ལྗང་ཡུལ་ཡ་ཀྲེ་མ་ཀྭ་སོགས་དགེ་བའི་སེམས་ལྡན་རྣམས་ཀྱི་ངོར།
གཞན་ཡང་བསང་མཆོད་མགྲོན་དུ་འོས་པ་ཡི། །སྔོན་ཚེ་པདྨ་འབྱུང་གནས་སྤྱན་སྔ་རུ། །ཁས་བླངས་དཀར་ཕྱོགས་སྐྱོང་བའི་མཐུ་རྩལ་ཅན། །སོ་སོ་རང་རང་གནས་ནས་འདིར་སྤྱོན་ལ། །དགྱེས་དགུའི་མཆོད་སྤྲིན་རྒྱ་མཚོ་དཔག་ཏུ་མེད། །སྤྱན་གཟིགས་དཀོར་ཆས་འདོད་ཡོན་རྣམ་པ་ལྔ། །སྣ་ཚོགས་བློ་ཡིས་བླངས་ཏེ་མཆོད་པ་འབུལ། །ཟག་མེད་བདེ་བ་ཆེན་པོར་ཚིམ་གྱུར་ཅིག །དམ་ཚིག་ལྡན་པའི་བཀའ་ཉན་བསྟན་སྐྱོང་བ། །བདུད་སྡེའི་དཔུང་གཞོམ་ལྷ་སྲུང་རྣམས་ལ་བསྟོད། །དེ་ལྟར་གསོལ་དང་མཆོད་པ་ལ་བརྟེན་ནས། །རྒྱལ་བསྟན་དྲི་མེད་ངེས་དོན་སྙིང་པོ་ཡི། །རིང་ལུགས་ཕྱོགས་བཅུར་སྤེལ་ཞིང་རྒྱས་པ་དང་། །དེ་འཛིན་སྐྱེས་བུའི་འགྲོ་དོན་ཕྲིན་ལས་སོགས། །རབ་འཕེལ་ཡུལ་རིས་ས་ཕྱོགས་འདི་ཉིད་དུ། །ཆར་ཆུ་དུས་བབས་ལོ་ཕྱུགས་རྟག་ཏུ་ལེགས། །ནད་དང་མཚོན་བསྐལ་ལ་སོགས་མི་མཐུན་ཞི། །སྐྱེ་དགུ་བདེ་ལ་གཞོལ་ཞིང་རྟག་པ་རུ། །རྫོགས་ལྡན་དུས་བཞིན་དཔལ་འབྱོར་གོང་འཕེལ་ནས། །ཆོས་མཐུན་བསམ་པ་འགྲུབ་པའི་ཕྲིན་ལས་མཛོད། །བདག་ཅག་མ་རིག་འཁྲུལ་པས་བསླད་པ་ཡི། །ཐུགས་འགལ་ཉེས་ཚོགས་མ་ལུས་མཐོལ་ཞིང་བཤགས། །དཀར་ཕྱོགས་ལྷ་དང་སྲུང་མའི་བཀྲ་ཤིས་གཡང་། །དེང་འདིར་རྟག་ཏུ་བདེ་ལེགས་ལྡན་གྱུར་ཅིག །ཅེས་པའང་ལྗང་ཡུལ་ཡ་ཀྲེ་མ་ཀྭ་སོགས་དགེ་བའི་སེམས་ལྡན་རྣམས་ཀྱི་ངོར་སི་ཏུས་སྨྲས་པ་སརྦ་མངྒ་ལམ། །