བསང་མཆོད་ཀྱི་རིམ་པ་རྣམས་ཕྱོགས་གཅིག་ཏུ་བསྡེབས་པ་ཕན་བདེ་བདུད་རྩིའི་གཏེར་མཛོད།
བསང་མཆོད་ཀྱི་རིམ་པ་རྣམས་ཕྱོགས་གཅིག་ཏུ་བསྡེབས་པ་ཕན་བདེ་བདུད་རྩིའི་གཏེར་མཛོད་ཅེས་བྱ་བ་བཞུགས་སོ།
ཨ་ཀཱ་རོས་བྱིན་གྱིས་བརླབས་ལ། རིན་ཆེན་ལས་གྲུབ་སྣོད་ཡངས་པར། །འདོད་ཡོན་ལྔ་ལྡན་གཏོར་མ་ནི། །ཟད་མི་ཤེས་པ་ནམ་མཁའི་མཛོད། །རྒྱ་ཆེན་རྒྱུན་མི་ཆད་པར་གྱུར། །ཀྱཻ། ཆོས་དབྱིངས་སྐྱེ་བ་མེད་པ་ལས། །ལོངས་སྐུ་འགག་མེད་ཅིར་ཡང་འཆར། །སྤྲུལ་པས་འཁོར་བ་དོང་སྤྲུགས་མཛོད། །འཕགས་མཆོག་འཇིག་རྟེན་མགོན་པོ་བསང་། །གང་འདུལ་ཐབས་ཀྱི་སྐུར་བཞེངས་པའི། །ཚེ་དཔལ་ཡེ་ཤེས་སྐྱེད་པ་མོ། །རྒྱལ་བ་ཀུན་གྱི་ཡུམ་གྱུར་མ། །རྗེ་བཙུན་སྒྲོལ་མའི་ལྷ་ཚོགས་བསང་། །རྒྱལ་བའི་བསྟན་པ་བསྲུང་བའི་ཕྱིར། །འདུལ་དཀའ་དྲེགས་ཅན་འཇོམས་མཛད་པ། །
དམ་ཆོས་མི་ནུབ་རྒྱལ་མཚན་བསྒྲེངས། །རྡོ་རྗེ་བེར་ཅན་ལྕམ་དྲལ་བསང་། །གཞན་ཡང་སྙིང་པོའི་བསྟན་སྲུང་བ། །རང་ཕྱོགས་བསྲུང་ཞིང་ཕས་རྒོལ་འཇོམས། །དམ་ཚིག་བཀའ་ཡི་མནའ་བོར་བ། །ཇོ་བོ་མ་ཀི་རྒོད་མགོ་བསང་། །གནས་ཆེན་ཉེར་བཞི་དུར་ཁྲོད་བརྒྱད། །ཡུལ་ཆེན་སོ་གཉིས་ལ་གནས་པའི། །དཀར་ཕྱོགས་སྐྱོང་བར་ཞལ་བཞེས་པའི། །མཐུ་ཆེན་ཆོས་ཀྱི་སྲུང་མ་བསང་། །ཁྱེད་རྣམས་མཆོད་པའི་ཡོན་ཏན་གྱིས། །གངས་ཅན་སྐྱབས་གཅིག་ཀརྨ་པའི། །ཕྲིན་ལས་ལྷུན་གྲུབ་བསྟན་པ་སྤེལ། །འགྲོ་རྣམས་དཔལ་འབྱོར་རྒྱས་པར་མཛོད། །བསྟོད་པར་འོས་པ་སོགས་བརྗོད་ནས།
བག་ཆགས་འཁྲུལ་པའི་དབང་གྱུར་ཏེ། །ཉེས་པར་གྱུར་པའི་ཚོགས་རྣམས་བཤགས། །ཐམས་ཅད་རང་གི་གནས་སུ་གཤེགས། །དུས་སུ་སླར་ཡང་འབྱོན་པར་གསོལ། །གཙྪས་གཤེགས། བཀྲ་ཤིས་དཔལ་འབར་འཛམ་གླིང་རྒྱན། །མངའ་རིས་རྒྱལ་ཁམས་བོད་ཀྱི་ཡུལ། །ཁ་བ་ཅན་གྱི་བྱང་ཕྱོགས་སུ། །ཆོས་སྒྲུབ་བརྒྱུད་ཀྱི་བསྟན་པ་དར་བར་ཤོག །འཛམ་གླིང་བདེ་བའི་བཀྲ་ཤིས་ཤོག །འཛམ་གླིང་བདེ་བར་མཛད་དུ་གསོལ། །ཞེས་ཤིས་བརྗོད་དང་། བསྔོ་སྨོན་བྱ། ཞེས་པ་གནས་མདོའི་དགེ་སློང་ཀརྨ་རྣམ་རྒྱལ་གྱིས་རྟེན་དང་བཅས་བསྐུལ་བར་བརྟེན། སི་ཏུའི་མིང་འཛིན་གྱིས་དཔལ་གྱི་མཚུར་བུའི་གནྡྷོ་ལར་བྲིས་པ་སྐྱེ་འགྲོ་ཐམས་ཅད་ལ་དགེ་བར་གྱུར་ཅིག །
མགོན་ཁང་རྒྱུན་བསང་ལས་བཞི་མྱུར་གྲུབ།
མགོན་ཁང་རྒྱུན་བསང་ལས་བཞི་མྱུར་གྲུབ་ཅེས་པ་བཞུགས། རྩ་གསུམ་འདུས་ཞལ་རྡོ་རྗེ་ནག་པོ་ཆེན་པོ་ལ་ན་མཿ འདིར་ཡེ་ཤེས་མགོན་པོ་བེར་ཅན་ལྕམ་དྲལ་འཁོར་དང་བཅས་པ་མངའ་གསོལ་ཞིང་བསང་མཆོད་འབུལ་བ་མདོར་བསྡུས་ཀྱི་རིམ་པ་ནི། དམ་ཚིག་དང་ལྡན་པའི་སྒྲུབ་པ་པོས། རྟེན་བཤམས་པའི་དྲུང་དུ། དམ་རྫས་གཏོར་མ། སྨན་དང་རཀྟའི་ཨརྒཾ། ཉེར་སྤྱོད་མཆོད་པ། ཕྱེ་མར་འབྲུ་སྣ་དང་སྨན་སྣ། ཕུད་སྣ་དར་སྣ་ཚོགས། རིན་ཆེན་ཕྱེ་མ། གཞན་ཡང་སྤྱན་གཟིགས་དཀོར་ཆས་ཀྱི་རིགས་དང་། དར་ནག་གི་བ་དན་བསྒྲེང་། དྲི་བཟང་པོ་བདུག་པའི་བྱེ་བྲག་དང་། གསུར་ཆེན་གྱི་དུད་པ་བཏང་ལ། དང་པོ་མཆོད་རྫས་བྱིན་
བརླབ་ནི། རང་ལྷར་གསལ་བའི་ངང་། ༀ་ཨཱ་བིགྷྣན་སོགས་ཀྱིས་བསངས། སྭ་བྷཱ་ཝས་སྦྱངས་ལ། སྟོང་པའི་ངང་ལས་ཡྃ་ལས་རླུང་དཀྱིལ་སྟེང་། །རྃ་ལས་མེ་དཀྱིལ་ཀྃ་ལས་ཐོད་སྒྱེད་གསུམ། །དེ་དབུས་ཨ་ལས་བྷནྡྷའི་སྣོད་ཡངས་པར། །གོ་ཀུ་ད་ཧ་ན་ལས་ཤ་ལྔ་དང་། །བི་མུ་མ་ར་ཤུ་ལས་བདུད་རྩི་ལྔ། །སོ་སོར་ཡི་གེ་དེ་དག་མཚན་པའོ། །རླུང་མེའི་སྦྱོར་བས་རྫས་ཀྱི་ཉེས་སྐྱོན་སྦྱངས། །འབྲུ་གསུམ་འཕྲོ་འདུས་ཡེ་ཤེས་བདུད་རྩིར་གྱུར། །ༀ་ཨཱ་ཧཱུྃ། ལན་གསུམ། རོལ་ཆེན་དང་བཅས། གུ་རུ་དེ་ཝ་ཌཱ་ཀི་ནི་དྷརྨ་པཱ་ལ་ས་པ་རི་ཝཱ་ར་བཛྲ་ས་མཱ་ཛཿ ༀ་མ་ཧཱ་ཀ་ལ་ཀཱ་ལ་ཡ། དེ་ཝ་རཀྵ་ཛཿཧཱུྃ་བྃ་ཧོཿ འདིར་ཤོག་འདིར་ཤོག །ཨ་གཙྪ་ཡ་ཨ་གཙྪ་ཡ། ཧཱུྃ་ཡ་ཛཿ ཧཱུྃ་ཡ་ཛཿ རྔ་འགྲིགས་དབྱངས་དང་བཅས། ཧཱུྃ། ཆོས་དབྱིངས་རྣམ་དག་ཕོ་བྲང་ནས། །སྐྱབས་གནས་བཀའ་བརྒྱུད་བླ་མ་རྣམས། །རྣལ་འབྱོར་གདུང་བས་སྤྱན་འདྲེན་ན། །འདིར་གཤེགས་མངའ་གསོལ་མཆོད་པ་བཞེས། །རང་བཞིན་ལྷུན་གྲུབ་ཞིང་ཁམས་ནས། །ཡི་དམ་དཔའ་བོ་ཌཱ་ཀིའི་ཚོགས། །རྣལ་འབྱོར༴ འདིར་གཤེགས༴ འོག་མིན་བྱང་ཕྱོགས་དུར་ཁྲོད་ནས། །དཔལ་ལྡན་རྡོ་རྗེ་ནག་པོ་ཆེ། །རྣལ་འབྱོར༴ འདིར་གཤེགས༴ བྱང་ཤར་ཐོད་མཁར་བརྩེགས་པ་ནས། །རྡོ་རྗེ་ནག་མོ་རེ་མ་ཏི། །རྣལ་
འབྱོར༴ འདིར་གཤེགས༴ ཕྲིན་ལས་རྣམ་བཞིའི་དཀྱིལ་འཁོར་ནས། །དཔལ་མགོན་ཕྱག་བཞི་བྱ་རོག་གདོང་། །རྣལ་འབྱོར༴ འདིར་གཤེགས༴ འཇིག་རྟེན་འཇིག་རྟེན་འདས་པ་ཡི། །ཆོས་སྐྱོང་སྲུང་མ་མ་ལུས་པ། །རྣལ་འབྱོར༴ འདིར་གཤེགས༴ མི་འགྱུར་བཀའ་གསང་རྡོ་རྗེ་ཡི། །དམ་ཚིག་གཉན་པོའི་གཞལ་ཡས་ནས། །རྒྱལ་ཆེན་རྣམ་མང་ཐོས་སྲས་མཆོག །དམ་ཅན་སྐྱེས་བུ་རྡོ་རྗེ་ལེགས། །ག་ཡ་དྷ་ར་ཡབ་ཡུམ་འཁོར། །སྲིན་མགོན་ནག་པོ་ཐོད་ཕྲེང་ཅན། །རྣལ་འབྱོར༴ འདིར་གཤེགས༴ ཀླུ་རྒྱལ་ཇོ་བོ་སྔགས་ཀྱི་བདག །དགེ་བསྙེན་བཛྲ་རཱ་ཛ་ཆེ། །དབྱིངས་ཕྱུག་ཨ་ཕྱི་ཆོས་ཀྱི་སྒྲོན། །བཀྲ་ཤིས་ཚེ་ཡི་དཔལ་སྟེར་མ། །ལྷ་སྨན་རྒྱལ་མོ་མཆེད་ལྔ་དང་། །བོད་ཁམས་སྐྱོང་མ་བཅུ་གཉིས་ཀྱང་། །རྣལ་འབྱོར༴ འདིར་གཤེགས༴ བཙན་རྒོད་རྡོ་རྗེ་དབང་དྲག་འབར། །ས་བརྒྱད་སེམས་དཔའ་ལྷ་ཆེན་གཙོ། །ཐང་ལྷ་ཡར་ཞུར་སྲས་འཁོར་བཅས། །རྨ་རྒྱལ་སྤོམ་ར་མཆེད་ལྕམ་དཔུང་། །སྐུ་ལྷ་གེར་མཛོ་འབྲི་གཉན་ལྡང་། །ཟིལ་ཕྲོམ་རྡོ་རྒྱལ་མུ་ནམ་སོགས། །རྣལ་འབྱོར༴ འདིར་གཤེགས༴ ཐུབ་བསྟན་ཆོས་འཁོར་གཉན་སྲུང་བ། །ཟོ་དོར་དབུ་ཆེ་བྲག་དཀར་ནི། །རྡོ་རྗེ་དཔལ་སྐྱོང་རྩལ་ཞེས་གྲགས། །དགྱེས་སྡེ་སྲས་འཁོར་སྒོ་
བ་བཞི། །སྨུག་སངས་རྩེ་རྒྱལ་ཞལ་ད་སོགས། །དཀར་ཕྱོགས་གཞི་གནས་ཡུལ་བདག་རྣམས། །རྣལ་འབྱོར༴ འདིར་གཤེགས༴ ཞེས་དང་། དེ་ནས་བསང་ཁང་དུ་ཕྱེ་མར་ལ་སོགས་འབྲུ་སྨན་གྱི་རིགས་རྣམས་གསུམ་ཆ་འབུལ་ཞིང་། གཏོར་མ་དང་གསེར་སྐྱེམས་ནམ་མཁར་མཆོད་ལ། ཀྱཻ། འཁོར་འདས་མཉམ་ཉིད་སྤྲོས་བྲལ་ཀློང་། །སྐྱེ་མེད་ཆོས་སྐུའི་རང་གདངས་རྩལ། །འགགས་མེད་ལོངས་སྐུའི་དཀྱིལ་འཁོར་ཤར། །གནས་མེད་སྤྲུལ་པའི་རོལ་པ་ལས། །འབྱུང་ལྔ་རྣམ་དག་ཡུམ་ལྔའི་དབྱིངས། །ཁམས་ལྔ་འདུས་པའི་རྟེན་འབྲེལ་གྱིས། །སྣང་སྲིད་སྣོད་བཅུད་ལྷུན་གྱིས་རྫོགས། །རབ་འབྱམས་འཇིག་རྟེན་བཀོད་པ་གསལ། །ཛམྦུ་བྲྀཀྵས་མཚན་པའི་ཞིང་། །སངས་རྒྱས་ཆོས་ཀྱི་དཔལ་གཡང་ལྡན། །བྱང་ཕྱོགས་གངས་རིའི་ཕྲེང་བསྐོོར་བའི། །སྨན་ལྗོངས་སྣ་ཚོགས་སྐྱེད་ཚལ་མཛེས། །དྲི་བསུང་སྤོས་ངད་ལྡང་པ་ཡི། །བདུད་རྩི་ཅན་ཤིང་རྣམ་མང་པོ། །རིན་ཆེན་བསང་ཁང་ཟླུམ་འཁྱིལ་དབུས། །འབར་གཡོའི་འཕྲུལ་གྱི་དུད་པའི་སྤྲིན། །ཕྱོགས་ཀྱི་གོ་སྐབས་འཕྲོག་བྱེད་པའི། །བཀྲ་ཤིས་རྫས་རྟགས་རྒྱལ་སྲིད་བདུན། །མཐོ་རིས་དབང་པོའི་ལོངས་སྤྱོད་ཀྱི། །ལེགས་བྱས་རང་གཟུགས་ཅི་ཡང་འཆར། །དག་གཙང་ཡིད་འོང་ཉེར་སྤྱོད་བདུན། །མཐའ་ཀླས་རྒྱས་པར་འགེངས་པ་དང་། །ཨཱིནྡྲ་
སྙིལ་གྱི་ཡོལ་གོ་རུ། །ཛ་གད་དང་སྦྱར་གསེར་གཡུའི་སྐྱེམས། །བཅུད་ལྡན་དཀར་མངར་བདའ་དགུའི་ཕུད། །ཚེ་གལ་མཐུན་བསྡེབས་དཔང་རེ་མཐོ། །དར་སྣ་བལ་ཚོན་མདངས་རེ་གསལ། །སྤྱན་གཟིགས་དཀོར་ཆས་རྔམས་ཤིང་བརྗིད། །ཤ་ཆེན་གཏོར་མ་རི་ལྟར་སྤུངས། །ཁྲག་ཆེན་ཨརྒྷཾ་མཚོ་ལྟར་བསྐྱིལ། །གསུར་ཆེན་དུད་པ་སྤྲིན་ལྟར་གཏིབས། །འདོད་ཡོད་སྣ་ཚོགས་གཅལ་དུ་བཀྲམ། །དར་ནག་རྒྱལ་མཚན་བ་དན་བསྒྲེངས། །རོལ་མོ་སིལ་སྙན་འབྲུག་སྟོང་ལྡིར། །ཏིང་འཛིན་མཆོད་པ་བསམ་མི་ཁྱབ། །གསོལ་ལོ་མཆོད་དོ་མངའ་གསོལ་ལོ། །ཀྱཻ། འགྲོ་བའི་མགོན་གྱུར་ཐུགས་རྗེའི་བདག། དཀོན་མཆོག་ཀུན་འདུས་ངོ་བོ་ཉིད། །རྩ་བརྒྱུད་བླ་མ་མངའ་གསོལ་ལོ། །ཡི་དམ་ལྷ་ཚོགས༴ ། དཔའ་བོ་མཁའ་འགྲོ༴ །ཡེ་ཤེས་མགོན་པོ༴ མ་ཧཱ་ཀཱ་ལ༴ །ལྷ་ཆེན་དཔལ་འབར༴ །ལེགས་ལྡན་ནག་པོ༴ །མཁའ་འགྲོའི་གཙོ་བོ་མངའ༴ །རིག་འཛིན་སྲུང་མ་མངའ༴ །རྣལ་འབྱོར་དགྲ་ལྷ༴ །དམ་ཉམས་སྲོག་གཅོད༴ །འཇིགས་བྱེད་ཆེན་མོ༴ །མ་གཅིག་ལྷ་མོ༴ །ཟ་བྱེད་ཆེན་མོ༴ །དབུགས་ལེན་བཅུ་དྲུག༴ །ཕྱོགས་བཅུ་མགོན་པོ༴ །དྲེགས་པ་དོན་གཉིས༴ །དྲེགས་པ་རྣམ་གསུམ༴ །མ་བདུན་སྲིང་བཞི༴ །འབར་དུས་ལྷ་མོ༴ །དམག་གི་རྒྱལ་མོ༴ །དབང་ཕྱུག་
ཉེར་བརྒྱད༴ བརྟན་མ་བཅུ་གཉིས༴ །སྤྲུལ་དང་ཡང་སྤྲུལ༴ །ཧཱུྃ། དཔལ་མགོན་ཕྱག་བཞི་མངའ་གསོལ་ལོ། །ལས་མགོན་བྱ་གདོང༴ །རྒྱལ་ཆེན་རྣམ་སྲས༴ །བཛྲ་སདྷུ༴ །དཔལ་ལྡན་ཞིང་སྐྱོང་༴ །སྲིན་མགོན་ཐོད་ཕྲེང༴ །མ་དྲོས་བདག་པོ༴ །ཀླུ་རྒྱལ་མཁར་ནག༴ །དྷརྨ་ཏཱ་ར༴ །ཚེ་རིང་མཆེད་ལྔ༴ །བཙན་རྒོད་འབར་བ༴ ། དྲི་ཟའི་རྒྱལ་པོ༴ །རྨ་རྒྱལ་སྤོམ་ར༴ །གེར་མཛོ་གཉན་པོ༴ རྡོ་རྗེ་བློ་གྲོས། །རྡོ་རྗེ་གཡུང་དྲུང༴ །མུ་ནམ་མཆེད་བརྒྱད༴ །རྡོ་རྗེ་དཔལ་སྐྱོང༴ །སྨུག་སངས་དགེ་བསྙེན༴ །རྩེ་རྒྱལ་ཞལ་ད༴ །གཞན་ཡང་ཡུལ་རིས་ས་ཕྱོགས་འདིར། །གནས་པའི་ས་བདག་ཀླུ་གཉན་ཚོགས། །གཉུག་གནས་གློ་བུར་ལྷགས་པ་རྣམས། །མངའ་གསོལ་བསང་མཆོད་དགྱེས་པར་རོལ། །གསོལ་དང་མཆོད་པའི་བྱིན་རླབས་ཀྱིས། །བསམ་པ་སྒྲུབས་ལ་རེ་བ་སྐོངས། །བར་དུ་གཅོད་པ་མཐའ་དག་སེལ། །དངོས་གྲུབ་མ་ལུས་ཀུན་སྩོལ་ཅིག །དེ་ནས་འདོད་དོན་གསོལ་ཞིང་ཕྲིན་ལས་བཅོལ་བ་ནི། སྐྱེམས་ཕུད་འཐོར་བཞིན་པས། ཀྱཻ། གསོལ་ལོ་མཆོད་དོ། །དྲིན་ཆེན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དང་། ཡི་དམ་དཔའ་བོ་རྣལ་འབྱོར་མའི་ཚོགས་རྣམས་དང་། དཔལ་ཡེ་ཤེས་ཀྱི་མགོན་
པོ་མ་ཧཱ་ཀཱ་ལ། བདུད་འདུལ་རྡོ་རྗེའི་དེད་དཔོན། འཇིགས་བྱེད་ཆེན་པོ་བེར་ནག་པོ་ཅན། ཡེ་ཤེས་ཀྱི་མགོན་པོ། ལས་ཀྱི་མགོན་པོ། འཇིག་རྟེན་གྱི་མགོན་པོ། ཡབ་ལེགས་ལྡན་ནག་པོ། སྐུ་ཡི་མགོན་པོ། གསུང་གི་མགོན་པོ། ཐུགས་ཀྱི་མགོན་པོ། ཡོན་ཏན་གྱི་མགོན་པོ། ཕྲིན་ལས་ཀྱི་མགོན་པོ། དཔལ་ལྡན་ལྷ་མོ་རང་བྱུང་གི་རྒྱལ་མོ། འདོད་པ་ཁམས་ཀྱི་དབང་ཕྱུག་མ། རེ་མ་ཏི། རེ་མ་ཛ། རེ་མ་ཛུ། དབུགས་ལེན་གྱི་ཤན་པ་ཡབ་ཡུམ་བཅུ་དྲུག །ཕྱོགས་སྐྱོང་བའི་མགོན་པོ་བཅུ། དྲེགས་པའི་གཙོ་བོ་བདུན་ཅུ་རྩ་གཉིས། མྱུར་མགྱོགས་ཀྱི་དྲེགས་པ་རྐྱ་གསུམ། མ་བདུན་སྲིང་བཞི། འབར་མ་དགུ། དུས་ལ་འཆར་བའི་ལྷ་མོ་བཞི། དམག་གི་རྒྱལ་མོ་ཆེན་མོ་བཞི། དབང་ཕྱུག་མ་ཉེར་བརྒྱད། རྡོ་རྗེའི་བརྟན་མ་བཅུ་གཉིས། གཞན་ཡང་སྤྲུལ་པ་ཡང་སྤྲུལ་ཉིང་སྤྲུལ་དམ་ཅན་རྒྱ་མཚོའི་དམག་ཚོགས་འཁོར་དང་བཅས་པ་རྣམས་གསོལ་ལོ་མཆོད་དོ། །དཔལ་ཁྲག་འཐུང་གི་རྒྱལ་པོ་ཕྱག་བཞི་པ། ལས་མགོན་བྱ་རོག་གི་མཚན་ཅན། རྒྱལ་ཆེན་ངལ་བསོས་པོ། སྐྱེས་བུ་བཛྲ་ཐིག་ལེ་རྩལ། ཞིང་སྐྱོང་ཀུན་དགའ་གཞོན་ནུ། ལངྐ་དུར་ཁྲོད་བདག་པོ། ཀླུ་རྒྱལ་སོག་མ་མེད། དགེ་བསྙེན་རྡོ་རྗེ་རྒྱལ་པོ། སྣ་ནམ་ལྷའི་ལྕམ་མོ། །བཀྲ་ཤིས་ཚེ་རིང་མ་མཆེད་ལྔ། མཐུ་
ཆེན་རྡོ་རྗེ་བྲག་བཙན་ལ་སོགས་ཡབ་ཡུམ་སྲས་འཁོར་བཀའ་སྡོད་ཕོ་ཉའི་ཚོགས་དང་བཅས་པ་རྣམས་གསོལ་ལོ་མཆོད་དོ། །གངས་ཅན་བོད་ཀྱི་བསྟན་སྲུང་ཁྱབ་འཇུག་གནམ་མཚོའི་བདག་པོ། ས་བརྒྱད་དབང་ཕྱུག་རྨ་རྒྱལ་རྡོ་རྗེ་བདུད་འཇོམས། སྲིད་པའི་ལྷ་ཆེན་ཨ་བོ་གེར་མཛོ། འབྲི་གཉན་ལྡང་བཛྲ་མ་ཏི་ལ་སོགས་དཀར་ཕྱོགས་སྐྱོང་བའི་ཡུལ་ལྷ་ཟོ་དོར་མཐུ་བོ་ཆེ་རྣམས་དང་། གདན་ས་གནས་མཆོག་འདི་ཉིད་ཀྱི་ཡུལ་དང་གཞིའི་བདག་པོ་དབུ་ཆེ་བྲག་དཀར་གཉན་པོ་ལ་སོགས་པ་རང་ལ་རིགས་ཀྱི་འགོ་བའི་ལྷ་དང་སྲུང་མ་བྱམས་པའི་སེམས་དང་ལྡན་པ་རྣམས་གསོལ་ལོ་མཆོད་དོ། །གསོལ་ཞིང་མཆོད་པ་ལ་བརྟེན་ནས་བདག་ཅག་དཔོན་སློབ་ཡོན་མཆོད་འཁོར་དང་བཅས་པ་རྣམས་ཀྱི་རྡོ་རྗེ་སློབ་དཔོན་སྐུ་ཚེ་རིང་བར་གྱུར་ཅིག །མཆེད་དང་ལྕམ་དྲལ་ལ་ན་ཚ་མེད་པར་གྱུར་ཅིག །སྒྲུབ་པ་པོ་བདག་ཅག་གི་སྦྱིན་པའི་ཟས་ཟོ། བཅོལ་བའི་ལས་གྱིས། གདམས་པའི་ངག་ཉོན། དགོས་པའི་དོན་སྒྲུབས། སྡང་བྱེད་ཀྱི་དགྲ་སོད། གནོད་བྱེད་ཀྱི་བགེགས་ཐུལ། བར་ཆད་ཀྱི་རྐྱེན་ཟློག །སྡོད་སའི་གནས་མལ་སྲུངས། མཁོ་བའི་ཡོ་བྱད་སྲུངས། བརྒྱུད་འཛིན་གྱི་སློབ་མ་སྲུངས། ལུས་དང་གྲིབ་མ་བཞིན་དུ་མི་འབྲལ་བར་འགྲོགས་ལ། བཅོལ་བའི་ཕྲིན་ལས་འགྲུབ་པར་མཛོད་ཅིག །ཅེས་བརྗོད།
ཚར་གྲངས་བཏོན་ན་སླར་ཡང་གོང་གི་བསང་གཞུང་དང་ཕྲིན་བཅོལ་བཅས་ཀྱི་གྲངས་འཛིན་ལ། རྗེས་མར་ཡང་སྐྱེམས་ཕུད་ཕྱེ་མར་འབུལ་ཞིང་འདོད་གསོལ་སྤྱི་འགྲོ་འདིའང་བྱ་སྟེ། སངས་རྒྱས་བསྟན་སྲུངས་དཀོན་མཆོག་དབུ་འཕང་བསྟོད། །དགེ་འདུན་སྡེ་སྐྱོངས་རྣལ་འབྱོར་ཚེ་དཔལ་སྤེལ། །སྙན་པའི་དར་ཕྱོར་གྲགས་པའི་དུང་བུས་ལ། །འཁོར་དང་ལོངས་སྤྱོད་རྒྱས་པ་ཉིད་དུ་མཛོད། །རྒས་མེད་ལང་ཚོ་ལྡན་པའི་ལུས་སྟོབས་རྒྱས། །མིག་ལ་ཡ་མཚན་ལྟད་མོའི་དགའ་བ་དང། །རྣ་བར་རྟག་ཏུ་སྙན་པའི་གཏམ་ཐོས་ཤིང་། །དྲི་ཞིམ་ངད་པ་སྣ་དང་མི་འབྲལ་བར། །ཟས་སྐོམ་འབྱོར་པས་རོ་འཛིན་ཚིམ་བྱེད་ཅིང་། །ལུས་ལ་རེག་བྱ་བདེ་བ་ཁོ་ནས་འཚོ། །ཡིད་ལ་རྣམ་པར་བཀྲ་བའི་ཤེས་རབ་དང་། །ཟག་མེད་བདེ་བས་ནམ་ཡང་ངོམ་པར་མཛོད། །ཁྱོད་གསོལ་ཁྱོད་བརྟེན་ཁྱོད་མཆོད་ཁྱོད་རྦད་ན། །མཐུ་རྩལ་མ་ཆུང་བརྩེ་གདུང་ཆེ་བར་མཛོད། །གཞི་ལ་བཀྲ་ཤིས་ཕུན་ཚོགས་ལོངས་སྤྱོད་ལྡན། །བྱེས་སུ་ལམ་འཕྲང་ཆུ་ལ་སྒྲོལ་འདོན་མཛོད། །འཇིགས་སར་དགྲ་ཇག་ཆོམ་རྐུན་འཚེ་བ་སྐྱོབས། །མདོར་ན་བསམ་དོན་ཡིད་བཞིན་གྲུབ་པར་མཛོད། །ཅེས་དང་། བདག་དང་མཐའ་ཡས་སེམས་ཅན་ཐམས་ཅད་ཀྱིས། །བླ་མེད་རྫོགས་པའི་བྱང་ཆུབ་བསྒྲུབ་པ་ལ། །འགལ་རྐྱེན་བར་ཆད་མ་ལུས་ཞི་བ་དང་། །མཐུན་
རྐྱེན་བསམ་དོན་ལྷུན་གྱིས་གྲུབ་པར་མཛོད། །ཅེས་དང་། སྲིད་ཞིའི་དཔལ་འབྱོར་མ་ལུས་འབྱུང་བའི་གཞི། །ཐུབ་པའི་བསྟན་པ་ཡུན་རིང་གནས་པ་དང་། །དེ་འཛིན་བྱེད་པའི་སྐྱེས་བུ་དམ་པ་རྣམས། །དཔལ་འབྱོར་གྱིས་བརྒྱན་ཡུན་རིང་ཞབས་བརྟན་ཤོག །བདག་ཅག་ཡོན་མཆོད་འཁོར་དང་བཅས་པ་ལ། །ཚེ་རིང་ནད་མེད་བདེ་སྐྱིད་ཕུན་སུམ་ཚོགས། །དོན་རྣམས་ཐམས་ཅད་ཡིད་བཞིན་འགྲུབ་པ་དང་། །འགྲོ་བའི་དོན་ལ་མཐུ་དང་ལྡན་པར་མཛོད། །ལྷ་རྣམས་ནོངས་པ་གང་མཆིས་བཟོད་པར་བཞེས། །ཡེ་ཤེས་རྟེན་བཞུགས་འཇིག་རྟེན་རང་གནས་གཤེགས། །འཇིག་རྟེན་འཇིག་རྟེན་འདས་པའི་དགེ་ལེགས་ཚོགས། །གོང་ནས་གོང་དུ་འཕེལ་བའི་བཀྲ་ཤིས་ཤོག །ཅེས་བདེ་ལེགས་ཀྱི་མེ་ཏོག་འཐོར་བར་བྱའོ། །ཞེས་པའང་མགོན་ཁང་ཆེན་མོར་རྒྱུན་བསང་ཁྱེར་བདེ་འདི་བཞིན། རྗེ་མཁའ་སྤྱོད་པས་མཛད་པའི་མངའ་གསོལ་བྱིན་རླབས་ཀྱི་ཁྱད་པར་གཞིར་བཀོད་ནས། མཆོད་འོས་ཁ་སྐོང་སོགས་ཀྱི་སྐོར་རྣམས་སི་ཏུ་པས་དགེ་བསྐོས་ཀརྨ་ལྷས་སྐྱབས་ཀྱི་བཞེད་ངོར་སྤེལ་བ་དགེ་བར་གྱུར་ཅིག་ཛ་ཡནྟུ། །
དབུ་ཆེའི་བསང་དགོས་འདོད་ཆར་འབེབས།
དབུ་ཆེའི་བསང་དགོས་འདོད་ཆར་འབེབས་བཞུགས། ༀ་བཛྲ་སྥ་ར་ཎ་ཁཾ། ལན་གསུམ་གྱིས་བྱིན་བརླབས་ལ། ལྷ་རྫས་འདོད་དགུའི་ལོངས་སྤྱོད་ཀྱི། །བསང་མཆོད་ཟག་མེད་བདེ་ཆེན་གྱུར། །
རང་ཉིད་ལྷར་གསལ་ཐུགས་ཀ་ནས། །འོད་འཕྲོས་གནས་བདག་ཚོགས་སྤྱན་དྲངས། །བྷུ་མི་པ་ཏི་ས་པ་རི་ཝཱ་ར་བཛྲ་ས་མ་ཛཿ ཀྱཻ། ཛམྦུ་བྲྀཀྵའི་བྱང་རོལ་ན། །གངས་ཅན་མདོ་ཁམས་གླིང་ཁྲི་སྨད། །འབྲི་རྒྱལ་ཆོས་ཕྱུག་སྐྱོང་བའི་ཡུལ། །དལ་འགྲོ་གསེར་ལྡན་ཀླུང་གི་ངོགས། །སྦས་གནས་ཨ་ཏ་རོང་གི་ཆར། །ཐུབ་བསྟན་ཤྲཱི་ནི་ཀཱ་ར། །བསྲུང་བར་སྨོན་ལམ་ལས་གྲུབ་ལྷ། །རབ་དཀར་སྟོན་ཟླ་ཆ་གང་བ། །འོད་འཚེར་ལྟ་བུའི་སྲ་བརྟན་གྱི། །ལྷུན་ཆགས་རྡོ་རྗེ་ཕ་ལམ་བྲག །ཀཻ་ལ་ཤ་ཡི་མདངས་འཕྲོག་པ། །ཕྱི་ལྟར་མཐོང་བ་ཀུན་སྨོན་ཞིང་། །ནང་ལྟར་ལྷ་ཀླུའི་རིན་ཆེན་གྱི། །ཕོ་བྲང་ཡིད་འོང་ལྟ་ན་སྡུག །གསང་ལྟར་རྒྱལ་བ་རྒྱ་མཚོ་ཡི། །དཀྱིལ་འཁོར་གདོད་ནས་རང་བྱུང་གྲུབ། །གནས་ཞིང་སྐྱོང་བའི་ཟོ་དོར་གཉེན། །དབུ་ཆེ་རྡོ་རྗེ་དཔལ་སྐྱོང་རྩལ། །དར་ཐོད་དར་བེར་གཡས་བ་དན། །གཡོན་པར་གཏེར་བུམ་ཕྱྭ་གཡང་འགུགས། །གཡས་གཡོན་དཔའ་ཆས་དགྲ་ལ་རྔམ། །ཅང་ཤེས་དུང་མདོག་རླུང་ཤུགས་བཅིབ། །དགྱེས་སྡེ་སྲས་དང་སྒོ་སྲུང་བཞི། །དཀར་པོ་ལྷ་ཡི་དཔུང་ཚོགས་བསྐོར། །ཁྱུང་འབྲུག་སྟག་སེང་ལྡིང་དང་འཕྱོ། །སྤྲིན་དང་ན་བུན་དབྱར་རྔ་ལྡིར། །རིན་ཆེན་ཨཱིནྡྲའི་མདངས་ལྡན་པའི། །རྫ་བྲག་རི་དབང་གནས་འཆའ་བའི། །སྨུག་སངས་མཚོ་སྨན་
འཁོར་བཅས་དང་། །མར་གད་ཞུན་མ་དང་མཚུངས་པའི། །ས་འཛིན་དཔལ་གཡང་ཅན་གྱི་བདག །རྩ་རྒྱལ་ཞལ་ད་སྲས་ཡུམ་འཁོར། །ཀུན་ཀྱང་དམ་ཚིག་རྡོ་རྗེ་ཡི། །བཀའ་བསྒོས་རྗེས་དྲན་འདིར་གཤེགས་བཞུགས། །དགྱེས་རྫས་མཆོད་པ་འབུལ་བ་ནི། །བཟང་ཤིང་རིགས་དགུའི་བསང་དུད་ལས། །མཆོད་པའི་བྱེ་བྲག་ཅི་ཡང་སྤྲུལ། །བཀྲ་ཤིས་རྫས་རྟགས་འདོད་ཡོན་ལྔ། །དཀར་གསུམ་མངར་གསུམ་རིན་ཆེན་སྨན། །འབྲུ་སྣ་ཕྱེ་མར་གསེར་སྐྱེམས་རྫས། །ཛ་གད་ཕུད་སྣ་གོ་ཁྲབ་དང་། །དར་གོས་རྒྱན་ཆས་རྐང་འགྲོའི་རིགས། །གནོད་སྦྱིན་དཀོར་བས་ཆེས་ལྷག་པ། །ཕྱོགས་ཀྱི་གོ་སྐབས་འགོག་བྱེད་པའི། །བདུག་སྤོས་སྤྲིན་ཆེན་གཡོ་བ་དང་། །རང་བཞིན་རྣམ་དག་བསུང་ངད་ལྡང་། །ཕྱི་སྣོད་ནང་བཅུད་དྲི་མ་བསང་། །ཉམས་གྱུར་ཉེས་ཚོགས་བྱང་གྱུར་ཅིག །མཐུ་སྟོབས་རྩལ་གྱིས་ཕ་རོལ་གནོན། །ལྷ་ཡི་དགེ་བསྙེན་འཁོར་བཅས་བསྟོད། །སྔོན་ཚེ་པད་འབྱུང་བྱང་ཆུབ་གླིང་། །གྲུབ་ཆེན་པཀྵི་ཆོས་ཀྱི་འབྱུང་། །སྤྱན་སྔར་དམ་མནོས་ཡལ་གམ་ཅན། །དེང་འདིར་ཐ་ཚིག་བརྩེར་དགོངས་ལ། །སྒྲུབ་བརྒྱུད་བསྟན་དང་བསྟན་འཛིན་སྐྱོངས། །རྣལ་འབྱོར་བསམ་དོན་ལྷུན་གྲུབ་པར། །ལེགས་པའི་རྒྱལ་ཁ་བསྟོད་པ་དང་། །སྡོང་གྲོགས་རྒྱབ་
བརྟེན་མེལ་ཚེ་མཛོད། །མི་འབྲལ་རྟག་པར་སྲུང་ཞིང་སྐྱོབས། །རྣམ་བཞིའི་ཕྲིན་ལས་མ་གཡེལ་སྒྲུབས། །རྒྱལ་བསྟན་མི་ནུབ་རྒྱལ་མཚན་མཆོག །སྲིད་རྩེར་བསྒྲེང་པའི་བཀྲ་ཤིས་ཀྱི། །ཉི་ཟླ་དཔལ་དུ་འབར་བ་ཡི། །རྣམ་ཀུན་ཕུན་ཚོགས་ཁྱབ་གྱུར་ཅིག། སརྦ་བྷཱུ་ཏ་གཙྪ། ཞེས་པའང་སི་ཏུ་པདྨ་ཉིན་བྱེད་དབང་པོས། དགེ་བཤེས་ཀརྨ་ཚེ་རིང་བཞེད་ལྟར་སྤེལ། སརྦ་མངྒ་ལམ། །
འབྲི་རྒྱལ་གཉན་ལྡང་དང་མུ་ནམ་བཅས་ཀྱི་བསང་མཆོད་རིན་ཆེན་ཆར་འབེབས།
འབྲི་རྒྱལ་གཉན་ལྡང་དང་མུ་ནམ་བཅས་ཀྱི་བསང་མཆོད་རིན་ཆེན་ཆར་འབེབས་ཞེས་པ་བཞུགས། ན་མོ་མ་ཧཱ་གུ་རུ་རཏྣ་པདྨཱ་ཀ་ར་ཡེ། འདིར་དཀར་པོ་ལྷའི་སྡེ་དཔོན་རིགས་ཆོས་རྒྱུད་སྲུང་འབྲི་རྒྱལ་གཉན་པོ་དང་། རྡོ་རྒྱལ་བཅས་ལ་བསང་མཆོད་སྤྲོ་བས་དང་པོ་དཀོན་མཆོག་གི་རྟེན་དྲུང་དུ་བསང་གཞུང་གང་ཡིན་དེའི་དགོས་ཆས་སྤྱི་དང་བྱེ་བྲག་པ་གང་དགོས་རྣམས་འདུ་བྱས་ལ། དམིགས་བསལ་གཞི་དཀར་པོའི་སྟེང་དུ་འབྲུ་དཀར་གྱིས་གཡུང་དྲུང་གཡས་འཁྱིལ་གཉིས་ཕན་ཚུན་དུ་བཀོད། དེ་སྟེང་མཉྫི་ལྟ་བུའི་ཁར་དཀར་བཤོས་གཙོ་འཁོར་ལྔ་ཚོམ་ཅན། རྩེར་ཉི་ཟླས་བརྒྱན་བ་གཉིས་ལ། དར་སྣ། སྟག་གཟིག་རས་མོ། ཁྱུང་དང་སེང་གེ་གཡུ་འབྲུག །བྱ་དང་རི་དྭགས་གཡུང་དྭགས་ལ་སོགས་དཀོར་ནོར་གཟུགས་འགྲོས་རིགས་སྤར་དུ་བཏབ་པ་མང་པོས་བརྒྱན་ཅིང་བསྐོར། མཆོད་ཡོན་སོགས་ཉེར་སྤྱོད་ཀྱི་མཆོད་པ་དང་། གྲངས་ཅི་ཙམ་འདོན་ན་དེ་ལ་དཀར་གཏོར་གཉིས་རེ་དང་། ཕུད་ཕོར་གཙང་མར་གསེར་སྐྱེམས།
རིན་ཆེན་ཕྱེ་མ། སྨན་སྣ། འབྲུ་སྣ། ཟས་སྣ། ཡོས་བཀྲ། ཕྱེ་མར། ཇ་ཆང་། དཀར་ཕུད་སོགས་བཤམས། བསང་ཁང་དུ་བཟང་ཤིང་སྤོས་སྨན་གང་འཛོམས་ཀྱི་རིགས་རྣམས་སྤུངས་ཤིང་། བསང་གཞུང་སྤྱི་ལྟར་བཏོན་ལ་སྐབས་མཚམས་ཞིག་ཏུ། སླར་ཡང་མཆོད་རྫས་རྣམས། ༀ་བཛྲ་ཨ་མྲི་ཏས་བསངས། ༀ་སྭ་བྷཱ་ཝས་སྦྱངས། སྟོང་པའི་ངང་ལས་རིན་ཆེན་བསང་ཁང་བཟང་། །རབ་དཀར་ཟླུམ་འཁྱིལ་དེ་དབུས་དྲི་བསུང་ངད། །རྨད་བྱུང་སྨན་སྤོས་བདུད་རྩི་ཅན་གྱི་ཤིང་། །རྣམ་མང་བདུག་པའི་སྤྲིན་ཕུང་ཕྱོགས་ཀུན་ཁྱབ། །གཞན་ཡང་སྐབས་གསུམ་གདེངས་ཅན་མིའི་འགྲོ་བའི། །ལོངས་སྤྱོད་མཁོ་དགུའི་ཡོ་བྱད་དཔག་ཏུ་མེད། །མཆོད་རྫས་དངོས་པོ་བཟང་ཞིང་རྒྱ་ཆེ་བ། །མཐའ་ཀླས་ཟད་མི་ཤེས་པ་ནམ་མཁའི་མཛོད། །ཀུན་བཟང་ཏིང་འཛིན་སྨོན་ལམ་ལས་གྲུབ་པའི། །འདོད་པའི་ཡོན་ཏན་བསམ་མི་ཁྱབ་པར་གྱུར། ༀ་ཨ་ཀ་རོས་ལན་གསུམ་བྱིན་བརླབས་ལ། ཀྱཻ། སྐྱབས་གནས་ཐུགས་རྗེའི་བདག་ཉིད་ཅན། །སྐལ་བཟང་ཞིང་གི་འདྲེན་པ་མཆོག །སྟོང་དང་རྩ་གཉིས་འབྱོན་པའི་གནས། །ལྷོ་རྒྱལ་ཛམ་གླིང་དབུས་འགྱུར་འཆང་། །རྒྱ་གར་འཕགས་ཡུལ་རྡོ་རྗེ་གདན། །བྱང་གི་ཆར་བརྟེན་གངས་ཅན་ལྗོངས། །འཇིག་རྟེན་དབང་ཕྱུག་གདུལ་བྱའི་ཞིང་། །བོད་ཆེན་མདོ་ཁམས་གླིང་ཁྲི་སྨད། །འབྲི་རྒྱལ་ཆོས་
ཀྱི་འཕེན་ཕྱུག་གིས། །སྐྱོང་བའི་སྦས་ཡུལ་ཨ་ཏ་རོང་། །རྗེས་འབྲེལ་ཆུ་བོ་གསེར་ལྡན་ངོགས། །རིན་ཆེན་ས་འཛིན་མར་གད་མདངས། །མཐོ་ལ་བརྗིད་ཅིང་རྫ་དང་བྲག། སྲ་བརྟན་གཞོམ་བྲལ་རྡོ་རྗེའི་རྫོང་། །སྔོན་ཚེ་དཔལ་ཆེན་ཧེ་རུ་ཀས། །བདུད་བཏུལ་གསང་སྔགས་ཆོས་འཁོར་བསྐོར། །བར་དུ་པདྨ་ཐོད་ཕྲེང་གིས། །བྱིན་གྱིས་བརླབས་ཤིང་ཟབ་གཏེར་སྦས། །ཐ་མར་ལས་ཅན་ཆོས་བདག་གིས། །གནས་གཏེར་སྒོ་འབྱེད་འགྲོ་དོན་སྐྱོང་། །གདོད་ནས་རྣམ་དག་ས་སྤྱོད་ཞིང་། །མཐོང་ཐོས་རེག་པ་ཙམ་གྱིས་ཀྱང་། །བདེ་ཆེན་ཐར་པའི་ལམ་ལ་སྦྱོར། །རྩ་བ་བརྒྱུད་པའི་བླ་མ་རྣམས། །ཐུགས་རྗེའི་ཆུ་འཛིན་ཐིབས་སེ་ཐིབ། །ཡི་དམ་ཌཱ་ཀིའི་དཀྱིལ་འཁོར་གསལ། །དངོས་གྲུབ་སྦྲང་ཆར་སི་ལི་ལི། །ཆོས་སྐྱོང་དམ་ཅན་གཞི་གནས་བདག །མྱུར་མགྱོགས་ཕྲིན་ལས་སྤྲིན་སྒྲ་སྒྲོགས། །ངོ་མཚར་མངོན་འཕགས་བཀོད་ལེགས་ཀྱི། །དགེ་མཚན་རེ་ཁཱ་ཅི་ཡང་འཆར། །སྣ་ཚོགས་རིན་ཆེན་ལས་གྲུབ་པའི། །ཕོ་བྲང་གཞལ་ཡས་ཉམས་རེ་དགའ། །ས་གསུམ་དཔལ་འབྱོར་འདོད་དགུའི་མཛོད། །གནོད་སྦྱིན་ནོར་དབང་འགྲན་བཟོད་པ། །དཀར་པོ་ལྷ་ཡི་སྡེ་དཔོན་ཆེ། །སངས་རྒྱས་བསྟན་སྲུང་ཕས་རྒོལ་འཇོམས། །རི་དབང་སྤུན་དགུའི་ཡ་གྱལ་དུ། །གྲགས་ལྡན་ཆོས་ཀྱི་བདེན་
མཐོང་བ། །འབྲི་རྒྱལ་རྡོ་རྗེ་བློ་གྲོས་ནི། །རབ་དཀར་སྟོན་ཟླ་དང་མཚུངས་པ། །མཐོ་རིས་བདག་པོའི་ཁེངས་འཕྲོག་བྱེད། །ཞི་འཛུམ་སྒེག་པའི་ཉམས་དང་ལྡན །དར་དཀར་ཐོད་བཅིངས་རིན་པོ་ཆེའི། །སྙན་རྒྱན་མགུལ་རྒྱན་དོ་ཤལ་འཕྱངས། །ཕྱག་གཡས་བ་དན་དཀར་པོ་འཕྱར། །བསྟན་པའི་རྒྱལ་མཚན་སྲིད་རྩེར་བསྒྲེང་། །གཡོན་པས་བཅུད་བཀང་རིན་ཆེན་བུམ། །སྒྲུབ་ལ་དངོས་གྲུབ་ཆར་ལྟར་འབེབས། །ལྷ་ཡི་རེག་བྱ་ཀུནྡའི་མདོག། ལྷབ་ལྷུབ་དར་གྱི་ན་བཟའ་དང་། །མདངས་ལྡན་རྨ་བྱའི་བེར་ཐུལ་གསོལ། །ཞབས་ཟུང་རིན་ཆེན་མཆིལ་ལྷམ་མཛེས། །དར་སྟན་གསེར་སྒ་རིན་ཆེན་རྒྱན། །ཅང་ཤེས་ངང་དཀར་རྩལ་ལྡན་ཆིབས། །ཕྱི་ནང་གསང་བའི་དགྱེས་སྡེ་དང་། །སྲས་ལྕམ་མཆེད་འཁོར་སྤྲུལ་པ་དང་། །ཡང་སྤྲུལ་དཔུང་གི་ཚོགས་དང་བཅས། །རིགས་མཐུན་རྒྱན་དང་ཆ་ལུགས་རྣམས། །མ་ངེས་སྣ་ཚོགས་སོ་སོར་སྟོན། །སྔོན་གྱི་ཐུགས་དམ་དྲན་མཛོད་ལ། །གནས་འདིར་སྤྱན་འདྲེན་གཤེགས་སུ་གསོལ། །ཀྱཻ། སངས་རྒྱས་ཆོས་ཀྱི་བཀའ་ཉན་པ། །ཤར་ཕྱོགས་མངའ་རིས་དབང་བསྒྱུར་ཞིང་། །སྟོབས་ཀྱི་དཔུང་པས་ལེགས་བརྟེན་པའི། །རྡོ་རྒྱལ་མུ་ནམ་མཆེད་བརྒྱད་པོ། །ཀཻ་ལཱ་ཤ་ཡི་ལྷུན་པོ་ལ། །གནས་བཅས་ལྷ་ཡི་དགའ་ཚལ་བཞིན། །
རྐང་འཐུང་ལྗོན་པ་སྨན་དང་ནི། །མེ་ཏོག་མཚོ་རྫིང་ཉལ་འགྲོའི་རྒྱུན། །དུས་བཞིར་ལས་བཞིའི་ཁ་དོག་བསྒྱུར། །འདབ་ཆགས་རི་དྭགས་སྤུ་སྡུག་རྣམས། །འཚེ་བ་དང་བྲལ་བག་ཡངས་རྒྱུ། །ནང་ལྟར་རིན་ཆེན་ཁང་བཟང་མཛེས། །དབྱིབས་ལེགས་ཡིད་འོང་ལྟ་ན་སྡུག །དེར་བཞུགས་ལྷ་ཡི་དགེ་བསྙེན་ནི། །རྡོ་རྗེ་གཡུང་དྲུང་དཔའ་རབ་འབར། །མདོག་དཀར་དགྱེས་པའི་འཛུམ་ཞལ་གཡོ། །སྐུ་ལ་དུང་ཁྲབ་དར་བེར་བཀླུབས། །དུང་རྨོག་ཁྱུང་དར་སྟག་འཕྲུ་ལྡེམ། །སྣ་ཚོགས་རིན་ཆེན་ཕྲེང་བས་བརྒྱན། །ཕྱག་གཡས་དར་དཀར་བ་དན་དང་། །གཡོན་པས་རཏྣའི་གཞོང་པ་བསྣམས། །སྟག་གདོང་གཟིག་ཤུབས་རལ་གྲི་སོགས། །འཁོར་གསུམ་སྐེད་བསྐོར་ཟ་འོག་གི། །ལྷམ་གསོལ་དུང་རྟ་གཡུ་རྔོག་ཅན། །རིན་ཆེན་སྒ་སྲབ་དར་སྟན་མཛེས། །རླུང་གི་རྩལ་ལྡན་ཆིབས་སུ་བཅིབས། །མཆེད་དང་བཙུན་མོ་སྲས་འཁོར་རྣམས། །རྣམ་འགྱུར་ཅིར་ཡང་སྟོན་ཅིང་བསྒྱུར། །མཆོད་པའི་གནས་འདིར་སྤྱན་འདྲེན་ན། །མ་ཐོགས་མྱུར་བར་གཤེགས་སུ་གསོལ། །ༀ་བྷཱུ་མི་པ་ཏི་ལོ་ཀ་པཱ་ལ་ས་པ་རི་ཝཱ་ར་བཛྲ་ས་མ་ཡ་ཛ་ཛཿ ཞེས་སྙན་པའི་དབྱངས་དང་རོལ་མོ་བཅས་ཀྱིས་སྤྱན་འདྲེན་ལ། དེ་ནས་བཞུགས་སུ་གསོལ་བ་ནི། ཀྱཻ། སྐུ་མཁར་འཕྲུལ་གྱི་ལྡིང་ཁང་རྒྱ་རེ་ཆེ། །སྣ་ཚོགས་རིན་ཆེན་ཁྲི་བཤམས་བཀོད་རེ་ལེགས། །པདྨ་འདབ་རྒྱས་ཟླ་
གདན་མདངས་རེ་གསལ། །སྤྱན་གཟིགས་དཀོར་ཆས་རྣམས་ནི་ལྷབ་མ་ལྷུབ། །དགྱེས་རྫས་འདོད་ཡོན་ལོངས་སྤྱོད་སྤུངས་སེ་སྤུངས། །ལྷ་ཆེན་འཁོར་བཅས་བརྟན་པར་བཞུགས་སུ་གསོལ། །ས་མ་ཡ་ཏིཥྛ་ལྷན། དེ་ནས་རང་ཡི་དམ་དུ་གསལ་བའི་ངང་ནས་སྤྱི་བོར་རྡོ་རྗེ་བཞག་པར་དམིགས་ནས་དམ་ལ་བཞག་པ་ནི། ཧྲཱིཿ སྔོན་ཚེ་ཀུན་བཟང་ཆེ་མཆོག་ཧེ་རུ་ཀས། །དཀྱིལ་འཁོར་དབང་བསྒྱུར་བཀའ་ཡི་སྲུང་མར་བསྐོས། །བར་དུ་མཚོ་སྐྱེས་པདྨ་རྒྱལ་པོའི་དྲུང་། །ཁས་བླངས་དམ་བཅས་ཟབ་གཏེར་གཉེར་ཁ་གཏད། །ཐ་མར་རིག་འཛིན་རྩ་བརྒྱུད་བླ་མ་ཡི། །སྤྱན་སྔར་བཀའ་བསྒོས་དམ་ལ་བཞག་པའི་ཚེ། །སངས་རྒྱས་བསྟན་པ་སྲུང་བར་མ་ཆད་དམ། །སྒྲུབ་མཆོག་སྐྱོང་བར་ཞལ་བཞེས་མ་ལགས་སམ། །རྡོ་རྗེའི་ཐ་ཚིག་མ་གཡེལ་རྗེས་དགོངས་ལ། །དེང་འདིར་ཆོས་ཀྱི་བརྒྱུད་འཛིན་རྣལ་འབྱོར་པས། །དམ་ཚིག་དབང་གིས་གནས་འདིར་སྤྱན་འདྲེན་གྱི། །བཤམས་པའི་གདན་ལ་དགྱེས་པར་བཞུགས་ནས་ཀྱང་། །མཉེས་པའི་མཆོད་པ་དམ་པ་འབུལ་ལགས་ན། །ཡལ་གམ་གཉན་ལ་མ་འདའ་ས་མ་ཡ། །བྷཱུ་མི་པ་ཏི་ས་པ་རི་ཝཱ་རེ་བྷྱཿས་མ་ཡ་རཀྵནྟུ། དེ་ནས་མཆོད་པ་འབུལ་བ་ནི། ཐལ་མོ་སྦྱར་ནས་སངས་རྒྱས་ཀྱི་ཡོན་ཏན་རྗེས་སུ་དྲན་བཞིན་པས། དེ་བཞིན་གཤེགས་པ་རིན་ཆེན་མང་ལ་ཕྱག་འཚལ་ལོ། །དེ་བཞིན་དུ།
གཟུགས་མཛེས་དམ་པ་ལ༴ སྐུ་འབྱམས་ཀླས་ལ༴ འཇིགས་པ་ཐམས་ཅད་དང་བྲལ་བ་ལ༴ མཆོད་སྦྱིན་གྱི་ཕྱག་རྒྱ་དང་བཅས། ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ༀ་སམྦྷ་ར་སམྦྷ་ར་ཧཱུྃ། ལན་གསུམ་གྱིས་བསྔོ་ཞིང་། ཀྱེ་ཧོ། ལྷ་ཡི་དགེ་བསྙེན་ཆེན་པོ་སྨན་བཙུན་སྡེ། །སྲས་ལྕམ་སྤྲུལ་འཁོར་བཅས་པ་ཐམས་ཅད་དང་། །ཟོ་དོར་མུ་ནམ་མཆེད་བརྒྱད་རང་རིགས་སྡེ། །ཆུ་ཤེལ་ནོར་བུའི་འཛུམ་དཀར་རབ་འཚེར་བའི། །དགྱེས་ཞལ་འོད་སྣང་ཕྲེང་བ་ངོམས་པར་མཛོད། །འཆི་མེད་བདུད་རྩི་ཅན་ཤིང་རྣམ་མང་པོ། །མ་ལ་ཡ་ཀླུང་དྲི་བཞོན་དང་མཚུངས་པ། །འབར་གཡོའི་འདུ་བྱེད་མཁའ་ཡི་གླང་པོ་དང་། །དབང་གཞུ་ལྟར་བཀྲའི་ཟེར་མ་རེ་རེ་ལས། །བཀྲ་ཤིས་རྫས་རྟགས་བརྒྱད་དང་རྒྱལ་སྲིད་བདུན། །ཉེ་བའི་རིན་ཆེན་འདོད་ཡོན་རྣམ་པ་ལྔ། །དངོས་སུ་འབྱོར་དང་ཡིད་ཀྱིས་སྤྲུལ་ནས་སུ། །ཟག་མེད་བདེ་བ་ཆེན་པོ་སྐྱེད་བྱེད་པའི། །མཆོད་པའི་སྤྲིན་ཕུང་རབ་འབྱམས་མཐའ་ཀླས་པ། །ཀུན་ཏུ་དཀྲིགས་པས་ཞིང་རྣམས་བཀང་བྱས་ཏེ། །བསང་མཆོད་དགྱེས་པ་ཆེན་པོས་བཞེས་སུ་གསོལ། །རོལ་མཚོ་བདུན་གྱི་དཔལ་ལ་ཅོ་འདྲི་བའི། །ཡིད་ལ་སིམ་པ་སྟེར་བའི་དལ་འབབ་རྒྱུན། །དག་གཙང་དྲི་མེད་ཡན་ལག་བརྒྱད་ལྡན་ཆབ། །འབུལ་གྱི་ཐུགས་དམ་དབང་གིས་བཞེས་སུ་གསོལ། །མཐོ་རིས་མེ་ན་ཀ་ཡི་སྤྱོད་ཡུལ་ལས། །ཁྱད་འཕགས་
