སོ་ཐར་སྡོམ་རྒྱུན་གྱི་ཟིན་བྲིས་ནོར་བུའི་ཕྲེང་མཛེས།
སོ་ཐར་སྡོམ་རྒྱུན་གྱི་ཟིན་བྲིས་ནོར་བུའི་ཕྲེང་མཛེས་ཞེས་པ་བཞུགས་སོ། །ན་མཿཤཱཀྱ་རཱ་ཛ་ཡེ། ཚད་མེད་ཡོན་ཏན་རྒྱ་མཚོའི་འཇུག་ངོགས་ནས། །མཐའ་ཡས་ཟབ་དོན་བསླབ་གསུམ་ནོར་བུ་མཆོག །ཇི་སྙེད་བརྗོད་བྲལ་ཐུགས་རྗེའི་གཏེར་ཆེན་པོ། །བདེར་གཤེགས་ཤཱཀྱའི་རྒྱལ་པོས་རྟག་ཏུ་སྐྱོངས། །རྣམ་དག་རྒྱ་ཆེན་སྡེ་སྣོད་སྐྱེད་ཚལ་དབུས། །ཟླ་མེད་ཚུལ་ཁྲིམས་བསུང་ཞིམ་འདབ་རྒྱས་པ། །ཐུབ་བསྟན་རྒྱན་མཆོག་པུཎྜཱ་རི་ཀ་ཡི། །ཕྲེང་མཛེས་བཀའ་བརྒྱུད་བླ་མར་གུས་པས་འདུད། །རླབས་ཆེན་བྱང་ཆུབ་སྤྱོད་པ་དཔག་བསམ་གྱི། །ཡོངས་འདུ་ུས་བརྟོལ་ལྗོན་དབང་ཇི་བཞིན་པར། །གྲུབ་གཉིས་ཆར་གྱིས་འགྲོ་བའི་གདུང་སེལ་གཉེན། །བདུད་འདུལ་རྡོ་རྗེར་བྱང་ཆུབ་བར་དུ་འདུད། །དེ་ལྟར་ཆེད་དུ་བརྗོད་པས་མདུན་བསུས་ཏེ། །འདི་ན་སོ་སོ་ཐར་པའི་སྡོམ་པ་ཡི། །སྲོལ་འཛིན་བྱུང་ཚུལ་ཟིན་ཐོར་སྤེལ་བ་ལ། །དེ་ཡང་འཕགས་པའི་ཡུལ་དུ་ཉན་ཐོས་ཀྱི། །སྡེ་པ་བཅོ་བརྒྱད་གྲགས་ཤིང་བོད་འདིར་ནི། །རྩ་བའི་སྡེ་བཞིའི་ནང་ནས་གཞི་ཐམས་ཅད། །ཡོད་པར་སྨྲ་བའི་སྡེ་སྟེ་སྡོམ་པའི་རྒྱུན། །ཟ་ཧོར་མཁན་པོ་ཞི་འཚོ་ནས་བརྒྱུད་པའི། །བསྟན་པ་སྔ་དར་རིང་ལ་ཚང་མ་དང་། །དེ་ཉིད་
རིམ་གྱིས་ཕྱི་དར་བླ་ཆེན་པ། །དགོངས་པ་རབ་གསལ་ལས་བརྒྱུད་སྡོམ་རྒྱུན་ནི། །ཁམས་ནས་ཡར་དར་སྨད་འདུལ་ཞེས་པར་གྲགས། །ཡང་ནི་འཕགས་ཡུལ་ཡོད་སྨྲའི་བིཀྵུ་ནི། །གུ་ཎ་མ་ཏིའི་སྡོམ་རྒྱུན་རྒྱལ་ཤེས་རབ། །མོན་གྲོ་འདུལ་འཛིན་ནས་བརྒྱུད་མངའ་རིས་ནས། །བར་དར་སྟོད་འདུལ་ཞེས་གྲགས་ཀརྨ་པ། །ཆོས་ཀྱི་བླ་མ་ཡན་ཆད་བོད་ལྗོངས་ཀྱི། །སྐྱེས་མཆོག་ཀུན་ཀྱང་སྡོམ་རྒྱུན་གཉིས་ཀ་ཡི། །ཁོངས་སུ་འདུས་ཤིང་མཉམ་མེད་འཇིག་རྟེན་མགོན། །བགྲང་བྱ་འཕེལ་བའི་སྐབས་དང་ས་པཎ་ཆེན། །ནར་སོན་ཙམ་དང་ཁྲོ་ལོ་བྱམས་པ་དཔལ། །ལ་སོགས་མཁས་གྲུབ་ས་སྟེང་ཁྱབ་པའི་སྐབས། །ཁ་ཆེ་པཎ་ཆེན་ཤཱཀྱ་ཤྲཱི་ཞེས། །མ་འོངས་སངས་རྒྱས་རབ་གསལ་རྣམ་པར་འཕྲུལ། །ཡོངས་རྫོགས་རྒྱལ་བསྟན་འཛིན་པ་ཆེན་པོ་དེ། ལྗོངས་འདིར་སྤྱན་དྲངས་ཆོས་རྗེ་ས་པཎ་དང་། །བྱང་རྡོར་རྣམ་གཉིས་ལ་སོགས་བོད་ཡུལ་གྱི། །དགེ་འདུན་སྡེ་རྣམས་བསླབ་པའི་གཞི་ལ་བཀོད། །དམ་ཆོས་ཉིན་བྱེད་སྣང་བའི་རྒྱལ་མཚན་བསྒྲེངས། །དེ་ཕྱིན་འཇམ་མགོན་པཎ་ཆེན་སྡོམ་རྒྱུན་དར། །ལྷོ་བྲག་བྱང་ཆུབ་དཔལ་བ་ནས་བརྒྱུད་དེ། །དགེ་འདུན་སྒང་དང་ཆོས་ལུང་མཁན་པོ་སོགས། །བརྒྱུད་ཅིང་གཞན་ཡང་དབུས་པ་རྡོ་རྗེ་དཔལ། །བརྒྱུད་ནས་ཚེགས་རྩེ་ལས་འཕྲོས་བྱེ་རྫིངས་པའི། །མཁན་རིམ་བརྒྱུད་པར་བྱུང་འདིས་ཕྱོགས་ཀུན་ཁྱབ། །དྲན་
པས་འཁོར་བའི་འཇིགས་འཕྲོག་མཐོང་བས་ནི། །ཡང་དག་ཐར་པའི་གོ་འཕང་སྦྱིན་ནུས་པའི། །རྒྱལ་བ་གཉིས་པ་བརྗོད་པར་དཀའ་བའི་མཚན། །དོན་སླད་སྨོས་ན་རྗེ་བཙུན་ཀརྨ་པ། །དཔལ་ལྡན་བསྟན་པའི་ཉིན་བྱེད་འཆི་མེད་གྲུབ་པའི་ཁྱུ་མཆོག་ཕྲིན་ལས་རྒྱས་པའི་སྡེ། །ཞེས་པའི་དྲུང་ནས་ནོད་པའི་སྡོམ་རྒྱུན་ནི། །བཅོམ་ལྡན་སངས་རྒྱས་རྣམ་འདྲེན་བཞི་པ་མཆོག །ཤེས་རབ་ཐོགས་མེད་འཕགས་པ་ཤཱ་རིའི་བུ། །གནས་བརྟན་སྒྲ་གཅན་འཛིན་དང་བྲཧྨ། །རཱ་ཧུ་ལ་སྟེ་སློབ་དཔོན་ཀླུ་སྒྲུབ་ཞབས། །ཡོན་ཏན་བློ་གྲོས་རིན་ཆེན་བཤེས་གཉེན་དང་། །ཆོས་ཀྱི་བཟང་པོ་ཡོན་ཏན་རྒྱ་མཚོའི་ཞབས། །ཆོས་ཀྱི་ཕྲེང་བ་བློ་གྲོས་འབྱུང་གནས་སྦས། །པཎ་ཆེན་ཤཱཀྱ་ཤྲཱི་བྷ་དྲ་ཡན། །རྒྱ་གར་ལས་འབྱོན་བོད་ཀྱི་འདུལ་འཛིན་པ། །བྱང་ཆུབ་དཔལ་དང་གཙང་པ་དབང་ཕྱུག་གྲགས། །གཞོན་ནུ་བྱང་ཆུབ་ཡོན་ཏན་རྒྱལ་བ་དང་། །མཁན་ཆེན་ཡོན་ཏན་བློ་གྲོས་སེདྒེ་དཔལ། །རབ་འབྱོར་སེདྒེ་ཆོས་གྲུབ་སེདྒེ་སོགས། །དགེ་འདུན་སྒང་པའི་མཁན་རིམ་ལས་བརྒྱུད་ནས། །རྒྱལ་དབང་བརྒྱད་པ་རྡོ་རྗེ་དགའ་བའི་དབྱངས། །གར་དབང་ལྔ་པ་དཀོན་མཆོག་ཤཱཀྱའི་གཙོ། །དབང་ཕྱུག་རྡོ་རྗེ་ཆོས་ཀྱི་དབང་ཕྱུག་དང་། །གྲུབ་དབང་བདུད་རྩི་ཀརྨ་རྣམ་རོལ་པ། །གར་དབང་བརྒྱད་པ་ཆོས་ཀྱི་དོན་གྲུབ་ཞབས། །བསྟན་པའི་ཉིན་བྱེད་གཙུག་ལག་
