་གིས། །དེང་འདིར་ཉེས་གསུམ་མུན་གཞོམ་ནས། །སྒོ་གསུམ་སྒྲིབ་ཚོགས་རྩད་འབྱིན་ཅིང་། །མཐར་ཐུག་སྐུ་གསུམ་ཡོངས་ཐོབ་ཤོག །ཅེས་པའམ་དབང་འཛིན་ངོར་སྤེལ། །གངས་ཅན་ལྷ་གཅིག་པདྨ་ཅན། །གང་གི་བྱང་ཆུབ་རླབས་ཆེན་གྱིས། །རིགས་དྲུག་སེམས་ཅན་སྡུག་བསྔལ་ལས། །སྒྲོལ་ཏེ་ལམ་བཟང་འགོད་གྱུར་ཅིག །འཇང་ཚེ་དབང་མགོན་པོས་བསྐུལ་བཞིན་སྤེལ། །བདེ་ཆེན་ཞིང་མགོན་འཆི་མེད་ཚེ་མཆོག་བདག །བཅོམ་ལྡན་མགོན་པོ་ཚེ་འོད་དཔག་མེད་ལ། །ཕྱག་འཚལ་མཆོད་འབུལ་ནོངས་འཆགས་ཡི་རང་ངོ་། །འགྲོ་བའི་དོན་བསྐུལ་གསོལ་འདེབས་དགེ་ཚོགས་ཀུན། །བདག་གཞན་ཐར་པའི་གྲོང་མཆོག་ཉམས་དགའ་བར། །འཇུག་པའི་ཕྱིར་བསྔོ་སྐྱེ་དང་སྐྱེ་བ་ནས། །ཕྱིན་དྲུག་དང་ལྡན་དོན་ལ་རབ་གནས་ཏེ། །སྐྱེ་རྒ་ན་འཆིའི་འཇིགས་ལས་གྲོལ་བར་ཤོག །སྦྱིན་པའི་སྟོབས་རྫོགས་རྣམ་ཐོས་སྲས་པོ་ཡི། །འདོད་དགུའི་དཔག་བསམ་མྱུར་དུ་སྨིན་པ་དང་། །ཉེར་འཚེ་ལས་གྱུར་མི་མཐུན་སྡེ་རིས་བཅས། །ཚར་གཅོད་རྗེས་འཛིན་ཕྲིན་ལས་མཛད་དུ་གསོལ། །ལྷ་བྲིས་ཚེ་དབང་དར་རྒྱས་ངོར་སྤེལ། །ཀྱེ་མ། རྣམ་པར་སྨིན་པའི་ལས་
དབང་དྲག་བོ་ཡིས། །གང་ཞིག་དུས་འདིར་དེར་སྣང་བྱོལ་སོང་ལུསག །བདག་གིས་བཟུང་དང་མ་བཟུང་ཇི་སྙེད་པ། །ཀུན་ཀྱང་མི་རྟག་ཆུ་བུར་ཡལ་མ་ཐག །བདེ་བ་ཅན་ཞེས་སྣང་མཐའི་ཞིང་ཁམས་སུ། །བརྫུས་ཏེ་སྐྱེས་ནས་སྟོན་མཆོག་ཞལ་མཐོང་ཤོག །དེ་མ་ཐོབ་བར་སྐྱེ་དང་ཚེ་རབས་སུ། །བདེ་དགའི་དཔལ་སྤྱོད་དལ་འབྱོར་རྟེན་བཟང་ཐོབ། །སྒྲུབ་བརྒྱུད་རིན་ཆེན་བསྟན་པའི་སྒོར་ཞུགས་ནས། །རྣམ་དག་བསླབ་པ་གསུམ་གྱི་དོན་སྤྱོད་ཅིང་ག །བདེར་གཤེགས་སྙིང་པོའི་རང་ཞལ་མངོན་སུམ་མཐོང་། །མཐའ་ཀླས་སེམས་ཅན་འདྲེན་པའི་གཉེན་གྱུར་ཅིག །དེ་ལྟར་སྐྱབས་ཡུལ་ཀུན་འདུས་དམ་པའི་མགོན། །ཨོ་རྒྱན་སློབ་དཔོན་ཆེན་པོ་པདྨ་འབྱུང་། །མཆོག་གི་བརྩེ་ཆེན་ཐུགས་བསྐྱེད་རྒྱ་ཚོ་ལས། །བྱིན་རླབས་དགོས་འབྱུང་ནོར་བུ་དཔག་བསམ་དབང་། །བདག་སོགས་མོས་པས་གསོལ་བཏབ་ཇི་བཞིན་དུ། །དེ་བཞིན་ཐོགས་མེད་ལྷུན་གྱིས་གྲུབ་པ་དང་། །ངེས་གསང་རྡོ་རྗེ་སྙིང་པོའི་རིང་ལུགས་གང་། །མཐའ་ཀླས་ཀུན་ཏུ་ཁྱབ་པའི་རྒྱུར་གྱུར་ཅིག །ཅེས་བདག་ཏུ་བཟུང་དང་མ་བཟུང་བའི་དུད་འགྲོའི་རིགས་སྤྱི་དང་བྱེ་བྲག་རྣམས་ཀྱིས་མཚོན་འགྲོ་དྲུག་ཕན་བདེའི་དགའ་སྟོན་སྤེལ་བར་སྨོན་ལམ་འདི་བཞིན་སི་ཏུ་པ་པདྨ་ཉིན་བྱེད་དབང་པོས་སྤེལ་བ་མངྒ་ལཾ། །སྲས་བཅས་རྒྱལ་བ་རྒྱ་མཚོའི་ཚོགས། །དབྱེར་མེད་པདྨ་ཐོད་ཕྲེང་གི། །བྱིན་མཐུས་གུ་རུ་ཛྙཱ་ན་ཉིད། །གསང་གསུམ་ཟླ་བ་ཆ་གང་
བཞིན། །མི་མཐུན་ཉེས་པའི་ཆུ་འཛིན་ཞི། །གདུལ་བྱའི་རྫིང་བུ་རྙོགས་བྲལ་བར། །དམ་ཆོས་བདུད་རྩིའི་ཆར་འབེབས་ཏེ། །ཐར་ལམ་ལྗོན་ཤིང་འཁྲུངས་པར་ཤོག །ཅེས་གཅོད་པ་ཡེ་ཤེས་དགོངས་བཞེད་ལྟར་སྤེལ་པའོ། །འཇིག་རྟེན་དབང་ཕྱུག་པད་དཀར་འཆང་དབང་པོ། །སྒྲུབ་བརྒྱུད་གཙུག་རྒྱན་དཔལ་ལྡན་ཀརྨ་པའི། །ཕྲིན་ལས་གྲུ་ཆེན་འདེགས་པའི་སྨོན་ལམ་ཅན། །ཀརྨ་སི་ཏུ་འདི་བཟུང་བྱང་ཆུབ་བར། །རྟག་ཏུ་འབྲལ་མེད་ཆོས་མཐུན་བསམ་འགྲུབ་ཅིང་། །བསྐལ་བཟང་རྣམ་འདྲེན་ལྔ་པའི་ཞབས་པདྨོར། །བསྙེན་ནས་འདུས་པ་དང་པོར་དབུགས་དབྱུང་སྟེ། །བླ་མེད་རྫོགས་པའི་འབྲས་བུ་མངོན་གྱུར་ཤོག །ལྷ་བཟོ་སྤྲུལ་སྐུའི་བཞེད་ལྟར་མཚུར་ཕུར་སྤེལ་བའོ། །བཅོམ་ལྡན་རྒྱལ་བ་ཡང་དག་རྫོགས་སངས་རྒྱས། །བདེ་གཤེགས་སྨན་གྱི་བླ་མ་བཻ་ཌཱུཪྱའི། །འོད་ཀྱི་སྣང་བ་དཔག་མེད་མཆོག་དེ་ཡི། །སྔོན་གྱི་སྨོན་ལམ་ཆེན་པོ་དེ་བཞིན་ཏུ། །གང་འདིར་ཡང་ནི་ཕན་བདེ་ཉེར་འཚོའི་གཞི། །གསོ་བ་རིག་པའི་བརྒྱུད་འཛིན་གང་སུ་དག །དེ་རྣམས་ཀྱི་ནི་རིག་པའི་བློ་གྲོས་ཀྱི། །ཉིན་བྱེད་འོད་ཀྱི་སྣང་བ་སྤྲོ་བཞིན་ནས། །སྐྱེ་འགྲོའི་འབྱུང་འདུས་འཁྲུགས་པའི་ཁྲི་མུན་བཅོམ། །འཆི་མེད་མཆོག་གི་པད་ཚལ་རྩ་བ་བརྟན། །དཔལ་འབྱོར་བཟང་པོའི་ལོ་འདབ་ཀུན་ཏུ་རྒྱས། །མཐར་ཐུག་ཞིང་ཁམས་དམ་པར་བགྲོད་གྱུར་ཅིག །ཅེས་གར་
དབང་རིན་པོ་ཆེས་གསུང་ངོར་སི་ཏུ་པས་དཔལ་སྤུངས་ཡང་དབེན་དུ་བྲིས། །མཆོག་གསུམ་ཐུགས་རྗེའི་མཁའ་དབྱིངས་དམ་པ་ནས། །རྨད་བྱུང་ཕྲིན་ལས་འོད་སྟོང་ཀུན་ཏུ་གསལ། །འགྲོ་ཚོགས་ལས་ཉོན་སྒྲིབ་མུན་དྲྭ་བ་བསལ། །ཡང་དག་ཡེ་ཤེས་པདྨོ་རབ་རྒྱས་ཤོག །དུས་གསུམ་བསགས་པའི་དགེ་བ་ཇི་སྙེད་པ། །དུས་གསུམ་རྒྱལ་བའི་དྲུང་དུ་མཆོད་ཅིང་འབུལ། །དུས་གསུམ་སེམས་ཅན་ཡོངས་ཀྱི་དོན་དུ་བསྔོ། །དུས་གསུམ་མཁྱེན་པའི་མངའ་དབང་ཐོབ་པར་ཤོག །བདེ་ལྡན་པདྨོ་བཀོད་པའི་ཞིང་ཁམས་སུ། །ནམ་ཞིག་མི་རྟག་ཆུ་བུར་ཡལ་མ་ཐག །སྐྱེ་གཞན་མ་ཆོད་ནུབ་ཕྱོགས་དག་ཞིང་དུ། །བརྫུས་ཏེ་སྐྱེས་ནས་སྟོན་མཆོག་བཅོམ་ལྡན་འདས། །འཛམ་གླིང་སྤྲུལ་སྐུའི་བཀོད་པས་རྣམ་རོལ་ནི། །མི་ཕམ་ཆོས་གྲུབ་རྒྱ་མཚོའི་དཔལ་ཞེས་པ། །འོད་སྣང་མཐའ་ཡས་དཔག་མེད་རྒྱལ་པོ་སྟེ། །མཆོག་གི་ཞལ་མཐོང་བྱང་ཆུབ་དབུགས་འབྱིན་ཞིང་ག །བླ་མེད་ལུང་བསྟན་པ་ཡང་ཐོབ་པར་ཤོག །དེ་ལྟར་སྨོན་པའི་འདོད་དོན་ཡོངས་གྲུབ་པའི། །རྩ་གསུམ་ངོ་བོ་དཔལ་ལྡན་ཀརྨ་པ། །མགོན་དེས་ཚད་མེད་དམ་བཅའི་ཁུར་ཟབ་མོས། །དེང་འདིར་ཇི་བཞིན་དོན་ཀུན་སྨིན་གྱུར་ཅིག །ཅེས་པ་རྟོགས་ལྡན་སྒྲུབ་བརྒྱུད་ཀྱིས་བསྐུལ་བཞིན་སི་ཏུ་པས་ཡང་དབེན་སྒྲུབ་བརྒྱུད་དར་རྒྱས་གླིང་དུ་བྲིས་པ་སརྦ་མངྒ་ལཾ་སུ་ཛ་ཡ། །རྒྱལ་ཀུན་འདུས་པའི་སྤྱི་དཔལ་མཆོག །ཧེ་རུ་ཀ་དཔལ་འཁོར་ལོས་སྒྱུར། །
རིག་འཛིན་ཡོངས་གཙོ་རྒྱལ་བའི་སྲས། །ཚེ་དབང་ནོར་བུའི་ཞབས་པདྨོ། །བྱང་ཆུབ་སྙིང་པོར་མཆིས་ཀྱི་བར། །རྟག་པར་བསྙེན་ཅིང་རྡོ་རྗེ་བཞིའི། །བྱིན་རླབས་སྐུ་བཞིའི་འབྲས་ཐོབ་ནས། །དེ་མཐུས་བསྟན་འགྲོའི་གསོས་གྱུརཤོག །ཅེས་པའང་རྒྱལ་རིགས་སྦས་པའི་ངང་ཚུལ་གྱི་བརྟུལ་ཞུགས་འཆང་བ་སྒྲུབ་པ་བ་ཤེས་རབ་ངོར་སྤེལ། །བླ་མེད་བླ་མར་གྱུར་པ་ཀརྨ་ཀའི། །བྱིན་རླབས་འོད་བརྒྱའི་སྣང་བས་དེང་འདི་རུ། །བསྐལ་མུན་བསགས་པའི་སྒྲིབ་མུན་བག་ཆགས་རྣམས། །མྱུར་དུ་གཞིལ་ཏེ་ཡང་དག་ཡེ་ཤེས་ཀྱི། །པད་ཚལ་ཆེན་པོ་རབ་ཏུ་གྲོལ་གྱུར་ཅིག །དེ་ལས་བྱུང་བའི་ཉམས་ལེན་གདམས་པའི་བཅུད། །འགྲོ་ཀུན་བུང་བ་དམུས་ལོང་ཚོགས་ཇི་སྙེད། །རང་བྱུང་ལྷན་སྐྱེས་བརྗོད་མེད་རྟོགས་གྱུར་ཅིག །རང་བཞིན་ངོར་སྤེལ། །ལྷ་མིའི་སྟོན་མཆོག་བླ་ན་མེད། །བདེར་གཤེགས་ཀུན་མཁྱེན་ཤཱཀྱའི་ཏོག །འདྲེན་པ་མཉམ་མེད་གང་དེ་ལ། །ལུས་དང་ལོངས་སྤྱོད་དུས་གསུམ་གྱི། །དགེ་ཚོགས་གཅིག་ཏུ་བསྡུས་ནས་ནི། །རྒྱལ་བ་ཁྱོད་ལ་འབུལ་བར་བགྱི། །སྲིད་པའི་མིག་གཅིག་བླ་ན་མེད། །རིགས་ཀུན་ཁྱབ་བདག་ཀརྨ་ཀ། བསྐལ་བརྒྱའི་བར་དུ་ཞབས་པད་བརྟན། །ཕྲིན་ལས་སྣང་བ་རྒྱས་གྱུར་ནས། །སྒྲུབ་བརྒྱུད་རིན་ཆེན་དར་ཞིང་རྒྱས། །རིགས་དྲུག་འཁོར་བ་དོང་སྤྲུགས་ཤོག །བཅོམ་ལྡན་འདས་མ་ཏུཏྟཱ་རེའི། །བྱིན་རླབས་འོད་དཀར་