སྟེང་འཐུང་རྣམ་པ་སྣ་ཚོགས་པ། །འདབ་རྒྱས་གེ་སར་བཞད་པའི་སྐྱེད་ཚལ་རྣམས། །འབུལ་གྱི་ཟག་མེད་བདེ་བས་ཚིམ་པར་མཛོད། །ཧ་རི་ཙནྡན་ལྗོན་པའི་ནགས་ཀླུང་ངོགས། །སྐྱི་བསེར་དལ་བུས་བསྐུལ་འདྲའི་ངད་ལྡང་བ། །དྲི་བསུང་ཕུན་ཚོགས་སྤོས་ཀྱི་བྱེ་བྲག་འཐུལ། །འབུལ་བཞེས་གྲིབ་དང་མི་གཙང་སེལ་གྱུར་ཅིག །ཕྱོགས་ཀྱི་གོ་སྐབས་གསལ་བར་བྱེད་པ་ཡི། །རིན་ཆེན་སྒྲོན་མེའི་བྱེ་བྲག་ཇི་སྙེད་པ། །སྲིད་པའི་སྣང་བྱེད་འོད་ཟེར་དང་མཚུངས་འདི། །འབུལ་གྱི་དགྱེས་པ་ཆེན་པོས་རོལ་པར་མཛོད། །གང་ཞིག་རེག་པས་བདེ་བའི་དཔལ་སྟེར་བྱེད། །ག་བུར་ཙནྡན་སིཧླ་གུར་གུམ་དང་། །ཨ་ག་རུ་སོགས་བྱུག་པའི་རྣམ་པ་གང་། །འབུལ་བཞེས་ཉམས་ཆག་བསྐང་ཞིང་དག་གྱུར་ཅིག །ལྷ་མིའི་ཞལ་ཟས་རོ་བཅུད་བརྒྱ་ལྡན་པའི། །བཟའ་བཏུང་བཅའ་བ་བལྡག་གཞིབ་མཆིས་སོ་ཅོག །རི་ལྟར་སྤུངས་ཤིང་མཚོ་ལྟར་བསྐྱིལ་བ་འདི། །འབུལ་གྱི་གཡར་དམ་གཉེན་པོ་བསྐང་གྱུར་ཅིག །གནྡྷར་དཔལ་མོའི་དབྱངས་ལ་སྙེམས་སྟེར་ཞིང་། །མིའམ་ཅི་ཡི་སྐད་གདངས་ཟིལ་གནོན་པའི། །སྒྲ་སྙན་རོལ་མོའི་བྱེ་བྲག་ཅི་ཡང་ལྡིར། །ཐོས་འཛིན་དཔྱིད་དུ་དགྱེས་བརྩེར་རོལ་པར་མཛོད། །ༀ་མ་ཧཱ་དེ་ཝ་ཨུ་པ་སི་ཀ་ས་པ་རི་ཝཱ་ར་ཨརྒྷཾ། པུཥྤེ། དྷཱུ་པེ། ཨཱ་ལོ་ཀེ། གནྡྷེ། ནེ་ཝིདྱ། ཤབྡ་
པྲ་ཏཱི་ཙྪ་ཡེ་སྭཱ་ཧཱ། ཞེས་རོལ་མོའི་རིགས་རྣམས་གང་ཡོད་བསྒྲགས་ལ། དེ་ནས་སྐྱེམས་དང་ཕྱེ་མར་གཏོར་མ་ལ་སོགས་མཐུན་རྫས་རྣམས་འབུལ་བ་ནི། ཧོ། རིན་ཆེན་བཻ་ཌཱུཪྱ་ཡི་ཡོལ་གོ་རུ། །ཛ་གད་དཔའ་བོའི་ཉིང་ཁུ་རྒྱ་མཚོར་འཁྱིལ། །གསེར་དངུལ་གཡུ་སོགས་རིན་ཆེན་འབྲུ་སྣ་སྨན། །རྨད་བྱུང་བཅུད་ལེན་ལྟ་བུར་དགྱེས་པར་རོལ། །རིན་ཆེན་ཨཱིནྡྲ་ནཱི་ལའི་སྣོད་ཡངས་པར། །རྩི་བཅུད་ཡོངས་འདུ་དཀར་ཕུད་གཙང་མ་དང་། །ཙཱི་ནའི་ལྗོན་འདབ་ལས་བྱུང་ཕུད་རྒོད་སྐྱེམས། །འབུལ་བཞེས་ཐུགས་ཀྱི་དགྱེས་པ་བསྐང་གྱུར་ཅིག །བ་ལིཾ་དཀར་བཤོས་རི་ལྟར་ཟངས་སེ་ཟང། །རྩེ་རྒྱན་ཉི་ཟླའི་མདངས་འོད་ཏ་ལ་ལ། །དར་སྣ་སྟག་རས་གཟིག་རས་ལྷབས་སེ་ལྷབ། །ཁྱུང་འབྲུག་འདབ་ཆགས་རྣམས་ནི་འཕུར་ལྡིང་འཕྱོ། །གདོང་ལྔའི་དབང་དང་སྟག་གཟིག་གཅན་གཟན་རྣམས། །གཏུམ་ཞིང་རྔམ་པའི་ངར་སྐད་སྒྲོག་ཅིང་རྒྱུ། །རི་དྭགས་གནག་ཕྱུགས་ཁྱུ་ཆེན་མེ་རེ་རེ། །ཕྱེ་མར་ཟས་ཕུད་རྣམས་ནི་སྤུངས་སེ་སྤུངས། །ནམ་མཁའ་མདའ་འཕང་རྒྱང་བུ་ལྡེམས་སེ་ལྡེམ། །ཤེལ་ཚིག་ཁྲི་དཀར་སྟོང་ནག་རྐང་འགྲོས་རིགས། །རྟ་གཡག་ར་ལུག་དུ་མར་སྤྲུལ་པ་དང་། །གོ་མཚོན་དཔའ་རྟགས་རྔམ་ཆས་སྐྱི་གཡའ་བར། །གཞན་ཡང་ལྷ་མིའི་དཀོར་ནོར་བསམ་ཡས་པ། །བཀོད་ལེགས་ཚར་དུ་དངར་བ་ལྟ་ན་སྡུག །
རྒྱ་ཆེན་རྒྱུན་མི་ཆད་པར་བློས་བླངས་ནས། །རྣམ་དག་ཐུགས་དམ་གཉན་པོ་བསྐང་ཕྱིར་འབུལ། །ཁྱད་པར་ཞི་བ་བསང་གིི་དུད་སྤྲིན་འདིས། །དཀར་ཕྱོགས་ལྷ་ཀླུ་སྡེ་བརྒྱད་ཐམས་ཅད་ལ། །སྙིགས་ལྔའི་དུས་ཀྱི་སེམས་ཅན་སྤྱོད་ངན་དབང་། །གནས་དང་གཞི་ཡི་བདག་རྣམས་ཉམས་ཤིང་གུད། །འཁྲུལ་དྲིས་ནོངས་པས་བསླད་པའི་དམ་གྲིབ་དང་། །མཁོན་གྲིབ་དམེ་གྲིབ་དག་གཙང་སངས་གྱུར་ཅིག །ཕོག་ཐུག་འགལ་བར་གྱུར་པ་གང་མཆིས་པ། །བཟོད་པར་བཞེས་ལ་བྱང་དག་ཚངས་པར་སྩོལ། །ༀ་བྷཱུ་མི་པ་ཏི་མ་ཧཱ་དེ་ཝ་ས་པ་རི་ཝ་ར་ཨི་དཾ་བ་ལིཾ་གྲྀཧྣ་ཁ་ཁ་ཁཱ་ཧི་ཁཱ་ཧི། མ་མ་སརྦ་ཀརྨ་སིདྡྷི་མྨེ་པྲ་ཡཙྪ་ཧཱུྃ། ཞེས་རོལ་མོ་དང་བཅས་བསང་རྫས་མཆོད་པ་རྣམས་ཕུལ་ལ། ཞལ་ནས་གསུངས་པའི་ཚིགས་སུ་བཅད་པའི་ཆོས་ཀྱི་སྦྱིན་པའང་བྱ་སྟེ། ཐལ་སྦྱར་དྲིལ་གསིལ་དང་བཅས། སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་སྤྱད། རང་གི་སེམས་ནི་ཡོངས་སུ་གདུལ། །འདི་ནི་སངས་རྒྱས་བསྟན་པ་ཡིན། །ཞེས་སོ། །དེ་ནས་བསྟོད་པ་ནི་རོལ་མོ་དང་བཅས། ཀྱེ་ཧོ། སྲིད་པའི་ལྷ་ཆེན་མཐུ་ལྡན་དྲེགས་པའི་ཚོགས། །ཀུན་གྱི་རྗེ་བོར་ལེགས་བྱས་བྱེ་བ་བརྒྱས། །མངོན་པར་འཕགས་པའི་བསྟན་སྐྱོང་ཁྱོད་ཀྱི་ཚུལ། །མཐོང་ནས་རབ་སྙན་དབྱངས་ཀྱིས་བསྟོད་པར་བགྱི། །མ་
ར་ཏ་ཀའི་ཞུན་མས་ལེགས་བཀྲུས་པའི། །བཻ་ཌཱུཪྱ་ཡི་ས་འཛིན་དྭངས་བའི་ངོགས། །དུས་བཞིའི་ངོ་མཚར་འཆར་བའི་ཨཱ་དཪྴ། །ལྕང་ལོ་ཅན་གྱི་ཕོ་བྲང་ཉིད་དང་མཚུངས། །འཆི་མེད་ལྷ་ཡི་བཏུང་པའི་ཡོན་ཏན་གང་། །བློ་ལྡན་བློ་ལ་རི་མོར་འདྲིར་བཟོད་པའི། །ཡན་ལག་བརྒྱད་ལྡན་དལ་གྱིས་འབབས་པ་དང་། །གཡའ་སྤང་སྨན་ལྗོངས་མེ་ཏོག་ཚལ་ཆེན་པོར། །དྲི་ཟའི་གླུ་ཡིས་མགྲིན་པར་མཛེས་པ་ཡི། །སྦྲང་རྩིའི་ཆང་མྱོས་དགའ་བའི་གཤོག་རྩལ་སྒྱུར། །སྣ་ཚོགས་རྐང་འཐུང་ལྗོན་པའི་ཡལ་འདབ་རྩེར། །འདབ་ཆགས་རྣམས་ཀྱང་རྩེ་འཇོའི་འཕུར་ལྡིང་གཡོ། །རི་སྐྱེས་རྐང་བཞི་པ་རྣམས་བག་ཕེབས་ཤིང་། །མཐོ་རིས་བདག་པོའི་དཀོར་ནོར་བཞིན་དུ་རྒྱུ། །མདོར་ན་ཛམ་བུས་མཚན་པའི་གླིང་མཆོག་གི། །ཕུན་ཚོགས་དཔལ་ཀུན་གཅིག་ཏུ་སྤུངས་པ་བཞིན། །ཕྱི་ལྟར་ཡིད་ཅན་མིག་ལ་སིམ་པ་བསྐྱེད། །ནང་ལྟར་རྩ་གསུམ་རྒྱལ་བ་རབ་འབྱམས་ཀྱི། །རང་བཞིན་དཀྱིལ་འཁོར་ཆེན་པོར་ལྷུན་རྫོགས་པ། །དཔའ་བོ་མཁའ་འགྲོ་རྟག་ཏུ་འདུ་བའི་ཞིང་། །ཨོ་རྒྱན་རང་བྱུང་གནས་མཆོག་གཉིས་པ་སྟེ། །གསང་བ་དོན་དམ་ཧེ་རུ་ཀ་ཡི་གནས། །དངོས་ཀུན་ཉེར་ཞི་རྡོ་རྗེ་བཙུན་མོའི་མཁའ། །མཐའ་ཡས་ཞིང་གི་ཡོན་ཏན་ཇི་སྙེད་པ། །ཅིག་ཆར་རྫོགས་པའི་ངོ་མཚར་བརྗོད་ལས་འདས། །
གནས་དེར་བསྟི་བའི་ལྷ་མཆོག་དགེ་བསྙེན་ཆེ། །བསྟན་ལ་རབ་གུས་རྣལ་འབྱོར་སྐྱོང་བའི་བློ། །དཀར་བ་ཐུན་མོང་ཉིད་གྱུར་སྐུ་མདོག་དང་། །ཆ་ལུགས་ཞོན་པ་འཁོར་ཚོགས་བགྲང་ཡས་རྣམས། །གང་ཞིག་མཆོད་ཅིང་བསྙེན་ལ་རེ་བའི་ཡིད། །ཤིང་རྟ་འགེངས་ཤིང་མཐུ་སྟོབས་གཟི་བྱིན་གྱིས། །བཀའ་འདས་ཉམས་པའི་ལོག་འདྲེན་དགྲ་བགེགས་རྣམས། །རྩད་ནས་གཅོད་ཅིང་ཐལ་བར་རློག་བྱེད་པ། །ཆོས་ཀྱི་སྲུང་མ་འཁོར་དང་བཅས་ལ་བསྟོད། །ཅེས་དང་། ཀྱཻ། ཕྱི་ལྟར་གངས་ཅན་རི་བོ་ལ། །དོ་ཟླར་བྱེད་པའི་ཁ་བའི་རྡུལ། །རབ་བརྩེགས་བཀྲ་ཤིས་རྟགས་ཀྱི་གྲངས། །མཐོ་ལ་བརྗིད་ཅིང་དགུང་དུ་བསྙེགས། །ནང་ལྟར་རིན་ཆེན་ལས་གྲུབ་པའི། །སྐུ་མཁར་གཞལ་ཡས་བཀོད་ལེགས་ཤིང་། །རྣམ་པར་རྒྱལ་བའི་ཕོ་བྲང་ནི། །ལྗོངས་འདིའི་དཔྱིད་དུ་འཕོས་པ་བཞིན། །དེར་གནས་དཀར་ཕྱོགས་སྐྱོང་བ་དང་། །རྒྱལ་བསྟན་སྲུང་བའི་མེལ་ཚེ་མཁན། །དམ་ལྡན་རྣལ་འབྱོར་བཀའ་ཉན་ཞིང་། །དམ་ཉམས་བསྟན་དགྲའི་དཔུང་གཞོམ་པ། །རྡོ་རྒྱལ་མུ་ནམ་མཆེད་བརྒྱད་ནི། །ལྷ་ཡི་རྫིང་རིང་མཛེས་པའི་གཉེན། །རྒྱུ་སྐར་བདག་པོའི་ཁེངས་འཕྲོག་པའི། །སྐུ་མདོག་ཕྱག་མཚན་བཞོན་པར་བཅས། །སྲེད་མེད་བུ་དང་གདོང་བཞི་པའི། །སྒྱུ་རྩལ་རང་དབང་ཉིད་གྱུར་པ། །མྱུར་མགྱོགས་མཐུ་
རྩལ་སྟོབས་དང་ལྡན། །རིགས་མཐུན་སྤྲུལ་དང་ཡང་སྤྲུལ་ཚོགས། །མ་ལུས་འཁོར་དང་བཅས་རྣམས་ལ། །དང་བའི་ཡིད་ཀྱིས་བསྟོད་པར་བགྱི། །གྲངས་འདོན་པའི་ཚེ། གོང་གི་དེ་བཞིན་གཤེགས་པའི་མཚན་ནས་མཐར་ཆགས་སུ་བཏོན་ལ། ཚར་རྗེས་མར་མཆོད་གཏོར་ལྔ་ཚོམ་ཅན་གཉིས་དེ་ཡང་འབུལ་ནས། འདོད་དོན་གསོལ་ཞིང་ཕྲིན་ལས་བཅོལ་བ་ནི། ཀྱཻ། གསོལ་ལོ། མཆོད་དོ། སངས་རྒྱས་ཀྱི་བསྟན་པ་རིན་པོ་ཆེ་སྲུང་ཞིང་། རྣལ་འབྱོར་སྒྲུབ་པ་པོའི་སྡོང་གྲོགས་མཛད་པར་ཞལ་གྱིས་བཞེས་པའི་དཀར་པོ་ལྷ་ཡི་སྡེ་རིས་ཡོངས་ཀྱི་གཙོ་བོ། རིགས་ཆོས་རྒྱུད་ཀྱི་སྲུང་མ་གཉན་པོ། སྲིད་པའི་ལྷ་ཆེན་རྡོ་རྗེ་བློ་གྲོས་རྩལ་སྨན་བཙུན་དགྱེས་སྡེ་མ་མོའི་ཚོགས་དང་། ལྷ་རིགས་ཀྱི་སྲས་ལྕམ་རྣམས་དང་། ཕྱི་ནང་བཀའ་ཡི་ལས་བྱེད་བློན་འཁོར་ཕོ་ཉ་སྤྲུལ་དང་ཡང་སྤྲུལ་ལྷ་ཀླུ་གཉན་གྱི་དཔུང་ཚོགས་ཡན་ལག་བཞི་དང་ལྡན་པ་ཁྱེད་རྣམས་གསོལ་ལོ་མཆོད་དོ། །བསྟོད་དོ། །བསྔགས་སོ། །སྒྲུབ་པོ། །བརྟེན་ནོ། །ཀྱཻ། ལྷ་ཡི་དགེ་བསྙེན་དམ་པ་ཆོས་ཀྱི་སྲུང་མ། ཤར་གྱི་ཕྱོགས་སྐྱོང་རྡོ་རྒྱལ་མུ་ནམ་གཉན་པོ་རྡོ་རྗེ་གཡུ་དྲུང་དཔལ་འབར་དུང་གི་མི་ཕོ་ཆེན་པོ་མཆེད་ཟླ་བརྒྱད། ལྷ་སྨན་བཙུན་མོ་སྲས་དང་འཁོར་ཚོགས་ལས་མཁན་སྤྲུལ་པ་སྡེ་དཔུང་བསམ་གྱིས་མི་ཁྱབ་པ་ཁྱེད་རྣམས་གསོལ་ཞིང་མཆོད་
དོ། །བསྟོད་ཅིང་བསྔགས་སོ། །སྒྲུབ་ཅིང་བརྟེན་ནོ། །གནས་དང་ཡུལ་གྱི་བདག་པོ་ཁྱེད་རྣམས་ལ་བཅོལ་པའི་ཕྲིན་ལས་སུ་བྱ་བ་ནི། སློབ་དཔོན་ཆེན་པོ་པདྨ་འབྱུང་གནས། གྲུབ་པའི་དབང་ཕྱུག་ཀརྨ་པཀྴི། བདུད་འདུལ་ནུས་ལྡན་རྡོ་རྗེ་ལ་སོགས་པ་རིག་འཛིན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བསྒོས་དམ་ཚིག་གཉན་ལས་མ་འདའ་བར། སྤྱིར་སངས་རྒྱས་ཀྱི་བསྟན་པ་རིན་པོ་ཆེ་དང་། ཁྱད་པར་དུ་སྒྲུབ་བརྒྱུད་བསྟན་པའི་སྙིང་པོ་ཀརྨ་ཀཾ་ཚང་གི་རིང་ལུགས་རྒྱལ་མཚན་སྲིད་ན་མངོན་པར་མཐོ་ཞིང་བསྒྲེང་བ་དང་། དེ་འཛིན་གྱི་སྐྱེས་མཆོག་རྣམས་ཀྱང་ཞབས་པད་བསྐལ་བརྒྱར་བརྟན་ཅིང་ཕྲིན་ལས་རྣམ་བཞི་ལྷུན་གྱིས་གྲུབ་པ་དང་། འཕགས་ཚོགས་དགེ་འདུན་གྱི་སྡེ་རྣམས་དར་ཞིང་རྒྱས་ལ་བཤད་དང་སྒྲུབ་པའི་འཁོར་ལོས་ས་སྟེང་ཁྱབ་ཅིང་ཡུན་རིང་དུ་གནས་པ་དང་། མི་དབང་ས་སྐྱོང་སྡེ༵་བཞི་མངོན་མཐོའི་ཆབ་སྲིད་བརྟན་ཅིང་དཀར་པོ་དགེ༵་བཅུའི་ཚུལ་ལ་རྟག་ཏུ་གཞོལ་བ་དང་། མཐའ་བཞིའི་དྲེགས་ལྡན་རྣམས་ཀྱང་བློ་དམ་པའི་ཆོས་ལ་བསྒྱུར་ནུས་པ་དང་། མངའ་རིས་ཡུལ་ལྗོངས་རྣམས་སུ་བདེ་སྐྱིད་དཔལ་འབྱོར་དབྱར་གྱི་མཚོ་ལྟར་རྒྱས་ཤིང་།
ཆར་ཆུ་དུས་སུ་འབབ། ལོ་ཕྱུགས་རྟག་ཏུ་ལེགས། ནད་དང་མུ་གེ་མཚོན་འཁྲུགས་ཀྱི་བསྐལ་བ་ངན་པ་མི་མཐུན་པའི་རིགས་ཐམས་ཅད་ཞི་ཞིང་རྫོགས་ལྡན་གསར་པའི་ལང་ཚོ་བཞད་པ་དང་། བཀའ་ལས་འདས་པའི་དམ་སྲི་དམ་ལོག་གདུག་འདྲེ་རྒྱལ་འགོང་མི་བསྲུན་པ་དངོས་ཅན་དང་དངོས་མེད་ཐམས་ཅད་དྲག་པོའི་སྟོབས་ཀྱི་ཚར་བཅད་ཅིང་ཕ་མཐར་བསྐྲད་པ་དང་། ཐལ་བའི་རྡུལ་ཕྲན་བཞིན་དུ་བརླག་པའི་ཕྲིན་ལས་མཛད་དུ་གསོལ། རྣལ་འབྱོར་སྒྲུབ་པ་པོ་བདག་གིས་བཅོལ་པའི་ལས་དང་དགོས་པའི་དོན་རྣམས་སྒྲུབས། སྡང་བའི་དགྲ་དང་གནོད་པའི་བགེགས་རྣམས་ཐུལ། བར་གཅོད་ཀྱི་རྐྱེན་ཟློག །རྟག་ཏུ་སྲུང་སྐྱོབ་མཛོད། ཚེ་དང་བསོད་ནམས་དཔལ་དང་གྲགས་པ་ཐམས་ཅད་ཡར་ངོའི་ཟླ་ལྟར་གོང་ནས་གོང་དུ་འཕེལ་ཞིང་རྒྱས་པ་དང་། མདོར་ན་གང་བཅོལ་པའི་འདོད་དོན་མཐའ་དག་ཐོགས་མེད་ཡིད་བཞིན་དུ་འགྲུབ་པའི་སྟོངས་གྲོགས་དམ་པ་མཛོད་ཅིག །མ་ཧཱ་ས་མ་ཡ་མ་ནུ་སྨ་ར་ཧྲཱིཿ ཞེས་རོལ་མོ་དང་བཅས་གསེར་སྐྱེམས་ནམ་མཁར་མཆོད་དོ། །དེ་ནས་ནོངས་པ་བཟོད་གསོལ་ནི། རྗེ་བཙུན་གོང་མས་བསྙེན་ཅིང་བརྟེན་པའི་ལྷ། །རིགས་ཆོས་བསྟན་སྐྱོང་མ་གྲུབ་རང་འཁོར་
བའི། །རྟག་ཏུ་འགོ་ཞིང་སྲུང་སྐྱོབ་སྡོང་གྲོགས་མཁན། །རྡོ་རྗེའི་དམ་ཅན་ཁྱེད་རྣམས་དགོངས་སུ་གསོལ། །བདག་ཅག་གཉིས་འཛིན་ཀུན་རྟོག་འཁྲུལ་དབང་གིས། །དེང་འདིར་གཏོར་མཆོད་དམན་དང་གཙང་སྦྲ་ཆུང་། །ལེ་ལོ་བག་ཉལ་དབང་གིས་ཉེས་པའི་ཚོགས། །ཐུགས་དང་འགལ་བར་གྱུར་རྣམས་བཟོད་པར་གསོལ། །རྒྱལ་བསྟན་སྲི་ཞུར་ལྷག་པའི་འདོད་དོན་གང་། །ཡར་ངོའི་ཟླ་ལྟར་འཕེལ་བའི་བཀྲ་ཤིས་ཤོག །དེ་ནས་བསང་གཞུང་གང་ཡིན་དེ་ལ་འཇུག་པར་བྱའོ། །འདི་ཉིད་ཁོ་ནའི་ཚེ་རྗེས་བསྡུ་ནི། ལྷ་རྣམས་རང་རང་གནས་སུ་བདེར་གཤེགས་ལ། །དུས་དང་དུས་སུ་སླར་ཡང་འབྱོན་པ་དང་། །རྣམ་ཀུན་དཔག་བསམ་ཡོངས་འདུ་དགེ་བའི་ཆར། །ཡིད་ལ་འཇོ་བའི་བཀྲ་ཤིས་མཛད་དུ་གསོལ། །ས་པ་རི་ཝཱ་ར་སྭ་སྦཱ་ནཾ་གཙྪ། ཞེས་པའང་ལྷ་ཆེན་པོ་ཟུང་གིས་དེང་འདིར་ལྷག་པར་ཕྲིན་ལས་ཀྱི་འོད་སྣང་ཆེས་ཆེར་སྤྲོ་བའི་ཆེད་དུ། སྔར་སྲོལ་ཡོད་བཞིན་པའི་བགྲང་བྱ་བསྟར་ཆགས་སུ་གཏང་རག་གི་བསང་མཆོད་སྐབས་འདོན་ཆ་ཁྲིགས་སུ་བསྡེབས་པ་འདི་ནི། སི་ཏུ་པདྨའི་མིང་ཅན་གྱིས་བཀོད་པ་སརྦ་མངྒ་ལམ། །
གཉན་ཆེན་ཐང་ལྷའི་བསང་མཆོད་འདོད་དོན་ལྷུན་གྲུབ།
གཉན་ཆེན་ཐང་ལྷའི་བསང་མཆོད་འདོད་དོན་ལྷུན་གྲུབ་བཞུགས་སོ། །གཉན་ཆེན་ཐང་ལྷའི་བསང་བྱ་བར་འདོད་པ་དག་གིས། ༀ་བཛྲ་ཨ་མྲྀཏ་སོགས་ཀྱིིས་བསངས་། སྭ་བྷཱ་ཝས་སྦྱངས། སྟོང་པའི་ངང་ལས་བྷཱུྃ་ལས་རིན་པོ་ཆེའི། །སྣོད་མཆོག་ཡངས་ཤིང་རྒྱ་ཆེ་རྣམས་ཀྱི་ནང་། །ལྷ་ཡི་ཞལ་ཟས་ཀུན་ཏུ་བཟང་པོ་ཡི། །རྣམ་ཐར་ཇི་བཞིན་ཟད་མི་ཤེས་པར་གྱུར། །ཀྱཻ། འཛམ་གླིང་ཉི་མ་བྱང་ཕྱོགས་ན། །ཤར་གྱི་རི་བོ་ལྟ་ན་སྡུག། འཆི་མེད་ཞིང་གི་ཕོ་བྲང་བཞིན། །དགེ་ལེགས་བཀྲ་ཤིས་ཀུན་འབྱུང་བའི། །གནས་མཆོག་དམ་པ་དེར་བཞུགས་པའི། །ས་བརྒྱད་བྱང་ཆུབ་སེམས་དཔའ་ཆེ། །ཟུར་ཕུད་ལྔ་པ་ཞེས་བྱ་བ། །འཁོར་ཚོགས་སྤྲུལ་པ་ཡང་སྤྲུལ་རྣམས། །ཐུགས་དམ་དབང་གིས་གནས་འདིར་གཤེགས། །འདིར་བཤམས་ཟ་འོག་རིན་ཆེན་ཁྲིར། །ལྷ་དབང་འཁོར་བཅས་བརྟན་པར་བཞུགས། །ཟག་མེད་མཆོད་སྤྲིན་དམ་པ་རོལ། །སྣང་སྲིད་ཟིལ་གནོན་པདྨ་ཐོད་ཕྲེང་དང་། །གྲུབ་མཆོག་དཔལ་ལྡན་རྗེ་བཙུན་ཀརྨ་པའི། །བསྟན་སྐྱོང་ཆོས་ཀྱི་སྲུང་མ་དམ་ཚིག་ཅན། །སྲིད་པའི་ལྷ་ཆེན་རྡོ་རྗེ་འབར་བ་རྩལ། །དྲི་མེད་སྐུ་མདོག་ཆུ་ཤེལ་ཕུང་པོ་ལ། །རབ་དཀར་ཆུ་འཛིན་དང་མཚུངས་རེག་བྱས་བཀླུབས། །ཕྱག་གཡས་སྦ་ལྕག་གཡུ་འབྲས་ཅན་བསྣམས་ནས། །བར་ཆད་བདུད་སྡེའི་ཚོགས་ཀུན་
ཉམས་པར་བྱེད། །གཡོན་པས་ལྷ་ཡི་བ་དན་དཀར་པོ་འཕྱར། །སྒྲུབ་བརྒྱུད་བསྟན་པའི་རྒྱལ་མཚན་སྲིད་རྩེར་བསྒྲེངས། །ཆིབས་སུ་རྟ་ཕོ་ངང་ཞུར་གཡུ་རྔོག་ཅན། །རྫུ་འཕྲུལ་རླུང་གི་རྩལ་ལྡན་ཆིབས་སུ་བཅིབས། །རྒྱལ་བའི་བསྟན་སྲུང་ཆེན་པོ་མངའ་གསོལ་ལོ། །དངོས་སུ་འབྱོར་དང་ཡིད་ཀྱིས་སྤྲུལ་པ་ཡིས། །སྣང་སྲིད་ཡོངས་བསྐང་མཆོད་གཏོར་རྒྱ་ཆེན་པོ། །འདོད་པའི་ལོངས་སྤྱོད་སྤྲིན་ལྟར་གཏིབ་པ་འདི། །ལྷ་ཆེན་འཁོར་བཅས་དགྱེས་པ་ཆེན་པོར་རོལ། །ཁྱད་པར་བདུད་རྩི་ཤིང་སྣའི་དུད་པ་འདིས། །སྐུ་ལྷ་གཉེན་པོ་ཡབ་ཡུམ་སྲས་འཁོར་ལ། །མི་གཙང་གྲིབ་ཀྱིས་ཕོག་པ་ཐམས་ཅད་སོལ། །རྣལ་འབྱོར་བདག་ཅག་བྱང་ཆུབ་སྤྱོད་པ་ལ། །ཉེས་པའི་ལོག་འདྲེན་བར་ཆད་ཀུན་ལས་གྲོལ། །ལས་བཞིའི་ཕྲིིན་ལས་གང་འདོད་ཡིད་བཞིན་དུ། །ཐོགས་པ་མེད་པར་ཐུགས་དམ་དབྱིངས་ནས་བསྐུལ། །བདག་ཅག་མ་རིག་འཁྲུལ་པའི་དབང་གྱུར་པས། །ཐུགས་འགལ་ཉེས་ཚོགས་ཐམས་ཅད་བཟོད་པར་བཞེས། །བཀྲ་ཤིས་བདེ་ལེགས་དཔལ་འབྱོར་ཆེན་པོ་ཡིས། །ཡོངས་སུ་འགེངས་པའི་ཕྲིན་ལས་མཛད་དུ་གསོལ། །གཙྪས་གཤེགས། ཞེས་པ་འདི་ཀརྨ་སི་ཏུས་ཆུ་གླང་ལོར་དད་བརྩོན་ལྡན་པ་འབྲུག་པ་བླ་མ་སྐྱིད་ཕུག་པ་དང་། ཀརྨ་བརྩོན་འགྲུས་བཅས་ཀྱི་དགོངས་བཞེད་ལྟར། འདམ་གྱི་བཀྲ་ཤིས་ཆོས་སྒར་ནས་བྲིས་པ་མངྒ་ལམ། །
སྤོམ་ར་ལ་གསེར་སྐྱེམས་འབུལ་བར།
སྤོམ་ར་ལ་གསེར་སྐྱེམས་འབུལ་བར་སྤྲོ་ན། བྷཱུྃ་ལས་རིན་ཆེན་ཨཱིནྡྲའི་སྣོད་མཆོག་ཏུ། །སྣང་སྲིད་རོ་བརྒྱ་ལྡན་པའི་བཏུང་པའི་ཚོགས། །དེང་འདིར་ཀུན་བཟང་མཆོད་པའི་སྤྲིན་སྤྲོ་བས། །ལྷ་ཡི་དགེ་བསྙེན་ཆེན་པོ་འཁོར་དང་བཅས། །དགྱེས་པ་བསྐྱེད་ཕྱིར་འབུལ་གྱི་བཞེས་སུ་གསལ། །དེ་ལྟར་ཕུལ་བའི་རྨད་བྱུང་མཐུ་དཔལ་གྱིས། །ཡིད་བཞིན་རེ་བསྐང་ཡོངས་འདུའི་ལྗོན་པ་བཞིན། །རྣལ་འབྱོར་འདོད་དོན་ཇི་ལྟར་ལྷུན་གྲུབ་ནས། །ཀུན་ཏུ་དགེ་བའི་བཀྲ་ཤིས་སྩོལ་གྱུར་ཅིག །བླ་མ་ཚེ་རིང་ངོར་སི་ཏུ་པས་སྤེལ། །
གེར་མཛོ་གཉན་པོའི་བསང་མཆོད།
ན་མོ་པདྨཱ་ཀ་ར་ཡེ། འདིར་གེར་མཛོ་གཉན་པོའི་བསང་མཆོད་རིམ་པ་འབུལ་བ་ནི། གཙང་སྦྲ་དང་ལྡན་པའི་མཆོད་གཏོར་དང་། གཞན་ཡང་སྤྱན་གཟིགས་དཀོར་ཆ་འདུ་བར་བྱས་ཏེ། ཧོ། སྐྱབས་ཡུལ་དམ་པ་མཆོག་གསུམ་དང་། །རྩ་བ་གསུམ་ལ་སྐྱབས་སུ་མཆི། །དེང་འདིར་མཆོད་སྦྱིན་དགེ་བའི་མཐུས། །འགྲོ་ཀུན་བླ་མེད་སངས་རྒྱས་ཤོག །སྭ་བྷཱ་ཝས་སྦྱངས། ཆོས་ཀུན་སྟོང་པ་ཆེན་པོའི་ངང་། །པད་ཟླར་ཧྲཱིཿཡིག་ཡོངས་གྱུར་ལས། །རང་ཉིད་མཚོ་སྐྱེས་པདྨ་རྒྱལ། །ཞལ་གཅིག་ཕྱག་གཉིས་རྡོ་རྗེ་ཐོད། །ཕོད་ཀ་ཆོས་གོས་ཟབ་བེར་གསོལ། །ཁ་ཊཱྃ་མཆན་བཅུག་སྐྱིལ་ཀྲུང་བཞུགས། །གནས་གསུམ་ༀ་ཨཱཿཧཱུྃ་གིས་མཚན། །ཡེ་ཤེས་འོད་ལྔའི་ཀློང་དུ་
གསལ། །བྷྲཱུྃ་ལས་རིན་ཆེན་སྣོད་ཡངས་པར། །འབྲུ་གསུམ་འོད་ཞུ་བསང་མཆོད་རྫས། །ཟད་མི་ཤེས་པ་ནམ་མཁའི་མཛོད། །འདོད་ཡོན་ལྔ་དང་ལྡན་པར་གྱུར། །ཀྱཻ། འཛམ་གླིང་སྐྱོང་བའི་སྐྱེས་གཅིག་པུ། །དགྲ་བླ་ཡོངས་ཀྱི་རྗེ་བོ་སྟེ། །གེར་མཛོ་གཉན་པོ་འཁོར་བཅས་རྣམས། །དེང་འདིར་རྣལ་འབྱོར་སྒྲུབ་པ་པོས། །དམ་ཚིག་དབང་གིས་སྤྱན་འདྲེན་ན། །སྔོན་གྱི་ཐུགས་དམ་མ་གཡེལ་བར། །སངས་རྒྱས་བསྟན་པ་བསྲུང་བའི་ཕྱིར། །མ་ཐོགས་མྱུར་དུ་ད་ཚུར་བྱོན། །འདིར་བཤམས་གདན་ལ་བཞུགས་སུ་གསོལ། །སྐུ་མདོག་ཉ་རྒྱས་ཟླ་ལྟར་དཀར། །ལྷོ་སྤྲིན་འཁྱུད་འདྲའི་འཇོལ་བེར་གསོལ། །ཕྱག་གཡས་རིན་ཆེན་གཞོང་པ་བསྣམས། །དགོས་འབྱུང་ལྷུན་གྲུབ་ཆར་ཆེན་འབེབས། །གཡོན་པས་དར་དཀར་བ་དན་འཕྱར། །སྒྲུབ་བརྒྱུད་བསྟན་པའི་རྒྱལ་མཚན་བསྒྲེངས། །ཆིབས་སུ་རྟ་མཆོག་རླུང་ཤུགས་ཅན། །དཀར་པོ་འཕུར་ཤེས་རྒྱན་ལྡན་ཆིབས། །མཐུ་ཆེན་དགྲ་བླའི་དཔུང་ཚོགས་རྣམས། །རྒྱུ་སྐར་ཕྲེང་བ་ལྟ་བུས་བསྐོར། །མཁའ་དབྱིངས་གང་བའི་མཆོད་པའི་རྫས། །ཀུན་བཟང་མཆོད་སྤྲིན་ཟག་མེད་ཀྱི། །བདུད་རྩི་ཤིང་གི་དུད་པ་ལ། །ཉེར་སྤྱོད་འདོད་ཡོན་དཀོར་ནོར་དང་། །རྒྱལ་སྲིད་བདུན་དང་བཀྲ་ཤིས་བརྒྱད། །
ཕྱེ་མར་ཛ་གད་ཨ་མྲི་ཏ། །འབྲུ་སྣ་རིན་ཆེན་སྨན་སྣ་དང་། །དར་ཟབ་གོ་མཚོན་ལ་སོགས་པ། །སྐོང་རྫས་སྒྲུབ་རྫས་མཐའ་ཡས་པས། །ལྷ་ཆེན་དགྲ་བླ་་འཁོར་བཅས་ལ། །མཆོད་དོ་འབུལ་ལོ་དགྱེས་པར་རོལ། །བསང་ངོ་བརྔན་ནོ་མངའ་གསོལ་ལོ། །བཞེས་ནས་ལས་བཞིའི་ཕྲིན་ལས་སྒྲུབས། །ཐོགས་མེད་མཐུ་ལྡན་སྐུ་ལྷ་ཁྱོད། །སྔོན་ཚེ་དཔལ་ཆེན་ཧེ་རུ་ཀ །ལྷ་མཆོག་རྡོ་རྗེ་གཞོན་ནུ་དང་། །རྒྱལ་དབང་པདྨ་འབྱུང་གནས་ཆེ། །སྣང་སྲིད་ཟིལ་གནོན་ཀརྨ་པ། །གྲུབ་པའི་དབང་ཕྱུག་པཀྵི་ཡིས། །བཀའ་བསྒོས་དམ་བཞག་མ་བསྙེལ་བར། །དམ་ཚིག་གཉན་པོ་རྗེས་དྲན་མཛོད། །སྲིད་པའི་ལྷ་ཆེན་དགྲ་བླའི་རྒྱལ། །མཐུ་སྟོབས་རྫུ་འཕྲུལ་ཅི་ཡང་སྟོན། །དཀར་པོ་ལྷ་ཡི་དགེ་བསྙེན་ཆེ། །ཡུལ་བདག་འཁོར་བཅས་བསྟོད་པར་འོས། །ཁྱོད་ལ་བཅོལ་པའི་ཕྲིན་ལས་ནི། །སངས་རྒྱས་བསྟན་པ་བསྲུང་བ་དང་། །སྐྱེས་མཆོག་ཞབས་པད་བསྐལ་བརྒྱར་བརྟན། །བདག་དང་རྒྱུ་སྦྱོར་ཡོན་བདག་གི། །མཐུན་རྐྱེན་སྒྲུབས་ལ་འགལ་རྐྱེན་སོལ། །དཔལ་དང་འབྱོར་པ་སྙན་གྲགས་སྤེལ། །བདེ་ཞིང་དགེ་བའི་སྟོངས་གྲོགས་མཛོད། །མི་མཐུན་ཉེར་འཚེའི་བདུད་རིགས་རྣམས། །རྨེག་མེད་ཐལ་བར་བརླག་པ་དང་། །མཐའ་བཞིའི་
དྲེགས་ལྡན་ཁེངས་པ་ཅན། །ཐམས་ཅད་དབང་དུ་གྱུར་ནས་སུ། །ཆོས་ཀྱི་རྒྱལ་མཚན་འཛུགས་པ་ཡི། །མ་གཡེལ་མ་འདའ་ཐུགས་དམ་ཅན། །རྣལ་འབྱོར་བདག་གི་བཅོལ་བའི་ལས། །ཐོགས་པ་མེད་པར་འབྱུང་བ་ཡི། །ཕྲིན་ལས་རྣམ་བཞི་བསྒྲུབ་པར་མཛོད། །ཀྱཻ། །སྲིད་ཞིའི་བདེ་ལེགས་གཡང་དུ་ལེན། །ཕྱེ་མར་འདི་ལ་བཅུད་གཡང་ཕོབ། །ཕྱྭ་དང་གཡང་གི་དངོས་གྲུབ་རྣམས། །འབད་མེད་ལྷུན་གྱིས་འགྲུབ་པར་མཛོད། །ཅེས་མདའ་དར་གཡབ་ཅིང་ཕྱེ་མར་དྲངས། བཤགས་པ་དང་བསྔོ་སྨོན་བཀྲ་ཤིས་ནི། འགལ་འཁྲུལ་ལྷག་ཆད་ནོངས་པ་བཤགས། །བྱང་དག་ཚངས་པར་མཛད་ནས་ཀྱང་། །འཁོར་བཅས་རང་གནས་ཅི་བདེར་གཤེགས། །དུས་སུ་སླར་ཡང་འབྱོན་པར་མཛོད། །གཙྪས་གཤེགས། དེ་ལྟར་མཆོད་བསྟོད་དགེ་བ་དེས། །འགྲོ་ཀུན་གཏན་བདེའི་གོ་འཕང་ཐོབ། །བཀྲ་ཤིས་དོན་གཉིས་འགྲུབ་པ་ཡི། །དགེ་ལེགས་དམ་པར་སྤྱོད་གྱུར་ཅིག །ཅེས་ཡུལ་ལྷ་གེར་མཛོའི་བསང་མཆོད་འདི་བཞིན་ཉེ་གནས་པ་དབོན་དྲུང་མཛོད་པ་ཀརྨ་ཕྲིན་ལས་ཡེ་ཤེས་ཀྱིས་བསྐུལ་ལྟར་སི་ཏུ་པདྨ་ཉིན་བྱེད་དབང་པོས་སྤེལ་བ་སརྦ་མངྒ་ལམ། །
ཨོ་ཆུང་གིས་བསྐུལ་ངོར།
ཨ་མྲྀ་ཏས་བསངས།སྭ་བྷཱ་ཝས་སྦྱངས་ལ། སྟོང་ལས་བསང་ཁང་ཡིད་འོང་ནང་། །འབྲུ་གསུམ་འོད་ཞུ་མཆོད་
པའི་རྫས། །ཟག་མེད་བདེ་ཆེན་སྐྱེད་བྱེད་པའི། །བདུག་སྤོས་སྤྲིན་ཆེན་གཡོ་བར་གྱུར། །ༀ་བཛྲ་སྥ་ར་ཎ་ཁཾ། ལན་གསུམ་གྱིས་སྤེལ་ལ། ཀྱཻ། བླ་མེད་དཀོན་མཆོག་རིན་ཆེན་གསུམ། །བླ་མ་ཡི་དམ་མཁའ་འགྲོ་དང་། །དཔའ་བོ་དམ་ཅན་ཆོས་སྐྱོང་ཚོགས། །ཏི་སེ་ཐང་ལྷ་སྤོམ་ར་གཉན། །ཟིལ་ཕྲོམ་གཉེན་ལྡང་ལ་སོགས་པ། །དཀར་ཕྱོགས་སྐྱོང་བའི་ཡུལ་གཞིས་བདག །གནས་བདག་དགེ་བསྙེན་ཞལ་ད་དང་། །དབུ་ཆེ་བྲག་དཀར་སྨུག་སངས་སོགས། །སྒྲུབ་པའི་སྟོངས་གྲོགས་མཛད་པ་ཡི། །གཉུག་མར་གནས་པའི་ཟོ་དོར་དང་། །ལྷ་ཀླུ་གཉན་དང་ས་བདག་རྣམས། །འདིར་བྱོན་དགྱེས་པའི་གདན་བཞུགས་ལ། །ཡིད་སྤྲུལ་མཆོད་པའི་རྣམ་པ་ཀུན། །བློ་ཡིས་བླངས་ཏེ་ཀུན་བཟང་གི། །རྣམ་ཐར་མཆོད་སྤྲིན་ཇི་བཞིན་པར། །མཆོད་འོས་སོ་སོར་མཐུན་རྫས་ཀྱི། །ལོངས་སྤྱོད་རྒྱ་ཆེན་ཟད་མེད་པ། །འབུལ་བཞེས་དངོས་གྲུབ་དམ་པ་སྩོལ། །ལེགས་དང་རྒྱལ་ཁ་བཏོང་པ་དང་། །བསམ་པ་ཡིད་བཞིན་འགྲུབ་པར་མཛོད། །གཞི་བྱེས་ཀུན་ཏུ་བསྲུང་ཞིང་སྐྱོབས། །ཚེ་རིང་ནད་མེད་བདེ་ཞིང་སྐྱིད། །ཆོས་ལྡན་འབྱོར་པ་རྒྱས་པ་དང་། །བར་ཆད་ཉེར་འཚེ་འགལ་རྐྱེན་ཚོགས། །མི་མཐུན་ཕྱོགས་ཀུན་བསྒྱུར་དུ་གསོལ། །ཁྱེད་རྣམས་ཐུགས་
དང་གང་འགལ་བ། །བཟོད་བཞེས་ཕྲིན་ལས་རྣམ་པ་བཞིར། །དབང་བསྒྱུར་མཐུ་རྩལ་ཅན་རྣམས་བསྟོད། །དུས་ཀུན་དགེ་བའི་བཀྲ་ཤིས་ཀྱི། །དཔལ་དུ་འབར་བས་ཁྱབ་པ་དང་། །རང་བཞིན་གནས་གཤེགས་སླར་ཡང་ནི། །དུས་སུ་འབྱོན་པར་མཛད་དུ་གསོལ། །ཞེས་པའང་ཨོ་ཆུང་གིས་བསྐུལ་ལྟར་སྤེལ། །
ཚེ་རིང་མ།
ཨ་མྲྀ་ཏས་བསངས།སྭ་བྷཱ་ཝས་སྦྱངས། ཆོས་ཀུན་དམིགས་མེད་སྟོང་ཉིད་གྱུར། །སྟོང་བའི་ངང་ལས་བསང་མཆོད་རྫས། །འདོད་ཡོན་རྣམ་མང་བཀོད་པའི་ཚོགས། །ནམ་མཁའ་མཉམ་པའི་རང་བཞིན་གྱུར། །ༀ་བཛྲ་སྥ་ར་ཎ་ཁཾ། ལན་གསུམ་གྱིས་བྱིན་བརླབས་ལ། ཧྲཱིཿ རང་ཉིད་ཡི་དམ་ལྷར་གསལ་བའི། །ཐུགས་ལས་འོད་འཕྲོས་བསྟན་སྲུང་གཙོ། །དཔལ་འབར་བཀྲ་ཤིས་ཚེ་རིང་མ། །རྡོ་རྗེ་མི་འགྱུར་ལྷ་མོ་ནི། །དབུས་འགྱུར་གནྡྷོའི་བྱང་གི་ཆར། །བལ་བོད་མཚམས་ཀྱི་གནས་ཀྱི་མཆོག །འབྲོག་ཆེན་ལ་ཕྱིའི་གངས་ཀྱི་ལྗོངས། །ཤེལ་དཀར་སྤུངས་དང་ཟླ་ཞུན་ཟེར། །ས་འཛིན་ཀེ་ལ་ཤ་ཡི་ངོགས། །དབང་གཞུ་ལྟར་བཀྲའི་དར་གུར་གྱི། །ངོ་མཚར་ལྷ་ཡི་ཕོ་བྲང་ནས། །ཡེ་ཤེས་ལས་དང་འཇིག་རྟེན་པའི། །སྲིད་གསུམ་མཁའ་འགྲོའི་ཚོགས་ཀྱི་རྗེ། །འཁོར་དང་སྤྲུལ་པ་ཡང་འཁོར་བཅས། །སྔོན་ཚེ་རིག་
འཛིན་གསང་བའི་བདག །སྤྱན་སྔར་ཞལ་བཞེས་རྗེས་དྲན་ནས། །དམ་ཚིག་གཉན་པོའི་དབང་གིས་ནི། །སྐད་ཅིག་ཐོགས་མེད་རྫུ་འཕྲུལ་གྱིས། །སྨན་བཙུན་རྒྱལ་མོ་མཆེད་ལྔ་པོ། །འདིར་གཤེགས་འདིར་བྱོན་སྤྱན་འདྲེན་ནོ། །གནས་འདིར་དགྱེས་པར་པདྨ་དང་། །ཉི་ཟླའི་གདན་ལ་བཞུགས་སུ་གསོལ། །ཀྱཻ། ཁྱེད་ལ་མཆོད་པ་འབུལ་བ་ནི། །རབ་དཀར་ལྷུན་སྡུག་མུ་ཏིག་མདངས། །འོད་འཚེར་ཡིད་འོང་བསང་ཁང་ནང། །དྲི་བསུང་ཕུན་ཚོགས་རྐང་འཐུང་གི། །རྣམ་པ་ཇི་སྙེད་མ་ལ་ཡའི། །རླུང་བསྐྱོན་ཙནྡན་ཧ་རི་ལྗོན། །ངད་ལྡན་ལས་ཀྱང་ཆེར་ལྷག་པའི། །བདུག་སྤོས་སྤྲིན་ཕུང་མཁའ་དབྱིངས་གང། །འོད་ཀྱི་ཟེར་མའི་འདུ་འཕྲོ་ལས། །བཀྲ་ཤིས་རྟགས་བརྒྱད་རྒྱལ་སྲིད་བདུན། །རྫས་བརྒྱད་རི་རབ་མཚོ་གླིང་བཀོད། །ཉེར་སྤྱོད་བདུན་དང་འདོད་ཡོན་ལྔ། །དམ་ཚིག་རྫས་མཆོག་བ་ལིངྟ། །འདོད་དགུའི་དཔལ་འབྱོར་ཅིར་ཡང་འཆར། །ཕྱེ་མར་ཛ་གད་ཕུད་སྣ་ཚོགས། །རྟ་ཕྱུགས་རྐང་འགྲོས་འདབ་ཆགས་རིགས། །གཞན་ཡང་ཕྱི་ནང་གསང་བ་ཡི། །སྐོང་རྟེན་སྒྲུབ་པའི་ཡོ་བྱད་རྣམས། །སྐབས་གསུམ་པ་དང་རྨུགས་འཛིན་དབང་། །གདེངས་ཀ་ཅན་གྱི་ལོངས་སྤྱོད་ལས། །ཁྱད་པར་འཕགས་པའི་མཆོད་པའི་རྫས། །དངོས་འབྱོར་སྤྲུལ་པ།
ཤོག་ལྷེབ་གཅིག་མི་ཚང་།
ས་སྤྱོད་གསུང་གི་གནས་མཆོག་ཀརྨ་རི་གླིང་གི་ཆོས་གྲྭ་ཆེན་པོའི་བླ་མ་དགེ་ལེགས་ཀྱིས་བསྐུལ་པའི་ངོར།
ཤོག་ལྷེབ་གཅིག་མི་ཚང་།
གསུམ་གྱིས་སྦྲུས་པའི་མཆོད་གཏོར་ཕྱེ་མར། དར་ཟབ་སྣ་ཚོགས། འབྲུ་སྣ། སྨན་སྣ། རིན་ཆེན་ཕྱེ་མ། ཇ་ཕུད། ཆང་ཕུད། དཀར་ཕུད། གསེར་སྐྱེམས། ཉེར་སྤྱོད་ལྔ་སོགས་དང་། དར་དཀར་བ་དན། གོ་ཁྲབ་མཚོན་ཆ་དཀོར་ཆས་གཟུགས་འགྲོས་སོགས་རྒྱས་པར་བཤམས་ལ། རང་ཉིད་ལྷའི་ང་རྒྱལ་དང་ལྡན་བཞིན་པས་མཆོད་རྫས་རྣམས། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་བྷྲཱུྃ་ལས་རིན་པོ་ཆེའི་སྣོད་ཡངས་ཞིང་རྒྱ་ཆེ་བ་རྣམས་ཀྱི་ནང་དུ་ༀ་ཨཱཿཧཱུྃ་ཞུ་བ་ལས་བྱུང་བའི་གཏོར་མ་འདོད་དགུའི་རྒྱ་མཚོ་ཆེན་པོ་དང་། བསང་མཆོད་དུད་པའི་སྤྲིན་ཕུང་གི་ཟེར་མ་ལས་འཕྲོ་བའི་མཁོ་དགུའི་ཡོ་བྱད་ལྷ་མིའི་དཔལ་འབྱོར་ཡིད་དུ་འོང་བས་ཡོངས་སུ་གང་བ་དང་། གཞན་ཡང་སྤྱན་གཟིགས་དཀོར་ཆས་གཟུགས་འགྲོས་ལ་སོགས་པ་ས་དང་བར་སྣང་ཁྱབ་པ་སོ་སོར་མོས་པའི་ལོངས་སྤྱོད་མི་ཟད་པ་ནམ་མཁའ་མཛོད་ཀྱི་རང་བཞིན་དུ་འཆར་བར་གྱུར། ཨ་ཀཱ་རོ་ལན་གསུམ་གྱིས་བྱིན་གྱིས་བརླབས། ཀྱཻ། བསྐལ་པ་བཟང་པོའི་ཞིང་ཁམས་འདིར། །བཅོམ་ལྡན་རྒྱལ་བ་སྟོང་འབྱུང་བའི། །སངས་རྒྱས་དྲུག་པ་སེངྒེ་ཡི། །རྣམ་འཕྲུལ་དཔལ་ལྡན་དུས་གསུམ་མཁྱེན། །སྐྱེས་རབས་ཕྲེང་བ་བཅུ་གསུམ་དང་། །རྣམ་འདྲེན་ལྔ་པ་མི་ཕམ་པ། །བྱམས་པ་མགོན་པོའི་གར་རོལ་པ། །འགྲོ་
མགོན་རས་ཆེན་ལ་སོགས་པ། །ཀཾ་ཚང་སྙིང་པོ་དོན་བརྒྱུད་ཀྱི། །ངོ་མཚར་སྒྲུབ་གནས་བྱིན་རླབས་ཅན། །རང་བཞིན་གདོད་ནས་ལྷུན་གྱིས་གྲུབ། །སྔོན་ཚེ་ཤཱཀྱ་སེངྒེ་ཡིས། །ཐུགས་རྗེའི་འོད་ཟེར་བསྟིམ་པ་ལས། །ས་སྤྱོད་གསུང་གི་དཀྱིལ་འཁོར་ཆེ། །འཁོར་ལོ་སྡོམ་པའི་ཕོ་བྲང་མཆོག །རིག་འཛིན་མཁའ་འགྲོ་འདུ་པའི་ཞིང་། །ཀརྨ་རི་གླིང་ཆོས་འཁོར་གྱི། །གནས་དང་གཙུག་ལག་བཀའ་སྲུང་བ། །ལྷ་ཡི་དགེ་བསྙེན་ཆེན་པོ་ཡི། །སྐུ་མཁར་རི་དབང་རབ་བརྗིད་པ། །ཕྱི་ལྟར་གཡའ་སྤང་ས་འཛིན་མཐོ། །དབྱར་སྐྱེས་སྒྲ་སྒྲོགས་ཆུ་ཁུར་འཁྲིགས། །ནང་ལྟར་བཀོད་པ་དཔག་ཏུ་མེད། །བསམ་བརྗོད་བྲལ་བའི་རང་བཞིན་ཅན། །རྨད་བྱུང་ལྷ་ཡི་གཞལ་ཡས་ཁང་། །ནོར་བུ་རིན་ཆེན་སྤུངས་པ་དང་། །ཟ་འོག་འཕན་དར་ལྷབ་མ་ལྷུབ། །སྣ་ཚོགས་འཇའ་འོད་ཁྱུགས་སེ་ཁྱུག །དེ་ལྟར་ལྷ་ཆེན་འཁོར་དང་བཅས། །གནས་འདིར་མཆོད་ཕྱིར་སྤྱན་འདྲེན་ན། །དམ་ཚིག་དབང་གིས་གཤེགས་ནས་ཀྱང་། །རང་རང་དགྱེས་དགུར་རོལ་པ་ཡི། །གདན་ལ་ཅི་ལྟར་བདེ་བར་བཞུགས། །འདིར་བཤམས་གཙང་ཞིང་ཡིད་འོང་བའི། །ཉེར་སྤྱོད་བདུན་དང་འདོད་ཡོན་ལྔ། །དཀར་མངར་རོ་བརྒྱ་ལྡན་པ་ཡི། །མཆོད་གཏོར་རི་ལྟར་སྤུངས་སེ་སྤུང་། །
ཛ་གད་ཕུད་སྣ་ཚོགས་པ་ཡི། །རྒྱ་མཚོ་རྦ་རླབས་ཁྲུགས་སེ་ཁྲུག །རིན་ཆེན་གསེར་གཡུའི་སྐྱེམས་བཟང་དང་། །སྤྱན་གཟིགས་དཀོར་ཆས་དཔག་ཏུ་མེད། །འཕན་དར་རྒྱལ་མཚན་བ་དན་དཀར། །གོ་ཁྲབ་དར་སྣ་སྟག་གཟིག་རྒྱན། །གསེར་རྟ་དུང་ལུག་ཤེལ་གྱི་ར། །བྱ་ེབ་དུང་ཕྱུར་གྲངས་ལས་འདས། །ཁྱད་པར་བདུད་རྩི་ཅན་གྱི་ཤིང་། །སྣ་དགུའི་དུད་པའི་དྲི་བཞོན་དཀྲིགས། །སྲིད་གསུམ་མ་ལུས་འགེངས་ནུས་པའི། །དུད་པའི་ཆ་ཤས་རེ་རེ་ལས། །བཀྲ་ཤིས་རྫས་རྟགས་རྒྱལ་སྲིད་བདུན། །འཆི་མེད་སྐབས་གསུམ་ལོངས་སྤྱོད་ལས ། །ལྷག་པའི་དགྱེས་བསྐང་མཐུན་པའི་རྫས། །སོ་སོར་མོས་པའི་འདོད་ཡོན་གྱིས། །ས་དང་བར་སྣང་ཀུན་ཁྱབ་པ། །ཟག་མེད་ཡེ་ཤེས་བདུད་རྩི་དངོས། །ངོ་བོར་སྦྱང་སྤེལ་བསྒྱུར་བྱས་ཏེ། །ཀུན་ཏུ་བཟང་པོའི་མཆོད་པའི་སྤྲིན། །ནམ་མཁའ་མཛོད་བཞིན་སྤེལ་བ་འདིས། །མཆོག་གསུམ་རྩ་གསུམ་ལྷ་ཡི་ཚོགས། །ཞི་དང་ཁྲོ་བོའི་སྐུར་སྟོན་དང་། །དཔལ་ཆེན་བདེ་མཆོག་འཁོར་ལོ་སྡོམ། །རྡོ་རྗེ་ཕག་མོ་ལ་སོགས་པ། །མཁའ་སྤྱོད་ས་སྤྱོད་འདུ་བ་ཡི། །རིག་འཛིན་དཔའ་བོ་མཁའ་འགྲོའི་ཚོགས། །ཡེ་ཤེས་མགོན་པོ་བེར་ནག་ཅན། །དཔལ་ལྡན་ལྷ་མོ་རང་བྱུང་མ། །རྒྱལ་ཆེན་རྣམ་སྲས་གསེར་ཕྲེང་ཅན། །ཀུན་དགའ་གཞོན་ནུ་རྡོ་རྗེ་
