མཛོད་དགོན་གྲྭ་པ་ཞིག་གི་ངོར།

ༀ་ལས་རིན་ཆེན་སྣོད་ཡངས་པར། །བྷྲཱུཾ་ཡིག་ཡོངས་གྱུར་མཆོད་པའི་རྫས། །བསང་དང་བརྔན་པའི་ཡོ་བྱད་ཀྱི། །ལོངས་སྤྱོད་ནམ་མཁའ་མཛོད་བཞིན་སྤེལ། །ༀ་བཛྲ་སྥ་ར་ཎ་ཁཾ། ཀྱཻ། རྒྱལ་བས་བྱིན་བརླབས་གྲུབ་པའི་གནས། །གདན་ས་ཆོས་འཁོར་སྐྱོང་བ་ཡི། །མགོན་བྱེད་ལྷ་དང་སྲུང་མ་དང་། །ཡུལ་ཕྱོགས་འདིར་གནས་གཞི་ཡི་བདག །དཀར་པོའི་ཕྱོགས་རྣམས་དགྱེས་པ་ཡི། །དངོས་འབྱོར་ཡིད་སྤྲུལ་མཆོད་ཚོགས་འབུལ། །མི་གཙང་ཉམས་གྲིབ་ཐམས་ཅད་སོལ། །ལྷ་ཞལ་ཟླ་ལྟར་དཀར་བ་དང་། །སངས་རྒྱས་བསྟན་པ་རིན་པོ་ཆེ། །ཉི་ལྟར་ཀུན་ཁྱབ་རབ་གསལ་ཞིང་། །སེམས་ཅན་ཐམས་ཅད་བདེ་ལྡན་ཤོག། ཅེས་པའང་མཛོད་དགོན་གྲྭ་པ་ཞིག་གི་ངོར་སྤེལ། །