ལི་ཡུལ་གྱི་ཆ་བཀྲ་ཤིས་ཆོས་གླིང་སྐྱོང་བའི་ལྷ་རྣམས་ལ་འདོད་གསོལ་མཆོད་ཕྲེང་།
ༀ་ཨཱཿཧཱུྃ། ཞེས་འབྲུ་གསུམ་གྱིས་མཆོད་རྫས་བྱིན་བརླབས་ལ། ཀྱཻ། སྣང་ཞིང་སྲིད་པས་བསྡུས་པའི་ཆོས་ཐམས་ཅད། །དག་པ་ཡེ་ཤེས་བདུད་རྩིར་བྱིན་བརླབས་ནས། །དངོས་ཀུན་སྣང་བ་སྣ་ཚོགས་རྟེན་འབྲེལ་གྱི། །སྒྱུ་མ་ཙམ་དུ་རང་རིག་གསལ་བའི་ངང་། །ཚུལ་ཁྲིམས་རྣམ་དག་དྲི་བསུང་ངད་ལྡང་ཞིང་། །ལྷ་མིའི་འབྱོར་པ་མཆོད་པའི་བྱེ་བྲག་ཚོགས། །འདོད་དགུའི་ལོངས་སྤྱོད་དཔག་མེད་སྤྲིན་ལྟར་གཏིབས། །མཆོག་གསུམ་རྩ་གསུམ་ལྷ་ལ་མཆོད་པ་འབུལ། །ཡུལ་གནས་གཞི་ཡི་ལྷ་ཀླུ་སྡེ་བརྒྱད་སོགས། །མཆོད་འོས་ཀུན་ལ་མཉེས་པའི་དགྱེས་རྫས་འབུལ། །ཕྱི་སྣོད་གཞལ་ཡས་འཇིག་རྟེན་དྲི་མ་བསང་། །བདེ་ལྡན་པདྨོ་བཀོད་ཀྱི་རྣམ་པར་གྱུར། །ནང་བཅུད་སེམས་ཅན་སྒྲིབ་གཉིས་བག་ཆགས་བསང་། །གློ་བུར་འཁྲུལ་རྟོག་མ་ལུས་ཞི་གྱུར་ཅིག །བཀྲ་ཤིས་རབ་དཀར་ཆ་ཤས་ཡོངས་རྫོགས་ཤིང་། །དགེ་ལེགས་བདུད་རྩིའི་འོད་སྣང་
བསིལ་ཟེར་གྱིས། །སྣོད་བཅུད་ཀུན་ཀྱང་བདེ་སྐྱིད་ལྡན་གྱུར་ཅིག །རྒྱལ་བསྟན་རིན་ཆེན་སྲིད་མཐར་ཁྱབ་ཡུན་གནས། །དེ་འཛིན་ཞབས་བརྟན་དགེ་འདུན་ཐུགས་མཐུན་ཞིང་། །བསླབ་གསུམ་རྣམ་དག་སྐྱེ་དགུའི་བསོད་ནམས་ཞིང་། །མངོན་པར་མཐོ་ཞིང་ཆོས་ཀྱི་ཆབ་སྲིད་བརྟན། །ཕས་རྒོལ་ལས་རྒྱལ་རྟག་ཏུ་བསམ་པའི་དོན། །ནོངས་མེད་ཡིད་བཞིན་འགྲུབ་པའི་ཕྲིན་ལས་མཛོད། །རྒྱལ་ཁམས་བདེ་དགའི་དཔལ་ལ་དབང་འབྱོར་ཞིང་། །རྣམ་ཀུན་དགེ་ལེགས་རྒྱ་མཚོར་སྤྱོད་པར་ཤོག །ཅེས་སི་ཏུ་པས་བླ་མ་ནོར་བུ་ཆོས་འཕེལ་བཞེད་ངོར་ལི་ཡུལ་གྱི་ཆ་བཀྲ་ཤིས་ཆོས་གླིང་སྐྱོང་བའི་ལྷ་རྣམས་ལ་འདོད་གསོལ་མཆོད་ཕྲེང་དུ་སྤེལ་བ་དགེ། །