ལེགས། །སྲིན་མགོན་ཇོ་བོ་སྔགས་ཀྱི་བདག །མཁར་ནག་ལ་སོགས་ཆོས་སྐྱོང་བ། །དྲེགས་པ་ཕོ་རྒྱུད་མོ་རྒྱུད་རྣམས། །གསོལ་ལོ་མཆོད་དོ་མངའ་གསོལ་ལོ། །གསོལ་དང་མཆོད་པ་ལ་བརྟེན་ནས། །བདག་རྒྱུད་བྱིན་གྱིས་བརླབ་པ་དང་། །མཆོག་དང་ཐུན་མོང་དངོས་གྲུབ་སྩོལ། །ཞི་རྒྱས་དབང་དང་དྲག་པོ་ཡི། །གང་བཅོལ་ཕྲིན་ལས་ཀུན་འགྲུབ་མཛོད། །ཀྱེ་ཧོ། ལྷ་ཆེན་གཉན་པོ་ཡོངས་ཀྱི་གཙོ། །དཔལ་ལྡན་ཤེས་རབ་ཅེས་བྱ་བ། །མདོག་དཀར་སྟོན་ཟླའི་ཁ་དོག་འཆང་། །འོད་ཟེར་རབ་འཕྲོ་མངའ་གསོལ་ལོ། །ཞི་འཛུམ་ཞལ་གཅིག་ཕྱག་གཉིས་པ། །གཡས་པས་དར་དཀར་བ་དན་འཕྱར། །གཡོན་པས་ནོར་བུ་བསམ་འཕེལ་བསྣམས། །དགོས་འདོད་ཆར་འབེབས་མངའ༴ སྐུ་ལ་དར་དཀར་རལ་ག་གསོལ། །ལ་ཐོད་དཀར་པོ་དབུ་ལ་མཛེས། །རིན་ཆེན་སྣ་ཚོགས་དུ་མ་ཡི། །རྒྱན་གྱིས་སྤྲས་པ་མངའ༴ སྟག་རལ་གཡས་ལ་གཟིག་ཤུབས་གཡོན། །ཐབས་ཤེས་མདའ་གཞུ་གློག་འོད་འཁྱུག། ཟ་འོག་རིན་ཆེན་མཆིལ་ལྷམ་གསོལ། །དགེ་བསྙེན་ཆེན་པོ་མངའ༴ ཆིབས་སུ་ལྷ་རྟ་ངང་ཞུར་ནིིི། །ཡ་མཚན་མྱུར་མགྱོགས་རླུང་ཤུགས་ཅན། །དར་སྟན་གསེར་སྒ་འོད་དུ་འཚེར། །གཡུ་མཐུར་གསེར་སྲབ་དྲིལ་གཡེར་བརྒྱན། །མུ་མེན་ཡོབ་ལ་པ་ཏྲ་རིས། །གཞན་ཡང་དར་དང་རིན་པོ་
ཆེས། །རྔམས་ཤིང་བརྗིད་ལྡན་མངའ༴ དཔའ་རྩལ་སྟག་གཟིག་གཡས་གཡོན་འདུར། །བར་སྣང་གཡུ་འབྲུག་གློག་འོད་འཁྱུག །ཆུ་འཛིན་འཇའ་ཚོན་ཐིབས་སེ་ཐིབས། །དངོས་གྲུབ་ཆར་གྱིས་ས་གཞི་གང་། །ལྷ་སྨན་བཙུན་མོ་དམ་པ་ནི། །ཚང་མང་རྨ་བྱ་ལྡེམ་ཡག་དང་། །ནང་བློན་བཞི་དང་བར་བློན་བཞི། །ཕྱི་བློན་བཞི་དང་རུ་འདྲེན་བཞི། །དྲག་རྩལ་ཀླུ་བཙན་རྐྱ་བདུན་དང་། །སྒོ་སྲུང་བཞི་དང་ར་བ་ལྔ། །རྫིའུ་སྡེ་ལྔ་ལ་སོགས་པ། །འཁོར་ཚོགས་ཡང་སྤྲུལ་མངའ་གསོལ་ལོ། །དེ་ལྟར་དཀར་པོའི་ཕྱོགས་སྐྱོང་རྣམས། །མངའ་གསོལ་དགེ་བའི་མཚན་མ་ཡིས། །བདེ་ལེགས་བསམ་དོན་ལྷུན་གྲུབ་ཅིང་། །ཕུན་ཚོགས་དཔལ་ལ་སྤྱོད་གྱུར་ཅིག །ཀྱེ། སངས་རྒྱས་བསྟན་པ་བསྲུང་པའི་ཕྱིར། །གནས་མཆོག་སྐྱོང་བར་ཞལ་བཞེས་པའི། །ལྷ་ཡི་དགེ་བསྙེན་ཆེན་པོ་ནི། །དཔལ་ལྡན་ཤེས་རབ་གཉེན་པོ་བསང་། །བཀའ་བརྒྱུད་ཡོངས་ཀྱི་སྲུང་མ་བསང་། །སྒྲུབ་བརྒྱུད་སྒོས་ཀྱི་སྲུང༴ དོན་བརྒྱུད་སྙིང་པོའི་སྲུང་༴ རྣལ་འབྱོར་ཕྲིན་ལས་ཀུན་སྒྲུབ་༴ རིག་འཛིན་སྒྲུབ་པའི་གྲོགས་བྱེད་༴ གཙུག་ལག་གནས་ཀྱི་སྲུང་༴ དམ་ཚིག་ལྡན་པའི་སྲུང་༴ བཙུན་མོ་བློན་པོ་སྤྲུལ་འཁོར་ཚོགས། །ཡང་འཁོར་དཀར་ཕྱོགས་སྡེ་སྐྱོང་བ། །ཐམས་ཅད་མ་ལུས་
བསང་ངོ་བརྔན། །གསོལ་ལོ་མཆོད་དོ་དགྱེས་གྱུར་ཅིག །ༀ་ཤྲཱི་མཱན་པྲ་ཛྙཱ་སྱ་ས་པ་རི་ཝཱ་ར་ཨི་དཾ་བ་ལིང་ཏ་ཁ་ཁ་ཁཱ་ཧི་ཁཱ་ཧི། ཞེས་མཆོད་གཏོར་འབུལ་ནས་ཕྲིན་ལས་བཅོལ་བ་ནི། ཀྱཻ། སྔོན་ཚེ་ཨོ་རྒྱན་ཆེན་པོ་དང་། །དུས་མཁྱེན་པཀྴི་རང་བྱུང་རྗེ། །འགྲོ་མགོན་རས་ཆེན་ལ་སོགས་པ། །བཀའ་བརྒྱུད་བླ་མའི་སྤྱན་སྔ་རུ། །ཁས་བླངས་དམ་བཅས་བ ཀའ་བསྒོས་བཞིན། །དེང་འདིར་ཐ་ཚིག་རྗེས་དྲན་ནས། །སངས་རྒྱས་བསྟན་པ་རིན་པོ་ཆེ། །དྲི་མེད་ངེས་གསང་བླ་མེད་པ། །རྡོ་རྗེ་ཐེག་པའི་དོན་གྱི་བཅུད། །སྒྲུབ་བརྒྱུད་ཀརྨ་ཀཾ་ཚང་གི། །རིང་ལུགས་མི་ནུབ་རྒྱལ་མཚན་ཕྱོར། །བསྟན་འཛིན་སྤྲུལ་པའི་སྐྱེས་མཆོག་རྣམས། །ཞབས་བརྟན་ཕྲིན་ལས་ཕྱོགས་བརྒྱར་སྤེལ། །དགེ་འདུན་འདུས་པའི་སྡེ་རྒྱས་ཤིང་། །བཤད་དང་སྒྲུབ་པའི་འོད་སྣང་གིས། །འཛམ་གླིང་ཁྱབ་པར་གསལ་བ་དང་། །གཙུག་ལག་ཆོས་ཀྱི་འཁོར་ལོའི་གཞི། །དཔལ་གྱི་ཀརྨའི་གནས་མཆོག་འདི། །རྟག་བརྟན་འགྱུར་མེད་ལྷུན་གྲུབ་ཅིང་། །བསྟན་པ་དར་ཞིང་རྒྱས་པར་མཛོད། །བསྟན་ལ་ཉེར་འཚེ་གནོད་བྱེད་ཀྱི། །གཟུགས་ཅན་གཟུགས་མེད་རྡུལ་དུ་རློགས། །རྣལ་འབྱོར་བདག་ཅག་འཁོར་བཅས་རྣམས། །དུས་དང་གནས་སྐབས་ཀུན་ཏུ་ཡང་། །ནད་གདོན་བགེགས་ཀྱི་བར་ཆད་ཞི། །ཚེ་བསོད་དཔལ་འབྱོར་སྙན་
གྲགས་རྒྱས། །ཁམས་གསུམ་སྲིད་བཅུད་དབང་སྡུད་ཅིང་། །མངོན་སྤྱོད་དྲག་པོའི་ཕྲིན་ལས་སོགས། །འགྲུབ་པའི་སྟོངས་གྲོགས་མཛད་དུ་གསོལ། །ཡུལ་ལྗོངས་སྤྱི་དང་བྱེ་བྲག་གི། །སེམས་ཅན་རྣམས་ནི་མ་ལུས་པ། །རྟག་པར་དཀར་པོའི་ཆོས་མཐུན་ནས། །ཡིད་ཀྱི་འདོད་པ་འཇོ་བར་མཛོད། །ལོ་ལེགས་འབྲུ་འཕེལ་སྐྱ་རྒྱལ་ཞིང་། །ཆར་ཆུ་དུས་སུ་འབབས་པ་དང་། །ནད་མུག་མཚོན་གྱི་བསྐལ་པ་ཞི། །མདོར་ན་བསྟན་འགྲོར་སྨན་པ་ཡི། །གང་བཅོལ་ཐོགས་མེད་བདེ་བླག་ཏུ། །མྱུར་དུ་སྒྲུབ་ཅིག་ས་མ་ཡ། །མ་གཡེལ་མ་འདའ་ལྷ་ཆེན་པོ། །རྫུ་འཕྲུལ་སྣ་ཚོགས་དབང་བསྒྱུར་ཞིང་། །ཁམས་གསུམ་གུང་གཉིས་ཁྱབ་པར་རྒྱུ། །རྒྱལ་བའི་བཀའ་ཉན་དམ་ཚིག་ཅན། །བསྟན་དང་བསྟན་འཛིན་གྲོགས་བྱེད་ཅིང་། །རང་ཕྱོགས་སྲུང་ཞིང་ཕས་རྒོལ་འཇོམས། །དཀར་པོ་ལྷ་ཡི་སྡེ་དཔོན་ཆེ། །བཀའ་བརྒྱུད་བསྟན་པའི་སྲུང་མ་སྟེ། །དགེ་བསྙེན་འཁོར་དང་བཅས་ལ་བསྟོད། །ཁྱེད་རྣམས་ཐུགས་དང་འགལ་བ་ཡི། །ཕོག་ཐུག་ཉེས་པ་ཅི་མཆིས་དང་། །མཆོད་གཏོར་ལོ་ཟླར་འདས་པ་དང་། །དངོས་འཛིན་འཁྲུལ་པས་བསྒྲིབས་པ་ཡིས། །བག་མེད་ནོངས་པར་གྱུར་པ་རྣམས། །བཤགས་སོ་ཚངས་པར་སྩལ་ནས་ཀྱང་། །རང་གནས་ཉམས་དགའི་སྐྱེད་ཚལ་དུ། །
ཇི་ལྟར་བདེ་བའི་ངང་དུ་གཤེགས། །སླར་ཡང་མཆོད་ཕྱིར་བསྐུལ་བའི་ཚེ། །དུས་སུ་འབྱོན་པར་མཛད་དུ་གསོལ། །སརྦ་བྷུ་ཏ་གཙྪཿ གཞི་བདག་འཁོར་བཅས་རང་གནས་སུ་གཤེགས་ལ། བཀྲ་ཤིས་འཛམ་གླིང་ཁྱོན་ཡངས་པོར། །འཆི་མེད་སྐབས་གསུམ་ཞིང་གི་བདག །ལྷ་དབང་ཤིས་པའི་མེ་ཏོག་ཆར། །སྐྱེ་དགུ་ཡོངས་ལ་བསྙིལ་གྱུར་ཅིག །དེ་ལྟར་འཇིག་རྟེན་སྐྱོང་བའི་ཚོགས། །མཆོད་ཅིང་བསྟོད་དང་བསྐུལ་བའི་མཐུས། །གདན་ས་ཡུལ་ལྗོངས་འདི་ཉིད་དུ། །རྫོགས་ལྡན་ལང་ཚོ་རྒྱས་པར་ཤོག། ཅེས་གཞན་ཡང་བསྔོ་བ་སྨོན་ལམ་ཤིས་བརྗོད་ཅི་ལྟར་རིགས་པར་བྱའོ། །དེ་ལྟར་ཀརྨ་པ་རབས་བཅུ་གསུམ་གྱི་གདན་ས་གོང་འོག་བར་གསུམ་ལས། ས་སྤྱོད་གསུང་གི་གནས་མཆོག་ཀརྨ་རི་གླིང་གི་ཆོས་གྲྭ་ཆེན་པོའི་བླ་མ་དགེ་ལེགས་ཀྱིས་བསྐུལ་པའི་ངོར་ས་ག་ཟླ་བའི་དཀར་པོའི་ཚེས་ལ་སི་ཏུ་པདྨ་ཉིན་བྱེད་དབང་པོས་སྤེལ་བ་ཀུན་ཏུ་ཛ་ཡ།། །།
རྒྱལ་དབང་མཆོག་སྤྲུལ་རིན་པོ་ཆེས་བཀའ་སྩལ་ལྟར།
༈ ན་མོ་པདྨཱ་ཀ་ར་ཡེ། ཡུལ་གནས་གཞི་བདག་དགྱེས་སྐོང་ཕྱིར། །བསང་མཆོད་སྤྲོ་ན་གཡུ་ཤུག་སོགས། །སྨན་སྤོས་ཕྱེ་མར་ཛ་གད་སྐྱེམས། །སྤྱན་གཟིགས་དཀོར་ཆས་འདུ་བྱས་ལ། །ཧྲཱིཿ ཡེ་ནས་མ་བཅོས་གཉུག་མའི་རང་མདངས་ལས། །རང་བྱུང་ལྷུན་གྲུབ་དཔལ་ཆེན་ཧེ་རུ་ཀ །གསལ་བའི་ཐུགས་ལས་འོད་འཕྲོས་མཆོད་རྫས་རྣམས། །གཉིས་འཛིན་མ་དག་རྟོག་ཚོགས་སྦྱང་བྱས་ནས། །ཀུན་བཟང་མཆོད་པའི་སྤྲིན་ཕུང་རྒྱ་ཆེར་སྤེལ། །ༀ་ཨ་
ཀཱ་རོས་བྱིན་བརླབས་ལན་གསུམ། ཀྱཻ། ཆོས་དབྱིངས་གདོད་ནས་སྐྱེ་མེད་ངང་། །བདེ་ཆེན་ཡེ་ཤེས་སྣང་ཆ་ལས། །བདེ་སྟོང་ཟུང་འཇུག་འཁོར་ལོ་སྡོམ། །དབྱེར་མེད་བཀའ་བརྒྱུད་བླ་མ་དང་། །དཔའ་བོ་རྣལ་འབྱོར་མ་རྣམས་ཀུན། །རྟག་ཏུ་འདུ་ཞིང་དགྱེས་རོལ་པའི། །ས་ལ་སྤྱོད་པའི་གནས་ཀྱི་མཆོག །འོག་མིན་ཀརྨའི་གནྡྷོ་ལ། །ཆོས་འཁོར་སྐྱོང་ཞིང་སྲུང་པ་ཡི། །དཀར་ཕྱོགས་ལྷ་ཡི་སྡེ་དཔོན་ཆེ། །དཔལ་ལྡན་ཤེས་རབ་འཁོར་བཅས་དང་། །ཡུལ་ལྗོངས་དགེ་བའི་སྟོབས་རྩལ་གྱི། །དཔུང་ཚོགས་ཡན་ལག་བཞི་ལྡན་པའི། །མངའ་དབང་འབྱོར་དང་རིགས་ཀྱི་ལྷ། །ཟོ་དོར་ཡོངས་ཀྱི་རྗེ་བོ་སྟེ། །རྡོ་རྗེ་སྨན་དཔལ་མཆོག་རབ་རྩལ། །འཆི་མེད་བདུད་རྩིའི་གཏེར་འཆང་བ། །གཞན་ཡང་སྟོབས་ལྡན་དགྲ་འདུལ་དང་། །རྡོ་རྗེ་རྩལ་ལྡན་དཔལ་རབ་དབང་། །རིན་ཆེན་གཏེར་སྤུངས་སྨན་བཙུན་རྒྱལ། །མཐུ་སྟོབས་ལྡན་པ་ལ་སོགས་དང་། །ཤེལ་དཀར་ལྡེམ་ཡག་དྲི་མེད་འོད། །དཀར་མོ་བདེ་སྐྱོང་ལྷ་དཀར་མཛེས། །རྡོ་རྗེ་དབང་མོ་ཀླུ་དཔལ་སྦྱིན། །སྲས་དང་དགྱེས་སྡེ་འཁོར་ཡང་འཁོར། །ཁྱེད་རྣམས་སྔོན་ཚེ་གསང་བའི་བདག། རིག་འཛིན་པདྨ་ཐོད་ཕྲེང་རྩལ། །དཔལ་ལྡན་ཀརྨ་པ་སོགས་ཀྱིས། །བཀའ་བསྒོས་དམ་ཚིག་རྗེས་དྲན་ལ། །རང་རང་གནས་ནས་གཤེགས་སུ་གསོལ། །འདིར་བཤམས་
གདན་ལ་བཞུགས་ནས་ཀྱང་། །བཀྲམ་པའི་མཆོད་པ་རྒྱ་ཆེན་པོ། །ཕྱི་དང་ནང་དང་གསང་བ་ཡི། །དངོས་འབྱོར་ལྷ་ཀླུ་མིའི་ལོངས་སྤྱོད། །འདོད་ཡོན་རྒྱལ་སྲིད་བཀྲ་ཤིས་ཀྱི། །རྫས་རྟགས་བརྒྱད་དང་དཀོར་ཆས་རིགས། །སྤྱན་གཟིགས་ཚར་དུ་དངར་བ་དང་། །ཕྱེ་མར་ཇ་ཕུད་ཛ་གད་སྐྱེམས། །རིན་ཆེན་ལྔ་དང་སྤོས་སྨན་སྣ། །ལྷ་ཤིང་གཡུ་ལོའི་དྲི་བསུང་ལས། །དུད་པའི་སྤྲིན་ཚོགས་དབང་གཞུ་ལྟར། །བཀྲ་ཤིས་རེ་ཁཱ་འབར་བ་དང་། །གང་འདོད་མཆོད་པའི་ཆར་ཆེན་པོ། །ནམ་མཁའ་མཛོད་བཞིན་སྤྲོ་བ་ཡིས། །ཡུལ་གཞི་གནས་བདག་སྐུ་ལྷའི་ཚོགས། །དགྱེས་བསྐང་ཟག་མེད་བདེ་བ་ཆེའི། །རང་བཞིན་ཉིད་དུ་རོལ་པར་མཛོད། །སྙིགས་མའི་སྐྱེ་བོ་མི་བསྲུན་པས། །བརླང་སྤྱོད་དབང་གིས་ཉམས་གྲིབ་མནོལ། །ཀུན་ཀྱང་ཞི་ཞིང་བདེ་ལེགས་ཤོག །རིགས་མཚུན་ལྷ་སྲུང་ཡལ་གམ་ཅན། །བདེན་པ་མཐོང་ཞིང་དམ་ཚིག་ལྡན། །རྣལ་འབྱོར་སྐྱོང་བར་ཞལ་བཞེས་པ། །ཐོགས་མེད་རྩལ་ལྡན་རྣམས་ལ་བསྟོད། །ནོངས་པར་གྱུར་ཀུན་བཟོད་པར་བཞེས། །བཅོལ་པའི་ཕྲིན་ལས་ཁྱད་པར་ནི། །ཐུབ་མཆོག་བསྟན་པ་རིན་པོ་ཆེ། །ནུབ་མེད་ཕྱོགས་བཅུར་སྤེལ་བ་དང་། །སངས་རྒྱས་གཉིས་པ་པད་འབྱུང་གི། །ངེས་གསང་བླ་མེད་རྫོགས་པ་ཆེ། །དྲི་མེད་སྙིང་པོའི་རིང་ལུགས་གང་། །དར་རྒྱས་ཡུན་
གནས་དེ་འཛིན་གྱི། །སྐྱེས་བུ་ཞབས་པད་བསྐལ་བརྒྱར་བརྟན། །འགྲོ་དོན་ཕྲིན་ལས་ལྷུན་གྲུབ་ཅིང་། །དགེ་འདུན་འདུས་པ་འཕེལ་ཞིང་རྒྱས། །ཐུགས་མཐུན་དམ་ཚིག་ལ་གནས་ཤིང་། །རྒྱལ་པོ་ཆོས་ལྡན་སྐྱེ་དགུ་རྣམས། །བྱམས་དང་སྙིང་རྗེས་རྒྱུད་བརླན་ནས། །དཀར་པོ་དགེ་ལ་སྤྱོད་པ་དང་། །ཆར་ཆུ་དུས་འབབ་ལོ་ཏོག་ལེགས། །ནད་འཁྲུགས་དབུལ་ཕོངས་བསྐལ་པ་ཞི། །རྫོགས་ལྡན་དུས་བཞིན་བདེ་སྐྱིད་སྤེལ། །མདོར་ན་གང་བཅོལ་ལས་འགྲུབ་པའི། །སྡོང་གྲོགས་མེལ་ཚེ་མ་གཡེལ་བར། །རྣམ་ཀུན་བཀྲ་ཤིས་ཕུན་སུམ་ཚོགས། །དོན་གཉིས་དཔལ་འབར་དགེ་ལེགས་ཤོག །བྷཱུ་ཏ་གཙྪ། ཞེས་རྒྱལ་དབང་མཆོག་སྤྲུལ་རིན་པོ་ཆེས་བཀའ་སྩལ་ལྟར་སི་ཏུ་པདྨ་ཉིན་བྱེད་དབང་པོས་ཕུལ་བ་དགེ། །
ཆགས་མེད་རིན་པོ་ཆེའི་བཞེད་ངོར།
ཨ་ཀཱ་རོས་བྱིན་བརླབས། ཀྱེ་ཧོཿ རྒྱལ་དབང་མཚོ་སྐྱེས་རྒྱལ་པོ་ཡི། །བཀའ་མཉན་དཀར་པོའི་སྡེ་སྐྱོང་བའི། །ལྷ་བཙན་རྡོ་རྗེ་ཐོགས་མེད་རྩལ། །སྔོན་ཚེ་ཡལ་གམ་རྗེས་དགོངས་ལ། །འདིར་གཤེགས་ཞི་བ་བསང་མཆོད་རྫས། །དགྱེས་མཆོད་མོས་པའི་རང་བཞིན་གྱི། །འདོད་ཡོན་རྒྱ་མཚོ་དཀྲིགས་པ་འདི། །བཞེས་ཤིག་རོལ་ཅིག་པུ་ཛ་ཧོ། །བདག་ཅག་དཔོན་སློབ་གཞི་བྱེས་ཀུན། །དགེ་ཞིང་ལེགས་པའི་སྡོང་གྲོགས་དང་། །ཁ་འཛིན་རྒྱབ་བརྟེན་མ་གཡེལ་མཛོད། །
བར་ཆད་རྐྱེན་ལས་བསྲུང་ཞིང་སྐྱོབས། །དམ་ལས་མ་འདའ་ས་མ་ཡ། །ཞེས་ཆགས་མེད་རིན་པོ་ཆེའི་བཞེད་ལྟར་སི་ཏུ་པས་སྤེལ་བ་མངྒ་ལམ། །
བསྟན་འཛིན་རིན་པོ་ཆེ་མཆོག་གིས་བསྐུལ་ངོར།
སྭ་བྷཱ་ཝས་སྦྱངས། སྟོང་ལས་རིན་ཆེན་སྣོད་ཡངས་པར། །འདོད་ཡོན་སྣ་ཚོགས་ཀུན་ཏུ་དཀྲིགས། །བདུག་སྤོས་དྲི་ལྡན་ཟེར་མ་ལས། །ཉེར་སྤྱོད་རྣམ་མང་ཆར་འབབས་གྱུར། །ༀ་བཛྲ་སྥ་ར་ཎ་ཁཾ། ཀྱཻ། སྔོན་ཚེ་ཨོ་རྒྱན་ཆེན་པོ་གསང་བའི་བདག །གྲུབ་ཆེན་ཀརྨ་པཀྴི་ལ་སོགས་པའི། །སྤྱན་སྔར་རྡོ་རྗེའི་ཐ་ཚིག་གཡར་དམ་ཅན། །ཟོ་དོར་སྟབ་རྒྱལ་ངང་པ་སེང་སེང་དང་། །འབུམ་རྫོང་ཡུལ་གཞི་གནས་བདག་དགེ་བསྙེན་ཆེ། །དཔའ་ཁམས་དཔལ་རྒྱལ་སྤོར་ནེ་རྩེ་རྒྱལ་དང་། །ཀ་ན་ཡངས་རྩེ་ཚྭ་སྨན་གཡུང་དྲུང་དཀར། །འཁོར་དང་ཡང་འཁོར་སྣང་སྲིད་གཞི་བདག་ཚོགས། །མ་ལུས་འཁོར་བཅས་འདིར་གཤེགས་གདན་ལ་བཞུགས། །དངོས་འབྱོར་ཡིད་ཀྱིས་སྤྲུལ་པའི་མཆོད་སྤྲིན་རྣམས། །ནམ་མཁའ་མཛོད་བཞིན་རྒྱ་ཆེན་སྤེལ་བ་འདིས། །ཡུལ་ལྷ་གནས་བདག་དཀར་ཕྱོགས་སྐྱོང་རྣམས་ལ། །འབུལ་ལོ་དགྱེས་བཞེས་ཁྱད་པར་བསང་མཆོད་མཐུས། །ཉམས་གྲིབ་དམེ་གྲིབ་མཁོན་གྲིབ་མུན་པའི་དཔུང་། །བསང་མཆོད་འོད་ཟེར་འདོད་ཡོན་འབུམ་འཕྲོ་བས། །རྨུགས་པ་སངས་ཤིང་བདེ་དང་ལྡན་གྱུར་ཅིག །ས་བདག་མཐུ་ཆེན་སོ་སོ་རང་རང་གིས། །སྐྱོང་བའི་
ཡུལ་ལྗོངས་ཕན་བདེའི་དཔལ་ཡོན་གྱི། །རྫོགས་ལྡན་གསར་པའི་དགའ་སྟོན་སྤེལ་བ་དང་། །བསྟན་འགྲོར་ཉེར་འཚེ་བགེགས་དཔུང་རྩད་ནས་བཅོམ། །ཆར་ཆུ་དུས་འབབས་ལོ་ལེགས་འབྲུ་འཕེལ་ཞིང་། །སྐྱེ་དགུ་དཀར་པོའི་ཆོས་ལ་བཀོད་པ་དང་། །འབྱུང་པོའི་རྒྱུད་བསྐུལ་བསླུ་བྲིད་ཆོས་མིན་གཞིག། སྔོན་གྱི་དམ་བཅའ་གཡེལ་མེད་ཕྲིན་ལས་ཀུན། །ལྷུན་གྱིས་གྲུབ་པའི་སྡོང་གྲོགས་མཛད་དུ་གསོལ། གཙྪ། ཞེས་བསྟན་འཛིན་རིན་པོ་ཆེ་མཆོག་གིས་བསྐུལ་བཞིན། སི་ཏུ་པདྨ་ཉིན་བྱེད་དབང་པོས་སྤེལ། སརྦ་མངྒ་ལམ། །
བཙན་ནེ་སྐལ་བཟང་ནས་བསྐུལ་ངོར།
ཀྱཻ། རིན་ཆེན་སྣོད་མཆོག་རྒྱ་ཆེའི་ནང་། །མཆོད་རྫས་གཙང་ཞིང་ཡིད་འོང་བ། །ནམ་མཁའ་མཛོད་བཞིན་སྤྲིན་གཏིབས་གྱུར། །དེང་འདིར་མཆོད་འོས་སྐྱབས་གསུམ་དང་། །ཡུལ་ལྷ་ཟོ་དོར་གཉན་པོའི་ཚོགས། །ཁྱད་པར་གནས་བདག་དགེ་བསྙེན་ཆེ། །གཉུ་རྒྱལ་ར་ལ་བྱ་ཁྱུང་ལྷ། །དགྱེས་པའི་མཆོད་འབུལ་བཞེས་སུ་གསོལ། །ཐུགས་འགལ་བཟོད་གསོལ་མཐུ་ཆེན་གྱི། །རྩལ་ལྡན་དཀར་པོའི་སྡེ་སྐྱོང་བ། །འཁོར་བཅས་བསྟོད་འོས་བསྔགས་པར་བགྱི། །དེ་ལྟར་བསང་མཆོད་ཕུལ་བའི་མཐུས། །པདྨ་ཐོད་ཕྲེང་ཧེ་རུ་ཀའི། །དམ་ལ་མ་འདའ་བསྟན་འགྲོ་ལ། །བདེ་ལེགས་རྒྱུན་མི་ཆད་པར་སྩོལ། །དུས་ཀུན་བཀྲ་ཤིས་
རྫོགས་ལྡན་གྱི། །དཔལ་ལ་སྤྱོད་བཞིན་ཆོས་འཕེལ་ཤོག །ཅེས་པ་འདི་བཙན་ནེ་སྐལ་བཟང་ནས་བསྐུལ་བཞིན་སི་ཏུས་བྲིས་པའོ། །
ཁང་སར་ཚེ་འཕེལ་གྱིས་བསྐུལ་ངོར།
ཀྱཻ། སྔོན་ཚེ་མ ཚོ་སྐྱེས་པད་འབྱུང་གི། །བསྟན་པ་སྐྱོང་བར་ཁས་བླངས་པའི། །ཟིལ་ཕྲོམ་རྡོ་རྗེ་གཡུ་དྲུང་རྩལ། །དམ་ཚིག་དབང་གིས་གནས་འདིར་གཤེགས། །དགྱེས་པའི་གདན་བཞུགས་འདིར་བཤམས་ཀྱི། །མཆོད་རྫས་དཀོར་ནོར་བསམ་མི་ཁྱབ། །འབུལ་གྱི་དགྱེས་པར་བཞེས་སུ་གསོལ། །ཡུལ་བདག་འཁོར་བཅས་རབ་ཏུ་བསྔགས། །རྒྱལ་པའི་བསྟན་པ་རིན་པོ་ཆེ། །མི་ནུབ་རྒྱལ་མཚན་སྲིད་རྩེར་བསྒྲེངས། །རྣལ་འབྱོར་བདག་གི་མཐུན་རྐྱེན་སྒྲུབས། །འགལ་རྐྱེན་སོལ་ལ་བར་ཆད་ཟློག། བསམ་པ་ཡིད་བཞིན་འགྲུབ་པ་དང་། །སྐྱེ་དགུ་བདེ་ལ་གཞོལ་བ་ཡི། །ཕྲིན་ལས་ཐོགས་པ་མེད་པར་སྒྲུབས། །རྟག་པར་བཀྲ་ཤིས་བདེ་ལེགས་སྩོལ། །གཙྪས་གཤེགས། ཞེས་པའང་ཁང་སར་ཚེ་འཕེལ་གྱིས་བསྐུལ་ལྟར་སི་ཏུས་སྤེལ་བ་མངྒ་ལམ། དགེའོ། །
ཀརྨ་ཨ་མཱ་རའི་ངོར།
ༀ་བཛྲ་ཨ་མྲི་ཏ་སོགས་ཀྱིས་བསངས། སྭ་བྷཱ་ཝས་སྦྱངས། སྟོང་ལས་རིན་ཆེན་སྣོད་ཡངས་པར། །ཀུན་བཟང་མཆོད་པའི་སྤྲིན་ཕུང་གི། །ཟག་མེད་བདེ་ཆེན་བསྐྱེད་པའི་རྫས། །རྒྱ་ཆེན་རྒྱུན་མི་ཆད་པར་གྱུར། །
ཨ་ཀཱ་རོས་བྱིན་བརླབས་ལ། ཀྱཻ། སྐྱབས་ཡུལ་མཆོག་གསུམ་རྩ་གསུམ་པོ། །ཀུན་འདུས་པདྨ་ཐོད་ཕྲེང་རྩལ། །བླ་མེད་གསར་རྙིང་བརྒྱུད་པ་བསང་། །རྒྱུད་བཞིར་འབྲེལ་བའི་ཡི་དམ་ལྷ། །གནས་གསུམ་དཔའ་བོ་ཌཱ་ཀི་བསང་། །ཡེ་ཤེས་མགོན་པོ་བེར་ནག་ཅན། །རང་བྱུང་རྒྱལ་མོ་རྣམ་ཐོས་སྲས། །ཞིང་སྐྱོང་སྲིན་མགོན་དམ་ཅན་མགར། །སྔགས་བདག་རྡོ་རྗེ་རྒྱལ་པོ་བསང་། །དཔལ་ལྡན་ཨ་ཕྱི་མཆེད་ལྔ་འཁོར། །ཚེ་རིང་མཆེད་ལྔ་ཐང་ལྷ་དང་། །སྤོམ་ར་ནོར་བདག་ཐམས་ཅད་བསང་། །ཡུལ་ཕྱོགས་འདིར་གནས་གཞི་ཡི་བདག །སོ་སོར་མཐུན་པའི་རྫས་ཀྱིས་བསང་། །དེ་ལྟར་མཆོད་པ་ལ་བརྟེན་ནས། །རྣལ་འབྱོར་བསམ་དོན་ལྷུན་གྱིས་གྲུབ། །ཚེ་བསོད་དཔལ་གྲགས་མཐུ་སྟོབས་རྒྱས། །བསྟན་དང་འགྲོ་བའི་བདེ་སྐྱིད་དང་། །བསྟན་འཛིན་འདུས་སྡེ་འཕེལ་རྒྱས་ཤིང་། །སྐྱེ་དགུ་ཀུན་ཀྱང་བདེ་དང་ལྡན། །ཉིན་མཚན་གུང་ལ་བཀྲ་ཤིས་ཀྱི། །ཉི་ཟླས་རྣམ་ཀུན་གསལ་གྱུར་ཅིག །ཅེས་ཀརྨ་ཨ་མཱ་ར་ཞེས་པའི་གསུང་ངོར་སྤེལ། །
བསྟན་སྙིང་མཆོག་སྤྲུལ་གྱི་བཞེད་ངོར།
ཨ་མྲྀ་ཏས་བསངས། སྭ་བྷཱ་ཝས་སྦྱངས། ཆོས་ཀུན་སྟོང་པའི་ངང་ཉིད་ལས། །རིན་ཆེན་ལས་གྲུབ་བསང་ཁང་བཟང་། །སྤོས་ཀྱི་དུད་སྤྲིན་ཆ་ཤས་ལས། །རིན་ཆེན་བདུན་དང་བཀྲ་ཤིས་བརྒྱད། །འདོད་ཡོན་ལྔ་དང་ལྷ་མི་ཡི། །སྲིད་
ཞིའི་དཔལ་འབྱོར་ཕུན་སུམ་ཚོགས། །ཟག་མེད་བདེ་ཆེན་སྐྱེད་བྱེད་པའི། །ཀུན་ཏུ་བཟང་པོའི་སྨོན་ལམ་ལས། །ཇི་ལྟར་ནམ་མཁའ་མཛོད་དུ་གྱུར། །ཨ་ཀཱ་རོ་ལན་གསུམ་གྱིས་བྱིན་བརླབས། ཀྱཻ། མགོན་གྱུར་སྐྱབས་གནས་ཐུགས་རྗེ་ཅན། །དུས་གསུམ་སངས་རྒྱས་སྟོང་རྩ་གཉིས། །གསར་རྙིང་གྲུབ་ཐོབ་རིག་འཛིན་ཚོགས། །ཡི་དམ་རྒྱུད་སྡེ་རབ་འབྱམས་དང་། །གནས་གསུམ་སྐྱོང་བའི་ཌཱ་ཀིའི་ཚོགས། །ཡེ་ཤེས་ལས་དང་འཇིག་རྟེན་པའི། །ཆོས་སྐྱོང་ཕོ་རྒྱུད་མོ་རྒྱུད་དང་། །ཡུལ་ལྷ་གནས་བདག་མགྲོན་རིགས་རྣམས། །གནས་འདིར་གཤེགས་ལ་བཤམས་པའི་གདན། །རྣམ་པར་བཀྲ་བར་བཞུགས་སུ་གསོལ། །འདིར་བཤམས་མཆོད་རྫས་ཡིད་དུ་འོང་། །དཔལ་འབྱོར་དམ་པའི་ལོངས་སྤྱོད་རྫས། །བདག་པོས་བཟུང་དང་མ་བཟུང་བའི། །དངོས་འབྱོར་ཡིད་སྤྲུལ་མཆོད་པའི་སྤྲིན། །སོ་སོའི་མཐུན་རྫས་ཇི་སྙེད་པ། །དཀོན་མཆོག་རྩ་གསུམ་ལྷ་ལ་འབུལ། །སྐུ་གསུམ་ལྷུན་གྲུབ་དངོས་གྲུབ་སྩོལ། །ཁྱད་པར་ཡེ་ཤེས་མགོན་པོ་ཆེ། །ཕྱག་བཞི་ཡབ་ཡུམ་འཁོར་བཅས་དང་། །བེར་ཆེན་རྡོ་རྗེ་གུར་གྱི་མགོན། །འདོད་ཁམས་དབང་ཕྱུག་རེ་མ་ཏི། །དམག་ཟོར་རྒྱལ་སོགས་ལྷ་མོའི་ཚོགས། །ཞིང་སྐྱོང་ཏྲཀྴད་རྣམ་ཐོས་སྲས། །རེ་མནྟ་དང་དཔལ་ལྷ་མོ། །གཟའ་བདུད་དམ་ཅན་མགར་བ་དམར། །ཐང་ལྷ་ཡར་ཞུར་
སྤོམ་ར་གཉེན། །ཇག་མེ་གནས་བརྒྱད་དགེ་བསྙེན་དང་། །རྡོ་རྗེ་ངས་ནུས་ལ་སོགས་པའི། །ཨོ་རྒྱན་ཆེན་པོའི་བཀའ་དང་དམ། །གནས་པའི་དཀར་པོའི་ཕྱོགས་སྐྱོང་བ། །ཡུལ་འདིར་གཉུག་མར་རྒྱུ་བ་ཡི། །མཆོད་པར་འོས་པའི་མགྲོན་རྣམས་ལ། །མཆོད་པའི་སྤྲིན་ཚོགས་ནམ་མཁའ་གང་། །འདོད་ཡོན་ལྔ་ལྡན་ཟད་མི་ཤེས། །རང་རང་དགྱེས་དགུར་རོལ་པ་རུ། །འབུལ་བཞེས་ཚིམ་ཞིང་མཉེས་པའི་མཐུས། །རིག་འཛིན་པདྨ་འབྱུང་གནས་ཀྱི། །ཡང་ཟབ་བསྟན་པ་ཕྱོགས་བཅུར་རྒྱས། །བསྟན་དང་བསྟན་འཛིན་འཚོ་གཞེས་ནས། །འགྲོ་དོན་ཕྲིན་ལས་ལྷུན་གྱིས་གྲུབ། །ཡུལ་རིས་ས་ཕྱོགས་འདི་ཉིད་དུ། །ཆར་ཆུ་དུས་འབབ་ལོ་ལེགས་ཤིང་། །རྫོགས་ལྡན་གསར་པའི་ལང་ཚོ་ལྟར། །བཀྲ་ཤིས་བདེ་ལེགས་མཁའ་དབྱིངས་སུ། །ཕུན་ཚོགས་ལྔ་ལྡན་ཉི་འོད་འབར། །བསྟན་འགྲོ་ཕན་བདེའི་པདྨོའི་ཚལ། །ཇི་བཞིན་བསམ་པའི་འདོད་དོན་ཀུན། །གེགས་མེད་ཡོངས་གྲུབ་བཀྲ་ཤིས་ཤོག །གཙྪས་གཤེགས། ཞེས་པའང་བསྟན་སྙིང་མཆོག་སྤྲུལ་གྱི་བཞེད་ལྟར་སི་ཏུ་པདྨ་ཉིན་བྱེད་དབང་པོས་སྤེལ་བ་དགེ། །
ཀརྨ་ཡན་ལག་དང་རབ་རྒྱལ་བཅས་ཀྱི་བཞེད་ངོར།
སྭ་བྷཱ་ཝས་བསངས། སྟོང་པའི་ངང་ལས་བསང་རྫས་ལྷ་མིའི་འདོད་ཡོན་ནམ་མཁའ་མཛོད་བཞིན་རྒྱ་ཆེན་རྒྱུན་མི་ཆད་པའི་རང་བཞིན་དུ་གྱུར། ༀ་བཛྲ་སྥ་ར་ཎ་ཁཾ། ལན་གསུམ།
རང་ཉིད་ལྷར་གསལ་ཐུགས་ཀ་ནས། །འོད་འཕྲོས་མཆོད་འོས་མགྲོན་རིགས་རྣམས། །སྤྱན་དྲངས་དགྱེས་པའི་གདན་ལ་བཞུགས། །ཀྱཻ། སྔོན་ཚེ་ཨོ་རྒྱན་སློབ་དཔོན་ཆེ། །པདྨ་ཐོད་ཕྲེང་ཀརྨ་པ། །ལ་སོགས་རྡོ་རྗེ་འཛིན་རྣམས་ཀྱི། །སྤྱན་སྔར་ཞལ་བཞེས་དམ་བཅས་བཞིན། །ཐ་ཚིག་གཉེན་ལས་མ་འདའ་བར། །དཀར་པོའི་ཕྱོགས་རྣམས་སྐྱོང་བ་ཡི། །དཔལ་ཟོ་ཡབ་ཡུམ་སྲས་འཁོར་དང་། །གཞན་ཡང་ཡུལ་རིས་ལྗོངས་རྣམས་སུ། །གནས་པའི་མགོན་སྐྱོབ་བྱེད་པ་ཡི། །ལྷ་ཀླུ་གཉན་རིགས་ཟོ་དོར་དང་། །དགེ་བསྙེན་སྨན་མོ་ལ་སོགས་པའི། །ཡིད་ཀྱི་གཟུགས་ཅན་ཐམས་ཅད་ལ། །སོ་སོར་མོས་པའི་འདོད་ཡོན་ཚོགས། །བཀྲ་ཤིས་རྟགས་ཀྱི་ཕྱག་རྒྱ་དང་། །དཀར་གསུམ་མངར་གསུམ་སྨན་ཕུད་གཏོར། །སྤྱན་གཟིགས་དཀོར་ཆ་རྟེན་དང་སྒྲུབ། །མཆོད་རྫས་ཡིད་འོང་ཕུན་ཚོགས་ཅན། །རྒྱ་ཆེན་ཟད་མེད་མཆོད་པའི་སྤྲིན། །དུད་པའི་ཟེར་གྱི་ཆ་ཤས་ལས། །སོ་སོར་མོས་ཐོབ་ཚིམ་ཞིང་དགྱེས། །ཞི་དང་བྱམས་པའི་སེམས་ལྡན་ཤོག །ཁྱེད་རྣམས་མཆོད་པའི་དགེ་ལེགས་ཀྱིས། །བསྟན་པ་དར་རྒྱས་ཡུལ་ཕྱོགས་འདིར། །ལོ་ལེགས་སྐྱ་རྒྱལ་ཆར་ཆུ་འབེབས། །ནད་མེད་བསམ་དོན་ཆོས་བཞིན་འགྲུབ། །རྣལ་འབྱོར་བར་ཆད་སེལ་བ་དང་། །མཐུ་དང་སྡོང་གྲོགས་རྒྱབ་བརྟེན་མཛོད། །
བདུད་རིས་ཕྱོགས་ལས་རྣམ་རྒྱལ་ཞིང་། །བཀྲ་ཤིས་རྫོགས་ལྡན་དགའ་སྟོན་ལྟར། །ལྷུན་གྲུབ་ཡིད་ལ་འདོད་འཇོར་ཤོག །སརྦ་བྷཱུ་ཏ་གཙྪས་གཤེགས། ཞེས་ཀརྨ་ཡན་ལག་དང་རབ་རྒྱལ་བཅས་ཀྱི་བཞེད་ལྟར་སྤེལ། །
ཟླ་རྒྱལ་བསང་བླ་མ་རབ་འབྱོར་ངོར།
ཨམྲྀ་ཏས་བསངས། སྭ་བྷཱ་ཝས་སྦྱངས ། སྟོང་ལས་བསང་ཁང་རིན་ཆེན་སྣོད་ཡངས་པར། །ལྷ་མིའི་འདོད་ཡོན་ཀུན་བཟང་མཆོད་སྤྲིན་གྱུར། །ༀ་བཛྲ་སྥ་ར་ཎ་ཁཾ། ཀྱཻ། སྔོན་ཚེ་གསང་བདག་ཐོད་ཕྲེང་གི། །བཀའ་དང་དམ་གནས་དགེ་བསྙེན་ཆེ། །ཟླ་རྒྱལ་གཉེན་པོ་ཡབ་ཡུམ་སྲས། །རང་འཁོར་ཚོགས་བཅས་འདིར་གཤེགས་ལ། །དགྱེས་པའི་བསང་མཆོད་འབུལ་བ་ནི། །སྐབས་གསུམ་ལོངས་སྤྱོད་མཁོ་དགུའི་ཚོགས། །དཔག་ཡས་བདུག་པའི་སྤྲིན་ཕུང་ལས། །གང་འདོད་ཡིད་བཞིན་འཆར་བ་ཡི། །བསང་མཆོད་དམ་པ་འདི་བཞེས་ཤིག །པད་འབྱུང་རྩ་བརྒྱུད་བླ་མ་ཡི། །བཀའ་དང་ཐ་ཚིག་དྲན་མཛོད་ལ། །སངས་རྒྱས་ཆོས་ཀྱི་བསྟན་པ་སྲུངས ། །དེ་འཛིན་སྐྱེས་བུའི་ཕྲིན་ལས་སྤེལ། །རྣལ་འབྱོར་བདག་གིས་གང་བཅོལ་ལས། །ཐོགས་མེད་ཡིད་བཞིན་མྱུར་སྒྲུབ་ཅིང་། །རྒྱལ་ཁམས་བདེ་ཞིང་བཀྲ་ཤིས་རྒྱས། །རྫོགས་ལྡན་དུས་ལྟར་དགེ་ལེགས་ཀྱི། །དཔལ་ཀུན་ཡོངས་སུ་ཁྱབ་པར་ཤོག །གཙྪས་རང་
གནས་གཤེགས། ཟླ་རྒྱལ་བསང་འདི་བླ་མ་རབ་འབྱོར་ངོར་སྤེལ། །
སྤྱི་ཕུག་བླ་མ་སྐུ་ཆེན་པས་བསྐུལ་ངོར་ཡུལ་ལྷའི་བསང་མཆོད།
འདིར་ཡུལ་ལྷའི་བསང་མཆོད་བྱེད་པར་སྤྲོ་ན། མཆོད་རྫས་བསང་ཤིང་སོགས་འདུ་བགྱིས་ནས། སྭ་བྷཱ་ཝ་སོགས། སྟོང་པར་གྱུར་པའི་ངང་ཉིད་ལས། །བསང་ཁང་ཡིད་འོང་རྒྱ་ཆེའི་ནང་། །སྨན་སྤོས་དྲི་ངད་བདུག་པའི་ཚོགས། །སྤྲིན་ཕུང་གཏིབས་པ་ལྟ་བུ་དང་། །དེ་ལས་འདོད་ཡོན་དཔག་མེད་པ། །རབ་འཕྲོས་ས་དང་བར་སྣང་གི། །ཕྱོགས་ཀུན་རྒྱས་པར་འགེངས་པ་དང་། །གཞན་ཡང་མཆོད་རྫས་ཉེར་སྤྱོད་དང་། །སྤྱན་གཟིགས་དཀོར་ཆ་ལ་སོགས་པ། །ལྷ་མིའི་ལོངས་སྤྱོད་ལས་ལྷག་གྱུར། །ༀ་བཛྲ་སྥ་ར་ཎ་ཁཾ། ལན་གསུམ་བརྗོད། ཀྱཻ། སྐྱབས་གནས་རྩ་གསུམ་ཐུགས་རྗེ་ཅན། །མཆོག་གསུམ་སྤྱི་དཔལ་པདྨ་འབྱུང་། །གསར་རྙིང་རྒྱུད་སྡེའི་ལྷ་རབ་འབྱམས། །ཇི་སྙེད་རྒྱལ་བ་སྲས་བཅས་རྣམས། །བསང་ངོ་མཆོད་དོ་དགྱེས་པར་རོལ། །ཐང་ལྷ་ཡར་ཞུར་སྤོམ་ར་གཉེན། །དགེ་བསྙེན་ཆེན་པོ་ཐམས་ཅད་དང་། །མདོ་ཁམས་སྒང་དྲུག་ཁྱད་པར་དུ། །ཟལ་མོའི་སྒང་དུ་གནས་པ་ཡི། །སྐུ་རྒྱལ་ཤེ་ནེ་འཁོར་བཅས་དང་། །ཆོས་འཁོར་འདི་ཉིད་སྐྱོང་བྱེད་པའི། །གནས་བདག་ཡུལ་ལྷ་གཞི་བདག་རྣམས། །ཟོ་དོར་སྟོན་རྒྱལ་གཉན་པོ་དང་། །རྒྱལ་ཆེན་གྲུ་གུ་ལ་སོགས་པ། །ཐམས་ཅད་འདིར་གཤེགས་བསང་ལ་བྱོན། །སྔོན་ཚེ་ཨོ་རྒྱན་ཆེན་པོ་དང་། །
རིག་འཛིན་གྲུབ་ཐོབ་རྒྱ་མཚོ་ཡི། །སྤྱན་སྔར་ཐ་ཚིག་མནའ་བོར་ལྟར། །སངས་རྒྱས་བསྟན་པ་བསྲུང་བའི་ཕྱིར། །རྣལ་འབྱོར་སྒྲུབ་པོའི་དམ་ལ་འདུས། །འདིར་བཤམས་ཡིད་འོང་བསང་མཆོད་རྫས། །མ་ལ་ཡ་ཡི་ནགས་རླུང་གི། །དྲི་བཞོན་དཀྲིགས་པ་དང་མཚུངས་དང་། །སྐབས་གསུམ་འཆི་མེད་ལོངས་སྤྱོད་ལས། །ཕུལ་གྱུར་རྨད་བྱུང་འདོད་ཡོན་རྣམས། །སོ་སོར་མོས་པའི་རང་བཞིན་དག །རྒྱ་ཆེན་རྒྱུན་མི་ཆད་པ་དང་། །རྒྱལ་སྲིད་བཀྲ་ཤིས་རྫས་རྟགས་དང་། །ནོར་བུ་རིན་ཆེན་དར་སྣ་དང་། །སྤྱན་གཟིགས་དཀོར་ཆས་གཟུགས་འགྲོས་སོགས། །གསེར་གཡུའི་སྐྱེམས་བཟང་ཛ་གད་ཕུད། །སྣ་ཚོགས་འབྲུ་སྣ་སྨན་སྣ་སོགས། །མདོར་ན་དགྱེས་བསྐང་མཐུན་པའི་རྫས། །བློ་ཡིས་དངོས་སྤྲུལ་འབུལ་གྱི་བཞེས། །བསང་ངོ་མཆོད་དོ་མངའ་གསོལ་ལོ། །གསོལ་ཞིང་མཆོད་པ་ལ་བརྟེན་ནས། །རྣམ་དག་དྲི་མེད་རྒྱལ་བའི་བསྟན། །བཀའ་བརྒྱུད་རིང་ལུགས་ཕྱོགས་མཐར་ཁྱབ། །བསྟན་འཛིན་དགེ་འདུན་རྒྱ་མཚོ་རྣམས། །འཕེལ་ཞིང་དར་རྒྱས་ཡུན་ཏུ་གནས། །གཟུགས་ཅན་གཟུགས་མེད་བདུད་ཀྱི་སྡེ། །ཆོས་འཁོར་གཉན་ལ་བར་གཅོད་པའི། །བསམ་སྦྱོར་ལོག་འདྲེན་བྱེད་པ་རྣམས། །ཚར་གཅོད་རྗེས་འཛིན་ཕྲིན་ལས་ཀྱི། །མེལ་ཚེ་མ་གཡེལ་དམ་ཚིག་ཅན། །རྣལ་འབྱོར་བདག་
ཅག་འཁོར་བཅས་ཀྱི། །བསམ་པ་སྒྲུབས་ལ་རེ་བ་སྐོངས། །མཐུན་རྐྱེན་ཡིད་བཞིན་འབད་མེད་དུ། །མྱུར་དུ་འགྲུབ་ཅིང་མི་མཐུན་པའི། །ནད་གདོན་འགལ་རྐྱེན་བཟློག་པ་དང་། །ཉིན་མཚན་དུས་རྣམས་ཀུན་ཏུ་ཡང་། །ལྷ་སྲུང་མགོན་བྱེད་མཆོད་བསྟོད་ན། །ཅི་ལྟར་བཅོལ་པའི་འདོད་དོན་ཀུན། །རེ་བའི་ཤིང་རྟ་འགེངས་པར་མཛོད། །མཐུ་སྟོབས་རྫུ་འཕྲུལ་མངའ་དབང་ཕྱུག །ལས་བཞིའི་ཕྲིན་ལས་བདག་པོ་སྟེ། །དཀར་ཕྱོགས་སྐྱོང་བའི་ལྷ་ཆེན་པོ། །ཡུལ་བདག་དགེ་བསྙེན་ཚོགས་བཅས་བསྟོད། །ཆོས་དང་ལོངས་སྤྱོད་དཔལ་འབྱོར་གྱི། །ཕྱྭ་གཡང་དངོས་གྲུབ་མ་ལུས་རྣམས། །ཐམས་ཅད་དབང་དུ་གྱུར་ནས་ཀྱང་། །བཀྲ་ཤིས་ཡིད་བཞིན་དཔག་བསམ་ཤིང་། །དགོས་འདོད་ལྷུན་གྲུབ་མཆོག་ཐུན་གྱི། །ཕུན་སུམ་ཚོགས་པའི་གཏེར་གང་ཞིང་། །བདེ་ལེགས་དབྱར་མཚོ་མཐའ་རྒྱས་ཤོག །གཙྪས་གཤེགས། ཞེས་སྤྱི་ཕུག་བླ་མ་སྐུ་ཆེན་པས་བསྐུལ་ངོར་སྤེལ། །
རྫ་རྒྱལ་འཕེན་པོའི་བསང་།
ན་མོ་གུ་རུ་པདྨཱ་ཀ་ར་ཡ། འདིར་རྫ་རྒྱལ་འཕེན་པོའི་བསང་བྱ་བར་འདོད་པ་དག་གིས། གསེར་སྐྱེམས་དང་མཆོད་པའི་རྫས་རྣམས་འདུ་བར་བྱ་སྟེ། རང་ཉིད་ལྷ་ཡི་ང་རྒྱལ་ལ་གནས་བཞིན་པས། ༀ་ཨཱཿཧཱུྃ་གིས་བྱིན་བརླབས། བྷྲཱུྃ་ལས་རིན་ཆེན་སྣོད་ཡངས་པར། །འབྲུ་གསུམ་ལས་བྱུང་འདོད་ཡོན་ཚོགས། །
ཟག་མེད་རབ་འབྱམས་ཀུན་བཟང་གི། །སྨོན་ལམ་ལས་གྲུབ་མཆོད་སྤྲིན་གྱུར། །མགྲོན་སྤྱན་དྲངས་པ་ནི། ཀྱཻ། མགོན་གྱུར་སྐྱབས་གནས་ཐུགས་རྗེ་ཅན། །སངས་རྒྱས་བྱང་སེམས་བླ་མ་དང་། །ཡི་དམ་དཔའ་བོ་མཁའ་འགྲོ་ཚོགས། །ཆོས་སྲུང་ནོར་ལྷའི་ཚོགས་བཅས་བསང་། །ཁྱད་པར་རིགས་ཀྱི་སྲུང་མ་ཆེ། །གནོད་སྦྱིན་ཡོངས་ཀྱི་རྗེ་བོ་སྟེ། །རྫ་རྒྱལ་འཕེན་པོ་འཁོར་དང་བཅས། །གནས་འདིར་སྤྱན་འདྲེན་བཞུགས་སུ་གསོལ། །སྐུ་མདོག་དཀར་སྨུག་དུང་རྨོག་གསོལ། །སྐུ་ལ་གསེར་ཁྲབ་འཁོར་གསུམ་རྫོགས། །ཕྱག་གཉིས་མདུང་དར་ཞགས་པ་བསྣམས། །ཆིབས་སུ་རྐྱང་བུ་སྨུག་ནག་ཆིབས། །ཤ་བ་རྒྱ་འཛོང་རོལ་དུ་ཁྲིད། །སྣང་སྲིད་ཡོངས་བསྐང་མཆོད་པ་བཞེས། །གསོལ་ལོ་མཆོད་དོ་ཕྲིན་ལས་སྒྲུབས། །ཡབ་གཅིག་གནམ་གཉེན་དཀར་པོ་དང་། །ཡུམ་མཆོག་ལྷ་མོ་དུང་སྐྱོང་དཀར། །ཕུ་བོ་གཉན་རྒྱལ་གངས་སྔོན་པོ། །གཅུང་པོ་ཚ་ལ་བྱ་ཞུར་དང་། །ལྕམ་སྲིང་ལྷ་ལྕམ་དཀར་མོ་ལ། །ལྷ་ཀླུ་གཉན་བདུད་ཚོགས་ཀྱིས་བསྐོར། །སྐུ་ཞང་རྡོ་རྗེ་འབར་བ་ལ། །གཉན་དམག་འབུམ་བསྐོར་རྒྱབ་བརྟེན་ཆེ། །རྨ་རྒྱལ་སྤོམ་ར་དགེ་བསྙེན་ཚོགས། །སྡོང་གྲོགས་གེར་མཛོ་དགྲ་ལྷས་བསྐོར། །བླ་མཆོད་སྒྱོགས་ཆེན་གདོང་ར་དང་། །གཉན་ཟླ་འབྲི་ཆེན་གདོང་ངུར་ལ། །འབྲོག་གནས་
