འཕགས་མ་སྒྲོལ་ལྗང་མཎྜལ་བཞི་པའི་ཟིན་ཐོ།
འཕགས་མ་སྒྲོལ་ལྗང་མཎྜལ་བཞི་པའི་ཟིན་ཐོ་ཨུཏྤལ་མཱ་ལ་བི་ཧ་ར་ཏིསྨ། སྭ་སྟི། ཐུགས་རྗེ་ཆེ་མངའ་བྱམས་མགོན་འཕགས་པ་མཆོག །གཉིས་མེད་སྤྲུལ་སྒྱུར་བཅོམ་ལྡན་རྗེ་བཙུན་མ། །ཚེ་དབང་དཔལ་སྟེར་རྒྱལ་ཀུན་སྐྱེད་པའི་ཡུམ། །གང་གིས་ཚེ་རབས་ཀུན་ཏུ་སྐྱོང་གྱུར་ཅིག། འཕགས་མ་སྒྲོལ་ལྗང་མཎྜལ་གྱི། །མཆོད་ཆོག་ཟིན་ཐོ་ཨུཏྤལ་ཕྲེང་། །སྤེལ་བགྱི་སྐལ་ལྡན་མགུལ་པའི་རྒྱན། །མཛེས་པའི་དཔྱིད་དུ་རོལ་པར་གྱིས། །དེ་ཡང་བཤམས་བཀོད་རིམ་པ་ལ། །དམིགས་རྟེན་ཏཱ་རེའི་སྐུ་བརྙན་ནི། །བྱིན་རླབས་ལྡན་པ་མཉྫིའི་ཁར། །བཞུགས་སུ་གསོལ་ཞིང་བསྡུས་པ་ན། །མཎྜལ་ཚོམ་བུར་བརྟེན་ཀྱང་རུང་། །ཕྱོགས་བཞིར་མཆོད་པའི་མཎྜལ་བཞི། །ཚོམ་
བུ་བདུན་བཀོད་རེ་རེ་ལའང་། །མཆོད་པ་རྣམ་ལྔ་ཅི་བདེར་བཤམས། །ཡང་ན་མཎྜལ་གཅིག་རིམ་བཞིན། །འདོན་པ་དང་བསྟུན་དབུལ་ཀྱང་འཐུས། །མཆོད་པའང་བརྗེའམ་ཁ་གསོ་བྱ། །དེ་དག་གང་འབྱོར་འདམ་གའོ། །མཆོད་པའི་འདས་གཏོར་མཐོ་བར་བཤམས། །གསུམ་པོ་ཕྲེང་ཚར་བཤམས་བྱས་ལ། །བསང་ཆུ་འབྲུ་དཀར་ལ་སོགས་པ། །མཁོ་བའི་ཡོ་བྱད་མཆོད་རྫས་རྣམས། །ལེགས་པར་འདུ་བྱས་གཙང་སྦྲ་དང་། །ལྡན་པས་བདེ་བའི་སྟན་ལ་འདུག །དང་པོ་རང་གི་མདུན་གྱི་མཁར། །བླ་མ་མཆོག་དང་དབྱེར་མེད་པའི། །འཕགས་མ་སྒྲོལ་ལྗང་གསལ་བཏབ་ལ། །མཐའ་སྐོར་དཀོན་མཆོག་
རྩ་གསུམ་རྣམས། །སྤྲིན་ཕུང་གཏིབས་བཞིན་བཞུགས་པའི་དྲུང་། །རང་དང་སེམས་ཅན་ཐམས་ཅད་ཀྱིས། །སྐྱབས་སུ་འགྲོ་ཞིང་སེམས་བསྐྱེད་བྱ། །དེ་ནས་རང་ཉིད་སྐད་ཅིག་གིས། །སྤྱན་རས་གཟིགས་དབང་སྐུ་མདོག་དཀར། །ཕྱག་གཡས་མཆོད་སྦྱིན་པདྨ་འཛིན། །གཡོན་པས་ཐུགས་ཀར་པདྨ་བསྣམས། །ཞལ་འཛུམ་སྤྱན་གསུམ་རིན་ཆེན་དར། །རྒྱན་མཛེས་རི་དྭགས་ལྤགས་པ་ཡིས། །ཕྲག་གཡོན་བཀབ་ཅིང་ཞབས་གཡས་བརྐྱང་། །གཡོན་བསྐུམ་པད་ཟླའི་གདན་བཞུགས་བསྐྱེད། །བསང་ཆུ་ཁྲོ་ཆེན་བདུད་རྩི་