སྨུག་པོའི་གནས་ཀྱི་བསང་མཆོད།
སྨུག་པོའི་གནས་ཀྱི་བསང་མཆོད་བཞུགས། ༀ་སྭ་སྟི། འདིར་ལི་ཡུལ་ལྕང་ར་སྨུག་པོའི་གནས་ཞིང་སྐྱོང་བ་ཆེན་མོའི་བསང་མཆོད་སྤྲོ་ན། འདི་ཉིད་ཁོ་ན་བཏོན་པའི་ཚེ་སྐྱབས་སེམས་དང་ཡི་དམ་གྱི་བདག་བསྐྱེད་མོས་པ་ལམ་བྱེད་ཙམ་སྔོན་དུ་བཏང་ནས། དཀར་གསུམ་མངར་གསུམ་གྱིས་སྦགས་པའི་དཀར་བཤོས་དར་སྣས་བརྒྱན་པ་དང་། ཕྱེ་མར། འབྲུ་སྣ། ཇ་ཆང་། འོ་ཕུད་ལ་རིན་ཆེན་ཕྱེ་མ་བཏབ་པ་དང་། བསང་ཁང་ཟླུམ་པོ་ལ་བདུག་སྤོས་ཀྱི་རིགས་དྲི་བསུང་སྣ་ཚོགས་ཚར་དུ་དངར་བ་གཙང་ཞིང་རྒྱ་ཆེ་བ་འདུ་བྱས་པར་བཤམས་ལ། ༀ་བཛྲ་ཨ་མྲྀ་ཏས་བསངས།སྭ་བྷཱ་ཝས་སྦྱངས། སྟོང་པའི་ངང་ལས་དྷཱི་ལས་བསང་ཁང་ཡིད་དུ་འོང་བ་དང་། བྷྲཱུྃ་ལས་བྱུང་བའི་རིན་པོ་ཆེའི་སྣོད་
རྣམས་སུ་ༀ་ཨཱཿཧཱུྃ་ལས་བྱུང་བའི་མཆོད་རྫས་རྣམས་ཁ་དོག་དྲི་རོ་རེག་བྱ་ནུས་པ་ཕུན་སུམ་ཚོགས་པའི་རང་བཞིན་ཅན་ཟག་མེད་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོ་ནམ་མཁའི་མཛོད་དུ་གྱུར། །ༀ་བཛྲ་སྥ་ར་ཎ་ཁཾ། ཞེས་ལན་གསུམ་གྱིས་བྱིན་བརླབས་ནས། ཧཱུྃ་ཧྲཱིཿ བདེ་ཆེན་ཡེ་ཤེས་འཁོར་ལོ་ཆེན་པོ་རུ། །དངོས་སྣང་དྲྭ་བ་སྡོམ་པ་བཅོམ་ལྡན་ཡབ། །ལྷན་སྐྱེས་ཡུམ་བཅས་དཔའ་བོ་རྣལ་འབྱོར་མ། །དགྱེས་རོལ་ཐར་པ་ཆེན་པོའི་ཞིང་གི་མཆོག །སྐྱོང་མཛད་སྣ་ཚོགས་སྒྱུ་འཕྲུལ་ཚུལ་ཤར་བས། །གནས་དང་ཉེ་བའི་གནས་སུ་གང་འདུལ་གྱི། །སྐུར་སྟོན་མི་ལས་འདས་པའི་གཟུགས་ཅན་མ། །མཚར་སྡུག་ཡིད་འོང་ཌཱ་ཀི་དཔའ་མོའི་ཚོགས། །གཙོ་དང་འཁོར་རྣམས་འཇིག་རྟེན་སྐྱོང་བའི་གཟུགས། །གྲངས་མེད་ཀྱིས་བསྐོར་སྔོན་ཚེ་དཔལ་ཆེན་པོ། །ཧེ་རུ་ཀ་ཡི་བྲན་དུ་དམ་བཅས་བཞིན། །དམ་ཚིག་རྗེས་དགོངས་འདིར་སྤྱོན་ས་མཱ་ཛཿ ཞེས་སྤྱན་དྲངས་ལ། ཡིད་སྤྲུལ་རྣམ་མང་རིན་ཆེན་ཁང་བཟང་དབུས། །དམ་ཚིག་བརྟེན་པའི་རྫས་ལ་བག་ཕོབ་ལ། །འཇམ་མཉེན་པདྨ་སྤུངས་པའི་གདན་བཞུགས་ཏེ། །རིག་འཛིན་རྒྱལ་བ་རྣམས་ཀྱིས་དབང་བསྐུར་བའི། །རྡོ་རྗེའི་ཐ་ཚིག་གཉེན་པོ་དྲན་མཛོད་ལ། །ཁམས་ཀྱི་རགས་པའི་ཟས་ཀྱི་སྲེད་བྲལ་ཡང་། །