འབྲི་ཀླུང་གཞི་བདག་སྐོར། །སྣང་སྲིད༴ གསོལ་ལོ༴ རྒྱལ་མོ་གཉེན་སྲས་ལྕམ་མོ་དང་། །དམག་དཔོན་དྭང་མོ་དིལ་དཀར་པོ། །ཁ་འཛིན་རི་མོ་དབང་གཞུ་དང་། །དར་འཛིན་ངང་ཡག་ལྷ་རྩེ་གཉན། །བློ་འཛིན་མཆོག་རྒྱབ་རི་བཀྲ་བ། །བློན་པོ་ཕྱག་དཀར་སྙིང་འབུམ་དང་། །ཀླུ་རངས་མདུང་རྩེ་སྟག་ར་རྒོད། །ཡོན་པོ་དགྲ་འདུལ་རམ་རམ་མཆེད། །རི་ནག་ཞལ་དཀར་ཝ་དིལ་དང་། །གཅོད་བྱེད་འཆོངས་བྱེད་ལྡིང་བྱེད་ཆེ། །མགྱོགས་བྱེད་སྟོན་བྱེད་རྣོ་བར་བྱེད། །བཙུན་བྱེད་ཡང་མཛད་ལག་རིང་དང་། །སྟོན་པ་འགལ་ཆེན་དཔའ་བར་བྱེད། །སྐུ་ལྷ་སྒོ་བ་སྒོ་སྲུང་སོགས། །གཞན་ཡང་གཞི་བདག་དཀར་ཕྱོགས་སྐྱོང་། །སྣང་སྲིད༴ གསོལ་ལོ༴ ནོངས་པ་བཤགས་སོ་བཟོད་པར་བཞེས། །སྔོན་ཚེ་པདྨ་འབྱུང་གནས་དང་། །གྲུབ་དབང་ཀརྨ་པཀྴི་ཡི། །དམ་ཚིག་གཉན་པོ་རྗེས་དྲན་མཛོད། །སངས་རྒྱས་བསྟན་པ་རིན་པོ་ཆེ། །སྙིང་པོ་དོན་གྱི་རིང་ལུགས་འདི། །སྲིད་པའི་རྩེ་མོར་བསྒྲེངས་བ་དང་། །བསྟན་འཛིན་འགྲོ་དོན་ཕྲིན་ལས་རྒྱས། །འགྲོ་རྣམས་དམ་པའི་ཆོས་ལྡན་ཞིང་། །དགེ་ལེགས་ལྷག་བསམ་འགྲུབ་པ་དང་། །ལོག་འདྲེན་བདུད་ཀྱི་གཡུལ་ངོ་ལས། །ཡོངས་སུ་རྣམ་པར་རྒྱལ་གྱུར་ཅིག །རྣལ་འབྱོར་བདག་གིས་བཅོལ་བའི་ལས། །ཡིད་བཞིན་ཕྲིན་ལས་བསྒྲུབ་ཏུ་
གསོལ། །ཕྱྭ་དང་གཡང་གི་དངོས་གྲུབ་སྩོལ། །མགྲོན་རྣམས་རང་གི་གནས་སུ་གཤེགས། །དུས་སུ་སླར་ཡང་འབྱོན་པར་མཛོད། །གཙྪས་གཤེགས། མངྒ་ལཾ་སིདྡྷི་ཛ་ཡ་ཨ་ལ་ལ་ཧོ། བཀྲ་ཤིས་གང་རིགས་བརྗོད། ཅེས་པ་འདི་ཞེ་འཛོང་བླ་མ་རྣམ་གཉིས་ཀྱི་ཐུགས་བཞེད་བསྐང་བའི་ཕྱིར་ཤིང་ཡོས་ལོར་སི་ཏུ་པས་ཐུབ་བསྟན་ཆོས་འཁོར་གླིང་དུ་སྤེལ་བའོ། །
ལྷ་བྲག་དཀར་པོའི་བསང་མཆོད།
སྭ་སྟི། ལྷ་བྲག་དཀར་པོའི་བསང་མཆོད་སྤྲོ་ན། མཆོད་རྫས་རྣམས་གཙང་ཞིང་བཟང་བ་འདུ་བར་བྱས་ལ་རང་ལྷའི་ང་རྒྱལ་དང་ལྡན་པས། ཨ་མྲྀ་ཏས་བསངས། སྭ་བྷཱ་ཝས་སྦྱངས ། སྟོང་པའི་ངང་ལས་སྣང་སྲིད་ཀྱི། །ཆོས་རྣམས་གཟུང་འཛིན་བྲལ་བའི་ངང་། །རིན་ཆེན་བསང་ཁང་ནང་དུ་ནི། །མཆོད་སྤྲིན་རབ་འབྱམས་ཆར་འབེབས་གྱུར། །ༀ་བཛྲ་སྥ་ར་ཎ་ཁཾ། ༀ་ཨཱཿཧཱུྃ། ཞེས་ལན་གསུམ་གྱིས་བྱིན་གྱིས་བརླབས། ཀྱཻ། ཛམ་བུ་བྲྀཀྴས་མཚན་པའི་བྱང་། །བསིལ་བའི་ལྗོངས་ཀྱི་མདོ་ཁམས་སྨད། །བོད་ཆེན་སྨར་ཁམས་སྒང་གི་ཆ། །བྱེ་བྲག་གྲུ་གུའི་གནས་མཆོག་གི །རིན་ཆེན་ཤེལ་གྱི་ལྡིང་ཁང་ན། །རིག་འཛིན་པདྨའི་དགེ་བསྙེན་ཆེ། །སངས་རྒྱས་ཆོས་ཀྱི་སྲུང་མ་སྟེ། །བཀའ་དང་ཟབ་གཏེར་གཉན་གྱི་བདག །ཡུལ་ལྷ་ཟོ་དོར་ཀུན་གྱི་གཙོ། །ལྷ་བྲག་རྡོ་རྗེ་འབར་བ་རྩལ། །ཞི་འཛུམ་རིན་ཆེན་རྒྱན་དང་ལྡན། །དར་
ཐོད་གསེར་གྱི་པྲོག་ཞུ་མཛེས། །སྐུ་མདོག་དཀར་ལ་བེར་དཀར་གསོལ། །གཡས་པས་དར་དཀར་བ་དན་དང་། །གཡོན་པས་རིན་ཆེན་རྒྱལ་མཚན་བསྣམས། །བསྟན་པ་སྐྱོང་དང་རྣལ་འབྱོར་སྲུང་། །དགྲ་བགེགས་འདུལ་བའི་རྟགས་ཀྱིས་བརྒྱན། །རཏྣའི་སྒ་སྲབ་རབ་བརྗིད་པའི། །མགྱོགས་འགྲོ་འཕུར་ཤེས་རྟ་དཀར་བཅིབས། །སྲས་དང་བཙུན་མོ་བློན་འཁོར་བཅས། །ས་བདག་གཏེར་བདག་ཡུལ་གནས་བདག །ལྷ་ཀླུ་གཉན་གྱི་སྡེ་རིས་བསྐོར། །གནས་འདིར་དམ་ཚིག་དབང་གིས་གཤེགས། །རང་རང་དགྱེས་པའི་གདན་ལ་བཞུགས། །འདིར་བཤམས་ཕྱི་ནང་མཆོད་པའི་ཚོགས། །རྣམ་མང་བཀོད་ལེགས་ཡིད་དུ་འོང་། །སྤྱན་གཟིགས་དཀོར་ཆས་རྟ་ཕྱུགས་དང་། །འཕུར་དགུ་འཛུལ་བཅུའི་གཟུགས་འགྲོས་དང་། །བཀྲ་ཤིས་རྫས་རྟགས་རྒྱལ་སྲིད་བདུན། །ཉེ་བའི་རིན་ཆེན་འདོད་ཡོན་ལྔ། །ཉེར་སྤྱོད་སྣ་ཚོགས་མཆོད་པའི་རྫས། །སོ་སོའི་ཡིད་བཞིན་འཆར་བ་ཡི། །ཟག་མེད་ནམ་མཁའི་མཛོད་ཇི་བཞིན། །ཀུན་ཏུ་བཟང་པོའི་སྨོན་ལམ་ལྟར། །བདུག་སྤོས་སྤྲིན་གྱི་ཕུང་པོ་ཡི། །འོད་ཀྱི་དྲྭ་བའི་ཆ་རྣམས་ལས། །གྲུ་ཆར་བཞིན་དུ་སྤུངས་སེ་སྤུང་། །ཆུ་འཛིན་འཁྲིགས་ལྟར་ཐིབས་སེ་ཐིབ། །གསེར་མངལ་ཅན་དང་ཀུ་བེ་ར། །ཀླུ་དབང་ལ་སོགས་རྣམ་དཔྱོད་འཕྲུལ། །ཟིལ་གནོན་ཡ་མཚན་
ཡིད་སྤྲུལ་གྱིས། །སྟོང་གསུམ་འཇིག་རྟེན་ཀུན་བཀང་འབུལ། །དགྱེས་པ་ཆེན་པོས་བཞེས་སུ་གསོལ། །བརྩེ་བས་དགོངས་ཏེ་རོལ་པར་མཛོད། །གསོལ་ལོ་མཆོད་དོ་མངའ་གསོལ་ལོ། །མཐུ་སྟོབས་རྫུ་འཕྲུལ་ཅིར་ཡང་བསྒྱུར། །དཀར་ཕྱོགས་སྲུང་ཞིང་ནག་ཕྱོགས་གཞོམ། །ཐོགས་མེད་རྩལ་ལྡན་སྐུ་ལྷ་གཉན། །འཁོར་དང་བཅས་ལ་བདག་བསྟོད་དོ། །སེངྒེ་བྲག་གི་ཡང་རྫོང་དུ། །སྔོན་ཚེ་དཔལ་ཆེན་ཧེ་རུ་ཀ །པདྨ་ཐོད་ཕྲེང་ལ་སོགས་དང་། །དྲག་པོ་ནུས་ལྡན་རྡོ་རྗེ་ཡི། །སྤྱན་སྔར་ཞལ་བཞེས་གཡར་དམ་གྱི། །ཐ་ཚིག་གཉན་པོ་དྲན་མཛོད་ལ། །རིག་འཛིན་བྱང་ཆུབ་བསྒྲུབ་པ་ཡི། །བར་ཆད་ཉེར་འཚེ་བདུད་དཔུང་རྣམས། །ཕ་མཐར་བསྐྲད་ཅིང་གནས་སྐབས་སུ། །བསམ་དོན་ལྷུན་གྲུབ་ཚེ་བསོད་རྒྱས། །འཁོར་སློབ་མངའ་ཐང་དབྱར་མཚོ་ལྟར། །རྒྱས་ཤིང་གཞི་བྱེས་རྟག་པར་སྐྱོངས། །སངས་རྒྱས་བསྟན་པ་དར་བ་དང་། །གསང་བ་སྔགས་ཀྱི་ཟབ་ཆོས་གང་། །ཕྱོགས་མཐར་ཁྱབ་ཡུན་གནས་པར་མཛོད། །བསྟན་འཛིན་འཚོ་བརྟན་རྒྱལ་ཁམས་བདེ། །ནད་འཁྲུགས་དབུལ་ཕོངས་ཞི་བ་སོགས། །མདོར་ན་ལེགས་པའི་དཔལ་ཡོན་རྣམས། །རབ་དཀར་ཆུ་ཤེལ་རི་བོང་འཛིན། །ཡར་ངོའི་ཆ་གང་ལྟར་འཕེལ་བའི། །སྡོང་གྲོགས་
མ་གཡེལ་ཕྲིན་ལས་ཀུན། །བདེ་བླག་ཉིད་དུ་འགྲུབ་པར་མཛོད། །བདག་སོགས་མ་ཤེས་འཁྲུལ་དབང་གིས། །ནོངས་པར་གྱུར་རྣམས་བཟོད་པར་བཞེས། །བཀྲ་ཤིས་ལྗོན་བཟང་རྒྱལ་བའི་བསྟན། །འཕེལ་ཞིང་དེ་འཛིན་ལོ་འདབ་རྒྱས། །རྣལ་འབྱོར་བསམ་དོན་རེ་བའི་འབྲས། །ཡོངས་སུ་སྨིན་པའི་བཀྲ་ཤིས་ཤོག། གཙྪས་གཤེགས་པའམ། རྟེན་ལ་བསྟིམ་པར་བྱའོ། །ཞེས་པའང་ཀུན་མཁྱེན་སྤྲུལ་པའི་སྐུའི་བཞེད་པ་ལྟར་སི་ཏུ་པདྨ་ཉིན་བྱེད་དབང་པོས་སྤེལ་བ་དགེ་བར་གྱུར་ཅིག །ཤུབྷཾ། །
བླ་མ་བསོད་ནམས་ཆོས་འཕེལ་བཞེད་ངོར།
ཨམྲྀ་ཏས་བསངས།སྭ་བྷཱ་ཝས་སྦྱངས། སྟོང་ལས་བསང་ཁང་ཡིད་འོང་ནང་། །བདུག་སྤོས་མཆོད་སྤྲིན་མི་ཟད་པ། །ནམ་མཁའ་མཛོད་བཞིན་འདོད་ཡོན་ཚོགས། །རྒྱ་ཆེན་རྒྱུན་མི་ཆད་པར་གྱུར། །ༀ་བཛྲ་སྥ་ར་ཎ་ཁཾ། ཀྱཻ། སྔོན་ཚེ་རིག་འཛིན་པདྨ་འབྱུང་། །སྤྱན་སྔར་ཞལ་བཞེས་དམ་ཚིག་ཅན། །ལྷ་ཡི་དགེ་བསྙེན་ཆེན་པོ་ནི། །འཛི་རྒྱལ་དགའ་བྲོ་སྲས་ཡུམ་འཁོར། །གཅིག་ཏུ་མ་ངེས་སྣ་ཚོགས་སུ། །རྫུ་འཕྲུལ་རོལ་པ་བསམ་ལས་འདས། །དཀར་པོའི་སྡེ་སྐྱོང་ཡུལ་ལྷའི་གཙོ། །གནས་འདིར་སྤྱན་འདྲེན་གཤེགས་སུ་གསོལ། །ཕྱི་ནང་གསང་བའི་མཆོད་པའི་རྫས། །མཐུན་པའི་དངོས་འབྱོར་ཡིད་སྤྲུལ་པ། །འབུལ་གྱི་དགྱེས་པར་བཞེས་སུ་གསོལ། །ཁྱད་
པར་བསང་མཆོད་དམ་པ་འདིས། །མི་གཙང་ཉམས་གྲིབ་དག་གྱུར་ནས། །ལྷ་ཞལ་ཟླ་བཞིན་གསལ་གྱུར་ཅིག །རྩ་བརྒྱུད་བླ་མའི་བཀའ་བཞིན་དུ། །ཡལ་གམ་གཉན་ལས་མ་འདའ་བར། །རྣལ་འབྱོར་ལས་བཞིའི་ཕྲིན་ལས་ཀུན། །གང་བཅོལ་འགྲུབ་པའི་སྡོང་གྲོགས་མཛོད། །གཞི་བྱེས་ཀུན་ཏུ་སྲུང་ཞིང་སྐྱོབས། །སངས་རྒྱས་བསྟན་པའི་སྙིང་པོ་སྤེལ། །བསྟན་འཛིན་ཞབས་བརྟན་དགེ་འདུན་རྒྱས། །ཡུལ་ཁམས་བདེ་ལྡན་རྣམ་ཀུན་ཏུ། །བཀྲ་ཤིས་ཀུན་ཏུ་ཁྱབ་པ་ཡི། །དགེ་ལེགས་དུ་མས་སྐྱོང་གྱུར་ནས། །ཐུགས་འགལ་དག་ཚངས་དངོས་གྲུབ་སྩོལ། །ཅེས་པའང་བླ་མ་བསོད་ནམས་ཆོས་འཕེལ་བཞེད་ངོར། ཡུལ་ལྷ་གཉན་པོས་སྐྱོང་བའི་ཆོས་སྒར་དུ་སྤེལ་བ་མངྒ་ལཾ། །།
ལྷ་བྲིས་རྟ་མགྲིན་ངོར།
ཨ་མྲྀ་ཏས་བསངས སྭ་བྷཱ་ཝས་སྦྱངས། བསང་མཆོད་བདུག་པའི་སྤྲིན་ཕུང་ཟག་མེད་ཀྱི། །བདུད་རྩིའི་རང་བཞིན་ནམ་མཁའི་མཛོད་བཞིན་གྱུར། །ཀྱཻ། རབ་དཀར་ཀཻ་ལ་ཤ་ཡི་ས་འཛིན་ནི། །མཐོ་རིས་གནས་སུ་བསྙེགས་འདྲའི་སྐུ་མཁར་ནས། །ཟོ་དོར་ཡོངས་ཀྱི་གཙོ་མཆོག་ཟིལ་ཕྲོམ་ཞེས། །རྡོ་རྗེ་གཡུ་དྲུང་སྲས་ལྕམ་འཁོར་དང་བཅས། །འདིར་བྱོན་འདོད་ཡོན་སྣ་ཚོགས་བསང་བརྔན་རྫས། །དགྱེས་དགུར་རོལ་ལ་རྣལ་འབྱོར་བསམ་དོན་ཀུན། །ཡིད་བཞིན་འགྲུབ་པའི་སྡོངས་
གྲོགས་དམ་པ་དང་། །ཁ་འཛིན་སྲུང་སྐྱོབ་གཡེལ་མེད་ཕྲིན་ལས་ཀུན། །ཆོས་བཞིན་སྨིན་པར་མཛོད་ཅིག་ལྷ་ཆེན་པོ། །མཐུ་རྩལ་རྫུ་འཕྲུལ་ལྡན་ལ་བསྟོད་པར་བགྱི། །ནོངས་པར་གྱུར་བཤགས་ཚངས་པར་བསྩལ་དུ་གསོལ། །རྣམ་ཀུན་བཀྲ་ཤིས་དཔལ་དང་ལྡན་གྱུར་ཅིག །གཙྪས་གཤེགས། ཞེས་ལྷ་བྲིས་རྟ་མགྲིན་ངོར་སི་ཏུས་སྤེལ། །
ལི་ཡུལ་གྱི་ཆ་བཀྲ་ཤིས་ཆོས་གླིང་སྐྱོང་བའི་ལྷ་རྣམས་ལ་འདོད་གསོལ་མཆོད་ཕྲེང་།
ༀ་ཨཱཿཧཱུྃ། ཞེས་འབྲུ་གསུམ་གྱིས་མཆོད་རྫས་བྱིན་བརླབས་ལ། ཀྱཻ། སྣང་ཞིང་སྲིད་པས་བསྡུས་པའི་ཆོས་ཐམས་ཅད། །དག་པ་ཡེ་ཤེས་བདུད་རྩིར་བྱིན་བརླབས་ནས། །དངོས་ཀུན་སྣང་བ་སྣ་ཚོགས་རྟེན་འབྲེལ་གྱི། །སྒྱུ་མ་ཙམ་དུ་རང་རིག་གསལ་བའི་ངང་། །ཚུལ་ཁྲིམས་རྣམ་དག་དྲི་བསུང་ངད་ལྡང་ཞིང་། །ལྷ་མིའི་འབྱོར་པ་མཆོད་པའི་བྱེ་བྲག་ཚོགས། །འདོད་དགུའི་ལོངས་སྤྱོད་དཔག་མེད་སྤྲིན་ལྟར་གཏིབས། །མཆོག་གསུམ་རྩ་གསུམ་ལྷ་ལ་མཆོད་པ་འབུལ། །ཡུལ་གནས་གཞི་ཡི་ལྷ་ཀླུ་སྡེ་བརྒྱད་སོགས། །མཆོད་འོས་ཀུན་ལ་མཉེས་པའི་དགྱེས་རྫས་འབུལ། །ཕྱི་སྣོད་གཞལ་ཡས་འཇིག་རྟེན་དྲི་མ་བསང་། །བདེ་ལྡན་པདྨོ་བཀོད་ཀྱི་རྣམ་པར་གྱུར། །ནང་བཅུད་སེམས་ཅན་སྒྲིབ་གཉིས་བག་ཆགས་བསང་། །གློ་བུར་འཁྲུལ་རྟོག་མ་ལུས་ཞི་གྱུར་ཅིག །བཀྲ་ཤིས་རབ་དཀར་ཆ་ཤས་ཡོངས་རྫོགས་ཤིང་། །དགེ་ལེགས་བདུད་རྩིའི་འོད་སྣང་
བསིལ་ཟེར་གྱིས། །སྣོད་བཅུད་ཀུན་ཀྱང་བདེ་སྐྱིད་ལྡན་གྱུར་ཅིག །རྒྱལ་བསྟན་རིན་ཆེན་སྲིད་མཐར་ཁྱབ་ཡུན་གནས། །དེ་འཛིན་ཞབས་བརྟན་དགེ་འདུན་ཐུགས་མཐུན་ཞིང་། །བསླབ་གསུམ་རྣམ་དག་སྐྱེ་དགུའི་བསོད་ནམས་ཞིང་། །མངོན་པར་མཐོ་ཞིང་ཆོས་ཀྱི་ཆབ་སྲིད་བརྟན། །ཕས་རྒོལ་ལས་རྒྱལ་རྟག་ཏུ་བསམ་པའི་དོན། །ནོངས་མེད་ཡིད་བཞིན་འགྲུབ་པའི་ཕྲིན་ལས་མཛོད། །རྒྱལ་ཁམས་བདེ་དགའི་དཔལ་ལ་དབང་འབྱོར་ཞིང་། །རྣམ་ཀུན་དགེ་ལེགས་རྒྱ་མཚོར་སྤྱོད་པར་ཤོག །ཅེས་སི་ཏུ་པས་བླ་མ་ནོར་བུ་ཆོས་འཕེལ་བཞེད་ངོར་ལི་ཡུལ་གྱི་ཆ་བཀྲ་ཤིས་ཆོས་གླིང་སྐྱོང་བའི་ལྷ་རྣམས་ལ་འདོད་གསོལ་མཆོད་ཕྲེང་དུ་སྤེལ་བ་དགེ། །
འབའ་ལུང་ཡུལ་ལྷའི་བསང་མཆོད།
བསང་མཆོད་ཇི་ལྟར་འོས་པ་འདུ་བར་བྱས་ལ། ཨ་ཀཱ་རོ་ལན་གསུམ་གྱིས་བྱིན་བརླབ། ཀྱཻ། སྟོབས་བཅུའི་མངའ་བདག་བདེ་བར་གཤེགས་པ་དང་། །ཞི་བ་ཆགས་བྲལ་དམ་པའི་ཆོས་ཀྱི་མཆོག །རིག་དང་གྲོལ་བའི་སར་གནས་དགེ་འདུན་སྡེ། །བླ་མེད་རིན་ཆེན་རྣམ་གསུམ་བྱིན་རླབས་དང་། །བདག་སོགས་མོས་བློའི་སྟོབས་ཀྱི་དགེ་ཚོགས་ལས། །ཕྱི་ནང་གསང་བའི་དམ་ཚིག་དག་གཙང་ཞིང་། །སྡོམ་པའི་ཚུལ་ཁྲིམས་ལ་སོགས་ཕར་ཕྱིན་དྲུག །ཡོངས་སུ་རྫོགས་པའི་དྲི་བ སུང་ཕུན་ཚོགས་ལྡན། །ཆོས་སྤྱོད་
བཅུ་དང་འཁོར་ལོ་རྣམ་གཉིས་སོགས། །རབ་དཀར་ལྷག་པའི་དགེ་མཚན་སྤྲིན་ཕུང་གཏིབས། །དེ་ལྟའི་ལེགས་པར་བྱས་བའི་རང་གཟུགས་ནི། །ཕྱོགས་དང་ཐ་གྲུར་ཁྱབ་པའི་ཡོན་ཏན་གྱིས། །འཕགས་ཚོགས་དགྱེས་ཤིང་དམ་ཅན་ཐུགས་དམ་བསྐང་། །དཀར་ཕྱོགས་ཀུན་ཀྱང་དགའ་བདེའི་སིམ་པ་བསྐྱེད། །སྣོད་བཅུད་སྣང་ཞིང་སྲིད་པའི་སེམས་ཅན་རྣམས། །མི་མཐུན་ནོངས་པའི་དྲི་མ་བ སང་གྱུར་ཅིག །རྐྱེན་ངན་བར་ཆད་ཐམས་ཅད་ཞི་གྱུར་ཅིག །བྱམས་པ་སྙིང་རྗེ་དགའ་བ་བཏང་སྙོམས་བཅས། །ཚད་མེད་བཞི་ལ་རྟག་ཏུ་གནས་གྱུར་ཅིག །ཡུལ་གཞི་གནས་བདག་ལྷ་ཡི་དགེ་བསྙེན་ཚོགས། །མཚོ་སྨན་ལ་སོགས་མཆོད་འོས་མགྲོན་རྣམས་ཀྱང་། །རྣམ་དག་ལྷག་པའི་དྲི་བཟང་དང་ལྷན་ཅིག །གཙང་ཞིང་ཡིད་འོང་སྐབས་གསུམ་མཆོད་པའི་རྫས། །འདོད་ཡོན་རྒྱ་མཚོ་འབུལ་བའི་དགེ་གང་དེས། །མཉེས་ཞིང་ཚིམ་ནས་དགའ་མགུ་ཡི་རངས་ལྡན། །དེ་མཐུས་རྒྱལ་བསྟན་བསྲུང་ཞིང་བསྟན་འཛིན་གྱི། །ཞབས་བརྟན་རྣལ་འབྱོར་བསམ་དོན་ཆོས་བཞིན་འགྲུབ། །གཞི་བྱེས་ཀུན་ཏུ་དགེ་བའི་སྡོང་གྲོགས་མཛོད། །ལེགས་ཁ་ཟུངས་ལ་རྒྱལ་ཁ་བཏོད་བ་དང་། །མི་ནོར་ཕྱུགས་གསུམ་ཉེར་འཚེ་ལས་རྒྱལ་ཞིང་། །ལོ་ལེགས་འབྲུ་འཕེལ་ནད་མུག་མཚོན་བསྐལ་ཞི། །ཚེ་དཔལ་ལོངས་སྤྱོད་དབྱར་མཚོ་ལྟ་བུར་རྒྱས། །རྟག་
པར་བཀྲ་ཤིས་སྣང་བས་ཁྱབ་གྱུར་ཅིག། ཅེས་པའང་སི་ཏུ་པས་ལྷུན་གྲུབ་སྤྲུལ་སྐུའི་བཞེད་ལྟར་འབའ་ལུང་ཡུལ་ལྷའི་བསང་མཆོད་དུ་སྤེལ་པ་དགེ་བར་གྱུར་ཅིག །
ཡུལ་ལྷ་ཞལ་ད་གཉན་པོའི་བསང་མཆོད།
ན་མོ་པདྨཱ་ཀ་ར་ཡ། འདིར་ཡུལ་ལྷ་ཞལ་ད་གཉན་པོའི་བསང་མཆོད་སྤྲོ་བར་འདོད་ན། གཙང་ཞིང་བཟང་བའི་མཆོད་རྫས་འདུ་བར་བྱས་ལ། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་ལས་བསང་ཁང་རིན་ཆེན་ལས་གྲུབ་པར། །བདུག་སྤོས་སྣ་ཚོགས་དྲི་བསུང་ངད་ལྡང་ཞིང་། །གཞན་ཡང་ལྷ་མིའི་འབྱོར་བ་མཐའ་ཡས་པ། །མཆོད་པའི་བྱེ་བྲག་ནམ་མཁའ་གང་བར་གྱུར། །ༀ་བཛྲ་སྥ་ར་ཎ་ཁཾ། ལན་གསུམ་དང་། རང་ཉིད་རྡོ་རྗེ་དྲག་རྩལ་གསལ་བ་ཡི། །ཐུགས་ལས་འོད་འཕྲོས་མཆོད་ཡུལ་སྤྱན་དྲངས་གྱུར། །ཀྱེ། སྔོན་ཚེ་མཚོ་སྐྱེས་རྡོ་རྗེ་ཐོད་ཕྲེང་རྩལ། །བཀའ་བརྒྱུད་བླ་མ་རྣམས་ཀྱི་སྤྱན་སྔ་རུ། །དམ་བཞག་དབང་བསྐུར་ཐ་ཚིག་ཡལ་གམ་ཅན། །ལྷ་ཡི་དགེ་བསྙེན་རྩེ་རྒྱལ་ཞལ་ད་གཉན། །སྦས་པའི་ཡུལ་ལྗོངས་བྱང་གི་ཨ་ཏ་རོང་། །གནས་ཤིང་སྐྱོང་བའི་དཀར་ཕྱོགས་སྡེ་དཔོན་ཆེ། །ཕྱི་ལྟར་རིན་ཆེན་མར་གད་ལྷུན་པོ་ལ། །ནང་ལྟར་བཀོད་ལེགས་ལྷ་ཡི་ཕོ་བྲང་མཛེས། །གསང་བ་རང་བཞིན་རྣམ་དག་དཀྱིལ་འཁོར་ཤར། །ངོ་མཚར་རྨད་དུ་བྱུང་བའི་བསྟི་གནས་ཀྱི། །ཡུལ་གཞིའི་བདག་པོ་བཙུན་མོ་སྲས་འཁོར་བཅས། །ཁྱེད་རྣམས་
དགྱེས་མཛད་སྨན་སྤོས་དུད་པའི་སྤྲིན། །རྒྱ་མཚོའི་གོས་ཅན་ཁྱབ་པར་གཡོ་བ་ཡི། །དབང་གཞུའི་ཁ་དོག་ཟེར་མའི་ཆ་ཤས་ལས། །བཀྲ་ཤིས་རྫས་རྟགས་འདོད་ཡོན་རྒྱལ་སྲིད་བདུན། །ལྷ་ཀླུ་མི་ཡི་ལོངས་སྤྱོད་མི་ཟད་པ། །འདོད་དགུ་ཡིད་བཞིན་སོ་སོར་འཕྲོ་བ་དང་། །ནམ་མཁའ་མདའ་འཕང་ལྗང་བུ་འཕེན་བཟང་ལྡན། །དཀར་གསུམ་མངར་གསུམ་འབྲུ་སྣ་བ་ལིང་ཏ། །ཕྱེ་མར་ཇ་ཕུད་ཛ་གད་རིན་ཆེན་སྐྱེམས། །སྲ་བརྟན་གོ་ཆ་མཚོན་དང་དར་སྣ་ཚོགས། །སྟག་གཟིག་དཀོར་ཆས་བསམ་ལས་འདས་པ་དང་། །འདབ་ལྡན་ཅང་ཤེས་ཙ་ར་ཤེལ་སྒོང་སོགས། །འཕུར་ལྡིང་རྐང་འགྲོ་རྣམ་པ་མང་པོ་བཅས། །དངོས་འབྱོར་ཡིད་ཀྱིས་སྤྲུལ་ནས་འབུལ་བར་བགྱི། །ཟག་མེད་བདེ་བ་ཆེན་པོའི་ངང་དུ་རོལ། །བསང་གི་སྤོས་སྤྲིན་དྲ་བའི་འོད་ཟེར་འདིས། །ཉམས་ཤིང་རྨུགས་པའི་གྲིབ་ཀུན་སངས་གྱུར་ཅིག །ཐུགས་འགལ་ཉེས་རྣམས་བྱང་ཞིང་དག་ཚངས་སྩོལ། །རང་ཕྱོགས་བསྲུང་ཞིང་ཕས་རྒོལ་འཇོམས་པའི་ལྷ། །མཆོད་དོ་བསྟོད་དོ་བརྔན་ནོ་མངའ་གསོལ་ལོ། །རྒྱལ་བའི་བསྟན་སྲུང་བསྟན་འཛིན་ཕྲིན་ལས་སྤེལ། །དགེ་འདུན་སྡེ་སྐྱོངས་བདག་ཅག་གཞི་བྱེས་ལ། །སྲུང་སྐྱོབ་རྟག་པར་འགོ་ཞིང་སྡོང་གྲོགས་དང་། །ཕོ་ལྷ་དགྲ་བླ་མ་ལྷ་བུ་རྫིར་མཛོད། །ཡུལ་ཕྱོགས་འདི་རུ་ཆར་ཆུ་དུས་འབེབས་ཤིང་། །ལོ་ལེགས་འབྲུ་འཕེལ་སྐྱེ་དགུ་བདེ་སྐྱིད་ལྡན། །ནད་མུག་མཚོན་བསྐལ་ཞི་བའི་ཕྲིན་ལས་མཛོད། །མདོར་ན་རྣལ་འབྱོར་བསམ་དོན་མ་ལུས་པ། །ཐོགས་མེད་
ཡིད་བཞིན་འགྲུབ་པའི་བཀྲ་ཤིས་སྩོལ། །གཙྪས་རང་གནས་གཤེགས་པར་བྱའོ། །ཞེས་པའང་སི་ཏུ་པདྨ་ཉིན་བྱེད་དབང་པོས་གཙུག་ལག་ཟུང་གི་མཁྱེན་སྟོབས་དང་ལྡན་པ་གཉེར་མགོན་བརྟན་བཞེད་ངོར་སྤེལ་བ་དགེ །
ཆོས་ལྡན་གྱི་བཞེད་ངོར།
རང་ཉིད་ལྷར་གསལ་ཐུགས་ཀ་ནས། །འོད་འཕྲོས་གནས་བདག་དགེ་བསྙེན་ཆེ། །འཁོར་བཅས་སྤྱན་དྲངས་གཤེགས་སུ་གསོལ། །བསང་མཆོད་འདོད་དགུའི་རྒྱ་མཚོར་སྤེལ། །ཨ་ཀཱ་རོས་བྱིན་བརླབས། ཀྱཻ། སྔོན་ཚེ་ཀུན་བཟང་ཐོད་ཕྲེང་རྩལ། །བར་དུ་ཧཱུྃ་མཛད་ཐུགས་གཏེར་འཛིན། །དེང་འདིར་བཀའ་བབས་བརྒྱུད་བཅས་ཀྱི། །སྤྱན་སྔར་ཞལ་བཞེས་ཐ་ཚིག་ཅན། །རྡོ་རྗེ་ལྕང་ཕུག་ཤེལ་བྲག་དཀར། །སྲ་མཁྲེགས་ཕ་ལམ་གཞལ་ཡས་ནས། །གནས་བདག་ལྷ་ཡི་དགེ་བསྙེན་ཆེ། །རྡོ་རྗེ་འབར་བ་དགྱེས་སྡེ་སྲས། །བློན་འཁོར་དཔུང་གི་ཚོགས་བཅས་ལ། །བསང་མཆོད་ལྷོ་སྤྲིན་གཏིབས་པ་ཡི། །ཟེར་མའི་ཆ་ལ་བཀྲ་ཤིས་རྫས། །རྒྱལ་སྲིད་འདོད་ཡོན་ལ་སོགས་དང་། །སྤྱན་གཟིགས་དཀོར་ཆས་ལྷ་ཀླུ་མིའི། །དཔལ་དང་འབྱོར་པ་མ་ཚང་མེད། །གང་འདོད་ཆར་བཞིན་འབེབས་པ་དང་། །ཕྱེ་མར་ཇ་ཆང་གསེར་སྐྱེམས་དང་། །རིན་ཆེན་འབྲུ་སྨན་ལ་སོགས་པས། །མཆོད་དོ་ཟབ་གཏེར་ཆོས་སྐྱོང་བའི། །ཟོ་དོར་འཁོར་དང་བཅས་པ་རྣམས། །གསོལ་ལོ་མཆོད་དོ་མངའ་གསོལ་ལོ། །ཐུགས་འགལ་དག་ཚངས་སྩལ་བ་དང་། །མཐུ་སྟོབས་རྫུ་འཕྲུལ་ལྡན་རྣམས་བསྟོད། །ཁྱོད་ལ་ཕྲིན་ལས་བཅོལ་བ་ནི། །སངས་རྒྱས་བསྟན་སྲུང་བསྟན་འཛིན་རྣམས། །དབུ་འཕང་བསྟོད་ཅིང་དགེ་འདུན་སྡེ། །འཕེལ་ཞིང་རྣལ་འབྱོར་འདོད་པའི་དོན། །ཡིད་བཞིན་
གེགས་མེད་འགྲུབ་པ་དང་། །གཞི་བྱེས་འགོ་ཞིང་སྲུང་སྐྱོབ་མཛོད། །དོན་གཉིས་མཐའ་རུ་ཕྱིན་པ་དང་། །བཀྲ་ཤིས་རྟག་བརྟན་དངོས་གྲུབ་སྩོལ། །གཙྪས་གཤེགས་པར་བྱའོ། །ཞེས་སི་ཏུ་པས་ཆོས་ལྡན་གྱི་བཞེད་ངོར་སྤེལ། །
བླ་མ་དཔལ་ལྡན་གྱི་ངོར།
ཨ་ཀཱ་རོས་བསང་རྫས་བྱིན་བརླབས། རིན་ཆེན་སྣོད་མཆོག་ཡངས་ཤིང་རྒྱ་ཆེའི་ནང་། །འབྲུ་གསུམ་འོད་ཞུ་བསང་རྫས་ཟག་མེད་ཀྱི། །བདུད་རྩིའི་རང་བཞིན་ནམ་མཁའི་མཐར་ཁྱབ་པ། །བདེ་ཆེན་ཡེ་ཤེས་སྐྱེད་བྱེད་མཆོད་སྤྲིན་གྱུར། །ཀྱཻ། སྔོན་ཚེ་རིག་འཛིན་ཐོད་ཕྲེང་རྩལ། །དབྱེར་མེད་གྲུབ་ཆེན་པཀྴི་ཡི། །བཀའ་སྲུང་དགེ་བསྙེན་རྡོ་རྗེ་རྒྱལ། །ཡབ་ཡུམ་སྲས་འཁོར་མང་པོ་བཅས། །གཞན་ཡང་ཁྲ་ཤོད་སྤོམ་བྲག་དང་། །རྒྱལ་བ་ཐོད་དཀར་ལ་སོགས་པ། །དམ་ཚིག་ཅན་གྱི་གནས་ཡུལ་བདག །ཀུན་ཀྱང་འདིར་བྱོན་བསང་མཆོད་བཞེས། །དངོས་འབྱོར་སྤྲུལ་པའི་ལྷ་རྫས་ཀྱི། །མཆོད་ཚོགས་དཔག་མེད་ཡིད་འོང་བ། །སོ་སོར་མོས་པའི་ཉེར་སྤྱོད་རྣམས། །འབུལ་བཞེས་དགྱེས་བསྐང་ཉམས་གྱུར་བཤགས། །རྣལ་འབྱོར་བཅོལ་པའི་ཕྲིན་ལས་མཛོད། །ཡུལ་ཕྱོགས་འདིར་གནས་སྐྱོང་བ་དང་། །སྲུང་ཞིང་ཁ་འཛིན་རྒྱབ་བརྟེན་དང་། །ལོ་ལེགས་འབྲུ་འཕེལ་རྩྭ་རྒྱས་ཞིང་། །སད་སེར་གནོད་པ་བཟློག་
ཏུ་གསོལ། །ཕོག་ཐུག་ཉེས་པ་བྱང་པ་དང་། །མི་གཙང་མནོལ་བ་སངས་གྱུར་ཅིག །གནས་སྐབས་དགེ་ཞིང་འདོད་པའི་དོན། །འབད་མེད་འགྲུབ་པའི་བཀྲ་ཤིས་སྩོལ། །གཙྪས་རང་གནས་གཤེགས། བླ་མ་དཔལ་ལྡན་གྱི་ངོར་སྤེལ་བ་དགེ། །
དབུ་མཛད་རིན་ཆེན་ངོར།
ཨ་མྲྀ་ཏས་བསངས།སྭ་བྷཱ་ཝས་སྦྱངས། སྟོང་ལས་བསང་ཁང་རིན་པོ་ཆེའི། །སྣོད་མཆོག་ཡངས་པར་ལྷ་དང་མིའི། །ལོངས་སྤྱོད་མཆོད་པའི་དངོས་པོ་རྣམས། །ཟག་མེད་བདེ་སྐྱེད་ཉིད་དུ་གྱུར། །ༀ་བཛྲ་སྥ་ར་ཎ་ཁཾ། ལན་གསུམ་གྱིས་བྱིན་བརླབས་ལ། ཀྱཻ། སྔོན་ཚེ་རྒྱལ་བས་བྱིན་བརླབས་པའི། །གནས་མཆོག་སྦས་ཡུལ་ཚ་བའི་རོང་། །ས་འཛིན་ཆེན་པོ་སྐྱོང་བ་ཡི། །ཟོ་དོར་གཉན་དང་དགེ་བསྙེན་ཚོགས། །བརྟན་མ་ལྷ་ཀླུ་ཡུལ་གཞིའི་བདག །ཀུན་ཀྱང་སྔོན་གྱི་ཞལ་བཞེས་ལྟར། །དམ་ཚིག་དབང་གིས་གནས་འདིར་བྱོན། །བདུག་སྤོས་དྲི་བསུང་ཚར་དངར་བའི། །མཆོད་པའི་སྤྲིན་ལས་བཀྲ་ཤིས་བརྒྱད། །རྒྱལ་སྲིད་འདོད་ཡོན་དཀོར་ནོར་དབྱིག །འཕུར་དགུ་འཛུལ་བཅུ་རྐང་འགྲོས་ཚོགས། །ལྷ་ལས་ལྷག་པའི་ལོངས་སྤྱོད་རྣམས། །འབུལ་བཞེས་དགྱེས་ཞིང་ཚིམ་གྱུར་ཅིག །མཐུ་རྩལ་སྟོབས་ལྡན་ཕས་རྒོལ་གཞོམ། །བཙན་པོའི་གོ་
བགོས་དཔའ་རྔམ་ཅན། །དཔུང་ཚོགས་དྲག་གཏུམ་འབར་བ་རྣམས། །བསྟོད་དོ་བསང་ངོ་མངའ་གསོལ་ལོ། །དབང་ཆེན་པདྨ་ཐོད་ཕྲེང་སོགས། །རྩ་བརྒྱུད་བླ་མས་བཀའ་བསྒོས་ལྟར། །རང་དམ་རང་གིས་མ་བཀྲལ་བར། །སངས་རྒྱས་བསྟན་སྐྱོང་རྣལ་འབྱོར་སྲུངས། །སྐྱེ་དགུ་བདེ་སྐྱིད་དཔལ་འབྱོར་ལྡན། །ཆར་ཆུ་དུས་འབེབས་འབྲུ་འཕེལ་ཞིང་། །ནད་ཡམས་འཁྲུགས་ཞི་རྣམ་ཀུན་ཏུ། །དགའ་བདེས་རྟག་པར་འཚོ་འགྱུར་ཞིང་། །ཕུན་ཚོགས་ལྡན་པའི་བཀྲ་ཤིས་མཛོད། །ཅེས་པའང་དབུ་མཛད་རིན་ཆེན་ངོར་སྤེལ་བ་དགེ། །
སྨུག་པོའི་གནས་ཀྱི་བསང་མཆོད།
སྨུག་པོའི་གནས་ཀྱི་བསང་མཆོད་བཞུགས། ༀ་སྭ་སྟི། འདིར་ལི་ཡུལ་ལྕང་ར་སྨུག་པོའི་གནས་ཞིང་སྐྱོང་བ་ཆེན་མོའི་བསང་མཆོད་སྤྲོ་ན། འདི་ཉིད་ཁོ་ན་བཏོན་པའི་ཚེ་སྐྱབས་སེམས་དང་ཡི་དམ་གྱི་བདག་བསྐྱེད་མོས་པ་ལམ་བྱེད་ཙམ་སྔོན་དུ་བཏང་ནས། དཀར་གསུམ་མངར་གསུམ་གྱིས་སྦགས་པའི་དཀར་བཤོས་དར་སྣས་བརྒྱན་པ་དང་། ཕྱེ་མར། འབྲུ་སྣ། ཇ་ཆང་། འོ་ཕུད་ལ་རིན་ཆེན་ཕྱེ་མ་བཏབ་པ་དང་། བསང་ཁང་ཟླུམ་པོ་ལ་བདུག་སྤོས་ཀྱི་རིགས་དྲི་བསུང་སྣ་ཚོགས་ཚར་དུ་དངར་བ་གཙང་ཞིང་རྒྱ་ཆེ་བ་འདུ་བྱས་པར་བཤམས་ལ། ༀ་བཛྲ་ཨ་མྲྀ་ཏས་བསངས།སྭ་བྷཱ་ཝས་སྦྱངས། སྟོང་པའི་ངང་ལས་དྷཱི་ལས་བསང་ཁང་ཡིད་དུ་འོང་བ་དང་། བྷྲཱུྃ་ལས་བྱུང་བའི་རིན་པོ་ཆེའི་སྣོད་
རྣམས་སུ་ༀ་ཨཱཿཧཱུྃ་ལས་བྱུང་བའི་མཆོད་རྫས་རྣམས་ཁ་དོག་དྲི་རོ་རེག་བྱ་ནུས་པ་ཕུན་སུམ་ཚོགས་པའི་རང་བཞིན་ཅན་ཟག་མེད་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོ་ནམ་མཁའི་མཛོད་དུ་གྱུར། །ༀ་བཛྲ་སྥ་ར་ཎ་ཁཾ། ཞེས་ལན་གསུམ་གྱིས་བྱིན་བརླབས་ནས། ཧཱུྃ་ཧྲཱིཿ བདེ་ཆེན་ཡེ་ཤེས་འཁོར་ལོ་ཆེན་པོ་རུ། །དངོས་སྣང་དྲྭ་བ་སྡོམ་པ་བཅོམ་ལྡན་ཡབ། །ལྷན་སྐྱེས་ཡུམ་བཅས་དཔའ་བོ་རྣལ་འབྱོར་མ། །དགྱེས་རོལ་ཐར་པ་ཆེན་པོའི་ཞིང་གི་མཆོག །སྐྱོང་མཛད་སྣ་ཚོགས་སྒྱུ་འཕྲུལ་ཚུལ་ཤར་བས། །གནས་དང་ཉེ་བའི་གནས་སུ་གང་འདུལ་གྱི། །སྐུར་སྟོན་མི་ལས་འདས་པའི་གཟུགས་ཅན་མ། །མཚར་སྡུག་ཡིད་འོང་ཌཱ་ཀི་དཔའ་མོའི་ཚོགས། །གཙོ་དང་འཁོར་རྣམས་འཇིག་རྟེན་སྐྱོང་བའི་གཟུགས། །གྲངས་མེད་ཀྱིས་བསྐོར་སྔོན་ཚེ་དཔལ་ཆེན་པོ། །ཧེ་རུ་ཀ་ཡི་བྲན་དུ་དམ་བཅས་བཞིན། །དམ་ཚིག་རྗེས་དགོངས་འདིར་སྤྱོན་ས་མཱ་ཛཿ ཞེས་སྤྱན་དྲངས་ལ། ཡིད་སྤྲུལ་རྣམ་མང་རིན་ཆེན་ཁང་བཟང་དབུས། །དམ་ཚིག་བརྟེན་པའི་རྫས་ལ་བག་ཕོབ་ལ། །འཇམ་མཉེན་པདྨ་སྤུངས་པའི་གདན་བཞུགས་ཏེ། །རིག་འཛིན་རྒྱལ་བ་རྣམས་ཀྱིས་དབང་བསྐུར་བའི། །རྡོ་རྗེའི་ཐ་ཚིག་གཉེན་པོ་དྲན་མཛོད་ལ། །ཁམས་ཀྱི་རགས་པའི་ཟས་ཀྱི་སྲེད་བྲལ་ཡང་། །
མོས་དང་དད་པས་ལེགས་སྦྱར་བཟའ་བཅའ་དང་། །བཏུང་བའི་ཚོགས་རྣམས་ཟག་མེད་བདེ་བ་ཆེའི། །ཡེ་ཤེས་བདུད་རྩི་ཆེན་པོར་བྱིན་བརླབས་ནས། །དང་བས་འབུལ་བཞེས་གང་གི་སྐུ་གསུང་ཐུགས། །དགྱེས་བསྐྱེད་རྣམ་མང་འདོད་རྒུ་ཀུན་བཟང་གི། །སྨོན་ལམ་ལས་བྱུང་མཆོད་སྤྲིན་ནམ་མཁའ་ཡི། །མཐའ་ཀླས་རྒྱས་པར་འགེངས་པ་ཇི་སྙེད་དང་། །ཁྱད་པར་དཀར་མངར་ཁ་ཟས་བཟང་རྒུ་ཡིས། །སྦགས་པའི་བཤོས་བུ་གཟུགས་སྒྲ་དྲི་དང་རོ། །རེག་བྱའི་སྐྱེ་མཆེད་ཉེར་སྤྱོད་རྣམ་པ་ལྔ། །བཀྲ་ཤིས་རྫས་རྟགས་སྤྱན་གཟིགས་དཀོར་ཆ་སོགས། །ཕྱེ་མར་ཇ་ཆང་གསེར་སྐྱེམས་བདུད་རྩིའི་མཚོ། །གང་གི་ལྗགས་ཀྱི་པདྨར་རྗེས་མཐུན་དུ། །འབུལ་གྱི་དགྱེས་རོལ་ལས་བཞིའི་ཕྲིན་ལས་སྒྲུབས། །དམ་ཚིག་སྡོམ་པ་མ་སྨིན་དྲི་བསུང་གིས། །ངོ་བོ་ཡུམ་ལྔའི་རྣམ་འཕྲུལ་བཟང་ཤིང་ཚོགས། །ཡེ་ཤེས་ཞུགས་ལྕེས་སྦར་བའི་དུད་སྤྲིན་གྱིས། །ལྷ་སྲུང་གྲིབ་ཀྱིས་གོས་པ་བསང་གྱུར་ཅིག །ལྷ་ཞལ་རི་བོང་འཛིན་ལས་དཀར་བ་ཡི། །ལྷ་ཡི་འཛུམ་འོད་ཟེར་ཕྲེང་སྤྲོ་བར་མཛོད། །ཕྱི་ལྟར་འཇིག་རྟེན་དབང་ཕྱུག་ཕོ་བྲང་སྟེ། །ནང་དུ་བདེ་མཆོག་འཁོར་ལོའི་དཀྱིལ་འཁོར་དངོས། །གསང་བ་རྡོ་རྗེ་བཙུན་མོའི་མཁའ་དབྱིངས་མཆོག །རྡོ་རྗེ་གནས་ཀྱི་སྲུང་མ་ཆེན་མོར་བསྟོད། །དེ་ལྟར་
མཆོད་བསྟོད་ཐུགས་དམ་བསྐུལ་བའི་མཐུས། །བྱམས་པའི་ཐུགས་ཀྱིས་བརྩེ་བར་རྗེས་དགོངས་ལ། །བསྟན་དང་འགྲོ་ལ་ཕན་བདེའི་དཔྱིད་འགྱུར་པའི། །ཕྲིན་ལས་གང་བཅོལ་ཐོགས་མེད་འགྲུབ་པར་མཛོད། །ཁྱད་པར་དཔལ་ཆེན་ཙཀྲ་སམྦ་རའི། །བསྐྱེད་རྫོགས་ཟབ་ལམ་རྡོ་རྗེའི་རྣལ་འབྱོར་ཆེའི། །བརྒྱུད་འཛིན་མཉམ་མེད་དྭགས་པོ་བཀའ་བརྒྱུད་ཀྱི། །བསྟན་པ་རིན་ཆེན་སྤེལ་པའི་ལས་མཛོད་ཅིག །སྒྲུབ་མཆོག་བསམ་དོན་ཆོས་བཞིན་ཡོངས་འགྲུབ་ཅིང་། །ཚེ་རིང་ནད་མེད་དཔལ་འབྱོར་ཡེ་ཤེས་རྒྱས། །འཇིག་རྟེན་བདེ་ཞིང་ནད་མུག་འཁྲུགས་རྩོད་ཞི། །རྫོགས་ལྡན་དུས་བཞིན་བསྐལ་པ་བཟང་སྤྱོད་པའི། །ཕྲིན་ལས་རབ་འབྱམས་ཡིད་བཞིན་འགྲུབ་པ་དང་། །དེང་འདིར་གཉིས་འཛིན་འཁྲུལ་པས་བསླད་པ་ཡི། །མཆོད་རྫས་མི་གཙང་ཏིང་འཛིན་མ་གསལ་སོགས། །ནོངས་པ་གང་མཆིས་བཟོད་པར་གསོལ་ནས་ཀྱང་། །འཇིག་རྟེན་འཇིག་རྟེན་ལས་འདས་དགེ་ལེགས་ཚོགས། །གོང་དུ་འཕེལ་ཞིང་རབ་རྒྱས་བཀྲ་ཤིས་ཤོག །ཅེས་བརྗོད། བཛྲ་མཱུཿ གཤེགས་སུ་གསོལ། ཞེས་པའང་སི་ཏུ་པདྨ་ཉིན་བྱེད་དབང་པོས། དྲུང་པ་སྤྲུལ་པའི་སྐུ་ཀརྨ་བསྟན་འཛིན་ཆོས་ཀྱི་རྒྱལ་པོའི་བཞེད་ངོར་སྤེལ་བ་དགེ །
ལྗང་ཡུལ་ཡ་ཀྲེ་མ་ཀྭ་སོགས་དགེ་བའི་སེམས་ལྡན་རྣམས་ཀྱི་ངོར།
གཞན་ཡང་བསང་མཆོད་མགྲོན་དུ་འོས་པ་ཡི། །སྔོན་ཚེ་པདྨ་འབྱུང་གནས་སྤྱན་སྔ་རུ། །ཁས་བླངས་དཀར་ཕྱོགས་སྐྱོང་བའི་མཐུ་རྩལ་ཅན། །སོ་སོ་རང་རང་གནས་ནས་འདིར་སྤྱོན་ལ། །དགྱེས་དགུའི་མཆོད་སྤྲིན་རྒྱ་མཚོ་དཔག་ཏུ་མེད། །སྤྱན་གཟིགས་དཀོར་ཆས་འདོད་ཡོན་རྣམ་པ་ལྔ། །སྣ་ཚོགས་བློ་ཡིས་བླངས་ཏེ་མཆོད་པ་འབུལ། །ཟག་མེད་བདེ་བ་ཆེན་པོར་ཚིམ་གྱུར་ཅིག །དམ་ཚིག་ལྡན་པའི་བཀའ་ཉན་བསྟན་སྐྱོང་བ། །བདུད་སྡེའི་དཔུང་གཞོམ་ལྷ་སྲུང་རྣམས་ལ་བསྟོད། །དེ་ལྟར་གསོལ་དང་མཆོད་པ་ལ་བརྟེན་ནས། །རྒྱལ་བསྟན་དྲི་མེད་ངེས་དོན་སྙིང་པོ་ཡི། །རིང་ལུགས་ཕྱོགས་བཅུར་སྤེལ་ཞིང་རྒྱས་པ་དང་། །དེ་འཛིན་སྐྱེས་བུའི་འགྲོ་དོན་ཕྲིན་ལས་སོགས། །རབ་འཕེལ་ཡུལ་རིས་ས་ཕྱོགས་འདི་ཉིད་དུ། །ཆར་ཆུ་དུས་བབས་ལོ་ཕྱུགས་རྟག་ཏུ་ལེགས། །ནད་དང་མཚོན་བསྐལ་ལ་སོགས་མི་མཐུན་ཞི། །སྐྱེ་དགུ་བདེ་ལ་གཞོལ་ཞིང་རྟག་པ་རུ། །རྫོགས་ལྡན་དུས་བཞིན་དཔལ་འབྱོར་གོང་འཕེལ་ནས། །ཆོས་མཐུན་བསམ་པ་འགྲུབ་པའི་ཕྲིན་ལས་མཛོད། །བདག་ཅག་མ་རིག་འཁྲུལ་པས་བསླད་པ་ཡི། །ཐུགས་འགལ་ཉེས་ཚོགས་མ་ལུས་མཐོལ་ཞིང་བཤགས། །དཀར་ཕྱོགས་ལྷ་དང་སྲུང་མའི་བཀྲ་ཤིས་གཡང་། །དེང་འདིར་རྟག་ཏུ་བདེ་ལེགས་ལྡན་གྱུར་ཅིག །ཅེས་པའང་ལྗང་ཡུལ་ཡ་ཀྲེ་མ་ཀྭ་སོགས་དགེ་བའི་སེམས་ལྡན་རྣམས་ཀྱི་ངོར་སི་ཏུས་སྨྲས་པ་སརྦ་མངྒ་ལམ། །
ཡུལ་ལྷ་ཁམས་གསུམ་དབང་ཕྱུག་ལ་བསང་མཆོད།
འདིར་ཡུལ་ལྷ་ཁམས་གསུམ་དབང་ཕྱུག་ལ་བསང་མཆོད་བྱེད་པར་སྤྲོ་ན། ཨ་ཀཱ་རོས་བྱིན་བརླབས་ནས། བསང་མཆོད་འདོད་པའི་ཡོན་ཏན་གཙང་ཞིང་ཡིད་འོང་དང་ལྡན་པར་གྱུར། ཀྱཻ། སྔོན་ཚེ་རྒྱལ་དབང་པདྨས་བྱིན་བརླབས་པའི། །གྲུབ་པའི་གནས་མཆོག་སྲུང་མར་དམ་བཅས་ཤིང་། །བསྟན་འཛིན་སྐྱོང་དང་སྐྱེ་དགུའི་ལེགས་སྩོལ་བའི། །ཁམས་གསུམ་དབང་ཕྱུག་འཁོར་དང་བཅས་པ་ཀུན། །སྤྱན་དྲངས་བཞུགས་གསོལ་བསང་མཆོད་བདུག་པའི་སྤྲིན། །འདོད་ཡོན་རྒྱལ་སྲིད་དཀོར་ཆས་མཆོད་པའི་ཚོགས། །སོ་སོར་མཐུན་པའི་དངོས་འབྱོར་ཡིད་སྤྲུལ་རྣམས། །ནམ་མཁའ་གང་བར་འབུལ་གྱི་བཞེས་སུ་གསོལ། །དཀར་ཕྱོགས་སྐྱོང་བའི་བསྟན་སྲུང་མཐུ་རྩལ་ཅན། །མ་ལུས་འཁོར་དང་བཅས་ཀུན་བསྟོད་པར་བགྱི། །མ་རིག་གཉིས་འཛིན་འཁྲུལ་པའི་དབང་གྱུར་པས། །ཐུགས་འགལ་ཉེས་ཚོགས་བྱང་དག་ཚངས་པར་སྩོལ། །རྒྱལ་བསྟན་སྲུང་དང་རྣལ་འབྱོར་མཐུན་རྐྱེན་སྒྲུབས། །གང་བཅོལ་ཕྲིན་ལས་ཐོགས་མེད་འགྲུབ་པར་མཛོད། །རང་
རང་གནས་གཤེགས་སླར་ཡང་བྱོན་པ་དང་། །བཀྲ་ཤིས་དཔལ་གྱི་སྣང་བས་ཁྱབ་གྱུར་ཅིག །ཅེས་བསོད་ཚེའི་ངོར་བྲིས་པའོ། །
ཀརྨ་རྣམ་རོལ་ངོར།
རྡོ་རྗེ་གདན་མཆོག་ཀརྨ་ཡི། །གནས་མཆོག་འདི་རུ་ུས་འཛིན་བདག །དགེ་བསྙེན་ཆེན་པོ་འཁོར་བཅས་ལ། །གཟུགས་སྒྲ་དྲི་རོ་རེག་བྱ་ཆོས། །ཉེར་སྤྱོད་དཀོར་ནོར་འཛམ་གླིང་གི། །ཡུལ་གྲུ་སོ་སོའི་ལོངས་སྤྱོད་བཅས། །འབུལ་ལོ་བཞེས་ལ་ཀརྨ་པའི། །བསྟན་སྲུང་ཕས་རྒོལ་གཞོམ་པ་དང་། །ལུས་མེད་རྒྱུད་བསྐུལ་བསླུ་ཆོས་མཁན། །སངས་རྒྱས་བསྟན་ལ་དམའ་འབེབས་རྣམས། །སྐད་ཅིག་ཐལ་བར་བརླག་པ་དང་། །མིང་རུས་ཙམ་ཡང་མེད་པར་མཛོད། །དུས་ཀུན་དག་པའི་ཡུལ་ལྗོངས་འདིར། །སྐྱེ་དགུའི་དཔལ་འབྱོར་རབ་རྒྱས་ཤིང་། །བསྟན་འཛིན་ཞབས་བརྟན་འདུས་སྡེ་རྒྱས། །བདེ་ལེགས་ཆར་ཆེན་སྤེལ་བར་མཛོད། །ཅེས་ཀརྨ་རྣམ་རོལ་ངོར་སྤེལ། །