འཁྱིལ། །བྱིན་རླབས་རང་བཞིན་མོས་ཀུ་ཤའི། །འཐོར་གཡབ་སེམས་མ་རྡོ་རྗེ་མའི། །རྒྱས་བཟུང་མཐོང་བ་བརྒྱུད་ལྟར་བྱ། །དེ་ནས་གནས་ཁང་མཆོད་པའི་རྫས། །ཡོ་བྱད་ཐམས་ཅད་ཡེ་ཤེས་ཀྱི། །ངོ་བོར་བྱིན་དབབ་ཚིག་དོན་དང་། །མཚུངས་པའི་གཞུང་ལྟར་མཐར་ཆགས་དང་། །མདུན་བསྐྱེད་སྒྲོལ་མ་མངོན་རྟོགས་ལྟར། །ཇི་བཞིན་བསྐྱེད་ལ་དམ་ཚིག་པར། །ཡེ་ཤེས་བསྐྱེད་བསྟིམ་དབང་བསྐུར་དང་། །རྒྱས་གདབ་ལ་སོགས་དཀྱུས་ལྟར་རོ། །རང་ལྷར་གསལ་བའི་ཐུགས་ཀའི་ཧྲཱིཿ །མདུན་བསྐྱེད་ཐུགས་ཀའི་ཏྲཱྃ་ལས་ཀྱང་། །འོད་འཕྲོས་རྒྱལ་བ་སྲས་འཁོར་བཅས། །ཚོགས་ཞིང་རྟེན་དུ་སྤྱན་དྲངས་ལ། །ཕྱི་འབྲང་བགེགས་བསྐྲད་གདན་བཞུགས་བསམ། །
དེ་ནས་དཀོན་མཆོག་ཡོན་ཏན་རྣམས། །རྗེས་སུ་དྲན་བཞིན་སྒོ་གསུམ་གྱི། །མོས་འདུན་དང་བཅས་མདོ་བཀླག་ནས། །ཕྱག་འཚལ་སྐབས་སུ་རང་དང་ནི། །སྦྱིན་བདག་སོགས་ཀྱི་ལུས་རྡུལ་སྙེད། །དུ་མར་སྤྲུལ་ནས་འདུད་པ་དང་། །གཞན་ཡང་མ་གྱུར་ཐམས་ཅད་ཀྱིས། །གུས་པས་སྒོ་གསུམ་དད་ཕྱག་དམིགས། །བཟང་སྤྱོད་ཡན་ལག་བདུན་པ་བརྗོད། །རང་གཞན་ཀུན་གྱིས་ཕྱག་འཚལ་མོས། །མཆོད་རྫས་རབ་འབྱམས་ཁམས་བཀང་འབུལ། །ཉེས་གྱུར་འགྱོད་བཤགས་སྡོམ་པ་བཟུང་། །རྒྱལ་བའི་མཛད་པར་རྗེས་ཡི་རང་། །ཆོས་འཁོར་བསྐོར་བར་བསྐུལ་གསོལ་འདེབས། །དུས་གསུམ་དགེ་ཀུན་བྱང་ཆེན་བསྔོ། །དེ་ནས་སེམས་བསྐྱེད་བཟུང་བ་ནི། །སྔོན་གྱི་འཕགས་པ་རྣམས་ཀྱིས་ནི། །བདག་མེད་སྟོང་ཉིད་རང་བཞིན་དུ། །ཐུགས་བསྐྱེད་ཇི་ལྟར་བདག་གཞན་གྱིས། །བྱང་ཆུབ་དམ་པར་སེམས་བསྐྱེད་མོས། །དེ་ནས་མཆོད་འབུལ་རིན་ཆེན་སེམས། །སོགས་ཀྱིས་འཇིག་རྟེན་ཁམས་དཔལ་འབྱོར། །བདག་པོས་བཟུང་དང་མ་བཟུང་བའི། །མཆོད་པ་དངོས་སུ་འབྱོར་པ་དང་། །ཡིད་སྤྲུལ་ཏིང་འཛིན་ངང་ནས་ཕུལ། །མཎྜལ་རྒྱས་བསྡུས་སྔགས་བཅས་བཏོན། །ལུས་དང་ལོངས་སྤྱོད་དགེ་རྩ་འབུལ། །མེ་ཏོག་བྱིན་བརླབས་སྔགས་བརྗོད་ཅིང་། །བྱང་སེམས་ཤིས་བརྗོད་སླར་ཡང་ནི། །མཐུ་བསྐྱེད་ཨཱ་ལི་ཀཱ་ལི་དང་། །ཡིག་བརྒྱ་རྟེན་སྙིང་སྦྲེལ་མར་བརྗོད། །མེ་ཏོག་བྱིན་བརླབས་ཁ་གསོ་བྱ། །འགྲེང་བཞིན་འདོད་
