ཡུལ་ལྷ་བཙན་རྒོད་འབར་བའི་བསང་མཆོད།
ཡུལ་ལྷ་བཙན་རྒོད་འབར་བའི་བསང་མཆོད་སྤྲོ་ན། མཆོད་རྫས་རྣམས་ལ་ཨ་ཀཱ་རོས་བྱིན་བརླབས་ནས། ཧྲཱིཿ བདག་ཉིད་ཆེ་མཆོག་པདྨའི་སྐུར་གསལ་བའི། །ཐུགས་ལས་འོད་འཕྲོས་ཡུལ་གནས་གཞི་ཡི་བདག །བཙན་རྒོད་རྡོ་རྗེ་དྲག་རྩལ་འཁོར་བཅས་རྣམས། །སྔོན་གྱི་དམ་བཅའ་རྗེས་དགོངས་དེང་འདིར་ནི། །ཞི་དང་བྱམས་པའི་ཚུལ་གྱིས་གཤེགས་སུ་གསོལ། །འདིར་བཤམས་ཕྱི་ནང་གསང་བ་དེ་ཁོ་ནའི། །བླ་མེད་མཆོད་པའི་སྤྲིན་ཕུང་བདུག་པའི་སྤོས། །ཕྱོགས་ཀྱི་གོ་སྐབས་འཕྲོག་པའི་ཟེར་མ་ལས། །གང་འདོད་དགྱེས་དགུའི་མཐུན་རྫས་མ་ཚང་མེད། །སྤྱན་གཟིགས་དཀོར་ཆས་འདོད་པའི་ལོངས་སྤྱོད་རྣམས། །རྒྱ་ཆེན་རྒྱུན་མི་ཆད་པར་
སྤྲོས་བྱས་ནས། །འབུལ་བཞེས་དགྱེས་རོལ་ཐུགས་དམ་གཉེན་པོ་བསྐང་། །ནོངས་བཤགས་བཟོད་གསོལ་བཅོལ་བའི་ཕྲིན་ལས་ནི། །རྣལ་འབྱོར་གང་འདོད་ཕྲིན་ལས་སྒྲུབ་པ་དང་། །ཁ་འཛིན་སྡོང་གྲོགས་མེལ་ཚེ་མ་གཡེལ་བར། །སྲུང་སྐྱོབ་མི་འབྲལ་རྟག་པར་བུ་བཞིན་སྐྱོངས། །བསྟན་འཛིན་ཞབས་བརྟན་དགེ་འདུན་སྡེ་རྒྱས་ཤིང་། །མངའ་རིས་ལོ་ལེགས་འབྲུ་འཕེལ་ནད་འཁྲུགས་ཞི། །མདོར་ན་རྫོགས་ལྡན་དཔལ་ལ་སྤྱོད་པ་ཡི། །རྣམ་ཀུན་ཕྲིན་ལས་མ་གཡེལ་བསྒྲུབ་པར་མཛོད། །གཙྪས་རང་གནས་སུ་གཤེགས། ཞེས་དད་སྦྱིན་རྒན་པོའི་ངོར་སི་ཏུས་སྤེལ་བ་དགེ་ལེགས་སུ་གྱུར་ཅིག །