རྒྱལ་དབང་མཆོག་སྤྲུལ་རིན་པོ་ཆེས་བཀའ་སྩལ་ལྟར།
༈ ན་མོ་པདྨཱ་ཀ་ར་ཡེ། ཡུལ་གནས་གཞི་བདག་དགྱེས་སྐོང་ཕྱིར། །བསང་མཆོད་སྤྲོ་ན་གཡུ་ཤུག་སོགས། །སྨན་སྤོས་ཕྱེ་མར་ཛ་གད་སྐྱེམས། །སྤྱན་གཟིགས་དཀོར་ཆས་འདུ་བྱས་ལ། །ཧྲཱིཿ ཡེ་ནས་མ་བཅོས་གཉུག་མའི་རང་མདངས་ལས། །རང་བྱུང་ལྷུན་གྲུབ་དཔལ་ཆེན་ཧེ་རུ་ཀ །གསལ་བའི་ཐུགས་ལས་འོད་འཕྲོས་མཆོད་རྫས་རྣམས། །གཉིས་འཛིན་མ་དག་རྟོག་ཚོགས་སྦྱང་བྱས་ནས། །ཀུན་བཟང་མཆོད་པའི་སྤྲིན་ཕུང་རྒྱ་ཆེར་སྤེལ། །ༀ་ཨ་
ཀཱ་རོས་བྱིན་བརླབས་ལན་གསུམ། ཀྱཻ། ཆོས་དབྱིངས་གདོད་ནས་སྐྱེ་མེད་ངང་། །བདེ་ཆེན་ཡེ་ཤེས་སྣང་ཆ་ལས། །བདེ་སྟོང་ཟུང་འཇུག་འཁོར་ལོ་སྡོམ། །དབྱེར་མེད་བཀའ་བརྒྱུད་བླ་མ་དང་། །དཔའ་བོ་རྣལ་འབྱོར་མ་རྣམས་ཀུན། །རྟག་ཏུ་འདུ་ཞིང་དགྱེས་རོལ་པའི། །ས་ལ་སྤྱོད་པའི་གནས་ཀྱི་མཆོག །འོག་མིན་ཀརྨའི་གནྡྷོ་ལ། །ཆོས་འཁོར་སྐྱོང་ཞིང་སྲུང་པ་ཡི། །དཀར་ཕྱོགས་ལྷ་ཡི་སྡེ་དཔོན་ཆེ། །དཔལ་ལྡན་ཤེས་རབ་འཁོར་བཅས་དང་། །ཡུལ་ལྗོངས་དགེ་བའི་སྟོབས་རྩལ་གྱི། །དཔུང་ཚོགས་ཡན་ལག་བཞི་ལྡན་པའི། །མངའ་དབང་འབྱོར་དང་རིགས་ཀྱི་ལྷ། །ཟོ་དོར་ཡོངས་ཀྱི་རྗེ་བོ་སྟེ། །རྡོ་རྗེ་སྨན་དཔལ་མཆོག་རབ་རྩལ། །འཆི་མེད་བདུད་རྩིའི་གཏེར་འཆང་བ། །གཞན་ཡང་སྟོབས་ལྡན་དགྲ་འདུལ་དང་། །རྡོ་རྗེ་རྩལ་ལྡན་དཔལ་རབ་དབང་། །རིན་ཆེན་གཏེར་སྤུངས་སྨན་བཙུན་རྒྱལ། །མཐུ་སྟོབས་ལྡན་པ་ལ་སོགས་དང་། །ཤེལ་དཀར་ལྡེམ་ཡག་དྲི་མེད་འོད། །དཀར་མོ་བདེ་སྐྱོང་ལྷ་དཀར་མཛེས། །རྡོ་རྗེ་དབང་མོ་ཀླུ་དཔལ་སྦྱིན། །སྲས་དང་དགྱེས་སྡེ་འཁོར་ཡང་འཁོར། །ཁྱེད་རྣམས་སྔོན་ཚེ་གསང་བའི་བདག། རིག་འཛིན་པདྨ་ཐོད་ཕྲེང་རྩལ། །དཔལ་ལྡན་ཀརྨ་པ་སོགས་ཀྱིས། །བཀའ་བསྒོས་དམ་ཚིག་རྗེས་དྲན་ལ། །རང་རང་གནས་ནས་གཤེགས་སུ་གསོལ། །འདིར་བཤམས་