དར་རྒྱས་ནས་བསྐུལ་ངོར།
ཀྱཻ། ཡུལ་ལྷ་འཛི་རྒྱལ་དགའ་བྲོ་ལ། །དགྱེས་དགུའི་མཆོད་འབུལ་བཞེས་སུ་གསོལ། །ནོངས་པའི་ཚོགས་ཀུན་དག་ཚངས་སྩོལ། །གང་བཅོལ་ལས་ཀུན་འགྲུབ་པར་མཛོད། །ཅེས་དར་རྒྱས་ནས་བསྐུལ་བཞིན་སྤེལ། །
བསང་མཆོད་ཀྱི་རིམ་པ་འདོད་དོན་ལྷུན་གྲུབ།
བསང་མཆོད་ཀྱི་རིམ་པ་འདོད་དོན་ལྷུན་གྲུབ་ཅེས་བྱ་བ་བཞུགས་སོ། །
ༀ་བཛྲ་སྥ་ར་ཎ་ཁཾ། དངོས་དང་ཡིད་སྤྲུལ་རྒྱ་མཚོས་དྲངས་པའི་བསང་མཆོད་ཟག་མེད་ཡེ་ཤེས་ཀྱི་བདུད་རྩིའི་རང་བཞིན་རྒྱ་ཆེན་རྒྱུན་མི་ཆད་པར་གྱུར། རང་ཉིད་ལྷར་གསལ་བའི་ཐུགས་ལས་འོད་འཕྲོས། གནས་བདག་ཡུལ་ལྷ་དགེ་བསྙེན་ལ་སོགས་པ་བསང་མགྲོན་གྱི་ཚོགས་རྣམས་གཤེགས་པར་གྱུར། །ཀྱཻ། ཛམ་གླིང་གངས་ཅན་བསིལ་ལྡན་གྱི། །ས་འཛིན་ཕྲེང་བས་བསྐོར་བའི་ཞིང་། །སྔོན་ཚེ་རྒྱལ་བས་བྱིན་བརླབས་གནས། །ད་ལྟ་གཙུག་ལག་ཆོས་འཁོར་གྱི། །བཀའ་སྲུང་ཡུལ་ལྷ་དཀར་ཕྱོགས་སྐྱོང་། །ཡོངས་ཀྱི་སྡེ་དཔོན་དམ་ཚིག་ཅན། །གོ་ཆེ་སྐྱིད་དགེ་གཉན་པོ་དང་། །ཕྱོགས་བཞིའི་བཀའ་ཉན་ལྷ་ཆེན་བཞི། །ལ་བཞི་ལུང་བརྒྱད་ལ་སོགས་པར། །གཞི་བདག་གཉུག་མར་གནས་པ་ཡི། །མཆོད་འོས་མགྲོན་རྣམས་ཐམས་ཅད་ལ། །སོ་སོར་དགྱེས་པའི་བསང་མཆོད་ཀྱི། །དུད་པའི་སྤྲིན་ཕུང་ཟེགས་མ་ལས། །འདོད་ཡོན་ཡིད་འོང་དཔག་མེད་པ། །ནམ་མཁའ་མཛོད་ཀྱི་རང་བཞིན་ཅན། །འབུལ་བཞེས་དགྱེས་པར་རོལ་པར་མཛོད། །སྤྱན་གཟིགས་དཀོར་ཆ་གཟུགས་འགྲོས་སོགས། །ཕྱི་ནང་མཆོད་པ་བླ་མེད་ཀྱི། །གསོལ་ལོ་མཆོད་དོ་མངའ་གསོལ་ལོ། །ཉམས་གྱུར་ནོངས་པ་ཅི་མཆིས་པ། །མཐོལ་བཤགས་བཟོད་གསོལ་དག་ཚངས་སྩོལ། །མཐུ་རྩལ་
ཐོགས་མེད་རྫུ་འཕྲུལ་ཅན། །ཕྲིན་ལས་སྣ་ཚོགས་ཅིར་ཡང་སྒྱུར། །བསྔགས་འོས་ཀུན་ཀྱང་བསྟོད་པར་བགྱི། །སྔོན་ཚེ་ཨོ་རྒྱན་ཆེན་པོ་དང་། །སྒྲུབ་བརྒྱུད་བླ་མའི་རྡོ་རྗེའི་བཀའ། །དམ་ཚིག་གཉན་པོ་དྲན་བཞིན་དུ། །ཡལ་གམ་མ་འདས་ས་མ་ཡ། །ཁྱོད་ལ་ཕྲིན་ལས་བཅོལ་བ་ནི། །ཡུལ་ལྗོངས་ས་ཕྱོགས་འདི་ཉིད་དུ། །ངེས་དོན་བསྟན་པའི་རིང་ལུགས་མཆོག །ཉམས་མེད་དར་ཞིང་རྒྱས་པ་དང་། །ཆོས་མཐུན་བསྟན་འཛིན་དགེ་འདུན་སྡེ། །འཁོར་ལོ་གཉིས་ཀྱི་ཡོན་ཏན་རྒྱས། །ཉེར་འཚེ་གཟུགས་ཅན་གཟུགས་མེད་ཀྱི། །དམ་སྲིའི་རྒྱུད་བསྐུལ་བྱེད་པ་རྣམས། །ཚར་གཅོད་རྗེས་འཛིན་ཕྲིན་ལས་མཛོད། །རྣལ་འབྱོར་བདག་ཅག་འཁོར་བཅས་རྣམས། །ཉིན་མཚན་རྟག་པར་སྐྱོང་བ་དང་། །བསམ་པ་ཡིད་བཞིན་ལྷུན་གྱིས་གྲུབ། །ཚེ་རིང་ནད་མེད་བདེ་སྐྱིད་ལྡན། །འདི་དང་གཏན་འདུན་ཡོངས་ཀྱི་གཙོ། །བསྟན་པའི་ཞབས་ཏོག་སྤེལ་ནུས་པའི། །སྣང་སྲིད་དབང་བསྒྱུར་སྟོངས་གྲོགས་མཛོད། །སྐྱེ་དགུ་མ་ལུས་ཐམས་ཅད་ཀྱང་། །རྟག་པར་བྱམས་པའི་སེམས་ལྡན་ཞིང་། །ཀུན་ཀྱང་བདེ་ལྡན་ཡོངས་གྲུབ་པའི། །བཀྲ་ཤིས་ཀུན་ཁྱབ་འོད་སྟོང་ཅན། །ཉིན་མཚན་གུང་ལ་གསལ་གྱུར་ཅིག །གཙྪས་མཆོད་ཡུལ་རང་གནས་བཏང་། ཞེས་གནས་མདོའི་དགེ་སློང་ཀརྨ་རྣམ་རྒྱལ་ངོར་བཀྲ་ཤིས་སྒང་གི་ཆོས་སྒར་ནས་སི་ཏུས་སྤེལ་བ་དགེ །
ལྷ་ཐོག་དཔོན་ཚང་གི་རྟ་དཔོན་པ་ཨ་ལྷ་ནས་བསྐུལ་ངོར།
ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་ལས་བསང་ཁང་རིན་ཆེན་དུ། །བདུག་པའི་སྤྲིན་ཚོགས་མི་ཟད་པ། །ནམ་མཁའ་མཛོད་ཀྱི་རང་བཞིན་ཅན། །མཆོད་རྫས་ཡིད་འོང་དཔག་མེད་གྱུར། །ༀ་ཨཱཿཧཱུྃ། ༀ་བཛྲ་སྥ་ར་ཎ་ཁཾ། ལན་གསུམ། ཀྱེ། དཀོན་མཆོག་གསུམ་དང་རྩ་བ་གསུམ། །ཕྱོགས་བཅུ་དུས་གསུམ་བདེ་བར་གཤེགས། །རྒྱུད་སྡེ་བཞི་འབྲེལ་ཡི་དམ་ལྷ། །གནས་གསུམ་དཔའ་བོ་ཌཱ་ཀིའི་ཚོགས། །ཡེ་ཤེས་ལས་དང་འཇིག་རྟེན་གྱི། །དྲེགས་བྱེད་ཆོས་སྐྱོང་རྒྱ་མཚོ་དང་། །དགྲ་བླ་ཡེ་བརྫུ་མཆེད་འཁོར་གཡོག །ལྷ་བྲག་དཀར་པོ་རྡོ་རྗེ་འབར། །རང་སྡེ་སྤྲུལ་དང་ཡང་སྤྲུལ་སོགས། །ལྷ་རིགས་མགོན་དང་སྐྱོབ་པ་ཡི། །ཡང་མེས་རྒྱུད་ཀྱི་སྲུང་མ་དང་། །གཞན་ཡང་ཡུལ་ལྗོངས་འདིར་གནས་པའི། །དམ་ཚིག་ཅན་དང་སྟོངས་གྲོགས་མཁན། །གཞི་བདག་ཡུལ་ལྷ་ཟོ་དོར་དང་། །དགེ་བསྙེན་སྨན་མོ་ས་བདག་སོགས། །མདོར་ན་མཆོད་འོས་མགྲོན་རྣམས་ཀུན། །ཐམས་ཅད་འདིར་གཤེགས་བསང་ལ་བྱོན། །རང་རང་དགྱེས་དགུར་རོལ་པ་ཡི། །འདོད་ཡོན་ཟག་མེད་
ལོངས་སྤྱོད་ཀྱི། །དྲི་བསུང་ཕུན་སུམ་ཚོགས་པ་འདིས། །བསང་ངོ་མཆོད་དོ་མངའ་གསོལ་ལོ། །རང་ཕྱོགས་སྲུང་ཞིང་གཞན་ཕྱོགས་འཇོམས། །རྩལ་ལྡན་དཔའ་བོ་རྔམས་བརྗིད་ཅན། །མྱུར་མགྱོགས་དྲག་ཤུལ་ལྡན་པ་ཡི། །དཀར་པོའི་ཕྱོགས་སྐྱོང་རྣམས་ལ་བསྟོད། །དེ་ལྟར་མཆོད་བསྟོད་དགེ་བའི་མཐུས། །བསྟན་འགྲོའི་བདེ་སྐྱིད་མཁའ་དང་མཉམ། །ཁྱད་པར་མི་དབང་ལྷ་ཡི་གདུང་། །རིགས་ཀྱི་སྐུ་ལྷ་མ་གཡེལ་བར། །མངའ་རིས་སྡེ་དཔུང་དཔལ་འབྱོར་གྱི། །ལོངས་སྤྱོད་འཛད་མེད་ཆར་བཞིན་ཕོབ། །ཚེ་བསོད་དབང་ཐང་ཀླུང་རྟ་དར། །མི་བརྒྱུད་འཕེལ་ཞིང་ཕྱུགས་སྤེལ་བའི། །ཕྲིན་ལས་སྟོངས་གྲོགས་མྱུར་དུ་མཛོད། །ནད་ཡམས་ཆོད་ལ་དལ་ཁ་བསྒྱུར། །བསམ་ངན་སྦྱོར་རྩུབ་དུག་རླངས་ཅན། །དགྲ་བགེགས་ཐལ་བའི་རྡུལ་དུ་རློགས། །སྔོན་ཚེ་ཨོ་རྒྱན་ཆེན་པོ་དང་། །རིག་འཛིན་མི་འགྱུར་རྡོ་རྗེ་ཡིས། །བཀའ་བསྒོས་ཐ་ཚིག་རྗེས་དྲན་ནས། །ཇི་ལྟར་བཅོལ་པའི་ཕྲིན་ལས་རྣམས། །མ་གཡེལ་མ་འདའ་ས་མ་ཡ། །རང་རང་གནས་སུ་བདེར་གཤེགས་ལ། །སླར་ཡང་མཆོད་ཕྱིར་འབྱོན་པར་གསོལ། །སརྦ་བྷཱུ་ཏ་གཙྪས་གཤེགས། ཞེས་ལྷ་ཐོག་དཔོན་ཚང་གི་རྟ་དཔོན་པ་ཨ་ལྷ་ནས་བསྐུལ་བ་ལྟར། སི་ཏུ་པདྨ་ཉིན་བྱེད་དབང་པོས་སྤེལ།། །།
ལྷ་སྟེང་གྲྭ་པ་ཞིག་གི་ངོར།
༈ ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་ལས་བསང་ཁང་ཡིད་འོང་ནང་། །འདོད་ཡོན་ལྔ་ལྡན་དྲི་མཆོག་གི། །ཡོན་ཏན་ཟག་མེད་ནམ་མཁའི་མཛོད། །སྐབས་གསུམ་ལོངས་སྤྱོད་ལས་ལྷག་གྱུར། །ཨ་ཀཱ་རོས་བྱིན་བརླབས་ནས། ཀྱཻ། བླ་མ་ཡི་དམ་མཁའ་འགྲོ་དང་། །དཔའ་བོ་རྣལ་འབྱོར་ཆོས་སྐྱོང་དང་། །ཞིང་སྐྱོང་གནས་སྲུང་ཡུལ་ལྷའི་ཚོགས། །དཀར་པོའི་ཕྱོགས་རྣམས་སྐྱོང་བྱེད་པ། །ཐམས་ཅན་མ་ལུས་འདིར་གཤེགས་ལ། །རང་རང་དགྱེས་དགུར་རོལ་པ་ཡི། །ཡིད་འོང་བསང་མཆོད་དཔག་མེད་འདི། །འབུལ་གྱི་བརྩེ་བར་དགོངས་མཛོད་ལ། །ཨོ་རྒྱན་རྗེ་དང་རང་བྱུང་བ། །གྲུབ་པའི་དབང་ཕྱུག་མཆོག་རྣམས་ཀྱིས། །བཀའ་བསྒོས་དམ་བཞག་མ་བསྙེལ་བར། །སངས་རྒྱས་བསྟན་པ་བསྲུང་བ་དང་། །སྒྲུབ་པའི་བར་ཆད་བཟློག་ཏུ་གསོལ། །ཡུལ་ཕྱོགས་ཀུན་ཀྱང་བདེ་ཞིང་སྐྱིད། །རྫོགས་ལྡན་བསྐལ་པར་སྤྱོད་པ་ཡི། །ཕྲིན་ལས་མྱུར་མགྱོགས་སྟོངས་གྲོགས་མཛོད། །སརྦ་བྷཱུ་ཏ་གཙྪས་གཤེགས། ཞེས་པའང་ལྷ་སྟེང་གྲྭ་པ་ཞིག་གི་ངོར་སི་ཏུས་སྤེལ། བཀྲ་ཤིས། །
དབོན་དྲུང་མགོན་པོ་དོན་གྲུབ་ཀྱིས་བསྐུལ་ངོར།
ཨ་མྲྀ་ཏས་བསངས།སྭ་བྷཱ་ཝས་སྦྱངས། སྟོང་ལས་བསང་ཁང་ཡིད་འོང་བར། །ཤིང་སྣ་ཚོགས་པའི་དུད་སྤྲིན་ལས། །ལྷ་མིའི་འདོད་ཡོན་དཀོར་ནོར་ཚོགས། །ཟག་མེད་བདེ་ཆེན་སྐྱེད་བྱེད་གྱུར། །ༀ་བཛྲ་སྥ་ར་ཎ་ཁཾ། ལན་གསུམ། ཀྱེ། མཆོག་གསུམ་རྩ་གསུམ་ཀུན་འདུས་རྡོ་རྗེ་འཆང་། །པདྨ་འོད་འབར་རྗེ་བཙུན་སྒྲོལ་མ་ཡུམ། །གསར་རྙིང་བརྒྱུད་པའི་ལྷ་ཚོགས་ཐམས་ཅད་དང་། །བེར་ནག་གུར་མགོན་རེ་ཏི་དམ་ཞིང་སོགས། །ཆོས་སྐྱོང་ཕོ་རྒྱུད་མོ་རྒྱུད་ཐམས་ཅད་བསང་། །ཏི་སེ་ཐང་ལྷ་སྤོམ་ར་གེར་མཛོ་གཉེན། །དཀར་ཕྱོགས་སྐྱོང་བའི་ཟོ་དོར་མ་ལུས་དང་། །ཡུལ་ཕྱོགས་འདི་ཡི་གཉུག་མར་གནས་ཀུན་བསང་། །སོ་སོར་དགྱེས་པའི་ལོངས་སྤྱོད་དཔལ་འབྱོར་བཟང་། །རྒྱ་ཆེན་རྒྱུན་མི་ཆད་པ་འདི་དག་ཀུན། །དངོས་འབྱོར་ཡིད་སྤྲུལ་བླ་མེད་མཆོད་པའི་སྤྲིན། །འབུལ་བཞེས་མཐུ་ཡིས་རྣལ་འབྱོར་ཚེ་བསོད་སྤེལ། །མཐུན་རྐྱེན་བསྒྲུབ་ལ་འགལ་རྐྱེན་བར་ཆད་སོལ། །ཁ་འཛིན་སྡོང་གྲོགས་སྲུང་སྐྱོབ་མི་འབྲལ་བར། །ལེགས་ཁ་རྒྱལ་ཁ་ཐོབ་ཅིང་ལ་ཆུ་འཕྲང་། །སྔུན་བསུ་རྒྱབ་བརྟེན་རྟག་པར་མེལ་ཚེ་དང་། །གཞི་བྱེས་ཀུན་ཏུ་དགེ་བའི་ཕྲིན་ལས་མཛོད། །ཉིན་མཚན་ཀུན་ཏུ་གཡེལ་མེད་མགོན་སྐྱོབ་སོགས། །མདོར་ན་བསམ་དོན་ཐོགས་མེད་བདེ་བླག་ཏུ། །འགྲུབ་པའི་དངོས་གྲུབ་ཐོགས་མེད་
སྩལ་དུ་གསོལ། །ཐུགས་རྗེ་མྱུར་མགྱོགས་བྱིན་རླབས་མཐའ་ཀླས་པ། །བསྟོད་འོས་རྣམས་ལ་དད་པས་བསྔགས་པར་བགྱི། །མཆོད་རྫས་དངོས་འཛིན་དྲི་མས་བསླད་པ་ཡི། །ནོངས་པ་དག་ཚངས་དུས་དང་གནས་སྐབས་ཀུན། །བཀྲ་ཤིས་བདེ་ལེགས་ཆར་གྱི་དཔལ་འབར་ཤོག། སརྦ་བྷཱུ་ཏ་གཙྪས་གཤེགས། ཞེས་པའང་དབོན་དྲུང་མགོན་པོ་དོན་གྲུབ་ཀྱིས་བསྐུལ་བ་བཞིན། སི་ཏུ་པདྨ་ཉིན་བྱེད་དབང་པོས་སྤེལ།། །།
མཐར་ཕྱིན་དང་བསམ་འགྲུབ་བཅས་ཀྱི་ངོར།
༈ བྷྲཱུཾ་ལས་རིན་ཆེན་སྣོད་ཡངས་པར། །ཁམ་ཞུ་འདོད་ཡོན་དུད་པའི་སྤྲིན། །རྒྱ་ཆེན་རྒྱུན་མི་ཆད་པར་གྱུར། །ཀྱཻ། གྲུབ་དབང་མཚོ་སྐྱེས་པདྨ་འབྱུང་། །རིག་འཛིན་རྩ་བ རྒྱུད་བླ་མ་ཡི། །སྤྱན་སྔར་མནའ་བོར་ཡལ་གམ་ཅན། །རྔོམ་ཐི་དགེ་བསྙེན་འཁོར་དང་བཅས། །འདིར་གཤེགས་འདིར་བཤམས་གདན་ལ་བཞུགས། །ཉེར་སྤྱོད་ཚང་ཞིང་ཡིད་འོང་བ། །ཟད་མི་ཤེས་པའི་མཆོད་སྤྲིན་ཚོགས། །རང་རང་དགྱེེས་དགུར་རོལ་པ་ཡི། །སྲིད་ཞིའི་དཔལ་འབྱོར་དངོས་ཀུན་འདི། །གནས་མཆོག་སྐྱོང་བའི་ཚོགས་ལ་འབུལ། །མི་གཙང་རྐྱེན་གྱིས་མནོལ་བ་ཀུན། །དྲི་ལྡན་སྤོས་མཆོག་འདི་དག་གིས། །སངས་ཤིང་མཐུ་རྩལ་སྟོབས་དང་ལྡན། །རྒྱལ་བསྟན་སྲུང་དང་འགྲོ་ཚོགས་སྐྱོངས། །ཆར་ཆུ་དུས་འབེབས་སྐྱ་རྒྱལ་
ཞིང་། །རྣལ་འབྱོར་གང་བཅོལ་ཕྲིན་ལས་ཀུན། །གཡེལ་མེད་ཉིད་དུ་འགྲུབ་པར་མཛོད། །ཅེས་མཐར་ཕྱིན་དང་བསམ་འགྲུབ་བཅས་ཀྱི་ངོར་སི་ཏུས་སྤེལ། །
ཉ་ཁེ་ལྷུན་གྲུབ་དབང་རྒྱལ་ངོར།
ཨ་ཀཱ་རོས་བྱིན་བརླབས། བྷྲཱུཾ་ལས་རིན་ཆེན་སྣོད་ཡངས་པར། །ཁམ་ཞུ་བསང་མཆོད་འདོད་ཡོན་རྣམས། །ཀུན་བཟང་སྨོན་ལམ་ཇི་བཞིན་པར། །རྒྱ་ཆེན་ནམ་མཁའ་མཛོད་བཞིན་གྱུར། །ཀྱཻ། རྒྱལ་བས་བྱིན་བརླབས་གྲུབ་པའི་གནས། །འབུམ་རྫོང་ཆོས་ཀྱི་ཕོ་བྲང་མཆོག། བཀའ་བརྒྱུད་རིག་འཛིན་རྒྱ་མཚོ་དང་། །བདེ་མཆོག་འཁོར་ལོའི་ལྷ་ཡི་ཚོགས། །དཔའ་བོ་མཁའ་འགྲོ་སྤྲིན་བཞིན་གཏིབས། །ཆོས་སྐྱོང་དམ་ཅན་རླུང་ལྟར་འཚུབས། །གཞན་ཡང་ཡུལ་གཞི་གནས་ཀྱི་བདག །དགེ་བསྙེན་དཀར་པོའི་སྡེ་སྐྱོང་བ། །འབྱུང་པོ་མཐུ་ཆེན་གཉུག་མར་གནས། །གློ་བུར་ལྷགས་པའི་མགྲོན་རྣམས་ལ། །སོ་སོའི་ཡིད་མཐུན་དངོས་འབྱོར་དང་། །ཡིད་སྤྲུལ་བློ་ཡིས་བླངས་ནས་སུ། །རྩ་གསུམ་ལྷ་ཚོགས་དགྱེས་བསྐངས་ཤིང་། །མཆོག་ཐུན་དངོས་གྲུབ་ཆར་ཆེན་སྩོལ། །ལས་བཞིའི་འདོད་དོན་ལྷུན་གྲུབ་མཛོད། །སྣང་སྲིད་གཞི་བདག་དགེ་བསྙེན་སོགས། །མཆོད་སྦྱིན་འདིས་ཚིམ་མཐུ་རྩལ་ལྡན། །བྱམས་པའི་སེམས་ཀྱིས་སྐྱེ་དགུ་སྐྱོངས། །ལོ་ལེགས་འབྲུ་འཕེལ་རྩྭ་རྒྱས་ཤིང་། །བཀྲ་
ཤིས་སྣང་བའི་འོད་ཟེར་གྱིས། །མི་མཐུན་རྒུད་པའི་མུན་པ་ཞི། །ཕན་བདེའི་པད་ཚལ་རྒྱས་གྱུར་ཅིག །ཅེས་ཉ་ཁེ་ལྷུན་གྲུབ་དབང་རྒྱལ་ངོར་སྤེལ། །
འབྲི་གཉན་རྡོ་རྗེ་བློ་གྲོས་རྩལ་གྱི་བསང་མཆོད།
ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་ལས་བྷྲཱུཾ་ཡིག་སེར་པོ་ཡོངས་སུ་གྱུར། །ཡིད་འོང་གཏོར་སྣོད་སྲིད་གསུམ་ཁྱབ་པའི་ནང་། །འབྲུ་གསུམ་འོད་ཞུ་ཟག་མེད་ཡེ་ཤེས་ཀྱི། །བསང་མཆོད་བདུད་རྩིའི་སྤྲིན་གཏིབས་ཆར་འབེབས་གྱུར། །ཨ་ཀཱ་རོ་ལན་གསུམ་གྱིས་བྱིན་བརླབས་ལ། ཀྱཻ། དམ་ཚིག་འདུ་འབྲལ་མེད་པ་ཡི། །བླ་མེད་གསང་སྔགས་ཟབ་མོའི་ལམ། །སྟོན་མཆོག་དཔལ་ལྡན་རྡོ་རྗེ་ཅན། །བཀའ་བརྒྱུད་གྲུབ་ཐོབ་རྒྱ་མཚོ་དང་། །ཐེག་པ་རིམ་དགུའི་ལྷ་ཡི་ཚོགས། །དཔའ་བོ་ཌཱ་ཀི་ཆོས་སྲུང་མ། །ཁྱད་པར་གནས་ཆེན་སྐྱོང་བ་ཡི། །དཀར་པོ་ལྷ་ཡི་སྡེ་དཔུང་གི། །ཚོགས་རྗེའི་བདག་པོར་དབང་བསྐུར་ཞིང་། །རིག་འཛིན་པདྨའི་དགེ་བསྙེན་ཆེ། །འབྲི་གཉན་རྡོ་རྗེ་བློ་གྲོས་རྩལ། །སྲས་ཡུམ་སྤྲུལ་དང་ཡང་འཁོར་བཅས། །སྔོན་གྱི་ཐུགས་དམ་བརྩེར་དགོངས་ལ། །རྣལ་འབྱོར་སྒྲུབ་པའི་གནས་མཆོག་འདིར། །སྤྱན་འདྲེན་ཅི་ལྟར་བདེ་བར་བཞུགས། ཀུན་བཟང་སྨོན་ལམ་ཇི་བཞིན་པའི། །བསང་མཆོད་བདུག་པའི་སྤྲིན་ཕུང་
ལས། །བཀྲ་ཤིས་རྫས་རྟགས་འདོད་ཡོན་དང་། །ལྷ་ཀླུ་མི་ཡི་ལོངས་སྤྱོད་ཚོགས། །རྒྱ་ཆེན་རྒྱུན་མི་ཆད་པ་འདི། །འབུལ་བཞེས་དགྱེས་པ་བསྐང་གྱུར་ཅིག །བག་མེད་ནོངས་པར་གྱུར་པ་བཤགས། །གྲུབ་པའི་དབང་ཕྱུག་མཆོག་རྣམས་ཀྱི། །རྡོ་རྗེའི་བཀའ་ལས་མ་འདའ་བར། །ལས་བཞིའི་ཕྲིན་ལས་བསྒྲུབ་པ་དང་། །དྲི་མེད་རྒྱལ་བསྟན་རིང་ལུགས་གང་། །དར་རྒྱས་ཡུན་གནས་བསྟན་འཛིན་རྣམས། །འཚོ་གཞེས་དགེ་འདུན་ཆོས་སྤྱོད་འཕེལ། །རྒྱལ་ཁམས་ནད་ཡམས་མཚོན་འཁྲུགས་ཞི། །ཆར་ཆུ་དུས་འབེབས་ལོ་འབྲས་ལེགས། །གཟུགས་ཅན་གཟུགས་མེད་འགྲོ་བ་རྣམས། །བྱང་ཆུབ་སེམས་ཀྱིས་རྒྱུད་བསྐུལ་ནས། །ཡང་དག་བདེན་པ་མཐོང་བ་དང་། །རྟག་ཏུ་བཀྲ་ཤིས་ཕུན་ཚོགས་ཤོག །ཤུ་བྷཾ།། །།
བསོད་ནམས་དབང་རྒྱལ་ངོར།
༈ ༀ་སྭ་བྷཱ་ཝས་སྦྱངས། སྟོང་ལས་བྷྲཱུཾ་ཡིག་ཡོངས་སུ་གྱུར། །རིན་ཆེན་སྣོད་དུ་ཡིག་འབྲུ་གསུམ། །འོད་ཞུ་འདོད་ཡོན་དཔག་མེད་དང་། །དྲི་བསུང་ཀུན་བཟང་མཆོད་སྤྲིན་གྱུར། །ༀ་བཛྲ་སྥ་ར་ཎ་ཁཾ། ཀྱཻ། རྒྱལ་དབང་མཚོ་སྐྱེས་རྡོ་རྗེ་འཆང་། །གྲུབ་པའི་སློབ་དཔོན་ཨུ་རྒྱན་རྗེ། །པདྨ་འབྱུང་གནས་འགྲོ་བའི་མགོན། །ཀརྨ་པཀྴི་ལ་སོགས་པའི། །སྤྱན་སྔར་ཐ་ཚིག་གཡར་དམ་ཅན། །དཀར་ཕྱོགས་ལྷ་ཡི་སྡེ་
དཔོན་ཆེ། །ཟིལ་ཕྲོམ་རྡོ་རྗེ་གཡུ་དྲུང་རྩལ། །འཁོར་བཅས་འདིར་གཤེགས་གདན་ལ་བཞུགས། །བསང་མཆོད་ནམ་མཁའ་མཛོད་བཞིན་པའི། །ཟག་མེད་ཡེ་ཤེས་བདུད་རྩི་དངོས། །སྦྱང་སྤེལ་བསྒྱུར་བ་བླ་མེད་ཀྱི། །སྤྱན་གཟིགས་དཀོར་ཆ་ནོར་དབྱིག་སོགས། །འདོད་དགུའི་དཔལ་འབྱོར་ཆར་ལྟར་འབེབས། །འཁོར་བཅས་མཐུན་རྫས་དཔག་མེད་ཀྱིས། །གསོལ་ལོ་མཆོད་དོ་མངའ་གསོལ་ལོ། །ཉམས་གྱུར་ནོངས་པ་ཅི་མཆིས་བཤགས། །སྔོན་ཚེ་གྲུབ་པའི་དབང་ཕྱུག་མཆོག །རྩ་བ་བརྒྱུད་པའི་བླ་མ་ཡི། །བཀའ་དང་དམ་ཚིག་རྗེས་དགོངས་ལ། །ངེས་དོན་བསྟན་པ་རིན་པོ་ཆེ། །སྲིད་མཐར་གནས་ཤིང་བསྟན་འཛིན་དང་། །འདུས་པ་དབྱར་མཚོ་ལྟར་རྒྱས་ཤིང་། །སྐྱེ་དགུ་ཀུན་ཀྱང་བྱང་ཆུབ་ཀྱི། །སེམས་ཀྱིས་རང་རྒྱུད་ཡོངས་སྨིན་ནས། །རྣམ་དག་དམ་པའི་ཆོས་སྤྱོད་ཅིང་། །ནད་མཚོན་ཡམས་དང་ལོ་ནད་ཞི། །ཆར་ཆུ་དུས་བབས་བདེ་སྐྱིད་ལྡན། །རྟག་ཏུ་བཀྲ་ཤིས་རབ་རྒྱས་ཤོག །གཙྪས་གཤེགས། བསང་མཆོད་ལེ་ཚན་གཉིས་འདི་བཞིན་དད་དམ་ལྡན་པ་བསོད་ནམས་དབང་རྒྱལ་བསྐུལ་ངོར། སི་ཏུ་པདྨ་ཉིན་བྱེད་དབང་པོས་བྲིས་པ་ཛ་ཡ། །
ཀརྨ་ཕུན་ཚོགས་ངོར།
སྣང་སྲིད་ཆོས་ཀུན་སྟོང་ཉིད་གྱུར། །རང་ཉིད་སྐད་ཅིག་པདྨ་འབྱུང་། །གསལ་བའི་མདུན་དུ་འཇིག་རྟེན་གྱི། །དྲེགས་བྱེད་དཀར་པོའི་སྡེ་སྐྱོང་བ། །རྡོ་རྗེ་ལྷ་རྩེ་འཁོར་དང་བཅས། །སྔོན་གྱི་དམ་ཚིག་རྗེས་དགོངས་ལ། །ཐུགས་དམ་དབང་གིས་འདིར་གཤེགས་བཞུགས། །བསང་དང་གསེར་སྐྱེམས་མཆོད་པའི་སྤྲིན། །སྣ་ཚོགས་འདོད་དགུར་དབང་སྒྱུར་བའི། །ཡིད་དང་མཐུན་པའི་མཆོད་རྫས་ཚོགས། །འབུལ་གྱི་དགྱེས་བསྐང་ཚིམ་གྱུར་ཅིག །ལས་བཞིའི་དངོས་གྲུབ་དཔལ་སྟེར་ཞིང་། །སངས་རྒྱས་བསྟན་དང་བསྟན་འཛིན་གྱི། །བར་ཆད་ཀུན་སེལ་ཕྲིན་ལས་སྒྲུབས། །རྒྱལ་བའི་སྤྱན་སྔར་དམ་བཅས་པའི། །ཡུལ་བདག་ཆེན་པོ་འཁོར་དང་བཅས། །རབ་ཏུ་དགེ་བའི་སེམས་ཀྱིས་བསྟོད། །དེ་ལྟར་མཆོད་དང་བསྟོད་པའི་མཐུས། །ངེས་དོན་དྲི་མེད་པདྨ་དཀར། །འདབ་བརྒྱ་གྲོལ་བའི་གཉེན་གཅིག་པུ། །ཐུབ་དབང་པད་འབྱུང་ཀརྨ་པའི། །རིང་ལུགས་ནོར་འཛིན་ཁྱོན་ཡངས་པོར། །ཉིན་མོ་བྱེད་ལྟར་གསལ་བ་དང་། །གཞན་ཡང་སྐྱེ་དགུ་བདེ་ལེགས་ཀྱི། །ལོ་འདབ་ཀུན་ཏུ་དཀྲིགས་པ་ཡི། །མཐུ་རྩལ་ནུས་པའི་དྲི་བཞོན་གྱིས། །ཕན་བདེའི་ཆར་ཆེན་སྩོལ་གྱུར་ཅིག །དུས་དང་གནས་སྐབས་ཐམས་ཅད་དུ། །བྱམས་པའི་སེམས་ཀྱི ས་རྟག་ཏུ་སྐྱོངས། །རྣམ་ཀུན་བཀྲ་ཤིས་དགེ་ལེགས་ཀྱིས། །རྟག་པར་བདེ་དང་ལྡན་པར་མཛོད། །གཙྪས་གཤེགས། ཞེས་ཀརྨ་ཕུན་ཚོགས་ནས་བསྐུལ་ལྟར་སྤེལ། །
ཀརྨ་ནོར་བུའི་ངོར།
རང་ཉིད་ལྷར་གསལ་ཐུགས་ཀ་ནས། །འོད་འཕྲོས་མཆོད་རྫས་འདོད་ཡོན་གྱི། །གཉིས་འཛིན་དྲི་མ་ཀུན་བསངས་ནས། །གང་འདོད་ལོངས་སྤྱོད་ནམ་མཁའི་མཛོད། །ཇི་བཞིན་རྒྱུན་མི་ཆད་པར་སྤེལ། །མགྲོན་རྣམས་དགྱེས་བསྐྱེད་རང་བཞིན་གྱུར། །ༀ་བཛྲ་སྥ་ར་ཎ་ཁཾ། ལན་གསུམ་བརྗོད། ཀྱཻ། སྔོན་ཚེ་ཨོ་རྒྱན་ཆེན་པོ་དང་། །དཔལ་ལྡན་བྱང་ཆུབ་གླིང་པ་ཡི། །སྤྱན་སྔར་ཐ་ཚིག་ཡལ་གམ་ཅན། །ཡུལ་ཕྱོགས་འདིར་གནས་གཞི་ཡི་བདག །གཉུག་མར་གནས་པ་མ་ལུས་དང་། །ཁྱད་པར་དཔལ་རྒྱལ་ར་རྗེ་གཉན། །གཞན་ཡང་གནས་ཡུལ་སྐྱོང་བྱེད་པ། །ཀུན་ཀྱང་འདིར་གཤེགས་མཆོད་པའི་རྫས། །འདོད་ཡོན་ཟག་མེད་སྣ་ཚོགས་རྣམས། །སོ་སོར་དགྱེས་རྫས་མཁོ་དགུའི་ཚོགས། །དངོས་འབྱོར་ཡིད་ལས་སྤྲུལ་པ་ཡི། །བསང་དང་མཆོད་པ་འདི་བཞེས་ལ། །རྩ་བརྒྱུད་བླ་མས་བཀའ་བསྒོས་ལྟར། །རང་ཕྱོགས་སྲུང་ཞིང་སྐྱོང་བ་དང་། །སངས་རྒྱས་བསྟན་དང་བསྟན་འཛིན་སྤེལ། །རྣལ་འབྱོར་བདག་གིས་གང་བཅོལ་བའི། །ཕྲིན་ལས་མ་གཡེལ་སྡོང་གྲོགས་
མཛོད། །གཞི་བྱེས་ཀུན་ཏུ་ལེགས་ཁ་དང་། །རྒྱལ་ཁ་བཏོད་ལ་འཚོ་བ་སྦྱོར། །ལོ་ལེགས་འབྲུ་འཕེལ་སྐྱ་རྒྱལ་ཞིང་། །ཆར་ཆུ་དུས་འབབ་བདེ་སྐྱིད་ལྡན། །ནད་མུག་མཚོན་བསྐལ་ཞི་བ་དང་། ཀུན་ཀྱང་དཀར་པོའི་ཆོས་ལ་སྤྱོད། །བསམ་དོན་ལྷུན་གྱིས་གྲུབ་ནས་སུ། །རྟག་པར་བཀྲ་ཤིས་བསམ་དོན་ཀུན། །ཇི་བཞིན་འགྲུབ་པར་མཛད་དུ་གསོལ། །གཙྪས་གཤེགས། ཞེས་པའང་ཀརྨ་ནོར་བུས་བསྐུལ་ངོར་སྤེལ། །
དགེ་སློང་བསམ་གཏན་ངོར།
ༀ་བཛྲ་སྥ་ར་ཎ་ཁཾ། བསང་མཆོད་འདོད་དགུའི་རྒྱ་མཚོ་མཐའ་ཀླས་གྱུར། ཀྱཻ། སྔོན་ཚེ་གསང་བདག་པད་འབྱུང་གི། །བཀའ་གཉན་ཡུལ་ལྷ་དཀར་ཕྱོགས་སྐྱོང་། །སྨུག་སངས་དགེ་བསྙེན་ཆེན་པོ་དང་། །མི་ཉག་རྒྱ་ཡི་ཟོ་དོར་སོགས། །ཁྱད་པར་སུམ་དིལ་ལ་གནས་པའི། །གཞི་བདག་གཉུག་མར་གནས་པ་རྣམས། །འདིར་གཤེགས་ཞི་བ་བསང་མཆོད་འབུལ། །དགྱེས་བསྐང་ཡིད་ལ་འདོད་འཇོ་བའི། །རྣམ་བཞིའི་ཕྲིན་ལས་མ་གཡེལ་སྒྲུབས། །ཁ་འཛིན་སྡོང་གྲོགས་རྒྱབ་བརྟེན་དང་། །ལེགས་དང་རྒྱལ་ཁ་ཐོབ་པར་མཛོད། །མཐུ་དང་རྩལ་ལྡན་རྣམས་ལ་བསྟོད། །གཉིས་སྣང་འཛིན་པའི་འཁྲུལ་དབང་གིས། །ནོངས་པ་བཤགས་སོ་བྱང་དག་སྩོལ། །རྣམ་ཀུན་བཀྲ་ཤིས་དགེ་བའི་
ཆར། །འབད་མེད་ལྷུན་གྲུབ་དཔལ་དུ་ཤོག །ཅེས་པ་དགེ་སློང་བསམ་གཏན་ལ་སྤེལ། །
ལྷ་བྲིས་པ་དབང་རྒྱལ་ངོར།
བསང་རྫས་རྣམས། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་ལས་བསང་མཆོད་འདོད་ཡོན་རྫས། །དངོས་འཛིན་དྲི་སྦྱང་ཟག་མེད་ཀྱི། །བདུད་རྩིའི་རང་བཞིན་རྒྱ་ཆེན་པོ། །སོ་སོར་མོས་ཐོབ་ལོངས་སྤྱོད་གྱུར། །ཨ་ཀཱ་རོས་བྱིན་བརླབས་ལ། ཀྱཻ། ཕྱོགས་བཅུའི་ཞིང་བཞུགས་བླ་མ་དང་། །སངས་རྒྱས་བྱང་སེམས་ཡི་དམ་ལྷ། །དཔའ་བོ་མཁའ་འགྲོ་ཆོས་སྲུང་མ། །ཁྱད་པར་རྡོ་རྗེ་ནག་པོ་བེར། །ལྕམ་དྲལ་བཀའ་འཁོར་བཅས་པ་དང་། །ལྷ་ཡི་དགེ་བསྙེན་ཆེན་པོ་སྟེ། །དཔལ་ལྡན་ཤེས་རབ་འཁོར་དང་གཡོག །སྤྲུལ་དང་ཡང་སྤྲུལ་རྒྱ་མཚོ་རྣམས། །འདིར་བྱོན་དགྱེས་པའི་གདན་ལ་བཞུགས། །དངོས་འབྱོར་མཆོད་པའི་བྱེ་བྲག་རྫས། །རབ་འབྱམས་མཁའ་དབྱིངས་ཁྱོན་བཀང་བ། །ལྷ་མིའི་དཔལ་འབྱོར་སྣ་ཚོགས་པ། །འདོད་ཡོན་ལྔ་ལྡན་མི་ཟད་གཏེར། །བསང་མཆོད་དམ་པ་འབུལ་གྱི་བཞེས། །དགྱེས་པར་རོལ་མཛོད་སྨིན་གྲོལ་གྱི། །མཆོག་ཐུན་དངོས་གྲུབ་སྩོལ་བ་དང་། །ལས་བཞིའི་ཕྲིན་ལས་ལྷུན་གྲུབ་ཅིང་། །སངས་རྒྱས་བསྟན་དང་བསྟན་འཛིན་གྱི། །ཞབས་བརྟན་རྣལ་འབྱོར་བདག་ཅག་གི །འདོད་དོན་ཡིད་བཞིན་རེ་བ་སྐོངས། ཚེ་
དང་བསོད་ནམས་དཔལ་འབྱོར་རྒྱས། །ནད་གདོན་སྔོན་ལས་འཕྲལ་རྐྱེན་གྱི། །མི་མཐུན་ཕྱོགས་རྣམས་ཞི་བར་མཛོད། །རྟག་པར་སྲུང་སྐྱོབ་མི་འབྲལ་བར། །ཁ་འཛིན་སྡོང་གྲོགས་དཔུང་གཉེན་མཛོད། །མཆོད་འོས་རང་བཞིན་གནས་སུ་གཤེགས། །བཀྲ་ཤིས་སྣང་བས་སྐྱོང་གྱུར་ཅིག །ཅེས་པའང་ལྷ་བྲིས་པ་དབང་རྒྱལ་ངོར་སྤེལ་བའོ། །
མཛོད་དགོན་གྲྭ་པ་ཞིག་གི་ངོར།
ༀ་ལས་རིན་ཆེན་སྣོད་ཡངས་པར། །བྷྲཱུཾ་ཡིག་ཡོངས་གྱུར་མཆོད་པའི་རྫས། །བསང་དང་བརྔན་པའི་ཡོ་བྱད་ཀྱི། །ལོངས་སྤྱོད་ནམ་མཁའ་མཛོད་བཞིན་སྤེལ། །ༀ་བཛྲ་སྥ་ར་ཎ་ཁཾ། ཀྱཻ། རྒྱལ་བས་བྱིན་བརླབས་གྲུབ་པའི་གནས། །གདན་ས་ཆོས་འཁོར་སྐྱོང་བ་ཡི། །མགོན་བྱེད་ལྷ་དང་སྲུང་མ་དང་། །ཡུལ་ཕྱོགས་འདིར་གནས་གཞི་ཡི་བདག །དཀར་པོའི་ཕྱོགས་རྣམས་དགྱེས་པ་ཡི། །དངོས་འབྱོར་ཡིད་སྤྲུལ་མཆོད་ཚོགས་འབུལ། །མི་གཙང་ཉམས་གྲིབ་ཐམས་ཅད་སོལ། །ལྷ་ཞལ་ཟླ་ལྟར་དཀར་བ་དང་། །སངས་རྒྱས་བསྟན་པ་རིན་པོ་ཆེ། །ཉི་ལྟར་ཀུན་ཁྱབ་རབ་གསལ་ཞིང་། །སེམས་ཅན་ཐམས་ཅད་བདེ་ལྡན་ཤོག། ཅེས་པའང་མཛོད་དགོན་གྲྭ་པ་ཞིག་གི་ངོར་སྤེལ། །
བསོད་དབང་སྤྲུལ་སྐུའི་ངོར།
རང་ཉིད་ལྷ་ཡི་ང་རྒྱལ་ལ་གནས་བཞིན་པས། ཨ་མྲྀ་ཏས་བསངས། སྭ་བྷཱ་ཝས་སྦྱངས།
བྷྲཱུཾ་ལས་བྱུང་བའི་སྣོད་ཡངས་པར། །འབྲུ་གསུམ་འོད་ཞུ་ཟག་མེད་བཅུད། །བླ་མེད་མཁའ་དབྱིངས་ཁྱོན་བཀང་བ། །རྒྱ་ཆེན་རྒྱུན་མི་ཆད་པར་གྱུར། །ཨ་ཀཱ་རོས་བྱིན་བརླབས་ལ། ཀྱཻ། སྔོན་ཚེ་གྲུབ་པའི་རིག་འཛིན་མཆོག །ཨོ་རྒྱན་པདྨཱ་ཀཱ་ར་ཡི། །ཟབ་གཏེར་རྒྱ་མཚོའི་འབྱུང་གནས་ཀྱི། །སྦས་པའི་ཡུལ་ལྗོངས་ཉམས་རེ་དགའ། །དཔའ་བོ་ཌཱ་ཀི་ཡི་དམ་དང་། །བཀའ་བརྒྱུད་བླ་མ་སྤྲིན་བཞིན་གཏིབས། །དམ་ཅན་སྲུང་མ་ཆར་ལྟར་བབས། །སྒྲུབ་གནས་དམ་པ་བྱིན་རེ་ཆེ། །པད་འབྱུང་དངོས་སྣང་གང་འདུལ་གྱི། །སྒྱུ་འཕྲུལ་རྡོ་རྗེའི་གར་སྟོན་པ། །ཟབ་དོན་བདུད་རྩིའི་ཡང་སྙིང་གང་། །མངའ་བདག་མི་འགྱུར་མཚན་ཅན་ཞབས། །ལ་སོགས་རྩ་བར་བརྒྱུད་པ་ཡི། །བཀའ་དང་དམ་གནས་དཀར་པོ་ཡི། །སྡེ་དང་ཕྱོགས་རྣམས་སྐྱོང་བྱེད་ཅིང་། །མགོན་དང་ཁ་འཛིན་སྟོངས་གྲོགས་མཁན། །ལྷ་ཡི་དགེ་བསྙེན་ཆེན་པོ་ནི། །ལྷ་བྲག་དཀར་པོ་རྡོ་རྗེ་འབར། །འཁོར་ཚོགས་སྤྲུལ་དང་ཡང་སྤྲུལ་དང་། །གནས་བརྒྱད་དགེ་བསྙེན་སྦ་ནག་གཉན། །ཁམས་རྒྱལ་རེ་ཕོ་དཀྲིགས་རྒྱལ་དང་། །སེ་ཐོ་ཁྱུང་རྫོང་ཕ་ཝོང་གྭ། །ལ་སོགས་གནས་ཡུལ་འདིར་བརྟེན་པའི། །གནས་དང་གཞི་ཡི་བདག་པོ་བསང་། །མཆོད་དོ་
ཡུལ་ལྷའི་དཔུང་ཚོགས་མཆོད། །བརྔན་ནོ་རིགས་ཀྱི་སྲུང་མ་བརྔན། །གསོལ་ལོ་མཆོད་དོ་མངའ་གསོལ་ལོ། །སངས་རྒྱས་བསྟན་སྲུང་མངའ་གསོལ་ལོ། །རྣལ་འབྱོར་དགྲ་བླ་མངའ་༴ དཀར་པོའི་ཕྱོགས་སྐྱོང་མངའ་༴ ནག་ཕྱོགས་གཡུལ་བཟློག༴ རྟེན་སྒྲུབ་མགོན་བྱེད་མངའ་གསོལ་ལོ། །བསང་མཆོད་སོ་སོར་མོས་ཐོབ་ཀྱི། །ལོངས་སྤྱོད་འདོད་ཡོན་ལྔ་ལྡན་པ། །སྤྱན་གཟིགས་དཀོར་ཆས་སྐོང་རྟེན་རྫས། །མ་ཚང་མེད་འབུལ་དགྱེས་བརྩེར་རོལ། །ཁྱོད་ལ་བཅོལ་བའི་ཕྲིན་ལས་ནི། །དཀོན་མཆོག་དབུ་འཕང་བསྟོད་པ་དང་། །བསྟན་དང་བསྟན་འཛིན་ཞབས་པད་བརྟན། །རིག་དང་གྲོལ་བའི་སྡེ་ཆེན་པོ། །ཕྱོགས་མཐར་ཁྱབ་ཡུན་གནས་པ་དང་། །མངའ་རིས་བདེ་ཞིང་སྐྱེ་དགུ་རྣམས། །ཆོས་མཐུན་བསམ་འགྲུབ་ལོག་ཕྱོགས་ཀྱི། །བདུད་དཔུང་ནམ་ཡང་ལྡང་མེད་ཤོག །མདོར་ན་ཅི་ལྟར་བཅོལ་བ་ཡི། །ལས་བཞིའི་ཕྲིན་ལས་གང་ཡིན་པ། །ཐོགས་མེད་བདེ་བླག་འགྲུབ་པ་དང་། །བདེ་ལེགས་བསམ་དོན་ལྷུན་གྲུབ་ཤོག །གཙྪས་གཤེགས། ཞེས་པའང་བསོད་དབང་སྤྲུལ་སྐུ་ནས་ལྷ་རྫས་དང་དངོས་པོ་རྟེན་འབྲེལ་རྨད་བྱུང་གིས་མཚོན་པ་དང་བཅས་བསྐུལ་ངོར་སྤེལ་བ་དགེ། །
དཔོན་བི་ཛ་ཡའི་བཞེད་ངོར།
ༀ་བཛྲ་ཨ་མྲྀ་ཏས་བསངས།སྭ་བྷཱ་ཝས་སྦྱངས། སྟོང་ལས་བསང་རྫས་འདོད་ཡོན་རྣམས། །དངོས་འཛིན་འཁྲུལ་རྟོག་དྲི་མ་སྦྱངས། །རྒྱ་ཆེན་ཀུན་ཏུ་བཟང་པོ་ཡི། །སྨོན་ལམ་ཇི་བཞིན་ཆར་འབེབས་གྱུར། །ༀ་བཛྲ་སྥ་ར་ཎ་ཁཾ། ལན་གསུམ་གྱིས་བྱིན་བརླབས་ལ། རང་ཉིད་ལྷར་གསལ་ཐུགས་ཀ་ནས། །འོད་འཕྲོས་མགྲོན་རྣམས་སྤྱན་དྲངས་གྱུར། །ཀྱཻ། སྔོན་ཚེ་རྒྱལ་དབང་པད་འབྱུང་དང་། །གྲུབ་ཆེན་ཀརྨ་པཀྴི་སོགས། །རྩ་བརྒྱུད་བླ་མའི་སྤྱན་སྔ་རུ། །ཐ་ཚིག་དམ་བཅའ་ཡལ་གམ་ཅན། །དཀར་ཕྱོགས་སྐྱོང་བའི་དགེ་བསྙེན་ཆེ། །རྩེ་རྒྱལ་ཞལ་ད་འཁོར་བཅས་ལ། །རང་རང་དགྱེས་དགུར་རོལ་པ་ཡི། །འདོད་དགུའི་དཔལ་འབྱོར་ལྷ་དང་མིའི། །ལོངས་སྤྱོད་སྣ་ཚོགས་བཀྲ་བ་དང་། །བསུང་ཞིམ་ངད་བཟང་མ་ལ་ཡའི། །དྲི་བཞོན་ལྟ་བུའི་བསང་དུད་སྤྲིན། །རབ་འབྱམས་ཁམས་ཀུན་སྤྲོས་ཏེ་འབུལ། །མི་གཙང་ཉེས་པའི་དྲི་མ་སོལ། །བསྟོད་དོ་བསང་ངོ་མངའ་གསོལ་ལོ། །དེ་ལྟར་མཆོད་བསྟོད་ལ་བརྟེན་ནས། །བདག་ཅག་གཞི་བྱེས་ལམ་གསུམ་དུ། །ཁ་འཛིན་སྡོང་གྲོགས་རྒྱབ་བརྟེན་དང་། །གང་བཅོལ་འདོད་དོན་ཡིད་བཞིན་དུ། །ལྷུན་གྱིས་གྲུབ་པའི་ཕྲིན་ལས་མཛོད། །བཀྲ་ཤིས་མཁའ་ཡི་ནོར་བུའི་འོད། །ཕན་བདེའི་
འདབ་བརྒྱ་བཞད་པ་དང་། །ཚེ་དཔལ་ཡེ་ཤེས་སྣང་བ་བསྐྱེད། །མི་མཐུན་ཕྱོགས་ལས་རྣམ་རྒྱལ་ཤོག །གཙྪས་གཤེགས། ཞེས་པའང་དཔོན་བི་ཛ་ཡའི་བཞེད་ངོར་སྤེལ་བ་དགེ་ལེགས་སུ་གྱུར་ཅིག །
དཔོན་ཛམ་ལྷས་བསྐུལ་ངོར།
ཨ་ཀཱ་རོས་བྱིན་བརླབས་ལ། ཀྱཻ། རྒྱལ་བས་བྱིན་བརླབས་དབང་བསྐུར་ཞིང་། །དམ་བཞག་བཀའ་བསྒོས་ཐ་ཚིག་ཅན། །ཡུལ་ལྷ་ཟོ་དོར་ཡོངས་ཀྱི་གཙོ། །སྐྱ་རྒྱལ་འབྲོང་བུ་གཉན་པོ་ནི། །འཁོར་བཅས་གནས་འདིར་གཤེགས་སུ་གསོལ། །གཡུ་ཤུག་ལ་སོགས་བདུག་པའི་སྤོས། །དྲི་ལྡན་ངད་བཟང་སྤྲིན་ལྟར་གཏིབས། །ཉེར་སྤྱོད་འདོད་ཡོན་ལྷ་དང་མིའི། །ལོངས་སྤྱོད་སྣ་ཚོགས་ཆར་ལྟར་འབབས། །རོལ་མོ་སྙན་པའི་དབྱངས་ཀྱིས་ནི། །བསྟོད་དོ་བརྔན་ནོ་མངའ་གསོལ་ལོ། །རང་རང་དགྱེས་དགུར་རོལ་པ་ཡིས། །གང་འདོད་མཆོད་བཞེས་དངོས་གྲུབ་སྩོལ། །སངས་རྒྱས་བསྟན་སྐྱོང་བསྟན་འཛིན་སྤེལ། །དགེ་འདུན་སྡེ་སྐྱོང་ཡུལ་ཕྱོགས་འདིར། །ནད་མུག་མཚོན་བསྐལ་ཞི་བ་དང་། །རྩྭ་རྒྱས་འབྲུ་འཕེལ་དགའ་དང་བདེའི། །དཔལ་འབྱོར་རྒྱ་ཆེན་སྩོལ་གྱུར་ཅིག །ཅེས་པའང་དཔོན་ཛམ་ལྷས་བསྐུལ་ངོར་ཡུལ་ལྷ་དེ་ཉིད་དང་ཉེ་བར་སྤེལ། །
བན་ཆེན་བླ་མ་ཀརྨ་རབ་དགའི་ངོར།
ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་ལས་རིན་ཆེན་སྣོད་ཀྱི་ནང་། །འབྲུ་གསུམ་འོད་ཞུ་བསང་མཆོད་རྫས། །ཟག་མེད་དཔལ་འབྱོར་འདོད་དགུའི་ཆར། །ནམ་མཁའ་མཛོད་བཞིན་རྒྱ་ཆེན་གྱུར། །ཨ་ཀཱ་རོས་བྱིན་བརླབས་ལ། ཀྱེ། སྔོན་ཚེ་འཆི་མེད་གྲུབ་པའི་གཙོ། །རྒྱལ་དབང་པདྨ་ཐོད་ཕྲེང་གི། །བཀའ་བསྒོས་ཡལ་གམ་དམ་ཚིག་ཅན། །གཉུ་རྒྱལ་ར་ལ་བྱ་ཁྱུང་དང་། །བཙུན་མོ་སྲས་འཁོར་ཡང་སྤྲུལ་པ། །དཀར་ཕྱོགས་མཐུ་ལྡན་སྟོངས་གྲོགས་མཁན། །ཡུལ་ལྗོངས་བདེ་སྐྱིད་སྤེལ་བ་ཡི། །གཉུག་མར་གནས་པའི་དགེ་བསྙེན་དང་། །གཞི་བདག་གནས་བདག་མཆོད་སྒྲུབ་ཅིང་། །རིགས་ཆོས་རྒྱུད་ཀྱི་སྲུང་མ་རྣམས། །ཀུན་ཀྱང་འདིར་བྱོན་བསང་མཆོད་བཞེས། །དངོས་འབྱོར་མཆོད་སྤྲིན་རྒྱ་མཚོའི་ཚོགས། །རང་རང་མོས་པའི་མཁོ་དགུ་ཡི། །ལོངས་སྤྱོད་སྣ་ཚོགས་བློས་བླངས་ཏེ། །འབུལ་བཞེས་དགྱེས་པ་བསྐང་གྱུར་ཅིག །བག་མེད་ཉེས་པའི་དབང་གིས་ནི། །ནོངས་པ་མཆིས་རྣམས་བཟོད་པ་མཛོད། །ཁྱོད་ལ་ཕྲིན་ལས་བཅོལ་བ་ནི། །སངས་རྒྱས་བསྟན་དང་བསྟན་འཛིན་སྤེལ། །དགེ་འདུན་སྡེ་སྐྱོང་རྣལ་འབྱོར་གྱི། །ཡིད་ལ་གང་བསམ་སྒྲུབ་པ་དང་། །ཡུལ་རིས་ས་ཕྱོགས་འདི་ཉིད་དུ། །ཆར་ཆུ་དུས་འབབས་ལོ་ལེགས་ཤིང་། །ནད་མུག་
མཚོན་བསྐལ་དལ་ཡམས་ཞི། །སྐྱེ་དགུ་དཀར་པོའི་ཆོས་ལྡན་ཞིང་། །དུས་ཀུན་བཀྲ་ཤིས་འབྱུང་གྱུར་ཅིག །ཅེས་པའང་བན་ཆེན་བླ་མ་ཀརྨ་རབ་དགའི་ངོར་སྤེལ། །