བདུད་རྩི་ཡིསག །ཚེ་དཔལ་བསོད་ནམས་ལོངས་སྤྱོད་འཕེལ། །དོན་གཉིས་མཐར་ཕྱིན་སངས་རྒྱས་ཤོག །ཅེས་ཡ་ཀྲེའི་བུ་མོ་ལྔ་ལ་སྨོན་ལམ་དུ་སྤེལ། །དཀོན་མཆོག་རྩ་གསུམ་ཀུན་འདུས་པདྨ་འབྱུང་། །གང་གི་བྱིན་རླབས་རྒྱུད་ལ་སིམ་པའི་མཐུས། །ཆོས་མཐུན་བསམ་དོན་ཡིད་བཞིན་འགྲུབ་པ་དང་ག །གནས་ལུགས་ཟབ་དོན་མངོན་གྱུར་སངས་རྒྱས་ཤོག །ཅེས་པའང་དབོན་སྤྲུལ་ཀརྨ་རབ་སྒྲུབ་བཞེད་ངོར་དགེག །ཡང་དག་རྫོགས་པའི་སངས་རྒྱས་ཀྱི། །ནུས་མཐུ་བྱིན་རླབས་གཏེར་ཆེན་པོསག །དེང་འདིར་ཉེར་འཚེ་ཀུན་བྲལ་ཞིང་། །ཚེ་དཔལ་ཡེ་ཤེས་དབང་འབྱོར་བའི། །རྨད་བྱུང་འདོད་དོན་ཡོངས་གྲུབ་ནས། །འདུས་བྱས་སྣང་བ་ནུབ་མ་ཐག །བདེ་ལྡན་བཀོད་པའི་ཞིང་བགྲོད་ནསག །རྒྱལ་བའི་ཞལ་མཐོང་དབུགས་དབྱུང་ཤོག །ཅེས་རྒྱ་རྡོ་རྗེ་དབང་ཕྱུག་ལ་སྤེལ། །འཕགས་མཆོག་ཐུགས་རྗེའི་གཏེར་ཆེན་འཇིག་རྟེན་མགོན། །དབྱེར་མེད་རྗེ་བཙུན་བདུད་འདུལ་རྡོ་རྗེའི་ཞབས། །དཔལ་ལྡན་འབྲུག་པའི་རྗེས་བཟུང་པདྨའི་གཉེན། །ཉིན་བྱེད་དབང་པོའི་རྒྱལ་བསྟན་གསལ་ལ་འདུད། །རྡོ་རྗེ་འཆང་ནས་རྩ་བའི་བླ་མའི་བར། །སྙིང་པོ་དོན་གྱི་བརྒྱུད་པའི་གདམས་ཟབ་རྒྱུན། །ལྷན་སྐྱེས་ཡེ་ཤེས་རང་བྱུང་ངོ་བོ་ཉིད། །དོན་དམ་ཆོས་སྐུའི་གནས་ལུགས་མ་བཅོས་ངང་། །འཁྲུལ་མེད་ལྟ་བའི་གདེང་ལྡན་ཞེན་མེད་ཀྱི། །སྒོམ་པ་འཛིན་མེད་དེ་ཡི་ངང་ཉིད་ལས། །བླང་དོར་བྲལ་
བའི་སྤྱོད་པ་སྐྱོང་བཞིན་དུ། །འབྲས་བུ་ཆོས་སྐུའི་རྒྱལ་ས་ཟིན་པར་ཤོག །དུས་གསུམ་དགེ་ཚོགས་བསགས་པའི་ལེགས་བྱས་ཀྱིས། །བླ་མའི་ཞབས་བརྟན་རྒྱལ་བསྟན་འཕེལ་ཡུན་གནས། །དགེ་འདུན་སྡེ་རྒྱས་བདག་དང་བདག་འབྲེལ་བའི། །ཐོག་མེད་དུས་ནས་ཕ་མར་གྱུར་པ་ཡི། །རིགས་དྲུག་སེམས་ཅན་འཁོར་བའི་དུཿཁ་ལས། །སྒྲོལ་ནས་བྱང་ཆུབ་སྙིང་པོ་མངོན་གྱུར་ཤོག །དེ་མ་ཐོབ་བར་ཚེ་རབས་ཐམས་ཅད་དུ། །སྡུག་བསྔལ་མིང་མེད་དགའ་བདེས་འཚོ་བཞིན་པར། །ཆོས་མིན་བཤེས་བྲལ་ཆོས་བཞིན་སྤྱོད་འཇུག་ནསག །མཐར་ཐུག་བླ་མེད་རྫོགས་སངས་རྒྱས་ཐོབ་ཤོག །ཅེས་འབྲུག་མཚོ་མཇུག་སྤྲུལ་སྐུ་ཀར་བརྒྱུད་བསྟན་འཛིན་ལྷུན་གྲུབ་ཀྱི་བཞེད་ངོར་སྤེལ། །བསྐལ་བཟང་རྣམ་འདྲེན་བཞི་པ་ཤཱཀྱའི་རྒྱལ། །དེས་གསུང་ཐེག་པ་གསུམ་གྱི་དམ་པའི་ཆོས། །ཉན་ཐོས་བཅུ་དྲུག་ལ་སོགས་དགེ་འདུན་ཏེ། །བླ་མེད་མཆོག་གསུམ་བདེན་པའི་བྱིན་རླབས་ཀྱིས། །ཕན་བདེ་མ་ལུས་འབྱུང་བའི་གནས་གཅིག་པུ། །ལུང་དང་རྟོགས་བའི་བསྟན་པ་རིན་པོ་ཆེ། །ཡུན་གནས་དེ་འཛིན་མཆོག་རྣམས་ཞབས་བརྟན་ཞིང་། །རྫོགས་ལྡན་དགེ་བའི་ལང་ཚོ་རྒྱས་གྱུར་ཅིག །ཁྱད་པར་རྒྱུད་སྡེ་རྒྱ་མཚོའི་མངའ་བདག་ཆེ། །སྐྱེས་མཆོག་མར་པའི་བཀའ་བརྒྱུད་ཡ་བཞི་དང་། །ཟུང་བརྒྱད་ཁྱད་པར་སྒྲུབ་བརྒྱུད་མཐར་ཐུག་པ། །ཀརྨ་ཀཾ་ཚང་ཞེས་གྲགས་སྙིང་པོའི་བསྟན། །སྤྲིན་བྲལ་མཁའ་ལ་ཉི་འོད་འབུམ་
བརྡལ་བཞིན། །འཛམ་གླིང་མཐའ་དབུས་ཁྱབ་བའི་ལྷག་བསམ་གྱི། །མཐུན་རྐྱེན་མཐའ་དག་འབད་མེད་ཡོངས་གྲུབ་ནས། །བཀྲ་ཤིས་དགེ་བའི་དཔལ་དང་ལྡན་གྱུར་ཅིག །ཅེས་དཔལ་ལྡན་དུས་གསུམ་མཁྱེན་པའི་གདན་ས་འོག་མ་ཤར་ཀཾ་པོ་གངས་ར་དང་རྗེས་སུ་འབྲེལ་བའི་ཀུན་ཏུ་བཟང་པོའི་ནགས་ཁྲོད་གཉིས་པར་གྲགས་པ་འདོབ་སྤང་ཕུག་འབྲུག་རྗེ་དར་རྒྱས་གླིང་པའི་འདུས་སྡེ་རྣམས་ཀྱི་བཞེད་ངོར་སྤེལ་བ་དགེག །སྐྱབས་གསུམ་ཀུན་འདུས་དཔལ་ལྡན་ཀརྨ་ཀ། ཡི་དམ་ཆོས་སྐྱོང་སྲུང་མའི་བྱིན་རླབས་ཀྱི། །ཆུ་འཛིན་འཐུག་པོར་གཏིབས་ལས་མཆོག་ཐུན་དང་། །ལས་བཞིའི་གྲུ་ཆར་འབེབས་པས་དད་གསུམ་གྱི། །ཞིང་སར་བདེ་ལེགས་འབྲས་བཟང་ཡོངས་སྨིན་པས། །གནས་སྐབས་མཐར་ཐུག་དགོས་དགུ་འགྲུབ་པ་དང་། །རང་རིག་བཅོས་མིན་ལྷན་སྐྱེས་ཕྱག་རྒྱ་ཆེག །གདོད་མའི་གཞི་དབྱིངས་མངོན་པར་བྱང་ཆུབ་ཤོག །འབྲུག་རྗེ་གླིང་དགེ་སློང་དཀོན་མཆོག་རྒྱ་མཚོའི་ངོར་སྤེལ། །དཔལ་ཀུན་ཏུ་བཟང་པོའི་ནགས་ཁྲོད་ན། །རྗེ་རྫོགས་པའི་སངས་རྒྱས་བཅོམ་ལྡན་འདས། །བསྐལ་བཟང་གི་འདྲེན་པ་འཁོར་བ་འཇིག །རྣམ་འཕྲུལ་མཆོག་རྡོ་རྗེ་རྒྱལ་པོ་ཡི། །བྱིན་རླབས་ཀྱི་ཉིན་བྱེད་འབུམ་བརྡལ་བས། །དེང་འདི་རུ་སྐལ་ལྡན་པདྨའི་ཚལ། །དོན་གཉིས་ཀྱི་འདབ་སྟོང་རྒྱས་བ་དང་། །བྱང་ཆུབ་ཀྱི་ལོ་འདབ་གཡོ་བཞིན་པར། །རང་གཞན་ཀུན་ཐར་པའི་ལམ་བཀོད་པའི། །སྐུ་ལྔ་ཡི་བདག་ཉིད་མཆོག་ཐོབ་ཤོག །ཅེས་འདབ་ཆགས་ནེ་ཙོའི་འདོད་ངོར་སྤེལ་
བར་བྱ་བའི་ཆོས་སོ། །སྐུ་གསུམ་བདག་ཉིད་འཆི་མེད་པདྨ་འབྱུང་། །ལྔ་བདོའི་དུས་འདིར་རྒྱལ་བ་གཞན་ཀུན་ལས། །ཆེས་ཆེར་འཕགས་པའི་ཐུགས་རྗེ་རྨད་བྱུང་བརག །རྣམ་ཀུན་གསོལ་བ་བཏབ་བའི་མཐུ་ལས་ནི། །ནམ་ཞིག་སྒྱུ་མའི་འཁྲུལ་འཁོར་ཡལ་བའི་ཚེ། །དག་པ་མཁའ་སྤྱོད་ཨོ་རྒྱན་ཞིང་དམ་པ། །པདྨ་འོད་དུ་མྱུར་བར་བགྲོད་ནས་སུ། །རིག་འཛིན་སློབ་དཔོན་ཆེན་པོའི་ཞལ་མཐོང་ནས། །གསང་བ་སྔགས་ཀྱི་དམ་ཚིག་ལ་གནས་ཏེ། །བླ་ན་མེད་པའི་ལུང་བསྟན་ཐོབ་པར་ཤོག །དེ་ལྟར་སྨོན་པ་ཡིད་བཞིན་འགྲུབ་པའི་ཕྱིར། །མཆོག་གསུམ་རྩ་གསུམ་རྒྱ་མཚོའི་བདེན་པ་དང་། །ཆོས་དབྱིངས་བསམ་མི་ཁྱབ་པའི་བདེན་པ་ཡིས། །ཇི་བཞིན་མྱུར་བ་ཉིད་དུ་འགྲུབ་གྱུར་ཅིག །ཅེས་པའང་སྤོང་བ་པ་ཀརྨ་དྷརྨ་ཤྲཱིའི་ངོར་སི་ཏུ་པདྨ་ཉིན་བྱེད་དབང་པོས་དཔལ་རི་རྩེ་ནས་སྤེལ་བའོ། །ཧྲཱིཿཕྱོགས་བཅུ་དུས་གསུམ་རྒྱལ་ཀུན་འདུས་པའི་སྐུག །བདེ་ལྡན་པདྨོ་བཀོད་པའི་ཞིང་བདག་མཆོག །སྟོན་པ་སངས་རྒྱས་འོད་སྣང་མཐའ་ཡས་ལག །བདག་དང་འགྲོ་ཀུན་ཕྱག་འཚལ་མཆོད་ཅིང་བཤགས། །རྗེས་སུ་ཡི་རངས་བསྐུལ་ཞིང་གསོལ་བ་འདེབས། །དུས་གསུམ་དགེ་ཚོགས་བྱང་ཆུབ་ཆེན་པོར་བསྔོ། །ཨ་འཐས་སྒྱུ་མའི་ལུས་རྟེན་བོར་མ་ཐག །བཅོམ་ལྡན་འོད་དཔག་མེད་ཀྱི་གནས་དམ་པ། །ཕུན་ཚོགས་ལྔ་ལྡན་ཞིང་ཁམས་དམ་པ་རུ། །བརྫུས་སྐྱེས་རྒྱལ་བའི་ཞལ་མཐོང་
བླ་མེད་ཀྱི། །ལུང་བསྟན་མཆོག་ཐོབ་འགྲོ་བའི་དེད་དཔོན་དུ། །གྱུར་ཏེ་ཁམས་གསུམ་སྒྲོལ་བའི་དཔལ་དུ་ཤོག །ཅེས་དད་ནོར་གྱིས་མངོན་པར་མཛེས་པ་རྒྱ་བཀྲ་ཤིས་དབང་ཕྱུག་དང་དར་རྒྱས་ཟུང་གི་ངོར་སྤེལ་བ་ཛ་ཡནྟུ། །སྐྱབས་གསུམ་ངོ་བོ་ཨོ་རྒྱན་རྗེ། །ཀརྨ་པ་ཡི་ཐུགས་རྗེའི་མཐུས། །གདོད་ནས་རང་བྱུང་སེམས་ཉིད་འདི། །གཞི་མེད་རྩ་བྲལ་དོན་རྟོགས་ཤིང་། །སྤྲོས་བྲལ་ཡེ་ཤེས་ཆོས་ཀྱི་སྐུ། །ཕྱག་རྒྱ་ཆེན་པོ་འགྲུབ་གྱུར་ནསག །ཟུང་འཇུག་རྡོ་རྗེ་འཆང་དབང་གི། །གོ་འཕང་དམ་པ་མྱུར་ཐོབ་ཤོག །ཅེས་པའང་ཟབ་མོའི་རྣལ་འབྱོར་རས་ཆུང་སྤྲུལ་ནས་བཞེད་ལྟར་སྤེལ། །རྒྱལ་ཀུན་འདུས་པ་པདྨ་ཐོད་ཕྲེང་རྩལ། །དབྱེར་མེད་དཔལ་ལྡན་བླ་མ་རྡོ་རྗེ་ཅན། །གང་ཁྱོད་སྙིང་གི་པདྨོར་རྟག་བཞུགས་ནསག །བདག་དང་མཁའ་མཉམ་སེམས་ཅན་ཐམས་ཅད་པ། །བླ་མེད་གསང་ཆེན་ཐེག་པའི་དོན་རྟོགས་ཤིང་། །སྲིད་པའི་འཇིགས་ཚོགས་མ་ལུས་ཀུན་སྒྲོལ་ནས། །གདོད་མའི་སངས་རྒྱས་ས་ལ་འགོད་གྱུར་ཅིག །ཅེས་རྡོ་རྗེ་དྲག་པོའི་གསོལ་འདེབས་འདི་བཞིན་ཅོག་རོ་སྤྲུལ་སྐུའི་བཞེད་ལྟར་བྲིས་པ་ཛ་ཡ། །རིགས་དྲུག་སྡུག་བསྔལ་རྒྱུ་བཅས་ཀུན། །རྩད་འབྱིན་ཐུགས་རྗེའི་འོད་དཀར་ཅན། །སྤྱན་རས་གཟིགས་ཀྱིས་ཚེ་རབས་སུ། །རྗེས་འཛིན་ཆོས་དང་དཔལ་འབྱོར་གྱི། །སྣང་བས་འཚོ་ཞིང་པོ་ཊ་ལའི། །ཞིང་མཆོག་དམ་པར་སྤྱོད་གྱུར་ཅིག །པདྨའི་བྱིན་རླབས་རྡོ་རྗེ་རྩེ་བརྒྱ་པས། །ལོག་ཕྱོགས་བདུད་རིགས་