གསོལ་གཞུང་ལྟར་གྱི། །རྡོ་རྗེའི་གསུང་རྣམས་ཚིག་དོན་དང་། །ཡིད་ལ་འདྲེས་པའི་འདུན་པ་ཡི། །ངེས་ཤེས་བརྟན་ཅིང་ཤིས་པ་བརྗོད། །དེ་དག་ཆོ་ག་དང་པོའོ། །དེ་ནས་གཉིས་པ་རྗེ་བཙུན་མར། །བྱེ་བྲག་མཆོད་ཅིང་གསོལ་གདབ་ནི། །མཆོད་ཞིང་རྒྱལ་བ་ཐམས་ཅད་ལ། །ཐལ་སྦྱར་འདུད་བཅས་སྙན་གསན་ཕབ། །དེ་དག་ཐམས་ཅད་འཕགས་མར་བསྟིམ། །དེ་ཉིད་དཀོན་མཆོག་འདུས་པའི་སྐུར། །ཡེ་ནས་ཡིད་བཞིན་མོས་གུས་ཀྱི། །སྣང་བ་ཟབ་མོས་རྒྱུད་བསྐུལ་ནས། །ཕྱག་འཚལ་དམིགས་པ་གོང་ལྟར་དང་། །སླར་ཡང་མཆོད་པ་མཐུ་བསྐྱེད་གཟུངས། །བཏོན་ཅིང་མཆོད་ཡོན་ཕལ་ཆེར་གྱིས། །མཆོད་འབུལ་སྔགས་བཅས་ཡན་ལག་བདུན། །ཚིགས་བཅད་དང་ནི་རྒྱུན་ཆགས་གཉིས། །གང་བདེ་མཎྜལ་ལ་སོགས་འབུལ། །རྗེ་བཙུན་བཅོམ་ལྡན་འདས་སོགས་ཀྱིས། །འདོད་དོན་གསོལ་བཏབ་སྨོན་ཤིས་བརྗོད། །སྔགས་ཀྱིས་མེ་ཏོག་བྱིན་བརླབས་ལ། །བྱང་སེམས་ཤིས་བརྗོད་མེ་ཏོག་འབུལ། །དེ་ནས་བསྙེན་པའི་དམིགས་པ་རྣམས། །གཞུང་ལྟར་ཇི་བཞིན་གསལ་གདབ་ལ། །སངས་རྒྱས་ཀུན་འདུས་འཕགས་མ་ལ། །རྩེ་གཅིག་དད་མོས་ཤུགས་ཕྱུང་གིས། །མཐར་ཐུག་མཆོག་སྩོལ་གནས་སྐབས་སུ། །ཐུན་མོང་ཡིད་བཞིན་དངོས་གྲུབ་ཀྱི། །འདོད་དོན་འགྲུབ་པར་
གསོལ་བ་བཏབ། །རྩ་སྔགས་བརྒྱ་རྩ་གཉིས་བཟླ་ཞིང་། །ཚེ་ཤམ་སྦྱར་བ་བརྒྱ་རྩ་བཟླ། །གཞན་ཡང་ཁ་བསྒྱུར་སྐབས་ཐོབ་སྦྱར། །ལས་ཐམས་ཅད་པའི་རིགས་སྔགས་ཀྱང་། །བཟླས་མཐར་ཁ་སྐོང་དང་བཅས་བརྗོད། །དེ་ནས་བདག་གཞན་སེམས་ཅན་དང་། །འབྱུང་བ་བཞི་དང་དེ་དག་གི། །ཆ་ཤས་རྡུལ་ཕྲན་རྣམས་ལས་ཀྱང་། །ཕྱག་འཚལ་ཉེར་གཅིག་རང་སྒྲ་སྒྲོག །མོས་བཞིན་ལན་གཉིས་ཕན་ཡོན་ཚར། །གཅིག་བཅས་སླར་ཡང་ཕན་ཡོན་གྱི། །མཐུ་བསྐྱེད་སུམ་སྦྲེལ་གཟུངས་སྔགས་བཟླ། །མེ་ཏོག་བྱིན་བརླབས་འདོད་གསོལ་གྱི། །ཚིག་དོན་བློ་དང་མཐུན་པར་བྱ། །ཤིས་བརྗོད་དང་བཅས་གཉིས་པའོ། །དེ་ནས་གསུམ་པར་ཕྱག་འཚལ་སོགས། །བཟླས་པའི་བར་དུ་གོང་ལྟར་ཁྱབ། །རྩ་སྔགས་བརྒྱ་རྩ་གསུམ་ཚེ་ཤམ། །བརྒྱ་དང་ལྔ་བཅུ་ཁ་བསྒྱུར་རྣམས། །སྐབས་ཐོབ་ལས་ཐམས་ཅད་པའི་སྔགས། །གང་འོས་བཟླས་མཐར་ཁ་སྐོང་བྱ། །ཕྱག་འཚལ་ཉེར་གཅིག་ལན་གསུམ་དང་། །ཕན་ཡོན་ཚར་གཅིག་འདོད་གསོལ་དང་། །བཀྲ་ཤིས་དང་བཅས་གསུམ་པའོ། །དེ་ནས་བཞི་པར་ཕྱག་འཚལ་བ། །བསྙེན་པའི་བར་དུ་གོང་བཞིན་ལ། །རྩ་སྔགས་བརྒྱ་རྩ་བདུན་ཚེ་ཤམ། །ཕྱེད་དང་བཞི་བརྒྱ་ཁ་བསྒྱུར་རྣམས། །གང་འོས་ལས་སྔགས་
སྐབས་ཐོབ་བཟླ། །སུམ་སྦྲེལ་ཁ་སྐོང་དང་བཅས་བཏོན། །ཕྱག་འཚལ་ཉེར་གཅིག་ཚར་བདུན་དང་། །ཕན་ཡོན་དང་བཅས་སྒྲོལ་མཚན་བརྒྱ། །འདོད་གསོལ་ཤིས་བརྗོད་བཞི་པའོ། །དེ་ནས་རྗེས་ཀྱི་ཆོ་གའི་རིམ། །གཏོར་འབུལ་སོ་སོར་རིམ་བཞིན་ཕུལ། །མཆོད་གཟུངས་བཟླས་ལ་མཆོད་བྱིན་བརླབས། །མཆོད་བསྟོད་བྱ་ཞིང་དགེ་བ་བསྔོ། །ཆད་ལྷག་ཁ་སྐོང་བཟོད་པར་གསོལ། །མདུན་བསྐྱེད་སྐུ་ལས་སྐུ་འཕྲོས་ནས། །རང་གི་དཔྲལ་ཐིམ་གཉིས་མེད་པར། །བྱིན་བརླབས་འདུ་འབྲལ་མེད་པར་མོས། །ཡེ་ཤེས་དབྱིངས་སུ་གཤེགས་པའམ། །རྟེན་ལ་བཞུགས་སུ་གསོལ་བྱས་ན། །རབ་ཏུ་གནས་པའི་མཆོག་གྱུར་གསུངས། །འཇིག་རྟེན་པ་རྣམས་རང་གནས་གཤེགས། །དེ་ནས་སྨོན་ལམ་རྒྱས་གདབ་དང་། །བཀྲ་ཤིས་མཐའ་རྒྱས་རྗེས་བསྡུ་སོགས། །གཞུང་གསལ་བཞིན་གྱིས་འགྲུབ་པར་འགྱུར། །དེ་ལྟར་བཀོད་པའི་བསོད་ནམས་ཀྱི། །དགེ་ཚོགས་རྒྱ་མཚོ་བསྒྲུབ་པའི་མཐུས། །འགྲོ་ཀུན་ཉེར་འཚེའི་དགོས་འབྱུང་དབང་། །བླ་མའི་ཞབས་བརྟན་བདག་གཞན་རྣམས། །ལེགས་པའི་ཡོན་ཏན་ཕུན་སུམ་ཚོགས། །ནོངས་གྱུར་དག་ཚངས་དངོས་གྲུབ་སྩོལ། །དད་གསུམ་འབྱོར་པ་དང་ལྡན་པས། །བསྐུལ་བའི་གཡར་ངོས་སི་ཏུ་པ། །པདྨ་ཉིན་བྱེད་དབང་གིས་སྤེལ། །བསྟན་འགྲོར་ཕན་བདེའི་དཔལ་དུ་ཤོག །སརྦ་མདྒ་ལྃ། །