མ་མགོན་ལྕམ་དྲལ་གཙོར་བཏོན་པའི་ཡུལ་ལྷར་བསང་བརྔན་མདོར་བསྡུས།
འདིར་མ་མགོན་ལྕམ་དྲལ་གཙོར་བཏོན་པའི་ཡུལ་ལྷར་བསང་བརྔན་མདོར་བསྡུས་སྤྲོ་ན། མཆོད་རྫས་རྣམས། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་བསང་མཆོད་རྫས། །འབྲུ་གསུམ་ངོ་བོ་འོད་དུ་ཞུ། །ཟག་མེད་ལོངས་སྤྱོད་འདོད་དགུའི་ཆར། །མཁའ་དབྱིངས་ཁྱོན་གང་བདེ་ཆེན་གྱུར། །ༀ་བཛྲ་སྥ་ར་ཎ་ཁཾ། ཧཱུྃ། རང་ཉིད་ལྷར་གསལ་ཐུགས་ཀ་ནས། །འོད་འཕྲོས་འོག་མིན་བྱང་ཕྱོགས་ཀྱི། །དུར་ཁྲོད་རབ་འཇིགས་གཞལ་ཡས་ནས། །དཔལ་ལྡན་མ་ཧཱ་ཀཱ་ལ་ཆེ། །རྡོ་རྗེ་བེར་ནག་ཟངས་གྲི་ཅན། །འདོད་ཁམས་དབང་ཕྱུག་དཔལ་ལྷ་མོ། །མ་གཅིག་རང་བྱུང་སྲིད་རྒྱལ་མོ། །བཀའ་སྡོད་བསྟན་སྲུང་དམ་ཚིག་ཅན། །འཁོར་བཅས་འདིར་བྱོན་བསང་མཆོད་བཞེས། །སྐོང་རྟེན་སྒྲུབ་དང་མཆོད་པའི་རྫས། །སྤྱན་གཟིགས་དཀོར་ཆས་ལྷ་དང་མིའི། །དཔལ་འབྱོར་ཕུན་ཚོགས་ནམ་མཁའི་མཛོད། །ཇི་བཞིན་སྤེལ་འདི་དགྱེས་བརྩེར་རོལ། །ཕྲིན་ལས་རྣམ་བཞིའི་མངའ་དབང་ཅན། །དྲེགས་བྱེད་སྲུང་མའི་ཚོགས་ལ་བསྟོད། །བདག་ཅག་
བྱང་ཆུབ་བསྒྲུབ་པ་ལ། །མཐུན་རྐྱེན་སྤེལ་ལ་འགལ་རྐྱེན་སོལ། །བཅོལ་པའི་ཕྲིན་ལས་འགྲུབ་པར་མཛོད། །གཞན་ཡང་མགྲོན་དུ་འོས་པ་ཡི། །ཡུལ་ལྷ་ཟླ་རྒྱལ་དགེ་བསྙེན་ཆེ། །གཡུང་དྲུང་ལྷ་རྩེ་འཁོར་དང་བཅས། །ཁྱད་པར་དགོན་གནས་འདི་ཉིད་དུ། །གཉུག་མར་གནས་པའི་ཡུལ་གཞིའི་བདག །མགོན་སྐྱོབ་དཔུང་གྲོགས་བྱེད་པ་རྣམས། །འབོད་པའི་གནས་འདིར་སྤྱན་འདྲེན་ན། །འདིར་གཤེགས་སོ་སོར་མོས་ཐོབ་ཀྱི། །བསང་དང་མཆོད་རྫས་སྣ་ཚོགས་པ། །འབུལ་བཞེས་དགྱེས་བསྐང་རྩ་བརྒྱུད་ཀྱི། །བླ་མའི་བཀའ་ལས་མ་འདའ་བར། །དཀར་པོའི་ཕྱོགས་སྐྱོངས་ནག་ཕྱོགས་ཐུལ། །གོད་འདྲེ་དབུལ་སྲི་ཞི་བར་མཛོད། །འགལ་རྐྱེན་སོལ་ལ་སྟོངས་གྲོགས་དང་། །རྒྱབ་བརྟེན་ཁ་འཛིན་མ་གཡེལ་བར། །ལེགས་ཁ་རྒྱལ་ཁ་ཐོབ་པ་དང་། །གང་བཅོལ་ཕྲིན་ལས་མྱུར་འགྲུབ་མཛོད། །ཡེ་ཤེས་འཇིག་རྟེན་མགྲོན་རྣམས་ཀུན། །རང་བཞིན་གནས་གཤེགས་དུས་སུ་ནི། །སླར་འབྱོན་རྣམ་ཀུན་བཀྲ་ཤིས་པའི། །ཉིན་བྱེད་འོད་སྟོང་གསལ་གྱུར་ནས། །དགེ་ལེགས་རྒྱ་མཚོ་མཐའ་རྒྱས་ཤོག །ཅེས་པའང་དྲུང་རམ་པ་བླ་མ་ཀརྨ་སྙན་གྲགས་དཔལ་བཟང་ངོར་སྤེལ་བ་ཛ་ཡནྟུ། །
སྒྲུབ་པ་ཚེ་དབང་དཔལ་འབར་ནས་བསྐུལ་ངོར།
བྷྲཱུཾ་ལས་རིན་ཆེན་སྣོད་ཡངས་པར། །མཆོད་རྫས་ཟག་མེད་བདེ་བ་ཆེའི། །ཡེ་ཤེས་བདུད་རྩིའི་རྒྱ་མཚོར་འཁྱིལ། །བདུག་སྤོས་སྤྲིན་བཞིན་གཏིབས་པར་གྱུར། །ༀ་བཛྲ་སྥ་ར་ཎ་ཁཾ། ལན་གསུམ། ཀྱཻ། དཀར་པོ་ལྷ་ཡི་ཕྱོགས་སྐྱོང་ཞིང་། །ནག་པོའི་བདུད་རིས་མཐར་བྱེད་པའི། །ཡུལ་ལྷ་ཟོ་དོར་ཡོངས་ཀྱི་གཙོ། །ས་ཡི་ཉི་ཟླའི་རི་བོ་དང་། །ལྗང་ར་སྨུག་པོའི་གནས་ཀྱི་བདག །ཁྱད་པར་ལ་ཤྲཱི་གནྡྷོ་ལའི། །སྲུང་མ་དགེ་བསྙེན་ཡབ་ཡུམ་སྲས། །གཞན་ཡང་ཉལ་འགྲོ་འཛིན་མའི་གཞིར། །གནས་བཅས་ཀླུ་གཉན་ས་བདག་དང་། །བྲག་བཙན་ལ་སོགས་གཉུག་མར་གནས། །མཆོད་འོས་སྤྱི་དང་གློ་བུར་མགྲོན། །ཀུན་ཀྱང་འདིར་གཤེགས་བསང་མཆོད་རྫས། །སོ་སོར་མོས་ཐོབ་དཀོར་ནོར་རྫས། །སྲིད་གསུམ་དངོས་པོའི་ལོངས་སྤྱོད་དང་། །མ་ལ་ཡ་ཀླུང་ཧ་རི་ལྗོན། །དྲི་བཞོན་གྱིས་བསྐུལ་ངད་བཟང་སྤོས། །རྒྱ་མཚོའི་གོས་ཅན་ཀུན་ཁྱབ་པའི། །སྡོམ་པ་དམ་ཚིག་ཚུལ་ཁྲིམས་ཀྱི། །བྱིན་རླབས་ཆུ་འཛིན་རབ་ཏུ་གཏིབས། །བྱམས་དང་སྙིང་རྗེའི་རང་རྩལ་མདངས། །འཕྲོས་པས་ལྷ་ཀླུ་ཡུལ་གཞིའི་བདག །རྨུགས་དང་ཉམས་དང་མནོལ་གྲིབ་སངས། །བྱང་ཆུབ་སེམས་ཀྱིས་རྒྱུད་བརླན་ཅིང་། །སྔོན་ཚེ་སུཪྱ་འོད་ཟེར་དང་། །རྩ་བརྒྱུད་བླ་མའི་བཀའ་བཞིན་དུ། །དམ་གནས་ཐ་ཚིག་རྗེས་དྲན་ལ། །རྒྱལ་བསྟན་སྐྱོང་ཞིང་བསྟན་
འཛིན་སྲུང་། །དགེ་འདུན་འཕེལ་རྒྱས་འགྲོ་ཁམས་བདེ། །ཆར་ཆུ་དུས་འབབས་ལོ་ཕྱུགས་ལེགས། །ནད་མུག་མཚོན་བསྐལ་དལ་ཡམས་ཞི། །རྣལ་འབྱོར་བཅོལ་བའི་འདོད་དོན་ཀུན། །ཐོགས་མེད་ཉིད་དུ་འགྲུབ་པར་མཛོད། །སྲུང་སྐྱོབ་མི་འབྲལ་དུས་ཀུན་སྐྱོངས། །དགེ་ཞིང་ཤིས་པའི་ཕུན་ཚོགས་ཀྱི། །བཀྲ་ཤིས་རབ་བརྟན་རབ་རྒྱས་ཤོག །གཙྪས་གཤེགས། ཞེས་པའང་སྒྲུབ་པ་ཚེ་དབང་དཔལ་འབར་ནས་བསྐུལ་ངོར་སྤེལ།། །།
བཀྲ་ཤིས་ལྷ་དར་ངོར།
༈ ཨ་མྲྀ་ཏས་བསངས། སྭ་བྷཱ་ཝས་སྦྱངས། ༀ་ལས་རིན་ཆེན་སྣོད་ཡངས་པར། །ཁམ་ཞུ་བསང་དང་མཆོད་པའི་རྫས། །དུད་སྤྲིན་ཟེར་ལས་འདོད་དགུའི་ཆར། །ཡིད་བཞིན་ཟག་མེད་བདེ་བསྐྱེད་གྱུར། །ༀ་བཛྲ་སྥ་ར་ཎ་ཁཾ། ཀྱཻ། རྒྱལ་དབང་མཚོ་སྐྱེས་པད་འབྱུང་གིས། །བཀའ་བསྒོས་ལྷ་ཡི་དགེ་བསྙེན་ཆེ། །ཁྱུང་དྲག་རྡོ་རྗེ་འབར་བ་རྩལ། །དགྱེས་སྡེ་འཁོར་དང་ཡང་འཁོར་བཅས། །གཞན་ཡང་ཡུལ་ཕྱོགས་འདིར་གནས་པའི། །དགེ་བའི་སྡོང་གྲོགས་མཛད་པ་ཡི། །གཉུག་མར་གནས་པའི་དཀར་ཕྱོགས་སྐྱོང་། །ཀུན་ཀྱང་འདིར་བྱོན་བསང་མཆོད་འབུལ། །སོ་སོར་མོས་ཐོབ་སྣ་ཚོགས་རྫས། །འཆི་མེད་བདག་པོའི་ལོངས་སྤྱོད་བཞིན། །དགྱེས་བསྐང་མཐུན་པའི་ཡོ་བྱད་ཚོགས། །འབུལ་བཞེས་
ཐུགས་དམ་བརྩེར་དགོངས་ལ། །ཉམས་ཆག་མནོལ་གྲིབ་བསང་གྱུར་ཅིག །རྟག་ཏུ་འགོ་ཞིང་སྲུང་བ་དང་། །མཐུ་རྩལ་སྟོབས་ལྡན་ཕྱྭ་ག ཡང་ཕོབ། །སྔོན་ཚེ་རྩ་བརྒྱུད་བླ་མ་ཡི། །བཀའ་དང་དམ་ཚིག་མ་གཡེལ་བར། །རྣལ་འབྱོར་བསམ་དོན་མྱུར་འགྲུབ་པའི། །ཕྲིན་ལས་ཐོགས་མེད་བསྒྲུབ་པར་མཛོད། །གཙྪས་རང་གནས་གཤེགས། ཞེས་པ་དད་དམ་ལྡན་པ་བཀྲ་ཤིས་ལྷ་དར་ངོར་སྤེལ་བ་དགེ། །།
རྒྱལ་རོང་ལེགས་བཤད་ངོར།
༈ སྭ་བྷཱ་ཝས་སྦྱངས། སྟོང་ལས་རིན་ཆེན་སྣོད་ཡངས་པར། །འབྲུ་གསུམ་འོད་ཞུ་མཆོད་པའི་རྫས། །དྲི་ཞིམ་བདུག་པའི་སྤྲིན་ཕུང་གིས། །ཕྱོགས་ཀུན་རྒྱས་པར་འགེངས་པར་གྱུར། །ༀ་བཛྲ་སྥ་ར་ཎ་ཁཾ། ཀྱཻ། སྔོན་ཚེ་རྒྱལ་དབང་པདྨ་ཐོད་ཕྲེང་གིས། །སྦས་པའི་ཡུལ་ལྗོངས་བྱིན་རླབས་ཤར་ཕྱོགས་ཀྱི། །རྒྱལ་མོ་ཚ་བ་རོང་གི་གཞི་གནས་བདག །འཇིག་རྟེན་དྲེགས་བྱེད་དམ་ཚིག་ཅན་གྱི་གྲོགས། །ཡུལ་ལྷ་ཐོ་བུག་བྷ་ཝེ་དྲེ་དང་ནི། །ཡ་ཕྲི་ཏ་ཕྱི་ཀ་ར་ཝ་རྣམས་དང་། །ཡ་ཝོ་ནི་སོགས་གནས་ཡུལ་སྐྱོང་བ་རྣམས། །འདིར་བྱོན་ཞི་བ་བསང་གི་མཆོད་པའི་རྫས། །སོ་སོར་མོས་ཐོབ་སྤྱན་གཟིགས་དཀོར་ཆས་བརྗིད། །ལྷ་མིའི་ལོངས་སྤྱོད་འདོད་ཡོན་སྣ་ཚོགས་དང་། །ཁྱད་པར་དྲི་བཞོན་གྱིས་བསྐུལ་དབྱར་སྐྱེས་ཀྱི། །
ཕྲེང་བ་དཀྲིགས་འདྲ་མ་ལ་ཡ་རླུང་གིས། །བསྐྱོད་པའི་ཧ་རི་ཙནྡན་ངད་ལྡང་པའི། །བསང་མཆོད་འདི་འབུལ་ཚིམ་ཞིང་དགྱེས་པར་རོལ། །མི་གཙང་ངན་སྤྱོད་གྲིབ་ཀྱིས་གོས་པ་བསང་། །མཐུ་རྩལ་ནུས་ལྡན་དཀར་ཕྱོགས་སྐྱོང་རྣམས་བསྟོད། །རྒྱལ་བསྟན་སྐྱོང་དང་ཆོས་འཁོར་འདུས་པ་རྒྱས། །ཡུལ་རིས་ས་ཕྱོགས་རྒྱལ་ཁམས་འདི་ཉིད་དུ། །སྐྱེ་དགུ་རྣམས་ཀྱང་བདེ་དགའི་དཔལ་ལྡན་ཅིང་། །ལོ་ལེགས་འབྲུ་འཕེལ་ནད་དང་གནོད་པ་ཞི། །མཐུན་རྐྱེན་འདོད་དགུ་གྲུབ་པར་མཛད་དུ་གསོལ། །མདོར་ན་རྣལ་འབྱོར་བསམ་དོན་གང་ཡིན་པ། །ལྷུན་གྱིས་གྲུབ་པར་བཅོལ་ཀུན་ཕྲིན་ལས་མཛོད། །གཙྪས་རང་གནས་སུ་གཤེགས། ཞེས་པ་འདི་རྒྱལ་རོང་ལེགས་བཤད་ངོར་སྤེལ། །
ཁྲོ་ཆུ་ཤུ་བྷམ་དགོན་གྱི་བླ་མ་ཏསྩ་རྗེ་དྲུང་པས་བསྐུལ་ངོར།
ཨ་མྲྀ་ཏས་བསངས་ལ། སྭ་བྷཱ་ཝས་སྦྱངས། སྟོང་ལས་བྷྲཱུཾ་ཡིག་རིན་ཆེན་སྣོད། །ཡིད་འོང་མཁའ་ལྟར་ཁྱབ་པའི་ནང་། །འབྲུ་གསུམ་འོད་ཞུ་བསང་མཆོད་རྫས། །ཟག་མེད་བདེ་ཆེན་སྐྱེད་བྱེད་པ། །འདོད་ཡོན་སྣ་ཚོགས་སྤྲིན་གྱི་ཆར། །སྣང་སྲིད་ཞིང་ཁམས་འབྱམས་ཀླས་པའི། །ཀུན་ཏུ་བཟང་པོའི་སྨོན་ལམ་བཞིན། །རྒྱ་ཆེན་རྒྱུན་མ་ཆད་པར་སྤེལ། །ཨ་ཀཱ་རོས་བྱིན་བརླབས་ལ། རང་ཉིད་ལྷར་གསལ་ཐུགས་འོད་ལས། །ཟེར་འཕྲོས་
མཆོད་འོས་མགྲོན་རིགས་རྣམས། །སྔོན་གྱི་དམ་ཚིག་རྗེ་དྲན་ནས། །སྐད་ཅིག་ཐོགས་མེད་འདིར་གཤེགས་གྱུར། །ཀྱཻ། བཅོམ་ལྡན་ཤཱཀྱ་སེང་གེ་ཡིས། །བདུད་བཏུལ་མངོན་བྱང་ཆུབ་པའི་ས། །རྡོ་རྗེ་གདན་གྱི་བྱང་གི་ཕྱོགས། །བསིལ་རིའི་ལྗོངས་ཏེ་གངས་ཅན་ཡུལ། །ཤར་གྱི་ཆར་བསྟན་སྦས་པའི་གནས། །རྒྱལ་མོ་ཚ་བའི་རོང་ཆེན་གྱི། །དཀར་པོ་ལྷ་ཡི་སྡེ་དཔོན་ཆེ། །ནག་ཕྱོགས་བདུད་རིས་མཐར་བྱེད་པའི། །ཡུལ་ལྷ་ཟོ་དོར་ཡོངས་ཀྱི་གཙོ། །ཨའུ་ཐབས་ཤེས་གཉན་པོ་ནི། །རྫུ་འཕྲུལ་སྣ་ཚོགས་སྟོབས་འཆང་ཞིང་། །སྐུ་མདོག་ཆ་ལུགས་ཅིར་ཡང་བསྒྱུར། །བཙུན་མོ་སྲས་འཁོར་ཡང་སྤྲུལ་དང་། །གཞན་ཡང་ཆོས་འཁོར་གཙུག་ལག་སྐྱོང་། །དགེ་བའི་གྲོགས་དང་མགོན་བྱེད་པའི། །གཞི་བདག་གཉུག་མར་གནས་པ་རྣམས། །ཀུན་ཀྱང་འདིར་བྱོན་གདན་ལ་བཞུགས། །འདིར་བཤམས་བསང་མཆོད་དུད་པའི་སྤྲིན། །ཆ་ཤས་ཟེར་མ་རེ་རེ་ལས། །བཀྲ་ཤིས་རྫས་རྟགས་འདོད་ཡོན་ལྔ། །མཁོ་དགུའི་སྤྱན་གཟིགས་དཀོར་ཆས་དང་། །ཉེར་སྤྱོད་རིན་ཆེན་གསེར་གྱི་སྐྱེམས། །རང་རང་ཇི་ལྟར་མོས་ཐོབ་ཀྱི། །སྣ་ཚོགས་ཡིད་ལ་འདོད་འཇོ་བའི། །མཆོད་རྫས་རྒྱ་ཆེན་འབུལ་བཞེས་གསོལ། །ངད་བཟང་བདུག་པའི་དྲི་བཞོན་གྱིས། །བྱིང་རྨུགས་དམེ་དང་
ཉམས་གྲིབ་སོགས། །མི་གཙང་ཉེས་པ་ཐམས་ཅད་སོལ། །སངས་རྒྱས་ཆོས་ཀྱི་འཁོར་ལོའི་གཞི། །བསྟན་པ་གཉན་སྲུང་ཕས་རྒོལ་འཇོམས། །དཀར་ཕྱོགས་སྐྱོང་བའི་སྡེ་དཔོན་ཆེ། །གསོལ་ལོ་མཆོད་དོ་མངའ་གསོལ་ལོ། །རྣམ་དག་ངེས་པའི་རིང་ལུགས་གང་། །འཛིན་བྱེད་རྡོ་རྗེ་སློབ་དཔོན་དང་། །སློབ་མར་བཅས་ཀུན་སྐྱོང་བྱེད་པ། །གསོལ་ལོ༴ རྒྱལ་ཁམས་བདེ་ལྡན་ཉེར་འཚོའི་གནས། །ས་སྐྱོང་མི་བདག་མངའ་རིས་ཀྱི། །ཡུལ་ལྗོངས་དགེ་བའི་མགོན་བྱེད་པ། །གསོལ་ལོ༴ རྣལ་འབྱོར་བརྟེན་བསྒྲུབ་འགོ་བ་ཡི། །རིགས་ཆོས་རྒྱུད་ཀྱི་སྲུང་མ་སྟེ། །ཁ་འཛིན་སྡོང་གྲོགས་རྒྱབ་རྟེན་བྱེད། །གསོལ་ལོ༴ མཐུ་ཆེན་རྩལ་དྲག་ལྡན་པ་ཡི། །སྦས་པའི་གནས་ཡུལ་བདེར་སྐྱོང་བ། །གཞི་བདག་ཟོ་དོར་དཔུང་གི་ཚོགས། །འཁོར་བཅས་བསྟོད་དོ་རབ་ཏུ་བསྔགས། །སྔོན་ཚེ་པདྨ་ཐོད་ཕྲེང་དང་། །ལོ་ཆེན་བཻ་རོ་ལ་སོགས་པ། །རྩ་བརྒྱུད་བླ་མའི་སྤྱན་སྔ་རུ། །ཐ་ཚིག་རྡོ་རྗེའི་མནའ་བོར་ལྟར། །བཀའ་བསྒོས་དམ་བཞག་མ་བསྙེལ་བར། །མི་ནུབ་བསྟན་པའི་རྒྱལ་མཚན་བསྒྲེང་། །ངེས་གསང་སྙིང་པོ་སྒྲུབ་བརྒྱུད་ཀྱི། །བསྟན་དང་བསྟན་འཛིན་ཕྲིན་ལས་འོད། །རྒྱ་མཚོའི་གོས་ཅན་ཁྱབ་པ་དང་། །དགེ་འདུན་འདུས་པ་ཚུལ་གནས་ཐོས། །
ཆོས་སྤྱོད་ཕར་ཕྱིན་བསླབ་གསུམ་ལྡན། །ནོངས་མེད་འཕེལ་རྒྱས་ཁམས་ཀུན་ཏུ། །རྒྱལ་པོ་ཆོས་མཐུན་སྐྱེ་དགུ་རྣམས། །དགེ་ལ་གཞོལ་ཞིང་རྟག་བདེ་སྐྱིད། །ཆར་ཆུ་དུས་འབབ་ལོ་ཕྱུགས་ལེགས། །ཡིད་སྲུབས་རྒྱུད་བསྐུལ་ཆོས་མིན་རྣམས། །མིང་མེད་རྩད་ནས་གཞོམ་པ་དང་། །ནད་ཡམས་བསྐལ་ངན་འཇིགས་ཆེན་བརྒྱད། །དལ་ཁ་མཚོན་ཁ་བསྒྱུར་དུ་གསོལ། །རྫོགས་ལྡན་དང་པོའི་ལང་ཚོ་ནི། །གསར་དུ་འཆར་འདྲའི་དཔལ་འབྱོར་གྱིས། །འཇིག་རྟེན་ཁྱབ་པར་མཛད་དུ་གསོལ། །རྣལ་འབྱོར་མཐུན་རྐྱེན་འདོད་པའི་དོན། །ཡིད་བཞིན་འགྲུབ་པའི་སྡོང་གྲོགས་མཛོད། །ཉིན་མཚན་དུས་ཀུན་འབྲལ་མེད་དུ། །སྲུང་སྐྱོབ་མེལ་ཚེ་མ་གཡེལ་ཅིག །འགལ་རྐྱེན་ནད་གདོན་བར་ཆད་རིགས། །མི་མཐུན་གཡུལ་ངོ་བཟློག་ཏུ་གསོལ། །གཉིས་སྣང་འཛིན་པའི་བག་ཆགས་ཀྱི། །འཁྲུལ་རྟོག་གིས་བསླད་ནོངས་པ་རྣམས། །བཟོད་བཞེས་མཉམ་ཉིད་མཁའ་ཡངས་པོར། །བཤགས་སོ་དག་ཚངས་དངོས་གྲུབ་སྩོལ། །རང་རང་གནས་གཤེགས་སླར་ཡང་ནི། །མཆོད་པའི་སླད་དུ་འབྱོན་པར་གསོལ། །སརྦ་བྷཱུ་ཏ་གཙྪས་གཤེགས། བཀྲ་ཤིས་ཕུན་ཚོགས་དགེ་བའི་ཆར། །སྲིད་ཞིའི་དངོས་ཀུན་ལེགས་བྱས་སུ། །དེང་འདིར་མངོན་པར་ཡོངས་གྲུབ་
ནས། །བསམ་པ་འགྲུབ་པའི་བཀྲ་ཤིས་ཤོག །ཅེས་པའང་རྒྱལ་རོང་ཁྲོ་ཆུ་ཤུ་བྷམ་དགོན་གྱི་བླ་མ་ཏསྩ་རྗེ་དྲུང་པས་བསྐུལ་ངོར། སི་ཏུ་པདྨ་ཉིན་བྱེད་དབང་པོས་སྤེལ་བ་དགེ་བར་གྱུར་ཅིག །
རྡོ་བླ་ལྕགས་རྩེ་གཉན་པོའི་བསང་མཆོད།
རྡོ་བླ་ལྕགས་རྩེ་གཉན་པོའི་བསང་མཆོད་བཞུགས། འདིར་ཡུལ་ལྷའི་བསང་བརྔན་བགྱི་བར་སྤྲོ་ན། བསང་ཁང་ཟླུམ་པོ་ཡིད་དུ་འོང་བ་ཕུབ། ཕྱེ་མར། འབྲུ་སྣ། དཀར་ཕུད། དར་ཟབ། རིན་ཆེན་ཕྱེ་མ་སོགས་མཆོད་པ་བཤམས། རང་ཉིད་ལྷ་ཡི་ང་རྒྱལ་དང་ལྡན་པས། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་དྷཱི་ཡིག་ཡོངས་གྱུར་ལས། །རིན་ཆེན་བསང་ཁང་ཡངས་ཤིང་རྒྱ་ཆེ་བར། །དྲི་བཟང་སྨན་སྤོས་ཤིང་སྣ་དུད་པའི་སྤྲིན། །འདོད་ཡོན་ལོངས་སྤྱོད་ནམ་མཁའ་མཛོད་བཞིན་སྤེལ། །ༀ་བཛྲ་སྥ་ར་ཎ་ཁཾ། ལན་གསུམ་དང་། ཨ་ཀཱ་རོས་བྱིན་གྱིས་བརླབས་ལ། ཀྱཻ། སྣང་སྲིད་ཟིལ་གནོན་གདུག་པ་འདུལ། །ཕྱི་ལྟར་ཆེ་མཆོག་དྲག་པོ་རྩལ། །ནང་ལྟར་པདྨ་འབྱུང་གནས་སྐུ། །གསང་བ་ཐོད་ཕྲེང་ཧེ་རུ་ཀ །འཁོར་འདས་ཀུན་ལ་དབང་བསྒྱུར་བའི། །རྡོ་རྗེའི་ཐ་ཚིག་གཉན་པོ་ཡི། །བཀའ་བསྒོས་དམ་བཞག་ཡལ་གམ་ཅན། །དཀར་པོའི་ཕྱོགས་རྣམས་སྐྱོང་བར་བྱེད། །ནག་ཕྱོགས་ཕས་རྒོལ་འཇོམས་པའི་ལྷ། །ཤར་ཟླའི་ལྗོངས་ཀྱི་བྱེ་བྲག་ཏུ། །རྡོ་ཡུལ་སྟོད་སྨད་མངའ་བའི་བདག །ཟོ་དོར་
རྣམས་ཀྱི་གཙོ་བོ་སྟེ། །སྐུ་ལྷ་ལྕགས་རྩེ་གཉན་པོ་དང་། །དིལ་དཀར་དང་ནི་གཡུང་དྲུང་རྩེ། །ལྷ་རི་དིལ་དཀར་ལ་སོགས་པ། །ཆ་ལུགས་ཞོན་པ་ཕྱག་མཚན་རྣམས། །མ་ངེས་སྣ་ཚོགས་སྟོན་ཅིང་བསྒྱུར། །གཞན་ཡང་ཡུལ་ཕྱོགས་འདིར་གནས་པའི། །དགེ་བསྙེན་སྨན་མོ་འབྱུང་པོའི་ཚོགས། །ཐམས་ཅད་མ་ལུས་འཁོར་དང་བཅས། །འདིར་གཤེགས་མཆོད་ཕྱིར་སྤྱན་འདྲེན་ནོ། །རིན་ཆེན་བསང་ཁང་ཡིད་འོང་བར། །དྲི་ལྡན་སྣ་ཚོགས་དུད་པའི་སྤྲིན། །རབ་འབྱམས་ཕྱོགས་མཐར་ཀུན་ཁྱབ་པའི། །ཆ་ཤས་ཟེར་ལས་འཕྲོས་པ་ཡི། །བཀྲ་ཤིས་རྫས་རྟགས་འདོད་ཡོན་དང་། །མཁོ་དགུའི་ལོངས་སྤྱོད་དཔལ་འབྱོར་རྣམས། །ཡོངས་འདུའི་ལྗོན་བཞིན་ཆར་ལྟར་འབེབས། །གཞན་ཡང་ཕྱེ་མར་འབྲུ་སྣའི་རིགས། །ཇ་ཆང་དཀར་ཕུད་དར་ཚོན་ལྔ། །རིན་ཆེན་གསེར་གཡུའི་ཕྱེ་མ་དང་། །མཐུན་རྫས་དཀོར་ཆས་ས་གཞི་དང་། །བར་སྣང་ཁྱབ་པར་འཕྲོ་བ་ཡི། །རྟ་ཕྱུགས་གནག་ལུག་གཟུགས་འགྲོས་སོགས། །མདོར་ན་སོ་སོར་མོས་ཐོབ་ཀྱི། །མཆོད་པའི་ཡོ་བྱད་སྣ་ཚོགས་ཕུལ། །རབ་ཏུ་ཚིམ་ཞིང་དགྱེས་གྱུར་ནས། །བདེ་དང་དགའ་བས་ངོམས་གྱུར་ཅིག །སྔོན་ཚེ་དཔལ་ཆེན་ཧེ་རུ་ཀ །གྲུབ་པའི་དབང་ཕྱུག་ཀརྨ་པ། །རྩ་བརྒྱུད་བླ་མའི་སྤྱན་སྔ་རུ། །ཅི་ལྟར་ཁས་བླངས་དམ་བཅས་བཞིན། །དམ་
ཚིག་རྗེས་སུ་དྲན་པར་གྱིས། །རྒྱལ་བའི་ཞལ་མཐོང་དགེ་བསྙེན་ཆེ། །མ་འོངས་འཁོར་བ་མཐའ་ཅན་དུ། །སེམས་བསྐྱེད་འབྲས་བུ་ཐོབ་གྱུར་པ། །ཁྱོད་ལ་བསྟོད་ཅིང་བསྔགས་པར་འོས། །བཅོལ་བའི་ཕྲིན་ལས་དམ་པ་ནི། །སངས་རྒྱས་བསྟན་དང་བསྟན་འཛིན་རྣམས། །དར་རྒྱས་ཡུན་གནས་དགེ་འདུན་སྡེ། །འཕེལ་ཞིང་རྒྱལ་པོ་ཆོས་བཞིན་སྤྱོད། །མངའ་རིས་བདེ་སྐྱིད་ལོ་ལེགས་ཤིང་། །ནད་མུག་མཚོན་བསྐལ་ཞི་བར་མཛོད། །རྣལ་འབྱོར་བདག་ཅག་འཁོར་དང་བཅས། །གཞི་བྱེས་བྱ་བ་གང་བརྩམ་པར། །ལེགས་ཁ་བཏོད་ལ་རྒྱལ་ཁ་ཟུངས། །མཐུ་དང་རྒྱབ་རྟེན་སྡོང་གྲོགས་མཛོད། །ཉིན་དང་མཚན་དུ་བྱ་ར་དང་། །སྲུང་སྐྱོབ་མི་འབྲལ་སྤ་བར་མཛོད། །གང་བཅོལ་བསམ་པའི་དོན་རྣམས་ཀུན། །ཐོགས་མེད་བདེ་བླག་འགྲུབ་གྱུར་པའི། །མྱུར་མགྱོགས་རྫུ་འཕྲུལ་སྟོབས་བསྐྱེད་ལ། །ཀུན་ཏུ་དགེ་ཞིང་ཤིས་པ་ཡི། །ཕྲིན་ལས་རྣམ་བཞི་ལྷུན་གྲུབ་ཤོག །མི་གཙང་ཉེས་པར་གྱུར་པ་རྣམས། །བཤགས་སོ་ཚངས་པར་མཛད་ནས་ཀྱང་། །རང་རང་གནས་སུ་སོ་སོར་གཤེགས། །དུས་སུ་སླར་ཡང་འབྱོན་པར་གསོལ། །སརྦ་བྷཱུ་ཏ་གཙྪས་གཤེགས་ལ། བསྔོ་བ་སྨོན་ལམ་བྱའོ། །དེ་ལྟར་སྒྲུབ་ཆེན་བླ་མ་ཀརྨ་གཟི་བརྗིད་ཀྱིས་བསྐུལ་བའི་ངོར། སི་ཏུ་པདྨ་ཉིན་བྱེད་དབང་པོས་སྣྲོན་ཟླའི་ཚེས་ལ་སྤེལ་བ་མངྒ་ལྃ། །
རིག་འཛིན་མི་འགྱུར་རྡོ་རྗེའི་མཆོག་སྤྲུལ་གྱི་བཞེད་ངོར།
ན་མོ་པདྨཱ་ཀ་ར་ཡེ། འདིར་བསྟན་པའི་བཀའ་སྲུང་ཡུལ་ལྷ་རྣམས་ཀྱི་བསང་མཆོད་བགྱིད་པར་སྤྲོ་ན། བསང་རྫས་གཙང་ཞིང་བཟང་བ་ཚར་དུ་དངར་བ་འདུ་བར་བྱས་ལ། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་བསང་མཆོད་རྫས། །འདོད་པའི་ཡོན་ཏན་རྒྱ་ཆེ་ཞིང་། །རྒྱུན་མི་ཆད་པའི་རྣམ་པ་ཅན། །ནམ་མཁའ་མཛོད་ཀྱི་རང་བཞིན་གྱུར། །ༀ་ཨ་ཀཱ་རོ་ལན་གསུམ་བརྗོད་པས་བྱིན་གྱིས་བརླབས། དེ་ནས་མགྲོན་རྣམས་སྤྱན་དྲངས་བ་ནི། ཀྱཻ། སྔོན་ཚེ་ཨོ་རྒྱན་རྡོ་རྗེ་འཆང་། །མཚོ་སྐྱེས་པདྨ་བཛྲ་གྱི། །བཀའ་དང་དམ་ལ་གནས་པ་ཡི། །དཀར་ཕྱོགས་སྐྱོང་བ་ཡོངས་ཀྱི་རྒྱལ། །ལྷ་ཡི་དགེ་བསྙེན་གྲགས་ལྡན་པ། །གནས་ཞིང་སྲུང་བའི་ཟོ་དོར་གཙོ། །ཁྲ་ཤོད་སྦོམ་བྲག་གཉེན་པོ་དང་། །ཇོ་བོ་ལྷ་འཁོར་སེང་གནམ་བྲག །ཁྱད་པར་ཆོས་འཁོར་གདན་ས་ཡི། །བཀའ་སྲུང་ཞལ་བཞེས་གཡར་དམ་ཅན། །ཡུལ་ལྗོངས་དགེ་ཞིང་ཤིས་པ་ཡི། །སྟོབས་ཀྱི་དཔུང་པས་ལེགས་སྐྱོང་བ། །རྨུགས་འཛིན་ནོར་བདག་མདོ་རྒྱལ་གཉེན། །སྲས་ལྕམ་བཙུན་མོའི་འཁོར་ཚོགས་དང་། །ཕྱཱ་རྒྱལ་རྡོ་རྗེ་གཡུ་དྲུང་རྩལ། །མཆེད་གསུམ་རང་རིགས་སྡེ་དཔུང་དང་། །འཛི་རྒྱལ་སྒབ་གྲོ་བཀྲམ་རྒྱལ་སོགས། །འདིར་དམིགས་བསལ་ཡུལ་ལྷ་གང་རུང་འཛུད་ཀྱང་ཆོག །རྣལ་འབྱོར་སྒྲུབ་པོས་སྤྱན་འདྲེན་ན། །མ་ཐོགས་མྱུར་བར་གནས་འདིར་གཤེགས། །རང་རང་གདན་ལ་བཞུགས་སུ་གསོལ། །འདིར་བཤམས་ཕྱི་ནང་གསང་མཆོད་རྫས། །བྱང་སེམས་ཀུན་ཏུ་
བཟང་པོ་ཡི། །མཆོད་སྤྲིན་རབ་འབྱམས་དང་མཉམ་པའི། །ཟད་མེད་ཕུན་སུམ་ཚོགས་པའི་གཏེར། །ཞིང་ཁམས་རྒྱ་མཚོར་འགེངས་པ་ཡི། །སྤྱན་གཟིགས་དཀོར་ཆས་སྣ་ཚོགས་དང་། །ཛ་གད་རཏྣའི་གསེར་སྐྱེམས་ཕུད། །ཕྱེ་མར་དཀར་གསུམ་མངར་གསུམ་དང་། །དར་སྣ་སྟག་རས་གཟིག་རས་སོགས། །བཟང་ཤིང་རྣམ་མང་བདུག་སྤོས་ཀྱི། །འོད་ཟེར་དྲྭ་བའི་རེ་ཁཱ་ལས། །མཐོ་རིས་བདག་པོའི་ལོངས་སྤྱོད་ཀྱི། །བཀྲ་ཤིས་རྫས་རྟགས་རྒྱལ་སྲིད་བདུན། །ཉེ་བའི་རིན་ཆེན་འདོད་ཡོན་ལྔ། །དགེ་མཚན་རི་མོ་ཅི་ཡང་འཆར། །གནས་ཡུལ་གཞི་ཡི་བདག་རྣམས་ལ། །འབུལ་གྱི་དགྱེས་པ་བསྐང་གྱུར་ཅིག །གཉིས་འཛིན་འཁྲུལ་པས་ནོངས་པ་ཡི། །ཐུགས་འགལ་ཉེས་ཚོགས་བཤགས་པར་བགྱི། །བྱང་དག་ཚངས་པར་བསྩལ་དུ་གསོལ། །རབ་དཀར་བརྒྱུད་པའི་བཀའ་སྲུང་བ། །དྲེགས་ལྡན་མཐུ་སྟོབས་ཐོགས་པ་མེད། །མཆོག་གསུམ་དམ་པར་སྐྱབས་གསོལ་བའི། །དགེ་བསྙེན་ཆེན་པོ་སྲས་ལྕམ་དང་། །མཆེད་འཁོར་སྤྲུལ་དང་ཡང་སྤྲུལ་ཚོགས། །གཞན་ཡང་ཡུལ་རིས་ས་ཕྱོགས་འདིར། །གཉུག་མར་གནས་དང་གློ་བུར་ལྷགས། །མཆོད་འོས་མགྲོན་རྣམས་ཐམས་ཅད་ལ། །ཞི་བ་བསང་གི་མཆོད་པ་འབུལ། །
མཉེས་ཤིང་དགྱེས་པ་བསྐང་གྱུར་ཅིག །རྒྱལ་བའི་བཀའ་སྡོད་དམ་ཚིག་ཅན། །ཕས་རྒོལ་འཇོམས་པའི་མཐུ་རྩལ་ལྡན། །ཆོས་ཀྱི་སྲུང་མ་ཁྱེད་རྣམས་བསྟོད། །སྔོན་ཚེ་དབང་དྲག་ཧེ་རུ་ཀ །རིག་འཛིན་རྩ་བརྒྱུད་བླ་མ་དང་། །ཁྱད་པར་མི་འགྱུར་རྡོ་རྗེ་ཅན། །ནུས་ལྡན་དྲག་པོ་རྩལ་སོགས་ཀྱི། །སྤྱན་སྔར་ཁས་བླངས་རྗེས་དྲན་ནས། །སངས་རྒྱས་བསྟན་པ་སྐྱོང་སྤེལ་དང་། །སྒྲུབ་པའི་མཐུན་རྐྱེན་སྒྲུབ་པ་དང་། །ཕྱི་ནང་བར་ཆད་བཟློག་ཏུ་གསོལ། །ཡུལ་རིས་ས་ཕྱོགས་རྣམ་ཀུན་བདེ། །དགེ་ཞིང་དགེ་བའི་སྡོང་གྲོགས་མཛོད། །བཀྲ་ཤིས་ཆོས་ཀྱི་རྒྱལ་སྲིད་ཆེ། །རྟག་བརྟན་ནོངས་མེད་ལྷུན་གྱིས་གྲུབ། །རྣམ་ཀུན་དགེ་ལེགས་འདོད་དགུའི་ཆར། །ཡོངས་སུ་འབེབས་པའི་བཀྲ་ཤིས་ཤོག གཙྪས་རང་གནས་སུ་གཤེགས་པར་བྱའོ། །ཞེས་པའང་སི་ཏུ་པདྨའི་མིང་ཅན་གྱིས་རིག་འཛིན་མི་འགྱུར་རྡོ་རྗེའི་མཆོག་སྤྲུལ་གྱི་དགོངས་བཞེད་བསྐང་ཕྱིར་སྤེལ་བ་ཡི་གེ་པ་ནི་ཀརྨ་པུཎྱེ་དྷརྨ་ཝརྡྷ་ཞེས་པའོ། །སརྦ་ཐཱ་མངྒ་ལམ། །
ཆགས་མེད་རིན་པོ་ཆེའི་བཞེད་ངོར།
ཨ་ཀཱ་རོས་བྱིན་བརླབས། ཀྱཻ་ཧོ། རྒྱལ་དབང་མཚོ་སྐྱེས་རྒྱལ་པོ་ཡི། །བཀའ་གཉན་དཀར་པོའི་སྡེ་སྐྱོང་བའི། །ལྷ་བཙན་རྡོ་རྗེ་ཐོགས་མེད་རྩལ། །སྔོན་ཚེ་ཡལ་གམ་རྗེས་དགོངས་ལ། །འདིར་གཤེགས་ཞི་བ་བསང་མཆོད་རྫས། །དགྱེས་མཆོད་མོས་པའི་
རང་བཞིན་གྱི། །འདོད་ཡོན་རྒྱ་མཚོ་དཀྲིགས་པ་འདི། །བཞེས་ཤིག་རོལ་ཅིག་པཱུ་ཛ་ཧོ། །བདག་ཅག་དཔོན་སློབ་གཞི་བྱེས་ཀུན། །དགེ་ཞིང་ལེགས་པའི་སྡོང་གྲོགས་དང་། །ཁ་འཛིན་རྒྱབ་བརྟེན་མ་གཡེལ་མཛོད། །བར་ཆད་རྐྱེན་ལས་བསྲུང་ཞིང་སྐྱོབས། །ཕྲིན་ལས་མ་གཡེལ་དམ་ཚིག་ཅན། །དམ་ལ་མ་འདའ་ས་མ་ཡ། །ཞེས་ཆགས་མེད་རིན་པོ་ཆེའི་བཞེད་ལྟར་སི་ཏུ་པས་སྤེལ་བ་མངྒ་ལམ།། །།
ཁྲ་ཕུག་གནས་སྤྲུལ་དྷྭ་ཛའི་མཚན་གྱིས་བསྐུལ་ངོར།
༈ ཡུལ་ལྷའི་བསང་བརྔན་བགྱིད་པར་སྤྲོ་ན་མཆོད་རྫས་རྣམས་འདུ་བགྱིད་ལ། རང་ཉིད་ཆེ་མཆོག་པདྨ་འབྱུང་གནས་གསལ། །ཐུགས་ཀའི་འོད་ཀྱི་འཕྲོ་འདུས་ཡུལ་ལྷ་རྣམས། །སྔོན་གྱི་དམ་ཚིག་གཉེན་པོའི་སྨོན་ལམ་གྱི། །རང་རང་གནས་ནས་མ་ལུས་སྤྱན་དྲངས་གྱུར། །མཆོད་རྫས་རྣམས། ༀ་ཨཱཿཧཱུྃ། ལན་གསུམ་དང་། ཨ་ཀཱ་རོ་ལན་གསུམ་དང་། ༀ་བཛྲ་སྥ་ར་ཎ་ཁཾ། གསུམ་གྱིས་བྱིན་བརླབས་སྦྱངས་སྤེལ་བྱས་ལ། ཧྲཱིཿ ཀུན་བཟང་པདྨ་འབྱུང་གནས་དང་། །གྲུབ་ཆེན་ཀརྨ་པཀྴི་ཡི། །སྤྱན་སྔར་ཁས་བླངས་དམ་བཅས་པའི། །གནས་དང་གཞི་ཡི་བདག་པོ་ནི། །འབུམ་རྒྱལ་གཉན་པོ་གནམ་རྫོང་དང་། །ཁྲ་ཚུག་ཛོ་ནག་ཁྲ་འབལ་དང་། །གོ་རི་རི་བཀྲ་ལ་སོགས་པ། །རྒྱལ་བའི་བསྟན་སྲུང་གཡར་དམ་ཅན། །དཀར་པོའི་ཕྱོགས་རྣམས་སྐྱོང་བ་ཡི། །ཟོ་དོར་ཡུལ་བདག་
དགེ་བསྙེན་སོགས། །བསང་མགྲོན་མཆོད་པར་འོས་པ་རྣམས། །འདིར་གཤེགས་མངའ་གསོལ་བསང་མཆོད་བཞེས། །འདོད་དགུའི་ལོངས་སྤྱོད་མཐུན་རྫས་ཚོགས། །དཔག་མེད་དངོས་བཤམས་ཡིད་ལས་སྤྲུལ། །ནམ་མཁའ་མཛོད་ཀྱི་རང་བཞིན་ཅན། །བློ་ཡིས་བླངས་ནས་འབུལ་གྱི་བཞེས། །དགྱེས་པར་རོལ་ཞིང་ཚིམ་པར་མཛོད། །མཐུ་དང་རྩལ་ལྡན་རང་ཕྱོགས་སྲུང་། །གཞན་ཕྱོགས་འཇོམས་པར་ཞལ་བཞེས་པའི། །བཀའ་སྲུང་གཉན་པོར་བསྟོད་པར་བགྱི། །བདག་ཅག་གཉིས་འཛིན་འཁྲུལ་དབང་གིས། །ནོངས་པར་གྱུར་རྣམས་བཟོད་པར་བཞེས། །སངས་རྒྱས་བསྟན་སྲུང་དཀོན་མཆོག་གི། །དབུ་འཕང་བསྟོད་ལ་བསྟན་འཛིན་རྣམས། །ཕྲིན་ལས་དར་རྒྱས་འདུས་པ་འཕེལ། །རྒྱལ་ཁམས་བདེ་སྐྱིད་ཕུན་ཚོགས་ཀྱི། །དཔལ་ཡོན་རྣམ་པར་རྒྱས་པ་ཡི། །བཅོལ་བའི་ལས་རྣམས་འགྲུབ་པར་མཛོད། །བཀྲ་ཤིས་སྣང་བས་ཁྱབ་གྱུར་ཅིག །སརྦ་བྷུ་ཏ་གཙྪས་རང་གནས་སུ་གཤེགས་པར་བྱའོ། །ཞེས་སི་ཏུ་པ་པདྨའི་མིང་ཅན་གྱིས། ཁྲ་ཕུག་གནས་སྤྲུལ་དྷྭ་ཛའི་མཚན་གྱིས་བསྐུལ་ངོར་སྤེལ་བ་དགེ་ལེགས་སུ་གྱུར་ཅིག། །།
མཛོད་དགོན་ཨ་ཅང་བསོད་དབང་སྤྲུལ་སྐུའི་བཞེད་ངོར་འབོལ་ཡག་ཡུལ་ལྷའི་བསང་མཆོད།
ན་མོ་པྲ་ཝཱ་ཀ་ར་ཡེ། འདིར་འབོལ་ཡག་བཀྲ་ཤིས་མཐོང་སྨོན་གནས་ཀྱི་ཟོ་དོར་རྣམས་ལ་བསང་མཆོད་འབུལ་བར་འདོད་ན། མཆོད་རྫས་སྤྱི་དང་བསང་ཤིང་
སྣ་ཚོགས་གཙང་ལ་བཟང་བ་འདུ་བགྱིད་ལ། རྣལ་འབྱོར་པ་ལྷའི་བསྐྱེད་རྫོགས་དང་ལྡན་པའི་ངང་ནས། ཨ་མྲྀ་ཏས་བསངས། སྭ་བྷཱ་ཝས་སྦྱངས་ལ། སྟོང་ལས་བསང་ཁང་བྷྲཱུྃ་ཡིག་ལས། །རིན་ཆེན་བཀོད་མཛེས་རབ་ཡངས་པར། །འབྲུ་གསུམ་འོད་ཞུ་བསང་བརྔན་རྫས། །ལྷ་ཀླུ་མི་ཡི་ལོངས་སྤྱོད་གང་། །རྒྱ་ཆེ་རྒྱུན་ཆད་མེད་གྱུར་བ། །སེམས་དཔའ་ཀུན་བཟང་སྨོན་སྟོབས་བཞིན། །དཔག་མེད་བསམ་ཡས་བརྗོད་བྲལ་ཞིང་། །མཆོད་སྤྲིན་རབ་འབྱམས་རྒྱས་འགེངས་གྱུར། །ཨ་ཀཱ་རོ་ལན་གསུམ་བྱིན་བརླབས་ལ། བསང་མགྲོན་མཆོད་ཡུལ་རྣམས་སྤྱན་དྲངས་པ་ནི། ཧྲཱིཿ སྐུ་གསུམ་ཡོན་ཏན་ཞིང་གི་བདག །རྒྱལ་དང་རྒྱལ་སྲས་རྩ་བརྒྱུད་ཀྱི། །བླ་མ་རིག་འཛིན་ཡི་དམ་དང་། །དཔའ་བོ་ཌཱ་ཀི་ཆོས་སྐྱོང་ཚོགས། །སྤྲིན་ལྟར་འདུ་ཞིང་གནས་པ་ཡི། །གདོད་ནས་རང་བྱུང་དག་པའི་ཞིང་། །ཐུབ་བསྟན་གསང་སྔགས་ཆོས་ཀྱི་རྫོང་། །བཀྲ་ཤིས་མཐོང་སྨོན་གཙུག་ལག་གི། །སྲུང་མ་རྡོ་ཐི་གངས་དཀར་གཉན། །རྡོ་རྗེ་ཅང་ཕུག་དགེ་བཙན་པོ། །ཁྱད་པར་གནས་ཀྱི་ཟོ་དོར་ནི། །དགུ་བཙུན་གངས་པ་དཀར་པོ་དང་། །ཇ་སྟི་ཉི་མ་ལྷ་རྩེ་སོགས། །པདྨའི་དགེ་བསྙེན་མཐུ་རྩལ་ཅན། །མ་ལུས་འཁོར་དང་ཡང་འཁོར་ཚོགས། །གཉུག་མར་གནས་པའི་ཡུལ་གཞིའི་བདག །རང་ལ་རིགས་ཀྱི་འགོ་བ་ཡི། །
ལྷ་དང་སྲུང་མ་དམ་ཚིག་ཅན། །བསང་བགྲོན་ཚོགས་རྣམས་འདིར་གཤེགས་ཤིག །རང་རང་དགྱེས་པའི་གདན་ལ་བཞུགས། །འདིར་བཤམས་ཕྱི་ནང་གསང་བ་ཡི། །མཆོད་པའི་བྱེ་བྲག་རྣམ་མང་པོ། །ཉེར་སྤྱོད་བདུན་དང་འདོད་ཡོན་ལྔ། །བཀྲ་ཤིས་དགེ་བའི་རྫས་རྟགས་དང་། །རྒྱལ་སྲིད་ཉེ་བའི་རིན་ཆེན་བདུན། །སྤྱན་གཟིགས་དཀོར་ཆས་རྐང་འགྲོས་རིགས། །དར་སྣ་རིན་ཆེན་སྤོས་སྨན་དང་། །ཛ་གད་ཕུད་སྣའི་སྐྱེམས་བཟང་དང་། །ཕྱེ་མར་དཀར་གསུམ་མངར་གསུམ་སོགས། །བདུག་སྤོས་སྤྲིན་གྱི་དྲྭ་བ་ལས། །ས་གསུམ་འདོད་དགུའི་ལོངས་སྤྱོད་རྣམས། །ཅིར་ཡང་འཆར་བའི་ཡིད་སྤྲུལ་ཀྱིས། །རང་བཞིན་བློ་ཡིས་བླངས་ནས་སུ། །འབུལ་གྱི་དགྱེས་པ་ཆེན་པོར་རོལ། །མཐའ་ཡས་འགྲོ་སྒྲོལ་ཕྲིན་ལས་བཞིའི། །མངའ་བདག་དཀྱིལ་འཁོར་ལྷ་ཚོགས་བསྟོད། །གནས་དང་ཞིང་སྐྱོང་སྒྲུབ་པ་པོའི། །སྡོང་གྲོགས་དཔུང་གཉེན་མེལ་ཚེ་མཁན། །ཟོ་དོར་སྲུང་མའི་ཚོགས་རྣམས་བསྟོད། །དེ་ལྟར་མཆོད་སྤྲིན་རྒྱ་མཚོ་ཡིས། །གསང་གསུམ་དགྱེས་པ་བསྐྱེད་པའི་མཐུས། །སངས་རྒྱས་བསྟན་པ་རིན་ཆེན་སྲུངས ། །བསྟན་འཛིན་ཞབས་བརྟན་དགེ་འདུན་རྒྱས། །སྐྱེ་དགུའི་དཔལ་དང་འབྱོར་པ་སྤེལ། །ཁྱད་པར་རྣལ་འབྱོར་འཁོར་བཅས་ལ། །ལེགས་ཁ་རྒྱལ་ཁ་བཏོད་པ་དང་། །བསམ་དོན་ཡིད་
བཞིན་ལྷུན་གྱིས་གྲུབ། །ནད་གདོན་བར་ཆད་ལས་རྒྱལ་ཞིང་། །ཚེ་རིང་བདེ་སྐྱིད་ཕུན་སུམ་ཚོགས། །ཡུལ་འདིར་མི་མཐུན་རྒུད་པ་བྲལ། །སད་སེར་བཙའ་འབུ་ཞི་བ་དང་། །ཆར་ཆུ་དུས་འབེབས་ལོ་འབྲས་ལེགས། །རྟག་ཏུ་བདེ་དང་ལྡན་གྱུར་ཅིག །བཀྲ་ཤིས་ཡོན་ཏན་ཀུན་འབྱུང་གནས། །པད་འབྱུང་རྩ་གསུམ་ལྷ་ཚོགས་ཀྱི། །བྱིན་རླབས་དངོས་གྲུབ་ཆར་གྱི་རྒྱུན། །དེང་འདིར་བདེ་ལེགས་རབ་རྒྱས་ཤོག །སརྦ་བྷཱུ་ཏ་གཙྪས་རང་གནས་གཤེགས། ཞེས་པའང་སི་ཏུ་པདྨའི་མིང་གིས་མཛོད་དགོན་ཨ་ཅང་བསོད་དབང་སྤྲུལ་སྐུའི་བཞེད་ངོར་འབོལ་ཡག་ཡུལ་ལྷའི་བསང་མཆོད་ཆེད་དུ་སྤེལ་བ་དགེ། །
ཇའི་སང་སྐལ་བཟང་ངོར་དཔོན་སྡེའི་དགྲ་བླ་དཔང་བསྟོད་ཕྲིན་བཅོལ།
དགྲ་བླ་ཡེ་བརྫུའི་གསོལ་མཆོད་ཕྲིན་བཅོལ་སྤྲོ་ན། བསང་གསུར་གསེར་སྐྱེམས་སོགས་བཤམས་ལ། ལྷའི་ང་རྒྱལ་ལྡན་པས། མཆོད་རྫས། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་ལས་སྣང་སྲིད་རབ་འབྱམས་ཞིང་། །མཐའ་ཀླས་རྒྱས་པར་འགེངས་བྱེད་པའི། །འདོད་ཡོན་མཆོད་རྫས་རྣམ་མང་པོ། །རྒྱ་ཆེན་མཆོད་པའི་སྤྲིན་དུ་གྱུར། །ༀ་བཛྲ་སྥ་ར་ཎ་ཁཾ། ལན་གསུམ་གྱི་བྱིན་གྱིས་བརླབས། ཧཱུྃ། ཀུན་བཟང་གདོད་མའི་སངས་རྒྱས་རྡོ་རྗེ་སེམས། །སྙིང་རྗེ་ཁྲོས་པ་བཛྲ་ཀཱི་ལ་ཡའི། །བཀའ་ཉན་ལས་བྱེད་དུང་གི་སྐྱེས་བུ་མཆོག །བོད་ཡུལ་གཞི་གནས་བདག་པོ་རྡོ་རྗེ་ལེགས། །མ་སངས་སྐྱེས་གཅིག་སྤྲུལ་
བསྒྱུར་ཅིར་ཡང་སྟོན། །དགྲ་བླ་ཡེ་བརྫུ་སུམ་བརྒྱ་དྲུག་ཅུ་སྟེ། །ལྷ་རིགས་དཀར་པོར་འགོ་ཞིང་སྟོངས་གྲོགས་བྱེད། །དཔུང་གཉེན་སྔོན་གྱི་དམ་བཅའ་རྗེས་དགོངས་ལ། །འདིར་གཤེགས་མཉེས་རྫས་ཉེར་སྤྱོད་བསང་གསུར་དུད། །ཁྱད་པར་བ་ལིཾ་དགྲ་བོའི་ཤ་ཁྲག་རུས། །སྦྱངས་སྤེལ་བསྒྱུར་བའི་བདུད་རྩི་རྒྱ་མཚོ་འདི། །བཞེས་ནས་བདག་ཅག་རིགས་བརྒྱུད་འཁོར་བཅས་ལ། །མགོན་སྐྱབས་མེལ་ཚེ་རྒྱབ་རྟེན་གྲོགས་མཛོད་ཅིག །དཀར་ཕྱོགས་ལྷ་ཡི་ལྷ་མཆོག་མངའ་གསོལ་ལོ། །དགྲ་བླ་གཉེན་དང་འབྲལ་མེད་དཔང་བསྟོད་དོ། །གསང་བདག་པད་འབྱུང་རྩ་བརྒྱུད་རིག་འཛིན་གྱི། །ཐ་ཚིག་བརྩེར་དགོངས་ཐུགས་དམ་མ་གཡེལ་བར། །ཆོས་འཁོར་སྐྱོངས་་དང་རྒྱལ་བློན་མངའ་འབངས་རྣམས། །བདེ་སྐྱིད་འབྱོར་རྒྱས་མི་འཕེན་རྟ་ཧྲགས་ཤིང་། །ཞི་རྒྱས་དབང་དྲག་ཕྲིན་ལས་མ་ལུས་པ། །མྱུར་སྒྲུབ་རང་ཕྱོགས་སྲུང་དང་ཕས་རྒོལ་འཇོམས། །གང་བཅོལ་འདོད་དོན་ཡིད་བཞིན་བསྒྲུབ་ཏུ་གསོལ། །གཙྪས་རང་གནས་གཤེགས། ཞེས་སི་ཏུ་པས། ཇའི་སང་སྐལ་བཟང་ནས་དཔོན་སྡེའི་དགྲ་བླ་དཔང་བསྟོད་ཕྲིན་བཅོལ་བསྐུལ་ངོར་སྤེལ། །