དཔུང་གཞོམ་མཆོག་ཐུན་གྱི། །དངོས་གྲུབ་དམ་པ་བདེ་བླག་ཉིད་ཐོབ་ནས། །མཐར་ཐུག་སྐུ་ལྔའི་བདག་ཉིད་ཐོབ་པར་ཤོག །ཕྱོགས་བཅུའི་རྒྱལ་དང་བྱང་སེམས་ཐུགས་རྗེའི་འཕྲུལ། །དེང་འདིར་ལས་ཉོན་སྒྲིབ་གཉིས་བག་ཆགས་ཀྱི། །དྲྭ་བ་སྟུག་པོ་རྩད་ནས་གཞོམ་པ་དང་། །ཡང་དག་ལེགས་པའི་ལམ་བཟང་ཐོབ་གྱུར་ཅིག །མཆོག་གསུམ་རྒྱ་མཚོའི་བདེ་ལེགས་ཀྱིས། །གང་ཞིག་ཡིད་ལ་འདོད་འཇོ་བའི། །ཆོས་མཐུན་བསམ་པ་འགྲུབ་པ་དང་། །ཡེ་ཤེས་ཆེན་པོ་མངོན་གྱུར་ཤོག །ཕྱོགས་བཅུའི་སངས་རྒྱས་ཀུན་འདུས་པ། །མཚོ་སྐྱེས་རྡོ་རྗེ་འཆང་ཆེན་གྱི། །མཚན་དཔེ་འོད་ཟེར་སྟོང་འཕྲོ་བས། །མི་མཐུན་སྒྲིབ་གཉིས་མ་ལུས་ཞི། །ཚེ་དཔལ་དོན་གཉིས་ལྷུན་གྱིས་གྲུབ། །རང་བྱུང་ཡེ་ཤེས་དོན་རྟོགས་ཤོག །ཅེས་རབ་སྣང་ངོར་སྤེལ། །བླ་མེད་བླ་མ་ཀརྨ་པ། །བཅུ་གསུམ་ཕྲེང་བ་རིམ་བྱོན་ལས། །མཚུངས་མེད་བདུད་འདུལ་རྡོ་རྗེ་འཆང་། །འབྲལ་མེད་བདེ་ཆེན་འཁོར་ལོ་རུ། །རྟག་པར་རིགས་དཀྱིལ་བདག་པོར་བཞུགས། །བྱིན་རླབས་དངོས་གྲུབ་ཡོངས་སྨིན་ནས། །གནས་སྐབས་བསམ་དོན་ཆོས་བཞིན་འགྲུབ། །བར་ཆད་བདུད་བཞིའི་གཡུལ་ལས་རྒྱལ། །རྣམ་གྲོལ་ཐར་པ་བྱང་ཆུབ་ཀྱི། །གོ་འཕང་བདེ་བླག་ཉིད་ཐོབ་ཤོག །ཅེས་བླ་མ་ཕྲིན་ལས་རབ་རྒྱས་ཀྱི་ཐུགས་བཞེད་ལྟར་སྤེལ། །
ཕྱོགས་བཅུ་དུས་གསུམ་ཞིང་ཁམས་རབ་འབྱམས་ན། །རྒྱལ་བ་སྲས་དང་སློབ་མར་བཅས་པའི་ཚོགས། །མ་ལུས་ཇི་སྙེད་བཞུགས་པ་དེ་དག་ལ། །ཕྱག་འཚལ་མི་དགེ་ནོངས་བའི་ལས་རྣམས་བཤགས། །བླ་མེད་བྱང་གྲོལ་གོ་འཕང་རིན་པོ་ཆེ། །བདེ་བླག་ཉིད་དུ་ཐོབ་པའི་ཕྱིར་དུ་བསྔོ། །སྐྱེ་ནས་སྐྱེ་བར་དམ་པས་རྗེས་བཟུང་ཞིང་། །ཆོས་སྤྱོད་བཅུ་ཡི་སྒྲུབ་པ་མཐར་ཕྱིན་ཤོག །བསྟན་དར་ངོར་སྤེལ། །གངས་ཅན་སྐྱེ་དགུའི་འདྲེན་པ་དཔལ་ཆེན་པོ། །རྒྱལ་བ་མཆོག་དངོས་ཁྱབ་བདག་ཀརྨ་ཀ། སྙན་པའི་བ་དན་སྲིད་གསུམ་ཀུན་ཁྱབ་པའི། །བདུད་འདུལ་རྡོ་རྗེའི་ཞབས་ལ་གུས་ཕྱག་འཚལ། །སངས་རྒྱས་གཉིས་པ་པདྨ་འབྱུང་གནས་ཀྱི། །གསང་སྔགས་ཐེག་པའི་སྟོན་པ་བླ་ན་མེད། །རྡོ་རྗེ་སློབ་དཔོན་ཙིཏྟ་བཛྲ་ཞབས། །སྤྱི་བོས་གུས་མཆོད་འདི་ནས་བྱང་ཆེན་བར། །རྗེས་སུ་འཛིན་ཅིང་དམ་ཆོས་སྙིང་པོ་ཡི། །སྒོར་ཞུགས་རྒྱལ་བསྟན་རིན་ཆེན་སྲི་ཞུ་དང་། །མ་གྱུར་མཁའ་མཉམ་རྫོགས་སངས་རྒྱས་ཐོབ་པའི། །གྲུབ་པ་རྣམ་གཉིས་མཐར་ཕྱིན་ལྷུན་གྲུབ་ཤོག །ཅེས་པའང་ལས་རྡོར་ཀར་བརྒྱུད་རབ་རྒྱས་ངོར་སྤེལ། །སྐྱེ་བ་ཀུན་ཏུ་མ་ནོར་ལམ་སྟོན་པའི། །རྡོ་རྗེ་སློབ་དཔོན་དཀྱིལ་འཁོར་དབང་ཕྱུག་མཆོག །འབྲལ་མེད་རྒྱལ་བསྟན་དྲི་མེད་རིན་པོ་ཆེར། །གཅེས་སྤྲས་འཛིན་པའི་མཐུ་དབང་ཐོབ་པར་ཤོག །དཀོན་མཆོག་རྣམ་
གསུམ་ཐུགས་རྗེ་ཡིས། །དེང་འདིར་དཀར་པོ་དགེ་བའི་ཆོས། །ལྷུན་གྱིས་གྲུབ་པའི་ཡོན་ཏན་རྫོགས། །མཐར་ཐུག་ཆོས་ཀྱི་སྐུ་ཐོབ་ཤོག །དབོན་དཔལ་ལུའི་ངོར་སྤེལ། །པདྨ་འབྱུང་གནས་ཐུགས་རྗེའི་འོད། །སྣང་བས་དེང་འདིར་བཀྲ་ཤིས་པའི། །བདེ་ལེགས་དཔལ་དང་འབྱོར་པ་ཡིས། །ཀུན་ནས་ཀུན་ཏུ་དགེ་གྱུར་ཅིག །གྲུ་འཛིན་ཕྲེང་བ་རིམ་བྱོན་པའི། །ཀརྨ་པ་ཞེས་ཉི་ཟླ་ལྟར། །གྲགས་དེའི་བྱིན་མཐུས་འགྲོ་བ་ཀུན། །བདེ་ཆེན་ཐར་པའི་སྣང་བྱེད་ཤོག །བསྟན་འཛིན་ནོར་བུའི་ངོར་སྤེལ། །རྒྱལ་ཀུན་འདུས་གཟུགས་པདྨ་འབྱུང་། །གང་དེའི་བླ་མེད་བྱིན་རླབས་ཀྱིསག །དེང་འདིར་ཚེ་དཔལ་ཡོན་ཏན་རྒྱས། །ལྷན་སྐྱེས་ཡེ་ཤེས་ཆོས་ཀྱི་སྐུའི། །གནས་ལུགས་མངོན་གྱུར་རྫོགས་སངས་རྒྱས། །གོ་འཕང་བདེ་བླག་ཉིད་ཐོབ་ནསག །། འཁོར་བ་སྲིད་པའི་རྒྱ་མཚོ་ལས། །སྒྲོལ་བའི་མགོན་དང་གཉེན་གྱུར་ཅིག །ཅེས་པའང་སྒྲུབ་པ་གཟི་བརྗིད་ངོར་སྤེལ། །སྲིད་ཞིའི་དཔལ་ཡོན་ཀརྨ་པ། །རྒྱལ་ཀུན་ཕྲིན་ལས་འཛིན་པའི་བདག །བཅུ་གསུམ་བདུད་འདུལ་རྡོ་རྗེ་ཡིས། །སྐྱེ་དང་ཚེ་རབས་རྗེས་འཛིན་ཤོག །ཆོས་དབྱིངས་ངོར་སྤེལ། །འཆི་མེད་དཔལ་ཀུན་སྟེར་བའི་མགོན། །ཨོ་རྒྱན་ཆེན་པོའི་བྱིན་རླབས་ཆར། །དེང་འདིར་དད་པའི་ཞིང་ས་རུ། །རྣམ་དག་འབྲས་བུ་བསྐྱེད་བསྲིང་ཤོག །
ཚད་མེད་སྙིང་རྗེའི་དབང་ཕྱུག་མཆོག །དངོས་སྣང་བདུད་འདུལ་རྡོ་རྗེ་འཆང་། །གང་དེས་སྐྱེ་དང་ཚེ་རབས་ཀུན། །རྗེས་བཟུང་བྱང་ཆུབ་ལམ་འགོད་ཤོག །ཀརྨ་བཟང་སྐྱོད་ངོར་སྤེལ། །སངས་རྒྱས་གཉིས་པ་པདྨ་འབྱུང་། །དབྱེར་མེད་བདེ་ཆེན་འཁོར་ལོའི་མགོན། །རྡོ་རྗེ་དྲག་པོའི་ཐུགས་རྗེའི་འོད། །སྣང་བས་དེང་བཟུང་བྱང་ཆུབ་བར། །རྗེས་བཟུང་ཆོས་མཐུན་བསམ་པ་འགྲུབ། །ཆོས་མིན་ལོག་རྟོག་དུག་ལྔ་ཡི། །གཡུལ་ལས་རྣམ་རྒྱལ་བདེ་བ་ཆེ། །པདྨ་འོད་ཞིང་བགྲོད་ནུས་ཤོག །སྐྱབས་རྗེ་འཛི་སྒར་རིན་པོ་ཆེའི་གསོལ་སྨོན་འདི་བཞིན་སྟོང་ནག་ཡང་དག་ཆེད་དུ་སྤེལ། །སྟོབས་བཅུའི་མངའ་བདག་དུས་གསུམ་རྒྱལ་དང་སྲས། །ཉན་ཐོས་གནས་བརྟན་དགྲ་བཅོམ་ཆེ་རྣམས་དང་། །གསང་སྔགས་རྒྱ་མཚོའི་འབྱུང་གནས་ཨོ་རྒྱན་རྗེ། །ངེས་དོན་མཐར་ཐུག་བསྟན་པའི་རྒྱལ་མཚན་འཛིན། །སངས་རྒྱས་ཀུན་གྱི་ཕྲིན་ལས་དབང་བསྒྱུར་བ། །ཀརྨ་པ་ཞེས་ཉི་ལྟར་རབ་གསལ་བའི། །རྗེ་བཙུན་བདུད་ལས་རྣམ་པར་རྒྱལ་བ་དེའི། །ཐུགས་བསྐྱེད་ཟབ་མོའི་འཇུག་ངོགས་མཐའ་ཡས་པར། །དོན་གཉིས་ནོར་བུའི་དཔལ་ལ་དབང་འབྱོར་ཕྱིར། །གཞན་ཕན་སེམས་བསྐྱེད་དམ་བཅའི་དྲི་བཞོན་གྱིས། །བསྐུལ་ཏེ་ལྷག་བསམ་གྲུ་རྫིངས་ལ་བརྟེན་ནས། །སྙིང་པོའི་རིང་ལུགས་ཕྱོགས་མཐར་སྤེལ་བྱེད་པའི། །ལྷུན་གྲུབ་ཡིད་ལ་འདོད་འཇོའི་དགེ་ལེགས་སྩོལ། །
དུས་ཀྱིས་བསླད་པའི་གཉིས་འཐུང་ལྟ་བའི་ལམ། །གཡང་ས་ཆེན་པོ་དག་ལས་སྒྲོལ་ནས་སུ། །ཐར་པ་མཆོག་གི་ཞིང་དེར་བགྲོད་པར་ཤོག །འབྲོང་པ་བླ་མ་ཀརྨ་ཡོན་ཏན་ལྷུན་གྲུབ་ནས་བསྐུལ་བཞིན་སྤེལ་བ་བསྟན་པ་དར་རྒྱས་སུ་གྱུར་ཅིག །ཛཡནྟུ། །སྟོབས་བཅུའི་མངའ་བདག་དེ་བཞིན་གཤེགསག །ཤཱཀྱ་སེང་གེའི་ཞལ་སྐྱིན་མཆོག །དཔལ་ལྡན་ཀརྨ་པ་ཞེས་པའི། །མཚན་སྙན་ཉི་ཟླ་ལྟར་གསལ་བའི། །སྐྱེས་རབས་ཕྲེང་བ་བཅུ་གསུམ་པ། །རྗེ་བཙུན་བདུད་འདུལ་རྡོ་རྗེ་ཡིས། །འགྲོ་རྒྱུད་མ་རིག་ལས་ཉོན་གྱིས། །འཐུམས་བྱེད་མུན་པའི་དྲྭ་བ་རྣམས། །ཡེ་ཤེས་ཆེན་པོའི་གཟི་ཡིས་བཅོམ། །རྣམ་ཀུན་མཆོག་དང་ལྡན་པ་ཡི། །དོན་དམ་དེ་ཉིད་གནས་མཐོང་ཤོག །ཀརྨ་ཡེ་ཤེས་ངོར་སྤེལ། །རྒྱལ་ཡུམ་འཕགས་མ་ཚེ་སྦྱིན་དཔལ། །གཏེར་འཛིན་དབང་མོའི་ཐུགས་བསྐྱེད་མཐུས། །དེང་འདིར་ཟག་བཅས་དངོས་ཀུན་གྱི། །དཔལ་འབྱོར་རབ་རྒྱས་ཟག་མེད་ནིག །འཆི་མེད་མཆོག་གྲུབ་གཉུག་མའི་སེམས། །སྤྲོས་བྲལ་ལྷན་སྐྱེས་མྱུར་རྟོགས་ཤོག །ཉི་མའི་ངོར་སྤེལ། །ཚད་མེད་ཐུགས་རྗེའི་བདག་ཉིད་ཅན། །ཨོ་རྒྱན་ཆེན་པོ་པདྨ་འབྱུང་། །གང་དེའི་གསང་གསུམ་ཡེ་ཤེས་ཀྱི། །བྱིན་རླབས་དབང་བཞི་མཆོག་ཐོབ་ཤོག །དེ་ལྟར་སྨིན་པའི་དགེ་ལེགས་ཀྱི། །བསམ་དོན་ལྷུན་གྲུབ་དཔལ་དང་འབྱོར། །
སྙན་གྲགས་ཆོས་སྲིད་དབང་ཐང་རྒྱས། །ཉེར་འཚེ་ཀུན་བྲལ་བདེ་ལྡན་ཤོག །དེ་ལྟར་བདེན་པའི་བྱིན་རླབས་གང་། །དཀོན་མཆོག་རྒྱ་མཚོའི་བདེན་སྟོབས་ཀྱིས། །ཇི་བཞིན་ཡོངས་གྲུབ་སྐུ་བཞི་ཡི། །གོ་འཕང་མཆོག་ལ་འགོད་གྱུར་ཅིག །གུ་རུ་བསྟན་སྐྱོང་བཞེད་ངོར་སྤེལ། །གྲུ་འཛིན་ཕྲེང་བ་འཛིན་པའི་མཆོག །རྒྱལ་མཆོག་སྟོབས་བཅུ་མངའ་བརྙེས་པ། །མཱ་ར་ད་མ་ཀ་བཛྲ། །དེང་འདིར་མྱང་འདས་ཆེན་པོའི་བར། །འབྲལ་མེད་ཐུགས་རྗེས་ཉེར་བཟུང་ནས། །རང་རིག་ཡེ་ཤེས་དོན་དམ་པའི། །གནས་ལུགས་གཉུག་མ་ཆོས་ཀྱི་སྐུའི། །ངོ་བོ་ཇི་བཞིན་མཐོང་གྱུར་ཅིག །བློ་གྲོས་ངོར་སྤེལ། །རིགས་བདག་སྣང་མཐའ་འོད་དཔག་མེད། །དབྱེར་མེད་ཆོས་གྲུབ་རྒྱ་མཚོ་མཆོག །ཚེ་རབས་ཀུན་ཏུ་འབྲལ་མེད་ཅིང་། །མཐར་ཐུག་གདོད་མའི་གནས་ལུགས་མཆོག །ཇི་ལྟར་ཉིད་དུ་ཚེགས་མེད་མཐོང་། །ཟུང་འཇུག་སྐུ་དང་ཡེ་ཤེས་ཀྱི། །བདག་ཉིད་ཆེན་པོར་དབང་འབྱོར་ནསག །འགྲོ་སྒྲོལ་སྤྲུལ་བསྒྱུར་སྟོན་ནུས་ཤོག །ཀརྨ་བསམ་འགྲུབ་ངོར་སྤེལ། །ཨོ་རྒྱན་གུ་རུ་པདྨ་འབྱུང་། །མཆོག་གི་གསང་གསུམ་ཡེ་ཤེས་ཀྱི། །ཉི་འོད་འབུམ་འཕྲོའི་མཐུ་དཔལ་ལས། །གདུལ་བྱ་སྐལ་ལྡན་པདྨོའི་ཚལ། །ཐར་པའི་ལམ་བཟང་འདབ་བརྒྱ་བཞད། །ཚེ་བསོད་འབྱོར་དང་གྲགས་པ་ཡི། །ལོ་འདབ་ཕྱོགས་ཀུན་ཁྱབ་པ་དང་། །ཀ་དག་ལྷུན་གྲུབ་ཐོད་རྒལ་གྱི། །
གཞི་ལམ་འབྲས་བུ་ཡོངས་སྨིན་ནས། །སྐུ་ལྔའི་བདག་ཉིད་ཆེན་པོ་མཆོག །ཐོག་མའི་སངས་རྒྱས་ཀུན་བཟང་དང་། །དགོངས་པ་མཉམ་ཉིད་ཀློང་ཡངས་སུ། །གཉིས་མེད་སྤྲུལ་བསྒྱུར་དུ་མ་ཡིས། མཐའ་ཡས་འགྲོ་བ་སྒྲོལ་བར་ཤོག །ཚེ་འབར་ངོར་སྤེལ། །ཕྱོགས་བཅུའི་སངས་རྒྱས་ཀུན་འདུས་ངོ་བོ་ཉིད། །སྐུ་བཞིའི་དབང་ཕྱུག་ཁྱབ་བདག་རིགས་ཀུན་གཙོ། །རྗེ་བཙུན་བདུད་འདུལ་རྡོ་རྗེ་གར་གྱི་དབང་། །ཆོས་གྲུབ་རྒྱ་མཚོ་དམ་ཆོས་ཉི་མའི་སྡེ། །རྡོ་རྗེ་དྲག་པོ་ཚེ་དབང་དཔལ་དར་སོགས། །གྲུབ་པ་མཆོག་སྟེར་རྩ་བརྒྱུད་བླ་མ་ལ། །བདག་ལུས་གངྒཱའི་བྱེ་སྙེད་ལུས་སྤྲུལ་ཏེ། །ཕྱག་འཚལ་མཆོད་ཅིང་ཉེས་བཤགས་ཡི་རང་ངོ་། །ཆོས་སྟོན་བཞུགས་གསོལ་དུས་གསུམ་དགེ་ཚོགས་རྣམས། །མཁའ་ཁྱབ་འགྲོ་བ་བྱང་ཆུབ་ཐོབ་ཕྱིར་བསྔོ། །ཐར་པའི་ལམ་སྟོན་འདྲེན་པ་མཆོག་རྣམས་ཀྱི། །བྱིན་རླབས་དབང་བཞིས་བདག་རྒྱུད་སྨིན་གྱུར་ཅིག །ཅེས་པའང་རྟོགས་ལྡན་རབ་འབྱོར་ངོར་སྤེལ། །སྟོན་པ་མཚུངས་མེད་དཔལ་ལྡན་ཀརྨ་པ། །གུ་རུའི་རྣམ་འཕྲུལ་ཚེ་དབང་ནོར་བུ་དང་། །དབྱེར་མེད་རྡོ་རྗེ་གཙུག་ལག་དགའ་བའི་དབང། །ཧྱ་གྲི་ཝ་ཙིཏྟ་བཛྲ་ཞབས། །ཀརྨ་རྣམ་རྒྱལ་རྡོ་རྗེ་རབ་བརྟན་སོགས། །བྱང་གྲོལ་ལམ་གྱི་འདྲེན་པ་མཆོག་རྣམས་ལ། །བདག་ལུས་ཞིང་རྡུལ་སྤྲུལ་ནས་ཕྱག་འཚལ་ལོ། །དེང་བཟུང་བླ་མེད་སྙིང་པོར་མཆིས་ཀྱི་བར། །
བསླབ་གསུམ་དང་ལྡན་གདམས་བའི་བཅུད་ཐོབ་ནས། །ས་དང་ལམ་གྱི་ཡོན་ཏན་མ་ལུས་རྫོགས། །བདེ་ལྡན་ཞིང་གི་མགོན་པོའི་ཞལ་མཐོང་ནས། །འགྲོ་བའི་དེད་དཔོན་ཉིད་དུ་འགྱུར་བར་ཤོག །ཀརྨ་བརྩོན་འགྲུས་ཀྱི་འདོད་དོན་བཞིན་སྤེལ། །མཆོག་གི་དངོས་གྲུབ་བརྙེས་པའི་དཔལ། །མཁའ་འགྲོའི་དབང་ཕྱུག་མི་ལ་རས། །གང་དེར་གསོལ་བཏབ་སྨིན་པའི་མཐུས། །རང་བྱུང་རིག་པའི་ཡེ་ཤེས་ཀྱི། །ངོ་བོ་གཅེར་མཐོང་ཕྱག་རྒྱ་ཆེའི། །གོ་འཕང་གེགས་མེད་ཉིད་ཐོབ་ནས། །མ་རྣམས་འཁོར་བའི་གཅོང་རོང་ལས། །འདྲེན་པའི་མགོན་དུ་དེང་གྱུར་ཅིག །ཅེས་སྒྲུབ་པ་ཆོས་དབང་ཕུན་ཚོགས་ངོར་སྤེལ། །དཀོན་མཆོག་རྩ་གསུམ་རྒྱ་མཚོའི་ངོ་བོ་ཉིད། །ཨོ་རྒྱན་སློབ་དཔོན་པདྨ་ཀཱ་ར་ཡི། །ཐུགས་རྗེའི་བདེན་པས་དེང་འདིར་སྐལ་ལྡན་གྱི། །སྒྲིབ་གཉིས་བག་ཆགས་མུན་པ་དྲུངས་ཕྱུང་ནས། །ས་ལམ་ཡོན་ཏན་གོང་དུ་རབ་གསལ་བའི། །བླ་མེད་མཆོག་གི་སྣང་བས་སྐྱོང་གྱུར་ཅིག །ཅེས་པའང་རྟོགས་ལྡན་ཟུང་གི་ངོར་སྤེལ། །སྟོན་མཆོག་ཤཱཀྱའི་རྒྱལ་པོ་དང་། །ཉན་ཐོས་གནས་བརྟན་བྱང་སེམས་ཚོགསག །རིག་འཛིན་གྲུབ་པའི་འཁོར་ལོས་སྒྱུར། །འཆི་མེད་པདྨཱ་ཀ་ར་དང་། །གསར་རྙིང་རྩ་བརྒྱུད་བླ་མའི་ཚོགས། །རྒྱུད་སྡེ་བཞི་འབྲེལ་ཡི་དམ་ལྷ། །དཔའ་བོ་ཌཱ་ཀི་ཡེ་ཤེས་དང་། །ལས་གྲུབ་འཇིག་རྟེན་ཆོས་སྐྱོང་ཚོགས། །བརྩེ་བས་འདིར་དགོངས་རྒྱལ་བའི་
བསྟན། །ཕྱོགས་ཀུན་ཁྱབ་ཅིང་ནུབ་མེད་པ། །སྲིད་མཐར་གནས་པར་བྱིན་གྱིས་རློབས། །བདུད་རིགས་ལོག་ཕྱོགས་བསླད་པ་ཡི། །ཆོས་མིན་ཆོས་ལྟར་བཅོས་པ་རྣམས། །ཞི་ཞིང་ཡང་དག་ངེས་པའི་ལམ། །བླ་མེད་འོད་གསལ་ཕྱག་རྫོགས་ཀྱི། །ཟུང་འཇུག་བསྟན་པ་དར་རྒྱས་ཤོག །ཚོགས་གཉིས་ངོར་སྤེལ། །བཅོམ་ལྡན་བདེར་གཤེགས་དོན་ཀུན་གྲུབ། །ཤཱཀྱའི་རྒྱལ་དང་མཚོ་སྐྱེས་ཀྱི། །སངས་རྒྱས་པདྨ་ཀཱ་ཱར་ཡི། །ཐུགས་རྗེའི་གར་གྱི་སྒྱུ་འཕྲུལ་བ། །བསྟན་འཛིན་ཆོས་ཀྱི་རྒྱལ་ཐབས་མཆོག །དྲི་མེད་རྡོ་རྗེ་སྙིང་པོ་ཡི། །རྒྱལ་མཚན་གྲགས་དཀར་བསྒྲེངས་པའི་བདག །མཐོན་མཐིང་ཅོད་པན་འཆང་བ་པོ། །དཔལ་ལྡན་དུས་གསུམ་མཁྱེན་པ་ནས། །རྗེ་བཙུན་བདུད་འདུལ་རྡོ་རྗེ་འཆང་། །བཅུ་གསུམ་ཡིད་བཞིན་ནོར་བུའི་ཕྲེང་། །ཆུ་ཟླའི་གར་གྱི་རོལ་པ་ཡིས། །སྐྱེ་དགུའི་ངན་སོང་མུན་གཞོམ་ཞིང། །བླ་མེད་ཡེ་ཤེས་སྣང་བ་ཆེ། །ཡང་དག་རང་བྱུང་རིག་སྟོང་པ། །སྐུ་བཞིའི་དབང་ཕྱུག་གོ་འཕང་མཆོག །དངོས་གྲུབ་ཆར་རྒྱུན་བསིལ་བའི་བདག །ཐུགས་རྗེ་ཕན་བདེའི་རང་བཞིན་གྱི། །ཕུན་ཚོགས་དཔལ་ཡོན་རབ་རྒྱས་ཤིང་། །རིང་ལུགས་ཉིན་མོར་བྱེད་པའི་འོད། །རབ་གསལ་ཕྱོགས་དེར་རྒུད་པའི་མུན། །དྲྭ་བ་གཏན་བཅོམ་མཐར་ཐུག་ཏུ། །བྱང་ཆེན་ལམ་མཆོག་དམ་པ་རུ། །མངོན་པར་རྫོགས་སངས་རྒྱས་པར་
