མ་མགོན་ལྕམ་དྲལ་གཙོར་བཏོན་པའི་ཡུལ་ལྷར་བསང་བརྔན་མདོར་བསྡུས།
འདིར་མ་མགོན་ལྕམ་དྲལ་གཙོར་བཏོན་པའི་ཡུལ་ལྷར་བསང་བརྔན་མདོར་བསྡུས་སྤྲོ་ན། མཆོད་རྫས་རྣམས། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་བསང་མཆོད་རྫས། །འབྲུ་གསུམ་ངོ་བོ་འོད་དུ་ཞུ། །ཟག་མེད་ལོངས་སྤྱོད་འདོད་དགུའི་ཆར། །མཁའ་དབྱིངས་ཁྱོན་གང་བདེ་ཆེན་གྱུར། །ༀ་བཛྲ་སྥ་ར་ཎ་ཁཾ། ཧཱུྃ། རང་ཉིད་ལྷར་གསལ་ཐུགས་ཀ་ནས། །འོད་འཕྲོས་འོག་མིན་བྱང་ཕྱོགས་ཀྱི། །དུར་ཁྲོད་རབ་འཇིགས་གཞལ་ཡས་ནས། །དཔལ་ལྡན་མ་ཧཱ་ཀཱ་ལ་ཆེ། །རྡོ་རྗེ་བེར་ནག་ཟངས་གྲི་ཅན། །འདོད་ཁམས་དབང་ཕྱུག་དཔལ་ལྷ་མོ། །མ་གཅིག་རང་བྱུང་སྲིད་རྒྱལ་མོ། །བཀའ་སྡོད་བསྟན་སྲུང་དམ་ཚིག་ཅན། །འཁོར་བཅས་འདིར་བྱོན་བསང་མཆོད་བཞེས། །སྐོང་རྟེན་སྒྲུབ་དང་མཆོད་པའི་རྫས། །སྤྱན་གཟིགས་དཀོར་ཆས་ལྷ་དང་མིའི། །དཔལ་འབྱོར་ཕུན་ཚོགས་ནམ་མཁའི་མཛོད། །ཇི་བཞིན་སྤེལ་འདི་དགྱེས་བརྩེར་རོལ། །ཕྲིན་ལས་རྣམ་བཞིའི་མངའ་དབང་ཅན། །དྲེགས་བྱེད་སྲུང་མའི་ཚོགས་ལ་བསྟོད། །བདག་ཅག་
བྱང་ཆུབ་བསྒྲུབ་པ་ལ། །མཐུན་རྐྱེན་སྤེལ་ལ་འགལ་རྐྱེན་སོལ། །བཅོལ་པའི་ཕྲིན་ལས་འགྲུབ་པར་མཛོད། །གཞན་ཡང་མགྲོན་དུ་འོས་པ་ཡི། །ཡུལ་ལྷ་ཟླ་རྒྱལ་དགེ་བསྙེན་ཆེ། །གཡུང་དྲུང་ལྷ་རྩེ་འཁོར་དང་བཅས། །ཁྱད་པར་དགོན་གནས་འདི་ཉིད་དུ། །གཉུག་མར་གནས་པའི་ཡུལ་གཞིའི་བདག །མགོན་སྐྱོབ་དཔུང་གྲོགས་བྱེད་པ་རྣམས། །འབོད་པའི་གནས་འདིར་སྤྱན་འདྲེན་ན། །འདིར་གཤེགས་སོ་སོར་མོས་ཐོབ་ཀྱི། །བསང་དང་མཆོད་རྫས་སྣ་ཚོགས་པ། །འབུལ་བཞེས་དགྱེས་བསྐང་རྩ་བརྒྱུད་ཀྱི། །བླ་མའི་བཀའ་ལས་མ་འདའ་བར། །དཀར་པོའི་ཕྱོགས་སྐྱོངས་ནག་ཕྱོགས་ཐུལ། །གོད་འདྲེ་དབུལ་སྲི་ཞི་བར་མཛོད། །འགལ་རྐྱེན་སོལ་ལ་སྟོངས་གྲོགས་དང་། །རྒྱབ་བརྟེན་ཁ་འཛིན་མ་གཡེལ་བར། །ལེགས་ཁ་རྒྱལ་ཁ་ཐོབ་པ་དང་། །གང་བཅོལ་ཕྲིན་ལས་མྱུར་འགྲུབ་མཛོད། །ཡེ་ཤེས་འཇིག་རྟེན་མགྲོན་རྣམས་ཀུན། །རང་བཞིན་གནས་གཤེགས་དུས་སུ་ནི། །སླར་འབྱོན་རྣམ་ཀུན་བཀྲ་ཤིས་པའི། །ཉིན་བྱེད་འོད་སྟོང་གསལ་གྱུར་ནས། །དགེ་ལེགས་རྒྱ་མཚོ་མཐའ་རྒྱས་ཤོག །ཅེས་པའང་དྲུང་རམ་པ་བླ་མ་ཀརྨ་སྙན་གྲགས་དཔལ་བཟང་ངོར་སྤེལ་བ་ཛ་ཡནྟུ། །