ཡུལ་ལྷ་གནས་བདག་ལ་བསང་མཆོད་འབུལ་བ།
སྭ་སྟི། ཡུལ་ལྷ་གནས་བདག་ལ་བསང་མཆོད་འབུལ་བར་སྤྲོ་ན། བསང་དང་མཆོད་རྫས་གང་འབྱོར་གཙང་ཞིང་བཟང་བར་འདུ་བྱས་ལ། རང་ཉིད་ལྷར་གསལ་ཐུགས་ལས་འོད་ཟེར་འཕྲོས། །བསང་མཆོད་མི་གཙང་དྲི་མ་སྦྱངས་བྱས་ནས། །དག་པ་ཡེ་ཤེས་བདུད་རྩིའི་རང་བཞིན་ཅན། །མཁའ་དབྱིངས་ཀུན་ཁྱབ་རྒྱ་ཆེར་སྤེལ་བར་གྱུར། །ༀ་བཛྲ་སྥ་ར་ན་ཁཾ། ལན་གསུམ་དང་། ཨ་ཀ་རོ་ལན་གསུམ་གྱིས་བྱིན་བརླབས་ནས། ཧྲཱིཿ སྔོན་ཚེ་གསང་བདག་པདྨ་ཀ་ར་དང་། །སྒྲུབ་མཆོག་པཀྴིའི་སྤྱན་སྔར་དམ་མནོས་པའི། །སངས་རྒྱས་བསྟན་པ་སྐྱོང་བར་ཞལ་བཞེས་པའི། །དཀར་པོ་ལྷའི་རིགས་དགེ་བསྙེན་ཟོ་དོར་ཆེ། །ཨ་བོ་གེར་མཛོ་སྐྱིད་རི་སྨན་ཆེན་སོགས། །ཡུལ་འདིར་ལྷགས་པའི་གཉུག་གནས་གློ་བུར་མགྲོན། །དེང་འདིར་རྣལ་འབྱོར་བདག་གི་མཆོད་པའི་གནས། །འདིར་གཤེགས་དངོས་སུ་འབྱོར་དང་ཡིད་ཀྱིས་སྤྲུལ། །རྣམ་མང་སྣ་ཚོགས་འདོད་ཡོན་མི་ཟད་པ། །ཀུན་བཟང་མཆོད་སྤྲིན་སོ་སོར་མོས་ཐོབ་པའི། །དགྱེས་རྫས་དཀོར་ནོར་ལྷ་མི་ཀླུའི་ལོངས་སྤྱོད། །འབུལ་བཞེས་ཚིམ་པར་སྤྱོད་ལ་ཐུགས་དམ་
བསྐང་། །བསང་ངོ་བརྔན་ནོ་བསྟོད་དོ་མངའ་གསོལ་ལོ། །ཐུགས་འགལ་ཉེས་ཚོགས་ནོངས་བཤགས་བཟོད་པར་བཞེས། །བསྟན་པ་བསྲུང་ཞིང་རྣལ་འབྱོར་སྐྱོང་བ་ཡི། །མཐུ་སྟོབས་རྩལ་ལྡན་ཁྱེད་རྣམས་བསྟོད་པར་བགྱི། །དེ་ལྟར་མཆོད་བསྟོད་བཤགས་པ་ལ་བརྟེན་ནས། །རྒྱལ་བསྟན་དྲི་མེད་སྒྲུབ་བརྒྱུད་དར་ཞིང་རྒྱས། །དེ་འཛིན་ཞབས་བརྟན་ཕྲིན་ལས་རྣམ་བཞི་སྤེལ། །དགེ་འདུན་སྡེ་རྒྱས་འགྲོ་རྣམས་ཆོས་དང་ལྡན། །རྟག་པར་ཚེ་རིང་ནད་མེད་བསམ་དོན་འགྲུབ། །ནད་མུག་མཚོན་བསྐལ་ལ་སོགས་འཇིགས་བརྒྱད་ཞི། །ཆར་ཆུ་དུས་བབ་ལོ་ལེགས་སྐྱ་རྒྱལ་ཞིང་། །རྣམ་ཀུན་བདེ་ལེགས་ལྷུན་གྱིས་འགྲུབ་པར་མཛོད། །སརྦ་བྷཱུ་ཏ་གཙྪ། བརྗོད་ལ་རང་གནས་སུ་གཤེགས་པར་བྱའོ། །ཞེས་པའང་སི་ཏུ་པདྨའི་མིང་ཅན་གྱིས། མགུལ་ཞག་རི་ཁྲོད་སྦྱིན་བདག་རྣམས་ཀྱི་ངོར་སྤེལ་བ་དགེ་ལེགས་འཕེལ། སརྦ་མངྒ་ལཾ། །