ཤོག །ཅེས་ལི་ཡུལ་ལྕང་ར་སྨུག་པོའི་ལྗོངས་སུ་བཀའ་བརྒྱུད་བསྟན་པའི་གསལ་བྱེད་བླ་མ་སྤྲུལ་སྐུ་ུརྣམ་རྒྱལ་གྱིས་བསྐུལ་ལྟར་སྤེལ། །པདྨ་འབྱུང་གནས་ཐུགས་རྗེའི་འོད། །སྣང་བས་དེང་འདིར་བཀྲ་ཤིས་པའི། །བདེ་ལེགས་དཔལ་དང་འབྱོར་བ་ཡིས། །ཀུན་ནས་ཀུན་ཏུ་དགེ་གྱུར་ཅིག །གྲུ་འཛིན་ཕྲེང་བ་རིམ་བྱོན་པའི། །ཀརྨ་པ་ཞེས་ཉི་ཟླ་ལྟར། །གྲགས་དེའི་བྱིན་མཐུས་འགྲོ་བ་ཀུན། །བདེ་ཆེན་ཐར་པའི་སྣང་བྱེད་ཤོག །བསྟན་འཛིན་ནོར་བུའི་ངོར་སྤེལ། །མཆོག་གསུམ་གསང་གསུམ་རྟེན་མཆོག་གི། །བསྟི་གནས་འོག་མིན་ཀརྨ་ཡི། །ཐུགས་རྗེས་དེང་འདིར་འགྲོ་བ་ཀུན། །རྡོ་རྗེ་འཆང་གི་སྐུ་ཐོབ་ཤོག །དུས་གསུམ་རྒྱལ་ཀུན་འདུས་པའི་རང་གཟུགས་མཆོག །སྟོབས་བཅུ་མངའ་བ་ཤཱཀྱ་ཐུབ་པའི་དབང་། །སྐུ་གསུམ་བདག་ཉིད་སངས་རྒྱས་གཉིས་པ་མཆོག །ཨོ་རྒྱན་ཆེན་པོ་པདྨ་འབྱུང་གནས་དང་། །བཀའ་བརྒྱུད་གྲུབ་ཐོབ་རྒྱ་མཚོའི་ཚོགས་བཅས་དང་ག །གཏེར་ཆེན་བརྒྱ་རྩ་གཏེར་ཕྲན་སྟོང་རྩ་གཉིས། །གསར་རྙིང་བརྒྱུད་པའི་བླ་མ་དམ་པ་དང་ག །བདེ་དགྱེས་གསང་འདུས་རྒྱུད་སྡེ་བཞིར་འབྲེལ་བའི། །ཡི་དམ་རབ་འབྱམས་དཔའ་བོ་ཌཱ་ཀི་དང་། །བེར་ཅན་ཕྱག་བཞི་མ་ནིང་རང་བྱུང་རྒྱལ། །ཕོ་རྒྱུད་མོ་རྒྱུད་ཡེ་ཤེས་ལས་འཇིག་རྟེནག །སྲུང་མ་དམ་ཅན་མ་ལུས་ཇི་སྙེད་པ། །དེང་འདིར་ཐུགས་རྗེ་ཆེན་པོས་
བརྩེར་དགོངས་ལག །ཆོས་མཐུན་བསམ་པ་ལྷུན་གྲུབ་ཚེ་མཐར་ཕྱིན། །དཔལ་དང་གྲགས་སྤེལ་རྣམ་ཀུན་བཀྲ་ཤིས་ཤིང་། །སྣང་ཞིང་སྲིད་པའི་སྡེ་བརྒྱད་འབྱུང་པོའི་ཚོགས། །ཀུན་ཀྱང་བྱམས་པའི་སེམས་ལྡན་དཀར་ཕྱོགས་སྐྱོང་། །མཐུན་རྐྱེན་གྲུབ་པའི་གྲོགས་སུ་འགྱུར་པ་དང་། །བདུད་དང་བདུད་ཀྱི་རིགས་གྱུར་ཉེར་འཚེའི་རིགས། །རང་སར་རང་གྲོལ་ཀ་དག་ཀློང་ཡངས་སུ། །མཁའ་ལ་སྤྲིན་ཐིམ་བཞིན་དུ་དག་གྱུར་ཅིག །དེ་ལྟར་མཆོག་གསུམ་རྩ་གསུམ་རིན་པོ་ཆེ། །བདེན་གསུང་བདེན་གྲུབ་རྣམས་ཀྱི་མཐུ་དཔལ་གྱིས། །ལྷུན་གྱིས་གྲུབ་པའི་བཀྲ་ཤིས་རབ་རྒྱས་ཤོག །ཅེས་བཟོ་རིགས་གནས་མདོ་བླ་མའི་བཞེད་ལྟར་སྤེལ། །གསང་སྔགས་ཐེག་པའི་མཐར་ཐུག་ཟབ་མོའི་ལམག །བསྐྱེད་རྫོགས་སྨིན་གྲོལ་གདམས་པའི་གཏེར་མཛོད་མཆོག །སྐུ་གསུམ་བདག་ཉིད་པདྨ་འབྱུང་གནས་ཀྱི། །ཟག་མེད་འོད་གསལ་དབང་བསྒྱུར་མྱང་བན་ཆེར། །དབང་བསྐུར་བཀའ་གཏད་ལུང་བསྟན་མཚམས་སྦྱར་ནས། །ཧམ་ཕྲང་ལྕགས་ཀྱི་སྒོ་མོར་རྒྱ་ཡིས་བཏབ། །སླར་ཡང་སྨོན་ལམ་མཐུ་ཡིས་སྤྲུལ་པའི་སྐུ། །ཨོ་རྒྱན་ལས་འཕྲོ་གླིང་པས་སྤྱན་དྲངས་པའི། །ཡང་ཟབ་བླ་མེད་དཀོན་མཆོག་སྤྱི་འདུས་ཀྱི། །གྲོལ་བྱེད་ཁྲིད་རིམ་རིག་འཛིན་འཁོར་ལོས་སྒྱུར། །ཚེ་དབང་ནོར་བུའི་དཔལ་གྱི་ཞལ་བདུད་རྩི། །བསྟན་འགྲོ་རྒུད་པའི་
ཚ་གདུང་གཞིལ་སླད་དུག །འཕྲུལ་གྱི་སྤར་ཡིག་ངོགས་སུ་སྤེལ་བའི་མཐུས། །མཁའ་ཁྱབ་སེམས་ཅན་ཕྲ་རབ་རྡུལ་གྱི་གྲངས། །ཡང་དག་ལྟ་བ་འཁྲུལ་མེད་ཉིད་དུ་རྟོགས། །སྤྲོས་བྲལ་ཡེ་ཤེས་ཆོས་ཀྱི་སྐུ་ཐོབ་ཤོག །ཅེས་དབོན་སྤྲུལ་ཀརྨ་རཏྣས་ཡང་ཟབ་ཁྲིད་རིམ་སྤར་དུ་བཞེངས་སྐབས་གང་དེའི་བཞེད་ལྟར་སྤེལ། །རྒྱལ་ཀུན་མཐུ་སྟོབས་གཅིག་བསྡུས་པ། །མཚོ་སྐྱེས་པད་འབྱུང་རྡོ་རྗེ་འཆང་། །གང་དེས་སྐྱེ་དང་ཚེ་རབས་ཀུན། །རྗེས་བཟུང་ཡང་དག་ཟབ་མོའི་ལམ། །བགེགས་མེད་མྱུར་དུ་བགྲོད་གྱུར་ནསག །འཁོར་འདས་ཡེ་གྲོལ་མཉམ་ཉིད་ཀློང་། །རང་རིག་ཡེ་ཤེས་ཆོས་ཀྱི་སྐུ། །ཀུན་ཏུ་བཟང་དང་དབྱེར་མེད་ཤོག །ལྷོ་ཆུང་ཚང་དམ་པའི་བླ་མཆན་ཀརྨ་ཚེ་བརྟན་དཔལ་དབང་ནས་བཞེད་ལྟར་སྤེལ། །སྐུ་གསུམ་བདག་ཉིད་བཅོམ་ལྡན་འདས། །ལུང་རྟོགས་ཡོན་ཏན་དམ་པའི་ཆོས། །རིག་གྲོལ་འཕགས་པའི་དགེ་འདུན་སྡེ། །སྐྱབས་གནས་གཞར་ཡང་བསླུ་མེད་པ། །མཆོག་གི་བྱིན་རླབས་བདུད་རྩིའི་ཆར། །བསྙིལ་བའི་ལེགས་བྱས་དགེ་ལེགས་ཀྱིས། །དེང་འདིར་ཐར་པའི་ས་བོན་གྱིག །སྐྱེད་བསྲིང་བླ་མེད་སངས་རྒྱས་ཤོག །རི་པ་བླ་མ་ཀརྨ་ཀུན་བཟང་ནས་བཞེད་ལྟར་སྤེལ། །དུས་གསུམ་རྒྱལ་ཀུན་འདུས་པའི་སྐུ། །ཨོ་རྒྱན་ཆེན་པོའི་གསང་གསུམ་གྱི། །ཡོན་ཏན་མཐའ་ཀླས་ཐུགས་རྗེའི་མཐུས། །བསམ་དོན་ཆོས་བཞིན་ཡོངས་འགྲུབ་
ཤོག །ཚེ་དཔལ་ཡེ་ཤེས་འབྱོར་བ་རྒྱས། །བདུད་བཞིའི་གཡུལ་རྒྱལ་སྒྲིབ་གཉིས་བྱང་། །བསོད་ནམས་ཚོགས་གཉིས་རབ་རྫོགས་ནས། །ཐར་པའི་གོ་འཕང་འགོད་ནུས་ཤོག །ཅེས་པ་བན་ཆེན་བླ་མའི་ངོར་སྤེལ། །དཀོན་མཆོག་རྒྱ་མཚོའི་མཐུ་དཔལ་གྱི། །ཆོས་ལྡན་བསམ་དོན་མྱུར་འགྲུབ་ཅིང་། །ཡང་དག་བདེ་ཆེན་མཆོག་གི་ལམ། །མ་ནོར་གསལ་བར་མཐོང་གྱུར་ནས། །བླ་མེད་སྐུ་ལྔའི་གོ་འཕང་ལ། །བདེ་བླག་ཉིད་དུ་བགྲོད་པར་ཤོག །ཅེས་མགོན་ཁང་པའི་ངོར་སྤེལ། །མཉམ་མེད་དོན་ཀུན་ཡོངས་གྲུབ་པ། །ཤཱཀྱའི་རྒྱལ་དང་མཚོ་སྐྱེས་ཀྱི། །བླ་མ་པད་འབྱུང་རྡོ་རྗེ་འཆང་། །གང་གི་བྱིན་རླབས་མཁའ་དབྱིངས་ལས། །ཐུགས་རྗེས་མ་རིག་མུན་སེལ་བའི། །ཉིན་བྱེད་འོད་སྟོང་ཕྱོགས་མཐར་འཕྲོ། །འགྲོ་བ་ཀུན་མཁྱེན་རྒྱལ་བ་ཡི། །ཞིང་ཁམས་པདྨོའི་དགའ་ཚལ་རྒྱསག །བླ་མེད་རང་བྱུང་ཡེ་ཤེས་ཀྱི། །འབྲས་བུ་མངོན་པར་བྱང་ཆུབ་ཆེའི། །གོ་འཕང་ཡོངས་ཐོབ་སངས་རྒྱས་ཤོག །ཅེས་པའང་དགེ་སློང་ཚུལ་ཁྲིམས་དང་དཔལ་འབྱོར་བཅས་ཀྱི་ངོར་སྤེལ། །མགོན་པོ་མཉམ་མེད་ཐུགས་རྗེ་ཅན། །རླབས་ཆེན་འགྲོ་བའི་དོན་སྤྱོད་པའི། །ཕྲིན་ལས་གཞན་དྲིང་མི་འཇོག་པ། །མཚོ་སྐྱེས་པདྨཱ་ཀ་ར་ཡི། །བྱིན་མཐུས་མཁའ་དབྱིངས་ཀློང་ཡངས་ནསག །དངོས་གྲུབ་འོད་སྟོང་རབ་གསལ་བས། །འགྲོ་རྒྱུད་
སྒྲིབ་གཉིས་མུན་པ་གཞོམ། །རྣམ་གྲོལ་རང་བྱུང་ཡེ་ཤེས་ཀྱི། །པད་ཚལ་ཆེས་ཆེར་རྒོད་གྱུར་ཏེ། །སྐུ་བཞི་བླ་མེད་འབྲས་བུ་མཆོག །ཆགས་མེད་ཐོབ་པར་བྱིན་གྱིས་རློབས། །ཞེས་ལྷ་བྲིས་པ་དབང་རྒྱལ་ངོར་སྤེལ། །པདྨཱ་ཀ་རའི་ཐུགས་རྗེའི་འོད། །དེང་འདིར་སྣང་བའི་བྱིན་རླབས་ཀྱིས། །ཡང་དག་སྣང་བའི་ལམ་གསལ་ནསག །བདེ་ཆེན་ཡེ་ཤེས་རབ་རྒྱས་ཤོག །ཐར་པའི་ངོར་སྤེལ། །ཨཱཪྱ་ཏཱ་རེ་ཡུམ་གྱུར་མའི། །ཐུགས་རྗེའི་འོད་དཀར་བསིལ་རྒྱུན་གྱིས། །སྲིད་འགྲོའི་ཉོན་མོངས་གདུང་བཅིལ་ནས། །དོན་གཉིས་ཀུནྡའི་ཚལ་རྒྱས་ཤོག །ཨ་བའི་ངོར་སྤེལ། །རབ་འབྱམས་མཐའ་ཀླས་བདེ་བར་གཤེགས་ཀུན་གྱི། །ཐུགས་རྗེའི་གོང་བུ་གཅིག་བསྡུས་འཇིག་རྟེན་མགོན། །དངོས་སྣང་མི་བསྐྱོད་རིགས་ཀྱི་ཅོད་པན་ཅན། །ཀརྨ་པ་མཆོག་བདུད་འདུལ་རྡོ་རྗེ་ཡིས། །རྣམ་ཀུན་རྗེས་བཟུང་དབང་བཞི་ཡོངས་ཐོབ་ནས། །སྐུ་བཞིའི་བདག་ཉིད་ཆེན་པོར་དབང་གྱུར་ཤོག །ཀརྨ་ཡིད་འོང་ངོར་སྤེལ། །ན་མོ་རཏྣ་ཏྲ་ཡཱ་ཡ། ཐུགས་རྗེ་བླ་མེད་བཅོམ་ལྡན་རྫོགས་སངས་རྒྱས། །ལུང་རྟོགས་ཞི་བ་ཆགས་བྲལ་ཆོས་ཀྱི་མཆོག །རྣམ་དག་བསླབ་གསུམ་འཕགས་པའི་དགེ་འདུན་སྡེ། །དེང་འདིར་བདེན་འགྲུབ་ཤིས་པའི་དཔལ་ཀུན་སྩོལ། །དུས་གསུམ་རྒྱལ་བའི་མཐུ་བྱིན་མ་ལུས་པའིག །གསང་གསུམ་ཡོན་ཏན་བྱེ་བས་མངོན་མཐོ་
