བསོད་དབང་སྤྲུལ་སྐུའི་ངོར།
རང་ཉིད་ལྷ་ཡི་ང་རྒྱལ་ལ་གནས་བཞིན་པས། ཨ་མྲྀ་ཏས་བསངས། སྭ་བྷཱ་ཝས་སྦྱངས།
བྷྲཱུཾ་ལས་བྱུང་བའི་སྣོད་ཡངས་པར། །འབྲུ་གསུམ་འོད་ཞུ་ཟག་མེད་བཅུད། །བླ་མེད་མཁའ་དབྱིངས་ཁྱོན་བཀང་བ། །རྒྱ་ཆེན་རྒྱུན་མི་ཆད་པར་གྱུར། །ཨ་ཀཱ་རོས་བྱིན་བརླབས་ལ། ཀྱཻ། སྔོན་ཚེ་གྲུབ་པའི་རིག་འཛིན་མཆོག །ཨོ་རྒྱན་པདྨཱ་ཀཱ་ར་ཡི། །ཟབ་གཏེར་རྒྱ་མཚོའི་འབྱུང་གནས་ཀྱི། །སྦས་པའི་ཡུལ་ལྗོངས་ཉམས་རེ་དགའ། །དཔའ་བོ་ཌཱ་ཀི་ཡི་དམ་དང་། །བཀའ་བརྒྱུད་བླ་མ་སྤྲིན་བཞིན་གཏིབས། །དམ་ཅན་སྲུང་མ་ཆར་ལྟར་བབས། །སྒྲུབ་གནས་དམ་པ་བྱིན་རེ་ཆེ། །པད་འབྱུང་དངོས་སྣང་གང་འདུལ་གྱི། །སྒྱུ་འཕྲུལ་རྡོ་རྗེའི་གར་སྟོན་པ། །ཟབ་དོན་བདུད་རྩིའི་ཡང་སྙིང་གང་། །མངའ་བདག་མི་འགྱུར་མཚན་ཅན་ཞབས། །ལ་སོགས་རྩ་བར་བརྒྱུད་པ་ཡི། །བཀའ་དང་དམ་གནས་དཀར་པོ་ཡི། །སྡེ་དང་ཕྱོགས་རྣམས་སྐྱོང་བྱེད་ཅིང་། །མགོན་དང་ཁ་འཛིན་སྟོངས་གྲོགས་མཁན། །ལྷ་ཡི་དགེ་བསྙེན་ཆེན་པོ་ནི། །ལྷ་བྲག་དཀར་པོ་རྡོ་རྗེ་འབར། །འཁོར་ཚོགས་སྤྲུལ་དང་ཡང་སྤྲུལ་དང་། །གནས་བརྒྱད་དགེ་བསྙེན་སྦ་ནག་གཉན། །ཁམས་རྒྱལ་རེ་ཕོ་དཀྲིགས་རྒྱལ་དང་། །སེ་ཐོ་ཁྱུང་རྫོང་ཕ་ཝོང་གྭ། །ལ་སོགས་གནས་ཡུལ་འདིར་བརྟེན་པའི། །གནས་དང་གཞི་ཡི་བདག་པོ་བསང་། །མཆོད་དོ་
ཡུལ་ལྷའི་དཔུང་ཚོགས་མཆོད། །བརྔན་ནོ་རིགས་ཀྱི་སྲུང་མ་བརྔན། །གསོལ་ལོ་མཆོད་དོ་མངའ་གསོལ་ལོ། །སངས་རྒྱས་བསྟན་སྲུང་མངའ་གསོལ་ལོ། །རྣལ་འབྱོར་དགྲ་བླ་མངའ་༴ དཀར་པོའི་ཕྱོགས་སྐྱོང་མངའ་༴ ནག་ཕྱོགས་གཡུལ་བཟློག༴ རྟེན་སྒྲུབ་མགོན་བྱེད་མངའ་གསོལ་ལོ། །བསང་མཆོད་སོ་སོར་མོས་ཐོབ་ཀྱི། །ལོངས་སྤྱོད་འདོད་ཡོན་ལྔ་ལྡན་པ། །སྤྱན་གཟིགས་དཀོར་ཆས་སྐོང་རྟེན་རྫས། །མ་ཚང་མེད་འབུལ་དགྱེས་བརྩེར་རོལ། །ཁྱོད་ལ་བཅོལ་བའི་ཕྲིན་ལས་ནི། །དཀོན་མཆོག་དབུ་འཕང་བསྟོད་པ་དང་། །བསྟན་དང་བསྟན་འཛིན་ཞབས་པད་བརྟན། །རིག་དང་གྲོལ་བའི་སྡེ་ཆེན་པོ། །ཕྱོགས་མཐར་ཁྱབ་ཡུན་གནས་པ་དང་། །མངའ་རིས་བདེ་ཞིང་སྐྱེ་དགུ་རྣམས། །ཆོས་མཐུན་བསམ་འགྲུབ་ལོག་ཕྱོགས་ཀྱི། །བདུད་དཔུང་ནམ་ཡང་ལྡང་མེད་ཤོག །མདོར་ན་ཅི་ལྟར་བཅོལ་བ་ཡི། །ལས་བཞིའི་ཕྲིན་ལས་གང་ཡིན་པ། །ཐོགས་མེད་བདེ་བླག་འགྲུབ་པ་དང་། །བདེ་ལེགས་བསམ་དོན་ལྷུན་གྲུབ་ཤོག །གཙྪས་གཤེགས། ཞེས་པའང་བསོད་དབང་སྤྲུལ་སྐུ་ནས་ལྷ་རྫས་དང་དངོས་པོ་རྟེན་འབྲེལ་རྨད་བྱུང་གིས་མཚོན་པ་དང་བཅས་བསྐུལ་ངོར་སྤེལ་བ་དགེ། །