རིག་འཛིན་མི་འགྱུར་རྡོ་རྗེའི་མཆོག་སྤྲུལ་གྱི་བཞེད་ངོར།
ན་མོ་པདྨཱ་ཀ་ར་ཡེ། འདིར་བསྟན་པའི་བཀའ་སྲུང་ཡུལ་ལྷ་རྣམས་ཀྱི་བསང་མཆོད་བགྱིད་པར་སྤྲོ་ན། བསང་རྫས་གཙང་ཞིང་བཟང་བ་ཚར་དུ་དངར་བ་འདུ་བར་བྱས་ལ། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་བསང་མཆོད་རྫས། །འདོད་པའི་ཡོན་ཏན་རྒྱ་ཆེ་ཞིང་། །རྒྱུན་མི་ཆད་པའི་རྣམ་པ་ཅན། །ནམ་མཁའ་མཛོད་ཀྱི་རང་བཞིན་གྱུར། །ༀ་ཨ་ཀཱ་རོ་ལན་གསུམ་བརྗོད་པས་བྱིན་གྱིས་བརླབས། དེ་ནས་མགྲོན་རྣམས་སྤྱན་དྲངས་བ་ནི། ཀྱཻ། སྔོན་ཚེ་ཨོ་རྒྱན་རྡོ་རྗེ་འཆང་། །མཚོ་སྐྱེས་པདྨ་བཛྲ་གྱི། །བཀའ་དང་དམ་ལ་གནས་པ་ཡི། །དཀར་ཕྱོགས་སྐྱོང་བ་ཡོངས་ཀྱི་རྒྱལ། །ལྷ་ཡི་དགེ་བསྙེན་གྲགས་ལྡན་པ། །གནས་ཞིང་སྲུང་བའི་ཟོ་དོར་གཙོ། །ཁྲ་ཤོད་སྦོམ་བྲག་གཉེན་པོ་དང་། །ཇོ་བོ་ལྷ་འཁོར་སེང་གནམ་བྲག །ཁྱད་པར་ཆོས་འཁོར་གདན་ས་ཡི། །བཀའ་སྲུང་ཞལ་བཞེས་གཡར་དམ་ཅན། །ཡུལ་ལྗོངས་དགེ་ཞིང་ཤིས་པ་ཡི། །སྟོབས་ཀྱི་དཔུང་པས་ལེགས་སྐྱོང་བ། །རྨུགས་འཛིན་ནོར་བདག་མདོ་རྒྱལ་གཉེན། །སྲས་ལྕམ་བཙུན་མོའི་འཁོར་ཚོགས་དང་། །ཕྱཱ་རྒྱལ་རྡོ་རྗེ་གཡུ་དྲུང་རྩལ། །མཆེད་གསུམ་རང་རིགས་སྡེ་དཔུང་དང་། །འཛི་རྒྱལ་སྒབ་གྲོ་བཀྲམ་རྒྱལ་སོགས། །འདིར་དམིགས་བསལ་ཡུལ་ལྷ་གང་རུང་འཛུད་ཀྱང་ཆོག །རྣལ་འབྱོར་སྒྲུབ་པོས་སྤྱན་འདྲེན་ན། །མ་ཐོགས་མྱུར་བར་གནས་འདིར་གཤེགས། །རང་རང་གདན་ལ་བཞུགས་སུ་གསོལ། །འདིར་བཤམས་ཕྱི་ནང་གསང་མཆོད་རྫས། །བྱང་སེམས་ཀུན་ཏུ་
བཟང་པོ་ཡི། །མཆོད་སྤྲིན་རབ་འབྱམས་དང་མཉམ་པའི། །ཟད་མེད་ཕུན་སུམ་ཚོགས་པའི་གཏེར། །ཞིང་ཁམས་རྒྱ་མཚོར་འགེངས་པ་ཡི། །སྤྱན་གཟིགས་དཀོར་ཆས་སྣ་ཚོགས་དང་། །ཛ་གད་རཏྣའི་གསེར་སྐྱེམས་ཕུད། །ཕྱེ་མར་དཀར་གསུམ་མངར་གསུམ་དང་། །དར་སྣ་སྟག་རས་གཟིག་རས་སོགས། །བཟང་ཤིང་རྣམ་མང་བདུག་སྤོས་ཀྱི། །འོད་ཟེར་དྲྭ་བའི་རེ་ཁཱ་ལས། །མཐོ་རིས་བདག་པོའི་ལོངས་སྤྱོད་ཀྱི། །བཀྲ་ཤིས་རྫས་རྟགས་རྒྱལ་སྲིད་བདུན། །ཉེ་བའི་རིན་ཆེན་འདོད་ཡོན་ལྔ། །དགེ་མཚན་རི་མོ་ཅི་ཡང་འཆར། །གནས་ཡུལ་གཞི་ཡི་བདག་རྣམས་ལ། །འབུལ་གྱི་དགྱེས་པ་བསྐང་གྱུར་ཅིག །གཉིས་འཛིན་འཁྲུལ་པས་ནོངས་པ་ཡི། །ཐུགས་འགལ་ཉེས་ཚོགས་བཤགས་པར་བགྱི། །བྱང་དག་ཚངས་པར་བསྩལ་དུ་གསོལ། །རབ་དཀར་བརྒྱུད་པའི་བཀའ་སྲུང་བ། །དྲེགས་ལྡན་མཐུ་སྟོབས་ཐོགས་པ་མེད། །མཆོག་གསུམ་དམ་པར་སྐྱབས་གསོལ་བའི། །དགེ་བསྙེན་ཆེན་པོ་སྲས་ལྕམ་དང་། །མཆེད་འཁོར་སྤྲུལ་དང་ཡང་སྤྲུལ་ཚོགས། །གཞན་ཡང་ཡུལ་རིས་ས་ཕྱོགས་འདིར། །གཉུག་མར་གནས་དང་གློ་བུར་ལྷགས། །མཆོད་འོས་མགྲོན་རྣམས་ཐམས་ཅད་ལ། །ཞི་བ་བསང་གི་མཆོད་པ་འབུལ། །
མཉེས་ཤིང་དགྱེས་པ་བསྐང་གྱུར་ཅིག །རྒྱལ་བའི་བཀའ་སྡོད་དམ་ཚིག་ཅན། །ཕས་རྒོལ་འཇོམས་པའི་མཐུ་རྩལ་ལྡན། །ཆོས་ཀྱི་སྲུང་མ་ཁྱེད་རྣམས་བསྟོད། །སྔོན་ཚེ་དབང་དྲག་ཧེ་རུ་ཀ །རིག་འཛིན་རྩ་བརྒྱུད་བླ་མ་དང་། །ཁྱད་པར་མི་འགྱུར་རྡོ་རྗེ་ཅན། །ནུས་ལྡན་དྲག་པོ་རྩལ་སོགས་ཀྱི། །སྤྱན་སྔར་ཁས་བླངས་རྗེས་དྲན་ནས། །སངས་རྒྱས་བསྟན་པ་སྐྱོང་སྤེལ་དང་། །སྒྲུབ་པའི་མཐུན་རྐྱེན་སྒྲུབ་པ་དང་། །ཕྱི་ནང་བར་ཆད་བཟློག་ཏུ་གསོལ། །ཡུལ་རིས་ས་ཕྱོགས་རྣམ་ཀུན་བདེ། །དགེ་ཞིང་དགེ་བའི་སྡོང་གྲོགས་མཛོད། །བཀྲ་ཤིས་ཆོས་ཀྱི་རྒྱལ་སྲིད་ཆེ། །རྟག་བརྟན་ནོངས་མེད་ལྷུན་གྱིས་གྲུབ། །རྣམ་ཀུན་དགེ་ལེགས་འདོད་དགུའི་ཆར། །ཡོངས་སུ་འབེབས་པའི་བཀྲ་ཤིས་ཤོག གཙྪས་རང་གནས་སུ་གཤེགས་པར་བྱའོ། །ཞེས་པའང་སི་ཏུ་པདྨའི་མིང་ཅན་གྱིས་རིག་འཛིན་མི་འགྱུར་རྡོ་རྗེའི་མཆོག་སྤྲུལ་གྱི་དགོངས་བཞེད་བསྐང་ཕྱིར་སྤེལ་བ་ཡི་གེ་པ་ནི་ཀརྨ་པུཎྱེ་དྷརྨ་ཝརྡྷ་ཞེས་པའོ། །སརྦ་ཐཱ་མངྒ་ལམ། །