ཀརྨ་པའི་རླུང་སེམས་གནད་ཀྱི་གདམས་པ།
ཀརྨ་པའི་རླུང་སེམས་གནད་ཀྱི་གདམས་པ་ལས། ཉོན་མོངས་དུག་ལྔའི་རྣམ་རྟོག་གང་ཤར་བའི་སྐབས་རླུང་ཕྱིར་འབུད་ན་འགལ་རྐྱེན་སེལ་ལོ། །དེ་ནས་སྙིང་ཁར་བླ་མ་བསྒོམ་དགོས། མོས་གུས་དང་། སྙིང་རྗེ། བསྐྱེད་རྫོགས། བདེ་གསལ་མི་རྟོག་པ་སོགས་འཆར་དུས་རླུང་ནང་དུ་བསྡུས་ན་དངོས་གྲུབ་ཐོབ། སྣང་སྲིད་འཁོར་འདས་ཀྱི་བདེ་
སྡུག་ཐམས་ཅད་རླུང་སེམས་ཀྱི་རྟེན་འབྲེལ་ཡིན་གསུངས་སོ། །མདོར་ན་རླུང་སེམས་ངན་པ་ཐམས་ཅད་ཕྱིར་ཕུད། བཟང་པོ་ཐམས་ཅད་ནང་དུ་བསྡུའོ། །ཐམས་ཅད་དབྱེར་མེད་རོ་གཅིག་ཏུ་མཉམ་པར་བཞག་གོ་ཞེས་གསུངས་སོ། བསྟན་པའི་ཉིན་བྱེད་མཆོག་གིས་བཀའ་བསྩལ་པ། །ཟབ་ལམ་མཐར་ཐུག་ནཱ་རོ་ཆོས་དྲུག་ནི། །ཉིན་པར་མཉམ་གཞག་གཏུམ་མོའི་རྣལ་འབྱོར་དང་། །རྗེས་ཐོབ་སྒྱུ་ལུས་མཚན་མོའི་མཉམ་གཞག་ཏུ། །འོད་གསལ་རྗེས་ཐོབ་རྨི་ལམ་ལམ་དུ་ཁྱེར། །མདོར་ན་ལུས་ཀྱི་བྱེད་བཅིང་ངག་རླུང་གནད། །མི་ཤིགས་ཐིག་ལེར་སེམས་ཀྱི་གནད་བཅིངས་པས། །གཟུང་འཛིན་འཁྲུལ་ཚོགས་རང་བཞིན་དབྱིངས་སུ་དག །འཕོ་མེད་བདེ་བ་ཆེན་པོའི་ཚོགས་རྫོགས་པས། །རྣམ་ཀུན་མཆོག་ལྡན་ཕྱག་རྒྱ་ཆེན་པོ་ལ། །དགྱེས་རོལ་སྐུ་བཞིའི་རྒྱལ་ས་ཐོབ་པར་འགྱུར། །ཞེས་སོ། །