ཆོས་སྣང་བ། །སྙིགས་དུས་འདྲེན་པ་ཕྱག་ན་པདྨོ་ཅན། །རྒྱལ་མཆོག་བཅུ་གསུམ་མཐོན་མཐིང་ཅོད་པན་འཆང་། །རྗེ་བཙུན་བདུད་ལས་རྣམ་པར་རྒྱལ་དེ་ཡི། །ཞབས་ཀྱི་པདྨ་མཆོག་ལ་གུས་བཏུད་ནས། །སྡོམ་གསུམ་ནོར་བུའི་ཕྲེང་བ་བདག་ལྟ་བུ། །སོ་སྐྱེ་ལས་ཀྱང་སོ་སྐྱེར་གྱུར་མོད་ཀྱང་། །སྔོན་གོམས་ཚོགས་གཉིས་རྨད་བྱུང་སྨིན་པའི་མཐུས། །བསྟན་བའི་སྙིང་པོར་གྱུར་པ་ཀཾ་ཚང་གི། །རིང་ལུགས་སྒོར་ཞུགས་མ་ནོར་ཡོངས་འཛིན་གྱི། །དམ་པས་རྗེས་བཟུང་བསླབ་གསུམ་སྡོམ་པ་ཡི། །ཚུལ་ཁྲིམས་རྒྱན་བཟང་བདག་ལྟས་ནོད་པའི་དགེས། །རྒྱལ་བསྟན་སྙིང་པོར་གྱུར་པ་གང་ཡིན་པ། །དེ་འཛིན་སྐྱེས་མཆོག་ཞབས་བརྟན་ཕྲིན་ལས་རྒྱས། །ལུང་རྟོགས་ཡོན་ཏན་མཛོད་འཛིན་རིག་པ་དང་། །གྲོལ་བའི་སར་གནས་དགེ་འདུན་འདུས་པའི་ཚོགས། །ཀུན་ཀྱང་བྱམས་དང་སྙིང་རྗེས་རྒྱུད་བརླན་ཅིང་། །ཆོས་སྤྱོད་བཅུ་དང་འཁོར་ལོ་རྣམ་གཉིས་སོགས། །རྒྱལ་བའི་བསྟན་ལ་བྱ་ར་བྱེད་པར་སྨོན། །འཇིག་རྟེན་ཁམས་སུའང་སེམས་ཅན་ཐམས་ཅད་བདེ། །ལྷ་ཀླུ་གནོད་སྦྱིན་མི་མ་ཡིན་རྣམས་ཀྱང་། །དཀར་ཕྱོགས་སྐྱོང་བའི་མེལ་ཚེ་སྒྲུབ་བཞིན་དུ། །སྡང་བའི་སེམས་ཀྱི་འཚེ་དང་བྲལ་བར་ཤོག །ཁྱད་པར་བུ་རམ་ཤིང་པའི་རིང་ལུགས་གང་། །དྲི་མེད་རྣམ་དག་ངེས་གསང་སྙིང་པོའི་བསྟན། །ཉམས་
མེད་ཡུན་གནས་མ་འོངས་རྣམ་པར་འདྲེན། །བྱམས་མགོན་བདུད་རྩི་བརྙེས་པར་གྱུར་གྱི་བར། །ཤཱཀ་ཐུབ་བསྟན་པའི་རྒྱལ་མཚན་མངོན་མཐོ་བ། །མི་ནུབ་སྲིད་མཐར་སྤེལ་བར་གཅིག་ཏུ་སྨོན། །དེ་ལྟར་སྨོན་པའི་བདེན་ཚིག་བསླུ་མེད་པ། །བདེན་པའི་བདག་ཉིད་བླ་མེད་དཀོན་མཆོག་གསུམ། །བྱིན་རླབས་སྟོབས་ཀྱིས་ཇི་ལྟར་སྨོན་པ་རྣམས། །བདེན་པ་དམ་པས་དེང་འདིར་བདེན་འགྲུབ་ཤོག །དེ་ལྟར་ཚུལ་འདིར་མོས་པའི་དང་བ་ཅན། །སྡེ་སྣོད་འཛིན་པ་ཀརྨ་དོན་དམ་གྱིས། །འདུལ་པའི་མཁན་བརྒྱུད་ཟིན་ཐོ་རབ་གསལ་བ། །སྤེལ་ཞེས་བྲིས་འདིར་འཁྲུལ་པའི་ཆ་གང་དང་། །ཚེ་རབས་སྒྲིབ་དང་ཆབས་ཅིག་མཐོལ་ལོ་བཤགས། །དགེ་གང་བསགས་དེས་འགྲོ་བའི་མ་རིག་བའི། །དུག་ལྔའི་མུན་བཅོམ་ཡང་དག་ཡེ་ཤེས་ཀྱི། །ཉི་མ་ཆེན་པོས་སྣང་བའི་གསོས་འགྱུར་ཤོག །ཅེས་པའང་སི་ཏུ་པདྨ་ཉིན་བྱེད་དབང་པོས་ནག་ཟླའི་རྒྱལ་བ་གཉིས་པར་སྤེལ་བ་ཀུན་ཏུ་ཛ་ཡ། །