བ། །འཇིག་རྟེན་དབང་ཕྱུག་ཕྱག་ན་པད་དཀར་འཆང་། །གངས་ཅན་ལྗོངས་འདིར་མཐོན་མཐིང་ཅོད་པན་འཆང་། །སྐྱེས་རབས་ཕྲེང་བ་ཚར་དུ་དངར་བ་ལས། །བཅུ་གསུམ་བདུད་ཚོགས་འདུལ་བའི་རྡོ་རྗེ་འཆང་། །གང་དེའི་གསུང་གསང་དད་དང་ངེས་པའི་དོན། །དམ་ཆོས་ནོར་བུ་རིན་ཆེན་འདོད་འཇོའི་གཏེར། །ཆུ་ཟླའི་གར་གྱི་རོལ་རྩེད་ཇི་བཞིན་པར། །བསྟན་དང་འགྲོ་བའི་གསོས་སུ་འགྱུར་བའི་ཆེད། །རྣམ་དཔྱོད་བློ་གྲོས་ཐོགས་མེད་ཤེས་རབ་ཀྱི། །ཟབ་མོའི་གནས་ལ་གཟིགས་པའི་སྤྱན་ཡངས་པ། དབོན་སྤྲུལ་ཀརྨ་རཏྣའི་ཐུགས་བསྐྱེད་ཀྱི། །ལེགས་བྱས་ཁྱུང་སྔོན་སྐྱེས་ཀྱིས་དྲངས་ནས་སུ། །རྒྱལ་བའི་བཀའ་མཆོག་ཉིན་མོར་བྱེད་པ་ཡིས། །མོས་ལྡན་པདྨའི་དགའ་ཚལ་བཞད་པའི་ཕྱིརག །དཔལ་སྤུངས་ཐུབ་བསྟན་ཆོས་འཁོར་གླིང་ཉིད་དུ། སྤར་དུ་བཀོད་པའི་དགེ་འབྲས་གང་ཐོབ་དེས། །བསྟན་འཛིན་ཞབས་བརྟན་དགེ་འདུན་འདུས་པ་འཕེལ། །འགྲོ་རྣམས་རྫོགས་ལྡན་དཔལ་ལ་ལོངས་སྤྱོད་ཅིང་། །རང་བྱུང་གདོད་མའི་གནས་ལུགས་མངོན་གྱུར་ནས། །བྱང་ཆུབ་ཆེན་པོར་རྫོགས་སངས་རྒྱས་ཐོབ་ཤོག །ཅེས་པའང་གང་དེའི་ཐུགས་བཞེད་ལྟར་སི་ཏུ་པས་སྤེལ་བ་ཛ་ཡནྟུ། །ན་མ་ཤྲཱི་གུ་ར་ཝེ། དུས་གསུམ་རྣམ་འདྲེན་གྲུབ་པའི་རྒྱན་གཅིག་བུ། །ཀརྨ་པ་མཆོག་སྐྱེས་རབས་ཕྲེང་བ་ལས། །བཅུ་གསུམ་འདུད་འདུལ་རྡོ་རྗེ་འཆང་ཆེན་པོ། །འདི་ནས་བྱང་ཆུབ་བར་དུ་སྤྱི་
བོས་མཆོད། །མ་རིག་འཁོར་བའི་སྡུག་བསྔལ་མེ་འོབས་ལས། །ཐར་བར་འདོད་པའི་བློ་ལྡན་མགོན་མེད་བདག །མགོན་ཁྱོད་ཐུགས་རྗེའི་བྱིན་རླབས་འོད་དཀར་གྱིག །སྣང་བའི་ཟེར་མ་བདུད་རྩིའི་རྒྱུན་བཟང་པོས། །རང་རྒྱུད་ཡོངས་སུ་སྨིན་པར་བྱིན་གྱིས་རློབསག །གདོད་ནས་དྲི་བྲལ་བདེ་བའི་རང་བཞིན་ཅན། །བླ་མེད་ཐེག་པ་མཆོག་གི་ཡང་སྙིང་དོན། །ཟབ་གསང་རྡོ་རྗེའི་གནད་ཀྱི་ལམ་བཟང་པོ། །མོས་གུས་དད་པའི་རྩལ་ཤུགས་ལ་བརྟེན་ནས། །རང་བྱུང་ཡེ་ཤེས་ངོ་བོ་ལྷུན་གྱིས་གྲུབ། །སྐུ་བཞིའི་དབང་ཕྱུག་རྒྱུད་ལ་སྨིན་པར་ཤོག །བདག་གི་དགེ་ཚོགས་ཆུ་རྒྱུན་ཇི་སྙེད་པ། །འགྲོ་རྣམས་མྱང་འདས་རྒྱ་མཚོར་འཇུག་ཕྱིར་བསྔོ། །འཁོར་གསུམ་མི་དམིགས་སྨོན་ལམ་མཐུ་ཡིས་ནི། །ཀུན་མཁྱེན་རྒྱལ་བའི་གོ་འཕང་ཐོབ་གྱུར་ཅིག །ཅེས་པ་འདི་ཡང་མཉན་པའི་དབོན་པོ་བླ་མ་ཀརྨ་འཆི་མེད་ཀྱི་དགོངས་བཞེད་ལྟར་སྤེལ། །སྐུ་གསུམ་ངོ་བོ་འདུས་པའི་དཔལ། །དཔལ་ལྡན་མཚོ་སྐྱེས་རྡོ་རྗེ་མཆོག །མཆོག་དངོས་གྲུབ་པའི་འབྲས་སྩོལ་མགོནག །མགོན་དེས་ཚེ་རབས་ཀུན་ཏུ་ཡང་། །ཡང་སྲིད་ལས་ཉོན་སྒྲིབ་ཚོགས་དག །དག་པའི་ཞིང་ཁམས་བགྲོད་ནུས་ཤོག །ཅེས་ཀརྨ་རབ་གསལ་ངོར་སྤེལ། །དུས་གསུམ་རྒྱལ་བ་ཡོངས་ཀྱི་ཐུགས་རྗེའི་འཕྲུལ། །དབྱེར་མེད་གཅིག་དྲིལ་སྲིད་དང་ཞི་བའི་དཔལ། །ཀོ་ཤའི་མཚོར་འཁྲུངས་འཆི་མེད་པདྨ་འབྱུང་། །སྒོ་གསུམ་ཕྱག་འཚལ་ཡིད་སྤྲུལ་
མཆོད་པས་མཆོད། །ནོངས་བཤགས་རྗེས་སུ་ཡི་རང་ཆོས་འཁོར་བསྐོར། །གསོལ་བ་འདེབས་སོ་དེང་འདིར་སྐལ་ལྡན་གྱིག །སྒྲིབ་གཉིས་བག་ཆགས་མ་ལུས་དྲུངས་ཕྱུང་ནས། །ཡང་དག་རང་བྱུང་ཡེ་ཤེས་ངོ་བོ་ཉིདག །གནས་ལུགས་མངོན་གྱུར་ཚེ་གཅིག་གདོད་མའི་མགོན། །གོ་འཕང་དམ་པ་བདེ་བླག་ཉིད་ཐོབ་ཤོག །དེ་ལྟར་བདེན་ཚིག་བདེན་པའི་མཐུ་ལྡན་པ། །བཀའ་བརྒྱུད་རིག་འཛིན་གྲུབ་ཐོབ་རྒྱ་མཚོ་དང་། །རབ་འབྱམས་རྒྱུད་སྡེར་འབྲེལ་བའི་ཡི་དམ་ལྷ། །དཔའ་བོ་ཌཱ་ཱཀི་ཡེ་ཤེས་ལས་འཇིག་རྟེན། །དྲེགས་བྱེད་དམ་ཅན་ཚོགས་ཀྱི་མཐུ་ནུས་ལས། །ཇི་ལྟར་སྨོན་བཞིན་དེ་ལྟར་ལྷུན་གྲུབ་ཤོག །ཅེས་ན་མདའ་དབོན་མོ་ཚངས་སྤྱོད་དཔལ་མོས་བསྐུལ་བཞིན། སི་ཏུ་པདྨ་ཉིན་བྱེད་དབང་པོས་རྡོ་སྨད་མི་རྗེའི་མཁར་གྱི་ཡང་རྩེའི་ལྷ་ཁང་ནས་སྤེལ་བ་མངྒ་ལཾ། །ཕྱོགས་བཅུ་དུས་གསུམ་རྒྱལ་ཀུན་འདུས་པའི་སྐུ། །འཆི་མེད་དབང་བཅུ་ཡོངས་སུ་རྫོགས་པའི་དཔལ། །སྐུ་དང་ཞིང་ཁམས་མ་ལུས་ལྷུན་གྱིས་གྲུབ། །དྲི་མེད་མཚོ་སྐྱེས་པདྨ་ལས་འཁྲུངས་པའི། །ཨོ་རྒྱན་ཆེན་པོ་པདྨ་འབྱུང་གནས་ལ། །རྣམ་ཀུན་ཕྱག་འཚལ་གསོལ་བཏབ་བདེན་པའི་མཐུས། །ལྔ་བདོས་བསླད་པའི་བསྟན་དང་འགྲོ་བ་ཀུན། །ཆོས་མིན་ཆོས་ལྟར་བརྫུ་བའི་གཡང་ས་དང་། །དུག་ལྔས་རྒྱུད་བསྐུལ་ཐར་ལམ་འགོག་བྱེད་པའི། །
རྟག་འཛིན་ཞེན་ཆགས་འཁོར་བའི་འཁྲུལ་འཁོར་རྣམསག །བདེན་མེད་རང་སར་ཞི་ཞིང་སྐྱེ་བ་ཀུན། །དཀར་པོ་དགེ་བཅུའི་བསམ་པ་ལྷུན་གྲུབ་ནས། །མ་ནོར་ལམ་སྟོན་ཆོས་དང་འཕྲད་པར་ཤོག །ཅེས་སྐྱོ་བྲག་དབོན་མོའི་ངོར་སྤེལ། །དཔལ་ལྡན་ཀརྨ་ཀ་ཡི་ཐུགས་རྗེའི་འོད། །ཀུན་ཏུ་སྣང་བའི་ལེགས་བྱས་རབ་གསལ་བས། །གང་འདིར་སྐལ་ལྡན་མོས་གུས་རྩ་བ་བརྟན། །ཞེན་ལོག་སྒོམ་གྱི་འདབ་བརྒྱ་རབ་གྲོལ་ནས། །མི་རྟོག་ཏིང་འཛིན་འབྲས་བུ་མཆོག་བརྙེས་ཤིང་། །བླ་མེད་སྐུ་བཞིའི་དབང་ཕྱུག་མངོན་གྱུར་ཤོག །ཅེས་རྟོགས་ལྡན་འཇམ་དབྱངས་ངོར་སྤེལ། །གནས་སྐབས་བདུད་བཞིའི་བར་ཆད་གཡུལ་ལས་རྒྱལ། །རྣམ་པར་དག་པའི་ངེས་དོན་གསང་བ་མཆོག །སྙིང་པོའི་བརྟན་ཐོབ་རང་གཞན་སྨིན་ཅིང་གྲོལ། །སྐུ་བཞིའི་གོ་འཕང་མྱུར་དུ་ཐོབ་པར་ཤོག །ཅེས་པའང་བསམ་སྤྲུལ་ལ་སྨོན་ལམ་དུ་སི་ཏུས་སྤེལ། །མཆོག་གསུམ་རྩ་གསུམ་རྒྱལ་བ་རྒྱ་མཚོའི་ཚོགས། །མི་མངོན་དབྱིངས་བཞུགས་ཡེ་ཤེས་སྤྱན་ལྡན་རྣམས། །ཐུགས་རྗེ་ཆེན་པོས་དགོངས་ཤིང་བསྐྱབ་ཏུ་གསོལ། །བདག་གི་རྣམ་པར་དཀར་བའི་དགེ་འབྲས་རྣམས། །བྱང་ཆུབ་ཆེན་པོའི་རྒྱུ་རུ་ཡོངས་བསྔོས་པས། །སངས་རྒྱས་བསྟན་པ་དར་རྒྱས་བསྟན་འཛིན་རྣམས། །ཞབས་པད་ཡུན་བརྟན་འགྲོ་རྣམས་བདེ་སྐྱིད་ལྡན། །ཀུན་བཟང་ཐར་
པའི་ལམ་སྣ་ཟིན་གྱུར་ཏེ། །ཕྱིར་མི་ལྡོག་པར་བདེ་ཆེན་ཞིང་བགྲོད་ཤོག །ཇ་དགོན་དོན་གཉིས་ལྷུན་གྲུབ་ངོར་སྤེལ། །སྲིད་པའི་མཚོ་ལས་སྒྲོལ་བའི་ཡུམ། །འཕགས་མཆོག་བཅོམ་ལྡན་འདས་མ་གང་། །འདི་ནས་བྱང་ཆུབ་ཐོབ་ཀྱི་བར། །ལྷག་པའི་ལྷར་གྱུར་ཐུགས་རྗེས་སྐྱོངས། །རང་གྲོལ་ངོར་སྤེལ། །སྭསྟི། ཕྱོགས་བཅུའི་རྒྱལ་དང་རྒྱལ་སྲས་འཕགས་པའི་ཚོགས། །བདེན་པ་གྲུབ་པ་རྣམས་ལ་ཕྱག་འཚལ་ལོ། །བདག་དང་ཕ་མས་གཙོར་བྱས་རིགས་དྲུག་གི། །སེམས་ཅན་སྡུག་བསྔལ་མཚོ་ལས་བསྒྲལ་དུ་ུགསོལ། །རང་གཞན་རྣམས་ཀྱི་དུས་གསུམ་དུས་མེད་ཀྱི། །དགེ་བའི་རྩ་བ་མཆོག་གསུམ་རྩ་གསུམ་ལྷའི། །སྐུ་གསུང་ཐུགས་ཡོན་ཕྲིན་ལས་རྟེན་མཆོག་རྣམས། །བཞེངས་པའི་ལེགས་བྱས་བྱང་ཆུབ་ཆེན་པོར་བསྔོ། །དེ་མ་ཐོབ་བར་ཚེ་རབས་ཀུན་ཏུ་ཡང་། །དལ་རྟེན་ཐོབ་ཅིང་མཚན་ལྡན་བླ་མ་མཇལ། །གསང་སྔགས་རྡོ་རྗེ་ཐེག་པའི་སྒོར་ཞུགས་ནས། །སྨིན་ཅིང་གྲོལ་བའི་ལམ་བཟང་ཐོབ་པར་ཤོག །ཆོས་དང་ཆོས་མིན་མ་ནོར་ཇི་བཞིན་པར། །གནས་སྐབས་ཚེ་བསོད་དཔལ་འབྱོར་རྒྱས་པ་དང་། །ནད་གདོན་བར་ཆད་མི་མཐུན་ཉེར་འཚེ་ཞི། །རང་བྱུང་ལྷན་སྐྱེས་འོད་གསལ་ཕྱག་རྒྱ་ཆེ། །གཉུག་མ་ཆོས་སྐུའི་རྒྱལ་སར་དབང་འབྱོར་ཤོག །ནམ་ཞིག་བདེ་ཆེན་པདྨོ་བཀོད་ཞིང་དུ། །བརྫུས་ཏེ་སྐྱེས་ནས་སངས་རྒྱས་ཞལ་