གདན་ལ་བཞུགས་ནས་ཀྱང་། །བཀྲམ་པའི་མཆོད་པ་རྒྱ་ཆེན་པོ། །ཕྱི་དང་ནང་དང་གསང་བ་ཡི། །དངོས་འབྱོར་ལྷ་ཀླུ་མིའི་ལོངས་སྤྱོད། །འདོད་ཡོན་རྒྱལ་སྲིད་བཀྲ་ཤིས་ཀྱི། །རྫས་རྟགས་བརྒྱད་དང་དཀོར་ཆས་རིགས། །སྤྱན་གཟིགས་ཚར་དུ་དངར་བ་དང་། །ཕྱེ་མར་ཇ་ཕུད་ཛ་གད་སྐྱེམས། །རིན་ཆེན་ལྔ་དང་སྤོས་སྨན་སྣ། །ལྷ་ཤིང་གཡུ་ལོའི་དྲི་བསུང་ལས། །དུད་པའི་སྤྲིན་ཚོགས་དབང་གཞུ་ལྟར། །བཀྲ་ཤིས་རེ་ཁཱ་འབར་བ་དང་། །གང་འདོད་མཆོད་པའི་ཆར་ཆེན་པོ། །ནམ་མཁའ་མཛོད་བཞིན་སྤྲོ་བ་ཡིས། །ཡུལ་གཞི་གནས་བདག་སྐུ་ལྷའི་ཚོགས། །དགྱེས་བསྐང་ཟག་མེད་བདེ་བ་ཆེའི། །རང་བཞིན་ཉིད་དུ་རོལ་པར་མཛོད། །སྙིགས་མའི་སྐྱེ་བོ་མི་བསྲུན་པས། །བརླང་སྤྱོད་དབང་གིས་ཉམས་གྲིབ་མནོལ། །ཀུན་ཀྱང་ཞི་ཞིང་བདེ་ལེགས་ཤོག །རིགས་མཚུན་ལྷ་སྲུང་ཡལ་གམ་ཅན། །བདེན་པ་མཐོང་ཞིང་དམ་ཚིག་ལྡན། །རྣལ་འབྱོར་སྐྱོང་བར་ཞལ་བཞེས་པ། །ཐོགས་མེད་རྩལ་ལྡན་རྣམས་ལ་བསྟོད། །ནོངས་པར་གྱུར་ཀུན་བཟོད་པར་བཞེས། །བཅོལ་པའི་ཕྲིན་ལས་ཁྱད་པར་ནི། །ཐུབ་མཆོག་བསྟན་པ་རིན་པོ་ཆེ། །ནུབ་མེད་ཕྱོགས་བཅུར་སྤེལ་བ་དང་། །སངས་རྒྱས་གཉིས་པ་པད་འབྱུང་གི། །ངེས་གསང་བླ་མེད་རྫོགས་པ་ཆེ། །དྲི་མེད་སྙིང་པོའི་རིང་ལུགས་གང་། །དར་རྒྱས་ཡུན་
གནས་དེ་འཛིན་གྱི། །སྐྱེས་བུ་ཞབས་པད་བསྐལ་བརྒྱར་བརྟན། །འགྲོ་དོན་ཕྲིན་ལས་ལྷུན་གྲུབ་ཅིང་། །དགེ་འདུན་འདུས་པ་འཕེལ་ཞིང་རྒྱས། །ཐུགས་མཐུན་དམ་ཚིག་ལ་གནས་ཤིང་། །རྒྱལ་པོ་ཆོས་ལྡན་སྐྱེ་དགུ་རྣམས། །བྱམས་དང་སྙིང་རྗེས་རྒྱུད་བརླན་ནས། །དཀར་པོ་དགེ་ལ་སྤྱོད་པ་དང་། །ཆར་ཆུ་དུས་འབབ་ལོ་ཏོག་ལེགས། །ནད་འཁྲུགས་དབུལ་ཕོངས་བསྐལ་པ་ཞི། །རྫོགས་ལྡན་དུས་བཞིན་བདེ་སྐྱིད་སྤེལ། །མདོར་ན་གང་བཅོལ་ལས་འགྲུབ་པའི། །སྡོང་གྲོགས་མེལ་ཚེ་མ་གཡེལ་བར། །རྣམ་ཀུན་བཀྲ་ཤིས་ཕུན་སུམ་ཚོགས། །དོན་གཉིས་དཔལ་འབར་དགེ་ལེགས་ཤོག །བྷཱུ་ཏ་གཙྪ། ཞེས་རྒྱལ་དབང་མཆོག་སྤྲུལ་རིན་པོ་ཆེས་བཀའ་སྩལ་ལྟར་སི་ཏུ་པདྨ་ཉིན་བྱེད་དབང་པོས་ཕུལ་བ་དགེ། །