མོས་དང་དད་པས་ལེགས་སྦྱར་བཟའ་བཅའ་དང་། །བཏུང་བའི་ཚོགས་རྣམས་ཟག་མེད་བདེ་བ་ཆེའི། །ཡེ་ཤེས་བདུད་རྩི་ཆེན་པོར་བྱིན་བརླབས་ནས། །དང་བས་འབུལ་བཞེས་གང་གི་སྐུ་གསུང་ཐུགས། །དགྱེས་བསྐྱེད་རྣམ་མང་འདོད་རྒུ་ཀུན་བཟང་གི། །སྨོན་ལམ་ལས་བྱུང་མཆོད་སྤྲིན་ནམ་མཁའ་ཡི། །མཐའ་ཀླས་རྒྱས་པར་འགེངས་པ་ཇི་སྙེད་དང་། །ཁྱད་པར་དཀར་མངར་ཁ་ཟས་བཟང་རྒུ་ཡིས། །སྦགས་པའི་བཤོས་བུ་གཟུགས་སྒྲ་དྲི་དང་རོ། །རེག་བྱའི་སྐྱེ་མཆེད་ཉེར་སྤྱོད་རྣམ་པ་ལྔ། །བཀྲ་ཤིས་རྫས་རྟགས་སྤྱན་གཟིགས་དཀོར་ཆ་སོགས། །ཕྱེ་མར་ཇ་ཆང་གསེར་སྐྱེམས་བདུད་རྩིའི་མཚོ། །གང་གི་ལྗགས་ཀྱི་པདྨར་རྗེས་མཐུན་དུ། །འབུལ་གྱི་དགྱེས་རོལ་ལས་བཞིའི་ཕྲིན་ལས་སྒྲུབས། །དམ་ཚིག་སྡོམ་པ་མ་སྨིན་དྲི་བསུང་གིས། །ངོ་བོ་ཡུམ་ལྔའི་རྣམ་འཕྲུལ་བཟང་ཤིང་ཚོགས། །ཡེ་ཤེས་ཞུགས་ལྕེས་སྦར་བའི་དུད་སྤྲིན་གྱིས། །ལྷ་སྲུང་གྲིབ་ཀྱིས་གོས་པ་བསང་གྱུར་ཅིག །ལྷ་ཞལ་རི་བོང་འཛིན་ལས་དཀར་བ་ཡི། །ལྷ་ཡི་འཛུམ་འོད་ཟེར་ཕྲེང་སྤྲོ་བར་མཛོད། །ཕྱི་ལྟར་འཇིག་རྟེན་དབང་ཕྱུག་ཕོ་བྲང་སྟེ། །ནང་དུ་བདེ་མཆོག་འཁོར་ལོའི་དཀྱིལ་འཁོར་དངོས། །གསང་བ་རྡོ་རྗེ་བཙུན་མོའི་མཁའ་དབྱིངས་མཆོག །རྡོ་རྗེ་གནས་ཀྱི་སྲུང་མ་ཆེན་མོར་བསྟོད། །དེ་ལྟར་
མཆོད་བསྟོད་ཐུགས་དམ་བསྐུལ་བའི་མཐུས། །བྱམས་པའི་ཐུགས་ཀྱིས་བརྩེ་བར་རྗེས་དགོངས་ལ། །བསྟན་དང་འགྲོ་ལ་ཕན་བདེའི་དཔྱིད་འགྱུར་པའི། །ཕྲིན་ལས་གང་བཅོལ་ཐོགས་མེད་འགྲུབ་པར་མཛོད། །ཁྱད་པར་དཔལ་ཆེན་ཙཀྲ་སམྦ་རའི། །བསྐྱེད་རྫོགས་ཟབ་ལམ་རྡོ་རྗེའི་རྣལ་འབྱོར་ཆེའི། །བརྒྱུད་འཛིན་མཉམ་མེད་དྭགས་པོ་བཀའ་བརྒྱུད་ཀྱི། །བསྟན་པ་རིན་ཆེན་སྤེལ་པའི་ལས་མཛོད་ཅིག །སྒྲུབ་མཆོག་བསམ་དོན་ཆོས་བཞིན་ཡོངས་འགྲུབ་ཅིང་། །ཚེ་རིང་ནད་མེད་དཔལ་འབྱོར་ཡེ་ཤེས་རྒྱས། །འཇིག་རྟེན་བདེ་ཞིང་ནད་མུག་འཁྲུགས་རྩོད་ཞི། །རྫོགས་ལྡན་དུས་བཞིན་བསྐལ་པ་བཟང་སྤྱོད་པའི། །ཕྲིན་ལས་རབ་འབྱམས་ཡིད་བཞིན་འགྲུབ་པ་དང་། །དེང་འདིར་གཉིས་འཛིན་འཁྲུལ་པས་བསླད་པ་ཡི། །མཆོད་རྫས་མི་གཙང་ཏིང་འཛིན་མ་གསལ་སོགས། །ནོངས་པ་གང་མཆིས་བཟོད་པར་གསོལ་ནས་ཀྱང་། །འཇིག་རྟེན་འཇིག་རྟེན་ལས་འདས་དགེ་ལེགས་ཚོགས། །གོང་དུ་འཕེལ་ཞིང་རབ་རྒྱས་བཀྲ་ཤིས་ཤོག །ཅེས་བརྗོད། བཛྲ་མཱུཿ གཤེགས་སུ་གསོལ། ཞེས་པའང་སི་ཏུ་པདྨ་ཉིན་བྱེད་དབང་པོས། དྲུང་པ་སྤྲུལ་པའི་སྐུ་ཀརྨ་བསྟན་འཛིན་ཆོས་ཀྱི་རྒྱལ་པོའི་བཞེད་ངོར་སྤེལ་བ་དགེ །