མཐོང་ཞིང་། །བླ་མེད་ལུང་བསྟན་དབུགས་དབྱུང་ཐོབ་ནས་སུག །ཕྱིར་མི་ལྡོག་པའི་གོ་འཕང་ཐོབ་གྱུར་ཅིག །དད་གསུམ་འགྱུར་མེད་ཆོས་ཚུལ་ལྡན་པ་ཀརྨའི་བཞེད་ངོར་སྤེལ་བ་དགེ་བར་གྱུར་ཅིག །མངྒ་ལཾ་བྷ་ཝནྟུ། །སྭ་སྟི་ཛ་ཡནྟུ། བཅོམ་ལྡན་ལྷ་ཡི་ལྷར་གྱུར་རྗེ་བཙུན་མ། །འཕགས་མ་སྒྲོལ་མའི་བྱིན་རླབས་ཀློང་ཡངས་ནས། །ཐུགས་རྗེའི་ཟླ་གཞོན་བདུད་རྩིའི་དཔལ་ཡོན་གྱིས། །དེང་འདིར་བདེ་ལེགས་དོན་ཀུན་གྲུབ་གྱུར་ཅིག །འཇིག་རྟེན་བཀྲ་ཤིས་ཕན་དང་བདེ་བའི་གནས། །ཐམས་ཅད་ལྷུན་གྲུབ་ཡིད་བཞིན་འདོད་འཇོ་ཞིང་། །འཇིག་རྟེན་འདས་པའི་དངོས་གྲུབ་ལ་སོགས་པ། །ཐོགས་མེད་འགྲུབ་ཅིང་ཚེ་དཔལ་ཡེ་ཤེས་རྒྱསག །བྱང་ཆུབ་སྙིང་པོ་མཆོག་གི་རྩ་བ་བརྟན། །རང་བྱུང་གདོད་མའི་ལྷན་སྐྱེས་ཆོས་ཀྱི་སྐུ། །གནས་ལུགས་ཇི་བཞིན་མངོན་གྱུར་མཐར་ཐུག་པ། །རྫོགས་སངས་རྒྱས་ཀྱི་ས་ལ་འགོད་ནུས་ཤོག །ཅེས་པའང་དབོན་སྤྲུལ་ཀརྨ་འབྱུང་གནས་བཞེད་ལྟར་སྤེལ། །དཀོན་མཆོག་འདུས་པའི་བདག་ཉིད་མཆོག །རྒྱལ་དབང་པདྨཱ་ཀ་ར་ཡི། །ཐུགས་རྗེའི་ཆར་གྱིས་སྐལ་ལྡན་རྣམས། །མི་མཐུན་འགལ་རྐྱེན་མ་ལུས་ཞི། །རང་བྱུང་སྟོང་གསལ་འགྱུར་མེད་ཀྱི། །རང་གདངས་གཤིས་ཀྱི་གནས་ལུགས་དོན། །གང་ཤར་ཆོས་སྐུའི་ཀློང་ཡངས་སུ། །རིག་སྟོང་ངང་དུ་གྲོལ་གྱུར་ཅིག །ཅེས་པའང་རབ་དགའི་ངོར་སྤེལ། །སྐུ་གསུམ་བདག་ཉིད་པདྨ་འབྱུང་། །
གང་གི་ཐུགས་རྗེའི་ཉི་འོད་ཀྱིས། །འགྲོ་རྒྱུད་སྒྲིབ་གཉིས་བསྲེག་གྱུར་ནས། །རྣམ་གྲོལ་ལམ་མཆོག་མྱུར་གསལ་ཞིང་ག །མཁའ་སྤྱོད་པདྨ་འོད་ཞིང་དུ། །རིག་འཛིན་རྒྱལ་བའི་སྲས་དབང་བསྐུར། །སྤྲུལ་པས་མཐའ་ཡས་སེམས་ཅན་ཀུན། །སྒྲོལ་བའི་གཉེན་དུ་དེང་གྱུར་ཅིག །ཅེས་པའང་ཀརྨ་ཆོས་རྒྱལ་ངོར་སྤེལ། །རྒྱལ་བ་རྒྱ་མཚོའི་ཐུགས་རྗེའི་དཔལ་ཡོན་ཀུན། །གཅིག་གྱུར་ཨོ་རྒྱན་ཆེན་པོ་པདྨ་འབྱུང་ག །གང་འདུལ་ཞི་དང་ཁྲོ་བོའི་གར་རོལ་པ། །སྣ་ཚོགས་ཐབས་ཀྱིས་འགྲོ་འདུལ་རྫུ་འཕྲུལ་ཅནག །གང་གི་བྱིན་རླབས་འོད་སྟོང་གཟི་བྱིན་གྱིས། །དེང་འདིར་ཉེས་གསུམ་ཁྲི་མུན་གཏན་བཅིལ་ནསག །ཐར་པ་དམ་པའི་གོ་འཕང་བླ་མེད་པར། །རིང་མིན་ཉིད་དུ་འགོད་པའི་སྐལ་ལྡན་ཤོག །ཅེས་ས་ཐམ་མཆོག་ཐུབ་ངོར་སྤེལ། །སྭསྟི། རྒྱལ་ཡུམ་ཚེ་སྦྱིན་ཏཱ་རེ་མས། །དེང་འདིར་རྣམ་ཀུན་ཤིས་གྱུར་བའི། །བདེ་ལེགས་ཡོངས་འདུའི་ཆར་རྒྱུན་གྱིས། །ཚེ་དང་དཔལ་གྲགས་ཡེ་ཤེས་གཟིའི། །སྣང་བ་རབ་རྒྱས་དོན་གཉིས་པོ། །ཡོངས་གྲུབ་འདི་གཏན་སྨན་པ་ཡི། །བསོད་ནམས་རྡུལ་བརྩེགས་ལྷུན་པོ་ལྟར། །སྲིད་རྩེར་ལྷམ་མེར་འབར་གྱུར་ཅིག །ཅེས་པའང་དགྱེས་མཛད་ངོར་སྤེལ། །དཔལ་ལྡན་ཕྱོགས་དུས་བདེ་བར་གཤེགས་རྣམས་ཀྱི། །ཐུགས་རྗེའི་གོང་བུ་གཅིག་བསྡུས་འཇིག་རྟེན་མགོན། །མངོན་སྣང་
མི་བསྐྱོད་རིགས་ཀྱི་ཅོད་པན་ཅན། །ཀརྨ་ཀ་དེས་དེང་འདིར་དགེ་ལེགས་སྩོལ། །རྣམ་དག་བསླབ་པའི་རྩ་བ་རབ་བརྟན་ཅིང་། །ཚུལ་ཁྲིམས་ཕུན་ཚོགས་ཡལ་འདབ་ཀུན་ཏུ་ཁྱབ། །བསྡུ་དངོས་བཞི་ཡི་པད་ཚལ་དྲི་བསུང་ལྡན། །ཡོངས་འདུའི་ལྗོན་བཞིན་དགེ་འདུན་སྡེ་འཕེལ་ཤོག །ཆོས་སྤྱོད་བཅུ་དང་འཁོར་ལོ་རྣམ་གཉིས་ཀྱི། །བསྟན་པའི་རྒྱལ་མཚན་ཡོངས་སུ་བསྒྲེང་བཞིན་པར། །དཀར་ཕྱོགས་ལྷ་ཀླུ་ཡིས་ཀྱང་སྲུང་བྱེད་ནསག །སྙིང་པོའི་རིང་ལུགས་ཡུན་གནས་དར་རྒྱས་ཤོག །དེ་ལྟར་བྱིན་མཐུས་འགྲོ་དྲུག་སེམས་ཅན་ཚོགས། །སྲིད་མཚོ་ལས་བརྒལ་མྱང་འདས་གོ་འཕང་ཐོབ། །བྱང་ཆུབ་ཆེན་པོར་མངོན་སངས་རྒྱས་པ་ཡི། །རྒྱལ་རྣམས་སྨོན་པ་ཡོངས་གྲུབ་དབུགས་དབྱུང་སྩོལ། །ཅེས་འཇང་ཡུལ་ཐར་པའི་ལམ་འཛིན་གླིང་གི་བླ་མ་མཐར་ཕྱིན་ནས་བསྟན་པ་རྒྱས་པའི་སྨོན་ལམ་བསྐུལ་ངོར་སྤེལ། །འཇང་ཡུལ་གྱི་དགེ་སློང་འགའ་ཞིག་གི་བཞེད་ངོར་སྨོན་ལམ་གསོལ་འདེབས་སོ་སོར་སྤེལ་པ་ནི། མཆོག་ཏུ་འགྱུར་མེད་བདེ་ཆེན་ཁམས། །མི་འགྱུར་སྒྱུ་འཕྲུལ་དྲྭ་བ་ཅན། །དཔལ་ལྡན་སྡོམ་པ་དེང་ནས་བཟུང་། །བྱང་ཆུབ་བར་དུ་འབྲལ་མེད་ཤོག །ལྷུན་གྲུབ་གདོད་མའི་སངས་རྒྱས་ཆེ། །ཀུན་བཟང་འོད་མི་འགྱུར་བ་ཡི། །ཐུགས་རྗེས་འདི་བཟུང་བྱང་ཆུབ་བར། །ནམ་ཡང་མི་བཏང་རྗེས་འཛིན་མཛོད། །ཁྱབ་
བདག་རིགས་དཀྱིལ་འཁོར་ལོའི་མགོན། །དཔལ་ལྡན་ཀརྨ་ཀ་མཆོག་དེས། །འདི་ནས་བྱང་ཆུབ་ཆེན་པོའི་བར། །འབྲལ་མེད་རྗེས་བཟུང་བྱིན་གྱིས་རློབས། །ཧེ་རུ་ཀ་དཔལ་དཔའ་བོ་ཆེ། །དཀྱིལ་འཁོར་ཀུན་གཙོ་འཁོར་ལོ་སྡོམ། །འབྲལ་མེད་མི་རྟོག་ཡེ་ཤེས་ཆེའི། །འབྲས་བུ་མངོན་བྱང་ཆུབ་པར་ཤོག །རྒྱལ་ཀུན་ཐུགས་རྗེའི་གར་རོལ་བ། །འཁོར་ལོའི་དབང་ཕྱུག་ཀརྨ་ཀ། འདི་ནས་བླ་མེད་བྱང་ཆུབ་བར། །མི་འབྲལ་བདེ་ཆེན་གཙུག་རོལ་མཛོད། །དུས་གསུམ་སྟོན་པ་བདེ་བར་གཤེགས། །ཡོངས་ཀྱི་སྤྱི་གཟུགས་ཀརྨ་པ། །རྣམ་ཀུན་མི་འབྲལ་སྐལ་ལྡན་གྱི། །ཡིད་ཀྱི་པདྨོར་འབྲལ་མེད་ཤོག །མཁའ་ཁྱབ་ཐུགས་རྗེའི་གཏེར་འཆང་བ། །མཐའ་བྲལ་ཕྲིན་ལས་རང་བཞིན་ཅན། །རྗེ་བཙུན་ཀརྨ་ཀ་མཆོག་གིས། །སྐྱེ་དང་སྐྱེ་བར་རྗེས་འཛིན་ཤོག །ལྷུན་གྲུབ་ཡེ་ཤེས་སྣང་བ་ཅན། །ཁྱབ་བདག་བདེ་ཆེན་འཁོར་ལོའི་མགོན། །རྩ་བའི་བླ་མ་རིན་པོ་ཆེ། །སྐྱེ་དང་ཚེ་རབས་འབྲལ་མེད་ཤོག །སྟོན་མཆོག་སྟོབས་བཅུའི་བདག་ཉིད་ཅན། །དུས་གསུམ་རྒྱལ་ཀུན་གསང་གསུམ་གྱི། །ཕྲིན་ལས་མཛོད་འཆང་ཀརྨ་ཀས། །རྣམ་ཀུན་རྗེས་འཛིན་བྱིན་གྱིས་རློབས། །དུས་གསུམ་རྒྱལ་ཀུན་འདུས་པའི་
སྐུ། །སྐུ་གསུམ་ལྷུན་གྲུབ་ཡོངས་རྫོགས་དཔལ། །དཔལ་ལྡན་རྡོ་རྗེ་ཅན་ཞབས་མཆོག །མཆོག་གིས་དེང་འདིར་སྨིན་གྲོལ་མཛོད། །རྒྱལ་ཀུན་ཕྲིན་ལས་མཛོད་འཆང་བ། །དཔལ་ལྡན་ཀརྨ་པ་མཆོག་དེས། །རྗེས་འཛིན་བྱང་ཆུབ་གོ་འཕང་ལ། །འགོད་པར་བྱིན་གྱིས་བརླབ་ཏུ་གསོལ། །བདེ་གཤེགས་གསང་གསུམ་གཏེར་མངའ་བ། །ཐུགས་རྗེའི་བདག་ཉིད་རྒྱལ་བའི་དབང་། །གང་དེས་ཚེ་རབས་ཕྲེང་བ་རུ། །རྗེས་འཛིན་ཕྱིར་མི་ལྡོག་པར་ཤོག །སྲས་བཅས་རྒྱལ་ཀུན་འདུས་བའི་སྐུ། །འཆི་མེད་པདྨ་འབྱུང་གནས་ཀྱི། །ཐུགས་རྗེའི་བདེན་པས་བྱིན་བརླབ་ནས། །སྨིན་གྲོལ་དབང་བཞི་མཆོག་ཐོབ་ཤོག །ཚེ་ཡི་མཆོག་སྦྱིན་འཕགས་མ་ཡུམ། །རྣམ་ཀུན་ལྷག་ལྷར་བསྙེན་བའི་མཐུསག །ཚེ་དང་ཡེ་ཤེས་འབྱོར་པ་རྒྱས། །བཀྲ་ཤིས་དོན་ཀུན་འགྲུབ་པར་ཤོག །ཆོས་སྐུ་མཁའ་དབྱིངས་ཡངས་པ་ལས། །ལོངས་སྐུ་འགག་མེད་སྣ་ཚོགས་འཆར། །སྤྲུལ་སྐུ་འགྲོ་དོན་ཕྲིན་ལས་ཅན། །ཀརྨ་ཀ་དེས་སྐྱོང་གྱུར་ཅིག །ཕྲིན་ལས་སྣ་ཚོགས་ཆུ་ཟླ་ཡི། །རོལ་པས་དུས་གསུམ་འགྲོ་སྒྲོལ་བ། །དཔལ་ལྡན་ཀརྨ་ཀ་མཆོག་དེ། །བྱང་ཆུབ་བར་དུ་འབྲལ་མེད་ཤོག །བུ་རམ་ཤིང་པའི་བསྟན་མཆོག་གི། །ཕྲིན་ལས་འདོད་