ནང་ཆེན་ཆིང་ཧུའི་མདུན་ན་འདོན་ཆོས་དང་ལྡན་པ་སྨན་དགའ་ཞེས་པའི་བཞེད་ངོར།
ན་མོ་གུ་རུ་དེ་ཝ་ཌཱ་ཀི་ནི་ཡེ། འདིར་ཡོན་བདག་ཀླུང་རྟ་བསྐྱེད་པའི་འདོད་གསོལ་བྱ་བ་ནི། རྩ་གསུམ་རྟེན་དྲུང་མཆོད་པ་ཚར་དུ་དངར་བ་ཇི་སྙེད་པ་དང་། ཁྱད་པར་ཕྱེ་མར། ཇ་ཆང་འོ་ཕུད། དར་ཚོན།
སྨན་དང་རིན་ཆེན་ཕྱེ་མ་། དར་རས་ལོ་ཁམས་མདོག་མཚུངས་ལ་ཀླུང་རྟ་སྤར་བཏབ་པ་རྣམས་དང་། གསས་མཁར་ལ་རྟེན་བཙུག་རྒྱུའི་ཁྱུང་འབྲུག་སེང་སྟག །བཀྲ་ཤིས་རྫས་རྟགས་རྒྱལ་སྲིད། གཞན་ཡང་སྤྱན་གཟིགས་དཀོར་ཆས་ཀྱི་རྣམ་པ་མཚོན་རིས་བཀྲ་བ་ལེགས་པར་བྲིས་པ་དང་། མདའ་དར། ཤུག་པ་རྩེ་རྒྱལ་བལ་ཚོན་གྱིས་བརྒྱན་པ། བསང་ཁང་ཟླུམ་པོར་བདུག་སྤོས་བསང་ཤིང་སོགས་འདུ་བྱས་ནས། དུད་སྤྲིན་བཏང་ཞིང་མཆོད་རྫས་རྣམས་བྲན་ལ་རིམ་པར་མཆོད་ཅིང་དང་པོ་གནས་དང་ཡོ་བྱད་རྣམས། ཨ་མྲྀ་ཏས་བསངས་། སྭ་བྷཱ་ཝས་སྦྱངས། ནམ་མཁའ་མཛོད་ཀྱི་རྒྱས། ཨ་ཀཱ་རོ་ལན་གསུམ་བརྗོད་ལ་རྒྱ་ཆེར་སྤེལ་ཞིང་དར་ཕྱར་དུང་འབུད་རྔ་རོལ་དང་དབྱངས་སྙན་པོས་འདི་སྐད་དོ། །ཀྱཻ། རིག་འཛིན་བརྒྱུད་པའི་བླ་མ་དང་། །ཡི་དམ་རྒྱལ་བ་ཞི་དང་ཁྲོ། །ཌཱ་ཀི་དམ་ཅན་ཆོས་སྐྱོང་བ། །རང་ལ་རིགས་ཀྱིས་འགོ་བ་ཡི། །ཕ་མེས་རྒྱུད་ཀྱི་སྲུང་མ་དང་། །སྲིད་གསུམ་དབང་བསྒྱུར་ལྷ་ཡི་ལྷ། །ཚོགས་རྗེ་ཚོགས་བདག་ཆེན་པོ་དང་། །སྐྱེས་བུ་རྡོ་རྗེ་ལེགས་པ་རྩལ། །ཏི་སེ་ཐང་ལྷ་སྤོམ་ར་གཉན། །བོད་ཀྱི་མགུར་ལྷ་བཅུ་གསུམ་དང་། །དགེ་བསྙེན་ཉི་ཤུ་རྩ་གཅིག་དང་། །མ་མོ་བརྟན་མ་བཅུ་གཉིས་པོ། །པདྨའི་སྤྱན་སྔར་དམ་བཅས་པའི། །རྡོ་རྗེའི་ཐ་ཚིག་ཡལ་གམ་ཅན། །རྣལ་འབྱོར་སྐྱོང་བར་ཞལ་བཞེས་པའི། །རྒྱལ་བའི་བསྟན་སྲུང་མཐུ་བོ་ཆེ། །དཀར་ཕྱོགས་སྐྱོང་བའི་ཚོགས་རྣམས་དང་། །
ཁྱད་པར་ཡུལ་རིས་ས་ཕྱོགས་འདིར། །གནས་པའི་ལྷ་ཀླུ་སྡེ་བརྒྱད་དང་། །དགེ་བསྙེན་སྨན་མོ་ཡུལ་གནས་བདག །གཉུག་མར་གནས་པའི་འབྱུང་པོ་རྣམས། །གནས་འདིར་སྤྱན་འདྲེན་གཤེགས་སུ་གསོལ། །རང་རང་དགྱེས་པའི་གདན་ལ་བཞུགས། །འདིར་བཤམས་ཕྱི་ནང་གསང་བ་ཡི། །མཆོད་པའི་བྱེ་བྲག་རྣམ་མང་པོ། །དངོས་སུ་འབྱོར་དང་ཡིད་ཀྱིས་སྤྲུལ། །ལྷ་མིའི་དཔལ་འབྱོར་འདོད་ཡོན་རྣམས། །བླ་མེད་ཀུན་བཟང་སྨོན་ལམ་གྱི། །མཆོད་སྤྲིན་ཟག་མེད་ཇི་བཞིན་པར། །དང་པའི་མོས་བློས་འབུལ་གྱི་བཞེས། །བསང་ངོ་བརྔན་ནོ་མངའ་གསོལ་ལོ། །མཆོད་དོ་འབུལ་ལོ་དགྱེས་པར་རོལ། །གསོལ་ཞིང་མཆོད་པ་ལ་བརྟེན་ནས། །རྣལ་འབྱོར་བདག་ཅག་སྒྲུབ་པ་པོ། །རྒྱུ་སྦྱོར་ཡོན་གྱི་བདག་པོ་ལ། །རྨ་གཡང་དངོས་གྲུབ་སྩོལ་བ་དང་། །ཚེ་བསོད་དཔལ་དང་འབྱོར་བ་སྤེལ། །ཀླུང་རྟ་ཡར་སྐྱེད་སྙན་གྲགས་རྒྱས། །རིགས་རྒྱུད་མངའ་ཐང་འཕེལ་བ་དང་། །ཞི་རྒྱས་དབང་དང་མངོན་སྤྱོད་ཀྱི། །ལས་རྣམས་ཡིད་ལ་བསམ་མ་ཐག །འདོད་དོན་གེགས་མེད་མྱུར་འགྲུབ་མཛོད། །ཕ་རོལ་སྡང་སེམས་ལྡན་པ་ཡི། །མི་དང་མི་མིན་ཐམས་ཅད་ཀྱི། །ལོག་པར་ལྟ་བའི་དཔུང་གཞོམ་སྟེ། །ཚར་གཅོད་རྗེས་སུ་འཛིན་ནས་སུ། །དམ་པའི་ཆོས་ལ་སྤྱོད་པ་ཡི། །སངས་རྒྱས་བསྟན་པ་རྒྱས་
པར་མཛོད། །མདོར་ན་བཅོལ་བའི་ཕྲིན་ལས་གང་། །ཐོགས་པ་མེད་པར་འགྲུབ་པར་མཛོད། །སྔོན་གྱི་ཐུགས་དམ་རྗེས་དགོངས་ལ། །རྣལ་འབྱོར་འཁོར་སྲུང་རྐྱེན་ངན་ཟློག །ཕྱོགས་རྣམས་ཀུན་ལས་རྣམ་རྒྱལ་བའི། །མི་ནུབ་བ་དན་བསྒྲེང་བར་མཛོད། །བཀྲ་ཤིས་དཔལ་བསྐྱེད་ཡོད་ཏན་གྱི། །དགེ་ལེགས་དངོས་པོ་རྒྱས་གྱུར་ཅིག །རང་ཕྱོགས་སྲུང་ཞིང་ཕས་རྒོལ་འཇོམས། །སྟོབས་རྩལ་ལྡན་རྣམས་བསྟོད་པར་བགྱི། །ཞེས་མཆོད་ཅིང་ཕྲིན་བཅོལ་བསྟོད་པར་བྱའོ། །གྲངས་གསོག་ཚེ་འདི་ནས་མཆོད་རྫས་བསང་སྦྱངས་ཕྱིན་ནས་མཐར་ཆགས་སུ་བཏོན། རྗེས་ནི། དེ་ལྟར་ཡེ་ཤེས་ལས་འཇིག་རྟེན། །དགེ་ཞིང་དགེ་བའི་སྟོངས་གྲོགས་ཅན། །འགོ་བའི་ལྷ་དང་སྲུང་མ་རྣམས། །གཏའ་འཛུགས་རྟེན་ལ་བརྟན་པར་བཞུགས། །གཞན་ཡང་འཇིག་རྟེན་སྐྱོང་བ་དང་། །གློ་བུར་ལྷགས་པའི་མགྲོན་རིགས་རྣམས། །རང་རང་གནས་གཤེགས་མཆོད་སྦྱིན་གྱིས། མཉེས་ཚིམ་དགའ་མགུར་ལྡན་པའི་ངང་། །མཐུན་རྐྱེན་སྒྲུབས་ལ་གནོད་པ་སྤོངས ། །ཞི་དང་བྱམས་པའི་སེམས་ལྡན་མཛོད། །སརྦ་བྷཱུ་ཏ་གཙྪས་གཤེགས། ཞེས་གནས་རི་བྱིན་ཆེན་ནམ་ཡུལ་ལྷ་གནས་པའི་རི་མཐོན་པོའམ་ཁང་ཐོག་ལ་སོགས་པར་ཀླུང་རྟ་རྣམས་དང་བརྟེན་རྫས་ཤིང་བྱང་བཅས་བཙུགས། མདའ་དར་གཡབ། འདོད་གསོལ་སྔགས་རྣམས་འདོན། ལྷ་རྒྱལ་འབོད།
ཤུག་པ་སྦྲའམ་ཁང་པའི་དཀྱིལ་ཀ་ལ་བཅིངས་ལ་བཞག །ཡེ་དྷརྨ་དང་། སུ་པྲ་ཏིཥྛ་ལན་གསུམ་མམ་བདུན་བརྗོད་ལ་སོ་སོར་མེ་ཏོག་འཐོར། རབ་ཏུ་གནས་ཤིང་། ཕྱེ་མར་དངོས་གྲུབ་ཏུ་རོལ། བཀྲ་ཤིས་བརྗོད་པ་དང་། དགེ་བ་བསྔོ་བ་སོགས་སྤྱི་དང་མཐུན་པར་བྱའོ། །ཞེས་པའང་སི་ཏུ་པདྨའི་མིང་ཅན་གྱིས་ནང་ཆེན་ཆིང་ཧུའི་མདུན་ན་འདོན་ཆོས་དང་ལྡན་པ་སྨན་དགའ་ཞེས་པའི་བཞེད་ངོར་སྤེལ་བ་དགེ་བར་གྱུར་ཅིག །སརྦ་མངྒ་ལཾ།། །།
སྐུ་ཚབ་ཀརྨའི་བཞེད་ངོར།
༈ ན་མོ་པྲ་ཝཱ་ཀ་ར་ཡེ། འདིར་སེང་ཆེན་གནམ་བྲག་གི་གནས་ཞིང་སྐྱོང་བའི་ཟོ་དོར་རྣམས་ལ་བསང་མཆོད་འབུལ་བར་འདོད་ན། མཆོད་རྫས་སྤྱི་དང་བསང་ཤིང་སྣ་ཚོགས་གཙང་ལ་བཟང་བ་འདུ་བགྱིད་ལ། རྣལ་འབྱོར་པ་རྣམས་ལྷ་ཡི་བསྐྱེད་རྫོགས་དང་ལྡན་པའི་ངང་ནས། ཨ་མྲྀ་ཏས་བསངས་། སྭ་ཧཱ་ཝས་སྦྱངས་ལ། སྟོང་ལས་བསང་ཁང་བྷྲཱུྃ་ཡིག་ལས། །རིན་ཆེན་བཀོད་མཛེས་རབ་ཡངས་པར། །འབྲུ་གསུམ་འོད་ཞུ་བསང་བརྔན་རྫས། །ལྷ་ཀླུ་མི་ཡི་ལོངས་སྤྱོད་གང་། །རྒྱ་ཆེ་རྒྱུན་ཆད་མེད་གྱུར་པ། །སེམས་དཔའ་ཀུན་བཟང་སྨོན་སྟོབས་བཞིན། །དཔག་མེད་བསམ་ཡས་བརྗོད་བྲལ་ཞིང་། །མཆོད་སྤྲིན་རབ་འབྱམས་རྒྱས་འགེངས་གྱུར། །ཨ་ཀཱ་རོས་ལན་གསུམ་བྱིན་བརླབས་ལ། བསང་མགྲོན་མཆོད་ཡུལ་རྣམས་སྤྱན་དྲངས་པ་ནི། ཧྲཱིཿ སྐུ་གསུམ་ཡོན་ཏན་ཞིང་གི་བདག །རྒྱལ་དང་རྒྱལ་སྲས་རྩ་བརྒྱུད་ཀྱི། །
བླ་མ་རིག་འཛིན་ཡི་དམ་དང་། །དཔའ་བོ་ཌཱ་ཀི་ཆོས་སྐྱོང་ཚོགས། །སྤྲིན་ལྟར་འདུ་ཞིང་གནས་པ་ཡི། །སྦས་ཡུལ་སེང་ཆེན་གནས་རྫོང་བྲག །གདོད་ནས་རང་བྱུང་དག་པའི་ཞིང་། །པདྨ་དབང་གི་དཀྱིལ་འཁོར་ཆེའི། །ཡེ་ཤེས་ལྷ་ཚོགས་འཁོར་ཡང་འཁོར། །སྤྲུལ་པར་བཅས་པ་ཐམས་ཅད་དང་། །གནས་ཀྱི་རྗེས་འབྲེལ་དཀར་པོའི་སྡེ། །སྐྱོང་ཞིང་རྒྱལ་བསྟན་སྤེལ་མཛད་པ། །པདྨའི་དགེ་བསྙེན་མཐུ་རྩལ་ཅན། །སྤོམ་བྲག་སྨུག་སངས་རི་བཀྲ་དང་། །འབྲི་གཉན་རྡོ་རྗེ་བློ་གྲོས་རྩལ། །ཟིལ་ཕྲོམ་མོ་ནམ་འབྲི་སྤོ་བོ། །མདོ་རྒྱལ་ཕྱ་རྒྱལ་བཀྲམ་རྒྱལ་གཉེན། །རྩེ་རྒྱལ་ཞལ་ད་སྲས་ལྕམ་འཁོར། །ཕྱོགས་བཞིའི་སྒོ་སྲུང་སོ་སྦྲམ་དང་། །བོ་ཐོག་རི་བཀྲ་ལྕགས་དེའུ། །ཤམ་རི་ཁྲ་ལེ བ་གནས་རྫོང་ཆེན། །ཞེ་མོག་ལྷ་སྨན་ལ་སོགས་པ། །སེང་ལུང་ཡུལ་ལྗོངས་འདིར་འཁོད་པའི། །གཉུག་མར་གནས་པའི་ཡུལ་གཞིའི་བདག །རང་ལ་རིགས་ཀྱིས་འགོ་བ་ཡི། །ལྷ་དང་སྲུང་མ་དམ་ཚིག་ཅན། །བསང་མགྲོན་ཚོགས་རྣམས་འདིར་གཤེགས་ཤིག །རང་རང་དགྱེས་པའི་གདན་ལ་བཞུགས། །འདིར་བཤམས་ཕྱི་ནང་གསང་བ་ཡི། །མཆོད་པའི་བྱེ་བྲག་རྣམ་མང་པོ། །ཉེར་སྤྱོད་བདུན་དང་འདོད་ཡོན་ལྔ། །བཀྲ་ཤིས་དགེ་བའི་རྫས་རྟགས་དང་། །རྒྱལ་སྲིད་ཉེ་
བའི་རིན་ཆེན་བདུན། །སྤྱན་གཟིགས་དཀོར་ཆས་རྐང་འགྲོས་རིགས། །དར་སྣ་རིན་ཆེན་སྤོས་སྨན་དང་། །ཛ་གད་ཕུད་སྣའི་སྐྱེམས་བཟང་དང་། །ཕྱེ་མར་དཀར་གསུམ་མངར་གསུམ་སོགས། །བདུག་སྤོས་སྤྲིན་གྱི་དྲྭ་བ་ལས། །ས་གསུམ་འདོད་དགུའི་ལོངས་སྤྱོད་རྣམས། །ཅིར་ཡང་འཆར་བའི་ཡིད་སྤྲུལ་ཀྱི། །རང་བཞིན་བློ་ཡིས་བླངས་ནས་སུ། །འབུལ་གྱི་དགྱེས་པ་ཆེན་པོར་རོལ། །མཐའ་ཡས་འགྲོ་སྒྲོལ་ཕྲིན་ལས་བཞིའི། །མངའ་བདག་དཀྱིལ་འཁོར་ལྷ་ཚོགས་བསྟོད། །གནས་དང་ཞིང་སྐྱོང་སྒྲུབ་པ་པོའི། །སྡོང་གྲོགས་དཔུང་གཉེན་མེལ་ཚེ་མཁན། །ཟོ་དོར་སྲུང་མའི་ཚོགས་རྣམས་བསྟོད། །དེ་ལྟར་མཆོད་སྤྲིན་རྒྱ་མཚོ་ཡིས། །གསང་གསུམ་དགྱེས་པ་བསྐྱེད་བའི་མཐུས། །སངས་རྒྱས་བསྟན་པ་རིན་ཆེན་སྲུང། །བསྟན་འཛིན་ཞབས་བརྟན་དགེ་འདུན་རྒྱས། །སྐྱེ་དགུའི་དཔལ་དང་འབྱོར་བ་སྤེལ། །ཁྱད་པར་རྣལ་འབྱོར་འཁོར་བཅས་ལ། །ལེགས་ཁ་རྒྱལ་ཁ་བཏོད་པ་དང་། །བསམ་དོན་ཡིད་བཞིན་ལྷུན་གྱིས་གྲུབ། །ནད་གདོན་བར་ཆད་ལས་རྒྱལ་ཞིང་། །ཚེ་རིང་བདེ་སྐྱིད་ཕུན་སུམ་ཚོགས། །ཡུལ་འདིར་མི་མཐུན་རྒུད་པ་བྲལ། །སད་སེར་བཙའ་འབུ་ཞི་བ་དང་། །ཆར་ཆུ་དུས་འབབ་ལོ་འབྲས་ལེགས། །རྟག་ཏུ་བདེ་དང་ལྡན་རྒྱུར་ཅིག། བཀྲ་ཤིས་ཡོན་ཏན་ཀུན་འབྱུང་གནས། །པད་འབྱུང་རྩ་
གསུམ་ལྷ་ཚོགས་ཀྱི། །བྱིན་རླབས་དངོས་གྲུབ་ཆར་གྱི་རྒྱུན། །དེང་འདིར་བདེ་ལེགས་རབ་རྒྱས་ཤོག །སརྦ་བྷཱུ་ཏ་གཙྪས་རང་གནས་གཤེགས། ཞེས་པའང་སི་ཏུ་པདྨའི་མིང་གིས་སྐུ་ཚབ་ཀརྨའི་བཞེད་ངོར་སྤེལ་བ་དགེ། །
ཡུལ་ལྷ་གནས་བདག་ལ་བསང་མཆོད་འབུལ་བ།
སྭ་སྟི། ཡུལ་ལྷ་གནས་བདག་ལ་བསང་མཆོད་འབུལ་བར་སྤྲོ་ན། བསང་དང་མཆོད་རྫས་གང་འབྱོར་གཙང་ཞིང་བཟང་བར་འདུ་བྱས་ལ། རང་ཉིད་ལྷར་གསལ་ཐུགས་ལས་འོད་ཟེར་འཕྲོས། །བསང་མཆོད་མི་གཙང་དྲི་མ་སྦྱངས་བྱས་ནས། །དག་པ་ཡེ་ཤེས་བདུད་རྩིའི་རང་བཞིན་ཅན། །མཁའ་དབྱིངས་ཀུན་ཁྱབ་རྒྱ་ཆེར་སྤེལ་བར་གྱུར། །ༀ་བཛྲ་སྥ་ར་ན་ཁཾ། ལན་གསུམ་དང་། ཨ་ཀ་རོ་ལན་གསུམ་གྱིས་བྱིན་བརླབས་ནས། ཧྲཱིཿ སྔོན་ཚེ་གསང་བདག་པདྨ་ཀ་ར་དང་། །སྒྲུབ་མཆོག་པཀྴིའི་སྤྱན་སྔར་དམ་མནོས་པའི། །སངས་རྒྱས་བསྟན་པ་སྐྱོང་བར་ཞལ་བཞེས་པའི། །དཀར་པོ་ལྷའི་རིགས་དགེ་བསྙེན་ཟོ་དོར་ཆེ། །ཨ་བོ་གེར་མཛོ་སྐྱིད་རི་སྨན་ཆེན་སོགས། །ཡུལ་འདིར་ལྷགས་པའི་གཉུག་གནས་གློ་བུར་མགྲོན། །དེང་འདིར་རྣལ་འབྱོར་བདག་གི་མཆོད་པའི་གནས། །འདིར་གཤེགས་དངོས་སུ་འབྱོར་དང་ཡིད་ཀྱིས་སྤྲུལ། །རྣམ་མང་སྣ་ཚོགས་འདོད་ཡོན་མི་ཟད་པ། །ཀུན་བཟང་མཆོད་སྤྲིན་སོ་སོར་མོས་ཐོབ་པའི། །དགྱེས་རྫས་དཀོར་ནོར་ལྷ་མི་ཀླུའི་ལོངས་སྤྱོད། །འབུལ་བཞེས་ཚིམ་པར་སྤྱོད་ལ་ཐུགས་དམ་
བསྐང་། །བསང་ངོ་བརྔན་ནོ་བསྟོད་དོ་མངའ་གསོལ་ལོ། །ཐུགས་འགལ་ཉེས་ཚོགས་ནོངས་བཤགས་བཟོད་པར་བཞེས། །བསྟན་པ་བསྲུང་ཞིང་རྣལ་འབྱོར་སྐྱོང་བ་ཡི། །མཐུ་སྟོབས་རྩལ་ལྡན་ཁྱེད་རྣམས་བསྟོད་པར་བགྱི། །དེ་ལྟར་མཆོད་བསྟོད་བཤགས་པ་ལ་བརྟེན་ནས། །རྒྱལ་བསྟན་དྲི་མེད་སྒྲུབ་བརྒྱུད་དར་ཞིང་རྒྱས། །དེ་འཛིན་ཞབས་བརྟན་ཕྲིན་ལས་རྣམ་བཞི་སྤེལ། །དགེ་འདུན་སྡེ་རྒྱས་འགྲོ་རྣམས་ཆོས་དང་ལྡན། །རྟག་པར་ཚེ་རིང་ནད་མེད་བསམ་དོན་འགྲུབ། །ནད་མུག་མཚོན་བསྐལ་ལ་སོགས་འཇིགས་བརྒྱད་ཞི། །ཆར་ཆུ་དུས་བབ་ལོ་ལེགས་སྐྱ་རྒྱལ་ཞིང་། །རྣམ་ཀུན་བདེ་ལེགས་ལྷུན་གྱིས་འགྲུབ་པར་མཛོད། །སརྦ་བྷཱུ་ཏ་གཙྪ། བརྗོད་ལ་རང་གནས་སུ་གཤེགས་པར་བྱའོ། །ཞེས་པའང་སི་ཏུ་པདྨའི་མིང་ཅན་གྱིས། མགུལ་ཞག་རི་ཁྲོད་སྦྱིན་བདག་རྣམས་ཀྱི་ངོར་སྤེལ་བ་དགེ་ལེགས་འཕེལ། སརྦ་མངྒ་ལཾ། །
བསང་མཆོད་འདོད་དགུའི་དཔལ་འབྱོར་ཅི་ཡང་འཆར་བའི་སྤྲིན་ཕུང་།
བསང་མཆོད་འདོད་དགུའི་དཔལ་འབྱོར་ཅི་ཡང་འཆར་བའི་སྤྲིན་ཕུང་དུ་གྱུར། ཨ་ཀཱ་རོས་བྱིན་བརླབས་ལ། ཀྱཻ། སྔོན་ཚེ་རྒྱལ་དབང་ཐོད་ཕྲེང་གི། །བཀའ་དང་དམ་གནས་ཡུལ་གཞིའི་བདག །མཆོད་པར་འོས་རྣམས་འདིར་གཤེགས་ཤིག །རང་རང་དགྱེས་པའི་གདན་ལ་བཞུགས། །འདིར་བཤམས་དངོས་འབྱོར་ཡིད་སྤྲུལ་གྱི། །སྣ་ཚོགས་འཇིག་རྟེན་ལོངས་སྤྱོད་རྫས། །
ཇི་སྙེད་ལྷ་མིའི་དཀོར་ནོར་ཚོགས། །རྒྱ་ཆེན་ནམ་མཁའ་མཛོད་ཇི་བཞིན། །མཁོ་དགུའི་མཐུན་རྫས་དཔག་མེད་རྣམས། །བསང་མཆོད་བདུག་སྤོས་སྤྲིན་ཆེན་ལས། །ཆར་བཞིན་བབ་འདི་དགྱེས་པར་རོལ། །མི་ཤེས་རྨོངས་པས་ནོངས་པ་ཡི། །མི་གཙང་ཐམས་ཅད་སངས་གྱུར་ཅིག །ལྷ་ཞལ་ཡར་ཟླའི་ཆ་གང་བཞིན། །རབ་ཏུ་གསལ་ཞིང་རྣལ་འབྱོར་གྱིས། །གང་བཅོལ་ཕྲིན་ལས་ཀུ་མུཏ་ཚལ། །འཛུམ་པའི་དགེ་མཚན་སངས་རྒྱས་བསྟན། །བསྟན་འཛིན་དགེ་འདུན་སྡེ་རྒྱས་ཤིང་། །རྒྱལ་ཁམས་རྒུད་པའི་དབུལ་ཕོངས་ཞི། །བདེ་སྐྱིད་འབྱོར་པ་དྲུག་ལྡན་པའི། །ཁ་འཛིན་སྡོང་གྲོགས་མ་གཡེལ་བར། །ཇི་ལྟར་བཅོལ་པའི་ཕྲིན་ལས་མཛོད། །གཙྪས་རང་གནས་བཏང་། ཞེས་ཨ་ཕྱུག་གྲྭ་ཚང་རྣམས་ཀྱིས་བསྐུལ་ལྟར། སི་ཏུས་སྤེལ། །
བླ་མ་ཀར་ལུའི་བཞེད་ངོར།
བྷཱུྃ་ལས་རིན་ཆེན་སྣོད་ཡངས་པར། །འབྲུ་གསུམ་འོད་ཞུ་བསང་མཆོད་རྫས། །ཟག་མེད་བདུད་རྩིའི་རང་བཞིན་ཅན། །རབ་འབྱམས་མཐའ་ཀླས་ཀུན་ཁྱབ་གྱུར། །ༀ་བཛྲ་སྥ་ར་ཎ་ཁཾ། ལན་གསུམ་གྱིས་བྱིན་བརླབས་ལ། ཀྱཻ། དུས་གསུམ་རྒྱལ་བའི་རང་གཟུགས་པདྨ་འབྱུང་། །སྤྱན་སྔར་དམ་མནོས་དཀར་པོའི་ཕྱོགས་སྐྱོང་གཙོ། །རྡོ་རྒྱལ་མུ་ནམ་མཆེད་བརྒྱད་སྲས་ཡུམ་འཁོར། །ཡལ་གམ་གཉན་
པོ་རྗེས་དགོངས་འདིར་གཤེགས་བཞུགས། །བཀོད་མཛེས་ལྷ་ཀླུ་མི་ཡི་ལོངས་སྤྱོད་རྣམས། །དབྱིབས་ལེགས་མཐུན་རྫས་དཀོར་ནོར་སྣ་ཚོགས་པ། །མ་ལ་ཡ་ཀླུང་ཧ་རི་ཙནྡན་ངད། །དྲི་བཞོན་བསྐུལ་མཚུངས་བདུག་སྤོས་སྤྲིན་ཆེན་གཡོ། །ཆབས་ཅིག་ཀུན་བཟང་རྣམ་ཐར་རྗེས་འགྲོ་པའི། །གཡུ་དུད་ཟེར་ལས་དཔལ་འབྱོར་འདོད་དགུའི་ཆར། །ཅི་དགར་འབབ་འདི་ལྷ་ཆེན་འཁོར་བཅས་ལ། །དགྱེས་བསྐང་འབུལ་བཞེས་ཁྱོད་ཐུགས་པདྨའི་ཚལ། །ཟག་མེད་བདེ་ཆེན་འདབ་སྟོང་རྒྱས་གྱུར་ཅིག །འཇིག་རྟེན་དྲེགས་པའི་ཁེངས་འཕྲོག་སྟོབས་རྩལ་ཅན། །གསང་སྔགས་རྣལ་འབྱོར་བཀའ་སྲུང་མངའ་གསོལ་བ། །དཀར་ཕྱོགས་ལྷ་ཡི་སྡེ་དཔོན་ཁྱོད་ལ་བསྟོད། །སྔོན་ཚེ་རྡོ་རྗེའི་ཐ་ཚིག་བྲོ་བོར་པ། །མ་གཡེལ་མ་འདའ་བསྐལ་དུས་སྙིགས་མ་འདིར། །པད་འབྱུང་བཀའ་གཏེར་སྤེལ་དང་བསྟན་འཛིན་སྲུངས ། །དགེ་འདུན་སྡེ་རྒྱས་མངའ་རིས་ཡུལ་ལྗོངས་རྣམས། །ནད་མུག་མཚོན་གྱི་སེར་བུ་རིང་བསྐྲད་ནས། །མཐའ་བཞིའི་རྐང་དྲུག་དབང་བསྡུས་བསླུ་ཆོས་མཁན། །ལུས་མེད་རྒྱུད་བསྐུལ་རྨེག་མེད་ཚར་ཆོད་ལ། །མདོར་ན་ལས་བཞིའི་ཕྲིན་ལས་མ་ལུས་སྒྲུབས། །བདག་ཅག་གཞི་བྱེས་ཁ་འཛིན་རྒྱབ་བརྟེན་དང་། །སྡོང་གྲོགས་མེལ་ཚེ་བུ་བཞིན་སྐྱོང་བར་མཛོད། །གང་བཅོལ་རེ་བའི་ཤིང་རྟ་
འགེངས་པ་ཡི། །བཀྲ་ཤིས་བསམ་དོན་ལྷུན་གྲུབ་བདེ་ལེགས་ཤོག །གཙྪས་རང་གནས་བཏང་། སི་ཏུ་པདྨ་ཉིན་བྱེད་དབང་པོས། བླ་མ་ཀར་ལུའི་བཞེད་ལྟར་སྤེལ་བ་དགེ། མངྒ་ལམ། །
སྒྲུབ་གཉེར་ཀརྨ་བདེ་ལེགས་ངོར།
ཡུལ་ལྷའི་བསང་མཆོད་སྤྲོ་ན། ཕྱེ་མར་ཕུད་སྐྱེམས་བཟང་ཤིང་ཚོགས་འདུ་བགྱིད་ལ། རང་ཉིད་པད་འབྱུང་སྐུར་གསལ་བའི། །ཐུགས་ལས་འོད་འཕྲོས་མཆོད་རྫས་རྣམས། །མི་གཙང་དྲི་མ་སྦྱངས་ནས་ཀྱང་། །དག་པ་ཡེ་ཤེས་བདུད་རྩིར་གྱུར། །ཨ་ཀཱ་རོས་བྱིན་བརླབས་ལ། རང་གི་སྙིང་གའི་འོད་ཟེར་གྱིས། །ཡུལ་གནས་གཞི་བདག་གླེ་བྲག་ཅེས། །འཁོར་བཅས་མཆོད་པའི་གནས་འདི་རུ། །སྤྱན་དྲངས་དགྱེས་པར་བཞུགས་སུ་གསོལ། །འདིར་བཤམས་མཁའ་དབྱིངས་གང་བ་ཡི། །བཟང་སྤོས་དུད་སྤྲིན་ཟེར་མ་ལས། །མཁོ་དགུའི་ལོངས་སྤྱོད་འདོད་ཡོན་ཚོགས། །དཔག་མེད་ཅིར་ཡང་སྤྲོ་བ་དང་། །ཕྱེ་མར་རིན་ཆེན་སྨན་སྣ་དང་། །དར་ཟབ་ཛ་གད་ཕུད་བཟང་སྐྱེམས། །འབུལ་བཞེས་ཐུགས་དམ་བསྐང་གྱུར་ཅིག །སྔོན་གྱི་དམ་ཚིག་གཡར་དམ་གཉེན། །རྗེས་དགོངས་རྒྱུ་སྦྱོར་ཡོན་བདག་ལ། འགལ་རྐྱེན་སེལ་ཞིང་མཐུན་རྐྱེན་སྒྲུབས། །མི་ལ་ན་ཚ་མ་བཏང་ཞིག །ཕྱུགས་ལ་གོད་ཡམས་མ་བཏང་བར། །ལོ་ལེགས་འབྲུ་འཕེལ་རྩྭ་རྒྱས་མཛོད། །ཁ་འཛིན་སྡོང་གྲོགས་མ་
གཡེལ་བར། །ལྷ་ཁྱོད་རྟག་པར་མཆོད་བསྐུལ་ན། །ཇི་ལྟར་བཅོལ་བའི་ཕྲིན་ལས་སྒྲུབས། །ཁྱེད་རྣམས་ཐུགས་འགལ་ནོངས་པའི་ཚོགས། །ཅི་མཆིས་བཤགས་ཤིང་བཟོད་པར་བཞེས། །མཐུ་རྩལ་རྨད་བྱུང་དཀར་ཕྱོགས་སྐྱོང་། གཙོ་དང་འཁོར་བཅས་བསྟོད་པར་བགྱི། །བཀྲ་ཤིས་བདེ་ལེགས་ཕུན་ཚོགས་ཆར། །ཡོངས་སུ་སྨིན་པའི་དཔལ་འབར་ཤོག །གཙྪ། ཞེས་སི་ཏུ་པས་སྒྲུབ་གཉེར་ཀརྨ་བདེ་ལེགས་ངོར་སྤེལ། །
དཔལ་མགོན་མ་ནིང་ནག་པོར་བསང་མཆོད།
དཔལ་མགོན་མ་ནིང་ནག་པོར་བསང་མཆོད་འབུལ་བར་སྤྲོ་ན། མཆོད་རྫས་རིགས་འདུ་བྱས་ལ། རང་ཉིད་ལྷའི་བསྐྱེད་རིམ་ལྡན་པས་འདི་སྐད་དོ། །བསང་རྫས་མཆོད་པའི་སྤྲིན་ཕུང་རྣམས། །ཟག་མེད་བདེ་ཆེན་སྐྱེད་བྱེད་གྱུར། །འབྲུ་གསུམ་གྱིས་བྱིན་བརླབས་ལ། ཧཱུྃ། ཆོས་དབྱིངས་སྐྱེ་མེད་ཀུན་ཏུ་བཟང་པོའི་ཀློང་། །མ་འགགས་ཐབས་ཀྱི་ཚུལ་སྣང་ཧེ་རུ་ཀ །སྒྱུ་འཕྲུལ་རོལ་པ་ཁྲོ་རྒྱལ་འཆོལ་བའི་རྗེ། །གཅིག་ཤུར་མ་ནིང་ནག་པོ་སྲོག་བདུད་ཆེ། །དཔལ་འབར་ཡུམ་དང་མགོན་ཆེན་སྡེ་ལྔ་པོ། །ཡང་འཁོར་སྡེ་བརྒྱད་དཔལ་མགོན་བདུན་ཅུ་ལ། །དགྱེས་རྫས་བསང་མཆོད་དམ་པ་འབུལ་བ་ནི། །ཉེར་སྤྱོད་བདུན་དང་བཀྲ་ཤིས་རྫས་རྟགས་བརྒྱད། །རྒྱལ་སྲིད་བདུན་དང་སྟོང་གསུམ་འཇིག་རྟེན་གྱི། །བཀོད་པ་ཡུལ་ལྗོངས་འདོད་ཡོན་མཆོད་པའི་སྤྲིན། །རིག་མ་བཅུ་དྲུག་སྨན་གཏོར་རཀྟའི་ཚོགས། །བརྟེན་
རྫས་བསྐང་རྫས་བསྒྲུབ་རྫས་མཆོད་པའི་རྫས། །དངོས་འབྱོར་ཡིད་སྤྲུལ་ནམ་མཁའི་ཁམས་གང་བས། །གསོལ་ལོ་མཆོད་དོ་བསང་ངོ་ཐུགས་དམ་བསྐང་། །ཐོག་མེད་དུས་ནས་མ་རིག་བདག་འཛིན་གྱི། །སྒྲིབ་གསུམ་རྣམ་རྟོག་དྲི་མས་ཉེས་བསགས་ཀུན། །རང་རིག་བརྗོད་བྲལ་ཀ་དག་ཀློང་ཡངས་ངང་། །མཐོལ་ལོ་བཤགས་སོ་དག་ཚངས་དངོས་གྲུབ་སྩོལ། །སངས་རྒྱས་བསྟན་སྐྱོང་བསྟན་འཛིན་ཞབས་བརྟན་ཅིང་། །དགེ་འདུན་སྡེ་རྒྱས་རྣལ་འབྱོར་བསམ་དོན་ཀུན། །ཐོགས་མེད་ཡིད་བཞིན་སྒྲུབས་ལ་རྐྱེན་ཕྱི་ནང་། །བར་ཆད་སོལ་ལ་ཆོས་མཐུན་བསམ་པ་སྒྲུབས། །བྱང་ཆུབ་ལམ་གྱི་ཉེར་འཚེ་ཞི་བ་དང་། །རྣམ་ཀུན་བཀྲ་ཤིས་བདེ་ལེགས་འབྱུང་གྱུར་ཅིག །ཅེས་སི་ཏུ་པདྨའི་མིང་ཅན་གྱིས། ཨ་མཆོད་བཀྲ་ཤིས་ངོར་སྤེལ་བ་དགེ། །
དཔོན་བཀྲ་དབང་ངོར།
ཨ་ཀཱ་རོས་བྱིན་བརླབས། སྭ་བྷཱས་སྦྱངས། སྟོང་ལས་བསང་ཁང་ཡི་གེ་དྷཱི། །འོད་ཟེར་འཕྲོ་འདུས་འདོད་ཡོན་ཚོགས། །དཔག་མེད་མཆོད་རྫས་ཀུན་བཟང་གི། །སྨོན་ལམ་ལས་གྲུབ་ཟག་མེད་གྱུར། །ༀ་བཛྲ་སྥ་ར་ཎ་ཁཾ། ཀྱཻ། རྩ་བརྒྱུད་བླ་མ་ཡི་དམ་ལྷ། དཔའ་བོ་མཁའ་འགྲོ་ཡེ་ཤེས་ཀྱི། །ཆོས་སྐྱོང་རྡོ་རྗེ་བེར་ལྕམ་དྲལ། །འཁོར་ལྔ་བཀྲ་ཤིས་ཚེ་རིང་མ། །དགྲ་བླ་ཡེ་བརྫུ་ཡུལ་གནས་སྐྱོང་། །རྫ་རྒྱལ་ཨར་མེ་
མུ་ནེ་དང་། །གཉུ་རྒྱལ་ཀླུ་མོ་རྫ་བཀྲ་དང་། །སྤོ་རྒྱལ་རྡོལ་པ་ལ་སོགས་པ། །རང་ལ་རིགས་ཀྱི་འགོ་བ་ཡི། །ལྷ་དང་སྲུང་མ་དགེ་བསྙེན་རྣམས། །རིག་འཛིན་པདྨའི་བཀའ་བསྒོས་བཞིན། །དམ་ལས་མ་འདའ་འདིར་གཤེགས་གསོལ། །དངོས་འབྱོར་ཡིད་སྤྲུལ་མཆོད་པའི་རྫས། །རབ་འབྱམས་ཞིང་ཀུན་ཁྱབ་པ་ཡི། །སྤྱན་གཟིགས་དཀོར་ཆས་ཚར་དུ་དངར། །ཕྱེ་མར་ཉེར་སྤྱོད་གསེར་སྐྱེམས་སོགས། །འདོད་དགུའི་ལོངས་སྤྱོད་ནམ་མཁའི་མཛོད། །དགྱེས་པ་བསྐྱེད་པའི་འདོད་ཡོན་རྣམས། །མཆོད་པ་འབུལ་བཞེས་དགྱེས་པར་རོལ། །རྣལ་འབྱོར་བཅོལ་བའི་ཕྲིན་ལས་རྣམས། །ཡིད་བཞིན་འགྲུབ་བའི་སྡོང་གྲོགས་མཛོད། །གཞི་བྱེས་ལེགས་དང་རྒྱལ་ཁ་བཏོད། །བསམ་པ་ཆོས་བཞིན་འགྲུབ་པར་མཛོད། །བཀྲ་ཤིས་དགེ་བའི་དཔལ་སྤྱོད་ཤོག །ཅེས་སི་ཏུ་པདྨའི་མིང་གིས། དཔོན་བཀྲ་དབང་ངོར་སྤེལ་བ་དགེ་ལེགས་འཕེལ། །
ཀརྨ་བསམ་འཕེལ་ངོར།
ༀ། རིན་ཆེན་སྣོད་མཆོག་སྟོང་གསུམ་མཉམ་པའི་ནང་། །འབྲུ་གསུམ་འོད་དུ་ཞུ་བ་ལས་བྱུང་བའི། །འདོད་ཡོན་ཉེར་སྤྱོད་མཁོ་དགུའི་མཆོད་རྫས་ཚོགས། །ཡིད་སྤྲུལ་ཅིར་ཡང་འཆར་བ་ཡེ་ཤེས་ཀྱི། །བདུད་རྩིར་གྱུར་པའི་བསང་གི་མཆོད་པ་འདིས། །ཡུལ་འདིར་གཉུག་གནས་རྫ་རྒོད་རོག་པོ་དང་། །རྡོ་ཡོལ་དཀར་ཟེ་བླ་མཚོ་ཕྱུག་
མོ་དང་། །དོམ་ར་བྲག་དཀར་ཨོམ་མཚོ་ཁྲ་ལེབ་ཟོར། །ཨ་རྨེ་དོམ་གཤམ་རིན་སྤུངས་རི་དམར་དང་། །རི་བཀྲ་རག་རེ་དིལ་ཡག་ལ་སོགས་པ། །གནས་དང་རྟེན་བཅས་ཡིད་ཀྱི་གཟུགས་འཆང་ཞིང་། །ཡུལ་གྱི་བདེ་སྐྱིད་སྤེལ་བའི་ནུས་སྟོབས་ཅན། །ཐམས་ཅད་བསང་ཞིང་བརྔན་ནོ་བདག་ཅག་ལ། །ཕན་པ་བསྒྲུབ་ཅིང་ཅི་བཅོལ་ལས་རྣམས་ཀུན། །རྗེ་བཙུན་བླ་མའི་བཀའ་ཡི་དམ་བཞག་བཞིན། །ཐོགས་མེད་ཡིད་བཞིན་འགྲུབ་པར་མཛད་དུ་གསོལ། །ཞེས་ཀརྨ་བསམ་འཕེལ་གྱི་འདོད་ངོར་སི་ཏུས་སྤེལ། །
ཡུལ་ལྷ་བཙན་རྒོད་འབར་བའི་བསང་མཆོད།
ཡུལ་ལྷ་བཙན་རྒོད་འབར་བའི་བསང་མཆོད་སྤྲོ་ན། མཆོད་རྫས་རྣམས་ལ་ཨ་ཀཱ་རོས་བྱིན་བརླབས་ནས། ཧྲཱིཿ བདག་ཉིད་ཆེ་མཆོག་པདྨའི་སྐུར་གསལ་བའི། །ཐུགས་ལས་འོད་འཕྲོས་ཡུལ་གནས་གཞི་ཡི་བདག །བཙན་རྒོད་རྡོ་རྗེ་དྲག་རྩལ་འཁོར་བཅས་རྣམས། །སྔོན་གྱི་དམ་བཅའ་རྗེས་དགོངས་དེང་འདིར་ནི། །ཞི་དང་བྱམས་པའི་ཚུལ་གྱིས་གཤེགས་སུ་གསོལ། །འདིར་བཤམས་ཕྱི་ནང་གསང་བ་དེ་ཁོ་ནའི། །བླ་མེད་མཆོད་པའི་སྤྲིན་ཕུང་བདུག་པའི་སྤོས། །ཕྱོགས་ཀྱི་གོ་སྐབས་འཕྲོག་པའི་ཟེར་མ་ལས། །གང་འདོད་དགྱེས་དགུའི་མཐུན་རྫས་མ་ཚང་མེད། །སྤྱན་གཟིགས་དཀོར་ཆས་འདོད་པའི་ལོངས་སྤྱོད་རྣམས། །རྒྱ་ཆེན་རྒྱུན་མི་ཆད་པར་
སྤྲོས་བྱས་ནས། །འབུལ་བཞེས་དགྱེས་རོལ་ཐུགས་དམ་གཉེན་པོ་བསྐང་། །ནོངས་བཤགས་བཟོད་གསོལ་བཅོལ་བའི་ཕྲིན་ལས་ནི། །རྣལ་འབྱོར་གང་འདོད་ཕྲིན་ལས་སྒྲུབ་པ་དང་། །ཁ་འཛིན་སྡོང་གྲོགས་མེལ་ཚེ་མ་གཡེལ་བར། །སྲུང་སྐྱོབ་མི་འབྲལ་རྟག་པར་བུ་བཞིན་སྐྱོངས། །བསྟན་འཛིན་ཞབས་བརྟན་དགེ་འདུན་སྡེ་རྒྱས་ཤིང་། །མངའ་རིས་ལོ་ལེགས་འབྲུ་འཕེལ་ནད་འཁྲུགས་ཞི། །མདོར་ན་རྫོགས་ལྡན་དཔལ་ལ་སྤྱོད་པ་ཡི། །རྣམ་ཀུན་ཕྲིན་ལས་མ་གཡེལ་བསྒྲུབ་པར་མཛོད། །གཙྪས་རང་གནས་སུ་གཤེགས། ཞེས་དད་སྦྱིན་རྒན་པོའི་ངོར་སི་ཏུས་སྤེལ་བ་དགེ་ལེགས་སུ་གྱུར་ཅིག །
ཡུལ་ལྷ་སོ་སྦྲམ་གཉན་པོའི་བསང་མཆོད།
འདིར་ཡུལ་ལྷ་སོ་སྦྲམ་གཉན་པོའི་བསང་མཆོད་སྤྲོ་ན། མཆོད་གཏོར་དཀར་བཤོས་དང་ཕྱེ་མར་ཕུད་རྒོད་བསང་ཤིང་སོགས་འདུ་བྱས་ལ་ཆུ་གཙང་གིས་བྲན། ཨ་མྲྀ་ཏས་བསངས། སྭ་བྷཱ་ཝས་སྦྱངས། རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་བསང་མཆོད་འདོད་ཡོན་གྱི་སྤྲིན་ཕུང་ཟད་མི་ཤེས་པ་ས་དང་བར་སྣང་མ་ལུས་ཡོངས་སུ་གང་བར་གྱུར། ༀ་བཛྲ་སྥ་ར་ཎ་ཁཾ། ལན་གསུམ། རང་ཉིད་སྐད་ཅིག་ཧྲཱིཿལས་པདྨ་འབྱུང་། །དཀར་གསལ་ཁྲོ་འཛུམ་ཟ་འོག་བེར་ཕྱམ་བརྗིད། །ཕྱག་གཉིས་རྡོ་རྗེ་ཐོད་པ་ཁ་ཊཱཾ་འཛིན། །སྣང་སྟོང་ཟུང་འཇུག་དམ་ཡེ་དབྱེར་མེད་གསལ། །ༀ་ཨཱ་ཧཱུྃ་བཛྲ་
གུ་རུ་པདྨ་སིདྡྷི་ཧཱུྃཿ ཞེས་བཟླས། བདག་ཉིད་པདྨ་ཐོད་ཕྲེང་ཐུགས་ཀ་ནས། །འོད་ཟེར་འཕྲོས་པས་སོ་སྦྲམ་འཁོར་བཅས་ལ། །ཕོག་པས་སྔོན་གྱི་ཁས་བླངས་དམ་བཅའ་བཞིན། །རྗེས་དགོངས་སྐད་ཅིག་གནས་འདིར་གཤེགས་པར་གྱུར། །བཛྲ་ས་མ་ཡ་ཛཿ ཏིཥྛ་ལྷན། ཀྱཻ། ལྷ་ཡི་དགེ་བསྙེན་འཁོར་བཅས་ལ། །མཐུན་པའི་མཆོད་རྫས་འབུལ་བ་ནི། །དཀར་གསུམ་ཕྱེ་མར་ཕུད་ཀྱིས་མཆོད། །ཇ་ཆང་འོ་ཞོ་བཏུང་བས་མཆོད། །དར་ཚོན་བལ་ཚོན་རྒྱན་གྱིས་མཆོད། །དྲི་ཞིམ་བསང་གི་དུད་པས་མཆོད། །གཡག་ལུག་ར་གསུམ་གཟུགས་ཀྱིས་མཆོད། །སྤྱན་གཟིགས་དཀོར་ཆ་དུ་མས་མཆོད། །རྔ་དུང་རོལ་མོ་སྙན་པས་མཆོད། །ཏིང་འཛིན་སྔགས་དང་ཕྱག་རྒྱས་འབུལ། །མཉེས་ཤིང་ཚིམས་པར་གྱུར་ནས་ཀྱང་། །ཕོག་ཐུག་འགྲམ་འཁྲུགས་ཞི་གྱུར་ཅིག །ན་མཿསརྦ་ཏ་ཐཱ་ག་ཏ་ཨ་ཝ་སོགས་གསུམ་གྱིས་བསྔོའོ། །ཀྱཻ། ལྷ་ཡི་དགེ་བསྙེན་ཡུལ་བདག་གཉན་པོ་ནི། །སྐུ་མདོག་དཀར་གསལ་དཔའ་བའི་ཆས་དང་ལྡན། །རྣམ་འགྱུར་ཆ་ལུགས་མ་ངེས་ཅིར་ཡང་སྟོན། །རང་ཕྱོགས་སྲུང་དང་གཞན་ཕྱོགས་འཇོམས་པར་བྱེད། །ཁྱོད་ནི་དམ་ཉམས་དགྲ་བོའི་གཤེད་མ་སྟེ། །སངས་རྒྱས་བསྟན་པ་བསྲུང་བའི་བྱ་ར་བ། །མཐུ་སྟོབས་ཐོགས་པ་མེད་པའི་རྫུ་འཕྲུལ་ཅན། །སྒྲུབ་མཆོག་
རྣལ་འབྱོར་མ་ཡིས་བུ་ལྟར་བརྩེ། །རྟག་ཏུ་མི་འབྲལ་སྲུང་སྐྱོབ་མཛད་པ་ཡི། །རྩལ་ལྡན་སྐྱེས་བུ་འཁོར་དང་བཅས་ལ་བསྟོད། །དེང་འདིར་ཁྱོད་ལ་བཅོལ་བའི་ཕྲིན་ལས་ནི། །རྣལ་འབྱོར་བདག་དང་རྒྱུ་སྦྱོར་ཡོན་བདག་གི། །ཚེ་བསོད་དཔལ་འབྱོར་ཡར་ངོའི་ཟླ་ལྟར་བསྐྱེད། །མི་མཐུན་བར་ཆད་ཐལ་བར་བརླག་པ་དང་། །སངས་རྒྱས་བསྟན་པ་གཉན་པོ་ཁྱོད་ཀྱིས་སྲུངས། །བསྟན་འཛིན་སྐྱེས་བུའི་སྐུ་དགྲ་ཁྱོད་ཀྱིས་སྒྲོལ། །ལས་བཞིའི་ཕྲིན་ལས་གང་བརྩམ་ཁྱོད་ཀྱིས་སྒྲུབས། །བཙའ་སད་སེར་གསུམ་ལོ་ཉེས་ཐན་པ་ཟློག །མི་ཕྱུགས་ནད་རིམས་དལ་ཁ་ཁྱོད་ཀྱིས་སྒྱུར། །སྔོན་གྱི་དམ་བཅའ་མ་གཡེལ་དྲན་མཛོད་ལ། །གང་བཅོལ་ལས་ཀུན་ཐོགས་མེད་བསྒྲུབ་པར་མཛོད། །ཅེས་རང་ཉིད་པད་འབྱུང་དུ་གསལ་བས་ཅི་བཅོལ་བའི་ཕྲིན་ལས་བསྒྲུབ་པར་བསམ་ཞིང་། གཙྪས་རང་ནས་སུ་གཤེགས། སྦྱིན་པ་རྒྱ་ཆེན་སོགས་བརྗོད། ཅེས་དད་ལྡན་ཕུན་ཚོགས་རབ་སྒྲུབ་ངོར་སྤེལ་བ་དགེ། །ཀྱཻ། སྔོན་ཚེ་པདྨ་ཐོད་ཕྲེང་གི། །སྤྱན་སྔར་ཁས་བླངས་དམ་བཅས་པའི། །ཕྱི་ནང་གསང་བའི་སྡེ་བརྒྱད་རྣམས། །དེང་འདིར་བསང་དང་གསེར་སྐྱེམས་ཀྱི། །མཆོད་པ་སྣ་ཚོགས་སོ་སོ་ཡིས། །གང་འདོད་ལོངས་སྤྱོད་རྒྱ་ཆེན་པོ། །ཕུལ་བཞེས་དགྱེས་པར་རོལ་མཛོད་ལ། །ཨོ་རྒྱན་ཆེན་པོའི་བཀའ་དམ་
ལས། །མ་འདའ་རྣལ་འབྱོར་བཅོལ་པའི་ལས། །ཕྲིན་ལས་རྣམ་བཞི་སྒྲུབ་པ་དང་། །ཁྱད་པར་ཡུལ་རིས་ས་ཕྱོགས་འདིར། །སྐྱིན་ཐང་གནོད་འཚེ་ལས་སྐྱོབ་པའི། །ལོ་ལེགས་འབྲུ་འཕེལ་སྐྱ་རྒྱལ་ཞིང་། །འགྲོ་བ་སེམས་ཅན་བདེ་སྐྱིད་ལྡན། །བཀྲ་ཤིས་སྣང་བས་ཁྱབ་པ་ཡི། །རྣམ་ཀུན་བདེ་སྐྱིད་ལྡན་པར་མཛོད། །
སྦས་ཡུལ་ཨ་ཏ་རོང་དང་རྗེས་འབྲེལ་གནས་ཆེན་སེང་ཆེན་གནམ་བྲག་ལ་བསང་མཆོད།
སྭསྟི། སྦས་ཡུལ་ཨ་ཏ་རོང་དང་རྗེས་འབྲེལ་གནས་ཆེན་སེང་ཆེན་གནམ་བྲག་ལ་བསང་མཆོད་སྤྲོ་ན། ཐོག་མར་མཆོད་རྫས་རྣམས་འདུ་བགྱི ད་ལ། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་ལས་རིན་ཆེན་སྣོད་ཡངས་པར། །ལྷ་རྫས་མཆོད་པའི་བྱེ་བྲག་རྣམས། །ཀུན་བཟང་སྨོན་ལམ་ལས་གྲུབ་པའི། །ནམ་མཁའ་མཛོད་བཞིན་རྒྱ་ཆེ་བ། །རྒྱུན་མི་ཆད་པ་རྣམས་སུ་གྱུར། །ༀ་བཛྲ་སྥ་ར་ཎ་ཁཾ། ལན་གསུམ། ཧྲཱིཿ རང་ཉིད་པདྨ་འབྱུང་གནས་སྐུར་གསལ་བའི། །ཐུགས་ལས་འོད་འཕྲོས་མཆོད་འོས་དཀོན་མཆོག་དང་། །རྩ་གསུམ་ལྷ་ཚོགས་ཡུལ་གཞི་གནས་བདག་རྣམས། །མདུན་གྱི་ནམ་མཁར་སྤྱན་དྲངས་བཞུགས་པར་གྱུར། །ཀྱཻ། གདོད་ནས་ཡོངས་གྲུབ་ས་སྤྱོད་ཀྱིི། །གནས་མཆོག་སེང་ཆེན་གནམ་བྲག་ཅེས། །པདྨ་དབང་གི་དཀྱིལ་འཁོར་ན། །ཨོ་ཌི་ཡ་ནའི་ཨཱ་ཙཪྻ། །གྲུབ་ཐོབ་བྱེ་བ་འབུམ་དང་བཅས། །རྒྱལ་བ་རྒྱ་མཚོའི་ལྷ་
ཡི་ཚོགས། །རྒྱུད་སྡེ་བཞི་འབྲེལ་ཡི་དམ་ལྷ། །ཡེ་ཤེས་ལས་དང་འཇིག་རྟེན་གྱི། ཆོས་སྐྱོང་སྲུང་མ་དམ་ཚིག་ཅན། །གནས་བདག་ཡུལ་བདག་དཀར་ཕྱོགས་སྐྱོང་། །མ་ལུས་ཇི་སྙེད་གཙོ་འཁོར་ལ། །ཕྱི་ནང་གསང་བའི་མཆོད་ཚོགས་དང་། །ཉེར་སྤྱོད་བདུན་དང་འདོད་ཡོན་ལྔ། །བཀྲ་ཤིས་རྫས་རྟགས་རྒྱལ་སྲིད་བདུན། །རིན་ཆེན་གསེར་སྐྱེམས་བདའ་དགུའི་ཕུད། །ལྷ་མིའི་ལོངས་སྤྱོད་དཀོར་ནོར་དབྱིག །མགྱོགས་འགྲོ་གཡག་ལུག་ར་གསུམ་སོགས། །སོ་སོར་དགྱེས་པ་སྐྱེད་བྱེད་པའི། །བཟང་ཞིང་སྣ་ཚོགས་དུད་སྤྲིན་ཟེར། །ཕྱོགས་ཀུན་ཁྱབ་པར་སྤྲོ་བ་ལས། །འདོད་དགུའི་དཔལ་འབྱོར་མི་ཟད་པ། །འབུལ་བཞེས་དགྱེས་པ་བསྐང་གྱུར་ཅིག །རབ་འབྱམས་རྒྱལ་བའི་དཀྱིལ་འཁོར་ལྷ། །མ་ལུས་བདག་གིས་བསྟོད་པར་བགྱི། །དེ་ལྟར་མཆོད་བསྟོད་བསྐུལ་བའི་མཐུས། །ཡེ་ཤེས་ལས་དང་འཇིག་རྟེན་སྐྱོང་། །ལྷ་ཚོགས་འཁོར་དང་ཡང་འཁོར་ལ། །སྙིགས་མའི་འགྲོ་རྣམས་འཆོལ་སྤྱོད་ཀྱི། །མ་རིག་དབང་གྱུར་ཉེས་པའི་ཚོགས། །བཤགས་སོ་བཟོད་བཞེས་དག་ཚངས་སྩོལ། །མི་གཙང་ཉམས་གྲིབ་བསང་ནས་ཀྱང་། །ལྷ་ཞལ་ཟླ་ལྟར་དཀར་གྱུར་ཅིག །རྣལ་འབྱོར་བཅོལ་པའི་ཕྲིན་ལས་ནི། །སངས་རྒྱས་བསྟན་པ་གཉན་པོ་སྲུངས། །རྡོ་རྗེ་སློབ་དཔོན་