དགུར་བསྒྱུར་མཛད་པ། །རྗེ་བཙུན་བདུད་འདུལ་རྡོ་རྗེ་གང་། །འདུ་འབྲལ་མེད་པ་གཅིག་ཏུ་སྨོན། །ཤེས་བྱའི་མཁའ་དབྱིངས་ཡངས་པ་ལ། །བློ་གྲོས་ཉི་མ་འབུམ་བརྡལ་བས། །རྒྱལ་བསྟན་ཡོངས་རྫོགས་འཛིན་པའི་གཙོག །དྷརྨཱ་ཀཱ་རས་རྗེས་བཟུང་མཛོད། །རྣམ་བཞིའི་ཕྲིན་ལས་ཐམས་ཅད་པ། །ལྷུན་གྱིས་གྲུབ་པའི་བདག་ཉིད་ཅན། །དྲག་པོ་མངོན་སྤྱོད་ཧེ་རུ་ཀ། རྡོ་རྗེ་བེར་གྱིས་སྐྱོང་གྱུར་ཅིག །རབ་གསལ་ཐུགས་རྗེའི་ཟླ་རིས་ཀྱིས། །རབ་སྣང་ལས་ཉོན་དྲི་མ་བསལ། །རབ་བསིལ་བྱམས་པའི་ཆུ་རྒྱུན་ཅན། །རབ་དགྱེས་མགོན་དེས་སྐྱོང་གྱུར་ཅིག །བདེ་ཆེན་རྡོ་རྗེའི་གར་རོལ་བ། །ཨེ་ཝྃ་ཟུང་འཇུག་བདག་ཉིད་ཅན། །དཔལ་ལྡན་སྡོམ་པ་དེང་ནས་བཟུང་། །བྱང་ཆུབ་བར་དུ་འབྲལ་མེད་ཤོག །སྙིང་རྗེ་ཚད་མེད་ཕྲིན་ལས་ཀྱི། །ཡེ་ཤེས་རང་གཟུགས་འཇིག་རྟེན་མགོན། །མཆོག་གིས་སྐྱེ་བར་རྗེས་བཟུང་ནས། །སྐུ་བཞི་མངོན་དུ་འགྱུར་བར་ཤོག །ཚེ་དང་འོད་སྣང་མཐའ་ཡས་པ། །པདྨ་འབྱུང་གནས་ཐུགས་རྗེའི་འོད། །རབ་གསལ་སྣང་བས་འཇིག་རྟེན་གྱི། །ཁམས་རྣམས་བདེ་དགེའི་དཔལ་རྒྱས་ཤོག །ཚེ་ཡི་མཆོག་སྦྱིན་ཏཱ་རེ་མའི། །ཐུགས་རྗེའི་འོད་སྣང་དཀར་པོ་ཡིས། །དེང་འདིར་འཛུམ་ཕྲེང་རབ་གཡོས་པས། །ཀུན་ནས་
ཀུན་ཏུ་ཤིས་གྱུར་ཅིག །སྟོན་མཆོག་མཉམ་མེད་ཤཱཀྱའི་ཏོག །གང་དེའི་བསྟན་པའི་སྙིང་པོ་སྟེ། །ངེས་དོན་སྒྲུབ་བརྒྱུད་ལམ་འཇུག་རྣམས། །ཆོས་སྤྱོད་བྱ་བ་འཕེལ་རྒྱས་ཤོག །ཨོ་རྒྱན་སངས་རྒྱས་པདྨ་སྐྱེས། །མཆོག་གི་བྱིན་རླབས་འོད་ཕྲེང་གིསག །སྐལ་ལྡན་སྒྲིབ་གཉིས་ཁྲི་མུན་གཞིལ། །སྐུ་གསུམ་བདག་ཉིད་ཆེ་ཐོབ་ཤོག །རྒྱལ་ཀུན་སྐྱེད་ཡུམ་འཕགས་མ་སྒྲོལ། །གང་གི་ཐུགས་རྗེའི་བདུད་རྩི་ཡིས། །དེང་འདིར་རྒྱུད་སྨིན་ཚེ་དཔལ་དང་། །ཡེ་ཤེས་སྣང་བ་རབ་རྒྱས་ཤོག །རྒྱལ་བ་རྒྱལ་བའི་དཀྱིལ་འཁོར་གྱི། །གཙོ་མཆོག་སངས་རྒྱས་པདྨ་འབྱུང་། །གང་དེའི་བྱིན་རླབས་སྨིན་གྱུར་ནས། །སྣང་སྲིད་དབང་བསྒྱུར་ནུས་ཐོབ་ཤོག །མངོན་ཤེས་ལྔ་ལྡན་བདེ་བར་གཤེགས། །དོན་ཀུན་གྲུབ་པས་ཚེ་རབས་ཀུན། །རྗེས་བཟུང་སོ་སོར་ཐར་སྒོར་ཞུགས། དགྲ་བཅོམ་འབྲས་ཐོབ་སངས་རྒྱས་ཤོག །དུས་གསུམ་སངས་རྒྱས་སྐྱེད་པའི་ཡུམ། །རྡོ་རྗེ་བཙུན་མོས་རྗེས་འཛིན་ནསག །མཆོག་ཏུ་འགྱུར་མེད་ཕྱག་རྒྱ་ཆེའི། །གོ་འཕང་དམ་པ་མྱུར་ཐོབ་ཤོག །ཡེ་ཤེས་དབྱིངས་ལས་ཁྲོ་བོའི་སྐུ། །སྙིང་རྗེའི་ཐབས་ཀྱིས་གདུག་པ་འདུལ། །མ་ཧཱ་ཀཱ་ལ་རྡོ་རྗེ་བེར། །འབྲལ་མེད་ཕྲིན་ལས་བཞི་འགྲུབ་ཤོག །ཀུན་བཟང་ཐུགས་རྗེའི་གར་རོལ་པ། །
སྤྲུལ་བསྒྱུར་སྣང་བ་རྩ་བརྒྱུད་ཀྱི། །བླ་མ་རྣམས་ཀྱིས་རྗེས་བཟུང་ནས། །མི་རྟོག་ཡེ་ཤེས་མངོན་གྱུར་ཤོག །རྒྱལ་དབང་མཚོར་འཁྲུངས་པད་འབྱུང་གི། །བྱིན་རླབས་འོད་ཕྲེང་ཐུགས་རྗེའི་ཟེར། །གང་ཞིག་དད་ལྡན་སྒོ་གསུམ་ལ། །དབང་བཞི་མྱུར་སྩོལ་རྒྱུད་སྨིན་ཤོག །དཔལ་ལྡན་བསྟན་སྲུང་རྡོ་རྗེ་བེར། །མཆོག་གི་མཐུ་སྟོབས་གཟི་འབར་བས། །ལོག་འདྲེན་ཐལ་བར་བསྲེག་པ་ཡི། །ལས་བཞིའི་ཕྲིན་ལས་དེང་སྒྲུབས་མཛོད། །ཚེ་དབང་དངོས་གྲུབ་འདོད་འཇོའི་གཏེརག །ལྷ་སྨན་རྒྱལ་མོས་དེང་འདི་རུ། །རྟག་ཏུ་སྲུང་སྐྱོབ་མགོན་དུ་ནི། །འབྲལ་མེད་བུ་བཞིན་བརྩེ་བར་མཛོད། །ཤྲཱི་ཤྲཱི་སྭ་སྟི། སྲིད་གསུམ་ཀུན་དགར་བྱེད་པ་ཡི། །མཆོག་གསུམ་ཐུགས་རྗེའི་ཉིན་བྱེད་འོད། །གང་འདིར་གསལ་བས་འགྲོ་རྣམས་ལ། །དགེ་ལེགས་སྣང་བས་སྐྱོང་གྱུར་ཅིག །དངོས་གྲུབ་བདུད་རྩིའི་འབྱུང་གནས་གཏེར། །རྩ་གསུམ་བྱིན་རླབས་ཆུ་ཤེལ་དབང་། །དེང་འདིར་སིམ་པའི་ཡོན་ཏན་གྱིས། །བཀྲ་ཤིས་འཛུམ་ཕྲེང་རྒོད་གྱུར་ཅིག །ལྷ་ཆེན་འཇིག་རྟེན་སྐྱོང་བ་ཡི། །དཀར་པོའི་སྡེ་རིས་དཔུང་ཚོགས་རྣམས། །སྐལ་ལྡན་བུ་བཞིན་བསྲུང་བ་ཡིས། །ཕྱོགས་ལས་རྣམ་པར་རྒྱལ་བར་མཛོད། །ཛ་ཡ་ཛ་ཡ་སུ་ཛ་ཡ། །ཞེས་བླ་མ་མཐར་ཕྱིན་པར་སྨོན་ལམ་དུ་སྤེལ། །རྒྱལ་ཀུན་སྐྱེད་ཡུམ་
ཚེ་སྦྱིན་མ། །འཕགས་མར་གསོལ་བཏབ་ཐུགས་རྗེ་ཡིས། །ཚེ་དཔལ་ཡེ་ཤེས་སྣང་བ་རྒྱས། །དོན་གཉིས་ལྷུན་གྲུབ་བཀྲ་ཤིས་སྩོལ། །འཕགས་མཆོག་ལོ་ཀི་ཤྭ་ར་ཡི། །བྱིན་རླབས་བདུད་རྩིའི་དཔལ་ཡོན་གྱིས། །དེང་འདིར་བསམ་དོན་ཆོས་འཕེལ་ཞིང་། །སྐུ་བཞིའི་འབྲས་བུ་མྱུར་ཐོབ་ཤོག །འཇམ་དཔལ་དཔའ་བོ་བརྩེ་ཆེན་གྱི། །ཐུགས་བསྐྱེད་ཟབ་མོའི་འོད་སྣང་གིས། །སྐལ་ལྡན་སྒྲིབ་གཉིས་མུན་བཅོམ་ནས། །ཡང་དག་ཡེ་ཤེས་ཀུན་གསལ་མཛོད། །གསང་བདག་མཐུ་སྟོབས་རྡོ་རྗེ་འཛིནག །མཆོག་གི་བདེན་པས་སྐྱོང་གྱུར་ནས། །གང་འདིར་ཉེར་འཚེ་ཡོངས་བྲལ་ཏེ། །དཀར་པོའི་འདོད་དོན་ལྷུན་གྲུབ་ཤོག །སྟོབས་བཅུའི་མངའ་བདག་བཅོམ་ལྡན་འདས། །ལུང་རྟོགས་དམ་པའི་ཆོས་ཀྱི་མཆོག །རིག་གྲོལ་འཕགས་ཚོགས་དགེ་འདུན་སྡེ། །མཆོག་གསུམ་ཐུགས་རྗེའི་འོད་དཀར་གྱིས། །ཉེ་བར་སིམ་པའི་ལེགས་བྱས་མཐུས། །ཚེ་དཔལ་ཀུ་མུཏ་རྣམ་པར་རྒྱས། །ཆོས་མཐུན་བསམ་པ་ལྷུན་གྲུབ་ཅིང་། །བདེ་དགའ་རྒྱ་མཚོས་འཚོ་གྱུར་ཅིག །མང་ཀྭ་སྐལ་བཟང་ངོར་སྤེལ། །སྟོབས་བཅུའི་སྟོབས་མངའ་བཅོམ་ལྡན་ཤཱཀྱ་ཐུབ། །ཆོས་ཉིད་རང་བཞིན་སྨྲ་བསམ་བློ་འདས་ཡུམ། །རིག་དང་གྲོལ་བའི་སར་གནས་འཕགས་དགེ་འདུན། །རིན་
ཆེན་རྣམ་གསུམ་སྐྱབས་སུ་བསྟེན་པའི་མཐུས། །འཕྲལ་སྣང་ཉོན་མོངས་མུན་སྟུག་རྒྱང་བསྲིང་ཞིང་། །བླ་མེད་ཐར་པ་བདེ་བའི་འོད་སྣང་གི། །སེམས་ཉིད་ཆོས་སྐུའི་ཉིན་བྱེད་འཆར་གྱུར་ནསག །རང་གཞན་རྣམ་མཁྱེན་གོ་འཕང་སྦྱོར་ནུས་ཤོག །བསྟན་འཕེལ་ངོར་སྤེལ། །ཀརྨ་པ་ཡི་བསྟན་ལ་ཚུལ་བཞིན་དུ། །ཞུགས་འདི་སྔོན་བསགས་བསོད་ནམས་འབྲས་བུར་ངེས། །དེས་ན་བཀའ་བརྒྱུད་བླ་མའི་རྣམ་ཐར་བཞིན། །སྡོམ་པ་གསུམ་གྱིས་རང་རྒྱུད་སྨིན་གྱུར་ཅིག །ཀརྨ་ཚེ་དབང་ལེགས་པའི་ངོར་སྤེལ། །རྒྱལ་ཀུན་སྤྱི་མེས་མཚོ་སྐྱེས་རྡོ་རྗེ་འཆང་། །དབྱེར་མེད་འདྲེན་མཆོག་རྩ་བའི་བླ་མའི་ཞབས། །རྣམ་ཀུན་མི་ཕྱེད་འདུན་པས་གསོལ་བ་འདེབས། །ཐུགས་ཡིད་གཅིག་འདྲེས་མཆོག་ཐུན་དངོས་གྲུབ་སྩོལ། །བདག་གི་རྣམ་ཀུན་བསམ་སྤྱོད་ཇི་སྙེད་པ། །ཆོས་མིན་གེགས་གྱུར་ནམ་ཡང་མི་འབྱུང་ཞིང་། །རྡོ་རྗེ་ཐེག་པའི་མྱུར་ལམ་ཟབ་མོ་ཡི། །ཟུང་འཇུག་འཕོ་བདེའི་ཡེ་ཤེས་བརྙེས་པར་ཤོག །རིག་འཛིན་སྔགས་ཀྱི་དམ་ཚིག་རྩ་བ་ནི། །རང་ལུས་ལྷ་སྐུ་འཛིན་མེད་གསལ་བ་དང་། །ངག་གི་སྔགས་བཟླས་ཡིད་ཀྱི་ཏིང་འཛིན་སྒོམ། །སྐུ་གསུང་ཐུགས་ཀྱི་རྣལ་འབྱོར་འབྲལ་མེད་ཤོག །རང་སེམས་ཡེ་ནས་སྐྱེ་འགགས་གནས་གསུམ་བྲལག །སྤང་བླང་ཡུལ་མེད་ཆོས་སྐུའི་གར་བསྒྱུར་ཚེ། །
སྐུ་གསུང་ཐུགས་ཀྱི་དམ་ཚིག་ལྟ་བས་བསྐང་ག །སྲུང་དུ་མེད་པའི་དམ་ཚིག་ལ་གནས་ཤོག །གནས་སྐབས་དྲན་པས་མ་ཟིན་རྐྱེན་དབང་གིག །འཁྲུལ་དྲིས་བསླད་པའི་ཉོན་མོངས་རྟོག་ཚོགས་ཀུན། །ཡེ་ནས་མ་གྲུབ་རང་སེམས་རིག་པའི་མདངས། །ཡིན་ལ་ངོ་ཤེས་ནོངས་པ་ཀ་དག་ཤོག །ཆོས་ཀུན་འདུན་པའི་རྩེ་ལ་གནས་གྱུར་པས། །ཟག་བཅས་ཟག་མེད་དགེ་རྩ་བྱས་སོ་ཅོག །ཐམས་ཅད་འགྲོ་ཀུན་སངས་རྒྱས་ཐོབ་པའི་རྒྱུར། །བྱང་ཆུབ་ཆེན་པོར་ཡོངས་སུ་བསྔོ་བར་བགྱི། །དེ་ལྟར་བསྔོས་པའི་མཐུ་ནུས་དགེ་རྩ་ཡིས། །བླ་མའི་ཞབས་བརྟན་བཤད་སྒྲུབ་བསྟན་པ་རྒྱས། །འགྲོ་རྣམས་དགེ་སྤྱོད་བདག་དང་འབྲེལ་བཅས་ཀུན། །ཀུན་ཏུ་བཟང་པོའི་གོ་འཕང་མྱུར་ཐོག་ཤོག །ཅེས་པའང་ལྷ་ལྕམ་བདེ་ཆེན་དབང་གི་རྒྱལ་མའི་བཞེད་ངོར་སྤེལ་བ་མངྒ་ལཾ།། །།