སློབ་མར་བཅས། །དགེ་འདུན་སྡེ་སྐྱོང་སྒྲུབ་པ་པོའི། །ཚེ་བསོད་ཡེ་ཤེས་འབྱོར་བ་རྒྱས། །ནད་གདོན་བར་ཆད་ཞི་ལ་སོགས། །རྣམ་བཞི་ཕྲིན་ལས་གང་བཅོལ་བ། །ཐོགས་པ་མེད་པ་བསྒྲུབ་པར་མཛོད། །ཡུལ་ཁམས་ཀུན་ཏུ་བཀྲ་ཤིས་ཤིང་། །ཆར་ཆུ་དུས་འབབ་ལོ་ཏོག་ལེགས། །ནད་མུག་མཚོན་འཁྲུགས་མི་མཐུན་ཞི། །རྫོགས་ལྡན་བསྐལ་པ་ཇི་བཞིན་དུ། །སྐྱེ་འགྲོ་བདེ་སྐྱིད་ལྡན་པ་ཡི། །དོན་གཉིས་ལྷུན་གྱིས་གྲུབ་ནས་སུ། །བཀྲ་ཤིས་དཔལ་འབར་ཕུན་ཚོགས་ཤོག །དད་དམ་ལྡན་པ་སྔགས་འཆང་ཨ་བཀྲའི་ངོར་སྤེལ་བ་དགེ །
རྒྱམ་རྡོ་ཏི་གངས་དཀར་གཉན་པོའི་གསོལ་མཆོད་ཕྲིན་བཅོལ་ལས་བཞི་མྱུར་འགྲུབ།
རྒྱམ་རྡོ་ཏི་གངས་དཀར་གཉན་པོའི་གསོལ་མཆོད་ཕྲིན་བཅོལ་ལས་བཞི་མྱུར་འགྲུབ་བཞུགས། ན་མོ་པདྨཱ་ཀ་ར་ཡེ། འདིར་རྒྱམ་རྒྱལ་རྡོ་ཏི་བཛྲ་དྷཱ་ཛའི་གསོལ་མཆོད་ཕྲིན་བཅོལ་ཀྱི་རིམ་པ་སྤྲོ་བ་དག་གིས། དང་པོ་རང་ཉིད་ལྷའི་བསྐྱེད་རིམ། དཀོན་མཆོག་སྤྱི་འདུས་གུ་རུ་ཞི་བ་སྤྲོས་མེད་རྒྱུན་གྱི་ཉམས་ལེན་སྒང་དུ་དྲིལ་བ་ནི། སྔོན་འགྲོ་ལ། སྲུང་འཁོར། ཧྲཱི༔ བདག་ཉིད་འགྱུར་མེད་ཡེ་ནས་རྡོ་རྗེའི་སྐུ༔ ཕྱི་ནང་སྣོད་བཅུད་གཞལ་ཡས་སྐྱེ་འགྲོ་ལྷ༔ ཕྱོགས་དང་ཕྱོགས་མཚམས་འཇའ་འོད་མཚོན་ཆས་གཏམས༔ རྡོ་རྗེའི་ས་གཞི་རྭ་གུར་མེ་རིས་བསྐོར༔ ༀ་བཛྲ་རཀྵ་ཛྭ་ལ་རཾ༔ སྐྱབས་སེམས༔ ༀ་ཨཱཿཧཱུྃཿ སྐྱབས་གནས་དམ་པ་རྣམས་ལ་སྐྱབས་སུ་མཆིའོ༔ རྒྱུད་དྲུག་འཁོར་
བར་འཁྱམས་པའི་ཕ་མ་རྣམས༔ བཟོད་མེད་གདུང་བས་སངས་རྒྱས་ཐོབ་བྱའི་ཕྱིར༔ ཀུན་ཀྱང་བྱང་ཆུབ་མཆོག་ཏུ་སེམས་བསྐྱེད་དོ༔ ལན་གསུམ། དངོས་གཞི་ལ། སྐད་ཅིག་དྲན་རྫོགས་ཀྱི་བསྐྱེད་རིམ། ཧྲཱི༔ བདག་ཉིད་ཐ་མལ་རང་སེམས་བཟོ་མེད་འདི༔ དཀོན་མཆོག་སྤྱི་འདུས་པདྨ་འོད་འབར་སྐུ༔ དཀར་གསལ་མདངས་ལྔ་མཛེས་འཛུམ་རྒྱན་གྱིས་སྤྲས༔ རྡོ་རྗེ་ཐོད་པ་ཚེ་བུམ་རིན་ཆེན་བརྒྱན༔ པད་ཞུ་རྒོད་ལྡེམ་ཁ་ཊྭཱྃ་གཡོན་ནས་འཁྲིལ༔ ཕོད་ཀ་ཆོས་གོས་ཟ་འོག་བེར་ཕྱམ་ཅན༔ མཚན་དཔེས་རབ་བརྒྱན་འོད་ཀྱི་དཀྱིལ་འཁོར་མཛེས༔ མཉམ་ཉིད་བདེ་ཆེན་འཁྱིལ་པའི་སྐྱིལ་ཀྲུང་བཞུགས༔ འོད་ཀྱི་ལུས་ལ་ཡེ་ཤེས་སྙིང་པོ་ཅན༔ གསལ་སྟོང་ཐུགས་རྗེའི་འོད་ཟེར་ཀུན་ལ་སྙོམས༔ མཁའ་འགྲོ་འཇའ་སྤྲིན་རྣམ་མང་འཁྲིགས་པའི་དབུས༔ སྐུ་ཡི་སྤྲུལ་པས་ཞིང་ཁམས་ཡོངས་ལ་ཁྱབ༔ ནམ་མཁའི་ལུས་ཅན་གར་ཡང་ཐོགས་པ་མེད༔ བདེ་གཤེགས་ཀུན་གྱི་བཀོད་པ་སྐུ་ལ་རྫོགས༔ ཀུན་ཀྱང་རྒྱལ་བའི་དཀྱིལ་འཁོར་ཟང་ཐལ་ལ༔ བགེགས་དང་བར་ཆད་ཅེས་བྱའི་མིང་ཡང་མེད༔ སྣང་སྟོང་སྒྱུ་མ་ཙམ་དུ་གསལ་བར་བསྐྱེད༔ ཅེས་རང་གསལ་རིག་བའི་ལྷ་སྐུ་དང་ཡེ་ཤེས་དབྱེར་མེད་གདོད་ནས་ཡེ་བཞུགས་ཆེན་པོར་མོས་པས་བཟླས་པར་འཇུག །གལ་ཏེ་སྤྲོས་པ་ལ་དགའ་ན་རྣམ་པ་སྒྱུ་མ་ལྟ་བུར་སྤྱན་འདྲེན་བྱིན་འབེབས་དང་མཆོད་བསྟོད་ཙམ་བྱ།
དེ་མིན་མི་དགོས་སོ། །འོན་ཀྱང་མངོན་རྟོགས་གྲུབ་ནས། ཚིག་བདུན་གསོལ་འདེབས་རྒྱས་པར་སྤྱན་འདྲེན་ལྟར་རམ། ཡང་ན། ཧཱུྃ༔ ཨོ་རྒྱན་ཡུལ་གྱི་ནུབ་བྱང་མཚམས༔ པདྨ་གེ་སར་སྡོང་པོ་ལ༔ ཡ་མཚན་མཆོག་གི་དངོས་གྲུབ་བརྙེས༔ པདྨ་འབྱུང་གནས་ཞེས་སུ་གྲགས༔ འཁོར་དུ་མཁའ་འགྲོ་མང་པོས་བསྐོར༔ ཁྱེད་ཀྱི་རྗེས་སུ་བདག་སྒྲུབ་ཀྱི༔ བྱིན་གྱིས་རློབས་ཕྱིར་གཤེགས་སུ་གསོལ༔ གུ་རུ་པདྨ་སིདྡྷི་ཧཱུྃ༔ ཞེས་པ་སྟེ་གང་རུང་དམིགས་པ་དང་བཅས་ཚར་ཁ་ཤས་ཀྱིས་བསྐུལ་ཞིང་བྱིན་ཕབས༔ ཕྱག་འཚལ་བ་ནི༔ ན་མོ་སྐྱེ་འགག་འགྱུར་མེད་ཕྲིན་ལས་རྫོགས༔ རང་བྱུང་ཐུགས་རྗེས་འགྲོ་རྣམས་སྒྲོལ༔ ཡིད་བཞིན་དངོས་གྲུབ་ཆར་འབེབས་པའི༔ པདྨ་འོད་འབར་སྐུ་ལ་ཕྱག་འཚལ་ལོ༔ མཆོད་པ་ནི། ༀ་བཛྲ་ཨརྒྷཾ། པདྱཾ། པུཥྤེ། དྷུ་པེ། ཨཱ་ལོ་ཀེ། གནྡྷེ། ནཻ་ཝི་དྱེ། ཤབྡ་པྲ་ཏཱིཙྪ་ཨཱཿཧཱུྃཿ མ་ཧཱ་པཉྩ། མ་ཧཱ་རཀྟ། མ་ཧཱ་བ་ལིང་ཏ་ཁཱ་ཧིཿ བསྟོད་པ་ནི། ཧྲཱི༔ རྒྱལ་བ་ཐམས་ཅད་ཡེ་ཤེས་ཀློང་དུ་གཅིག༔ ཆོས་ཉིད་དོན་ལ་ཆ་ལུགས་མི་མངའ་ཡང༔ ཐབས་མཁས་གང་འདུལ་སོ་སོའི་སྐུར་སྟོན་པ༔ ཐུགས་རྗེའི་སྤྲུལ་བསྒྱུར་འགྱེད་ལ་ཕྱག་འཚལ་བསྟོད༔ དེ་ནས་ཛབ་ཀྱི་དམིགས་པ་གསལ་བཏབ་སྟེ། ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃཿ
ཞེས་བཟླས་པ་ཅིི་ནུས་གྲག་སྟོང་བསམ་བརྗོད་བྲལ་བའི་ངང་དུ་བྱེད་ལ། གཉིས་པ་རང་ཉིད་ལྷ་ཡི་ང་རྒྱལ་བརྟན་པོའི་ངང་ནས་གཞི་གནས་བདག་པོ་རྣམས་མདུན་དུ་བསྐྱེད་པའི་རིམ་པ་ནི། མཆོད་རྫས་རྣམས། ཨ་ཀཱ་རོས་ལན་གསུམ་གྱི་བྱིན་གྱིས་བརླབས་ནས་བྲན་ལ། ཀྱཻ། འཕགས་མཆོག་ཐུགས་རྗེ་ཆེན་པོས་བྱིན་བརླབས་གནས། །མདོ་ཁམས་གླིང་ཁྲི་བར་མའི་ནོར་འཛིན་གཞི། །སྐྱོང་ཞིང་རྒྱལ་བསྟན་སྤེལ་པའི་ལྷ་ཆེན་པོ། །རིག་འཛིན་པདྨའི་བཀའ་ཉན་དམ་ཚིག་ཅན། །ས་བརྒྱད་དབང་ཕྱུག་བྱང་ཆུབ་སེམས་ལྡན་པ། །གནས་ཆེན་དྲུག་གི་ཡུལ་གཞི་གནས་བདག་གཙོ། །དགེ་བསྙེན་རྡོ་རྗེ་རྒྱལ་མཚན་ཞེས་བྱ་བ། །ཀུནྡ་ལྟར་དཀར་ཞི་འཛུམ་བརྗིད་ཆགས་ཤིང་། །དབུ་ལ་དུང་རྨོག་སྐུ་ལ་དུང་ཁྲབ་དང་། །བེར་དཀར་གསོལ་ཞིང་ཕྱག་གཡས་རྒྱལ་མཚན་འཕྱར། །གཡོན་པས་གཏེར་བུམ་འཛིན་ཅིང་རྟ་དཀར་ཆིབས། །དར་དང་རིན་ཆེན་སྒ་སྲབ་མཛེས་པས་སྤྲས། །རང་འདྲའི་སྤྲུལ་པ་བརྒྱད་བརྒྱད་འཁོར་ཡང་འཁོར། །བྱེ་བ་འབུམ་སྡེས་བསྐོར་བའི་དབུས་སུ་གསལ། །བར་སྣང་ག་རུ་ཌ་དང་འབྲུག་སེང་འཕྱོ། །གཡག་དཀར་ཞོལ་ཅན་རྒྱ་སྟག་ཕྱི་ནས་འབྲང་། །རིན་ཆེན་འབྱུང་གནས་ས་མུ་དྲ་ཡི་ཀློང་། །འཇའ་ཟེར་འོད་དུ་འཁྱིལ་པའི་གུར་ཁང་དབུས། །མཚོ་སྨན་ནོར་བུ་འོད་ལྡན་འཛུམ་མཛེས་
དཀར། །དབུ་སྐྲ་ཐོར་ཚུགས་ནོར་བུ་རིན་ཆེན་རྒྱན། །དར་དཀར་བེར་གསོལ་ཕྱག་གཡས་མདའ་དར་གཡོབ། །གཡོན་པས་མེ་ལོང་འཛིན་ཅིང་གཡུ་འབྲུག་ཞོན། །བསྟན་པའི་མེལ་ཚེ་རྣལ་འབྱོར་བུ་ལྟར་བརྩེ། །ལྷ་སྨན་བརྒྱ་རྩ་བརྒྱད་ཀྱིས་བསྐོར་བར་གསལ། །དུག་གི་མཚོ་ཆེན་ཁོལ་ཞིང་འབར་བའིི་དབུས། །ཀླུ་བདུད་ཁ་ལ་རཀྵ་མཐུ་བོ་ཆེ། །དུད་ཁ་དབུ་དགུ་རྩ་ཞལ་ཆུ་སྲིན་གདོང་། །ཁྲོ་གཏུམ་མཆེ་གཙིག་ལྗགས་བསྐྱོད་ཞལ་ལྷག་མ། །སྦྲུལ་མགོ་བརྒྱད་ཀྱང་གདུག་པའི་དུག་རླངས་འཕྱོ། །སྐུ་སྟོད་མི་ལ་སྐུ་སྨད་སྦྲུལ་མཇུག་ཅན། །ལུས་ཀུན་མིག་གང་ཕྱག་གཡས་སྤུ་གྲི་འཕྱར། །གཡོན་པས་དགྲ་སྙིང་སྦྲུལ་ཞགས་འཛིན་བཞིན་ཏུ། །ཆུ་སྲིན་ལ་ཞོན་བུ་ཡུག་ཐོག་སེར་འབེབས། །ཀླུ་བདུད་ནག་པོ་འབུམ་སྡེས་བསྐོར་བར་གསལ། །གཞན་ཡང་ལྷ་ཆེན་མཆེད་ལྕམ་དགྱེས་སྡེ་མོ། །ཕྱི་ནང་བློན་འཁོར་དཀར་པོའི་ཕྱོགས་སྐྱོང་བ། །དཔག་མེད་ཆར་སྤྲིན་འཁྲིགས་བཞིན་གསལ་བ་ཡི། །གནས་གསུམ་འབྲུ་གསུམ་འོད་དང་རང་ཉིད་ལྷའི། །ཐུགས་ཀའི་འོད་ཟེར་འཕྲོ་འདུས་རང་གནས་ནས། །སྤྱན་དྲངས་དམ་ཚིག་ཡེ་ཤེས་དབྱེར་མེད་གྱུར། །ༀ་བྷཱུ་མི་པ་ཏི་བཛྲ་དྷྭ་ཛ་ས་པ་རི་ཝཱ་ར་བཛྲ་ས་མ་ཡ་ཛཿ ཛཿཧཱུྃ་བྃ་ཧོཿ ཞེས་སྤྱན་དྲངས་
ལ་བཞུགས་གསོལ་དང་དམ་སྦྲགས་བསྟོད་ཕྱག་ནི། རིན་ཆེན་དར་ཟབ་ལ་སོགས་ཁྲི་སྟེང་དུ། །རང་རང་འཚམས་པའི་གདན་ལ་བཞུགས་སུ་གསོལ། །སྔོན་ཚེ་ཨོ་རྒྱན་ཆེན་པོ་པདྨ་འབྱུང་། །སྣང་སྲིད་ཟིལ་གནོན་ཀརྨ་པཀྴི་དང་། །མ་ཏི་རཏྣའི་དྲུང་དུ་དམ་བཅས་ལྟར། །རྡོ་རྗེའི་ཐ་ཚིག་རྗེས་སུ་དྲན་པར་མཛོད། །བཛྲ་ས་མ་ཡ་རཀྵནྟུ། སངས་རྒྱས་བསྟན་སྲུང་རྣལ་འབྱོར་བུ་ལྟར་སྐྱོངས ། །བདེན་པ་མཐོང་བའི་དགེ་བསྙེན་ཡལ་གམ་ཅན། །ཡབ་ཡུམ་སྲས་ལྕམ་འཁོར་དང་ཡང་སྤྲུལ་བཅས། །རྫུ་འཕྲུལ་ཐོགས་མེད་རྩལ་ལྡན་རྣམས་ལ་བསྟོད། །དེ་ནས་མཆོད་པ་འབུལ་བ་ནི། །བསང་རྫས་དང་མཆོད་པ་རྣམས་སླར་ཡང་བྲན་ལ། ༀ་ཨཱཿཧཱུྃ་ཧ་ཧོཿཧྲཱིཿ ལན་གསུམ། ཀྱཻ། བསང་ཁང་རིན་ཆེན་དཀར་ཟླུ མ་ནང་། །ཙནྡན་དཀར་དམར་ཨ་ག་རུ། །གཡུ་ཤུག་བལ་བུ་ལ་སོགས་པའི། །བཟང་ཤིང་སྣ་ཚོགས་དུད་སྤྲིན་འཁྲིགས། །དེ་ལས་བཀྲ་ཤིས་རྫས་རྟགས་བརྒྱད། །རྒྱལ་པོ་ལ་འོས་རིན་ཆེན་བདུན། །ལྷ་ཀླུ་མི་ཡི་ལོངས་སྤྱོད་ཀྱི། །འདོད་དགུ་སྣ་ཚོགས་ཆར་བཞིན་འབེབས། །གཞན་ཡང་མཆོད་པའི་བྱེ་བྲག་ནི། །དག་གཙང་ཡ ན་ལག་བརྒྱད་ལྡན་ཆབ། །ཆུ་དང་ཐང་སྐྱེས་མེ་ཏོག་ཚལ། །སྨན་མཆོག་ཇི་སྙེད་སྤོས་ངད་ལྡིར། །སྣང་ཞིང་གསལ་བྱེད་འོད་དུ་འབར། །དྲི་བཟང་
བྱུག་པའི་ལྡེ་གུ་དང་། །ལྷ་ཡི་ཞལ་ཟས་རོ་བརྒྱ་ལྡན། །དབྱངས་སྙན་རོལ་མོའི་བྱེ་བྲག་ལྡིར། །འདོད་ཡོན་མཆོད་རྫས་རྣམ་པ་ལྔ། །ཕྱེ་མར་ཛ་གད་རིན་ཆེན་སྐྱེམས། །སྣ་ཚོགས་ཕུད་སྣ་མང་པོ་དང་། །སྐོང་རྟེན་སྒྲུབ་ཅིང་མཆོད་པའི་རྫས། །མ་ཚང་མེད་པ་ཚར་དུ་དངར། །གོ་ཆ་མཚོན་ཆ་དར་ཟབ་གོས། །སྤྱན་གཟིགས་དཀོར་ཆས་དཔག་ཏུ་མེད། །གཙོ་འཁོར་དགྱེས་པ་སྐྱེད་བྱེད་པ། །ནམ་མཁའ་མཛོད་ཀྱི་རང་བཞིན་ཅན། །མཆོད་དོ་འབུལ་ལོ་དགྱེས་པར་རོལ། །ༀ་བཛྲ་ཨརྒྷཾ། པུཥྤེ། དྷཱུཔེ། ཨཱ་ལོ་ཀེ། གནྡྷེ། ནཻ་ཝིདྱ། ཤབྡ་ཨཱཿཧཱུྃ། རཱུ་པ། ཤབྡ། གནྡྷེ། རཱ་ས། སྤཪྴེ་པྲ་ཏིཙྪ་སྭཱ་ཧཱ། དེ་ནས་བསྟོད་པ། ཀྱེ་ཧོཿ ཛམ་གླིང་བྱང་ཕྱོགས་ཆར་བརྟེན་པའི། །གངས་རི་ཤེལ་དཀར་སྤུངས་འདྲ་སོགས། །གནས་མཆོག་དམ་པར་མངའ་དབང་བསྒྱུར། །སྲིད་པའི་ལྷ་ཆེན་དཔལ་འབར་བ། །འཇིག་རྟེན་སྐྱོང་བ་ཡོངས་ཀྱི་རྗེ། །དཀར་པོ་ལྷ་ཡི་སྡེ་དཔོན་མཆོག །ནག་པོ་བདུད་ཀྱི་ཁ་གནོན་ཏེ། །དགེ་བསྙེན་ཆེན་པོ་ཁྱོད་ལ་བསྟོད། །བདུད་རྩི་ལྟ་བུའི་རྒྱ་མཚོ་ལ། །གནས་བཅས་མ་ཡིས་བུ་བཞིན་སྐྱོང་། །བཞིན་མཛེས་མཚར་སྡུག་ལང་ཚོ་ཅན། །ནོར་བུ་འོད་ལྡན་མ་ལ་བསྟོད། །འཇིགས་རུང་དུག་མཚོ་
ཁོལ་དབུས་སུ། །མ་རུངས་དགྲ་བགེགས་ཡོངས་ཀྱི་གཤེད། །ཀླུ་བདུད་གདོལ་པ་ལག་རིང་ཞེས། །ཀླུ་རྒྱལ་དྲག་པོའི་རྩལ་ལྡན་བསྟོད། །གཞན་ཡང་མཆེད་བརྒྱད་ལྕམ་དྲལ་དང་། །བཙུན་མོ་བློན་འབངས་སྤྲུལ་ཡང་སྤྲུལ། །བསམ་མི་ཁྱབ་པའི་འཁོར་ཚོགས་ལ། །དང་བའི་ཡིད་ཀྱིས་བསྟོད་པར་བགྱི། །ཞེས་བསྟོད་ལ། བསྙེན་པ་ནི། རང་ལྷར་གསལ་བའི་ཐུགས་ཀའི་ཧཱུྃ་འོད་ཀྱིས་ཡུལ་ལྷའི་སྙིང་གའི་ས་བོན་མཐར་སྔགས་ཕྲེང་ལ་ཐིམ་པས་ལས་བཞིའི་ཕྲིན་ལས་འགྲུབ་པར་མོས་ལ། ༀ་ཨཱཿབཛྲ་དྷཱ་ཛ་ཧཱུྃ། བཟླས་མཐར། ༀ་ཨཱཿབཛྲ་དྷཱ་ཛ་མ་མ་རཀྵ་ཀུ་རུ་ཡེ་སྭཱ་ཧཱ། ཨ་ཡུཿཔུཎྱེ་སིདྡྷི་ཧཱུྃ། ཞེས་ཀྱང་བཟླས་ལ། འདི་སྐབས་གཏོར་འབུལ་གཏེར་གཞུང་བཞིན། ཀྱཻ། དད་པ་དང་ནི་སོགས་གཙོ་འཁོར་གསུམ་གྱི་གཏོར་འབུལ་ཕྲིན་བཅོལ་རྣམས་བཏོན་ལ། མངའ་གསོལ་དང་བསྐང་བ་ནི། ཧྲཱིཿ ཀུན་བཟང་དཔལ་ཆེན་པདྨ་ཐོད་ཕྲེང་གི། །བཀའ་ཉན་གསུང་སྡོད་ལྷ་ཡི་ལྷ་མཆོག་ཁྱོད། །སངས་རྒྱས་བསྟན་པ་བསྲུང་ཕྱིར་མངའ་གསོལ་ལོ། །ཕྱི་ནང་གསང་གསུམ་མཆོད་པས་ཐུགས་དམ་བསྐང་། །དུས་གསུམ་རྒྱལ་ཀུན་ཕྲིན་ལས་གསང་མཛོད་འཛིན། །དཔལ་ལྡན་ཀརྨ་པ་ཡི་སྒྲུབ་བརྒྱུད་ཀྱི། །རིང་ལུགས་ཕྱོགས་མཐར་སྤེལ་ཕྱིར་མངའ་གསོལ་ལོ། །སྐོང་རྟེན་སྒྲུབ་རྫས་ཚོགས་ཀྱིས་ཐུགས་དམ་བསྐང་། །ངེས་དོན་སྙིང་པོའི་ཟབ་གསང་གཞུང་འཛིན་ཅིང་། །ཆོས་
སྤྱོད་བཅུ་དང་འཁོར་ལོ་གཉིས་ཀྱི་བདག །བསྟན་འཛིན་དགེ་འདུན་སྡེ་སྐྱོང་མངའ་གསོལ་ལོ། །སྤྱན་གཟིགས་དཀོར་ཆས་སྣ་ཚོགས་ཐུགས་དམ་བསྐང་། །དགེ་བཅུ་དང་ལེན་གཏན་གྱི་འདུན་མ་སྒྲུབ། །དཀོན་མཆོག་སྲི་ཞུ་ལྷག་བློས་ཁུར་འདེགས་པའི། །རྒྱུ་སྦྱོར་དོན་གཉིས་འགྲུབ་ཕྱིར་མངའ་གསོལ་ལོ། །མཉེས་རྫས་མཆོད་སྤྲིན་རྒྱ་མཚོས་ཐུགས་དམ་བསྐང་། །དེ་ལྟར་མངའ་གསོལ་ཐུགས་དམ་བསྐང་བའི་མཐུས། །བདག་རྒྱུད་ཉེས་གསུམ་དྲི་མས་བསླད་པ་ཡིས། །ནོངས་པར་གྱུར་ཀུན་མཐོལ་བཤགས་བཟོད་པར་བཞེས། །བྱང་དག་ཚངས་པའི་དངོས་གྲུབ་སྩལ་དུ་གསོལ། །ཡིག་བརྒྱ་བརྗོད། ཕྱེ་མར་དང་སྐྱེམས་ཕུད་ནམ་མཁར་མཆོད། དེ་ནས་ཕྲིན་ལས་བཅོལ་བ་ནི། ཧཱུྃ། ཆེ་མཆོག་ཧེ་རུ་ཀ་དཔལ་ཐོད་ཕྲེང་རྩལ། །སྲིད་གསུམ་ཟིལ་གནོན་དབང་དྲག་འབར་བ་ཡི། །སྤྱན་སྔར་སྔོན་ཚེ་དམ་བཅའ་མ་གཡེལ་བར། །ཟོ་དོར་གཉན་པོ་སྲས་འཁོར་དགོངས་སུ་གསོལ། །བསྐལ་བཟང་རྣམ་འདྲེན་བཅོམ་ལྡན་ཤཱཀྱ་སེང་། །མཚོ་སྐྱེས་པདྨའི་རིང་ལུགས་མདོ་སྔགས་བསྟན། །ཕྱོགས་དང་ཐ་གྲུར་ཁྱབ་ཅིང་ཡུན་དུ་གནས། །བསྟན་འཛིན་ཞབས་བརྟན་དགེ་འདུན་སྡེ་རྒྱས་མཛོད། །རིག་འཛིན་སྒྲུབ་པའི་རྣལ་འབྱོར་དམ་ལྡན་གྱི། །ཚེ་བསོད་
དཔལ་འབྱོར་ཡེ་ཤེས་སྣང་བ་རྒྱས། །གང་བཅོལ་འདོད་དོན་ཕྲིན་ལས་རྣམ་པ་བཞི། །ཆོས་བཞིན་བསམ་པ་འགྲུབ་པའི་སྡོང་གྲོགས་མཛོད། །དད་གསུམ་ལྷག་པའི་བསམ་སྦྱོར་མ་སྨད་པའི། །བློ་ལྡན་ཡོན་གྱི་བདག་པོའི་འགལ་རྐྱེན་སོལ། །མཐུན་རྐྱེན་ཡིད་བཞིན་ལྷུན་གྱིས་གྲུབ་ནས་སུ། །བྱང་ཆུབ་ལམ་གྱི་བར་ཆད་ཞི་བར་མཛོད། །རྒྱལ་ཁམས་བདེ་ཞིང་ནད་མུག་མཚོན་འཁྲུགས་ཞི། །ལོ་ལེགས་འབྲུ་འཕེལ་རྟ་ཕྱུགས་རྐང་བཞི་བདེ། །དགྲ་རྐུན་ཇག་སོགས་མི་མཐུན་གནོད་པ་བྲལ། །གནས་སྐབས་མཐར་ཐུག་དགའ་བདེའི་དཔལ་སྤྱོད་མཛོད། །བསྟན་ལ་སྡང་བའི་དགྲ་བགེགས་མི་མི་མིན། །བསམ་སྦྱོར་ལོག་པར་འདྲེན་པའི་དུཥྚན་རྣམས། །ལྷག་མ་རྗེས་ཤུལ་མིང་ཙམ་མེད་པ་རུ། །ཐལ་བའི་རྡུལ་བཞིན་བརླག་པར་མཛད་དུ་གསོལ། །དམ་རྫས་བརྒྱན་པའི་མཆོད་གཏོར་འདི་བཞེས་ལ། །རྣལ་འབྱོར་བཅོལ་པའི་ཕྲིན་ལས་འགྲུབ་པར་མཛོད། །ཅེས་བསྐུལ། གཏོར་འབུལ། དེ་ནས་རྗེས་ཀྱི་རིམ་པ་ནི། དེ་ལྟར་བསང་གསོལ་མཆོད་ཅིང་བསྟོད་པའི་མཐུས། །ཡུལ་བདག་མཆོག་དམན་བར་མའི་མགྲོན་རྣམས་ལ། །སྙིགས་དུས་སྐྱེ་བོ་ཉོན་མོངས་དབང་གྱུར་པས། །ཆོས་མིན་ལོག་པར་སྤྱོད་པའི་མི་གཙང་གྲིབ། །དམ་གྲིབ་དམེ་གྲིབ་ཡུག་གྲིབ་ལ་སོགས་
དང་། །སྡིག་པའི་ས་བོན་ཉེས་མེད་རི་དྭགས་བཤོར། །ཐབ་མཁོན་གཞོབ་ཀྱིས་མནོལ་ཞིང་བྱིང་རྨུགས་འཐིབ། །གྲིབ་རིགས་ཐམས་ཅད་བྱང་དག་སངས་གྱུར་ཅིག། ས་གཡོས་ཆུ་འབྲུབ་ཞུགས་འབར་སྐྱི་བསེར་འཚུབས། །འབྱུང་བཞིའི་གནོད་པ་རང་སར་ཞི་བར་མཛོད། །གཞི་བྱེས་ཀུན་ཏུ་འགོ་བའི་དགྲ་བླ་དང་། །དཔུང་གྲོགས་རྒྱབ་བརྟེན་མེལ་ཚེ་མ་གཡེལ་ཀྱེ། །བསང་གིས་མི་སངས་ཁྲུས་ཀྱིས་མི་དག་མེད། །ལྷ་ཞལ་ཟླ་ལྟར་དཀར་ཞིང་གསལ་གྱུར་ཅིག། སྟོང་ཉིད་ཟབ་མོའི་དོན་རྟོགས་བྱང་སེམས་ཀྱིས། །རྒྱུད་སྨིན་གྲོལ་ནས་བདུད་བཞིའི་གཡུལ་ལས་རྒྱལ། །བསམ་དོན་ཡིད་བཞིན་འགྲུབ་པའི་བཀྲ་ཤིས་གང་། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཅེས་ཤིས་པའི་མེ་ཏོག་གི་ཆར་བསྙིལ་བར་བྱའོ། །སླར་ཡང་། སངས་རྒྱས་བསྟན་སྲུང་དཀོན་མཆོག་དབུ་འཕང་བསྟོད། །དགེ་འདུན་སྡེ་སྐྱོངས་རྣལ་འབྱོར་ཚེ་དཔལ་སྤེལ། །སྙན་པའི་དར་ཕྱོར་གྲགས་པའི་དུང་བུས་ལ། །འཁོར་དང་ལོངས་སྤྱོད་རྒྱས་པ་ཉིད་དུ་མཛོད། །རྒས་མེད་ལང་ཚོ་ལྡན་པའི་ལུས་སྟོགས་རྒྱས། །མིག་ལ་ཡ་མཚན་ལྟད་མོའི་དགའ་བ་དང་། །རྣ་བར་རྟག་ཏུ་སྙན་པའི་གཏམ་ཐོས་ཤིང་། །དྲི་ཞིམ་ངད་པ་སྣ་དང་མི་འབྲལ་བར། །ཟས་སྐོམ་འབྱོར་པས་རོ་
འཛིན་ཚིམ་བྱེད་ཅིང་། །ལུས་ལ་རེག་བྱ་བདེ་བ་ཁོ་ནས་འཚོ། །ཡིད་ལ་རྣམ་པར་བཀྲ་བའི་ཤེས་རབ་དང་། །ཟག་མེད་བདེ་བས་ནམ་ཡང་ངོམ་པར་མཛོད། །ཁྱོད་གསོལ་ཁྱོད་བརྟེན་ཁྱོད་མཆོད་ཁྱོད་རྦད་ན། །མཐུ་རྩལ་མ་ཆུང་བརྩེ་གདུང་ཆེ་བར་མཛོད། །གཞི་ལ་བཀྲ་ཤིས་ཕུན་ཚོགས་ལོངས་སྤྱོད་ལྡན། །བྱེས་སུ་ལམ་འཕྲང་ཆུ་ལ་སྒྲོལ་འདོན་མཛོད། །འཇིགས་སར་དགྲ་ཇག་ཆོམ་རྐུན་འཚེ་བ་སྐྱོབས། །མདོར་ན་བསམ་དོན་ཡིད་བཞིན་བགྲུབ་པར་མཛོད། །བདག་དང་མཐའ་ཡས་སེམས་ཅན་ཐམས་ཅད་ཀྱིས། །བླ་མེད་རྫོགས་པའི་བྱང་ཆུབ་བསྒྲུབ་པ་ལ། །འགལ་རྐྱེན་བར་ཆད་མ་ལུས་ཞི་བ་དང་། །མཐུན་རྐྱེན་བསམ་དོན་ལྷུན་གྱིས་གྲུབ་པར་མཛོད། །ཅེས་དང་། སྲིད་ཞིའི་དཔལ་འབྱོར་མ་ལུས་འབྱུང་བའི་གཞི། །ཐུབ་པའི་བསྟན་པ་ཡུན་རིང་གནས་པ་དང་། །དེ་འཛིན་བྱེད་པའི་སྐྱེས་བུ་དམ་པ་རྣམས། །དཔལ་འབྱོར་གྱིས་བརྒྱན་ཡུན་རིང་ཞབས་བརྟན་ཤོག །བདག་ཅག་ཡོན་མཆོད་འཁོར་དང་བཅས་པ་ལ། །ཚེ་རིང་ནད་མེད་བདེ་སྐྱིད་ཕུན་སུམ་ཚོགས། །དོན་རྣམས་ཐམས་ཅད་ཡིད་བཞིན་འགྲུབ་པ་དང་། །འགྲོ་བའི་དོན་ལ་མཐུ་དང་ལྡན་པར་མཛོད། །ལྷ་རྣམས་ནོངས་པ་གང་མཆིས་བཟོད་པར་བཞེས། །ཡེ་ཤེས་རྟེན་བཞུགས་འཇིག་རྟེན་རང་གནས་གཤེགས། །འཇིག་རྟེན་
འཇིག་རྟེན་འདས་པའི་དགེ་ལེགས་ཚོགས། །གོང་ནས་གོང་དུ་འཕེལ་བའི་བཀྲ་ཤིས་ཤོག །སོགས་ཀྱང་བརྗོད། དེ་ནས་ལས་གཞུང་གི་བསྔོ་སྨོན་ནི། ༀ་ཨཱཿཧཱུྃ༔ སྐྱབས་མེད་མགོན་མེད་སྐྱེ་འགྲོ་འདི་དག་ཀུན༔ འཁོར་བའི་འཁྲུལ་འཁོར་ཀུན་གྱི་གཞི་རྟེན་ལ༔ རྟེན་འབྲེལ་བཅུ་གཉིས་ཤིང་རྟ་ལྟ་བུ་ཡི༔ འཕང་ལོ་འདྲ་བ་མྱུར་དུ་ཞིག་གྱུར་ཅིག༔ བླ་མེད་རྫོགས་པའི་བྱང་ཆུབ་མྱུར་ཐོབ་ཤོག༔ རྫོགས་རིམ་བསྡུས། ༀ་ཨཱཿཧཱུྃ༔ སྣོད་བཅུད་སྣད་སྲིད་ཐམས་ཅད་ཀུན༔ སྒྱུ་ལུས་གཞལ་ཡས་ཁང་དུ་བསྡུ༔ དེ་ཡང་ཡས་མར་འོད་དུ་ཞུ༔ སྔགས་ཕྲེང་གསེར་གྱི་རྡོ་རྗེར་བསྡུ༔ དེ་ཡང་འཇའ་འམ་ཆུ་བུར་ལྟར༔ དམིགས་མེད་རྒྱ་ཡན་ལྷུག་པར་བཞག༔ རང་བཞིན་དབྱིངས་རིག་མ་བུ་འདྲེས༔ གདོད་མའི་ཀུན་བཟང་མཇལ་བར་འགྱུར༔ སླར་ཝལ་གྱིས་ལྷ་སྐུར་ལྡང་ངོ་། །ཞེས་ཡང་འགྲེལ་སྙིང་པོ་གསལ་བྱེད་དུ་གསུངས་པའི་དོན་གསལ་བར། དཔལ་ལྡན་དཔའ་བོ་རྡོ་རྗེ་གཙུག་ལག་དགའ་བས་བསྒྲིགས་པ་སརྦ་མངྒ་ལྃ། སླར་སི་ཏུ་པདྨའི་མིང་ཅན་གྱིས་བསླབ་གསུམ་རྣམ་དག་བསྟན་པའི་ཕྲིན་ལས་ཀྱི་ཤིང་རྟ་པ་བླའོ་སྤྲུལ་སྐུ་ཀརྨ་ཨཱཿཡུ་ཏིཥྛ་ཝནྡྷའི་བཞེད་ལྟར་རྒྱས་པར་སྤེལ་བ་དགེ་བར་གྱུར་ཅིག་ཛ་ཡ། དགེའོ། །
བསང་མཆོད་རིན་ཆེན་ཆར་འབེབས་བཀྲ་ཤིས་རེ་སྐོང་།
བསང་མཆོད་རིན་ཆེན་ཆར་འབེབས་བཀྲ་ཤིས་རེ་སྐོང་བཞུགས་སོ། །ཀྱཻ་བླ་མ་དཀོན་མཆོག་རྣམ་གསུམ་ལ། །སྒོ་གསུམ་གུས་པས་སྐྱབས་སུ་མཆི། །འགྲོ་བ་སེམས་ཅན་ཀུན་དོན་དུ། །བདག་གིས་བསང་དང་མཆོད་པ་བྱ། །ཆོས་རྣམས་སྟོང་པའི་ངང་ཉིད་ལས། །རང་ཉིད་རྡོ་རྗེ་གྲོ་ལོད་སྐུ། །སྨུག་ནག་སྤྱན་གསུམ་ཨཾ་གཙིག་སྡོམ། །ཐོར་ཚུགས་ཕོད་ཁ་ཆོས་གོས་གསོལ། །རྡོ་རྗེ་འཕྱར་ཞིང་ཕུར་བུ་འདྲིལ། །སྟག་མོའི་སྟེང་ན་དོར་སྟབས་བསྒྲད། །ཡེ་ཤེས་དམ་ཚིག་དབྱེར་མེད་པའི། །ཐུགས་སྲོག་ཧཱུྃ་ལས་འོད་འཕྲོས་པས། །བསང་མགྲོན་ཐམས་ཅད་སྤྱན་དྲངས་གྱུར། །ཀྱཻ་སྐུ་གསུམ་དག་པའི་ཞིང་ཁམས་ནས། །འཇིག་རྟེན་འདས་དང་མ་འདས་པའི། །ལྷ་དང་སྲུང་མ་ཐམས་ཅད་ཀུན། །གནས་འདིར་སྤྱན་འདྲེན་གཤེགས་སུ་གསོལ། །གཙོ་འཁོར་འཚམས་པའི་གདན་ལ་བཞུགས། །དངོས་འབྱོར་ཡིད་སྤྲུལ་མཆོད་པ་འབུལ། །ཡན་ལག་དྲུག་ཅུའི་དབྱངས་ཀྱིས་བསྟོད། །ཀྱཻ་བསང་གི་རྒྱུ་བྱུང་གང་ནས་བྱུང་། །གྲངས་མེད་བསྐལ་པའི་སྔོན་རོལ་ནས། །བཅོམ་ལྡན་ཤཱཀྱ་ཐུབ་པ་ཉིད། །རྒྱལ་པོ་ཆོས་ཀྱི་དབང་
ཕྱུག་གྱུར། །དེ་ཡི་སངས་རྒྱས་མཆོད་པའི་ཕྱིར། །སྤོས་ཀྱི་རེང་བུ་གཅིག་བསྲེགས་ནས། །སིལ་སྙན་བཀྲོལ་ཞིང་བསང་མཆོད་མཛད། །སྤོས་སྤྲིན་ན་བུན་ཆེན་པོ་ཡིས། །ཞག་བདུན་བར་དུ་འཛམ་གླིང་ཁྱབ། །དེ་ནས་བསང་བྱུང་གང་ནས་བྱུང་། །སློབ་དཔོན་འཕགས་པ་ཀླུ་སྒྲུབ་ཀྱིས། །འཛམ་གླིང་སྤྱི་བསང་བསྡུས་པ་བརྩམས། །རྒྱ་གར་ལྷ་འདྲེ་ཐམས་ཅད་མཉེས། །རྡོ་རྗེ་གདན་གྱི་གཙུག་ལག་འགྲུབ། །དེ་ནས་སློབ་དཔོན་པདྨ་ཡིས། །ཞི་བརྔན་བསང་གསུར་ཆོ་ག་མཛད། །བོད་ཀྱི་ལྷ་འདྲེ་ཐམས་ཅད་མགུ། །དཔལ་གྱི་བསམ་ཡས་གཙུག་ལག་འགྲུབ། །དེ་ནས་རང་བྱུང་རྒྱལ་བ་ཡིས། །འཛམ་གླིང་སྤྱི་ཡི་བསང་མཆོད་མཛད། །ཁམས་ཕྱོགས་ས་བདག་ཀླུ་གཉན་དགའ། །སོག་གི་ཆུ་ལ་ལྕགས་ཟམ་ཚུགས། །སྔོན་དུས་སྲིད་པ་དེ་བཞིན་དུ། །ད་ལྟ་རྣལ་འབྱོར་བདག་ཅག་གིས། །བཟང་ཤིང་སྣ་ཚོགས་བསྲེག་པ་ལ། །འབྲུ་སྣ་ཕྱེ་མར་ཟས་ཕུད་དང་། །ཇ་ཆང་འོ་ཞོའི་ཕུད་ཀྱིས་མཆོད། །རྃ་ཡྃ་ཁྃ་གིས་མི་གཙང་སྦྱངས། །ༀ་ཨཱཿཧཱུྃ་གིས་བྱིན་གྱིས་བརླབས། །དྷུ་ལས་ལྷ་མོ་བདུག་སྤོས་མ། །མཐིང་གསལ་མཛེས་
སྡུག་རྒྱན་རྣམས་རྫོགས། །ཕྱག་གཡས་བུམ་པས་ཉམས་གྲིབ་འཁྲུད། །གཡོན་པས་སྨན་སྤོས་གཞོང་པ་བསྣམས། །སྤོས་སྤྲིན་བསང་དུད་ཁམས་གསུམ་ཁྱབ། །རབ་འབྱམས་སངས་རྒྱས་ཞིང་རྣམས་ཀུན། །སྤོས་ཀྱི་འཁྲི་ཤིང་དུ་བ་འཁྲིགས། །དུད་པའི་ཆ་ཤས་རེ་རེ་ལས། །འདོད་ཡོན་ལྔ་དང་རྒྱལ་སྲིད་བདུན། །བཀྲ་ཤིས་རྫས་རྟགས་མཆོད་པའི་ཚོགས། །ཅི་འདོད་ལོངས་སྤྱོད་ཆར་ལྟར་འབེབས། །འདི་འདྲའི་ངོ་མཚར་བསང་མཆོད་འདིས། །ཀྱཻ་ཆོས་སྐུ་ཀུན་བཟང་ཡབ་ཡུམ་བསང་། །ཡུམ་ཆེན་ཤེས་རབ་ཕར་ཕྱིན༴ དྲུག་པ་རྡོ་རྗེ་འཆང་ཆེན་༴ ལོངས་སྐུ་རིགས་ལྔ་ཡབ་ཡུམ་༴ སྤྲུལ་སྐུ་སངས་རྒྱས་སྟོང་རྩ་༴ ཐུབ་པ་གནས་བརྟན་བཅུ་དྲུག་༴ གུ་རུ་སྐུ་ལྔ་མཚན་བརྒྱད་༴ རྒྱ་གར་གྲུབ་ཆེན་བརྒྱད་ཅུ་༴ བོད་ཀྱི་རྗེ་འབངས་ཉེར་ལྔ་༴ ལོ་པཎ་ཆོས་རྒྱལ་ཐམས་ཅད་༴ རྒྱ་བོད་མཁས་གྲུབ་ཐམས་ཅད་༴ རྩ་བ་བརྒྱུད་པའི་བླ་མ་༴ མགོན་པོ་ཚེ་དཔག་མེད་པ་༴ ཡི་དམ་ཐུགས་རྗེ་ཆེན་པོ་༴ རྒྱུད་སྡེ་བཞི་ཡི་ལྷ་ཚོགས་༴ ཐེག་པ་དགུ་ཡི་ལྷ་ཚོགས་༴ དམར་ནག་མེ་ཕྲེང་ལྷ་ཚོགས་༴ དབང་ཆེན་རྟ་མགྲིན་ལྷ་ཚོགས་༴ བཀའ་དགོངས་ཕུར་གསུམ་ལྷ་ཚོགས་༴ བདེ་གསང་འཇིགས་
གསུམ་ལྷ་ཚོགས་༴ སྒྲོལ་མ་ཉི་ཤུ་རྩ་གཅིག་༴ ཕག་ཁྲོས་སེང་གསུམ་ལྷ་ཚོགས་བསང་། །ཀྱཻ་དུས་གསུམ་རྒྱལ་ཀུན་འདུས་པའི་དཔྱིད། །ཀོ་ཤའི་མཚོར་འཁྲུངས་པདྨ་འབྱུང་། །མ་རུངས་དྲེགས་པ་ཚར་གཅོད་ཕྱིར། །ཁྲག་འཐུང་དབང་དྲག་འབར་བའི་སྐུ། །ཆེ་མཆོག་རྡོ་རྗེ་གྲོ་བོ་ལོད། །ཡེ་ཤེས་ཁྲོ་བོའི་དཀྱིལ་འཁོར་བསང་། །ཛྙ་ན་ཌཱ་ཀིའི་གཙོ་མཆོག་མ། །བདེ་ཆེན་དབྱིངས་ཕྱུག་མཚོ་རྒྱལ་ཡུམ། །རྡོ་རྗེ་དྲག་མོ་སེང་གེའི་གདོང་། །མཁའ་འགྲོ་བྱེ་བ་འབུམ་སྡེ་༴ ནོར་བདག་རྨུགས་འཛིན་ཛམ་སེར་ནག །ལས་མགོན་ཏྲཀྴད་མཐུ་བོ་ཆེ། །ཡུམ་བཞི་སྲོག་བདུད་བརྒྱད་ལ་སོགས། །བདུད་ཀྱི་དམག་ཚོགས་རྒྱ་མཚོ་བསང་། །ཀྱཻ་འོག་མིན་བྱང་ཕྱོགས་དུར་ཁྲོད་ཀྱི། །གྲོང་ཁྱེར་སུམ་བརྩེགས་ཕོ་བྲང་བདག །མ་ཧཱ་ཀཱ་ལ་ཡོངས་ཀྱི་རྗེ། །དཔལ་ལྡན་མགོན་པོ་རྡོ་རྗེ་བེར། །མགོན་ཆེན་སྡེ་བཞི་འཁོར་བཅས་བསང་། །མ་ནིང་མཆེད་གསུམ་རིགས་ལྔ་༴ མགོན་ཆེན་བཞི་བཅུ་རྩ་ལྔ་༴ བྱང་ཤར་ཡོངས་འདུའི་ལྗོན་པའི་ཚལ། །ཐོད་པ་འཕྲུལ་གྱི་ལྡིང་ཁང་ནས། །རང་བྱུང་སྲིད་རྒྱལ་མུ་ཁ་ལེ། །མ་གཅིག་གཉེན་གྱི་རེ་མ་ཏི། །དཔལ་ལྡན་ལྷ་མོ་དཔོན་གཡོག ༴ ལྷ་མོ་སྟོང་དང་རྩ་བརྒྱད་༴
དཔལ་མགོན་བདུན་ཅུ་རྩ་གཉིས་༴ ཞིང་སྐྱོང་ཉི་ཤུ་རྩ་བཞི་༴ མཁའ་འགྲོ་སུམ་ཅུ་སོ་གཉིས་༴ དྲེགས་པའི་སྡེ་དཔོན་སུམ་ཅུ་༴ སྲོག་བདག་དྲེགས་ཆེན་བཅོ་བརྒྱད་༴ ནོར་ལྷ་རྣམ་སྲས་རིགས་བརྒྱད་༴ གཏེར་བདག་ཛམ་ལྷ་རིགས་ལྔ་༴ ནོར་རྒྱུན་ལྷ་མོ་མཆེད་བརྒྱད་༴ གནོད་སྦྱིན་འབྲོག་གནས་མཆེད་ལྔ་༴ རེ་མན་རྟ་ལྷ་ལྔ་བརྒྱ་༴ ཞིང་སྐྱོང་ཀུན་དགའ་གཞོན་ནུ་༴ སྲིན་མགོན་ཐོད་ཕྲེང་ཡབ་ཡུམ་༴ ཀླུ་རྒྱལ་མནྟྲ་པ་ཏི་༴ མཁར་ནག་རྡོ་རྗེ་རྒྱལ་པོ་༴ འོག་མིན་གནས་དང་མ་ལ་ཡ། །ཕ་ཝང་ལོང་བུའི་སྐུ་མཁར་ན། །ཡེ་ཤེས་ལས་དང་འཇིག་རྟེན་གྱི། །དམ་ཅན་སྐྱེས་བུ་རྡོ་རྗེ་ལེགས། །མགར་བ་ནག་པོ་དགྱེས་སྡེ་འཁོར། །གིང་ཆེན་སྡེ་བཞི་ལ་སོགས་པའི། །མཆེད་ཟླ་སུམ་བརྒྱ་དྲུག་ཅུ་བཅས། །འཁོར་དང་ཡང་འཁོར་ཐམས་ཅད་བསང་། །མ་གཅིག་དཔལ་གྱི་ལྷ་མོ་༴ ཨ་ཕྱི་ཆོས་ཀྱི་སྒྲོལ་མ༴ བཀྲ་ཤིས་ཚེ་རིང་མཆེད་ལྔ་༴ བོད་ཁམས་བརྟན་མ་བཅུ་གཉིས་༴ བྲག་བཙན་དབང་དྲག་འབར་བ་༴ གཉན་ཆེན་ཐང་ལྷ་ཡར་བཞུར་༴ རྨ་རྒྱལ་རྡོ་རྗེ་བདུད་འཇོམས་༴ སྐུ་ལྷ་ཨ་བོ་གེར་མཛོ་༴ སྦས་ཡུལ་ཨ་ཏ་རོང་གི་ཆར། །འབྲི་གཉན་རྡོ་རྗེ་བློ་གྲོས་སོགས། །དཀར་པོ་ལྷ་ཡི་
དགེ་བསྙེན་ཚོགས། །དམ་ཚིག་ཅན་གྱི་ཟོ་དོར་བསང་། །ཁྱད་པར་གནས་འདིའི་ཡུལ་གཞིའི་བདག །དབུ་ཆེ་བྲག་དཀར་ཡབ་ཡུམ་༴ །སྒོ་སྲུང་སྡེ་བཞི་ལ་སོགས་༴ །རྡོ་རྒྱལ་མུ་ུནམ་མཆེད་བརྒྱད་༴ རྨུགས་སངས་རྩེ་རྒྱལ་ཞལ་ད༴ །ཀྱཻ་བསིལ་ལྡན་བོད་ཡུལ་བསྟན་སྲུང་བ། །པདྨའི་དགེ་བསྙེན་ཐ་ཚིག་ཅན། །རྗེ་ཡི་མགུར་ལྷ་བཅུ་གསུམ་༴ །དགེ་བསྙེན་ཉི་ཤུ་རྩ་གཅིག་༴ །ཕྱོགས་བཞིའི་གཉན་ཆེན་སྡེ་བཞི་༴ །གཉན་ཕྲན་བཞི་བཅུ་རྩ་གཉིས༴ །ཕ་མཚུན་དགྲ་བླ་འཁོར་བཅས༴ །ཁྱིམ་ལྷ་ཞིང་ལྷ་ཐབ་ལྷ༴ །བདག་ལ་འགོ་བའི་ལྷ་སྲུང་བསང་། །འཁོར་འདས་གཉིས་ལ་གཏོགས་པ་ཡི། །གཉུག་མར་གནས་དང་གློ་བུར་མགྲོན། །མ་ལུས་ལུས་པ་མེད་རྣམས་བསང་། །ཞི་བ་བསང་མཆོད་འདི་ཕུལ་བས། །གྲིབ་དང་མི་གཙང་བསང་གྱུར་ཅིག །རྣལ་འབྱོར་འདོད་དོན་ཀུན་འགྲུབ་མཛོད། །ཅེས་མཆོད་གཏོར་སྐྱེམས་ཕུད་ཕྱེ་མར་འབུལ་ལ། ལམ་ལྷ་སྤྲོ་ན། ཀྱཻ་སྤྱན་ལྔ་མངོན་ཤེས་ལྔ་ལྡན་རྣམས། །ལམ་ལྷ་དཔུང་གྲོགས་མ་གཡེལ་བར། །མཐུན་རྐྱེན་སྒྲུབས་ལ་འགལ་རྐྱེན་སོལ། །བདེ་ཞིང་དགེ་བར་བསྐྱང་དུ་གསོལ། །ཞེས་དང་། ཀྱཻ་རྣལ་འབྱོར་དམ་ཚིག་མོས་བློ་རྣམ་དག་
གིས། །རབ་དཀར་དགེ་བའི་སྤྱོད་ཚུལ་མ་སྨད་པས། །མཆོད་ཅིང་སྦྱིན་པའི་དངོས་པོ་ལ་བརྟེན་ནས། །དཀོན་མཆོག་གསུམ་གྱིས་བྱིན་གྱིས་བརླབས་པ་དང་། །ཡི་དམ་ལྷ་ཡིས་དངོས་གྲུབ་མཆོག་སྩོལ་ཞིང་། །ཆོས་སྐྱོང་སྲུང་མས་བར་ཆད་སེལ་བ་དང་། །ཡུལ་ལྷ་གཉན་གྱིས་སྡོང་གྲོགས་རྒྱབ་རྟེན་མཛོད། །དགྲ་བླ་ཝེར་མས་ཕ་རོལ་རྒོལ་བ་འཇོམས། །རིག་འཛིན་སྒྲུབ་པོའི་ཕྲིན་ལས་རྣམ་བཞི་སྒྲུབས། །རྒྱལ་བསྟན་རིན་ཆེན་དར་ཞིང་རྒྱས་པ་དང་། །སྐྱེས་མཆོག་ཞབས་བརྟན་དགེ་འདུན་འདུས་པ་མཐུན། །ཡེ་ཤེས་ཡོན་ཏན་དཔལ་དང་འབྱོར་པ་འཕེལ། །ཆར་ཆུ་དུས་འབབ་ལོ་ཕྱུགས་རྟག་ཏུ་ལེགས། །མི་ནད་ཕྱུགས་ནད་ཡམས་ནད་འཁྲུགས་རྩོད་ཞི། །འཇིག་རྟེན་ཁམས་ཀུན་བདེ་ལེགས་སྣང་བས་ཁྱབ། །རྫོགས་ལྡན་གསར་པའི་ལང་ཚོ་ངོམ་པར་མཛོད། །ཅེས་ཕྲིན་ལས་བཅོལ་ནས། གཡང་ལེན་བྱ་བ་ནི། ཀྱཻ་སྲིད་ཞི་ཕུན་ཚོགས་འབྱུང་གནས་གཏེར། །རྩ་བརྒྱུད་བླ་མའི་ཐུགས་རྗེ་དང་། །ཡི་དམ་དཔའ་བོ་མཁའ་འགྲོ་ཡི། །དངོས་གྲུབ་རྟེན་འབྲེལ་དམ་པ་རྣམས། །ཁུ་ཡེ་ཕྱྭ་དང་གཡང་དུ་ལེན། །རྣལ་འབྱོར་རིག་འཛིན་མཆོག་བརྙེས་ཤོག །དམ་ཅན་ཆོས་སྐྱོང་དྲག་རྩལ་
དང་། །དཀར་ཕྱོགས་ལྷ་ཡི་གཟི་བྱིན་དང་། །དགྲ་བླ་ཝེར་མའི་སྟོབས་རྩལ་རྣམས། །ཁུ་ཡེ་ཕྱྭ་དང་གཡང་དུ་ལེན། །ནུས་མཐུའི་དཔལ་དུ་འབར་བ་དང་། །འབད་མེད་ཕྲིན་ལས་ལྡན་པར་ཤོག །གཞན་ཡང་སྲིད་པའི་ཆེ་དགུ་ཡི། །སྙན་གྲགས་དབང་ཐང་འབྱོར་བ་སྟོབས། །རྨ་གཡང་ལོངས་སྤྱོད་ཟས་ནོར་འབྲུ། །རྐང་བཞི་ཕྱུགས་ཀྱི་འཕེན་གཡང་རྣམས། །ཁུ་ཡེ་ཕྱྭ་དང་གཡང་དུ་ལེན། །མི་འཛད་ནམ་མཁའི་མཛོད་ཐོབ་ཤོག །སརྦ་སིདྡྷི་ཕ་ལ་ཧོཿ ཞེས་བརྗོད། ཡེ་ཤེས་ལྷ་ཚོགས་རྟེན་ལ་བཞུགས། །འཇིག་རྟེན་པ་རྣམས་རང་གནས་གཤེགས། །སརྦ་བྷུ་ཏ་གཙྪཿ ཞེས་དང་། རང་ཉིད་ལྷར་གསལ་མི་དམིགས་སྤྲོས་བྲལ་ངང་། །སྐྱེ་འགགས་གཉིས་མེད་ཟུང་འཇུག་རོལ་པར་ཤར། །བཀྲ་ཤིས་གུང་གཉིས་བདེ་ལེགས་གྲུ་ཆར་གྱིས། །བསམ་དོན་ཡོངས་འདུའི་ལྗོན་དབང་རྩ་བ་བརྟན། །གཙུག་ལག་ཟུང་གི་ལོ་འབྲས་གཡུར་ཟ་བའི། །རྟག་བརྟན་འགྱུར་བ་མེད་པའི་བཀྲ་ཤིས་ཤོག །ཅེས་བརྗོད། དེ་ལྟར་རྗེ་ཀརྨ་ཆགས་མེད་ཀྱིས་མཛད་པའི་རྒྱུན་བསང་བྱིན་རླབས་ཀྱི་ཚན་ཁ་རྨད་དུ་བྱུང་བ་གཞིར་བཞག་ནས་མཆོད་ཡུལ་དམིགས་བསལ་འགའ་ཞིག་དང་ཕྲིན་ལས་བཅོལ་བ་སོགས་རྗེས་ཆོག་གི་རིམ་པ་རྣམས་སི་ཏུ་པས་གྲོ་ལོད་སྒྲུབ་པ་མངྒ་ཛ་ཡི་ཆེད་དུ་བཀོད་པ་སརྦ་མངྒ་ལམ། །